ಶಾರದಾತ್ರಿಶತೀ
{॥ ಶಾರದಾತ್ರಿಶತೀ ॥}
ಗಙ್ಗಾಧರಮಖಿವಿರಚಿತಾ ।
ಪರಮಾಭರಣಂ ಧಾತುರ್ವದನಾಮ್ಭೋಜಸ್ಯ ಶಾರದಾ ದೇವೀ ।
ಯಾ ರಾಜತಿ ಜನನೀ ಸಾ ಲಸತು ಸದಾ ಸುಪ್ರಸನ್ನಾ ನಃ ॥ ೧॥
ಸಾ ಶಾರದಾ ಪ್ರಸನ್ನಾ ರಾಜತಿ ಮಮ ಮಾನಸೇ ನಿತ್ಯಮ್ ।
ಯಾ ಶಾರದಾಬ್ಜವದನಾ ಜನನೀ ಕೀರ್ತ್ಯಾ ಹಿ ಸರ್ವಲೋಕಾನಾಮ್ ॥ ೨॥
ಸಂಪದ್ ದಿವ್ಯಾ ಧಾತುಃ ಖ್ಯಾತಾ ಸಾ ಶಾರದಾ ದೇವೀ ।
ಯದ್ಭಜನಂ ದೇವಾನಾಮಪಿ ತತ್ತ್ವಜ್ಞಾನದಂ ವಿದುರ್ವಿಬುಧಾಃ ॥ ೩॥
ಸರಸಕವಿತಾವಿಭೂತ್ಯೈ ಯತ್ಪದಮಾರಾಧ್ಯತೇ ವಿಶೇಷಜ್ಞೈಃ ।
ಸಾ ಶಾರದಾ ಶ್ರಿಯೈ ನಃ ಕಾಲೇ ಸರ್ವಪ್ರಸನ್ನಾತ್ಮಾ ॥ ೪॥
ನೀಲಾರವಿನ್ದಲೋಚನಯುಗಲಾ ಸಾ ಶಾರದಾ ದೇವೀ ।
ಕರಕಮಲಕಲಿತವೀಣಾ ಸದಾ ಪ್ರಸನ್ನಾ ಶ್ರಿಯೈಃ ವಃ ಸ್ಯಾತ್ ॥೫॥
ಕಲಯೇ ತಾಮಹಮನಿಶಂ ಫುಲ್ಲಾಬ್ಜವಿಲೋಚನಾಂ ವಾಣೀಮ್ ।
ಯಾ ಸೃಷ್ಟ್ಯಾದೌ ಸಾಹ್ಯಂ ಕಲಯತಿ ಧಾತುರ್ಜಗನ್ಮಾತಾ ॥ ೬॥
ಯಸ್ಯಾ ಲೀಲಾಲೋಲಃ ಪದ್ಮಾಸನಗೋಽಪಿ ವೇದಪಾಠರತಃ ।
ತಾಮಹಮತುಲಾನನ್ದಪ್ರಾಪ್ತ್ಯೈ ಕಲಯೇ ಮನಃಪದ್ಮೇ ॥ ೭॥
ಬ್ರಹ್ಮಾಣಂ ತಾಂ ವಾಣೀಮೇಕಾಸನಭಾಸುರಾಂ ಶ್ರಿಯಃ ಪ್ರಾಪ್ತ್ಯೈ ।
ಆರಾದ್ವಿಲೋಕ್ಯ ಮಾನಸಮಾನನ್ದರಸಂ ಪರಂ ಭಜತೇ ॥ ೮॥
ಮುಕ್ತಾಮಯೇ ವಿಮಾನೇ ಪದ್ಮಾಸನಯನ್ತ್ರಿಕಾಮಧ್ಯೇ ।
ದೃಶ್ಯಾಂ ವಾಣೀಂ ದೇವೀಂ ಸೇವೇ ಸಂತತಸುಖಪ್ರಾಪ್ತ್ಯೈ ॥ ೯॥
ಭಾಗ್ಯಾನ್ಮಮ ಚ ಕವೀನಾಂ ಸಾ ದೇವೀ ದೃಶ್ಯತಾಮೇತಿ ।
ವೀಣಾಪುಸ್ತಕಹಸ್ತಾ ಯಾ ಕಮಲಾಸನಪುರನ್ಧ್ರೀ ಹಿ ॥ ೧೦॥
ಮಾಮಕಮಾನಸಕೀರಂ ಬಧ್ನೀಯಾಶ್ಚರಣಪಞ್ಜರೇ ಮಾತಃ ।
ತೇನ ಮಮ ಜನ್ಮಲಾಭಃ ಸ್ತೋತ್ರಂ ಚ ತವ ಪ್ರಕಾಮಕಲಿತಾರ್ಥಮ್ ॥ ೧೧॥
ಸಂವಿತ್ಪ್ರರೋಹಕಲಿಕಾಪ್ರಾಪ್ತ್ಯೈ ತಾಂ ನೌಮಿ ಶಾರದಾಂ ದೇವೀಮ್ ।
ಯಾ ಕಿಲ ಕವೀಶ್ಚರಾಣಾಮಧಿನೇತ್ರೀ ಕಾವ್ಯಕಲನಾದೌ ॥ ೧೨॥
ಭಕ್ತಾನಾಂ ಜಿಹ್ವಾಗ್ರಂ ಸಿಂಹಾಸನಮಾದರಾದ್ ವಾಣೀ ।
ಕಲಯನ್ತಿ ನೃತ್ಯತಿ ಕಿಲ ತತಸ್ತು ತನ್ನೂಪುರನಿನಾದಃ ॥ ೧೩॥
ಮಞ್ಜುಲಫಣಿತಿಝರೀತಿ ಪ್ರಗೀಯತೇ ದಿಕ್ತಟೇ ರಸಿಕೈಃ ।
ಪ್ರಾತಃಫುಲ್ಲಪಯೋರುಹಮರನ್ದರಸಕೇಲಿಧೂರ್ವಹಾ ಕಾಲೇ ॥ ೧೪॥
ದುರ್ವಾರಗರ್ವದುರ್ಮತಿದುರರ್ಥನಿರಸನಕಲಾನಿಪುಣಾಃ ।
ಮಾತಸ್ತವ ಪಾದಯೋರುಹಸೇವಾಧನ್ಯತಾಂ ಪ್ರಾಪ್ತಾಃ ॥ ೧೫॥
ನೀಚಾ ಮಮ ತು ಮನೀಷಾ ತಥಾಪಿ ತವ ನುತಿಕಲಾಪ್ರವೃತ್ತೋಽಸ್ಮಿ ।
ಅಮ್ಬ ತವ ತತ್ರ ಹೇತುಃ ಕೃಪಾಂ ಪರಂ ಬುದ್ಧಿದಾ ಜಯತಿ ॥ ೧೬॥
ವಿಧಿದಯಿತೇ ತವ ಮಾತಃ ಸ್ತುತೌ ನ ಶಕ್ತಾ ಅಪಿ ತ್ರಿದಶಾಃ ।
ಕ್ಷನ್ತವ್ಯಮತ್ರ ದಯಯಾ ಮಮ ಚಾಪಲ್ಯಂ ತವ ಸ್ತೋತ್ರೇ ॥ ೧೭॥
ಶುಕವಾಣೀಮಿವ ಮಾತರ್ನಿರರ್ಥಕಾಂ ಮದ್ವಚೋಭಙ್ಗೀಮ್ ।
ಸದಸಿ ಶೃಣೋಷಿ ದಯಯಾ ತತ್ ತವ ಚೋತ್ತಮಪದವ್ಯಕ್ತ್ಯೈ ॥ ೧೮॥
ಪರದೇವತೇ ಪ್ರಸೀದ ಪ್ರಾಣೇಶ್ವರಿ ಧಾತುರಮ್ಬ ಮಮ ವಾಣೀಮ್ ।
ಕೃಪಯಾ ತವ ನುತಿಯೋಗ್ಯಾಂ ತ್ವನ್ನೂಪುರನಿನದರಮ್ಯರಸಗುಮ್ಫಾಮ್ ॥ ೧೯॥
ಸರ್ವಜ್ಞತ್ವಂ ಸಂಪದಮಥವಾನ್ಯಾಂ ಪ್ರಾಪ್ತುಮತ್ರ ತವ ಮಾತಃ ।
ತವ ಚರಣಕಮಲಮೇತಚ್ಛರಣಂ ನಾನ್ಯಾ ಗತಿರ್ದೃಷ್ಟಾ ॥ ೨೦॥
ಮನ್ದಧಿಯಾ ಸ್ವಲ್ಪಾಪಿ ಸ್ತುತಿರಮ್ಬ ನಿರರ್ಥಕಾಪಿ ರಸಹೀನಾ ।
ಕಲಿತಾ ಚೇತ್ ತವ ಕೃಪಯಾ ತದೇವ ಸದಸೀಡಿತಂ ಭಾತಿ ॥ ೨೧॥
ಕುಣ್ಠೀಕರೋತು ವಿಪದಂ ಚಾಜ್ಞಾನಂ ದುರ್ಗತಿಂ ವಾಣಿ ।
ತವ ಚರಣಕಮಲಸೇವಾದರೋ ಜನಾನಾಂ ಕಲೌ ಕಾಲೇ ॥ ೨೨॥
ವೀರಶ್ರೀರ್ವಿದ್ವಚ್ಛ್ರೀರ್ಜಯಶ್ರಿಯೋ ವಾಮರೈರ್ಮಾನ್ಯೇ ।
ತವ ಪಾದಾಮ್ಬುಜಸೇವಾದರೇಣ ಸಿಧ್ಯನ್ತಿ ನಾನ್ಯಥಾ ಲೋಕೇ ॥ ೨೩॥
ಕರುಣಾರಸವರ್ಷಿಣಿ ತೇ ಚರಣಸರೋಜದ್ವಯಂ ನಿಧೇಹಿ ಮಮ ।
ಮಸ್ತಕತಲೇ ವಿದಾರಿತಜರಾದಿಕಂ ಸಪದಿ ಜನ್ಮ ಸಾರ್ಥಂ ಮೇ ॥ ೨೪॥
ಶ್ರದ್ಧಾಂ ಮೇಧಾಂ ಸಂಪದಮನ್ಯಾಮಮರೇನ್ದ್ರಮಾನನೀಯಾಂ ಹಿ ।
ದಯಯಾ ವಿಧೇಹಿ ಕಾಲೇ ಭಕ್ತಾನಾಂ ನಸ್ತ್ವದೇಕಶರಣಾನಾಮ್ ॥ ೨೫॥
ಪ್ರೇಯಸಿ ಧಾತುರ್ಜಗತಾಂ ಪರಮೇಶ್ವರಿ ವಾಣಿ ಮಾತರಮ್ಬ ನನು ।
ತವ ನಾಮಾನಿ ಫಣನ್ತಸ್ತ್ರಿದಶೈಃ ಸಹ ಯಾನ್ತಿ ಯಾನೇನ ॥ ೨೬॥
ತವ ನಾಮ ಯಸ್ಯ ಜಿಹ್ವಾಙ್ಗಣೇ ವಿಶುದ್ಧಂ ಕ್ಷಣಂ ಸ್ಫುರತಿ ।
ಸ ಹಿ ವನ್ದ್ಯಸ್ತ್ರಿದಶೈರಪಿ ವಿಗಲಿತಪಾಪಃ ಪರೇ ಲೋಕೇ ॥ ೨೭॥
ನತನಾಕೀಶ್ವರವನಿತಾಮೌಲಿಸ್ರಗ್ಗಲಿತಮಕರನ್ದೈಃ ।
ಸ್ನಿಗ್ಧಪದಾಮ್ಬುಜಯುಗಲಾ ವಾಣೀ ದೇವೀ ಶ್ರಿಯೋ ಹಿ ಲಸತಿ ಪರಾ ॥ ೨೮॥
ವಿದುಷಾಮಪಿ ತುಷ್ಟಿಕರಂ ನವನವರಸಗುಮ್ಫನಂ ಕವಿತ್ವಂ ತು ।
ಯತ್ಕರುಣಾವೀಕ್ಷಣತೋ ಸಿಧ್ಯತಿ ತಾಂ ಶಾರದಾಂ ವನ್ದೇ ॥ ೨೯॥
ಅಮ್ಬ ಪ್ರಸೀದ ಪರಮಂ ಮಾಯಾಮೇತಾಂ ನಿರಸ್ಯ ನತಿಭಾಜಃ ।
ಮಮ ಸಂವಿಧೇಹಿ ಮಧುರಾಂ ವಾಚಂ ತವ ನುತಿಕಲಾರ್ಹಾಂ ಚ ॥ ೩೦॥
ವಾಣೀ ಮಾತಾ ಜಗತಾಂ ವಾಣೀಪುಸ್ತಕಕರಾಮ್ಭೋಜಾ ।
ಹಂಸಾಶ್ರಿತಾ ಹಿ ನಮತಾಂ ಶ್ರೇಯಃಸಿಧ್ಯೈ ಪ್ರಸನ್ನಾ ನಃ ॥ ೩೧॥
ಶ್ಲಾಘ್ಯಾ ಸಂಪತ್ಕಾಲೇ ವೈದುಷ್ಯಂ ವಾ ಯದೀಯವೀಕ್ಷಣತಃ ।
ಸಿಧ್ಯನ್ತ್ಯಪಿ ದೇವಾನಾಂ ತಾಂ ವನ್ದೇ ಶಾರದಾಂ ದೇವೀಮ್ ॥ ೩೨॥
ವಿದ್ಯಾದಾನಕರೀಯಂ ಕಮಲಾಸನಪುಣ್ಯಪರಿಪಾಕಃ ।
ಮಮ ಮನಸಿ ಸಂನಿಧತ್ತಾಂ ದಿವ್ಯಜ್ಞಾನಾದಿಸಿಧ್ಯೈ ಹಿ ॥ ೩೩॥
ದಿವ್ಯಜ್ಞಾನಂ ದಯಯಾ ವಿಧೇಹಿ ಮಾತರ್ಮಹಾಸಾರಮ್ ।
ತೇನೈವ ತೇ ತು ಕೀರ್ತಿರ್ದಾನಫಲಂ ನಶ್ಚ ಜನ್ಮಸಾಫಲ್ಯಮ್ ॥ ೩೪॥
ದ್ವಾದಶಬೀಜಾಕ್ಷರಗಾಂ ಮನ್ತ್ರೋದ್ಧಾರಕ್ರಿಯಾಶಕ್ತಿಮ್ ।
ವಾಣೀಂ ವಿಧೇಸ್ತು ಪತ್ನೀಂ ಮಧ್ಯೇ ಪಶ್ಯಾಮಿ ಬಿಮ್ಬಮಧ್ಯಸ್ಥಾಮ್ ॥ ೩೫॥
ರವಿಕೋಟಿತೇಜಸಂ ತಾಂ ಸರಸ್ವತೀಂ ತ್ರ್ಯಕ್ಷರಕ್ರಿಯಾಶಕ್ತಿಮ್ ।
ಅಣಿಮಾದಿದಾಂ ಪ್ರಸನ್ನಾಮಮ್ಬಾಂ ಪಶ್ಯಾಮಿ ಪದ್ಮಮಧ್ಯಗತಾಮ್ ॥ ೩೬॥
ಜಗದೀಶ್ವರಿ ಭಾರತಿ ಮೇ ಪ್ರಸೀದ ವಾಣಿ ಪ್ರಪನ್ನಾಯ ।
ಅಹಮಪಿ ಕುತುಕಾತ್ ತವ ನುತಿಕಲನೇಽಶಕ್ತಶ್ಚ ಮನ್ದಧಿಷಣಶ್ಚ ॥ ೩೭॥
ಮುನಿಜನಮಾನಸಪೇಟೀರತ್ನಂ ಧಾತುರ್ಗೃಹೇ ರತ್ನಮ್ ।
ವಾಣೀತಿ ದಿವ್ಯರತ್ನಂ ಜಯತಿ ಸದಾ ಕಾಮಧುಕ್ ಕಾಲೇ ॥ ೩೮॥
ಅಜ್ಞಾನವ್ಯಾಧಿಹರಂ ತದೌಷಧಂ ಶಾರದಾರೂಪಮ್ ।
ಯಃ ಪಶ್ಯತಿ ಸ ಹಿ ಲೋಕೇ ಪರಾತ್ಮನೇ ರೋಚತೇ ಕಾಲೇ ॥ ೩೯॥
ಕಮಲಾಸನನಯನಫಲಂ ಸೃಷ್ಟ್ಯಾದಿಕಲಾಸಮಾಸಕ್ತಮ್ ।
ವಾಣೀರೂಪಂ ತೇಜಃ ಸ್ಫುರತಿ ಜಗಚ್ಛ್ರೇಯಸೇ ನಿತ್ಯಮ್ ॥ ೪೦॥
ಹಂಸಗತಿಂ ತಾಮಮ್ಬಾಮಮ್ಭೋರುಹಲೋಚನಾಂ ವನ್ದೇ ।
ತಿಲಕಯತಿ ಯಾ ಗುರೂಣಾಂ ಜಿಹ್ವಾಸಿಂಹಾಸನಂ ವಾಣೀ ॥ ೪೧॥
ವಾಣಿ ತರಙ್ಗಯ ಲೋಚನವೀಕ್ಷಣಶೈಲೀಂ ಕ್ಷಣಂ ಮಯಿ ಭೋಃ ।
ಮಮ ಜನ್ಮ ಲಬ್ಧವಿಭವಂ ತೇನ ಭವೇನ್ನೈವ ತೇ ಹಾನಿಃ ॥ ೪೨॥
ಪದ್ಮಾಸನೇನ ಸಾಕಂ ಕಾಲೇ ವಾಣೀ ಸಮಾಸನಾ ಜಯತಿ ।
ಕುಚಕಲಶನಮಿತದೇಹಾ ಕುರ್ವನ್ತೀ ಭದ್ರಸಂತತಿಂ ನಮತಾಮ್ ॥ ೪೩॥
ವ್ಯಾತನ್ವಾನಾ ವಾಣೀ ಕವೀಶ್ವರಾಣಾಂ ಮನೋಜ್ಞವಚನಝರೀಮ್ ।
ಜಯತಿ ವಿಧಿಸುಕೃತಸಂತತಿಪರಿಣಮಿತಮಾಲಾ ಬುಧೈರ್ವನ್ದ್ಯಾ ॥ ೪೪॥
ಕಮಲಸುಷಮಾಙ್ಗಯಷ್ಟಿಃ ಸಾ ದೇವೀ ಜಯತಿ ಪದ್ಮಮಧ್ಯತಲೇ ।
ಶತಬೀಜಾಕ್ಷರಲಸಿತಂ ದಿಕ್ಪತಿಕೃತರಕ್ಷಕಂ ಚ ಮೇರುಮುಖಮ್ ॥ ೪೫॥
ವಾಣೀಯನ್ತ್ರಂ ವಿಬುಧೈರ್ಮಾನ್ಯಂ ಯೋಗಾಸನಾಬ್ಧೀನ್ದುಮ್ ।
ಹ್ರೀಮಕ್ಷರಮುಖಮಾದ್ಯಂ ಪ್ರಾಕ್ತಟಕಲಿತಂ ಚ ಪದ್ಮಮಧ್ಯತಲೇ ॥ ೪೬॥
ತನ್ಮೇರುಚಕ್ರರೂಪಂ ಸಮಾಧಿದೃಶ್ಯಂ ಚ ಲೋಕವೇದ್ಯಂ ಚ ।
ಸೈಷಾಶ್ರಿತ್ಯ ತದೇತದ್ ರಾಜತಿ ರಾಜೀವಲೋಚನಾ ವಾಣೀ ॥ ೪೭॥
ಹಂಸಾಶ್ರಿತಗತಿವಿಭವಾ ಮನ್ದಸ್ಮೇರಾ ತಮೋನಿಹನ್ತ್ರೀ ಚ ।
ಮಧುರತರವಾಙ್ನಿಗುಮ್ಫಾ ವೀಣಾಪುಸ್ತಕಕರಾಮ್ಭೋಜಾ ॥ ೪೮॥
ವೀಣಾವಾದನರಸಿಕಾ ನಮತಾಮಿಷ್ಟಾರ್ಥದಾಯಿನೀ ವಾಣೀ ।
ಧಾತುರ್ನಯನಮಹೋತ್ಸವಕಲಿಕಾ ಕುರ್ಯಾಚ್ಛುಭಂ ಜಗತಾಮ್ ॥ ೪೯॥
ತಾಪಿಞ್ಛರಮ್ಯದೇಹಶ್ರೀರೇಷಾ ಕವಿಸಮಾಜನುತಾ ।
ಅಷ್ಟೈಶ್ವರ್ಯಾದಿಕಲಾದಾನೇ ದತ್ತೇಕ್ಷಣಾ ಜಯತಿ ॥ ೫೦॥
ಸೃಷ್ಟ್ಯಾದೌ ವಿಧಿಲಿಖಿತಂ ವಾಣೀ ಸೈಷಾ ಹಿ ಚಾನ್ಯಥಾಕರ್ತುಮ್ ।
ನಾಕೌಕಸಾಮಪೀಹ ಪ್ರಭವತಿ ಕಲಿತಪ್ರಣಾಮಾನಾಮ್ ॥ ೫೧॥
ಯಃ ಪಶ್ಯತಿ ತಾಮೇತಾಂ ವಾಣೀಂ ಪುರುಷೋ ಹಿ ಧನ್ಯತಾಮೇತಿ ।
ಯಂ ಪಶ್ಯತಿ ಸೈಷಾಯಂ ನಿತರಾಂ ಧನ್ಯೋ ನೃಪೇಡಿತಃ ಕಾಲೇ ॥ ೫೨॥
ಕಬಲಿತತಮಃಸಮೂಹಾ ವಾಣೀ ಸೈಷಾ ಹಿ ವಿಜಯತೇ ಜಗತಿ ।
ಅಪುನರ್ಭವಸುಖದಾತ್ರೀ ವಿರಿಞ್ಚಿಮುಖಲಾಲಿತಾ ಕಾಲೇ ॥ ೫೩॥
ಕಮಲಾಸನಮುಖಕಮಲಸ್ಥಿರಾಸನಾಂ ಶಾರದಾಂ ವನ್ದೇ ।
ಯನ್ನಾಮೋಚ್ಚರಣಕಲಾವಿಭವಾತ್ ಸರ್ವಜ್ಞತಾ ನಿಯತಮ್ ॥ ೫೪॥
ಭವಪರಮೌಷಧಮೇತದ್ವಾಣೀರೂಪಂ ಸದಾರಾಧ್ಯಮ್ ।
ಕಮಲಾಸನಲೋಚನಗಣಸರಸಕ್ರೀಡಾಸ್ಪದಂ ಜಯತಿ ॥ ೫೫॥
ನಾರೀವಂಶಶಿಖಾಮಣಿರೇಷಾ ಚಿನ್ತಾಮಣಿರ್ನತಾನಾಂ ಹಿ ।
ಧಾತೃಗೃಹಭಾಗಧೇಯಂ ಧ್ಯೇಯಂ ಸದ್ಭಿಃ ಶ್ರಿಯಃ ಸಮೃದ್ಧ್ಯೈ ನಃ ॥ ೫೬॥
ಜನನಿ ಭುವನೇಶ್ವರಿ ತ್ವಾಂ ವಾಣೀಂ ವನ್ದೇ ಕವಿತ್ವರಸಸಿದ್ಧ್ಯೈ ।
ತ್ವಂ ತು ದದಾಸಿ ಹಿ ದಯಯಾ ಮಮ ಮನ್ದಸ್ಯಾಪಿ ವಾಗ್ಝರೀರ್ಮಧುರಾಃ ॥ ೫೭॥
ಏತೇನ ತವ ತು ಕೀರ್ತೇರ್ಮಹಿಮಾ ಸಂಗೀಯತೇ ದಿಶಾಂ ವಲಯೇ ।
ಕಿಂನರವರ್ಗೈರಮರೀಕನ್ಯಾಭಿಃ ಕಲ್ಪವೃಕ್ಷಮೂಲತಲೇ ॥ ೫೮॥
ಕವಿಮಲ್ಲಸೂಕ್ತಿಲಹರೀಸ್ತನ್ವಾನಾ ಶಾರದಾ ಜಯತಿ ।
ವಿಧಿಕೇಲಿಸದನಹಂಸೀ ಕಲ್ಯಾಣೈಕಸ್ಥಲೀ ನಮತಾಮ್ ॥ ೫೯॥
ಸ್ಫುರತು ಮಮ ವಚಸಿ ವಾಣಿ ತ್ವದೀಯವೈಭವಸುಧಾಧಾರಾ ।
ನಿತ್ಯಂ ವ್ಯಕ್ತಿಂ ಪ್ರಾಪ್ತಾ ಧುತನತಜನಖೇದಜಾಲಕಾ ಮಹತೀ ॥ ೬೦॥
ವಾಣಿ ತವ ಸ್ತುತಿವಿಷಯೇ ಬುದ್ಧಿರ್ಜಾತಾ ಹಿ ಮೇ ಸಹಸಾ ।
ತೇನ ಮಮ ಭಾಗದೇಯಂ ಪರಿಣತಿಮಿತ್ಯೇವ ನಿತ್ಯಸಂತುಷ್ಟಃ ॥ ೬೧॥
ಸೃಷ್ಟಿಕಲಾಮಣ್ಡನಭೂರೇಷಾ ವಾಣೀ ಜಗಜ್ಜನನೀ ।
ಆಲೋಕಮಾತ್ರವಶತಸ್ತಮಸೋ ಹನ್ತ್ರೀ ಚ ಸಂಪದಾಂ ಜನನೀ ॥ ೬೨॥
ಪೌರುಷಲೋಪವಿಧಾತ್ರೀ ಧಾತುರಿಯಂ ಕಮಲಕೋಮಲಾಙ್ಗಲತಾ ।
ವಸತು ಸದಾ ಜಿಹ್ವಾಗ್ರೇ ದಿವ್ಯಜ್ಞಾನಪ್ರದಾ ದೇವೀ ॥ ೬೩॥
ಪ್ರತಿದಿನದುರಿತನಿಹನ್ತ್ರೀ ಪದ್ಮಾಸನನಯನಪುಣ್ಯಪರಿಪಾಕಃ ।
ಕವಿತಾಸಂತಾನಕಲಾಬೀಜಙ್ಕುರವರ್ಧಿನೀ ಜಯತಿ ॥ ೬೪॥
ಕ್ಷಣವೀಕ್ಷಣೇನ ಮಾತಾ ಲಕ್ಷ್ಮೀಂ ಪಕ್ಷ್ಮಲಯತಿ ಪ್ರಣತೇ ।
ವೇಧಸಿ ಸುರತಮಹೋತ್ಸವಸಂಕೇತತಲಪ್ರದರ್ಶಿನೀ ಕಾಲೇ ॥ ೬೫॥
ಶೃಙ್ಗಾರವಿಭ್ರಮವತಾ ನೀಲೋತ್ಪಲಕಾನ್ತಿಚಾತುರೀಸುಪುಷಾ ।
ವಾಣೀನೇತ್ರೇಣ ವಿಧಿರ್ಜಿತೋಽಭವತ್ ಸೋಽಪಿ ಸತತಕೃತವೇದಃ ॥ ೬೬॥
ಶ್ಯಾಮಾ ಕಟಾಕ್ಷಲಹರೀ ಮಾತುರ್ಜಯತೀಹ ಸಂಪದಾಂ ಜನನೀ ।
ಯಾಮಸ್ತೌಷೀತ್ ಕಾಲೇ ಮಘವಾ ನಾಕಾಧಿಪಾ ಮುನಯಃ ॥ ೬೭॥
ಮಣಿಕಟಕನಾದಪೂರಿತಮಮ್ಬಾಪಾದಾಮ್ಬುಜಂ ಮಹಾಮನ್ತ್ರೈಃ ।
ಜಪ್ಯಂ ಧ್ಯೇಯಂ ಕಾಲೇ ದಿಶಿ ದಿಶಿ ಕಲಿತಸ್ವರಕ್ಷಂ ಚ ॥ ೬೮॥
ಸ್ಮರಣೇನ ದುರಿತಹನ್ತ್ರೀ ನಮನೇನ ಕವಿತ್ವಸಿದ್ಧಿದಾ ವಾಣೀ ।
ಕುಸುಮಸಮರ್ಪಣಕಲಯಾ ಕಾಲೇ ಮೋಕ್ಷಪ್ರದಾತ್ರೀ ಚ ॥ ೬೯॥
ವಿಸೃಮರತಮೋನಿಹನ್ತ್ರಿ ತ್ವಾಂ ಸೇವೇ ಶಾರದಾದೇವಿ ।
ಶಿಶಿರೀಕುರು ಮಾಂ ಕಾಲೇ ಕರುಣಾರಸವೀಕ್ಷಿತೇನ ವರದೇನ ॥ ೭೦॥
ಮಾತರ್ನಮೋಽಸ್ತು ತಾವಕಕಟಾಕ್ಷಮಧುಪಾಯ ಶಾರದೇ ಜಯತಿ ।
ಯೋ ವೇಧಸೋಽಪಿ ಕಾಲೇ ಸೃಷ್ಟ್ಯಾದೌ ಚಾತುರೀಂ ದಿತ್ಸನ್ ॥ ೭೧॥
ಸುಮನೋವಾಞ್ಛಾದಾನೇ ಕೃತಾವಧಾನಂ ಧನಂ ಧಾತುಃ ।
ಧಿಷಣಾಜಾಡ್ಯಾದಿಹರಂ ಯದ್ವೀಕ್ಷಣಮಾಮನನ್ತಿ ಜಗತಿ ಬುಧಾಃ ॥ ೭೨॥
ಲಲಿತಗಮನಂ ತ್ವದೀಯಂ ಕಲನೂಪುರನಾದಪೂರಿತಂ ವಾಣಿ ।
ನೌಮಿ ಪದಾಮ್ಬುಜಯುಗಲಂ ಕವಿತಾಸಿದ್ಧ್ಯೈ ವಿಧೇಃ ಕಾನ್ತೇ ॥ ೭೩॥
ಕಮಲಕೃತವೈಜಯನ್ತೀ ವಿಧೇರ್ಮುಖೇಷ್ವಾದರಾದ್ವಾಣ್ಯಾಃ ।
ಜಯತಿ ಕಟಾಕ್ಷಲಹರೀ ತೋರಣಲಕ್ಷ್ಮೀಸ್ತು ಸತ್ಯಲೋಕೇ ಹಿ ॥ ೭೪॥
ನಿಶ್ರೇಣಿಕಾ ಚ ಮುಕ್ತೇಃ ಸಜ್ಜ್ಞಾನನದೀಮಹಾಲಹರೀ ।
ನಾನಾರಸಚಾತುರ್ಯಪ್ರಸಾರಿಕಾ ದುರಿತಶಙ್ಕುಲಾ ಕಾಲೇ ॥ ೭೫॥
ಪರತನ್ತ್ರಿತವಿಧಿವಿಭವಾ ದೇವೀ ಸಾ ಶಾರದಾ ಜಯತಿ ।
ಕೈವಲ್ಯಾದಿಕಲಾನಾಂ ದಾತ್ರೀ ಭಕ್ತಾಲಿಕಾಮಧೇನುರ್ಯಾ ॥ ೭೬॥
ಕವಿಕಾಮಧೇನುರೇಷಾ ಮಞ್ಜುಸ್ಮೇರಾನನಾಮ್ಭೋಜಾ ।
ವಾಣೀ ಜಯತಿ ವಿಧಾತುರ್ಮನನಾಗಮಸಂಪ್ರದಾಯಫಲದಾ ಹಿ ॥ ೭೭॥
ಘನತರಕೃಪಾರಸಾರ್ದ್ರೈರ್ನಾನಾವಿಭವಪ್ರದಾನಕೃತದೀಕ್ಷೈಃ ।
