% Text title : indrANIsaptashatI % File name : indrANIsaptashatI.itx % Location : doc\_devii % Language : Sanskrit % Subject : philosophy/hinduism/religion % Proofread by : DPD % Description-comments : Complete Works of Ganapati Muni Vol 02-14 % Latest update : September 7, 2013 % Send corrections to : Sanskrit@cheerful.com % Site access : http://sanskritdocuments.org % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. indrANIsaptashatI ..}## \itxtitle{.. indrANIsaptashatI ..}##\endtitles ## \section{.. indrANIsaptashatI ..} || prathamaM gAyatraM shatakam || || prathamaH shashivadanApAdaH || harilalane me pathi timirANi | haradarahAsadyutibhirimAni || 1|| agatimavIryAmapagatadhairyAm | avatu shachI me janibhuvamAryAm || 2|| shR^iNu karuNAvatyalaghumakharve | stavamahamAryastava shachi kurve || 3|| trijagadatIto vilasati nityaH | aNuraNuto yo bhagavati satyaH || 4|| tvamakhilakAryeShvayi dhR^itasaktiH | urugatirasya prabhutamashaktiH || 5|| vidurimameke jagati mahendram | jagurayi kechijjanani mahesham || 6|| avagatavedo vadati mahendram | parichitatantro bhaNati mahesham || 7|| janani shachi tvaM prathamadalasya | bhagavati durgAsyaparadalasya || 8|| na shachi shivAtastvamitaradaivam | bahumunivANIsamarasataivam || 9|| divi cha sitAdrau shachivapuShorvAm | pR^ithagupalambhAdayi bhidayoktiH || 10|| tanuyugamUlaM vapuratimAyam | karacharaNAdyairviyutamameyam || 11|| tvamudaravartitribhuvanajIvA | bhavasi shachI sA janani shivA vA || 12|| vibhushuchikIlAtatirayi dhUmam | tvamamaramArgaM bata vamasImam || 13|| jayasi nabhastho janani parastAt | nabhasi cha bhAntI bhavasi purastAt || 14|| tvamatanuramba jvalasi parastAt | iha khasharIrA lasasi purastAt || 15|| janani parastAnmatirasi bhartuH | asi khasharIrA pR^ithagavagantrI || 16|| aNuchayarUpaM bhagavati shAntam | na bhavati shUnyaM tadidamanantam || 17|| divi dadhatIshe puruShasharIram | janani purandhrI tanurabhavastvam || 18|| dR^ishi vilasantaM prabhumupayAntI | bhavasi virAT tvaM nR^itanuShu bhAntI || 19|| tava guNagAnaM janani vidhAtum | bhavati paTuH ko viyadiva mAtum || 20|| bhagavati tR^iptirbhavatu na vA te | abhilaShitAptirbhavatu na vA me || 21|| bhajati tavA~NghriM mama khalu bhAShA | pati manurAgAt priyamiva yoShA || 22|| aghamapahartuM shubhamapi kartum | alamajare te guNagaNagAnam || 23|| avasi jagattvaM kulishibhujasthA | ava munibhUmiM gaNapatidhIsthA || 24|| shashivadanAbhirgaNapatijAbhiH | shashivadanAdyA paricharitA.astu || 25|| || dvitIyastanumadhyApAdaH || dhvAntaM parihartuM tejAMsyapi bhartum | antarjagadambA hAsaM kurutAnme || 26|| bhItAmaridhUtAmAryAvanimetAm | samrAj~ni budhAnAM dUnAmava dInAm || 27|| Ishasya sahAyAM vishvasya vidhAne | AkAshasharIrAmambAM praNamAmaH || 28|| karturbhuvanAnAM mAyAsi shachi tvam | satyasya tapo.asi j~nasyAsi manIShA || 29|| Aj~nAsi vinetustejo.asi vibhAtaH | niryatnasamAdherAnandaraso.asi || 30|| tasya tvamananyA.apyanyeva khakAyA | atyadbhutamAyA jAyA.asi sahAyA || 31|| AkAshasharIrAM jAyAmasharIraH | Ali~Ngya vibhustvAM nandatyayi chitram || 32|| vajreshvari ghasre yadvanmukuTena | dIptena savitra mUrdhA tava bhAti || 33|| nakShatrasahasraishshubhradyutibhiste | puShpAyitametairmAtarnishimaste || 34|| ghasraH khalu kAlo rAjyaM nanu kartum | rAtriH khalu kAlo rantuM ramaNena || 35|| niHshabdatara~NgAsvaglauShu nishAsu | nUnaM khasharIre kAntaM ramayantI || 36|| sAndroDusumasragvibhrAjitakeshA | dhvAntAsitachelA shAntA.apyasi bhImA || 37|| rAjanmitatArAmandAravataMsAm | mAtassitabhAsA smerAM hasitena || 38|| jyotsnA ghanasAradrAvairanuliptAm | tvAM vIkShya na shAntiH kasya kShaNadAsu || 39|| bAlAruNarochiH kAshmIrarajobhiH | AliptamukhIM tvAM prAtaH praNamAmi || 40|| sAyaM samayashrI lAkShArasaraktam | pratyak.h prasR^itaM te vande varade.a~Nghrim || 41|| dIptArkakirITAM sarvAn vinayantIm | vande bhuvanAnAM rAj~nImasamAnAm || 42|| dhUtAkhilarogAH shvAsAstava vAtAH | mAtarvitarantu prANasya balaM naH || 43|| prA~nchastava vAtAH svAsAH shamushantu | pratya~ncha eme naH pApaM shamayantu || 44|| manmAtaravA~ncho vIryaM vitarantu | santApamuda~nchaH sarvaM cha harantu || 45|| asyA iva bhUmerbhUtaprasavAyAH | ekaikasha AhuryeShAM mahimAnam || 46|| adrerupalAnAM nadyAH sikatAnAm | yeShAM cha na kadhchChikto gaNanAyAm || 47|| romAyitametairgolaistava kAye | vyAkhyAtamanena shlAghyaM tava bhAgyam || 48|| vishvaM vahasIdaM jambhAribhujasthA | AryAnvahamAtarvAsiShThamatisthA || 49|| AdyAM bhuvanAnAM bhartustanumadhyAm | bhaktsya bhajantAmetAstanumadhyAH || 50|| || tR^itIyo mukulapAdaH || hAsAH shakragR^iheshvaryAshchandraruchaH | bhUyAsurvimalapraj~nAyai hR^idi me || 51|| indrANyAH karuNA lokAshshokahR^itaH | bhUyAsurbharatakShmAyai kShemakR^itaH || 52|| vyaktirvyomatanuH shaktitvAdvanitA | j~nAtR^itvAtpuruShaH keShA~nchidviduShAm || 53|| vyaktiM vyomatanuM ye prAhuH puruSham | teShAM tattvavidAM kalpassyAt trividhaH || 54|| rudraM ke.api jaguH shakraM ke.api viduH | bhAShante bhuvanaprANaM ke.api vidaH || 55|| vyaktiM vyomatanuM prAhurye vanitAm | teShAM cha trividhaH kalpashshAstravidAm || 56|| durgA sUrivaraiH kaishchitsA gaditA | shachyanyairvibudhairj~nairanyairaditiH || 57|| ekeShAM viduShAM vyaktirvyomatanuH | na strI no puruSho brahmaitatsaguNam || 58|| tvaM vishvasya mahAn prANaH kaH parame | tvaM rudraH praNavastvaM shakro.abhrashikhI || 59|| tvaM kasyAsyaditistvaM rudrasya shivA | tvaM shakrasya shachI shaktirdevanute || 60|| prANashcha praNavo jyotishchAmbaragam | vastvekaM triguNaM no vastu tritayam || 61|| shakterambapare shaktsyApi bhidA | jvAlA pAvakavadbhAShA bhedakR^itA || 62|| sarvaM dR^ishyamidaM bhu~njAne parame | puMnAmastutayo yujyante khalu te || 63|| kurvANembasatassantoShaM satatam | strInAmastutayaH shobhAM te dadhate || 64|| sadbrahma bruvate vidvAMso viguNam | tvaM mAtassaguNaM brahmAsi prathite || 65|| shabdAdyairviyutaM sadbrahmAmalinam | shabdAdyaiH sahitA tvaM devyachChahitA || 66|| sAkShi brahma paraM tvaM mAtaH kuruShe | sarveShAM jagatAM kAryaM sarvavidham || 67|| dyaurmAtA jagato dyaurevAsya pitA | vyAptaM bhAti jagaddyAvA sarvamidam || 68|| AkAshAdrajaso dyauranyA virajAH | AkAshe.asti punastatpAre cha parA || 69|| dyAvaM tAM jagato ra~Nge vyomatanum | pAre shuddhatamAM vidmastvAM parame || 70|| tvAM pUrNAmaditiM shaktiM devi shachIm | nityaM shabdavatIM gaurIM prabruvate || 71|| puMnAmA bhavatu strInAmAstvathavA | vyaktirvyomatanurlokaM pAtyakhilam || 72|| nAke sA kila bhAtyaindrI rAjyaramA | vibhrANA lalitaM strIrUpaM paramA || 73|| shaktAM devi vidhehyArtAnAmavane | indrasyeva bhujAM vAsiShThasya matim || 74|| pUjAshakrataruNyaitaissidhyatu te | gAtR^iNAM varade gAyatraurmukulaiH || 75|| || chaturtho vasumatIpAdaH || mohaM pariharan yogaM vitanutAm | devendradayitA hAso mama hR^idi || 76|| AbhAtu karuNA sA bhAratabhuvi | sutrAmasudR^isho yadvannijadivi || 77|| vandArujanatAmandAralatikAm | vande harihayaprANapriyatamAm || 78|| shokasya damanIM lokasya jananIm | gAyAmi lalitAM shakrasya dayitAm || 79|| ramyA sumanasAM bhUpasya mahiShI | saumyA janimatAM mAtA vijayate || 80|| vIryasya cha dhiyastrailokyabharaNe | dAtrI maghavate devI vijayate || 81|| vyAptA jagadidaM guptA hR^idi nR^iNAm | AptA sukR^itinAM daivaM mama shachI || 82|| khe shaktiratulA pAre chidamalA | svashchArumahilA daivaM mama shachI || 83|| shastraM maghavataH shAstraM yamavatAm | vastraM trijagato daivaM mama shachI || 84|| yuktsya bhajataH sharmAntaratulam | varmApi cha bahirdaivaM mama shachI || 85|| vIryaM balavatAM buddhirmatimatAm | tejo dyutimatAM daivaM mama shachI || 86|| ekaiva janayantyekaiva dadhatI | ekaiva layakR^iddaivaM mama shachI || 87|| shaktIravitathAH kShetroShu dadhatI | bIjeShu cha parA daivaM mama shachI || 88|| chinvantyapi pachantyekA pashugaNam | khAdantyapi bhave daivaM mama shachI || 89|| dR^iShTau dhR^itachitirdR^ishye tataguNA | vishvAtmamahiShI daivaM mama shachI || 90|| rAkAshashimukhI rAjIvanayanA | svaH kApi lalanA daivaM mama shachI || 91|| sthANAvapi chare sarvatra vitatA | sAkShAdbhavatu me svarnAthadayitA || 92|| yanmAtaranR^itaM dhyAtaM cha gaditam | juShTaM cha hara me taddevi duritam || 93|| mAM mochaya R^iNAdindrANi subhuje | mAmalpamatayo mA nindiShuraje || 94|| shatrushcha shachi me sakhyAya yatatAm | dR^iptashcha imanujo mAmamba bhajatAm || 95|| kaShTaM shachi vidhUyeShTaM vidadhatI | Anandaya janaM preyAMsamayi me || 96|| astraM mama bhava dhvaMsAya raTatAm | sutrAmaramaNi shrImAtarasatAm || 97|| sampUrayatu me sarvaM suranutA | svargakShitipateshshuddhAntavanitA || 98|| saMvardhaya shachi svaM deshamavitum | bAhoriva harerbuddhermama balam || 99|| etairvasumatIvR^ittairnavasumaiH | bhUyAchcharaNayoH pUjA janani te || 100|| || prathamaM gAyatraM shatakaM samAptam || \medskip\hrule\medskip || atha dvitIyamauShNihaM shatakam || || prathamaH kumAralalitApAdaH || sureshvaramahiShyAH smitaM shashisitaM me | tanotu matimachChAM karotu balamagraym || 101|| vidhAya ripudhUtiM nidhAya sudashAyAm | pulomatanujAtA dhinotu bharatakShmAm || 102|| padapraNatarakShA vidhAnadhR^itadIkShA | jagadbharaNadakShA parA jayati shaktiH || 103|| svaratyavirataM sA shanairnabhasi ra~Nge | jvalatyadhikasUkShmaM jagatprabhavashaktiH || 104|| mahastava susUkShmaM nidAnamakhilAnAm | bhavatyakhilamAtarjagatyanubhavAnAm || 105|| jananyanubhavAnAM matitvapariNAme | svaro bhavati mUlaM tavAbhrahayarAme || 106|| ya Ishvari nidAnaM samastamatibhAne | svaro gativisheShAtsa eva khalu kAlaH || 107|| jvalantyabhihitA tvaM vihAyasi vishAle | prachaNDapadapUrvA prapa~nchakarichaNDI || 108|| svarantyakhilabuddhipradA bhavasi gaurI | trikAlatanuramba smR^itA tvamiha kAlI || 109|| mahassvara itIdaM dvayaM tadatisUkShmam | maheshvari tavAMshadvayaM paramamuktam || 110|| maho.atishayamAptaM tvayi tridivagAyAm | svaro.atishayamAptaH sitAdrinilayAyAm || 111|| divaM nayati pUrvA bhuvaM yuvatiranyA | dvayoH prakR^itirabhraM vishAlamatimAnyA || 112|| na te divi lasantyAH pitA tanubhR^idanyaH | svayaM bhuvamimAM tvAM satAmavani vidmaH || 113|| surArikulajanmA