ಇನ್ದ್ರಾಣೀಸಪ್ತಶತೀ
{॥ ಇನ್ದ್ರಾಣೀಸಪ್ತಶತೀ ॥}
॥ ಪ್ರಥಮಂ ಗಾಯತ್ರಂ ಶತಕಮ್ ॥
॥ ಪ್ರಥಮಃ ಶಶಿವದನಾಪಾದಃ ॥
ಹರಿಲಲನೇ ಮೇ ಪಥಿ ತಿಮಿರಾಣಿ ।
ಹರದರಹಾಸದ್ಯುತಿಭಿರಿಮಾನಿ ॥ ೧॥
ಅಗತಿಮವೀರ್ಯಾಮಪಗತಧೈರ್ಯಾಮ್ ।
ಅವತು ಶಚೀ ಮೇ ಜನಿಭುವಮಾರ್ಯಾಮ್ ॥ ೨॥
ಶೃಣು ಕರುಣಾವತ್ಯಲಘುಮಖರ್ವೇ ।
ಸ್ತವಮಹಮಾರ್ಯಸ್ತವ ಶಚಿ ಕುರ್ವೇ ॥ ೩॥
ತ್ರಿಜಗದತೀತೋ ವಿಲಸತಿ ನಿತ್ಯಃ ।
ಅಣುರಣುತೋ ಯೋ ಭಗವತಿ ಸತ್ಯಃ ॥ ೪॥
ತ್ವಮಖಿಲಕಾರ್ಯೇಷ್ವಯಿ ಧೃತಸಕ್ತಿಃ ।
ಉರುಗತಿರಸ್ಯ ಪ್ರಭುತಮಶಕ್ತಿಃ ॥ ೫॥
ವಿದುರಿಮಮೇಕೇ ಜಗತಿ ಮಹೇನ್ದ್ರಮ್ ।
ಜಗುರಯಿ ಕೇಚಿಜ್ಜನನಿ ಮಹೇಶಮ್ ॥ ೬॥
ಅವಗತವೇದೋ ವದತಿ ಮಹೇನ್ದ್ರಮ್ ।
ಪರಿಚಿತತನ್ತ್ರೋ ಭಣತಿ ಮಹೇಶಮ್ ॥ ೭॥
ಜನನಿ ಶಚಿ ತ್ವಂ ಪ್ರಥಮದಲಸ್ಯ ।
ಭಗವತಿ ದುರ್ಗಾಸ್ಯಪರದಲಸ್ಯ ॥ ೮॥
ನ ಶಚಿ ಶಿವಾತಸ್ತ್ವಮಿತರದೈವಮ್ ।
ಬಹುಮುನಿವಾಣೀಸಮರಸತೈವಮ್ ॥ ೯॥
ದಿವಿ ಚ ಸಿತಾದ್ರೌ ಶಚಿವಪುಷೋರ್ವಾಮ್ ।
ಪೃಥಗುಪಲಮ್ಭಾದಯಿ ಭಿದಯೋಕ್ತಿಃ ॥ ೧೦॥
ತನುಯುಗಮೂಲಂ ವಪುರತಿಮಾಯಮ್ ।
ಕರಚರಣಾದ್ಯೈರ್ವಿಯುತಮಮೇಯಮ್ ॥ ೧೧॥
ತ್ವಮುದರವರ್ತಿತ್ರಿಭುವನಜೀವಾ ।
ಭವಸಿ ಶಚೀ ಸಾ ಜನನಿ ಶಿವಾ ವಾ ॥ ೧೨॥
ವಿಭುಶುಚಿಕೀಲಾತತಿರಯಿ ಧೂಮಮ್ ।
ತ್ವಮಮರಮಾರ್ಗಂ ಬತ ವಮಸೀಮಮ್ ॥ ೧೩॥
ಜಯಸಿ ನಭಸ್ಥೋ ಜನನಿ ಪರಸ್ತಾತ್ ।
ನಭಸಿ ಚ ಭಾನ್ತೀ ಭವಸಿ ಪುರಸ್ತಾತ್ ॥ ೧೪॥
ತ್ವಮತನುರಮ್ಬ ಜ್ವಲಸಿ ಪರಸ್ತಾತ್ ।
ಇಹ ಖಶರೀರಾ ಲಸಸಿ ಪುರಸ್ತಾತ್ ॥ ೧೫॥
ಜನನಿ ಪರಸ್ತಾನ್ಮತಿರಸಿ ಭರ್ತುಃ ।
ಅಸಿ ಖಶರೀರಾ ಪೃಥಗವಗನ್ತ್ರೀ ॥ ೧೬॥
ಅಣುಚಯರೂಪಂ ಭಗವತಿ ಶಾನ್ತಮ್ ।
ನ ಭವತಿ ಶೂನ್ಯಂ ತದಿದಮನನ್ತಮ್ ॥ ೧೭॥
ದಿವಿ ದಧತೀಶೇ ಪುರುಷಶರೀರಮ್ ।
ಜನನಿ ಪುರನ್ಧ್ರೀ ತನುರಭವಸ್ತ್ವಮ್ ॥ ೧೮॥
ದೃಶಿ ವಿಲಸನ್ತಂ ಪ್ರಭುಮುಪಯಾನ್ತೀ ।
ಭವಸಿ ವಿರಾಟ್ ತ್ವಂ ನೃತನುಷು ಭಾನ್ತೀ ॥ ೧೯॥
ತವ ಗುಣಗಾನಂ ಜನನಿ ವಿಧಾತುಮ್ ।
ಭವತಿ ಪಟುಃ ಕೋ ವಿಯದಿವ ಮಾತುಮ್ ॥ ೨೦॥
ಭಗವತಿ ತೃಪ್ತಿರ್ಭವತು ನ ವಾ ತೇ ।
ಅಭಿಲಷಿತಾಪ್ತಿರ್ಭವತು ನ ವಾ ಮೇ ॥ ೨೧॥
ಭಜತಿ ತವಾಙ್ಘ್ರಿಂ ಮಮ ಖಲು ಭಾಷಾ ।
ಪತಿ ಮನುರಾಗಾತ್ ಪ್ರಿಯಮಿವ ಯೋಷಾ ॥ ೨೨॥
ಅಘಮಪಹರ್ತುಂ ಶುಭಮಪಿ ಕರ್ತುಮ್ ।
ಅಲಮಜರೇ ತೇ ಗುಣಗಣಗಾನಮ್ ॥ ೨೩॥
ಅವಸಿ ಜಗತ್ತ್ವಂ ಕುಲಿಶಿಭುಜಸ್ಥಾ ।
ಅವ ಮುನಿಭೂಮಿಂ ಗಣಪತಿಧೀಸ್ಥಾ ॥ ೨೪॥
ಶಶಿವದನಾಭಿರ್ಗಣಪತಿಜಾಭಿಃ ।
ಶಶಿವದನಾದ್ಯಾ ಪರಿಚರಿತಾಽಸ್ತು ॥ ೨೫॥
॥ ದ್ವಿತೀಯಸ್ತನುಮಧ್ಯಾಪಾದಃ ॥
ಧ್ವಾನ್ತಂ ಪರಿಹರ್ತುಂ ತೇಜಾಂಸ್ಯಪಿ ಭರ್ತುಮ್ ।
ಅನ್ತರ್ಜಗದಮ್ಬಾ ಹಾಸಂ ಕುರುತಾನ್ಮೇ ॥ ೨೬॥
ಭೀತಾಮರಿಧೂತಾಮಾರ್ಯಾವನಿಮೇತಾಮ್ ।
ಸಮ್ರಾಜ್ಞಿ ಬುಧಾನಾಂ ದೂನಾಮವ ದೀನಾಮ್ ॥ ೨೭॥
ಈಶಸ್ಯ ಸಹಾಯಾಂ ವಿಶ್ವಸ್ಯ ವಿಧಾನೇ ।
ಆಕಾಶಶರೀರಾಮಮ್ಬಾಂ ಪ್ರಣಮಾಮಃ ॥ ೨೮॥
ಕರ್ತುರ್ಭುವನಾನಾಂ ಮಾಯಾಸಿ ಶಚಿ ತ್ವಮ್ ।
ಸತ್ಯಸ್ಯ ತಪೋಽಸಿ ಜ್ಞಸ್ಯಾಸಿ ಮನೀಷಾ ॥ ೨೯॥
ಆಜ್ಞಾಸಿ ವಿನೇತುಸ್ತೇಜೋಽಸಿ ವಿಭಾತಃ ।
ನಿರ್ಯತ್ನಸಮಾಧೇರಾನನ್ದರಸೋಽಸಿ ॥ ೩೦॥
ತಸ್ಯ ತ್ವಮನನ್ಯಾಽಪ್ಯನ್ಯೇವ ಖಕಾಯಾ ।
