কমলাত্রিশতী
{॥ কমলাত্রিশতী ॥}
গঙ্গাধরমখিবিরচিতা ।
পরমাভরণং বিষ্ণোর্বক্ষসি সা সাগরেন্দ্রবরপুত্রী ।
যা মূর্তির্মতী কালে ক্ষমা জনানাং কৃতাপরাধানাম্ ॥ ১ ॥
সা নঃ শ্রেযো দদ্যাত্ কমলা কমলাসনাদিজননীং যাম্ ।
সংপ্রাপ্য সহচরীং হরিরবতি জগন্ত্যনাকুলং সততম্ ॥ ২ ॥
নিত্যশ্রেযোদানে খ্যাতা যা হরিগৃহস্য সর্বস্বম্ ।
শ্রুতিমৌলিস্তুতবিভবা সা ভাতু পুরঃ সদাস্মাকম্ ॥ ৩ ॥
বিষ্ণুক্রীডালোলা বিখ্যাতা দীনরক্ষণে লক্ষ্মীঃ ।
জননী নঃ স্ফুরতু সদা তেন বযং কিল কৃতার্থাঃ স্মঃ ॥ ৪ ॥
নির্বাণাঙ্কুরজননী কালে সা সার্বভৌমপদদোগ্ধ্রী ।
নিরসতিমোহসমূহা মম দৈবতমাদৃতং গুরুভিঃ ॥ ৫ ॥
বিষ্ণোর্বক্ষসি লসিতা শীতমযূখস্য সোদরী কমলা ।
কমলাযতনযনা নঃ পাতু সদা পাপরাশিভ্যঃ ॥ ৬ ॥
কবিপরিষদা চ বেদৈঃ নিত্যং স্তুতনিজমহোদযা কমলা ।
মনসি মম সংনিধত্তাং ত্বমিতানন্দায লোকনাথেন ॥ ৭ ॥
দুগ্ধোদধিতনযা সা দুরিতনিহন্ত্রী কৃতপ্রণামানাম্ ।
আনন্দপদবিধাত্রী পত্যা সাকং পদে পদে লোকে ॥ ৮ ॥
মন্মথজননী সা মামবতু সরোজা(ক্ষ)গেহিনী কমলা ।
যামারাধ্য বুধেন্দ্রা বিশন্তি পরমং তু তত্ পদং বিষ্ণোঃ ॥ ৯ ॥
সত্সূক্তিকৃতিবিধাত্রী নমতামম্বা ত্রিলোক্যাস্তু ।
নিত্যপ্রসাদভূম্না রক্ষতি মামাদরাত্ কমলা ॥ ১০ ॥
মম সূক্তিরঞ্জলিপুটঃ প্রণতিশ্চানেকসংখ্যাকা ।
কুতুকাত্ ক্ষীরোদসুতামমিতানন্দায গাহতে কমলাম্ ॥ ১১ ॥
যা পারমার্থ্যসরণিঃ সা কমলা নিশ্চিতা বেদৈঃ ।
সৈষা হি জগন্মাতা সংসৃতিতাপাপহন্ত্রী চ ॥ ১২ ॥
মন্দস্মিতমধুরাননমমন্দসংতোষদাযি ভজতাং তত্ ।
কমলারূপং তেজো বিভাতু নিত্যং মদীযহৃত্কমলে ॥ ১৩ ॥
কালে ক্ষপযতি কমলা কটাক্ষধাট্যা হি মামকং দুরিতম্ ।
অত এবাশ্রিতরক্ষণদীক্ষেত্যেবং জনো বদতি ॥ ১৪ ॥
নবনবহর্ম্যবিধাত্রী নাকিকিরীটার্চিতা চ সা দেবী ।
জ্যোতির্মণ্ডললসিতা মুনিহৃদযাব্জাসনা চ সদ্গতিদা ॥ ১৫ ॥
সংবীক্ষ্য জলধিতনযাং ভূযো ভূযঃ প্রণম্য ভক্তগণঃ ।
নিরসিতদুরিতৌঘঃ সন্ স্তৌতি মুদা মোক্ষসিদ্ধযে কমলাম্ ॥ ১৬ ॥
রাকানিশীব দেব্যাং দৃষ্টাযাং ভক্তগণবাণী ।
ভজতে জলনিধিশৈলীং সাঙ্গোপাঙ্গং কৃতানন্দা ॥ ১৭ ॥
দুর্গতিভীত্যা খিন্নঃ সোঽহং শরণং ভজামি তাং কমলাম্ ।
শরণার্থিনাং হি রক্ষাকৃদিতি খ্যাতা হি যা লোকে ॥ ১৮ ॥
ন হি কলযতে হৃদন্তে মন্দারং কামধেনুং বা ।
যঃ সেবতে মুকুন্দপ্রিযাং শ্রিযং নিত্যভাবেন ॥ ১৯ ॥
কৈটভমর্দনমহিষীং মমাঞ্জলির্গাহতাং কালে ।
ন হি নাথনীযমত্র ক্ষমাতলে সা প্রসন্নাস্তু ॥ ২০ ॥
সংতাপপীডিতং মামবতু সদা শ্রীর্হরিপ্রিযা মাতা ।
রক্ষিতবাযসমুখ্যা কৃপানিধিঃ পুণ্যকৃদ্দৃশ্যা ॥ ২১ ॥
ন হি কেবলং প্রণামৈঃ স্তুত্যা ভক্ত্যা সমারাধ্যা ।
সত্যেন ধর্মনিবহৈর্ভাবেন চ কমলগেহিনী কমলা ॥ ২২ ॥
কদাচিত্কবিলোকেঽপ্যক্ষীণানন্দদাযিনী কমলা ।
রক্ষতু কটাক্ষকলিকাঙ্কূরৈর্ভক্তানিহাদরতঃ ॥ ২৩ ॥
কলিপাপগ্লপিতানাং মুরমর্দনদিব্যগেহিনী লক্ষ্মীঃ ।
রাজতি শরণং পরমং বশীকৃতেশা চ বিবুধগণসেব্যা ॥ ২৪ ॥
নিত্যোল্লসদুরুমালা বক্ষসি কমলা হরের্ভাতি ।
নিজতনুভাসা দ্যোতিতকৌস্তুভমণিরম্বুধেস্তনযা ॥ ২৫ ॥
মাতর্মঙ্গলদাযিন্যমরেন্দ্রবধূসমর্চিতাঙ্ঘ্রিযুগে ।
মাং পাহ্যপাযনিবহাত্ সংততমকলক্ষমামূর্তে ॥ ২৬ ॥
যদি কলিতা চোপেক্ষা নশ্যেত্ কিল তাবকী মহতী ।
কীর্তিরতোঽম্ব কটাক্ষৈঃ পরিষিঞ্চ মুদা মুহুঃ শীতৈঃ ॥ ২৭ ॥
ধনধান্যসুতাদিরুচিগ্রস্তং মাং পাহি কমলে ত্বম্ ।
তেনোর্জিতকীর্তিঃ স্যা মাতস্ত্বং সর্বরক্ষিণী খ্যাতা ॥ ২৮ ॥
তব পাদাম্বুজযুগলধ্যানং মাতর্মদীযমঘমাশু ।
কবলীকরোতি কালে তেনাহং সিদ্ধসংকল্পঃ ॥ ২৯ ॥
অঞ্জলিকলিকা হি কৃতা যদি তস্যৈ মুরনিহন্তৃদযিতাযৈ ।
রসনাগ্রে খেলনভাক্ তস্য তু পুংসো গিরাং দেবী ॥ ৩০ ॥
মাতস্তব মূর্তিরিযং সুধামযী নিশ্চিতা নিপুণৈঃ ।
যত্ তদ্দর্শনভূম্না নিরস্ততাপা বুধা ভবন্ত্যচিরাত্ ॥ ৩১ ॥
কলিতজগত্ত্রযরক্ষাভরাণি মযি দেবি সংবিধেহি মুদা ।
ত্বদ্বীক্ষণানি কমলে তেনাহং সিদ্ধসংকল্পঃ ॥ ৩২ ॥
বরদে মুরারিদযিতে জযন্তি তে বীক্ষণানি যানি দিবি ।
সংপ্রাপ্য তানি মঘবা বিজিতারির্দেবসংঘবন্দ্যশ্চ ॥ ৩৩ ॥
মোহান্ধকারভাস্করমম্ব কটাক্ষং বিধেহি মযি কমলে ।
যেনাপ্তজ্ঞানকলাঃ স্তুবন্তি বিবুধাস্ত্বদীযসদসি কলম্ ॥ ৩৪ ॥
কামক্রোধাদিমহাসত্ত্বনিরাসং কৃপাসারাত্ ।
কুরু মাতর্মম সংসৃতিভীতিং চ নিরাকুরু ত্বমেবারাত্ ॥ ৩৫ ॥
মূঢানামপি হৃদ্যাং কবিতাং দাতুং যদীযপরিচর্যা ।
প্রভবতি কালে সা হি শ্রীরম্বা নঃ প্রসন্নাস্তু ॥ ৩৬ ॥
দিব্যক্ষেত্রেষু বুধা দিনকরমধ্যে চ বেদমৌলৌ চ ।
যত্স্থানমিতি বদন্তি শ্রীরেষা ভাতি সংশ্রিতহরির্হি ॥ ৩৭ ॥
নিজলীলাক্রান্তহরী রক্ষতি কমলা কটাক্ষধাট্যা নঃ ।
শরণার্থিনশ্চ কালে বিহগোরগপশুমুখানুর্ব্যাম্ ॥ ৩৮ ॥
সমরাঙ্গণেষু জযদা ত্রিদশানাং মৌলিভির্মান্যা ।
আপদি রক্ষণদক্ষা সা কমলা নঃ প্রসন্নাস্তু ॥ ৩৯ ॥
নিত্যানন্দাসনভাড্ নবনিধিবন্দ্যা চ সাগরেন্দ্রসুতা ।
বিলসতি মাধববক্ষসি পালিতলোকত্রযা চ জননী নঃ ॥ ৪০ ॥
মুনিনুতনিজপরিপাটী বাগ্ধাটী দানলোলুপা ভজতাম্ ।
শিক্ষিতরিপুজনকোটী বিলসতি ধৃতশাতকুম্ভমযশাটী ॥ ৪১ ॥
নিখিলাগমবেদ্যপদা নিত্যং সদ্ভিঃ সমারাধ্যা ।
সংসৃতিপাশনিহন্ত্রী যা তস্যৈ চাঞ্জলিঃ ক্রিযতে ॥ ৪২ ॥
ভূযাংসি নমাংসি মযা ভক্তেন কৃতানি কমলজাঙ্ঘ্রিযুগে ।
নিত্যং লগন্তু তেন হি সর্বা রাজন্তি সংপদো মান্যাঃ ॥ ৪৩ ॥
নিত্যং নির্মলরূপে বরদে বারাশিকন্যকে মাতঃ ।
সদ্গণরক্ষণদীক্ষে পাহীতি বদন্তমাশু মাং পাহি ॥ ৪৪ ॥
ভুবনজননি ত্বমারাত্ কৃতরক্ষণসংততিঃ ক্ষমামূর্তে ।
প্রতিবস্তু রমে কলিতস্বরূপশক্ত্যা হি রাজসে জগতি ॥ ৪৫ ॥
জয জয কলশাব্ধিসুতে জয জয হরিবল্লভে রমে মাতঃ ।
প্রাতরিতি বিবুধবর্যাঃ পঠন্তি নামানি তে হি মে গুরবঃ ॥ ৪৬ ॥
নেত্ররুচিবিজিতশারদপদ্মে পদ্মে নমস্তুভ্যম্ ।
তেন বযং গতবিপদঃ সা মুক্তিঃ করগতা কলিতা ॥ ৪৭ ॥
সততং বদ্ধাঞ্জলিপুটমুপাস্মহে তচ্ছুভপ্রদং তেজঃ ।
যত্ কমলোদরনিলযং কমলাক্ষপ্রীতিবীচিকাপূরম্ ॥ ৪৮ ॥
স্ফুরতু মম বচসি কমলে ত্বদীযবৈভবসুধাধারা ।
নিত্যং ব্যক্তিং প্রাপ্তা ধুতনুতজনখেদজালকা মহতী ॥ ৪৯ ॥
কমলে তব নুতিবিষযে বুদ্ধির্জাতা হি মে সহসা ।
তেন মম ভাগধেযং পরিণতমিত্যেব নিত্যসংতুষ্টঃ ॥ ৫০ ॥
কবিতারসপরিমলিতং করোতি বদনং নতানাং যা ।
স্তোতুং তাং মে হ্যারাত্ সা দেবী সুপ্রসন্নাস্তু ॥ ৫১ ॥
হরিগৃহিণি তাবকং নুতরূপং যে ভুবি নিজে হৃদম্ভোজে ।
ধ্যাযন্তি তেষু বিবুধা অপি কল্পককুসুমমর্পযন্তি মুদা ॥ ৫২ ॥
নানাবরদানকলালোলুপহৃদযে হৃদম্ভুজস্থে মাম্ ।
রক্ষাপাযাত্ সহসা কুরু ভক্তং দোষহীনং চ ॥ ৫৩ ॥
নিজঘনকেশরুচা জিতনীলাম্বুধরে শশাঙ্কসহজন্মন্ ।
পদ্মে ত্বদীযরূপং মনোহরং ভাতু মে হৃদযে ॥ ৫৪ ॥
ঘনকুঙ্কুমলসিতাঙ্গং মুক্তাহারাদিভূষিতং মধুরম্ ।
মন্দস্মিতমধুরাস্যং সূর্যেন্দুবিলোচনং চ বুধমান্যম্ ॥ ৫৫ ॥
নিবিডকুচকুম্ভযুগলং নিজদৃগ্জিতহরিণশাবকাক্ষিযুগম্ ।
লীলাগতিজিতকলভং মধুবৈরিমনোহরং চ সুরমান্যম্ ॥ ৫৬ ॥
দিশি দিশি বিস্তৃতসংপদ্বিলাসমধুরং চ কুন্দদন্তালি ।
মদনজনকং চ বিষ্ণোঃ সর্বস্বং সর্বদানচণম্ ॥ ৫৭ ॥
কুলদৈবতমস্মাকং সংবিদ্রূপং নতার্তিহররূপম্ ।
নানাদুর্গতিহরণক্ষমমমরীসেবিতং সকলম্ ॥ ৫৮ ॥
পঞ্চদশবর্ণমানং পযোজবক্ত্রং পিতামহসমর্চ্যম্ ।
জগদবনজাগরূকং হরিহরসংমান্যবৈভবং কিমপি ॥ ৫৯ ॥
করুণাপূরিতনযনং পরমানন্দপ্রদং চ পরিশুদ্ধম্ ।
আগমগণসংবেদ্যং কোশগৃহং সর্বসংপদাং নিত্যম্ ॥ ৬০ ॥
মাতস্তাবকপাদাম্বুজযুগলং সংততং স্ফুরতু ।
তেনাহং তব রূপং দ্রক্ষ্যাম্যানন্দসিদ্ধযে সকলম্ ॥ ৬১ ॥
দেব্যা কটাক্ষিতাঃ কিল পুরুষা বা যোষিতঃ পশবঃ ।
মান্যন্তে সুরসংসদি কল্পককুসুমৈঃ কৃতার্হণাঃ কালে ॥ ৬২ ॥
সুমনোবাঞ্ছাদানে কৃতাবধানং ধনং বিষ্ণোঃ ।
ধিষণাজাড্যাদিহরং যদ্বীক্ষণমামনন্তি জগতি বুধাঃ ॥ ৬৩ ॥
অন্তরপি বহিরুদারং তব রূপং মন্ত্রদেবতোপাস্যম্ ।
জননি স্ফুরতু সদা নঃ সংমান্যং শ্রেযসে কালে ॥ ৬৪ ॥
মুররিপুপুণ্যশ্রেণীপরিপাকং তাবকং রূপম্ ।
কমলে জননি বিশুদ্ধং দদ্যাচ্ছ্রেযো মুহুর্ভজতাম্ ॥ ৬৫ ॥
পুণ্যশ্রেণী কমলা সা জননী ভক্তমানসে স্থিতিভাক্ ।
তেজস্ততিভির্মোহিতভুবনা ভুবনাধিনাথগৃহিণীযম্ ॥ ৬৬ ॥
জলনিধিকন্যারূপং হরিমান্যং সর্বসংপদাং হেতুঃ ।
চিরকৃতসুকৃতবিশেষান্নযনযুগে ভাতি সর্বস্য ॥ ৬৭ ॥
জলনিধিতপঃফলং যন্মুনিজনহৃদযাব্জনিত্যকৃতনৃত্তম্ ।
করুণালোলাপাঙ্গং তত্ তেজো ভাতু নিঃসমং বদনে ॥ ৬৮ ॥
শমিতনতদুরিতসংঘা হরযে নিজনেত্রকল্পিতানঙ্গা ।
কৃতসুরশাত্রবভঙ্গা সা দেবী মঙ্গলৈস্তুঙ্গা ॥ ৬৯ ॥
নিখিলাগমসিদ্ধান্তং হরিশুদ্ধান্তং সদা নৌমি ।
তেনৈব সর্বসিদ্ধিঃ শাস্ত্রেষু বিনিশ্চিতা বিবুধৈঃ ॥ ৭০ ॥
কৃষ্ণকৃতবিবিধলীলং তব রূপং মাতরাদরান্মান্যম্ ।
স্ফুরতু বিলোচনযুগলে নিত্যং সংপত্সমৃদ্ধ্যৈ নঃ ॥ ৭১ ॥
করুণাকটাক্ষলহরী কামাযাস্তু প্রকামকৃতরক্ষা ।
লক্ষ্ম্যা মাধবমান্যা সত্সুখদানে দিশি খ্যাতা ॥ ৭২ ॥
অপবর্গসিদ্ধযে ত্বামম্বামম্ভোজলোচনাং লক্ষ্মীম্ ।
অবলম্বে হরিদযিতে পদ্মাসনমুখসুরেন্দ্রকৃতপূজাম্ ॥ ৭৩ ॥
তাবককটাক্ষলহরীং নিধেহি মযি দেবি কমলে ত্বম্ ।
তেন মনোরথসিধ্হির্ভুবি পরমে ধামনি প্রচুরা ॥ ৭৪ ॥
ত্বামাদরেণ সততং বীক্ষেমহি মাতরব্জকৃতবাসাম্ ।
বিষ্ণোর্বক্ষোনিলযামক্ষযসুখসিদ্ধযে লোকে ॥ ৭৫ ॥
সা নঃ সিধ্যতু সিদ্ধ্যৈ দেবানাং বাঙ্মমনোঽতীতা ।
