{॥ ಶ್ರೀಲಕ್ಷ್ಮೀಲಹರೀ ॥}
ಶ್ರೀಗಣೇಶಾಯ ನಮಃ ।
ಸಮುನ್ಮೀಲನ್ನೀಲಾಮ್ಬುಜನಿಕರನೀರಾಜಿತರುಚಾಮ್-
ಅಪಾಙ್ಗಾನಾಂ ಭಙ್ಗೈರಮೃತಲಹರೀಶ್ರೇಣಿಮಸೃಣೈಃ ।
ಹ್ರಿಯಾ ಹೀನಂ ದೀನಂ ಭೃಶಮುದರಲೀನಂ ಕರುಣಯಾ
ಹರಿಶ್ಯಾಮಾ ಸಾ ಮಾಮವತು ಜಡಸಾಮಾಜಿಕಮಪಿ ॥ ೧॥

ಸಮುನ್ಮೀಲತ್ವನ್ತಃಕರಣಕರುಣೋದ್ಗಾರಚತುರಃ
ಕರಿಪ್ರಾಣತ್ರಾಣಪ್ರಣಯಿನಿ ದೃಗನ್ತಸ್ತವ ಮಯಿ ।
ಯಮಾಸಾದ್ಯೋನ್ಮಾದ್ಯದ್ದ್ವಿಪನಿಯುತಗಣ್ಡಸ್ಥಲಗಲನ್-
ಮದಕ್ಲಿನ್ನದ್ವಾರೋ ಭವತಿ ಸುಖಸಾರೋ ನರಪತಿಃ ॥ ೨॥

ಉರಸ್ಯಸ್ಯ ಭ್ರಶ್ಯತ್ಕಬರಭರನಿರ್ಯತ್ಸುಮನಸಃ
ಪತನ್ತಿ ಸ್ವರ್ಬಾಲಾಃ ಸ್ಮರಶರಪರಾಧೀನಮನಸಃ ।
ಸುರಾಸ್ತಂ ಗಾಯನ್ತಿ ಸ್ಫುರಿತತನುಗಙ್ಗಾಧರಮುಖಾಸ್-
ತವಾಯಂ ದೃಕ್ಪಾತೋ ಯದುಪರಿ ಕೃಪಾತೋ ವಿಲಸತಿ ॥ ೩॥

ಸಮೀಪೇ ಸಙ್ಗೀತಸ್ವರಮಧುರಭಙ್ಗೀ ಮೃಗದೃಶಾಂ
ವಿದೂರೇ ದಾನಾನ್ಧದ್ವಿರದಕಲಭೋದ್ದಾಮನಿನದಃ ।
ಬಹಿರ್ದ್ವಾರೇ ತೇಷಾಂ ಭವತಿ ಹಯಹೇಷಾಕಲಕಲೋ
ದೃಗೇಷಾ ತೇ ಯೇಷಾಮುಪರಿ ಕಮಲೇ ದೇವಿ ಸದಯಾ ॥ ೪॥

ಅಗಣ್ಯೈರಿನ್ದ್ರಾದ್ಯೈರಪಿ ಪರಮಪುಣ್ಯೈಃ ಪರಿಚಿತೋ
ಜಗಜ್ಜನ್ಮಸ್ಥಾನಪ್ರಲಯರಚನಾಶಿಲ್ಪನಿಪುಣಃ ।
ಉದಞ್ಚತ್ಪೀಯೂಷಾಮ್ಬುಧಿಲಹರಿಲೀಲಾಮನುಹರನ್-
ನಪಾಙ್ಗಸ್ತೇಽಮನ್ದಂ ಮಮ ಕಲುಷವೃನ್ದಂ ದಲಯತು ॥ ೫॥

