{॥ শ্রীবেঙ্কটেশ সুপ্রভাতম্ ॥}
॥ শ্রীঃ ॥
॥ অথ শ্রী বেঙ্কটেশ সুপ্রভাতম্ ॥
কৌসল্যা সুপ্রজা রাম পূর্বা সন্ধ্যা প্রবর্ততে
উত্তিষ্ঠ নরশার্দূল কর্তব্যং দৈবমাহ্নিকম্ ॥ ১

উত্তিষ্ঠোত্তিষ্ঠ গোবিন্দ উত্তিষ্ঠ গরুডধ্বজ
উত্তিষ্ঠ কমলাকান্ত ত্রৈলোক্যং মঙ্গলং কুরু ॥ ২

মাতস্সমস্তজগতাং মধুকৈটভারেঃ
বক্ষোবিহারিণি মনোহরদিব্যমূর্তে ।
শ্রীস্বামিনি শ্রিতজনপ্রিযদানশীলে
শ্রীবেঙ্কটেশদযিতে তব সুপ্রভাতম্ ॥ ৩

তব সুপ্রভাতমরবিন্দলোচনে
ভবতু প্রসন্নমুখচন্দ্রমণ্ডলে ।
বিধিশঙ্করেন্দ্রবনিতাভিরর্চিতে
বৃষশৈলনাথদযিতে দযানিধে ॥ ৪

অত্র্যাদিসপ্তঋষযস্সমুপাস্য সন্ধ্যাং
আকাশসিন্ধুকমলানি মনোহরাণি ।
আদায পাদযুগমর্চযিতুং প্রপন্নাঃ
শেষাদ্রিশেখরবিভো তব সুপ্রভাতম্ ॥ ৫

পঞ্চাননাব্জভবষণ্মুখবাসবাদ্যাঃ
ত্রৈবিক্রমাদিচরিতং বিবুধাঃ স্তুবন্তি ।
ভাষাপতিঃ পঠতি বাসর শুদ্ধিমারাত্
শেষাদ্রিশেখরবিভো তব সুপ্রভাতম্ ॥ ৬

ঈষত্প্রফুল্লসরসীরুহনারিকেল
পূগদ্রুমাদিসুমনোহরপালিকানাম্ ।
আবাতি মন্দমনিলস্সহ দিব্যগন্ধৈঃ
শেষাদ্রিশেখরবিভো তব সুপ্রভাতম্ ॥ ৭

উন্মীল্য নেত্রযুগমুত্তম পংজরস্থাঃ
পাত্রাবশিষ্টকদলীফলপাযসানি ।
ভুক্ত্বা সলীলমথ কেলিশুকাঃ পঠন্তি
শেষাদ্রিশেখরবিভো তব সুপ্রভাতম্ ॥ ৮

তন্ত্রীপ্রকর্ষমধুরস্বনযা বিপঞ্চ্যা
গাযত্যনন্তিচরিতং তব নারদোঽপি ।
ভাষাসমগ্রমসকৃত্করচাররম্যং
শেষাদ্রিশেখরবিভো তব সুপ্রভাতম্ ॥ ৯

ভৃঙ্গাবলী চ মকরন্দরসানুবিদ্ধ
ঝঙ্কারগীত নিনদৈঃসহ সেবনায ।
নির্যাত্যুপান্তসরসীকমলোদরেভ্যঃ
শেষাদ্রিশেখরবিভো তব সুপ্রভাতম্ ॥ ১০

যোষাগণেন বরদধ্নিবিমথ্যমানে
ঘোষালযেষু দধিমন্থনতীব্রঘোষাঃ ।
রোষাত্কলিং বিদধতেককুভশ্চ কুম্ভাঃ
শেষাদ্রিশেখরবিভো তব সুপ্রভাতম্ ॥ ১১