taveshvari pulomA | piteti kavibhAShA parokShagatireShA || 114|| vadantyasurashabdairghanaM sajalametam | pulomapadamekaM purANasatiteShu || 115|| prakR^iShTataradIptirgabhIrataranAdA | ito hi bhavasi tvaM taTittanurameye || 116|| arAtirasuro.ayaM vibhornigaditaste | hayashcha batagItaH pitA tava payodaH || 117|| priyaiH kila pare vAM parokShavachanaughaiH | pratAritamivelA jaganmunigaNena || 118|| nikR^iShTamapi ramyaM yadi tridivaloke | tavAmba kimu vAchyA ruchistridivanAthe || 119|| tvamamba ramaNIyA vadhUstvamiva nAke | tvayA ka iva tulyAM mR^ido vadatu loke || 120|| vinIlamiva khAMshaM vidustridivameke | parastu vadasi svaH kaviH kamalabandhum || 121|| amutragatashoke mahAmahasi nAke | namAmyadhikR^itAM tAM purANakulakAntAm || 122|| yadA mamutapakvaM madIyamaghamugram | tadindrakulakAnte nivAraya samagram || 123|| dadAtu bharatakShmAviShAdaharaNAya | alaM balamudArA jayantajananI me || 124|| atIva lalitAbhiH kumAralalitAbhiH | imAbhiramareshapriyA bhajatu modam || 125|| || dvitIyo madalekhApAdaH || paulomyAH parishubhrajyotsnAdR^ishyarucho me | shrImanto darahAsAH kalpantAM kushalAya || 126|| kAruNyAmR^itasiktA shaktA shakramahiShyAH | prekShA bhAratabhUmerdaurbalyaM vidhunotu || 127|| vande nirjararAj~nIM sa~Nklpe sati yasyAH | sAdhyAsAdhyavichAro naiva syAdaNuko.api || 128|| sa~Nklpastava kashchchichatte cheddiva Ishe | syAdulla~Nghya nisargaM siddhirniShphalatA cha || 129|| mUDho.apyuttamarItyA sidhyedadhyayaneShu | medhAvI cha nitAntaM naiva syAtkR^itakR^ityaH || 130|| utpadyeta maheshvaryaprAj~nAdapi shAstram | yAyAnmAtarakasmAdvibhrAntiM vibudho.api || 131|| alpAnAmabalAnAM sa~NgrAme vijayaH syAt | shaktAnAM bahulAnAM ghorA syAtparibhUtiH || 132|| rAjerannR^ipapITheShvakhyAtAni kulAni | syAddurdharShabalAnAM pAto rAjakulAnAm || 133|| niryatno.api samAdhervindeddevi samR^iddhim | yogasyAmba na pashyedabhyasyannapi siddhim || 134|| atyantaM yadasAdhyaM nediShThaM bhavatIdam | sAdhyaM sarvavidhAbhiH syAdindrANi daviShTham || 135|| gAyAmo munisa~NghairgeyAM kAmapi mAyAm | indrasyApi vinetrIM trailokyasya cha dhAtrIm || 136|| vidyAnAmadhinAthe kAM vidyAM shrayase tvam | indraM kartumadhInaM vishvasmAdadhikaM tam || 137|| nityAlirminIShe strImoho na vitarkyaH | bhrUcheShTAnucharatvAdanyA syAdanukampA || 138|| saundaryaM paramanyadvajeraddaryathavA te | hartuM yatsukhamIShTe tAdR^iktasya cha chittam || 139|| chakShurdarshanamAtrannistejo vidadhAnam | chittaM chojjhitadhairyaM mattAnAM danujAnAm || 140|| garte durjanadehe magnAn pa~NkvilagnAn | prANAnAtmasajAtInuddhartuM dhR^itadIkSham || 141|| vajraM nirjararAjo yaddhatte samareShu | tvachChakteH kalayaitanmanmAtarniramAyi || 142|| rAj~nItvAtparamete rAjatvaM shatamanyoH | nishshaktissa vinA tvAM kAmAj~nAM kurutAM naH || 143|| sarvaM shakranishAntasyeshAne tava haste | asmAkaM tu dhiyedaM stotraM sa~Ngrahataste || 144|| gantavyaM svaradhIshe nishsheShArpaNashUram | bibhrANA nayasi tvaM mArjAlIva kishoram || 145|| gR^ihNnnambaranAthAmambAmashlathamandhaH | kIshasyeva kishoro yogI gachChati gamyam || 146|| pUrNAtmArpaNahIno.apyaj~nAtA.api samAdheH | nityaM yo jagadamba tvAM seveta japAdyaiH || 147|| taM chAcha~nchalabhaktiM kR^itvA pUritakAmam | niShThAM dAsyasi tasmai paulomi kramashastvam || 148|| bhinnAM sa~NghasahastraiH khinnAM shatrubhareNa | pAtuM bhAratabhUmiM mAtardehi balaM me || 149|| tryailokyAvanabhArashrAntAM vAsavakAntAm | hairambyo madalekhAH samyak.h sammadayantu || 150|| || tR^itIyo haMsamAlApAdaH || suruchirvajrapANessudR^isho mandahAsaH | haratAnmohamUlaM hR^idayasthaM tamo me || 151|| amR^itaM sa~NkirantyA prasarantyeha dR^iShTyA | surarAj~nI balADhyAM bharatakShmAM karotu || 152|| amR^itAmbhaH kirantI karuNAmbho vahantI | natarakShAttadIkShA shachi mAtastavekShA || 153|| kR^itapIyUShavR^iShTistatakalyANasR^iShTiH | vihitainovinaShTirdhR^itavij~nAnapuShTiH || 154|| bhR^itadevendratuShTiryaminAM devagR^iShTiH | mama kAmyAni deyAttava vishvAmba dR^iShTiH || 155|| jagatAM chakravartinyasitaste kaTAkShaH | jalado bhaktibhAjAM shikhinAM nartanAya || 156|| sukR^itI ko.api nATye bahule tatra mAtaH | jagate sArabhUtAnupadeshAnkaroti || 157|| aparo navyakAvyAnyanavadyAni dhanyaH | vidadhAtyaprayatnAdbudhabhogakShamANi || 158|| itaro bhAgyashAlI ramaNIyaiH prasa~NgaiH | vitanoti svajAtiM jagati shreShThanItim || 159|| jagatAM mAtareko mahasA puNyashAlI | vidhutAriH svadeshaM kurute vItapAsham || 160|| para indrANi sAdhurbata vismR^itya vishvam | ramate siktagaNDaH pramadAshrupradAnaiH || 161|| tava rAgArdradR^iShTyA divi shakrasya nATyam | karuNAsiktadR^iShTayA bhuvi bhaktsya nATyam || 162|| tava sapremadR^iShTirbalamindre dadhAti | tava kAruNyadR^iShTirbalamasmAsu dhattAm || 163|| tava vAmAH kaTAkShAH prabhumAnandayantu | uchito dakShiNAnAmayamastvIkShaNAnAm || 164|| sukR^itAnAM prapoShaM duritAnAM vishoSham | karuNArdrA vibhAntI tava dR^iShTiH kriyAnnaH || 165|| kuru pAdAbjabandhoH saraNiM nistamaskAm | shachi vij~nAnatejaH kiratAvIkShitena || 166|| kriyayArAdhayanto bhuvane te vibhUtIH | iha kechillabhante tava mAtaH kaTAkShAn || 167|| sphuTavij~nAnapUrvaM prabhajeran yadi tvAm | sthirayA devi bhaktyA kimu vaktavyamIshe || 168|| kuvidhervismarantI bharatakShmA shachi tvAm | bahukAlAdabhAgye patitA devyayogye || 169|| abhiShiktsya mAtA tava tejoMshabhUtA | sudashAM sevamAnAmanayatpashchimAshAm || 170|| ayi kAlaM kiyantaM dayase pashchimasyAm | ita indrANi pUrvAmavalokasva dInAm || 171 || na vayaM pashchimasyAshshachi yAchAmanAsham | kR^ipayaitAM cha pUrvAM nihatAshAmavAshAm || 172|| sakalaM vyarthamAsIdayi dIneShu dR^iShTA | tava vishvasya mAtaH karuNaikAvashiShTA || 173|| surarAjasya kAnte narasiMhasya sUnum | balavantaM kuru tvaM bharatakShmAvanAya || 174|| ruchirAbhirnijAbhirgatibhirharShayantu | marutAM bharturetAstaruNIM haMsamAlAH || 175|| || chaturtho madhumatIpAdaH || dishi dishi prasaradruchitamodamanam | haratu me duritaM harivadhUhasitam || 176|| haratu duHkhabharaprasR^itamashrujalam | bharatabhUsudR^isho balajito ramaNI || 177|| atitarAM mahitA surapatervanitA | karuNayA kalitA mama shachI sharaNam || 178|| tribhuvanakShitirADbhuvanabhUShaNabhA | akhilabhAsakabhA mama shachI sharaNam || 179|| satatayuktasudhIhR^idayadIpakabhA | nikhilapAchakabhA mama shachI sharaNam || 180|| ravivirochakabhA shashivirAjakabhA | bhagaNashobhakabhA mama shachI sharaNam || 181|| gaganakhelakabhA sakalachAlakabhA | abhayadA.atishubhA mama shachI sharaNam || 182|| ruchilava~NgatayA yadanaghAMshunidheH | hR^itatamobhavanaM bhavati dIpikayA || 183|| sphurati chAru yataH kiraNamekamitA | jaladasaudhatale muhuriyaM chapalA || 184|| bhavati yaddyutitaH kamapi bhAgamitaH | pavirarAtiharaH praharaNeshapadam || 185|| bhavati yatsurucheraNutamAMshamitA | yuvamanomadanI suvadanAsmitabhA || 186|| vitatasUkShmatanurmahati sA gagane | paramapUruShabhA mama shachI sharaNam || 187|| amaranAthasakhI ruchinidhAnamukhI | amR^itavarShakadR^i~N mama shachI sharaNam || 188|| avidhavA satataM yuvatireva sadA | anaghavIrasutA mama shachI sharaNam || 189|| amR^itavatyadhare suradharApataye | charaNayorbhajate mama shachI sharaNam || 190|| smitalaveShu sitA shirasijeShvasitA | charaNayoraruNA bahirapi triguNA || 191 || kapaTachandramukhI prakR^itirindrasakhI | mR^itijarArahitA mama shachI sharaNam || 192 || kR^ishatamepyudare tribhuvanaM dadhatI | janimatAM jananI mama shachI sharaNam || 193 || sthiratarA manasi sthiratamA vachasi | nayanayostaralA mama shachI sharaNam || 194|| mR^idutarA karayormR^idutamA vachasi | bhujabale kaThinA mama shachI sharaNam || 195|| mR^idulabAhulatA.apyamitabhImabalA | asuradarpaharI mama shachI sharaNam || 196|| abalayA.api yayA na sadR^isho.asti bale | jagati kashchidasau mama shachI sharaNam || 197|| atitarAM sadayA padarate manuje | khalajane paruShA mama shachI sharaNam || 198|| gaNapatiM kurutAdbharatabhUmyavane | amarabhUmipateH priyatamA sabalam || 199|| madhurashabdatatIrmadhumatIrajarA | gaNapateshshR^iNuyAtsurapatestaruNI || 200|| || dvitIyamauShNihaM shatakaM samAptam || \medskip\hrule\medskip || atha tR^itIyamAnuShTubhaM shatakam || || prathamaH pathyAvaktrapAdaH || hasitaM tanmahAshakterasmAkaM haratu bhramam | yata eva mahachchitraM vishvametadvijR^imbhate || 201|| rAjantI sarvabhUteShu sarvAvasthAsu sarvadA | mAtA sargasya chitpAyAt paulomI bhAratakShitim || 202|| dharmij~nAnaM vibhostattvaM dharmo j~nAnaM savitri te | vyavahR^ityai vibhAgo.ayaM vastvekaM tattvato yuvAm || 203|| indreshavAsudevAdyaiH padaiH sa~NkItryate vibhuH | shachI shivA mahAlakShmIpramukhairbhavatI padaiH || 204|| antaraM vastuno j~nAtR^i tachChaktaM parichakShate | shAkhAH samantato j~nAnaM shaktiM sa~NkIrtayanti tAm || 205|| antarasya cha shAkhAnAmaikyaM nirviShayasthitau | viShayagrahaNeShveva savibhAgaH pradR^ishyate || 206|| syAdevaM viShayApekShI shAkhAnAmantarasya cha | avibhaktaikarUpANAM vibhAgo haritAmiva || 207|| lakShyamantarvayaM chakre dhyAyAmo yatra niShThitAH | antarIbhAvatastasya nAntaraM tu vilakShaNam || 208|| aha~NkR^itervayaM nAnye yatrAha~NkR^itisambhavaH | sampadyetAntaraM tatra j~nAnasya j~nAtR^itAvaham || 209|| antarAvartabhUyastvAdekasmin bodhasAgare | boddhAro bahavo.abhUvan vastu naiva tu bhidyate || 210|| chidrUpe mAtarevaM tvaM parasmAdbrahmaNo yathA | na devi devatAtmabhyo jIvAtmabhyashcha bhidyase || 211|| samastabhUtabIjAnAM gUDhAnAmantarAtmani | tavodgAro.ayamAkAsho mAtassUkShmarajomayaH || 212|| na sarvabhUtabIjAni vastUni syuH pR^ithak.h pR^ithak.h | tvayi prAgavibhaktAni babhUvuriti vishrutiH || 213|| yathAmbasmR^itibIjAnAM praj~nAyAmavisheShataH | tathA syAdbhUtabIjAnAmavibhaktsthitistvayi || 214|| nANUni bhUtabIjAni prAksargAttvayi saMsthitau | chitishaktyAtmakAnyeva nirAkArANi sarvathA || 215|| anAdi chedidaM vishvaM smaraNNAttava sarjanam | sAdi chedAdimaH sargo vaktvyastava kalpanAt || 216|| vidhAtuM shaknuyAtsaMvidabhUtasyApi kalpanam | kalpitasyaikadA bhUyaH sarjanAvasare smR^itiH || 217|| chiterasmAdR^ishAM vIryaM svapne chedvishvakAraNam | chitessamaShTibhUtAyAH