ઇન્દ્રાણીસપ્તશતી
{ ઇન્દ્રાણીસપ્તશતી }
પ્રથમં ગાયત્રં શતકમ્
પ્રથમઃ શશિવદનાપાદઃ
હરિલલને મે પથિ તિમિરાણિ
હરદરહાસદ્યુતિભિરિમાનિ ૧
અગતિમવીર્યામપગતધૈર્યામ્
અવતુ શચી મે જનિભુવમાર્યામ્ ૨
શૃણુ કરુણાવત્યલઘુમખર્વે
સ્તવમહમાર્યસ્તવ શચિ કુર્વે ૩
ત્રિજગદતીતો વિલસતિ નિત્યઃ
અણુરણુતો યો ભગવતિ સત્યઃ ૪
ત્વમખિલકાર્યેષ્વયિ ધૃતસક્તિઃ
ઉરુગતિરસ્ય પ્રભુતમશક્તિઃ ૫
વિદુરિમમેકે જગતિ મહેન્દ્રમ્
જગુરયિ કેચિજ્જનનિ મહેશમ્ ૬
અવગતવેદો વદતિ મહેન્દ્રમ્
પરિચિતતન્ત્રો ભણતિ મહેશમ્ ૭
જનનિ શચિ ત્વં પ્રથમદલસ્ય
ભગવતિ દુર્ગાસ્યપરદલસ્ય ૮
ન શચિ શિવાતસ્ત્વમિતરદૈવમ્
બહુમુનિવાણીસમરસતૈવમ્ ૯
દિવિ ચ સિતાદ્રૌ શચિવપુષોર્વામ્
પૃથગુપલમ્ભાદયિ ભિદયોક્તિઃ ૧૦
તનુયુગમૂલં વપુરતિમાયમ્
કરચરણાદ્યૈર્વિયુતમમેયમ્ ૧૧
ત્વમુદરવર્તિત્રિભુવનજીવા
ભવસિ શચી સા જનનિ શિવા વા ૧૨
વિભુશુચિકીલાતતિરયિ ધૂમમ્
ત્વમમરમાર્ગં બત વમસીમમ્ ૧૩
જયસિ નભસ્થો જનનિ પરસ્તાત્
નભસિ ચ ભાન્તી ભવસિ પુરસ્તાત્ ૧૪
ત્વમતનુરમ્બ જ્વલસિ પરસ્તાત્
ઇહ ખશરીરા લસસિ પુરસ્તાત્ ૧૫
જનનિ પરસ્તાન્મતિરસિ ભર્તુઃ
અસિ ખશરીરા પૃથગવગન્ત્રી ૧૬
અણુચયરૂપં ભગવતિ શાન્તમ્
ન ભવતિ શૂન્યં તદિદમનન્તમ્ ૧૭
દિવિ દધતીશે પુરુષશરીરમ્
જનનિ પુરન્ધ્રી તનુરભવસ્ત્વમ્ ૧૮
દૃશિ વિલસન્તં પ્રભુમુપયાન્તી
ભવસિ વિરાટ્ ત્વં નૃતનુષુ ભાન્તી ૧૯
તવ ગુણગાનં જનનિ વિધાતુમ્
ભવતિ પટુઃ કો વિયદિવ માતુમ્ ૨૦
ભગવતિ તૃપ્તિર્ભવતુ ન વા તે
અભિલષિતાપ્તિર્ભવતુ ન વા મે ૨૧
ભજતિ તવાઙ્ઘ્રિં મમ ખલુ ભાષા
પતિ મનુરાગાત્ પ્રિયમિવ યોષા ૨૨
અઘમપહર્તું શુભમપિ કર્તુમ્
અલમજરે તે ગુણગણગાનમ્ ૨૩
અવસિ જગત્ત્વં કુલિશિભુજસ્થા
અવ મુનિભૂમિં ગણપતિધીસ્થા ૨૪
શશિવદનાભિર્ગણપતિજાભિઃ
શશિવદનાદ્યા પરિચરિતાઽસ્તુ ૨૫
દ્વિતીયસ્તનુમધ્યાપાદઃ
ધ્વાન્તં પરિહર્તું તેજાંસ્યપિ ભર્તુમ્
અન્તર્જગદમ્બા હાસં કુરુતાન્મે ૨૬
ભીતામરિધૂતામાર્યાવનિમેતામ્
સમ્રાજ્ઞિ બુધાનાં દૂનામવ દીનામ્ ૨૭
ઈશસ્ય સહાયાં વિશ્વસ્ય વિધાને
આકાશશરીરામમ્બાં પ્રણમામઃ ૨૮
કર્તુર્ભુવનાનાં માયાસિ શચિ ત્વમ્
સત્યસ્ય તપોઽસિ જ્ઞસ્યાસિ મનીષા ૨૯
આજ્ઞાસિ વિનેતુસ્તેજોઽસિ વિભાતઃ
નિર્યત્નસમાધેરાનન્દરસોઽસિ ૩૦
તસ્ય ત્વમનન્યાઽપ્યન્યેવ ખકાયા
અત્યદ્ભુતમાયા જાયાઽસિ સહાયા ૩૧
આકાશશરીરાં જાયામશરીરઃ
આલિઙ્ગ્ય વિભુસ્ત્વાં નન્દત્યયિ ચિત્રમ્ ૩૨
વજ્રેશ્વરિ ઘસ્રે યદ્વન્મુકુટેન
દીપ્તેન સવિત્ર મૂર્ધા તવ ભાતિ ૩૩
નક્ષત્રસહસ્રૈશ્શુભ્રદ્યુતિભિસ્તે
પુષ્પાયિતમેતૈર્માતર્નિશિમસ્તે ૩૪
ઘસ્રઃ ખલુ કાલો રાજ્યં નનુ કર્તુમ્
રાત્રિઃ ખલુ કાલો રન્તું રમણેન ૩૫
નિઃશબ્દતરઙ્ગાસ્વગ્લૌષુ નિશાસુ
નૂનં ખશરીરે કાન્તં રમયન્તી ૩૬
સાન્દ્રોડુસુમસ્રગ્વિભ્રાજિતકેશા
ધ્વાન્તાસિતચેલા શાન્તાઽપ્યસિ ભીમા ૩૭
રાજન્મિતતારામન્દારવતંસામ્
માતસ્સિતભાસા સ્મેરાં હસિતેન ૩૮
જ્યોત્સ્ના ઘનસારદ્રાવૈરનુલિપ્તામ્
ત્વાં વીક્ષ્ય ન શાન્તિઃ કસ્ય ક્ષણદાસુ ૩૯
બાલારુણરોચિઃ કાશ્મીરરજોભિઃ
આલિપ્તમુખીં ત્વાં પ્રાતઃ પ્રણમામિ ૪૦
સાયં સમયશ્રી લાક્ષારસરક્તમ્
પ્રત્યક્ પ્રસૃતં તે વન્દે વરદેઽઙ્ઘ્રિમ્ ૪૧
દીપ્તાર્કકિરીટાં સર્વાન્ વિનયન્તીમ્
વન્દે ભુવનાનાં રાજ્ઞીમસમાનામ્ ૪૨
ધૂતાખિલરોગાઃ શ્વાસાસ્તવ વાતાઃ
માતર્વિતરન્તુ પ્રાણસ્ય બલં નઃ ૪૩
પ્રાઞ્ચસ્તવ વાતાઃ સ્વાસાઃ શમુશન્તુ
પ્રત્યઞ્ચ એમે નઃ પાપં શમયન્તુ ૪૪
મન્માતરવાઞ્ચો વીર્યં વિતરન્તુ
સન્તાપમુદઞ્ચઃ સર્વં ચ હરન્તુ ૪૫
અસ્યા ઇવ ભૂમેર્ભૂતપ્રસવાયાઃ
એકૈકશ આહુર્યેષાં મહિમાનમ્ ૪૬
અદ્રેરુપલાનાં નદ્યાઃ સિકતાનામ્
યેષાં ચ ન કધ્ચ્છિક્તો ગણનાયામ્ ૪૭
રોમાયિતમેતૈર્ગોલૈસ્તવ કાયે
વ્યાખ્યાતમનેન શ્લાઘ્યં તવ ભાગ્યમ્ ૪૮
વિશ્વં વહસીદં જમ્ભારિભુજસ્થા
આર્યાન્વહમાતર્વાસિષ્ઠમતિસ્થા ૪૯
આદ્યાં ભુવનાનાં ભર્તુસ્તનુમધ્યામ્
ભક્ત્સ્ય ભજન્તામેતાસ્તનુમધ્યાઃ ૫૦
તૃતીયો મુકુલપાદઃ
હાસાઃ શક્રગૃહેશ્વર્યાશ્ચન્દ્રરુચઃ
ભૂયાસુર્વિમલપ્રજ્ઞાયૈ હૃદિ મે ૫૧
ઇન્દ્રાણ્યાઃ કરુણા લોકાશ્શોકહૃતઃ
ભૂયાસુર્ભરતક્ષ્માયૈ ક્ષેમકૃતઃ ૫૨
વ્યક્તિર્વ્યોમતનુઃ શક્તિત્વાદ્વનિતા
જ્ઞાતૃત્વાત્પુરુષઃ કેષાઞ્ચિદ્વિદુષામ્ ૫૩
વ્યક્તિં વ્યોમતનું યે પ્રાહુઃ પુરુષમ્
તેષાં તત્ત્વવિદાં કલ્પસ્સ્યાત્ ત્રિવિધઃ ૫૪
રુદ્રં કેઽપિ જગુઃ શક્રં કેઽપિ વિદુઃ
ભાષન્તે ભુવનપ્રાણં કેઽપિ વિદઃ ૫૫
વ્યક્તિં વ્યોમતનું પ્રાહુર્યે વનિતામ્
તેષાં ચ ત્રિવિધઃ કલ્પશ્શાસ્ત્રવિદામ્ ૫૬
દુર્ગા સૂરિવરૈઃ કૈશ્ચિત્સા ગદિતા
શચ્યન્યૈર્વિબુધૈર્જ્ઞૈરન્યૈરદિતિઃ ૫૭
એકેષાં વિદુષાં વ્યક્તિર્વ્યોમતનુઃ
ન સ્ત્રી નો પુરુષો બ્રહ્મૈતત્સગુણમ્ ૫૮
ત્વં વિશ્વસ્ય મહાન્ પ્રાણઃ કઃ પરમે
ત્વં રુદ્રઃ પ્રણવસ્ત્વં શક્રોઽભ્રશિખી ૫૯
ત્વં કસ્યાસ્યદિતિસ્ત્વં રુદ્રસ્ય શિવા
ત્વં શક્રસ્ય શચી શક્તિર્દેવનુતે ૬૦
પ્રાણશ્ચ પ્રણવો જ્યોતિશ્ચામ્બરગમ્
વસ્ત્વેકં ત્રિગુણં નો વસ્તુ ત્રિતયમ્ ૬૧
શક્તેરમ્બપરે શક્ત્સ્યાપિ ભિદા
જ્વાલા પાવકવદ્ભાષા ભેદકૃતા ૬૨
સર્વં દૃશ્યમિદં ભુઞ્જાને પરમે
પુંનામસ્તુતયો યુજ્યન્તે ખલુ તે ૬૩
કુર્વાણેમ્બસતસ્સન્તોષં સતતમ્
સ્ત્રીનામસ્તુતયઃ શોભાં તે દધતે ૬૪
સદ્બ્રહ્મ બ્રુવતે વિદ્વાંસો વિગુણમ્
ત્વં માતસ્સગુણં બ્રહ્માસિ પ્રથિતે ૬૫
શબ્દાદ્યૈર્વિયુતં સદ્બ્રહ્મામલિનમ્
શબ્દાદ્યૈઃ સહિતા ત્વં દેવ્યચ્છહિતા ૬૬
સાક્ષિ બ્રહ્મ પરં ત્વં માતઃ કુરુષે
સર્વેષાં જગતાં કાર્યં સર્વવિધમ્ ૬૭
દ્યૌર્માતા જગતો દ્યૌરેવાસ્ય પિતા
વ્યાપ્તં ભાતિ જગદ્દ્યાવા સર્વમિદમ્ ૬૮
આકાશાદ્રજસો દ્યૌરન્યા વિરજાઃ
આકાશેઽસ્તિ પુનસ્તત્પારે ચ પરા ૬૯
દ્યાવં તાં જગતો રઙ્ગે વ્યોમતનુમ્
પારે શુદ્ધતમાં વિદ્મસ્ત્વાં પરમે ૭૦
ત્વાં પૂર્ણામદિતિં શક્તિં દેવિ શચીમ્
નિત્યં શબ્દવતીં ગૌરીં પ્રબ્રુવતે ૭૧
પુંનામા ભવતુ સ્ત્રીનામાસ્ત્વથવા
વ્યક્તિર્વ્યોમતનુર્લોકં પાત્યખિલમ્ ૭૨
નાકે સા કિલ ભાત્યૈન્દ્રી રાજ્યરમા
વિભ્રાણા લલિતં સ્ત્રીરૂપં પરમા ૭૩
શક્તાં દેવિ વિધેહ્યાર્તાનામવને
ઇન્દ્રસ્યેવ ભુજાં વાસિષ્ઠસ્ય મતિમ્ ૭૪
પૂજાશક્રતરુણ્યૈતૈસ્સિધ્યતુ તે
ગાતૃણાં વરદે ગાયત્રૌર્મુકુલૈઃ ૭૫
ચતુર્થો વસુમતીપાદઃ
મોહં પરિહરન્ યોગં વિતનુતામ્
દેવેન્દ્રદયિતા હાસો મમ હૃદિ ૭૬
આભાતુ કરુણા સા ભારતભુવિ
સુત્રામસુદૃશો યદ્વન્નિજદિવિ ૭૭
વન્દારુજનતામન્દારલતિકામ્
વન્દે હરિહયપ્રાણપ્રિયતમામ્ ૭૮
શોકસ્ય દમનીં લોકસ્ય જનનીમ્
ગાયામિ લલિતાં શક્રસ્ય દયિતામ્ ૭૯
રમ્યા સુમનસાં ભૂપસ્ય મહિષી
સૌમ્યા જનિમતાં માતા વિજયતે ૮૦
વીર્યસ્ય ચ ધિયસ્ત્રૈલોક્યભરણે
દાત્રી મઘવતે દેવી વિજયતે ૮૧
વ્યાપ્તા જગદિદં ગુપ્તા હૃદિ નૃણામ્
આપ્તા સુકૃતિનાં દૈવં મમ શચી ૮૨
ખે શક્તિરતુલા પારે ચિદમલા
સ્વશ્ચારુમહિલા દૈવં મમ શચી ૮૩
શસ્ત્રં મઘવતઃ શાસ્ત્રં યમવતામ્
વસ્ત્રં ત્રિજગતો દૈવં મમ શચી ૮૪
યુક્ત્સ્ય ભજતઃ શર્માન્તરતુલમ્
વર્માપિ ચ બહિર્દૈવં મમ શચી ૮૫
વીર્યં બલવતાં બુદ્ધિર્મતિમતામ્
તેજો દ્યુતિમતાં દૈવં મમ શચી ૮૬
એકૈવ જનયન્ત્યેકૈવ દધતી
એકૈવ લયકૃદ્દૈવં મમ શચી ૮૭
શક્તીરવિતથાઃ ક્ષેત્રોષુ દધતી
બીજેષુ ચ પરા દૈવં મમ શચી ૮૮
ચિન્વન્ત્યપિ પચન્ત્યેકા પશુગણમ્
ખાદન્ત્યપિ ભવે દૈવં મમ શચી ૮૯
દૃષ્ટૌ ધૃતચિતિર્દૃશ્યે તતગુણા
વિશ્વાત્મમહિષી દૈવં મમ શચી ૯૦
રાકાશશિમુખી રાજીવનયના
સ્વઃ કાપિ લલના દૈવં મમ શચી ૯૧
સ્થાણાવપિ ચરે સર્વત્ર વિતતા
સાક્ષાદ્ભવતુ મે સ્વર્નાથદયિતા ૯૨
યન્માતરનૃતં ધ્યાતં ચ ગદિતમ્
જુષ્ટં ચ હર મે તદ્દેવિ દુરિતમ્ ૯૩
માં મોચય ઋણાદિન્દ્રાણિ સુભુજે
મામલ્પમતયો મા નિન્દિષુરજે ૯૪
શત્રુશ્ચ શચિ મે સખ્યાય યતતામ્
દૃપ્તશ્ચ ઇમનુજો મામમ્બ ભજતામ્ ૯૫
કષ્ટં શચિ વિધૂયેષ્ટં વિદધતી
આનન્દય જનં પ્રેયાંસમયિ મે ૯૬
અસ્ત્રં મમ ભવ ધ્વંસાય રટતામ્
સુત્રામરમણિ શ્રીમાતરસતામ્ ૯૭
સમ્પૂરયતુ મે સર્વં સુરનુતા
સ્વર્ગક્ષિતિપતેશ્શુદ્ધાન્તવનિતા ૯૮
સંવર્ધય શચિ સ્વં દેશમવિતુમ્
બાહોરિવ હરેર્બુદ્ધેર્મમ બલમ્ ૯૯
એતૈર્વસુમતીવૃત્તૈર્નવસુમૈઃ
ભૂયાચ્ચરણયોઃ પૂજા જનનિ તે ૧૦૦
પ્રથમં ગાયત્રં શતકં સમાપ્તમ્
અથ દ્વિતીયમૌષ્ણિહં શતકમ્
પ્રથમઃ કુમારલલિતાપાદઃ
સુરેશ્વરમહિષ્યાઃ સ્મિતં શશિસિતં મે
તનોતુ મતિમચ્છાં કરોતુ બલમગ્રય્મ્ ૧૦૧
વિધાય રિપુધૂતિં નિધાય સુદશાયામ્
પુલોમતનુજાતા ધિનોતુ ભરતક્ષ્મામ્ ૧૦૨
પદપ્રણતરક્ષા વિધાનધૃતદીક્ષા
જગદ્ભરણદક્ષા પરા જયતિ શક્તિઃ ૧૦૩
સ્વરત્યવિરતં સા શનૈર્નભસિ રઙ્ગે
જ્વલત્યધિકસૂક્ષ્મં જગત્પ્રભવશક્તિઃ ૧૦૪
મહસ્તવ સુસૂક્ષ્મં નિદાનમખિલાનામ્
ભવત્યખિલમાતર્જગત્યનુભવાનામ્ ૧૦૫
જનન્યનુભવાનાં મતિત્વપરિણામે
સ્વરો ભવતિ મૂલં તવાભ્રહયરામે ૧૦૬
ય ઈશ્વરિ નિદાનં સમસ્તમતિભાને
સ્વરો ગતિવિશેષાત્સ એવ ખલુ કાલઃ ૧૦૭
જ્વલન્ત્યભિહિતા ત્વં વિહાયસિ વિશાલે
પ્રચણ્ડપદપૂર્વા પ્રપઞ્ચકરિચણ્ડી ૧૦૮
સ્વરન્ત્યખિલબુદ્ધિપ્રદા ભવસિ ગૌરી
ત્રિકાલતનુરમ્બ સ્મૃતા ત્વમિહ કાલી ૧૦૯
મહસ્સ્વર ઇતીદં દ્વયં તદતિસૂક્ષ્મમ્
મહેશ્વરિ તવાંશદ્વયં પરમમુક્તમ્ ૧૧૦
મહોઽતિશયમાપ્તં ત્વયિ ત્રિદિવગાયામ્
સ્વરોઽતિશયમાપ્તઃ સિતાદ્રિનિલયાયામ્ ૧૧૧
દિવં નયતિ પૂર્વા ભુવં યુવતિરન્યા
દ્વયોઃ પ્રકૃતિરભ્રં વિશાલમતિમાન્યા ૧૧૨
ન તે દિવિ લસન્ત્યાઃ પિતા તનુભૃદન્યઃ
સ્વયં ભુવમિમાં ત્વાં સતામવનિ વિદ્મઃ ૧૧૩
સુરારિકુલજન્મા તવેશ્વરિ પુલોમા
પિતેતિ કવિભાષા પરોક્ષગતિરેષા ૧૧૪
વદન્ત્યસુરશબ્દૈર્ઘનં સજલમેતમ્
પુલોમપદમેકં પુરાણસતિતેષુ ૧૧૫
પ્રકૃષ્ટતરદીપ્તિર્ગભીરતરનાદા
ઇતો હિ ભવસિ ત્વં તટિત્તનુરમેયે ૧૧૬
અરાતિરસુરોઽયં વિભોર્નિગદિતસ્તે
હયશ્ચ બતગીતઃ પિતા તવ પયોદઃ ૧૧૭
પ્રિયૈઃ કિલ પરે વાં પરોક્ષવચનૌઘૈઃ
પ્રતારિતમિવેલા જગન્મુનિગણેન ૧૧૮
નિકૃષ્ટમપિ રમ્યં યદિ ત્રિદિવલોકે
તવામ્બ કિમુ વાચ્યા રુચિસ્ત્રિદિવનાથે ૧૧૯
ત્વમમ્બ રમણીયા વધૂસ્ત્વમિવ નાકે
ત્વયા ક ઇવ તુલ્યાં મૃદો વદતુ લોકે ૧૨૦
વિનીલમિવ ખાંશં વિદુસ્ત્રિદિવમેકે
પરસ્તુ વદસિ સ્વઃ કવિઃ કમલબન્ધુમ્ ૧૨૧
અમુત્રગતશોકે મહામહસિ નાકે
નમામ્યધિકૃતાં તાં પુરાણકુલકાન્તામ્ ૧૨૨
યદા મમુતપક્વં મદીયમઘમુગ્રમ્
તદિન્દ્રકુલકાન્તે નિવારય સમગ્રમ્ ૧૨૩
દદાતુ ભરતક્ષ્માવિષાદહરણાય
અલં બલમુદારા જયન્તજનની મે ૧૨૪
અતીવ લલિતાભિઃ કુમારલલિતાભિઃ
ઇમાભિરમરેશપ્રિયા ભજતુ મોદમ્ ૧૨૫
દ્વિતીયો મદલેખાપાદઃ
પૌલોમ્યાઃ પરિશુભ્રજ્યોત્સ્નાદૃશ્યરુચો મે
શ્રીમન્તો દરહાસાઃ કલ્પન્તાં કુશલાય ૧૨૬
કારુણ્યામૃતસિક્તા શક્તા શક્રમહિષ્યાઃ
પ્રેક્ષા ભારતભૂમેર્દૌર્બલ્યં વિધુનોતુ ૧૨૭
વન્દે નિર્જરરાજ્ઞીં સઙ્ક્લ્પે સતિ યસ્યાઃ
સાધ્યાસાધ્યવિચારો નૈવ સ્યાદણુકોઽપિ ૧૨૮
સઙ્ક્લ્પસ્તવ કશ્ચ્ચિચત્તે ચેદ્દિવ ઈશે
સ્યાદુલ્લઙ્ઘ્ય નિસર્ગં સિદ્ધિર્નિષ્ફલતા ચ ૧૨૯
મૂઢોઽપ્યુત્તમરીત્યા સિધ્યેદધ્યયનેષુ
મેધાવી ચ નિતાન્તં નૈવ સ્યાત્કૃતકૃત્યઃ ૧૩૦
ઉત્પદ્યેત મહેશ્વર્યપ્રાજ્ઞાદપિ શાસ્ત્રમ્
યાયાન્માતરકસ્માદ્વિભ્રાન્તિં વિબુધોઽપિ ૧૩૧
અલ્પાનામબલાનાં સઙ્ગ્રામે વિજયઃ સ્યાત્
શક્તાનાં બહુલાનાં ઘોરા સ્યાત્પરિભૂતિઃ ૧૩૨
રાજેરન્નૃપપીઠેષ્વખ્યાતાનિ કુલાનિ
સ્યાદ્દુર્ધર્ષબલાનાં પાતો રાજકુલાનામ્ ૧૩૩
નિર્યત્નોઽપિ સમાધેર્વિન્દેદ્દેવિ સમૃદ્ધિમ્
યોગસ્યામ્બ ન પશ્યેદભ્યસ્યન્નપિ સિદ્ધિમ્ ૧૩૪
અત્યન્તં યદસાધ્યં નેદિષ્ઠં ભવતીદમ્
સાધ્યં સર્વવિધાભિઃ સ્યાદિન્દ્રાણિ દવિષ્ઠમ્ ૧૩૫
ગાયામો મુનિસઙ્ઘૈર્ગેયાં કામપિ માયામ્
ઇન્દ્રસ્યાપિ વિનેત્રીં ત્રૈલોક્યસ્ય ચ ધાત્રીમ્ ૧૩૬
વિદ્યાનામધિનાથે કાં વિદ્યાં શ્રયસે ત્વમ્
ઇન્દ્રં કર્તુમધીનં વિશ્વસ્માદધિકં તમ્ ૧૩૭
નિત્યાલિર્મિનીષે સ્ત્રીમોહો ન વિતર્ક્યઃ
ભ્રૂચેષ્ટાનુચરત્વાદન્યા સ્યાદનુકમ્પા ૧૩૮
સૌન્દર્યં પરમન્યદ્વજેરદ્દર્યથવા તે
હર્તું યત્સુખમીષ્ટે તાદૃક્તસ્ય ચ ચિત્તમ્ ૧૩૯
ચક્ષુર્દર્શનમાત્રન્નિસ્તેજો વિદધાનમ્
ચિત્તં ચોજ્ઝિતધૈર્યં મત્તાનાં દનુજાનામ્ ૧૪૦
ગર્તે દુર્જનદેહે મગ્નાન્ પઙ્ક્વિલગ્નાન્
પ્રાણાનાત્મસજાતીનુદ્ધર્તું ધૃતદીક્ષમ્ ૧૪૧
વજ્રં નિર્જરરાજો યદ્ધત્તે સમરેષુ
ત્વચ્છક્તેઃ કલયૈતન્મન્માતર્નિરમાયિ ૧૪૨
રાજ્ઞીત્વાત્પરમેતે રાજત્વં શતમન્યોઃ
નિશ્શક્તિસ્સ વિના ત્વાં કામાજ્ઞાં કુરુતાં નઃ ૧૪૩
સર્વં શક્રનિશાન્તસ્યેશાને તવ હસ્તે
અસ્માકં તુ ધિયેદં સ્તોત્રં સઙ્ગ્રહતસ્તે ૧૪૪
ગન્તવ્યં સ્વરધીશે નિશ્શેષાર્પણશૂરમ્
બિભ્રાણા નયસિ ત્વં માર્જાલીવ કિશોરમ્ ૧૪૫
ગૃહ્ણ્ન્નમ્બરનાથામમ્બામશ્લથમન્ધઃ
કીશસ્યેવ કિશોરો યોગી ગચ્છતિ ગમ્યમ્ ૧૪૬
પૂર્ણાત્માર્પણહીનોઽપ્યજ્ઞાતાઽપિ સમાધેઃ
નિત્યં યો જગદમ્બ ત્વાં સેવેત જપાદ્યૈઃ ૧૪૭
તં ચાચઞ્ચલભક્તિં કૃત્વા પૂરિતકામમ્
નિષ્ઠાં દાસ્યસિ તસ્મૈ પૌલોમિ ક્રમશસ્ત્વમ્ ૧૪૮
ભિન્નાં સઙ્ઘસહસ્ત્રૈઃ ખિન્નાં શત્રુભરેણ
પાતું ભારતભૂમિં માતર્દેહિ બલં મે ૧૪૯
ત્ર્યૈલોક્યાવનભારશ્રાન્તાં વાસવકાન્તામ્
હૈરમ્બ્યો મદલેખાઃ સમ્યક્ સમ્મદયન્તુ ૧૫૦
તૃતીયો હંસમાલાપાદઃ
સુરુચિર્વજ્રપાણેસ્સુદૃશો મન્દહાસઃ
હરતાન્મોહમૂલં હૃદયસ્થં તમો મે ૧૫૧
અમૃતં સઙ્કિરન્ત્યા પ્રસરન્ત્યેહ દૃષ્ટ્યા
સુરરાજ્ઞી બલાઢ્યાં ભરતક્ષ્માં કરોતુ ૧૫૨
અમૃતામ્ભઃ કિરન્તી કરુણામ્ભો વહન્તી
નતરક્ષાત્તદીક્ષા શચિ માતસ્તવેક્ષા ૧૫૩
કૃતપીયૂષવૃષ્ટિસ્તતકલ્યાણસૃષ્ટિઃ
વિહિતૈનોવિનષ્ટિર્ધૃતવિજ્ઞાનપુષ્ટિઃ ૧૫૪
ભૃતદેવેન્દ્રતુષ્ટિર્યમિનાં દેવગૃષ્ટિઃ
મમ કામ્યાનિ દેયાત્તવ વિશ્વામ્બ દૃષ્ટિઃ ૧૫૫
જગતાં ચક્રવર્તિન્યસિતસ્તે કટાક્ષઃ
જલદો ભક્તિભાજાં શિખિનાં નર્તનાય ૧૫૬
સુકૃતી કોઽપિ નાટ્યે બહુલે તત્ર માતઃ
જગતે સારભૂતાનુપદેશાન્કરોતિ ૧૫૭
અપરો નવ્યકાવ્યાન્યનવદ્યાનિ ધન્યઃ
વિદધાત્યપ્રયત્નાદ્બુધભોગક્ષમાણિ ૧૫૮
ઇતરો ભાગ્યશાલી રમણીયૈઃ પ્રસઙ્ગૈઃ
વિતનોતિ સ્વજાતિં જગતિ શ્રેષ્ઠનીતિમ્ ૧૫૯
જગતાં માતરેકો મહસા પુણ્યશાલી
વિધુતારિઃ સ્વદેશં કુરુતે વીતપાશમ્ ૧૬૦
પર ઇન્દ્રાણિ સાધુર્બત વિસ્મૃત્ય વિશ્વમ્
રમતે સિક્તગણ્ડઃ પ્રમદાશ્રુપ્રદાનૈઃ ૧૬૧
તવ રાગાર્દ્રદૃષ્ટ્યા દિવિ શક્રસ્ય નાટ્યમ્
કરુણાસિક્તદૃષ્ટયા ભુવિ ભક્ત્સ્ય નાટ્યમ્ ૧૬૨
તવ સપ્રેમદૃષ્ટિર્બલમિન્દ્રે દધાતિ
તવ કારુણ્યદૃષ્ટિર્બલમસ્માસુ ધત્તામ્ ૧૬૩
તવ વામાઃ કટાક્ષાઃ પ્રભુમાનન્દયન્તુ
ઉચિતો દક્ષિણાનામયમસ્ત્વીક્ષણાનામ્ ૧૬૪
સુકૃતાનાં પ્રપોષં દુરિતાનાં વિશોષમ્
કરુણાર્દ્રા વિભાન્તી તવ દૃષ્ટિઃ ક્રિયાન્નઃ ૧૬૫
કુરુ પાદાબ્જબન્ધોઃ સરણિં નિસ્તમસ્કામ્
શચિ વિજ્ઞાનતેજઃ કિરતાવીક્ષિતેન ૧૬૬
ક્રિયયારાધયન્તો ભુવને તે વિભૂતીઃ
ઇહ કેચિલ્લભન્તે તવ માતઃ કટાક્ષાન્ ૧૬૭
સ્ફુટવિજ્ઞાનપૂર્વં પ્રભજેરન્ યદિ ત્વામ્
સ્થિરયા દેવિ ભક્ત્યા કિમુ વક્તવ્યમીશે ૧૬૮
કુવિધેર્વિસ્મરન્તી ભરતક્ષ્મા શચિ ત્વામ્
બહુકાલાદભાગ્યે પતિતા દેવ્યયોગ્યે ૧૬૯
અભિષિક્ત્સ્ય માતા તવ તેજોંશભૂતા
સુદશાં સેવમાનામનયત્પશ્ચિમાશામ્ ૧૭૦
અયિ કાલં કિયન્તં દયસે પશ્ચિમસ્યામ્
ઇત ઇન્દ્રાણિ પૂર્વામવલોકસ્વ દીનામ્ ૧૭૧
ન વયં પશ્ચિમસ્યાશ્શચિ યાચામનાશમ્
કૃપયૈતાં ચ પૂર્વાં નિહતાશામવાશામ્ ૧૭૨
સકલં વ્યર્થમાસીદયિ દીનેષુ દૃષ્ટા
તવ વિશ્વસ્ય માતઃ કરુણૈકાવશિષ્ટા ૧૭૩
સુરરાજસ્ય કાન્તે નરસિંહસ્ય સૂનુમ્
બલવન્તં કુરુ ત્વં ભરતક્ષ્માવનાય ૧૭૪
રુચિરાભિર્નિજાભિર્ગતિભિર્હર્ષયન્તુ
મરુતાં ભર્તુરેતાસ્તરુણીં હંસમાલાઃ ૧૭૫
ચતુર્થો મધુમતીપાદઃ
દિશિ દિશિ પ્રસરદ્રુચિતમોદમનમ્
હરતુ મે દુરિતં હરિવધૂહસિતમ્ ૧૭૬
હરતુ દુઃખભરપ્રસૃતમશ્રુજલમ્
ભરતભૂસુદૃશો બલજિતો રમણી ૧૭૭
અતિતરાં મહિતા સુરપતેર્વનિતા
કરુણયા કલિતા મમ શચી શરણમ્ ૧૭૮
ત્રિભુવનક્ષિતિરાડ્ભુવનભૂષણભા
અખિલભાસકભા મમ શચી શરણમ્ ૧૭૯
સતતયુક્તસુધીહૃદયદીપકભા
નિખિલપાચકભા મમ શચી શરણમ્ ૧૮૦
રવિવિરોચકભા શશિવિરાજકભા
ભગણશોભકભા મમ શચી શરણમ્ ૧૮૧
ગગનખેલકભા સકલચાલકભા
અભયદાઽતિશુભા મમ શચી શરણમ્ ૧૮૨
રુચિલવઙ્ગતયા યદનઘાંશુનિધેઃ
હૃતતમોભવનં ભવતિ દીપિકયા ૧૮૩
સ્ફુરતિ ચારુ યતઃ કિરણમેકમિતા
જલદસૌધતલે મુહુરિયં ચપલા ૧૮૪
ભવતિ યદ્દ્યુતિતઃ કમપિ ભાગમિતઃ
પવિરરાતિહરઃ પ્રહરણેશપદમ્ ૧૮૫
ભવતિ યત્સુરુચેરણુતમાંશમિતા
યુવમનોમદની સુવદનાસ્મિતભા ૧૮૬
વિતતસૂક્ષ્મતનુર્મહતિ સા ગગને
પરમપૂરુષભા મમ શચી શરણમ્ ૧૮૭
અમરનાથસખી રુચિનિધાનમુખી
અમૃતવર્ષકદૃઙ્ મમ શચી શરણમ્ ૧૮૮
અવિધવા સતતં યુવતિરેવ સદા
અનઘવીરસુતા મમ શચી શરણમ્ ૧૮૯
અમૃતવત્યધરે સુરધરાપતયે
ચરણયોર્ભજતે મમ શચી શરણમ્ ૧૯૦
સ્મિતલવેષુ સિતા શિરસિજેષ્વસિતા
ચરણયોરરુણા બહિરપિ ત્રિગુણા ૧૯૧
કપટચન્દ્રમુખી પ્રકૃતિરિન્દ્રસખી
મૃતિજરારહિતા મમ શચી શરણમ્ ૧૯૨
કૃશતમેપ્યુદરે ત્રિભુવનં દધતી
જનિમતાં જનની મમ શચી શરણમ્ ૧૯૩
સ્થિરતરા મનસિ સ્થિરતમા વચસિ
નયનયોસ્તરલા મમ શચી શરણમ્ ૧૯૪
મૃદુતરા કરયોર્મૃદુતમા વચસિ
ભુજબલે કઠિના મમ શચી શરણમ્ ૧૯૫
મૃદુલબાહુલતાઽપ્યમિતભીમબલા
અસુરદર્પહરી મમ શચી શરણમ્ ૧૯૬
અબલયાઽપિ યયા ન સદૃશોઽસ્તિ બલે
જગતિ કશ્ચિદસૌ મમ શચી શરણમ્ ૧૯૭
અતિતરાં સદયા પદરતે મનુજે
ખલજને પરુષા મમ શચી શરણમ્ ૧૯૮
ગણપતિં કુરુતાદ્ભરતભૂમ્યવને
અમરભૂમિપતેઃ પ્રિયતમા સબલમ્ ૧૯૯
મધુરશબ્દતતીર્મધુમતીરજરા
ગણપતેશ્શૃણુયાત્સુરપતેસ્તરુણી ૨૦૦
દ્વિતીયમૌષ્ણિહં શતકં સમાપ્તમ્
અથ તૃતીયમાનુષ્ટુભં શતકમ્
પ્રથમઃ પથ્યાવક્ત્રપાદઃ
હસિતં તન્મહાશક્તેરસ્માકં હરતુ ભ્રમમ્
યત એવ મહચ્ચિત્રં વિશ્વમેતદ્વિજૃમ્ભતે ૨૦૧
રાજન્તી સર્વભૂતેષુ સર્વાવસ્થાસુ સર્વદા
માતા સર્ગસ્ય ચિત્પાયાત્ પૌલોમી ભારતક્ષિતિમ્ ૨૦૨
ધર્મિજ્ઞાનં વિભોસ્તત્ત્વં ધર્મો જ્ઞાનં સવિત્રિ તે
વ્યવહૃત્યૈ વિભાગોઽયં વસ્ત્વેકં તત્ત્વતો યુવામ્ ૨૦૩
ઇન્દ્રેશવાસુદેવાદ્યૈઃ પદૈઃ સઙ્કીત્ર્યતે વિભુઃ
શચી શિવા મહાલક્ષ્મીપ્રમુખૈર્ભવતી પદૈઃ ૨૦૪
અન્તરં વસ્તુનો જ્ઞાતૃ તચ્છક્તં પરિચક્ષતે
શાખાઃ સમન્તતો જ્ઞાનં શક્તિં સઙ્કીર્તયન્તિ તામ્ ૨૦૫
અન્તરસ્ય ચ શાખાનામૈક્યં નિર્વિષયસ્થિતૌ
વિષયગ્રહણેષ્વેવ સવિભાગઃ પ્રદૃશ્યતે ૨૦૬
સ્યાદેવં વિષયાપેક્ષી શાખાનામન્તરસ્ય ચ
અવિભક્તૈકરૂપાણાં વિભાગો હરિતામિવ ૨૦૭
લક્ષ્યમન્તર્વયં ચક્રે ધ્યાયામો યત્ર નિષ્ઠિતાઃ
અન્તરીભાવતસ્તસ્ય નાન્તરં તુ વિલક્ષણમ્ ૨૦૮
અહઙ્કૃતેર્વયં નાન્યે યત્રાહઙ્કૃતિસમ્ભવઃ
સમ્પદ્યેતાન્તરં તત્ર જ્ઞાનસ્ય જ્ઞાતૃતાવહમ્ ૨૦૯
અન્તરાવર્તભૂયસ્ત્વાદેકસ્મિન્ બોધસાગરે
બોદ્ધારો બહવોઽભૂવન્ વસ્તુ નૈવ તુ ભિદ્યતે ૨૧૦
ચિદ્રૂપે માતરેવં ત્વં પરસ્માદ્બ્રહ્મણો યથા
ન દેવિ દેવતાત્મભ્યો જીવાત્મભ્યશ્ચ ભિદ્યસે ૨૧૧
સમસ્તભૂતબીજાનાં ગૂઢાનામન્તરાત્મનિ
તવોદ્ગારોઽયમાકાશો માતસ્સૂક્ષ્મરજોમયઃ ૨૧૨
ન સર્વભૂતબીજાનિ વસ્તૂનિ સ્યુઃ પૃથક્ પૃથક્
ત્વયિ પ્રાગવિભક્તાનિ બભૂવુરિતિ વિશ્રુતિઃ ૨૧૩
યથામ્બસ્મૃતિબીજાનાં પ્રજ્ઞાયામવિશેષતઃ
તથા સ્યાદ્ભૂતબીજાનામવિભક્ત્સ્થિતિસ્ત્વયિ ૨૧૪
નાણૂનિ ભૂતબીજાનિ પ્રાક્સર્ગાત્ત્વયિ સંસ્થિતૌ
ચિતિશક્ત્યાત્મકાન્યેવ નિરાકારાણિ સર્વથા ૨૧૫
અનાદિ ચેદિદં વિશ્વં સ્મરણ્ણાત્તવ સર્જનમ્
સાદિ ચેદાદિમઃ સર્ગો વક્ત્વ્યસ્તવ કલ્પનાત્ ૨૧૬
વિધાતું શક્નુયાત્સંવિદભૂતસ્યાપિ કલ્પનમ્
કલ્પિતસ્યૈકદા ભૂયઃ સર્જનાવસરે સ્મૃતિઃ ૨૧૭
ચિતેરસ્માદૃશાં વીર્યં સ્વપ્ને ચેદ્વિશ્વકારણમ્
ચિતેસ્સમષ્ટિભૂતાયાઃ પ્રભાવે સંશયઃ કુતઃ ૨૧૮
માતસ્સમષ્ટિચિદ્રૂપે વિભૂતિર્ભુવનં તવ
ઇહ વ્યષ્ટિ શરીરેષુ ભાન્તી તદનુપશ્યસિ ૨૧૯
ત્વં બહ્મ ત્વં પરાશક્તિસ્ત્વં સર્વા અપિ દેવતાઃ
