കമലാത്രിശതീ
{॥ കമലാത്രിശതീ ॥}
ഗങ്ഗാധരമഖിവിരചിതാ ।
പരമാഭരണം വിഷ്ണോര്വക്ഷസി സാ സാഗരേന്ദ്രവരപുത്രീ ।
യാ മൂര്തിര്മതീ കാലേ ക്ഷമാ ജനാനാം കൃതാപരാധാനാമ് ॥ ൧ ॥
സാ നഃ ശ്രേയോ ദദ്യാത് കമലാ കമലാസനാദിജനനീം യാമ് ।
സംപ്രാപ്യ സഹചരീം ഹരിരവതി ജഗന്ത്യനാകുലം സതതമ് ॥ ൨ ॥
നിത്യശ്രേയോദാനേ ഖ്യാതാ യാ ഹരിഗൃഹസ്യ സര്വസ്വമ് ।
ശ്രുതിമൌലിസ്തുതവിഭവാ സാ ഭാതു പുരഃ സദാസ്മാകമ് ॥ ൩ ॥
വിഷ്ണുക്രീഡാലോലാ വിഖ്യാതാ ദീനരക്ഷണേ ലക്ഷ്മീഃ ।
ജനനീ നഃ സ്ഫുരതു സദാ തേന വയം കില കൃതാര്ഥാഃ സ്മഃ ॥ ൪ ॥
നിര്വാണാങ്കുരജനനീ കാലേ സാ സാര്വഭൌമപദദോഗ്ധ്രീ ।
നിരസതിമോഹസമൂഹാ മമ ദൈവതമാദൃതം ഗുരുഭിഃ ॥ ൫ ॥
വിഷ്ണോര്വക്ഷസി ലസിതാ ശീതമയൂഖസ്യ സോദരീ കമലാ ।
കമലായതനയനാ നഃ പാതു സദാ പാപരാശിഭ്യഃ ॥ ൬ ॥
കവിപരിഷദാ ച വേദൈഃ നിത്യം സ്തുതനിജമഹോദയാ കമലാ ।
മനസി മമ സംനിധത്താം ത്വമിതാനന്ദായ ലോകനാഥേന ॥ ൭ ॥
ദുഗ്ധോദധിതനയാ സാ ദുരിതനിഹന്ത്രീ കൃതപ്രണാമാനാമ് ।
ആനന്ദപദവിധാത്രീ പത്യാ സാകം പദേ പദേ ലോകേ ॥ ൮ ॥
മന്മഥജനനീ സാ മാമവതു സരോജാ(ക്ഷ)ഗേഹിനീ കമലാ ।
യാമാരാധ്യ ബുധേന്ദ്രാ വിശന്തി പരമം തു തത് പദം വിഷ്ണോഃ ॥ ൯ ॥
സത്സൂക്തികൃതിവിധാത്രീ നമതാമമ്ബാ ത്രിലോക്യാസ്തു ।
നിത്യപ്രസാദഭൂമ്നാ രക്ഷതി മാമാദരാത് കമലാ ॥ ൧൦ ॥
മമ സൂക്തിരഞ്ജലിപുടഃ പ്രണതിശ്ചാനേകസംഖ്യാകാ ।
കുതുകാത് ക്ഷീരോദസുതാമമിതാനന്ദായ ഗാഹതേ കമലാമ് ॥ ൧൧ ॥
യാ പാരമാര്ഥ്യസരണിഃ സാ കമലാ നിശ്ചിതാ വേദൈഃ ।
സൈഷാ ഹി ജഗന്മാതാ സംസൃതിതാപാപഹന്ത്രീ ച ॥ ൧൨ ॥
മന്ദസ്മിതമധുരാനനമമന്ദസംതോഷദായി ഭജതാം തത് ।
കമലാരൂപം തേജോ വിഭാതു നിത്യം മദീയഹൃത്കമലേ ॥ ൧൩ ॥
കാലേ ക്ഷപയതി കമലാ കടാക്ഷധാട്യാ ഹി മാമകം ദുരിതമ് ।
അത ഏവാശ്രിതരക്ഷണദീക്ഷേത്യേവം ജനോ വദതി ॥ ൧൪ ॥
നവനവഹര്മ്യവിധാത്രീ നാകികിരീടാര്ചിതാ ച സാ ദേവീ ।
ജ്യോതിര്മണ്ഡലലസിതാ മുനിഹൃദയാബ്ജാസനാ ച സദ്ഗതിദാ ॥ ൧൫ ॥
സംവീക്ഷ്യ ജലധിതനയാം ഭൂയോ ഭൂയഃ പ്രണമ്യ ഭക്തഗണഃ ।
നിരസിതദുരിതൌഘഃ സന് സ്തൌതി മുദാ മോക്ഷസിദ്ധയേ കമലാമ് ॥ ൧൬ ॥
രാകാനിശീവ ദേവ്യാം ദൃഷ്ടായാം ഭക്തഗണവാണീ ।
ഭജതേ ജലനിധിശൈലീം സാങ്ഗോപാങ്ഗം കൃതാനന്ദാ ॥ ൧൭ ॥
ദുര്ഗതിഭീത്യാ ഖിന്നഃ സോഽഹം ശരണം ഭജാമി താം കമലാമ് ।
ശരണാര്ഥിനാം ഹി രക്ഷാകൃദിതി ഖ്യാതാ ഹി യാ ലോകേ ॥ ൧൮ ॥
ന ഹി കലയതേ ഹൃദന്തേ മന്ദാരം കാമധേനും വാ ।
യഃ സേവതേ മുകുന്ദപ്രിയാം ശ്രിയം നിത്യഭാവേന ॥ ൧൯ ॥
കൈടഭമര്ദനമഹിഷീം മമാഞ്ജലിര്ഗാഹതാം കാലേ ।
ന ഹി നാഥനീയമത്ര ക്ഷമാതലേ സാ പ്രസന്നാസ്തു ॥ ൨൦ ॥
സംതാപപീഡിതം മാമവതു സദാ ശ്രീര്ഹരിപ്രിയാ മാതാ ।
രക്ഷിതവായസമുഖ്യാ കൃപാനിധിഃ പുണ്യകൃദ്ദൃശ്യാ ॥ ൨൧ ॥
ന ഹി കേവലം പ്രണാമൈഃ സ്തുത്യാ ഭക്ത്യാ സമാരാധ്യാ ।
സത്യേന ധര്മനിവഹൈര്ഭാവേന ച കമലഗേഹിനീ കമലാ ॥ ൨൨ ॥
കദാചിത്കവിലോകേഽപ്യക്ഷീണാനന്ദദായിനീ കമലാ ।
രക്ഷതു കടാക്ഷകലികാങ്കൂരൈര്ഭക്താനിഹാദരതഃ ॥ ൨൩ ॥
കലിപാപഗ്ലപിതാനാം മുരമര്ദനദിവ്യഗേഹിനീ ലക്ഷ്മീഃ ।
രാജതി ശരണം പരമം വശീകൃതേശാ ച വിബുധഗണസേവ്യാ ॥ ൨൪ ॥
നിത്യോല്ലസദുരുമാലാ വക്ഷസി കമലാ ഹരേര്ഭാതി ।
നിജതനുഭാസാ ദ്യോതിതകൌസ്തുഭമണിരമ്ബുധേസ്തനയാ ॥ ൨൫ ॥
മാതര്മങ്ഗലദായിന്യമരേന്ദ്രവധൂസമര്ചിതാങ്ഘ്രിയുഗേ ।
മാം പാഹ്യപായനിവഹാത് സംതതമകലക്ഷമാമൂര്തേ ॥ ൨൬ ॥
യദി കലിതാ ചോപേക്ഷാ നശ്യേത് കില താവകീ മഹതീ ।
കീര്തിരതോഽമ്ബ കടാക്ഷൈഃ പരിഷിഞ്ച മുദാ മുഹുഃ ശീതൈഃ ॥ ൨൭ ॥
ധനധാന്യസുതാദിരുചിഗ്രസ്തം മാം പാഹി കമലേ ത്വമ് ।
തേനോര്ജിതകീര്തിഃ സ്യാ മാതസ്ത്വം സര്വരക്ഷിണീ ഖ്യാതാ ॥ ൨൮ ॥
തവ പാദാമ്ബുജയുഗലധ്യാനം മാതര്മദീയമഘമാശു ।
കബലീകരോതി കാലേ തേനാഹം സിദ്ധസംകല്പഃ ॥ ൨൯ ॥
അഞ്ജലികലികാ ഹി കൃതാ യദി തസ്യൈ മുരനിഹന്തൃദയിതായൈ ।
രസനാഗ്രേ ഖേലനഭാക് തസ്യ തു പുംസോ ഗിരാം ദേവീ ॥ ൩൦ ॥
മാതസ്തവ മൂര്തിരിയം സുധാമയീ നിശ്ചിതാ നിപുണൈഃ ।
യത് തദ്ദര്ശനഭൂമ്നാ നിരസ്തതാപാ ബുധാ ഭവന്ത്യചിരാത് ॥ ൩൧ ॥
കലിതജഗത്ത്രയരക്ഷാഭരാണി മയി ദേവി സംവിധേഹി മുദാ ।
ത്വദ്വീക്ഷണാനി കമലേ തേനാഹം സിദ്ധസംകല്പഃ ॥ ൩൨ ॥
വരദേ മുരാരിദയിതേ ജയന്തി തേ വീക്ഷണാനി യാനി ദിവി ।
സംപ്രാപ്യ താനി മഘവാ വിജിതാരിര്ദേവസംഘവന്ദ്യശ്ച ॥ ൩൩ ॥
മോഹാന്ധകാരഭാസ്കരമമ്ബ കടാക്ഷം വിധേഹി മയി കമലേ ।
യേനാപ്തജ്ഞാനകലാഃ സ്തുവന്തി വിബുധാസ്ത്വദീയസദസി കലമ് ॥ ൩൪ ॥
കാമക്രോധാദിമഹാസത്ത്വനിരാസം കൃപാസാരാത് ।
കുരു മാതര്മമ സംസൃതിഭീതിം ച നിരാകുരു ത്വമേവാരാത് ॥ ൩൫ ॥
മൂഢാനാമപി ഹൃദ്യാം കവിതാം ദാതും യദീയപരിചര്യാ ।
പ്രഭവതി കാലേ സാ ഹി ശ്രീരമ്ബാ നഃ പ്രസന്നാസ്തു ॥ ൩൬ ॥
ദിവ്യക്ഷേത്രേഷു ബുധാ ദിനകരമധ്യേ ച വേദമൌലൌ ച ।
യത്സ്ഥാനമിതി വദന്തി ശ്രീരേഷാ ഭാതി സംശ്രിതഹരിര്ഹി ॥ ൩൭ ॥
നിജലീലാക്രാന്തഹരീ രക്ഷതി കമലാ കടാക്ഷധാട്യാ നഃ ।
ശരണാര്ഥിനശ്ച കാലേ വിഹഗോരഗപശുമുഖാനുര്വ്യാമ് ॥ ൩൮ ॥
സമരാങ്ഗണേഷു ജയദാ ത്രിദശാനാം മൌലിഭിര്മാന്യാ ।
ആപദി രക്ഷണദക്ഷാ സാ കമലാ നഃ പ്രസന്നാസ്തു ॥ ൩൯ ॥
നിത്യാനന്ദാസനഭാഡ് നവനിധിവന്ദ്യാ ച സാഗരേന്ദ്രസുതാ ।
വിലസതി മാധവവക്ഷസി പാലിതലോകത്രയാ ച ജനനീ നഃ ॥ ൪൦ ॥
മുനിനുതനിജപരിപാടീ വാഗ്ധാടീ ദാനലോലുപാ ഭജതാമ് ।
ശിക്ഷിതരിപുജനകോടീ വിലസതി ധൃതശാതകുമ്ഭമയശാടീ ॥ ൪൧ ॥
നിഖിലാഗമവേദ്യപദാ നിത്യം സദ്ഭിഃ സമാരാധ്യാ ।
സംസൃതിപാശനിഹന്ത്രീ യാ തസ്യൈ ചാഞ്ജലിഃ ക്രിയതേ ॥ ൪൨ ॥
ഭൂയാംസി നമാംസി മയാ ഭക്തേന കൃതാനി കമലജാങ്ഘ്രിയുഗേ ।
നിത്യം ലഗന്തു തേന ഹി സര്വാ രാജന്തി സംപദോ മാന്യാഃ ॥ ൪൩ ॥
നിത്യം നിര്മലരൂപേ ബരദേ വാരാശികന്യകേ മാതഃ ।
സദ്ഗണരക്ഷണദീക്ഷേ പാഹീതി വദന്തമാശു മാം പാഹി ॥ ൪൪ ॥
ഭുവനജനനി ത്വമാരാത് കൃതരക്ഷണസംതതിഃ ക്ഷമാമൂര്തേ ।
പ്രതിവസ്തു രമേ കലിതസ്വരൂപശക്ത്യാ ഹി രാജസേ ജഗതി ॥ ൪൫ ॥
ജയ ജയ കലശാബ്ധിസുതേ ജയ ജയ ഹരിവല്ലഭേ രമേ മാതഃ ।
പ്രാതരിതി വിബുധവര്യാഃ പഠന്തി നാമാനി തേ ഹി മേ ഗുരവഃ ॥ ൪൬ ॥
നേത്രരുചിവിജിതശാരദപദ്മേ പദ്മേ നമസ്തുഭ്യമ് ।
തേന വയം ഗതവിപദഃ സാ മുക്തിഃ കരഗതാ കലിതാ ॥ ൪൭ ॥
സതതം ബദ്ധാഞ്ജലിപുടമുപാസ്മഹേ തച്ഛുഭപ്രദം തേജഃ ।
യത് കമലോദരനിലയം കമലാക്ഷപ്രീതിവീചികാപൂരമ് ॥ ൪൮ ॥
സ്ഫുരതു മമ വചസി കമലേ ത്വദീയവൈഭവസുധാധാരാ ।
നിത്യം വ്യക്തിം പ്രാപ്താ ധുതനുതജനഖേദജാലകാ മഹതീ ॥ ൪൯ ॥
കമലേ തവ നുതിവിഷയേ ബുദ്ധിര്ജാതാ ഹി മേ സഹസാ ।
തേന മമ ഭാഗധേയം പരിണതമിത്യേവ നിത്യസംതുഷ്ടഃ ॥ ൫൦ ॥
കവിതാരസപരിമലിതം കരോതി വദനം നതാനാം യാ ।
സ്തോതും താം മേ ഹ്യാരാത് സാ ദേവീ സുപ്രസന്നാസ്തു ॥ ൫൧ ॥
ഹരിഗൃഹിണി താവകം നുതരൂപം യേ ഭുവി നിജേ ഹൃദമ്ഭോജേ ।
ധ്യായന്തി തേഷു വിബുധാ അപി കല്പകകുസുമമര്പയന്തി മുദാ ॥ ൫൨ ॥
നാനാവരദാനകലാലോലുപഹൃദയേ ഹൃദമ്ഭുജസ്ഥേ മാമ് ।
രക്ഷാപായാത് സഹസാ കുരു ഭക്തം ദോഷഹീനം ച ॥ ൫൩ ॥
നിജഘനകേശരുചാ ജിതനീലാമ്ബുധരേ ശശാങ്കസഹജന്മന് ।
പദ്മേ ത്വദീയരൂപം മനോഹരം ഭാതു മേ ഹൃദയേ ॥ ൫൪ ॥
ഘനകുങ്കുമലസിതാങ്ഗം മുക്താഹാരാദിഭൂഷിതം മധുരമ് ।
മന്ദസ്മിതമധുരാസ്യം സൂര്യേന്ദുവിലോചനം ച ബുധമാന്യമ് ॥ ൫൫ ॥
നിബിഡകുചകുമ്ഭയുഗലം നിജദൃഗ്ജിതഹരിണശാബകാക്ഷിയുഗമ് ।
ലീലാഗതിജിതകലഭം മധുവൈരിമനോഹരം ച സുരമാന്യമ് ॥ ൫൬ ॥
ദിശി ദിശി വിസ്തൃതസംപദ്വിലാസമധുരം ച കുന്ദദന്താലി ।
മദനജനകം ച വിഷ്ണോഃ സര്വസ്വം സര്വദാനചണമ് ॥ ൫൭ ॥
കുലദൈവതമസ്മാകം സംവിദ്രൂപം നതാര്തിഹരരൂപമ് ।
നാനാദുര്ഗതിഹരണക്ഷമമമരീസേവിതം സകലമ് ॥ ൫൮ ॥
പഞ്ചദശവര്ണമാനം പയോജവക്ത്രം പിതാമഹസമര്ച്യമ് ।
ജഗദവനജാഗരൂകം ഹരിഹരസംമാന്യവൈഭവം കിമപി ॥ ൫൯ ॥
കരുണാപൂരിതനയനം പരമാനന്ദപ്രദം ച പരിശുദ്ധമ് ।
ആഗമഗണസംവേദ്യം കോശഗൃഹം സര്വസംപദാം നിത്യമ് ॥ ൬൦ ॥
മാതസ്താവകപാദാമ്ബുജയുഗലം സംതതം സ്ഫുരതു ।
തേനാഹം തവ രൂപം ദ്രക്ഷ്യാമ്യാനന്ദസിദ്ധയേ സകലമ് ॥ ൬൧ ॥
ദേവ്യാ കടാക്ഷിതാഃ കില പുരുഷാ വാ യോഷിതഃ പശവഃ ।
മാന്യന്തേ സുരസംസദി കല്പകകുസുമൈഃ കൃതാര്ഹണാഃ കാലേ ॥ ൬൨ ॥
സുമനോവാഞ്ഛാദാനേ കൃതാവധാനം ധനം വിഷ്ണോഃ ।
ധിഷണാജാഡ്യാദിഹരം യദ്വീക്ഷണമാമനന്തി ജഗതി ബുധാഃ ॥ ൬൩ ॥
അന്തരപി ബഹിരുദാരം തവ രൂപം മന്ത്രദേവതോപാസ്യമ് ।
ജനനി സ്ഫുരതു സദാ നഃ സംമാന്യം ശ്രേയസേ കാലേ ॥ ൬൪ ॥
മുരരിപുപുണ്യശ്രേണീപരിപാകം താവകം രൂപമ് ।
കമലേ ജനനി വിശുദ്ധം ദദ്യാച്ഛ്രേയോ മുഹുര്ഭജതാമ് ॥ ൬൫ ॥
പുണ്യശ്രേണീ കമലാ സാ ജനനീ ഭക്തമാനസേ സ്ഥിതിഭാക് ।
തേജസ്തതിഭിര്മോഹിതഭുവനാ ഭുവനാധിനാഥഗൃഹിണീയമ് ॥ ൬൬ ॥
ജലനിധികന്യാരൂപം ഹരിമാന്യം സര്വസംപദാം ഹേതുഃ ।
ചിരകൃതസുകൃതവിശേഷാന്നയനയുഗേ ഭാതി സര്വസ്യ ॥ ൬൭ ॥
ജലനിധിതപഃഫലം യന്മുനിജനഹൃദയാബ്ജനിത്യകൃതനൃത്തമ് ।
കരുണാലോലാപാങ്ഗം തത് തേജോ ഭാതു നിഃസമം വദനേ ॥ ൬൮ ॥
ശമിതനതദുരിതസംഘാ ഹരയേ നിജനേത്രകല്പിതാനങ്ഗാ ।
കൃതസുരശാത്രവഭങ്ഗാ സാ ദേവീ മങ്ഗലൈസ്തുങ്ഗാ ॥ ൬൯ ॥
നിഖിലാഗമസിദ്ധാന്തം ഹരിശുദ്ധാന്തം സദാ നൌമി ।
തേനൈവ സര്വസിദ്ധിഃ ശാസ്ത്രേഷു വിനിശ്ചിതാ വിബുധൈഃ ॥ ൭൦ ॥
കൃഷ്ണകൃതവിവിധലീലം തവ രൂപം മാതരാദരാന്മാന്യമ് ।
സ്ഫുരതു വിലോചനയുഗലേ നിത്യം സംപത്സമൃദ്ധ്യൈ നഃ ॥ ൭൧ ॥
കരുണാകടാക്ഷലഹരീ കാമായാസ്തു പ്രകാമകൃതരക്ഷാ ।
ലക്ഷ്മ്യാ മാധവമാന്യാ സത്സുഖദാനേ ദിശി ഖ്യാതാ ॥ ൭൨ ॥
അപവര്ഗസിദ്ധയേ ത്വാമമ്ബാമമ്ഭോജലോചനാം ലക്ഷ്മീമ് ।
അവലമ്ബേ ഹരിദയിതേ പദ്മാസനമുഖസുരേന്ദ്രകൃതപൂജാമ് ॥ ൭൩ ॥
താവകകടാക്ഷലഹരീം നിധേഹി മയി ദേവി കമലേ ത്വമ് ।
തേന മനോരഥസിധ്ഹിര്ഭുവി പരമേ ധാമനി പ്രചുരാ ॥ ൭൪ ॥
ത്വാമാദരേണ സതതം വീക്ഷേമഹി മാതരബ്ജകൃതവാസാമ് ।
വിഷ്ണോര്വക്ഷോനിലയാമക്ഷയസുഖസിദ്ധയേ ലോകേ ॥ ൭൫ ॥
സാ നഃ സിധ്യതു സിദ്ധ്യൈ ദേവാനാം വാങ്മമനോഽതീതാ ।
