{॥ ଗଙ୍ଗାସ୍ତଵଃ ॥}
ଶ୍ରୀଗଣେଶାଯ ନମଃ ॥

ସୂତ ଉଵାଚ --
ଶୃଣୁଧ୍ଵଂ ମୁନଯଃ ସର୍ଵେ ଗଙ୍ଗାସ୍ତଵମନୁତ୍ତମମ୍ ।
ଶୋକମୋହହରଂ ପୁଂସାମୃଷିଭିଃ ପରିକୀର୍ତିତମ୍ ॥ ୧॥

ଋଷଯ ଊଚୁଃ --
ଇଯଂ ସୁରତରଙ୍ଗିଣୀ ଭଵନଵାରିଧେସ୍ତାରିଣୀ
ସ୍ତୁତା ହରିପଦାମ୍ବୁଜାଦୁପଗତା ଜଗତ୍ସଂସଦଃ ।
ସୁମେରୁଶିଖରାମରପ୍ରିଯଜଲାମଲକ୍ଷାଲିନୀ
ପ୍ରସନ୍ନଵଦନା ଶୁଭା ଭଵଭଯସ୍ଯ ଵିଦ୍ରାଵିଣୀ ॥ ୨॥

ଭଗୀରଥରଥାନୁଗା ସୁରକରୀନ୍ଦ୍ରଦର୍ପାପହା
ମହେଶମୁକୁଟପ୍ରଭା ଗିରିଶିରଃପତାକା ସିତା ।
ସୁରାସୁରନରୋରଗୈରଜଭଵାଚ୍ଯୁତୈଃ ସଂସ୍ତୁତା
ଵିମୁକ୍ତିଫଲଶାଲିନୀ କଲୁଷନାଶିନୀ ରାଜତେ ॥ ୩॥

ପିତାମହକମଣ୍ଡଲୁପ୍ରଭଵମୁକ୍ତିବୀଜା ଲତା
ଶ୍ରୁତିସ୍ମୃତିଗଣସ୍ତୁତଦ୍ଵିଜକୁଲାଲଵାଲାଵୃତା ।
ସୁମେରୁଶିଖରାଭିଦା ନିପତିତା ତ୍ରିଲୋକାଵୃତା
ସୁଧର୍ମଫଲଶାଲିନୀ ସୁଖପଲାଶିନୀ ରାଜତେ ॥ ୪॥

ଚରଦ୍ଵିହଗମାଲିନୀ ସଗରଵଂଶମୁକ୍ତିପ୍ରଦା
ମୁନୀନ୍ଦ୍ରଵରନନ୍ଦିନୀ ଦିଵି ମତା ଚ ମନ୍ଦାକିନୀ ।
ସଦା ଦୁରିତନାଶିନୀ ଵିମଲଵାରିସନ୍ଦର୍ଶନ-
ପ୍ରଣାମଗୁଣକୀର୍ତନାଦିଷୁ ଜଗତ୍ସୁ ସଂରାଜତେ ॥ ୫॥

ମହାଭିଷସୁତାଙ୍ଗନା ହିମଗିରୀଶକୂଟସ୍ତନା
ସଫେନଜଲହାସିନୀ ସିତମରାଲସଚ୍ଚାରିଣୀ ।
ଚଲଲ୍ଲହରିସତ୍କରା ଵରସରୋଜମାଲାଧରା
ରସୋଲ୍ଲସିତଗାମିନୀ ଜଲଧିକାମିନୀ ରାଜତେ ॥ ୬॥

କ୍ଵଚିନ୍ମୁନିଗଣୈଃ ସ୍ତୁତା କ୍ଵଚିଦନନ୍ତସମ୍ପୂଜିତା
କ୍ଵଚିତ୍କଲକଲସ୍ଵନା କ୍ଵଚିଦଧୀରଯାଦୋଗଣା ।
କ୍ଵଚିଦ୍ରଵିକରୋଜ୍ଜ୍ଵଲା କ୍ଵଚିଦୁଦଗ୍ରପାତାକୁଲା
କ୍ଵଚିଜ୍ଜନଵିଗାହିତା ଜଯତି ଭୀଷ୍ମମାତା ସତୀ ॥ ୭॥

ସ ଏଵ କୁଶଲୀ ଜନଃ ପ୍ରଣମତୀହ ଭାଗୀରଥୀଂ
ସ ଏଵ ତପସାଂ ନିଧିର୍ଜପତି ଜାହ୍ନଵୀମାଦରାତ୍ ।
ସ ଏଵ ପୁରୁଷୋତ୍ତମଃ ସ୍ମରତି ସାଧୁ ମନ୍ଦାକିନୀଂ
ସ ଏଵ ଵିଜଯୀ ପ୍ରଭୁଃ ସୁରତରଙ୍ଗିଣୀଂ ସେଵତେ ॥ ୮॥