ત્વં જીવાસ્ત્વં જગત્સર્વં ત્વદન્યન્નાસ્તિ કિઞ્ચન ૨૨૦
સતી ચિદમ્બ નૈવ ત્વં ભાવાભાવવિલક્ષણા
શક્તિશક્તિમતોર્ભેદદર્શનાદેષ વિભ્રમઃ ૨૨૧
તવામ્બ જગતધાસ્ય મૃત્તિકાઘટયોરેવ
સમ્બન્ધો વેદિતવ્યઃ સ્યાન્ન રજ્જૌફણિનોરિવ ૨૨૨
ત્વં શક્તિરસ્યવિચ્છિન્ના ભાવૈરાત્મવિભૂતિભિઃ
અન્તરાસ્તુ મહેન્દ્રસ્ય શક્ત્સ્ય પ્રતિબિમ્બવત્ ૨૨૩
શક્તિર્ગણપતેઃ કાયે પ્રવહન્તી સનાતની
ભારતસ્ય ક્રિયાદસ્ય બાધ્યમાનસ્ય રક્ષણમ્ ૨૨૪
ઇમાનિ તત્ત્વવાદીનિ વાસિષ્ઠસ્ય મહામુનેઃ
પથ્યાવક્ત્રણિ સેવન્તામનન્તામભવાં ચિતિમ્ ૨૨૫
દ્વિતીયો માણવકપાદઃ
શક્ત્તમા શક્રવધૂ હાસવિભા મે હરતુ
માનસમાર્ગાવરકં જેતુમશક્યં તિમિરમ્ ૨૨૬
ભારતભૂપદ્મદૃશો દુર્દશયા ક્ષીણતનોઃ
બાષ્પમજસ્રં વિગલદ્વાસવભામા હરતુ ૨૨૭
દણ્ડિતરક્ષોજનતા પણ્ડિતગીતાવનિતા
મણ્ડિતમાહેન્દ્રગૃહા ખણ્ડિતપાપા જયતિ ૨૨૮
સદ્ગુણસમ્પત્કલિતં સર્વશરીરે લલિતમ્
દેવપતેઃ પુણ્યફલં પુષ્યતુ મે બુદ્ધિબલમ્ ૨૨૯
હાસવિશેષૈરલસૈર્દિક્ષુ કિરન્ત્યચ્છસુધામ્
ઇન્દ્રદૃગાનન્દકરી ચન્દ્રમુખી મામવતુ ૨૩૦
પ્રેમતરઙ્ગપ્રતિમૈઃ શીતલદૃષ્ટિપ્રકરૈઃ
શક્રમનોમોહકરી વક્રકચા મામવતુ ૨૩૧
ગાઢરસૈશ્ચારુપદૈર્ગૂઢતરાર્થૈર્વચનૈઃ
કામકરી વૃત્રજિતો હેમતનુર્મામવતુ ૨૩૨
મૃત્યુતનુઃ કાલતનોર્વિશ્વપતેઃ પાર્શ્વચરી
પ્રેતજગદ્રક્ષતિ યા સા તરુણી મામવતુ ૨૩૩
પ્રેતજગત્કેચિદધો લોકમપુણ્યં બ્રુવતે
શીતરુચેર્દેવિ પરો નેતરદેતદ્ વદતિ ૨૩૪
ભૂરિયમુર્વી વસુધા વારિજવૈર્યેષભુવઃ
સ્વર્મહસાં રાશિરસૌ યેષુ નરપ્રેતસુરાઃ ૨૩૫
રાજતશૈલં શશિનઃ કેચિદભિન્નં બ્રુવતે
મૃત્યુયમાવેવ શિવાવીશ્વરિ તેષાં તુ મતે ૨૩૬
રાજતશૈલઃ પિતૃભૂરોષધિરાડેષ યદિ
કાઞ્ચનશૈલઃ સુરભૂર્બન્ધુરસૌ વારિરુહામ્ ૨૩૭
પાવય ભૂમિં દધતઃ પાવકકાયસ્ય વિભોઃ
ભામિનિ ભાવાનુગુણે સેવકમગ્નાયિ તવ ૨૩૮
યસ્ય યમો ભૂતપતિર્બુદ્ધિમતસ્તસ્ય મતે
આગ્નિરુપેન્દ્રો મઘવા કાઞ્ચનગર્ભો ભગવાન્ ૨૩૯
યસ્ય મહાકાલવધૂર્મૃત્યુરપિ દ્વે ન વિદઃ
ત્વં શચિ મેધાઽસ્યમતે પાવકશક્તિઃ કમલા ૨૪૦
નામસુ ભેદોઽસ્તુ ધિયામીશ્વરિ નિષ્કૃષ્ટમિદમ્
સૂર્યધરેન્દુષ્વજરે ત્વં ત્રિતનુર્ભાસિ પરે ૨૪૧
સાત્ત્વિકશક્તિઃ સવિતર્યાદિમરામે ભવસિ
રાજસશક્તિર્ભુવિ નસ્તામસશક્તિઃ શશિનિ ૨૪૨
સર્વગુણા સર્વવિભા સર્વબલા સર્વરસા
સર્વમિદં વ્યાપ્ય જગત્કાપિ વિભાન્તી પરમા ૨૪૩
વ્યોમતનુર્નિર્વપુષો દેવિ સતસ્ત્વં દયિતા
અસ્યભિયુક્તૈર્વિબુધૈરમ્બ મહેશ્વર્યુદિતા ૨૪૪
સા ખલુ માયા પરમા કારણમીશં વદતામ્
સા પ્રકૃતિઃ સાઙ્ખ્યવિદાં સા યમિનાં કુણ્ડલિની ૨૪૫
સા લલિતા પઞ્ચદશીમુત્તમવિદ્યાં જપતામ્
સા ખલુ ચણ્ડી જનની સાધુનવાર્ણં ભજતામ્ ૨૪૬
સા મમ શચ્યાઃ પરમં કારણરૂપં ભવતિ
કાર્યતનુર્દિવિ શક્રં સમ્મદયન્તી લસતિ ૨૪૭
વ્યોમતનોઃ સર્વજગચ્ચાલનસૂત્રં તુ વશે
નિર્વહણે તસ્ય પુનર્દિવ્યતનુસ્ત્રીત્રિતયમ્ ૨૪૮
પાતુમિમં સ્વં વિષયં હન્ત ચિરાન્નિર્વિજયમ્
કિઙ્ક્રમીશે વિભયં માં કુરુ પર્યાર્શિયમ્ ૨૪૯
ચારુપદક્રીડનકૈર્માતરિમૈર્માણવકૈઃ
ચેતસિ તે દેવનુતે પ્રીતિરમોઘા ભવતુ ૨૫૦
તૃતીયશ્ચિત્રપદાપાદઃ
અપ્યલસો હરિદન્તધ્વાન્તતતેરપિ હર્તા
અસ્તુ મમેન્દ્રપુરન્ધ્રી હાસલવઃ શુભકર્તા ૨૫૧
પાહિ પરૈર્હૃતસારાં નેત્રગલજ્જલધારામ્
ભારતભૂમિમનાથાં દેવિ વિધાય સનાથામ્ ૨૫૨
ચાલયતા સુરરાજં પાલયતા ભુવનાનિ
શીલયતા નતરક્ષાં કાલયતા વૃજિનાનિ ૨૫૩
લાલયતા મુનિસઙ્ઘં કીલયતા દિવિ ભદ્રમ્
પાવય માં સકૃદીશે ભાસુરદૃક્પ્રસરેણ ૨૫૪
સર્વરુચામાપિ શાલાં ત્વાં શચિ મઙ્ગલલીલામ્
કાલકચામુત કાલીં પદ્મમુખીમુત પદ્મામ્ ૨૫૫
યઃ સ્મરતિ પ્રતિકલ્યં ભક્તિભરેણ પરેણ
તસ્ય સુરેશ્વરિ સાધોરસ્મિ પદાબ્જભુજિષ્યઃ ૨૫૬
યસ્તવ નામપવિત્રં કીર્તયતે સુકૃતી ના
વાસવસુન્દરિ દાસસ્તચ્ચરણસ્ય સદાઽહમ્ ૨૫૭
પાવકસાગરકોણં યસ્તવ પાવનયન્ત્રમ્
પૂજયતિ પ્રતિઘસ્રં દેવિ ભજામિ તદઙ્ધ્રિમ્ ૨૫૮
યસ્તવ મન્ત્રમુદારપ્રાભવમાગમસારમ્
પાવનિ કૂર્ચમુપાસ્તે તસ્ય નમધ્રણાય ૨૫૯
શાન્તધિયેતરચિન્તાસન્તતિમમ્બ વિધૂય
ચિન્તયતાં તવ પાદાવસ્મિ સતામનુયાયી ૨૬૦
શોધયતાં નિજતત્ત્વં સાધયતાં મહિમાનમ્
ભાવયતાં ચરણં તે દેવિ પદાનુચરોઽહમ્ ૨૬૧
યોઽનુભવેન્નિજદેહે ત્વામજરે પ્રવહન્તીમ્
સન્તતચિન્તનયોગાત્તસ્ય નમામિ પદાબ્જમ્ ૨૬૨
બોધયતે ભવતીં યઃ પ્રાણગતાગતદર્શી
કુણ્ડલિનીં કુલકુણ્ડાત્તં ત્રિદિવેશ્વરિ વન્દે ૨૬૩
લોચનમણ્ડલસૌધાં લોકનમૂલવિચારી
વિન્દતિ યઃ પરમે ત્વાં વન્દનમસ્ય કરોમિ ૨૬૪
માનિનિ જમ્ભજિતસ્ત્વાં માનસમૂલવિતર્કી
વેદહૃદમ્બુરુહે યઃ પાદમમુષ્ય નમામિ ૨૬૫
અન્તરનાદવિમર્શી પશ્યતિ યઃ સુકૃતી તે
વૈભવમમ્બ વિશુદ્ધે તેન વયં પરવન્તઃ ૨૬૬
ઇન્દ્રપદસ્થિતચિત્તશ્શીર્ષસુધારસમત્તઃ
યો ભજતે જનનિ ત્વાં તચ્ચરણં પ્રણમામિ ૨૬૭
રાસનવારિણિ લગ્નઃ સમ્મદવીચિષુ મગ્નઃ
ધ્યાયતિ યઃ પરમે ત્વાં તસ્ય પદં મમ વન્દ્યમ્ ૨૬૮
ત્વાં સદહઞઙ્કૃતિરૂપાં યોગિનુતે હતપાપામ્
ધારયતે હૃદયે યસ્તસ્ય સદાઽસ્મિ વિધેયઃ ૨૬૯
ધૂતસમસ્તવિકલ્પો યસ્તવ પાવનલીલામ્
શોધયતિ સ્વગુહાયાં તસ્ય ભવામ્યનુજીવી ૨૭૦
યો ભજતે નિજદૃટિં રૂપપરિગ્રહણેષુ
કામપિ દેવિ કલાં તે તસ્ય પદે નિપતેયમ્ ૨૭૧
કર્મણિ કર્મણિ ચેષ્ટામમ્બ તવૈવ વિભૂતિમ્
યઃ શિતબુદ્ધિરુપાસ્તે તત્પદમેષ ઉપાસ્તે ૨૭૨
વસ્તુનિ વસ્તુનિ સત્તાં યો ભવતીં સમુપાસ્તે
માતરમુષ્ય વહેયં પાદયુગં શિરસાઽહમ્ ૨૭૩
પાતુમિમં નિજદેશં સર્વદિશાસુ સપાશમ્
અમ્બ વિધાય સમર્થં માં કુરુ દેવિ કૃતાર્થમ્ ૨૭૪
ચિત્રપદાભિરિમાભિશ્ચિત્રવિચિત્રચરિત્રા
સમ્મદમેતુ મઘોનઃ પ્રાણસખી મૃગનેત્ર ૨૭૫
ચતુર્થો નારાચિકાપાદઃ
અન્તર્વિધુન્વતા તમઃ પ્રાણસ્ય તન્વતા બલમ્
મન્દસ્મિતેન દેવતારાજ્ઞી કરોતુ મે શિવમ્ ૨૭૬
ઉત્થાપ્ય પુણ્યસઞ્ચયં સમ્મદ્ર્ય પાપસંહતિમ્
સા ભારતસ્ય સમ્પદે ભૂયાદ્બલારિભામિની ૨૭૭
લીલાસખી બિડૌજસસ્સ્વર્વાટિકાસુ ખેલને
પીયુષભાનુજિન્મુખી દેવી શચી વિરાજતે ૨૭૮
પક્ષઃ પરો મરુત્વતો રક્ષઃ પ્રવીરમર્દને
ભામાલિ ભાસુરાનના દેવી શચી વિરાજતે ૨૭૯
ભીતિં નિશાટસંહતેઃ પ્રીતિં સુપર્વણાં તતેઃ
જ્યાટઙ્કૃતૈર્વિતન્વતી દેવી શચી વિરાજતે ૨૮૦
દેવેન્દ્રશક્તિધારિણી શત્રુપ્રસક્તિવારિણી
મૌનીન્દ્રમુક્તિકારિણી દેવી શચી ગતિર્મમ ૨૮૧
સન્નસ્વદેશદર્શનાદ્ભિન્નસ્વજાતિવીક્ષણાત્
ખિન્નસ્ય સંશ્રિતાવની દેવી શચી ગતિર્મમ ૨૮૨
સઙ્ઘે સહસ્રધાકૃતે દેશે નિકૃષ્ટતાં ગતે
શોકાકુલસ્ય લોકભૃદ્દેવી શચી ગતિર્મમ ૨૮૩
સા સંવિદોઽધિદેવતા તસ્યાસ્સ્વરઃ પરો વશે
સર્વં વિધીયતે તયા તસ્માત્પરા મતા શચી ૨૮૪
સા યાતિ સૂક્ષ્મમપ્યલં સા ભાતિ સર્વવસ્તુષુ
સા માતિ ખં ચ નિસ્તુલં તસ્માત્પરા મતા શચી ૨૮૫
સા સર્વલોકનાયિકા સા સર્વગોલપાલિકા
સા સર્વદેહચાલિકા તસ્માત્પરા મતા શચી ૨૮૬
યસ્યાઃ કૃતિર્જગત્ત્રયં યા તદ્બિભર્તિ લીલયા
યસ્યાં પ્રયાતિ તલ્લયં સા વિશ્વનાયિકા શચી ૨૮૭
ધર્મે પરિક્ષયં ગતે યાઽવિશ્ય નિર્મલં જનમ્
તદ્રક્ષણાય જાયતે સા વિશ્વનાયિકા શચી ૨૮૮
વેધા ઋતસ્ય યોદિતા મન્ત્રેણ સત્યવાદિના
બાધાનિવારિણી સતાં સા વિશ્વનાયિકા શચી ૨૮૯
યજ્ઞો યયા વિનીયતે યુદ્ધં તથા પૃથગ્વિધભ્
તાં દેવરાજમોહિનીં નારીં નુમઃ પુરાતનીમ્ ૨૯૦
યસ્યાસ્સુતો વૃષાકપિર્દેવોઽસતાં પ્રશાસિતા
તાં સર્વદા સુવાસિનીં નારીં નુમઃ પુરાતનીમ્ ૨૯૧
યસ્યાસ્સમા નિતમ્બિની કાચિન્ન વિષ્ટપત્રયે
તાં નિત્યચારુ યૌવનાં નારીં નુમઃ પુરાતનીમ્ ૨૯૨
યચ્ચારુતા ન દૃશ્યતે મન્દારપલ્લવેષ્વપિ
તત્સુન્દરાચ્ચસુન્દરં શચ્યાઃ પદામ્બુજં શ્રયે ૨૯૩
યસ્ય પ્રભા ન વિદ્યતે માણિક્યતલ્લ્જેષ્વપિ
તદ્ભાસુરાચ્ચ ભાસુરં શચ્યાઃ પદામ્બુજં શ્રયે ૨૯૪
ન સ્યાદઘૈસ્તિરસ્કૃતો યચ્ચિન્તકો નરઃ કૃતી
તત્પાવનાચ્ચ પાવનં શચ્યાઃ પદામ્બુજં શ્રયે ૨૯૫
રાજન્નખેન્દુભાનુભિસ્સર્વં તમો વિધુન્વતે
બૃન્દારકેન્દ્રસુન્દરીપાદામ્બુજાય મઙ્ગલમ્ ૨૯૬
ગીર્વાણમૌલિરીભા સઙ્ક્ષાલિતાય દીપ્યતે
સ્વર્ગાધિનાથભામિનિપાદામ્બુજાય મઙ્ગલમ્ ૨૯૭
બાલાર્કબિમ્બરોચિષે યોગીન્દ્ર હૃદ્ગુહાજુષે
પાકારિજીવિતેશ્વરીપાદામ્બુજાય મઙ્ગલમ્ ૨૯૮
આત્મીયદેશરક્ષણે શક્તં કરોતુ સર્વથા
પાપદ્વિષાં પ્રિયઙ્કરી વાસિષ્ઠમિન્દ્રસુન્દરી ૨૯૯
વાસિષ્ઠવાક્પ્રદીપ્તિર્ભિનારાચિકાભિરીશ્વરી
ગીર્વાણચક્રવર્તિનસ્સમ્મોદમેતુ સુન્દરી ૩૦૦
તૃતીયમાનુષ્ટુભં શતકં સમાપ્તમ્
અથ ચતુર્થં બાર્હતં શતકમ્
પ્રથમો હલમુખીપાદઃ
ક્ષીરવીચિપૃષતસિતં પ્રેમધારિદરહસિતમ્
નાકરાજનલિનદૃશઃ શોકહારિ મમ ભવતુ ૩૦૧
અધ્વનો ગલિતચરણામધ્વરક્ષિતિમવિભવામ્
આદધાતુ પથિ વિમલે વૈભવે ચ હરિતરુણી ૩૦૨
બ્રહ્મણશ્વિતિરથનભઃ કાયભાગવગતિમતી
યા તદા પૃથગિવ બભૌ ધર્મિતાં સ્વયમપિ ગતા ૩૦૩
મોદબોધવિભવકૃતપ્રાકૃતેતરવરતનુ
સર્વસદ્ગુણગણયુતં યા સસર્જ સુરમિથુનમ્ ૩૦૪
પુંસિ દીપ્તવપુષિ તયોર્બ્રહ્મ સોઽહમિતિ લસતિ
યોષિતે કિલ ધિયમદાત્તસ્ય શક્તિરહમિતિ યા ૩૦૫
યાભિમાનબલવશતસ્તામુદારતમવિભવામ્
મન્યતે સ્મ વરવનિતાં સ્વાધિદૈવિકતનુરિતિ ૩૦૬
આદિપુંસિ ગગનતનુર્યા તનોતિ તનુજમતિમ્
આદધાતિ યુવતિતનુઃ પ્રાણનાયક ઇતિ રતિમ્ ૩૦૭
તાં પરાં ભુવનજનનીં સર્વપાપતતિશમનીમ્
તન્ત્રજાલવિનુતબલાં સ્તૌમિ સર્વમતિમમલામ્ ૩૦૮
સા મતિર્વિદિતવિષયા સા રુચિર્વિતતવિષયા
સા રતિર્વિનુતવિષયા સા સ્થિતિર્વિધુતવિષયા ૩૦૯
યત્ર યત્ર મમ ધિષણા ગ્રાહ્યવસ્તુનિ ગતિમતી
તત્ર તત્ર વિલસતુ સા સર્વગા સકલચરિતા ૩૧૦
દુર્બલસ્ય બહુલબલૈરર્દિતસ્ય જગતિ ખલૈઃ
આદિદેવિ તવ ચરણં પાવનં ભવતિ શરણમ્ ૩૧૧
પૌરુષે ભવતિ વિફલે ત્વામયં જનનિ ભજતે
કિં નુતે યદિ વિમુખતા પૌરુષં કથય ભજતામ્ ૩૧૨
કર્તુરપ્રતિહતગિરઃ પૌરુષાચ્છતગુણમિદમ્
ધ્યાતુરસ્ખલિતમનસઃ કાર્યસિદ્ધિષુ તવ પદમ્ ૩૧૩
પૌરુષં વિદિતમફલં કાઙ્ક્ષિતે મમ સુરનુતે
શક્તમીદૃશિ તુ સમયે શ્રદ્દધામિ તવ ચરણમ્ ૩૧૪
પૌરુષં યદિ કવિમતં દેવિ તેઽપિ પદભજનમ્
દૈવવાદપટુવચસો મૂકતૈવ મમ શરણમ્ ૩૧૫
પૂર્વજન્મસુકૃતફલં દૈવમમ્બ નિગદતિ યઃ
ભક્તિપૌરુષવિરહિણો ભાવિતસ્ય રિપુદયિતમ્ ૩૧૬
ઉદ્યતસ્ય તવ ચરણં સંશ્રિતસ્ય ચ સુરનુતે
પૂર્વજન્મસુકૃતબલશ્રદ્ધયાઽલમહૃદયયા ૩૧૭
અસ્તુ પૂર્વભવસુકૃતં માસ્તુ વા જનનિ જગતામ્
સામ્પ્રતં તવ પદયુગં સંશ્રિતોસ્મ્યવ વિસૃજ વા ૩૧૮
નાસ્તિ સમ્પ્રતિ કિમપિ કિં ભૂતિમાપ્સ્યસિ કિમુ તતઃ
અન્યજન્મનિ વિતરણે કા પ્રસક્તિરમરનુતે ૩૧૯
નાન્યજન્મનિ બહુશિવં નાપિ નાકભુવનસુખમ્
કામયે ફલમભિમતં દેહિ સમ્પ્રતિ શચિ ન વા ૩૨૦
મેદિની ભુવનતલતો નિસ્તુલાદુત ગગનતઃ
ભાસ્કરાદુત રુચિનિધેઃ કામ્યમીશ્વરિ વિતર મે ૩૨૧
વિષ્ટપે ક્વચન વરદે દાતુમીશ્વરિ કૃતમતિમ્
વારયેજ્જનનિ ન પરસ્ત્વાં જનસ્તવ પતિમિવ ૩૨૨
દેહિ વા ભગવતિ ન વા પાહિ વા શશિમુખિ ન વા
પાવનં તવ પદયુગં ન ત્યજાનિ હરિદયિતે ૩૨૩
રક્ષિતું ભરતવિષયં શક્તમિન્દ્રહૃદયસખી
ચન્દ્રબિમ્બરુચિરમુખી સા ક્રિયાદ્ભુવિ ગણપતિમ્ ૩૨૪
સમ્પ્રહૃષ્યતુ હલમુખીર્ભાસ્વતીર્ગણપતિમુનેઃ
સા નિશમ્ય સુરનૃપતેર્મોહિની સદયહૃદયા ૩૨૫
દ્વિતીયો ભુજગશિશુભૃતાપાદઃ
મરુદધિપમનોનાથા મધુકરચિકુરાસ્માકમ્
વૃજિનવિધુતિમાધત્તાં વિશદહસિતલેશેન ૩૨૬
અખિલનિગમસિદ્ધાન્તો બહુમુનિવરબુદ્ધાન્તઃ
સુરપરિબૃઢશુદ્ધાન્તો ભરતવસુમતીમવ્યાત્ ૩૨૭
ભગવતિ ભવતીચેતો રતિકૃદભવદિન્દ્રસ્ય
સ તવ જનનિ સન્તાનદ્રુમવનમતિરમ્યં વામ્ ૩૨૮
પતિરખિલયુવશ્રેષ્ઠઃ કિમપિ યુવતિરત્નં ત્વમ્
વનવિહૃતિષુ વાં ચેતો હરણમભવદન્યોન્યમ્ ૩૨૯
મધુરલલિતગમ્ભીરૈસ્તવ હૃદયમુપન્યાસૈઃ
વનવિહરણલીલાયામહરદયિ દિવો રાજા ૩૩૦
કલવચનવિલાસેન પ્રગુણમુખવિકાસેન
ભુવનમપિમનોઽહાર્ષીર્જનનિ વનવિહારે ત્વમ્ ૩૩૧
કનકકમલકાન્તાસ્યા ધવલકિરણવક્ત્રેણ
અસિતજલજપત્રાક્ષી સિતનલિનદલાક્ષેણ ૩૩૨
અલિચયનિજધમ્મિલ્લા નવજલધરકેશેન
મૃદુલતમભુજાવલ્લી દૃઢતમભુજદણ્ડેન ૩૩૩
અમૃતનિલયબિમ્બોષ્ઠી રુચિરધવલદન્તેન
અતિમુકુરલસદ્ગણ્ડા વિકચજલજહસ્તેન ૩૩૪
યુવતિરતિતરાં રમ્યા સુલલિતવપુષા યૂના
ભગવતિ શચિ યુક્તા ત્વં ત્રિભુવનવિભુનેન્દ્રેણ ૩૩૫
વિકચકુસુમમન્દારદ્રષ્ઠ્હમવનવરવાટીષુ
વિહરણમયિ કુર્વાણા મનસિજમનુગૃહ્ણાસિ ૩૩૬
તવ શચિ ચિકુરે રાજત્કુસુમમમરવૃક્ષસ્ય
નવ સલિલભૃતો મધ્યે સ્ફુરદિવ નવનક્ષત્રમ્ ૩૩૭
અભજતતરુરૌદાર્યં વિભવમપિ મહાન્તં સઃ
વિકચકુસુમસમ્પત્ત્યા ભગવતિ ભજતે યસ્ત્વામ્ ૩૩૮
અમરનૃપતિના સાકં કુસુમિતવનવાટીષુ
ભગવતિ તવ વિશ્રાન્તેઃ સ જયતિ સમયઃ કોઽપિ ૩૩૯
અમરતરુવરચ્છાયાસ્વયિ મુહુરુપવિશ્ય ત્વમ્
શચિ કૃતિજનરક્ષાયૈ મનસિ વિતનુષુ ચર્ચામ્ ૩૪૦
કિમુ વસુ વિતરાણ્યસ્મૈ સુમતિમુત દદાન્યસ્મૈ
ક્ષમતમમથવાઽમુષ્મિન્ બલમુરુઘટયાનીતિ ૩૪૧
હરિતરુણિ કદા વામે વિનમદવનચર્ચાસુ
સ્મરણસમય આયાસ્યત્યમલહૃદયરઙ્ગે તે ૩૪૨
શચિ ભગવતિ સાક્ષાત્તે ચરણકમલદાસોઽહમ્
ઇહ તુ વસુમતીલોકે સ્મર મમ વિષયં પૂર્વમ્ ૩૪૩
ન યદિ તવ મનો દાતું સ્વયમયિ લઘવે મહ્યમ્
ઉપવનતરુકર્ણે વા વદ મદભિમતં કર્તુમ્ ૩૪૪
નિજવિષયમતિશ્રેષ્ઠં વિપદિ નિપતિતં ત્રાતુમ્
સ્વકુલમપિ સદધ્વાનં ગમયિતુમપથે શ્રાન્તમ્ ૩૪૫
અખિલભુવનસમ્રાજઃ પ્રિયતરુણિ ભવત્યૈવ
મતિબલપરિપૂર્ણોએઽયં ગણપતિમુનિરાધેયઃ ૩૪૬
ન કિમુ ભવતિ શં દેશે ગતવતિ કલુષે કાલે
તવ ભજનમઘં સદ્યો હરિહયલલને જેતુમ્ ૩૪૭
ત્રિજગતિ સકલં યસ્ય પ્રભવતિ પૃથુલે હસ્તે
સ બહુલમહિમા કાલો મમ જનનિ વિભૂતિસ્તે ૩૪૮
અનવરતગલદ્બાષ્પાં ભરતવસુમતીં ત્રાતુમ્
વિતરતુ દયિતાજિષ્ણોર્ગણપતિમુનયે શક્તિમ્ ૩૪૯
ભુજગશિશુભૃતા એતાઃ કવિગણપતિના ગીતાઃ
વિદધતુ મુદિતાં દેવીં વિબુધપતિમનોનાથામ્ ૩૫૦
તૃતીયો મણિમધ્યાપાદઃ
મઙ્ગલધાયી પુણ્યવતાં મન્મથધાયી દેવપતેઃ
વિષ્ટપરાજ્ઞીહાસલવો વિક્રમધાયી મે ભવતુ ૩૫૧
દૃષ્ટિવિશેષૈશ્શીતતરૈર્ભૂર્યનુકમ્પૈઃ પુણ્યતમૈઃ
ભારતભૂમેસ્તાપતતિં વાસવકાન્તા સા હરતુ ૩૫૨
પાવનદૃષ્ટિર્યોગિહિતા ભાસુરદૃષ્ટિર્દેવહિતા
શીતલદૃષ્ટિર્ભક્થિતા મોહનદૃષ્ટિશ્શક્રહિતા ૩૫૩
ઉજ્જ્વલવાણી વિક્રમદા વત્સલવાણી સાન્ત્વનદા
મઞ્જુલવાણી સમ્મદદા પન્નગવેણી સા જયતિ ૩૫૪
શારદરાકાચન્દ્રમુખી તોયદમાલાકારકચા
મેચકપાથોજાતદલશ્રીહરચક્ષુર્વાસિકૃપા ૩૫૫
ચમ્પકનાસાગણ્ડવિભામણ્ડલખેલત્કુણ્ડલભા
ઉક્તિષુ વીણાબિમ્બફલશ્રીહરદન્તપ્રાવરણા ૩૫૬
નિર્મલહાસક્ષાલિતદિગ્ભિત્તિસમૂહા મોહહરી
કાઞ્ચનમાલાશોભિગલા સન્તતલીલા બુદ્ધિકલા ૩૫૭
વિષ્ટપધારિ ક્ષીરધરસ્વર્ણઘટશ્રીહારિકુચા
કાપિ બિડૌજો રાજ્યરમા ચેતસિ માતા ભાતુ મમ ૩૫૮
દિવ્યસુધોર્મિર્ભક્તિમતાં પાવકકીલા પાપકૃતામ્
વ્યોમ્નિ ચરન્તી શક્રસખી શક્તિરમોઘા મામવતુ ૩૫૯
સમ્મદયન્તી સર્વતનું સંશમયન્તી પાપતતિમ્
સમ્પ્રથયન્તી સર્વમતીસ્સઙ્ઘટયન્તી પ્રાણબલમ્ ૩૬૦
નિર્જિતશોકાધૂતતમાસ્સંસ્કૃતચિત્તા શુદ્ધતમા
વાસવશક્તેર્વ્યોમજુષઃ કાચન વીચિર્માં વિશતુ ૩૬૧
ઉદ્ગતકીલં મૂલમિદં ભિન્નકપાલં શીર્ષમિદમ્
ઉજ્ઝિત મોહં ચિત્તમિદં વાસવશક્તિર્માં વિશતુ ૩૬૨
દૃશ્યવિરક્તં ચક્ષુરિદં ભોગવિરક્તં કાયમિદમ્
ધ્યેયવિરક્તા બુદ્ધિરિયં વાસવશક્તિર્માં વિશતુ ૩૬૩
ચક્ષુરદૃશ્યજ્વાલભૃતા વ્યાપકખેન પ્રોલ્લસતા
વિસ્મૃતકાયં સન્દધતી વાસવશક્તિર્માં વિશતુ ૩૬૪
કાયમજસ્રં વજ્રદૃઢં બુદ્ધિમશેષે વ્યાપ્તિમતીમ્
દિવ્યતરઙ્ગૈરાદધતી વાસવશક્તિર્માં વિશતુ ૩૬૫
મૂર્ધ્નિ પતન્તી વ્યોમતલાત્સન્તતમન્તઃ સર્વતનૌ
સમ્પ્રવહન્તી દિવ્યઝરૈર્વાસવશક્તિર્માં વિશતુ ૩૬૬
ભાનુવિભાયાં ભાસકતા દિવ્યસુધાયાં મોદકતા
કાઽપિ સુરાયાં માદકતા વાસવશક્ત્યાં તત્ત્રિતયમ્ ૩૬૭
ભાસયતાન્મે સમ્યગૃતં મોદમુદારં પુષ્યતુ મે
સાધુમદં મે વર્ધયતાન્નિર્જરભર્તુઃ શક્તિરજા ૩૬૮
કશ્ચન શક્તિં યોગબલાદાત્મશરીરે વર્ધયતિ
એષિ વિવૃદ્ધિં ભક્તિમતઃ કસ્યચિદેશે ત્વં વપુષિ ૩૬૯
સાધયતાં વા યોગવિદાં કીર્તયતાં વા ભક્તિમતામ્
વત્સલભાવાદિન્દ્રવધૂર્ગર્ભભુવાં વા યાતિ વશમ્ ૩૭૦
યસ્ય સમાધિઃ કોઽપિ ભવેદાત્મમનીષા તસ્ય બલમ્
યસ્તવ પાદામ્ભોજરતસ્તસ્ય ખલુ ત્વં દેવિ બલમ્ ૩૭૧
દ્વાદશવર્ષી યોગબલાદ્યા ખલુ શક્તિર્યુક્તમતેઃ
તાં શચિ દાતું ભક્તિમતે કાપિ ઘટી તે માતરલમ્ ૩૭૨
યોગબલાદ્વા ધ્યાનકૃતો ભક્તિબલાદ્વા કીર્તયતઃ
યાતુ વિવૃદ્ધિં વિશ્વહિતા વાસવશક્તિર્મે વપુષિ ૩૭૩
દુઃખિતમેતચ્છ્રીરહિતં ભારતખણ્ડં સર્વહિતમ્
ત્રાતુમધીશા સ્વર્જગતઃ સુક્ષમબુદ્ધિં માં કુરુતામ્ ૩૭૪
સન્તુ કવીનાં ભર્તુરિમે સુન્દરબન્ધાશુદ્ધતમાઃ
સન્મણિમધ્યાઃ સ્વર્જગતો રાજમહિષ્યાઃ કર્ણસુખાઃ ૩૭૫
ચતુર્થો માત્રસમકપાદઃ
શુક્લ્જ્યોતિઃ પ્રકરૈર્વ્યાપ્તઃ સૂક્ષ્મોઽપ્યન્તાન્ હરિતાં હાસઃ
જિષ્ણોઃ પત્ન્યાસ્તિમિરારાતિર્નિશ્શેષં મે હરતાન્મોહમ્ ૩૭૬
શૃણ્વત્કર્ણા સદયાલોકા લોકેન્દ્રસ્ય પ્રિયનારી સા
નિત્યાક્રોશૈર્વિરુદદ્વાણીં પાયાદેતાં ભરતક્ષોણીમ્ ૩૭૭
દેવેષુ સ્વઃ પરિદીપ્યન્તી ભૂતેષ્વિન્દૌ પરિખેલન્તી
શક્તિર્જિષ્ણોર્દ્વપદાં સઙ્ઘે હન્તૈતસ્યાં ભુવિ નિદ્રાતિ ૩૭૮
નિદ્રાણાયા અપિ તે જ્યોતિર્ગન્ધાદેતે ધરણીલોકે
મર્ત્યાઃ કિઞ્ચત્પ્રભવન્તીશે ત્વં બુદ્ધા ચેત્કિમુ વક્ત્વ્યમ્ ૩૭૯
મેઘચ્છન્નોઽપ્યરુણસ્તેજો દદ્યાદેવ પ્રમદે જિષ્ણોઃ
અત્રસ્થાનાં ભવતીગ્રન્થિચ્છન્નાપ્યેવં કુરુતે પ્રજ્ઞામ્ ૩૮૦
ધ્યાયામો યત્કથયામો યત્પશ્યામો યચ્છૃણુમો યચ્ચ
જીવામો વા તદિદં સર્વં નિદ્રાણાયા અપિ તે ભાસા ૩૮૧
નાડીબન્ધાદભિમાનાચ્ચ ચ્છન્ના માતર્ભવતી દેહે
એકાપાયાદિતરો નશ્યેત્તસ્માદ્દ્વેધા તપસઃ પન્થાઃ ૩૮૨
ચિત્તં યસ્ય સ્વજનિસ્થાને પ્રજ્ઞા બાહ્યા ન ભવેદ્યસ્ય
આધત્સે ત્વં ભુવનાધીશે બુદ્ધા ક્રીડાં હૃદયે તસ્ય ૩૮૩
વાણી યસ્ય સ્વજનિસ્થાને દૂરે કૃત્વા મનસા સઙ્ગમ્
માતસ્તત્ર પ્રતિબુદ્ધા ત્વં શ્લોકૈર્લોકં કુરુષે બુદ્ધમ્ ૩૮૪
હિત્વા દૃશ્યાન્યતિસૂક્ષ્માયાં ચક્ષુર્યસ્ય સ્વમહો વૃત્તૌ
વિશ્વાઽલિપ્તા જગતાં માતર્જાગ્રત્યસ્મિન્નચલા ભાસિ ૩૮૫
શૃણ્વન્ કર્ણો દયિતે જિષ્ણોરન્તઃ શબ્દં ધ્રિયતે યસ્ય
બુદ્ધા ભૂત્વા વિયતા સાધોરેકીભાવં કુરુષે તસ્ય ૩૮૬
યાતાયાતં સતતં પશ્યેદ્યઃ પ્રાણસ્ય પ્રયતો મર્ત્યઃ
વિશ્વસ્યેષ્ટાં તનુષે ક્રીડાં તસ્મિન્ બુદ્ધા તરુણીન્દ્રસ્ય ૩૮૭
સ્વાન્તં યસ્ય પ્રભવેત્કાર્યેષ્વમ્બૈતસ્મિન્નયિ નિદ્રાસિ
આત્મા યસ્ય પ્રભવેત્કાર્યેષ્વમ્બૈતસ્મિન્નયિ જાગર્ષિ ૩૮૮
યસ્યાઽહન્તા ભવતિ સ્વાન્તે તસ્ય સ્વાન્તં પ્રભવેત્કર્તુમ્
યસ્યાઽહન્તા ભવતિ સ્વાત્મન્યાત્મા તસ્ય પ્રભવેત્કર્તુમ્ ૩૮૯
સ્વાન્તં યસ્ય પ્રભવેત્કર્તું તત્કર્માલ્પં ભવતિ વ્યષ્ટેઃ
આત્મા યસ્ય પ્રભવેત્કર્તું તચ્છ્લાધ્યં તે બલજિત્કાન્તે ૩૯૦
એતત્સ્વાન્તં હૃદયાજ્જાતં શીર્ષે વાસં પૃથગાધાય
હાર્દાહન્તાં સ્વયમાક્રમ્ય ભ્રાન્તાનસ્માન્ કુરુતે માતઃ ૩૯૧
અસ્માકં ભોઃ કુરુતે બાધામસ્મજ્યોતિર્જનનિ પ્રાપ્ય
સ્વાન્તે નૈતત્કૃતમન્યાય્યં કાન્તે જિષ્ણોઃ શૃણુ રાજ્ઞિ ત્વમ્ ૩૯૨
સ્વાન્તે તેજો હૃદયાદાયાચ્ચન્દ્રે તેજો દિનભર્તુર્વા
આશ્રાન્તં યો મનુતે ધીરસ્તસ્ય સ્વાન્તં હૃદિ લીનં સ્યાત્ ૩૯૩
મૂલાન્વેષિસ્ફુરદાવૃત્તં નીચૈરાયાત્કબલીકૃત્ય
જાનન્ત્યેકા હૃદયસ્થાને યુઞ્જાનાનાં જ્વલસીશાને ૩૯૪
શીર્ષે ચન્દ્રો હૃદયે ભાનુર્નેત્રો વિદ્યુત્કુલકુણ્ડેઽગ્નિઃ
સમ્પદ્યન્તે મહસાઽશૈસ્તે જિષ્ણોઃ કાન્તે સુતરાં શસ્તે ૩૯૫
મન્વાનાં ત્વાં શિરસિ સ્થાને પશ્યન્તીં વા નયનસ્થાને
ચેતન્તીં વા હૃદયસ્થાને રાજન્તીં વા જ્વલનસ્થાને ૩૯૬
યો ના ધ્યાયેજ્જગતાં માતઃ કશ્ચિચ્છ્રેયાનવનૌ નાઽતઃ
પૂતં વન્દ્યં ચરણં તસ્ય શ્રેષ્ઠં વર્ણ્યં ચરિતં તસ્ય ૩૯૭
દોગ્ધ્રીં માયાં રસનાં વા યો મન્ત્રં માતર્જપતિ પ્રાજ્ઞઃ
સોઽયં પાત્રં કરુણાયાસ્તે સર્વં કામ્યં લભતે હસ્તે ૩૯૮