ഹരിഗൃഹിണീ ഹരിണാക്ഷീ പാലിതലോകത്രയാ ച ജനനീയമ് ॥ ൭൬ ॥
സകലചരാചരചിന്മയരൂപം യസ്യാ ഹി ദേവതോപാസ്യമ് ।
സാ ദദതു മങ്ഗലം മേ നിത്യോജ്ജ്വലമാദരാജ്ജനനീ ॥ ൭൭ ॥
ശീതമയൂഖസഹോദരി താം ത്വാമമ്ബാം ഹി ശീലയേ നിത്യമ് ।
നിരസിതവൈരിഗണോഽഹം ഹരിചരണന്യസ്തരക്ഷശ്ച ॥ ൭൮ ॥
ദിക്ഷി വിദിക്ഷു കൃതശ്രീഃ സാ മേ ജനനീ നദീശതനയേയമ് ।
ഹരിണാ സാകം ഭജതു പ്രാകാശ്യം ഹൃദി സതാം സമൃദ്ധ്യൈ നഃ ॥ ൭൯ ॥
വാരിനിധിവംശസംപദ് ദിവ്യാ കാചിദ്ധരേര്മാന്യാ ।
അര്ചന്തി യാം തു മുനയോ യോഗാരമ്ഭേ തഥാന്തേ ച ॥ ൮൦ ॥
ധൃതസുമമധുപക്രീഡാസ്ഥാനായിതകേശഭാരായൈ ।
നമ ഉക്തിരസ്തു മാത്രേ വാഗ്ജിതപീയൂഷധാരായൈ ॥ ൮൧ ॥
സംദേഹേ സിദ്ധാന്തേ വാദേ വാ സമരഭൂമിഭാഗേ വാ ।
യാ രാജതി ബഹുരൂപാ സാ ദേവീ വിഷ്ണുവല്ലഭാ ഖ്യാതാ ॥ ൮൨ ॥
പ്രതിഫലതു മേ സദാ തന്മുനിമാനസപേടികാരത്നമ് ।
വിഷ്ണോര്വക്ഷോഭൂഷണമാദൃതനിര്ഗതിജനാവനം തേജഃ ॥ ൮൩ ॥
ബാലകുരങ്ഗവിലോചനധാടീരക്ഷിതസുരാദി മനുജാനാമ് ।
നയനയുഗാസേവ്യം തദ് ഭാതീഹ ധരാതലേ തേജഃ ॥ ൮൪ ॥
മാധവദൃക്സാഫല്യം ഭക്താവലിദൃശ്യകാമധേനുകലാ ।
ലക്ഷ്മീരൂപം തേജോ വിഭാതു മമ മാനസേ വചസി ॥ ൮൫ ॥
ഹരിസരസക്രീഡാര്ഥം യാ വിധൃതാനേകരൂപികാ മാതാ ।
സാ ഗേഹഭൂഷണം നഃ സ്ഫുരതു സദാ നിത്യസംപൂജ്യാ ॥ ൮൬ ॥
ദ്വാരവതീപുരഭാഗേ മൈഥിലനഗരേ ച യത്കഥാസാരഃ ।
സാ ദേവീ ജലധിസുതാ വിഹരണഭാങ് മാമകേ മനസി ॥ ൮൭ ॥
ജലനിധിതപോമഹിമ്നേ ദേവ്യൈ പരമാത്മനഃ ശ്രിയൈ സതതമ് ।
ഭൂയാംസി നമാംസി പുനഃ സര്വാ നഃ സംപദഃ സന്തു ॥ ൮൮ ॥
പരമൌഷധം ഹി സംസൃതിവ്യാധേര്യത് കീര്തിതം നിപുണൈഃ ।
തദഹം ഭജാമി സതതം ലക്ഷ്മീരൂപം സദാനന്ദമ് ॥ ൮൯ ॥
ദശരഥസുതകോദണ്ഡപ്രഭാവസാക്ഷാത്കൃതേ കൃതാനന്ദാ ।
സീതാരൂപാ മാതേ ജജ്ഞേ യജ്ഞക്ഷിതൌ ഹി സാ സിദ്ധ്യൈ ॥ ൯൦ ॥
മുനിജനമാനസനിലയേ കമലേ തേ ചരണപങ്കജം ശിരസി ।
അവതംസയന്നുദാരം വിശാമി ദേവൈഃ സുധര്മാം വാ ॥ ൯൧ ॥
ധനമദമേദുരസേവാം ത്യക്തവാഹം തേ പദാമ്ഭോജമ് ।
ശരണം യാമി പുമര്ഥസ്ഫൂര്തികലായൈ ഭൃശം ദീനഃ ॥ ൯൨ ॥
ന ഘടയ കുത്സിതസേവാം ദുഷ്ടൈര്വാ സംഗമം മാതഃ ।
കുരു മാം ദാസം സംസൃതിപാപം ച ഹര ശീഘ്രമ് ॥ ൯൩ ॥
മയി നമതി വിഷ്ണുകാന്തേ തവാഗ്രതസ്താപഭാരാര്തേ ।
മാതഃ സഹസാ സുമുഖീ ഭവ ബാലേ ദോഷനിലയേ ച ॥ ൯൪ ॥
ഹന്ത കദാ വാ മാതസ്തവ ലോചനസേചനം ഭവേന്മയി ഭോഃ ।
ഈത്ഥം പ്രാതഃ സ്തുവതാം ത്വമേവ രക്ഷാകരീ നിയതമ് ॥ ൯൫ ॥
സംസാരരോഗശാന്തിപ്രദമേതല്ലോചനം മാതഃ ।
താവത്കമഹമുപാസേ ദിവ്യൌഷധമാശു സാഗരേന്ദ്രസുതേ ॥ ൯൬ ॥
സംസൃതിരോഗാര്താനാം തവ നാമസ്മരണമത്ര ധരണിതലേ ।
പൂജാപ്രദക്ഷിണാദികമാര്യാ മുഖ്യൌഷധം വദന്തി കില ॥ ൯൭ ॥
മാതര്വിനാ ധരണ്യാം സുകൃതാനാം ഖണ്ഡമിഹ ജന്തുഃ ।
ധ്യാനം വാ ന ഹി ലഭതേ പ്രണതിം വാ സംപദാം ജനനീമ് ॥ ൯൮ ॥
ഗുരുവരകടാക്ഷവിഭവാദ് ദേവി ത്വാങ്ഘ്രിപ്രണാമധുതപാപഃ ।
തവ ച ഹരേര്ദാസഃ സന് വിശാമി ദേവേശ മാനിതാം ച സഭാമ് ॥ ൯൯ ॥
മുരഹരനേത്രമഹോത്സവതാരുണ്യശ്രീര്നിരസ്തനതശത്രുഃ ।
ലലിതലികുചാഭകുചഭരയുഗലാ ദൃഗ്വിജിതഹരിണസംദോഹാ ॥ ൧൦൦ ॥
കാരുണ്യപൂര്ണനയനാ കലികല്മഷഹാരിണീ ച സാ കമലാ ।
മുഖജിതശാരദകമലാ വക്ത്രാമ്ഭോജേ സദാ സ്ഫുരതു മാതാ ॥ ൧൦൧ ॥
താവകകടാക്ഷസേചനവിഭവാം നിര്ധൂതദുരിതസംഘാ ഹി ।
പരമം സുഖം ലഭന്തേ പരേ തു ലോകേ ച സൂരിഭിഃ സാര്ധമ് ॥ ൧൦൨ ॥
തവ പാദപദ്മവിസൃമരകാന്തിഝരീം മനസി കലയംസ്തു ।
നിരസിതനരകാദിഭയോ വിരാജതേ നാകിസദസി സുരവന്ദ്യഃ ॥ ൧൦൩ ॥
ഹന്ത സഹസ്രേഷ്വഥ വാ ശതേഷു സുകൃതീ പുമാന് മാതഃ ।
താവകപാദപയോരുഹവരിവസ്യാം കലയതേ സകലമ് ॥ ൧൦൪ ॥
ജനനി തരങ്ഗയ നയനേ മയി ദീനേ തേ ദയാസ്നിഗ്ധേ ।
തേന വയം തു കൃതാര്ഥാ നാതഃ പരമസ്തിഃ നഃ പ്രാര്ഥ്യമ് ॥ ൧൦൫ ॥
താവകകൃപാവശാദിഹ നാനായോഗാദിനാശിതഭയാ യേ ।
തേഷാം സ്മരണമപി ദ്രാക് ശ്രിയാവഹം നിത്യമാകലയേ ॥ ൧൦൬ ॥
നൈവ പ്രായശ്ചിത്തം ദുരിതാനാം മാമകാനാം ഹി ।
ത്വാമേവ യാമി ശരണം തസ്മാല്ലക്ഷ്മി ക്ഷമാധാരേ ॥ ൧൦൭ ॥
മുരവൈരിമാന്യചരിതേ മാതസ്ത്വാമഖിലലോകസാമ്രാജ്യേ ।
പശ്യന്തി ദിവി സുരേന്ദ്രാ മുനയസ്തത്ത്വാര്ഥിനശ്ച നിത്യകലാമ് ॥ ൧൦൮ ॥
സ്വീയപദപ്രാപ്ത്യൈ നനു വിബുധേശാ ജലധികന്യകേ മാതഃ ।
ആരാധ്യ ദിവ്യകുസുമൈസ്തവ പാദാബ്ജം പരം തുഷ്ടാഃ ॥ ൧൦൯ ॥
സൃഷ്ടിസ്ഥിത്യാദൌ ഹരിരമ്ബ തവാപാങ്ഗവീക്ഷണാദരവാന് ।
ജഗദേതദവതി കാലേ ത്വം ച ഹരിര്നഃ ക്രമാത് പിതരൌ ॥ ൧൧൦ ॥
രാജ്യസുഖലാഭസംപത്പ്രാപ്ത്യൈ ക്ഷിതിപാശ്ച യേ ച വിപ്രാദ്യാഃ ।
ഗാങ്ഗജലൈരപി കുസുമൈര്വരിവസ്യാം തേ ക്രമേണ കലയന്തി ॥ ൧൧൧ ॥
സംത്യക്തകാമതദനുജഡമ്ഭാസൂയാദയോ നരാഃ കമലേ ।
ആരാധ്യ ത്വാം ച ഹരിം കാലേ ചൈകാസനസ്ഥിതാം ധന്യാഃ ॥ ൧൧൨ ॥
ജനനീ കദാ പുനീതേ മമ ലോചനമാര്ഗമാദരാദേഷാ ।
യേ കില വദന്തി ധന്യാസ്തേഷാം ദര്ശനമഹം കലയേ ॥ ൧൧൩ ॥
കരധൃതലീലാപദ്മാ പദ്മാ പദ്മാക്ഷഗേഹിനീ നയനേ ।
സിഞ്ചതി സകലശ്രേയഃപ്രാപ്ത്യൈ നിര്വ്യാജകാരുണ്യാ ॥ ൧൧൪ ॥
നാനാവിധവിദ്യാനാം ലീലാസദനം സരോജനിലയേയമ് ।
കവികുലവചഃപയോജദ്യുമണിരുചിര്ഭാതി നഃ പുരത്ഃ ॥ ൧൧൫ ॥
അതസീകുസുമദ്യുതിഭാങ് നാകിഗണൈര്വന്ദ്യപാദപദ്മയുഗാ ।
സരസിജനിലയാ സാ മേ പ്രസീദതു ക്ഷിപ്രമാദരാത് സിദ്ധ്യൈ ॥ ൧൧൬ ॥
ജഗദീശവല്ലഭേ ത്വയി വിന്യസ്തഭരഃ പുമാന് സഹസാ ।
തീര്ത്വാ നാകിസ്ഥാനം വിശതി പരം വൈഷ്ണവം സുരൈര്മാന്യമ് ॥ ൧൧൭ ॥
മാതര്ജ്ഞാനവികാസം കാരയ കരുണാവലോകനൈര്മധുരൈഃ ।
തേനാഹം ധന്യതമോ ഭവേയമാര്യാവൃതേ സദസി ॥ ൧൧൮ ॥
ഹരിവക്ഷസി മണിദീപപ്രകാശവത്യാന്യാ മാത്രാ ।
നിത്യം വയമിഹ ദാസാഃ ശ്രിയാ സനാഥാ മുദാ പരം നൌമഃ ॥ ൧൧൯ ॥
വിദ്രാവയതു സരോജാസനേ ത്വദീയാ കടാക്ഷധാടീ നഃ ।
അജ്ഞാനാങ്കുരമുദ്രാം പുനരപി സംസാരഭീതിദാം സഹസാ ॥ ൧൨൦ ॥
താവകകടാക്ഷസൂര്യോദയേ മദീയം ഹൃദമ്ഭോജമ് ।
ഭജതേ വികാസമചിരാത് തമോവിനാശശ്ച നിശ്ചിതോ വിബുധൈഃ ॥ ൧൨൧ ॥
ലക്ഷ്മീകടാക്ഷലഹരീ ലക്ഷ്മീം പക്ഷ്മലയതി ക്രമാന്നമതാമ് ।
പാദപയോരുഹസേവാ പരം പദം ചിത്സുഖോല്ലാസമ് ॥ ൧൨൨ ॥
ചിദ്രൂപാ പരമാ സാ കമലേക്ഷണനായികാ മുദേ ഭജതാമ് ।
യത്പ്രണയകോപകാലേ ജഗദീശഃ കിംകരോ ഭവതി ॥ ൧൨൩ ॥
കാചന ദേവീ വിഹരതു മമ ചിത്തേ സംതതം സിദ്ധ്യൈ ।
യാപത്യം കലശാബ്ധേരുരഗേശയസത്കലത്രം ച ॥ ൧൨൪ ॥
അഷ്ടസു മഹിഷീഷ്വേകാ കമലാ മുഖ്യാ ഹി നിര്ദിഷ്ടാ ।
അനയൈവ സര്വജഗതാമുദയാദിസ്തന്യതേ കാലേ ॥ ൧൨൫ ॥
കൈവല്യാനന്ദകലാകന്ദമഹം സംതതം വന്ദേ ।
തത്തു മുകുന്ദകലത്രം ചിന്തിതഫലദാനദീക്ഷിതം കിമപി ॥ ൧൨൬ ॥
ഈക്ഷേ കമലാമേനാമമ്ബാമമ്ഭോജലോചനാം സതതമ് ।
മന്ദസ്മിതമധുരാസ്യാം നിത്യം ചാജ്ഞാതകോപമുഖദോഷാമ് ॥ ൧൨൭ ॥
അങ്കിതമാധവവക്ഷഃസ്ഥലാ സരോജേക്ഷണാ ച ഹരികാന്താ ।
കബലയതി മാനസം മേ ദയാപ്രസാരാദിഭിര്നിത്യമ് ॥ ൧൨൮ ॥
ഭൂത്യൈ മമ ഭവതു ദ്രാഗജ്ഞാനധ്വംസിനീ നമതാമ് ।
നാഥാനുരൂപരൂപാ ശ്രുത്യന്തേഡ്യാ ദശാവതാരേഷു ॥ ൧൨൯ ॥
സകലജനരക്ഷണേശു പ്രണിഹിതനയനാ ത്രിലോകമാതാ നഃ ।
പുഷ്ണാതി മങ്ഗലാനാം നികരം സേവാക്രമേണ incomplete ॥ ൧൩൦ ॥
പദ്മാസനജനനീ മാം പാതു മുദാ സുന്ദരാപാങ്ഗൈഃ ।
സര്വൈശ്വര്യനിദാനം യാമാഹുര്വൈദികാ ദീപ്താമ് ॥ ൧൩൧ ॥
നാനാലംകാരവതീ മുനിമാനസവാസിനീ ഹരേഃ പത്നീ ।
ത്രൈലോക്യവിനുതവിഭവാ മാം പായാദാപദാം നിചയാത് ॥ ൧൩൨ ॥
വിദ്രാവയതു ഭയം നഃ സാ കമലാ വിഷ്ണുവല്ലഭാ മാതാ ।
അബ്ധിഃ സംക്ഷുഭിതോഽഭൂത് യദര്ഥമാര്യേണ രാമേണ ॥ ൧൩൩ ॥
ഭൂയോ യദര്ഥമിന്ദ്രഃ സുരതരുകുസുമാര്ഥിനാ ച കൃഷ്ണേന ।
ഹതഗര്വോഽജനി യുദ്ധേ സാ നിത്യം ശ്രേയസേ ഭൂയാത് ॥ ൧൩൪ ॥
ത്വാമാരാധ്യ ജനാ അപി ധനഹീനാഃ സൌധമധ്യതലഭാജഃ ।
നാനാദേശവനീപകജനസ്തുതാ ഭാന്തി നിത്യമേവ രമേ ॥ ൧൩൫ ॥
സംസൃതിതാപോ ന ഭവതി പുനരപി യത്പാദപങ്കജം നമതാമ് ।
സാ മയി കലിതദയാ സ്യാദമ്ബാ വിഷ്ണോഃ കലത്രമനുരൂപമ് ॥ ൧൩൬ ॥
ജനനീകടാക്ഷഭാജാമിഹ മര്ത്യാനാം സുരാസ്തു കിംകരതാമ് ।
രിപവോ ഗിരിതടവാസം ഭജന്തി വേശ്മാനി സിദ്ധയഃ സര്വാഃ ॥ ൧൩൭ ॥
സ്മരണാദ്വാ ഭജനാദ്വാ യസ്യാഃ പാദാമ്ബുജസ്യ ഭുവി ധന്യാഃ ।
ഹന്ത രമന്തേ സ്തമ്ബേരമനിവഹാവൃതഗൃഹാങ്ഗണേ മനുജാഃ ॥ ൧൩൮ ॥
ചിരകൃതസുകൃതനിഷേവ്യാ സാ ദേവീ വിഷ്ണുവല്ലഭാ ഖ്യാതാ ।
യസ്യാഃ പ്രസാദഭൂമ്നാ ജാതാഃ പശ്വാദയോ വദാന്യാ ഹി ॥ ൧൩൯ ॥
അമ്ബ മധുരാന് കടാക്ഷാന് താപഹരാന് വികിര മയി കൃപാജലധേ ।
യേ വിന്യസ്താഃ കരിവരമാരുതിമുഖഭക്തവര്യേഷു ॥ ൧൪൦ ॥
അമൃതലഹരീവ മധുരാ ജലധരരുചിരാ നതാര്തിഹരശീലാ ।
സര്വശ്രേയോദാത്രീ കാചിദ് ദേവീ സദാ വിഭാതു ഹൃദി ॥ ൧൪൧ ॥
ഗീതാചാര്യപുരന്ധ്രീ ത്വദീയനാമപ്രഭാവകലനാദ്യൈഃ ।
യമഭയവാര്താ ദൂരേ ഹരിസാംനിധ്യം കുതോ ന സ്യാത് ॥ ൧൪൨ ॥
ജലനിധിതനയേ കാന്തേ വിഷ്ണോരുഷ്ണാംശുചന്ദ്രനയനേ തേ ।
ചതുരാനനാദയസ്തു ഖ്യാതാ ബാലാഃ ശ്രുതൌ ചോക്താഃ ॥ ൧൪൩ ॥
മനസിജവൈരം ഗാത്രം വാണീ സൌധാരസീ ച യദ്ഭജതാമ് ।
ശ്ലാധ്യാ സംപത് സജ്ജനസമാഗമശ്ചാശു സിധ്യന്തി ॥ ൧൪൪ ॥
സഫലയതു നേത്രയുഗലം ഹതനതദുരിതാ ച സാ പരാ ദേവീ ।
ജലനിധികന്യാ മാന്യാ പത്യവതാരാനുകൂലനിജചരിതാ ॥ ൧൪൫ ॥
നിത്യം സ്മരാമി ദേവീം നമതാം സര്വാര്ഥദായിനീം കമലാമ് ।
യാമാഹുര്ഭവനിഗലധ്വംസനദീക്ഷാം ച incomplete ॥ ൧൪൬ ॥=൨൦
സകലജഗദഘനിവാരണസംകല്പാം മധുജിതോ ദയിതാമ് ।
ജീവാതുമേവ കലയേ മോക്ഷാര്ഥിജനസ്യ ഭൂമിസുതാമ് ॥ ൧൪൭ ॥
മന്ദാനാമപി ദയയാ തമോനിരാസം വിതന്വന്തീ ।
സര്വത്ര ഭാതി കമലാ തനുരിവ വിഷ്ണോര്നിരസ്താഘാ ॥ ൧൪൮ ॥
ബാലമരാലീഗത്യൈ സുരപുരകന്യാദിമഹിതകലഗീത്യൈ ।
വിരചിതനാനാനീത്യൈ ചേതോ മേ സ്പൃഹയതേ ബഹുലകീര്ത്യൈ ॥ ൧൪൯ ॥
അഭിലഷിതദാനകുശലാ വാഗ്ദേവീവന്ദിതാ ച സാ കമലാ ।
നിത്യം മാനസപദ്മേ സംചാരം കലയതേ മുഹുഃ കുതുകാത് ॥ ൧൫൦ ॥
മുരമഥനനയനപങ്കജവിലാസകലികാ സുരേശമുഖസേവ്യാ ।
ഭൂതമയീ സാവിത്രീ ഗയത്രീ സര്വദേവതാ ജയതി ॥ ൧൫൧ ॥
സാ ഹി പരാ വിദ്യാ മേ ലക്ഷ്മീരക്ഷോഭണീയകീര്തികലാ ।
ഹൃദ്യാം വിദ്യാം ദയാദദ്യ ശ്രേയഃപരംപരാസിദ്ധ്യൈ ॥ ൧൫൨ ॥