হরিগৃহিণী হরিণাক্ষী পালিতলোকত্রযা চ জননীযম্ ॥ ৭৬ ॥
সকলচরাচরচিন্মযরূপং যস্যা হি দেবতোপাস্যম্ ।
সা দদতু মঙ্গলং মে নিত্যোজ্জ্বলমাদরাজ্জননী ॥ ৭৭ ॥
শীতমযূখসহোদরি তাং ত্বামম্বাং হি শীলযে নিত্যম্ ।
নিরসিতবৈরিগণোঽহং হরিচরণন্যস্তরক্ষশ্চ ॥ ৭৮ ॥
দিক্ষি বিদিক্ষু কৃতশ্রীঃ সা মে জননী নদীশতনযেযম্ ।
হরিণা সাকং ভজতু প্রাকাশ্যং হৃদি সতাং সমৃদ্ধ্যৈ নঃ ॥ ৭৯ ॥
বারিনিধিবংশসংপদ্ দিব্যা কাচিদ্ধরের্মান্যা ।
অর্চন্তি যাং তু মুনযো যোগারম্ভে তথান্তে চ ॥ ৮০ ॥
ধৃতসুমমধুপক্রীডাস্থানাযিতকেশভারাযৈ ।
নম উক্তিরস্তু মাত্রে বাগ্জিতপীযূষধারাযৈ ॥ ৮১ ॥
সংদেহে সিদ্ধান্তে বাদে বা সমরভূমিভাগে বা ।
যা রাজতি বহুরূপা সা দেবী বিষ্ণুবল্লভা খ্যাতা ॥ ৮২ ॥
প্রতিফলতু মে সদা তন্মুনিমানসপেটিকারত্নম্ ।
বিষ্ণোর্বক্ষোভূষণমাদৃতনির্গতিজনাবনং তেজঃ ॥ ৮৩ ॥
বালকুরঙ্গবিলোচনধাটীরক্ষিতসুরাদি মনুজানাম্ ।
নযনযুগাসেব্যং তদ্ ভাতীহ ধরাতলে তেজঃ ॥ ৮৪ ॥
মাধবদৃক্সাফল্যং ভক্তাবলিদৃশ্যকামধেনুকলা ।
লক্ষ্মীরূপং তেজো বিভাতু মম মানসে বচসি ॥ ৮৫ ॥
হরিসরসক্রীডার্থং যা বিধৃতানেকরূপিকা মাতা ।
সা গেহভূষণং নঃ স্ফুরতু সদা নিত্যসংপূজ্যা ॥ ৮৬ ॥
দ্বারবতীপুরভাগে মৈথিলনগরে চ যত্কথাসারঃ ।
সা দেবী জলধিসুতা বিহরণভাঙ্ মামকে মনসি ॥ ৮৭ ॥
জলনিধিতপোমহিম্নে দেব্যৈ পরমাত্মনঃ শ্রিযৈ সততম্ ।
ভূযাংসি নমাংসি পুনঃ সর্বা নঃ সংপদঃ সন্তু ॥ ৮৮ ॥
পরমৌষধং হি সংসৃতিব্যাধের্যত্ কীর্তিতং নিপুণৈঃ ।
তদহং ভজামি সততং লক্ষ্মীরূপং সদানন্দম্ ॥ ৮৯ ॥
দশরথসুতকোদণ্ডপ্রভাবসাক্ষাত্কৃতে কৃতানন্দা ।
সীতারূপা মাতে জজ্ঞে যজ্ঞক্ষিতৌ হি সা সিদ্ধ্যৈ ॥ ৯০ ॥
মুনিজনমানসনিলযে কমলে তে চরণপঙ্কজং শিরসি ।
অবতংসযন্নুদারং বিশামি দেবৈঃ সুধর্মাং বা ॥ ৯১ ॥
ধনমদমেদুরসেবাং ত্যক্তবাহং তে পদাম্ভোজম্ ।
শরণং যামি পুমর্থস্ফূর্তিকলাযৈ ভৃশং দীনঃ ॥ ৯২ ॥
ন ঘটয কুত্সিতসেবাং দুষ্টৈর্বা সংগমং মাতঃ ।
কুরু মাং দাসং সংসৃতিপাপং চ হর শীঘ্রম্ ॥ ৯৩ ॥
মযি নমতি বিষ্ণুকান্তে তবাগ্রতস্তাপভারার্তে ।
মাতঃ সহসা সুমুখী ভব বালে দোষনিলযে চ ॥ ৯৪ ॥
হন্ত কদা বা মাতস্তব লোচনসেচনং ভবেন্মযি ভোঃ ।
ঈত্থং প্রাতঃ স্তুবতাং ত্বমেব রক্ষাকরী নিযতম্ ॥ ৯৫ ॥
সংসাররোগশান্তিপ্রদমেতল্লোচনং মাতঃ ।
তাবত্কমহমুপাসে দিব্যৌষধমাশু সাগরেন্দ্রসুতে ॥ ৯৬ ॥
সংসৃতিরোগার্তানাং তব নামস্মরণমত্র ধরণিতলে ।
পূজাপ্রদক্ষিণাদিকমার্যা মুখ্যৌষধং বদন্তি কিল ॥ ৯৭ ॥
মাতর্বিনা ধরণ্যাং সুকৃতানাং খণ্ডমিহ জন্তুঃ ।
ধ্যানং বা ন হি লভতে প্রণতিং বা সংপদাং জননীম্ ॥ ৯৮ ॥
গুরুবরকটাক্ষবিভবাদ্ দেবি ত্বাঙ্ঘ্রিপ্রণামধুতপাপঃ ।
তব চ হরের্দাসঃ সন্ বিশামি দেবেশ মানিতাং চ সভাম্ ॥ ৯৯ ॥
মুরহরনেত্রমহোত্সবতারুণ্যশ্রীর্নিরস্তনতশত্রুঃ ।
ললিতলিকুচাভকুচভরযুগলা দৃগ্বিজিতহরিণসংদোহা ॥ ১০০ ॥
কারুণ্যপূর্ণনযনা কলিকল্মষহারিণী চ সা কমলা ।
মুখজিতশারদকমলা বক্ত্রাম্ভোজে সদা স্ফুরতু মাতা ॥ ১০১ ॥
তাবককটাক্ষসেচনবিভবাং নির্ধূতদুরিতসংঘা হি ।
পরমং সুখং লভন্তে পরে তু লোকে চ সূরিভিঃ সার্ধম্ ॥ ১০২ ॥
তব পাদপদ্মবিসৃমরকান্তিঝরীং মনসি কলযংস্তু ।
নিরসিতনরকাদিভযো বিরাজতে নাকিসদসি সুরবন্দ্যঃ ॥ ১০৩ ॥
হন্ত সহস্রেষ্বথ বা শতেষু সুকৃতী পুমান্ মাতঃ ।
তাবকপাদপযোরুহবরিবস্যাং কলযতে সকলম্ ॥ ১০৪ ॥
জননি তরঙ্গয নযনে মযি দীনে তে দযাস্নিগ্ধে ।
তেন বযং তু কৃতার্থা নাতঃ পরমস্তিঃ নঃ প্রার্থ্যম্ ॥ ১০৫ ॥
তাবককৃপাবশাদিহ নানাযোগাদিনাশিতভযা যে ।
তেষাং স্মরণমপি দ্রাক্ শ্রিযাবহং নিত্যমাকলযে ॥ ১০৬ ॥
নৈব প্রাযশ্চিত্তং দুরিতানাং মামকানাং হি ।
ত্বামেব যামি শরণং তস্মাল্লক্ষ্মি ক্ষমাধারে ॥ ১০৭ ॥
মুরবৈরিমান্যচরিতে মাতস্ত্বামখিললোকসাম্রাজ্যে ।
পশ্যন্তি দিবি সুরেন্দ্রা মুনযস্তত্ত্বার্থিনশ্চ নিত্যকলাম্ ॥ ১০৮ ॥
স্বীযপদপ্রাপ্ত্যৈ ননু বিবুধেশা জলধিকন্যকে মাতঃ ।
আরাধ্য দিব্যকুসুমৈস্তব পাদাব্জং পরং তুষ্টাঃ ॥ ১০৯ ॥
সৃষ্টিস্থিত্যাদৌ হরিরম্ব তবাপাঙ্গবীক্ষণাদরবান্ ।
জগদেতদবতি কালে ত্বং চ হরির্নঃ ক্রমাত্ পিতরৌ ॥ ১১০ ॥
রাজ্যসুখলাভসংপত্প্রাপ্ত্যৈ ক্ষিতিপাশ্চ যে চ বিপ্রাদ্যাঃ ।
গাঙ্গজলৈরপি কুসুমৈর্বরিবস্যাং তে ক্রমেণ কলযন্তি ॥ ১১১ ॥
সংত্যক্তকামতদনুজডম্ভাসূযাদযো নরাঃ কমলে ।
আরাধ্য ত্বাং চ হরিং কালে চৈকাসনস্থিতাং ধন্যাঃ ॥ ১১২ ॥
জননী কদা পুনীতে মম লোচনমার্গমাদরাদেষা ।
যে কিল বদন্তি ধন্যাস্তেষাং দর্শনমহং কলযে ॥ ১১৩ ॥
করধৃতলীলাপদ্মা পদ্মা পদ্মাক্ষগেহিনী নযনে ।
সিঞ্চতি সকলশ্রেযঃপ্রাপ্ত্যৈ নির্ব্যাজকারুণ্যা ॥ ১১৪ ॥
নানাবিধবিদ্যানাং লীলাসদনং সরোজনিলযেযম্ ।
কবিকুলবচঃপযোজদ্যুমণিরুচির্ভাতি নঃ পুরত্ঃ ॥ ১১৫ ॥
অতসীকুসুমদ্যুতিভাঙ্ নাকিগণৈর্বন্দ্যপাদপদ্মযুগা ।
সরসিজনিলযা সা মে প্রসীদতু ক্ষিপ্রমাদরাত্ সিদ্ধ্যৈ ॥ ১১৬ ॥
জগদীশবল্লভে ত্বযি বিন্যস্তভরঃ পুমান্ সহসা ।
তীর্ত্বা নাকিস্থানং বিশতি পরং বৈষ্ণবং সুরৈর্মান্যম্ ॥ ১১৭ ॥
মাতর্জ্ঞানবিকাসং কারয করুণাবলোকনৈর্মধুরৈঃ ।
তেনাহং ধন্যতমো ভবেযমার্যাবৃতে সদসি ॥ ১১৮ ॥
হরিবক্ষসি মণিদীপপ্রকাশবত্যান্যা মাত্রা ।
নিত্যং বযমিহ দাসাঃ শ্রিযা সনাথা মুদা পরং নৌমঃ ॥ ১১৯ ॥
বিদ্রাবযতু সরোজাসনে ত্বদীযা কটাক্ষধাটী নঃ ।
অজ্ঞানাঙ্কুরমুদ্রাং পুনরপি সংসারভীতিদাং সহসা ॥ ১২০ ॥
তাবককটাক্ষসূর্যোদযে মদীযং হৃদম্ভোজম্ ।
ভজতে বিকাসমচিরাত্ তমোবিনাশশ্চ নিশ্চিতো বিবুধৈঃ ॥ ১২১ ॥
লক্ষ্মীকটাক্ষলহরী লক্ষ্মীং পক্ষ্মলযতি ক্রমান্নমতাম্ ।
পাদপযোরুহসেবা পরং পদং চিত্সুখোল্লাসম্ ॥ ১২২ ॥
চিদ্রূপা পরমা সা কমলেক্ষণনাযিকা মুদে ভজতাম্ ।
যত্প্রণযকোপকালে জগদীশঃ কিংকরো ভবতি ॥ ১২৩ ॥
কাচন দেবী বিহরতু মম চিত্তে সংততং সিদ্ধ্যৈ ।
যাপত্যং কলশাব্ধেরুরগেশযসত্কলত্রং চ ॥ ১২৪ ॥
অষ্টসু মহিষীষ্বেকা কমলা মুখ্যা হি নির্দিষ্টা ।
অনযৈব সর্বজগতামুদযাদিস্তন্যতে কালে ॥ ১২৫ ॥
কৈবল্যানন্দকলাকন্দমহং সংততং বন্দে ।
তত্তু মুকুন্দকলত্রং চিন্তিতফলদানদীক্ষিতং কিমপি ॥ ১২৬ ॥
ঈক্ষে কমলামেনামম্বামম্ভোজলোচনাং সততম্ ।
মন্দস্মিতমধুরাস্যাং নিত্যং চাজ্ঞাতকোপমুখদোষাম্ ॥ ১২৭ ॥
অঙ্কিতমাধববক্ষঃস্থলা সরোজেক্ষণা চ হরিকান্তা ।
কবলযতি মানসং মে দযাপ্রসারাদিভির্নিত্যম্ ॥ ১২৮ ॥
ভূত্যৈ মম ভবতু দ্রাগজ্ঞানধ্বংসিনী নমতাম্ ।
নাথানুরূপরূপা শ্রুত্যন্তেড্যা দশাবতারেষু ॥ ১২৯ ॥
সকলজনরক্ষণেশু প্রণিহিতনযনা ত্রিলোকমাতা নঃ ।
পুষ্ণাতি মঙ্গলানাং নিকরং সেবাক্রমেণ incomplete ॥ ১৩০ ॥
পদ্মাসনজননী মাং পাতু মুদা সুন্দরাপাঙ্গৈঃ ।
সর্বৈশ্বর্যনিদানং যামাহুর্বৈদিকা দীপ্তাম্ ॥ ১৩১ ॥
নানালংকারবতী মুনিমানসবাসিনী হরেঃ পত্নী ।
ত্রৈলোক্যবিনুতবিভবা মাং পাযাদাপদাং নিচযাত্ ॥ ১৩২ ॥
বিদ্রাবযতু ভযং নঃ সা কমলা বিষ্ণুবল্লভা মাতা ।
অব্ধিঃ সংক্ষুভিতোঽভূত্ যদর্থমার্যেণ রামেণ ॥ ১৩৩ ॥
ভূযো যদর্থমিন্দ্রঃ সুরতরুকুসুমার্থিনা চ কৃষ্ণেন ।
হতগর্বোঽজনি যুদ্ধে সা নিত্যং শ্রেযসে ভূযাত্ ॥ ১৩৪ ॥
ত্বামারাধ্য জনা অপি ধনহীনাঃ সৌধমধ্যতলভাজঃ ।
নানাদেশবনীপকজনস্তুতা ভান্তি নিত্যমেব রমে ॥ ১৩৫ ॥
সংসৃতিতাপো ন ভবতি পুনরপি যত্পাদপঙ্কজং নমতাম্ ।
সা মযি কলিতদযা স্যাদম্বা বিষ্ণোঃ কলত্রমনুরূপম্ ॥ ১৩৬ ॥
জননীকটাক্ষভাজামিহ মর্ত্যানাং সুরাস্তু কিংকরতাম্ ।
রিপবো গিরিতটবাসং ভজন্তি বেশ্মানি সিদ্ধযঃ সর্বাঃ ॥ ১৩৭ ॥
স্মরণাদ্বা ভজনাদ্বা যস্যাঃ পাদাম্বুজস্য ভুবি ধন্যাঃ ।
হন্ত রমন্তে স্তম্বেরমনিবহাবৃতগৃহাঙ্গণে মনুজাঃ ॥ ১৩৮ ॥
চিরকৃতসুকৃতনিষেব্যা সা দেবী বিষ্ণুবল্লভা খ্যাতা ।
যস্যাঃ প্রসাদভূম্না জাতাঃ পশ্বাদযো বদান্যা হি ॥ ১৩৯ ॥
অম্ব মধুরান্ কটাক্ষান্ তাপহরান্ বিকির মযি কৃপাজলধে ।
যে বিন্যস্তাঃ করিবরমারুতিমুখভক্তবর্যেষু ॥ ১৪০ ॥
অমৃতলহরীব মধুরা জলধররুচিরা নতার্তিহরশীলা ।
সর্বশ্রেযোদাত্রী কাচিদ্ দেবী সদা বিভাতু হৃদি ॥ ১৪১ ॥
গীতাচার্যপুরন্ধ্রী ত্বদীযনামপ্রভাবকলনাদ্যৈঃ ।
যমভযবার্তা দূরে হরিসাংনিধ্যং কুতো ন স্যাত্ ॥ ১৪২ ॥
জলনিধিতনযে কান্তে বিষ্ণোরুষ্ণাংশুচন্দ্রনযনে তে ।
চতুরাননাদযস্তু খ্যাতা বালাঃ শ্রুতৌ চোক্তাঃ ॥ ১৪৩ ॥
মনসিজবৈরং গাত্রং বাণী সৌধারসী চ যদ্ভজতাম্ ।
শ্লাধ্যা সংপত্ সজ্জনসমাগমশ্চাশু সিধ্যন্তি ॥ ১৪৪ ॥
সফলযতু নেত্রযুগলং হতনতদুরিতা চ সা পরা দেবী ।
জলনিধিকন্যা মান্যা পত্যবতারানুকূলনিজচরিতা ॥ ১৪৫ ॥
নিত্যং স্মরামি দেবীং নমতাং সর্বার্থদাযিনীং কমলাম্ ।
যামাহুর্ভবনিগলধ্বংসনদীক্ষাং চ incomplete ॥ ১৪৬ ॥=২০
সকলজগদঘনিবারণসংকল্পাং মধুজিতো দযিতাম্ ।
জীবাতুমেব কলযে মোক্ষার্থিজনস্য ভূমিসুতাম্ ॥ ১৪৭ ॥
মন্দানামপি দযযা তমোনিরাসং বিতন্বন্তী ।
সর্বত্র ভাতি কমলা তনুরিব বিষ্ণোর্নিরস্তাঘা ॥ ১৪৮ ॥
বালমরালীগত্যৈ সুরপুরকন্যাদিমহিতকলগীত্যৈ ।
বিরচিতনানানীত্যৈ চেতো মে স্পৃহযতে বহুলকীর্ত্যৈ ॥ ১৪৯ ॥
অভিলষিতদানকুশলা বাগ্দেবীবন্দিতা চ সা কমলা ।
নিত্যং মানসপদ্মে সংচারং কলযতে মুহুঃ কুতুকাত্ ॥ ১৫০ ॥
মুরমথননযনপঙ্কজবিলাসকলিকা সুরেশমুখসেব্যা ।
ভূতমযী সাবিত্রী গযত্রী সর্বদেবতা জযতি ॥ ১৫১ ॥
সা হি পরা বিদ্যা মে লক্ষ্মীরক্ষোভণীযকীর্তিকলা ।
হৃদ্যাং বিদ্যাং দযাদদ্য শ্রেযঃপরংপরাসিদ্ধ্যৈ ॥ ১৫২ ॥
