{॥ ಶ್ರೀದತ್ತ ಭಾವಸುಧಾರಸಸ್ತೋತ್ರಮ್ ॥}
ಶ್ರೀ ದತ್ತ ಭಾವಸುಧಾರಸ ಸ್ತೋತ್ರಮ್ ।
ದತ್ತಾತ್ರೇಯಂ ಪರಮಸುಖಮಯಂ ವೇದಗೇಯಂ ಹ್ಯಮೇಯಂ
ಯೋಗಿಧ್ಯೇಯಂ ಹೃತನಿಜಭಯಂ ಸ್ವೀಕೃತಾನೇಕಕಾಯಮ್ ।
ದುಷ್ಟಾಗಮ್ಯಂ ವಿತತವಿಜಯಂ ದೇವದೈತ್ಯರ್ಷಿವನ್ದ್ಯಂ
ವನ್ದೇ ನಿತ್ಯಂ ವಿಹಿತವಿನಯಂ ಚಾವ್ಯಯಂ ಭಾವಗಮ್ಯಮ್ ॥ ೧॥

ದತ್ತಾತ್ರೇಯ ನಮೋಽಸ್ತು ತೇ ಭಗವತೇ ಪಾಪಕ್ಷಯಂ ಕುರ್ವತೇ
ದಾರಿದ್ರ್ಯಂ ಹರತೇ ಭಯಂ ಶಮಯತೇ ಕಾರುಣ್ಯಮಾತನ್ವತೇ ।
ಭಕ್ತಾನುದ್ಧರತೇ ಶಿವಂ ಚ ದದತೇ ಸತ್ಕೀರ್ತಿಮಾತನ್ವತೇ
ಭೂತಾನ್ದ್ರಾವಯತೇ ವರಂ ಪ್ರದದತೇ ಶ್ರೇಯಃ ಪತೇ ಸದ್ಗತೇ ॥ ೨॥

ಏಕಂ ಸೌಭಾಗ್ಯಜನಕಂ ತಾರಕಂ ಲೋಕನಾಯಕಮ್ ।
ವಿಶೋಕಂ ತ್ರಾತಭಜಕಂ ನಮಸ್ಯೇ ಕಾಮಪೂರಕಮ್ ॥ ೩॥

ನಿತ್ಯಂ ಸ್ಮರಾಮಿ ತೇ ಪಾದೇ ಹತಖೇದೇ ಸುಖಪ್ರದೇ ।
ಪ್ರದೇಹಿ ಮೇ ಶುದ್ಧಭಾವಂ ಭಾವಂ ಯೋ ವಾರಯೇದ್ದ್ರುತಮ್ ॥ ೪॥

ಸಮಸ್ತಸಮ್ಪತ್ಪ್ರದಮಾರ್ತಬಂಧುಂ ಸಮಸ್ತಕಲ್ಯಾಣದಮಸ್ತಬಂಧುಮ್ ।
ಕಾರುಣ್ಯಸಿಂಧುಂ ಪ್ರಣಮಾಮಿ ದತ್ತಂ ಯಃ ಶೋಧಯತ್ಯಾಶು ಮಲೀನಚಿತ್ತಮ್ ॥ ೫॥

ಸಮಸ್ತಭೂತಾಂತರಬಾಹ್ಯವರ್ತೀ ಯಶ್ಚಾತ್ರಿಪುತ್ರೋ ಯತಿಚಕ್ರವರ್ತೀ ।
ಸುಕೀರ್ತಿಸಂವ್ಯಾಪ್ತದಿಗಂತರಾಲಃ ಸ ಪಾತು ಮಾಂ ನಿರ್ಜಿತಭಕ್ತಕಾಲಃ ॥ ೬॥

ವ್ಯಾಧ್ಯಾಧಿದಾರಿದ್ರ್ಯಭಯಾರ್ತಿಹರ್ತಾ ಸ್ವಗುಪ್ತಯೇಽನೇಕಶರೀರಧರ್ತಾ
ಸ್ವದಾಸಭರ್ತಾ ಬಹುಧಾ ವಿಹರ್ತಾ ಕರ್ತಾಪ್ಯಕರ್ತಾ ಸ್ವವಶೋಽರಿಹರ್ತಾ ॥ ೭॥

ಸ ಚಾನಸೂಯಾತನಯೋಽಭವದ್ಯೋ ವಿಷ್ಣುಃ ಸ್ವಯಂ ಭಾವಿಕರಕ್ಷಣಾಯ ।
ಗುಣಾ ಯದೀಯಾ ಮ ಹಿ ಬುದ್ಧಿಮದ್ಭಿರ್ಗಣ್ಯಂತ ಆಕಲ್ಪಮಪೀಹ ಧಾತ್ರಾ ॥ ೮॥

ನ ಯತ್ಕಟಾಕ್ಷಾಮೃತವೃಷ್ಟಿತೋಽತ್ರ
ತಿಷ್ಠನ್ತಿ ತಾಪಾಃ ಸಕಲಾಃ ಪರತ್ರ ।
ಯಃ ಸದ್ಗತಿಂ ಸಮ್ಪ್ರದದಾತಿ ಭೂಮಾ
ಸ ಮೇಽನ್ತರೇ ತಿಷ್ಠತು ದಿವ್ಯಧಾಮಾ ॥ ೯॥

ಸ ತ್ವಂ ಪ್ರಸೀದಾತ್ರಿಸುತಾರ್ತಿಹಾರಿನ್
ದಿಗಮ್ಬರ ಸ್ವೀಯಮನೋವಿಹಾರಿನ್ ।
ದುಷ್ಟಾ ಲಿಪಿರ್ಯಾ ಲಿಖಿತಾತ್ರ ಧಾತ್ರಾ
ಕಾರ್ಯಾ ತ್ವಯಾ ಸಾಽತಿಶುಭಾ ವಿಧಾತ್ರಾ ॥ ೧೦॥

ಸರ್ವಮಂಗಲಸಂಯುಕ್ತ ಸರ್ವೈಶ್ವರ್ಯಸಮನ್ವಿತ ।
ಪ್ರಸನ್ನೇ ತ್ವಯಿ ಸರ್ವೇಶೇ ಕಿಂ ಕೇಷಾಂ ದುರ್ಲಭಂ ಕುಹ ॥ ೧೧॥