കാമജനനീ ഹി ലക്ഷ്മീഃ നാനാലീലാദിഭിര്നിജം നാഥമ് ।
മോഹയതി വിഷ്ണുമചിരാത് പ്രകൃതീനാം ക്ഷേമസിദ്ധ്യര്ഥമ് ॥ ൧൫൩ ॥
മനസിജസാമ്രാജ്യകലാനിദാനമാര്യാഭിവന്ദിതം കിമപി ।
ലക്ഷ്മീരൂപം തേജോ വിലസതി മമ മനസി വിഷ്ണുസംക്രാന്തമ് ॥ ൧൫൪ ॥
വിഷ്ണുമനോരഥപാത്രം സംതപ്തസ്വര്ണകാമ്യനിജഗാത്രമ് ।
ആശ്രിതജലനിധിഗോത്രം രക്ഷിതനതബാഹുജച്ഛാത്രമ് ॥ ൧൫൫ ॥
കവികുലജിഹ്വാലോലം മുരമര്ദനകലിതരമ്യബഹുലീലമ് ।
നിരസിതനതദുഷ്കാലം വന്ദേ തേജഃ സദാലിനുതശീലമ് ॥ ൧൫൬ ॥
ആദിമപുരുഷപുരന്ധ്രീമമ്ബാമമ്ഭോജലോചനാം വന്ദേ ।
യാം നത്വാ ഗതതാപാസ്ത്യക്ത്വാ ദേഹം വിശന്തി പരമപദമ് ॥ ൧൫൭ ॥
ലക്ഷ്മ്യാ ഹരിരപി ഭാതി പ്രകൃതിക്ഷേമായ ദീക്ഷിതായാസൌ ।
മമ ലോചനയോഃ പുരതോ ലസതു ഗഭീരം ക്രിയാസിദ്ധ്യൈ ॥ ൧൫൮ ॥
ജനനി കദാ വാ നേഷ്യാമ്യഹമാരാദര്ചിതത്വദീയപദഃ ।
നിമിഷമിവ ഹന്ത ദിവസന് ദൃഷ്ട്വാ ത്വാമാദരേണ കല്യാണീമ് ॥ ൧൫൯ ॥
സംപൂര്ണയൌവനോജ്ജ്വലദേഹാം യാം വീക്ഷ്യ ശൌരിരപി ।
കുസുമശരവിദ്ധചേതാഃ കിംകരഭാവം സ്വയം പ്രാപ്തഃ ॥ ൧൬൦ ॥
അനുനയശീലസ്തദനു പ്രണയക്രോധാദിനാ ഭീതഃ ।
ആദിമപുരുഷഃ സോഽയം സാ ലക്ഷ്മീര്ന ശ്രിയൈ ഭവതു ॥ ൧൬൧ ॥
മണികുണ്ഡലലസിതാസ്യം കൃപാകരം കിമപി കുങ്കുമച്ഛായമ് ।
ഹരിണാ കൃതസംചാരം തേജോ മേ ഭാതു സര്വദാ സിദ്ധ്യൈ ॥ ൧൬൨ ॥
സാമ്രാജ്യമങ്ഗലശ്രീഃ ശ്രീരേഷാ പുഷ്കരാക്ഷസ്യ ।
ഗന്ധര്വകന്യകാദ്യൈര്ഗങ്ഗാതീരേഷു ഗീതകീര്തിര്ഹി ॥ ൧൬൩ ॥
കവിതാഭാഗ്യവിധാത്രീ പരിമലസംക്രാന്തമധുപഗണകേശാ ।
മമ നയനയോഃ കദാ വാ സാ ദേവീ കലിതസംനിധാനകലാ ॥ ൧൬൪ ॥
കീര്തിഃ സ്വയം വൃണീതേ വാഗ്ദേവീ ചാപി വിജയലക്ഷ്മീശ്ച ।
തം നരമചിരാല്ലോകേ യോ ലക്ഷ്മീപാദഭക്തസ്തു ॥ ൧൬൫ ॥
സന്മിത്രം പാണ്ഡിത്യം സദ്ദാരാഃ സത്സുതാദ്യാശ്ച ।
ജായന്തേ തസ്യ ഭുവി ശ്രീഭക്തോ യശ്ച നിര്ദിഷ്ടഃ ॥ ൧൬൬ ॥
പരമാചാര്യൈര്വിനുതാം താമമ്ബാമാദരാന്നൌമി ।
പരമൈശ്വര്യം വിഷ്ണോരപി യാ വേദേഷു നിര്ദിഷ്ടാ ॥ ൧൬൭ ॥
കവികുലസൂക്തിശ്രേണീശ്രവണാനന്ദോല്ലസദ്വതംസസുമാ ।
സാ ദേവീ മമ ഹൃദയേ കൃതസാംനിധ്യാ വിരാജതേ പരമാ ॥ ൧൬൮ ॥
താപാര്താസ്തു തടാകം യഥാ ഭജന്തേ രമാം ദേവീമ് ।
സംസൃതിതപ്താഃ സര്വേ യാന്തി ഹി ശരണം ശരണ്യാം താമ് ॥ ൧൬൯ ॥
സര്വജ്ഞത്വം ശ്ലാധ്യം ധരാധിപത്യം രമേ ദേവി ।
യദ്യത് പ്രാര്ഥ്യം ദയയാ തദ് ദിശ മോക്ഷം ച മേ ജനനി ॥ ൧൭൦ ॥
വിദ്യുതമചഞ്ചലാം ത്വാം കൃഷ്ണേ മേഘേ പയോധിവരകന്യേ ।
നിത്യമവൈമി ശ്രേയഃസിധ്യ മാതഃ പ്രസന്നേ നഃ ॥ ൧൭൧ ॥
ത്വാമമ്ബ സംതതരുചിം കൃഷ്ണോ മേഘഃ സമാസാദ്യ ।
സദ്വര്ത്മനി വര്ഷതി കില കാങ്ക്ഷാധികമാദരേണ വാര്ധിസുതേ ॥ ൧൭൨ ॥
അമ്ബ ത്വമേവ കാലേ മുകുന്ദമപി ദര്ശയന്തീഹ ।
ശ്രേയഃസിദ്ധ്യൈ നമതാം ഭാസി ഹൃദി ശ്രുതിശിരഃസു സല്ലോകേ ॥ ൧൭൩ ॥
വിനമദമരേശസുദതീകചസുമമകരന്ദധാരയാ സ്നിഗ്ധമ് ।
തവ പാദപദ്മമേതത് കദാ നു മമ മൂര്ധ്നി ഭൂഷണം ജനനി ॥ ൧൭൪ ॥
അപവര്ഗസൌഖ്യദേ തേ ദയാപ്രസാരഃ കഥം വര്ണ്യഃ ।
യാമവലമ്ബ്യ ഹി യഷ്ടിം ന പതതി സംസാരപങ്കിലേ മാര്ഗേ ॥ ൧൭൫ ॥
സൂക്ഷ്മാത് സൂക്ഷ്മതരം തേ രൂപം പശ്യന്തി യോഗിനോ ഹൃദയേ ।
താം ത്വാമഹം കദാ വാ ദ്രക്ഷ്യേഽലംകാരമണ്ഡിതാം മാതഃ ॥ ൧൭൬ ॥
ചിരതരതപസാ ക്ലിഷ്ടേ യോഗിഹൃദി സ്ഥാനഭാഗ് രമാ ദേവീ ।
ദര്ശനമചിരാദ് ദയയാ ദദാതി യോഗാദിഹീനാനാമ് ॥ ൧൭൭ ॥
തീരം സംസൃതിജലധേഃ പൂരം കമലാക്ഷലോചനപ്രീതേഃ ।
സാരം നിഗമാന്താനാം ദൂരം ദുര്ജനതതേര്ഹി തത്തേജഃ ॥ ൧൭൮ ॥
ലക്ഷ്മീരൂപം തേജോ മമാവിരസ്തു ശ്രിയൈ നിത്യമ് ।
യന്നിത്യധര്മദാരാന് വിഷ്ണോരമിതൌജസഃ പ്രാഹുഃ ॥ ൧൭൯ ॥
ജലധിസുതേ ത്വം ജനനീ സ വാസുദേവഃ പിതാ ച നഃ കഥിതഃ ।
ശരണം യുവാം പ്രപന്നാ നാതോ ദുര്ഗതിപരിസ്ഫൂര്തിഃ ॥ ൧൮൦ ॥
ഹരിനീലരത്നഭാസാ പ്രകശിതാത്മാ സമുദ്രവരകന്യാ ।
മങ്ഗലമാതനുതേയം കടാക്ഷകലികാപ്രസാരൈസ്തു ॥ ൧൮൧ ॥
മച്ചിത്തമത്തവാരണബന്ധനമധുനാ ത്വദീയപാദയുഗേ ।
കലയാമി രമേ മാതര്മാം രക്ഷ ക്ഷിപ്രമേവ സംസൃതിതഃ ॥ ൧൮൨ ॥
മോചയ സംസൃതിബന്ധം കടാക്ഷകലികാങ്കുരൈ രമേ മാതഃ ।
നാതഃ പരമര്ഥ്യമിഹ ക്ഷമാതലേ ത്വം ദയാമൂര്തിഃ ॥ ൧൮൩ ॥
മഞ്ജുലകവിതാസംതതിബീജാങ്കുരദായിസാരസാലോകാ ।
ജനനി തവാപാങ്ഗശ്രീഃ ജയതി ജഗത്ത്രാണകലിതദീക്ഷേയമ് ॥ ൧൮൪ ॥
അമ്ബ തവാപാങ്ഗശ്രീരപാങ്ഗകേലീശതാനി ജനയന്തീ ।
മുരഹന്തുര്ഹൃദി ജയതി വ്രീഡാമദമോഹകാമസാരകരീ ॥ ൧൮൫ ॥
ബദ്ധമപി ചിത്തമേതദ് യമനിയമാദ്യൈഃ പരിഷ്കാരൈഃ ।
ധാവതി ബലാദ് രമേ തവ പാദാബ്ജം യാമി ശരണമഹമ് ॥ ൧൮൬ ॥
മത്തഗജമാന്യഗമനാ മധുരാലാപാ ച മാന്യചരിതാ സാ ।
മന്ദസ്മേരമുഖാബ്ജാ കമലാ മേ ഹൃദയസാരസേ ലസതു ॥ ൧൮൭ ॥
ശാസ്ത്രസ്മരണവിഹീനം പാപിനമേനം ജനം രമാ ദേവീ ।
ദയയാ രക്ഷതി കാലേ തസ്യാസ്തേന പ്രഥാ മഹതീ ॥ ൧൮൮ ॥
മുഖവിജിതചന്ദ്രമണ്ഡലമിദമമ്ഭോരുഹവിലോചനം തേജഃ ।
ധ്യാനേ ജപേ ച സുദൃശാം ചകാസ്തി ഹൃദയേ കവീശ്വറാണാം ച ॥ ൧൮൯ ॥
അമ്ബ വിവേകവിദൂരം ജനമേനം ശിശിരലോചനപ്രസരൈഃ ।
ശിശിരയ കൃപയാ ദേവി ത്വമേവ മാതാ ഹി ലോകസ്യ ॥ ൧൯൦ ॥
കോപദുപേക്ഷസേ യദി മാതര്മേ രക്ഷകഃ കഃ സ്യാത് ।
മയി ദീനേ കോ ലാഭസ്തവ തു ദയായാഃ പ്രസാരിണ്യാഃ ॥ ൧൯൧ ॥
ഭവചണ്ഡകിരണതപ്തഃ ശ്രാന്തോഽഹം ജ്ഞാനവാരിദൂരസ്ഥഃ ।
ശിശിരാമങ്ഘ്രിച്ഛായാം തവ മാതര്യാമി ശരണമാരാത്തു ॥ ൧൯൨ ॥
മാതരശോകോല്ലാസം പ്രകടയ തവ കോമലകടാക്ഷൈഃ ।
യൈര്ദീനാ നരപതയഃ കലിതാ വാരണശതാവൃതേ ഗേഹേ ॥ ൧൯൩ ॥
ജയതി രമേ തവ മഹതീ കൃപാഝരീ സര്വസംമാന്യാ ।
ക്ഷേമംകരീ യദേഷാ പ്രതികല്പം സര്വജഗതാം ച ॥ ൧൯൪ ॥
അജ്ഞാനകൂപകുഹരേ പതിതം മാം പാഹി കമലേ ത്വമ് ।
നഗരേ വാ ഗ്രാമേ വാ വനമധ്യേ ദിക്ഷു രക്ഷിണീ ത്വമസി ॥ ൧൯൫ ॥
തവ ചരണൌ ശരണമിതി ബ്രുവന്നഹം മാതരബ്ധിതനയേ ത്വമ് ।
ഹരിണാ സഹിതാ ദയയാ പ്രാഹ്യവിലമ്ബേന ദീനം മാമ് ॥ ൧൯൬ ॥
പരിസരനതവിബുധാലീകിരീടമണികാന്തിവല്ലരീവിസരൈഃ ।
കൃതനീരാജനവിധി തേ മമ തു ശിരോഭൂഷണം ഹി പദയുഗലമ് ॥ ൧൯൭ ॥
മമ ഹൃദയപങ്കജവനീവികാസഹേതൌ ദിനാധിപായേതാമ് ।
തവ തു കടാക്ഷപ്രസരഃ ദീപായേതാം തമോനിരാകരണേ ॥ ൧൯൮ ॥
യാവച്ഛരണം യാതി ക്ഷിതിതനയേ ത്വാം ഹി ജന്തുരിഹ മൂഢഃ ।
താവത് തസ്യ തു രസനാങ്ഗണേ തു വാണീ സമാകലിതനൃത്താ ॥ ൧൯൯ ॥
പങ്കജനിലയേ താവകചരണം ശരണം സമാകലയേ ।
തേന ഹി സര്വകൃതാനാം ഭവിഷ്യതാം ഹാനിരേവ ദുരിതാനാമ് ॥ ൨൦൦ ॥
ശ്രുത്യന്തസേവിതം തേ ചരണസരോജം പ്രണമ്യ കില ജന്തുഃ ।
ഛത്രോല്ലസിതശിരാഃ സന് വനീപകാന് ദാനവാരിണാ സിഞ്ചന് ॥ ൨൦൧ ॥
വിഷ്വക്സേനമുഖാദ്യൈഃ സേവിതമമ്ബ ത്വദീയപാദയുഗമ് ।
അവതംസയന്തി സന്തഃ കലിതാപപ്രശമനായാസ്തു ॥ ൨൦൨ ॥
ദുഗ്ധോദധിതനയേ ത്വാം ദിശാഗജേന്ദ്രാഃ സുവര്ണഘടതോയൈഃ ।
മണിമണ്ടപമധ്യതലേ സമഭ്യഷിഞ്ചന് ഹരിപ്രീത്യൈ ॥ ൨൦൩ ॥
ദിഗ്ഗജപുഷ്പകരകുമ്ഭൈരഭിഷിക്താം ത്വാം ഹരിഃ പ്രീത്യാ ।
ഉദവഹദാരാന്മുനിഗണമധ്യേ സര്വശ്രിയോ മൂലമ് ॥ ൨൦൪ ॥
ജാതപരാക്രമകലികാ ദിശി ദിശി കിംനരസുഗീതനിജയശസഃ ।
ധന്യാ ഭാന്തി ഹി മനുജാഃ യദ്വീക്ഷാലവവിശേഷതഃ കാലേ ॥ ൨൦൫ ॥
നമദമരീകചഭരസുമമരന്ദധാരാഭിഷിക്തം തേ ।
പദകമലയുഗലമേതച്ഛ്രേയഃസ്ഫൂര്ത്യൈ സദാ ഭവതു ॥ ൨൦൬ ॥
രാഗദ്വേഷാദിഹതം മാമവ കമലേ ഹരേഃ കാന്തേ ।
ദര്ശയ ദയയാ കാലേ ഹ്യപവര്ഗസ്ഥാനമാര്ഗം ച ॥ ൨൦൭ ॥
ന ഹി ജാനേ വര്ണയിതും പരമേ സ്ഥനേ ത്വദീയവിഭവമഹമ് ।
മുനയശ്ച സുരാ വേദാ യതോ നിവൃത്താഃ ക്ഷമാതനയേ ॥ ൨൦൮ ॥
മനുജാഃ കടാക്ഷിതാഃ കില തഥാമ്ബയാ മേദിനീപുത്ര്യാ ।
സത്സുതകലത്രസഹിതാഃ സുരഭിം കാലേന നിര്വിശാന്തി മുദാ ॥ ൨൦൯ ॥
ജലധീശകന്യകാ സാ ലസതു പുരോഽസ്മാകമാദരകൃതശ്രീഃ ।
യത്പ്രണമനാജ്ജനാനാം കവിതോന്മേഷഃ സദീഡിതേ ഭാതി ॥ ൨൧൦ ॥
ദൂരികരോതു ദുരിതം ത്വദ്ഭക്തിര്മാമകം കമലേ ।
അഹമപി സുരേശസേവ്യേ തവ സദസി വിശാമി കീര്തിഗാനപരഃ ॥ ൨൧൧ ॥
പരമജ്ഞാനവിധാത്രീ തവ പാദപയോജഭക്തിരസ്മാകമ് ।
കിം വാശാസ്യമതോഽന്യത് സമുദ്രതനയേ ഹരേര്ജായേ ॥ ൨൧൨ ॥
അമ്ബ കദാ വാ ലപ്സ്യേ മദീയപാപാപനോദായ ।
തവ പാദകമലസേവാമബ്ജഭവാദ്യൈസ്തു സംപ്രാര്ഥ്യാമ് ॥ ൨൧൩ ॥
മന്ദാനാമപി മഞ്ജുലകവിത്വരസദായിനീ ജനനീ ।
കാപി കരുണാമയീ സാ ലസതു പുരസ്താത് സദാസ്മാകമ് ॥ ൨൧൪ ॥
സകലകവിലോകവിനുതേ കമലേ കമലാക്ഷി വല്ലഭേ വിഷ്ണോഃ ।
ത്വന്നാമാനി ഹി കലയേ വനേ ജലേ ശത്രുപീഡായാമ് ॥ ൨൧൫ ॥
ദിവി വാ ഭുവി ദിക്ഷു ജലേ വഹ്നൌ വാ സര്വതഃ കമലേ ।
ജന്തൂനാം കില രക്ഷാ ത്വദധീനാ കീര്ത്യതേ വിബുധൈഃ ॥ ൨൧൬ ॥
കുശലവിധയേ തദസ്തു ത്രിവിക്രമാസേവ്യരമ്യനിജകേലി ।
കബലിതപദനതദൈന്യം തരുണാമ്ബുജലോചനം തേജഃ ॥ ൨൧൭ ॥
ജനനീ സുവര്ണവൃഷ്ടിപ്രദായിനീ ഭാതി വിഷ്ണുവക്ഷഃസ്ഥാ ।
കമലാ കലിതക്ഷേമാ പ്രകൃതീനാം ശീതലാപാങ്ഗൈഃ ॥ ൨൧൮ ॥
ജഗതാമാദിമജനനീ ലസതി കവേരാത്മജാപുലിനേ ।
ക്ഷേത്രേഷൂത്തമജുഷ്ടേഷ്വയോനിജാ ലോകരക്ഷായൈ ॥ ൨൧൯ ॥
കുചശോഭാജിതവിഷ്ണുഃ കുങ്കുമപങ്കാങ്കിതാ കമലാ ।
കാഞ്ച്യാം രാജതി കാഞ്ചീമണിഗണനീരാജിതാങ്ഘ്രിയുഗാ ॥ ൨൨൦ ॥
മന്ദാരകുസുമമദഹരമന്ദസ്മിതമധുരവദനപങ്കരുഹാ ।
ഹൃദ്യതമനിത്യയൌവനമണ്ഡിതഗാത്രീ വിരാജതേ കമലാ ॥ ൨൨൧ ॥
കംസരിപുഗേഹിനീ സാ ഹംസഗതിര്ഹംസമാന്യനിജചരിതാ ।
സംസാരതാപഹാനിം കലയതു കാലേ രമാസ്മാകമ് ॥ ൨൨൨ ॥
മനസിജജനനീ ജനനീ ചാസ്മാകമിഹാദരാത് കാലേ ।
ശീതലലോലാപാങ്ഗൈസ്തരങ്ഗയതി ശ്രേയസാം സരിണമ് ॥ ൨൨൩ ॥
തവ മന്ദഹാസകലികാം ഭജേ ഭുജങ്ഗേ ശയാനം തമ് ।
യാ കലയതി ഗതകോപം ബാലാനാം നഃ കൃതാപരാധാനാമ് ॥ ൨൨൪ ॥
സാ സാധയേദഭീഷ്ടം കമലാ ശ്രീര്വിഷ്ണുവക്ഷഃസ്ഥാ ।
യസ്യാഃ പദവിന്യാസഃ ശ്രുതിമൌലിഷു തന്യതേ മഹാലക്ഷ്മ്യാഃ ॥ ൨൨൫ ॥
ശാന്തിരസനിത്യശേവധിമമ്ബാം സേവേ മനോരഥാവാപ്ത്യൈ ।
യാമാരാധ്യ സുരേശാഃ സ്വപദം പ്രാപുര്ഹി താദൃക്ഷമ് ॥ ൨൨൬ ॥
ധാതുരപി വേദവചസാം ദൂരേ യത്സ്ഥാനമാമനന്തി ബുധാഃ ।
സാസ്തു മുദേ ശ്രീരേഷാ മുരമര്ദനസത്കലത്രമമിതൌജഃ ॥ ൨൨൭ ॥
ഭവദുഃഖരാശിജലധേര്ഹഠാത് തരിത്രീം പരം വിദ്മഃ ।
താമമ്ബാം കമലസ്ഥാം മുരാരിവക്ഷോമണിപ്രദീപാം ച ॥ ൨൨൮ ॥