কামজননী হি লক্ষ্মীঃ নানালীলাদিভির্নিজং নাথম্ ।
মোহযতি বিষ্ণুমচিরাত্ প্রকৃতীনাং ক্ষেমসিদ্ধ্যর্থম্ ॥ ১৫৩ ॥
মনসিজসাম্রাজ্যকলানিদানমার্যাভিবন্দিতং কিমপি ।
লক্ষ্মীরূপং তেজো বিলসতি মম মনসি বিষ্ণুসংক্রান্তম্ ॥ ১৫৪ ॥
বিষ্ণুমনোরথপাত্রং সংতপ্তস্বর্ণকাম্যনিজগাত্রম্ ।
আশ্রিতজলনিধিগোত্রং রক্ষিতনতবাহুজচ্ছাত্রম্ ॥ ১৫৫ ॥
কবিকুলজিহ্বালোলং মুরমর্দনকলিতরম্যবহুলীলম্ ।
নিরসিতনতদুষ্কালং বন্দে তেজঃ সদালিনুতশীলম্ ॥ ১৫৬ ॥
আদিমপুরুষপুরন্ধ্রীমম্বামম্ভোজলোচনাং বন্দে ।
যাং নত্বা গততাপাস্ত্যক্ত্বা দেহং বিশন্তি পরমপদম্ ॥ ১৫৭ ॥
লক্ষ্ম্যা হরিরপি ভাতি প্রকৃতিক্ষেমায দীক্ষিতাযাসৌ ।
মম লোচনযোঃ পুরতো লসতু গভীরং ক্রিযাসিদ্ধ্যৈ ॥ ১৫৮ ॥
জননি কদা বা নেষ্যাম্যহমারাদর্চিতত্বদীযপদঃ ।
নিমিষমিব হন্ত দিবসন্ দৃষ্ট্বা ত্বামাদরেণ কল্যাণীম্ ॥ ১৫৯ ॥
সংপূর্ণযৌবনোজ্জ্বলদেহাং যাং বীক্ষ্য শৌরিরপি ।
কুসুমশরবিদ্ধচেতাঃ কিংকরভাবং স্বযং প্রাপ্তঃ ॥ ১৬০ ॥
অনুনযশীলস্তদনু প্রণযক্রোধাদিনা ভীতঃ ।
আদিমপুরুষঃ সোঽযং সা লক্ষ্মীর্ন শ্রিযৈ ভবতু ॥ ১৬১ ॥
মণিকুণ্ডললসিতাস্যং কৃপাকরং কিমপি কুঙ্কুমচ্ছাযম্ ।
হরিণা কৃতসংচারং তেজো মে ভাতু সর্বদা সিদ্ধ্যৈ ॥ ১৬২ ॥
সাম্রাজ্যমঙ্গলশ্রীঃ শ্রীরেষা পুষ্করাক্ষস্য ।
গন্ধর্বকন্যকাদ্যৈর্গঙ্গাতীরেষু গীতকীর্তির্হি ॥ ১৬৩ ॥
কবিতাভাগ্যবিধাত্রী পরিমলসংক্রান্তমধুপগণকেশা ।
মম নযনযোঃ কদা বা সা দেবী কলিতসংনিধানকলা ॥ ১৬৪ ॥
কীর্তিঃ স্বযং বৃণীতে বাগ্দেবী চাপি বিজযলক্ষ্মীশ্চ ।
তং নরমচিরাল্লোকে যো লক্ষ্মীপাদভক্তস্তু ॥ ১৬৫ ॥
সন্মিত্রং পাণ্ডিত্যং সদ্দারাঃ সত্সুতাদ্যাশ্চ ।
জাযন্তে তস্য ভুবি শ্রীভক্তো যশ্চ নির্দিষ্টঃ ॥ ১৬৬ ॥
পরমাচার্যৈর্বিনুতাং তামম্বামাদরান্নৌমি ।
পরমৈশ্বর্যং বিষ্ণোরপি যা বেদেষু নির্দিষ্টা ॥ ১৬৭ ॥
কবিকুলসূক্তিশ্রেণীশ্রবণানন্দোল্লসদ্বতংসসুমা ।
সা দেবী মম হৃদযে কৃতসাংনিধ্যা বিরাজতে পরমা ॥ ১৬৮ ॥
তাপার্তাস্তু তটাকং যথা ভজন্তে রমাং দেবীম্ ।
সংসৃতিতপ্তাঃ সর্বে যান্তি হি শরণং শরণ্যাং তাম্ ॥ ১৬৯ ॥
সর্বজ্ঞত্বং শ্লাধ্যং ধরাধিপত্যং রমে দেবি ।
যদ্যত্ প্রার্থ্যং দযযা তদ্ দিশ মোক্ষং চ মে জননি ॥ ১৭০ ॥
বিদ্যুতমচঞ্চলাং ত্বাং কৃষ্ণে মেঘে পযোধিবরকন্যে ।
নিত্যমবৈমি শ্রেযঃসিধ্য মাতঃ প্রসন্নে নঃ ॥ ১৭১ ॥
ত্বামম্ব সংততরুচিং কৃষ্ণো মেঘঃ সমাসাদ্য ।
সদ্বর্ত্মনি বর্ষতি কিল কাঙ্ক্ষাধিকমাদরেণ বার্ধিসুতে ॥ ১৭২ ॥
অম্ব ত্বমেব কালে মুকুন্দমপি দর্শযন্তীহ ।
শ্রেযঃসিদ্ধ্যৈ নমতাং ভাসি হৃদি শ্রুতিশিরঃসু সল্লোকে ॥ ১৭৩ ॥
বিনমদমরেশসুদতীকচসুমমকরন্দধারযা স্নিগ্ধম্ ।
তব পাদপদ্মমেতত্ কদা নু মম মূর্ধ্নি ভূষণং জননি ॥ ১৭৪ ॥
অপবর্গসৌখ্যদে তে দযাপ্রসারঃ কথং বর্ণ্যঃ ।
যামবলম্ব্য হি যষ্টিং ন পততি সংসারপঙ্কিলে মার্গে ॥ ১৭৫ ॥
সূক্ষ্মাত্ সূক্ষ্মতরং তে রূপং পশ্যন্তি যোগিনো হৃদযে ।
তাং ত্বামহং কদা বা দ্রক্ষ্যেঽলংকারমণ্ডিতাং মাতঃ ॥ ১৭৬ ॥
চিরতরতপসা ক্লিষ্টে যোগিহৃদি স্থানভাগ্ রমা দেবী ।
দর্শনমচিরাদ্ দযযা দদাতি যোগাদিহীনানাম্ ॥ ১৭৭ ॥
তীরং সংসৃতিজলধেঃ পূরং কমলাক্ষলোচনপ্রীতেঃ ।
সারং নিগমান্তানাং দূরং দুর্জনততের্হি তত্তেজঃ ॥ ১৭৮ ॥
লক্ষ্মীরূপং তেজো মমাবিরস্তু শ্রিযৈ নিত্যম্ ।
যন্নিত্যধর্মদারান্ বিষ্ণোরমিতৌজসঃ প্রাহুঃ ॥ ১৭৯ ॥
জলধিসুতে ত্বং জননী স বাসুদেবঃ পিতা চ নঃ কথিতঃ ।
শরণং যুবাং প্রপন্না নাতো দুর্গতিপরিস্ফূর্তিঃ ॥ ১৮০ ॥
হরিনীলরত্নভাসা প্রকশিতাত্মা সমুদ্রবরকন্যা ।
মঙ্গলমাতনুতেযং কটাক্ষকলিকাপ্রসারৈস্তু ॥ ১৮১ ॥
মচ্চিত্তমত্তবারণবন্ধনমধুনা ত্বদীযপাদযুগে ।
কলযামি রমে মাতর্মাং রক্ষ ক্ষিপ্রমেব সংসৃতিতঃ ॥ ১৮২ ॥
মোচয সংসৃতিবন্ধং কটাক্ষকলিকাঙ্কুরৈ রমে মাতঃ ।
নাতঃ পরমর্থ্যমিহ ক্ষমাতলে ত্বং দযামূর্তিঃ ॥ ১৮৩ ॥
মঞ্জুলকবিতাসংততিবীজাঙ্কুরদাযিসারসালোকা ।
জননি তবাপাঙ্গশ্রীঃ জযতি জগত্ত্রাণকলিতদীক্ষেযম্ ॥ ১৮৪ ॥
অম্ব তবাপাঙ্গশ্রীরপাঙ্গকেলীশতানি জনযন্তী ।
মুরহন্তুর্হৃদি জযতি ব্রীডামদমোহকামসারকরী ॥ ১৮৫ ॥
বদ্ধমপি চিত্তমেতদ্ যমনিযমাদ্যৈঃ পরিষ্কারৈঃ ।
ধাবতি বলাদ্ রমে তব পাদাব্জং যামি শরণমহম্ ॥ ১৮৬ ॥
মত্তগজমান্যগমনা মধুরালাপা চ মান্যচরিতা সা ।
মন্দস্মেরমুখাব্জা কমলা মে হৃদযসারসে লসতু ॥ ১৮৭ ॥
শাস্ত্রস্মরণবিহীনং পাপিনমেনং জনং রমা দেবী ।
দযযা রক্ষতি কালে তস্যাস্তেন প্রথা মহতী ॥ ১৮৮ ॥
মুখবিজিতচন্দ্রমণ্ডলমিদমম্ভোরুহবিলোচনং তেজঃ ।
ধ্যানে জপে চ সুদৃশাং চকাস্তি হৃদযে কবীশ্বাণাং চ ॥ ১৮৯ ॥
অম্ব বিবেকবিদূরং জনমেনং শিশিরলোচনপ্রসরৈঃ ।
শিশিরয কৃপযা দেবি ত্বমেব মাতা হি লোকস্য ॥ ১৯০ ॥
কোপদুপেক্ষসে যদি মাতর্মে রক্ষকঃ কঃ স্যাত্ ।
মযি দীনে কো লাভস্তব তু দযাযাঃ প্রসারিণ্যাঃ ॥ ১৯১ ॥
ভবচণ্ডকিরণতপ্তঃ শ্রান্তোঽহং জ্ঞানবারিদূরস্থঃ ।
শিশিরামঙ্ঘ্রিচ্ছাযাং তব মাতর্যামি শরণমারাত্তু ॥ ১৯২ ॥
মাতরশোকোল্লাসং প্রকটয তব কোমলকটাক্ষৈঃ ।
যৈর্দীনা নরপতযঃ কলিতা বারণশতাবৃতে গেহে ॥ ১৯৩ ॥
জযতি রমে তব মহতী কৃপাঝরী সর্বসংমান্যা ।
ক্ষেমংকরী যদেষা প্রতিকল্পং সর্বজগতাং চ ॥ ১৯৪ ॥
অজ্ঞানকূপকুহরে পতিতং মাং পাহি কমলে ত্বম্ ।
নগরে বা গ্রামে বা বনমধ্যে দিক্ষু রক্ষিণী ত্বমসি ॥ ১৯৫ ॥
তব চরণৌ শরণমিতি ব্রুবন্নহং মাতরব্ধিতনযে ত্বম্ ।
হরিণা সহিতা দযযা প্রাহ্যবিলম্বেন দীনং মাম্ ॥ ১৯৬ ॥
পরিসরনতবিবুধালীকিরীটমণিকান্তিবল্লরীবিসরৈঃ ।
কৃতনীরাজনবিধি তে মম তু শিরোভূষণং হি পদযুগলম্ ॥ ১৯৭ ॥
মম হৃদযপঙ্কজবনীবিকাসহেতৌ দিনাধিপাযেতাম্ ।
তব তু কটাক্ষপ্রসরঃ দীপাযেতাং তমোনিরাকরণে ॥ ১৯৮ ॥
যাবচ্ছরণং যাতি ক্ষিতিতনযে ত্বাং হি জন্তুরিহ মূঢঃ ।
তাবত্ তস্য তু রসনাঙ্গণে তু বাণী সমাকলিতনৃত্তা ॥ ১৯৯ ॥
পঙ্কজনিলযে তাবকচরণং শরণং সমাকলযে ।
তেন হি সর্বকৃতানাং ভবিষ্যতাং হানিরেব দুরিতানাম্ ॥ ২০০ ॥
শ্রুত্যন্তসেবিতং তে চরণসরোজং প্রণম্য কিল জন্তুঃ ।
ছত্রোল্লসিতশিরাঃ সন্ বনীপকান্ দানবারিণা সিঞ্চন্ ॥ ২০১ ॥
বিষ্বক্সেনমুখাদ্যৈঃ সেবিতমম্ব ত্বদীযপাদযুগম্ ।
অবতংসযন্তি সন্তঃ কলিতাপপ্রশমনাযাস্তু ॥ ২০২ ॥
দুগ্ধোদধিতনযে ত্বাং দিশাগজেন্দ্রাঃ সুবর্ণঘটতোযৈঃ ।
মণিমণ্টপমধ্যতলে সমভ্যষিঞ্চন্ হরিপ্রীত্যৈ ॥ ২০৩ ॥
দিগ্গজপুষ্পকরকুম্ভৈরভিষিক্তাং ত্বাং হরিঃ প্রীত্যা ।
উদবহদারান্মুনিগণমধ্যে সর্বশ্রিযো মূলম্ ॥ ২০৪ ॥
জাতপরাক্রমকলিকা দিশি দিশি কিংনরসুগীতনিজযশসঃ ।
ধন্যা ভান্তি হি মনুজাঃ যদ্বীক্ষালববিশেষতঃ কালে ॥ ২০৫ ॥
নমদমরীকচভরসুমমরন্দধারাভিষিক্তং তে ।
পদকমলযুগলমেতচ্ছ্রেযঃস্ফূর্ত্যৈ সদা ভবতু ॥ ২০৬ ॥
রাগদ্বেষাদিহতং মামব কমলে হরেঃ কান্তে ।
দর্শয দযযা কালে হ্যপবর্গস্থানমার্গং চ ॥ ২০৭ ॥
ন হি জানে বর্ণযিতুং পরমে স্থনে ত্বদীযবিভবমহম্ ।
মুনযশ্চ সুরা বেদা যতো নিবৃত্তাঃ ক্ষমাতনযে ॥ ২০৮ ॥
মনুজাঃ কটাক্ষিতাঃ কিল তথাম্বযা মেদিনীপুত্র্যা ।
সত্সুতকলত্রসহিতাঃ সুরভিং কালেন নির্বিশান্তি মুদা ॥ ২০৯ ॥
জলধীশকন্যকা সা লসতু পুরোঽস্মাকমাদরকৃতশ্রীঃ ।
যত্প্রণমনাজ্জনানাং কবিতোন্মেষঃ সদীডিতে ভাতি ॥ ২১০ ॥
দূরিকরোতু দুরিতং ত্বদ্ভক্তির্মামকং কমলে ।
অহমপি সুরেশসেব্যে তব সদসি বিশামি কীর্তিগানপরঃ ॥ ২১১ ॥
পরমজ্ঞানবিধাত্রী তব পাদপযোজভক্তিরস্মাকম্ ।
কিং বাশাস্যমতোঽন্যত্ সমুদ্রতনযে হরের্জাযে ॥ ২১২ ॥
অম্ব কদা বা লপ্স্যে মদীযপাপাপনোদায ।
তব পাদকমলসেবামব্জভবাদ্যৈস্তু সংপ্রার্থ্যাম্ ॥ ২১৩ ॥
মন্দানামপি মঞ্জুলকবিত্বরসদাযিনী জননী ।
কাপি করুণামযী সা লসতু পুরস্তাত্ সদাস্মাকম্ ॥ ২১৪ ॥
সকলকবিলোকবিনুতে কমলে কমলাক্ষি বল্লভে বিষ্ণোঃ ।
ত্বন্নামানি হি কলযে বনে জলে শত্রুপীডাযাম্ ॥ ২১৫ ॥
দিবি বা ভুবি দিক্ষু জলে বহ্নৌ বা সর্বতঃ কমলে ।
জন্তূনাং কিল রক্ষা ত্বদধীনা কীর্ত্যতে বিবুধৈঃ ॥ ২১৬ ॥
কুশলবিধযে তদস্তু ত্রিবিক্রমাসেব্যরম্যনিজকেলি ।
কবলিতপদনতদৈন্যং তরুণাম্বুজলোচনং তেজঃ ॥ ২১৭ ॥
জননী সুবর্ণবৃষ্টিপ্রদাযিনী ভাতি বিষ্ণুবক্ষঃস্থা ।
কমলা কলিতক্ষেমা প্রকৃতীনাং শীতলাপাঙ্গৈঃ ॥ ২১৮ ॥
জগতামাদিমজননী লসতি কবেরাত্মজাপুলিনে ।
ক্ষেত্রেষূত্তমজুষ্টেষ্বযোনিজা লোকরক্ষাযৈ ॥ ২১৯ ॥
কুচশোভাজিতবিষ্ণুঃ কুঙ্কুমপঙ্কাঙ্কিতা কমলা ।
কাঞ্চ্যাং রাজতি কাঞ্চীমণিগণনীরাজিতাঙ্ঘ্রিযুগা ॥ ২২০ ॥
মন্দারকুসুমমদহরমন্দস্মিতমধুরবদনপঙ্করুহা ।
হৃদ্যতমনিত্যযৌবনমণ্ডিতগাত্রী বিরাজতে কমলা ॥ ২২১ ॥
কংসরিপুগেহিনী সা হংসগতির্হংসমান্যনিজচরিতা ।
সংসারতাপহানিং কলযতু কালে রমাস্মাকম্ ॥ ২২২ ॥
মনসিজজননী জননী চাস্মাকমিহাদরাত্ কালে ।
শীতললোলাপাঙ্গৈস্তরঙ্গযতি শ্রেযসাং সরিণম্ ॥ ২২৩ ॥
তব মন্দহাসকলিকাং ভজে ভুজঙ্গে শযানং তম্ ।
যা কলযতি গতকোপং বালানাং নঃ কৃতাপরাধানাম্ ॥ ২২৪ ॥
সা সাধযেদভীষ্টং কমলা শ্রীর্বিষ্ণুবক্ষঃস্থা ।
যস্যাঃ পদবিন্যাসঃ শ্রুতিমৌলিষু তন্যতে মহালক্ষ্ম্যাঃ ॥ ২২৫ ॥
শান্তিরসনিত্যশেবধিমম্বাং সেবে মনোরথাবাপ্ত্যৈ ।
যামারাধ্য সুরেশাঃ স্বপদং প্রাপুর্হি তাদৃক্ষম্ ॥ ২২৬ ॥
ধাতুরপি বেদবচসাং দূরে যত্স্থানমামনন্তি বুধাঃ ।
সাস্তু মুদে শ্রীরেষা মুরমর্দনসত্কলত্রমমিতৌজঃ ॥ ২২৭ ॥
ভবদুঃখরাশিজলধের্হঠাত্ তরিত্রীং পরং বিদ্মঃ ।
তামম্বাং কমলস্থাং মুরারিবক্ষোমণিপ্রদীপাং চ ॥ ২২৮ ॥