ಅತ್ಯದ್ಭುತಮಾಯಾ ಜಾಯಾಽಸಿ ಸಹಾಯಾ ॥ ೩೧॥
ಆಕಾಶಶರೀರಾಂ ಜಾಯಾಮಶರೀರಃ ।
ಆಲಿಙ್ಗ್ಯ ವಿಭುಸ್ತ್ವಾಂ ನನ್ದತ್ಯಯಿ ಚಿತ್ರಮ್ ॥ ೩೨॥
ವಜ್ರೇಶ್ವರಿ ಘಸ್ರೇ ಯದ್ವನ್ಮುಕುಟೇನ ।
ದೀಪ್ತೇನ ಸವಿತ್ರ ಮೂರ್ಧಾ ತವ ಭಾತಿ ॥ ೩೩॥
ನಕ್ಷತ್ರಸಹಸ್ರೈಶ್ಶುಭ್ರದ್ಯುತಿಭಿಸ್ತೇ ।
ಪುಷ್ಪಾಯಿತಮೇತೈರ್ಮಾತರ್ನಿಶಿಮಸ್ತೇ ॥ ೩೪॥
ಘಸ್ರಃ ಖಲು ಕಾಲೋ ರಾಜ್ಯಂ ನನು ಕರ್ತುಮ್ ।
ರಾತ್ರಿಃ ಖಲು ಕಾಲೋ ರನ್ತುಂ ರಮಣೇನ ॥ ೩೫॥
ನಿಃಶಬ್ದತರಙ್ಗಾಸ್ವಗ್ಲೌಷು ನಿಶಾಸು ।
ನೂನಂ ಖಶರೀರೇ ಕಾನ್ತಂ ರಮಯನ್ತೀ ॥ ೩೬॥
ಸಾನ್ದ್ರೋಡುಸುಮಸ್ರಗ್ವಿಭ್ರಾಜಿತಕೇಶಾ ।
ಧ್ವಾನ್ತಾಸಿತಚೇಲಾ ಶಾನ್ತಾಽಪ್ಯಸಿ ಭೀಮಾ ॥ ೩೭॥
ರಾಜನ್ಮಿತತಾರಾಮನ್ದಾರವತಂಸಾಮ್ ।
ಮಾತಸ್ಸಿತಭಾಸಾ ಸ್ಮೇರಾಂ ಹಸಿತೇನ ॥ ೩೮॥
ಜ್ಯೋತ್ಸ್ನಾ ಘನಸಾರದ್ರಾವೈರನುಲಿಪ್ತಾಮ್ ।
ತ್ವಾಂ ವೀಕ್ಷ್ಯ ನ ಶಾನ್ತಿಃ ಕಸ್ಯ ಕ್ಷಣದಾಸು ॥ ೩೯॥
ಬಾಲಾರುಣರೋಚಿಃ ಕಾಶ್ಮೀರರಜೋಭಿಃ ।
ಆಲಿಪ್ತಮುಖೀಂ ತ್ವಾಂ ಪ್ರಾತಃ ಪ್ರಣಮಾಮಿ ॥ ೪೦॥
ಸಾಯಂ ಸಮಯಶ್ರೀ ಲಾಕ್ಷಾರಸರಕ್ತಮ್ ।
ಪ್ರತ್ಯಕ್ ಪ್ರಸೃತಂ ತೇ ವನ್ದೇ ವರದೇಽಙ್ಘ್ರಿಮ್ ॥ ೪೧॥
ದೀಪ್ತಾರ್ಕಕಿರೀಟಾಂ ಸರ್ವಾನ್ ವಿನಯನ್ತೀಮ್ ।
ವನ್ದೇ ಭುವನಾನಾಂ ರಾಜ್ಞೀಮಸಮಾನಾಮ್ ॥ ೪೨॥
ಧೂತಾಖಿಲರೋಗಾಃ ಶ್ವಾಸಾಸ್ತವ ವಾತಾಃ ।
ಮಾತರ್ವಿತರನ್ತು ಪ್ರಾಣಸ್ಯ ಬಲಂ ನಃ ॥ ೪೩॥
ಪ್ರಾಞ್ಚಸ್ತವ ವಾತಾಃ ಸ್ವಾಸಾಃ ಶಮುಶನ್ತು ।
ಪ್ರತ್ಯಞ್ಚ ಏಮೇ ನಃ ಪಾಪಂ ಶಮಯನ್ತು ॥ ೪೪॥
ಮನ್ಮಾತರವಾಞ್ಚೋ ವೀರ್ಯಂ ವಿತರನ್ತು ।
ಸನ್ತಾಪಮುದಞ್ಚಃ ಸರ್ವಂ ಚ ಹರನ್ತು ॥ ೪೫॥
ಅಸ್ಯಾ ಇವ ಭೂಮೇರ್ಭೂತಪ್ರಸವಾಯಾಃ ।
ಏಕೈಕಶ ಆಹುರ್ಯೇಷಾಂ ಮಹಿಮಾನಮ್ ॥ ೪೬॥
ಅದ್ರೇರುಪಲಾನಾಂ ನದ್ಯಾಃ ಸಿಕತಾನಾಮ್ ।
ಯೇಷಾಂ ಚ ನ ಕಧ್ಚ್ಛಿಕ್ತೋ ಗಣನಾಯಾಮ್ ॥ ೪೭॥
ರೋಮಾಯಿತಮೇತೈರ್ಗೋಲೈಸ್ತವ ಕಾಯೇ ।
ವ್ಯಾಖ್ಯಾತಮನೇನ ಶ್ಲಾಘ್ಯಂ ತವ ಭಾಗ್ಯಮ್ ॥ ೪೮॥
ವಿಶ್ವಂ ವಹಸೀದಂ ಜಮ್ಭಾರಿಭುಜಸ್ಥಾ ।
ಆರ್ಯಾನ್ವಹಮಾತರ್ವಾಸಿಷ್ಠಮತಿಸ್ಥಾ ॥ ೪೯॥
ಆದ್ಯಾಂ ಭುವನಾನಾಂ ಭರ್ತುಸ್ತನುಮಧ್ಯಾಮ್ ।
ಭಕ್ತ್ಸ್ಯ ಭಜನ್ತಾಮೇತಾಸ್ತನುಮಧ್ಯಾಃ ॥ ೫೦॥
॥ ತೃತೀಯೋ ಮುಕುಲಪಾದಃ ॥
ಹಾಸಾಃ ಶಕ್ರಗೃಹೇಶ್ವರ್ಯಾಶ್ಚನ್ದ್ರರುಚಃ ।
ಭೂಯಾಸುರ್ವಿಮಲಪ್ರಜ್ಞಾಯೈ ಹೃದಿ ಮೇ ॥ ೫೧॥
ಇನ್ದ್ರಾಣ್ಯಾಃ ಕರುಣಾ ಲೋಕಾಶ್ಶೋಕಹೃತಃ ।
ಭೂಯಾಸುರ್ಭರತಕ್ಷ್ಮಾಯೈ ಕ್ಷೇಮಕೃತಃ ॥ ೫೨॥
ವ್ಯಕ್ತಿರ್ವ್ಯೋಮತನುಃ ಶಕ್ತಿತ್ವಾದ್ವನಿತಾ ।
ಜ್ಞಾತೃತ್ವಾತ್ಪುರುಷಃ ಕೇಷಾಞ್ಚಿದ್ವಿದುಷಾಮ್ ॥ ೫೩॥
ವ್ಯಕ್ತಿಂ ವ್ಯೋಮತನುಂ ಯೇ ಪ್ರಾಹುಃ ಪುರುಷಮ್ ।
ತೇಷಾಂ ತತ್ತ್ವವಿದಾಂ ಕಲ್ಪಸ್ಸ್ಯಾತ್ ತ್ರಿವಿಧಃ ॥ ೫೪॥
ರುದ್ರಂ ಕೇಽಪಿ ಜಗುಃ ಶಕ್ರಂ ಕೇಽಪಿ ವಿದುಃ ।
ಭಾಷನ್ತೇ ಭುವನಪ್ರಾಣಂ ಕೇಽಪಿ ವಿದಃ ॥ ೫೫॥
ವ್ಯಕ್ತಿಂ ವ್ಯೋಮತನುಂ ಪ್ರಾಹುರ್ಯೇ ವನಿತಾಮ್ ।
ತೇಷಾಂ ಚ ತ್ರಿವಿಧಃ ಕಲ್ಪಶ್ಶಾಸ್ತ್ರವಿದಾಮ್ ॥ ೫೬॥
ದುರ್ಗಾ ಸೂರಿವರೈಃ ಕೈಶ್ಚಿತ್ಸಾ ಗದಿತಾ ।
ಶಚ್ಯನ್ಯೈರ್ವಿಬುಧೈರ್ಜ್ಞೈರನ್ಯೈರದಿತಿಃ ॥ ೫೭॥
ಏಕೇಷಾಂ ವಿದುಷಾಂ ವ್ಯಕ್ತಿರ್ವ್ಯೋಮತನುಃ ।