prabhAve saMshayaH kutaH || 218|| mAtassamaShTichidrUpe vibhUtirbhuvanaM tava | iha vyaShTi sharIreShu bhAntI tadanupashyasi || 219|| tvaM bahma tvaM parAshaktistvaM sarvA api devatAH | tvaM jIvAstvaM jagatsarvaM tvadanyannAsti ki~nchana || 220|| satI chidamba naiva tvaM bhAvAbhAvavilakShaNA | shaktishaktimatorbhedadarshanAdeSha vibhramaH || 221|| tavAmba jagatadhAsya mR^ittikAghaTayoreva | sambandho veditavyaH syAnna rajjauphaNinoriva || 222|| tvaM shaktirasyavichChinnA bhAvairAtmavibhUtibhiH | antarAstu mahendrasya shaktsya pratibimbavat || 223|| shaktirgaNapateH kAye pravahantI sanAtanI | bhAratasya kriyAdasya bAdhyamAnasya rakShaNam || 224|| imAni tattvavAdIni vAsiShThasya mahAmuneH | pathyAvaktraNi sevantAmanantAmabhavAM chitim || 225|| || dvitIyo mANavakapAdaH || shakttamA shakravadhU hAsavibhA me haratu | mAnasamArgAvarakaM jetumashakyaM timiram || 226|| bhAratabhUpadmadR^isho durdashayA kShINatanoH | bAShpamajasraM vigaladvAsavabhAmA haratu || 227|| daNDitarakShojanatA paNDitagItAvanitA | maNDitamAhendragR^ihA khaNDitapApA jayati || 228|| sadguNasampatkalitaM sarvasharIre lalitam | devapateH puNyaphalaM puShyatu me buddhibalam || 229|| hAsavisheShairalasairdikShu kirantyachChasudhAm | indradR^igAnandakarI chandramukhI mAmavatu || 230|| prematara~NgapratimaiH shItaladR^iShTiprakaraiH | shakramanomohakarI vakrakachA mAmavatu || 231|| gADharasaishchArupadairgUDhatarArthairvachanaiH | kAmakarI vR^itrajito hematanurmAmavatu || 232|| mR^ityutanuH kAlatanorvishvapateH pArshvacharI | pretajagadrakShati yA sA taruNI mAmavatu || 233|| pretajagatkechidadho lokamapuNyaM bruvate | shItarucherdevi paro netaradetad vadati || 234|| bhUriyamurvI vasudhA vArijavairyeShabhuvaH | svarmahasAM rAshirasau yeShu narapretasurAH || 235|| rAjatashailaM shashinaH kechidabhinnaM bruvate | mR^ityuyamAveva shivAvIshvari teShAM tu mate || 236|| rAjatashailaH pitR^ibhUroShadhirADeSha yadi | kA~nchanashailaH surabhUrbandhurasau vAriruhAm || 237|| pAvaya bhUmiM dadhataH pAvakakAyasya vibhoH | bhAmini bhAvAnuguNe sevakamagnAyi tava || 238|| yasya yamo bhUtapatirbuddhimatastasya mate | Agnirupendro maghavA kA~nchanagarbho bhagavAn || 239|| yasya mahAkAlavadhUrmR^ityurapi dve na vidaH | tvaM shachi medhA.asyamate pAvakashaktiH kamalA || 240|| nAmasu bhedo.astu dhiyAmIshvari niShkR^iShTamidam | sUryadharenduShvajare tvaM tritanurbhAsi pare || 241|| sAttvikashaktiH savitaryAdimarAme bhavasi | rAjasashaktirbhuvi nastAmasashaktiH shashini || 242|| sarvaguNA sarvavibhA sarvabalA sarvarasA | sarvamidaM vyApya jagatkApi vibhAntI paramA || 243|| vyomatanurnirvapuSho devi satastvaM dayitA | asyabhiyuktairvibudhairamba maheshvaryuditA || 244|| sA khalu mAyA paramA kAraNamIshaM vadatAm | sA prakR^itiH sA~NkhyavidAM sA yaminAM kuNDalinI || 245|| sA lalitA pa~nchadashImuttamavidyAM japatAm | sA khalu chaNDI jananI sAdhunavArNaM bhajatAm || 246|| sA mama shachyAH paramaM kAraNarUpaM bhavati | kAryatanurdivi shakraM sammadayantI lasati || 247|| vyomatanoH sarvajagachchAlanasUtraM tu vashe | nirvahaNe tasya punardivyatanustrItritayam || 248|| pAtumimaM svaM viShayaM hanta chirAnnirvijayam | ki~NkramIshe vibhayaM mAM kuru paryArshiyam || 249|| chArupadakrIDanakairmAtarimairmANavakaiH | chetasi te devanute prItiramoghA bhavatu || 250|| || tR^itIyashchitrapadApAdaH || apyalaso haridantadhvAntataterapi hartA | astu mamendrapurandhrI hAsalavaH shubhakartA || 251|| pAhi parairhR^itasArAM netragalajjaladhArAm | bhAratabhUmimanAthAM devi vidhAya sanAthAm || 252|| chAlayatA surarAjaM pAlayatA bhuvanAni | shIlayatA natarakShAM kAlayatA vR^ijinAni || 253|| lAlayatA munisa~NghaM kIlayatA divi bhadram | pAvaya mAM sakR^idIshe bhAsuradR^ikprasareNa || 254|| sarvaruchAmApi shAlAM tvAM shachi ma~NgalalIlAm | kAlakachAmuta kAlIM padmamukhImuta padmAm || 255|| yaH smarati pratikalyaM bhaktibhareNa pareNa | tasya sureshvari sAdhorasmi padAbjabhujiShyaH || 256|| yastava nAmapavitraM kIrtayate sukR^itI nA | vAsavasundari dAsastachcharaNasya sadA.aham || 257|| pAvakasAgarakoNaM yastava pAvanayantram | pUjayati pratighasraM devi bhajAmi tada~Ndhrim || 258|| yastava mantramudAraprAbhavamAgamasAram | pAvani kUrchamupAste tasya namadhraNAya || 259|| shAntadhiyetarachintAsantatimamba vidhUya | chintayatAM tava pAdAvasmi satAmanuyAyI || 260|| shodhayatAM nijatattvaM sAdhayatAM mahimAnam | bhAvayatAM charaNaM te devi padAnucharo.aham || 261|| yo.anubhavennijadehe tvAmajare pravahantIm | santatachintanayogAttasya namAmi padAbjam || 262|| bodhayate bhavatIM yaH prANagatAgatadarshI | kuNDalinIM kulakuNDAttaM tridiveshvari vande || 263|| lochanamaNDalasaudhAM lokanamUlavichArI | vindati yaH parame tvAM vandanamasya karomi || 264|| mAnini jambhajitastvAM mAnasamUlavitarkI | vedahR^idamburuhe yaH pAdamamuShya namAmi || 265|| antaranAdavimarshI pashyati yaH sukR^itI te | vaibhavamamba vishuddhe tena vayaM paravantaH || 266|| indrapadasthitachittashshIrShasudhArasamattaH | yo bhajate janani tvAM tachcharaNaM praNamAmi || 267|| rAsanavAriNi lagnaH sammadavIchiShu magnaH | dhyAyati yaH parame tvAM tasya padaM mama vandyam || 268|| tvAM sadaha~na~NkR^itirUpAM yoginute hatapApAm | dhArayate hR^idaye yastasya sadA.asmi vidheyaH || 269|| dhUtasamastavikalpo yastava pAvanalIlAm | shodhayati svaguhAyAM tasya bhavAmyanujIvI || 270|| yo bhajate nijadR^iTiM rUpaparigrahaNeShu | kAmapi devi kalAM te tasya pade nipateyam || 271|| karmaNi karmaNi cheShTAmamba tavaiva vibhUtim | yaH shitabuddhirupAste tatpadameSha upAste || 272|| vastuni vastuni sattAM yo bhavatIM samupAste | mAtaramuShya vaheyaM pAdayugaM shirasA.aham || 273|| pAtumimaM nijadeshaM sarvadishAsu sapAsham | amba vidhAya samarthaM mAM kuru devi kR^itArtham || 274|| chitrapadAbhirimAbhishchitravichitracharitrA | sammadametu maghonaH prANasakhI mR^iganetra || 275|| || chaturtho nArAchikApAdaH || antarvidhunvatA tamaH prANasya tanvatA balam | mandasmitena devatArAj~nI karotu me shivam || 276|| utthApya puNyasa~nchayaM sammadrya pApasaMhatim | sA bhAratasya sampade bhUyAdbalAribhAminI || 277|| lIlAsakhI biDaujasassvarvATikAsu khelane | pIyuShabhAnujinmukhI devI shachI virAjate || 278|| pakShaH paro marutvato rakShaH pravIramardane | bhAmAli bhAsurAnanA devI shachI virAjate || 279|| bhItiM nishATasaMhateH prItiM suparvaNAM tateH | jyATa~NkR^itairvitanvatI devI shachI virAjate || 280|| devendrashaktidhAriNI shatruprasaktivAriNI | maunIndramuktikAriNI devI shachI gatirmama || 281|| sannasvadeshadarshanAdbhinnasvajAtivIkShaNAt | khinnasya saMshritAvanI devI shachI gatirmama || 282|| sa~Nghe sahasradhAkR^ite deshe nikR^iShTatAM gate | shokAkulasya lokabhR^iddevI shachI gatirmama || 283|| sA saMvido.adhidevatA tasyAssvaraH paro vashe | sarvaM vidhIyate tayA tasmAtparA matA shachI || 284|| sA yAti sUkShmamapyalaM sA bhAti sarvavastuShu | sA mAti khaM cha nistulaM tasmAtparA matA shachI || 285|| sA sarvalokanAyikA sA sarvagolapAlikA | sA sarvadehachAlikA tasmAtparA matA shachI || 286|| yasyAH kR^itirjagattrayaM yA tadbibharti lIlayA | yasyAM prayAti tallayaM sA vishvanAyikA shachI || 287|| dharme parikShayaM gate yA.avishya nirmalaM janam | tadrakShaNAya jAyate sA vishvanAyikA shachI || 288|| vedhA R^itasya yoditA mantreNa satyavAdinA | bAdhAnivAriNI satAM sA vishvanAyikA shachI || 289|| yaj~no yayA vinIyate yuddhaM tathA pR^ithagvidhabh | tAM devarAjamohinIM nArIM numaH purAtanIm || 290|| yasyAssuto vR^iShAkapirdevo.asatAM prashAsitA | tAM sarvadA suvAsinIM nArIM numaH purAtanIm || 291|| yasyAssamA nitambinI kAchinna viShTapatraye | tAM nityachAru yauvanAM nArIM numaH purAtanIm || 292|| yachchArutA na dR^ishyate mandArapallaveShvapi | tatsundarAchchasundaraM shachyAH padAmbujaM shraye || 293|| yasya prabhA na vidyate mANikyatalljeShvapi | tadbhAsurAchcha bhAsuraM shachyAH padAmbujaM shraye || 294|| na syAdaghaistiraskR^ito yachchintako naraH kR^itI | tatpAvanAchcha pAvanaM shachyAH padAmbujaM shraye || 295|| rAjannakhendubhAnubhissarvaM tamo vidhunvate | bR^indArakendrasundarIpAdAmbujAya ma~Ngalam || 296|| gIrvANamaulirIbhA sa~NkShAlitAya dIpyate | svargAdhinAthabhAminipAdAmbujAya ma~Ngalam || 297|| bAlArkabimbarochiShe yogIndra hR^idguhAjuShe | pAkArijIviteshvarIpAdAmbujAya ma~Ngalam || 298|| AtmIyadesharakShaNe shaktaM karotu sarvathA | pApadviShAM priya~NkarI vAsiShThamindrasundarI || 299|| vAsiShThavAkpradIptirbhinArAchikAbhirIshvarI | gIrvANachakravartinassammodametu sundarI || 300|| || tR^itIyamAnuShTubhaM shatakaM samAptam || \medskip\hrule\medskip || atha chaturthaM bArhataM shatakam || || prathamo halamukhIpAdaH || kShIravIchipR^iShatasitaM premadhAridarahasitam | nAkarAjanalinadR^ishaH shokahAri mama bhavatu || 301|| adhvano galitacharaNAmadhvarakShitimavibhavAm | AdadhAtu pathi vimale vaibhave cha haritaruNI || 302|| brahmaNashvitirathanabhaH kAyabhAgavagatimatI | yA tadA pR^ithagiva babhau dharmitAM svayamapi gatA || 303|| modabodhavibhavakR^itaprAkR^itetaravaratanu | sarvasadguNagaNayutaM yA sasarja suramithunam || 304|| puMsi dIptavapuShi tayorbrahma so.ahamiti lasati | yoShite kila dhiyamadAttasya shaktirahamiti yA || 305|| yAbhimAnabalavashatastAmudAratamavibhavAm | manyate sma varavanitAM svAdhidaivikatanuriti || 306|| AdipuMsi gaganatanuryA tanoti tanujamatim | AdadhAti yuvatitanuH prANanAyaka iti ratim || 307|| tAM parAM bhuvanajananIM sarvapApatatishamanIm | tantrajAlavinutabalAM staumi sarvamatimamalAm || 308|| sA matirviditaviShayA sA ruchirvitataviShayA | sA ratirvinutaviShayA sA sthitirvidhutaviShayA || 309|| yatra yatra mama dhiShaNA grAhyavastuni gatimatI | tatra tatra vilasatu sA sarvagA sakalacharitA || 310|| durbalasya bahulabalairarditasya jagati khalaiH | Adidevi tava charaNaM pAvanaM bhavati sharaNam || 311|| pauruShe bhavati viphale tvAmayaM janani bhajate | kiM nute yadi vimukhatA pauruShaM kathaya bhajatAm || 312|| karturapratihatagiraH pauruShAchChataguNamidam | dhyAturaskhalitamanasaH kAryasiddhiShu tava padam || 313|| pauruShaM viditamaphalaM