{॥ ശാരദാത്രിശതീ ॥}
ഗങ്ഗാധരമഖിവിരചിതാ ।
പരമാഭരണം ധാതുര്വദനാമ്ഭോജസ്യ ശാരദാ ദേവീ ।
യാ രാജതി ജനനീ സാ ലസതു സദാ സുപ്രസന്നാ നഃ ॥ ൧॥

സാ ശാരദാ പ്രസന്നാ രാജതി മമ മാനസേ നിത്യമ് ।
യാ ശാരദാബ്ജവദനാ ജനനീ കീര്ത്യാ ഹി സര്വലോകാനാമ് ॥ ൨॥

സംപദ് ദിവ്യാ ധാതുഃ ഖ്യാതാ സാ ശാരദാ ദേവീ ।
യദ്ഭജനം ദേവാനാമപി തത്ത്വജ്ഞാനദം വിദുര്വിബുധാഃ ॥ ൩॥

സരസകവിതാവിഭൂത്യൈ യത്പദമാരാധ്യതേ വിശേഷജ്ഞൈഃ ।
സാ ശാരദാ ശ്രിയൈ നഃ കാലേ സര്വപ്രസന്നാത്മാ ॥ ൪॥

നീലാരവിന്ദലോചനയുഗലാ സാ ശാരദാ ദേവീ ।
കരകമലകലിതവീണാ സദാ പ്രസന്നാ ശ്രിയൈഃ വഃ സ്യാത് ॥൫॥

കലയേ താമഹമനിശം ഫുല്ലാബ്ജവിലോചനാം വാണീമ് ।
യാ സൃഷ്ട്യാദൌ സാഹ്യം കലയതി ധാതുര്ജഗന്മാതാ ॥ ൬॥

യസ്യാ ലീലാലോലഃ പദ്മാസനഗോഽപി വേദപാഠരതഃ ।
താമഹമതുലാനന്ദപ്രാപ്ത്യൈ കലയേ മനഃപദ്മേ ॥ ൭॥

ബ്രഹ്മാണം താം വാണീമേകാസനഭാസുരാം ശ്രിയഃ പ്രാപ്ത്യൈ ।
ആരാദ്വിലോക്യ മാനസമാനന്ദരസം പരം ഭജതേ ॥ ൮॥

മുക്താമയേ വിമാനേ പദ്മാസനയന്ത്രികാമധ്യേ ।
ദൃശ്യാം വാണീം ദേവീം സേവേ സംതതസുഖപ്രാപ്ത്യൈ ॥ ൯॥

ഭാഗ്യാന്മമ ച കവീനാം സാ ദേവീ ദൃശ്യതാമേതി ।
വീണാപുസ്തകഹസ്താ യാ കമലാസനപുരന്ധ്രീ ഹി ॥ ൧൦॥

മാമകമാനസകീരം ബധ്നീയാശ്ചരണപഞ്ജരേ മാതഃ ।
തേന മമ ജന്മലാഭഃ സ്തോത്രം ച തവ പ്രകാമകലിതാര്ഥമ് ॥ ൧൧॥

സംവിത്പ്രരോഹകലികാപ്രാപ്ത്യൈ താം നൌമി ശാരദാം ദേവീമ് ।
യാ കില കവീശ്ചരാണാമധിനേത്രീ കാവ്യകലനാദൌ ॥ ൧൨॥

ഭക്താനാം ജിഹ്വാഗ്രം സിംഹാസനമാദരാദ് വാണീ ।
കലയന്തി നൃത്യതി കില തതസ്തു തന്നൂപുരനിനാദഃ ॥ ൧൩॥

മഞ്ജുലഫണിതിഝരീതി പ്രഗീയതേ ദിക്തടേ രസികൈഃ ।
പ്രാതഃഫുല്ലപയോരുഹമരന്ദരസകേലിധൂര്വഹാ കാലേ ॥ ൧൪॥

ദുര്വാരഗര്വദുര്മതിദുരര്ഥനിരസനകലാനിപുണാഃ ।
മാതസ്തവ പാദയോരുഹസേവാധന്യതാം പ്രാപ്താഃ ॥ ൧൫॥

നീചാ മമ തു മനീഷാ തഥാപി തവ നുതികലാപ്രവൃത്തോഽസ്മി ।
അമ്ബ തവ തത്ര ഹേതുഃ കൃപാം പരം ബുദ്ധിദാ ജയതി ॥ ൧൬॥

വിധിദയിതേ തവ മാതഃ സ്തുതൌ ന ശക്താ അപി ത്രിദശാഃ ।
ക്ഷന്തവ്യമത്ര ദയയാ മമ ചാപല്യം തവ സ്തോത്രേ ॥ ൧൭॥

ശുകവാണീമിവ മാതര്നിരര്ഥകാം മദ്വചോഭങ്ഗീമ് ।
സദസി ശൃണോഷി ദയയാ തത് തവ ചോത്തമപദവ്യക്ത്യൈ ॥ ൧൮॥

പരദേവതേ പ്രസീദ പ്രാണേശ്വരി ധാതുരമ്ബ മമ വാണീമ് ।
കൃപയാ തവ നുതിയോഗ്യാം ത്വന്നൂപുരനിനദരമ്യരസഗുമ്ഫാമ് ॥ ൧൯॥

സര്വജ്ഞത്വം സംപദമഥവാന്യാം പ്രാപ്തുമത്ര തവ മാതഃ ।
തവ ചരണകമലമേതച്ഛരണം നാന്യാ ഗതിര്ദൃഷ്ടാ ॥ ൨൦॥

മന്ദധിയാ സ്വല്പാപി സ്തുതിരമ്ബ നിരര്ഥകാപി രസഹീനാ ।
കലിതാ ചേത് തവ കൃപയാ തദേവ സദസീഡിതം ഭാതി ॥ ൨൧॥

കുണ്ഠീകരോതു വിപദം ചാജ്ഞാനം ദുര്ഗതിം വാണി ।
തവ ചരണകമലസേവാദരോ ജനാനാം കലൌ കാലേ ॥ ൨൨॥

വീരശ്രീര്വിദ്വച്ഛ്രീര്ജയശ്രിയോ വാമരൈര്മാന്യേ ।
തവ പാദാമ്ബുജസേവാദരേണ സിധ്യന്തി നാന്യഥാ ലോകേ ॥ ൨൩॥

കരുണാരസവര്ഷിണി തേ ചരണസരോജദ്വയം നിധേഹി മമ ।
മസ്തകതലേ വിദാരിതജരാദികം സപദി ജന്മ സാര്ഥം മേ ॥ ൨൪॥

ശ്രദ്ധാം മേധാം സംപദമന്യാമമരേന്ദ്രമാനനീയാം ഹി ।
ദയയാ വിധേഹി കാലേ ഭക്താനാം നസ്ത്വദേകശരണാനാമ് ॥ ൨൫॥

പ്രേയസി ധാതുര്ജഗതാം പരമേശ്വരി വാണി മാതരമ്ബ നനു ।
തവ നാമാനി ഫണന്തസ്ത്രിദശൈഃ സഹ യാന്തി യാനേന ॥ ൨൬॥

തവ നാമ യസ്യ ജിഹ്വാങ്ഗണേ വിശുദ്ധം ക്ഷണം സ്ഫുരതി ।
സ ഹി വന്ദ്യസ്ത്രിദശൈരപി വിഗലിതപാപഃ പരേ ലോകേ ॥ ൨൭॥

നതനാകീശ്വരവനിതാമൌലിസ്രഗ്ഗലിതമകരന്ദൈഃ ।
സ്നിഗ്ധപദാമ്ബുജയുഗലാ വാണീ ദേവീ ശ്രിയോ ഹി ലസതി പരാ ॥ ൨൮॥

വിദുഷാമപി തുഷ്ടികരം നവനവരസഗുമ്ഫനം കവിത്വം തു ।
യത്കരുണാവീക്ഷണതോ സിധ്യതി താം ശാരദാം വന്ദേ ॥ ൨൯॥

അമ്ബ പ്രസീദ പരമം മായാമേതാം നിരസ്യ നതിഭാജഃ ।
മമ സംവിധേഹി മധുരാം വാചം തവ നുതികലാര്ഹാം ച ॥ ൩൦॥

വാണീ മാതാ ജഗതാം വാണീപുസ്തകകരാമ്ഭോജാ ।
ഹംസാശ്രിതാ ഹി നമതാം ശ്രേയഃസിധ്യൈ പ്രസന്നാ നഃ ॥ ൩൧॥

ശ്ലാഘ്യാ സംപത്കാലേ വൈദുഷ്യം വാ യദീയവീക്ഷണതഃ ।
സിധ്യന്ത്യപി ദേവാനാം താം വന്ദേ ശാരദാം ദേവീമ് ॥ ൩൨॥

വിദ്യാദാനകരീയം കമലാസനപുണ്യപരിപാകഃ ।
മമ മനസി സംനിധത്താം ദിവ്യജ്ഞാനാദിസിധ്യൈ ഹി ॥ ൩൩॥

ദിവ്യജ്ഞാനം ദയയാ വിധേഹി മാതര്മഹാസാരമ് ।
തേനൈവ തേ തു കീര്തിര്ദാനഫലം നശ്ച ജന്മസാഫല്യമ് ॥ ൩൪॥

ദ്വാദശബീജാക്ഷരഗാം മന്ത്രോദ്ധാരക്രിയാശക്തിമ് ।
വാണീം വിധേസ്തു പത്നീം മധ്യേ പശ്യാമി ബിമ്ബമധ്യസ്ഥാമ് ॥ ൩൫॥

രവികോടിതേജസം താം സരസ്വതീം ത്ര്യക്ഷരക്രിയാശക്തിമ് ।
അണിമാദിദാം പ്രസന്നാമമ്ബാം പശ്യാമി പദ്മമധ്യഗതാമ് ॥ ൩൬॥

ജഗദീശ്വരി ഭാരതി മേ പ്രസീദ വാണി പ്രപന്നായ ।
അഹമപി കുതുകാത് തവ നുതികലനേഽശക്തശ്ച മന്ദധിഷണശ്ച ॥ ൩൭॥

മുനിജനമാനസപേടീരത്നം ധാതുര്ഗൃഹേ രത്നമ് ।
വാണീതി ദിവ്യരത്നം ജയതി സദാ കാമധുക് കാലേ ॥ ൩൮॥

അജ്ഞാനവ്യാധിഹരം തദൌഷധം ശാരദാരൂപമ് ।
യഃ പശ്യതി സ ഹി ലോകേ പരാത്മനേ രോചതേ കാലേ ॥ ൩൯॥