ವಾಣೀ ಜಯತಿ ಕಟಾಕ್ಷೈರ್ನಃ ಕಾಶ್ಮಲ್ಯಂ ಹಠಾನ್ನಿರಸ್ಯನ್ತೀ ॥ ೭೮॥
ದಾಸಾಶಾದಾನಕಲಾಪ್ರಕ್ಲೃಪ್ತದೀಕ್ಷಾಕಟಾಕ್ಷಲಹರೀ ಮೇ ।
ಕಬಲಯತು ಪಾಪರಾಶಿಂ ವಾಣ್ಯಾ ನಿತ್ಯಂ ಮಹೌದಾರ್ಯಾ ॥ ೭೯॥
ಆದಿಮಜನನೀ ಸೈಷಾ ವಾಣೀ ಜಯತೀಹ ಭಕ್ತರಕ್ಷಾಯೈ ।
ಸರ್ವತ್ರ ಕಲಿತದೇಹಾ ನಾನಾಶಾಸ್ತ್ರಾದಿರೂಪತೋ ಜಗತಿ ॥ ೮೦॥
ಬಹುವಿಧಲೀಲಾಸದನಂ ಸಂಭೃತಫುಲ್ಲಾಬ್ಜಶಿಲ್ಪವೈಚಿತ್ರ್ಯಮ್ ।
ವಾಣೀಮುಖಾರವಿನ್ದಂ ಚುಮ್ಬತಿ ಮಾನಸಮಿದಂ ಹಠಾತ್ ಕೃತ್ಯಮ್ ॥ ೮೧॥
ಸೌಭಾಗ್ಯಕಾನ್ತಿಸಾರಂ ವದನಾಮ್ಭೋಜಂ ಶ್ರಿಯೈ ವಾಣ್ಯಾಃ ।
ಆಶ್ರಿತ್ಯ ಸಕಲವೇದಾ ಅಪಿ ನಿತ್ಯಂ ಮಾನ್ಯತಾಂ ಪ್ರಾಪ್ತಾಃ ॥ ೮೨॥
ಜ್ಞಾನಮಯೀ ಸಲಿಲಮಯೀ ತತ್ತ್ವಮಯೀ ಭಾತಿ ಸರ್ವಲೋಕಾನಾಮ್ ।
ಅಕ್ಷರಮಯೀ ಚ ವಾಣೀ ಶ್ರೇಯೋದಾನೇ ನಿಬದ್ಧಚಿತ್ತಗತಿಃ ॥ ೮೩॥
ನಮೌಕ್ತಿರಸ್ತು ಮಾತ್ರೇ ವಾಣ್ಯೈಃ ನಃ ಸಿದ್ಧಿದಾ ಭಕ್ತ್ಯಾ ।
ಆನನ್ದಿನ್ಯೈ ಜ್ಞಾನಸ್ವರೂಪಭಾಜೇ ಪ್ರಬನ್ಧರೂಪಾಯೈ ॥ ೮೪॥
ಆರಾಧ್ಯಾಯೈ ಧ್ಯೇಯಾಯೈ ಚಾತ್ತಕಲಾಚಿತ್ರನಾದರೂಪಾಯೈ ।
ಸಚ್ಚಿತ್ತವಾಸಭಾಜೇ ವಾಣ್ಯೈ ಭೂಯೋ ನಮೋಽಸ್ತು ಭಕ್ತಿಕೃತಮ್ ॥ ೮೫॥
ಕಮಲಾಸನಪುಣ್ಯಕಲಾ ನಮತಾಂ ಚಿನ್ತಾಮಣಿರ್ವಾಣೀ ।
ಜೀವಾಕ್ಷರಬೋಧಕಲಾರೂಪಾ ಜಯತೀಹ ಸತ್ತ್ವರೂಪವತೀ ॥ ೮೬॥
ಬ್ರಹ್ಮಾಣ್ಡಮಣ್ಡಲಮಿದಂ ವ್ಯಾಪ್ತಂ ಮಾತ್ರಾ ಕ್ಷರಾಕ್ಷರಾದಿಜುಷಾ ।
ಯತ್ಪದಕಮಲಂ ನಿತ್ಯಂ ಶ್ರುತಿತತಿಸುದತೀವಿಭೂಷಣಂ ಚ ವಿದುಃ ॥ ೮೭॥
ಮನಸಿಜಸಾಮ್ರಾಜ್ಯಕಲಾಲಕ್ಷ್ಮೀರೇಷಾ ವಿರಿಞ್ಚಿಮುಖಹರ್ಷಮ್ ।
ವ್ಯಾತನ್ವಾನಾ ನಿತ್ಯಂ ರಾಜತಿ ಷಡರಸ್ವರೂಪಚಕ್ರತಲೇ ॥ ೮೮॥
ಮಞ್ಜುಲವೀಣಾನಿನದಪ್ರಯೋಗನಿರ್ಧೂತಮೋಹಸಂಚಾರಾ ।
ಹಂಸೀಯಾನಾ ವಾಣೀ ಹಂಸಗತಿಃ ಸುಕೃತಿನೇತ್ರಪುಣ್ಯಕಲಾ ॥ ೮೯॥
ಕುಚಕಲಶಸವಿಧವಿನಿಹಿತವೀಣಾನಿಕ್ಕಾಣಸಾವಧಾನಕಲಾ ।
ಅಧಿನೇತ್ರೀ ಹಿ ಕಲಾನಾಂ ಸಕಲಾನಾಂ ಶಾರದಾ ಜಯತಿ ॥ ೯೦॥
ತ್ರಿದಶಪರಿಷನ್ನಿಷೇವ್ಯಾ ಪ್ರಾತಃ ಸಾಯಂ ಪ್ರಫುಲ್ಲಮುಖಕಮಲಾ ।
ಕಮಲಾಸ್ನುಷಾ ಹಿ ವಾಣೀ ವಾಣೀಂ ದಿಶತು ಪ್ರಬನ್ಧರಸಭರಿತಾಮ್ ॥ ೯೧॥
ಅಧಿಕಚಪಲೈಃ ಕಟಾಕ್ಷೈರಞ್ಚಿತಲೀಲಾರಸೈರುದಾರೈರ್ನಃ ।
ಮಙ್ಗಲಮಾತನ್ವಾನಾ ವಿಧಾತೃಗೃಹಿಣೀ ಸುರಾದಿನುತಪಾದಾ ॥ ೯೨॥
ಕಾನ್ತಂ ಲಕ್ಷ್ಮೀಭವನಂ ಮುಖಕಮಲಂ ಶಾರದಾದೇವ್ಯಾಃ ।
ಸೌಭಾಗ್ಯಕಾನ್ತಿಸಾರಂ ಸ್ಪೃಹಯತಿ ಮೇ ಮಾನಸಂ ಸರಸಮ್ ॥ ೯೩॥
ಕಾರುಣ್ಯಪೂರ್ಣನಯನಂ ಪುಸ್ತಕಹಸ್ತಂ ಮಹಃ ಕಿಮಪಿ ।
ಧಾತುಃ ಪುಣ್ಯಕಲಾನಾಂ ಪರಿಪಾಕೋ ಮರ್ತ್ಯರಕ್ಷಣಂ ಕುರುತೇ ॥ ೯೪॥
ಸಂಸಾರವಾರಿರಾಶಿಂ ತರ್ತುಂ ಸಾ ಸೇತುರೇಷಾ ನಃ ।
ಧಾತುರ್ಗೃಹಿಣೀ ದುಃಖಂ ಶಿಥಿಲಯತು ಪರಂ ಜನಿಪ್ರಾಪ್ತಮ್ ॥ ೯೫॥
ಸರಸಕವಿಕಲ್ಪವಲ್ಲೀಮಮ್ಬಾಂ ವಾಣೀಮಹಮುಪಾಸೇ ।
ಅನ್ತಸ್ತಮೋನಿಹನ್ತ್ರೀಂ ಯಾಮಾಹುರ್ಜ್ಞಾನದಾಂ ಮುನಯಃ ॥ ೯೬॥
ಮಮ ಲೋಚನಯೋರ್ಭೂಯಾತ್ ವಿದ್ಯಾ ಕಾಪಿ ಪ್ರಧೂತಜನಿಭೀತಿಃ ।
ನಿಗಮೇಷು ಸಂಚರನ್ತೀ ಕೃಪಾನಿಧಿಃ ಶಾರದಾ ದೇವೀ ॥ ೯೭॥
ಶಮಿತನತದುರಿತಸಂಘಾ ಧಾತ್ರೇ ನಿಜನೇತ್ರಕಲ್ಪಿತಾನಙ್ಗಾ ।
ಕೃತಸುರಶಾತ್ರವಭಙ್ಗಾ ಸಾ ದೇವೀ ಮಙ್ಗಲೈಸ್ತುಙ್ಗಾ ॥ ೯೮॥
ಪದ್ಮಾಸನಸ್ಥಿತಾಂ ತಾಂ ವಾಣೀಂ ಚತುರಾನನಾಂ ವನ್ದೇ ।
ಕಲ್ಯಾಣಾನಾಂ ಸರಣಿಂ ಕವಿಪರಿಷತ್ಕಲ್ಪವಲ್ಲರೀಂ ಮಾನ್ಯಾಮ್ ॥ ೯೯॥
ಕುಚಭಾರಸಂನತಾಙ್ಗೀಂ ಕುನ್ದಸ್ಮೇರಾನನಾಮ್ಭೋಜಾಮ್ ।
ಕುನ್ದಲಕುಸುಮಪರಿಮಲಸಂಪಾದಿತಭೃಙ್ಗಝಂಕೃತಿತರಙ್ಗಾಮ್ ॥ ೧೦೦॥
ಚಿದ್ರೂಪಾಂ ವಿಧಿಮಹಿಷೀಂ ಹಂಸಗತಿಂ ಹಂಸಸಂನುತಚರಿತ್ರಾಮ್ ।
ವಿದ್ಯಾಕಲಾದಿನಿಲಯಾಮಾರಾಧ್ಯಾಂ ಸಕಲಜಡಿಮದೋಷಹರೀಮ್ ॥ ೧೦೧॥
ಜನನಿ ಯದಿ ಭಜತಿ ಲೋಕೇ ತವ ಲೋಚನವೀಕ್ಷಣಂ ಕ್ಷಣಂ ಮರ್ತ್ಯಃ ।
ಕುಪುರುಷನುತಿವಿಮುಖಸ್ತೇ ರೂಪಂ ಜ್ಞಾನಪ್ರದಂ ಪಶ್ಯನ್ ॥ ೧೦೨॥
ಕುಕ್ಷಿಂಭರಿತ್ವಮುಖದುರ್ಗುಣಾದಿಕಂ ದೂರತಸ್ತ್ಯಕ್ತ್ವಾ ।
ತ್ವದ್ಭಾವನೇನ ಧನ್ಯೋ ನಯತಿ ಚ ಕಾಲಂ ಪ್ರಮೋದೇನ ॥ ೧೦೩॥
ಮಯಿ ತಾಪಭಾರಶಾನ್ತ್ಯೈ ತರಙ್ಗಯ ತ್ವದಿಲೋಚನೇ ಮಾತಃ ।
ಯಚ್ಛಾರದಾಬ್ಜಸುಷಮಾಮಾನ್ಯೇ ದೇವಾದಿಭಿಃ ಪ್ರಾರ್ಥ್ಯೇ ॥ ೧೦೪॥
ಸರ್ವಾರ್ಥದಾ ಹಿ ಭಜತಾಂ ಕಟಾಕ್ಷಧಾಟೀ ಶಿವಂಕರೀ ವಾಣಿ ।
ಚಿನ್ತಾಮಣಿಮಿವ ಕಲಯತಿ ಯಾಂ ಹಿ ವಿಧಿರ್ವಿದಿತಮನ್ತ್ರೋಽಪಿ ॥ ೧೦೫॥
ಸುಕೃತಪರಿಪಾಕಮಾನಸಾ ಧನ್ಯಾಸ್ತ್ವಾಮರ್ಚಯನ್ತಿ ನನು ವಾಣಿ ।
ಅಹಮಪಿ ತದ್ವತ್ಕಲಯೇ ಫಲಪ್ರದಾ ತ್ವಂ ಸಮಾನಕಲ್ಪಾಸಿ ॥ ೧೦೬॥
ನಿಗಮವಚಸಾಂ ನಿದಾನಂ ತವ ಪಾದಾಬ್ಜಂ ವತಂಸಯತು ಕಾಲೇ ।
ದೇವೋಽಪಿ ದೇವದೇವೋ ವಿಜಿತಜಗತ್ತ್ರಯತಲೇ ಮಾತಃ ॥ ೧೦೭॥
ಅನ್ತಸ್ತಮಸೋ ಹನ್ತ್ರೀ ಪಟೀಯಸೀ ತೇ ಕಟಾಕ್ಷಝರಮಾಲಾ ।
ಯಾ ತೋರಣಮಾಲ್ಯಶ್ರಿಯಮಾತನುತೇ ವೇಧಸಃ ಸೌಧೇ ॥ ೧೦೮॥
ಶೃಙ್ಗಾರವಿಭ್ರಮವತೀಂ ತ್ವಾಂ ಪ್ರಾಪ್ಯೈವ ಕ್ರಿಯಾಕಾಲೇ ।
ಕಲಯತಿ ಸೃಷ್ಟ್ಯಾದಿಮಸೌ ವಿಧಿಃ ಶ್ರುತಿವ್ಯಕ್ತಮಾಹಾತ್ಮ್ಯಃ ॥ ೧೦೯॥
ವೇಧೋವದನಂ ಕೇಲೀವನಮಾಸಾದ್ಯಾಮ್ಬ ಪರಮಯಾ ಹಿ ಮುದಾ ।
ಕ್ರೀಡಸಿ ಶುಕೀವ ಕಾಲೇ ದ್ವಿಜಸಂಘಸಮರ್ಚಿತಾತ್ಮವೃತ್ತಿಶ್ಚ ॥ ೧೧೦॥
ಧಾತುರ್ಮುಖಮಞ್ಜೂಷಾರತ್ನಂ ನಿಗಮಾನ್ತಕೇಲಿವನಹಂಸೀಮ್ ।
ಪರಮಾಂ ಕಲಾಮುಪಾಸೇ ತಾಮಮ್ಬಾಂ ಚಿದ್ವಿಲಾಸಘನವೃತ್ತಿಮ್ ॥ ೧೧೧॥
ವಾಗೀಶದೇವರೂಪಿಣಿ ಗೀಷ್ಪತಿಮುಖದೇವಸಂಘನುತಚರಣೇ ।
ತವ ರೂಪಂ ಸೂರ್ಯಾಯುತದೃಶ್ಯಂ ದರ್ಶಯ ಮಮ ಜ್ಞಾನೇ ॥ ೧೧೨॥
ದಿವ್ಯಜ್ಞಾನಪ್ರದಮಿದಮಮ್ಬ ತ್ವದ್ರೂಪಮಾದರಾದ್ವಾಣಿ ।
ಕಾಲೇ ದರ್ಶಯ ಕೃಪಯಾ ತೇನ ವಯಂ ಪ್ರಾಪ್ತಕಾರ್ಯಸಾಫಲ್ಯಾಃ ॥ ೧೧೩॥
ಅಮ್ಬಾ ತ್ರಿಸಂಧ್ಯಪಠನಪ್ರವೃತ್ತಿಭಾಜಾಂ ಕ್ರಮೇಣ ನಾಮ್ನಾಂ ತು ।
ದ್ವಾದಶಕಲಾವಿಭೇದವ್ಯೂಹಾದಿಜ್ಞಾನದಾ ಪ್ರಸನ್ನಾ ಹಿ ॥ ೧೧೪॥
ಮೂಕೋಽಪಿ ಸತ್ಕವಿಃ ಸ್ಯಾದ್ ದುರಕ್ಷರಾಣ್ಯಪಿ ವಿಧಾತೃಲಿಖಿತಾನಿ ।
ಸತ್ಫಲದಾನಿ ಸರಸ್ವತಿ ಕಟಾಕ್ಷಪೂರೇ ಯದಿ ಕಾಪಿ ॥ ೧೧೫॥
ಅವಲಮ್ಬೇ ತಾಮಮ್ಬಾಂ ಪಞ್ಚಾಶದ್ವರ್ಣಕಲ್ಪಿತಜಗತ್ಕಾಮ್ ।
ಸೃಷ್ಟಿಸ್ಥಿತಿಸಂಹಾರಸ್ಥಿರೋದಯಾಂ ವಿವಿಧಶಾಸ್ತ್ರರೂಪಾಢ್ಯಾಮ್ ॥ ೧೧೬॥
ವಾಣೀಂ ದಿಶತು ಮನೋಜ್ಞಾಂ ವಾಣೀ ಗತಿಹಸಿತಕಾದಮ್ಬಾ ।
ಯಾ ದಮ್ಭಾದಿವಿಮುಕ್ತಾ ನಾದಂ ಭಾವ್ಯಂ ವದನ್ತಿ ಯದ್ರೂಪಮ್ ॥ ೧೧೭॥
ರಾಕೇನ್ದುವದನಬಿಮ್ಬಾ ಸಾಮ್ಬಾ ವಾಣೀ ಪುನಾತು ಕೃತಿಮೇನಾಮ್ ।
ಪರಿಕಲಿತಭಾವಬನ್ಧಾಂ ರಸೋಜ್ಜ್ವಲಾಂ ಮಙ್ಗಲೋತ್ತುಙ್ಗಾಮ್ ॥ ೧೧೮॥
ಲಾವಣ್ಯಕಾನ್ತಿಸಿನ್ಧುಃ ಪಾದಾಬ್ಜನತಪ್ರಭಾವಸಂಧಾತ್ರೀ ।
ಪ್ರಸೃಮರತಮೋನಿಹನ್ತ್ರೀ ಮದ್ವಾಚಾಂ ದೇವತಾ ಚಾದ್ಯಾ ॥ ೧೧೯॥
ಜನತಾನೇತ್ರಾನನ್ದಂ ರೂಪಂ ಯಸ್ಯಾಃ ಸ್ಫುಟಂ ಭಾತಿ ।
ಸ್ಮರಣಂ ತ್ವಜ್ಞಾನಹರಂ ವಿಶ್ವಜ್ಞಾನಪ್ರದಂ ಚ ಸಾ ಜಯತಿ ॥ ೧೨೦॥
ಸಹಧರ್ಮಿಣೀ ವಿಧಾತುರ್ದಾರಿದ್ರ್ಯಧ್ವಂಸಿನೀ ನಿಜಕಟಾಕ್ಷೈಃ ।
ಸಾಂನಿಧ್ಯಂ ಜನಯತು ಮೇ ಸುರಮುನಿನರಸಂನುತಸ್ವಮಹಿಮೇಯಮ್ ॥ ೧೨೧॥
ಮುಖರಿತವೀಣಾ ವಾಣೀ ವಾಣೀಂ ಮೇ ದಿಶತು ನೈಜನುತಿಯೋಗ್ಯಾಮ್ ।
ಆಸ್ವಾದಿತಶಾಸ್ತ್ರಾಮೃತಲಹರೀಂ ಸದ್ಯಸ್ತಮೋನಿಹನ್ತ್ರೀಂ ಚ ॥ ೧೨೨॥
ಮಣಿನೂಪುರನಾದನಿಭಾ ವಾಣೀ ಭಾತಿ ತ್ವದೀಯಭಕ್ತಮುಖೇ ।
ಕೀರ್ತಿರ್ದಿಶಾಸು ಶುದ್ಧಿರ್ವಪುಷಿ ಬಹುಮುಖೀ ಪರಂ ಕಾಲೇ ॥ ೧೨೩॥
ತವ ಪಾದಸ್ಮರಣವಶಾತ್ ತಾಮ್ಯತಿ ತಿಮಿರಾವಲಿಶ್ಚಾನ್ತಃ ।
ಆನನ್ದಲಹರಿವೀಚೀ ಪ್ರಸರ್ಪತಿ ಕ್ಷಮಾತಲೇ ಹಿ ಭಕ್ತಾನಾಮ್ ॥ ೧೨೪॥
ಸಂಪನ್ನಲಿನೀಭಾನುಂ ಜ್ಞಾನಾಬ್ಧಿಸುಧಾಕರಂ ಹಿ ತವ ರೂಪಮ್ ।
ಭಕ್ತ್ಯಾ ಮನಸಿ ಗೃಣನ್ತೋ ಗಚ್ಛನ್ತಿ ವ್ಯೋಮಯಾನಮಾರೂಢಾಃ ॥ ೧೨೫॥
ಹೃತ್ತಮಸಾಂ ದೀಪರುಚಿರ್ವಿಧಾತೃದಯಿತಾ ಮಮಾಸ್ತು ಪರದೈವಮ್ ।
ಭವತಾಪಮೇಘಮಾಲಾ ಕವಿಶುಕವಾಸನ್ತಿಕಶ್ರೀರ್ಹಿ ॥ ೧೨೬॥
ಮಮ ಮಾನಸಮಣಿಹರ್ಮ್ಯೇ ವಿಹರತು ವಾಣ್ಯಾಃ ಸ್ವರೂಪಂ ತು ।
ನಿಗಮವಚಸಾಂ ನಿಗುಮ್ಫೈರ್ವೇದ್ಯಂ ತದ್ವೇಧಸಾ ಲಾಲ್ಯಮ್ ॥ ೧೨೭॥
ಸತತಮಭಿಗಮ್ಯರೂಪಾ ವಿಬುಧವರೇಡ್ಯಾ ಸರಸ್ವತೀ ಮಾತಾ ।
ಮನಸಿ ಮಮ ಸಂನಿಧತ್ತಾಂ ಭೂತ್ಯೈ ನಃ ಸರ್ವತಃ ಕಾಲೇ ॥ ೧೨೮॥
ಮಮ ಶಿರಸಿ ನೀಚಪುಣ್ಯೇ ಪುಣ್ಯಘನಾ ವೇದಮೌಲಿಹರ್ಮ್ಯಾ ಚ ।
ಕೃತಪದವಿನ್ಯಾಸಭರಾ ವಾಣೀ ಜಯತೀಹ ಶತಮಖಾದಿನುತಾ ॥ ೧೨೯॥
ಮಾಯಾನಿರಸನದಕ್ಷಾ ಮಾತೇಯಂ ಸುಪ್ರಸನ್ನಾ ಮೇ ।
ಲಭತೇ ಪರಮಂ ಜ್ಞಾನಂ ಯದ್ಭಕ್ತ್ಯಾ ಪಾಮರೋಽಪಿ ಚ ಧರಿತ್ರ್ಯಾಮ್ ॥ ೧೩೦॥
ವಾಣೀಶ್ವರಿ ತವ ರೂಪಂ ನಾಮಸ್ಮರಣಂ ಚ ಪೂಜನಂ ಭಕ್ತ್ಯಾ ।
ಸಿಧ್ಯತಿ ಸಕಲವಿಭೂತ್ಯೈ ತತ್ರ ಹಿ ಭವತೀದಯಾಪ್ರಸಾರಸ್ತು ॥ ೧೩೧॥
ಸಫಲಯತು ನೇತ್ರಯುಗಲಂ ಹತನತದುರಿತಾ ಚ ಸಾ ಪರಾ ದೇವೀ ।
ಕಮಲಜಮಾನ್ಯಚರಿತ್ರಾ ಸುಮನೋವಾಞ್ಛಾಪ್ರದಾನಕೃತದೀಕ್ಷಾ ॥ ೧೩೨॥
ಪಙ್ಕಜಮೃಣಾಲತನ್ತುಪ್ರತಿಭಟರೂಪಂ ಕ್ವಚಿದ್ದೃಶ್ಯಮ್ ।
ಕವಿಕುಲವಾಣೀಕೈರವಶಾರದಚನ್ದ್ರಪ್ರಭಾಕಬಲಿತಂ ಚ ॥ ೧೩೩॥
ನಲಿನಭವಗೃಹಿಣಿ ವಾಣಿ ಪ್ರಹ್ವಾನಾಂ ಸಪದಿ ಭಕ್ತಾನಾಮ್ ।
ಲುಮ್ಪಸಿ ಮೋಹಂ ಭವತೀಸ್ಮರಣಾದ್ವರಿವಸ್ಯಯಾ ಸ್ತುತ್ಯಾ ॥ ೧೩೪॥
ಕವಿಕುಲಕಲ್ಪಕವಲ್ಲೀಮಪಾಙ್ಗಲೀಲಾಕೃತಾರ್ತಿಶಮನಾಂ ತಾಮ್ ।
ವಾಣೀಮನ್ವಹಮಾರ್ಯಾರಾಧ್ಯಾಂ ಮೋಕ್ಷಾಯ ನಿಭೃತಮಹಮೀಡೇ ॥ ೧೩೫॥
ಸಂವಿತ್ಸುಖಸ್ವರೂಪಾಮಮ್ಬಾಂ ವಾಣೀಮಹರ್ನಿಶಂ ಮನಸಿ ।
ಕಲಯೇ ಕಲಿತಾಪ್ರಭರಪ್ರಶಾನ್ತಿಕಾಮಃ ಪ್ರಭಾವತೀಂ ಜಯದಾಮ್ ॥ ೧೩೬॥
ನತಪರಿಪಾಲಿನಿ ವಾಣಿ ತ್ರಿಜಗದಘಧ್ವಂಸಿನಿ ಶ್ರಿತಾನಾಂ ನಃ ।
ತವ ಪಾದಯುಗಂ ನಿಗಲಂ ಭವತು ತಮೋರಾಶಿದುಷ್ಟಹಸ್ತಿಗಣೇ ॥ ೧೩೭॥
ಕಾಮಾದಿದುರ್ಗ್ರಹಕೃತಾನರ್ಥನಿರಾಸಾಯ ತಾವಕಾಪಾಙ್ಗಾಃ ।
ವಾಣಿ ಜನಯನ್ತಿ ನತಾನಾಂ ಕೈವಲ್ಯ ಖಪ್ರದಾನಾಯ ॥ ೧೩೮॥
ತವ ದರ್ಶನಂ ಹಿ ಮಾತಃ ಪರಮಂ ಸಂಸ್ಕಾರಮಾತ್ತಪಾಪಾನಾಮ್ ।
ಕಲ್ಯಾಣಸೂಕ್ತಿಕನ್ದಲರಸಪ್ರದಂ ಮಾನ್ಯತೇ ವಿಬುಧೈಃ ॥ ೧೩೯॥
ಧಾತುರ್ವದನಸರೋಜೇ ಶ್ರುತಿಸೀಮನಿ ಹೃದಿ ಚ ಭಕ್ತಾನಾಮ್ ।
ಏಕಪದಾ ದ್ವಿಪದಾ ವಾ ರಾಜತಿ ವಾಣೀ ಜಗನ್ಮಾತಾ ॥ ೧೪೦॥
ಮಣಿಮಯಕಾಞ್ಚೀಲಸಿತಾ ವೀಣಾಪುಸ್ತಕಕರಾರವಿನ್ದಾ ಚ ।
ನಮತಾಂ ಜಾಡ್ಯವಿಧೂನನಧೃತದೀಕ್ಷಾ ರಾಜತೇ ವಾಣೀ ॥ ೧೪೧॥
ಕಬಲಯತು ತಾಪಮಸ್ಯಾಃ ಸ್ಮರಣಂ ಪಾದಾಬ್ಜವನ್ದನಂ ವಾಣ್ಯಾಃ ।
ಧಾತುರ್ಜಿಹ್ವಾಗ್ರತಲೇ ನೃತ್ಯನ್ತ್ಯಾಃ ಸಾರಸೂಕ್ತಿರಸಯನ್ತ್ಯಾಃ ॥ ೧೪೨॥
ಪದ್ಮಜವದನವಿಭೂಷಾ ನಿಗಮಶಿಖೋತ್ತಂಸಪೀಠಿಕಾ ವಾಣೀ ।
ಸಕಲವಿಧಶಾಸ್ತ್ರರೂಪಾ ಭಕ್ತಾನಾಂ ಸತ್ಕವಿತ್ವದಾನಪ್ರಾ ॥ ೧೪೩ ॥।
ಗತಿಜಿತಮರಾಲಗಮನಾ ಮರಾಲವಾಹಾ ಚ ವೇಧಸೋ ದಾರಾಃ ।
ಶಿಶಿರದಯಾಸಾರಾ ಸಾ ನಮತಾಂ ಸಂತಾಪಹಾರಿಣೀ ಸಹಸಾ ॥ ೧೪೪॥
ಸ್ತನಭಾರಸಂನತಾಙ್ಗೀ ದರದಲಿತಾಮ್ಭೋಜಲೋಚನಾನ್ತಶ್ರೀಃ ।
ಸವಿಧತಲೇ ವಿಬುಧವಧೂಪರಿಚರಣಾದ್ಯೈಶ್ಚ ತುಷ್ಟಚಿತ್ತಾ ಸಾ ॥ ೧೪೫॥
ಹರಿಣಾಙ್ಕವದನಬಿಮ್ಬಾ ಪೃಥುಲನಿತಮ್ಬಾ ಕಚಾತ್ತಲೋಲಮ್ಬಾ ।
ನಿಜಗತಿಜಿತಕಾದಮ್ಬಾ ಸಾಮ್ಬಾ ಪದಪದ್ಮನಮ್ರಭಕ್ತಕದಮ್ಬಾ ॥ ೧೪೬॥
ಪರಿಹಸಿತನೀಲನೀರಜದೇಹಶ್ರೀಃ ಶಾರದಾ ಪ್ರಥಮಾ ।
ಸ್ಫಟಿಕಮಣಿಭರಕಾನ್ತಿಃ ಸರಸ್ವತೀ ಕೀರ್ತ್ಯತೇ ಚ ವಿಬುಧಗಣೈಃ ॥ ೧೪೭॥
ನಾಥೇ ದೃಢಭಕ್ತಿಮತೀ ಸೃಷ್ಟ್ಯಾದೌ ಚಿತ್ಸ್ವರೂಪಾ ಚ ।
ಧಾತ್ರಾ ಸಮಾನಭಾವಾ ಚೈಕಾಸನಪೂಣ್ಡರೀಕಮಧ್ಯಸ್ಥಾ ॥ ೧೪೮॥
ಪ್ರೀತ್ಯಾ ಸರಸಪುಮರ್ಥಾನ್ ದದಾತಿ ಕಾಲೇ ಚಿದಾದಿಸಂಧಾತ್ರೀ ।
ಸಾ ಮೇ ದೈವತಮೇಷಾ ಸತತನಿಷೇವ್ಯಾ ಚ ಕಾಮದಾ ಭೂಯಾತ್ ॥ ೧೪೯॥
ಹರಿಚರಣನಲಿನಯುಗಲೇ ಸದೈಕತಾನಾ ಹಿ ಶಾರದಾ ಜನನೀ ।
ಪದ್ಮಾನೀಲಾದಿಸಖೀ ಶ್ರುತ್ಯುದ್ಯಾನೇ ವಿಹಾರರಸಭರಿತಾ ॥ ೧೫೦॥
ಧಾತುಃ ಕುಟುಮ್ಬಿನೀಯಂ ತನ್ಯಾತ್ ಕಲ್ಯಾಣಸಂತತಿಂ ಸತತಮ್ ।
ಯಾ ತಾರುಣ್ಯವಿಭುಷಾ ಸಮಕ್ರಮಾ ತ್ರಿಪುರಸುನ್ದರ್ಯಾ ॥ ೧೫೧॥
ನಾನಾಕ್ಷರಾದಿಮಾತೃಕಗಣೇಡಿತಾ ಶಬ್ದರೂಪಾ ಚ ।
ನಾದಬ್ರಹ್ಮವಿಲಾಸಾ ವಾಣೀ ಸಾ ಮಙ್ಗಲಾನಿ ನಸ್ತನ್ಯಾತ್ ॥ ೧೫೨॥
ದೃಕ್ಕೋಣವೀಕ್ಷಣಕಲಾನಿಗಮಪ್ರಾಭವವಿಧಾನದಾ ನಮತಾಮ್ ।
ವಿಬುಧಾನಾಂ ಹೃದಯಾಬ್ಜಂ ಯಸ್ಯಾ ವಾಸಸ್ಥಲೀ ಚ ನಿರ್ದಿಷ್ಟಮ್ ॥ ೧೫೩॥
