ಅಮ್ಬಿಕಾತ್ರಿಶತೀ
{॥ ಅಮ್ಬಿಕಾತ್ರಿಶತೀ ॥}
ಗಙ್ಗಾಧರಮಖಿವಿರಚಿತಾ ।
ಪರಮಾಭರಣಂ ಶಂಭೋಃ ಪರ್ವತನಾಥಸ್ಯ ಪುಣ್ಯಪರಿಪಾಕಃ ।
ನಿಜಲೋಚನವೀಕ್ಷಣತೋ ರಕ್ಷಿತಲೋಕತ್ರಯಂ ಚ ತದ್ರತ್ನಮ್ ॥ ೧ ॥
ನಿಗಮಾನ್ತಪರಮವಿದ್ಯಾ ದದ್ಯಾದದ್ಯ ಪ್ರಮೋದಮಿಹ ನಮತಾಮ್ ।
ನಿಖಿಲಚರಾಚರಚಿನ್ಮಯರೂಪಂ ರಕ್ಷಾಕರಂ ಚ ಲೋಕಾನಾಮ್ ॥ ೨ ॥
ಆದೃತಶಿವವಾಮಾನ್ತಾಮಾರ್ಯಾಮಾರ್ಯಾಭಿಮಾನ್ಯಮಹಿಮಾನಮ್ ।
ಆಗಮಮೌಲಿವತಂಸಾಂ ವನ್ದೇ ಚಿದ್ರೂಪಕನ್ದಲಾಂ ಜನನೀಮ್ ॥ ೩ ॥
ಪರಮಶಿವಭಾಗಧೇಯಂ ಸುರಮುನಿಮನುಜಾದಿಭಿಃ ಸದಾ ಧ್ಯೇಯಮ್ ।
ಯನ್ನಾಮ ಕರ್ಣಪೇಯಂ ಪಾತು ಸದಾ ವೇದಮೌಲಿಕಾಮೇಯಮ್ ॥ ೪ ॥
ಜಯತಿ ತವಾಮ್ಬ ಕಟಾಕ್ಷೇ ಕೋ ವಾ ಸೇವೇತ ಕಲ್ಪಭೂಮಿರುಹಮ್ ।
ಕಾಮಾದಿಹಾನಿದೋಽಸೌ ನಮತಾಂ ಸಂಪತ್ಪ್ರದಾನಕೃತದೀಕ್ಷಃ ॥ ೫ ॥
ಭುವನಜನನೀ ಪುರಾರೇಃ ಮಹಿಷೀ ಭೂಷಾಯಿತಾಮೃತಮಯೂಖಾ ।
ಕಲಿಕಲುಷಿತಜನಮೇನಂ ಪಾತು ಸುಧಾಕಾರಮಞ್ಜುಲಾಪಾಙ್ಗೈಃ ॥ ೬ ॥
ನಿಖಿಲನಿಗಮಾನ್ತವೇದ್ಯಾ ವಿದ್ಯಾ ಪರಮಾ ಪುರಾರಿಸರ್ವಸ್ವಮ್ ।
ಯಮಪಾಶಭೀತಮೇನಂ ರಕ್ಷತು ಜನಮೇನಮದ್ರಿಪತಿಕನ್ಯಾ ॥ ೭ ॥
ಧುತಪದನತಜನಪಾಪಾ ಪರಚಿದ್ರೂಪಾಪ್ರೇಮಯನಿಜರೂಪಾ ।
ಶಶಿಮೌಲಿಭಾಗಧೇಯಂ ಜಯತಿ ನಗೇಶಾನಕನ್ಯಕಾ ಮಾನ್ಯಾ ॥ ೮ ॥
ತವ ಭೂಧರೇನ್ದ್ರತನಯೇ ಪಾದಾಬ್ಜಂ ನಿಗಮದೀರ್ಘಿಕಾಫುಲ್ಲಮ್ ।
ಉತ್ತಂಸಯನ್ತಿ ಪುರುಷಾ ಧನ್ಯಾಃ ಕೇಚಿತ್ ತ ಏವ ಸುರಮಾನ್ಯಾಃ ॥ ೯ ॥
ಶತಮಖನೀಲಮಣೀನಾಂ ಪ್ರಭಯಾಚ್ಛುರಿತಾ ತವಾಕ್ಷಿಯುಗಲಶ್ರೀಃ ।
ತಾರಕವಿಭೇದಿವಾಹಂ ನೃತ್ತೋನ್ಮುಖಮಾತನೋತಿ ಶರದಿ ಪಥಿ ॥ ೧೦ ॥
ಕುವಲಯಸಂಪತ್ಪ್ರದಮಿಹ ವಿಲೋಚನಂ ಮಾತರಚಲತನಯೇ ತೇ ।
ಮಮ ಮಾನಸಂ ತು ಚನ್ದ್ರಂ ಕಲಯತಿ ತಾಪಪ್ರಶಾನ್ತಿದಂ ಸಮಯೇ ॥ ೧೧ ॥
ನಿಜಗತಿಜಿತಕಾದಮ್ಬಾಮಮ್ಬಾಮಮ್ಭೋಜಲೋಚನಾಂ ವನ್ದೇ ।
ಸಂಭಾವಯತಿ ಮಹೇಶೋ ಯಾಂ ಕಿಲ ಕಾಲೇಷು ಹೃದ್ಯನವ್ಯರಸೈಃ ॥ ೧೨ ॥
ಲಲಿತಗುಣರತ್ನಭೂಷಾಪೇಟೀ ಶುಕಮಾನ್ಯನೈಜವಾಗ್ಧಾಟೀ ।
ಆಶ್ರಿತಕದಮ್ಬವಾಟೀ ಜಯತಿ ಪರಾನನ್ದಜಾತಪರಿಪಾಟೀ ॥ ೧೩ ॥
ಕುಸುಮಶರವೈರಿಕಾನ್ತಾ ಕಾನ್ತಾಲಕಭಾರಲಲಿತಾಫಾಲಾನ್ತಾ ।
ನಿಖಿಲನಿಗಮಾನ್ತಸಾರಾ ಸಾ ರಜತಿ ಶಂಭುಭಾಗ್ಯಧಾರಾ ಹಿ ॥ ೧೪ ॥
ಕರಕಮಲಕಲಿತಚಾಪೇ ಪರಮಾನನ್ದೈಕಕನ್ದಲೇ ಶಂಭೋಃ ।
ಕನಕಮಣಿಲಲಿತಕಣ್ಠೇ ತ್ವಾಮೇವಾಹಂ ಭಜಾಮಿ ಪರವೃತ್ತ್ಯೈ ॥ ೧೫ ॥
ಚಿನ್ತಿತಫಲದೇ ಪುಂಸಾಂ ಪ್ರಬಲತರಾಮೋದಕನ್ದಲೇ ಶಂಭೋಃ ।
ಪುಣ್ಯಾನಾಂ ಪರಿಪಾಕಂ ತ್ವತ್ಪದಪದ್ಮಂ ಪ್ರಫುಲ್ಲಮಿಹ ಚಿತ್ತೇ ॥ ೧೬ ॥
ನಿಜಮೌಲಿಲಸನಶಶಿಕರವಿಲಾಸಿಧಮ್ಮಿಲ್ಲಕುವಲಯಾಮೋದೈಃ ।
ತತಮಧುಕರಗೀತೀನಾಂ ದಮ್ಭಾದಮ್ಬ ತ್ವದೀಯವಾಗ್ರಕ್ಷಾ ॥ ೧೭ ॥
ಲಲಿತಕುಟಿಲಾಲಕಾನ್ತಾ ಕಾನ್ತಾ ಶಂಭೋರಮೇಯವಿಭವಾನ್ತಾ ।
ಸಂಪದಮಿಹ ನಸ್ತನುತೇ ಕುಲಭೂಧರನಾಥಭಾಗ್ಯಪರಿಣಾಮಃ ॥ ೧೮ ॥
ಜನತಾಚಿರತರವಿರಚಿತಸುಚರಿತಪರಿಪಾಕರೂಪಮಮರೇಡ್ಯಮ್ ।
ಕುಸುಮಶರವೈರಿಭಾಗ್ಯಂ ಲಸತು ಕಲಿಕ್ಷೋಭಹಾನಯೇ ಮನಸಿ ॥ ೧೯ ॥
ವಿನತಾಲಿವಿಭವದಾ ತೇ ಕಟಾಕ್ಷಧಾರಾ ವಿಭಾತಿ ಲೋಕಾಮ್ಬ ।
ಕುಸುಮಶರಶಾಸ್ತ್ರಸಿದ್ಧಿಪ್ರದಾ ಗಿರೀಶಸ್ಯ ಯೋಗಿಹೃದ್ದೀಪಾ ॥ ೨೦ ॥
ನಿತ್ಯಕುಮಾರೀ ಕಾಲೇ ಕಾಪಿ ಪಯೋಜಾಸನಾದಿನುತಿತುಷ್ಟಾ ।
ಶಿತಿಕಣ್ಠಭಾಗ್ಯರಕ್ಷಾಸೂತ್ರಂ ತನುತೇ ಸ್ವವೈಭವೈರ್ಹೃದ್ಯೈಃ ॥ ೨೧ ॥
ನಿಖಿಲನಿಗಮಾನ್ತಸಾರಂ ಯಾವದ್ರೂಪಂ ಮದಮ್ಬ ಪಶ್ಯಾಮಿ ।
ಸಾ ತು ನಿಯಮಿತದೂತಗಣೋ ದೂರೇ ಯಾತ್ಯಮಿತಕೋಪಕೋಪಕೋಽಪಿ ಯಮಃ ॥ ೨೨ ॥
ಶಿವವಾಮಭಾಗಭೂಷಾ ಕಾಚಿದ್ ಯೋಷಾ ನತಾಲಿಕೃತಭಾಷಾ ।
ತಾಟಙ್ಕರತ್ನಭೂಷಾರುಚಿಭರಕಾಷಾಯಿತಾತ್ಮಮುಖವೇಷಾ ॥ ೨೩ ॥
ವಾಣೀಶವಿನುತಮಹಿಮಾ ಪರಮಾ ಚ ಕಲಾ ಸತಾಂ ಸಮಾರಾಧ್ಯಾ ।
ಹಿಮಭೂಧರವರಕನ್ಯಾ ಕೃತಭೂಸುರಸೌಖ್ಯಸಂಪದಾರಾನ್ಮೇ ॥ ೨೪ ॥
ಶಿಥಿಲಿತಭವಭೀತಿತತಿಂ ಭೂಧರಕನ್ಯಾಮಹಂ ಸದೋಪಾಸ್ಯಾಮ್ ।
ಆನನ್ದಾದ್ವೈತಕಲಾಂ ಭಜೇ ಕಲಿಕ್ಷೋಭಹಾನಯೇ ನಿಭೃತಮ್ ॥ ೨೫ ॥
ನವರತ್ನಖಚಿತಭೂಷಾತತಿಭಾನೀರಾಜಿತಾಖಿಲಾಙ್ಗೀಂ ತಾಮ್ ।
ಕಾಮಪಿ ಕಲಾಮುಪಾಸೇ ಸತತಾನನ್ದೈಕಕನ್ದಲೀಂ ಜನನೀಂ ॥ ೨೬ ॥
ಮಮ ಹೃದಯಕೇಲಿಭವನೇ ವಿಲಸತಿ ತದ್ರೂಪಮಿಷ್ಟದಂ ಪುಂಸಾಮ್ ।
ಯದಿಹಾದರೇಣ ಶಂಭುರ್ಲೋಕತ್ರಯರಕ್ಷಣಾಯ ಚಕಮೇ ಚ ॥ ೨೭ ॥
ಗಙ್ಗಾಧರವರಭೂಷಾ ಭಙ್ಗಾಯಾಸ್ಮಾಕಮಖಿಲದುರಿತಾನಾಮ್ ।
ಶೃಙ್ಗಾರಸಾರವೇಷಾ ತುಙ್ಗಾನನ್ದಪ್ರದಾಸ್ತು ಜಗದಮ್ಬಾ ॥ ೨೮ ॥
ತೇನ ವಯಂ ಪರತನ್ತ್ರಾಃ ಯಚ್ಛಶಿಶೇಖರಮನಶ್ವರೈಶ್ವರ್ಯಮ್ ।
ಶಂಭೋರಿಹ ಲೋಕಾನಾಂ ಚಿನ್ತಾಮಣಿರಾದಿಮಃ ಸುಲಭ್ಯಶ್ಚ ॥ ೨೯ ॥
ನಯನಾಞ್ಜನಕಲಿಕೇಯಂ ಶಂಭೋರಮ್ಭೋಜಲೋಚನಾ ಚಪಲಾ ।
ಶ್ರುತಿಸುದತೀಸೂತ್ರಕಲಾ ಮಮ ಹೃದಿ ಭವನೇ ವಿಕಾಸಮುಪಯಾತಿ ॥ ೩೦ ॥
ಕುಚಕುಮ್ಭಾಙ್ಕಿತಶಂಭುಂ ಕರಪದ್ಮಾದೃತಪಯೋಜಮಣಿಮಾಲಾಮ್ ।
ನತಜನಭರಣಾಸಕ್ತಾಮಮ್ಬಾಮಮ್ಭೋಜಲೋಚನಾಂ ನೌಮಿ ॥ ೩೧ ॥
ಬಾಲಮರಾಲೀಲೀಲಾಂ ಬಾಲಾಂ ಬಲಿವೈರಿವಾಸವಾದಿನುತಾಮ್ ।
ಜಗದಮ್ಬಾಮಾಲಮ್ಬಾಂ ನಿಬಿಡನಿತಮ್ಬಾಂ ಹಿತಾರ್ಥಮವಲಮ್ಬೇ ॥ ೩೨ ॥
ಧ್ಯಾನೈರ್ವೇದ್ಯಂ ತತ್ತ್ವಂ ಮೀನಧ್ವಜವೈರಿಮಹಿತಭಾಗ್ಯಂ ತತ್ ।
ಭೂಧರಕನ್ಯಾರೂಪಂ ವಿಹರತಿ ಮಮ ಮಾನಸೇ ಹತತಮಸ್ಕೇ ॥ ೩೩ ॥
ಮುನಿಜನಮಾನ್ಯಚರಿತ್ರಾ ನಾನಾದೇಶೇಷು ಲಸಿತಬಹುಪೀಠಾ ।
ಸರ್ವಸ್ವಸಂಪ್ರದಾಯಃ ಶಂಭೋರಮ್ಬಾ ಮಮಾಞ್ಜಲಿಪ್ರೀತಾ ॥ ೩೪ ॥
ವಾಚಾಮಗೋಚರಂ ತತ್ ಪುರಾತನೀನಾಮಪೀಹ ನತಸುಲಭಮ್ ।
ಗಿರಿಜಾರೂಪಂ ತೇಜೋ ಭಾತು ಗಿರೀಶಾರ್ಧಮಾದರಾದಕ್ಷ್ಣೋಃ ॥ ೩೫ ॥
ಮನ್ದಸ್ಮಿತೇನ ಮಧುರಾ ಮಧುರಾಪೀಠಸ್ಥಿತಾ ಚ ಹರಭಾಗ್ಯಮ್ ।
ಶೀತಲನಯನಾಸಾರೈಃ ಸಿಞ್ಚತಿ ಮಾಮಞ್ಜಸಾ ಜಗನ್ಮಾತಾ ॥ ೩೬ ॥
ಭಾತಿ ಪುರನ್ಧ್ರೀ ಶಂಭೋರಿಹ ಪುರತೋಽಸ್ಮಾಕಮಾತ್ತಸುಮಬಾಣಾ ।
ಸುಮಬಾಣವೈರಿಚಿತ್ತಾಕರ್ಷಣಕುಲಿಕಾ ಚ ಚಿನ್ಮಯೀ ಪರಮಾ ॥ ೩೭ ॥
ಲೋಚನಪಾತೇ ಶೀತಾ ಪಾತಾ ಪಾದಾಮ್ಬುಜಾತ್ತಚಿತ್ತಾನಾಮ್ ।
ಶ್ವೇತಾ ಚ ಮನ್ದಹಸಿತೇ ಶ್ವೇತಾರಣ್ಯಸ್ಥಿರಪ್ರದೀಪಕಲಾ ॥ ೩೮ ॥
ಪುರಮಥನಮಹಿಷಿ ಚಿತ್ತೇ ಕುರು ಪದವಿನ್ಯಾಸಮಾತ್ತಕುತುಕಾ ತ್ವಮ್ ।
ತೇನೈವಾಹಂ ಧನ್ಯಃ ಕುರವೈ ಪುರವೈರಿಪಾದಪೂಜಾಂ ಚ ॥ ೩೯ ॥
ಶತಮಖಮುಖಸುರವನ್ದ್ಯೇ ಕಾನ್ತಾಶ್ಲೇಷೇಣ ಪುಲಕಿತಾಙ್ಗಿ ತ್ವಾಮ್ ।
ಮನಸಾ ಸ್ಮರಾಮಿ ದಯಸೇ ತೇನೈವಾಹಂ ಕಲೌ ಯುಗೇ ಧನ್ಯಃ ॥ ೪೦ ॥
ಪುರಮಥನಸ್ಯಾಪಿ ವಪುಃ ಪುನತೀಮಮ್ಬಾಂ ನಿಜಾಕ್ರಮಣಶಕ್ತ್ಯಾ ।
ಚಿರಪುಣ್ಯದರ್ಶನೀಯಾಂ ಸ್ಮರಾಮಿ ಮನಸಾ ಪರಾಂ ಸುತಾಮದ್ರೇಃ ॥ ೪೧ ॥
ಕುಙ್ಕುಮಕಣಲಸಿತಾಙ್ಗೀಂ ಕುವಲಯದೃಶಮಬ್ಜಲೋಚನಾಂ ವನ್ದೇ ।
ಲೋಚನಜಿತಸಾರಙ್ಗೀಂ ಭವಮಹಿಷೀಮರ್ಧಚನ್ದ್ರಶೇಖರಿಣೀಮ್ ॥ ೪೨ ॥
ನಾನಾಲೀಲಾಖೇಲಾಂ ಹರರತಿಲೋಲಾಂ ಹಿತೈಕಪರಿಶೀಲಾಮ್ ।
ವನ್ದೇ ಬಾಲಾಂ ಭೂಮಿಧರಪತಿಕನ್ಯಾಂ ಸುರೇಶಬಹುಮಾನ್ಯಾಮ್ ॥ ೪೩ ॥
ಸರಸಿಜಮೃದುಲಪದಾಬ್ಜಂ ಪದಾಬ್ಜವಿನ್ಯಾಸಧನ್ಯಭೂಭಾಗಮ್ ।
ಮನಸಿ ನಯನೇ ಚ ವಾಚಿ ಸ್ಫುರತು ಮಹೇಶಾನಮಾನ್ಯಸಾಮ್ರಾಜ್ಯಮ್ ॥ ೪೪ ।
ಶಂಭೋಃ ಕುಟುಮ್ಬಿನೀ ಸಾ ಮಧುಕರಮಾಲಾಲಸತ್ಸ್ವಧಮ್ಮಿಲ್ಲಾ ।
ಸೌಭಾಗ್ಯದಾ ಸದಾ ಮೇ ಲಸತು ಕೃಪಾಪೂರಲಾಲಿತಾಪಾಙ್ಗಾ ॥ ೪೫ ॥
ಊರೀಕೃತಪುರಮಥನಾ ದೂರೀಕೃತದುಷ್ಟರಾಕ್ಷಸಾದಿಗಣಾ ।
ನಾರೀ ಪರಮಾ ಸೈಷಾ ಭೇರೀಭಾಸ್ವತ್ಕರೋರುಹಾ ಭಾತಿ ॥ ೪೬ ॥
ನಿಖಿಲೋಪನಿಷದ್ವಿದ್ಯಾಸಾರಂ ಸಂಸಾರಬನ್ಧಮೋಹಹರಮ್ ।
ಹರಮಾನ್ಯಂ ತತ್ ತೇಜೋ ಭಾತಿ ಸುರೇಶಾದಿರಕ್ಷಣೋಪಾಯಮ್ ॥ ೪೭ ॥
ಶಂಭೋರುತ್ಸವಧಾರಾ ನವನವಹಾರಾ ಸಮಾಶ್ರಿತಾಧಾರಾ ।
ಸಂವಿದ್ರೂಪಾರೂಪಾ ಕೋಪಾರ್ದಿತದುರ್ಜನಾ ಚ ಸಾ ಜಯತಿ ॥ ೪೮ ॥
ಪುಣ್ಯಸಮುದಾಯಸರಣಿಂ ಪುರಹೂತಮುಖೈರಭಿಷ್ಟುತಾಮಮ್ಬಾಮ್ ।
ಭಜ ಮಾನಸ ಭೋ ನಿತ್ಯಂ ನಿತ್ಯಾನನ್ದಾದ್ವಯಾತ್ಮಿಕಾಂ ದೇವೀಮ್ ॥ ೪೯ ॥
ಜೀವಿತಸರ್ವಸ್ವಮಿದಂ ಶಂಭೋರಮ್ಭೋಜಲೋಚನಂ ರತ್ನಮ್ ।
ಯಚ್ಚಿನ್ತನೇನ ಧನ್ಯಾ ವೈಮಾನಿಕವನ್ಯಕಲಿತವಿಶ್ರಾಮಾಃ ॥ ೫೦ ॥
ಅನ್ತಸ್ತಮೋನಿಹನ್ತ್ರೀ ಸಂಧ್ಯಾಪೂರ್ವಾ ವಿಭಾತಿ ಗಿರಿತನಯಾ ।
ಉದಯೇ ಯಸ್ಯಾ ವಿದುಷಾಂ ವಿಲಸನ್ತಿ ಕರಾಮ್ಬುಜಾನಿ ನಕ್ತಮಪಿ ॥ ೫೧ ॥
ಕುಲಗಿರಿನಾಥನೂಜೇ ಲೋಕಾಮ್ಬ ತ್ವತ್ಪದಾಮ್ಬುಜಂ ಜನ್ತುಃ ।
ಭಕ್ತ್ಯಾ ಸ್ಮರತಿ ಹೃದಿ ಸ್ವೇ ತತ್ಪದಯುಗಲಂ ವಹನ್ತಿ ಶಿರಸಾನ್ಯೇ ॥ ೫೨ ॥
ಮಹಿಷಾಸುರಮರ್ದನಿ ತೇ ಭೀಮಂ ರೂಪಂ ತದಸ್ತು ರಿಪುನೇತ್ರೇ ।
ಸಾದರಕಟಾಕ್ಷಾಪಾತಂ ಪುರತೋ ಮಮ ಭಾತು ಸೌಮ್ಯರೂಪಂ ತೇ ॥ ೫೩ ॥
ಆದೃತಶುಕಾದಿವಾಣೀ ವಾಣೀಶಸುರೇಶಹರಿಮುಖೈಃ ಸ್ತುತ್ಯಾ ।
ಸುಮಲಸಿತಮೃದುಲವೇಣೀ ವಿಲಸತಿ ಕೈಲಾಸಪೀಠಿಕಾಮಧ್ಯೇ ॥ ೫೪ ॥
ದಯಮಾನಮಾನಸಂ ತತ್ ಸ್ಮಯಮಾನಮುಖಂ ನಿರೀಕ್ಷ್ಯ ತತ್ತೇಜಃ ।
ನಿಯಮಾದಿವಿಧುತಪಾಪಾ ವಯಮಾನನ್ದಾಶ್ರುಝರಪರೀತಾಙ್ಗಾಃ ॥ ೫೫ ॥
ಲಲಿತಗತಿಂ ಸುರವಿನುತಿಂ ಲಸಿತಮತಿಂ ಕಿಂಚ ಯತಿಮನೋಜುಷ್ಟಾಮ್ ।
ತವ ಮೂರ್ತಿಮಮ್ಬ ಪಾರ್ವತಿ ಕದಾ ನು ಪಶ್ಯನ್ ನಯಾಮಿ ಕಲಿಕಾಲಮ್ ॥ ೫೬ ॥
ಕುರುತೇ ಮನಸಿ ಮದೀಯೇ ವಿಹಾರಲೀಲಾಂ ನಗೇನ್ದ್ರವರಕನ್ಯಾ ।
ತಾವದ್ ವಿಲಸತಿ ಚಿನ್ಮಯತತ್ತ್ವಂ ತತ್ತ್ವಾರ್ಥಿಭಿಃ ಸಮಾರಾಧ್ಯಮ್ ॥ ೫೭ ॥
ಶಂಕರಮಿಶ್ರಿತದೇಹಂ ಶ್ರುತಿಸುದತೀಮೌಲಿಭೂಷಣಂ ತೇಜಃ ।
ಮುಖಜಿತಚನ್ದ್ರಂ ತನ್ಮೇ ಪ್ರಸೀದತು ಕ್ಷಿಪ್ರನಮ್ರಪಾಪಹರಮ್ ॥ ೫೮ ॥
ವಿಧುಮೌಲಿವಿಭ್ರಮಶ್ರೀರ್ವಿದ್ರುಮರುಚಿಸೋದರಾತ್ಮತನುಕಾನ್ತಿಃ ।
ಸಿಞ್ಚತ್ಯಮೃತಮಿಹಾಕ್ಷ್ಣೋಶ್ಚಿರಪುಣ್ಯವಶಾದಿಹಾಸೇವ್ಯಮ್ ॥ ೫೯ ॥
ಪರಕೈವಲ್ಯಾನನ್ದಪ್ರಾಪ್ತಿಸ್ತೇಷಾಂ ಧ್ರುವಂ ಹಿ ತನುಭಜಾಮ್ ।
ಯೇಷಾಂ ಚಿತ್ತೇ ವಿತ್ತಾಧಿಪಮುಖಸೇವ್ಯಾ ವಿಹಾರಭಾಗ್ ಗೌರೀ ॥ ೬೦ ॥
ಗೌರಿ ತವ ಪಾದಪದ್ಮಂ ಶಶಧರಕಲಯಾಙ್ಕಿತಾತ್ಮಮೌಲಿತಲೇ ।
ಮಮ ಚಾನ್ತಿಮಪ್ರಯಾಣೇ ವಿಲಸತು ನೇತ್ರೇ ಸ್ಮೃತೌ ಚ ಹೃದಿ ವಾಚಿ ॥ ೬೧ ॥
ಶಂಕರಸುಕೃತಸಮೂಹಾ ಕಿಂಕರದೇವಾದಿರಙ್ಕವೀಣಾ ಚ ।
ಶಙ್ಕಾದಿಮೋಹಹನ್ತ್ರೀ ಲಸತು ಮಮಾಕ್ಷ್ಣೋಃ ಶಶಾಙ್ಕಮೌಲಿತಲಾ ॥ ೬೨ ॥
ಕುಚಕುಮ್ಭಾಶ್ಲೇಷವಶಾದಾಹೃತಹರಚಿತ್ತವೃತ್ತಿರಮರಾಣಾಮ್ ।
ಮನುಜಾನಾಮಪಿ ನಿತ್ಯಂ ದೈವತಮೇಷಾ ಚಕಾಸ್ತಿ ಗಿರಿಕನ್ಯಾ ॥ ೬೩ ॥
ಪರಿತುಷ್ಟಾ ಹರಭಜನೇ ನಿಜಗಲಕಲಗೀತಿವಿಜಿತಪರಪುಷ್ಟಾ ।
ಸೂಚಿತಸುರರಿಪುಕಷ್ಟಾ ಪರಮಕಲತ್ರಂ ಹರಸ್ಯ ತಜ್ಜಯತಿ ॥ ೬೪ ॥
ಸತತಾಲೋಲಿತದಯಯಾ ದೃಶಾಮ್ಬ ಮಾಂ ಪಶ್ಯ ಸರಸಿಜಾತರುಚಾ ।
ಪರಮಶಿವೇ ನಿರ್ವೃತ್ತಿಮಹಮವಾಪ್ಯ ತೇನೈವ ತಾವಕೋ ಭಕ್ತಃ ॥ ೬೫ ॥
ಸರಸಕವಿತಾ ಚ ಸಂಪಚ್ಚಾಕ್ಷೋಭ್ಯಂ ಮಣ್ಡಲಾಧಿಪತ್ಯಂ ಚ ।
ನನು ಜಾಯತೇ ನೃಣಾಂ ಕಿಲ ತವ ವೀಕ್ಷಾವೈಭವೇನ ಭವಕಾನ್ತೇ ॥ ೬೬ ॥
ತ್ವನ್ಮೌಲಿಚನ್ದ್ರವಿಸೃಮರಕರಧಾರಾಭಿಃ ಕೃತಾಭಿಷೇಕಾ ತ್ವಮ್ ।
ದ್ವಿಗುಣಿತದಯಾರ್ದ್ರಹೃದಯಾ ಪರಿಪುಷ್ಯಸಿ ಮಙ್ಗಲಾನಿ ಭಕ್ತಾನಾಮ್ ॥ ೬೭ ॥
ಗೌರಿ ನಗಾಧಿಪತನಯೇ ಶಶಿಶೇಖರದಿವ್ಯಮಹಿಷಿ ಮಾಂ ಪಾಹಿ ।
ಇತಿ ಕಿಲ ಕಲಿತಾಞ್ಜಲಯಃ ಸೇವನ್ತೇ ಸುರನರಾದಯೋ ನಿತ್ಯಮ್ ॥ ೬೮ ॥
ಪರಮೇಶ್ವರದಯಿತೇ ತ್ವತ್ಪದಪದ್ಮಯುಗಾರ್ಚನಾರತಾಃ ಸನ್ತಃ ।
ಕಲಯನ್ತಿ ಗಾಙ್ಗಸಲಿಲಂ ಪುಷ್ಪಾಣ್ಯಪಿ ಭಕ್ತಿಭಾರಸಂಪನ್ನಾಃ ॥ ೬೯ ॥
ಶೃಙ್ಗಾರಾಗಮಸಾರಾ ತವ ಲೀಲಾ ಜಯತಿ ಚೇತಸಿ ಭವಸ್ಯ ।
ಅತ ಏವ ಸ್ವಾಙ್ಗೇ ತ್ವಾಮಾರೋಪಯದಾಶು ವಿಜಿತಕಾಮೋಽಪಿ ॥ ೭೦ ॥
ನನು ಮಾತರಮ್ಬ ಮನ್ದಸ್ಮಿತಲೀಲಾದಿಕಮುದೀಕ್ಷ್ಯ ಶಶಿಮೌಲಿಃ ।
ವಿರಹಾಸಹಿಷ್ಣುರನಿಶಂ ವಹತಿ ತ್ವಾಂ ನೈಜವಪುಷಿ ಸಾನನ್ದಮ್ ॥ ೭೧ ॥
ತವ ಶಂಕರಿ ಭೂಷೋರಗಲಸದುರುಮಣಿದಮ್ಭತಃ ಶಿವಃ ಕಾಲೇ ।
ನೀರಾಜನಮಾತನುತೇ ಭಕ್ತಹಿತಾರ್ಥೀ ಸುಮಙ್ಗಲಾವಾಪ್ತ್ಯೈ ॥ ೭೨ ॥
ತವ ಪಾದಭಕ್ತಿರಮ್ಬ ಕ್ಷಿತಿಧರತನಯೇ ತನೋತಿ ಕವಿಸೂಕ್ತಿಮ್ ।
ಅಮರಶ್ರಿಯಮಥ ಸಹಸಾ ಧರಾಧಿಪತ್ಯಾದಿಕಂ ನೃಣಾಮ್ ॥ ೭೩ ॥
ಆಲೋಕನೇನ ಮಾತಸ್ತವ ಮನುಜಾನಾಂ ಹೃದಿ ಸ್ಥಿತಂ ಚ ತಮಃ ।
ಗಲತಿ ಹಠಾತ್ ಪಾಪಾಲಿಃ ಸಹಸಾಮರಲೋಕಸಂಪದಾಭಾತಿ ॥ ೭೪ ॥
ಯಃ ಸೂಕ್ತಿಮಾಲಿಕಾಭಿಸ್ತವ ಪಾದಯುಗಂ ಸಮರ್ಚಯತಿ ಜನ್ತುಃ ।
ತತ್ಪದಯುಗ್ಮಂ ತು ಸುರಾಃ ಕಲ್ಪಮಹೀರುಹಸುಮೈಶ್ಚ ಗಾಙ್ಗಜಲೈಃ ॥ ೭೫ ॥
