{॥ ಆನನ್ದಸಾಗರಸ್ತವಃ ॥}
॥ ಆನನ್ದಸಾಗರಸ್ತವಃ ॥
ವಿಜ್ಞಾಪನಾರ್ಹವಿರಲಾವಸರಾನವಾಪ್ತ್ಯಾ
ಮನ್ದೋದ್ಯಮೇ ಮಯಿ ದವೀಯಸಿ ವಿಶ್ವಮಾತುಃ ।
ಅವ್ಯಾಜಭೂತಕರುಣಾಪವನಾಪವಿದ್ಧಾ-
ನ್ಯನ್ತಃ ಸ್ಮರಾಮ್ಯಹಮಪಾಙ್ಗತರಙ್ಗಿತಾನಿ ॥ ೧ ॥

ಆವೇದ್ಯತಾಮವಿದಿತಂ ಕಿಮಥಾಪ್ಯನುಕ್ತಂ
ವಕ್ತವ್ಯಮಾನ್ತರರುಜೋಪಶಮಾಯ ನಾಲಮ್ ।
ಇತ್ಯರ್ಥ್ಯಸೇ ಕಿಮಪಿ ತಚ್ಛ್ರವಣೇ ನಿಧಾತುಂ
ಮಾತಃ ಪ್ರಸೀದ ಮಲಯಧ್ವಜಪಾಣ್ಡ್ಯಕನ್ಯೇ ॥೨॥

ಆಕ್ರನ್ದಿತಂ ರುದಿತಮಾಹತಮಾನನೇ ವಾ
ಕಸ್ಯಾರ್ದ್ರಮಸ್ತು ಹೃದಯಂ ಕಿಮತಃ ಫಲಂ ವಾ ।
ಯಸ್ಯಾ ಮನೋ ದ್ರವತಿ ಯಾ ಜಗತಾಂ ಸ್ವತನ್ತ್ರಾ
ತಸ್ಯಾಸ್ತವಾಮ್ಬ ಪುರತಃ ಕಥಯಾಮಿ ಖೇದಮ್ ॥ ೩ ॥

ಪರ್ಯಾಕುಲೇ ಮನಸಿ ವಾಚಿ ಪರಿಸ್ಖಲನ್ತ್ಯಾಂ
ಆವರ್ತಗರ್ತ ಇವ ಚಕ್ಷಿಷಿ ಘೂರ್ಣಮಾನೇ ।
ಕಸ್ತೇಽಭಿದಾಸ್ಯತಿ ಶಿವೇ ಮಮತಾಮವಸ್ಥಾಂ
ಕಾಲೇ ದಯಸ್ವ ಕಥಯಾಮಿ ತವಾಧುನೈವ ॥ ೪ ॥

ಭಕ್ತಿಂ ಕರೋತು ನಿತರಾಂ ಸುರಜಾತಿಮಾತ್ರೇ
ಗ್ರಾಮೀಣಜನ್ತುರಿವ ಪೌರಜನೇಷು ಲೋಕಃ ।
ಅನ್ಯತ್ರ ದೇವಿ ಭವದೀಯಪದಾರವಿನ್ದಾ-
ದಾಕೃಷ್ಯಮಾಣಮಪಿ ಮೇ ಹೃದಯಂ ನ ಯಾತಿ ॥ ೫ ॥

ಅಙ್ಗೀಕುರು ತ್ವಮವಧೀರಯ ವಾ ವಯಂ ತು
ದಾಸಾಸ್ತವೇತಿ ವಚಸೈವ ಜಯೇಮ ಲೋಕಾನ್ ।
ಏತಾವತೈವ ಸುಕರೋ ನನು ವಿಶ್ವಮಾತಃ
ಉದ್ದಣ್ಡದಣ್ಡಧರಕಿಙ್ಕರಮೌಲಿಭಙ್ಗಃ ॥ ೬ ॥

ವೇದಾನ್ತವಾಕ್ಯಜನಿತಂ ವಿಮಲಂ ವಿಚಾರೈಃ
ಆಸಾದ್ಯ ಬೋಧಮನುಚಿನ್ತನತೋಽಪರೋಕ್ಷಮ್ ।
ಮುಕ್ತಿಂ ವ್ರಜನ್ತಿ ಮನುಜಾ ಇತಿ ಸೂಕ್ತಿಮಾದ್ಯಾ-
ಮಾಲಮ್ಬ್ಯ ಕಸ್ತರಿತುಮರ್ಹತಿ ಶೈಲಕನ್ಯೇ ॥ ೭ ॥

ಏಕೈಕವೇದವಿಷಯಾಃ ಕತಿ ನಾಮಶಾಖಾ-
ಸ್ತಾಸಾಂ ಶಿರಾಂಸಿ ಕತಿ ನಾಮ ಪೃಥಗ್ವಿಧಾನಿ ।
ಅರ್ಥಾವಬೋಧವಿಧುರೋಽಕ್ಷರಲಾಭ ಏವ
ಕೇಷಾಂ ನೃಣಾಂ ಕತಿಭಿರಸ್ತು ಶರೀರಬನ್ಧೈಃ ॥ ೮ ॥

ನ್ಯಾಯಾಃ ಪರಸ್ಪರವಿಭಿನ್ನದಿಶಃ ಸಹಸ್ರ-
ಮುಚ್ಛಾವಚಾನಿ ಚ ಭವನ್ತ್ಯುಪಬೃಂಹಣಾನಿ ।
ಏವಂ ಸ್ಥಿತೇ ಗಿರಿಸುತೇ ನಿಗಮೋಪಲಾನಾಂ
ತಾತ್ಪರ್ಯಸಾರಮವಧಾರಯಿತುಂ ಕ್ಷಮಃ ಕಃ ॥ ೯ ॥

ಅಸ್ತ್ವಕ್ಷರಗ್ರಹವಿಧಿರ್ಜನುಷಾಂ ಸಹಸ್ರೈ-
ರಾಪಾತತೋ ಭವತು ನಾಮ ತತೋಽರ್ಥಬೋಧಃ ।
ದುರ್ವಾದಿಕಲ್ಪಿತವಿಕಲ್ಪತರಙ್ಗಸಾನ್ದ್ರಾನ್
ದುಷ್ಪೂರ್ವಪಕ್ಷಜಲಧೀನ್ ಕಥಮುತ್ತರೇಯಃ ॥ ೧೦ ॥

ಬ್ರಹ್ಮೇತಿ ಶಕ್ತಿರಿತಿ ಬನ್ಧವಿಮೋಚನೀತಿ
ಮಾಯಾಮಯೀತಿ ಮದನಾನ್ತಕವಲ್ಲಭೇತಿ ।
ಸಪ್ತಾಷ್ಟಶಬ್ದಪರಿವರ್ತನಮಾತ್ರ ಏವ
ಸಾಮರ್ಥ್ಯಮಾವಹತಿ ಶಾಸ್ತ್ರಪರಿಶ್ರಮೋಽಯಮ್ ॥ ೧೧ ॥

ತಸ್ಯೈ ಪ್ರಸೀದಸಿ ಗಿರೀನ್ದ್ರಸುತೇ ಯ ಇತ್ಥಂ
ಸಮ್ಪಾದಯೇತ ಶನಕೈರಪರೋಕ್ಷಬೋಧಮ್ ।
ಯಸ್ಮೈ ಪ್ರಸೀದಸಿ ಸ ಚ ಕ್ಷಮತೇಽವಬೋದ್ಧು-
ಮಿತ್ಥಂ ಪರಸ್ಪರಸಮಾಶ್ರಯಮೇತದಾಸ್ತೇ ॥ ೧೨ ॥

ಆಕರ್ಣಯ ತ್ವಮಿಮಮಭ್ಯುಪಗಮ್ಯ ವಾದಂ
ಜಾನಾತು ಕೋಽಪಿ ಯದಿ ವಾ ಹೃದಯಂ ಶ್ರುತೀನಾಮ್ ।
ತಸ್ಯಾಪ್ಯಸಙ್ಖ್ಯಭವಬನ್ಧಶತಾರ್ಜಿತೋಽಯಂ
ದ್ವೈತಭ್ರಮೋ ಗಲತು ಜನ್ಮಶತೈಃ ಕಿಯದ್ಭಿಃ ॥ ೧೩ ॥

ಕಾಲೇ ಮಹತ್ಯನವಧಾವಪತನ್ಕ್ವದಾಪಿ
ಕ್ವಾಪ್ಯನ್ತಿಮೇ ಜನುಷಿ ಕೋಽಪಿ ಗತಿಂ ಲಭೇತ ।
ಇತ್ಥಂ ಸಮರ್ಥನವಿಧಿಃ ಪರಮಾಗಮಾನಾಂ
ಪರ್ಯಾಯಸೂಕ್ತಿವಿಧಯಾ ನಯನಂ ನಞರ್ಥೇ ॥೧೪ ॥