മുനിസാര്വഭൌമവര്ണിതമഹാചരിത്രം ഹരേഃ കലത്രം തത് ।
പഥി മങ്ഗലായ ഭവതു പ്രസ്ഥാനജുഷാം കൃപാധാരമ് ॥ ൨൨൯ ॥
ഖണ്ഡിതവൈരിഗണേയം മണ്ഡിതഭക്താ സുതാദ്യൈശ്ച ।
ഭാസുരകീര്തിര്ജയതി ക്ഷോണീസുരവന്ദ്യചരണാബ്ജാ ॥ ൨൩൦ ॥
നതപാലിനി മാം പാഹി ത്രിജഗദ്വന്ദ്യേ നിധേഹി മയി ദയയാ ।
താവകകടാക്ഷലഹരീഃ ശക്തിമയേ സകലസിദ്ധീനാമ് ॥ ൨൩൧ ॥
ഭവസാഗരം തിതീര്ഷുസ്തവ ചരണാബ്ജം മഹാസേയുമ് ।
മാതഃ കദാ നു ലപ്സ്യേ ഘനതാപോര്മ്യാദിപീഡിതോ ദീനഃ ॥ ൨൩൨ ॥
കവിവാഗ്വാസന്തീനാം വസന്തലക്ഷ്മീര്മുരാരിദയിതാ നഃ ।
പരമാം മുദം വിധത്തേ കാലേ കാലേ മഹാഭൂത്യൈ ॥ ൨൩൩ ॥
സുരഹരപരതന്ത്രം തദ് ഗതതന്ദ്രം വസ്തു നിസ്തുലമുപാസേ ।
തേനൈവാഹം ധന്യോ മദ്വംശ്യാ നിരസിതാത്മതാപഭരാഃ ॥ ൨൩൪ ॥
തൃഷ്ണാം ശമയതി ദേവീ രാഘവദയിതാ നതാലിസുരവല്ലീ ।
ഇട്യാര്യവചോ ധൈര്യം ജനയതി കാലേ ധരാപുത്രി ॥ ൨൩൫ ॥
രഘുപതിദയിതേ മാതഃ കാകാസുരരക്ഷണാദിനാ ലോകേ ।
താവകകരുണാമഹിമാ പ്രഥിതഃ കില ഭൂതിദായീ നഃ ॥ ൨൩൬ ॥
പ്രചുരതദുരിതപാലീസമാവൃതാനാം കലൌ ഹി തപ്താനാമ് ।
താവകദയാ ഹി മാതഃ ശരണം വരമിതി സതാം ഗണഃ സ്തൌതി ॥ ൨൩൭ ॥
അത്യന്തശീതലാം താം കടാക്ഷധാടീമുപാസേഽഹമ് ।
തേന മമ ത്രിദശാനാം ന കോഽപി ഭേദോ ധരാതനയേ ॥ ൨൩൮ ॥
യൈഃ സേവാ സംകലിതാ തവ പാദാബ്ജേ ധരാതനയേ ।
തേഷാമജ്ഞാനഝരീ യാതി ഹി വിലയം ക്ഷണേനൈവ ॥ ൨൩൯ ॥
ജ്ഞാനാരവിന്ദവിലസനമചിരാദസ്യ സ്തുതൌ ഹി കവിവര്യാഃ ।
സംപദ് ദിവ്യാ ച തഥാ വിബുധാവലിമാനനീയാത്ര ॥ ൨൪൦ ॥
മാതസ്തവ പാദാബ്ജം യസ്യ ലലാടേ കൃതോരുനിജകാന്തി ।
തത്പാദപദ്മമചിരാദ് വിമാനഗാ ദേവതാ വഹതി ॥ ൨൪൧ ॥
ആജ്ഞാവശേന ദേവ്യാ ലസന്തി ദിവി ദേവതാമാന്യാഃ ।
ഇന്ദ്രാദ്യാഃ സ ച ധാതാ ദിക്പാലാശ്ചാപി ഗന്ധര്വാഃ ॥ ൨൪൨ ॥
കൈവല്യാനന്ദകലാദാത്രീം കമലാമഹര്നിശം നൌമി ।
തേനൈവ ജന്മ സഫലം തീര്ഥാദിനിഷേവണാദ്യച്ച ॥ ൨൪൩ ॥
യച്ച ഹരിപാദപങ്കേരുഹപരിചരണാദിനാ ലോകേ ।
തത് സര്വമാശു ഘടയതി സഹസാ മന്ദസ്യ മേ മാതാ ॥ ൨൪൪ ॥
നാനാശ്രുത്യന്തകലാപരിമലപരിവാഹവാസിതം മാതഃ ।
തവ ചരണകമലയുഗലം മമാവതംസഃ ക്ഷണം ഭാതു ॥ ൨൪൫ ॥
നതദേവനഗരനാരീധമ്മില്ലലസത്സുമാലികൃതനാദാഃ ।
പ്രാതര്മുരജവിലാസം കലയന്തി ഭൃശം തവാഗ്രതോ ഭൃങ്ഗാഃ ॥ ൨൪൬ ॥
പാപപ്രശമനദീക്ഷാകലാധുരീണാഃ പയോജനിലയേ തേ ।
മാം ച പവിത്രീകുര്യുഃ പാദപരാഗാഃ കൃപാവശതഃ ॥ ൨൪൭ ॥
ഹന്ത കദാ വാ ലപ്സ്യേ തവാങ്ഘ്രിശുശ്രൂഷണാസക്തിമ് ।
സഹജാനന്ദം തേന ഹി പദം ക്രമാത് പ്രാപ്യമാദിഷ്ടമ് ॥ ൨൪൮ ॥
നലിനീവിലാസരുചിരാം മയി ദേവി ത്വത്കടാക്ഷലഹരീം ഹി ।
കാലേ നിധേഹി ദയയാ സ്ഫീതാ തേ കീര്തിരാദൃതാ സര്വൈഃ ॥ ൨൪൯ ॥
വിനിഹതദുരിതസ്തോമാ കാപി മദീയേ ഹൃദമ്ഭോജേ ।
ലസതു പരദേവതാഖ്യാ മാധവനേത്രപ്രിയംകരീ കലികാ ॥ ൨൫൦ ॥
പഞ്ചായുധഗുരുമന്ത്രം കലനൂപുരനിനദമാദരാത് കമലേ ।
കലയതി രമാധവഗൃഹം യാതും കാലേ ത്വയി പ്രവൃത്തായാമ് ॥ ൨൫൧ ॥
നതനാകിലോകവനിതാലലാടസിന്ദൂരശോണകാന്തിഭൃതോഃ ।
കലയേ നമാംസി കമലേ തവ പാദപയോജയോര്നിത്യമ് ॥ ൨൫൨ ॥
കമലസുഷുമാനിവാസസ്ഥാനകടാക്ഷം ചിരായ കൃതരക്ഷമ് ।
രക്ഷോഗണഭീതികരം തേജോ ഭാതി പ്രകാമമിഹ മനസി ॥ ൨൫൩ ॥
ജ്യോത്സ്നേവ ശിശിരപാതാ കടാക്ഷധാടീ ത്വദീയാ ഹി ।
അമ്ബ മുകുന്ദ ( ||. incomplete ||. ) കുരുതേ ॥ ൨൫൪ ॥
താപഹരരസവിവര്ഷംഅധൃതകുതുകാ കാപി നീലനലിനരുചിഃ ।
കാദമ്ബിനീ പുരസ്തദാസ്താം നഃ സംതതം ജനനീ ॥ ൨൫൫ ॥
സഫലയതു നേത്രയുഗലം മാമകമേതത് ത്വദീയരൂപമഹോ ।
യത് കമലനേത്രസുചരിതപചേലിമം വൈദികീ ശ്രുതിര്ബ്രൂതേ ॥ ൨൫൬ ॥
മാധവനേത്രപയോജാമൃതലഹരീ ഭാതി താവകം രൂപമ് ।
അമ്ബ യുവാമാദ്യൌ നഃ പിതരൌ വനേ സുഖാവാപ്ത്യൈ ॥ ൨൫൭ ॥
സരസകവിതാദിസംപദ്വിലസനമാരാദുശാന്തി കവിവര്യാഃ ।
യത്പ്രീണനേന സാ മേ ഭവതു വിഭൂത്യൈ ഹി സാ കമലാ ॥ ൨൫൮ ॥
മനസിജജയാദികാര്യം യദപാങ്ഗലവാന്നൃണാം ഭവതി ।
തത്പദമാനന്ദകലം സേവ്യം ച ഭജേ രമാം ജനനീമ് ॥ ൨൫൯ ॥
ശിഥിലതതമഃസമൂഹാ ഭക്താനാം സാ രമാ ദേവീ ।
ജനയതി ധൈര്യം ച ഹരേഃ കാലേ യാ സര്വദാ സേവ്യാ ॥ ൨൬൦ ॥
യദ്ഭ്രൂവിലാസവശതഃ ശക്തഃ സൃഷ്ട്യാദികം കര്തുമ് ।
ഹരിരപി ലോകേ ഖ്യാതഃ സാ നഃ ശരണം ജഗന്മാതാ ॥ ൨൬൧ ॥
നയനയുഗലീം കദാ മേ സിഞ്ചതി ഏവ്യാഃ പരം രൂപമ് ।
യദ്ഭജനാന്ന ഹി ലോകേ ദൃഷ്ടം ശ്ലാധ്യം പരം വസ്തു ॥ ൨൬൨ ॥
സുചരിതഫലം ത്വദീയം രൂപം നഃ കലിതഭക്തീനാമ് ।
അത ഏവ മാമകാനാം പാപാനാം വിരതിരൂര്ജിതാ കമലേ ॥ ൨൬൩ ॥
സുകൃതിവിഭവാദുപാസ്യാ കമലാ സാ സര്വകല്യാണാ ।
ഹരിവക്ഷസി കൃതവാസാ രക്ഷതി ലോകാനഹോരാത്രമ് ॥ ൨൬൪ ॥
സംവിദ്രൂപാ ഹി ഹരേഃ കുടുമ്ബിനീ ഭാതി ഭക്തഹൃദയേഷു ।
സര്വശ്രേയഃപ്രാപ്ത്യൈ യാം വിദുരാര്യാ രമാം കമലാമ് ॥ ൨൬൫ ॥
വിഷയലഹരീപ്രശാന്ത്യൈ കമലാപാദാമ്ബുജം നൌമി ।
പൂര്വം ശുകാദിസുധിയോ യദ്ധ്യാനാദ് ഗലിതശത്രുഭയാഃ ॥ ൨൬൬ ॥
ലലിതഗമനം ത്വദീയം കലനൂപുരനാദപൂരിതം മാതഃ ।
നൌമി പദാമ്ബുജയുഗലം ഭവതാപനിരാസനായാദ്യ ॥ ൨൬൭ ॥
വിരലീകരോതി താപം കമലായാ മന്ദഹാസഝരീ ।
യത്സേവനേഷു സമുദിതകൌതുകരസനിര്ഭരോ ഹരിര്ജയതി ॥ ൨൬൮ ॥
പ്രതിഫലതു സംതതം മേ പുരതോ മാതസ്ത്വദീയരൂപമിദമ് ।
യദ്ദര്ശനരസഭൂമ്നാ ഹരിരപി നാനാസ്വരൂപഭാക് കാലേ ॥ ൨൬൯ ॥
അമ്ബ തവ ചരണസേവാം സംതതമഹമാദരാത് കലയേ ।
തേന മമ ജന്മ സഫലം ത്രിദശാനാമിവ മുനീന്ദ്രാണാമ് ॥ ൨൭൦ ॥
ദുര്വാരഗര്വദുര്മതിദുരര്ഥനിരസനകലാനിപുണാഃ ।
തവ ചരണസേവയൈവ ഹി കമലേ മാതര്ബുധാ ജഗതി ॥ ൨൭൧ ॥
ആനദമേതി മാതസ്തവ നാമോച്ചാരണേന സിന്ധുഭവേ ।
സംപ്രാപ്തത്വദ്രൂപം മമ മാനസമാത്തയോഗകലമ് ॥ ൨൭൨ ॥
തവ ദൃഷ്ടിപാതവിഭവാത് സര്വേ ലോകേ വിധൂതതാപഭരാഃ ।
യാന്തി മുദാ ത്രിദശൈഃ സഹ വിഭാനമാരുഹ്യ മാതരഹോ ॥ ൨൭൩ ॥
കോ വാ ന ശ്രയതി ബുധഃ ശ്രേയോഽര്ഥീ താമിമാം കമലാമ് ।
യാം പന്നഗാരിവാഹനസദ്ഗര്മിണീമര്ചയന്തി സുരനാഥാഃ ॥ ൨൭൪ ॥
താമരവിന്ദനിവാസാമമ്ബാം ശരണാര്ഥിനാം കലിതരക്ഷാമ് ।
ബഹുരൂപേഷ്വഘനിചയേഷ്വപി നിശ്ചിത്യാത്മനോ ധൈര്യമ് ॥ ൨൭൫ ॥
കരുണാപ്രവാഹഝര്യാ ഗതപങ്ക ഭൂതലം മാതഃ ।
സത്വാങ്കുരാദിലസിതം ജയതി പയോരാശികകന്യകേ കമലേ ॥ ൨൭൬ ॥
വിധിശിവവാസവമുഖ്യൈര്വന്ദ്യപദാബ്ജേ നമസ്തുഭ്യമ് ।
മാതര്വിഷ്ണോര്ദയിതേ സര്വജ്ഞത്വം ച മേ കലയ ॥ ൨൭൭ ॥
പരദേവതേ പ്രസീദ പ്രസീദ ഹരിവല്ലഭേ മാതഃ ।
ത്വാമാഹുഃ ശ്രുതയഃ കില കല്യാണഗുണാകരാം നിത്യാമ് ॥ ൨൭൮ ॥
ക്ഷന്തവ്യമമ്ബ മാമകമഘരാശിം ക്ഷപയ വീക്ഷണതഃ ।
സത്വോന്മേഷം ദേഹി പ്രിയേ ഹരേര്ദാസമപി കുരു മാമ് ॥ ൨൭൯ ॥
വാഞ്ഛിതസിദ്ധിര്ന സ്യാദ് യദി പാദാബ്ജേ കൃതപ്രണാമാനാമ് ।
ഹാനിസ്ത്വദീയയശസാമിതി കേചിദ്ധൈര്യവന്തശ്ച ॥ ൨൮൦ ॥
സദസദനുഗ്രഹദക്ഷാം ത്വാം മാതഃ സംതതം നൌമി ।
ഗ്രഹപീഡാ നൈവ ഭവേദ്യമപീഡാ ദൂരതഃ കാലേ ॥ ൨൮൧ ॥
വിദ്യാഃ കലാശ്ച കാലേ കൃപയാ കലയ പ്രസീദാശു ।
മാതസ്ത്വമേവ ജഗതാം സര്വേഷാം രക്ഷണം ത്വയാ ക്രിയതേ ॥ ൨൮൨ ॥
ഉഛേഷ്വപി നീചേഷു പ്രകാശതേ തുല്യമേവ തവ രൂപമ് ।
ഏതദ് ദൃഷ്ട്വാ ധൈര്യം ഘനാഗസോഽപ്യമ്ബ ജായതേ നനു മേ ॥ ൨൮൩ ॥
കാ ശങ്കാ തവ വൈഭവജാലം വക്തും ദിഗന്തരേ മാതഃ ।
വരഹാരാലംകാരാം സേവന്തേ ത്വാം ഹരിത്പതയഃ ॥ ൨൮൪ ॥
കമലായാശ്ച ഹരേരപി സംദൃഷ്യം ദിവ്യദാംപത്യമ് ।
താവേവ നഃ പതീ കില ജന്മാന്തരപുണ്യപരിപാകാത് ॥ ൨൮൫ ॥
സര്വാസാമുപനിഷദാം വിദ്യാനാം ത്വംപരം സ്ഥാനമ് ।
അല്പധിയോ വയമേതേ ത്വത്സ്തോത്രേ ഭോഃ കഥം ശക്താഃ ॥ ൨൮൬ ॥
സാഷ്ടാങ്ഗപ്രണതിരിയം പ്രകല്പിതാ മാതരദ്യ തവ ചരണേ ।
തേനാഹം ഹി കൃതാര്ഥഃ കിം പ്രാര്ഥ്യം വസ്ത്വതഃ കമലേ ॥ ൨൮൭ ॥
സ്തോത്രമിദംഹി മയാ തേ ചരണാമ്ഭോജേ സമര്പിതം ഭക്ത്യാ ।
തവ ച ഗുരോരപി വീക്ഷാ തത്ര നിദാനം പരം നാന്യത് ॥ ൨൮൮ ॥
ദേഹാന്തേ നനു മാതര്മോക്ഷം ത്രിദശൈഃ സമം ദേഹി ।
അഹമപി സാമ പഠന് സന് ത്വാം ച ഹരിം യാമി ശരണാര്ഥീ ॥ ൨൮൯ ॥
ശുകവാണീമിവ മാതര്നിരര്ഥകാം മദ്വചോഭങ്ഗീമ് ।
ആരാച്ഛൃണോഷി ദയയാ തദേവ ചോത്തമപദവ്യക്ത്യൈ ॥ ൨൯൦ ॥
വിദ്യാം കലാം വരിഷ്ഠാം അമ്ബ ത്വാം സംതതം വന്ദേ ।
യാ വ്യാകരോഷി കാലേ വിദ്വദ്ഭിര്വേദതത്ത്വാദി ॥ ൨൯൧ ॥
വൈദുഷ്യം വാണ്യാഃ സത്സംപജ്ഝര്യോ യദീയവീക്ഷണതഃ ।
സിധ്യന്ത്യപി ദേവാനാം സാ നഃ ശരണം രമാ ദേവീ ॥ ൨൯൨ ॥
വിപുലം ശ്രിയോ വിലാസം ശ്രദ്ധാം ഭക്ത്യാദികം ദേഹി ।
അമ്ബ പ്രസീദ കാലേ തവ പാദാബ്ജൈകസേവിനാമിഹ നഃ ॥ ൨൯൩ ॥
കേചിത് പ്രാഞ്ചഃ കമലാം പ്രാപ്യ ഹി ശരണം വിപത്കാലേ ।
ഝടിതി വിധൂനിതതാപാഃ സാ മേ ദേവീ പ്രസന്നാസ്തു ॥ ൨൯൪ ॥
മരകതകാന്തിമനോഹരമൂര്തിഃ സൈഷാ രമാ ദേവീ ।
പാതി സകലാനി കാലേ ജഗന്തി കരുണാവലോകാദ്യൈഃ ॥ ൨൯൫ ॥
ഭാഗീരഥീവ വാണീ തവ നുതിരൂപാ വിരാജതേ പരമാ ।
ഇഹ മാതര്യദ്ഭജനം സര്വേഷാം സര്വസംപദാം ഹേതുഃ ॥ ൨൯൬ ॥
കലശപയോദധിതനയേ ഹരിപ്രിയേ ലക്ഷ്മി മാതരമ്ബേതി ।
തവ നാമാനി ജപന് സന് ത്വദ്ദാസോഽഹം തു മുക്തയേ സിദ്ധഃ ॥ ൨൯൭ ॥
നിഖിലചരാചരരക്ഷാം വിതന്വതീ വിഷ്ണുവല്ലഭാ കമലാ ।
മമ കുലദൈവതമേഷാ ജയതി സദാരാധ്യമാന്യപാദകമലാ ॥ ൨൯൮ ॥
സര്വജന്നുതവിഭവേ സംതതമപി വാഞ്ഛിതപ്രദേ ദേവി ।
അമ്ബ ത്വമേവ ശരണം തേനാഹം പ്രാപ്തസര്വകാര്യാര്ഥഃ ॥ ൨൯൯ ॥
കമലേ കഥം നു വര്ണ്യസ്തവ മഹിമാ നിഗമമൌലിഗണവേദ്യഃ ।
ഇതി നിശ്ചിത്യ പദാബ്ജം തവ വന്ദേ മോക്ഷകാമോഽഹമ് ॥ ൩൦൦ ॥
ത്വാമമ്ബ ബാലിശോഽഹം ത്വചമത്കാരൈര്ഗിരാം ഗുമ്ഭൈഃ ।
അയഥായഥക്രമം ഹി സ്തുവന്നപി പ്രാപ്തജന്മസാഫല്യഃ ॥ ൩൦൧ ॥
ഇതി ശ്രീകമലാത്രിശതീ സമാപ്താ
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ത്oday
http://sanskritdocuments.org
ഗങ്ഗാധരമഖിവിരചിതാ ।
പരമാഭരണം വിഷ്ണോര്വക്ഷസി സാ സാഗരേന്ദ്രവരപുത്രീ ।
യാ മൂര്തിര്മതീ കാലേ ക്ഷമാ ജനാനാം കൃതാപരാധാനാമ് ॥ ൧ ॥
സാ നഃ ശ്രേയോ ദദ്യാത് കമലാ കമലാസനാദിജനനീം യാമ് ।
സംപ്രാപ്യ സഹചരീം ഹരിരവതി ജഗന്ത്യനാകുലം സതതമ് ॥ ൨ ॥
നിത്യശ്രേയോദാനേ ഖ്യാതാ യാ ഹരിഗൃഹസ്യ സര്വസ്വമ് ।
