ଶାରଦାତ୍ରିଶତୀ
{॥ ଶାରଦାତ୍ରିଶତୀ ॥}
ଗଙ୍ଗାଧରମଖିଵିରଚିତା ।
ପରମାଭରଣଂ ଧାତୁର୍ଵଦନାମ୍ଭୋଜସ୍ଯ ଶାରଦା ଦେଵୀ ।
ଯା ରାଜତି ଜନନୀ ସା ଲସତୁ ସଦା ସୁପ୍ରସନ୍ନା ନଃ ॥ ୧॥
ସା ଶାରଦା ପ୍ରସନ୍ନା ରାଜତି ମମ ମାନସେ ନିତ୍ଯମ୍ ।
ଯା ଶାରଦାବ୍ଜଵଦନା ଜନନୀ କୀର୍ତ୍ଯା ହି ସର୍ଵଲୋକାନାମ୍ ॥ ୨॥
ସଂପଦ୍ ଦିଵ୍ଯା ଧାତୁଃ ଖ୍ଯାତା ସା ଶାରଦା ଦେଵୀ ।
ଯଦ୍ଭଜନଂ ଦେଵାନାମପି ତତ୍ତ୍ଵଜ୍ଞାନଦଂ ଵିଦୁର୍ଵିବୁଧାଃ ॥ ୩॥
ସରସକଵିତାଵିଭୂତ୍ଯୈ ଯତ୍ପଦମାରାଧ୍ଯତେ ଵିଶେଷଜ୍ଞୈଃ ।
ସା ଶାରଦା ଶ୍ରିଯୈ ନଃ କାଲେ ସର୍ଵପ୍ରସନ୍ନାତ୍ମା ॥ ୪॥
ନୀଲାରଵିନ୍ଦଲୋଚନଯୁଗଲା ସା ଶାରଦା ଦେଵୀ ।
କରକମଲକଲିତଵୀଣା ସଦା ପ୍ରସନ୍ନା ଶ୍ରିଯୈଃ ଵଃ ସ୍ଯାତ୍ ॥୫॥
କଲଯେ ତାମହମନିଶଂ ଫୁଲ୍ଲାବ୍ଜଵିଲୋଚନାଂ ଵାଣୀମ୍ ।
ଯା ସୃଷ୍ଟ୍ଯାଦୌ ସାହ୍ଯଂ କଲଯତି ଧାତୁର୍ଜଗନ୍ମାତା ॥ ୬॥
ଯସ୍ଯା ଲୀଲାଲୋଲଃ ପଦ୍ମାସନଗୋଽପି ଵେଦପାଠରତଃ ।
ତାମହମତୁଲାନନ୍ଦପ୍ରାପ୍ତ୍ଯୈ କଲଯେ ମନଃପଦ୍ମେ ॥ ୭॥
ବ୍ରହ୍ମାଣଂ ତାଂ ଵାଣୀମେକାସନଭାସୁରାଂ ଶ୍ରିଯଃ ପ୍ରାପ୍ତ୍ଯୈ ।
ଆରାଦ୍ଵିଲୋକ୍ଯ ମାନସମାନନ୍ଦରସଂ ପରଂ ଭଜତେ ॥ ୮॥
ମୁକ୍ତାମଯେ ଵିମାନେ ପଦ୍ମାସନଯନ୍ତ୍ରିକାମଧ୍ଯେ ।
ଦୃଶ୍ଯାଂ ଵାଣୀଂ ଦେଵୀଂ ସେଵେ ସଂତତସୁଖପ୍ରାପ୍ତ୍ଯୈ ॥ ୯॥
ଭାଗ୍ଯାନ୍ମମ ଚ କଵୀନାଂ ସା ଦେଵୀ ଦୃଶ୍ଯତାମେତି ।
ଵୀଣାପୁସ୍ତକହସ୍ତା ଯା କମଲାସନପୁରନ୍ଧ୍ରୀ ହି ॥ ୧୦॥
ମାମକମାନସକୀରଂ ବଧ୍ନୀଯାଶ୍ଚରଣପଞ୍ଜରେ ମାତଃ ।
ତେନ ମମ ଜନ୍ମଲାଭଃ ସ୍ତୋତ୍ରଂ ଚ ତଵ ପ୍ରକାମକଲିତାର୍ଥମ୍ ॥ ୧୧॥
ସଂଵିତ୍ପ୍ରରୋହକଲିକାପ୍ରାପ୍ତ୍ଯୈ ତାଂ ନୌମି ଶାରଦାଂ ଦେଵୀମ୍ ।
ଯା କିଲ କଵୀଶ୍ଚରାଣାମଧିନେତ୍ରୀ କାଵ୍ଯକଲନାଦୌ ॥ ୧୨॥
ଭକ୍ତାନାଂ ଜିହ୍ଵାଗ୍ରଂ ସିଂହାସନମାଦରାଦ୍ ଵାଣୀ ।
କଲଯନ୍ତି ନୃତ୍ଯତି କିଲ ତତସ୍ତୁ ତନ୍ନୂପୁରନିନାଦଃ ॥ ୧୩॥
ମଞ୍ଜୁଲଫଣିତିଝରୀତି ପ୍ରଗୀଯତେ ଦିକ୍ତଟେ ରସିକୈଃ ।
ପ୍ରାତଃଫୁଲ୍ଲପଯୋରୁହମରନ୍ଦରସକେଲିଧୂର୍ଵହା କାଲେ ॥ ୧୪॥
ଦୁର୍ଵାରଗର୍ଵଦୁର୍ମତିଦୁରର୍ଥନିରସନକଲାନିପୁଣାଃ ।
ମାତସ୍ତଵ ପାଦଯୋରୁହସେଵାଧନ୍ଯତାଂ ପ୍ରାପ୍ତାଃ ॥ ୧୫॥
ନୀଚା ମମ ତୁ ମନୀଷା ତଥାପି ତଵ ନୁତିକଲାପ୍ରଵୃତ୍ତୋଽସ୍ମି ।
ଅମ୍ବ ତଵ ତତ୍ର ହେତୁଃ କୃପାଂ ପରଂ ବୁଦ୍ଧିଦା ଜଯତି ॥ ୧୬॥
ଵିଧିଦଯିତେ ତଵ ମାତଃ ସ୍ତୁତୌ ନ ଶକ୍ତା ଅପି ତ୍ରିଦଶାଃ ।
କ୍ଷନ୍ତଵ୍ଯମତ୍ର ଦଯଯା ମମ ଚାପଲ୍ଯଂ ତଵ ସ୍ତୋତ୍ରେ ॥ ୧୭॥
ଶୁକଵାଣୀମିଵ ମାତର୍ନିରର୍ଥକାଂ ମଦ୍ଵଚୋଭଙ୍ଗୀମ୍ ।
ସଦସି ଶୃଣୋଷି ଦଯଯା ତତ୍ ତଵ ଚୋତ୍ତମପଦଵ୍ଯକ୍ତ୍ଯୈ ॥ ୧୮॥
ପରଦେଵତେ ପ୍ରସୀଦ ପ୍ରାଣେଶ୍ଵରି ଧାତୁରମ୍ବ ମମ ଵାଣୀମ୍ ।
କୃପଯା ତଵ ନୁତିଯୋଗ୍ଯାଂ ତ୍ଵନ୍ନୂପୁରନିନଦରମ୍ଯରସଗୁମ୍ଫାମ୍ ॥ ୧୯॥
ସର୍ଵଜ୍ଞତ୍ଵଂ ସଂପଦମଥଵାନ୍ଯାଂ ପ୍ରାପ୍ତୁମତ୍ର ତଵ ମାତଃ ।
ତଵ ଚରଣକମଲମେତଚ୍ଛରଣଂ ନାନ୍ଯା ଗତିର୍ଦୃଷ୍ଟା ॥ ୨୦॥
ମନ୍ଦଧିଯା ସ୍ଵଲ୍ପାପି ସ୍ତୁତିରମ୍ବ ନିରର୍ଥକାପି ରସହୀନା ।
କଲିତା ଚେତ୍ ତଵ କୃପଯା ତଦେଵ ସଦସୀଡିତଂ ଭାତି ॥ ୨୧॥
କୁଣ୍ଠୀକରୋତୁ ଵିପଦଂ ଚାଜ୍ଞାନଂ ଦୁର୍ଗତିଂ ଵାଣି ।
ତଵ ଚରଣକମଲସେଵାଦରୋ ଜନାନାଂ କଲୌ କାଲେ ॥ ୨୨॥
ଵୀରଶ୍ରୀର୍ଵିଦ୍ଵଚ୍ଛ୍ରୀର୍ଜଯଶ୍ରିଯୋ ଵାମରୈର୍ମାନ୍ଯେ ।
ତଵ ପାଦାମ୍ବୁଜସେଵାଦରେଣ ସିଧ୍ଯନ୍ତି ନାନ୍ଯଥା ଲୋକେ ॥ ୨୩॥
କରୁଣାରସଵର୍ଷିଣି ତେ ଚରଣସରୋଜଦ୍ଵଯଂ ନିଧେହି ମମ ।
ମସ୍ତକତଲେ ଵିଦାରିତଜରାଦିକଂ ସପଦି ଜନ୍ମ ସାର୍ଥଂ ମେ ॥ ୨୪॥
ଶ୍ରଦ୍ଧାଂ ମେଧାଂ ସଂପଦମନ୍ଯାମମରେନ୍ଦ୍ରମାନନୀଯାଂ ହି ।
ଦଯଯା ଵିଧେହି କାଲେ ଭକ୍ତାନାଂ ନସ୍ତ୍ଵଦେକଶରଣାନାମ୍ ॥ ୨୫॥
ପ୍ରେଯସି ଧାତୁର୍ଜଗତାଂ ପରମେଶ୍ଵରି ଵାଣି ମାତରମ୍ବ ନନୁ ।
ତଵ ନାମାନି ଫଣନ୍ତସ୍ତ୍ରିଦଶୈଃ ସହ ଯାନ୍ତି ଯାନେନ ॥ ୨୬॥
ତଵ ନାମ ଯସ୍ଯ ଜିହ୍ଵାଙ୍ଗଣେ ଵିଶୁଦ୍ଧଂ କ୍ଷଣଂ ସ୍ଫୁରତି ।
ସ ହି ଵନ୍ଦ୍ଯସ୍ତ୍ରିଦଶୈରପି ଵିଗଲିତପାପଃ ପରେ ଲୋକେ ॥ ୨୭॥
ନତନାକୀଶ୍ଵରଵନିତାମୌଲିସ୍ରଗ୍ଗଲିତମକରନ୍ଦୈଃ ।
ସ୍ନିଗ୍ଧପଦାମ୍ବୁଜଯୁଗଲା ଵାଣୀ ଦେଵୀ ଶ୍ରିଯୋ ହି ଲସତି ପରା ॥ ୨୮॥
ଵିଦୁଷାମପି ତୁଷ୍ଟିକରଂ ନଵନଵରସଗୁମ୍ଫନଂ କଵିତ୍ଵଂ ତୁ ।
ଯତ୍କରୁଣାଵୀକ୍ଷଣତୋ ସିଧ୍ଯତି ତାଂ ଶାରଦାଂ ଵନ୍ଦେ ॥ ୨୯॥
ଅମ୍ବ ପ୍ରସୀଦ ପରମଂ ମାଯାମେତାଂ ନିରସ୍ଯ ନତିଭାଜଃ ।
ମମ ସଂଵିଧେହି ମଧୁରାଂ ଵାଚଂ ତଵ ନୁତିକଲାର୍ହାଂ ଚ ॥ ୩୦॥
ଵାଣୀ ମାତା ଜଗତାଂ ଵାଣୀପୁସ୍ତକକରାମ୍ଭୋଜା ।
ହଂସାଶ୍ରିତା ହି ନମତାଂ ଶ୍ରେଯଃସିଧ୍ଯୈ ପ୍ରସନ୍ନା ନଃ ॥ ୩୧॥
ଶ୍ଲାଘ୍ଯା ସଂପତ୍କାଲେ ଵୈଦୁଷ୍ଯଂ ଵା ଯଦୀଯଵୀକ୍ଷଣତଃ ।
ସିଧ୍ଯନ୍ତ୍ଯପି ଦେଵାନାଂ ତାଂ ଵନ୍ଦେ ଶାରଦାଂ ଦେଵୀମ୍ ॥ ୩୨॥
ଵିଦ୍ଯାଦାନକରୀଯଂ କମଲାସନପୁଣ୍ଯପରିପାକଃ ।
ମମ ମନସି ସଂନିଧତ୍ତାଂ ଦିଵ୍ଯଜ୍ଞାନାଦିସିଧ୍ଯୈ ହି ॥ ୩୩॥
ଦିଵ୍ଯଜ୍ଞାନଂ ଦଯଯା ଵିଧେହି ମାତର୍ମହାସାରମ୍ ।
ତେନୈଵ ତେ ତୁ କୀର୍ତିର୍ଦାନଫଲଂ ନଶ୍ଚ ଜନ୍ମସାଫଲ୍ଯମ୍ ॥ ୩୪॥
ଦ୍ଵାଦଶବୀଜାକ୍ଷରଗାଂ ମନ୍ତ୍ରୋଦ୍ଧାରକ୍ରିଯାଶକ୍ତିମ୍ ।
ଵାଣୀଂ ଵିଧେସ୍ତୁ ପତ୍ନୀଂ ମଧ୍ଯେ ପଶ୍ଯାମି ବିମ୍ବମଧ୍ଯସ୍ଥାମ୍ ॥ ୩୫॥
ରଵିକୋଟିତେଜସଂ ତାଂ ସରସ୍ଵତୀଂ ତ୍ର୍ଯକ୍ଷରକ୍ରିଯାଶକ୍ତିମ୍ ।
ଅଣିମାଦିଦାଂ ପ୍ରସନ୍ନାମମ୍ବାଂ ପଶ୍ଯାମି ପଦ୍ମମଧ୍ଯଗତାମ୍ ॥ ୩୬॥
ଜଗଦୀଶ୍ଵରି ଭାରତି ମେ ପ୍ରସୀଦ ଵାଣି ପ୍ରପନ୍ନାଯ ।
ଅହମପି କୁତୁକାତ୍ ତଵ ନୁତିକଲନେଽଶକ୍ତଶ୍ଚ ମନ୍ଦଧିଷଣଶ୍ଚ ॥ ୩୭॥
ମୁନିଜନମାନସପେଟୀରତ୍ନଂ ଧାତୁର୍ଗୃହେ ରତ୍ନମ୍ ।
ଵାଣୀତି ଦିଵ୍ଯରତ୍ନଂ ଜଯତି ସଦା କାମଧୁକ୍ କାଲେ ॥ ୩୮॥
ଅଜ୍ଞାନଵ୍ଯାଧିହରଂ ତଦୌଷଧଂ ଶାରଦାରୂପମ୍ ।
ଯଃ ପଶ୍ଯତି ସ ହି ଲୋକେ ପରାତ୍ମନେ ରୋଚତେ କାଲେ ॥ ୩୯॥
କମଲାସନନଯନଫଲଂ ସୃଷ୍ଟ୍ଯାଦିକଲାସମାସକ୍ତମ୍ ।
ଵାଣୀରୂପଂ ତେଜଃ ସ୍ଫୁରତି ଜଗଚ୍ଛ୍ରେଯସେ ନିତ୍ଯମ୍ ॥ ୪୦॥
ହଂସଗତିଂ ତାମମ୍ବାମମ୍ଭୋରୁହଲୋଚନାଂ ଵନ୍ଦେ ।
ତିଲକଯତି ଯା ଗୁରୂଣାଂ ଜିହ୍ଵାସିଂହାସନଂ ଵାଣୀ ॥ ୪୧॥
ଵାଣି ତରଙ୍ଗଯ ଲୋଚନଵୀକ୍ଷଣଶୈଲୀଂ କ୍ଷଣଂ ମଯି ଭୋଃ ।
ମମ ଜନ୍ମ ଲବ୍ଧଵିଭଵଂ ତେନ ଭଵେନ୍ନୈଵ ତେ ହାନିଃ ॥ ୪୨॥
ପଦ୍ମାସନେନ ସାକଂ କାଲେ ଵାଣୀ ସମାସନା ଜଯତି ।
କୁଚକଲଶନମିତଦେହା କୁର୍ଵନ୍ତୀ ଭଦ୍ରସଂତତିଂ ନମତାମ୍ ॥ ୪୩॥
ଵ୍ଯାତନ୍ଵାନା ଵାଣୀ କଵୀଶ୍ଵରାଣାଂ ମନୋଜ୍ଞଵଚନଝରୀମ୍ ।
ଜଯତି ଵିଧିସୁକୃତସଂତତିପରିଣମିତମାଲା ବୁଧୈର୍ଵନ୍ଦ୍ଯା ॥ ୪୪॥
କମଲସୁଷମାଙ୍ଗଯଷ୍ଟିଃ ସା ଦେଵୀ ଜଯତି ପଦ୍ମମଧ୍ଯତଲେ ।
ଶତବୀଜାକ୍ଷରଲସିତଂ ଦିକ୍ପତିକୃତରକ୍ଷକଂ ଚ ମେରୁମୁଖମ୍ ॥ ୪୫॥
ଵାଣୀଯନ୍ତ୍ରଂ ଵିବୁଧୈର୍ମାନ୍ଯଂ ଯୋଗାସନାବ୍ଧୀନ୍ଦୁମ୍ ।
ହ୍ରୀମକ୍ଷରମୁଖମାଦ୍ଯଂ ପ୍ରାକ୍ତଟକଲିତଂ ଚ ପଦ୍ମମଧ୍ଯତଲେ ॥ ୪୬॥
ତନ୍ମେରୁଚକ୍ରରୂପଂ ସମାଧିଦୃଶ୍ଯଂ ଚ ଲୋକଵେଦ୍ଯଂ ଚ ।
ସୈଷାଶ୍ରିତ୍ଯ ତଦେତଦ୍ ରାଜତି ରାଜୀଵଲୋଚନା ଵାଣୀ ॥ ୪୭॥
ହଂସାଶ୍ରିତଗତିଵିଭଵା ମନ୍ଦସ୍ମେରା ତମୋନିହନ୍ତ୍ରୀ ଚ ।
ମଧୁରତରଵାଙ୍ନିଗୁମ୍ଫା ଵୀଣାପୁସ୍ତକକରାମ୍ଭୋଜା ॥ ୪୮॥
ଵୀଣାଵାଦନରସିକା ନମତାମିଷ୍ଟାର୍ଥଦାଯିନୀ ଵାଣୀ ।
ଧାତୁର୍ନଯନମହୋତ୍ସଵକଲିକା କୁର୍ଯାଚ୍ଛୁଭଂ ଜଗତାମ୍ ॥ ୪୯॥
ତାପିଞ୍ଛରମ୍ଯଦେହଶ୍ରୀରେଷା କଵିସମାଜନୁତା ।
ଅଷ୍ଟୈଶ୍ଵର୍ଯାଦିକଲାଦାନେ ଦତ୍ତେକ୍ଷଣା ଜଯତି ॥ ୫୦॥
ସୃଷ୍ଟ୍ଯାଦୌ ଵିଧିଲିଖିତଂ ଵାଣୀ ସୈଷା ହି ଚାନ୍ଯଥାକର୍ତୁମ୍ ।
ନାକୌକସାମପୀହ ପ୍ରଭଵତି କଲିତପ୍ରଣାମାନାମ୍ ॥ ୫୧॥
ଯଃ ପଶ୍ଯତି ତାମେତାଂ ଵାଣୀଂ ପୁରୁଷୋ ହି ଧନ୍ଯତାମେତି ।
ଯଂ ପଶ୍ଯତି ସୈଷାଯଂ ନିତରାଂ ଧନ୍ଯୋ ନୃପେଡିତଃ କାଲେ ॥ ୫୨॥
କବଲିତତମଃସମୂହା ଵାଣୀ ସୈଷା ହି ଵିଜଯତେ ଜଗତି ।
ଅପୁନର୍ଭଵସୁଖଦାତ୍ରୀ ଵିରିଞ୍ଚିମୁଖଲାଲିତା କାଲେ ॥ ୫୩॥
କମଲାସନମୁଖକମଲସ୍ଥିରାସନାଂ ଶାରଦାଂ ଵନ୍ଦେ ।
ଯନ୍ନାମୋଚ୍ଚରଣକଲାଵିଭଵାତ୍ ସର୍ଵଜ୍ଞତା ନିଯତମ୍ ॥ ୫୪॥
ଭଵପରମୌଷଧମେତଦ୍ଵାଣୀରୂପଂ ସଦାରାଧ୍ଯମ୍ ।
କମଲାସନଲୋଚନଗଣସରସକ୍ରୀଡାସ୍ପଦଂ ଜଯତି ॥ ୫୫॥
ନାରୀଵଂଶଶିଖାମଣିରେଷା ଚିନ୍ତାମଣିର୍ନତାନାଂ ହି ।
ଧାତୃଗୃହଭାଗଧେଯଂ ଧ୍ଯେଯଂ ସଦ୍ଭିଃ ଶ୍ରିଯଃ ସମୃଦ୍ଧ୍ଯୈ ନଃ ॥ ୫୬॥
ଜନନି ଭୁଵନେଶ୍ଵରି ତ୍ଵାଂ ଵାଣୀଂ ଵନ୍ଦେ କଵିତ୍ଵରସସିଦ୍ଧ୍ଯୈ ।
ତ୍ଵଂ ତୁ ଦଦାସି ହି ଦଯଯା ମମ ମନ୍ଦସ୍ଯାପି ଵାଗ୍ଝରୀର୍ମଧୁରାଃ ॥ ୫୭॥
ଏତେନ ତଵ ତୁ କୀର୍ତେର୍ମହିମା ସଂଗୀଯତେ ଦିଶାଂ ଵଲଯେ ।
କିଂନରଵର୍ଗୈରମରୀକନ୍ଯାଭିଃ କଲ୍ପଵୃକ୍ଷମୂଲତଲେ ॥ ୫୮॥
କଵିମଲ୍ଲସୂକ୍ତିଲହରୀସ୍ତନ୍ଵାନା ଶାରଦା ଜଯତି ।
ଵିଧିକେଲିସଦନହଂସୀ କଲ୍ଯାଣୈକସ୍ଥଲୀ ନମତାମ୍ ॥ ୫୯॥
ସ୍ଫୁରତୁ ମମ ଵଚସି ଵାଣି ତ୍ଵଦୀଯଵୈଭଵସୁଧାଧାରା ।
ନିତ୍ଯଂ ଵ୍ଯକ୍ତିଂ ପ୍ରାପ୍ତା ଧୁତନତଜନଖେଦଜାଲକା ମହତୀ ॥ ୬୦॥
ଵାଣି ତଵ ସ୍ତୁତିଵିଷଯେ ବୁଦ୍ଧିର୍ଜାତା ହି ମେ ସହସା ।
ତେନ ମମ ଭାଗଦେଯଂ ପରିଣତିମିତ୍ଯେଵ ନିତ୍ଯସଂତୁଷ୍ଟଃ ॥ ୬୧॥
ସୃଷ୍ଟିକଲାମଣ୍ଡନଭୂରେଷା ଵାଣୀ ଜଗଜ୍ଜନନୀ ।
ଆଲୋକମାତ୍ରଵଶତସ୍ତମସୋ ହନ୍ତ୍ରୀ ଚ ସଂପଦାଂ ଜନନୀ ॥ ୬୨॥
ପୌରୁଷଲୋପଵିଧାତ୍ରୀ ଧାତୁରିଯଂ କମଲକୋମଲାଙ୍ଗଲତା ।
ଵସତୁ ସଦା ଜିହ୍ଵାଗ୍ରେ ଦିଵ୍ଯଜ୍ଞାନପ୍ରଦା ଦେଵୀ ॥ ୬୩॥
ପ୍ରତିଦିନଦୁରିତନିହନ୍ତ୍ରୀ ପଦ୍ମାସନନଯନପୁଣ୍ଯପରିପାକଃ ।
କଵିତାସଂତାନକଲାବୀଜଙ୍କୁରଵର୍ଧିନୀ ଜଯତି ॥ ୬୪॥
କ୍ଷଣଵୀକ୍ଷଣେନ ମାତା ଲକ୍ଷ୍ମୀଂ ପକ୍ଷ୍ମଲଯତି ପ୍ରଣତେ ।
ଵେଧସି ସୁରତମହୋତ୍ସଵସଂକେତତଲପ୍ରଦର୍ଶିନୀ କାଲେ ॥ ୬୫॥
ଶୃଙ୍ଗାରଵିଭ୍ରମଵତା ନୀଲୋତ୍ପଲକାନ୍ତିଚାତୁରୀସୁପୁଷା ।
ଵାଣୀନେତ୍ରେଣ ଵିଧିର୍ଜିତୋଽଭଵତ୍ ସୋଽପି ସତତକୃତଵେଦଃ ॥ ୬୬॥
ଶ୍ଯାମା କଟାକ୍ଷଲହରୀ ମାତୁର୍ଜଯତୀହ ସଂପଦାଂ ଜନନୀ ।
ଯାମସ୍ତୌଷୀତ୍ କାଲେ ମଘଵା ନାକାଧିପା ମୁନଯଃ ॥ ୬୭॥
ମଣିକଟକନାଦପୂରିତମମ୍ବାପାଦାମ୍ବୁଜଂ ମହାମନ୍ତ୍ରୈଃ ।
ଜପ୍ଯଂ ଧ୍ଯେଯଂ କାଲେ ଦିଶି ଦିଶି କଲିତସ୍ଵରକ୍ଷଂ ଚ ॥ ୬୮॥
ସ୍ମରଣେନ ଦୁରିତହନ୍ତ୍ରୀ ନମନେନ କଵିତ୍ଵସିଦ୍ଧିଦା ଵାଣୀ ।
କୁସୁମସମର୍ପଣକଲଯା କାଲେ ମୋକ୍ଷପ୍ରଦାତ୍ରୀ ଚ ॥ ୬୯॥
ଵିସୃମରତମୋନିହନ୍ତ୍ରି ତ୍ଵାଂ ସେଵେ ଶାରଦାଦେଵି ।
ଶିଶିରୀକୁରୁ ମାଂ କାଲେ କରୁଣାରସଵୀକ୍ଷିତେନ ଵରଦେନ ॥ ୭୦॥
ମାତର୍ନମୋଽସ୍ତୁ ତାଵକକଟାକ୍ଷମଧୁପାଯ ଶାରଦେ ଜଯତି ।
ଯୋ ଵେଧସୋଽପି କାଲେ ସୃଷ୍ଟ୍ଯାଦୌ ଚାତୁରୀଂ ଦିତ୍ସନ୍ ॥ ୭୧॥
ସୁମନୋଵାଞ୍ଛାଦାନେ କୃତାଵଧାନଂ ଧନଂ ଧାତୁଃ ।
ଧିଷଣାଜାଡ୍ଯାଦିହରଂ ଯଦ୍ଵୀକ୍ଷଣମାମନନ୍ତି ଜଗତି ବୁଧାଃ ॥ ୭୨॥
ଲଲିତଗମନଂ ତ୍ଵଦୀଯଂ କଲନୂପୁରନାଦପୂରିତଂ ଵାଣି ।
ନୌମି ପଦାମ୍ବୁଜଯୁଗଲଂ କଵିତାସିଦ୍ଧ୍ଯୈ ଵିଧେଃ କାନ୍ତେ ॥ ୭୩॥
କମଲକୃତଵୈଜଯନ୍ତୀ ଵିଧେର୍ମୁଖେଷ୍ଵାଦରାଦ୍ଵାଣ୍ଯାଃ ।
ଜଯତି କଟାକ୍ଷଲହରୀ ତୋରଣଲକ୍ଷ୍ମୀସ୍ତୁ ସତ୍ଯଲୋକେ ହି ॥ ୭୪॥
ନିଶ୍ରେଣିକା ଚ ମୁକ୍ତେଃ ସଜ୍ଜ୍ଞାନନଦୀମହାଲହରୀ ।
ନାନାରସଚାତୁର୍ଯପ୍ରସାରିକା ଦୁରିତଶଙ୍କୁଲା କାଲେ ॥ ୭୫॥
ପରତନ୍ତ୍ରିତଵିଧିଵିଭଵା ଦେଵୀ ସା ଶାରଦା ଜଯତି ।
କୈଵଲ୍ଯାଦିକଲାନାଂ ଦାତ୍ରୀ ଭକ୍ତାଲିକାମଧେନୁର୍ଯା ॥ ୭୬॥
କଵିକାମଧେନୁରେଷା ମଞ୍ଜୁସ୍ମେରାନନାମ୍ଭୋଜା ।
ଵାଣୀ ଜଯତି ଵିଧାତୁର୍ମନନାଗମସଂପ୍ରଦାଯଫଲଦା ହି ॥ ୭୭॥
ଘନତରକୃପାରସାର୍ଦ୍ରୈର୍ନାନାଵିଭଵପ୍ରଦାନକୃତଦୀକ୍ଷୈଃ ।
ଵାଣୀ ଜଯତି କଟାକ୍ଷୈର୍ନଃ କାଶ୍ମଲ୍ଯଂ ହଠାନ୍ନିରସ୍ଯନ୍ତୀ ॥ ୭୮॥