ನ ಸ್ತ್ರೀ ನೋ ಪುರುಷೋ ಬ್ರಹ್ಮೈತತ್ಸಗುಣಮ್ ॥ ೫೮॥
ತ್ವಂ ವಿಶ್ವಸ್ಯ ಮಹಾನ್ ಪ್ರಾಣಃ ಕಃ ಪರಮೇ ।
ತ್ವಂ ರುದ್ರಃ ಪ್ರಣವಸ್ತ್ವಂ ಶಕ್ರೋಽಭ್ರಶಿಖೀ ॥ ೫೯॥
ತ್ವಂ ಕಸ್ಯಾಸ್ಯದಿತಿಸ್ತ್ವಂ ರುದ್ರಸ್ಯ ಶಿವಾ ।
ತ್ವಂ ಶಕ್ರಸ್ಯ ಶಚೀ ಶಕ್ತಿರ್ದೇವನುತೇ ॥ ೬೦॥
ಪ್ರಾಣಶ್ಚ ಪ್ರಣವೋ ಜ್ಯೋತಿಶ್ಚಾಮ್ಬರಗಮ್ ।
ವಸ್ತ್ವೇಕಂ ತ್ರಿಗುಣಂ ನೋ ವಸ್ತು ತ್ರಿತಯಮ್ ॥ ೬೧॥
ಶಕ್ತೇರಮ್ಬಪರೇ ಶಕ್ತ್ಸ್ಯಾಪಿ ಭಿದಾ ।
ಜ್ವಾಲಾ ಪಾವಕವದ್ಭಾಷಾ ಭೇದಕೃತಾ ॥ ೬೨॥
ಸರ್ವಂ ದೃಶ್ಯಮಿದಂ ಭುಞ್ಜಾನೇ ಪರಮೇ ।
ಪುಂನಾಮಸ್ತುತಯೋ ಯುಜ್ಯನ್ತೇ ಖಲು ತೇ ॥ ೬೩॥
ಕುರ್ವಾಣೇಮ್ಬಸತಸ್ಸನ್ತೋಷಂ ಸತತಮ್ ।
ಸ್ತ್ರೀನಾಮಸ್ತುತಯಃ ಶೋಭಾಂ ತೇ ದಧತೇ ॥ ೬೪॥
ಸದ್ಬ್ರಹ್ಮ ಬ್ರುವತೇ ವಿದ್ವಾಂಸೋ ವಿಗುಣಮ್ ।
ತ್ವಂ ಮಾತಸ್ಸಗುಣಂ ಬ್ರಹ್ಮಾಸಿ ಪ್ರಥಿತೇ ॥ ೬೫॥
ಶಬ್ದಾದ್ಯೈರ್ವಿಯುತಂ ಸದ್ಬ್ರಹ್ಮಾಮಲಿನಮ್ ।
ಶಬ್ದಾದ್ಯೈಃ ಸಹಿತಾ ತ್ವಂ ದೇವ್ಯಚ್ಛಹಿತಾ ॥ ೬೬॥
ಸಾಕ್ಷಿ ಬ್ರಹ್ಮ ಪರಂ ತ್ವಂ ಮಾತಃ ಕುರುಷೇ ।
ಸರ್ವೇಷಾಂ ಜಗತಾಂ ಕಾರ್ಯಂ ಸರ್ವವಿಧಮ್ ॥ ೬೭॥
ದ್ಯೌರ್ಮಾತಾ ಜಗತೋ ದ್ಯೌರೇವಾಸ್ಯ ಪಿತಾ ।
ವ್ಯಾಪ್ತಂ ಭಾತಿ ಜಗದ್ದ್ಯಾವಾ ಸರ್ವಮಿದಮ್ ॥ ೬೮॥
ಆಕಾಶಾದ್ರಜಸೋ ದ್ಯೌರನ್ಯಾ ವಿರಜಾಃ ।
ಆಕಾಶೇಽಸ್ತಿ ಪುನಸ್ತತ್ಪಾರೇ ಚ ಪರಾ ॥ ೬೯॥
ದ್ಯಾವಂ ತಾಂ ಜಗತೋ ರಙ್ಗೇ ವ್ಯೋಮತನುಮ್ ।
ಪಾರೇ ಶುದ್ಧತಮಾಂ ವಿದ್ಮಸ್ತ್ವಾಂ ಪರಮೇ ॥ ೭೦॥
ತ್ವಾಂ ಪೂರ್ಣಾಮದಿತಿಂ ಶಕ್ತಿಂ ದೇವಿ ಶಚೀಮ್ ।
ನಿತ್ಯಂ ಶಬ್ದವತೀಂ ಗೌರೀಂ ಪ್ರಬ್ರುವತೇ ॥ ೭೧॥
ಪುಂನಾಮಾ ಭವತು ಸ್ತ್ರೀನಾಮಾಸ್ತ್ವಥವಾ ।
ವ್ಯಕ್ತಿರ್ವ್ಯೋಮತನುರ್ಲೋಕಂ ಪಾತ್ಯಖಿಲಮ್ ॥ ೭೨॥
ನಾಕೇ ಸಾ ಕಿಲ ಭಾತ್ಯೈನ್ದ್ರೀ ರಾಜ್ಯರಮಾ ।
ವಿಭ್ರಾಣಾ ಲಲಿತಂ ಸ್ತ್ರೀರೂಪಂ ಪರಮಾ ॥ ೭೩॥
ಶಕ್ತಾಂ ದೇವಿ ವಿಧೇಹ್ಯಾರ್ತಾನಾಮವನೇ ।
ಇನ್ದ್ರಸ್ಯೇವ ಭುಜಾಂ ವಾಸಿಷ್ಠಸ್ಯ ಮತಿಮ್ ॥ ೭೪॥
ಪೂಜಾಶಕ್ರತರುಣ್ಯೈತೈಸ್ಸಿಧ್ಯತು ತೇ ।
ಗಾತೃಣಾಂ ವರದೇ ಗಾಯತ್ರೌರ್ಮುಕುಲೈಃ ॥ ೭೫॥
॥ ಚತುರ್ಥೋ ವಸುಮತೀಪಾದಃ ॥
ಮೋಹಂ ಪರಿಹರನ್ ಯೋಗಂ ವಿತನುತಾಮ್ ।
ದೇವೇನ್ದ್ರದಯಿತಾ ಹಾಸೋ ಮಮ ಹೃದಿ ॥ ೭೬॥
ಆಭಾತು ಕರುಣಾ ಸಾ ಭಾರತಭುವಿ ।
ಸುತ್ರಾಮಸುದೃಶೋ ಯದ್ವನ್ನಿಜದಿವಿ ॥ ೭೭॥
ವನ್ದಾರುಜನತಾಮನ್ದಾರಲತಿಕಾಮ್ ।
ವನ್ದೇ ಹರಿಹಯಪ್ರಾಣಪ್ರಿಯತಮಾಮ್ ॥ ೭೮॥
ಶೋಕಸ್ಯ ದಮನೀಂ ಲೋಕಸ್ಯ ಜನನೀಮ್ ।
ಗಾಯಾಮಿ ಲಲಿತಾಂ ಶಕ್ರಸ್ಯ ದಯಿತಾಮ್ ॥ ೭೯॥
ರಮ್ಯಾ ಸುಮನಸಾಂ ಭೂಪಸ್ಯ ಮಹಿಷೀ ।
ಸೌಮ್ಯಾ ಜನಿಮತಾಂ ಮಾತಾ ವಿಜಯತೇ ॥ ೮೦॥
ವೀರ್ಯಸ್ಯ ಚ ಧಿಯಸ್ತ್ರೈಲೋಕ್ಯಭರಣೇ ।
ದಾತ್ರೀ ಮಘವತೇ ದೇವೀ ವಿಜಯತೇ ॥ ೮೧॥
ವ್ಯಾಪ್ತಾ ಜಗದಿದಂ ಗುಪ್ತಾ ಹೃದಿ ನೃಣಾಮ್ ।
ಆಪ್ತಾ ಸುಕೃತಿನಾಂ ದೈವಂ ಮಮ ಶಚೀ ॥ ೮೨॥
ಖೇ ಶಕ್ತಿರತುಲಾ ಪಾರೇ ಚಿದಮಲಾ ।
ಸ್ವಶ್ಚಾರುಮಹಿಲಾ ದೈವಂ ಮಮ ಶಚೀ ॥ ೮೩॥
ಶಸ್ತ್ರಂ ಮಘವತಃ ಶಾಸ್ತ್ರಂ ಯಮವತಾಮ್ ।
ವಸ್ತ್ರಂ ತ್ರಿಜಗತೋ ದೈವಂ ಮಮ ಶಚೀ ॥ ೮೪॥
ಯುಕ್ತ್ಸ್ಯ ಭಜತಃ ಶರ್ಮಾನ್ತರತುಲಮ್ ।
ವರ್ಮಾಪಿ ಚ ಬಹಿರ್ದೈವಂ ಮಮ ಶಚೀ ॥ ೮೫॥