ನಮನ್ಮೌಲಿಶ್ರೇಣಿತ್ರಿಪುರಪರಿಪನ್ಥಿಪ್ರತಿಲಸತ್-
ಕಪರ್ದವ್ಯಾವೃತ್ತಿಸ್ಫುರಿತಫಣಿಫೂತ್ಕಾರಚಕಿತಃ ।
ಲಸತ್ಫುಲ್ಲಾಮ್ಭೋಜಮ್ರದಿಮಹರಣಃ ಕೋಽಪಿ ಚರಣಶ್-
ಚಿರಂ ಚೇತಶ್ಚಾರೀ ಮಮ ಭವತು ವಾರೀಶದುಹಿತುಃ ॥ ೬॥

ಪ್ರವಾಲಾನಾಂ ದೀಕ್ಷಾಗುರುರಪಿ ಚ ಲಾಕ್ಷಾರುಣರುಚಾಂ
ನಿಯನ್ತ್ರೀ ಬನ್ಧೂಕದ್ಯುತಿನಿಕರಬನ್ಧೂಕೃತಿಪಟುಃ ।
ನೃಣಾಮನ್ತರ್ಧ್ವಾನ್ತಂ ನಿಬಿಡಮಪಹರ್ತುಂ ತವ ಕಿಲ
ಪ್ರಭಾತಶ್ರೀರೇಷಾ ಚರಣರುಚಿವೇಷಾ ವಿಜಯತೇ ॥ ೭॥

ಪ್ರಭಾತಪ್ರೋನ್ಮೀಲತ್ಕಮಲವನಸಞ್ಚಾರಸಮಯೇ
ಶಿಖಾಃ ಕಿಞ್ಜಲ್ಕಾನಾಂ ವಿದಧತಿ ರುಜಂ ಯತ್ರ ಮೃದುಲಾಃ ।
ತದೇತನ್ಮಾತಸ್ತೇ ಚರಣಮರುಣಶ್ಲಾಘ್ಯಕರುಣಂ
ಕಠೋರಾ ಮದ್ವಾಣೀ ಕಥಮಿಯಮಿದಾನೀಂ ಪ್ರವಿಶತು ॥ ೮॥

ಸ್ಮಿತಜ್ಯೋತ್ಸ್ನಾಮಜ್ಜದ್ದ್ವಿಜಮಣಿಮಯೂಖಾಮೃತಝರೈರ್-
ನಿಷಿಞ್ಚನ್ತೀಂ ವಿಶ್ವಂ ತವ ವಿಮಲಮೂರ್ತಿಂ ಸ್ಮರತಿ ಯಃ ।
ಅಮನ್ದಂ ಸ್ಯನ್ದನ್ತೇ ವದನಕಮಲಾದತ್ಯ ಕೃತಿನೋ
ವಿವಿಕ್ತೌ ವೈ ಕಲ್ಪಾಃ ಸತತಮವಿಕಲ್ಪಾ ನವಗಿರಃ ॥ ೯॥

ಶರೌ ಮಾಯಾಬೀಜೌ ಹಿಮಕರಕಲಾಕ್ರಾನ್ತಶಿರಸೌ
ವಿಧಾಯೋರ್ಧ್ವಂ ಬಿನ್ದುಂ ಸ್ಫುರಿತಮಿತಿ ಬೀಜಂ ಜಲಧಿಜೇ ।
ಜಪೇದ್ಯಃ ಸ್ವಚ್ಛನ್ದಂ ಸ ಹಿ ಪುನರಮನ್ದಂ ಗಜಘಟಾಮ್-
ಅದಭ್ರಾಮ್ಯದ್ಭೃಙ್ಗೈರ್ಮುಖರಯತಿ ವೇಶ್ಮಾನಿ ವಿದುಷಾಮ್ ॥ ೧೦॥