ശ്രുതിമൌലിസ്തുതവിഭവാ സാ ഭാതു പുരഃ സദാസ്മാകമ് ॥ ൩ ॥
വിഷ്ണുക്രീഡാലോലാ വിഖ്യാതാ ദീനരക്ഷണേ ലക്ഷ്മീഃ ।
ജനനീ നഃ സ്ഫുരതു സദാ തേന വയം കില കൃതാര്ഥാഃ സ്മഃ ॥ ൪ ॥
നിര്വാണാങ്കുരജനനീ കാലേ സാ സാര്വഭൌമപദദോഗ്ധ്രീ ।
നിരസതിമോഹസമൂഹാ മമ ദൈവതമാദൃതം ഗുരുഭിഃ ॥ ൫ ॥
വിഷ്ണോര്വക്ഷസി ലസിതാ ശീതമയൂഖസ്യ സോദരീ കമലാ ।
കമലായതനയനാ നഃ പാതു സദാ പാപരാശിഭ്യഃ ॥ ൬ ॥
കവിപരിഷദാ ച വേദൈഃ നിത്യം സ്തുതനിജമഹോദയാ കമലാ ।
മനസി മമ സംനിധത്താം ത്വമിതാനന്ദായ ലോകനാഥേന ॥ ൭ ॥
ദുഗ്ധോദധിതനയാ സാ ദുരിതനിഹന്ത്രീ കൃതപ്രണാമാനാമ് ।
ആനന്ദപദവിധാത്രീ പത്യാ സാകം പദേ പദേ ലോകേ ॥ ൮ ॥
മന്മഥജനനീ സാ മാമവതു സരോജാ(ക്ഷ)ഗേഹിനീ കമലാ ।
യാമാരാധ്യ ബുധേന്ദ്രാ വിശന്തി പരമം തു തത് പദം വിഷ്ണോഃ ॥ ൯ ॥
സത്സൂക്തികൃതിവിധാത്രീ നമതാമമ്ബാ ത്രിലോക്യാസ്തു ।
നിത്യപ്രസാദഭൂമ്നാ രക്ഷതി മാമാദരാത് കമലാ ॥ ൧൦ ॥
മമ സൂക്തിരഞ്ജലിപുടഃ പ്രണതിശ്ചാനേകസംഖ്യാകാ ।
കുതുകാത് ക്ഷീരോദസുതാമമിതാനന്ദായ ഗാഹതേ കമലാമ് ॥ ൧൧ ॥
യാ പാരമാര്ഥ്യസരണിഃ സാ കമലാ നിശ്ചിതാ വേദൈഃ ।
സൈഷാ ഹി ജഗന്മാതാ സംസൃതിതാപാപഹന്ത്രീ ച ॥ ൧൨ ॥
മന്ദസ്മിതമധുരാനനമമന്ദസംതോഷദായി ഭജതാം തത് ।
കമലാരൂപം തേജോ വിഭാതു നിത്യം മദീയഹൃത്കമലേ ॥ ൧൩ ॥
കാലേ ക്ഷപയതി കമലാ കടാക്ഷധാട്യാ ഹി മാമകം ദുരിതമ് ।
അത ഏവാശ്രിതരക്ഷണദീക്ഷേത്യേവം ജനോ വദതി ॥ ൧൪ ॥
നവനവഹര്മ്യവിധാത്രീ നാകികിരീടാര്ചിതാ ച സാ ദേവീ ।
ജ്യോതിര്മണ്ഡലലസിതാ മുനിഹൃദയാബ്ജാസനാ ച സദ്ഗതിദാ ॥ ൧൫ ॥
സംവീക്ഷ്യ ജലധിതനയാം ഭൂയോ ഭൂയഃ പ്രണമ്യ ഭക്തഗണഃ ।
നിരസിതദുരിതൌഘഃ സന് സ്തൌതി മുദാ മോക്ഷസിദ്ധയേ കമലാമ് ॥ ൧൬ ॥
രാകാനിശീവ ദേവ്യാം ദൃഷ്ടായാം ഭക്തഗണവാണീ ।
ഭജതേ ജലനിധിശൈലീം സാങ്ഗോപാങ്ഗം കൃതാനന്ദാ ॥ ൧൭ ॥
ദുര്ഗതിഭീത്യാ ഖിന്നഃ സോഽഹം ശരണം ഭജാമി താം കമലാമ് ।
ശരണാര്ഥിനാം ഹി രക്ഷാകൃദിതി ഖ്യാതാ ഹി യാ ലോകേ ॥ ൧൮ ॥
ന ഹി കലയതേ ഹൃദന്തേ മന്ദാരം കാമധേനും വാ ।
യഃ സേവതേ മുകുന്ദപ്രിയാം ശ്രിയം നിത്യഭാവേന ॥ ൧൯ ॥
കൈടഭമര്ദനമഹിഷീം മമാഞ്ജലിര്ഗാഹതാം കാലേ ।
ന ഹി നാഥനീയമത്ര ക്ഷമാതലേ സാ പ്രസന്നാസ്തു ॥ ൨൦ ॥
സംതാപപീഡിതം മാമവതു സദാ ശ്രീര്ഹരിപ്രിയാ മാതാ ।
രക്ഷിതവായസമുഖ്യാ കൃപാനിധിഃ പുണ്യകൃദ്ദൃശ്യാ ॥ ൨൧ ॥
ന ഹി കേവലം പ്രണാമൈഃ സ്തുത്യാ ഭക്ത്യാ സമാരാധ്യാ ।
സത്യേന ധര്മനിവഹൈര്ഭാവേന ച കമലഗേഹിനീ കമലാ ॥ ൨൨ ॥
കദാചിത്കവിലോകേഽപ്യക്ഷീണാനന്ദദായിനീ കമലാ ।
രക്ഷതു കടാക്ഷകലികാങ്കൂരൈര്ഭക്താനിഹാദരതഃ ॥ ൨൩ ॥
കലിപാപഗ്ലപിതാനാം മുരമര്ദനദിവ്യഗേഹിനീ ലക്ഷ്മീഃ ।
രാജതി ശരണം പരമം വശീകൃതേശാ ച വിബുധഗണസേവ്യാ ॥ ൨൪ ॥
നിത്യോല്ലസദുരുമാലാ വക്ഷസി കമലാ ഹരേര്ഭാതി ।
നിജതനുഭാസാ ദ്യോതിതകൌസ്തുഭമണിരമ്ബുധേസ്തനയാ ॥ ൨൫ ॥
മാതര്മങ്ഗലദായിന്യമരേന്ദ്രവധൂസമര്ചിതാങ്ഘ്രിയുഗേ ।
മാം പാഹ്യപായനിവഹാത് സംതതമകലക്ഷമാമൂര്തേ ॥ ൨൬ ॥
യദി കലിതാ ചോപേക്ഷാ നശ്യേത് കില താവകീ മഹതീ ।
കീര്തിരതോഽമ്ബ കടാക്ഷൈഃ പരിഷിഞ്ച മുദാ മുഹുഃ ശീതൈഃ ॥ ൨൭ ॥
ധനധാന്യസുതാദിരുചിഗ്രസ്തം മാം പാഹി കമലേ ത്വമ് ।
തേനോര്ജിതകീര്തിഃ സ്യാ മാതസ്ത്വം സര്വരക്ഷിണീ ഖ്യാതാ ॥ ൨൮ ॥
തവ പാദാമ്ബുജയുഗലധ്യാനം മാതര്മദീയമഘമാശു ।
കബലീകരോതി കാലേ തേനാഹം സിദ്ധസംകല്പഃ ॥ ൨൯ ॥
അഞ്ജലികലികാ ഹി കൃതാ യദി തസ്യൈ മുരനിഹന്തൃദയിതായൈ ।
രസനാഗ്രേ ഖേലനഭാക് തസ്യ തു പുംസോ ഗിരാം ദേവീ ॥ ൩൦ ॥
മാതസ്തവ മൂര്തിരിയം സുധാമയീ നിശ്ചിതാ നിപുണൈഃ ।
യത് തദ്ദര്ശനഭൂമ്നാ നിരസ്തതാപാ ബുധാ ഭവന്ത്യചിരാത് ॥ ൩൧ ॥
കലിതജഗത്ത്രയരക്ഷാഭരാണി മയി ദേവി സംവിധേഹി മുദാ ।
ത്വദ്വീക്ഷണാനി കമലേ തേനാഹം സിദ്ധസംകല്പഃ ॥ ൩൨ ॥
വരദേ മുരാരിദയിതേ ജയന്തി തേ വീക്ഷണാനി യാനി ദിവി ।
സംപ്രാപ്യ താനി മഘവാ വിജിതാരിര്ദേവസംഘവന്ദ്യശ്ച ॥ ൩൩ ॥
മോഹാന്ധകാരഭാസ്കരമമ്ബ കടാക്ഷം വിധേഹി മയി കമലേ ।
യേനാപ്തജ്ഞാനകലാഃ സ്തുവന്തി വിബുധാസ്ത്വദീയസദസി കലമ് ॥ ൩൪ ॥
കാമക്രോധാദിമഹാസത്ത്വനിരാസം കൃപാസാരാത് ।
കുരു മാതര്മമ സംസൃതിഭീതിം ച നിരാകുരു ത്വമേവാരാത് ॥ ൩൫ ॥
മൂഢാനാമപി ഹൃദ്യാം കവിതാം ദാതും യദീയപരിചര്യാ ।
പ്രഭവതി കാലേ സാ ഹി ശ്രീരമ്ബാ നഃ പ്രസന്നാസ്തു ॥ ൩൬ ॥
ദിവ്യക്ഷേത്രേഷു ബുധാ ദിനകരമധ്യേ ച വേദമൌലൌ ച ।
യത്സ്ഥാനമിതി വദന്തി ശ്രീരേഷാ ഭാതി സംശ്രിതഹരിര്ഹി ॥ ൩൭ ॥
നിജലീലാക്രാന്തഹരീ രക്ഷതി കമലാ കടാക്ഷധാട്യാ നഃ ।
ശരണാര്ഥിനശ്ച കാലേ വിഹഗോരഗപശുമുഖാനുര്വ്യാമ് ॥ ൩൮ ॥
സമരാങ്ഗണേഷു ജയദാ ത്രിദശാനാം മൌലിഭിര്മാന്യാ ।
ആപദി രക്ഷണദക്ഷാ സാ കമലാ നഃ പ്രസന്നാസ്തു ॥ ൩൯ ॥
നിത്യാനന്ദാസനഭാഡ് നവനിധിവന്ദ്യാ ച സാഗരേന്ദ്രസുതാ ।
വിലസതി മാധവവക്ഷസി പാലിതലോകത്രയാ ച ജനനീ നഃ ॥ ൪൦ ॥
മുനിനുതനിജപരിപാടീ വാഗ്ധാടീ ദാനലോലുപാ ഭജതാമ് ।
ശിക്ഷിതരിപുജനകോടീ വിലസതി ധൃതശാതകുമ്ഭമയശാടീ ॥ ൪൧ ॥
നിഖിലാഗമവേദ്യപദാ നിത്യം സദ്ഭിഃ സമാരാധ്യാ ।
സംസൃതിപാശനിഹന്ത്രീ യാ തസ്യൈ ചാഞ്ജലിഃ ക്രിയതേ ॥ ൪൨ ॥
ഭൂയാംസി നമാംസി മയാ ഭക്തേന കൃതാനി കമലജാങ്ഘ്രിയുഗേ ।
നിത്യം ലഗന്തു തേന ഹി സര്വാ രാജന്തി സംപദോ മാന്യാഃ ॥ ൪൩ ॥
നിത്യം നിര്മലരൂപേ ബരദേ വാരാശികന്യകേ മാതഃ ।
സദ്ഗണരക്ഷണദീക്ഷേ പാഹീതി വദന്തമാശു മാം പാഹി ॥ ൪൪ ॥
ഭുവനജനനി ത്വമാരാത് കൃതരക്ഷണസംതതിഃ ക്ഷമാമൂര്തേ ।
പ്രതിവസ്തു രമേ കലിതസ്വരൂപശക്ത്യാ ഹി രാജസേ ജഗതി ॥ ൪൫ ॥
ജയ ജയ കലശാബ്ധിസുതേ ജയ ജയ ഹരിവല്ലഭേ രമേ മാതഃ ।
പ്രാതരിതി വിബുധവര്യാഃ പഠന്തി നാമാനി തേ ഹി മേ ഗുരവഃ ॥ ൪൬ ॥
നേത്രരുചിവിജിതശാരദപദ്മേ പദ്മേ നമസ്തുഭ്യമ് ।
തേന വയം ഗതവിപദഃ സാ മുക്തിഃ കരഗതാ കലിതാ ॥ ൪൭ ॥
സതതം ബദ്ധാഞ്ജലിപുടമുപാസ്മഹേ തച്ഛുഭപ്രദം തേജഃ ।
യത് കമലോദരനിലയം കമലാക്ഷപ്രീതിവീചികാപൂരമ് ॥ ൪൮ ॥
സ്ഫുരതു മമ വചസി കമലേ ത്വദീയവൈഭവസുധാധാരാ ।
നിത്യം വ്യക്തിം പ്രാപ്താ ധുതനുതജനഖേദജാലകാ മഹതീ ॥ ൪൯ ॥
കമലേ തവ നുതിവിഷയേ ബുദ്ധിര്ജാതാ ഹി മേ സഹസാ ।
തേന മമ ഭാഗധേയം പരിണതമിത്യേവ നിത്യസംതുഷ്ടഃ ॥ ൫൦ ॥
കവിതാരസപരിമലിതം കരോതി വദനം നതാനാം യാ ।
സ്തോതും താം മേ ഹ്യാരാത് സാ ദേവീ സുപ്രസന്നാസ്തു ॥ ൫൧ ॥
ഹരിഗൃഹിണി താവകം നുതരൂപം യേ ഭുവി നിജേ ഹൃദമ്ഭോജേ ।
ധ്യായന്തി തേഷു വിബുധാ അപി കല്പകകുസുമമര്പയന്തി മുദാ ॥ ൫൨ ॥
നാനാവരദാനകലാലോലുപഹൃദയേ ഹൃദമ്ഭുജസ്ഥേ മാമ് ।
രക്ഷാപായാത് സഹസാ കുരു ഭക്തം ദോഷഹീനം ച ॥ ൫൩ ॥
നിജഘനകേശരുചാ ജിതനീലാമ്ബുധരേ ശശാങ്കസഹജന്മന് ।
പദ്മേ ത്വദീയരൂപം മനോഹരം ഭാതു മേ ഹൃദയേ ॥ ൫൪ ॥
ഘനകുങ്കുമലസിതാങ്ഗം മുക്താഹാരാദിഭൂഷിതം മധുരമ് ।
മന്ദസ്മിതമധുരാസ്യം സൂര്യേന്ദുവിലോചനം ച ബുധമാന്യമ് ॥ ൫൫ ॥
നിബിഡകുചകുമ്ഭയുഗലം നിജദൃഗ്ജിതഹരിണശാബകാക്ഷിയുഗമ് ।
ലീലാഗതിജിതകലഭം മധുവൈരിമനോഹരം ച സുരമാന്യമ് ॥ ൫൬ ॥
ദിശി ദിശി വിസ്തൃതസംപദ്വിലാസമധുരം ച കുന്ദദന്താലി ।
മദനജനകം ച വിഷ്ണോഃ സര്വസ്വം സര്വദാനചണമ് ॥ ൫൭ ॥
കുലദൈവതമസ്മാകം സംവിദ്രൂപം നതാര്തിഹരരൂപമ് ।
നാനാദുര്ഗതിഹരണക്ഷമമമരീസേവിതം സകലമ് ॥ ൫൮ ॥
പഞ്ചദശവര്ണമാനം പയോജവക്ത്രം പിതാമഹസമര്ച്യമ് ।
ജഗദവനജാഗരൂകം ഹരിഹരസംമാന്യവൈഭവം കിമപി ॥ ൫൯ ॥
കരുണാപൂരിതനയനം പരമാനന്ദപ്രദം ച പരിശുദ്ധമ് ।
ആഗമഗണസംവേദ്യം കോശഗൃഹം സര്വസംപദാം നിത്യമ് ॥ ൬൦ ॥
മാതസ്താവകപാദാമ്ബുജയുഗലം സംതതം സ്ഫുരതു ।
തേനാഹം തവ രൂപം ദ്രക്ഷ്യാമ്യാനന്ദസിദ്ധയേ സകലമ് ॥ ൬൧ ॥
ദേവ്യാ കടാക്ഷിതാഃ കില പുരുഷാ വാ യോഷിതഃ പശവഃ ।
മാന്യന്തേ സുരസംസദി കല്പകകുസുമൈഃ കൃതാര്ഹണാഃ കാലേ ॥ ൬൨ ॥
സുമനോവാഞ്ഛാദാനേ കൃതാവധാനം ധനം വിഷ്ണോഃ ।
ധിഷണാജാഡ്യാദിഹരം യദ്വീക്ഷണമാമനന്തി ജഗതി ബുധാഃ ॥ ൬൩ ॥
അന്തരപി ബഹിരുദാരം തവ രൂപം മന്ത്രദേവതോപാസ്യമ് ।
ജനനി സ്ഫുരതു സദാ നഃ സംമാന്യം ശ്രേയസേ കാലേ ॥ ൬൪ ॥
മുരരിപുപുണ്യശ്രേണീപരിപാകം താവകം രൂപമ് ।
കമലേ ജനനി വിശുദ്ധം ദദ്യാച്ഛ്രേയോ മുഹുര്ഭജതാമ് ॥ ൬൫ ॥
പുണ്യശ്രേണീ കമലാ സാ ജനനീ ഭക്തമാനസേ സ്ഥിതിഭാക് ।
തേജസ്തതിഭിര്മോഹിതഭുവനാ ഭുവനാധിനാഥഗൃഹിണീയമ് ॥ ൬൬ ॥
ജലനിധികന്യാരൂപം ഹരിമാന്യം സര്വസംപദാം ഹേതുഃ ।
ചിരകൃതസുകൃതവിശേഷാന്നയനയുഗേ ഭാതി സര്വസ്യ ॥ ൬൭ ॥
ജലനിധിതപഃഫലം യന്മുനിജനഹൃദയാബ്ജനിത്യകൃതനൃത്തമ് ।
കരുണാലോലാപാങ്ഗം തത് തേജോ ഭാതു നിഃസമം വദനേ ॥ ൬൮ ॥
ശമിതനതദുരിതസംഘാ ഹരയേ നിജനേത്രകല്പിതാനങ്ഗാ ।
കൃതസുരശാത്രവഭങ്ഗാ സാ ദേവീ മങ്ഗലൈസ്തുങ്ഗാ ॥ ൬൯ ॥
നിഖിലാഗമസിദ്ധാന്തം ഹരിശുദ്ധാന്തം സദാ നൌമി ।
തേനൈവ സര്വസിദ്ധിഃ ശാസ്ത്രേഷു വിനിശ്ചിതാ വിബുധൈഃ ॥ ൭൦ ॥
കൃഷ്ണകൃതവിവിധലീലം തവ രൂപം മാതരാദരാന്മാന്യമ് ।
സ്ഫുരതു വിലോചനയുഗലേ നിത്യം സംപത്സമൃദ്ധ്യൈ നഃ ॥ ൭൧ ॥
കരുണാകടാക്ഷലഹരീ കാമായാസ്തു പ്രകാമകൃതരക്ഷാ ।
ലക്ഷ്മ്യാ മാധവമാന്യാ സത്സുഖദാനേ ദിശി ഖ്യാതാ ॥ ൭൨ ॥
അപവര്ഗസിദ്ധയേ ത്വാമമ്ബാമമ്ഭോജലോചനാം ലക്ഷ്മീമ് ।
അവലമ്ബേ ഹരിദയിതേ പദ്മാസനമുഖസുരേന്ദ്രകൃതപൂജാമ് ॥ ൭൩ ॥
താവകകടാക്ഷലഹരീം നിധേഹി മയി ദേവി കമലേ ത്വമ് ।
തേന മനോരഥസിധ്ഹിര്ഭുവി പരമേ ധാമനി പ്രചുരാ ॥ ൭൪ ॥
ത്വാമാദരേണ സതതം വീക്ഷേമഹി മാതരബ്ജകൃതവാസാമ് ।
വിഷ്ണോര്വക്ഷോനിലയാമക്ഷയസുഖസിദ്ധയേ ലോകേ ॥ ൭൫ ॥
സാ നഃ സിധ്യതു സിദ്ധ്യൈ ദേവാനാം വാങ്മമനോഽതീതാ ।
ഹരിഗൃഹിണീ ഹരിണാക്ഷീ പാലിതലോകത്രയാ ച ജനനീയമ് ॥ ൭൬ ॥
സകലചരാചരചിന്മയരൂപം യസ്യാ ഹി ദേവതോപാസ്യമ് ।
സാ ദദതു മങ്ഗലം മേ നിത്യോജ്ജ്വലമാദരാജ്ജനനീ ॥ ൭൭ ॥
ശീതമയൂഖസഹോദരി താം ത്വാമമ്ബാം ഹി ശീലയേ നിത്യമ് ।
നിരസിതവൈരിഗണോഽഹം ഹരിചരണന്യസ്തരക്ഷശ്ച ॥ ൭൮ ॥
ദിക്ഷി വിദിക്ഷു കൃതശ്രീഃ സാ മേ ജനനീ നദീശതനയേയമ് ।