ವೀರ್ಯಂ ಬಲವತಾಂ ಬುದ್ಧಿರ್ಮತಿಮತಾಮ್ ।
ತೇಜೋ ದ್ಯುತಿಮತಾಂ ದೈವಂ ಮಮ ಶಚೀ ॥ ೮೬॥
ಏಕೈವ ಜನಯನ್ತ್ಯೇಕೈವ ದಧತೀ ।
ಏಕೈವ ಲಯಕೃದ್ದೈವಂ ಮಮ ಶಚೀ ॥ ೮೭॥
ಶಕ್ತೀರವಿತಥಾಃ ಕ್ಷೇತ್ರೋಷು ದಧತೀ ।
ಬೀಜೇಷು ಚ ಪರಾ ದೈವಂ ಮಮ ಶಚೀ ॥ ೮೮॥
ಚಿನ್ವನ್ತ್ಯಪಿ ಪಚನ್ತ್ಯೇಕಾ ಪಶುಗಣಮ್ ।
ಖಾದನ್ತ್ಯಪಿ ಭವೇ ದೈವಂ ಮಮ ಶಚೀ ॥ ೮೯॥
ದೃಷ್ಟೌ ಧೃತಚಿತಿರ್ದೃಶ್ಯೇ ತತಗುಣಾ ।
ವಿಶ್ವಾತ್ಮಮಹಿಷೀ ದೈವಂ ಮಮ ಶಚೀ ॥ ೯೦॥
ರಾಕಾಶಶಿಮುಖೀ ರಾಜೀವನಯನಾ ।
ಸ್ವಃ ಕಾಪಿ ಲಲನಾ ದೈವಂ ಮಮ ಶಚೀ ॥ ೯೧॥
ಸ್ಥಾಣಾವಪಿ ಚರೇ ಸರ್ವತ್ರ ವಿತತಾ ।
ಸಾಕ್ಷಾದ್ಭವತು ಮೇ ಸ್ವರ್ನಾಥದಯಿತಾ ॥ ೯೨॥
ಯನ್ಮಾತರನೃತಂ ಧ್ಯಾತಂ ಚ ಗದಿತಮ್ ।
ಜುಷ್ಟಂ ಚ ಹರ ಮೇ ತದ್ದೇವಿ ದುರಿತಮ್ ॥ ೯೩॥
ಮಾಂ ಮೋಚಯ ಋಣಾದಿನ್ದ್ರಾಣಿ ಸುಭುಜೇ ।
ಮಾಮಲ್ಪಮತಯೋ ಮಾ ನಿನ್ದಿಷುರಜೇ ॥ ೯೪॥
ಶತ್ರುಶ್ಚ ಶಚಿ ಮೇ ಸಖ್ಯಾಯ ಯತತಾಮ್ ।
ದೃಪ್ತಶ್ಚ ಇಮನುಜೋ ಮಾಮಮ್ಬ ಭಜತಾಮ್ ॥ ೯೫॥
ಕಷ್ಟಂ ಶಚಿ ವಿಧೂಯೇಷ್ಟಂ ವಿದಧತೀ ।
ಆನನ್ದಯ ಜನಂ ಪ್ರೇಯಾಂಸಮಯಿ ಮೇ ॥ ೯೬॥
ಅಸ್ತ್ರಂ ಮಮ ಭವ ಧ್ವಂಸಾಯ ರಟತಾಮ್ ।
ಸುತ್ರಾಮರಮಣಿ ಶ್ರೀಮಾತರಸತಾಮ್ ॥ ೯೭॥
ಸಮ್ಪೂರಯತು ಮೇ ಸರ್ವಂ ಸುರನುತಾ ।
ಸ್ವರ್ಗಕ್ಷಿತಿಪತೇಶ್ಶುದ್ಧಾನ್ತವನಿತಾ ॥ ೯೮॥
ಸಂವರ್ಧಯ ಶಚಿ ಸ್ವಂ ದೇಶಮವಿತುಮ್ ।
ಬಾಹೋರಿವ ಹರೇರ್ಬುದ್ಧೇರ್ಮಮ ಬಲಮ್ ॥ ೯೯॥
ಏತೈರ್ವಸುಮತೀವೃತ್ತೈರ್ನವಸುಮೈಃ ।
ಭೂಯಾಚ್ಚರಣಯೋಃ ಪೂಜಾ ಜನನಿ ತೇ ॥ ೧೦೦॥
॥ ಪ್ರಥಮಂ ಗಾಯತ್ರಂ ಶತಕಂ ಸಮಾಪ್ತಮ್ ॥
॥ ಅಥ ದ್ವಿತೀಯಮೌಷ್ಣಿಹಂ ಶತಕಮ್ ॥
॥ ಪ್ರಥಮಃ ಕುಮಾರಲಲಿತಾಪಾದಃ ॥
ಸುರೇಶ್ವರಮಹಿಷ್ಯಾಃ ಸ್ಮಿತಂ ಶಶಿಸಿತಂ ಮೇ ।
ತನೋತು ಮತಿಮಚ್ಛಾಂ ಕರೋತು ಬಲಮಗ್ರಯ್ಮ್ ॥ ೧೦೧॥
ವಿಧಾಯ ರಿಪುಧೂತಿಂ ನಿಧಾಯ ಸುದಶಾಯಾಮ್ ।
ಪುಲೋಮತನುಜಾತಾ ಧಿನೋತು ಭರತಕ್ಷ್ಮಾಮ್ ॥ ೧೦೨॥
ಪದಪ್ರಣತರಕ್ಷಾ ವಿಧಾನಧೃತದೀಕ್ಷಾ ।
ಜಗದ್ಭರಣದಕ್ಷಾ ಪರಾ ಜಯತಿ ಶಕ್ತಿಃ ॥ ೧೦೩॥
ಸ್ವರತ್ಯವಿರತಂ ಸಾ ಶನೈರ್ನಭಸಿ ರಙ್ಗೇ ।
ಜ್ವಲತ್ಯಧಿಕಸೂಕ್ಷ್ಮಂ ಜಗತ್ಪ್ರಭವಶಕ್ತಿಃ ॥ ೧೦೪॥
ಮಹಸ್ತವ ಸುಸೂಕ್ಷ್ಮಂ ನಿದಾನಮಖಿಲಾನಾಮ್ ।
ಭವತ್ಯಖಿಲಮಾತರ್ಜಗತ್ಯನುಭವಾನಾಮ್ ॥ ೧೦೫॥
ಜನನ್ಯನುಭವಾನಾಂ ಮತಿತ್ವಪರಿಣಾಮೇ ।
ಸ್ವರೋ ಭವತಿ ಮೂಲಂ ತವಾಭ್ರಹಯರಾಮೇ ॥ ೧೦೬॥
ಯ ಈಶ್ವರಿ ನಿದಾನಂ ಸಮಸ್ತಮತಿಭಾನೇ ।
ಸ್ವರೋ ಗತಿವಿಶೇಷಾತ್ಸ ಏವ ಖಲು ಕಾಲಃ ॥ ೧೦೭॥
ಜ್ವಲನ್ತ್ಯಭಿಹಿತಾ ತ್ವಂ ವಿಹಾಯಸಿ ವಿಶಾಲೇ ।
ಪ್ರಚಣ್ಡಪದಪೂರ್ವಾ ಪ್ರಪಞ್ಚಕರಿಚಣ್ಡೀ ॥ ೧೦೮॥
ಸ್ವರನ್ತ್ಯಖಿಲಬುದ್ಧಿಪ್ರದಾ ಭವಸಿ ಗೌರೀ ।
ತ್ರಿಕಾಲತನುರಮ್ಬ ಸ್ಮೃತಾ ತ್ವಮಿಹ ಕಾಲೀ ॥ ೧೦೯॥
ಮಹಸ್ಸ್ವರ ಇತೀದಂ ದ್ವಯಂ ತದತಿಸೂಕ್ಷ್ಮಮ್ ।
ಮಹೇಶ್ವರಿ ತವಾಂಶದ್ವಯಂ ಪರಮಮುಕ್ತಮ್ ॥ ೧೧೦॥
ಮಹೋಽತಿಶಯಮಾಪ್ತಂ ತ್ವಯಿ ತ್ರಿದಿವಗಾಯಾಮ್ ।
ಸ್ವರೋಽತಿಶಯಮಾಪ್ತಃ ಸಿತಾದ್ರಿನಿಲಯಾಯಾಮ್ ॥ ೧೧೧॥
ದಿವಂ ನಯತಿ ಪೂರ್ವಾ ಭುವಂ ಯುವತಿರನ್ಯಾ ।
ದ್ವಯೋಃ ಪ್ರಕೃತಿರಭ್ರಂ ವಿಶಾಲಮತಿಮಾನ್ಯಾ ॥ ೧೧೨॥
ನ ತೇ ದಿವಿ ಲಸನ್ತ್ಯಾಃ ಪಿತಾ ತನುಭೃದನ್ಯಃ ।