ಹಾರ್ದಾಂಧತಿಮಿರಂ ಹನ್ತುಂ ಶುದ್ಧಜ್ಞಾನಪ್ರಕಾಶಕ ।
ತ್ವದಂಘ್ರಿನಖಮಾಣಿಕ್ಯದ್ಯುತಿರೇವಾಲಮೀಶ ನಃ ॥ ೧೨॥

ಸ್ವಕೃಪಾರ್ದ್ರಕಟಾಕ್ಷೇಣ ವೀಕ್ಷಸೇ ಚೇತ್ಸಕೃದ್ಧಿ ಮಾಮ್ ।
ಭವಿಷ್ಯಾಮಿ ಕೃತಾರ್ಥೋಽತ್ರ ಪಾತ್ರಂ ಚಾಪಿ ಸ್ಥಿತೇಸ್ತವ ॥ ೧೩॥

ಕ್ವ ಚ ಮನ್ದೋ ವರಾಕೋಽಹಂ ಕ್ವ ಭವಾನ್ಭಗವಾನ್ಪ್ರಭುಃ ।
ಅಥಾಪಿ ಭವದಾವೇಶ ಭಾಗ್ಯವಾನಸ್ಮಿ ತೇ ದೃಶಾ ॥ ೧೪॥

ವಿಹಿತಾನಿ ಮಯಾ ನಾನಾ ಪಾತಕಾನಿ ಚ ಯದ್ಯಪಿ ।
ಅಥಾಪಿ ತೇ ಪ್ರಸಾದೇನ ಪವಿತ್ರೋಽಹಂ ನ ಸಂಶಯಃ ॥ ೧೫॥

ಸ್ವಲೀಲಯಾ ತ್ವಂ ಹಿ ಜನಾನ್ಪುನಾಸಿ
ತನ್ಮೇ ಸ್ವಲೀಲಾ ಶ್ರವಣಂ ಪ್ರಯಚ್ಛ ।
ತಸ್ಯಾಃ ಶ್ರುತೇಃ ಸಾನ್ದ್ರವಿಲೋಚನೋಽಹಂ
ಪುನಾಮಿ ಚಾತ್ಮಾನಮತೀವ ದೇವ ॥ ೧೬॥

ಪುರತಸ್ತೇ ಸ್ಫುಟಂ ವಚ್ಮಿ ದೋಷರಾಶಿರಹಂ ಕಿಲ ।
ದೋಷಾ ಮಮಾಮಿತಾಃ ಪಾಂಸುವೃಷ್ಟಿಬಿನ್ದುಸಮಾ ವಿಭೋಃ ॥ ೧೭॥

ಪಾಪೀಯಸಾಮಹಂ ಮುಖ್ಯಸ್ತ್ವಂ ತು ಕಾರುಣಿಕಾಗ್ರಣೀಃ ।
ದಯನೀಯೋ ನ ಹಿ ಕ್ವಾಪಿ ಮದನ್ಯ ಇತಿ ಭಾತಿ ಮೇ ॥ ೧೮॥

ಈದೃಶಂ ಮಾಂ ವಿಲೋಕ್ಯಾಪಿ ಕೃಪಾಲೋ ತೇ ಮನೋ ಯದಿ ।
ನ ದ್ರವೇತ್ತರ್ಹಿ ಕಿಂ ವಾಚ್ಯಮದೃಷ್ಟಂ ಮೇ ತವಾಗ್ರತಃ ॥ ೧೯॥

ತ್ವಮೇವ ಸೃಷ್ಟವಾನ್ಸರ್ವಾನ್ದತ್ತಾತ್ರೇಯ ದಯಾನಿಧೇ ।
ವಯಂ ದೀನತರಾಃ ಪುತ್ರಾಸ್ತವಾಕಲ್ಪಾಃ ಸ್ವರಕ್ಷಣೇ ॥ ೨೦॥

ಜಯತು ಜಯತು ದತ್ತೋ ದೇವಸಙ್ಘಾಭಿಪೂಜ್ಯೋ
ಜಯತು ಜಯತು ಭದ್ರೋ ಭದ್ರದೋ ಭಾವುಕೇಜ್ಯಃ ।
ಜಯತು ಜಯತು ನಿತ್ಯೋ ನಿರ್ಮಲಜ್ಞಾನವೇದ್ಯೋ
ಜಯತು ಜಯತು ಸತ್ಯಃ ಸತ್ಯಸಂಧೋಽನವದ್ಯಃ ॥ ೨೧॥

ಯದ್ಯಹಂ ತವ ಪುತ್ರಃ ಸ್ಯಾಂ ಪಿತಾ ಮಾತಾ ತ್ವಮೇವ ಮೇ ।
ದಯಾಸ್ತನ್ಯಾಮೃತೇನಾಶು ಮಾತಸ್ತ್ವಮಭಿಷಿಞ್ಚ ಮಾಮ್ ॥ ೨೨॥

ಈಶಾಭಿನ್ನನಿಮಿತ್ತೋಪಾದನಾತ್ಸ್ರಷ್ಟುರಸ್ಯ ತೇ ।
ಜಗದ್ಯೋನೇ ಸುತೋ ನಾಹಂ ದತ್ತ ಮಾಂ ಪರಿಪಾಹ್ಯತಃ ॥ ೨೩॥

ತವ ವತ್ಸಸ್ಯ ಮೇ ವಾಕ್ಯಂ ಸೂಕ್ತಂ ವಾಽಸೂಕ್ತಮಪ್ಯಹೋ ।
ಕ್ಷನ್ತವ್ಯಂ ಮೇಽಪರಾಧಶ್ಚ ತ್ವತ್ತೋಽನ್ಯಾ ನ ಗತಿರ್ಹಿ ಮೇ ॥ ೨೪॥