ഹരിണാ സാകം ഭജതു പ്രാകാശ്യം ഹൃദി സതാം സമൃദ്ധ്യൈ നഃ ॥ ൭൯ ॥
വാരിനിധിവംശസംപദ് ദിവ്യാ കാചിദ്ധരേര്മാന്യാ ।
അര്ചന്തി യാം തു മുനയോ യോഗാരമ്ഭേ തഥാന്തേ ച ॥ ൮൦ ॥
ധൃതസുമമധുപക്രീഡാസ്ഥാനായിതകേശഭാരായൈ ।
നമ ഉക്തിരസ്തു മാത്രേ വാഗ്ജിതപീയൂഷധാരായൈ ॥ ൮൧ ॥
സംദേഹേ സിദ്ധാന്തേ വാദേ വാ സമരഭൂമിഭാഗേ വാ ।
യാ രാജതി ബഹുരൂപാ സാ ദേവീ വിഷ്ണുവല്ലഭാ ഖ്യാതാ ॥ ൮൨ ॥
പ്രതിഫലതു മേ സദാ തന്മുനിമാനസപേടികാരത്നമ് ।
വിഷ്ണോര്വക്ഷോഭൂഷണമാദൃതനിര്ഗതിജനാവനം തേജഃ ॥ ൮൩ ॥
ബാലകുരങ്ഗവിലോചനധാടീരക്ഷിതസുരാദി മനുജാനാമ് ।
നയനയുഗാസേവ്യം തദ് ഭാതീഹ ധരാതലേ തേജഃ ॥ ൮൪ ॥
മാധവദൃക്സാഫല്യം ഭക്താവലിദൃശ്യകാമധേനുകലാ ।
ലക്ഷ്മീരൂപം തേജോ വിഭാതു മമ മാനസേ വചസി ॥ ൮൫ ॥
ഹരിസരസക്രീഡാര്ഥം യാ വിധൃതാനേകരൂപികാ മാതാ ।
സാ ഗേഹഭൂഷണം നഃ സ്ഫുരതു സദാ നിത്യസംപൂജ്യാ ॥ ൮൬ ॥
ദ്വാരവതീപുരഭാഗേ മൈഥിലനഗരേ ച യത്കഥാസാരഃ ।
സാ ദേവീ ജലധിസുതാ വിഹരണഭാങ് മാമകേ മനസി ॥ ൮൭ ॥
ജലനിധിതപോമഹിമ്നേ ദേവ്യൈ പരമാത്മനഃ ശ്രിയൈ സതതമ് ।
ഭൂയാംസി നമാംസി പുനഃ സര്വാ നഃ സംപദഃ സന്തു ॥ ൮൮ ॥
പരമൌഷധം ഹി സംസൃതിവ്യാധേര്യത് കീര്തിതം നിപുണൈഃ ।
തദഹം ഭജാമി സതതം ലക്ഷ്മീരൂപം സദാനന്ദമ് ॥ ൮൯ ॥
ദശരഥസുതകോദണ്ഡപ്രഭാവസാക്ഷാത്കൃതേ കൃതാനന്ദാ ।
സീതാരൂപാ മാതേ ജജ്ഞേ യജ്ഞക്ഷിതൌ ഹി സാ സിദ്ധ്യൈ ॥ ൯൦ ॥
മുനിജനമാനസനിലയേ കമലേ തേ ചരണപങ്കജം ശിരസി ।
അവതംസയന്നുദാരം വിശാമി ദേവൈഃ സുധര്മാം വാ ॥ ൯൧ ॥
ധനമദമേദുരസേവാം ത്യക്തവാഹം തേ പദാമ്ഭോജമ് ।
ശരണം യാമി പുമര്ഥസ്ഫൂര്തികലായൈ ഭൃശം ദീനഃ ॥ ൯൨ ॥
ന ഘടയ കുത്സിതസേവാം ദുഷ്ടൈര്വാ സംഗമം മാതഃ ।
കുരു മാം ദാസം സംസൃതിപാപം ച ഹര ശീഘ്രമ് ॥ ൯൩ ॥
മയി നമതി വിഷ്ണുകാന്തേ തവാഗ്രതസ്താപഭാരാര്തേ ।
മാതഃ സഹസാ സുമുഖീ ഭവ ബാലേ ദോഷനിലയേ ച ॥ ൯൪ ॥
ഹന്ത കദാ വാ മാതസ്തവ ലോചനസേചനം ഭവേന്മയി ഭോഃ ।
ഈത്ഥം പ്രാതഃ സ്തുവതാം ത്വമേവ രക്ഷാകരീ നിയതമ് ॥ ൯൫ ॥
സംസാരരോഗശാന്തിപ്രദമേതല്ലോചനം മാതഃ ।
താവത്കമഹമുപാസേ ദിവ്യൌഷധമാശു സാഗരേന്ദ്രസുതേ ॥ ൯൬ ॥
സംസൃതിരോഗാര്താനാം തവ നാമസ്മരണമത്ര ധരണിതലേ ।
പൂജാപ്രദക്ഷിണാദികമാര്യാ മുഖ്യൌഷധം വദന്തി കില ॥ ൯൭ ॥
മാതര്വിനാ ധരണ്യാം സുകൃതാനാം ഖണ്ഡമിഹ ജന്തുഃ ।
ധ്യാനം വാ ന ഹി ലഭതേ പ്രണതിം വാ സംപദാം ജനനീമ് ॥ ൯൮ ॥
ഗുരുവരകടാക്ഷവിഭവാദ് ദേവി ത്വാങ്ഘ്രിപ്രണാമധുതപാപഃ ।
തവ ച ഹരേര്ദാസഃ സന് വിശാമി ദേവേശ മാനിതാം ച സഭാമ് ॥ ൯൯ ॥
മുരഹരനേത്രമഹോത്സവതാരുണ്യശ്രീര്നിരസ്തനതശത്രുഃ ।
ലലിതലികുചാഭകുചഭരയുഗലാ ദൃഗ്വിജിതഹരിണസംദോഹാ ॥ ൧൦൦ ॥
കാരുണ്യപൂര്ണനയനാ കലികല്മഷഹാരിണീ ച സാ കമലാ ।
മുഖജിതശാരദകമലാ വക്ത്രാമ്ഭോജേ സദാ സ്ഫുരതു മാതാ ॥ ൧൦൧ ॥
താവകകടാക്ഷസേചനവിഭവാം നിര്ധൂതദുരിതസംഘാ ഹി ।
പരമം സുഖം ലഭന്തേ പരേ തു ലോകേ ച സൂരിഭിഃ സാര്ധമ് ॥ ൧൦൨ ॥
തവ പാദപദ്മവിസൃമരകാന്തിഝരീം മനസി കലയംസ്തു ।
നിരസിതനരകാദിഭയോ വിരാജതേ നാകിസദസി സുരവന്ദ്യഃ ॥ ൧൦൩ ॥
ഹന്ത സഹസ്രേഷ്വഥ വാ ശതേഷു സുകൃതീ പുമാന് മാതഃ ।
താവകപാദപയോരുഹവരിവസ്യാം കലയതേ സകലമ് ॥ ൧൦൪ ॥
ജനനി തരങ്ഗയ നയനേ മയി ദീനേ തേ ദയാസ്നിഗ്ധേ ।
തേന വയം തു കൃതാര്ഥാ നാതഃ പരമസ്തിഃ നഃ പ്രാര്ഥ്യമ് ॥ ൧൦൫ ॥
താവകകൃപാവശാദിഹ നാനായോഗാദിനാശിതഭയാ യേ ।
തേഷാം സ്മരണമപി ദ്രാക് ശ്രിയാവഹം നിത്യമാകലയേ ॥ ൧൦൬ ॥
നൈവ പ്രായശ്ചിത്തം ദുരിതാനാം മാമകാനാം ഹി ।
ത്വാമേവ യാമി ശരണം തസ്മാല്ലക്ഷ്മി ക്ഷമാധാരേ ॥ ൧൦൭ ॥
മുരവൈരിമാന്യചരിതേ മാതസ്ത്വാമഖിലലോകസാമ്രാജ്യേ ।
പശ്യന്തി ദിവി സുരേന്ദ്രാ മുനയസ്തത്ത്വാര്ഥിനശ്ച നിത്യകലാമ് ॥ ൧൦൮ ॥
സ്വീയപദപ്രാപ്ത്യൈ നനു വിബുധേശാ ജലധികന്യകേ മാതഃ ।
ആരാധ്യ ദിവ്യകുസുമൈസ്തവ പാദാബ്ജം പരം തുഷ്ടാഃ ॥ ൧൦൯ ॥
സൃഷ്ടിസ്ഥിത്യാദൌ ഹരിരമ്ബ തവാപാങ്ഗവീക്ഷണാദരവാന് ।
ജഗദേതദവതി കാലേ ത്വം ച ഹരിര്നഃ ക്രമാത് പിതരൌ ॥ ൧൧൦ ॥
രാജ്യസുഖലാഭസംപത്പ്രാപ്ത്യൈ ക്ഷിതിപാശ്ച യേ ച വിപ്രാദ്യാഃ ।
ഗാങ്ഗജലൈരപി കുസുമൈര്വരിവസ്യാം തേ ക്രമേണ കലയന്തി ॥ ൧൧൧ ॥
സംത്യക്തകാമതദനുജഡമ്ഭാസൂയാദയോ നരാഃ കമലേ ।
ആരാധ്യ ത്വാം ച ഹരിം കാലേ ചൈകാസനസ്ഥിതാം ധന്യാഃ ॥ ൧൧൨ ॥
ജനനീ കദാ പുനീതേ മമ ലോചനമാര്ഗമാദരാദേഷാ ।
യേ കില വദന്തി ധന്യാസ്തേഷാം ദര്ശനമഹം കലയേ ॥ ൧൧൩ ॥
കരധൃതലീലാപദ്മാ പദ്മാ പദ്മാക്ഷഗേഹിനീ നയനേ ।
സിഞ്ചതി സകലശ്രേയഃപ്രാപ്ത്യൈ നിര്വ്യാജകാരുണ്യാ ॥ ൧൧൪ ॥
നാനാവിധവിദ്യാനാം ലീലാസദനം സരോജനിലയേയമ് ।
കവികുലവചഃപയോജദ്യുമണിരുചിര്ഭാതി നഃ പുരത്ഃ ॥ ൧൧൫ ॥
അതസീകുസുമദ്യുതിഭാങ് നാകിഗണൈര്വന്ദ്യപാദപദ്മയുഗാ ।
സരസിജനിലയാ സാ മേ പ്രസീദതു ക്ഷിപ്രമാദരാത് സിദ്ധ്യൈ ॥ ൧൧൬ ॥
ജഗദീശവല്ലഭേ ത്വയി വിന്യസ്തഭരഃ പുമാന് സഹസാ ।
തീര്ത്വാ നാകിസ്ഥാനം വിശതി പരം വൈഷ്ണവം സുരൈര്മാന്യമ് ॥ ൧൧൭ ॥
മാതര്ജ്ഞാനവികാസം കാരയ കരുണാവലോകനൈര്മധുരൈഃ ।
തേനാഹം ധന്യതമോ ഭവേയമാര്യാവൃതേ സദസി ॥ ൧൧൮ ॥
ഹരിവക്ഷസി മണിദീപപ്രകാശവത്യാന്യാ മാത്രാ ।
നിത്യം വയമിഹ ദാസാഃ ശ്രിയാ സനാഥാ മുദാ പരം നൌമഃ ॥ ൧൧൯ ॥
വിദ്രാവയതു സരോജാസനേ ത്വദീയാ കടാക്ഷധാടീ നഃ ।
അജ്ഞാനാങ്കുരമുദ്രാം പുനരപി സംസാരഭീതിദാം സഹസാ ॥ ൧൨൦ ॥
താവകകടാക്ഷസൂര്യോദയേ മദീയം ഹൃദമ്ഭോജമ് ।
ഭജതേ വികാസമചിരാത് തമോവിനാശശ്ച നിശ്ചിതോ വിബുധൈഃ ॥ ൧൨൧ ॥
ലക്ഷ്മീകടാക്ഷലഹരീ ലക്ഷ്മീം പക്ഷ്മലയതി ക്രമാന്നമതാമ് ।
പാദപയോരുഹസേവാ പരം പദം ചിത്സുഖോല്ലാസമ് ॥ ൧൨൨ ॥
ചിദ്രൂപാ പരമാ സാ കമലേക്ഷണനായികാ മുദേ ഭജതാമ് ।
യത്പ്രണയകോപകാലേ ജഗദീശഃ കിംകരോ ഭവതി ॥ ൧൨൩ ॥
കാചന ദേവീ വിഹരതു മമ ചിത്തേ സംതതം സിദ്ധ്യൈ ।
യാപത്യം കലശാബ്ധേരുരഗേശയസത്കലത്രം ച ॥ ൧൨൪ ॥
അഷ്ടസു മഹിഷീഷ്വേകാ കമലാ മുഖ്യാ ഹി നിര്ദിഷ്ടാ ।
അനയൈവ സര്വജഗതാമുദയാദിസ്തന്യതേ കാലേ ॥ ൧൨൫ ॥
കൈവല്യാനന്ദകലാകന്ദമഹം സംതതം വന്ദേ ।
തത്തു മുകുന്ദകലത്രം ചിന്തിതഫലദാനദീക്ഷിതം കിമപി ॥ ൧൨൬ ॥
ഈക്ഷേ കമലാമേനാമമ്ബാമമ്ഭോജലോചനാം സതതമ് ।
മന്ദസ്മിതമധുരാസ്യാം നിത്യം ചാജ്ഞാതകോപമുഖദോഷാമ് ॥ ൧൨൭ ॥
അങ്കിതമാധവവക്ഷഃസ്ഥലാ സരോജേക്ഷണാ ച ഹരികാന്താ ।
കബലയതി മാനസം മേ ദയാപ്രസാരാദിഭിര്നിത്യമ് ॥ ൧൨൮ ॥
ഭൂത്യൈ മമ ഭവതു ദ്രാഗജ്ഞാനധ്വംസിനീ നമതാമ് ।
നാഥാനുരൂപരൂപാ ശ്രുത്യന്തേഡ്യാ ദശാവതാരേഷു ॥ ൧൨൯ ॥
സകലജനരക്ഷണേശു പ്രണിഹിതനയനാ ത്രിലോകമാതാ നഃ ।
പുഷ്ണാതി മങ്ഗലാനാം നികരം സേവാക്രമേണ incomplete ॥ ൧൩൦ ॥
പദ്മാസനജനനീ മാം പാതു മുദാ സുന്ദരാപാങ്ഗൈഃ ।
സര്വൈശ്വര്യനിദാനം യാമാഹുര്വൈദികാ ദീപ്താമ് ॥ ൧൩൧ ॥
നാനാലംകാരവതീ മുനിമാനസവാസിനീ ഹരേഃ പത്നീ ।
ത്രൈലോക്യവിനുതവിഭവാ മാം പായാദാപദാം നിചയാത് ॥ ൧൩൨ ॥
വിദ്രാവയതു ഭയം നഃ സാ കമലാ വിഷ്ണുവല്ലഭാ മാതാ ।
അബ്ധിഃ സംക്ഷുഭിതോഽഭൂത് യദര്ഥമാര്യേണ രാമേണ ॥ ൧൩൩ ॥
ഭൂയോ യദര്ഥമിന്ദ്രഃ സുരതരുകുസുമാര്ഥിനാ ച കൃഷ്ണേന ।
ഹതഗര്വോഽജനി യുദ്ധേ സാ നിത്യം ശ്രേയസേ ഭൂയാത് ॥ ൧൩൪ ॥
ത്വാമാരാധ്യ ജനാ അപി ധനഹീനാഃ സൌധമധ്യതലഭാജഃ ।
നാനാദേശവനീപകജനസ്തുതാ ഭാന്തി നിത്യമേവ രമേ ॥ ൧൩൫ ॥
സംസൃതിതാപോ ന ഭവതി പുനരപി യത്പാദപങ്കജം നമതാമ് ।
സാ മയി കലിതദയാ സ്യാദമ്ബാ വിഷ്ണോഃ കലത്രമനുരൂപമ് ॥ ൧൩൬ ॥
ജനനീകടാക്ഷഭാജാമിഹ മര്ത്യാനാം സുരാസ്തു കിംകരതാമ് ।
രിപവോ ഗിരിതടവാസം ഭജന്തി വേശ്മാനി സിദ്ധയഃ സര്വാഃ ॥ ൧൩൭ ॥
സ്മരണാദ്വാ ഭജനാദ്വാ യസ്യാഃ പാദാമ്ബുജസ്യ ഭുവി ധന്യാഃ ।
ഹന്ത രമന്തേ സ്തമ്ബേരമനിവഹാവൃതഗൃഹാങ്ഗണേ മനുജാഃ ॥ ൧൩൮ ॥
ചിരകൃതസുകൃതനിഷേവ്യാ സാ ദേവീ വിഷ്ണുവല്ലഭാ ഖ്യാതാ ।
യസ്യാഃ പ്രസാദഭൂമ്നാ ജാതാഃ പശ്വാദയോ വദാന്യാ ഹി ॥ ൧൩൯ ॥
അമ്ബ മധുരാന് കടാക്ഷാന് താപഹരാന് വികിര മയി കൃപാജലധേ ।
യേ വിന്യസ്താഃ കരിവരമാരുതിമുഖഭക്തവര്യേഷു ॥ ൧൪൦ ॥
അമൃതലഹരീവ മധുരാ ജലധരരുചിരാ നതാര്തിഹരശീലാ ।
സര്വശ്രേയോദാത്രീ കാചിദ് ദേവീ സദാ വിഭാതു ഹൃദി ॥ ൧൪൧ ॥
ഗീതാചാര്യപുരന്ധ്രീ ത്വദീയനാമപ്രഭാവകലനാദ്യൈഃ ।
യമഭയവാര്താ ദൂരേ ഹരിസാംനിധ്യം കുതോ ന സ്യാത് ॥ ൧൪൨ ॥
ജലനിധിതനയേ കാന്തേ വിഷ്ണോരുഷ്ണാംശുചന്ദ്രനയനേ തേ ।
ചതുരാനനാദയസ്തു ഖ്യാതാ ബാലാഃ ശ്രുതൌ ചോക്താഃ ॥ ൧൪൩ ॥
മനസിജവൈരം ഗാത്രം വാണീ സൌധാരസീ ച യദ്ഭജതാമ് ।
ശ്ലാധ്യാ സംപത് സജ്ജനസമാഗമശ്ചാശു സിധ്യന്തി ॥ ൧൪൪ ॥
സഫലയതു നേത്രയുഗലം ഹതനതദുരിതാ ച സാ പരാ ദേവീ ।
ജലനിധികന്യാ മാന്യാ പത്യവതാരാനുകൂലനിജചരിതാ ॥ ൧൪൫ ॥
നിത്യം സ്മരാമി ദേവീം നമതാം സര്വാര്ഥദായിനീം കമലാമ് ।
യാമാഹുര്ഭവനിഗലധ്വംസനദീക്ഷാം ച incomplete ॥ ൧൪൬ ॥=൨൦
സകലജഗദഘനിവാരണസംകല്പാം മധുജിതോ ദയിതാമ് ।
ജീവാതുമേവ കലയേ മോക്ഷാര്ഥിജനസ്യ ഭൂമിസുതാമ് ॥ ൧൪൭ ॥
മന്ദാനാമപി ദയയാ തമോനിരാസം വിതന്വന്തീ ।
സര്വത്ര ഭാതി കമലാ തനുരിവ വിഷ്ണോര്നിരസ്താഘാ ॥ ൧൪൮ ॥
ബാലമരാലീഗത്യൈ സുരപുരകന്യാദിമഹിതകലഗീത്യൈ ।
വിരചിതനാനാനീത്യൈ ചേതോ മേ സ്പൃഹയതേ ബഹുലകീര്ത്യൈ ॥ ൧൪൯ ॥
അഭിലഷിതദാനകുശലാ വാഗ്ദേവീവന്ദിതാ ച സാ കമലാ ।
നിത്യം മാനസപദ്മേ സംചാരം കലയതേ മുഹുഃ കുതുകാത് ॥ ൧൫൦ ॥
മുരമഥനനയനപങ്കജവിലാസകലികാ സുരേശമുഖസേവ്യാ ।
ഭൂതമയീ സാവിത്രീ ഗയത്രീ സര്വദേവതാ ജയതി ॥ ൧൫൧ ॥
സാ ഹി പരാ വിദ്യാ മേ ലക്ഷ്മീരക്ഷോഭണീയകീര്തികലാ ।
ഹൃദ്യാം വിദ്യാം ദയാദദ്യ ശ്രേയഃപരംപരാസിദ്ധ്യൈ ॥ ൧൫൨ ॥
കാമജനനീ ഹി ലക്ഷ്മീഃ നാനാലീലാദിഭിര്നിജം നാഥമ് ।
മോഹയതി വിഷ്ണുമചിരാത് പ്രകൃതീനാം ക്ഷേമസിദ്ധ്യര്ഥമ് ॥ ൧൫൩ ॥
മനസിജസാമ്രാജ്യകലാനിദാനമാര്യാഭിവന്ദിതം കിമപി ।
ലക്ഷ്മീരൂപം തേജോ വിലസതി മമ മനസി വിഷ്ണുസംക്രാന്തമ് ॥ ൧൫൪ ॥
വിഷ്ണുമനോരഥപാത്രം സംതപ്തസ്വര്ണകാമ്യനിജഗാത്രമ് ।
ആശ്രിതജലനിധിഗോത്രം രക്ഷിതനതബാഹുജച്ഛാത്രമ് ॥ ൧൫൫ ॥