ಸ್ವಯಂ ಭುವಮಿಮಾಂ ತ್ವಾಂ ಸತಾಮವನಿ ವಿದ್ಮಃ ॥ ೧೧೩॥
ಸುರಾರಿಕುಲಜನ್ಮಾ ತವೇಶ್ವರಿ ಪುಲೋಮಾ ।
ಪಿತೇತಿ ಕವಿಭಾಷಾ ಪರೋಕ್ಷಗತಿರೇಷಾ ॥ ೧೧೪॥
ವದನ್ತ್ಯಸುರಶಬ್ದೈರ್ಘನಂ ಸಜಲಮೇತಮ್ ।
ಪುಲೋಮಪದಮೇಕಂ ಪುರಾಣಸತಿತೇಷು ॥ ೧೧೫॥
ಪ್ರಕೃಷ್ಟತರದೀಪ್ತಿರ್ಗಭೀರತರನಾದಾ ।
ಇತೋ ಹಿ ಭವಸಿ ತ್ವಂ ತಟಿತ್ತನುರಮೇಯೇ ॥ ೧೧೬॥
ಅರಾತಿರಸುರೋಽಯಂ ವಿಭೋರ್ನಿಗದಿತಸ್ತೇ ।
ಹಯಶ್ಚ ಬತಗೀತಃ ಪಿತಾ ತವ ಪಯೋದಃ ॥ ೧೧೭॥
ಪ್ರಿಯೈಃ ಕಿಲ ಪರೇ ವಾಂ ಪರೋಕ್ಷವಚನೌಘೈಃ ।
ಪ್ರತಾರಿತಮಿವೇಲಾ ಜಗನ್ಮುನಿಗಣೇನ ॥ ೧೧೮॥
ನಿಕೃಷ್ಟಮಪಿ ರಮ್ಯಂ ಯದಿ ತ್ರಿದಿವಲೋಕೇ ।
ತವಾಮ್ಬ ಕಿಮು ವಾಚ್ಯಾ ರುಚಿಸ್ತ್ರಿದಿವನಾಥೇ ॥ ೧೧೯॥
ತ್ವಮಮ್ಬ ರಮಣೀಯಾ ವಧೂಸ್ತ್ವಮಿವ ನಾಕೇ ।
ತ್ವಯಾ ಕ ಇವ ತುಲ್ಯಾಂ ಮೃದೋ ವದತು ಲೋಕೇ ॥ ೧೨೦॥
ವಿನೀಲಮಿವ ಖಾಂಶಂ ವಿದುಸ್ತ್ರಿದಿವಮೇಕೇ ।
ಪರಸ್ತು ವದಸಿ ಸ್ವಃ ಕವಿಃ ಕಮಲಬನ್ಧುಮ್ ॥ ೧೨೧॥
ಅಮುತ್ರಗತಶೋಕೇ ಮಹಾಮಹಸಿ ನಾಕೇ ।
ನಮಾಮ್ಯಧಿಕೃತಾಂ ತಾಂ ಪುರಾಣಕುಲಕಾನ್ತಾಮ್ ॥ ೧೨೨॥
ಯದಾ ಮಮುತಪಕ್ವಂ ಮದೀಯಮಘಮುಗ್ರಮ್ ।
ತದಿನ್ದ್ರಕುಲಕಾನ್ತೇ ನಿವಾರಯ ಸಮಗ್ರಮ್ ॥ ೧೨೩॥
ದದಾತು ಭರತಕ್ಷ್ಮಾವಿಷಾದಹರಣಾಯ ।
ಅಲಂ ಬಲಮುದಾರಾ ಜಯನ್ತಜನನೀ ಮೇ ॥ ೧೨೪॥
ಅತೀವ ಲಲಿತಾಭಿಃ ಕುಮಾರಲಲಿತಾಭಿಃ ।
ಇಮಾಭಿರಮರೇಶಪ್ರಿಯಾ ಭಜತು ಮೋದಮ್ ॥ ೧೨೫॥
॥ ದ್ವಿತೀಯೋ ಮದಲೇಖಾಪಾದಃ ॥
ಪೌಲೋಮ್ಯಾಃ ಪರಿಶುಭ್ರಜ್ಯೋತ್ಸ್ನಾದೃಶ್ಯರುಚೋ ಮೇ ।
ಶ್ರೀಮನ್ತೋ ದರಹಾಸಾಃ ಕಲ್ಪನ್ತಾಂ ಕುಶಲಾಯ ॥ ೧೨೬॥
ಕಾರುಣ್ಯಾಮೃತಸಿಕ್ತಾ ಶಕ್ತಾ ಶಕ್ರಮಹಿಷ್ಯಾಃ ।
ಪ್ರೇಕ್ಷಾ ಭಾರತಭೂಮೇರ್ದೌರ್ಬಲ್ಯಂ ವಿಧುನೋತು ॥ ೧೨೭॥
ವನ್ದೇ ನಿರ್ಜರರಾಜ್ಞೀಂ ಸಙ್ಕ್ಲ್ಪೇ ಸತಿ ಯಸ್ಯಾಃ ।
ಸಾಧ್ಯಾಸಾಧ್ಯವಿಚಾರೋ ನೈವ ಸ್ಯಾದಣುಕೋಽಪಿ ॥ ೧೨೮॥
ಸಙ್ಕ್ಲ್ಪಸ್ತವ ಕಶ್ಚ್ಚಿಚತ್ತೇ ಚೇದ್ದಿವ ಈಶೇ ।
ಸ್ಯಾದುಲ್ಲಙ್ಘ್ಯ ನಿಸರ್ಗಂ ಸಿದ್ಧಿರ್ನಿಷ್ಫಲತಾ ಚ ॥ ೧೨೯॥
ಮೂಢೋಽಪ್ಯುತ್ತಮರೀತ್ಯಾ ಸಿಧ್ಯೇದಧ್ಯಯನೇಷು ।
ಮೇಧಾವೀ ಚ ನಿತಾನ್ತಂ ನೈವ ಸ್ಯಾತ್ಕೃತಕೃತ್ಯಃ ॥ ೧೩೦॥
ಉತ್ಪದ್ಯೇತ ಮಹೇಶ್ವರ್ಯಪ್ರಾಜ್ಞಾದಪಿ ಶಾಸ್ತ್ರಮ್ ।
ಯಾಯಾನ್ಮಾತರಕಸ್ಮಾದ್ವಿಭ್ರಾನ್ತಿಂ ವಿಬುಧೋಽಪಿ ॥ ೧೩೧॥
ಅಲ್ಪಾನಾಮಬಲಾನಾಂ ಸಙ್ಗ್ರಾಮೇ ವಿಜಯಃ ಸ್ಯಾತ್ ।
ಶಕ್ತಾನಾಂ ಬಹುಲಾನಾಂ ಘೋರಾ ಸ್ಯಾತ್ಪರಿಭೂತಿಃ ॥ ೧೩೨॥
ರಾಜೇರನ್ನೃಪಪೀಠೇಷ್ವಖ್ಯಾತಾನಿ ಕುಲಾನಿ ।
ಸ್ಯಾದ್ದುರ್ಧರ್ಷಬಲಾನಾಂ ಪಾತೋ ರಾಜಕುಲಾನಾಮ್ ॥ ೧೩೩॥
ನಿರ್ಯತ್ನೋಽಪಿ ಸಮಾಧೇರ್ವಿನ್ದೇದ್ದೇವಿ ಸಮೃದ್ಧಿಮ್ ।
ಯೋಗಸ್ಯಾಮ್ಬ ನ ಪಶ್ಯೇದಭ್ಯಸ್ಯನ್ನಪಿ ಸಿದ್ಧಿಮ್ ॥ ೧೩೪॥
ಅತ್ಯನ್ತಂ ಯದಸಾಧ್ಯಂ ನೇದಿಷ್ಠಂ ಭವತೀದಮ್ ।
ಸಾಧ್ಯಂ ಸರ್ವವಿಧಾಭಿಃ ಸ್ಯಾದಿನ್ದ್ರಾಣಿ ದವಿಷ್ಠಮ್ ॥ ೧೩೫॥
ಗಾಯಾಮೋ ಮುನಿಸಙ್ಘೈರ್ಗೇಯಾಂ ಕಾಮಪಿ ಮಾಯಾಮ್ ।
ಇನ್ದ್ರಸ್ಯಾಪಿ ವಿನೇತ್ರೀಂ ತ್ರೈಲೋಕ್ಯಸ್ಯ ಚ ಧಾತ್ರೀಮ್ ॥ ೧೩೬॥
ವಿದ್ಯಾನಾಮಧಿನಾಥೇ ಕಾಂ ವಿದ್ಯಾಂ ಶ್ರಯಸೇ ತ್ವಮ್ ।
ಇನ್ದ್ರಂ ಕರ್ತುಮಧೀನಂ ವಿಶ್ವಸ್ಮಾದಧಿಕಂ ತಮ್ ॥ ೧೩೭॥
