{॥ ଶ୍ରୀଲକ୍ଷ୍ମୀନୃସିଂହକରୁଣାରସସ୍ତୋତ୍ରମ୍ ॥}
ଶ୍ରୀମତ୍ପଯୋନିଧିନିକେତନଚକ୍ରପାଣେ
ଭୋଗୀନ୍ଦ୍ରଭୋଗମଣିରାଜିତପୁଣ୍ଯମୂର୍ତେ ।
(ପାଠଭେଦ- ଭୋଗୀନ୍ଦ୍ରଭୋଗମଣିରଞ୍ଜିତ ପୁଣ୍ଯମୂର୍ତେ)
ଯୋଗୀଶ ଶାଶ୍ଵତ ଶରଣ୍ଯ ଭଵାବ୍ଧିପୋତ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧॥

ବ୍ରହ୍ମେନ୍ଦ୍ରରୁଦ୍ରମରୁଦର୍କକିରୀଟକୋଟି-
ସଙ୍ଘଟ୍ଟିତାଙ୍ଘ୍ରିକମଲାମଲକାନ୍ତିକାନ୍ତ ।
ଲକ୍ଷ୍ମୀଲସତ୍କୁଚସରୋରୁହରାଜହଂସ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୨॥

ସଂସାରଦାଵଦହନାକରଭୀକରୋରୁ-
(ପାଠଭେଦ-ସଂସାରଦାଵଦହନାତୁରଭୀକରୋରୁ-)
ଜ୍ଵାଲାଵଲୀଭିରତିଦଗ୍ଧତନୂରୁହସ୍ଯ ।
ତ୍ଵତ୍ପାଦପଦ୍ମସରସୀରୁହମାଗତସ୍ଯ
(ପାଠଭେଦ- ତ୍ଵତ୍ପାଦପଦ୍ମସରସୀଂ ଶରଣାଗତସ୍ଯ)
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୩॥

ସଂସାରଜାଲପତିତସ୍ଯ ଜଗନ୍ନିଵାସ
ସର୍ଵେନ୍ଦ୍ରିଯାର୍ଥବଡିଶାଗ୍ରଝଷୋପମସ୍ଯ ।
ପ୍ରୋତ୍କମ୍ପିତପ୍ରଚୁରତାଲୁକମସ୍ତକସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୪॥

ସଂସାରକୂପମତିଘୋରମଗାଧମୂଲଂ
ସମ୍ପ୍ରାପ୍ଯ ଦୁଃଖଶତସର୍ପସମାକୁଲସ୍ଯ ।
ଦୀନସ୍ଯ ଦେଵ କୃପଯା ପଦମାଗତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୫॥

ସଂସାରଭୀକରକରୀନ୍ଦ୍ରକରାଭିଘାତ-
ନିଷ୍ପୀଡ୍ଯମାନଵପୁଷଃ ସକଲାର୍ତିନାଶ ।
ପ୍ରାଣପ୍ରଯାଣଭଵଭୀତିସମାକୁଲସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୬॥

ସଂସାରସର୍ପଵିଷଦିଗ୍ଧମହୋଗ୍ରତୀଵ୍ର-
ଦଂଷ୍ଟ୍ରାଗ୍ରକୋଟିପରିଦଷ୍ଟଵିନଷ୍ଟମୂର୍ତେଃ ।
ନାଗାରିଵାହନ ସୁଧାବ୍ଧିନିଵାସ ଶୌରେ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୭॥

ସଂସାରଵୃକ୍ଷମଘବୀଜମନନ୍ତକର୍ମ-
ଶାଖାଯୁତଂ କରଣପତ୍ରମନଙ୍ଗପୁଷ୍ପମ୍ ।
ଆରୁହ୍ଯ ଦୁଃଖଫଲିତଂ ଚକିତଂ ଦଯାଲୋ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୮॥

ସଂସାରସାଗରଵିଶାଲକରାଲକାଲ-
ନକ୍ରଗ୍ରହଗ୍ରସିତନିଗ୍ରହଵିଗ୍ରହସ୍ଯ ।
ଵ୍ଯଗ୍ରସ୍ଯ ରାଗନିଚଯୋର୍ମିନିପୀଡିତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୯॥

ସଂସାରସାଗରନିମଜ୍ଜନମୁହ୍ଯମାନଂ
ଦୀନଂ ଵିଲୋକଯ ଵିଭୋ କରୁଣାନିଧେ ମାମ୍ ।
ପ୍ରହ୍ଲାଦଖେଦପରିହାରପରାଵତାର
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧୦॥

ସଂସାରଘୋରଗହନେ ଚରତୋ ମୁରାରେ
ମାରୋଗ୍ରଭୀକରମୃଗପ୍ରଚୁରାର୍ଦିତସ୍ଯ ।
ଆର୍ତସ୍ଯ ମତ୍ସରନିଦାଘସୁଦୁଃଖିତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧୧॥

