{॥ ಶ್ರೀರೇಣುಕಾಸಹಸ್ರನಾಮಸ್ತೋತ್ರಮ್ ॥}
ಅಥ ಶ್ರೀರೇಣುಕಾತನ್ತ್ರಾನ್ತರ್ಗತಂ ಶ್ರೀರೇಣುಕಾಸಹಸ್ರನಾಮಸ್ತೋತ್ರಮ್ ।
ಶ್ರೀ ಗಣೇಶಾಯ ನಮಃ । ಶ್ರೀ ರೇಣುಕಾಯೈ ನಮಃ ।
ಗಿರಿಪೃಷ್ಠೇ ಸಮಾಸೀನಂ ಶಙ್ಕರಂ ಲೋಕಶಙ್ಕರಮ್ ।
ಪ್ರಣತಃ ಪರಿಪಪ್ರಚ್ಛ ಸಂಶಯಸ್ಥಃ ಷಡಾನನಃ ॥ ೧॥

ಸ್ಕನ್ದ ಉವಾಚ --
ತಾತ ಸರ್ವೇಶ್ವರಸ್ತ್ವಂ ಹಿ ಸರ್ವಜ್ಞಃ ಸರ್ವಭಾವನಃ ।
ಕಥಯಸ್ವ ಪ್ರಸಾದೇನ ರಹಸ್ಯಂ ಸಕಲಾರ್ಥದಮ್ ॥ ೨॥

ವಿಜಯಃ ಸಙ್ಕಟೇ ಘೋರೇ ನಿರ್ವಿಘ್ನಂ ಬಲಮುತ್ಕಟಮ್ ।
ಅನ್ಯೇಽಪಿ ವಾಞ್ಛಿತಾರ್ಥಾಶ್ಚ ಸಿದ್ಧ್ಯನ್ತ್ಯಾಶು ವಿನಾ ಶ್ರಮಮ್ ॥ ೩॥

ಶಙ್ಕರ ಉವಾಚ --
ಸಾಧು ಪೃಷ್ಟಂ ಮಹಾಬಾಹೋ ಸಂಶಯೋ ಮಾಸ್ತು ಮಾಸ್ತು ತೇ ।
ಯದನುಷ್ಠಾನಮಾತ್ರೇಣ ಸರ್ವಾನ್ಕಾಮಾನವಾಪ್ಸ್ಯಸಿ ॥ ೪॥

ಕಸ್ಯಚಿನ್ನಯದಾಖ್ಯಾತಂ ತದ್ರಹಸ್ಯಂ ವದಾಮ್ಯಹಮ್ ।
ಸ್ತೋತ್ರಂ ಸಹಸ್ರನಾಮಾಖ್ಯಂ ರೇಣುಕಾಯಾಸ್ತು ಸಿದ್ಧಿದಮ್ ॥ ೫॥

ಸದ್ಯಃ ಪ್ರತ್ಯಯಕಾಮಸ್ತ್ವಂ ಶೃಣು ಷಣ್ಮುಖ ಭಕ್ತಿತಃ ।
ಸರ್ವದೇವಾಶ್ಚ ವೇದಾಶ್ಚಕ್ಷೀಣವೀರ್ಯಾ ಯುಗೇ ಯುಗೇ ॥ ೬॥

ಅಕ್ಷೀಣಫಲದಾತ್ರೀಯಂ ತ್ರಿಸತ್ಯಂ ಮಮ ಭಾಷಿತಮ್ ।
ಸರ್ವದೇವಮಯೀ ದೇವೀ ರೇಣುಕಾ ಕಾಮದಾರ್ಚಿತಾ ॥ ೭॥

ಪುರದಾಹೇ ಮಯಾ ಧ್ಯಾತಾ ತಥೈವ ಗರಲಾಶನೇ ।
ವಿಷ್ಣುನಾ ಸಾಗರೋನ್ಮಾಥೇ ಬ್ರಹ್ಮಣಾ ಸೃಷ್ಟಿಕರ್ಮಣಿ ॥ ೮॥

ಗೋತ್ರಭೇದೇ ಮಘವತಾ ಜಗತೀ ಧಾರಣೇಽಹಿನಾ ।
ಕಾಮೇನ ಶಮ್ಬರವಧೇ ರತ್ಯಾ ತತ್ಪ್ರಾಪ್ತಯೇ ಪುನಃ ॥ ೯॥

ಗಣಾಧೀಶೇನ ಸತತಂ ವಿಘ್ನವಾರಣಕರ್ಮಣಿ ।
ಕಿಂ ವತ್ಸ ಬಹುನೋಕ್ತೇನ ಹೈಮವತ್ಯಾ ಮದಾಖ್ಯಯಾ ॥ ೧೦॥

ಧ್ಯಾತ್ವಾ ಸರ್ವಾರ್ಥದಾ ಸಾ ಹಿ ಸರ್ವಲೋಕೈಕಸಂಶ್ರಯಾ ।
ಮಹತ್ಕಾರ್ಯೋದ್ಯತೈರನ್ಯೈರ್ಬಹುಭಿಶ್ಚಿನ್ತಿತಾ ಶಿವಾ ॥ ೧೧॥

ಧರ್ಮಾರ್ಥಕಾಮಮೋಕ್ಷಾರ್ಥಮವಾಙ್ಮನಸಗೋಚರಾ ।
ತಸ್ಯಾ ಏವ ಪ್ರಸಾದಾತ್ತಾಂ ಸ್ತೌಮಿ ನಾಮಾವಲಿಚ್ಛಲಾತ್ ॥ ೧೨॥

ಋಷ್ಯಾದಿಕಂ ಚ ಸಙ್ಕ್ಷೇಪಾತ್ಕಥಯಾಮಿ ಷಡಾನನ ।
ತ್ರ್ಯಮ್ಬಕಶ್ಚ ಋಷಿಃ ಪ್ರೋಕ್ತೋಽನುಷ್ಟುಪ್ಛನ್ದಃ ಪ್ರಕೀರ್ತಿತಮ್ ॥ ೧೩॥

ಏಕವೀರಾ ಮಹಾಮಾಯಾ ರೇಣುಕಾ ದೈವತಂ ಸ್ಮೃತಮ್ ।
ಸರ್ವಪಾಪಕ್ಷಯದ್ವಾರಾ ಪ್ರೀತ್ಯೈ ದೇವ್ಯಾ ಮುಹುರ್ಮುಹುಃ ॥ ೧೪॥

ಸರ್ವಾಭೀಷ್ಟಫಲಪ್ರಾಪ್ತೌ ವಿನಿಯೋಗ ಉದಾಹೃತಃ ।
ರೇಣುಕಾ ರಾಮಮಾತೇತಿ ಮಹಾಪುರನಿವಾಸಿನೀ ॥ ೧೫॥

ಏಕವೀರಾ ಕಾಲರಾತ್ರಿರೇಕಲಾ ನಾಮಭಿಃ ಕ್ರಮಾತ್
ಅಙ್ಗುಷ್ಠಾದಿ ಕರನ್ಯಾಸೋ ಹೃದಯಾದಿ ಷಡಙ್ಗಕಮ್ ।
ಚತುರ್ಥ್ಯನ್ತೈರ್ನಮೋನ್ತೈಶ್ಚ ಪ್ರಣವಾದಿಭಿರಾಚರೇತ್ ॥ ೧೬॥

ಅಸ್ಯ ಶ್ರೀ ರೇಣುಕಾ ಸಹಸ್ರನಾಮಸ್ತೋತ್ರಮನ್ತ್ರಸ್ಯ ತ್ರ್ಯಮ್ಬಕ ಋಷಿಃ
ಶ್ರೀರೇಣುಕಾ ದೇವತಾ । ಅನುಷ್ಟುಪ್ಛನ್ದಃ । ಸರ್ವಪಾಪಕ್ಷಯದ್ವಾರಾ
ಶ್ರೀ ಜಗದಮ್ಬಾ ರೇಣುಕಾ ಪ್ರೀತ್ಯರ್ಥಂ ಸರ್ವಾಭೀಷ್ಟಫಲಪ್ರಾಪ್ತ್ಯರ್ಥಂ
ಚ ಜಪೇ ವಿನಿಯೋಗಃ ।
ಅಥ ನ್ಯಾಸಃ - ಶ್ರೀರೇಣುಕಾಯೈ ನಮಃ ಅಙ್ಗುಷ್ಠಾಭ್ಯಾಂ ನಮಃ ।
ಓಂ ರಾಮಮಾತ್ರೇ ನಮಃ ತರ್ಜನೀಭ್ಯಾಂ ನಮಃ ।
ಓಂ ಮಹಾಪುರವಾಸಿನ್ಯೈ ನಮಃ ಮಧ್ಯಮಾಭ್ಯಾಂ ನಮಃ ।
ಓಂ ಏಕವೀರಾಯೈ ನಮಃ ಅನಾಮಿಕಾಭ್ಯಾಂ ನಮಃ ।
ಓಂ ಕಾಲರಾತ್ರ್ಯೈ ನಮಃ ಕನಿಷ್ಠಿಕಾಭ್ಯಾಂ ನಮಃ ।
ಓಂ ಏಕಲಾಯೈ ನಮಃ ಕರತಲಕರಪೃಷ್ಠಾಭ್ಯಾಂ ನಮಃ ।
ಏವಂ ಹೃದಯಾದಿ- ಓಂ ರೇಣುಕಾಯೈ ನಮಃ ಹೃದಯಾಯ ನಮಃ ।
ಓಂ ರಾಮಮಾತ್ರೇ ನಮಃ ಶಿರಸೇ ಸ್ವಾಹಾ ।
ಓಂ ಮಹಾಪುರವಾಸಿನ್ಯೈ ನಮಃ ಶಿಖಾಯೈ ವಷಟ್ ।
ಓಂ ಏಕವೀರಾಯೈ ನಮಃ ಕವಚಾಯ ಹುಂ ।
ಓಂ ಕಾಲರಾತ್ರ್ಯೈ ನಮಃ ನೇತ್ರತ್ರಯಾಯ ವೌಷಟ್ ।
ಓಂ ಏಕಲಾಯೈ ನಮಃ ಅಸ್ತ್ರಾಯ ಫಟ್ ।
ಧ್ಯಾನಮ್ --
ಧ್ಯಾಯೇನ್ನಿತ್ಯಮಪೂರ್ವವೇಷಲಲಿತಾಂ ಕನ್ದರ್ಪಲಾವಣ್ಯದಾಂ
ದೇವೀಂ ದೇವಗಣೈರುಪಾಸ್ಯಚರಣಾಂ ಕಾರುಣ್ಯರತ್ನಾಕರಾಮ್ ।
ಲೀಲಾವಿಗ್ರಹಿಣೀಂ ವಿರಾಜಿತಭುಜಾಂ ಸಚ್ಚನ್ದ್ರಹಾಸಾದಿಭಿ-
ರ್ಭಕ್ತಾನನ್ದವಿಧಾಯಿನೀಂ ಪ್ರಮುದಿತಾಂ ನಿತ್ಯೋತ್ಸವಾಂ ರೇಣುಕಾಮ್ ॥ ೧೭॥