ଦାସାଶାଦାନକଲାପ୍ରକ୍ଲୃପ୍ତଦୀକ୍ଷାକଟାକ୍ଷଲହରୀ ମେ ।
କବଲଯତୁ ପାପରାଶିଂ ଵାଣ୍ଯା ନିତ୍ଯଂ ମହୌଦାର୍ଯା ॥ ୭୯॥
ଆଦିମଜନନୀ ସୈଷା ଵାଣୀ ଜଯତୀହ ଭକ୍ତରକ୍ଷାଯୈ ।
ସର୍ଵତ୍ର କଲିତଦେହା ନାନାଶାସ୍ତ୍ରାଦିରୂପତୋ ଜଗତି ॥ ୮୦॥
ବହୁଵିଧଲୀଲାସଦନଂ ସଂଭୃତଫୁଲ୍ଲାବ୍ଜଶିଲ୍ପଵୈଚିତ୍ର୍ଯମ୍ ।
ଵାଣୀମୁଖାରଵିନ୍ଦଂ ଚୁମ୍ବତି ମାନସମିଦଂ ହଠାତ୍ କୃତ୍ଯମ୍ ॥ ୮୧॥
ସୌଭାଗ୍ଯକାନ୍ତିସାରଂ ଵଦନାମ୍ଭୋଜଂ ଶ୍ରିଯୈ ଵାଣ୍ଯାଃ ।
ଆଶ୍ରିତ୍ଯ ସକଲଵେଦା ଅପି ନିତ୍ଯଂ ମାନ୍ଯତାଂ ପ୍ରାପ୍ତାଃ ॥ ୮୨॥
ଜ୍ଞାନମଯୀ ସଲିଲମଯୀ ତତ୍ତ୍ଵମଯୀ ଭାତି ସର୍ଵଲୋକାନାମ୍ ।
ଅକ୍ଷରମଯୀ ଚ ଵାଣୀ ଶ୍ରେଯୋଦାନେ ନିବଦ୍ଧଚିତ୍ତଗତିଃ ॥ ୮୩॥
ନମୌକ୍ତିରସ୍ତୁ ମାତ୍ରେ ଵାଣ୍ଯୈଃ ନଃ ସିଦ୍ଧିଦା ଭକ୍ତ୍ଯା ।
ଆନନ୍ଦିନ୍ଯୈ ଜ୍ଞାନସ୍ଵରୂପଭାଜେ ପ୍ରବନ୍ଧରୂପାଯୈ ॥ ୮୪॥
ଆରାଧ୍ଯାଯୈ ଧ୍ଯେଯାଯୈ ଚାତ୍ତକଲାଚିତ୍ରନାଦରୂପାଯୈ ।
ସଚ୍ଚିତ୍ତଵାସଭାଜେ ଵାଣ୍ଯୈ ଭୂଯୋ ନମୋଽସ୍ତୁ ଭକ୍ତିକୃତମ୍ ॥ ୮୫॥
କମଲାସନପୁଣ୍ଯକଲା ନମତାଂ ଚିନ୍ତାମଣିର୍ଵାଣୀ ।
ଜୀଵାକ୍ଷରବୋଧକଲାରୂପା ଜଯତୀହ ସତ୍ତ୍ଵରୂପଵତୀ ॥ ୮୬॥
ବ୍ରହ୍ମାଣ୍ଡମଣ୍ଡଲମିଦଂ ଵ୍ଯାପ୍ତଂ ମାତ୍ରା କ୍ଷରାକ୍ଷରାଦିଜୁଷା ।
ଯତ୍ପଦକମଲଂ ନିତ୍ଯଂ ଶ୍ରୁତିତତିସୁଦତୀଵିଭୂଷଣଂ ଚ ଵିଦୁଃ ॥ ୮୭॥
ମନସିଜସାମ୍ରାଜ୍ଯକଲାଲକ୍ଷ୍ମୀରେଷା ଵିରିଞ୍ଚିମୁଖହର୍ଷମ୍ ।
ଵ୍ଯାତନ୍ଵାନା ନିତ୍ଯଂ ରାଜତି ଷଡରସ୍ଵରୂପଚକ୍ରତଲେ ॥ ୮୮॥
ମଞ୍ଜୁଲଵୀଣାନିନଦପ୍ରଯୋଗନିର୍ଧୂତମୋହସଂଚାରା ।
ହଂସୀଯାନା ଵାଣୀ ହଂସଗତିଃ ସୁକୃତିନେତ୍ରପୁଣ୍ଯକଲା ॥ ୮୯॥
କୁଚକଲଶସଵିଧଵିନିହିତଵୀଣାନିକ୍କାଣସାଵଧାନକଲା ।
ଅଧିନେତ୍ରୀ ହି କଲାନାଂ ସକଲାନାଂ ଶାରଦା ଜଯତି ॥ ୯୦॥
ତ୍ରିଦଶପରିଷନ୍ନିଷେଵ୍ଯା ପ୍ରାତଃ ସାଯଂ ପ୍ରଫୁଲ୍ଲମୁଖକମଲା ।
କମଲାସ୍ନୁଷା ହି ଵାଣୀ ଵାଣୀଂ ଦିଶତୁ ପ୍ରବନ୍ଧରସଭରିତାମ୍ ॥ ୯୧॥
ଅଧିକଚପଲୈଃ କଟାକ୍ଷୈରଞ୍ଚିତଲୀଲାରସୈରୁଦାରୈର୍ନଃ ।
ମଙ୍ଗଲମାତନ୍ଵାନା ଵିଧାତୃଗୃହିଣୀ ସୁରାଦିନୁତପାଦା ॥ ୯୨॥
କାନ୍ତଂ ଲକ୍ଷ୍ମୀଭଵନଂ ମୁଖକମଲଂ ଶାରଦାଦେଵ୍ଯାଃ ।
ସୌଭାଗ୍ଯକାନ୍ତିସାରଂ ସ୍ପୃହଯତି ମେ ମାନସଂ ସରସମ୍ ॥ ୯୩॥
କାରୁଣ୍ଯପୂର୍ଣନଯନଂ ପୁସ୍ତକହସ୍ତଂ ମହଃ କିମପି ।
ଧାତୁଃ ପୁଣ୍ଯକଲାନାଂ ପରିପାକୋ ମର୍ତ୍ଯରକ୍ଷଣଂ କୁରୁତେ ॥ ୯୪॥
ସଂସାରଵାରିରାଶିଂ ତର୍ତୁଂ ସା ସେତୁରେଷା ନଃ ।
ଧାତୁର୍ଗୃହିଣୀ ଦୁଃଖଂ ଶିଥିଲଯତୁ ପରଂ ଜନିପ୍ରାପ୍ତମ୍ ॥ ୯୫॥
ସରସକଵିକଲ୍ପଵଲ୍ଲୀମମ୍ବାଂ ଵାଣୀମହମୁପାସେ ।
ଅନ୍ତସ୍ତମୋନିହନ୍ତ୍ରୀଂ ଯାମାହୁର୍ଜ୍ଞାନଦାଂ ମୁନଯଃ ॥ ୯୬॥
ମମ ଲୋଚନଯୋର୍ଭୂଯାତ୍ ଵିଦ୍ଯା କାପି ପ୍ରଧୂତଜନିଭୀତିଃ ।
ନିଗମେଷୁ ସଂଚରନ୍ତୀ କୃପାନିଧିଃ ଶାରଦା ଦେଵୀ ॥ ୯୭॥
ଶମିତନତଦୁରିତସଂଘା ଧାତ୍ରେ ନିଜନେତ୍ରକଲ୍ପିତାନଙ୍ଗା ।
କୃତସୁରଶାତ୍ରଵଭଙ୍ଗା ସା ଦେଵୀ ମଙ୍ଗଲୈସ୍ତୁଙ୍ଗା ॥ ୯୮॥
ପଦ୍ମାସନସ୍ଥିତାଂ ତାଂ ଵାଣୀଂ ଚତୁରାନନାଂ ଵନ୍ଦେ ।
କଲ୍ଯାଣାନାଂ ସରଣିଂ କଵିପରିଷତ୍କଲ୍ପଵଲ୍ଲରୀଂ ମାନ୍ଯାମ୍ ॥ ୯୯॥
କୁଚଭାରସଂନତାଙ୍ଗୀଂ କୁନ୍ଦସ୍ମେରାନନାମ୍ଭୋଜାମ୍ ।
କୁନ୍ଦଲକୁସୁମପରିମଲସଂପାଦିତଭୃଙ୍ଗଝଂକୃତିତରଙ୍ଗାମ୍ ॥ ୧୦୦॥
ଚିଦ୍ରୂପାଂ ଵିଧିମହିଷୀଂ ହଂସଗତିଂ ହଂସସଂନୁତଚରିତ୍ରାମ୍ ।
ଵିଦ୍ଯାକଲାଦିନିଲଯାମାରାଧ୍ଯାଂ ସକଲଜଡିମଦୋଷହରୀମ୍ ॥ ୧୦୧॥
ଜନନି ଯଦି ଭଜତି ଲୋକେ ତଵ ଲୋଚନଵୀକ୍ଷଣଂ କ୍ଷଣଂ ମର୍ତ୍ଯଃ ।
କୁପୁରୁଷନୁତିଵିମୁଖସ୍ତେ ରୂପଂ ଜ୍ଞାନପ୍ରଦଂ ପଶ୍ଯନ୍ ॥ ୧୦୨॥
କୁକ୍ଷିଂଭରିତ୍ଵମୁଖଦୁର୍ଗୁଣାଦିକଂ ଦୂରତସ୍ତ୍ଯକ୍ତ୍ଵା ।
ତ୍ଵଦ୍ଭାଵନେନ ଧନ୍ଯୋ ନଯତି ଚ କାଲଂ ପ୍ରମୋଦେନ ॥ ୧୦୩॥
ମଯି ତାପଭାରଶାନ୍ତ୍ଯୈ ତରଙ୍ଗଯ ତ୍ଵଦିଲୋଚନେ ମାତଃ ।
ଯଚ୍ଛାରଦାବ୍ଜସୁଷମାମାନ୍ଯେ ଦେଵାଦିଭିଃ ପ୍ରାର୍ଥ୍ଯେ ॥ ୧୦୪॥
ସର୍ଵାର୍ଥଦା ହି ଭଜତାଂ କଟାକ୍ଷଧାଟୀ ଶିଵଂକରୀ ଵାଣି ।
ଚିନ୍ତାମଣିମିଵ କଲଯତି ଯାଂ ହି ଵିଧିର୍ଵିଦିତମନ୍ତ୍ରୋଽପି ॥ ୧୦୫॥
ସୁକୃତପରିପାକମାନସା ଧନ୍ଯାସ୍ତ୍ଵାମର୍ଚଯନ୍ତି ନନୁ ଵାଣି ।
ଅହମପି ତଦ୍ଵତ୍କଲଯେ ଫଲପ୍ରଦା ତ୍ଵଂ ସମାନକଲ୍ପାସି ॥ ୧୦୬॥
ନିଗମଵଚସାଂ ନିଦାନଂ ତଵ ପାଦାବ୍ଜଂ ଵତଂସଯତୁ କାଲେ ।
ଦେଵୋଽପି ଦେଵଦେଵୋ ଵିଜିତଜଗତ୍ତ୍ରଯତଲେ ମାତଃ ॥ ୧୦୭॥
ଅନ୍ତସ୍ତମସୋ ହନ୍ତ୍ରୀ ପଟୀଯସୀ ତେ କଟାକ୍ଷଝରମାଲା ।
ଯା ତୋରଣମାଲ୍ଯଶ୍ରିଯମାତନୁତେ ଵେଧସଃ ସୌଧେ ॥ ୧୦୮॥
ଶୃଙ୍ଗାରଵିଭ୍ରମଵତୀଂ ତ୍ଵାଂ ପ୍ରାପ୍ଯୈଵ କ୍ରିଯାକାଲେ ।
କଲଯତି ସୃଷ୍ଟ୍ଯାଦିମସୌ ଵିଧିଃ ଶ୍ରୁତିଵ୍ଯକ୍ତମାହାତ୍ମ୍ଯଃ ॥ ୧୦୯॥
ଵେଧୋଵଦନଂ କେଲୀଵନମାସାଦ୍ଯାମ୍ବ ପରମଯା ହି ମୁଦା ।
କ୍ରୀଡସି ଶୁକୀଵ କାଲେ ଦ୍ଵିଜସଂଘସମର୍ଚିତାତ୍ମଵୃତ୍ତିଶ୍ଚ ॥ ୧୧୦॥
ଧାତୁର୍ମୁଖମଞ୍ଜୂଷାରତ୍ନଂ ନିଗମାନ୍ତକେଲିଵନହଂସୀମ୍ ।
ପରମାଂ କଲାମୁପାସେ ତାମମ୍ବାଂ ଚିଦ୍ଵିଲାସଘନଵୃତ୍ତିମ୍ ॥ ୧୧୧॥
ଵାଗୀଶଦେଵରୂପିଣି ଗୀଷ୍ପତିମୁଖଦେଵସଂଘନୁତଚରଣେ ।
ତଵ ରୂପଂ ସୂର୍ଯାଯୁତଦୃଶ୍ଯଂ ଦର୍ଶଯ ମମ ଜ୍ଞାନେ ॥ ୧୧୨॥
ଦିଵ୍ଯଜ୍ଞାନପ୍ରଦମିଦମମ୍ବ ତ୍ଵଦ୍ରୂପମାଦରାଦ୍ଵାଣି ।
କାଲେ ଦର୍ଶଯ କୃପଯା ତେନ ଵଯଂ ପ୍ରାପ୍ତକାର୍ଯସାଫଲ୍ଯାଃ ॥ ୧୧୩॥
ଅମ୍ବା ତ୍ରିସଂଧ୍ଯପଠନପ୍ରଵୃତ୍ତିଭାଜାଂ କ୍ରମେଣ ନାମ୍ନାଂ ତୁ ।
ଦ୍ଵାଦଶକଲାଵିଭେଦଵ୍ଯୂହାଦିଜ୍ଞାନଦା ପ୍ରସନ୍ନା ହି ॥ ୧୧୪॥
ମୂକୋଽପି ସତ୍କଵିଃ ସ୍ଯାଦ୍ ଦୁରକ୍ଷରାଣ୍ଯପି ଵିଧାତୃଲିଖିତାନି ।
ସତ୍ଫଲଦାନି ସରସ୍ଵତି କଟାକ୍ଷପୂରେ ଯଦି କାପି ॥ ୧୧୫॥
ଅଵଲମ୍ବେ ତାମମ୍ବାଂ ପଞ୍ଚାଶଦ୍ଵର୍ଣକଲ୍ପିତଜଗତ୍କାମ୍ ।
ସୃଷ୍ଟିସ୍ଥିତିସଂହାରସ୍ଥିରୋଦଯାଂ ଵିଵିଧଶାସ୍ତ୍ରରୂପାଢ୍ଯାମ୍ ॥ ୧୧୬॥
ଵାଣୀଂ ଦିଶତୁ ମନୋଜ୍ଞାଂ ଵାଣୀ ଗତିହସିତକାଦମ୍ବା ।
ଯା ଦମ୍ଭାଦିଵିମୁକ୍ତା ନାଦଂ ଭାଵ୍ଯଂ ଵଦନ୍ତି ଯଦ୍ରୂପମ୍ ॥ ୧୧୭॥
ରାକେନ୍ଦୁଵଦନବିମ୍ବା ସାମ୍ବା ଵାଣୀ ପୁନାତୁ କୃତିମେନାମ୍ ।
ପରିକଲିତଭାଵବନ୍ଧାଂ ରସୋଜ୍ଜ୍ଵଲାଂ ମଙ୍ଗଲୋତ୍ତୁଙ୍ଗାମ୍ ॥ ୧୧୮॥
ଲାଵଣ୍ଯକାନ୍ତିସିନ୍ଧୁଃ ପାଦାବ୍ଜନତପ୍ରଭାଵସଂଧାତ୍ରୀ ।
ପ୍ରସୃମରତମୋନିହନ୍ତ୍ରୀ ମଦ୍ଵାଚାଂ ଦେଵତା ଚାଦ୍ଯା ॥ ୧୧୯॥
ଜନତାନେତ୍ରାନନ୍ଦଂ ରୂପଂ ଯସ୍ଯାଃ ସ୍ଫୁଟଂ ଭାତି ।
ସ୍ମରଣଂ ତ୍ଵଜ୍ଞାନହରଂ ଵିଶ୍ଵଜ୍ଞାନପ୍ରଦଂ ଚ ସା ଜଯତି ॥ ୧୨୦॥
ସହଧର୍ମିଣୀ ଵିଧାତୁର୍ଦାରିଦ୍ର୍ଯଧ୍ଵଂସିନୀ ନିଜକଟାକ୍ଷୈଃ ।
ସାଂନିଧ୍ଯଂ ଜନଯତୁ ମେ ସୁରମୁନିନରସଂନୁତସ୍ଵମହିମେଯମ୍ ॥ ୧୨୧॥
ମୁଖରିତଵୀଣା ଵାଣୀ ଵାଣୀଂ ମେ ଦିଶତୁ ନୈଜନୁତିଯୋଗ୍ଯାମ୍ ।
ଆସ୍ଵାଦିତଶାସ୍ତ୍ରାମୃତଲହରୀଂ ସଦ୍ଯସ୍ତମୋନିହନ୍ତ୍ରୀଂ ଚ ॥ ୧୨୨॥
ମଣିନୂପୁରନାଦନିଭା ଵାଣୀ ଭାତି ତ୍ଵଦୀଯଭକ୍ତମୁଖେ ।
କୀର୍ତିର୍ଦିଶାସୁ ଶୁଦ୍ଧିର୍ଵପୁଷି ବହୁମୁଖୀ ପରଂ କାଲେ ॥ ୧୨୩॥
ତଵ ପାଦସ୍ମରଣଵଶାତ୍ ତାମ୍ଯତି ତିମିରାଵଲିଶ୍ଚାନ୍ତଃ ।
ଆନନ୍ଦଲହରିଵୀଚୀ ପ୍ରସର୍ପତି କ୍ଷମାତଲେ ହି ଭକ୍ତାନାମ୍ ॥ ୧୨୪॥
ସଂପନ୍ନଲିନୀଭାନୁଂ ଜ୍ଞାନାବ୍ଧିସୁଧାକରଂ ହି ତଵ ରୂପମ୍ ।
ଭକ୍ତ୍ଯା ମନସି ଗୃଣନ୍ତୋ ଗଚ୍ଛନ୍ତି ଵ୍ଯୋମଯାନମାରୂଢାଃ ॥ ୧୨୫॥
ହୃତ୍ତମସାଂ ଦୀପରୁଚିର୍ଵିଧାତୃଦଯିତା ମମାସ୍ତୁ ପରଦୈଵମ୍ ।
ଭଵତାପମେଘମାଲା କଵିଶୁକଵାସନ୍ତିକଶ୍ରୀର୍ହି ॥ ୧୨୬॥
ମମ ମାନସମଣିହର୍ମ୍ଯେ ଵିହରତୁ ଵାଣ୍ଯାଃ ସ୍ଵରୂପଂ ତୁ ।
ନିଗମଵଚସାଂ ନିଗୁମ୍ଫୈର୍ଵେଦ୍ଯଂ ତଦ୍ଵେଧସା ଲାଲ୍ଯମ୍ ॥ ୧୨୭॥
ସତତମଭିଗମ୍ଯରୂପା ଵିବୁଧଵରେଡ୍ଯା ସରସ୍ଵତୀ ମାତା ।
ମନସି ମମ ସଂନିଧତ୍ତାଂ ଭୂତ୍ଯୈ ନଃ ସର୍ଵତଃ କାଲେ ॥ ୧୨୮॥
ମମ ଶିରସି ନୀଚପୁଣ୍ଯେ ପୁଣ୍ଯଘନା ଵେଦମୌଲିହର୍ମ୍ଯା ଚ ।
କୃତପଦଵିନ୍ଯାସଭରା ଵାଣୀ ଜଯତୀହ ଶତମଖାଦିନୁତା ॥ ୧୨୯॥
ମାଯାନିରସନଦକ୍ଷା ମାତେଯଂ ସୁପ୍ରସନ୍ନା ମେ ।
ଲଭତେ ପରମଂ ଜ୍ଞାନଂ ଯଦ୍ଭକ୍ତ୍ଯା ପାମରୋଽପି ଚ ଧରିତ୍ର୍ଯାମ୍ ॥ ୧୩୦॥
ଵାଣୀଶ୍ଵରି ତଵ ରୂପଂ ନାମସ୍ମରଣଂ ଚ ପୂଜନଂ ଭକ୍ତ୍ଯା ।
ସିଧ୍ଯତି ସକଲଵିଭୂତ୍ଯୈ ତତ୍ର ହି ଭଵତୀଦଯାପ୍ରସାରସ୍ତୁ ॥ ୧୩୧॥
ସଫଲଯତୁ ନେତ୍ରଯୁଗଲଂ ହତନତଦୁରିତା ଚ ସା ପରା ଦେଵୀ ।
କମଲଜମାନ୍ଯଚରିତ୍ରା ସୁମନୋଵାଞ୍ଛାପ୍ରଦାନକୃତଦୀକ୍ଷା ॥ ୧୩୨॥
ପଙ୍କଜମୃଣାଲତନ୍ତୁପ୍ରତିଭଟରୂପଂ କ୍ଵଚିଦ୍ଦୃଶ୍ଯମ୍ ।
କଵିକୁଲଵାଣୀକୈରଵଶାରଦଚନ୍ଦ୍ରପ୍ରଭାକବଲିତଂ ଚ ॥ ୧୩୩॥
ନଲିନଭଵଗୃହିଣି ଵାଣି ପ୍ରହ୍ଵାନାଂ ସପଦି ଭକ୍ତାନାମ୍ ।
ଲୁମ୍ପସି ମୋହଂ ଭଵତୀସ୍ମରଣାଦ୍ଵରିଵସ୍ଯଯା ସ୍ତୁତ୍ଯା ॥ ୧୩୪॥
କଵିକୁଲକଲ୍ପକଵଲ୍ଲୀମପାଙ୍ଗଲୀଲାକୃତାର୍ତିଶମନାଂ ତାମ୍ ।
ଵାଣୀମନ୍ଵହମାର୍ଯାରାଧ୍ଯାଂ ମୋକ୍ଷାଯ ନିଭୃତମହମୀଡେ ॥ ୧୩୫॥
ସଂଵିତ୍ସୁଖସ୍ଵରୂପାମମ୍ବାଂ ଵାଣୀମହର୍ନିଶଂ ମନସି ।
କଲଯେ କଲିତାପ୍ରଭରପ୍ରଶାନ୍ତିକାମଃ ପ୍ରଭାଵତୀଂ ଜଯଦାମ୍ ॥ ୧୩୬॥
ନତପରିପାଲିନି ଵାଣି ତ୍ରିଜଗଦଘଧ୍ଵଂସିନି ଶ୍ରିତାନାଂ ନଃ ।
ତଵ ପାଦଯୁଗଂ ନିଗଲଂ ଭଵତୁ ତମୋରାଶିଦୁଷ୍ଟହସ୍ତିଗଣେ ॥ ୧୩୭॥
କାମାଦିଦୁର୍ଗ୍ରହକୃତାନର୍ଥନିରାସାଯ ତାଵକାପାଙ୍ଗାଃ ।
ଵାଣି ଜନଯନ୍ତି ନତାନାଂ କୈଵଲ୍ଯ ଖପ୍ରଦାନାଯ ॥ ୧୩୮॥
ତଵ ଦର୍ଶନଂ ହି ମାତଃ ପରମଂ ସଂସ୍କାରମାତ୍ତପାପାନାମ୍ ।
କଲ୍ଯାଣସୂକ୍ତିକନ୍ଦଲରସପ୍ରଦଂ ମାନ୍ଯତେ ଵିବୁଧୈଃ ॥ ୧୩୯॥
ଧାତୁର୍ଵଦନସରୋଜେ ଶ୍ରୁତିସୀମନି ହୃଦି ଚ ଭକ୍ତାନାମ୍ ।
ଏକପଦା ଦ୍ଵିପଦା ଵା ରାଜତି ଵାଣୀ ଜଗନ୍ମାତା ॥ ୧୪୦॥
ମଣିମଯକାଞ୍ଚୀଲସିତା ଵୀଣାପୁସ୍ତକକରାରଵିନ୍ଦା ଚ ।
ନମତାଂ ଜାଡ୍ଯଵିଧୂନନଧୃତଦୀକ୍ଷା ରାଜତେ ଵାଣୀ ॥ ୧୪୧॥
କବଲଯତୁ ତାପମସ୍ଯାଃ ସ୍ମରଣଂ ପାଦାବ୍ଜଵନ୍ଦନଂ ଵାଣ୍ଯାଃ ।
ଧାତୁର୍ଜିହ୍ଵାଗ୍ରତଲେ ନୃତ୍ଯନ୍ତ୍ଯାଃ ସାରସୂକ୍ତିରସଯନ୍ତ୍ଯାଃ ॥ ୧୪୨॥
ପଦ୍ମଜଵଦନଵିଭୂଷା ନିଗମଶିଖୋତ୍ତଂସପୀଠିକା ଵାଣୀ ।
ସକଲଵିଧଶାସ୍ତ୍ରରୂପା ଭକ୍ତାନାଂ ସତ୍କଵିତ୍ଵଦାନପ୍ରା ॥ ୧୪୩ ॥।
ଗତିଜିତମରାଲଗମନା ମରାଲଵାହା ଚ ଵେଧସୋ ଦାରାଃ ।
ଶିଶିରଦଯାସାରା ସା ନମତାଂ ସଂତାପହାରିଣୀ ସହସା ॥ ୧୪୪॥
ସ୍ତନଭାରସଂନତାଙ୍ଗୀ ଦରଦଲିତାମ୍ଭୋଜଲୋଚନାନ୍ତଶ୍ରୀଃ ।
ସଵିଧତଲେ ଵିବୁଧଵଧୂପରିଚରଣାଦ୍ଯୈଶ୍ଚ ତୁଷ୍ଟଚିତ୍ତା ସା ॥ ୧୪୫॥
ହରିଣାଙ୍କଵଦନବିମ୍ବା ପୃଥୁଲନିତମ୍ବା କଚାତ୍ତଲୋଲମ୍ବା ।
ନିଜଗତିଜିତକାଦମ୍ବା ସାମ୍ବା ପଦପଦ୍ମନମ୍ରଭକ୍ତକଦମ୍ବା ॥ ୧୪୬॥
ପରିହସିତନୀଲନୀରଜଦେହଶ୍ରୀଃ ଶାରଦା ପ୍ରଥମା ।
ସ୍ଫଟିକମଣିଭରକାନ୍ତିଃ ସରସ୍ଵତୀ କୀର୍ତ୍ଯତେ ଚ ଵିବୁଧଗଣୈଃ ॥ ୧୪୭॥
ନାଥେ ଦୃଢଭକ୍ତିମତୀ ସୃଷ୍ଟ୍ଯାଦୌ ଚିତ୍ସ୍ଵରୂପା ଚ ।
ଧାତ୍ରା ସମାନଭାଵା ଚୈକାସନପୂଣ୍ଡରୀକମଧ୍ଯସ୍ଥା ॥ ୧୪୮॥
ପ୍ରୀତ୍ଯା ସରସପୁମର୍ଥାନ୍ ଦଦାତି କାଲେ ଚିଦାଦିସଂଧାତ୍ରୀ ।
ସା ମେ ଦୈଵତମେଷା ସତତନିଷେଵ୍ଯା ଚ କାମଦା ଭୂଯାତ୍ ॥ ୧୪୯॥
ହରିଚରଣନଲିନଯୁଗଲେ ସଦୈକତାନା ହି ଶାରଦା ଜନନୀ ।
ପଦ୍ମାନୀଲାଦିସଖୀ ଶ୍ରୁତ୍ଯୁଦ୍ଯାନେ ଵିହାରରସଭରିତା ॥ ୧୫୦॥
ଧାତୁଃ କୁଟୁମ୍ବିନୀଯଂ ତନ୍ଯାତ୍ କଲ୍ଯାଣସଂତତିଂ ସତତମ୍ ।
ଯା ତାରୁଣ୍ଯଵିଭୁଷା ସମକ୍ରମା ତ୍ରିପୁରସୁନ୍ଦର୍ଯା ॥ ୧୫୧॥
ନାନାକ୍ଷରାଦିମାତୃକଗଣେଡିତା ଶବ୍ଦରୂପା ଚ ।
ନାଦବ୍ରହ୍ମଵିଲାସା ଵାଣୀ ସା ମଙ୍ଗଲାନି ନସ୍ତନ୍ଯାତ୍ ॥ ୧୫୨॥
ଦୃକ୍କୋଣଵୀକ୍ଷଣକଲାନିଗମପ୍ରାଭଵଵିଧାନଦା ନମତାମ୍ ।
ଵିବୁଧାନାଂ ହୃଦଯାବ୍ଜଂ ଯସ୍ଯା ଵାସସ୍ଥଲୀ ଚ ନିର୍ଦିଷ୍ଟମ୍ ॥ ୧୫୩॥
ମୋହାଦିଵନକୁଠାରା ଯା ନିତ୍ଯଂ ସେଵ୍ଯତେ ତ୍ରିଦଶସଂଧୈଃ ।