കവികുലജിഹ്വാലോലം മുരമര്ദനകലിതരമ്യബഹുലീലമ് ।
നിരസിതനതദുഷ്കാലം വന്ദേ തേജഃ സദാലിനുതശീലമ് ॥ ൧൫൬ ॥
ആദിമപുരുഷപുരന്ധ്രീമമ്ബാമമ്ഭോജലോചനാം വന്ദേ ।
യാം നത്വാ ഗതതാപാസ്ത്യക്ത്വാ ദേഹം വിശന്തി പരമപദമ് ॥ ൧൫൭ ॥
ലക്ഷ്മ്യാ ഹരിരപി ഭാതി പ്രകൃതിക്ഷേമായ ദീക്ഷിതായാസൌ ।
മമ ലോചനയോഃ പുരതോ ലസതു ഗഭീരം ക്രിയാസിദ്ധ്യൈ ॥ ൧൫൮ ॥
ജനനി കദാ വാ നേഷ്യാമ്യഹമാരാദര്ചിതത്വദീയപദഃ ।
നിമിഷമിവ ഹന്ത ദിവസന് ദൃഷ്ട്വാ ത്വാമാദരേണ കല്യാണീമ് ॥ ൧൫൯ ॥
സംപൂര്ണയൌവനോജ്ജ്വലദേഹാം യാം വീക്ഷ്യ ശൌരിരപി ।
കുസുമശരവിദ്ധചേതാഃ കിംകരഭാവം സ്വയം പ്രാപ്തഃ ॥ ൧൬൦ ॥
അനുനയശീലസ്തദനു പ്രണയക്രോധാദിനാ ഭീതഃ ।
ആദിമപുരുഷഃ സോഽയം സാ ലക്ഷ്മീര്ന ശ്രിയൈ ഭവതു ॥ ൧൬൧ ॥
മണികുണ്ഡലലസിതാസ്യം കൃപാകരം കിമപി കുങ്കുമച്ഛായമ് ।
ഹരിണാ കൃതസംചാരം തേജോ മേ ഭാതു സര്വദാ സിദ്ധ്യൈ ॥ ൧൬൨ ॥
സാമ്രാജ്യമങ്ഗലശ്രീഃ ശ്രീരേഷാ പുഷ്കരാക്ഷസ്യ ।
ഗന്ധര്വകന്യകാദ്യൈര്ഗങ്ഗാതീരേഷു ഗീതകീര്തിര്ഹി ॥ ൧൬൩ ॥
കവിതാഭാഗ്യവിധാത്രീ പരിമലസംക്രാന്തമധുപഗണകേശാ ।
മമ നയനയോഃ കദാ വാ സാ ദേവീ കലിതസംനിധാനകലാ ॥ ൧൬൪ ॥
കീര്തിഃ സ്വയം വൃണീതേ വാഗ്ദേവീ ചാപി വിജയലക്ഷ്മീശ്ച ।
തം നരമചിരാല്ലോകേ യോ ലക്ഷ്മീപാദഭക്തസ്തു ॥ ൧൬൫ ॥
സന്മിത്രം പാണ്ഡിത്യം സദ്ദാരാഃ സത്സുതാദ്യാശ്ച ।
ജായന്തേ തസ്യ ഭുവി ശ്രീഭക്തോ യശ്ച നിര്ദിഷ്ടഃ ॥ ൧൬൬ ॥
പരമാചാര്യൈര്വിനുതാം താമമ്ബാമാദരാന്നൌമി ।
പരമൈശ്വര്യം വിഷ്ണോരപി യാ വേദേഷു നിര്ദിഷ്ടാ ॥ ൧൬൭ ॥
കവികുലസൂക്തിശ്രേണീശ്രവണാനന്ദോല്ലസദ്വതംസസുമാ ।
സാ ദേവീ മമ ഹൃദയേ കൃതസാംനിധ്യാ വിരാജതേ പരമാ ॥ ൧൬൮ ॥
താപാര്താസ്തു തടാകം യഥാ ഭജന്തേ രമാം ദേവീമ് ।
സംസൃതിതപ്താഃ സര്വേ യാന്തി ഹി ശരണം ശരണ്യാം താമ് ॥ ൧൬൯ ॥
സര്വജ്ഞത്വം ശ്ലാധ്യം ധരാധിപത്യം രമേ ദേവി ।
യദ്യത് പ്രാര്ഥ്യം ദയയാ തദ് ദിശ മോക്ഷം ച മേ ജനനി ॥ ൧൭൦ ॥
വിദ്യുതമചഞ്ചലാം ത്വാം കൃഷ്ണേ മേഘേ പയോധിവരകന്യേ ।
നിത്യമവൈമി ശ്രേയഃസിധ്യ മാതഃ പ്രസന്നേ നഃ ॥ ൧൭൧ ॥
ത്വാമമ്ബ സംതതരുചിം കൃഷ്ണോ മേഘഃ സമാസാദ്യ ।
സദ്വര്ത്മനി വര്ഷതി കില കാങ്ക്ഷാധികമാദരേണ വാര്ധിസുതേ ॥ ൧൭൨ ॥
അമ്ബ ത്വമേവ കാലേ മുകുന്ദമപി ദര്ശയന്തീഹ ।
ശ്രേയഃസിദ്ധ്യൈ നമതാം ഭാസി ഹൃദി ശ്രുതിശിരഃസു സല്ലോകേ ॥ ൧൭൩ ॥
വിനമദമരേശസുദതീകചസുമമകരന്ദധാരയാ സ്നിഗ്ധമ് ।
തവ പാദപദ്മമേതത് കദാ നു മമ മൂര്ധ്നി ഭൂഷണം ജനനി ॥ ൧൭൪ ॥
അപവര്ഗസൌഖ്യദേ തേ ദയാപ്രസാരഃ കഥം വര്ണ്യഃ ।
യാമവലമ്ബ്യ ഹി യഷ്ടിം ന പതതി സംസാരപങ്കിലേ മാര്ഗേ ॥ ൧൭൫ ॥
സൂക്ഷ്മാത് സൂക്ഷ്മതരം തേ രൂപം പശ്യന്തി യോഗിനോ ഹൃദയേ ।
താം ത്വാമഹം കദാ വാ ദ്രക്ഷ്യേഽലംകാരമണ്ഡിതാം മാതഃ ॥ ൧൭൬ ॥
ചിരതരതപസാ ക്ലിഷ്ടേ യോഗിഹൃദി സ്ഥാനഭാഗ് രമാ ദേവീ ।
ദര്ശനമചിരാദ് ദയയാ ദദാതി യോഗാദിഹീനാനാമ് ॥ ൧൭൭ ॥
തീരം സംസൃതിജലധേഃ പൂരം കമലാക്ഷലോചനപ്രീതേഃ ।
സാരം നിഗമാന്താനാം ദൂരം ദുര്ജനതതേര്ഹി തത്തേജഃ ॥ ൧൭൮ ॥
ലക്ഷ്മീരൂപം തേജോ മമാവിരസ്തു ശ്രിയൈ നിത്യമ് ।
യന്നിത്യധര്മദാരാന് വിഷ്ണോരമിതൌജസഃ പ്രാഹുഃ ॥ ൧൭൯ ॥
ജലധിസുതേ ത്വം ജനനീ സ വാസുദേവഃ പിതാ ച നഃ കഥിതഃ ।
ശരണം യുവാം പ്രപന്നാ നാതോ ദുര്ഗതിപരിസ്ഫൂര്തിഃ ॥ ൧൮൦ ॥
ഹരിനീലരത്നഭാസാ പ്രകശിതാത്മാ സമുദ്രവരകന്യാ ।
മങ്ഗലമാതനുതേയം കടാക്ഷകലികാപ്രസാരൈസ്തു ॥ ൧൮൧ ॥
മച്ചിത്തമത്തവാരണബന്ധനമധുനാ ത്വദീയപാദയുഗേ ।
കലയാമി രമേ മാതര്മാം രക്ഷ ക്ഷിപ്രമേവ സംസൃതിതഃ ॥ ൧൮൨ ॥
മോചയ സംസൃതിബന്ധം കടാക്ഷകലികാങ്കുരൈ രമേ മാതഃ ।
നാതഃ പരമര്ഥ്യമിഹ ക്ഷമാതലേ ത്വം ദയാമൂര്തിഃ ॥ ൧൮൩ ॥
മഞ്ജുലകവിതാസംതതിബീജാങ്കുരദായിസാരസാലോകാ ।
ജനനി തവാപാങ്ഗശ്രീഃ ജയതി ജഗത്ത്രാണകലിതദീക്ഷേയമ് ॥ ൧൮൪ ॥
അമ്ബ തവാപാങ്ഗശ്രീരപാങ്ഗകേലീശതാനി ജനയന്തീ ।
മുരഹന്തുര്ഹൃദി ജയതി വ്രീഡാമദമോഹകാമസാരകരീ ॥ ൧൮൫ ॥
ബദ്ധമപി ചിത്തമേതദ് യമനിയമാദ്യൈഃ പരിഷ്കാരൈഃ ।
ധാവതി ബലാദ് രമേ തവ പാദാബ്ജം യാമി ശരണമഹമ് ॥ ൧൮൬ ॥
മത്തഗജമാന്യഗമനാ മധുരാലാപാ ച മാന്യചരിതാ സാ ।
മന്ദസ്മേരമുഖാബ്ജാ കമലാ മേ ഹൃദയസാരസേ ലസതു ॥ ൧൮൭ ॥
ശാസ്ത്രസ്മരണവിഹീനം പാപിനമേനം ജനം രമാ ദേവീ ।
ദയയാ രക്ഷതി കാലേ തസ്യാസ്തേന പ്രഥാ മഹതീ ॥ ൧൮൮ ॥
മുഖവിജിതചന്ദ്രമണ്ഡലമിദമമ്ഭോരുഹവിലോചനം തേജഃ ।
ധ്യാനേ ജപേ ച സുദൃശാം ചകാസ്തി ഹൃദയേ കവീശ്വറാണാം ച ॥ ൧൮൯ ॥
അമ്ബ വിവേകവിദൂരം ജനമേനം ശിശിരലോചനപ്രസരൈഃ ।
ശിശിരയ കൃപയാ ദേവി ത്വമേവ മാതാ ഹി ലോകസ്യ ॥ ൧൯൦ ॥
കോപദുപേക്ഷസേ യദി മാതര്മേ രക്ഷകഃ കഃ സ്യാത് ।
മയി ദീനേ കോ ലാഭസ്തവ തു ദയായാഃ പ്രസാരിണ്യാഃ ॥ ൧൯൧ ॥
ഭവചണ്ഡകിരണതപ്തഃ ശ്രാന്തോഽഹം ജ്ഞാനവാരിദൂരസ്ഥഃ ।
ശിശിരാമങ്ഘ്രിച്ഛായാം തവ മാതര്യാമി ശരണമാരാത്തു ॥ ൧൯൨ ॥
മാതരശോകോല്ലാസം പ്രകടയ തവ കോമലകടാക്ഷൈഃ ।
യൈര്ദീനാ നരപതയഃ കലിതാ വാരണശതാവൃതേ ഗേഹേ ॥ ൧൯൩ ॥
ജയതി രമേ തവ മഹതീ കൃപാഝരീ സര്വസംമാന്യാ ।
ക്ഷേമംകരീ യദേഷാ പ്രതികല്പം സര്വജഗതാം ച ॥ ൧൯൪ ॥
അജ്ഞാനകൂപകുഹരേ പതിതം മാം പാഹി കമലേ ത്വമ് ।
നഗരേ വാ ഗ്രാമേ വാ വനമധ്യേ ദിക്ഷു രക്ഷിണീ ത്വമസി ॥ ൧൯൫ ॥
തവ ചരണൌ ശരണമിതി ബ്രുവന്നഹം മാതരബ്ധിതനയേ ത്വമ് ।
ഹരിണാ സഹിതാ ദയയാ പ്രാഹ്യവിലമ്ബേന ദീനം മാമ് ॥ ൧൯൬ ॥
പരിസരനതവിബുധാലീകിരീടമണികാന്തിവല്ലരീവിസരൈഃ ।
കൃതനീരാജനവിധി തേ മമ തു ശിരോഭൂഷണം ഹി പദയുഗലമ് ॥ ൧൯൭ ॥
മമ ഹൃദയപങ്കജവനീവികാസഹേതൌ ദിനാധിപായേതാമ് ।
തവ തു കടാക്ഷപ്രസരഃ ദീപായേതാം തമോനിരാകരണേ ॥ ൧൯൮ ॥
യാവച്ഛരണം യാതി ക്ഷിതിതനയേ ത്വാം ഹി ജന്തുരിഹ മൂഢഃ ।
താവത് തസ്യ തു രസനാങ്ഗണേ തു വാണീ സമാകലിതനൃത്താ ॥ ൧൯൯ ॥
പങ്കജനിലയേ താവകചരണം ശരണം സമാകലയേ ।
തേന ഹി സര്വകൃതാനാം ഭവിഷ്യതാം ഹാനിരേവ ദുരിതാനാമ് ॥ ൨൦൦ ॥
ശ്രുത്യന്തസേവിതം തേ ചരണസരോജം പ്രണമ്യ കില ജന്തുഃ ।
ഛത്രോല്ലസിതശിരാഃ സന് വനീപകാന് ദാനവാരിണാ സിഞ്ചന് ॥ ൨൦൧ ॥
വിഷ്വക്സേനമുഖാദ്യൈഃ സേവിതമമ്ബ ത്വദീയപാദയുഗമ് ।
അവതംസയന്തി സന്തഃ കലിതാപപ്രശമനായാസ്തു ॥ ൨൦൨ ॥
ദുഗ്ധോദധിതനയേ ത്വാം ദിശാഗജേന്ദ്രാഃ സുവര്ണഘടതോയൈഃ ।
മണിമണ്ടപമധ്യതലേ സമഭ്യഷിഞ്ചന് ഹരിപ്രീത്യൈ ॥ ൨൦൩ ॥
ദിഗ്ഗജപുഷ്പകരകുമ്ഭൈരഭിഷിക്താം ത്വാം ഹരിഃ പ്രീത്യാ ।
ഉദവഹദാരാന്മുനിഗണമധ്യേ സര്വശ്രിയോ മൂലമ് ॥ ൨൦൪ ॥
ജാതപരാക്രമകലികാ ദിശി ദിശി കിംനരസുഗീതനിജയശസഃ ।
ധന്യാ ഭാന്തി ഹി മനുജാഃ യദ്വീക്ഷാലവവിശേഷതഃ കാലേ ॥ ൨൦൫ ॥
നമദമരീകചഭരസുമമരന്ദധാരാഭിഷിക്തം തേ ।
പദകമലയുഗലമേതച്ഛ്രേയഃസ്ഫൂര്ത്യൈ സദാ ഭവതു ॥ ൨൦൬ ॥
രാഗദ്വേഷാദിഹതം മാമവ കമലേ ഹരേഃ കാന്തേ ।
ദര്ശയ ദയയാ കാലേ ഹ്യപവര്ഗസ്ഥാനമാര്ഗം ച ॥ ൨൦൭ ॥
ന ഹി ജാനേ വര്ണയിതും പരമേ സ്ഥനേ ത്വദീയവിഭവമഹമ് ।
മുനയശ്ച സുരാ വേദാ യതോ നിവൃത്താഃ ക്ഷമാതനയേ ॥ ൨൦൮ ॥
മനുജാഃ കടാക്ഷിതാഃ കില തഥാമ്ബയാ മേദിനീപുത്ര്യാ ।
സത്സുതകലത്രസഹിതാഃ സുരഭിം കാലേന നിര്വിശാന്തി മുദാ ॥ ൨൦൯ ॥
ജലധീശകന്യകാ സാ ലസതു പുരോഽസ്മാകമാദരകൃതശ്രീഃ ।
യത്പ്രണമനാജ്ജനാനാം കവിതോന്മേഷഃ സദീഡിതേ ഭാതി ॥ ൨൧൦ ॥
ദൂരികരോതു ദുരിതം ത്വദ്ഭക്തിര്മാമകം കമലേ ।
അഹമപി സുരേശസേവ്യേ തവ സദസി വിശാമി കീര്തിഗാനപരഃ ॥ ൨൧൧ ॥
പരമജ്ഞാനവിധാത്രീ തവ പാദപയോജഭക്തിരസ്മാകമ് ।
കിം വാശാസ്യമതോഽന്യത് സമുദ്രതനയേ ഹരേര്ജായേ ॥ ൨൧൨ ॥
അമ്ബ കദാ വാ ലപ്സ്യേ മദീയപാപാപനോദായ ।
തവ പാദകമലസേവാമബ്ജഭവാദ്യൈസ്തു സംപ്രാര്ഥ്യാമ് ॥ ൨൧൩ ॥
മന്ദാനാമപി മഞ്ജുലകവിത്വരസദായിനീ ജനനീ ।
കാപി കരുണാമയീ സാ ലസതു പുരസ്താത് സദാസ്മാകമ് ॥ ൨൧൪ ॥
സകലകവിലോകവിനുതേ കമലേ കമലാക്ഷി വല്ലഭേ വിഷ്ണോഃ ।
ത്വന്നാമാനി ഹി കലയേ വനേ ജലേ ശത്രുപീഡായാമ് ॥ ൨൧൫ ॥
ദിവി വാ ഭുവി ദിക്ഷു ജലേ വഹ്നൌ വാ സര്വതഃ കമലേ ।
ജന്തൂനാം കില രക്ഷാ ത്വദധീനാ കീര്ത്യതേ വിബുധൈഃ ॥ ൨൧൬ ॥
കുശലവിധയേ തദസ്തു ത്രിവിക്രമാസേവ്യരമ്യനിജകേലി ।
കബലിതപദനതദൈന്യം തരുണാമ്ബുജലോചനം തേജഃ ॥ ൨൧൭ ॥
ജനനീ സുവര്ണവൃഷ്ടിപ്രദായിനീ ഭാതി വിഷ്ണുവക്ഷഃസ്ഥാ ।
കമലാ കലിതക്ഷേമാ പ്രകൃതീനാം ശീതലാപാങ്ഗൈഃ ॥ ൨൧൮ ॥
ജഗതാമാദിമജനനീ ലസതി കവേരാത്മജാപുലിനേ ।
ക്ഷേത്രേഷൂത്തമജുഷ്ടേഷ്വയോനിജാ ലോകരക്ഷായൈ ॥ ൨൧൯ ॥
കുചശോഭാജിതവിഷ്ണുഃ കുങ്കുമപങ്കാങ്കിതാ കമലാ ।
കാഞ്ച്യാം രാജതി കാഞ്ചീമണിഗണനീരാജിതാങ്ഘ്രിയുഗാ ॥ ൨൨൦ ॥
മന്ദാരകുസുമമദഹരമന്ദസ്മിതമധുരവദനപങ്കരുഹാ ।
ഹൃദ്യതമനിത്യയൌവനമണ്ഡിതഗാത്രീ വിരാജതേ കമലാ ॥ ൨൨൧ ॥
കംസരിപുഗേഹിനീ സാ ഹംസഗതിര്ഹംസമാന്യനിജചരിതാ ।
സംസാരതാപഹാനിം കലയതു കാലേ രമാസ്മാകമ് ॥ ൨൨൨ ॥
മനസിജജനനീ ജനനീ ചാസ്മാകമിഹാദരാത് കാലേ ।
ശീതലലോലാപാങ്ഗൈസ്തരങ്ഗയതി ശ്രേയസാം സരിണമ് ॥ ൨൨൩ ॥
തവ മന്ദഹാസകലികാം ഭജേ ഭുജങ്ഗേ ശയാനം തമ് ।
യാ കലയതി ഗതകോപം ബാലാനാം നഃ കൃതാപരാധാനാമ് ॥ ൨൨൪ ॥
സാ സാധയേദഭീഷ്ടം കമലാ ശ്രീര്വിഷ്ണുവക്ഷഃസ്ഥാ ।
യസ്യാഃ പദവിന്യാസഃ ശ്രുതിമൌലിഷു തന്യതേ മഹാലക്ഷ്മ്യാഃ ॥ ൨൨൫ ॥
ശാന്തിരസനിത്യശേവധിമമ്ബാം സേവേ മനോരഥാവാപ്ത്യൈ ।
യാമാരാധ്യ സുരേശാഃ സ്വപദം പ്രാപുര്ഹി താദൃക്ഷമ് ॥ ൨൨൬ ॥
ധാതുരപി വേദവചസാം ദൂരേ യത്സ്ഥാനമാമനന്തി ബുധാഃ ।
സാസ്തു മുദേ ശ്രീരേഷാ മുരമര്ദനസത്കലത്രമമിതൌജഃ ॥ ൨൨൭ ॥
ഭവദുഃഖരാശിജലധേര്ഹഠാത് തരിത്രീം പരം വിദ്മഃ ।
താമമ്ബാം കമലസ്ഥാം മുരാരിവക്ഷോമണിപ്രദീപാം ച ॥ ൨൨൮ ॥
മുനിസാര്വഭൌമവര്ണിതമഹാചരിത്രം ഹരേഃ കലത്രം തത് ।
പഥി മങ്ഗലായ ഭവതു പ്രസ്ഥാനജുഷാം കൃപാധാരമ് ॥ ൨൨൯ ॥
ഖണ്ഡിതവൈരിഗണേയം മണ്ഡിതഭക്താ സുതാദ്യൈശ്ച ।
ഭാസുരകീര്തിര്ജയതി ക്ഷോണീസുരവന്ദ്യചരണാബ്ജാ ॥ ൨൩൦ ॥
നതപാലിനി മാം പാഹി ത്രിജഗദ്വന്ദ്യേ നിധേഹി മയി ദയയാ ।
താവകകടാക്ഷലഹരീഃ ശക്തിമയേ സകലസിദ്ധീനാമ് ॥ ൨൩൧ ॥