ಏಕಾಪವರ್ಗಸಮಯೇ ಜಗತೋಽಪವರ್ಗಃ
ಸರ್ವಾಪವರ್ಗಸಮಯೇ ಪುನರಸ್ತಶಙ್ಕಃ ।
ಈದೃಗ್ವಿಧಂ ಕಮಪಿ ಪಕ್ಷಮಿಹಾವಲಮ್ಬ್ಯ
ಸ್ಥಾತುಂ ಸುಖಂ ಕ್ಷಮಮನೇವ ಪಥಾ ಪ್ರವೃತ್ತೈಃ ॥ ೧೫ ॥

ಅಭ್ಯಸ್ಯ ವೇದಮವಧಾರ್ಯ ಚ ಪೂರ್ವತನ್ತ್ರ-
ಮಾಲಕ್ಷ್ಯ ಶಿಷ್ಟಚರಿತಾನಿ ಪೃಥಗ್ವಿಧಾನಿ ।
ಅಧ್ಯಾಪನಾದಿಭಿರವಾಪ್ಯ ಧನಂ ಚ ಭೂರಿ
ಶರ್ಮಾಣಿ ಮಾತರಲಸಾಃ ಕಥಮಾಚರೇಯುಃ ॥ ೧೬ ॥

ಆಯಸ್ಯ ತಾವದಪಿ ಕರ್ಮ ಕರೋತು ಕಶ್ಚಿ-
ತ್ತೇನಾಪಿ ಮಾತರಧಿಕಂ ಕಿಮಿವಾನುಭಾವ್ಯಮ್ ।
ಅಸ್ತೇ ಸುಖಂ ಯ ಇಹ ಭಾರತವರ್ಷಸೀಮ-
ನ್ಯಾಸ್ತೇ ಸ ಕಿಞ್ಚಿದಿತ ಉತ್ತರತೋಽಪಸೃತ್ಯ ॥ ೧೭ ॥

ಕರ್ಮ ತ್ಯಜೇಮ ಯದಿ ನೂನಮಧಃ ಪತೇಮ
ಯದ್ಯಾಚರೇಮ ನ ಕದಾಪಿ ಭವಂ ತರೇಮ ।
ಕರ್ಮ ತ್ಯಜೇದಿತಿ ಚರೇದಿತಿ ಚ ಪ್ರವೃತ್ತಾಃ
ಭಾವೇನ ಕೇನ ನಿಗಮಾ ಇತಿ ನ ಪ್ರತೀಮಃ ॥ ೧೮ ॥

ಕರ್ಮಣ್ಯಕರ್ಮವಿಧಿರೇಷ ಯದಾಚರನ್ತಿ
ಕರ್ಮಾಣಿ ತತ್ತದನುಬನ್ಧಜಿಹಾಸಯೇತಿ ।
ಸತ್ಯಂ ತಥಾಪ್ಯಭಿನವೋ ಭವಿತಾ ನ ಬನ್ಧಃ
ಪ್ರಾಚೀನಬನ್ಧಹರಣೇ ಕ ಇವಾಭ್ಯುಪಾಯಃ ॥ ೧೯ ॥

ಪ್ರಾರಬ್ಧಕರ್ಮ ಕಿಯದಾರಭತೇ ಕಿಯದ್ವಾ
ಪ್ರಾರಪ್ಸ್ಯತೇ ಕಿಯದಿದಂ ಕ ಇವಾವಧತ್ತಾಮ್ ।
ಕಾಲಃ ಕಿಯಾನಿವ ಮಯಾ ಪ್ರತಿಪಾಲನೀಯೋ
ಯಸ್ಯ ಕ್ಷಣಾರ್ಧಮಪಿ ಕಲ್ಪಶತತ್ವಮೇತಿ ॥ ೨೦ ॥

ಪುಂಸಃ ಕ್ಷಣಾರ್ಧಮಪಿ ಸಂಸರಣಾಕ್ಷಮಸ್ಯ
ಸಾಙ್ಖ್ಯಾದಯಃ ಸರಣಯೋ ನ ವಿಶನ್ತಿ ಕರ್ಣಮ್ ।
ಸಙ್ಖ್ಯಾಯ ಗಾಙ್ಗಸಿಕತಾಃ ಸಕಲಾಶ್ಚ ಸೂಕ್ಷ್ಮಾ
ಭುಙ್ಕ್ಷ್ವೇತಿ ವಾಗಿವ ಮಹಾಕ್ಷುಧಯಾರ್ದಿತಸ್ಯ ॥ ೨೧ ॥

ಭಕ್ತಿಸ್ತು ಕಾ ಯದಿ ಭವೇದ್ರತಿಭಾವಭೇದ-
ಸ್ತತ್ಕೇವಲಾನ್ವಯಿತಯಾ ವಿಫಲೈವ ಭಕ್ತಿಃ ।
ಪ್ರೀತಿಸ್ತ್ವಯಿ ತ್ರಿಜಗದಾತ್ಮನಿ ಕಸ್ಯ ನಾಸ್ತಿ
ಸ್ವಾತ್ಮದ್ರುಹೋ ನ ಖಲು ಸನ್ತಿ ಜನಾಸ್ತ್ರಿಲೋಕ್ಯಾಮ್ ॥ ೨೨ ॥

ಆತ್ಮಾ ಸಮಸ್ತಜಗತಾಂ ಭವತೀತಿ ಸಮ್ಯ-
ಗ್ವಿಜ್ಞಾಯ ಯದ್ವಿತನುತೇ ತ್ವಯಿ ಭಾವಬನ್ಧಮ್ ।
ಸಾ ಭಕ್ತಿರಿತ್ಯಭಿಮತಂ ಯದಿ ಸಿದ್ಧಮಿಷ್ಟಂ
ವ್ಯರ್ಥಂ ವಿಶೇಷ್ಯಮಲಮಸ್ತು ವಿಶೇಷಣಂ ನಃ ॥ ೨೩ ॥

ಸ್ವಾತ್ಮೇತರತ್ವಮವಧಾರ್ಯ ಪರತ್ವಬುದ್ಧ್ಯಾ
ಯತ್ಪ್ರೀಯತೇ ಗುರುಜನೇಷ್ವಿವ ಸೈವ ಭಕ್ತಿಃ ।
ಸ್ಯಾದೇತದೇವಮಿಯಮೇವ ತು ಮೇ ಜಿಹಾಸ್ಯಾ
ದ್ವೈತಭ್ರಮಾತ್ಕಿಮಧಿಕಂ ಭವಬನ್ಧಮೂಲಮ್ ॥ ೨೪ ॥

ಸೇವೈವ ಭಕ್ತಿರಿತಿ ಕರ್ಮಪಥಪ್ರವೇಶಃ
ಸೇವ್ಯಪ್ರಸಾದಫಲಕಾ ಕಿಲ ಕರ್ಮಸೇವಾ ।
ಧ್ಯಾನಪ್ರವಾಹ ಇತಿ ಚೇಚ್ಛ್ರವಣಾತ್ ತೃತೀಯಃ
ಪ್ರಾಗೇವ ಮಾತರಯಮಾಕಲಿತೋಽಭ್ಯುಪಾಯಃ ॥ ೨೫ ॥

ಅತ್ರೈವ ದಾಸ್ಯಸಿ ವಿಮುಕ್ತಿಮಥಾಪಿ ಯಾಚೇ
ಮಾತಃ ಶರೀರಪತನಂ ಮಣಿಕರ್ಣಿಕಾಯಾಮ್ ।
ಅಸ್ತು ಸ್ವಕೃತ್ಯಮನುಕಮ್ಪನಮೀಶ್ವರಾಣಾಂ
ದಾಸಸ್ಯ ಕರ್ಮಕರತೈವ ತಥಾ ಸ್ವಕೃತ್ಯಮ್ ॥ ೨೬ ॥

ಸದ್ಯೋ ಭವೇತ್ಸುಕೃತಿನಾಮುಪದೇಶಲಾಭಃ
ಪಾಪಾತ್ಮನಾಂ ಬಹುತಿಥೇ ಸಮಯೇ ವ್ಯತೀತೇ ।
ಇತ್ಯಾದಿಭಿಃ ಕಿಲ ಪುರಾಣವಚೋಭಿರಮ್ಬ
ವಾರಾಣಸೀಮಪಿ ನ ಯಾಚಿತುಮುತ್ಸುಕೋಽಸ್ಮಿ ॥ ೨೭ ॥