মুনিসার্বভৌমবর্ণিতমহাচরিত্রং হরেঃ কলত্রং তত্ ।
পথি মঙ্গলায ভবতু প্রস্থানজুষাং কৃপাধারম্ ॥ ২২৯ ॥
খণ্ডিতবৈরিগণেযং মণ্ডিতভক্তা সুতাদ্যৈশ্চ ।
ভাসুরকীর্তির্জযতি ক্ষোণীসুরবন্দ্যচরণাব্জা ॥ ২৩০ ॥
নতপালিনি মাং পাহি ত্রিজগদ্বন্দ্যে নিধেহি মযি দযযা ।
তাবককটাক্ষলহরীঃ শক্তিমযে সকলসিদ্ধীনাম্ ॥ ২৩১ ॥
ভবসাগরং তিতীর্ষুস্তব চরণাব্জং মহাসেযুম্ ।
মাতঃ কদা নু লপ্স্যে ঘনতাপোর্ম্যাদিপীডিতো দীনঃ ॥ ২৩২ ॥
কবিবাগ্বাসন্তীনাং বসন্তলক্ষ্মীর্মুরারিদযিতা নঃ ।
পরমাং মুদং বিধত্তে কালে কালে মহাভূত্যৈ ॥ ২৩৩ ॥
সুরহরপরতন্ত্রং তদ্ গততন্দ্রং বস্তু নিস্তুলমুপাসে ।
তেনৈবাহং ধন্যো মদ্বংশ্যা নিরসিতাত্মতাপভরাঃ ॥ ২৩৪ ॥
তৃষ্ণাং শমযতি দেবী রাঘবদযিতা নতালিসুরবল্লী ।
ইট্যার্যবচো ধৈর্যং জনযতি কালে ধরাপুত্রি ॥ ২৩৫ ॥
রঘুপতিদযিতে মাতঃ কাকাসুররক্ষণাদিনা লোকে ।
তাবককরুণামহিমা প্রথিতঃ কিল ভূতিদাযী নঃ ॥ ২৩৬ ॥
প্রচুরতদুরিতপালীসমাবৃতানাং কলৌ হি তপ্তানাম্ ।
তাবকদযা হি মাতঃ শরণং বরমিতি সতাং গণঃ স্তৌতি ॥ ২৩৭ ॥
অত্যন্তশীতলাং তাং কটাক্ষধাটীমুপাসেঽহম্ ।
তেন মম ত্রিদশানাং ন কোঽপি ভেদো ধরাতনযে ॥ ২৩৮ ॥
যৈঃ সেবা সংকলিতা তব পাদাব্জে ধরাতনযে ।
তেষামজ্ঞানঝরী যাতি হি বিলযং ক্ষণেনৈব ॥ ২৩৯ ॥
জ্ঞানারবিন্দবিলসনমচিরাদস্য স্তুতৌ হি কবিবর্যাঃ ।
সংপদ্ দিব্যা চ তথা বিবুধাবলিমাননীযাত্র ॥ ২৪০ ॥
মাতস্তব পাদাব্জং যস্য ললাটে কৃতোরুনিজকান্তি ।
তত্পাদপদ্মমচিরাদ্ বিমানগা দেবতা বহতি ॥ ২৪১ ॥
আজ্ঞাবশেন দেব্যা লসন্তি দিবি দেবতামান্যাঃ ।
ইন্দ্রাদ্যাঃ স চ ধাতা দিক্পালাশ্চাপি গন্ধর্বাঃ ॥ ২৪২ ॥
কৈবল্যানন্দকলাদাত্রীং কমলামহর্নিশং নৌমি ।
তেনৈব জন্ম সফলং তীর্থাদিনিষেবণাদ্যচ্চ ॥ ২৪৩ ॥
যচ্চ হরিপাদপঙ্কেরুহপরিচরণাদিনা লোকে ।
তত্ সর্বমাশু ঘটযতি সহসা মন্দস্য মে মাতা ॥ ২৪৪ ॥
নানাশ্রুত্যন্তকলাপরিমলপরিবাহবাসিতং মাতঃ ।
তব চরণকমলযুগলং মমাবতংসঃ ক্ষণং ভাতু ॥ ২৪৫ ॥
নতদেবনগরনারীধম্মিল্ললসত্সুমালিকৃতনাদাঃ ।
প্রাতর্মুরজবিলাসং কলযন্তি ভৃশং তবাগ্রতো ভৃঙ্গাঃ ॥ ২৪৬ ॥
পাপপ্রশমনদীক্ষাকলাধুরীণাঃ পযোজনিলযে তে ।
মাং চ পবিত্রীকুর্যুঃ পাদপরাগাঃ কৃপাবশতঃ ॥ ২৪৭ ॥
হন্ত কদা বা লপ্স্যে তবাঙ্ঘ্রিশুশ্রূষণাসক্তিম্ ।
সহজানন্দং তেন হি পদং ক্রমাত্ প্রাপ্যমাদিষ্টম্ ॥ ২৪৮ ॥
নলিনীবিলাসরুচিরাং মযি দেবি ত্বত্কটাক্ষলহরীং হি ।
কালে নিধেহি দযযা স্ফীতা তে কীর্তিরাদৃতা সর্বৈঃ ॥ ২৪৯ ॥
বিনিহতদুরিতস্তোমা কাপি মদীযে হৃদম্ভোজে ।
লসতু পরদেবতাখ্যা মাধবনেত্রপ্রিযংকরী কলিকা ॥ ২৫০ ॥
পঞ্চাযুধগুরুমন্ত্রং কলনূপুরনিনদমাদরাত্ কমলে ।
কলযতি রমাধবগৃহং যাতুং কালে ত্বযি প্রবৃত্তাযাম্ ॥ ২৫১ ॥
নতনাকিলোকবনিতাললাটসিন্দূরশোণকান্তিভৃতোঃ ।
কলযে নমাংসি কমলে তব পাদপযোজযোর্নিত্যম্ ॥ ২৫২ ॥
কমলসুষুমানিবাসস্থানকটাক্ষং চিরায কৃতরক্ষম্ ।
রক্ষোগণভীতিকরং তেজো ভাতি প্রকামমিহ মনসি ॥ ২৫৩ ॥
জ্যোত্স্নেব শিশিরপাতা কটাক্ষধাটী ত্বদীযা হি ।
অম্ব মুকুন্দ ( ||. incomplete ||. ) কুরুতে ॥ ২৫৪ ॥
তাপহররসবিবর্ষংঅধৃতকুতুকা কাপি নীলনলিনরুচিঃ ।
কাদম্বিনী পুরস্তদাস্তাং নঃ সংততং জননী ॥ ২৫৫ ॥
সফলযতু নেত্রযুগলং মামকমেতত্ ত্বদীযরূপমহো ।
যত্ কমলনেত্রসুচরিতপচেলিমং বৈদিকী শ্রুতির্ব্রূতে ॥ ২৫৬ ॥
মাধবনেত্রপযোজামৃতলহরী ভাতি তাবকং রূপম্ ।
অম্ব যুবামাদ্যৌ নঃ পিতরৌ বনে সুখাবাপ্ত্যৈ ॥ ২৫৭ ॥
সরসকবিতাদিসংপদ্বিলসনমারাদুশান্তি কবিবর্যাঃ ।
যত্প্রীণনেন সা মে ভবতু বিভূত্যৈ হি সা কমলা ॥ ২৫৮ ॥
মনসিজজযাদিকার্যং যদপাঙ্গলবান্নৃণাং ভবতি ।
তত্পদমানন্দকলং সেব্যং চ ভজে রমাং জননীম্ ॥ ২৫৯ ॥
শিথিলততমঃসমূহা ভক্তানাং সা রমা দেবী ।
জনযতি ধৈর্যং চ হরেঃ কালে যা সর্বদা সেব্যা ॥ ২৬০ ॥
যদ্ভ্রূবিলাসবশতঃ শক্তঃ সৃষ্ট্যাদিকং কর্তুম্ ।
হরিরপি লোকে খ্যাতঃ সা নঃ শরণং জগন্মাতা ॥ ২৬১ ॥
নযনযুগলীং কদা মে সিঞ্চতি এব্যাঃ পরং রূপম্ ।
যদ্ভজনান্ন হি লোকে দৃষ্টং শ্লাধ্যং পরং বস্তু ॥ ২৬২ ॥
সুচরিতফলং ত্বদীযং রূপং নঃ কলিতভক্তীনাম্ ।
অত এব মামকানাং পাপানাং বিরতিরূর্জিতা কমলে ॥ ২৬৩ ॥
সুকৃতিবিভবাদুপাস্যা কমলা সা সর্বকল্যাণা ।
হরিবক্ষসি কৃতবাসা রক্ষতি লোকানহোরাত্রম্ ॥ ২৬৪ ॥
সংবিদ্রূপা হি হরেঃ কুটুম্বিনী ভাতি ভক্তহৃদযেষু ।
সর্বশ্রেযঃপ্রাপ্ত্যৈ যাং বিদুরার্যা রমাং কমলাম্ ॥ ২৬৫ ॥
বিষযলহরীপ্রশান্ত্যৈ কমলাপাদাম্বুজং নৌমি ।
পূর্বং শুকাদিসুধিযো যদ্ধ্যানাদ্ গলিতশত্রুভযাঃ ॥ ২৬৬ ॥
ললিতগমনং ত্বদীযং কলনূপুরনাদপূরিতং মাতঃ ।
নৌমি পদাম্বুজযুগলং ভবতাপনিরাসনাযাদ্য ॥ ২৬৭ ॥
বিরলীকরোতি তাপং কমলাযা মন্দহাসঝরী ।
যত্সেবনেষু সমুদিতকৌতুকরসনির্ভরো হরির্জযতি ॥ ২৬৮ ॥
প্রতিফলতু সংততং মে পুরতো মাতস্ত্বদীযরূপমিদম্ ।
যদ্দর্শনরসভূম্না হরিরপি নানাস্বরূপভাক্ কালে ॥ ২৬৯ ॥
অম্ব তব চরণসেবাং সংততমহমাদরাত্ কলযে ।
তেন মম জন্ম সফলং ত্রিদশানামিব মুনীন্দ্রাণাম্ ॥ ২৭০ ॥
দুর্বারগর্বদুর্মতিদুরর্থনিরসনকলানিপুণাঃ ।
তব চরণসেবযৈব হি কমলে মাতর্বুধা জগতি ॥ ২৭১ ॥
আনদমেতি মাতস্তব নামোচ্চারণেন সিন্ধুভবে ।
সংপ্রাপ্তত্বদ্রূপং মম মানসমাত্তযোগকলম্ ॥ ২৭২ ॥
তব দৃষ্টিপাতবিভবাত্ সর্বে লোকে বিধূততাপভরাঃ ।
যান্তি মুদা ত্রিদশৈঃ সহ বিভানমারুহ্য মাতরহো ॥ ২৭৩ ॥
কো বা ন শ্রযতি বুধঃ শ্রেযোঽর্থী তামিমাং কমলাম্ ।
যাং পন্নগারিবাহনসদ্গর্মিণীমর্চযন্তি সুরনাথাঃ ॥ ২৭৪ ॥
তামরবিন্দনিবাসামম্বাং শরণার্থিনাং কলিতরক্ষাম্ ।
বহুরূপেষ্বঘনিচযেষ্বপি নিশ্চিত্যাত্মনো ধৈর্যম্ ॥ ২৭৫ ॥
করুণাপ্রবাহঝর্যা গতপঙ্ক ভূতলং মাতঃ ।
সত্বাঙ্কুরাদিলসিতং জযতি পযোরাশিককন্যকে কমলে ॥ ২৭৬ ॥
বিধিশিববাসবমুখ্যৈর্বন্দ্যপদাব্জে নমস্তুভ্যম্ ।
মাতর্বিষ্ণোর্দযিতে সর্বজ্ঞত্বং চ মে কলয ॥ ২৭৭ ॥
পরদেবতে প্রসীদ প্রসীদ হরিবল্লভে মাতঃ ।
ত্বামাহুঃ শ্রুতযঃ কিল কল্যাণগুণাকরাং নিত্যাম্ ॥ ২৭৮ ॥
ক্ষন্তব্যমম্ব মামকমঘরাশিং ক্ষপয বীক্ষণতঃ ।
সত্বোন্মেষং দেহি প্রিযে হরের্দাসমপি কুরু মাম্ ॥ ২৭৯ ॥
বাঞ্ছিতসিদ্ধির্ন স্যাদ্ যদি পাদাব্জে কৃতপ্রণামানাম্ ।
হানিস্ত্বদীযযশসামিতি কেচিদ্ধৈর্যবন্তশ্চ ॥ ২৮০ ॥
সদসদনুগ্রহদক্ষাং ত্বাং মাতঃ সংততং নৌমি ।
গ্রহপীডা নৈব ভবেদ্যমপীডা দূরতঃ কালে ॥ ২৮১ ॥
বিদ্যাঃ কলাশ্চ কালে কৃপযা কলয প্রসীদাশু ।
মাতস্ত্বমেব জগতাং সর্বেষাং রক্ষণং ত্বযা ক্রিযতে ॥ ২৮২ ॥
উছেষ্বপি নীচেষু প্রকাশতে তুল্যমেব তব রূপম্ ।
এতদ্ দৃষ্ট্বা ধৈর্যং ঘনাগসোঽপ্যম্ব জাযতে ননু মে ॥ ২৮৩ ॥
কা শঙ্কা তব বৈভবজালং বক্তুং দিগন্তরে মাতঃ ।
বরহারালংকারাং সেবন্তে ত্বাং হরিত্পতযঃ ॥ ২৮৪ ॥
কমলাযাশ্চ হরেরপি সংদৃষ্যং দিব্যদাংপত্যম্ ।
তাবেব নঃ পতী কিল জন্মান্তরপুণ্যপরিপাকাত্ ॥ ২৮৫ ॥
সর্বাসামুপনিষদাং বিদ্যানাং ত্বংপরং স্থানম্ ।
অল্পধিযো বযমেতে ত্বত্স্তোত্রে ভোঃ কথং শক্তাঃ ॥ ২৮৬ ॥
সাষ্টাঙ্গপ্রণতিরিযং প্রকল্পিতা মাতরদ্য তব চরণে ।
তেনাহং হি কৃতার্থঃ কিং প্রার্থ্যং বস্ত্বতঃ কমলে ॥ ২৮৭ ॥
স্তোত্রমিদংহি মযা তে চরণাম্ভোজে সমর্পিতং ভক্ত্যা ।
তব চ গুরোরপি বীক্ষা তত্র নিদানং পরং নান্যত্ ॥ ২৮৮ ॥
দেহান্তে ননু মাতর্মোক্ষং ত্রিদশৈঃ সমং দেহি ।
অহমপি সাম পঠন্ সন্ ত্বাং চ হরিং যামি শরণার্থী ॥ ২৮৯ ॥
শুকবাণীমিব মাতর্নিরর্থকাং মদ্বচোভঙ্গীম্ ।
আরাচ্ছৃণোষি দযযা তদেব চোত্তমপদব্যক্ত্যৈ ॥ ২৯০ ॥
বিদ্যাং কলাং বরিষ্ঠাং অম্ব ত্বাং সংততং বন্দে ।
যা ব্যাকরোষি কালে বিদ্বদ্ভির্বেদতত্ত্বাদি ॥ ২৯১ ॥
বৈদুষ্যং বাণ্যাঃ সত্সংপজ্ঝর্যো যদীযবীক্ষণতঃ ।
সিধ্যন্ত্যপি দেবানাং সা নঃ শরণং রমা দেবী ॥ ২৯২ ॥
বিপুলং শ্রিযো বিলাসং শ্রদ্ধাং ভক্ত্যাদিকং দেহি ।
অম্ব প্রসীদ কালে তব পাদাব্জৈকসেবিনামিহ নঃ ॥ ২৯৩ ॥
কেচিত্ প্রাঞ্চঃ কমলাং প্রাপ্য হি শরণং বিপত্কালে ।
ঝটিতি বিধূনিততাপাঃ সা মে দেবী প্রসন্নাস্তু ॥ ২৯৪ ॥
মরকতকান্তিমনোহরমূর্তিঃ সৈষা রমা দেবী ।
পাতি সকলানি কালে জগন্তি করুণাবলোকাদ্যৈঃ ॥ ২৯৫ ॥
ভাগীরথীব বাণী তব নুতিরূপা বিরাজতে পরমা ।
ইহ মাতর্যদ্ভজনং সর্বেষাং সর্বসংপদাং হেতুঃ ॥ ২৯৬ ॥
কলশপযোদধিতনযে হরিপ্রিযে লক্ষ্মি মাতরম্বেতি ।
তব নামানি জপন্ সন্ ত্বদ্দাসোঽহং তু মুক্তযে সিদ্ধঃ ॥ ২৯৭ ॥
নিখিলচরাচররক্ষাং বিতন্বতী বিষ্ণুবল্লভা কমলা ।
মম কুলদৈবতমেষা জযতি সদারাধ্যমান্যপাদকমলা ॥ ২৯৮ ॥
সর্বজন্নুতবিভবে সংততমপি বাঞ্ছিতপ্রদে দেবি ।
অম্ব ত্বমেব শরণং তেনাহং প্রাপ্তসর্বকার্যার্থঃ ॥ ২৯৯ ॥
কমলে কথং নু বর্ণ্যস্তব মহিমা নিগমমৌলিগণবেদ্যঃ ।
ইতি নিশ্চিত্য পদাব্জং তব বন্দে মোক্ষকামোঽহম্ ॥ ৩০০ ॥
ত্বামম্ব বালিশোঽহং ত্বচমত্কারৈর্গিরাং গুম্ভৈঃ ।
অযথাযথক্রমং হি স্তুবন্নপি প্রাপ্তজন্মসাফল্যঃ ॥ ৩০১ ॥
ইতি শ্রীকমলাত্রিশতী সমাপ্তা
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ত্oday
http://sanskritdocuments.org
গঙ্গাধরমখিবিরচিতা ।
পরমাভরণং বিষ্ণোর্বক্ষসি সা সাগরেন্দ্রবরপুত্রী ।
যা মূর্তির্মতী কালে ক্ষমা জনানাং কৃতাপরাধানাম্ ॥ ১ ॥
সা নঃ শ্রেযো দদ্যাত্ কমলা কমলাসনাদিজননীং যাম্ ।
সংপ্রাপ্য সহচরীং হরিরবতি জগন্ত্যনাকুলং সততম্ ॥ ২ ॥
নিত্যশ্রেযোদানে খ্যাতা যা হরিগৃহস্য সর্বস্বম্ ।