ಮೋಹಾದಿವನಕುಠಾರಾ ಯಾ ನಿತ್ಯಂ ಸೇವ್ಯತೇ ತ್ರಿದಶಸಂಧೈಃ ।
ನಿತ್ಯಪ್ರಸನ್ನರೂಪಾಂ ಶಾನ್ತಾಂ ಯಾಮೇವ ಸೇವತೇ ವೇಧಾಃ ॥ ೧೫೪॥
ನಮತಾಂ ಯಯೈವ ಖಣ್ಡೀಕ್ರಿಯತೇ ಸುವರ್ಣದೃಷ್ಟಿಪುಷಾ ।
ಯದ್ವೀಕ್ಷಣೇನ ಪುರುಷಃ ಖ್ಯಾತೋ ನೃಪಸದಸಿ ಮಾನ್ಯತೇ ಪ್ರಥಮಮ್ ॥ ೧೫೫॥
ಯಸ್ಯೈ ಶ್ರೋತ್ರಿಯವರ್ಯೈಸ್ತ್ರಿಸಂಧ್ಯಮಧಾರ್ದಿಕಂ ಕ್ರಿಯತೇ ।
ಸಾ ಮಞ್ಜುನೀತಿರೂಪಾ ವಾಣೀರೂಪಾ ಚ ಭಣ್ಯತೇ ನಿಪುಣೈಃ ॥ ೧೫೬॥
ಸಾ ಮಯಿ ತನ್ಯಾದೀಕ್ಷಾಂ ವೀಕ್ಷಾವನದಾಂ ಸರಸ್ವತೀ ದೇವೀ ।
ಸಂತಾನಕುಸುಮಜೈತ್ರೀಂ ಯಾಮೈಚ್ಛತ್ ಪ್ರಾಪ್ತುಮಞ್ಜಸಾ ವೇಧಾಃ ॥ ೧೫೭॥
ಮನ್ದಸ್ಮಿತಮಧುರಾಸ್ಯಂ ಕೃಪಾವಲೋಕಂ ನಿರಸ್ತಜಾದ್ಯತತಿ ।
ಭೂಯಾದ್ ವಾಣ್ಯಾ ರೂಪಂ ಪುರಃ ಕರಾಮ್ಭೋಜಕಲಿತವೀಣಾದಿ ॥ ೧೫೮॥
ವಾಣ್ಯಾಃ ಪರಂ ನ ಜಾನೇ ದೈವತಮನ್ಯದ್ ವನೇ ಗಿರೌ ಚ ಪಥಿ ।
ಗಗನೇ ವಾ ಸಂರಕ್ಷಿತನತಜನತಾಯಾಃ ಕೃಪಾರಸಾರ್ದ್ರಾಯಾಃ ॥ ೧೫೯॥
ಆಸ್ಯೇನ್ದೋರವಲೋಕನಮಮ್ಬಾಯಾಃ ಪಾದಪದ್ಮಸೇವಾ ಚ ।
ಸರ್ವಶ್ರೇಯಃಪ್ರಾಪ್ತ್ಯೈ ಶಾಸ್ತ್ರಜ್ಞೈಃ ಸುಷ್ಠು ನಿರ್ದಿಷ್ಟಾ ॥ ೧೬೦॥
ವಾಣೀ ಹಿ ತಾಪಹನ್ತ್ರೀ ಜಗತಾಂ ಕಾರುಣ್ಯಪೂರ್ಣನಯನಶ್ರೀಃ ।
ಮನ್ದಾನ್ ಕರೋತಿ ವಿಬುಧಾನ್ ದ್ರಾವಯತಿ ಶಿಲಾಸ್ತತಸ್ತು ಕಿಂ ಚಿತ್ರಮ್ ॥ ೧೬೧॥
ಯಸ್ಮಿನ್ ಕಟಾಕ್ಷಪೂರೋ ನ ಭವತಿ ಸ ಹಿ ದೀನವದನಃ ಸನ್ ।
ಪ್ರಸ್ಖಲಿತವಾಗ್ಭಾರ್ತೋ ಭಿಕ್ಷಾಮಟತೀಹ ನಿನ್ದಿತೋ ಬಹುಶಃ ॥ ೧೬೨॥
ವಾಣ್ಯಾಃ ಕಟಾಕ್ಷಪೂರಸ್ರಜಾ ತ್ವಲಂಕೃತನಿಗಾಲೋ ಯಃ ।
ಸ ಹಿ ಭವತಿ ರಾಜಮಾನ್ಯಃ ಕಾನ್ತಾಧರಮಧುರವಾಗ್ವಿಲಾಸಶ್ಚ ॥ ೧೬೩॥
ಕವಿತಾಭಾಗ್ಯವಿಧಾತ್ರೀ ಪರಿಮಲಸಂಕ್ರಾನ್ತಮಧುಪಗಣಕೇಶಾ ।
ಮಮ ನಯನಯೋಃ ಕದಾ ವಾ ಸಾ ದೇವೀ ಕಲಿತಸಂನಿಧಾನಕಲಾ ॥ ೧೬೪॥
ಪರಚಿದ್ವಿಧಾನರೂಪಾ ವಾಣೀ ಶ್ರುತಿಸೀಮ್ನಿ ರಾಜತೇ ಪರಮಾ ।
ಮುನಿಜನಮಾನಸಹಂಸೀ ಯಾ ವಿಹರತಿ ಸಾ ಶುಭಾಯ ಸ್ಯಾತ್ ॥ ೧೬೫॥
ಜಪಮಾಲಿಕಯಾ ವಾಣೀಕರಧೃತಯಾ ವೀಣಯಾ ಚ ಕೋಶೇನ ।
ಅಹಮಸ್ಮಿ ನಾಥವಾನಿಹ ಕಿಂ ವಾಶಾಸ್ಯಂ ಪರಂ ಲೋಕೇ ॥ ೧೬೬॥
ಕೈವಲ್ಯಾನನ್ದಸುಖಪ್ರಾಪ್ತ್ಯೈ ತೇಜಸ್ತು ಮನ್ಮಹೇ ಕಿಮಪಿ ।
ಯದ್ ವಾಞ್ಛಿತಚಿನ್ತಾಮಣಿರಿತಿ ವಾಣೀತಿ ಚ ಭುವಿ ಖ್ಯಾತಮ್ ॥ ೧೬೭॥
ಕವಿಕುಲಸೂಕ್ತಿಶ್ರೇಣೀಶ್ರವಣಾನನ್ದೋಲ್ಲಸದ್ವತಂಸಸುಮಾ ।
ಸಾ ದೇವೀ ಮಮ ಹೃದಯೇ ಕೃತಸಾಂನಿಧ್ಯಾ ಕೃತತ್ರಾಣಾ ॥ ೧೬೮॥
ಯಸ್ಯಾ ದೃಷ್ಟಿವಿದೂರಾಃ ಕುಮತಾಃ ಶ್ರುತ್ಯರ್ಥವಞ್ಚಕಾಃ ಶಪ್ತಾಃ ।
ಕ್ರನ್ದನ್ತಿ ದಿಗನ್ತತಟೇ ಮೋಹಾದ್ಯೈರ್ಲುಪ್ತನಯನಾಶ್ಚ ॥ ೧೬೯॥
ಸತ್ಪರಿಷತ್ಸಂಮಾನ್ಯಾ ಶ್ರುತಿಜೀವನದಾಯಿನೀ ಜಗನ್ಮಾತಾ ।
ಚತುರಾನನಭಾಗ್ಯಕಲಾ ಕೃತಸಾಂನಿಧ್ಯಾ ಹಿ ರಾಜತೇ ಹೃದಯೇ ॥ ೧೭೦॥
ಕೃತಸುಕೃತೈಃ ಸಂದೃಶ್ಯಾ ಮನ್ದಸ್ಮಿತಮಧುರವದನಪದ್ಮಶ್ರೀಃ ।
ಮುನಿನಾರದಾದಿಪರಿಷತ್ತತ್ತ್ವೋಪಕ್ರಮವಿಚಕ್ಷಣಾ ವಾಣೀ ॥ ೧೭೧॥
ಕವಿವಾಗ್ವಾಸನ್ತೀನಾಂ ವಸನ್ತಲಕ್ಷ್ಮೀರ್ವಿಧಾತೃದಯಿತಾ ನಃ ।
ಪರಮಾಂ ಮುದಂ ವಿಧತ್ತೇ ಕಾಲೇ ಕಾಲೇ ಮಹಾಭೂತ್ಯೈ ॥ ೧೭೨॥
ಕವಿತಾರಸಪರಿಮಲಿತಂ ಕರೋತಿ ವದನಂ ನತಾನಾಂ ಯಾ ।
ಸ್ತೋತುಂ ತಾಂ ಮೇ ಹ್ಯಾರಾತ್ ಸಾ ದೇವೀ ಸುಪ್ರಸನ್ನಾಸ್ತು ॥ ೧೭೩॥
ಯಸ್ಯಾಃ ಪ್ರಸಾದಭೂಮ್ನಾ ನಾಕಿಗಣಾಃ ಸತ್ತ್ವಸಂಪನ್ನಾಃ ।
ಐನ್ದ್ರೀಂ ಶ್ರಿಯಮಪಿ ಮಾನ್ಯಾಂ ಪಶ್ಯನ್ತಿ ಕ್ಷಪಿತಶತ್ರುಭಯಪೀಡಾಮ್ ॥ ೧೭೪॥
ಮಾನ್ಯಂ ವಿಧಾತೃಲೋಕೇ ತತ್ತೇಜೋ ಭಾತಿ ಸರ್ವಸುರವನ್ದ್ಯಮ್ ।
ಬ್ರಹ್ಮಾಣ್ಡಮಣ್ಡಲಮಿದಂ ಯದ್ರೂಪಂ ಯತ್ರ ಚಾಕ್ಷರಗತಿಶ್ಚ ॥ ೧೭೫॥
ಜನನಿ ತರಙ್ಗಯ ನಯನೇ ಮಯಿ ದೀನೇ ತೇ ದಯಾಸ್ನಿಗ್ಧೇ ।
ತೇನ ವಯಂ ಕೃತಾರ್ಥಾ ನಾತಃ ಪರಮಸ್ತಿಃ ನಃ ಪ್ರಾರ್ಥ್ಯಮ್ ॥ ೧೭೬॥
ವಾಣಿ ವಿಧಾತುಃ ಕಾನ್ತೇ ಸ್ತೋತುಂ ತ್ವಾಮಾದರೇಣ ಕಿಂ ವಾಚ್ಯಮ್ ।
ಭಾಸಿ ತ್ವಮೇವ ಪರಮಂ ದೈವತಮಿತ್ಯೇವ ಜಾನಾಮಿ ॥ ೧೭೭॥
ಕಬಲಿತತಮೋವಿಲಾಸಂ ತೇಜಸ್ತನ್ಮನ್ಮಹೇ ಮಹೋದಾರಮ್ ।
ಫಲಿತಸುಮನೋಽಭಿಲಾಷಂ ವಾಣೀರೂಪಂ ವಿಪಞ್ಚಿಕೋಲ್ಲಸಿತಮ್ ॥ ೧೭೮॥
ಪದ್ಮಸನಸುಕೃತಕಲಾಪರಿಪಾಕೋದಯಮಪಾಸ್ತನತದೋಷಮ್ ।
ಸರಸಜ್ಞಾನಕವಿತ್ವಾದ್ಯನನ್ತಸುಕೃತಂ ವಿರಾಜತೇ ತೇಜಃ ॥ ೧೭೯॥
ನಿಜನಾಥವದನಸಿಂಹಾಸನಮಾರೂಢಾಮುಪಾಸ್ಮಹೇ ವಾಣೀಮ್ ।
ಯಾ ಕೃತ್ರಿಮವಾಗ್ಗುಮ್ಫೈರ್ವಿರಚಿತಕೇಲಿರ್ಧಿನೋತಿ ವಿಧಿಮಾದ್ಯಮ್ ॥ ೧೮೦॥
ಸುಜನಾನನ್ದಕರೀ ಸಾ ಜನಯನ್ತೀ ಸರ್ವಸಂಪದಂ ಧಾತುಃ ।
ಭಕ್ತೇಷು ತಾಂ ನಯನ್ತೀಮನ್ವಹಮಹಮಾದ್ರಿಯೇ ಗಿರಾಂ ದೇವೀಮ್ ॥ ೧೮೧॥
ಕರುಣಾಕಟಾಕ್ಷಲಹರೀ ಕಾಮಾಯಾಸ್ತು ಪ್ರಕಾಮಕೃತರಕ್ಷಾ ।
ವಾಣ್ಯಾ ವಿಧಾತೃಮಾನ್ಯಾ ಸತ್ಸುಖದಾನೇ ದಿಶಿ ಖ್ಯಾತಾ ॥ ೧೮೨॥
ವಿಸರೋ ಮಹೋತ್ಸವಾನಾಂ ವಿರಿಞ್ಚಿನಯನಾವಲೇರಿಯಂ ಮಾತಾ ।
ಪ್ರಿಯಕಾರ್ಯಸಿದ್ಧಿದಾತ್ರೀ ಜಗತೀರಕ್ಷಾಧುರಂಧರಾ ಜಯತಿ ॥ ೧೮೩॥
ವಿಬುಧಾಭಿಗಮ್ಯರೂಪಾ ಹಂಸಾವಲಿಸೇವಿತಾ ಗಿರಾಂ ದೇವೀ ।
ಗಙ್ಗೇವ ಕನತಿ ಕಾಲೇ ಪರಿಕಮ್ಪಿತಶಿವಜಟಾಕೋಟಿಃ ॥ ೧೮೪॥
ನೌಕಾಂ ಭವಾಮ್ಬುರಾಶೇರಜ್ಞಾನಧ್ವಾನ್ತಚನ್ದ್ರಿಕಾಂ ವಾಣೀಮ್ ।
ಕಲಯೇ ಮನಸಿ ಸದಾಹಂ ಶ್ರುತಿಪಞ್ಜರಶಾರಿಕಾಂ ದೇವೀಮ್ ॥ ೧೮೫॥
ಭವತಾಪಾರಣ್ಯತಲೇ ಜಹ್ನುಸುತಾ ಶಾರದಾ ದೇವೀ ।
ಜ್ಞಾನಾನನ್ದಮಯೀ ನಃ ಸಂಪತ್ಸಿದ್ಧ್ಯೈ ಪ್ರತಿಕ್ಷಣಂ ಜಯತು ॥ ೧೮೬॥
ಮತ್ತಗಜಮಾನ್ಯಗಮನಾ ಮಧುರಾಲಾಪಾ ಚ ಮಾನ್ಯಚರಿತಾ ಸಾ ।
ಮನ್ದಸ್ಮೇರಮುಖಾಬ್ಜಾ ವಾಣೀ ಮಮ ಹೃದಯಸಾರಸೇ ಲಸತು ॥ ೧೮೭॥
ರಕ್ಷಣಚಣೌ ಚ ವಾಣ್ಯಾಃ ಪಾದೌ ವನ್ದೇ ಮನೋಜ್ಞಮಣಿನಾದೌ ।
ಯತ್ಸೇವನೇನ ಧನ್ಯಾಃ ಪುರುಹೂತಾದ್ಯಾ ದಿಶಾಂ ನಾಥಾಃ ॥ ೧೮೮॥
ಧಾತುರ್ಧೈರ್ಯಕೃಪಾಣೀ ವಾಣೀ ಸುರವೃಕ್ಷಕುಸುಮಮೃದುವೇಣೀ ।
ಶುಕವಾಣೀ ನುತವಾಣೀ ಕವಿಕುಲಮೋದಾಯ ಜಯತಿ ಮೃದುವಾಣೀ ॥ ೧೮೯॥
ಕಲ್ಯಾಣೈಕನಿಕೇತನಮಸ್ಯಾ ರೂಪಂ ಸದಾ ಸ್ಫುರತು ಚಿತ್ತೇ ।
ಮಾನಸಕಾಲುಷ್ಯಹರಂ ಮಧುಮಥನಶಿವಾದಿಬಹುಮತೋತ್ಕರ್ಷಮ್ ॥ ೧೯೦॥
ಮುನಿಜನಮಾನಸರತ್ನಂ ಚಿರತ್ನಮೇತದ್ವಿಧಾತೃಸುಕೃತಕಲಾ ।
ವಿನತಜನಲೋಚನಶ್ರೀಕರ್ಪೂರಕಲಾ ಪರಾ ಜಯತಿ ॥ ೧೯೧॥
ಧೃತಸುಮಮಧುಪಕ್ರೀಡಾಸ್ಥಾನಾಯಿತಕೇಶಭಾರಾಯೈ ।
ನಮ ಉಕ್ತಿರಸ್ತು ಮಾತ್ರೇ ವಾಗ್ಜಿತಪೀಯೂಷಧಾರಾಯೈ ॥ ೧೯೨॥
ಬಾಲಕುರಙ್ಗವಿಲೋಚನಧಾಟೀರಕ್ಷಿತಸುರಾದಿಮನುಜಾನಾಮ್ ।
ನಯನಯುಗಾಸೇವ್ಯಂ ತದ್ಭಾತೀಹ ಧರಾತಲೇ ತೇಜಃ ॥ ೧೯೩॥
ಕುಶಲವಿಧಯೇ ತದಸ್ತು ಶ್ರುತಿಪಾಠರತಾದೃತಾತ್ಮಬಹುಕೇಲಿಃ ।
ಕಬಲಿತಪದನತದೈನ್ಯಂ ತರುಣಾಮ್ಬುಜಲೋಚನಂ ತೇಜಃ ॥ ೧೯೪॥
ಬಾಲಮರಾಲೀಗತ್ಯೈ ಸುರಗಿರಿಕನ್ಯಾದಿಮಹಿತಕಲಗೀತ್ಯೈ ।
ವಿರಚಿತನಾನಾನೀತ್ಯೈ ಚೇತೋ ಮೇ ಸ್ಪೃಹಯತೇ ಬಹುಲಕೀರ್ತ್ಯೈ ॥ ೧೯೫॥
ವಿನಮದಮರೇಶಸುದತೀಕಚಸುಮಮಕರನ್ದಧಾರಯಾ ಸ್ನಿಗ್ಧಮ್ ।
ತವ ಪಾದಪದ್ಮಮೇತತ್ ಕದಾ ನು ಮಮ ಮೂರ್ಧ್ನಿ ಭೂಷಣಂ ಜನನಿ ॥ ೧೯೬॥
ಕಮಲಜಪರತನ್ತ್ರಂ ತದ್ಗತತನ್ದ್ರಂ ವಸ್ತು ನಿಸ್ತುಲಮುಪಾಸೇ ।
ತೇನೈವಾಹಂ ಧನ್ಯೋ ಮದ್ವಂಶ್ಯಾ ನಿರಸಿತಾತ್ಮತಾಪಭರಾಃ ॥ ೧೯೭॥
ಜ್ಞಾನಾಮೃತಸಂಧಾತ್ರೀ ಭವಾಬ್ಧಿಸಂತರಣಪೋತ್ರನಾಮಾದಿಃ ।
ವಾಣೀ ವಾಚಾಂ ಲಹರೀಮವನ್ಧ್ಯಯನ್ತೀ ಸುರಾದಿನುತಚರಿತಾ ॥ ೧೯೮॥
ಕಾರುಣ್ಯಪೂರ್ಣಮೇತದ್ ವಾಣೀರೂಪಂ ಸದಾ ಕಲಯೇ ।
ಯದ್ಭಜನಾದ್ ದೇವಾನಾಮಪಿ ಸಂವಿದ್ ಭಾತಿ ಕಾರ್ಯಕಾಲೇಷು ॥ ೧೯೯॥
ಧೀಪದ್ಮಪೀಠಮಾಸ್ತೇ ಸಾ ವಾಣೀ ಕಾಙ್ಕ್ಷಿತಾನಿ ಕಲಯನ್ತೀ ।
ಯಾ ಘನಕೃಪಾಸ್ವರೂಪಾ ಸಂಕೀರ್ತ್ಯಾ ಸರ್ವದೇವನುತಾ ॥ ೨೦೦॥
ತವ ಪಾದಪದ್ಮವಿಸೃಮರಕಾನ್ತಿಝರೀಂ ಮನಸಿ ಕಲಯಂಸ್ತು ।
ನಿರಸಿತನರಕಾದಿಭಯೋ ವಿರಾಜತೇ ನಾಕಿಸದಸಿ ಸುರಮಾನ್ಯಃ ॥ ೨೦೧॥
ಕುಚಯುಗಲನಮ್ರಗಾತ್ರಂ ಪವಿತ್ರಮೇತದ್ ಭಜೇ ತೇಜಃ ।
ಧಾತುರಪಿ ಸರ್ವದೇವೈರ್ಯನ್ನಿರ್ದಿಷ್ಟಂ ಹು ಭದ್ರಾಯ ॥ ೨೦೨॥
ಕೃತನತಪದವಾಗ್ಧಾಟೀ ಚೇಟೀಭೂತಾಮರೇಶಮಹಿಷೀ ನಃ ।
ಕಟಿಕೃತಮನೋಜ್ಞಶಾಟೀ ಪಾಟೀರರಸಾರ್ದ್ರನೈಜತನುಕೋಟೀ ॥ ೨೦೩॥
ಪದ್ಮಭವಪುಣ್ಯಕೋಟೀ ಹರ್ಷಿತಕವಿಬೃನ್ದಸೂಕ್ತಿರಸಧಾಟೀ ।
ಮುಖಲಸಿತಸರಸವಾಟೀ ವಿಲಸತು ಮಮ ಮಾನಸೇ ಕೃಪಾಕೋಟೀ ॥ ೨೦೪॥
ಜ್ಞಾನಪರಾಕ್ರಮಕಲಿಕಾ ದಿಶಿ ದಿಶಿ ಕಿನ್ನರಸುಗೀತನಿಜಯಶಸಃ ।
ಧನ್ಯಾ ಭಾನ್ತಿ ಹಿ ಮನುಜಾಃ ಯದ್ವೀಕ್ಷಾಲವವಿಶೇಷತಃ ಕಾಲೇ ॥ ೨೦೫॥
ಸುರಜನಪಾಲನದಕ್ಷಾ ಪ್ರಶಾನ್ತವೀಕ್ಷಾ ನಿರಸ್ತರಿಪುಪಕ್ಷಾ ।
ಮೋಕ್ಷಾರ್ಥಿಭಿಃ ಶ್ರಿತಾ ಸಾ ಲಾಕ್ಷಾರಸಲಸಿತಪಾದಭಾಗ್ ಭಾತಿ ॥ ೨೦೬॥
ಕುಙ್ಕುಮಭರರುಚಿರಾಙ್ಗೀ ಭಾತಿ ಕೃಶಾಙ್ಗೀ ಗಿರಾಂ ದೇವೀ ।
ಧಾತುರಪಿ ಜ್ಞಾನಪ್ರದಮಸ್ಯಾ ರೂಪಂ ವದನ್ತಿ ವಿಬುಧೇಶಾಃ ॥ ೨೦೭॥
ವಾಣಿ ನತಿಮಮ್ಬ ನಿತ್ಯಂ ಕರವಾಣಿ ಹಿ ಚಿತ್ಸುಖಾವಾಪ್ತ್ಯೈ ।
ತಾದೃಕ್ತ್ವದೀಯಕರುಣಾವೀಕ್ಷಣತೋ ಗೀಷ್ಪತಿಶ್ಚ ಸುರಮಾನ್ಯಃ ॥ ೨೦೮॥
ಕಲ್ಯಾಮಿ ನತಿಮನನ್ತಾಂ ಕಾಲೇ ಕಾಲೇ ಶುಭಪ್ರಾಪ್ತ್ಯೈ ।
ಧಾತುಃ ಸುಕೃತೋಲ್ಲಾಸಂ ಕರಧೃತವೀಣಾದಿಕಂ ಚ ಯದ್ರೂಪಮ್ ॥ ೨೦೯॥
ಕಮಲಾಸನದಯಿತಾ ಸಾ ಲಸತು ಪುರೋಽಸ್ಮಾಕಮಾದರಕೃತಶ್ರೀಃ ।
ಯತ್ಪ್ರಣಮನಾಜ್ಜನಾನಾಂ ಕವಿತೋನ್ಮೇಷಃ ಸದೀಡಿತೋ ಭವತಿ ॥ ೨೧೦॥
ಪರಸಂವಿದಾತ್ಮಿಕಾ ಸಾ ಮಹಿಷೀ ಧಾತುಃ ಕಲಾವತೀ ವಾಣೀ ।
ಶಿಶಿರೀಕರೋತಿ ತಪ್ತಾನ್ ಕರುಣಾರಸದಿಗ್ಧನೇತ್ರಪಾಲ್ಯಾ ನಃ ॥ ೨೧೧॥
ಧಾತೃಮನೋರಥಪಾತ್ರಂ ಸಂತಪ್ತಸ್ವರ್ಣಕಾಮ್ಯನಿಜಗಾತ್ರಮ್ ।
ಆಶ್ರಿತಕಮಲಜಗೋತ್ರಂ ರಕ್ಷಿತನತಬಾಹುಚ್ಛಾತ್ರಮ್ ॥ ೨೧೨॥
ಕವಿಕುಲಜಿಹ್ವಾಲೋಲಂ ಪಿತಾಮಹಾದೃತಮನೋಜ್ಞನಿಜಲೀಲಮ್ ।
ನಿರಸಿತನತದುಷ್ಕಾಲಂ ವನ್ದೇ ತೇಜಃ ಸದಾಲಿನುತಶೀಲಮ್ ॥ ೨೧೩॥
ಮನ್ದಾನಾಮಪಿ ಮಞ್ಜುಲಕವಿತ್ವರಸದಾಯಿನೀ ಜನನೀ ।
ಕಾಪಿ ಕರುಣಾಮಯೀ ಸಾ ಲಸತು ಪುರಸ್ತಾತ್ ಸದಾಸ್ಮಾಕಮ್ ॥ ೨೧೪॥
ನಿಸ್ತುಲಪದಸಂಪ್ರಾಪ್ತ್ಯೈ ಭೂಯೋ ಭೂಯೋ ನಮಾಂಸಿ ತೇ ವಾಣಿ ।
ದೀಪಕಲಾಮಯಿ ಚಾನ್ತಃಸ್ಮರಣಂ ಧಾತುಃ ಕುಟುಮ್ಬಿನ್ಯೈ ॥ ೨೧೫॥
ಮಾಯಾನಿರಾಸಕಾಮೋ ವನ್ದೇ ವಾಣ್ಯಾಃ ಪದಾಮ್ಭೋಜಮ್ ।
ಸಿದ್ಧಮನೋರಥಶತಕಾ ಯದ್ಭಜನೇನಾರ್ಥಿನಃ ಕಾಲೇ ॥ ೨೧೬॥
ಸತತಂ ಬದ್ಧಾಞ್ಜಲಿಪುಟುಮುಪಾಸ್ಮಹೇ ತಚ್ಛುಭಪ್ರದಂ ತೇಜಃ ।
ಯತ್ಕಮಲಜನಯನಾನಾಂ ಪ್ರಮೋದಪೀಯೂಷಲಹರಿಕಾಮೋದಮ್ ॥ ೨೧೭॥
ದಿವಿ ವಾ ಭುವಿ ದಿಕ್ಷು ಜಲೇ ವಹ್ನೌ ವಾ ಸರ್ವತೋ ವಾಣಿ ।
ಜನ್ತೂನಾಂ ಕಿಲ ರಕ್ಷಾ ತ್ವಧೀನಾ ಕೀರ್ತ್ಯತೇ ವಿಬುಧೈಃ ॥ ೨೧೮॥
ಭಾರತಿ ಭವತಾಪಾರ್ತಾನ್ ಪಾಹಿ ಕಟಾಕ್ಷಾಙ್ಕುರೈಃ ಶೀತೈಃ ।
ಪರಮನನ್ದವಿಧಾತೃನ್ ಯಾನೇವ ಸ್ತೌತಿ ಪದ್ಮವಾಸೋಽಪಿ ॥ ೨೧೯॥
ಕುಲದೈವತಮಸ್ಮಾಕಂ ತತ್ತೇಜಃ ಕುಟಿಲಕುನ್ತಲಂ ಕಿಮಪಿ ।
ಕರಧೃತಪುಸ್ತಕವೀಣಂ ಕಲಯೇ ಕಾಮಾಗಮೋದಯಂ ಧಾತುಃ ॥ ೨೨೦॥
ಪರಮಾನನ್ದಧನಂ ತದ್ಧಾತುರಪಿ ಬ್ರಹ್ಮತತ್ತ್ವರಸದಾಯಿ ।
ಆಬ್ರಹ್ಮಕೀಟನೃತ್ಯತ್ಸ್ವವೈಭವಂ ಜಯತಿ ಶಾರದಾರೂಪಮ್ ॥ ೨೨೧॥
ವಿಬುಧಜನಮೋದಜನನೀ ಜನನೀ ನಃ ಸಾ ವಿಧೇಃ ಪತ್ನೀ ।
ಮೃದುಸಂಚಾರವಿಲಾಸೈಃ ಶುಭಂಕರೀ ಭವತು ಸಂತತಂ ಕಾಲೇ ॥ ೨೨೨॥
ಸರಸಮನೋಜ್ಞವಿಲಾಸೈಃ ಸ್ವವಶೇ ಕೃತ್ವಾ ಮನೋ ವಿಧೇರ್ವಾಣೀ ।
ಸೃಷ್ಟ್ಯಾದೌ ಶುಭಲೇಖಾಕರೀ ನೃಣಾಂ ಮಸ್ತಕೇ ಮಾತಾ ॥ ೨೨೩॥
ಪ್ರಕೃತಿಮೃದುಲಂ ಪದಾಬ್ಜಂ ವಾಣೀದೇವ್ಯಾ ಮದೀಯಚಿತ್ತತಟೇ ।
ಕಾಮಾದಿಸೂಚಿನಿಚಿತೇ ಕಥಂ ಸ್ಥಿತಿಂ ಪ್ರಾಪ್ನುಯಾತ್ ಕಾಲೇ ॥ ೨೨೪॥
ನಿಖಿಲಚರಾಚರರಕ್ಷಾಂ ವಿತನ್ವತೀ ಪದ್ಮಜಪ್ರಿಯಾ ದೇವೀ ।
ಮಮ ಕುಲದೈವತಮೇಷಾ ಜಯತಿ ಸದಾರಾಧ್ಯಮಾನ್ಯಪದಕಮಲಾ ॥ ೨೨೫॥
ಕುಶಲಸಮೃದ್ಧ್ಯೈ ಭೂಯಾದಮ್ಬಾ ಸಾ ಶಾರದಾ ದೇವೀ ।
ಜನಿರಕ್ಷಣಾದಿಲೀಲಾವಿಹಾರಭಾಙ್ನಿಗಮಸೌಧದೀಪಕಲಾ ॥ ೨೨೬॥
ವಾಚಾಲಯತಿ ಕಟಾಕ್ಷೈರ್ಜಡಂ ಶಿಲಾಮಲ್ಪಜನ್ತುಂ ವಾ ।
ಯಾ ವಾಣೀ ಸಾ ಶರಣಂ ಭವೇ ಭವೇ ಪ್ರಾರ್ಥ್ಯೇ ಶ್ರಿಯಃಪ್ರಾಪ್ತ್ಯೈ ॥ ೨೨೭॥
ಯದಿ ಹಿ ಪ್ರಸಾದಭೂಮಾ ವಾಣ್ಯಾಸ್ತತ್ರೈವ ಸಾ ಹರೇಃ ಕಾನ್ತಾ ।
ಪರಿಲಸಿತ ( ... incomplete ... ) ನಿತ್ಯವಾಸರತಾ ॥ ೨೨೮॥
ಸನಕಸನನ್ದನವನ್ದ್ಯೇ ಕಾನ್ತೇ ಪರಮೇಷ್ಟಿನಃ ಶ್ರಿಯಃಪ್ರಾಪ್ತ್ಯೈ ।