છિન્નાં ભિન્નાં સુતરાં સન્નામન્નાભાવાદભિતઃ ખિન્નામ્
એતાં પાતું ભરતક્ષોણીં જાયે જિષ્ણોઃ કુરુ માં શક્તમ્ ૩૯૯
ક્લૃપ્તૈઃ સમ્યગ્બૃહતીછન્દસ્યેતૈર્માત્રસમકૈર્વૃત્તૈઃ
કર્ણાધ્વાનં પ્રવિશદ્ભિસ્સા પૌલોમ્યમ્બાપરિતૃપ્તાસ્તુ ૪૦૦
ચતુર્થં બાર્હતં શતકં સમાપ્તમ્
અથ પઞ્ચમં પાઙ્ક્તં શતકમ્
પ્રથમો મયૂરસારિણીપાદઃ
પ્રેમવાસભૂમિરચ્છભાવસ્થાનમાનમજ્જનાઘહા મે
ઇન્દ્રસુન્દરી મુખાબ્જભાસી મન્દહાસ આપદં ધુનોતુ ૪૦૧
વીક્ષિતૈઃ કૃપાન્વિતૈર્હરન્તી પાતકાનિ મઙ્ગલં ભણન્તી
જમ્ભભેદિજીવિતેશ્વરી મે જન્મદેશમુજ્જ્વલં કરોતુ ૪૦૨
અમ્બરં ચ દેવતાનતભ્રૂરમ્બ તે તનુદ્વયં યદુક્તમ્
આદિમા તયોર્વૃષાકપિં તં દેવ્યજીજનત્પરા જયન્તમ્ ૪૦૩
એતમેવ દેવિ લોકબન્ધું સૂરયો વૃષાકપિં ભણન્તિ
વર્ષહેતુદીધિતિર્વૃષાયં કં પિબન્ કરૈઃ કપિર્નિરુક્ત્ઃ ૪૦૪
કેચિદિન્દ્રનારિ ચન્દ્રરેખાશેખરં વૃષાકપિં ગદન્તિ
પણ્ડિતાઃ પરે તુ શેષશય્યાશાયિનં વૃષાકપિં તમાહુઃ ૪૦૫
બ્રહ્મણસ્પતિં તુ વૈદ્યુતાગ્નેરંશજં મરુદ્ગણેષુ મુખ્યમ્
વિશ્વરાજ્ઞિ વિઘ્નરાજમેકે વિશ્રુતં વૃષાકપિં વદન્તિ ૪૦૬
ભાસ્કરશ્ચ શઙ્ક્રશ્ચ માતર્માધવશ્ચ મન્ત્રનાયકશ્ચ
આત્મજેષુ તે ન સન્તિ નાન્તર્વ્યાપકાન્તરિક્ષવિગ્રહાયાઃ ૪૦૭
વાસવોઽપિ દેવિ દેવતાત્મા વલ્લભસ્તવ ચ્છલાઙ્ગનાયાઃ
આત્મજાત એવ કીર્તનીયો દેવતાપથેન દેહવત્યાઃ ૪૦૮
સાશવસ્યુદીરિતાસિ ધીરૈર્દેહિની વિહાયસેન્દ્રસૂસ્ત્વમ્
લિઙ્ગભેદતોઽનુરૂપતસ્તત્કીર્તનં શવો હિ શક્તિવાચિ ૪૦૯
નાદિતિર્વિભિદ્યતે શવસ્યાસ્સર્વદેવ માતરં વિદુર્યામ્
સા મરુત્પ્રસૂરભાણિ પૃશ્નિઃ સાપિ ભિદ્યતે તતો ન દેવ્યાઃ ૪૧૦
શક્તિરેવ સા ન્યગાદિ પૃશ્નિશ્શક્તિરેવ સાઽદિતિર્ન્યભાણિ
શક્તિરેવ સાઽભ્યધાયિ ભદ્રા શક્તિરેવ સા શવસ્યવાદિ ૪૧૧
વિજ્જનઃ પ્રકૃષ્ટશક્તિભાગં શબ્દમેવ પૃશ્નિમાહ ધેનુમ્
યા પરૈર્બુધૈરભાણિ ગૌરી માનવેષ્ટભાષયૈવ નારી ૪૧૨
વ્યાપકત્વકલ્પિતં વિશાલં દેશમેવ શક્તિભાગમાહુઃ
બુદ્ધિશાલિનોઽદિતિં સવિત્રીં યા પરૈર્વિચક્ષણૈઃ સ્મૃતા દ્યૌઃ ૪૧૩
નિત્યમોદરૂપશક્તિભાગં પણ્ડિતાઃ પ્રકીર્તયન્તિ ભદ્રામ્
ઉક્તિભેદચાતુરીપ્રલુબ્ધાઃ સૂરયઃ પરે શિવાં જુગુર્યામ્ ૪૧૪
વીર્યરૂપભાગ એવ ગણ્યઃ પણ્ડિતૈઃ શવસ્યભાણિ શક્તેઃ
ઓજસો ન સોઽતિરિચ્ય તેંશો ભિદ્યતે તતો ન વજ્રમુગ્રમ્ ૪૧૫
વજ્રમેવ ભાષયા પરેષામુચ્યતે પ્રચણ્ડચણ્ડિકેતિ
યદ્વિભૂતિલેશચુમ્બિતાત્મા જીયતે ન કેનચિત્પૃથિવ્યામ્ ૪૧૬
સર્વતો ગતિશ્શચીતિ શક્તિઃ કીર્ત્યતે બુધૈરુદારકીર્તિઃ
સર્વભાગવાચકં પદં તત્ પાવનં પુરાતનં પ્રિયં નઃ ૪૧૭
યશ્શચીતિ નામકીર્તયેન્ના પુષ્કરેણ તે શરીરવત્યાઃ
દિવ્યસુન્દરી તનોરુતાહો તં પરાભવેન્ન દેવિ પાપમ્ ૪૧૮
અમ્બરં વરં તવામ્બ કાયં યસ્સદા વિલોકયન્નૌપાસ્તે
લોકજાલચક્રવર્તિજાયે તં પરાભવેન્ન દેવિ પાપમ્ ૪૧૯
પૂર્ણિમાસુધાંશુબિમ્બવક્ત્રં ફુર્વિંઆરિજાતપત્રનેત્રમ્
શુભ્રતાનિધાનમન્દહાસં કાલમેઘકલ્પકેશપાશમ્ ૪૨૦
રત્ન્દર્પણાભમઞ્જુગણ્ડં ચમ્પકપ્રસૂનચારુનાસમ્
કુન્દકુડ્મલાભકાન્તદન્તં કલ્પપર્વિંઆભદન્તચેલમ્ ૪૨૧
સદ્વરાભયપ્રદાયિહસ્તં સર્વદેવવન્દ્યપાદકઞ્જમ્
દિવ્યરત્નભૂષણૈરનર્ઘૈર્ભૂષિતં કનત્સુવર્ણવર્ણમ્ ૪૨૨
દિવ્યશુક્લ્વસ્ત્રયુગ્મધારિ સ્વર્ગસાર્વભોમનેત્રહારિ
યઃ સ્મરેદ્વરાઙ્ગનાવપુસ્તે તં પરાભવેન્ન દેવિ પાપમ્ ૪૨૩
ભારતક્ષિતેરિદં જનન્યાશ્શોકજન્યબાષ્પવારિ હર્તુમ્
દેહિ શક્તિમાશ્રિતાય મહ્યં પાહિ ધર્મમિન્દ્રચિત્તનાથે ૪૨૪
સદ્વસિષ્ઠસન્તતેરિમાભિસ્સત્કવેર્મયૂરસારિણીભિઃ
સમ્મદં પ્રયાતુ શક્રચેતસ્સમ્પ્રમોહિનીસરોજનેત્ર ૪૨૫
દ્વિતીયો મનોરમાપાદઃ
હસિતમાતતાયિપાતકપ્રમથનપ્રસિદ્ધવિક્રમમ્
અમરભૂમિપાલયોષિતો મમ કરોતુ ભૂરિમઙ્ગલમ્ ૪૨૬
કરુણયા પ્રચોદિતા ક્રિયાદ્ભરતભૂમિમક્ષયશ્રિયમ્
ચરણકઞ્જરાજદિન્દિરા સુરનરેશ્વરસ્ય સુન્દરી ૪૨૭
ન ભવનં ન વા જગત્પૃથઙ્નિવસનાય તે સુરાર્ચતે
યદખિલાનિ વિષ્ટપાનિ તે વપુષિ સર્વમન્દિરાણિ ચ ૪૨૮
મતિદવિષ્ઠસીમભાસુરં તવ શરીરમેવ પુષ્કરમ્
પરમપૂરુષસ્ય વલ્લભે ભુવનમેકમુચ્યતે બુધૈઃ ૪૨૯
તરણયસ્સુધાંશવસ્તથા સહ ભુવા ગ્રહાઃ સહસ્રશઃ
અયિ જગન્તિ વિસ્તૃતાનિ તે વપુષિ પુષ્કરે જગત્યજે ૪૩૦
બહુભિરુષ્ણભાનુભિક્ર્તતાત્ બહુભિરિન્દુભિર્વશીકૃતાત્
વિયતિ લોકજાલધાત્રિ તે શતગુણં બલં પ્રશિશ્યતે ૪૩૧
ન વિભુરેકકસ્ય ભાસ્વતો વિભવમેવ ના પ્રભાષિતુમ્
કિમુત તે દધાસિ યોદરે દ્યુતિમતાં શતાનિ તાદૃશામ્ ૪૩૨
ઇહ વિહાયસા શરીરિણીમતિસમીપવાસિનીમપિ
ન ખલુ કોઽપિ લોકિતું પ્રભુર્ભગવતીં પરામયુક્તધીઃ ૪૩૩
તદિદમુચ્યતે જનો જગદ્વપુરમેયમાદિદેવિ તે
જનયતે યતોઽખિલં દૃશોર્વિષયભૂતમેતદાતતમ્ ૪૩૪
બહુલતારકાગણૈર્યુતં કિમપિ ખં તવેહ વર્ષ્મણિ
શચિ વિભજ્ય ભાષયૈકયા સુકવયો મહોજગદ્વિદુઃ ૪૩૫
ઇદમિનેન્દુભૂવિલક્ષણૈર્દિનકરૈસ્સુધાકરૈર્ગ્રહૈઃ
બહુજગદ્ભિરન્વિતં મહોજગદશેષધાત્રિ નૈકકમ્ ૪૩૬
અજરમવ્યયં સનાતનં મુનિજનૈકવેદ્યવૈભવમ્
ન ભવતીં વિના તપોજગત્પૃથગશેષનાથનાયિકે ૪૩૭
સકલદૃશ્યમૂલકારણં તવ ચ સંશ્રયો નિરાશ્રયઃ
જનનિ સત્યલોક સંજ્ઞયા પરમપૂરુષોઽભિધીયતે ૪૩૮
અયિ પુરાતનર્ષિભાષયા ગગનમેતદાપ ઈરિતાઃ
અથ યદાસુવીર્યમુજ્ઝિતં ભગવતસ્ત્વમેવ તત્પરે ૪૩૯
શચિ વિરાડ્ભવત્યભાષત શ્રુતિરપીદમેવ નામ તે
વિતતવિશ્વવિગ્રહાત્મનિ પ્રથિતમેતદાહ્મયં પરમ્ ૪૪૦
ઉપનિષદ્ગિરા વિરાડ્વધૂઃ પુરુષ એષ ભાષયાન્યયા
ઉભયથાપિ સાધુ તત્પદં ભવતિ તે ન સંશયાસ્પદમ્ ૪૪૧
ન વનિતા ન વા પુમાન્ ભવેજ્જગતિ યોઽન્તરશ્શરીરિણામ્
તનુષુ લિઙ્ગભેદદર્શનાત્ તનુમતશ્ચ લિઙ્ગમુચ્યતે ૪૪૨
અખિલનાથવીર્યધારણાન્ન્ગનભૂમિરઙ્ગનામતા
સકલલોકબીજભૃત્ત્વતો ગગનદેશ એષ પૂરુષઃ ૪૪૩
સ્ફુટવિભક્તગાત્રલક્ષ્મણાં નિયતવાદિનામદર્શનાત્
ન પુરુષો વિયદ્યથા વયં ન વનિતા વિયદ્યથૈવ નઃ ૪૪૪
અભિવિમાનતોઽથ વા શચી વિબુધરાજયોર્વિલક્ષણાત્
વરવિલસિની વિયત્તનુસ્સદવિકારમુત્તમઃ પુમાન્ ૪૪૫
હૃદયમલ્પમપ્યદો જનન્યનવમં વિશાલપુષ્કરાત્
વિમલદેહદુર્ગમધ્યગં સકલરાજ્ઞિ સૌધમસ્તુ તે ૪૪૬
વિકસિતં નિજાંશુવીચિભિક્ર્તદયમાલયં વિશામ્બ મે
વિકચમુષ્ણભાનુભાનુભિર્દશશતચ્છદં યથા રમા ૪૪૭
હૃદયસાધુસૌધશાયિનીં નયનરમ્યહર્મ્યચારિણીમ્
ભુવનરાજચિત્તમોહિનીં નમત તાં પરાં વિલાસિનીમ્ ૪૪૮
તવ પરે મરીચિવીચયસ્તનુગુહાં પ્રવિશ્ય વિશ્રુતે
ભરતભૂમિરક્ષણોદ્યતં ગણપતિં ક્રિયાસુરુજ્જ્વલમ્ ૪૪૯
ગણપતેર્મનોરમા ઇમાસ્સુગુણવેદિનાં મનોરમાઃ
અવહિતા શૃણોતુ સાદરં સુરમહીપતેર્મનોરમાઃ ૪૫૦
તૃતીયો મણિરાગપાદઃ
જ્યોતિષાં નૃપતિઃ સકલાનાં શાન્તિમેવ સદાભિદધાનઃ
નિર્મલો હરતાત્સુરરાજ્ઞીમન્દહાસલવો મમ પાપમ્ ૪૫૧
દુષ્ટલોકદવિષ્ઠપદાબ્જા શિષ્ટશોકનિવારણદક્ષા
નાકલોકમહીપતિરામા ભારતસ્ય ધુનોત્વસુખાનિ ૪૫૨
દેવમૌલિમણીકિરણેભ્યો વિક્રમં સ્વયમેવ દદાના
દેવરાજવધૂપદપદ્મશ્રીસ્તનોતુ સદા મમ ભદ્રમ્ ૪૫૩
દેવિ તે વદનં બહુકાન્તં સાક્ષિ તત્ર પુરન્દરચેતઃ
અમ્બ તે ચરણાવતિકાન્તાવત્ર સાક્ષિ મનઃ સ્મરતાં નઃ ૪૫૪
ભાસુરં સુરસંહતિવન્દ્યં સુન્દરં હરિલોચનહારિ
પાવનં નતપાપવિદારિ સ્વર્ગરાજ્ઞિ પદં તવ સેવે ૪૫૫
જઙ્ઘિકે જયતસ્તવ માતઃ સ૪ એવ રુચાં યદધીનઃ
વાસવસ્ય દૃશાં ચ સહસ્રં યદ્વિલોકનલોભવિનમ્રમ્ ૪૫૬
સક્થિની તવ વાસવકાન્તે રામણીયકસારનિશાન્તે
વન્દતે વિનયેન મમેયં વન્દિનસ્તવ પાવનિ વાણી ૪૫૭
ઇન્દ્રનારિ કટિસ્તવ પૃથ્વીમણ્ડલસ્યતુલા મહનીયે
મધ્યમો નભસઃ પ્રતિમાનં ભોગિનાં ભુવનસ્ય ચ નાભિઃ ૪૫૮
ધીરતાં કુરુતે વિગતાસું સા સુપર્વપતેર્નિશિતાગ્રા
સા તવામ્બ મનોભવશસ્ત્રી રોમરાજિરઘં મમ હન્તુ ૪૫૯
રોમરાજિભુજઙ્ગશિશુસ્તે દેવિ દેવપતેર્હૃદયસ્ય
દંશનેન કરોત્યયિ મોહં જીવિતાય ચિરાય વિચિત્રમ્ ૪૬૦
પૂર્ણહેમઘટવિવ શક્રાવાહિતાં દધતાવયિ શક્તિમ્
વિશ્વપોષણકર્મણિ દક્ષાવમ્બ દુગ્ધધરૌ જયતસ્તે ૪૬૧
લોકમાતરુરોરુહપૂર્ણસ્વર્ણકુમ્ભગતા તવ શક્તિઃ
લોકપાલનકર્મણિ વીર્યં દેવિ વજ્રધરસ્ય બિભર્તિ ૪૬૨
અક્ષયામૃતપૂર્ણઘટૌ તે શક્રપત્નિ કુચૈ તવ પીત્વા
લોકબાધકભીકરરક્ષો ધૂનને પ્રબભૂવ જયન્તઃ ૪૬૩
હસ્તયોસ્તવ માર્દવમિન્દ્રો ભાષતાં સુષમામપિ દેવઃ
દાતૃતામનયોર્મુનિવર્ગો વર્ણયત્યજરે પટુતાં ચ ૪૬૪
પુષ્પમાલ્યમૃદોરપિ બાહોઃ શક્તિરુગ્રતમાશરનાશે
દૃશ્યતે જગતામધિપે તે ભાષતાં તવ કસ્તનુતત્ત્વમ્ ૪૬૫
કમ્બુકણ્ઠિ તવેશ્વરિ કણ્ઠસ્તારહારવિતાનવિરાજી
દેવરાડ્ભુજલોચનપથ્યો દેવિ મે ભણતાદ્બહુભદ્રમ્ ૪૬૬
આનનસ્ય ગભસ્તિનિધેસ્તે રામણીયકમદ્ભુતમીષ્ટે
અપ્યમર્ત્યનુતાખિલસિદ્ધેર્વાસવસ્ય વશીકરણાય ૪૬૭
ન પ્રસન્નમલં રવિબિમ્બિં ચન્દ્રબિમ્બમતીવ ન ભાતિ
સુપ્રસન્નમહોજ્જ્વલમાસ્યં કેન પાવનિ તે તુલયામઃ ૪૬૮
લોચને તવ લોકસવિત્રિ જ્યોતિષઃ શવસશ્ચ નિધાને
વક્તુમબ્જસમે નનુ લજ્જે ધોરણીમનુસૃત્ય કવીનામ્ ૪૬૯
આયતોજ્જ્વલપક્ષ્મલનેત્રા ચમ્પકપ્રસવોપમનાસા
રત્નદર્પણરમ્યકપોલા શ્રીલિપિદ્યુતિસુન્દરકર્ણા ૪૭૦
અષ્ટમીશશિભાસુરભાલા વિષ્ટપત્રયચાલકલીલા
સ્મેરચારુમુખી સુરભર્તુઃ પ્રેયસી વિદધાતુ શિવં મે ૪૭૧
મન્દહાસલવેષુ વલક્ષા મેચકા ચિકુરપ્રકરેષુ
શોણતામધરે દધતી સા રક્ષતુ પ્રકૃતિસ્ત્રિગુણા નઃ ૪૭૨
સર્વલોકવધૂજનમધ્યે યાં શ્રુતિસ્સુભગામભિધત્તે
યા દિવો જગતો રુચિસારસ્તાં નમામિ પુરન્દરરામામ્ ૪૭૩
સ્વર્ગભૂપતિલોચનભાગ્યશ્રીશ્શરીરવતી જલજાક્ષી
ભારતસ્ય કરોતુ સમર્થં રક્ષણે નરસિંહતનૂજમ્ ૪૭૪
લોકમાતુરિમે રમણીયાઃ પાકશાસનચિત્તરમણ્યાઃ
અર્પિતાઃ પદયોર્વિજયન્તાં સત્કવેઃ કૃતયો મણિરાગાઃ ૪૭૫
ચતુર્થો મેઘવિતાનપાદઃ
અમરક્ષિતિપાલકચેતો મદનં સદનં શુચિતાયાઃ
સ્મિતમાદિવધૂવદનોત્ત્થં હરતાદખિલં કલુષં મે ૪૭૬
સુતરામધનામતિખિન્નામધુના બહુલં વિલપન્તીમ્
પરિપાતુ જગત્ત્રયનેત્રી ભરતક્ષિતિમિન્દ્રપુરન્ધ્રી ૪૭૭
સ્થલમેતદમર્ત્યનૃપાલપ્રમદે તવ મેઘવિતાનમ્
અયિ યત્ર પરિસ્ફુસીશે તટિદુજ્જ્વલવેષધરા ત્વમ્ ૪૭૮
તટિતા તવ ભૌતિકતન્વા જિતમમ્બુધરે વિલસન્ત્યા
ઉપમા ભુવિ યા લલિતાનાં યુવચિત્તહૃતાં વનિતાનામ્ ૪૭૯
સ્ફુરિતં તવ લોચનહારિ સ્તનિતં તવ ધીરગભીરમ્
રમણીયતયા મિલિતા તે શચિ ભીકરતા ચપલાયાઃ ૪૮૦
ચપલે શચિ વિસ્ફુરસીન્દ્રં ઘનજાલપતિં મદયન્તી
દિતિજાતમવગ્રહસંજ્ઞં જનદુઃખકરં દમયન્તી ૪૮૧
પ્રભુમભ્રપતિં રમયન્તી દુરિતં નમતાં શમયન્તી
હરિતાં તિમિરાણિ હરન્તી પવમાનપથે વિલસન્તી ૪૮૨
અલઘુસ્તનિતં વિદધાના બલમુગ્રતમં ચ દધાના
હૃદયાવરકં મમ માયાપટલં તટિદાશુ ધુનોતુ ૪૮૩
સુરપાર્થવજીવિતનાથે નિખિલે ગગને પ્રવહન્ત્યાઃ
તટિતસ્તવ વીચિષુ કાચિચ્ચપલા લસતીહ પયોદે ૪૮૪
વિબુધપ્રણુતે ધનિકાનાં ભવનેષુ ભવન્ત્યયિ દીપાઃ
પટુયન્ત્રબલાદુદિતાનાં તવ દેવિ લવાઃ કિરણાનામ્ ૪૮૫
વ્યજનાનિ ચ ચાલયસિ ત્વં બત સર્વજગન્નઋપજાયે
વિબુધોઽભિદધાત્વથવા કો મહતાં ચરિતસ્ય રહસ્યમ્ ૪૮૬
ઇહ ચાલિત ઈડ્યમનીષૈરયિ યન્ત્રવિશેષવિધિજ્ઞૈઃ
બહુલાદ્ભુતકાર્યકલાપસ્તટિતસ્તવ માતરધીનઃ ૪૮૭
અચરસ્તરુગુલ્મલતાદિઃ સકલશ્ચ ચરો ભુવિ જન્તુઃ
અનિતિ પ્રમદે સુરભર્તુસ્તટિતસ્તવ દેવિ બલેન ૪૮૮
મનુતે નિખિલોઽપિ ભવત્યા મનુજોઽનિતિ વક્તિશૃણોતિ
અવલોકયતે ચ ભણામઃ કિમુ તે જગદમ્બ વિભૂતિમ્ ૪૮૯
અતિસૂક્ષ્મપવિત્રસુષુમ્ણાપથતસ્તનુષુ પ્રયતાનામ્
કુલકુણ્ડકૃશાનુશિખા ત્વં જ્વલસિ ત્રિદશાલયનાથે ૪૯૦
ઇતરો ન સુરક્ષિતિપાલાત્કુલકુણ્ડગતો જ્વલનોઽયમ્
ઇતરેન્દ્રવિલાસિનિ ન ત્વત્કુલકુણ્ડકૃશાનુશિખેયમ્ ૪૯૧
કુલકુણ્ડકૃશાનુશિખાયાઃ કિરણૈઃ શિરસિ સ્થિત એષઃ
દ્રવતીન્દુરનારતમેતદ્વપુરાત્મમયં વિદધાનઃ ૪૯૨
મદકૃદ્બહુલામૃતધારાપરિપૂતમિદં મમ કાયમ્
વિદધાસિ ભજન્મનુજાપ્તે કુલકુણ્ડધનંજયદીપ્તે ૪૯૩
શિરસીહ સતઃ સિતભાનોરમૃતેન વપુર્મદમેતિ
હૃદિ ભાત ઇનસ્ય ચ ભાસા મતિમેતુ પરાં શચિ ચેતઃ ૪૯૪
મમ યોગમદેન ન તૃપ્તિનિજદેશદશાવ્યથિતસ્ય
અવગન્તુમુપાયમમોઘં શચિ ભાસય મે હૃદિ ભાનુમ્ ૪૯૫
વિદિતઃ પ્રમદસ્ય વિધાતુઃ શશિનો જનયિત્રિ વિલાસઃ
અહમુત્સુક ઈશ્વરિ ભાનોર્વિભવસ્ય ચ વેત્તુમિયત્તામ્ ૪૯૬
વરુણસ્ય દિશિ પ્રવહન્તી મદમમ્બ કરોષિ મહાન્તમ્
દિશિ વજ્રભૃતઃ પ્રવહન્તી કુરુ બુદ્ધિમકુણ્ઠિતસિદ્ધિમ્ ૪૯૭
અમલામધિરુહ્ય સુષુમ્ણાં પ્રવહસ્યધુનામ્બ મદાય
અમૃતામધિરુહ્ય ચ કિઞ્ચિત્પ્રિવહેશ્વરિ બુદ્ધિબલાય ૪૯૮
ભરતક્ષિતિક્ષણકર્મણ્યભિધાય મનોજ્ઞમુપાયમ્
અથ દેવિ વિધાય ચ શક્તં કુરુ માં કૃતિનં શચિ ભક્તમ્ ૪૯૯
નરસિંહસુતેન કવીનાં વિભુના રચિતૈઃ કમનીયૈઃ
પરિતૃપ્યતુ મેઘવિતાનૈર્મરુતામધિપસ્ય પુરન્ધ્રી ૫૦૦
પઞ્ચમં પાઙ્ક્તં શતકં સમાપ્તમ્
અથ ષષ્ઠં ત્રૈષ્ટુભં શતકમ્
પ્રથમ ઉપજાતિપાદઃ
મન્દોઽપિ બોધં વિદધન્મુનીનાં સ્વચ્છોઽપિ રાગં ત્રિદશેશ્વરસ્ય
અલ્પોઽપિ ધુન્વન્હરિતાં તમાંસિ સ્મિતાઙ્કુરો ભાતુ જયન્તમાતુઃ ૫૦૧
અશેષપાપૌઘનિવારણાય ભાગ્યસ્ય પાકાય ચ દેવરાજ્ઞી
શોકાકુલાં ભારતભૂમિમેતાં લોકસ્ય માતા હૃદયે કરોતુ ૫૦૨
ધર્મદ્વિષામિન્દ્રનિરાદરાણાં સંહારકર્મણ્યતિજાગરૂકામ્
દેવીં પરાં દેવપથે જ્વલન્તીં પ્રચણ્ડચણ્ડીં મનસા સ્મરામિ ૫૦૩
વ્યાપ્તા તટિદ્વા ગગને નિગૂઢા નારી સુરેશાનમનોરમા વા
શક્તિઃ સુષુમ્ણાપથચારિણી વા પ્રચણ્ડચણ્ડીતિ પદસ્ય ભાવઃ ૫૦૪
સમસ્તલોકાવનિનાયિકાયાઃ સુપર્વમાર્ગેણ શરીરવત્યાઃ
માતુર્મહોંશં મહનીયસારં વિજ્ઞાનવન્તસ્તટિતં ભણન્તિ ૫૦૫
નિગૂઢતેજસ્તનુરમ્બિકેયં પ્રચણ્ડચણ્ડી પરિતો લસન્તી
અવ્યક્ત્શબ્દેન શરીરવત્યાઃ કાલ્યાઃ કવીનાં વચનેષુ ભિન્ના ૫૦૬
શબ્દં વિના નૈવ કદાપિ તેજસ્તેજો વિના નૈવ કદાપિ શબ્દઃ
શક્તિદ્વયં સન્તતયુક્તમેતત્કથં સ્વરૂપેણ ભવેદ્વિભક્તમ્ ૫૦૭
એકૈવ શક્તિર્જ્વલતિ પ્રકૃષ્ટા સ્વરત્યપિ પ્રાભવતઃ સમન્તાત્
ક્રિયાવિભેદાદિહ પણ્ડિતાનાં શક્તિદ્વયોક્તિસ્તુ સમર્થનીયા ૫૦૮
એકક્રિયાયાશ્ચ ફલપ્રભેદાત્પુનર્વિભાગઃ ક્રિયતે બહુજ્ઞૈઃ
કાલીં ચ તારાં સ્વરમગ્ર્યમાહુઃ પ્રચણ્ડચણ્ડીં લલિતાં ચ તેજઃ ૫૦૯
સમ્પદ્યતે શબ્દગતેર્હિ કાલઃ શબ્દો વરેણ્યસ્તદભાણિ કાલી
ધ્યાતેન શબ્દેન ભવં તરેદ્યદ્સુધાસ્તતઃ શબ્દમુશન્તિ તારામ્ ૫૧૦
યદક્ષરં વેદવિદામૃષીણાં વેદાન્તિનાં યઃ પ્રણવો મુનીનામ્
ગૌરી પુરાણેષુ વિપશ્ચિતાં યા સા તાન્ત્રિકાણાં વચનેન તારા ૫૧૧
સમ્પદ્યતે સંહૃતિરોજસા યત્પ્રચણ્ડચણ્ડી તદુદીરિતૌજઃ
સિધ્યેદશેષોઽનુભવો યદોજસ્યતો બુધાસ્તાં લલિતાં વદન્તિ ૫૧૨
પ્રચણ્ડચણ્ડીં લઘુના પદેન ચણ્ડીં વિદુઃ કેચન બુદ્ધિમન્તઃ
એકે વિદઃ શ્રેષ્ઠમહોમયીં તાં લક્ષ્મીં મહત્પૂર્વપદાં વદન્તિ ૫૧૩
અતીવ સૌમ્યં લલિતેતિ શબ્દં પ્રચણ્ડચણ્ડીતિ પદં ચ ભીમમ્
દેવી દધાના સુતરાં મનોજ્ઞા ઘોરા ચ નિત્યં હૃદિ મે વિભાતુ ૫૧૪
પ્રચણ્ડચણ્ડીં તુ શરીરભાજાં તનૂષુ યોગેન વિભિન્નશીર્ષામ્
શક્તિં સુષુમ્ણાસરણૌ ચરન્તીં તાં છિન્નમસ્તાં મુનયો વદન્તિ ૫૧૫
કપાલભેદો યદિ યોગવીર્યાત્સમ્પદ્યતે જીવત એવ સાધોઃ
તમેવ સન્તઃ પ્રવદન્તિ શીર્ષચ્છેદં શરીરાન્તરભાસિ શક્તેઃ ૫૧૬
ઉદીર્યસે નિર્જરરાજપત્નિ ત્વં છિન્નમસ્તા યમિનાં તનૂષુ
ઉજ્જઋમ્ભણે વિશ્વસવિત્રિ યસ્યાઃ કાયં ભવેદ્વૈદ્યુતયન્ત્રતુલ્યમ્ ૫૧૭
પિતુર્નિયોગાત્તનયેન કૃત્તે મસ્તે જનન્યાઃ કિલ રેણુકાયાઃ
ત્વમાવિશઃ પાવનિ તત્કબન્ધં તદ્વા ત્વમુક્તાસિ નિકૃત્તમસ્તા ૫૧૮
છિન્નં શિરઃ કીર્ણકચં દધાનાં કરેણ કણ્ઠોદ્ગતરક્તધારામ્
રામામ્બિકાં દુર્જનકાલરાત્રિં દેવીં પવિત્રં મનસા સ્મરામિ ૫૧૯
ધ્રુવો રમા ચન્દ્રધરસ્ય રામા વાગ્વજ્રવૈરોચસદીર્ઘનિર્યે
કૂર્ચદ્વયં શસ્ત્રકૃશાનુજાયે વિદ્યાનૃપાર્ણા સુરરાજશક્તેઃ ૫૨૦
માયાદ્વિવારં યદિ સૈકવર્ણા વિદ્યૈકવર્ણા યદિ ધેનુરેકા
ધેન્વાદિ સમ્બોધનમસ્ત્રમગ્નેર્વિલાસિની ચેતિ ધરેન્દુવર્ણા ૫૨૧
ચતુષ્ટયેત્રન્યતમં ગૃહીત્વા મન્ત્રં મહેન્દ્રસ્ય મનોધિનાથામ્
ભજેત યસ્તાન્ત્રિકદિવ્યભાવમાશ્રિત્ય સિદ્વીઃ સકલાઃ સ વિન્દેત્ ૫૨૨
સંહોત્રમિત્યદ્ભુતશક્તિયુક્તં વૃષાકપેર્દર્શનમમ્બ મન્ત્રમ્
યો વૈદિકં તે મનુજો ભજેત કિઞ્ચિન્ન તસ્યેહ જગત્યસાધ્યમ્ ૫૨૩
પ્રચણ્ડચણ્ડિ પ્રમદે પુરાણિ પુરાણવીરસ્ય મનોધિનાથે
પ્રયચ્છ પાતું પટુતાં પરાં મે પુણ્યામિમામાર્યનિવાસભૂમિમ્ ૫૨૪
પ્રપઞ્ચરાજ્ઞીં પ્રથિતપ્રભાવાં પ્રચણ્ડચણ્ડીં પરિકીર્તયન્ત્યઃ
એતાઃ પ્રમોદાય ભવન્તુ શક્તેરુપાસકાનામુપજાતયો નઃ ૫૨૫
દ્વિતીયો રથોદ્ધતાપાદઃ
ક્ષાલનાય હરિતાં વિભૂતયે વિષ્ટપસ્ય મદનાય વજ્રિણઃ
તજ્જયન્તજનનીમુખાબ્જતો નિર્ગતં સ્મિતમઘં ધુનોતુ નઃ ૫૨૬
અન્નલોપકૃશભીરુકપ્રજાં ભિન્નભાવબલહીનનેતૃકામ્
વાસવસ્ય વરવર્ણિની પરૈરર્દિતામવતુ ભારતાવનિમ્ ૫૨૭
પાણિપાદમનિમેષરાજ્ઞિ તે પારિજાતનવપલ્લવોપમમ્
અક્ષપાવિરહમઙ્ગભાસરિદ્વાસિચક્રમિથુનં કુચદ્વયમ્ ૫૨૮
પૂર્ણચન્દ્રયશસોઽપહારકં સમ્પ્રસાદસુષમાસ્પદં મુખમ્
જ્ઞાનશક્તિરુચિશેવધીદૃશૌ રક્ત્વર્ણકસુધાઘનોઽધરઃ ૫૨૯
મર્દયત્તિમિરમુદ્ધતં દિશાં અલ્પમપ્યધિકવૈભવં સ્મિતમ્
પ્રાવૃડન્તયમુનાતરઙ્ગવન્નત્ન્લચારુરતિપાવનઃ કચઃ ૫૩૦
વલ્લકીં ચ પરુષધ્વનિં વદન્ દુઃખિતસ્ય ચ મુદાવહઃ સ્વરઃ
ચારુ હાવશબલાઽલસા ગતિઃ કાયધામવચસાં ન પદ્ધતૌ ૫૩૧
યોગસિદ્ધિમતુલાં ગતા મતિશ્ચાતુરી ચ બુધમણ્ડલસ્તુતા
વિષ્ટપત્રિતયરાજ્યતોઽપ્યસિ ત્વં સુખાય મહતે બિડૌજસઃ ૫૩૨
ત્વામુદીક્ષ્ય ધૃતદેવતાતનું દીપ્તપક્ષ્મલવિશાલલોચનામ્
આદિતો જનનિ જન્મિનામભૂદ્ વાસવસ્ય રતિરાદિમે રસે ૫૩૩
આદિમં રસમનાદિવાસના વાસિતૌ પ્રથમમન્વગૃહ્ણતામ્
સમ્મદસ્ય નિધિમાદિદમ્પતી સોઽચલત્ત્રિભુવને તતઃ ક્રમઃ ૫૩૪
જ્યાયસા દિવિષદાં પુરાતની નીલકઞ્જનયના વિલાસિની
યદ્વિહારમતનોત્પ્રરોચનં તત્સતામભવદાદિમે રસે ૫૩૫
ન ત્વદમ્બ નલિનાનનાઽધિકા નાપિ નાકપતિતોઽધિકઃ પુમાન્
નાધિકં ચ વનમસ્તિ નન્દનાન્નાદિમાદપિ રસોઽધિકો રસાત્ ૫૩૬
નાયિકા ત્વમસમાનચારુતા નાયકઃ સ મરુતાં મહીપતિઃ
નન્દનં ચ રસરઙ્ગભૂઃ કથં મન્મથસ્ય ન ભવેદિહોત્સવઃ ૫૩૭
દેવિ વાં મૃતિકથૈવ દૂરતો જાતુચિદ્ગલતિ નૈવ યૌવનમ્
કાઙ્ક્ષિતઃ પરિકરો ન દુર્લભઃ કિં રસઃ પરિણમેદિહાન્યથા ૫૩૮
વિષ્ટપસ્ય યુવરાજકેશવે ત્રાણભારમખિલં નિધાય વામ્
ક્રીડતોરમરરાજ્ઞિ નન્દને ક્રીડિતાનિ મમ સન્તુ ભૂતયે ૫૩૯
યદ્યુવામમરરાજ્ઞિ નન્દને કુર્વતો રહસિ દેવિ મન્ત્રણમ્
તત્ર ચેન્મમ કૃતિર્મનાગિયં સ્પર્શમેતિ ભુવિ કો નુ મત્કૃતી ૫૪૦
ક્રન્દનં યદિ મમેહ વન્દિનો નન્દને વિહરતોઃ સવિત્રિ વામ્
અન્તરાયકૃદથાબ્જકાન્તિ તે સમ્પ્રગૃહ્ય ચરણં ક્ષમાપયે ૫૪૧
યોષિતામપિ વિમોહનાકૃતિર્મોહનં તુ પુરુષસંહતેરપિ
ઇન્દ્રમમ્બરમયાં બભૂવિથ ત્વં રસાર્દ્રહૃદયા લસદ્રસમ્ ૫૪૨
દિવ્યચન્દનરસાનુલેપનૈઃ પારિજાતસુમતલ્પકલ્પનૈઃ
ચારુગીતકૃતિભિશ્ચ ભેજિરે નાકલોકવનદેવતાશ્ચ વામ્ ૫૪૩
સ્વર્ણદીસલિલશીકરોક્ષિતાઃ પારિજાતસુમગન્ધધારિણઃ
નન્દને ત્રિદશલોકરાજ્ઞિ વાં કેપિ ભેજુરલસાઃ સમીરણાઃ ૫૪૪
આદધાસિ સકલાઙ્ગનાધિકે પદ્મગન્ધિનિ સુધાધરાધરે
મઞ્જુવાણિ સુકુમારિ સુન્દરિ ત્વં સુરેન્દ્રસકલેન્દ્રિયાર્ચનમ્ ૫૪૫
આદિદેવિ વદનં તવાભવત્ કાન્તિધામ મદનં દિવસ્પતેઃ
આનનાદપિ રસામૃતં કિરન્નિષ્ક્રમં વિલસિતં કલં ગિરામ્ ૫૪૬
ચારુવાગ્વિલસિતાચ્ચ નિસ્તુલપ્રેમવીચિરુચિરં વિલોકિતમ્
વીક્ષિતાદપિ વિલાસવિશ્રમસ્થાનમલ્પમલસં શુચિસ્મિતમ્ ૫૪૭
ભાસુરેન્દ્રદૃઢબાહુપઞ્જરે લજ્જયા સહજયા નમન્મુખી
તદ્વિલોચનવિકર્ષકાલકા પાતુ માં ત્રિદિવલોકનાયિકા ૫૪૮
ભારતક્ષિતિવિષાદવારણે તત્સુતં ગણપતિં કૃતોદ્યમમ્
આદધાતુ પટુમર્જુનસ્મિતા દુર્જનપ્રમથનક્ષમા શચી ૫૪૯
ચારુશબ્દકલિતાઃ કૃતીરિમાઃ સત્કવિક્ષિતિભુજો રથોદ્ધતાઃ
સા શૃણોતુ સુરમેદિનીપતેર્નેત્રચિત્તમદની વિલાસિની ૫૫૦
તૃતીયો મૌક્તિકમાલાપાદઃ
નિર્મલભાસાં દિશિ દિશિ કર્તા પુણ્યમતીનાં હૃદિ હૃદિ ધર્તા
પાલયતાન્મામનઘવિલાસઃ શક્રમહિશ્યાઃ સિતદરહાસઃ ૫૫૧
