କମଲାତ୍ରିଶତୀ
{॥ କମଲାତ୍ରିଶତୀ ॥}
ଗଙ୍ଗାଧରମଖିଵିରଚିତା ।
ପରମାଭରଣଂ ଵିଷ୍ଣୋର୍ଵକ୍ଷସି ସା ସାଗରେନ୍ଦ୍ରଵରପୁତ୍ରୀ ।
ଯା ମୂର୍ତିର୍ମତୀ କାଲେ କ୍ଷମା ଜନାନାଂ କୃତାପରାଧାନାମ୍ ॥ ୧ ॥
ସା ନଃ ଶ୍ରେଯୋ ଦଦ୍ଯାତ୍ କମଲା କମଲାସନାଦିଜନନୀଂ ଯାମ୍ ।
ସଂପ୍ରାପ୍ଯ ସହଚରୀଂ ହରିରଵତି ଜଗନ୍ତ୍ଯନାକୁଲଂ ସତତମ୍ ॥ ୨ ॥
ନିତ୍ଯଶ୍ରେଯୋଦାନେ ଖ୍ଯାତା ଯା ହରିଗୃହସ୍ଯ ସର୍ଵସ୍ଵମ୍ ।
ଶ୍ରୁତିମୌଲିସ୍ତୁତଵିଭଵା ସା ଭାତୁ ପୁରଃ ସଦାସ୍ମାକମ୍ ॥ ୩ ॥
ଵିଷ୍ଣୁକ୍ରୀଡାଲୋଲା ଵିଖ୍ଯାତା ଦୀନରକ୍ଷଣେ ଲକ୍ଷ୍ମୀଃ ।
ଜନନୀ ନଃ ସ୍ଫୁରତୁ ସଦା ତେନ ଵଯଂ କିଲ କୃତାର୍ଥାଃ ସ୍ମଃ ॥ ୪ ॥
ନିର୍ଵାଣାଙ୍କୁରଜନନୀ କାଲେ ସା ସାର୍ଵଭୌମପଦଦୋଗ୍ଧ୍ରୀ ।
ନିରସତିମୋହସମୂହା ମମ ଦୈଵତମାଦୃତଂ ଗୁରୁଭିଃ ॥ ୫ ॥
ଵିଷ୍ଣୋର୍ଵକ୍ଷସି ଲସିତା ଶୀତମଯୂଖସ୍ଯ ସୋଦରୀ କମଲା ।
କମଲାଯତନଯନା ନଃ ପାତୁ ସଦା ପାପରାଶିଭ୍ଯଃ ॥ ୬ ॥
କଵିପରିଷଦା ଚ ଵେଦୈଃ ନିତ୍ଯଂ ସ୍ତୁତନିଜମହୋଦଯା କମଲା ।
ମନସି ମମ ସଂନିଧତ୍ତାଂ ତ୍ଵମିତାନନ୍ଦାଯ ଲୋକନାଥେନ ॥ ୭ ॥
ଦୁଗ୍ଧୋଦଧିତନଯା ସା ଦୁରିତନିହନ୍ତ୍ରୀ କୃତପ୍ରଣାମାନାମ୍ ।
ଆନନ୍ଦପଦଵିଧାତ୍ରୀ ପତ୍ଯା ସାକଂ ପଦେ ପଦେ ଲୋକେ ॥ ୮ ॥
ମନ୍ମଥଜନନୀ ସା ମାମଵତୁ ସରୋଜା(କ୍ଷ)ଗେହିନୀ କମଲା ।
ଯାମାରାଧ୍ଯ ବୁଧେନ୍ଦ୍ରା ଵିଶନ୍ତି ପରମଂ ତୁ ତତ୍ ପଦଂ ଵିଷ୍ଣୋଃ ॥ ୯ ॥
ସତ୍ସୂକ୍ତିକୃତିଵିଧାତ୍ରୀ ନମତାମମ୍ବା ତ୍ରିଲୋକ୍ଯାସ୍ତୁ ।
ନିତ୍ଯପ୍ରସାଦଭୂମ୍ନା ରକ୍ଷତି ମାମାଦରାତ୍ କମଲା ॥ ୧୦ ॥
ମମ ସୂକ୍ତିରଞ୍ଜଲିପୁଟଃ ପ୍ରଣତିଶ୍ଚାନେକସଂଖ୍ଯାକା ।
କୁତୁକାତ୍ କ୍ଷୀରୋଦସୁତାମମିତାନନ୍ଦାଯ ଗାହତେ କମଲାମ୍ ॥ ୧୧ ॥
ଯା ପାରମାର୍ଥ୍ଯସରଣିଃ ସା କମଲା ନିଶ୍ଚିତା ଵେଦୈଃ ।
ସୈଷା ହି ଜଗନ୍ମାତା ସଂସୃତିତାପାପହନ୍ତ୍ରୀ ଚ ॥ ୧୨ ॥
ମନ୍ଦସ୍ମିତମଧୁରାନନମମନ୍ଦସଂତୋଷଦାଯି ଭଜତାଂ ତତ୍ ।
କମଲାରୂପଂ ତେଜୋ ଵିଭାତୁ ନିତ୍ଯଂ ମଦୀଯହୃତ୍କମଲେ ॥ ୧୩ ॥
କାଲେ କ୍ଷପଯତି କମଲା କଟାକ୍ଷଧାଟ୍ଯା ହି ମାମକଂ ଦୁରିତମ୍ ।
ଅତ ଏଵାଶ୍ରିତରକ୍ଷଣଦୀକ୍ଷେତ୍ଯେଵଂ ଜନୋ ଵଦତି ॥ ୧୪ ॥
ନଵନଵହର୍ମ୍ଯଵିଧାତ୍ରୀ ନାକିକିରୀଟାର୍ଚିତା ଚ ସା ଦେଵୀ ।
ଜ୍ଯୋତିର୍ମଣ୍ଡଲଲସିତା ମୁନିହୃଦଯାବ୍ଜାସନା ଚ ସଦ୍ଗତିଦା ॥ ୧୫ ॥
ସଂଵୀକ୍ଷ୍ଯ ଜଲଧିତନଯାଂ ଭୂଯୋ ଭୂଯଃ ପ୍ରଣମ୍ଯ ଭକ୍ତଗଣଃ ।
ନିରସିତଦୁରିତୌଘଃ ସନ୍ ସ୍ତୌତି ମୁଦା ମୋକ୍ଷସିଦ୍ଧଯେ କମଲାମ୍ ॥ ୧୬ ॥
ରାକାନିଶୀଵ ଦେଵ୍ଯାଂ ଦୃଷ୍ଟାଯାଂ ଭକ୍ତଗଣଵାଣୀ ।
ଭଜତେ ଜଲନିଧିଶୈଲୀଂ ସାଙ୍ଗୋପାଙ୍ଗଂ କୃତାନନ୍ଦା ॥ ୧୭ ॥
ଦୁର୍ଗତିଭୀତ୍ଯା ଖିନ୍ନଃ ସୋଽହଂ ଶରଣଂ ଭଜାମି ତାଂ କମଲାମ୍ ।
ଶରଣାର୍ଥିନାଂ ହି ରକ୍ଷାକୃଦିତି ଖ୍ଯାତା ହି ଯା ଲୋକେ ॥ ୧୮ ॥
ନ ହି କଲଯତେ ହୃଦନ୍ତେ ମନ୍ଦାରଂ କାମଧେନୁଂ ଵା ।
ଯଃ ସେଵତେ ମୁକୁନ୍ଦପ୍ରିଯାଂ ଶ୍ରିଯଂ ନିତ୍ଯଭାଵେନ ॥ ୧୯ ॥
କୈଟଭମର୍ଦନମହିଷୀଂ ମମାଞ୍ଜଲିର୍ଗାହତାଂ କାଲେ ।
ନ ହି ନାଥନୀଯମତ୍ର କ୍ଷମାତଲେ ସା ପ୍ରସନ୍ନାସ୍ତୁ ॥ ୨୦ ॥
ସଂତାପପୀଡିତଂ ମାମଵତୁ ସଦା ଶ୍ରୀର୍ହରିପ୍ରିଯା ମାତା ।
ରକ୍ଷିତଵାଯସମୁଖ୍ଯା କୃପାନିଧିଃ ପୁଣ୍ଯକୃଦ୍ଦୃଶ୍ଯା ॥ ୨୧ ॥
ନ ହି କେଵଲଂ ପ୍ରଣାମୈଃ ସ୍ତୁତ୍ଯା ଭକ୍ତ୍ଯା ସମାରାଧ୍ଯା ।
ସତ୍ଯେନ ଧର୍ମନିଵହୈର୍ଭାଵେନ ଚ କମଲଗେହିନୀ କମଲା ॥ ୨୨ ॥
କଦାଚିତ୍କଵିଲୋକେଽପ୍ଯକ୍ଷୀଣାନନ୍ଦଦାଯିନୀ କମଲା ।
ରକ୍ଷତୁ କଟାକ୍ଷକଲିକାଙ୍କୂରୈର୍ଭକ୍ତାନିହାଦରତଃ ॥ ୨୩ ॥
କଲିପାପଗ୍ଲପିତାନାଂ ମୁରମର୍ଦନଦିଵ୍ଯଗେହିନୀ ଲକ୍ଷ୍ମୀଃ ।
ରାଜତି ଶରଣଂ ପରମଂ ଵଶୀକୃତେଶା ଚ ଵିବୁଧଗଣସେଵ୍ଯା ॥ ୨୪ ॥
ନିତ୍ଯୋଲ୍ଲସଦୁରୁମାଲା ଵକ୍ଷସି କମଲା ହରେର୍ଭାତି ।
ନିଜତନୁଭାସା ଦ୍ଯୋତିତକୌସ୍ତୁଭମଣିରମ୍ବୁଧେସ୍ତନଯା ॥ ୨୫ ॥
ମାତର୍ମଙ୍ଗଲଦାଯିନ୍ଯମରେନ୍ଦ୍ରଵଧୂସମର୍ଚିତାଙ୍ଘ୍ରିଯୁଗେ ।
ମାଂ ପାହ୍ଯପାଯନିଵହାତ୍ ସଂତତମକଲକ୍ଷମାମୂର୍ତେ ॥ ୨୬ ॥
ଯଦି କଲିତା ଚୋପେକ୍ଷା ନଶ୍ଯେତ୍ କିଲ ତାଵକୀ ମହତୀ ।
କୀର୍ତିରତୋଽମ୍ବ କଟାକ୍ଷୈଃ ପରିଷିଞ୍ଚ ମୁଦା ମୁହୁଃ ଶୀତୈଃ ॥ ୨୭ ॥
ଧନଧାନ୍ଯସୁତାଦିରୁଚିଗ୍ରସ୍ତଂ ମାଂ ପାହି କମଲେ ତ୍ଵମ୍ ।
ତେନୋର୍ଜିତକୀର୍ତିଃ ସ୍ଯା ମାତସ୍ତ୍ଵଂ ସର୍ଵରକ୍ଷିଣୀ ଖ୍ଯାତା ॥ ୨୮ ॥
ତଵ ପାଦାମ୍ବୁଜଯୁଗଲଧ୍ଯାନଂ ମାତର୍ମଦୀଯମଘମାଶୁ ।
କବଲୀକରୋତି କାଲେ ତେନାହଂ ସିଦ୍ଧସଂକଲ୍ପଃ ॥ ୨୯ ॥
ଅଞ୍ଜଲିକଲିକା ହି କୃତା ଯଦି ତସ୍ଯୈ ମୁରନିହନ୍ତୃଦଯିତାଯୈ ।
ରସନାଗ୍ରେ ଖେଲନଭାକ୍ ତସ୍ଯ ତୁ ପୁଂସୋ ଗିରାଂ ଦେଵୀ ॥ ୩୦ ॥
ମାତସ୍ତଵ ମୂର୍ତିରିଯଂ ସୁଧାମଯୀ ନିଶ୍ଚିତା ନିପୁଣୈଃ ।
ଯତ୍ ତଦ୍ଦର୍ଶନଭୂମ୍ନା ନିରସ୍ତତାପା ବୁଧା ଭଵନ୍ତ୍ଯଚିରାତ୍ ॥ ୩୧ ॥
କଲିତଜଗତ୍ତ୍ରଯରକ୍ଷାଭରାଣି ମଯି ଦେଵି ସଂଵିଧେହି ମୁଦା ।
ତ୍ଵଦ୍ଵୀକ୍ଷଣାନି କମଲେ ତେନାହଂ ସିଦ୍ଧସଂକଲ୍ପଃ ॥ ୩୨ ॥
ଵରଦେ ମୁରାରିଦଯିତେ ଜଯନ୍ତି ତେ ଵୀକ୍ଷଣାନି ଯାନି ଦିଵି ।
ସଂପ୍ରାପ୍ଯ ତାନି ମଘଵା ଵିଜିତାରିର୍ଦେଵସଂଘଵନ୍ଦ୍ଯଶ୍ଚ ॥ ୩୩ ॥
ମୋହାନ୍ଧକାରଭାସ୍କରମମ୍ବ କଟାକ୍ଷଂ ଵିଧେହି ମଯି କମଲେ ।
ଯେନାପ୍ତଜ୍ଞାନକଲାଃ ସ୍ତୁଵନ୍ତି ଵିବୁଧାସ୍ତ୍ଵଦୀଯସଦସି କଲମ୍ ॥ ୩୪ ॥
କାମକ୍ରୋଧାଦିମହାସତ୍ତ୍ଵନିରାସଂ କୃପାସାରାତ୍ ।
କୁରୁ ମାତର୍ମମ ସଂସୃତିଭୀତିଂ ଚ ନିରାକୁରୁ ତ୍ଵମେଵାରାତ୍ ॥ ୩୫ ॥
ମୂଢାନାମପି ହୃଦ୍ଯାଂ କଵିତାଂ ଦାତୁଂ ଯଦୀଯପରିଚର୍ଯା ।
ପ୍ରଭଵତି କାଲେ ସା ହି ଶ୍ରୀରମ୍ବା ନଃ ପ୍ରସନ୍ନାସ୍ତୁ ॥ ୩୬ ॥
ଦିଵ୍ଯକ୍ଷେତ୍ରେଷୁ ବୁଧା ଦିନକରମଧ୍ଯେ ଚ ଵେଦମୌଲୌ ଚ ।
ଯତ୍ସ୍ଥାନମିତି ଵଦନ୍ତି ଶ୍ରୀରେଷା ଭାତି ସଂଶ୍ରିତହରିର୍ହି ॥ ୩୭ ॥
ନିଜଲୀଲାକ୍ରାନ୍ତହରୀ ରକ୍ଷତି କମଲା କଟାକ୍ଷଧାଟ୍ଯା ନଃ ।
ଶରଣାର୍ଥିନଶ୍ଚ କାଲେ ଵିହଗୋରଗପଶୁମୁଖାନୁର୍ଵ୍ଯାମ୍ ॥ ୩୮ ॥
ସମରାଙ୍ଗଣେଷୁ ଜଯଦା ତ୍ରିଦଶାନାଂ ମୌଲିଭିର୍ମାନ୍ଯା ।
ଆପଦି ରକ୍ଷଣଦକ୍ଷା ସା କମଲା ନଃ ପ୍ରସନ୍ନାସ୍ତୁ ॥ ୩୯ ॥
ନିତ୍ଯାନନ୍ଦାସନଭାଡ୍ ନଵନିଧିଵନ୍ଦ୍ଯା ଚ ସାଗରେନ୍ଦ୍ରସୁତା ।
ଵିଲସତି ମାଧଵଵକ୍ଷସି ପାଲିତଲୋକତ୍ରଯା ଚ ଜନନୀ ନଃ ॥ ୪୦ ॥
ମୁନିନୁତନିଜପରିପାଟୀ ଵାଗ୍ଧାଟୀ ଦାନଲୋଲୁପା ଭଜତାମ୍ ।
ଶିକ୍ଷିତରିପୁଜନକୋଟୀ ଵିଲସତି ଧୃତଶାତକୁମ୍ଭମଯଶାଟୀ ॥ ୪୧ ॥
ନିଖିଲାଗମଵେଦ୍ଯପଦା ନିତ୍ଯଂ ସଦ୍ଭିଃ ସମାରାଧ୍ଯା ।
ସଂସୃତିପାଶନିହନ୍ତ୍ରୀ ଯା ତସ୍ଯୈ ଚାଞ୍ଜଲିଃ କ୍ରିଯତେ ॥ ୪୨ ॥
ଭୂଯାଂସି ନମାଂସି ମଯା ଭକ୍ତେନ କୃତାନି କମଲଜାଙ୍ଘ୍ରିଯୁଗେ ।
ନିତ୍ଯଂ ଲଗନ୍ତୁ ତେନ ହି ସର୍ଵା ରାଜନ୍ତି ସଂପଦୋ ମାନ୍ଯାଃ ॥ ୪୩ ॥
ନିତ୍ଯଂ ନିର୍ମଲରୂପେ ବରଦେ ଵାରାଶିକନ୍ଯକେ ମାତଃ ।
ସଦ୍ଗଣରକ୍ଷଣଦୀକ୍ଷେ ପାହୀତି ଵଦନ୍ତମାଶୁ ମାଂ ପାହି ॥ ୪୪ ॥
ଭୁଵନଜନନି ତ୍ଵମାରାତ୍ କୃତରକ୍ଷଣସଂତତିଃ କ୍ଷମାମୂର୍ତେ ।
ପ୍ରତିଵସ୍ତୁ ରମେ କଲିତସ୍ଵରୂପଶକ୍ତ୍ଯା ହି ରାଜସେ ଜଗତି ॥ ୪୫ ॥
ଜଯ ଜଯ କଲଶାବ୍ଧିସୁତେ ଜଯ ଜଯ ହରିଵଲ୍ଲଭେ ରମେ ମାତଃ ।
ପ୍ରାତରିତି ଵିବୁଧଵର୍ଯାଃ ପଠନ୍ତି ନାମାନି ତେ ହି ମେ ଗୁରଵଃ ॥ ୪୬ ॥
ନେତ୍ରରୁଚିଵିଜିତଶାରଦପଦ୍ମେ ପଦ୍ମେ ନମସ୍ତୁଭ୍ଯମ୍ ।
ତେନ ଵଯଂ ଗତଵିପଦଃ ସା ମୁକ୍ତିଃ କରଗତା କଲିତା ॥ ୪୭ ॥
ସତତଂ ବଦ୍ଧାଞ୍ଜଲିପୁଟମୁପାସ୍ମହେ ତଚ୍ଛୁଭପ୍ରଦଂ ତେଜଃ ।
ଯତ୍ କମଲୋଦରନିଲଯଂ କମଲାକ୍ଷପ୍ରୀତିଵୀଚିକାପୂରମ୍ ॥ ୪୮ ॥
ସ୍ଫୁରତୁ ମମ ଵଚସି କମଲେ ତ୍ଵଦୀଯଵୈଭଵସୁଧାଧାରା ।
ନିତ୍ଯଂ ଵ୍ଯକ୍ତିଂ ପ୍ରାପ୍ତା ଧୁତନୁତଜନଖେଦଜାଲକା ମହତୀ ॥ ୪୯ ॥
କମଲେ ତଵ ନୁତିଵିଷଯେ ବୁଦ୍ଧିର୍ଜାତା ହି ମେ ସହସା ।
ତେନ ମମ ଭାଗଧେଯଂ ପରିଣତମିତ୍ଯେଵ ନିତ୍ଯସଂତୁଷ୍ଟଃ ॥ ୫୦ ॥
କଵିତାରସପରିମଲିତଂ କରୋତି ଵଦନଂ ନତାନାଂ ଯା ।
ସ୍ତୋତୁଂ ତାଂ ମେ ହ୍ଯାରାତ୍ ସା ଦେଵୀ ସୁପ୍ରସନ୍ନାସ୍ତୁ ॥ ୫୧ ॥
ହରିଗୃହିଣି ତାଵକଂ ନୁତରୂପଂ ଯେ ଭୁଵି ନିଜେ ହୃଦମ୍ଭୋଜେ ।
ଧ୍ଯାଯନ୍ତି ତେଷୁ ଵିବୁଧା ଅପି କଲ୍ପକକୁସୁମମର୍ପଯନ୍ତି ମୁଦା ॥ ୫୨ ॥
ନାନାଵରଦାନକଲାଲୋଲୁପହୃଦଯେ ହୃଦମ୍ଭୁଜସ୍ଥେ ମାମ୍ ।
ରକ୍ଷାପାଯାତ୍ ସହସା କୁରୁ ଭକ୍ତଂ ଦୋଷହୀନଂ ଚ ॥ ୫୩ ॥
ନିଜଘନକେଶରୁଚା ଜିତନୀଲାମ୍ବୁଧରେ ଶଶାଙ୍କସହଜନ୍ମନ୍ ।
ପଦ୍ମେ ତ୍ଵଦୀଯରୂପଂ ମନୋହରଂ ଭାତୁ ମେ ହୃଦଯେ ॥ ୫୪ ॥
ଘନକୁଙ୍କୁମଲସିତାଙ୍ଗଂ ମୁକ୍ତାହାରାଦିଭୂଷିତଂ ମଧୁରମ୍ ।
ମନ୍ଦସ୍ମିତମଧୁରାସ୍ଯଂ ସୂର୍ଯେନ୍ଦୁଵିଲୋଚନଂ ଚ ବୁଧମାନ୍ଯମ୍ ॥ ୫୫ ॥
ନିବିଡକୁଚକୁମ୍ଭଯୁଗଲଂ ନିଜଦୃଗ୍ଜିତହରିଣଶାବକାକ୍ଷିଯୁଗମ୍ ।
ଲୀଲାଗତିଜିତକଲଭଂ ମଧୁଵୈରିମନୋହରଂ ଚ ସୁରମାନ୍ଯମ୍ ॥ ୫୬ ॥
ଦିଶି ଦିଶି ଵିସ୍ତୃତସଂପଦ୍ଵିଲାସମଧୁରଂ ଚ କୁନ୍ଦଦନ୍ତାଲି ।
ମଦନଜନକଂ ଚ ଵିଷ୍ଣୋଃ ସର୍ଵସ୍ଵଂ ସର୍ଵଦାନଚଣମ୍ ॥ ୫୭ ॥
କୁଲଦୈଵତମସ୍ମାକଂ ସଂଵିଦ୍ରୂପଂ ନତାର୍ତିହରରୂପମ୍ ।
ନାନାଦୁର୍ଗତିହରଣକ୍ଷମମମରୀସେଵିତଂ ସକଲମ୍ ॥ ୫୮ ॥
ପଞ୍ଚଦଶଵର୍ଣମାନଂ ପଯୋଜଵକ୍ତ୍ରଂ ପିତାମହସମର୍ଚ୍ଯମ୍ ।
ଜଗଦଵନଜାଗରୂକଂ ହରିହରସଂମାନ୍ଯଵୈଭଵଂ କିମପି ॥ ୫୯ ॥
କରୁଣାପୂରିତନଯନଂ ପରମାନନ୍ଦପ୍ରଦଂ ଚ ପରିଶୁଦ୍ଧମ୍ ।
ଆଗମଗଣସଂଵେଦ୍ଯଂ କୋଶଗୃହଂ ସର୍ଵସଂପଦାଂ ନିତ୍ଯମ୍ ॥ ୬୦ ॥
ମାତସ୍ତାଵକପାଦାମ୍ବୁଜଯୁଗଲଂ ସଂତତଂ ସ୍ଫୁରତୁ ।
ତେନାହଂ ତଵ ରୂପଂ ଦ୍ରକ୍ଷ୍ଯାମ୍ଯାନନ୍ଦସିଦ୍ଧଯେ ସକଲମ୍ ॥ ୬୧ ॥
ଦେଵ୍ଯା କଟାକ୍ଷିତାଃ କିଲ ପୁରୁଷା ଵା ଯୋଷିତଃ ପଶଵଃ ।
ମାନ୍ଯନ୍ତେ ସୁରସଂସଦି କଲ୍ପକକୁସୁମୈଃ କୃତାର୍ହଣାଃ କାଲେ ॥ ୬୨ ॥
ସୁମନୋଵାଞ୍ଛାଦାନେ କୃତାଵଧାନଂ ଧନଂ ଵିଷ୍ଣୋଃ ।
ଧିଷଣାଜାଡ୍ଯାଦିହରଂ ଯଦ୍ଵୀକ୍ଷଣମାମନନ୍ତି ଜଗତି ବୁଧାଃ ॥ ୬୩ ॥
ଅନ୍ତରପି ବହିରୁଦାରଂ ତଵ ରୂପଂ ମନ୍ତ୍ରଦେଵତୋପାସ୍ଯମ୍ ।
ଜନନି ସ୍ଫୁରତୁ ସଦା ନଃ ସଂମାନ୍ଯଂ ଶ୍ରେଯସେ କାଲେ ॥ ୬୪ ॥
ମୁରରିପୁପୁଣ୍ଯଶ୍ରେଣୀପରିପାକଂ ତାଵକଂ ରୂପମ୍ ।
କମଲେ ଜନନି ଵିଶୁଦ୍ଧଂ ଦଦ୍ଯାଚ୍ଛ୍ରେଯୋ ମୁହୁର୍ଭଜତାମ୍ ॥ ୬୫ ॥
ପୁଣ୍ଯଶ୍ରେଣୀ କମଲା ସା ଜନନୀ ଭକ୍ତମାନସେ ସ୍ଥିତିଭାକ୍ ।
ତେଜସ୍ତତିଭିର୍ମୋହିତଭୁଵନା ଭୁଵନାଧିନାଥଗୃହିଣୀଯମ୍ ॥ ୬୬ ॥
ଜଲନିଧିକନ୍ଯାରୂପଂ ହରିମାନ୍ଯଂ ସର୍ଵସଂପଦାଂ ହେତୁଃ ।
ଚିରକୃତସୁକୃତଵିଶେଷାନ୍ନଯନଯୁଗେ ଭାତି ସର୍ଵସ୍ଯ ॥ ୬୭ ॥
ଜଲନିଧିତପଃଫଲଂ ଯନ୍ମୁନିଜନହୃଦଯାବ୍ଜନିତ୍ଯକୃତନୃତ୍ତମ୍ ।
କରୁଣାଲୋଲାପାଙ୍ଗଂ ତତ୍ ତେଜୋ ଭାତୁ ନିଃସମଂ ଵଦନେ ॥ ୬୮ ॥
ଶମିତନତଦୁରିତସଂଘା ହରଯେ ନିଜନେତ୍ରକଲ୍ପିତାନଙ୍ଗା ।
କୃତସୁରଶାତ୍ରଵଭଙ୍ଗା ସା ଦେଵୀ ମଙ୍ଗଲୈସ୍ତୁଙ୍ଗା ॥ ୬୯ ॥
ନିଖିଲାଗମସିଦ୍ଧାନ୍ତଂ ହରିଶୁଦ୍ଧାନ୍ତଂ ସଦା ନୌମି ।
ତେନୈଵ ସର୍ଵସିଦ୍ଧିଃ ଶାସ୍ତ୍ରେଷୁ ଵିନିଶ୍ଚିତା ଵିବୁଧୈଃ ॥ ୭୦ ॥
କୃଷ୍ଣକୃତଵିଵିଧଲୀଲଂ ତଵ ରୂପଂ ମାତରାଦରାନ୍ମାନ୍ଯମ୍ ।
ସ୍ଫୁରତୁ ଵିଲୋଚନଯୁଗଲେ ନିତ୍ଯଂ ସଂପତ୍ସମୃଦ୍ଧ୍ଯୈ ନଃ ॥ ୭୧ ॥
କରୁଣାକଟାକ୍ଷଲହରୀ କାମାଯାସ୍ତୁ ପ୍ରକାମକୃତରକ୍ଷା ।
ଲକ୍ଷ୍ମ୍ଯା ମାଧଵମାନ୍ଯା ସତ୍ସୁଖଦାନେ ଦିଶି ଖ୍ଯାତା ॥ ୭୨ ॥
ଅପଵର୍ଗସିଦ୍ଧଯେ ତ୍ଵାମମ୍ବାମମ୍ଭୋଜଲୋଚନାଂ ଲକ୍ଷ୍ମୀମ୍ ।
ଅଵଲମ୍ବେ ହରିଦଯିତେ ପଦ୍ମାସନମୁଖସୁରେନ୍ଦ୍ରକୃତପୂଜାମ୍ ॥ ୭୩ ॥
ତାଵକକଟାକ୍ଷଲହରୀଂ ନିଧେହି ମଯି ଦେଵି କମଲେ ତ୍ଵମ୍ ।
ତେନ ମନୋରଥସିଧ୍ହିର୍ଭୁଵି ପରମେ ଧାମନି ପ୍ରଚୁରା ॥ ୭୪ ॥
ତ୍ଵାମାଦରେଣ ସତତଂ ଵୀକ୍ଷେମହି ମାତରବ୍ଜକୃତଵାସାମ୍ ।
ଵିଷ୍ଣୋର୍ଵକ୍ଷୋନିଲଯାମକ୍ଷଯସୁଖସିଦ୍ଧଯେ ଲୋକେ ॥ ୭୫ ॥
ସା ନଃ ସିଧ୍ଯତୁ ସିଦ୍ଧ୍ଯୈ ଦେଵାନାଂ ଵାଙ୍ମମନୋଽତୀତା ।