ಓಂ ರೇಣುಕಾ ರಾಮಜನನೀ ಜಮದಗ್ನಿಪ್ರಿಯಾ ಸತೀ ।
ಏಕವೀರಾ ಮಹಾಮಾಯಾ ಕಾಲರಾತ್ರಿಃ ಶಿವಾತ್ಮಿಕಾ ॥ ೧೮॥

ಮಹಾಮೋಹಾ ಮಹಾದೀಪ್ತಿಃ ಸಿದ್ಧವಿದ್ಯಾ ಸರಸ್ವತೀ ।
ಯೋಗಿನೀ ಚನ್ದ್ರಿಕಾಸಿದ್ಧಾ ಸಿದ್ಧಲಕ್ಷ್ಮೀಃ ಶಿವಪ್ರಿಯಾ ॥ ೧೯॥

ಕಾಮದಾ ಕಾಮಜನನೀ ಮಾತೃಕಾ ಮನ್ತ್ರಸಿದ್ಧಿದಾ ।
ಮನ್ತ್ರಸಿದ್ಧಿರ್ಮಹಾಲಕ್ಷ್ಮೀ ಮಾತೃಮಣ್ಡಲವಲ್ಲಭಾ ॥ ೨೦॥

ಚನ್ದ್ರಿಕಾ ಚನ್ದ್ರಕಾನ್ತಿಶ್ಚ ಸೂರ್ಯಕಾನ್ತಿಃ ಶುಚಿಸ್ಮಿತಾ ।
ಯೋಗೇಶ್ವರೀ ಯೋಗನಿದ್ರಾ ಯೋಗದಾತ್ರೀ ಪ್ರಭಾವತೀ ॥ ೨೧॥

ಅನಾದ್ಯನ್ತಸ್ವರೂಪಾ ಶ್ರೀಃ ಕ್ರೋಧರೂಪಾ ಮಹಾಗತಿಃ ।
ಮನಃಶ್ರುತಿಸ್ಮೃತಿರ್ಘ್ರಾಣಚಕ್ಷುಸ್ತ್ವಗ್ರಸನಾ ರಸಾ ॥ ೨೨॥

ಮಾತೃಕಾ ಪತಿರುತ್ಕ್ರೋಶಾ ಚಣ್ಡಹಾಸಾ ಮಹಾವರಾ ।
ಮಹಾವೀರಾ ಮಹಾಶೂರಾ ಮಹಾಚಾಪಾ ರಥಸ್ಥಿತಾ ॥ ೨೩॥

ಬರ್ಹಿಪತ್ರಪ್ರಿಯಾ ತನ್ವೀ ಬರ್ಹಿಪತ್ರಾ ಚತುರ್ಭುಜಾ ।
ನಾದಪ್ರಿಯಾ ನಾದಲುಬ್ಧಾ ತ್ರ್ಯಕ್ಷರಾ ಮೃತಜೀವನೀ ॥ ೨೪॥

ಅಮೃತಾಮೃತಪಾನೇಷ್ಟಾ ಸಿನ್ಧುಪಾ ಪಾತ್ರಶಾಲಿನೀ ।
ಚಣ್ಡಹಾಸಧರಾ ಶೂರಾ ವೀರಾ ಡಮರುಮಾಲಿನೀ ॥ ೨೫॥

ಶಿರೋಧರಾ ಪಾತ್ರಕರಾ ವರದಾ ವರವರ್ಣಿನೀ ।
ತ್ರಿಮೂರ್ತಿರ್ವೇದಜನನೀ ವೇದವಿದ್ಯಾ ತಪೋನಿಧಿಃ ॥ ೨೬॥

ತಪೋಯುಕ್ತಾ ತಪೋಲಕ್ಷ್ಮೀಸ್ತಪಸಃ ಸಿದ್ಧಿದಾಪರಾ ।
ಲಲಿತಾ ಸಾತ್ವಿಕೀ ಶಾನ್ತಾ ರಾಜಸೀ ರಕ್ತದನ್ತಿಕಾ ॥ ೨೭॥

ಏಕಲಾ ರೇಣುತನಯಾ ಕಾಮಾಕ್ಷೀ ಸತ್ಪರಾಯಣಾ ।
ಐನ್ದ್ರೀ ಮಾಹೇಶ್ವರೀ ಬ್ರಾಹ್ಮೀ ವೈಷ್ಣವೀ ವಡವಾನಲಾ ॥ ೨೮॥

ಕಾವೇರೀ ಘನದಾ ಯಾಮ್ಯಾ ಯಾಮ್ಯಾಗ್ನೇಯೀ ತನುರ್ನಿಶಾ ।
ಈಶಾನೀ ನೈಋತಿಃ ಸೌಮ್ಯಾ ಮಾಹೇನ್ದ್ರೀ ವಾರುಣೀ ಸಮಾ ॥ ೨೯॥

ಸರ್ವರ್ಷಿಧ್ಯೇಯಚರಣಾ ನೃವಾರಣಾ ನರವಲ್ಲಭಾ ।
ಭಿಲ್ಲೀವೇಷಧರಾ ಭಿಲ್ಲೀವರ್ವರಾಲಕ ಮಣ್ಡಿತಾ ॥ ೩೦॥

ಶೃಙ್ಗೀವಾದನ ಸುರಸಾ ಗುಞ್ಜಾಹಾರ ವಿಭೂಷಣಾ ।
ಮಯೂರ ಪಿಚ್ಛಾಭರಣಾ ಶ್ಯಾಮಾ ನೀಲಾಮ್ಬರಾ ಶಿವಾ ॥ ೩೧॥

ಕಾಲಿಕಾ ರೇಣುದುಹಿತಾ ಶಿವಪೂಜ್ಯಾ ಪ್ರಿಯಂವದಾ ।
ಸೃಷ್ಟಿಕೃತ್ ಸ್ಥಿತಿಕೃತ್ಕ್ರುದ್ಧಾ ಪೃಥ್ವೀ ನಾರದಸೇವಿತಾ ॥ ೩೨॥

ಸಂಹಾರಕಾರಿಣೀನ್ದ್ರಾಕ್ಷೀ ರಕ್ಷೋಘ್ನೀ ಚನ್ದ್ರಶೇಖರಾ ।
ಹುಂ ಫಟ್ ವೌಷಟ್ ವಷಡ್ರೂಪಾ ಸ್ವಧಾ ಸ್ವಾಹಾ ನಮೋ ಮನುಃ ॥ ೩೩॥

ಸುಷುಪ್ತಿರ್ಜಾಗ್ರತಿರ್ನಿದ್ರಾ ಸ್ವಪ್ನಾ ತುರ್ಯಾ ಚ ಚಕ್ರಿಣೀ ।
ತಾರಾ ಮನ್ದೋದರೀ ಸೀತಾಽಹಲ್ಯಾಽರುನ್ಧತಿಕಾ ದಿತಿಃ ॥ ೩೪॥

ಭಗೀರಥೀ ಚ ಕಾವೇರೀ ಗೌತಮೀ ನರ್ಮದಾ ಮಹೀ ।
ಸರಯೂರ್ಗೌತಮೀ ಭೀಮಾ ತ್ರಿವೇಣೀ ಗಣ್ಡಕೀ ಸರೀ ॥ ೩೫॥

ಮಾನಸಂ ಚನ್ದ್ರಭಾಗಾ ಚ ರೇವಾ ಗಙ್ಗಾ ಚ ವೇದಿಕಾ ।
ಹರಿದ್ವಾರಂ ಮಾತೃಪುರಂ ದತ್ತಾತ್ರೇಯನಿವಾಸಭೂಃ ॥ ೩೬॥

ಮಾತೃಸ್ಥಾದಿಸಂಸ್ಥಾನಾ ಮಾತೃಮಣ್ಡಲಮಣ್ಡಿತಾ ।
ಮಾತೃಮಣ್ಡಲಸಮ್ಪೂಜ್ಯಾ ಮಾತೃಮಣ್ಡಲಮಧ್ಯಗಾ ॥ ೩೭॥

ನಾನಾಸ್ಥಾನಾವತಾರಾದ್ಯಾ ನಾನಾಸ್ಥಾನಚರಿತ್ರಕೃತ್ ।
ಕಮಲಾ ತುಲಜಾತ್ರೇಯೀ ಕೋಹ್ಲಾಪುರನಿವಾಸಿನೀ ॥ ೩೮॥

ಮನ್ದಾಕಿನೀ ಭೋಗವತೀ ದತ್ತಾತ್ರೇಯಾನುಸೂಯಕಾ ।
ಷಟ್ಚಕ್ರದೇವತಾ ಪಿಙ್ಗಾ ಜಮದಗ್ನೀಶ್ವರಾರ್ದ್ಧಹೃತ್ ॥ ೩೯॥

ಇಡಾಖ್ಯಾ ಚ ಸುಷುಮ್ನಾಖ್ಯಾ ಚನ್ದ್ರಸೂರ್ಯಗತಿರ್ವಿಯತ್ ।
ಚನ್ದ್ರಸೂರ್ಯಸಮಾಖ್ಯಾತಾ ಸರ್ವಸ್ತ್ರೀನಿಲಯಾಧ್ವನಿಃ ॥ ೪೦॥

ಸಮಸ್ತವಿದ್ಯಾತತ್ತ್ವಜ್ಞಾ ಸರ್ವರೂಪಾ ಸುಖಾಶ್ರಯಾ ।
ಪುಣ್ಯಪಾಪೇಶ್ವರೀ ಕೀರ್ತಿರ್ಭೋಕ್ತ್ರೀ ಭೋಗಪ್ರವರ್ತಿನೀ ॥ ೪೧॥

ಜಮದಗ್ನ್ಯಸ್ಯ ಜನನೀ ಕವಿಶಕ್ತಿಃ ಕವಿತ್ವದಾ ।
ಹ್ರೀಙ್ಕಾರಾಮ್ಬಾ ತಮೋರೂಪಾ ಕ್ಲೀಙ್ಕಾರಾ ಕಾಮದಾಯಿನೀ ॥ ೪೨॥

ವಾಕ್ಪ್ರದೈಙ್ಕಾರರೂಪಾ ಚ ಮುಕ್ತಿದೌಙ್ಕಾರರೂಪಿಣೀ ।
ಶ್ರೀಙ್ಕಾರಾಖಿಲದಾನೋಕ್ತಾ ಸರ್ವಬೀಜಾತ್ಮಿಕಾತ್ಮಭೂಃ ॥ ೪೩॥