પુણ્યચરિત્રા મુનિજનગીતા વાસવકાન્તા ત્રિભુવનમાતા
વત્સલભાવાદવતુ વિદૂનાં ભારતભૂમિં ધનબલહીનામ્ ૫૫૨
કોટિતટિદ્વત્તવ તનુકાન્તિઃ પૂર્ણસમાધેસ્તવ હૃદિ શાન્તિઃ
વાસવભામે ભગવતિ ઘોરઃ શત્રુવિદારી તવ ભુજસારઃ ૫૫૩
આશ્રયભૂતં સુમધુરતાયા આલયભૂતં જલધિસુતાયાઃ
વાસવદૃષ્ટેસ્તવમુખમબ્જં કિઙ્ક્રદૃષ્ટેસ્તવ પદમબ્જમ્ ૫૫૪
પાદસરોજં વૃજિનહરં તે યો ભજતે ના સુરપતિકાન્તે
તત્ર કટાક્ષા અયિ શતશસ્તે તસ્ય સમસ્તં ભગવતિ હસ્તે ૫૫૫
જ્ઞાપકશક્તિઃ પ્રતિનરમસ્તં કારકશક્તિઃ પ્રતિનરહસ્તમ્
વાસવચક્ષુસ્સુકૃતફલશ્રીર્ભાતુ મમાન્તઃ સુરભુવનશ્રીઃ ૫૫૬
મન્ત્રપરાણાં વચસિ વસન્તી ધ્યાનપરાણાં મનસિ લસન્તી
ભક્તિપરાણાં હૃદિ વિહરન્તી ભાતિ પરામ્બા નભસિ ચરન્તી ૫૫૭
સેવકપાપપ્રશમનનામા દિક્તિમિરૌઘપ્રમથનધામા
ઉજ્જ્વલશસ્ત્રા રણભુવિ ભીમા પાતુ નતં માં હરિહયરામા ૫૫૮
યોગિનિ શક્તિર્વિલસસિ દાન્તિઃ યોષિતિ શક્તિર્વિલસસિ કાન્તિઃ
જ્ઞાનિનિ શક્તિર્વિલસસિ તુષ્ટિઃ ધન્વિનિ શક્તિર્વિલસસિ દૃષ્ટિઃ ૫૫૯
સઙ્ગિનિ શક્તિર્વિલસસિ નિદ્રા ધ્યાતરિ શક્તિર્વિલસસિ મુદ્રા
વાસવકાન્તે ગગનનિશાન્તે ભાષિતુમીશઃ ક્વ નુ વિભવં તે ૫૬૦
યદ્દિતિજાનાં દમનમવક્રં કેશવહસ્તે વિલસતિ ચક્રમ્
તત્ર કલા તે ભગવતિ ભદ્રા કાચન ભારં વહતિ વિનિદ્રા ૫૬૧
દુષ્ટનિશાટપ્રશમનશીલં યત્ સિતભૂભૃત્પતિકરશૂલમ્
તત્ર મર્મહોંશસ્તવ જગદીશે રાજતિ કશ્ચિત્પટુરરિનાશે ૫૬૨
યન્નિજરોચિક્ર્તતરિપુસારં વાસવહસ્તે કુલિશમુદારમ્
તત્ર તવાંશો વિલસતિ દિવ્યઃ કશ્ચન ભાસો ભગવતિ ભવ્યઃ ૫૬૩
અમ્બરદેશે સુમહતિ ગુપ્તા પઙ્ક્જબન્ધૌ વિલસતિ દીપ્તા
રાજસિ માતર્હિમરુચિશીતા વેદિકૃશાનૌ ક્રતુભૃતિપૂતા ૫૬૪
સૂક્ષ્મરજોભિર્વિહિતમુદારં યજ્જગદેતન્ન્ગગનમપારમ્
તત્તવવેદઃ પ્રવદતિ કાયં પાવનિ ભાનુસ્તવ તનુજોઽયમ્ ૫૬૫
ઈશ્વરિ નૈકસ્તવ ખરતેજાઃ તેઽપિ ચ સર્વે જનનિ તનૂજાઃ
ઉજ્વલખેટાઃ કુવદતિ કાયાઃ પાવનિ કસ્તે પ્રવદતુ માયાઃ ૫૬૬
યા મહિમાનં પ્રથયતિ ભૂમિઃ પાવનકીર્તિર્જલનિધિનેમિઃ
સેયમપીશે ભવતિ સુપુત્રી વાસવજાયે તવ જનધાત્રી ૫૬૭
અઙ્ગ સખાયો વિરમતસઙ્ગાશ્વષ્ઠ્હર્વિષયાણાં કૃતમતિભઙ્ગાત્
ધ્યાયત ચિત્તે ધુતભયબીજં વાસવજાયાચરણસરોજમ્ ૫૬૮
પાપમશેષં સપદિ વિહાતું શક્તિમનલ્પામપિ પરિધાતુમ્
ચેતસિ સાધો કુરુ પરિપૂતં વાસવજાયાપદજલજાતમ્ ૫૬૯
ઈશ્વરિ વન્દ્યદ્યુતિભૃતિમેધે કાઙ્ક્ષિતનીરાણ્યસૃજતિ મોઘે
નિર્મલકીર્તેસ્તવ શચિ ગાનં શક્ષ્યતિ કર્તું તદુદકદાનમ્ ૫૭૦
આમયવીર્યાદ્વિગલતિ સારે જીવતિ કિઞ્ચિદ્રિસનગનીરે
રક્ષતિ જન્તું તવ શચિ નામ પ્રાજ્ઞજનૈરપ્યગણિતધામ ૫૭૧
મધ્યમલોકે સ્યતિ શુચિરુગ્રા રાજસિ નાકે વિભવસમગ્રા
પ્રાણિશરીરે ભવસિ વિચિત્ર વાસવજાયે વિવિધચરિત્ર ૫૭૨
વ્યોમ્નિ વપુસ્તે વિનિહતપાપં વિશ્રુતલીલં તવ દિવિ રૂપમ્
કર્મવશાત્તે ભવતિ સ ભોગઃ પ્રાણિશરીરે ભગવતિ ભાગઃ ૫૭૩
ભારતભૂમેઃ શુચમપહન્તું શ્રેષ્ઠમુપાયં પુનરવગન્તુમ્
વાસવજાયે દિશ મમ બુદ્ધિં પાવનિ માયે કુરુ કુરુ સિદ્ધિમ્ ૫૭૪
સમ્મદયન્તીર્બુધજનમેતાઃ સ્વર્ગધરિત્રીપતિસતિપૂતાઃ
મૌક્તિકમાલાઃ શૃણુ નુતિકર્તુર્ભક્તિનિબદ્ધાઃ કવિકુલભર્તુઃ ૫૭૫
ચતુર્થઃ સુમુખીપાદઃ
અજિતમિનાગ્નિતટિચ્છશિભિઃ મમ હૃદયસ્ય તમઃ પ્રબલમ્
અમરપતિપ્રમદાહસિતં વિમલઘૃણિપ્રકરૈર્હરતુ ૫૭૬
સુરનૃપતેર્દયિતા વિનતાહિતશમની લુલિતામિતરૈઃ
વરકરુણાવરુણાલયદૃઙ્મમ જનનીમવતાદવનિમ્ ૫૭૭
પટુતપસો જમદગ્નિમુનેરિહ સહધર્મચરીં ભુવને
તનયનિકૃત્તશિરઃ કમલાં વરમતિમાવિશદિન્દ્રવધૂઃ ૫૭૮
યદુકુલકીર્તિવિલોપભિયા બતવિનિગૂહ્ય ઋતં કવયઃ
મુનિગૃહિણી વધહેતુકથામિતરપથેન ભણન્તિ મૃષા ૫૭૯
ન સુરભિરર્જુનભૂમિપતિર્ભૃગુતિલકસ્ય જહાર સ યામ્
ઇયમમૃતાંશુમનોજ્ઞમુખી પરશુધરસ્ય જનન્યનઘા ૫૮૦
અતિરથમર્જુનભૂમિપતિં સહપૃતનં જમદગ્નિસુતઃ
યુધિ સ વિજિત્ય વિશાલયશાઃ પુનરપિ માતરમાહૃતવાન્ ૫૮૧
પરગૃહવાસકલઙ્કવશાન્નિજગૃહિણીં જમદગ્નિમુનિઃ
બતવિનિહન્તુમના કલયંસ્તનુભવમાદિશદુગ્રમનાઃ ૫૮૨
પિતૃવચનાદતિભક્તિમતાપ્યસુરવદાત્મસુતેન હતામ્
મુનિગૃહિણીમનઘેતિવદંસ્તવ વરદેઽવિશદંશ ઇમામ્ ૫૮૩
ઇદમવિકમ્પ્યમતિપ્રબલં પ્રભવતિ કારણમાર્યનુતે
મુનિગૃહિણીમનઘાં ભણિતું શચિ કલયા યદિ મામવિશઃ ૫૮૪
ખલજનકલ્પિતદુષ્ટકથાશ્રવણવશાદ્વ્યથિતં હૃદયમ્
અથ ચરિતેઽવગતે વિમલસ્મૃતિવશતો મમ યાતિ મુદમ્ ૫૮૫
તવ મહસા વિશતા કૃપયા મમ શચિ સૂક્ષ્મશરીરમિદમ્
નૃપરિપુમાતૃપવિત્રકથા સ્મરણપથં ગમિતા સપદિ ૫૮૬
વિદધતુરાસુરકૃત્યમુભૌ બહુલગુણામપિ યદ્ગૃહિણીમ્
સ મુનિરઘાતયદચ્છકથાં દશરથજશ્ચ મુમોચ વને ૫૮૭
અપિ વિનિકૃત્તશિરાઃ શચિ તે વરમહસા વિશતા સપદિ
અલભત જીવિતમમ્બ પુનર્ભુવનશુભાય મુનેસ્તરુણી ૫૮૮
યદિ શિરસા રહિતે વપુષિ પ્રકટતયા વિલસન્ત્યસવઃ
યદિ હૃદયં સહભાતિ ધિયા કિમિવ વિચિત્રમિતશ્ચરિતમ્ ૫૮૯
પરશુધરસ્ય સવિત્રિ કલા ત્વયિ પુરુહૂતસરોજદૃશઃ
સ શિરસિ કાચિદભૂદ્રુચિરા વિશિરસિ ભીમતમા ભવતિ ૫૯૦
પરશુધરોઽર્જુનભૂમિપતિં યદજયદમ્બ તપોઽત્ર તવ
અભજત કારણતામનઘે વરમુનિગેયપવિત્રકથે ૫૯૧
ભગવતિ કૃત્તશિરો ભવતી મથિતવતી નૃપતીનશુભાન્
પ્રથનભુવિ પ્રગુણં ભુજયોઃ પરશુધરાય વિતીર્ય બલમ્ ૫૯૨
શુભતમકુણ્ડલપૂર્વસતિઃ પદનતપાતકસંશમની
દિશતુ નિકૃત્તશિરાઃ કુશલં મમ સુરપાર્થવશક્તિકલા ૫૯૩
નિજસુતરઙ્ગપતેર્નિકટે કૃતવસતિર્નતસિદ્ધિકરી
દલિતશિરાઃ પ્રતનોતુ મમ શ્રિયમમરેશ્વરશક્તિકલા ૫૯૪
ભુવિ તતસહ્યનગાન્તરગે શુભતમચન્દ્રગિરૌ વરદા
કૃતવસતિઃ કુરુતાન્મમ શં ભૃગૂકુલરામજનન્યજરા ૫૯૫
અવતુ વિકૃત્તશિરાઃ પદયોર્ભજકમનિન્દ્યવિચિત્રકથા
દિનકરમણ્ડલમધ્યગૃહા સુરધરણીપતિશક્તિકલા ૫૯૬
ગગનચરાર્ચિતપાદુકયા પદનતસન્મતિબોધિકયા
મમ સતતં શુચિરેણુકયા પરવદિદં કુલમમ્બિકયા ૫૯૭
શમયિતુમુગ્રતમં દુરિતં પ્રથયિતુમાત્મનિગૂઢબલમ્
ગમયિતુમગ્રય્દશાં સ્વકુલં તવ ચરણામ્બુજમમ્બ ભજે ૫૯૮
પરવશગામશિવેન વૃતાં ભરતધરાં પરિપાતુમિમામ્
પટુમતિવાક્ક્રિયમાતનુતાદ્ગણપતિમભ્રહયપ્રમદા ૫૯૯
ગણપતિદેવમર્મહોંશજુષો ગણપતિનામકવિપ્રકવેઃ
સુરપતિજીવસખીશૃણુયાદ્દશશતપત્રમુખી સુમુખીઃ ૬૦૦
ષષ્ઠં ત્રૈષ્ટુભં શતકં સમાપ્તમ્
અથ સપ્તમં જાગતં શતકમ્
પ્રથમો દ્રુતવિલમ્બિતપાદઃ
સુરમહીરમણસ્ય વિલાસિની જલચરધ્વજજીવિતદાયિની
હરતુ બોધદૃગાવરણં તમો હૃદયગં હસિતેન સિતેન મે ૬૦૧
નમદમર્ત્યકિરીટકૃતૈઃ કિણૈઃ કમઠપૃષ્ઠનિભે પ્રપદેઽઙ્કિતા
પરિધુનોતુ શચી ભરતક્ષિતેર્વૃજિનજાલમજાલમકમ્પનમ્ ૬૦૨
અતિતરાં નતપાલનલોલયા વિબુધનાથમનોહરલીલયા
કિરિમુખીમુખશક્ત્યુપજીવ્યયા વિદિતયાદિતયા ગતિમાનહમ્ ૬૦૩
ઘનહિરણ્યમદાપહરોચિષા વનરુહાનનયાઽવનદક્ષયા
ગતિમદિન્દ્રમનોરથનાથયા ભુવનમેવ ન મે કુલમાત્રકમ્ ૬૦૪
તનુષુ વામનમૂર્તિધરે વિભૌ તમનુયાચ વિરાજતિ વામની
શરણવાનનયામ્બિકયા લસત્ કરુણયાઽરુણયા પદયોરહમ્ ૬૦૫
સકરુણા કુશલં મમ રેણુકાતનુરજા તનુતાદુદિતો યતઃ
યુધિ મુનિર્વિદધૌ પરશું દધજ્જનપતીનપતીવ્રભુજામદાન્ ૬૦૬
સુજનશત્રુરમાથિ ઘનધ્વનિઃ શચિ સરાત્રિચરસ્તવ તેજસા
જનનિ રામસહોદરસાયકં પ્રવિશતાઽવિશતાદધિકૌજસા ૬૦૭
તવ મહઃકલયાબલમાપ્તયા જનનિ શુમ્ભનિશુમ્ભમદચ્છિદા
જગદરક્ષ્યત ગોપકુલેશિતુસ્તનુજયાઽનુજયાર્જુનસારથેઃ ૬૦૮
ન વિનિરૂપયિતું પ્રબભૂવ યાં કવિજનો વિવિધં કથયન્નપિ
મુનિહૃદમ્બુજસૌધતલેન્દિરા જયતિ સા યતિસાધુજનાવની ૬૦૯
ઇમમયિ ત્રિદિવેશ્વરિ કલ્કિનં રુષમપોહ્ય સવિત્રિ વિલોકિતૈઃ
સુરપતેર્દ્વિષતોઽઘવતો લસન્ મદનકૈરવકૈરવલોચને ૬૧૦
સ્મરદમર્ત્યનૃપાલવિલાસિનીં પ્રબલપાતકભીતિવિનાશિનીમ્
પ્રવણયાન્તરનન્યધિયા લસદ્વિનયયાનયયામવતીર્મનઃ ૬૧૧
ભગવતીગગનસ્થલચારિણી જયતિ સઙ્ગરરઙ્ગવિહારિણી
સુકૃતશત્રુમતિભ્રમકારિણી હરિહયારિહયાદિવિદારિણી ૬૧૨
શરણવાનહમર્જુનહાસયા ભુવનભૂપતિહારિવિલાસયા
દિવિ પુલોમજયા ધવલાચલે ગિરિજયાઽરિજયાવિતદેવયા ૬૧૩
ચરણયોર્ધૃતયા વિજયામહે વયમશેષજગન્નૃપજાયયા
દિવિ પુલોમજયા ધવલાચલે નગજયા ગજયાનવિલાસયા ૬૧૪
અરિવધાય વિધાય બુધાધિપં પટુભુજાબલભીષણમાજિષુ
ન ભવતી શચિ ગચ્છતિ દુર્ગતઃ ક્વચન કાચન કાતરધીરિવ ૬૧૫
સપદિ માનસધૈર્યહૃતો જગજ્જનનિ વજ્રતનોર્જ્વલિતાર્ચિષઃ
અરિજને પ્રથમં તવ વીક્ષયા સુરપતેરપતેજસિ વિ ક્રમઃ ૬૧૬
ન મનનોચિતમસ્તિ પરં નૃણાં વિબુધરાજવધૂપદપદ્મતઃ
જગતિ દર્શનયોગ્યમિહાપરં ન રમણી રમણીયમુખાબ્જતઃ ૬૧૭
શરણવાનહમસ્મિ પુરાતનપ્રમદયા મુનિગેયચરિત્રયા
સ્વબલચાલિતનાકજગન્નભો વસુધયા સુધયા સુરરાડ્દૃશામ્ ૬૧૮
અયમહં ગતિમાનતિશાન્તયા ત્રિદિવભૂમિપતિપ્રિયકાન્તયા
મનસિ મૌનિજનૈરતિભક્તિતો નિહિતયા હિતયા સુકૃતાત્મનામ્ ૬૧૯
વિનયતઃ સ્તુતયા ગમયામ્યહં જનિમતાં જનયિત્રિ નિશાસ્ત્વયા
પ્રસૃતયા કુલકુણ્ડધનઞ્જયાદ્ધૃતતનૂતતનૂતનવેગયા ૬૨૦
સકૃદમોઘસરસ્વતિસાધુધી હૃદયવેદ્યપદામ્બુજસૌષ્ઠવે
મમ શિવં સુમનઃ પૃથિવીપતેઃ સુવદને વદ નેત્રલસદ્દયે ૬૨૧
દુરવગાહપથે પતિતં ચિરાજ્જનનિ ગમ્યવિલોકનલાલસમ્
સ્વયમમર્ત્યનૃપાલમનોરમે સુનયને નયનેયમિમં જનમ્ ૬૨૨
અવતુ નઃ સ્વયમેવ પટૂન્ વિપદ્વિમથનાય વિધાય બુધેશ્વરી
સકલમર્મસુવીતદયૈઃ પરૈર્વિનિહતાનિહ તાપવતઃ શચી ૬૨૩
સુરધરાપતિજીવિતનાથયા સ્વજનનક્ષિતિરક્ષણકર્મણિ
પટુતમો જન એષ વિધીયતામિહ તયા હતયા તુ સમૂહયા ૬૨૪
ગણપતેઃ શૃણુયાદિમમુજ્વલં દ્રુતવિલમ્બિતવૃત્તગણં શચી
સલિલરાશિસુતાભવનીભવદ્ભુવનપાવનપાદસરોરુહા ૬૨૫
દ્વિતીયો જલોદ્ધતગતિપાદઃ
હરિત્સુ પરિતઃ પ્રસાદમધિકં દધાનમમલત્વિષાં પ્રસરણૈઃ
મહેન્દ્રમહિલાવિલાસહસિતં મદન્તરતમો ધુનોતુ વિતતમ્ ૬૨૬
પ્રસૂસ્ત્રિજગતઃ પ્રિયા મઘવતઃ કૃપાકલિતયા કટાક્ષકલયા
નિતાન્તમગતેર્વિકુણ્ઠિતમતેર્ધુનોતુ ભરતક્ષિતેરકુશલમ્ ૬૨૭
પુરા શચિ મતિસ્ત્વમીશિતુરથો નભસ્તનુમિતા પૃથઙ્મતિમતી
અનન્તરમભૂઃ સરોજનયના તનુઃ સુરપતેર્વિલોચનસુધા ૬૨૮
પરત્ર વિગુણા સતોઽસિ ધિષણા નભસ્તનુરિહ પ્રપઞ્ચમવસિ
અસિ સ્વરબલા પ્રિયા સુરપતેરિયત્તવ શચિ સ્વરૂપકથનમ્ ૬૨૯
પ્રજાપતિપદે પુરાણપુરુષે સ્મૃતા ત્વમદિતિઃ સુરાસુરનુતે
જનાર્દનપદે રમાસિ પરમે સદાશિવપદે શિવા ત્વમજરે ૬૩૦
ઉષા ઇનપદે સ્વધાઽનલપદે પુરન્દરપદે ત્વમીશ્વરિ શચી
યથા રુચિવિદુઃ પદાનિ કવયશ્ચિતૈશ્ચ ચિતિમાન્યુવામૃજુગિરા ૬૩૧
અમેયમમલં પુરાણપુરુષં તદીયવિભવાભિધાયિભિરિમે
વદન્તિ કવયઃ પદૈર્બહુવિધૈસ્તથૈવ ભવતીં તતો મતભિદાઃ ૬૩૨
નભશ્ચ પવનઃ સ્વરશ્ચ પરમસ્તટિચ્ચ વિતતા પતિશ્ચ મહસામ્
સુધાંશુરનલો જલં ચ પૃથિવી સવિત્રિ યુવયોર્વિભૂતિપટલી ૬૩૩
અપારબહુલપ્રમોદલહરી સતઃ કિલચિતિઃ પરત્ર વિતતા
પુનર્વિયદિદં પરીત્ય નિખિલં જગન્તિ દધતી પરા વિજયતે ૬૩૪
ન યદ્યપિ પરાત્પરે નભસિ તે સરોજનયના વપુઃ પૃથગજે
તથાપિ નમતાં મતીરનુસરન્ત્યમેયવિભવે દધાસિ ચ તનૂઃ ૬૩૫
સહ ત્રિભુવનપ્રપાલનકૃતા સમસ્તમરુતાં ગણસ્ય વિભુના
સદા શશિમુખી શરીરભૃદજા જગત્યદુરિતે શચી વિજયતે ૬૩૬
કુલં બહુભિદં બલં ન ભુજયોઃ કથં નુ વિપદસ્તરેમ ભરતાઃ
સમર્થમધુના વિપદ્વિધુતયે તવામ્બ ચરણં વ્રજામિ શરણમ્ ૬૩૭
સમસ્તમપિ ચ સ્વદેશવિદુષાં વિધાનપટલં બભૂવ વિફલમ્
અભાગ્યદમનક્ષમં તદધુના તવામ્બ ચરણં વ્રજામિ શરણમ્ ૬૩૮
નિજો મમ જનો નિતાન્તમગતિર્ન કુક્ષિભરણેઽપ્યયં પ્રભવતિ
મહેશ્વરિ કૃપામરન્દમધુના તવામ્બ ચરણં વ્રજામિ શરણમ્ ૬૩૯
અદૃષ્ટકનકં કુલં મમ ચિરાન્નિરાયુધમિદં નિરાશમભિતઃ
સ્વભાવત ઇવ પ્રબદ્ધમભવત્તવામ્બ ચરણં વ્રજામિ શરણમ્ ૬૪૦
અવીરચરિતં વિપાલકકથં નિરાર્ષવિભવં ચિરાન્મમ કુલમ્
ઇદં મમ મનો નિકૃન્તતિ મુહુસ્તવામ્બ ચરણં વ્રજામિ શરણમ્ ૬૪૧
ચિરાત્સ્મૃતિપથાદપિ ચ્યુતમજે તપોબલભવં તમાર્ષવિભવમ્
સ્વદેશમધુના પુનર્ગમયિતું તવામ્બ ચરણં વ્રજામિ શરણમ્ ૬૪૨
હતં ચ વિહતં ધુતં ચ વિધુતં રુદન્તમભિતો વિશિષ્ટકરુણે
ઇમં સ્વવિષયં શિવં ગમયિતું તવામ્બ ચરણં વ્રજામિ શરણમ્ ૬૪૩
ક્ષયાય સુકૃતદ્વિષાં વિહરતાં શિવાય ચ સતાં પ્રપઞ્ચસુહૃદામ્
નિજસ્ય મનસો બલાય ચ પરે તવામ્બ ચરણં વ્રજામિ શરણમ્ ૬૪૪
જયત્સુ સુકૃતં દ્વિષત્સુ પરિતઃ સતામપિ કુલે બલેન રહિતે
ખલપ્રિયયુગે કલૌ પરિણતે તવામ્બ ચરણં વ્રજામિ શરણમ્ ૬૪૫
અભાતિ સુકૃતે નિગૂઢવિભવે વિભાતિ દુરિતે ફલાનિ દિશતિ
વિધાનવિકલે મનસ્યભયદે તવામ્બ ચરણં વ્રજામિ શરણમ્ ૬૪૬
પટૌ પ્રતિભટે ગદે પ્રતિભયે નતાવનવિધાવતીવ નિપુણમ્
સુપર્વભુવનક્ષિતીશદયિતે તવામ્બ ચરણં વ્રજામિ શરણમ્ ૬૪૭
અમર્ત્યપટલીકિરીટમણિભાભુજઙ્ગકિરણં નિતાન્તમરુણમ્
વિપત્તિદમનં તમઃ પ્રશમનં તવામ્બ ચરણં વ્રજામિ શરણમ્ ૬૪૮
વિનષ્ટવિભવામિમાં પુનરપિ શ્રિયાવિલસિતાં વિધાતુમજરે
સ્વજન્મપૃથિવીં સ્વરીશદયિતે દિશેર્ગણપતેઃ કરાય પટુતામ્ ૬૪૯
સુપર્વવસુધાધિનાથસુદૃશો જલોદ્ધતગતિસ્તવોઽયમનઘઃ
કૃતિર્ગણપતેઃ કરોતુ વિધુતિં ભયસ્ય ભરતક્ષમાતલજુષામ્ ૬૫૦
તૃતીયઃ પ્રમિતાક્ષરપાદઃ
ઉદિતં મહેન્દ્રમહિલાવદને પ્રસૃતં કરૈર્દિશિ દિશિ પ્રગુણૈઃ
અહિતં તમઃ પ્રશમયદ્યમિનાં હસિતં કરોતુ મમ ભૂરિ શિવમ્ ૬૫૧
ભરતક્ષિતેસ્તિમિરમાશુ હરત્વરિચાતુરીકૃતવિમોહમતેઃ
રવિલક્ષતોઽપ્યધિકમંશુમતી પવિપાણિચિત્તદયિતા વનિતા ૬૫૨
શશિલક્ષશીતલકટાક્ષસુધા તરુણાર્કકોટિરુચિપાદયુગા
હૃદિ મે વિભાતુ મુનિગેયગુણા વિબુધેન્દ્રચિત્તરમણી તરુણી ૬૫૩
કમનીયદીપ્તસુકુમારતનુર્મનનીયપાવનપદામ્બુરુહા
વિદધાતુ મે શિવમસદ્વિમુખી વિબુધેન્દ્રજીવિતસખી સુમુખી ૬૫૪
અનુમાનમૂઢપિતૃવાક્યવશાત્તનયેન દેવિ વિનિકૃત્તશિરાઃ
તવ રેણુકા વિલસિતા કલયા ગણનીયશક્તિરભવદ્દશસુ ૬૫૫
સકલામયપ્રશમનં દુરિતક્ષયકારિકાઙ્ક્ષિતકરં ચ ભવેત્
સુરસુન્દરી જનસમર્ચતયોર્હૃદિ રેણુકાચરણયોઃ કરણમ્ ૬૫૬
વિનિહન્તિ પાપપટલં સ્મરણાદ્વિધુનોતિ રોગનિવહં ભજનાત્
વિદઘાતિ વાઞ્છિતતફલં સ્તવનાન્મનુજસ્ય રામજનની ચરણમ્ ૬૫૭
શરણં વ્રજામિ નવરવ્યરુણં ચરણં તવામ્બ નૃપજાતિરિપોઃ
ભરતક્ષિતેરવનતઃ પ્રથમં મરણં મમેહ ન ભવત્વધમમ્ ૬૫૮
સ્મરણં ચિરાદવિરતં વિદધચ્ચરણસ્ય તે તરુણભાનુરુચઃ
અયમસ્તુ રામજનયિત્રિપટુઃ સુરકાર્યમાર્યવિનુતે ચરિતુમ્ ૬૫૯
અવ ભારતક્ષિતિમમોઘદયે કરણં ભવત્વિહ તવૈષ જનઃ
નિજયોઃ સવિત્રિ ચરણામ્બુજયોર્ન વિહાતુમર્હસિ ચિરાદ્ભજકમ્ ૬૬૦
અવિશસ્ત્વમિન્દ્રદયિતે કિલતામપિ યજ્ઞસેનતનયાં કલયા
અનઘવ્રતાસુ કવયઃ પ્રથમાં પ્રવદન્તિ યાં બહુલવન્દ્યગુણામ્ ૬૬૧
ભુવિ ભારતં પઠતિ યઃ સુકૃતી કલુષં ધુનોતિ સકલં કિલ સઃ
ઇયમમ્બ શક્તિકુલરાજ્ઞિ તવ દ્રુપદસ્ય નન્દિનિ કથામહિમા ૬૬૨
અભિમન્યુમાતરમનલ્પગુણામતિલઙ્ઘ્ય ચૈક્ષત હરિર્ભવતીમ્
અતિસૌહૃદેન યદિહાર્યનુતે તવ હેતુરીડ્યતમશક્તિકલા ૬૬૩
ગૃહકાર્યતન્ત્રચતુરા ગૃહીણી સકલીન્દ્રિયામૃતઝરી રમણી
વરનીતિમાર્ગકથને સચિવોઽપ્યભવસ્ત્વમમ્બ કુરુ વંશભૃતામ્ ૬૬૪
ન યુધિષ્ઠિરસ્ય વરઘોરતપો ન ધનઞ્જયસ્ય પટુ બાહુબલમ્
અરિસઙ્ક્ષયં કૃતવતી બહુલં તવ વેણિકાઽપચરિતા ફણિની ૬૬૫
અસિતાપિ કાન્તિવસતિર્મહતી વનિતાજનસ્ય ચ વિમોહકરી
કુશલં મમાભ્રપતિશક્તિકલા દ્રુપદક્ષિતીન્દ્રદુહિતા દિશતુ ૬૬૬
શિરસા સમસ્તજનપાપભરં વહતો ભવાય ભુવિ યામવૃણોત્
અમરાધિપઃ પતિતપાવનિ તાં ભુવિ કન્યકાં તવ વિવેશ કલા ૬૬૭
કલયા તવાતિબલયા કલિતા પુરુષસ્ય યોગમખિલામ્બ વિના
અખિલેશ્વરપ્રહિતતેજ ઇયં સુતજન્મને કિલ દધાવનઘા ૬૬૮
સુરરક્ષકસ્ય મદયિત્રિ દૃશાં નરરક્ષકસ્ય જનયિત્રિ પરે
કુલરક્ષણાય કૃતબુદ્ધિમિમં કુરુ દક્ષમદ્ભુતપવિત્રકથે ૬૬૯
મુમુચુઃ કુલે મમ સુપર્વપતેસ્તવ ચાભિધેયમિહ મન્દધિયઃ
અપરાધમેતમતિઘોરતરં જનનિ ક્ષમસ્વ મમ વીક્ષ્ય મુખમ્ ૬૭૦
ઇહ શારદેતિ યતિભિર્વિનુતા પ્રથિતા સુરેશ્વરમનોદયિતા
ભુવિ ભાતિ કીર્તિવપુષા શચિ યા સુકથાપિ સા તવ સવિત્રિ કલા ૬૭૧
અરુણાચલેશ્વરદરીવસતેસ્તપતો મુનેર્ગણપતેઃ કુશલમ્
વિવિધાવતારવિલસચ્ચરિતા વિતનોતુ સા વિબુધરાડ્વનિતા ૬૭૨
અરુણાચલસ્ય વરકન્દરયા પ્રતિઘોષિતં કલુષહારિ યશઃ
વિબુધાધિનાથરમણી શૃણુયાદ્ગણનાથગીતમતિચારુનિજમ્ ૬૭૩
ભરતક્ષિતેઃ શુભવિધાયિષુ સા વિબુધક્ષિતીશદયિતા દયયા
ધનશક્તિબન્ધુબલહીનમપિ પ્રથમં કરોતુ ગણનાથમુનિમ્ ૬૭૪
મુદિતામિમા વિદધતુ પ્રમદાં ત્રિદિવાધિપસ્ય નિપુણશ્રવણામ્
અમિતપ્રકાશગુણશક્તિમજાં પ્રમિતાક્ષરાઃ સુકવિભૂમિપતેઃ ૬૭૫
ચતુર્થસ્તામરસપાદઃ
દિશતુ શિવં મમ ચન્દ્રવલક્ષસ્તિમિરસમૂહનિવારણદક્ષઃ
કૃતગતિરોધકપાતકનાશઃ સુરધરણીશવધૂસ્મિતલેશઃ ૬૭૬
અવિદિતમાર્ગતયાતિવિષણ્ણાં ગતિમપહાય ચિરાય નિષણ્ણામ્
ભરતધરામનિમેષધરત્રી પતિગૃહિણી પરિપાતુ સવિત્રી ૬૭૭
ભુવનમિદં ભવતઃ કિલ પૂર્વં યદમલરૂપમનાકૃતિસર્વમ્
પ્રકૃતિરિયં કુરુતાદદરિદ્રામતિમતિશાતતરાં મમ ભદ્રા ૬૭૮
સૃજતિ જગન્તિ વિભૌ પરમે યા સુબહુલશક્તિરરાજત માયા
પ્રદિશતુ સા મમ કઞ્ચન યોગં ઝટિતિ નિરાકૃતમાનસરોગમ્ ૬૭૯
પ્રતિવિષયં વિકૃતીતર સત્તા વિલસતિ યા મતિમદ્ભિરુપાત્તા
ઇયમનઘા પરિપાલિતજાતિં વિતરતુ મે વિવિધાં ચ વિભૂતિમ્ ૬૮૦
પ્રતિવિષયગ્રહણં પરિપૂતામતિરખિલસ્ય જનસ્ય ચ માતા
મમ વિદધાતુ શુભં શુભનામા ત્રિદિવનિવાસિનરેશ્વરરામા ૬૮૧
ગગનતનુર્જગતો વિપુલસ્ય પ્રભુપદમગ્રય્મિતા સકલસ્ય
પ્રતિજનદેહમજા પ્રવહન્તી મમ હૃદિ નન્દતુ સા વિહરન્તી ૬૮૨
પટુકુલકુણ્ડધનઞ્જયકીલા સમુદિતહાર્દવિભાકરલીલા
દ્રુતશિર ઇન્દુકલામૃતધારા જનમવતાન્નિજભક્તમુદારા ૬૮૩
વિષયસમાકૃતિરત્ર પુરસ્તાદ્વિમલતમા કિલ તત્ર પરસ્તાત્
ભુવનમયી ભુવનાચ્ચ વિભક્તામતિરનઘાઽવતુ મામતિશક્તા ૬૮૪
વિષયપરિગ્રહણેષ્વતિસક્તા વિષયવિભૂતિષુ કાપિ વિવિક્તા
અખિલપતેર્મયિ દીવ્યતુ શક્તિર્વિમલતમા વિધુતેતરશક્તિઃ ૬૮૫
દૃશિ દૃશિ ભાતિ યદીયમપાપં દિશિ દિશિ ગન્તૃ ચ વેત્તૃ ચ રૂપમ્
ભવતુ શિવાય મમેયમનિન્દ્યા ભુવનપતેર્ગૃહિણી મુનિવન્દ્યા ૬૮૬
જડકુલકુણ્ડદરીષુ શયાના બુધકુલવહ્નિષુ ભૂરિવિભાના
હરિહયશક્તિરમેયચરિત્ર મમ કુશલં વિદધાતુ પવિત્ર ૬૮૭
દહરગતાખિલમાકલયન્તી દ્વિદલગતા સકલં વિનયન્તી
દશશતપત્રગતા મદયન્તી ભવતુ મયીન્દ્રવધૂર્વિલસન્તી ૬૮૮
ગૃહયુગલીશ્રિય આશ્રિતગમ્યા પદકમલદ્વિતયી બહુરમ્યા
મમ હૃદિ ભાત્વવિકુણ્ઠિતયાના હરિસુદૃશસ્તરુણારુણભાના ૬૮૯
ઉપરિ તતા કુલકુણ્ડનિશાન્તાજ્જ્વલિતધનઞ્જયદીધિતિકાન્તાત્
હરિહયશક્તિરિયં મમ પુષ્ટા દ્રવયતુ મસ્તકચન્દ્રમદુષ્ટા ૬૯૦
નભસિ વિરાજતિ યા પરશક્તિર્મમ હૃદિ રાજતિ યા વરશક્તિઃ
ઉભયમિદં મિલિતં બહુવીર્યં ભવતુ સુખં મમ સાધિતકાર્યમ્ ૬૯૧
ત્રિભુવનભૂમિપતેઃ પ્રિયયોષા ત્રિમલહરી સુરવિષ્ટપભૂષા
મમ વિતનોતુ મનોરથપોષં દુરિતવિપત્તિતતેરપિ શોષમ્ ૬૯૨
પવનજગત્પ્રભુપાવનમૂર્તિર્જલધરચાલનવિશ્રુતકીર્તિઃ
મમ કુશલાય ભવત્વરિભીમા જનનવતાં જનની બહુધામા ૬૯૩
મમ સુરરાજવધૂકલયોગ્રા ખલજનધૂનનશક્તનખાગ્રા
દમયતુ કૃત્તશિરાઃ કલુષાણિ પ્રકટબલા હૃદયસ્ય વિષાણિ ૬૯૪
કુલિશિવધૂકલયા પરિપુષ્ટા બુધનુતસન્નુણજાલવિશિષ્ટા
મમ પરિતો વિલસદ્વિભવાનિ દ્રુપદસુતા વિદધાતુ શિવાનિ ૬૯૫
સુરજનરાડ્દયિતાંશવિદીપ્તે પદકમલાશ્રિતસાધુજનાપ્તે
દુરિતવશાદભિતો ગતભાસં મનુજકુમારજનન્યવદાસમ્ ૬૯૬
અમરનરેશ્વરમન્દિરનેત્રી સુમશરજીવનસુન્દરગાત્રી
ભવતુ શચી વિતતસ્વયશસ્સુ પ્રતિફલિતા ગણનાથવચસ્સુ ૬૯૭
વિકસતુ મે હૃદયં જલજાતં વિલસતુ તત્ર શચીસ્તુતિગીતમ્
સ્ફુરતુ સમસ્તમિહેપ્સિતવસ્તુ પ્રથિતતમં મમ પાટવમસ્તુ ૬૯૮
કુરુ કરુણારસસિક્તનિરીક્ષે વચનપથાતિગસન્નુણલક્ષે
શચિ નરસિંહજમાહિતગીતં ભરતધરામવિતું પટુમેતમ્ ૬૯૯
સુલલિતતામરસૈઃ પ્રસમાપ્તં વરનુતિબન્ધમિમં શ્રવણાપ્તમ્
જનનિ નિશમ્ય સુસિદ્ધમશેષં હરિલલને મમ કુર્વભિલાષમ્ ૭૦૦
ઇતિ શ્રીભગવન્મહર્ષિરમણાન્તેવાસિનો વાસિષ્ઠસ્ય નરસિંહસૂનોઃ
ગણપતેઃ કૃતૌ ઇન્દ્રાણીસપ્તશતી સમાપ્તા
Complete Works of Ganapati Muni Vol 02-14
Proofread byDPD
Please send corrections to sanskrit@cheerful.com
Last updated ત્oday
http://sanskritdocuments.org
પ્રથમં ગાયત્રં શતકમ્
પ્રથમઃ શશિવદનાપાદઃ