ಆಕ್ರಾನ್ತಮನ್ತರರಿಭಿಃ ಮದಮತ್ಸರಾದ್ಯೈಃ
ಗಾತ್ರಂ ವಲೀಪಲಿತರೋಗಶತಾನುವಿದ್ಧಮ್ ।
ದಾರೈಃ ಸುತೈಶ್ಚ ಗೃಹಮಾವೃತಮುತ್ತಮರ್ಣೈಃ
ಮಾತಃ ಕಥಂ ಭವತು ಮೇ ಮನಸಃ ಪ್ರಸಾದಃ ॥ ೨೮ ॥

ಧನ್ಯಾಃ ಕತಿ ತ್ರಿಭುವನೇ ಪರಮೋಪಭಾಗ್ಯಂ
ಸಂಸಾರಮೇವ ಪರಮೇಶ್ವರಿ ಭಾವಯನ್ತಃ ।
ಆಭಾಸರೂಪಮವಬೋಧಮಿಮಂ ಸಮೇತ್ಯ
ಕ್ಲಿಶ್ಯೇ ಕಿಯತ್ಕಿಯದಹಂ ತ್ವಮುನಾ ಭವೇನ ॥ ೨೯ ॥

ಕಾ ಸಂಸ್ಕೃತಿಃ ಕಿಮಪಚಾರನಿಬನ್ಧನೇಯಂ
ಕೀದೃಗ್ವಿಧಸ್ಯ ತವ ಕಿಂ ಕ್ಷತಮೇತಯೇತಿ ।
ಪ್ರಶ್ನೇ ತು ನಾಸ್ಮಿ ಕುಶಲಃ ಪ್ರತಿವಕ್ತುಮೇವ
ಖೇದಸ್ತು ಮೇ ಜನನಿ ಕೋಽಪ್ಯಯಮೇವಮಾಸ್ತೇ ॥ ೩೦ ॥

ಏವಂ ಗತಸ್ಯ ಮಮ ಸಾಮ್ಪ್ರತಮೇತದರ್ಹ-
ಮತ್ರೇದಮೌಪಯಿಕಮಿತ್ಥಮಿದಂ ಚ ಸಾಧ್ಯಮ್ ।
ಅಸ್ಮಿನ್ಪ್ರಮಾಣಮಿದಮಿತ್ಯಪಿ ಬೋದ್ಧುಮಮ್ಬ
ಶಕ್ತಿರ್ನ ಮೇ ಭುವನಸಾಕ್ಷಿಣಿ ಕಿಂ ಕರೋಮಿ ॥ ೩೧ ॥

ನ ಜ್ಞಾಯತೇ ಮಮ ಹಿತಂ ನಿತರಾಮುಪಾಯೋ
ದೀನೋಽಸ್ಮಿ ದೇವಿ ಸಮಯಾಚರಣಾಕ್ಷಮೋಽಸ್ಮಿ ।
ತತ್ತ್ವಾಮನನ್ಯಶರಣಃ ಶರಣಂ ಪ್ರಪದ್ಯೇ
ಮೀನಾಕ್ಷಿ ವಿಶ್ವಜನನೀಂ ಜನನೀಂ ಮಮೈವ ॥ ೩೨ ॥

ಕಿಞ್ಚಿನ್ಮಯಾ ಶ್ರುತಿಷು ಕಿಞ್ಚಿದಿವಾಗಮೇಷು
ಶಾಸ್ತ್ರೇಷು ಕಿಞ್ಚಿದುಪದೇಶಪಥೇಷು ಕಿಞ್ಚಿತ್ ।
ಆಘ್ರಾತಮಸ್ತಿ ಯದತೋ ಭವತೀಂ ವರೀತುಂ
ಗೋಪ್ತ್ರೀತಿ ಕಾಚಿದುದಪದ್ಯತ ಬುದ್ಧಿರೇಷಾ ॥ ೩೩ ॥

ಬ್ರಹ್ಮೈವಮೇವಮಹಮೇಷ ತದಾಪ್ತ್ಯುಪಾಯ
ಇತ್ಯಾಗಮಾರ್ಥವಿಧುರಾಃ ಪ್ರಥಮೇ ದಯಾರ್ಹಾಃ ।
ತ್ವದ್ರಕ್ಷಕತ್ವಗುಣಮಾತ್ರವಿದೋ ದ್ವಿತೀಯಾ
ಇತ್ಯರ್ಥಯೇ ಸದಧಿಕಾರ ನಿರೂಪಣಾಯ ॥ ೩೪ ॥

ಮಾತಾ ಕರೋಷಿ ಮಮತಾಂ ಮಯಿ ಯಾವದೀಶ-
ತ್ತಾವದ್ಯತೇ ಮಮ ತತಃ ಕಿಮಿವಾಸ್ತಿ ಸಾಧ್ಯಮ್ ।
ಮಾಮಿತ್ಥಮಿತ್ಥಮುಪಯುಙ್ಕ್ಷ್ವ ನ ವಿಸ್ಮರೇತಿ
ಕಿಂ ಸ್ವಾಮಿನಂ ತ್ವರಯತೇ ಕ್ವಚನ ಸ್ವಭೃತ್ಯಃ ॥ ೩೫ ॥

ತ್ಯಾಜ್ಯಂ ತ್ಯಜಾನಿ ವಿಹಿತಂ ಚ ಸಮಾಚರಾಣಿ
ನಿತ್ಯೇಷು ಶಕ್ತಿಮನುರುಧ್ಯ ಹು ವರ್ತಿತವ್ಯಮ್ ।
ತದ್ಬುದ್ಧಿಶಕ್ತಿಮನುರುದ್ಧ್ಯ ನ ಕಾರ್ಯಶಕ್ತಿ-
ಮಿತ್ಯೇತದೇವ ತು ಶಿವೇ ವಿನಿವೇದಯಾಮಿ ॥ ೩೬ ॥

ಆತ್ಮೈವ ಭಾರ ಇತಿ ತಂ ತ್ವಯಿ ಯೋ ನಿಧತ್ತೇ
ಸೋಽಙ್ಗಾನಿ ಕಾನಿ ಕಲಯತ್ವಲಸಃ ಪ್ರಪತ್ತೇಃ ।
ವಿಶ್ವಸ್ಯ ಸಾಕ್ಷಿಣಿ ವಿಲಕ್ಷಣಲಕ್ಷಣಾ ಯಾ
ವಿಸ್ರಮ್ಭಸಮ್ಪದಿಯಮೇವ ಸಮಸ್ತಮಙ್ಗಮ್ ॥ ೩೭ ॥

ತ್ವತ್ಪ್ರೇರಣೇನ ಮಿಷತಃ ಶ್ವಸತೋಽಪಿ ಮಾತಃ
ಪ್ರಾಮಾದಿಕೇಽಪಿ ಸತಿ ಕರ್ಮಣಿ ಮೇ ನ ದೋಷಃ ।
ಮಾತ್ರೈವ ದತ್ತಮಶನಂ ಗ್ರಸತಃ ಸುತಸ್ಯ
ಕೋ ನಾಮ ವಕ್ಷ್ಯತಿ ಶಿಶೋರತಿಭುಕ್ತಿದೋಷಮ್ ॥ ೩೮ ॥

ಮುಕ್ತಿಂ ನಿಷಾಧಯಿಷತಾಂ ನಿಜಯೈವ ಬುದ್ಧ್ಯಾ
ಪ್ರಾರಬ್ಧಕರ್ಮ ಭವತು ಪ್ರತಿಬನ್ಧಹೇತುಃ ।
ತ್ವಾಮೇವ ಸಾಧನತಯಾಪಿ ಸಮಾಶ್ರಿತಾನಾಂ
ತುಲ್ಯಂ ತದಮ್ಬ ಯದಿ ಕಸ್ತವ ವೀರವಾದಃ ॥ ೩೯ ॥

ಪ್ರಾರಬ್ಧಕರ್ಮ ಗಿರಿಜೇ ಭವದಾಶ್ರಿತಾನಾ-
ಮನ್ಯತ್ರ ಸಂಕ್ರಮಯ ನಾಶಯ ವಾ ಸಮೂಲಮ್ ।
ಮರ್ತ್ಯಾಶ್ಚ ಖಲ್ವಪಿ ವಿಷಂ ವಪುಷಿ ಪ್ರಸಕ್ತಂ
ಸಂಕ್ರಾಮಯನ್ತಿ ಪರತೋಽಪಿ ಚ ನಾಶಯನ್ತಿ ॥ ೪೦ ॥

