{॥ শ্রীদুর্গামানস পূজা ॥}
শ্রী গণেশায নমঃ ।
উদ্যচ্চন্দনকুঙ্কুমারুণপযোধারাভিরাপ্লাবিতাং
নানানর্ঘ্যমণিপ্রবালঘটিতাং দত্তাং গৃহাণাম্বিকে ।
আমৃষ্টাং সুরসুন্দরীভিরভিতো হস্তাম্বুজৈর্ভক্তিতো
মাতঃ সুন্দরি ভক্তকল্পলতিকে শ্রীপাদুকামাদরাত্ ॥ ১॥

দেবেন্দ্রাদিভিরর্চিতং সুরগণৈরাদায সিংহাসনং
চঞ্চত্কাঞ্চনসঞ্চযাভিরচিতং চারুপ্রভাভাস্বরম্ ।
এতচ্চম্পককেতকীপরিমলং তৈলং মহানির্মলং
গন্ধোদ্বর্তনমাদরেণ তরুণীদত্তং গৃহাণাম্বিকে ॥ ২॥

পশ্চাদ্দেবি গৃহাণ শম্ভুগৃহিণি শ্রীসুন্দরি প্রাযশো
গন্ধদ্রব্যসমূহনির্ভরতরং ধাত্রীফলং নির্মলম্ ।
তত্কেশান্ পরিশোধ্য কঙ্কতিকযা মন্দাকিনীস্রোতসি
স্নাত্বা প্রোজ্জ্বলগন্ধকং ভবতু হে শ্রীসুন্দরি ত্বন্মুদে ॥ ৩॥

সুরাধিপতিকামিনীকরসরোজনালীধৃতাং
সচন্দনসকুঙ্কুমাগুরুভরেণ বিভ্রাজিতাম্ ।
মহাপরিমলোজ্জ্বলাং সরসশুদ্ধকস্তূরিকাং
গৃহাণ বরদাযিনি ত্রিপুরসুন্দরি শ্রীপ্রদে ॥ ৪॥

গন্ধর্বামরকিন্নরপ্রিযতমাসন্তানহস্তাম্বুজ-
প্রস্তারৈর্ধ্রিযমাণমুত্তমতরং কাশ্মীরজাপিঞ্জরম্ ।
মাতর্ভাস্বরভানুমণ্ডললসত্কান্তিপ্রদানোজ্জ্বলং
চৈতন্নির্মলমাতনোতু বসনং শ্রীসুন্দরি ত্বন্মুদম্ ॥ ৫॥

স্বর্ণাকল্পিতকুণ্ডলে শ্রুতিযুগে হস্তাম্বুজে মুদ্রিকা
মধ্যে সারসনা নিতম্বফলকে মঞ্জীরমংঘ্রিদ্বযে ।
হারো বক্ষসি কঙ্কণৌ ক্বণরণত্কারৌ করদ্বন্দ্বকে
বিন্যস্তং মুকুটং শিরস্যনুদিনং দত্তোন্মদং স্তূযতাম্ ॥ ৬॥

গ্রীবাযাং ধৃতকান্তিকান্তপটলং গ্রৈবেযকং সুন্দরং
সিন্দূরং বিলসল্ললাটফলকে সৌন্দর্যমুদ্রাধরম্ ।
রাজত্কজ্জলমুজ্জ্বলোত্পলদলশ্রীমোচনে লোচনে
তদ্দিব্যৌষধিনির্মিতং রচযতু শ্রীশাম্ভবি শ্রীপ্রদে ॥ ৭॥

অমন্দতরমন্দরোন্মথিতদুগ্ধসিন্ধূদ্ভবং
নিশাকরকরোপমং ত্রিপুরসুন্দরি শ্রীপ্রদে ।
গৃহাণ মুখমীক্ষতুং মুকুরবিম্বমাবিদ্রুমৈ-
র্বিনির্মিতমধচ্ছিদে রতিকরাম্বুজস্থাযিনম্ ॥ ৮॥

কস্তূরীদ্রবচন্দনাগুরুসুধাধারাভিরাপ্লাবিতং
চঞ্চচ্চম্পকপাটলাদিসুরভির্দ্রব্যৈঃ সুগন্ধীকৃতম্ ।
দেবস্ত্রীগণমস্তকস্থিতমহারত্নাদিকুম্ভব্রজৈ-
রম্ভঃশাম্ভবি সম্ভ্রমেণ বিমলং দত্তং গৃহাণাম্বিকে ॥ ৯॥