ତଵାମଲଜଲାଚିତଂ ଖଗସୃଗାଲମୀନକ୍ଷତଂ
ଚଲଲ୍ଲହରିଲୋଲିତଂ ରୁଚିରତୀରଜମ୍ବାଲିତମ୍ ।
କଦା ନିଜଵପୁର୍ମୁଦା ସୁରନରୋରଗୈଃ ସଂସ୍ତୁତୋଽପ୍ଯହଂ
ତ୍ରିପଥଗାମିନି ପ୍ରିଯମତୀଵ ପଶ୍ଯାମ୍ଯହୋ ॥ ୯॥

ତ୍ଵତ୍ତୀରେ ଵସତିଂ ତଵାମଲଜଲସ୍ନାନଂ ତଵ ପ୍ରେକ୍ଷଣଂ
ତ୍ଵନ୍ନାମସ୍ମରଣଂ ତଵୋଦଯକଥାସଂଲାପନଂ ପାଵନମ୍ ।
ଗଙ୍ଗେ ମେ ତଵ ସେଵନୈକନିପୁଣୋଽପ୍ଯାନନ୍ଦିତଶ୍ଚାଦୃତଃ
ସ୍ତୁତ୍ଵା ଚୋଦ୍ଗତପାତକୋ ଭୁଵି କଦା ଶାନ୍ତଶ୍ଚରିଷ୍ଯାମ୍ଯହମ୍ ॥ ୧୦॥

ଇତ୍ଯେତଦୃଷିଭିଃ ପ୍ରୋକ୍ତଂ ଗଙ୍ଗାସ୍ତଵନମୁତ୍ତମମ୍ ।
ସ୍ଵର୍ଗ୍ଯଂ ଯଶ୍ସ୍ଯମାଯୁଷ୍ଯଂ ପଠନାଚ୍ଛ୍ରଵଣାଦପି ॥ ୧୧॥

ସର୍ଵପାପହରଂ ପୁଂସାଂ ବଲମାଯୁର୍ଵିଵର୍ଧନମ୍ ।
ପ୍ରାତର୍ମଧ୍ଯାହ୍ନସାଯାହ୍ନେ ଗଙ୍ଗାସାନ୍ନିଧ୍ଯତା ଭଵେତ୍ ॥ ୧୨॥

ଇତ୍ଯେତଦ୍ଭାର୍ଗଵାଖ୍ଯାନଂ ଶୁକଦେଵାନ୍ମଯା ଶ୍ରୁତମ୍ ।
ପଠିତଂ ଶ୍ରାଵିତଂ ଚାତ୍ର ପୁଣ୍ଯଂ ଧନ୍ଯଂ ଯଶସ୍କରମ୍ ॥ ୧୩॥

ଅଵତାରଂ ମହାଵିଷ୍ଣୋଃ କଲ୍କେଃ ପରମମଦ୍ଭୁତମ୍ ।
ପଠତାଂ ଶୃଣ୍ଵତାଂ ଭକ୍ତ୍ଯା ସର୍ଵାଶୁଭଵିନାଶନମ୍ ॥ ୧୪॥

ଇତି ଶ୍ରୀକଲ୍କିପୁରାଣେଽନୁଭାଗଵତେ ଭଵିଷ୍ଯେ ତୃତୀଯାଂଶେ
ଋଷିକୃତୋ ଗଙ୍ଗାସ୍ତଵଃ ସମ୍ପୂର୍ଣଃ ॥




Encoded and proofread by Dinesh Agarwal dinesh.garghouse at gmail.com
Proofread by PSA EASWARAN psaeaswaran at gmail.com

Please send corrections to sanskrit@cheerful.com
Last updated ତ୍oday
http://sanskritdocuments.org

Ganga Stavam Lyrics in Oriya PDF
% File name : gangAstavakalkIP.itx
% Location : doc\_devii
% Language : Sanskrit
% Subject : philosophy/hinduism/religion
% Transliterated by : Dinesh Agarwal dinesh.garghouse at gmail.com
% Proofread by : Dinesh Agarwaa, by PSA EASWARAN psaeaswaran at gmail.coml
% Description-comments : shrIkalkipurANe.anubhAgavate bhaviShye tRityA.nshe
% Latest update : May 18, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website