ತ್ವದ್ದರ್ಶನಶ್ರವಣಚಿನ್ತನವನ್ದನಾದಿ-
ಷ್ವಕ್ಷಾಣಿ ದೇವಿ ವಿನಿಯುಜ್ಯ ಯಥಾಧಿಕಾರಮ್ ।
ರಕ್ಷೇತ್ಯಸಙ್ಖ್ಯಭವಸಮ್ಭೃತಯೈವ ಮೈತ್ರ್ಯಾ
ರುನ್ಧ್ಯಾಂ ಯದಿ ಸ್ಥಿರಮಮೂನ್ಯಧುನೈವ ನ ಸ್ಯುಃ ॥ ೪೧ ॥

ತ್ರಾತವ್ಯ ಏಷ ಇತಿ ಚೇತ್ಕರುಣಾ ಮಯಿ ಸ್ಯಾ-
ತ್ತ್ರಾಯಸ್ವ ಕಿಂ ಸುಕೃತದುಷ್ಕೃತಚಿನ್ತಯಾ ಮೇ ।
ಕರ್ತುಂ ಜಗತ್ತಿರಯಿತುಂ ಚ ವಿಶೃಂಖಲಾಯಾಃ
ಕರ್ಮಾನುರೋಧ ಇತಿ ಕಂ ಪ್ರತಿ ವಞ್ಚನೇಯಮ್ ॥ ೪೨ ॥

ತ್ವಯ್ಯರ್ಪಿತಂ ಪ್ರಥಮಮಪ್ಪಯಯಜ್ವನೈವ
ಸ್ವಾತ್ಮಾರ್ಪಣಂ ವಿದಧತಾ ಸ್ವಕುಲಂ ಸಮಸ್ತಮ್ ।
ಕಾ ತ್ವಂ ಮಹೇಶಿ ಕುಲದಾಸಮುಪೇಕ್ಷಿತುಂ ಮಾಂ
ಕೋ ವಾನುಪಾಸಿತುಮಹಂ ಕುಲದೇವತಾಂ ತ್ವಾಮ್ ॥ ೪೩ ॥

ಮೌಢ್ಯಾದಹಂ ಶರಣಯಾಮಿ ಸುರಾನ್ತರಂ ಚೇ-
ತ್ಕಿಂ ತಾವತಾ ಸ್ವಮಪಿ ತಸ್ಯ ಭವಾಮಿ ಮಾತಃ ।
ಅಜ್ಞಾನತಃ ಪರಗೃಹಂ ಪ್ರವಿಶನ್ಪರಸ್ಯ
ಸ್ವತ್ವಂ ಪ್ರಯಾಸ್ಯತಿ ಪಶುಃ ಕಿಮು ರಾಜಕೀಯಃ ॥ ೪೪ ॥

ಆಧಾಯ ಮೂರ್ಧನಿ ವೃಥೈವ ಭರಂ ಮಹಾನ್ತಂ
ಮೂರ್ಖಾ ನಿಮಜ್ಜಥ ಕಥಂ ಭವಸಾಗರೇಽಸ್ಮಿನ್ ।
ವಿನ್ಯಸ್ಯ ಭಾರಮಖಿಲಂ ಪದಯೋರ್ಜನನ್ಯಾ
ವಿಸ್ರಬ್ಧಮುತ್ತರತ ಪಲ್ವಲತುಲ್ಯಮೇನಮ್ ॥ ೪೫ ॥

ಕ್ವೇದಂ ಪತಿಷ್ಯತಿ ವಪುಃ ಕ್ವ ತತೋ ನು ಗಮ್ಯಂ
ಕೋ ದಣ್ಡಯಿಷ್ಯತಿ ಕಿಯಂತಮನೇಹಸಂ ವಾ ।
ಕಿಂ ತಸ್ಯ ಸನ್ತರಣಸಾಧನಮಿತ್ಯನನ್ತಾ
ಚಿನ್ತಾ ಸ್ಥಿತಾ ತ್ವಯಿ ಶನೈರವತಾರಿತಾ ಸಾ ॥ ೪೬ ॥

ಜ್ಞಾನಂ ವಿಶೇಯಮುತ ತೇನ ವಿನೋದ್ಧರೇಯಂ
ಪ್ರಾರಬ್ಧಮಪ್ಯಪಲಪೇಯಮುತಾನುರುಂಧ್ಯಾಮ್ ।
ಇತ್ಥಂ ಸಕೃತ್ಪ್ರಪದನೈಕವಶಂವದಾಯಾ
ಮಾತುರ್ಮಯಿ ಪ್ರವವೃತೇ ಮಹತೀಹ ಚಿನ್ತಾ ॥ ೪೭ ॥

ಏತಜ್ಜಡಾಜಡವಿವೇಚನಮೇತದೇವ
ಕ್ಷಿತ್ಯಾದಿತತ್ವಪರಿಶೋಧನಕೌಶಲಂ ಚ ।
ಜ್ಞಾನಂ ಚ ಶೈವಮಿದಮಾಗಮಕೋಟಿಲಭ್ಯಂ
ಮಾತುರ್ಯದಙ್ಘ್ರಿಯುಗಲೇ ನಿಹಿತೋ ಮಯಾತ್ಮಾ ॥ ೪೮ ॥

ಷಟ್ತ್ರಿಂಶದಾವರಣಮಧ್ಯಜುಷಿ ತ್ವದಙ್ಘ್ರೌ
ಹಾಲಾಸ್ಯನಾಥದಯಿತೇ ನಿಹಿತೋ ಮಯಾತ್ಮಾ ।
ಭೂಭುತಲತ್ರಿದಿವವರ್ತಿಷು ಕಃ ಕ್ಷಮೇತ
ತಚ್ಚಕ್ಷುಶಾದಿ ನಿಭೃತೇನ ನಿರೀಕ್ಷಿತುಂ ಮಾಮ್ ॥ ೪೯ ॥

ಬನ್ಧಂ ಹರಿಷ್ಯಸಿ ಸುಖಂ ವಿತರಿಷ್ಯಸೀತಿ
ನಿಶ್ಚಪ್ರಚಂ ನಿಖಿಲಮಮ್ಬ ತದಾಸ್ತ ಏವ ।
ಸಮ್ಪ್ರತ್ಯಹಂ ತ್ವಯಿ ನಿಧಾಯ ಭರಂ ಸಮಸ್ತಂ
ಯಾನಿರ್ವೃಣೋಮಿಕಿಮಿತೋಽಪಿ ಮಮಾಪವರ್ಗೇ ॥ ೫೦ ॥

ಕಾಶ್ಯಾಂ ನಿಪಾತಯ ವಪುಃ ಶ್ವಪಚಾಲಯೇ ವಾ
ಸ್ವರ್ಗಂ ನಯ ತ್ವಮಪವರ್ಗಮಧೋಗತಿಂ ವಾ ।
ಅದ್ಯೈವ ವಾ ಕುರು ದಯಾಂ ಪುನರಾಯತೌ ವಾ
ಕಃ ಸಮ್ಭ್ರಮೋ ಮಮ ಧನೇ ಧನಿನಃ ಪ್ರಮಾಣಮ್ ॥ ೫೧ ॥

ನಾಹಂ ಸಹೇ ತವ ಕಥಾಶ್ರವಣಾನ್ತರಾಯಂ
ನಾಹಂ ಸಹೇ ತವ ಪದಾರ್ಚನವಿಚ್ಯುತಿಂ ವಾ ।
ಮೋಕ್ಷಂ ದಿಶೈತದವಿರುದ್ಧಮಿದಂ ನ ಚೇತ್ಯಾ-
ನ್ನೈವಾಸ್ತು ಮಾತರಪವರ್ಗಮಹೋಪಸರ್ಗಃ ॥ ೫೨ ॥

ಆಚೂಡಮಾಚರಣಮಮ್ಬ ತವಾನುವಾರ-
ಮನ್ತಃಸ್ಮರನ್ಭುವನಮಙ್ಗಲಮಙ್ಗಮಙ್ಗಮ್ ।
ಆನನ್ದಸಾಗರತರಙ್ಗಪರಮ್ಪರಾಭಿ-
ರಾನ್ದೋಲಿತೋ ನ ಗಣಯಾಮಿ ಗತಾನ್ಯಹಾನಿ ॥ ೫೩ ॥

ಪಾಷಾಣತೋಽಪಿ ಕಠಿನೇ ಶಿರಸಿ ಶ್ರುತೀನಾಂ
ಪ್ರಾಯಃ ಪರಿಕ್ರಮವಶಾದಿವ ಪಾಟಲಾಭಮ್ ।
ಅಮ್ಬ ಸ್ಮರೇಯಮಮೃತಾರ್ಣವಮಾಥಲಬ್ಧ-
ಹೈಯ್ಯಙ್ಗವೀನಸು ಕುಮಾರಮಿದಂ ಪದಂ ತೇ ॥ ೫೪ ॥