ନିତ୍ଯପ୍ରସନ୍ନରୂପାଂ ଶାନ୍ତାଂ ଯାମେଵ ସେଵତେ ଵେଧାଃ ॥ ୧୫୪॥
ନମତାଂ ଯଯୈଵ ଖଣ୍ଡୀକ୍ରିଯତେ ସୁଵର୍ଣଦୃଷ୍ଟିପୁଷା ।
ଯଦ୍ଵୀକ୍ଷଣେନ ପୁରୁଷଃ ଖ୍ଯାତୋ ନୃପସଦସି ମାନ୍ଯତେ ପ୍ରଥମମ୍ ॥ ୧୫୫॥
ଯସ୍ଯୈ ଶ୍ରୋତ୍ରିଯଵର୍ଯୈସ୍ତ୍ରିସଂଧ୍ଯମଧାର୍ଦିକଂ କ୍ରିଯତେ ।
ସା ମଞ୍ଜୁନୀତିରୂପା ଵାଣୀରୂପା ଚ ଭଣ୍ଯତେ ନିପୁଣୈଃ ॥ ୧୫୬॥
ସା ମଯି ତନ୍ଯାଦୀକ୍ଷାଂ ଵୀକ୍ଷାଵନଦାଂ ସରସ୍ଵତୀ ଦେଵୀ ।
ସଂତାନକୁସୁମଜୈତ୍ରୀଂ ଯାମୈଚ୍ଛତ୍ ପ୍ରାପ୍ତୁମଞ୍ଜସା ଵେଧାଃ ॥ ୧୫୭॥
ମନ୍ଦସ୍ମିତମଧୁରାସ୍ଯଂ କୃପାଵଲୋକଂ ନିରସ୍ତଜାଦ୍ଯତତି ।
ଭୂଯାଦ୍ ଵାଣ୍ଯା ରୂପଂ ପୁରଃ କରାମ୍ଭୋଜକଲିତଵୀଣାଦି ॥ ୧୫୮॥
ଵାଣ୍ଯାଃ ପରଂ ନ ଜାନେ ଦୈଵତମନ୍ଯଦ୍ ଵନେ ଗିରୌ ଚ ପଥି ।
ଗଗନେ ଵା ସଂରକ୍ଷିତନତଜନତାଯାଃ କୃପାରସାର୍ଦ୍ରାଯାଃ ॥ ୧୫୯॥
ଆସ୍ଯେନ୍ଦୋରଵଲୋକନମମ୍ବାଯାଃ ପାଦପଦ୍ମସେଵା ଚ ।
ସର୍ଵଶ୍ରେଯଃପ୍ରାପ୍ତ୍ଯୈ ଶାସ୍ତ୍ରଜ୍ଞୈଃ ସୁଷ୍ଠୁ ନିର୍ଦିଷ୍ଟା ॥ ୧୬୦॥
ଵାଣୀ ହି ତାପହନ୍ତ୍ରୀ ଜଗତାଂ କାରୁଣ୍ଯପୂର୍ଣନଯନଶ୍ରୀଃ ।
ମନ୍ଦାନ୍ କରୋତି ଵିବୁଧାନ୍ ଦ୍ରାଵଯତି ଶିଲାସ୍ତତସ୍ତୁ କିଂ ଚିତ୍ରମ୍ ॥ ୧୬୧॥
ଯସ୍ମିନ୍ କଟାକ୍ଷପୂରୋ ନ ଭଵତି ସ ହି ଦୀନଵଦନଃ ସନ୍ ।
ପ୍ରସ୍ଖଲିତଵାଗ୍ଭାର୍ତୋ ଭିକ୍ଷାମଟତୀହ ନିନ୍ଦିତୋ ବହୁଶଃ ॥ ୧୬୨॥
ଵାଣ୍ଯାଃ କଟାକ୍ଷପୂରସ୍ରଜା ତ୍ଵଲଂକୃତନିଗାଲୋ ଯଃ ।
ସ ହି ଭଵତି ରାଜମାନ୍ଯଃ କାନ୍ତାଧରମଧୁରଵାଗ୍ଵିଲାସଶ୍ଚ ॥ ୧୬୩॥
କଵିତାଭାଗ୍ଯଵିଧାତ୍ରୀ ପରିମଲସଂକ୍ରାନ୍ତମଧୁପଗଣକେଶା ।
ମମ ନଯନଯୋଃ କଦା ଵା ସା ଦେଵୀ କଲିତସଂନିଧାନକଲା ॥ ୧୬୪॥
ପରଚିଦ୍ଵିଧାନରୂପା ଵାଣୀ ଶ୍ରୁତିସୀମ୍ନି ରାଜତେ ପରମା ।
ମୁନିଜନମାନସହଂସୀ ଯା ଵିହରତି ସା ଶୁଭାଯ ସ୍ଯାତ୍ ॥ ୧୬୫॥
ଜପମାଲିକଯା ଵାଣୀକରଧୃତଯା ଵୀଣଯା ଚ କୋଶେନ ।
ଅହମସ୍ମି ନାଥଵାନିହ କିଂ ଵାଶାସ୍ଯଂ ପରଂ ଲୋକେ ॥ ୧୬୬॥
କୈଵଲ୍ଯାନନ୍ଦସୁଖପ୍ରାପ୍ତ୍ଯୈ ତେଜସ୍ତୁ ମନ୍ମହେ କିମପି ।
ଯଦ୍ ଵାଞ୍ଛିତଚିନ୍ତାମଣିରିତି ଵାଣୀତି ଚ ଭୁଵି ଖ୍ଯାତମ୍ ॥ ୧୬୭॥
କଵିକୁଲସୂକ୍ତିଶ୍ରେଣୀଶ୍ରଵଣାନନ୍ଦୋଲ୍ଲସଦ୍ଵତଂସସୁମା ।
ସା ଦେଵୀ ମମ ହୃଦଯେ କୃତସାଂନିଧ୍ଯା କୃତତ୍ରାଣା ॥ ୧୬୮॥
ଯସ୍ଯା ଦୃଷ୍ଟିଵିଦୂରାଃ କୁମତାଃ ଶ୍ରୁତ୍ଯର୍ଥଵଞ୍ଚକାଃ ଶପ୍ତାଃ ।
କ୍ରନ୍ଦନ୍ତି ଦିଗନ୍ତତଟେ ମୋହାଦ୍ଯୈର୍ଲୁପ୍ତନଯନାଶ୍ଚ ॥ ୧୬୯॥
ସତ୍ପରିଷତ୍ସଂମାନ୍ଯା ଶ୍ରୁତିଜୀଵନଦାଯିନୀ ଜଗନ୍ମାତା ।
ଚତୁରାନନଭାଗ୍ଯକଲା କୃତସାଂନିଧ୍ଯା ହି ରାଜତେ ହୃଦଯେ ॥ ୧୭୦॥
କୃତସୁକୃତୈଃ ସଂଦୃଶ୍ଯା ମନ୍ଦସ୍ମିତମଧୁରଵଦନପଦ୍ମଶ୍ରୀଃ ।
ମୁନିନାରଦାଦିପରିଷତ୍ତତ୍ତ୍ଵୋପକ୍ରମଵିଚକ୍ଷଣା ଵାଣୀ ॥ ୧୭୧॥
କଵିଵାଗ୍ଵାସନ୍ତୀନାଂ ଵସନ୍ତଲକ୍ଷ୍ମୀର୍ଵିଧାତୃଦଯିତା ନଃ ।
ପରମାଂ ମୁଦଂ ଵିଧତ୍ତେ କାଲେ କାଲେ ମହାଭୂତ୍ଯୈ ॥ ୧୭୨॥
କଵିତାରସପରିମଲିତଂ କରୋତି ଵଦନଂ ନତାନାଂ ଯା ।
ସ୍ତୋତୁଂ ତାଂ ମେ ହ୍ଯାରାତ୍ ସା ଦେଵୀ ସୁପ୍ରସନ୍ନାସ୍ତୁ ॥ ୧୭୩॥
ଯସ୍ଯାଃ ପ୍ରସାଦଭୂମ୍ନା ନାକିଗଣାଃ ସତ୍ତ୍ଵସଂପନ୍ନାଃ ।
ଐନ୍ଦ୍ରୀଂ ଶ୍ରିଯମପି ମାନ୍ଯାଂ ପଶ୍ଯନ୍ତି କ୍ଷପିତଶତ୍ରୁଭଯପୀଡାମ୍ ॥ ୧୭୪॥
ମାନ୍ଯଂ ଵିଧାତୃଲୋକେ ତତ୍ତେଜୋ ଭାତି ସର୍ଵସୁରଵନ୍ଦ୍ଯମ୍ ।
ବ୍ରହ୍ମାଣ୍ଡମଣ୍ଡଲମିଦଂ ଯଦ୍ରୂପଂ ଯତ୍ର ଚାକ୍ଷରଗତିଶ୍ଚ ॥ ୧୭୫॥
ଜନନି ତରଙ୍ଗଯ ନଯନେ ମଯି ଦୀନେ ତେ ଦଯାସ୍ନିଗ୍ଧେ ।
ତେନ ଵଯଂ କୃତାର୍ଥା ନାତଃ ପରମସ୍ତିଃ ନଃ ପ୍ରାର୍ଥ୍ଯମ୍ ॥ ୧୭୬॥
ଵାଣି ଵିଧାତୁଃ କାନ୍ତେ ସ୍ତୋତୁଂ ତ୍ଵାମାଦରେଣ କିଂ ଵାଚ୍ଯମ୍ ।
ଭାସି ତ୍ଵମେଵ ପରମଂ ଦୈଵତମିତ୍ଯେଵ ଜାନାମି ॥ ୧୭୭॥
କବଲିତତମୋଵିଲାସଂ ତେଜସ୍ତନ୍ମନ୍ମହେ ମହୋଦାରମ୍ ।
ଫଲିତସୁମନୋଽଭିଲାଷଂ ଵାଣୀରୂପଂ ଵିପଞ୍ଚିକୋଲ୍ଲସିତମ୍ ॥ ୧୭୮॥
ପଦ୍ମସନସୁକୃତକଲାପରିପାକୋଦଯମପାସ୍ତନତଦୋଷମ୍ ।
ସରସଜ୍ଞାନକଵିତ୍ଵାଦ୍ଯନନ୍ତସୁକୃତଂ ଵିରାଜତେ ତେଜଃ ॥ ୧୭୯॥
ନିଜନାଥଵଦନସିଂହାସନମାରୂଢାମୁପାସ୍ମହେ ଵାଣୀମ୍ ।
ଯା କୃତ୍ରିମଵାଗ୍ଗୁମ୍ଫୈର୍ଵିରଚିତକେଲିର୍ଧିନୋତି ଵିଧିମାଦ୍ଯମ୍ ॥ ୧୮୦॥
ସୁଜନାନନ୍ଦକରୀ ସା ଜନଯନ୍ତୀ ସର୍ଵସଂପଦଂ ଧାତୁଃ ।
ଭକ୍ତେଷୁ ତାଂ ନଯନ୍ତୀମନ୍ଵହମହମାଦ୍ରିଯେ ଗିରାଂ ଦେଵୀମ୍ ॥ ୧୮୧॥
କରୁଣାକଟାକ୍ଷଲହରୀ କାମାଯାସ୍ତୁ ପ୍ରକାମକୃତରକ୍ଷା ।
ଵାଣ୍ଯା ଵିଧାତୃମାନ୍ଯା ସତ୍ସୁଖଦାନେ ଦିଶି ଖ୍ଯାତା ॥ ୧୮୨॥
ଵିସରୋ ମହୋତ୍ସଵାନାଂ ଵିରିଞ୍ଚିନଯନାଵଲେରିଯଂ ମାତା ।
ପ୍ରିଯକାର୍ଯସିଦ୍ଧିଦାତ୍ରୀ ଜଗତୀରକ୍ଷାଧୁରଂଧରା ଜଯତି ॥ ୧୮୩॥
ଵିବୁଧାଭିଗମ୍ଯରୂପା ହଂସାଵଲିସେଵିତା ଗିରାଂ ଦେଵୀ ।
ଗଙ୍ଗେଵ କନତି କାଲେ ପରିକମ୍ପିତଶିଵଜଟାକୋଟିଃ ॥ ୧୮୪॥
ନୌକାଂ ଭଵାମ୍ବୁରାଶେରଜ୍ଞାନଧ୍ଵାନ୍ତଚନ୍ଦ୍ରିକାଂ ଵାଣୀମ୍ ।
କଲଯେ ମନସି ସଦାହଂ ଶ୍ରୁତିପଞ୍ଜରଶାରିକାଂ ଦେଵୀମ୍ ॥ ୧୮୫॥
ଭଵତାପାରଣ୍ଯତଲେ ଜହ୍ନୁସୁତା ଶାରଦା ଦେଵୀ ।
ଜ୍ଞାନାନନ୍ଦମଯୀ ନଃ ସଂପତ୍ସିଦ୍ଧ୍ଯୈ ପ୍ରତିକ୍ଷଣଂ ଜଯତୁ ॥ ୧୮୬॥
ମତ୍ତଗଜମାନ୍ଯଗମନା ମଧୁରାଲାପା ଚ ମାନ୍ଯଚରିତା ସା ।
ମନ୍ଦସ୍ମେରମୁଖାବ୍ଜା ଵାଣୀ ମମ ହୃଦଯସାରସେ ଲସତୁ ॥ ୧୮୭॥
ରକ୍ଷଣଚଣୌ ଚ ଵାଣ୍ଯାଃ ପାଦୌ ଵନ୍ଦେ ମନୋଜ୍ଞମଣିନାଦୌ ।
ଯତ୍ସେଵନେନ ଧନ୍ଯାଃ ପୁରୁହୂତାଦ୍ଯା ଦିଶାଂ ନାଥାଃ ॥ ୧୮୮॥
ଧାତୁର୍ଧୈର୍ଯକୃପାଣୀ ଵାଣୀ ସୁରଵୃକ୍ଷକୁସୁମମୃଦୁଵେଣୀ ।
ଶୁକଵାଣୀ ନୁତଵାଣୀ କଵିକୁଲମୋଦାଯ ଜଯତି ମୃଦୁଵାଣୀ ॥ ୧୮୯॥
କଲ୍ଯାଣୈକନିକେତନମସ୍ଯା ରୂପଂ ସଦା ସ୍ଫୁରତୁ ଚିତ୍ତେ ।
ମାନସକାଲୁଷ୍ଯହରଂ ମଧୁମଥନଶିଵାଦିବହୁମତୋତ୍କର୍ଷମ୍ ॥ ୧୯୦॥
ମୁନିଜନମାନସରତ୍ନଂ ଚିରତ୍ନମେତଦ୍ଵିଧାତୃସୁକୃତକଲା ।
ଵିନତଜନଲୋଚନଶ୍ରୀକର୍ପୂରକଲା ପରା ଜଯତି ॥ ୧୯୧॥
ଧୃତସୁମମଧୁପକ୍ରୀଡାସ୍ଥାନାଯିତକେଶଭାରାଯୈ ।
ନମ ଉକ୍ତିରସ୍ତୁ ମାତ୍ରେ ଵାଗ୍ଜିତପୀଯୂଷଧାରାଯୈ ॥ ୧୯୨॥
ବାଲକୁରଙ୍ଗଵିଲୋଚନଧାଟୀରକ୍ଷିତସୁରାଦିମନୁଜାନାମ୍ ।
ନଯନଯୁଗାସେଵ୍ଯଂ ତଦ୍ଭାତୀହ ଧରାତଲେ ତେଜଃ ॥ ୧୯୩॥
କୁଶଲଵିଧଯେ ତଦସ୍ତୁ ଶ୍ରୁତିପାଠରତାଦୃତାତ୍ମବହୁକେଲିଃ ।
କବଲିତପଦନତଦୈନ୍ଯଂ ତରୁଣାମ୍ବୁଜଲୋଚନଂ ତେଜଃ ॥ ୧୯୪॥
ବାଲମରାଲୀଗତ୍ଯୈ ସୁରଗିରିକନ୍ଯାଦିମହିତକଲଗୀତ୍ଯୈ ।
ଵିରଚିତନାନାନୀତ୍ଯୈ ଚେତୋ ମେ ସ୍ପୃହଯତେ ବହୁଲକୀର୍ତ୍ଯୈ ॥ ୧୯୫॥
ଵିନମଦମରେଶସୁଦତୀକଚସୁମମକରନ୍ଦଧାରଯା ସ୍ନିଗ୍ଧମ୍ ।
ତଵ ପାଦପଦ୍ମମେତତ୍ କଦା ନୁ ମମ ମୂର୍ଧ୍ନି ଭୂଷଣଂ ଜନନି ॥ ୧୯୬॥
କମଲଜପରତନ୍ତ୍ରଂ ତଦ୍ଗତତନ୍ଦ୍ରଂ ଵସ୍ତୁ ନିସ୍ତୁଲମୁପାସେ ।
ତେନୈଵାହଂ ଧନ୍ଯୋ ମଦ୍ଵଂଶ୍ଯା ନିରସିତାତ୍ମତାପଭରାଃ ॥ ୧୯୭॥
ଜ୍ଞାନାମୃତସଂଧାତ୍ରୀ ଭଵାବ୍ଧିସଂତରଣପୋତ୍ରନାମାଦିଃ ।
ଵାଣୀ ଵାଚାଂ ଲହରୀମଵନ୍ଧ୍ଯଯନ୍ତୀ ସୁରାଦିନୁତଚରିତା ॥ ୧୯୮॥
କାରୁଣ୍ଯପୂର୍ଣମେତଦ୍ ଵାଣୀରୂପଂ ସଦା କଲଯେ ।
ଯଦ୍ଭଜନାଦ୍ ଦେଵାନାମପି ସଂଵିଦ୍ ଭାତି କାର୍ଯକାଲେଷୁ ॥ ୧୯୯॥
ଧୀପଦ୍ମପୀଠମାସ୍ତେ ସା ଵାଣୀ କାଙ୍କ୍ଷିତାନି କଲଯନ୍ତୀ ।
ଯା ଘନକୃପାସ୍ଵରୂପା ସଂକୀର୍ତ୍ଯା ସର୍ଵଦେଵନୁତା ॥ ୨୦୦॥
ତଵ ପାଦପଦ୍ମଵିସୃମରକାନ୍ତିଝରୀଂ ମନସି କଲଯଂସ୍ତୁ ।
ନିରସିତନରକାଦିଭଯୋ ଵିରାଜତେ ନାକିସଦସି ସୁରମାନ୍ଯଃ ॥ ୨୦୧॥
କୁଚଯୁଗଲନମ୍ରଗାତ୍ରଂ ପଵିତ୍ରମେତଦ୍ ଭଜେ ତେଜଃ ।
ଧାତୁରପି ସର୍ଵଦେଵୈର୍ଯନ୍ନିର୍ଦିଷ୍ଟଂ ହୁ ଭଦ୍ରାଯ ॥ ୨୦୨॥
କୃତନତପଦଵାଗ୍ଧାଟୀ ଚେଟୀଭୂତାମରେଶମହିଷୀ ନଃ ।
କଟିକୃତମନୋଜ୍ଞଶାଟୀ ପାଟୀରରସାର୍ଦ୍ରନୈଜତନୁକୋଟୀ ॥ ୨୦୩॥
ପଦ୍ମଭଵପୁଣ୍ଯକୋଟୀ ହର୍ଷିତକଵିବୃନ୍ଦସୂକ୍ତିରସଧାଟୀ ।
ମୁଖଲସିତସରସଵାଟୀ ଵିଲସତୁ ମମ ମାନସେ କୃପାକୋଟୀ ॥ ୨୦୪॥
ଜ୍ଞାନପରାକ୍ରମକଲିକା ଦିଶି ଦିଶି କିନ୍ନରସୁଗୀତନିଜଯଶସଃ ।
ଧନ୍ଯା ଭାନ୍ତି ହି ମନୁଜାଃ ଯଦ୍ଵୀକ୍ଷାଲଵଵିଶେଷତଃ କାଲେ ॥ ୨୦୫॥
ସୁରଜନପାଲନଦକ୍ଷା ପ୍ରଶାନ୍ତଵୀକ୍ଷା ନିରସ୍ତରିପୁପକ୍ଷା ।
ମୋକ୍ଷାର୍ଥିଭିଃ ଶ୍ରିତା ସା ଲାକ୍ଷାରସଲସିତପାଦଭାଗ୍ ଭାତି ॥ ୨୦୬॥
କୁଙ୍କୁମଭରରୁଚିରାଙ୍ଗୀ ଭାତି କୃଶାଙ୍ଗୀ ଗିରାଂ ଦେଵୀ ।
ଧାତୁରପି ଜ୍ଞାନପ୍ରଦମସ୍ଯା ରୂପଂ ଵଦନ୍ତି ଵିବୁଧେଶାଃ ॥ ୨୦୭॥
ଵାଣି ନତିମମ୍ବ ନିତ୍ଯଂ କରଵାଣି ହି ଚିତ୍ସୁଖାଵାପ୍ତ୍ଯୈ ।
ତାଦୃକ୍ତ୍ଵଦୀଯକରୁଣାଵୀକ୍ଷଣତୋ ଗୀଷ୍ପତିଶ୍ଚ ସୁରମାନ୍ଯଃ ॥ ୨୦୮॥
କଲ୍ଯାମି ନତିମନନ୍ତାଂ କାଲେ କାଲେ ଶୁଭପ୍ରାପ୍ତ୍ଯୈ ।
ଧାତୁଃ ସୁକୃତୋଲ୍ଲାସଂ କରଧୃତଵୀଣାଦିକଂ ଚ ଯଦ୍ରୂପମ୍ ॥ ୨୦୯॥
କମଲାସନଦଯିତା ସା ଲସତୁ ପୁରୋଽସ୍ମାକମାଦରକୃତଶ୍ରୀଃ ।
ଯତ୍ପ୍ରଣମନାଜ୍ଜନାନାଂ କଵିତୋନ୍ମେଷଃ ସଦୀଡିତୋ ଭଵତି ॥ ୨୧୦॥
ପରସଂଵିଦାତ୍ମିକା ସା ମହିଷୀ ଧାତୁଃ କଲାଵତୀ ଵାଣୀ ।
ଶିଶିରୀକରୋତି ତପ୍ତାନ୍ କରୁଣାରସଦିଗ୍ଧନେତ୍ରପାଲ୍ଯା ନଃ ॥ ୨୧୧॥
ଧାତୃମନୋରଥପାତ୍ରଂ ସଂତପ୍ତସ୍ଵର୍ଣକାମ୍ଯନିଜଗାତ୍ରମ୍ ।
ଆଶ୍ରିତକମଲଜଗୋତ୍ରଂ ରକ୍ଷିତନତବାହୁଚ୍ଛାତ୍ରମ୍ ॥ ୨୧୨॥
କଵିକୁଲଜିହ୍ଵାଲୋଲଂ ପିତାମହାଦୃତମନୋଜ୍ଞନିଜଲୀଲମ୍ ।
ନିରସିତନତଦୁଷ୍କାଲଂ ଵନ୍ଦେ ତେଜଃ ସଦାଲିନୁତଶୀଲମ୍ ॥ ୨୧୩॥
ମନ୍ଦାନାମପି ମଞ୍ଜୁଲକଵିତ୍ଵରସଦାଯିନୀ ଜନନୀ ।
କାପି କରୁଣାମଯୀ ସା ଲସତୁ ପୁରସ୍ତାତ୍ ସଦାସ୍ମାକମ୍ ॥ ୨୧୪॥
ନିସ୍ତୁଲପଦସଂପ୍ରାପ୍ତ୍ଯୈ ଭୂଯୋ ଭୂଯୋ ନମାଂସି ତେ ଵାଣି ।
ଦୀପକଲାମଯି ଚାନ୍ତଃସ୍ମରଣଂ ଧାତୁଃ କୁଟୁମ୍ବିନ୍ଯୈ ॥ ୨୧୫॥
ମାଯାନିରାସକାମୋ ଵନ୍ଦେ ଵାଣ୍ଯାଃ ପଦାମ୍ଭୋଜମ୍ ।
ସିଦ୍ଧମନୋରଥଶତକା ଯଦ୍ଭଜନେନାର୍ଥିନଃ କାଲେ ॥ ୨୧୬॥
ସତତଂ ବଦ୍ଧାଞ୍ଜଲିପୁଟୁମୁପାସ୍ମହେ ତଚ୍ଛୁଭପ୍ରଦଂ ତେଜଃ ।
ଯତ୍କମଲଜନଯନାନାଂ ପ୍ରମୋଦପୀଯୂଷଲହରିକାମୋଦମ୍ ॥ ୨୧୭॥
ଦିଵି ଵା ଭୁଵି ଦିକ୍ଷୁ ଜଲେ ଵହ୍ନୌ ଵା ସର୍ଵତୋ ଵାଣି ।
ଜନ୍ତୂନାଂ କିଲ ରକ୍ଷା ତ୍ଵଧୀନା କୀର୍ତ୍ଯତେ ଵିବୁଧୈଃ ॥ ୨୧୮॥
ଭାରତି ଭଵତାପାର୍ତାନ୍ ପାହି କଟାକ୍ଷାଙ୍କୁରୈଃ ଶୀତୈଃ ।
ପରମନନ୍ଦଵିଧାତୃନ୍ ଯାନେଵ ସ୍ତୌତି ପଦ୍ମଵାସୋଽପି ॥ ୨୧୯॥
କୁଲଦୈଵତମସ୍ମାକଂ ତତ୍ତେଜଃ କୁଟିଲକୁନ୍ତଲଂ କିମପି ।
କରଧୃତପୁସ୍ତକଵୀଣଂ କଲଯେ କାମାଗମୋଦଯଂ ଧାତୁଃ ॥ ୨୨୦॥
ପରମାନନ୍ଦଧନଂ ତଦ୍ଧାତୁରପି ବ୍ରହ୍ମତତ୍ତ୍ଵରସଦାଯି ।
ଆବ୍ରହ୍ମକୀଟନୃତ୍ଯତ୍ସ୍ଵଵୈଭଵଂ ଜଯତି ଶାରଦାରୂପମ୍ ॥ ୨୨୧॥
ଵିବୁଧଜନମୋଦଜନନୀ ଜନନୀ ନଃ ସା ଵିଧେଃ ପତ୍ନୀ ।
ମୃଦୁସଂଚାରଵିଲାସୈଃ ଶୁଭଂକରୀ ଭଵତୁ ସଂତତଂ କାଲେ ॥ ୨୨୨॥
ସରସମନୋଜ୍ଞଵିଲାସୈଃ ସ୍ଵଵଶେ କୃତ୍ଵା ମନୋ ଵିଧେର୍ଵାଣୀ ।
ସୃଷ୍ଟ୍ଯାଦୌ ଶୁଭଲେଖାକରୀ ନୃଣାଂ ମସ୍ତକେ ମାତା ॥ ୨୨୩॥
ପ୍ରକୃତିମୃଦୁଲଂ ପଦାବ୍ଜଂ ଵାଣୀଦେଵ୍ଯା ମଦୀଯଚିତ୍ତତଟେ ।
କାମାଦିସୂଚିନିଚିତେ କଥଂ ସ୍ଥିତିଂ ପ୍ରାପ୍ନୁଯାତ୍ କାଲେ ॥ ୨୨୪॥
ନିଖିଲଚରାଚରରକ୍ଷାଂ ଵିତନ୍ଵତୀ ପଦ୍ମଜପ୍ରିଯା ଦେଵୀ ।
ମମ କୁଲଦୈଵତମେଷା ଜଯତି ସଦାରାଧ୍ଯମାନ୍ଯପଦକମଲା ॥ ୨୨୫॥
କୁଶଲସମୃଦ୍ଧ୍ଯୈ ଭୂଯାଦମ୍ବା ସା ଶାରଦା ଦେଵୀ ।
ଜନିରକ୍ଷଣାଦିଲୀଲାଵିହାରଭାଙ୍ନିଗମସୌଧଦୀପକଲା ॥ ୨୨୬॥
ଵାଚାଲଯତି କଟାକ୍ଷୈର୍ଜଡଂ ଶିଲାମଲ୍ପଜନ୍ତୁଂ ଵା ।
ଯା ଵାଣୀ ସା ଶରଣଂ ଭଵେ ଭଵେ ପ୍ରାର୍ଥ୍ଯେ ଶ୍ରିଯଃପ୍ରାପ୍ତ୍ଯୈ ॥ ୨୨୭॥
ଯଦି ହି ପ୍ରସାଦଭୂମା ଵାଣ୍ଯାସ୍ତତ୍ରୈଵ ସା ହରେଃ କାନ୍ତା ।
ପରିଲସିତ ( ... incomplete ... ) ନିତ୍ଯଵାସରତା ॥ ୨୨୮॥
ସନକସନନ୍ଦନଵନ୍ଦ୍ଯେ କାନ୍ତେ ପରମେଷ୍ଟିନଃ ଶ୍ରିଯଃପ୍ରାପ୍ତ୍ଯୈ ।
ଵାଣି ତ୍ଵାଂ ନୌମି ସଦା ଭଵ ପ୍ରସନ୍ନା ଵିପ`ନ୍ଚିଲସିତକରେ ॥ ୨୨୯॥
