{॥ శ్రీలక్ష్మీనృసింహకరుణారసస్తోత్రమ్ ॥}
శ్రీమత్పయోనిధినికేతనచక్రపాణే
భోగీన్ద్రభోగమణిరాజితపుణ్యమూర్తే ।
(పాఠభేద- భోగీన్ద్రభోగమణిరఞ్జిత పుణ్యమూర్తే)
యోగీశ శాశ్వత శరణ్య భవాబ్ధిపోత
లక్ష్మీనృసింహ మమ దేహి కరావలమ్బమ్ ॥ ౧॥

బ్రహ్మేన్ద్రరుద్రమరుదర్కకిరీటకోటి-
సఙ్ఘట్టితాఙ్ఘ్రికమలామలకాన్తికాన్త ।
లక్ష్మీలసత్కుచసరోరుహరాజహంస
లక్ష్మీనృసింహ మమ దేహి కరావలమ్బమ్ ॥ ౨॥

సంసారదావదహనాకరభీకరోరు-
(పాఠభేద-సంసారదావదహనాతురభీకరోరు-)
జ్వాలావలీభిరతిదగ్ధతనూరుహస్య ।
త్వత్పాదపద్మసరసీరుహమాగతస్య
(పాఠభేద- త్వత్పాదపద్మసరసీం శరణాగతస్య)
లక్ష్మీనృసింహ మమ దేహి కరావలమ్బమ్ ॥ ౩॥

సంసారజాలపతితస్య జగన్నివాస
సర్వేన్ద్రియార్థబడిశాగ్రఝషోపమస్య ।
ప్రోత్కమ్పితప్రచురతాలుకమస్తకస్య
లక్ష్మీనృసింహ మమ దేహి కరావలమ్బమ్ ॥ ౪॥

సంసారకూపమతిఘోరమగాధమూలం
సమ్ప్రాప్య దుఃఖశతసర్పసమాకులస్య ।
దీనస్య దేవ కృపయా పదమాగతస్య
లక్ష్మీనృసింహ మమ దేహి కరావలమ్బమ్ ॥ ౫॥

సంసారభీకరకరీన్ద్రకరాభిఘాత-
నిష్పీడ్యమానవపుషః సకలార్తినాశ ।
ప్రాణప్రయాణభవభీతిసమాకులస్య
లక్ష్మీనృసింహ మమ దేహి కరావలమ్బమ్ ॥ ౬॥

సంసారసర్పవిషదిగ్ధమహోగ్రతీవ్ర-
దంష్ట్రాగ్రకోటిపరిదష్టవినష్టమూర్తేః ।
నాగారివాహన సుధాబ్ధినివాస శౌరే
లక్ష్మీనృసింహ మమ దేహి కరావలమ్బమ్ ॥ ౭॥

సంసారవృక్షమఘబీజమనన్తకర్మ-
శాఖాయుతం కరణపత్రమనఙ్గపుష్పమ్ ।
ఆరుహ్య దుఃఖఫలితం చకితం దయాలో
లక్ష్మీనృసింహ మమ దేహి కరావలమ్బమ్ ॥ ౮॥

సంసారసాగరవిశాలకరాలకాల-
నక్రగ్రహగ్రసితనిగ్రహవిగ్రహస్య ।
వ్యగ్రస్య రాగనిచయోర్మినిపీడితస్య
లక్ష్మీనృసింహ మమ దేహి కరావలమ్బమ్ ॥ ౯॥

సంసారసాగరనిమజ్జనముహ్యమానం
దీనం విలోకయ విభో కరుణానిధే మామ్ ।
ప్రహ్లాదఖేదపరిహారపరావతార
లక్ష్మీనృసింహ మమ దేహి కరావలమ్బమ్ ॥ ౧౦॥

సంసారఘోరగహనే చరతో మురారే
మారోగ్రభీకరమృగప్రచురార్దితస్య ।
ఆర్తస్య మత్సరనిదాఘసుదుఃఖితస్య
లక్ష్మీనృసింహ మమ దేహి కరావలమ్బమ్ ॥ ౧౧॥

బద్ధ్వా గలే యమభటా బహు తర్జయన్తః
కర్షన్తి యత్ర భవపాశశతైర్యుతం మామ్ ।
ఏకాకినం పరవశం చకితం దయాలో
లక్ష్మీనృసింహ మమ దేహి కరావలమ్బమ్ ॥ ౧౨॥

లక్ష్మీపతే కమలనాభ సురేశ విష్ణో
యజ్ఞేశ యజ్ఞ మధుసూదన విశ్వరూప ।
బ్రహ్మణ్య కేశవ జనార్దన వాసుదేవ
లక్ష్మీనృసింహ మమ దేహి కరావలమ్బమ్ ॥ ౧౩॥

ఏకేన చక్రమపరేణ కరేణ శఙ్ఖ-
మన్యేన సిన్ధుతనయామవలమ్బ్య తిష్ఠన్ ।
వామేతరేణ వరదాభయపద్మచిహ్నం
లక్ష్మీనృసింహ మమ దేహి కరావలమ్బమ్ ॥

(పాఠభేద-దేవేశ దేహి కృపణస్య కరావలమ్బమ్)।॥౧౪॥

అన్ధస్య మే హృతవివేకమహాధనస్య
చోరైర్మహాబలిభిరిన్ద్రియనామధేయైః ।
మోహాన్ధకారకుహరే వినిపాతితస్య
లక్ష్మీనృసింహ మమ దేహి కరావలమ్బమ్ ॥ ౧౫॥

ప్రహ్లాదనారదపరాశరపుణ్డరీక-
వ్యాసాదిభాగవతపుఙ్గవహృన్నివాస ।
భక్తానురుక్తపరిపాలనపారిజాత
లక్ష్మీనృసింహ మమ దేహి కరావలమ్బమ్ ॥ ౧౬॥

లక్ష్మీనృసింహచరణాబ్జమధువ్రతేన
స్తోత్రం కృతం శుభకరం భువి శఙ్కరేణ ।
యే తత్పఠన్తి మనుజా హరిభక్తియుక్తా-
స్తే యాన్తి తత్పదసరోజమఖణ్డరూపమ్ ॥ ౧౭॥

(పాఠభేద- యన్మాయయోర్జితవపుఃప్రచురప్రవాహ-
మగ్నార్థమత్ర నివహోరుకరావలమ్బమ్ । ।
లక్ష్మీనృసింహచరణాబ్జమధువ్రతేన
స్తోత్రం కృతం సుఖకరం భువి శఙ్కరేణ ॥ ౧౭॥)

ఇతి శ్రీమత్పరమహంసపరివ్రాజకాచార్యస్య
శ్రీగోవిన్దభగవత్పూజ్యపాదశిష్యస్య
శ్రీమచ్ఛఙ్కరభగవతః కృతౌ
లక్ష్మీనృసింహకరుణారసస్తోత్రం సమ్పూర్ణమ్ ॥



Please send corrections to sanskrit@cheerful.com
Last updated త్oday
http://sanskritdocuments.org

Lakshmi Narasimha Karavalamba Stotram Lyrics in Telugu PDF
% File name : lxmnrikar.itx
% Location : doc\_vishhnu
% Author : Adi Shankara
% Language : Sanskrit
% Subject : philosophy/hinduism/religion
% Transliterated by : Sunder Hattangadi (sunderh at hotmail.com)
% Proofread by : Sunder Hattangadi (sunderh at hotmail.com)
% Description-comments : Hymn to Lakshmi-Nrisinha
% Latest update : April, 26, 2000
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website