ಯೇ ನಾಮ ಸನ್ತಿ ಕತಿಚಿದ್ಗುರವಿಸ್ತ್ರಿಲೋಕ್ಯಾಂ
ತೇಷಾಮಪಿ ಸ್ವಯಮುಪೇತವತಾ ಗುರುತ್ವಮ್ ।
ಪಾದೇನ ಮೂರ್ಧ್ನಿ ವಿಧೃತೇನ ವಯಂ ತವಾಮ್ಬ
ಸಂಸಾರಸಾಗರಮಿಮಂ ಸುಖಮುತ್ತರಾಮಃ ॥ ೫೫ ।

ಸಾಧಾರಣೇ ಸ್ಮರಜಯೇ ನಿತಿಲಾಕ್ಷಿಸಾಧ್ಯೇ
ಭಾಗೀ ಶಿವೋ ಭಜತು ನಾಮ ಯಶಃ ಸಮಗ್ರಮ್ ।
ವಾಮಾಙ್ಘ್ರಿಮಾತ್ರಕಲಿತೇ ಜನನಿ ತ್ವದೀಯೇ
ಕಾ ವಾ ಪ್ರಸಕ್ತಿರಪಿ ಕಾಲಜಯೇ ಪುರಾರೇಃ ॥ ೫೬ ॥

ಸ್ಯಾತ್ಕೋಮಲಂ ಯದಿ ಮನೋ ಮಮ ವಿಶ್ವಮಾತಃ
ತತ್ಪಾದಯೋರ್ಮೃದುಲಯೋಸ್ತವ ಪಾದುಕಾಽಸ್ತು ।
ಸ್ಯಾತ್ಕರ್ಕಶಂ ಯದಿ ಕರಗ್ರಹಣೇ ಪುರಾರೇಃ
ಅಶ್ಮಾಧಿರೋಪಣವಿಧೌ ಭವತೂಪಯೋಗಃ ॥ ೫೭ ॥

ಪ್ರಸ್ನಿಗ್ಧಮುಗ್ಧರುಚಿಪಾದತಲೇ ಭವತ್ಯಾ
ಲಗ್ನಂ ದೃಢಂ ಯದಿಹ ಮೇ ಹೃದಯಾರವಿನ್ದಮ್ ।
ಏಷೈವ ಸಾಗ್ರಭುವನದ್ವಿಶತೀಪತಿತ್ವ-
ಸಾಮ್ರಾಜ್ಯಸೂಚನಕರೀ ತವ ಪದ್ಮರೇಖಾ ॥ ೫೮ ॥

ಅಪ್ರಾಕೃತಂ ಮೃದುಲತಾಮವಿಚಿನ್ತ್ಯ ಕಿಞ್ಚಿ-
ದಾಲಮ್ಬಿತಾಸಿ ಪದಯೋಃ ಸುದೃಢಂ ಮಯಾ ಯತ್ ।
ತನ್ಮೇ ಭವಾರ್ಣವನಿಮಜ್ಜನಕಾತರಸ್ಯ
ಮಾತಃ ಕ್ಷಮಸ್ವ ಮಧುರೇಶ್ವರಿ ಬಾಲಕೃತ್ಯಮ್ ॥ ೫೯ ॥

ಯತ್ರಾನಮನ್ಪಶುಪತಿಃ ಪ್ರಣಯಾಪರಾಧೇ
ಮನ್ದಂ ಕಿಲ ಸ್ಪೃಶತಿ ಚನ್ದ್ರಕಲಾಞ್ಚಲೇನ ।
ಪುಷ್ಪಾರ್ಚನೇಽಪಿ ಮೃದಿತಂ ಪದಯೋರ್ಯುಗಂ ತ-
ನ್ಮಾತಸ್ತುದನ್ತಿ ನ ಕಥಂ ಪರುಷಾ ಗಿರೋ ಮೇ ॥ ೬೦ ॥

ಅವ್ಯಾಜಸುನ್ದರಮನುತ್ತರಮಪ್ರಮೇಯ-
ಮಪ್ರಾಕೃತಂ ಪರಮಮಙ್ಗಲಮಙ್ಘ್ರಿಪದ್ಮಮ್ ।
ಸಂದರ್ಶಯೇದಪಿ ಸಕೃದ್ಭವತೀ ದಯಾರ್ದ್ರಾ
ದ್ರಷ್ಟಾಸ್ಮಿ ಕೇನ ತದಹಂ ತು ವಿಲೋಚನೇನ ॥ ೬೧ ॥

ದಿವ್ಯಾ ದೃಶೋಽಪಿ ದಿವಿಷದ್ಗ್ರಹಣೋಚಿತಾನಿ
ವಸ್ತೂನಿ ಕಾಮಮವಧಾರಯಿತುಂ ಕ್ಷಮನ್ತೇ ।
ತ್ವನ್ಮಾತ್ರವೇದ್ಯವಿಭವೇ ತವ ರೂಪಧೇಯೇ
ತ್ವದ್ಭಾವ ಏವ ಶರಣಂ ಪರಿಶೇಷಿತೋ ನಃ ॥ ೬೨ ॥

ಅಸ್ಮಿನ್ಮಹತ್ಯನವಧೌ ಕಿಲ ಕಾಲಚಕ್ರೇ
ಧನ್ಯಾಸ್ತು ಯೇ ಕತಿಪಯೇ ಶುಕಯೋಗಿಮುಖ್ಯಾಃ ।
ಲೀನಾಸ್ತ್ವದಙ್ಘ್ರಿಯುಗಲೇ ಪರಿಶುದ್ಧಸತ್ವಾನ್
ತಾನಾತ್ಮನಸ್ತವ ನಖಾನವಧಾರಯಾಮಃ ॥ ೬೩ ॥

ಆ ಶೈಶವಾನ್ಮಮತಯಾ ಕಲಿತಸ್ತ್ವಯಾಸಾ-
ವಾನೃಣ್ಯಮಮ್ಬ ತವ ಲಬ್ಧುಮನಾ ಮೃಗಾಙ್ಗಕಃ ।
ಸ್ವಾತ್ಮಾನಮೇವ ನಿಯತಂ ಬಹುಧಾ ವಿಭಜ್ಯ
ತ್ವತ್ಪಾದಯೋರ್ವಿನಿದಧೇ ನಖರಾಪದೇಶಾತ್ ॥ ೬೪ ॥

ನಾನ್ತಃ ಪ್ರವೇಶಮಯತೇ ಕಿಮಪಿ ಶ್ರುತಂ ಮೇ
ನಾಸ್ತಿಕ್ಯವಾದಶಿಲಯಾ ಪ್ರತಿರುಧ್ಯಮಾನಮ್ ।
ತತ್ಪಾತಯಾಮ್ಯಹಮಿಮಾಂ ಮಹತೀಮಧಸ್ತಾ-
ತ್ಪಾದೋದಕೇನ ಕಿಯತಾ ಪರದೇವತಾಯಾಃ ॥ ೬೫ ॥

ಸನ್ನಾಹಿಭಿಃ ಯಮಭಟೈಃ ಪರಿವಾರ್ಯಮಾಣೇ
ಮಯ್ಯರ್ಭಕೇ ಕರುಣಯಾ ಸ್ವಯಮಾಪತನ್ತ್ಯಾಃ ।
ಆಕರ್ಣಯೇಯಮಪಿ ನಾಮ ವಿರಾಮಕಾಲೇ
ಮಾತಸ್ತವಾಙ್ಘ್ರಿಮಣಿನೂಪುರಶಿಞ್ಜಿತಾನಿ ॥ ೬೬ ॥

ಬ್ರಹ್ಮೇಶಕೇಶವಮುಖೈರ್ಬಹುಭಿಃ ಕುಮಾರೈಃ
ಪರ್ಯಾಯತಃ ಪರಿಗೃಹೀತವಿಮುಕ್ತದೇಶಮ್ ।
ಉತ್ಸಙ್ಗಮಮ್ಬ ತವ ದಾಸ್ಯಸಿ ಮೇ ಕದಾ ತ್ವಂ
ಮಾತೃಪ್ರಿಯಂ ಕಿಲ ಜಡಂ ಸುತಮಾಮನನ್ತಿ ॥ ೬೭ ॥

ಊರೌ ಶಿರಸ್ತವ ನಿವೇಶ್ಯ ದಯಾವಿತೀರ್ಣ-
ಸಂವ್ಯಾನಪಲ್ಲವಸಮೀರವಿನೀತಖೇದಮ್ ।
ಅತ್ರೈವ ಜನ್ಮನಿ ವಿಭೋಃ ಪರಮೋಪದೇಶ-
ಮಾಕರ್ಣಯೇಯಮಪಿ ಕಿಂ ಮಣಿಕರ್ಣಿಕಾಯಾಮ್ ॥ ೬೮ ॥