শ্রুতিমৌলিস্তুতবিভবা সা ভাতু পুরঃ সদাস্মাকম্ ॥ ৩ ॥
বিষ্ণুক্রীডালোলা বিখ্যাতা দীনরক্ষণে লক্ষ্মীঃ ।
জননী নঃ স্ফুরতু সদা তেন বযং কিল কৃতার্থাঃ স্মঃ ॥ ৪ ॥
নির্বাণাঙ্কুরজননী কালে সা সার্বভৌমপদদোগ্ধ্রী ।
নিরসতিমোহসমূহা মম দৈবতমাদৃতং গুরুভিঃ ॥ ৫ ॥
বিষ্ণোর্বক্ষসি লসিতা শীতমযূখস্য সোদরী কমলা ।
কমলাযতনযনা নঃ পাতু সদা পাপরাশিভ্যঃ ॥ ৬ ॥
কবিপরিষদা চ বেদৈঃ নিত্যং স্তুতনিজমহোদযা কমলা ।
মনসি মম সংনিধত্তাং ত্বমিতানন্দায লোকনাথেন ॥ ৭ ॥
দুগ্ধোদধিতনযা সা দুরিতনিহন্ত্রী কৃতপ্রণামানাম্ ।
আনন্দপদবিধাত্রী পত্যা সাকং পদে পদে লোকে ॥ ৮ ॥
মন্মথজননী সা মামবতু সরোজা(ক্ষ)গেহিনী কমলা ।
যামারাধ্য বুধেন্দ্রা বিশন্তি পরমং তু তত্ পদং বিষ্ণোঃ ॥ ৯ ॥
সত্সূক্তিকৃতিবিধাত্রী নমতামম্বা ত্রিলোক্যাস্তু ।
নিত্যপ্রসাদভূম্না রক্ষতি মামাদরাত্ কমলা ॥ ১০ ॥
মম সূক্তিরঞ্জলিপুটঃ প্রণতিশ্চানেকসংখ্যাকা ।
কুতুকাত্ ক্ষীরোদসুতামমিতানন্দায গাহতে কমলাম্ ॥ ১১ ॥
যা পারমার্থ্যসরণিঃ সা কমলা নিশ্চিতা বেদৈঃ ।
সৈষা হি জগন্মাতা সংসৃতিতাপাপহন্ত্রী চ ॥ ১২ ॥
মন্দস্মিতমধুরাননমমন্দসংতোষদাযি ভজতাং তত্ ।
কমলারূপং তেজো বিভাতু নিত্যং মদীযহৃত্কমলে ॥ ১৩ ॥
কালে ক্ষপযতি কমলা কটাক্ষধাট্যা হি মামকং দুরিতম্ ।
অত এবাশ্রিতরক্ষণদীক্ষেত্যেবং জনো বদতি ॥ ১৪ ॥
নবনবহর্ম্যবিধাত্রী নাকিকিরীটার্চিতা চ সা দেবী ।
জ্যোতির্মণ্ডললসিতা মুনিহৃদযাব্জাসনা চ সদ্গতিদা ॥ ১৫ ॥
সংবীক্ষ্য জলধিতনযাং ভূযো ভূযঃ প্রণম্য ভক্তগণঃ ।
নিরসিতদুরিতৌঘঃ সন্ স্তৌতি মুদা মোক্ষসিদ্ধযে কমলাম্ ॥ ১৬ ॥
রাকানিশীব দেব্যাং দৃষ্টাযাং ভক্তগণবাণী ।
ভজতে জলনিধিশৈলীং সাঙ্গোপাঙ্গং কৃতানন্দা ॥ ১৭ ॥
দুর্গতিভীত্যা খিন্নঃ সোঽহং শরণং ভজামি তাং কমলাম্ ।
শরণার্থিনাং হি রক্ষাকৃদিতি খ্যাতা হি যা লোকে ॥ ১৮ ॥
ন হি কলযতে হৃদন্তে মন্দারং কামধেনুং বা ।
যঃ সেবতে মুকুন্দপ্রিযাং শ্রিযং নিত্যভাবেন ॥ ১৯ ॥
কৈটভমর্দনমহিষীং মমাঞ্জলির্গাহতাং কালে ।
ন হি নাথনীযমত্র ক্ষমাতলে সা প্রসন্নাস্তু ॥ ২০ ॥
সংতাপপীডিতং মামবতু সদা শ্রীর্হরিপ্রিযা মাতা ।
রক্ষিতবাযসমুখ্যা কৃপানিধিঃ পুণ্যকৃদ্দৃশ্যা ॥ ২১ ॥
ন হি কেবলং প্রণামৈঃ স্তুত্যা ভক্ত্যা সমারাধ্যা ।
সত্যেন ধর্মনিবহৈর্ভাবেন চ কমলগেহিনী কমলা ॥ ২২ ॥
কদাচিত্কবিলোকেঽপ্যক্ষীণানন্দদাযিনী কমলা ।
রক্ষতু কটাক্ষকলিকাঙ্কূরৈর্ভক্তানিহাদরতঃ ॥ ২৩ ॥
কলিপাপগ্লপিতানাং মুরমর্দনদিব্যগেহিনী লক্ষ্মীঃ ।
রাজতি শরণং পরমং বশীকৃতেশা চ বিবুধগণসেব্যা ॥ ২৪ ॥
নিত্যোল্লসদুরুমালা বক্ষসি কমলা হরের্ভাতি ।
নিজতনুভাসা দ্যোতিতকৌস্তুভমণিরম্বুধেস্তনযা ॥ ২৫ ॥
মাতর্মঙ্গলদাযিন্যমরেন্দ্রবধূসমর্চিতাঙ্ঘ্রিযুগে ।
মাং পাহ্যপাযনিবহাত্ সংততমকলক্ষমামূর্তে ॥ ২৬ ॥
যদি কলিতা চোপেক্ষা নশ্যেত্ কিল তাবকী মহতী ।
কীর্তিরতোঽম্ব কটাক্ষৈঃ পরিষিঞ্চ মুদা মুহুঃ শীতৈঃ ॥ ২৭ ॥
ধনধান্যসুতাদিরুচিগ্রস্তং মাং পাহি কমলে ত্বম্ ।
তেনোর্জিতকীর্তিঃ স্যা মাতস্ত্বং সর্বরক্ষিণী খ্যাতা ॥ ২৮ ॥
তব পাদাম্বুজযুগলধ্যানং মাতর্মদীযমঘমাশু ।
কবলীকরোতি কালে তেনাহং সিদ্ধসংকল্পঃ ॥ ২৯ ॥
অঞ্জলিকলিকা হি কৃতা যদি তস্যৈ মুরনিহন্তৃদযিতাযৈ ।
রসনাগ্রে খেলনভাক্ তস্য তু পুংসো গিরাং দেবী ॥ ৩০ ॥
মাতস্তব মূর্তিরিযং সুধামযী নিশ্চিতা নিপুণৈঃ ।
যত্ তদ্দর্শনভূম্না নিরস্ততাপা বুধা ভবন্ত্যচিরাত্ ॥ ৩১ ॥
কলিতজগত্ত্রযরক্ষাভরাণি মযি দেবি সংবিধেহি মুদা ।
ত্বদ্বীক্ষণানি কমলে তেনাহং সিদ্ধসংকল্পঃ ॥ ৩২ ॥
বরদে মুরারিদযিতে জযন্তি তে বীক্ষণানি যানি দিবি ।
সংপ্রাপ্য তানি মঘবা বিজিতারির্দেবসংঘবন্দ্যশ্চ ॥ ৩৩ ॥
মোহান্ধকারভাস্করমম্ব কটাক্ষং বিধেহি মযি কমলে ।
যেনাপ্তজ্ঞানকলাঃ স্তুবন্তি বিবুধাস্ত্বদীযসদসি কলম্ ॥ ৩৪ ॥
কামক্রোধাদিমহাসত্ত্বনিরাসং কৃপাসারাত্ ।
কুরু মাতর্মম সংসৃতিভীতিং চ নিরাকুরু ত্বমেবারাত্ ॥ ৩৫ ॥
মূঢানামপি হৃদ্যাং কবিতাং দাতুং যদীযপরিচর্যা ।
প্রভবতি কালে সা হি শ্রীরম্বা নঃ প্রসন্নাস্তু ॥ ৩৬ ॥
দিব্যক্ষেত্রেষু বুধা দিনকরমধ্যে চ বেদমৌলৌ চ ।
যত্স্থানমিতি বদন্তি শ্রীরেষা ভাতি সংশ্রিতহরির্হি ॥ ৩৭ ॥
নিজলীলাক্রান্তহরী রক্ষতি কমলা কটাক্ষধাট্যা নঃ ।
শরণার্থিনশ্চ কালে বিহগোরগপশুমুখানুর্ব্যাম্ ॥ ৩৮ ॥
সমরাঙ্গণেষু জযদা ত্রিদশানাং মৌলিভির্মান্যা ।
আপদি রক্ষণদক্ষা সা কমলা নঃ প্রসন্নাস্তু ॥ ৩৯ ॥
নিত্যানন্দাসনভাড্ নবনিধিবন্দ্যা চ সাগরেন্দ্রসুতা ।
বিলসতি মাধববক্ষসি পালিতলোকত্রযা চ জননী নঃ ॥ ৪০ ॥
মুনিনুতনিজপরিপাটী বাগ্ধাটী দানলোলুপা ভজতাম্ ।
শিক্ষিতরিপুজনকোটী বিলসতি ধৃতশাতকুম্ভমযশাটী ॥ ৪১ ॥
নিখিলাগমবেদ্যপদা নিত্যং সদ্ভিঃ সমারাধ্যা ।
সংসৃতিপাশনিহন্ত্রী যা তস্যৈ চাঞ্জলিঃ ক্রিযতে ॥ ৪২ ॥
ভূযাংসি নমাংসি মযা ভক্তেন কৃতানি কমলজাঙ্ঘ্রিযুগে ।
নিত্যং লগন্তু তেন হি সর্বা রাজন্তি সংপদো মান্যাঃ ॥ ৪৩ ॥
নিত্যং নির্মলরূপে বরদে বারাশিকন্যকে মাতঃ ।
সদ্গণরক্ষণদীক্ষে পাহীতি বদন্তমাশু মাং পাহি ॥ ৪৪ ॥
ভুবনজননি ত্বমারাত্ কৃতরক্ষণসংততিঃ ক্ষমামূর্তে ।
প্রতিবস্তু রমে কলিতস্বরূপশক্ত্যা হি রাজসে জগতি ॥ ৪৫ ॥
জয জয কলশাব্ধিসুতে জয জয হরিবল্লভে রমে মাতঃ ।
প্রাতরিতি বিবুধবর্যাঃ পঠন্তি নামানি তে হি মে গুরবঃ ॥ ৪৬ ॥
নেত্ররুচিবিজিতশারদপদ্মে পদ্মে নমস্তুভ্যম্ ।
তেন বযং গতবিপদঃ সা মুক্তিঃ করগতা কলিতা ॥ ৪৭ ॥
সততং বদ্ধাঞ্জলিপুটমুপাস্মহে তচ্ছুভপ্রদং তেজঃ ।
যত্ কমলোদরনিলযং কমলাক্ষপ্রীতিবীচিকাপূরম্ ॥ ৪৮ ॥
স্ফুরতু মম বচসি কমলে ত্বদীযবৈভবসুধাধারা ।
নিত্যং ব্যক্তিং প্রাপ্তা ধুতনুতজনখেদজালকা মহতী ॥ ৪৯ ॥
কমলে তব নুতিবিষযে বুদ্ধির্জাতা হি মে সহসা ।
তেন মম ভাগধেযং পরিণতমিত্যেব নিত্যসংতুষ্টঃ ॥ ৫০ ॥
কবিতারসপরিমলিতং করোতি বদনং নতানাং যা ।
স্তোতুং তাং মে হ্যারাত্ সা দেবী সুপ্রসন্নাস্তু ॥ ৫১ ॥
হরিগৃহিণি তাবকং নুতরূপং যে ভুবি নিজে হৃদম্ভোজে ।
ধ্যাযন্তি তেষু বিবুধা অপি কল্পককুসুমমর্পযন্তি মুদা ॥ ৫২ ॥
নানাবরদানকলালোলুপহৃদযে হৃদম্ভুজস্থে মাম্ ।
রক্ষাপাযাত্ সহসা কুরু ভক্তং দোষহীনং চ ॥ ৫৩ ॥
নিজঘনকেশরুচা জিতনীলাম্বুধরে শশাঙ্কসহজন্মন্ ।
পদ্মে ত্বদীযরূপং মনোহরং ভাতু মে হৃদযে ॥ ৫৪ ॥
ঘনকুঙ্কুমলসিতাঙ্গং মুক্তাহারাদিভূষিতং মধুরম্ ।
মন্দস্মিতমধুরাস্যং সূর্যেন্দুবিলোচনং চ বুধমান্যম্ ॥ ৫৫ ॥
নিবিডকুচকুম্ভযুগলং নিজদৃগ্জিতহরিণশাবকাক্ষিযুগম্ ।
লীলাগতিজিতকলভং মধুবৈরিমনোহরং চ সুরমান্যম্ ॥ ৫৬ ॥
দিশি দিশি বিস্তৃতসংপদ্বিলাসমধুরং চ কুন্দদন্তালি ।
মদনজনকং চ বিষ্ণোঃ সর্বস্বং সর্বদানচণম্ ॥ ৫৭ ॥
কুলদৈবতমস্মাকং সংবিদ্রূপং নতার্তিহররূপম্ ।
নানাদুর্গতিহরণক্ষমমমরীসেবিতং সকলম্ ॥ ৫৮ ॥
পঞ্চদশবর্ণমানং পযোজবক্ত্রং পিতামহসমর্চ্যম্ ।
জগদবনজাগরূকং হরিহরসংমান্যবৈভবং কিমপি ॥ ৫৯ ॥
করুণাপূরিতনযনং পরমানন্দপ্রদং চ পরিশুদ্ধম্ ।
আগমগণসংবেদ্যং কোশগৃহং সর্বসংপদাং নিত্যম্ ॥ ৬০ ॥
মাতস্তাবকপাদাম্বুজযুগলং সংততং স্ফুরতু ।
তেনাহং তব রূপং দ্রক্ষ্যাম্যানন্দসিদ্ধযে সকলম্ ॥ ৬১ ॥
দেব্যা কটাক্ষিতাঃ কিল পুরুষা বা যোষিতঃ পশবঃ ।
মান্যন্তে সুরসংসদি কল্পককুসুমৈঃ কৃতার্হণাঃ কালে ॥ ৬২ ॥
সুমনোবাঞ্ছাদানে কৃতাবধানং ধনং বিষ্ণোঃ ।
ধিষণাজাড্যাদিহরং যদ্বীক্ষণমামনন্তি জগতি বুধাঃ ॥ ৬৩ ॥
অন্তরপি বহিরুদারং তব রূপং মন্ত্রদেবতোপাস্যম্ ।
জননি স্ফুরতু সদা নঃ সংমান্যং শ্রেযসে কালে ॥ ৬৪ ॥
মুররিপুপুণ্যশ্রেণীপরিপাকং তাবকং রূপম্ ।
কমলে জননি বিশুদ্ধং দদ্যাচ্ছ্রেযো মুহুর্ভজতাম্ ॥ ৬৫ ॥
পুণ্যশ্রেণী কমলা সা জননী ভক্তমানসে স্থিতিভাক্ ।
তেজস্ততিভির্মোহিতভুবনা ভুবনাধিনাথগৃহিণীযম্ ॥ ৬৬ ॥
জলনিধিকন্যারূপং হরিমান্যং সর্বসংপদাং হেতুঃ ।
চিরকৃতসুকৃতবিশেষান্নযনযুগে ভাতি সর্বস্য ॥ ৬৭ ॥
জলনিধিতপঃফলং যন্মুনিজনহৃদযাব্জনিত্যকৃতনৃত্তম্ ।
করুণালোলাপাঙ্গং তত্ তেজো ভাতু নিঃসমং বদনে ॥ ৬৮ ॥
শমিতনতদুরিতসংঘা হরযে নিজনেত্রকল্পিতানঙ্গা ।
কৃতসুরশাত্রবভঙ্গা সা দেবী মঙ্গলৈস্তুঙ্গা ॥ ৬৯ ॥
নিখিলাগমসিদ্ধান্তং হরিশুদ্ধান্তং সদা নৌমি ।
তেনৈব সর্বসিদ্ধিঃ শাস্ত্রেষু বিনিশ্চিতা বিবুধৈঃ ॥ ৭০ ॥
কৃষ্ণকৃতবিবিধলীলং তব রূপং মাতরাদরান্মান্যম্ ।
স্ফুরতু বিলোচনযুগলে নিত্যং সংপত্সমৃদ্ধ্যৈ নঃ ॥ ৭১ ॥
করুণাকটাক্ষলহরী কামাযাস্তু প্রকামকৃতরক্ষা ।
লক্ষ্ম্যা মাধবমান্যা সত্সুখদানে দিশি খ্যাতা ॥ ৭২ ॥
অপবর্গসিদ্ধযে ত্বামম্বামম্ভোজলোচনাং লক্ষ্মীম্ ।
অবলম্বে হরিদযিতে পদ্মাসনমুখসুরেন্দ্রকৃতপূজাম্ ॥ ৭৩ ॥
তাবককটাক্ষলহরীং নিধেহি মযি দেবি কমলে ত্বম্ ।
তেন মনোরথসিধ্হির্ভুবি পরমে ধামনি প্রচুরা ॥ ৭৪ ॥
ত্বামাদরেণ সততং বীক্ষেমহি মাতরব্জকৃতবাসাম্ ।
বিষ্ণোর্বক্ষোনিলযামক্ষযসুখসিদ্ধযে লোকে ॥ ৭৫ ॥
সা নঃ সিধ্যতু সিদ্ধ্যৈ দেবানাং বাঙ্মমনোঽতীতা ।
হরিগৃহিণী হরিণাক্ষী পালিতলোকত্রযা চ জননীযম্ ॥ ৭৬ ॥
সকলচরাচরচিন্মযরূপং যস্যা হি দেবতোপাস্যম্ ।
সা দদতু মঙ্গলং মে নিত্যোজ্জ্বলমাদরাজ্জননী ॥ ৭৭ ॥
শীতমযূখসহোদরি তাং ত্বামম্বাং হি শীলযে নিত্যম্ ।
নিরসিতবৈরিগণোঽহং হরিচরণন্যস্তরক্ষশ্চ ॥ ৭৮ ॥
দিক্ষি বিদিক্ষু কৃতশ্রীঃ সা মে জননী নদীশতনযেযম্ ।