ହରିଗୃହିଣୀ ହରିଣାକ୍ଷୀ ପାଲିତଲୋକତ୍ରଯା ଚ ଜନନୀଯମ୍ ॥ ୭୬ ॥
ସକଲଚରାଚରଚିନ୍ମଯରୂପଂ ଯସ୍ଯା ହି ଦେଵତୋପାସ୍ଯମ୍ ।
ସା ଦଦତୁ ମଙ୍ଗଲଂ ମେ ନିତ୍ଯୋଜ୍ଜ୍ଵଲମାଦରାଜ୍ଜନନୀ ॥ ୭୭ ॥
ଶୀତମଯୂଖସହୋଦରି ତାଂ ତ୍ଵାମମ୍ବାଂ ହି ଶୀଲଯେ ନିତ୍ଯମ୍ ।
ନିରସିତଵୈରିଗଣୋଽହଂ ହରିଚରଣନ୍ଯସ୍ତରକ୍ଷଶ୍ଚ ॥ ୭୮ ॥
ଦିକ୍ଷି ଵିଦିକ୍ଷୁ କୃତଶ୍ରୀଃ ସା ମେ ଜନନୀ ନଦୀଶତନଯେଯମ୍ ।
ହରିଣା ସାକଂ ଭଜତୁ ପ୍ରାକାଶ୍ଯଂ ହୃଦି ସତାଂ ସମୃଦ୍ଧ୍ଯୈ ନଃ ॥ ୭୯ ॥
ଵାରିନିଧିଵଂଶସଂପଦ୍ ଦିଵ୍ଯା କାଚିଦ୍ଧରେର୍ମାନ୍ଯା ।
ଅର୍ଚନ୍ତି ଯାଂ ତୁ ମୁନଯୋ ଯୋଗାରମ୍ଭେ ତଥାନ୍ତେ ଚ ॥ ୮୦ ॥
ଧୃତସୁମମଧୁପକ୍ରୀଡାସ୍ଥାନାଯିତକେଶଭାରାଯୈ ।
ନମ ଉକ୍ତିରସ୍ତୁ ମାତ୍ରେ ଵାଗ୍ଜିତପୀଯୂଷଧାରାଯୈ ॥ ୮୧ ॥
ସଂଦେହେ ସିଦ୍ଧାନ୍ତେ ଵାଦେ ଵା ସମରଭୂମିଭାଗେ ଵା ।
ଯା ରାଜତି ବହୁରୂପା ସା ଦେଵୀ ଵିଷ୍ଣୁଵଲ୍ଲଭା ଖ୍ଯାତା ॥ ୮୨ ॥
ପ୍ରତିଫଲତୁ ମେ ସଦା ତନ୍ମୁନିମାନସପେଟିକାରତ୍ନମ୍ ।
ଵିଷ୍ଣୋର୍ଵକ୍ଷୋଭୂଷଣମାଦୃତନିର୍ଗତିଜନାଵନଂ ତେଜଃ ॥ ୮୩ ॥
ବାଲକୁରଙ୍ଗଵିଲୋଚନଧାଟୀରକ୍ଷିତସୁରାଦି ମନୁଜାନାମ୍ ।
ନଯନଯୁଗାସେଵ୍ଯଂ ତଦ୍ ଭାତୀହ ଧରାତଲେ ତେଜଃ ॥ ୮୪ ॥
ମାଧଵଦୃକ୍ସାଫଲ୍ଯଂ ଭକ୍ତାଵଲିଦୃଶ୍ଯକାମଧେନୁକଲା ।
ଲକ୍ଷ୍ମୀରୂପଂ ତେଜୋ ଵିଭାତୁ ମମ ମାନସେ ଵଚସି ॥ ୮୫ ॥
ହରିସରସକ୍ରୀଡାର୍ଥଂ ଯା ଵିଧୃତାନେକରୂପିକା ମାତା ।
ସା ଗେହଭୂଷଣଂ ନଃ ସ୍ଫୁରତୁ ସଦା ନିତ୍ଯସଂପୂଜ୍ଯା ॥ ୮୬ ॥
ଦ୍ଵାରଵତୀପୁରଭାଗେ ମୈଥିଲନଗରେ ଚ ଯତ୍କଥାସାରଃ ।
ସା ଦେଵୀ ଜଲଧିସୁତା ଵିହରଣଭାଙ୍ ମାମକେ ମନସି ॥ ୮୭ ॥
ଜଲନିଧିତପୋମହିମ୍ନେ ଦେଵ୍ଯୈ ପରମାତ୍ମନଃ ଶ୍ରିଯୈ ସତତମ୍ ।
ଭୂଯାଂସି ନମାଂସି ପୁନଃ ସର୍ଵା ନଃ ସଂପଦଃ ସନ୍ତୁ ॥ ୮୮ ॥
ପରମୌଷଧଂ ହି ସଂସୃତିଵ୍ଯାଧେର୍ଯତ୍ କୀର୍ତିତଂ ନିପୁଣୈଃ ।
ତଦହଂ ଭଜାମି ସତତଂ ଲକ୍ଷ୍ମୀରୂପଂ ସଦାନନ୍ଦମ୍ ॥ ୮୯ ॥
ଦଶରଥସୁତକୋଦଣ୍ଡପ୍ରଭାଵସାକ୍ଷାତ୍କୃତେ କୃତାନନ୍ଦା ।
ସୀତାରୂପା ମାତେ ଜଜ୍ଞେ ଯଜ୍ଞକ୍ଷିତୌ ହି ସା ସିଦ୍ଧ୍ଯୈ ॥ ୯୦ ॥
ମୁନିଜନମାନସନିଲଯେ କମଲେ ତେ ଚରଣପଙ୍କଜଂ ଶିରସି ।
ଅଵତଂସଯନ୍ନୁଦାରଂ ଵିଶାମି ଦେଵୈଃ ସୁଧର୍ମାଂ ଵା ॥ ୯୧ ॥
ଧନମଦମେଦୁରସେଵାଂ ତ୍ଯକ୍ତଵାହଂ ତେ ପଦାମ୍ଭୋଜମ୍ ।
ଶରଣଂ ଯାମି ପୁମର୍ଥସ୍ଫୂର୍ତିକଲାଯୈ ଭୃଶଂ ଦୀନଃ ॥ ୯୨ ॥
ନ ଘଟଯ କୁତ୍ସିତସେଵାଂ ଦୁଷ୍ଟୈର୍ଵା ସଂଗମଂ ମାତଃ ।
କୁରୁ ମାଂ ଦାସଂ ସଂସୃତିପାପଂ ଚ ହର ଶୀଘ୍ରମ୍ ॥ ୯୩ ॥
ମଯି ନମତି ଵିଷ୍ଣୁକାନ୍ତେ ତଵାଗ୍ରତସ୍ତାପଭାରାର୍ତେ ।
ମାତଃ ସହସା ସୁମୁଖୀ ଭଵ ବାଲେ ଦୋଷନିଲଯେ ଚ ॥ ୯୪ ॥
ହନ୍ତ କଦା ଵା ମାତସ୍ତଵ ଲୋଚନସେଚନଂ ଭଵେନ୍ମଯି ଭୋଃ ।
ଈତ୍ଥଂ ପ୍ରାତଃ ସ୍ତୁଵତାଂ ତ୍ଵମେଵ ରକ୍ଷାକରୀ ନିଯତମ୍ ॥ ୯୫ ॥
ସଂସାରରୋଗଶାନ୍ତିପ୍ରଦମେତଲ୍ଲୋଚନଂ ମାତଃ ।
ତାଵତ୍କମହମୁପାସେ ଦିଵ୍ଯୌଷଧମାଶୁ ସାଗରେନ୍ଦ୍ରସୁତେ ॥ ୯୬ ॥
ସଂସୃତିରୋଗାର୍ତାନାଂ ତଵ ନାମସ୍ମରଣମତ୍ର ଧରଣିତଲେ ।
ପୂଜାପ୍ରଦକ୍ଷିଣାଦିକମାର୍ଯା ମୁଖ୍ଯୌଷଧଂ ଵଦନ୍ତି କିଲ ॥ ୯୭ ॥
ମାତର୍ଵିନା ଧରଣ୍ଯାଂ ସୁକୃତାନାଂ ଖଣ୍ଡମିହ ଜନ୍ତୁଃ ।
ଧ୍ଯାନଂ ଵା ନ ହି ଲଭତେ ପ୍ରଣତିଂ ଵା ସଂପଦାଂ ଜନନୀମ୍ ॥ ୯୮ ॥
ଗୁରୁଵରକଟାକ୍ଷଵିଭଵାଦ୍ ଦେଵି ତ୍ଵାଙ୍ଘ୍ରିପ୍ରଣାମଧୁତପାପଃ ।
ତଵ ଚ ହରେର୍ଦାସଃ ସନ୍ ଵିଶାମି ଦେଵେଶ ମାନିତାଂ ଚ ସଭାମ୍ ॥ ୯୯ ॥
ମୁରହରନେତ୍ରମହୋତ୍ସଵତାରୁଣ୍ଯଶ୍ରୀର୍ନିରସ୍ତନତଶତ୍ରୁଃ ।
ଲଲିତଲିକୁଚାଭକୁଚଭରଯୁଗଲା ଦୃଗ୍ଵିଜିତହରିଣସଂଦୋହା ॥ ୧୦୦ ॥
କାରୁଣ୍ଯପୂର୍ଣନଯନା କଲିକଲ୍ମଷହାରିଣୀ ଚ ସା କମଲା ।
ମୁଖଜିତଶାରଦକମଲା ଵକ୍ତ୍ରାମ୍ଭୋଜେ ସଦା ସ୍ଫୁରତୁ ମାତା ॥ ୧୦୧ ॥
ତାଵକକଟାକ୍ଷସେଚନଵିଭଵାଂ ନିର୍ଧୂତଦୁରିତସଂଘା ହି ।
ପରମଂ ସୁଖଂ ଲଭନ୍ତେ ପରେ ତୁ ଲୋକେ ଚ ସୂରିଭିଃ ସାର୍ଧମ୍ ॥ ୧୦୨ ॥
ତଵ ପାଦପଦ୍ମଵିସୃମରକାନ୍ତିଝରୀଂ ମନସି କଲଯଂସ୍ତୁ ।
ନିରସିତନରକାଦିଭଯୋ ଵିରାଜତେ ନାକିସଦସି ସୁରଵନ୍ଦ୍ଯଃ ॥ ୧୦୩ ॥
ହନ୍ତ ସହସ୍ରେଷ୍ଵଥ ଵା ଶତେଷୁ ସୁକୃତୀ ପୁମାନ୍ ମାତଃ ।
ତାଵକପାଦପଯୋରୁହଵରିଵସ୍ଯାଂ କଲଯତେ ସକଲମ୍ ॥ ୧୦୪ ॥
ଜନନି ତରଙ୍ଗଯ ନଯନେ ମଯି ଦୀନେ ତେ ଦଯାସ୍ନିଗ୍ଧେ ।
ତେନ ଵଯଂ ତୁ କୃତାର୍ଥା ନାତଃ ପରମସ୍ତିଃ ନଃ ପ୍ରାର୍ଥ୍ଯମ୍ ॥ ୧୦୫ ॥
ତାଵକକୃପାଵଶାଦିହ ନାନାଯୋଗାଦିନାଶିତଭଯା ଯେ ।
ତେଷାଂ ସ୍ମରଣମପି ଦ୍ରାକ୍ ଶ୍ରିଯାଵହଂ ନିତ୍ଯମାକଲଯେ ॥ ୧୦୬ ॥
ନୈଵ ପ୍ରାଯଶ୍ଚିତ୍ତଂ ଦୁରିତାନାଂ ମାମକାନାଂ ହି ।
ତ୍ଵାମେଵ ଯାମି ଶରଣଂ ତସ୍ମାଲ୍ଲକ୍ଷ୍ମି କ୍ଷମାଧାରେ ॥ ୧୦୭ ॥
ମୁରଵୈରିମାନ୍ଯଚରିତେ ମାତସ୍ତ୍ଵାମଖିଲଲୋକସାମ୍ରାଜ୍ଯେ ।
ପଶ୍ଯନ୍ତି ଦିଵି ସୁରେନ୍ଦ୍ରା ମୁନଯସ୍ତତ୍ତ୍ଵାର୍ଥିନଶ୍ଚ ନିତ୍ଯକଲାମ୍ ॥ ୧୦୮ ॥
ସ୍ଵୀଯପଦପ୍ରାପ୍ତ୍ଯୈ ନନୁ ଵିବୁଧେଶା ଜଲଧିକନ୍ଯକେ ମାତଃ ।
ଆରାଧ୍ଯ ଦିଵ୍ଯକୁସୁମୈସ୍ତଵ ପାଦାବ୍ଜଂ ପରଂ ତୁଷ୍ଟାଃ ॥ ୧୦୯ ॥
ସୃଷ୍ଟିସ୍ଥିତ୍ଯାଦୌ ହରିରମ୍ବ ତଵାପାଙ୍ଗଵୀକ୍ଷଣାଦରଵାନ୍ ।
ଜଗଦେତଦଵତି କାଲେ ତ୍ଵଂ ଚ ହରିର୍ନଃ କ୍ରମାତ୍ ପିତରୌ ॥ ୧୧୦ ॥
ରାଜ୍ଯସୁଖଲାଭସଂପତ୍ପ୍ରାପ୍ତ୍ଯୈ କ୍ଷିତିପାଶ୍ଚ ଯେ ଚ ଵିପ୍ରାଦ୍ଯାଃ ।
ଗାଙ୍ଗଜଲୈରପି କୁସୁମୈର୍ଵରିଵସ୍ଯାଂ ତେ କ୍ରମେଣ କଲଯନ୍ତି ॥ ୧୧୧ ॥
ସଂତ୍ଯକ୍ତକାମତଦନୁଜଡମ୍ଭାସୂଯାଦଯୋ ନରାଃ କମଲେ ।
ଆରାଧ୍ଯ ତ୍ଵାଂ ଚ ହରିଂ କାଲେ ଚୈକାସନସ୍ଥିତାଂ ଧନ୍ଯାଃ ॥ ୧୧୨ ॥
ଜନନୀ କଦା ପୁନୀତେ ମମ ଲୋଚନମାର୍ଗମାଦରାଦେଷା ।
ଯେ କିଲ ଵଦନ୍ତି ଧନ୍ଯାସ୍ତେଷାଂ ଦର୍ଶନମହଂ କଲଯେ ॥ ୧୧୩ ॥
କରଧୃତଲୀଲାପଦ୍ମା ପଦ୍ମା ପଦ୍ମାକ୍ଷଗେହିନୀ ନଯନେ ।
ସିଞ୍ଚତି ସକଲଶ୍ରେଯଃପ୍ରାପ୍ତ୍ଯୈ ନିର୍ଵ୍ଯାଜକାରୁଣ୍ଯା ॥ ୧୧୪ ॥
ନାନାଵିଧଵିଦ୍ଯାନାଂ ଲୀଲାସଦନଂ ସରୋଜନିଲଯେଯମ୍ ।
କଵିକୁଲଵଚଃପଯୋଜଦ୍ଯୁମଣିରୁଚିର୍ଭାତି ନଃ ପୁରତ୍ଃ ॥ ୧୧୫ ॥
ଅତସୀକୁସୁମଦ୍ଯୁତିଭାଙ୍ ନାକିଗଣୈର୍ଵନ୍ଦ୍ଯପାଦପଦ୍ମଯୁଗା ।
ସରସିଜନିଲଯା ସା ମେ ପ୍ରସୀଦତୁ କ୍ଷିପ୍ରମାଦରାତ୍ ସିଦ୍ଧ୍ଯୈ ॥ ୧୧୬ ॥
ଜଗଦୀଶଵଲ୍ଲଭେ ତ୍ଵଯି ଵିନ୍ଯସ୍ତଭରଃ ପୁମାନ୍ ସହସା ।
ତୀର୍ତ୍ଵା ନାକିସ୍ଥାନଂ ଵିଶତି ପରଂ ଵୈଷ୍ଣଵଂ ସୁରୈର୍ମାନ୍ଯମ୍ ॥ ୧୧୭ ॥
ମାତର୍ଜ୍ଞାନଵିକାସଂ କାରଯ କରୁଣାଵଲୋକନୈର୍ମଧୁରୈଃ ।
ତେନାହଂ ଧନ୍ଯତମୋ ଭଵେଯମାର୍ଯାଵୃତେ ସଦସି ॥ ୧୧୮ ॥
ହରିଵକ୍ଷସି ମଣିଦୀପପ୍ରକାଶଵତ୍ଯାନ୍ଯା ମାତ୍ରା ।
ନିତ୍ଯଂ ଵଯମିହ ଦାସାଃ ଶ୍ରିଯା ସନାଥା ମୁଦା ପରଂ ନୌମଃ ॥ ୧୧୯ ॥
ଵିଦ୍ରାଵଯତୁ ସରୋଜାସନେ ତ୍ଵଦୀଯା କଟାକ୍ଷଧାଟୀ ନଃ ।
ଅଜ୍ଞାନାଙ୍କୁରମୁଦ୍ରାଂ ପୁନରପି ସଂସାରଭୀତିଦାଂ ସହସା ॥ ୧୨୦ ॥
ତାଵକକଟାକ୍ଷସୂର୍ଯୋଦଯେ ମଦୀଯଂ ହୃଦମ୍ଭୋଜମ୍ ।
ଭଜତେ ଵିକାସମଚିରାତ୍ ତମୋଵିନାଶଶ୍ଚ ନିଶ୍ଚିତୋ ଵିବୁଧୈଃ ॥ ୧୨୧ ॥
ଲକ୍ଷ୍ମୀକଟାକ୍ଷଲହରୀ ଲକ୍ଷ୍ମୀଂ ପକ୍ଷ୍ମଲଯତି କ୍ରମାନ୍ନମତାମ୍ ।
ପାଦପଯୋରୁହସେଵା ପରଂ ପଦଂ ଚିତ୍ସୁଖୋଲ୍ଲାସମ୍ ॥ ୧୨୨ ॥
ଚିଦ୍ରୂପା ପରମା ସା କମଲେକ୍ଷଣନାଯିକା ମୁଦେ ଭଜତାମ୍ ।
ଯତ୍ପ୍ରଣଯକୋପକାଲେ ଜଗଦୀଶଃ କିଂକରୋ ଭଵତି ॥ ୧୨୩ ॥
କାଚନ ଦେଵୀ ଵିହରତୁ ମମ ଚିତ୍ତେ ସଂତତଂ ସିଦ୍ଧ୍ଯୈ ।
ଯାପତ୍ଯଂ କଲଶାବ୍ଧେରୁରଗେଶଯସତ୍କଲତ୍ରଂ ଚ ॥ ୧୨୪ ॥
ଅଷ୍ଟସୁ ମହିଷୀଷ୍ଵେକା କମଲା ମୁଖ୍ଯା ହି ନିର୍ଦିଷ୍ଟା ।
ଅନଯୈଵ ସର୍ଵଜଗତାମୁଦଯାଦିସ୍ତନ୍ଯତେ କାଲେ ॥ ୧୨୫ ॥
କୈଵଲ୍ଯାନନ୍ଦକଲାକନ୍ଦମହଂ ସଂତତଂ ଵନ୍ଦେ ।
ତତ୍ତୁ ମୁକୁନ୍ଦକଲତ୍ରଂ ଚିନ୍ତିତଫଲଦାନଦୀକ୍ଷିତଂ କିମପି ॥ ୧୨୬ ॥
ଈକ୍ଷେ କମଲାମେନାମମ୍ବାମମ୍ଭୋଜଲୋଚନାଂ ସତତମ୍ ।
ମନ୍ଦସ୍ମିତମଧୁରାସ୍ଯାଂ ନିତ୍ଯଂ ଚାଜ୍ଞାତକୋପମୁଖଦୋଷାମ୍ ॥ ୧୨୭ ॥
ଅଙ୍କିତମାଧଵଵକ୍ଷଃସ୍ଥଲା ସରୋଜେକ୍ଷଣା ଚ ହରିକାନ୍ତା ।
କବଲଯତି ମାନସଂ ମେ ଦଯାପ୍ରସାରାଦିଭିର୍ନିତ୍ଯମ୍ ॥ ୧୨୮ ॥
ଭୂତ୍ଯୈ ମମ ଭଵତୁ ଦ୍ରାଗଜ୍ଞାନଧ୍ଵଂସିନୀ ନମତାମ୍ ।
ନାଥାନୁରୂପରୂପା ଶ୍ରୁତ୍ଯନ୍ତେଡ୍ଯା ଦଶାଵତାରେଷୁ ॥ ୧୨୯ ॥
ସକଲଜନରକ୍ଷଣେଶୁ ପ୍ରଣିହିତନଯନା ତ୍ରିଲୋକମାତା ନଃ ।
ପୁଷ୍ଣାତି ମଙ୍ଗଲାନାଂ ନିକରଂ ସେଵାକ୍ରମେଣ incomplete ॥ ୧୩୦ ॥
ପଦ୍ମାସନଜନନୀ ମାଂ ପାତୁ ମୁଦା ସୁନ୍ଦରାପାଙ୍ଗୈଃ ।
ସର୍ଵୈଶ୍ଵର୍ଯନିଦାନଂ ଯାମାହୁର୍ଵୈଦିକା ଦୀପ୍ତାମ୍ ॥ ୧୩୧ ॥
ନାନାଲଂକାରଵତୀ ମୁନିମାନସଵାସିନୀ ହରେଃ ପତ୍ନୀ ।
ତ୍ରୈଲୋକ୍ଯଵିନୁତଵିଭଵା ମାଂ ପାଯାଦାପଦାଂ ନିଚଯାତ୍ ॥ ୧୩୨ ॥
ଵିଦ୍ରାଵଯତୁ ଭଯଂ ନଃ ସା କମଲା ଵିଷ୍ଣୁଵଲ୍ଲଭା ମାତା ।
ଅବ୍ଧିଃ ସଂକ୍ଷୁଭିତୋଽଭୂତ୍ ଯଦର୍ଥମାର୍ଯେଣ ରାମେଣ ॥ ୧୩୩ ॥
ଭୂଯୋ ଯଦର୍ଥମିନ୍ଦ୍ରଃ ସୁରତରୁକୁସୁମାର୍ଥିନା ଚ କୃଷ୍ଣେନ ।
ହତଗର୍ଵୋଽଜନି ଯୁଦ୍ଧେ ସା ନିତ୍ଯଂ ଶ୍ରେଯସେ ଭୂଯାତ୍ ॥ ୧୩୪ ॥
ତ୍ଵାମାରାଧ୍ଯ ଜନା ଅପି ଧନହୀନାଃ ସୌଧମଧ୍ଯତଲଭାଜଃ ।
ନାନାଦେଶଵନୀପକଜନସ୍ତୁତା ଭାନ୍ତି ନିତ୍ଯମେଵ ରମେ ॥ ୧୩୫ ॥
ସଂସୃତିତାପୋ ନ ଭଵତି ପୁନରପି ଯତ୍ପାଦପଙ୍କଜଂ ନମତାମ୍ ।
ସା ମଯି କଲିତଦଯା ସ୍ଯାଦମ୍ବା ଵିଷ୍ଣୋଃ କଲତ୍ରମନୁରୂପମ୍ ॥ ୧୩୬ ॥
ଜନନୀକଟାକ୍ଷଭାଜାମିହ ମର୍ତ୍ଯାନାଂ ସୁରାସ୍ତୁ କିଂକରତାମ୍ ।
ରିପଵୋ ଗିରିତଟଵାସଂ ଭଜନ୍ତି ଵେଶ୍ମାନି ସିଦ୍ଧଯଃ ସର୍ଵାଃ ॥ ୧୩୭ ॥
ସ୍ମରଣାଦ୍ଵା ଭଜନାଦ୍ଵା ଯସ୍ଯାଃ ପାଦାମ୍ବୁଜସ୍ଯ ଭୁଵି ଧନ୍ଯାଃ ।
ହନ୍ତ ରମନ୍ତେ ସ୍ତମ୍ବେରମନିଵହାଵୃତଗୃହାଙ୍ଗଣେ ମନୁଜାଃ ॥ ୧୩୮ ॥
ଚିରକୃତସୁକୃତନିଷେଵ୍ଯା ସା ଦେଵୀ ଵିଷ୍ଣୁଵଲ୍ଲଭା ଖ୍ଯାତା ।
ଯସ୍ଯାଃ ପ୍ରସାଦଭୂମ୍ନା ଜାତାଃ ପଶ୍ଵାଦଯୋ ଵଦାନ୍ଯା ହି ॥ ୧୩୯ ॥
ଅମ୍ବ ମଧୁରାନ୍ କଟାକ୍ଷାନ୍ ତାପହରାନ୍ ଵିକିର ମଯି କୃପାଜଲଧେ ।
ଯେ ଵିନ୍ଯସ୍ତାଃ କରିଵରମାରୁତିମୁଖଭକ୍ତଵର୍ଯେଷୁ ॥ ୧୪୦ ॥
ଅମୃତଲହରୀଵ ମଧୁରା ଜଲଧରରୁଚିରା ନତାର୍ତିହରଶୀଲା ।
ସର୍ଵଶ୍ରେଯୋଦାତ୍ରୀ କାଚିଦ୍ ଦେଵୀ ସଦା ଵିଭାତୁ ହୃଦି ॥ ୧୪୧ ॥
ଗୀତାଚାର୍ଯପୁରନ୍ଧ୍ରୀ ତ୍ଵଦୀଯନାମପ୍ରଭାଵକଲନାଦ୍ଯୈଃ ।
ଯମଭଯଵାର୍ତା ଦୂରେ ହରିସାଂନିଧ୍ଯଂ କୁତୋ ନ ସ୍ଯାତ୍ ॥ ୧୪୨ ॥
ଜଲନିଧିତନଯେ କାନ୍ତେ ଵିଷ୍ଣୋରୁଷ୍ଣାଂଶୁଚନ୍ଦ୍ରନଯନେ ତେ ।
ଚତୁରାନନାଦଯସ୍ତୁ ଖ୍ଯାତା ବାଲାଃ ଶ୍ରୁତୌ ଚୋକ୍ତାଃ ॥ ୧୪୩ ॥
ମନସିଜଵୈରଂ ଗାତ୍ରଂ ଵାଣୀ ସୌଧାରସୀ ଚ ଯଦ୍ଭଜତାମ୍ ।
ଶ୍ଲାଧ୍ଯା ସଂପତ୍ ସଜ୍ଜନସମାଗମଶ୍ଚାଶୁ ସିଧ୍ଯନ୍ତି ॥ ୧୪୪ ॥
ସଫଲଯତୁ ନେତ୍ରଯୁଗଲଂ ହତନତଦୁରିତା ଚ ସା ପରା ଦେଵୀ ।
ଜଲନିଧିକନ୍ଯା ମାନ୍ଯା ପତ୍ଯଵତାରାନୁକୂଲନିଜଚରିତା ॥ ୧୪୫ ॥
ନିତ୍ଯଂ ସ୍ମରାମି ଦେଵୀଂ ନମତାଂ ସର୍ଵାର୍ଥଦାଯିନୀଂ କମଲାମ୍ ।
ଯାମାହୁର୍ଭଵନିଗଲଧ୍ଵଂସନଦୀକ୍ଷାଂ ଚ incomplete ॥ ୧୪୬ ॥=୨୦
ସକଲଜଗଦଘନିଵାରଣସଂକଲ୍ପାଂ ମଧୁଜିତୋ ଦଯିତାମ୍ ।
ଜୀଵାତୁମେଵ କଲଯେ ମୋକ୍ଷାର୍ଥିଜନସ୍ଯ ଭୂମିସୁତାମ୍ ॥ ୧୪୭ ॥
ମନ୍ଦାନାମପି ଦଯଯା ତମୋନିରାସଂ ଵିତନ୍ଵନ୍ତୀ ।
ସର୍ଵତ୍ର ଭାତି କମଲା ତନୁରିଵ ଵିଷ୍ଣୋର୍ନିରସ୍ତାଘା ॥ ୧୪୮ ॥
ବାଲମରାଲୀଗତ୍ଯୈ ସୁରପୁରକନ୍ଯାଦିମହିତକଲଗୀତ୍ଯୈ ।
ଵିରଚିତନାନାନୀତ୍ଯୈ ଚେତୋ ମେ ସ୍ପୃହଯତେ ବହୁଲକୀର୍ତ୍ଯୈ ॥ ୧୪୯ ॥
ଅଭିଲଷିତଦାନକୁଶଲା ଵାଗ୍ଦେଵୀଵନ୍ଦିତା ଚ ସା କମଲା ।
ନିତ୍ଯଂ ମାନସପଦ୍ମେ ସଂଚାରଂ କଲଯତେ ମୁହୁଃ କୁତୁକାତ୍ ॥ ୧୫୦ ॥
ମୁରମଥନନଯନପଙ୍କଜଵିଲାସକଲିକା ସୁରେଶମୁଖସେଵ୍ଯା ।
ଭୂତମଯୀ ସାଵିତ୍ରୀ ଗଯତ୍ରୀ ସର୍ଵଦେଵତା ଜଯତି ॥ ୧୫୧ ॥
ସା ହି ପରା ଵିଦ୍ଯା ମେ ଲକ୍ଷ୍ମୀରକ୍ଷୋଭଣୀଯକୀର୍ତିକଲା ।
ହୃଦ୍ଯାଂ ଵିଦ୍ଯାଂ ଦଯାଦଦ୍ଯ ଶ୍ରେଯଃପରଂପରାସିଦ୍ଧ୍ଯୈ ॥ ୧୫୨ ॥