ಅನನ್ಯಗತಿಕಸ್ಯಾಸ್ಯ ಬಾಲಸ್ಯ ಮಮ ತೇ ಪಿತಃ ।
ನ ಸರ್ವಥೋಚಿತೋಪೇಕ್ಷಾ ದೋಷಾಣಾಂ ಗಣನಾಪಿ ಚ ॥ ೨೫॥

ಅಜ್ಞಾನಿತ್ವಾದಕಲ್ಪತ್ವಾದ್ದೋಷಾ ಮಮ ಪದೇ ಪದೇ ।
ಭವನ್ತಿ ಕಿಂ ಕರೋಮೀಶ ಕರುಣಾವರುಣಾಲಯ ॥ ೨೬॥

ಅಥಾಪಿ ಮೇಽಪರಾಧೈಶ್ಚೇದಾಯಾಸ್ಯನ್ತರ್ವಿಷಾದತಾಮ್ ।
ಪದಾಹತಾರ್ಭಕೇಣಾಪಿ ಮಾತಾ ರುಷ್ಯತಿ ಕಿಂ ಭುವಿ ॥ ೨೭॥

ರಙ್ಕಮಙ್ಕಗತಂ ದೀನಂ ತಾಡಯನ್ತಂ ಪದೇನ ಚ ।
ಮಾತಾ ತ್ಯಜತಿ ಕಿಂ ಬಾಲಂ ಪ್ರತ್ಯುತಾಶ್ವಾಸಯತ್ಯಹೋ ॥ ೨೮॥

ತಾದೃಶಂ ಮಾಮಕಲ್ಪಂ ಚೇನ್ನಾಶ್ವಾಸಯಸಿ ಭೋ ಪ್ರಭೋ ।
ಅಹಹಾ ಬತ ದೀನಸ್ಯ ತ್ವಾಂ ವಿನಾ ಮಮ ಕಾ ಗತಿಃ ॥ ೨೯॥

ಶಿಶುರ್ನಾಯಂ ಶಠಃ ಸ್ವಾರ್ಥೀತ್ಯಪಿ ನಾಯಾತು ತೇಽನ್ತರಮ್ ।
ಲೋಕೇ ಹಿ ಕ್ಷುಧಿತಾ ಬಾಲಾಃ ಸ್ಮರನ್ತಿ ನಿಜಮಾತರಮ್ ॥ ೩೦॥

ಜೀವನಂ ಭಿನ್ನಯೋಃ ಪಿತ್ರೋರ್ಲೋಕ ಏಕತರಾಚ್ಛಿಶೋಃ ।
ತ್ವಂ ತೂಭಯಂ ದತ್ತ ಮಮ ಮಾಽಸ್ತು ನಿರ್ದಯತಾ ಮಯಿ ॥ ೩೧॥

ಸ್ತವನೇನ ನ ಶಕ್ತೋಽಸ್ಮಿ ತ್ವಾಂ ಪ್ರಸಾದಯಿತುಂ ಪ್ರಭೋ ।
ಬ್ರಹ್ಮಾದ್ಯಾಶ್ಚಕಿತಾಸ್ತತ್ರ ಮನ್ದೋಽಹಂ ಶಕ್ನುಯಾಂ ಕಥಮ್ ॥ ೩೨॥

ದತ್ತ ತ್ವದ್ಬಾಲವಾಕ್ಯಾನಿ ಸೂಕ್ತಾಸೂಕ್ತಾನಿ ಯಾನಿ ಚ ।
ತಾನಿ ಸ್ವೀಕುರು ಸರ್ವಜ್ಞ ದಯಾಲೋ ಭಕ್ತಭಾವನ ॥ ೩೩॥

ಯೇ ತ್ವಾ ಶರಣಮಾಪನ್ನಾಃ ಕೃತಾರ್ಥಾ ಅಭವನ್ಹಿ ತೇ ।
ಏತದ್ವಿಚಾರ್ಯ ಮನಸಾ ದತ್ತ ತ್ವಾಂ ಶರಣಂ ಗತಃ ॥ ೩೪॥

ತ್ವನ್ನಿಷ್ಠಾಸ್ತ್ವತ್ಪರಾ ಭಕ್ತಾಸ್ತವ ತೇ ಸುಖಭಾಗಿನಃ ।
ಇತಿ ಶಾಸ್ತ್ರಾನುರೋಧೇನ ದತ್ತ ತ್ವಾಂ ಶರಣಂ ಗತಃ ॥ ೩೫॥

ಸ್ವಭಕ್ತಾನನುಗೃಹ್ಣಾತಿ ಭಗವಾನ್ ಭಕ್ತವತ್ಸಲಃ ।
ಇತಿ ಸಞ್ಚಿತ್ಯ ಸಞ್ಚಿತ್ಯ ಕಥಞ್ಚಿದ್ಧಾರಯಾಮ್ಯಸೂನ್ ॥ ೩೬॥

ತ್ವದ್ಭಕ್ತಸ್ತ್ವದಧೀನೋಽಹಮಸ್ಮಿ ತುಭ್ಯಂ ಸಮರ್ಪಿತಮ್ ।
ತನುಂ ಮನೋ ಧನಂ ಚಾಪಿ ಕೃಪಾಂ ಕುರು ಮಮೋಪರಿ ॥ ೩೭॥

ತ್ವಯಿ ಭಕ್ತಿಂ ನೈವ ಜಾನೇ ನ ಜಾನೇಽರ್ಚನಪದ್ಧತಿಮ್ ।
ಕೃತಂ ನ ದಾನಧರ್ಮಾದಿ ಪ್ರಸಾದಂ ಕುರು ಕೇವಲಮ್ ॥ ೩೮॥

ಬ್ರಹ್ಮಚರ್ಯಾದಿ ನಾಚೀರ್ಣಂ ನಾಧೀತಾ ವಿಧಿತಃ ಶ್ರುತಿಃ ।
ಗಾರ್ಹಸ್ಥ್ಯಂ ವಿಧಿನಾ ದತ್ತ ನ ಕೃತಂ ತತ್ಪ್ರಸೀದ ಮೇ ॥ ೩೯॥

ನ ಸಾಧುಸಙ್ಗಮೋ ಮೇಽಸ್ತಿ ನ ಕೃತಂ ವೃದ್ಧಸೇವನಮ್ ।
ನ ಶಾಸ್ತ್ರಶಾಸನಂ ದತ್ತ ಕೇವಲಂ ತ್ವಂ ದಯಾಂ ಕುರು ॥ ೪೦॥