ಸ್ಮರೋ ನಾಮಂ ನಾಮಂ ತ್ರಿಜಗದಭಿರಾಮಂ ತವ ಪದಂ
ಪ್ರಪೇದೇ ಸಿದ್ಧಿಂ ಯಾಂ ಕಥಮಿವ ನರಸ್ತಾಂ ಕಥಯತು ।
ಯಯಾ ಪಾತಂ ಪಾತಂ ಪದಕಮಲಯೋಃ ಪರ್ವತಚರೋ
ಹರೋ ಹಾ ರೋಷಾರ್ದ್ರಾಮನುನಯತಿ ಶೈಲೇನ್ದ್ರತನಯಾಮ್ ॥ ೧೧॥

ಹರನ್ತೋ ನಿಃಶಙ್ಕಂ ಹಿಮಕರಕಲಾನಾಂ ರುಚಿರತಾಂ
ಕಿರನ್ತಃ ಸ್ವಚ್ಛನ್ದಂ ಕಿರಣಮಯಪೀಯೂಷನಿಕರಮ್ ।
ವಿಲುಮ್ಪನ್ತು ಪ್ರೌಢಾ ಹರಿಹೃದಯಹಾರಾಃ ಪ್ರಿಯತಮಾ
ಮಮಾನ್ತಃಸನ್ತಾಪಂ ತವ ಚರಣಶೋಣಾಮ್ಬುಜನಖಾಃ ॥ ೧೨॥

ಮಿಷಾನ್ಮಾಣಿಕ್ಯಾನಾಂ ವಿಗಲಿತನಿಮೇಷಂ ನಿಮಿಷತಾಮ್-
ಅಮನ್ದಂ ಸೌನ್ದರ್ಯ ತವ ಚರಣಯೋರಮ್ಬುಧಿಸುತೇ ।
ಪದಾಲಙ್ಕಾರಾಣಾಂ ಜಯತಿ ಕಲನಿಕ್ವಾಣನಪಟುರ್-
ಉದಞ್ಚನ್ನುದ್ದಾಮಃ ಸ್ತುತಿವಚನಲೀಲಾಕಲಕಲಃ ॥ ೧೩॥

ಮಣಿಜ್ಯೋತ್ಸ್ನಾಜಾಲೈರ್ನಿಜತನುರುಚಾಂ ಮಾಂಸಲತಯಾ
ಜಟಾಲಂ ತೇ ಜಙ್ಘಾಯುಗಲಮಘಭಙ್ಗಾಯ ಭವತು ।
ಭ್ರಮನ್ತೀ ಯನ್ಮಧ್ಯೇ ದರದಲಿತಶೋಣಾಮ್ಬುಜರುಚಾಂ
ದೃಶಾಂ ಮಾಲಾ ನೀರಾಜನಮಿವ ವಿಧತ್ತೇ ಮುರರಿಪೋಃ ॥ ೧೪॥

ಹರದ್ಗರ್ವಂ ಸರ್ವಂ ಕರಿಪತಿಕರಾಣಾಂ ಮೃದುತಯಾ
ಭೃಶಂ ಭಾಭಿರ್ದಮ್ಭಂ ಕನಕಮಯರಮ್ಭಾವನಿರುಹಾಮ್ ।
ಲಸಜ್ಜಾನುಜ್ಯೋತ್ಸ್ನಾ ತರಣಿಪರಿಣದ್ಧಂ ಜಲಧಿಜೇ
ತವೋರುದ್ವನ್ದ್ವಂ ನಃ ಶ್ಲಥಯತು ಭವೋರುಜ್ವರಭಯಮ್ ॥ ೧೫॥

ಕಲಕ್ವಾಣಾಂ ಕಾಞ್ಚೀಂ ಮಣಿಗಣಜಟಾಲಾಮಧಿವಹನ್-
ವಸಾನಃ ಕೌಸುಮ್ಭಂ ವಸನಮಸನಂ ಕೌಸ್ತುಭರುಚಾಮ್ ।
ಮುನಿವ್ರಾತೈಃ ಪ್ರಾತಃ ಶುಚಿವಚನಜಾತೈರತಿನುತಂ
ನಿತಮ್ಬಸ್ತೇ ಬಿಮ್ಬಂ ಹಸತಿ ನವಮಮ್ಬಾಮ್ಬರಮಣೇಃ ॥ ೧೬॥