କାମଜନନୀ ହି ଲକ୍ଷ୍ମୀଃ ନାନାଲୀଲାଦିଭିର୍ନିଜଂ ନାଥମ୍ ।
ମୋହଯତି ଵିଷ୍ଣୁମଚିରାତ୍ ପ୍ରକୃତୀନାଂ କ୍ଷେମସିଦ୍ଧ୍ଯର୍ଥମ୍ ॥ ୧୫୩ ॥
ମନସିଜସାମ୍ରାଜ୍ଯକଲାନିଦାନମାର୍ଯାଭିଵନ୍ଦିତଂ କିମପି ।
ଲକ୍ଷ୍ମୀରୂପଂ ତେଜୋ ଵିଲସତି ମମ ମନସି ଵିଷ୍ଣୁସଂକ୍ରାନ୍ତମ୍ ॥ ୧୫୪ ॥
ଵିଷ୍ଣୁମନୋରଥପାତ୍ରଂ ସଂତପ୍ତସ୍ଵର୍ଣକାମ୍ଯନିଜଗାତ୍ରମ୍ ।
ଆଶ୍ରିତଜଲନିଧିଗୋତ୍ରଂ ରକ୍ଷିତନତବାହୁଜଚ୍ଛାତ୍ରମ୍ ॥ ୧୫୫ ॥
କଵିକୁଲଜିହ୍ଵାଲୋଲଂ ମୁରମର୍ଦନକଲିତରମ୍ଯବହୁଲୀଲମ୍ ।
ନିରସିତନତଦୁଷ୍କାଲଂ ଵନ୍ଦେ ତେଜଃ ସଦାଲିନୁତଶୀଲମ୍ ॥ ୧୫୬ ॥
ଆଦିମପୁରୁଷପୁରନ୍ଧ୍ରୀମମ୍ବାମମ୍ଭୋଜଲୋଚନାଂ ଵନ୍ଦେ ।
ଯାଂ ନତ୍ଵା ଗତତାପାସ୍ତ୍ଯକ୍ତ୍ଵା ଦେହଂ ଵିଶନ୍ତି ପରମପଦମ୍ ॥ ୧୫୭ ॥
ଲକ୍ଷ୍ମ୍ଯା ହରିରପି ଭାତି ପ୍ରକୃତିକ୍ଷେମାଯ ଦୀକ୍ଷିତାଯାସୌ ।
ମମ ଲୋଚନଯୋଃ ପୁରତୋ ଲସତୁ ଗଭୀରଂ କ୍ରିଯାସିଦ୍ଧ୍ଯୈ ॥ ୧୫୮ ॥
ଜନନି କଦା ଵା ନେଷ୍ଯାମ୍ଯହମାରାଦର୍ଚିତତ୍ଵଦୀଯପଦଃ ।
ନିମିଷମିଵ ହନ୍ତ ଦିଵସନ୍ ଦୃଷ୍ଟ୍ଵା ତ୍ଵାମାଦରେଣ କଲ୍ଯାଣୀମ୍ ॥ ୧୫୯ ॥
ସଂପୂର୍ଣଯୌଵନୋଜ୍ଜ୍ଵଲଦେହାଂ ଯାଂ ଵୀକ୍ଷ୍ଯ ଶୌରିରପି ।
କୁସୁମଶରଵିଦ୍ଧଚେତାଃ କିଂକରଭାଵଂ ସ୍ଵଯଂ ପ୍ରାପ୍ତଃ ॥ ୧୬୦ ॥
ଅନୁନଯଶୀଲସ୍ତଦନୁ ପ୍ରଣଯକ୍ରୋଧାଦିନା ଭୀତଃ ।
ଆଦିମପୁରୁଷଃ ସୋଽଯଂ ସା ଲକ୍ଷ୍ମୀର୍ନ ଶ୍ରିଯୈ ଭଵତୁ ॥ ୧୬୧ ॥
ମଣିକୁଣ୍ଡଲଲସିତାସ୍ଯଂ କୃପାକରଂ କିମପି କୁଙ୍କୁମଚ୍ଛାଯମ୍ ।
ହରିଣା କୃତସଂଚାରଂ ତେଜୋ ମେ ଭାତୁ ସର୍ଵଦା ସିଦ୍ଧ୍ଯୈ ॥ ୧୬୨ ॥
ସାମ୍ରାଜ୍ଯମଙ୍ଗଲଶ୍ରୀଃ ଶ୍ରୀରେଷା ପୁଷ୍କରାକ୍ଷସ୍ଯ ।
ଗନ୍ଧର୍ଵକନ୍ଯକାଦ୍ଯୈର୍ଗଙ୍ଗାତୀରେଷୁ ଗୀତକୀର୍ତିର୍ହି ॥ ୧୬୩ ॥
କଵିତାଭାଗ୍ଯଵିଧାତ୍ରୀ ପରିମଲସଂକ୍ରାନ୍ତମଧୁପଗଣକେଶା ।
ମମ ନଯନଯୋଃ କଦା ଵା ସା ଦେଵୀ କଲିତସଂନିଧାନକଲା ॥ ୧୬୪ ॥
କୀର୍ତିଃ ସ୍ଵଯଂ ଵୃଣୀତେ ଵାଗ୍ଦେଵୀ ଚାପି ଵିଜଯଲକ୍ଷ୍ମୀଶ୍ଚ ।
ତଂ ନରମଚିରାଲ୍ଲୋକେ ଯୋ ଲକ୍ଷ୍ମୀପାଦଭକ୍ତସ୍ତୁ ॥ ୧୬୫ ॥
ସନ୍ମିତ୍ରଂ ପାଣ୍ଡିତ୍ଯଂ ସଦ୍ଦାରାଃ ସତ୍ସୁତାଦ୍ଯାଶ୍ଚ ।
ଜାଯନ୍ତେ ତସ୍ଯ ଭୁଵି ଶ୍ରୀଭକ୍ତୋ ଯଶ୍ଚ ନିର୍ଦିଷ୍ଟଃ ॥ ୧୬୬ ॥
ପରମାଚାର୍ଯୈର୍ଵିନୁତାଂ ତାମମ୍ବାମାଦରାନ୍ନୌମି ।
ପରମୈଶ୍ଵର୍ଯଂ ଵିଷ୍ଣୋରପି ଯା ଵେଦେଷୁ ନିର୍ଦିଷ୍ଟା ॥ ୧୬୭ ॥
କଵିକୁଲସୂକ୍ତିଶ୍ରେଣୀଶ୍ରଵଣାନନ୍ଦୋଲ୍ଲସଦ୍ଵତଂସସୁମା ।
ସା ଦେଵୀ ମମ ହୃଦଯେ କୃତସାଂନିଧ୍ଯା ଵିରାଜତେ ପରମା ॥ ୧୬୮ ॥
ତାପାର୍ତାସ୍ତୁ ତଟାକଂ ଯଥା ଭଜନ୍ତେ ରମାଂ ଦେଵୀମ୍ ।
ସଂସୃତିତପ୍ତାଃ ସର୍ଵେ ଯାନ୍ତି ହି ଶରଣଂ ଶରଣ୍ଯାଂ ତାମ୍ ॥ ୧୬୯ ॥
ସର୍ଵଜ୍ଞତ୍ଵଂ ଶ୍ଲାଧ୍ଯଂ ଧରାଧିପତ୍ଯଂ ରମେ ଦେଵି ।
ଯଦ୍ଯତ୍ ପ୍ରାର୍ଥ୍ଯଂ ଦଯଯା ତଦ୍ ଦିଶ ମୋକ୍ଷଂ ଚ ମେ ଜନନି ॥ ୧୭୦ ॥
ଵିଦ୍ଯୁତମଚଞ୍ଚଲାଂ ତ୍ଵାଂ କୃଷ୍ଣେ ମେଘେ ପଯୋଧିଵରକନ୍ଯେ ।
ନିତ୍ଯମଵୈମି ଶ୍ରେଯଃସିଧ୍ଯ ମାତଃ ପ୍ରସନ୍ନେ ନଃ ॥ ୧୭୧ ॥
ତ୍ଵାମମ୍ବ ସଂତତରୁଚିଂ କୃଷ୍ଣୋ ମେଘଃ ସମାସାଦ୍ଯ ।
ସଦ୍ଵର୍ତ୍ମନି ଵର୍ଷତି କିଲ କାଙ୍କ୍ଷାଧିକମାଦରେଣ ଵାର୍ଧିସୁତେ ॥ ୧୭୨ ॥
ଅମ୍ବ ତ୍ଵମେଵ କାଲେ ମୁକୁନ୍ଦମପି ଦର୍ଶଯନ୍ତୀହ ।
ଶ୍ରେଯଃସିଦ୍ଧ୍ଯୈ ନମତାଂ ଭାସି ହୃଦି ଶ୍ରୁତିଶିରଃସୁ ସଲ୍ଲୋକେ ॥ ୧୭୩ ॥
ଵିନମଦମରେଶସୁଦତୀକଚସୁମମକରନ୍ଦଧାରଯା ସ୍ନିଗ୍ଧମ୍ ।
ତଵ ପାଦପଦ୍ମମେତତ୍ କଦା ନୁ ମମ ମୂର୍ଧ୍ନି ଭୂଷଣଂ ଜନନି ॥ ୧୭୪ ॥
ଅପଵର୍ଗସୌଖ୍ଯଦେ ତେ ଦଯାପ୍ରସାରଃ କଥଂ ଵର୍ଣ୍ଯଃ ।
ଯାମଵଲମ୍ବ୍ଯ ହି ଯଷ୍ଟିଂ ନ ପତତି ସଂସାରପଙ୍କିଲେ ମାର୍ଗେ ॥ ୧୭୫ ॥
ସୂକ୍ଷ୍ମାତ୍ ସୂକ୍ଷ୍ମତରଂ ତେ ରୂପଂ ପଶ୍ଯନ୍ତି ଯୋଗିନୋ ହୃଦଯେ ।
ତାଂ ତ୍ଵାମହଂ କଦା ଵା ଦ୍ରକ୍ଷ୍ଯେଽଲଂକାରମଣ୍ଡିତାଂ ମାତଃ ॥ ୧୭୬ ॥
ଚିରତରତପସା କ୍ଲିଷ୍ଟେ ଯୋଗିହୃଦି ସ୍ଥାନଭାଗ୍ ରମା ଦେଵୀ ।
ଦର୍ଶନମଚିରାଦ୍ ଦଯଯା ଦଦାତି ଯୋଗାଦିହୀନାନାମ୍ ॥ ୧୭୭ ॥
ତୀରଂ ସଂସୃତିଜଲଧେଃ ପୂରଂ କମଲାକ୍ଷଲୋଚନପ୍ରୀତେଃ ।
ସାରଂ ନିଗମାନ୍ତାନାଂ ଦୂରଂ ଦୁର୍ଜନତତେର୍ହି ତତ୍ତେଜଃ ॥ ୧୭୮ ॥
ଲକ୍ଷ୍ମୀରୂପଂ ତେଜୋ ମମାଵିରସ୍ତୁ ଶ୍ରିଯୈ ନିତ୍ଯମ୍ ।
ଯନ୍ନିତ୍ଯଧର୍ମଦାରାନ୍ ଵିଷ୍ଣୋରମିତୌଜସଃ ପ୍ରାହୁଃ ॥ ୧୭୯ ॥
ଜଲଧିସୁତେ ତ୍ଵଂ ଜନନୀ ସ ଵାସୁଦେଵଃ ପିତା ଚ ନଃ କଥିତଃ ।
ଶରଣଂ ଯୁଵାଂ ପ୍ରପନ୍ନା ନାତୋ ଦୁର୍ଗତିପରିସ୍ଫୂର୍ତିଃ ॥ ୧୮୦ ॥
ହରିନୀଲରତ୍ନଭାସା ପ୍ରକଶିତାତ୍ମା ସମୁଦ୍ରଵରକନ୍ଯା ।
ମଙ୍ଗଲମାତନୁତେଯଂ କଟାକ୍ଷକଲିକାପ୍ରସାରୈସ୍ତୁ ॥ ୧୮୧ ॥
ମଚ୍ଚିତ୍ତମତ୍ତଵାରଣବନ୍ଧନମଧୁନା ତ୍ଵଦୀଯପାଦଯୁଗେ ।
କଲଯାମି ରମେ ମାତର୍ମାଂ ରକ୍ଷ କ୍ଷିପ୍ରମେଵ ସଂସୃତିତଃ ॥ ୧୮୨ ॥
ମୋଚଯ ସଂସୃତିବନ୍ଧଂ କଟାକ୍ଷକଲିକାଙ୍କୁରୈ ରମେ ମାତଃ ।
ନାତଃ ପରମର୍ଥ୍ଯମିହ କ୍ଷମାତଲେ ତ୍ଵଂ ଦଯାମୂର୍ତିଃ ॥ ୧୮୩ ॥
ମଞ୍ଜୁଲକଵିତାସଂତତିବୀଜାଙ୍କୁରଦାଯିସାରସାଲୋକା ।
ଜନନି ତଵାପାଙ୍ଗଶ୍ରୀଃ ଜଯତି ଜଗତ୍ତ୍ରାଣକଲିତଦୀକ୍ଷେଯମ୍ ॥ ୧୮୪ ॥
ଅମ୍ବ ତଵାପାଙ୍ଗଶ୍ରୀରପାଙ୍ଗକେଲୀଶତାନି ଜନଯନ୍ତୀ ।
ମୁରହନ୍ତୁର୍ହୃଦି ଜଯତି ଵ୍ରୀଡାମଦମୋହକାମସାରକରୀ ॥ ୧୮୫ ॥
ବଦ୍ଧମପି ଚିତ୍ତମେତଦ୍ ଯମନିଯମାଦ୍ଯୈଃ ପରିଷ୍କାରୈଃ ।
ଧାଵତି ବଲାଦ୍ ରମେ ତଵ ପାଦାବ୍ଜଂ ଯାମି ଶରଣମହମ୍ ॥ ୧୮୬ ॥
ମତ୍ତଗଜମାନ୍ଯଗମନା ମଧୁରାଲାପା ଚ ମାନ୍ଯଚରିତା ସା ।
ମନ୍ଦସ୍ମେରମୁଖାବ୍ଜା କମଲା ମେ ହୃଦଯସାରସେ ଲସତୁ ॥ ୧୮୭ ॥
ଶାସ୍ତ୍ରସ୍ମରଣଵିହୀନଂ ପାପିନମେନଂ ଜନଂ ରମା ଦେଵୀ ।
ଦଯଯା ରକ୍ଷତି କାଲେ ତସ୍ଯାସ୍ତେନ ପ୍ରଥା ମହତୀ ॥ ୧୮୮ ॥
ମୁଖଵିଜିତଚନ୍ଦ୍ରମଣ୍ଡଲମିଦମମ୍ଭୋରୁହଵିଲୋଚନଂ ତେଜଃ ।
ଧ୍ଯାନେ ଜପେ ଚ ସୁଦୃଶାଂ ଚକାସ୍ତି ହୃଦଯେ କଵୀଶ୍ଵାଣାଂ ଚ ॥ ୧୮୯ ॥
ଅମ୍ବ ଵିଵେକଵିଦୂରଂ ଜନମେନଂ ଶିଶିରଲୋଚନପ୍ରସରୈଃ ।
ଶିଶିରଯ କୃପଯା ଦେଵି ତ୍ଵମେଵ ମାତା ହି ଲୋକସ୍ଯ ॥ ୧୯୦ ॥
କୋପଦୁପେକ୍ଷସେ ଯଦି ମାତର୍ମେ ରକ୍ଷକଃ କଃ ସ୍ଯାତ୍ ।
ମଯି ଦୀନେ କୋ ଲାଭସ୍ତଵ ତୁ ଦଯାଯାଃ ପ୍ରସାରିଣ୍ଯାଃ ॥ ୧୯୧ ॥
ଭଵଚଣ୍ଡକିରଣତପ୍ତଃ ଶ୍ରାନ୍ତୋଽହଂ ଜ୍ଞାନଵାରିଦୂରସ୍ଥଃ ।
ଶିଶିରାମଙ୍ଘ୍ରିଚ୍ଛାଯାଂ ତଵ ମାତର୍ଯାମି ଶରଣମାରାତ୍ତୁ ॥ ୧୯୨ ॥
ମାତରଶୋକୋଲ୍ଲାସଂ ପ୍ରକଟଯ ତଵ କୋମଲକଟାକ୍ଷୈଃ ।
ଯୈର୍ଦୀନା ନରପତଯଃ କଲିତା ଵାରଣଶତାଵୃତେ ଗେହେ ॥ ୧୯୩ ॥
ଜଯତି ରମେ ତଵ ମହତୀ କୃପାଝରୀ ସର୍ଵସଂମାନ୍ଯା ।
କ୍ଷେମଂକରୀ ଯଦେଷା ପ୍ରତିକଲ୍ପଂ ସର୍ଵଜଗତାଂ ଚ ॥ ୧୯୪ ॥
ଅଜ୍ଞାନକୂପକୁହରେ ପତିତଂ ମାଂ ପାହି କମଲେ ତ୍ଵମ୍ ।
ନଗରେ ଵା ଗ୍ରାମେ ଵା ଵନମଧ୍ଯେ ଦିକ୍ଷୁ ରକ୍ଷିଣୀ ତ୍ଵମସି ॥ ୧୯୫ ॥
ତଵ ଚରଣୌ ଶରଣମିତି ବ୍ରୁଵନ୍ନହଂ ମାତରବ୍ଧିତନଯେ ତ୍ଵମ୍ ।
ହରିଣା ସହିତା ଦଯଯା ପ୍ରାହ୍ଯଵିଲମ୍ବେନ ଦୀନଂ ମାମ୍ ॥ ୧୯୬ ॥
ପରିସରନତଵିବୁଧାଲୀକିରୀଟମଣିକାନ୍ତିଵଲ୍ଲରୀଵିସରୈଃ ।
କୃତନୀରାଜନଵିଧି ତେ ମମ ତୁ ଶିରୋଭୂଷଣଂ ହି ପଦଯୁଗଲମ୍ ॥ ୧୯୭ ॥
ମମ ହୃଦଯପଙ୍କଜଵନୀଵିକାସହେତୌ ଦିନାଧିପାଯେତାମ୍ ।
ତଵ ତୁ କଟାକ୍ଷପ୍ରସରଃ ଦୀପାଯେତାଂ ତମୋନିରାକରଣେ ॥ ୧୯୮ ॥
ଯାଵଚ୍ଛରଣଂ ଯାତି କ୍ଷିତିତନଯେ ତ୍ଵାଂ ହି ଜନ୍ତୁରିହ ମୂଢଃ ।
ତାଵତ୍ ତସ୍ଯ ତୁ ରସନାଙ୍ଗଣେ ତୁ ଵାଣୀ ସମାକଲିତନୃତ୍ତା ॥ ୧୯୯ ॥
ପଙ୍କଜନିଲଯେ ତାଵକଚରଣଂ ଶରଣଂ ସମାକଲଯେ ।
ତେନ ହି ସର୍ଵକୃତାନାଂ ଭଵିଷ୍ଯତାଂ ହାନିରେଵ ଦୁରିତାନାମ୍ ॥ ୨୦୦ ॥
ଶ୍ରୁତ୍ଯନ୍ତସେଵିତଂ ତେ ଚରଣସରୋଜଂ ପ୍ରଣମ୍ଯ କିଲ ଜନ୍ତୁଃ ।
ଛତ୍ରୋଲ୍ଲସିତଶିରାଃ ସନ୍ ଵନୀପକାନ୍ ଦାନଵାରିଣା ସିଞ୍ଚନ୍ ॥ ୨୦୧ ॥
ଵିଷ୍ଵକ୍ସେନମୁଖାଦ୍ଯୈଃ ସେଵିତମମ୍ବ ତ୍ଵଦୀଯପାଦଯୁଗମ୍ ।
ଅଵତଂସଯନ୍ତି ସନ୍ତଃ କଲିତାପପ୍ରଶମନାଯାସ୍ତୁ ॥ ୨୦୨ ॥
ଦୁଗ୍ଧୋଦଧିତନଯେ ତ୍ଵାଂ ଦିଶାଗଜେନ୍ଦ୍ରାଃ ସୁଵର୍ଣଘଟତୋଯୈଃ ।
ମଣିମଣ୍ଟପମଧ୍ଯତଲେ ସମଭ୍ଯଷିଞ୍ଚନ୍ ହରିପ୍ରୀତ୍ଯୈ ॥ ୨୦୩ ॥
ଦିଗ୍ଗଜପୁଷ୍ପକରକୁମ୍ଭୈରଭିଷିକ୍ତାଂ ତ୍ଵାଂ ହରିଃ ପ୍ରୀତ୍ଯା ।
ଉଦଵହଦାରାନ୍ମୁନିଗଣମଧ୍ଯେ ସର୍ଵଶ୍ରିଯୋ ମୂଲମ୍ ॥ ୨୦୪ ॥
ଜାତପରାକ୍ରମକଲିକା ଦିଶି ଦିଶି କିଂନରସୁଗୀତନିଜଯଶସଃ ।
ଧନ୍ଯା ଭାନ୍ତି ହି ମନୁଜାଃ ଯଦ୍ଵୀକ୍ଷାଲଵଵିଶେଷତଃ କାଲେ ॥ ୨୦୫ ॥
ନମଦମରୀକଚଭରସୁମମରନ୍ଦଧାରାଭିଷିକ୍ତଂ ତେ ।
ପଦକମଲଯୁଗଲମେତଚ୍ଛ୍ରେଯଃସ୍ଫୂର୍ତ୍ଯୈ ସଦା ଭଵତୁ ॥ ୨୦୬ ॥
ରାଗଦ୍ଵେଷାଦିହତଂ ମାମଵ କମଲେ ହରେଃ କାନ୍ତେ ।
ଦର୍ଶଯ ଦଯଯା କାଲେ ହ୍ଯପଵର୍ଗସ୍ଥାନମାର୍ଗଂ ଚ ॥ ୨୦୭ ॥
ନ ହି ଜାନେ ଵର୍ଣଯିତୁଂ ପରମେ ସ୍ଥନେ ତ୍ଵଦୀଯଵିଭଵମହମ୍ ।
ମୁନଯଶ୍ଚ ସୁରା ଵେଦା ଯତୋ ନିଵୃତ୍ତାଃ କ୍ଷମାତନଯେ ॥ ୨୦୮ ॥
ମନୁଜାଃ କଟାକ୍ଷିତାଃ କିଲ ତଥାମ୍ବଯା ମେଦିନୀପୁତ୍ର୍ଯା ।
ସତ୍ସୁତକଲତ୍ରସହିତାଃ ସୁରଭିଂ କାଲେନ ନିର୍ଵିଶାନ୍ତି ମୁଦା ॥ ୨୦୯ ॥
ଜଲଧୀଶକନ୍ଯକା ସା ଲସତୁ ପୁରୋଽସ୍ମାକମାଦରକୃତଶ୍ରୀଃ ।
ଯତ୍ପ୍ରଣମନାଜ୍ଜନାନାଂ କଵିତୋନ୍ମେଷଃ ସଦୀଡିତେ ଭାତି ॥ ୨୧୦ ॥
ଦୂରିକରୋତୁ ଦୁରିତଂ ତ୍ଵଦ୍ଭକ୍ତିର୍ମାମକଂ କମଲେ ।
ଅହମପି ସୁରେଶସେଵ୍ଯେ ତଵ ସଦସି ଵିଶାମି କୀର୍ତିଗାନପରଃ ॥ ୨୧୧ ॥
ପରମଜ୍ଞାନଵିଧାତ୍ରୀ ତଵ ପାଦପଯୋଜଭକ୍ତିରସ୍ମାକମ୍ ।
କିଂ ଵାଶାସ୍ଯମତୋଽନ୍ଯତ୍ ସମୁଦ୍ରତନଯେ ହରେର୍ଜାଯେ ॥ ୨୧୨ ॥
ଅମ୍ବ କଦା ଵା ଲପ୍ସ୍ଯେ ମଦୀଯପାପାପନୋଦାଯ ।
ତଵ ପାଦକମଲସେଵାମବ୍ଜଭଵାଦ୍ଯୈସ୍ତୁ ସଂପ୍ରାର୍ଥ୍ଯାମ୍ ॥ ୨୧୩ ॥
ମନ୍ଦାନାମପି ମଞ୍ଜୁଲକଵିତ୍ଵରସଦାଯିନୀ ଜନନୀ ।
କାପି କରୁଣାମଯୀ ସା ଲସତୁ ପୁରସ୍ତାତ୍ ସଦାସ୍ମାକମ୍ ॥ ୨୧୪ ॥
ସକଲକଵିଲୋକଵିନୁତେ କମଲେ କମଲାକ୍ଷି ଵଲ୍ଲଭେ ଵିଷ୍ଣୋଃ ।
ତ୍ଵନ୍ନାମାନି ହି କଲଯେ ଵନେ ଜଲେ ଶତ୍ରୁପୀଡାଯାମ୍ ॥ ୨୧୫ ॥
ଦିଵି ଵା ଭୁଵି ଦିକ୍ଷୁ ଜଲେ ଵହ୍ନୌ ଵା ସର୍ଵତଃ କମଲେ ।
ଜନ୍ତୂନାଂ କିଲ ରକ୍ଷା ତ୍ଵଦଧୀନା କୀର୍ତ୍ଯତେ ଵିବୁଧୈଃ ॥ ୨୧୬ ॥
କୁଶଲଵିଧଯେ ତଦସ୍ତୁ ତ୍ରିଵିକ୍ରମାସେଵ୍ଯରମ୍ଯନିଜକେଲି ।
କବଲିତପଦନତଦୈନ୍ଯଂ ତରୁଣାମ୍ବୁଜଲୋଚନଂ ତେଜଃ ॥ ୨୧୭ ॥
ଜନନୀ ସୁଵର୍ଣଵୃଷ୍ଟିପ୍ରଦାଯିନୀ ଭାତି ଵିଷ୍ଣୁଵକ୍ଷଃସ୍ଥା ।
କମଲା କଲିତକ୍ଷେମା ପ୍ରକୃତୀନାଂ ଶୀତଲାପାଙ୍ଗୈଃ ॥ ୨୧୮ ॥
ଜଗତାମାଦିମଜନନୀ ଲସତି କଵେରାତ୍ମଜାପୁଲିନେ ।
କ୍ଷେତ୍ରେଷୂତ୍ତମଜୁଷ୍ଟେଷ୍ଵଯୋନିଜା ଲୋକରକ୍ଷାଯୈ ॥ ୨୧୯ ॥
କୁଚଶୋଭାଜିତଵିଷ୍ଣୁଃ କୁଙ୍କୁମପଙ୍କାଙ୍କିତା କମଲା ।
କାଞ୍ଚ୍ଯାଂ ରାଜତି କାଞ୍ଚୀମଣିଗଣନୀରାଜିତାଙ୍ଘ୍ରିଯୁଗା ॥ ୨୨୦ ॥
ମନ୍ଦାରକୁସୁମମଦହରମନ୍ଦସ୍ମିତମଧୁରଵଦନପଙ୍କରୁହା ।
ହୃଦ୍ଯତମନିତ୍ଯଯୌଵନମଣ୍ଡିତଗାତ୍ରୀ ଵିରାଜତେ କମଲା ॥ ୨୨୧ ॥
କଂସରିପୁଗେହିନୀ ସା ହଂସଗତିର୍ହଂସମାନ୍ଯନିଜଚରିତା ।
ସଂସାରତାପହାନିଂ କଲଯତୁ କାଲେ ରମାସ୍ମାକମ୍ ॥ ୨୨୨ ॥
ମନସିଜଜନନୀ ଜନନୀ ଚାସ୍ମାକମିହାଦରାତ୍ କାଲେ ।
ଶୀତଲଲୋଲାପାଙ୍ଗୈସ୍ତରଙ୍ଗଯତି ଶ୍ରେଯସାଂ ସରିଣମ୍ ॥ ୨୨୩ ॥
ତଵ ମନ୍ଦହାସକଲିକାଂ ଭଜେ ଭୁଜଙ୍ଗେ ଶଯାନଂ ତମ୍ ।
ଯା କଲଯତି ଗତକୋପଂ ବାଲାନାଂ ନଃ କୃତାପରାଧାନାମ୍ ॥ ୨୨୪ ॥
ସା ସାଧଯେଦଭୀଷ୍ଟଂ କମଲା ଶ୍ରୀର୍ଵିଷ୍ଣୁଵକ୍ଷଃସ୍ଥା ।
ଯସ୍ଯାଃ ପଦଵିନ୍ଯାସଃ ଶ୍ରୁତିମୌଲିଷୁ ତନ୍ଯତେ ମହାଲକ୍ଷ୍ମ୍ଯାଃ ॥ ୨୨୫ ॥
ଶାନ୍ତିରସନିତ୍ଯଶେଵଧିମମ୍ବାଂ ସେଵେ ମନୋରଥାଵାପ୍ତ୍ଯୈ ।
ଯାମାରାଧ୍ଯ ସୁରେଶାଃ ସ୍ଵପଦଂ ପ୍ରାପୁର୍ହି ତାଦୃକ୍ଷମ୍ ॥ ୨୨୬ ॥
ଧାତୁରପି ଵେଦଵଚସାଂ ଦୂରେ ଯତ୍ସ୍ଥାନମାମନନ୍ତି ବୁଧାଃ ।
ସାସ୍ତୁ ମୁଦେ ଶ୍ରୀରେଷା ମୁରମର୍ଦନସତ୍କଲତ୍ରମମିତୌଜଃ ॥ ୨୨୭ ॥
ଭଵଦୁଃଖରାଶିଜଲଧେର୍ହଠାତ୍ ତରିତ୍ରୀଂ ପରଂ ଵିଦ୍ମଃ ।
ତାମମ୍ବାଂ କମଲସ୍ଥାଂ ମୁରାରିଵକ୍ଷୋମଣିପ୍ରଦୀପାଂ ଚ ॥ ୨୨୮ ॥