കമലാസനനയനഫലം സൃഷ്ട്യാദികലാസമാസക്തമ് ।
വാണീരൂപം തേജഃ സ്ഫുരതി ജഗച്ഛ്രേയസേ നിത്യമ് ॥ ൪൦॥

ഹംസഗതിം താമമ്ബാമമ്ഭോരുഹലോചനാം വന്ദേ ।
തിലകയതി യാ ഗുരൂണാം ജിഹ്വാസിംഹാസനം വാണീ ॥ ൪൧॥

വാണി തരങ്ഗയ ലോചനവീക്ഷണശൈലീം ക്ഷണം മയി ഭോഃ ।
മമ ജന്മ ലബ്ധവിഭവം തേന ഭവേന്നൈവ തേ ഹാനിഃ ॥ ൪൨॥

പദ്മാസനേന സാകം കാലേ വാണീ സമാസനാ ജയതി ।
കുചകലശനമിതദേഹാ കുര്വന്തീ ഭദ്രസംതതിം നമതാമ് ॥ ൪൩॥

വ്യാതന്വാനാ വാണീ കവീശ്വരാണാം മനോജ്ഞവചനഝരീമ് ।
ജയതി വിധിസുകൃതസംതതിപരിണമിതമാലാ ബുധൈര്വന്ദ്യാ ॥ ൪൪॥

കമലസുഷമാങ്ഗയഷ്ടിഃ സാ ദേവീ ജയതി പദ്മമധ്യതലേ ।
ശതബീജാക്ഷരലസിതം ദിക്പതികൃതരക്ഷകം ച മേരുമുഖമ് ॥ ൪൫॥

വാണീയന്ത്രം വിബുധൈര്മാന്യം യോഗാസനാബ്ധീന്ദുമ് ।
ഹ്രീമക്ഷരമുഖമാദ്യം പ്രാക്തടകലിതം ച പദ്മമധ്യതലേ ॥ ൪൬॥

തന്മേരുചക്രരൂപം സമാധിദൃശ്യം ച ലോകവേദ്യം ച ।
സൈഷാശ്രിത്യ തദേതദ് രാജതി രാജീവലോചനാ വാണീ ॥ ൪൭॥

ഹംസാശ്രിതഗതിവിഭവാ മന്ദസ്മേരാ തമോനിഹന്ത്രീ ച ।
മധുരതരവാങ്നിഗുമ്ഫാ വീണാപുസ്തകകരാമ്ഭോജാ ॥ ൪൮॥

വീണാവാദനരസികാ നമതാമിഷ്ടാര്ഥദായിനീ വാണീ ।
ധാതുര്നയനമഹോത്സവകലികാ കുര്യാച്ഛുഭം ജഗതാമ് ॥ ൪൯॥

താപിഞ്ഛരമ്യദേഹശ്രീരേഷാ കവിസമാജനുതാ ।
അഷ്ടൈശ്വര്യാദികലാദാനേ ദത്തേക്ഷണാ ജയതി ॥ ൫൦॥

സൃഷ്ട്യാദൌ വിധിലിഖിതം വാണീ സൈഷാ ഹി ചാന്യഥാകര്തുമ് ।
നാകൌകസാമപീഹ പ്രഭവതി കലിതപ്രണാമാനാമ് ॥ ൫൧॥

യഃ പശ്യതി താമേതാം വാണീം പുരുഷോ ഹി ധന്യതാമേതി ।
യം പശ്യതി സൈഷായം നിതരാം ധന്യോ നൃപേഡിതഃ കാലേ ॥ ൫൨॥

കബലിതതമഃസമൂഹാ വാണീ സൈഷാ ഹി വിജയതേ ജഗതി ।
അപുനര്ഭവസുഖദാത്രീ വിരിഞ്ചിമുഖലാലിതാ കാലേ ॥ ൫൩॥

കമലാസനമുഖകമലസ്ഥിരാസനാം ശാരദാം വന്ദേ ।
യന്നാമോച്ചരണകലാവിഭവാത് സര്വജ്ഞതാ നിയതമ് ॥ ൫൪॥

ഭവപരമൌഷധമേതദ്വാണീരൂപം സദാരാധ്യമ് ।
കമലാസനലോചനഗണസരസക്രീഡാസ്പദം ജയതി ॥ ൫൫॥

നാരീവംശശിഖാമണിരേഷാ ചിന്താമണിര്നതാനാം ഹി ।
ധാതൃഗൃഹഭാഗധേയം ധ്യേയം സദ്ഭിഃ ശ്രിയഃ സമൃദ്ധ്യൈ നഃ ॥ ൫൬॥

ജനനി ഭുവനേശ്വരി ത്വാം വാണീം വന്ദേ കവിത്വരസസിദ്ധ്യൈ ।
ത്വം തു ദദാസി ഹി ദയയാ മമ മന്ദസ്യാപി വാഗ്ഝരീര്മധുരാഃ ॥ ൫൭॥

ഏതേന തവ തു കീര്തേര്മഹിമാ സംഗീയതേ ദിശാം വലയേ ।
കിംനരവര്ഗൈരമരീകന്യാഭിഃ കല്പവൃക്ഷമൂലതലേ ॥ ൫൮॥

കവിമല്ലസൂക്തിലഹരീസ്തന്വാനാ ശാരദാ ജയതി ।
വിധികേലിസദനഹംസീ കല്യാണൈകസ്ഥലീ നമതാമ് ॥ ൫൯॥

സ്ഫുരതു മമ വചസി വാണി ത്വദീയവൈഭവസുധാധാരാ ।
നിത്യം വ്യക്തിം പ്രാപ്താ ധുതനതജനഖേദജാലകാ മഹതീ ॥ ൬൦॥

വാണി തവ സ്തുതിവിഷയേ ബുദ്ധിര്ജാതാ ഹി മേ സഹസാ ।
തേന മമ ഭാഗദേയം പരിണതിമിത്യേവ നിത്യസംതുഷ്ടഃ ॥ ൬൧॥

സൃഷ്ടികലാമണ്ഡനഭൂരേഷാ വാണീ ജഗജ്ജനനീ ।
ആലോകമാത്രവശതസ്തമസോ ഹന്ത്രീ ച സംപദാം ജനനീ ॥ ൬൨॥

പൌരുഷലോപവിധാത്രീ ധാതുരിയം കമലകോമലാങ്ഗലതാ ।
വസതു സദാ ജിഹ്വാഗ്രേ ദിവ്യജ്ഞാനപ്രദാ ദേവീ ॥ ൬൩॥

പ്രതിദിനദുരിതനിഹന്ത്രീ പദ്മാസനനയനപുണ്യപരിപാകഃ ।
കവിതാസംതാനകലാബീജങ്കുരവര്ധിനീ ജയതി ॥ ൬൪॥

ക്ഷണവീക്ഷണേന മാതാ ലക്ഷ്മീം പക്ഷ്മലയതി പ്രണതേ ।
വേധസി സുരതമഹോത്സവസംകേതതലപ്രദര്ശിനീ കാലേ ॥ ൬൫॥

ശൃങ്ഗാരവിഭ്രമവതാ നീലോത്പലകാന്തിചാതുരീസുപുഷാ ।
വാണീനേത്രേണ വിധിര്ജിതോഽഭവത് സോഽപി സതതകൃതവേദഃ ॥ ൬൬॥

ശ്യാമാ കടാക്ഷലഹരീ മാതുര്ജയതീഹ സംപദാം ജനനീ ।
യാമസ്തൌഷീത് കാലേ മഘവാ നാകാധിപാ മുനയഃ ॥ ൬൭॥

മണികടകനാദപൂരിതമമ്ബാപാദാമ്ബുജം മഹാമന്ത്രൈഃ ।
ജപ്യം ധ്യേയം കാലേ ദിശി ദിശി കലിതസ്വരക്ഷം ച ॥ ൬൮॥

സ്മരണേന ദുരിതഹന്ത്രീ നമനേന കവിത്വസിദ്ധിദാ വാണീ ।
കുസുമസമര്പണകലയാ കാലേ മോക്ഷപ്രദാത്രീ ച ॥ ൬൯॥

വിസൃമരതമോനിഹന്ത്രി ത്വാം സേവേ ശാരദാദേവി ।
ശിശിരീകുരു മാം കാലേ കരുണാരസവീക്ഷിതേന വരദേന ॥ ൭൦॥

മാതര്നമോഽസ്തു താവകകടാക്ഷമധുപായ ശാരദേ ജയതി ।
യോ വേധസോഽപി കാലേ സൃഷ്ട്യാദൌ ചാതുരീം ദിത്സന് ॥ ൭൧॥

സുമനോവാഞ്ഛാദാനേ കൃതാവധാനം ധനം ധാതുഃ ।
ധിഷണാജാഡ്യാദിഹരം യദ്വീക്ഷണമാമനന്തി ജഗതി ബുധാഃ ॥ ൭൨॥

ലലിതഗമനം ത്വദീയം കലനൂപുരനാദപൂരിതം വാണി ।
നൌമി പദാമ്ബുജയുഗലം കവിതാസിദ്ധ്യൈ വിധേഃ കാന്തേ ॥ ൭൩॥

കമലകൃതവൈജയന്തീ വിധേര്മുഖേഷ്വാദരാദ്വാണ്യാഃ ।
ജയതി കടാക്ഷലഹരീ തോരണലക്ഷ്മീസ്തു സത്യലോകേ ഹി ॥ ൭൪॥

നിശ്രേണികാ ച മുക്തേഃ സജ്ജ്ഞാനനദീമഹാലഹരീ ।
നാനാരസചാതുര്യപ്രസാരികാ ദുരിതശങ്കുലാ കാലേ ॥ ൭൫॥

പരതന്ത്രിതവിധിവിഭവാ ദേവീ സാ ശാരദാ ജയതി ।
കൈവല്യാദികലാനാം ദാത്രീ ഭക്താലികാമധേനുര്യാ ॥ ൭൬॥

കവികാമധേനുരേഷാ മഞ്ജുസ്മേരാനനാമ്ഭോജാ ।
വാണീ ജയതി വിധാതുര്മനനാഗമസംപ്രദായഫലദാ ഹി ॥ ൭൭॥

ഘനതരകൃപാരസാര്ദ്രൈര്നാനാവിഭവപ്രദാനകൃതദീക്ഷൈഃ ।
വാണീ ജയതി കടാക്ഷൈര്നഃ കാശ്മല്യം ഹഠാന്നിരസ്യന്തീ ॥ ൭൮॥

ദാസാശാദാനകലാപ്രക്ലൃപ്തദീക്ഷാകടാക്ഷലഹരീ മേ ।
കബലയതു പാപരാശിം വാണ്യാ നിത്യം മഹൌദാര്യാ ॥ ൭൯॥