হরিণা সাকং ভজতু প্রাকাশ্যং হৃদি সতাং সমৃদ্ধ্যৈ নঃ ॥ ৭৯ ॥
বারিনিধিবংশসংপদ্ দিব্যা কাচিদ্ধরের্মান্যা ।
অর্চন্তি যাং তু মুনযো যোগারম্ভে তথান্তে চ ॥ ৮০ ॥
ধৃতসুমমধুপক্রীডাস্থানাযিতকেশভারাযৈ ।
নম উক্তিরস্তু মাত্রে বাগ্জিতপীযূষধারাযৈ ॥ ৮১ ॥
সংদেহে সিদ্ধান্তে বাদে বা সমরভূমিভাগে বা ।
যা রাজতি বহুরূপা সা দেবী বিষ্ণুবল্লভা খ্যাতা ॥ ৮২ ॥
প্রতিফলতু মে সদা তন্মুনিমানসপেটিকারত্নম্ ।
বিষ্ণোর্বক্ষোভূষণমাদৃতনির্গতিজনাবনং তেজঃ ॥ ৮৩ ॥
বালকুরঙ্গবিলোচনধাটীরক্ষিতসুরাদি মনুজানাম্ ।
নযনযুগাসেব্যং তদ্ ভাতীহ ধরাতলে তেজঃ ॥ ৮৪ ॥
মাধবদৃক্সাফল্যং ভক্তাবলিদৃশ্যকামধেনুকলা ।
লক্ষ্মীরূপং তেজো বিভাতু মম মানসে বচসি ॥ ৮৫ ॥
হরিসরসক্রীডার্থং যা বিধৃতানেকরূপিকা মাতা ।
সা গেহভূষণং নঃ স্ফুরতু সদা নিত্যসংপূজ্যা ॥ ৮৬ ॥
দ্বারবতীপুরভাগে মৈথিলনগরে চ যত্কথাসারঃ ।
সা দেবী জলধিসুতা বিহরণভাঙ্ মামকে মনসি ॥ ৮৭ ॥
জলনিধিতপোমহিম্নে দেব্যৈ পরমাত্মনঃ শ্রিযৈ সততম্ ।
ভূযাংসি নমাংসি পুনঃ সর্বা নঃ সংপদঃ সন্তু ॥ ৮৮ ॥
পরমৌষধং হি সংসৃতিব্যাধের্যত্ কীর্তিতং নিপুণৈঃ ।
তদহং ভজামি সততং লক্ষ্মীরূপং সদানন্দম্ ॥ ৮৯ ॥
দশরথসুতকোদণ্ডপ্রভাবসাক্ষাত্কৃতে কৃতানন্দা ।
সীতারূপা মাতে জজ্ঞে যজ্ঞক্ষিতৌ হি সা সিদ্ধ্যৈ ॥ ৯০ ॥
মুনিজনমানসনিলযে কমলে তে চরণপঙ্কজং শিরসি ।
অবতংসযন্নুদারং বিশামি দেবৈঃ সুধর্মাং বা ॥ ৯১ ॥
ধনমদমেদুরসেবাং ত্যক্তবাহং তে পদাম্ভোজম্ ।
শরণং যামি পুমর্থস্ফূর্তিকলাযৈ ভৃশং দীনঃ ॥ ৯২ ॥
ন ঘটয কুত্সিতসেবাং দুষ্টৈর্বা সংগমং মাতঃ ।
কুরু মাং দাসং সংসৃতিপাপং চ হর শীঘ্রম্ ॥ ৯৩ ॥
মযি নমতি বিষ্ণুকান্তে তবাগ্রতস্তাপভারার্তে ।
মাতঃ সহসা সুমুখী ভব বালে দোষনিলযে চ ॥ ৯৪ ॥
হন্ত কদা বা মাতস্তব লোচনসেচনং ভবেন্মযি ভোঃ ।
ঈত্থং প্রাতঃ স্তুবতাং ত্বমেব রক্ষাকরী নিযতম্ ॥ ৯৫ ॥
সংসাররোগশান্তিপ্রদমেতল্লোচনং মাতঃ ।
তাবত্কমহমুপাসে দিব্যৌষধমাশু সাগরেন্দ্রসুতে ॥ ৯৬ ॥
সংসৃতিরোগার্তানাং তব নামস্মরণমত্র ধরণিতলে ।
পূজাপ্রদক্ষিণাদিকমার্যা মুখ্যৌষধং বদন্তি কিল ॥ ৯৭ ॥
মাতর্বিনা ধরণ্যাং সুকৃতানাং খণ্ডমিহ জন্তুঃ ।
ধ্যানং বা ন হি লভতে প্রণতিং বা সংপদাং জননীম্ ॥ ৯৮ ॥
গুরুবরকটাক্ষবিভবাদ্ দেবি ত্বাঙ্ঘ্রিপ্রণামধুতপাপঃ ।
তব চ হরের্দাসঃ সন্ বিশামি দেবেশ মানিতাং চ সভাম্ ॥ ৯৯ ॥
মুরহরনেত্রমহোত্সবতারুণ্যশ্রীর্নিরস্তনতশত্রুঃ ।
ললিতলিকুচাভকুচভরযুগলা দৃগ্বিজিতহরিণসংদোহা ॥ ১০০ ॥
কারুণ্যপূর্ণনযনা কলিকল্মষহারিণী চ সা কমলা ।
মুখজিতশারদকমলা বক্ত্রাম্ভোজে সদা স্ফুরতু মাতা ॥ ১০১ ॥
তাবককটাক্ষসেচনবিভবাং নির্ধূতদুরিতসংঘা হি ।
পরমং সুখং লভন্তে পরে তু লোকে চ সূরিভিঃ সার্ধম্ ॥ ১০২ ॥
তব পাদপদ্মবিসৃমরকান্তিঝরীং মনসি কলযংস্তু ।
নিরসিতনরকাদিভযো বিরাজতে নাকিসদসি সুরবন্দ্যঃ ॥ ১০৩ ॥
হন্ত সহস্রেষ্বথ বা শতেষু সুকৃতী পুমান্ মাতঃ ।
তাবকপাদপযোরুহবরিবস্যাং কলযতে সকলম্ ॥ ১০৪ ॥
জননি তরঙ্গয নযনে মযি দীনে তে দযাস্নিগ্ধে ।
তেন বযং তু কৃতার্থা নাতঃ পরমস্তিঃ নঃ প্রার্থ্যম্ ॥ ১০৫ ॥
তাবককৃপাবশাদিহ নানাযোগাদিনাশিতভযা যে ।
তেষাং স্মরণমপি দ্রাক্ শ্রিযাবহং নিত্যমাকলযে ॥ ১০৬ ॥
নৈব প্রাযশ্চিত্তং দুরিতানাং মামকানাং হি ।
ত্বামেব যামি শরণং তস্মাল্লক্ষ্মি ক্ষমাধারে ॥ ১০৭ ॥
মুরবৈরিমান্যচরিতে মাতস্ত্বামখিললোকসাম্রাজ্যে ।
পশ্যন্তি দিবি সুরেন্দ্রা মুনযস্তত্ত্বার্থিনশ্চ নিত্যকলাম্ ॥ ১০৮ ॥
স্বীযপদপ্রাপ্ত্যৈ ননু বিবুধেশা জলধিকন্যকে মাতঃ ।
আরাধ্য দিব্যকুসুমৈস্তব পাদাব্জং পরং তুষ্টাঃ ॥ ১০৯ ॥
সৃষ্টিস্থিত্যাদৌ হরিরম্ব তবাপাঙ্গবীক্ষণাদরবান্ ।
জগদেতদবতি কালে ত্বং চ হরির্নঃ ক্রমাত্ পিতরৌ ॥ ১১০ ॥
রাজ্যসুখলাভসংপত্প্রাপ্ত্যৈ ক্ষিতিপাশ্চ যে চ বিপ্রাদ্যাঃ ।
গাঙ্গজলৈরপি কুসুমৈর্বরিবস্যাং তে ক্রমেণ কলযন্তি ॥ ১১১ ॥
সংত্যক্তকামতদনুজডম্ভাসূযাদযো নরাঃ কমলে ।
আরাধ্য ত্বাং চ হরিং কালে চৈকাসনস্থিতাং ধন্যাঃ ॥ ১১২ ॥
জননী কদা পুনীতে মম লোচনমার্গমাদরাদেষা ।
যে কিল বদন্তি ধন্যাস্তেষাং দর্শনমহং কলযে ॥ ১১৩ ॥
করধৃতলীলাপদ্মা পদ্মা পদ্মাক্ষগেহিনী নযনে ।
সিঞ্চতি সকলশ্রেযঃপ্রাপ্ত্যৈ নির্ব্যাজকারুণ্যা ॥ ১১৪ ॥
নানাবিধবিদ্যানাং লীলাসদনং সরোজনিলযেযম্ ।
কবিকুলবচঃপযোজদ্যুমণিরুচির্ভাতি নঃ পুরত্ঃ ॥ ১১৫ ॥
অতসীকুসুমদ্যুতিভাঙ্ নাকিগণৈর্বন্দ্যপাদপদ্মযুগা ।
সরসিজনিলযা সা মে প্রসীদতু ক্ষিপ্রমাদরাত্ সিদ্ধ্যৈ ॥ ১১৬ ॥
জগদীশবল্লভে ত্বযি বিন্যস্তভরঃ পুমান্ সহসা ।
তীর্ত্বা নাকিস্থানং বিশতি পরং বৈষ্ণবং সুরৈর্মান্যম্ ॥ ১১৭ ॥
মাতর্জ্ঞানবিকাসং কারয করুণাবলোকনৈর্মধুরৈঃ ।
তেনাহং ধন্যতমো ভবেযমার্যাবৃতে সদসি ॥ ১১৮ ॥
হরিবক্ষসি মণিদীপপ্রকাশবত্যান্যা মাত্রা ।
নিত্যং বযমিহ দাসাঃ শ্রিযা সনাথা মুদা পরং নৌমঃ ॥ ১১৯ ॥
বিদ্রাবযতু সরোজাসনে ত্বদীযা কটাক্ষধাটী নঃ ।
অজ্ঞানাঙ্কুরমুদ্রাং পুনরপি সংসারভীতিদাং সহসা ॥ ১২০ ॥
তাবককটাক্ষসূর্যোদযে মদীযং হৃদম্ভোজম্ ।
ভজতে বিকাসমচিরাত্ তমোবিনাশশ্চ নিশ্চিতো বিবুধৈঃ ॥ ১২১ ॥
লক্ষ্মীকটাক্ষলহরী লক্ষ্মীং পক্ষ্মলযতি ক্রমান্নমতাম্ ।
পাদপযোরুহসেবা পরং পদং চিত্সুখোল্লাসম্ ॥ ১২২ ॥
চিদ্রূপা পরমা সা কমলেক্ষণনাযিকা মুদে ভজতাম্ ।
যত্প্রণযকোপকালে জগদীশঃ কিংকরো ভবতি ॥ ১২৩ ॥
কাচন দেবী বিহরতু মম চিত্তে সংততং সিদ্ধ্যৈ ।
যাপত্যং কলশাব্ধেরুরগেশযসত্কলত্রং চ ॥ ১২৪ ॥
অষ্টসু মহিষীষ্বেকা কমলা মুখ্যা হি নির্দিষ্টা ।
অনযৈব সর্বজগতামুদযাদিস্তন্যতে কালে ॥ ১২৫ ॥
কৈবল্যানন্দকলাকন্দমহং সংততং বন্দে ।
তত্তু মুকুন্দকলত্রং চিন্তিতফলদানদীক্ষিতং কিমপি ॥ ১২৬ ॥
ঈক্ষে কমলামেনামম্বামম্ভোজলোচনাং সততম্ ।
মন্দস্মিতমধুরাস্যাং নিত্যং চাজ্ঞাতকোপমুখদোষাম্ ॥ ১২৭ ॥
অঙ্কিতমাধববক্ষঃস্থলা সরোজেক্ষণা চ হরিকান্তা ।
কবলযতি মানসং মে দযাপ্রসারাদিভির্নিত্যম্ ॥ ১২৮ ॥
ভূত্যৈ মম ভবতু দ্রাগজ্ঞানধ্বংসিনী নমতাম্ ।
নাথানুরূপরূপা শ্রুত্যন্তেড্যা দশাবতারেষু ॥ ১২৯ ॥
সকলজনরক্ষণেশু প্রণিহিতনযনা ত্রিলোকমাতা নঃ ।
পুষ্ণাতি মঙ্গলানাং নিকরং সেবাক্রমেণ incomplete ॥ ১৩০ ॥
পদ্মাসনজননী মাং পাতু মুদা সুন্দরাপাঙ্গৈঃ ।
সর্বৈশ্বর্যনিদানং যামাহুর্বৈদিকা দীপ্তাম্ ॥ ১৩১ ॥
নানালংকারবতী মুনিমানসবাসিনী হরেঃ পত্নী ।
ত্রৈলোক্যবিনুতবিভবা মাং পাযাদাপদাং নিচযাত্ ॥ ১৩২ ॥
বিদ্রাবযতু ভযং নঃ সা কমলা বিষ্ণুবল্লভা মাতা ।
অব্ধিঃ সংক্ষুভিতোঽভূত্ যদর্থমার্যেণ রামেণ ॥ ১৩৩ ॥
ভূযো যদর্থমিন্দ্রঃ সুরতরুকুসুমার্থিনা চ কৃষ্ণেন ।
হতগর্বোঽজনি যুদ্ধে সা নিত্যং শ্রেযসে ভূযাত্ ॥ ১৩৪ ॥
ত্বামারাধ্য জনা অপি ধনহীনাঃ সৌধমধ্যতলভাজঃ ।
নানাদেশবনীপকজনস্তুতা ভান্তি নিত্যমেব রমে ॥ ১৩৫ ॥
সংসৃতিতাপো ন ভবতি পুনরপি যত্পাদপঙ্কজং নমতাম্ ।
সা মযি কলিতদযা স্যাদম্বা বিষ্ণোঃ কলত্রমনুরূপম্ ॥ ১৩৬ ॥
জননীকটাক্ষভাজামিহ মর্ত্যানাং সুরাস্তু কিংকরতাম্ ।
রিপবো গিরিতটবাসং ভজন্তি বেশ্মানি সিদ্ধযঃ সর্বাঃ ॥ ১৩৭ ॥
স্মরণাদ্বা ভজনাদ্বা যস্যাঃ পাদাম্বুজস্য ভুবি ধন্যাঃ ।
হন্ত রমন্তে স্তম্বেরমনিবহাবৃতগৃহাঙ্গণে মনুজাঃ ॥ ১৩৮ ॥
চিরকৃতসুকৃতনিষেব্যা সা দেবী বিষ্ণুবল্লভা খ্যাতা ।
যস্যাঃ প্রসাদভূম্না জাতাঃ পশ্বাদযো বদান্যা হি ॥ ১৩৯ ॥
অম্ব মধুরান্ কটাক্ষান্ তাপহরান্ বিকির মযি কৃপাজলধে ।
যে বিন্যস্তাঃ করিবরমারুতিমুখভক্তবর্যেষু ॥ ১৪০ ॥
অমৃতলহরীব মধুরা জলধররুচিরা নতার্তিহরশীলা ।
সর্বশ্রেযোদাত্রী কাচিদ্ দেবী সদা বিভাতু হৃদি ॥ ১৪১ ॥
গীতাচার্যপুরন্ধ্রী ত্বদীযনামপ্রভাবকলনাদ্যৈঃ ।
যমভযবার্তা দূরে হরিসাংনিধ্যং কুতো ন স্যাত্ ॥ ১৪২ ॥
জলনিধিতনযে কান্তে বিষ্ণোরুষ্ণাংশুচন্দ্রনযনে তে ।
চতুরাননাদযস্তু খ্যাতা বালাঃ শ্রুতৌ চোক্তাঃ ॥ ১৪৩ ॥
মনসিজবৈরং গাত্রং বাণী সৌধারসী চ যদ্ভজতাম্ ।
শ্লাধ্যা সংপত্ সজ্জনসমাগমশ্চাশু সিধ্যন্তি ॥ ১৪৪ ॥
সফলযতু নেত্রযুগলং হতনতদুরিতা চ সা পরা দেবী ।
জলনিধিকন্যা মান্যা পত্যবতারানুকূলনিজচরিতা ॥ ১৪৫ ॥
নিত্যং স্মরামি দেবীং নমতাং সর্বার্থদাযিনীং কমলাম্ ।
যামাহুর্ভবনিগলধ্বংসনদীক্ষাং চ incomplete ॥ ১৪৬ ॥=২০
সকলজগদঘনিবারণসংকল্পাং মধুজিতো দযিতাম্ ।
জীবাতুমেব কলযে মোক্ষার্থিজনস্য ভূমিসুতাম্ ॥ ১৪৭ ॥
মন্দানামপি দযযা তমোনিরাসং বিতন্বন্তী ।
সর্বত্র ভাতি কমলা তনুরিব বিষ্ণোর্নিরস্তাঘা ॥ ১৪৮ ॥
বালমরালীগত্যৈ সুরপুরকন্যাদিমহিতকলগীত্যৈ ।
বিরচিতনানানীত্যৈ চেতো মে স্পৃহযতে বহুলকীর্ত্যৈ ॥ ১৪৯ ॥
অভিলষিতদানকুশলা বাগ্দেবীবন্দিতা চ সা কমলা ।
নিত্যং মানসপদ্মে সংচারং কলযতে মুহুঃ কুতুকাত্ ॥ ১৫০ ॥
মুরমথননযনপঙ্কজবিলাসকলিকা সুরেশমুখসেব্যা ।
ভূতমযী সাবিত্রী গযত্রী সর্বদেবতা জযতি ॥ ১৫১ ॥
সা হি পরা বিদ্যা মে লক্ষ্মীরক্ষোভণীযকীর্তিকলা ।
হৃদ্যাং বিদ্যাং দযাদদ্য শ্রেযঃপরংপরাসিদ্ধ্যৈ ॥ ১৫২ ॥
কামজননী হি লক্ষ্মীঃ নানালীলাদিভির্নিজং নাথম্ ।
মোহযতি বিষ্ণুমচিরাত্ প্রকৃতীনাং ক্ষেমসিদ্ধ্যর্থম্ ॥ ১৫৩ ॥
মনসিজসাম্রাজ্যকলানিদানমার্যাভিবন্দিতং কিমপি ।
লক্ষ্মীরূপং তেজো বিলসতি মম মনসি বিষ্ণুসংক্রান্তম্ ॥ ১৫৪ ॥
বিষ্ণুমনোরথপাত্রং সংতপ্তস্বর্ণকাম্যনিজগাত্রম্ ।
আশ্রিতজলনিধিগোত্রং রক্ষিতনতবাহুজচ্ছাত্রম্ ॥ ১৫৫ ॥