ଵାଣି ଵିପଞ୍ଚୀକଲରଵରସିକେ ଗନ୍ଧର୍ଵଯୋଷିଦଭିଵନ୍ଦ୍ଯେ ।
ତଵ ଚରଣଂ ମମ ଶରଣଂ ଭଵଵାରିଧିସୁତେମମ୍ବ କଲଯାମି ॥ ୨୩୦॥
ଵାଣି କଦାହଂ ଲପ୍ସ୍ଯେ ଚରଣାମ୍ଭୋଜଂ ତ୍ଵଦୀଯମିଦମାରାତ୍ ।
ନିଜମଣିନୂପୁରନାଦସ୍ପୃହଣୀଯଵଚଃପଦଂ କଲିତଭକ୍ତେଃ ॥ ୨୩୧॥
ଶ୍ରୁତିପୂତମୁଖମନୋହରଲାଵଣ୍ଯକୁସୁମମୃଦୁଶରୀରେଯମ୍ ।
ନିଜକରୁଣାପାଙ୍ଗସୁଧାପୂରଣକୃତଵୈଭଵା ଭାତି ॥ ୨୩୨॥
ପରିସରନତଵିବୁଧାଲୀକିରୀଟମଣିକାନ୍ତିଵଲ୍ଲରୀଵିସରୈଃ ।
କୃତନୀରାଜନଵିଧି ତେ ମମ ତୁ ଶିରୋଭୂଷଣଂ ହି ପଦଯୁଗଲମ୍ ॥ ୨୩୩॥
ପ୍ରେମଵତୀ ଵିଧିଭଵନେ ହଂସଗତିର୍ହଂସଯାନକୃତଚାରା ।
ଵାଚାମକୃତ୍ରିମାନାଂ ସ୍ଥୈର୍ଯଵିଧାତ୍ରୀ ମହେଶାନୀ ॥ ୨୩୪॥
ଆନନ୍ଦରୂପକୋଟୀମମ୍ବାଂ ତାଂ ସଂତତଂ କଲଯେ ।
ସଂଵିଦ୍ରୂପା ଯା କିଲ ଵିଧାତୃଗେହେ ଶ୍ରୁତିଶ୍ରିଯଂ ଧତ୍ତେ ॥ ୨୩୫॥
କମଲଜନେତ୍ରମହୋତ୍ସଵତାରୁଣ୍ଯଶ୍ରୀର୍ନିରସ୍ତନତଶତ୍ରୁଃ ।
ଲଲିତଲିକୁଚାଭକୁଚଭରଯୁଗଲା ଦୃଗ୍ଵିଜିତହରିଣସଂଦୋହା ॥ ୨୩୬॥
କାରୁଣ୍ଯପୂର୍ଣନଯନା କଲିକଲ୍ମଷନାଶିନୀ ଚ ସା ଵାଣୀ ।
ମୁଖଜିତଶାରଦକମଲା ଵକ୍ତ୍ରାମ୍ଭୋଜେ ସଦା ସ୍ଫୁରତୁ ମାତା ॥ ୨୩୭॥
କମଲସୁଷମାନିଵାସସ୍ଥାନକଟାକ୍ଷଂ ଚିରାଯ କୃତରକ୍ଷମ୍ ।
ରକ୍ଷୋଗଣଭୀତିକରଂ ତେଜୋ ଭାତି ପ୍ରକାମମିହ ମନସି ॥ ୨୩୮॥
କମଲଜତପଃଫଲଂ ତନ୍ମୁନିଜନହୃଦଯାବ୍ଜନିତ୍ଯକୃତନୃତ୍ତମ୍ ।
କରୁଣାଲୋଲାପାଙ୍ଗଂ ତତ୍ତେଜୋ ଭାତୁ ମମ ମୁଖାମ୍ଭୋଜେ ॥ ୨୩୯॥
ଭାଗ୍ଯଂ ଵିଧିନଯନାନାଂ ସଂସୃତିତାପଜ୍ଵରାଦିତପ୍ତାନାମ୍ ।
ଭେଷଜମେତଦ୍ରୂପଂ କଲାଗ୍ରହଂ ମନ୍ଯତେ ଦେଵ୍ଯାଃ ॥ ୨୪୦॥
ଜନନି କଦା ଵା ନେଷ୍ଯାମ୍ଯହମାରାଦର୍ଚିତତ୍ଵଦୀଯପଦଃ ।
ନିମିଷମିଵ ହନ୍ତ ଦିଵସାନ୍ ଦୃଷ୍ଟ୍ଵା ତ୍ଵାମାଦରେଣ କଲ୍ଯାଣୀମ୍ ॥ ୨୪୧॥
ମଞ୍ଜୁଲକଵିତାସଂତତିବୀଜାଙ୍କୁରଦାଯିସାରସାଲୋକା ।
ଜନନି ତଵାପାଙ୍ଗଶ୍ରୀର୍ଜଯତି ଜଗତ୍ତ୍ରାଣକଲିତଦୀକ୍ଷେଯମ୍ ॥ ୨୪୨॥
ଅମ୍ବ ତଵାପାଙ୍ଗଶ୍ରୀରପାଙ୍ଗକେଲୀଶତାନି ଜନଯନ୍ତୀ ।
ଧାତୁର୍ହୃଦଯେ ଜଯତି ଵ୍ରୀଡାମଦମୋଦକାମସାରକରୀ ॥ ୨୪୩॥
ସର୍ଵଜଗନ୍ନୁତଵିଭଵେ ସଂତତମପି ଵାଞ୍ଛିତପ୍ରଦେ ମାତଃ ।
ଅଧୁନା ତ୍ଵମେଵ ଶରଣଂ ତେନାହଂ ପ୍ରାପ୍ତଜନ୍ମସାଫଲ୍ଯଃ ॥ ୨୪୪॥
ଶାନ୍ତିରସସର୍ଵଶେଵଧିମମ୍ବାଂ ସେଵେ ମନୋରଥାଵାପ୍ତ୍ଯୈ ।
ଯାମାରାଧ୍ଯ ସୁରେଶାଃ ସ୍ଵପଦଂ ପ୍ରାପୁର୍ହି ତଦ୍ରକ୍ଷମ୍ ॥ ୨୪୫॥
କୁଲଜା ଭାର୍ଯା କୀର୍ତିର୍ଦାନଂ ପୁତ୍ରାଦଯୋ ଯେ ଚ ।
ସିଧ୍ଯନ୍ତି ତେ ହି ସର୍ଵେ ଯସ୍ମୈ ଵାଣୀ ପ୍ରସନ୍ନା ସା ॥ ୨୪୬॥
କା କ୍ଷତିରମ୍ବ କଟାକ୍ଷେ ନ୍ଯସ୍ତେ ସତି ମଯି ଵିରିଞ୍ଚିଵରପତ୍ନି ।
ଗଙ୍ଗାଶୁନକନ୍ଯାଯାନ୍ମହତୀ ମମ ଵୃଦ୍ଧିରୀରିତା ନିପୁଣୈଃ ॥ ୨୪୭॥
ଅଵିରଲଦଯାର୍ଦ୍ରଲୋଚନସେଵନଯା ଧୂତତାପା ହି ।
ପ୍ରତିକଲ୍ପଂ ସୁରସଂଘାସ୍ତ୍ଵାମଭଜନ୍ ନୁତିନତିପ୍ରମୁଖୈଃ ॥ ୨୪୮॥
ଦୀନାନାଂ ଚ କଵୀନାଂ ଵାଣି ତ୍ଵଂ କାମଧେନୁରସି ମାତଃ ।
ସିଦ୍ଧିସ୍ତେଷାମତୁଲା ସୁରମାନ୍ଯା ତେନ ସଂକଲିତା ॥ ୨୪୯॥
ସକଲଜଗତାଂ ହି ଜନନୀଂ ଵାଣି ତ୍ଵାଂ ସଂତତମୁପାସେ ।
ଶ୍ରୁତିସୁଦତୀଭୂଷାମଣିମଖିଲାର୍ଥପ୍ରାପ୍ତ୍ଯୈ ଲୋକେ ॥ ୨୫୦॥
ଧାତୁଃ କୁଟୁମ୍ବିନୀ ତ୍ଵଂ ସନ୍ମଙ୍ଗଲଦାଯିନୀ ସ୍ଵମାହାତ୍ମ୍ଯାତ୍ ।
ଶ୍ଵଶ୍ରୂଶ୍ଵଶୁରମୁଖାଦିପ୍ରୀଣନଚତୁରା ଚ ଭାସି ନିଗମକଲା ॥ ୨୫୧॥
ମୁଖଵିଜିତଚନ୍ଦ୍ରମଣ୍ଡଲମିଦମମ୍ଭୋରୁହଵିଲୋଚନଂ ତେଜଃ ।
ଧ୍ଯାନେ ଜପେ ଚ ସୁଦୃଶାଂ ଚକାସ୍ତି ହୃଦଯେ କଵୀଶ୍ଵରାଣାଂ ଚ ॥ ୨୫୨॥
ଯସ୍ମୈ ପ୍ରସନ୍ନଵଦନା ସା ଵାଣୀ ଲୋକମାତା ହି ।
ତସ୍ଯ ସହସା ସହସ୍ରଂ ଲାଭଃ ସ୍ଯାଦ୍ ବାନ୍ଧଵାଃ ସୁଖିନଃ ॥ ୨୫୩॥
ତାପହରରସଵିଵର୍ଷଣଧୃତକୁତୁକା କାପି ନୀଲନଲିନରୁଚିଃ ।
କାଦମ୍ବିନୀ ପୁରସ୍ତାଦାସ୍ତାଂ ନଃ ସଂତତଂ ଜନନୀ ॥ ୨୫୪॥
ପଦ୍ମାକ୍ଷନାଭିପଦ୍ମଜଦଯିତେ ଲୋକାମ୍ବ ଶାରଦେତି ସଦା ।
ତଵ ନାମାନି ଜପନ୍ ସନ୍ ତ୍ଵଦ୍ଦାସୋଽହଂ ତୁ ମୁକ୍ତଯେ ସିଦ୍ଧଃ ॥ ୨୫୫॥
ଅମ୍ବାପ୍ରସାଦଭୂମ୍ନା ନରୋ ହି ଭୁଙ୍କ୍ତେ ସୁଖାନି ଵିଵିଧାନି ।
ସ୍ମରେ ଵିଜଯଃ କଵିତାଧନଲକ୍ଷ୍ମ୍ଯାଦେର୍ଵିଲାସଲୀଲାଦିଃ ॥ ୨୫୬॥
ତୀରଂ ସଂସୃତିଜଲଧେଃ ପୂରଂ କମଲଜଵିଲୋଚନପ୍ରୀତେଃ ।
ସାରଂ ନିଗମାନ୍ତାନାଂ ଦୂରଂ ଦୁର୍ଜନତତେର୍ହି ତତ୍ତେଜଃ ॥ ୨୫୭॥
ଅପି ଦାସକୁଲେ ଜାତଃ କଟାକ୍ଷଭୂମ୍ନା ଵିଧାତୃମୁଖପତ୍ନ୍ଯାଃ ।
ଜ୍ଞାନୀ ଭଵଵାରାଶିଂ ତରତି ଚ ରାଜ୍ଯଶ୍ରିଯଂ ଭୁଙ୍କ୍ତେ ॥ ୨୫୮॥
ସତ୍କୃତଦେଶିକପାଦାମ୍ବୁଜଯୁଗଲୋଽହଂ ନମାମି ଵାଣି ତ୍ଵାମ୍ ।
ତ୍ଵଂ ତୁ ଗୁରୁମୂର୍ତିରୁକ୍ତା କାଲେ କାଲେ ଚ କାଙ୍କ୍ଷିତଵିଧାତ୍ରୀ ॥ ୨୫୯॥
ଜ୍ଞାନାନନ୍ଦମୁଖାଦୀନପଵର୍ଗଂ ଵା ଦଦାସି ଭକ୍ତେଭ୍ଯଃ ।
ଅତ ଏଵାନନ୍ଯଗତିସ୍ତ୍ଵାଂ ଵିଧିପତ୍ନୀଂ ପ୍ରପଦ୍ଯେଽହମ୍ ॥ ୨୬୦॥
ତ୍ଵଯି ଵିନ୍ଯସ୍ତଭରାଣାଂ ନ ହି ଚିନ୍ତା ଜାଯତେ ନୃଣାଂ କାପି ।
ପରମାନନ୍ଦାଦିକଲାସ୍ଫୂର୍ତିର୍ଦିଵିଷଦ୍ଗଣେନ ସଂମାନ୍ଯା ॥ ୨୬୧॥
ସୁମଶରସାମ୍ରାଜ୍ଯକଲାମଙ୍ଗଲଵିଧିରେଖିକା ଵାଣୀ ।
ଧାତୁରପି ଚିତ୍ତଵୃତ୍ତିସ୍ଥୈର୍ଯଂ ତ୍ଵନ୍ଯାଦୃଶଂ କୁରୁତେ ॥ ୨୬୨॥
ସା ଧେନୁଶ୍ଚିନ୍ତାମଣିରପି ଵୃକ୍ଷଃ ସଂପଦାଂ ପ୍ରଦାଯିନ୍ଯଃ ।
ଅମ୍ବ ତ୍ଵମେଵ କାଲେ ଭସି ଜ୍ଞାନପ୍ରଦା ଵ୍ଯପୋହ୍ଯ ତମଃ ॥ ୨୬୩॥
ମନସୋ ନୈର୍ମଲ୍ଯପ୍ରଦମସ୍ଯାଃ ସେଵେ କଟାକ୍ଷମହମାରାତ୍ ।
ଯଃ କୁରୁତେ ଜନତାଂ ତାଂ ହତମାଯାଂ ମଧୁରାମଯୋଧ୍ଯାଂ ଚ ॥ ୨୬୪॥
ଶରଦିଵ ହଂସକୁଲେଡ୍ଯା ଜ୍ଯୋତ୍ସ୍ନେଵ ଜନାର୍ତିହାରିଣୀ ଵାଣ୍ଯାଃ ।
ଜଯତି ହି କଟାକ୍ଷରେଖା ଦୀପକଲେଵ ପ୍ରକାମହତତିମିରା ॥ ୨୬୫॥
ପଙ୍କଜଭଵଵଦନମଣିଂ ପରଵିଦ୍ଯାଦେଵତାଂ ଵାଣୀମ୍ ।
ନିତ୍ଯଂ ଯଜତାଂ ଜପତାଂ ନ ହି ତୁଲ୍ଯୋଽସ୍ମିନ୍ କ୍ଷମାତଲେ କଶ୍ଚିତ୍ ॥ ୨୬୬॥
ଵାଣୀ ନିଜଵାଣୀଭୀ ରଚଯତି ନୁତିମାତ୍ତଵୀଣଯା କାଲେ ।
ଧାତୁଃ ପ୍ରସାଦହେତୋଃ ପତିଵ୍ରତାଲକ୍ଷଣୈରନ୍ଯୈଃ ॥ ୨୬୭॥
ଆନନ୍ଦଯତି ଵିଲସୈରମ୍ବା ପଦ୍ମାସନଂ ନିଜଂ ଦେଵମ୍ ।
ତେନୈଵ ତୁଷ୍ଟହୃଦଯଃ ଶୁଭାକ୍ଷରାଣ୍ଯାଦରାଲ୍ଲିଖତି ମୌଲୌ ॥ ୨୬୮॥
ମମ ମାନସଦୁର୍ମଦଗଜମପାରତାପାଟଵୀଷୁ ଧାଵନ୍ତମ୍ ।
ଵିରଚଯ୍ଯ ମୁଦିତଚିତ୍ତଂ କୁରୁ ଵାଣି ତ୍ଵତ୍ପଦାବ୍ଜକୃତହସ୍ତମ୍ ॥ ୨୬୯॥
କମଲାସନଧୈର୍ଯମହୀଧରକୁଲିଶସ୍ତେ କଟାକ୍ଷ ଏଵାଯମ୍ ।
କଵିକୁଲମଯୂରକାଦମ୍ବିନୀଵିଲାସୋ ମୁଦେଽସ୍ତୁ ସତତଂ ନଃ ॥ ୨୭୦॥
ଗୁରୁଵରଦନାମ୍ଭୋଜେ ନୃତ୍ଯନ୍ତୀ ଶାରଦା ଦେଵୀ ।
ମଧୁରତରଶ୍ଲୋକନିଭା ମଣିନୂପୁରନିନଦସଂତତିର୍ଭ୍ତି ॥ ୨୭୧॥
କୋ ଵା ନ ଶ୍ରଯତି ବୁଧଃ ଶ୍ରେଯୋଽର୍ଥୀ ତାମିମାଂ ଵାଣୀମ୍ ।
ଯାଂ ପଙ୍କଜାକ୍ଷନାଭିଜସଧର୍ମିଣୀମର୍ଚଯନ୍ତି ସୁରନାଥାଃ ॥ ୨୭୨॥
ମୁଷିତପଯୋଜମୃଦିମ୍ନା ଚରଣତଲେନାତ୍ର ମାନସେ ଵାଣୀ ।
ପରିହରତୁ ପାପରାଶିଂ ସୁରୌଘସଂମାନିତେନ କାଲେ ମେ ॥ ୨୭୩॥
ଯାଥାର୍ଥ୍ଯଜ୍ଞାନକଲାପ୍ରାପ୍ତ୍ଯୈ ତ୍ଵାଂ ଶାରଦାଂ ଵନ୍ଦେ ।
ସେଵାଫଲଂ ପ୍ରଯଚ୍ଛ ପ୍ରସୀଦ ପରମେଶି ଵଲ୍ଲଭେ ଧାତୁଃ ॥ ୨୭୪॥
ନିଗମାନ୍ତସାରମର୍ଥଂ ବୋଧଯସି ତ୍ଵଂ ଗୁରୂନ୍ ପ୍ରକଲ୍ପ୍ଯ ଭୁଵି ।
ସୈଷା ମେ ଜ୍ଞାନଘନା ଵାଣୀ ନିତ୍ଯଂ ପ୍ରସନ୍ନାସି ॥ ୨୭୫॥
ମନ୍ଦାରକୁସୁମମଦହରମନ୍ଦସ୍ମିତମଧୁରଵଦନପଙ୍କରୁହା ।
ହୃଦ୍ଯତମନିତ୍ଯଯୌଵନମଣ୍ଡିତଗାତ୍ରୀ ଵିରାଜତେ ଵାଣୀ ॥ ୨୭୬॥
ସୌଭାଗ୍ଯସୂଚକାଭୀ ରେଖାଭିର୍ଭୂଷିତଂ ସୌରୈର୍ଵନ୍ଦ୍ଯମ୍ ।
ଅମ୍ବାଚରଣପଯୋଜଂ ଵତଂସଯନ୍ ପ୍ରାପ୍ତସଂମୋଦଃ ॥ ୨୭୭॥
ଦ୍ଵିଜଗଣପୂଜ୍ଯଂ ନିତ୍ଯଂ ନିରସ୍ତଜାଡ୍ଯଂ ତ୍ଵଦୀଯପାଦଯୁଗମ୍ ।
କ୍ଷଣମପି ଵା ସାଂନିଧ୍ଯଂ ଭଜତୁ ମଦୀଯେ ହୃଦି ସ୍ଵୈରମ୍ ॥ ୨୭୮॥
ନତଦେଵରାଜମକୁଟୀମଣିଘୃଣିପରିଚୁମ୍ବିତାଙ୍ଘ୍ରିକମଲା ନଃ ।
କମଲାସନସ୍ଯ ଦଯିତା ତନ୍ଯାଦନ୍ଯାଦୃଶୀ ଶ୍ରିଯଂ ଭଜତାମ୍ ॥ ୨୭୯॥
ଵାଣୀ ଶ୍ରିତକାଦମ୍ବା ଦମ୍ଭାଦିରିପୂନ୍ ନିରସ୍ଯ ନଃ କାଲେ ।
କ୍ଷେମମଵନ୍ଯାଂ ତନ୍ଯାତ୍ ପଦେ ପରେ ଦେଵସଂଘପରିସେଵ୍ଯେ ॥ ୨୮୦॥
ପଙ୍କଜଭଵସାମ୍ରାଜ୍ଯସ୍ଥିରଲକ୍ଷ୍ମୀଶ୍ଚପାଣ୍ଡରତନୁଶ୍ରୀଃ ।
ନତମାନଵସୁକୃତକଲାପରିପାଟୀ ଭାତି ସକଲଗୁଣପେଟୀ ॥ ୨୮୧॥
ମୁଖଵିଜିତଚନ୍ଦ୍ରବିମ୍ବା ସାମ୍ବା କାଦମ୍ବସେଵ୍ଯପଦକମଲା ।
କମଲାସନଗୃହଲକ୍ଷ୍ମୀର୍ଲକ୍ଷ୍ମୀଂ ପୁଷ୍ଣାତୁ ଶାରଦା ଦେଵୀ ॥ ୨୮୨॥
ମୁରମଥନସ୍ଯେଵ ରମା ଶଂଭୋରିଵ ସକଲଭୂଧରେନ୍ଦ୍ରସୁତା ।
ଵାଣି ଵିଧାତୁଃ ସଦନେଽନୁରୂପଦାମ୍ପତ୍ଯସଂପଦା ଭାସି ॥ ୨୮୩॥
ଵାଣି ତଵ ଦେହକାନ୍ତ୍ଯା କଟାକ୍ଷଲହରୀ ତୁ ସଂଯୁତା କାଲେ ।
ଧତ୍ତେ କାମପି ଶୋଭାଂ ସୁରସ୍ରଵନ୍ତ୍ଯେଵ ସଂଗତା ଯମୁନା ॥ ୨୮୪॥
ମଧୁରାସେଚନଦୃଷ୍ଟ୍ଯା ମାଂ ପାଯାଦାପଦୋ ମୁହୁର୍ଵାଣୀ ।
ଆଶ୍ରିତତାପଵିଭେତ୍ରୀତ୍ଯେଵଂ ଯାମାମନନ୍ତି ସୂରିଵରାଃ ॥ ୨୮୫॥
ଅଜ୍ଞାତକୋପପୂରା ଯସ୍ଯା ଦୃଷ୍ଟିଃ କୃତାଦରା ଭଜତାମ୍ ।
ସୈଷା ଵିହସିତପୌରଂଦରଲକ୍ଷ୍ମୀଂ ସଂପଦଂ ଦଦ୍ଯାତ୍ ॥ ୨୮୬॥
ବାଲକୁରଙ୍ଗଵିଲୋଚନମୀଷତ୍ସ୍ମିତମଧୁରମାନନଂ ଵାଣ୍ଯାଃ ।
ମଣିମଯତାଟଙ୍କମଣୀଵିଲାସି ଭୂଯାନ୍ମୁଦେଽସ୍ମାକମ୍ ॥ ୨୮୭॥
ମୁନିଜନମାନସହଂସୀଂ ଶ୍ରୁତିତତିପଞ୍ଜରଶୁକୀଂ ମହାଦେଵୀମ୍ ।
ନୌମି ସ୍ନୁଷାଂ ରମାଯାଃ ମାହେଶ୍ଵରମହିତସତ୍ପଦପ୍ରାପ୍ତ୍ଯୈ ॥ ୨୮୮॥
ଧାତୁଃ ସୌଧାଙ୍ଗଣକୃତଚଙ୍କ୍ରମଣାଂ ଶାରଦାଂ ନୌମି ।
ମତ୍ତମତଙ୍ଗଜଗମନାଂ ପରିପନ୍ଥିଜଯାଯ ସୁକୃତିସଂଦୃଶ୍ଯାମ୍ ॥ ୨୮୯॥
ଵାଗୀଶମୁଖା ଦେଵା ଯସ୍ଯାଃ ପ୍ରସଦନବଲଦ୍ଧି ଵିଜଯନ୍ତେ ।
ପରିପାଲିତଭକ୍ତଗଣା ଯଦ୍ଧ୍ଯାନୋଲ୍ଲସଦପାରପୁଲକାନ୍ତାଃ ॥ ୨୯୦॥
ନୈସର୍ଗିକଵାକ୍ଷ୍ରେଣୀକେଲିଵନମମଲଭୂଷଣଂ ଧାତୁଃ ।
ଵଦନାନାମିଯମମ୍ବା ଜଯତୁ ଚିରଂ କାମଵର୍ଷିଣୀ ଭଜତାମ୍ ॥ ୨୯୧॥
କଲଯାମି ହୃଦଯମେତତ୍ ପାଦାବ୍ଜେ ଶାରଦାଦେଵ୍ଯାଃ ।
ପ୍ରାପ୍ତାରିଷଟ୍କଵିଜଯଂ ତତ୍ତ୍ଵଧନଂ କଲିତଶାରଦାଧ୍ଯାନମ୍ ॥ ୨୯୨॥
ପାଦାରଵିନ୍ଦନମନପ୍ରଭାଵପରିକଲିତଦେଵସାରୂପ୍ଯାଃ ।
ପରମାନନ୍ଦନିମଗ୍ନାଃ ସୁଧିଯୋ ଭାନ୍ତି କ୍ଷମାଵଲଯେ ॥ ୨୯୩॥
ଲଲିତଵିଧାତୃରୂପଂ ପାଲିତଲୋକତ୍ରଯଂ ଚ ତତ୍ ତେଜଃ ।
ସକଲାଗମଶିଖରକଲାପରତତ୍ତ୍ଵଂ ଶାରଦାରୂପମ୍ ॥ ୨୯୪॥
ଧ୍ଯାନୈର୍ଯୋଗୈଶ୍ଚ ଜପୈର୍ଯତ୍ ସେଵ୍ଯଂ ପରମମାଦିଷ୍ଟମ୍ ।
ତନ୍ନଶ୍ଚକାସ୍ତୁ ହୃଦଯେ ଵିଶ୍ଵଜନୀନଂ ହି ଭକ୍ତାନାମ୍ ॥ ୨୯୫॥
ଭାଗୀରଥୀଵ ଵାଣୀ ତଵ ନୁତିରୂପା ଵିରାଜତେ ପରମା ।
ଇହ ମାତର୍ଯଦ୍ଭଜନଂ ସର୍ଵେଷାଂ ସର୍ଵସଂପଦାଂ ହେତୁଃ ॥ ୨୯୬॥
ସଂତତମଧୁରାଲାପୈର୍ଲାଲିତଵିଧିଵୈଭଵୈରମେଯକଲୈଃ ।
ଶ୍ରେଯଃପ୍ରଦାନଦୀକ୍ଷିତକଟାକ୍ଷପାତୈର୍ମହାତତ୍ତ୍ଵୈଃ ॥ ୨୯୭॥
ଖେଲଲ୍ଲୋଲମ୍ବକଚୈଃ କୁଚଭରନମ୍ରୈଃ ପୁରଂଧ୍ରିଗୁଣପୂର୍ଣୈଃ ।
ଆଶ୍ରିତସଂଵିତ୍ପୀଠୈରମରେଶଵଧୂକରାଦୃତଚ୍ଛତ୍ରୈଃ ॥ ୨୯୮॥
ଵୀଣାପୁସ୍ତକହସ୍ତୈର୍ଵିଧିଭାଗ୍ଯୈରସ୍ତୁ ମମ ତୁ ସାରୂପ୍ଯମ୍ ।
ସଂଵିଦ୍ଧନୈଶ୍ଚ ଵାଣୀରୂପୈରେତୈର୍ଦଯାସାରୈଃ ॥ ୨୯୯॥
ମାତଃ କଥଂ ନୁ ଵର୍ଣ୍ଯସ୍ତଵ ମହିମା ଵାଣି ନିଗମଚଯଵେଦ୍ଯଃ ।
ଇତି ନିଶ୍ଚିତ୍ଯ ପଦାବ୍ଜଂ ତଵ ଵନ୍ଦେ ମୋକ୍ଷକାମୋଽହମ୍ ॥ ୩୦୦॥
ତ୍ଵାମମ୍ବ ବାଲିଶୋଽହଂ ତ୍ଵଚମତ୍କାରୈର୍ଗିରାଂ ଗୁମ୍ଭୈଃ ।
ଅଯଥାଯଥକ୍ରମଂ ହି ସ୍ତୁଵନ୍ନପି ପ୍ରାପ୍ତଜନ୍ମସାଫଲ୍ଯଃ ॥ ୩୦୧॥
ଇତି ଶ୍ରୀଶାରଦାତ୍ରିଶତୀ ସମାପ୍ତା
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ତ୍oday
http://sanskritdocuments.org
ଗଙ୍ଗାଧରମଖିଵିରଚିତା ।
ପରମାଭରଣଂ ଧାତୁର୍ଵଦନାମ୍ଭୋଜସ୍ଯ ଶାରଦା ଦେଵୀ ।
ଯା ରାଜତି ଜନନୀ ସା ଲସତୁ ସଦା ସୁପ୍ରସନ୍ନା ନଃ ॥ ୧॥
ସା ଶାରଦା ପ୍ରସନ୍ନା ରାଜତି ମମ ମାନସେ ନିତ୍ଯମ୍ ।
ଯା ଶାରଦାବ୍ଜଵଦନା ଜନନୀ କୀର୍ତ୍ଯା ହି ସର୍ଵଲୋକାନାମ୍ ॥ ୨॥