ആദിമജനനീ സൈഷാ വാണീ ജയതീഹ ഭക്തരക്ഷായൈ ।
സര്വത്ര കലിതദേഹാ നാനാശാസ്ത്രാദിരൂപതോ ജഗതി ॥ ൮൦॥

ബഹുവിധലീലാസദനം സംഭൃതഫുല്ലാബ്ജശില്പവൈചിത്ര്യമ് ।
വാണീമുഖാരവിന്ദം ചുമ്ബതി മാനസമിദം ഹഠാത് കൃത്യമ് ॥ ൮൧॥

സൌഭാഗ്യകാന്തിസാരം വദനാമ്ഭോജം ശ്രിയൈ വാണ്യാഃ ।
ആശ്രിത്യ സകലവേദാ അപി നിത്യം മാന്യതാം പ്രാപ്താഃ ॥ ൮൨॥

ജ്ഞാനമയീ സലിലമയീ തത്ത്വമയീ ഭാതി സര്വലോകാനാമ് ।
അക്ഷരമയീ ച വാണീ ശ്രേയോദാനേ നിബദ്ധചിത്തഗതിഃ ॥ ൮൩॥

നമൌക്തിരസ്തു മാത്രേ വാണ്യൈഃ നഃ സിദ്ധിദാ ഭക്ത്യാ ।
ആനന്ദിന്യൈ ജ്ഞാനസ്വരൂപഭാജേ പ്രബന്ധരൂപായൈ ॥ ൮൪॥

ആരാധ്യായൈ ധ്യേയായൈ ചാത്തകലാചിത്രനാദരൂപായൈ ।
സച്ചിത്തവാസഭാജേ വാണ്യൈ ഭൂയോ നമോഽസ്തു ഭക്തികൃതമ് ॥ ൮൫॥

കമലാസനപുണ്യകലാ നമതാം ചിന്താമണിര്വാണീ ।
ജീവാക്ഷരബോധകലാരൂപാ ജയതീഹ സത്ത്വരൂപവതീ ॥ ൮൬॥

ബ്രഹ്മാണ്ഡമണ്ഡലമിദം വ്യാപ്തം മാത്രാ ക്ഷരാക്ഷരാദിജുഷാ ।
യത്പദകമലം നിത്യം ശ്രുതിതതിസുദതീവിഭൂഷണം ച വിദുഃ ॥ ൮൭॥

മനസിജസാമ്രാജ്യകലാലക്ഷ്മീരേഷാ വിരിഞ്ചിമുഖഹര്ഷമ് ।
വ്യാതന്വാനാ നിത്യം രാജതി ഷഡരസ്വരൂപചക്രതലേ ॥ ൮൮॥

മഞ്ജുലവീണാനിനദപ്രയോഗനിര്ധൂതമോഹസംചാരാ ।
ഹംസീയാനാ വാണീ ഹംസഗതിഃ സുകൃതിനേത്രപുണ്യകലാ ॥ ൮൯॥

കുചകലശസവിധവിനിഹിതവീണാനിക്കാണസാവധാനകലാ ।
അധിനേത്രീ ഹി കലാനാം സകലാനാം ശാരദാ ജയതി ॥ ൯൦॥

ത്രിദശപരിഷന്നിഷേവ്യാ പ്രാതഃ സായം പ്രഫുല്ലമുഖകമലാ ।
കമലാസ്നുഷാ ഹി വാണീ വാണീം ദിശതു പ്രബന്ധരസഭരിതാമ് ॥ ൯൧॥

അധികചപലൈഃ കടാക്ഷൈരഞ്ചിതലീലാരസൈരുദാരൈര്നഃ ।
മങ്ഗലമാതന്വാനാ വിധാതൃഗൃഹിണീ സുരാദിനുതപാദാ ॥ ൯൨॥

കാന്തം ലക്ഷ്മീഭവനം മുഖകമലം ശാരദാദേവ്യാഃ ।
സൌഭാഗ്യകാന്തിസാരം സ്പൃഹയതി മേ മാനസം സരസമ് ॥ ൯൩॥

കാരുണ്യപൂര്ണനയനം പുസ്തകഹസ്തം മഹഃ കിമപി ।
ധാതുഃ പുണ്യകലാനാം പരിപാകോ മര്ത്യരക്ഷണം കുരുതേ ॥ ൯൪॥

സംസാരവാരിരാശിം തര്തും സാ സേതുരേഷാ നഃ ।
ധാതുര്ഗൃഹിണീ ദുഃഖം ശിഥിലയതു പരം ജനിപ്രാപ്തമ് ॥ ൯൫॥

സരസകവികല്പവല്ലീമമ്ബാം വാണീമഹമുപാസേ ।
അന്തസ്തമോനിഹന്ത്രീം യാമാഹുര്ജ്ഞാനദാം മുനയഃ ॥ ൯൬॥

മമ ലോചനയോര്ഭൂയാത് വിദ്യാ കാപി പ്രധൂതജനിഭീതിഃ ।
നിഗമേഷു സംചരന്തീ കൃപാനിധിഃ ശാരദാ ദേവീ ॥ ൯൭॥

ശമിതനതദുരിതസംഘാ ധാത്രേ നിജനേത്രകല്പിതാനങ്ഗാ ।
കൃതസുരശാത്രവഭങ്ഗാ സാ ദേവീ മങ്ഗലൈസ്തുങ്ഗാ ॥ ൯൮॥

പദ്മാസനസ്ഥിതാം താം വാണീം ചതുരാനനാം വന്ദേ ।
കല്യാണാനാം സരണിം കവിപരിഷത്കല്പവല്ലരീം മാന്യാമ് ॥ ൯൯॥

കുചഭാരസംനതാങ്ഗീം കുന്ദസ്മേരാനനാമ്ഭോജാമ് ।
കുന്ദലകുസുമപരിമലസംപാദിതഭൃങ്ഗഝംകൃതിതരങ്ഗാമ് ॥ ൧൦൦॥

ചിദ്രൂപാം വിധിമഹിഷീം ഹംസഗതിം ഹംസസംനുതചരിത്രാമ് ।
വിദ്യാകലാദിനിലയാമാരാധ്യാം സകലജഡിമദോഷഹരീമ് ॥ ൧൦൧॥

ജനനി യദി ഭജതി ലോകേ തവ ലോചനവീക്ഷണം ക്ഷണം മര്ത്യഃ ।
കുപുരുഷനുതിവിമുഖസ്തേ രൂപം ജ്ഞാനപ്രദം പശ്യന് ॥ ൧൦൨॥

കുക്ഷിംഭരിത്വമുഖദുര്ഗുണാദികം ദൂരതസ്ത്യക്ത്വാ ।
ത്വദ്ഭാവനേന ധന്യോ നയതി ച കാലം പ്രമോദേന ॥ ൧൦൩॥

മയി താപഭാരശാന്ത്യൈ തരങ്ഗയ ത്വദിലോചനേ മാതഃ ।
യച്ഛാരദാബ്ജസുഷമാമാന്യേ ദേവാദിഭിഃ പ്രാര്ഥ്യേ ॥ ൧൦൪॥

സര്വാര്ഥദാ ഹി ഭജതാം കടാക്ഷധാടീ ശിവംകരീ വാണി ।
ചിന്താമണിമിവ കലയതി യാം ഹി വിധിര്വിദിതമന്ത്രോഽപി ॥ ൧൦൫॥

സുകൃതപരിപാകമാനസാ ധന്യാസ്ത്വാമര്ചയന്തി നനു വാണി ।
അഹമപി തദ്വത്കലയേ ഫലപ്രദാ ത്വം സമാനകല്പാസി ॥ ൧൦൬॥

നിഗമവചസാം നിദാനം തവ പാദാബ്ജം വതംസയതു കാലേ ।
ദേവോഽപി ദേവദേവോ വിജിതജഗത്ത്രയതലേ മാതഃ ॥ ൧൦൭॥

അന്തസ്തമസോ ഹന്ത്രീ പടീയസീ തേ കടാക്ഷഝരമാലാ ।
യാ തോരണമാല്യശ്രിയമാതനുതേ വേധസഃ സൌധേ ॥ ൧൦൮॥

ശൃങ്ഗാരവിഭ്രമവതീം ത്വാം പ്രാപ്യൈവ ക്രിയാകാലേ ।
കലയതി സൃഷ്ട്യാദിമസൌ വിധിഃ ശ്രുതിവ്യക്തമാഹാത്മ്യഃ ॥ ൧൦൯॥

വേധോവദനം കേലീവനമാസാദ്യാമ്ബ പരമയാ ഹി മുദാ ।
ക്രീഡസി ശുകീവ കാലേ ദ്വിജസംഘസമര്ചിതാത്മവൃത്തിശ്ച ॥ ൧൧൦॥

ധാതുര്മുഖമഞ്ജൂഷാരത്നം നിഗമാന്തകേലിവനഹംസീമ് ।
പരമാം കലാമുപാസേ താമമ്ബാം ചിദ്വിലാസഘനവൃത്തിമ് ॥ ൧൧൧॥

വാഗീശദേവരൂപിണി ഗീഷ്പതിമുഖദേവസംഘനുതചരണേ ।
തവ രൂപം സൂര്യായുതദൃശ്യം ദര്ശയ മമ ജ്ഞാനേ ॥ ൧൧൨॥

ദിവ്യജ്ഞാനപ്രദമിദമമ്ബ ത്വദ്രൂപമാദരാദ്വാണി ।
കാലേ ദര്ശയ കൃപയാ തേന വയം പ്രാപ്തകാര്യസാഫല്യാഃ ॥ ൧൧൩॥

അമ്ബാ ത്രിസംധ്യപഠനപ്രവൃത്തിഭാജാം ക്രമേണ നാമ്നാം തു ।
ദ്വാദശകലാവിഭേദവ്യൂഹാദിജ്ഞാനദാ പ്രസന്നാ ഹി ॥ ൧൧൪॥

മൂകോഽപി സത്കവിഃ സ്യാദ് ദുരക്ഷരാണ്യപി വിധാതൃലിഖിതാനി ।
സത്ഫലദാനി സരസ്വതി കടാക്ഷപൂരേ യദി കാപി ॥ ൧൧൫॥

അവലമ്ബേ താമമ്ബാം പഞ്ചാശദ്വര്ണകല്പിതജഗത്കാമ് ।
സൃഷ്ടിസ്ഥിതിസംഹാരസ്ഥിരോദയാം വിവിധശാസ്ത്രരൂപാഢ്യാമ് ॥ ൧൧൬॥