ಪಾರ್ವತಿ ತವ ಮುಖಕಮಲಾಲೋಕನತೋ ಗಲಿತಸಂಶಯಾಃ ಸನ್ತಃ ।
ಕೈವಲ್ಯರೂಪಕನ್ದಲಮಾಸಾದ್ಯ ವಿಧಾನತೋ ಜನಾ ಭಾನ್ತಿ ॥ ೭೬ ॥
ನನ್ವದ್ರಿಸುತೇ ಮನ್ದಸ್ಮಿತಕಾನ್ತಿಮಿಷಾತ್ ತ್ವದೀಯಕೀರ್ತಿಝರೀ ।
ದಿಕ್ಸೌಧಾಞ್ಚಲಭಾಗೇ ವಿಲಸತಿ ನತರಕ್ಷಣೋತ್ಥಿತಾ ಜಗತಿ ॥ ೭೭ ॥
ಕರಣವಿಹೀನಾನ್ ಮೂಢಾನ್ ನರಾನ್ ಸುರಾನ್ ಪಾಸಿ ಯೋಗಿನೋಽಪಿ ತಥಾ ।
ಲೋಕಾಮ್ಬ ಭಾವನಾದ್ಯೈಃ ಕಾಲೇ ಕಾಲೇ ನಗೇನ್ದ್ರತನಯೇ ತ್ವಮ್ ॥ ೭೮ ॥
ನಗರಾಜವಂಶಸಂಪದ್ ದಿವ್ಯಾ ಕಾಚಿದ್ ವಿಭಾತಿ ಹರಮಾನ್ಯಾ ।
ಗಣಪತಿಮಯೂರವಾಹೌ ಯತ್ತನಯೌ ಲೋಕಸಂಪದೇ ಜಯತಃ ॥ ೭೯ ॥
ಪ್ರತಿದಿನಕಲಿತಾಮೇನಾಮಞ್ಜಲಿಕಲಿಕಾಮಗಾಧಿಪತನೂಜೇ ।
ಅಙ್ಗೀಕುರುಷ್ವ ದಯಯಾ ತೇನೈವ ವಯಂ ಕೃತಾರ್ಥಾಃ ಸ್ಮಃ ॥ ೮೦ ॥
ಕಲ್ಯಾಣಕೇಲಿಭಾಜನಮಿಹ ಶರ್ವಸ್ಯಾಪ್ರೇಮಯತುಷ್ಟಿಕಲಾ ।
ಚನ್ದ್ರಕಲಾವಿಲಸಿತನಿಜಮೌಲಿತಲಾ ಭಾತು ಮಾನಸೇ ಕಾಪಿ ॥ ೮೧ ॥
ವಿನತಜನಬನ್ಧಹಾರಿಣಿ ಕಲ್ಯಾಣಿ ಪುರಾರಿಸುಕೃತಪರಿಪಾಕೇ ।
ಬಧ್ನೀಮೋ ವಯಮಞ್ಜಲಿಮನುದಿನಮಮಿತಾತ್ಮಚಿತ್ಸುಖಾವಾಪ್ತ್ಯೈ ॥ ೮೨ ॥
ಕಂದರ್ಪಾಗಮಸಾರಾ ಲಸದುರುಹಾರಾ ಚ ಮಙ್ಗಲಾಕಾರಾ ।
ತಾರಾಧಿಪವಾಸಲಸನ್ಮೌಲಿತಲಾ ಭಾತು ಮಾನಸೇ ದೇವೀ ॥ ೮೩ ॥
ನತಹಂಸಾವಲಿರೇಷಾ ಗತಿಜಿತಹಂಸಾವಲೀ ಚ ಗಿರಿತನಯಾ ।
ಶಿಶಿರೀಕರೋತಿ ಲೋಚನಮಾಲಾಮಾಲಾಪವಿಜಿತಶುಕವಾಣೀ ॥ ೮೪ ॥
ಶುಕವಾಣೀಸದೃಶೀಯಂ ಮಮ ವಾಣೀ ಹರಕುಟುಮ್ಬಿನೀನಿಕಟಮ್ ।
ನ ಖಲು ಕರೋತಿ ಪ್ರಾಪ್ತಾ ಮುದಮಸ್ಯಾ ಮಧುರಮನ್ದಹಾಸಜುಷಃ ॥ ೮೫ ॥
ಶಶಿಶಕಲಕಲಿತಮೌಲಿಸ್ತ್ರಿಲೋಚನಾ ಕುಙ್ಕುಮಚ್ಛಾಯಾ ।
ಪಾತಿ ಜನನೀ ಜನಾನಾಂ ಕಿಂನರಯಕ್ಷಾದಿಗೇಯಮಾಹಾತ್ಮ್ಯಾ ॥ ೮೬ ॥
ನಿಜತನುತೇಜಃಪ್ರಸರೌರಿನ್ದುಕಲೋತ್ತಂಸಲಸಿತಮೌಲಿತಲಾ ।
ಪೂರಯತಿ ಲೋಕಮಾತಾ ತ್ರಿಭುವನಮಿದಮಾತ್ತಕೌತುಕಾ ಪೀಠೇ ॥ ೮೭ ॥
ತವ ಮಾತರಙ್ಘ್ರಿಸರಸಿಜಭಕ್ತಿವಿಶೇಷಾತ್ತವೈಭವಾ ಹಿ ನರಾಃ ।
ವೈಮಾನಿಕಪದವೀಷ್ವಪ್ಯಾಶಾರಹಿತಾ ವಿಶನ್ತಿ ತೇ ಧಾಮ ॥ ೮೮ ॥
ತವ ಹಾರಮಣಿಪ್ರಭಯಾ ಪಾರ್ಶ್ವಸ್ಥಿತಶಂಭುಚನ್ದ್ರಮೌಲಿಕಲಾ ।
ಸಂಪ್ರಾಪ್ತಪೂರ್ಣಮಣ್ಡಲಶೋಭಾ ಸತತಂ ವಿರಾಜತೇ ಮಾತಃ ॥ ೮೯ ॥
ಅರ್ಧಾಙ್ಗಶಂಭುಭೂಷಣಫಣಾಮಣಿಪ್ರಚುರಕಾನ್ತಿವೀಚೀಭಿಃ ।
ತವ ಹಸ್ತಹರಿಣಪೋತಃ ಶಶ್ವದ್ ಧಾವತಿ ನವೀನತೃಣಬುದ್ಧ್ಯಾ ॥ ೯೦ ॥
ನಾಥಕಲಾನುಗುಣಂ ತೇ ರೂಪಂ ಜಗದಮ್ಬ ಸರ್ವಬುಧವನ್ದ್ಯಮ್ ।
ಪರ್ವತರಾಜಸುತೇ ನಃ ಶ್ರೇಯಃಶ್ರೇಣ್ಯೈ ತದಸ್ತು ಕಲಿತದಯಮ್ ॥ ೯೧ ॥
ಕೈರಾತೋ ವೇಷೋ ವಾ ಭಿಕ್ಷಾಟನರೂಪಮನ್ಯದಪಿ ಶಂಭೋಃ ।
ಸರ್ವಂ ತತ್ ತ್ವತ್ಕಲಯಾ ಲಸಿತಂ ಭಾತ್ಯತ್ರ ಭೂಧರೇನ್ದ್ರಸುತೇ ॥ ೯೨ ॥
ತ್ರಿಪುರವಿಜಯಶ್ಚ ಮಾತಸ್ತ್ವತ್ಕೋಪಾದರಿಷು ಚನ್ದ್ರಮೌಲೇಸ್ತು ।
ಆಸೀತ್ ಸುಲಭಕಲಃ ಕಿಲ ತೇ ಕೀರ್ತಿಃ ಕೀರ್ತಿತಾ ದಿಶಾಂ ವಲಯೇ ॥ ೯೩ ॥
ತವ ಪಾದಾಮ್ಬುಜಸೇವಾದರೇಣ ಮಾತಸ್ತವ ಸ್ತುತ್ಯಾಮ್ ।
ಯೈಃ ಕಲಿತಾ ಮತಿರೇಷಾಂ ಚರಣೌ ಪೂಜ್ಯೌ ಹಿ ನಾಕಿನಾಂ ವೃನ್ದೈಃ ॥ ೯೪ ॥
ತವ ಪಾದಭಕ್ತಿಭೂಮ್ನಾ ಪಾಣ್ಡಿತ್ಯಂ ಸರ್ವಸಂಮಾನ್ಯಮ್ ।
ಕೀರ್ತಿಂ ಚ ಸುಖಂ ಲಭತೇ ಭಕ್ತಸ್ತೇ ಮಾತರಚಲಸುತೇ ॥ ೯೫ ॥
ಪರಿಫುಲ್ಲಕಮಲಸುಷಮಾಸಂಮಾನ್ಯೈಸ್ತೇ ಕಟಾಕ್ಷೈರ್ಯಃ ।
ಭಾತ್ಯಙ್ಕಿತೋ ಧರಣ್ಯಾಂ ಸ ತು ಧನದೋ ವಾ ಮಹೇನ್ದ್ರೋ ವಾ ॥ ೯೬ ॥
ಕಮಲಾಕ್ಷಮುಖೈರ್ದೇವೈಃ ಫಕ್ಕೃತಗೀರ್ಭಿಸ್ತವ ಸ್ತುತೌ ಮಾತಃ ।
ಕಥಮಮ್ಬ ಮಾನುಷೋಽಹಂ ಸ್ತೋತುಂ ತ್ವಾಂ ಶಕ್ನುಯಾಂ ಮನ್ದಃ ॥ ೯೭ ॥
ತವ ಪಾದಪದ್ಮಭಕ್ತಿರ್ಧರಣಿಧರೇನ್ದ್ರಸ್ಯ ಕನ್ಯಕೇ ಕಾಲೇ ।
ವಾಚಾಲೀಕುರುತೇ ಮಾಂ ಮನ್ದಮಪಿ ಸ್ತೋತುಮಾದರಾಜ್ಜನನಿ ॥ ೯೮ ॥
ಜನನಿ ವಿನಾ ಪುಣ್ಯಾನಾಂ ಖಣ್ಡಂ ತ್ವಾಮೀಕ್ಷಿತುಂ ನಯನೈಃ ।
ಶಕ್ತಾ ನೈವ ಹಿ ಮನುಜಾಸ್ತೇ ರೂಪಂ ತತ್ ಪರಂ ಜಯತಿ ॥ ೯೯ ॥
ನಾಕಿನಗರಾಮ್ಬುಜಾಕ್ಷೀನಿಟಿಲಸುಮಾಮೋದವಾಸಿತಂ ಮಾತಃ ।
ತವ ಚರಣಪಙ್ಕಜಂ ಮೇ ಕೃನ್ತತಿ ಮೋಹಾದಿಕಂ ಹೃದಯೇ ॥ ೧೦೦ ॥
ಪರಮೇಶ್ವರಸ್ಯ ದಯಿತಾಪಾದಪಯೋಜಾತಪಾಂಸವೋ ಧನ್ಯಾಃ ।
ಕೃತಪುಣ್ಯಾನಾಂ ಮೂರ್ತಿಷು ಭಾಸನ್ತೇ ಸರ್ವಶುದ್ಧಯೇ ಹ್ಯೇತೇ ॥ ೧೦೧ ॥
ತವ ಪಾದಜಲಜರೇಣುಸ್ಪರ್ಶನಸಂಜಾತವೈಭವಾ ಮನುಜಾಃ ।
ಧಿಕ್ಕೃತನಾಕೇಶಪದಾಸ್ತವ ಸಾರೂಪ್ಯಾದಿಸಂಪದುಲ್ಲಸಿತಾಃ ॥ ೧೦೨ ॥
ಜನನಿ ತವಾಲಕರತ್ನಪ್ರಭಾಪ್ರರೋಹೈರ್ಗಿರೀಶಶಿರಸಿ ಕಲಾ ।
ಚಾನ್ದ್ರಮಸೀ ಸಾ ಭಜತೇ ಜಪಾಪ್ರಭಾಲೇಪನಂ ರಮ್ಯಮ್ ॥ ೧೦೩ ॥
ಕಾಞ್ಚ್ಯಾಂ ವಾ ಕೈಲಾಸೇ ಮೇರೌ ವಾ ಭಕ್ತಮಾನಸಾಮ್ಭೋಜೇ ।
ಪರಮಶಿವವಾಮಭಾಗೇ ರಾಜತಿ ಕಾಲೇಽಮ್ಬಿಕಾ ಖ್ಯಾತಾ ॥ ೧೦೪ ॥
ಧ್ಯಾನಪರೀವಾಹಾಙ್ಕುರಕಲಿತಂ ತೇ ಕುಸುಮಕೋಮಲಂ ಹಿ ವಪುಃ ।
ಯೋಗಿಹೃದಯಾಮ್ಬುಜಾನ್ತರ್ಜನನಿ ವಿಭಾತಿ ಸ್ಫುಟಾಕಾರಮ್ ॥ ೧೦೫ ॥
ಯೇಷಾಮಞ್ಜಲಿಕಲಿಕಾಲಸಿತಂ ಕರಯುಗಮಿದಂ ಕಾಲೇ ।
ನ ಪ್ರೇರಯತಿ ಕೃತಾನ್ತೋ ನಿಜದೂತಾನ್ ತೇಷು ತೇ ಪರಂ ಗುರವಃ ॥ ೧೦೬ ॥
ಕಾರುಣ್ಯಾಕುಲಿತಹೃದಾ ತಯಾಮ್ಬಯಾ ಭಕ್ತಪಾಪಾಲಿಃ ।
ನ ಹಿ ಗಣ್ಯತೇ ಗಿರೀಶೋಽಪ್ಯಸ್ಮಿನ್ ಸತತಂ ಕೃತಪ್ರಸಾದಶ್ಚ ॥ ೧೦೭ ॥
ಜಗತಃ ಪಿತರಾವೇತೌ ರಕ್ಷಾಹೇತೋರ್ನಿಜಾಙ್ಘ್ರಿಭಕ್ತಾನಾಮ್ ।
ರಾಜತ ಇಹ ಬಹುರೂಪೌ ಜನದೃಕ್ದೃಶ್ಯೌ ಚ ದೇವವನ್ದ್ಯೌ ಚ ॥ ೧೦೮ ॥
ಸಾ ಭಗವತೀ ಪುರಸ್ತಾದಾಸ್ತಾಂ ನಃ ಶಾಂಕರೀ ಜನನೀ ।
ಯದ್ವೀಕ್ಷಾಲವಹೀನಾಃ ಪೀಡ್ಯನ್ತೇ ತಪ್ತಗಾತ್ರಾಶ್ಚ ॥ ೧೦೯ ॥
ಜಾತಪರಾಕ್ರಮಕಲಿಕಾ ದಿಶಿ ದಿಶಿ ಕಿಂನರಸುಗೀತನಿಜಯಶಸಃ ।
ಧನ್ಯಾ ಭಾನ್ತಿ ಹಿ ಮನುಜಾ ಯದ್ವೀಕ್ಷಾಲವವಿಶೇಷತಃ ಕಾಲೇ ॥ ೧೧೦ ॥
ವಾಚಾಂ ಸನಾತನೀನಾಂ ವಿಶ್ರಾನ್ತಿಸ್ಥಾನಕಂ ಹಿ ಯತ್ ಸ್ಥಾನಮ್ ।
ಕರುಣಾಪಾಲಿತಲೋಕತ್ರಿತಯಂ ತದ್ ಭಾತಿ ಸುಕೃತಿಹೃದಯತಟೇ ॥ ೧೧೧ ॥
ಶ್ರುತಿಮೌಲಿಭೂಷಣಂ ತೇ ಪದಾರವಿನ್ದಂ ಜನಃ ಕಾಲೇ ।
ಭಕ್ತ್ಯಾ ಪ್ರಣಮ್ಯ ಬಹುಜನನಗರೇ ಸಿಂಹಾಸನೇ ಲಸತಿ ॥ ೧೧೨ ॥
ಶ್ಯಾಮಾ ಚನ್ದ್ರಕಲೋಜ್ಜ್ವಲಮೌಲಿರಿಯಂ ಶಾಂಕರೀ ಕಾಲೇ ।
ಧ್ಯಾನಜಪಾದೌ ಪುಣ್ಯಾತ್ಮನಾಂ ಹೃದಿ ಪ್ರಸ್ಫುರತ್ಯಮಲೇ ॥ ೧೧೩ ॥
ತ್ರಿಭುವನರಕ್ಷಾಹೇತೋರಙ್ಗೀಕೃತಗಿರಿಶದೇಹಯಷ್ಟಿರಿಯಮ್ ।
ರಾಜತಿ ರಾಜತಪೀಠೇ ತ್ರಿಭುವನಸುನ್ದರರುಚಾತ್ತಬಹುಕೋಣೇ ॥ ೧೧೪ ॥
ನಿಶ್ಚಲದೀಪಕಲಾ ಸಾ ರಕ್ಷಿತಮರುದೌಷ್ಣ್ಯಹೀನನಿಜರೂಪಾ ।
ಶೂಲಿಸ್ನೇಹೋಲ್ಲಸಿತಾ ಜನಹೃತ್ತಮಸಾಂ ನಿಹನ್ತ್ರೀ ಚ ॥ ೧೧೫ ॥
ನಿಗಮಾನ್ತಮಧ್ಯವೀಥೀಮಹಾಮಣಿಃ ಸರ್ವಮೂಲ್ಯಾ ಚ ।
ಭಕ್ತಿಕ್ರಯಾ ಚ ಕಾಲೇ ಕೇಯೂರಮಣಿಶ್ಚ ಶೂಲಿನೋ ಜಯತಿ ॥ ೧೧೬ ॥
ಕಲ್ಯಾಣಸಂತತೇರ್ಯಾ ಕಲಿತಾ ಜನ್ಮಸ್ಥಲೀತಿ ವಿಬುಧೇಶೈಃ ।
ನಃ ಕಲ್ಯಾಣಾಯ ಸ್ಯಾತ್ ಸಾ ಗೌರೀ ಮೇದುರಾ ದಯಯಾ ॥ ೧೧೭ ॥
ತವ ಕೇಶಕಾನ್ತಿವಿಸರೈ ರಾಹೋಃ ಶಙ್ಕಾ ಶಿರಃಸ್ಥೇನ್ದೋಃ ।
ಗ್ರಸನಾದಿದೈನ್ಯಹಾರಿಪ್ರಭಾವಮಾಲೋಚ್ಯ ತೇ ಸೌಮ್ಯಃ ॥ ೧೧೮ ॥
ಮನ್ದಸ್ಮಿತರುಚಿಭರಿತೇ ಪುರಃಸ್ಥಲೇ ತೇಽರ್ಚನಾಹೇತೋಃ ।
ನ್ಯಸ್ತಾನಿ ಹಿ ಪುಷ್ಪಾಣಿ ಭ್ರಮರಾಕ್ಷೇಪಾತ್ ಸ್ಫುಟಂ ಭಾನ್ತಿ ॥ ೧೧೯ ॥
ಕ್ಷೀರಸಹೋದರಮನ್ದಸ್ಮಿತರುಚಿನಿರಸಿತನತಾಲಿಹೃತ್ತಿಮಿರಾ ।
ಸಾ ಜಯತಿ ಶಾಂಕರೀ ಕಿಲ ಶಂಕರಸಂಸ್ತೂಯಮಾನವಿಭವಾ ಚ ॥ ೧೨೦ ॥
ಮನ್ದಾನಾಮಪಿ ಮಞ್ಜುಲಕವಿತ್ವರಸದಾಯಿನೀ ಜನನೀ ।
ಕಾಪಿ ಕರುಣಾಮಯೀ ಸಾ ಲಸತು ಪುರಸ್ತಾತ್ ಸದಾಸ್ಮಾಕಮ್ ॥ ೧೨೧ ॥
ತಾಪಹರಸವಿವರ್ಷಣಕೃತಕುತುಕಾ ಕಾಪಿ ನೀಲನಲಿನರುಚಿಃ ।
ಕಾದಮ್ಬಿನೀ ಪುರಸ್ತಾದಾಸ್ತಾಂ ನಃ ಸಂತತಂ ಜನನೀ ॥ ೧೨೨ ॥
ಕರುಣಾಕಟಾಕ್ಷಲಹರೀ ಕಾಮಾಯಾಸ್ತು ಪ್ರಕಾಮಕೃತರಕ್ಷಾ ।
ಗೌರ್ಯಾ ಗಿರಿಪತಿಮಾನ್ಯಾ ಸತ್ಸುಖದಾನೇ ಭೃಶಂ ಖ್ಯಾತಾ ॥ ೧೨೩ ॥
ಐಕ್ಯಮನೀಯತ ನಿತರಾಂ ಯದಾದರೇಣೇನ್ದುಮೌಲಿನಾ ಪೂರ್ವಮ್ ।
ತತ್ ತೇಜೋ ಹೃದಿ ಲಸತು ಸ್ಥಿರೇ ಚ ನಿಷ್ಕಲ್ಮಷೇಽಸ್ಮಾಕಮ್ ॥ ೧೨೪ ॥
ಯತ್ಪದರೇಖಾ ಮಾನ್ಯಾ ಲೇಖಾದೀನಾಂ ಶುಭೋದಯೇ ನಿಭೃತಮ್ ।
ಸಾ ಲೋಚನೇ ಪುರಸ್ತಾದಾಸ್ತಾಂ ನಃ ಶಶಿಕಲೋಲ್ಲಸನ್ಮೌಲಿಃ ॥ ೧೨೫ ॥
ಯಸ್ಯಾವಿರ್ಭಾವವಶಾನ್ಮಾನ್ಯೋಽಭೂದ್ ಭೂಧರೇನ್ದ್ರೋಽಪಿ ।
ತತ್ ಪಾರ್ವತೀತಿ ಸಂಜ್ಞಂ ಗೌರೀ ದಾಕ್ಷಾಯಣೀ ಚ ಲೋಕಾಮ್ಬಾ ॥ ೧೨೬ ॥
ಮಾರಾರಾತಿಮನೋಹರಲಾವಣ್ಯಾ ಕುಸುಮಮೃದುಶರೀರೇಯಮ್ ।
ನಿಜಕರುಣಾಪಾಙ್ಗಸುಧಾಪೂರಣಕೃತವೈಭವಾ ಭಾತಿ ॥ ೧೨೭ ॥
ಧನಧಾನ್ಯಕೀರ್ತಿಕವಿತಾಲಲನಾಸುತಹರ್ಮ್ಯಮುಖ್ಯಕಾಮಪರೈಃ ।
ತೈರ್ನೂನಮರ್ಚಿತಾಚಲಸುತಾಙ್ಘ್ರಿಜಲಜೈಸ್ತಥಾಭೂತೈಃ ॥ ೧೨೮ ॥
ಗಿರಿಶ್ಶರೀರವಿಹಾರಿ ತ್ರಾತಜಗತ್ ತತ್ ಪರಂ ಜ್ಯೋತಿಃ ।
ಶಾರದಸರಸಿಜನಯನಂ ಮಮ ಗೌರೀರೂಪಮಾವಿರಸ್ತು ಹೃದಿ ॥ ೧೨೯ ॥
ಅಚಲಸುತಯಾ ಸನಾಥಾ ವಯಮೇತೇ ಧೂತಪಾಪಕಲಾಃ ।
ಶಶಿಶಿಖರಂ ಚರ್ಮಧರಂ ಗಙ್ಗಾಧರಮೀಕ್ಷ್ಯ ಮೋದನ್ತೇ ॥ ೧೩೦ ॥
ಪ್ರೌಢಾನ್ಧಕಾರನಿರಸನಚಣಮೇತತ್ ಪಾರ್ವತೀರೂಪಮ್ ।
ಪರಮಂ ಜ್ಯೋತಿರ್ಲಸತಿ ಸ್ಫುಟಂ ಚ ಸದ್ಗಣಸಮಾವೃತಂ ಹೃದಯೇ ॥ ೧೩೧ ॥
ದಹರಾಕಾಶವಿಹಾರಿ ಜ್ಯೋತ್ಸ್ನಾಲಸದುತ್ತಮಾಙ್ಗಮಿದಮಾದ್ಯಮ್ ।
ಚಿನ್ತಾರತ್ನಂ ಗಿರಿಶಪ್ರಕಾಮಭಾಗ್ಯಂ ಚ ಲೋಕದೀಪಕಲಾ ॥ ೧೩೨ ॥
ಪುಣ್ಯಾಙ್ಕುರವೃದ್ಧಿಕರಂ ಗೌರೀರೂಪಂ ಸದಾ ಧ್ಯಾಯೇ ।
ಯಚ್ಛಿವನೇತ್ರಮಹೋತ್ಸವನಿಭೃತಂ ರಕ್ಷಿತಜಗತ್ತ್ರಿತಯಮ್ ॥ ೧೩೩ ॥
ಸೂರ್ಯಸುತಾಕಲ್ಲೋಲೋಲ್ಲಲನದಶಾರಮ್ಯನೇತ್ರಲಹರೀಭಿಃ ।
ಶ್ರೇಯಃಸಂತತಿಮಚಿರಾತ್ ತರಙ್ಗಯತಿ ನಃ ಸದಾ ದೇವೀ ॥ ೧೩೪ ॥
ಭೂಧರಕನ್ಯಾ ಸೇಯಂ ಸಾದರದತ್ತಾರ್ಹಣಾದಿಬಹುತೋಷಾ ।
ವಾದರಸವಿಜಯದಾಃ ನಃ ಪಾದರಸಾಸಕ್ತಕಲಿತಬಹುಭಾಷಾ ॥ ೧೩೫ ॥
ಪ್ರೌಢತಮಾಲವನಾಲೀರುಚಿಭರಕಮನೀಯನೇತ್ರವಿಸ್ಫಾರೈಃ ।
ದಿಶಿ ದಿಶಿ ಕಲಿತಾ ಸಂಪದ್ ಯಯಾ ತಯಾ ನಃ ಕುಲಂ ಜಯತಿ ॥ ೧೩೬ ॥
ನಿಜತಾರುಣ್ಯವಿಹಾರೈರ್ಮೋಹಕರಂ ಶೂಲಿನೋಽಪಿ ಯತ್ ತೇಜಃ ।
ತತ್ ಕುಮುದಿನೀಶಖಣ್ಡಸ್ಫುರಚ್ಛಿರಃಕರಲಸದ್ಧನುರ್ವರ್ಯಮ್ ॥ ೧೩೭ ॥
ಶಂಕರಪುಣ್ಯಾಙ್ಕುರಕೃತರೂಪಂ ಪಾಥೋಜನಯನಂ ಚ ।
ಪೃಥುಜಘನಕುಚಯುಗಂ ಚ ತ್ರಾತಜಗತ್ ದಗ್ಧದೈತ್ಯಚಯಮ್ ॥ ೧೩೮ ॥
ನೀಲನಲಿನೀಸುಮಾಲೀಲಲಿತಕಚಂ ಶಂಕರಾರ್ಹಲಲಿತಕುಚಮ್ ।
ಕೈಲಾಸಪೀಠಮಧ್ಯೇ ಭಾತಿ ಸದಾ ಧ್ಯೇಯಮಾರಾಧ್ಯಮ್ ॥ ೧೩೯ ॥
ಸ್ಮರಣದಶಯಾಪಿ ಕಾಪಿ ಪ್ರದೀಪಿಕಾ ನಾಶಿನೀ ತಮಸಾಮ್ ।
ನಿಗಮತತಿಸೌಧವಲಭೀಪ್ರಕಾಶಿನೀ ನಿತ್ಯತೇಜಸ್ಕಾ ॥ ೧೪೦ ॥
ಪುರಾರಿಪುವಾಮಾಙ್ಕತಲೋದ್ಭಾಸಿತಗಾತ್ರಂ ಮಹಃ ಕಿಮಪಿ ।
ಹೃದಿ ಲಸತು ಸಂತತಂ ಮೇ ನಿರಸ್ತಸಂಸೃತಿತಮೋರಾಶಿ ॥ ೧೪೧ ॥
ನಿಗಮಾನ್ತಮಧ್ಯಪಞ್ಜರಶುಕೀ ಶುಕಾದ್ಯೈಃ ಸಮಾರಾಧ್ಯಾ ।
ಕರಧೃತಪುಣ್ಡ್ರೇಕ್ಷುಕಲಾ ಶ್ರೇಯಃಸಂತಾನದಾಯಿನೀ ನಮತಾಮ್ ॥ ೧೪೨ ॥
ತವ ಪಾದಪದ್ಮಶೋಭಾಚ್ಛುರಿತಂ ಪುರತಃ ಸ್ಥಲಂ ಗೌರ್ಯಾಃ ।
ಕೃತಪಲ್ಲವಸಂಸ್ತರಣಂ ಮತ್ವಾ ತೂಷ್ಣೀಂ ಬಭೂವ ತೇ ದಾಸಃ ॥ ೧೪೩ ॥
ನವಜಲಧರನೀಲರುಚಾ ಸಂಮಾನ್ಯೈಸ್ತೇ ಕಟಾಕ್ಷಕಾನ್ತಿಭರೈಃ ।
ಸಂಕಲಿತನಿತ್ಯತೋರಣಶೋಭಂ ತೇ ಮಣ್ಟಪಾಸ್ಥಾನಮ್ ॥ ೧೪೪ ॥
ರಾಕಾಚನ್ದ್ರನಿಭಾಸ್ಯಾ ಸಾ ಕಾಶ್ಯಾದಿಷು ಕೃತಾತ್ಮಬಹುಪೀಠಾ ।
ನಾಕಾದಿರಾಜವಿನುತಾ ಶೋಕಾದಿಹರಪ್ರಭಾವಜನ್ಮಕಲಾ ॥ ೧೪೫ ॥
ಪಾರಾವಾರಸುತಾದ್ಯೈರಾರಾತ್ಕಲನೀಯನೈಜವಿಭವಾ ಸಾ ।
ವೀರಾಢ್ಯನೈಜರೂಪಾ ದಾರಾಃ ಕೈಲಾಸವಾಸಿನೋ ಜಯತಿ ॥ ೧೪೬ ॥
ಧೀರಾತ್ಮಹೃದಯಕಮಲೇ ಧಾರಾಧರನೀಲಚಿಕುರಭಾರವತೀ ।
ಕ್ಷೀರಾದಿಹೃದ್ಯವಾಣೀ ಧಾರಾ ಸಾ ಭಾತಿ ಪಾರ್ವತೀರೂಪಾ ॥ ೧೪೭ ॥
ಪರಮಶಿವಭಾಗ್ಯಧಾಟೀ ಕಾಞ್ಚನಶಾಟೀ ಮಮಾಸ್ತು ಹೃದಿ ಸತತಮ್ ।
ಪರಿಮಲಿತವಕ್ತ್ರವೀಟೀ ಕೃತನತಿಘೋಟೀ ಗಜಾದಿಪರಿಪಾಟೀ ॥ ೧೪೮ ॥
ಸನ್ಮಾನಸಕಾಸಾರೇ ಕೃತಪರಮಾನನ್ದಸಂತತಿರ್ಜನನೀ ।
ಶಂಕರತತ್ತ್ವೋನ್ಮೇಷಂ ಕಲ್ಯತಿ ಕಾಲೇ ದಯಾಸಾರಾತ್ ॥ ೧೪೯ ॥
ಏಣಾಙ್ಕಲಸಿತಮೌಲಿಃ ಕ್ಷೀಣಾನಾಂ ರಕ್ಷಿಣೀ ಪರಮಾ ।
ಪಾಣಾವಾದೃತಹರಿಣಾ ವೀಣಾನುತಿಲಾಲಿತಾ ಚ ಸಾ ಜಯತಿ ॥ ೧೫೦ ॥
ಮೂಕಾದೀನಾಂ ಪುರಹರಮೌಲ್ಯಾನ್ದೋಲನಕರೋಜ್ಜ್ವಲಾ ವಾಚಃ ।
ಯತ್ಕಾರುಣ್ಯಾತ್ ಕಾಲೇ ಸಮುಲ್ಲಸನ್ತೀಹ ಸಾ ಮದೀಯಧನಮ್ ॥ ೧೫೧ ॥
ಸರ್ವೇಷಾಂ ದೇವಾನಾಮಪಿ ಮರ್ತ್ಯಾನಾಂ ತಥಾ ಗಿರೀಶಸ್ಯ ।