ಜ್ಞಾತೇಽಪಿ ಧರ್ಮೇ ನಹಿ ಮೇ ಪ್ರವೃತ್ತಿ-
ರ್ಜ್ಞಾತೇಽಪ್ಯಧರ್ಮೇ ನ ತತೋ ನಿವೃತ್ತಿಃ ॥

ಶ್ರೀದತ್ತನಾಥೇನ ಹೃದಿ ಸ್ಥಿತೇನ
ಯಥಾ ನಿಯುಕ್ತೋಽಸ್ಮಿ ತಥಾ ಕರೋಮಿ ॥ ೪೧॥

ಕೃತಿಃ ಸೇವಾ ಗತಿರ್ಯಾತ್ರಾ ಸ್ಮೃತಿಶ್ಚಿನ್ತಾ ಸ್ತುತಿರ್ವಚಃ ।
ಭವನ್ತು ದತ್ತ ಮೇ ನಿತ್ಯಂ ತ್ವದೀಯಾ ಏವ ಸರ್ವಥಾ ॥ ೪೨॥

ಪ್ರತಿಜ್ಞಾ ತೇ ನ ಭಕ್ತಾ ಮೇ ನಶ್ಯನ್ತೀತಿ ಸುನಿಶ್ಚಿತಮ್ ।
ಶ್ರೀದತ್ತ ಚಿತ್ತ ಆನೀಯ ಜೀವನಂ ಧಾರಯಾಮ್ಯಹಮ್ ॥ ೪೩॥

ದತ್ತೋಽಹಂ ತೇ ಮಯೇತೀಶ ಆತ್ಮದಾನೇನ ಯೋಽಭವತ್ ।
ಅನಸೂಯಾತ್ರಿಪುತ್ರಃ ಸ ಶ್ರೀದತ್ತಃ ಶರಣಂ ಮಮ ॥ ೪೪॥

ಕಾರ್ತವೀರ್ಯಾರ್ಜುನಾಯಾದಾದ್ಯೋಗರ್ಧಿಮುಭಯೀಂ ಪ್ರಭುಃ ।
ಅವ್ಯಾಹತಗತಿಂ ಚಾಸೌ ಶ್ರೀದತ್ತಃ ಶರಣಂ ಮಮ ॥ ೪೫॥

ಆನ್ವೀಕ್ಷಿಕೀಮಲರ್ಕಾಯ ವಿಕಲ್ಪತ್ಯಾಗಪೂರ್ವಕಮ್ ।
ಯೋಽದಾದಾಚಾರ್ಯವರ್ಯಃ ಸ ಶ್ರೀದತ್ತಃ ಶರಣಂ ಮಮ ॥ ೪೬॥

ಚತುರ್ವಿಂಶತಿಗುರ್ವಾಪ್ತಂ ಹೇಯೋಪಾದೇಯಲಕ್ಷಣಂ ।
ಜ್ಞಾನಂ ಯೋ ಯದವೇಽದಾತ್ಸ ಶ್ರೀದತ್ತಃ ಶರಣಂ ಮಮ ॥ ೪೭॥

ಮದಾಲಸಾಗರ್ಭರತ್ನಾಲರ್ಕಾಯ ಪ್ರಾಹಿಣೋಚ್ಚ ಯಃ ।
ಯೋಗಪೂರ್ವಾತ್ಮವಿಜ್ಞಾನಂ ಶ್ರೀದತ್ತಃ ಶರಣಂ ಮಮ ॥ ೪೮॥

ಆಯುರಾಜಾಯ ಸತ್ಪುತ್ರಂ ಸೇವಾಧರ್ಮಪರಾಯ ಯಃ ।
ಪ್ರದದೌ ಸದ್ಗತಿಂ ಚೈಷ ಶ್ರೀದತ್ತಃ ಶರಣಂ ಮಮ ॥ ೪೯॥

ಲೋಕೋಪಕೃತಯೇ ವಿಷ್ಣುದತ್ತವಿಪ್ರಾಯ ಯೋಽರ್ಪಯತ್ ।
ವಿದ್ಯಾಸ್ತಚ್ಛ್ರಾದ್ಧಭುಗ್ಯಃ ಸ ಶ್ರೀದತ್ತಃ ಶರಣಂ ಮಮ ॥ ೫೦॥

ಭರ್ತ್ರಾ ಸಹಾನುಗಮನವಿಧಿಂ ಯಃ ಪ್ರಾಹ ಸರ್ವವಿತ್ ।
ರಾಮಮಾತ್ರೇ ರೇಣುಕಾಯೈ ಶ್ರೀದತ್ತಃ ಶರಣಂ ಮಮ ॥ ೫೧॥

ಸಮೂಲಮಾಹ್ನಿಕಂ ಕರ್ಮ ಸೋಮಕೀರ್ತಿನೃಪಾಯ ಯಃ ।
ಮೋಕ್ಷೋಪಯೋಗಿ ಸಕಲಂ ಶ್ರೀದತ್ತಃ ಶರಣಂ ಮಮ ॥ ೫೨॥

ನಾಮಧಾರಕ ಭಕ್ತಾಯ ನಿರ್ವಿಣ್ಣಾಯ ವ್ಯದರ್ಶಯತ್ ।
ತುಷ್ಟಃ ಸ್ತುತ್ಯಾ ಸ್ವರೂಪಂ ಸ ಶ್ರೀದತ್ತಃ ಶರಣಂ ಮಮ ॥ ೫೩॥

ಯಃ ಕಲಿಬ್ರಹ್ಮಸಂವಾದಮಿಷೇಣಾಹ ಯುಗಸ್ಥಿತೀಃ ।
ಗುರುಸೇವಾಂ ಚ ಸಿದ್ಧಾಽಽಸ್ಯಾಚ್ಛ್ರೀದತ್ತಃ ಶರಣಂ ಮಮ ॥ ೫೪॥

ದುರ್ವಾಸಃಶಾಪಮಾಶ್ರುತ್ಯ ಯೋಽಮ್ಬರೀಷಾರ್ಥಮವ್ಯಯಃ ।
ನಾನಾವತಾರಧಾರೀ ಸ ಶ್ರೀದತ್ತಃ ಶರಣಂ ಮಮ ॥ ೫೫॥

ಅನಸೂಯಾಸತೀದುಗ್ಧಾಸ್ವಾದಾಯೇವ ತ್ರಿರೂಪತಃ ।
ಅವಾತರದಜೋ ಯೋಽಪಿ ಶ್ರೀದತ್ತಃ ಶರಣಂ ಮಮ ॥ ೫೬॥

ಪೀಠಾಪುರೇ ಯಃ ಸುಮತಿಬ್ರಾಹ್ಮಣೀಭಕ್ತಿತೋಽಭವತ್ ।
ಶ್ರೀಪಾದಸ್ತತ್ಸುತಸ್ತ್ರಾತಾ ಶ್ರೀದತ್ತಃ ಶರಣಂ ಮಮ ॥ ೫೭॥