ಜಗನ್ಮಿಥ್ಯಾಭೂತಂ ಮಮ ನಿಗದತಾಂ ವೇದವಚಸಾಮ್-
ಅಭಿಪ್ರಾಯೋ ನಾದ್ಯಾವಧಿ ಹೃದಯಮಧ್ಯಾವಿಶದಯಮ್ ।
ಇದಾನೀಂ ವಿಶ್ವೇಷಾಂ ಜನಕಮುದರಂ ತೇ ವಿಮೃಶತೋ
ವಿಸನ್ದೇಹಂ ಚೇತೋಽಜನಿ ಗರುಡಕೇತೋಃ ಪ್ರಿಯತಮೇ ॥ ೧೭॥

ಅನಲ್ಪೈರ್ವಾದೀನ್ದ್ರೈರಗಣಿತಮಹಾಯುಕ್ತಿನಿವಹೈರ್-
ನಿರಸ್ತಾ ವಿಸ್ತಾರಂ ಕ್ವಚಿದಕಲಯನ್ತೀ ತನುಮಪಿ ।
ಅಸತ್ಖ್ಯಾತಿವ್ಯಾಖ್ಯಾಧಿಕಚತುರಿಮಾಖ್ಯಾತಮಹಿಮಾ
ವಲಗ್ನೇ ಲಗ್ನೇಯಂ ಸುಗತಮತಸಿದ್ಧಾನ್ತಸರಣಿಃ ॥ ೧೮॥

ನಿದಾನಂ ಶೃಙ್ಗಾಂರಪ್ರಕರಮಕರನ್ದಸ್ಯ ಕಮಲೇ
ಮಹಾನೇವಾಲಮ್ಬೋ ಹರಿನಯನರೋಲಮ್ಬವರಯೋಃ ।
ನಿಧಾನಂ ಶೋಭಾನಾಂ ನಿಧನಮನುತಾಪಸ್ಯ ಜಗತೋ
ಜವೇನಾಭೀತಿಂ ಮೇ ದಿಶತು ತವ ನಾಭೀಸರಸಿಜಮ್ ॥ ೧೯॥

ಗಭೀರಾಮುದ್ವೇಲಾಂ ಪ್ರಥಮರಸಕಲ್ಲೋಲಮಿಲಿತಾಂ
ವಿಗಾಢುಂ ತೇ ನಾಭೀವಿಮಲಸರಸೀಂ ಗೌರ್ಮಮ ಮನಾಕ್ ।
ಪದಂ ಯಾವನ್ನಯಸ್ಯತ್ಯಹಹ ವಿನಿಮಗ್ನೈವ ಸಹಸಾ
ನಹಿ ಕ್ಷೇಮಂ ಸೂತೇ ಗುರುಮಹಿಮಭೂತೇಷ್ವವಿನಯಃ ॥ ೨೦॥

ಕುಚೌ ತೇ ದುಗ್ಧಾಮ್ಭೋನಿಧಿಕುಲಶಿಖಾಮಣ್ಡನಮಣೇ
ಹರೇತೇ ಸೌಭಾಗ್ಯಂ ಯದಿ ಸುರಗಿರೇಶ್ಚಿತ್ರಮಿಹ ಕಿಮ್ ।
ತ್ರಿಲೋಕೀಲಾವಣ್ಯಾಹರಣನವಲೀಲಾನಿಪುಣಯೋರ್-
ಯಯೋರ್ದತ್ತೇ ಭೂಯಃ ಕರಮಖಿಲನಾಥೋ ಮಧುರಿಪುಃ ॥ ೨೧॥