ಜಮದಗ್ನಿ ಶಿವಾಙ್ಕಸ್ಥಾ ಧರ್ಮಾರ್ಥಕಾಮಮೋಕ್ಷದಾ ।
ಜಮದಗ್ನಿಕ್ರೋಧಹರಾ ಜಮದಗ್ನಿವಚಃಕರೀ ॥ ೪೪॥

ಜಮದಗ್ನಿತಮೋಹನ್ತ್ರೀ ಜಮದಗ್ನಿಸುಖೈಕಭೂಃ ।
ಜಿತವೀರಾ ವೀರಮಾತಾ ವೀರಭೂರ್ವೀರಸೇವಿತಾ ॥ ೪೫॥

ವೀರದೀಕ್ಷಾಕರೀ ಸೌರ್ಯದೀಕ್ಷಿತಾ ಸರ್ವಮಙ್ಗಲಾ ।
ಕಾತ್ಯಾಯನೀ ಪರೀವಾರಾ ಕಾಲಕಾಲಾ ಕಲಾನಿಧಿಃ ॥ ೪೬॥

ಅಷ್ಟಸಿದ್ಧಿಪ್ರದಾ ಕ್ರೂರಾ ಕ್ರೂರಗ್ರಹವಿನಾಶಿನೀ ।
ಸಾಕಾರಾ ಚ ನಿರಾಕಾರಾಹಙ್ಕಾರಾಕಾರಣಾ ಕೃತಿಃ ॥ ೪೭॥

ಸಮ್ಮತಾ ವಿಷಮಘ್ನೀ ಚ ವಿಷಹನ್ತ್ರೀ ವಿಷಾಶನಾ ।
ವ್ಯಾಲಾಭರಣಸಂಹೃಷ್ಟಾ ವ್ಯಾಲಮಣ್ಡನಮಣ್ಡಿತಾ ॥ ೪೮॥

ಅಣುರೂಪಾ ಪರಾಣುಶ್ಚ ಸದ್ರೂಪಾ ಚ ಮಹಾಪರಾ ।
ಹ್ರಸ್ವಾ ಹ್ರಸ್ವಪರಾ ದೀರ್ಘಾ ಪರದೀರ್ಘಾ ಪರಾತ್ಪರಾ ॥ ೪೯॥

ಅದ್ವಯಾದ್ವಯರೂಪಾ ಚ ಪ್ರಪಞ್ಚರಹಿತಾ ಪೃಥುಃ ।
ಸ್ಥೂಲಸೂಕ್ಷ್ಮಾ ನಿರೀಹಾ ಚ ಸ್ನೇಹಾಞ್ಜನವಿವರ್ಜಿತಾ ॥ ೫೦॥

ಬ್ರಹ್ಮಸೂತಾ ಮಹಾನಿದ್ರಾ ಯೋಗನಿದ್ರಾ ಹರಿಸ್ತುತಾ ।
ಹಿರಣ್ಯಗರ್ಭರೂಪಾ ಚ ಪರಬ್ರಹ್ಮಸ್ವರೂಪಿಣೀ ॥ ೫೧॥

ಬ್ರಹ್ಮಶಕ್ತಿರ್ಬ್ರಹ್ಮವಿದ್ಯಾ ವಿಶ್ವಬೀಜಾ ನಿರಞ್ಜನಾ ।
ಅತುಲಾ ಕರ್ಮರೂಪಾ ಚ ಶ್ಯಾಮಲಾ ಪರಿಘಾಯುಧಾ ॥ ೫೨॥

ನಾರಾಯಣೀ ವಿಷ್ಣುಶಕ್ತಿಃ ಅವಾಙ್ಮನಸಗೋಚರಾ ।
ಘೃತಮಾರೀ ಪುಣ್ಯಕರೀ ಪುಣ್ಯಶಕ್ತಿರಮಾಮ್ಬಿಕಾ ॥ ೫೩॥

ರಕ್ತಬೀಜವಧೋದ್ರಿಕ್ತಾ ರಕ್ತಚನ್ದನಚರ್ಚಿತಾ ।
ಸುರಕ್ತಪುಷ್ಪಾಭರಣಾ ರಕ್ತದಂಷ್ಟ್ರಾಭಯಪ್ರದಾ ॥ ೫೪॥

ತೀಕ್ಷ್ಣರಕ್ತನಖಾರಕ್ತಾ ನಿಶುಮ್ಭಪ್ರಾಣಕೃನ್ತಿನೀ ।
ಶುಮ್ಭಪ್ರಾಣನಿಹನ್ತ್ರೀ ಚ ಮಹಾಮೃತ್ಯುವಿನಾಶಿನೀ ॥ ೫೫॥

ಸರ್ವದೇವಮಹಾಶಕ್ತಿರ್ಮಹಾಲಕ್ಷ್ಮೀ ಸುರಸ್ತುತಾ ।
ಅಷ್ಟಾದಶಭುಜಾರ್ಚ್ಯಾಂಶಾ ದಶದೋರ್ದಣ್ಡಮಣ್ಡಿತಾ ॥ ೫೬॥

ನಿಷ್ಕಲಾಷ್ಟಭುಜಾ ಧಾತ್ರೀ ಕಲ್ಪಾತೀತಾ ಮನೋಹರಾ ।
ಕಲ್ಪನಾ ರಹಿತಾರ್ಚ್ಯಾದ್ಯಾ ದಾರಿದ್ರ್ಯವನದಾಹಿನೀ ॥ ೫೭॥

ಕೌಸ್ತುಭಾ ಪಾರಿಜಾತಾ ಚ ಹಾಹಾದಿರೂಪಧಾರಿಣೀ ।
ತಿಲೋತ್ತಮಾಪ್ಸರೋರೂಪಾ ನವನಾಗಸ್ವರೂಪಿಣೀ ॥ ೫೮॥

ನಿಧಿರೂಪಾ ಸಮಾಧಿಸ್ಥಾ ಖಡ್ಗರೂಪಾ ಶವಸ್ಥಿತಾ ।
ಮಹಿಷಾಸುರದತ್ತಾಂಘ್ರಿಃ ಸಿಂಹಗಾ ಸಿಂಹಗಾಮಿನೀ ॥ ೫೯॥

ತ್ರಿಶೂಲಧಾರಿಣೀ ಪ್ರೌಢಾ ಬಾಲಾ ಮುಗ್ಧಾ ಸುಧರ್ಮಿಣೀ ।
ಶಙ್ಖಭೃಚ್ಚಕ್ರಭೃತ್ಪಾಶಾ ಗದಾಭೃತ್ಪಾಶಮಣ್ಡಿತಾ ॥ ೬೦॥

ಕಾಲಶಕ್ತಿಃ ಕೃಪಾಸಿನ್ಧುರ್ಮೃಗಾರಿವರವಾಹನಾ ।
ಗಣರಾಜಮಹಾಶಕ್ತಿಃ ಶಿವಶಕ್ತಿಃ ಶಿವಸ್ತುತಾ ॥ ೬೧॥

ಹರಿಪ್ರಿಯಾ ಶ್ರಾದ್ಧದೇವೀ ಪ್ರಧಾನಾ ಗುಹರೂಪಿಣೀ ।
ಗುಹಪ್ರೀತಾ ಗಣೇಟ್ಪ್ರೀತಾ ಕಾಮಪ್ರೀತಾ ಗುಹಸ್ಥಿತಾ ॥ ೬೨॥

ಸರ್ವಾರ್ಥದಾಯಿನೀ ರೌದ್ರೀ ನೀಲಾಗತಿರಲೋಲುಪಾ ।
ಚಾಮುಣ್ಡಾ ಚಿತ್ರಘಣ್ಟಾ ಚ ವಿಶ್ವಯೋನಿರ್ನಿರನ್ತರಮ್ ॥ ೬೩॥

ಶ್ರಾವಣೀ ಶ್ರಮಹನ್ತ್ರೀ ಚ ಸಂಸಾರಭ್ರಮನಾಶಿನೀ ।
ಸಂಸಾರಫಲಸಮ್ಪನ್ನಾ ಸಂಸಾರಮತಿರುಚ್ಚಗಾ ॥ ೬೪॥

ಉಚ್ಚಾಸನಸಮಾರೂಢಾ ವಿಮಾನವರಗಾಮಿನೀ ।
ವಿಮಾನಸ್ಥಾ ವಿಮಾನಘ್ನೀ ಪಾಶಘ್ನೀ ಕಾಲನಾಶಿನೀ ॥ ೬೫॥

ಕಾಲಚಕ್ರಭ್ರಮಭ್ರಾನ್ತಾ ಕಾಲಚಕ್ರಪ್ರವರ್ತಿನೀ ।
ಚೇತನಾ ಚಾಪಿನೀ ಭವ್ಯಾ ಭವ್ಯಾಭವ್ಯವಿನಾಶಿನೀ ॥ ೬೬॥

ಸಿಂಹಾಸನಸುಖಾವಿಷ್ಟಾ ಕ್ಷೀರಸಾಗರಕನ್ಯಕಾ ।
ವಣಿಕ್ಕನ್ಯಾ ಕ್ಷೇಮಕರೀ ಮುಕುಟೇಶಾವನಿಸ್ಥಿತಾ ॥ ೬೭॥

ಶ್ರುತಿಜ್ಞಾ ಚ ಪುರಾಣಜ್ಞಾ ಸ್ಮೃತಿಜ್ಞಾ ವೇದವಾದನೀ ।
ವೇದವೇದಾರ್ಥತತ್ತ್ವಜ್ಞಾ ಹಿಙ್ಗುಲಾ ಕಾಲಶಾಲಿನೀ ॥ ೬೮॥

ಇತಿಹಾಸಾರ್ಥವಿದ್ಧರ್ಮ್ಯಾ ಧ್ಯೇಯಾ ಹನ್ತ್ರೀ ಶಿಶುಪ್ರಿಯಾ ।
ಸ್ತನ್ಯದಾ ಸ್ತನ್ಯಧಾರಾ ಚ ವನಸ್ಥಾ ಪಾರ್ವತೀಶಿವಾ ॥ ೬೯॥

ಮೇನಾ ಮೈನಾಕಭಗಿನೀ ಸುರಭಿರ್ಜಲಭುಕ್ತಡಿತ್ ।
ಸರ್ವಬೀಜಾನ್ತರಸ್ಥಾತ್ರೀ ಸಕಲಾಗಮದೇವತಾ ॥ ೭೦॥

ಸ್ಥಲಸ್ಥಲಾ ಜಲಸ್ಥಾ ಚ ವನಸ್ಥಾ ವನದೇವತಾ ।
ಕ್ಷಯಹನ್ತ್ರೀ ನಿಹನ್ತ್ರೀ ಚ ನಿರಾತಙ್ಕಾಮರಪ್ರಿಯಾ ॥ ೭೧॥