ನಿತ್ಯಾಲಿರ್ಮಿನೀಷೇ ಸ್ತ್ರೀಮೋಹೋ ನ ವಿತರ್ಕ್ಯಃ ।
ಭ್ರೂಚೇಷ್ಟಾನುಚರತ್ವಾದನ್ಯಾ ಸ್ಯಾದನುಕಮ್ಪಾ ॥ ೧೩೮॥
ಸೌನ್ದರ್ಯಂ ಪರಮನ್ಯದ್ವಜೇರದ್ದರ್ಯಥವಾ ತೇ ।
ಹರ್ತುಂ ಯತ್ಸುಖಮೀಷ್ಟೇ ತಾದೃಕ್ತಸ್ಯ ಚ ಚಿತ್ತಮ್ ॥ ೧೩೯॥
ಚಕ್ಷುರ್ದರ್ಶನಮಾತ್ರನ್ನಿಸ್ತೇಜೋ ವಿದಧಾನಮ್ ।
ಚಿತ್ತಂ ಚೋಜ್ಝಿತಧೈರ್ಯಂ ಮತ್ತಾನಾಂ ದನುಜಾನಾಮ್ ॥ ೧೪೦॥
ಗರ್ತೇ ದುರ್ಜನದೇಹೇ ಮಗ್ನಾನ್ ಪಙ್ಕ್ವಿಲಗ್ನಾನ್ ।
ಪ್ರಾಣಾನಾತ್ಮಸಜಾತೀನುದ್ಧರ್ತುಂ ಧೃತದೀಕ್ಷಮ್ ॥ ೧೪೧॥
ವಜ್ರಂ ನಿರ್ಜರರಾಜೋ ಯದ್ಧತ್ತೇ ಸಮರೇಷು ।
ತ್ವಚ್ಛಕ್ತೇಃ ಕಲಯೈತನ್ಮನ್ಮಾತರ್ನಿರಮಾಯಿ ॥ ೧೪೨॥
ರಾಜ್ಞೀತ್ವಾತ್ಪರಮೇತೇ ರಾಜತ್ವಂ ಶತಮನ್ಯೋಃ ।
ನಿಶ್ಶಕ್ತಿಸ್ಸ ವಿನಾ ತ್ವಾಂ ಕಾಮಾಜ್ಞಾಂ ಕುರುತಾಂ ನಃ ॥ ೧೪೩॥
ಸರ್ವಂ ಶಕ್ರನಿಶಾನ್ತಸ್ಯೇಶಾನೇ ತವ ಹಸ್ತೇ ।
ಅಸ್ಮಾಕಂ ತು ಧಿಯೇದಂ ಸ್ತೋತ್ರಂ ಸಙ್ಗ್ರಹತಸ್ತೇ ॥ ೧೪೪॥
ಗನ್ತವ್ಯಂ ಸ್ವರಧೀಶೇ ನಿಶ್ಶೇಷಾರ್ಪಣಶೂರಮ್ ।
ಬಿಭ್ರಾಣಾ ನಯಸಿ ತ್ವಂ ಮಾರ್ಜಾಲೀವ ಕಿಶೋರಮ್ ॥ ೧೪೫॥
ಗೃಹ್ಣ್ನ್ನಮ್ಬರನಾಥಾಮಮ್ಬಾಮಶ್ಲಥಮನ್ಧಃ ।
ಕೀಶಸ್ಯೇವ ಕಿಶೋರೋ ಯೋಗೀ ಗಚ್ಛತಿ ಗಮ್ಯಮ್ ॥ ೧೪೬॥
ಪೂರ್ಣಾತ್ಮಾರ್ಪಣಹೀನೋಽಪ್ಯಜ್ಞಾತಾಽಪಿ ಸಮಾಧೇಃ ।
ನಿತ್ಯಂ ಯೋ ಜಗದಮ್ಬ ತ್ವಾಂ ಸೇವೇತ ಜಪಾದ್ಯೈಃ ॥ ೧೪೭॥
ತಂ ಚಾಚಞ್ಚಲಭಕ್ತಿಂ ಕೃತ್ವಾ ಪೂರಿತಕಾಮಮ್ ।
ನಿಷ್ಠಾಂ ದಾಸ್ಯಸಿ ತಸ್ಮೈ ಪೌಲೋಮಿ ಕ್ರಮಶಸ್ತ್ವಮ್ ॥ ೧೪೮॥
ಭಿನ್ನಾಂ ಸಙ್ಘಸಹಸ್ತ್ರೈಃ ಖಿನ್ನಾಂ ಶತ್ರುಭರೇಣ ।
ಪಾತುಂ ಭಾರತಭೂಮಿಂ ಮಾತರ್ದೇಹಿ ಬಲಂ ಮೇ ॥ ೧೪೯॥
ತ್ರ್ಯೈಲೋಕ್ಯಾವನಭಾರಶ್ರಾನ್ತಾಂ ವಾಸವಕಾನ್ತಾಮ್ ।
ಹೈರಮ್ಬ್ಯೋ ಮದಲೇಖಾಃ ಸಮ್ಯಕ್ ಸಮ್ಮದಯನ್ತು ॥ ೧೫೦॥
॥ ತೃತೀಯೋ ಹಂಸಮಾಲಾಪಾದಃ ॥
ಸುರುಚಿರ್ವಜ್ರಪಾಣೇಸ್ಸುದೃಶೋ ಮನ್ದಹಾಸಃ ।
ಹರತಾನ್ಮೋಹಮೂಲಂ ಹೃದಯಸ್ಥಂ ತಮೋ ಮೇ ॥ ೧೫೧॥
ಅಮೃತಂ ಸಙ್ಕಿರನ್ತ್ಯಾ ಪ್ರಸರನ್ತ್ಯೇಹ ದೃಷ್ಟ್ಯಾ ।
ಸುರರಾಜ್ಞೀ ಬಲಾಢ್ಯಾಂ ಭರತಕ್ಷ್ಮಾಂ ಕರೋತು ॥ ೧೫೨॥
ಅಮೃತಾಮ್ಭಃ ಕಿರನ್ತೀ ಕರುಣಾಮ್ಭೋ ವಹನ್ತೀ ।
ನತರಕ್ಷಾತ್ತದೀಕ್ಷಾ ಶಚಿ ಮಾತಸ್ತವೇಕ್ಷಾ ॥ ೧೫೩॥
ಕೃತಪೀಯೂಷವೃಷ್ಟಿಸ್ತತಕಲ್ಯಾಣಸೃಷ್ಟಿಃ ।
ವಿಹಿತೈನೋವಿನಷ್ಟಿರ್ಧೃತವಿಜ್ಞಾನಪುಷ್ಟಿಃ ॥ ೧೫೪॥
ಭೃತದೇವೇನ್ದ್ರತುಷ್ಟಿರ್ಯಮಿನಾಂ ದೇವಗೃಷ್ಟಿಃ ।
ಮಮ ಕಾಮ್ಯಾನಿ ದೇಯಾತ್ತವ ವಿಶ್ವಾಮ್ಬ ದೃಷ್ಟಿಃ ॥ ೧೫೫॥
ಜಗತಾಂ ಚಕ್ರವರ್ತಿನ್ಯಸಿತಸ್ತೇ ಕಟಾಕ್ಷಃ ।
ಜಲದೋ ಭಕ್ತಿಭಾಜಾಂ ಶಿಖಿನಾಂ ನರ್ತನಾಯ ॥ ೧೫೬॥
ಸುಕೃತೀ ಕೋಽಪಿ ನಾಟ್ಯೇ ಬಹುಲೇ ತತ್ರ ಮಾತಃ ।
ಜಗತೇ ಸಾರಭೂತಾನುಪದೇಶಾನ್ಕರೋತಿ ॥ ೧೫೭॥
ಅಪರೋ ನವ್ಯಕಾವ್ಯಾನ್ಯನವದ್ಯಾನಿ ಧನ್ಯಃ ।
ವಿದಧಾತ್ಯಪ್ರಯತ್ನಾದ್ಬುಧಭೋಗಕ್ಷಮಾಣಿ ॥ ೧೫೮॥
ಇತರೋ ಭಾಗ್ಯಶಾಲೀ ರಮಣೀಯೈಃ ಪ್ರಸಙ್ಗೈಃ ।
ವಿತನೋತಿ ಸ್ವಜಾತಿಂ ಜಗತಿ ಶ್ರೇಷ್ಠನೀತಿಮ್ ॥ ೧೫೯॥
ಜಗತಾಂ ಮಾತರೇಕೋ ಮಹಸಾ ಪುಣ್ಯಶಾಲೀ ।
ವಿಧುತಾರಿಃ ಸ್ವದೇಶಂ ಕುರುತೇ ವೀತಪಾಶಮ್ ॥ ೧೬೦॥
ಪರ ಇನ್ದ್ರಾಣಿ ಸಾಧುರ್ಬತ ವಿಸ್ಮೃತ್ಯ ವಿಶ್ವಮ್ ।
ರಮತೇ ಸಿಕ್ತಗಣ್ಡಃ ಪ್ರಮದಾಶ್ರುಪ್ರದಾನೈಃ ॥ ೧೬೧॥