ସଂପଦ୍ ଦିଵ୍ଯା ଧାତୁଃ ଖ୍ଯାତା ସା ଶାରଦା ଦେଵୀ ।
ଯଦ୍ଭଜନଂ ଦେଵାନାମପି ତତ୍ତ୍ଵଜ୍ଞାନଦଂ ଵିଦୁର୍ଵିବୁଧାଃ ॥ ୩॥
ସରସକଵିତାଵିଭୂତ୍ଯୈ ଯତ୍ପଦମାରାଧ୍ଯତେ ଵିଶେଷଜ୍ଞୈଃ ।
ସା ଶାରଦା ଶ୍ରିଯୈ ନଃ କାଲେ ସର୍ଵପ୍ରସନ୍ନାତ୍ମା ॥ ୪॥
ନୀଲାରଵିନ୍ଦଲୋଚନଯୁଗଲା ସା ଶାରଦା ଦେଵୀ ।
କରକମଲକଲିତଵୀଣା ସଦା ପ୍ରସନ୍ନା ଶ୍ରିଯୈଃ ଵଃ ସ୍ଯାତ୍ ॥୫॥
କଲଯେ ତାମହମନିଶଂ ଫୁଲ୍ଲାବ୍ଜଵିଲୋଚନାଂ ଵାଣୀମ୍ ।
ଯା ସୃଷ୍ଟ୍ଯାଦୌ ସାହ୍ଯଂ କଲଯତି ଧାତୁର୍ଜଗନ୍ମାତା ॥ ୬॥
ଯସ୍ଯା ଲୀଲାଲୋଲଃ ପଦ୍ମାସନଗୋଽପି ଵେଦପାଠରତଃ ।
ତାମହମତୁଲାନନ୍ଦପ୍ରାପ୍ତ୍ଯୈ କଲଯେ ମନଃପଦ୍ମେ ॥ ୭॥
ବ୍ରହ୍ମାଣଂ ତାଂ ଵାଣୀମେକାସନଭାସୁରାଂ ଶ୍ରିଯଃ ପ୍ରାପ୍ତ୍ଯୈ ।
ଆରାଦ୍ଵିଲୋକ୍ଯ ମାନସମାନନ୍ଦରସଂ ପରଂ ଭଜତେ ॥ ୮॥
ମୁକ୍ତାମଯେ ଵିମାନେ ପଦ୍ମାସନଯନ୍ତ୍ରିକାମଧ୍ଯେ ।
ଦୃଶ୍ଯାଂ ଵାଣୀଂ ଦେଵୀଂ ସେଵେ ସଂତତସୁଖପ୍ରାପ୍ତ୍ଯୈ ॥ ୯॥
ଭାଗ୍ଯାନ୍ମମ ଚ କଵୀନାଂ ସା ଦେଵୀ ଦୃଶ୍ଯତାମେତି ।
ଵୀଣାପୁସ୍ତକହସ୍ତା ଯା କମଲାସନପୁରନ୍ଧ୍ରୀ ହି ॥ ୧୦॥
ମାମକମାନସକୀରଂ ବଧ୍ନୀଯାଶ୍ଚରଣପଞ୍ଜରେ ମାତଃ ।
ତେନ ମମ ଜନ୍ମଲାଭଃ ସ୍ତୋତ୍ରଂ ଚ ତଵ ପ୍ରକାମକଲିତାର୍ଥମ୍ ॥ ୧୧॥
ସଂଵିତ୍ପ୍ରରୋହକଲିକାପ୍ରାପ୍ତ୍ଯୈ ତାଂ ନୌମି ଶାରଦାଂ ଦେଵୀମ୍ ।
ଯା କିଲ କଵୀଶ୍ଚରାଣାମଧିନେତ୍ରୀ କାଵ୍ଯକଲନାଦୌ ॥ ୧୨॥
ଭକ୍ତାନାଂ ଜିହ୍ଵାଗ୍ରଂ ସିଂହାସନମାଦରାଦ୍ ଵାଣୀ ।
କଲଯନ୍ତି ନୃତ୍ଯତି କିଲ ତତସ୍ତୁ ତନ୍ନୂପୁରନିନାଦଃ ॥ ୧୩॥
ମଞ୍ଜୁଲଫଣିତିଝରୀତି ପ୍ରଗୀଯତେ ଦିକ୍ତଟେ ରସିକୈଃ ।
ପ୍ରାତଃଫୁଲ୍ଲପଯୋରୁହମରନ୍ଦରସକେଲିଧୂର୍ଵହା କାଲେ ॥ ୧୪॥
ଦୁର୍ଵାରଗର୍ଵଦୁର୍ମତିଦୁରର୍ଥନିରସନକଲାନିପୁଣାଃ ।
ମାତସ୍ତଵ ପାଦଯୋରୁହସେଵାଧନ୍ଯତାଂ ପ୍ରାପ୍ତାଃ ॥ ୧୫॥
ନୀଚା ମମ ତୁ ମନୀଷା ତଥାପି ତଵ ନୁତିକଲାପ୍ରଵୃତ୍ତୋଽସ୍ମି ।
ଅମ୍ବ ତଵ ତତ୍ର ହେତୁଃ କୃପାଂ ପରଂ ବୁଦ୍ଧିଦା ଜଯତି ॥ ୧୬॥
ଵିଧିଦଯିତେ ତଵ ମାତଃ ସ୍ତୁତୌ ନ ଶକ୍ତା ଅପି ତ୍ରିଦଶାଃ ।
କ୍ଷନ୍ତଵ୍ଯମତ୍ର ଦଯଯା ମମ ଚାପଲ୍ଯଂ ତଵ ସ୍ତୋତ୍ରେ ॥ ୧୭॥
ଶୁକଵାଣୀମିଵ ମାତର୍ନିରର୍ଥକାଂ ମଦ୍ଵଚୋଭଙ୍ଗୀମ୍ ।
ସଦସି ଶୃଣୋଷି ଦଯଯା ତତ୍ ତଵ ଚୋତ୍ତମପଦଵ୍ଯକ୍ତ୍ଯୈ ॥ ୧୮॥
ପରଦେଵତେ ପ୍ରସୀଦ ପ୍ରାଣେଶ୍ଵରି ଧାତୁରମ୍ବ ମମ ଵାଣୀମ୍ ।
କୃପଯା ତଵ ନୁତିଯୋଗ୍ଯାଂ ତ୍ଵନ୍ନୂପୁରନିନଦରମ୍ଯରସଗୁମ୍ଫାମ୍ ॥ ୧୯॥
ସର୍ଵଜ୍ଞତ୍ଵଂ ସଂପଦମଥଵାନ୍ଯାଂ ପ୍ରାପ୍ତୁମତ୍ର ତଵ ମାତଃ ।
ତଵ ଚରଣକମଲମେତଚ୍ଛରଣଂ ନାନ୍ଯା ଗତିର୍ଦୃଷ୍ଟା ॥ ୨୦॥
ମନ୍ଦଧିଯା ସ୍ଵଲ୍ପାପି ସ୍ତୁତିରମ୍ବ ନିରର୍ଥକାପି ରସହୀନା ।
କଲିତା ଚେତ୍ ତଵ କୃପଯା ତଦେଵ ସଦସୀଡିତଂ ଭାତି ॥ ୨୧॥
କୁଣ୍ଠୀକରୋତୁ ଵିପଦଂ ଚାଜ୍ଞାନଂ ଦୁର୍ଗତିଂ ଵାଣି ।
ତଵ ଚରଣକମଲସେଵାଦରୋ ଜନାନାଂ କଲୌ କାଲେ ॥ ୨୨॥
ଵୀରଶ୍ରୀର୍ଵିଦ୍ଵଚ୍ଛ୍ରୀର୍ଜଯଶ୍ରିଯୋ ଵାମରୈର୍ମାନ୍ଯେ ।
ତଵ ପାଦାମ୍ବୁଜସେଵାଦରେଣ ସିଧ୍ଯନ୍ତି ନାନ୍ଯଥା ଲୋକେ ॥ ୨୩॥
କରୁଣାରସଵର୍ଷିଣି ତେ ଚରଣସରୋଜଦ୍ଵଯଂ ନିଧେହି ମମ ।
ମସ୍ତକତଲେ ଵିଦାରିତଜରାଦିକଂ ସପଦି ଜନ୍ମ ସାର୍ଥଂ ମେ ॥ ୨୪॥
ଶ୍ରଦ୍ଧାଂ ମେଧାଂ ସଂପଦମନ୍ଯାମମରେନ୍ଦ୍ରମାନନୀଯାଂ ହି ।
ଦଯଯା ଵିଧେହି କାଲେ ଭକ୍ତାନାଂ ନସ୍ତ୍ଵଦେକଶରଣାନାମ୍ ॥ ୨୫॥
ପ୍ରେଯସି ଧାତୁର୍ଜଗତାଂ ପରମେଶ୍ଵରି ଵାଣି ମାତରମ୍ବ ନନୁ ।
ତଵ ନାମାନି ଫଣନ୍ତସ୍ତ୍ରିଦଶୈଃ ସହ ଯାନ୍ତି ଯାନେନ ॥ ୨୬॥
ତଵ ନାମ ଯସ୍ଯ ଜିହ୍ଵାଙ୍ଗଣେ ଵିଶୁଦ୍ଧଂ କ୍ଷଣଂ ସ୍ଫୁରତି ।
ସ ହି ଵନ୍ଦ୍ଯସ୍ତ୍ରିଦଶୈରପି ଵିଗଲିତପାପଃ ପରେ ଲୋକେ ॥ ୨୭॥
ନତନାକୀଶ୍ଵରଵନିତାମୌଲିସ୍ରଗ୍ଗଲିତମକରନ୍ଦୈଃ ।
ସ୍ନିଗ୍ଧପଦାମ୍ବୁଜଯୁଗଲା ଵାଣୀ ଦେଵୀ ଶ୍ରିଯୋ ହି ଲସତି ପରା ॥ ୨୮॥
ଵିଦୁଷାମପି ତୁଷ୍ଟିକରଂ ନଵନଵରସଗୁମ୍ଫନଂ କଵିତ୍ଵଂ ତୁ ।
ଯତ୍କରୁଣାଵୀକ୍ଷଣତୋ ସିଧ୍ଯତି ତାଂ ଶାରଦାଂ ଵନ୍ଦେ ॥ ୨୯॥
ଅମ୍ବ ପ୍ରସୀଦ ପରମଂ ମାଯାମେତାଂ ନିରସ୍ଯ ନତିଭାଜଃ ।
ମମ ସଂଵିଧେହି ମଧୁରାଂ ଵାଚଂ ତଵ ନୁତିକଲାର୍ହାଂ ଚ ॥ ୩୦॥
ଵାଣୀ ମାତା ଜଗତାଂ ଵାଣୀପୁସ୍ତକକରାମ୍ଭୋଜା ।
ହଂସାଶ୍ରିତା ହି ନମତାଂ ଶ୍ରେଯଃସିଧ୍ଯୈ ପ୍ରସନ୍ନା ନଃ ॥ ୩୧॥
ଶ୍ଲାଘ୍ଯା ସଂପତ୍କାଲେ ଵୈଦୁଷ୍ଯଂ ଵା ଯଦୀଯଵୀକ୍ଷଣତଃ ।
ସିଧ୍ଯନ୍ତ୍ଯପି ଦେଵାନାଂ ତାଂ ଵନ୍ଦେ ଶାରଦାଂ ଦେଵୀମ୍ ॥ ୩୨॥
ଵିଦ୍ଯାଦାନକରୀଯଂ କମଲାସନପୁଣ୍ଯପରିପାକଃ ।
ମମ ମନସି ସଂନିଧତ୍ତାଂ ଦିଵ୍ଯଜ୍ଞାନାଦିସିଧ୍ଯୈ ହି ॥ ୩୩॥
ଦିଵ୍ଯଜ୍ଞାନଂ ଦଯଯା ଵିଧେହି ମାତର୍ମହାସାରମ୍ ।
ତେନୈଵ ତେ ତୁ କୀର୍ତିର୍ଦାନଫଲଂ ନଶ୍ଚ ଜନ୍ମସାଫଲ୍ଯମ୍ ॥ ୩୪॥
ଦ୍ଵାଦଶବୀଜାକ୍ଷରଗାଂ ମନ୍ତ୍ରୋଦ୍ଧାରକ୍ରିଯାଶକ୍ତିମ୍ ।
ଵାଣୀଂ ଵିଧେସ୍ତୁ ପତ୍ନୀଂ ମଧ୍ଯେ ପଶ୍ଯାମି ବିମ୍ବମଧ୍ଯସ୍ଥାମ୍ ॥ ୩୫॥
ରଵିକୋଟିତେଜସଂ ତାଂ ସରସ୍ଵତୀଂ ତ୍ର୍ଯକ୍ଷରକ୍ରିଯାଶକ୍ତିମ୍ ।
ଅଣିମାଦିଦାଂ ପ୍ରସନ୍ନାମମ୍ବାଂ ପଶ୍ଯାମି ପଦ୍ମମଧ୍ଯଗତାମ୍ ॥ ୩୬॥
ଜଗଦୀଶ୍ଵରି ଭାରତି ମେ ପ୍ରସୀଦ ଵାଣି ପ୍ରପନ୍ନାଯ ।
ଅହମପି କୁତୁକାତ୍ ତଵ ନୁତିକଲନେଽଶକ୍ତଶ୍ଚ ମନ୍ଦଧିଷଣଶ୍ଚ ॥ ୩୭॥
ମୁନିଜନମାନସପେଟୀରତ୍ନଂ ଧାତୁର୍ଗୃହେ ରତ୍ନମ୍ ।
ଵାଣୀତି ଦିଵ୍ଯରତ୍ନଂ ଜଯତି ସଦା କାମଧୁକ୍ କାଲେ ॥ ୩୮॥
ଅଜ୍ଞାନଵ୍ଯାଧିହରଂ ତଦୌଷଧଂ ଶାରଦାରୂପମ୍ ।
ଯଃ ପଶ୍ଯତି ସ ହି ଲୋକେ ପରାତ୍ମନେ ରୋଚତେ କାଲେ ॥ ୩୯॥
କମଲାସନନଯନଫଲଂ ସୃଷ୍ଟ୍ଯାଦିକଲାସମାସକ୍ତମ୍ ।
ଵାଣୀରୂପଂ ତେଜଃ ସ୍ଫୁରତି ଜଗଚ୍ଛ୍ରେଯସେ ନିତ୍ଯମ୍ ॥ ୪୦॥
ହଂସଗତିଂ ତାମମ୍ବାମମ୍ଭୋରୁହଲୋଚନାଂ ଵନ୍ଦେ ।
ତିଲକଯତି ଯା ଗୁରୂଣାଂ ଜିହ୍ଵାସିଂହାସନଂ ଵାଣୀ ॥ ୪୧॥
ଵାଣି ତରଙ୍ଗଯ ଲୋଚନଵୀକ୍ଷଣଶୈଲୀଂ କ୍ଷଣଂ ମଯି ଭୋଃ ।
ମମ ଜନ୍ମ ଲବ୍ଧଵିଭଵଂ ତେନ ଭଵେନ୍ନୈଵ ତେ ହାନିଃ ॥ ୪୨॥
ପଦ୍ମାସନେନ ସାକଂ କାଲେ ଵାଣୀ ସମାସନା ଜଯତି ।
କୁଚକଲଶନମିତଦେହା କୁର୍ଵନ୍ତୀ ଭଦ୍ରସଂତତିଂ ନମତାମ୍ ॥ ୪୩॥
ଵ୍ଯାତନ୍ଵାନା ଵାଣୀ କଵୀଶ୍ଵରାଣାଂ ମନୋଜ୍ଞଵଚନଝରୀମ୍ ।
ଜଯତି ଵିଧିସୁକୃତସଂତତିପରିଣମିତମାଲା ବୁଧୈର୍ଵନ୍ଦ୍ଯା ॥ ୪୪॥
କମଲସୁଷମାଙ୍ଗଯଷ୍ଟିଃ ସା ଦେଵୀ ଜଯତି ପଦ୍ମମଧ୍ଯତଲେ ।
ଶତବୀଜାକ୍ଷରଲସିତଂ ଦିକ୍ପତିକୃତରକ୍ଷକଂ ଚ ମେରୁମୁଖମ୍ ॥ ୪୫॥
ଵାଣୀଯନ୍ତ୍ରଂ ଵିବୁଧୈର୍ମାନ୍ଯଂ ଯୋଗାସନାବ୍ଧୀନ୍ଦୁମ୍ ।
ହ୍ରୀମକ୍ଷରମୁଖମାଦ୍ଯଂ ପ୍ରାକ୍ତଟକଲିତଂ ଚ ପଦ୍ମମଧ୍ଯତଲେ ॥ ୪୬॥
ତନ୍ମେରୁଚକ୍ରରୂପଂ ସମାଧିଦୃଶ୍ଯଂ ଚ ଲୋକଵେଦ୍ଯଂ ଚ ।
ସୈଷାଶ୍ରିତ୍ଯ ତଦେତଦ୍ ରାଜତି ରାଜୀଵଲୋଚନା ଵାଣୀ ॥ ୪୭॥
ହଂସାଶ୍ରିତଗତିଵିଭଵା ମନ୍ଦସ୍ମେରା ତମୋନିହନ୍ତ୍ରୀ ଚ ।
ମଧୁରତରଵାଙ୍ନିଗୁମ୍ଫା ଵୀଣାପୁସ୍ତକକରାମ୍ଭୋଜା ॥ ୪୮॥
ଵୀଣାଵାଦନରସିକା ନମତାମିଷ୍ଟାର୍ଥଦାଯିନୀ ଵାଣୀ ।
ଧାତୁର୍ନଯନମହୋତ୍ସଵକଲିକା କୁର୍ଯାଚ୍ଛୁଭଂ ଜଗତାମ୍ ॥ ୪୯॥
ତାପିଞ୍ଛରମ୍ଯଦେହଶ୍ରୀରେଷା କଵିସମାଜନୁତା ।
ଅଷ୍ଟୈଶ୍ଵର୍ଯାଦିକଲାଦାନେ ଦତ୍ତେକ୍ଷଣା ଜଯତି ॥ ୫୦॥
ସୃଷ୍ଟ୍ଯାଦୌ ଵିଧିଲିଖିତଂ ଵାଣୀ ସୈଷା ହି ଚାନ୍ଯଥାକର୍ତୁମ୍ ।
ନାକୌକସାମପୀହ ପ୍ରଭଵତି କଲିତପ୍ରଣାମାନାମ୍ ॥ ୫୧॥
ଯଃ ପଶ୍ଯତି ତାମେତାଂ ଵାଣୀଂ ପୁରୁଷୋ ହି ଧନ୍ଯତାମେତି ।
ଯଂ ପଶ୍ଯତି ସୈଷାଯଂ ନିତରାଂ ଧନ୍ଯୋ ନୃପେଡିତଃ କାଲେ ॥ ୫୨॥
କବଲିତତମଃସମୂହା ଵାଣୀ ସୈଷା ହି ଵିଜଯତେ ଜଗତି ।
ଅପୁନର୍ଭଵସୁଖଦାତ୍ରୀ ଵିରିଞ୍ଚିମୁଖଲାଲିତା କାଲେ ॥ ୫୩॥
କମଲାସନମୁଖକମଲସ୍ଥିରାସନାଂ ଶାରଦାଂ ଵନ୍ଦେ ।
ଯନ୍ନାମୋଚ୍ଚରଣକଲାଵିଭଵାତ୍ ସର୍ଵଜ୍ଞତା ନିଯତମ୍ ॥ ୫୪॥
ଭଵପରମୌଷଧମେତଦ୍ଵାଣୀରୂପଂ ସଦାରାଧ୍ଯମ୍ ।
କମଲାସନଲୋଚନଗଣସରସକ୍ରୀଡାସ୍ପଦଂ ଜଯତି ॥ ୫୫॥
ନାରୀଵଂଶଶିଖାମଣିରେଷା ଚିନ୍ତାମଣିର୍ନତାନାଂ ହି ।
ଧାତୃଗୃହଭାଗଧେଯଂ ଧ୍ଯେଯଂ ସଦ୍ଭିଃ ଶ୍ରିଯଃ ସମୃଦ୍ଧ୍ଯୈ ନଃ ॥ ୫୬॥
ଜନନି ଭୁଵନେଶ୍ଵରି ତ୍ଵାଂ ଵାଣୀଂ ଵନ୍ଦେ କଵିତ୍ଵରସସିଦ୍ଧ୍ଯୈ ।
ତ୍ଵଂ ତୁ ଦଦାସି ହି ଦଯଯା ମମ ମନ୍ଦସ୍ଯାପି ଵାଗ୍ଝରୀର୍ମଧୁରାଃ ॥ ୫୭॥
ଏତେନ ତଵ ତୁ କୀର୍ତେର୍ମହିମା ସଂଗୀଯତେ ଦିଶାଂ ଵଲଯେ ।
କିଂନରଵର୍ଗୈରମରୀକନ୍ଯାଭିଃ କଲ୍ପଵୃକ୍ଷମୂଲତଲେ ॥ ୫୮॥
କଵିମଲ୍ଲସୂକ୍ତିଲହରୀସ୍ତନ୍ଵାନା ଶାରଦା ଜଯତି ।
ଵିଧିକେଲିସଦନହଂସୀ କଲ୍ଯାଣୈକସ୍ଥଲୀ ନମତାମ୍ ॥ ୫୯॥
ସ୍ଫୁରତୁ ମମ ଵଚସି ଵାଣି ତ୍ଵଦୀଯଵୈଭଵସୁଧାଧାରା ।
ନିତ୍ଯଂ ଵ୍ଯକ୍ତିଂ ପ୍ରାପ୍ତା ଧୁତନତଜନଖେଦଜାଲକା ମହତୀ ॥ ୬୦॥
ଵାଣି ତଵ ସ୍ତୁତିଵିଷଯେ ବୁଦ୍ଧିର୍ଜାତା ହି ମେ ସହସା ।
ତେନ ମମ ଭାଗଦେଯଂ ପରିଣତିମିତ୍ଯେଵ ନିତ୍ଯସଂତୁଷ୍ଟଃ ॥ ୬୧॥
ସୃଷ୍ଟିକଲାମଣ୍ଡନଭୂରେଷା ଵାଣୀ ଜଗଜ୍ଜନନୀ ।
ଆଲୋକମାତ୍ରଵଶତସ୍ତମସୋ ହନ୍ତ୍ରୀ ଚ ସଂପଦାଂ ଜନନୀ ॥ ୬୨॥
ପୌରୁଷଲୋପଵିଧାତ୍ରୀ ଧାତୁରିଯଂ କମଲକୋମଲାଙ୍ଗଲତା ।
ଵସତୁ ସଦା ଜିହ୍ଵାଗ୍ରେ ଦିଵ୍ଯଜ୍ଞାନପ୍ରଦା ଦେଵୀ ॥ ୬୩॥
ପ୍ରତିଦିନଦୁରିତନିହନ୍ତ୍ରୀ ପଦ୍ମାସନନଯନପୁଣ୍ଯପରିପାକଃ ।
କଵିତାସଂତାନକଲାବୀଜଙ୍କୁରଵର୍ଧିନୀ ଜଯତି ॥ ୬୪॥
କ୍ଷଣଵୀକ୍ଷଣେନ ମାତା ଲକ୍ଷ୍ମୀଂ ପକ୍ଷ୍ମଲଯତି ପ୍ରଣତେ ।
ଵେଧସି ସୁରତମହୋତ୍ସଵସଂକେତତଲପ୍ରଦର୍ଶିନୀ କାଲେ ॥ ୬୫॥
ଶୃଙ୍ଗାରଵିଭ୍ରମଵତା ନୀଲୋତ୍ପଲକାନ୍ତିଚାତୁରୀସୁପୁଷା ।
ଵାଣୀନେତ୍ରେଣ ଵିଧିର୍ଜିତୋଽଭଵତ୍ ସୋଽପି ସତତକୃତଵେଦଃ ॥ ୬୬॥
ଶ୍ଯାମା କଟାକ୍ଷଲହରୀ ମାତୁର୍ଜଯତୀହ ସଂପଦାଂ ଜନନୀ ।
ଯାମସ୍ତୌଷୀତ୍ କାଲେ ମଘଵା ନାକାଧିପା ମୁନଯଃ ॥ ୬୭॥
ମଣିକଟକନାଦପୂରିତମମ୍ବାପାଦାମ୍ବୁଜଂ ମହାମନ୍ତ୍ରୈଃ ।
ଜପ୍ଯଂ ଧ୍ଯେଯଂ କାଲେ ଦିଶି ଦିଶି କଲିତସ୍ଵରକ୍ଷଂ ଚ ॥ ୬୮॥
ସ୍ମରଣେନ ଦୁରିତହନ୍ତ୍ରୀ ନମନେନ କଵିତ୍ଵସିଦ୍ଧିଦା ଵାଣୀ ।
କୁସୁମସମର୍ପଣକଲଯା କାଲେ ମୋକ୍ଷପ୍ରଦାତ୍ରୀ ଚ ॥ ୬୯॥
ଵିସୃମରତମୋନିହନ୍ତ୍ରି ତ୍ଵାଂ ସେଵେ ଶାରଦାଦେଵି ।
ଶିଶିରୀକୁରୁ ମାଂ କାଲେ କରୁଣାରସଵୀକ୍ଷିତେନ ଵରଦେନ ॥ ୭୦॥
ମାତର୍ନମୋଽସ୍ତୁ ତାଵକକଟାକ୍ଷମଧୁପାଯ ଶାରଦେ ଜଯତି ।
ଯୋ ଵେଧସୋଽପି କାଲେ ସୃଷ୍ଟ୍ଯାଦୌ ଚାତୁରୀଂ ଦିତ୍ସନ୍ ॥ ୭୧॥
ସୁମନୋଵାଞ୍ଛାଦାନେ କୃତାଵଧାନଂ ଧନଂ ଧାତୁଃ ।
ଧିଷଣାଜାଡ୍ଯାଦିହରଂ ଯଦ୍ଵୀକ୍ଷଣମାମନନ୍ତି ଜଗତି ବୁଧାଃ ॥ ୭୨॥
ଲଲିତଗମନଂ ତ୍ଵଦୀଯଂ କଲନୂପୁରନାଦପୂରିତଂ ଵାଣି ।
ନୌମି ପଦାମ୍ବୁଜଯୁଗଲଂ କଵିତାସିଦ୍ଧ୍ଯୈ ଵିଧେଃ କାନ୍ତେ ॥ ୭୩॥
କମଲକୃତଵୈଜଯନ୍ତୀ ଵିଧେର୍ମୁଖେଷ୍ଵାଦରାଦ୍ଵାଣ୍ଯାଃ ।
ଜଯତି କଟାକ୍ଷଲହରୀ ତୋରଣଲକ୍ଷ୍ମୀସ୍ତୁ ସତ୍ଯଲୋକେ ହି ॥ ୭୪॥
ନିଶ୍ରେଣିକା ଚ ମୁକ୍ତେଃ ସଜ୍ଜ୍ଞାନନଦୀମହାଲହରୀ ।
ନାନାରସଚାତୁର୍ଯପ୍ରସାରିକା ଦୁରିତଶଙ୍କୁଲା କାଲେ ॥ ୭୫॥
ପରତନ୍ତ୍ରିତଵିଧିଵିଭଵା ଦେଵୀ ସା ଶାରଦା ଜଯତି ।
କୈଵଲ୍ଯାଦିକଲାନାଂ ଦାତ୍ରୀ ଭକ୍ତାଲିକାମଧେନୁର୍ଯା ॥ ୭୬॥
କଵିକାମଧେନୁରେଷା ମଞ୍ଜୁସ୍ମେରାନନାମ୍ଭୋଜା ।
ଵାଣୀ ଜଯତି ଵିଧାତୁର୍ମନନାଗମସଂପ୍ରଦାଯଫଲଦା ହି ॥ ୭୭॥
ଘନତରକୃପାରସାର୍ଦ୍ରୈର୍ନାନାଵିଭଵପ୍ରଦାନକୃତଦୀକ୍ଷୈଃ ।
ଵାଣୀ ଜଯତି କଟାକ୍ଷୈର୍ନଃ କାଶ୍ମଲ୍ଯଂ ହଠାନ୍ନିରସ୍ଯନ୍ତୀ ॥ ୭୮॥
ଦାସାଶାଦାନକଲାପ୍ରକ୍ଲୃପ୍ତଦୀକ୍ଷାକଟାକ୍ଷଲହରୀ ମେ ।
କବଲଯତୁ ପାପରାଶିଂ ଵାଣ୍ଯା ନିତ୍ଯଂ ମହୌଦାର୍ଯା ॥ ୭୯॥
ଆଦିମଜନନୀ ସୈଷା ଵାଣୀ ଜଯତୀହ ଭକ୍ତରକ୍ଷାଯୈ ।
ସର୍ଵତ୍ର କଲିତଦେହା ନାନାଶାସ୍ତ୍ରାଦିରୂପତୋ ଜଗତି ॥ ୮୦॥
ବହୁଵିଧଲୀଲାସଦନଂ ସଂଭୃତଫୁଲ୍ଲାବ୍ଜଶିଲ୍ପଵୈଚିତ୍ର୍ଯମ୍ ।