kA~NkShite mama suranute | shaktamIdR^ishi tu samaye shraddadhAmi tava charaNam || 314|| pauruShaM yadi kavimataM devi te.api padabhajanam | daivavAdapaTuvachaso mUkataiva mama sharaNam || 315|| pUrvajanmasukR^itaphalaM daivamamba nigadati yaH | bhaktipauruShavirahiNo bhAvitasya ripudayitam || 316|| udyatasya tava charaNaM saMshritasya cha suranute | pUrvajanmasukR^itabalashraddhayA.alamahR^idayayA || 317|| astu pUrvabhavasukR^itaM mAstu vA janani jagatAm | sAmprataM tava padayugaM saMshritosmyava visR^ija vA || 318|| nAsti samprati kimapi kiM bhUtimApsyasi kimu tataH | anyajanmani vitaraNe kA prasaktiramaranute || 319|| nAnyajanmani bahushivaM nApi nAkabhuvanasukham | kAmaye phalamabhimataM dehi samprati shachi na vA || 320|| medinI bhuvanatalato nistulAduta gaganataH | bhAskarAduta ruchinidheH kAmyamIshvari vitara me || 321|| viShTape kvachana varade dAtumIshvari kR^itamatim | vArayejjanani na parastvAM janastava patimiva || 322|| dehi vA bhagavati na vA pAhi vA shashimukhi na vA | pAvanaM tava padayugaM na tyajAni haridayite || 323|| rakShituM bharataviShayaM shaktamindrahR^idayasakhI | chandrabimbaruchiramukhI sA kriyAdbhuvi gaNapatim || 324|| samprahR^iShyatu halamukhIrbhAsvatIrgaNapatimuneH | sA nishamya suranR^ipatermohinI sadayahR^idayA || 325|| || dvitIyo bhujagashishubhR^itApAdaH || marudadhipamanonAthA madhukarachikurAsmAkam | vR^ijinavidhutimAdhattAM vishadahasitaleshena || 326|| akhilanigamasiddhAnto bahumunivarabuddhAntaH | suraparibR^iDhashuddhAnto bharatavasumatImavyAt || 327|| bhagavati bhavatIcheto ratikR^idabhavadindrasya | sa tava janani santAnadrumavanamatiramyaM vAm || 328|| patirakhilayuvashreShThaH kimapi yuvatiratnaM tvam | vanavihR^itiShu vAM cheto haraNamabhavadanyonyam || 329|| madhuralalitagambhIraistava hR^idayamupanyAsaiH | vanaviharaNalIlAyAmaharadayi divo rAjA || 330|| kalavachanavilAsena praguNamukhavikAsena | bhuvanamapimano.ahArShIrjanani vanavihAre tvam || 331|| kanakakamalakAntAsyA dhavalakiraNavaktreNa | asitajalajapatrAkShI sitanalinadalAkSheNa || 332|| alichayanijadhammillA navajaladharakeshena | mR^idulatamabhujAvallI dR^iDhatamabhujadaNDena || 333|| amR^itanilayabimboShThI ruchiradhavaladantena | atimukuralasadgaNDA vikachajalajahastena || 334|| yuvatiratitarAM ramyA sulalitavapuShA yUnA | bhagavati shachi yuktA tvaM tribhuvanavibhunendreNa || 335|| vikachakusumamandAradraShThhamavanavaravATIShu | viharaNamayi kurvANA manasijamanugR^ihNAsi || 336|| tava shachi chikure rAjatkusumamamaravR^ikShasya | nava salilabhR^ito madhye sphuradiva navanakShatram || 337|| abhajatataruraudAryaM vibhavamapi mahAntaM saH | vikachakusumasampattyA bhagavati bhajate yastvAm || 338|| amaranR^ipatinA sAkaM kusumitavanavATIShu | bhagavati tava vishrAnteH sa jayati samayaH ko.api || 339|| amarataruvarachChAyAsvayi muhurupavishya tvam | shachi kR^itijanarakShAyai manasi vitanuShu charchAm || 340|| kimu vasu vitarANyasmai sumatimuta dadAnyasmai | kShamatamamathavA.amuShmin balamurughaTayAnIti || 341|| haritaruNi kadA vAme vinamadavanacharchAsu | smaraNasamaya AyAsyatyamalahR^idayara~Nge te || 342|| shachi bhagavati sAkShAtte charaNakamaladAso.aham | iha tu vasumatIloke smara mama viShayaM pUrvam || 343|| na yadi tava mano dAtuM svayamayi laghave mahyam | upavanatarukarNe vA vada madabhimataM kartum || 344|| nijaviShayamatishreShThaM vipadi nipatitaM trAtum | svakulamapi sadadhvAnaM gamayitumapathe shrAntam || 345|| akhilabhuvanasamrAjaH priyataruNi bhavatyaiva | matibalaparipUrNoe.ayaM gaNapatimunirAdheyaH || 346|| na kimu bhavati shaM deshe gatavati kaluShe kAle | tava bhajanamaghaM sadyo harihayalalane jetum || 347|| trijagati sakalaM yasya prabhavati pR^ithule haste | sa bahulamahimA kAlo mama janani vibhUtiste || 348|| anavaratagaladbAShpAM bharatavasumatIM trAtum | vitaratu dayitAjiShNorgaNapatimunaye shaktim || 349|| bhujagashishubhR^itA etAH kavigaNapatinA gItAH | vidadhatu muditAM devIM vibudhapatimanonAthAm || 350|| || tR^itIyo maNimadhyApAdaH || ma~NgaladhAyI puNyavatAM manmathadhAyI devapateH | viShTaparAj~nIhAsalavo vikramadhAyI me bhavatu || 351|| dR^iShTivisheShaishshItatarairbhUryanukampaiH puNyatamaiH | bhAratabhUmestApatatiM vAsavakAntA sA haratu || 352|| pAvanadR^iShTiryogihitA bhAsuradR^iShTirdevahitA | shItaladR^iShTirbhakthitA mohanadR^iShTishshakrahitA || 353|| ujjvalavANI vikramadA vatsalavANI sAntvanadA | ma~njulavANI sammadadA pannagaveNI sA jayati || 354|| shAradarAkAchandramukhI toyadamAlAkArakachA | mechakapAthojAtadalashrIharachakShurvAsikR^ipA || 355|| champakanAsAgaNDavibhAmaNDalakhelatkuNDalabhA | uktiShu vINAbimbaphalashrIharadantaprAvaraNA || 356|| nirmalahAsakShAlitadigbhittisamUhA mohaharI | kA~nchanamAlAshobhigalA santatalIlA buddhikalA || 357|| viShTapadhAri kShIradharasvarNaghaTashrIhArikuchA | kApi biDaujo rAjyaramA chetasi mAtA bhAtu mama || 358|| divyasudhormirbhaktimatAM pAvakakIlA pApakR^itAm | vyomni charantI shakrasakhI shaktiramoghA mAmavatu || 359|| sammadayantI sarvatanuM saMshamayantI pApatatim | samprathayantI sarvamatIssa~NghaTayantI prANabalam || 360|| nirjitashokAdhUtatamAssaMskR^itachittA shuddhatamA | vAsavashaktervyomajuShaH kAchana vIchirmAM vishatu || 361|| udgatakIlaM mUlamidaM bhinnakapAlaM shIrShamidam | ujjhita mohaM chittamidaM vAsavashaktirmAM vishatu || 362|| dR^ishyaviraktaM chakShuridaM bhogaviraktaM kAyamidam | dhyeyaviraktA buddhiriyaM vAsavashaktirmAM vishatu || 363|| chakShuradR^ishyajvAlabhR^itA vyApakakhena prollasatA | vismR^itakAyaM sandadhatI vAsavashaktirmAM vishatu || 364|| kAyamajasraM vajradR^iDhaM buddhimasheShe vyAptimatIm | divyatara~NgairAdadhatI vAsavashaktirmAM vishatu || 365|| mUrdhni patantI vyomatalAtsantatamantaH sarvatanau | sampravahantI divyajharairvAsavashaktirmAM vishatu || 366|| bhAnuvibhAyAM bhAsakatA divyasudhAyAM modakatA | kA.api surAyAM mAdakatA vAsavashaktyAM tattritayam || 367|| bhAsayatAnme samyagR^itaM modamudAraM puShyatu me | sAdhumadaM me vardhayatAnnirjarabhartuH shaktirajA || 368|| kashchana shaktiM yogabalAdAtmasharIre vardhayati | eShi vivR^iddhiM bhaktimataH kasyachideshe tvaM vapuShi || 369|| sAdhayatAM vA yogavidAM kIrtayatAM vA bhaktimatAm | vatsalabhAvAdindravadhUrgarbhabhuvAM vA yAti vasham || 370|| yasya samAdhiH ko.api bhavedAtmamanIShA tasya balam | yastava pAdAmbhojaratastasya khalu tvaM devi balam || 371|| dvAdashavarShI yogabalAdyA khalu shaktiryuktamateH | tAM shachi dAtuM bhaktimate kApi ghaTI te mAtaralam || 372|| yogabalAdvA dhyAnakR^ito bhaktibalAdvA kIrtayataH | yAtu vivR^iddhiM vishvahitA vAsavashaktirme vapuShi || 373|| duHkhitametachChrIrahitaM bhAratakhaNDaM sarvahitam | trAtumadhIshA svarjagataH sukShamabuddhiM mAM kurutAm || 374|| santu kavInAM bharturime sundarabandhAshuddhatamAH | sanmaNimadhyAH svarjagato rAjamahiShyAH karNasukhAH || 375|| || chaturtho mAtrasamakapAdaH || shukljyotiH prakarairvyAptaH sUkShmo.apyantAn haritAM hAsaH | jiShNoH patnyAstimirArAtirnishsheShaM me haratAnmoham || 376|| shR^iNvatkarNA sadayAlokA lokendrasya priyanArI sA | nityAkroshairvirudadvANIM pAyAdetAM bharatakShoNIm || 377|| deveShu svaH paridIpyantI bhUteShvindau parikhelantI | shaktirjiShNordvapadAM sa~Nghe hantaitasyAM bhuvi nidrAti || 378|| nidrANAyA api te jyotirgandhAdete dharaNIloke | martyAH ki~nchatprabhavantIshe tvaM buddhA chetkimu vaktvyam || 379|| meghachChanno.apyaruNastejo dadyAdeva pramade jiShNoH | atrasthAnAM bhavatIgranthichChannApyevaM kurute praj~nAm || 380|| dhyAyAmo yatkathayAmo yatpashyAmo yachChR^iNumo yachcha | jIvAmo vA tadidaM sarvaM nidrANAyA api te bhAsA || 381|| nADIbandhAdabhimAnAchcha chChannA mAtarbhavatI dehe | ekApAyAditaro nashyettasmAddvedhA tapasaH panthAH || 382|| chittaM yasya svajanisthAne praj~nA bAhyA na bhavedyasya | Adhatse tvaM bhuvanAdhIshe buddhA krIDAM hR^idaye tasya || 383|| vANI yasya svajanisthAne dUre kR^itvA manasA sa~Ngam | mAtastatra pratibuddhA tvaM shlokairlokaM kuruShe buddham || 384|| hitvA dR^ishyAnyatisUkShmAyAM chakShuryasya svamaho vR^ittau | vishvA.aliptA jagatAM mAtarjAgratyasminnachalA bhAsi || 385|| shR^iNvan karNo dayite jiShNorantaH shabdaM dhriyate yasya | buddhA bhUtvA viyatA sAdhorekIbhAvaM kuruShe tasya || 386|| yAtAyAtaM satataM pashyedyaH prANasya prayato martyaH | vishvasyeShTAM tanuShe krIDAM tasmin buddhA taruNIndrasya || 387|| svAntaM yasya prabhavetkAryeShvambaitasminnayi nidrAsi | AtmA yasya prabhavetkAryeShvambaitasminnayi jAgarShi || 388|| yasyA.ahantA bhavati svAnte tasya svAntaM prabhavetkartum | yasyA.ahantA bhavati svAtmanyAtmA tasya prabhavetkartum || 389|| svAntaM yasya prabhavetkartuM tatkarmAlpaM bhavati vyaShTeH | AtmA yasya prabhavetkartuM tachChlAdhyaM te balajitkAnte || 390|| etatsvAntaM hR^idayAjjAtaM shIrShe vAsaM pR^ithagAdhAya | hArdAhantAM svayamAkramya bhrAntAnasmAn kurute mAtaH || 391|| asmAkaM bhoH kurute bAdhAmasmajyotirjanani prApya | svAnte naitatkR^itamanyAyyaM kAnte jiShNoH shR^iNu rAj~ni tvam || 392|| svAnte tejo hR^idayAdAyAchchandre tejo dinabharturvA | AshrAntaM yo manute dhIrastasya svAntaM hR^idi lInaM syAt || 393|| mUlAnveShisphuradAvR^ittaM nIchairAyAtkabalIkR^itya | jAnantyekA hR^idayasthAne yu~njAnAnAM jvalasIshAne || 394|| shIrShe chandro hR^idaye bhAnurnetro vidyutkulakuNDe.agniH | sampadyante mahasA.ashaiste jiShNoH kAnte sutarAM shaste || 395|| manvAnAM tvAM shirasi sthAne pashyantIM vA nayanasthAne | chetantIM vA hR^idayasthAne rAjantIM vA jvalanasthAne || 396|| yo nA dhyAyejjagatAM mAtaH kashchichChreyAnavanau nA.ataH | pUtaM vandyaM charaNaM tasya shreShThaM varNyaM charitaM tasya || 397|| dogdhrIM mAyAM rasanAM vA yo mantraM mAtarjapati prAj~naH | so.ayaM pAtraM karuNAyAste sarvaM kAmyaM labhate haste || 398|| ChinnAM bhinnAM sutarAM sannAmannAbhAvAdabhitaH khinnAm | etAM pAtuM bharatakShoNIM jAye jiShNoH kuru mAM shaktam || 399|| klR^iptaiH samyagbR^ihatIChandasyetairmAtrasamakairvR^ittaiH | karNAdhvAnaM pravishadbhissA paulomyambAparitR^iptAstu || 400|| || chaturthaM bArhataM shatakaM samAptam || \medskip\hrule\medskip || atha pa~nchamaM pA~NktaM shatakam || || prathamo mayUrasAriNIpAdaH || premavAsabhUmirachChabhAvasthAnamAnamajjanAghahA me | indrasundarI mukhAbjabhAsI mandahAsa ApadaM dhunotu || 401|| vIkShitaiH kR^ipAnvitairharantI pAtakAni ma~NgalaM bhaNantI | jambhabhedijIviteshvarI me janmadeshamujjvalaM karotu || 402|| ambaraM cha devatAnatabhrUramba te tanudvayaM yaduktam | AdimA tayorvR^iShAkapiM taM devyajIjanatparA jayantam || 403|| etameva devi lokabandhuM sUrayo vR^iShAkapiM bhaNanti | varShahetudIdhitirvR^iShAyaM kaM piban karaiH kapirniruktH || 404|| kechidindranAri chandrarekhAshekharaM vR^iShAkapiM gadanti | paNDitAH pare tu sheShashayyAshAyinaM vR^iShAkapiM tamAhuH || 405|| brahmaNaspatiM tu vaidyutAgneraMshajaM marudgaNeShu mukhyam | vishvarAj~ni vighnarAjameke vishrutaM vR^iShAkapiM vadanti || 406|| bhAskarashcha sha~Nkrashcha mAtarmAdhavashcha mantranAyakashcha | AtmajeShu te na santi nAntarvyApakAntarikShavigrahAyAH || 407|| vAsavo.api devi devatAtmA vallabhastava chChalA~NganAyAH | AtmajAta eva kIrtanIyo devatApathena dehavatyAH || 408|| sAshavasyudIritAsi dhIrairdehinI vihAyasendrasUstvam | li~Ngabhedato.anurUpatastatkIrtanaM shavo hi shaktivAchi || 409|| nAditirvibhidyate shavasyAssarvadeva mAtaraM viduryAm | sA marutprasUrabhANi pR^ishniH sApi bhidyate tato na devyAH || 410|| shaktireva sA nyagAdi pR^ishnishshaktireva sA.aditirnyabhANi | shaktireva sA.abhyadhAyi bhadrA shaktireva sA shavasyavAdi || 411|| vijjanaH prakR^iShTashaktibhAgaM shabdameva pR^ishnimAha dhenum | yA parairbudhairabhANi gaurI mAnaveShTabhAShayaiva nArI || 412|| vyApakatvakalpitaM vishAlaM deshameva shaktibhAgamAhuH | buddhishAlino.aditiM savitrIM yA parairvichakShaNaiH smR^itA dyauH || 413|| nityamodarUpashaktibhAgaM paNDitAH prakIrtayanti bhadrAm | uktibhedachAturIpralubdhAH sUrayaH pare shivAM juguryAm || 414|| vIryarUpabhAga eva gaNyaH paNDitaiH shavasyabhANi shakteH | ojaso na so.atirichya te.nsho bhidyate tato na vajramugram || 415|| vajrameva bhAShayA pareShAmuchyate prachaNDachaNDiketi | yadvibhUtileshachumbitAtmA jIyate na kenachitpR^ithivyAm || 416|| sarvato gatishshachIti shaktiH kIrtyate budhairudArakIrtiH | sarvabhAgavAchakaM padaM tat pAvanaM purAtanaM priyaM naH || 417|| yashshachIti nAmakIrtayennA puShkareNa te sharIravatyAH | divyasundarI tanorutAho taM parAbhavenna devi pApam || 418|| ambaraM varaM tavAmba kAyaM yassadA vilokayannaupAste | lokajAlachakravartijAye taM parAbhavenna devi pApam || 419|| pUrNimAsudhAMshubimbavaktraM phurviMArijAtapatranetram | shubhratAnidhAnamandahAsaM kAlameghakalpakeshapAsham || 420|| ratndarpaNAbhama~njugaNDaM champakaprasUnachArunAsam | kundakuDmalAbhakAntadantaM kalpaparviMAbhadantachelam || 421|| sadvarAbhayapradAyihastaM sarvadevavandyapAdaka~njam | divyaratnabhUShaNairanarghairbhUShitaM kanatsuvarNavarNam || 422|| divyashuklvastrayugmadhAri svargasArvabhomanetrahAri | yaH smaredvarA~NganAvapuste taM parAbhavenna devi pApam || 423|| bhAratakShiteridaM jananyAshshokajanyabAShpavAri hartum | dehi shaktimAshritAya mahyaM pAhi dharmamindrachittanAthe || 424|| sadvasiShThasantaterimAbhissatkavermayUrasAriNIbhiH | sammadaM prayAtu shakrachetassampramohinIsarojanetra || 425|| || dvitIyo manoramApAdaH || hasitamAtatAyipAtakapramathanaprasiddhavikramam | amarabhUmipAlayoShito mama karotu bhUrima~Ngalam || 426|| karuNayA prachoditA kriyAdbharatabhUmimakShayashriyam | charaNaka~njarAjadindirA suranareshvarasya sundarI || 427|| na bhavanaM na vA jagatpR^itha~NnivasanAya te surArchate | yadakhilAni viShTapAni te vapuShi sarvamandirANi cha || 428|| matidaviShThasImabhAsuraM tava sharIrameva puShkaram | paramapUruShasya vallabhe bhuvanamekamuchyate budhaiH || 429|| taraNayassudhAMshavastathA saha bhuvA grahAH sahasrashaH | ayi jaganti vistR^itAni te vapuShi puShkare jagatyaje || 430|| bahubhiruShNabhAnubhikrtatAt bahubhirindubhirvashIkR^itAt | viyati lokajAladhAtri te shataguNaM balaM prashishyate || 431|| na vibhurekakasya bhAsvato vibhavameva nA prabhAShitum | kimuta te dadhAsi yodare dyutimatAM shatAni tAdR^ishAm || 432|| iha vihAyasA sharIriNImatisamIpavAsinImapi | na khalu ko.api lokituM prabhurbhagavatIM parAmayuktadhIH || 433|| tadidamuchyate jano jagadvapurameyamAdidevi te | janayate yato.akhilaM dR^ishorviShayabhUtametadAtatam || 434|| bahulatArakAgaNairyutaM kimapi khaM taveha varShmaNi | shachi vibhajya bhAShayaikayA sukavayo mahojagadviduH || 435|| idaminendubhUvilakShaNairdinakaraissudhAkarairgrahaiH | bahujagadbhiranvitaM mahojagadasheShadhAtri naikakam || 436|| ajaramavyayaM sanAtanaM munijanaikavedyavaibhavam | na bhavatIM vinA tapojagatpR^ithagasheShanAthanAyike || 437|| sakaladR^ishyamUlakAraNaM tava cha saMshrayo nirAshrayaH | janani satyaloka saMj~nayA paramapUruSho.abhidhIyate || 438|| ayi purAtanarShibhAShayA gaganametadApa IritAH | atha yadAsuvIryamujjhitaM bhagavatastvameva tatpare || 439|| shachi virADbhavatyabhAShata shrutirapIdameva nAma te | vitatavishvavigrahAtmani prathitametadAhmayaM param || 440|| upaniShadgirA virADvadhUH puruSha eSha bhAShayAnyayA | ubhayathApi sAdhu tatpadaM bhavati te na saMshayAspadam || 441|| na vanitA na vA pumAn bhavejjagati yo.antarashsharIriNAm | tanuShu li~NgabhedadarshanAt tanumatashcha li~Ngamuchyate || 442|| akhilanAthavIryadhAraNAnnganabhUmira~NganAmatA | sakalalokabIjabhR^ittvato gaganadesha eSha pUruShaH || 443|| sphuTavibhaktagAtralakShmaNAM niyatavAdinAmadarshanAt | na puruSho viyadyathA vayaM na vanitA viyadyathaiva naH || 444|| abhivimAnato.atha vA shachI vibudharAjayorvilakShaNAt | varavilasinI viyattanussadavikAramuttamaH pumAn || 445|| hR^idayamalpamapyado jananyanavamaM vishAlapuShkarAt | vimaladehadurgamadhyagaM sakalarAj~ni saudhamastu te || 446|| vikasitaM nijAMshuvIchibhikrtadayamAlayaM vishAmba me | vikachamuShNabhAnubhAnubhirdashashatachChadaM yathA ramA || 447|| hR^idayasAdhusaudhashAyinIM nayanaramyaharmyachAriNIm | bhuvanarAjachittamohinIM namata tAM parAM vilAsinIm || 448|| tava pare marIchivIchayastanuguhAM pravishya vishrute | bharatabhUmirakShaNodyataM gaNapatiM kriyAsurujjvalam || 449|| gaNapatermanoramA imAssuguNavedinAM manoramAH | avahitA shR^iNotu sAdaraM suramahIpatermanoramAH || 450|| || tR^itIyo maNirAgapAdaH || jyotiShAM nR^ipatiH sakalAnAM shAntimeva sadAbhidadhAnaH | nirmalo haratAtsurarAj~nImandahAsalavo mama pApam || 451|| duShTalokadaviShThapadAbjA shiShTashokanivAraNadakShA | nAkalokamahIpatirAmA bhAratasya dhunotvasukhAni || 452|| devamaulimaNIkiraNebhyo vikramaM svayameva dadAnA | devarAjavadhUpadapadmashrIstanotu sadA mama bhadram || 453|| devi te vadanaM bahukAntaM sAkShi tatra purandarachetaH | amba te charaNAvatikAntAvatra sAkShi manaH smaratAM naH || 454|| bhAsuraM surasaMhativandyaM sundaraM harilochanahAri | pAvanaM natapApavidAri svargarAj~ni padaM tava seve || 455|| ja~Nghike jayatastava mAtaH sa4 eva ruchAM yadadhInaH | vAsavasya dR^ishAM cha sahasraM yadvilokanalobhavinamram || 456|| sakthinI tava vAsavakAnte rAmaNIyakasAranishAnte | vandate vinayena mameyaM vandinastava pAvani vANI || 457|| indranAri kaTistava pR^ithvImaNDalasyatulA mahanIye | madhyamo nabhasaH pratimAnaM bhoginAM bhuvanasya cha nAbhiH || 458|| dhIratAM kurute vigatAsuM sA suparvapaternishitAgrA | sA tavAmba manobhavashastrI romarAjiraghaM mama hantu || 459|| romarAjibhuja~Ngashishuste devi devapaterhR^idayasya | daMshanena karotyayi mohaM jIvitAya chirAya vichitram || 460|| pUrNahemaghaTaviva shakrAvAhitAM dadhatAvayi shaktim | vishvapoShaNakarmaNi dakShAvamba dugdhadharau jayataste || 461|| lokamAtaruroruhapUrNasvarNakumbhagatA tava shaktiH | lokapAlanakarmaNi vIryaM devi vajradharasya bibharti || 462|| akShayAmR^itapUrNaghaTau te shakrapatni kuchai tava pItvA | lokabAdhakabhIkararakSho dhUnane prababhUva jayantaH || 463|| hastayostava mArdavamindro bhAShatAM suShamAmapi devaH | dAtR^itAmanayormunivargo varNayatyajare paTutAM cha || 464|| puShpamAlyamR^idorapi bAhoH shaktirugratamAsharanAshe | dR^ishyate jagatAmadhipe te bhAShatAM tava kastanutattvam || 465|| kambukaNThi taveshvari kaNThastArahAravitAnavirAjI | devarADbhujalochanapathyo devi me bhaNatAdbahubhadram || 466|| Ananasya gabhastinidheste rAmaNIyakamadbhutamIShTe | apyamartyanutAkhilasiddhervAsavasya vashIkaraNAya || 467|| na prasannamalaM ravibimbiM chandrabimbamatIva na bhAti | suprasannamahojjvalamAsyaM kena pAvani te tulayAmaH || 468|| lochane tava lokasavitri jyotiShaH shavasashcha nidhAne | vaktumabjasame nanu lajje dhoraNImanusR^itya kavInAm || 469|| AyatojjvalapakShmalanetrA champakaprasavopamanAsA | ratnadarpaNaramyakapolA shrIlipidyutisundarakarNA || 470|| aShTamIshashibhAsurabhAlA viShTapatrayachAlakalIlA | smerachArumukhI surabhartuH preyasI vidadhAtu shivaM me || 471|| mandahAsalaveShu valakShA mechakA chikuraprakareShu | shoNatAmadhare dadhatI sA rakShatu prakR^itistriguNA naH || 472|| sarvalokavadhUjanamadhye yAM shrutissubhagAmabhidhatte | yA divo jagato ruchisArastAM namAmi purandararAmAm || 473|| svargabhUpatilochanabhAgyashrIshsharIravatI jalajAkShI | bhAratasya karotu samarthaM rakShaNe narasiMhatanUjam || 474|| lokamAturime ramaNIyAH pAkashAsanachittaramaNyAH | arpitAH padayorvijayantAM satkaveH kR^itayo maNirAgAH || 475|| || chaturtho meghavitAnapAdaH || amarakShitipAlakacheto madanaM sadanaM shuchitAyAH | smitamAdivadhUvadanottthaM haratAdakhilaM kaluShaM me || 476|| sutarAmadhanAmatikhinnAmadhunA bahulaM vilapantIm | paripAtu jagattrayanetrI bharatakShitimindrapurandhrI || 477|| sthalametadamartyanR^ipAlapramade tava meghavitAnam | ayi yatra parisphusIshe taTidujjvalaveShadharA tvam || 478|| taTitA tava bhautikatanvA jitamambudhare vilasantyA | upamA bhuvi yA lalitAnAM yuvachittahR^itAM vanitAnAm || 479|| sphuritaM tava lochanahAri stanitaM tava dhIragabhIram | ramaNIyatayA militA te shachi bhIkaratA chapalAyAH || 480|| chapale shachi visphurasIndraM ghanajAlapatiM madayantI | ditijAtamavagrahasaMj~naM janaduHkhakaraM damayantI || 481|| prabhumabhrapatiM