ମୁନିସାର୍ଵଭୌମଵର୍ଣିତମହାଚରିତ୍ରଂ ହରେଃ କଲତ୍ରଂ ତତ୍ ।
ପଥି ମଙ୍ଗଲାଯ ଭଵତୁ ପ୍ରସ୍ଥାନଜୁଷାଂ କୃପାଧାରମ୍ ॥ ୨୨୯ ॥
ଖଣ୍ଡିତଵୈରିଗଣେଯଂ ମଣ୍ଡିତଭକ୍ତା ସୁତାଦ୍ଯୈଶ୍ଚ ।
ଭାସୁରକୀର୍ତିର୍ଜଯତି କ୍ଷୋଣୀସୁରଵନ୍ଦ୍ଯଚରଣାବ୍ଜା ॥ ୨୩୦ ॥
ନତପାଲିନି ମାଂ ପାହି ତ୍ରିଜଗଦ୍ଵନ୍ଦ୍ଯେ ନିଧେହି ମଯି ଦଯଯା ।
ତାଵକକଟାକ୍ଷଲହରୀଃ ଶକ୍ତିମଯେ ସକଲସିଦ୍ଧୀନାମ୍ ॥ ୨୩୧ ॥
ଭଵସାଗରଂ ତିତୀର୍ଷୁସ୍ତଵ ଚରଣାବ୍ଜଂ ମହାସେଯୁମ୍ ।
ମାତଃ କଦା ନୁ ଲପ୍ସ୍ଯେ ଘନତାପୋର୍ମ୍ଯାଦିପୀଡିତୋ ଦୀନଃ ॥ ୨୩୨ ॥
କଵିଵାଗ୍ଵାସନ୍ତୀନାଂ ଵସନ୍ତଲକ୍ଷ୍ମୀର୍ମୁରାରିଦଯିତା ନଃ ।
ପରମାଂ ମୁଦଂ ଵିଧତ୍ତେ କାଲେ କାଲେ ମହାଭୂତ୍ଯୈ ॥ ୨୩୩ ॥
ସୁରହରପରତନ୍ତ୍ରଂ ତଦ୍ ଗତତନ୍ଦ୍ରଂ ଵସ୍ତୁ ନିସ୍ତୁଲମୁପାସେ ।
ତେନୈଵାହଂ ଧନ୍ଯୋ ମଦ୍ଵଂଶ୍ଯା ନିରସିତାତ୍ମତାପଭରାଃ ॥ ୨୩୪ ॥
ତୃଷ୍ଣାଂ ଶମଯତି ଦେଵୀ ରାଘଵଦଯିତା ନତାଲିସୁରଵଲ୍ଲୀ ।
ଇଟ୍ଯାର୍ଯଵଚୋ ଧୈର୍ଯଂ ଜନଯତି କାଲେ ଧରାପୁତ୍ରି ॥ ୨୩୫ ॥
ରଘୁପତିଦଯିତେ ମାତଃ କାକାସୁରରକ୍ଷଣାଦିନା ଲୋକେ ।
ତାଵକକରୁଣାମହିମା ପ୍ରଥିତଃ କିଲ ଭୂତିଦାଯୀ ନଃ ॥ ୨୩୬ ॥
ପ୍ରଚୁରତଦୁରିତପାଲୀସମାଵୃତାନାଂ କଲୌ ହି ତପ୍ତାନାମ୍ ।
ତାଵକଦଯା ହି ମାତଃ ଶରଣଂ ଵରମିତି ସତାଂ ଗଣଃ ସ୍ତୌତି ॥ ୨୩୭ ॥
ଅତ୍ଯନ୍ତଶୀତଲାଂ ତାଂ କଟାକ୍ଷଧାଟୀମୁପାସେଽହମ୍ ।
ତେନ ମମ ତ୍ରିଦଶାନାଂ ନ କୋଽପି ଭେଦୋ ଧରାତନଯେ ॥ ୨୩୮ ॥
ଯୈଃ ସେଵା ସଂକଲିତା ତଵ ପାଦାବ୍ଜେ ଧରାତନଯେ ।
ତେଷାମଜ୍ଞାନଝରୀ ଯାତି ହି ଵିଲଯଂ କ୍ଷଣେନୈଵ ॥ ୨୩୯ ॥
ଜ୍ଞାନାରଵିନ୍ଦଵିଲସନମଚିରାଦସ୍ଯ ସ୍ତୁତୌ ହି କଵିଵର୍ଯାଃ ।
ସଂପଦ୍ ଦିଵ୍ଯା ଚ ତଥା ଵିବୁଧାଵଲିମାନନୀଯାତ୍ର ॥ ୨୪୦ ॥
ମାତସ୍ତଵ ପାଦାବ୍ଜଂ ଯସ୍ଯ ଲଲାଟେ କୃତୋରୁନିଜକାନ୍ତି ।
ତତ୍ପାଦପଦ୍ମମଚିରାଦ୍ ଵିମାନଗା ଦେଵତା ଵହତି ॥ ୨୪୧ ॥
ଆଜ୍ଞାଵଶେନ ଦେଵ୍ଯା ଲସନ୍ତି ଦିଵି ଦେଵତାମାନ୍ଯାଃ ।
ଇନ୍ଦ୍ରାଦ୍ଯାଃ ସ ଚ ଧାତା ଦିକ୍ପାଲାଶ୍ଚାପି ଗନ୍ଧର୍ଵାଃ ॥ ୨୪୨ ॥
କୈଵଲ୍ଯାନନ୍ଦକଲାଦାତ୍ରୀଂ କମଲାମହର୍ନିଶଂ ନୌମି ।
ତେନୈଵ ଜନ୍ମ ସଫଲଂ ତୀର୍ଥାଦିନିଷେଵଣାଦ୍ଯଚ୍ଚ ॥ ୨୪୩ ॥
ଯଚ୍ଚ ହରିପାଦପଙ୍କେରୁହପରିଚରଣାଦିନା ଲୋକେ ।
ତତ୍ ସର୍ଵମାଶୁ ଘଟଯତି ସହସା ମନ୍ଦସ୍ଯ ମେ ମାତା ॥ ୨୪୪ ॥
ନାନାଶ୍ରୁତ୍ଯନ୍ତକଲାପରିମଲପରିଵାହଵାସିତଂ ମାତଃ ।
ତଵ ଚରଣକମଲଯୁଗଲଂ ମମାଵତଂସଃ କ୍ଷଣଂ ଭାତୁ ॥ ୨୪୫ ॥
ନତଦେଵନଗରନାରୀଧମ୍ମିଲ୍ଲଲସତ୍ସୁମାଲିକୃତନାଦାଃ ।
ପ୍ରାତର୍ମୁରଜଵିଲାସଂ କଲଯନ୍ତି ଭୃଶଂ ତଵାଗ୍ରତୋ ଭୃଙ୍ଗାଃ ॥ ୨୪୬ ॥
ପାପପ୍ରଶମନଦୀକ୍ଷାକଲାଧୁରୀଣାଃ ପଯୋଜନିଲଯେ ତେ ।
ମାଂ ଚ ପଵିତ୍ରୀକୁର୍ଯୁଃ ପାଦପରାଗାଃ କୃପାଵଶତଃ ॥ ୨୪୭ ॥
ହନ୍ତ କଦା ଵା ଲପ୍ସ୍ଯେ ତଵାଙ୍ଘ୍ରିଶୁଶ୍ରୂଷଣାସକ୍ତିମ୍ ।
ସହଜାନନ୍ଦଂ ତେନ ହି ପଦଂ କ୍ରମାତ୍ ପ୍ରାପ୍ଯମାଦିଷ୍ଟମ୍ ॥ ୨୪୮ ॥
ନଲିନୀଵିଲାସରୁଚିରାଂ ମଯି ଦେଵି ତ୍ଵତ୍କଟାକ୍ଷଲହରୀଂ ହି ।
କାଲେ ନିଧେହି ଦଯଯା ସ୍ଫୀତା ତେ କୀର୍ତିରାଦୃତା ସର୍ଵୈଃ ॥ ୨୪୯ ॥
ଵିନିହତଦୁରିତସ୍ତୋମା କାପି ମଦୀଯେ ହୃଦମ୍ଭୋଜେ ।
ଲସତୁ ପରଦେଵତାଖ୍ଯା ମାଧଵନେତ୍ରପ୍ରିଯଂକରୀ କଲିକା ॥ ୨୫୦ ॥
ପଞ୍ଚାଯୁଧଗୁରୁମନ୍ତ୍ରଂ କଲନୂପୁରନିନଦମାଦରାତ୍ କମଲେ ।
କଲଯତି ରମାଧଵଗୃହଂ ଯାତୁଂ କାଲେ ତ୍ଵଯି ପ୍ରଵୃତ୍ତାଯାମ୍ ॥ ୨୫୧ ॥
ନତନାକିଲୋକଵନିତାଲଲାଟସିନ୍ଦୂରଶୋଣକାନ୍ତିଭୃତୋଃ ।
କଲଯେ ନମାଂସି କମଲେ ତଵ ପାଦପଯୋଜଯୋର୍ନିତ୍ଯମ୍ ॥ ୨୫୨ ॥
କମଲସୁଷୁମାନିଵାସସ୍ଥାନକଟାକ୍ଷଂ ଚିରାଯ କୃତରକ୍ଷମ୍ ।
ରକ୍ଷୋଗଣଭୀତିକରଂ ତେଜୋ ଭାତି ପ୍ରକାମମିହ ମନସି ॥ ୨୫୩ ॥
ଜ୍ଯୋତ୍ସ୍ନେଵ ଶିଶିରପାତା କଟାକ୍ଷଧାଟୀ ତ୍ଵଦୀଯା ହି ।
ଅମ୍ବ ମୁକୁନ୍ଦ ( ||. incomplete ||. ) କୁରୁତେ ॥ ୨୫୪ ॥
ତାପହରରସଵିଵର୍ଷଂଅଧୃତକୁତୁକା କାପି ନୀଲନଲିନରୁଚିଃ ।
କାଦମ୍ବିନୀ ପୁରସ୍ତଦାସ୍ତାଂ ନଃ ସଂତତଂ ଜନନୀ ॥ ୨୫୫ ॥
ସଫଲଯତୁ ନେତ୍ରଯୁଗଲଂ ମାମକମେତତ୍ ତ୍ଵଦୀଯରୂପମହୋ ।
ଯତ୍ କମଲନେତ୍ରସୁଚରିତପଚେଲିମଂ ଵୈଦିକୀ ଶ୍ରୁତିର୍ବ୍ରୂତେ ॥ ୨୫୬ ॥
ମାଧଵନେତ୍ରପଯୋଜାମୃତଲହରୀ ଭାତି ତାଵକଂ ରୂପମ୍ ।
ଅମ୍ବ ଯୁଵାମାଦ୍ଯୌ ନଃ ପିତରୌ ଵନେ ସୁଖାଵାପ୍ତ୍ଯୈ ॥ ୨୫୭ ॥
ସରସକଵିତାଦିସଂପଦ୍ଵିଲସନମାରାଦୁଶାନ୍ତି କଵିଵର୍ଯାଃ ।
ଯତ୍ପ୍ରୀଣନେନ ସା ମେ ଭଵତୁ ଵିଭୂତ୍ଯୈ ହି ସା କମଲା ॥ ୨୫୮ ॥
ମନସିଜଜଯାଦିକାର୍ଯଂ ଯଦପାଙ୍ଗଲଵାନ୍ନୃଣାଂ ଭଵତି ।
ତତ୍ପଦମାନନ୍ଦକଲଂ ସେଵ୍ଯଂ ଚ ଭଜେ ରମାଂ ଜନନୀମ୍ ॥ ୨୫୯ ॥
ଶିଥିଲତତମଃସମୂହା ଭକ୍ତାନାଂ ସା ରମା ଦେଵୀ ।
ଜନଯତି ଧୈର୍ଯଂ ଚ ହରେଃ କାଲେ ଯା ସର୍ଵଦା ସେଵ୍ଯା ॥ ୨୬୦ ॥
ଯଦ୍ଭ୍ରୂଵିଲାସଵଶତଃ ଶକ୍ତଃ ସୃଷ୍ଟ୍ଯାଦିକଂ କର୍ତୁମ୍ ।
ହରିରପି ଲୋକେ ଖ୍ଯାତଃ ସା ନଃ ଶରଣଂ ଜଗନ୍ମାତା ॥ ୨୬୧ ॥
ନଯନଯୁଗଲୀଂ କଦା ମେ ସିଞ୍ଚତି ଏଵ୍ଯାଃ ପରଂ ରୂପମ୍ ।
ଯଦ୍ଭଜନାନ୍ନ ହି ଲୋକେ ଦୃଷ୍ଟଂ ଶ୍ଲାଧ୍ଯଂ ପରଂ ଵସ୍ତୁ ॥ ୨୬୨ ॥
ସୁଚରିତଫଲଂ ତ୍ଵଦୀଯଂ ରୂପଂ ନଃ କଲିତଭକ୍ତୀନାମ୍ ।
ଅତ ଏଵ ମାମକାନାଂ ପାପାନାଂ ଵିରତିରୂର୍ଜିତା କମଲେ ॥ ୨୬୩ ॥
ସୁକୃତିଵିଭଵାଦୁପାସ୍ଯା କମଲା ସା ସର୍ଵକଲ୍ଯାଣା ।
ହରିଵକ୍ଷସି କୃତଵାସା ରକ୍ଷତି ଲୋକାନହୋରାତ୍ରମ୍ ॥ ୨୬୪ ॥
ସଂଵିଦ୍ରୂପା ହି ହରେଃ କୁଟୁମ୍ବିନୀ ଭାତି ଭକ୍ତହୃଦଯେଷୁ ।
ସର୍ଵଶ୍ରେଯଃପ୍ରାପ୍ତ୍ଯୈ ଯାଂ ଵିଦୁରାର୍ଯା ରମାଂ କମଲାମ୍ ॥ ୨୬୫ ॥
ଵିଷଯଲହରୀପ୍ରଶାନ୍ତ୍ଯୈ କମଲାପାଦାମ୍ବୁଜଂ ନୌମି ।
ପୂର୍ଵଂ ଶୁକାଦିସୁଧିଯୋ ଯଦ୍ଧ୍ଯାନାଦ୍ ଗଲିତଶତ୍ରୁଭଯାଃ ॥ ୨୬୬ ॥
ଲଲିତଗମନଂ ତ୍ଵଦୀଯଂ କଲନୂପୁରନାଦପୂରିତଂ ମାତଃ ।
ନୌମି ପଦାମ୍ବୁଜଯୁଗଲଂ ଭଵତାପନିରାସନାଯାଦ୍ଯ ॥ ୨୬୭ ॥
ଵିରଲୀକରୋତି ତାପଂ କମଲାଯା ମନ୍ଦହାସଝରୀ ।
ଯତ୍ସେଵନେଷୁ ସମୁଦିତକୌତୁକରସନିର୍ଭରୋ ହରିର୍ଜଯତି ॥ ୨୬୮ ॥
ପ୍ରତିଫଲତୁ ସଂତତଂ ମେ ପୁରତୋ ମାତସ୍ତ୍ଵଦୀଯରୂପମିଦମ୍ ।
ଯଦ୍ଦର୍ଶନରସଭୂମ୍ନା ହରିରପି ନାନାସ୍ଵରୂପଭାକ୍ କାଲେ ॥ ୨୬୯ ॥
ଅମ୍ବ ତଵ ଚରଣସେଵାଂ ସଂତତମହମାଦରାତ୍ କଲଯେ ।
ତେନ ମମ ଜନ୍ମ ସଫଲଂ ତ୍ରିଦଶାନାମିଵ ମୁନୀନ୍ଦ୍ରାଣାମ୍ ॥ ୨୭୦ ॥
ଦୁର୍ଵାରଗର୍ଵଦୁର୍ମତିଦୁରର୍ଥନିରସନକଲାନିପୁଣାଃ ।
ତଵ ଚରଣସେଵଯୈଵ ହି କମଲେ ମାତର୍ବୁଧା ଜଗତି ॥ ୨୭୧ ॥
ଆନଦମେତି ମାତସ୍ତଵ ନାମୋଚ୍ଚାରଣେନ ସିନ୍ଧୁଭଵେ ।
ସଂପ୍ରାପ୍ତତ୍ଵଦ୍ରୂପଂ ମମ ମାନସମାତ୍ତଯୋଗକଲମ୍ ॥ ୨୭୨ ॥
ତଵ ଦୃଷ୍ଟିପାତଵିଭଵାତ୍ ସର୍ଵେ ଲୋକେ ଵିଧୂତତାପଭରାଃ ।
ଯାନ୍ତି ମୁଦା ତ୍ରିଦଶୈଃ ସହ ଵିଭାନମାରୁହ୍ଯ ମାତରହୋ ॥ ୨୭୩ ॥
କୋ ଵା ନ ଶ୍ରଯତି ବୁଧଃ ଶ୍ରେଯୋଽର୍ଥୀ ତାମିମାଂ କମଲାମ୍ ।
ଯାଂ ପନ୍ନଗାରିଵାହନସଦ୍ଗର୍ମିଣୀମର୍ଚଯନ୍ତି ସୁରନାଥାଃ ॥ ୨୭୪ ॥
ତାମରଵିନ୍ଦନିଵାସାମମ୍ବାଂ ଶରଣାର୍ଥିନାଂ କଲିତରକ୍ଷାମ୍ ।
ବହୁରୂପେଷ୍ଵଘନିଚଯେଷ୍ଵପି ନିଶ୍ଚିତ୍ଯାତ୍ମନୋ ଧୈର୍ଯମ୍ ॥ ୨୭୫ ॥
କରୁଣାପ୍ରଵାହଝର୍ଯା ଗତପଙ୍କ ଭୂତଲଂ ମାତଃ ।
ସତ୍ଵାଙ୍କୁରାଦିଲସିତଂ ଜଯତି ପଯୋରାଶିକକନ୍ଯକେ କମଲେ ॥ ୨୭୬ ॥
ଵିଧିଶିଵଵାସଵମୁଖ୍ଯୈର୍ଵନ୍ଦ୍ଯପଦାବ୍ଜେ ନମସ୍ତୁଭ୍ଯମ୍ ।
ମାତର୍ଵିଷ୍ଣୋର୍ଦଯିତେ ସର୍ଵଜ୍ଞତ୍ଵଂ ଚ ମେ କଲଯ ॥ ୨୭୭ ॥
ପରଦେଵତେ ପ୍ରସୀଦ ପ୍ରସୀଦ ହରିଵଲ୍ଲଭେ ମାତଃ ।
ତ୍ଵାମାହୁଃ ଶ୍ରୁତଯଃ କିଲ କଲ୍ଯାଣଗୁଣାକରାଂ ନିତ୍ଯାମ୍ ॥ ୨୭୮ ॥
କ୍ଷନ୍ତଵ୍ଯମମ୍ବ ମାମକମଘରାଶିଂ କ୍ଷପଯ ଵୀକ୍ଷଣତଃ ।
ସତ୍ଵୋନ୍ମେଷଂ ଦେହି ପ୍ରିଯେ ହରେର୍ଦାସମପି କୁରୁ ମାମ୍ ॥ ୨୭୯ ॥
ଵାଞ୍ଛିତସିଦ୍ଧିର୍ନ ସ୍ଯାଦ୍ ଯଦି ପାଦାବ୍ଜେ କୃତପ୍ରଣାମାନାମ୍ ।
ହାନିସ୍ତ୍ଵଦୀଯଯଶସାମିତି କେଚିଦ୍ଧୈର୍ଯଵନ୍ତଶ୍ଚ ॥ ୨୮୦ ॥
ସଦସଦନୁଗ୍ରହଦକ୍ଷାଂ ତ୍ଵାଂ ମାତଃ ସଂତତଂ ନୌମି ।
ଗ୍ରହପୀଡା ନୈଵ ଭଵେଦ୍ଯମପୀଡା ଦୂରତଃ କାଲେ ॥ ୨୮୧ ॥
ଵିଦ୍ଯାଃ କଲାଶ୍ଚ କାଲେ କୃପଯା କଲଯ ପ୍ରସୀଦାଶୁ ।
ମାତସ୍ତ୍ଵମେଵ ଜଗତାଂ ସର୍ଵେଷାଂ ରକ୍ଷଣଂ ତ୍ଵଯା କ୍ରିଯତେ ॥ ୨୮୨ ॥
ଉଛେଷ୍ଵପି ନୀଚେଷୁ ପ୍ରକାଶତେ ତୁଲ୍ଯମେଵ ତଵ ରୂପମ୍ ।
ଏତଦ୍ ଦୃଷ୍ଟ୍ଵା ଧୈର୍ଯଂ ଘନାଗସୋଽପ୍ଯମ୍ବ ଜାଯତେ ନନୁ ମେ ॥ ୨୮୩ ॥
କା ଶଙ୍କା ତଵ ଵୈଭଵଜାଲଂ ଵକ୍ତୁଂ ଦିଗନ୍ତରେ ମାତଃ ।
ଵରହାରାଲଂକାରାଂ ସେଵନ୍ତେ ତ୍ଵାଂ ହରିତ୍ପତଯଃ ॥ ୨୮୪ ॥
କମଲାଯାଶ୍ଚ ହରେରପି ସଂଦୃଷ୍ଯଂ ଦିଵ୍ଯଦାଂପତ୍ଯମ୍ ।
ତାଵେଵ ନଃ ପତୀ କିଲ ଜନ୍ମାନ୍ତରପୁଣ୍ଯପରିପାକାତ୍ ॥ ୨୮୫ ॥
ସର୍ଵାସାମୁପନିଷଦାଂ ଵିଦ୍ଯାନାଂ ତ୍ଵଂପରଂ ସ୍ଥାନମ୍ ।
ଅଲ୍ପଧିଯୋ ଵଯମେତେ ତ୍ଵତ୍ସ୍ତୋତ୍ରେ ଭୋଃ କଥଂ ଶକ୍ତାଃ ॥ ୨୮୬ ॥
ସାଷ୍ଟାଙ୍ଗପ୍ରଣତିରିଯଂ ପ୍ରକଲ୍ପିତା ମାତରଦ୍ଯ ତଵ ଚରଣେ ।
ତେନାହଂ ହି କୃତାର୍ଥଃ କିଂ ପ୍ରାର୍ଥ୍ଯଂ ଵସ୍ତ୍ଵତଃ କମଲେ ॥ ୨୮୭ ॥
ସ୍ତୋତ୍ରମିଦଂହି ମଯା ତେ ଚରଣାମ୍ଭୋଜେ ସମର୍ପିତଂ ଭକ୍ତ୍ଯା ।
ତଵ ଚ ଗୁରୋରପି ଵୀକ୍ଷା ତତ୍ର ନିଦାନଂ ପରଂ ନାନ୍ଯତ୍ ॥ ୨୮୮ ॥
ଦେହାନ୍ତେ ନନୁ ମାତର୍ମୋକ୍ଷଂ ତ୍ରିଦଶୈଃ ସମଂ ଦେହି ।
ଅହମପି ସାମ ପଠନ୍ ସନ୍ ତ୍ଵାଂ ଚ ହରିଂ ଯାମି ଶରଣାର୍ଥୀ ॥ ୨୮୯ ॥
ଶୁକଵାଣୀମିଵ ମାତର୍ନିରର୍ଥକାଂ ମଦ୍ଵଚୋଭଙ୍ଗୀମ୍ ।
ଆରାଚ୍ଛୃଣୋଷି ଦଯଯା ତଦେଵ ଚୋତ୍ତମପଦଵ୍ଯକ୍ତ୍ଯୈ ॥ ୨୯୦ ॥
ଵିଦ୍ଯାଂ କଲାଂ ଵରିଷ୍ଠାଂ ଅମ୍ବ ତ୍ଵାଂ ସଂତତଂ ଵନ୍ଦେ ।
ଯା ଵ୍ଯାକରୋଷି କାଲେ ଵିଦ୍ଵଦ୍ଭିର୍ଵେଦତତ୍ତ୍ଵାଦି ॥ ୨୯୧ ॥
ଵୈଦୁଷ୍ଯଂ ଵାଣ୍ଯାଃ ସତ୍ସଂପଜ୍ଝର୍ଯୋ ଯଦୀଯଵୀକ୍ଷଣତଃ ।
ସିଧ୍ଯନ୍ତ୍ଯପି ଦେଵାନାଂ ସା ନଃ ଶରଣଂ ରମା ଦେଵୀ ॥ ୨୯୨ ॥
ଵିପୁଲଂ ଶ୍ରିଯୋ ଵିଲାସଂ ଶ୍ରଦ୍ଧାଂ ଭକ୍ତ୍ଯାଦିକଂ ଦେହି ।
ଅମ୍ବ ପ୍ରସୀଦ କାଲେ ତଵ ପାଦାବ୍ଜୈକସେଵିନାମିହ ନଃ ॥ ୨୯୩ ॥
କେଚିତ୍ ପ୍ରାଞ୍ଚଃ କମଲାଂ ପ୍ରାପ୍ଯ ହି ଶରଣଂ ଵିପତ୍କାଲେ ।
ଝଟିତି ଵିଧୂନିତତାପାଃ ସା ମେ ଦେଵୀ ପ୍ରସନ୍ନାସ୍ତୁ ॥ ୨୯୪ ॥
ମରକତକାନ୍ତିମନୋହରମୂର୍ତିଃ ସୈଷା ରମା ଦେଵୀ ।
ପାତି ସକଲାନି କାଲେ ଜଗନ୍ତି କରୁଣାଵଲୋକାଦ୍ଯୈଃ ॥ ୨୯୫ ॥
ଭାଗୀରଥୀଵ ଵାଣୀ ତଵ ନୁତିରୂପା ଵିରାଜତେ ପରମା ।
ଇହ ମାତର୍ଯଦ୍ଭଜନଂ ସର୍ଵେଷାଂ ସର୍ଵସଂପଦାଂ ହେତୁଃ ॥ ୨୯୬ ॥
କଲଶପଯୋଦଧିତନଯେ ହରିପ୍ରିଯେ ଲକ୍ଷ୍ମି ମାତରମ୍ବେତି ।
ତଵ ନାମାନି ଜପନ୍ ସନ୍ ତ୍ଵଦ୍ଦାସୋଽହଂ ତୁ ମୁକ୍ତଯେ ସିଦ୍ଧଃ ॥ ୨୯୭ ॥
ନିଖିଲଚରାଚରରକ୍ଷାଂ ଵିତନ୍ଵତୀ ଵିଷ୍ଣୁଵଲ୍ଲଭା କମଲା ।
ମମ କୁଲଦୈଵତମେଷା ଜଯତି ସଦାରାଧ୍ଯମାନ୍ଯପାଦକମଲା ॥ ୨୯୮ ॥
ସର୍ଵଜନ୍ନୁତଵିଭଵେ ସଂତତମପି ଵାଞ୍ଛିତପ୍ରଦେ ଦେଵି ।
ଅମ୍ବ ତ୍ଵମେଵ ଶରଣଂ ତେନାହଂ ପ୍ରାପ୍ତସର୍ଵକାର୍ଯାର୍ଥଃ ॥ ୨୯୯ ॥
କମଲେ କଥଂ ନୁ ଵର୍ଣ୍ଯସ୍ତଵ ମହିମା ନିଗମମୌଲିଗଣଵେଦ୍ଯଃ ।
ଇତି ନିଶ୍ଚିତ୍ଯ ପଦାବ୍ଜଂ ତଵ ଵନ୍ଦେ ମୋକ୍ଷକାମୋଽହମ୍ ॥ ୩୦୦ ॥
ତ୍ଵାମମ୍ବ ବାଲିଶୋଽହଂ ତ୍ଵଚମତ୍କାରୈର୍ଗିରାଂ ଗୁମ୍ଭୈଃ ।
ଅଯଥାଯଥକ୍ରମଂ ହି ସ୍ତୁଵନ୍ନପି ପ୍ରାପ୍ତଜନ୍ମସାଫଲ୍ଯଃ ॥ ୩୦୧ ॥
ଇତି ଶ୍ରୀକମଲାତ୍ରିଶତୀ ସମାପ୍ତା
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ତ୍oday
http://sanskritdocuments.org
ଗଙ୍ଗାଧରମଖିଵିରଚିତା ।
ପରମାଭରଣଂ ଵିଷ୍ଣୋର୍ଵକ୍ଷସି ସା ସାଗରେନ୍ଦ୍ରଵରପୁତ୍ରୀ ।
ଯା ମୂର୍ତିର୍ମତୀ କାଲେ କ୍ଷମା ଜନାନାଂ କୃତାପରାଧାନାମ୍ ॥ ୧ ॥
ସା ନଃ ଶ୍ରେଯୋ ଦଦ୍ଯାତ୍ କମଲା କମଲାସନାଦିଜନନୀଂ ଯାମ୍ ।
ସଂପ୍ରାପ୍ଯ ସହଚରୀଂ ହରିରଵତି ଜଗନ୍ତ୍ଯନାକୁଲଂ ସତତମ୍ ॥ ୨ ॥
ନିତ୍ଯଶ୍ରେଯୋଦାନେ ଖ୍ଯାତା ଯା ହରିଗୃହସ୍ଯ ସର୍ଵସ୍ଵମ୍ ।