ತ್ರಿಕಾಲಜ್ಞಾ ತ್ರಿರೂಪಾ ಚ ಲೀಲಾವಿಗ್ರಹಧಾರಿಣೀ ।
ಸಮಾಧಿಃ ಪುಣ್ಯಧಿಃ ಪುಣ್ಯಾ ಪಾಪಾಜ್ಞಾನವಿನಾಶಿನೀ ॥ ೭೨॥

ದೃಶ್ಯಾ ದೃಗ್ವಿಷಯಾ ದೃಷ್ಟಿಃ ಪಾಪಹನ್ತ್ರೀ ಶಮಸ್ಥಿತಾ ।
ವಿರಥಾ ರಥನಿಷ್ಠಾ ಚ ವರೂಥರಥಸಂಸ್ಥಿತಾ ॥ ೭೩॥

ಮಧುಕೈಟಭಹನ್ತ್ರೀ ಚ ಸರ್ವದೇವಶರೀರಭೃತ್ ।
ತ್ರಿಪುರಾ ಪುಣ್ಯಕೀರ್ತಿಶ್ಚ ನೃಪವಶ್ಯಪ್ರದಾಯಿನೀ ॥ ೭೪॥

ಸಾಂಖ್ಯವಿದ್ಯಾ ತ್ರಯೀವಿದ್ಯಾ ಯೋಗವಿದ್ಯಾ ರವಿಸ್ಥಿತಾ ।
ಸ್ಥಾವರಾ ಜಙ್ಗಮಾ ಕ್ಷಾನ್ತಿರ್ಬಲಿಶಕ್ತಿರ್ಬಲಿಪ್ರಿಯಾ ॥ ೭೫॥

ಮಹಿಷಾಸುರನಿರ್ಣಾಶೀ ದೈತ್ಯಸೈನ್ಯಪರಾನ್ತಕೃತ್ ।
ಡಮಡ್ಡಮರುಡಾಙ್ಕಾರಾ ವೀರಶ್ರೀರ್ಜನದೇವತಾ ॥ ೭೬॥

ಉದ್ಗೀಥೋದ್ಗೀಥಮರ್ಯಾದಾ ಕ್ಷೀರಸಾಗರಶಾಯಿನೀ ।
ವೀರಲಕ್ಷ್ಮೀರ್ವೀರಕಾನ್ತಾ ಶಿವದೂತೀ ಸನಾತನೀ ॥ ೭೭॥

ಶಕ್ರಾದಿಸಂಸ್ತುತಾ ಹೃಷ್ಟಾ ಚಣ್ಡಮುಣ್ಡವಿನಾಶಿನೀ ।
ಪಞ್ಚವಕ್ತ್ರೈಕರೂಪಾ ಚ ತ್ರಿನೇತ್ರಾವಲಿಮೋಹಿನೀ ॥ ೭೮॥

ಧೂಮ್ರಲೋಚನನಿರ್ನಾಶಾಹಙ್ಕಾರೋದ್ಗಾರಭಾಷಿಣೀ ।
ಏಕಮೂರ್ತಿಸ್ತ್ರಿಧಾಮೂರ್ತಿಃ ತ್ರಿಲೋಕಾನನ್ದದಾಯಿನೀ ॥ ೭೯॥

ಭವಾನೀ ದಶಮೂರ್ತಿಶ್ಚ ಪಞ್ಚಮೂರ್ತಿರ್ಜಯನ್ತಿಕಾ ।
ದಕ್ಷಿಣಾ ದಕ್ಷಿಣಾಮೂರ್ತಿಃ ಅನೇಕೈಕಾದಶಾಕೃತಿಃ ॥ ೮೦॥

ಏಕಚಕ್ಷುರನನ್ತಾಕ್ಷೀ ವಿಶ್ವಾಕ್ಷೀ ವಿಶ್ವಪಾಲಿನೀ ।
ಚತುರ್ವಿಂಶತಿತತ್ತ್ವಾದ್ಯಾ ಚತುರ್ವಿಂಶತಿತತ್ತ್ವವಿತ್ ॥ ೮೧॥

ಸೋಽಹಂ ಹಂಸಾವಿಶೇಷಜ್ಞಾ ನಿರ್ವಿಶೇಷಾ ನಿರಾಕೃತಿಃ ।
ಯಮಘಣ್ಟಾಮೃತಕಲಾ ಜಯಘಣ್ಟಾ ಜಯಧ್ವನಿಃ ॥ ೮೨॥

ಪಾಞ್ಚಜನ್ಯಸ್ಫುರಚ್ಛಕ್ತಿರ್ಹನುಮಚ್ಛಕ್ತಿರಾಸ್ತಿಕಾ ।
ಶೀಲಾತರಣಶಕ್ತಿಶ್ಚ ರಾಮಶಕ್ತಿರ್ವಿರಾಟ್ತನುಃ ॥ ೮೩॥

ಲಙ್ಕಾಪ್ರಜ್ವಲನಾ ವೇಲಾ ಸಾಗರಕ್ರಮಣಕ್ರಮಾತ್ ।
ನರನಾರಾಯಣಪ್ರೀತಿರ್ಲೋಕನೀತಿರಘೌಘಕೃತ್ ॥ ೮೪॥

ವಿಪಾಶಾ ಪಾಶಹಸ್ತಾ ಚ ವಿಶ್ವಬಾಹುಸ್ತ್ರಿಲಿಙ್ಗಿಕಾ ।
ಪ್ರಾಚೀ ಪ್ರತೀಚೀ ವಿದಿಶಾ ದಕ್ಷಿಣಾ ದಕ್ಷಕನ್ಯಕಾ ॥ ೮೫॥

ಶಿವಲಿಙ್ಗಪ್ರತಿಷ್ಠಾತ್ರೀ ಶಿವಲಿಙ್ಗಪ್ರತಿಷ್ಠಿತಾ ।
ಅಜ್ಞಾನನಾಶಿನೀ ಬುದ್ಧಿಸ್ತತ್ತ್ವವಿದ್ಯಾ ಸುಚೇತನಾ ॥ ೮೬॥

ಪ್ರಕಾಶಾ ಸ್ವಪ್ರಕಾಶಾ ಚ ದ್ವಯಾದ್ವಯವರ್ಜಿತಾ ।
ಅಸದ್ರೂಪಾ ಚ ಸದ್ರೂಪಾ ಸದಸದ್ರೂಪಶಾಲಿನೀ ॥ ೮೭॥

ಕೈಲಾಸನಿಲಯಾ ಗೌರೀ ವೃಷಗಾ ವೃಷವಾಹನಾ ।
ಸೋಮಸೂರ್ಯಾಗ್ನಿನಯನಾ ಸೋಮಸೂರ್ಯಾಗ್ನಿವಿಗ್ರಹಾ ॥ ೮೮॥

ವಿಷಮೇಕ್ಷಣದುರ್ಧರ್ಷಾ ಲಙ್ಕಾದಾಹಕರೀ ದಿತಿಃ ।
ವೈಕುಣ್ಠವಿಲಸನ್ಮೂರ್ತಿಃ ವೈಕುಣ್ಠನಿಲಯಾನಿಲಾ ॥ ೮೯॥

ನಮೋಮೂರ್ತಿಸ್ತಮೋಮೂರ್ತಿಸ್ತೇಜೋಮೂರ್ತಿರಮೇಯಧೀಃ ।
ಸೂರ್ಯಮೂರ್ತಿಶ್ಚನ್ದ್ರಮೂರ್ತಿಃ ಯಜಮಾನಶರೀರಿಣೀ ॥ ೯೦॥

ಆಪ್ಯಮೂರ್ತಿರಿಲಾಮೂರ್ತಿಃ ನರನಾರಾಯಣಾಕೃತಿಃ ।
ವಿಷಯಾಜ್ಞಾನಭಿನ್ನಾ ಚ ವಿಷಯಾಜ್ಞಾನನಿರ್ವೃತಿಃ ॥ ೯೧॥

ಸುಖವಿತ್ಸುಖಿನೀ ಸೌಖ್ಯಾ ವೇದವೇದಾಙ್ಗಪಾರಗಾ ।
ಸ್ರುಕ್ ಸ್ರುವಾ ಚ ವಸೋರ್ಧಾರಾ ಯಾಗಶಕ್ತಿರಶಕ್ತಿಹೃತ್ ॥ ೯೨॥

ಯಜ್ಞಕೃತ್ ಪ್ರಾಕೃತಿರ್ಯಜ್ಞಾ ಯಜ್ಞರಾಗವಿವರ್ಧಿನೀ ।
ಯಜ್ಞಭೋಕ್ತ್ರೀ ಯಜ್ಞಭಾಗಾ ಸೌಭಾಗ್ಯವರದಾಯಿನೀ ॥ ೯೩॥

ವ್ಯಾಪಿನೀ ದಶದಿಗ್ಬಾಹುರ್ದಿಗನ್ತಾ ಬಲಿದಾಯಿನೀ ।
ಕೃಪಾ ವಿಶ್ವೇಶ್ವರೀ ಸ್ವಙ್ಗಾ ಶತಾಕ್ಷೀ ಕಾಮದೇವತಾ ॥ ೯೪॥

ಕಾಮಚಾರಪ್ರಿಯಾ ಕಾಮಾ ಕಾಮಾಚಾರಪರಾಯಣಾ ।
ಚಿಕಿತ್ಸಾ ವೇದವಿದ್ಯಾ ಚ ವೈದ್ಯಮಾತಾಮಹೌಷಧಿಃ ॥ ೯೫॥

ಮಹೌಷಧಿರಸಪ್ರೀತಾ ವಿಕರಾಲಾ ಕಲಾತಿಗಾ ।
ಮೇಘಶಕ್ತಿರ್ಮಹಾವೃಷ್ಟಿಃ ಸುವೃಷ್ಟಿಃ ಶಿವಶರ್ಮದಾ ॥ ೯೬॥

ರುದ್ರಾಣೀ ರುದ್ರವದನಾ ರುದ್ರಪೂಜ್ಯಾನ್ನಪೂರ್ಣಿಕಾ ।
ಅನ್ನದಾನರಸಾನ್ನಾದ್ಯಾ ತೃಪ್ತಿದಾ ಭೋಜನಪ್ರಿಯಾ ॥ ೯೭॥

ಕರ್ಮಪಾಶಪ್ರದಾ ಪಙ್ಕ್ತಿಃ ಪಾಕಶಕ್ತಿಃ ಪಚಿಕ್ರಿಯಾ ।
ಸುಪಕ್ವಫಲದಾ ವಾಞ್ಛಾ ವಾಞ್ಛಾಧಿಕಫಲಪ್ರದಾ ॥ ೯೮॥

ಸರ್ವಯನ್ತ್ರಮಯೀ ಪೂರ್ಣಾ ಸರ್ವಭೂತಾಶ್ರಯಾಮ್ಬಿಕಾ ।
ಬ್ರಾಹ್ಮಣೀ ಬ್ರಹ್ಮಶಕ್ತಿಶ್ಚ ಚರಾಚರವಿಭಾವಿನೀ ॥ ೯೯॥