পদ্মেশমিত্রশতপত্রগতালিবর্গাঃ
হর্তুং শ্রিযং কুবলযস্য নিজাঙ্গলক্ষ্ম্যা ।
ভেরীনিনাদমিব বিভ্রতি তীব্রনাদং
শেষাদ্রিশেখরবিভো তব সুপ্রভাতম্ ॥ ১২

শ্রীমন্নভীষ্ট বরদাখিললোকবন্ধো
শ্রীশ্রীনিবাস জগদেকদযৈকসিন্ধো ।
শ্রীদেবতাগৃহভুজান্তর দিব্য মূর্তে
শ্রীবেঙ্কটাচলপতে তব সুপ্রভাতম্ ॥ ১৩

শ্রীস্বামিপুষ্করিণিকাঽঽপ্লবনির্মলাঙ্গাঃ
শ্রেযোঽর্থিনো হরবিরিংচসনন্দনাদ্যাঃ ।
দ্বারে বসন্তি বরবেত্রহতোত্তমাঙ্গাঃ
শ্রীবেঙ্কটাচলপতে তব সুপ্রভাতম্ ॥ ১৪

শ্রী শেষশৈল গরুডাচল বেঙ্কটাদ্রি
নারাযণাদ্রি বৃষভাদ্রি বৃষাদ্রি মুখ্যাম্ ।
আখ্যাম্ ত্বদীয বসতেরনিশং বদন্তি
শ্রীবেঙ্কটাচলপতে তব সুপ্রভাতম্ ॥ ১৫

সেবাপরাঃ শিবসুরেশকৃশানুধর্ম
রক্ষোঽম্বুনাথ পবমান ধনাধিনাথাঃ ।
বদ্ধাংজলি প্রবিলসন্নিজশীর্ষ দেশাঃ
শ্রীবেঙ্কটাচলপতে তব সুপ্রভাতম্ ॥ ১৬

ঘাটীষু তে বিহগরাজ মৃগাধিরাজ-
নাগাধিরাজ গজরাজ হযাধিরাজাঃ ।
স্বস্বাধিকার মহিমাধিকমর্থযন্তে
শ্রীবেঙ্কটাচলপতে তব সুপ্রভাতম্ ॥ ১৭

সূর্যেন্দু ভৌম বুধ বাক্পতি কাব্য সৌরি
স্বর্ভানু কেতু দিবিষত্পরিষত্প্রধানাঃ ।
ত্বদ্দাস দাস চরমাবধি দাসদাসাঃ
শ্রীবেঙ্কটাচলপতে তব সুপ্রভাতম্ ॥ ১৮

ত্বত্পাদধূলি ভরিতস্ফুরিতোত্তমাঙ্গাঃ
স্বর্গাপবর্গ নিরপেক্ষ নিজান্তরঙ্গাঃ ।
কল্পাগমাঽঽকলনযাঽঽকুলতাং লভন্তে
শ্রীবেঙ্কটাচলপতে তব সুপ্রভাতম্ ॥ ১৯

ত্বদ্গোপুরাগ্রশিখরাণি নিরীক্ষমাণাঃ
স্বর্গাপবর্গপদবীং পরমাং শ্রযন্তঃ ।
মর্ত্যা মনুষ্যভুবনে মতিমাশ্রযন্তে
শ্রীবেঙ্কটাচলপতে তব সুপ্রভাতম্ ॥ ২০

শ্রীভূমিনাযক দযাদিগুণামৃতাব্ধে
দেবাধিদেব জগদেকশরণ্যমূর্তে ।
শ্রীমন্ননন্ত গরুডাদিভিরর্চিতাঙ্ঘ্রে
শ্রীবেঙ্কটাচলপতে তব সুপ্রভাতম্ ॥ ২১

শ্রীপদ্মনাভ পুরুষোত্তম বাসুদেব
বৈকুণ্ঠ মাধব জনার্দন চক্রপাণে ।
শ্রীবত্সচিন্হ শরণাগতপারিজাত
শ্রীবেঙ্কটাচলপতে তব সুপ্রভাতম্ ॥ ২২