ಹರಕ್ರೋಧತ್ರಸ್ಯನ್ಮದನನವದುರ್ಗದ್ವಯತುಲಾಂ
ದಧತ್ಕೋಕದ್ವನ್ದ್ವದ್ಯುತಿದಮನದೀಕ್ಷಾಧಿಗುರುತಾಮ್ ।
ತವೈತದ್ವಕ್ಷೋಜದ್ವಿತಯಮರವಿನ್ದಾಕ್ಷಮಹಿಲೇ
ಮಮ ಸ್ವಾನ್ತಧ್ವಾನ್ತಂ ಕಿಮಪಿ ಚ ನಿತಾನ್ತಂ ಗಮಯತು ॥ ೨೨॥

ಅನೇಕಬ್ರಹ್ಮಾಣ್ಡಸ್ಥಿತಿನಿಯಮಲೀಲಾವಿಲಸಿತೇ
ದಯಾಪೀಯೂಷಾಮ್ಭೋನಿಧಿಸಹಜಸಂವಾಸಭವನೇ ।
ವಿಧೋಶ್ಚಿತ್ತಾಯಾಮೇ ಹೃದಯಕಮಲೇ ತೇ ತು ಕಮಲೇ
ಮನಾಙ್ಗ ಮನ್ನಿಸ್ತಾರಸ್ಮೃತಿರಪಿ ಚ ಕೋಣೇ ನಿವಸತು ॥ ೨೩॥

ಮೃಣಾಲೀನಾಂ ಲೀಲಾಃ ಸಹಜಲವಣಿಮ್ನಾ ಲಘಯತಾಂ
ಚತುರ್ಣಾಂ ಸೌಭಾಗ್ಯಂ ತವ ಜನನಿ ದೋಷ್ಣಾಂ ವದತು ಕಃ ।
ಲುಠನ್ತಿ ಸ್ವಚ್ಛನ್ದಂ ಮರಕತಶಿಲಾಮಾಂಸಲರುಚಃ
ಶ್ರುತೀನಾಂ ಸ್ಪರ್ಧಾಂ ಯೇ ದಧತ ಇವ ಕಣ್ಠೇ ಮಧುರಿಪೋಃ ॥ ೨೪॥

ಅಲಭ್ಯಂ ಸೌರಭ್ಯಂ ಕವಿಕುಲನಮಸ್ಯಾ ರುಚಿರತಾ
ತಥಾಪಿ ತ್ವದ್ಧಸ್ತೇ ನಿವಸದರವಿನ್ದಂ ವಿಕಸಿತಮ್ ।
ಕಲಾಪೇ ಕಾವ್ಯಾನಾಂ ಪ್ರಕೃತಿಕಮನೀಯಸ್ತುತಿವಿಧೌ
ಗುಣೋತ್ಕರ್ಷಾಧಾನಂ ಪ್ರಥಿತಮುಪಮಾನಂ ಸಮಜನಿ ॥ ೨೫॥

ಅನಲ್ಪಂ ಜಲ್ಪನ್ತು ಪ್ರತಿಹತಧಿಯಃ ಪಲ್ಲವತುಲಾಂ
ರಸಜ್ಞಾಮಜ್ಞಾನಾಂ ಕ ಇವ ಕಮಲೇ ಮಂಥರಯತು ।
ತ್ರಪನ್ತು ಶ್ರೀಭಿಕ್ಷಾವಿತರಣವಶೀಭೂತಜಗತಾಂ
ಕರಾಣಾಂ ಸೌಭಾಗ್ಯಂ ತವ ತುಲಯಿತುಂ ತುಙ್ಗರಸನಾಃ ॥ ೨೬॥