ramayantI duritaM namatAM shamayantI | haritAM timirANi harantI pavamAnapathe vilasantI || 482|| alaghustanitaM vidadhAnA balamugratamaM cha dadhAnA | hR^idayAvarakaM mama mAyApaTalaM taTidAshu dhunotu || 483|| surapArthavajIvitanAthe nikhile gagane pravahantyAH | taTitastava vIchiShu kAchichchapalA lasatIha payode || 484|| vibudhapraNute dhanikAnAM bhavaneShu bhavantyayi dIpAH | paTuyantrabalAduditAnAM tava devi lavAH kiraNAnAm || 485|| vyajanAni cha chAlayasi tvaM bata sarvajagannaR^ipajAye | vibudho.abhidadhAtvathavA ko mahatAM charitasya rahasyam || 486|| iha chAlita IDyamanIShairayi yantravisheShavidhij~naiH | bahulAdbhutakAryakalApastaTitastava mAtaradhInaH || 487|| acharastarugulmalatAdiH sakalashcha charo bhuvi jantuH | aniti pramade surabhartustaTitastava devi balena || 488|| manute nikhilo.api bhavatyA manujo.aniti vaktishR^iNoti | avalokayate cha bhaNAmaH kimu te jagadamba vibhUtim || 489|| atisUkShmapavitrasuShumNApathatastanuShu prayatAnAm | kulakuNDakR^ishAnushikhA tvaM jvalasi tridashAlayanAthe || 490|| itaro na surakShitipAlAtkulakuNDagato jvalano.ayam | itarendravilAsini na tvatkulakuNDakR^ishAnushikheyam || 491|| kulakuNDakR^ishAnushikhAyAH kiraNaiH shirasi sthita eShaH | dravatInduranAratametadvapurAtmamayaM vidadhAnaH || 492|| madakR^idbahulAmR^itadhArAparipUtamidaM mama kAyam | vidadhAsi bhajanmanujApte kulakuNDadhanaMjayadIpte || 493|| shirasIha sataH sitabhAnoramR^itena vapurmadameti | hR^idi bhAta inasya cha bhAsA matimetu parAM shachi chetaH || 494|| mama yogamadena na tR^iptinijadeshadashAvyathitasya | avagantumupAyamamoghaM shachi bhAsaya me hR^idi bhAnum || 495|| viditaH pramadasya vidhAtuH shashino janayitri vilAsaH | ahamutsuka Ishvari bhAnorvibhavasya cha vettumiyattAm || 496|| varuNasya dishi pravahantI madamamba karoShi mahAntam | dishi vajrabhR^itaH pravahantI kuru buddhimakuNThitasiddhim || 497|| amalAmadhiruhya suShumNAM pravahasyadhunAmba madAya | amR^itAmadhiruhya cha ki~nchitprivaheshvari buddhibalAya || 498|| bharatakShitikShaNakarmaNyabhidhAya manoj~namupAyam | atha devi vidhAya cha shaktaM kuru mAM kR^itinaM shachi bhaktam || 499|| narasiMhasutena kavInAM vibhunA rachitaiH kamanIyaiH | paritR^ipyatu meghavitAnairmarutAmadhipasya purandhrI || 500|| || pa~nchamaM pA~NktaM shatakaM samAptam || \medskip\hrule\medskip || atha ShaShThaM traiShTubhaM shatakam || || prathama upajAtipAdaH || mando.api bodhaM vidadhanmunInAM svachCho.api rAgaM tridasheshvarasya | alpo.api dhunvanharitAM tamAMsi smitA~Nkuro bhAtu jayantamAtuH || 501|| asheShapApaughanivAraNAya bhAgyasya pAkAya cha devarAj~nI | shokAkulAM bhAratabhUmimetAM lokasya mAtA hR^idaye karotu || 502|| dharmadviShAmindranirAdarANAM saMhArakarmaNyatijAgarUkAm | devIM parAM devapathe jvalantIM prachaNDachaNDIM manasA smarAmi || 503|| vyAptA taTidvA gagane nigUDhA nArI sureshAnamanoramA vA | shaktiH suShumNApathachAriNI vA prachaNDachaNDIti padasya bhAvaH || 504|| samastalokAvaninAyikAyAH suparvamArgeNa sharIravatyAH | mAturmaho.nshaM mahanIyasAraM vij~nAnavantastaTitaM bhaNanti || 505|| nigUDhatejastanurambikeyaM prachaNDachaNDI parito lasantI | avyaktshabdena sharIravatyAH kAlyAH kavInAM vachaneShu bhinnA || 506|| shabdaM vinA naiva kadApi tejastejo vinA naiva kadApi shabdaH | shaktidvayaM santatayuktametatkathaM svarUpeNa bhavedvibhaktam || 507|| ekaiva shaktirjvalati prakR^iShTA svaratyapi prAbhavataH samantAt | kriyAvibhedAdiha paNDitAnAM shaktidvayoktistu samarthanIyA || 508|| ekakriyAyAshcha phalaprabhedAtpunarvibhAgaH kriyate bahuj~naiH | kAlIM cha tArAM svaramagryamAhuH prachaNDachaNDIM lalitAM cha tejaH || 509|| sampadyate shabdagaterhi kAlaH shabdo vareNyastadabhANi kAlI | dhyAtena shabdena bhavaM taredyadsudhAstataH shabdamushanti tArAm || 510|| yadakSharaM vedavidAmR^iShINAM vedAntinAM yaH praNavo munInAm | gaurI purANeShu vipashchitAM yA sA tAntrikANAM vachanena tArA || 511|| sampadyate saMhR^itirojasA yatprachaNDachaNDI tadudIritaujaH | sidhyedasheSho.anubhavo yadojasyato budhAstAM lalitAM vadanti || 512|| prachaNDachaNDIM laghunA padena chaNDIM viduH kechana buddhimantaH | eke vidaH shreShThamahomayIM tAM lakShmIM mahatpUrvapadAM vadanti || 513|| atIva saumyaM laliteti shabdaM prachaNDachaNDIti padaM cha bhImam | devI dadhAnA sutarAM manoj~nA ghorA cha nityaM hR^idi me vibhAtu || 514|| prachaNDachaNDIM tu sharIrabhAjAM tanUShu yogena vibhinnashIrShAm | shaktiM suShumNAsaraNau charantIM tAM ChinnamastAM munayo vadanti || 515|| kapAlabhedo yadi yogavIryAtsampadyate jIvata eva sAdhoH | tameva santaH pravadanti shIrShachChedaM sharIrAntarabhAsi shakteH || 516|| udIryase nirjararAjapatni tvaM ChinnamastA yaminAM tanUShu | ujjaR^imbhaNe vishvasavitri yasyAH kAyaM bhavedvaidyutayantratulyam || 517|| piturniyogAttanayena kR^itte maste jananyAH kila reNukAyAH | tvamAvishaH pAvani tatkabandhaM tadvA tvamuktAsi nikR^ittamastA || 518|| ChinnaM shiraH kIrNakachaM dadhAnAM kareNa kaNThodgataraktadhArAm | rAmAmbikAM durjanakAlarAtriM devIM pavitraM manasA smarAmi || 519|| dhruvo ramA chandradharasya rAmA vAgvajravairochasadIrghanirye | kUrchadvayaM shastrakR^ishAnujAye vidyAnR^ipArNA surarAjashakteH || 520|| mAyAdvivAraM yadi saikavarNA vidyaikavarNA yadi dhenurekA | dhenvAdi sambodhanamastramagnervilAsinI cheti dharenduvarNA || 521|| chatuShTayetranyatamaM gR^ihItvA mantraM mahendrasya manodhinAthAm | bhajeta yastAntrikadivyabhAvamAshritya sidvIH sakalAH sa vindet || 522|| saMhotramityadbhutashaktiyuktaM vR^iShAkaperdarshanamamba mantram | yo vaidikaM te manujo bhajeta ki~nchinna tasyeha jagatyasAdhyam || 523|| prachaNDachaNDi pramade purANi purANavIrasya manodhinAthe | prayachCha pAtuM paTutAM parAM me puNyAmimAmAryanivAsabhUmim || 524|| prapa~ncharAj~nIM prathitaprabhAvAM prachaNDachaNDIM parikIrtayantyaH | etAH pramodAya bhavantu shakterupAsakAnAmupajAtayo naH || 525|| || dvitIyo rathoddhatApAdaH || kShAlanAya haritAM vibhUtaye viShTapasya madanAya vajriNaH | tajjayantajananImukhAbjato nirgataM smitamaghaM dhunotu naH || 526|| annalopakR^ishabhIrukaprajAM bhinnabhAvabalahInanetR^ikAm | vAsavasya varavarNinI parairarditAmavatu bhAratAvanim || 527|| pANipAdamanimeSharAj~ni te pArijAtanavapallavopamam | akShapAvirahama~NgabhAsaridvAsichakramithunaM kuchadvayam || 528|| pUrNachandrayashaso.apahArakaM samprasAdasuShamAspadaM mukham | j~nAnashaktiruchishevadhIdR^ishau raktvarNakasudhAghano.adharaH || 529|| mardayattimiramuddhataM dishAM alpamapyadhikavaibhavaM smitam | prAvR^iDantayamunAtara~NgavannatnlachAruratipAvanaH kachaH || 530|| vallakIM cha paruShadhvaniM vadan duHkhitasya cha mudAvahaH svaraH | chAru hAvashabalA.alasA gatiH kAyadhAmavachasAM na paddhatau || 531|| yogasiddhimatulAM gatA matishchAturI cha budhamaNDalastutA | viShTapatritayarAjyato.apyasi tvaM sukhAya mahate biDaujasaH || 532|| tvAmudIkShya dhR^itadevatAtanuM dIptapakShmalavishAlalochanAm | Adito janani janminAmabhUd vAsavasya ratirAdime rase || 533|| AdimaM rasamanAdivAsanA vAsitau prathamamanvagR^ihNatAm | sammadasya nidhimAdidampatI so.achalattribhuvane tataH kramaH || 534|| jyAyasA diviShadAM purAtanI nIlaka~njanayanA vilAsinI | yadvihAramatanotprarochanaM tatsatAmabhavadAdime rase || 535|| na tvadamba nalinAnanA.adhikA nApi nAkapatito.adhikaH pumAn | nAdhikaM cha vanamasti nandanAnnAdimAdapi raso.adhiko rasAt || 536|| nAyikA tvamasamAnachArutA nAyakaH sa marutAM mahIpatiH | nandanaM cha rasara~NgabhUH kathaM manmathasya na bhavedihotsavaH || 537|| devi vAM mR^itikathaiva dUrato jAtuchidgalati naiva yauvanam | kA~NkShitaH parikaro na durlabhaH kiM rasaH pariNamedihAnyathA || 538|| viShTapasya yuvarAjakeshave trANabhAramakhilaM nidhAya vAm | krIDatoramararAj~ni nandane krIDitAni mama santu bhUtaye || 539|| yadyuvAmamararAj~ni nandane kurvato rahasi devi mantraNam | tatra chenmama kR^itirmanAgiyaM sparshameti bhuvi ko nu matkR^itI || 540|| krandanaM yadi mameha vandino nandane viharatoH savitri vAm | antarAyakR^idathAbjakAnti te sampragR^ihya charaNaM kShamApaye || 541|| yoShitAmapi vimohanAkR^itirmohanaM tu puruShasaMhaterapi | indramambaramayAM babhUvitha tvaM rasArdrahR^idayA lasadrasam || 542|| divyachandanarasAnulepanaiH pArijAtasumatalpakalpanaiH | chArugItakR^itibhishcha bhejire nAkalokavanadevatAshcha vAm || 543|| svarNadIsalilashIkarokShitAH pArijAtasumagandhadhAriNaH | nandane tridashalokarAj~ni vAM kepi bhejuralasAH samIraNAH || 544|| AdadhAsi sakalA~NganAdhike padmagandhini sudhAdharAdhare | ma~njuvANi sukumAri sundari tvaM surendrasakalendriyArchanam || 545|| Adidevi vadanaM tavAbhavat kAntidhAma madanaM divaspateH | AnanAdapi rasAmR^itaM kiranniShkramaM vilasitaM kalaM girAm || 546|| chAruvAgvilasitAchcha nistulapremavIchiruchiraM vilokitam | vIkShitAdapi vilAsavishramasthAnamalpamalasaM shuchismitam || 547|| bhAsurendradR^iDhabAhupa~njare lajjayA sahajayA namanmukhI | tadvilochanavikarShakAlakA pAtu mAM tridivalokanAyikA || 548|| bhAratakShitiviShAdavAraNe tatsutaM gaNapatiM kR^itodyamam | AdadhAtu paTumarjunasmitA durjanapramathanakShamA shachI || 549|| chArushabdakalitAH kR^itIrimAH satkavikShitibhujo rathoddhatAH | sA shR^iNotu suramedinIpaternetrachittamadanI vilAsinI || 550|| || tR^itIyo mauktikamAlApAdaH || nirmalabhAsAM dishi dishi kartA puNyamatInAM hR^idi hR^idi dhartA | pAlayatAnmAmanaghavilAsaH shakramahishyAH sitadarahAsaH || 551|| puNyacharitrA munijanagItA vAsavakAntA tribhuvanamAtA | vatsalabhAvAdavatu vidUnAM bhAratabhUmiM dhanabalahInAm || 552|| koTitaTidvattava tanukAntiH pUrNasamAdhestava hR^idi shAntiH | vAsavabhAme bhagavati ghoraH shatruvidArI tava bhujasAraH || 553|| AshrayabhUtaM sumadhuratAyA AlayabhUtaM jaladhisutAyAH | vAsavadR^iShTestavamukhamabjaM ki~NkradR^iShTestava padamabjam || 554|| pAdasarojaM vR^ijinaharaM te yo bhajate nA surapatikAnte | tatra kaTAkShA ayi shatashaste tasya samastaM bhagavati haste || 555|| j~nApakashaktiH pratinaramastaM kArakashaktiH pratinarahastam | vAsavachakShussukR^itaphalashrIrbhAtu mamAntaH surabhuvanashrIH || 556|| mantraparANAM vachasi vasantI dhyAnaparANAM manasi lasantI | bhaktiparANAM hR^idi viharantI bhAti parAmbA nabhasi charantI || 557|| sevakapApaprashamananAmA diktimiraughapramathanadhAmA | ujjvalashastrA raNabhuvi bhImA pAtu nataM mAM harihayarAmA || 558|| yogini shaktirvilasasi dAntiH yoShiti shaktirvilasasi kAntiH | j~nAnini shaktirvilasasi tuShTiH dhanvini shaktirvilasasi dR^iShTiH || 559|| sa~Ngini shaktirvilasasi nidrA dhyAtari shaktirvilasasi mudrA | vAsavakAnte gagananishAnte bhAShitumIshaH kva nu vibhavaM te || 560|| yadditijAnAM damanamavakraM keshavahaste vilasati chakram | tatra kalA te bhagavati bhadrA kAchana bhAraM vahati vinidrA || 561|| duShTanishATaprashamanashIlaM yat sitabhUbhR^itpatikarashUlam | tatra marmaho.nshastava jagadIshe rAjati kashchitpaTurarinAshe || 562|| yannijarochikrtataripusAraM vAsavahaste kulishamudAram | tatra tavAMsho vilasati divyaH kashchana bhAso bhagavati bhavyaH || 563|| ambaradeshe sumahati guptA pa~Nkjabandhau vilasati dIptA | rAjasi mAtarhimaruchishItA vedikR^ishAnau kratubhR^itipUtA || 564|| sUkShmarajobhirvihitamudAraM yajjagadetanngaganamapAram | tattavavedaH pravadati kAyaM pAvani bhAnustava tanujo.ayam || 565|| Ishvari naikastava kharatejAH te.api cha sarve janani tanUjAH | ujvalakheTAH kuvadati kAyAH pAvani kaste pravadatu mAyAH || 566|| yA mahimAnaM prathayati bhUmiH pAvanakIrtirjalanidhinemiH | seyamapIshe bhavati suputrI vAsavajAye tava janadhAtrI || 567|| a~Nga sakhAyo viramatasa~NgAshvaShThharviShayANAM kR^itamatibha~NgAt | dhyAyata chitte dhutabhayabIjaM vAsavajAyAcharaNasarojam || 568|| pApamasheShaM sapadi vihAtuM shaktimanalpAmapi paridhAtum | chetasi sAdho kuru paripUtaM vAsavajAyApadajalajAtam || 569|| Ishvari vandyadyutibhR^itimedhe kA~NkShitanIrANyasR^ijati moghe | nirmalakIrtestava shachi gAnaM shakShyati kartuM tadudakadAnam || 570|| AmayavIryAdvigalati sAre jIvati ki~nchidrisanaganIre | rakShati jantuM tava shachi nAma prAj~najanairapyagaNitadhAma || 571|| madhyamaloke syati shuchirugrA rAjasi nAke vibhavasamagrA | prANisharIre bhavasi vichitra vAsavajAye vividhacharitra || 572|| vyomni vapuste vinihatapApaM vishrutalIlaM tava divi rUpam | karmavashAtte bhavati sa bhogaH prANisharIre bhagavati bhAgaH || 573|| bhAratabhUmeH shuchamapahantuM shreShThamupAyaM punaravagantum | vAsavajAye disha mama buddhiM pAvani mAye kuru kuru siddhim || 574|| sammadayantIrbudhajanametAH svargadharitrIpatisatipUtAH | mauktikamAlAH shR^iNu nutikarturbhaktinibaddhAH kavikulabhartuH || 575|| || chaturthaH sumukhIpAdaH || ajitaminAgnitaTichChashibhiH mama hR^idayasya tamaH prabalam | amarapatipramadAhasitaM vimalaghR^iNiprakarairharatu || 576|| suranR^ipaterdayitA vinatAhitashamanI lulitAmitaraiH | varakaruNAvaruNAlayadR^i~Nmama jananImavatAdavanim || 577|| paTutapaso jamadagnimuneriha sahadharmacharIM bhuvane | tanayanikR^ittashiraH kamalAM varamatimAvishadindravadhUH || 578|| yadukulakIrtivilopabhiyA batavinigUhya R^itaM kavayaH | munigR^ihiNI vadhahetukathAmitarapathena bhaNanti mR^iShA || 579|| na surabhirarjunabhUmipatirbhR^igutilakasya jahAra sa yAm | iyamamR^itAMshumanoj~namukhI parashudharasya jananyanaghA || 580|| atirathamarjunabhUmipatiM sahapR^itanaM jamadagnisutaH | yudhi sa vijitya vishAlayashAH punarapi mAtaramAhR^itavAn || 581|| paragR^ihavAsakala~NkavashAnnijagR^ihiNIM jamadagnimuniH | batavinihantumanA kalayaMstanubhavamAdishadugramanAH || 582|| pitR^ivachanAdatibhaktimatApyasuravadAtmasutena hatAm | munigR^ihiNImanaghetivadaMstava varade.avishadaMsha imAm || 583|| idamavikampyamatiprabalaM prabhavati kAraNamAryanute | munigR^ihiNImanaghAM bhaNituM shachi kalayA yadi mAmavishaH || 584|| khalajanakalpitaduShTakathAshravaNavashAdvyathitaM hR^idayam | atha charite.avagate vimalasmR^itivashato mama yAti mudam || 585|| tava mahasA vishatA kR^ipayA mama shachi sUkShmasharIramidam | nR^iparipumAtR^ipavitrakathA smaraNapathaM gamitA sapadi || 586|| vidadhaturAsurakR^ityamubhau bahulaguNAmapi yadgR^ihiNIm | sa muniraghAtayadachChakathAM dasharathajashcha mumocha vane || 587|| api vinikR^ittashirAH shachi te varamahasA vishatA sapadi | alabhata jIvitamamba punarbhuvanashubhAya munestaruNI || 588|| yadi shirasA rahite vapuShi prakaTatayA vilasantyasavaH | yadi hR^idayaM sahabhAti dhiyA kimiva vichitramitashcharitam || 589|| parashudharasya savitri kalA tvayi puruhUtasarojadR^ishaH | sa shirasi kAchidabhUdruchirA vishirasi bhImatamA bhavati || 590|| parashudharo.arjunabhUmipatiM yadajayadamba tapo.atra tava | abhajata kAraNatAmanaghe varamunigeyapavitrakathe || 591|| bhagavati kR^ittashiro bhavatI mathitavatI nR^ipatInashubhAn | prathanabhuvi praguNaM bhujayoH parashudharAya vitIrya balam || 592|| shubhatamakuNDalapUrvasatiH padanatapAtakasaMshamanI | dishatu nikR^ittashirAH kushalaM mama surapArthavashaktikalA || 593|| nijasutara~NgapaternikaTe kR^itavasatirnatasiddhikarI | dalitashirAH pratanotu mama shriyamamareshvarashaktikalA || 594|| bhuvi tatasahyanagAntarage shubhatamachandragirau varadA | kR^itavasatiH kurutAnmama shaM bhR^igUkularAmajananyajarA || 595|| avatu vikR^ittashirAH padayorbhajakamanindyavichitrakathA | dinakaramaNDalamadhyagR^ihA suradharaNIpatishaktikalA || 596|| gaganacharArchitapAdukayA padanatasanmatibodhikayA | mama satataM shuchireNukayA paravadidaM kulamambikayA || 597|| shamayitumugratamaM duritaM prathayitumAtmanigUDhabalam | gamayitumagraydashAM svakulaM tava charaNAmbujamamba bhaje || 598|| paravashagAmashivena vR^itAM bharatadharAM paripAtumimAm | paTumativAkkriyamAtanutAdgaNapatimabhrahayapramadA || 599|| gaNapatidevamarmaho.nshajuSho gaNapatinAmakaviprakaveH | surapatijIvasakhIshR^iNuyAddashashatapatramukhI sumukhIH || 600|| || ShaShThaM traiShTubhaM shatakaM samAptam || \medskip\hrule\medskip || atha saptamaM jAgataM shatakam || || prathamo drutavilambitapAdaH || suramahIramaNasya vilAsinI jalacharadhvajajIvitadAyinI | haratu bodhadR^igAvaraNaM tamo hR^idayagaM hasitena sitena me || 601|| namadamartyakirITakR^itaiH kiNaiH kamaThapR^iShThanibhe prapade.a~NkitA | paridhunotu shachI bharatakShitervR^ijinajAlamajAlamakampanam || 602|| atitarAM natapAlanalolayA vibudhanAthamanoharalIlayA | kirimukhImukhashaktyupajIvyayA viditayAditayA gatimAnaham || 603|| ghanahiraNyamadApaharochiShA vanaruhAnanayA.avanadakShayA | gatimadindramanorathanAthayA bhuvanameva na me kulamAtrakam || 604|| tanuShu vAmanamUrtidhare vibhau tamanuyAcha virAjati vAmanI | sharaNavAnanayAmbikayA lasat karuNayA.aruNayA padayoraham || 605|| sakaruNA kushalaM mama reNukAtanurajA tanutAdudito yataH | yudhi munirvidadhau parashuM dadhajjanapatInapatIvrabhujAmadAn || 606|| sujanashatruramAthi ghanadhvaniH shachi sarAtricharastava tejasA | janani rAmasahodarasAyakaM pravishatA.avishatAdadhikaujasA || 607|| tava mahaHkalayAbalamAptayA janani shumbhanishumbhamadachChidA | jagadarakShyata gopakuleshitustanujayA.anujayArjunasAratheH || 608|| na vinirUpayituM prababhUva yAM kavijano vividhaM kathayannapi | munihR^idambujasaudhatalendirA jayati sA yatisAdhujanAvanI || 609|| imamayi tridiveshvari kalkinaM ruShamapohya savitri vilokitaiH | surapaterdviShato.aghavato lasan madanakairavakairavalochane || 610|| smaradamartyanR^ipAlavilAsinIM prabalapAtakabhItivinAshinIm | pravaNayAntarananyadhiyA lasadvinayayAnayayAmavatIrmanaH || 611|| bhagavatIgaganasthalachAriNI jayati sa~Ngarara~NgavihAriNI | sukR^itashatrumatibhramakAriNI harihayArihayAdividAriNI || 612|| sharaNavAnahamarjunahAsayA bhuvanabhUpatihArivilAsayA | divi pulomajayA dhavalAchale girijayA.arijayAvitadevayA || 613|| charaNayordhR^itayA vijayAmahe vayamasheShajagannR^ipajAyayA | divi pulomajayA dhavalAchale nagajayA gajayAnavilAsayA || 614|| arivadhAya vidhAya budhAdhipaM paTubhujAbalabhIShaNamAjiShu | na bhavatI shachi gachChati durgataH kvachana kAchana kAtaradhIriva || 615|| sapadi mAnasadhairyahR^ito jagajjanani vajratanorjvalitArchiShaH | arijane prathamaM tava vIkShayA surapaterapatejasi vi kramaH || 616|| na mananochitamasti paraM nR^iNAM vibudharAjavadhUpadapadmataH | jagati darshanayogyamihAparaM na ramaNI ramaNIyamukhAbjataH || 617|| sharaNavAnahamasmi purAtanapramadayA munigeyacharitrayA | svabalachAlitanAkajagannabho vasudhayA sudhayA surarADdR^ishAm || 618|| ayamahaM gatimAnatishAntayA tridivabhUmipatipriyakAntayA | manasi maunijanairatibhaktito nihitayA hitayA sukR^itAtmanAm || 619|| vinayataH stutayA gamayAmyahaM janimatAM janayitri nishAstvayA | prasR^itayA kulakuNDadhana~njayAddhR^itatanUtatanUtanavegayA || 620|| sakR^idamoghasarasvatisAdhudhI hR^idayavedyapadAmbujasauShThave | mama shivaM sumanaH pR^ithivIpateH suvadane vada netralasaddaye || 621|| duravagAhapathe patitaM chirAjjanani gamyavilokanalAlasam | svayamamartyanR^ipAlamanorame sunayane nayaneyamimaM janam || 622|| avatu naH svayameva paTUn vipadvimathanAya vidhAya budheshvarI | sakalamarmasuvItadayaiH parairvinihatAniha tApavataH shachI || 623|| suradharApatijIvitanAthayA svajananakShitirakShaNakarmaNi | paTutamo jana eSha vidhIyatAmiha tayA hatayA tu samUhayA || 624|| gaNapateH shR^iNuyAdimamujvalaM drutavilambitavR^ittagaNaM shachI | salilarAshisutAbhavanIbhavadbhuvanapAvanapAdasaroruhA || 625|| || dvitIyo jaloddhatagatipAdaH || haritsu paritaH prasAdamadhikaM dadhAnamamalatviShAM prasaraNaiH | mahendramahilAvilAsahasitaM madantaratamo dhunotu vitatam || 626|| prasUstrijagataH priyA maghavataH kR^ipAkalitayA kaTAkShakalayA | nitAntamagatervikuNThitamaterdhunotu bharatakShiterakushalam || 627|| purA shachi matistvamIshituratho nabhastanumitA pR^itha~NmatimatI | anantaramabhUH sarojanayanA tanuH surapatervilochanasudhA || 628|| paratra viguNA sato.asi dhiShaNA nabhastanuriha prapa~nchamavasi | asi svarabalA priyA surapateriyattava shachi svarUpakathanam || 629|| prajApatipade purANapuruShe smR^itA tvamaditiH surAsuranute | janArdanapade ramAsi parame sadAshivapade shivA tvamajare || 630|| uShA inapade svadhA.analapade purandarapade tvamIshvari shachI | yathA ruchividuH padAni