কন্দর্পদর্প হরসুন্দর দিব্যমূর্তে
কান্তাকুচাম্বুরুহ কুট্মল লোলদৃষ্টে ।
কল্যাণনির্মলগুণাকর দিব্যকীর্তে
শ্রীবেঙ্কটাচলপতে তব সুপ্রভাতম্ ॥ ২৩

মীনাকৃতে কমঠ কোল নৃসিংহ বর্ণিন্
স্বামিন্ পরশ্বথতপোধন রামচন্দ্র ।
শেষাংশরাম যদুনন্দন কল্কিরূপ
শ্রীবেঙ্কটাচলপতে তব সুপ্রভাতম্ ॥ ২৪

এলা লবঙ্গ ঘনসার সুগন্ধি তীর্থং
দিব্যং বিযত্সরিতি হেমঘটেষু পূর্ণম্ ।
ধৃত্বাঽঽদ্য বৈদিক শিখামণযঃ প্রহৃষ্টাঃ
তিষ্ঠন্তি বেঙ্কটপতে তব সুপ্রভাতম্ ॥ ২৫

ভাস্বানুদেতি বিকচানি সরোরুহাণি
সম্পূরযন্তি নিনদৈঃ ককুভো বিহঙ্গাঃ ।
শ্রীবৈষ্ণবাস্সততমর্থিত মঙ্গলাস্তে
ধামাঽঽশ্রযন্তি তব বেঙ্কট সুপ্রভাতম্ ॥ ২৬

ব্রহ্মাদযঃ সুরবরাস্সমহর্ষযস্তে
সন্তস্সনন্দন মুখাস্ত্বথ যোগিবর্যাঃ ।
ধামান্তিকে তব হি মঙ্গলবস্তু হস্তাঃ
শ্রীবেঙ্কটাচলপতে তব সুপ্রভাতম্ ॥ ২৭

লক্ষ্মীনিবাস নিরবদ্যগুণৈকসিন্ধো
সংসার সাগর সমুত্তরণৈকসেতো ।
বেদান্তবেদ্যনিজবৈভব ভক্তভোগ্য
শ্রীবেঙ্কটাচলপতে তব সুপ্রভাতম্ ॥ ২৮

ইত্থং বৃষাচলপতেরিহ সুপ্রভাতম্
যে মানবাঃ প্রতিদিনং পঠিতুং প্রবৃত্তাঃ ।
তেষাং প্রভাতসমযে স্মৃতিরঙ্গভাজাং
প্রজ্ঞাং পরার্থসুলভাং পরমাং প্রসূতে ॥ ২৯

॥ ইতি বেঙ্কটেশ সুপ্রভাতম্ ॥
॥ অথ বেঙ্কটেশ স্তোত্রম্ ॥
কমলা কুচ চূচুক কুঙ্কুমতো
নিযতারুণিতাতুল নীলতনো ।
কমলাযতলোচন লোকপতে
বিজযী ভব বেঙ্কটশৈলপতে ॥ ১

সচতুর্মুখষণ্মুখপঞ্চমুখ
প্রমুখাখিলদৈবতমৌলিমণে ।
শরণাগতবত্সল সারনিধে
পরিপালয মাং বৃষশৈলপতে ॥ ২

অতিবেলতযা তব দুর্বিষহৈঃ
অনুবেলকৃতৈরপরাধশতৈঃ ।
ভরিতং ত্বরিতং বৃষশৈলপতে
পরযা কৃপযা পরিপাহি হরে ॥ ৩

অধিবেঙ্কটশৈলমুদারমতে
জনতাভিমতাধিকদানরতাত্ ।
পরদেবতযা গদিতান্নিগমৈঃ
কমলাদযিতান্ন পরং কলযে ॥ ৪

কলবেণুরবাবশগোপবধূ
শতকোটিবৃতাত্স্মরকোটিসমাত্ ।
প্রতিবল্লবিকাভিমতাত্সুখদাত্
বসুদেবসুতান্ন পরং কলযে ॥ ৫