ಚರಾಚರಗತಿರ್ಜೈತ್ರೀ ಲಕ್ಷಾಲಕ್ಷೇಶ್ವರಾರ್ದ್ಧಹೃತ್ ।
ಗುಹಶಕ್ತಿರ್ಗಣೇಟ್ ಶಕ್ತಿರ್ನಾರಸಿಂಹೀ ಸಹಸ್ರದೃಕ್ ॥ ೧೦೦॥

ಸರ್ಪಮಾಲೋತ್ತರೀಯಾ ಚ ಸರ್ಪ ಸರ್ವಾಙ್ಗಭೂಷಣಾ ।
ವಾರಾಹೀ ಚ ಸಹಸ್ರಾಕ್ಷೀ ಕೂರ್ಮಶಕ್ತಿಃ ಶುಭಾಲಯಾ ॥ ೧೦೧॥

ಶೇಷರೂಪಾ ಶೇಷಶಕ್ತಿಃ ಶೇಷಪರ್ಯಙ್ಕಶಾಯಿನೀ ।
ವರಾಹದಂಷ್ಟ್ರಾ ವಲಿಧಿಃ ಕಾಮಧೀಃ ಕಾಮಮೋಹಿನೀ ॥ ೧೦೨॥

ಮಾಯಿನೀ ಚಿತ್ತಸದನಾ ಕಾಮಿಕಾಮಪ್ರವರ್ಧಿನೀ ।
ಸರ್ವಲಕ್ಷಣಸಮ್ಪೂರ್ಣಾ ಸರ್ವಲಕ್ಷಣನಾಶಿನೀ ॥ ೧೦೩॥

ನಾದರೂಪಾ ಬಿನ್ದುರೂಪಾ ಕೃತಕರ್ಮಫಲಪ್ರದಾ ।
ಧ್ರುವಶಕ್ತಿಃ ಧ್ರುವಾರೋಹಾ ಧ್ರುವಾಟೋಪಾ ಧ್ರುವಾರ್ಥದಾ ॥ ೧೦೪॥

ಧ್ರುವಾಕಾರಾಗ್ನಿಹೋತ್ರಾಢ್ಯಾ ಧ್ರುವಾಚಾರಾ ಧ್ರುವಸ್ಥಿತಿಃ ।
ಧ್ರುವಾಧ್ರುವಮಯೀ ಧ್ರೌವ್ಯಾ ಚಿದ್ರೂಪಾನನ್ದರೂಪಿಣೀ ॥ ೧೦೫॥

ಹೃದ್ರೂಪಾ ಬಗಲಾ ಕೃಷ್ಣಾ ನೀಲಗ್ರೀವಾ ಕುಧೀಹರಾ ।
ಪವಿತ್ರದೃಷ್ಟಿಃ ಪಾವಿತ್ರ್ಯಕಾರಿಣೀ ಋಷಿವತ್ಸಲಾ ॥ ೧೦೬॥

ಶಿಶೂತ್ಸಙ್ಗಧರಾಸಙ್ಗಾ ಸಙ್ಗರಾಗಪ್ರವರ್ಧಿನೀ ।
ನಿಃಸಙ್ಗಾ ಸಙ್ಗಬಹುಲಾ ಚತುರಾಶ್ರಮವಾಸಿನೀ ॥ ೧೦೭॥

ಚತುರ್ವರ್ಣಪರಿಷ್ವಙ್ಗಾ ಚತುರ್ವರ್ಣಬಹಿಸ್ಥಿತಾ ।
ನಿರಾಶ್ರಯಾ ರಾಗವತೀ ರಾಗಿಮಾನಸಸಂಶ್ರಯಾ ॥ ೧೦೮॥

ಬ್ರಾಹ್ಮಣೀ ರಾಜದುಹಿತಾ ವೈಶ್ಯಾ ಶೂದ್ರಾ ಪರಾಸುರಾ ।
ಗೃಹಾಶ್ರಮಸಮಾಸೀನಾ ಗೃಹಧರ್ಮನಿರೂಪಿಣೀ ॥ ೧೦೯॥

ಗೃಹಧರ್ಮಾ ವಿಷಾದಘ್ನೀ ಬ್ರಹ್ಮಚರ್ಯನಿಷೇವಿಣೀ ।
ವಾನಪ್ರಸ್ಥಾಶ್ರಮಸ್ಥಾ ಚ ಯತಿಧರ್ಮಾ ಸ್ಫುರತ್ತನುಃ ॥ ೧೧೦॥

ಸಂಸ್ಥಿತಿಃ ಪ್ರಲಯಾ ಸೃಷ್ಟಿಃ ಸರ್ಗಸ್ಥಿತ್ಯನ್ತಖೇಲಕೃತ್ ।
ಜ್ಞಾನಶಕ್ತಿಃ ಕ್ರಿಯಾಶಕ್ತಿಃ ಛಾಯಾಶಕ್ತಿರಪೂರ್ವಕೃತ್ ॥ ೧೧೧॥

ನಾನಾವಾದವಿಶೇಷಜ್ಞಾ ನಾನಾವಾದನಿರಙ್ಗತಾ ।
ಶೂನ್ಯವಾದನಿರಾಕಾರಾ ಧರ್ಮವಾದನಿರೂಪಿಣೀ ॥ ೧೧೨॥

ನವಚಣ್ಡೀ ಕ್ರಿಯಾಹೇತುಃ ಸಙ್ಕಲ್ಪಾಕಲ್ಪನಾತಿಗಾ ।
ನಿರ್ವಿಕಲ್ಪಾ ವಿಕಲ್ಪಾದ್ಯಾ ಸಙ್ಕಲ್ಪಾಕಲ್ಪಭೂರುಹಾ ॥ ೧೧೩॥

ಸೃಷ್ಟಿಘ್ನೀ ಚ ಸ್ಥಿತಿಘ್ನೀ ಚ ವಿನಾಶಘ್ನೀ ತ್ರಿರೂಪಭೃತ್ ।
ಅಯೋಧ್ಯಾ ದ್ವಾರಕಾ ಕಾಶೀ ಮಥುರಾ ಕಾಞ್ಚ್ಯವನ್ತಿಕಾ ॥ ೧೧೪॥

ವಿಶೋಕಾ ಶೋಕಮಾರ್ತಣ್ಡೀ ಪಾಞ್ಚಾಲೀ ಶೋಕನಾಶಿನೀ ।
ಶಮನಿಯಮಶಕ್ತಿಶ್ಚ ಧರ್ಮಶಕ್ತಿರ್ಜಯಧ್ವಜಾ ॥ ೧೧೫॥

ಮುಕ್ತಿಃ ಕುಣ್ಡಲಿನೀ ಭುಕ್ತಿರ್ವಿಷದೃಷ್ಟಿಃ ಸಮೇಕ್ಷಣಾ ।
ಕೃಪೇಕ್ಷಣಾ ಕೃಪಾರ್ದ್ರಾಙ್ಗೀ ಕೃಪಾರ್ಚಿತಾ ಕೃಪಾಶ್ರುತಿಃ ॥ ೧೧೬॥

ಮಹಾಪುರಾದ್ರಿನಿಲಯಾ ಮಹಾಪುರಕೃತಸ್ಥಿತಿಃ ।
ಅಜ್ಞಾನಕಲ್ಪನಾನನ್ತಾ ಪ್ರಪಞ್ಜಕಲನಾತಿಗಾ ॥ ೧೧೭॥

ಸಾಮ್ಯದೃಷ್ಟಿಃ ದೇಹಪುಷ್ಟಿಃ ಕೃತಸೃಷ್ಟಿರ್ಹೃತಾಖಿಲಾ ।
ವೇಣುಪುಣ್ಯಪರೀಪಾಕಾಽಯೋನಿಜಾ ವಹ್ನಿಸಮ್ಭವಾ ॥ ೧೧೮॥

ಮಹಾಪುರಸುಖಾಸೀನಾ ಡಮಡ್ಡಮರುದರ್ಪಿತಾ ।
ಮಹಾಪುರಮಹಾದೇವೀ ಡಮರುಪ್ರೀತಿವಲ್ಗಿತಾ ॥ ೧೧೯॥

ಭದ್ರಕಾಲೀ ಪಿತೃಶಕ್ತಿರ್ಹ್ಯಾಲಸಾ ಭುವನೇಶ್ವರೀ ।
ಗಾಯತ್ರೀ ಚ ಚತುರ್ವಕ್ತ್ರಾ ತ್ರಿಪುರಾ ವೀರವನ್ದಿತಾ ॥ ೧೨೦॥

ಯಮಾಮ್ಬಾ ತ್ರಿಗುಣಾನನ್ದಾ ಕೈವಲ್ಯಪದದಾಯಿನೀ ।
ವಡವಾ ಸದಯಾ ಭೂಸ್ಥಾ ಶಾಕ್ತಸರ್ಗಪ್ರವರ್ತಿನೀ ॥ ೧೨೧॥

ಇನ್ದ್ರಾದಿ ದೇವಜನನೀ ಏಲಾಮ್ಬಾ ಕೋಲರೂಪಿಣೀ ।
ಕುಮ್ಭದರ್ಪಹರಾ ದೋಲಾ ದೋಲಾಕ್ರೀಡನಲಾಲಸಾ ॥ ೧೨೨॥

ಶೀತಲಾ ವಿಷ್ಣುಮಾಯಾ ಚ ಚತುರ್ವಕ್ತ್ರನಮಸ್ಕೃತಾ ।
ಮಾತಙ್ಗೀ ವಿಷ್ಣುಜನನೀ ಪ್ರೇತಾಸನನಿವಾಸಿನೀ ॥ ೧೨೩॥

ಗರುತ್ಮತ್ಗಮನಾನೀಲಾ ಬ್ರಹ್ಮಾಸ್ತ್ರಾ ಬ್ರಹ್ಮಭೂಷಿತಾ ।
ಸಿದ್ಧಿಃ ಪಾಶುಪತಾಸ್ತ್ರಾ ಚ ನೀಲೇನ್ದೀವರಲೋಚನಾ ॥ ೧೨೪॥

ರುಕ್ಮಾ ಶಙ್ಕರಜನನೀ ಕರ್ಮನಾಶಾ ಚ ಶಾಮ್ಭವೀ ।
ತ್ರಿಗಾ ವಾಮನಶಕ್ತಿಶ್ಚ ಹಿರಣ್ಯಗರ್ಭಭೂಸುರಾ ॥ ೧೨೫॥

ವಾಗ್ವಾದಿನೀ ಚ ವರ್ಣಾ ಚ ಶಙ್ಕರಾರ್ಧಶರೀರಿಣೀ ।
ದಾರುಣಾ ಮೋಹರಾತ್ರಿಶ್ಚ ಭ್ರಮಾದಿಗಣರೂಪಿಣೀ ॥ ೧೨೬॥