ഭവസാഗരം തിതീര്ഷുസ്തവ ചരണാബ്ജം മഹാസേയുമ് ।
മാതഃ കദാ നു ലപ്സ്യേ ഘനതാപോര്മ്യാദിപീഡിതോ ദീനഃ ॥ ൨൩൨ ॥
കവിവാഗ്വാസന്തീനാം വസന്തലക്ഷ്മീര്മുരാരിദയിതാ നഃ ।
പരമാം മുദം വിധത്തേ കാലേ കാലേ മഹാഭൂത്യൈ ॥ ൨൩൩ ॥
സുരഹരപരതന്ത്രം തദ് ഗതതന്ദ്രം വസ്തു നിസ്തുലമുപാസേ ।
തേനൈവാഹം ധന്യോ മദ്വംശ്യാ നിരസിതാത്മതാപഭരാഃ ॥ ൨൩൪ ॥
തൃഷ്ണാം ശമയതി ദേവീ രാഘവദയിതാ നതാലിസുരവല്ലീ ।
ഇട്യാര്യവചോ ധൈര്യം ജനയതി കാലേ ധരാപുത്രി ॥ ൨൩൫ ॥
രഘുപതിദയിതേ മാതഃ കാകാസുരരക്ഷണാദിനാ ലോകേ ।
താവകകരുണാമഹിമാ പ്രഥിതഃ കില ഭൂതിദായീ നഃ ॥ ൨൩൬ ॥
പ്രചുരതദുരിതപാലീസമാവൃതാനാം കലൌ ഹി തപ്താനാമ് ।
താവകദയാ ഹി മാതഃ ശരണം വരമിതി സതാം ഗണഃ സ്തൌതി ॥ ൨൩൭ ॥
അത്യന്തശീതലാം താം കടാക്ഷധാടീമുപാസേഽഹമ് ।
തേന മമ ത്രിദശാനാം ന കോഽപി ഭേദോ ധരാതനയേ ॥ ൨൩൮ ॥
യൈഃ സേവാ സംകലിതാ തവ പാദാബ്ജേ ധരാതനയേ ।
തേഷാമജ്ഞാനഝരീ യാതി ഹി വിലയം ക്ഷണേനൈവ ॥ ൨൩൯ ॥
ജ്ഞാനാരവിന്ദവിലസനമചിരാദസ്യ സ്തുതൌ ഹി കവിവര്യാഃ ।
സംപദ് ദിവ്യാ ച തഥാ വിബുധാവലിമാനനീയാത്ര ॥ ൨൪൦ ॥
മാതസ്തവ പാദാബ്ജം യസ്യ ലലാടേ കൃതോരുനിജകാന്തി ।
തത്പാദപദ്മമചിരാദ് വിമാനഗാ ദേവതാ വഹതി ॥ ൨൪൧ ॥
ആജ്ഞാവശേന ദേവ്യാ ലസന്തി ദിവി ദേവതാമാന്യാഃ ।
ഇന്ദ്രാദ്യാഃ സ ച ധാതാ ദിക്പാലാശ്ചാപി ഗന്ധര്വാഃ ॥ ൨൪൨ ॥
കൈവല്യാനന്ദകലാദാത്രീം കമലാമഹര്നിശം നൌമി ।
തേനൈവ ജന്മ സഫലം തീര്ഥാദിനിഷേവണാദ്യച്ച ॥ ൨൪൩ ॥
യച്ച ഹരിപാദപങ്കേരുഹപരിചരണാദിനാ ലോകേ ।
തത് സര്വമാശു ഘടയതി സഹസാ മന്ദസ്യ മേ മാതാ ॥ ൨൪൪ ॥
നാനാശ്രുത്യന്തകലാപരിമലപരിവാഹവാസിതം മാതഃ ।
തവ ചരണകമലയുഗലം മമാവതംസഃ ക്ഷണം ഭാതു ॥ ൨൪൫ ॥
നതദേവനഗരനാരീധമ്മില്ലലസത്സുമാലികൃതനാദാഃ ।
പ്രാതര്മുരജവിലാസം കലയന്തി ഭൃശം തവാഗ്രതോ ഭൃങ്ഗാഃ ॥ ൨൪൬ ॥
പാപപ്രശമനദീക്ഷാകലാധുരീണാഃ പയോജനിലയേ തേ ।
മാം ച പവിത്രീകുര്യുഃ പാദപരാഗാഃ കൃപാവശതഃ ॥ ൨൪൭ ॥
ഹന്ത കദാ വാ ലപ്സ്യേ തവാങ്ഘ്രിശുശ്രൂഷണാസക്തിമ് ।
സഹജാനന്ദം തേന ഹി പദം ക്രമാത് പ്രാപ്യമാദിഷ്ടമ് ॥ ൨൪൮ ॥
നലിനീവിലാസരുചിരാം മയി ദേവി ത്വത്കടാക്ഷലഹരീം ഹി ।
കാലേ നിധേഹി ദയയാ സ്ഫീതാ തേ കീര്തിരാദൃതാ സര്വൈഃ ॥ ൨൪൯ ॥
വിനിഹതദുരിതസ്തോമാ കാപി മദീയേ ഹൃദമ്ഭോജേ ।
ലസതു പരദേവതാഖ്യാ മാധവനേത്രപ്രിയംകരീ കലികാ ॥ ൨൫൦ ॥
പഞ്ചായുധഗുരുമന്ത്രം കലനൂപുരനിനദമാദരാത് കമലേ ।
കലയതി രമാധവഗൃഹം യാതും കാലേ ത്വയി പ്രവൃത്തായാമ് ॥ ൨൫൧ ॥
നതനാകിലോകവനിതാലലാടസിന്ദൂരശോണകാന്തിഭൃതോഃ ।
കലയേ നമാംസി കമലേ തവ പാദപയോജയോര്നിത്യമ് ॥ ൨൫൨ ॥
കമലസുഷുമാനിവാസസ്ഥാനകടാക്ഷം ചിരായ കൃതരക്ഷമ് ।
രക്ഷോഗണഭീതികരം തേജോ ഭാതി പ്രകാമമിഹ മനസി ॥ ൨൫൩ ॥
ജ്യോത്സ്നേവ ശിശിരപാതാ കടാക്ഷധാടീ ത്വദീയാ ഹി ।
അമ്ബ മുകുന്ദ ( ||. incomplete ||. ) കുരുതേ ॥ ൨൫൪ ॥
താപഹരരസവിവര്ഷംഅധൃതകുതുകാ കാപി നീലനലിനരുചിഃ ।
കാദമ്ബിനീ പുരസ്തദാസ്താം നഃ സംതതം ജനനീ ॥ ൨൫൫ ॥
സഫലയതു നേത്രയുഗലം മാമകമേതത് ത്വദീയരൂപമഹോ ।
യത് കമലനേത്രസുചരിതപചേലിമം വൈദികീ ശ്രുതിര്ബ്രൂതേ ॥ ൨൫൬ ॥
മാധവനേത്രപയോജാമൃതലഹരീ ഭാതി താവകം രൂപമ് ।
അമ്ബ യുവാമാദ്യൌ നഃ പിതരൌ വനേ സുഖാവാപ്ത്യൈ ॥ ൨൫൭ ॥
സരസകവിതാദിസംപദ്വിലസനമാരാദുശാന്തി കവിവര്യാഃ ।
യത്പ്രീണനേന സാ മേ ഭവതു വിഭൂത്യൈ ഹി സാ കമലാ ॥ ൨൫൮ ॥
മനസിജജയാദികാര്യം യദപാങ്ഗലവാന്നൃണാം ഭവതി ।
തത്പദമാനന്ദകലം സേവ്യം ച ഭജേ രമാം ജനനീമ് ॥ ൨൫൯ ॥
ശിഥിലതതമഃസമൂഹാ ഭക്താനാം സാ രമാ ദേവീ ।
ജനയതി ധൈര്യം ച ഹരേഃ കാലേ യാ സര്വദാ സേവ്യാ ॥ ൨൬൦ ॥
യദ്ഭ്രൂവിലാസവശതഃ ശക്തഃ സൃഷ്ട്യാദികം കര്തുമ് ।
ഹരിരപി ലോകേ ഖ്യാതഃ സാ നഃ ശരണം ജഗന്മാതാ ॥ ൨൬൧ ॥
നയനയുഗലീം കദാ മേ സിഞ്ചതി ഏവ്യാഃ പരം രൂപമ് ।
യദ്ഭജനാന്ന ഹി ലോകേ ദൃഷ്ടം ശ്ലാധ്യം പരം വസ്തു ॥ ൨൬൨ ॥
സുചരിതഫലം ത്വദീയം രൂപം നഃ കലിതഭക്തീനാമ് ।
അത ഏവ മാമകാനാം പാപാനാം വിരതിരൂര്ജിതാ കമലേ ॥ ൨൬൩ ॥
സുകൃതിവിഭവാദുപാസ്യാ കമലാ സാ സര്വകല്യാണാ ।
ഹരിവക്ഷസി കൃതവാസാ രക്ഷതി ലോകാനഹോരാത്രമ് ॥ ൨൬൪ ॥
സംവിദ്രൂപാ ഹി ഹരേഃ കുടുമ്ബിനീ ഭാതി ഭക്തഹൃദയേഷു ।
സര്വശ്രേയഃപ്രാപ്ത്യൈ യാം വിദുരാര്യാ രമാം കമലാമ് ॥ ൨൬൫ ॥
വിഷയലഹരീപ്രശാന്ത്യൈ കമലാപാദാമ്ബുജം നൌമി ।
പൂര്വം ശുകാദിസുധിയോ യദ്ധ്യാനാദ് ഗലിതശത്രുഭയാഃ ॥ ൨൬൬ ॥
ലലിതഗമനം ത്വദീയം കലനൂപുരനാദപൂരിതം മാതഃ ।
നൌമി പദാമ്ബുജയുഗലം ഭവതാപനിരാസനായാദ്യ ॥ ൨൬൭ ॥
വിരലീകരോതി താപം കമലായാ മന്ദഹാസഝരീ ।
യത്സേവനേഷു സമുദിതകൌതുകരസനിര്ഭരോ ഹരിര്ജയതി ॥ ൨൬൮ ॥
പ്രതിഫലതു സംതതം മേ പുരതോ മാതസ്ത്വദീയരൂപമിദമ് ।
യദ്ദര്ശനരസഭൂമ്നാ ഹരിരപി നാനാസ്വരൂപഭാക് കാലേ ॥ ൨൬൯ ॥
അമ്ബ തവ ചരണസേവാം സംതതമഹമാദരാത് കലയേ ।
തേന മമ ജന്മ സഫലം ത്രിദശാനാമിവ മുനീന്ദ്രാണാമ് ॥ ൨൭൦ ॥
ദുര്വാരഗര്വദുര്മതിദുരര്ഥനിരസനകലാനിപുണാഃ ।
തവ ചരണസേവയൈവ ഹി കമലേ മാതര്ബുധാ ജഗതി ॥ ൨൭൧ ॥
ആനദമേതി മാതസ്തവ നാമോച്ചാരണേന സിന്ധുഭവേ ।
സംപ്രാപ്തത്വദ്രൂപം മമ മാനസമാത്തയോഗകലമ് ॥ ൨൭൨ ॥
തവ ദൃഷ്ടിപാതവിഭവാത് സര്വേ ലോകേ വിധൂതതാപഭരാഃ ।
യാന്തി മുദാ ത്രിദശൈഃ സഹ വിഭാനമാരുഹ്യ മാതരഹോ ॥ ൨൭൩ ॥
കോ വാ ന ശ്രയതി ബുധഃ ശ്രേയോഽര്ഥീ താമിമാം കമലാമ് ।
യാം പന്നഗാരിവാഹനസദ്ഗര്മിണീമര്ചയന്തി സുരനാഥാഃ ॥ ൨൭൪ ॥
താമരവിന്ദനിവാസാമമ്ബാം ശരണാര്ഥിനാം കലിതരക്ഷാമ് ।
ബഹുരൂപേഷ്വഘനിചയേഷ്വപി നിശ്ചിത്യാത്മനോ ധൈര്യമ് ॥ ൨൭൫ ॥
കരുണാപ്രവാഹഝര്യാ ഗതപങ്ക ഭൂതലം മാതഃ ।
സത്വാങ്കുരാദിലസിതം ജയതി പയോരാശികകന്യകേ കമലേ ॥ ൨൭൬ ॥
വിധിശിവവാസവമുഖ്യൈര്വന്ദ്യപദാബ്ജേ നമസ്തുഭ്യമ് ।
മാതര്വിഷ്ണോര്ദയിതേ സര്വജ്ഞത്വം ച മേ കലയ ॥ ൨൭൭ ॥
പരദേവതേ പ്രസീദ പ്രസീദ ഹരിവല്ലഭേ മാതഃ ।
ത്വാമാഹുഃ ശ്രുതയഃ കില കല്യാണഗുണാകരാം നിത്യാമ് ॥ ൨൭൮ ॥
ക്ഷന്തവ്യമമ്ബ മാമകമഘരാശിം ക്ഷപയ വീക്ഷണതഃ ।
സത്വോന്മേഷം ദേഹി പ്രിയേ ഹരേര്ദാസമപി കുരു മാമ് ॥ ൨൭൯ ॥
വാഞ്ഛിതസിദ്ധിര്ന സ്യാദ് യദി പാദാബ്ജേ കൃതപ്രണാമാനാമ് ।
ഹാനിസ്ത്വദീയയശസാമിതി കേചിദ്ധൈര്യവന്തശ്ച ॥ ൨൮൦ ॥
സദസദനുഗ്രഹദക്ഷാം ത്വാം മാതഃ സംതതം നൌമി ।
ഗ്രഹപീഡാ നൈവ ഭവേദ്യമപീഡാ ദൂരതഃ കാലേ ॥ ൨൮൧ ॥
വിദ്യാഃ കലാശ്ച കാലേ കൃപയാ കലയ പ്രസീദാശു ।
മാതസ്ത്വമേവ ജഗതാം സര്വേഷാം രക്ഷണം ത്വയാ ക്രിയതേ ॥ ൨൮൨ ॥
ഉഛേഷ്വപി നീചേഷു പ്രകാശതേ തുല്യമേവ തവ രൂപമ് ।
ഏതദ് ദൃഷ്ട്വാ ധൈര്യം ഘനാഗസോഽപ്യമ്ബ ജായതേ നനു മേ ॥ ൨൮൩ ॥
കാ ശങ്കാ തവ വൈഭവജാലം വക്തും ദിഗന്തരേ മാതഃ ।
വരഹാരാലംകാരാം സേവന്തേ ത്വാം ഹരിത്പതയഃ ॥ ൨൮൪ ॥
കമലായാശ്ച ഹരേരപി സംദൃഷ്യം ദിവ്യദാംപത്യമ് ।
താവേവ നഃ പതീ കില ജന്മാന്തരപുണ്യപരിപാകാത് ॥ ൨൮൫ ॥
സര്വാസാമുപനിഷദാം വിദ്യാനാം ത്വംപരം സ്ഥാനമ് ।
അല്പധിയോ വയമേതേ ത്വത്സ്തോത്രേ ഭോഃ കഥം ശക്താഃ ॥ ൨൮൬ ॥
സാഷ്ടാങ്ഗപ്രണതിരിയം പ്രകല്പിതാ മാതരദ്യ തവ ചരണേ ।
തേനാഹം ഹി കൃതാര്ഥഃ കിം പ്രാര്ഥ്യം വസ്ത്വതഃ കമലേ ॥ ൨൮൭ ॥
സ്തോത്രമിദംഹി മയാ തേ ചരണാമ്ഭോജേ സമര്പിതം ഭക്ത്യാ ।
തവ ച ഗുരോരപി വീക്ഷാ തത്ര നിദാനം പരം നാന്യത് ॥ ൨൮൮ ॥
ദേഹാന്തേ നനു മാതര്മോക്ഷം ത്രിദശൈഃ സമം ദേഹി ।
അഹമപി സാമ പഠന് സന് ത്വാം ച ഹരിം യാമി ശരണാര്ഥീ ॥ ൨൮൯ ॥
ശുകവാണീമിവ മാതര്നിരര്ഥകാം മദ്വചോഭങ്ഗീമ് ।
ആരാച്ഛൃണോഷി ദയയാ തദേവ ചോത്തമപദവ്യക്ത്യൈ ॥ ൨൯൦ ॥
വിദ്യാം കലാം വരിഷ്ഠാം അമ്ബ ത്വാം സംതതം വന്ദേ ।
യാ വ്യാകരോഷി കാലേ വിദ്വദ്ഭിര്വേദതത്ത്വാദി ॥ ൨൯൧ ॥
വൈദുഷ്യം വാണ്യാഃ സത്സംപജ്ഝര്യോ യദീയവീക്ഷണതഃ ।
സിധ്യന്ത്യപി ദേവാനാം സാ നഃ ശരണം രമാ ദേവീ ॥ ൨൯൨ ॥
വിപുലം ശ്രിയോ വിലാസം ശ്രദ്ധാം ഭക്ത്യാദികം ദേഹി ।
അമ്ബ പ്രസീദ കാലേ തവ പാദാബ്ജൈകസേവിനാമിഹ നഃ ॥ ൨൯൩ ॥
കേചിത് പ്രാഞ്ചഃ കമലാം പ്രാപ്യ ഹി ശരണം വിപത്കാലേ ।
ഝടിതി വിധൂനിതതാപാഃ സാ മേ ദേവീ പ്രസന്നാസ്തു ॥ ൨൯൪ ॥
മരകതകാന്തിമനോഹരമൂര്തിഃ സൈഷാ രമാ ദേവീ ।
പാതി സകലാനി കാലേ ജഗന്തി കരുണാവലോകാദ്യൈഃ ॥ ൨൯൫ ॥
ഭാഗീരഥീവ വാണീ തവ നുതിരൂപാ വിരാജതേ പരമാ ।
ഇഹ മാതര്യദ്ഭജനം സര്വേഷാം സര്വസംപദാം ഹേതുഃ ॥ ൨൯൬ ॥
കലശപയോദധിതനയേ ഹരിപ്രിയേ ലക്ഷ്മി മാതരമ്ബേതി ।
തവ നാമാനി ജപന് സന് ത്വദ്ദാസോഽഹം തു മുക്തയേ സിദ്ധഃ ॥ ൨൯൭ ॥
നിഖിലചരാചരരക്ഷാം വിതന്വതീ വിഷ്ണുവല്ലഭാ കമലാ ।
മമ കുലദൈവതമേഷാ ജയതി സദാരാധ്യമാന്യപാദകമലാ ॥ ൨൯൮ ॥
സര്വജന്നുതവിഭവേ സംതതമപി വാഞ്ഛിതപ്രദേ ദേവി ।
അമ്ബ ത്വമേവ ശരണം തേനാഹം പ്രാപ്തസര്വകാര്യാര്ഥഃ ॥ ൨൯൯ ॥
കമലേ കഥം നു വര്ണ്യസ്തവ മഹിമാ നിഗമമൌലിഗണവേദ്യഃ ।
ഇതി നിശ്ചിത്യ പദാബ്ജം തവ വന്ദേ മോക്ഷകാമോഽഹമ് ॥ ൩൦൦ ॥
ത്വാമമ്ബ ബാലിശോഽഹം ത്വചമത്കാരൈര്ഗിരാം ഗുമ്ഭൈഃ ।
അയഥായഥക്രമം ഹി സ്തുവന്നപി പ്രാപ്തജന്മസാഫല്യഃ ॥ ൩൦൧ ॥
ഇതി ശ്രീകമലാത്രിശതീ സമാപ്താ
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ത്oday
http://sanskritdocuments.org
Kamala Trishati Lyrics in Malayalam PDF
% File name : kamalA300.itx
% Category : trishati
% Location : doc\_devii
% Author : gaNgAdharamakhivirachitA
% Language : Sanskrit
% Subject : hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : July 15, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : kamalA300.itx
% Category : trishati
% Location : doc\_devii
% Author : gaNgAdharamakhivirachitA
% Language : Sanskrit
% Subject : hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : July 15, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website