വാണീം ദിശതു മനോജ്ഞാം വാണീ ഗതിഹസിതകാദമ്ബാ ।
യാ ദമ്ഭാദിവിമുക്താ നാദം ഭാവ്യം വദന്തി യദ്രൂപമ് ॥ ൧൧൭॥

രാകേന്ദുവദനബിമ്ബാ സാമ്ബാ വാണീ പുനാതു കൃതിമേനാമ് ।
പരികലിതഭാവബന്ധാം രസോജ്ജ്വലാം മങ്ഗലോത്തുങ്ഗാമ് ॥ ൧൧൮॥

ലാവണ്യകാന്തിസിന്ധുഃ പാദാബ്ജനതപ്രഭാവസംധാത്രീ ।
പ്രസൃമരതമോനിഹന്ത്രീ മദ്വാചാം ദേവതാ ചാദ്യാ ॥ ൧൧൯॥

ജനതാനേത്രാനന്ദം രൂപം യസ്യാഃ സ്ഫുടം ഭാതി ।
സ്മരണം ത്വജ്ഞാനഹരം വിശ്വജ്ഞാനപ്രദം ച സാ ജയതി ॥ ൧൨൦॥

സഹധര്മിണീ വിധാതുര്ദാരിദ്ര്യധ്വംസിനീ നിജകടാക്ഷൈഃ ।
സാംനിധ്യം ജനയതു മേ സുരമുനിനരസംനുതസ്വമഹിമേയമ് ॥ ൧൨൧॥

മുഖരിതവീണാ വാണീ വാണീം മേ ദിശതു നൈജനുതിയോഗ്യാമ് ।
ആസ്വാദിതശാസ്ത്രാമൃതലഹരീം സദ്യസ്തമോനിഹന്ത്രീം ച ॥ ൧൨൨॥

മണിനൂപുരനാദനിഭാ വാണീ ഭാതി ത്വദീയഭക്തമുഖേ ।
കീര്തിര്ദിശാസു ശുദ്ധിര്വപുഷി ബഹുമുഖീ പരം കാലേ ॥ ൧൨൩॥

തവ പാദസ്മരണവശാത് താമ്യതി തിമിരാവലിശ്ചാന്തഃ ।
ആനന്ദലഹരിവീചീ പ്രസര്പതി ക്ഷമാതലേ ഹി ഭക്താനാമ് ॥ ൧൨൪॥

സംപന്നലിനീഭാനും ജ്ഞാനാബ്ധിസുധാകരം ഹി തവ രൂപമ് ।
ഭക്ത്യാ മനസി ഗൃണന്തോ ഗച്ഛന്തി വ്യോമയാനമാരൂഢാഃ ॥ ൧൨൫॥

ഹൃത്തമസാം ദീപരുചിര്വിധാതൃദയിതാ മമാസ്തു പരദൈവമ് ।
ഭവതാപമേഘമാലാ കവിശുകവാസന്തികശ്രീര്ഹി ॥ ൧൨൬॥

മമ മാനസമണിഹര്മ്യേ വിഹരതു വാണ്യാഃ സ്വരൂപം തു ।
നിഗമവചസാം നിഗുമ്ഫൈര്വേദ്യം തദ്വേധസാ ലാല്യമ് ॥ ൧൨൭॥

സതതമഭിഗമ്യരൂപാ വിബുധവരേഡ്യാ സരസ്വതീ മാതാ ।
മനസി മമ സംനിധത്താം ഭൂത്യൈ നഃ സര്വതഃ കാലേ ॥ ൧൨൮॥

മമ ശിരസി നീചപുണ്യേ പുണ്യഘനാ വേദമൌലിഹര്മ്യാ ച ।
കൃതപദവിന്യാസഭരാ വാണീ ജയതീഹ ശതമഖാദിനുതാ ॥ ൧൨൯॥

മായാനിരസനദക്ഷാ മാതേയം സുപ്രസന്നാ മേ ।
ലഭതേ പരമം ജ്ഞാനം യദ്ഭക്ത്യാ പാമരോഽപി ച ധരിത്ര്യാമ് ॥ ൧൩൦॥

വാണീശ്വരി തവ രൂപം നാമസ്മരണം ച പൂജനം ഭക്ത്യാ ।
സിധ്യതി സകലവിഭൂത്യൈ തത്ര ഹി ഭവതീദയാപ്രസാരസ്തു ॥ ൧൩൧॥

സഫലയതു നേത്രയുഗലം ഹതനതദുരിതാ ച സാ പരാ ദേവീ ।
കമലജമാന്യചരിത്രാ സുമനോവാഞ്ഛാപ്രദാനകൃതദീക്ഷാ ॥ ൧൩൨॥

പങ്കജമൃണാലതന്തുപ്രതിഭടരൂപം ക്വചിദ്ദൃശ്യമ് ।
കവികുലവാണീകൈരവശാരദചന്ദ്രപ്രഭാകബലിതം ച ॥ ൧൩൩॥

നലിനഭവഗൃഹിണി വാണി പ്രഹ്വാനാം സപദി ഭക്താനാമ് ।
ലുമ്പസി മോഹം ഭവതീസ്മരണാദ്വരിവസ്യയാ സ്തുത്യാ ॥ ൧൩൪॥

കവികുലകല്പകവല്ലീമപാങ്ഗലീലാകൃതാര്തിശമനാം താമ് ।
വാണീമന്വഹമാര്യാരാധ്യാം മോക്ഷായ നിഭൃതമഹമീഡേ ॥ ൧൩൫॥

സംവിത്സുഖസ്വരൂപാമമ്ബാം വാണീമഹര്നിശം മനസി ।
കലയേ കലിതാപ്രഭരപ്രശാന്തികാമഃ പ്രഭാവതീം ജയദാമ് ॥ ൧൩൬॥

നതപരിപാലിനി വാണി ത്രിജഗദഘധ്വംസിനി ശ്രിതാനാം നഃ ।
തവ പാദയുഗം നിഗലം ഭവതു തമോരാശിദുഷ്ടഹസ്തിഗണേ ॥ ൧൩൭॥

കാമാദിദുര്ഗ്രഹകൃതാനര്ഥനിരാസായ താവകാപാങ്ഗാഃ ।
വാണി ജനയന്തി നതാനാം കൈവല്യ ഖപ്രദാനായ ॥ ൧൩൮॥

തവ ദര്ശനം ഹി മാതഃ പരമം സംസ്കാരമാത്തപാപാനാമ് ।
കല്യാണസൂക്തികന്ദലരസപ്രദം മാന്യതേ വിബുധൈഃ ॥ ൧൩൯॥

ധാതുര്വദനസരോജേ ശ്രുതിസീമനി ഹൃദി ച ഭക്താനാമ് ।
ഏകപദാ ദ്വിപദാ വാ രാജതി വാണീ ജഗന്മാതാ ॥ ൧൪൦॥

മണിമയകാഞ്ചീലസിതാ വീണാപുസ്തകകരാരവിന്ദാ ച ।
നമതാം ജാഡ്യവിധൂനനധൃതദീക്ഷാ രാജതേ വാണീ ॥ ൧൪൧॥

കബലയതു താപമസ്യാഃ സ്മരണം പാദാബ്ജവന്ദനം വാണ്യാഃ ।
ധാതുര്ജിഹ്വാഗ്രതലേ നൃത്യന്ത്യാഃ സാരസൂക്തിരസയന്ത്യാഃ ॥ ൧൪൨॥

പദ്മജവദനവിഭൂഷാ നിഗമശിഖോത്തംസപീഠികാ വാണീ ।
സകലവിധശാസ്ത്രരൂപാ ഭക്താനാം സത്കവിത്വദാനപ്രാ ॥ ൧൪൩ ॥।

ഗതിജിതമരാലഗമനാ മരാലവാഹാ ച വേധസോ ദാരാഃ ।
ശിശിരദയാസാരാ സാ നമതാം സംതാപഹാരിണീ സഹസാ ॥ ൧൪൪॥

സ്തനഭാരസംനതാങ്ഗീ ദരദലിതാമ്ഭോജലോചനാന്തശ്രീഃ ।
സവിധതലേ വിബുധവധൂപരിചരണാദ്യൈശ്ച തുഷ്ടചിത്താ സാ ॥ ൧൪൫॥

ഹരിണാങ്കവദനബിമ്ബാ പൃഥുലനിതമ്ബാ കചാത്തലോലമ്ബാ ।
നിജഗതിജിതകാദമ്ബാ സാമ്ബാ പദപദ്മനമ്രഭക്തകദമ്ബാ ॥ ൧൪൬॥

പരിഹസിതനീലനീരജദേഹശ്രീഃ ശാരദാ പ്രഥമാ ।
സ്ഫടികമണിഭരകാന്തിഃ സരസ്വതീ കീര്ത്യതേ ച വിബുധഗണൈഃ ॥ ൧൪൭॥

നാഥേ ദൃഢഭക്തിമതീ സൃഷ്ട്യാദൌ ചിത്സ്വരൂപാ ച ।
ധാത്രാ സമാനഭാവാ ചൈകാസനപൂണ്ഡരീകമധ്യസ്ഥാ ॥ ൧൪൮॥

പ്രീത്യാ സരസപുമര്ഥാന് ദദാതി കാലേ ചിദാദിസംധാത്രീ ।
സാ മേ ദൈവതമേഷാ സതതനിഷേവ്യാ ച കാമദാ ഭൂയാത് ॥ ൧൪൯॥

ഹരിചരണനലിനയുഗലേ സദൈകതാനാ ഹി ശാരദാ ജനനീ ।
പദ്മാനീലാദിസഖീ ശ്രുത്യുദ്യാനേ വിഹാരരസഭരിതാ ॥ ൧൫൦॥

ധാതുഃ കുടുമ്ബിനീയം തന്യാത് കല്യാണസംതതിം സതതമ് ।
യാ താരുണ്യവിഭുഷാ സമക്രമാ ത്രിപുരസുന്ദര്യാ ॥ ൧൫൧॥

നാനാക്ഷരാദിമാതൃകഗണേഡിതാ ശബ്ദരൂപാ ച ।
നാദബ്രഹ്മവിലാസാ വാണീ സാ മങ്ഗലാനി നസ്തന്യാത് ॥ ൧൫൨॥

ദൃക്കോണവീക്ഷണകലാനിഗമപ്രാഭവവിധാനദാ നമതാമ് ।
വിബുധാനാം ഹൃദയാബ്ജം യസ്യാ വാസസ്ഥലീ ച നിര്ദിഷ്ടമ് ॥ ൧൫൩॥

മോഹാദിവനകുഠാരാ യാ നിത്യം സേവ്യതേ ത്രിദശസംധൈഃ ।
നിത്യപ്രസന്നരൂപാം ശാന്താം യാമേവ സേവതേ വേധാഃ ॥ ൧൫൪॥