હરિલલને મે પથિ તિમિરાણિ
હરદરહાસદ્યુતિભિરિમાનિ ૧
અગતિમવીર્યામપગતધૈર્યામ્
અવતુ શચી મે જનિભુવમાર્યામ્ ૨
શૃણુ કરુણાવત્યલઘુમખર્વે
સ્તવમહમાર્યસ્તવ શચિ કુર્વે ૩
ત્રિજગદતીતો વિલસતિ નિત્યઃ
અણુરણુતો યો ભગવતિ સત્યઃ ૪
ત્વમખિલકાર્યેષ્વયિ ધૃતસક્તિઃ
ઉરુગતિરસ્ય પ્રભુતમશક્તિઃ ૫
વિદુરિમમેકે જગતિ મહેન્દ્રમ્
જગુરયિ કેચિજ્જનનિ મહેશમ્ ૬
અવગતવેદો વદતિ મહેન્દ્રમ્
પરિચિતતન્ત્રો ભણતિ મહેશમ્ ૭
જનનિ શચિ ત્વં પ્રથમદલસ્ય
ભગવતિ દુર્ગાસ્યપરદલસ્ય ૮
ન શચિ શિવાતસ્ત્વમિતરદૈવમ્
બહુમુનિવાણીસમરસતૈવમ્ ૯
દિવિ ચ સિતાદ્રૌ શચિવપુષોર્વામ્
પૃથગુપલમ્ભાદયિ ભિદયોક્તિઃ ૧૦
તનુયુગમૂલં વપુરતિમાયમ્
કરચરણાદ્યૈર્વિયુતમમેયમ્ ૧૧
ત્વમુદરવર્તિત્રિભુવનજીવા
ભવસિ શચી સા જનનિ શિવા વા ૧૨
વિભુશુચિકીલાતતિરયિ ધૂમમ્
ત્વમમરમાર્ગં બત વમસીમમ્ ૧૩
જયસિ નભસ્થો જનનિ પરસ્તાત્
નભસિ ચ ભાન્તી ભવસિ પુરસ્તાત્ ૧૪
ત્વમતનુરમ્બ જ્વલસિ પરસ્તાત્
ઇહ ખશરીરા લસસિ પુરસ્તાત્ ૧૫
જનનિ પરસ્તાન્મતિરસિ ભર્તુઃ
અસિ ખશરીરા પૃથગવગન્ત્રી ૧૬
અણુચયરૂપં ભગવતિ શાન્તમ્
ન ભવતિ શૂન્યં તદિદમનન્તમ્ ૧૭
દિવિ દધતીશે પુરુષશરીરમ્
જનનિ પુરન્ધ્રી તનુરભવસ્ત્વમ્ ૧૮
દૃશિ વિલસન્તં પ્રભુમુપયાન્તી
ભવસિ વિરાટ્ ત્વં નૃતનુષુ ભાન્તી ૧૯
તવ ગુણગાનં જનનિ વિધાતુમ્
ભવતિ પટુઃ કો વિયદિવ માતુમ્ ૨૦
ભગવતિ તૃપ્તિર્ભવતુ ન વા તે
અભિલષિતાપ્તિર્ભવતુ ન વા મે ૨૧
ભજતિ તવાઙ્ઘ્રિં મમ ખલુ ભાષા
પતિ મનુરાગાત્ પ્રિયમિવ યોષા ૨૨
અઘમપહર્તું શુભમપિ કર્તુમ્
અલમજરે તે ગુણગણગાનમ્ ૨૩
અવસિ જગત્ત્વં કુલિશિભુજસ્થા
અવ મુનિભૂમિં ગણપતિધીસ્થા ૨૪
શશિવદનાભિર્ગણપતિજાભિઃ
શશિવદનાદ્યા પરિચરિતાઽસ્તુ ૨૫
દ્વિતીયસ્તનુમધ્યાપાદઃ
ધ્વાન્તં પરિહર્તું તેજાંસ્યપિ ભર્તુમ્
અન્તર્જગદમ્બા હાસં કુરુતાન્મે ૨૬
ભીતામરિધૂતામાર્યાવનિમેતામ્
સમ્રાજ્ઞિ બુધાનાં દૂનામવ દીનામ્ ૨૭
ઈશસ્ય સહાયાં વિશ્વસ્ય વિધાને
આકાશશરીરામમ્બાં પ્રણમામઃ ૨૮
કર્તુર્ભુવનાનાં માયાસિ શચિ ત્વમ્
સત્યસ્ય તપોઽસિ જ્ઞસ્યાસિ મનીષા ૨૯
આજ્ઞાસિ વિનેતુસ્તેજોઽસિ વિભાતઃ
નિર્યત્નસમાધેરાનન્દરસોઽસિ ૩૦
તસ્ય ત્વમનન્યાઽપ્યન્યેવ ખકાયા
અત્યદ્ભુતમાયા જાયાઽસિ સહાયા ૩૧
આકાશશરીરાં જાયામશરીરઃ
આલિઙ્ગ્ય વિભુસ્ત્વાં નન્દત્યયિ ચિત્રમ્ ૩૨
વજ્રેશ્વરિ ઘસ્રે યદ્વન્મુકુટેન
દીપ્તેન સવિત્ર મૂર્ધા તવ ભાતિ ૩૩
નક્ષત્રસહસ્રૈશ્શુભ્રદ્યુતિભિસ્તે
પુષ્પાયિતમેતૈર્માતર્નિશિમસ્તે ૩૪
ઘસ્રઃ ખલુ કાલો રાજ્યં નનુ કર્તુમ્
રાત્રિઃ ખલુ કાલો રન્તું રમણેન ૩૫
નિઃશબ્દતરઙ્ગાસ્વગ્લૌષુ નિશાસુ
નૂનં ખશરીરે કાન્તં રમયન્તી ૩૬
સાન્દ્રોડુસુમસ્રગ્વિભ્રાજિતકેશા
ધ્વાન્તાસિતચેલા શાન્તાઽપ્યસિ ભીમા ૩૭
રાજન્મિતતારામન્દારવતંસામ્
માતસ્સિતભાસા સ્મેરાં હસિતેન ૩૮
જ્યોત્સ્ના ઘનસારદ્રાવૈરનુલિપ્તામ્
ત્વાં વીક્ષ્ય ન શાન્તિઃ કસ્ય ક્ષણદાસુ ૩૯
બાલારુણરોચિઃ કાશ્મીરરજોભિઃ
આલિપ્તમુખીં ત્વાં પ્રાતઃ પ્રણમામિ ૪૦
સાયં સમયશ્રી લાક્ષારસરક્તમ્
પ્રત્યક્ પ્રસૃતં તે વન્દે વરદેઽઙ્ઘ્રિમ્ ૪૧
દીપ્તાર્કકિરીટાં સર્વાન્ વિનયન્તીમ્
વન્દે ભુવનાનાં રાજ્ઞીમસમાનામ્ ૪૨
ધૂતાખિલરોગાઃ શ્વાસાસ્તવ વાતાઃ
માતર્વિતરન્તુ પ્રાણસ્ય બલં નઃ ૪૩
પ્રાઞ્ચસ્તવ વાતાઃ સ્વાસાઃ શમુશન્તુ
પ્રત્યઞ્ચ એમે નઃ પાપં શમયન્તુ ૪૪
મન્માતરવાઞ્ચો વીર્યં વિતરન્તુ
સન્તાપમુદઞ્ચઃ સર્વં ચ હરન્તુ ૪૫
અસ્યા ઇવ ભૂમેર્ભૂતપ્રસવાયાઃ
એકૈકશ આહુર્યેષાં મહિમાનમ્ ૪૬
અદ્રેરુપલાનાં નદ્યાઃ સિકતાનામ્
યેષાં ચ ન કધ્ચ્છિક્તો ગણનાયામ્ ૪૭
રોમાયિતમેતૈર્ગોલૈસ્તવ કાયે
વ્યાખ્યાતમનેન શ્લાઘ્યં તવ ભાગ્યમ્ ૪૮
વિશ્વં વહસીદં જમ્ભારિભુજસ્થા
આર્યાન્વહમાતર્વાસિષ્ઠમતિસ્થા ૪૯
આદ્યાં ભુવનાનાં ભર્તુસ્તનુમધ્યામ્
ભક્ત્સ્ય ભજન્તામેતાસ્તનુમધ્યાઃ ૫૦
તૃતીયો મુકુલપાદઃ
હાસાઃ શક્રગૃહેશ્વર્યાશ્ચન્દ્રરુચઃ
ભૂયાસુર્વિમલપ્રજ્ઞાયૈ હૃદિ મે ૫૧
ઇન્દ્રાણ્યાઃ કરુણા લોકાશ્શોકહૃતઃ
ભૂયાસુર્ભરતક્ષ્માયૈ ક્ષેમકૃતઃ ૫૨
વ્યક્તિર્વ્યોમતનુઃ શક્તિત્વાદ્વનિતા
જ્ઞાતૃત્વાત્પુરુષઃ કેષાઞ્ચિદ્વિદુષામ્ ૫૩
વ્યક્તિં વ્યોમતનું યે પ્રાહુઃ પુરુષમ્
તેષાં તત્ત્વવિદાં કલ્પસ્સ્યાત્ ત્રિવિધઃ ૫૪
રુદ્રં કેઽપિ જગુઃ શક્રં કેઽપિ વિદુઃ
ભાષન્તે ભુવનપ્રાણં કેઽપિ વિદઃ ૫૫
વ્યક્તિં વ્યોમતનું પ્રાહુર્યે વનિતામ્
તેષાં ચ ત્રિવિધઃ કલ્પશ્શાસ્ત્રવિદામ્ ૫૬
દુર્ગા સૂરિવરૈઃ કૈશ્ચિત્સા ગદિતા
શચ્યન્યૈર્વિબુધૈર્જ્ઞૈરન્યૈરદિતિઃ ૫૭
એકેષાં વિદુષાં વ્યક્તિર્વ્યોમતનુઃ
ન સ્ત્રી નો પુરુષો બ્રહ્મૈતત્સગુણમ્ ૫૮
ત્વં વિશ્વસ્ય મહાન્ પ્રાણઃ કઃ પરમે
ત્વં રુદ્રઃ પ્રણવસ્ત્વં શક્રોઽભ્રશિખી ૫૯
ત્વં કસ્યાસ્યદિતિસ્ત્વં રુદ્રસ્ય શિવા
ત્વં શક્રસ્ય શચી શક્તિર્દેવનુતે ૬૦
પ્રાણશ્ચ પ્રણવો જ્યોતિશ્ચામ્બરગમ્
વસ્ત્વેકં ત્રિગુણં નો વસ્તુ ત્રિતયમ્ ૬૧
શક્તેરમ્બપરે શક્ત્સ્યાપિ ભિદા
જ્વાલા પાવકવદ્ભાષા ભેદકૃતા ૬૨
સર્વં દૃશ્યમિદં ભુઞ્જાને પરમે
પુંનામસ્તુતયો યુજ્યન્તે ખલુ તે ૬૩
કુર્વાણેમ્બસતસ્સન્તોષં સતતમ્
સ્ત્રીનામસ્તુતયઃ શોભાં તે દધતે ૬૪
સદ્બ્રહ્મ બ્રુવતે વિદ્વાંસો વિગુણમ્
ત્વં માતસ્સગુણં બ્રહ્માસિ પ્રથિતે ૬૫
શબ્દાદ્યૈર્વિયુતં સદ્બ્રહ્મામલિનમ્
શબ્દાદ્યૈઃ સહિતા ત્વં દેવ્યચ્છહિતા ૬૬
સાક્ષિ બ્રહ્મ પરં ત્વં માતઃ કુરુષે
સર્વેષાં જગતાં કાર્યં સર્વવિધમ્ ૬૭
દ્યૌર્માતા જગતો દ્યૌરેવાસ્ય પિતા
વ્યાપ્તં ભાતિ જગદ્દ્યાવા સર્વમિદમ્ ૬૮
આકાશાદ્રજસો દ્યૌરન્યા વિરજાઃ
આકાશેઽસ્તિ પુનસ્તત્પારે ચ પરા ૬૯
દ્યાવં તાં જગતો રઙ્ગે વ્યોમતનુમ્
પારે શુદ્ધતમાં વિદ્મસ્ત્વાં પરમે ૭૦
ત્વાં પૂર્ણામદિતિં શક્તિં દેવિ શચીમ્
નિત્યં શબ્દવતીં ગૌરીં પ્રબ્રુવતે ૭૧
પુંનામા ભવતુ સ્ત્રીનામાસ્ત્વથવા
વ્યક્તિર્વ્યોમતનુર્લોકં પાત્યખિલમ્ ૭૨
નાકે સા કિલ ભાત્યૈન્દ્રી રાજ્યરમા
વિભ્રાણા લલિતં સ્ત્રીરૂપં પરમા ૭૩
શક્તાં દેવિ વિધેહ્યાર્તાનામવને
ઇન્દ્રસ્યેવ ભુજાં વાસિષ્ઠસ્ય મતિમ્ ૭૪
પૂજાશક્રતરુણ્યૈતૈસ્સિધ્યતુ તે
ગાતૃણાં વરદે ગાયત્રૌર્મુકુલૈઃ ૭૫
ચતુર્થો વસુમતીપાદઃ
મોહં પરિહરન્ યોગં વિતનુતામ્
દેવેન્દ્રદયિતા હાસો મમ હૃદિ ૭૬
આભાતુ કરુણા સા ભારતભુવિ
સુત્રામસુદૃશો યદ્વન્નિજદિવિ ૭૭
વન્દારુજનતામન્દારલતિકામ્
વન્દે હરિહયપ્રાણપ્રિયતમામ્ ૭૮
શોકસ્ય દમનીં લોકસ્ય જનનીમ્
ગાયામિ લલિતાં શક્રસ્ય દયિતામ્ ૭૯
રમ્યા સુમનસાં ભૂપસ્ય મહિષી
સૌમ્યા જનિમતાં માતા વિજયતે ૮૦
વીર્યસ્ય ચ ધિયસ્ત્રૈલોક્યભરણે
દાત્રી મઘવતે દેવી વિજયતે ૮૧
વ્યાપ્તા જગદિદં ગુપ્તા હૃદિ નૃણામ્
આપ્તા સુકૃતિનાં દૈવં મમ શચી ૮૨
ખે શક્તિરતુલા પારે ચિદમલા
સ્વશ્ચારુમહિલા દૈવં મમ શચી ૮૩
શસ્ત્રં મઘવતઃ શાસ્ત્રં યમવતામ્
વસ્ત્રં ત્રિજગતો દૈવં મમ શચી ૮૪
યુક્ત્સ્ય ભજતઃ શર્માન્તરતુલમ્
વર્માપિ ચ બહિર્દૈવં મમ શચી ૮૫
વીર્યં બલવતાં બુદ્ધિર્મતિમતામ્
તેજો દ્યુતિમતાં દૈવં મમ શચી ૮૬
એકૈવ જનયન્ત્યેકૈવ દધતી
એકૈવ લયકૃદ્દૈવં મમ શચી ૮૭
શક્તીરવિતથાઃ ક્ષેત્રોષુ દધતી
બીજેષુ ચ પરા દૈવં મમ શચી ૮૮
ચિન્વન્ત્યપિ પચન્ત્યેકા પશુગણમ્
ખાદન્ત્યપિ ભવે દૈવં મમ શચી ૮૯
દૃષ્ટૌ ધૃતચિતિર્દૃશ્યે તતગુણા
વિશ્વાત્મમહિષી દૈવં મમ શચી ૯૦
રાકાશશિમુખી રાજીવનયના
સ્વઃ કાપિ લલના દૈવં મમ શચી ૯૧
સ્થાણાવપિ ચરે સર્વત્ર વિતતા
સાક્ષાદ્ભવતુ મે સ્વર્નાથદયિતા ૯૨
યન્માતરનૃતં ધ્યાતં ચ ગદિતમ્
જુષ્ટં ચ હર મે તદ્દેવિ દુરિતમ્ ૯૩
માં મોચય ઋણાદિન્દ્રાણિ સુભુજે
મામલ્પમતયો મા નિન્દિષુરજે ૯૪
શત્રુશ્ચ શચિ મે સખ્યાય યતતામ્
દૃપ્તશ્ચ ઇમનુજો મામમ્બ ભજતામ્ ૯૫
કષ્ટં શચિ વિધૂયેષ્ટં વિદધતી
આનન્દય જનં પ્રેયાંસમયિ મે ૯૬
અસ્ત્રં મમ ભવ ધ્વંસાય રટતામ્
સુત્રામરમણિ શ્રીમાતરસતામ્ ૯૭
સમ્પૂરયતુ મે સર્વં સુરનુતા
સ્વર્ગક્ષિતિપતેશ્શુદ્ધાન્તવનિતા ૯૮
સંવર્ધય શચિ સ્વં દેશમવિતુમ્
બાહોરિવ હરેર્બુદ્ધેર્મમ બલમ્ ૯૯
એતૈર્વસુમતીવૃત્તૈર્નવસુમૈઃ
ભૂયાચ્ચરણયોઃ પૂજા જનનિ તે ૧૦૦
પ્રથમં ગાયત્રં શતકં સમાપ્તમ્
અથ દ્વિતીયમૌષ્ણિહં શતકમ્
પ્રથમઃ કુમારલલિતાપાદઃ
સુરેશ્વરમહિષ્યાઃ સ્મિતં શશિસિતં મે
તનોતુ મતિમચ્છાં કરોતુ બલમગ્રય્મ્ ૧૦૧
વિધાય રિપુધૂતિં નિધાય સુદશાયામ્
પુલોમતનુજાતા ધિનોતુ ભરતક્ષ્મામ્ ૧૦૨
પદપ્રણતરક્ષા વિધાનધૃતદીક્ષા
જગદ્ભરણદક્ષા પરા જયતિ શક્તિઃ ૧૦૩
સ્વરત્યવિરતં સા શનૈર્નભસિ રઙ્ગે
જ્વલત્યધિકસૂક્ષ્મં જગત્પ્રભવશક્તિઃ ૧૦૪
મહસ્તવ સુસૂક્ષ્મં નિદાનમખિલાનામ્
ભવત્યખિલમાતર્જગત્યનુભવાનામ્ ૧૦૫
જનન્યનુભવાનાં મતિત્વપરિણામે
સ્વરો ભવતિ મૂલં તવાભ્રહયરામે ૧૦૬
ય ઈશ્વરિ નિદાનં સમસ્તમતિભાને
સ્વરો ગતિવિશેષાત્સ એવ ખલુ કાલઃ ૧૦૭
જ્વલન્ત્યભિહિતા ત્વં વિહાયસિ વિશાલે
પ્રચણ્ડપદપૂર્વા પ્રપઞ્ચકરિચણ્ડી ૧૦૮
સ્વરન્ત્યખિલબુદ્ધિપ્રદા ભવસિ ગૌરી
ત્રિકાલતનુરમ્બ સ્મૃતા ત્વમિહ કાલી ૧૦૯
મહસ્સ્વર ઇતીદં દ્વયં તદતિસૂક્ષ્મમ્
મહેશ્વરિ તવાંશદ્વયં પરમમુક્તમ્ ૧૧૦
મહોઽતિશયમાપ્તં ત્વયિ ત્રિદિવગાયામ્
સ્વરોઽતિશયમાપ્તઃ સિતાદ્રિનિલયાયામ્ ૧૧૧
દિવં નયતિ પૂર્વા ભુવં યુવતિરન્યા
દ્વયોઃ પ્રકૃતિરભ્રં વિશાલમતિમાન્યા ૧૧૨
ન તે દિવિ લસન્ત્યાઃ પિતા તનુભૃદન્યઃ
સ્વયં ભુવમિમાં ત્વાં સતામવનિ વિદ્મઃ ૧૧૩
સુરારિકુલજન્મા તવેશ્વરિ પુલોમા
પિતેતિ કવિભાષા પરોક્ષગતિરેષા ૧૧૪
વદન્ત્યસુરશબ્દૈર્ઘનં સજલમેતમ્
પુલોમપદમેકં પુરાણસતિતેષુ ૧૧૫
પ્રકૃષ્ટતરદીપ્તિર્ગભીરતરનાદા
ઇતો હિ ભવસિ ત્વં તટિત્તનુરમેયે ૧૧૬
અરાતિરસુરોઽયં વિભોર્નિગદિતસ્તે
હયશ્ચ બતગીતઃ પિતા તવ પયોદઃ ૧૧૭
પ્રિયૈઃ કિલ પરે વાં પરોક્ષવચનૌઘૈઃ
પ્રતારિતમિવેલા જગન્મુનિગણેન ૧૧૮
નિકૃષ્ટમપિ રમ્યં યદિ ત્રિદિવલોકે
તવામ્બ કિમુ વાચ્યા રુચિસ્ત્રિદિવનાથે ૧૧૯
ત્વમમ્બ રમણીયા વધૂસ્ત્વમિવ નાકે
ત્વયા ક ઇવ તુલ્યાં મૃદો વદતુ લોકે ૧૨૦
વિનીલમિવ ખાંશં વિદુસ્ત્રિદિવમેકે
પરસ્તુ વદસિ સ્વઃ કવિઃ કમલબન્ધુમ્ ૧૨૧
અમુત્રગતશોકે મહામહસિ નાકે
નમામ્યધિકૃતાં તાં પુરાણકુલકાન્તામ્ ૧૨૨
યદા મમુતપક્વં મદીયમઘમુગ્રમ્
તદિન્દ્રકુલકાન્તે નિવારય સમગ્રમ્ ૧૨૩
દદાતુ ભરતક્ષ્માવિષાદહરણાય
અલં બલમુદારા જયન્તજનની મે ૧૨૪
અતીવ લલિતાભિઃ કુમારલલિતાભિઃ
ઇમાભિરમરેશપ્રિયા ભજતુ મોદમ્ ૧૨૫
દ્વિતીયો મદલેખાપાદઃ
પૌલોમ્યાઃ પરિશુભ્રજ્યોત્સ્નાદૃશ્યરુચો મે
શ્રીમન્તો દરહાસાઃ કલ્પન્તાં કુશલાય ૧૨૬
કારુણ્યામૃતસિક્તા શક્તા શક્રમહિષ્યાઃ
પ્રેક્ષા ભારતભૂમેર્દૌર્બલ્યં વિધુનોતુ ૧૨૭
વન્દે નિર્જરરાજ્ઞીં સઙ્ક્લ્પે સતિ યસ્યાઃ
સાધ્યાસાધ્યવિચારો નૈવ સ્યાદણુકોઽપિ ૧૨૮
સઙ્ક્લ્પસ્તવ કશ્ચ્ચિચત્તે ચેદ્દિવ ઈશે
સ્યાદુલ્લઙ્ઘ્ય નિસર્ગં સિદ્ધિર્નિષ્ફલતા ચ ૧૨૯
મૂઢોઽપ્યુત્તમરીત્યા સિધ્યેદધ્યયનેષુ
મેધાવી ચ નિતાન્તં નૈવ સ્યાત્કૃતકૃત્યઃ ૧૩૦
ઉત્પદ્યેત મહેશ્વર્યપ્રાજ્ઞાદપિ શાસ્ત્રમ્
યાયાન્માતરકસ્માદ્વિભ્રાન્તિં વિબુધોઽપિ ૧૩૧
અલ્પાનામબલાનાં સઙ્ગ્રામે વિજયઃ સ્યાત્
શક્તાનાં બહુલાનાં ઘોરા સ્યાત્પરિભૂતિઃ ૧૩૨
રાજેરન્નૃપપીઠેષ્વખ્યાતાનિ કુલાનિ
સ્યાદ્દુર્ધર્ષબલાનાં પાતો રાજકુલાનામ્ ૧૩૩
નિર્યત્નોઽપિ સમાધેર્વિન્દેદ્દેવિ સમૃદ્ધિમ્
યોગસ્યામ્બ ન પશ્યેદભ્યસ્યન્નપિ સિદ્ધિમ્ ૧૩૪
અત્યન્તં યદસાધ્યં નેદિષ્ઠં ભવતીદમ્
સાધ્યં સર્વવિધાભિઃ સ્યાદિન્દ્રાણિ દવિષ્ઠમ્ ૧૩૫
ગાયામો મુનિસઙ્ઘૈર્ગેયાં કામપિ માયામ્
ઇન્દ્રસ્યાપિ વિનેત્રીં ત્રૈલોક્યસ્ય ચ ધાત્રીમ્ ૧૩૬
વિદ્યાનામધિનાથે કાં વિદ્યાં શ્રયસે ત્વમ્
ઇન્દ્રં કર્તુમધીનં વિશ્વસ્માદધિકં તમ્ ૧૩૭
નિત્યાલિર્મિનીષે સ્ત્રીમોહો ન વિતર્ક્યઃ
ભ્રૂચેષ્ટાનુચરત્વાદન્યા સ્યાદનુકમ્પા ૧૩૮
સૌન્દર્યં પરમન્યદ્વજેરદ્દર્યથવા તે
હર્તું યત્સુખમીષ્ટે તાદૃક્તસ્ય ચ ચિત્તમ્ ૧૩૯
ચક્ષુર્દર્શનમાત્રન્નિસ્તેજો વિદધાનમ્
ચિત્તં ચોજ્ઝિતધૈર્યં મત્તાનાં દનુજાનામ્ ૧૪૦
ગર્તે દુર્જનદેહે મગ્નાન્ પઙ્ક્વિલગ્નાન્
પ્રાણાનાત્મસજાતીનુદ્ધર્તું ધૃતદીક્ષમ્ ૧૪૧
વજ્રં નિર્જરરાજો યદ્ધત્તે સમરેષુ
ત્વચ્છક્તેઃ કલયૈતન્મન્માતર્નિરમાયિ ૧૪૨
રાજ્ઞીત્વાત્પરમેતે રાજત્વં શતમન્યોઃ
નિશ્શક્તિસ્સ વિના ત્વાં કામાજ્ઞાં કુરુતાં નઃ ૧૪૩
સર્વં શક્રનિશાન્તસ્યેશાને તવ હસ્તે
અસ્માકં તુ ધિયેદં સ્તોત્રં સઙ્ગ્રહતસ્તે ૧૪૪
ગન્તવ્યં સ્વરધીશે નિશ્શેષાર્પણશૂરમ્
બિભ્રાણા નયસિ ત્વં માર્જાલીવ કિશોરમ્ ૧૪૫
ગૃહ્ણ્ન્નમ્બરનાથામમ્બામશ્લથમન્ધઃ
કીશસ્યેવ કિશોરો યોગી ગચ્છતિ ગમ્યમ્ ૧૪૬
પૂર્ણાત્માર્પણહીનોઽપ્યજ્ઞાતાઽપિ સમાધેઃ
નિત્યં યો જગદમ્બ ત્વાં સેવેત જપાદ્યૈઃ ૧૪૭
તં ચાચઞ્ચલભક્તિં કૃત્વા પૂરિતકામમ્
નિષ્ઠાં દાસ્યસિ તસ્મૈ પૌલોમિ ક્રમશસ્ત્વમ્ ૧૪૮
ભિન્નાં સઙ્ઘસહસ્ત્રૈઃ ખિન્નાં શત્રુભરેણ
પાતું ભારતભૂમિં માતર્દેહિ બલં મે ૧૪૯
ત્ર્યૈલોક્યાવનભારશ્રાન્તાં વાસવકાન્તામ્
હૈરમ્બ્યો મદલેખાઃ સમ્યક્ સમ્મદયન્તુ ૧૫૦
તૃતીયો હંસમાલાપાદઃ
સુરુચિર્વજ્રપાણેસ્સુદૃશો મન્દહાસઃ
હરતાન્મોહમૂલં હૃદયસ્થં તમો મે ૧૫૧
અમૃતં સઙ્કિરન્ત્યા પ્રસરન્ત્યેહ દૃષ્ટ્યા
સુરરાજ્ઞી બલાઢ્યાં ભરતક્ષ્માં કરોતુ ૧૫૨
અમૃતામ્ભઃ કિરન્તી કરુણામ્ભો વહન્તી
નતરક્ષાત્તદીક્ષા શચિ માતસ્તવેક્ષા ૧૫૩
કૃતપીયૂષવૃષ્ટિસ્તતકલ્યાણસૃષ્ટિઃ
વિહિતૈનોવિનષ્ટિર્ધૃતવિજ્ઞાનપુષ્ટિઃ ૧૫૪
ભૃતદેવેન્દ્રતુષ્ટિર્યમિનાં દેવગૃષ્ટિઃ
મમ કામ્યાનિ દેયાત્તવ વિશ્વામ્બ દૃષ્ટિઃ ૧૫૫
જગતાં ચક્રવર્તિન્યસિતસ્તે કટાક્ષઃ
જલદો ભક્તિભાજાં શિખિનાં નર્તનાય ૧૫૬
સુકૃતી કોઽપિ નાટ્યે બહુલે તત્ર માતઃ
જગતે સારભૂતાનુપદેશાન્કરોતિ ૧૫૭
અપરો નવ્યકાવ્યાન્યનવદ્યાનિ ધન્યઃ
વિદધાત્યપ્રયત્નાદ્બુધભોગક્ષમાણિ ૧૫૮
ઇતરો ભાગ્યશાલી રમણીયૈઃ પ્રસઙ્ગૈઃ
વિતનોતિ સ્વજાતિં જગતિ શ્રેષ્ઠનીતિમ્ ૧૫૯
જગતાં માતરેકો મહસા પુણ્યશાલી
વિધુતારિઃ સ્વદેશં કુરુતે વીતપાશમ્ ૧૬૦
પર ઇન્દ્રાણિ સાધુર્બત વિસ્મૃત્ય વિશ્વમ્
રમતે સિક્તગણ્ડઃ પ્રમદાશ્રુપ્રદાનૈઃ ૧૬૧
તવ રાગાર્દ્રદૃષ્ટ્યા દિવિ શક્રસ્ય નાટ્યમ્
કરુણાસિક્તદૃષ્ટયા ભુવિ ભક્ત્સ્ય નાટ્યમ્ ૧૬૨
તવ સપ્રેમદૃષ્ટિર્બલમિન્દ્રે દધાતિ
તવ કારુણ્યદૃષ્ટિર્બલમસ્માસુ ધત્તામ્ ૧૬૩
તવ વામાઃ કટાક્ષાઃ પ્રભુમાનન્દયન્તુ
ઉચિતો દક્ષિણાનામયમસ્ત્વીક્ષણાનામ્ ૧૬૪
સુકૃતાનાં પ્રપોષં દુરિતાનાં વિશોષમ્
કરુણાર્દ્રા વિભાન્તી તવ દૃષ્ટિઃ ક્રિયાન્નઃ ૧૬૫
કુરુ પાદાબ્જબન્ધોઃ સરણિં નિસ્તમસ્કામ્
શચિ વિજ્ઞાનતેજઃ કિરતાવીક્ષિતેન ૧૬૬
ક્રિયયારાધયન્તો ભુવને તે વિભૂતીઃ
ઇહ કેચિલ્લભન્તે તવ માતઃ કટાક્ષાન્ ૧૬૭
સ્ફુટવિજ્ઞાનપૂર્વં પ્રભજેરન્ યદિ ત્વામ્
સ્થિરયા દેવિ ભક્ત્યા કિમુ વક્તવ્યમીશે ૧૬૮
કુવિધેર્વિસ્મરન્તી ભરતક્ષ્મા શચિ ત્વામ્
બહુકાલાદભાગ્યે પતિતા દેવ્યયોગ્યે ૧૬૯
અભિષિક્ત્સ્ય માતા તવ તેજોંશભૂતા
સુદશાં સેવમાનામનયત્પશ્ચિમાશામ્ ૧૭૦
અયિ કાલં કિયન્તં દયસે પશ્ચિમસ્યામ્
ઇત ઇન્દ્રાણિ પૂર્વામવલોકસ્વ દીનામ્ ૧૭૧
ન વયં પશ્ચિમસ્યાશ્શચિ યાચામનાશમ્
કૃપયૈતાં ચ પૂર્વાં નિહતાશામવાશામ્ ૧૭૨
સકલં વ્યર્થમાસીદયિ દીનેષુ દૃષ્ટા
તવ વિશ્વસ્ય માતઃ કરુણૈકાવશિષ્ટા ૧૭૩
સુરરાજસ્ય કાન્તે નરસિંહસ્ય સૂનુમ્
બલવન્તં કુરુ ત્વં ભરતક્ષ્માવનાય ૧૭૪
રુચિરાભિર્નિજાભિર્ગતિભિર્હર્ષયન્તુ
મરુતાં ભર્તુરેતાસ્તરુણીં હંસમાલાઃ ૧૭૫
ચતુર્થો મધુમતીપાદઃ
દિશિ દિશિ પ્રસરદ્રુચિતમોદમનમ્
હરતુ મે દુરિતં હરિવધૂહસિતમ્ ૧૭૬
હરતુ દુઃખભરપ્રસૃતમશ્રુજલમ્
ભરતભૂસુદૃશો બલજિતો રમણી ૧૭૭
અતિતરાં મહિતા સુરપતેર્વનિતા
કરુણયા કલિતા મમ શચી શરણમ્ ૧૭૮
ત્રિભુવનક્ષિતિરાડ્ભુવનભૂષણભા
અખિલભાસકભા મમ શચી શરણમ્ ૧૭૯
સતતયુક્તસુધીહૃદયદીપકભા
નિખિલપાચકભા મમ શચી શરણમ્ ૧૮૦
રવિવિરોચકભા શશિવિરાજકભા
ભગણશોભકભા મમ શચી શરણમ્ ૧૮૧
ગગનખેલકભા સકલચાલકભા
અભયદાઽતિશુભા મમ શચી શરણમ્ ૧૮૨
રુચિલવઙ્ગતયા યદનઘાંશુનિધેઃ
હૃતતમોભવનં ભવતિ દીપિકયા ૧૮૩
સ્ફુરતિ ચારુ યતઃ કિરણમેકમિતા
જલદસૌધતલે મુહુરિયં ચપલા ૧૮૪
ભવતિ યદ્દ્યુતિતઃ કમપિ ભાગમિતઃ
પવિરરાતિહરઃ પ્રહરણેશપદમ્ ૧૮૫
ભવતિ યત્સુરુચેરણુતમાંશમિતા
યુવમનોમદની સુવદનાસ્મિતભા ૧૮૬
વિતતસૂક્ષ્મતનુર્મહતિ સા ગગને
પરમપૂરુષભા મમ શચી શરણમ્ ૧૮૭
અમરનાથસખી રુચિનિધાનમુખી
અમૃતવર્ષકદૃઙ્ મમ શચી શરણમ્ ૧૮૮
અવિધવા સતતં યુવતિરેવ સદા
અનઘવીરસુતા મમ શચી શરણમ્ ૧૮૯
અમૃતવત્યધરે સુરધરાપતયે
ચરણયોર્ભજતે મમ શચી શરણમ્ ૧૯૦
સ્મિતલવેષુ સિતા શિરસિજેષ્વસિતા
ચરણયોરરુણા બહિરપિ ત્રિગુણા ૧૯૧
કપટચન્દ્રમુખી પ્રકૃતિરિન્દ્રસખી
મૃતિજરારહિતા મમ શચી શરણમ્ ૧૯૨
કૃશતમેપ્યુદરે ત્રિભુવનં દધતી
જનિમતાં જનની મમ શચી શરણમ્ ૧૯૩
સ્થિરતરા મનસિ સ્થિરતમા વચસિ
નયનયોસ્તરલા મમ શચી શરણમ્ ૧૯૪
મૃદુતરા કરયોર્મૃદુતમા વચસિ
ભુજબલે કઠિના મમ શચી શરણમ્ ૧૯૫
મૃદુલબાહુલતાઽપ્યમિતભીમબલા
અસુરદર્પહરી મમ શચી શરણમ્ ૧૯૬
અબલયાઽપિ યયા ન સદૃશોઽસ્તિ બલે
જગતિ કશ્ચિદસૌ મમ શચી શરણમ્ ૧૯૭
અતિતરાં સદયા પદરતે મનુજે
ખલજને પરુષા મમ શચી શરણમ્ ૧૯૮
ગણપતિં કુરુતાદ્ભરતભૂમ્યવને
અમરભૂમિપતેઃ પ્રિયતમા સબલમ્ ૧૯૯
મધુરશબ્દતતીર્મધુમતીરજરા
ગણપતેશ્શૃણુયાત્સુરપતેસ્તરુણી ૨૦૦
દ્વિતીયમૌષ્ણિહં શતકં સમાપ્તમ્
અથ તૃતીયમાનુષ્ટુભં શતકમ્
પ્રથમઃ પથ્યાવક્ત્રપાદઃ
હસિતં તન્મહાશક્તેરસ્માકં હરતુ ભ્રમમ્
યત એવ મહચ્ચિત્રં વિશ્વમેતદ્વિજૃમ્ભતે ૨૦૧
રાજન્તી સર્વભૂતેષુ સર્વાવસ્થાસુ સર્વદા
માતા સર્ગસ્ય ચિત્પાયાત્ પૌલોમી ભારતક્ષિતિમ્ ૨૦૨
ધર્મિજ્ઞાનં વિભોસ્તત્ત્વં ધર્મો જ્ઞાનં સવિત્રિ તે
વ્યવહૃત્યૈ વિભાગોઽયં વસ્ત્વેકં તત્ત્વતો યુવામ્ ૨૦૩
ઇન્દ્રેશવાસુદેવાદ્યૈઃ પદૈઃ સઙ્કીત્ર્યતે વિભુઃ
શચી શિવા મહાલક્ષ્મીપ્રમુખૈર્ભવતી પદૈઃ ૨૦૪
અન્તરં વસ્તુનો જ્ઞાતૃ તચ્છક્તં પરિચક્ષતે
શાખાઃ સમન્તતો જ્ઞાનં શક્તિં સઙ્કીર્તયન્તિ તામ્ ૨૦૫
અન્તરસ્ય ચ શાખાનામૈક્યં નિર્વિષયસ્થિતૌ
વિષયગ્રહણેષ્વેવ સવિભાગઃ પ્રદૃશ્યતે ૨૦૬
સ્યાદેવં વિષયાપેક્ષી શાખાનામન્તરસ્ય ચ
અવિભક્તૈકરૂપાણાં વિભાગો હરિતામિવ ૨૦૭
લક્ષ્યમન્તર્વયં ચક્રે ધ્યાયામો યત્ર નિષ્ઠિતાઃ
અન્તરીભાવતસ્તસ્ય નાન્તરં તુ વિલક્ષણમ્ ૨૦૮
અહઙ્કૃતેર્વયં નાન્યે યત્રાહઙ્કૃતિસમ્ભવઃ
સમ્પદ્યેતાન્તરં તત્ર જ્ઞાનસ્ય જ્ઞાતૃતાવહમ્ ૨૦૯
અન્તરાવર્તભૂયસ્ત્વાદેકસ્મિન્ બોધસાગરે
બોદ્ધારો બહવોઽભૂવન્ વસ્તુ નૈવ તુ ભિદ્યતે ૨૧૦
ચિદ્રૂપે માતરેવં ત્વં પરસ્માદ્બ્રહ્મણો યથા
ન દેવિ દેવતાત્મભ્યો જીવાત્મભ્યશ્ચ ભિદ્યસે ૨૧૧
સમસ્તભૂતબીજાનાં ગૂઢાનામન્તરાત્મનિ
તવોદ્ગારોઽયમાકાશો માતસ્સૂક્ષ્મરજોમયઃ ૨૧૨
ન સર્વભૂતબીજાનિ વસ્તૂનિ સ્યુઃ પૃથક્ પૃથક્
ત્વયિ પ્રાગવિભક્તાનિ બભૂવુરિતિ વિશ્રુતિઃ ૨૧૩
યથામ્બસ્મૃતિબીજાનાં પ્રજ્ઞાયામવિશેષતઃ
તથા સ્યાદ્ભૂતબીજાનામવિભક્ત્સ્થિતિસ્ત્વયિ ૨૧૪
નાણૂનિ ભૂતબીજાનિ પ્રાક્સર્ગાત્ત્વયિ સંસ્થિતૌ
ચિતિશક્ત્યાત્મકાન્યેવ નિરાકારાણિ સર્વથા ૨૧૫
અનાદિ ચેદિદં વિશ્વં સ્મરણ્ણાત્તવ સર્જનમ્
સાદિ ચેદાદિમઃ સર્ગો વક્ત્વ્યસ્તવ કલ્પનાત્ ૨૧૬
વિધાતું શક્નુયાત્સંવિદભૂતસ્યાપિ કલ્પનમ્
કલ્પિતસ્યૈકદા ભૂયઃ સર્જનાવસરે સ્મૃતિઃ ૨૧૭
ચિતેરસ્માદૃશાં વીર્યં સ્વપ્ને ચેદ્વિશ્વકારણમ્
ચિતેસ્સમષ્ટિભૂતાયાઃ પ્રભાવે સંશયઃ કુતઃ ૨૧૮
માતસ્સમષ્ટિચિદ્રૂપે વિભૂતિર્ભુવનં તવ
ઇહ વ્યષ્ટિ શરીરેષુ ભાન્તી તદનુપશ્યસિ ૨૧૯
ત્વં બહ્મ ત્વં પરાશક્તિસ્ત્વં સર્વા અપિ દેવતાઃ
ત્વં જીવાસ્ત્વં જગત્સર્વં ત્વદન્યન્નાસ્તિ કિઞ્ચન ૨૨૦