ಕಾಞ್ಚೀಗುಣಗ್ರಥಿತಕಾಞ್ಚನಚೇಲದೃಶ್ಯ-
ಚಣ್ಡಾತಕಾಂಶುಕವಿಭಾಪರಭಾಗಶೋಭಿ ।
ಪರ್ಯಙ್ಕಮಣ್ಡಲಪರಿಷ್ಕರಣಂ ಪುರಾರೇಃ
ಧ್ಯಾಯಾಮಿ ತೇ ವಿಪುಲಮಮ್ಬ ನಿತಮ್ಬಬಿಮ್ಬಮ್ ॥ ೬೯ ॥

ಗರ್ಭೇ ನಿವೇಶ್ಯ ಭುವನಾನಿ ಚತುರ್ದಶಾಪಿ
ಸಂರಕ್ಷಿತುಂ ಕಲಿತನಿಶ್ಚಿತಯಾ ಭವತ್ಯಾ ।
ಪ್ರಾಕಾರಮೇವ ರಚಿತಂ ಪರಿತೋಽಪಿ ನೂನ-
ಮೂಹೇ ಸುವರ್ಣಮಯಮೇದುರಪಟ್ಟಬನ್ಧಮ್ ॥ ೭೦ ॥

ಮುಕ್ತಾಶ್ಚ ಖಲ್ವಪಿ ಯದಿ ತ್ರಿಪುರೇ ಭವತ್ಯಾಃ
ಸ್ತನ್ಯಾಶಯಾ ಸ್ತನತಟಂ ನ ಪರಿತ್ಯಜನ್ತಿ ।
ಅಸ್ಮಾಕಮುದ್ಭಟಭವಜ್ವರತಾಪಿತಾನಾ-
ಮಾರ್ದ್ರೀಭವನ್ ತು ವದನಾನಿ ಕುತೋ ನ ಹೇತೋಃ ॥ ೭೧ ॥

ನಷ್ಟೋಪಲಬ್ಧಮಧಿಗತ್ಯ ಶಿಶುಂ ಚಿರಾನ್ಮಾಂ
ವಾತ್ಸಲ್ಯವಿದ್ರುತಹೃದಃ ಪರದೇವತಾಯಾಃ ।
ಕ್ಲಿದ್ಯತ್ಪಯೋಧರವಿನಿಃಸೃತದುಗ್ಧಬಿನ್ದು-
ನಿಷ್ಯನ್ದಪಙ್ಕ್ತಿರಿವ ದೀವ್ಯತಿ ಹಾರಯಷ್ಟಿಃ ॥ ೭೨ ॥

ಯತ್ತದ್ಧನುರ್ಜನಮನೋಮಯಮೈಕ್ಷವಂ ತೇ
ತಸ್ಯಾಸ್ತು ದೇವಿ ಹೃದಯಂ ಮಮ ಮೂಲದೇಶಃ ।
ಚಾಪಾಧಿರೋಪಣವಿಧೌ ಚರಣಾಞ್ಚಲೇನ
ಸಮ್ಭಾವ್ಯತೇ ಕಿಲ ಸಮಾಕ್ರಮಣಂ ಕದಾಚಿತ್ ॥ ೭೩ ॥

ಆಸ್ಥಾಯ ದಾರುಣತರಂ ಕಮಪಿ ಸ್ವಭಾವ-
ಮತ್ಯನ್ತದುಷ್ಕೃತಕೃತಾಮಪಿ ಶಿಕ್ಷಣಾಯ ।
ಗೃಹ್ಣಾಸಿ ಸಾಯಕಪದೇ ಕುಸುಮಾನ್ಯಮೂನಿ
ಮಾತಃ ಸುತೇಷು ಮಹತೀ ಕಿಲ ರೂಕ್ಷತೇಯಮ್ ॥ ೭೪ ॥

ಪಾಶಂ ಸೃಣಿಂ ಚ ಕರಯೋಸ್ತವ ಭಾವಯನ್ತಃ
ಸಂಸ್ತಮ್ಭಯನ್ತಿ ವಶಯನ್ತಿ ಚ ಸರ್ವಲೋಕಾನ್ ।
ಚಾಪಂ ಶರಂ ಚ ಸಕೃದಮ್ಬ ತವ ಸ್ಮರನ್ತೋ
ಭೂಪಾಲತಾಂ ದಧತಿ ಭೋಗಪಥಾವತೀರ್ಣಃ ॥ ೭೫ ॥

ಪಾಶಾಙ್ಕುಶೌ ತವ ಕರೇ ಪರಿಚಿನ್ತ್ಯ ರಾಗ-
ದ್ವೇಷೌ ಜಯನ್ತಿ ಪರಮಾರ್ಥವಿದಸ್ತು ಧನ್ಯಾಃ ।
ಏಕತ್ರ ಚಾಪಮಿತರತ್ರ ಶರಂ ಚ ಮತ್ವಾ
ವ್ಯಾವರ್ತಯನ್ತಿ ಹೃದಯಂ ವಿಷಯಾನ್ಧಕೂಪಾತ್ ॥ ೭೬ ॥

ಉತ್ಕ್ರಾನ್ತಮಾನ್ತರಮಿದಂ ಶರಣಂ ಜನಾನಾ-
ಮಪ್ಯೇತಿ ಚನ್ದ್ರಮಿತಿ ಹೇ ಶ್ರುತಯೋ ವದನ್ತಿ ।
ಆಸ್ತಾಮಿದಂ ಮಮ ತು ದೇವಿ ಮನೋಽಧುನೈವ
ಲೀನಂ ದೃಢಂ ವದನಚನ್ದ್ರಮಸಿ ತ್ವದೀಯೇ ॥ ೭೭ ॥

ವಿದ್ಯಾತ್ಮನೋ ಜನನಿ ತಾವಕದನ್ತಪಙ್ಕ್ತೇಃ
ವೈಮಲ್ಯಮೀದೃಗಿತಿ ವರ್ಣಯಿತುಂ ಕ್ಷಮಃ ಕಃ ।
ತತ್ಸಮ್ಭವಾ ಯದಮಲಾ ವಚಸಾಂ ಸವಿತ್ರೀ
ತನ್ಮೂಲಕಂ ಕವಿಯಶೋಽಪಿ ತತಸ್ತರಾಂ ಯತ್ ॥ ೭೮ ॥

ಸ್ವಚ್ಛಾಪಿ ತೇ ವಹತಿ ಯತ್ಕಿಲ ದನ್ತಪಙ್ಕ್ತಿಃ
ಸ್ವಚ್ಛನ್ದನಿರ್ದಲಿತದಾಡಿಮಬೀಜಶೋಭಾಮ್ ।
ತನ್ಮೇ ರಜೋವ್ಯತಿಕರಾಧಿಕಪಾಟಲಿಮ್ನಿ
ಚಿತ್ತೇ ಪರಂ ಪರಿಚಯಾದಿತಿ ಚಿನ್ತಯಾಮಿ ॥ ೭೯ ॥

ಅರ್ಧಂ ಜಿತತ್ರಿಪುರಮಮ್ಬ ತವ ಸ್ಮಿತಂ ಚೇ-
ದರ್ಧಾನ್ತರೇಣ ಚ ತಥಾ ಭವಿತವ್ಯಮೇವ ।
ತಚ್ಚಿನ್ತಯೇ ಜನನಿ ಕಾರಣಸೂಕ್ಷ್ಮರೂಪ-
ಸ್ಥೂಲಾತ್ಮಕತ್ರಿಪುರಶಾನ್ತಿಕೃತೇ ಸ್ಮಿತಂ ತೇ ॥೮೦ ॥

ಮತ್ಕ್ಲೇಶದರ್ಶನಪರಿದ್ರವದನ್ತರಙ್ಗ-
ಹೈಯ್ಯಙ್ಗವೀ ನಪರಿವಾಹನಿಭಂ ಜನನ್ಯಾಃ ।
ಅನ್ತಸ್ತಮೋಪಹಮನುಸ್ಮರತಾಂ ಜನಾನಾಂ
ಮನ್ದಸ್ಮಿತಂ ಭುವನಮಙ್ಗಲಮಸ್ತು ಭೂತ್ಯೈ ॥ ೮೧ ॥