ಸಮಾಹಾರಃ ಶ್ರೀಣಾಂ ವಿರಚಿತವಿಹಾರೋ ಹರಿದೃಶಾಂ
ಪರೀಹಾರೋ ಭಕ್ತಪ್ರಭವಭವಸನ್ತಾಪಸರಣೇಃ ।
ಪ್ರಹಾರಃ ಸರ್ವಾಸಾಮಪಿ ಚ ವಿಪದಾಂ ವಿಷ್ಣುದಯಿತೇ
ಮಮೋದ್ಧಾರೋಪಾಯಂ ತವ ಸಪದಿ ಹಾರೋ ವಿಮೃಶತು ॥ ೨೭॥

ಅಲಙ್ಕುರ್ವಾಣಾನಾಂ ಮಣಿಗಣಘೃಣೀನಾಂ ಲವಣಿಮಾ
ಯದೀಯಾಭಿರ್ಭಾಭಿರ್ಭಜತಿ ಮಹಿಮಾನಂ ಲಘುರಪಿ ।
ಸುಪರ್ವಶ್ರೇಣೀನಾಂ ಜನಿತಪರಸೌಭಾಗ್ಯವಿಭವಾಸ್-
ತವಾಙ್ಗುಲ್ಯಸ್ತಾ ಮೇ ದದತು ಹರಿವಾಮೇಽಭಿಲಷಿತಮ್ ॥ ೨೮॥

ತಪಸ್ತೇಪೇ ತೀವ್ರಂ ಕಿಮಪಿ ಪರಿತಪ್ಯ ಪ್ರತಿದಿನಂ
ತವ ಗ್ರೀವಾಲಕ್ಷ್ಮೀಲವಪರಿಚಯಾದಾಪ್ತವಿಭವಮ್ ।
ಹರಿಃ ಕಮ್ಬುಂ ಚುಮ್ಬತ್ಯಥ ವಹತಿ ಪಾಣೌ ಕಿಮಧಿಕಂ
ವದಾಮಸ್ತತ್ರಾಯಂ ಪ್ರಣಯವಶತೋಽಸ್ಯೈ ಸ್ಪೃಹಯತಿ ॥ ೨೯॥

ಅಭೂದಪ್ರತ್ಯೂಹಃ ಸಕಲಹರಿದುಲ್ಲಾಸನವಿಧಿರ್-
ವಿಲೀನೋ ಲೋಕಾನಾಂ ಸ ಹಿ ನಯನತಾಪೋಽಪಿ ಕಮಲೇ ।
ತವಾಸ್ಮಿನ್ಪೀಯೂಷಂ ಕಿರತಿ ವದನೇ ರಮ್ಯವದನೇ
ಕುತೋ ಹೇತೋಶ್ಚೇತೋವಿಧುರಯಮುದೇತಿ ಸ್ಮ ಜಲಧೇಃ ॥ ೩೦॥

ಮುಖಾಮ್ಭೋಜೇ ಮನ್ದಸ್ಮಿತಮಧುರಕಾನ್ತ್ಯಾ ವಿಕಸತಾಂ
ದ್ವಿಜಾನಾಂ ತೇ ಹೀರಾವಲಿವಿಹಿತನೀರಾಜನರುಚಾಮ್ ।
ಇಯಂ ಜ್ಯೋತ್ಸ್ನಾ ಕಾಪಿ ಸ್ರವದಮೃತಸಂದೋಹಸರಸಾ
ಮಮೋದ್ಯದ್ದಾರಿದ್ರ್ಯಜ್ವರತರುಣತಾಪಂ ತಿರಯತು ॥ ೩೧॥

ಕುಲೈಃ ಕಸ್ತೂರೀಣಾಂ ಭೃಶಮನಿಶಮಾಶಾಸ್ಯಮಪಿ
ಚ ಪ್ರಭಾತಪ್ರೋನ್ಮೀಲನ್ನಲಿನನಿವಹೈರಶ್ರುತಚರಮ್ ।
ವಹನ್ತಃ ಸೌರಭ್ಯಂ ಮೃದುಗತಿವಿಲಾಸಾ ಮಮ ಶಿವಂ
ತವ ಶ್ವಾಸಾ ನಾಸಾಪುಟವಿಹಿತವಾಸಾ ವಿದಧತಾಮ್ ॥ ೩೨॥