સતી ચિદમ્બ નૈવ ત્વં ભાવાભાવવિલક્ષણા
શક્તિશક્તિમતોર્ભેદદર્શનાદેષ વિભ્રમઃ ૨૨૧
તવામ્બ જગતધાસ્ય મૃત્તિકાઘટયોરેવ
સમ્બન્ધો વેદિતવ્યઃ સ્યાન્ન રજ્જૌફણિનોરિવ ૨૨૨
ત્વં શક્તિરસ્યવિચ્છિન્ના ભાવૈરાત્મવિભૂતિભિઃ
અન્તરાસ્તુ મહેન્દ્રસ્ય શક્ત્સ્ય પ્રતિબિમ્બવત્ ૨૨૩
શક્તિર્ગણપતેઃ કાયે પ્રવહન્તી સનાતની
ભારતસ્ય ક્રિયાદસ્ય બાધ્યમાનસ્ય રક્ષણમ્ ૨૨૪
ઇમાનિ તત્ત્વવાદીનિ વાસિષ્ઠસ્ય મહામુનેઃ
પથ્યાવક્ત્રણિ સેવન્તામનન્તામભવાં ચિતિમ્ ૨૨૫
દ્વિતીયો માણવકપાદઃ
શક્ત્તમા શક્રવધૂ હાસવિભા મે હરતુ
માનસમાર્ગાવરકં જેતુમશક્યં તિમિરમ્ ૨૨૬
ભારતભૂપદ્મદૃશો દુર્દશયા ક્ષીણતનોઃ
બાષ્પમજસ્રં વિગલદ્વાસવભામા હરતુ ૨૨૭
દણ્ડિતરક્ષોજનતા પણ્ડિતગીતાવનિતા
મણ્ડિતમાહેન્દ્રગૃહા ખણ્ડિતપાપા જયતિ ૨૨૮
સદ્ગુણસમ્પત્કલિતં સર્વશરીરે લલિતમ્
દેવપતેઃ પુણ્યફલં પુષ્યતુ મે બુદ્ધિબલમ્ ૨૨૯
હાસવિશેષૈરલસૈર્દિક્ષુ કિરન્ત્યચ્છસુધામ્
ઇન્દ્રદૃગાનન્દકરી ચન્દ્રમુખી મામવતુ ૨૩૦
પ્રેમતરઙ્ગપ્રતિમૈઃ શીતલદૃષ્ટિપ્રકરૈઃ
શક્રમનોમોહકરી વક્રકચા મામવતુ ૨૩૧
ગાઢરસૈશ્ચારુપદૈર્ગૂઢતરાર્થૈર્વચનૈઃ
કામકરી વૃત્રજિતો હેમતનુર્મામવતુ ૨૩૨
મૃત્યુતનુઃ કાલતનોર્વિશ્વપતેઃ પાર્શ્વચરી
પ્રેતજગદ્રક્ષતિ યા સા તરુણી મામવતુ ૨૩૩
પ્રેતજગત્કેચિદધો લોકમપુણ્યં બ્રુવતે
શીતરુચેર્દેવિ પરો નેતરદેતદ્ વદતિ ૨૩૪
ભૂરિયમુર્વી વસુધા વારિજવૈર્યેષભુવઃ
સ્વર્મહસાં રાશિરસૌ યેષુ નરપ્રેતસુરાઃ ૨૩૫
રાજતશૈલં શશિનઃ કેચિદભિન્નં બ્રુવતે
મૃત્યુયમાવેવ શિવાવીશ્વરિ તેષાં તુ મતે ૨૩૬
રાજતશૈલઃ પિતૃભૂરોષધિરાડેષ યદિ
કાઞ્ચનશૈલઃ સુરભૂર્બન્ધુરસૌ વારિરુહામ્ ૨૩૭
પાવય ભૂમિં દધતઃ પાવકકાયસ્ય વિભોઃ
ભામિનિ ભાવાનુગુણે સેવકમગ્નાયિ તવ ૨૩૮
યસ્ય યમો ભૂતપતિર્બુદ્ધિમતસ્તસ્ય મતે
આગ્નિરુપેન્દ્રો મઘવા કાઞ્ચનગર્ભો ભગવાન્ ૨૩૯
યસ્ય મહાકાલવધૂર્મૃત્યુરપિ દ્વે ન વિદઃ
ત્વં શચિ મેધાઽસ્યમતે પાવકશક્તિઃ કમલા ૨૪૦
નામસુ ભેદોઽસ્તુ ધિયામીશ્વરિ નિષ્કૃષ્ટમિદમ્
સૂર્યધરેન્દુષ્વજરે ત્વં ત્રિતનુર્ભાસિ પરે ૨૪૧
સાત્ત્વિકશક્તિઃ સવિતર્યાદિમરામે ભવસિ
રાજસશક્તિર્ભુવિ નસ્તામસશક્તિઃ શશિનિ ૨૪૨
સર્વગુણા સર્વવિભા સર્વબલા સર્વરસા
સર્વમિદં વ્યાપ્ય જગત્કાપિ વિભાન્તી પરમા ૨૪૩
વ્યોમતનુર્નિર્વપુષો દેવિ સતસ્ત્વં દયિતા
અસ્યભિયુક્તૈર્વિબુધૈરમ્બ મહેશ્વર્યુદિતા ૨૪૪
સા ખલુ માયા પરમા કારણમીશં વદતામ્
સા પ્રકૃતિઃ સાઙ્ખ્યવિદાં સા યમિનાં કુણ્ડલિની ૨૪૫
સા લલિતા પઞ્ચદશીમુત્તમવિદ્યાં જપતામ્
સા ખલુ ચણ્ડી જનની સાધુનવાર્ણં ભજતામ્ ૨૪૬
સા મમ શચ્યાઃ પરમં કારણરૂપં ભવતિ
કાર્યતનુર્દિવિ શક્રં સમ્મદયન્તી લસતિ ૨૪૭
વ્યોમતનોઃ સર્વજગચ્ચાલનસૂત્રં તુ વશે
નિર્વહણે તસ્ય પુનર્દિવ્યતનુસ્ત્રીત્રિતયમ્ ૨૪૮
પાતુમિમં સ્વં વિષયં હન્ત ચિરાન્નિર્વિજયમ્
કિઙ્ક્રમીશે વિભયં માં કુરુ પર્યાર્શિયમ્ ૨૪૯
ચારુપદક્રીડનકૈર્માતરિમૈર્માણવકૈઃ
ચેતસિ તે દેવનુતે પ્રીતિરમોઘા ભવતુ ૨૫૦
તૃતીયશ્ચિત્રપદાપાદઃ
અપ્યલસો હરિદન્તધ્વાન્તતતેરપિ હર્તા
અસ્તુ મમેન્દ્રપુરન્ધ્રી હાસલવઃ શુભકર્તા ૨૫૧
પાહિ પરૈર્હૃતસારાં નેત્રગલજ્જલધારામ્
ભારતભૂમિમનાથાં દેવિ વિધાય સનાથામ્ ૨૫૨
ચાલયતા સુરરાજં પાલયતા ભુવનાનિ
શીલયતા નતરક્ષાં કાલયતા વૃજિનાનિ ૨૫૩
લાલયતા મુનિસઙ્ઘં કીલયતા દિવિ ભદ્રમ્
પાવય માં સકૃદીશે ભાસુરદૃક્પ્રસરેણ ૨૫૪
સર્વરુચામાપિ શાલાં ત્વાં શચિ મઙ્ગલલીલામ્
કાલકચામુત કાલીં પદ્મમુખીમુત પદ્મામ્ ૨૫૫
યઃ સ્મરતિ પ્રતિકલ્યં ભક્તિભરેણ પરેણ
તસ્ય સુરેશ્વરિ સાધોરસ્મિ પદાબ્જભુજિષ્યઃ ૨૫૬
યસ્તવ નામપવિત્રં કીર્તયતે સુકૃતી ના
વાસવસુન્દરિ દાસસ્તચ્ચરણસ્ય સદાઽહમ્ ૨૫૭
પાવકસાગરકોણં યસ્તવ પાવનયન્ત્રમ્
પૂજયતિ પ્રતિઘસ્રં દેવિ ભજામિ તદઙ્ધ્રિમ્ ૨૫૮
યસ્તવ મન્ત્રમુદારપ્રાભવમાગમસારમ્
પાવનિ કૂર્ચમુપાસ્તે તસ્ય નમધ્રણાય ૨૫૯
શાન્તધિયેતરચિન્તાસન્તતિમમ્બ વિધૂય
ચિન્તયતાં તવ પાદાવસ્મિ સતામનુયાયી ૨૬૦
શોધયતાં નિજતત્ત્વં સાધયતાં મહિમાનમ્
ભાવયતાં ચરણં તે દેવિ પદાનુચરોઽહમ્ ૨૬૧
યોઽનુભવેન્નિજદેહે ત્વામજરે પ્રવહન્તીમ્
સન્તતચિન્તનયોગાત્તસ્ય નમામિ પદાબ્જમ્ ૨૬૨
બોધયતે ભવતીં યઃ પ્રાણગતાગતદર્શી
કુણ્ડલિનીં કુલકુણ્ડાત્તં ત્રિદિવેશ્વરિ વન્દે ૨૬૩
લોચનમણ્ડલસૌધાં લોકનમૂલવિચારી
વિન્દતિ યઃ પરમે ત્વાં વન્દનમસ્ય કરોમિ ૨૬૪
માનિનિ જમ્ભજિતસ્ત્વાં માનસમૂલવિતર્કી
વેદહૃદમ્બુરુહે યઃ પાદમમુષ્ય નમામિ ૨૬૫
અન્તરનાદવિમર્શી પશ્યતિ યઃ સુકૃતી તે
વૈભવમમ્બ વિશુદ્ધે તેન વયં પરવન્તઃ ૨૬૬
ઇન્દ્રપદસ્થિતચિત્તશ્શીર્ષસુધારસમત્તઃ
યો ભજતે જનનિ ત્વાં તચ્ચરણં પ્રણમામિ ૨૬૭
રાસનવારિણિ લગ્નઃ સમ્મદવીચિષુ મગ્નઃ
ધ્યાયતિ યઃ પરમે ત્વાં તસ્ય પદં મમ વન્દ્યમ્ ૨૬૮
ત્વાં સદહઞઙ્કૃતિરૂપાં યોગિનુતે હતપાપામ્
ધારયતે હૃદયે યસ્તસ્ય સદાઽસ્મિ વિધેયઃ ૨૬૯
ધૂતસમસ્તવિકલ્પો યસ્તવ પાવનલીલામ્
શોધયતિ સ્વગુહાયાં તસ્ય ભવામ્યનુજીવી ૨૭૦
યો ભજતે નિજદૃટિં રૂપપરિગ્રહણેષુ
કામપિ દેવિ કલાં તે તસ્ય પદે નિપતેયમ્ ૨૭૧
કર્મણિ કર્મણિ ચેષ્ટામમ્બ તવૈવ વિભૂતિમ્
યઃ શિતબુદ્ધિરુપાસ્તે તત્પદમેષ ઉપાસ્તે ૨૭૨
વસ્તુનિ વસ્તુનિ સત્તાં યો ભવતીં સમુપાસ્તે
માતરમુષ્ય વહેયં પાદયુગં શિરસાઽહમ્ ૨૭૩
પાતુમિમં નિજદેશં સર્વદિશાસુ સપાશમ્
અમ્બ વિધાય સમર્થં માં કુરુ દેવિ કૃતાર્થમ્ ૨૭૪
ચિત્રપદાભિરિમાભિશ્ચિત્રવિચિત્રચરિત્રા
સમ્મદમેતુ મઘોનઃ પ્રાણસખી મૃગનેત્ર ૨૭૫
ચતુર્થો નારાચિકાપાદઃ
અન્તર્વિધુન્વતા તમઃ પ્રાણસ્ય તન્વતા બલમ્
મન્દસ્મિતેન દેવતારાજ્ઞી કરોતુ મે શિવમ્ ૨૭૬
ઉત્થાપ્ય પુણ્યસઞ્ચયં સમ્મદ્ર્ય પાપસંહતિમ્
સા ભારતસ્ય સમ્પદે ભૂયાદ્બલારિભામિની ૨૭૭
લીલાસખી બિડૌજસસ્સ્વર્વાટિકાસુ ખેલને
પીયુષભાનુજિન્મુખી દેવી શચી વિરાજતે ૨૭૮
પક્ષઃ પરો મરુત્વતો રક્ષઃ પ્રવીરમર્દને
ભામાલિ ભાસુરાનના દેવી શચી વિરાજતે ૨૭૯
ભીતિં નિશાટસંહતેઃ પ્રીતિં સુપર્વણાં તતેઃ
જ્યાટઙ્કૃતૈર્વિતન્વતી દેવી શચી વિરાજતે ૨૮૦
દેવેન્દ્રશક્તિધારિણી શત્રુપ્રસક્તિવારિણી
મૌનીન્દ્રમુક્તિકારિણી દેવી શચી ગતિર્મમ ૨૮૧
સન્નસ્વદેશદર્શનાદ્ભિન્નસ્વજાતિવીક્ષણાત્
ખિન્નસ્ય સંશ્રિતાવની દેવી શચી ગતિર્મમ ૨૮૨
સઙ્ઘે સહસ્રધાકૃતે દેશે નિકૃષ્ટતાં ગતે
શોકાકુલસ્ય લોકભૃદ્દેવી શચી ગતિર્મમ ૨૮૩
સા સંવિદોઽધિદેવતા તસ્યાસ્સ્વરઃ પરો વશે
સર્વં વિધીયતે તયા તસ્માત્પરા મતા શચી ૨૮૪
સા યાતિ સૂક્ષ્મમપ્યલં સા ભાતિ સર્વવસ્તુષુ
સા માતિ ખં ચ નિસ્તુલં તસ્માત્પરા મતા શચી ૨૮૫
સા સર્વલોકનાયિકા સા સર્વગોલપાલિકા
સા સર્વદેહચાલિકા તસ્માત્પરા મતા શચી ૨૮૬
યસ્યાઃ કૃતિર્જગત્ત્રયં યા તદ્બિભર્તિ લીલયા
યસ્યાં પ્રયાતિ તલ્લયં સા વિશ્વનાયિકા શચી ૨૮૭
ધર્મે પરિક્ષયં ગતે યાઽવિશ્ય નિર્મલં જનમ્
તદ્રક્ષણાય જાયતે સા વિશ્વનાયિકા શચી ૨૮૮
વેધા ઋતસ્ય યોદિતા મન્ત્રેણ સત્યવાદિના
બાધાનિવારિણી સતાં સા વિશ્વનાયિકા શચી ૨૮૯
યજ્ઞો યયા વિનીયતે યુદ્ધં તથા પૃથગ્વિધભ્
તાં દેવરાજમોહિનીં નારીં નુમઃ પુરાતનીમ્ ૨૯૦
યસ્યાસ્સુતો વૃષાકપિર્દેવોઽસતાં પ્રશાસિતા
તાં સર્વદા સુવાસિનીં નારીં નુમઃ પુરાતનીમ્ ૨૯૧
યસ્યાસ્સમા નિતમ્બિની કાચિન્ન વિષ્ટપત્રયે
તાં નિત્યચારુ યૌવનાં નારીં નુમઃ પુરાતનીમ્ ૨૯૨
યચ્ચારુતા ન દૃશ્યતે મન્દારપલ્લવેષ્વપિ
તત્સુન્દરાચ્ચસુન્દરં શચ્યાઃ પદામ્બુજં શ્રયે ૨૯૩
યસ્ય પ્રભા ન વિદ્યતે માણિક્યતલ્લ્જેષ્વપિ
તદ્ભાસુરાચ્ચ ભાસુરં શચ્યાઃ પદામ્બુજં શ્રયે ૨૯૪
ન સ્યાદઘૈસ્તિરસ્કૃતો યચ્ચિન્તકો નરઃ કૃતી
તત્પાવનાચ્ચ પાવનં શચ્યાઃ પદામ્બુજં શ્રયે ૨૯૫
રાજન્નખેન્દુભાનુભિસ્સર્વં તમો વિધુન્વતે
બૃન્દારકેન્દ્રસુન્દરીપાદામ્બુજાય મઙ્ગલમ્ ૨૯૬
ગીર્વાણમૌલિરીભા સઙ્ક્ષાલિતાય દીપ્યતે
સ્વર્ગાધિનાથભામિનિપાદામ્બુજાય મઙ્ગલમ્ ૨૯૭
બાલાર્કબિમ્બરોચિષે યોગીન્દ્ર હૃદ્ગુહાજુષે
પાકારિજીવિતેશ્વરીપાદામ્બુજાય મઙ્ગલમ્ ૨૯૮
આત્મીયદેશરક્ષણે શક્તં કરોતુ સર્વથા
પાપદ્વિષાં પ્રિયઙ્કરી વાસિષ્ઠમિન્દ્રસુન્દરી ૨૯૯
વાસિષ્ઠવાક્પ્રદીપ્તિર્ભિનારાચિકાભિરીશ્વરી
ગીર્વાણચક્રવર્તિનસ્સમ્મોદમેતુ સુન્દરી ૩૦૦
તૃતીયમાનુષ્ટુભં શતકં સમાપ્તમ્
અથ ચતુર્થં બાર્હતં શતકમ્
પ્રથમો હલમુખીપાદઃ
ક્ષીરવીચિપૃષતસિતં પ્રેમધારિદરહસિતમ્
નાકરાજનલિનદૃશઃ શોકહારિ મમ ભવતુ ૩૦૧
અધ્વનો ગલિતચરણામધ્વરક્ષિતિમવિભવામ્
આદધાતુ પથિ વિમલે વૈભવે ચ હરિતરુણી ૩૦૨
બ્રહ્મણશ્વિતિરથનભઃ કાયભાગવગતિમતી
યા તદા પૃથગિવ બભૌ ધર્મિતાં સ્વયમપિ ગતા ૩૦૩
મોદબોધવિભવકૃતપ્રાકૃતેતરવરતનુ
સર્વસદ્ગુણગણયુતં યા સસર્જ સુરમિથુનમ્ ૩૦૪
પુંસિ દીપ્તવપુષિ તયોર્બ્રહ્મ સોઽહમિતિ લસતિ
યોષિતે કિલ ધિયમદાત્તસ્ય શક્તિરહમિતિ યા ૩૦૫
યાભિમાનબલવશતસ્તામુદારતમવિભવામ્
મન્યતે સ્મ વરવનિતાં સ્વાધિદૈવિકતનુરિતિ ૩૦૬
આદિપુંસિ ગગનતનુર્યા તનોતિ તનુજમતિમ્
આદધાતિ યુવતિતનુઃ પ્રાણનાયક ઇતિ રતિમ્ ૩૦૭
તાં પરાં ભુવનજનનીં સર્વપાપતતિશમનીમ્
તન્ત્રજાલવિનુતબલાં સ્તૌમિ સર્વમતિમમલામ્ ૩૦૮
સા મતિર્વિદિતવિષયા સા રુચિર્વિતતવિષયા
સા રતિર્વિનુતવિષયા સા સ્થિતિર્વિધુતવિષયા ૩૦૯
યત્ર યત્ર મમ ધિષણા ગ્રાહ્યવસ્તુનિ ગતિમતી
તત્ર તત્ર વિલસતુ સા સર્વગા સકલચરિતા ૩૧૦
દુર્બલસ્ય બહુલબલૈરર્દિતસ્ય જગતિ ખલૈઃ
આદિદેવિ તવ ચરણં પાવનં ભવતિ શરણમ્ ૩૧૧
પૌરુષે ભવતિ વિફલે ત્વામયં જનનિ ભજતે
કિં નુતે યદિ વિમુખતા પૌરુષં કથય ભજતામ્ ૩૧૨
કર્તુરપ્રતિહતગિરઃ પૌરુષાચ્છતગુણમિદમ્
ધ્યાતુરસ્ખલિતમનસઃ કાર્યસિદ્ધિષુ તવ પદમ્ ૩૧૩
પૌરુષં વિદિતમફલં કાઙ્ક્ષિતે મમ સુરનુતે
શક્તમીદૃશિ તુ સમયે શ્રદ્દધામિ તવ ચરણમ્ ૩૧૪
પૌરુષં યદિ કવિમતં દેવિ તેઽપિ પદભજનમ્
દૈવવાદપટુવચસો મૂકતૈવ મમ શરણમ્ ૩૧૫
પૂર્વજન્મસુકૃતફલં દૈવમમ્બ નિગદતિ યઃ
ભક્તિપૌરુષવિરહિણો ભાવિતસ્ય રિપુદયિતમ્ ૩૧૬
ઉદ્યતસ્ય તવ ચરણં સંશ્રિતસ્ય ચ સુરનુતે
પૂર્વજન્મસુકૃતબલશ્રદ્ધયાઽલમહૃદયયા ૩૧૭
અસ્તુ પૂર્વભવસુકૃતં માસ્તુ વા જનનિ જગતામ્
સામ્પ્રતં તવ પદયુગં સંશ્રિતોસ્મ્યવ વિસૃજ વા ૩૧૮
નાસ્તિ સમ્પ્રતિ કિમપિ કિં ભૂતિમાપ્સ્યસિ કિમુ તતઃ
અન્યજન્મનિ વિતરણે કા પ્રસક્તિરમરનુતે ૩૧૯
નાન્યજન્મનિ બહુશિવં નાપિ નાકભુવનસુખમ્
કામયે ફલમભિમતં દેહિ સમ્પ્રતિ શચિ ન વા ૩૨૦
મેદિની ભુવનતલતો નિસ્તુલાદુત ગગનતઃ
ભાસ્કરાદુત રુચિનિધેઃ કામ્યમીશ્વરિ વિતર મે ૩૨૧
વિષ્ટપે ક્વચન વરદે દાતુમીશ્વરિ કૃતમતિમ્
વારયેજ્જનનિ ન પરસ્ત્વાં જનસ્તવ પતિમિવ ૩૨૨
દેહિ વા ભગવતિ ન વા પાહિ વા શશિમુખિ ન વા
પાવનં તવ પદયુગં ન ત્યજાનિ હરિદયિતે ૩૨૩
રક્ષિતું ભરતવિષયં શક્તમિન્દ્રહૃદયસખી
ચન્દ્રબિમ્બરુચિરમુખી સા ક્રિયાદ્ભુવિ ગણપતિમ્ ૩૨૪
સમ્પ્રહૃષ્યતુ હલમુખીર્ભાસ્વતીર્ગણપતિમુનેઃ
સા નિશમ્ય સુરનૃપતેર્મોહિની સદયહૃદયા ૩૨૫
દ્વિતીયો ભુજગશિશુભૃતાપાદઃ
મરુદધિપમનોનાથા મધુકરચિકુરાસ્માકમ્
વૃજિનવિધુતિમાધત્તાં વિશદહસિતલેશેન ૩૨૬
અખિલનિગમસિદ્ધાન્તો બહુમુનિવરબુદ્ધાન્તઃ
સુરપરિબૃઢશુદ્ધાન્તો ભરતવસુમતીમવ્યાત્ ૩૨૭
ભગવતિ ભવતીચેતો રતિકૃદભવદિન્દ્રસ્ય
સ તવ જનનિ સન્તાનદ્રુમવનમતિરમ્યં વામ્ ૩૨૮
પતિરખિલયુવશ્રેષ્ઠઃ કિમપિ યુવતિરત્નં ત્વમ્
વનવિહૃતિષુ વાં ચેતો હરણમભવદન્યોન્યમ્ ૩૨૯
મધુરલલિતગમ્ભીરૈસ્તવ હૃદયમુપન્યાસૈઃ
વનવિહરણલીલાયામહરદયિ દિવો રાજા ૩૩૦
કલવચનવિલાસેન પ્રગુણમુખવિકાસેન
ભુવનમપિમનોઽહાર્ષીર્જનનિ વનવિહારે ત્વમ્ ૩૩૧
કનકકમલકાન્તાસ્યા ધવલકિરણવક્ત્રેણ
અસિતજલજપત્રાક્ષી સિતનલિનદલાક્ષેણ ૩૩૨
અલિચયનિજધમ્મિલ્લા નવજલધરકેશેન
મૃદુલતમભુજાવલ્લી દૃઢતમભુજદણ્ડેન ૩૩૩
અમૃતનિલયબિમ્બોષ્ઠી રુચિરધવલદન્તેન
અતિમુકુરલસદ્ગણ્ડા વિકચજલજહસ્તેન ૩૩૪
યુવતિરતિતરાં રમ્યા સુલલિતવપુષા યૂના
ભગવતિ શચિ યુક્તા ત્વં ત્રિભુવનવિભુનેન્દ્રેણ ૩૩૫
વિકચકુસુમમન્દારદ્રષ્ઠ્હમવનવરવાટીષુ
વિહરણમયિ કુર્વાણા મનસિજમનુગૃહ્ણાસિ ૩૩૬
તવ શચિ ચિકુરે રાજત્કુસુમમમરવૃક્ષસ્ય
નવ સલિલભૃતો મધ્યે સ્ફુરદિવ નવનક્ષત્રમ્ ૩૩૭
અભજતતરુરૌદાર્યં વિભવમપિ મહાન્તં સઃ
વિકચકુસુમસમ્પત્ત્યા ભગવતિ ભજતે યસ્ત્વામ્ ૩૩૮
અમરનૃપતિના સાકં કુસુમિતવનવાટીષુ
ભગવતિ તવ વિશ્રાન્તેઃ સ જયતિ સમયઃ કોઽપિ ૩૩૯
અમરતરુવરચ્છાયાસ્વયિ મુહુરુપવિશ્ય ત્વમ્
શચિ કૃતિજનરક્ષાયૈ મનસિ વિતનુષુ ચર્ચામ્ ૩૪૦
કિમુ વસુ વિતરાણ્યસ્મૈ સુમતિમુત દદાન્યસ્મૈ
ક્ષમતમમથવાઽમુષ્મિન્ બલમુરુઘટયાનીતિ ૩૪૧
હરિતરુણિ કદા વામે વિનમદવનચર્ચાસુ
સ્મરણસમય આયાસ્યત્યમલહૃદયરઙ્ગે તે ૩૪૨
શચિ ભગવતિ સાક્ષાત્તે ચરણકમલદાસોઽહમ્
ઇહ તુ વસુમતીલોકે સ્મર મમ વિષયં પૂર્વમ્ ૩૪૩
ન યદિ તવ મનો દાતું સ્વયમયિ લઘવે મહ્યમ્
ઉપવનતરુકર્ણે વા વદ મદભિમતં કર્તુમ્ ૩૪૪
નિજવિષયમતિશ્રેષ્ઠં વિપદિ નિપતિતં ત્રાતુમ્
સ્વકુલમપિ સદધ્વાનં ગમયિતુમપથે શ્રાન્તમ્ ૩૪૫
અખિલભુવનસમ્રાજઃ પ્રિયતરુણિ ભવત્યૈવ
મતિબલપરિપૂર્ણોએઽયં ગણપતિમુનિરાધેયઃ ૩૪૬
ન કિમુ ભવતિ શં દેશે ગતવતિ કલુષે કાલે
તવ ભજનમઘં સદ્યો હરિહયલલને જેતુમ્ ૩૪૭
ત્રિજગતિ સકલં યસ્ય પ્રભવતિ પૃથુલે હસ્તે
સ બહુલમહિમા કાલો મમ જનનિ વિભૂતિસ્તે ૩૪૮
અનવરતગલદ્બાષ્પાં ભરતવસુમતીં ત્રાતુમ્
વિતરતુ દયિતાજિષ્ણોર્ગણપતિમુનયે શક્તિમ્ ૩૪૯
ભુજગશિશુભૃતા એતાઃ કવિગણપતિના ગીતાઃ
વિદધતુ મુદિતાં દેવીં વિબુધપતિમનોનાથામ્ ૩૫૦
તૃતીયો મણિમધ્યાપાદઃ
મઙ્ગલધાયી પુણ્યવતાં મન્મથધાયી દેવપતેઃ
વિષ્ટપરાજ્ઞીહાસલવો વિક્રમધાયી મે ભવતુ ૩૫૧
દૃષ્ટિવિશેષૈશ્શીતતરૈર્ભૂર્યનુકમ્પૈઃ પુણ્યતમૈઃ
ભારતભૂમેસ્તાપતતિં વાસવકાન્તા સા હરતુ ૩૫૨
પાવનદૃષ્ટિર્યોગિહિતા ભાસુરદૃષ્ટિર્દેવહિતા
શીતલદૃષ્ટિર્ભક્થિતા મોહનદૃષ્ટિશ્શક્રહિતા ૩૫૩
ઉજ્જ્વલવાણી વિક્રમદા વત્સલવાણી સાન્ત્વનદા
મઞ્જુલવાણી સમ્મદદા પન્નગવેણી સા જયતિ ૩૫૪
શારદરાકાચન્દ્રમુખી તોયદમાલાકારકચા
મેચકપાથોજાતદલશ્રીહરચક્ષુર્વાસિકૃપા ૩૫૫
ચમ્પકનાસાગણ્ડવિભામણ્ડલખેલત્કુણ્ડલભા
ઉક્તિષુ વીણાબિમ્બફલશ્રીહરદન્તપ્રાવરણા ૩૫૬
નિર્મલહાસક્ષાલિતદિગ્ભિત્તિસમૂહા મોહહરી
કાઞ્ચનમાલાશોભિગલા સન્તતલીલા બુદ્ધિકલા ૩૫૭
વિષ્ટપધારિ ક્ષીરધરસ્વર્ણઘટશ્રીહારિકુચા
કાપિ બિડૌજો રાજ્યરમા ચેતસિ માતા ભાતુ મમ ૩૫૮
દિવ્યસુધોર્મિર્ભક્તિમતાં પાવકકીલા પાપકૃતામ્
વ્યોમ્નિ ચરન્તી શક્રસખી શક્તિરમોઘા મામવતુ ૩૫૯
સમ્મદયન્તી સર્વતનું સંશમયન્તી પાપતતિમ્
સમ્પ્રથયન્તી સર્વમતીસ્સઙ્ઘટયન્તી પ્રાણબલમ્ ૩૬૦
નિર્જિતશોકાધૂતતમાસ્સંસ્કૃતચિત્તા શુદ્ધતમા
વાસવશક્તેર્વ્યોમજુષઃ કાચન વીચિર્માં વિશતુ ૩૬૧
ઉદ્ગતકીલં મૂલમિદં ભિન્નકપાલં શીર્ષમિદમ્
ઉજ્ઝિત મોહં ચિત્તમિદં વાસવશક્તિર્માં વિશતુ ૩૬૨
દૃશ્યવિરક્તં ચક્ષુરિદં ભોગવિરક્તં કાયમિદમ્
ધ્યેયવિરક્તા બુદ્ધિરિયં વાસવશક્તિર્માં વિશતુ ૩૬૩
ચક્ષુરદૃશ્યજ્વાલભૃતા વ્યાપકખેન પ્રોલ્લસતા
વિસ્મૃતકાયં સન્દધતી વાસવશક્તિર્માં વિશતુ ૩૬૪
કાયમજસ્રં વજ્રદૃઢં બુદ્ધિમશેષે વ્યાપ્તિમતીમ્
દિવ્યતરઙ્ગૈરાદધતી વાસવશક્તિર્માં વિશતુ ૩૬૫
મૂર્ધ્નિ પતન્તી વ્યોમતલાત્સન્તતમન્તઃ સર્વતનૌ
સમ્પ્રવહન્તી દિવ્યઝરૈર્વાસવશક્તિર્માં વિશતુ ૩૬૬
ભાનુવિભાયાં ભાસકતા દિવ્યસુધાયાં મોદકતા
કાઽપિ સુરાયાં માદકતા વાસવશક્ત્યાં તત્ત્રિતયમ્ ૩૬૭
ભાસયતાન્મે સમ્યગૃતં મોદમુદારં પુષ્યતુ મે
સાધુમદં મે વર્ધયતાન્નિર્જરભર્તુઃ શક્તિરજા ૩૬૮
કશ્ચન શક્તિં યોગબલાદાત્મશરીરે વર્ધયતિ
એષિ વિવૃદ્ધિં ભક્તિમતઃ કસ્યચિદેશે ત્વં વપુષિ ૩૬૯
સાધયતાં વા યોગવિદાં કીર્તયતાં વા ભક્તિમતામ્
વત્સલભાવાદિન્દ્રવધૂર્ગર્ભભુવાં વા યાતિ વશમ્ ૩૭૦
યસ્ય સમાધિઃ કોઽપિ ભવેદાત્મમનીષા તસ્ય બલમ્
યસ્તવ પાદામ્ભોજરતસ્તસ્ય ખલુ ત્વં દેવિ બલમ્ ૩૭૧
દ્વાદશવર્ષી યોગબલાદ્યા ખલુ શક્તિર્યુક્તમતેઃ
તાં શચિ દાતું ભક્તિમતે કાપિ ઘટી તે માતરલમ્ ૩૭૨
યોગબલાદ્વા ધ્યાનકૃતો ભક્તિબલાદ્વા કીર્તયતઃ
યાતુ વિવૃદ્ધિં વિશ્વહિતા વાસવશક્તિર્મે વપુષિ ૩૭૩
દુઃખિતમેતચ્છ્રીરહિતં ભારતખણ્ડં સર્વહિતમ્
ત્રાતુમધીશા સ્વર્જગતઃ સુક્ષમબુદ્ધિં માં કુરુતામ્ ૩૭૪
સન્તુ કવીનાં ભર્તુરિમે સુન્દરબન્ધાશુદ્ધતમાઃ
સન્મણિમધ્યાઃ સ્વર્જગતો રાજમહિષ્યાઃ કર્ણસુખાઃ ૩૭૫
ચતુર્થો માત્રસમકપાદઃ
શુક્લ્જ્યોતિઃ પ્રકરૈર્વ્યાપ્તઃ સૂક્ષ્મોઽપ્યન્તાન્ હરિતાં હાસઃ
જિષ્ણોઃ પત્ન્યાસ્તિમિરારાતિર્નિશ્શેષં મે હરતાન્મોહમ્ ૩૭૬
શૃણ્વત્કર્ણા સદયાલોકા લોકેન્દ્રસ્ય પ્રિયનારી સા
નિત્યાક્રોશૈર્વિરુદદ્વાણીં પાયાદેતાં ભરતક્ષોણીમ્ ૩૭૭
દેવેષુ સ્વઃ પરિદીપ્યન્તી ભૂતેષ્વિન્દૌ પરિખેલન્તી
શક્તિર્જિષ્ણોર્દ્વપદાં સઙ્ઘે હન્તૈતસ્યાં ભુવિ નિદ્રાતિ ૩૭૮
નિદ્રાણાયા અપિ તે જ્યોતિર્ગન્ધાદેતે ધરણીલોકે
મર્ત્યાઃ કિઞ્ચત્પ્રભવન્તીશે ત્વં બુદ્ધા ચેત્કિમુ વક્ત્વ્યમ્ ૩૭૯
મેઘચ્છન્નોઽપ્યરુણસ્તેજો દદ્યાદેવ પ્રમદે જિષ્ણોઃ
અત્રસ્થાનાં ભવતીગ્રન્થિચ્છન્નાપ્યેવં કુરુતે પ્રજ્ઞામ્ ૩૮૦
ધ્યાયામો યત્કથયામો યત્પશ્યામો યચ્છૃણુમો યચ્ચ
જીવામો વા તદિદં સર્વં નિદ્રાણાયા અપિ તે ભાસા ૩૮૧
નાડીબન્ધાદભિમાનાચ્ચ ચ્છન્ના માતર્ભવતી દેહે
એકાપાયાદિતરો નશ્યેત્તસ્માદ્દ્વેધા તપસઃ પન્થાઃ ૩૮૨
ચિત્તં યસ્ય સ્વજનિસ્થાને પ્રજ્ઞા બાહ્યા ન ભવેદ્યસ્ય
આધત્સે ત્વં ભુવનાધીશે બુદ્ધા ક્રીડાં હૃદયે તસ્ય ૩૮૩
વાણી યસ્ય સ્વજનિસ્થાને દૂરે કૃત્વા મનસા સઙ્ગમ્
માતસ્તત્ર પ્રતિબુદ્ધા ત્વં શ્લોકૈર્લોકં કુરુષે બુદ્ધમ્ ૩૮૪
હિત્વા દૃશ્યાન્યતિસૂક્ષ્માયાં ચક્ષુર્યસ્ય સ્વમહો વૃત્તૌ
વિશ્વાઽલિપ્તા જગતાં માતર્જાગ્રત્યસ્મિન્નચલા ભાસિ ૩૮૫
શૃણ્વન્ કર્ણો દયિતે જિષ્ણોરન્તઃ શબ્દં ધ્રિયતે યસ્ય
બુદ્ધા ભૂત્વા વિયતા સાધોરેકીભાવં કુરુષે તસ્ય ૩૮૬
યાતાયાતં સતતં પશ્યેદ્યઃ પ્રાણસ્ય પ્રયતો મર્ત્યઃ
વિશ્વસ્યેષ્ટાં તનુષે ક્રીડાં તસ્મિન્ બુદ્ધા તરુણીન્દ્રસ્ય ૩૮૭
સ્વાન્તં યસ્ય પ્રભવેત્કાર્યેષ્વમ્બૈતસ્મિન્નયિ નિદ્રાસિ
આત્મા યસ્ય પ્રભવેત્કાર્યેષ્વમ્બૈતસ્મિન્નયિ જાગર્ષિ ૩૮૮
યસ્યાઽહન્તા ભવતિ સ્વાન્તે તસ્ય સ્વાન્તં પ્રભવેત્કર્તુમ્
યસ્યાઽહન્તા ભવતિ સ્વાત્મન્યાત્મા તસ્ય પ્રભવેત્કર્તુમ્ ૩૮૯
સ્વાન્તં યસ્ય પ્રભવેત્કર્તું તત્કર્માલ્પં ભવતિ વ્યષ્ટેઃ
આત્મા યસ્ય પ્રભવેત્કર્તું તચ્છ્લાધ્યં તે બલજિત્કાન્તે ૩૯૦
એતત્સ્વાન્તં હૃદયાજ્જાતં શીર્ષે વાસં પૃથગાધાય
હાર્દાહન્તાં સ્વયમાક્રમ્ય ભ્રાન્તાનસ્માન્ કુરુતે માતઃ ૩૯૧
અસ્માકં ભોઃ કુરુતે બાધામસ્મજ્યોતિર્જનનિ પ્રાપ્ય
સ્વાન્તે નૈતત્કૃતમન્યાય્યં કાન્તે જિષ્ણોઃ શૃણુ રાજ્ઞિ ત્વમ્ ૩૯૨
સ્વાન્તે તેજો હૃદયાદાયાચ્ચન્દ્રે તેજો દિનભર્તુર્વા
આશ્રાન્તં યો મનુતે ધીરસ્તસ્ય સ્વાન્તં હૃદિ લીનં સ્યાત્ ૩૯૩
મૂલાન્વેષિસ્ફુરદાવૃત્તં નીચૈરાયાત્કબલીકૃત્ય
જાનન્ત્યેકા હૃદયસ્થાને યુઞ્જાનાનાં જ્વલસીશાને ૩૯૪
શીર્ષે ચન્દ્રો હૃદયે ભાનુર્નેત્રો વિદ્યુત્કુલકુણ્ડેઽગ્નિઃ
સમ્પદ્યન્તે મહસાઽશૈસ્તે જિષ્ણોઃ કાન્તે સુતરાં શસ્તે ૩૯૫
મન્વાનાં ત્વાં શિરસિ સ્થાને પશ્યન્તીં વા નયનસ્થાને
ચેતન્તીં વા હૃદયસ્થાને રાજન્તીં વા જ્વલનસ્થાને ૩૯૬
યો ના ધ્યાયેજ્જગતાં માતઃ કશ્ચિચ્છ્રેયાનવનૌ નાઽતઃ
પૂતં વન્દ્યં ચરણં તસ્ય શ્રેષ્ઠં વર્ણ્યં ચરિતં તસ્ય ૩૯૭
દોગ્ધ્રીં માયાં રસનાં વા યો મન્ત્રં માતર્જપતિ પ્રાજ્ઞઃ
સોઽયં પાત્રં કરુણાયાસ્તે સર્વં કામ્યં લભતે હસ્તે ૩૯૮
છિન્નાં ભિન્નાં સુતરાં સન્નામન્નાભાવાદભિતઃ ખિન્નામ્
એતાં પાતું ભરતક્ષોણીં જાયે જિષ્ણોઃ કુરુ માં શક્તમ્ ૩૯૯