ತವ ರಾಗಾರ್ದ್ರದೃಷ್ಟ್ಯಾ ದಿವಿ ಶಕ್ರಸ್ಯ ನಾಟ್ಯಮ್ ।
ಕರುಣಾಸಿಕ್ತದೃಷ್ಟಯಾ ಭುವಿ ಭಕ್ತ್ಸ್ಯ ನಾಟ್ಯಮ್ ॥ ೧೬೨॥
ತವ ಸಪ್ರೇಮದೃಷ್ಟಿರ್ಬಲಮಿನ್ದ್ರೇ ದಧಾತಿ ।
ತವ ಕಾರುಣ್ಯದೃಷ್ಟಿರ್ಬಲಮಸ್ಮಾಸು ಧತ್ತಾಮ್ ॥ ೧೬೩॥
ತವ ವಾಮಾಃ ಕಟಾಕ್ಷಾಃ ಪ್ರಭುಮಾನನ್ದಯನ್ತು ।
ಉಚಿತೋ ದಕ್ಷಿಣಾನಾಮಯಮಸ್ತ್ವೀಕ್ಷಣಾನಾಮ್ ॥ ೧೬೪॥
ಸುಕೃತಾನಾಂ ಪ್ರಪೋಷಂ ದುರಿತಾನಾಂ ವಿಶೋಷಮ್ ।
ಕರುಣಾರ್ದ್ರಾ ವಿಭಾನ್ತೀ ತವ ದೃಷ್ಟಿಃ ಕ್ರಿಯಾನ್ನಃ ॥ ೧೬೫॥
ಕುರು ಪಾದಾಬ್ಜಬನ್ಧೋಃ ಸರಣಿಂ ನಿಸ್ತಮಸ್ಕಾಮ್ ।
ಶಚಿ ವಿಜ್ಞಾನತೇಜಃ ಕಿರತಾವೀಕ್ಷಿತೇನ ॥ ೧೬೬॥
ಕ್ರಿಯಯಾರಾಧಯನ್ತೋ ಭುವನೇ ತೇ ವಿಭೂತೀಃ ।
ಇಹ ಕೇಚಿಲ್ಲಭನ್ತೇ ತವ ಮಾತಃ ಕಟಾಕ್ಷಾನ್ ॥ ೧೬೭॥
ಸ್ಫುಟವಿಜ್ಞಾನಪೂರ್ವಂ ಪ್ರಭಜೇರನ್ ಯದಿ ತ್ವಾಮ್ ।
ಸ್ಥಿರಯಾ ದೇವಿ ಭಕ್ತ್ಯಾ ಕಿಮು ವಕ್ತವ್ಯಮೀಶೇ ॥ ೧೬೮॥
ಕುವಿಧೇರ್ವಿಸ್ಮರನ್ತೀ ಭರತಕ್ಷ್ಮಾ ಶಚಿ ತ್ವಾಮ್ ।
ಬಹುಕಾಲಾದಭಾಗ್ಯೇ ಪತಿತಾ ದೇವ್ಯಯೋಗ್ಯೇ ॥ ೧೬೯॥
ಅಭಿಷಿಕ್ತ್ಸ್ಯ ಮಾತಾ ತವ ತೇಜೋಂಶಭೂತಾ ।
ಸುದಶಾಂ ಸೇವಮಾನಾಮನಯತ್ಪಶ್ಚಿಮಾಶಾಮ್ ॥ ೧೭೦॥
ಅಯಿ ಕಾಲಂ ಕಿಯನ್ತಂ ದಯಸೇ ಪಶ್ಚಿಮಸ್ಯಾಮ್ ।
ಇತ ಇನ್ದ್ರಾಣಿ ಪೂರ್ವಾಮವಲೋಕಸ್ವ ದೀನಾಮ್ ॥ ೧೭೧ ॥
ನ ವಯಂ ಪಶ್ಚಿಮಸ್ಯಾಶ್ಶಚಿ ಯಾಚಾಮನಾಶಮ್ ।
ಕೃಪಯೈತಾಂ ಚ ಪೂರ್ವಾಂ ನಿಹತಾಶಾಮವಾಶಾಮ್ ॥ ೧೭೨॥
ಸಕಲಂ ವ್ಯರ್ಥಮಾಸೀದಯಿ ದೀನೇಷು ದೃಷ್ಟಾ ।
ತವ ವಿಶ್ವಸ್ಯ ಮಾತಃ ಕರುಣೈಕಾವಶಿಷ್ಟಾ ॥ ೧೭೩॥
ಸುರರಾಜಸ್ಯ ಕಾನ್ತೇ ನರಸಿಂಹಸ್ಯ ಸೂನುಮ್ ।
ಬಲವನ್ತಂ ಕುರು ತ್ವಂ ಭರತಕ್ಷ್ಮಾವನಾಯ ॥ ೧೭೪॥
ರುಚಿರಾಭಿರ್ನಿಜಾಭಿರ್ಗತಿಭಿರ್ಹರ್ಷಯನ್ತು ।
ಮರುತಾಂ ಭರ್ತುರೇತಾಸ್ತರುಣೀಂ ಹಂಸಮಾಲಾಃ ॥ ೧೭೫॥
॥ ಚತುರ್ಥೋ ಮಧುಮತೀಪಾದಃ ॥
ದಿಶಿ ದಿಶಿ ಪ್ರಸರದ್ರುಚಿತಮೋದಮನಮ್ ।
ಹರತು ಮೇ ದುರಿತಂ ಹರಿವಧೂಹಸಿತಮ್ ॥ ೧೭೬॥
ಹರತು ದುಃಖಭರಪ್ರಸೃತಮಶ್ರುಜಲಮ್ ।
ಭರತಭೂಸುದೃಶೋ ಬಲಜಿತೋ ರಮಣೀ ॥ ೧೭೭॥
ಅತಿತರಾಂ ಮಹಿತಾ ಸುರಪತೇರ್ವನಿತಾ ।
ಕರುಣಯಾ ಕಲಿತಾ ಮಮ ಶಚೀ ಶರಣಮ್ ॥ ೧೭೮॥
ತ್ರಿಭುವನಕ್ಷಿತಿರಾಡ್ಭುವನಭೂಷಣಭಾ ।
ಅಖಿಲಭಾಸಕಭಾ ಮಮ ಶಚೀ ಶರಣಮ್ ॥ ೧೭೯॥
ಸತತಯುಕ್ತಸುಧೀಹೃದಯದೀಪಕಭಾ ।
ನಿಖಿಲಪಾಚಕಭಾ ಮಮ ಶಚೀ ಶರಣಮ್ ॥ ೧೮೦॥
ರವಿವಿರೋಚಕಭಾ ಶಶಿವಿರಾಜಕಭಾ ।
ಭಗಣಶೋಭಕಭಾ ಮಮ ಶಚೀ ಶರಣಮ್ ॥ ೧೮೧॥
ಗಗನಖೇಲಕಭಾ ಸಕಲಚಾಲಕಭಾ ।
ಅಭಯದಾಽತಿಶುಭಾ ಮಮ ಶಚೀ ಶರಣಮ್ ॥ ೧೮೨॥
ರುಚಿಲವಙ್ಗತಯಾ ಯದನಘಾಂಶುನಿಧೇಃ ।
ಹೃತತಮೋಭವನಂ ಭವತಿ ದೀಪಿಕಯಾ ॥ ೧೮೩॥
ಸ್ಫುರತಿ ಚಾರು ಯತಃ ಕಿರಣಮೇಕಮಿತಾ ।
ಜಲದಸೌಧತಲೇ ಮುಹುರಿಯಂ ಚಪಲಾ ॥ ೧೮೪॥
ಭವತಿ ಯದ್ದ್ಯುತಿತಃ ಕಮಪಿ ಭಾಗಮಿತಃ ।
ಪವಿರರಾತಿಹರಃ ಪ್ರಹರಣೇಶಪದಮ್ ॥ ೧೮೫॥
ಭವತಿ ಯತ್ಸುರುಚೇರಣುತಮಾಂಶಮಿತಾ ।
ಯುವಮನೋಮದನೀ ಸುವದನಾಸ್ಮಿತಭಾ ॥ ೧೮೬॥
ವಿತತಸೂಕ್ಷ್ಮತನುರ್ಮಹತಿ ಸಾ ಗಗನೇ ।
ಪರಮಪೂರುಷಭಾ ಮಮ ಶಚೀ ಶರಣಮ್ ॥ ೧೮೭॥
ಅಮರನಾಥಸಖೀ ರುಚಿನಿಧಾನಮುಖೀ ।
ಅಮೃತವರ್ಷಕದೃಙ್ ಮಮ ಶಚೀ ಶರಣಮ್ ॥ ೧೮೮॥
ಅವಿಧವಾ ಸತತಂ ಯುವತಿರೇವ ಸದಾ ।