ಪ್ರಕಾಶಯಾಮಾಸ ಸಿದ್ಧಮುಖಾತ್ಸ್ಥಾಪನಮಾದಿತಃ ।
ಮಹಾಬಲೇಶ್ವರಸ್ಯೈಷ ಶ್ರೀದತ್ತಃ ಶರಣಂ ಮಮ ॥ ೫೮॥

ಚಣ್ಡಾಲ್ಯಪಿ ಯತೋ ಮುಕ್ತಾ ಗೋಕರ್ಣೇ ತತ್ರ ಯೋಽವಸತ್ ।
ಲಿಙ್ಗತೀರ್ಥಮಯೇ ತ್ರ್ಯಬ್ದಂ ಶ್ರೀದತ್ತಃ ಶರಣಂ ಮಮ ॥ ೫೯॥

ಕೃಷ್ಣಾದ್ವೀಪೇ ಕುರುಪುರೇ ಕುಪುತ್ರಂ ಜನನೀಯುತಮ್ ।
ಯೋ ಹಿ ಮೃತ್ಯೋರಪಾಚ್ಛ್ರೀಪಾಚ್ಛ್ರೀದತ್ತಃ ಶರಣಂ ಮಮ ॥ ೬೦॥

ರಜಕಾಯಾಪಿ ದಾಸ್ಯನ್ಯೋ ರಾಜ್ಯಂ ಕುರುಪುರೇ ಪ್ರಭುಃ ।
ತಿರೋಽಭೂದಜ್ಞದೃಷ್ಟ್ಯಾ ಸ ಶ್ರೀದತ್ತಃ ಶರಣಂ ಮಮ ॥ ೬೧॥

ವಿಶ್ವಾಸಘಾತಿನಶ್ಚೋರಾನ್ಸ್ವಭಕ್ತಘ್ನಾನ್ನಿಹತ್ಯ ಯಃ ।
ಜೀವಯಾಮಾಸ ಭಕ್ತಂ ಸ ಶ್ರೀದತ್ತಃ ಶರಣಂ ಮಮ ॥ ೬೨॥

ಕರಞ್ಜನಗರೇಽಮ್ಬಾಯಾಃ ಪ್ರದೋಷವ್ರತಸಿದ್ಧಯೇ ।
ಯೋಽಭೂತ್ಸುತೋ ನೃಹರ್ಯಾಖ್ಯಃ ಶ್ರೀದತ್ತಃ ಶರಣಂ ಮಮ ॥ ೬೩॥

ಮೂಕೋ ಭೂತ್ವಾ ವ್ರತಾತ್ಪಶ್ಚಾದ್ವದನ್ವೇದಾನ್ಸ್ವಮಾತರಮ್ ।
ಪ್ರವ್ರಜನ್ ಬೋಧಯಾಮಾಸ ಶ್ರೀದತ್ತಃ ಶರಣಂ ಮಮ ॥ ೬೪॥

ಕಾಶೀವಾಸೀ ಸ ಸಂನ್ಯಾಸೀ ನಿರಾಶೀಷ್ಟ್ವಪ್ರದೋ ವೃಷಮ್ ।
ವೈದಿಕಂ ವಿಶದೀಕುರ್ವನ್ ಶ್ರೀದತ್ತಃ ಶರಣಂ ಮಮ ॥ ೬೫॥

ಭೂಮಿಂ ಪ್ರದಕ್ಷಿಣೀಕೃತ್ಯ ಸಶಿಷ್ಯೋ ವೀಕ್ಷ್ಯ ಮಾತರಮ್ ।
ಜಹಾರ ದ್ವಿಜಶೂಲಾರ್ತಿಂ ಶ್ರೀದತ್ತಃ ಶರಣಂ ಮಮ ॥ ೬೬॥

ಶಿಷ್ಯತ್ವೇನೋರರೀಕೃತ್ಯ ಸಾಯಂದೇವಂ ರರಕ್ಷ ಯಃ ॥

ಭೀತೇ ಚ ಕ್ರೂರಯವನಾಚ್ಛ್ರೀದತ್ತಃ ಶರಣಂ ಮಮ ॥ ೬೭॥

ಪ್ರೇರಯತ್ತೀರ್ಥಯಾತ್ರಾಯೈ ತೀರ್ಥರೂಪೋಽಪಿ ಯಃ ಸ್ವಕಾನ್ ।
ಸಮ್ಯಗ್ಧರ್ಮಮುಪಾದಿಶ್ಯ ಶ್ರೀದತ್ತಃ ಶರಣಂ ಮಮ ॥ ೬೮॥

ಸಶಿಷ್ಯಃ ಪರ್ಯಲೀಕ್ಷೇತ್ರೇ ವೈದ್ಯನಾಥಸಮೀಪತಃ ।
ಸ್ಥಿತ್ವೋದ್ದಧಾರ ಮೂಢೋ ಯಃ ಶ್ರೀದತ್ತಃ ಶರಣಂ ಮಮ ॥ ೬೯॥

ವಿದ್ವತ್ಸುತಮವಿದ್ಯಂ ಯೋ ಆಗತಂ ಲೋಕನಿನ್ದಿತಮ್ ।
ಛಿನ್ನಜಿಹ್ವಂ ಬುಧಂ ಚಕ್ರೇ ಶ್ರೀದತ್ತಃ ಶರಣಂ ಮಮ ॥ ೭೦॥

ನೃಸಿಂಹವಾಟಿಕಾಸ್ಥೋ ಯಃ ಪ್ರದದೌ ಶಾಕಭುಙ್-ನಿಧಿಮ್ ।
ದರಿದ್ರಬ್ರಾಹ್ಮಣಾಯಾಸೌ ಶ್ರೀದತ್ತಃ ಶರಣಂ ಮಮ ॥ ೭೧॥