ଶ୍ରୁତିମୌଲିସ୍ତୁତଵିଭଵା ସା ଭାତୁ ପୁରଃ ସଦାସ୍ମାକମ୍ ॥ ୩ ॥
ଵିଷ୍ଣୁକ୍ରୀଡାଲୋଲା ଵିଖ୍ଯାତା ଦୀନରକ୍ଷଣେ ଲକ୍ଷ୍ମୀଃ ।
ଜନନୀ ନଃ ସ୍ଫୁରତୁ ସଦା ତେନ ଵଯଂ କିଲ କୃତାର୍ଥାଃ ସ୍ମଃ ॥ ୪ ॥
ନିର୍ଵାଣାଙ୍କୁରଜନନୀ କାଲେ ସା ସାର୍ଵଭୌମପଦଦୋଗ୍ଧ୍ରୀ ।
ନିରସତିମୋହସମୂହା ମମ ଦୈଵତମାଦୃତଂ ଗୁରୁଭିଃ ॥ ୫ ॥
ଵିଷ୍ଣୋର୍ଵକ୍ଷସି ଲସିତା ଶୀତମଯୂଖସ୍ଯ ସୋଦରୀ କମଲା ।
କମଲାଯତନଯନା ନଃ ପାତୁ ସଦା ପାପରାଶିଭ୍ଯଃ ॥ ୬ ॥
କଵିପରିଷଦା ଚ ଵେଦୈଃ ନିତ୍ଯଂ ସ୍ତୁତନିଜମହୋଦଯା କମଲା ।
ମନସି ମମ ସଂନିଧତ୍ତାଂ ତ୍ଵମିତାନନ୍ଦାଯ ଲୋକନାଥେନ ॥ ୭ ॥
ଦୁଗ୍ଧୋଦଧିତନଯା ସା ଦୁରିତନିହନ୍ତ୍ରୀ କୃତପ୍ରଣାମାନାମ୍ ।
ଆନନ୍ଦପଦଵିଧାତ୍ରୀ ପତ୍ଯା ସାକଂ ପଦେ ପଦେ ଲୋକେ ॥ ୮ ॥
ମନ୍ମଥଜନନୀ ସା ମାମଵତୁ ସରୋଜା(କ୍ଷ)ଗେହିନୀ କମଲା ।
ଯାମାରାଧ୍ଯ ବୁଧେନ୍ଦ୍ରା ଵିଶନ୍ତି ପରମଂ ତୁ ତତ୍ ପଦଂ ଵିଷ୍ଣୋଃ ॥ ୯ ॥
ସତ୍ସୂକ୍ତିକୃତିଵିଧାତ୍ରୀ ନମତାମମ୍ବା ତ୍ରିଲୋକ୍ଯାସ୍ତୁ ।
ନିତ୍ଯପ୍ରସାଦଭୂମ୍ନା ରକ୍ଷତି ମାମାଦରାତ୍ କମଲା ॥ ୧୦ ॥
ମମ ସୂକ୍ତିରଞ୍ଜଲିପୁଟଃ ପ୍ରଣତିଶ୍ଚାନେକସଂଖ୍ଯାକା ।
କୁତୁକାତ୍ କ୍ଷୀରୋଦସୁତାମମିତାନନ୍ଦାଯ ଗାହତେ କମଲାମ୍ ॥ ୧୧ ॥
ଯା ପାରମାର୍ଥ୍ଯସରଣିଃ ସା କମଲା ନିଶ୍ଚିତା ଵେଦୈଃ ।
ସୈଷା ହି ଜଗନ୍ମାତା ସଂସୃତିତାପାପହନ୍ତ୍ରୀ ଚ ॥ ୧୨ ॥
ମନ୍ଦସ୍ମିତମଧୁରାନନମମନ୍ଦସଂତୋଷଦାଯି ଭଜତାଂ ତତ୍ ।
କମଲାରୂପଂ ତେଜୋ ଵିଭାତୁ ନିତ୍ଯଂ ମଦୀଯହୃତ୍କମଲେ ॥ ୧୩ ॥
କାଲେ କ୍ଷପଯତି କମଲା କଟାକ୍ଷଧାଟ୍ଯା ହି ମାମକଂ ଦୁରିତମ୍ ।
ଅତ ଏଵାଶ୍ରିତରକ୍ଷଣଦୀକ୍ଷେତ୍ଯେଵଂ ଜନୋ ଵଦତି ॥ ୧୪ ॥
ନଵନଵହର୍ମ୍ଯଵିଧାତ୍ରୀ ନାକିକିରୀଟାର୍ଚିତା ଚ ସା ଦେଵୀ ।
ଜ୍ଯୋତିର୍ମଣ୍ଡଲଲସିତା ମୁନିହୃଦଯାବ୍ଜାସନା ଚ ସଦ୍ଗତିଦା ॥ ୧୫ ॥
ସଂଵୀକ୍ଷ୍ଯ ଜଲଧିତନଯାଂ ଭୂଯୋ ଭୂଯଃ ପ୍ରଣମ୍ଯ ଭକ୍ତଗଣଃ ।
ନିରସିତଦୁରିତୌଘଃ ସନ୍ ସ୍ତୌତି ମୁଦା ମୋକ୍ଷସିଦ୍ଧଯେ କମଲାମ୍ ॥ ୧୬ ॥
ରାକାନିଶୀଵ ଦେଵ୍ଯାଂ ଦୃଷ୍ଟାଯାଂ ଭକ୍ତଗଣଵାଣୀ ।
ଭଜତେ ଜଲନିଧିଶୈଲୀଂ ସାଙ୍ଗୋପାଙ୍ଗଂ କୃତାନନ୍ଦା ॥ ୧୭ ॥
ଦୁର୍ଗତିଭୀତ୍ଯା ଖିନ୍ନଃ ସୋଽହଂ ଶରଣଂ ଭଜାମି ତାଂ କମଲାମ୍ ।
ଶରଣାର୍ଥିନାଂ ହି ରକ୍ଷାକୃଦିତି ଖ୍ଯାତା ହି ଯା ଲୋକେ ॥ ୧୮ ॥
ନ ହି କଲଯତେ ହୃଦନ୍ତେ ମନ୍ଦାରଂ କାମଧେନୁଂ ଵା ।
ଯଃ ସେଵତେ ମୁକୁନ୍ଦପ୍ରିଯାଂ ଶ୍ରିଯଂ ନିତ୍ଯଭାଵେନ ॥ ୧୯ ॥
କୈଟଭମର୍ଦନମହିଷୀଂ ମମାଞ୍ଜଲିର୍ଗାହତାଂ କାଲେ ।
ନ ହି ନାଥନୀଯମତ୍ର କ୍ଷମାତଲେ ସା ପ୍ରସନ୍ନାସ୍ତୁ ॥ ୨୦ ॥
ସଂତାପପୀଡିତଂ ମାମଵତୁ ସଦା ଶ୍ରୀର୍ହରିପ୍ରିଯା ମାତା ।
ରକ୍ଷିତଵାଯସମୁଖ୍ଯା କୃପାନିଧିଃ ପୁଣ୍ଯକୃଦ୍ଦୃଶ୍ଯା ॥ ୨୧ ॥
ନ ହି କେଵଲଂ ପ୍ରଣାମୈଃ ସ୍ତୁତ୍ଯା ଭକ୍ତ୍ଯା ସମାରାଧ୍ଯା ।
ସତ୍ଯେନ ଧର୍ମନିଵହୈର୍ଭାଵେନ ଚ କମଲଗେହିନୀ କମଲା ॥ ୨୨ ॥
କଦାଚିତ୍କଵିଲୋକେଽପ୍ଯକ୍ଷୀଣାନନ୍ଦଦାଯିନୀ କମଲା ।
ରକ୍ଷତୁ କଟାକ୍ଷକଲିକାଙ୍କୂରୈର୍ଭକ୍ତାନିହାଦରତଃ ॥ ୨୩ ॥
କଲିପାପଗ୍ଲପିତାନାଂ ମୁରମର୍ଦନଦିଵ୍ଯଗେହିନୀ ଲକ୍ଷ୍ମୀଃ ।
ରାଜତି ଶରଣଂ ପରମଂ ଵଶୀକୃତେଶା ଚ ଵିବୁଧଗଣସେଵ୍ଯା ॥ ୨୪ ॥
ନିତ୍ଯୋଲ୍ଲସଦୁରୁମାଲା ଵକ୍ଷସି କମଲା ହରେର୍ଭାତି ।
ନିଜତନୁଭାସା ଦ୍ଯୋତିତକୌସ୍ତୁଭମଣିରମ୍ବୁଧେସ୍ତନଯା ॥ ୨୫ ॥
ମାତର୍ମଙ୍ଗଲଦାଯିନ୍ଯମରେନ୍ଦ୍ରଵଧୂସମର୍ଚିତାଙ୍ଘ୍ରିଯୁଗେ ।
ମାଂ ପାହ୍ଯପାଯନିଵହାତ୍ ସଂତତମକଲକ୍ଷମାମୂର୍ତେ ॥ ୨୬ ॥
ଯଦି କଲିତା ଚୋପେକ୍ଷା ନଶ୍ଯେତ୍ କିଲ ତାଵକୀ ମହତୀ ।
କୀର୍ତିରତୋଽମ୍ବ କଟାକ୍ଷୈଃ ପରିଷିଞ୍ଚ ମୁଦା ମୁହୁଃ ଶୀତୈଃ ॥ ୨୭ ॥
ଧନଧାନ୍ଯସୁତାଦିରୁଚିଗ୍ରସ୍ତଂ ମାଂ ପାହି କମଲେ ତ୍ଵମ୍ ।
ତେନୋର୍ଜିତକୀର୍ତିଃ ସ୍ଯା ମାତସ୍ତ୍ଵଂ ସର୍ଵରକ୍ଷିଣୀ ଖ୍ଯାତା ॥ ୨୮ ॥
ତଵ ପାଦାମ୍ବୁଜଯୁଗଲଧ୍ଯାନଂ ମାତର୍ମଦୀଯମଘମାଶୁ ।
କବଲୀକରୋତି କାଲେ ତେନାହଂ ସିଦ୍ଧସଂକଲ୍ପଃ ॥ ୨୯ ॥
ଅଞ୍ଜଲିକଲିକା ହି କୃତା ଯଦି ତସ୍ଯୈ ମୁରନିହନ୍ତୃଦଯିତାଯୈ ।
ରସନାଗ୍ରେ ଖେଲନଭାକ୍ ତସ୍ଯ ତୁ ପୁଂସୋ ଗିରାଂ ଦେଵୀ ॥ ୩୦ ॥
ମାତସ୍ତଵ ମୂର୍ତିରିଯଂ ସୁଧାମଯୀ ନିଶ୍ଚିତା ନିପୁଣୈଃ ।
ଯତ୍ ତଦ୍ଦର୍ଶନଭୂମ୍ନା ନିରସ୍ତତାପା ବୁଧା ଭଵନ୍ତ୍ଯଚିରାତ୍ ॥ ୩୧ ॥
କଲିତଜଗତ୍ତ୍ରଯରକ୍ଷାଭରାଣି ମଯି ଦେଵି ସଂଵିଧେହି ମୁଦା ।
ତ୍ଵଦ୍ଵୀକ୍ଷଣାନି କମଲେ ତେନାହଂ ସିଦ୍ଧସଂକଲ୍ପଃ ॥ ୩୨ ॥
ଵରଦେ ମୁରାରିଦଯିତେ ଜଯନ୍ତି ତେ ଵୀକ୍ଷଣାନି ଯାନି ଦିଵି ।
ସଂପ୍ରାପ୍ଯ ତାନି ମଘଵା ଵିଜିତାରିର୍ଦେଵସଂଘଵନ୍ଦ୍ଯଶ୍ଚ ॥ ୩୩ ॥
ମୋହାନ୍ଧକାରଭାସ୍କରମମ୍ବ କଟାକ୍ଷଂ ଵିଧେହି ମଯି କମଲେ ।
ଯେନାପ୍ତଜ୍ଞାନକଲାଃ ସ୍ତୁଵନ୍ତି ଵିବୁଧାସ୍ତ୍ଵଦୀଯସଦସି କଲମ୍ ॥ ୩୪ ॥
କାମକ୍ରୋଧାଦିମହାସତ୍ତ୍ଵନିରାସଂ କୃପାସାରାତ୍ ।
କୁରୁ ମାତର୍ମମ ସଂସୃତିଭୀତିଂ ଚ ନିରାକୁରୁ ତ୍ଵମେଵାରାତ୍ ॥ ୩୫ ॥
ମୂଢାନାମପି ହୃଦ୍ଯାଂ କଵିତାଂ ଦାତୁଂ ଯଦୀଯପରିଚର୍ଯା ।
ପ୍ରଭଵତି କାଲେ ସା ହି ଶ୍ରୀରମ୍ବା ନଃ ପ୍ରସନ୍ନାସ୍ତୁ ॥ ୩୬ ॥
ଦିଵ୍ଯକ୍ଷେତ୍ରେଷୁ ବୁଧା ଦିନକରମଧ୍ଯେ ଚ ଵେଦମୌଲୌ ଚ ।
ଯତ୍ସ୍ଥାନମିତି ଵଦନ୍ତି ଶ୍ରୀରେଷା ଭାତି ସଂଶ୍ରିତହରିର୍ହି ॥ ୩୭ ॥
ନିଜଲୀଲାକ୍ରାନ୍ତହରୀ ରକ୍ଷତି କମଲା କଟାକ୍ଷଧାଟ୍ଯା ନଃ ।
ଶରଣାର୍ଥିନଶ୍ଚ କାଲେ ଵିହଗୋରଗପଶୁମୁଖାନୁର୍ଵ୍ଯାମ୍ ॥ ୩୮ ॥
ସମରାଙ୍ଗଣେଷୁ ଜଯଦା ତ୍ରିଦଶାନାଂ ମୌଲିଭିର୍ମାନ୍ଯା ।
ଆପଦି ରକ୍ଷଣଦକ୍ଷା ସା କମଲା ନଃ ପ୍ରସନ୍ନାସ୍ତୁ ॥ ୩୯ ॥
ନିତ୍ଯାନନ୍ଦାସନଭାଡ୍ ନଵନିଧିଵନ୍ଦ୍ଯା ଚ ସାଗରେନ୍ଦ୍ରସୁତା ।
ଵିଲସତି ମାଧଵଵକ୍ଷସି ପାଲିତଲୋକତ୍ରଯା ଚ ଜନନୀ ନଃ ॥ ୪୦ ॥
ମୁନିନୁତନିଜପରିପାଟୀ ଵାଗ୍ଧାଟୀ ଦାନଲୋଲୁପା ଭଜତାମ୍ ।
ଶିକ୍ଷିତରିପୁଜନକୋଟୀ ଵିଲସତି ଧୃତଶାତକୁମ୍ଭମଯଶାଟୀ ॥ ୪୧ ॥
ନିଖିଲାଗମଵେଦ୍ଯପଦା ନିତ୍ଯଂ ସଦ୍ଭିଃ ସମାରାଧ୍ଯା ।
ସଂସୃତିପାଶନିହନ୍ତ୍ରୀ ଯା ତସ୍ଯୈ ଚାଞ୍ଜଲିଃ କ୍ରିଯତେ ॥ ୪୨ ॥
ଭୂଯାଂସି ନମାଂସି ମଯା ଭକ୍ତେନ କୃତାନି କମଲଜାଙ୍ଘ୍ରିଯୁଗେ ।
ନିତ୍ଯଂ ଲଗନ୍ତୁ ତେନ ହି ସର୍ଵା ରାଜନ୍ତି ସଂପଦୋ ମାନ୍ଯାଃ ॥ ୪୩ ॥
ନିତ୍ଯଂ ନିର୍ମଲରୂପେ ବରଦେ ଵାରାଶିକନ୍ଯକେ ମାତଃ ।
ସଦ୍ଗଣରକ୍ଷଣଦୀକ୍ଷେ ପାହୀତି ଵଦନ୍ତମାଶୁ ମାଂ ପାହି ॥ ୪୪ ॥
ଭୁଵନଜନନି ତ୍ଵମାରାତ୍ କୃତରକ୍ଷଣସଂତତିଃ କ୍ଷମାମୂର୍ତେ ।
ପ୍ରତିଵସ୍ତୁ ରମେ କଲିତସ୍ଵରୂପଶକ୍ତ୍ଯା ହି ରାଜସେ ଜଗତି ॥ ୪୫ ॥
ଜଯ ଜଯ କଲଶାବ୍ଧିସୁତେ ଜଯ ଜଯ ହରିଵଲ୍ଲଭେ ରମେ ମାତଃ ।
ପ୍ରାତରିତି ଵିବୁଧଵର୍ଯାଃ ପଠନ୍ତି ନାମାନି ତେ ହି ମେ ଗୁରଵଃ ॥ ୪୬ ॥
ନେତ୍ରରୁଚିଵିଜିତଶାରଦପଦ୍ମେ ପଦ୍ମେ ନମସ୍ତୁଭ୍ଯମ୍ ।
ତେନ ଵଯଂ ଗତଵିପଦଃ ସା ମୁକ୍ତିଃ କରଗତା କଲିତା ॥ ୪୭ ॥
ସତତଂ ବଦ୍ଧାଞ୍ଜଲିପୁଟମୁପାସ୍ମହେ ତଚ୍ଛୁଭପ୍ରଦଂ ତେଜଃ ।
ଯତ୍ କମଲୋଦରନିଲଯଂ କମଲାକ୍ଷପ୍ରୀତିଵୀଚିକାପୂରମ୍ ॥ ୪୮ ॥
ସ୍ଫୁରତୁ ମମ ଵଚସି କମଲେ ତ୍ଵଦୀଯଵୈଭଵସୁଧାଧାରା ।
ନିତ୍ଯଂ ଵ୍ଯକ୍ତିଂ ପ୍ରାପ୍ତା ଧୁତନୁତଜନଖେଦଜାଲକା ମହତୀ ॥ ୪୯ ॥
କମଲେ ତଵ ନୁତିଵିଷଯେ ବୁଦ୍ଧିର୍ଜାତା ହି ମେ ସହସା ।
ତେନ ମମ ଭାଗଧେଯଂ ପରିଣତମିତ୍ଯେଵ ନିତ୍ଯସଂତୁଷ୍ଟଃ ॥ ୫୦ ॥
କଵିତାରସପରିମଲିତଂ କରୋତି ଵଦନଂ ନତାନାଂ ଯା ।
ସ୍ତୋତୁଂ ତାଂ ମେ ହ୍ଯାରାତ୍ ସା ଦେଵୀ ସୁପ୍ରସନ୍ନାସ୍ତୁ ॥ ୫୧ ॥
ହରିଗୃହିଣି ତାଵକଂ ନୁତରୂପଂ ଯେ ଭୁଵି ନିଜେ ହୃଦମ୍ଭୋଜେ ।
ଧ୍ଯାଯନ୍ତି ତେଷୁ ଵିବୁଧା ଅପି କଲ୍ପକକୁସୁମମର୍ପଯନ୍ତି ମୁଦା ॥ ୫୨ ॥
ନାନାଵରଦାନକଲାଲୋଲୁପହୃଦଯେ ହୃଦମ୍ଭୁଜସ୍ଥେ ମାମ୍ ।
ରକ୍ଷାପାଯାତ୍ ସହସା କୁରୁ ଭକ୍ତଂ ଦୋଷହୀନଂ ଚ ॥ ୫୩ ॥
ନିଜଘନକେଶରୁଚା ଜିତନୀଲାମ୍ବୁଧରେ ଶଶାଙ୍କସହଜନ୍ମନ୍ ।
ପଦ୍ମେ ତ୍ଵଦୀଯରୂପଂ ମନୋହରଂ ଭାତୁ ମେ ହୃଦଯେ ॥ ୫୪ ॥
ଘନକୁଙ୍କୁମଲସିତାଙ୍ଗଂ ମୁକ୍ତାହାରାଦିଭୂଷିତଂ ମଧୁରମ୍ ।
ମନ୍ଦସ୍ମିତମଧୁରାସ୍ଯଂ ସୂର୍ଯେନ୍ଦୁଵିଲୋଚନଂ ଚ ବୁଧମାନ୍ଯମ୍ ॥ ୫୫ ॥
ନିବିଡକୁଚକୁମ୍ଭଯୁଗଲଂ ନିଜଦୃଗ୍ଜିତହରିଣଶାବକାକ୍ଷିଯୁଗମ୍ ।
ଲୀଲାଗତିଜିତକଲଭଂ ମଧୁଵୈରିମନୋହରଂ ଚ ସୁରମାନ୍ଯମ୍ ॥ ୫୬ ॥
ଦିଶି ଦିଶି ଵିସ୍ତୃତସଂପଦ୍ଵିଲାସମଧୁରଂ ଚ କୁନ୍ଦଦନ୍ତାଲି ।
ମଦନଜନକଂ ଚ ଵିଷ୍ଣୋଃ ସର୍ଵସ୍ଵଂ ସର୍ଵଦାନଚଣମ୍ ॥ ୫୭ ॥
କୁଲଦୈଵତମସ୍ମାକଂ ସଂଵିଦ୍ରୂପଂ ନତାର୍ତିହରରୂପମ୍ ।
ନାନାଦୁର୍ଗତିହରଣକ୍ଷମମମରୀସେଵିତଂ ସକଲମ୍ ॥ ୫୮ ॥
ପଞ୍ଚଦଶଵର୍ଣମାନଂ ପଯୋଜଵକ୍ତ୍ରଂ ପିତାମହସମର୍ଚ୍ଯମ୍ ।
ଜଗଦଵନଜାଗରୂକଂ ହରିହରସଂମାନ୍ଯଵୈଭଵଂ କିମପି ॥ ୫୯ ॥
କରୁଣାପୂରିତନଯନଂ ପରମାନନ୍ଦପ୍ରଦଂ ଚ ପରିଶୁଦ୍ଧମ୍ ।
ଆଗମଗଣସଂଵେଦ୍ଯଂ କୋଶଗୃହଂ ସର୍ଵସଂପଦାଂ ନିତ୍ଯମ୍ ॥ ୬୦ ॥
ମାତସ୍ତାଵକପାଦାମ୍ବୁଜଯୁଗଲଂ ସଂତତଂ ସ୍ଫୁରତୁ ।
ତେନାହଂ ତଵ ରୂପଂ ଦ୍ରକ୍ଷ୍ଯାମ୍ଯାନନ୍ଦସିଦ୍ଧଯେ ସକଲମ୍ ॥ ୬୧ ॥
ଦେଵ୍ଯା କଟାକ୍ଷିତାଃ କିଲ ପୁରୁଷା ଵା ଯୋଷିତଃ ପଶଵଃ ।
ମାନ୍ଯନ୍ତେ ସୁରସଂସଦି କଲ୍ପକକୁସୁମୈଃ କୃତାର୍ହଣାଃ କାଲେ ॥ ୬୨ ॥
ସୁମନୋଵାଞ୍ଛାଦାନେ କୃତାଵଧାନଂ ଧନଂ ଵିଷ୍ଣୋଃ ।
ଧିଷଣାଜାଡ୍ଯାଦିହରଂ ଯଦ୍ଵୀକ୍ଷଣମାମନନ୍ତି ଜଗତି ବୁଧାଃ ॥ ୬୩ ॥
ଅନ୍ତରପି ବହିରୁଦାରଂ ତଵ ରୂପଂ ମନ୍ତ୍ରଦେଵତୋପାସ୍ଯମ୍ ।
ଜନନି ସ୍ଫୁରତୁ ସଦା ନଃ ସଂମାନ୍ଯଂ ଶ୍ରେଯସେ କାଲେ ॥ ୬୪ ॥
ମୁରରିପୁପୁଣ୍ଯଶ୍ରେଣୀପରିପାକଂ ତାଵକଂ ରୂପମ୍ ।
କମଲେ ଜନନି ଵିଶୁଦ୍ଧଂ ଦଦ୍ଯାଚ୍ଛ୍ରେଯୋ ମୁହୁର୍ଭଜତାମ୍ ॥ ୬୫ ॥
ପୁଣ୍ଯଶ୍ରେଣୀ କମଲା ସା ଜନନୀ ଭକ୍ତମାନସେ ସ୍ଥିତିଭାକ୍ ।
ତେଜସ୍ତତିଭିର୍ମୋହିତଭୁଵନା ଭୁଵନାଧିନାଥଗୃହିଣୀଯମ୍ ॥ ୬୬ ॥
ଜଲନିଧିକନ୍ଯାରୂପଂ ହରିମାନ୍ଯଂ ସର୍ଵସଂପଦାଂ ହେତୁଃ ।
ଚିରକୃତସୁକୃତଵିଶେଷାନ୍ନଯନଯୁଗେ ଭାତି ସର୍ଵସ୍ଯ ॥ ୬୭ ॥
ଜଲନିଧିତପଃଫଲଂ ଯନ୍ମୁନିଜନହୃଦଯାବ୍ଜନିତ୍ଯକୃତନୃତ୍ତମ୍ ।
କରୁଣାଲୋଲାପାଙ୍ଗଂ ତତ୍ ତେଜୋ ଭାତୁ ନିଃସମଂ ଵଦନେ ॥ ୬୮ ॥
ଶମିତନତଦୁରିତସଂଘା ହରଯେ ନିଜନେତ୍ରକଲ୍ପିତାନଙ୍ଗା ।
କୃତସୁରଶାତ୍ରଵଭଙ୍ଗା ସା ଦେଵୀ ମଙ୍ଗଲୈସ୍ତୁଙ୍ଗା ॥ ୬୯ ॥
ନିଖିଲାଗମସିଦ୍ଧାନ୍ତଂ ହରିଶୁଦ୍ଧାନ୍ତଂ ସଦା ନୌମି ।
ତେନୈଵ ସର୍ଵସିଦ୍ଧିଃ ଶାସ୍ତ୍ରେଷୁ ଵିନିଶ୍ଚିତା ଵିବୁଧୈଃ ॥ ୭୦ ॥
କୃଷ୍ଣକୃତଵିଵିଧଲୀଲଂ ତଵ ରୂପଂ ମାତରାଦରାନ୍ମାନ୍ଯମ୍ ।
ସ୍ଫୁରତୁ ଵିଲୋଚନଯୁଗଲେ ନିତ୍ଯଂ ସଂପତ୍ସମୃଦ୍ଧ୍ଯୈ ନଃ ॥ ୭୧ ॥
କରୁଣାକଟାକ୍ଷଲହରୀ କାମାଯାସ୍ତୁ ପ୍ରକାମକୃତରକ୍ଷା ।
ଲକ୍ଷ୍ମ୍ଯା ମାଧଵମାନ୍ଯା ସତ୍ସୁଖଦାନେ ଦିଶି ଖ୍ଯାତା ॥ ୭୨ ॥
ଅପଵର୍ଗସିଦ୍ଧଯେ ତ୍ଵାମମ୍ବାମମ୍ଭୋଜଲୋଚନାଂ ଲକ୍ଷ୍ମୀମ୍ ।
ଅଵଲମ୍ବେ ହରିଦଯିତେ ପଦ୍ମାସନମୁଖସୁରେନ୍ଦ୍ରକୃତପୂଜାମ୍ ॥ ୭୩ ॥
ତାଵକକଟାକ୍ଷଲହରୀଂ ନିଧେହି ମଯି ଦେଵି କମଲେ ତ୍ଵମ୍ ।
ତେନ ମନୋରଥସିଧ୍ହିର୍ଭୁଵି ପରମେ ଧାମନି ପ୍ରଚୁରା ॥ ୭୪ ॥
ତ୍ଵାମାଦରେଣ ସତତଂ ଵୀକ୍ଷେମହି ମାତରବ୍ଜକୃତଵାସାମ୍ ।
ଵିଷ୍ଣୋର୍ଵକ୍ଷୋନିଲଯାମକ୍ଷଯସୁଖସିଦ୍ଧଯେ ଲୋକେ ॥ ୭୫ ॥
ସା ନଃ ସିଧ୍ଯତୁ ସିଦ୍ଧ୍ଯୈ ଦେଵାନାଂ ଵାଙ୍ମମନୋଽତୀତା ।
ହରିଗୃହିଣୀ ହରିଣାକ୍ଷୀ ପାଲିତଲୋକତ୍ରଯା ଚ ଜନନୀଯମ୍ ॥ ୭୬ ॥
ସକଲଚରାଚରଚିନ୍ମଯରୂପଂ ଯସ୍ଯା ହି ଦେଵତୋପାସ୍ଯମ୍ ।
ସା ଦଦତୁ ମଙ୍ଗଲଂ ମେ ନିତ୍ଯୋଜ୍ଜ୍ଵଲମାଦରାଜ୍ଜନନୀ ॥ ୭୭ ॥
ଶୀତମଯୂଖସହୋଦରି ତାଂ ତ୍ଵାମମ୍ବାଂ ହି ଶୀଲଯେ ନିତ୍ଯମ୍ ।
ନିରସିତଵୈରିଗଣୋଽହଂ ହରିଚରଣନ୍ଯସ୍ତରକ୍ଷଶ୍ଚ ॥ ୭୮ ॥
ଦିକ୍ଷି ଵିଦିକ୍ଷୁ କୃତଶ୍ରୀଃ ସା ମେ ଜନନୀ ନଦୀଶତନଯେଯମ୍ ।