ಏಕಾ ಪುಣ್ಯಶ್ರೇಣೀ ಗೌರೀರೂಪಾ ಹಿ ಸರ್ವದಾ ಜಯತಿ ॥ ೧೫೨ ॥
ಪಶುಪತಿಪುಣ್ಯಶ್ರೇಣೀಪರಿಪಾಕಂ ಪಾರ್ವತೀರೂಪಮ್ ।
ನಿಜದೃಗ್ರಕ್ಷಿತಲೋಕತ್ರಯಮಿದಮಾರಾದ್ ವಿರಾಜತೇ ತೇಜಃ ॥ ೧೫೩ ॥
ಶೀತಲಭೂಧರಜನಿತಾ ದಯಯಾ ಚ ಪುನಸ್ತಥಾ ಶೀತಾ ।
ಶೀತಲಲಲಯಕಟಾಕ್ಷಾ ಸಾ ಜನನೀ ನಃ ಸದಾ ಜಯತಿ ॥ ೧೫೪ ॥
ಸ್ಮೃತಿಮಾತ್ರತಾಪಹಾನ್ಯೈ ಕಲಿತಪ್ತಾನಾಂ ಜನಾನಾಂ ಸಾ ।
ಕೃತಸಂಕಲ್ಪಾನಲ್ಪಾಭರಣಾ ಭರಣಾಯ ಹೃದಿ ಲಸತಿ ॥ ೧೫೫ ॥
ಸುಕೃತಿಜನದೃಶ್ಯರೂಪಂ ದುಷ್ಕೃತಿಜನದೂರಗಂ ಚ ತತ್ ತೇಜಃ ।
ಕಾರುಣ್ಯಪೂರ್ಣಹೃದಯಂ ತದ್ಭಾವನತಾಂ ತಥಾ ಜಯತಿ ॥ ೧೫೬ ॥
ತಾಪಿಞ್ಛಸ್ತಬಕರುಚಿರ್ಜನನೀ ಸಾ ಶಾಂಕರೀ ಭಜತಾಮ್ ।
ನಿಜದೃಕ್ಪಾತಪ್ರಶಮಿತದಾರಿದ್ರ್ಯಾದಿರ್ಲಸತಿ ಪೀಠೇ ॥ ೧೫೭ ॥
ಪರಮಶಿವಾಸ್ಥಾನತಲೇ ನಿತ್ಯಂ ಖೇಲನಕೃತಾದರಂ ತೇಜಃ
ತದ್ ರಾಜತೇ ಮುನೀನಾಂ ಹೃದಯೇ ನಿಗಮಾನ್ತಸೌಧೇ ಚ ॥ ೧೫೮ ॥
ನಿಶ್ಚಲಭಾವಭೃತಾಂ ತನ್ನಿಶ್ಚಲರೂಪಂ ವಿರಾಜತೇ ತೇಜಃ ।
ಹಂಸೀವ ಮಾನಸೇ ಮೇ ಮಞ್ಜುಲಗತಿದಾಯಿನೀ ಸುದೃಶಾಮ್ ॥ ೧೫೯ ॥
ಮಾಧುರ್ಯಂ ವಚಸಿ ಗತೌ ಗಾಮ್ಭೀರ್ಯಂ ನೇತ್ರಯೋಸ್ತೈಕ್ಷಣ್ಯಮ್ ।
ಶೈತಲ್ಯಂ ಹೃದಿ ಚ ಸದಾ ಯತ್ರ ಹಿ ದೃಶ್ಯಂ ತದೇವ ಜನನೀ ನಃ ॥ ೧೬೦॥
ನಿಜಶೋಭಾಜಿತಕನ್ದುಕಕುಚಯುಗಲಶ್ರೀಜಿತೇಶಹೃದಯಾ ಸಾ ।
ಮನಸಿ ಮಮ ಸಂನಿಧತ್ತಾಂ ದತ್ತಾತ್ರೇಯಾದಿಭಿರ್ವನ್ದ್ಯಾ ॥ ೧೬೧ ॥
ನಿಜಮೌಲಿಚನ್ದ್ರಕಿರಣಪ್ರಸಾರಣೇಽಪ್ಯುಲ್ಲಸತ್ಸರೋಜಯುಗಮ್ ।
ದಧತೀ ಶ್ರವಸೋರೇಷಾ ಚಕಾಸ್ತಿ ಹೃದಯೇ ಪರಾ ದೇವೀ ॥ ೧೬೨ ॥
ಮುಖಜಿತತಾರಾನಾಥಾ ಮಖಭುಗ್ಗಣಸೇವ್ಯಚರಣಜಲಜಾತಾ ।
ನಖಕಾನ್ತಿಪಟಲದಮ್ಭಾದ್ ಗತಿಜಿತಹಂಸಾವಲೀ ವಿಭಾತು ಹೃದಿ ॥ ೧೬೩ ॥
ಕವಿತಾಭಾಗ್ಯವಿಧಾತ್ರೀ ಪರಿಮಲಸಂಕ್ರಾನ್ತಮಧುಪಗಣಕೇಶಾ ।
ಮಮ ನಯನಯೋಃ ಕದಾ ವಾ ಕರ್ಣೇಜಪಲೋಚನಂ ದಿವ್ಯಮ್ ॥ ೧೬೪ ॥
ಶಶಿಖಣ್ಡವತಂಸಶ್ರೀಃ ಪಶುಪತಿಭಾಗ್ಯಂ ಚ ತತ್ ತೇಜಃ ।
ಮಮ ನಯನಯೋಃ ಕದಾ ವಾ ಕರ್ಣೇಜಪಲೋಚನಂ ದಿವ್ಯಮ್ ॥ ೧೬೫ ॥
ತತ್ ತೇಜಃ ಶಾಶ್ವತಮಿಹ ಸಾಮಾನ್ಯಂ ಭೂನಿವಾಸಕೃತಾಮ್ ।
ದ್ಯುಸದಾಮಪಿ ಜಯತಿ ಕೃತಾದರಂ ತದಸ್ತು ಶ್ರಿಯೈ ಕಾಲೇ ॥ ೧೬೬ ॥
ಶತಮಖನೀಲಮಣೀನಾಂ ಪ್ರಭಾವಿಸಾರಪ್ರಲೋಭತನುಕಾನ್ತ್ಯಾ ।
ಶ್ರುತಿಮೌಲಿಸೌಧದೀಪಶ್ರಿಯಾ ತಯಾ ನಾಥವಾನಹಂ ಕಾಲೇ ॥ ೧೬೭ ॥
ಕವಿಕುಲಸೂಕ್ತಿಶ್ರೇಣೀಶ್ರವಣಾನನ್ದೋಲ್ಲಸದ್ವತಂಸಸುಮಾ ।
ಸಾ ದೇವೀ ಮಮ ಹೃದಯೇ ಕೃತಸಾಂನಿಧ್ಯಾ ಕೃತತ್ರಾಣಾ ॥ ೧೬೮ ॥
ಪುಷ್ಪೇಷ್ವಾಗಮಸಾರಾ ಪುರಭಿನ್ಮಾನಸವಿಭೇದಿನಿಜಕೇಲಿಃ ।
ವಿಶ್ವವಿಮೋಹನಮೂರ್ತಿಃ ಸಾ ದೇವೀ ಶಾಂಕರೀ ಜಯತಿ ॥ ೧೬೯ ॥
ಕಾಶೀಕಾಞ್ಚ್ಯಾದಿತಟಸ್ಥಿರಾಸನಾ ಮೇಖಲಾಭಿರಾಮಕಟಿಃ ।
ಮುಗ್ಧಸ್ಮೇರಮುಖೀ ಸಾ ಯಾ ಗೌರೀ ಸಂಪದಾಂ ಜನನೀ ॥ ೧೭೦ ॥
ಮುಖವಿಜಿತಚನ್ದ್ರಮಣ್ಡಲಮಿದಮಮ್ಭೋರುಹವಿಲೋಚನಂ ತೇಜಃ ।
ಧ್ಯಾನೇ ಜಪೇ ಚ ಜಪತಾಂ ಚಕಾಸ್ತಿ ಹೃದಯೇ ಕವೀಶ್ವರಾಣಾಂ ಚ ॥ ೧೭೧ ॥
ಮಞ್ಜುಲಕವಿತಾಸಂತತಿಬೀಜಾಙ್ಕುರದಾಯಿನೀ ರಸಾಲೋಕಾ ।
ಜನನಿ ತವಾಪಾಙ್ಗಶ್ರೀರ್ಜಯತಿ ಜಗತ್ತ್ರಾಣಕಲಿತದೀಕ್ಷೇಯಮ್ ॥ ೧೭೨ ॥
ಅಮ್ಬ ತವಾಪಾಙ್ಗಶ್ರೀರಪಾಙ್ಗಕೇಲೀಶತಾನಿ ಜನಯನ್ತೀ ।
ಪುರಹನ್ತುರ್ಹೃದಿ ಜಯತಿ ವ್ರೀಡಾಮದಮೋಹಕಾಮಸಾರಕರೀ ॥ ೧೭೩ ॥
ದಿನಕರಸುತಾತರಙ್ಗಾವಲಿಶೋಭಾಕೃತಕಚಾಕಚಿಶ್ರೀಶ್ಚ ।
ಶಶಿಖಣ್ಡವತಂಸಶಿರಾಃ ಸಾ ದೇವೀ ಶರಣಮರ್ಥಿನಾಂ ಪರಮಮ್ ॥ ೧೭೪ ॥
ಕಲಕಲನಿನದತ್ಕಾಞ್ಚೀ ಕಾಞ್ಚ್ಯಾದಿತಲಸ್ಥಿರಾಸನಾ ದೇವೀ ।
ಪುರಹರಭೂಷಣಮೂರ್ತಿಃ ಸಾ ದೇವೀ ಶರಣಮಸ್ಮಾಕಮ್ ॥ ೧೭೫ ॥
ಪುರಹರಸಹಧರ್ಮಚರೀಂ ಕಚಭಾರಲಸನ್ನಿಶೀಥಿನೀಶಕಲಾಮ್ ।
ಕವಿಕುಲಮಾನ್ಯಚರಿತ್ರಾಂ ಪವಿತ್ರಿತಕ್ಷೋಣಿಭೃತ್ಕುಲಾಂ ವನ್ದೇ ॥ ೧೭೬ ॥
ಭಕ್ತಜನಾವಲಿಕಥಿತಸ್ತುತಿಶತದತ್ತಾದರಾಮಿಮಾಂ ದೇವೀಮ್ ।
ಸರಸಕವನಪ್ರದಾತ್ರೀಂ ಭೂಷಿತಶಿವವಾಮಭಾಗರೇಖಾನ್ತಾಮ್ ॥ ೧೭೭ ॥
ಮಙ್ಗಲಮೂರ್ತಿಂ ಕಿಂನರಕೀರ್ತಿತನಿಜಕೀರ್ತಿವಲ್ಲರೀಂ ಜನನೀಮ್ ।
ಮೂರ್ತಿಮತೀಂ ಕಾಮಕಲಾಂ ಶಂಭೋರಮ್ಭೋಜಲೋಚನಾಂ ನೌಮಿ ॥ ೧೭೮ ॥
ಜಿತಮನ್ಮಥಮಾರಕಲಾದಾತ್ರೀಂ ಶಿವಗಾತ್ರದಿವ್ಯಭೂಷಾಂ ತಾಮ್ ।
ತ್ರಿಜಗತ್ಸುಖಜನಯಿತ್ರೀಮಮ್ಬಾಮಮ್ಬುದಮನೋಜ್ಞತನುಮೂರ್ತಿಮ್ ॥ ೧೭೯ ॥
ಖಣ್ಡಿತಸುರವೈರಿಗಣಾಂ ಚಣ್ಡಕರಾದ್ಯೈಃ ಸುರೈಶ್ಚ ನುತಸದನಾಮ್ ।
ಮಣ್ಡಿತಪುರಹರದೇಹಾಂ ತಾಣ್ಡವಿನಃ ಸರ್ವಮಙ್ಗಲಾಂ ದೇವೀಮ್ ॥ ೧೮೦ ॥
ನಿಜಲೋಚನಕೃತಸಂಪದಮಜಕಮಲೇಕ್ಷಣಶಚೀಶಸುರವನ್ದ್ಯಾಮ್ ।
ಭಜನಕೃದನ್ತರ್ಜ್ಯೋತಿಷಮಜತನಯಾದ್ಯೈಶ್ಚ ನಿತ್ಯಸೇವ್ಯಕಲಾಮ್ ॥ ೧೮೧ ॥
ಭರಿತಭುವನಾಮಪರ್ಣಾಂ ಸರಿದುರುವೀಚೀವಿಲೋಲಿತಾತ್ಮಕಚಾಮ್ ।
ಗಿರಿಶಕೃತನಿತ್ಯಲೀಲಾಂ ವರಿವಸ್ಯಾದಾನತುಷ್ಟನಿಜಹೃದಯಾಮ್ ॥ ೧೮೨ ॥
ಜನನುತನಿತ್ಯವಿಭೂತಿಂ ಕನದುರುಭೂಷಾವಲೀಲಸಿತದೇಹಾಮ್ ।
ಮನಸಾಪ್ಯಗಣ್ಯತತ್ತ್ವಾಂ ವನವಾಸಿಧ್ಯಾನಗೋಚರಾತ್ಮಕಲಾಮ್ ॥ ೧೮೩ ॥
ನೀಲಾಮ್ಬುಜಕಾನ್ತಿಮುಷಂ ಬಾಲಾರ್ಕನಿಭಾತ್ಮಕರ್ಣಪೂರವತೀಮ್ ।
ಮಾಲಾಲಂಕೃತಕಣ್ಠಾಂ ಬಾಲಾಂ ಸ್ಕನ್ದಸ್ಯ ಮಾತರಂ ವನ್ದೇ ॥ ೧೮೪ ॥
ಶರಣಾಗತಜನರಕ್ಷಣಕೃತದೀಕ್ಷಾವೀಕ್ಷಣೇನ ಜಿತಶಂಭುಃ ।
ಕುಲಭೂಧರವರತಪಸಾಂ ಪರಿಪಾಕಃ ಕೋಽಪಿ ವಿಜಯತೇ ಲೋಕೇ ॥ ೧೮೫ ॥
ಕುಸುಮಶರಮಥನಮನಸಾಪ್ಯಾದರಣೀಯಾತ್ಮಕಾಮಕೇಲಿರಿಯಮ್ ।
ಜನನೀ ಕಲ್ಯಾಣತತಿಂ ಭಜತಾಂ ನಃ ಸಾದರಾತ್ ತರಙ್ಗಯತಿ ॥ ೧೮೬ ॥
ಮತ್ತಗಜಮಾನ್ಯಗಮನಾ ಮಧುರಾಲಾಪಾ ಚ ಮಾನ್ಯಚರಿತಾ ಸಾ ।
ಮನ್ದಸ್ಮೇರಮುಖಾಬ್ಜಾ ಗೌರೀ ಮಮ ಹೃದಯಸಾರಸೇ ಲಸತು ॥ ೧೮೭ ॥
ಪುರಹರನೇತ್ರಮಹೋತ್ಸವತಾರುಣ್ಯಶ್ರೀರ್ನಿರಸ್ತನತಶತ್ರುಃ ।
ಲಲಿತಲಿಕುಚಾಭಕುಚಭರಯುಗಲಾ ದೃಗ್ವಿಜಿತಹರಿಣಸಂದೋಹಾ ॥ ೧೮೮ ॥
ಕಾರುಣ್ಯಪೂರ್ಣನಯನಾ ಕಲಿಕಲ್ಮಷಹಾರಿಣೀ ಚ ಸಾ ಗೌರೀ ।
ಮುಖಜಿತಶಾರದಕಮಲಾ ವಕ್ತ್ರಾಮ್ಭೋಜೇ ಸದಾ ಸ್ಫುರತು ಕಾಲೇ ॥ ೧೮೯ ॥
ಶೂಲಿಮನೋರಥಪಾತ್ರಂ ಸಂತಪ್ತಸ್ವರ್ಣಕಾಮ್ಯನಿಜಗಾತ್ರಮ್ ।
ಆಶ್ರಿತಹಿಮವದ್ಗೋತ್ರಂ ರಕ್ಷಿತನತಬಾಹುಜಚ್ಛಾತ್ರಮ್ ॥ ೧೯೦ ॥
ಕವಿಕುಲಜಿಹ್ವಾಲೋಲಂ ಶಶಿಶೇಖರಕಲಿತರಮ್ಯಬಹುಲೀಲಮ್ ।
ನಿರಸಿತನತದುಷ್ಕಾಲಂ ವನ್ದೇ ತೇಜಃ ಸದಾಲಿನುತಶೀಲಮ್ ॥ ೧೯೧ ॥
ಕಮಲಸುಷಮಾನಿವಾಸಸ್ಥಾನಕಟಾಕ್ಷಂ ಚಿರಾಯ ಕೃತರಕ್ಷಮ್ ।
ರಕ್ಷೋಗಣಭೀತಿಕರಂ ತೇಜೋ ಭಾತಿ ಪ್ರಕಾಮಮಿಹ ಮನಸಿ ॥ ೧೯೨ ॥
ಕುಮುದವನೀಶಕ್ರೀಡಾಸ್ಥಾನಾಯಿತಕೇಶಭಾರಾಯೈ ।
ನಮ ಉಕ್ತಿರಸ್ತು ಮಾತ್ರೇ ವಾಗ್ಜಿತಪೀಯೂಷಧಾರಾಯೈ ॥ ೧೯೩ ॥
ಬಾಲಕುರಙ್ಗವಿಲೋಚನಧಾಟೀರಕ್ಷಿತಸುರಾದಿಮನುಜಾನ್ತಮ್ ।
ನಯನಯುಗಾಸೇವ್ಯಂ ತದ್ ಭಾತೀಹ ಧರಾತಲೇ ನಿಯತಮ್ ॥ ೧೯೪ ॥
ಕುಶಲವಿಧಯೇ ತದಸ್ತು ಪ್ರಸೂನವಿಶಿಖಾರಿಕೃತಲೀಲಮ್ ।
ಕಬಲಿತಪದನತದೈನ್ಯಂ ತರುಣಾಮ್ಬುದಮೇಚಕಂ ಧಾಮ ॥ ೧೯೫ ॥
ಜನನಿ ಕದಾ ವಾ ನೇಷ್ಯಾಮ್ಯಹಮಾರಾದರ್ಚಿತತ್ವದೀಯಪದಃ ।
ನಿಮಿಷಮಿವ ಹನ್ತ ದಿವಸಾನ್ ದೃಷ್ಟ್ವಾ ತ್ವಾಮಾದರೇಣ ಕಲ್ಯಾಣೀಮ್ ॥ ೧೯೬ ॥
ಕವಿವಾಗ್ವಾಸನ್ತೀನಾಂ ವಸನ್ತಲಕ್ಷ್ಮೀಃ ಪುರಾರಿದಯಿತಾ ನಃ ।
ಪರಮಾಂ ಮುದಂ ವಿಧತ್ತೇ ಕಾಲೇ ಕಾಲೇ ಮಹಾಭೂತ್ಯೈ ॥ ೧೯೭ ॥
ತ್ರಿಭುವನಸುನ್ದರರೂಪಂ ತೇಜಸ್ತದ್ ಭಕ್ತಿತಃ ಸಮಭ್ಯರ್ಚ್ಯ ।
ಗರುಡೇನ ಯಾತಿ ಕುತುಕಾದಥವಾ ಹಂಸೇನ ಸುರಸೇವ್ಯಃ ॥ ೧೯೮ ॥
ತವ ಪದಪದ್ಮೇ ಭಕ್ತಿರ್ನ ಮೇ ತಥಾಪಿ ತವದೀಯಕೃಪಯಾಹಮ್ ।
ಧ್ಯಾಯಾಮ್ಯನ್ವಹಮಮ್ಬ ತ್ವಾಮಾರಾದಾದರಾತ್ ಸಿದ್ಧ್ಯೈ ॥ ೧೯೯ ॥
ಯೋ ದೇವ್ಯಾಃ ಪದಸರಸಿಜನತಿಭಾಕ್ ತಸ್ಯೇಹ ಸಿಧ್ಯನ್ತಿ ।
ಸ್ಥಿರವಿಭುತಾ ಸತ್ಸಙ್ಗಃ ಸಾಯುಜ್ಯಂ ಚಾಪಿ ಕಾಲೇನ ॥ ೨೦೦ ॥
ಹಿಮಗಿರಿತಪಃಫಲಂ ತನ್ಮುನಿಜನಹೃದಯಾಬ್ಜನಿತ್ಯಕೃತನೃತ್ತಮ್ ।
ಕರುಣಾಲೋಲಾಪಾಙ್ಗಂ ತತ್ ತೇಜೋ ಭಾತು ನಿಃಸಮಂ ವದನೇ ॥ ೨೦೧ ॥
ಜನನಿ ತರಙ್ಗಯ ನಯನೇ ಮಯಿ ದೀನೇ ತೇ ದಯಾಸ್ನಿಗ್ಧೇ ।
ತೇನ ವಯಂ ತು ಕೃತಾರ್ಥಾ ನಾತಃ ಪರಮಸ್ತಿ ನಃ ಪ್ರಾರ್ಥ್ಯಮ್ ॥ ೨೦೨ ॥
ಮುನಿಹೃದಯಪದ್ಮಹಂಸೀ ಶಿವಕೇಲೀಸದನರತ್ನದೀಪಕಲಾ ।
ಹಿಮವತ್ಪುತ್ರೀ ಕೃಪಯಾ ಮಾಮವತಿ ಮಹೌಷಧೀ ಕಲಿವ್ಯಾಧೇಃ ॥ ೨೦೩ ॥
ಪ್ರತಿಫಲತು ಭಾವನಾಯಾಮಸ್ಮಾಕಂ ಸಾ ಸ್ಫುರತ್ಕೃಪಾಧಾರಾ ।
ಪುರಹರದೃಕ್ಸಾಫಲ್ಯಂ ಕೈಲಾಸೇ ಕಿಮಪಿ ನಿಶ್ಚಿತಂ ತೇಜಃ ॥ ೨೦೪ ॥
ಸಜ್ಜನಮಾನಸಧಾಮ್ನೇ ನಮ ಉಕ್ತಿರ್ಮೇ ಶ್ರುತೀಡ್ಯನಿಜಭೂಮ್ನೇ ।
ಶಿವವಾಮಭಾಗಧಾಮ್ನೇ ಮಹಾವಿಭೂತ್ಯೈ ಹಿ ಶಂಕರೀನಾಮ್ನೇ ॥ ೨೦೫ ॥
ದೇಶಿಕಮಾನಸವಿಹರಣಕಲಾಜುಷೇ ಭಕ್ತಿರಸ್ತು ಮೇ ತಸ್ಮೈ ।
ಯಚ್ಚನ್ದ್ರಮೌಲಿಲೋಚನಚಾಪಲ್ಯಂ ರಕ್ಷಿತಸ್ವಭಕ್ತೌಘಮ್ ॥ ೨೦೬ ॥
ನಿಜಲೋಚನಕೇಲಿಕಲಾವಶೀಕೃತಪ್ರಸಬಾಣರಿಪುಹೃದಯಮ್ ।
ದಯಯಾ ಲೋಲಿತಹೃದಯಂ ತದಸ್ತು ತೇಜಃ ಪುರೋಽಸ್ಮಾಕಮ್ ॥ ೨೦೭ ॥
ಸತತಂ ಬದ್ಧಾಞ್ಜಲಿಪುಟಮುಪಾಸ್ಮಹೇ ತಚ್ಛುಭಪ್ರದಂ ತೇಜಃ ।
ಯನ್ಮರಕತಕಾನ್ತಿಲಸತ್ ಪ್ರಸೂನಶರವೈರಿಪುಣ್ಯಪರಿಪಾಕಮ್ ॥ ೨೦೮ ॥
ತೀರಂ ಸಂಸೃತಿಜಲಧೇಃ ಪೂರಂ ಶಂಕರವಿಲೋಚನಪ್ರೀತೇಃ ।
ಸಾರಂ ನಿಗಮಾನ್ತಾನಾಂ ದೂರಂ ದುರ್ಜನತತೇರ್ಹಿ ತತ್ ತೇಜಃ ॥ ೨೦೯ ॥
ನಗರಾಜಕನ್ಯಕಾ ಸಾ ಲಸತು ಪುರೋಽಸ್ಮಾಕಮಾದರಕೃತಶ್ರೀಃ ।
ಯತ್ಪ್ರಣಮನಾಜ್ಜನಾನಾಂ ಕವಿತೋನ್ಮೇಷಃ ಸದೀಡಿತೋ ಲಸತಿ ॥ ೨೧೦ ॥
ಸನ್ನಯನಸಾರಸಾಲೀಪೂಷಾ ಭೂಷಾ ಚ ಹರಶರೀರಸ್ಯ ।
ಹಿಮಗಿರಿತನಯಾ ಯೋಷಾ ಭಾಷಾಸ್ತೋತ್ರಪ್ರಿಯಾ ಚ ಸಾ ಭಾತಿ ॥ ೨೧೧ ॥
ಸಫಲಯತು ನೇತ್ರಯುಗಲಂ ಹತನತದುರಿತಾ ಹಿ ಸಾ ಪರಾ ದೇವೀ ।
ಧರಣಿಧರನಾಯಕಪ್ರಿಯಸುತಾ ಚ ಸೋಮಾರ್ಧಭೂಷಿತಾತ್ಮಕಚಾ ॥ ೨೧೨ ॥
ಸುಮನೋವಾಞ್ಛಾದಾನೇ ಕೃತಾವಧಾನಂ ಧನಂ ಶಂಭೋಃ ।
ಧಿಷಣಾಜಾಡ್ಯಾದಿಹರಂ ಯದ್ವೀಕ್ಷಣಮಾಮನನ್ತಿ ಜಗತಿ ಬುಧಾಃ ॥ ೨೧೩ ॥
ಕೋ ವಾ ನ ಶ್ರಯತಿ ಬುಧಃ ಶ್ರೇಯೋಽರ್ಥೀ ತಾಮಿಮಾಮಮ್ಬಾಮ್ ।
ಯಾಮರ್ಧಚನ್ದ್ರಶೇಖರಸಧರ್ಮಿಣೀಮರ್ಚಯನ್ತಿ ಸುರನಾಥಾಃ ॥ ೨೧೪ ॥
ಶಮಿತನತದುರಿತಸಂಘಾ ಹರಾಯ ನಿಜನೇತ್ರಕಲ್ಪಿತಾನಙ್ಗಾ ।
ಕೃತಸುರಶಾತ್ರವಭಙ್ಗಾ ಸಾ ದೇವೀ ಮಙ್ಗಲೈಸ್ತುಙ್ಗಾ ॥ ೨೧೫ ॥
ಕವಿತಾರಸಪರಿಮಲಿತಂ ಕರೋತಿ ವದನಂ ನತಾನಾಂ ಯಾ ।
ಸ್ತೋತುಂ ತಾಮಹಮಾರಾತ್ ಸಾ ದೇವೀ ಸುಪ್ರಸನ್ನಾಸ್ತು ॥ ೨೧೬ ॥
ಪುರಹರವಾಮೋತ್ಸಙ್ಗೇ ಭಜಾಮಿ ಲಸಿತಂ ತು ತತ್ ತೇಜಃ ।
ಸೃಷ್ಟಿಸ್ಥಿತಿಲಯಕಾರ್ಯಂ ಯಜ್ಜನಯತಿ ಕಾಲಭೇದೇನ ॥ ೨೧೭ ॥
ಕಲ್ಯಾಣದಾನಕಲನಾತ್ ಖ್ಯಾತಾ ಸಾ ಶಾಂಕರೀ ಲೋಕೇ ।
ತದ್ವೈಭವಕೀರ್ತನತೋ ವಯಮತ್ರಾಸಾಃ ಪರಾನನ್ದಾಃ ॥ ೨೧೮ ॥
ಮನ್ದಹಸಿತೈರ್ವಶೀಕೃತಶಾಂಕರಹೃದಯಾ ಹಿ ಭಕ್ತಾನಾಮ್ ।
ರಕ್ಷಣಕಾರ್ಯಾಯ ಪರಂ ಸಾಮ್ಬಾ ಕುಮ್ಭೋದ್ಭವಾದಿಭಿರ್ವನ್ದ್ಯಾ ॥ ೨೧೯ ॥
ನಿಜಮೌಲಿಚನ್ದ್ರಕಿರಣಪ್ರಸಾರಣಾದ್ಗಾಙ್ಗವೀಚಿಕಾಪವನೈಃ ।
ತತ್ಕ್ಷಣನಿರಸಿತಸುರತಶ್ರಮಾ ಭವಾನೀಹ ರಾಜತೇ ಭೂತ್ಯೈ ॥ ೨೨೦ ॥
ಮಮ ಗಾಹತೇ ಹಿ ಹೃದಯಂ ನಯನಯುಗಂ ತ್ರಿಪುರದಮಯಿತುರ್ಭಾಗ್ಯಮ್ ।
ಯದಕೃತ್ರಿಮವಾಗ್ಗುಮ್ಭೈಃ ಸ್ತುತ್ಯಂ ಧ್ಯೇಯ ಸದಾಭ್ಯರ್ಚ್ಯಮ್ ॥ ೨೨೧ ॥
ಕರಧೃತಶೂಲಾದ್ಯಾಯುಧಜಾಲನಿರಸ್ತಾಖಿಲಾರಿಬೃನ್ದೇಯಮ್ ।
ಕುನ್ದಾಭದನ್ತವದನಾನನ್ದಾಯಾಸ್ತು ಪ್ರಕಾಮಮಿಹ ನಮತಾಮ್ ॥ ೨೨೨ ॥
ಕುಚಭಾರನಮ್ರಗಾತ್ರಂ ನಿಜಜನಿಪರಿಪೂತಜನಕವರಗೋತ್ರಮ್ ।
ಸುರವೈರಿಕಲಿತಕೋಪಂ ಗೌರೀರೂಪಂ ತದಸ್ತು ಹತತಾಪಮ್ ॥ ೨೨೩ ॥
ನಿಟಿಲಾತ್ತವಹ್ನಿನೇತ್ರಂ ಲೋಲಾಲಕಮೇತದಾದೃತಂ ತೇಜಃ ।
ನಿಜಕೇಲ್ಯಧೀನಶಂಕರಮಸ್ಮಾಕಂ ಚಾಕ್ಷಯಂ ಸ್ಥಾನಮ್ ॥ ೨೨೪ ॥
ತವ ಮನ್ದಸ್ಮಿತಲಹರೀವಿಶೇಷಿತರುಚಿರ್ಗಿರೀಶಶಶಿಶಕಲಃ ।
ತವ ರೂಪಂ ಗಿರಿಶಸ್ಯ ಸ್ವರೂಪಮಪಿ ಭಾತಿ ಯೋಗಿನಾಂ ಹೃದಯೇ ॥ ೨೨೫ ॥
ನೀಲಾರವಿನ್ದಲೋಚನಯುಗಲಾಮಮ್ಬಾಮಹಂ ನೌಮಿ ।
ಕಾಲಾರಿಚಿತ್ತಹರಣೇ ಯಲ್ಲೀಲಾಃ ಪಾಟವಂ ನೀತಾಃ ॥ ೨೨೬ ॥
ಶಶಧರಭೂಷಿತಮಕುಟೀ ಕವಿಕುಲವಾಗಬ್ಜಶರದಿಯಂ ದೇವೀ ।
ಆರ್ತತ್ರಾಣಪರಾಯಣವಿಲೋಚನಾ ಹಿಮವತಃ ಪುತ್ರೀ ॥ ೨೨೭ ॥
ಶ್ರುತಿಪಞ್ಜರಕೇಲಿಶುಕೀ ಶಂಕರಪರಿರಮ್ಭಣೋತ್ಸುಕಾ ಮಾತಾ ।
ಬಹಿರಪ್ಯನ್ತಯರ್ಮಿನಾಂ ಚಕಾಸ್ತಿ ಲೋಕಾಮ್ಬಿಕಾ ಕೃತತ್ರಾಣಾ ॥ ೨೨೮ ॥
ಚಿನ್ತಿತವಸ್ತುವಿಧಾತ್ರೀ ಸಂತತಮಪಿ ಲೋಕರಕ್ಷಣೈಕರತಾ ।