kavayashchitaishcha chitimAnyuvAmR^ijugirA || 631|| ameyamamalaM purANapuruShaM tadIyavibhavAbhidhAyibhirime | vadanti kavayaH padairbahuvidhaistathaiva bhavatIM tato matabhidAH || 632|| nabhashcha pavanaH svarashcha paramastaTichcha vitatA patishcha mahasAm | sudhAMshuranalo jalaM cha pR^ithivI savitri yuvayorvibhUtipaTalI || 633|| apArabahulapramodalaharI sataH kilachitiH paratra vitatA | punarviyadidaM parItya nikhilaM jaganti dadhatI parA vijayate || 634|| na yadyapi parAtpare nabhasi te sarojanayanA vapuH pR^ithagaje | tathApi namatAM matIranusarantyameyavibhave dadhAsi cha tanUH || 635|| saha tribhuvanaprapAlanakR^itA samastamarutAM gaNasya vibhunA | sadA shashimukhI sharIrabhR^idajA jagatyadurite shachI vijayate || 636|| kulaM bahubhidaM balaM na bhujayoH kathaM nu vipadastarema bharatAH | samarthamadhunA vipadvidhutaye tavAmba charaNaM vrajAmi sharaNam || 637|| samastamapi cha svadeshaviduShAM vidhAnapaTalaM babhUva viphalam | abhAgyadamanakShamaM tadadhunA tavAmba charaNaM vrajAmi sharaNam || 638|| nijo mama jano nitAntamagatirna kukShibharaNe.apyayaM prabhavati | maheshvari kR^ipAmarandamadhunA tavAmba charaNaM vrajAmi sharaNam || 639|| adR^iShTakanakaM kulaM mama chirAnnirAyudhamidaM nirAshamabhitaH | svabhAvata iva prabaddhamabhavattavAmba charaNaM vrajAmi sharaNam || 640|| avIracharitaM vipAlakakathaM nirArShavibhavaM chirAnmama kulam | idaM mama mano nikR^intati muhustavAmba charaNaM vrajAmi sharaNam || 641|| chirAtsmR^itipathAdapi chyutamaje tapobalabhavaM tamArShavibhavam | svadeshamadhunA punargamayituM tavAmba charaNaM vrajAmi sharaNam || 642|| hataM cha vihataM dhutaM cha vidhutaM rudantamabhito vishiShTakaruNe | imaM svaviShayaM shivaM gamayituM tavAmba charaNaM vrajAmi sharaNam || 643|| kShayAya sukR^itadviShAM viharatAM shivAya cha satAM prapa~nchasuhR^idAm | nijasya manaso balAya cha pare tavAmba charaNaM vrajAmi sharaNam || 644|| jayatsu sukR^itaM dviShatsu paritaH satAmapi kule balena rahite | khalapriyayuge kalau pariNate tavAmba charaNaM vrajAmi sharaNam || 645|| abhAti sukR^ite nigUDhavibhave vibhAti durite phalAni dishati | vidhAnavikale manasyabhayade tavAmba charaNaM vrajAmi sharaNam || 646|| paTau pratibhaTe gade pratibhaye natAvanavidhAvatIva nipuNam | suparvabhuvanakShitIshadayite tavAmba charaNaM vrajAmi sharaNam || 647|| amartyapaTalIkirITamaNibhAbhuja~NgakiraNaM nitAntamaruNam | vipattidamanaM tamaH prashamanaM tavAmba charaNaM vrajAmi sharaNam || 648|| vinaShTavibhavAmimAM punarapi shriyAvilasitAM vidhAtumajare | svajanmapR^ithivIM svarIshadayite dishergaNapateH karAya paTutAm || 649|| suparvavasudhAdhinAthasudR^isho jaloddhatagatistavo.ayamanaghaH | kR^itirgaNapateH karotu vidhutiM bhayasya bharatakShamAtalajuShAm || 650|| || tR^itIyaH pramitAkSharapAdaH || uditaM mahendramahilAvadane prasR^itaM karairdishi dishi praguNaiH | ahitaM tamaH prashamayadyaminAM hasitaM karotu mama bhUri shivam || 651|| bharatakShitestimiramAshu haratvarichAturIkR^itavimohamateH | ravilakShato.apyadhikamaMshumatI pavipANichittadayitA vanitA || 652|| shashilakShashItalakaTAkShasudhA taruNArkakoTiruchipAdayugA | hR^idi me vibhAtu munigeyaguNA vibudhendrachittaramaNI taruNI || 653|| kamanIyadIptasukumAratanurmananIyapAvanapadAmburuhA | vidadhAtu me shivamasadvimukhI vibudhendrajIvitasakhI sumukhI || 654|| anumAnamUDhapitR^ivAkyavashAttanayena devi vinikR^ittashirAH | tava reNukA vilasitA kalayA gaNanIyashaktirabhavaddashasu || 655|| sakalAmayaprashamanaM duritakShayakArikA~NkShitakaraM cha bhavet | surasundarI janasamarchatayorhR^idi reNukAcharaNayoH karaNam || 656|| vinihanti pApapaTalaM smaraNAdvidhunoti roganivahaM bhajanAt | vidaghAti vA~nChitataphalaM stavanAnmanujasya rAmajananI charaNam || 657|| sharaNaM vrajAmi navaravyaruNaM charaNaM tavAmba nR^ipajAtiripoH | bharatakShiteravanataH prathamaM maraNaM mameha na bhavatvadhamam || 658|| smaraNaM chirAdavirataM vidadhachcharaNasya te taruNabhAnuruchaH | ayamastu rAmajanayitripaTuH surakAryamAryavinute charitum || 659|| ava bhAratakShitimamoghadaye karaNaM bhavatviha tavaiSha janaH | nijayoH savitri charaNAmbujayorna vihAtumarhasi chirAdbhajakam || 660|| avishastvamindradayite kilatAmapi yaj~nasenatanayAM kalayA | anaghavratAsu kavayaH prathamAM pravadanti yAM bahulavandyaguNAm || 661|| bhuvi bhArataM paThati yaH sukR^itI kaluShaM dhunoti sakalaM kila saH | iyamamba shaktikularAj~ni tava drupadasya nandini kathAmahimA || 662|| abhimanyumAtaramanalpaguNAmatila~Nghya chaikShata harirbhavatIm | atisauhR^idena yadihAryanute tava heturIDyatamashaktikalA || 663|| gR^ihakAryatantrachaturA gR^ihINI sakaleendriyAmR^itajharI ramaNI | varanItimArgakathane sachivo.apyabhavastvamamba kuru vaMshabhR^itAm || 664|| na yudhiShThirasya varaghoratapo na dhana~njayasya paTu bAhubalam | arisa~NkShayaM kR^itavatI bahulaM tava veNikA.apacharitA phaNinI || 665|| asitApi kAntivasatirmahatI vanitAjanasya cha vimohakarI | kushalaM mamAbhrapatishaktikalA drupadakShitIndraduhitA dishatu || 666|| shirasA samastajanapApabharaM vahato bhavAya bhuvi yAmavR^iNot | amarAdhipaH patitapAvani tAM bhuvi kanyakAM tava vivesha kalA || 667|| kalayA tavAtibalayA kalitA puruShasya yogamakhilAmba vinA | akhileshvaraprahitateja iyaM sutajanmane kila dadhAvanaghA || 668|| surarakShakasya madayitri dR^ishAM nararakShakasya janayitri pare | kularakShaNAya kR^itabuddhimimaM kuru dakShamadbhutapavitrakathe || 669|| mumuchuH kule mama suparvapatestava chAbhidheyamiha mandadhiyaH | aparAdhametamatighorataraM janani kShamasva mama vIkShya mukham || 670|| iha shAradeti yatibhirvinutA prathitA sureshvaramanodayitA | bhuvi bhAti kIrtivapuShA shachi yA sukathApi sA tava savitri kalA || 671|| aruNAchaleshvaradarIvasatestapato munergaNapateH kushalam | vividhAvatAravilasachcharitA vitanotu sA vibudharADvanitA || 672|| aruNAchalasya varakandarayA pratighoShitaM kaluShahAri yashaH | vibudhAdhinAtharamaNI shR^iNuyAdgaNanAthagItamatichArunijam || 673|| bharatakShiteH shubhavidhAyiShu sA vibudhakShitIshadayitA dayayA | dhanashaktibandhubalahInamapi prathamaM karotu gaNanAthamunim || 674|| muditAmimA vidadhatu pramadAM tridivAdhipasya nipuNashravaNAm | amitaprakAshaguNashaktimajAM pramitAkSharAH sukavibhUmipateH || 675|| || chaturthastAmarasapAdaH || dishatu shivaM mama chandravalakShastimirasamUhanivAraNadakShaH | kR^itagatirodhakapAtakanAshaH suradharaNIshavadhUsmitaleshaH || 676|| aviditamArgatayAtiviShaNNAM gatimapahAya chirAya niShaNNAm | bharatadharAmanimeShadharatrI patigR^ihiNI paripAtu savitrI || 677|| bhuvanamidaM bhavataH kila pUrvaM yadamalarUpamanAkR^itisarvam | prakR^itiriyaM kurutAdadaridrAmatimatishAtatarAM mama bhadrA || 678|| sR^ijati jaganti vibhau parame yA subahulashaktirarAjata mAyA | pradishatu sA mama ka~nchana yogaM jhaTiti nirAkR^itamAnasarogam || 679|| prativiShayaM vikR^itItara sattA vilasati yA matimadbhirupAttA | iyamanaghA paripAlitajAtiM vitaratu me vividhAM cha vibhUtim || 680|| prativiShayagrahaNaM paripUtAmatirakhilasya janasya cha mAtA | mama vidadhAtu shubhaM shubhanAmA tridivanivAsinareshvararAmA || 681|| gaganatanurjagato vipulasya prabhupadamagraymitA sakalasya | pratijanadehamajA pravahantI mama hR^idi nandatu sA viharantI || 682|| paTukulakuNDadhana~njayakIlA samuditahArdavibhAkaralIlA | drutashira indukalAmR^itadhArA janamavatAnnijabhaktamudArA || 683|| viShayasamAkR^itiratra purastAdvimalatamA kila tatra parastAt | bhuvanamayI bhuvanAchcha vibhaktAmatiranaghA.avatu mAmatishaktA || 684|| viShayaparigrahaNeShvatisaktA viShayavibhUtiShu kApi viviktA | akhilapatermayi dIvyatu shaktirvimalatamA vidhutetarashaktiH || 685|| dR^ishi dR^ishi bhAti yadIyamapApaM dishi dishi gantR^i cha vettR^i cha rUpam | bhavatu shivAya mameyamanindyA bhuvanapatergR^ihiNI munivandyA || 686|| jaDakulakuNDadarIShu shayAnA budhakulavahniShu bhUrivibhAnA | harihayashaktirameyacharitra mama kushalaM vidadhAtu pavitra || 687|| daharagatAkhilamAkalayantI dvidalagatA sakalaM vinayantI | dashashatapatragatA madayantI bhavatu mayIndravadhUrvilasantI || 688|| gR^ihayugalIshriya AshritagamyA padakamaladvitayI bahuramyA | mama hR^idi bhAtvavikuNThitayAnA harisudR^ishastaruNAruNabhAnA || 689|| upari tatA kulakuNDanishAntAjjvalitadhana~njayadIdhitikAntAt | harihayashaktiriyaM mama puShTA dravayatu mastakachandramaduShTA || 690|| nabhasi virAjati yA parashaktirmama hR^idi rAjati yA varashaktiH | ubhayamidaM militaM bahuvIryaM bhavatu sukhaM mama sAdhitakAryam || 691|| tribhuvanabhUmipateH priyayoShA trimalaharI suraviShTapabhUShA | mama vitanotu manorathapoShaM duritavipattitaterapi shoSham || 692|| pavanajagatprabhupAvanamUrtirjaladharachAlanavishrutakIrtiH | mama kushalAya bhavatvaribhImA jananavatAM jananI bahudhAmA || 693|| mama surarAjavadhUkalayogrA khalajanadhUnanashaktanakhAgrA | damayatu kR^ittashirAH kaluShANi prakaTabalA hR^idayasya viShANi || 694|| kulishivadhUkalayA paripuShTA budhanutasannuNajAlavishiShTA | mama parito vilasadvibhavAni drupadasutA vidadhAtu shivAni || 695|| surajanarADdayitAMshavidIpte padakamalAshritasAdhujanApte | duritavashAdabhito gatabhAsaM manujakumArajananyavadAsam || 696|| amaranareshvaramandiranetrI sumasharajIvanasundaragAtrI | bhavatu shachI vitatasvayashassu pratiphalitA gaNanAthavachassu || 697|| vikasatu me hR^idayaM jalajAtaM vilasatu tatra shachIstutigItam | sphuratu samastamihepsitavastu prathitatamaM mama pATavamastu || 698|| kuru karuNArasasiktanirIkShe vachanapathAtigasannuNalakShe | shachi narasiMhajamAhitagItaM bharatadharAmavituM paTumetam || 699|| sulalitatAmarasaiH prasamAptaM varanutibandhamimaM shravaNAptam | janani nishamya susiddhamasheShaM harilalane mama kurvabhilASham || 700|| || iti shrIbhagavanmaharShiramaNAntevAsino vAsiShThasya narasiMhasUnoH gaNapateH kR^itau indrANIsaptashatI samAptA || ## Complete Works of Ganapati Muni Vol 02-14 Proofread byDPD \medskip\hrule\obeylines Please send corrections to sanskrit@cheerful.com Last updated \today http://sanskritdocuments.org \end{document}