ಸಾಂಸಿದ್ಧಿಕಾನನಸರೋರುಹದಿವ್ಯಗನ್ಧ-
ಸಾನ್ದ್ರೀಕೃತೇನ್ದುಶಕಲಾಕಲಿತಾಧಿವಾಸಮ್ ।
ತಾಮ್ಬೂಲಸಾರಮಖಿಲಾಗಮಬೋಧಸಾರಂ
ಮಾತರ್ವಿಧೇಹಿ ಮಮ ವಕ್ತ್ರಕಲಾಚಿಕಾಯಾಮ್ ॥ ೮೨ ॥

ನಾಸಾಮಣಿಸ್ತವ ಶಿವೇ ಚಿರಸಂಸ್ತವೇನ
ಪ್ರತ್ಯಾಹೃತೇ ಮನಸಿ ಭಾತಿ ತಪೋಧನಾನಾಮ್ ।
ಅಜ್ಞಾನಸನ್ತತಿನಿಶಾತ್ಯಯಸೂಚನಾರ್ಥಂ
ಆವಿರ್ಭವನ್ತ್ಯಸುರದೇಶಿಕತಾರಕೇವ ॥ ೮೩ ॥

ತಾಮ್ಬೂಲಗರ್ಭಪರಿಫುಲ್ಲಕಪೋಲಲಕ್ಷ್ಯ-
ತಾಟಙ್ಕಮೌಕ್ತಿಕಮಣಿಪ್ರತಿಬಿಮ್ಬದಮ್ಭಾತ್ ।
ಅಸ್ತದ್ವಯವ್ಯತಿಕರಾಮಲಸತ್ವಮಾದ್ಯಂ
ವರ್ಣಂ ಬಿಭರ್ತಿ ಜಠರೇ ತವ ವಕ್ತ್ರಬಿಮ್ಬಮ್ ॥ ೮೪ ॥

ದತ್ತೇ ಶ್ರಿಯಂ ಬಹುವಿಧಾಂ ಕುಶಲಾನಿ ದತ್ತೇ
ದತ್ತೇ ಪದಂ ಸುರಪತೇರಪಿ ಲೀಲಯೈವ ।
ಈದೃಗ್ವಿಧಾಮ್ಬ ತವ ದೃಷ್ಟಿರಿತೋಽಧಿಕಾ ವಾ
ನಾದ್ಯಾಪಿ ಕರ್ಣಮತಿವರ್ತಿತುಮೀಶ್ವರೀಯಮ್ ॥ ೮೫ ॥

ಪಾಶಾಣಕೂಟಕಠಿಣೇ ಜನದುರ್ವಿಗಾಹೇ
ವ್ಯರ್ಥಂ ಮಹತ್ಯುಪನಿಷದ್ವಿಪಿನೇ ಪ್ರವೃತ್ತಾ ।
ಸೇವ್ಯೇತ ಕೇನ ತವ ಲೋಚನಚನ್ದ್ರಿಕೇಯ-
ಮೇನಾಂ ನಿಪಾತಯ ಸಕೃನ್ಮಯಿ ತಪ್ಯಮಾನೇ ॥ ೮೬ ॥

ಕಾಮಂ ಶಿವೇನ ಶಮಿತಂ ಪುನರುಜ್ಜಗಾರ
ದೃಷ್ಟಿಸ್ತವೇತಿ ಕಿಮಿಯಂ ಜನನಿ ಸ್ತುತಿಸ್ತೇ ।
ಲೀಲಾಪ್ರಸೂತಪುರುಷಾರ್ಥಚತುಷ್ಟಯಾಯಾ-
ಸ್ತಸ್ಯಾಃ ಪರಂ ತು ಸ ಭವತ್ಯವಯುತ್ಯವಾದಃ ॥ ೮೭ ॥

ಸೋಮೋ ಜಗಜ್ಜನಯಿತೇತಿ ಯದಾಹ ವೇದೋ
ನೇದಂ ಲತಾಪರಮಿತಿ ಭ್ರಮಿತವ್ಯಮಾರ್ಯೈಃ ।
ಯಃ ಶೈವವಾಮತನುವರ್ತಿಭವದ್ದೃಗಾತ್ಮಾ
ಚನ್ದ್ರೋ ಜಗತ್ಸೃಜತಿ ತತ್ಪರ ಏಷ ವಾದಃ ॥ ೮೮ ॥

ಸೂಚ್ಯಗ್ರವದ್ವಸುಮತೀಮಣುವಚ್ಚ ಮೇರುಂ
ದೃಷ್ಟಿರ್ಯದಮ್ಬ ತವ ಪಶ್ಯತಿ ದಾನಶೌಣ್ಡಾ ।
ದೃಷ್ಟಾಸ್ತ್ವಯಾ ವಯಮಪೀಹ ತತಃ ಸ್ಮರಾಮೋ
ವೇಶನ್ತಮೇವ ಭವಸಾಗರಮುತ್ತರಙ್ಗಮ್ ॥ ೮೯ ॥

ವಾಣೀನಿಕೇತನತಯಾ ಘನಸಾರಗೌರಾಃ
ಕಲ್ಹಾರಕೇಸರರುಚಃ ಕಮಲಾನುಷಙ್ಗಾತ್ ।
ಮಾತರ್ಜಯನ್ತಿ ಶರಣಾಗತಲೋಕಚೇತೋ-
ಮಾಲಿನ್ಯಮಾರ್ಜನವಶಾದಸಿತಾಃ ಕಟಾಕ್ಷಾಃ ॥ ೯೦ ॥

ಆಕರ್ಣಮುಲ್ಲಸತಿ ಮಾತರಪಾಙ್ಗದೇಶೇ
ಕಾಲಾಞ್ಜನೇನ ಘಟಿತಾ ತವ ಭಾತಿ ರೇಖಾ ।
ಶೈವಾಲಪಙ್ಕ್ತಿರಿವಸನ್ತತನಿರ್ಜಿಹಾನ-
ಕಾರುಣ್ಯಪೂರಪದವೀಕಲಿತಾನುಬನ್ಧಃ ॥ ೯೧ ॥

ವಿಶ್ವಂ ಸೃಜತಿ ಹನ್ತಿ ಚ ಯಃ ಕಟಾಕ್ಷೋ
ವಿಶ್ವಸ್ಯತಾಂ ಕಥಮಸೌ ಚಪಲಸ್ವಭಾವಃ ।
ಏಷೋಽಪಿ ಯಾಮನುಸರಲ್ಲಭತೇ ಯಶಾಂಸಿ
ತಾಮೇವ ವಿಶ್ವಸಿಮಿ ದೇವಿ ತವಾನುಕಮ್ಪಾಮ್ ॥ ೯೨ ॥

ಅರ್ಧಂ ಕಲಙ್ಕರಹಿತಾ ಕರುಣೈವ ಶಮ್ಭೋ-
ರರ್ಧಂ ಗುಣಾಸ್ತದಿತರೇ ಸಕಲಾಃ ಸಮೇತಾಃ ।
ಇತ್ಯಮ್ಬ ಸಮ್ಪ್ರತಿ ಕಿಲ ಸ್ಫುರಿತಂ ರಹಸ್ಯಂ
ಸಮ್ಪಶ್ಯತೋ ಮಮ ಭವನ್ಮಯಮೈಶಮರ್ಧಮ್ ॥ ೯೩ ॥

ಅಮ್ಬ ಭ್ರುವೋಸ್ತವ ವಿಚೇಷ್ಟಿತಮಪ್ರಮತ್ತಂ
ಸಮ್ಪಶ್ಯತಾಂ ನಿಜನಿಜಾರ್ಥನಿದೇಶಹೇತೋಃ ।
ತನ್ಮೂಲದೇಶನಿಹಿತಾ ನಿಭೃತಾ ಸುರಾಣಾಂ
ದೃಷ್ಟಿಃ ಪ್ರಯಾತಿ ಮೃಗನಾಭಿವಿಶೇಷಕತ್ವಮ್ ॥ ೯೪ ॥

ಸಾರಂ ಕಣಂ ಕಣಮಘರ್ಮರುಚಾಂ ಸಹಸ್ರಾ-
ತ್ಸಙ್ಗೃಹ್ಯ ನಿರ್ಮಿತಮಿದಂ ತವ ವಕ್ತ್ರಬಿಮ್ಬಮ್ ।
ತಾವತ್ಸುಧಾಕರಕಲಙ್ಕಕುಲಾನಿ ಪಶ್ಚಾ-
ದೇಕತ್ರ ದೇವಿ ನಿಹಿತಾನಿ ಕಚಾಪದೇಶಾತ್ ॥ ೯೫ ॥

ವಿನ್ಯಸ್ತಮಿನ್ದ್ರಮಣಿಕನ್ದಲಸುನ್ದರೇಷು
ಕೇಶೇಷು ತೇ ಸ್ಫಟಿಕನಿರ್ಮಲಮಿನ್ದುಖಣ್ಡಮ್ ।
ಆಧಾರಸಙ್ಗತಿವಶಾದಸಿತಾಯಮಾನ-
ಮಿನ್ದೀವರಚ್ಛದವತಂಸದಶಾಂ ಬಿಭರ್ತಿ ॥ ೯೬ ॥