কহ্লারোত্পলনাগকেসরসরোজাখ্যাবলীমালতী-
মল্লীকৈরবকেতকাদিকুসুমৈ রক্তাশ্বমারাদিভিঃ ।
পুষ্পৈর্মাল্যভরেণ বৈ সুরভিণা নানারসস্রোতসা
তাম্রাম্ভোজনিবাসিনীং ভগবতীং শ্রীচণ্ডিকাং পূজযে ॥ ১০॥

মাংসীগুগ্গুলচন্দনাগুরুরজঃ কর্পূরশৈলেযজৈ-
র্মাধ্বীকৈঃ সহকুঙ্কুমৈঃ সুরচিতৈঃ সর্পিভিরামিশ্রিতৈঃ ।
সৌরভ্যস্থিতিমন্দিরে মণিমযে পাত্রে ভবেত্ প্রীতযে
ধূপোঽযং সুরকামিনীবিরচিতঃ শ্রীচণ্ডিকে ত্বন্মুদে ॥ ১১॥

ঘৃতদ্রবপরিস্ফুরদ্রুচিররত্নযষ্ট্যান্বিতো
মহাতিমিরনাশনঃ সুরনিতম্বিনীনির্মিতঃ ।
সুবর্ণচষকস্থিতঃ সঘনসারবর্ত্যান্বিত-
স্তব ত্রিপুরসুন্দরি স্ফুরতি দেবি দীপো মুদে ॥ ১২॥

জাতীসৌরভনির্ভরং রুচিকরং শাল্যোদনং নির্মলং
যুক্তং হিঙ্গুমরীচজীরসুরভির্দ্রব্যান্বিতৈর্ব্যঞ্জনৈঃ ।
পক্বান্নেন সপাযসেন মধুনা দধ্যাজ্যসম্মিশ্রিতং
নৈবেদ্যং সুরকামিনীবিরচিতং শ্রীচণ্ডিকে ত্বন্মুদে ॥ ১৩॥

লবঙ্গকলিকোজ্জ্বলং বহুলনাগবল্লীদলং
সজাতিফলকোমলং সঘনসারপূগীফলম্ ।
সুধামধুরমাকুলং রুচিররত্নপাত্রস্থিতং
গৃহাণ মুখপঙ্কজে স্ফুরিতমম্ব তাম্বূলকম্ ॥ ১৪॥

শরত্প্রভবচন্দ্রমঃ স্ফুরিতচন্দ্রিকাসুন্দরং
গলত্সুরতরঙ্গিণীললিতমৌক্তিকাডম্বরম্ ।
গৃহাণ নবকাঞ্চনপ্রভবদণ্ডখণ্ডোজ্জ্বলং
মহাত্রিপুরসুন্দরি প্রকটমাতপত্রং মহত্ ॥ ১৫॥

মাতস্ত্বন্মুদমাতনোতু সুভগস্ত্রীভিঃ সদাঽঽন্দোলিতং
শুভ্রং চামরমিন্দুকুন্দসদৃশং প্রস্বেদদুঃখাপহম্ ।
সদ্যোঽগস্ত্যবসিষ্ঠনারদশুকব্যাসাদিবাল্মীকিভিঃ
স্বে চিত্তে ক্রিযমাণ এব কুরুতাং শর্মাণি বেদধ্বনিঃ ॥ ১৬॥

স্বর্গাঙ্গণে বেণুমৃদঙ্গশঙ্খভেরীনিনাদৈরূপগীযমানা ।
কোলাহলৈরাকলিতাতবাস্তু বিদ্যাধরীনৃত্যকলাসুখায ॥ ১৭॥

দেবি ভক্তিরসভাবিতবৃত্তে প্রীযতাং যদি কুতোঽপি লভ্যতে ।
তত্র লৌল্যমপি সত্ফলমেকঞ্জন্মকোটিভিরপীহ ন লভ্যম্ ॥ ১৮॥

এতৈঃ ষোডশভিঃ পদ্যৈরূপচারোপকল্পিতৈঃ ।
যঃ পরাং দেবতাং স্তৌতি স তেষাং ফলমাপ্নুযাত্ ॥ ১৯॥

॥ ইতি দুর্গাতন্ত্রে দুর্গামানসপূজা সমাপ্তা ॥

Proofread by Ravin Bhalekar ravibhalekar@hotmail.com

Please send corrections to sanskrit@cheerful.com
Last updated ত্oday
http://sanskritdocuments.org

Durga Manasa puja Lyrics in Bengali PDF
% File name : durgaamaanasa.itx
% Category : pUjA
% Location : doc\_devii
% Author : Traditional
% Language : Sanskrit
% Subject : philosophy/hinduism/religion
% Transliterated by : WebD
% Proofread by : Ravin Bhalekar ravibhalekar at hotmail.com
% Description-comments : durgAtantre
% Latest update : October 14, 2004
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website