നമതാം യയൈവ ഖണ്ഡീക്രിയതേ സുവര്ണദൃഷ്ടിപുഷാ ।
യദ്വീക്ഷണേന പുരുഷഃ ഖ്യാതോ നൃപസദസി മാന്യതേ പ്രഥമമ് ॥ ൧൫൫॥

യസ്യൈ ശ്രോത്രിയവര്യൈസ്ത്രിസംധ്യമധാര്ദികം ക്രിയതേ ।
സാ മഞ്ജുനീതിരൂപാ വാണീരൂപാ ച ഭണ്യതേ നിപുണൈഃ ॥ ൧൫൬॥

സാ മയി തന്യാദീക്ഷാം വീക്ഷാവനദാം സരസ്വതീ ദേവീ ।
സംതാനകുസുമജൈത്രീം യാമൈച്ഛത് പ്രാപ്തുമഞ്ജസാ വേധാഃ ॥ ൧൫൭॥

മന്ദസ്മിതമധുരാസ്യം കൃപാവലോകം നിരസ്തജാദ്യതതി ।
ഭൂയാദ് വാണ്യാ രൂപം പുരഃ കരാമ്ഭോജകലിതവീണാദി ॥ ൧൫൮॥

വാണ്യാഃ പരം ന ജാനേ ദൈവതമന്യദ് വനേ ഗിരൌ ച പഥി ।
ഗഗനേ വാ സംരക്ഷിതനതജനതായാഃ കൃപാരസാര്ദ്രായാഃ ॥ ൧൫൯॥

ആസ്യേന്ദോരവലോകനമമ്ബായാഃ പാദപദ്മസേവാ ച ।
സര്വശ്രേയഃപ്രാപ്ത്യൈ ശാസ്ത്രജ്ഞൈഃ സുഷ്ഠു നിര്ദിഷ്ടാ ॥ ൧൬൦॥

വാണീ ഹി താപഹന്ത്രീ ജഗതാം കാരുണ്യപൂര്ണനയനശ്രീഃ ।
മന്ദാന് കരോതി വിബുധാന് ദ്രാവയതി ശിലാസ്തതസ്തു കിം ചിത്രമ് ॥ ൧൬൧॥

യസ്മിന് കടാക്ഷപൂരോ ന ഭവതി സ ഹി ദീനവദനഃ സന് ।
പ്രസ്ഖലിതവാഗ്ഭാര്തോ ഭിക്ഷാമടതീഹ നിന്ദിതോ ബഹുശഃ ॥ ൧൬൨॥

വാണ്യാഃ കടാക്ഷപൂരസ്രജാ ത്വലംകൃതനിഗാലോ യഃ ।
സ ഹി ഭവതി രാജമാന്യഃ കാന്താധരമധുരവാഗ്വിലാസശ്ച ॥ ൧൬൩॥

കവിതാഭാഗ്യവിധാത്രീ പരിമലസംക്രാന്തമധുപഗണകേശാ ।
മമ നയനയോഃ കദാ വാ സാ ദേവീ കലിതസംനിധാനകലാ ॥ ൧൬൪॥

പരചിദ്വിധാനരൂപാ വാണീ ശ്രുതിസീമ്നി രാജതേ പരമാ ।
മുനിജനമാനസഹംസീ യാ വിഹരതി സാ ശുഭായ സ്യാത് ॥ ൧൬൫॥

ജപമാലികയാ വാണീകരധൃതയാ വീണയാ ച കോശേന ।
അഹമസ്മി നാഥവാനിഹ കിം വാശാസ്യം പരം ലോകേ ॥ ൧൬൬॥

കൈവല്യാനന്ദസുഖപ്രാപ്ത്യൈ തേജസ്തു മന്മഹേ കിമപി ।
യദ് വാഞ്ഛിതചിന്താമണിരിതി വാണീതി ച ഭുവി ഖ്യാതമ് ॥ ൧൬൭॥

കവികുലസൂക്തിശ്രേണീശ്രവണാനന്ദോല്ലസദ്വതംസസുമാ ।
സാ ദേവീ മമ ഹൃദയേ കൃതസാംനിധ്യാ കൃതത്രാണാ ॥ ൧൬൮॥

യസ്യാ ദൃഷ്ടിവിദൂരാഃ കുമതാഃ ശ്രുത്യര്ഥവഞ്ചകാഃ ശപ്താഃ ।
ക്രന്ദന്തി ദിഗന്തതടേ മോഹാദ്യൈര്ലുപ്തനയനാശ്ച ॥ ൧൬൯॥

സത്പരിഷത്സംമാന്യാ ശ്രുതിജീവനദായിനീ ജഗന്മാതാ ।
ചതുരാനനഭാഗ്യകലാ കൃതസാംനിധ്യാ ഹി രാജതേ ഹൃദയേ ॥ ൧൭൦॥

കൃതസുകൃതൈഃ സംദൃശ്യാ മന്ദസ്മിതമധുരവദനപദ്മശ്രീഃ ।
മുനിനാരദാദിപരിഷത്തത്ത്വോപക്രമവിചക്ഷണാ വാണീ ॥ ൧൭൧॥

കവിവാഗ്വാസന്തീനാം വസന്തലക്ഷ്മീര്വിധാതൃദയിതാ നഃ ।
പരമാം മുദം വിധത്തേ കാലേ കാലേ മഹാഭൂത്യൈ ॥ ൧൭൨॥

കവിതാരസപരിമലിതം കരോതി വദനം നതാനാം യാ ।
സ്തോതും താം മേ ഹ്യാരാത് സാ ദേവീ സുപ്രസന്നാസ്തു ॥ ൧൭൩॥

യസ്യാഃ പ്രസാദഭൂമ്നാ നാകിഗണാഃ സത്ത്വസംപന്നാഃ ।
ഐന്ദ്രീം ശ്രിയമപി മാന്യാം പശ്യന്തി ക്ഷപിതശത്രുഭയപീഡാമ് ॥ ൧൭൪॥

മാന്യം വിധാതൃലോകേ തത്തേജോ ഭാതി സര്വസുരവന്ദ്യമ് ।
ബ്രഹ്മാണ്ഡമണ്ഡലമിദം യദ്രൂപം യത്ര ചാക്ഷരഗതിശ്ച ॥ ൧൭൫॥

ജനനി തരങ്ഗയ നയനേ മയി ദീനേ തേ ദയാസ്നിഗ്ധേ ।
തേന വയം കൃതാര്ഥാ നാതഃ പരമസ്തിഃ നഃ പ്രാര്ഥ്യമ് ॥ ൧൭൬॥

വാണി വിധാതുഃ കാന്തേ സ്തോതും ത്വാമാദരേണ കിം വാച്യമ് ।
ഭാസി ത്വമേവ പരമം ദൈവതമിത്യേവ ജാനാമി ॥ ൧൭൭॥

കബലിതതമോവിലാസം തേജസ്തന്മന്മഹേ മഹോദാരമ് ।
ഫലിതസുമനോഽഭിലാഷം വാണീരൂപം വിപഞ്ചികോല്ലസിതമ് ॥ ൧൭൮॥

പദ്മസനസുകൃതകലാപരിപാകോദയമപാസ്തനതദോഷമ് ।
സരസജ്ഞാനകവിത്വാദ്യനന്തസുകൃതം വിരാജതേ തേജഃ ॥ ൧൭൯॥

നിജനാഥവദനസിംഹാസനമാരൂഢാമുപാസ്മഹേ വാണീമ് ।
യാ കൃത്രിമവാഗ്ഗുമ്ഫൈര്വിരചിതകേലിര്ധിനോതി വിധിമാദ്യമ് ॥ ൧൮൦॥

സുജനാനന്ദകരീ സാ ജനയന്തീ സര്വസംപദം ധാതുഃ ।
ഭക്തേഷു താം നയന്തീമന്വഹമഹമാദ്രിയേ ഗിരാം ദേവീമ് ॥ ൧൮൧॥

കരുണാകടാക്ഷലഹരീ കാമായാസ്തു പ്രകാമകൃതരക്ഷാ ।
വാണ്യാ വിധാതൃമാന്യാ സത്സുഖദാനേ ദിശി ഖ്യാതാ ॥ ൧൮൨॥

വിസരോ മഹോത്സവാനാം വിരിഞ്ചിനയനാവലേരിയം മാതാ ।
പ്രിയകാര്യസിദ്ധിദാത്രീ ജഗതീരക്ഷാധുരംധരാ ജയതി ॥ ൧൮൩॥

വിബുധാഭിഗമ്യരൂപാ ഹംസാവലിസേവിതാ ഗിരാം ദേവീ ।
ഗങ്ഗേവ കനതി കാലേ പരികമ്പിതശിവജടാകോടിഃ ॥ ൧൮൪॥

നൌകാം ഭവാമ്ബുരാശേരജ്ഞാനധ്വാന്തചന്ദ്രികാം വാണീമ് ।
കലയേ മനസി സദാഹം ശ്രുതിപഞ്ജരശാരികാം ദേവീമ് ॥ ൧൮൫॥

ഭവതാപാരണ്യതലേ ജഹ്നുസുതാ ശാരദാ ദേവീ ।
ജ്ഞാനാനന്ദമയീ നഃ സംപത്സിദ്ധ്യൈ പ്രതിക്ഷണം ജയതു ॥ ൧൮൬॥

മത്തഗജമാന്യഗമനാ മധുരാലാപാ ച മാന്യചരിതാ സാ ।
മന്ദസ്മേരമുഖാബ്ജാ വാണീ മമ ഹൃദയസാരസേ ലസതു ॥ ൧൮൭॥

രക്ഷണചണൌ ച വാണ്യാഃ പാദൌ വന്ദേ മനോജ്ഞമണിനാദൌ ।
യത്സേവനേന ധന്യാഃ പുരുഹൂതാദ്യാ ദിശാം നാഥാഃ ॥ ൧൮൮॥

ധാതുര്ധൈര്യകൃപാണീ വാണീ സുരവൃക്ഷകുസുമമൃദുവേണീ ।
ശുകവാണീ നുതവാണീ കവികുലമോദായ ജയതി മൃദുവാണീ ॥ ൧൮൯॥

കല്യാണൈകനികേതനമസ്യാ രൂപം സദാ സ്ഫുരതു ചിത്തേ ।
മാനസകാലുഷ്യഹരം മധുമഥനശിവാദിബഹുമതോത്കര്ഷമ് ॥ ൧൯൦॥