কবিকুলজিহ্বালোলং মুরমর্দনকলিতরম্যবহুলীলম্ ।
নিরসিতনতদুষ্কালং বন্দে তেজঃ সদালিনুতশীলম্ ॥ ১৫৬ ॥
আদিমপুরুষপুরন্ধ্রীমম্বামম্ভোজলোচনাং বন্দে ।
যাং নত্বা গততাপাস্ত্যক্ত্বা দেহং বিশন্তি পরমপদম্ ॥ ১৫৭ ॥
লক্ষ্ম্যা হরিরপি ভাতি প্রকৃতিক্ষেমায দীক্ষিতাযাসৌ ।
মম লোচনযোঃ পুরতো লসতু গভীরং ক্রিযাসিদ্ধ্যৈ ॥ ১৫৮ ॥
জননি কদা বা নেষ্যাম্যহমারাদর্চিতত্বদীযপদঃ ।
নিমিষমিব হন্ত দিবসন্ দৃষ্ট্বা ত্বামাদরেণ কল্যাণীম্ ॥ ১৫৯ ॥
সংপূর্ণযৌবনোজ্জ্বলদেহাং যাং বীক্ষ্য শৌরিরপি ।
কুসুমশরবিদ্ধচেতাঃ কিংকরভাবং স্বযং প্রাপ্তঃ ॥ ১৬০ ॥
অনুনযশীলস্তদনু প্রণযক্রোধাদিনা ভীতঃ ।
আদিমপুরুষঃ সোঽযং সা লক্ষ্মীর্ন শ্রিযৈ ভবতু ॥ ১৬১ ॥
মণিকুণ্ডললসিতাস্যং কৃপাকরং কিমপি কুঙ্কুমচ্ছাযম্ ।
হরিণা কৃতসংচারং তেজো মে ভাতু সর্বদা সিদ্ধ্যৈ ॥ ১৬২ ॥
সাম্রাজ্যমঙ্গলশ্রীঃ শ্রীরেষা পুষ্করাক্ষস্য ।
গন্ধর্বকন্যকাদ্যৈর্গঙ্গাতীরেষু গীতকীর্তির্হি ॥ ১৬৩ ॥
কবিতাভাগ্যবিধাত্রী পরিমলসংক্রান্তমধুপগণকেশা ।
মম নযনযোঃ কদা বা সা দেবী কলিতসংনিধানকলা ॥ ১৬৪ ॥
কীর্তিঃ স্বযং বৃণীতে বাগ্দেবী চাপি বিজযলক্ষ্মীশ্চ ।
তং নরমচিরাল্লোকে যো লক্ষ্মীপাদভক্তস্তু ॥ ১৬৫ ॥
সন্মিত্রং পাণ্ডিত্যং সদ্দারাঃ সত্সুতাদ্যাশ্চ ।
জাযন্তে তস্য ভুবি শ্রীভক্তো যশ্চ নির্দিষ্টঃ ॥ ১৬৬ ॥
পরমাচার্যৈর্বিনুতাং তামম্বামাদরান্নৌমি ।
পরমৈশ্বর্যং বিষ্ণোরপি যা বেদেষু নির্দিষ্টা ॥ ১৬৭ ॥
কবিকুলসূক্তিশ্রেণীশ্রবণানন্দোল্লসদ্বতংসসুমা ।
সা দেবী মম হৃদযে কৃতসাংনিধ্যা বিরাজতে পরমা ॥ ১৬৮ ॥
তাপার্তাস্তু তটাকং যথা ভজন্তে রমাং দেবীম্ ।
সংসৃতিতপ্তাঃ সর্বে যান্তি হি শরণং শরণ্যাং তাম্ ॥ ১৬৯ ॥
সর্বজ্ঞত্বং শ্লাধ্যং ধরাধিপত্যং রমে দেবি ।
যদ্যত্ প্রার্থ্যং দযযা তদ্ দিশ মোক্ষং চ মে জননি ॥ ১৭০ ॥
বিদ্যুতমচঞ্চলাং ত্বাং কৃষ্ণে মেঘে পযোধিবরকন্যে ।
নিত্যমবৈমি শ্রেযঃসিধ্য মাতঃ প্রসন্নে নঃ ॥ ১৭১ ॥
ত্বামম্ব সংততরুচিং কৃষ্ণো মেঘঃ সমাসাদ্য ।
সদ্বর্ত্মনি বর্ষতি কিল কাঙ্ক্ষাধিকমাদরেণ বার্ধিসুতে ॥ ১৭২ ॥
অম্ব ত্বমেব কালে মুকুন্দমপি দর্শযন্তীহ ।
শ্রেযঃসিদ্ধ্যৈ নমতাং ভাসি হৃদি শ্রুতিশিরঃসু সল্লোকে ॥ ১৭৩ ॥
বিনমদমরেশসুদতীকচসুমমকরন্দধারযা স্নিগ্ধম্ ।
তব পাদপদ্মমেতত্ কদা নু মম মূর্ধ্নি ভূষণং জননি ॥ ১৭৪ ॥
অপবর্গসৌখ্যদে তে দযাপ্রসারঃ কথং বর্ণ্যঃ ।
যামবলম্ব্য হি যষ্টিং ন পততি সংসারপঙ্কিলে মার্গে ॥ ১৭৫ ॥
সূক্ষ্মাত্ সূক্ষ্মতরং তে রূপং পশ্যন্তি যোগিনো হৃদযে ।
তাং ত্বামহং কদা বা দ্রক্ষ্যেঽলংকারমণ্ডিতাং মাতঃ ॥ ১৭৬ ॥
চিরতরতপসা ক্লিষ্টে যোগিহৃদি স্থানভাগ্ রমা দেবী ।
দর্শনমচিরাদ্ দযযা দদাতি যোগাদিহীনানাম্ ॥ ১৭৭ ॥
তীরং সংসৃতিজলধেঃ পূরং কমলাক্ষলোচনপ্রীতেঃ ।
সারং নিগমান্তানাং দূরং দুর্জনততের্হি তত্তেজঃ ॥ ১৭৮ ॥
লক্ষ্মীরূপং তেজো মমাবিরস্তু শ্রিযৈ নিত্যম্ ।
যন্নিত্যধর্মদারান্ বিষ্ণোরমিতৌজসঃ প্রাহুঃ ॥ ১৭৯ ॥
জলধিসুতে ত্বং জননী স বাসুদেবঃ পিতা চ নঃ কথিতঃ ।
শরণং যুবাং প্রপন্না নাতো দুর্গতিপরিস্ফূর্তিঃ ॥ ১৮০ ॥
হরিনীলরত্নভাসা প্রকশিতাত্মা সমুদ্রবরকন্যা ।
মঙ্গলমাতনুতেযং কটাক্ষকলিকাপ্রসারৈস্তু ॥ ১৮১ ॥
মচ্চিত্তমত্তবারণবন্ধনমধুনা ত্বদীযপাদযুগে ।
কলযামি রমে মাতর্মাং রক্ষ ক্ষিপ্রমেব সংসৃতিতঃ ॥ ১৮২ ॥
মোচয সংসৃতিবন্ধং কটাক্ষকলিকাঙ্কুরৈ রমে মাতঃ ।
নাতঃ পরমর্থ্যমিহ ক্ষমাতলে ত্বং দযামূর্তিঃ ॥ ১৮৩ ॥
মঞ্জুলকবিতাসংততিবীজাঙ্কুরদাযিসারসালোকা ।
জননি তবাপাঙ্গশ্রীঃ জযতি জগত্ত্রাণকলিতদীক্ষেযম্ ॥ ১৮৪ ॥
অম্ব তবাপাঙ্গশ্রীরপাঙ্গকেলীশতানি জনযন্তী ।
মুরহন্তুর্হৃদি জযতি ব্রীডামদমোহকামসারকরী ॥ ১৮৫ ॥
বদ্ধমপি চিত্তমেতদ্ যমনিযমাদ্যৈঃ পরিষ্কারৈঃ ।
ধাবতি বলাদ্ রমে তব পাদাব্জং যামি শরণমহম্ ॥ ১৮৬ ॥
মত্তগজমান্যগমনা মধুরালাপা চ মান্যচরিতা সা ।
মন্দস্মেরমুখাব্জা কমলা মে হৃদযসারসে লসতু ॥ ১৮৭ ॥
শাস্ত্রস্মরণবিহীনং পাপিনমেনং জনং রমা দেবী ।
দযযা রক্ষতি কালে তস্যাস্তেন প্রথা মহতী ॥ ১৮৮ ॥
মুখবিজিতচন্দ্রমণ্ডলমিদমম্ভোরুহবিলোচনং তেজঃ ।
ধ্যানে জপে চ সুদৃশাং চকাস্তি হৃদযে কবীশ্বাণাং চ ॥ ১৮৯ ॥
অম্ব বিবেকবিদূরং জনমেনং শিশিরলোচনপ্রসরৈঃ ।
শিশিরয কৃপযা দেবি ত্বমেব মাতা হি লোকস্য ॥ ১৯০ ॥
কোপদুপেক্ষসে যদি মাতর্মে রক্ষকঃ কঃ স্যাত্ ।
মযি দীনে কো লাভস্তব তু দযাযাঃ প্রসারিণ্যাঃ ॥ ১৯১ ॥
ভবচণ্ডকিরণতপ্তঃ শ্রান্তোঽহং জ্ঞানবারিদূরস্থঃ ।
শিশিরামঙ্ঘ্রিচ্ছাযাং তব মাতর্যামি শরণমারাত্তু ॥ ১৯২ ॥
মাতরশোকোল্লাসং প্রকটয তব কোমলকটাক্ষৈঃ ।
যৈর্দীনা নরপতযঃ কলিতা বারণশতাবৃতে গেহে ॥ ১৯৩ ॥
জযতি রমে তব মহতী কৃপাঝরী সর্বসংমান্যা ।
ক্ষেমংকরী যদেষা প্রতিকল্পং সর্বজগতাং চ ॥ ১৯৪ ॥
অজ্ঞানকূপকুহরে পতিতং মাং পাহি কমলে ত্বম্ ।
নগরে বা গ্রামে বা বনমধ্যে দিক্ষু রক্ষিণী ত্বমসি ॥ ১৯৫ ॥
তব চরণৌ শরণমিতি ব্রুবন্নহং মাতরব্ধিতনযে ত্বম্ ।
হরিণা সহিতা দযযা প্রাহ্যবিলম্বেন দীনং মাম্ ॥ ১৯৬ ॥
পরিসরনতবিবুধালীকিরীটমণিকান্তিবল্লরীবিসরৈঃ ।
কৃতনীরাজনবিধি তে মম তু শিরোভূষণং হি পদযুগলম্ ॥ ১৯৭ ॥
মম হৃদযপঙ্কজবনীবিকাসহেতৌ দিনাধিপাযেতাম্ ।
তব তু কটাক্ষপ্রসরঃ দীপাযেতাং তমোনিরাকরণে ॥ ১৯৮ ॥
যাবচ্ছরণং যাতি ক্ষিতিতনযে ত্বাং হি জন্তুরিহ মূঢঃ ।
তাবত্ তস্য তু রসনাঙ্গণে তু বাণী সমাকলিতনৃত্তা ॥ ১৯৯ ॥
পঙ্কজনিলযে তাবকচরণং শরণং সমাকলযে ।
তেন হি সর্বকৃতানাং ভবিষ্যতাং হানিরেব দুরিতানাম্ ॥ ২০০ ॥
শ্রুত্যন্তসেবিতং তে চরণসরোজং প্রণম্য কিল জন্তুঃ ।
ছত্রোল্লসিতশিরাঃ সন্ বনীপকান্ দানবারিণা সিঞ্চন্ ॥ ২০১ ॥
বিষ্বক্সেনমুখাদ্যৈঃ সেবিতমম্ব ত্বদীযপাদযুগম্ ।
অবতংসযন্তি সন্তঃ কলিতাপপ্রশমনাযাস্তু ॥ ২০২ ॥
দুগ্ধোদধিতনযে ত্বাং দিশাগজেন্দ্রাঃ সুবর্ণঘটতোযৈঃ ।
মণিমণ্টপমধ্যতলে সমভ্যষিঞ্চন্ হরিপ্রীত্যৈ ॥ ২০৩ ॥
দিগ্গজপুষ্পকরকুম্ভৈরভিষিক্তাং ত্বাং হরিঃ প্রীত্যা ।
উদবহদারান্মুনিগণমধ্যে সর্বশ্রিযো মূলম্ ॥ ২০৪ ॥
জাতপরাক্রমকলিকা দিশি দিশি কিংনরসুগীতনিজযশসঃ ।
ধন্যা ভান্তি হি মনুজাঃ যদ্বীক্ষালববিশেষতঃ কালে ॥ ২০৫ ॥
নমদমরীকচভরসুমমরন্দধারাভিষিক্তং তে ।
পদকমলযুগলমেতচ্ছ্রেযঃস্ফূর্ত্যৈ সদা ভবতু ॥ ২০৬ ॥
রাগদ্বেষাদিহতং মামব কমলে হরেঃ কান্তে ।
দর্শয দযযা কালে হ্যপবর্গস্থানমার্গং চ ॥ ২০৭ ॥
ন হি জানে বর্ণযিতুং পরমে স্থনে ত্বদীযবিভবমহম্ ।
মুনযশ্চ সুরা বেদা যতো নিবৃত্তাঃ ক্ষমাতনযে ॥ ২০৮ ॥
মনুজাঃ কটাক্ষিতাঃ কিল তথাম্বযা মেদিনীপুত্র্যা ।
সত্সুতকলত্রসহিতাঃ সুরভিং কালেন নির্বিশান্তি মুদা ॥ ২০৯ ॥
জলধীশকন্যকা সা লসতু পুরোঽস্মাকমাদরকৃতশ্রীঃ ।
যত্প্রণমনাজ্জনানাং কবিতোন্মেষঃ সদীডিতে ভাতি ॥ ২১০ ॥
দূরিকরোতু দুরিতং ত্বদ্ভক্তির্মামকং কমলে ।
অহমপি সুরেশসেব্যে তব সদসি বিশামি কীর্তিগানপরঃ ॥ ২১১ ॥
পরমজ্ঞানবিধাত্রী তব পাদপযোজভক্তিরস্মাকম্ ।
কিং বাশাস্যমতোঽন্যত্ সমুদ্রতনযে হরের্জাযে ॥ ২১২ ॥
অম্ব কদা বা লপ্স্যে মদীযপাপাপনোদায ।
তব পাদকমলসেবামব্জভবাদ্যৈস্তু সংপ্রার্থ্যাম্ ॥ ২১৩ ॥
মন্দানামপি মঞ্জুলকবিত্বরসদাযিনী জননী ।
কাপি করুণামযী সা লসতু পুরস্তাত্ সদাস্মাকম্ ॥ ২১৪ ॥
সকলকবিলোকবিনুতে কমলে কমলাক্ষি বল্লভে বিষ্ণোঃ ।
ত্বন্নামানি হি কলযে বনে জলে শত্রুপীডাযাম্ ॥ ২১৫ ॥
দিবি বা ভুবি দিক্ষু জলে বহ্নৌ বা সর্বতঃ কমলে ।
জন্তূনাং কিল রক্ষা ত্বদধীনা কীর্ত্যতে বিবুধৈঃ ॥ ২১৬ ॥
কুশলবিধযে তদস্তু ত্রিবিক্রমাসেব্যরম্যনিজকেলি ।
কবলিতপদনতদৈন্যং তরুণাম্বুজলোচনং তেজঃ ॥ ২১৭ ॥
জননী সুবর্ণবৃষ্টিপ্রদাযিনী ভাতি বিষ্ণুবক্ষঃস্থা ।
কমলা কলিতক্ষেমা প্রকৃতীনাং শীতলাপাঙ্গৈঃ ॥ ২১৮ ॥
জগতামাদিমজননী লসতি কবেরাত্মজাপুলিনে ।
ক্ষেত্রেষূত্তমজুষ্টেষ্বযোনিজা লোকরক্ষাযৈ ॥ ২১৯ ॥
কুচশোভাজিতবিষ্ণুঃ কুঙ্কুমপঙ্কাঙ্কিতা কমলা ।
কাঞ্চ্যাং রাজতি কাঞ্চীমণিগণনীরাজিতাঙ্ঘ্রিযুগা ॥ ২২০ ॥
মন্দারকুসুমমদহরমন্দস্মিতমধুরবদনপঙ্করুহা ।
হৃদ্যতমনিত্যযৌবনমণ্ডিতগাত্রী বিরাজতে কমলা ॥ ২২১ ॥
কংসরিপুগেহিনী সা হংসগতির্হংসমান্যনিজচরিতা ।
সংসারতাপহানিং কলযতু কালে রমাস্মাকম্ ॥ ২২২ ॥
মনসিজজননী জননী চাস্মাকমিহাদরাত্ কালে ।
শীতললোলাপাঙ্গৈস্তরঙ্গযতি শ্রেযসাং সরিণম্ ॥ ২২৩ ॥
তব মন্দহাসকলিকাং ভজে ভুজঙ্গে শযানং তম্ ।
যা কলযতি গতকোপং বালানাং নঃ কৃতাপরাধানাম্ ॥ ২২৪ ॥
সা সাধযেদভীষ্টং কমলা শ্রীর্বিষ্ণুবক্ষঃস্থা ।
যস্যাঃ পদবিন্যাসঃ শ্রুতিমৌলিষু তন্যতে মহালক্ষ্ম্যাঃ ॥ ২২৫ ॥
শান্তিরসনিত্যশেবধিমম্বাং সেবে মনোরথাবাপ্ত্যৈ ।
যামারাধ্য সুরেশাঃ স্বপদং প্রাপুর্হি তাদৃক্ষম্ ॥ ২২৬ ॥
ধাতুরপি বেদবচসাং দূরে যত্স্থানমামনন্তি বুধাঃ ।
সাস্তু মুদে শ্রীরেষা মুরমর্দনসত্কলত্রমমিতৌজঃ ॥ ২২৭ ॥
ভবদুঃখরাশিজলধের্হঠাত্ তরিত্রীং পরং বিদ্মঃ ।
তামম্বাং কমলস্থাং মুরারিবক্ষোমণিপ্রদীপাং চ ॥ ২২৮ ॥
মুনিসার্বভৌমবর্ণিতমহাচরিত্রং হরেঃ কলত্রং তত্ ।
পথি মঙ্গলায ভবতু প্রস্থানজুষাং কৃপাধারম্ ॥ ২২৯ ॥
খণ্ডিতবৈরিগণেযং মণ্ডিতভক্তা সুতাদ্যৈশ্চ ।
ভাসুরকীর্তির্জযতি ক্ষোণীসুরবন্দ্যচরণাব্জা ॥ ২৩০ ॥
নতপালিনি মাং পাহি ত্রিজগদ্বন্দ্যে নিধেহি মযি দযযা ।
তাবককটাক্ষলহরীঃ শক্তিমযে সকলসিদ্ধীনাম্ ॥ ২৩১ ॥