ଵାଣୀମୁଖାରଵିନ୍ଦଂ ଚୁମ୍ବତି ମାନସମିଦଂ ହଠାତ୍ କୃତ୍ଯମ୍ ॥ ୮୧॥
ସୌଭାଗ୍ଯକାନ୍ତିସାରଂ ଵଦନାମ୍ଭୋଜଂ ଶ୍ରିଯୈ ଵାଣ୍ଯାଃ ।
ଆଶ୍ରିତ୍ଯ ସକଲଵେଦା ଅପି ନିତ୍ଯଂ ମାନ୍ଯତାଂ ପ୍ରାପ୍ତାଃ ॥ ୮୨॥
ଜ୍ଞାନମଯୀ ସଲିଲମଯୀ ତତ୍ତ୍ଵମଯୀ ଭାତି ସର୍ଵଲୋକାନାମ୍ ।
ଅକ୍ଷରମଯୀ ଚ ଵାଣୀ ଶ୍ରେଯୋଦାନେ ନିବଦ୍ଧଚିତ୍ତଗତିଃ ॥ ୮୩॥
ନମୌକ୍ତିରସ୍ତୁ ମାତ୍ରେ ଵାଣ୍ଯୈଃ ନଃ ସିଦ୍ଧିଦା ଭକ୍ତ୍ଯା ।
ଆନନ୍ଦିନ୍ଯୈ ଜ୍ଞାନସ୍ଵରୂପଭାଜେ ପ୍ରବନ୍ଧରୂପାଯୈ ॥ ୮୪॥
ଆରାଧ୍ଯାଯୈ ଧ୍ଯେଯାଯୈ ଚାତ୍ତକଲାଚିତ୍ରନାଦରୂପାଯୈ ।
ସଚ୍ଚିତ୍ତଵାସଭାଜେ ଵାଣ୍ଯୈ ଭୂଯୋ ନମୋଽସ୍ତୁ ଭକ୍ତିକୃତମ୍ ॥ ୮୫॥
କମଲାସନପୁଣ୍ଯକଲା ନମତାଂ ଚିନ୍ତାମଣିର୍ଵାଣୀ ।
ଜୀଵାକ୍ଷରବୋଧକଲାରୂପା ଜଯତୀହ ସତ୍ତ୍ଵରୂପଵତୀ ॥ ୮୬॥
ବ୍ରହ୍ମାଣ୍ଡମଣ୍ଡଲମିଦଂ ଵ୍ଯାପ୍ତଂ ମାତ୍ରା କ୍ଷରାକ୍ଷରାଦିଜୁଷା ।
ଯତ୍ପଦକମଲଂ ନିତ୍ଯଂ ଶ୍ରୁତିତତିସୁଦତୀଵିଭୂଷଣଂ ଚ ଵିଦୁଃ ॥ ୮୭॥
ମନସିଜସାମ୍ରାଜ୍ଯକଲାଲକ୍ଷ୍ମୀରେଷା ଵିରିଞ୍ଚିମୁଖହର୍ଷମ୍ ।
ଵ୍ଯାତନ୍ଵାନା ନିତ୍ଯଂ ରାଜତି ଷଡରସ୍ଵରୂପଚକ୍ରତଲେ ॥ ୮୮॥
ମଞ୍ଜୁଲଵୀଣାନିନଦପ୍ରଯୋଗନିର୍ଧୂତମୋହସଂଚାରା ।
ହଂସୀଯାନା ଵାଣୀ ହଂସଗତିଃ ସୁକୃତିନେତ୍ରପୁଣ୍ଯକଲା ॥ ୮୯॥
କୁଚକଲଶସଵିଧଵିନିହିତଵୀଣାନିକ୍କାଣସାଵଧାନକଲା ।
ଅଧିନେତ୍ରୀ ହି କଲାନାଂ ସକଲାନାଂ ଶାରଦା ଜଯତି ॥ ୯୦॥
ତ୍ରିଦଶପରିଷନ୍ନିଷେଵ୍ଯା ପ୍ରାତଃ ସାଯଂ ପ୍ରଫୁଲ୍ଲମୁଖକମଲା ।
କମଲାସ୍ନୁଷା ହି ଵାଣୀ ଵାଣୀଂ ଦିଶତୁ ପ୍ରବନ୍ଧରସଭରିତାମ୍ ॥ ୯୧॥
ଅଧିକଚପଲୈଃ କଟାକ୍ଷୈରଞ୍ଚିତଲୀଲାରସୈରୁଦାରୈର୍ନଃ ।
ମଙ୍ଗଲମାତନ୍ଵାନା ଵିଧାତୃଗୃହିଣୀ ସୁରାଦିନୁତପାଦା ॥ ୯୨॥
କାନ୍ତଂ ଲକ୍ଷ୍ମୀଭଵନଂ ମୁଖକମଲଂ ଶାରଦାଦେଵ୍ଯାଃ ।
ସୌଭାଗ୍ଯକାନ୍ତିସାରଂ ସ୍ପୃହଯତି ମେ ମାନସଂ ସରସମ୍ ॥ ୯୩॥
କାରୁଣ୍ଯପୂର୍ଣନଯନଂ ପୁସ୍ତକହସ୍ତଂ ମହଃ କିମପି ।
ଧାତୁଃ ପୁଣ୍ଯକଲାନାଂ ପରିପାକୋ ମର୍ତ୍ଯରକ୍ଷଣଂ କୁରୁତେ ॥ ୯୪॥
ସଂସାରଵାରିରାଶିଂ ତର୍ତୁଂ ସା ସେତୁରେଷା ନଃ ।
ଧାତୁର୍ଗୃହିଣୀ ଦୁଃଖଂ ଶିଥିଲଯତୁ ପରଂ ଜନିପ୍ରାପ୍ତମ୍ ॥ ୯୫॥
ସରସକଵିକଲ୍ପଵଲ୍ଲୀମମ୍ବାଂ ଵାଣୀମହମୁପାସେ ।
ଅନ୍ତସ୍ତମୋନିହନ୍ତ୍ରୀଂ ଯାମାହୁର୍ଜ୍ଞାନଦାଂ ମୁନଯଃ ॥ ୯୬॥
ମମ ଲୋଚନଯୋର୍ଭୂଯାତ୍ ଵିଦ୍ଯା କାପି ପ୍ରଧୂତଜନିଭୀତିଃ ।
ନିଗମେଷୁ ସଂଚରନ୍ତୀ କୃପାନିଧିଃ ଶାରଦା ଦେଵୀ ॥ ୯୭॥
ଶମିତନତଦୁରିତସଂଘା ଧାତ୍ରେ ନିଜନେତ୍ରକଲ୍ପିତାନଙ୍ଗା ।
କୃତସୁରଶାତ୍ରଵଭଙ୍ଗା ସା ଦେଵୀ ମଙ୍ଗଲୈସ୍ତୁଙ୍ଗା ॥ ୯୮॥
ପଦ୍ମାସନସ୍ଥିତାଂ ତାଂ ଵାଣୀଂ ଚତୁରାନନାଂ ଵନ୍ଦେ ।
କଲ୍ଯାଣାନାଂ ସରଣିଂ କଵିପରିଷତ୍କଲ୍ପଵଲ୍ଲରୀଂ ମାନ୍ଯାମ୍ ॥ ୯୯॥
କୁଚଭାରସଂନତାଙ୍ଗୀଂ କୁନ୍ଦସ୍ମେରାନନାମ୍ଭୋଜାମ୍ ।
କୁନ୍ଦଲକୁସୁମପରିମଲସଂପାଦିତଭୃଙ୍ଗଝଂକୃତିତରଙ୍ଗାମ୍ ॥ ୧୦୦॥
ଚିଦ୍ରୂପାଂ ଵିଧିମହିଷୀଂ ହଂସଗତିଂ ହଂସସଂନୁତଚରିତ୍ରାମ୍ ।
ଵିଦ୍ଯାକଲାଦିନିଲଯାମାରାଧ୍ଯାଂ ସକଲଜଡିମଦୋଷହରୀମ୍ ॥ ୧୦୧॥
ଜନନି ଯଦି ଭଜତି ଲୋକେ ତଵ ଲୋଚନଵୀକ୍ଷଣଂ କ୍ଷଣଂ ମର୍ତ୍ଯଃ ।
କୁପୁରୁଷନୁତିଵିମୁଖସ୍ତେ ରୂପଂ ଜ୍ଞାନପ୍ରଦଂ ପଶ୍ଯନ୍ ॥ ୧୦୨॥
କୁକ୍ଷିଂଭରିତ୍ଵମୁଖଦୁର୍ଗୁଣାଦିକଂ ଦୂରତସ୍ତ୍ଯକ୍ତ୍ଵା ।
ତ୍ଵଦ୍ଭାଵନେନ ଧନ୍ଯୋ ନଯତି ଚ କାଲଂ ପ୍ରମୋଦେନ ॥ ୧୦୩॥
ମଯି ତାପଭାରଶାନ୍ତ୍ଯୈ ତରଙ୍ଗଯ ତ୍ଵଦିଲୋଚନେ ମାତଃ ।
ଯଚ୍ଛାରଦାବ୍ଜସୁଷମାମାନ୍ଯେ ଦେଵାଦିଭିଃ ପ୍ରାର୍ଥ୍ଯେ ॥ ୧୦୪॥
ସର୍ଵାର୍ଥଦା ହି ଭଜତାଂ କଟାକ୍ଷଧାଟୀ ଶିଵଂକରୀ ଵାଣି ।
ଚିନ୍ତାମଣିମିଵ କଲଯତି ଯାଂ ହି ଵିଧିର୍ଵିଦିତମନ୍ତ୍ରୋଽପି ॥ ୧୦୫॥
ସୁକୃତପରିପାକମାନସା ଧନ୍ଯାସ୍ତ୍ଵାମର୍ଚଯନ୍ତି ନନୁ ଵାଣି ।
ଅହମପି ତଦ୍ଵତ୍କଲଯେ ଫଲପ୍ରଦା ତ୍ଵଂ ସମାନକଲ୍ପାସି ॥ ୧୦୬॥
ନିଗମଵଚସାଂ ନିଦାନଂ ତଵ ପାଦାବ୍ଜଂ ଵତଂସଯତୁ କାଲେ ।
ଦେଵୋଽପି ଦେଵଦେଵୋ ଵିଜିତଜଗତ୍ତ୍ରଯତଲେ ମାତଃ ॥ ୧୦୭॥
ଅନ୍ତସ୍ତମସୋ ହନ୍ତ୍ରୀ ପଟୀଯସୀ ତେ କଟାକ୍ଷଝରମାଲା ।
ଯା ତୋରଣମାଲ୍ଯଶ୍ରିଯମାତନୁତେ ଵେଧସଃ ସୌଧେ ॥ ୧୦୮॥
ଶୃଙ୍ଗାରଵିଭ୍ରମଵତୀଂ ତ୍ଵାଂ ପ୍ରାପ୍ଯୈଵ କ୍ରିଯାକାଲେ ।
କଲଯତି ସୃଷ୍ଟ୍ଯାଦିମସୌ ଵିଧିଃ ଶ୍ରୁତିଵ୍ଯକ୍ତମାହାତ୍ମ୍ଯଃ ॥ ୧୦୯॥
ଵେଧୋଵଦନଂ କେଲୀଵନମାସାଦ୍ଯାମ୍ବ ପରମଯା ହି ମୁଦା ।
କ୍ରୀଡସି ଶୁକୀଵ କାଲେ ଦ୍ଵିଜସଂଘସମର୍ଚିତାତ୍ମଵୃତ୍ତିଶ୍ଚ ॥ ୧୧୦॥
ଧାତୁର୍ମୁଖମଞ୍ଜୂଷାରତ୍ନଂ ନିଗମାନ୍ତକେଲିଵନହଂସୀମ୍ ।
ପରମାଂ କଲାମୁପାସେ ତାମମ୍ବାଂ ଚିଦ୍ଵିଲାସଘନଵୃତ୍ତିମ୍ ॥ ୧୧୧॥
ଵାଗୀଶଦେଵରୂପିଣି ଗୀଷ୍ପତିମୁଖଦେଵସଂଘନୁତଚରଣେ ।
ତଵ ରୂପଂ ସୂର୍ଯାଯୁତଦୃଶ୍ଯଂ ଦର୍ଶଯ ମମ ଜ୍ଞାନେ ॥ ୧୧୨॥
ଦିଵ୍ଯଜ୍ଞାନପ୍ରଦମିଦମମ୍ବ ତ୍ଵଦ୍ରୂପମାଦରାଦ୍ଵାଣି ।
କାଲେ ଦର୍ଶଯ କୃପଯା ତେନ ଵଯଂ ପ୍ରାପ୍ତକାର୍ଯସାଫଲ୍ଯାଃ ॥ ୧୧୩॥
ଅମ୍ବା ତ୍ରିସଂଧ୍ଯପଠନପ୍ରଵୃତ୍ତିଭାଜାଂ କ୍ରମେଣ ନାମ୍ନାଂ ତୁ ।
ଦ୍ଵାଦଶକଲାଵିଭେଦଵ୍ଯୂହାଦିଜ୍ଞାନଦା ପ୍ରସନ୍ନା ହି ॥ ୧୧୪॥
ମୂକୋଽପି ସତ୍କଵିଃ ସ୍ଯାଦ୍ ଦୁରକ୍ଷରାଣ୍ଯପି ଵିଧାତୃଲିଖିତାନି ।
ସତ୍ଫଲଦାନି ସରସ୍ଵତି କଟାକ୍ଷପୂରେ ଯଦି କାପି ॥ ୧୧୫॥
ଅଵଲମ୍ବେ ତାମମ୍ବାଂ ପଞ୍ଚାଶଦ୍ଵର୍ଣକଲ୍ପିତଜଗତ୍କାମ୍ ।
ସୃଷ୍ଟିସ୍ଥିତିସଂହାରସ୍ଥିରୋଦଯାଂ ଵିଵିଧଶାସ୍ତ୍ରରୂପାଢ୍ଯାମ୍ ॥ ୧୧୬॥
ଵାଣୀଂ ଦିଶତୁ ମନୋଜ୍ଞାଂ ଵାଣୀ ଗତିହସିତକାଦମ୍ବା ।
ଯା ଦମ୍ଭାଦିଵିମୁକ୍ତା ନାଦଂ ଭାଵ୍ଯଂ ଵଦନ୍ତି ଯଦ୍ରୂପମ୍ ॥ ୧୧୭॥
ରାକେନ୍ଦୁଵଦନବିମ୍ବା ସାମ୍ବା ଵାଣୀ ପୁନାତୁ କୃତିମେନାମ୍ ।
ପରିକଲିତଭାଵବନ୍ଧାଂ ରସୋଜ୍ଜ୍ଵଲାଂ ମଙ୍ଗଲୋତ୍ତୁଙ୍ଗାମ୍ ॥ ୧୧୮॥
ଲାଵଣ୍ଯକାନ୍ତିସିନ୍ଧୁଃ ପାଦାବ୍ଜନତପ୍ରଭାଵସଂଧାତ୍ରୀ ।
ପ୍ରସୃମରତମୋନିହନ୍ତ୍ରୀ ମଦ୍ଵାଚାଂ ଦେଵତା ଚାଦ୍ଯା ॥ ୧୧୯॥
ଜନତାନେତ୍ରାନନ୍ଦଂ ରୂପଂ ଯସ୍ଯାଃ ସ୍ଫୁଟଂ ଭାତି ।
ସ୍ମରଣଂ ତ୍ଵଜ୍ଞାନହରଂ ଵିଶ୍ଵଜ୍ଞାନପ୍ରଦଂ ଚ ସା ଜଯତି ॥ ୧୨୦॥
ସହଧର୍ମିଣୀ ଵିଧାତୁର୍ଦାରିଦ୍ର୍ଯଧ୍ଵଂସିନୀ ନିଜକଟାକ୍ଷୈଃ ।
ସାଂନିଧ୍ଯଂ ଜନଯତୁ ମେ ସୁରମୁନିନରସଂନୁତସ୍ଵମହିମେଯମ୍ ॥ ୧୨୧॥
ମୁଖରିତଵୀଣା ଵାଣୀ ଵାଣୀଂ ମେ ଦିଶତୁ ନୈଜନୁତିଯୋଗ୍ଯାମ୍ ।
ଆସ୍ଵାଦିତଶାସ୍ତ୍ରାମୃତଲହରୀଂ ସଦ୍ଯସ୍ତମୋନିହନ୍ତ୍ରୀଂ ଚ ॥ ୧୨୨॥
ମଣିନୂପୁରନାଦନିଭା ଵାଣୀ ଭାତି ତ୍ଵଦୀଯଭକ୍ତମୁଖେ ।
କୀର୍ତିର୍ଦିଶାସୁ ଶୁଦ୍ଧିର୍ଵପୁଷି ବହୁମୁଖୀ ପରଂ କାଲେ ॥ ୧୨୩॥
ତଵ ପାଦସ୍ମରଣଵଶାତ୍ ତାମ୍ଯତି ତିମିରାଵଲିଶ୍ଚାନ୍ତଃ ।
ଆନନ୍ଦଲହରିଵୀଚୀ ପ୍ରସର୍ପତି କ୍ଷମାତଲେ ହି ଭକ୍ତାନାମ୍ ॥ ୧୨୪॥
ସଂପନ୍ନଲିନୀଭାନୁଂ ଜ୍ଞାନାବ୍ଧିସୁଧାକରଂ ହି ତଵ ରୂପମ୍ ।
ଭକ୍ତ୍ଯା ମନସି ଗୃଣନ୍ତୋ ଗଚ୍ଛନ୍ତି ଵ୍ଯୋମଯାନମାରୂଢାଃ ॥ ୧୨୫॥
ହୃତ୍ତମସାଂ ଦୀପରୁଚିର୍ଵିଧାତୃଦଯିତା ମମାସ୍ତୁ ପରଦୈଵମ୍ ।
ଭଵତାପମେଘମାଲା କଵିଶୁକଵାସନ୍ତିକଶ୍ରୀର୍ହି ॥ ୧୨୬॥
ମମ ମାନସମଣିହର୍ମ୍ଯେ ଵିହରତୁ ଵାଣ୍ଯାଃ ସ୍ଵରୂପଂ ତୁ ।
ନିଗମଵଚସାଂ ନିଗୁମ୍ଫୈର୍ଵେଦ୍ଯଂ ତଦ୍ଵେଧସା ଲାଲ୍ଯମ୍ ॥ ୧୨୭॥
ସତତମଭିଗମ୍ଯରୂପା ଵିବୁଧଵରେଡ୍ଯା ସରସ୍ଵତୀ ମାତା ।
ମନସି ମମ ସଂନିଧତ୍ତାଂ ଭୂତ୍ଯୈ ନଃ ସର୍ଵତଃ କାଲେ ॥ ୧୨୮॥
ମମ ଶିରସି ନୀଚପୁଣ୍ଯେ ପୁଣ୍ଯଘନା ଵେଦମୌଲିହର୍ମ୍ଯା ଚ ।
କୃତପଦଵିନ୍ଯାସଭରା ଵାଣୀ ଜଯତୀହ ଶତମଖାଦିନୁତା ॥ ୧୨୯॥
ମାଯାନିରସନଦକ୍ଷା ମାତେଯଂ ସୁପ୍ରସନ୍ନା ମେ ।
ଲଭତେ ପରମଂ ଜ୍ଞାନଂ ଯଦ୍ଭକ୍ତ୍ଯା ପାମରୋଽପି ଚ ଧରିତ୍ର୍ଯାମ୍ ॥ ୧୩୦॥
ଵାଣୀଶ୍ଵରି ତଵ ରୂପଂ ନାମସ୍ମରଣଂ ଚ ପୂଜନଂ ଭକ୍ତ୍ଯା ।
ସିଧ୍ଯତି ସକଲଵିଭୂତ୍ଯୈ ତତ୍ର ହି ଭଵତୀଦଯାପ୍ରସାରସ୍ତୁ ॥ ୧୩୧॥
ସଫଲଯତୁ ନେତ୍ରଯୁଗଲଂ ହତନତଦୁରିତା ଚ ସା ପରା ଦେଵୀ ।
କମଲଜମାନ୍ଯଚରିତ୍ରା ସୁମନୋଵାଞ୍ଛାପ୍ରଦାନକୃତଦୀକ୍ଷା ॥ ୧୩୨॥
ପଙ୍କଜମୃଣାଲତନ୍ତୁପ୍ରତିଭଟରୂପଂ କ୍ଵଚିଦ୍ଦୃଶ୍ଯମ୍ ।
କଵିକୁଲଵାଣୀକୈରଵଶାରଦଚନ୍ଦ୍ରପ୍ରଭାକବଲିତଂ ଚ ॥ ୧୩୩॥
ନଲିନଭଵଗୃହିଣି ଵାଣି ପ୍ରହ୍ଵାନାଂ ସପଦି ଭକ୍ତାନାମ୍ ।
ଲୁମ୍ପସି ମୋହଂ ଭଵତୀସ୍ମରଣାଦ୍ଵରିଵସ୍ଯଯା ସ୍ତୁତ୍ଯା ॥ ୧୩୪॥
କଵିକୁଲକଲ୍ପକଵଲ୍ଲୀମପାଙ୍ଗଲୀଲାକୃତାର୍ତିଶମନାଂ ତାମ୍ ।
ଵାଣୀମନ୍ଵହମାର୍ଯାରାଧ୍ଯାଂ ମୋକ୍ଷାଯ ନିଭୃତମହମୀଡେ ॥ ୧୩୫॥
ସଂଵିତ୍ସୁଖସ୍ଵରୂପାମମ୍ବାଂ ଵାଣୀମହର୍ନିଶଂ ମନସି ।
କଲଯେ କଲିତାପ୍ରଭରପ୍ରଶାନ୍ତିକାମଃ ପ୍ରଭାଵତୀଂ ଜଯଦାମ୍ ॥ ୧୩୬॥
ନତପରିପାଲିନି ଵାଣି ତ୍ରିଜଗଦଘଧ୍ଵଂସିନି ଶ୍ରିତାନାଂ ନଃ ।
ତଵ ପାଦଯୁଗଂ ନିଗଲଂ ଭଵତୁ ତମୋରାଶିଦୁଷ୍ଟହସ୍ତିଗଣେ ॥ ୧୩୭॥
କାମାଦିଦୁର୍ଗ୍ରହକୃତାନର୍ଥନିରାସାଯ ତାଵକାପାଙ୍ଗାଃ ।
ଵାଣି ଜନଯନ୍ତି ନତାନାଂ କୈଵଲ୍ଯ ଖପ୍ରଦାନାଯ ॥ ୧୩୮॥
ତଵ ଦର୍ଶନଂ ହି ମାତଃ ପରମଂ ସଂସ୍କାରମାତ୍ତପାପାନାମ୍ ।
କଲ୍ଯାଣସୂକ୍ତିକନ୍ଦଲରସପ୍ରଦଂ ମାନ୍ଯତେ ଵିବୁଧୈଃ ॥ ୧୩୯॥
ଧାତୁର୍ଵଦନସରୋଜେ ଶ୍ରୁତିସୀମନି ହୃଦି ଚ ଭକ୍ତାନାମ୍ ।
ଏକପଦା ଦ୍ଵିପଦା ଵା ରାଜତି ଵାଣୀ ଜଗନ୍ମାତା ॥ ୧୪୦॥
ମଣିମଯକାଞ୍ଚୀଲସିତା ଵୀଣାପୁସ୍ତକକରାରଵିନ୍ଦା ଚ ।
ନମତାଂ ଜାଡ୍ଯଵିଧୂନନଧୃତଦୀକ୍ଷା ରାଜତେ ଵାଣୀ ॥ ୧୪୧॥
କବଲଯତୁ ତାପମସ୍ଯାଃ ସ୍ମରଣଂ ପାଦାବ୍ଜଵନ୍ଦନଂ ଵାଣ୍ଯାଃ ।
ଧାତୁର୍ଜିହ୍ଵାଗ୍ରତଲେ ନୃତ୍ଯନ୍ତ୍ଯାଃ ସାରସୂକ୍ତିରସଯନ୍ତ୍ଯାଃ ॥ ୧୪୨॥
ପଦ୍ମଜଵଦନଵିଭୂଷା ନିଗମଶିଖୋତ୍ତଂସପୀଠିକା ଵାଣୀ ।
ସକଲଵିଧଶାସ୍ତ୍ରରୂପା ଭକ୍ତାନାଂ ସତ୍କଵିତ୍ଵଦାନପ୍ରା ॥ ୧୪୩ ॥।
ଗତିଜିତମରାଲଗମନା ମରାଲଵାହା ଚ ଵେଧସୋ ଦାରାଃ ।
ଶିଶିରଦଯାସାରା ସା ନମତାଂ ସଂତାପହାରିଣୀ ସହସା ॥ ୧୪୪॥
ସ୍ତନଭାରସଂନତାଙ୍ଗୀ ଦରଦଲିତାମ୍ଭୋଜଲୋଚନାନ୍ତଶ୍ରୀଃ ।
ସଵିଧତଲେ ଵିବୁଧଵଧୂପରିଚରଣାଦ୍ଯୈଶ୍ଚ ତୁଷ୍ଟଚିତ୍ତା ସା ॥ ୧୪୫॥
ହରିଣାଙ୍କଵଦନବିମ୍ବା ପୃଥୁଲନିତମ୍ବା କଚାତ୍ତଲୋଲମ୍ବା ।
ନିଜଗତିଜିତକାଦମ୍ବା ସାମ୍ବା ପଦପଦ୍ମନମ୍ରଭକ୍ତକଦମ୍ବା ॥ ୧୪୬॥
ପରିହସିତନୀଲନୀରଜଦେହଶ୍ରୀଃ ଶାରଦା ପ୍ରଥମା ।
ସ୍ଫଟିକମଣିଭରକାନ୍ତିଃ ସରସ୍ଵତୀ କୀର୍ତ୍ଯତେ ଚ ଵିବୁଧଗଣୈଃ ॥ ୧୪୭॥
ନାଥେ ଦୃଢଭକ୍ତିମତୀ ସୃଷ୍ଟ୍ଯାଦୌ ଚିତ୍ସ୍ଵରୂପା ଚ ।
ଧାତ୍ରା ସମାନଭାଵା ଚୈକାସନପୂଣ୍ଡରୀକମଧ୍ଯସ୍ଥା ॥ ୧୪୮॥
ପ୍ରୀତ୍ଯା ସରସପୁମର୍ଥାନ୍ ଦଦାତି କାଲେ ଚିଦାଦିସଂଧାତ୍ରୀ ।
ସା ମେ ଦୈଵତମେଷା ସତତନିଷେଵ୍ଯା ଚ କାମଦା ଭୂଯାତ୍ ॥ ୧୪୯॥
ହରିଚରଣନଲିନଯୁଗଲେ ସଦୈକତାନା ହି ଶାରଦା ଜନନୀ ।
ପଦ୍ମାନୀଲାଦିସଖୀ ଶ୍ରୁତ୍ଯୁଦ୍ଯାନେ ଵିହାରରସଭରିତା ॥ ୧୫୦॥
ଧାତୁଃ କୁଟୁମ୍ବିନୀଯଂ ତନ୍ଯାତ୍ କଲ୍ଯାଣସଂତତିଂ ସତତମ୍ ।
ଯା ତାରୁଣ୍ଯଵିଭୁଷା ସମକ୍ରମା ତ୍ରିପୁରସୁନ୍ଦର୍ଯା ॥ ୧୫୧॥
ନାନାକ୍ଷରାଦିମାତୃକଗଣେଡିତା ଶବ୍ଦରୂପା ଚ ।
ନାଦବ୍ରହ୍ମଵିଲାସା ଵାଣୀ ସା ମଙ୍ଗଲାନି ନସ୍ତନ୍ଯାତ୍ ॥ ୧୫୨॥
ଦୃକ୍କୋଣଵୀକ୍ଷଣକଲାନିଗମପ୍ରାଭଵଵିଧାନଦା ନମତାମ୍ ।
ଵିବୁଧାନାଂ ହୃଦଯାବ୍ଜଂ ଯସ୍ଯା ଵାସସ୍ଥଲୀ ଚ ନିର୍ଦିଷ୍ଟମ୍ ॥ ୧୫୩॥
ମୋହାଦିଵନକୁଠାରା ଯା ନିତ୍ଯଂ ସେଵ୍ଯତେ ତ୍ରିଦଶସଂଧୈଃ ।
ନିତ୍ଯପ୍ରସନ୍ନରୂପାଂ ଶାନ୍ତାଂ ଯାମେଵ ସେଵତେ ଵେଧାଃ ॥ ୧୫୪॥
ନମତାଂ ଯଯୈଵ ଖଣ୍ଡୀକ୍ରିଯତେ ସୁଵର୍ଣଦୃଷ୍ଟିପୁଷା ।
ଯଦ୍ଵୀକ୍ଷଣେନ ପୁରୁଷଃ ଖ୍ଯାତୋ ନୃପସଦସି ମାନ୍ଯତେ ପ୍ରଥମମ୍ ॥ ୧୫୫॥
ଯସ୍ଯୈ ଶ୍ରୋତ୍ରିଯଵର୍ଯୈସ୍ତ୍ରିସଂଧ୍ଯମଧାର୍ଦିକଂ କ୍ରିଯତେ ।
ସା ମଞ୍ଜୁନୀତିରୂପା ଵାଣୀରୂପା ଚ ଭଣ୍ଯତେ ନିପୁଣୈଃ ॥ ୧୫୬॥