ಕಪೋಲೇ ತೇ ದೋಲಾಯಿತಲಲಿತಲೋಲಾಲಕವೃತೇ
ವಿಮುಕ್ತಾ ಧಮ್ಮಿಲ್ಲಾದಭಿಲಸತಿ ಮುಕ್ತಾವಲಿರಿಯಮ್ ।
ಸ್ವಕೀಯಾನಾಂ ಬನ್ದೀಕೃತಮಸಹಮಾನೈರಿವ ಬಲಾನ್-
ನಿಬಧ್ಯೋರ್ಧ್ವಂ ಕೃಷ್ಟಾ ತಿಮಿರನಿಕುರಮ್ಬೈರ್ವಿಧುಕಲಾ ॥ ೩೩॥

ಪ್ರಸಾದೋ ಯಸ್ಯಾಯಂ ನಮದಮಿತಗೀರ್ವಾಣಮುಕುಟ-
ಪ್ರಸರ್ಪಜ್ಜೋತ್ಸ್ನಾಭಿಶ್ಚರಣತಲಪೀಠಾರ್ಚಿತವಿಧಿಃ ।
ದೃಗಮ್ಭೋಜಂ ತತ್ತೇ ಗತಿಹಸಿತಮತ್ತೇಭಗಮನೇ
ವನೇ ಲೀನೈರ್ದೀನೈಃ ಕಥಯ ಕಥಮೀಯಾದಿಹ ತುಲಾಮ್ ॥ ೩೪॥

ದುರಾಪಾ ದುರ್ವೃತ್ತೈರ್ದುರಿತದಮನೇ ದಾರಣಭರಾ
ದಯಾರ್ದ್ರಾ ದೀನಾನಾಮುಪರಿ ದಲದಿನ್ದೀವರನಿಭಾ ।
ದಹನ್ತೀ ದಾರಿದ್ರ್ಯದ್ರುಮಕುಲಮುದಾರದ್ರವಿಣದಾ
ತ್ವದೀಯಾ ದೃಷ್ಟಿರ್ಮೇ ಜನನಿ ದುರದೃಷ್ಟಂ ದಲಯತು ॥ ೩೫॥

ತವ ಶ್ರೋತ್ರೇ ಫುಲ್ಲೋತ್ಪಲಸಕಲಸೌಭಾಗ್ಯಜಯಿನೀ
ಸದೈವ ಶ್ರೀನಾರಾಯಣಗುಣಗಣೌಘಪ್ರಣಯಿನೀ ।
ರವೈರ್ದೀನಾಂ ಲೀನಾಮನಿಶಮವಧಾನಾತಿಶಯಿನೀ
ಮಮಾಪ್ಯೇತಾಂ ವಾಚಂ ಜಲಧಿತನಯೇ ಗೋಚರಯತಾಮ್ ॥ ೩೬॥

ಪ್ರಭಾಜಾಲೈಃ ಪ್ರಾಭಾತಿಕದಿನಕರಾಭಾಪನಯನಂ
ತವೇದಂ ಖೇದಂ ಮೇ ವಿಘಟಯತು ತಾಟಙ್ಕಯುಗಲಮ್ ।
ಮಹಿಮ್ನಾ ಯಸ್ಯಾಯಂ ಪ್ರಲಯಸಮಯೇಽಪಿ ಕ್ರತುಭುಜಾಂ
ಜಗತ್ಪಾಯಂ ಪಾಯಂ ಸ್ವಪಿತಿ ನಿರಪಾಯಂ ತವ ಪತಿಃ ॥ ೩೭॥