ಭಕ್ತಾಯ ತ್ರಿಸ್ಥಲೀಯಾತ್ರಾಂ ದರ್ಶಯಾಮಾಸ ಯಃ ಕ್ಷಣಾತ್ ।
ಚಕಾರ ವರದಂ ಕ್ಷೇತ್ರಂ ಸ ಶ್ರೀದತ್ತಃ ಶರಣಂ ಮಮ ॥ ೭೨॥

ಪ್ರೇತಾರ್ತಿಂ ವಾರಯಿತ್ವಾ ಯೋ ಬ್ರಾಹ್ಮಣ್ಯೈ ಭಕ್ತಿಭಾವಿತಃ ।
ದದೌ ಪುತ್ರೌ ಸ ಗತಿದಃ ಶ್ರೀದತ್ತಃ ಶರಣಂ ಮಮ ॥ ೭೩॥

ತತ್ತ್ವಂ ಯೋ ಮೃತಪುತ್ರಾಯೈ ಬೋಧಯಿತ್ವಾಪ್ಯಜೀವಯತ್ ।
ಮೃತಂ ಕಲ್ಪದ್ರುಮಸ್ಥಃ ಸ ಶ್ರೀದತ್ತಃ ಶರಣಂ ಮಮ ॥ ೭೪॥

ದೋಹಯಾಮಾಸ ಭಿಕ್ಷಾರ್ಥಂ ಯೋ ವನ್ಧ್ಯಾಂ ಮಹಿಷೀಂ ಪ್ರಭುಃ ।
ದಾರಿದ್ರ್ಯದಾವದಾವಃ ಸ ಶ್ರೀದತ್ತಃ ಶರಣಂ ಮಮ ॥ ೭೫॥

ರಾಜಪ್ರಾರ್ಥಿತ ಏತ್ಯಾಸ್ಥಾನ್ಮಠೇ ಯೋ ಗಾಣಗಾಪುರೇ ।
ಬ್ರಹ್ಮರಕ್ಷಃ ಸಮುದ್ಧರ್ತಾ ಶ್ರೀದತ್ತಃ ಶರಣಂ ಮಮ ॥ ೭೬॥

ವಿಶ್ವರೂಪಂ ನಿನ್ದಕಾಯ ಶಿಬಿಕಾಸ್ಥಃ ಸ್ವಲಙ್ಕೃತಃ ।
ಗರ್ವಹಾ ದರ್ಶಯದ್ಯಃ ಸ ಶ್ರೀದತ್ತಃ ಶರಣಂ ಮಮ ॥ ೭೭॥

ತ್ರಿವಿಕ್ರಮೇಣ ಚಾನೀತೌ ಗರ್ವಿತೌ ಬ್ರಾಹ್ಮಣದ್ವಿಷೌ ।
ಬೋಧಯಾಮಾಸ ತೌ ಯಃ ಸ ಶ್ರೀದತ್ತಃ ಶರಣಂ ಮಮ ॥ ೭೮॥

ಉಕ್ತ್ವಾ ಚತುರ್ವೇದಶಾಖಾತದಙ್ಗಾದಿಕಮೀಶ್ವರಃ ।
ವಿಪ್ರಗರ್ವಹರೋ ಯಃ ಸ ಶ್ರೀದತ್ತಃ ಶರಣಂ ಮಮ ॥ ೭೯॥

ಸಪ್ತಜನ್ಮವಿದಂ ಸಪ್ತರೇಖೋಲ್ಲಙ್ಘನತೋ ದದೌ ।
ಯೋ ಹೀನಾಯ ಶ್ರುತಿಸ್ಫೂರ್ತಿಃ ಶ್ರೀದತ್ತಃ ಶರಣಂ ಮಮ ॥ ೮೦॥

ತ್ರಿವಿಕ್ರಮಾಯಾಹ ಕರ್ಮಗತಿಂ ದತ್ತವಿದಾ ಪುನಃ ।
ವಿಯುಕ್ತಂ ಪತಿತಂ ಚಕ್ರೇ ಶ್ರೀದತ್ತಃ ಶರಣಂ ಮಮ ॥ ೮೧॥

ರಕ್ಷಸೇ ವಾಮದೇವೇನ ಭಸ್ಮಮಾಹಾತ್ಮ್ಯಮುದ್ಗತಿಮ್ ।
ಉಕ್ತಾಂ ತ್ರಿವಿಕ್ರಮಾಯಾಹ ಶ್ರೀದತ್ತಃ ಶರಣಂ ಮಮ ॥ ೮೨॥

ಗೋಪೀನಾಥಸುತೋ ರುಗ್ಣೋ ಮೃತಸ್ತತ್ಸ್ತ್ರೀ ಶುಶೋಚ ತಾಮ್ ।
ಬೋಧಯಾಮಾಸ ಯೋ ಯೋಗೀ ಶ್ರೀದತ್ತಃ ಶರಣಂ ಮಮ ॥ ೮೩॥

ಗುರ್ವಗಸ್ತ್ಯರ್ಷಿಸಂವಾದರೂಪಂ ಸ್ತ್ರೀಧರ್ಮಮಾಹ ಯಃ ।
ರೂಪಾನ್ತರೇಣ ಸ ಪ್ರಾಜ್ಞಃ ಶ್ರೀದತ್ತಃ ಶರಣಂ ಮಮ ॥ ೮೪॥

ವಿಧವಾಧರ್ಮಮಾದಿಶ್ಯಾನುಗಮಂ ಚಾಕ್ಷಭಸ್ಮದಃ ।
ಅಜೀವಯನ್ಮೃತಂ ವಿಪ್ರಂ ಶ್ರೀದತ್ತಃ ಶರಣಂ ಮಮ ॥ ೮೫॥

ವೇಶ್ಯಾಸತ್ಯೈ ತು ರುದ್ರಾಕ್ಷಮಾಹಾತ್ಮ್ಯಯುತಮೀಟ್-ಕೃತಮ್ ।
ಪ್ರಸಾದಂ ಪ್ರಾಹ ಯಃ ಸತ್ಯೈ ಶ್ರೀದತ್ತಃ ಶರಣಂ ಮಮ ॥ ೮೬॥

ಶತರುದ್ರೀಯಮಾಹಾತ್ಮ್ಯಂ ಮೃತರಾಟ್ ಸುತಜೀವನಮ್ ।
ಸತ್ಯೈ ಶಶಂಸ ಸ ಗುರುಃ ಶ್ರೀದತ್ತಃ ಶರಣಂ ಮಮ ॥ ೮೭॥