ହରିଣା ସାକଂ ଭଜତୁ ପ୍ରାକାଶ୍ଯଂ ହୃଦି ସତାଂ ସମୃଦ୍ଧ୍ଯୈ ନଃ ॥ ୭୯ ॥
ଵାରିନିଧିଵଂଶସଂପଦ୍ ଦିଵ୍ଯା କାଚିଦ୍ଧରେର୍ମାନ୍ଯା ।
ଅର୍ଚନ୍ତି ଯାଂ ତୁ ମୁନଯୋ ଯୋଗାରମ୍ଭେ ତଥାନ୍ତେ ଚ ॥ ୮୦ ॥
ଧୃତସୁମମଧୁପକ୍ରୀଡାସ୍ଥାନାଯିତକେଶଭାରାଯୈ ।
ନମ ଉକ୍ତିରସ୍ତୁ ମାତ୍ରେ ଵାଗ୍ଜିତପୀଯୂଷଧାରାଯୈ ॥ ୮୧ ॥
ସଂଦେହେ ସିଦ୍ଧାନ୍ତେ ଵାଦେ ଵା ସମରଭୂମିଭାଗେ ଵା ।
ଯା ରାଜତି ବହୁରୂପା ସା ଦେଵୀ ଵିଷ୍ଣୁଵଲ୍ଲଭା ଖ୍ଯାତା ॥ ୮୨ ॥
ପ୍ରତିଫଲତୁ ମେ ସଦା ତନ୍ମୁନିମାନସପେଟିକାରତ୍ନମ୍ ।
ଵିଷ୍ଣୋର୍ଵକ୍ଷୋଭୂଷଣମାଦୃତନିର୍ଗତିଜନାଵନଂ ତେଜଃ ॥ ୮୩ ॥
ବାଲକୁରଙ୍ଗଵିଲୋଚନଧାଟୀରକ୍ଷିତସୁରାଦି ମନୁଜାନାମ୍ ।
ନଯନଯୁଗାସେଵ୍ଯଂ ତଦ୍ ଭାତୀହ ଧରାତଲେ ତେଜଃ ॥ ୮୪ ॥
ମାଧଵଦୃକ୍ସାଫଲ୍ଯଂ ଭକ୍ତାଵଲିଦୃଶ୍ଯକାମଧେନୁକଲା ।
ଲକ୍ଷ୍ମୀରୂପଂ ତେଜୋ ଵିଭାତୁ ମମ ମାନସେ ଵଚସି ॥ ୮୫ ॥
ହରିସରସକ୍ରୀଡାର୍ଥଂ ଯା ଵିଧୃତାନେକରୂପିକା ମାତା ।
ସା ଗେହଭୂଷଣଂ ନଃ ସ୍ଫୁରତୁ ସଦା ନିତ୍ଯସଂପୂଜ୍ଯା ॥ ୮୬ ॥
ଦ୍ଵାରଵତୀପୁରଭାଗେ ମୈଥିଲନଗରେ ଚ ଯତ୍କଥାସାରଃ ।
ସା ଦେଵୀ ଜଲଧିସୁତା ଵିହରଣଭାଙ୍ ମାମକେ ମନସି ॥ ୮୭ ॥
ଜଲନିଧିତପୋମହିମ୍ନେ ଦେଵ୍ଯୈ ପରମାତ୍ମନଃ ଶ୍ରିଯୈ ସତତମ୍ ।
ଭୂଯାଂସି ନମାଂସି ପୁନଃ ସର୍ଵା ନଃ ସଂପଦଃ ସନ୍ତୁ ॥ ୮୮ ॥
ପରମୌଷଧଂ ହି ସଂସୃତିଵ୍ଯାଧେର୍ଯତ୍ କୀର୍ତିତଂ ନିପୁଣୈଃ ।
ତଦହଂ ଭଜାମି ସତତଂ ଲକ୍ଷ୍ମୀରୂପଂ ସଦାନନ୍ଦମ୍ ॥ ୮୯ ॥
ଦଶରଥସୁତକୋଦଣ୍ଡପ୍ରଭାଵସାକ୍ଷାତ୍କୃତେ କୃତାନନ୍ଦା ।
ସୀତାରୂପା ମାତେ ଜଜ୍ଞେ ଯଜ୍ଞକ୍ଷିତୌ ହି ସା ସିଦ୍ଧ୍ଯୈ ॥ ୯୦ ॥
ମୁନିଜନମାନସନିଲଯେ କମଲେ ତେ ଚରଣପଙ୍କଜଂ ଶିରସି ।
ଅଵତଂସଯନ୍ନୁଦାରଂ ଵିଶାମି ଦେଵୈଃ ସୁଧର୍ମାଂ ଵା ॥ ୯୧ ॥
ଧନମଦମେଦୁରସେଵାଂ ତ୍ଯକ୍ତଵାହଂ ତେ ପଦାମ୍ଭୋଜମ୍ ।
ଶରଣଂ ଯାମି ପୁମର୍ଥସ୍ଫୂର୍ତିକଲାଯୈ ଭୃଶଂ ଦୀନଃ ॥ ୯୨ ॥
ନ ଘଟଯ କୁତ୍ସିତସେଵାଂ ଦୁଷ୍ଟୈର୍ଵା ସଂଗମଂ ମାତଃ ।
କୁରୁ ମାଂ ଦାସଂ ସଂସୃତିପାପଂ ଚ ହର ଶୀଘ୍ରମ୍ ॥ ୯୩ ॥
ମଯି ନମତି ଵିଷ୍ଣୁକାନ୍ତେ ତଵାଗ୍ରତସ୍ତାପଭାରାର୍ତେ ।
ମାତଃ ସହସା ସୁମୁଖୀ ଭଵ ବାଲେ ଦୋଷନିଲଯେ ଚ ॥ ୯୪ ॥
ହନ୍ତ କଦା ଵା ମାତସ୍ତଵ ଲୋଚନସେଚନଂ ଭଵେନ୍ମଯି ଭୋଃ ।
ଈତ୍ଥଂ ପ୍ରାତଃ ସ୍ତୁଵତାଂ ତ୍ଵମେଵ ରକ୍ଷାକରୀ ନିଯତମ୍ ॥ ୯୫ ॥
ସଂସାରରୋଗଶାନ୍ତିପ୍ରଦମେତଲ୍ଲୋଚନଂ ମାତଃ ।
ତାଵତ୍କମହମୁପାସେ ଦିଵ୍ଯୌଷଧମାଶୁ ସାଗରେନ୍ଦ୍ରସୁତେ ॥ ୯୬ ॥
ସଂସୃତିରୋଗାର୍ତାନାଂ ତଵ ନାମସ୍ମରଣମତ୍ର ଧରଣିତଲେ ।
ପୂଜାପ୍ରଦକ୍ଷିଣାଦିକମାର୍ଯା ମୁଖ୍ଯୌଷଧଂ ଵଦନ୍ତି କିଲ ॥ ୯୭ ॥
ମାତର୍ଵିନା ଧରଣ୍ଯାଂ ସୁକୃତାନାଂ ଖଣ୍ଡମିହ ଜନ୍ତୁଃ ।
ଧ୍ଯାନଂ ଵା ନ ହି ଲଭତେ ପ୍ରଣତିଂ ଵା ସଂପଦାଂ ଜନନୀମ୍ ॥ ୯୮ ॥
ଗୁରୁଵରକଟାକ୍ଷଵିଭଵାଦ୍ ଦେଵି ତ୍ଵାଙ୍ଘ୍ରିପ୍ରଣାମଧୁତପାପଃ ।
ତଵ ଚ ହରେର୍ଦାସଃ ସନ୍ ଵିଶାମି ଦେଵେଶ ମାନିତାଂ ଚ ସଭାମ୍ ॥ ୯୯ ॥
ମୁରହରନେତ୍ରମହୋତ୍ସଵତାରୁଣ୍ଯଶ୍ରୀର୍ନିରସ୍ତନତଶତ୍ରୁଃ ।
ଲଲିତଲିକୁଚାଭକୁଚଭରଯୁଗଲା ଦୃଗ୍ଵିଜିତହରିଣସଂଦୋହା ॥ ୧୦୦ ॥
କାରୁଣ୍ଯପୂର୍ଣନଯନା କଲିକଲ୍ମଷହାରିଣୀ ଚ ସା କମଲା ।
ମୁଖଜିତଶାରଦକମଲା ଵକ୍ତ୍ରାମ୍ଭୋଜେ ସଦା ସ୍ଫୁରତୁ ମାତା ॥ ୧୦୧ ॥
ତାଵକକଟାକ୍ଷସେଚନଵିଭଵାଂ ନିର୍ଧୂତଦୁରିତସଂଘା ହି ।
ପରମଂ ସୁଖଂ ଲଭନ୍ତେ ପରେ ତୁ ଲୋକେ ଚ ସୂରିଭିଃ ସାର୍ଧମ୍ ॥ ୧୦୨ ॥
ତଵ ପାଦପଦ୍ମଵିସୃମରକାନ୍ତିଝରୀଂ ମନସି କଲଯଂସ୍ତୁ ।
ନିରସିତନରକାଦିଭଯୋ ଵିରାଜତେ ନାକିସଦସି ସୁରଵନ୍ଦ୍ଯଃ ॥ ୧୦୩ ॥
ହନ୍ତ ସହସ୍ରେଷ୍ଵଥ ଵା ଶତେଷୁ ସୁକୃତୀ ପୁମାନ୍ ମାତଃ ।
ତାଵକପାଦପଯୋରୁହଵରିଵସ୍ଯାଂ କଲଯତେ ସକଲମ୍ ॥ ୧୦୪ ॥
ଜନନି ତରଙ୍ଗଯ ନଯନେ ମଯି ଦୀନେ ତେ ଦଯାସ୍ନିଗ୍ଧେ ।
ତେନ ଵଯଂ ତୁ କୃତାର୍ଥା ନାତଃ ପରମସ୍ତିଃ ନଃ ପ୍ରାର୍ଥ୍ଯମ୍ ॥ ୧୦୫ ॥
ତାଵକକୃପାଵଶାଦିହ ନାନାଯୋଗାଦିନାଶିତଭଯା ଯେ ।
ତେଷାଂ ସ୍ମରଣମପି ଦ୍ରାକ୍ ଶ୍ରିଯାଵହଂ ନିତ୍ଯମାକଲଯେ ॥ ୧୦୬ ॥
ନୈଵ ପ୍ରାଯଶ୍ଚିତ୍ତଂ ଦୁରିତାନାଂ ମାମକାନାଂ ହି ।
ତ୍ଵାମେଵ ଯାମି ଶରଣଂ ତସ୍ମାଲ୍ଲକ୍ଷ୍ମି କ୍ଷମାଧାରେ ॥ ୧୦୭ ॥
ମୁରଵୈରିମାନ୍ଯଚରିତେ ମାତସ୍ତ୍ଵାମଖିଲଲୋକସାମ୍ରାଜ୍ଯେ ।
ପଶ୍ଯନ୍ତି ଦିଵି ସୁରେନ୍ଦ୍ରା ମୁନଯସ୍ତତ୍ତ୍ଵାର୍ଥିନଶ୍ଚ ନିତ୍ଯକଲାମ୍ ॥ ୧୦୮ ॥
ସ୍ଵୀଯପଦପ୍ରାପ୍ତ୍ଯୈ ନନୁ ଵିବୁଧେଶା ଜଲଧିକନ୍ଯକେ ମାତଃ ।
ଆରାଧ୍ଯ ଦିଵ୍ଯକୁସୁମୈସ୍ତଵ ପାଦାବ୍ଜଂ ପରଂ ତୁଷ୍ଟାଃ ॥ ୧୦୯ ॥
ସୃଷ୍ଟିସ୍ଥିତ୍ଯାଦୌ ହରିରମ୍ବ ତଵାପାଙ୍ଗଵୀକ୍ଷଣାଦରଵାନ୍ ।
ଜଗଦେତଦଵତି କାଲେ ତ୍ଵଂ ଚ ହରିର୍ନଃ କ୍ରମାତ୍ ପିତରୌ ॥ ୧୧୦ ॥
ରାଜ୍ଯସୁଖଲାଭସଂପତ୍ପ୍ରାପ୍ତ୍ଯୈ କ୍ଷିତିପାଶ୍ଚ ଯେ ଚ ଵିପ୍ରାଦ୍ଯାଃ ।
ଗାଙ୍ଗଜଲୈରପି କୁସୁମୈର୍ଵରିଵସ୍ଯାଂ ତେ କ୍ରମେଣ କଲଯନ୍ତି ॥ ୧୧୧ ॥
ସଂତ୍ଯକ୍ତକାମତଦନୁଜଡମ୍ଭାସୂଯାଦଯୋ ନରାଃ କମଲେ ।
ଆରାଧ୍ଯ ତ୍ଵାଂ ଚ ହରିଂ କାଲେ ଚୈକାସନସ୍ଥିତାଂ ଧନ୍ଯାଃ ॥ ୧୧୨ ॥
ଜନନୀ କଦା ପୁନୀତେ ମମ ଲୋଚନମାର୍ଗମାଦରାଦେଷା ।
ଯେ କିଲ ଵଦନ୍ତି ଧନ୍ଯାସ୍ତେଷାଂ ଦର୍ଶନମହଂ କଲଯେ ॥ ୧୧୩ ॥
କରଧୃତଲୀଲାପଦ୍ମା ପଦ୍ମା ପଦ୍ମାକ୍ଷଗେହିନୀ ନଯନେ ।
ସିଞ୍ଚତି ସକଲଶ୍ରେଯଃପ୍ରାପ୍ତ୍ଯୈ ନିର୍ଵ୍ଯାଜକାରୁଣ୍ଯା ॥ ୧୧୪ ॥
ନାନାଵିଧଵିଦ୍ଯାନାଂ ଲୀଲାସଦନଂ ସରୋଜନିଲଯେଯମ୍ ।
କଵିକୁଲଵଚଃପଯୋଜଦ୍ଯୁମଣିରୁଚିର୍ଭାତି ନଃ ପୁରତ୍ଃ ॥ ୧୧୫ ॥
ଅତସୀକୁସୁମଦ୍ଯୁତିଭାଙ୍ ନାକିଗଣୈର୍ଵନ୍ଦ୍ଯପାଦପଦ୍ମଯୁଗା ।
ସରସିଜନିଲଯା ସା ମେ ପ୍ରସୀଦତୁ କ୍ଷିପ୍ରମାଦରାତ୍ ସିଦ୍ଧ୍ଯୈ ॥ ୧୧୬ ॥
ଜଗଦୀଶଵଲ୍ଲଭେ ତ୍ଵଯି ଵିନ୍ଯସ୍ତଭରଃ ପୁମାନ୍ ସହସା ।
ତୀର୍ତ୍ଵା ନାକିସ୍ଥାନଂ ଵିଶତି ପରଂ ଵୈଷ୍ଣଵଂ ସୁରୈର୍ମାନ୍ଯମ୍ ॥ ୧୧୭ ॥
ମାତର୍ଜ୍ଞାନଵିକାସଂ କାରଯ କରୁଣାଵଲୋକନୈର୍ମଧୁରୈଃ ।
ତେନାହଂ ଧନ୍ଯତମୋ ଭଵେଯମାର୍ଯାଵୃତେ ସଦସି ॥ ୧୧୮ ॥
ହରିଵକ୍ଷସି ମଣିଦୀପପ୍ରକାଶଵତ୍ଯାନ୍ଯା ମାତ୍ରା ।
ନିତ୍ଯଂ ଵଯମିହ ଦାସାଃ ଶ୍ରିଯା ସନାଥା ମୁଦା ପରଂ ନୌମଃ ॥ ୧୧୯ ॥
ଵିଦ୍ରାଵଯତୁ ସରୋଜାସନେ ତ୍ଵଦୀଯା କଟାକ୍ଷଧାଟୀ ନଃ ।
ଅଜ୍ଞାନାଙ୍କୁରମୁଦ୍ରାଂ ପୁନରପି ସଂସାରଭୀତିଦାଂ ସହସା ॥ ୧୨୦ ॥
ତାଵକକଟାକ୍ଷସୂର୍ଯୋଦଯେ ମଦୀଯଂ ହୃଦମ୍ଭୋଜମ୍ ।
ଭଜତେ ଵିକାସମଚିରାତ୍ ତମୋଵିନାଶଶ୍ଚ ନିଶ୍ଚିତୋ ଵିବୁଧୈଃ ॥ ୧୨୧ ॥
ଲକ୍ଷ୍ମୀକଟାକ୍ଷଲହରୀ ଲକ୍ଷ୍ମୀଂ ପକ୍ଷ୍ମଲଯତି କ୍ରମାନ୍ନମତାମ୍ ।
ପାଦପଯୋରୁହସେଵା ପରଂ ପଦଂ ଚିତ୍ସୁଖୋଲ୍ଲାସମ୍ ॥ ୧୨୨ ॥
ଚିଦ୍ରୂପା ପରମା ସା କମଲେକ୍ଷଣନାଯିକା ମୁଦେ ଭଜତାମ୍ ।
ଯତ୍ପ୍ରଣଯକୋପକାଲେ ଜଗଦୀଶଃ କିଂକରୋ ଭଵତି ॥ ୧୨୩ ॥
କାଚନ ଦେଵୀ ଵିହରତୁ ମମ ଚିତ୍ତେ ସଂତତଂ ସିଦ୍ଧ୍ଯୈ ।
ଯାପତ୍ଯଂ କଲଶାବ୍ଧେରୁରଗେଶଯସତ୍କଲତ୍ରଂ ଚ ॥ ୧୨୪ ॥
ଅଷ୍ଟସୁ ମହିଷୀଷ୍ଵେକା କମଲା ମୁଖ୍ଯା ହି ନିର୍ଦିଷ୍ଟା ।
ଅନଯୈଵ ସର୍ଵଜଗତାମୁଦଯାଦିସ୍ତନ୍ଯତେ କାଲେ ॥ ୧୨୫ ॥
କୈଵଲ୍ଯାନନ୍ଦକଲାକନ୍ଦମହଂ ସଂତତଂ ଵନ୍ଦେ ।
ତତ୍ତୁ ମୁକୁନ୍ଦକଲତ୍ରଂ ଚିନ୍ତିତଫଲଦାନଦୀକ୍ଷିତଂ କିମପି ॥ ୧୨୬ ॥
ଈକ୍ଷେ କମଲାମେନାମମ୍ବାମମ୍ଭୋଜଲୋଚନାଂ ସତତମ୍ ।
ମନ୍ଦସ୍ମିତମଧୁରାସ୍ଯାଂ ନିତ୍ଯଂ ଚାଜ୍ଞାତକୋପମୁଖଦୋଷାମ୍ ॥ ୧୨୭ ॥
ଅଙ୍କିତମାଧଵଵକ୍ଷଃସ୍ଥଲା ସରୋଜେକ୍ଷଣା ଚ ହରିକାନ୍ତା ।
କବଲଯତି ମାନସଂ ମେ ଦଯାପ୍ରସାରାଦିଭିର୍ନିତ୍ଯମ୍ ॥ ୧୨୮ ॥
ଭୂତ୍ଯୈ ମମ ଭଵତୁ ଦ୍ରାଗଜ୍ଞାନଧ୍ଵଂସିନୀ ନମତାମ୍ ।
ନାଥାନୁରୂପରୂପା ଶ୍ରୁତ୍ଯନ୍ତେଡ୍ଯା ଦଶାଵତାରେଷୁ ॥ ୧୨୯ ॥
ସକଲଜନରକ୍ଷଣେଶୁ ପ୍ରଣିହିତନଯନା ତ୍ରିଲୋକମାତା ନଃ ।
ପୁଷ୍ଣାତି ମଙ୍ଗଲାନାଂ ନିକରଂ ସେଵାକ୍ରମେଣ incomplete ॥ ୧୩୦ ॥
ପଦ୍ମାସନଜନନୀ ମାଂ ପାତୁ ମୁଦା ସୁନ୍ଦରାପାଙ୍ଗୈଃ ।
ସର୍ଵୈଶ୍ଵର୍ଯନିଦାନଂ ଯାମାହୁର୍ଵୈଦିକା ଦୀପ୍ତାମ୍ ॥ ୧୩୧ ॥
ନାନାଲଂକାରଵତୀ ମୁନିମାନସଵାସିନୀ ହରେଃ ପତ୍ନୀ ।
ତ୍ରୈଲୋକ୍ଯଵିନୁତଵିଭଵା ମାଂ ପାଯାଦାପଦାଂ ନିଚଯାତ୍ ॥ ୧୩୨ ॥
ଵିଦ୍ରାଵଯତୁ ଭଯଂ ନଃ ସା କମଲା ଵିଷ୍ଣୁଵଲ୍ଲଭା ମାତା ।
ଅବ୍ଧିଃ ସଂକ୍ଷୁଭିତୋଽଭୂତ୍ ଯଦର୍ଥମାର୍ଯେଣ ରାମେଣ ॥ ୧୩୩ ॥
ଭୂଯୋ ଯଦର୍ଥମିନ୍ଦ୍ରଃ ସୁରତରୁକୁସୁମାର୍ଥିନା ଚ କୃଷ୍ଣେନ ।
ହତଗର୍ଵୋଽଜନି ଯୁଦ୍ଧେ ସା ନିତ୍ଯଂ ଶ୍ରେଯସେ ଭୂଯାତ୍ ॥ ୧୩୪ ॥
ତ୍ଵାମାରାଧ୍ଯ ଜନା ଅପି ଧନହୀନାଃ ସୌଧମଧ୍ଯତଲଭାଜଃ ।
ନାନାଦେଶଵନୀପକଜନସ୍ତୁତା ଭାନ୍ତି ନିତ୍ଯମେଵ ରମେ ॥ ୧୩୫ ॥
ସଂସୃତିତାପୋ ନ ଭଵତି ପୁନରପି ଯତ୍ପାଦପଙ୍କଜଂ ନମତାମ୍ ।
ସା ମଯି କଲିତଦଯା ସ୍ଯାଦମ୍ବା ଵିଷ୍ଣୋଃ କଲତ୍ରମନୁରୂପମ୍ ॥ ୧୩୬ ॥
ଜନନୀକଟାକ୍ଷଭାଜାମିହ ମର୍ତ୍ଯାନାଂ ସୁରାସ୍ତୁ କିଂକରତାମ୍ ।
ରିପଵୋ ଗିରିତଟଵାସଂ ଭଜନ୍ତି ଵେଶ୍ମାନି ସିଦ୍ଧଯଃ ସର୍ଵାଃ ॥ ୧୩୭ ॥
ସ୍ମରଣାଦ୍ଵା ଭଜନାଦ୍ଵା ଯସ୍ଯାଃ ପାଦାମ୍ବୁଜସ୍ଯ ଭୁଵି ଧନ୍ଯାଃ ।
ହନ୍ତ ରମନ୍ତେ ସ୍ତମ୍ବେରମନିଵହାଵୃତଗୃହାଙ୍ଗଣେ ମନୁଜାଃ ॥ ୧୩୮ ॥
ଚିରକୃତସୁକୃତନିଷେଵ୍ଯା ସା ଦେଵୀ ଵିଷ୍ଣୁଵଲ୍ଲଭା ଖ୍ଯାତା ।
ଯସ୍ଯାଃ ପ୍ରସାଦଭୂମ୍ନା ଜାତାଃ ପଶ୍ଵାଦଯୋ ଵଦାନ୍ଯା ହି ॥ ୧୩୯ ॥
ଅମ୍ବ ମଧୁରାନ୍ କଟାକ୍ଷାନ୍ ତାପହରାନ୍ ଵିକିର ମଯି କୃପାଜଲଧେ ।
ଯେ ଵିନ୍ଯସ୍ତାଃ କରିଵରମାରୁତିମୁଖଭକ୍ତଵର୍ଯେଷୁ ॥ ୧୪୦ ॥
ଅମୃତଲହରୀଵ ମଧୁରା ଜଲଧରରୁଚିରା ନତାର୍ତିହରଶୀଲା ।
ସର୍ଵଶ୍ରେଯୋଦାତ୍ରୀ କାଚିଦ୍ ଦେଵୀ ସଦା ଵିଭାତୁ ହୃଦି ॥ ୧୪୧ ॥
ଗୀତାଚାର୍ଯପୁରନ୍ଧ୍ରୀ ତ୍ଵଦୀଯନାମପ୍ରଭାଵକଲନାଦ୍ଯୈଃ ।
ଯମଭଯଵାର୍ତା ଦୂରେ ହରିସାଂନିଧ୍ଯଂ କୁତୋ ନ ସ୍ଯାତ୍ ॥ ୧୪୨ ॥
ଜଲନିଧିତନଯେ କାନ୍ତେ ଵିଷ୍ଣୋରୁଷ୍ଣାଂଶୁଚନ୍ଦ୍ରନଯନେ ତେ ।
ଚତୁରାନନାଦଯସ୍ତୁ ଖ୍ଯାତା ବାଲାଃ ଶ୍ରୁତୌ ଚୋକ୍ତାଃ ॥ ୧୪୩ ॥
ମନସିଜଵୈରଂ ଗାତ୍ରଂ ଵାଣୀ ସୌଧାରସୀ ଚ ଯଦ୍ଭଜତାମ୍ ।
ଶ୍ଲାଧ୍ଯା ସଂପତ୍ ସଜ୍ଜନସମାଗମଶ୍ଚାଶୁ ସିଧ୍ଯନ୍ତି ॥ ୧୪୪ ॥
ସଫଲଯତୁ ନେତ୍ରଯୁଗଲଂ ହତନତଦୁରିତା ଚ ସା ପରା ଦେଵୀ ।
ଜଲନିଧିକନ୍ଯା ମାନ୍ଯା ପତ୍ଯଵତାରାନୁକୂଲନିଜଚରିତା ॥ ୧୪୫ ॥
ନିତ୍ଯଂ ସ୍ମରାମି ଦେଵୀଂ ନମତାଂ ସର୍ଵାର୍ଥଦାଯିନୀଂ କମଲାମ୍ ।
ଯାମାହୁର୍ଭଵନିଗଲଧ୍ଵଂସନଦୀକ୍ଷାଂ ଚ incomplete ॥ ୧୪୬ ॥=୨୦
ସକଲଜଗଦଘନିଵାରଣସଂକଲ୍ପାଂ ମଧୁଜିତୋ ଦଯିତାମ୍ ।
ଜୀଵାତୁମେଵ କଲଯେ ମୋକ୍ଷାର୍ଥିଜନସ୍ଯ ଭୂମିସୁତାମ୍ ॥ ୧୪୭ ॥
ମନ୍ଦାନାମପି ଦଯଯା ତମୋନିରାସଂ ଵିତନ୍ଵନ୍ତୀ ।
ସର୍ଵତ୍ର ଭାତି କମଲା ତନୁରିଵ ଵିଷ୍ଣୋର୍ନିରସ୍ତାଘା ॥ ୧୪୮ ॥
ବାଲମରାଲୀଗତ୍ଯୈ ସୁରପୁରକନ୍ଯାଦିମହିତକଲଗୀତ୍ଯୈ ।
ଵିରଚିତନାନାନୀତ୍ଯୈ ଚେତୋ ମେ ସ୍ପୃହଯତେ ବହୁଲକୀର୍ତ୍ଯୈ ॥ ୧୪୯ ॥
ଅଭିଲଷିତଦାନକୁଶଲା ଵାଗ୍ଦେଵୀଵନ୍ଦିତା ଚ ସା କମଲା ।
ନିତ୍ଯଂ ମାନସପଦ୍ମେ ସଂଚାରଂ କଲଯତେ ମୁହୁଃ କୁତୁକାତ୍ ॥ ୧୫୦ ॥
ମୁରମଥନନଯନପଙ୍କଜଵିଲାସକଲିକା ସୁରେଶମୁଖସେଵ୍ଯା ।
ଭୂତମଯୀ ସାଵିତ୍ରୀ ଗଯତ୍ରୀ ସର୍ଵଦେଵତା ଜଯତି ॥ ୧୫୧ ॥
ସା ହି ପରା ଵିଦ୍ଯା ମେ ଲକ୍ଷ୍ମୀରକ୍ଷୋଭଣୀଯକୀର୍ତିକଲା ।
ହୃଦ୍ଯାଂ ଵିଦ୍ଯାଂ ଦଯାଦଦ୍ଯ ଶ୍ରେଯଃପରଂପରାସିଦ୍ଧ୍ଯୈ ॥ ୧୫୨ ॥
କାମଜନନୀ ହି ଲକ୍ଷ୍ମୀଃ ନାନାଲୀଲାଦିଭିର୍ନିଜଂ ନାଥମ୍ ।
ମୋହଯତି ଵିଷ୍ଣୁମଚିରାତ୍ ପ୍ରକୃତୀନାଂ କ୍ଷେମସିଦ୍ଧ୍ଯର୍ଥମ୍ ॥ ୧୫୩ ॥
ମନସିଜସାମ୍ରାଜ୍ଯକଲାନିଦାନମାର୍ଯାଭିଵନ୍ଦିତଂ କିମପି ।
ଲକ୍ଷ୍ମୀରୂପଂ ତେଜୋ ଵିଲସତି ମମ ମନସି ଵିଷ୍ଣୁସଂକ୍ରାନ୍ତମ୍ ॥ ୧୫୪ ॥
ଵିଷ୍ଣୁମନୋରଥପାତ୍ରଂ ସଂତପ୍ତସ୍ଵର୍ଣକାମ୍ଯନିଜଗାତ୍ରମ୍ ।
ଆଶ୍ରିତଜଲନିଧିଗୋତ୍ରଂ ରକ୍ଷିତନତବାହୁଜଚ୍ଛାତ୍ରମ୍ ॥ ୧୫୫ ॥