ನಿವಾಸೋ ಮುಕ್ತಾನಾಂ ನಿಬಿಡತರನೀಲಾಮ್ಬುದನಿಭಸ್-
ತವಾಯಂ ಧಮ್ಮಿಲ್ಲೋ ವಿಮಲಯತು ಮಲ್ಲೋಚನಯುಗಮ್ ।
ಭೃಶಂ ಯಸ್ಮಿನ್ಕಾಲಾಗರುಬಹುಲಸೌರಭ್ಯನಿವಹೈಃ
ಪತನ್ತಿ ಶ್ರೀಭಿಕ್ಷಾರ್ಥಿನ ಇವ ಮದಾನ್ಧಾ ಮಧುಲಿಹಃ ॥ ೩೮॥

ವಿಲಗ್ನೌ ತೇ ಪಾರ್ಶ್ವದ್ವಯಪರಿಸರೇ ಮತ್ತಕರಿಣೌ
ಕರೋನ್ನೀತೈರಞ್ಚನ್ಮಣಿಕಲಶಮುಗ್ಧಾಸ್ಯಗಲಿತೈಃ ।
ನಿಷಿಞ್ಚನ್ತೌ ಮುಕ್ತಾಮಣಿಗಣಜಯೈಸ್ತ್ವಾಂ ಜಲಕಣೈರ್-
ನಮಸ್ಯಾಮೋ ದಾಮೋದರಗೃಹಿಣೀ ದಾರಿದ್ರ್ಯದಲಿತಾಃ ॥ ೩೯॥

ಅಯೇ ಮಾತರ್ಲಕ್ಷ್ಮಿ ತ್ವದರುಣಪದಾಮ್ಭೋಜನಿಕಟೇ
ಲುಠನ್ತಂ ಬಾಲಂ ಮಾಮವಿರಲಗಲದ್ಬಾಷ್ಪಜಟಿಲಮ್ ।
ಸುಧಾಸೇಕಸ್ನಿಗ್ಧೈರತಿಮಸೃಣಮುಗ್ಧೈಃ ಕರತಲೈಃ
ಸ್ಪೃಶನ್ತೀ ಮಾ ರೋದೀರಿತಿ ವದ ಸಮಾಶ್ವಾಸ್ಯಸಿ ಕದಾ ॥ ೪೦॥

ರಮೇ ಪದ್ಮೇ ಲಕ್ಷ್ಮಿ ಪ್ರಣತಜನಕಲ್ಪದ್ರುಮಲತೇ
ಸುಧಾಮ್ಭೋಧೇಃ ಪುತ್ರಿ ತ್ರಿದಶನಿಕರೋಪಾಸ್ತಚರಣೇ ।
ಪರೇ ನಿತ್ಯಂ ಮಾತರ್ಗುಣಮಯಿ ಪರಬ್ರಹ್ಮಮಹಿಲೇ
ಜಗನ್ನಾಥಸ್ಯಾಕರ್ಣಯ ಮೃದುಲವರ್ಣಾವಲಿಮಿಮಾಮ್ ॥ ೪೧॥

॥ ಇತಿ ಪಣ್ಡಿತರಾಜಶ್ರೀಜಗನ್ನಾಥವಿರಚಿತಾ ಲಕ್ಷ್ಮೀಲಹರೀ ಸಮಾಪ್ತಾ ॥

Proofread by Ravin Bhalekar ravibhalekar@hotmail.com

Please send corrections to sanskrit@cheerful.com
Last updated ತ್oday
http://sanskritdocuments.org

Lakshmi Lahari Lyrics in Kannada PDF
% File name : laxmiilaharii.itx
% Category : laharI
% Location : doc\_devii
% Author : paNDitarAja\_shrIjagannAtha
% Language : Sanskrit
% Subject : philosophy/hinduism/religion
% Transliterated by : WebD
% Proofread by : Ravin Bhalekar ravibhalekar at hotmail.com
% Latest update : July 20, 2004, June 17, 2012
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website