ದೀಪಿಕಾ ಕ್ರೀಡವರದಾ ಮೋಹಿನೀ ಗರಲಾಶನಾ ।
ಕಪರ್ದಾರ್ಚಿತಸರ್ವಾಙ್ಗೀ ಕಪರ್ದಾಭರಣಪ್ರಿಯಾ ॥ ೧೨೭॥

ಸಾವಿತ್ರೀ ಭೈರವೀವಿಘ್ನಾ ಪೀತಾಪೀತಾಮ್ಬರಪ್ರಭುಃ ।
ದಶವಕ್ತ್ರಾನವದ್ಯಾಙ್ಗೀ ತ್ರಿಂಶಲ್ಲೋಚನಭೂಷಿತಾ ॥ ೧೨೮॥

ದಶಾಂಘ್ರಿರ್ದಶದೋರ್ದಣ್ಡಾ ಸ್ಫುರದ್ದಂಷ್ಟ್ರಾತಿಭೀಷಣಾ ।
ಕರ್ಪೂರಕಾನ್ತಿವದನಾ ನೀಲಬಾಹುರನುತ್ತಮಾ ॥ ೧೨೯॥

ಬ್ರಹ್ಮಗೇಯಾ ಮುನಿಧ್ಯೇಯಾ ಹ್ರೀಙ್ಕಾರಾ ಕಾಮವಿಗ್ರಹಾ ।
ಷಡ್ಬೀಜಾ ನವಬೀಜಾ ಚ ನವಾಕ್ಷರತನುಃ ಖಗಾ ॥ ೧೩೦॥

ದಶಾರ್ಣಾ ದ್ವಾದಶಾರ್ಣಾಢ್ಯಾ ಷೋಡಶಾರ್ಣಾವಿಬೀಜಗಾ ।
ಮಾಲಾಮನ್ತ್ರಮಯೀ ಜಯ್ಯಾ ಸರ್ವಬೀಜೈಕದೇವತಾ ॥ ೧೩೧॥

ಜಪಮಾಲಾ ಚ ಜಯದಾ ಜಪವಿಘ್ನವಿನಾಶಿನೀ ।
ಜಪಕರ್ತ್ರೀ ಜಪಸ್ತೋತ್ರಾ ಮನ್ತ್ರಯನ್ತ್ರಫಲಪ್ರದಾ ॥ ೧೩೨॥

ಮನ್ತ್ರಾವರಣರೂಪೈಕಾ ಯನ್ತ್ರಾವರಣದೇವತಾ ।
ಪದ್ಮಿನೀ ಪದ್ಮಪತ್ರಾಕ್ಷೀ ಶಮೀ ಯಜ್ಞಾಙ್ಗದೇವತಾ ॥ ೧೩೩॥

ಯಜ್ಞಸಿದ್ಧಿಃ ಸಹಸ್ರಾಕ್ಷೀ ಸಹಸ್ರಾಕ್ಷಪದಪ್ರದಾ ।
ರೇಣುವಶಾವತಾರಾಢ್ಯಾ ಮಹಿಷಾನ್ತಕರೀ ಸಮಿತ್ ॥ ೧೩೪॥

ಋಗ್ವೇದಾ ಚ ಯಜುರ್ವೇದಾ ಸಾಮವೇದಾ ತ್ರಯೀಪರಾ ।
ಅಭಿಚಾರಪ್ರಿಯಾಥರ್ವಾ ಪಞ್ಚತನ್ತ್ರಾಧಿದೇವತಾ ॥ ೧೩೫॥

ಅಭಿಚಾರಕ್ರಿಯಾ ಶಾನ್ತಿಃ ಶಾನ್ತಿಮನ್ತ್ರಾಧಿದೇವತಾ ।
ಅಭಿಚಾರೋಪಶಮನೀ ಸರ್ವಾನನ್ದವಿಧಾಯಿನೀ ॥ ೧೩೬॥

ಅಥರ್ವಪಾಠಸಮ್ಪನ್ನಾ ಲೇಖನೀ ಲೇಖಕಸ್ಥಿತಾ ।
ಭೂಮಲೇಖ್ಯಾ ವರ್ಣಶಕ್ತಿಃ ಸರ್ವಶಕ್ತಿಃ ಪ್ರಸಿದ್ಧಿದಾ ॥ ೧೩೭॥

ಕೀರ್ತಿಕಾಮಾ ಕಲಾಕಾಮಾ ಕಾಮಾಕ್ಷೀ ಸರ್ವಮಙ್ಗಲಾ ।
ಶೂಲೇಶ್ವರೀ ಕುಶೂಲಘ್ನೀ ಚಿನ್ತಾಶೋಕವಿನಾಶಿನೀ ॥ ೧೩೮॥

ಚಿನ್ತಾದಿದೇವತಾ ಭೂತನಾಯಕಾ ನಲಕೂಬರೀ ।
ಕರಾಲೀತ್ಯೂರ್ಧ್ವಕೇಶೀ ಚ ಶ್ರೀಧರೀ ಚ ವಿನಾಯಕೀ ॥ ೧೩೯॥

ಕಾಮೇಶ್ವರೀ ಚ ಕೌವೇರೀ ಪದ್ಮಾವತ್ಯಭಿಧಾಗತಿಃ ।
ಜ್ವಾಲಾಮುಖೀ ಚ ಕೌವೇರೀ ವಿಜಯಾ ಮೇಘವಾಹನಾ ॥ ೧೪೦॥

ಮಹಾಬಲಾ ಮಹೋತ್ಸಾಹಾ ಮಹಾಭಯನಿವಾರಿಣೀ ।
ಕಾಮಿನೀ ಶಾಙ್ಕರೀ ಕಾಷ್ಠಾ ಸಹಸ್ರಭುಜನಿಗ್ರಹಾ ॥ ೧೪೧॥

ಪ್ರಭಾ ಪ್ರಭಾಕರೀ ಭಾಷಾ ಸಪ್ತಾಶ್ವರಥಸಂಸ್ಥಿತಾ ।
ಅಲಕಾಪುರಸಂಸ್ಥಾನಾ ಮೃಡಾನೀ ವಿನ್ಧ್ಯನಿಶ್ಚಲಾ ॥ ೧೪೨॥

ಹಿಮಾಚಲಕೃತಕ್ರೀಡಾ ಪೀಡಾಪಾಪನಿವಾರಿಣೀ ।
ಅರ್ಧಮಾತ್ರಾಕ್ಷರಾ ಸನ್ಧ್ಯಾ ತ್ರಿಮಾತ್ರಾ ಭಾರತೀ ಧೃತಿಃ ॥ ೧೪೩॥

ವೇದಮಾತಾ ವೇದಗರ್ಭಾ ಕೌಶಿಕೀ ತ್ರ್ಯಮ್ಬಕಾ ಸ್ವರಾ ।
ಅಮ್ಬಾಲಿಕಾ ಕ್ಷುಧಾ ತೃಷ್ಣಾ ಧೂಮ್ರಾ ರೌದ್ರಾ ದುರತ್ಯಯಾ ॥ ೧೪೪॥

ಪಾನಪಾತ್ರಕರಾ ಜಾತಿಃ ಶ್ರದ್ಧಾವಾರ್ತಾ ಚಿತಾಸ್ಥಿತಾ ।
ದುರ್ಗಾಣೀ ರಕ್ತಚಾಮುಣ್ಡಾವೃತಿಃ ಸೋಮಾವತಂಸಿನೀ ॥ ೧೪೫॥

ಶರಣ್ಯಾರ್ಯಾ ದುರ್ಗಾಪರಾ ಸಾರಾ ಜ್ಯೋಸ್ಲಾ ಮಹಾಸ್ಮೃತಿಃ । ಜ್ಯೋತ್ಸ್ನಾ
ಜಗತ್ಪ್ರತಿಷ್ಠಾ ಕಲ್ಯಾಣೀ ಛಾಯಾ ತುಷ್ಟಿಶ್ಚ ತಾಮಸೀ ॥ ೧೪೬॥

ತೃಷ್ಣಾ ವಾಗ್ಧೀಶ್ಚ ನದ್ಧಾ ಚ ಗದಿನೀ ಚಕ್ರಧಾರಿಣೀ ।
ಲಜ್ಜಾ ಸಹಸ್ರನಯನಾ ಮಹಿಷಾಸುರಮರ್ದಿನೀ ॥ ೧೪೭॥

ಭೀಮಾ ಭದ್ರಾ ಭಗವತೀ ನವದುರ್ಗಾಽಪರಾಜಿತಾ ।
ಮೇಘಾಷ್ಟಾದಶ ದೋರ್ದಣ್ಡಾ ದುರ್ಗಾ ಕಾತ್ಯಾಯನೀ ರತಿಃ ॥ ೧೪೮॥

ಸರ್ವತಃ ಪಾಣಿಪಾದೋರುರ್ಭ್ರಾಮರೀ ಚನ್ದ್ರರೂಪಿಣೀ ।
ಇನ್ದ್ರಾಣೀ ಚ ಮಹಾಮಾರೀ ಸರ್ವತೋಽಕ್ಷಿಶಿರೋಮುಖಾ ॥ ೧೪೯॥

ಸಪ್ತಾಧಿಸಂಶ್ರಯಾ ಸತ್ತಾ ಸಪ್ತದ್ವೀಪಾಬ್ಧಿಮೇಖಲಾ ।
ಸೂರ್ಯದೀಪ್ತಿರ್ವಜ್ರಪಂಕ್ತಿಃ ಪಾನೋನ್ಮತ್ತಾ ಚ ಪಿಙ್ಗಲಾ ॥ ೧೫೦॥

ಸರ್ವಜ್ಞಾ ವಿಶ್ವಮಾತಾ ಚ ಭಕ್ತಾನುಗ್ರಹಕಾರಿಣೀ ।
ವಿಶ್ವಪ್ರಿಯಾ ಪ್ರಾಣಶಕ್ತಿರನನ್ತಗುಣನಾಮಧೀಃ ॥ ೧೫೧॥


ಸರ್ವಕಲ್ಯಾಣನಿಲಯಾ ಶಾರದಾ ತ್ರ್ಯಮ್ಬಿಕಾ ಸುಧಾ ॥ ೧೫೨॥

ಶ್ರೀ ಶಙ್ಕರ ಉವಾಚ --
ದಿವ್ಯಂ ನಾಮಸಹಸ್ರಂ ತೇ ರೇಣುಕಾಯಾ ಮಯೇರಿತಮ್ ।
ಸರ್ವಕಾಮಸಮೃದ್ಧ್ಯರ್ಥಮನೇನ ಭಜ ಷಣ್ಮುಖ ॥ ೧೫೩॥ ಸಮೃದ್ಧಿ ಅರ್ಥಂ ಅನೇನ