କଵିକୁଲଜିହ୍ଵାଲୋଲଂ ମୁରମର୍ଦନକଲିତରମ୍ଯବହୁଲୀଲମ୍ ।
ନିରସିତନତଦୁଷ୍କାଲଂ ଵନ୍ଦେ ତେଜଃ ସଦାଲିନୁତଶୀଲମ୍ ॥ ୧୫୬ ॥
ଆଦିମପୁରୁଷପୁରନ୍ଧ୍ରୀମମ୍ବାମମ୍ଭୋଜଲୋଚନାଂ ଵନ୍ଦେ ।
ଯାଂ ନତ୍ଵା ଗତତାପାସ୍ତ୍ଯକ୍ତ୍ଵା ଦେହଂ ଵିଶନ୍ତି ପରମପଦମ୍ ॥ ୧୫୭ ॥
ଲକ୍ଷ୍ମ୍ଯା ହରିରପି ଭାତି ପ୍ରକୃତିକ୍ଷେମାଯ ଦୀକ୍ଷିତାଯାସୌ ।
ମମ ଲୋଚନଯୋଃ ପୁରତୋ ଲସତୁ ଗଭୀରଂ କ୍ରିଯାସିଦ୍ଧ୍ଯୈ ॥ ୧୫୮ ॥
ଜନନି କଦା ଵା ନେଷ୍ଯାମ୍ଯହମାରାଦର୍ଚିତତ୍ଵଦୀଯପଦଃ ।
ନିମିଷମିଵ ହନ୍ତ ଦିଵସନ୍ ଦୃଷ୍ଟ୍ଵା ତ୍ଵାମାଦରେଣ କଲ୍ଯାଣୀମ୍ ॥ ୧୫୯ ॥
ସଂପୂର୍ଣଯୌଵନୋଜ୍ଜ୍ଵଲଦେହାଂ ଯାଂ ଵୀକ୍ଷ୍ଯ ଶୌରିରପି ।
କୁସୁମଶରଵିଦ୍ଧଚେତାଃ କିଂକରଭାଵଂ ସ୍ଵଯଂ ପ୍ରାପ୍ତଃ ॥ ୧୬୦ ॥
ଅନୁନଯଶୀଲସ୍ତଦନୁ ପ୍ରଣଯକ୍ରୋଧାଦିନା ଭୀତଃ ।
ଆଦିମପୁରୁଷଃ ସୋଽଯଂ ସା ଲକ୍ଷ୍ମୀର୍ନ ଶ୍ରିଯୈ ଭଵତୁ ॥ ୧୬୧ ॥
ମଣିକୁଣ୍ଡଲଲସିତାସ୍ଯଂ କୃପାକରଂ କିମପି କୁଙ୍କୁମଚ୍ଛାଯମ୍ ।
ହରିଣା କୃତସଂଚାରଂ ତେଜୋ ମେ ଭାତୁ ସର୍ଵଦା ସିଦ୍ଧ୍ଯୈ ॥ ୧୬୨ ॥
ସାମ୍ରାଜ୍ଯମଙ୍ଗଲଶ୍ରୀଃ ଶ୍ରୀରେଷା ପୁଷ୍କରାକ୍ଷସ୍ଯ ।
ଗନ୍ଧର୍ଵକନ୍ଯକାଦ୍ଯୈର୍ଗଙ୍ଗାତୀରେଷୁ ଗୀତକୀର୍ତିର୍ହି ॥ ୧୬୩ ॥
କଵିତାଭାଗ୍ଯଵିଧାତ୍ରୀ ପରିମଲସଂକ୍ରାନ୍ତମଧୁପଗଣକେଶା ।
ମମ ନଯନଯୋଃ କଦା ଵା ସା ଦେଵୀ କଲିତସଂନିଧାନକଲା ॥ ୧୬୪ ॥
କୀର୍ତିଃ ସ୍ଵଯଂ ଵୃଣୀତେ ଵାଗ୍ଦେଵୀ ଚାପି ଵିଜଯଲକ୍ଷ୍ମୀଶ୍ଚ ।
ତଂ ନରମଚିରାଲ୍ଲୋକେ ଯୋ ଲକ୍ଷ୍ମୀପାଦଭକ୍ତସ୍ତୁ ॥ ୧୬୫ ॥
ସନ୍ମିତ୍ରଂ ପାଣ୍ଡିତ୍ଯଂ ସଦ୍ଦାରାଃ ସତ୍ସୁତାଦ୍ଯାଶ୍ଚ ।
ଜାଯନ୍ତେ ତସ୍ଯ ଭୁଵି ଶ୍ରୀଭକ୍ତୋ ଯଶ୍ଚ ନିର୍ଦିଷ୍ଟଃ ॥ ୧୬୬ ॥
ପରମାଚାର୍ଯୈର୍ଵିନୁତାଂ ତାମମ୍ବାମାଦରାନ୍ନୌମି ।
ପରମୈଶ୍ଵର୍ଯଂ ଵିଷ୍ଣୋରପି ଯା ଵେଦେଷୁ ନିର୍ଦିଷ୍ଟା ॥ ୧୬୭ ॥
କଵିକୁଲସୂକ୍ତିଶ୍ରେଣୀଶ୍ରଵଣାନନ୍ଦୋଲ୍ଲସଦ୍ଵତଂସସୁମା ।
ସା ଦେଵୀ ମମ ହୃଦଯେ କୃତସାଂନିଧ୍ଯା ଵିରାଜତେ ପରମା ॥ ୧୬୮ ॥
ତାପାର୍ତାସ୍ତୁ ତଟାକଂ ଯଥା ଭଜନ୍ତେ ରମାଂ ଦେଵୀମ୍ ।
ସଂସୃତିତପ୍ତାଃ ସର୍ଵେ ଯାନ୍ତି ହି ଶରଣଂ ଶରଣ୍ଯାଂ ତାମ୍ ॥ ୧୬୯ ॥
ସର୍ଵଜ୍ଞତ୍ଵଂ ଶ୍ଲାଧ୍ଯଂ ଧରାଧିପତ୍ଯଂ ରମେ ଦେଵି ।
ଯଦ୍ଯତ୍ ପ୍ରାର୍ଥ୍ଯଂ ଦଯଯା ତଦ୍ ଦିଶ ମୋକ୍ଷଂ ଚ ମେ ଜନନି ॥ ୧୭୦ ॥
ଵିଦ୍ଯୁତମଚଞ୍ଚଲାଂ ତ୍ଵାଂ କୃଷ୍ଣେ ମେଘେ ପଯୋଧିଵରକନ୍ଯେ ।
ନିତ୍ଯମଵୈମି ଶ୍ରେଯଃସିଧ୍ଯ ମାତଃ ପ୍ରସନ୍ନେ ନଃ ॥ ୧୭୧ ॥
ତ୍ଵାମମ୍ବ ସଂତତରୁଚିଂ କୃଷ୍ଣୋ ମେଘଃ ସମାସାଦ୍ଯ ।
ସଦ୍ଵର୍ତ୍ମନି ଵର୍ଷତି କିଲ କାଙ୍କ୍ଷାଧିକମାଦରେଣ ଵାର୍ଧିସୁତେ ॥ ୧୭୨ ॥
ଅମ୍ବ ତ୍ଵମେଵ କାଲେ ମୁକୁନ୍ଦମପି ଦର୍ଶଯନ୍ତୀହ ।
ଶ୍ରେଯଃସିଦ୍ଧ୍ଯୈ ନମତାଂ ଭାସି ହୃଦି ଶ୍ରୁତିଶିରଃସୁ ସଲ୍ଲୋକେ ॥ ୧୭୩ ॥
ଵିନମଦମରେଶସୁଦତୀକଚସୁମମକରନ୍ଦଧାରଯା ସ୍ନିଗ୍ଧମ୍ ।
ତଵ ପାଦପଦ୍ମମେତତ୍ କଦା ନୁ ମମ ମୂର୍ଧ୍ନି ଭୂଷଣଂ ଜନନି ॥ ୧୭୪ ॥
ଅପଵର୍ଗସୌଖ୍ଯଦେ ତେ ଦଯାପ୍ରସାରଃ କଥଂ ଵର୍ଣ୍ଯଃ ।
ଯାମଵଲମ୍ବ୍ଯ ହି ଯଷ୍ଟିଂ ନ ପତତି ସଂସାରପଙ୍କିଲେ ମାର୍ଗେ ॥ ୧୭୫ ॥
ସୂକ୍ଷ୍ମାତ୍ ସୂକ୍ଷ୍ମତରଂ ତେ ରୂପଂ ପଶ୍ଯନ୍ତି ଯୋଗିନୋ ହୃଦଯେ ।
ତାଂ ତ୍ଵାମହଂ କଦା ଵା ଦ୍ରକ୍ଷ୍ଯେଽଲଂକାରମଣ୍ଡିତାଂ ମାତଃ ॥ ୧୭୬ ॥
ଚିରତରତପସା କ୍ଲିଷ୍ଟେ ଯୋଗିହୃଦି ସ୍ଥାନଭାଗ୍ ରମା ଦେଵୀ ।
ଦର୍ଶନମଚିରାଦ୍ ଦଯଯା ଦଦାତି ଯୋଗାଦିହୀନାନାମ୍ ॥ ୧୭୭ ॥
ତୀରଂ ସଂସୃତିଜଲଧେଃ ପୂରଂ କମଲାକ୍ଷଲୋଚନପ୍ରୀତେଃ ।
ସାରଂ ନିଗମାନ୍ତାନାଂ ଦୂରଂ ଦୁର୍ଜନତତେର୍ହି ତତ୍ତେଜଃ ॥ ୧୭୮ ॥
ଲକ୍ଷ୍ମୀରୂପଂ ତେଜୋ ମମାଵିରସ୍ତୁ ଶ୍ରିଯୈ ନିତ୍ଯମ୍ ।
ଯନ୍ନିତ୍ଯଧର୍ମଦାରାନ୍ ଵିଷ୍ଣୋରମିତୌଜସଃ ପ୍ରାହୁଃ ॥ ୧୭୯ ॥
ଜଲଧିସୁତେ ତ୍ଵଂ ଜନନୀ ସ ଵାସୁଦେଵଃ ପିତା ଚ ନଃ କଥିତଃ ।
ଶରଣଂ ଯୁଵାଂ ପ୍ରପନ୍ନା ନାତୋ ଦୁର୍ଗତିପରିସ୍ଫୂର୍ତିଃ ॥ ୧୮୦ ॥
ହରିନୀଲରତ୍ନଭାସା ପ୍ରକଶିତାତ୍ମା ସମୁଦ୍ରଵରକନ୍ଯା ।
ମଙ୍ଗଲମାତନୁତେଯଂ କଟାକ୍ଷକଲିକାପ୍ରସାରୈସ୍ତୁ ॥ ୧୮୧ ॥
ମଚ୍ଚିତ୍ତମତ୍ତଵାରଣବନ୍ଧନମଧୁନା ତ୍ଵଦୀଯପାଦଯୁଗେ ।
କଲଯାମି ରମେ ମାତର୍ମାଂ ରକ୍ଷ କ୍ଷିପ୍ରମେଵ ସଂସୃତିତଃ ॥ ୧୮୨ ॥
ମୋଚଯ ସଂସୃତିବନ୍ଧଂ କଟାକ୍ଷକଲିକାଙ୍କୁରୈ ରମେ ମାତଃ ।
ନାତଃ ପରମର୍ଥ୍ଯମିହ କ୍ଷମାତଲେ ତ୍ଵଂ ଦଯାମୂର୍ତିଃ ॥ ୧୮୩ ॥
ମଞ୍ଜୁଲକଵିତାସଂତତିବୀଜାଙ୍କୁରଦାଯିସାରସାଲୋକା ।
ଜନନି ତଵାପାଙ୍ଗଶ୍ରୀଃ ଜଯତି ଜଗତ୍ତ୍ରାଣକଲିତଦୀକ୍ଷେଯମ୍ ॥ ୧୮୪ ॥
ଅମ୍ବ ତଵାପାଙ୍ଗଶ୍ରୀରପାଙ୍ଗକେଲୀଶତାନି ଜନଯନ୍ତୀ ।
ମୁରହନ୍ତୁର୍ହୃଦି ଜଯତି ଵ୍ରୀଡାମଦମୋହକାମସାରକରୀ ॥ ୧୮୫ ॥
ବଦ୍ଧମପି ଚିତ୍ତମେତଦ୍ ଯମନିଯମାଦ୍ଯୈଃ ପରିଷ୍କାରୈଃ ।
ଧାଵତି ବଲାଦ୍ ରମେ ତଵ ପାଦାବ୍ଜଂ ଯାମି ଶରଣମହମ୍ ॥ ୧୮୬ ॥
ମତ୍ତଗଜମାନ୍ଯଗମନା ମଧୁରାଲାପା ଚ ମାନ୍ଯଚରିତା ସା ।
ମନ୍ଦସ୍ମେରମୁଖାବ୍ଜା କମଲା ମେ ହୃଦଯସାରସେ ଲସତୁ ॥ ୧୮୭ ॥
ଶାସ୍ତ୍ରସ୍ମରଣଵିହୀନଂ ପାପିନମେନଂ ଜନଂ ରମା ଦେଵୀ ।
ଦଯଯା ରକ୍ଷତି କାଲେ ତସ୍ଯାସ୍ତେନ ପ୍ରଥା ମହତୀ ॥ ୧୮୮ ॥
ମୁଖଵିଜିତଚନ୍ଦ୍ରମଣ୍ଡଲମିଦମମ୍ଭୋରୁହଵିଲୋଚନଂ ତେଜଃ ।
ଧ୍ଯାନେ ଜପେ ଚ ସୁଦୃଶାଂ ଚକାସ୍ତି ହୃଦଯେ କଵୀଶ୍ଵାଣାଂ ଚ ॥ ୧୮୯ ॥
ଅମ୍ବ ଵିଵେକଵିଦୂରଂ ଜନମେନଂ ଶିଶିରଲୋଚନପ୍ରସରୈଃ ।
ଶିଶିରଯ କୃପଯା ଦେଵି ତ୍ଵମେଵ ମାତା ହି ଲୋକସ୍ଯ ॥ ୧୯୦ ॥
କୋପଦୁପେକ୍ଷସେ ଯଦି ମାତର୍ମେ ରକ୍ଷକଃ କଃ ସ୍ଯାତ୍ ।
ମଯି ଦୀନେ କୋ ଲାଭସ୍ତଵ ତୁ ଦଯାଯାଃ ପ୍ରସାରିଣ୍ଯାଃ ॥ ୧୯୧ ॥
ଭଵଚଣ୍ଡକିରଣତପ୍ତଃ ଶ୍ରାନ୍ତୋଽହଂ ଜ୍ଞାନଵାରିଦୂରସ୍ଥଃ ।
ଶିଶିରାମଙ୍ଘ୍ରିଚ୍ଛାଯାଂ ତଵ ମାତର୍ଯାମି ଶରଣମାରାତ୍ତୁ ॥ ୧୯୨ ॥
ମାତରଶୋକୋଲ୍ଲାସଂ ପ୍ରକଟଯ ତଵ କୋମଲକଟାକ୍ଷୈଃ ।
ଯୈର୍ଦୀନା ନରପତଯଃ କଲିତା ଵାରଣଶତାଵୃତେ ଗେହେ ॥ ୧୯୩ ॥
ଜଯତି ରମେ ତଵ ମହତୀ କୃପାଝରୀ ସର୍ଵସଂମାନ୍ଯା ।
କ୍ଷେମଂକରୀ ଯଦେଷା ପ୍ରତିକଲ୍ପଂ ସର୍ଵଜଗତାଂ ଚ ॥ ୧୯୪ ॥
ଅଜ୍ଞାନକୂପକୁହରେ ପତିତଂ ମାଂ ପାହି କମଲେ ତ୍ଵମ୍ ।
ନଗରେ ଵା ଗ୍ରାମେ ଵା ଵନମଧ୍ଯେ ଦିକ୍ଷୁ ରକ୍ଷିଣୀ ତ୍ଵମସି ॥ ୧୯୫ ॥
ତଵ ଚରଣୌ ଶରଣମିତି ବ୍ରୁଵନ୍ନହଂ ମାତରବ୍ଧିତନଯେ ତ୍ଵମ୍ ।
ହରିଣା ସହିତା ଦଯଯା ପ୍ରାହ୍ଯଵିଲମ୍ବେନ ଦୀନଂ ମାମ୍ ॥ ୧୯୬ ॥
ପରିସରନତଵିବୁଧାଲୀକିରୀଟମଣିକାନ୍ତିଵଲ୍ଲରୀଵିସରୈଃ ।
କୃତନୀରାଜନଵିଧି ତେ ମମ ତୁ ଶିରୋଭୂଷଣଂ ହି ପଦଯୁଗଲମ୍ ॥ ୧୯୭ ॥
ମମ ହୃଦଯପଙ୍କଜଵନୀଵିକାସହେତୌ ଦିନାଧିପାଯେତାମ୍ ।
ତଵ ତୁ କଟାକ୍ଷପ୍ରସରଃ ଦୀପାଯେତାଂ ତମୋନିରାକରଣେ ॥ ୧୯୮ ॥
ଯାଵଚ୍ଛରଣଂ ଯାତି କ୍ଷିତିତନଯେ ତ୍ଵାଂ ହି ଜନ୍ତୁରିହ ମୂଢଃ ।
ତାଵତ୍ ତସ୍ଯ ତୁ ରସନାଙ୍ଗଣେ ତୁ ଵାଣୀ ସମାକଲିତନୃତ୍ତା ॥ ୧୯୯ ॥
ପଙ୍କଜନିଲଯେ ତାଵକଚରଣଂ ଶରଣଂ ସମାକଲଯେ ।
ତେନ ହି ସର୍ଵକୃତାନାଂ ଭଵିଷ୍ଯତାଂ ହାନିରେଵ ଦୁରିତାନାମ୍ ॥ ୨୦୦ ॥
ଶ୍ରୁତ୍ଯନ୍ତସେଵିତଂ ତେ ଚରଣସରୋଜଂ ପ୍ରଣମ୍ଯ କିଲ ଜନ୍ତୁଃ ।
ଛତ୍ରୋଲ୍ଲସିତଶିରାଃ ସନ୍ ଵନୀପକାନ୍ ଦାନଵାରିଣା ସିଞ୍ଚନ୍ ॥ ୨୦୧ ॥
ଵିଷ୍ଵକ୍ସେନମୁଖାଦ୍ଯୈଃ ସେଵିତମମ୍ବ ତ୍ଵଦୀଯପାଦଯୁଗମ୍ ।
ଅଵତଂସଯନ୍ତି ସନ୍ତଃ କଲିତାପପ୍ରଶମନାଯାସ୍ତୁ ॥ ୨୦୨ ॥
ଦୁଗ୍ଧୋଦଧିତନଯେ ତ୍ଵାଂ ଦିଶାଗଜେନ୍ଦ୍ରାଃ ସୁଵର୍ଣଘଟତୋଯୈଃ ।
ମଣିମଣ୍ଟପମଧ୍ଯତଲେ ସମଭ୍ଯଷିଞ୍ଚନ୍ ହରିପ୍ରୀତ୍ଯୈ ॥ ୨୦୩ ॥
ଦିଗ୍ଗଜପୁଷ୍ପକରକୁମ୍ଭୈରଭିଷିକ୍ତାଂ ତ୍ଵାଂ ହରିଃ ପ୍ରୀତ୍ଯା ।
ଉଦଵହଦାରାନ୍ମୁନିଗଣମଧ୍ଯେ ସର୍ଵଶ୍ରିଯୋ ମୂଲମ୍ ॥ ୨୦୪ ॥
ଜାତପରାକ୍ରମକଲିକା ଦିଶି ଦିଶି କିଂନରସୁଗୀତନିଜଯଶସଃ ।
ଧନ୍ଯା ଭାନ୍ତି ହି ମନୁଜାଃ ଯଦ୍ଵୀକ୍ଷାଲଵଵିଶେଷତଃ କାଲେ ॥ ୨୦୫ ॥
ନମଦମରୀକଚଭରସୁମମରନ୍ଦଧାରାଭିଷିକ୍ତଂ ତେ ।
ପଦକମଲଯୁଗଲମେତଚ୍ଛ୍ରେଯଃସ୍ଫୂର୍ତ୍ଯୈ ସଦା ଭଵତୁ ॥ ୨୦୬ ॥
ରାଗଦ୍ଵେଷାଦିହତଂ ମାମଵ କମଲେ ହରେଃ କାନ୍ତେ ।
ଦର୍ଶଯ ଦଯଯା କାଲେ ହ୍ଯପଵର୍ଗସ୍ଥାନମାର୍ଗଂ ଚ ॥ ୨୦୭ ॥
ନ ହି ଜାନେ ଵର୍ଣଯିତୁଂ ପରମେ ସ୍ଥନେ ତ୍ଵଦୀଯଵିଭଵମହମ୍ ।
ମୁନଯଶ୍ଚ ସୁରା ଵେଦା ଯତୋ ନିଵୃତ୍ତାଃ କ୍ଷମାତନଯେ ॥ ୨୦୮ ॥
ମନୁଜାଃ କଟାକ୍ଷିତାଃ କିଲ ତଥାମ୍ବଯା ମେଦିନୀପୁତ୍ର୍ଯା ।
ସତ୍ସୁତକଲତ୍ରସହିତାଃ ସୁରଭିଂ କାଲେନ ନିର୍ଵିଶାନ୍ତି ମୁଦା ॥ ୨୦୯ ॥
ଜଲଧୀଶକନ୍ଯକା ସା ଲସତୁ ପୁରୋଽସ୍ମାକମାଦରକୃତଶ୍ରୀଃ ।
ଯତ୍ପ୍ରଣମନାଜ୍ଜନାନାଂ କଵିତୋନ୍ମେଷଃ ସଦୀଡିତେ ଭାତି ॥ ୨୧୦ ॥
ଦୂରିକରୋତୁ ଦୁରିତଂ ତ୍ଵଦ୍ଭକ୍ତିର୍ମାମକଂ କମଲେ ।
ଅହମପି ସୁରେଶସେଵ୍ଯେ ତଵ ସଦସି ଵିଶାମି କୀର୍ତିଗାନପରଃ ॥ ୨୧୧ ॥
ପରମଜ୍ଞାନଵିଧାତ୍ରୀ ତଵ ପାଦପଯୋଜଭକ୍ତିରସ୍ମାକମ୍ ।
କିଂ ଵାଶାସ୍ଯମତୋଽନ୍ଯତ୍ ସମୁଦ୍ରତନଯେ ହରେର୍ଜାଯେ ॥ ୨୧୨ ॥
ଅମ୍ବ କଦା ଵା ଲପ୍ସ୍ଯେ ମଦୀଯପାପାପନୋଦାଯ ।
ତଵ ପାଦକମଲସେଵାମବ୍ଜଭଵାଦ୍ଯୈସ୍ତୁ ସଂପ୍ରାର୍ଥ୍ଯାମ୍ ॥ ୨୧୩ ॥
ମନ୍ଦାନାମପି ମଞ୍ଜୁଲକଵିତ୍ଵରସଦାଯିନୀ ଜନନୀ ।
କାପି କରୁଣାମଯୀ ସା ଲସତୁ ପୁରସ୍ତାତ୍ ସଦାସ୍ମାକମ୍ ॥ ୨୧୪ ॥
ସକଲକଵିଲୋକଵିନୁତେ କମଲେ କମଲାକ୍ଷି ଵଲ୍ଲଭେ ଵିଷ୍ଣୋଃ ।
ତ୍ଵନ୍ନାମାନି ହି କଲଯେ ଵନେ ଜଲେ ଶତ୍ରୁପୀଡାଯାମ୍ ॥ ୨୧୫ ॥
ଦିଵି ଵା ଭୁଵି ଦିକ୍ଷୁ ଜଲେ ଵହ୍ନୌ ଵା ସର୍ଵତଃ କମଲେ ।
ଜନ୍ତୂନାଂ କିଲ ରକ୍ଷା ତ୍ଵଦଧୀନା କୀର୍ତ୍ଯତେ ଵିବୁଧୈଃ ॥ ୨୧୬ ॥
କୁଶଲଵିଧଯେ ତଦସ୍ତୁ ତ୍ରିଵିକ୍ରମାସେଵ୍ଯରମ୍ଯନିଜକେଲି ।
କବଲିତପଦନତଦୈନ୍ଯଂ ତରୁଣାମ୍ବୁଜଲୋଚନଂ ତେଜଃ ॥ ୨୧୭ ॥
ଜନନୀ ସୁଵର୍ଣଵୃଷ୍ଟିପ୍ରଦାଯିନୀ ଭାତି ଵିଷ୍ଣୁଵକ୍ଷଃସ୍ଥା ।
କମଲା କଲିତକ୍ଷେମା ପ୍ରକୃତୀନାଂ ଶୀତଲାପାଙ୍ଗୈଃ ॥ ୨୧୮ ॥
ଜଗତାମାଦିମଜନନୀ ଲସତି କଵେରାତ୍ମଜାପୁଲିନେ ।
କ୍ଷେତ୍ରେଷୂତ୍ତମଜୁଷ୍ଟେଷ୍ଵଯୋନିଜା ଲୋକରକ୍ଷାଯୈ ॥ ୨୧୯ ॥
କୁଚଶୋଭାଜିତଵିଷ୍ଣୁଃ କୁଙ୍କୁମପଙ୍କାଙ୍କିତା କମଲା ।
କାଞ୍ଚ୍ଯାଂ ରାଜତି କାଞ୍ଚୀମଣିଗଣନୀରାଜିତାଙ୍ଘ୍ରିଯୁଗା ॥ ୨୨୦ ॥
ମନ୍ଦାରକୁସୁମମଦହରମନ୍ଦସ୍ମିତମଧୁରଵଦନପଙ୍କରୁହା ।
ହୃଦ୍ଯତମନିତ୍ଯଯୌଵନମଣ୍ଡିତଗାତ୍ରୀ ଵିରାଜତେ କମଲା ॥ ୨୨୧ ॥
କଂସରିପୁଗେହିନୀ ସା ହଂସଗତିର୍ହଂସମାନ୍ଯନିଜଚରିତା ।
ସଂସାରତାପହାନିଂ କଲଯତୁ କାଲେ ରମାସ୍ମାକମ୍ ॥ ୨୨୨ ॥
ମନସିଜଜନନୀ ଜନନୀ ଚାସ୍ମାକମିହାଦରାତ୍ କାଲେ ।
ଶୀତଲଲୋଲାପାଙ୍ଗୈସ୍ତରଙ୍ଗଯତି ଶ୍ରେଯସାଂ ସରିଣମ୍ ॥ ୨୨୩ ॥
ତଵ ମନ୍ଦହାସକଲିକାଂ ଭଜେ ଭୁଜଙ୍ଗେ ଶଯାନଂ ତମ୍ ।
ଯା କଲଯତି ଗତକୋପଂ ବାଲାନାଂ ନଃ କୃତାପରାଧାନାମ୍ ॥ ୨୨୪ ॥
ସା ସାଧଯେଦଭୀଷ୍ଟଂ କମଲା ଶ୍ରୀର୍ଵିଷ୍ଣୁଵକ୍ଷଃସ୍ଥା ।
ଯସ୍ଯାଃ ପଦଵିନ୍ଯାସଃ ଶ୍ରୁତିମୌଲିଷୁ ତନ୍ଯତେ ମହାଲକ୍ଷ୍ମ୍ଯାଃ ॥ ୨୨୫ ॥
ଶାନ୍ତିରସନିତ୍ଯଶେଵଧିମମ୍ବାଂ ସେଵେ ମନୋରଥାଵାପ୍ତ୍ଯୈ ।
ଯାମାରାଧ୍ଯ ସୁରେଶାଃ ସ୍ଵପଦଂ ପ୍ରାପୁର୍ହି ତାଦୃକ୍ଷମ୍ ॥ ୨୨୬ ॥
ଧାତୁରପି ଵେଦଵଚସାଂ ଦୂରେ ଯତ୍ସ୍ଥାନମାମନନ୍ତି ବୁଧାଃ ।
ସାସ୍ତୁ ମୁଦେ ଶ୍ରୀରେଷା ମୁରମର୍ଦନସତ୍କଲତ୍ରମମିତୌଜଃ ॥ ୨୨୭ ॥
ଭଵଦୁଃଖରାଶିଜଲଧେର୍ହଠାତ୍ ତରିତ୍ରୀଂ ପରଂ ଵିଦ୍ମଃ ।
ତାମମ୍ବାଂ କମଲସ୍ଥାଂ ମୁରାରିଵକ୍ଷୋମଣିପ୍ରଦୀପାଂ ଚ ॥ ୨୨୮ ॥
ମୁନିସାର୍ଵଭୌମଵର୍ଣିତମହାଚରିତ୍ରଂ ହରେଃ କଲତ୍ରଂ ତତ୍ ।
ପଥି ମଙ୍ଗଲାଯ ଭଵତୁ ପ୍ରସ୍ଥାନଜୁଷାଂ କୃପାଧାରମ୍ ॥ ୨୨୯ ॥
ଖଣ୍ଡିତଵୈରିଗଣେଯଂ ମଣ୍ଡିତଭକ୍ତା ସୁତାଦ୍ଯୈଶ୍ଚ ।
ଭାସୁରକୀର୍ତିର୍ଜଯତି କ୍ଷୋଣୀସୁରଵନ୍ଦ୍ଯଚରଣାବ୍ଜା ॥ ୨୩୦ ॥
ନତପାଲିନି ମାଂ ପାହି ତ୍ରିଜଗଦ୍ଵନ୍ଦ୍ଯେ ନିଧେହି ମଯି ଦଯଯା ।
ତାଵକକଟାକ୍ଷଲହରୀଃ ଶକ୍ତିମଯେ ସକଲସିଦ୍ଧୀନାମ୍ ॥ ୨୩୧ ॥