ವಾಣಿ ತ್ವಾಂ ನೌಮಿ ಸದಾ ಭವ ಪ್ರಸನ್ನಾ ವಿಪ`ನ್ಚಿಲಸಿತಕರೇ ॥ ೨೨೯॥
ವಾಣಿ ವಿಪಞ್ಚೀಕಲರವರಸಿಕೇ ಗನ್ಧರ್ವಯೋಷಿದಭಿವನ್ದ್ಯೇ ।
ತವ ಚರಣಂ ಮಮ ಶರಣಂ ಭವವಾರಿಧಿಸುತೇಮಮ್ಬ ಕಲಯಾಮಿ ॥ ೨೩೦॥
ವಾಣಿ ಕದಾಹಂ ಲಪ್ಸ್ಯೇ ಚರಣಾಮ್ಭೋಜಂ ತ್ವದೀಯಮಿದಮಾರಾತ್ ।
ನಿಜಮಣಿನೂಪುರನಾದಸ್ಪೃಹಣೀಯವಚಃಪದಂ ಕಲಿತಭಕ್ತೇಃ ॥ ೨೩೧॥
ಶ್ರುತಿಪೂತಮುಖಮನೋಹರಲಾವಣ್ಯಕುಸುಮಮೃದುಶರೀರೇಯಮ್ ।
ನಿಜಕರುಣಾಪಾಙ್ಗಸುಧಾಪೂರಣಕೃತವೈಭವಾ ಭಾತಿ ॥ ೨೩೨॥
ಪರಿಸರನತವಿಬುಧಾಲೀಕಿರೀಟಮಣಿಕಾನ್ತಿವಲ್ಲರೀವಿಸರೈಃ ।
ಕೃತನೀರಾಜನವಿಧಿ ತೇ ಮಮ ತು ಶಿರೋಭೂಷಣಂ ಹಿ ಪದಯುಗಲಮ್ ॥ ೨೩೩॥
ಪ್ರೇಮವತೀ ವಿಧಿಭವನೇ ಹಂಸಗತಿರ್ಹಂಸಯಾನಕೃತಚಾರಾ ।
ವಾಚಾಮಕೃತ್ರಿಮಾನಾಂ ಸ್ಥೈರ್ಯವಿಧಾತ್ರೀ ಮಹೇಶಾನೀ ॥ ೨೩೪॥
ಆನನ್ದರೂಪಕೋಟೀಮಮ್ಬಾಂ ತಾಂ ಸಂತತಂ ಕಲಯೇ ।
ಸಂವಿದ್ರೂಪಾ ಯಾ ಕಿಲ ವಿಧಾತೃಗೇಹೇ ಶ್ರುತಿಶ್ರಿಯಂ ಧತ್ತೇ ॥ ೨೩೫॥
ಕಮಲಜನೇತ್ರಮಹೋತ್ಸವತಾರುಣ್ಯಶ್ರೀರ್ನಿರಸ್ತನತಶತ್ರುಃ ।
ಲಲಿತಲಿಕುಚಾಭಕುಚಭರಯುಗಲಾ ದೃಗ್ವಿಜಿತಹರಿಣಸಂದೋಹಾ ॥ ೨೩೬॥
ಕಾರುಣ್ಯಪೂರ್ಣನಯನಾ ಕಲಿಕಲ್ಮಷನಾಶಿನೀ ಚ ಸಾ ವಾಣೀ ।
ಮುಖಜಿತಶಾರದಕಮಲಾ ವಕ್ತ್ರಾಮ್ಭೋಜೇ ಸದಾ ಸ್ಫುರತು ಮಾತಾ ॥ ೨೩೭॥
ಕಮಲಸುಷಮಾನಿವಾಸಸ್ಥಾನಕಟಾಕ್ಷಂ ಚಿರಾಯ ಕೃತರಕ್ಷಮ್ ।
ರಕ್ಷೋಗಣಭೀತಿಕರಂ ತೇಜೋ ಭಾತಿ ಪ್ರಕಾಮಮಿಹ ಮನಸಿ ॥ ೨೩೮॥
ಕಮಲಜತಪಃಫಲಂ ತನ್ಮುನಿಜನಹೃದಯಾಬ್ಜನಿತ್ಯಕೃತನೃತ್ತಮ್ ।
ಕರುಣಾಲೋಲಾಪಾಙ್ಗಂ ತತ್ತೇಜೋ ಭಾತು ಮಮ ಮುಖಾಮ್ಭೋಜೇ ॥ ೨೩೯॥
ಭಾಗ್ಯಂ ವಿಧಿನಯನಾನಾಂ ಸಂಸೃತಿತಾಪಜ್ವರಾದಿತಪ್ತಾನಾಮ್ ।
ಭೇಷಜಮೇತದ್ರೂಪಂ ಕಲಾಗ್ರಹಂ ಮನ್ಯತೇ ದೇವ್ಯಾಃ ॥ ೨೪೦॥
ಜನನಿ ಕದಾ ವಾ ನೇಷ್ಯಾಮ್ಯಹಮಾರಾದರ್ಚಿತತ್ವದೀಯಪದಃ ।
ನಿಮಿಷಮಿವ ಹನ್ತ ದಿವಸಾನ್ ದೃಷ್ಟ್ವಾ ತ್ವಾಮಾದರೇಣ ಕಲ್ಯಾಣೀಮ್ ॥ ೨೪೧॥
ಮಞ್ಜುಲಕವಿತಾಸಂತತಿಬೀಜಾಙ್ಕುರದಾಯಿಸಾರಸಾಲೋಕಾ ।
ಜನನಿ ತವಾಪಾಙ್ಗಶ್ರೀರ್ಜಯತಿ ಜಗತ್ತ್ರಾಣಕಲಿತದೀಕ್ಷೇಯಮ್ ॥ ೨೪೨॥
ಅಮ್ಬ ತವಾಪಾಙ್ಗಶ್ರೀರಪಾಙ್ಗಕೇಲೀಶತಾನಿ ಜನಯನ್ತೀ ।
ಧಾತುರ್ಹೃದಯೇ ಜಯತಿ ವ್ರೀಡಾಮದಮೋದಕಾಮಸಾರಕರೀ ॥ ೨೪೩॥
ಸರ್ವಜಗನ್ನುತವಿಭವೇ ಸಂತತಮಪಿ ವಾಞ್ಛಿತಪ್ರದೇ ಮಾತಃ ।
ಅಧುನಾ ತ್ವಮೇವ ಶರಣಂ ತೇನಾಹಂ ಪ್ರಾಪ್ತಜನ್ಮಸಾಫಲ್ಯಃ ॥ ೨೪೪॥
ಶಾನ್ತಿರಸಸರ್ವಶೇವಧಿಮಮ್ಬಾಂ ಸೇವೇ ಮನೋರಥಾವಾಪ್ತ್ಯೈ ।
ಯಾಮಾರಾಧ್ಯ ಸುರೇಶಾಃ ಸ್ವಪದಂ ಪ್ರಾಪುರ್ಹಿ ತದ್ರಕ್ಷಮ್ ॥ ೨೪೫॥
ಕುಲಜಾ ಭಾರ್ಯಾ ಕೀರ್ತಿರ್ದಾನಂ ಪುತ್ರಾದಯೋ ಯೇ ಚ ।
ಸಿಧ್ಯನ್ತಿ ತೇ ಹಿ ಸರ್ವೇ ಯಸ್ಮೈ ವಾಣೀ ಪ್ರಸನ್ನಾ ಸಾ ॥ ೨೪೬॥
ಕಾ ಕ್ಷತಿರಮ್ಬ ಕಟಾಕ್ಷೇ ನ್ಯಸ್ತೇ ಸತಿ ಮಯಿ ವಿರಿಞ್ಚಿವರಪತ್ನಿ ।
ಗಙ್ಗಾಶುನಕನ್ಯಾಯಾನ್ಮಹತೀ ಮಮ ವೃದ್ಧಿರೀರಿತಾ ನಿಪುಣೈಃ ॥ ೨೪೭॥
ಅವಿರಲದಯಾರ್ದ್ರಲೋಚನಸೇವನಯಾ ಧೂತತಾಪಾ ಹಿ ।
ಪ್ರತಿಕಲ್ಪಂ ಸುರಸಂಘಾಸ್ತ್ವಾಮಭಜನ್ ನುತಿನತಿಪ್ರಮುಖೈಃ ॥ ೨೪೮॥
ದೀನಾನಾಂ ಚ ಕವೀನಾಂ ವಾಣಿ ತ್ವಂ ಕಾಮಧೇನುರಸಿ ಮಾತಃ ।
ಸಿದ್ಧಿಸ್ತೇಷಾಮತುಲಾ ಸುರಮಾನ್ಯಾ ತೇನ ಸಂಕಲಿತಾ ॥ ೨೪೯॥
ಸಕಲಜಗತಾಂ ಹಿ ಜನನೀಂ ವಾಣಿ ತ್ವಾಂ ಸಂತತಮುಪಾಸೇ ।
ಶ್ರುತಿಸುದತೀಭೂಷಾಮಣಿಮಖಿಲಾರ್ಥಪ್ರಾಪ್ತ್ಯೈ ಲೋಕೇ ॥ ೨೫೦॥
ಧಾತುಃ ಕುಟುಮ್ಬಿನೀ ತ್ವಂ ಸನ್ಮಙ್ಗಲದಾಯಿನೀ ಸ್ವಮಾಹಾತ್ಮ್ಯಾತ್ ।
ಶ್ವಶ್ರೂಶ್ವಶುರಮುಖಾದಿಪ್ರೀಣನಚತುರಾ ಚ ಭಾಸಿ ನಿಗಮಕಲಾ ॥ ೨೫೧॥
ಮುಖವಿಜಿತಚನ್ದ್ರಮಣ್ಡಲಮಿದಮಮ್ಭೋರುಹವಿಲೋಚನಂ ತೇಜಃ ।
ಧ್ಯಾನೇ ಜಪೇ ಚ ಸುದೃಶಾಂ ಚಕಾಸ್ತಿ ಹೃದಯೇ ಕವೀಶ್ವರಾಣಾಂ ಚ ॥ ೨೫೨॥
ಯಸ್ಮೈ ಪ್ರಸನ್ನವದನಾ ಸಾ ವಾಣೀ ಲೋಕಮಾತಾ ಹಿ ।
ತಸ್ಯ ಸಹಸಾ ಸಹಸ್ರಂ ಲಾಭಃ ಸ್ಯಾದ್ ಬಾನ್ಧವಾಃ ಸುಖಿನಃ ॥ ೨೫೩॥
ತಾಪಹರರಸವಿವರ್ಷಣಧೃತಕುತುಕಾ ಕಾಪಿ ನೀಲನಲಿನರುಚಿಃ ।
ಕಾದಮ್ಬಿನೀ ಪುರಸ್ತಾದಾಸ್ತಾಂ ನಃ ಸಂತತಂ ಜನನೀ ॥ ೨೫೪॥
ಪದ್ಮಾಕ್ಷನಾಭಿಪದ್ಮಜದಯಿತೇ ಲೋಕಾಮ್ಬ ಶಾರದೇತಿ ಸದಾ ।
ತವ ನಾಮಾನಿ ಜಪನ್ ಸನ್ ತ್ವದ್ದಾಸೋಽಹಂ ತು ಮುಕ್ತಯೇ ಸಿದ್ಧಃ ॥ ೨೫೫॥
ಅಮ್ಬಾಪ್ರಸಾದಭೂಮ್ನಾ ನರೋ ಹಿ ಭುಙ್ಕ್ತೇ ಸುಖಾನಿ ವಿವಿಧಾನಿ ।
ಸ್ಮರೇ ವಿಜಯಃ ಕವಿತಾಧನಲಕ್ಷ್ಮ್ಯಾದೇರ್ವಿಲಾಸಲೀಲಾದಿಃ ॥ ೨೫೬॥
ತೀರಂ ಸಂಸೃತಿಜಲಧೇಃ ಪೂರಂ ಕಮಲಜವಿಲೋಚನಪ್ರೀತೇಃ ।
ಸಾರಂ ನಿಗಮಾನ್ತಾನಾಂ ದೂರಂ ದುರ್ಜನತತೇರ್ಹಿ ತತ್ತೇಜಃ ॥ ೨೫೭॥
ಅಪಿ ದಾಸಕುಲೇ ಜಾತಃ ಕಟಾಕ್ಷಭೂಮ್ನಾ ವಿಧಾತೃಮುಖಪತ್ನ್ಯಾಃ ।
ಜ್ಞಾನೀ ಭವವಾರಾಶಿಂ ತರತಿ ಚ ರಾಜ್ಯಶ್ರಿಯಂ ಭುಙ್ಕ್ತೇ ॥ ೨೫೮॥
ಸತ್ಕೃತದೇಶಿಕಪಾದಾಮ್ಬುಜಯುಗಲೋಽಹಂ ನಮಾಮಿ ವಾಣಿ ತ್ವಾಮ್ ।
ತ್ವಂ ತು ಗುರುಮೂರ್ತಿರುಕ್ತಾ ಕಾಲೇ ಕಾಲೇ ಚ ಕಾಙ್ಕ್ಷಿತವಿಧಾತ್ರೀ ॥ ೨೫೯॥
ಜ್ಞಾನಾನನ್ದಮುಖಾದೀನಪವರ್ಗಂ ವಾ ದದಾಸಿ ಭಕ್ತೇಭ್ಯಃ ।
ಅತ ಏವಾನನ್ಯಗತಿಸ್ತ್ವಾಂ ವಿಧಿಪತ್ನೀಂ ಪ್ರಪದ್ಯೇಽಹಮ್ ॥ ೨೬೦॥
ತ್ವಯಿ ವಿನ್ಯಸ್ತಭರಾಣಾಂ ನ ಹಿ ಚಿನ್ತಾ ಜಾಯತೇ ನೃಣಾಂ ಕಾಪಿ ।
ಪರಮಾನನ್ದಾದಿಕಲಾಸ್ಫೂರ್ತಿರ್ದಿವಿಷದ್ಗಣೇನ ಸಂಮಾನ್ಯಾ ॥ ೨೬೧॥
ಸುಮಶರಸಾಮ್ರಾಜ್ಯಕಲಾಮಙ್ಗಲವಿಧಿರೇಖಿಕಾ ವಾಣೀ ।
ಧಾತುರಪಿ ಚಿತ್ತವೃತ್ತಿಸ್ಥೈರ್ಯಂ ತ್ವನ್ಯಾದೃಶಂ ಕುರುತೇ ॥ ೨೬೨॥
ಸಾ ಧೇನುಶ್ಚಿನ್ತಾಮಣಿರಪಿ ವೃಕ್ಷಃ ಸಂಪದಾಂ ಪ್ರದಾಯಿನ್ಯಃ ।
ಅಮ್ಬ ತ್ವಮೇವ ಕಾಲೇ ಭಸಿ ಜ್ಞಾನಪ್ರದಾ ವ್ಯಪೋಹ್ಯ ತಮಃ ॥ ೨೬೩॥
ಮನಸೋ ನೈರ್ಮಲ್ಯಪ್ರದಮಸ್ಯಾಃ ಸೇವೇ ಕಟಾಕ್ಷಮಹಮಾರಾತ್ ।
ಯಃ ಕುರುತೇ ಜನತಾಂ ತಾಂ ಹತಮಾಯಾಂ ಮಧುರಾಮಯೋಧ್ಯಾಂ ಚ ॥ ೨೬೪॥
ಶರದಿವ ಹಂಸಕುಲೇಡ್ಯಾ ಜ್ಯೋತ್ಸ್ನೇವ ಜನಾರ್ತಿಹಾರಿಣೀ ವಾಣ್ಯಾಃ ।
ಜಯತಿ ಹಿ ಕಟಾಕ್ಷರೇಖಾ ದೀಪಕಲೇವ ಪ್ರಕಾಮಹತತಿಮಿರಾ ॥ ೨೬೫॥
ಪಙ್ಕಜಭವವದನಮಣಿಂ ಪರವಿದ್ಯಾದೇವತಾಂ ವಾಣೀಮ್ ।
ನಿತ್ಯಂ ಯಜತಾಂ ಜಪತಾಂ ನ ಹಿ ತುಲ್ಯೋಽಸ್ಮಿನ್ ಕ್ಷಮಾತಲೇ ಕಶ್ಚಿತ್ ॥ ೨೬೬॥
ವಾಣೀ ನಿಜವಾಣೀಭೀ ರಚಯತಿ ನುತಿಮಾತ್ತವೀಣಯಾ ಕಾಲೇ ।
ಧಾತುಃ ಪ್ರಸಾದಹೇತೋಃ ಪತಿವ್ರತಾಲಕ್ಷಣೈರನ್ಯೈಃ ॥ ೨೬೭॥
ಆನನ್ದಯತಿ ವಿಲಸೈರಮ್ಬಾ ಪದ್ಮಾಸನಂ ನಿಜಂ ದೇವಮ್ ।
ತೇನೈವ ತುಷ್ಟಹೃದಯಃ ಶುಭಾಕ್ಷರಾಣ್ಯಾದರಾಲ್ಲಿಖತಿ ಮೌಲೌ ॥ ೨೬೮॥
ಮಮ ಮಾನಸದುರ್ಮದಗಜಮಪಾರತಾಪಾಟವೀಷು ಧಾವನ್ತಮ್ ।
ವಿರಚಯ್ಯ ಮುದಿತಚಿತ್ತಂ ಕುರು ವಾಣಿ ತ್ವತ್ಪದಾಬ್ಜಕೃತಹಸ್ತಮ್ ॥ ೨೬೯॥
ಕಮಲಾಸನಧೈರ್ಯಮಹೀಧರಕುಲಿಶಸ್ತೇ ಕಟಾಕ್ಷ ಏವಾಯಮ್ ।
ಕವಿಕುಲಮಯೂರಕಾದಮ್ಬಿನೀವಿಲಾಸೋ ಮುದೇಽಸ್ತು ಸತತಂ ನಃ ॥ ೨೭೦॥
ಗುರುವರದನಾಮ್ಭೋಜೇ ನೃತ್ಯನ್ತೀ ಶಾರದಾ ದೇವೀ ।
ಮಧುರತರಶ್ಲೋಕನಿಭಾ ಮಣಿನೂಪುರನಿನದಸಂತತಿರ್ಭ್ತಿ ॥ ೨೭೧॥
ಕೋ ವಾ ನ ಶ್ರಯತಿ ಬುಧಃ ಶ್ರೇಯೋಽರ್ಥೀ ತಾಮಿಮಾಂ ವಾಣೀಮ್ ।
ಯಾಂ ಪಙ್ಕಜಾಕ್ಷನಾಭಿಜಸಧರ್ಮಿಣೀಮರ್ಚಯನ್ತಿ ಸುರನಾಥಾಃ ॥ ೨೭೨॥
ಮುಷಿತಪಯೋಜಮೃದಿಮ್ನಾ ಚರಣತಲೇನಾತ್ರ ಮಾನಸೇ ವಾಣೀ ।
ಪರಿಹರತು ಪಾಪರಾಶಿಂ ಸುರೌಘಸಂಮಾನಿತೇನ ಕಾಲೇ ಮೇ ॥ ೨೭೩॥
ಯಾಥಾರ್ಥ್ಯಜ್ಞಾನಕಲಾಪ್ರಾಪ್ತ್ಯೈ ತ್ವಾಂ ಶಾರದಾಂ ವನ್ದೇ ।
ಸೇವಾಫಲಂ ಪ್ರಯಚ್ಛ ಪ್ರಸೀದ ಪರಮೇಶಿ ವಲ್ಲಭೇ ಧಾತುಃ ॥ ೨೭೪॥
ನಿಗಮಾನ್ತಸಾರಮರ್ಥಂ ಬೋಧಯಸಿ ತ್ವಂ ಗುರೂನ್ ಪ್ರಕಲ್ಪ್ಯ ಭುವಿ ।
ಸೈಷಾ ಮೇ ಜ್ಞಾನಘನಾ ವಾಣೀ ನಿತ್ಯಂ ಪ್ರಸನ್ನಾಸಿ ॥ ೨೭೫॥
ಮನ್ದಾರಕುಸುಮಮದಹರಮನ್ದಸ್ಮಿತಮಧುರವದನಪಙ್ಕರುಹಾ ।
ಹೃದ್ಯತಮನಿತ್ಯಯೌವನಮಣ್ಡಿತಗಾತ್ರೀ ವಿರಾಜತೇ ವಾಣೀ ॥ ೨೭೬॥
ಸೌಭಾಗ್ಯಸೂಚಕಾಭೀ ರೇಖಾಭಿರ್ಭೂಷಿತಂ ಸೌರೈರ್ವನ್ದ್ಯಮ್ ।
ಅಮ್ಬಾಚರಣಪಯೋಜಂ ವತಂಸಯನ್ ಪ್ರಾಪ್ತಸಂಮೋದಃ ॥ ೨೭೭॥
ದ್ವಿಜಗಣಪೂಜ್ಯಂ ನಿತ್ಯಂ ನಿರಸ್ತಜಾಡ್ಯಂ ತ್ವದೀಯಪಾದಯುಗಮ್ ।
ಕ್ಷಣಮಪಿ ವಾ ಸಾಂನಿಧ್ಯಂ ಭಜತು ಮದೀಯೇ ಹೃದಿ ಸ್ವೈರಮ್ ॥ ೨೭೮॥
ನತದೇವರಾಜಮಕುಟೀಮಣಿಘೃಣಿಪರಿಚುಮ್ಬಿತಾಙ್ಘ್ರಿಕಮಲಾ ನಃ ।
ಕಮಲಾಸನಸ್ಯ ದಯಿತಾ ತನ್ಯಾದನ್ಯಾದೃಶೀ ಶ್ರಿಯಂ ಭಜತಾಮ್ ॥ ೨೭೯॥
ವಾಣೀ ಶ್ರಿತಕಾದಮ್ಬಾ ದಮ್ಭಾದಿರಿಪೂನ್ ನಿರಸ್ಯ ನಃ ಕಾಲೇ ।
ಕ್ಷೇಮಮವನ್ಯಾಂ ತನ್ಯಾತ್ ಪದೇ ಪರೇ ದೇವಸಂಘಪರಿಸೇವ್ಯೇ ॥ ೨೮೦॥
ಪಙ್ಕಜಭವಸಾಮ್ರಾಜ್ಯಸ್ಥಿರಲಕ್ಷ್ಮೀಶ್ಚಪಾಣ್ಡರತನುಶ್ರೀಃ ।
ನತಮಾನವಸುಕೃತಕಲಾಪರಿಪಾಟೀ ಭಾತಿ ಸಕಲಗುಣಪೇಟೀ ॥ ೨೮೧॥
ಮುಖವಿಜಿತಚನ್ದ್ರಬಿಮ್ಬಾ ಸಾಮ್ಬಾ ಕಾದಮ್ಬಸೇವ್ಯಪದಕಮಲಾ ।
ಕಮಲಾಸನಗೃಹಲಕ್ಷ್ಮೀರ್ಲಕ್ಷ್ಮೀಂ ಪುಷ್ಣಾತು ಶಾರದಾ ದೇವೀ ॥ ೨೮೨॥
ಮುರಮಥನಸ್ಯೇವ ರಮಾ ಶಂಭೋರಿವ ಸಕಲಭೂಧರೇನ್ದ್ರಸುತಾ ।
ವಾಣಿ ವಿಧಾತುಃ ಸದನೇಽನುರೂಪದಾಮ್ಪತ್ಯಸಂಪದಾ ಭಾಸಿ ॥ ೨೮೩॥
ವಾಣಿ ತವ ದೇಹಕಾನ್ತ್ಯಾ ಕಟಾಕ್ಷಲಹರೀ ತು ಸಂಯುತಾ ಕಾಲೇ ।
ಧತ್ತೇ ಕಾಮಪಿ ಶೋಭಾಂ ಸುರಸ್ರವನ್ತ್ಯೇವ ಸಂಗತಾ ಯಮುನಾ ॥ ೨೮೪॥
ಮಧುರಾಸೇಚನದೃಷ್ಟ್ಯಾ ಮಾಂ ಪಾಯಾದಾಪದೋ ಮುಹುರ್ವಾಣೀ ।
ಆಶ್ರಿತತಾಪವಿಭೇತ್ರೀತ್ಯೇವಂ ಯಾಮಾಮನನ್ತಿ ಸೂರಿವರಾಃ ॥ ೨೮೫॥
ಅಜ್ಞಾತಕೋಪಪೂರಾ ಯಸ್ಯಾ ದೃಷ್ಟಿಃ ಕೃತಾದರಾ ಭಜತಾಮ್ ।
ಸೈಷಾ ವಿಹಸಿತಪೌರಂದರಲಕ್ಷ್ಮೀಂ ಸಂಪದಂ ದದ್ಯಾತ್ ॥ ೨೮೬॥
ಬಾಲಕುರಙ್ಗವಿಲೋಚನಮೀಷತ್ಸ್ಮಿತಮಧುರಮಾನನಂ ವಾಣ್ಯಾಃ ।
ಮಣಿಮಯತಾಟಙ್ಕಮಣೀವಿಲಾಸಿ ಭೂಯಾನ್ಮುದೇಽಸ್ಮಾಕಮ್ ॥ ೨೮೭॥
ಮುನಿಜನಮಾನಸಹಂಸೀಂ ಶ್ರುತಿತತಿಪಞ್ಜರಶುಕೀಂ ಮಹಾದೇವೀಮ್ ।
ನೌಮಿ ಸ್ನುಷಾಂ ರಮಾಯಾಃ ಮಾಹೇಶ್ವರಮಹಿತಸತ್ಪದಪ್ರಾಪ್ತ್ಯೈ ॥ ೨೮೮॥
ಧಾತುಃ ಸೌಧಾಙ್ಗಣಕೃತಚಙ್ಕ್ರಮಣಾಂ ಶಾರದಾಂ ನೌಮಿ ।
ಮತ್ತಮತಙ್ಗಜಗಮನಾಂ ಪರಿಪನ್ಥಿಜಯಾಯ ಸುಕೃತಿಸಂದೃಶ್ಯಾಮ್ ॥ ೨೮೯॥
ವಾಗೀಶಮುಖಾ ದೇವಾ ಯಸ್ಯಾಃ ಪ್ರಸದನಬಲದ್ಧಿ ವಿಜಯನ್ತೇ ।
ಪರಿಪಾಲಿತಭಕ್ತಗಣಾ ಯದ್ಧ್ಯಾನೋಲ್ಲಸದಪಾರಪುಲಕಾನ್ತಾಃ ॥ ೨೯೦॥
ನೈಸರ್ಗಿಕವಾಕ್ಷ್ರೇಣೀಕೇಲಿವನಮಮಲಭೂಷಣಂ ಧಾತುಃ ।
ವದನಾನಾಮಿಯಮಮ್ಬಾ ಜಯತು ಚಿರಂ ಕಾಮವರ್ಷಿಣೀ ಭಜತಾಮ್ ॥ ೨೯೧॥
ಕಲಯಾಮಿ ಹೃದಯಮೇತತ್ ಪಾದಾಬ್ಜೇ ಶಾರದಾದೇವ್ಯಾಃ ।
ಪ್ರಾಪ್ತಾರಿಷಟ್ಕವಿಜಯಂ ತತ್ತ್ವಧನಂ ಕಲಿತಶಾರದಾಧ್ಯಾನಮ್ ॥ ೨೯೨॥
ಪಾದಾರವಿನ್ದನಮನಪ್ರಭಾವಪರಿಕಲಿತದೇವಸಾರೂಪ್ಯಾಃ ।
ಪರಮಾನನ್ದನಿಮಗ್ನಾಃ ಸುಧಿಯೋ ಭಾನ್ತಿ ಕ್ಷಮಾವಲಯೇ ॥ ೨೯೩॥
ಲಲಿತವಿಧಾತೃರೂಪಂ ಪಾಲಿತಲೋಕತ್ರಯಂ ಚ ತತ್ ತೇಜಃ ।
ಸಕಲಾಗಮಶಿಖರಕಲಾಪರತತ್ತ್ವಂ ಶಾರದಾರೂಪಮ್ ॥ ೨೯೪॥
ಧ್ಯಾನೈರ್ಯೋಗೈಶ್ಚ ಜಪೈರ್ಯತ್ ಸೇವ್ಯಂ ಪರಮಮಾದಿಷ್ಟಮ್ ।
ತನ್ನಶ್ಚಕಾಸ್ತು ಹೃದಯೇ ವಿಶ್ವಜನೀನಂ ಹಿ ಭಕ್ತಾನಾಮ್ ॥ ೨೯೫॥
ಭಾಗೀರಥೀವ ವಾಣೀ ತವ ನುತಿರೂಪಾ ವಿರಾಜತೇ ಪರಮಾ ।
ಇಹ ಮಾತರ್ಯದ್ಭಜನಂ ಸರ್ವೇಷಾಂ ಸರ್ವಸಂಪದಾಂ ಹೇತುಃ ॥ ೨೯೬॥
ಸಂತತಮಧುರಾಲಾಪೈರ್ಲಾಲಿತವಿಧಿವೈಭವೈರಮೇಯಕಲೈಃ ।
ಶ್ರೇಯಃಪ್ರದಾನದೀಕ್ಷಿತಕಟಾಕ್ಷಪಾತೈರ್ಮಹಾತತ್ತ್ವೈಃ ॥ ೨೯೭॥
ಖೇಲಲ್ಲೋಲಮ್ಬಕಚೈಃ ಕುಚಭರನಮ್ರೈಃ ಪುರಂಧ್ರಿಗುಣಪೂರ್ಣೈಃ ।
ಆಶ್ರಿತಸಂವಿತ್ಪೀಠೈರಮರೇಶವಧೂಕರಾದೃತಚ್ಛತ್ರೈಃ ॥ ೨೯೮॥
ವೀಣಾಪುಸ್ತಕಹಸ್ತೈರ್ವಿಧಿಭಾಗ್ಯೈರಸ್ತು ಮಮ ತು ಸಾರೂಪ್ಯಮ್ ।
ಸಂವಿದ್ಧನೈಶ್ಚ ವಾಣೀರೂಪೈರೇತೈರ್ದಯಾಸಾರೈಃ ॥ ೨೯೯॥
ಮಾತಃ ಕಥಂ ನು ವರ್ಣ್ಯಸ್ತವ ಮಹಿಮಾ ವಾಣಿ ನಿಗಮಚಯವೇದ್ಯಃ ।
ಇತಿ ನಿಶ್ಚಿತ್ಯ ಪದಾಬ್ಜಂ ತವ ವನ್ದೇ ಮೋಕ್ಷಕಾಮೋಽಹಮ್ ॥ ೩೦೦॥
ತ್ವಾಮಮ್ಬ ಬಾಲಿಶೋಽಹಂ ತ್ವಚಮತ್ಕಾರೈರ್ಗಿರಾಂ ಗುಮ್ಭೈಃ ।
ಅಯಥಾಯಥಕ್ರಮಂ ಹಿ ಸ್ತುವನ್ನಪಿ ಪ್ರಾಪ್ತಜನ್ಮಸಾಫಲ್ಯಃ ॥ ೩೦೧॥
ಇತಿ ಶ್ರೀಶಾರದಾತ್ರಿಶತೀ ಸಮಾಪ್ತಾ
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ತ್oday
http://sanskritdocuments.org
ಗಙ್ಗಾಧರಮಖಿವಿರಚಿತಾ ।
ಪರಮಾಭರಣಂ ಧಾತುರ್ವದನಾಮ್ಭೋಜಸ್ಯ ಶಾರದಾ ದೇವೀ ।