ಭುಕ್ತಿದೋ ಮುಕ್ತಿಶ್ಚಾಪಿ ಭಜತಾಂ ಕಲ್ಪಪಾದಪಃ ।
ಜಯಪ್ರದೋ ವಿಶೇಷೇಣ ನಾನೇನ ಸದೃಶೋ ಮನುಃ ॥ ೧೫೪॥

ಪುರಶ್ಚರಣಮುದ್ದಿಷ್ಟಂ ಸಹಸ್ರಂ ನವಕಂ ಶುಭಮ್ ।
ವಿಜಯಾರ್ಥಂ ವಿಶೇಷೇಣ ಪ್ರಯೋಗಂ ಸಾಧಯೇತ್ತತಃ ॥ ೧೫೫॥

ಹಸ್ತಯೋರ್ಭಾಜನಂ ಕೃತ್ವಾ ಪ್ರಸಾದಂ ಯಾಚಯೇನ್ಮುಹುಃ ।
ಲಬ್ಧಪ್ರಸಾದೋ ಭಕ್ತೇಭ್ಯಶ್ಚಿನ್ತಯೇಧೃದಿ ರೇಣುಕಾಮ್ ॥ ೧೫೬॥ ಚಿನ್ತಯೇತ್ ಹೃದಿ

ಭಕ್ತಿತೋ ಯೋಗಿನೀವೃನ್ದಂ ಪೂಜಯೇತ್ತೋಷಯೇನ್ಮುದಾ ।
ತತ್ಪಾತ್ರಂ ಪೂರಯೇದನ್ನೈಃ ಪೂಜಯಿತ್ವೋಪಚಾರಕೈಃ ॥ ೧೫೭॥

ಶೃಙ್ಗಿನಾದಂ ಸಮಾಕರ್ಣ್ಯ ಪ್ರಾರ್ಥಯೇದುದಯಾಶಿಷಮ್ ।
ಸರ್ವೇಭ್ಯಶ್ಚಾಶಿಷೋ ಲಬ್ಧ್ವಾ ಭುಞ್ಜೀತ ಸಹಬಾನ್ಧವೈಃ ॥ ೧೫೮॥

ನಾನಾಜಾತಿಭವಾನ್ಭಕ್ತಾನ್ ಪ್ರೀಯತಾಂ ರೇಣುಕೇತಿ ಚ ।
ಉತ್ಸರ್ಗಾದಿಪ್ರಸಾದೇನ ತೋಷಯೇಚ್ಚ ಮುಹುರ್ಮುಹುಃ ॥ ೧೫೯॥

ದೀಪಕಾಡಮರುಧ್ವಾನೈರುದಯೋದ್ದಾಮಕೀರ್ತನೈಃ ।
ಗೋದೋಹಸಮಯೇ ಕುರ್ಯಾದ್ಗೋದೋಹಜಮಹೋತ್ಸವಮ್ ॥ ೧೬೦॥

ಜಗದಮ್ಬಾಮಯಂ ಪಶ್ಯನ್ ಸಕಲಂ ದೃಷ್ಟಿಗೋಚರಮ್ ।
ದೀಪಿಕಾಡಮರೂತ್ಸಾಹಂ ಭಕ್ತೈಃ ಸಹ ನಿಶಾಂ ನಯೇತ್ ॥ ೧೬೧॥

ಅವರ್ಷಣೇ ಧರಾಕಮ್ಪೇ ಸಂಕ್ಷೋಭೇ ಸಾಗರಸ್ಯ ಚ ।
ಆವರ್ತನಸಹಸ್ರೇಣ ನಿಶ್ಚಿತೇ ಜಾಯತೇ ಶುಭಮ್ ॥ ೧೬೨॥

ದುಷ್ಟೋತ್ಪಾತೇ ಮಹಾಘೋರೇ ಸಙ್ಕಟೇ ದುರತಿಕ್ರಮೇ ।
ಅಯುತಾವರ್ತನಾನ್ನೂನಮಸಾಧ್ಯಮಪಿ ಸಾಧಯೇತ್ ॥ ೧೬೩॥

ನಿಶೀಥೇ ವಾ ಪ್ರದೋಷೇ ವಾ ಜಗದಮ್ಬಾಲಯೇ ಶುಚಿಃ ।
ನವರಾತ್ರಂ ಜಪೇದ್ಯಸ್ತು ಪ್ರತ್ಯಹಂ ನವವಾರಕಮ್ ॥ ೧೬೪॥

ನಾಮಭಿಃ ಪೂಜನಂ ಹೋಮಂ ಪ್ರತ್ಯಯಂ ಕುರುತೇ ವ್ರತೀ ।
ಪ್ರಸನ್ನಾಸ್ಮೈ ಮಹಾಮಾಯಾ ಪ್ರತ್ಯಕ್ಷಂ ಭವತಿ ಧ್ರುವಮ್ ॥ ೧೬೫॥

ತ್ರಿವಾರಂ ನಿಯತಂ ಜಪ್ತ್ವಾ ಷಣ್ಮಾಸಂ ವ್ರತವಾನ್ ಶುಚಿಃ ।
ದಾರಿದ್ರ್ಯಾರ್ಣವಮುತ್ತೀರ್ಯ ವಿಪುಲಾಂ ಶ್ರಿಯಮಾಪ್ನುಯಾತ್ ॥ ೧೬೬॥

ವಿಶೇಷಸಾಧನಂ ಕುರ್ಯಾತ್ಪುರಶ್ಚರ್ಯಾಂ ಪುನಃ ಸುಧೀಃ ।
ಸಾಧಯೇತ್ಸಕಲಾನ್ಕಾಮಾನ್ ಸತ್ವರಂ ನಾತ್ರ ಸಂಶಯಃ ॥ ೧೬೭॥

ಪುಷ್ಪಾಜ್ಯಪಾಯಸತಿಲೈರ್ಹರಿದ್ರಾಮಧುಚನ್ದನೈಃ ।
ನಾನಾಪರಿಮಲದ್ರವ್ಯೈರ್ಭಕ್ತಿಯುಕ್ತೋ ಯಜೇನ್ಮುದಾ ॥ ೧೬೮॥

ಇದಂ ಪಠತಿ ಯೋ ಭಕ್ತ್ಯಾ ಶೃಣುಯಾದ್ವಾಪಿ ನಿತ್ಯಶಃ ।
ನಿರ್ವಿಘ್ನಂ ಲಭತೇಽಭೀಷ್ಟಂ ಜೀವೇಚ್ಚ ಶರದಾಂ ಶತಮ್ ॥ ೧೬೯॥

ಶುಕ್ಲಪಕ್ಷೇಽಥವಾ ಕೃಷ್ಣೇ ಭೂತಾಧಃ ಷಷ್ಠಿಕಾದಿನಾತ್ ।
ಸಾಧಕಃ ಸಾಙ್ಗವಿಧಿನಾ ಸಾಧಯೇತ್ಸ್ತೋತ್ರಮನ್ತ್ರವಿತ್ ॥ ೧೭೦॥

ಇಷೇ ಶುಕ್ಲನವಮ್ಯನ್ತಮಾರಭ್ಯ ಪ್ರತಿಪತ್ತಿಥಿಮ್ ।
ನವರಾತ್ರೋಕ್ತವಿಧಿನಾ ಕಲಶಂ ಪೂಜಯೇನ್ಮುದಾ ॥ ೧೭೧॥

ಸಙ್ಕಟೇ ಸತ್ವರೇ ಕೃತ್ಯೇ ವಿಧಿನಾವರ್ತಯೇತ್ ಸ್ಥಿತಿಮ್ ।
ಪ್ರಾಪ್ನೋತಿ ವಾಞ್ಛಿತಂ ಸದ್ಯಃ ಸರ್ವವಿಘ್ನವಿನಾಶಕೃತ್ ॥ ೧೭೨॥

ಘೃತದ್ವೀಪದ್ವಯಂ ಕೃತ್ವಾ ದಕ್ಷಿಣೋತ್ತರಭಾಗಯೋಃ ।
ನಾನಾಭೋಗೋಪಚಾರೈಶ್ಚ ತೋಷಯೇಜ್ಜಗದಮ್ಬಿಕಾಮ್ ॥ ೧೭೩॥

ಕುಙ್ಕುಮಾಗರುಕಸ್ತೂರೀಚನ್ದನಾಭಿರರ್ಚಯೇತ್ ।
ಕುಮಾರೀಂ ಪೂಜಯೇತ್ಭಕ್ತ್ಯಾ ಬ್ರಾಹ್ಮಣಾಂಶ್ಚ ಸುವಾಸಿನೀಮ್ ॥ ೧೭೪॥

ಷಡ್ರಸೈಃ ಸ್ವಾದು ಪಕ್ವಾನ್ನೈರ್ಭೋಜಯೇಚ್ಚ ಚತುರ್ವಿಧೈಃ ।
ಶಕ್ತಿತೋ ದಕ್ಷಿಣಾಂ ದದ್ಯಾದ್ವಾಸೋಧಾನ್ಯಂ ಗವಾದಿಕಮ್ ॥ ೧೭೫॥

ವಿತ್ತಶಾಠ್ಯಂ ನ ಕುರ್ವೀತ ಸರ್ವಕಾರ್ಯಸಮೃದ್ಧಯೇ ।
ಪ್ರಣಮೇತ್ ಪ್ರಣಮೇದ್ಭಕ್ತ್ಯಾ ಪ್ರೋಚ್ಯತಾಮುದಯೋಸ್ತ್ವತಿಃ ॥ ೧೭೬॥

ಭೂಷಿತೋ ಮಙ್ಗಲಸ್ನಾನೈಃ ಸ್ವಾಲೇಪ್ಯಾಮ್ಬರಮಾಲ್ಯವಾನ್ ।
ವಿಭೂಷ್ಯಾಙ್ಗಂ ಕಪರ್ದೈಶ್ಚ ಪ್ರಜ್ವಾಲ್ಯ ಘೃತದೀಪಿಕಾಮ್ ॥ ೧೭೭॥

ಯದ್ಯದಾರಭ್ಯತೇ ಕಾರ್ಯಂ ತದಾದೌ ಚ ಸಮಾಪನೇ ।
ಸಮ್ಪೂಜ್ಯಾಮ್ಬಾಂ ಕುಮಾರೀಂಶ್ಚ ಪೂಜಯೇಜ್ಜಪಪೂರ್ವಕಮ್ ॥ ೧೭೮॥

ಭೂತಾಷ್ಟಮ್ಯಾಂ ನವಮ್ಯಾಂ ಚ ಭೌಮೇ ಚ ನಿಯತಃ ಪಠೇತ್ ।
ಸರ್ವಾನ್ ಕಾಮಾನವಾಪ್ನೋತಿ ನಾತ್ರ ಕಾರ್ಯಾ ವಿಚಾರಣಾ ॥ ೧೭೯॥