ଭଵସାଗରଂ ତିତୀର୍ଷୁସ୍ତଵ ଚରଣାବ୍ଜଂ ମହାସେଯୁମ୍ ।
ମାତଃ କଦା ନୁ ଲପ୍ସ୍ଯେ ଘନତାପୋର୍ମ୍ଯାଦିପୀଡିତୋ ଦୀନଃ ॥ ୨୩୨ ॥
କଵିଵାଗ୍ଵାସନ୍ତୀନାଂ ଵସନ୍ତଲକ୍ଷ୍ମୀର୍ମୁରାରିଦଯିତା ନଃ ।
ପରମାଂ ମୁଦଂ ଵିଧତ୍ତେ କାଲେ କାଲେ ମହାଭୂତ୍ଯୈ ॥ ୨୩୩ ॥
ସୁରହରପରତନ୍ତ୍ରଂ ତଦ୍ ଗତତନ୍ଦ୍ରଂ ଵସ୍ତୁ ନିସ୍ତୁଲମୁପାସେ ।
ତେନୈଵାହଂ ଧନ୍ଯୋ ମଦ୍ଵଂଶ୍ଯା ନିରସିତାତ୍ମତାପଭରାଃ ॥ ୨୩୪ ॥
ତୃଷ୍ଣାଂ ଶମଯତି ଦେଵୀ ରାଘଵଦଯିତା ନତାଲିସୁରଵଲ୍ଲୀ ।
ଇଟ୍ଯାର୍ଯଵଚୋ ଧୈର୍ଯଂ ଜନଯତି କାଲେ ଧରାପୁତ୍ରି ॥ ୨୩୫ ॥
ରଘୁପତିଦଯିତେ ମାତଃ କାକାସୁରରକ୍ଷଣାଦିନା ଲୋକେ ।
ତାଵକକରୁଣାମହିମା ପ୍ରଥିତଃ କିଲ ଭୂତିଦାଯୀ ନଃ ॥ ୨୩୬ ॥
ପ୍ରଚୁରତଦୁରିତପାଲୀସମାଵୃତାନାଂ କଲୌ ହି ତପ୍ତାନାମ୍ ।
ତାଵକଦଯା ହି ମାତଃ ଶରଣଂ ଵରମିତି ସତାଂ ଗଣଃ ସ୍ତୌତି ॥ ୨୩୭ ॥
ଅତ୍ଯନ୍ତଶୀତଲାଂ ତାଂ କଟାକ୍ଷଧାଟୀମୁପାସେଽହମ୍ ।
ତେନ ମମ ତ୍ରିଦଶାନାଂ ନ କୋଽପି ଭେଦୋ ଧରାତନଯେ ॥ ୨୩୮ ॥
ଯୈଃ ସେଵା ସଂକଲିତା ତଵ ପାଦାବ୍ଜେ ଧରାତନଯେ ।
ତେଷାମଜ୍ଞାନଝରୀ ଯାତି ହି ଵିଲଯଂ କ୍ଷଣେନୈଵ ॥ ୨୩୯ ॥
ଜ୍ଞାନାରଵିନ୍ଦଵିଲସନମଚିରାଦସ୍ଯ ସ୍ତୁତୌ ହି କଵିଵର୍ଯାଃ ।
ସଂପଦ୍ ଦିଵ୍ଯା ଚ ତଥା ଵିବୁଧାଵଲିମାନନୀଯାତ୍ର ॥ ୨୪୦ ॥
ମାତସ୍ତଵ ପାଦାବ୍ଜଂ ଯସ୍ଯ ଲଲାଟେ କୃତୋରୁନିଜକାନ୍ତି ।
ତତ୍ପାଦପଦ୍ମମଚିରାଦ୍ ଵିମାନଗା ଦେଵତା ଵହତି ॥ ୨୪୧ ॥
ଆଜ୍ଞାଵଶେନ ଦେଵ୍ଯା ଲସନ୍ତି ଦିଵି ଦେଵତାମାନ୍ଯାଃ ।
ଇନ୍ଦ୍ରାଦ୍ଯାଃ ସ ଚ ଧାତା ଦିକ୍ପାଲାଶ୍ଚାପି ଗନ୍ଧର୍ଵାଃ ॥ ୨୪୨ ॥
କୈଵଲ୍ଯାନନ୍ଦକଲାଦାତ୍ରୀଂ କମଲାମହର୍ନିଶଂ ନୌମି ।
ତେନୈଵ ଜନ୍ମ ସଫଲଂ ତୀର୍ଥାଦିନିଷେଵଣାଦ୍ଯଚ୍ଚ ॥ ୨୪୩ ॥
ଯଚ୍ଚ ହରିପାଦପଙ୍କେରୁହପରିଚରଣାଦିନା ଲୋକେ ।
ତତ୍ ସର୍ଵମାଶୁ ଘଟଯତି ସହସା ମନ୍ଦସ୍ଯ ମେ ମାତା ॥ ୨୪୪ ॥
ନାନାଶ୍ରୁତ୍ଯନ୍ତକଲାପରିମଲପରିଵାହଵାସିତଂ ମାତଃ ।
ତଵ ଚରଣକମଲଯୁଗଲଂ ମମାଵତଂସଃ କ୍ଷଣଂ ଭାତୁ ॥ ୨୪୫ ॥
ନତଦେଵନଗରନାରୀଧମ୍ମିଲ୍ଲଲସତ୍ସୁମାଲିକୃତନାଦାଃ ।
ପ୍ରାତର୍ମୁରଜଵିଲାସଂ କଲଯନ୍ତି ଭୃଶଂ ତଵାଗ୍ରତୋ ଭୃଙ୍ଗାଃ ॥ ୨୪୬ ॥
ପାପପ୍ରଶମନଦୀକ୍ଷାକଲାଧୁରୀଣାଃ ପଯୋଜନିଲଯେ ତେ ।
ମାଂ ଚ ପଵିତ୍ରୀକୁର୍ଯୁଃ ପାଦପରାଗାଃ କୃପାଵଶତଃ ॥ ୨୪୭ ॥
ହନ୍ତ କଦା ଵା ଲପ୍ସ୍ଯେ ତଵାଙ୍ଘ୍ରିଶୁଶ୍ରୂଷଣାସକ୍ତିମ୍ ।
ସହଜାନନ୍ଦଂ ତେନ ହି ପଦଂ କ୍ରମାତ୍ ପ୍ରାପ୍ଯମାଦିଷ୍ଟମ୍ ॥ ୨୪୮ ॥
ନଲିନୀଵିଲାସରୁଚିରାଂ ମଯି ଦେଵି ତ୍ଵତ୍କଟାକ୍ଷଲହରୀଂ ହି ।
କାଲେ ନିଧେହି ଦଯଯା ସ୍ଫୀତା ତେ କୀର୍ତିରାଦୃତା ସର୍ଵୈଃ ॥ ୨୪୯ ॥
ଵିନିହତଦୁରିତସ୍ତୋମା କାପି ମଦୀଯେ ହୃଦମ୍ଭୋଜେ ।
ଲସତୁ ପରଦେଵତାଖ୍ଯା ମାଧଵନେତ୍ରପ୍ରିଯଂକରୀ କଲିକା ॥ ୨୫୦ ॥
ପଞ୍ଚାଯୁଧଗୁରୁମନ୍ତ୍ରଂ କଲନୂପୁରନିନଦମାଦରାତ୍ କମଲେ ।
କଲଯତି ରମାଧଵଗୃହଂ ଯାତୁଂ କାଲେ ତ୍ଵଯି ପ୍ରଵୃତ୍ତାଯାମ୍ ॥ ୨୫୧ ॥
ନତନାକିଲୋକଵନିତାଲଲାଟସିନ୍ଦୂରଶୋଣକାନ୍ତିଭୃତୋଃ ।
କଲଯେ ନମାଂସି କମଲେ ତଵ ପାଦପଯୋଜଯୋର୍ନିତ୍ଯମ୍ ॥ ୨୫୨ ॥
କମଲସୁଷୁମାନିଵାସସ୍ଥାନକଟାକ୍ଷଂ ଚିରାଯ କୃତରକ୍ଷମ୍ ।
ରକ୍ଷୋଗଣଭୀତିକରଂ ତେଜୋ ଭାତି ପ୍ରକାମମିହ ମନସି ॥ ୨୫୩ ॥
ଜ୍ଯୋତ୍ସ୍ନେଵ ଶିଶିରପାତା କଟାକ୍ଷଧାଟୀ ତ୍ଵଦୀଯା ହି ।
ଅମ୍ବ ମୁକୁନ୍ଦ ( ||. incomplete ||. ) କୁରୁତେ ॥ ୨୫୪ ॥
ତାପହରରସଵିଵର୍ଷଂଅଧୃତକୁତୁକା କାପି ନୀଲନଲିନରୁଚିଃ ।
କାଦମ୍ବିନୀ ପୁରସ୍ତଦାସ୍ତାଂ ନଃ ସଂତତଂ ଜନନୀ ॥ ୨୫୫ ॥
ସଫଲଯତୁ ନେତ୍ରଯୁଗଲଂ ମାମକମେତତ୍ ତ୍ଵଦୀଯରୂପମହୋ ।
ଯତ୍ କମଲନେତ୍ରସୁଚରିତପଚେଲିମଂ ଵୈଦିକୀ ଶ୍ରୁତିର୍ବ୍ରୂତେ ॥ ୨୫୬ ॥
ମାଧଵନେତ୍ରପଯୋଜାମୃତଲହରୀ ଭାତି ତାଵକଂ ରୂପମ୍ ।
ଅମ୍ବ ଯୁଵାମାଦ୍ଯୌ ନଃ ପିତରୌ ଵନେ ସୁଖାଵାପ୍ତ୍ଯୈ ॥ ୨୫୭ ॥
ସରସକଵିତାଦିସଂପଦ୍ଵିଲସନମାରାଦୁଶାନ୍ତି କଵିଵର୍ଯାଃ ।
ଯତ୍ପ୍ରୀଣନେନ ସା ମେ ଭଵତୁ ଵିଭୂତ୍ଯୈ ହି ସା କମଲା ॥ ୨୫୮ ॥
ମନସିଜଜଯାଦିକାର୍ଯଂ ଯଦପାଙ୍ଗଲଵାନ୍ନୃଣାଂ ଭଵତି ।
ତତ୍ପଦମାନନ୍ଦକଲଂ ସେଵ୍ଯଂ ଚ ଭଜେ ରମାଂ ଜନନୀମ୍ ॥ ୨୫୯ ॥
ଶିଥିଲତତମଃସମୂହା ଭକ୍ତାନାଂ ସା ରମା ଦେଵୀ ।
ଜନଯତି ଧୈର୍ଯଂ ଚ ହରେଃ କାଲେ ଯା ସର୍ଵଦା ସେଵ୍ଯା ॥ ୨୬୦ ॥
ଯଦ୍ଭ୍ରୂଵିଲାସଵଶତଃ ଶକ୍ତଃ ସୃଷ୍ଟ୍ଯାଦିକଂ କର୍ତୁମ୍ ।
ହରିରପି ଲୋକେ ଖ୍ଯାତଃ ସା ନଃ ଶରଣଂ ଜଗନ୍ମାତା ॥ ୨୬୧ ॥
ନଯନଯୁଗଲୀଂ କଦା ମେ ସିଞ୍ଚତି ଏଵ୍ଯାଃ ପରଂ ରୂପମ୍ ।
ଯଦ୍ଭଜନାନ୍ନ ହି ଲୋକେ ଦୃଷ୍ଟଂ ଶ୍ଲାଧ୍ଯଂ ପରଂ ଵସ୍ତୁ ॥ ୨୬୨ ॥
ସୁଚରିତଫଲଂ ତ୍ଵଦୀଯଂ ରୂପଂ ନଃ କଲିତଭକ୍ତୀନାମ୍ ।
ଅତ ଏଵ ମାମକାନାଂ ପାପାନାଂ ଵିରତିରୂର୍ଜିତା କମଲେ ॥ ୨୬୩ ॥
ସୁକୃତିଵିଭଵାଦୁପାସ୍ଯା କମଲା ସା ସର୍ଵକଲ୍ଯାଣା ।
ହରିଵକ୍ଷସି କୃତଵାସା ରକ୍ଷତି ଲୋକାନହୋରାତ୍ରମ୍ ॥ ୨୬୪ ॥
ସଂଵିଦ୍ରୂପା ହି ହରେଃ କୁଟୁମ୍ବିନୀ ଭାତି ଭକ୍ତହୃଦଯେଷୁ ।
ସର୍ଵଶ୍ରେଯଃପ୍ରାପ୍ତ୍ଯୈ ଯାଂ ଵିଦୁରାର୍ଯା ରମାଂ କମଲାମ୍ ॥ ୨୬୫ ॥
ଵିଷଯଲହରୀପ୍ରଶାନ୍ତ୍ଯୈ କମଲାପାଦାମ୍ବୁଜଂ ନୌମି ।
ପୂର୍ଵଂ ଶୁକାଦିସୁଧିଯୋ ଯଦ୍ଧ୍ଯାନାଦ୍ ଗଲିତଶତ୍ରୁଭଯାଃ ॥ ୨୬୬ ॥
ଲଲିତଗମନଂ ତ୍ଵଦୀଯଂ କଲନୂପୁରନାଦପୂରିତଂ ମାତଃ ।
ନୌମି ପଦାମ୍ବୁଜଯୁଗଲଂ ଭଵତାପନିରାସନାଯାଦ୍ଯ ॥ ୨୬୭ ॥
ଵିରଲୀକରୋତି ତାପଂ କମଲାଯା ମନ୍ଦହାସଝରୀ ।
ଯତ୍ସେଵନେଷୁ ସମୁଦିତକୌତୁକରସନିର୍ଭରୋ ହରିର୍ଜଯତି ॥ ୨୬୮ ॥
ପ୍ରତିଫଲତୁ ସଂତତଂ ମେ ପୁରତୋ ମାତସ୍ତ୍ଵଦୀଯରୂପମିଦମ୍ ।
ଯଦ୍ଦର୍ଶନରସଭୂମ୍ନା ହରିରପି ନାନାସ୍ଵରୂପଭାକ୍ କାଲେ ॥ ୨୬୯ ॥
ଅମ୍ବ ତଵ ଚରଣସେଵାଂ ସଂତତମହମାଦରାତ୍ କଲଯେ ।
ତେନ ମମ ଜନ୍ମ ସଫଲଂ ତ୍ରିଦଶାନାମିଵ ମୁନୀନ୍ଦ୍ରାଣାମ୍ ॥ ୨୭୦ ॥
ଦୁର୍ଵାରଗର୍ଵଦୁର୍ମତିଦୁରର୍ଥନିରସନକଲାନିପୁଣାଃ ।
ତଵ ଚରଣସେଵଯୈଵ ହି କମଲେ ମାତର୍ବୁଧା ଜଗତି ॥ ୨୭୧ ॥
ଆନଦମେତି ମାତସ୍ତଵ ନାମୋଚ୍ଚାରଣେନ ସିନ୍ଧୁଭଵେ ।
ସଂପ୍ରାପ୍ତତ୍ଵଦ୍ରୂପଂ ମମ ମାନସମାତ୍ତଯୋଗକଲମ୍ ॥ ୨୭୨ ॥
ତଵ ଦୃଷ୍ଟିପାତଵିଭଵାତ୍ ସର୍ଵେ ଲୋକେ ଵିଧୂତତାପଭରାଃ ।
ଯାନ୍ତି ମୁଦା ତ୍ରିଦଶୈଃ ସହ ଵିଭାନମାରୁହ୍ଯ ମାତରହୋ ॥ ୨୭୩ ॥
କୋ ଵା ନ ଶ୍ରଯତି ବୁଧଃ ଶ୍ରେଯୋଽର୍ଥୀ ତାମିମାଂ କମଲାମ୍ ।
ଯାଂ ପନ୍ନଗାରିଵାହନସଦ୍ଗର୍ମିଣୀମର୍ଚଯନ୍ତି ସୁରନାଥାଃ ॥ ୨୭୪ ॥
ତାମରଵିନ୍ଦନିଵାସାମମ୍ବାଂ ଶରଣାର୍ଥିନାଂ କଲିତରକ୍ଷାମ୍ ।
ବହୁରୂପେଷ୍ଵଘନିଚଯେଷ୍ଵପି ନିଶ୍ଚିତ୍ଯାତ୍ମନୋ ଧୈର୍ଯମ୍ ॥ ୨୭୫ ॥
କରୁଣାପ୍ରଵାହଝର୍ଯା ଗତପଙ୍କ ଭୂତଲଂ ମାତଃ ।
ସତ୍ଵାଙ୍କୁରାଦିଲସିତଂ ଜଯତି ପଯୋରାଶିକକନ୍ଯକେ କମଲେ ॥ ୨୭୬ ॥
ଵିଧିଶିଵଵାସଵମୁଖ୍ଯୈର୍ଵନ୍ଦ୍ଯପଦାବ୍ଜେ ନମସ୍ତୁଭ୍ଯମ୍ ।
ମାତର୍ଵିଷ୍ଣୋର୍ଦଯିତେ ସର୍ଵଜ୍ଞତ୍ଵଂ ଚ ମେ କଲଯ ॥ ୨୭୭ ॥
ପରଦେଵତେ ପ୍ରସୀଦ ପ୍ରସୀଦ ହରିଵଲ୍ଲଭେ ମାତଃ ।
ତ୍ଵାମାହୁଃ ଶ୍ରୁତଯଃ କିଲ କଲ୍ଯାଣଗୁଣାକରାଂ ନିତ୍ଯାମ୍ ॥ ୨୭୮ ॥
କ୍ଷନ୍ତଵ୍ଯମମ୍ବ ମାମକମଘରାଶିଂ କ୍ଷପଯ ଵୀକ୍ଷଣତଃ ।
ସତ୍ଵୋନ୍ମେଷଂ ଦେହି ପ୍ରିଯେ ହରେର୍ଦାସମପି କୁରୁ ମାମ୍ ॥ ୨୭୯ ॥
ଵାଞ୍ଛିତସିଦ୍ଧିର୍ନ ସ୍ଯାଦ୍ ଯଦି ପାଦାବ୍ଜେ କୃତପ୍ରଣାମାନାମ୍ ।
ହାନିସ୍ତ୍ଵଦୀଯଯଶସାମିତି କେଚିଦ୍ଧୈର୍ଯଵନ୍ତଶ୍ଚ ॥ ୨୮୦ ॥
ସଦସଦନୁଗ୍ରହଦକ୍ଷାଂ ତ୍ଵାଂ ମାତଃ ସଂତତଂ ନୌମି ।
ଗ୍ରହପୀଡା ନୈଵ ଭଵେଦ୍ଯମପୀଡା ଦୂରତଃ କାଲେ ॥ ୨୮୧ ॥
ଵିଦ୍ଯାଃ କଲାଶ୍ଚ କାଲେ କୃପଯା କଲଯ ପ୍ରସୀଦାଶୁ ।
ମାତସ୍ତ୍ଵମେଵ ଜଗତାଂ ସର୍ଵେଷାଂ ରକ୍ଷଣଂ ତ୍ଵଯା କ୍ରିଯତେ ॥ ୨୮୨ ॥
ଉଛେଷ୍ଵପି ନୀଚେଷୁ ପ୍ରକାଶତେ ତୁଲ୍ଯମେଵ ତଵ ରୂପମ୍ ।
ଏତଦ୍ ଦୃଷ୍ଟ୍ଵା ଧୈର୍ଯଂ ଘନାଗସୋଽପ୍ଯମ୍ବ ଜାଯତେ ନନୁ ମେ ॥ ୨୮୩ ॥
କା ଶଙ୍କା ତଵ ଵୈଭଵଜାଲଂ ଵକ୍ତୁଂ ଦିଗନ୍ତରେ ମାତଃ ।
ଵରହାରାଲଂକାରାଂ ସେଵନ୍ତେ ତ୍ଵାଂ ହରିତ୍ପତଯଃ ॥ ୨୮୪ ॥
କମଲାଯାଶ୍ଚ ହରେରପି ସଂଦୃଷ୍ଯଂ ଦିଵ୍ଯଦାଂପତ୍ଯମ୍ ।
ତାଵେଵ ନଃ ପତୀ କିଲ ଜନ୍ମାନ୍ତରପୁଣ୍ଯପରିପାକାତ୍ ॥ ୨୮୫ ॥
ସର୍ଵାସାମୁପନିଷଦାଂ ଵିଦ୍ଯାନାଂ ତ୍ଵଂପରଂ ସ୍ଥାନମ୍ ।
ଅଲ୍ପଧିଯୋ ଵଯମେତେ ତ୍ଵତ୍ସ୍ତୋତ୍ରେ ଭୋଃ କଥଂ ଶକ୍ତାଃ ॥ ୨୮୬ ॥
ସାଷ୍ଟାଙ୍ଗପ୍ରଣତିରିଯଂ ପ୍ରକଲ୍ପିତା ମାତରଦ୍ଯ ତଵ ଚରଣେ ।
ତେନାହଂ ହି କୃତାର୍ଥଃ କିଂ ପ୍ରାର୍ଥ୍ଯଂ ଵସ୍ତ୍ଵତଃ କମଲେ ॥ ୨୮୭ ॥
ସ୍ତୋତ୍ରମିଦଂହି ମଯା ତେ ଚରଣାମ୍ଭୋଜେ ସମର୍ପିତଂ ଭକ୍ତ୍ଯା ।
ତଵ ଚ ଗୁରୋରପି ଵୀକ୍ଷା ତତ୍ର ନିଦାନଂ ପରଂ ନାନ୍ଯତ୍ ॥ ୨୮୮ ॥
ଦେହାନ୍ତେ ନନୁ ମାତର୍ମୋକ୍ଷଂ ତ୍ରିଦଶୈଃ ସମଂ ଦେହି ।
ଅହମପି ସାମ ପଠନ୍ ସନ୍ ତ୍ଵାଂ ଚ ହରିଂ ଯାମି ଶରଣାର୍ଥୀ ॥ ୨୮୯ ॥
ଶୁକଵାଣୀମିଵ ମାତର୍ନିରର୍ଥକାଂ ମଦ୍ଵଚୋଭଙ୍ଗୀମ୍ ।
ଆରାଚ୍ଛୃଣୋଷି ଦଯଯା ତଦେଵ ଚୋତ୍ତମପଦଵ୍ଯକ୍ତ୍ଯୈ ॥ ୨୯୦ ॥
ଵିଦ୍ଯାଂ କଲାଂ ଵରିଷ୍ଠାଂ ଅମ୍ବ ତ୍ଵାଂ ସଂତତଂ ଵନ୍ଦେ ।
ଯା ଵ୍ଯାକରୋଷି କାଲେ ଵିଦ୍ଵଦ୍ଭିର୍ଵେଦତତ୍ତ୍ଵାଦି ॥ ୨୯୧ ॥
ଵୈଦୁଷ୍ଯଂ ଵାଣ୍ଯାଃ ସତ୍ସଂପଜ୍ଝର୍ଯୋ ଯଦୀଯଵୀକ୍ଷଣତଃ ।
ସିଧ୍ଯନ୍ତ୍ଯପି ଦେଵାନାଂ ସା ନଃ ଶରଣଂ ରମା ଦେଵୀ ॥ ୨୯୨ ॥
ଵିପୁଲଂ ଶ୍ରିଯୋ ଵିଲାସଂ ଶ୍ରଦ୍ଧାଂ ଭକ୍ତ୍ଯାଦିକଂ ଦେହି ।
ଅମ୍ବ ପ୍ରସୀଦ କାଲେ ତଵ ପାଦାବ୍ଜୈକସେଵିନାମିହ ନଃ ॥ ୨୯୩ ॥
କେଚିତ୍ ପ୍ରାଞ୍ଚଃ କମଲାଂ ପ୍ରାପ୍ଯ ହି ଶରଣଂ ଵିପତ୍କାଲେ ।
ଝଟିତି ଵିଧୂନିତତାପାଃ ସା ମେ ଦେଵୀ ପ୍ରସନ୍ନାସ୍ତୁ ॥ ୨୯୪ ॥
ମରକତକାନ୍ତିମନୋହରମୂର୍ତିଃ ସୈଷା ରମା ଦେଵୀ ।
ପାତି ସକଲାନି କାଲେ ଜଗନ୍ତି କରୁଣାଵଲୋକାଦ୍ଯୈଃ ॥ ୨୯୫ ॥
ଭାଗୀରଥୀଵ ଵାଣୀ ତଵ ନୁତିରୂପା ଵିରାଜତେ ପରମା ।
ଇହ ମାତର୍ଯଦ୍ଭଜନଂ ସର୍ଵେଷାଂ ସର୍ଵସଂପଦାଂ ହେତୁଃ ॥ ୨୯୬ ॥
କଲଶପଯୋଦଧିତନଯେ ହରିପ୍ରିଯେ ଲକ୍ଷ୍ମି ମାତରମ୍ବେତି ।
ତଵ ନାମାନି ଜପନ୍ ସନ୍ ତ୍ଵଦ୍ଦାସୋଽହଂ ତୁ ମୁକ୍ତଯେ ସିଦ୍ଧଃ ॥ ୨୯୭ ॥
ନିଖିଲଚରାଚରରକ୍ଷାଂ ଵିତନ୍ଵତୀ ଵିଷ୍ଣୁଵଲ୍ଲଭା କମଲା ।
ମମ କୁଲଦୈଵତମେଷା ଜଯତି ସଦାରାଧ୍ଯମାନ୍ଯପାଦକମଲା ॥ ୨୯୮ ॥
ସର୍ଵଜନ୍ନୁତଵିଭଵେ ସଂତତମପି ଵାଞ୍ଛିତପ୍ରଦେ ଦେଵି ।
ଅମ୍ବ ତ୍ଵମେଵ ଶରଣଂ ତେନାହଂ ପ୍ରାପ୍ତସର୍ଵକାର୍ଯାର୍ଥଃ ॥ ୨୯୯ ॥
କମଲେ କଥଂ ନୁ ଵର୍ଣ୍ଯସ୍ତଵ ମହିମା ନିଗମମୌଲିଗଣଵେଦ୍ଯଃ ।
ଇତି ନିଶ୍ଚିତ୍ଯ ପଦାବ୍ଜଂ ତଵ ଵନ୍ଦେ ମୋକ୍ଷକାମୋଽହମ୍ ॥ ୩୦୦ ॥
ତ୍ଵାମମ୍ବ ବାଲିଶୋଽହଂ ତ୍ଵଚମତ୍କାରୈର୍ଗିରାଂ ଗୁମ୍ଭୈଃ ।
ଅଯଥାଯଥକ୍ରମଂ ହି ସ୍ତୁଵନ୍ନପି ପ୍ରାପ୍ତଜନ୍ମସାଫଲ୍ଯଃ ॥ ୩୦୧ ॥
ଇତି ଶ୍ରୀକମଲାତ୍ରିଶତୀ ସମାପ୍ତା
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ତ୍oday
http://sanskritdocuments.org
Kamala Trishati Lyrics in Oriya PDF
% File name : kamalA300.itx
% Category : trishati
% Location : doc\_devii
% Author : gaNgAdharamakhivirachitA
% Language : Sanskrit
% Subject : hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : July 15, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : kamalA300.itx
% Category : trishati
% Location : doc\_devii
% Author : gaNgAdharamakhivirachitA
% Language : Sanskrit
% Subject : hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : July 15, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website