മുനിജനമാനസരത്നം ചിരത്നമേതദ്വിധാതൃസുകൃതകലാ ।
വിനതജനലോചനശ്രീകര്പൂരകലാ പരാ ജയതി ॥ ൧൯൧॥

ധൃതസുമമധുപക്രീഡാസ്ഥാനായിതകേശഭാരായൈ ।
നമ ഉക്തിരസ്തു മാത്രേ വാഗ്ജിതപീയൂഷധാരായൈ ॥ ൧൯൨॥

ബാലകുരങ്ഗവിലോചനധാടീരക്ഷിതസുരാദിമനുജാനാമ് ।
നയനയുഗാസേവ്യം തദ്ഭാതീഹ ധരാതലേ തേജഃ ॥ ൧൯൩॥

കുശലവിധയേ തദസ്തു ശ്രുതിപാഠരതാദൃതാത്മബഹുകേലിഃ ।
കബലിതപദനതദൈന്യം തരുണാമ്ബുജലോചനം തേജഃ ॥ ൧൯൪॥

ബാലമരാലീഗത്യൈ സുരഗിരികന്യാദിമഹിതകലഗീത്യൈ ।
വിരചിതനാനാനീത്യൈ ചേതോ മേ സ്പൃഹയതേ ബഹുലകീര്ത്യൈ ॥ ൧൯൫॥

വിനമദമരേശസുദതീകചസുമമകരന്ദധാരയാ സ്നിഗ്ധമ് ।
തവ പാദപദ്മമേതത് കദാ നു മമ മൂര്ധ്നി ഭൂഷണം ജനനി ॥ ൧൯൬॥

കമലജപരതന്ത്രം തദ്ഗതതന്ദ്രം വസ്തു നിസ്തുലമുപാസേ ।
തേനൈവാഹം ധന്യോ മദ്വംശ്യാ നിരസിതാത്മതാപഭരാഃ ॥ ൧൯൭॥

ജ്ഞാനാമൃതസംധാത്രീ ഭവാബ്ധിസംതരണപോത്രനാമാദിഃ ।
വാണീ വാചാം ലഹരീമവന്ധ്യയന്തീ സുരാദിനുതചരിതാ ॥ ൧൯൮॥

കാരുണ്യപൂര്ണമേതദ് വാണീരൂപം സദാ കലയേ ।
യദ്ഭജനാദ് ദേവാനാമപി സംവിദ് ഭാതി കാര്യകാലേഷു ॥ ൧൯൯॥

ധീപദ്മപീഠമാസ്തേ സാ വാണീ കാങ്ക്ഷിതാനി കലയന്തീ ।
യാ ഘനകൃപാസ്വരൂപാ സംകീര്ത്യാ സര്വദേവനുതാ ॥ ൨൦൦॥

തവ പാദപദ്മവിസൃമരകാന്തിഝരീം മനസി കലയംസ്തു ।
നിരസിതനരകാദിഭയോ വിരാജതേ നാകിസദസി സുരമാന്യഃ ॥ ൨൦൧॥

കുചയുഗലനമ്രഗാത്രം പവിത്രമേതദ് ഭജേ തേജഃ ।
ധാതുരപി സര്വദേവൈര്യന്നിര്ദിഷ്ടം ഹു ഭദ്രായ ॥ ൨൦൨॥

കൃതനതപദവാഗ്ധാടീ ചേടീഭൂതാമരേശമഹിഷീ നഃ ।
കടികൃതമനോജ്ഞശാടീ പാടീരരസാര്ദ്രനൈജതനുകോടീ ॥ ൨൦൩॥

പദ്മഭവപുണ്യകോടീ ഹര്ഷിതകവിബൃന്ദസൂക്തിരസധാടീ ।
മുഖലസിതസരസവാടീ വിലസതു മമ മാനസേ കൃപാകോടീ ॥ ൨൦൪॥

ജ്ഞാനപരാക്രമകലികാ ദിശി ദിശി കിന്നരസുഗീതനിജയശസഃ ।
ധന്യാ ഭാന്തി ഹി മനുജാഃ യദ്വീക്ഷാലവവിശേഷതഃ കാലേ ॥ ൨൦൫॥

സുരജനപാലനദക്ഷാ പ്രശാന്തവീക്ഷാ നിരസ്തരിപുപക്ഷാ ।
മോക്ഷാര്ഥിഭിഃ ശ്രിതാ സാ ലാക്ഷാരസലസിതപാദഭാഗ് ഭാതി ॥ ൨൦൬॥

കുങ്കുമഭരരുചിരാങ്ഗീ ഭാതി കൃശാങ്ഗീ ഗിരാം ദേവീ ।
ധാതുരപി ജ്ഞാനപ്രദമസ്യാ രൂപം വദന്തി വിബുധേശാഃ ॥ ൨൦൭॥

വാണി നതിമമ്ബ നിത്യം കരവാണി ഹി ചിത്സുഖാവാപ്ത്യൈ ।
താദൃക്ത്വദീയകരുണാവീക്ഷണതോ ഗീഷ്പതിശ്ച സുരമാന്യഃ ॥ ൨൦൮॥

കല്യാമി നതിമനന്താം കാലേ കാലേ ശുഭപ്രാപ്ത്യൈ ।
ധാതുഃ സുകൃതോല്ലാസം കരധൃതവീണാദികം ച യദ്രൂപമ് ॥ ൨൦൯॥

കമലാസനദയിതാ സാ ലസതു പുരോഽസ്മാകമാദരകൃതശ്രീഃ ।
യത്പ്രണമനാജ്ജനാനാം കവിതോന്മേഷഃ സദീഡിതോ ഭവതി ॥ ൨൧൦॥

പരസംവിദാത്മികാ സാ മഹിഷീ ധാതുഃ കലാവതീ വാണീ ।
ശിശിരീകരോതി തപ്താന് കരുണാരസദിഗ്ധനേത്രപാല്യാ നഃ ॥ ൨൧൧॥

ധാതൃമനോരഥപാത്രം സംതപ്തസ്വര്ണകാമ്യനിജഗാത്രമ് ।
ആശ്രിതകമലജഗോത്രം രക്ഷിതനതബാഹുച്ഛാത്രമ് ॥ ൨൧൨॥

കവികുലജിഹ്വാലോലം പിതാമഹാദൃതമനോജ്ഞനിജലീലമ് ।
നിരസിതനതദുഷ്കാലം വന്ദേ തേജഃ സദാലിനുതശീലമ് ॥ ൨൧൩॥

മന്ദാനാമപി മഞ്ജുലകവിത്വരസദായിനീ ജനനീ ।
കാപി കരുണാമയീ സാ ലസതു പുരസ്താത് സദാസ്മാകമ് ॥ ൨൧൪॥

നിസ്തുലപദസംപ്രാപ്ത്യൈ ഭൂയോ ഭൂയോ നമാംസി തേ വാണി ।
ദീപകലാമയി ചാന്തഃസ്മരണം ധാതുഃ കുടുമ്ബിന്യൈ ॥ ൨൧൫॥

മായാനിരാസകാമോ വന്ദേ വാണ്യാഃ പദാമ്ഭോജമ് ।
സിദ്ധമനോരഥശതകാ യദ്ഭജനേനാര്ഥിനഃ കാലേ ॥ ൨൧൬॥

സതതം ബദ്ധാഞ്ജലിപുടുമുപാസ്മഹേ തച്ഛുഭപ്രദം തേജഃ ।
യത്കമലജനയനാനാം പ്രമോദപീയൂഷലഹരികാമോദമ് ॥ ൨൧൭॥

ദിവി വാ ഭുവി ദിക്ഷു ജലേ വഹ്നൌ വാ സര്വതോ വാണി ।
ജന്തൂനാം കില രക്ഷാ ത്വധീനാ കീര്ത്യതേ വിബുധൈഃ ॥ ൨൧൮॥

ഭാരതി ഭവതാപാര്താന് പാഹി കടാക്ഷാങ്കുരൈഃ ശീതൈഃ ।
പരമനന്ദവിധാതൃന് യാനേവ സ്തൌതി പദ്മവാസോഽപി ॥ ൨൧൯॥

കുലദൈവതമസ്മാകം തത്തേജഃ കുടിലകുന്തലം കിമപി ।
കരധൃതപുസ്തകവീണം കലയേ കാമാഗമോദയം ധാതുഃ ॥ ൨൨൦॥

പരമാനന്ദധനം തദ്ധാതുരപി ബ്രഹ്മതത്ത്വരസദായി ।
ആബ്രഹ്മകീടനൃത്യത്സ്വവൈഭവം ജയതി ശാരദാരൂപമ് ॥ ൨൨൧॥

വിബുധജനമോദജനനീ ജനനീ നഃ സാ വിധേഃ പത്നീ ।
മൃദുസംചാരവിലാസൈഃ ശുഭംകരീ ഭവതു സംതതം കാലേ ॥ ൨൨൨॥

സരസമനോജ്ഞവിലാസൈഃ സ്വവശേ കൃത്വാ മനോ വിധേര്വാണീ ।
സൃഷ്ട്യാദൌ ശുഭലേഖാകരീ നൃണാം മസ്തകേ മാതാ ॥ ൨൨൩॥

പ്രകൃതിമൃദുലം പദാബ്ജം വാണീദേവ്യാ മദീയചിത്തതടേ ।
കാമാദിസൂചിനിചിതേ കഥം സ്ഥിതിം പ്രാപ്നുയാത് കാലേ ॥ ൨൨൪॥

നിഖിലചരാചരരക്ഷാം വിതന്വതീ പദ്മജപ്രിയാ ദേവീ ।
മമ കുലദൈവതമേഷാ ജയതി സദാരാധ്യമാന്യപദകമലാ ॥ ൨൨൫॥

കുശലസമൃദ്ധ്യൈ ഭൂയാദമ്ബാ സാ ശാരദാ ദേവീ ।
ജനിരക്ഷണാദിലീലാവിഹാരഭാങ്നിഗമസൌധദീപകലാ ॥ ൨൨൬॥

വാചാലയതി കടാക്ഷൈര്ജഡം ശിലാമല്പജന്തും വാ ।
യാ വാണീ സാ ശരണം ഭവേ ഭവേ പ്രാര്ഥ്യേ ശ്രിയഃപ്രാപ്ത്യൈ ॥ ൨൨൭॥

യദി ഹി പ്രസാദഭൂമാ വാണ്യാസ്തത്രൈവ സാ ഹരേഃ കാന്താ ।
പരിലസിത ( ... incomplete ... ) നിത്യവാസരതാ ॥ ൨൨൮॥
സനകസനന്ദനവന്ദ്യേ കാന്തേ പരമേഷ്ടിനഃ ശ്രിയഃപ്രാപ്ത്യൈ ।
വാണി ത്വാം നൌമി സദാ ഭവ പ്രസന്നാ വിപ`ന്ചിലസിതകരേ ॥ ൨൨൯॥