ভবসাগরং তিতীর্ষুস্তব চরণাব্জং মহাসেযুম্ ।
মাতঃ কদা নু লপ্স্যে ঘনতাপোর্ম্যাদিপীডিতো দীনঃ ॥ ২৩২ ॥
কবিবাগ্বাসন্তীনাং বসন্তলক্ষ্মীর্মুরারিদযিতা নঃ ।
পরমাং মুদং বিধত্তে কালে কালে মহাভূত্যৈ ॥ ২৩৩ ॥
সুরহরপরতন্ত্রং তদ্ গততন্দ্রং বস্তু নিস্তুলমুপাসে ।
তেনৈবাহং ধন্যো মদ্বংশ্যা নিরসিতাত্মতাপভরাঃ ॥ ২৩৪ ॥
তৃষ্ণাং শমযতি দেবী রাঘবদযিতা নতালিসুরবল্লী ।
ইট্যার্যবচো ধৈর্যং জনযতি কালে ধরাপুত্রি ॥ ২৩৫ ॥
রঘুপতিদযিতে মাতঃ কাকাসুররক্ষণাদিনা লোকে ।
তাবককরুণামহিমা প্রথিতঃ কিল ভূতিদাযী নঃ ॥ ২৩৬ ॥
প্রচুরতদুরিতপালীসমাবৃতানাং কলৌ হি তপ্তানাম্ ।
তাবকদযা হি মাতঃ শরণং বরমিতি সতাং গণঃ স্তৌতি ॥ ২৩৭ ॥
অত্যন্তশীতলাং তাং কটাক্ষধাটীমুপাসেঽহম্ ।
তেন মম ত্রিদশানাং ন কোঽপি ভেদো ধরাতনযে ॥ ২৩৮ ॥
যৈঃ সেবা সংকলিতা তব পাদাব্জে ধরাতনযে ।
তেষামজ্ঞানঝরী যাতি হি বিলযং ক্ষণেনৈব ॥ ২৩৯ ॥
জ্ঞানারবিন্দবিলসনমচিরাদস্য স্তুতৌ হি কবিবর্যাঃ ।
সংপদ্ দিব্যা চ তথা বিবুধাবলিমাননীযাত্র ॥ ২৪০ ॥
মাতস্তব পাদাব্জং যস্য ললাটে কৃতোরুনিজকান্তি ।
তত্পাদপদ্মমচিরাদ্ বিমানগা দেবতা বহতি ॥ ২৪১ ॥
আজ্ঞাবশেন দেব্যা লসন্তি দিবি দেবতামান্যাঃ ।
ইন্দ্রাদ্যাঃ স চ ধাতা দিক্পালাশ্চাপি গন্ধর্বাঃ ॥ ২৪২ ॥
কৈবল্যানন্দকলাদাত্রীং কমলামহর্নিশং নৌমি ।
তেনৈব জন্ম সফলং তীর্থাদিনিষেবণাদ্যচ্চ ॥ ২৪৩ ॥
যচ্চ হরিপাদপঙ্কেরুহপরিচরণাদিনা লোকে ।
তত্ সর্বমাশু ঘটযতি সহসা মন্দস্য মে মাতা ॥ ২৪৪ ॥
নানাশ্রুত্যন্তকলাপরিমলপরিবাহবাসিতং মাতঃ ।
তব চরণকমলযুগলং মমাবতংসঃ ক্ষণং ভাতু ॥ ২৪৫ ॥
নতদেবনগরনারীধম্মিল্ললসত্সুমালিকৃতনাদাঃ ।
প্রাতর্মুরজবিলাসং কলযন্তি ভৃশং তবাগ্রতো ভৃঙ্গাঃ ॥ ২৪৬ ॥
পাপপ্রশমনদীক্ষাকলাধুরীণাঃ পযোজনিলযে তে ।
মাং চ পবিত্রীকুর্যুঃ পাদপরাগাঃ কৃপাবশতঃ ॥ ২৪৭ ॥
হন্ত কদা বা লপ্স্যে তবাঙ্ঘ্রিশুশ্রূষণাসক্তিম্ ।
সহজানন্দং তেন হি পদং ক্রমাত্ প্রাপ্যমাদিষ্টম্ ॥ ২৪৮ ॥
নলিনীবিলাসরুচিরাং মযি দেবি ত্বত্কটাক্ষলহরীং হি ।
কালে নিধেহি দযযা স্ফীতা তে কীর্তিরাদৃতা সর্বৈঃ ॥ ২৪৯ ॥
বিনিহতদুরিতস্তোমা কাপি মদীযে হৃদম্ভোজে ।
লসতু পরদেবতাখ্যা মাধবনেত্রপ্রিযংকরী কলিকা ॥ ২৫০ ॥
পঞ্চাযুধগুরুমন্ত্রং কলনূপুরনিনদমাদরাত্ কমলে ।
কলযতি রমাধবগৃহং যাতুং কালে ত্বযি প্রবৃত্তাযাম্ ॥ ২৫১ ॥
নতনাকিলোকবনিতাললাটসিন্দূরশোণকান্তিভৃতোঃ ।
কলযে নমাংসি কমলে তব পাদপযোজযোর্নিত্যম্ ॥ ২৫২ ॥
কমলসুষুমানিবাসস্থানকটাক্ষং চিরায কৃতরক্ষম্ ।
রক্ষোগণভীতিকরং তেজো ভাতি প্রকামমিহ মনসি ॥ ২৫৩ ॥
জ্যোত্স্নেব শিশিরপাতা কটাক্ষধাটী ত্বদীযা হি ।
অম্ব মুকুন্দ ( ||. incomplete ||. ) কুরুতে ॥ ২৫৪ ॥
তাপহররসবিবর্ষংঅধৃতকুতুকা কাপি নীলনলিনরুচিঃ ।
কাদম্বিনী পুরস্তদাস্তাং নঃ সংততং জননী ॥ ২৫৫ ॥
সফলযতু নেত্রযুগলং মামকমেতত্ ত্বদীযরূপমহো ।
যত্ কমলনেত্রসুচরিতপচেলিমং বৈদিকী শ্রুতির্ব্রূতে ॥ ২৫৬ ॥
মাধবনেত্রপযোজামৃতলহরী ভাতি তাবকং রূপম্ ।
অম্ব যুবামাদ্যৌ নঃ পিতরৌ বনে সুখাবাপ্ত্যৈ ॥ ২৫৭ ॥
সরসকবিতাদিসংপদ্বিলসনমারাদুশান্তি কবিবর্যাঃ ।
যত্প্রীণনেন সা মে ভবতু বিভূত্যৈ হি সা কমলা ॥ ২৫৮ ॥
মনসিজজযাদিকার্যং যদপাঙ্গলবান্নৃণাং ভবতি ।
তত্পদমানন্দকলং সেব্যং চ ভজে রমাং জননীম্ ॥ ২৫৯ ॥
শিথিলততমঃসমূহা ভক্তানাং সা রমা দেবী ।
জনযতি ধৈর্যং চ হরেঃ কালে যা সর্বদা সেব্যা ॥ ২৬০ ॥
যদ্ভ্রূবিলাসবশতঃ শক্তঃ সৃষ্ট্যাদিকং কর্তুম্ ।
হরিরপি লোকে খ্যাতঃ সা নঃ শরণং জগন্মাতা ॥ ২৬১ ॥
নযনযুগলীং কদা মে সিঞ্চতি এব্যাঃ পরং রূপম্ ।
যদ্ভজনান্ন হি লোকে দৃষ্টং শ্লাধ্যং পরং বস্তু ॥ ২৬২ ॥
সুচরিতফলং ত্বদীযং রূপং নঃ কলিতভক্তীনাম্ ।
অত এব মামকানাং পাপানাং বিরতিরূর্জিতা কমলে ॥ ২৬৩ ॥
সুকৃতিবিভবাদুপাস্যা কমলা সা সর্বকল্যাণা ।
হরিবক্ষসি কৃতবাসা রক্ষতি লোকানহোরাত্রম্ ॥ ২৬৪ ॥
সংবিদ্রূপা হি হরেঃ কুটুম্বিনী ভাতি ভক্তহৃদযেষু ।
সর্বশ্রেযঃপ্রাপ্ত্যৈ যাং বিদুরার্যা রমাং কমলাম্ ॥ ২৬৫ ॥
বিষযলহরীপ্রশান্ত্যৈ কমলাপাদাম্বুজং নৌমি ।
পূর্বং শুকাদিসুধিযো যদ্ধ্যানাদ্ গলিতশত্রুভযাঃ ॥ ২৬৬ ॥
ললিতগমনং ত্বদীযং কলনূপুরনাদপূরিতং মাতঃ ।
নৌমি পদাম্বুজযুগলং ভবতাপনিরাসনাযাদ্য ॥ ২৬৭ ॥
বিরলীকরোতি তাপং কমলাযা মন্দহাসঝরী ।
যত্সেবনেষু সমুদিতকৌতুকরসনির্ভরো হরির্জযতি ॥ ২৬৮ ॥
প্রতিফলতু সংততং মে পুরতো মাতস্ত্বদীযরূপমিদম্ ।
যদ্দর্শনরসভূম্না হরিরপি নানাস্বরূপভাক্ কালে ॥ ২৬৯ ॥
অম্ব তব চরণসেবাং সংততমহমাদরাত্ কলযে ।
তেন মম জন্ম সফলং ত্রিদশানামিব মুনীন্দ্রাণাম্ ॥ ২৭০ ॥
দুর্বারগর্বদুর্মতিদুরর্থনিরসনকলানিপুণাঃ ।
তব চরণসেবযৈব হি কমলে মাতর্বুধা জগতি ॥ ২৭১ ॥
আনদমেতি মাতস্তব নামোচ্চারণেন সিন্ধুভবে ।
সংপ্রাপ্তত্বদ্রূপং মম মানসমাত্তযোগকলম্ ॥ ২৭২ ॥
তব দৃষ্টিপাতবিভবাত্ সর্বে লোকে বিধূততাপভরাঃ ।
যান্তি মুদা ত্রিদশৈঃ সহ বিভানমারুহ্য মাতরহো ॥ ২৭৩ ॥
কো বা ন শ্রযতি বুধঃ শ্রেযোঽর্থী তামিমাং কমলাম্ ।
যাং পন্নগারিবাহনসদ্গর্মিণীমর্চযন্তি সুরনাথাঃ ॥ ২৭৪ ॥
তামরবিন্দনিবাসামম্বাং শরণার্থিনাং কলিতরক্ষাম্ ।
বহুরূপেষ্বঘনিচযেষ্বপি নিশ্চিত্যাত্মনো ধৈর্যম্ ॥ ২৭৫ ॥
করুণাপ্রবাহঝর্যা গতপঙ্ক ভূতলং মাতঃ ।
সত্বাঙ্কুরাদিলসিতং জযতি পযোরাশিককন্যকে কমলে ॥ ২৭৬ ॥
বিধিশিববাসবমুখ্যৈর্বন্দ্যপদাব্জে নমস্তুভ্যম্ ।
মাতর্বিষ্ণোর্দযিতে সর্বজ্ঞত্বং চ মে কলয ॥ ২৭৭ ॥
পরদেবতে প্রসীদ প্রসীদ হরিবল্লভে মাতঃ ।
ত্বামাহুঃ শ্রুতযঃ কিল কল্যাণগুণাকরাং নিত্যাম্ ॥ ২৭৮ ॥
ক্ষন্তব্যমম্ব মামকমঘরাশিং ক্ষপয বীক্ষণতঃ ।
সত্বোন্মেষং দেহি প্রিযে হরের্দাসমপি কুরু মাম্ ॥ ২৭৯ ॥
বাঞ্ছিতসিদ্ধির্ন স্যাদ্ যদি পাদাব্জে কৃতপ্রণামানাম্ ।
হানিস্ত্বদীযযশসামিতি কেচিদ্ধৈর্যবন্তশ্চ ॥ ২৮০ ॥
সদসদনুগ্রহদক্ষাং ত্বাং মাতঃ সংততং নৌমি ।
গ্রহপীডা নৈব ভবেদ্যমপীডা দূরতঃ কালে ॥ ২৮১ ॥
বিদ্যাঃ কলাশ্চ কালে কৃপযা কলয প্রসীদাশু ।
মাতস্ত্বমেব জগতাং সর্বেষাং রক্ষণং ত্বযা ক্রিযতে ॥ ২৮২ ॥
উছেষ্বপি নীচেষু প্রকাশতে তুল্যমেব তব রূপম্ ।
এতদ্ দৃষ্ট্বা ধৈর্যং ঘনাগসোঽপ্যম্ব জাযতে ননু মে ॥ ২৮৩ ॥
কা শঙ্কা তব বৈভবজালং বক্তুং দিগন্তরে মাতঃ ।
বরহারালংকারাং সেবন্তে ত্বাং হরিত্পতযঃ ॥ ২৮৪ ॥
কমলাযাশ্চ হরেরপি সংদৃষ্যং দিব্যদাংপত্যম্ ।
তাবেব নঃ পতী কিল জন্মান্তরপুণ্যপরিপাকাত্ ॥ ২৮৫ ॥
সর্বাসামুপনিষদাং বিদ্যানাং ত্বংপরং স্থানম্ ।
অল্পধিযো বযমেতে ত্বত্স্তোত্রে ভোঃ কথং শক্তাঃ ॥ ২৮৬ ॥
সাষ্টাঙ্গপ্রণতিরিযং প্রকল্পিতা মাতরদ্য তব চরণে ।
তেনাহং হি কৃতার্থঃ কিং প্রার্থ্যং বস্ত্বতঃ কমলে ॥ ২৮৭ ॥
স্তোত্রমিদংহি মযা তে চরণাম্ভোজে সমর্পিতং ভক্ত্যা ।
তব চ গুরোরপি বীক্ষা তত্র নিদানং পরং নান্যত্ ॥ ২৮৮ ॥
দেহান্তে ননু মাতর্মোক্ষং ত্রিদশৈঃ সমং দেহি ।
অহমপি সাম পঠন্ সন্ ত্বাং চ হরিং যামি শরণার্থী ॥ ২৮৯ ॥
শুকবাণীমিব মাতর্নিরর্থকাং মদ্বচোভঙ্গীম্ ।
আরাচ্ছৃণোষি দযযা তদেব চোত্তমপদব্যক্ত্যৈ ॥ ২৯০ ॥
বিদ্যাং কলাং বরিষ্ঠাং অম্ব ত্বাং সংততং বন্দে ।
যা ব্যাকরোষি কালে বিদ্বদ্ভির্বেদতত্ত্বাদি ॥ ২৯১ ॥
বৈদুষ্যং বাণ্যাঃ সত্সংপজ্ঝর্যো যদীযবীক্ষণতঃ ।
সিধ্যন্ত্যপি দেবানাং সা নঃ শরণং রমা দেবী ॥ ২৯২ ॥
বিপুলং শ্রিযো বিলাসং শ্রদ্ধাং ভক্ত্যাদিকং দেহি ।
অম্ব প্রসীদ কালে তব পাদাব্জৈকসেবিনামিহ নঃ ॥ ২৯৩ ॥
কেচিত্ প্রাঞ্চঃ কমলাং প্রাপ্য হি শরণং বিপত্কালে ।
ঝটিতি বিধূনিততাপাঃ সা মে দেবী প্রসন্নাস্তু ॥ ২৯৪ ॥
মরকতকান্তিমনোহরমূর্তিঃ সৈষা রমা দেবী ।
পাতি সকলানি কালে জগন্তি করুণাবলোকাদ্যৈঃ ॥ ২৯৫ ॥
ভাগীরথীব বাণী তব নুতিরূপা বিরাজতে পরমা ।
ইহ মাতর্যদ্ভজনং সর্বেষাং সর্বসংপদাং হেতুঃ ॥ ২৯৬ ॥
কলশপযোদধিতনযে হরিপ্রিযে লক্ষ্মি মাতরম্বেতি ।
তব নামানি জপন্ সন্ ত্বদ্দাসোঽহং তু মুক্তযে সিদ্ধঃ ॥ ২৯৭ ॥
নিখিলচরাচররক্ষাং বিতন্বতী বিষ্ণুবল্লভা কমলা ।
মম কুলদৈবতমেষা জযতি সদারাধ্যমান্যপাদকমলা ॥ ২৯৮ ॥
সর্বজন্নুতবিভবে সংততমপি বাঞ্ছিতপ্রদে দেবি ।
অম্ব ত্বমেব শরণং তেনাহং প্রাপ্তসর্বকার্যার্থঃ ॥ ২৯৯ ॥
কমলে কথং নু বর্ণ্যস্তব মহিমা নিগমমৌলিগণবেদ্যঃ ।
ইতি নিশ্চিত্য পদাব্জং তব বন্দে মোক্ষকামোঽহম্ ॥ ৩০০ ॥
ত্বামম্ব বালিশোঽহং ত্বচমত্কারৈর্গিরাং গুম্ভৈঃ ।
অযথাযথক্রমং হি স্তুবন্নপি প্রাপ্তজন্মসাফল্যঃ ॥ ৩০১ ॥
ইতি শ্রীকমলাত্রিশতী সমাপ্তা
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ত্oday
http://sanskritdocuments.org
Kamala Trishati Lyrics in Bengali PDF
% File name : kamalA300.itx
% Category : trishati
% Location : doc\_devii
% Author : gaNgAdharamakhivirachitA
% Language : Sanskrit
% Subject : hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : July 15, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : kamalA300.itx
% Category : trishati
% Location : doc\_devii
% Author : gaNgAdharamakhivirachitA
% Language : Sanskrit
% Subject : hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : July 15, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website