ಭೂತಾ ರಕ್ಷಃ ಪಿಶಾಚಾದ್ಯಾ ವೈರಿಣೋ ದಸ್ಯವೋಪಿ ಚ ।
ಪಠ್ಯತೇಽನುದಿನಂ ಯತ್ರ ತದ್ಗೃಹಂ ನ ವಿಶನ್ತಿ ಚ ॥ ೧೮೦॥

ಅಬ್ಧಿಸಞ್ಚರಣೇ ಪೋತೇ ಲಙ್ಘನೇ ಗಿರಿರೋಹಣೇ ।
ಚಿತ್ತಕ್ಷೋಭೇ ಪ್ರಸಾದೇ ಚ ವಿಷಾದೇ ವಾ ಪಠೇದಿದಮ್ ॥ ೧೮೧॥

ದುಃಸ್ವಪ್ನದರ್ಶನೇ ಮಾರ್ಗೇ ವಿಡ್ವರೇ ಕಲಹಾಗಮೇ ।
ಯಾತ್ರಾಕಾಲೇ ಪಠೇದೇತತ್ ಸರ್ವಮಾಙ್ಗಲಿಕಾಗಮೇ ॥ ೧೮೨॥

ನಿಷ್ಕಾಮೋ ವಾ ಸಕಾಮೋ ವಾ ಪುರುಷಾರ್ಥಪ್ರದಂ ಯತಃ ।
ತ್ರೈವರ್ಣಿಕಃ ಪಠೇದೇತದಿತರಃ ಪಾಠಯೇತ್ ಸದಾ ॥ ೧೮೩॥

ಸೌಭಾಗ್ಯಂ ಲಭತೇ ನಾರೀ ಕನ್ಯಾ ಸರ್ವೋತ್ತಮಂ ವರಮ್ ।
ಮೃತವತ್ಸಾ ಲಭೇತ್ಪುಣ್ಯಮಾಯುಷ್ಮತ್ಸನ್ತತಿಂ ಶುಭಾಮ್ ॥ ೧೮೪॥

ಅಸೂತಿರ್ಲಭತೇ ಸೂತಿಂ ಸುಸೂತಿಂ ಕಷ್ಟಸೂತಿಕಾ ।
ಉದಾಸೀನಾ ಲಭೇತ್ಪ್ರೀತಿಂ ಪತಿಬಾಲಪ್ರಿಯಙ್ಕರೀ ॥ ೧೮೫॥

ನ ವೈಧವ್ಯಮವಾಪ್ನೋತಿ ನ ಸಪತ್ನೀಂ ಲಭೇತ್ಕ್ವಚಿತ್ ।
ಸುರೂಪಾ ಸುಭಗಾ ಧನ್ಯಾ ವಿರಹಂ ನಾಪ್ನುಯಾತ್ಕ್ವಚಿತ್ ॥ ೧೮೬॥

ಚ್ಯವದ್ಗರ್ಭವತೀ ಯಾ ಚ ದೃಢಗರ್ಭವತೀ ಭವೇತ್ ।
ವಿತ್ತಾಪತ್ಯಪರೀವಾರಾ ಪತಿಮಣ್ಡಿತವಿಗ್ರಹಾ ॥ ೧೮೭॥

ಸಹಸ್ರನಾಮಕಂ ಸ್ತೋತ್ರಂ ಪಠ್ಯತೇ ಯತ್ರ ವೇಶ್ಮನಿ ।
ಗ್ರಹಾಃ ಕಾಲಗ್ರಹಾಃ ಪೀಡಾಂ ನೈವ ಕುರ್ವನ್ತಿ ಕರ್ಹಿಚಿತ್ ॥ ೧೮೮॥

ಯದ್ಗೃಹೇ ಪೂಜಿತಂ ಹ್ಯೇತತ್ ಪುಸ್ತಕಂ ವಾ ಸುಭಕ್ತಿತಃ ।
ಶಕ್ತಿತೋ ಹವನಂ ಕುರ್ಯಾದ್ ವಿಘ್ನಸ್ತತ್ರ ವಿನಶ್ಯತಿ ॥ ೧೮೯॥

ಗರ್ಭಿಣೀ ಸ್ರಾವಯೇನ್ನಿತ್ಯಂ ಗರ್ಭದೋಷಾನ್ನಿವರ್ತತೇ ।
ಸೂತಿಕಾಯತನೇ ಪ್ರೋಕ್ತಂ ಸೂತಿಕಾಬಾಲಸೌಖ್ಯದಮ್ ॥ ೧೯೦॥

ಸರ್ವಂ ಮನ್ತ್ರಾಧಿಕಮಿದಂ ಭಕ್ತ್ಯಾ ಯಃ ಸರ್ವದಾ ಪಠೇತ್ ।
ಶ್ರಾವಯೇತ್ ಪಾಠಯೇದ್ವಾಪಿ ಸರ್ವತ್ರ ಲಭತೇ ಜಯಮ್ ॥ ೧೯೧॥

ಪುಸ್ತಕಾನಿ ಪ್ರದೇಯಾನಿ ವಿಪ್ರೇಭ್ಯೋ ನವಭಕ್ತಿತಃ ।
ಸೋಪಚಾರಾಣಿ ವಿಧಿನಾ ರೇಣುಕಾ ತುಷ್ಟಿಹೇತವೇ ॥ ೧೯೨॥

ಪುತ್ರಕಾಮೀ ಶುಭಾನ್ ಪುತ್ರಾನ್ ಧನಾರ್ಥೀ ವಿಪುಲಂ ಧನಮ್ ।
ಕನ್ಯಾರ್ಥೀ ಲಭತೇ ಕನ್ಯಾಂ ಕುಲಶೀಲಾದಿಮಣ್ಡಿತಾಮ್ ॥ ೧೯೩॥

ವಿದ್ಯಾಕಾಮೋ ಲಭೇದ್ವಿದ್ಯಾಂ ಕವಿತ್ವಂ ಕವಿತಾಪ್ರಿಯಃ ।
ಪ್ರಜ್ಞಾತಿಶಯಮಾಸಾದ್ಯ ಸಮರ್ಥೋ ಗ್ರನ್ಥಧಾರಣೇ ॥ ೧೯೪॥

ಮುಚ್ಯತೇ ನಿಗಡಾಬದ್ಧಃ ಸ್ಖಲದ್ಗೀಃ ಸ್ಪಷ್ಟವಾಗ್ಭವೇತ್ ।
ಕಾಮುಕಃ ಕಾಮಮಾಪ್ನೋತಿ ಭೂಪಾಲಂ ವಶಮಾನಯೇತ್ ॥ ೧೯೫॥

ಕುಷ್ಠಾಪಸ್ಮಾರರಹಿತೋ ಜ್ವರರೋಗವಿವರ್ಜಿತಃ ।
ರೋಗೀ ರೋಗವಿನಿರ್ಮುಕ್ತಃ ಶತ್ರುಸಙ್ಘಾಜ್ಜಯೋ ಭವೇತ್ ॥ ೧೯೬॥

ಶೀತಲೋ ಜಾಯತೇ ವಹ್ನಿರ್ವಿಷಂ ಸ್ಯಾದಮೃತೋಪಮಮ್ ।
ಶಸ್ತ್ರಾಣ್ಯುತ್ಪಲತಾಂ ಯಾನ್ತಿ ಪಠನಾದಸ್ಯ ಭಕ್ತಿತಃ ॥ ೧೯೭॥

ಅನ್ಧೋ ದೃಷ್ಟಿಮವಾಪ್ನೋತಿ ಬಧಿರಃ ಶ್ರುತಿಮಾನ್ ಭವೇತ್ ।
ಮೂಕೋ ವಾಚಾಲತಾಮೇತಿ ರೇಣುಕಾಯಾಃ ಪ್ರಸಾದತಃ ॥ ೧೯೮॥

ರೇಣುಕೇತ್ಯೇಕನಾಮೇದಂ ಧರ್ಮಾರ್ಥಕಾಮಮೋಕ್ಷದಮ್ ।
ಫಲಂ ನಾಮಸಹಸ್ರಸ್ಯ ಸಮರ್ಥೋ ವಕ್ತುಮಸ್ತಿ ಕಃ ॥ ೧೯೯॥

ರೇಣುಕಾಸ್ಮರಣಾನ್ನೂನಂ ವಿಷಂ ನಾಕ್ರಮೇತ್ ತನೌ ।
ಸರ್ವಪೀಡೋಪಶಾನ್ತಿಶ್ಚ ಸಕಲಾರ್ಥಸುಖೋದಯಃ ॥ ೨೦೦॥

ನಾರಾಯಣಃ ಶ್ರಿಯಾ ಯುಕ್ತಃ ಸಾವಿತ್ರೀಸಹಿತೋ ವಿಧಿಃ ।
ಅಹಂ ಭವಾನೀಸಹಿತೋ ರೇಣುಕಾರ್ಚನತೋಽರ್ಚಿತಾ ॥ ೨೦೧॥

ಸರ್ವಂ ಯಜ್ಞಫಲಂ ತಸ್ಯ ಪಾರಾಯಣಫಲಂ ತಥಾ ।
ಸಾಙ್ಗಯೋಗಫಲಂ ತಸ್ಯ ರೇಣುಕಾ ಯೇನ ಪೂಜಿತಾ ॥ ೨೦೨॥

ಉಚ್ಯತೇ ಬಾಹುಮುದ್ಧೃತ್ಯ ಬಹುನೋಕ್ತೇನ ಷಣ್ಮುಖ ।
ಸೇವ್ಯತೇ ರೇಣುಕಾ ಯೈಸ್ತೇ ಸೇವ್ಯನ್ತೇ ತ್ರಿದಶೈರಪಿ ॥ ೨೦೩॥

ಇತಿ ಶ್ರೀ ಪದ್ಮಪುರಾಣೇ ಮಾಯೋಪಾಖ್ಯಾನೇ ರೇಣುಕಾಪ್ರಸ್ತಾವೇ
ರೇಣುಕಾಪ್ರಕೃತಿಭಾವೇ ಶಙ್ಕರಷಣ್ಮುಖಸಂವಾದೇ
ಶಙ್ಕರಪ್ರೋಕ್ತಂ ರೇಣುಕಾಸಹಸ್ರನಾಮಸ್ತೋತ್ರಂ ಸಮ್ಪೂರ್ಣಮ್ ॥


Encoded and proofread by Singanallur Ganesan singanallur at gmail.com

Please send corrections to sanskrit@cheerful.com
Last updated ತ್oday
http://sanskritdocuments.org

Renuka Sahasranama Stotram Lyrics in Kannada PDF
% File name : reNukAsahasranAmastotra.itx
% Category : sahasranAma
% Location : doc\_devii
% Language : Sanskrit
% Subject : philosophy/hinduism/religion
% Transliterated by : Singanallur Ganesan singanallur at gmail.com
% Proofread by : Singanallur Ganesan singanallur at gmail.com
% Description-comments : from shrIreNukAtantram, Pitambarapeeth, Datia
% Latest update : March 24, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website