অভিরামগুণাকর দাশরথে
জগদেকধনুর্ধর ধীরমতে ।
রঘুনাযক রাম রমেশ বিভো
বরদোভব দেব দযাজলধে ॥ ৬

অবনীতনযাকমনীযকরং
রজনীকরচারুমুখাম্বুরুহম্ ।
রজনীচররাজতমোমিহিরং
মহনীযমহং রঘুরাম মযে ॥ ৭

সুমুখং সুহৃদং সুলভং সুখদং
স্বনুজং চ সুখাযমমোঘশরম্ ।
অপহায রঘূদ্বহমন্যমহং
ন কথঞ্চন কঞ্চন জাতু ভজে ॥ ৮

বিনা বেঙ্কটেশং ন নাথো নাথঃ
সদা বেঙ্কটেশং স্মরামি স্মরামি ।
হরে বেঙ্কটেশ প্রসীদ প্রসীদ
প্রিযং বেঙ্কটেশ প্রযচ্ছ প্রযচ্ছ ॥ ৯

অহং দূরতস্তে পদাম্ভোজযুগ্ম
প্রণামেচ্ছযাঽঽগত্য সেবাং করোমি ।
সকৃত্সেবযা নিত্যসেবাফলং ত্বং
প্রযচ্ছ প্রযচ্ছ প্রভো বেঙ্কটেশ ॥ ১০

অজ্ঞানিনা মযা দোষান্
অশেষান্বিহিতান্ হরে ।
ক্ষমস্ব ত্বং ক্ষমস্ব ত্বং
শেষশৈল শিখামণে ॥ ১১

॥ ইতি বেঙ্কটেশ স্তোত্রম্ ॥
॥ অথ বেঙ্কটেশ প্রপত্তি ॥
ঈশানাং জগতোঽস্য বেঙ্কটপতেঃ বিষ্ণোঃ পরাং প্রেযসীং
তদ্বক্ষস্স্থল নিত্য বাসরসিকাং তত্ক্ষান্তি সংবর্ধিনীম্ ।
পদ্মালঙ্কৃতপাণিপল্লবযুগাং পদ্মাসনস্থাং শ্রিযং
বাত্সল্যাদিগুণোজ্জ্বলাং ভগবতীং বংদে জগন্মাতরম্ ॥ ১

শ্রীমন্ কৃপাজলনিধে কৃতসর্বলোক
সর্বজ্ঞ শক্ত নতবত্সল সর্বশেষিন্ ।
স্বামিন্ সুশীলসুলভাশ্রিতপারিজাত
শ্রীবেঙ্কটেশচরণৌ শরণং প্রপদ্যে ॥ ২

আনূপুরার্পিতসুজাতসুগন্ধিপুষ্প
সৌরভ্যসৌরভকরৌ সমসন্নিবেশৌ ।
সৌম্যৌ সদাঽনুভবনেঽপি নবানুভাব্যৌ
শ্রীবেঙ্কটেশচরণৌ শরণং প্রপদ্যে ॥ ৩

সদ্যোবিকাসিসমুদিত্বরসান্দ্ররাগ
সৌরভ্যনির্ভরসরোরুহসাম্যবার্তাম্ ।
সম্যক্ষু সাহসপদেষু বিলেখযন্তৌ
শ্রীবেঙ্কটেশচরণৌ শরণং প্রপদ্যে ॥ ৪

রেখামযধ্বজসুধাকলশাতপত্র
বজ্রাঙ্কুশাম্বুরুহকল্পকশঙ্খচক্রৈঃ ।
ভব্যৈরলঙ্কৃততলৌ পরতত্ব চিন্হৈঃ
শ্রীবেঙ্কটেশচরণৌ শরণং প্রপদ্যে ॥ ৫