ಸಂದಾನಿತನಾಕಿಲಸತ್ಸಂತಾನಸುಮಪ್ರಗಲ್ಭಧಮ್ಮಿಲ್ಲಾ ॥ ೨೨೯ ॥
ಕಲಿತತ್ರಿವರ್ಗಪದವೀಮಪವರ್ಗದಕಲ್ಯಸೇವನಾಮಮ್ಬಾಮ್ ।
ಗಾಙ್ಗಜಲೈರ್ನಲಿನದಲೈರಾರಗ್ವಧಪತ್ರಜಾಲಕೈರರ್ಚ್ಯಾಮ್ ॥ ೨೩೦ ॥
ಶಶಿಶೇಖರಸರ್ವಸ್ವಂ ಪೂರ್ವಾಚಾರ್ಯೈಃ ಪುರಸ್ಕೃತಂ ತೇಜಃ ।
ಮಾಮಕಚಕ್ಷುರ್ವಿಷಯಂ ಕದಾ ನು ಕೈಲಾಸಕಲಿತಚಙ್ಕ್ರಮಣಮ್ ॥ ೨೩೧ ॥
ಮೋಹಿತಭುವನಾ ದೇವೀ ಸಾ ಹಿತಕರನಿತ್ಯಚಿನ್ತನಾ ಭಜತಾಮ್ ।
ತಾಡಿತರಿಪುಜನಮಾನ್ಯಾ ಪೀಡಿತನಿಜಭಕ್ತಭವಭಯಾ ಜಯತಿ ॥ ೨೩೨ ॥
ಪ್ರತ್ಯಙ್ಗಲಸಿತಭೂಷಾ ಸತ್ಯಂ ಮಾತಾ ಹಿ ಶರಣಮಸ್ಮಾಕಮ್ ।
ಕ್ಕ್ತ್ಯಂ ಯಮಭಯಮಸ್ಯಾಃ ಸ್ತುತ್ಯಂ ಜಗತೀಹ ವೈಭವಂ ಮನುಜೈಃ ॥ ೨೩೩ ॥
ಅಮ್ಬ ತ್ವಮೇವ ಕಮಲಾಸನಾದಿವೈಭವವಿಧಾತ್ರೀ ಚ ।
ತಾಂ ತ್ವಾಂ ಶರಣಂ ಪ್ರಾಪ್ತಾಃ ಲೋಕೇಽಮುಷ್ಮಿನ್ ಕಿಮಾಶಾಸ್ಯಮ್ ॥ ೨೩೪ ॥
ಕುಙ್ಕುಮರುಚಿಲಸಿತಾಙ್ಗಂ ಕಮಲಾಸನಮಾತ್ತಕಮಲಂ ಚ ।
ಹಸ್ತಾಮ್ಬುಜಧೃತಪುಸ್ತಕರುದ್ರಾಕ್ಷಾದಿ ಚ ತಥಾ ರೂಪಮ್ ॥ ೨೩೫ ॥
ಜಿತಮನ್ಮಥವರಿವಸ್ಯಾಸಕ್ತಂ ರೂಪಂ ಚ ತೇ ಮಾತಃ ।
ಕಾಲಾನುಕೂಲಕಲಿತಂ ಪರತತ್ವವಿದಾಂ ಚಕಾಸ್ತಿ ಹೃದಯತಟೇ ॥ ೨೩೬ ॥
ಹಿಮವನ್ನಗೇನ್ದ್ರಕನ್ಯೇ ಭೂಸುರಕೃತಬಹುಲಪೂಜಯಾ ಧನ್ಯೇ ।
ಮಾನ್ಯೇ ಸುಮನಃಸಂಘೈಸ್ತ್ವಾಂ ಕಲಯೇ ಹೃದಿ ಸದಾ ಹಿ ಕಟಿಶೂನ್ಯೇ ॥ ೨೩೭ ॥
ನಿರಸಿತನಿಷ್ಕಂಚನಜನದೈನ್ಯಾ ಕನ್ಯಾ ಧರಾಧರೇಶಸ್ಯ ।
ದೃಕ್ಕಾನ್ತಿವಿಜಿತಹರಿಣಾ ಹರಿಣಾರಾಧ್ಯಾ ಚ ಸಾ ಜಯತಿ ॥ ೨೩೮ ॥
ವಿನತಜನಿತಾಪವರ್ಗಾ ಸರ್ಗಾದಿಕರೀ ಚ ಸಾ ದೇವೀ ।
ನಿಜಲೀಲಾಹೃತಭರ್ಗಾ ದುರ್ಗಾದಿಶ್ರೇಯಸಾಂ ಜನನೀ ॥ ೨೩೯ ॥
ಕವನಕೃತಾಂ ತೋಷಕೃತೇ ಜಗದವನಾದಿಕ್ರಿಯಾಪೇಷು ಭವತು ।
ಶಾಂಕರಿರೂಪಾಯ ಪರಂ ನಮ ಉಕ್ತಿರ್ಜ್ಯೋತಿಷೇಽಸ್ಮಾಕಮ್ ॥ ೨೪೦ ॥
ಫಣಿಪತಿಭೂಷಿತದೇಹಾ ಹರಭಜನಾನನ್ದಸಂದೋಹಾ ।
ತತ್ತ್ವೈರ್ಹತಸಂದೇಹಾ ಚಕಾಸ್ತು ಹೃದಯೇ ವಿಧೂತಜನಮೋಹಾ ॥ ೨೪೧ ॥
ಜಯತಿ ಜನನಿ ತ್ವದೀಯಂ ರೂಪಂ ರವಿಕೋಟಿತುಲಿತಮಿದಮ್ ।
ಏತನ್ನಾನಾಕಾರಂ ಕಾಲೇ ಕೃತರಕ್ಷಣಂ ಚ ಭುವನೇಡ್ಯಮ್ ॥ ೨೪೨ ॥
ಮದನಾರಿಕಣ್ಠಸುಷಮಾಸಾಕ್ಷೀಭೂತಸ್ವಬಾಹುಯುಗಲಾ ಸಾ ।
ಕುಙ್ಕುಮಪಙ್ಕಾಙ್ಕಿತತನುರೇಷಾ ದೇವೀ ಚಕಾಸ್ತಿ ಬಹುರೂಪಾ ॥ ೨೪೩ ॥
ಕಾಞ್ಚೀಮಣಿಲಸಿತಕಟಿಃ ಕಾಞ್ಚೀಪುರಭೂಷಣಂ ಚ ತದ್ಧಾಮ ।
ಯನ್ಮನ್ಮಥರಿಪುಮಾನ್ಯಂ ನಿಜಲೀಲಾಕಲಿತಬಹುರೂಪಮ್ ॥ ೨೪೪ ॥
ಕರಪಙ್ಕಜಧೃತಮಾಲಾ ಸೃಷ್ಟಿಸ್ಥಿತ್ಯಾದಿಬಹುಲೀಲಾ ।
ವೀಟೀವಿಲಸಿತವದನಾ ವಿರಚಿತನತಹರ್ಮ್ಯವರಸದನಾ ॥ ೨೪೫ ॥
ವಿಸೃಮರತಾನುಕಮ್ಪಾ ತಂ ಪಾತಕಿವರ್ಗಮಾದರಾದಮ್ಬಾ ।
ರಕ್ಷತಿ ತನುಜಿತಶಮ್ಪಾ ಸಾ ನಃ ಶರಣಂ ಪುರಃ ಸ್ಫುರತು ॥ ೨೪೬ ॥
ಶೂಲಿನಿ ಸುರಜನಪಾಲಿನಿ ಕಾತ್ಯಾಯನಿ ದೇವಿ ಮಾಂ ಪಾಹಿ ।
ಸುರಲೋಕಕುಸುಮಮಾಲಿನಿ ಶಿವಖೇಲಿನಿ ಚಣ್ಡಿಕೇ ಪಾಹಿ ॥ ೨೪೭ ॥
ಭಾರತಿ ಭೈರವಿ ಶಾಂಕರಿ ಕಪಾಲಿನಿ ನಮೋಽಸ್ತು ತೇ ನಿತ್ಯಮ್ ।
ಸ್ತುತ್ವೈವಮಮ್ಬ ವಾಚಾ ಮನಸಾರಾಧ್ಯಂ ನಮಾಮಿ ತೇ ಪಾದಮ್ ॥ ೨೪೮ ॥
ಕುಟಿಲಕಚಂ ಲಿಕುಚಕುಚಂ ಮೃದುಬಾಹುಲತಂ ಚ ಕಙ್ಕುಮಚ್ಛಾಯಮ್ ।
ವಿಲಸತಿ ಶಶಧರಮೌಲೇಃ ಸರ್ವಸ್ವಂ ಸುಕೃತಪರಿಪಾಕಃ ॥ ೨೪೯ ॥
ಉನ್ಮೂಲಯತಿ ಶುಭೇತರವಾರ್ತಾಮಪ್ಯಮ್ಬ ತೇ ನಾಮ ।
ಭಜನಾದಪಿ ಕೀರ್ತನತಃ ಕಿಂ ವಾ ಭಾಗ್ಯಂ ತ್ವದೀಯಭಕ್ತಾನಾಮ್। ॥ ೨೫೦ ॥
ಪರಮಶಿವಪುಣ್ಯಕೋಟೀ ನಿಜಗತಿಜಿತಸನ್ಮರಾಲಗತಿಧಾಟೀ ।
ಕೃತನಿತ್ಯಕಾಮಕೋಟೀ ಕೋಟೀರೋಲ್ಲಸಿತಚನ್ದ್ರಪರಿಪಾಟೀ ॥ ೨೫೧ ॥
ಚನ್ದ್ರಾಭರಣವತಂಸಾ ಕಂಸಾರಿಮುಖೈಃ ಸುರೈಶ್ಚ ನುತಚರಿತಾ ।
ಗಜಮುಖಷಣ್ಮುಖಜನನೀ ಸಾಸ್ಮಾಕಂ ಮಾನಸೇ ಕೃತಾಸ್ಥಾನಾ ॥ ೨೫೨ ॥
ಪರಮಶಿವದಿವ್ಯಜಾಯಾ ಮಾಯಾಮೋಹಿತಸುರಾಸುರಾ ಜನನೀ ।
ಕುಙ್ಕುಮವಿಲಸಿತಕಾಯಾಪಾಯಾನ್ಮಾಂ ರಕ್ಷತೀಹ ಕವಿಗೇಯಾ ॥ ೨೫೩ ॥
ಭೂಷಿತರತ್ನಾಭರಣಾ ಶರಣರ್ಥಿಜನಾಲಿಕಲ್ಪಿತಾಭರಣಾ ।
ಮುದಿತನಿಜಾನ್ತಃಕರಣಾ ಮರಣಾದಿಧ್ವಂಸಿನೀ ಸದಾವರಣಾ ॥ ೨೫೪ ॥
ಶ್ರುತಿಸುದತೀಸ್ತಬಕಾಯಿತಚರಣಾಮ್ಭೋಜಾ ಚ ಭೋಜಾದ್ಯೈಃ ।
ಕೃತಪರಿಚರಣಾ ವಿಸ್ತೃತಕರುಣಾಮ್ಬಾ ಶೈಲರಾಜವರತನಯಾ ॥ ೨೫೫ ॥
ಅಧರೇ ಲಸಿತಾರುಣ್ಯಂ ತನೌ ತು ಹರಮಾನ್ಯಪೂರ್ಣತಾರುಣ್ಯಮ್ ।
ಲೋಚನಧೃತಕಾರುಣ್ಯಂ ಕರೇ ಕುಸುಮ್ಭಾದಿಸಂಭೃತಾರುಣ್ಯಮ್ ॥ ೨೫೬ ॥
ತತ್ತೇಜೋ ಲಸತಿ ಹೃದಿ ಸ್ಮರಾರಿಸಂಮಾನ್ಯಬಹುಲೀಲಮ್ ।
ಸೃಣಿಪಾಶಾಙ್ಕುಶಹಸ್ತಂ ಪ್ರಶಸ್ತಮಸ್ತೋದಯಾದಿಹೀನಂ ಚ ॥ ೨೫೭ ॥
ಕಲಿತಚರಾಚರರಕ್ಷಣಮಕ್ಷೀಣೋದ್ದಾಮವೈಭವಂ ಕಿಮಪಿ ।
ನಿಖಿಲಾಗಮಯನ್ತ್ರಕಲಾಸಾರಂ ತಲ್ಲಸತಿ ಪುರಭಿದಾ ಮಾನ್ಯಮ್ ॥ ೨೫೮ ॥
ಭವಚಿತ್ತರಾಜಹಂಸೀ ಭವಭಯಮೋಹಾದಿಭೇದಿನೀ ಶರಣಮ್ ।
ಸವರಕ್ಷಣಕೃತದೀಕ್ಷಾ ಶಿವವಾಮಾಙ್ಗೋಲ್ಲಸಿತಮೂರ್ತಿಃ ॥ ೨೫೯ ॥
ತವ ಚರಣನ್ಯಾಸವಶಾತ್ ಪರಿಪೂತಾ ಭೂರಿಯಂ ಭೂತ್ಯೈ ।
ದೇವೇಶಮೌಲಿಸೇವ್ಯಾ ತಾಂ ತ್ವಾಮಾರಾಧಯಾಮಿ ಗಿರಿತನಯೇ ॥ ೨೬೦ ॥
ಕ್ಷಣಮಿಹ ಮಾತರ್ದೂರೇ ಸ್ಯಾದ್ ಯದಿ ದೃಷ್ಟಿಃ ಶುಭಂಕರೀ ಮಾನ್ಯಾ ।
ಅಷ್ಟೈಶ್ವರ್ಯೋಽಪಿ ತದಾ ವಿನಷ್ಟಶೋಭೋ ವಿಕಲ್ಯಶ್ಚ ॥ ೨೬೧ ॥
ಅತ ಏವ ಹಿ ಕಾರುಣ್ಯಾಲ್ಲೋಕಾಮ್ಬ ತ್ವಂ ಸದಾದೃತಭವಾಙ್ಗಾ ।
ಕ್ರೀಡಸಿ ರಕ್ಷಸಿ ಕಾಲೇ ಜನಯಸಿ ಮೋಹಾದಿಕಾನಥವಾ ॥ ೨೬೨ ॥
ಪರಮಶಿವಕೇಲಿರಸಿಕೇ ಯಃ ಕೋಽಪಿ ಜನಸ್ತವ ಸ್ತವಂ ಕುರ್ವನ್ ।
ನಿರಸಿತನಾಕೇಶಪದಸ್ತವ ಸಾರೂಪ್ಯಂ ಕ್ರಮಾದ್ ಭಜತಿ ॥ ೨೬೩ ॥
ತವ ಪಾದಪದ್ಮವಿಸೃಮರಕಾನ್ತಿಝರೀಂ ಮನಸಿ ಕಲಯಂಸ್ತು ।
ನಿರಸಿತನರಕಾದಿಭಯೋ ವಿರಾಜತೇ ನಾಕಿಸದಸಿ ಸುರವನ್ದ್ಯಃ ॥ ೨೬೪ ॥
ಬಾಲಮರಾಲೀಗತ್ಯೈ ಸುರಗಿರಿಧಾನುಷ್ಕಮಹಿತಕಲಗೀತ್ಯೈ ।
ವಿರಚಿತನಾನಾನೀತ್ಯೈ ಚೇತೋ ಮೇ ಸ್ಪೃಹಯತೇ ಬಹುಲಕೀರ್ತ್ಯೈ ॥ ೨೬೫ ॥
ವಿತರಣಕಲಾಪ್ರಸಕ್ತೌ ಚಿನ್ತಾಮಣಿಕಾಮಧೇನುಸುರವೃಕ್ಷಾಃ ।
ತೇ ದೂರೇ ತಾಂ ತ್ವಾಮಹಮಾರಾಧಯಿತುಂ ಕೃತಪ್ರಯತ್ನೋಽಸ್ಮಿ ॥ ೨೬೬ ॥
ವಿನಮದಮರೇಶಸುದತೀಕಚಸುಮಮಕರನ್ದಧಾರಯಾ ಸ್ನಿಗ್ಧಮ್ ।
ತವ ಪಾದಪದ್ಮಮೇತತ್ ಕದಾ ನು ಮಮ ಮೂರ್ಧ್ನಿ ಭೂಷಣಂ ಜನನಿ ॥ ೨೬೭ ॥
ತವ ಹರಪುರಂಧ್ರಿ ಮಾತಶ್ಚರಣಪಯೋಜಂ ಕ್ರಮಾರ್ಚಿತಂ ಯೇನ ।
ತೇನೈನ್ದ್ರಪದಮಪಿ ದ್ರಾಗ್ ವಿರಾಜತೇ ತತ್ ಸಮಾಕ್ರಾನ್ತಮ್ ॥ ೨೬೮ ॥
ತವ ಪದಸರೋಜಪಾಂಸುನ್ಯಾಸಾದ್ಧನ್ಯೋತ್ತಮಾಙ್ಗಲಸಿತಾಶ್ಚ ।
ಗಾಯನ್ತಿ ಚ ನೃತ್ಯನ್ತಿ ಪ್ರಮೋದಕೃತನುತಿಚಯಾಶ್ಚ ರಾಜನ್ತೇ ॥ ೨೬೯ ॥
ಯತ್ಪ್ರಣಯಕಲಹವಾರ್ತಾಭೀತೋ ನಿರಸಿತಸಿಮೇಷುರಪಿ ವಿನಯೀ ।
ಮದನಂ ತಮಪಿ ವಸನ್ತಂ ಮಾನಯಿತುಂ ಸಂಪ್ರವೃತ್ತಹೃದಯೋಽಭೂತ್ ॥ ೨೭೦ ॥
ಕುಸುಮೈರ್ಗಾಙ್ಗೈರ್ವಾರಿಭಿರನುನಯವಾಗ್ಭಿಶ್ಚ ನಮ್ರಮುಖಃ ।
ಸಾ ಪುರಹರಭೂಷಾ ನೋ ಮನಸಿ ವಿಹರತಾಂ ಕಿರೀಟಲಸದಿನ್ದುಃ ॥ ೨೭೧ ॥
ಪುರಹರಪರತನ್ತ್ರಂ ತದ್ ಗತತನ್ದ್ರಂ ವಸ್ತು ನಿಸ್ತುಲಮುಪಾಸೇ ।
ತೇನೈವಾಹಂ ಧನ್ಯೋ ಮದ್ವಂಶ್ಯಾ ನಿರಸಿತಾತ್ಮತಾಪಭರಾಃ ॥ ೨೭೨ ॥
ಮುಖಸುಷಮಾಜಿತಪದ್ಮಂ ಪದ್ಮಜಹರಿವಾಸವಾದಿಬುಧಸೇವ್ಯಮ್ ।
ಕಾವ್ಯಾರ್ಥಸಾರಮೇತದ್ ಗೌರೀರೂಪ ಹಿ ವಿಜಯತೇ ತೇಜಃ ॥ ೨೭೩ ॥
ಯಸ್ಯಾಃ ಪದಸರಸಿಜಯೋರ್ವಿಬುಧಕಿರೀಟಾವಲಿರ್ಗೌರ್ಯಾಃ ।
ನೀರಾಜನವಿಧಿಕಲಿತಾ ಸಾ ಮೇ ಕುಲದೈವತಂ ಲಸತು ॥ ೨೭೪ ॥
ಕವಿಹೃತ್ಕೈರವಿಕಸನಚನ್ದ್ರಿಕಯಾ ಶಮಿತತಾಪಭರಾಃ ।
ಮನ್ದಸ್ಮಿತಶ್ರಿಯಾ ಕಿಲ ಯಸ್ಯಾಃ ಸಾ ಭಾತಿ ಹಿಮವತಃ ಪುತ್ರೀ ॥ ೨೭೫ ॥
ನಿರಸಿತತಮಃಪ್ರಚಾರಾ ಪೂರ್ವಾ ಸಂಧ್ಯೇವ ನಗಪತೇಸ್ತನಯಾ ।
ದ್ವಿಜಸಂಘೋದಯಕಲನಾ ಸಾ ಮೇ ಕುಲದೈವತಂ ಲಸತು ॥ ೨೭೬ ॥
ರಚಯಾಮಿ ನಮಂಸಿ ಭೃಶಂ ಶಂಕರಮಣ್ಡಿತನಿಜಾಙ್ಕವಲ್ಲರ್ಯೈ ।
ಪುಣ್ಯಾತ್ಮನೇ ಪುರಾರೇಃ ಪರ್ವತಕುಲರಾಜತನಯಾಯೈ ॥ ೨೭೭ ॥
ಪುರಮಥನಭಾಗ್ಯಧಾಟೀ ಕವಿಲೋಕಸಮೀಡ್ಯಸೂಕ್ತಿರಸಧಾಟೀ ।
ಮುಖಲಸಿತಸಾರವೀಟೀ ವಿಹರತು ಹೃದಿ ಮೇ ಕೃಪೌಘಪರಿಪಾಟೀ ॥ ೨೭೮ ॥
ಅಮ್ಬ ತವ ಕರುಣಯಾಹಂ ರಕ್ಷಿತಸಂತಾನವೈಭವೋ ನಿತ್ಯಮ್ ।
ಏತಾದೃಶೀ ತುಮಹತೀ ಕೀರ್ತಿಸ್ತೇ ಜೃಮ್ಭತೇ ಪ್ರತಿದಿಶಂ ಹಿ ॥ ೨೭೯ ॥
ಮದನಪರಿಪನ್ಥಿಮಹಿಷೀ ಮಮ ಮಾನಸಕಲ್ಪಿತಾಸನಾ ಜಯತಿ ।
ಶ್ರುತಿಮೌಲಿವಿಹಿತಚರಣಾ ಯೋಗಿಹೃದಮ್ಭೋಜಲಾಲಿತಾಪಿ ಮುಹುಃ ॥ ೨೮೦ ॥
ಪಶುಪತಿಪುರಂಧ್ರಿ ಮಾತಸ್ತವ ಪಾದಯುಗಂ ಪ್ರಣಮ್ಯ ಜನ್ತುರಿಹ ।
ವಿಧುತಯಮದೂತಭೀತಿಸ್ತ್ರಿದಿಶೈರಪಿ ಮಾನ್ಯತೇ ಕಲಿತಸೇವಃ ॥ ೨೮೧ ॥
ಸುರಸುದತೀಲೋಲಾಲಕಮಕರನ್ದರಸವಾಸಿತಂ ತವ ಪದಾಬ್ಜಮ್ ।
ಮಮ ಮಾನಸೇ ತು ಫುಲ್ಲಂ ಭವತು ಹಿ ಕಾಲೇ ವಯಂ ತು ಧನ್ಯಾಃ ಸ್ಮಃ ॥ ೨೮೨ ॥
ತವ ನಾಮ ಯಸ್ಯ ವಕ್ತ್ರೇ ಫಾಲೇ ಚ ಪದಾಬ್ಜಕುಙ್ಕುಮಚ್ಛಾಯಾ ।
ಸ ಭವತಿ ಮಾನ್ಯಸ್ತ್ರಿದಶೈರಪಿ ಧುತಸಮಸ್ತದುರಿತಜಾಲಃ ಸನ್ ॥ ೨೮೩ ॥
ಆಸ್ತಾಂ ಹಿ ಮೇ ಪುರಸ್ತಾತ್ ಪುರಜಯಿನಃ ಪುಣ್ಯಪರಿಮಲೋಲ್ಲಾಸಿ ।
ಜನನೀರೂಪಂ ಸಂತತಮಾಶ್ರಿತರಕ್ಷೈಕಕ್ಲೃಪ್ತದೀಕ್ಷಂ ತತ್ ॥ ೨೮೪ ॥
ಹರಿಣಾಙ್ಕಮೌಲಿದಯಿತೇ ಯದಿ ತೇ ದೃಷ್ಟಿಸ್ತದಾದರಾತ್ ಕವಿತಾ ।
ಆಲಿಙ್ಗ್ಯ ಮೋದತಿ ಚಿರಂ ತೇನ ಹಿ ಸರ್ವಜ್ಞತಾ ಲೋಕೇ ॥ ೨೮೫ ॥
ಡಮ್ಭಾದಿದುರ್ಗುಣೌಘೋ ಧಾವತಿ ದೂರೇ ತ್ವದೀಯಪದಭಕ್ತಮ್ ।
ತ್ಯಕ್ತ್ವಾ ಯದಿ ತೇ ದೃಷ್ಟಿಸ್ತೇನ ಹಿ ಸರ್ವಾಃ ಶ್ರಿಯಃ ಕಾಲೇ ॥ ೨೮೬ ॥
ತವ ಮಾತರ್ಮುನಿಮಾನ್ಯಂ ಪದಮಾರಾಧ್ಯ ಪ್ರಸೂನೌಘೈಃ ।
ಲಭತೇ ಸಹಸ್ರನಯನಾನ್ಯಥವಾಷ್ಟೌ ಪುಣ್ಯಸಂವೃತಃ ಪುರುಷಃ ॥ ೨೮೭ ॥
ನಿರ್ಧೂತತಮಃಕನ್ದೇ ಮುಕುನ್ದಪದ್ಮಾಸನಾದಿಸೇವ್ಯಪದೇ ।
ಭಕ್ತಿರ್ಮಮ ಹಿ ಸದಾ ಸ್ಯಾತ್ ತೇನಾಹಂ ಧನ್ಯಚರಿತೋಽಸ್ಮಿ ॥ ೨೮೮ ॥
ನೂಪುರಮನಿಗಣರಞ್ಜಿತಪಾದಾಬ್ಜಂ ಮಾತರಮ್ಬಿಕೇ ಹೃದಯೇ ।
ಮಮ ಲಸತು ತವ ಕಟಾಕ್ಷಾನ್ನಾತಃ ಪರಮರ್ಥನೀಯಂ ಹಿ ॥ ೨೮೯ ॥
ಮುಕ್ತಾಮಣಿಭೂಷಿತಯಾ ಕೋಕಿಲಶುಕಮಾನ್ಯವಾಗ್ವಿಭೂಷಿತಯಾ ।
ಹಿಮಗಿರಿಸುತಯಾಹಂ ಕಿಲ ಸನಾಯಕೋ ಧೂತಪಾಪಾದಿಃ ॥ ೨೯೦ ॥
ನಿರ್ಧೂತತಮಸಿ ರೂಪಂ ತವ ಮಾತರ್ಮಾಮಕೇ ಹೃದಯೇ ।
ಸ್ಫುರತಿ ತವೈವ ಹಿ ದಯಯಾ ನ ಮಾಮಕೈಃ ಕರ್ಮಭಿಶ್ಚ ವ್ರತಗುಮ್ಭೈಃ ॥ ೨೯೧ ॥
ನಿಗಮಾನ್ತವೇದ್ಯವೈಭವಮೇತತ್ ತೇ ರೂಪಮಮ್ಬಿಕೇ ಮಾತಃ ।
ಸ್ಫುರತಿ ಮಮ ನಯನಯೋರಿಹ ತತ್ರ ತು ಹೇತುಸ್ತ್ವದೀಯಕರುಣಾ ಹಿ ॥ ೨೯೨ ॥
ತ್ರಿಣಯನಸಾಮ್ರಾಜ್ಯಮಿದಂ ತವ ರೂಪಂ ನಿಖಿಲದೇವತೋಪಾಸ್ಯಮ್ ।
ನನು ಮಾತಃ ಸ್ಫುರತು ಸದಾ ನಾತಃ ಪರಮರ್ಥನೀಯಂ ಹಿ ॥ ೨೯೩ ॥
ಹರಿಣಾಙ್ಕಮೌಲ್ಯಧೀನಾ ಕಾಪಿಪರಾ ಶಕ್ತಿರಮ್ಬಿಕಾ ಕ್ಷೇತ್ರೇ ।
ಮೌಲೌ ಚ ನಿತ್ಯವಚಸಾಂ ಮಮ ಚಿತ್ತೇ ಭಜತು ನಿತ್ಯಲೀಲಾದಿಮ್ ॥ ೨೯೪ ॥
ಪರಿಸರನತವಿಬುಧಾಲೀಕಿರೀಟಮಣಿಕಾನ್ತಿವಲ್ಲರೀವಿಸರೈಃ ।
ಕೃತನೀರಾಜನವಿಧಿ ತೇ ಮಮ ತು ಶಿರೋಭೂಷಣಂ ಪದಸರೋಜಮ್ ॥ ೨೯೫ ॥
ಭಾಗೀರಥೀವ ವಾಣೀ ತವ ನುತಿರೂಪಾ ವಿರಾಜತೇ ಪರಮಾ ।
ಇಹ ಮಾತರ್ಯದ್ಭಜನಂ ಸರ್ವೇಷಾಂ ಸರ್ವಸಂಪದಾಂ ಹೇತುಃ ॥ ೨೯೬ ॥
ನಗಪತಿತನಯೇ ಮಾತಃ ಶಾಂಕರಿ ಮಾಹೇಸ್ವರೀತಿ ನಾಮಾನಿ ।
ನಿತ್ಯಂ ಜಪನ್ನಹಂ ತು ತ್ವದೀಯದಾಸೋಽಸ್ಮಿ ಮುಕ್ತಯೇ ಸಿದ್ಧಃ ॥ ೨೯೭ ॥
ನಿಖಿಲಚರಾಚರರಕ್ಷಾಂ ವಿತನ್ವತೀ ಶಾಂಕರೀ ದಯಯಾ ।
ಮಮ ಕುಲದೈವತಮೇಷಾ ಜಯತಿ ಸದಾರಾಧ್ಯಮಾನ್ಯಪದಕಮಲಾ ॥ ೨೯೮ ॥
ಸರ್ವಜನೈಃ ಸಂಸೇವ್ಯೇ ಸಂತತಮಪಿ ವಾಞ್ಛಿತಪ್ರದೇ ದೇವಿ ।
ಅಮ್ಬ ತ್ವಮೇವ ಶರಣಂ ತೇನಾಹಂ ಪ್ರಾಪ್ತಸರ್ವಕಾರ್ಯಾರ್ಥಃ ॥ ೨೯೯ ॥
ಶಾಂಕರಿ ಕಥಂ ನು ವರ್ಣ್ಯಸ್ತವ ಮಹಿಮಾ ವೇದಮೌಲಿಗಣವೇದ್ಯಃ ।
ಇತಿ ನಿಶ್ಚಿತ್ಯ ಪದಾಬ್ಜಂ ತವ ವನ್ದೇ ಮೋಕ್ಷಕಾಮೋಽಹಮ್ ॥ ೩೦೦ ॥
ತ್ವಾಮಮ್ಬ ಬಾಲಿಶೋಽಹಂ ತ್ವಚಮತ್ಕಾರೈರ್ಗಿರಾಂ ಗುಮ್ಭೈಃ ।
ಅಯಥಾಯಥಕ್ರಮಂ ಹಿ ಸ್ತುವನ್ನಪಿ ಪ್ರಾಪ್ತಜನ್ಮಸಾಫಲ್ಯಃ ॥ ೩೦೧ ॥
ಇತಿ ಅಮ್ಬಿಕಾತ್ರಿಶತೀ ಸಮಾಪ್ತಾ
Encoded and proofread by Sridhar Seshagiri seshagir at egr.msu.edu
Please send corrections to sanskrit@cheerful.com
Last updated ತ್oday
http://sanskritdocuments.org
ಗಙ್ಗಾಧರಮಖಿವಿರಚಿತಾ ।
ಪರಮಾಭರಣಂ ಶಂಭೋಃ ಪರ್ವತನಾಥಸ್ಯ ಪುಣ್ಯಪರಿಪಾಕಃ ।