ક્લૃપ્તૈઃ સમ્યગ્બૃહતીછન્દસ્યેતૈર્માત્રસમકૈર્વૃત્તૈઃ
કર્ણાધ્વાનં પ્રવિશદ્ભિસ્સા પૌલોમ્યમ્બાપરિતૃપ્તાસ્તુ ૪૦૦
ચતુર્થં બાર્હતં શતકં સમાપ્તમ્
અથ પઞ્ચમં પાઙ્ક્તં શતકમ્
પ્રથમો મયૂરસારિણીપાદઃ
પ્રેમવાસભૂમિરચ્છભાવસ્થાનમાનમજ્જનાઘહા મે
ઇન્દ્રસુન્દરી મુખાબ્જભાસી મન્દહાસ આપદં ધુનોતુ ૪૦૧
વીક્ષિતૈઃ કૃપાન્વિતૈર્હરન્તી પાતકાનિ મઙ્ગલં ભણન્તી
જમ્ભભેદિજીવિતેશ્વરી મે જન્મદેશમુજ્જ્વલં કરોતુ ૪૦૨
અમ્બરં ચ દેવતાનતભ્રૂરમ્બ તે તનુદ્વયં યદુક્તમ્
આદિમા તયોર્વૃષાકપિં તં દેવ્યજીજનત્પરા જયન્તમ્ ૪૦૩
એતમેવ દેવિ લોકબન્ધું સૂરયો વૃષાકપિં ભણન્તિ
વર્ષહેતુદીધિતિર્વૃષાયં કં પિબન્ કરૈઃ કપિર્નિરુક્ત્ઃ ૪૦૪
કેચિદિન્દ્રનારિ ચન્દ્રરેખાશેખરં વૃષાકપિં ગદન્તિ
પણ્ડિતાઃ પરે તુ શેષશય્યાશાયિનં વૃષાકપિં તમાહુઃ ૪૦૫
બ્રહ્મણસ્પતિં તુ વૈદ્યુતાગ્નેરંશજં મરુદ્ગણેષુ મુખ્યમ્
વિશ્વરાજ્ઞિ વિઘ્નરાજમેકે વિશ્રુતં વૃષાકપિં વદન્તિ ૪૦૬
ભાસ્કરશ્ચ શઙ્ક્રશ્ચ માતર્માધવશ્ચ મન્ત્રનાયકશ્ચ
આત્મજેષુ તે ન સન્તિ નાન્તર્વ્યાપકાન્તરિક્ષવિગ્રહાયાઃ ૪૦૭
વાસવોઽપિ દેવિ દેવતાત્મા વલ્લભસ્તવ ચ્છલાઙ્ગનાયાઃ
આત્મજાત એવ કીર્તનીયો દેવતાપથેન દેહવત્યાઃ ૪૦૮
સાશવસ્યુદીરિતાસિ ધીરૈર્દેહિની વિહાયસેન્દ્રસૂસ્ત્વમ્
લિઙ્ગભેદતોઽનુરૂપતસ્તત્કીર્તનં શવો હિ શક્તિવાચિ ૪૦૯
નાદિતિર્વિભિદ્યતે શવસ્યાસ્સર્વદેવ માતરં વિદુર્યામ્
સા મરુત્પ્રસૂરભાણિ પૃશ્નિઃ સાપિ ભિદ્યતે તતો ન દેવ્યાઃ ૪૧૦
શક્તિરેવ સા ન્યગાદિ પૃશ્નિશ્શક્તિરેવ સાઽદિતિર્ન્યભાણિ
શક્તિરેવ સાઽભ્યધાયિ ભદ્રા શક્તિરેવ સા શવસ્યવાદિ ૪૧૧
વિજ્જનઃ પ્રકૃષ્ટશક્તિભાગં શબ્દમેવ પૃશ્નિમાહ ધેનુમ્
યા પરૈર્બુધૈરભાણિ ગૌરી માનવેષ્ટભાષયૈવ નારી ૪૧૨
વ્યાપકત્વકલ્પિતં વિશાલં દેશમેવ શક્તિભાગમાહુઃ
બુદ્ધિશાલિનોઽદિતિં સવિત્રીં યા પરૈર્વિચક્ષણૈઃ સ્મૃતા દ્યૌઃ ૪૧૩
નિત્યમોદરૂપશક્તિભાગં પણ્ડિતાઃ પ્રકીર્તયન્તિ ભદ્રામ્
ઉક્તિભેદચાતુરીપ્રલુબ્ધાઃ સૂરયઃ પરે શિવાં જુગુર્યામ્ ૪૧૪
વીર્યરૂપભાગ એવ ગણ્યઃ પણ્ડિતૈઃ શવસ્યભાણિ શક્તેઃ
ઓજસો ન સોઽતિરિચ્ય તેંશો ભિદ્યતે તતો ન વજ્રમુગ્રમ્ ૪૧૫
વજ્રમેવ ભાષયા પરેષામુચ્યતે પ્રચણ્ડચણ્ડિકેતિ
યદ્વિભૂતિલેશચુમ્બિતાત્મા જીયતે ન કેનચિત્પૃથિવ્યામ્ ૪૧૬
સર્વતો ગતિશ્શચીતિ શક્તિઃ કીર્ત્યતે બુધૈરુદારકીર્તિઃ
સર્વભાગવાચકં પદં તત્ પાવનં પુરાતનં પ્રિયં નઃ ૪૧૭
યશ્શચીતિ નામકીર્તયેન્ના પુષ્કરેણ તે શરીરવત્યાઃ
દિવ્યસુન્દરી તનોરુતાહો તં પરાભવેન્ન દેવિ પાપમ્ ૪૧૮
અમ્બરં વરં તવામ્બ કાયં યસ્સદા વિલોકયન્નૌપાસ્તે
લોકજાલચક્રવર્તિજાયે તં પરાભવેન્ન દેવિ પાપમ્ ૪૧૯
પૂર્ણિમાસુધાંશુબિમ્બવક્ત્રં ફુર્વિંઆરિજાતપત્રનેત્રમ્
શુભ્રતાનિધાનમન્દહાસં કાલમેઘકલ્પકેશપાશમ્ ૪૨૦
રત્ન્દર્પણાભમઞ્જુગણ્ડં ચમ્પકપ્રસૂનચારુનાસમ્
કુન્દકુડ્મલાભકાન્તદન્તં કલ્પપર્વિંઆભદન્તચેલમ્ ૪૨૧
સદ્વરાભયપ્રદાયિહસ્તં સર્વદેવવન્દ્યપાદકઞ્જમ્
દિવ્યરત્નભૂષણૈરનર્ઘૈર્ભૂષિતં કનત્સુવર્ણવર્ણમ્ ૪૨૨
દિવ્યશુક્લ્વસ્ત્રયુગ્મધારિ સ્વર્ગસાર્વભોમનેત્રહારિ
યઃ સ્મરેદ્વરાઙ્ગનાવપુસ્તે તં પરાભવેન્ન દેવિ પાપમ્ ૪૨૩
ભારતક્ષિતેરિદં જનન્યાશ્શોકજન્યબાષ્પવારિ હર્તુમ્
દેહિ શક્તિમાશ્રિતાય મહ્યં પાહિ ધર્મમિન્દ્રચિત્તનાથે ૪૨૪
સદ્વસિષ્ઠસન્તતેરિમાભિસ્સત્કવેર્મયૂરસારિણીભિઃ
સમ્મદં પ્રયાતુ શક્રચેતસ્સમ્પ્રમોહિનીસરોજનેત્ર ૪૨૫
દ્વિતીયો મનોરમાપાદઃ
હસિતમાતતાયિપાતકપ્રમથનપ્રસિદ્ધવિક્રમમ્
અમરભૂમિપાલયોષિતો મમ કરોતુ ભૂરિમઙ્ગલમ્ ૪૨૬
કરુણયા પ્રચોદિતા ક્રિયાદ્ભરતભૂમિમક્ષયશ્રિયમ્
ચરણકઞ્જરાજદિન્દિરા સુરનરેશ્વરસ્ય સુન્દરી ૪૨૭
ન ભવનં ન વા જગત્પૃથઙ્નિવસનાય તે સુરાર્ચતે
યદખિલાનિ વિષ્ટપાનિ તે વપુષિ સર્વમન્દિરાણિ ચ ૪૨૮
મતિદવિષ્ઠસીમભાસુરં તવ શરીરમેવ પુષ્કરમ્
પરમપૂરુષસ્ય વલ્લભે ભુવનમેકમુચ્યતે બુધૈઃ ૪૨૯
તરણયસ્સુધાંશવસ્તથા સહ ભુવા ગ્રહાઃ સહસ્રશઃ
અયિ જગન્તિ વિસ્તૃતાનિ તે વપુષિ પુષ્કરે જગત્યજે ૪૩૦
બહુભિરુષ્ણભાનુભિક્ર્તતાત્ બહુભિરિન્દુભિર્વશીકૃતાત્
વિયતિ લોકજાલધાત્રિ તે શતગુણં બલં પ્રશિશ્યતે ૪૩૧
ન વિભુરેકકસ્ય ભાસ્વતો વિભવમેવ ના પ્રભાષિતુમ્
કિમુત તે દધાસિ યોદરે દ્યુતિમતાં શતાનિ તાદૃશામ્ ૪૩૨
ઇહ વિહાયસા શરીરિણીમતિસમીપવાસિનીમપિ
ન ખલુ કોઽપિ લોકિતું પ્રભુર્ભગવતીં પરામયુક્તધીઃ ૪૩૩
તદિદમુચ્યતે જનો જગદ્વપુરમેયમાદિદેવિ તે
જનયતે યતોઽખિલં દૃશોર્વિષયભૂતમેતદાતતમ્ ૪૩૪
બહુલતારકાગણૈર્યુતં કિમપિ ખં તવેહ વર્ષ્મણિ
શચિ વિભજ્ય ભાષયૈકયા સુકવયો મહોજગદ્વિદુઃ ૪૩૫
ઇદમિનેન્દુભૂવિલક્ષણૈર્દિનકરૈસ્સુધાકરૈર્ગ્રહૈઃ
બહુજગદ્ભિરન્વિતં મહોજગદશેષધાત્રિ નૈકકમ્ ૪૩૬
અજરમવ્યયં સનાતનં મુનિજનૈકવેદ્યવૈભવમ્
ન ભવતીં વિના તપોજગત્પૃથગશેષનાથનાયિકે ૪૩૭
સકલદૃશ્યમૂલકારણં તવ ચ સંશ્રયો નિરાશ્રયઃ
જનનિ સત્યલોક સંજ્ઞયા પરમપૂરુષોઽભિધીયતે ૪૩૮
અયિ પુરાતનર્ષિભાષયા ગગનમેતદાપ ઈરિતાઃ
અથ યદાસુવીર્યમુજ્ઝિતં ભગવતસ્ત્વમેવ તત્પરે ૪૩૯
શચિ વિરાડ્ભવત્યભાષત શ્રુતિરપીદમેવ નામ તે
વિતતવિશ્વવિગ્રહાત્મનિ પ્રથિતમેતદાહ્મયં પરમ્ ૪૪૦
ઉપનિષદ્ગિરા વિરાડ્વધૂઃ પુરુષ એષ ભાષયાન્યયા
ઉભયથાપિ સાધુ તત્પદં ભવતિ તે ન સંશયાસ્પદમ્ ૪૪૧
ન વનિતા ન વા પુમાન્ ભવેજ્જગતિ યોઽન્તરશ્શરીરિણામ્
તનુષુ લિઙ્ગભેદદર્શનાત્ તનુમતશ્ચ લિઙ્ગમુચ્યતે ૪૪૨
અખિલનાથવીર્યધારણાન્ન્ગનભૂમિરઙ્ગનામતા
સકલલોકબીજભૃત્ત્વતો ગગનદેશ એષ પૂરુષઃ ૪૪૩
સ્ફુટવિભક્તગાત્રલક્ષ્મણાં નિયતવાદિનામદર્શનાત્
ન પુરુષો વિયદ્યથા વયં ન વનિતા વિયદ્યથૈવ નઃ ૪૪૪
અભિવિમાનતોઽથ વા શચી વિબુધરાજયોર્વિલક્ષણાત્
વરવિલસિની વિયત્તનુસ્સદવિકારમુત્તમઃ પુમાન્ ૪૪૫
હૃદયમલ્પમપ્યદો જનન્યનવમં વિશાલપુષ્કરાત્
વિમલદેહદુર્ગમધ્યગં સકલરાજ્ઞિ સૌધમસ્તુ તે ૪૪૬
વિકસિતં નિજાંશુવીચિભિક્ર્તદયમાલયં વિશામ્બ મે
વિકચમુષ્ણભાનુભાનુભિર્દશશતચ્છદં યથા રમા ૪૪૭
હૃદયસાધુસૌધશાયિનીં નયનરમ્યહર્મ્યચારિણીમ્
ભુવનરાજચિત્તમોહિનીં નમત તાં પરાં વિલાસિનીમ્ ૪૪૮
તવ પરે મરીચિવીચયસ્તનુગુહાં પ્રવિશ્ય વિશ્રુતે
ભરતભૂમિરક્ષણોદ્યતં ગણપતિં ક્રિયાસુરુજ્જ્વલમ્ ૪૪૯
ગણપતેર્મનોરમા ઇમાસ્સુગુણવેદિનાં મનોરમાઃ
અવહિતા શૃણોતુ સાદરં સુરમહીપતેર્મનોરમાઃ ૪૫૦
તૃતીયો મણિરાગપાદઃ
જ્યોતિષાં નૃપતિઃ સકલાનાં શાન્તિમેવ સદાભિદધાનઃ
નિર્મલો હરતાત્સુરરાજ્ઞીમન્દહાસલવો મમ પાપમ્ ૪૫૧
દુષ્ટલોકદવિષ્ઠપદાબ્જા શિષ્ટશોકનિવારણદક્ષા
નાકલોકમહીપતિરામા ભારતસ્ય ધુનોત્વસુખાનિ ૪૫૨
દેવમૌલિમણીકિરણેભ્યો વિક્રમં સ્વયમેવ દદાના
દેવરાજવધૂપદપદ્મશ્રીસ્તનોતુ સદા મમ ભદ્રમ્ ૪૫૩
દેવિ તે વદનં બહુકાન્તં સાક્ષિ તત્ર પુરન્દરચેતઃ
અમ્બ તે ચરણાવતિકાન્તાવત્ર સાક્ષિ મનઃ સ્મરતાં નઃ ૪૫૪
ભાસુરં સુરસંહતિવન્દ્યં સુન્દરં હરિલોચનહારિ
પાવનં નતપાપવિદારિ સ્વર્ગરાજ્ઞિ પદં તવ સેવે ૪૫૫
જઙ્ઘિકે જયતસ્તવ માતઃ સ૪ એવ રુચાં યદધીનઃ
વાસવસ્ય દૃશાં ચ સહસ્રં યદ્વિલોકનલોભવિનમ્રમ્ ૪૫૬
સક્થિની તવ વાસવકાન્તે રામણીયકસારનિશાન્તે
વન્દતે વિનયેન મમેયં વન્દિનસ્તવ પાવનિ વાણી ૪૫૭
ઇન્દ્રનારિ કટિસ્તવ પૃથ્વીમણ્ડલસ્યતુલા મહનીયે
મધ્યમો નભસઃ પ્રતિમાનં ભોગિનાં ભુવનસ્ય ચ નાભિઃ ૪૫૮
ધીરતાં કુરુતે વિગતાસું સા સુપર્વપતેર્નિશિતાગ્રા
સા તવામ્બ મનોભવશસ્ત્રી રોમરાજિરઘં મમ હન્તુ ૪૫૯
રોમરાજિભુજઙ્ગશિશુસ્તે દેવિ દેવપતેર્હૃદયસ્ય
દંશનેન કરોત્યયિ મોહં જીવિતાય ચિરાય વિચિત્રમ્ ૪૬૦
પૂર્ણહેમઘટવિવ શક્રાવાહિતાં દધતાવયિ શક્તિમ્
વિશ્વપોષણકર્મણિ દક્ષાવમ્બ દુગ્ધધરૌ જયતસ્તે ૪૬૧
લોકમાતરુરોરુહપૂર્ણસ્વર્ણકુમ્ભગતા તવ શક્તિઃ
લોકપાલનકર્મણિ વીર્યં દેવિ વજ્રધરસ્ય બિભર્તિ ૪૬૨
અક્ષયામૃતપૂર્ણઘટૌ તે શક્રપત્નિ કુચૈ તવ પીત્વા
લોકબાધકભીકરરક્ષો ધૂનને પ્રબભૂવ જયન્તઃ ૪૬૩
હસ્તયોસ્તવ માર્દવમિન્દ્રો ભાષતાં સુષમામપિ દેવઃ
દાતૃતામનયોર્મુનિવર્ગો વર્ણયત્યજરે પટુતાં ચ ૪૬૪
પુષ્પમાલ્યમૃદોરપિ બાહોઃ શક્તિરુગ્રતમાશરનાશે
દૃશ્યતે જગતામધિપે તે ભાષતાં તવ કસ્તનુતત્ત્વમ્ ૪૬૫
કમ્બુકણ્ઠિ તવેશ્વરિ કણ્ઠસ્તારહારવિતાનવિરાજી
દેવરાડ્ભુજલોચનપથ્યો દેવિ મે ભણતાદ્બહુભદ્રમ્ ૪૬૬
આનનસ્ય ગભસ્તિનિધેસ્તે રામણીયકમદ્ભુતમીષ્ટે
અપ્યમર્ત્યનુતાખિલસિદ્ધેર્વાસવસ્ય વશીકરણાય ૪૬૭
ન પ્રસન્નમલં રવિબિમ્બિં ચન્દ્રબિમ્બમતીવ ન ભાતિ
સુપ્રસન્નમહોજ્જ્વલમાસ્યં કેન પાવનિ તે તુલયામઃ ૪૬૮
લોચને તવ લોકસવિત્રિ જ્યોતિષઃ શવસશ્ચ નિધાને
વક્તુમબ્જસમે નનુ લજ્જે ધોરણીમનુસૃત્ય કવીનામ્ ૪૬૯
આયતોજ્જ્વલપક્ષ્મલનેત્રા ચમ્પકપ્રસવોપમનાસા
રત્નદર્પણરમ્યકપોલા શ્રીલિપિદ્યુતિસુન્દરકર્ણા ૪૭૦
અષ્ટમીશશિભાસુરભાલા વિષ્ટપત્રયચાલકલીલા
સ્મેરચારુમુખી સુરભર્તુઃ પ્રેયસી વિદધાતુ શિવં મે ૪૭૧
મન્દહાસલવેષુ વલક્ષા મેચકા ચિકુરપ્રકરેષુ
શોણતામધરે દધતી સા રક્ષતુ પ્રકૃતિસ્ત્રિગુણા નઃ ૪૭૨
સર્વલોકવધૂજનમધ્યે યાં શ્રુતિસ્સુભગામભિધત્તે
યા દિવો જગતો રુચિસારસ્તાં નમામિ પુરન્દરરામામ્ ૪૭૩
સ્વર્ગભૂપતિલોચનભાગ્યશ્રીશ્શરીરવતી જલજાક્ષી
ભારતસ્ય કરોતુ સમર્થં રક્ષણે નરસિંહતનૂજમ્ ૪૭૪
લોકમાતુરિમે રમણીયાઃ પાકશાસનચિત્તરમણ્યાઃ
અર્પિતાઃ પદયોર્વિજયન્તાં સત્કવેઃ કૃતયો મણિરાગાઃ ૪૭૫
ચતુર્થો મેઘવિતાનપાદઃ
અમરક્ષિતિપાલકચેતો મદનં સદનં શુચિતાયાઃ
સ્મિતમાદિવધૂવદનોત્ત્થં હરતાદખિલં કલુષં મે ૪૭૬
સુતરામધનામતિખિન્નામધુના બહુલં વિલપન્તીમ્
પરિપાતુ જગત્ત્રયનેત્રી ભરતક્ષિતિમિન્દ્રપુરન્ધ્રી ૪૭૭
સ્થલમેતદમર્ત્યનૃપાલપ્રમદે તવ મેઘવિતાનમ્
અયિ યત્ર પરિસ્ફુસીશે તટિદુજ્જ્વલવેષધરા ત્વમ્ ૪૭૮
તટિતા તવ ભૌતિકતન્વા જિતમમ્બુધરે વિલસન્ત્યા
ઉપમા ભુવિ યા લલિતાનાં યુવચિત્તહૃતાં વનિતાનામ્ ૪૭૯
સ્ફુરિતં તવ લોચનહારિ સ્તનિતં તવ ધીરગભીરમ્
રમણીયતયા મિલિતા તે શચિ ભીકરતા ચપલાયાઃ ૪૮૦
ચપલે શચિ વિસ્ફુરસીન્દ્રં ઘનજાલપતિં મદયન્તી
દિતિજાતમવગ્રહસંજ્ઞં જનદુઃખકરં દમયન્તી ૪૮૧
પ્રભુમભ્રપતિં રમયન્તી દુરિતં નમતાં શમયન્તી
હરિતાં તિમિરાણિ હરન્તી પવમાનપથે વિલસન્તી ૪૮૨
અલઘુસ્તનિતં વિદધાના બલમુગ્રતમં ચ દધાના
હૃદયાવરકં મમ માયાપટલં તટિદાશુ ધુનોતુ ૪૮૩
સુરપાર્થવજીવિતનાથે નિખિલે ગગને પ્રવહન્ત્યાઃ
તટિતસ્તવ વીચિષુ કાચિચ્ચપલા લસતીહ પયોદે ૪૮૪
વિબુધપ્રણુતે ધનિકાનાં ભવનેષુ ભવન્ત્યયિ દીપાઃ
પટુયન્ત્રબલાદુદિતાનાં તવ દેવિ લવાઃ કિરણાનામ્ ૪૮૫
વ્યજનાનિ ચ ચાલયસિ ત્વં બત સર્વજગન્નઋપજાયે
વિબુધોઽભિદધાત્વથવા કો મહતાં ચરિતસ્ય રહસ્યમ્ ૪૮૬
ઇહ ચાલિત ઈડ્યમનીષૈરયિ યન્ત્રવિશેષવિધિજ્ઞૈઃ
બહુલાદ્ભુતકાર્યકલાપસ્તટિતસ્તવ માતરધીનઃ ૪૮૭
અચરસ્તરુગુલ્મલતાદિઃ સકલશ્ચ ચરો ભુવિ જન્તુઃ
અનિતિ પ્રમદે સુરભર્તુસ્તટિતસ્તવ દેવિ બલેન ૪૮૮
મનુતે નિખિલોઽપિ ભવત્યા મનુજોઽનિતિ વક્તિશૃણોતિ
અવલોકયતે ચ ભણામઃ કિમુ તે જગદમ્બ વિભૂતિમ્ ૪૮૯
અતિસૂક્ષ્મપવિત્રસુષુમ્ણાપથતસ્તનુષુ પ્રયતાનામ્
કુલકુણ્ડકૃશાનુશિખા ત્વં જ્વલસિ ત્રિદશાલયનાથે ૪૯૦
ઇતરો ન સુરક્ષિતિપાલાત્કુલકુણ્ડગતો જ્વલનોઽયમ્
ઇતરેન્દ્રવિલાસિનિ ન ત્વત્કુલકુણ્ડકૃશાનુશિખેયમ્ ૪૯૧
કુલકુણ્ડકૃશાનુશિખાયાઃ કિરણૈઃ શિરસિ સ્થિત એષઃ
દ્રવતીન્દુરનારતમેતદ્વપુરાત્મમયં વિદધાનઃ ૪૯૨
મદકૃદ્બહુલામૃતધારાપરિપૂતમિદં મમ કાયમ્
વિદધાસિ ભજન્મનુજાપ્તે કુલકુણ્ડધનંજયદીપ્તે ૪૯૩
શિરસીહ સતઃ સિતભાનોરમૃતેન વપુર્મદમેતિ
હૃદિ ભાત ઇનસ્ય ચ ભાસા મતિમેતુ પરાં શચિ ચેતઃ ૪૯૪
મમ યોગમદેન ન તૃપ્તિનિજદેશદશાવ્યથિતસ્ય
અવગન્તુમુપાયમમોઘં શચિ ભાસય મે હૃદિ ભાનુમ્ ૪૯૫
વિદિતઃ પ્રમદસ્ય વિધાતુઃ શશિનો જનયિત્રિ વિલાસઃ
અહમુત્સુક ઈશ્વરિ ભાનોર્વિભવસ્ય ચ વેત્તુમિયત્તામ્ ૪૯૬
વરુણસ્ય દિશિ પ્રવહન્તી મદમમ્બ કરોષિ મહાન્તમ્
દિશિ વજ્રભૃતઃ પ્રવહન્તી કુરુ બુદ્ધિમકુણ્ઠિતસિદ્ધિમ્ ૪૯૭
અમલામધિરુહ્ય સુષુમ્ણાં પ્રવહસ્યધુનામ્બ મદાય
અમૃતામધિરુહ્ય ચ કિઞ્ચિત્પ્રિવહેશ્વરિ બુદ્ધિબલાય ૪૯૮
ભરતક્ષિતિક્ષણકર્મણ્યભિધાય મનોજ્ઞમુપાયમ્
અથ દેવિ વિધાય ચ શક્તં કુરુ માં કૃતિનં શચિ ભક્તમ્ ૪૯૯
નરસિંહસુતેન કવીનાં વિભુના રચિતૈઃ કમનીયૈઃ
પરિતૃપ્યતુ મેઘવિતાનૈર્મરુતામધિપસ્ય પુરન્ધ્રી ૫૦૦
પઞ્ચમં પાઙ્ક્તં શતકં સમાપ્તમ્
અથ ષષ્ઠં ત્રૈષ્ટુભં શતકમ્
પ્રથમ ઉપજાતિપાદઃ
મન્દોઽપિ બોધં વિદધન્મુનીનાં સ્વચ્છોઽપિ રાગં ત્રિદશેશ્વરસ્ય
અલ્પોઽપિ ધુન્વન્હરિતાં તમાંસિ સ્મિતાઙ્કુરો ભાતુ જયન્તમાતુઃ ૫૦૧
અશેષપાપૌઘનિવારણાય ભાગ્યસ્ય પાકાય ચ દેવરાજ્ઞી
શોકાકુલાં ભારતભૂમિમેતાં લોકસ્ય માતા હૃદયે કરોતુ ૫૦૨
ધર્મદ્વિષામિન્દ્રનિરાદરાણાં સંહારકર્મણ્યતિજાગરૂકામ્
દેવીં પરાં દેવપથે જ્વલન્તીં પ્રચણ્ડચણ્ડીં મનસા સ્મરામિ ૫૦૩
વ્યાપ્તા તટિદ્વા ગગને નિગૂઢા નારી સુરેશાનમનોરમા વા
શક્તિઃ સુષુમ્ણાપથચારિણી વા પ્રચણ્ડચણ્ડીતિ પદસ્ય ભાવઃ ૫૦૪
સમસ્તલોકાવનિનાયિકાયાઃ સુપર્વમાર્ગેણ શરીરવત્યાઃ
માતુર્મહોંશં મહનીયસારં વિજ્ઞાનવન્તસ્તટિતં ભણન્તિ ૫૦૫
નિગૂઢતેજસ્તનુરમ્બિકેયં પ્રચણ્ડચણ્ડી પરિતો લસન્તી
અવ્યક્ત્શબ્દેન શરીરવત્યાઃ કાલ્યાઃ કવીનાં વચનેષુ ભિન્ના ૫૦૬
શબ્દં વિના નૈવ કદાપિ તેજસ્તેજો વિના નૈવ કદાપિ શબ્દઃ
શક્તિદ્વયં સન્તતયુક્તમેતત્કથં સ્વરૂપેણ ભવેદ્વિભક્તમ્ ૫૦૭
એકૈવ શક્તિર્જ્વલતિ પ્રકૃષ્ટા સ્વરત્યપિ પ્રાભવતઃ સમન્તાત્
ક્રિયાવિભેદાદિહ પણ્ડિતાનાં શક્તિદ્વયોક્તિસ્તુ સમર્થનીયા ૫૦૮
એકક્રિયાયાશ્ચ ફલપ્રભેદાત્પુનર્વિભાગઃ ક્રિયતે બહુજ્ઞૈઃ
કાલીં ચ તારાં સ્વરમગ્ર્યમાહુઃ પ્રચણ્ડચણ્ડીં લલિતાં ચ તેજઃ ૫૦૯
સમ્પદ્યતે શબ્દગતેર્હિ કાલઃ શબ્દો વરેણ્યસ્તદભાણિ કાલી
ધ્યાતેન શબ્દેન ભવં તરેદ્યદ્સુધાસ્તતઃ શબ્દમુશન્તિ તારામ્ ૫૧૦
યદક્ષરં વેદવિદામૃષીણાં વેદાન્તિનાં યઃ પ્રણવો મુનીનામ્
ગૌરી પુરાણેષુ વિપશ્ચિતાં યા સા તાન્ત્રિકાણાં વચનેન તારા ૫૧૧
સમ્પદ્યતે સંહૃતિરોજસા યત્પ્રચણ્ડચણ્ડી તદુદીરિતૌજઃ
સિધ્યેદશેષોઽનુભવો યદોજસ્યતો બુધાસ્તાં લલિતાં વદન્તિ ૫૧૨
પ્રચણ્ડચણ્ડીં લઘુના પદેન ચણ્ડીં વિદુઃ કેચન બુદ્ધિમન્તઃ
એકે વિદઃ શ્રેષ્ઠમહોમયીં તાં લક્ષ્મીં મહત્પૂર્વપદાં વદન્તિ ૫૧૩
અતીવ સૌમ્યં લલિતેતિ શબ્દં પ્રચણ્ડચણ્ડીતિ પદં ચ ભીમમ્
દેવી દધાના સુતરાં મનોજ્ઞા ઘોરા ચ નિત્યં હૃદિ મે વિભાતુ ૫૧૪
પ્રચણ્ડચણ્ડીં તુ શરીરભાજાં તનૂષુ યોગેન વિભિન્નશીર્ષામ્
શક્તિં સુષુમ્ણાસરણૌ ચરન્તીં તાં છિન્નમસ્તાં મુનયો વદન્તિ ૫૧૫
કપાલભેદો યદિ યોગવીર્યાત્સમ્પદ્યતે જીવત એવ સાધોઃ
તમેવ સન્તઃ પ્રવદન્તિ શીર્ષચ્છેદં શરીરાન્તરભાસિ શક્તેઃ ૫૧૬
ઉદીર્યસે નિર્જરરાજપત્નિ ત્વં છિન્નમસ્તા યમિનાં તનૂષુ
ઉજ્જઋમ્ભણે વિશ્વસવિત્રિ યસ્યાઃ કાયં ભવેદ્વૈદ્યુતયન્ત્રતુલ્યમ્ ૫૧૭
પિતુર્નિયોગાત્તનયેન કૃત્તે મસ્તે જનન્યાઃ કિલ રેણુકાયાઃ
ત્વમાવિશઃ પાવનિ તત્કબન્ધં તદ્વા ત્વમુક્તાસિ નિકૃત્તમસ્તા ૫૧૮
છિન્નં શિરઃ કીર્ણકચં દધાનાં કરેણ કણ્ઠોદ્ગતરક્તધારામ્
રામામ્બિકાં દુર્જનકાલરાત્રિં દેવીં પવિત્રં મનસા સ્મરામિ ૫૧૯
ધ્રુવો રમા ચન્દ્રધરસ્ય રામા વાગ્વજ્રવૈરોચસદીર્ઘનિર્યે
કૂર્ચદ્વયં શસ્ત્રકૃશાનુજાયે વિદ્યાનૃપાર્ણા સુરરાજશક્તેઃ ૫૨૦
માયાદ્વિવારં યદિ સૈકવર્ણા વિદ્યૈકવર્ણા યદિ ધેનુરેકા
ધેન્વાદિ સમ્બોધનમસ્ત્રમગ્નેર્વિલાસિની ચેતિ ધરેન્દુવર્ણા ૫૨૧
ચતુષ્ટયેત્રન્યતમં ગૃહીત્વા મન્ત્રં મહેન્દ્રસ્ય મનોધિનાથામ્
ભજેત યસ્તાન્ત્રિકદિવ્યભાવમાશ્રિત્ય સિદ્વીઃ સકલાઃ સ વિન્દેત્ ૫૨૨
સંહોત્રમિત્યદ્ભુતશક્તિયુક્તં વૃષાકપેર્દર્શનમમ્બ મન્ત્રમ્
યો વૈદિકં તે મનુજો ભજેત કિઞ્ચિન્ન તસ્યેહ જગત્યસાધ્યમ્ ૫૨૩
પ્રચણ્ડચણ્ડિ પ્રમદે પુરાણિ પુરાણવીરસ્ય મનોધિનાથે
પ્રયચ્છ પાતું પટુતાં પરાં મે પુણ્યામિમામાર્યનિવાસભૂમિમ્ ૫૨૪
પ્રપઞ્ચરાજ્ઞીં પ્રથિતપ્રભાવાં પ્રચણ્ડચણ્ડીં પરિકીર્તયન્ત્યઃ
એતાઃ પ્રમોદાય ભવન્તુ શક્તેરુપાસકાનામુપજાતયો નઃ ૫૨૫
દ્વિતીયો રથોદ્ધતાપાદઃ
ક્ષાલનાય હરિતાં વિભૂતયે વિષ્ટપસ્ય મદનાય વજ્રિણઃ
તજ્જયન્તજનનીમુખાબ્જતો નિર્ગતં સ્મિતમઘં ધુનોતુ નઃ ૫૨૬
અન્નલોપકૃશભીરુકપ્રજાં ભિન્નભાવબલહીનનેતૃકામ્
વાસવસ્ય વરવર્ણિની પરૈરર્દિતામવતુ ભારતાવનિમ્ ૫૨૭
પાણિપાદમનિમેષરાજ્ઞિ તે પારિજાતનવપલ્લવોપમમ્
અક્ષપાવિરહમઙ્ગભાસરિદ્વાસિચક્રમિથુનં કુચદ્વયમ્ ૫૨૮
પૂર્ણચન્દ્રયશસોઽપહારકં સમ્પ્રસાદસુષમાસ્પદં મુખમ્
જ્ઞાનશક્તિરુચિશેવધીદૃશૌ રક્ત્વર્ણકસુધાઘનોઽધરઃ ૫૨૯
મર્દયત્તિમિરમુદ્ધતં દિશાં અલ્પમપ્યધિકવૈભવં સ્મિતમ્
પ્રાવૃડન્તયમુનાતરઙ્ગવન્નત્ન્લચારુરતિપાવનઃ કચઃ ૫૩૦
વલ્લકીં ચ પરુષધ્વનિં વદન્ દુઃખિતસ્ય ચ મુદાવહઃ સ્વરઃ
ચારુ હાવશબલાઽલસા ગતિઃ કાયધામવચસાં ન પદ્ધતૌ ૫૩૧
યોગસિદ્ધિમતુલાં ગતા મતિશ્ચાતુરી ચ બુધમણ્ડલસ્તુતા
વિષ્ટપત્રિતયરાજ્યતોઽપ્યસિ ત્વં સુખાય મહતે બિડૌજસઃ ૫૩૨
ત્વામુદીક્ષ્ય ધૃતદેવતાતનું દીપ્તપક્ષ્મલવિશાલલોચનામ્
આદિતો જનનિ જન્મિનામભૂદ્ વાસવસ્ય રતિરાદિમે રસે ૫૩૩
આદિમં રસમનાદિવાસના વાસિતૌ પ્રથમમન્વગૃહ્ણતામ્
સમ્મદસ્ય નિધિમાદિદમ્પતી સોઽચલત્ત્રિભુવને તતઃ ક્રમઃ ૫૩૪
જ્યાયસા દિવિષદાં પુરાતની નીલકઞ્જનયના વિલાસિની
યદ્વિહારમતનોત્પ્રરોચનં તત્સતામભવદાદિમે રસે ૫૩૫
ન ત્વદમ્બ નલિનાનનાઽધિકા નાપિ નાકપતિતોઽધિકઃ પુમાન્
નાધિકં ચ વનમસ્તિ નન્દનાન્નાદિમાદપિ રસોઽધિકો રસાત્ ૫૩૬
નાયિકા ત્વમસમાનચારુતા નાયકઃ સ મરુતાં મહીપતિઃ
નન્દનં ચ રસરઙ્ગભૂઃ કથં મન્મથસ્ય ન ભવેદિહોત્સવઃ ૫૩૭
દેવિ વાં મૃતિકથૈવ દૂરતો જાતુચિદ્ગલતિ નૈવ યૌવનમ્
કાઙ્ક્ષિતઃ પરિકરો ન દુર્લભઃ કિં રસઃ પરિણમેદિહાન્યથા ૫૩૮
વિષ્ટપસ્ય યુવરાજકેશવે ત્રાણભારમખિલં નિધાય વામ્
ક્રીડતોરમરરાજ્ઞિ નન્દને ક્રીડિતાનિ મમ સન્તુ ભૂતયે ૫૩૯
યદ્યુવામમરરાજ્ઞિ નન્દને કુર્વતો રહસિ દેવિ મન્ત્રણમ્
તત્ર ચેન્મમ કૃતિર્મનાગિયં સ્પર્શમેતિ ભુવિ કો નુ મત્કૃતી ૫૪૦
ક્રન્દનં યદિ મમેહ વન્દિનો નન્દને વિહરતોઃ સવિત્રિ વામ્
અન્તરાયકૃદથાબ્જકાન્તિ તે સમ્પ્રગૃહ્ય ચરણં ક્ષમાપયે ૫૪૧
યોષિતામપિ વિમોહનાકૃતિર્મોહનં તુ પુરુષસંહતેરપિ
ઇન્દ્રમમ્બરમયાં બભૂવિથ ત્વં રસાર્દ્રહૃદયા લસદ્રસમ્ ૫૪૨
દિવ્યચન્દનરસાનુલેપનૈઃ પારિજાતસુમતલ્પકલ્પનૈઃ
ચારુગીતકૃતિભિશ્ચ ભેજિરે નાકલોકવનદેવતાશ્ચ વામ્ ૫૪૩
સ્વર્ણદીસલિલશીકરોક્ષિતાઃ પારિજાતસુમગન્ધધારિણઃ
નન્દને ત્રિદશલોકરાજ્ઞિ વાં કેપિ ભેજુરલસાઃ સમીરણાઃ ૫૪૪
આદધાસિ સકલાઙ્ગનાધિકે પદ્મગન્ધિનિ સુધાધરાધરે
મઞ્જુવાણિ સુકુમારિ સુન્દરિ ત્વં સુરેન્દ્રસકલેન્દ્રિયાર્ચનમ્ ૫૪૫
આદિદેવિ વદનં તવાભવત્ કાન્તિધામ મદનં દિવસ્પતેઃ
આનનાદપિ રસામૃતં કિરન્નિષ્ક્રમં વિલસિતં કલં ગિરામ્ ૫૪૬
ચારુવાગ્વિલસિતાચ્ચ નિસ્તુલપ્રેમવીચિરુચિરં વિલોકિતમ્
વીક્ષિતાદપિ વિલાસવિશ્રમસ્થાનમલ્પમલસં શુચિસ્મિતમ્ ૫૪૭
ભાસુરેન્દ્રદૃઢબાહુપઞ્જરે લજ્જયા સહજયા નમન્મુખી
તદ્વિલોચનવિકર્ષકાલકા પાતુ માં ત્રિદિવલોકનાયિકા ૫૪૮
ભારતક્ષિતિવિષાદવારણે તત્સુતં ગણપતિં કૃતોદ્યમમ્
આદધાતુ પટુમર્જુનસ્મિતા દુર્જનપ્રમથનક્ષમા શચી ૫૪૯
ચારુશબ્દકલિતાઃ કૃતીરિમાઃ સત્કવિક્ષિતિભુજો રથોદ્ધતાઃ
સા શૃણોતુ સુરમેદિનીપતેર્નેત્રચિત્તમદની વિલાસિની ૫૫૦
તૃતીયો મૌક્તિકમાલાપાદઃ
નિર્મલભાસાં દિશિ દિશિ કર્તા પુણ્યમતીનાં હૃદિ હૃદિ ધર્તા
પાલયતાન્મામનઘવિલાસઃ શક્રમહિશ્યાઃ સિતદરહાસઃ ૫૫૧
પુણ્યચરિત્રા મુનિજનગીતા વાસવકાન્તા ત્રિભુવનમાતા
વત્સલભાવાદવતુ વિદૂનાં ભારતભૂમિં ધનબલહીનામ્ ૫૫૨