তাম্রোদরদ্যুতিপরাজিতপদ্মরাগৌ
বাহ্যৈর্মহোভিরভিভূতমহেন্দ্রনীলৌ ।
উধ্যন্নখাংশুভিরুদস্তশশাঙ্কভাসৌ
শ্রীবেঙ্কটেশচরণৌ শরণং প্রপদ্যে ॥ ৬

সপ্রেমভীতি কমলাকরপল্লবাভ্যাং
সংবাহনেঽপি সপদি ক্লমমাদধানৌ ।
কান্তাববাঙ্গ্মনসগোচরসৌকুমার্যৌ
শ্রীবেঙ্কটেশচরণৌ শরণং প্রপদ্যে ॥ ৭

লক্ষ্মীমহীতদনুরূপনিজানুভাব
নীলাদিদিব্যমহিষীকরপল্লবানাম্ ।
আরুণ্যসঙ্ক্রমণতঃ কিল সান্দ্ররাগৌ
শ্রীবেঙ্কটেশচরণৌ শরণং প্রপদ্যে ॥ ৮

নিত্যান্নমদ্বিধিশিবাদিকিরীটকোটি
প্রত্যুপ্ত দীপ্ত নবরত্ন মহঃপ্ররোহৈঃ ।
নীরাজনা বিধিমুদারমুপাদধানৌ
শ্রীবেঙ্কটেশ চরণৌ শরণং প্রপদ্যে ॥ ৯

বিষ্ণোঃ পদে পরম ইত্যুতিদপ্রশংসৌ
যৌ মধ্ব উত্স ইতি ভোগ্যতযাঽপ্যপাত্তৌ ।
ভূযস্তথেতি তব পাণিতলপ্রদিষ্টৌ
শ্রীবেঙ্কটেশ চরণৌ শরণং প্রপদ্যে ॥ ১০

পার্থায তত্সদৃশ সারথিনা ত্বযৈব
যৌ দর্শিতৌ স্বচরণৌ শরণং ব্রজেতি ।
ভূযোঽপি মহ্যমিহতৌ করদর্শিতৌ তে
শ্রী বেঙ্কটেশ চরণৌ শরণং প্রপদ্যে ॥ ১১

মন্মূর্ধ্নি কালিযফণে বিকটাটবীষু
শ্রী বেঙ্কটাদ্রিশিখরে শিরসি শ্রুতীনাম্ ॥

চিত্তেঽপ্যনন্যমনসাং সমমাহিতৌতে
শ্রীবেঙ্কটেশ চরণৌ শরণং প্রপদ্যে ॥ ১২

অম্লানহৃষ্যদবনীতলকীর্ণপুষ্পৌ
শ্রীবেঙ্কটাদ্রি শিখরাভরণাযমানৌ ।
আনন্দিতাখিল মনো নযনৌ তবৈতৌ
শ্রীবেঙ্কটেশ চরণৌ শরণং প্রপদ্যে ॥ ১৩

প্রাযঃ প্রপন্ন জনতা প্রথমাবগাহ্যৌ
মাতুস্স্তনাবিব শিশোরমৃতাযমানৌ ।
প্রাপ্তৌপরস্পরতুলামতুলান্তরৌ তে
শ্রীবেঙ্কটেশ চরণৌ শরণং প্রপদ্যে ॥ ১৪

সত্বোত্তরৈস্সতত সেব্যপদাম্বুজেন
সংসারতারকদযার্দ্র দৃগংচলেন ।
সৌম্যোপযন্তৃমুনিনা মম দর্শিতৌ তে
শ্রীবেঙ্কটেশ চরণৌ শরণং প্রপদ্যে ॥ ১৫

শ্রীশ শ্রিযা ঘটিকযা ত্বদুপাযভাবে
প্রাপ্যে ত্বযি স্বযমুপেযতযাস্ফুরন্ত্যা ।
নিত্যাশ্রিতায নিরবদ্যগুণায তুভ্যং
স্যাং কিঙ্করো বৃষগিরীশ ন জাতু মহ্যম্ ॥ ১৬