ನಿಜಲೋಚನವೀಕ್ಷಣತೋ ರಕ್ಷಿತಲೋಕತ್ರಯಂ ಚ ತದ್ರತ್ನಮ್ ॥ ೧ ॥
ನಿಗಮಾನ್ತಪರಮವಿದ್ಯಾ ದದ್ಯಾದದ್ಯ ಪ್ರಮೋದಮಿಹ ನಮತಾಮ್ ।
ನಿಖಿಲಚರಾಚರಚಿನ್ಮಯರೂಪಂ ರಕ್ಷಾಕರಂ ಚ ಲೋಕಾನಾಮ್ ॥ ೨ ॥
ಆದೃತಶಿವವಾಮಾನ್ತಾಮಾರ್ಯಾಮಾರ್ಯಾಭಿಮಾನ್ಯಮಹಿಮಾನಮ್ ।
ಆಗಮಮೌಲಿವತಂಸಾಂ ವನ್ದೇ ಚಿದ್ರೂಪಕನ್ದಲಾಂ ಜನನೀಮ್ ॥ ೩ ॥
ಪರಮಶಿವಭಾಗಧೇಯಂ ಸುರಮುನಿಮನುಜಾದಿಭಿಃ ಸದಾ ಧ್ಯೇಯಮ್ ।
ಯನ್ನಾಮ ಕರ್ಣಪೇಯಂ ಪಾತು ಸದಾ ವೇದಮೌಲಿಕಾಮೇಯಮ್ ॥ ೪ ॥
ಜಯತಿ ತವಾಮ್ಬ ಕಟಾಕ್ಷೇ ಕೋ ವಾ ಸೇವೇತ ಕಲ್ಪಭೂಮಿರುಹಮ್ ।
ಕಾಮಾದಿಹಾನಿದೋಽಸೌ ನಮತಾಂ ಸಂಪತ್ಪ್ರದಾನಕೃತದೀಕ್ಷಃ ॥ ೫ ॥
ಭುವನಜನನೀ ಪುರಾರೇಃ ಮಹಿಷೀ ಭೂಷಾಯಿತಾಮೃತಮಯೂಖಾ ।
ಕಲಿಕಲುಷಿತಜನಮೇನಂ ಪಾತು ಸುಧಾಕಾರಮಞ್ಜುಲಾಪಾಙ್ಗೈಃ ॥ ೬ ॥
ನಿಖಿಲನಿಗಮಾನ್ತವೇದ್ಯಾ ವಿದ್ಯಾ ಪರಮಾ ಪುರಾರಿಸರ್ವಸ್ವಮ್ ।
ಯಮಪಾಶಭೀತಮೇನಂ ರಕ್ಷತು ಜನಮೇನಮದ್ರಿಪತಿಕನ್ಯಾ ॥ ೭ ॥
ಧುತಪದನತಜನಪಾಪಾ ಪರಚಿದ್ರೂಪಾಪ್ರೇಮಯನಿಜರೂಪಾ ।
ಶಶಿಮೌಲಿಭಾಗಧೇಯಂ ಜಯತಿ ನಗೇಶಾನಕನ್ಯಕಾ ಮಾನ್ಯಾ ॥ ೮ ॥
ತವ ಭೂಧರೇನ್ದ್ರತನಯೇ ಪಾದಾಬ್ಜಂ ನಿಗಮದೀರ್ಘಿಕಾಫುಲ್ಲಮ್ ।
ಉತ್ತಂಸಯನ್ತಿ ಪುರುಷಾ ಧನ್ಯಾಃ ಕೇಚಿತ್ ತ ಏವ ಸುರಮಾನ್ಯಾಃ ॥ ೯ ॥
ಶತಮಖನೀಲಮಣೀನಾಂ ಪ್ರಭಯಾಚ್ಛುರಿತಾ ತವಾಕ್ಷಿಯುಗಲಶ್ರೀಃ ।
ತಾರಕವಿಭೇದಿವಾಹಂ ನೃತ್ತೋನ್ಮುಖಮಾತನೋತಿ ಶರದಿ ಪಥಿ ॥ ೧೦ ॥
ಕುವಲಯಸಂಪತ್ಪ್ರದಮಿಹ ವಿಲೋಚನಂ ಮಾತರಚಲತನಯೇ ತೇ ।
ಮಮ ಮಾನಸಂ ತು ಚನ್ದ್ರಂ ಕಲಯತಿ ತಾಪಪ್ರಶಾನ್ತಿದಂ ಸಮಯೇ ॥ ೧೧ ॥
ನಿಜಗತಿಜಿತಕಾದಮ್ಬಾಮಮ್ಬಾಮಮ್ಭೋಜಲೋಚನಾಂ ವನ್ದೇ ।
ಸಂಭಾವಯತಿ ಮಹೇಶೋ ಯಾಂ ಕಿಲ ಕಾಲೇಷು ಹೃದ್ಯನವ್ಯರಸೈಃ ॥ ೧೨ ॥
ಲಲಿತಗುಣರತ್ನಭೂಷಾಪೇಟೀ ಶುಕಮಾನ್ಯನೈಜವಾಗ್ಧಾಟೀ ।
ಆಶ್ರಿತಕದಮ್ಬವಾಟೀ ಜಯತಿ ಪರಾನನ್ದಜಾತಪರಿಪಾಟೀ ॥ ೧೩ ॥
ಕುಸುಮಶರವೈರಿಕಾನ್ತಾ ಕಾನ್ತಾಲಕಭಾರಲಲಿತಾಫಾಲಾನ್ತಾ ।
ನಿಖಿಲನಿಗಮಾನ್ತಸಾರಾ ಸಾ ರಜತಿ ಶಂಭುಭಾಗ್ಯಧಾರಾ ಹಿ ॥ ೧೪ ॥
ಕರಕಮಲಕಲಿತಚಾಪೇ ಪರಮಾನನ್ದೈಕಕನ್ದಲೇ ಶಂಭೋಃ ।
ಕನಕಮಣಿಲಲಿತಕಣ್ಠೇ ತ್ವಾಮೇವಾಹಂ ಭಜಾಮಿ ಪರವೃತ್ತ್ಯೈ ॥ ೧೫ ॥
ಚಿನ್ತಿತಫಲದೇ ಪುಂಸಾಂ ಪ್ರಬಲತರಾಮೋದಕನ್ದಲೇ ಶಂಭೋಃ ।
ಪುಣ್ಯಾನಾಂ ಪರಿಪಾಕಂ ತ್ವತ್ಪದಪದ್ಮಂ ಪ್ರಫುಲ್ಲಮಿಹ ಚಿತ್ತೇ ॥ ೧೬ ॥
ನಿಜಮೌಲಿಲಸನಶಶಿಕರವಿಲಾಸಿಧಮ್ಮಿಲ್ಲಕುವಲಯಾಮೋದೈಃ ।
ತತಮಧುಕರಗೀತೀನಾಂ ದಮ್ಭಾದಮ್ಬ ತ್ವದೀಯವಾಗ್ರಕ್ಷಾ ॥ ೧೭ ॥
ಲಲಿತಕುಟಿಲಾಲಕಾನ್ತಾ ಕಾನ್ತಾ ಶಂಭೋರಮೇಯವಿಭವಾನ್ತಾ ।
ಸಂಪದಮಿಹ ನಸ್ತನುತೇ ಕುಲಭೂಧರನಾಥಭಾಗ್ಯಪರಿಣಾಮಃ ॥ ೧೮ ॥
ಜನತಾಚಿರತರವಿರಚಿತಸುಚರಿತಪರಿಪಾಕರೂಪಮಮರೇಡ್ಯಮ್ ।
ಕುಸುಮಶರವೈರಿಭಾಗ್ಯಂ ಲಸತು ಕಲಿಕ್ಷೋಭಹಾನಯೇ ಮನಸಿ ॥ ೧೯ ॥
ವಿನತಾಲಿವಿಭವದಾ ತೇ ಕಟಾಕ್ಷಧಾರಾ ವಿಭಾತಿ ಲೋಕಾಮ್ಬ ।
ಕುಸುಮಶರಶಾಸ್ತ್ರಸಿದ್ಧಿಪ್ರದಾ ಗಿರೀಶಸ್ಯ ಯೋಗಿಹೃದ್ದೀಪಾ ॥ ೨೦ ॥
ನಿತ್ಯಕುಮಾರೀ ಕಾಲೇ ಕಾಪಿ ಪಯೋಜಾಸನಾದಿನುತಿತುಷ್ಟಾ ।
ಶಿತಿಕಣ್ಠಭಾಗ್ಯರಕ್ಷಾಸೂತ್ರಂ ತನುತೇ ಸ್ವವೈಭವೈರ್ಹೃದ್ಯೈಃ ॥ ೨೧ ॥
ನಿಖಿಲನಿಗಮಾನ್ತಸಾರಂ ಯಾವದ್ರೂಪಂ ಮದಮ್ಬ ಪಶ್ಯಾಮಿ ।
ಸಾ ತು ನಿಯಮಿತದೂತಗಣೋ ದೂರೇ ಯಾತ್ಯಮಿತಕೋಪಕೋಪಕೋಽಪಿ ಯಮಃ ॥ ೨೨ ॥
ಶಿವವಾಮಭಾಗಭೂಷಾ ಕಾಚಿದ್ ಯೋಷಾ ನತಾಲಿಕೃತಭಾಷಾ ।
ತಾಟಙ್ಕರತ್ನಭೂಷಾರುಚಿಭರಕಾಷಾಯಿತಾತ್ಮಮುಖವೇಷಾ ॥ ೨೩ ॥
ವಾಣೀಶವಿನುತಮಹಿಮಾ ಪರಮಾ ಚ ಕಲಾ ಸತಾಂ ಸಮಾರಾಧ್ಯಾ ।
ಹಿಮಭೂಧರವರಕನ್ಯಾ ಕೃತಭೂಸುರಸೌಖ್ಯಸಂಪದಾರಾನ್ಮೇ ॥ ೨೪ ॥
ಶಿಥಿಲಿತಭವಭೀತಿತತಿಂ ಭೂಧರಕನ್ಯಾಮಹಂ ಸದೋಪಾಸ್ಯಾಮ್ ।
ಆನನ್ದಾದ್ವೈತಕಲಾಂ ಭಜೇ ಕಲಿಕ್ಷೋಭಹಾನಯೇ ನಿಭೃತಮ್ ॥ ೨೫ ॥
ನವರತ್ನಖಚಿತಭೂಷಾತತಿಭಾನೀರಾಜಿತಾಖಿಲಾಙ್ಗೀಂ ತಾಮ್ ।
ಕಾಮಪಿ ಕಲಾಮುಪಾಸೇ ಸತತಾನನ್ದೈಕಕನ್ದಲೀಂ ಜನನೀಂ ॥ ೨೬ ॥
ಮಮ ಹೃದಯಕೇಲಿಭವನೇ ವಿಲಸತಿ ತದ್ರೂಪಮಿಷ್ಟದಂ ಪುಂಸಾಮ್ ।
ಯದಿಹಾದರೇಣ ಶಂಭುರ್ಲೋಕತ್ರಯರಕ್ಷಣಾಯ ಚಕಮೇ ಚ ॥ ೨೭ ॥
ಗಙ್ಗಾಧರವರಭೂಷಾ ಭಙ್ಗಾಯಾಸ್ಮಾಕಮಖಿಲದುರಿತಾನಾಮ್ ।
ಶೃಙ್ಗಾರಸಾರವೇಷಾ ತುಙ್ಗಾನನ್ದಪ್ರದಾಸ್ತು ಜಗದಮ್ಬಾ ॥ ೨೮ ॥
ತೇನ ವಯಂ ಪರತನ್ತ್ರಾಃ ಯಚ್ಛಶಿಶೇಖರಮನಶ್ವರೈಶ್ವರ್ಯಮ್ ।
ಶಂಭೋರಿಹ ಲೋಕಾನಾಂ ಚಿನ್ತಾಮಣಿರಾದಿಮಃ ಸುಲಭ್ಯಶ್ಚ ॥ ೨೯ ॥
ನಯನಾಞ್ಜನಕಲಿಕೇಯಂ ಶಂಭೋರಮ್ಭೋಜಲೋಚನಾ ಚಪಲಾ ।
ಶ್ರುತಿಸುದತೀಸೂತ್ರಕಲಾ ಮಮ ಹೃದಿ ಭವನೇ ವಿಕಾಸಮುಪಯಾತಿ ॥ ೩೦ ॥
ಕುಚಕುಮ್ಭಾಙ್ಕಿತಶಂಭುಂ ಕರಪದ್ಮಾದೃತಪಯೋಜಮಣಿಮಾಲಾಮ್ ।
ನತಜನಭರಣಾಸಕ್ತಾಮಮ್ಬಾಮಮ್ಭೋಜಲೋಚನಾಂ ನೌಮಿ ॥ ೩೧ ॥
ಬಾಲಮರಾಲೀಲೀಲಾಂ ಬಾಲಾಂ ಬಲಿವೈರಿವಾಸವಾದಿನುತಾಮ್ ।
ಜಗದಮ್ಬಾಮಾಲಮ್ಬಾಂ ನಿಬಿಡನಿತಮ್ಬಾಂ ಹಿತಾರ್ಥಮವಲಮ್ಬೇ ॥ ೩೨ ॥
ಧ್ಯಾನೈರ್ವೇದ್ಯಂ ತತ್ತ್ವಂ ಮೀನಧ್ವಜವೈರಿಮಹಿತಭಾಗ್ಯಂ ತತ್ ।
ಭೂಧರಕನ್ಯಾರೂಪಂ ವಿಹರತಿ ಮಮ ಮಾನಸೇ ಹತತಮಸ್ಕೇ ॥ ೩೩ ॥
ಮುನಿಜನಮಾನ್ಯಚರಿತ್ರಾ ನಾನಾದೇಶೇಷು ಲಸಿತಬಹುಪೀಠಾ ।
ಸರ್ವಸ್ವಸಂಪ್ರದಾಯಃ ಶಂಭೋರಮ್ಬಾ ಮಮಾಞ್ಜಲಿಪ್ರೀತಾ ॥ ೩೪ ॥
ವಾಚಾಮಗೋಚರಂ ತತ್ ಪುರಾತನೀನಾಮಪೀಹ ನತಸುಲಭಮ್ ।
ಗಿರಿಜಾರೂಪಂ ತೇಜೋ ಭಾತು ಗಿರೀಶಾರ್ಧಮಾದರಾದಕ್ಷ್ಣೋಃ ॥ ೩೫ ॥
ಮನ್ದಸ್ಮಿತೇನ ಮಧುರಾ ಮಧುರಾಪೀಠಸ್ಥಿತಾ ಚ ಹರಭಾಗ್ಯಮ್ ।
ಶೀತಲನಯನಾಸಾರೈಃ ಸಿಞ್ಚತಿ ಮಾಮಞ್ಜಸಾ ಜಗನ್ಮಾತಾ ॥ ೩೬ ॥
ಭಾತಿ ಪುರನ್ಧ್ರೀ ಶಂಭೋರಿಹ ಪುರತೋಽಸ್ಮಾಕಮಾತ್ತಸುಮಬಾಣಾ ।
ಸುಮಬಾಣವೈರಿಚಿತ್ತಾಕರ್ಷಣಕುಲಿಕಾ ಚ ಚಿನ್ಮಯೀ ಪರಮಾ ॥ ೩೭ ॥
ಲೋಚನಪಾತೇ ಶೀತಾ ಪಾತಾ ಪಾದಾಮ್ಬುಜಾತ್ತಚಿತ್ತಾನಾಮ್ ।
ಶ್ವೇತಾ ಚ ಮನ್ದಹಸಿತೇ ಶ್ವೇತಾರಣ್ಯಸ್ಥಿರಪ್ರದೀಪಕಲಾ ॥ ೩೮ ॥
ಪುರಮಥನಮಹಿಷಿ ಚಿತ್ತೇ ಕುರು ಪದವಿನ್ಯಾಸಮಾತ್ತಕುತುಕಾ ತ್ವಮ್ ।
ತೇನೈವಾಹಂ ಧನ್ಯಃ ಕುರವೈ ಪುರವೈರಿಪಾದಪೂಜಾಂ ಚ ॥ ೩೯ ॥
ಶತಮಖಮುಖಸುರವನ್ದ್ಯೇ ಕಾನ್ತಾಶ್ಲೇಷೇಣ ಪುಲಕಿತಾಙ್ಗಿ ತ್ವಾಮ್ ।
ಮನಸಾ ಸ್ಮರಾಮಿ ದಯಸೇ ತೇನೈವಾಹಂ ಕಲೌ ಯುಗೇ ಧನ್ಯಃ ॥ ೪೦ ॥
ಪುರಮಥನಸ್ಯಾಪಿ ವಪುಃ ಪುನತೀಮಮ್ಬಾಂ ನಿಜಾಕ್ರಮಣಶಕ್ತ್ಯಾ ।
ಚಿರಪುಣ್ಯದರ್ಶನೀಯಾಂ ಸ್ಮರಾಮಿ ಮನಸಾ ಪರಾಂ ಸುತಾಮದ್ರೇಃ ॥ ೪೧ ॥
ಕುಙ್ಕುಮಕಣಲಸಿತಾಙ್ಗೀಂ ಕುವಲಯದೃಶಮಬ್ಜಲೋಚನಾಂ ವನ್ದೇ ।
ಲೋಚನಜಿತಸಾರಙ್ಗೀಂ ಭವಮಹಿಷೀಮರ್ಧಚನ್ದ್ರಶೇಖರಿಣೀಮ್ ॥ ೪೨ ॥
ನಾನಾಲೀಲಾಖೇಲಾಂ ಹರರತಿಲೋಲಾಂ ಹಿತೈಕಪರಿಶೀಲಾಮ್ ।
ವನ್ದೇ ಬಾಲಾಂ ಭೂಮಿಧರಪತಿಕನ್ಯಾಂ ಸುರೇಶಬಹುಮಾನ್ಯಾಮ್ ॥ ೪೩ ॥
ಸರಸಿಜಮೃದುಲಪದಾಬ್ಜಂ ಪದಾಬ್ಜವಿನ್ಯಾಸಧನ್ಯಭೂಭಾಗಮ್ ।
ಮನಸಿ ನಯನೇ ಚ ವಾಚಿ ಸ್ಫುರತು ಮಹೇಶಾನಮಾನ್ಯಸಾಮ್ರಾಜ್ಯಮ್ ॥ ೪೪ ।
ಶಂಭೋಃ ಕುಟುಮ್ಬಿನೀ ಸಾ ಮಧುಕರಮಾಲಾಲಸತ್ಸ್ವಧಮ್ಮಿಲ್ಲಾ ।
ಸೌಭಾಗ್ಯದಾ ಸದಾ ಮೇ ಲಸತು ಕೃಪಾಪೂರಲಾಲಿತಾಪಾಙ್ಗಾ ॥ ೪೫ ॥
ಊರೀಕೃತಪುರಮಥನಾ ದೂರೀಕೃತದುಷ್ಟರಾಕ್ಷಸಾದಿಗಣಾ ।
ನಾರೀ ಪರಮಾ ಸೈಷಾ ಭೇರೀಭಾಸ್ವತ್ಕರೋರುಹಾ ಭಾತಿ ॥ ೪೬ ॥
ನಿಖಿಲೋಪನಿಷದ್ವಿದ್ಯಾಸಾರಂ ಸಂಸಾರಬನ್ಧಮೋಹಹರಮ್ ।
ಹರಮಾನ್ಯಂ ತತ್ ತೇಜೋ ಭಾತಿ ಸುರೇಶಾದಿರಕ್ಷಣೋಪಾಯಮ್ ॥ ೪೭ ॥
ಶಂಭೋರುತ್ಸವಧಾರಾ ನವನವಹಾರಾ ಸಮಾಶ್ರಿತಾಧಾರಾ ।
ಸಂವಿದ್ರೂಪಾರೂಪಾ ಕೋಪಾರ್ದಿತದುರ್ಜನಾ ಚ ಸಾ ಜಯತಿ ॥ ೪೮ ॥
ಪುಣ್ಯಸಮುದಾಯಸರಣಿಂ ಪುರಹೂತಮುಖೈರಭಿಷ್ಟುತಾಮಮ್ಬಾಮ್ ।
ಭಜ ಮಾನಸ ಭೋ ನಿತ್ಯಂ ನಿತ್ಯಾನನ್ದಾದ್ವಯಾತ್ಮಿಕಾಂ ದೇವೀಮ್ ॥ ೪೯ ॥
ಜೀವಿತಸರ್ವಸ್ವಮಿದಂ ಶಂಭೋರಮ್ಭೋಜಲೋಚನಂ ರತ್ನಮ್ ।
ಯಚ್ಚಿನ್ತನೇನ ಧನ್ಯಾ ವೈಮಾನಿಕವನ್ಯಕಲಿತವಿಶ್ರಾಮಾಃ ॥ ೫೦ ॥
ಅನ್ತಸ್ತಮೋನಿಹನ್ತ್ರೀ ಸಂಧ್ಯಾಪೂರ್ವಾ ವಿಭಾತಿ ಗಿರಿತನಯಾ ।
ಉದಯೇ ಯಸ್ಯಾ ವಿದುಷಾಂ ವಿಲಸನ್ತಿ ಕರಾಮ್ಬುಜಾನಿ ನಕ್ತಮಪಿ ॥ ೫೧ ॥
ಕುಲಗಿರಿನಾಥನೂಜೇ ಲೋಕಾಮ್ಬ ತ್ವತ್ಪದಾಮ್ಬುಜಂ ಜನ್ತುಃ ।
ಭಕ್ತ್ಯಾ ಸ್ಮರತಿ ಹೃದಿ ಸ್ವೇ ತತ್ಪದಯುಗಲಂ ವಹನ್ತಿ ಶಿರಸಾನ್ಯೇ ॥ ೫೨ ॥
ಮಹಿಷಾಸುರಮರ್ದನಿ ತೇ ಭೀಮಂ ರೂಪಂ ತದಸ್ತು ರಿಪುನೇತ್ರೇ ।
ಸಾದರಕಟಾಕ್ಷಾಪಾತಂ ಪುರತೋ ಮಮ ಭಾತು ಸೌಮ್ಯರೂಪಂ ತೇ ॥ ೫೩ ॥
ಆದೃತಶುಕಾದಿವಾಣೀ ವಾಣೀಶಸುರೇಶಹರಿಮುಖೈಃ ಸ್ತುತ್ಯಾ ।
ಸುಮಲಸಿತಮೃದುಲವೇಣೀ ವಿಲಸತಿ ಕೈಲಾಸಪೀಠಿಕಾಮಧ್ಯೇ ॥ ೫೪ ॥
ದಯಮಾನಮಾನಸಂ ತತ್ ಸ್ಮಯಮಾನಮುಖಂ ನಿರೀಕ್ಷ್ಯ ತತ್ತೇಜಃ ।
ನಿಯಮಾದಿವಿಧುತಪಾಪಾ ವಯಮಾನನ್ದಾಶ್ರುಝರಪರೀತಾಙ್ಗಾಃ ॥ ೫೫ ॥
ಲಲಿತಗತಿಂ ಸುರವಿನುತಿಂ ಲಸಿತಮತಿಂ ಕಿಂಚ ಯತಿಮನೋಜುಷ್ಟಾಮ್ ।
ತವ ಮೂರ್ತಿಮಮ್ಬ ಪಾರ್ವತಿ ಕದಾ ನು ಪಶ್ಯನ್ ನಯಾಮಿ ಕಲಿಕಾಲಮ್ ॥ ೫೬ ॥
ಕುರುತೇ ಮನಸಿ ಮದೀಯೇ ವಿಹಾರಲೀಲಾಂ ನಗೇನ್ದ್ರವರಕನ್ಯಾ ।
ತಾವದ್ ವಿಲಸತಿ ಚಿನ್ಮಯತತ್ತ್ವಂ ತತ್ತ್ವಾರ್ಥಿಭಿಃ ಸಮಾರಾಧ್ಯಮ್ ॥ ೫೭ ॥
ಶಂಕರಮಿಶ್ರಿತದೇಹಂ ಶ್ರುತಿಸುದತೀಮೌಲಿಭೂಷಣಂ ತೇಜಃ ।
ಮುಖಜಿತಚನ್ದ್ರಂ ತನ್ಮೇ ಪ್ರಸೀದತು ಕ್ಷಿಪ್ರನಮ್ರಪಾಪಹರಮ್ ॥ ೫೮ ॥
ವಿಧುಮೌಲಿವಿಭ್ರಮಶ್ರೀರ್ವಿದ್ರುಮರುಚಿಸೋದರಾತ್ಮತನುಕಾನ್ತಿಃ ।
ಸಿಞ್ಚತ್ಯಮೃತಮಿಹಾಕ್ಷ್ಣೋಶ್ಚಿರಪುಣ್ಯವಶಾದಿಹಾಸೇವ್ಯಮ್ ॥ ೫೯ ॥
ಪರಕೈವಲ್ಯಾನನ್ದಪ್ರಾಪ್ತಿಸ್ತೇಷಾಂ ಧ್ರುವಂ ಹಿ ತನುಭಜಾಮ್ ।
ಯೇಷಾಂ ಚಿತ್ತೇ ವಿತ್ತಾಧಿಪಮುಖಸೇವ್ಯಾ ವಿಹಾರಭಾಗ್ ಗೌರೀ ॥ ೬೦ ॥
ಗೌರಿ ತವ ಪಾದಪದ್ಮಂ ಶಶಧರಕಲಯಾಙ್ಕಿತಾತ್ಮಮೌಲಿತಲೇ ।
ಮಮ ಚಾನ್ತಿಮಪ್ರಯಾಣೇ ವಿಲಸತು ನೇತ್ರೇ ಸ್ಮೃತೌ ಚ ಹೃದಿ ವಾಚಿ ॥ ೬೧ ॥
ಶಂಕರಸುಕೃತಸಮೂಹಾ ಕಿಂಕರದೇವಾದಿರಙ್ಕವೀಣಾ ಚ ।
ಶಙ್ಕಾದಿಮೋಹಹನ್ತ್ರೀ ಲಸತು ಮಮಾಕ್ಷ್ಣೋಃ ಶಶಾಙ್ಕಮೌಲಿತಲಾ ॥ ೬೨ ॥
ಕುಚಕುಮ್ಭಾಶ್ಲೇಷವಶಾದಾಹೃತಹರಚಿತ್ತವೃತ್ತಿರಮರಾಣಾಮ್ ।
ಮನುಜಾನಾಮಪಿ ನಿತ್ಯಂ ದೈವತಮೇಷಾ ಚಕಾಸ್ತಿ ಗಿರಿಕನ್ಯಾ ॥ ೬೩ ॥
ಪರಿತುಷ್ಟಾ ಹರಭಜನೇ ನಿಜಗಲಕಲಗೀತಿವಿಜಿತಪರಪುಷ್ಟಾ ।
ಸೂಚಿತಸುರರಿಪುಕಷ್ಟಾ ಪರಮಕಲತ್ರಂ ಹರಸ್ಯ ತಜ್ಜಯತಿ ॥ ೬೪ ॥
ಸತತಾಲೋಲಿತದಯಯಾ ದೃಶಾಮ್ಬ ಮಾಂ ಪಶ್ಯ ಸರಸಿಜಾತರುಚಾ ।
ಪರಮಶಿವೇ ನಿರ್ವೃತ್ತಿಮಹಮವಾಪ್ಯ ತೇನೈವ ತಾವಕೋ ಭಕ್ತಃ ॥ ೬೫ ॥
ಸರಸಕವಿತಾ ಚ ಸಂಪಚ್ಚಾಕ್ಷೋಭ್ಯಂ ಮಣ್ಡಲಾಧಿಪತ್ಯಂ ಚ ।
ನನು ಜಾಯತೇ ನೃಣಾಂ ಕಿಲ ತವ ವೀಕ್ಷಾವೈಭವೇನ ಭವಕಾನ್ತೇ ॥ ೬೬ ॥
ತ್ವನ್ಮೌಲಿಚನ್ದ್ರವಿಸೃಮರಕರಧಾರಾಭಿಃ ಕೃತಾಭಿಷೇಕಾ ತ್ವಮ್ ।
ದ್ವಿಗುಣಿತದಯಾರ್ದ್ರಹೃದಯಾ ಪರಿಪುಷ್ಯಸಿ ಮಙ್ಗಲಾನಿ ಭಕ್ತಾನಾಮ್ ॥ ೬೭ ॥
ಗೌರಿ ನಗಾಧಿಪತನಯೇ ಶಶಿಶೇಖರದಿವ್ಯಮಹಿಷಿ ಮಾಂ ಪಾಹಿ ।
ಇತಿ ಕಿಲ ಕಲಿತಾಞ್ಜಲಯಃ ಸೇವನ್ತೇ ಸುರನರಾದಯೋ ನಿತ್ಯಮ್ ॥ ೬೮ ॥
ಪರಮೇಶ್ವರದಯಿತೇ ತ್ವತ್ಪದಪದ್ಮಯುಗಾರ್ಚನಾರತಾಃ ಸನ್ತಃ ।
ಕಲಯನ್ತಿ ಗಾಙ್ಗಸಲಿಲಂ ಪುಷ್ಪಾಣ್ಯಪಿ ಭಕ್ತಿಭಾರಸಂಪನ್ನಾಃ ॥ ೬೯ ॥
ಶೃಙ್ಗಾರಾಗಮಸಾರಾ ತವ ಲೀಲಾ ಜಯತಿ ಚೇತಸಿ ಭವಸ್ಯ ।
ಅತ ಏವ ಸ್ವಾಙ್ಗೇ ತ್ವಾಮಾರೋಪಯದಾಶು ವಿಜಿತಕಾಮೋಽಪಿ ॥ ೭೦ ॥
ನನು ಮಾತರಮ್ಬ ಮನ್ದಸ್ಮಿತಲೀಲಾದಿಕಮುದೀಕ್ಷ್ಯ ಶಶಿಮೌಲಿಃ ।
ವಿರಹಾಸಹಿಷ್ಣುರನಿಶಂ ವಹತಿ ತ್ವಾಂ ನೈಜವಪುಷಿ ಸಾನನ್ದಮ್ ॥ ೭೧ ॥
ತವ ಶಂಕರಿ ಭೂಷೋರಗಲಸದುರುಮಣಿದಮ್ಭತಃ ಶಿವಃ ಕಾಲೇ ।
ನೀರಾಜನಮಾತನುತೇ ಭಕ್ತಹಿತಾರ್ಥೀ ಸುಮಙ್ಗಲಾವಾಪ್ತ್ಯೈ ॥ ೭೨ ॥
ತವ ಪಾದಭಕ್ತಿರಮ್ಬ ಕ್ಷಿತಿಧರತನಯೇ ತನೋತಿ ಕವಿಸೂಕ್ತಿಮ್ ।
ಅಮರಶ್ರಿಯಮಥ ಸಹಸಾ ಧರಾಧಿಪತ್ಯಾದಿಕಂ ನೃಣಾಮ್ ॥ ೭೩ ॥
ಆಲೋಕನೇನ ಮಾತಸ್ತವ ಮನುಜಾನಾಂ ಹೃದಿ ಸ್ಥಿತಂ ಚ ತಮಃ ।
ಗಲತಿ ಹಠಾತ್ ಪಾಪಾಲಿಃ ಸಹಸಾಮರಲೋಕಸಂಪದಾಭಾತಿ ॥ ೭೪ ॥
ಯಃ ಸೂಕ್ತಿಮಾಲಿಕಾಭಿಸ್ತವ ಪಾದಯುಗಂ ಸಮರ್ಚಯತಿ ಜನ್ತುಃ ।
ತತ್ಪದಯುಗ್ಮಂ ತು ಸುರಾಃ ಕಲ್ಪಮಹೀರುಹಸುಮೈಶ್ಚ ಗಾಙ್ಗಜಲೈಃ ॥ ೭೫ ॥
ಪಾರ್ವತಿ ತವ ಮುಖಕಮಲಾಲೋಕನತೋ ಗಲಿತಸಂಶಯಾಃ ಸನ್ತಃ ।
ಕೈವಲ್ಯರೂಪಕನ್ದಲಮಾಸಾದ್ಯ ವಿಧಾನತೋ ಜನಾ ಭಾನ್ತಿ ॥ ೭೬ ॥