ಕಚಾಖ್ಯಾನಂ ಸ್ತ್ರಿಯೋ ಮಂತ್ರಾನರ್ಹತಾರ್ಥಸುಭಾಗ್ಯದಮ್ ।
ಸೋಮವ್ರತಂ ಚ ಯಃ ಪ್ರಾಹ ಶ್ರೀದತ್ತಃ ಶರಣಂ ಮಮ ॥ ೮೮॥

ಬ್ರಾಹ್ಮಣ್ಯಾ ದುಃಸ್ವಭಾವಂ ಯೋ ನಿವಾರ್ಯಾಹ್ನಿಕಮುತ್ತಮಮ್ ।
ಶಶಂಸ ಬ್ರಾಹ್ಮಣಾಯಾಸೌ ಶ್ರೀದತ್ತಃ ಶರಣಂ ಮಮ ॥ ೮೯॥

ಗಾರ್ಹಸ್ಥಧರ್ಮಂ ವಿಪ್ರಾಯ ಪ್ರತ್ಯವಾಯಜಿಹಾಸಯಾ ।
ಕ್ರಮಮುಕ್ತ್ಯೈ ಯ ಊಚೇ ಸ ಶ್ರೀದತ್ತಃ ಶರಣಂ ಮಮ ॥ ೯೦॥

ತ್ರಿಪುಂಪರ್ಯಾಪ್ತಪಾಕೇನ ಭೋಜಯಾಮಾಸ ಯೋ ನೃಣಾಮ್ ।
ಸಿದ್ಧಶ್ಚತುಃಸಹಸ್ರಾಣಿ ಶ್ರೀದತ್ತಃ ಶರಣಂ ಮಮ ॥ ೯೧॥

ಅಶ್ವತ್ಥಸೇವಾಮಾದಿಶ್ಯ ಪುತ್ರೌ ಯೋಽದಾತ್ಫಲಪ್ರದಃ ।
ಚಿತ್ರಕೃದ್-ವೃದ್ಧವನ್ಧ್ಯಾಯೈ ಶ್ರೀದತ್ತಃ ಶರಣಂ ಮಮ ॥ ೯೨॥

ಕಾರಯಿತ್ವಾ ಶುಷ್ಕಕಾಷ್ಠಸೇವಾಂ ತದ್-ವೃಕ್ಷತಾಂ ನಯನ್ ।
ವಿಪ್ರಕುಷ್ಠಂ ಜಹಾರಾಸೌ ಶ್ರೀದತ್ತಃ ಶರಣಂ ಮಮ ॥ ೯೩॥

ಭಜನ್ತಂ ಕಷ್ಟತೋಽಪ್ಯಾಹ ಸಾಯಂದೇವಂ ಪರೀಕ್ಷ್ಯ ಯಃ ।
ಗುರುಸೇವಾವಿಧಾನಂ ಸ ಶ್ರೀದತ್ತಃ ಶರಣಂ ಮಮ ॥ ೯೪॥

ಶಿವತೋಷಕರೀಂ ಕಾಶೀಯಾತ್ರಾಂ ಭಕ್ತಾಯ ಯೋಽವದತ್ ।
ಸವಿಧಿಂ ವಿಹಿತಾಂ ತ್ವಷ್ಟ್ರಾ ಶ್ರೀದತ್ತಃ ಶರಣಂ ಮಮ ॥ ೯೫॥

ಕೌಣ್ಡಿಣ್ಯಧರ್ಮವಿಹಿತಮನಂತವ್ರತಮಾಹ ಯಃ ।
ಕಾರಯಾಮಾಸ ತದ್ಯೋಽಪಿ ಶ್ರೀದತ್ತಃ ಶರಣಂ ಮಮ ॥ ೯೬॥

ಶ್ರೀಶೈಲಂ ತಂತುಕಾಯಾಸೌ ಯೋಗಗತ್ಯಾ ವ್ಯದರ್ಶಯತ್ ।
ಶಿವರಾತ್ರಿವ್ರತಾಹೇ ಸ ಶ್ರೀದತ್ತಃ ಶರಣಂ ಮಮ ॥ ೯೭॥

ಜ್ಞಾಪಯಿತ್ವಾಪ್ಯರ್ಮತ್ಯತ್ವಂ ಸ್ವಸ್ಯ ದೃಷ್ಟ್ಯಾ ಚಕಾರ ಯಃ ।
ವಿಕುಷ್ಠಂ ನನ್ದಿಶರ್ಮಾಣಂ ಶ್ರೀದತ್ತಃ ಶರಣಂ ಮಮ ॥ ೯೮॥

ನರಕೇಸರಿಣೇ ಸ್ವಪ್ನೇ ಸ್ವಂ ಕಲ್ಲೇಶ್ವರಲಿಙ್ಗಗಮ್ ।
ದರ್ಶಯಿತ್ವಾನುಜಗ್ರಾಹ ಶ್ರೀದತ್ತಃ ಶರಣಂ ಮಮ ॥ ೯೯॥

ಅಷ್ಟಮೂರ್ತಿಧರೋಽಪ್ಯಷ್ಟಗ್ರಾಮಗೋ ಭಕ್ತವತ್ಸಲಃ ।
ದೀಪಾವಲ್ಯುತ್ಸವೇಽಭೂತ್ಸ ಶ್ರೀದತ್ತಃ ಶರಣಂ ಮಮ ॥ ೧೦೦॥

ಅಪಕ್ವಂ ಛೇದಯಿತ್ವಾಪಿ ಕ್ಷೇತ್ರೇ ಶತಗುಣಂ ತತಃ ।
ಧಾನ್ಯಂ ಶೂದ್ರಾಯ ಯೋಽದಾತ್ಸ ಶ್ರೀದತ್ತಃ ಶರಣಂ ಮಮ ॥ ೧೦೧॥

ಗಾಣಗಾಪುರಕೇ ಕ್ಷೇತ್ರೇ ಯೋಽಷ್ಟತೀರ್ಥಾನ್ಯದರ್ಶಯತ್ ।
ಭಕ್ತೇಭ್ಯೋ ಭೀಮರಥ್ಯಾಂ ಸ ಶ್ರೀದತ್ತಃ ಶರಣಂ ಮಮ ॥ ೧೦೨॥