ಚಿನ್ತಾಮಣಿಸ್ತ್ರಿಭುವನೇಶ್ವರಿ ಕೌಸ್ತುಭಶ್ಚ
ಖ್ಯಾತೌ ಮಣೀ ತವ ಗೃಹಾಙ್ಗಣಕುಟ್ಟಿಮಸ್ಥೌ ।
ಕಿಂ ರತ್ನಮನ್ಯದುಪಲಭ್ಯ ಕಿರೀಟಕೋಟಿಂ
ವಾಚಸ್ಪತಿಪ್ರಭೃತಯಸ್ತವ ವರ್ಣಯನ್ತು ॥ ೯೭ ॥

ಪ್ರಾದುರ್ಭವತ್ತರಣಿಬಿಮ್ಬಶತಾರುಣಾನಿ
ಪರ್ಯಾಪ್ತಶೀತಕಿರಣಾಯುತಶೀತಲಾನಿ ।
ಶೃಙ್ಗಾರಸಾರಪರಿವಾಹಮಯಾನಿ ಮಾತ-
ರಙ್ಗಾನಿ ಕೇಽಪಿ ಚರಮೇ ಜನುಷಿ ಸ್ಮರನ್ತಿ ॥ ೯೮॥

ಪ್ರತ್ಯುಗ್ರಕುಙ್ಕುಮರಸಾಕಲಿತಾಙ್ಗರಾಗಂ
ಪ್ರತ್ಯಙ್ಗದತ್ತಮಣಿಭೂಷಣಜಾಲರಮ್ಯಮ್ ।
ತಾಮ್ಬೂಲಪೂರಿತಮುಖಂ ತರುಣೇನ್ದುಚೂಡಂ
ಸರ್ವಾರುಣಂ ಕಿಮಪಿ ವಸ್ತು ಮಮಾವಿರಸ್ತು ॥ ೯೯ ॥

ಅರ್ಧಂ ಸ್ತ್ರಿಯಸ್ತ್ರಿಭುವನೇ ಸಚರಾಚರೇಽಸ್ಮಿ-
ನ್ನರ್ಧಂ ಪುಮಾಂಸ ಇತಿ ದರ್ಶಯಿತುಂ ಭವತ್ಯಾ ।
ಸ್ತ್ರೀಪುಂಸಲಕ್ಷಣಮಿದಂ ವಪುರಾದೃತಂ ಯ-
ತ್ತೇನಾಸಿ ದೇವಿ ವಿದಿತಾ ತ್ರಿಜಗಚ್ಛರೀರಾ ॥ ೧೦೦ ॥

ನಿರ್ಮಾಸಿ ಸಂಹರಸಿ ನಿರ್ವಹಸಿ ತ್ರಿಲೋಕೀಂ
ವೃತ್ತಾನ್ತಮೇತಮಪಿ ವೇತ್ತಿ ನ ವಾ ಮಹೇಶಃ ।
ತಸ್ಯೇಶ್ವರಸ್ಯ ಗಿರಿಜೇ ತವ ಸಾಹಚರ್ಯಾ-
ಜ್ಜಾತಃ ಶ್ರುತಿಷ್ವಪಿ ಜಗಜ್ಜನಕತ್ವವಾದಃ ॥ ೧೦೧ ॥

ಸತ್ತಾಸ್ಯಖಣ್ಡಸುಖಸಂವಿದಸಿ ತ್ರಿಲೋಕೀ-
ಸರ್ಗಸ್ಥಿತಿಪ್ರತಿಹತಿಷ್ವಪಿನಿರ್ವ್ಯಪೇಕ್ಷಾ ।
ತ್ವಾಮನ್ತರೇಣ ಶಿವ ಇತ್ಯವಶಿಷ್ಯತೇ ಕಿ-
ಮರ್ಧಂ ಶಿವಸ್ಯ ಭವತೀತ್ಯನಭಿಜ್ಞವಾದಃ ॥ ೧೦೨ ॥

ನಾಸ್ಮಿನ್ರವಿಸ್ತಪತಿ ನಾತ್ರ ವಿವಾತಿ ವಾತೋ
ನಾಸ್ಯ ಪ್ರವೃತ್ತಿಮಪಿ ವೇದ ಜಗತ್ಸಮಸ್ತಮ್ ।
ಅನ್ತಃಪುರಂ ತದಿದಮೀದೃಶಮನ್ತಕಾರೇ-
ರಸ್ಮಾದೃಶಾಸ್ತು ಸುಖಮತ್ರ ಚರನ್ತಿ ಬಾಲಾಃ ॥ ೧೦೩ ॥

ತ್ವತ್ಸನ್ನಿಧಾನರಹಿತೋ ಮಮ ಮಾಸ್ತು ದೇಶ-
ಸ್ತ್ವತ್ತತ್ತ್ವಬೋಧರಹಿತಾ ಮಮ ಮಾಸ್ತು ವಿದ್ಯಾ ।
ತ್ವತ್ಪಾದಭಕ್ತಿರಹಿತೋ ಮಮ ಮಾಸ್ತು ವಂಶ-
ಸ್ತ್ವಚ್ಚಿನ್ತಯಾ ವಿರಹಿತಂ ಮಮ ಮಾಸ್ತು ಚಾಯುಃ ॥ ೧೦೪ ॥

ತ್ವಂ ದೇವಿ ಯಾದೃಗಸಿ ತಾದೃಗಸಿ ತ್ವಮೀದೃ-
ಗೇವೇತಿ ವಕ್ತುಮಪಿ ಬೋದ್ಧುಮಪಿ ಕ್ಷಮಃ ಕಃ ।
ಮಾಮೇವ ತಾವದವಿದನ್ನತಿಪಾಮರೋಽಹಂ
ಮಾತಃ ಸ್ತುತಿಂ ತ್ವಯಿ ಸಮರ್ಪಯಿತುಂ ವಿಲಜ್ಜೇ ॥ ೧೦೫ ॥

ಕಾಚಿತ್ಕೃತಾ ಕೃತಿರಿತಿ ತ್ವಯಿ ಸಾಽರ್ಪಿತೇತಿ
ಕಾಪಿ ಪ್ರಮೋದಕಣಿಕಾ ನ ಮಮಾಂತರಙ್ಗೇ ।
ಮೌಢ್ಯಂ ಮದೀಯಮಿಹ ಯದ್ವಿದಿತಂ ಮಮೈವ
ಕಿಂ ತ್ವಮ್ಬ ವಿಶ್ವಸಿಮಿ ದೀನಶರಣ್ಯತಾಂ ತೇ ॥ ೧೦೬ ॥

ಕಾಲಾನಪಾಸ್ಯ ವಿಷುವಾಯನಸಙ್ಕ್ರಮಾದೀ-
ನಸ್ತಙ್ಗತೇ ಹಿಮಕರೇ ಚ ದಿವಾಕರೇ ಚ ।
ಅಮ್ಬ ಸ್ಮರೇಯಮಪಿ ತೇ ಚರಣಾರವಿನ್ದ-
ಮಾನನ್ದಲಕ್ಷಣಮಪಾಸ್ತಸಮಸ್ತಭೇದಮ್ ॥ ೧೦೭ ॥

ಚತುರಧ್ಯಾಯೀರೂಪಂ ಕಲಹಂಸವ್ಯಞ್ಜನಂ ಜಗನ್ಮಾತುಃ ।
ಅಪರಬ್ರಹ್ಮಮಯಂ ವಪುರನ್ತಃ ಶಶಿಖಣ್ಡಮಣ್ಡನಮುಪಾಸೇ ॥ ೧೦೮ ॥

॥ ಇತಿ ಶ್ರೀ ನೀಲಕಣ್ಠದೀಕ್ಷಿತವಿರಚಿತಃ

ಶ್ರೀಆನನ್ದಸಾಗರಸ್ತವಃ ಸಮ್ಪೂರ್ಣಃ ॥



Please send corrections to sanskrit@cheerful.com
Last updated ತ್oday
http://sanskritdocuments.org

Ananda Sagara Stavam Lyrics in Kannada PDF
% File name : anandasagarastava.itx
% Location : doc\_devii
% Author : Nilakantha Dikshitar
% Language : Sanskrit
% Subject : philosophy/hinduism/religion
% Transliterated by : Sunder Hattangadi
% Translated by : n/a
% Description-comments : Hymn to Devi Minakshi
% Latest update : Dec. 18, 2009
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website