ಯಾ ರಾಜತಿ ಜನನೀ ಸಾ ಲಸತು ಸದಾ ಸುಪ್ರಸನ್ನಾ ನಃ ॥ ೧॥
ಸಾ ಶಾರದಾ ಪ್ರಸನ್ನಾ ರಾಜತಿ ಮಮ ಮಾನಸೇ ನಿತ್ಯಮ್ ।
ಯಾ ಶಾರದಾಬ್ಜವದನಾ ಜನನೀ ಕೀರ್ತ್ಯಾ ಹಿ ಸರ್ವಲೋಕಾನಾಮ್ ॥ ೨॥
ಸಂಪದ್ ದಿವ್ಯಾ ಧಾತುಃ ಖ್ಯಾತಾ ಸಾ ಶಾರದಾ ದೇವೀ ।
ಯದ್ಭಜನಂ ದೇವಾನಾಮಪಿ ತತ್ತ್ವಜ್ಞಾನದಂ ವಿದುರ್ವಿಬುಧಾಃ ॥ ೩॥
ಸರಸಕವಿತಾವಿಭೂತ್ಯೈ ಯತ್ಪದಮಾರಾಧ್ಯತೇ ವಿಶೇಷಜ್ಞೈಃ ।
ಸಾ ಶಾರದಾ ಶ್ರಿಯೈ ನಃ ಕಾಲೇ ಸರ್ವಪ್ರಸನ್ನಾತ್ಮಾ ॥ ೪॥
ನೀಲಾರವಿನ್ದಲೋಚನಯುಗಲಾ ಸಾ ಶಾರದಾ ದೇವೀ ।
ಕರಕಮಲಕಲಿತವೀಣಾ ಸದಾ ಪ್ರಸನ್ನಾ ಶ್ರಿಯೈಃ ವಃ ಸ್ಯಾತ್ ॥೫॥
ಕಲಯೇ ತಾಮಹಮನಿಶಂ ಫುಲ್ಲಾಬ್ಜವಿಲೋಚನಾಂ ವಾಣೀಮ್ ।
ಯಾ ಸೃಷ್ಟ್ಯಾದೌ ಸಾಹ್ಯಂ ಕಲಯತಿ ಧಾತುರ್ಜಗನ್ಮಾತಾ ॥ ೬॥
ಯಸ್ಯಾ ಲೀಲಾಲೋಲಃ ಪದ್ಮಾಸನಗೋಽಪಿ ವೇದಪಾಠರತಃ ।
ತಾಮಹಮತುಲಾನನ್ದಪ್ರಾಪ್ತ್ಯೈ ಕಲಯೇ ಮನಃಪದ್ಮೇ ॥ ೭॥
ಬ್ರಹ್ಮಾಣಂ ತಾಂ ವಾಣೀಮೇಕಾಸನಭಾಸುರಾಂ ಶ್ರಿಯಃ ಪ್ರಾಪ್ತ್ಯೈ ।
ಆರಾದ್ವಿಲೋಕ್ಯ ಮಾನಸಮಾನನ್ದರಸಂ ಪರಂ ಭಜತೇ ॥ ೮॥
ಮುಕ್ತಾಮಯೇ ವಿಮಾನೇ ಪದ್ಮಾಸನಯನ್ತ್ರಿಕಾಮಧ್ಯೇ ।
ದೃಶ್ಯಾಂ ವಾಣೀಂ ದೇವೀಂ ಸೇವೇ ಸಂತತಸುಖಪ್ರಾಪ್ತ್ಯೈ ॥ ೯॥
ಭಾಗ್ಯಾನ್ಮಮ ಚ ಕವೀನಾಂ ಸಾ ದೇವೀ ದೃಶ್ಯತಾಮೇತಿ ।
ವೀಣಾಪುಸ್ತಕಹಸ್ತಾ ಯಾ ಕಮಲಾಸನಪುರನ್ಧ್ರೀ ಹಿ ॥ ೧೦॥
ಮಾಮಕಮಾನಸಕೀರಂ ಬಧ್ನೀಯಾಶ್ಚರಣಪಞ್ಜರೇ ಮಾತಃ ।
ತೇನ ಮಮ ಜನ್ಮಲಾಭಃ ಸ್ತೋತ್ರಂ ಚ ತವ ಪ್ರಕಾಮಕಲಿತಾರ್ಥಮ್ ॥ ೧೧॥
ಸಂವಿತ್ಪ್ರರೋಹಕಲಿಕಾಪ್ರಾಪ್ತ್ಯೈ ತಾಂ ನೌಮಿ ಶಾರದಾಂ ದೇವೀಮ್ ।
ಯಾ ಕಿಲ ಕವೀಶ್ಚರಾಣಾಮಧಿನೇತ್ರೀ ಕಾವ್ಯಕಲನಾದೌ ॥ ೧೨॥
ಭಕ್ತಾನಾಂ ಜಿಹ್ವಾಗ್ರಂ ಸಿಂಹಾಸನಮಾದರಾದ್ ವಾಣೀ ।
ಕಲಯನ್ತಿ ನೃತ್ಯತಿ ಕಿಲ ತತಸ್ತು ತನ್ನೂಪುರನಿನಾದಃ ॥ ೧೩॥
ಮಞ್ಜುಲಫಣಿತಿಝರೀತಿ ಪ್ರಗೀಯತೇ ದಿಕ್ತಟೇ ರಸಿಕೈಃ ।
ಪ್ರಾತಃಫುಲ್ಲಪಯೋರುಹಮರನ್ದರಸಕೇಲಿಧೂರ್ವಹಾ ಕಾಲೇ ॥ ೧೪॥
ದುರ್ವಾರಗರ್ವದುರ್ಮತಿದುರರ್ಥನಿರಸನಕಲಾನಿಪುಣಾಃ ।
ಮಾತಸ್ತವ ಪಾದಯೋರುಹಸೇವಾಧನ್ಯತಾಂ ಪ್ರಾಪ್ತಾಃ ॥ ೧೫॥
ನೀಚಾ ಮಮ ತು ಮನೀಷಾ ತಥಾಪಿ ತವ ನುತಿಕಲಾಪ್ರವೃತ್ತೋಽಸ್ಮಿ ।
ಅಮ್ಬ ತವ ತತ್ರ ಹೇತುಃ ಕೃಪಾಂ ಪರಂ ಬುದ್ಧಿದಾ ಜಯತಿ ॥ ೧೬॥
ವಿಧಿದಯಿತೇ ತವ ಮಾತಃ ಸ್ತುತೌ ನ ಶಕ್ತಾ ಅಪಿ ತ್ರಿದಶಾಃ ।
ಕ್ಷನ್ತವ್ಯಮತ್ರ ದಯಯಾ ಮಮ ಚಾಪಲ್ಯಂ ತವ ಸ್ತೋತ್ರೇ ॥ ೧೭॥
ಶುಕವಾಣೀಮಿವ ಮಾತರ್ನಿರರ್ಥಕಾಂ ಮದ್ವಚೋಭಙ್ಗೀಮ್ ।
ಸದಸಿ ಶೃಣೋಷಿ ದಯಯಾ ತತ್ ತವ ಚೋತ್ತಮಪದವ್ಯಕ್ತ್ಯೈ ॥ ೧೮॥
ಪರದೇವತೇ ಪ್ರಸೀದ ಪ್ರಾಣೇಶ್ವರಿ ಧಾತುರಮ್ಬ ಮಮ ವಾಣೀಮ್ ।
ಕೃಪಯಾ ತವ ನುತಿಯೋಗ್ಯಾಂ ತ್ವನ್ನೂಪುರನಿನದರಮ್ಯರಸಗುಮ್ಫಾಮ್ ॥ ೧೯॥
ಸರ್ವಜ್ಞತ್ವಂ ಸಂಪದಮಥವಾನ್ಯಾಂ ಪ್ರಾಪ್ತುಮತ್ರ ತವ ಮಾತಃ ।
ತವ ಚರಣಕಮಲಮೇತಚ್ಛರಣಂ ನಾನ್ಯಾ ಗತಿರ್ದೃಷ್ಟಾ ॥ ೨೦॥
ಮನ್ದಧಿಯಾ ಸ್ವಲ್ಪಾಪಿ ಸ್ತುತಿರಮ್ಬ ನಿರರ್ಥಕಾಪಿ ರಸಹೀನಾ ।
ಕಲಿತಾ ಚೇತ್ ತವ ಕೃಪಯಾ ತದೇವ ಸದಸೀಡಿತಂ ಭಾತಿ ॥ ೨೧॥
ಕುಣ್ಠೀಕರೋತು ವಿಪದಂ ಚಾಜ್ಞಾನಂ ದುರ್ಗತಿಂ ವಾಣಿ ।
ತವ ಚರಣಕಮಲಸೇವಾದರೋ ಜನಾನಾಂ ಕಲೌ ಕಾಲೇ ॥ ೨೨॥
ವೀರಶ್ರೀರ್ವಿದ್ವಚ್ಛ್ರೀರ್ಜಯಶ್ರಿಯೋ ವಾಮರೈರ್ಮಾನ್ಯೇ ।
ತವ ಪಾದಾಮ್ಬುಜಸೇವಾದರೇಣ ಸಿಧ್ಯನ್ತಿ ನಾನ್ಯಥಾ ಲೋಕೇ ॥ ೨೩॥
ಕರುಣಾರಸವರ್ಷಿಣಿ ತೇ ಚರಣಸರೋಜದ್ವಯಂ ನಿಧೇಹಿ ಮಮ ।
ಮಸ್ತಕತಲೇ ವಿದಾರಿತಜರಾದಿಕಂ ಸಪದಿ ಜನ್ಮ ಸಾರ್ಥಂ ಮೇ ॥ ೨೪॥
ಶ್ರದ್ಧಾಂ ಮೇಧಾಂ ಸಂಪದಮನ್ಯಾಮಮರೇನ್ದ್ರಮಾನನೀಯಾಂ ಹಿ ।
ದಯಯಾ ವಿಧೇಹಿ ಕಾಲೇ ಭಕ್ತಾನಾಂ ನಸ್ತ್ವದೇಕಶರಣಾನಾಮ್ ॥ ೨೫॥
ಪ್ರೇಯಸಿ ಧಾತುರ್ಜಗತಾಂ ಪರಮೇಶ್ವರಿ ವಾಣಿ ಮಾತರಮ್ಬ ನನು ।
ತವ ನಾಮಾನಿ ಫಣನ್ತಸ್ತ್ರಿದಶೈಃ ಸಹ ಯಾನ್ತಿ ಯಾನೇನ ॥ ೨೬॥
ತವ ನಾಮ ಯಸ್ಯ ಜಿಹ್ವಾಙ್ಗಣೇ ವಿಶುದ್ಧಂ ಕ್ಷಣಂ ಸ್ಫುರತಿ ।
ಸ ಹಿ ವನ್ದ್ಯಸ್ತ್ರಿದಶೈರಪಿ ವಿಗಲಿತಪಾಪಃ ಪರೇ ಲೋಕೇ ॥ ೨೭॥
ನತನಾಕೀಶ್ವರವನಿತಾಮೌಲಿಸ್ರಗ್ಗಲಿತಮಕರನ್ದೈಃ ।
ಸ್ನಿಗ್ಧಪದಾಮ್ಬುಜಯುಗಲಾ ವಾಣೀ ದೇವೀ ಶ್ರಿಯೋ ಹಿ ಲಸತಿ ಪರಾ ॥ ೨೮॥
ವಿದುಷಾಮಪಿ ತುಷ್ಟಿಕರಂ ನವನವರಸಗುಮ್ಫನಂ ಕವಿತ್ವಂ ತು ।
ಯತ್ಕರುಣಾವೀಕ್ಷಣತೋ ಸಿಧ್ಯತಿ ತಾಂ ಶಾರದಾಂ ವನ್ದೇ ॥ ೨೯॥
ಅಮ್ಬ ಪ್ರಸೀದ ಪರಮಂ ಮಾಯಾಮೇತಾಂ ನಿರಸ್ಯ ನತಿಭಾಜಃ ।
ಮಮ ಸಂವಿಧೇಹಿ ಮಧುರಾಂ ವಾಚಂ ತವ ನುತಿಕಲಾರ್ಹಾಂ ಚ ॥ ೩೦॥
ವಾಣೀ ಮಾತಾ ಜಗತಾಂ ವಾಣೀಪುಸ್ತಕಕರಾಮ್ಭೋಜಾ ।
ಹಂಸಾಶ್ರಿತಾ ಹಿ ನಮತಾಂ ಶ್ರೇಯಃಸಿಧ್ಯೈ ಪ್ರಸನ್ನಾ ನಃ ॥ ೩೧॥
ಶ್ಲಾಘ್ಯಾ ಸಂಪತ್ಕಾಲೇ ವೈದುಷ್ಯಂ ವಾ ಯದೀಯವೀಕ್ಷಣತಃ ।
ಸಿಧ್ಯನ್ತ್ಯಪಿ ದೇವಾನಾಂ ತಾಂ ವನ್ದೇ ಶಾರದಾಂ ದೇವೀಮ್ ॥ ೩೨॥
ವಿದ್ಯಾದಾನಕರೀಯಂ ಕಮಲಾಸನಪುಣ್ಯಪರಿಪಾಕಃ ।
ಮಮ ಮನಸಿ ಸಂನಿಧತ್ತಾಂ ದಿವ್ಯಜ್ಞಾನಾದಿಸಿಧ್ಯೈ ಹಿ ॥ ೩೩॥
ದಿವ್ಯಜ್ಞಾನಂ ದಯಯಾ ವಿಧೇಹಿ ಮಾತರ್ಮಹಾಸಾರಮ್ ।
ತೇನೈವ ತೇ ತು ಕೀರ್ತಿರ್ದಾನಫಲಂ ನಶ್ಚ ಜನ್ಮಸಾಫಲ್ಯಮ್ ॥ ೩೪॥
ದ್ವಾದಶಬೀಜಾಕ್ಷರಗಾಂ ಮನ್ತ್ರೋದ್ಧಾರಕ್ರಿಯಾಶಕ್ತಿಮ್ ।
ವಾಣೀಂ ವಿಧೇಸ್ತು ಪತ್ನೀಂ ಮಧ್ಯೇ ಪಶ್ಯಾಮಿ ಬಿಮ್ಬಮಧ್ಯಸ್ಥಾಮ್ ॥ ೩೫॥
ರವಿಕೋಟಿತೇಜಸಂ ತಾಂ ಸರಸ್ವತೀಂ ತ್ರ್ಯಕ್ಷರಕ್ರಿಯಾಶಕ್ತಿಮ್ ।
ಅಣಿಮಾದಿದಾಂ ಪ್ರಸನ್ನಾಮಮ್ಬಾಂ ಪಶ್ಯಾಮಿ ಪದ್ಮಮಧ್ಯಗತಾಮ್ ॥ ೩೬॥
ಜಗದೀಶ್ವರಿ ಭಾರತಿ ಮೇ ಪ್ರಸೀದ ವಾಣಿ ಪ್ರಪನ್ನಾಯ ।
ಅಹಮಪಿ ಕುತುಕಾತ್ ತವ ನುತಿಕಲನೇಽಶಕ್ತಶ್ಚ ಮನ್ದಧಿಷಣಶ್ಚ ॥ ೩೭॥
ಮುನಿಜನಮಾನಸಪೇಟೀರತ್ನಂ ಧಾತುರ್ಗೃಹೇ ರತ್ನಮ್ ।
ವಾಣೀತಿ ದಿವ್ಯರತ್ನಂ ಜಯತಿ ಸದಾ ಕಾಮಧುಕ್ ಕಾಲೇ ॥ ೩೮॥
ಅಜ್ಞಾನವ್ಯಾಧಿಹರಂ ತದೌಷಧಂ ಶಾರದಾರೂಪಮ್ ।
ಯಃ ಪಶ್ಯತಿ ಸ ಹಿ ಲೋಕೇ ಪರಾತ್ಮನೇ ರೋಚತೇ ಕಾಲೇ ॥ ೩೯॥
ಕಮಲಾಸನನಯನಫಲಂ ಸೃಷ್ಟ್ಯಾದಿಕಲಾಸಮಾಸಕ್ತಮ್ ।
ವಾಣೀರೂಪಂ ತೇಜಃ ಸ್ಫುರತಿ ಜಗಚ್ಛ್ರೇಯಸೇ ನಿತ್ಯಮ್ ॥ ೪೦॥
ಹಂಸಗತಿಂ ತಾಮಮ್ಬಾಮಮ್ಭೋರುಹಲೋಚನಾಂ ವನ್ದೇ ।
ತಿಲಕಯತಿ ಯಾ ಗುರೂಣಾಂ ಜಿಹ್ವಾಸಿಂಹಾಸನಂ ವಾಣೀ ॥ ೪೧॥
ವಾಣಿ ತರಙ್ಗಯ ಲೋಚನವೀಕ್ಷಣಶೈಲೀಂ ಕ್ಷಣಂ ಮಯಿ ಭೋಃ ।
ಮಮ ಜನ್ಮ ಲಬ್ಧವಿಭವಂ ತೇನ ಭವೇನ್ನೈವ ತೇ ಹಾನಿಃ ॥ ೪೨॥
ಪದ್ಮಾಸನೇನ ಸಾಕಂ ಕಾಲೇ ವಾಣೀ ಸಮಾಸನಾ ಜಯತಿ ।
ಕುಚಕಲಶನಮಿತದೇಹಾ ಕುರ್ವನ್ತೀ ಭದ್ರಸಂತತಿಂ ನಮತಾಮ್ ॥ ೪೩॥
ವ್ಯಾತನ್ವಾನಾ ವಾಣೀ ಕವೀಶ್ವರಾಣಾಂ ಮನೋಜ್ಞವಚನಝರೀಮ್ ।
ಜಯತಿ ವಿಧಿಸುಕೃತಸಂತತಿಪರಿಣಮಿತಮಾಲಾ ಬುಧೈರ್ವನ್ದ್ಯಾ ॥ ೪೪॥
ಕಮಲಸುಷಮಾಙ್ಗಯಷ್ಟಿಃ ಸಾ ದೇವೀ ಜಯತಿ ಪದ್ಮಮಧ್ಯತಲೇ ।
ಶತಬೀಜಾಕ್ಷರಲಸಿತಂ ದಿಕ್ಪತಿಕೃತರಕ್ಷಕಂ ಚ ಮೇರುಮುಖಮ್ ॥ ೪೫॥
ವಾಣೀಯನ್ತ್ರಂ ವಿಬುಧೈರ್ಮಾನ್ಯಂ ಯೋಗಾಸನಾಬ್ಧೀನ್ದುಮ್ ।
ಹ್ರೀಮಕ್ಷರಮುಖಮಾದ್ಯಂ ಪ್ರಾಕ್ತಟಕಲಿತಂ ಚ ಪದ್ಮಮಧ್ಯತಲೇ ॥ ೪೬॥
ತನ್ಮೇರುಚಕ್ರರೂಪಂ ಸಮಾಧಿದೃಶ್ಯಂ ಚ ಲೋಕವೇದ್ಯಂ ಚ ।
ಸೈಷಾಶ್ರಿತ್ಯ ತದೇತದ್ ರಾಜತಿ ರಾಜೀವಲೋಚನಾ ವಾಣೀ ॥ ೪೭॥
ಹಂಸಾಶ್ರಿತಗತಿವಿಭವಾ ಮನ್ದಸ್ಮೇರಾ ತಮೋನಿಹನ್ತ್ರೀ ಚ ।
ಮಧುರತರವಾಙ್ನಿಗುಮ್ಫಾ ವೀಣಾಪುಸ್ತಕಕರಾಮ್ಭೋಜಾ ॥ ೪೮॥
ವೀಣಾವಾದನರಸಿಕಾ ನಮತಾಮಿಷ್ಟಾರ್ಥದಾಯಿನೀ ವಾಣೀ ।
ಧಾತುರ್ನಯನಮಹೋತ್ಸವಕಲಿಕಾ ಕುರ್ಯಾಚ್ಛುಭಂ ಜಗತಾಮ್ ॥ ೪೯॥
ತಾಪಿಞ್ಛರಮ್ಯದೇಹಶ್ರೀರೇಷಾ ಕವಿಸಮಾಜನುತಾ ।
ಅಷ್ಟೈಶ್ವರ್ಯಾದಿಕಲಾದಾನೇ ದತ್ತೇಕ್ಷಣಾ ಜಯತಿ ॥ ೫೦॥
ಸೃಷ್ಟ್ಯಾದೌ ವಿಧಿಲಿಖಿತಂ ವಾಣೀ ಸೈಷಾ ಹಿ ಚಾನ್ಯಥಾಕರ್ತುಮ್ ।
ನಾಕೌಕಸಾಮಪೀಹ ಪ್ರಭವತಿ ಕಲಿತಪ್ರಣಾಮಾನಾಮ್ ॥ ೫೧॥
ಯಃ ಪಶ್ಯತಿ ತಾಮೇತಾಂ ವಾಣೀಂ ಪುರುಷೋ ಹಿ ಧನ್ಯತಾಮೇತಿ ।
ಯಂ ಪಶ್ಯತಿ ಸೈಷಾಯಂ ನಿತರಾಂ ಧನ್ಯೋ ನೃಪೇಡಿತಃ ಕಾಲೇ ॥ ೫೨॥
ಕಬಲಿತತಮಃಸಮೂಹಾ ವಾಣೀ ಸೈಷಾ ಹಿ ವಿಜಯತೇ ಜಗತಿ ।
ಅಪುನರ್ಭವಸುಖದಾತ್ರೀ ವಿರಿಞ್ಚಿಮುಖಲಾಲಿತಾ ಕಾಲೇ ॥ ೫೩॥
ಕಮಲಾಸನಮುಖಕಮಲಸ್ಥಿರಾಸನಾಂ ಶಾರದಾಂ ವನ್ದೇ ।
ಯನ್ನಾಮೋಚ್ಚರಣಕಲಾವಿಭವಾತ್ ಸರ್ವಜ್ಞತಾ ನಿಯತಮ್ ॥ ೫೪॥
ಭವಪರಮೌಷಧಮೇತದ್ವಾಣೀರೂಪಂ ಸದಾರಾಧ್ಯಮ್ ।
ಕಮಲಾಸನಲೋಚನಗಣಸರಸಕ್ರೀಡಾಸ್ಪದಂ ಜಯತಿ ॥ ೫೫॥
ನಾರೀವಂಶಶಿಖಾಮಣಿರೇಷಾ ಚಿನ್ತಾಮಣಿರ್ನತಾನಾಂ ಹಿ ।
ಧಾತೃಗೃಹಭಾಗಧೇಯಂ ಧ್ಯೇಯಂ ಸದ್ಭಿಃ ಶ್ರಿಯಃ ಸಮೃದ್ಧ್ಯೈ ನಃ ॥ ೫೬॥
ಜನನಿ ಭುವನೇಶ್ವರಿ ತ್ವಾಂ ವಾಣೀಂ ವನ್ದೇ ಕವಿತ್ವರಸಸಿದ್ಧ್ಯೈ ।
ತ್ವಂ ತು ದದಾಸಿ ಹಿ ದಯಯಾ ಮಮ ಮನ್ದಸ್ಯಾಪಿ ವಾಗ್ಝರೀರ್ಮಧುರಾಃ ॥ ೫೭॥
ಏತೇನ ತವ ತು ಕೀರ್ತೇರ್ಮಹಿಮಾ ಸಂಗೀಯತೇ ದಿಶಾಂ ವಲಯೇ ।
ಕಿಂನರವರ್ಗೈರಮರೀಕನ್ಯಾಭಿಃ ಕಲ್ಪವೃಕ್ಷಮೂಲತಲೇ ॥ ೫೮॥
ಕವಿಮಲ್ಲಸೂಕ್ತಿಲಹರೀಸ್ತನ್ವಾನಾ ಶಾರದಾ ಜಯತಿ ।
ವಿಧಿಕೇಲಿಸದನಹಂಸೀ ಕಲ್ಯಾಣೈಕಸ್ಥಲೀ ನಮತಾಮ್ ॥ ೫೯॥
ಸ್ಫುರತು ಮಮ ವಚಸಿ ವಾಣಿ ತ್ವದೀಯವೈಭವಸುಧಾಧಾರಾ ।
ನಿತ್ಯಂ ವ್ಯಕ್ತಿಂ ಪ್ರಾಪ್ತಾ ಧುತನತಜನಖೇದಜಾಲಕಾ ಮಹತೀ ॥ ೬೦॥
ವಾಣಿ ತವ ಸ್ತುತಿವಿಷಯೇ ಬುದ್ಧಿರ್ಜಾತಾ ಹಿ ಮೇ ಸಹಸಾ ।
ತೇನ ಮಮ ಭಾಗದೇಯಂ ಪರಿಣತಿಮಿತ್ಯೇವ ನಿತ್ಯಸಂತುಷ್ಟಃ ॥ ೬೧॥
ಸೃಷ್ಟಿಕಲಾಮಣ್ಡನಭೂರೇಷಾ ವಾಣೀ ಜಗಜ್ಜನನೀ ।
ಆಲೋಕಮಾತ್ರವಶತಸ್ತಮಸೋ ಹನ್ತ್ರೀ ಚ ಸಂಪದಾಂ ಜನನೀ ॥ ೬೨॥
ಪೌರುಷಲೋಪವಿಧಾತ್ರೀ ಧಾತುರಿಯಂ ಕಮಲಕೋಮಲಾಙ್ಗಲತಾ ।
ವಸತು ಸದಾ ಜಿಹ್ವಾಗ್ರೇ ದಿವ್ಯಜ್ಞಾನಪ್ರದಾ ದೇವೀ ॥ ೬೩॥
ಪ್ರತಿದಿನದುರಿತನಿಹನ್ತ್ರೀ ಪದ್ಮಾಸನನಯನಪುಣ್ಯಪರಿಪಾಕಃ ।
ಕವಿತಾಸಂತಾನಕಲಾಬೀಜಙ್ಕುರವರ್ಧಿನೀ ಜಯತಿ ॥ ೬೪॥
ಕ್ಷಣವೀಕ್ಷಣೇನ ಮಾತಾ ಲಕ್ಷ್ಮೀಂ ಪಕ್ಷ್ಮಲಯತಿ ಪ್ರಣತೇ ।
ವೇಧಸಿ ಸುರತಮಹೋತ್ಸವಸಂಕೇತತಲಪ್ರದರ್ಶಿನೀ ಕಾಲೇ ॥ ೬೫॥
ಶೃಙ್ಗಾರವಿಭ್ರಮವತಾ ನೀಲೋತ್ಪಲಕಾನ್ತಿಚಾತುರೀಸುಪುಷಾ ।
ವಾಣೀನೇತ್ರೇಣ ವಿಧಿರ್ಜಿತೋಽಭವತ್ ಸೋಽಪಿ ಸತತಕೃತವೇದಃ ॥ ೬೬॥
ಶ್ಯಾಮಾ ಕಟಾಕ್ಷಲಹರೀ ಮಾತುರ್ಜಯತೀಹ ಸಂಪದಾಂ ಜನನೀ ।
ಯಾಮಸ್ತೌಷೀತ್ ಕಾಲೇ ಮಘವಾ ನಾಕಾಧಿಪಾ ಮುನಯಃ ॥ ೬೭॥
ಮಣಿಕಟಕನಾದಪೂರಿತಮಮ್ಬಾಪಾದಾಮ್ಬುಜಂ ಮಹಾಮನ್ತ್ರೈಃ ।
ಜಪ್ಯಂ ಧ್ಯೇಯಂ ಕಾಲೇ ದಿಶಿ ದಿಶಿ ಕಲಿತಸ್ವರಕ್ಷಂ ಚ ॥ ೬೮॥
ಸ್ಮರಣೇನ ದುರಿತಹನ್ತ್ರೀ ನಮನೇನ ಕವಿತ್ವಸಿದ್ಧಿದಾ ವಾಣೀ ।
ಕುಸುಮಸಮರ್ಪಣಕಲಯಾ ಕಾಲೇ ಮೋಕ್ಷಪ್ರದಾತ್ರೀ ಚ ॥ ೬೯॥
ವಿಸೃಮರತಮೋನಿಹನ್ತ್ರಿ ತ್ವಾಂ ಸೇವೇ ಶಾರದಾದೇವಿ ।
ಶಿಶಿರೀಕುರು ಮಾಂ ಕಾಲೇ ಕರುಣಾರಸವೀಕ್ಷಿತೇನ ವರದೇನ ॥ ೭೦॥
ಮಾತರ್ನಮೋಽಸ್ತು ತಾವಕಕಟಾಕ್ಷಮಧುಪಾಯ ಶಾರದೇ ಜಯತಿ ।
ಯೋ ವೇಧಸೋಽಪಿ ಕಾಲೇ ಸೃಷ್ಟ್ಯಾದೌ ಚಾತುರೀಂ ದಿತ್ಸನ್ ॥ ೭೧॥
ಸುಮನೋವಾಞ್ಛಾದಾನೇ ಕೃತಾವಧಾನಂ ಧನಂ ಧಾತುಃ ।
ಧಿಷಣಾಜಾಡ್ಯಾದಿಹರಂ ಯದ್ವೀಕ್ಷಣಮಾಮನನ್ತಿ ಜಗತಿ ಬುಧಾಃ ॥ ೭೨॥
ಲಲಿತಗಮನಂ ತ್ವದೀಯಂ ಕಲನೂಪುರನಾದಪೂರಿತಂ ವಾಣಿ ।
ನೌಮಿ ಪದಾಮ್ಬುಜಯುಗಲಂ ಕವಿತಾಸಿದ್ಧ್ಯೈ ವಿಧೇಃ ಕಾನ್ತೇ ॥ ೭೩॥
ಕಮಲಕೃತವೈಜಯನ್ತೀ ವಿಧೇರ್ಮುಖೇಷ್ವಾದರಾದ್ವಾಣ್ಯಾಃ ।
ಜಯತಿ ಕಟಾಕ್ಷಲಹರೀ ತೋರಣಲಕ್ಷ್ಮೀಸ್ತು ಸತ್ಯಲೋಕೇ ಹಿ ॥ ೭೪॥
ನಿಶ್ರೇಣಿಕಾ ಚ ಮುಕ್ತೇಃ ಸಜ್ಜ್ಞಾನನದೀಮಹಾಲಹರೀ ।
ನಾನಾರಸಚಾತುರ್ಯಪ್ರಸಾರಿಕಾ ದುರಿತಶಙ್ಕುಲಾ ಕಾಲೇ ॥ ೭೫॥
ಪರತನ್ತ್ರಿತವಿಧಿವಿಭವಾ ದೇವೀ ಸಾ ಶಾರದಾ ಜಯತಿ ।
ಕೈವಲ್ಯಾದಿಕಲಾನಾಂ ದಾತ್ರೀ ಭಕ್ತಾಲಿಕಾಮಧೇನುರ್ಯಾ ॥ ೭೬॥
ಕವಿಕಾಮಧೇನುರೇಷಾ ಮಞ್ಜುಸ್ಮೇರಾನನಾಮ್ಭೋಜಾ ।
ವಾಣೀ ಜಯತಿ ವಿಧಾತುರ್ಮನನಾಗಮಸಂಪ್ರದಾಯಫಲದಾ ಹಿ ॥ ೭೭॥
ಘನತರಕೃಪಾರಸಾರ್ದ್ರೈರ್ನಾನಾವಿಭವಪ್ರದಾನಕೃತದೀಕ್ಷೈಃ ।
ವಾಣೀ ಜಯತಿ ಕಟಾಕ್ಷೈರ್ನಃ ಕಾಶ್ಮಲ್ಯಂ ಹಠಾನ್ನಿರಸ್ಯನ್ತೀ ॥ ೭೮॥
ದಾಸಾಶಾದಾನಕಲಾಪ್ರಕ್ಲೃಪ್ತದೀಕ್ಷಾಕಟಾಕ್ಷಲಹರೀ ಮೇ ।
ಕಬಲಯತು ಪಾಪರಾಶಿಂ ವಾಣ್ಯಾ ನಿತ್ಯಂ ಮಹೌದಾರ್ಯಾ ॥ ೭೯॥