॥ ইতি বেঙ্কটেশ প্রপত্তি ॥
॥ অথ বেঙ্কটেশ মঙ্গলাশাসনম্ ॥
শ্রিযঃ কান্তায কল্যাণ নিধযে নিধযেঽর্থিনাং
শ্রীবেঙ্কটনিবাসায শ্রীনিবাসায মঙ্গলম্ ॥ ১

লক্ষ্মী সবিভ্রমালোক সুভ্রূ বিভ্রমচক্ষুষে
চক্ষুষে সর্বলোকানাং বেঙ্কটেশায মঙ্গলম্ ॥ ২

শ্রী বেঙ্কটাদ্রি শৃঙ্গাঙ্গ্র মঙ্গলাভরণাঙ্ঘ্রযে
মঙ্গলানাং নিবাসায বেঙ্কটেশায মঙ্গলম্ ॥ ৩

সর্বাবযবসৌন্দর্য সম্পদা সর্বচেতসাং
সদা সম্মোহনাযাস্তু বেঙ্কটেশায মঙ্গলম্ ॥ ৪

নিত্যায নিরবদ্যায সত্যানন্দচিদাত্মনে
সর্বান্তরাত্মনে শ্রীমদ্ বেঙ্কটেশায মঙ্গলম্ ॥ ৫

স্বতস্সর্ববিদে সর্ব শক্তযে সর্বশেষিণে
সুলভায সুশীলাযা বেঙ্কটেশায মঙ্গলম্ ॥ ৬

পরস্মৈ ব্রহ্মণে পূর্ণকামায পরমাত্মনে
প্রযুংজে পরতত্ত্বায বেঙ্কটেশায মঙ্গলম্ ॥ ৭

আকাল তত্ত্বমশ্রান্তং আত্মনাং অনুপশ্যতাং
অতৃপ্ত্যমৃতরূপায বেঙ্কটেশায মঙ্গলম্ ॥ ৮

প্রাযস্স্বচরণৌ পুংসাং শরণ্যত্বেন পাণিনা
কৃপযাঽঽদিশতে শ্রীমদ্ বেঙ্কটেশায মঙ্গলম্ ॥ ৯

দযামৃত তরঙ্গিণ্যাস্তরঙ্গৈরিব শীতলৈঃ
অপাংগৈঃ সিংচতে বিশ্বং বেঙ্কটেশায মঙ্গলম্ ॥ ১০

স্রগ্ভূষাম্বরহেতীনাং সুষমাবহ মূর্তযে
সর্বার্তি শমনাযাস্তু বেঙ্কটেশায মঙ্গলম্ ॥ ১১

শ্রীবৈকুণ্ঠবিরক্তায স্বামিপুষ্করিণীতটে
রমযা রমমাণায বেঙ্কটেশায মঙ্গলম্ ॥ ১২

শ্রীমদ্সুন্দরজামাতৃমুনি মানসবাসিনে
সর্বলোক নিবাসায শ্রীনিবাসায মঙ্গলম্ ॥ ১৩

মঙ্গলাশাসনপরৈর্মদাচার্য পুরোগমৈঃ
সর্বৈশ্চ পূর্বৈরাচার্যৈঃ সত্কৃতাযাস্তু মঙ্গলম্ ॥ ১৪

॥ ইতি বেঙ্কটেশ মঙ্গলাশাসনম্ ॥
॥ ॐ তত্ সত্ ॥

Encoded and proofread by Srinivas Sunder sunder at crystal.cirrus.com

Please send corrections to sanskrit@cheerful.com
Last updated ত্oday
http://sanskritdocuments.org

Venkateshwara Suprabhatam Lyrics in Bengali PDF
% File name : venkatsp.itx
% Category : suprabhAta
% Location : doc\_vishhnu
% Language : Sanskrit
% Subject : philosophy/hinduism/religion
% Transliterated by : Srinivas Sunder sunder at crystal.cirrus.com
% Proofread by : Srinivas Sunder sunder at crystal.cirrus.com
% Latest update : January 27, 1995
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website