ಪೂರ್ವದತ್ತವರಾಯಾದಾದ್ರಾಜ್ಯಂ ಸ್ಫೋಟಕರುಗ್ಘರಃ ।
ಮ್ಲೇಚ್ಛಾಯ ದೃಷ್ಟಿಂ ಚೇಷ್ಟಂ ಸ ಶ್ರೀದತ್ತಃ ಶರಣಂ ಮಮ ॥ ೧೦೩॥

ಶ್ರೀಶೈಲಯಾತ್ರಾಮಿಷೇಣ ವರದಃ ಪುಷ್ಪಪೀಠಗಃ ।
ಕಲೌ ತಿರೋಽಭವದ್ಯಃ ಸ ಶ್ರೀದತ್ತಃ ಶರಣಂ ಮಮ ॥ ೧೦೪॥

ನಿದ್ರಾಮಾತೃಪುರೇಽಸ್ಯ ಸಹ್ಯಶಿಖರೇ ಪೋಠಂ ಮಿಮಂಕ್ಷಾಪುರೇ
ಕಾಶ್ಯಾಖ್ಯೇ ಕರಹಾಟಕೇಽರ್ಘ್ಯಮವರೇ ಭಿಕ್ಷಾಸ್ಯ ಕೋಲಾಪುರೇ ।
ಪಾಞ್ಚಾಲೇ ಭುಜಿರಸ್ಯ ವಿಠ್ಠಲಪುರೇ ಪತ್ರಂ ವಿಚಿತ್ರಂ ಪುರೇ
ಗಾಂಧರ್ವೇ ಯುಜಿರಾಚಮಃ ಕುರುಪುರೇ ದೂರೇ ಸ್ಮೃತೋ ನಾನ್ತರೇ ॥ ೧೦೫॥

ಅಮಲಕಮಲವಕ್ತ್ರಃ ಪದ್ಮಪತ್ರಾಭನೇತ್ರಃ
ಪರವಿರತಿಕಲತ್ರಃ ಸರ್ವಥಾ ಯಃ ಸ್ವತನ್ತ್ರಃ ।
ಸ ಚ ಪರಮಪವಿತ್ರಃ ಸತ್ಕಮಣ್ಡಲ್ವಮತ್ರಃ
ಪರಮರುಚಿರಗಾತ್ರೋ ಯೋಽನಸೂಯಾತ್ರಿಪುತ್ರಃ ॥ ೧೦೬॥

ನಮಸ್ತೇ ಸಮಸ್ತೇಷ್ಟದಾತ್ರೇ ವಿಧಾತ್ರೇ
ನಮಸ್ತೇ ಸಮಸ್ತೇಡಿತಾಘೌಘಹರ್ತ್ರೇ ।
ನಮಸ್ತೇ ಸಮಸ್ತೇಙ್ಗಿತಜ್ಞಾಯ ಭರ್ತ್ರೇ
ನಮಸ್ತೇ ಸಮಸ್ತೇಷ್ಟಕರ್ತ್ರೇಽಕಹರ್ತ್ರೇ ॥ ೧೦೭॥

ನಮೋ ನಮಸ್ತೇಽಸ್ತು ಪುರಾನ್ತಕಾಯ
ನಮೋ ನಮಸ್ತೇಽಸ್ತ್ವಸುರಾನ್ತಕಾಯ ।
ನಮೋ ನಮಸ್ತೇಽಸ್ತು ಖಲಾನ್ತಕಾಯ
ದತ್ತಾಯ ಭಕ್ತಾರ್ತಿವಿನಾಶಕಾಯ ॥ ೧೦೮॥

ಶ್ರೀದತ್ತದೇವೇಶ್ವರ ಮೇ ಪ್ರಸೀದ
ಶ್ರೀದತ್ತಸರ್ವೇಶ್ವರ ಮೇ ಪ್ರಸೀದ ।
ಪ್ರಸೀದ ಯೋಗೇಶ್ವರ ದೇಹಿ ಯೋಗಂ
ತ್ವದೀಯಭಕ್ತೇಃ ಕುರು ಮಾ ವಿಯೋಗಮ್ ॥ ೧೦೯॥

ಶ್ರೀದತ್ತೋ ಜಯತೀಹ ದತ್ತಮನಿಶಂ ಧ್ಯಾಯಾಮಿ ದತ್ತೇನ ಮೇ
ಹೃಚ್ಛುದ್ಧಿರ್ವಿಹಿತಾ ತತೋಽಸ್ತು ಸತತಂ ದತ್ತಾಯ ತುಭ್ಯಂ ನಮಃ ।
ದತ್ತಾನ್ನಾಸ್ತಿ ಪರಾಯಣಂ ಶ್ರುತಿಮತಂ ದತ್ತಸ್ಯ ದಾಸೋಽಸ್ಮ್ಯಹಮ್ ।
ಶ್ರೀದತ್ತೇ ಪರಭಕ್ತಿರಸ್ತು ಮಮ ಭೋ ದತ್ತ ಪ್ರಸೀದೇಶ್ವರ ॥ ೧೧೦॥

॥ ಇತಿ ಶ್ರೀ ಪರಮಹಂಸ ಪರಿವ್ರಾಜಕಾಚಾರ್ಯ ಶ್ರೀ ಶ್ರೀ ಶ್ರೀ

ವಾಸುದೇವಾನನ್ದ ಸರಸ್ವತೀ ಯತಿ ವರೇಣ್ಯ ವಿರಚಿತಂ ಶ್ರೀ ದತ್ತ
ಭಾವಸುಧಾರಸ ಸ್ತೋತ್ರಂ ಸಮ್ಪೂರ್ಣಮ್ ॥


Encoded and proofread by Arun Shantharam shantharam.arun @ gmail.com

Please send corrections to sanskrit@cheerful.com
Last updated ತ್oday
http://sanskritdocuments.org

Datta Bhavasudharasa Stotram Lyrics in Kannada PDF
% File name : dattabhaavasudhaarasastotram.itx
% Location : doc\_deities\_misc
% Author : vAsudevAnanda sarasvatI
% Language : Sanskrit
% Subject : philosophy/hinduism/religion
% Transliterated by : Arun Shantharam shantharam.arun at gmail.com
% Proofread by : Arun Shantharam shantharam.arun at gmail.com
% Latest update : April 4, 2009
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website