ನನ್ವದ್ರಿಸುತೇ ಮನ್ದಸ್ಮಿತಕಾನ್ತಿಮಿಷಾತ್ ತ್ವದೀಯಕೀರ್ತಿಝರೀ ।
ದಿಕ್ಸೌಧಾಞ್ಚಲಭಾಗೇ ವಿಲಸತಿ ನತರಕ್ಷಣೋತ್ಥಿತಾ ಜಗತಿ ॥ ೭೭ ॥
ಕರಣವಿಹೀನಾನ್ ಮೂಢಾನ್ ನರಾನ್ ಸುರಾನ್ ಪಾಸಿ ಯೋಗಿನೋಽಪಿ ತಥಾ ।
ಲೋಕಾಮ್ಬ ಭಾವನಾದ್ಯೈಃ ಕಾಲೇ ಕಾಲೇ ನಗೇನ್ದ್ರತನಯೇ ತ್ವಮ್ ॥ ೭೮ ॥
ನಗರಾಜವಂಶಸಂಪದ್ ದಿವ್ಯಾ ಕಾಚಿದ್ ವಿಭಾತಿ ಹರಮಾನ್ಯಾ ।
ಗಣಪತಿಮಯೂರವಾಹೌ ಯತ್ತನಯೌ ಲೋಕಸಂಪದೇ ಜಯತಃ ॥ ೭೯ ॥
ಪ್ರತಿದಿನಕಲಿತಾಮೇನಾಮಞ್ಜಲಿಕಲಿಕಾಮಗಾಧಿಪತನೂಜೇ ।
ಅಙ್ಗೀಕುರುಷ್ವ ದಯಯಾ ತೇನೈವ ವಯಂ ಕೃತಾರ್ಥಾಃ ಸ್ಮಃ ॥ ೮೦ ॥
ಕಲ್ಯಾಣಕೇಲಿಭಾಜನಮಿಹ ಶರ್ವಸ್ಯಾಪ್ರೇಮಯತುಷ್ಟಿಕಲಾ ।
ಚನ್ದ್ರಕಲಾವಿಲಸಿತನಿಜಮೌಲಿತಲಾ ಭಾತು ಮಾನಸೇ ಕಾಪಿ ॥ ೮೧ ॥
ವಿನತಜನಬನ್ಧಹಾರಿಣಿ ಕಲ್ಯಾಣಿ ಪುರಾರಿಸುಕೃತಪರಿಪಾಕೇ ।
ಬಧ್ನೀಮೋ ವಯಮಞ್ಜಲಿಮನುದಿನಮಮಿತಾತ್ಮಚಿತ್ಸುಖಾವಾಪ್ತ್ಯೈ ॥ ೮೨ ॥
ಕಂದರ್ಪಾಗಮಸಾರಾ ಲಸದುರುಹಾರಾ ಚ ಮಙ್ಗಲಾಕಾರಾ ।
ತಾರಾಧಿಪವಾಸಲಸನ್ಮೌಲಿತಲಾ ಭಾತು ಮಾನಸೇ ದೇವೀ ॥ ೮೩ ॥
ನತಹಂಸಾವಲಿರೇಷಾ ಗತಿಜಿತಹಂಸಾವಲೀ ಚ ಗಿರಿತನಯಾ ।
ಶಿಶಿರೀಕರೋತಿ ಲೋಚನಮಾಲಾಮಾಲಾಪವಿಜಿತಶುಕವಾಣೀ ॥ ೮೪ ॥
ಶುಕವಾಣೀಸದೃಶೀಯಂ ಮಮ ವಾಣೀ ಹರಕುಟುಮ್ಬಿನೀನಿಕಟಮ್ ।
ನ ಖಲು ಕರೋತಿ ಪ್ರಾಪ್ತಾ ಮುದಮಸ್ಯಾ ಮಧುರಮನ್ದಹಾಸಜುಷಃ ॥ ೮೫ ॥
ಶಶಿಶಕಲಕಲಿತಮೌಲಿಸ್ತ್ರಿಲೋಚನಾ ಕುಙ್ಕುಮಚ್ಛಾಯಾ ।
ಪಾತಿ ಜನನೀ ಜನಾನಾಂ ಕಿಂನರಯಕ್ಷಾದಿಗೇಯಮಾಹಾತ್ಮ್ಯಾ ॥ ೮೬ ॥
ನಿಜತನುತೇಜಃಪ್ರಸರೌರಿನ್ದುಕಲೋತ್ತಂಸಲಸಿತಮೌಲಿತಲಾ ।
ಪೂರಯತಿ ಲೋಕಮಾತಾ ತ್ರಿಭುವನಮಿದಮಾತ್ತಕೌತುಕಾ ಪೀಠೇ ॥ ೮೭ ॥
ತವ ಮಾತರಙ್ಘ್ರಿಸರಸಿಜಭಕ್ತಿವಿಶೇಷಾತ್ತವೈಭವಾ ಹಿ ನರಾಃ ।
ವೈಮಾನಿಕಪದವೀಷ್ವಪ್ಯಾಶಾರಹಿತಾ ವಿಶನ್ತಿ ತೇ ಧಾಮ ॥ ೮೮ ॥
ತವ ಹಾರಮಣಿಪ್ರಭಯಾ ಪಾರ್ಶ್ವಸ್ಥಿತಶಂಭುಚನ್ದ್ರಮೌಲಿಕಲಾ ।
ಸಂಪ್ರಾಪ್ತಪೂರ್ಣಮಣ್ಡಲಶೋಭಾ ಸತತಂ ವಿರಾಜತೇ ಮಾತಃ ॥ ೮೯ ॥
ಅರ್ಧಾಙ್ಗಶಂಭುಭೂಷಣಫಣಾಮಣಿಪ್ರಚುರಕಾನ್ತಿವೀಚೀಭಿಃ ।
ತವ ಹಸ್ತಹರಿಣಪೋತಃ ಶಶ್ವದ್ ಧಾವತಿ ನವೀನತೃಣಬುದ್ಧ್ಯಾ ॥ ೯೦ ॥
ನಾಥಕಲಾನುಗುಣಂ ತೇ ರೂಪಂ ಜಗದಮ್ಬ ಸರ್ವಬುಧವನ್ದ್ಯಮ್ ।
ಪರ್ವತರಾಜಸುತೇ ನಃ ಶ್ರೇಯಃಶ್ರೇಣ್ಯೈ ತದಸ್ತು ಕಲಿತದಯಮ್ ॥ ೯೧ ॥
ಕೈರಾತೋ ವೇಷೋ ವಾ ಭಿಕ್ಷಾಟನರೂಪಮನ್ಯದಪಿ ಶಂಭೋಃ ।
ಸರ್ವಂ ತತ್ ತ್ವತ್ಕಲಯಾ ಲಸಿತಂ ಭಾತ್ಯತ್ರ ಭೂಧರೇನ್ದ್ರಸುತೇ ॥ ೯೨ ॥
ತ್ರಿಪುರವಿಜಯಶ್ಚ ಮಾತಸ್ತ್ವತ್ಕೋಪಾದರಿಷು ಚನ್ದ್ರಮೌಲೇಸ್ತು ।
ಆಸೀತ್ ಸುಲಭಕಲಃ ಕಿಲ ತೇ ಕೀರ್ತಿಃ ಕೀರ್ತಿತಾ ದಿಶಾಂ ವಲಯೇ ॥ ೯೩ ॥
ತವ ಪಾದಾಮ್ಬುಜಸೇವಾದರೇಣ ಮಾತಸ್ತವ ಸ್ತುತ್ಯಾಮ್ ।
ಯೈಃ ಕಲಿತಾ ಮತಿರೇಷಾಂ ಚರಣೌ ಪೂಜ್ಯೌ ಹಿ ನಾಕಿನಾಂ ವೃನ್ದೈಃ ॥ ೯೪ ॥
ತವ ಪಾದಭಕ್ತಿಭೂಮ್ನಾ ಪಾಣ್ಡಿತ್ಯಂ ಸರ್ವಸಂಮಾನ್ಯಮ್ ।
ಕೀರ್ತಿಂ ಚ ಸುಖಂ ಲಭತೇ ಭಕ್ತಸ್ತೇ ಮಾತರಚಲಸುತೇ ॥ ೯೫ ॥
ಪರಿಫುಲ್ಲಕಮಲಸುಷಮಾಸಂಮಾನ್ಯೈಸ್ತೇ ಕಟಾಕ್ಷೈರ್ಯಃ ।
ಭಾತ್ಯಙ್ಕಿತೋ ಧರಣ್ಯಾಂ ಸ ತು ಧನದೋ ವಾ ಮಹೇನ್ದ್ರೋ ವಾ ॥ ೯೬ ॥
ಕಮಲಾಕ್ಷಮುಖೈರ್ದೇವೈಃ ಫಕ್ಕೃತಗೀರ್ಭಿಸ್ತವ ಸ್ತುತೌ ಮಾತಃ ।
ಕಥಮಮ್ಬ ಮಾನುಷೋಽಹಂ ಸ್ತೋತುಂ ತ್ವಾಂ ಶಕ್ನುಯಾಂ ಮನ್ದಃ ॥ ೯೭ ॥
ತವ ಪಾದಪದ್ಮಭಕ್ತಿರ್ಧರಣಿಧರೇನ್ದ್ರಸ್ಯ ಕನ್ಯಕೇ ಕಾಲೇ ।
ವಾಚಾಲೀಕುರುತೇ ಮಾಂ ಮನ್ದಮಪಿ ಸ್ತೋತುಮಾದರಾಜ್ಜನನಿ ॥ ೯೮ ॥
ಜನನಿ ವಿನಾ ಪುಣ್ಯಾನಾಂ ಖಣ್ಡಂ ತ್ವಾಮೀಕ್ಷಿತುಂ ನಯನೈಃ ।
ಶಕ್ತಾ ನೈವ ಹಿ ಮನುಜಾಸ್ತೇ ರೂಪಂ ತತ್ ಪರಂ ಜಯತಿ ॥ ೯೯ ॥
ನಾಕಿನಗರಾಮ್ಬುಜಾಕ್ಷೀನಿಟಿಲಸುಮಾಮೋದವಾಸಿತಂ ಮಾತಃ ।
ತವ ಚರಣಪಙ್ಕಜಂ ಮೇ ಕೃನ್ತತಿ ಮೋಹಾದಿಕಂ ಹೃದಯೇ ॥ ೧೦೦ ॥
ಪರಮೇಶ್ವರಸ್ಯ ದಯಿತಾಪಾದಪಯೋಜಾತಪಾಂಸವೋ ಧನ್ಯಾಃ ।
ಕೃತಪುಣ್ಯಾನಾಂ ಮೂರ್ತಿಷು ಭಾಸನ್ತೇ ಸರ್ವಶುದ್ಧಯೇ ಹ್ಯೇತೇ ॥ ೧೦೧ ॥
ತವ ಪಾದಜಲಜರೇಣುಸ್ಪರ್ಶನಸಂಜಾತವೈಭವಾ ಮನುಜಾಃ ।
ಧಿಕ್ಕೃತನಾಕೇಶಪದಾಸ್ತವ ಸಾರೂಪ್ಯಾದಿಸಂಪದುಲ್ಲಸಿತಾಃ ॥ ೧೦೨ ॥
ಜನನಿ ತವಾಲಕರತ್ನಪ್ರಭಾಪ್ರರೋಹೈರ್ಗಿರೀಶಶಿರಸಿ ಕಲಾ ।
ಚಾನ್ದ್ರಮಸೀ ಸಾ ಭಜತೇ ಜಪಾಪ್ರಭಾಲೇಪನಂ ರಮ್ಯಮ್ ॥ ೧೦೩ ॥
ಕಾಞ್ಚ್ಯಾಂ ವಾ ಕೈಲಾಸೇ ಮೇರೌ ವಾ ಭಕ್ತಮಾನಸಾಮ್ಭೋಜೇ ।
ಪರಮಶಿವವಾಮಭಾಗೇ ರಾಜತಿ ಕಾಲೇಽಮ್ಬಿಕಾ ಖ್ಯಾತಾ ॥ ೧೦೪ ॥
ಧ್ಯಾನಪರೀವಾಹಾಙ್ಕುರಕಲಿತಂ ತೇ ಕುಸುಮಕೋಮಲಂ ಹಿ ವಪುಃ ।
ಯೋಗಿಹೃದಯಾಮ್ಬುಜಾನ್ತರ್ಜನನಿ ವಿಭಾತಿ ಸ್ಫುಟಾಕಾರಮ್ ॥ ೧೦೫ ॥
ಯೇಷಾಮಞ್ಜಲಿಕಲಿಕಾಲಸಿತಂ ಕರಯುಗಮಿದಂ ಕಾಲೇ ।
ನ ಪ್ರೇರಯತಿ ಕೃತಾನ್ತೋ ನಿಜದೂತಾನ್ ತೇಷು ತೇ ಪರಂ ಗುರವಃ ॥ ೧೦೬ ॥
ಕಾರುಣ್ಯಾಕುಲಿತಹೃದಾ ತಯಾಮ್ಬಯಾ ಭಕ್ತಪಾಪಾಲಿಃ ।
ನ ಹಿ ಗಣ್ಯತೇ ಗಿರೀಶೋಽಪ್ಯಸ್ಮಿನ್ ಸತತಂ ಕೃತಪ್ರಸಾದಶ್ಚ ॥ ೧೦೭ ॥
ಜಗತಃ ಪಿತರಾವೇತೌ ರಕ್ಷಾಹೇತೋರ್ನಿಜಾಙ್ಘ್ರಿಭಕ್ತಾನಾಮ್ ।
ರಾಜತ ಇಹ ಬಹುರೂಪೌ ಜನದೃಕ್ದೃಶ್ಯೌ ಚ ದೇವವನ್ದ್ಯೌ ಚ ॥ ೧೦೮ ॥
ಸಾ ಭಗವತೀ ಪುರಸ್ತಾದಾಸ್ತಾಂ ನಃ ಶಾಂಕರೀ ಜನನೀ ।
ಯದ್ವೀಕ್ಷಾಲವಹೀನಾಃ ಪೀಡ್ಯನ್ತೇ ತಪ್ತಗಾತ್ರಾಶ್ಚ ॥ ೧೦೯ ॥
ಜಾತಪರಾಕ್ರಮಕಲಿಕಾ ದಿಶಿ ದಿಶಿ ಕಿಂನರಸುಗೀತನಿಜಯಶಸಃ ।
ಧನ್ಯಾ ಭಾನ್ತಿ ಹಿ ಮನುಜಾ ಯದ್ವೀಕ್ಷಾಲವವಿಶೇಷತಃ ಕಾಲೇ ॥ ೧೧೦ ॥
ವಾಚಾಂ ಸನಾತನೀನಾಂ ವಿಶ್ರಾನ್ತಿಸ್ಥಾನಕಂ ಹಿ ಯತ್ ಸ್ಥಾನಮ್ ।
ಕರುಣಾಪಾಲಿತಲೋಕತ್ರಿತಯಂ ತದ್ ಭಾತಿ ಸುಕೃತಿಹೃದಯತಟೇ ॥ ೧೧೧ ॥
ಶ್ರುತಿಮೌಲಿಭೂಷಣಂ ತೇ ಪದಾರವಿನ್ದಂ ಜನಃ ಕಾಲೇ ।
ಭಕ್ತ್ಯಾ ಪ್ರಣಮ್ಯ ಬಹುಜನನಗರೇ ಸಿಂಹಾಸನೇ ಲಸತಿ ॥ ೧೧೨ ॥
ಶ್ಯಾಮಾ ಚನ್ದ್ರಕಲೋಜ್ಜ್ವಲಮೌಲಿರಿಯಂ ಶಾಂಕರೀ ಕಾಲೇ ।
ಧ್ಯಾನಜಪಾದೌ ಪುಣ್ಯಾತ್ಮನಾಂ ಹೃದಿ ಪ್ರಸ್ಫುರತ್ಯಮಲೇ ॥ ೧೧೩ ॥
ತ್ರಿಭುವನರಕ್ಷಾಹೇತೋರಙ್ಗೀಕೃತಗಿರಿಶದೇಹಯಷ್ಟಿರಿಯಮ್ ।
ರಾಜತಿ ರಾಜತಪೀಠೇ ತ್ರಿಭುವನಸುನ್ದರರುಚಾತ್ತಬಹುಕೋಣೇ ॥ ೧೧೪ ॥
ನಿಶ್ಚಲದೀಪಕಲಾ ಸಾ ರಕ್ಷಿತಮರುದೌಷ್ಣ್ಯಹೀನನಿಜರೂಪಾ ।
ಶೂಲಿಸ್ನೇಹೋಲ್ಲಸಿತಾ ಜನಹೃತ್ತಮಸಾಂ ನಿಹನ್ತ್ರೀ ಚ ॥ ೧೧೫ ॥
ನಿಗಮಾನ್ತಮಧ್ಯವೀಥೀಮಹಾಮಣಿಃ ಸರ್ವಮೂಲ್ಯಾ ಚ ।
ಭಕ್ತಿಕ್ರಯಾ ಚ ಕಾಲೇ ಕೇಯೂರಮಣಿಶ್ಚ ಶೂಲಿನೋ ಜಯತಿ ॥ ೧೧೬ ॥
ಕಲ್ಯಾಣಸಂತತೇರ್ಯಾ ಕಲಿತಾ ಜನ್ಮಸ್ಥಲೀತಿ ವಿಬುಧೇಶೈಃ ।
ನಃ ಕಲ್ಯಾಣಾಯ ಸ್ಯಾತ್ ಸಾ ಗೌರೀ ಮೇದುರಾ ದಯಯಾ ॥ ೧೧೭ ॥
ತವ ಕೇಶಕಾನ್ತಿವಿಸರೈ ರಾಹೋಃ ಶಙ್ಕಾ ಶಿರಃಸ್ಥೇನ್ದೋಃ ।
ಗ್ರಸನಾದಿದೈನ್ಯಹಾರಿಪ್ರಭಾವಮಾಲೋಚ್ಯ ತೇ ಸೌಮ್ಯಃ ॥ ೧೧೮ ॥
ಮನ್ದಸ್ಮಿತರುಚಿಭರಿತೇ ಪುರಃಸ್ಥಲೇ ತೇಽರ್ಚನಾಹೇತೋಃ ।
ನ್ಯಸ್ತಾನಿ ಹಿ ಪುಷ್ಪಾಣಿ ಭ್ರಮರಾಕ್ಷೇಪಾತ್ ಸ್ಫುಟಂ ಭಾನ್ತಿ ॥ ೧೧೯ ॥
ಕ್ಷೀರಸಹೋದರಮನ್ದಸ್ಮಿತರುಚಿನಿರಸಿತನತಾಲಿಹೃತ್ತಿಮಿರಾ ।
ಸಾ ಜಯತಿ ಶಾಂಕರೀ ಕಿಲ ಶಂಕರಸಂಸ್ತೂಯಮಾನವಿಭವಾ ಚ ॥ ೧೨೦ ॥
ಮನ್ದಾನಾಮಪಿ ಮಞ್ಜುಲಕವಿತ್ವರಸದಾಯಿನೀ ಜನನೀ ।
ಕಾಪಿ ಕರುಣಾಮಯೀ ಸಾ ಲಸತು ಪುರಸ್ತಾತ್ ಸದಾಸ್ಮಾಕಮ್ ॥ ೧೨೧ ॥
ತಾಪಹರಸವಿವರ್ಷಣಕೃತಕುತುಕಾ ಕಾಪಿ ನೀಲನಲಿನರುಚಿಃ ।
ಕಾದಮ್ಬಿನೀ ಪುರಸ್ತಾದಾಸ್ತಾಂ ನಃ ಸಂತತಂ ಜನನೀ ॥ ೧೨೨ ॥
ಕರುಣಾಕಟಾಕ್ಷಲಹರೀ ಕಾಮಾಯಾಸ್ತು ಪ್ರಕಾಮಕೃತರಕ್ಷಾ ।
ಗೌರ್ಯಾ ಗಿರಿಪತಿಮಾನ್ಯಾ ಸತ್ಸುಖದಾನೇ ಭೃಶಂ ಖ್ಯಾತಾ ॥ ೧೨೩ ॥
ಐಕ್ಯಮನೀಯತ ನಿತರಾಂ ಯದಾದರೇಣೇನ್ದುಮೌಲಿನಾ ಪೂರ್ವಮ್ ।
ತತ್ ತೇಜೋ ಹೃದಿ ಲಸತು ಸ್ಥಿರೇ ಚ ನಿಷ್ಕಲ್ಮಷೇಽಸ್ಮಾಕಮ್ ॥ ೧೨೪ ॥
ಯತ್ಪದರೇಖಾ ಮಾನ್ಯಾ ಲೇಖಾದೀನಾಂ ಶುಭೋದಯೇ ನಿಭೃತಮ್ ।
ಸಾ ಲೋಚನೇ ಪುರಸ್ತಾದಾಸ್ತಾಂ ನಃ ಶಶಿಕಲೋಲ್ಲಸನ್ಮೌಲಿಃ ॥ ೧೨೫ ॥
ಯಸ್ಯಾವಿರ್ಭಾವವಶಾನ್ಮಾನ್ಯೋಽಭೂದ್ ಭೂಧರೇನ್ದ್ರೋಽಪಿ ।
ತತ್ ಪಾರ್ವತೀತಿ ಸಂಜ್ಞಂ ಗೌರೀ ದಾಕ್ಷಾಯಣೀ ಚ ಲೋಕಾಮ್ಬಾ ॥ ೧೨೬ ॥
ಮಾರಾರಾತಿಮನೋಹರಲಾವಣ್ಯಾ ಕುಸುಮಮೃದುಶರೀರೇಯಮ್ ।
ನಿಜಕರುಣಾಪಾಙ್ಗಸುಧಾಪೂರಣಕೃತವೈಭವಾ ಭಾತಿ ॥ ೧೨೭ ॥
ಧನಧಾನ್ಯಕೀರ್ತಿಕವಿತಾಲಲನಾಸುತಹರ್ಮ್ಯಮುಖ್ಯಕಾಮಪರೈಃ ।
ತೈರ್ನೂನಮರ್ಚಿತಾಚಲಸುತಾಙ್ಘ್ರಿಜಲಜೈಸ್ತಥಾಭೂತೈಃ ॥ ೧೨೮ ॥
ಗಿರಿಶ್ಶರೀರವಿಹಾರಿ ತ್ರಾತಜಗತ್ ತತ್ ಪರಂ ಜ್ಯೋತಿಃ ।
ಶಾರದಸರಸಿಜನಯನಂ ಮಮ ಗೌರೀರೂಪಮಾವಿರಸ್ತು ಹೃದಿ ॥ ೧೨೯ ॥
ಅಚಲಸುತಯಾ ಸನಾಥಾ ವಯಮೇತೇ ಧೂತಪಾಪಕಲಾಃ ।
ಶಶಿಶಿಖರಂ ಚರ್ಮಧರಂ ಗಙ್ಗಾಧರಮೀಕ್ಷ್ಯ ಮೋದನ್ತೇ ॥ ೧೩೦ ॥
ಪ್ರೌಢಾನ್ಧಕಾರನಿರಸನಚಣಮೇತತ್ ಪಾರ್ವತೀರೂಪಮ್ ।
ಪರಮಂ ಜ್ಯೋತಿರ್ಲಸತಿ ಸ್ಫುಟಂ ಚ ಸದ್ಗಣಸಮಾವೃತಂ ಹೃದಯೇ ॥ ೧೩೧ ॥
ದಹರಾಕಾಶವಿಹಾರಿ ಜ್ಯೋತ್ಸ್ನಾಲಸದುತ್ತಮಾಙ್ಗಮಿದಮಾದ್ಯಮ್ ।
ಚಿನ್ತಾರತ್ನಂ ಗಿರಿಶಪ್ರಕಾಮಭಾಗ್ಯಂ ಚ ಲೋಕದೀಪಕಲಾ ॥ ೧೩೨ ॥
ಪುಣ್ಯಾಙ್ಕುರವೃದ್ಧಿಕರಂ ಗೌರೀರೂಪಂ ಸದಾ ಧ್ಯಾಯೇ ।
ಯಚ್ಛಿವನೇತ್ರಮಹೋತ್ಸವನಿಭೃತಂ ರಕ್ಷಿತಜಗತ್ತ್ರಿತಯಮ್ ॥ ೧೩೩ ॥
ಸೂರ್ಯಸುತಾಕಲ್ಲೋಲೋಲ್ಲಲನದಶಾರಮ್ಯನೇತ್ರಲಹರೀಭಿಃ ।
ಶ್ರೇಯಃಸಂತತಿಮಚಿರಾತ್ ತರಙ್ಗಯತಿ ನಃ ಸದಾ ದೇವೀ ॥ ೧೩೪ ॥
ಭೂಧರಕನ್ಯಾ ಸೇಯಂ ಸಾದರದತ್ತಾರ್ಹಣಾದಿಬಹುತೋಷಾ ।
ವಾದರಸವಿಜಯದಾಃ ನಃ ಪಾದರಸಾಸಕ್ತಕಲಿತಬಹುಭಾಷಾ ॥ ೧೩೫ ॥
ಪ್ರೌಢತಮಾಲವನಾಲೀರುಚಿಭರಕಮನೀಯನೇತ್ರವಿಸ್ಫಾರೈಃ ।
ದಿಶಿ ದಿಶಿ ಕಲಿತಾ ಸಂಪದ್ ಯಯಾ ತಯಾ ನಃ ಕುಲಂ ಜಯತಿ ॥ ೧೩೬ ॥
ನಿಜತಾರುಣ್ಯವಿಹಾರೈರ್ಮೋಹಕರಂ ಶೂಲಿನೋಽಪಿ ಯತ್ ತೇಜಃ ।
ತತ್ ಕುಮುದಿನೀಶಖಣ್ಡಸ್ಫುರಚ್ಛಿರಃಕರಲಸದ್ಧನುರ್ವರ್ಯಮ್ ॥ ೧೩೭ ॥
ಶಂಕರಪುಣ್ಯಾಙ್ಕುರಕೃತರೂಪಂ ಪಾಥೋಜನಯನಂ ಚ ।
ಪೃಥುಜಘನಕುಚಯುಗಂ ಚ ತ್ರಾತಜಗತ್ ದಗ್ಧದೈತ್ಯಚಯಮ್ ॥ ೧೩೮ ॥
ನೀಲನಲಿನೀಸುಮಾಲೀಲಲಿತಕಚಂ ಶಂಕರಾರ್ಹಲಲಿತಕುಚಮ್ ।
ಕೈಲಾಸಪೀಠಮಧ್ಯೇ ಭಾತಿ ಸದಾ ಧ್ಯೇಯಮಾರಾಧ್ಯಮ್ ॥ ೧೩೯ ॥
ಸ್ಮರಣದಶಯಾಪಿ ಕಾಪಿ ಪ್ರದೀಪಿಕಾ ನಾಶಿನೀ ತಮಸಾಮ್ ।
ನಿಗಮತತಿಸೌಧವಲಭೀಪ್ರಕಾಶಿನೀ ನಿತ್ಯತೇಜಸ್ಕಾ ॥ ೧೪೦ ॥
ಪುರಾರಿಪುವಾಮಾಙ್ಕತಲೋದ್ಭಾಸಿತಗಾತ್ರಂ ಮಹಃ ಕಿಮಪಿ ।
ಹೃದಿ ಲಸತು ಸಂತತಂ ಮೇ ನಿರಸ್ತಸಂಸೃತಿತಮೋರಾಶಿ ॥ ೧೪೧ ॥
ನಿಗಮಾನ್ತಮಧ್ಯಪಞ್ಜರಶುಕೀ ಶುಕಾದ್ಯೈಃ ಸಮಾರಾಧ್ಯಾ ।
ಕರಧೃತಪುಣ್ಡ್ರೇಕ್ಷುಕಲಾ ಶ್ರೇಯಃಸಂತಾನದಾಯಿನೀ ನಮತಾಮ್ ॥ ೧೪೨ ॥
ತವ ಪಾದಪದ್ಮಶೋಭಾಚ್ಛುರಿತಂ ಪುರತಃ ಸ್ಥಲಂ ಗೌರ್ಯಾಃ ।
ಕೃತಪಲ್ಲವಸಂಸ್ತರಣಂ ಮತ್ವಾ ತೂಷ್ಣೀಂ ಬಭೂವ ತೇ ದಾಸಃ ॥ ೧೪೩ ॥
ನವಜಲಧರನೀಲರುಚಾ ಸಂಮಾನ್ಯೈಸ್ತೇ ಕಟಾಕ್ಷಕಾನ್ತಿಭರೈಃ ।
ಸಂಕಲಿತನಿತ್ಯತೋರಣಶೋಭಂ ತೇ ಮಣ್ಟಪಾಸ್ಥಾನಮ್ ॥ ೧೪೪ ॥
ರಾಕಾಚನ್ದ್ರನಿಭಾಸ್ಯಾ ಸಾ ಕಾಶ್ಯಾದಿಷು ಕೃತಾತ್ಮಬಹುಪೀಠಾ ।
ನಾಕಾದಿರಾಜವಿನುತಾ ಶೋಕಾದಿಹರಪ್ರಭಾವಜನ್ಮಕಲಾ ॥ ೧೪೫ ॥
ಪಾರಾವಾರಸುತಾದ್ಯೈರಾರಾತ್ಕಲನೀಯನೈಜವಿಭವಾ ಸಾ ।
ವೀರಾಢ್ಯನೈಜರೂಪಾ ದಾರಾಃ ಕೈಲಾಸವಾಸಿನೋ ಜಯತಿ ॥ ೧೪೬ ॥
ಧೀರಾತ್ಮಹೃದಯಕಮಲೇ ಧಾರಾಧರನೀಲಚಿಕುರಭಾರವತೀ ।
ಕ್ಷೀರಾದಿಹೃದ್ಯವಾಣೀ ಧಾರಾ ಸಾ ಭಾತಿ ಪಾರ್ವತೀರೂಪಾ ॥ ೧೪೭ ॥
ಪರಮಶಿವಭಾಗ್ಯಧಾಟೀ ಕಾಞ್ಚನಶಾಟೀ ಮಮಾಸ್ತು ಹೃದಿ ಸತತಮ್ ।
ಪರಿಮಲಿತವಕ್ತ್ರವೀಟೀ ಕೃತನತಿಘೋಟೀ ಗಜಾದಿಪರಿಪಾಟೀ ॥ ೧೪೮ ॥
ಸನ್ಮಾನಸಕಾಸಾರೇ ಕೃತಪರಮಾನನ್ದಸಂತತಿರ್ಜನನೀ ।
ಶಂಕರತತ್ತ್ವೋನ್ಮೇಷಂ ಕಲ್ಯತಿ ಕಾಲೇ ದಯಾಸಾರಾತ್ ॥ ೧೪೯ ॥
ಏಣಾಙ್ಕಲಸಿತಮೌಲಿಃ ಕ್ಷೀಣಾನಾಂ ರಕ್ಷಿಣೀ ಪರಮಾ ।
ಪಾಣಾವಾದೃತಹರಿಣಾ ವೀಣಾನುತಿಲಾಲಿತಾ ಚ ಸಾ ಜಯತಿ ॥ ೧೫೦ ॥
ಮೂಕಾದೀನಾಂ ಪುರಹರಮೌಲ್ಯಾನ್ದೋಲನಕರೋಜ್ಜ್ವಲಾ ವಾಚಃ ।
ಯತ್ಕಾರುಣ್ಯಾತ್ ಕಾಲೇ ಸಮುಲ್ಲಸನ್ತೀಹ ಸಾ ಮದೀಯಧನಮ್ ॥ ೧೫೧ ॥
ಸರ್ವೇಷಾಂ ದೇವಾನಾಮಪಿ ಮರ್ತ್ಯಾನಾಂ ತಥಾ ಗಿರೀಶಸ್ಯ ।
ಏಕಾ ಪುಣ್ಯಶ್ರೇಣೀ ಗೌರೀರೂಪಾ ಹಿ ಸರ್ವದಾ ಜಯತಿ ॥ ೧೫೨ ॥
ಪಶುಪತಿಪುಣ್ಯಶ್ರೇಣೀಪರಿಪಾಕಂ ಪಾರ್ವತೀರೂಪಮ್ ।