ସା ମଯି ତନ୍ଯାଦୀକ୍ଷାଂ ଵୀକ୍ଷାଵନଦାଂ ସରସ୍ଵତୀ ଦେଵୀ ।
ସଂତାନକୁସୁମଜୈତ୍ରୀଂ ଯାମୈଚ୍ଛତ୍ ପ୍ରାପ୍ତୁମଞ୍ଜସା ଵେଧାଃ ॥ ୧୫୭॥
ମନ୍ଦସ୍ମିତମଧୁରାସ୍ଯଂ କୃପାଵଲୋକଂ ନିରସ୍ତଜାଦ୍ଯତତି ।
ଭୂଯାଦ୍ ଵାଣ୍ଯା ରୂପଂ ପୁରଃ କରାମ୍ଭୋଜକଲିତଵୀଣାଦି ॥ ୧୫୮॥
ଵାଣ୍ଯାଃ ପରଂ ନ ଜାନେ ଦୈଵତମନ୍ଯଦ୍ ଵନେ ଗିରୌ ଚ ପଥି ।
ଗଗନେ ଵା ସଂରକ୍ଷିତନତଜନତାଯାଃ କୃପାରସାର୍ଦ୍ରାଯାଃ ॥ ୧୫୯॥
ଆସ୍ଯେନ୍ଦୋରଵଲୋକନମମ୍ବାଯାଃ ପାଦପଦ୍ମସେଵା ଚ ।
ସର୍ଵଶ୍ରେଯଃପ୍ରାପ୍ତ୍ଯୈ ଶାସ୍ତ୍ରଜ୍ଞୈଃ ସୁଷ୍ଠୁ ନିର୍ଦିଷ୍ଟା ॥ ୧୬୦॥
ଵାଣୀ ହି ତାପହନ୍ତ୍ରୀ ଜଗତାଂ କାରୁଣ୍ଯପୂର୍ଣନଯନଶ୍ରୀଃ ।
ମନ୍ଦାନ୍ କରୋତି ଵିବୁଧାନ୍ ଦ୍ରାଵଯତି ଶିଲାସ୍ତତସ୍ତୁ କିଂ ଚିତ୍ରମ୍ ॥ ୧୬୧॥
ଯସ୍ମିନ୍ କଟାକ୍ଷପୂରୋ ନ ଭଵତି ସ ହି ଦୀନଵଦନଃ ସନ୍ ।
ପ୍ରସ୍ଖଲିତଵାଗ୍ଭାର୍ତୋ ଭିକ୍ଷାମଟତୀହ ନିନ୍ଦିତୋ ବହୁଶଃ ॥ ୧୬୨॥
ଵାଣ୍ଯାଃ କଟାକ୍ଷପୂରସ୍ରଜା ତ୍ଵଲଂକୃତନିଗାଲୋ ଯଃ ।
ସ ହି ଭଵତି ରାଜମାନ୍ଯଃ କାନ୍ତାଧରମଧୁରଵାଗ୍ଵିଲାସଶ୍ଚ ॥ ୧୬୩॥
କଵିତାଭାଗ୍ଯଵିଧାତ୍ରୀ ପରିମଲସଂକ୍ରାନ୍ତମଧୁପଗଣକେଶା ।
ମମ ନଯନଯୋଃ କଦା ଵା ସା ଦେଵୀ କଲିତସଂନିଧାନକଲା ॥ ୧୬୪॥
ପରଚିଦ୍ଵିଧାନରୂପା ଵାଣୀ ଶ୍ରୁତିସୀମ୍ନି ରାଜତେ ପରମା ।
ମୁନିଜନମାନସହଂସୀ ଯା ଵିହରତି ସା ଶୁଭାଯ ସ୍ଯାତ୍ ॥ ୧୬୫॥
ଜପମାଲିକଯା ଵାଣୀକରଧୃତଯା ଵୀଣଯା ଚ କୋଶେନ ।
ଅହମସ୍ମି ନାଥଵାନିହ କିଂ ଵାଶାସ୍ଯଂ ପରଂ ଲୋକେ ॥ ୧୬୬॥
କୈଵଲ୍ଯାନନ୍ଦସୁଖପ୍ରାପ୍ତ୍ଯୈ ତେଜସ୍ତୁ ମନ୍ମହେ କିମପି ।
ଯଦ୍ ଵାଞ୍ଛିତଚିନ୍ତାମଣିରିତି ଵାଣୀତି ଚ ଭୁଵି ଖ୍ଯାତମ୍ ॥ ୧୬୭॥
କଵିକୁଲସୂକ୍ତିଶ୍ରେଣୀଶ୍ରଵଣାନନ୍ଦୋଲ୍ଲସଦ୍ଵତଂସସୁମା ।
ସା ଦେଵୀ ମମ ହୃଦଯେ କୃତସାଂନିଧ୍ଯା କୃତତ୍ରାଣା ॥ ୧୬୮॥
ଯସ୍ଯା ଦୃଷ୍ଟିଵିଦୂରାଃ କୁମତାଃ ଶ୍ରୁତ୍ଯର୍ଥଵଞ୍ଚକାଃ ଶପ୍ତାଃ ।
କ୍ରନ୍ଦନ୍ତି ଦିଗନ୍ତତଟେ ମୋହାଦ୍ଯୈର୍ଲୁପ୍ତନଯନାଶ୍ଚ ॥ ୧୬୯॥
ସତ୍ପରିଷତ୍ସଂମାନ୍ଯା ଶ୍ରୁତିଜୀଵନଦାଯିନୀ ଜଗନ୍ମାତା ।
ଚତୁରାନନଭାଗ୍ଯକଲା କୃତସାଂନିଧ୍ଯା ହି ରାଜତେ ହୃଦଯେ ॥ ୧୭୦॥
କୃତସୁକୃତୈଃ ସଂଦୃଶ୍ଯା ମନ୍ଦସ୍ମିତମଧୁରଵଦନପଦ୍ମଶ୍ରୀଃ ।
ମୁନିନାରଦାଦିପରିଷତ୍ତତ୍ତ୍ଵୋପକ୍ରମଵିଚକ୍ଷଣା ଵାଣୀ ॥ ୧୭୧॥
କଵିଵାଗ୍ଵାସନ୍ତୀନାଂ ଵସନ୍ତଲକ୍ଷ୍ମୀର୍ଵିଧାତୃଦଯିତା ନଃ ।
ପରମାଂ ମୁଦଂ ଵିଧତ୍ତେ କାଲେ କାଲେ ମହାଭୂତ୍ଯୈ ॥ ୧୭୨॥
କଵିତାରସପରିମଲିତଂ କରୋତି ଵଦନଂ ନତାନାଂ ଯା ।
ସ୍ତୋତୁଂ ତାଂ ମେ ହ୍ଯାରାତ୍ ସା ଦେଵୀ ସୁପ୍ରସନ୍ନାସ୍ତୁ ॥ ୧୭୩॥
ଯସ୍ଯାଃ ପ୍ରସାଦଭୂମ୍ନା ନାକିଗଣାଃ ସତ୍ତ୍ଵସଂପନ୍ନାଃ ।
ଐନ୍ଦ୍ରୀଂ ଶ୍ରିଯମପି ମାନ୍ଯାଂ ପଶ୍ଯନ୍ତି କ୍ଷପିତଶତ୍ରୁଭଯପୀଡାମ୍ ॥ ୧୭୪॥
ମାନ୍ଯଂ ଵିଧାତୃଲୋକେ ତତ୍ତେଜୋ ଭାତି ସର୍ଵସୁରଵନ୍ଦ୍ଯମ୍ ।
ବ୍ରହ୍ମାଣ୍ଡମଣ୍ଡଲମିଦଂ ଯଦ୍ରୂପଂ ଯତ୍ର ଚାକ୍ଷରଗତିଶ୍ଚ ॥ ୧୭୫॥
ଜନନି ତରଙ୍ଗଯ ନଯନେ ମଯି ଦୀନେ ତେ ଦଯାସ୍ନିଗ୍ଧେ ।
ତେନ ଵଯଂ କୃତାର୍ଥା ନାତଃ ପରମସ୍ତିଃ ନଃ ପ୍ରାର୍ଥ୍ଯମ୍ ॥ ୧୭୬॥
ଵାଣି ଵିଧାତୁଃ କାନ୍ତେ ସ୍ତୋତୁଂ ତ୍ଵାମାଦରେଣ କିଂ ଵାଚ୍ଯମ୍ ।
ଭାସି ତ୍ଵମେଵ ପରମଂ ଦୈଵତମିତ୍ଯେଵ ଜାନାମି ॥ ୧୭୭॥
କବଲିତତମୋଵିଲାସଂ ତେଜସ୍ତନ୍ମନ୍ମହେ ମହୋଦାରମ୍ ।
ଫଲିତସୁମନୋଽଭିଲାଷଂ ଵାଣୀରୂପଂ ଵିପଞ୍ଚିକୋଲ୍ଲସିତମ୍ ॥ ୧୭୮॥
ପଦ୍ମସନସୁକୃତକଲାପରିପାକୋଦଯମପାସ୍ତନତଦୋଷମ୍ ।
ସରସଜ୍ଞାନକଵିତ୍ଵାଦ୍ଯନନ୍ତସୁକୃତଂ ଵିରାଜତେ ତେଜଃ ॥ ୧୭୯॥
ନିଜନାଥଵଦନସିଂହାସନମାରୂଢାମୁପାସ୍ମହେ ଵାଣୀମ୍ ।
ଯା କୃତ୍ରିମଵାଗ୍ଗୁମ୍ଫୈର୍ଵିରଚିତକେଲିର୍ଧିନୋତି ଵିଧିମାଦ୍ଯମ୍ ॥ ୧୮୦॥
ସୁଜନାନନ୍ଦକରୀ ସା ଜନଯନ୍ତୀ ସର୍ଵସଂପଦଂ ଧାତୁଃ ।
ଭକ୍ତେଷୁ ତାଂ ନଯନ୍ତୀମନ୍ଵହମହମାଦ୍ରିଯେ ଗିରାଂ ଦେଵୀମ୍ ॥ ୧୮୧॥
କରୁଣାକଟାକ୍ଷଲହରୀ କାମାଯାସ୍ତୁ ପ୍ରକାମକୃତରକ୍ଷା ।
ଵାଣ୍ଯା ଵିଧାତୃମାନ୍ଯା ସତ୍ସୁଖଦାନେ ଦିଶି ଖ୍ଯାତା ॥ ୧୮୨॥
ଵିସରୋ ମହୋତ୍ସଵାନାଂ ଵିରିଞ୍ଚିନଯନାଵଲେରିଯଂ ମାତା ।
ପ୍ରିଯକାର୍ଯସିଦ୍ଧିଦାତ୍ରୀ ଜଗତୀରକ୍ଷାଧୁରଂଧରା ଜଯତି ॥ ୧୮୩॥
ଵିବୁଧାଭିଗମ୍ଯରୂପା ହଂସାଵଲିସେଵିତା ଗିରାଂ ଦେଵୀ ।
ଗଙ୍ଗେଵ କନତି କାଲେ ପରିକମ୍ପିତଶିଵଜଟାକୋଟିଃ ॥ ୧୮୪॥
ନୌକାଂ ଭଵାମ୍ବୁରାଶେରଜ୍ଞାନଧ୍ଵାନ୍ତଚନ୍ଦ୍ରିକାଂ ଵାଣୀମ୍ ।
କଲଯେ ମନସି ସଦାହଂ ଶ୍ରୁତିପଞ୍ଜରଶାରିକାଂ ଦେଵୀମ୍ ॥ ୧୮୫॥
ଭଵତାପାରଣ୍ଯତଲେ ଜହ୍ନୁସୁତା ଶାରଦା ଦେଵୀ ।
ଜ୍ଞାନାନନ୍ଦମଯୀ ନଃ ସଂପତ୍ସିଦ୍ଧ୍ଯୈ ପ୍ରତିକ୍ଷଣଂ ଜଯତୁ ॥ ୧୮୬॥
ମତ୍ତଗଜମାନ୍ଯଗମନା ମଧୁରାଲାପା ଚ ମାନ୍ଯଚରିତା ସା ।
ମନ୍ଦସ୍ମେରମୁଖାବ୍ଜା ଵାଣୀ ମମ ହୃଦଯସାରସେ ଲସତୁ ॥ ୧୮୭॥
ରକ୍ଷଣଚଣୌ ଚ ଵାଣ୍ଯାଃ ପାଦୌ ଵନ୍ଦେ ମନୋଜ୍ଞମଣିନାଦୌ ।
ଯତ୍ସେଵନେନ ଧନ୍ଯାଃ ପୁରୁହୂତାଦ୍ଯା ଦିଶାଂ ନାଥାଃ ॥ ୧୮୮॥
ଧାତୁର୍ଧୈର୍ଯକୃପାଣୀ ଵାଣୀ ସୁରଵୃକ୍ଷକୁସୁମମୃଦୁଵେଣୀ ।
ଶୁକଵାଣୀ ନୁତଵାଣୀ କଵିକୁଲମୋଦାଯ ଜଯତି ମୃଦୁଵାଣୀ ॥ ୧୮୯॥
କଲ୍ଯାଣୈକନିକେତନମସ୍ଯା ରୂପଂ ସଦା ସ୍ଫୁରତୁ ଚିତ୍ତେ ।
ମାନସକାଲୁଷ୍ଯହରଂ ମଧୁମଥନଶିଵାଦିବହୁମତୋତ୍କର୍ଷମ୍ ॥ ୧୯୦॥
ମୁନିଜନମାନସରତ୍ନଂ ଚିରତ୍ନମେତଦ୍ଵିଧାତୃସୁକୃତକଲା ।
ଵିନତଜନଲୋଚନଶ୍ରୀକର୍ପୂରକଲା ପରା ଜଯତି ॥ ୧୯୧॥
ଧୃତସୁମମଧୁପକ୍ରୀଡାସ୍ଥାନାଯିତକେଶଭାରାଯୈ ।
ନମ ଉକ୍ତିରସ୍ତୁ ମାତ୍ରେ ଵାଗ୍ଜିତପୀଯୂଷଧାରାଯୈ ॥ ୧୯୨॥
ବାଲକୁରଙ୍ଗଵିଲୋଚନଧାଟୀରକ୍ଷିତସୁରାଦିମନୁଜାନାମ୍ ।
ନଯନଯୁଗାସେଵ୍ଯଂ ତଦ୍ଭାତୀହ ଧରାତଲେ ତେଜଃ ॥ ୧୯୩॥
କୁଶଲଵିଧଯେ ତଦସ୍ତୁ ଶ୍ରୁତିପାଠରତାଦୃତାତ୍ମବହୁକେଲିଃ ।
କବଲିତପଦନତଦୈନ୍ଯଂ ତରୁଣାମ୍ବୁଜଲୋଚନଂ ତେଜଃ ॥ ୧୯୪॥
ବାଲମରାଲୀଗତ୍ଯୈ ସୁରଗିରିକନ୍ଯାଦିମହିତକଲଗୀତ୍ଯୈ ।
ଵିରଚିତନାନାନୀତ୍ଯୈ ଚେତୋ ମେ ସ୍ପୃହଯତେ ବହୁଲକୀର୍ତ୍ଯୈ ॥ ୧୯୫॥
ଵିନମଦମରେଶସୁଦତୀକଚସୁମମକରନ୍ଦଧାରଯା ସ୍ନିଗ୍ଧମ୍ ।
ତଵ ପାଦପଦ୍ମମେତତ୍ କଦା ନୁ ମମ ମୂର୍ଧ୍ନି ଭୂଷଣଂ ଜନନି ॥ ୧୯୬॥
କମଲଜପରତନ୍ତ୍ରଂ ତଦ୍ଗତତନ୍ଦ୍ରଂ ଵସ୍ତୁ ନିସ୍ତୁଲମୁପାସେ ।
ତେନୈଵାହଂ ଧନ୍ଯୋ ମଦ୍ଵଂଶ୍ଯା ନିରସିତାତ୍ମତାପଭରାଃ ॥ ୧୯୭॥
ଜ୍ଞାନାମୃତସଂଧାତ୍ରୀ ଭଵାବ୍ଧିସଂତରଣପୋତ୍ରନାମାଦିଃ ।
ଵାଣୀ ଵାଚାଂ ଲହରୀମଵନ୍ଧ୍ଯଯନ୍ତୀ ସୁରାଦିନୁତଚରିତା ॥ ୧୯୮॥
କାରୁଣ୍ଯପୂର୍ଣମେତଦ୍ ଵାଣୀରୂପଂ ସଦା କଲଯେ ।
ଯଦ୍ଭଜନାଦ୍ ଦେଵାନାମପି ସଂଵିଦ୍ ଭାତି କାର୍ଯକାଲେଷୁ ॥ ୧୯୯॥
ଧୀପଦ୍ମପୀଠମାସ୍ତେ ସା ଵାଣୀ କାଙ୍କ୍ଷିତାନି କଲଯନ୍ତୀ ।
ଯା ଘନକୃପାସ୍ଵରୂପା ସଂକୀର୍ତ୍ଯା ସର୍ଵଦେଵନୁତା ॥ ୨୦୦॥
ତଵ ପାଦପଦ୍ମଵିସୃମରକାନ୍ତିଝରୀଂ ମନସି କଲଯଂସ୍ତୁ ।
ନିରସିତନରକାଦିଭଯୋ ଵିରାଜତେ ନାକିସଦସି ସୁରମାନ୍ଯଃ ॥ ୨୦୧॥
କୁଚଯୁଗଲନମ୍ରଗାତ୍ରଂ ପଵିତ୍ରମେତଦ୍ ଭଜେ ତେଜଃ ।
ଧାତୁରପି ସର୍ଵଦେଵୈର୍ଯନ୍ନିର୍ଦିଷ୍ଟଂ ହୁ ଭଦ୍ରାଯ ॥ ୨୦୨॥
କୃତନତପଦଵାଗ୍ଧାଟୀ ଚେଟୀଭୂତାମରେଶମହିଷୀ ନଃ ।
କଟିକୃତମନୋଜ୍ଞଶାଟୀ ପାଟୀରରସାର୍ଦ୍ରନୈଜତନୁକୋଟୀ ॥ ୨୦୩॥
ପଦ୍ମଭଵପୁଣ୍ଯକୋଟୀ ହର୍ଷିତକଵିବୃନ୍ଦସୂକ୍ତିରସଧାଟୀ ।
ମୁଖଲସିତସରସଵାଟୀ ଵିଲସତୁ ମମ ମାନସେ କୃପାକୋଟୀ ॥ ୨୦୪॥
ଜ୍ଞାନପରାକ୍ରମକଲିକା ଦିଶି ଦିଶି କିନ୍ନରସୁଗୀତନିଜଯଶସଃ ।
ଧନ୍ଯା ଭାନ୍ତି ହି ମନୁଜାଃ ଯଦ୍ଵୀକ୍ଷାଲଵଵିଶେଷତଃ କାଲେ ॥ ୨୦୫॥
ସୁରଜନପାଲନଦକ୍ଷା ପ୍ରଶାନ୍ତଵୀକ୍ଷା ନିରସ୍ତରିପୁପକ୍ଷା ।
ମୋକ୍ଷାର୍ଥିଭିଃ ଶ୍ରିତା ସା ଲାକ୍ଷାରସଲସିତପାଦଭାଗ୍ ଭାତି ॥ ୨୦୬॥
କୁଙ୍କୁମଭରରୁଚିରାଙ୍ଗୀ ଭାତି କୃଶାଙ୍ଗୀ ଗିରାଂ ଦେଵୀ ।
ଧାତୁରପି ଜ୍ଞାନପ୍ରଦମସ୍ଯା ରୂପଂ ଵଦନ୍ତି ଵିବୁଧେଶାଃ ॥ ୨୦୭॥
ଵାଣି ନତିମମ୍ବ ନିତ୍ଯଂ କରଵାଣି ହି ଚିତ୍ସୁଖାଵାପ୍ତ୍ଯୈ ।
ତାଦୃକ୍ତ୍ଵଦୀଯକରୁଣାଵୀକ୍ଷଣତୋ ଗୀଷ୍ପତିଶ୍ଚ ସୁରମାନ୍ଯଃ ॥ ୨୦୮॥
କଲ୍ଯାମି ନତିମନନ୍ତାଂ କାଲେ କାଲେ ଶୁଭପ୍ରାପ୍ତ୍ଯୈ ।
ଧାତୁଃ ସୁକୃତୋଲ୍ଲାସଂ କରଧୃତଵୀଣାଦିକଂ ଚ ଯଦ୍ରୂପମ୍ ॥ ୨୦୯॥
କମଲାସନଦଯିତା ସା ଲସତୁ ପୁରୋଽସ୍ମାକମାଦରକୃତଶ୍ରୀଃ ।
ଯତ୍ପ୍ରଣମନାଜ୍ଜନାନାଂ କଵିତୋନ୍ମେଷଃ ସଦୀଡିତୋ ଭଵତି ॥ ୨୧୦॥
ପରସଂଵିଦାତ୍ମିକା ସା ମହିଷୀ ଧାତୁଃ କଲାଵତୀ ଵାଣୀ ।
ଶିଶିରୀକରୋତି ତପ୍ତାନ୍ କରୁଣାରସଦିଗ୍ଧନେତ୍ରପାଲ୍ଯା ନଃ ॥ ୨୧୧॥
ଧାତୃମନୋରଥପାତ୍ରଂ ସଂତପ୍ତସ୍ଵର୍ଣକାମ୍ଯନିଜଗାତ୍ରମ୍ ।
ଆଶ୍ରିତକମଲଜଗୋତ୍ରଂ ରକ୍ଷିତନତବାହୁଚ୍ଛାତ୍ରମ୍ ॥ ୨୧୨॥
କଵିକୁଲଜିହ୍ଵାଲୋଲଂ ପିତାମହାଦୃତମନୋଜ୍ଞନିଜଲୀଲମ୍ ।
ନିରସିତନତଦୁଷ୍କାଲଂ ଵନ୍ଦେ ତେଜଃ ସଦାଲିନୁତଶୀଲମ୍ ॥ ୨୧୩॥
ମନ୍ଦାନାମପି ମଞ୍ଜୁଲକଵିତ୍ଵରସଦାଯିନୀ ଜନନୀ ।
କାପି କରୁଣାମଯୀ ସା ଲସତୁ ପୁରସ୍ତାତ୍ ସଦାସ୍ମାକମ୍ ॥ ୨୧୪॥
ନିସ୍ତୁଲପଦସଂପ୍ରାପ୍ତ୍ଯୈ ଭୂଯୋ ଭୂଯୋ ନମାଂସି ତେ ଵାଣି ।
ଦୀପକଲାମଯି ଚାନ୍ତଃସ୍ମରଣଂ ଧାତୁଃ କୁଟୁମ୍ବିନ୍ଯୈ ॥ ୨୧୫॥
ମାଯାନିରାସକାମୋ ଵନ୍ଦେ ଵାଣ୍ଯାଃ ପଦାମ୍ଭୋଜମ୍ ।
ସିଦ୍ଧମନୋରଥଶତକା ଯଦ୍ଭଜନେନାର୍ଥିନଃ କାଲେ ॥ ୨୧୬॥
ସତତଂ ବଦ୍ଧାଞ୍ଜଲିପୁଟୁମୁପାସ୍ମହେ ତଚ୍ଛୁଭପ୍ରଦଂ ତେଜଃ ।
ଯତ୍କମଲଜନଯନାନାଂ ପ୍ରମୋଦପୀଯୂଷଲହରିକାମୋଦମ୍ ॥ ୨୧୭॥
ଦିଵି ଵା ଭୁଵି ଦିକ୍ଷୁ ଜଲେ ଵହ୍ନୌ ଵା ସର୍ଵତୋ ଵାଣି ।
ଜନ୍ତୂନାଂ କିଲ ରକ୍ଷା ତ୍ଵଧୀନା କୀର୍ତ୍ଯତେ ଵିବୁଧୈଃ ॥ ୨୧୮॥
ଭାରତି ଭଵତାପାର୍ତାନ୍ ପାହି କଟାକ୍ଷାଙ୍କୁରୈଃ ଶୀତୈଃ ।
ପରମନନ୍ଦଵିଧାତୃନ୍ ଯାନେଵ ସ୍ତୌତି ପଦ୍ମଵାସୋଽପି ॥ ୨୧୯॥
କୁଲଦୈଵତମସ୍ମାକଂ ତତ୍ତେଜଃ କୁଟିଲକୁନ୍ତଲଂ କିମପି ।
କରଧୃତପୁସ୍ତକଵୀଣଂ କଲଯେ କାମାଗମୋଦଯଂ ଧାତୁଃ ॥ ୨୨୦॥
ପରମାନନ୍ଦଧନଂ ତଦ୍ଧାତୁରପି ବ୍ରହ୍ମତତ୍ତ୍ଵରସଦାଯି ।
ଆବ୍ରହ୍ମକୀଟନୃତ୍ଯତ୍ସ୍ଵଵୈଭଵଂ ଜଯତି ଶାରଦାରୂପମ୍ ॥ ୨୨୧॥
ଵିବୁଧଜନମୋଦଜନନୀ ଜନନୀ ନଃ ସା ଵିଧେଃ ପତ୍ନୀ ।
ମୃଦୁସଂଚାରଵିଲାସୈଃ ଶୁଭଂକରୀ ଭଵତୁ ସଂତତଂ କାଲେ ॥ ୨୨୨॥
ସରସମନୋଜ୍ଞଵିଲାସୈଃ ସ୍ଵଵଶେ କୃତ୍ଵା ମନୋ ଵିଧେର୍ଵାଣୀ ।
ସୃଷ୍ଟ୍ଯାଦୌ ଶୁଭଲେଖାକରୀ ନୃଣାଂ ମସ୍ତକେ ମାତା ॥ ୨୨୩॥
ପ୍ରକୃତିମୃଦୁଲଂ ପଦାବ୍ଜଂ ଵାଣୀଦେଵ୍ଯା ମଦୀଯଚିତ୍ତତଟେ ।
କାମାଦିସୂଚିନିଚିତେ କଥଂ ସ୍ଥିତିଂ ପ୍ରାପ୍ନୁଯାତ୍ କାଲେ ॥ ୨୨୪॥
ନିଖିଲଚରାଚରରକ୍ଷାଂ ଵିତନ୍ଵତୀ ପଦ୍ମଜପ୍ରିଯା ଦେଵୀ ।
ମମ କୁଲଦୈଵତମେଷା ଜଯତି ସଦାରାଧ୍ଯମାନ୍ଯପଦକମଲା ॥ ୨୨୫॥
କୁଶଲସମୃଦ୍ଧ୍ଯୈ ଭୂଯାଦମ୍ବା ସା ଶାରଦା ଦେଵୀ ।
ଜନିରକ୍ଷଣାଦିଲୀଲାଵିହାରଭାଙ୍ନିଗମସୌଧଦୀପକଲା ॥ ୨୨୬॥
ଵାଚାଲଯତି କଟାକ୍ଷୈର୍ଜଡଂ ଶିଲାମଲ୍ପଜନ୍ତୁଂ ଵା ।
ଯା ଵାଣୀ ସା ଶରଣଂ ଭଵେ ଭଵେ ପ୍ରାର୍ଥ୍ଯେ ଶ୍ରିଯଃପ୍ରାପ୍ତ୍ଯୈ ॥ ୨୨୭॥
ଯଦି ହି ପ୍ରସାଦଭୂମା ଵାଣ୍ଯାସ୍ତତ୍ରୈଵ ସା ହରେଃ କାନ୍ତା ।
ପରିଲସିତ ( ... incomplete ... ) ନିତ୍ଯଵାସରତା ॥ ୨୨୮॥
ସନକସନନ୍ଦନଵନ୍ଦ୍ଯେ କାନ୍ତେ ପରମେଷ୍ଟିନଃ ଶ୍ରିଯଃପ୍ରାପ୍ତ୍ଯୈ ।
ଵାଣି ତ୍ଵାଂ ନୌମି ସଦା ଭଵ ପ୍ରସନ୍ନା ଵିପ`ନ୍ଚିଲସିତକରେ ॥ ୨୨୯॥
ଵାଣି ଵିପଞ୍ଚୀକଲରଵରସିକେ ଗନ୍ଧର୍ଵଯୋଷିଦଭିଵନ୍ଦ୍ଯେ ।
ତଵ ଚରଣଂ ମମ ଶରଣଂ ଭଵଵାରିଧିସୁତେମମ୍ବ କଲଯାମି ॥ ୨୩୦॥
ଵାଣି କଦାହଂ ଲପ୍ସ୍ଯେ ଚରଣାମ୍ଭୋଜଂ ତ୍ଵଦୀଯମିଦମାରାତ୍ ।
ନିଜମଣିନୂପୁରନାଦସ୍ପୃହଣୀଯଵଚଃପଦଂ କଲିତଭକ୍ତେଃ ॥ ୨୩୧॥
ଶ୍ରୁତିପୂତମୁଖମନୋହରଲାଵଣ୍ଯକୁସୁମମୃଦୁଶରୀରେଯମ୍ ।