വാണി വിപഞ്ചീകലരവരസികേ ഗന്ധര്വയോഷിദഭിവന്ദ്യേ ।
തവ ചരണം മമ ശരണം ഭവവാരിധിസുതേമമ്ബ കലയാമി ॥ ൨൩൦॥

വാണി കദാഹം ലപ്സ്യേ ചരണാമ്ഭോജം ത്വദീയമിദമാരാത് ।
നിജമണിനൂപുരനാദസ്പൃഹണീയവചഃപദം കലിതഭക്തേഃ ॥ ൨൩൧॥

ശ്രുതിപൂതമുഖമനോഹരലാവണ്യകുസുമമൃദുശരീരേയമ് ।
നിജകരുണാപാങ്ഗസുധാപൂരണകൃതവൈഭവാ ഭാതി ॥ ൨൩൨॥

പരിസരനതവിബുധാലീകിരീടമണികാന്തിവല്ലരീവിസരൈഃ ।
കൃതനീരാജനവിധി തേ മമ തു ശിരോഭൂഷണം ഹി പദയുഗലമ് ॥ ൨൩൩॥

പ്രേമവതീ വിധിഭവനേ ഹംസഗതിര്ഹംസയാനകൃതചാരാ ।
വാചാമകൃത്രിമാനാം സ്ഥൈര്യവിധാത്രീ മഹേശാനീ ॥ ൨൩൪॥

ആനന്ദരൂപകോടീമമ്ബാം താം സംതതം കലയേ ।
സംവിദ്രൂപാ യാ കില വിധാതൃഗേഹേ ശ്രുതിശ്രിയം ധത്തേ ॥ ൨൩൫॥

കമലജനേത്രമഹോത്സവതാരുണ്യശ്രീര്നിരസ്തനതശത്രുഃ ।
ലലിതലികുചാഭകുചഭരയുഗലാ ദൃഗ്വിജിതഹരിണസംദോഹാ ॥ ൨൩൬॥

കാരുണ്യപൂര്ണനയനാ കലികല്മഷനാശിനീ ച സാ വാണീ ।
മുഖജിതശാരദകമലാ വക്ത്രാമ്ഭോജേ സദാ സ്ഫുരതു മാതാ ॥ ൨൩൭॥

കമലസുഷമാനിവാസസ്ഥാനകടാക്ഷം ചിരായ കൃതരക്ഷമ് ।
രക്ഷോഗണഭീതികരം തേജോ ഭാതി പ്രകാമമിഹ മനസി ॥ ൨൩൮॥

കമലജതപഃഫലം തന്മുനിജനഹൃദയാബ്ജനിത്യകൃതനൃത്തമ് ।
കരുണാലോലാപാങ്ഗം തത്തേജോ ഭാതു മമ മുഖാമ്ഭോജേ ॥ ൨൩൯॥

ഭാഗ്യം വിധിനയനാനാം സംസൃതിതാപജ്വരാദിതപ്താനാമ് ।
ഭേഷജമേതദ്രൂപം കലാഗ്രഹം മന്യതേ ദേവ്യാഃ ॥ ൨൪൦॥

ജനനി കദാ വാ നേഷ്യാമ്യഹമാരാദര്ചിതത്വദീയപദഃ ।
നിമിഷമിവ ഹന്ത ദിവസാന് ദൃഷ്ട്വാ ത്വാമാദരേണ കല്യാണീമ് ॥ ൨൪൧॥

മഞ്ജുലകവിതാസംതതിബീജാങ്കുരദായിസാരസാലോകാ ।
ജനനി തവാപാങ്ഗശ്രീര്ജയതി ജഗത്ത്രാണകലിതദീക്ഷേയമ് ॥ ൨൪൨॥

അമ്ബ തവാപാങ്ഗശ്രീരപാങ്ഗകേലീശതാനി ജനയന്തീ ।
ധാതുര്ഹൃദയേ ജയതി വ്രീഡാമദമോദകാമസാരകരീ ॥ ൨൪൩॥

സര്വജഗന്നുതവിഭവേ സംതതമപി വാഞ്ഛിതപ്രദേ മാതഃ ।
അധുനാ ത്വമേവ ശരണം തേനാഹം പ്രാപ്തജന്മസാഫല്യഃ ॥ ൨൪൪॥

ശാന്തിരസസര്വശേവധിമമ്ബാം സേവേ മനോരഥാവാപ്ത്യൈ ।
യാമാരാധ്യ സുരേശാഃ സ്വപദം പ്രാപുര്ഹി തദ്രക്ഷമ് ॥ ൨൪൫॥

കുലജാ ഭാര്യാ കീര്തിര്ദാനം പുത്രാദയോ യേ ച ।
സിധ്യന്തി തേ ഹി സര്വേ യസ്മൈ വാണീ പ്രസന്നാ സാ ॥ ൨൪൬॥

കാ ക്ഷതിരമ്ബ കടാക്ഷേ ന്യസ്തേ സതി മയി വിരിഞ്ചിവരപത്നി ।
ഗങ്ഗാശുനകന്യായാന്മഹതീ മമ വൃദ്ധിരീരിതാ നിപുണൈഃ ॥ ൨൪൭॥

അവിരലദയാര്ദ്രലോചനസേവനയാ ധൂതതാപാ ഹി ।
പ്രതികല്പം സുരസംഘാസ്ത്വാമഭജന് നുതിനതിപ്രമുഖൈഃ ॥ ൨൪൮॥

ദീനാനാം ച കവീനാം വാണി ത്വം കാമധേനുരസി മാതഃ ।
സിദ്ധിസ്തേഷാമതുലാ സുരമാന്യാ തേന സംകലിതാ ॥ ൨൪൯॥

സകലജഗതാം ഹി ജനനീം വാണി ത്വാം സംതതമുപാസേ ।
ശ്രുതിസുദതീഭൂഷാമണിമഖിലാര്ഥപ്രാപ്ത്യൈ ലോകേ ॥ ൨൫൦॥

ധാതുഃ കുടുമ്ബിനീ ത്വം സന്മങ്ഗലദായിനീ സ്വമാഹാത്മ്യാത് ।
ശ്വശ്രൂശ്വശുരമുഖാദിപ്രീണനചതുരാ ച ഭാസി നിഗമകലാ ॥ ൨൫൧॥

മുഖവിജിതചന്ദ്രമണ്ഡലമിദമമ്ഭോരുഹവിലോചനം തേജഃ ।
ധ്യാനേ ജപേ ച സുദൃശാം ചകാസ്തി ഹൃദയേ കവീശ്വരാണാം ച ॥ ൨൫൨॥

യസ്മൈ പ്രസന്നവദനാ സാ വാണീ ലോകമാതാ ഹി ।
തസ്യ സഹസാ സഹസ്രം ലാഭഃ സ്യാദ് ബാന്ധവാഃ സുഖിനഃ ॥ ൨൫൩॥

താപഹരരസവിവര്ഷണധൃതകുതുകാ കാപി നീലനലിനരുചിഃ ।
കാദമ്ബിനീ പുരസ്താദാസ്താം നഃ സംതതം ജനനീ ॥ ൨൫൪॥

പദ്മാക്ഷനാഭിപദ്മജദയിതേ ലോകാമ്ബ ശാരദേതി സദാ ।
തവ നാമാനി ജപന് സന് ത്വദ്ദാസോഽഹം തു മുക്തയേ സിദ്ധഃ ॥ ൨൫൫॥

അമ്ബാപ്രസാദഭൂമ്നാ നരോ ഹി ഭുങ്ക്തേ സുഖാനി വിവിധാനി ।
സ്മരേ വിജയഃ കവിതാധനലക്ഷ്മ്യാദേര്വിലാസലീലാദിഃ ॥ ൨൫൬॥

തീരം സംസൃതിജലധേഃ പൂരം കമലജവിലോചനപ്രീതേഃ ।
സാരം നിഗമാന്താനാം ദൂരം ദുര്ജനതതേര്ഹി തത്തേജഃ ॥ ൨൫൭॥

അപി ദാസകുലേ ജാതഃ കടാക്ഷഭൂമ്നാ വിധാതൃമുഖപത്ന്യാഃ ।
ജ്ഞാനീ ഭവവാരാശിം തരതി ച രാജ്യശ്രിയം ഭുങ്ക്തേ ॥ ൨൫൮॥

സത്കൃതദേശികപാദാമ്ബുജയുഗലോഽഹം നമാമി വാണി ത്വാമ് ।
ത്വം തു ഗുരുമൂര്തിരുക്താ കാലേ കാലേ ച കാങ്ക്ഷിതവിധാത്രീ ॥ ൨൫൯॥

ജ്ഞാനാനന്ദമുഖാദീനപവര്ഗം വാ ദദാസി ഭക്തേഭ്യഃ ।
അത ഏവാനന്യഗതിസ്ത്വാം വിധിപത്നീം പ്രപദ്യേഽഹമ് ॥ ൨൬൦॥

ത്വയി വിന്യസ്തഭരാണാം ന ഹി ചിന്താ ജായതേ നൃണാം കാപി ।
പരമാനന്ദാദികലാസ്ഫൂര്തിര്ദിവിഷദ്ഗണേന സംമാന്യാ ॥ ൨൬൧॥

സുമശരസാമ്രാജ്യകലാമങ്ഗലവിധിരേഖികാ വാണീ ।
ധാതുരപി ചിത്തവൃത്തിസ്ഥൈര്യം ത്വന്യാദൃശം കുരുതേ ॥ ൨൬൨॥

സാ ധേനുശ്ചിന്താമണിരപി വൃക്ഷഃ സംപദാം പ്രദായിന്യഃ ।
അമ്ബ ത്വമേവ കാലേ ഭസി ജ്ഞാനപ്രദാ വ്യപോഹ്യ തമഃ ॥ ൨൬൩॥

മനസോ നൈര്മല്യപ്രദമസ്യാഃ സേവേ കടാക്ഷമഹമാരാത് ।
യഃ കുരുതേ ജനതാം താം ഹതമായാം മധുരാമയോധ്യാം ച ॥ ൨൬൪॥

ശരദിവ ഹംസകുലേഡ്യാ ജ്യോത്സ്നേവ ജനാര്തിഹാരിണീ വാണ്യാഃ ।
ജയതി ഹി കടാക്ഷരേഖാ ദീപകലേവ പ്രകാമഹതതിമിരാ ॥ ൨൬൫॥