ನಿಜದೃಗ್ರಕ್ಷಿತಲೋಕತ್ರಯಮಿದಮಾರಾದ್ ವಿರಾಜತೇ ತೇಜಃ ॥ ೧೫೩ ॥
ಶೀತಲಭೂಧರಜನಿತಾ ದಯಯಾ ಚ ಪುನಸ್ತಥಾ ಶೀತಾ ।
ಶೀತಲಲಲಯಕಟಾಕ್ಷಾ ಸಾ ಜನನೀ ನಃ ಸದಾ ಜಯತಿ ॥ ೧೫೪ ॥
ಸ್ಮೃತಿಮಾತ್ರತಾಪಹಾನ್ಯೈ ಕಲಿತಪ್ತಾನಾಂ ಜನಾನಾಂ ಸಾ ।
ಕೃತಸಂಕಲ್ಪಾನಲ್ಪಾಭರಣಾ ಭರಣಾಯ ಹೃದಿ ಲಸತಿ ॥ ೧೫೫ ॥
ಸುಕೃತಿಜನದೃಶ್ಯರೂಪಂ ದುಷ್ಕೃತಿಜನದೂರಗಂ ಚ ತತ್ ತೇಜಃ ।
ಕಾರುಣ್ಯಪೂರ್ಣಹೃದಯಂ ತದ್ಭಾವನತಾಂ ತಥಾ ಜಯತಿ ॥ ೧೫೬ ॥
ತಾಪಿಞ್ಛಸ್ತಬಕರುಚಿರ್ಜನನೀ ಸಾ ಶಾಂಕರೀ ಭಜತಾಮ್ ।
ನಿಜದೃಕ್ಪಾತಪ್ರಶಮಿತದಾರಿದ್ರ್ಯಾದಿರ್ಲಸತಿ ಪೀಠೇ ॥ ೧೫೭ ॥
ಪರಮಶಿವಾಸ್ಥಾನತಲೇ ನಿತ್ಯಂ ಖೇಲನಕೃತಾದರಂ ತೇಜಃ
ತದ್ ರಾಜತೇ ಮುನೀನಾಂ ಹೃದಯೇ ನಿಗಮಾನ್ತಸೌಧೇ ಚ ॥ ೧೫೮ ॥
ನಿಶ್ಚಲಭಾವಭೃತಾಂ ತನ್ನಿಶ್ಚಲರೂಪಂ ವಿರಾಜತೇ ತೇಜಃ ।
ಹಂಸೀವ ಮಾನಸೇ ಮೇ ಮಞ್ಜುಲಗತಿದಾಯಿನೀ ಸುದೃಶಾಮ್ ॥ ೧೫೯ ॥
ಮಾಧುರ್ಯಂ ವಚಸಿ ಗತೌ ಗಾಮ್ಭೀರ್ಯಂ ನೇತ್ರಯೋಸ್ತೈಕ್ಷಣ್ಯಮ್ ।
ಶೈತಲ್ಯಂ ಹೃದಿ ಚ ಸದಾ ಯತ್ರ ಹಿ ದೃಶ್ಯಂ ತದೇವ ಜನನೀ ನಃ ॥ ೧೬೦॥
ನಿಜಶೋಭಾಜಿತಕನ್ದುಕಕುಚಯುಗಲಶ್ರೀಜಿತೇಶಹೃದಯಾ ಸಾ ।
ಮನಸಿ ಮಮ ಸಂನಿಧತ್ತಾಂ ದತ್ತಾತ್ರೇಯಾದಿಭಿರ್ವನ್ದ್ಯಾ ॥ ೧೬೧ ॥
ನಿಜಮೌಲಿಚನ್ದ್ರಕಿರಣಪ್ರಸಾರಣೇಽಪ್ಯುಲ್ಲಸತ್ಸರೋಜಯುಗಮ್ ।
ದಧತೀ ಶ್ರವಸೋರೇಷಾ ಚಕಾಸ್ತಿ ಹೃದಯೇ ಪರಾ ದೇವೀ ॥ ೧೬೨ ॥
ಮುಖಜಿತತಾರಾನಾಥಾ ಮಖಭುಗ್ಗಣಸೇವ್ಯಚರಣಜಲಜಾತಾ ।
ನಖಕಾನ್ತಿಪಟಲದಮ್ಭಾದ್ ಗತಿಜಿತಹಂಸಾವಲೀ ವಿಭಾತು ಹೃದಿ ॥ ೧೬೩ ॥
ಕವಿತಾಭಾಗ್ಯವಿಧಾತ್ರೀ ಪರಿಮಲಸಂಕ್ರಾನ್ತಮಧುಪಗಣಕೇಶಾ ।
ಮಮ ನಯನಯೋಃ ಕದಾ ವಾ ಕರ್ಣೇಜಪಲೋಚನಂ ದಿವ್ಯಮ್ ॥ ೧೬೪ ॥
ಶಶಿಖಣ್ಡವತಂಸಶ್ರೀಃ ಪಶುಪತಿಭಾಗ್ಯಂ ಚ ತತ್ ತೇಜಃ ।
ಮಮ ನಯನಯೋಃ ಕದಾ ವಾ ಕರ್ಣೇಜಪಲೋಚನಂ ದಿವ್ಯಮ್ ॥ ೧೬೫ ॥
ತತ್ ತೇಜಃ ಶಾಶ್ವತಮಿಹ ಸಾಮಾನ್ಯಂ ಭೂನಿವಾಸಕೃತಾಮ್ ।
ದ್ಯುಸದಾಮಪಿ ಜಯತಿ ಕೃತಾದರಂ ತದಸ್ತು ಶ್ರಿಯೈ ಕಾಲೇ ॥ ೧೬೬ ॥
ಶತಮಖನೀಲಮಣೀನಾಂ ಪ್ರಭಾವಿಸಾರಪ್ರಲೋಭತನುಕಾನ್ತ್ಯಾ ।
ಶ್ರುತಿಮೌಲಿಸೌಧದೀಪಶ್ರಿಯಾ ತಯಾ ನಾಥವಾನಹಂ ಕಾಲೇ ॥ ೧೬೭ ॥
ಕವಿಕುಲಸೂಕ್ತಿಶ್ರೇಣೀಶ್ರವಣಾನನ್ದೋಲ್ಲಸದ್ವತಂಸಸುಮಾ ।
ಸಾ ದೇವೀ ಮಮ ಹೃದಯೇ ಕೃತಸಾಂನಿಧ್ಯಾ ಕೃತತ್ರಾಣಾ ॥ ೧೬೮ ॥
ಪುಷ್ಪೇಷ್ವಾಗಮಸಾರಾ ಪುರಭಿನ್ಮಾನಸವಿಭೇದಿನಿಜಕೇಲಿಃ ।
ವಿಶ್ವವಿಮೋಹನಮೂರ್ತಿಃ ಸಾ ದೇವೀ ಶಾಂಕರೀ ಜಯತಿ ॥ ೧೬೯ ॥
ಕಾಶೀಕಾಞ್ಚ್ಯಾದಿತಟಸ್ಥಿರಾಸನಾ ಮೇಖಲಾಭಿರಾಮಕಟಿಃ ।
ಮುಗ್ಧಸ್ಮೇರಮುಖೀ ಸಾ ಯಾ ಗೌರೀ ಸಂಪದಾಂ ಜನನೀ ॥ ೧೭೦ ॥
ಮುಖವಿಜಿತಚನ್ದ್ರಮಣ್ಡಲಮಿದಮಮ್ಭೋರುಹವಿಲೋಚನಂ ತೇಜಃ ।
ಧ್ಯಾನೇ ಜಪೇ ಚ ಜಪತಾಂ ಚಕಾಸ್ತಿ ಹೃದಯೇ ಕವೀಶ್ವರಾಣಾಂ ಚ ॥ ೧೭೧ ॥
ಮಞ್ಜುಲಕವಿತಾಸಂತತಿಬೀಜಾಙ್ಕುರದಾಯಿನೀ ರಸಾಲೋಕಾ ।
ಜನನಿ ತವಾಪಾಙ್ಗಶ್ರೀರ್ಜಯತಿ ಜಗತ್ತ್ರಾಣಕಲಿತದೀಕ್ಷೇಯಮ್ ॥ ೧೭೨ ॥
ಅಮ್ಬ ತವಾಪಾಙ್ಗಶ್ರೀರಪಾಙ್ಗಕೇಲೀಶತಾನಿ ಜನಯನ್ತೀ ।
ಪುರಹನ್ತುರ್ಹೃದಿ ಜಯತಿ ವ್ರೀಡಾಮದಮೋಹಕಾಮಸಾರಕರೀ ॥ ೧೭೩ ॥
ದಿನಕರಸುತಾತರಙ್ಗಾವಲಿಶೋಭಾಕೃತಕಚಾಕಚಿಶ್ರೀಶ್ಚ ।
ಶಶಿಖಣ್ಡವತಂಸಶಿರಾಃ ಸಾ ದೇವೀ ಶರಣಮರ್ಥಿನಾಂ ಪರಮಮ್ ॥ ೧೭೪ ॥
ಕಲಕಲನಿನದತ್ಕಾಞ್ಚೀ ಕಾಞ್ಚ್ಯಾದಿತಲಸ್ಥಿರಾಸನಾ ದೇವೀ ।
ಪುರಹರಭೂಷಣಮೂರ್ತಿಃ ಸಾ ದೇವೀ ಶರಣಮಸ್ಮಾಕಮ್ ॥ ೧೭೫ ॥
ಪುರಹರಸಹಧರ್ಮಚರೀಂ ಕಚಭಾರಲಸನ್ನಿಶೀಥಿನೀಶಕಲಾಮ್ ।
ಕವಿಕುಲಮಾನ್ಯಚರಿತ್ರಾಂ ಪವಿತ್ರಿತಕ್ಷೋಣಿಭೃತ್ಕುಲಾಂ ವನ್ದೇ ॥ ೧೭೬ ॥
ಭಕ್ತಜನಾವಲಿಕಥಿತಸ್ತುತಿಶತದತ್ತಾದರಾಮಿಮಾಂ ದೇವೀಮ್ ।
ಸರಸಕವನಪ್ರದಾತ್ರೀಂ ಭೂಷಿತಶಿವವಾಮಭಾಗರೇಖಾನ್ತಾಮ್ ॥ ೧೭೭ ॥
ಮಙ್ಗಲಮೂರ್ತಿಂ ಕಿಂನರಕೀರ್ತಿತನಿಜಕೀರ್ತಿವಲ್ಲರೀಂ ಜನನೀಮ್ ।
ಮೂರ್ತಿಮತೀಂ ಕಾಮಕಲಾಂ ಶಂಭೋರಮ್ಭೋಜಲೋಚನಾಂ ನೌಮಿ ॥ ೧೭೮ ॥
ಜಿತಮನ್ಮಥಮಾರಕಲಾದಾತ್ರೀಂ ಶಿವಗಾತ್ರದಿವ್ಯಭೂಷಾಂ ತಾಮ್ ।
ತ್ರಿಜಗತ್ಸುಖಜನಯಿತ್ರೀಮಮ್ಬಾಮಮ್ಬುದಮನೋಜ್ಞತನುಮೂರ್ತಿಮ್ ॥ ೧೭೯ ॥
ಖಣ್ಡಿತಸುರವೈರಿಗಣಾಂ ಚಣ್ಡಕರಾದ್ಯೈಃ ಸುರೈಶ್ಚ ನುತಸದನಾಮ್ ।
ಮಣ್ಡಿತಪುರಹರದೇಹಾಂ ತಾಣ್ಡವಿನಃ ಸರ್ವಮಙ್ಗಲಾಂ ದೇವೀಮ್ ॥ ೧೮೦ ॥
ನಿಜಲೋಚನಕೃತಸಂಪದಮಜಕಮಲೇಕ್ಷಣಶಚೀಶಸುರವನ್ದ್ಯಾಮ್ ।
ಭಜನಕೃದನ್ತರ್ಜ್ಯೋತಿಷಮಜತನಯಾದ್ಯೈಶ್ಚ ನಿತ್ಯಸೇವ್ಯಕಲಾಮ್ ॥ ೧೮೧ ॥
ಭರಿತಭುವನಾಮಪರ್ಣಾಂ ಸರಿದುರುವೀಚೀವಿಲೋಲಿತಾತ್ಮಕಚಾಮ್ ।
ಗಿರಿಶಕೃತನಿತ್ಯಲೀಲಾಂ ವರಿವಸ್ಯಾದಾನತುಷ್ಟನಿಜಹೃದಯಾಮ್ ॥ ೧೮೨ ॥
ಜನನುತನಿತ್ಯವಿಭೂತಿಂ ಕನದುರುಭೂಷಾವಲೀಲಸಿತದೇಹಾಮ್ ।
ಮನಸಾಪ್ಯಗಣ್ಯತತ್ತ್ವಾಂ ವನವಾಸಿಧ್ಯಾನಗೋಚರಾತ್ಮಕಲಾಮ್ ॥ ೧೮೩ ॥
ನೀಲಾಮ್ಬುಜಕಾನ್ತಿಮುಷಂ ಬಾಲಾರ್ಕನಿಭಾತ್ಮಕರ್ಣಪೂರವತೀಮ್ ।
ಮಾಲಾಲಂಕೃತಕಣ್ಠಾಂ ಬಾಲಾಂ ಸ್ಕನ್ದಸ್ಯ ಮಾತರಂ ವನ್ದೇ ॥ ೧೮೪ ॥
ಶರಣಾಗತಜನರಕ್ಷಣಕೃತದೀಕ್ಷಾವೀಕ್ಷಣೇನ ಜಿತಶಂಭುಃ ।
ಕುಲಭೂಧರವರತಪಸಾಂ ಪರಿಪಾಕಃ ಕೋಽಪಿ ವಿಜಯತೇ ಲೋಕೇ ॥ ೧೮೫ ॥
ಕುಸುಮಶರಮಥನಮನಸಾಪ್ಯಾದರಣೀಯಾತ್ಮಕಾಮಕೇಲಿರಿಯಮ್ ।
ಜನನೀ ಕಲ್ಯಾಣತತಿಂ ಭಜತಾಂ ನಃ ಸಾದರಾತ್ ತರಙ್ಗಯತಿ ॥ ೧೮೬ ॥
ಮತ್ತಗಜಮಾನ್ಯಗಮನಾ ಮಧುರಾಲಾಪಾ ಚ ಮಾನ್ಯಚರಿತಾ ಸಾ ।
ಮನ್ದಸ್ಮೇರಮುಖಾಬ್ಜಾ ಗೌರೀ ಮಮ ಹೃದಯಸಾರಸೇ ಲಸತು ॥ ೧೮೭ ॥
ಪುರಹರನೇತ್ರಮಹೋತ್ಸವತಾರುಣ್ಯಶ್ರೀರ್ನಿರಸ್ತನತಶತ್ರುಃ ।
ಲಲಿತಲಿಕುಚಾಭಕುಚಭರಯುಗಲಾ ದೃಗ್ವಿಜಿತಹರಿಣಸಂದೋಹಾ ॥ ೧೮೮ ॥
ಕಾರುಣ್ಯಪೂರ್ಣನಯನಾ ಕಲಿಕಲ್ಮಷಹಾರಿಣೀ ಚ ಸಾ ಗೌರೀ ।
ಮುಖಜಿತಶಾರದಕಮಲಾ ವಕ್ತ್ರಾಮ್ಭೋಜೇ ಸದಾ ಸ್ಫುರತು ಕಾಲೇ ॥ ೧೮೯ ॥
ಶೂಲಿಮನೋರಥಪಾತ್ರಂ ಸಂತಪ್ತಸ್ವರ್ಣಕಾಮ್ಯನಿಜಗಾತ್ರಮ್ ।
ಆಶ್ರಿತಹಿಮವದ್ಗೋತ್ರಂ ರಕ್ಷಿತನತಬಾಹುಜಚ್ಛಾತ್ರಮ್ ॥ ೧೯೦ ॥
ಕವಿಕುಲಜಿಹ್ವಾಲೋಲಂ ಶಶಿಶೇಖರಕಲಿತರಮ್ಯಬಹುಲೀಲಮ್ ।
ನಿರಸಿತನತದುಷ್ಕಾಲಂ ವನ್ದೇ ತೇಜಃ ಸದಾಲಿನುತಶೀಲಮ್ ॥ ೧೯೧ ॥
ಕಮಲಸುಷಮಾನಿವಾಸಸ್ಥಾನಕಟಾಕ್ಷಂ ಚಿರಾಯ ಕೃತರಕ್ಷಮ್ ।
ರಕ್ಷೋಗಣಭೀತಿಕರಂ ತೇಜೋ ಭಾತಿ ಪ್ರಕಾಮಮಿಹ ಮನಸಿ ॥ ೧೯೨ ॥
ಕುಮುದವನೀಶಕ್ರೀಡಾಸ್ಥಾನಾಯಿತಕೇಶಭಾರಾಯೈ ।
ನಮ ಉಕ್ತಿರಸ್ತು ಮಾತ್ರೇ ವಾಗ್ಜಿತಪೀಯೂಷಧಾರಾಯೈ ॥ ೧೯೩ ॥
ಬಾಲಕುರಙ್ಗವಿಲೋಚನಧಾಟೀರಕ್ಷಿತಸುರಾದಿಮನುಜಾನ್ತಮ್ ।
ನಯನಯುಗಾಸೇವ್ಯಂ ತದ್ ಭಾತೀಹ ಧರಾತಲೇ ನಿಯತಮ್ ॥ ೧೯೪ ॥
ಕುಶಲವಿಧಯೇ ತದಸ್ತು ಪ್ರಸೂನವಿಶಿಖಾರಿಕೃತಲೀಲಮ್ ।
ಕಬಲಿತಪದನತದೈನ್ಯಂ ತರುಣಾಮ್ಬುದಮೇಚಕಂ ಧಾಮ ॥ ೧೯೫ ॥
ಜನನಿ ಕದಾ ವಾ ನೇಷ್ಯಾಮ್ಯಹಮಾರಾದರ್ಚಿತತ್ವದೀಯಪದಃ ।
ನಿಮಿಷಮಿವ ಹನ್ತ ದಿವಸಾನ್ ದೃಷ್ಟ್ವಾ ತ್ವಾಮಾದರೇಣ ಕಲ್ಯಾಣೀಮ್ ॥ ೧೯೬ ॥
ಕವಿವಾಗ್ವಾಸನ್ತೀನಾಂ ವಸನ್ತಲಕ್ಷ್ಮೀಃ ಪುರಾರಿದಯಿತಾ ನಃ ।
ಪರಮಾಂ ಮುದಂ ವಿಧತ್ತೇ ಕಾಲೇ ಕಾಲೇ ಮಹಾಭೂತ್ಯೈ ॥ ೧೯೭ ॥
ತ್ರಿಭುವನಸುನ್ದರರೂಪಂ ತೇಜಸ್ತದ್ ಭಕ್ತಿತಃ ಸಮಭ್ಯರ್ಚ್ಯ ।
ಗರುಡೇನ ಯಾತಿ ಕುತುಕಾದಥವಾ ಹಂಸೇನ ಸುರಸೇವ್ಯಃ ॥ ೧೯೮ ॥
ತವ ಪದಪದ್ಮೇ ಭಕ್ತಿರ್ನ ಮೇ ತಥಾಪಿ ತವದೀಯಕೃಪಯಾಹಮ್ ।
ಧ್ಯಾಯಾಮ್ಯನ್ವಹಮಮ್ಬ ತ್ವಾಮಾರಾದಾದರಾತ್ ಸಿದ್ಧ್ಯೈ ॥ ೧೯೯ ॥
ಯೋ ದೇವ್ಯಾಃ ಪದಸರಸಿಜನತಿಭಾಕ್ ತಸ್ಯೇಹ ಸಿಧ್ಯನ್ತಿ ।
ಸ್ಥಿರವಿಭುತಾ ಸತ್ಸಙ್ಗಃ ಸಾಯುಜ್ಯಂ ಚಾಪಿ ಕಾಲೇನ ॥ ೨೦೦ ॥
ಹಿಮಗಿರಿತಪಃಫಲಂ ತನ್ಮುನಿಜನಹೃದಯಾಬ್ಜನಿತ್ಯಕೃತನೃತ್ತಮ್ ।
ಕರುಣಾಲೋಲಾಪಾಙ್ಗಂ ತತ್ ತೇಜೋ ಭಾತು ನಿಃಸಮಂ ವದನೇ ॥ ೨೦೧ ॥
ಜನನಿ ತರಙ್ಗಯ ನಯನೇ ಮಯಿ ದೀನೇ ತೇ ದಯಾಸ್ನಿಗ್ಧೇ ।
ತೇನ ವಯಂ ತು ಕೃತಾರ್ಥಾ ನಾತಃ ಪರಮಸ್ತಿ ನಃ ಪ್ರಾರ್ಥ್ಯಮ್ ॥ ೨೦೨ ॥
ಮುನಿಹೃದಯಪದ್ಮಹಂಸೀ ಶಿವಕೇಲೀಸದನರತ್ನದೀಪಕಲಾ ।
ಹಿಮವತ್ಪುತ್ರೀ ಕೃಪಯಾ ಮಾಮವತಿ ಮಹೌಷಧೀ ಕಲಿವ್ಯಾಧೇಃ ॥ ೨೦೩ ॥
ಪ್ರತಿಫಲತು ಭಾವನಾಯಾಮಸ್ಮಾಕಂ ಸಾ ಸ್ಫುರತ್ಕೃಪಾಧಾರಾ ।
ಪುರಹರದೃಕ್ಸಾಫಲ್ಯಂ ಕೈಲಾಸೇ ಕಿಮಪಿ ನಿಶ್ಚಿತಂ ತೇಜಃ ॥ ೨೦೪ ॥
ಸಜ್ಜನಮಾನಸಧಾಮ್ನೇ ನಮ ಉಕ್ತಿರ್ಮೇ ಶ್ರುತೀಡ್ಯನಿಜಭೂಮ್ನೇ ।
ಶಿವವಾಮಭಾಗಧಾಮ್ನೇ ಮಹಾವಿಭೂತ್ಯೈ ಹಿ ಶಂಕರೀನಾಮ್ನೇ ॥ ೨೦೫ ॥
ದೇಶಿಕಮಾನಸವಿಹರಣಕಲಾಜುಷೇ ಭಕ್ತಿರಸ್ತು ಮೇ ತಸ್ಮೈ ।
ಯಚ್ಚನ್ದ್ರಮೌಲಿಲೋಚನಚಾಪಲ್ಯಂ ರಕ್ಷಿತಸ್ವಭಕ್ತೌಘಮ್ ॥ ೨೦೬ ॥
ನಿಜಲೋಚನಕೇಲಿಕಲಾವಶೀಕೃತಪ್ರಸಬಾಣರಿಪುಹೃದಯಮ್ ।
ದಯಯಾ ಲೋಲಿತಹೃದಯಂ ತದಸ್ತು ತೇಜಃ ಪುರೋಽಸ್ಮಾಕಮ್ ॥ ೨೦೭ ॥
ಸತತಂ ಬದ್ಧಾಞ್ಜಲಿಪುಟಮುಪಾಸ್ಮಹೇ ತಚ್ಛುಭಪ್ರದಂ ತೇಜಃ ।
ಯನ್ಮರಕತಕಾನ್ತಿಲಸತ್ ಪ್ರಸೂನಶರವೈರಿಪುಣ್ಯಪರಿಪಾಕಮ್ ॥ ೨೦೮ ॥
ತೀರಂ ಸಂಸೃತಿಜಲಧೇಃ ಪೂರಂ ಶಂಕರವಿಲೋಚನಪ್ರೀತೇಃ ।
ಸಾರಂ ನಿಗಮಾನ್ತಾನಾಂ ದೂರಂ ದುರ್ಜನತತೇರ್ಹಿ ತತ್ ತೇಜಃ ॥ ೨೦೯ ॥
ನಗರಾಜಕನ್ಯಕಾ ಸಾ ಲಸತು ಪುರೋಽಸ್ಮಾಕಮಾದರಕೃತಶ್ರೀಃ ।
ಯತ್ಪ್ರಣಮನಾಜ್ಜನಾನಾಂ ಕವಿತೋನ್ಮೇಷಃ ಸದೀಡಿತೋ ಲಸತಿ ॥ ೨೧೦ ॥
ಸನ್ನಯನಸಾರಸಾಲೀಪೂಷಾ ಭೂಷಾ ಚ ಹರಶರೀರಸ್ಯ ।
ಹಿಮಗಿರಿತನಯಾ ಯೋಷಾ ಭಾಷಾಸ್ತೋತ್ರಪ್ರಿಯಾ ಚ ಸಾ ಭಾತಿ ॥ ೨೧೧ ॥
ಸಫಲಯತು ನೇತ್ರಯುಗಲಂ ಹತನತದುರಿತಾ ಹಿ ಸಾ ಪರಾ ದೇವೀ ।
ಧರಣಿಧರನಾಯಕಪ್ರಿಯಸುತಾ ಚ ಸೋಮಾರ್ಧಭೂಷಿತಾತ್ಮಕಚಾ ॥ ೨೧೨ ॥
ಸುಮನೋವಾಞ್ಛಾದಾನೇ ಕೃತಾವಧಾನಂ ಧನಂ ಶಂಭೋಃ ।
ಧಿಷಣಾಜಾಡ್ಯಾದಿಹರಂ ಯದ್ವೀಕ್ಷಣಮಾಮನನ್ತಿ ಜಗತಿ ಬುಧಾಃ ॥ ೨೧೩ ॥
ಕೋ ವಾ ನ ಶ್ರಯತಿ ಬುಧಃ ಶ್ರೇಯೋಽರ್ಥೀ ತಾಮಿಮಾಮಮ್ಬಾಮ್ ।
ಯಾಮರ್ಧಚನ್ದ್ರಶೇಖರಸಧರ್ಮಿಣೀಮರ್ಚಯನ್ತಿ ಸುರನಾಥಾಃ ॥ ೨೧೪ ॥
ಶಮಿತನತದುರಿತಸಂಘಾ ಹರಾಯ ನಿಜನೇತ್ರಕಲ್ಪಿತಾನಙ್ಗಾ ।
ಕೃತಸುರಶಾತ್ರವಭಙ್ಗಾ ಸಾ ದೇವೀ ಮಙ್ಗಲೈಸ್ತುಙ್ಗಾ ॥ ೨೧೫ ॥
ಕವಿತಾರಸಪರಿಮಲಿತಂ ಕರೋತಿ ವದನಂ ನತಾನಾಂ ಯಾ ।
ಸ್ತೋತುಂ ತಾಮಹಮಾರಾತ್ ಸಾ ದೇವೀ ಸುಪ್ರಸನ್ನಾಸ್ತು ॥ ೨೧೬ ॥
ಪುರಹರವಾಮೋತ್ಸಙ್ಗೇ ಭಜಾಮಿ ಲಸಿತಂ ತು ತತ್ ತೇಜಃ ।
ಸೃಷ್ಟಿಸ್ಥಿತಿಲಯಕಾರ್ಯಂ ಯಜ್ಜನಯತಿ ಕಾಲಭೇದೇನ ॥ ೨೧೭ ॥
ಕಲ್ಯಾಣದಾನಕಲನಾತ್ ಖ್ಯಾತಾ ಸಾ ಶಾಂಕರೀ ಲೋಕೇ ।
ತದ್ವೈಭವಕೀರ್ತನತೋ ವಯಮತ್ರಾಸಾಃ ಪರಾನನ್ದಾಃ ॥ ೨೧೮ ॥
ಮನ್ದಹಸಿತೈರ್ವಶೀಕೃತಶಾಂಕರಹೃದಯಾ ಹಿ ಭಕ್ತಾನಾಮ್ ।
ರಕ್ಷಣಕಾರ್ಯಾಯ ಪರಂ ಸಾಮ್ಬಾ ಕುಮ್ಭೋದ್ಭವಾದಿಭಿರ್ವನ್ದ್ಯಾ ॥ ೨೧೯ ॥
ನಿಜಮೌಲಿಚನ್ದ್ರಕಿರಣಪ್ರಸಾರಣಾದ್ಗಾಙ್ಗವೀಚಿಕಾಪವನೈಃ ।
ತತ್ಕ್ಷಣನಿರಸಿತಸುರತಶ್ರಮಾ ಭವಾನೀಹ ರಾಜತೇ ಭೂತ್ಯೈ ॥ ೨೨೦ ॥
ಮಮ ಗಾಹತೇ ಹಿ ಹೃದಯಂ ನಯನಯುಗಂ ತ್ರಿಪುರದಮಯಿತುರ್ಭಾಗ್ಯಮ್ ।
ಯದಕೃತ್ರಿಮವಾಗ್ಗುಮ್ಭೈಃ ಸ್ತುತ್ಯಂ ಧ್ಯೇಯ ಸದಾಭ್ಯರ್ಚ್ಯಮ್ ॥ ೨೨೧ ॥
ಕರಧೃತಶೂಲಾದ್ಯಾಯುಧಜಾಲನಿರಸ್ತಾಖಿಲಾರಿಬೃನ್ದೇಯಮ್ ।
ಕುನ್ದಾಭದನ್ತವದನಾನನ್ದಾಯಾಸ್ತು ಪ್ರಕಾಮಮಿಹ ನಮತಾಮ್ ॥ ೨೨೨ ॥
ಕುಚಭಾರನಮ್ರಗಾತ್ರಂ ನಿಜಜನಿಪರಿಪೂತಜನಕವರಗೋತ್ರಮ್ ।
ಸುರವೈರಿಕಲಿತಕೋಪಂ ಗೌರೀರೂಪಂ ತದಸ್ತು ಹತತಾಪಮ್ ॥ ೨೨೩ ॥
ನಿಟಿಲಾತ್ತವಹ್ನಿನೇತ್ರಂ ಲೋಲಾಲಕಮೇತದಾದೃತಂ ತೇಜಃ ।
ನಿಜಕೇಲ್ಯಧೀನಶಂಕರಮಸ್ಮಾಕಂ ಚಾಕ್ಷಯಂ ಸ್ಥಾನಮ್ ॥ ೨೨೪ ॥
ತವ ಮನ್ದಸ್ಮಿತಲಹರೀವಿಶೇಷಿತರುಚಿರ್ಗಿರೀಶಶಶಿಶಕಲಃ ।
ತವ ರೂಪಂ ಗಿರಿಶಸ್ಯ ಸ್ವರೂಪಮಪಿ ಭಾತಿ ಯೋಗಿನಾಂ ಹೃದಯೇ ॥ ೨೨೫ ॥
ನೀಲಾರವಿನ್ದಲೋಚನಯುಗಲಾಮಮ್ಬಾಮಹಂ ನೌಮಿ ।
ಕಾಲಾರಿಚಿತ್ತಹರಣೇ ಯಲ್ಲೀಲಾಃ ಪಾಟವಂ ನೀತಾಃ ॥ ೨೨೬ ॥
ಶಶಧರಭೂಷಿತಮಕುಟೀ ಕವಿಕುಲವಾಗಬ್ಜಶರದಿಯಂ ದೇವೀ ।
ಆರ್ತತ್ರಾಣಪರಾಯಣವಿಲೋಚನಾ ಹಿಮವತಃ ಪುತ್ರೀ ॥ ೨೨೭ ॥
ಶ್ರುತಿಪಞ್ಜರಕೇಲಿಶುಕೀ ಶಂಕರಪರಿರಮ್ಭಣೋತ್ಸುಕಾ ಮಾತಾ ।
ಬಹಿರಪ್ಯನ್ತಯರ್ಮಿನಾಂ ಚಕಾಸ್ತಿ ಲೋಕಾಮ್ಬಿಕಾ ಕೃತತ್ರಾಣಾ ॥ ೨೨೮ ॥
ಚಿನ್ತಿತವಸ್ತುವಿಧಾತ್ರೀ ಸಂತತಮಪಿ ಲೋಕರಕ್ಷಣೈಕರತಾ ।
ಸಂದಾನಿತನಾಕಿಲಸತ್ಸಂತಾನಸುಮಪ್ರಗಲ್ಭಧಮ್ಮಿಲ್ಲಾ ॥ ೨೨೯ ॥
ಕಲಿತತ್ರಿವರ್ಗಪದವೀಮಪವರ್ಗದಕಲ್ಯಸೇವನಾಮಮ್ಬಾಮ್ ।