ନିଜକରୁଣାପାଙ୍ଗସୁଧାପୂରଣକୃତଵୈଭଵା ଭାତି ॥ ୨୩୨॥
ପରିସରନତଵିବୁଧାଲୀକିରୀଟମଣିକାନ୍ତିଵଲ୍ଲରୀଵିସରୈଃ ।
କୃତନୀରାଜନଵିଧି ତେ ମମ ତୁ ଶିରୋଭୂଷଣଂ ହି ପଦଯୁଗଲମ୍ ॥ ୨୩୩॥
ପ୍ରେମଵତୀ ଵିଧିଭଵନେ ହଂସଗତିର୍ହଂସଯାନକୃତଚାରା ।
ଵାଚାମକୃତ୍ରିମାନାଂ ସ୍ଥୈର୍ଯଵିଧାତ୍ରୀ ମହେଶାନୀ ॥ ୨୩୪॥
ଆନନ୍ଦରୂପକୋଟୀମମ୍ବାଂ ତାଂ ସଂତତଂ କଲଯେ ।
ସଂଵିଦ୍ରୂପା ଯା କିଲ ଵିଧାତୃଗେହେ ଶ୍ରୁତିଶ୍ରିଯଂ ଧତ୍ତେ ॥ ୨୩୫॥
କମଲଜନେତ୍ରମହୋତ୍ସଵତାରୁଣ୍ଯଶ୍ରୀର୍ନିରସ୍ତନତଶତ୍ରୁଃ ।
ଲଲିତଲିକୁଚାଭକୁଚଭରଯୁଗଲା ଦୃଗ୍ଵିଜିତହରିଣସଂଦୋହା ॥ ୨୩୬॥
କାରୁଣ୍ଯପୂର୍ଣନଯନା କଲିକଲ୍ମଷନାଶିନୀ ଚ ସା ଵାଣୀ ।
ମୁଖଜିତଶାରଦକମଲା ଵକ୍ତ୍ରାମ୍ଭୋଜେ ସଦା ସ୍ଫୁରତୁ ମାତା ॥ ୨୩୭॥
କମଲସୁଷମାନିଵାସସ୍ଥାନକଟାକ୍ଷଂ ଚିରାଯ କୃତରକ୍ଷମ୍ ।
ରକ୍ଷୋଗଣଭୀତିକରଂ ତେଜୋ ଭାତି ପ୍ରକାମମିହ ମନସି ॥ ୨୩୮॥
କମଲଜତପଃଫଲଂ ତନ୍ମୁନିଜନହୃଦଯାବ୍ଜନିତ୍ଯକୃତନୃତ୍ତମ୍ ।
କରୁଣାଲୋଲାପାଙ୍ଗଂ ତତ୍ତେଜୋ ଭାତୁ ମମ ମୁଖାମ୍ଭୋଜେ ॥ ୨୩୯॥
ଭାଗ୍ଯଂ ଵିଧିନଯନାନାଂ ସଂସୃତିତାପଜ୍ଵରାଦିତପ୍ତାନାମ୍ ।
ଭେଷଜମେତଦ୍ରୂପଂ କଲାଗ୍ରହଂ ମନ୍ଯତେ ଦେଵ୍ଯାଃ ॥ ୨୪୦॥
ଜନନି କଦା ଵା ନେଷ୍ଯାମ୍ଯହମାରାଦର୍ଚିତତ୍ଵଦୀଯପଦଃ ।
ନିମିଷମିଵ ହନ୍ତ ଦିଵସାନ୍ ଦୃଷ୍ଟ୍ଵା ତ୍ଵାମାଦରେଣ କଲ୍ଯାଣୀମ୍ ॥ ୨୪୧॥
ମଞ୍ଜୁଲକଵିତାସଂତତିବୀଜାଙ୍କୁରଦାଯିସାରସାଲୋକା ।
ଜନନି ତଵାପାଙ୍ଗଶ୍ରୀର୍ଜଯତି ଜଗତ୍ତ୍ରାଣକଲିତଦୀକ୍ଷେଯମ୍ ॥ ୨୪୨॥
ଅମ୍ବ ତଵାପାଙ୍ଗଶ୍ରୀରପାଙ୍ଗକେଲୀଶତାନି ଜନଯନ୍ତୀ ।
ଧାତୁର୍ହୃଦଯେ ଜଯତି ଵ୍ରୀଡାମଦମୋଦକାମସାରକରୀ ॥ ୨୪୩॥
ସର୍ଵଜଗନ୍ନୁତଵିଭଵେ ସଂତତମପି ଵାଞ୍ଛିତପ୍ରଦେ ମାତଃ ।
ଅଧୁନା ତ୍ଵମେଵ ଶରଣଂ ତେନାହଂ ପ୍ରାପ୍ତଜନ୍ମସାଫଲ୍ଯଃ ॥ ୨୪୪॥
ଶାନ୍ତିରସସର୍ଵଶେଵଧିମମ୍ବାଂ ସେଵେ ମନୋରଥାଵାପ୍ତ୍ଯୈ ।
ଯାମାରାଧ୍ଯ ସୁରେଶାଃ ସ୍ଵପଦଂ ପ୍ରାପୁର୍ହି ତଦ୍ରକ୍ଷମ୍ ॥ ୨୪୫॥
କୁଲଜା ଭାର୍ଯା କୀର୍ତିର୍ଦାନଂ ପୁତ୍ରାଦଯୋ ଯେ ଚ ।
ସିଧ୍ଯନ୍ତି ତେ ହି ସର୍ଵେ ଯସ୍ମୈ ଵାଣୀ ପ୍ରସନ୍ନା ସା ॥ ୨୪୬॥
କା କ୍ଷତିରମ୍ବ କଟାକ୍ଷେ ନ୍ଯସ୍ତେ ସତି ମଯି ଵିରିଞ୍ଚିଵରପତ୍ନି ।
ଗଙ୍ଗାଶୁନକନ୍ଯାଯାନ୍ମହତୀ ମମ ଵୃଦ୍ଧିରୀରିତା ନିପୁଣୈଃ ॥ ୨୪୭॥
ଅଵିରଲଦଯାର୍ଦ୍ରଲୋଚନସେଵନଯା ଧୂତତାପା ହି ।
ପ୍ରତିକଲ୍ପଂ ସୁରସଂଘାସ୍ତ୍ଵାମଭଜନ୍ ନୁତିନତିପ୍ରମୁଖୈଃ ॥ ୨୪୮॥
ଦୀନାନାଂ ଚ କଵୀନାଂ ଵାଣି ତ୍ଵଂ କାମଧେନୁରସି ମାତଃ ।
ସିଦ୍ଧିସ୍ତେଷାମତୁଲା ସୁରମାନ୍ଯା ତେନ ସଂକଲିତା ॥ ୨୪୯॥
ସକଲଜଗତାଂ ହି ଜନନୀଂ ଵାଣି ତ୍ଵାଂ ସଂତତମୁପାସେ ।
ଶ୍ରୁତିସୁଦତୀଭୂଷାମଣିମଖିଲାର୍ଥପ୍ରାପ୍ତ୍ଯୈ ଲୋକେ ॥ ୨୫୦॥
ଧାତୁଃ କୁଟୁମ୍ବିନୀ ତ୍ଵଂ ସନ୍ମଙ୍ଗଲଦାଯିନୀ ସ୍ଵମାହାତ୍ମ୍ଯାତ୍ ।
ଶ୍ଵଶ୍ରୂଶ୍ଵଶୁରମୁଖାଦିପ୍ରୀଣନଚତୁରା ଚ ଭାସି ନିଗମକଲା ॥ ୨୫୧॥
ମୁଖଵିଜିତଚନ୍ଦ୍ରମଣ୍ଡଲମିଦମମ୍ଭୋରୁହଵିଲୋଚନଂ ତେଜଃ ।
ଧ୍ଯାନେ ଜପେ ଚ ସୁଦୃଶାଂ ଚକାସ୍ତି ହୃଦଯେ କଵୀଶ୍ଵରାଣାଂ ଚ ॥ ୨୫୨॥
ଯସ୍ମୈ ପ୍ରସନ୍ନଵଦନା ସା ଵାଣୀ ଲୋକମାତା ହି ।
ତସ୍ଯ ସହସା ସହସ୍ରଂ ଲାଭଃ ସ୍ଯାଦ୍ ବାନ୍ଧଵାଃ ସୁଖିନଃ ॥ ୨୫୩॥
ତାପହରରସଵିଵର୍ଷଣଧୃତକୁତୁକା କାପି ନୀଲନଲିନରୁଚିଃ ।
କାଦମ୍ବିନୀ ପୁରସ୍ତାଦାସ୍ତାଂ ନଃ ସଂତତଂ ଜନନୀ ॥ ୨୫୪॥
ପଦ୍ମାକ୍ଷନାଭିପଦ୍ମଜଦଯିତେ ଲୋକାମ୍ବ ଶାରଦେତି ସଦା ।
ତଵ ନାମାନି ଜପନ୍ ସନ୍ ତ୍ଵଦ୍ଦାସୋଽହଂ ତୁ ମୁକ୍ତଯେ ସିଦ୍ଧଃ ॥ ୨୫୫॥
ଅମ୍ବାପ୍ରସାଦଭୂମ୍ନା ନରୋ ହି ଭୁଙ୍କ୍ତେ ସୁଖାନି ଵିଵିଧାନି ।
ସ୍ମରେ ଵିଜଯଃ କଵିତାଧନଲକ୍ଷ୍ମ୍ଯାଦେର୍ଵିଲାସଲୀଲାଦିଃ ॥ ୨୫୬॥
ତୀରଂ ସଂସୃତିଜଲଧେଃ ପୂରଂ କମଲଜଵିଲୋଚନପ୍ରୀତେଃ ।
ସାରଂ ନିଗମାନ୍ତାନାଂ ଦୂରଂ ଦୁର୍ଜନତତେର୍ହି ତତ୍ତେଜଃ ॥ ୨୫୭॥
ଅପି ଦାସକୁଲେ ଜାତଃ କଟାକ୍ଷଭୂମ୍ନା ଵିଧାତୃମୁଖପତ୍ନ୍ଯାଃ ।
ଜ୍ଞାନୀ ଭଵଵାରାଶିଂ ତରତି ଚ ରାଜ୍ଯଶ୍ରିଯଂ ଭୁଙ୍କ୍ତେ ॥ ୨୫୮॥
ସତ୍କୃତଦେଶିକପାଦାମ୍ବୁଜଯୁଗଲୋଽହଂ ନମାମି ଵାଣି ତ୍ଵାମ୍ ।
ତ୍ଵଂ ତୁ ଗୁରୁମୂର୍ତିରୁକ୍ତା କାଲେ କାଲେ ଚ କାଙ୍କ୍ଷିତଵିଧାତ୍ରୀ ॥ ୨୫୯॥
ଜ୍ଞାନାନନ୍ଦମୁଖାଦୀନପଵର୍ଗଂ ଵା ଦଦାସି ଭକ୍ତେଭ୍ଯଃ ।
ଅତ ଏଵାନନ୍ଯଗତିସ୍ତ୍ଵାଂ ଵିଧିପତ୍ନୀଂ ପ୍ରପଦ୍ଯେଽହମ୍ ॥ ୨୬୦॥
ତ୍ଵଯି ଵିନ୍ଯସ୍ତଭରାଣାଂ ନ ହି ଚିନ୍ତା ଜାଯତେ ନୃଣାଂ କାପି ।
ପରମାନନ୍ଦାଦିକଲାସ୍ଫୂର୍ତିର୍ଦିଵିଷଦ୍ଗଣେନ ସଂମାନ୍ଯା ॥ ୨୬୧॥
ସୁମଶରସାମ୍ରାଜ୍ଯକଲାମଙ୍ଗଲଵିଧିରେଖିକା ଵାଣୀ ।
ଧାତୁରପି ଚିତ୍ତଵୃତ୍ତିସ୍ଥୈର୍ଯଂ ତ୍ଵନ୍ଯାଦୃଶଂ କୁରୁତେ ॥ ୨୬୨॥
ସା ଧେନୁଶ୍ଚିନ୍ତାମଣିରପି ଵୃକ୍ଷଃ ସଂପଦାଂ ପ୍ରଦାଯିନ୍ଯଃ ।
ଅମ୍ବ ତ୍ଵମେଵ କାଲେ ଭସି ଜ୍ଞାନପ୍ରଦା ଵ୍ଯପୋହ୍ଯ ତମଃ ॥ ୨୬୩॥
ମନସୋ ନୈର୍ମଲ୍ଯପ୍ରଦମସ୍ଯାଃ ସେଵେ କଟାକ୍ଷମହମାରାତ୍ ।
ଯଃ କୁରୁତେ ଜନତାଂ ତାଂ ହତମାଯାଂ ମଧୁରାମଯୋଧ୍ଯାଂ ଚ ॥ ୨୬୪॥
ଶରଦିଵ ହଂସକୁଲେଡ୍ଯା ଜ୍ଯୋତ୍ସ୍ନେଵ ଜନାର୍ତିହାରିଣୀ ଵାଣ୍ଯାଃ ।
ଜଯତି ହି କଟାକ୍ଷରେଖା ଦୀପକଲେଵ ପ୍ରକାମହତତିମିରା ॥ ୨୬୫॥
ପଙ୍କଜଭଵଵଦନମଣିଂ ପରଵିଦ୍ଯାଦେଵତାଂ ଵାଣୀମ୍ ।
ନିତ୍ଯଂ ଯଜତାଂ ଜପତାଂ ନ ହି ତୁଲ୍ଯୋଽସ୍ମିନ୍ କ୍ଷମାତଲେ କଶ୍ଚିତ୍ ॥ ୨୬୬॥
ଵାଣୀ ନିଜଵାଣୀଭୀ ରଚଯତି ନୁତିମାତ୍ତଵୀଣଯା କାଲେ ।
ଧାତୁଃ ପ୍ରସାଦହେତୋଃ ପତିଵ୍ରତାଲକ୍ଷଣୈରନ୍ଯୈଃ ॥ ୨୬୭॥
ଆନନ୍ଦଯତି ଵିଲସୈରମ୍ବା ପଦ୍ମାସନଂ ନିଜଂ ଦେଵମ୍ ।
ତେନୈଵ ତୁଷ୍ଟହୃଦଯଃ ଶୁଭାକ୍ଷରାଣ୍ଯାଦରାଲ୍ଲିଖତି ମୌଲୌ ॥ ୨୬୮॥
ମମ ମାନସଦୁର୍ମଦଗଜମପାରତାପାଟଵୀଷୁ ଧାଵନ୍ତମ୍ ।
ଵିରଚଯ୍ଯ ମୁଦିତଚିତ୍ତଂ କୁରୁ ଵାଣି ତ୍ଵତ୍ପଦାବ୍ଜକୃତହସ୍ତମ୍ ॥ ୨୬୯॥
କମଲାସନଧୈର୍ଯମହୀଧରକୁଲିଶସ୍ତେ କଟାକ୍ଷ ଏଵାଯମ୍ ।
କଵିକୁଲମଯୂରକାଦମ୍ବିନୀଵିଲାସୋ ମୁଦେଽସ୍ତୁ ସତତଂ ନଃ ॥ ୨୭୦॥
ଗୁରୁଵରଦନାମ୍ଭୋଜେ ନୃତ୍ଯନ୍ତୀ ଶାରଦା ଦେଵୀ ।
ମଧୁରତରଶ୍ଲୋକନିଭା ମଣିନୂପୁରନିନଦସଂତତିର୍ଭ୍ତି ॥ ୨୭୧॥
କୋ ଵା ନ ଶ୍ରଯତି ବୁଧଃ ଶ୍ରେଯୋଽର୍ଥୀ ତାମିମାଂ ଵାଣୀମ୍ ।
ଯାଂ ପଙ୍କଜାକ୍ଷନାଭିଜସଧର୍ମିଣୀମର୍ଚଯନ୍ତି ସୁରନାଥାଃ ॥ ୨୭୨॥
ମୁଷିତପଯୋଜମୃଦିମ୍ନା ଚରଣତଲେନାତ୍ର ମାନସେ ଵାଣୀ ।
ପରିହରତୁ ପାପରାଶିଂ ସୁରୌଘସଂମାନିତେନ କାଲେ ମେ ॥ ୨୭୩॥
ଯାଥାର୍ଥ୍ଯଜ୍ଞାନକଲାପ୍ରାପ୍ତ୍ଯୈ ତ୍ଵାଂ ଶାରଦାଂ ଵନ୍ଦେ ।
ସେଵାଫଲଂ ପ୍ରଯଚ୍ଛ ପ୍ରସୀଦ ପରମେଶି ଵଲ୍ଲଭେ ଧାତୁଃ ॥ ୨୭୪॥
ନିଗମାନ୍ତସାରମର୍ଥଂ ବୋଧଯସି ତ୍ଵଂ ଗୁରୂନ୍ ପ୍ରକଲ୍ପ୍ଯ ଭୁଵି ।
ସୈଷା ମେ ଜ୍ଞାନଘନା ଵାଣୀ ନିତ୍ଯଂ ପ୍ରସନ୍ନାସି ॥ ୨୭୫॥
ମନ୍ଦାରକୁସୁମମଦହରମନ୍ଦସ୍ମିତମଧୁରଵଦନପଙ୍କରୁହା ।
ହୃଦ୍ଯତମନିତ୍ଯଯୌଵନମଣ୍ଡିତଗାତ୍ରୀ ଵିରାଜତେ ଵାଣୀ ॥ ୨୭୬॥
ସୌଭାଗ୍ଯସୂଚକାଭୀ ରେଖାଭିର୍ଭୂଷିତଂ ସୌରୈର୍ଵନ୍ଦ୍ଯମ୍ ।
ଅମ୍ବାଚରଣପଯୋଜଂ ଵତଂସଯନ୍ ପ୍ରାପ୍ତସଂମୋଦଃ ॥ ୨୭୭॥
ଦ୍ଵିଜଗଣପୂଜ୍ଯଂ ନିତ୍ଯଂ ନିରସ୍ତଜାଡ୍ଯଂ ତ୍ଵଦୀଯପାଦଯୁଗମ୍ ।
କ୍ଷଣମପି ଵା ସାଂନିଧ୍ଯଂ ଭଜତୁ ମଦୀଯେ ହୃଦି ସ୍ଵୈରମ୍ ॥ ୨୭୮॥
ନତଦେଵରାଜମକୁଟୀମଣିଘୃଣିପରିଚୁମ୍ବିତାଙ୍ଘ୍ରିକମଲା ନଃ ।
କମଲାସନସ୍ଯ ଦଯିତା ତନ୍ଯାଦନ୍ଯାଦୃଶୀ ଶ୍ରିଯଂ ଭଜତାମ୍ ॥ ୨୭୯॥
ଵାଣୀ ଶ୍ରିତକାଦମ୍ବା ଦମ୍ଭାଦିରିପୂନ୍ ନିରସ୍ଯ ନଃ କାଲେ ।
କ୍ଷେମମଵନ୍ଯାଂ ତନ୍ଯାତ୍ ପଦେ ପରେ ଦେଵସଂଘପରିସେଵ୍ଯେ ॥ ୨୮୦॥
ପଙ୍କଜଭଵସାମ୍ରାଜ୍ଯସ୍ଥିରଲକ୍ଷ୍ମୀଶ୍ଚପାଣ୍ଡରତନୁଶ୍ରୀଃ ।
ନତମାନଵସୁକୃତକଲାପରିପାଟୀ ଭାତି ସକଲଗୁଣପେଟୀ ॥ ୨୮୧॥
ମୁଖଵିଜିତଚନ୍ଦ୍ରବିମ୍ବା ସାମ୍ବା କାଦମ୍ବସେଵ୍ଯପଦକମଲା ।
କମଲାସନଗୃହଲକ୍ଷ୍ମୀର୍ଲକ୍ଷ୍ମୀଂ ପୁଷ୍ଣାତୁ ଶାରଦା ଦେଵୀ ॥ ୨୮୨॥
ମୁରମଥନସ୍ଯେଵ ରମା ଶଂଭୋରିଵ ସକଲଭୂଧରେନ୍ଦ୍ରସୁତା ।
ଵାଣି ଵିଧାତୁଃ ସଦନେଽନୁରୂପଦାମ୍ପତ୍ଯସଂପଦା ଭାସି ॥ ୨୮୩॥
ଵାଣି ତଵ ଦେହକାନ୍ତ୍ଯା କଟାକ୍ଷଲହରୀ ତୁ ସଂଯୁତା କାଲେ ।
ଧତ୍ତେ କାମପି ଶୋଭାଂ ସୁରସ୍ରଵନ୍ତ୍ଯେଵ ସଂଗତା ଯମୁନା ॥ ୨୮୪॥
ମଧୁରାସେଚନଦୃଷ୍ଟ୍ଯା ମାଂ ପାଯାଦାପଦୋ ମୁହୁର୍ଵାଣୀ ।
ଆଶ୍ରିତତାପଵିଭେତ୍ରୀତ୍ଯେଵଂ ଯାମାମନନ୍ତି ସୂରିଵରାଃ ॥ ୨୮୫॥
ଅଜ୍ଞାତକୋପପୂରା ଯସ୍ଯା ଦୃଷ୍ଟିଃ କୃତାଦରା ଭଜତାମ୍ ।
ସୈଷା ଵିହସିତପୌରଂଦରଲକ୍ଷ୍ମୀଂ ସଂପଦଂ ଦଦ୍ଯାତ୍ ॥ ୨୮୬॥
ବାଲକୁରଙ୍ଗଵିଲୋଚନମୀଷତ୍ସ୍ମିତମଧୁରମାନନଂ ଵାଣ୍ଯାଃ ।
ମଣିମଯତାଟଙ୍କମଣୀଵିଲାସି ଭୂଯାନ୍ମୁଦେଽସ୍ମାକମ୍ ॥ ୨୮୭॥
ମୁନିଜନମାନସହଂସୀଂ ଶ୍ରୁତିତତିପଞ୍ଜରଶୁକୀଂ ମହାଦେଵୀମ୍ ।
ନୌମି ସ୍ନୁଷାଂ ରମାଯାଃ ମାହେଶ୍ଵରମହିତସତ୍ପଦପ୍ରାପ୍ତ୍ଯୈ ॥ ୨୮୮॥
ଧାତୁଃ ସୌଧାଙ୍ଗଣକୃତଚଙ୍କ୍ରମଣାଂ ଶାରଦାଂ ନୌମି ।
ମତ୍ତମତଙ୍ଗଜଗମନାଂ ପରିପନ୍ଥିଜଯାଯ ସୁକୃତିସଂଦୃଶ୍ଯାମ୍ ॥ ୨୮୯॥
ଵାଗୀଶମୁଖା ଦେଵା ଯସ୍ଯାଃ ପ୍ରସଦନବଲଦ୍ଧି ଵିଜଯନ୍ତେ ।
ପରିପାଲିତଭକ୍ତଗଣା ଯଦ୍ଧ୍ଯାନୋଲ୍ଲସଦପାରପୁଲକାନ୍ତାଃ ॥ ୨୯୦॥
ନୈସର୍ଗିକଵାକ୍ଷ୍ରେଣୀକେଲିଵନମମଲଭୂଷଣଂ ଧାତୁଃ ।
ଵଦନାନାମିଯମମ୍ବା ଜଯତୁ ଚିରଂ କାମଵର୍ଷିଣୀ ଭଜତାମ୍ ॥ ୨୯୧॥
କଲଯାମି ହୃଦଯମେତତ୍ ପାଦାବ୍ଜେ ଶାରଦାଦେଵ୍ଯାଃ ।
ପ୍ରାପ୍ତାରିଷଟ୍କଵିଜଯଂ ତତ୍ତ୍ଵଧନଂ କଲିତଶାରଦାଧ୍ଯାନମ୍ ॥ ୨୯୨॥
ପାଦାରଵିନ୍ଦନମନପ୍ରଭାଵପରିକଲିତଦେଵସାରୂପ୍ଯାଃ ।
ପରମାନନ୍ଦନିମଗ୍ନାଃ ସୁଧିଯୋ ଭାନ୍ତି କ୍ଷମାଵଲଯେ ॥ ୨୯୩॥
ଲଲିତଵିଧାତୃରୂପଂ ପାଲିତଲୋକତ୍ରଯଂ ଚ ତତ୍ ତେଜଃ ।
ସକଲାଗମଶିଖରକଲାପରତତ୍ତ୍ଵଂ ଶାରଦାରୂପମ୍ ॥ ୨୯୪॥
ଧ୍ଯାନୈର୍ଯୋଗୈଶ୍ଚ ଜପୈର୍ଯତ୍ ସେଵ୍ଯଂ ପରମମାଦିଷ୍ଟମ୍ ।
ତନ୍ନଶ୍ଚକାସ୍ତୁ ହୃଦଯେ ଵିଶ୍ଵଜନୀନଂ ହି ଭକ୍ତାନାମ୍ ॥ ୨୯୫॥
ଭାଗୀରଥୀଵ ଵାଣୀ ତଵ ନୁତିରୂପା ଵିରାଜତେ ପରମା ।
ଇହ ମାତର୍ଯଦ୍ଭଜନଂ ସର୍ଵେଷାଂ ସର୍ଵସଂପଦାଂ ହେତୁଃ ॥ ୨୯୬॥
ସଂତତମଧୁରାଲାପୈର୍ଲାଲିତଵିଧିଵୈଭଵୈରମେଯକଲୈଃ ।
ଶ୍ରେଯଃପ୍ରଦାନଦୀକ୍ଷିତକଟାକ୍ଷପାତୈର୍ମହାତତ୍ତ୍ଵୈଃ ॥ ୨୯୭॥
ଖେଲଲ୍ଲୋଲମ୍ବକଚୈଃ କୁଚଭରନମ୍ରୈଃ ପୁରଂଧ୍ରିଗୁଣପୂର୍ଣୈଃ ।
ଆଶ୍ରିତସଂଵିତ୍ପୀଠୈରମରେଶଵଧୂକରାଦୃତଚ୍ଛତ୍ରୈଃ ॥ ୨୯୮॥
ଵୀଣାପୁସ୍ତକହସ୍ତୈର୍ଵିଧିଭାଗ୍ଯୈରସ୍ତୁ ମମ ତୁ ସାରୂପ୍ଯମ୍ ।
ସଂଵିଦ୍ଧନୈଶ୍ଚ ଵାଣୀରୂପୈରେତୈର୍ଦଯାସାରୈଃ ॥ ୨୯୯॥
ମାତଃ କଥଂ ନୁ ଵର୍ଣ୍ଯସ୍ତଵ ମହିମା ଵାଣି ନିଗମଚଯଵେଦ୍ଯଃ ।
ଇତି ନିଶ୍ଚିତ୍ଯ ପଦାବ୍ଜଂ ତଵ ଵନ୍ଦେ ମୋକ୍ଷକାମୋଽହମ୍ ॥ ୩୦୦॥
ତ୍ଵାମମ୍ବ ବାଲିଶୋଽହଂ ତ୍ଵଚମତ୍କାରୈର୍ଗିରାଂ ଗୁମ୍ଭୈଃ ।
ଅଯଥାଯଥକ୍ରମଂ ହି ସ୍ତୁଵନ୍ନପି ପ୍ରାପ୍ତଜନ୍ମସାଫଲ୍ଯଃ ॥ ୩୦୧॥
ଇତି ଶ୍ରୀଶାରଦାତ୍ରିଶତୀ ସମାପ୍ତା
Encoded and proofread by Sridhar Seshagiri seshagir at engineering.sdsu.edu
Please send corrections to sanskrit@cheerful.com
Last updated ତ୍oday
http://sanskritdocuments.org
Sharada Trishati Lyrics in Oriya PDF
% File name : shAradA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : shAradA300.itx
% Category : trishati
% Location : doc\_devii
% Author : Gangadharamakhin
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : July 14, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website