ବଦ୍ଧ୍ଵା ଗଲେ ଯମଭଟା ବହୁ ତର୍ଜଯନ୍ତଃ
କର୍ଷନ୍ତି ଯତ୍ର ଭଵପାଶଶତୈର୍ଯୁତଂ ମାମ୍ ।
ଏକାକିନଂ ପରଵଶଂ ଚକିତଂ ଦଯାଲୋ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧୨॥

ଲକ୍ଷ୍ମୀପତେ କମଲନାଭ ସୁରେଶ ଵିଷ୍ଣୋ
ଯଜ୍ଞେଶ ଯଜ୍ଞ ମଧୁସୂଦନ ଵିଶ୍ଵରୂପ ।
ବ୍ରହ୍ମଣ୍ଯ କେଶଵ ଜନାର୍ଦନ ଵାସୁଦେଵ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧୩॥

ଏକେନ ଚକ୍ରମପରେଣ କରେଣ ଶଙ୍ଖ-
ମନ୍ଯେନ ସିନ୍ଧୁତନଯାମଵଲମ୍ବ୍ଯ ତିଷ୍ଠନ୍ ।
ଵାମେତରେଣ ଵରଦାଭଯପଦ୍ମଚିହ୍ନଂ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥

(ପାଠଭେଦ-ଦେଵେଶ ଦେହି କୃପଣସ୍ଯ କରାଵଲମ୍ବମ୍)।॥୧୪॥

ଅନ୍ଧସ୍ଯ ମେ ହୃତଵିଵେକମହାଧନସ୍ଯ
ଚୋରୈର୍ମହାବଲିଭିରିନ୍ଦ୍ରିଯନାମଧେଯୈଃ ।
ମୋହାନ୍ଧକାରକୁହରେ ଵିନିପାତିତସ୍ଯ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧୫॥

ପ୍ରହ୍ଲାଦନାରଦପରାଶରପୁଣ୍ଡରୀକ-
ଵ୍ଯାସାଦିଭାଗଵତପୁଙ୍ଗଵହୃନ୍ନିଵାସ ।
ଭକ୍ତାନୁରୁକ୍ତପରିପାଲନପାରିଜାତ
ଲକ୍ଷ୍ମୀନୃସିଂହ ମମ ଦେହି କରାଵଲମ୍ବମ୍ ॥ ୧୬॥

ଲକ୍ଷ୍ମୀନୃସିଂହଚରଣାବ୍ଜମଧୁଵ୍ରତେନ
ସ୍ତୋତ୍ରଂ କୃତଂ ଶୁଭକରଂ ଭୁଵି ଶଙ୍କରେଣ ।
ଯେ ତତ୍ପଠନ୍ତି ମନୁଜା ହରିଭକ୍ତିଯୁକ୍ତା-
ସ୍ତେ ଯାନ୍ତି ତତ୍ପଦସରୋଜମଖଣ୍ଡରୂପମ୍ ॥ ୧୭॥

(ପାଠଭେଦ- ଯନ୍ମାଯଯୋର୍ଜିତଵପୁଃପ୍ରଚୁରପ୍ରଵାହ-
ମଗ୍ନାର୍ଥମତ୍ର ନିଵହୋରୁକରାଵଲମ୍ବମ୍ । ।
ଲକ୍ଷ୍ମୀନୃସିଂହଚରଣାବ୍ଜମଧୁଵ୍ରତେନ
ସ୍ତୋତ୍ରଂ କୃତଂ ସୁଖକରଂ ଭୁଵି ଶଙ୍କରେଣ ॥ ୧୭॥)

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ଯସ୍ଯ
ଶ୍ରୀଗୋଵିନ୍ଦଭଗଵତ୍ପୂଜ୍ଯପାଦଶିଷ୍ଯସ୍ଯ
ଶ୍ରୀମଚ୍ଛଙ୍କରଭଗଵତଃ କୃତୌ
ଲକ୍ଷ୍ମୀନୃସିଂହକରୁଣାରସସ୍ତୋତ୍ରଂ ସମ୍ପୂର୍ଣମ୍ ॥



Please send corrections to sanskrit@cheerful.com
Last updated ତ୍oday
http://sanskritdocuments.org

Lakshmi Narasimha Karavalamba Stotram Lyrics in Oriya PDF
% File name : lxmnrikar.itx
% Location : doc\_vishhnu
% Author : Adi Shankara
% Language : Sanskrit
% Subject : philosophy/hinduism/religion
% Transliterated by : Sunder Hattangadi (sunderh at hotmail.com)
% Proofread by : Sunder Hattangadi (sunderh at hotmail.com)
% Description-comments : Hymn to Lakshmi-Nrisinha
% Latest update : April, 26, 2000
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website