ಗಾಙ್ಗಜಲೈರ್ನಲಿನದಲೈರಾರಗ್ವಧಪತ್ರಜಾಲಕೈರರ್ಚ್ಯಾಮ್ ॥ ೨೩೦ ॥
ಶಶಿಶೇಖರಸರ್ವಸ್ವಂ ಪೂರ್ವಾಚಾರ್ಯೈಃ ಪುರಸ್ಕೃತಂ ತೇಜಃ ।
ಮಾಮಕಚಕ್ಷುರ್ವಿಷಯಂ ಕದಾ ನು ಕೈಲಾಸಕಲಿತಚಙ್ಕ್ರಮಣಮ್ ॥ ೨೩೧ ॥
ಮೋಹಿತಭುವನಾ ದೇವೀ ಸಾ ಹಿತಕರನಿತ್ಯಚಿನ್ತನಾ ಭಜತಾಮ್ ।
ತಾಡಿತರಿಪುಜನಮಾನ್ಯಾ ಪೀಡಿತನಿಜಭಕ್ತಭವಭಯಾ ಜಯತಿ ॥ ೨೩೨ ॥
ಪ್ರತ್ಯಙ್ಗಲಸಿತಭೂಷಾ ಸತ್ಯಂ ಮಾತಾ ಹಿ ಶರಣಮಸ್ಮಾಕಮ್ ।
ಕ್ಕ್ತ್ಯಂ ಯಮಭಯಮಸ್ಯಾಃ ಸ್ತುತ್ಯಂ ಜಗತೀಹ ವೈಭವಂ ಮನುಜೈಃ ॥ ೨೩೩ ॥
ಅಮ್ಬ ತ್ವಮೇವ ಕಮಲಾಸನಾದಿವೈಭವವಿಧಾತ್ರೀ ಚ ।
ತಾಂ ತ್ವಾಂ ಶರಣಂ ಪ್ರಾಪ್ತಾಃ ಲೋಕೇಽಮುಷ್ಮಿನ್ ಕಿಮಾಶಾಸ್ಯಮ್ ॥ ೨೩೪ ॥
ಕುಙ್ಕುಮರುಚಿಲಸಿತಾಙ್ಗಂ ಕಮಲಾಸನಮಾತ್ತಕಮಲಂ ಚ ।
ಹಸ್ತಾಮ್ಬುಜಧೃತಪುಸ್ತಕರುದ್ರಾಕ್ಷಾದಿ ಚ ತಥಾ ರೂಪಮ್ ॥ ೨೩೫ ॥
ಜಿತಮನ್ಮಥವರಿವಸ್ಯಾಸಕ್ತಂ ರೂಪಂ ಚ ತೇ ಮಾತಃ ।
ಕಾಲಾನುಕೂಲಕಲಿತಂ ಪರತತ್ವವಿದಾಂ ಚಕಾಸ್ತಿ ಹೃದಯತಟೇ ॥ ೨೩೬ ॥
ಹಿಮವನ್ನಗೇನ್ದ್ರಕನ್ಯೇ ಭೂಸುರಕೃತಬಹುಲಪೂಜಯಾ ಧನ್ಯೇ ।
ಮಾನ್ಯೇ ಸುಮನಃಸಂಘೈಸ್ತ್ವಾಂ ಕಲಯೇ ಹೃದಿ ಸದಾ ಹಿ ಕಟಿಶೂನ್ಯೇ ॥ ೨೩೭ ॥
ನಿರಸಿತನಿಷ್ಕಂಚನಜನದೈನ್ಯಾ ಕನ್ಯಾ ಧರಾಧರೇಶಸ್ಯ ।
ದೃಕ್ಕಾನ್ತಿವಿಜಿತಹರಿಣಾ ಹರಿಣಾರಾಧ್ಯಾ ಚ ಸಾ ಜಯತಿ ॥ ೨೩೮ ॥
ವಿನತಜನಿತಾಪವರ್ಗಾ ಸರ್ಗಾದಿಕರೀ ಚ ಸಾ ದೇವೀ ।
ನಿಜಲೀಲಾಹೃತಭರ್ಗಾ ದುರ್ಗಾದಿಶ್ರೇಯಸಾಂ ಜನನೀ ॥ ೨೩೯ ॥
ಕವನಕೃತಾಂ ತೋಷಕೃತೇ ಜಗದವನಾದಿಕ್ರಿಯಾಪೇಷು ಭವತು ।
ಶಾಂಕರಿರೂಪಾಯ ಪರಂ ನಮ ಉಕ್ತಿರ್ಜ್ಯೋತಿಷೇಽಸ್ಮಾಕಮ್ ॥ ೨೪೦ ॥
ಫಣಿಪತಿಭೂಷಿತದೇಹಾ ಹರಭಜನಾನನ್ದಸಂದೋಹಾ ।
ತತ್ತ್ವೈರ್ಹತಸಂದೇಹಾ ಚಕಾಸ್ತು ಹೃದಯೇ ವಿಧೂತಜನಮೋಹಾ ॥ ೨೪೧ ॥
ಜಯತಿ ಜನನಿ ತ್ವದೀಯಂ ರೂಪಂ ರವಿಕೋಟಿತುಲಿತಮಿದಮ್ ।
ಏತನ್ನಾನಾಕಾರಂ ಕಾಲೇ ಕೃತರಕ್ಷಣಂ ಚ ಭುವನೇಡ್ಯಮ್ ॥ ೨೪೨ ॥
ಮದನಾರಿಕಣ್ಠಸುಷಮಾಸಾಕ್ಷೀಭೂತಸ್ವಬಾಹುಯುಗಲಾ ಸಾ ।
ಕುಙ್ಕುಮಪಙ್ಕಾಙ್ಕಿತತನುರೇಷಾ ದೇವೀ ಚಕಾಸ್ತಿ ಬಹುರೂಪಾ ॥ ೨೪೩ ॥
ಕಾಞ್ಚೀಮಣಿಲಸಿತಕಟಿಃ ಕಾಞ್ಚೀಪುರಭೂಷಣಂ ಚ ತದ್ಧಾಮ ।
ಯನ್ಮನ್ಮಥರಿಪುಮಾನ್ಯಂ ನಿಜಲೀಲಾಕಲಿತಬಹುರೂಪಮ್ ॥ ೨೪೪ ॥
ಕರಪಙ್ಕಜಧೃತಮಾಲಾ ಸೃಷ್ಟಿಸ್ಥಿತ್ಯಾದಿಬಹುಲೀಲಾ ।
ವೀಟೀವಿಲಸಿತವದನಾ ವಿರಚಿತನತಹರ್ಮ್ಯವರಸದನಾ ॥ ೨೪೫ ॥
ವಿಸೃಮರತಾನುಕಮ್ಪಾ ತಂ ಪಾತಕಿವರ್ಗಮಾದರಾದಮ್ಬಾ ।
ರಕ್ಷತಿ ತನುಜಿತಶಮ್ಪಾ ಸಾ ನಃ ಶರಣಂ ಪುರಃ ಸ್ಫುರತು ॥ ೨೪೬ ॥
ಶೂಲಿನಿ ಸುರಜನಪಾಲಿನಿ ಕಾತ್ಯಾಯನಿ ದೇವಿ ಮಾಂ ಪಾಹಿ ।
ಸುರಲೋಕಕುಸುಮಮಾಲಿನಿ ಶಿವಖೇಲಿನಿ ಚಣ್ಡಿಕೇ ಪಾಹಿ ॥ ೨೪೭ ॥
ಭಾರತಿ ಭೈರವಿ ಶಾಂಕರಿ ಕಪಾಲಿನಿ ನಮೋಽಸ್ತು ತೇ ನಿತ್ಯಮ್ ।
ಸ್ತುತ್ವೈವಮಮ್ಬ ವಾಚಾ ಮನಸಾರಾಧ್ಯಂ ನಮಾಮಿ ತೇ ಪಾದಮ್ ॥ ೨೪೮ ॥
ಕುಟಿಲಕಚಂ ಲಿಕುಚಕುಚಂ ಮೃದುಬಾಹುಲತಂ ಚ ಕಙ್ಕುಮಚ್ಛಾಯಮ್ ।
ವಿಲಸತಿ ಶಶಧರಮೌಲೇಃ ಸರ್ವಸ್ವಂ ಸುಕೃತಪರಿಪಾಕಃ ॥ ೨೪೯ ॥
ಉನ್ಮೂಲಯತಿ ಶುಭೇತರವಾರ್ತಾಮಪ್ಯಮ್ಬ ತೇ ನಾಮ ।
ಭಜನಾದಪಿ ಕೀರ್ತನತಃ ಕಿಂ ವಾ ಭಾಗ್ಯಂ ತ್ವದೀಯಭಕ್ತಾನಾಮ್। ॥ ೨೫೦ ॥
ಪರಮಶಿವಪುಣ್ಯಕೋಟೀ ನಿಜಗತಿಜಿತಸನ್ಮರಾಲಗತಿಧಾಟೀ ।
ಕೃತನಿತ್ಯಕಾಮಕೋಟೀ ಕೋಟೀರೋಲ್ಲಸಿತಚನ್ದ್ರಪರಿಪಾಟೀ ॥ ೨೫೧ ॥
ಚನ್ದ್ರಾಭರಣವತಂಸಾ ಕಂಸಾರಿಮುಖೈಃ ಸುರೈಶ್ಚ ನುತಚರಿತಾ ।
ಗಜಮುಖಷಣ್ಮುಖಜನನೀ ಸಾಸ್ಮಾಕಂ ಮಾನಸೇ ಕೃತಾಸ್ಥಾನಾ ॥ ೨೫೨ ॥
ಪರಮಶಿವದಿವ್ಯಜಾಯಾ ಮಾಯಾಮೋಹಿತಸುರಾಸುರಾ ಜನನೀ ।
ಕುಙ್ಕುಮವಿಲಸಿತಕಾಯಾಪಾಯಾನ್ಮಾಂ ರಕ್ಷತೀಹ ಕವಿಗೇಯಾ ॥ ೨೫೩ ॥
ಭೂಷಿತರತ್ನಾಭರಣಾ ಶರಣರ್ಥಿಜನಾಲಿಕಲ್ಪಿತಾಭರಣಾ ।
ಮುದಿತನಿಜಾನ್ತಃಕರಣಾ ಮರಣಾದಿಧ್ವಂಸಿನೀ ಸದಾವರಣಾ ॥ ೨೫೪ ॥
ಶ್ರುತಿಸುದತೀಸ್ತಬಕಾಯಿತಚರಣಾಮ್ಭೋಜಾ ಚ ಭೋಜಾದ್ಯೈಃ ।
ಕೃತಪರಿಚರಣಾ ವಿಸ್ತೃತಕರುಣಾಮ್ಬಾ ಶೈಲರಾಜವರತನಯಾ ॥ ೨೫೫ ॥
ಅಧರೇ ಲಸಿತಾರುಣ್ಯಂ ತನೌ ತು ಹರಮಾನ್ಯಪೂರ್ಣತಾರುಣ್ಯಮ್ ।
ಲೋಚನಧೃತಕಾರುಣ್ಯಂ ಕರೇ ಕುಸುಮ್ಭಾದಿಸಂಭೃತಾರುಣ್ಯಮ್ ॥ ೨೫೬ ॥
ತತ್ತೇಜೋ ಲಸತಿ ಹೃದಿ ಸ್ಮರಾರಿಸಂಮಾನ್ಯಬಹುಲೀಲಮ್ ।
ಸೃಣಿಪಾಶಾಙ್ಕುಶಹಸ್ತಂ ಪ್ರಶಸ್ತಮಸ್ತೋದಯಾದಿಹೀನಂ ಚ ॥ ೨೫೭ ॥
ಕಲಿತಚರಾಚರರಕ್ಷಣಮಕ್ಷೀಣೋದ್ದಾಮವೈಭವಂ ಕಿಮಪಿ ।
ನಿಖಿಲಾಗಮಯನ್ತ್ರಕಲಾಸಾರಂ ತಲ್ಲಸತಿ ಪುರಭಿದಾ ಮಾನ್ಯಮ್ ॥ ೨೫೮ ॥
ಭವಚಿತ್ತರಾಜಹಂಸೀ ಭವಭಯಮೋಹಾದಿಭೇದಿನೀ ಶರಣಮ್ ।
ಸವರಕ್ಷಣಕೃತದೀಕ್ಷಾ ಶಿವವಾಮಾಙ್ಗೋಲ್ಲಸಿತಮೂರ್ತಿಃ ॥ ೨೫೯ ॥
ತವ ಚರಣನ್ಯಾಸವಶಾತ್ ಪರಿಪೂತಾ ಭೂರಿಯಂ ಭೂತ್ಯೈ ।
ದೇವೇಶಮೌಲಿಸೇವ್ಯಾ ತಾಂ ತ್ವಾಮಾರಾಧಯಾಮಿ ಗಿರಿತನಯೇ ॥ ೨೬೦ ॥
ಕ್ಷಣಮಿಹ ಮಾತರ್ದೂರೇ ಸ್ಯಾದ್ ಯದಿ ದೃಷ್ಟಿಃ ಶುಭಂಕರೀ ಮಾನ್ಯಾ ।
ಅಷ್ಟೈಶ್ವರ್ಯೋಽಪಿ ತದಾ ವಿನಷ್ಟಶೋಭೋ ವಿಕಲ್ಯಶ್ಚ ॥ ೨೬೧ ॥
ಅತ ಏವ ಹಿ ಕಾರುಣ್ಯಾಲ್ಲೋಕಾಮ್ಬ ತ್ವಂ ಸದಾದೃತಭವಾಙ್ಗಾ ।
ಕ್ರೀಡಸಿ ರಕ್ಷಸಿ ಕಾಲೇ ಜನಯಸಿ ಮೋಹಾದಿಕಾನಥವಾ ॥ ೨೬೨ ॥
ಪರಮಶಿವಕೇಲಿರಸಿಕೇ ಯಃ ಕೋಽಪಿ ಜನಸ್ತವ ಸ್ತವಂ ಕುರ್ವನ್ ।
ನಿರಸಿತನಾಕೇಶಪದಸ್ತವ ಸಾರೂಪ್ಯಂ ಕ್ರಮಾದ್ ಭಜತಿ ॥ ೨೬೩ ॥
ತವ ಪಾದಪದ್ಮವಿಸೃಮರಕಾನ್ತಿಝರೀಂ ಮನಸಿ ಕಲಯಂಸ್ತು ।
ನಿರಸಿತನರಕಾದಿಭಯೋ ವಿರಾಜತೇ ನಾಕಿಸದಸಿ ಸುರವನ್ದ್ಯಃ ॥ ೨೬೪ ॥
ಬಾಲಮರಾಲೀಗತ್ಯೈ ಸುರಗಿರಿಧಾನುಷ್ಕಮಹಿತಕಲಗೀತ್ಯೈ ।
ವಿರಚಿತನಾನಾನೀತ್ಯೈ ಚೇತೋ ಮೇ ಸ್ಪೃಹಯತೇ ಬಹುಲಕೀರ್ತ್ಯೈ ॥ ೨೬೫ ॥
ವಿತರಣಕಲಾಪ್ರಸಕ್ತೌ ಚಿನ್ತಾಮಣಿಕಾಮಧೇನುಸುರವೃಕ್ಷಾಃ ।
ತೇ ದೂರೇ ತಾಂ ತ್ವಾಮಹಮಾರಾಧಯಿತುಂ ಕೃತಪ್ರಯತ್ನೋಽಸ್ಮಿ ॥ ೨೬೬ ॥
ವಿನಮದಮರೇಶಸುದತೀಕಚಸುಮಮಕರನ್ದಧಾರಯಾ ಸ್ನಿಗ್ಧಮ್ ।
ತವ ಪಾದಪದ್ಮಮೇತತ್ ಕದಾ ನು ಮಮ ಮೂರ್ಧ್ನಿ ಭೂಷಣಂ ಜನನಿ ॥ ೨೬೭ ॥
ತವ ಹರಪುರಂಧ್ರಿ ಮಾತಶ್ಚರಣಪಯೋಜಂ ಕ್ರಮಾರ್ಚಿತಂ ಯೇನ ।
ತೇನೈನ್ದ್ರಪದಮಪಿ ದ್ರಾಗ್ ವಿರಾಜತೇ ತತ್ ಸಮಾಕ್ರಾನ್ತಮ್ ॥ ೨೬೮ ॥
ತವ ಪದಸರೋಜಪಾಂಸುನ್ಯಾಸಾದ್ಧನ್ಯೋತ್ತಮಾಙ್ಗಲಸಿತಾಶ್ಚ ।
ಗಾಯನ್ತಿ ಚ ನೃತ್ಯನ್ತಿ ಪ್ರಮೋದಕೃತನುತಿಚಯಾಶ್ಚ ರಾಜನ್ತೇ ॥ ೨೬೯ ॥
ಯತ್ಪ್ರಣಯಕಲಹವಾರ್ತಾಭೀತೋ ನಿರಸಿತಸಿಮೇಷುರಪಿ ವಿನಯೀ ।
ಮದನಂ ತಮಪಿ ವಸನ್ತಂ ಮಾನಯಿತುಂ ಸಂಪ್ರವೃತ್ತಹೃದಯೋಽಭೂತ್ ॥ ೨೭೦ ॥
ಕುಸುಮೈರ್ಗಾಙ್ಗೈರ್ವಾರಿಭಿರನುನಯವಾಗ್ಭಿಶ್ಚ ನಮ್ರಮುಖಃ ।
ಸಾ ಪುರಹರಭೂಷಾ ನೋ ಮನಸಿ ವಿಹರತಾಂ ಕಿರೀಟಲಸದಿನ್ದುಃ ॥ ೨೭೧ ॥
ಪುರಹರಪರತನ್ತ್ರಂ ತದ್ ಗತತನ್ದ್ರಂ ವಸ್ತು ನಿಸ್ತುಲಮುಪಾಸೇ ।
ತೇನೈವಾಹಂ ಧನ್ಯೋ ಮದ್ವಂಶ್ಯಾ ನಿರಸಿತಾತ್ಮತಾಪಭರಾಃ ॥ ೨೭೨ ॥
ಮುಖಸುಷಮಾಜಿತಪದ್ಮಂ ಪದ್ಮಜಹರಿವಾಸವಾದಿಬುಧಸೇವ್ಯಮ್ ।
ಕಾವ್ಯಾರ್ಥಸಾರಮೇತದ್ ಗೌರೀರೂಪ ಹಿ ವಿಜಯತೇ ತೇಜಃ ॥ ೨೭೩ ॥
ಯಸ್ಯಾಃ ಪದಸರಸಿಜಯೋರ್ವಿಬುಧಕಿರೀಟಾವಲಿರ್ಗೌರ್ಯಾಃ ।
ನೀರಾಜನವಿಧಿಕಲಿತಾ ಸಾ ಮೇ ಕುಲದೈವತಂ ಲಸತು ॥ ೨೭೪ ॥
ಕವಿಹೃತ್ಕೈರವಿಕಸನಚನ್ದ್ರಿಕಯಾ ಶಮಿತತಾಪಭರಾಃ ।
ಮನ್ದಸ್ಮಿತಶ್ರಿಯಾ ಕಿಲ ಯಸ್ಯಾಃ ಸಾ ಭಾತಿ ಹಿಮವತಃ ಪುತ್ರೀ ॥ ೨೭೫ ॥
ನಿರಸಿತತಮಃಪ್ರಚಾರಾ ಪೂರ್ವಾ ಸಂಧ್ಯೇವ ನಗಪತೇಸ್ತನಯಾ ।
ದ್ವಿಜಸಂಘೋದಯಕಲನಾ ಸಾ ಮೇ ಕುಲದೈವತಂ ಲಸತು ॥ ೨೭೬ ॥
ರಚಯಾಮಿ ನಮಂಸಿ ಭೃಶಂ ಶಂಕರಮಣ್ಡಿತನಿಜಾಙ್ಕವಲ್ಲರ್ಯೈ ।
ಪುಣ್ಯಾತ್ಮನೇ ಪುರಾರೇಃ ಪರ್ವತಕುಲರಾಜತನಯಾಯೈ ॥ ೨೭೭ ॥
ಪುರಮಥನಭಾಗ್ಯಧಾಟೀ ಕವಿಲೋಕಸಮೀಡ್ಯಸೂಕ್ತಿರಸಧಾಟೀ ।
ಮುಖಲಸಿತಸಾರವೀಟೀ ವಿಹರತು ಹೃದಿ ಮೇ ಕೃಪೌಘಪರಿಪಾಟೀ ॥ ೨೭೮ ॥
ಅಮ್ಬ ತವ ಕರುಣಯಾಹಂ ರಕ್ಷಿತಸಂತಾನವೈಭವೋ ನಿತ್ಯಮ್ ।
ಏತಾದೃಶೀ ತುಮಹತೀ ಕೀರ್ತಿಸ್ತೇ ಜೃಮ್ಭತೇ ಪ್ರತಿದಿಶಂ ಹಿ ॥ ೨೭೯ ॥
ಮದನಪರಿಪನ್ಥಿಮಹಿಷೀ ಮಮ ಮಾನಸಕಲ್ಪಿತಾಸನಾ ಜಯತಿ ।
ಶ್ರುತಿಮೌಲಿವಿಹಿತಚರಣಾ ಯೋಗಿಹೃದಮ್ಭೋಜಲಾಲಿತಾಪಿ ಮುಹುಃ ॥ ೨೮೦ ॥
ಪಶುಪತಿಪುರಂಧ್ರಿ ಮಾತಸ್ತವ ಪಾದಯುಗಂ ಪ್ರಣಮ್ಯ ಜನ್ತುರಿಹ ।
ವಿಧುತಯಮದೂತಭೀತಿಸ್ತ್ರಿದಿಶೈರಪಿ ಮಾನ್ಯತೇ ಕಲಿತಸೇವಃ ॥ ೨೮೧ ॥
ಸುರಸುದತೀಲೋಲಾಲಕಮಕರನ್ದರಸವಾಸಿತಂ ತವ ಪದಾಬ್ಜಮ್ ।
ಮಮ ಮಾನಸೇ ತು ಫುಲ್ಲಂ ಭವತು ಹಿ ಕಾಲೇ ವಯಂ ತು ಧನ್ಯಾಃ ಸ್ಮಃ ॥ ೨೮೨ ॥
ತವ ನಾಮ ಯಸ್ಯ ವಕ್ತ್ರೇ ಫಾಲೇ ಚ ಪದಾಬ್ಜಕುಙ್ಕುಮಚ್ಛಾಯಾ ।
ಸ ಭವತಿ ಮಾನ್ಯಸ್ತ್ರಿದಶೈರಪಿ ಧುತಸಮಸ್ತದುರಿತಜಾಲಃ ಸನ್ ॥ ೨೮೩ ॥
ಆಸ್ತಾಂ ಹಿ ಮೇ ಪುರಸ್ತಾತ್ ಪುರಜಯಿನಃ ಪುಣ್ಯಪರಿಮಲೋಲ್ಲಾಸಿ ।
ಜನನೀರೂಪಂ ಸಂತತಮಾಶ್ರಿತರಕ್ಷೈಕಕ್ಲೃಪ್ತದೀಕ್ಷಂ ತತ್ ॥ ೨೮೪ ॥
ಹರಿಣಾಙ್ಕಮೌಲಿದಯಿತೇ ಯದಿ ತೇ ದೃಷ್ಟಿಸ್ತದಾದರಾತ್ ಕವಿತಾ ।
ಆಲಿಙ್ಗ್ಯ ಮೋದತಿ ಚಿರಂ ತೇನ ಹಿ ಸರ್ವಜ್ಞತಾ ಲೋಕೇ ॥ ೨೮೫ ॥
ಡಮ್ಭಾದಿದುರ್ಗುಣೌಘೋ ಧಾವತಿ ದೂರೇ ತ್ವದೀಯಪದಭಕ್ತಮ್ ।
ತ್ಯಕ್ತ್ವಾ ಯದಿ ತೇ ದೃಷ್ಟಿಸ್ತೇನ ಹಿ ಸರ್ವಾಃ ಶ್ರಿಯಃ ಕಾಲೇ ॥ ೨೮೬ ॥
ತವ ಮಾತರ್ಮುನಿಮಾನ್ಯಂ ಪದಮಾರಾಧ್ಯ ಪ್ರಸೂನೌಘೈಃ ।
ಲಭತೇ ಸಹಸ್ರನಯನಾನ್ಯಥವಾಷ್ಟೌ ಪುಣ್ಯಸಂವೃತಃ ಪುರುಷಃ ॥ ೨೮೭ ॥
ನಿರ್ಧೂತತಮಃಕನ್ದೇ ಮುಕುನ್ದಪದ್ಮಾಸನಾದಿಸೇವ್ಯಪದೇ ।
ಭಕ್ತಿರ್ಮಮ ಹಿ ಸದಾ ಸ್ಯಾತ್ ತೇನಾಹಂ ಧನ್ಯಚರಿತೋಽಸ್ಮಿ ॥ ೨೮೮ ॥
ನೂಪುರಮನಿಗಣರಞ್ಜಿತಪಾದಾಬ್ಜಂ ಮಾತರಮ್ಬಿಕೇ ಹೃದಯೇ ।
ಮಮ ಲಸತು ತವ ಕಟಾಕ್ಷಾನ್ನಾತಃ ಪರಮರ್ಥನೀಯಂ ಹಿ ॥ ೨೮೯ ॥
ಮುಕ್ತಾಮಣಿಭೂಷಿತಯಾ ಕೋಕಿಲಶುಕಮಾನ್ಯವಾಗ್ವಿಭೂಷಿತಯಾ ।
ಹಿಮಗಿರಿಸುತಯಾಹಂ ಕಿಲ ಸನಾಯಕೋ ಧೂತಪಾಪಾದಿಃ ॥ ೨೯೦ ॥
ನಿರ್ಧೂತತಮಸಿ ರೂಪಂ ತವ ಮಾತರ್ಮಾಮಕೇ ಹೃದಯೇ ।
ಸ್ಫುರತಿ ತವೈವ ಹಿ ದಯಯಾ ನ ಮಾಮಕೈಃ ಕರ್ಮಭಿಶ್ಚ ವ್ರತಗುಮ್ಭೈಃ ॥ ೨೯೧ ॥
ನಿಗಮಾನ್ತವೇದ್ಯವೈಭವಮೇತತ್ ತೇ ರೂಪಮಮ್ಬಿಕೇ ಮಾತಃ ।
ಸ್ಫುರತಿ ಮಮ ನಯನಯೋರಿಹ ತತ್ರ ತು ಹೇತುಸ್ತ್ವದೀಯಕರುಣಾ ಹಿ ॥ ೨೯೨ ॥
ತ್ರಿಣಯನಸಾಮ್ರಾಜ್ಯಮಿದಂ ತವ ರೂಪಂ ನಿಖಿಲದೇವತೋಪಾಸ್ಯಮ್ ।
ನನು ಮಾತಃ ಸ್ಫುರತು ಸದಾ ನಾತಃ ಪರಮರ್ಥನೀಯಂ ಹಿ ॥ ೨೯೩ ॥
ಹರಿಣಾಙ್ಕಮೌಲ್ಯಧೀನಾ ಕಾಪಿಪರಾ ಶಕ್ತಿರಮ್ಬಿಕಾ ಕ್ಷೇತ್ರೇ ।
ಮೌಲೌ ಚ ನಿತ್ಯವಚಸಾಂ ಮಮ ಚಿತ್ತೇ ಭಜತು ನಿತ್ಯಲೀಲಾದಿಮ್ ॥ ೨೯೪ ॥
ಪರಿಸರನತವಿಬುಧಾಲೀಕಿರೀಟಮಣಿಕಾನ್ತಿವಲ್ಲರೀವಿಸರೈಃ ।
ಕೃತನೀರಾಜನವಿಧಿ ತೇ ಮಮ ತು ಶಿರೋಭೂಷಣಂ ಪದಸರೋಜಮ್ ॥ ೨೯೫ ॥
ಭಾಗೀರಥೀವ ವಾಣೀ ತವ ನುತಿರೂಪಾ ವಿರಾಜತೇ ಪರಮಾ ।
ಇಹ ಮಾತರ್ಯದ್ಭಜನಂ ಸರ್ವೇಷಾಂ ಸರ್ವಸಂಪದಾಂ ಹೇತುಃ ॥ ೨೯೬ ॥
ನಗಪತಿತನಯೇ ಮಾತಃ ಶಾಂಕರಿ ಮಾಹೇಸ್ವರೀತಿ ನಾಮಾನಿ ।
ನಿತ್ಯಂ ಜಪನ್ನಹಂ ತು ತ್ವದೀಯದಾಸೋಽಸ್ಮಿ ಮುಕ್ತಯೇ ಸಿದ್ಧಃ ॥ ೨೯೭ ॥
ನಿಖಿಲಚರಾಚರರಕ್ಷಾಂ ವಿತನ್ವತೀ ಶಾಂಕರೀ ದಯಯಾ ।
ಮಮ ಕುಲದೈವತಮೇಷಾ ಜಯತಿ ಸದಾರಾಧ್ಯಮಾನ್ಯಪದಕಮಲಾ ॥ ೨೯೮ ॥
ಸರ್ವಜನೈಃ ಸಂಸೇವ್ಯೇ ಸಂತತಮಪಿ ವಾಞ್ಛಿತಪ್ರದೇ ದೇವಿ ।
ಅಮ್ಬ ತ್ವಮೇವ ಶರಣಂ ತೇನಾಹಂ ಪ್ರಾಪ್ತಸರ್ವಕಾರ್ಯಾರ್ಥಃ ॥ ೨೯೯ ॥
ಶಾಂಕರಿ ಕಥಂ ನು ವರ್ಣ್ಯಸ್ತವ ಮಹಿಮಾ ವೇದಮೌಲಿಗಣವೇದ್ಯಃ ।
ಇತಿ ನಿಶ್ಚಿತ್ಯ ಪದಾಬ್ಜಂ ತವ ವನ್ದೇ ಮೋಕ್ಷಕಾಮೋಽಹಮ್ ॥ ೩೦೦ ॥
ತ್ವಾಮಮ್ಬ ಬಾಲಿಶೋಽಹಂ ತ್ವಚಮತ್ಕಾರೈರ್ಗಿರಾಂ ಗುಮ್ಭೈಃ ।
ಅಯಥಾಯಥಕ್ರಮಂ ಹಿ ಸ್ತುವನ್ನಪಿ ಪ್ರಾಪ್ತಜನ್ಮಸಾಫಲ್ಯಃ ॥ ೩೦೧ ॥
ಇತಿ ಅಮ್ಬಿಕಾತ್ರಿಶತೀ ಸಮಾಪ್ತಾ
Encoded and proofread by Sridhar Seshagiri seshagir at egr.msu.edu
Please send corrections to sanskrit@cheerful.com
Last updated ತ್oday
http://sanskritdocuments.org
Ambika Trishati Lyrics in Kannada PDF
% File name : ambikA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : ambikA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website