ಆದಿಮಜನನೀ ಸೈಷಾ ವಾಣೀ ಜಯತೀಹ ಭಕ್ತರಕ್ಷಾಯೈ ।
ಸರ್ವತ್ರ ಕಲಿತದೇಹಾ ನಾನಾಶಾಸ್ತ್ರಾದಿರೂಪತೋ ಜಗತಿ ॥ ೮೦॥
ಬಹುವಿಧಲೀಲಾಸದನಂ ಸಂಭೃತಫುಲ್ಲಾಬ್ಜಶಿಲ್ಪವೈಚಿತ್ರ್ಯಮ್ ।
ವಾಣೀಮುಖಾರವಿನ್ದಂ ಚುಮ್ಬತಿ ಮಾನಸಮಿದಂ ಹಠಾತ್ ಕೃತ್ಯಮ್ ॥ ೮೧॥
ಸೌಭಾಗ್ಯಕಾನ್ತಿಸಾರಂ ವದನಾಮ್ಭೋಜಂ ಶ್ರಿಯೈ ವಾಣ್ಯಾಃ ।
ಆಶ್ರಿತ್ಯ ಸಕಲವೇದಾ ಅಪಿ ನಿತ್ಯಂ ಮಾನ್ಯತಾಂ ಪ್ರಾಪ್ತಾಃ ॥ ೮೨॥
ಜ್ಞಾನಮಯೀ ಸಲಿಲಮಯೀ ತತ್ತ್ವಮಯೀ ಭಾತಿ ಸರ್ವಲೋಕಾನಾಮ್ ।
ಅಕ್ಷರಮಯೀ ಚ ವಾಣೀ ಶ್ರೇಯೋದಾನೇ ನಿಬದ್ಧಚಿತ್ತಗತಿಃ ॥ ೮೩॥
ನಮೌಕ್ತಿರಸ್ತು ಮಾತ್ರೇ ವಾಣ್ಯೈಃ ನಃ ಸಿದ್ಧಿದಾ ಭಕ್ತ್ಯಾ ।
ಆನನ್ದಿನ್ಯೈ ಜ್ಞಾನಸ್ವರೂಪಭಾಜೇ ಪ್ರಬನ್ಧರೂಪಾಯೈ ॥ ೮೪॥
ಆರಾಧ್ಯಾಯೈ ಧ್ಯೇಯಾಯೈ ಚಾತ್ತಕಲಾಚಿತ್ರನಾದರೂಪಾಯೈ ।
ಸಚ್ಚಿತ್ತವಾಸಭಾಜೇ ವಾಣ್ಯೈ ಭೂಯೋ ನಮೋಽಸ್ತು ಭಕ್ತಿಕೃತಮ್ ॥ ೮೫॥
ಕಮಲಾಸನಪುಣ್ಯಕಲಾ ನಮತಾಂ ಚಿನ್ತಾಮಣಿರ್ವಾಣೀ ।
ಜೀವಾಕ್ಷರಬೋಧಕಲಾರೂಪಾ ಜಯತೀಹ ಸತ್ತ್ವರೂಪವತೀ ॥ ೮೬॥
ಬ್ರಹ್ಮಾಣ್ಡಮಣ್ಡಲಮಿದಂ ವ್ಯಾಪ್ತಂ ಮಾತ್ರಾ ಕ್ಷರಾಕ್ಷರಾದಿಜುಷಾ ।
ಯತ್ಪದಕಮಲಂ ನಿತ್ಯಂ ಶ್ರುತಿತತಿಸುದತೀವಿಭೂಷಣಂ ಚ ವಿದುಃ ॥ ೮೭॥
ಮನಸಿಜಸಾಮ್ರಾಜ್ಯಕಲಾಲಕ್ಷ್ಮೀರೇಷಾ ವಿರಿಞ್ಚಿಮುಖಹರ್ಷಮ್ ।
ವ್ಯಾತನ್ವಾನಾ ನಿತ್ಯಂ ರಾಜತಿ ಷಡರಸ್ವರೂಪಚಕ್ರತಲೇ ॥ ೮೮॥
ಮಞ್ಜುಲವೀಣಾನಿನದಪ್ರಯೋಗನಿರ್ಧೂತಮೋಹಸಂಚಾರಾ ।
ಹಂಸೀಯಾನಾ ವಾಣೀ ಹಂಸಗತಿಃ ಸುಕೃತಿನೇತ್ರಪುಣ್ಯಕಲಾ ॥ ೮೯॥
ಕುಚಕಲಶಸವಿಧವಿನಿಹಿತವೀಣಾನಿಕ್ಕಾಣಸಾವಧಾನಕಲಾ ।
ಅಧಿನೇತ್ರೀ ಹಿ ಕಲಾನಾಂ ಸಕಲಾನಾಂ ಶಾರದಾ ಜಯತಿ ॥ ೯೦॥
ತ್ರಿದಶಪರಿಷನ್ನಿಷೇವ್ಯಾ ಪ್ರಾತಃ ಸಾಯಂ ಪ್ರಫುಲ್ಲಮುಖಕಮಲಾ ।
ಕಮಲಾಸ್ನುಷಾ ಹಿ ವಾಣೀ ವಾಣೀಂ ದಿಶತು ಪ್ರಬನ್ಧರಸಭರಿತಾಮ್ ॥ ೯೧॥
ಅಧಿಕಚಪಲೈಃ ಕಟಾಕ್ಷೈರಞ್ಚಿತಲೀಲಾರಸೈರುದಾರೈರ್ನಃ ।
ಮಙ್ಗಲಮಾತನ್ವಾನಾ ವಿಧಾತೃಗೃಹಿಣೀ ಸುರಾದಿನುತಪಾದಾ ॥ ೯೨॥
ಕಾನ್ತಂ ಲಕ್ಷ್ಮೀಭವನಂ ಮುಖಕಮಲಂ ಶಾರದಾದೇವ್ಯಾಃ ।
ಸೌಭಾಗ್ಯಕಾನ್ತಿಸಾರಂ ಸ್ಪೃಹಯತಿ ಮೇ ಮಾನಸಂ ಸರಸಮ್ ॥ ೯೩॥
ಕಾರುಣ್ಯಪೂರ್ಣನಯನಂ ಪುಸ್ತಕಹಸ್ತಂ ಮಹಃ ಕಿಮಪಿ ।
ಧಾತುಃ ಪುಣ್ಯಕಲಾನಾಂ ಪರಿಪಾಕೋ ಮರ್ತ್ಯರಕ್ಷಣಂ ಕುರುತೇ ॥ ೯೪॥
ಸಂಸಾರವಾರಿರಾಶಿಂ ತರ್ತುಂ ಸಾ ಸೇತುರೇಷಾ ನಃ ।
ಧಾತುರ್ಗೃಹಿಣೀ ದುಃಖಂ ಶಿಥಿಲಯತು ಪರಂ ಜನಿಪ್ರಾಪ್ತಮ್ ॥ ೯೫॥
ಸರಸಕವಿಕಲ್ಪವಲ್ಲೀಮಮ್ಬಾಂ ವಾಣೀಮಹಮುಪಾಸೇ ।
ಅನ್ತಸ್ತಮೋನಿಹನ್ತ್ರೀಂ ಯಾಮಾಹುರ್ಜ್ಞಾನದಾಂ ಮುನಯಃ ॥ ೯೬॥
ಮಮ ಲೋಚನಯೋರ್ಭೂಯಾತ್ ವಿದ್ಯಾ ಕಾಪಿ ಪ್ರಧೂತಜನಿಭೀತಿಃ ।
ನಿಗಮೇಷು ಸಂಚರನ್ತೀ ಕೃಪಾನಿಧಿಃ ಶಾರದಾ ದೇವೀ ॥ ೯೭॥
ಶಮಿತನತದುರಿತಸಂಘಾ ಧಾತ್ರೇ ನಿಜನೇತ್ರಕಲ್ಪಿತಾನಙ್ಗಾ ।
ಕೃತಸುರಶಾತ್ರವಭಙ್ಗಾ ಸಾ ದೇವೀ ಮಙ್ಗಲೈಸ್ತುಙ್ಗಾ ॥ ೯೮॥
ಪದ್ಮಾಸನಸ್ಥಿತಾಂ ತಾಂ ವಾಣೀಂ ಚತುರಾನನಾಂ ವನ್ದೇ ।
ಕಲ್ಯಾಣಾನಾಂ ಸರಣಿಂ ಕವಿಪರಿಷತ್ಕಲ್ಪವಲ್ಲರೀಂ ಮಾನ್ಯಾಮ್ ॥ ೯೯॥
ಕುಚಭಾರಸಂನತಾಙ್ಗೀಂ ಕುನ್ದಸ್ಮೇರಾನನಾಮ್ಭೋಜಾಮ್ ।
ಕುನ್ದಲಕುಸುಮಪರಿಮಲಸಂಪಾದಿತಭೃಙ್ಗಝಂಕೃತಿತರಙ್ಗಾಮ್ ॥ ೧೦೦॥
ಚಿದ್ರೂಪಾಂ ವಿಧಿಮಹಿಷೀಂ ಹಂಸಗತಿಂ ಹಂಸಸಂನುತಚರಿತ್ರಾಮ್ ।
ವಿದ್ಯಾಕಲಾದಿನಿಲಯಾಮಾರಾಧ್ಯಾಂ ಸಕಲಜಡಿಮದೋಷಹರೀಮ್ ॥ ೧೦೧॥
ಜನನಿ ಯದಿ ಭಜತಿ ಲೋಕೇ ತವ ಲೋಚನವೀಕ್ಷಣಂ ಕ್ಷಣಂ ಮರ್ತ್ಯಃ ।
ಕುಪುರುಷನುತಿವಿಮುಖಸ್ತೇ ರೂಪಂ ಜ್ಞಾನಪ್ರದಂ ಪಶ್ಯನ್ ॥ ೧೦೨॥
ಕುಕ್ಷಿಂಭರಿತ್ವಮುಖದುರ್ಗುಣಾದಿಕಂ ದೂರತಸ್ತ್ಯಕ್ತ್ವಾ ।
ತ್ವದ್ಭಾವನೇನ ಧನ್ಯೋ ನಯತಿ ಚ ಕಾಲಂ ಪ್ರಮೋದೇನ ॥ ೧೦೩॥
ಮಯಿ ತಾಪಭಾರಶಾನ್ತ್ಯೈ ತರಙ್ಗಯ ತ್ವದಿಲೋಚನೇ ಮಾತಃ ।
ಯಚ್ಛಾರದಾಬ್ಜಸುಷಮಾಮಾನ್ಯೇ ದೇವಾದಿಭಿಃ ಪ್ರಾರ್ಥ್ಯೇ ॥ ೧೦೪॥
ಸರ್ವಾರ್ಥದಾ ಹಿ ಭಜತಾಂ ಕಟಾಕ್ಷಧಾಟೀ ಶಿವಂಕರೀ ವಾಣಿ ।
ಚಿನ್ತಾಮಣಿಮಿವ ಕಲಯತಿ ಯಾಂ ಹಿ ವಿಧಿರ್ವಿದಿತಮನ್ತ್ರೋಽಪಿ ॥ ೧೦೫॥
ಸುಕೃತಪರಿಪಾಕಮಾನಸಾ ಧನ್ಯಾಸ್ತ್ವಾಮರ್ಚಯನ್ತಿ ನನು ವಾಣಿ ।
ಅಹಮಪಿ ತದ್ವತ್ಕಲಯೇ ಫಲಪ್ರದಾ ತ್ವಂ ಸಮಾನಕಲ್ಪಾಸಿ ॥ ೧೦೬॥
ನಿಗಮವಚಸಾಂ ನಿದಾನಂ ತವ ಪಾದಾಬ್ಜಂ ವತಂಸಯತು ಕಾಲೇ ।
ದೇವೋಽಪಿ ದೇವದೇವೋ ವಿಜಿತಜಗತ್ತ್ರಯತಲೇ ಮಾತಃ ॥ ೧೦೭॥
ಅನ್ತಸ್ತಮಸೋ ಹನ್ತ್ರೀ ಪಟೀಯಸೀ ತೇ ಕಟಾಕ್ಷಝರಮಾಲಾ ।
ಯಾ ತೋರಣಮಾಲ್ಯಶ್ರಿಯಮಾತನುತೇ ವೇಧಸಃ ಸೌಧೇ ॥ ೧೦೮॥
ಶೃಙ್ಗಾರವಿಭ್ರಮವತೀಂ ತ್ವಾಂ ಪ್ರಾಪ್ಯೈವ ಕ್ರಿಯಾಕಾಲೇ ।
ಕಲಯತಿ ಸೃಷ್ಟ್ಯಾದಿಮಸೌ ವಿಧಿಃ ಶ್ರುತಿವ್ಯಕ್ತಮಾಹಾತ್ಮ್ಯಃ ॥ ೧೦೯॥
ವೇಧೋವದನಂ ಕೇಲೀವನಮಾಸಾದ್ಯಾಮ್ಬ ಪರಮಯಾ ಹಿ ಮುದಾ ।
ಕ್ರೀಡಸಿ ಶುಕೀವ ಕಾಲೇ ದ್ವಿಜಸಂಘಸಮರ್ಚಿತಾತ್ಮವೃತ್ತಿಶ್ಚ ॥ ೧೧೦॥
ಧಾತುರ್ಮುಖಮಞ್ಜೂಷಾರತ್ನಂ ನಿಗಮಾನ್ತಕೇಲಿವನಹಂಸೀಮ್ ।
ಪರಮಾಂ ಕಲಾಮುಪಾಸೇ ತಾಮಮ್ಬಾಂ ಚಿದ್ವಿಲಾಸಘನವೃತ್ತಿಮ್ ॥ ೧೧೧॥
ವಾಗೀಶದೇವರೂಪಿಣಿ ಗೀಷ್ಪತಿಮುಖದೇವಸಂಘನುತಚರಣೇ ।
ತವ ರೂಪಂ ಸೂರ್ಯಾಯುತದೃಶ್ಯಂ ದರ್ಶಯ ಮಮ ಜ್ಞಾನೇ ॥ ೧೧೨॥
ದಿವ್ಯಜ್ಞಾನಪ್ರದಮಿದಮಮ್ಬ ತ್ವದ್ರೂಪಮಾದರಾದ್ವಾಣಿ ।
ಕಾಲೇ ದರ್ಶಯ ಕೃಪಯಾ ತೇನ ವಯಂ ಪ್ರಾಪ್ತಕಾರ್ಯಸಾಫಲ್ಯಾಃ ॥ ೧೧೩॥
ಅಮ್ಬಾ ತ್ರಿಸಂಧ್ಯಪಠನಪ್ರವೃತ್ತಿಭಾಜಾಂ ಕ್ರಮೇಣ ನಾಮ್ನಾಂ ತು ।
ದ್ವಾದಶಕಲಾವಿಭೇದವ್ಯೂಹಾದಿಜ್ಞಾನದಾ ಪ್ರಸನ್ನಾ ಹಿ ॥ ೧೧೪॥
ಮೂಕೋಽಪಿ ಸತ್ಕವಿಃ ಸ್ಯಾದ್ ದುರಕ್ಷರಾಣ್ಯಪಿ ವಿಧಾತೃಲಿಖಿತಾನಿ ।
ಸತ್ಫಲದಾನಿ ಸರಸ್ವತಿ ಕಟಾಕ್ಷಪೂರೇ ಯದಿ ಕಾಪಿ ॥ ೧೧೫॥
ಅವಲಮ್ಬೇ ತಾಮಮ್ಬಾಂ ಪಞ್ಚಾಶದ್ವರ್ಣಕಲ್ಪಿತಜಗತ್ಕಾಮ್ ।
ಸೃಷ್ಟಿಸ್ಥಿತಿಸಂಹಾರಸ್ಥಿರೋದಯಾಂ ವಿವಿಧಶಾಸ್ತ್ರರೂಪಾಢ್ಯಾಮ್ ॥ ೧೧೬॥
ವಾಣೀಂ ದಿಶತು ಮನೋಜ್ಞಾಂ ವಾಣೀ ಗತಿಹಸಿತಕಾದಮ್ಬಾ ।
ಯಾ ದಮ್ಭಾದಿವಿಮುಕ್ತಾ ನಾದಂ ಭಾವ್ಯಂ ವದನ್ತಿ ಯದ್ರೂಪಮ್ ॥ ೧೧೭॥
ರಾಕೇನ್ದುವದನಬಿಮ್ಬಾ ಸಾಮ್ಬಾ ವಾಣೀ ಪುನಾತು ಕೃತಿಮೇನಾಮ್ ।
ಪರಿಕಲಿತಭಾವಬನ್ಧಾಂ ರಸೋಜ್ಜ್ವಲಾಂ ಮಙ್ಗಲೋತ್ತುಙ್ಗಾಮ್ ॥ ೧೧೮॥
ಲಾವಣ್ಯಕಾನ್ತಿಸಿನ್ಧುಃ ಪಾದಾಬ್ಜನತಪ್ರಭಾವಸಂಧಾತ್ರೀ ।
ಪ್ರಸೃಮರತಮೋನಿಹನ್ತ್ರೀ ಮದ್ವಾಚಾಂ ದೇವತಾ ಚಾದ್ಯಾ ॥ ೧೧೯॥
ಜನತಾನೇತ್ರಾನನ್ದಂ ರೂಪಂ ಯಸ್ಯಾಃ ಸ್ಫುಟಂ ಭಾತಿ ।
ಸ್ಮರಣಂ ತ್ವಜ್ಞಾನಹರಂ ವಿಶ್ವಜ್ಞಾನಪ್ರದಂ ಚ ಸಾ ಜಯತಿ ॥ ೧೨೦॥
ಸಹಧರ್ಮಿಣೀ ವಿಧಾತುರ್ದಾರಿದ್ರ್ಯಧ್ವಂಸಿನೀ ನಿಜಕಟಾಕ್ಷೈಃ ।
ಸಾಂನಿಧ್ಯಂ ಜನಯತು ಮೇ ಸುರಮುನಿನರಸಂನುತಸ್ವಮಹಿಮೇಯಮ್ ॥ ೧೨೧॥
ಮುಖರಿತವೀಣಾ ವಾಣೀ ವಾಣೀಂ ಮೇ ದಿಶತು ನೈಜನುತಿಯೋಗ್ಯಾಮ್ ।
ಆಸ್ವಾದಿತಶಾಸ್ತ್ರಾಮೃತಲಹರೀಂ ಸದ್ಯಸ್ತಮೋನಿಹನ್ತ್ರೀಂ ಚ ॥ ೧೨೨॥
ಮಣಿನೂಪುರನಾದನಿಭಾ ವಾಣೀ ಭಾತಿ ತ್ವದೀಯಭಕ್ತಮುಖೇ ।
ಕೀರ್ತಿರ್ದಿಶಾಸು ಶುದ್ಧಿರ್ವಪುಷಿ ಬಹುಮುಖೀ ಪರಂ ಕಾಲೇ ॥ ೧೨೩॥
ತವ ಪಾದಸ್ಮರಣವಶಾತ್ ತಾಮ್ಯತಿ ತಿಮಿರಾವಲಿಶ್ಚಾನ್ತಃ ।
ಆನನ್ದಲಹರಿವೀಚೀ ಪ್ರಸರ್ಪತಿ ಕ್ಷಮಾತಲೇ ಹಿ ಭಕ್ತಾನಾಮ್ ॥ ೧೨೪॥
ಸಂಪನ್ನಲಿನೀಭಾನುಂ ಜ್ಞಾನಾಬ್ಧಿಸುಧಾಕರಂ ಹಿ ತವ ರೂಪಮ್ ।
ಭಕ್ತ್ಯಾ ಮನಸಿ ಗೃಣನ್ತೋ ಗಚ್ಛನ್ತಿ ವ್ಯೋಮಯಾನಮಾರೂಢಾಃ ॥ ೧೨೫॥
ಹೃತ್ತಮಸಾಂ ದೀಪರುಚಿರ್ವಿಧಾತೃದಯಿತಾ ಮಮಾಸ್ತು ಪರದೈವಮ್ ।
ಭವತಾಪಮೇಘಮಾಲಾ ಕವಿಶುಕವಾಸನ್ತಿಕಶ್ರೀರ್ಹಿ ॥ ೧೨೬॥
ಮಮ ಮಾನಸಮಣಿಹರ್ಮ್ಯೇ ವಿಹರತು ವಾಣ್ಯಾಃ ಸ್ವರೂಪಂ ತು ।
ನಿಗಮವಚಸಾಂ ನಿಗುಮ್ಫೈರ್ವೇದ್ಯಂ ತದ್ವೇಧಸಾ ಲಾಲ್ಯಮ್ ॥ ೧೨೭॥
ಸತತಮಭಿಗಮ್ಯರೂಪಾ ವಿಬುಧವರೇಡ್ಯಾ ಸರಸ್ವತೀ ಮಾತಾ ।
ಮನಸಿ ಮಮ ಸಂನಿಧತ್ತಾಂ ಭೂತ್ಯೈ ನಃ ಸರ್ವತಃ ಕಾಲೇ ॥ ೧೨೮॥
ಮಮ ಶಿರಸಿ ನೀಚಪುಣ್ಯೇ ಪುಣ್ಯಘನಾ ವೇದಮೌಲಿಹರ್ಮ್ಯಾ ಚ ।
ಕೃತಪದವಿನ್ಯಾಸಭರಾ ವಾಣೀ ಜಯತೀಹ ಶತಮಖಾದಿನುತಾ ॥ ೧೨೯॥
ಮಾಯಾನಿರಸನದಕ್ಷಾ ಮಾತೇಯಂ ಸುಪ್ರಸನ್ನಾ ಮೇ ।
ಲಭತೇ ಪರಮಂ ಜ್ಞಾನಂ ಯದ್ಭಕ್ತ್ಯಾ ಪಾಮರೋಽಪಿ ಚ ಧರಿತ್ರ್ಯಾಮ್ ॥ ೧೩೦॥
ವಾಣೀಶ್ವರಿ ತವ ರೂಪಂ ನಾಮಸ್ಮರಣಂ ಚ ಪೂಜನಂ ಭಕ್ತ್ಯಾ ।
ಸಿಧ್ಯತಿ ಸಕಲವಿಭೂತ್ಯೈ ತತ್ರ ಹಿ ಭವತೀದಯಾಪ್ರಸಾರಸ್ತು ॥ ೧೩೧॥
ಸಫಲಯತು ನೇತ್ರಯುಗಲಂ ಹತನತದುರಿತಾ ಚ ಸಾ ಪರಾ ದೇವೀ ।
ಕಮಲಜಮಾನ್ಯಚರಿತ್ರಾ ಸುಮನೋವಾಞ್ಛಾಪ್ರದಾನಕೃತದೀಕ್ಷಾ ॥ ೧೩೨॥
ಪಙ್ಕಜಮೃಣಾಲತನ್ತುಪ್ರತಿಭಟರೂಪಂ ಕ್ವಚಿದ್ದೃಶ್ಯಮ್ ।
ಕವಿಕುಲವಾಣೀಕೈರವಶಾರದಚನ್ದ್ರಪ್ರಭಾಕಬಲಿತಂ ಚ ॥ ೧೩೩॥
ನಲಿನಭವಗೃಹಿಣಿ ವಾಣಿ ಪ್ರಹ್ವಾನಾಂ ಸಪದಿ ಭಕ್ತಾನಾಮ್ ।
ಲುಮ್ಪಸಿ ಮೋಹಂ ಭವತೀಸ್ಮರಣಾದ್ವರಿವಸ್ಯಯಾ ಸ್ತುತ್ಯಾ ॥ ೧೩೪॥
ಕವಿಕುಲಕಲ್ಪಕವಲ್ಲೀಮಪಾಙ್ಗಲೀಲಾಕೃತಾರ್ತಿಶಮನಾಂ ತಾಮ್ ।
ವಾಣೀಮನ್ವಹಮಾರ್ಯಾರಾಧ್ಯಾಂ ಮೋಕ್ಷಾಯ ನಿಭೃತಮಹಮೀಡೇ ॥ ೧೩೫॥
ಸಂವಿತ್ಸುಖಸ್ವರೂಪಾಮಮ್ಬಾಂ ವಾಣೀಮಹರ್ನಿಶಂ ಮನಸಿ ।
ಕಲಯೇ ಕಲಿತಾಪ್ರಭರಪ್ರಶಾನ್ತಿಕಾಮಃ ಪ್ರಭಾವತೀಂ ಜಯದಾಮ್ ॥ ೧೩೬॥
ನತಪರಿಪಾಲಿನಿ ವಾಣಿ ತ್ರಿಜಗದಘಧ್ವಂಸಿನಿ ಶ್ರಿತಾನಾಂ ನಃ ।
ತವ ಪಾದಯುಗಂ ನಿಗಲಂ ಭವತು ತಮೋರಾಶಿದುಷ್ಟಹಸ್ತಿಗಣೇ ॥ ೧೩೭॥
ಕಾಮಾದಿದುರ್ಗ್ರಹಕೃತಾನರ್ಥನಿರಾಸಾಯ ತಾವಕಾಪಾಙ್ಗಾಃ ।
ವಾಣಿ ಜನಯನ್ತಿ ನತಾನಾಂ ಕೈವಲ್ಯ ಖಪ್ರದಾನಾಯ ॥ ೧೩೮॥
ತವ ದರ್ಶನಂ ಹಿ ಮಾತಃ ಪರಮಂ ಸಂಸ್ಕಾರಮಾತ್ತಪಾಪಾನಾಮ್ ।
ಕಲ್ಯಾಣಸೂಕ್ತಿಕನ್ದಲರಸಪ್ರದಂ ಮಾನ್ಯತೇ ವಿಬುಧೈಃ ॥ ೧೩೯॥
ಧಾತುರ್ವದನಸರೋಜೇ ಶ್ರುತಿಸೀಮನಿ ಹೃದಿ ಚ ಭಕ್ತಾನಾಮ್ ।
ಏಕಪದಾ ದ್ವಿಪದಾ ವಾ ರಾಜತಿ ವಾಣೀ ಜಗನ್ಮಾತಾ ॥ ೧೪೦॥
ಮಣಿಮಯಕಾಞ್ಚೀಲಸಿತಾ ವೀಣಾಪುಸ್ತಕಕರಾರವಿನ್ದಾ ಚ ।
ನಮತಾಂ ಜಾಡ್ಯವಿಧೂನನಧೃತದೀಕ್ಷಾ ರಾಜತೇ ವಾಣೀ ॥ ೧೪೧॥
ಕಬಲಯತು ತಾಪಮಸ್ಯಾಃ ಸ್ಮರಣಂ ಪಾದಾಬ್ಜವನ್ದನಂ ವಾಣ್ಯಾಃ ।
ಧಾತುರ್ಜಿಹ್ವಾಗ್ರತಲೇ ನೃತ್ಯನ್ತ್ಯಾಃ ಸಾರಸೂಕ್ತಿರಸಯನ್ತ್ಯಾಃ ॥ ೧೪೨॥
ಪದ್ಮಜವದನವಿಭೂಷಾ ನಿಗಮಶಿಖೋತ್ತಂಸಪೀಠಿಕಾ ವಾಣೀ ।
ಸಕಲವಿಧಶಾಸ್ತ್ರರೂಪಾ ಭಕ್ತಾನಾಂ ಸತ್ಕವಿತ್ವದಾನಪ್ರಾ ॥ ೧೪೩ ॥।
ಗತಿಜಿತಮರಾಲಗಮನಾ ಮರಾಲವಾಹಾ ಚ ವೇಧಸೋ ದಾರಾಃ ।
ಶಿಶಿರದಯಾಸಾರಾ ಸಾ ನಮತಾಂ ಸಂತಾಪಹಾರಿಣೀ ಸಹಸಾ ॥ ೧೪೪॥
ಸ್ತನಭಾರಸಂನತಾಙ್ಗೀ ದರದಲಿತಾಮ್ಭೋಜಲೋಚನಾನ್ತಶ್ರೀಃ ।
ಸವಿಧತಲೇ ವಿಬುಧವಧೂಪರಿಚರಣಾದ್ಯೈಶ್ಚ ತುಷ್ಟಚಿತ್ತಾ ಸಾ ॥ ೧೪೫॥
ಹರಿಣಾಙ್ಕವದನಬಿಮ್ಬಾ ಪೃಥುಲನಿತಮ್ಬಾ ಕಚಾತ್ತಲೋಲಮ್ಬಾ ।
ನಿಜಗತಿಜಿತಕಾದಮ್ಬಾ ಸಾಮ್ಬಾ ಪದಪದ್ಮನಮ್ರಭಕ್ತಕದಮ್ಬಾ ॥ ೧೪೬॥
ಪರಿಹಸಿತನೀಲನೀರಜದೇಹಶ್ರೀಃ ಶಾರದಾ ಪ್ರಥಮಾ ।
ಸ್ಫಟಿಕಮಣಿಭರಕಾನ್ತಿಃ ಸರಸ್ವತೀ ಕೀರ್ತ್ಯತೇ ಚ ವಿಬುಧಗಣೈಃ ॥ ೧೪೭॥
ನಾಥೇ ದೃಢಭಕ್ತಿಮತೀ ಸೃಷ್ಟ್ಯಾದೌ ಚಿತ್ಸ್ವರೂಪಾ ಚ ।
ಧಾತ್ರಾ ಸಮಾನಭಾವಾ ಚೈಕಾಸನಪೂಣ್ಡರೀಕಮಧ್ಯಸ್ಥಾ ॥ ೧೪೮॥
ಪ್ರೀತ್ಯಾ ಸರಸಪುಮರ್ಥಾನ್ ದದಾತಿ ಕಾಲೇ ಚಿದಾದಿಸಂಧಾತ್ರೀ ।
ಸಾ ಮೇ ದೈವತಮೇಷಾ ಸತತನಿಷೇವ್ಯಾ ಚ ಕಾಮದಾ ಭೂಯಾತ್ ॥ ೧೪೯॥
ಹರಿಚರಣನಲಿನಯುಗಲೇ ಸದೈಕತಾನಾ ಹಿ ಶಾರದಾ ಜನನೀ ।
ಪದ್ಮಾನೀಲಾದಿಸಖೀ ಶ್ರುತ್ಯುದ್ಯಾನೇ ವಿಹಾರರಸಭರಿತಾ ॥ ೧೫೦॥
ಧಾತುಃ ಕುಟುಮ್ಬಿನೀಯಂ ತನ್ಯಾತ್ ಕಲ್ಯಾಣಸಂತತಿಂ ಸತತಮ್ ।
ಯಾ ತಾರುಣ್ಯವಿಭುಷಾ ಸಮಕ್ರಮಾ ತ್ರಿಪುರಸುನ್ದರ್ಯಾ ॥ ೧೫೧॥
ನಾನಾಕ್ಷರಾದಿಮಾತೃಕಗಣೇಡಿತಾ ಶಬ್ದರೂಪಾ ಚ ।
ನಾದಬ್ರಹ್ಮವಿಲಾಸಾ ವಾಣೀ ಸಾ ಮಙ್ಗಲಾನಿ ನಸ್ತನ್ಯಾತ್ ॥ ೧೫೨॥
ದೃಕ್ಕೋಣವೀಕ್ಷಣಕಲಾನಿಗಮಪ್ರಾಭವವಿಧಾನದಾ ನಮತಾಮ್ ।
ವಿಬುಧಾನಾಂ ಹೃದಯಾಬ್ಜಂ ಯಸ್ಯಾ ವಾಸಸ್ಥಲೀ ಚ ನಿರ್ದಿಷ್ಟಮ್ ॥ ೧೫೩॥
ಮೋಹಾದಿವನಕುಠಾರಾ ಯಾ ನಿತ್ಯಂ ಸೇವ್ಯತೇ ತ್ರಿದಶಸಂಧೈಃ ।
ನಿತ್ಯಪ್ರಸನ್ನರೂಪಾಂ ಶಾನ್ತಾಂ ಯಾಮೇವ ಸೇವತೇ ವೇಧಾಃ ॥ ೧೫೪॥