പങ്കജഭവവദനമണിം പരവിദ്യാദേവതാം വാണീമ് ।
നിത്യം യജതാം ജപതാം ന ഹി തുല്യോഽസ്മിന് ക്ഷമാതലേ കശ്ചിത് ॥ ൨൬൬॥

വാണീ നിജവാണീഭീ രചയതി നുതിമാത്തവീണയാ കാലേ ।
ധാതുഃ പ്രസാദഹേതോഃ പതിവ്രതാലക്ഷണൈരന്യൈഃ ॥ ൨൬൭॥

ആനന്ദയതി വിലസൈരമ്ബാ പദ്മാസനം നിജം ദേവമ് ।
തേനൈവ തുഷ്ടഹൃദയഃ ശുഭാക്ഷരാണ്യാദരാല്ലിഖതി മൌലൌ ॥ ൨൬൮॥

മമ മാനസദുര്മദഗജമപാരതാപാടവീഷു ധാവന്തമ് ।
വിരചയ്യ മുദിതചിത്തം കുരു വാണി ത്വത്പദാബ്ജകൃതഹസ്തമ് ॥ ൨൬൯॥

കമലാസനധൈര്യമഹീധരകുലിശസ്തേ കടാക്ഷ ഏവായമ് ।
കവികുലമയൂരകാദമ്ബിനീവിലാസോ മുദേഽസ്തു സതതം നഃ ॥ ൨൭൦॥

ഗുരുവരദനാമ്ഭോജേ നൃത്യന്തീ ശാരദാ ദേവീ ।
മധുരതരശ്ലോകനിഭാ മണിനൂപുരനിനദസംതതിര്ഭ്തി ॥ ൨൭൧॥

കോ വാ ന ശ്രയതി ബുധഃ ശ്രേയോഽര്ഥീ താമിമാം വാണീമ് ।
യാം പങ്കജാക്ഷനാഭിജസധര്മിണീമര്ചയന്തി സുരനാഥാഃ ॥ ൨൭൨॥

മുഷിതപയോജമൃദിമ്നാ ചരണതലേനാത്ര മാനസേ വാണീ ।
പരിഹരതു പാപരാശിം സുരൌഘസംമാനിതേന കാലേ മേ ॥ ൨൭൩॥

യാഥാര്ഥ്യജ്ഞാനകലാപ്രാപ്ത്യൈ ത്വാം ശാരദാം വന്ദേ ।
സേവാഫലം പ്രയച്ഛ പ്രസീദ പരമേശി വല്ലഭേ ധാതുഃ ॥ ൨൭൪॥

നിഗമാന്തസാരമര്ഥം ബോധയസി ത്വം ഗുരൂന് പ്രകല്പ്യ ഭുവി ।
സൈഷാ മേ ജ്ഞാനഘനാ വാണീ നിത്യം പ്രസന്നാസി ॥ ൨൭൫॥

മന്ദാരകുസുമമദഹരമന്ദസ്മിതമധുരവദനപങ്കരുഹാ ।
ഹൃദ്യതമനിത്യയൌവനമണ്ഡിതഗാത്രീ വിരാജതേ വാണീ ॥ ൨൭൬॥

സൌഭാഗ്യസൂചകാഭീ രേഖാഭിര്ഭൂഷിതം സൌരൈര്വന്ദ്യമ് ।
അമ്ബാചരണപയോജം വതംസയന് പ്രാപ്തസംമോദഃ ॥ ൨൭൭॥

ദ്വിജഗണപൂജ്യം നിത്യം നിരസ്തജാഡ്യം ത്വദീയപാദയുഗമ് ।
ക്ഷണമപി വാ സാംനിധ്യം ഭജതു മദീയേ ഹൃദി സ്വൈരമ് ॥ ൨൭൮॥

നതദേവരാജമകുടീമണിഘൃണിപരിചുമ്ബിതാങ്ഘ്രികമലാ നഃ ।
കമലാസനസ്യ ദയിതാ തന്യാദന്യാദൃശീ ശ്രിയം ഭജതാമ് ॥ ൨൭൯॥

വാണീ ശ്രിതകാദമ്ബാ ദമ്ഭാദിരിപൂന് നിരസ്യ നഃ കാലേ ।
ക്ഷേമമവന്യാം തന്യാത് പദേ പരേ ദേവസംഘപരിസേവ്യേ ॥ ൨൮൦॥

പങ്കജഭവസാമ്രാജ്യസ്ഥിരലക്ഷ്മീശ്ചപാണ്ഡരതനുശ്രീഃ ।
നതമാനവസുകൃതകലാപരിപാടീ ഭാതി സകലഗുണപേടീ ॥ ൨൮൧॥

മുഖവിജിതചന്ദ്രബിമ്ബാ സാമ്ബാ കാദമ്ബസേവ്യപദകമലാ ।
കമലാസനഗൃഹലക്ഷ്മീര്ലക്ഷ്മീം പുഷ്ണാതു ശാരദാ ദേവീ ॥ ൨൮൨॥

മുരമഥനസ്യേവ രമാ ശംഭോരിവ സകലഭൂധരേന്ദ്രസുതാ ।
വാണി വിധാതുഃ സദനേഽനുരൂപദാമ്പത്യസംപദാ ഭാസി ॥ ൨൮൩॥

വാണി തവ ദേഹകാന്ത്യാ കടാക്ഷലഹരീ തു സംയുതാ കാലേ ।
ധത്തേ കാമപി ശോഭാം സുരസ്രവന്ത്യേവ സംഗതാ യമുനാ ॥ ൨൮൪॥

മധുരാസേചനദൃഷ്ട്യാ മാം പായാദാപദോ മുഹുര്വാണീ ।
ആശ്രിതതാപവിഭേത്രീത്യേവം യാമാമനന്തി സൂരിവരാഃ ॥ ൨൮൫॥

അജ്ഞാതകോപപൂരാ യസ്യാ ദൃഷ്ടിഃ കൃതാദരാ ഭജതാമ് ।
സൈഷാ വിഹസിതപൌരംദരലക്ഷ്മീം സംപദം ദദ്യാത് ॥ ൨൮൬॥

ബാലകുരങ്ഗവിലോചനമീഷത്സ്മിതമധുരമാനനം വാണ്യാഃ ।
മണിമയതാടങ്കമണീവിലാസി ഭൂയാന്മുദേഽസ്മാകമ് ॥ ൨൮൭॥

മുനിജനമാനസഹംസീം ശ്രുതിതതിപഞ്ജരശുകീം മഹാദേവീമ് ।
നൌമി സ്നുഷാം രമായാഃ മാഹേശ്വരമഹിതസത്പദപ്രാപ്ത്യൈ ॥ ൨൮൮॥

ധാതുഃ സൌധാങ്ഗണകൃതചങ്ക്രമണാം ശാരദാം നൌമി ।
മത്തമതങ്ഗജഗമനാം പരിപന്ഥിജയായ സുകൃതിസംദൃശ്യാമ് ॥ ൨൮൯॥

വാഗീശമുഖാ ദേവാ യസ്യാഃ പ്രസദനബലദ്ധി വിജയന്തേ ।
പരിപാലിതഭക്തഗണാ യദ്ധ്യാനോല്ലസദപാരപുലകാന്താഃ ॥ ൨൯൦॥

നൈസര്ഗികവാക്ഷ്രേണീകേലിവനമമലഭൂഷണം ധാതുഃ ।
വദനാനാമിയമമ്ബാ ജയതു ചിരം കാമവര്ഷിണീ ഭജതാമ് ॥ ൨൯൧॥

കലയാമി ഹൃദയമേതത് പാദാബ്ജേ ശാരദാദേവ്യാഃ ।
പ്രാപ്താരിഷട്കവിജയം തത്ത്വധനം കലിതശാരദാധ്യാനമ് ॥ ൨൯൨॥

പാദാരവിന്ദനമനപ്രഭാവപരികലിതദേവസാരൂപ്യാഃ ।
പരമാനന്ദനിമഗ്നാഃ സുധിയോ ഭാന്തി ക്ഷമാവലയേ ॥ ൨൯൩॥

ലലിതവിധാതൃരൂപം പാലിതലോകത്രയം ച തത് തേജഃ ।
സകലാഗമശിഖരകലാപരതത്ത്വം ശാരദാരൂപമ് ॥ ൨൯൪॥

ധ്യാനൈര്യോഗൈശ്ച ജപൈര്യത് സേവ്യം പരമമാദിഷ്ടമ് ।
തന്നശ്ചകാസ്തു ഹൃദയേ വിശ്വജനീനം ഹി ഭക്താനാമ് ॥ ൨൯൫॥

ഭാഗീരഥീവ വാണീ തവ നുതിരൂപാ വിരാജതേ പരമാ ।
ഇഹ മാതര്യദ്ഭജനം സര്വേഷാം സര്വസംപദാം ഹേതുഃ ॥ ൨൯൬॥

സംതതമധുരാലാപൈര്ലാലിതവിധിവൈഭവൈരമേയകലൈഃ ।
ശ്രേയഃപ്രദാനദീക്ഷിതകടാക്ഷപാതൈര്മഹാതത്ത്വൈഃ ॥ ൨൯൭॥

ഖേലല്ലോലമ്ബകചൈഃ കുചഭരനമ്രൈഃ പുരംധ്രിഗുണപൂര്ണൈഃ ।
ആശ്രിതസംവിത്പീഠൈരമരേശവധൂകരാദൃതച്ഛത്രൈഃ ॥ ൨൯൮॥

വീണാപുസ്തകഹസ്തൈര്വിധിഭാഗ്യൈരസ്തു മമ തു സാരൂപ്യമ് ।
സംവിദ്ധനൈശ്ച വാണീരൂപൈരേതൈര്ദയാസാരൈഃ ॥ ൨൯൯॥

മാതഃ കഥം നു വര്ണ്യസ്തവ മഹിമാ വാണി നിഗമചയവേദ്യഃ ।
ഇതി നിശ്ചിത്യ പദാബ്ജം തവ വന്ദേ മോക്ഷകാമോഽഹമ് ॥ ൩൦൦॥

ത്വാമമ്ബ ബാലിശോഽഹം ത്വചമത്കാരൈര്ഗിരാം ഗുമ്ഭൈഃ ।
അയഥായഥക്രമം ഹി സ്തുവന്നപി പ്രാപ്തജന്മസാഫല്യഃ ॥ ൩൦൧॥

ഇതി ശ്രീശാരദാത്രിശതീ സമാപ്താ

Encoded and proofread by Sridhar Seshagiri seshagir at engineering.sdsu.edu

Please send corrections to sanskrit@cheerful.com
Last updated ത്oday
http://sanskritdocuments.org

Sharada Trishati Lyrics in Malayalam PDF
% File name : shAradA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website