કોટિતટિદ્વત્તવ તનુકાન્તિઃ પૂર્ણસમાધેસ્તવ હૃદિ શાન્તિઃ
વાસવભામે ભગવતિ ઘોરઃ શત્રુવિદારી તવ ભુજસારઃ ૫૫૩
આશ્રયભૂતં સુમધુરતાયા આલયભૂતં જલધિસુતાયાઃ
વાસવદૃષ્ટેસ્તવમુખમબ્જં કિઙ્ક્રદૃષ્ટેસ્તવ પદમબ્જમ્ ૫૫૪
પાદસરોજં વૃજિનહરં તે યો ભજતે ના સુરપતિકાન્તે
તત્ર કટાક્ષા અયિ શતશસ્તે તસ્ય સમસ્તં ભગવતિ હસ્તે ૫૫૫
જ્ઞાપકશક્તિઃ પ્રતિનરમસ્તં કારકશક્તિઃ પ્રતિનરહસ્તમ્
વાસવચક્ષુસ્સુકૃતફલશ્રીર્ભાતુ મમાન્તઃ સુરભુવનશ્રીઃ ૫૫૬
મન્ત્રપરાણાં વચસિ વસન્તી ધ્યાનપરાણાં મનસિ લસન્તી
ભક્તિપરાણાં હૃદિ વિહરન્તી ભાતિ પરામ્બા નભસિ ચરન્તી ૫૫૭
સેવકપાપપ્રશમનનામા દિક્તિમિરૌઘપ્રમથનધામા
ઉજ્જ્વલશસ્ત્રા રણભુવિ ભીમા પાતુ નતં માં હરિહયરામા ૫૫૮
યોગિનિ શક્તિર્વિલસસિ દાન્તિઃ યોષિતિ શક્તિર્વિલસસિ કાન્તિઃ
જ્ઞાનિનિ શક્તિર્વિલસસિ તુષ્ટિઃ ધન્વિનિ શક્તિર્વિલસસિ દૃષ્ટિઃ ૫૫૯
સઙ્ગિનિ શક્તિર્વિલસસિ નિદ્રા ધ્યાતરિ શક્તિર્વિલસસિ મુદ્રા
વાસવકાન્તે ગગનનિશાન્તે ભાષિતુમીશઃ ક્વ નુ વિભવં તે ૫૬૦
યદ્દિતિજાનાં દમનમવક્રં કેશવહસ્તે વિલસતિ ચક્રમ્
તત્ર કલા તે ભગવતિ ભદ્રા કાચન ભારં વહતિ વિનિદ્રા ૫૬૧
દુષ્ટનિશાટપ્રશમનશીલં યત્ સિતભૂભૃત્પતિકરશૂલમ્
તત્ર મર્મહોંશસ્તવ જગદીશે રાજતિ કશ્ચિત્પટુરરિનાશે ૫૬૨
યન્નિજરોચિક્ર્તતરિપુસારં વાસવહસ્તે કુલિશમુદારમ્
તત્ર તવાંશો વિલસતિ દિવ્યઃ કશ્ચન ભાસો ભગવતિ ભવ્યઃ ૫૬૩
અમ્બરદેશે સુમહતિ ગુપ્તા પઙ્ક્જબન્ધૌ વિલસતિ દીપ્તા
રાજસિ માતર્હિમરુચિશીતા વેદિકૃશાનૌ ક્રતુભૃતિપૂતા ૫૬૪
સૂક્ષ્મરજોભિર્વિહિતમુદારં યજ્જગદેતન્ન્ગગનમપારમ્
તત્તવવેદઃ પ્રવદતિ કાયં પાવનિ ભાનુસ્તવ તનુજોઽયમ્ ૫૬૫
ઈશ્વરિ નૈકસ્તવ ખરતેજાઃ તેઽપિ ચ સર્વે જનનિ તનૂજાઃ
ઉજ્વલખેટાઃ કુવદતિ કાયાઃ પાવનિ કસ્તે પ્રવદતુ માયાઃ ૫૬૬
યા મહિમાનં પ્રથયતિ ભૂમિઃ પાવનકીર્તિર્જલનિધિનેમિઃ
સેયમપીશે ભવતિ સુપુત્રી વાસવજાયે તવ જનધાત્રી ૫૬૭
અઙ્ગ સખાયો વિરમતસઙ્ગાશ્વષ્ઠ્હર્વિષયાણાં કૃતમતિભઙ્ગાત્
ધ્યાયત ચિત્તે ધુતભયબીજં વાસવજાયાચરણસરોજમ્ ૫૬૮
પાપમશેષં સપદિ વિહાતું શક્તિમનલ્પામપિ પરિધાતુમ્
ચેતસિ સાધો કુરુ પરિપૂતં વાસવજાયાપદજલજાતમ્ ૫૬૯
ઈશ્વરિ વન્દ્યદ્યુતિભૃતિમેધે કાઙ્ક્ષિતનીરાણ્યસૃજતિ મોઘે
નિર્મલકીર્તેસ્તવ શચિ ગાનં શક્ષ્યતિ કર્તું તદુદકદાનમ્ ૫૭૦
આમયવીર્યાદ્વિગલતિ સારે જીવતિ કિઞ્ચિદ્રિસનગનીરે
રક્ષતિ જન્તું તવ શચિ નામ પ્રાજ્ઞજનૈરપ્યગણિતધામ ૫૭૧
મધ્યમલોકે સ્યતિ શુચિરુગ્રા રાજસિ નાકે વિભવસમગ્રા
પ્રાણિશરીરે ભવસિ વિચિત્ર વાસવજાયે વિવિધચરિત્ર ૫૭૨
વ્યોમ્નિ વપુસ્તે વિનિહતપાપં વિશ્રુતલીલં તવ દિવિ રૂપમ્
કર્મવશાત્તે ભવતિ સ ભોગઃ પ્રાણિશરીરે ભગવતિ ભાગઃ ૫૭૩
ભારતભૂમેઃ શુચમપહન્તું શ્રેષ્ઠમુપાયં પુનરવગન્તુમ્
વાસવજાયે દિશ મમ બુદ્ધિં પાવનિ માયે કુરુ કુરુ સિદ્ધિમ્ ૫૭૪
સમ્મદયન્તીર્બુધજનમેતાઃ સ્વર્ગધરિત્રીપતિસતિપૂતાઃ
મૌક્તિકમાલાઃ શૃણુ નુતિકર્તુર્ભક્તિનિબદ્ધાઃ કવિકુલભર્તુઃ ૫૭૫
ચતુર્થઃ સુમુખીપાદઃ
અજિતમિનાગ્નિતટિચ્છશિભિઃ મમ હૃદયસ્ય તમઃ પ્રબલમ્
અમરપતિપ્રમદાહસિતં વિમલઘૃણિપ્રકરૈર્હરતુ ૫૭૬
સુરનૃપતેર્દયિતા વિનતાહિતશમની લુલિતામિતરૈઃ
વરકરુણાવરુણાલયદૃઙ્મમ જનનીમવતાદવનિમ્ ૫૭૭
પટુતપસો જમદગ્નિમુનેરિહ સહધર્મચરીં ભુવને
તનયનિકૃત્તશિરઃ કમલાં વરમતિમાવિશદિન્દ્રવધૂઃ ૫૭૮
યદુકુલકીર્તિવિલોપભિયા બતવિનિગૂહ્ય ઋતં કવયઃ
મુનિગૃહિણી વધહેતુકથામિતરપથેન ભણન્તિ મૃષા ૫૭૯
ન સુરભિરર્જુનભૂમિપતિર્ભૃગુતિલકસ્ય જહાર સ યામ્
ઇયમમૃતાંશુમનોજ્ઞમુખી પરશુધરસ્ય જનન્યનઘા ૫૮૦
અતિરથમર્જુનભૂમિપતિં સહપૃતનં જમદગ્નિસુતઃ
યુધિ સ વિજિત્ય વિશાલયશાઃ પુનરપિ માતરમાહૃતવાન્ ૫૮૧
પરગૃહવાસકલઙ્કવશાન્નિજગૃહિણીં જમદગ્નિમુનિઃ
બતવિનિહન્તુમના કલયંસ્તનુભવમાદિશદુગ્રમનાઃ ૫૮૨
પિતૃવચનાદતિભક્તિમતાપ્યસુરવદાત્મસુતેન હતામ્
મુનિગૃહિણીમનઘેતિવદંસ્તવ વરદેઽવિશદંશ ઇમામ્ ૫૮૩
ઇદમવિકમ્પ્યમતિપ્રબલં પ્રભવતિ કારણમાર્યનુતે
મુનિગૃહિણીમનઘાં ભણિતું શચિ કલયા યદિ મામવિશઃ ૫૮૪
ખલજનકલ્પિતદુષ્ટકથાશ્રવણવશાદ્વ્યથિતં હૃદયમ્
અથ ચરિતેઽવગતે વિમલસ્મૃતિવશતો મમ યાતિ મુદમ્ ૫૮૫
તવ મહસા વિશતા કૃપયા મમ શચિ સૂક્ષ્મશરીરમિદમ્
નૃપરિપુમાતૃપવિત્રકથા સ્મરણપથં ગમિતા સપદિ ૫૮૬
વિદધતુરાસુરકૃત્યમુભૌ બહુલગુણામપિ યદ્ગૃહિણીમ્
સ મુનિરઘાતયદચ્છકથાં દશરથજશ્ચ મુમોચ વને ૫૮૭
અપિ વિનિકૃત્તશિરાઃ શચિ તે વરમહસા વિશતા સપદિ
અલભત જીવિતમમ્બ પુનર્ભુવનશુભાય મુનેસ્તરુણી ૫૮૮
યદિ શિરસા રહિતે વપુષિ પ્રકટતયા વિલસન્ત્યસવઃ
યદિ હૃદયં સહભાતિ ધિયા કિમિવ વિચિત્રમિતશ્ચરિતમ્ ૫૮૯
પરશુધરસ્ય સવિત્રિ કલા ત્વયિ પુરુહૂતસરોજદૃશઃ
સ શિરસિ કાચિદભૂદ્રુચિરા વિશિરસિ ભીમતમા ભવતિ ૫૯૦
પરશુધરોઽર્જુનભૂમિપતિં યદજયદમ્બ તપોઽત્ર તવ
અભજત કારણતામનઘે વરમુનિગેયપવિત્રકથે ૫૯૧
ભગવતિ કૃત્તશિરો ભવતી મથિતવતી નૃપતીનશુભાન્
પ્રથનભુવિ પ્રગુણં ભુજયોઃ પરશુધરાય વિતીર્ય બલમ્ ૫૯૨
શુભતમકુણ્ડલપૂર્વસતિઃ પદનતપાતકસંશમની
દિશતુ નિકૃત્તશિરાઃ કુશલં મમ સુરપાર્થવશક્તિકલા ૫૯૩
નિજસુતરઙ્ગપતેર્નિકટે કૃતવસતિર્નતસિદ્ધિકરી
દલિતશિરાઃ પ્રતનોતુ મમ શ્રિયમમરેશ્વરશક્તિકલા ૫૯૪
ભુવિ તતસહ્યનગાન્તરગે શુભતમચન્દ્રગિરૌ વરદા
કૃતવસતિઃ કુરુતાન્મમ શં ભૃગૂકુલરામજનન્યજરા ૫૯૫
અવતુ વિકૃત્તશિરાઃ પદયોર્ભજકમનિન્દ્યવિચિત્રકથા
દિનકરમણ્ડલમધ્યગૃહા સુરધરણીપતિશક્તિકલા ૫૯૬
ગગનચરાર્ચિતપાદુકયા પદનતસન્મતિબોધિકયા
મમ સતતં શુચિરેણુકયા પરવદિદં કુલમમ્બિકયા ૫૯૭
શમયિતુમુગ્રતમં દુરિતં પ્રથયિતુમાત્મનિગૂઢબલમ્
ગમયિતુમગ્રય્દશાં સ્વકુલં તવ ચરણામ્બુજમમ્બ ભજે ૫૯૮
પરવશગામશિવેન વૃતાં ભરતધરાં પરિપાતુમિમામ્
પટુમતિવાક્ક્રિયમાતનુતાદ્ગણપતિમભ્રહયપ્રમદા ૫૯૯
ગણપતિદેવમર્મહોંશજુષો ગણપતિનામકવિપ્રકવેઃ
સુરપતિજીવસખીશૃણુયાદ્દશશતપત્રમુખી સુમુખીઃ ૬૦૦
ષષ્ઠં ત્રૈષ્ટુભં શતકં સમાપ્તમ્
અથ સપ્તમં જાગતં શતકમ્
પ્રથમો દ્રુતવિલમ્બિતપાદઃ
સુરમહીરમણસ્ય વિલાસિની જલચરધ્વજજીવિતદાયિની
હરતુ બોધદૃગાવરણં તમો હૃદયગં હસિતેન સિતેન મે ૬૦૧
નમદમર્ત્યકિરીટકૃતૈઃ કિણૈઃ કમઠપૃષ્ઠનિભે પ્રપદેઽઙ્કિતા
પરિધુનોતુ શચી ભરતક્ષિતેર્વૃજિનજાલમજાલમકમ્પનમ્ ૬૦૨
અતિતરાં નતપાલનલોલયા વિબુધનાથમનોહરલીલયા
કિરિમુખીમુખશક્ત્યુપજીવ્યયા વિદિતયાદિતયા ગતિમાનહમ્ ૬૦૩
ઘનહિરણ્યમદાપહરોચિષા વનરુહાનનયાઽવનદક્ષયા
ગતિમદિન્દ્રમનોરથનાથયા ભુવનમેવ ન મે કુલમાત્રકમ્ ૬૦૪
તનુષુ વામનમૂર્તિધરે વિભૌ તમનુયાચ વિરાજતિ વામની
શરણવાનનયામ્બિકયા લસત્ કરુણયાઽરુણયા પદયોરહમ્ ૬૦૫
સકરુણા કુશલં મમ રેણુકાતનુરજા તનુતાદુદિતો યતઃ
યુધિ મુનિર્વિદધૌ પરશું દધજ્જનપતીનપતીવ્રભુજામદાન્ ૬૦૬
સુજનશત્રુરમાથિ ઘનધ્વનિઃ શચિ સરાત્રિચરસ્તવ તેજસા
જનનિ રામસહોદરસાયકં પ્રવિશતાઽવિશતાદધિકૌજસા ૬૦૭
તવ મહઃકલયાબલમાપ્તયા જનનિ શુમ્ભનિશુમ્ભમદચ્છિદા
જગદરક્ષ્યત ગોપકુલેશિતુસ્તનુજયાઽનુજયાર્જુનસારથેઃ ૬૦૮
ન વિનિરૂપયિતું પ્રબભૂવ યાં કવિજનો વિવિધં કથયન્નપિ
મુનિહૃદમ્બુજસૌધતલેન્દિરા જયતિ સા યતિસાધુજનાવની ૬૦૯
ઇમમયિ ત્રિદિવેશ્વરિ કલ્કિનં રુષમપોહ્ય સવિત્રિ વિલોકિતૈઃ
સુરપતેર્દ્વિષતોઽઘવતો લસન્ મદનકૈરવકૈરવલોચને ૬૧૦
સ્મરદમર્ત્યનૃપાલવિલાસિનીં પ્રબલપાતકભીતિવિનાશિનીમ્
પ્રવણયાન્તરનન્યધિયા લસદ્વિનયયાનયયામવતીર્મનઃ ૬૧૧
ભગવતીગગનસ્થલચારિણી જયતિ સઙ્ગરરઙ્ગવિહારિણી
સુકૃતશત્રુમતિભ્રમકારિણી હરિહયારિહયાદિવિદારિણી ૬૧૨
શરણવાનહમર્જુનહાસયા ભુવનભૂપતિહારિવિલાસયા
દિવિ પુલોમજયા ધવલાચલે ગિરિજયાઽરિજયાવિતદેવયા ૬૧૩
ચરણયોર્ધૃતયા વિજયામહે વયમશેષજગન્નૃપજાયયા
દિવિ પુલોમજયા ધવલાચલે નગજયા ગજયાનવિલાસયા ૬૧૪
અરિવધાય વિધાય બુધાધિપં પટુભુજાબલભીષણમાજિષુ
ન ભવતી શચિ ગચ્છતિ દુર્ગતઃ ક્વચન કાચન કાતરધીરિવ ૬૧૫
સપદિ માનસધૈર્યહૃતો જગજ્જનનિ વજ્રતનોર્જ્વલિતાર્ચિષઃ
અરિજને પ્રથમં તવ વીક્ષયા સુરપતેરપતેજસિ વિ ક્રમઃ ૬૧૬
ન મનનોચિતમસ્તિ પરં નૃણાં વિબુધરાજવધૂપદપદ્મતઃ
જગતિ દર્શનયોગ્યમિહાપરં ન રમણી રમણીયમુખાબ્જતઃ ૬૧૭
શરણવાનહમસ્મિ પુરાતનપ્રમદયા મુનિગેયચરિત્રયા
સ્વબલચાલિતનાકજગન્નભો વસુધયા સુધયા સુરરાડ્દૃશામ્ ૬૧૮
અયમહં ગતિમાનતિશાન્તયા ત્રિદિવભૂમિપતિપ્રિયકાન્તયા
મનસિ મૌનિજનૈરતિભક્તિતો નિહિતયા હિતયા સુકૃતાત્મનામ્ ૬૧૯
વિનયતઃ સ્તુતયા ગમયામ્યહં જનિમતાં જનયિત્રિ નિશાસ્ત્વયા
પ્રસૃતયા કુલકુણ્ડધનઞ્જયાદ્ધૃતતનૂતતનૂતનવેગયા ૬૨૦
સકૃદમોઘસરસ્વતિસાધુધી હૃદયવેદ્યપદામ્બુજસૌષ્ઠવે
મમ શિવં સુમનઃ પૃથિવીપતેઃ સુવદને વદ નેત્રલસદ્દયે ૬૨૧
દુરવગાહપથે પતિતં ચિરાજ્જનનિ ગમ્યવિલોકનલાલસમ્
સ્વયમમર્ત્યનૃપાલમનોરમે સુનયને નયનેયમિમં જનમ્ ૬૨૨
અવતુ નઃ સ્વયમેવ પટૂન્ વિપદ્વિમથનાય વિધાય બુધેશ્વરી
સકલમર્મસુવીતદયૈઃ પરૈર્વિનિહતાનિહ તાપવતઃ શચી ૬૨૩
સુરધરાપતિજીવિતનાથયા સ્વજનનક્ષિતિરક્ષણકર્મણિ
પટુતમો જન એષ વિધીયતામિહ તયા હતયા તુ સમૂહયા ૬૨૪
ગણપતેઃ શૃણુયાદિમમુજ્વલં દ્રુતવિલમ્બિતવૃત્તગણં શચી
સલિલરાશિસુતાભવનીભવદ્ભુવનપાવનપાદસરોરુહા ૬૨૫
દ્વિતીયો જલોદ્ધતગતિપાદઃ
હરિત્સુ પરિતઃ પ્રસાદમધિકં દધાનમમલત્વિષાં પ્રસરણૈઃ
મહેન્દ્રમહિલાવિલાસહસિતં મદન્તરતમો ધુનોતુ વિતતમ્ ૬૨૬
પ્રસૂસ્ત્રિજગતઃ પ્રિયા મઘવતઃ કૃપાકલિતયા કટાક્ષકલયા
નિતાન્તમગતેર્વિકુણ્ઠિતમતેર્ધુનોતુ ભરતક્ષિતેરકુશલમ્ ૬૨૭
પુરા શચિ મતિસ્ત્વમીશિતુરથો નભસ્તનુમિતા પૃથઙ્મતિમતી
અનન્તરમભૂઃ સરોજનયના તનુઃ સુરપતેર્વિલોચનસુધા ૬૨૮
પરત્ર વિગુણા સતોઽસિ ધિષણા નભસ્તનુરિહ પ્રપઞ્ચમવસિ
અસિ સ્વરબલા પ્રિયા સુરપતેરિયત્તવ શચિ સ્વરૂપકથનમ્ ૬૨૯
પ્રજાપતિપદે પુરાણપુરુષે સ્મૃતા ત્વમદિતિઃ સુરાસુરનુતે
જનાર્દનપદે રમાસિ પરમે સદાશિવપદે શિવા ત્વમજરે ૬૩૦
ઉષા ઇનપદે સ્વધાઽનલપદે પુરન્દરપદે ત્વમીશ્વરિ શચી
યથા રુચિવિદુઃ પદાનિ કવયશ્ચિતૈશ્ચ ચિતિમાન્યુવામૃજુગિરા ૬૩૧
અમેયમમલં પુરાણપુરુષં તદીયવિભવાભિધાયિભિરિમે
વદન્તિ કવયઃ પદૈર્બહુવિધૈસ્તથૈવ ભવતીં તતો મતભિદાઃ ૬૩૨
નભશ્ચ પવનઃ સ્વરશ્ચ પરમસ્તટિચ્ચ વિતતા પતિશ્ચ મહસામ્
સુધાંશુરનલો જલં ચ પૃથિવી સવિત્રિ યુવયોર્વિભૂતિપટલી ૬૩૩
અપારબહુલપ્રમોદલહરી સતઃ કિલચિતિઃ પરત્ર વિતતા
પુનર્વિયદિદં પરીત્ય નિખિલં જગન્તિ દધતી પરા વિજયતે ૬૩૪
ન યદ્યપિ પરાત્પરે નભસિ તે સરોજનયના વપુઃ પૃથગજે
તથાપિ નમતાં મતીરનુસરન્ત્યમેયવિભવે દધાસિ ચ તનૂઃ ૬૩૫
સહ ત્રિભુવનપ્રપાલનકૃતા સમસ્તમરુતાં ગણસ્ય વિભુના
સદા શશિમુખી શરીરભૃદજા જગત્યદુરિતે શચી વિજયતે ૬૩૬
કુલં બહુભિદં બલં ન ભુજયોઃ કથં નુ વિપદસ્તરેમ ભરતાઃ
સમર્થમધુના વિપદ્વિધુતયે તવામ્બ ચરણં વ્રજામિ શરણમ્ ૬૩૭
સમસ્તમપિ ચ સ્વદેશવિદુષાં વિધાનપટલં બભૂવ વિફલમ્
અભાગ્યદમનક્ષમં તદધુના તવામ્બ ચરણં વ્રજામિ શરણમ્ ૬૩૮
નિજો મમ જનો નિતાન્તમગતિર્ન કુક્ષિભરણેઽપ્યયં પ્રભવતિ
મહેશ્વરિ કૃપામરન્દમધુના તવામ્બ ચરણં વ્રજામિ શરણમ્ ૬૩૯
અદૃષ્ટકનકં કુલં મમ ચિરાન્નિરાયુધમિદં નિરાશમભિતઃ
સ્વભાવત ઇવ પ્રબદ્ધમભવત્તવામ્બ ચરણં વ્રજામિ શરણમ્ ૬૪૦
અવીરચરિતં વિપાલકકથં નિરાર્ષવિભવં ચિરાન્મમ કુલમ્
ઇદં મમ મનો નિકૃન્તતિ મુહુસ્તવામ્બ ચરણં વ્રજામિ શરણમ્ ૬૪૧
ચિરાત્સ્મૃતિપથાદપિ ચ્યુતમજે તપોબલભવં તમાર્ષવિભવમ્
સ્વદેશમધુના પુનર્ગમયિતું તવામ્બ ચરણં વ્રજામિ શરણમ્ ૬૪૨
હતં ચ વિહતં ધુતં ચ વિધુતં રુદન્તમભિતો વિશિષ્ટકરુણે
ઇમં સ્વવિષયં શિવં ગમયિતું તવામ્બ ચરણં વ્રજામિ શરણમ્ ૬૪૩
ક્ષયાય સુકૃતદ્વિષાં વિહરતાં શિવાય ચ સતાં પ્રપઞ્ચસુહૃદામ્
નિજસ્ય મનસો બલાય ચ પરે તવામ્બ ચરણં વ્રજામિ શરણમ્ ૬૪૪
જયત્સુ સુકૃતં દ્વિષત્સુ પરિતઃ સતામપિ કુલે બલેન રહિતે
ખલપ્રિયયુગે કલૌ પરિણતે તવામ્બ ચરણં વ્રજામિ શરણમ્ ૬૪૫
અભાતિ સુકૃતે નિગૂઢવિભવે વિભાતિ દુરિતે ફલાનિ દિશતિ
વિધાનવિકલે મનસ્યભયદે તવામ્બ ચરણં વ્રજામિ શરણમ્ ૬૪૬
પટૌ પ્રતિભટે ગદે પ્રતિભયે નતાવનવિધાવતીવ નિપુણમ્
સુપર્વભુવનક્ષિતીશદયિતે તવામ્બ ચરણં વ્રજામિ શરણમ્ ૬૪૭
અમર્ત્યપટલીકિરીટમણિભાભુજઙ્ગકિરણં નિતાન્તમરુણમ્
વિપત્તિદમનં તમઃ પ્રશમનં તવામ્બ ચરણં વ્રજામિ શરણમ્ ૬૪૮
વિનષ્ટવિભવામિમાં પુનરપિ શ્રિયાવિલસિતાં વિધાતુમજરે
સ્વજન્મપૃથિવીં સ્વરીશદયિતે દિશેર્ગણપતેઃ કરાય પટુતામ્ ૬૪૯
સુપર્વવસુધાધિનાથસુદૃશો જલોદ્ધતગતિસ્તવોઽયમનઘઃ
કૃતિર્ગણપતેઃ કરોતુ વિધુતિં ભયસ્ય ભરતક્ષમાતલજુષામ્ ૬૫૦
તૃતીયઃ પ્રમિતાક્ષરપાદઃ
ઉદિતં મહેન્દ્રમહિલાવદને પ્રસૃતં કરૈર્દિશિ દિશિ પ્રગુણૈઃ
અહિતં તમઃ પ્રશમયદ્યમિનાં હસિતં કરોતુ મમ ભૂરિ શિવમ્ ૬૫૧
ભરતક્ષિતેસ્તિમિરમાશુ હરત્વરિચાતુરીકૃતવિમોહમતેઃ
રવિલક્ષતોઽપ્યધિકમંશુમતી પવિપાણિચિત્તદયિતા વનિતા ૬૫૨
શશિલક્ષશીતલકટાક્ષસુધા તરુણાર્કકોટિરુચિપાદયુગા
હૃદિ મે વિભાતુ મુનિગેયગુણા વિબુધેન્દ્રચિત્તરમણી તરુણી ૬૫૩
કમનીયદીપ્તસુકુમારતનુર્મનનીયપાવનપદામ્બુરુહા
વિદધાતુ મે શિવમસદ્વિમુખી વિબુધેન્દ્રજીવિતસખી સુમુખી ૬૫૪
અનુમાનમૂઢપિતૃવાક્યવશાત્તનયેન દેવિ વિનિકૃત્તશિરાઃ
તવ રેણુકા વિલસિતા કલયા ગણનીયશક્તિરભવદ્દશસુ ૬૫૫
સકલામયપ્રશમનં દુરિતક્ષયકારિકાઙ્ક્ષિતકરં ચ ભવેત્
સુરસુન્દરી જનસમર્ચતયોર્હૃદિ રેણુકાચરણયોઃ કરણમ્ ૬૫૬
વિનિહન્તિ પાપપટલં સ્મરણાદ્વિધુનોતિ રોગનિવહં ભજનાત્
વિદઘાતિ વાઞ્છિતતફલં સ્તવનાન્મનુજસ્ય રામજનની ચરણમ્ ૬૫૭
શરણં વ્રજામિ નવરવ્યરુણં ચરણં તવામ્બ નૃપજાતિરિપોઃ
ભરતક્ષિતેરવનતઃ પ્રથમં મરણં મમેહ ન ભવત્વધમમ્ ૬૫૮
સ્મરણં ચિરાદવિરતં વિદધચ્ચરણસ્ય તે તરુણભાનુરુચઃ
અયમસ્તુ રામજનયિત્રિપટુઃ સુરકાર્યમાર્યવિનુતે ચરિતુમ્ ૬૫૯
અવ ભારતક્ષિતિમમોઘદયે કરણં ભવત્વિહ તવૈષ જનઃ
નિજયોઃ સવિત્રિ ચરણામ્બુજયોર્ન વિહાતુમર્હસિ ચિરાદ્ભજકમ્ ૬૬૦
અવિશસ્ત્વમિન્દ્રદયિતે કિલતામપિ યજ્ઞસેનતનયાં કલયા
અનઘવ્રતાસુ કવયઃ પ્રથમાં પ્રવદન્તિ યાં બહુલવન્દ્યગુણામ્ ૬૬૧
ભુવિ ભારતં પઠતિ યઃ સુકૃતી કલુષં ધુનોતિ સકલં કિલ સઃ
ઇયમમ્બ શક્તિકુલરાજ્ઞિ તવ દ્રુપદસ્ય નન્દિનિ કથામહિમા ૬૬૨
અભિમન્યુમાતરમનલ્પગુણામતિલઙ્ઘ્ય ચૈક્ષત હરિર્ભવતીમ્
અતિસૌહૃદેન યદિહાર્યનુતે તવ હેતુરીડ્યતમશક્તિકલા ૬૬૩
ગૃહકાર્યતન્ત્રચતુરા ગૃહીણી સકલીન્દ્રિયામૃતઝરી રમણી
વરનીતિમાર્ગકથને સચિવોઽપ્યભવસ્ત્વમમ્બ કુરુ વંશભૃતામ્ ૬૬૪
ન યુધિષ્ઠિરસ્ય વરઘોરતપો ન ધનઞ્જયસ્ય પટુ બાહુબલમ્
અરિસઙ્ક્ષયં કૃતવતી બહુલં તવ વેણિકાઽપચરિતા ફણિની ૬૬૫
અસિતાપિ કાન્તિવસતિર્મહતી વનિતાજનસ્ય ચ વિમોહકરી
કુશલં મમાભ્રપતિશક્તિકલા દ્રુપદક્ષિતીન્દ્રદુહિતા દિશતુ ૬૬૬
શિરસા સમસ્તજનપાપભરં વહતો ભવાય ભુવિ યામવૃણોત્
અમરાધિપઃ પતિતપાવનિ તાં ભુવિ કન્યકાં તવ વિવેશ કલા ૬૬૭
કલયા તવાતિબલયા કલિતા પુરુષસ્ય યોગમખિલામ્બ વિના
અખિલેશ્વરપ્રહિતતેજ ઇયં સુતજન્મને કિલ દધાવનઘા ૬૬૮
સુરરક્ષકસ્ય મદયિત્રિ દૃશાં નરરક્ષકસ્ય જનયિત્રિ પરે
કુલરક્ષણાય કૃતબુદ્ધિમિમં કુરુ દક્ષમદ્ભુતપવિત્રકથે ૬૬૯
મુમુચુઃ કુલે મમ સુપર્વપતેસ્તવ ચાભિધેયમિહ મન્દધિયઃ
અપરાધમેતમતિઘોરતરં જનનિ ક્ષમસ્વ મમ વીક્ષ્ય મુખમ્ ૬૭૦
ઇહ શારદેતિ યતિભિર્વિનુતા પ્રથિતા સુરેશ્વરમનોદયિતા
ભુવિ ભાતિ કીર્તિવપુષા શચિ યા સુકથાપિ સા તવ સવિત્રિ કલા ૬૭૧
અરુણાચલેશ્વરદરીવસતેસ્તપતો મુનેર્ગણપતેઃ કુશલમ્
વિવિધાવતારવિલસચ્ચરિતા વિતનોતુ સા વિબુધરાડ્વનિતા ૬૭૨
અરુણાચલસ્ય વરકન્દરયા પ્રતિઘોષિતં કલુષહારિ યશઃ
વિબુધાધિનાથરમણી શૃણુયાદ્ગણનાથગીતમતિચારુનિજમ્ ૬૭૩
ભરતક્ષિતેઃ શુભવિધાયિષુ સા વિબુધક્ષિતીશદયિતા દયયા
ધનશક્તિબન્ધુબલહીનમપિ પ્રથમં કરોતુ ગણનાથમુનિમ્ ૬૭૪
મુદિતામિમા વિદધતુ પ્રમદાં ત્રિદિવાધિપસ્ય નિપુણશ્રવણામ્
અમિતપ્રકાશગુણશક્તિમજાં પ્રમિતાક્ષરાઃ સુકવિભૂમિપતેઃ ૬૭૫
ચતુર્થસ્તામરસપાદઃ
દિશતુ શિવં મમ ચન્દ્રવલક્ષસ્તિમિરસમૂહનિવારણદક્ષઃ
કૃતગતિરોધકપાતકનાશઃ સુરધરણીશવધૂસ્મિતલેશઃ ૬૭૬
અવિદિતમાર્ગતયાતિવિષણ્ણાં ગતિમપહાય ચિરાય નિષણ્ણામ્
ભરતધરામનિમેષધરત્રી પતિગૃહિણી પરિપાતુ સવિત્રી ૬૭૭
ભુવનમિદં ભવતઃ કિલ પૂર્વં યદમલરૂપમનાકૃતિસર્વમ્
પ્રકૃતિરિયં કુરુતાદદરિદ્રામતિમતિશાતતરાં મમ ભદ્રા ૬૭૮
સૃજતિ જગન્તિ વિભૌ પરમે યા સુબહુલશક્તિરરાજત માયા
પ્રદિશતુ સા મમ કઞ્ચન યોગં ઝટિતિ નિરાકૃતમાનસરોગમ્ ૬૭૯
પ્રતિવિષયં વિકૃતીતર સત્તા વિલસતિ યા મતિમદ્ભિરુપાત્તા
ઇયમનઘા પરિપાલિતજાતિં વિતરતુ મે વિવિધાં ચ વિભૂતિમ્ ૬૮૦
પ્રતિવિષયગ્રહણં પરિપૂતામતિરખિલસ્ય જનસ્ય ચ માતા
મમ વિદધાતુ શુભં શુભનામા ત્રિદિવનિવાસિનરેશ્વરરામા ૬૮૧
ગગનતનુર્જગતો વિપુલસ્ય પ્રભુપદમગ્રય્મિતા સકલસ્ય
પ્રતિજનદેહમજા પ્રવહન્તી મમ હૃદિ નન્દતુ સા વિહરન્તી ૬૮૨
પટુકુલકુણ્ડધનઞ્જયકીલા સમુદિતહાર્દવિભાકરલીલા
દ્રુતશિર ઇન્દુકલામૃતધારા જનમવતાન્નિજભક્તમુદારા ૬૮૩
વિષયસમાકૃતિરત્ર પુરસ્તાદ્વિમલતમા કિલ તત્ર પરસ્તાત્
ભુવનમયી ભુવનાચ્ચ વિભક્તામતિરનઘાઽવતુ મામતિશક્તા ૬૮૪
વિષયપરિગ્રહણેષ્વતિસક્તા વિષયવિભૂતિષુ કાપિ વિવિક્તા
અખિલપતેર્મયિ દીવ્યતુ શક્તિર્વિમલતમા વિધુતેતરશક્તિઃ ૬૮૫
દૃશિ દૃશિ ભાતિ યદીયમપાપં દિશિ દિશિ ગન્તૃ ચ વેત્તૃ ચ રૂપમ્
ભવતુ શિવાય મમેયમનિન્દ્યા ભુવનપતેર્ગૃહિણી મુનિવન્દ્યા ૬૮૬
જડકુલકુણ્ડદરીષુ શયાના બુધકુલવહ્નિષુ ભૂરિવિભાના
હરિહયશક્તિરમેયચરિત્ર મમ કુશલં વિદધાતુ પવિત્ર ૬૮૭
દહરગતાખિલમાકલયન્તી દ્વિદલગતા સકલં વિનયન્તી
દશશતપત્રગતા મદયન્તી ભવતુ મયીન્દ્રવધૂર્વિલસન્તી ૬૮૮
ગૃહયુગલીશ્રિય આશ્રિતગમ્યા પદકમલદ્વિતયી બહુરમ્યા
મમ હૃદિ ભાત્વવિકુણ્ઠિતયાના હરિસુદૃશસ્તરુણારુણભાના ૬૮૯
ઉપરિ તતા કુલકુણ્ડનિશાન્તાજ્જ્વલિતધનઞ્જયદીધિતિકાન્તાત્
હરિહયશક્તિરિયં મમ પુષ્ટા દ્રવયતુ મસ્તકચન્દ્રમદુષ્ટા ૬૯૦
નભસિ વિરાજતિ યા પરશક્તિર્મમ હૃદિ રાજતિ યા વરશક્તિઃ
ઉભયમિદં મિલિતં બહુવીર્યં ભવતુ સુખં મમ સાધિતકાર્યમ્ ૬૯૧
ત્રિભુવનભૂમિપતેઃ પ્રિયયોષા ત્રિમલહરી સુરવિષ્ટપભૂષા
મમ વિતનોતુ મનોરથપોષં દુરિતવિપત્તિતતેરપિ શોષમ્ ૬૯૨
પવનજગત્પ્રભુપાવનમૂર્તિર્જલધરચાલનવિશ્રુતકીર્તિઃ
મમ કુશલાય ભવત્વરિભીમા જનનવતાં જનની બહુધામા ૬૯૩
મમ સુરરાજવધૂકલયોગ્રા ખલજનધૂનનશક્તનખાગ્રા
દમયતુ કૃત્તશિરાઃ કલુષાણિ પ્રકટબલા હૃદયસ્ય વિષાણિ ૬૯૪
કુલિશિવધૂકલયા પરિપુષ્ટા બુધનુતસન્નુણજાલવિશિષ્ટા
મમ પરિતો વિલસદ્વિભવાનિ દ્રુપદસુતા વિદધાતુ શિવાનિ ૬૯૫
સુરજનરાડ્દયિતાંશવિદીપ્તે પદકમલાશ્રિતસાધુજનાપ્તે
દુરિતવશાદભિતો ગતભાસં મનુજકુમારજનન્યવદાસમ્ ૬૯૬
અમરનરેશ્વરમન્દિરનેત્રી સુમશરજીવનસુન્દરગાત્રી
ભવતુ શચી વિતતસ્વયશસ્સુ પ્રતિફલિતા ગણનાથવચસ્સુ ૬૯૭
વિકસતુ મે હૃદયં જલજાતં વિલસતુ તત્ર શચીસ્તુતિગીતમ્
સ્ફુરતુ સમસ્તમિહેપ્સિતવસ્તુ પ્રથિતતમં મમ પાટવમસ્તુ ૬૯૮
કુરુ કરુણારસસિક્તનિરીક્ષે વચનપથાતિગસન્નુણલક્ષે
શચિ નરસિંહજમાહિતગીતં ભરતધરામવિતું પટુમેતમ્ ૬૯૯
સુલલિતતામરસૈઃ પ્રસમાપ્તં વરનુતિબન્ધમિમં શ્રવણાપ્તમ્
જનનિ નિશમ્ય સુસિદ્ધમશેષં હરિલલને મમ કુર્વભિલાષમ્ ૭૦૦
ઇતિ શ્રીભગવન્મહર્ષિરમણાન્તેવાસિનો વાસિષ્ઠસ્ય નરસિંહસૂનોઃ
ગણપતેઃ કૃતૌ ઇન્દ્રાણીસપ્તશતી સમાપ્તા
Complete Works of Ganapati Muni Vol 02-14
Proofread byDPD
Please send corrections to sanskrit@cheerful.com
Last updated ત્oday
http://sanskritdocuments.org
Indrani Saptashati Lyrics in Gujarati PDF
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website