ನಮತಾಂ ಯಯೈವ ಖಣ್ಡೀಕ್ರಿಯತೇ ಸುವರ್ಣದೃಷ್ಟಿಪುಷಾ ।
ಯದ್ವೀಕ್ಷಣೇನ ಪುರುಷಃ ಖ್ಯಾತೋ ನೃಪಸದಸಿ ಮಾನ್ಯತೇ ಪ್ರಥಮಮ್ ॥ ೧೫೫॥
ಯಸ್ಯೈ ಶ್ರೋತ್ರಿಯವರ್ಯೈಸ್ತ್ರಿಸಂಧ್ಯಮಧಾರ್ದಿಕಂ ಕ್ರಿಯತೇ ।
ಸಾ ಮಞ್ಜುನೀತಿರೂಪಾ ವಾಣೀರೂಪಾ ಚ ಭಣ್ಯತೇ ನಿಪುಣೈಃ ॥ ೧೫೬॥
ಸಾ ಮಯಿ ತನ್ಯಾದೀಕ್ಷಾಂ ವೀಕ್ಷಾವನದಾಂ ಸರಸ್ವತೀ ದೇವೀ ।
ಸಂತಾನಕುಸುಮಜೈತ್ರೀಂ ಯಾಮೈಚ್ಛತ್ ಪ್ರಾಪ್ತುಮಞ್ಜಸಾ ವೇಧಾಃ ॥ ೧೫೭॥
ಮನ್ದಸ್ಮಿತಮಧುರಾಸ್ಯಂ ಕೃಪಾವಲೋಕಂ ನಿರಸ್ತಜಾದ್ಯತತಿ ।
ಭೂಯಾದ್ ವಾಣ್ಯಾ ರೂಪಂ ಪುರಃ ಕರಾಮ್ಭೋಜಕಲಿತವೀಣಾದಿ ॥ ೧೫೮॥
ವಾಣ್ಯಾಃ ಪರಂ ನ ಜಾನೇ ದೈವತಮನ್ಯದ್ ವನೇ ಗಿರೌ ಚ ಪಥಿ ।
ಗಗನೇ ವಾ ಸಂರಕ್ಷಿತನತಜನತಾಯಾಃ ಕೃಪಾರಸಾರ್ದ್ರಾಯಾಃ ॥ ೧೫೯॥
ಆಸ್ಯೇನ್ದೋರವಲೋಕನಮಮ್ಬಾಯಾಃ ಪಾದಪದ್ಮಸೇವಾ ಚ ।
ಸರ್ವಶ್ರೇಯಃಪ್ರಾಪ್ತ್ಯೈ ಶಾಸ್ತ್ರಜ್ಞೈಃ ಸುಷ್ಠು ನಿರ್ದಿಷ್ಟಾ ॥ ೧೬೦॥
ವಾಣೀ ಹಿ ತಾಪಹನ್ತ್ರೀ ಜಗತಾಂ ಕಾರುಣ್ಯಪೂರ್ಣನಯನಶ್ರೀಃ ।
ಮನ್ದಾನ್ ಕರೋತಿ ವಿಬುಧಾನ್ ದ್ರಾವಯತಿ ಶಿಲಾಸ್ತತಸ್ತು ಕಿಂ ಚಿತ್ರಮ್ ॥ ೧೬೧॥
ಯಸ್ಮಿನ್ ಕಟಾಕ್ಷಪೂರೋ ನ ಭವತಿ ಸ ಹಿ ದೀನವದನಃ ಸನ್ ।
ಪ್ರಸ್ಖಲಿತವಾಗ್ಭಾರ್ತೋ ಭಿಕ್ಷಾಮಟತೀಹ ನಿನ್ದಿತೋ ಬಹುಶಃ ॥ ೧೬೨॥
ವಾಣ್ಯಾಃ ಕಟಾಕ್ಷಪೂರಸ್ರಜಾ ತ್ವಲಂಕೃತನಿಗಾಲೋ ಯಃ ।
ಸ ಹಿ ಭವತಿ ರಾಜಮಾನ್ಯಃ ಕಾನ್ತಾಧರಮಧುರವಾಗ್ವಿಲಾಸಶ್ಚ ॥ ೧೬೩॥
ಕವಿತಾಭಾಗ್ಯವಿಧಾತ್ರೀ ಪರಿಮಲಸಂಕ್ರಾನ್ತಮಧುಪಗಣಕೇಶಾ ।
ಮಮ ನಯನಯೋಃ ಕದಾ ವಾ ಸಾ ದೇವೀ ಕಲಿತಸಂನಿಧಾನಕಲಾ ॥ ೧೬೪॥
ಪರಚಿದ್ವಿಧಾನರೂಪಾ ವಾಣೀ ಶ್ರುತಿಸೀಮ್ನಿ ರಾಜತೇ ಪರಮಾ ।
ಮುನಿಜನಮಾನಸಹಂಸೀ ಯಾ ವಿಹರತಿ ಸಾ ಶುಭಾಯ ಸ್ಯಾತ್ ॥ ೧೬೫॥
ಜಪಮಾಲಿಕಯಾ ವಾಣೀಕರಧೃತಯಾ ವೀಣಯಾ ಚ ಕೋಶೇನ ।
ಅಹಮಸ್ಮಿ ನಾಥವಾನಿಹ ಕಿಂ ವಾಶಾಸ್ಯಂ ಪರಂ ಲೋಕೇ ॥ ೧೬೬॥
ಕೈವಲ್ಯಾನನ್ದಸುಖಪ್ರಾಪ್ತ್ಯೈ ತೇಜಸ್ತು ಮನ್ಮಹೇ ಕಿಮಪಿ ।
ಯದ್ ವಾಞ್ಛಿತಚಿನ್ತಾಮಣಿರಿತಿ ವಾಣೀತಿ ಚ ಭುವಿ ಖ್ಯಾತಮ್ ॥ ೧೬೭॥
ಕವಿಕುಲಸೂಕ್ತಿಶ್ರೇಣೀಶ್ರವಣಾನನ್ದೋಲ್ಲಸದ್ವತಂಸಸುಮಾ ।
ಸಾ ದೇವೀ ಮಮ ಹೃದಯೇ ಕೃತಸಾಂನಿಧ್ಯಾ ಕೃತತ್ರಾಣಾ ॥ ೧೬೮॥
ಯಸ್ಯಾ ದೃಷ್ಟಿವಿದೂರಾಃ ಕುಮತಾಃ ಶ್ರುತ್ಯರ್ಥವಞ್ಚಕಾಃ ಶಪ್ತಾಃ ।
ಕ್ರನ್ದನ್ತಿ ದಿಗನ್ತತಟೇ ಮೋಹಾದ್ಯೈರ್ಲುಪ್ತನಯನಾಶ್ಚ ॥ ೧೬೯॥
ಸತ್ಪರಿಷತ್ಸಂಮಾನ್ಯಾ ಶ್ರುತಿಜೀವನದಾಯಿನೀ ಜಗನ್ಮಾತಾ ।
ಚತುರಾನನಭಾಗ್ಯಕಲಾ ಕೃತಸಾಂನಿಧ್ಯಾ ಹಿ ರಾಜತೇ ಹೃದಯೇ ॥ ೧೭೦॥
ಕೃತಸುಕೃತೈಃ ಸಂದೃಶ್ಯಾ ಮನ್ದಸ್ಮಿತಮಧುರವದನಪದ್ಮಶ್ರೀಃ ।
ಮುನಿನಾರದಾದಿಪರಿಷತ್ತತ್ತ್ವೋಪಕ್ರಮವಿಚಕ್ಷಣಾ ವಾಣೀ ॥ ೧೭೧॥
ಕವಿವಾಗ್ವಾಸನ್ತೀನಾಂ ವಸನ್ತಲಕ್ಷ್ಮೀರ್ವಿಧಾತೃದಯಿತಾ ನಃ ।
ಪರಮಾಂ ಮುದಂ ವಿಧತ್ತೇ ಕಾಲೇ ಕಾಲೇ ಮಹಾಭೂತ್ಯೈ ॥ ೧೭೨॥
ಕವಿತಾರಸಪರಿಮಲಿತಂ ಕರೋತಿ ವದನಂ ನತಾನಾಂ ಯಾ ।
ಸ್ತೋತುಂ ತಾಂ ಮೇ ಹ್ಯಾರಾತ್ ಸಾ ದೇವೀ ಸುಪ್ರಸನ್ನಾಸ್ತು ॥ ೧೭೩॥
ಯಸ್ಯಾಃ ಪ್ರಸಾದಭೂಮ್ನಾ ನಾಕಿಗಣಾಃ ಸತ್ತ್ವಸಂಪನ್ನಾಃ ।
ಐನ್ದ್ರೀಂ ಶ್ರಿಯಮಪಿ ಮಾನ್ಯಾಂ ಪಶ್ಯನ್ತಿ ಕ್ಷಪಿತಶತ್ರುಭಯಪೀಡಾಮ್ ॥ ೧೭೪॥
ಮಾನ್ಯಂ ವಿಧಾತೃಲೋಕೇ ತತ್ತೇಜೋ ಭಾತಿ ಸರ್ವಸುರವನ್ದ್ಯಮ್ ।
ಬ್ರಹ್ಮಾಣ್ಡಮಣ್ಡಲಮಿದಂ ಯದ್ರೂಪಂ ಯತ್ರ ಚಾಕ್ಷರಗತಿಶ್ಚ ॥ ೧೭೫॥
ಜನನಿ ತರಙ್ಗಯ ನಯನೇ ಮಯಿ ದೀನೇ ತೇ ದಯಾಸ್ನಿಗ್ಧೇ ।
ತೇನ ವಯಂ ಕೃತಾರ್ಥಾ ನಾತಃ ಪರಮಸ್ತಿಃ ನಃ ಪ್ರಾರ್ಥ್ಯಮ್ ॥ ೧೭೬॥
ವಾಣಿ ವಿಧಾತುಃ ಕಾನ್ತೇ ಸ್ತೋತುಂ ತ್ವಾಮಾದರೇಣ ಕಿಂ ವಾಚ್ಯಮ್ ।
ಭಾಸಿ ತ್ವಮೇವ ಪರಮಂ ದೈವತಮಿತ್ಯೇವ ಜಾನಾಮಿ ॥ ೧೭೭॥
ಕಬಲಿತತಮೋವಿಲಾಸಂ ತೇಜಸ್ತನ್ಮನ್ಮಹೇ ಮಹೋದಾರಮ್ ।
ಫಲಿತಸುಮನೋಽಭಿಲಾಷಂ ವಾಣೀರೂಪಂ ವಿಪಞ್ಚಿಕೋಲ್ಲಸಿತಮ್ ॥ ೧೭೮॥
ಪದ್ಮಸನಸುಕೃತಕಲಾಪರಿಪಾಕೋದಯಮಪಾಸ್ತನತದೋಷಮ್ ।
ಸರಸಜ್ಞಾನಕವಿತ್ವಾದ್ಯನನ್ತಸುಕೃತಂ ವಿರಾಜತೇ ತೇಜಃ ॥ ೧೭೯॥
ನಿಜನಾಥವದನಸಿಂಹಾಸನಮಾರೂಢಾಮುಪಾಸ್ಮಹೇ ವಾಣೀಮ್ ।
ಯಾ ಕೃತ್ರಿಮವಾಗ್ಗುಮ್ಫೈರ್ವಿರಚಿತಕೇಲಿರ್ಧಿನೋತಿ ವಿಧಿಮಾದ್ಯಮ್ ॥ ೧೮೦॥
ಸುಜನಾನನ್ದಕರೀ ಸಾ ಜನಯನ್ತೀ ಸರ್ವಸಂಪದಂ ಧಾತುಃ ।
ಭಕ್ತೇಷು ತಾಂ ನಯನ್ತೀಮನ್ವಹಮಹಮಾದ್ರಿಯೇ ಗಿರಾಂ ದೇವೀಮ್ ॥ ೧೮೧॥
ಕರುಣಾಕಟಾಕ್ಷಲಹರೀ ಕಾಮಾಯಾಸ್ತು ಪ್ರಕಾಮಕೃತರಕ್ಷಾ ।
ವಾಣ್ಯಾ ವಿಧಾತೃಮಾನ್ಯಾ ಸತ್ಸುಖದಾನೇ ದಿಶಿ ಖ್ಯಾತಾ ॥ ೧೮೨॥
ವಿಸರೋ ಮಹೋತ್ಸವಾನಾಂ ವಿರಿಞ್ಚಿನಯನಾವಲೇರಿಯಂ ಮಾತಾ ।
ಪ್ರಿಯಕಾರ್ಯಸಿದ್ಧಿದಾತ್ರೀ ಜಗತೀರಕ್ಷಾಧುರಂಧರಾ ಜಯತಿ ॥ ೧೮೩॥
ವಿಬುಧಾಭಿಗಮ್ಯರೂಪಾ ಹಂಸಾವಲಿಸೇವಿತಾ ಗಿರಾಂ ದೇವೀ ।
ಗಙ್ಗೇವ ಕನತಿ ಕಾಲೇ ಪರಿಕಮ್ಪಿತಶಿವಜಟಾಕೋಟಿಃ ॥ ೧೮೪॥
ನೌಕಾಂ ಭವಾಮ್ಬುರಾಶೇರಜ್ಞಾನಧ್ವಾನ್ತಚನ್ದ್ರಿಕಾಂ ವಾಣೀಮ್ ।
ಕಲಯೇ ಮನಸಿ ಸದಾಹಂ ಶ್ರುತಿಪಞ್ಜರಶಾರಿಕಾಂ ದೇವೀಮ್ ॥ ೧೮೫॥
ಭವತಾಪಾರಣ್ಯತಲೇ ಜಹ್ನುಸುತಾ ಶಾರದಾ ದೇವೀ ।
ಜ್ಞಾನಾನನ್ದಮಯೀ ನಃ ಸಂಪತ್ಸಿದ್ಧ್ಯೈ ಪ್ರತಿಕ್ಷಣಂ ಜಯತು ॥ ೧೮೬॥
ಮತ್ತಗಜಮಾನ್ಯಗಮನಾ ಮಧುರಾಲಾಪಾ ಚ ಮಾನ್ಯಚರಿತಾ ಸಾ ।
ಮನ್ದಸ್ಮೇರಮುಖಾಬ್ಜಾ ವಾಣೀ ಮಮ ಹೃದಯಸಾರಸೇ ಲಸತು ॥ ೧೮೭॥
ರಕ್ಷಣಚಣೌ ಚ ವಾಣ್ಯಾಃ ಪಾದೌ ವನ್ದೇ ಮನೋಜ್ಞಮಣಿನಾದೌ ।
ಯತ್ಸೇವನೇನ ಧನ್ಯಾಃ ಪುರುಹೂತಾದ್ಯಾ ದಿಶಾಂ ನಾಥಾಃ ॥ ೧೮೮॥
ಧಾತುರ್ಧೈರ್ಯಕೃಪಾಣೀ ವಾಣೀ ಸುರವೃಕ್ಷಕುಸುಮಮೃದುವೇಣೀ ।
ಶುಕವಾಣೀ ನುತವಾಣೀ ಕವಿಕುಲಮೋದಾಯ ಜಯತಿ ಮೃದುವಾಣೀ ॥ ೧೮೯॥
ಕಲ್ಯಾಣೈಕನಿಕೇತನಮಸ್ಯಾ ರೂಪಂ ಸದಾ ಸ್ಫುರತು ಚಿತ್ತೇ ।
ಮಾನಸಕಾಲುಷ್ಯಹರಂ ಮಧುಮಥನಶಿವಾದಿಬಹುಮತೋತ್ಕರ್ಷಮ್ ॥ ೧೯೦॥
ಮುನಿಜನಮಾನಸರತ್ನಂ ಚಿರತ್ನಮೇತದ್ವಿಧಾತೃಸುಕೃತಕಲಾ ।
ವಿನತಜನಲೋಚನಶ್ರೀಕರ್ಪೂರಕಲಾ ಪರಾ ಜಯತಿ ॥ ೧೯೧॥
ಧೃತಸುಮಮಧುಪಕ್ರೀಡಾಸ್ಥಾನಾಯಿತಕೇಶಭಾರಾಯೈ ।
ನಮ ಉಕ್ತಿರಸ್ತು ಮಾತ್ರೇ ವಾಗ್ಜಿತಪೀಯೂಷಧಾರಾಯೈ ॥ ೧೯೨॥
ಬಾಲಕುರಙ್ಗವಿಲೋಚನಧಾಟೀರಕ್ಷಿತಸುರಾದಿಮನುಜಾನಾಮ್ ।
ನಯನಯುಗಾಸೇವ್ಯಂ ತದ್ಭಾತೀಹ ಧರಾತಲೇ ತೇಜಃ ॥ ೧೯೩॥
ಕುಶಲವಿಧಯೇ ತದಸ್ತು ಶ್ರುತಿಪಾಠರತಾದೃತಾತ್ಮಬಹುಕೇಲಿಃ ।
ಕಬಲಿತಪದನತದೈನ್ಯಂ ತರುಣಾಮ್ಬುಜಲೋಚನಂ ತೇಜಃ ॥ ೧೯೪॥
ಬಾಲಮರಾಲೀಗತ್ಯೈ ಸುರಗಿರಿಕನ್ಯಾದಿಮಹಿತಕಲಗೀತ್ಯೈ ।
ವಿರಚಿತನಾನಾನೀತ್ಯೈ ಚೇತೋ ಮೇ ಸ್ಪೃಹಯತೇ ಬಹುಲಕೀರ್ತ್ಯೈ ॥ ೧೯೫॥
ವಿನಮದಮರೇಶಸುದತೀಕಚಸುಮಮಕರನ್ದಧಾರಯಾ ಸ್ನಿಗ್ಧಮ್ ।
ತವ ಪಾದಪದ್ಮಮೇತತ್ ಕದಾ ನು ಮಮ ಮೂರ್ಧ್ನಿ ಭೂಷಣಂ ಜನನಿ ॥ ೧೯೬॥
ಕಮಲಜಪರತನ್ತ್ರಂ ತದ್ಗತತನ್ದ್ರಂ ವಸ್ತು ನಿಸ್ತುಲಮುಪಾಸೇ ।
ತೇನೈವಾಹಂ ಧನ್ಯೋ ಮದ್ವಂಶ್ಯಾ ನಿರಸಿತಾತ್ಮತಾಪಭರಾಃ ॥ ೧೯೭॥
ಜ್ಞಾನಾಮೃತಸಂಧಾತ್ರೀ ಭವಾಬ್ಧಿಸಂತರಣಪೋತ್ರನಾಮಾದಿಃ ।
ವಾಣೀ ವಾಚಾಂ ಲಹರೀಮವನ್ಧ್ಯಯನ್ತೀ ಸುರಾದಿನುತಚರಿತಾ ॥ ೧೯೮॥
ಕಾರುಣ್ಯಪೂರ್ಣಮೇತದ್ ವಾಣೀರೂಪಂ ಸದಾ ಕಲಯೇ ।
ಯದ್ಭಜನಾದ್ ದೇವಾನಾಮಪಿ ಸಂವಿದ್ ಭಾತಿ ಕಾರ್ಯಕಾಲೇಷು ॥ ೧೯೯॥
ಧೀಪದ್ಮಪೀಠಮಾಸ್ತೇ ಸಾ ವಾಣೀ ಕಾಙ್ಕ್ಷಿತಾನಿ ಕಲಯನ್ತೀ ।
ಯಾ ಘನಕೃಪಾಸ್ವರೂಪಾ ಸಂಕೀರ್ತ್ಯಾ ಸರ್ವದೇವನುತಾ ॥ ೨೦೦॥
ತವ ಪಾದಪದ್ಮವಿಸೃಮರಕಾನ್ತಿಝರೀಂ ಮನಸಿ ಕಲಯಂಸ್ತು ।
ನಿರಸಿತನರಕಾದಿಭಯೋ ವಿರಾಜತೇ ನಾಕಿಸದಸಿ ಸುರಮಾನ್ಯಃ ॥ ೨೦೧॥
ಕುಚಯುಗಲನಮ್ರಗಾತ್ರಂ ಪವಿತ್ರಮೇತದ್ ಭಜೇ ತೇಜಃ ।
ಧಾತುರಪಿ ಸರ್ವದೇವೈರ್ಯನ್ನಿರ್ದಿಷ್ಟಂ ಹು ಭದ್ರಾಯ ॥ ೨೦೨॥
ಕೃತನತಪದವಾಗ್ಧಾಟೀ ಚೇಟೀಭೂತಾಮರೇಶಮಹಿಷೀ ನಃ ।
ಕಟಿಕೃತಮನೋಜ್ಞಶಾಟೀ ಪಾಟೀರರಸಾರ್ದ್ರನೈಜತನುಕೋಟೀ ॥ ೨೦೩॥
ಪದ್ಮಭವಪುಣ್ಯಕೋಟೀ ಹರ್ಷಿತಕವಿಬೃನ್ದಸೂಕ್ತಿರಸಧಾಟೀ ।
ಮುಖಲಸಿತಸರಸವಾಟೀ ವಿಲಸತು ಮಮ ಮಾನಸೇ ಕೃಪಾಕೋಟೀ ॥ ೨೦೪॥
ಜ್ಞಾನಪರಾಕ್ರಮಕಲಿಕಾ ದಿಶಿ ದಿಶಿ ಕಿನ್ನರಸುಗೀತನಿಜಯಶಸಃ ।
ಧನ್ಯಾ ಭಾನ್ತಿ ಹಿ ಮನುಜಾಃ ಯದ್ವೀಕ್ಷಾಲವವಿಶೇಷತಃ ಕಾಲೇ ॥ ೨೦೫॥
ಸುರಜನಪಾಲನದಕ್ಷಾ ಪ್ರಶಾನ್ತವೀಕ್ಷಾ ನಿರಸ್ತರಿಪುಪಕ್ಷಾ ।
ಮೋಕ್ಷಾರ್ಥಿಭಿಃ ಶ್ರಿತಾ ಸಾ ಲಾಕ್ಷಾರಸಲಸಿತಪಾದಭಾಗ್ ಭಾತಿ ॥ ೨೦೬॥
ಕುಙ್ಕುಮಭರರುಚಿರಾಙ್ಗೀ ಭಾತಿ ಕೃಶಾಙ್ಗೀ ಗಿರಾಂ ದೇವೀ ।
ಧಾತುರಪಿ ಜ್ಞಾನಪ್ರದಮಸ್ಯಾ ರೂಪಂ ವದನ್ತಿ ವಿಬುಧೇಶಾಃ ॥ ೨೦೭॥
ವಾಣಿ ನತಿಮಮ್ಬ ನಿತ್ಯಂ ಕರವಾಣಿ ಹಿ ಚಿತ್ಸುಖಾವಾಪ್ತ್ಯೈ ।
ತಾದೃಕ್ತ್ವದೀಯಕರುಣಾವೀಕ್ಷಣತೋ ಗೀಷ್ಪತಿಶ್ಚ ಸುರಮಾನ್ಯಃ ॥ ೨೦೮॥
ಕಲ್ಯಾಮಿ ನತಿಮನನ್ತಾಂ ಕಾಲೇ ಕಾಲೇ ಶುಭಪ್ರಾಪ್ತ್ಯೈ ।
ಧಾತುಃ ಸುಕೃತೋಲ್ಲಾಸಂ ಕರಧೃತವೀಣಾದಿಕಂ ಚ ಯದ್ರೂಪಮ್ ॥ ೨೦೯॥
ಕಮಲಾಸನದಯಿತಾ ಸಾ ಲಸತು ಪುರೋಽಸ್ಮಾಕಮಾದರಕೃತಶ್ರೀಃ ।
ಯತ್ಪ್ರಣಮನಾಜ್ಜನಾನಾಂ ಕವಿತೋನ್ಮೇಷಃ ಸದೀಡಿತೋ ಭವತಿ ॥ ೨೧೦॥
ಪರಸಂವಿದಾತ್ಮಿಕಾ ಸಾ ಮಹಿಷೀ ಧಾತುಃ ಕಲಾವತೀ ವಾಣೀ ।
ಶಿಶಿರೀಕರೋತಿ ತಪ್ತಾನ್ ಕರುಣಾರಸದಿಗ್ಧನೇತ್ರಪಾಲ್ಯಾ ನಃ ॥ ೨೧೧॥
ಧಾತೃಮನೋರಥಪಾತ್ರಂ ಸಂತಪ್ತಸ್ವರ್ಣಕಾಮ್ಯನಿಜಗಾತ್ರಮ್ ।
ಆಶ್ರಿತಕಮಲಜಗೋತ್ರಂ ರಕ್ಷಿತನತಬಾಹುಚ್ಛಾತ್ರಮ್ ॥ ೨೧೨॥
ಕವಿಕುಲಜಿಹ್ವಾಲೋಲಂ ಪಿತಾಮಹಾದೃತಮನೋಜ್ಞನಿಜಲೀಲಮ್ ।
ನಿರಸಿತನತದುಷ್ಕಾಲಂ ವನ್ದೇ ತೇಜಃ ಸದಾಲಿನುತಶೀಲಮ್ ॥ ೨೧೩॥
ಮನ್ದಾನಾಮಪಿ ಮಞ್ಜುಲಕವಿತ್ವರಸದಾಯಿನೀ ಜನನೀ ।
ಕಾಪಿ ಕರುಣಾಮಯೀ ಸಾ ಲಸತು ಪುರಸ್ತಾತ್ ಸದಾಸ್ಮಾಕಮ್ ॥ ೨೧೪॥
ನಿಸ್ತುಲಪದಸಂಪ್ರಾಪ್ತ್ಯೈ ಭೂಯೋ ಭೂಯೋ ನಮಾಂಸಿ ತೇ ವಾಣಿ ।
ದೀಪಕಲಾಮಯಿ ಚಾನ್ತಃಸ್ಮರಣಂ ಧಾತುಃ ಕುಟುಮ್ಬಿನ್ಯೈ ॥ ೨೧೫॥
ಮಾಯಾನಿರಾಸಕಾಮೋ ವನ್ದೇ ವಾಣ್ಯಾಃ ಪದಾಮ್ಭೋಜಮ್ ।
ಸಿದ್ಧಮನೋರಥಶತಕಾ ಯದ್ಭಜನೇನಾರ್ಥಿನಃ ಕಾಲೇ ॥ ೨೧೬॥
ಸತತಂ ಬದ್ಧಾಞ್ಜಲಿಪುಟುಮುಪಾಸ್ಮಹೇ ತಚ್ಛುಭಪ್ರದಂ ತೇಜಃ ।
ಯತ್ಕಮಲಜನಯನಾನಾಂ ಪ್ರಮೋದಪೀಯೂಷಲಹರಿಕಾಮೋದಮ್ ॥ ೨೧೭॥
ದಿವಿ ವಾ ಭುವಿ ದಿಕ್ಷು ಜಲೇ ವಹ್ನೌ ವಾ ಸರ್ವತೋ ವಾಣಿ ।
ಜನ್ತೂನಾಂ ಕಿಲ ರಕ್ಷಾ ತ್ವಧೀನಾ ಕೀರ್ತ್ಯತೇ ವಿಬುಧೈಃ ॥ ೨೧೮॥
ಭಾರತಿ ಭವತಾಪಾರ್ತಾನ್ ಪಾಹಿ ಕಟಾಕ್ಷಾಙ್ಕುರೈಃ ಶೀತೈಃ ।
ಪರಮನನ್ದವಿಧಾತೃನ್ ಯಾನೇವ ಸ್ತೌತಿ ಪದ್ಮವಾಸೋಽಪಿ ॥ ೨೧೯॥
ಕುಲದೈವತಮಸ್ಮಾಕಂ ತತ್ತೇಜಃ ಕುಟಿಲಕುನ್ತಲಂ ಕಿಮಪಿ ।
ಕರಧೃತಪುಸ್ತಕವೀಣಂ ಕಲಯೇ ಕಾಮಾಗಮೋದಯಂ ಧಾತುಃ ॥ ೨೨೦॥
ಪರಮಾನನ್ದಧನಂ ತದ್ಧಾತುರಪಿ ಬ್ರಹ್ಮತತ್ತ್ವರಸದಾಯಿ ।
ಆಬ್ರಹ್ಮಕೀಟನೃತ್ಯತ್ಸ್ವವೈಭವಂ ಜಯತಿ ಶಾರದಾರೂಪಮ್ ॥ ೨೨೧॥
ವಿಬುಧಜನಮೋದಜನನೀ ಜನನೀ ನಃ ಸಾ ವಿಧೇಃ ಪತ್ನೀ ।
ಮೃದುಸಂಚಾರವಿಲಾಸೈಃ ಶುಭಂಕರೀ ಭವತು ಸಂತತಂ ಕಾಲೇ ॥ ೨೨೨॥
ಸರಸಮನೋಜ್ಞವಿಲಾಸೈಃ ಸ್ವವಶೇ ಕೃತ್ವಾ ಮನೋ ವಿಧೇರ್ವಾಣೀ ।
ಸೃಷ್ಟ್ಯಾದೌ ಶುಭಲೇಖಾಕರೀ ನೃಣಾಂ ಮಸ್ತಕೇ ಮಾತಾ ॥ ೨೨೩॥
ಪ್ರಕೃತಿಮೃದುಲಂ ಪದಾಬ್ಜಂ ವಾಣೀದೇವ್ಯಾ ಮದೀಯಚಿತ್ತತಟೇ ।
ಕಾಮಾದಿಸೂಚಿನಿಚಿತೇ ಕಥಂ ಸ್ಥಿತಿಂ ಪ್ರಾಪ್ನುಯಾತ್ ಕಾಲೇ ॥ ೨೨೪॥
ನಿಖಿಲಚರಾಚರರಕ್ಷಾಂ ವಿತನ್ವತೀ ಪದ್ಮಜಪ್ರಿಯಾ ದೇವೀ ।
ಮಮ ಕುಲದೈವತಮೇಷಾ ಜಯತಿ ಸದಾರಾಧ್ಯಮಾನ್ಯಪದಕಮಲಾ ॥ ೨೨೫॥
ಕುಶಲಸಮೃದ್ಧ್ಯೈ ಭೂಯಾದಮ್ಬಾ ಸಾ ಶಾರದಾ ದೇವೀ ।
ಜನಿರಕ್ಷಣಾದಿಲೀಲಾವಿಹಾರಭಾಙ್ನಿಗಮಸೌಧದೀಪಕಲಾ ॥ ೨೨೬॥
ವಾಚಾಲಯತಿ ಕಟಾಕ್ಷೈರ್ಜಡಂ ಶಿಲಾಮಲ್ಪಜನ್ತುಂ ವಾ ।
ಯಾ ವಾಣೀ ಸಾ ಶರಣಂ ಭವೇ ಭವೇ ಪ್ರಾರ್ಥ್ಯೇ ಶ್ರಿಯಃಪ್ರಾಪ್ತ್ಯೈ ॥ ೨೨೭॥
ಯದಿ ಹಿ ಪ್ರಸಾದಭೂಮಾ ವಾಣ್ಯಾಸ್ತತ್ರೈವ ಸಾ ಹರೇಃ ಕಾನ್ತಾ ।
ಪರಿಲಸಿತ ( ... incomplete ... ) ನಿತ್ಯವಾಸರತಾ ॥ ೨೨೮॥
ಸನಕಸನನ್ದನವನ್ದ್ಯೇ ಕಾನ್ತೇ ಪರಮೇಷ್ಟಿನಃ ಶ್ರಿಯಃಪ್ರಾಪ್ತ್ಯೈ ।
ವಾಣಿ ತ್ವಾಂ ನೌಮಿ ಸದಾ ಭವ ಪ್ರಸನ್ನಾ ವಿಪ`ನ್ಚಿಲಸಿತಕರೇ ॥ ೨೨೯॥
ವಾಣಿ ವಿಪಞ್ಚೀಕಲರವರಸಿಕೇ ಗನ್ಧರ್ವಯೋಷಿದಭಿವನ್ದ್ಯೇ ।
ತವ ಚರಣಂ ಮಮ ಶರಣಂ ಭವವಾರಿಧಿಸುತೇಮಮ್ಬ ಕಲಯಾಮಿ ॥ ೨೩೦॥
ವಾಣಿ ಕದಾಹಂ ಲಪ್ಸ್ಯೇ ಚರಣಾಮ್ಭೋಜಂ ತ್ವದೀಯಮಿದಮಾರಾತ್ ।
ನಿಜಮಣಿನೂಪುರನಾದಸ್ಪೃಹಣೀಯವಚಃಪದಂ ಕಲಿತಭಕ್ತೇಃ ॥ ೨೩೧॥
ಶ್ರುತಿಪೂತಮುಖಮನೋಹರಲಾವಣ್ಯಕುಸುಮಮೃದುಶರೀರೇಯಮ್ ।
ನಿಜಕರುಣಾಪಾಙ್ಗಸುಧಾಪೂರಣಕೃತವೈಭವಾ ಭಾತಿ ॥ ೨೩೨॥
ಪರಿಸರನತವಿಬುಧಾಲೀಕಿರೀಟಮಣಿಕಾನ್ತಿವಲ್ಲರೀವಿಸರೈಃ ।
ಕೃತನೀರಾಜನವಿಧಿ ತೇ ಮಮ ತು ಶಿರೋಭೂಷಣಂ ಹಿ ಪದಯುಗಲಮ್ ॥ ೨೩೩॥
ಪ್ರೇಮವತೀ ವಿಧಿಭವನೇ ಹಂಸಗತಿರ್ಹಂಸಯಾನಕೃತಚಾರಾ ।
ವಾಚಾಮಕೃತ್ರಿಮಾನಾಂ ಸ್ಥೈರ್ಯವಿಧಾತ್ರೀ ಮಹೇಶಾನೀ ॥ ೨೩೪॥
ಆನನ್ದರೂಪಕೋಟೀಮಮ್ಬಾಂ ತಾಂ ಸಂತತಂ ಕಲಯೇ ।
ಸಂವಿದ್ರೂಪಾ ಯಾ ಕಿಲ ವಿಧಾತೃಗೇಹೇ ಶ್ರುತಿಶ್ರಿಯಂ ಧತ್ತೇ ॥ ೨೩೫॥
ಕಮಲಜನೇತ್ರಮಹೋತ್ಸವತಾರುಣ್ಯಶ್ರೀರ್ನಿರಸ್ತನತಶತ್ರುಃ ।
ಲಲಿತಲಿಕುಚಾಭಕುಚಭರಯುಗಲಾ ದೃಗ್ವಿಜಿತಹರಿಣಸಂದೋಹಾ ॥ ೨೩೬॥
ಕಾರುಣ್ಯಪೂರ್ಣನಯನಾ ಕಲಿಕಲ್ಮಷನಾಶಿನೀ ಚ ಸಾ ವಾಣೀ ।
ಮುಖಜಿತಶಾರದಕಮಲಾ ವಕ್ತ್ರಾಮ್ಭೋಜೇ ಸದಾ ಸ್ಫುರತು ಮಾತಾ ॥ ೨೩೭॥
ಕಮಲಸುಷಮಾನಿವಾಸಸ್ಥಾನಕಟಾಕ್ಷಂ ಚಿರಾಯ ಕೃತರಕ್ಷಮ್ ।
ರಕ್ಷೋಗಣಭೀತಿಕರಂ ತೇಜೋ ಭಾತಿ ಪ್ರಕಾಮಮಿಹ ಮನಸಿ ॥ ೨೩೮॥
ಕಮಲಜತಪಃಫಲಂ ತನ್ಮುನಿಜನಹೃದಯಾಬ್ಜನಿತ್ಯಕೃತನೃತ್ತಮ್ ।
ಕರುಣಾಲೋಲಾಪಾಙ್ಗಂ ತತ್ತೇಜೋ ಭಾತು ಮಮ ಮುಖಾಮ್ಭೋಜೇ ॥ ೨೩೯॥
ಭಾಗ್ಯಂ ವಿಧಿನಯನಾನಾಂ ಸಂಸೃತಿತಾಪಜ್ವರಾದಿತಪ್ತಾನಾಮ್ ।
ಭೇಷಜಮೇತದ್ರೂಪಂ ಕಲಾಗ್ರಹಂ ಮನ್ಯತೇ ದೇವ್ಯಾಃ ॥ ೨೪೦॥
ಜನನಿ ಕದಾ ವಾ ನೇಷ್ಯಾಮ್ಯಹಮಾರಾದರ್ಚಿತತ್ವದೀಯಪದಃ ।
ನಿಮಿಷಮಿವ ಹನ್ತ ದಿವಸಾನ್ ದೃಷ್ಟ್ವಾ ತ್ವಾಮಾದರೇಣ ಕಲ್ಯಾಣೀಮ್ ॥ ೨೪೧॥
ಮಞ್ಜುಲಕವಿತಾಸಂತತಿಬೀಜಾಙ್ಕುರದಾಯಿಸಾರಸಾಲೋಕಾ ।
ಜನನಿ ತವಾಪಾಙ್ಗಶ್ರೀರ್ಜಯತಿ ಜಗತ್ತ್ರಾಣಕಲಿತದೀಕ್ಷೇಯಮ್ ॥ ೨೪೨॥
ಅಮ್ಬ ತವಾಪಾಙ್ಗಶ್ರೀರಪಾಙ್ಗಕೇಲೀಶತಾನಿ ಜನಯನ್ತೀ ।
ಧಾತುರ್ಹೃದಯೇ ಜಯತಿ ವ್ರೀಡಾಮದಮೋದಕಾಮಸಾರಕರೀ ॥ ೨೪೩॥
ಸರ್ವಜಗನ್ನುತವಿಭವೇ ಸಂತತಮಪಿ ವಾಞ್ಛಿತಪ್ರದೇ ಮಾತಃ ।
ಅಧುನಾ ತ್ವಮೇವ ಶರಣಂ ತೇನಾಹಂ ಪ್ರಾಪ್ತಜನ್ಮಸಾಫಲ್ಯಃ ॥ ೨೪೪॥
ಶಾನ್ತಿರಸಸರ್ವಶೇವಧಿಮಮ್ಬಾಂ ಸೇವೇ ಮನೋರಥಾವಾಪ್ತ್ಯೈ ।
ಯಾಮಾರಾಧ್ಯ ಸುರೇಶಾಃ ಸ್ವಪದಂ ಪ್ರಾಪುರ್ಹಿ ತದ್ರಕ್ಷಮ್ ॥ ೨೪೫॥
ಕುಲಜಾ ಭಾರ್ಯಾ ಕೀರ್ತಿರ್ದಾನಂ ಪುತ್ರಾದಯೋ ಯೇ ಚ ।
ಸಿಧ್ಯನ್ತಿ ತೇ ಹಿ ಸರ್ವೇ ಯಸ್ಮೈ ವಾಣೀ ಪ್ರಸನ್ನಾ ಸಾ ॥ ೨೪೬॥
ಕಾ ಕ್ಷತಿರಮ್ಬ ಕಟಾಕ್ಷೇ ನ್ಯಸ್ತೇ ಸತಿ ಮಯಿ ವಿರಿಞ್ಚಿವರಪತ್ನಿ ।
ಗಙ್ಗಾಶುನಕನ್ಯಾಯಾನ್ಮಹತೀ ಮಮ ವೃದ್ಧಿರೀರಿತಾ ನಿಪುಣೈಃ ॥ ೨೪೭॥
ಅವಿರಲದಯಾರ್ದ್ರಲೋಚನಸೇವನಯಾ ಧೂತತಾಪಾ ಹಿ ।
ಪ್ರತಿಕಲ್ಪಂ ಸುರಸಂಘಾಸ್ತ್ವಾಮಭಜನ್ ನುತಿನತಿಪ್ರಮುಖೈಃ ॥ ೨೪೮॥
ದೀನಾನಾಂ ಚ ಕವೀನಾಂ ವಾಣಿ ತ್ವಂ ಕಾಮಧೇನುರಸಿ ಮಾತಃ ।
ಸಿದ್ಧಿಸ್ತೇಷಾಮತುಲಾ ಸುರಮಾನ್ಯಾ ತೇನ ಸಂಕಲಿತಾ ॥ ೨೪೯॥
ಸಕಲಜಗತಾಂ ಹಿ ಜನನೀಂ ವಾಣಿ ತ್ವಾಂ ಸಂತತಮುಪಾಸೇ ।
ಶ್ರುತಿಸುದತೀಭೂಷಾಮಣಿಮಖಿಲಾರ್ಥಪ್ರಾಪ್ತ್ಯೈ ಲೋಕೇ ॥ ೨೫೦॥
ಧಾತುಃ ಕುಟುಮ್ಬಿನೀ ತ್ವಂ ಸನ್ಮಙ್ಗಲದಾಯಿನೀ ಸ್ವಮಾಹಾತ್ಮ್ಯಾತ್ ।
ಶ್ವಶ್ರೂಶ್ವಶುರಮುಖಾದಿಪ್ರೀಣನಚತುರಾ ಚ ಭಾಸಿ ನಿಗಮಕಲಾ ॥ ೨೫೧॥
ಮುಖವಿಜಿತಚನ್ದ್ರಮಣ್ಡಲಮಿದಮಮ್ಭೋರುಹವಿಲೋಚನಂ ತೇಜಃ ।
ಧ್ಯಾನೇ ಜಪೇ ಚ ಸುದೃಶಾಂ ಚಕಾಸ್ತಿ ಹೃದಯೇ ಕವೀಶ್ವರಾಣಾಂ ಚ ॥ ೨೫೨॥
ಯಸ್ಮೈ ಪ್ರಸನ್ನವದನಾ ಸಾ ವಾಣೀ ಲೋಕಮಾತಾ ಹಿ ।
ತಸ್ಯ ಸಹಸಾ ಸಹಸ್ರಂ ಲಾಭಃ ಸ್ಯಾದ್ ಬಾನ್ಧವಾಃ ಸುಖಿನಃ ॥ ೨೫೩॥
ತಾಪಹರರಸವಿವರ್ಷಣಧೃತಕುತುಕಾ ಕಾಪಿ ನೀಲನಲಿನರುಚಿಃ ।
ಕಾದಮ್ಬಿನೀ ಪುರಸ್ತಾದಾಸ್ತಾಂ ನಃ ಸಂತತಂ ಜನನೀ ॥ ೨೫೪॥
ಪದ್ಮಾಕ್ಷನಾಭಿಪದ್ಮಜದಯಿತೇ ಲೋಕಾಮ್ಬ ಶಾರದೇತಿ ಸದಾ ।
ತವ ನಾಮಾನಿ ಜಪನ್ ಸನ್ ತ್ವದ್ದಾಸೋಽಹಂ ತು ಮುಕ್ತಯೇ ಸಿದ್ಧಃ ॥ ೨೫೫॥
ಅಮ್ಬಾಪ್ರಸಾದಭೂಮ್ನಾ ನರೋ ಹಿ ಭುಙ್ಕ್ತೇ ಸುಖಾನಿ ವಿವಿಧಾನಿ ।
ಸ್ಮರೇ ವಿಜಯಃ ಕವಿತಾಧನಲಕ್ಷ್ಮ್ಯಾದೇರ್ವಿಲಾಸಲೀಲಾದಿಃ ॥ ೨೫೬॥
ತೀರಂ ಸಂಸೃತಿಜಲಧೇಃ ಪೂರಂ ಕಮಲಜವಿಲೋಚನಪ್ರೀತೇಃ ।
ಸಾರಂ ನಿಗಮಾನ್ತಾನಾಂ ದೂರಂ ದುರ್ಜನತತೇರ್ಹಿ ತತ್ತೇಜಃ ॥ ೨೫೭॥
ಅಪಿ ದಾಸಕುಲೇ ಜಾತಃ ಕಟಾಕ್ಷಭೂಮ್ನಾ ವಿಧಾತೃಮುಖಪತ್ನ್ಯಾಃ ।
ಜ್ಞಾನೀ ಭವವಾರಾಶಿಂ ತರತಿ ಚ ರಾಜ್ಯಶ್ರಿಯಂ ಭುಙ್ಕ್ತೇ ॥ ೨೫೮॥
ಸತ್ಕೃತದೇಶಿಕಪಾದಾಮ್ಬುಜಯುಗಲೋಽಹಂ ನಮಾಮಿ ವಾಣಿ ತ್ವಾಮ್ ।
ತ್ವಂ ತು ಗುರುಮೂರ್ತಿರುಕ್ತಾ ಕಾಲೇ ಕಾಲೇ ಚ ಕಾಙ್ಕ್ಷಿತವಿಧಾತ್ರೀ ॥ ೨೫೯॥
ಜ್ಞಾನಾನನ್ದಮುಖಾದೀನಪವರ್ಗಂ ವಾ ದದಾಸಿ ಭಕ್ತೇಭ್ಯಃ ।
ಅತ ಏವಾನನ್ಯಗತಿಸ್ತ್ವಾಂ ವಿಧಿಪತ್ನೀಂ ಪ್ರಪದ್ಯೇಽಹಮ್ ॥ ೨೬೦॥
ತ್ವಯಿ ವಿನ್ಯಸ್ತಭರಾಣಾಂ ನ ಹಿ ಚಿನ್ತಾ ಜಾಯತೇ ನೃಣಾಂ ಕಾಪಿ ।
ಪರಮಾನನ್ದಾದಿಕಲಾಸ್ಫೂರ್ತಿರ್ದಿವಿಷದ್ಗಣೇನ ಸಂಮಾನ್ಯಾ ॥ ೨೬೧॥
ಸುಮಶರಸಾಮ್ರಾಜ್ಯಕಲಾಮಙ್ಗಲವಿಧಿರೇಖಿಕಾ ವಾಣೀ ।
ಧಾತುರಪಿ ಚಿತ್ತವೃತ್ತಿಸ್ಥೈರ್ಯಂ ತ್ವನ್ಯಾದೃಶಂ ಕುರುತೇ ॥ ೨೬೨॥
ಸಾ ಧೇನುಶ್ಚಿನ್ತಾಮಣಿರಪಿ ವೃಕ್ಷಃ ಸಂಪದಾಂ ಪ್ರದಾಯಿನ್ಯಃ ।
ಅಮ್ಬ ತ್ವಮೇವ ಕಾಲೇ ಭಸಿ ಜ್ಞಾನಪ್ರದಾ ವ್ಯಪೋಹ್ಯ ತಮಃ ॥ ೨೬೩॥
ಮನಸೋ ನೈರ್ಮಲ್ಯಪ್ರದಮಸ್ಯಾಃ ಸೇವೇ ಕಟಾಕ್ಷಮಹಮಾರಾತ್ ।
ಯಃ ಕುರುತೇ ಜನತಾಂ ತಾಂ ಹತಮಾಯಾಂ ಮಧುರಾಮಯೋಧ್ಯಾಂ ಚ ॥ ೨೬೪॥
ಶರದಿವ ಹಂಸಕುಲೇಡ್ಯಾ ಜ್ಯೋತ್ಸ್ನೇವ ಜನಾರ್ತಿಹಾರಿಣೀ ವಾಣ್ಯಾಃ ।
ಜಯತಿ ಹಿ ಕಟಾಕ್ಷರೇಖಾ ದೀಪಕಲೇವ ಪ್ರಕಾಮಹತತಿಮಿರಾ ॥ ೨೬೫॥
ಪಙ್ಕಜಭವವದನಮಣಿಂ ಪರವಿದ್ಯಾದೇವತಾಂ ವಾಣೀಮ್ ।
ನಿತ್ಯಂ ಯಜತಾಂ ಜಪತಾಂ ನ ಹಿ ತುಲ್ಯೋಽಸ್ಮಿನ್ ಕ್ಷಮಾತಲೇ ಕಶ್ಚಿತ್ ॥ ೨೬೬॥
ವಾಣೀ ನಿಜವಾಣೀಭೀ ರಚಯತಿ ನುತಿಮಾತ್ತವೀಣಯಾ ಕಾಲೇ ।
ಧಾತುಃ ಪ್ರಸಾದಹೇತೋಃ ಪತಿವ್ರತಾಲಕ್ಷಣೈರನ್ಯೈಃ ॥ ೨೬೭॥
ಆನನ್ದಯತಿ ವಿಲಸೈರಮ್ಬಾ ಪದ್ಮಾಸನಂ ನಿಜಂ ದೇವಮ್ ।
ತೇನೈವ ತುಷ್ಟಹೃದಯಃ ಶುಭಾಕ್ಷರಾಣ್ಯಾದರಾಲ್ಲಿಖತಿ ಮೌಲೌ ॥ ೨೬೮॥
ಮಮ ಮಾನಸದುರ್ಮದಗಜಮಪಾರತಾಪಾಟವೀಷು ಧಾವನ್ತಮ್ ।
ವಿರಚಯ್ಯ ಮುದಿತಚಿತ್ತಂ ಕುರು ವಾಣಿ ತ್ವತ್ಪದಾಬ್ಜಕೃತಹಸ್ತಮ್ ॥ ೨೬೯॥
ಕಮಲಾಸನಧೈರ್ಯಮಹೀಧರಕುಲಿಶಸ್ತೇ ಕಟಾಕ್ಷ ಏವಾಯಮ್ ।
ಕವಿಕುಲಮಯೂರಕಾದಮ್ಬಿನೀವಿಲಾಸೋ ಮುದೇಽಸ್ತು ಸತತಂ ನಃ ॥ ೨೭೦॥
ಗುರುವರದನಾಮ್ಭೋಜೇ ನೃತ್ಯನ್ತೀ ಶಾರದಾ ದೇವೀ ।
ಮಧುರತರಶ್ಲೋಕನಿಭಾ ಮಣಿನೂಪುರನಿನದಸಂತತಿರ್ಭ್ತಿ ॥ ೨೭೧॥
ಕೋ ವಾ ನ ಶ್ರಯತಿ ಬುಧಃ ಶ್ರೇಯೋಽರ್ಥೀ ತಾಮಿಮಾಂ ವಾಣೀಮ್ ।
ಯಾಂ ಪಙ್ಕಜಾಕ್ಷನಾಭಿಜಸಧರ್ಮಿಣೀಮರ್ಚಯನ್ತಿ ಸುರನಾಥಾಃ ॥ ೨೭೨॥
ಮುಷಿತಪಯೋಜಮೃದಿಮ್ನಾ ಚರಣತಲೇನಾತ್ರ ಮಾನಸೇ ವಾಣೀ ।
ಪರಿಹರತು ಪಾಪರಾಶಿಂ ಸುರೌಘಸಂಮಾನಿತೇನ ಕಾಲೇ ಮೇ ॥ ೨೭೩॥
ಯಾಥಾರ್ಥ್ಯಜ್ಞಾನಕಲಾಪ್ರಾಪ್ತ್ಯೈ ತ್ವಾಂ ಶಾರದಾಂ ವನ್ದೇ ।
ಸೇವಾಫಲಂ ಪ್ರಯಚ್ಛ ಪ್ರಸೀದ ಪರಮೇಶಿ ವಲ್ಲಭೇ ಧಾತುಃ ॥ ೨೭೪॥
ನಿಗಮಾನ್ತಸಾರಮರ್ಥಂ ಬೋಧಯಸಿ ತ್ವಂ ಗುರೂನ್ ಪ್ರಕಲ್ಪ್ಯ ಭುವಿ ।
ಸೈಷಾ ಮೇ ಜ್ಞಾನಘನಾ ವಾಣೀ ನಿತ್ಯಂ ಪ್ರಸನ್ನಾಸಿ ॥ ೨೭೫॥
ಮನ್ದಾರಕುಸುಮಮದಹರಮನ್ದಸ್ಮಿತಮಧುರವದನಪಙ್ಕರುಹಾ ।
ಹೃದ್ಯತಮನಿತ್ಯಯೌವನಮಣ್ಡಿತಗಾತ್ರೀ ವಿರಾಜತೇ ವಾಣೀ ॥ ೨೭೬॥
ಸೌಭಾಗ್ಯಸೂಚಕಾಭೀ ರೇಖಾಭಿರ್ಭೂಷಿತಂ ಸೌರೈರ್ವನ್ದ್ಯಮ್ ।
ಅಮ್ಬಾಚರಣಪಯೋಜಂ ವತಂಸಯನ್ ಪ್ರಾಪ್ತಸಂಮೋದಃ ॥ ೨೭೭॥
ದ್ವಿಜಗಣಪೂಜ್ಯಂ ನಿತ್ಯಂ ನಿರಸ್ತಜಾಡ್ಯಂ ತ್ವದೀಯಪಾದಯುಗಮ್ ।
ಕ್ಷಣಮಪಿ ವಾ ಸಾಂನಿಧ್ಯಂ ಭಜತು ಮದೀಯೇ ಹೃದಿ ಸ್ವೈರಮ್ ॥ ೨೭೮॥
ನತದೇವರಾಜಮಕುಟೀಮಣಿಘೃಣಿಪರಿಚುಮ್ಬಿತಾಙ್ಘ್ರಿಕಮಲಾ ನಃ ।
ಕಮಲಾಸನಸ್ಯ ದಯಿತಾ ತನ್ಯಾದನ್ಯಾದೃಶೀ ಶ್ರಿಯಂ ಭಜತಾಮ್ ॥ ೨೭೯॥
ವಾಣೀ ಶ್ರಿತಕಾದಮ್ಬಾ ದಮ್ಭಾದಿರಿಪೂನ್ ನಿರಸ್ಯ ನಃ ಕಾಲೇ ।
ಕ್ಷೇಮಮವನ್ಯಾಂ ತನ್ಯಾತ್ ಪದೇ ಪರೇ ದೇವಸಂಘಪರಿಸೇವ್ಯೇ ॥ ೨೮೦॥
ಪಙ್ಕಜಭವಸಾಮ್ರಾಜ್ಯಸ್ಥಿರಲಕ್ಷ್ಮೀಶ್ಚಪಾಣ್ಡರತನುಶ್ರೀಃ ।
ನತಮಾನವಸುಕೃತಕಲಾಪರಿಪಾಟೀ ಭಾತಿ ಸಕಲಗುಣಪೇಟೀ ॥ ೨೮೧॥
ಮುಖವಿಜಿತಚನ್ದ್ರಬಿಮ್ಬಾ ಸಾಮ್ಬಾ ಕಾದಮ್ಬಸೇವ್ಯಪದಕಮಲಾ ।
ಕಮಲಾಸನಗೃಹಲಕ್ಷ್ಮೀರ್ಲಕ್ಷ್ಮೀಂ ಪುಷ್ಣಾತು ಶಾರದಾ ದೇವೀ ॥ ೨೮೨॥
ಮುರಮಥನಸ್ಯೇವ ರಮಾ ಶಂಭೋರಿವ ಸಕಲಭೂಧರೇನ್ದ್ರಸುತಾ ।
ವಾಣಿ ವಿಧಾತುಃ ಸದನೇಽನುರೂಪದಾಮ್ಪತ್ಯಸಂಪದಾ ಭಾಸಿ ॥ ೨೮೩॥
ವಾಣಿ ತವ ದೇಹಕಾನ್ತ್ಯಾ ಕಟಾಕ್ಷಲಹರೀ ತು ಸಂಯುತಾ ಕಾಲೇ ।
ಧತ್ತೇ ಕಾಮಪಿ ಶೋಭಾಂ ಸುರಸ್ರವನ್ತ್ಯೇವ ಸಂಗತಾ ಯಮುನಾ ॥ ೨೮೪॥
ಮಧುರಾಸೇಚನದೃಷ್ಟ್ಯಾ ಮಾಂ ಪಾಯಾದಾಪದೋ ಮುಹುರ್ವಾಣೀ ।
ಆಶ್ರಿತತಾಪವಿಭೇತ್ರೀತ್ಯೇವಂ ಯಾಮಾಮನನ್ತಿ ಸೂರಿವರಾಃ ॥ ೨೮೫॥
ಅಜ್ಞಾತಕೋಪಪೂರಾ ಯಸ್ಯಾ ದೃಷ್ಟಿಃ ಕೃತಾದರಾ ಭಜತಾಮ್ ।
ಸೈಷಾ ವಿಹಸಿತಪೌರಂದರಲಕ್ಷ್ಮೀಂ ಸಂಪದಂ ದದ್ಯಾತ್ ॥ ೨೮೬॥
ಬಾಲಕುರಙ್ಗವಿಲೋಚನಮೀಷತ್ಸ್ಮಿತಮಧುರಮಾನನಂ ವಾಣ್ಯಾಃ ।
ಮಣಿಮಯತಾಟಙ್ಕಮಣೀವಿಲಾಸಿ ಭೂಯಾನ್ಮುದೇಽಸ್ಮಾಕಮ್ ॥ ೨೮೭॥
ಮುನಿಜನಮಾನಸಹಂಸೀಂ ಶ್ರುತಿತತಿಪಞ್ಜರಶುಕೀಂ ಮಹಾದೇವೀಮ್ ।
ನೌಮಿ ಸ್ನುಷಾಂ ರಮಾಯಾಃ ಮಾಹೇಶ್ವರಮಹಿತಸತ್ಪದಪ್ರಾಪ್ತ್ಯೈ ॥ ೨೮೮॥
ಧಾತುಃ ಸೌಧಾಙ್ಗಣಕೃತಚಙ್ಕ್ರಮಣಾಂ ಶಾರದಾಂ ನೌಮಿ ।
ಮತ್ತಮತಙ್ಗಜಗಮನಾಂ ಪರಿಪನ್ಥಿಜಯಾಯ ಸುಕೃತಿಸಂದೃಶ್ಯಾಮ್ ॥ ೨೮೯॥
ವಾಗೀಶಮುಖಾ ದೇವಾ ಯಸ್ಯಾಃ ಪ್ರಸದನಬಲದ್ಧಿ ವಿಜಯನ್ತೇ ।
ಪರಿಪಾಲಿತಭಕ್ತಗಣಾ ಯದ್ಧ್ಯಾನೋಲ್ಲಸದಪಾರಪುಲಕಾನ್ತಾಃ ॥ ೨೯೦॥
ನೈಸರ್ಗಿಕವಾಕ್ಷ್ರೇಣೀಕೇಲಿವನಮಮಲಭೂಷಣಂ ಧಾತುಃ ।
ವದನಾನಾಮಿಯಮಮ್ಬಾ ಜಯತು ಚಿರಂ ಕಾಮವರ್ಷಿಣೀ ಭಜತಾಮ್ ॥ ೨೯೧॥
ಕಲಯಾಮಿ ಹೃದಯಮೇತತ್ ಪಾದಾಬ್ಜೇ ಶಾರದಾದೇವ್ಯಾಃ ।
ಪ್ರಾಪ್ತಾರಿಷಟ್ಕವಿಜಯಂ ತತ್ತ್ವಧನಂ ಕಲಿತಶಾರದಾಧ್ಯಾನಮ್ ॥ ೨೯೨॥
ಪಾದಾರವಿನ್ದನಮನಪ್ರಭಾವಪರಿಕಲಿತದೇವಸಾರೂಪ್ಯಾಃ ।
ಪರಮಾನನ್ದನಿಮಗ್ನಾಃ ಸುಧಿಯೋ ಭಾನ್ತಿ ಕ್ಷಮಾವಲಯೇ ॥ ೨೯೩॥
ಲಲಿತವಿಧಾತೃರೂಪಂ ಪಾಲಿತಲೋಕತ್ರಯಂ ಚ ತತ್ ತೇಜಃ ।
ಸಕಲಾಗಮಶಿಖರಕಲಾಪರತತ್ತ್ವಂ ಶಾರದಾರೂಪಮ್ ॥ ೨೯೪॥
ಧ್ಯಾನೈರ್ಯೋಗೈಶ್ಚ ಜಪೈರ್ಯತ್ ಸೇವ್ಯಂ ಪರಮಮಾದಿಷ್ಟಮ್ ।
ತನ್ನಶ್ಚಕಾಸ್ತು ಹೃದಯೇ ವಿಶ್ವಜನೀನಂ ಹಿ ಭಕ್ತಾನಾಮ್ ॥ ೨೯೫॥
ಭಾಗೀರಥೀವ ವಾಣೀ ತವ ನುತಿರೂಪಾ ವಿರಾಜತೇ ಪರಮಾ ।
ಇಹ ಮಾತರ್ಯದ್ಭಜನಂ ಸರ್ವೇಷಾಂ ಸರ್ವಸಂಪದಾಂ ಹೇತುಃ ॥ ೨೯೬॥
ಸಂತತಮಧುರಾಲಾಪೈರ್ಲಾಲಿತವಿಧಿವೈಭವೈರಮೇಯಕಲೈಃ ।
ಶ್ರೇಯಃಪ್ರದಾನದೀಕ್ಷಿತಕಟಾಕ್ಷಪಾತೈರ್ಮಹಾತತ್ತ್ವೈಃ ॥ ೨೯೭॥
ಖೇಲಲ್ಲೋಲಮ್ಬಕಚೈಃ ಕುಚಭರನಮ್ರೈಃ ಪುರಂಧ್ರಿಗುಣಪೂರ್ಣೈಃ ।
ಆಶ್ರಿತಸಂವಿತ್ಪೀಠೈರಮರೇಶವಧೂಕರಾದೃತಚ್ಛತ್ರೈಃ ॥ ೨೯೮॥
ವೀಣಾಪುಸ್ತಕಹಸ್ತೈರ್ವಿಧಿಭಾಗ್ಯೈರಸ್ತು ಮಮ ತು ಸಾರೂಪ್ಯಮ್ ।
ಸಂವಿದ್ಧನೈಶ್ಚ ವಾಣೀರೂಪೈರೇತೈರ್ದಯಾಸಾರೈಃ ॥ ೨೯೯॥
ಮಾತಃ ಕಥಂ ನು ವರ್ಣ್ಯಸ್ತವ ಮಹಿಮಾ ವಾಣಿ ನಿಗಮಚಯವೇದ್ಯಃ ।
ಇತಿ ನಿಶ್ಚಿತ್ಯ ಪದಾಬ್ಜಂ ತವ ವನ್ದೇ ಮೋಕ್ಷಕಾಮೋಽಹಮ್ ॥ ೩೦೦॥
ತ್ವಾಮಮ್ಬ ಬಾಲಿಶೋಽಹಂ ತ್ವಚಮತ್ಕಾರೈರ್ಗಿರಾಂ ಗುಮ್ಭೈಃ ।
ಅಯಥಾಯಥಕ್ರಮಂ ಹಿ ಸ್ತುವನ್ನಪಿ ಪ್ರಾಪ್ತಜನ್ಮಸಾಫಲ್ಯಃ ॥ ೩೦೧॥
ಇತಿ ಶ್ರೀಶಾರದಾತ್ರಿಶತೀ ಸಮಾಪ್ತಾ
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ತ್oday
http://sanskritdocuments.org
Sharada Trishati Lyrics in Kannada PDF
% File name : shAradA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : shAradA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website