ಅನಘವೀರಸುತಾ ಮಮ ಶಚೀ ಶರಣಮ್ ॥ ೧೮೯॥
ಅಮೃತವತ್ಯಧರೇ ಸುರಧರಾಪತಯೇ ।
ಚರಣಯೋರ್ಭಜತೇ ಮಮ ಶಚೀ ಶರಣಮ್ ॥ ೧೯೦॥
ಸ್ಮಿತಲವೇಷು ಸಿತಾ ಶಿರಸಿಜೇಷ್ವಸಿತಾ ।
ಚರಣಯೋರರುಣಾ ಬಹಿರಪಿ ತ್ರಿಗುಣಾ ॥ ೧೯೧ ॥
ಕಪಟಚನ್ದ್ರಮುಖೀ ಪ್ರಕೃತಿರಿನ್ದ್ರಸಖೀ ।
ಮೃತಿಜರಾರಹಿತಾ ಮಮ ಶಚೀ ಶರಣಮ್ ॥ ೧೯೨ ॥
ಕೃಶತಮೇಪ್ಯುದರೇ ತ್ರಿಭುವನಂ ದಧತೀ ।
ಜನಿಮತಾಂ ಜನನೀ ಮಮ ಶಚೀ ಶರಣಮ್ ॥ ೧೯೩ ॥
ಸ್ಥಿರತರಾ ಮನಸಿ ಸ್ಥಿರತಮಾ ವಚಸಿ ।
ನಯನಯೋಸ್ತರಲಾ ಮಮ ಶಚೀ ಶರಣಮ್ ॥ ೧೯೪॥
ಮೃದುತರಾ ಕರಯೋರ್ಮೃದುತಮಾ ವಚಸಿ ।
ಭುಜಬಲೇ ಕಠಿನಾ ಮಮ ಶಚೀ ಶರಣಮ್ ॥ ೧೯೫॥
ಮೃದುಲಬಾಹುಲತಾಽಪ್ಯಮಿತಭೀಮಬಲಾ ।
ಅಸುರದರ್ಪಹರೀ ಮಮ ಶಚೀ ಶರಣಮ್ ॥ ೧೯೬॥
ಅಬಲಯಾಽಪಿ ಯಯಾ ನ ಸದೃಶೋಽಸ್ತಿ ಬಲೇ ।
ಜಗತಿ ಕಶ್ಚಿದಸೌ ಮಮ ಶಚೀ ಶರಣಮ್ ॥ ೧೯೭॥
ಅತಿತರಾಂ ಸದಯಾ ಪದರತೇ ಮನುಜೇ ।
ಖಲಜನೇ ಪರುಷಾ ಮಮ ಶಚೀ ಶರಣಮ್ ॥ ೧೯೮॥
ಗಣಪತಿಂ ಕುರುತಾದ್ಭರತಭೂಮ್ಯವನೇ ।
ಅಮರಭೂಮಿಪತೇಃ ಪ್ರಿಯತಮಾ ಸಬಲಮ್ ॥ ೧೯೯॥
ಮಧುರಶಬ್ದತತೀರ್ಮಧುಮತೀರಜರಾ ।
ಗಣಪತೇಶ್ಶೃಣುಯಾತ್ಸುರಪತೇಸ್ತರುಣೀ ॥ ೨೦೦॥
॥ ದ್ವಿತೀಯಮೌಷ್ಣಿಹಂ ಶತಕಂ ಸಮಾಪ್ತಮ್ ॥
॥ ಅಥ ತೃತೀಯಮಾನುಷ್ಟುಭಂ ಶತಕಮ್ ॥
॥ ಪ್ರಥಮಃ ಪಥ್ಯಾವಕ್ತ್ರಪಾದಃ ॥
ಹಸಿತಂ ತನ್ಮಹಾಶಕ್ತೇರಸ್ಮಾಕಂ ಹರತು ಭ್ರಮಮ್ ।
ಯತ ಏವ ಮಹಚ್ಚಿತ್ರಂ ವಿಶ್ವಮೇತದ್ವಿಜೃಮ್ಭತೇ ॥ ೨೦೧॥
ರಾಜನ್ತೀ ಸರ್ವಭೂತೇಷು ಸರ್ವಾವಸ್ಥಾಸು ಸರ್ವದಾ ।
ಮಾತಾ ಸರ್ಗಸ್ಯ ಚಿತ್ಪಾಯಾತ್ ಪೌಲೋಮೀ ಭಾರತಕ್ಷಿತಿಮ್ ॥ ೨೦೨॥
ಧರ್ಮಿಜ್ಞಾನಂ ವಿಭೋಸ್ತತ್ತ್ವಂ ಧರ್ಮೋ ಜ್ಞಾನಂ ಸವಿತ್ರಿ ತೇ ।
ವ್ಯವಹೃತ್ಯೈ ವಿಭಾಗೋಽಯಂ ವಸ್ತ್ವೇಕಂ ತತ್ತ್ವತೋ ಯುವಾಮ್ ॥ ೨೦೩॥
ಇನ್ದ್ರೇಶವಾಸುದೇವಾದ್ಯೈಃ ಪದೈಃ ಸಙ್ಕೀತ್ರ್ಯತೇ ವಿಭುಃ ।
ಶಚೀ ಶಿವಾ ಮಹಾಲಕ್ಷ್ಮೀಪ್ರಮುಖೈರ್ಭವತೀ ಪದೈಃ ॥ ೨೦೪॥
ಅನ್ತರಂ ವಸ್ತುನೋ ಜ್ಞಾತೃ ತಚ್ಛಕ್ತಂ ಪರಿಚಕ್ಷತೇ ।
ಶಾಖಾಃ ಸಮನ್ತತೋ ಜ್ಞಾನಂ ಶಕ್ತಿಂ ಸಙ್ಕೀರ್ತಯನ್ತಿ ತಾಮ್ ॥ ೨೦೫॥
ಅನ್ತರಸ್ಯ ಚ ಶಾಖಾನಾಮೈಕ್ಯಂ ನಿರ್ವಿಷಯಸ್ಥಿತೌ ।
ವಿಷಯಗ್ರಹಣೇಷ್ವೇವ ಸವಿಭಾಗಃ ಪ್ರದೃಶ್ಯತೇ ॥ ೨೦೬॥
ಸ್ಯಾದೇವಂ ವಿಷಯಾಪೇಕ್ಷೀ ಶಾಖಾನಾಮನ್ತರಸ್ಯ ಚ ।
ಅವಿಭಕ್ತೈಕರೂಪಾಣಾಂ ವಿಭಾಗೋ ಹರಿತಾಮಿವ ॥ ೨೦೭॥
ಲಕ್ಷ್ಯಮನ್ತರ್ವಯಂ ಚಕ್ರೇ ಧ್ಯಾಯಾಮೋ ಯತ್ರ ನಿಷ್ಠಿತಾಃ ।
ಅನ್ತರೀಭಾವತಸ್ತಸ್ಯ ನಾನ್ತರಂ ತು ವಿಲಕ್ಷಣಮ್ ॥ ೨೦೮॥
ಅಹಙ್ಕೃತೇರ್ವಯಂ ನಾನ್ಯೇ ಯತ್ರಾಹಙ್ಕೃತಿಸಮ್ಭವಃ ।
ಸಮ್ಪದ್ಯೇತಾನ್ತರಂ ತತ್ರ ಜ್ಞಾನಸ್ಯ ಜ್ಞಾತೃತಾವಹಮ್ ॥ ೨೦೯॥
ಅನ್ತರಾವರ್ತಭೂಯಸ್ತ್ವಾದೇಕಸ್ಮಿನ್ ಬೋಧಸಾಗರೇ ।
ಬೋದ್ಧಾರೋ ಬಹವೋಽಭೂವನ್ ವಸ್ತು ನೈವ ತು ಭಿದ್ಯತೇ ॥ ೨೧೦॥
ಚಿದ್ರೂಪೇ ಮಾತರೇವಂ ತ್ವಂ ಪರಸ್ಮಾದ್ಬ್ರಹ್ಮಣೋ ಯಥಾ ।
ನ ದೇವಿ ದೇವತಾತ್ಮಭ್ಯೋ ಜೀವಾತ್ಮಭ್ಯಶ್ಚ ಭಿದ್ಯಸೇ ॥ ೨೧೧॥
ಸಮಸ್ತಭೂತಬೀಜಾನಾಂ ಗೂಢಾನಾಮನ್ತರಾತ್ಮನಿ ।
ತವೋದ್ಗಾರೋಽಯಮಾಕಾಶೋ ಮಾತಸ್ಸೂಕ್ಷ್ಮರಜೋಮಯಃ ॥ ೨೧೨॥
ನ ಸರ್ವಭೂತಬೀಜಾನಿ ವಸ್ತೂನಿ ಸ್ಯುಃ ಪೃಥಕ್ ಪೃಥಕ್ ।
ತ್ವಯಿ ಪ್ರಾಗವಿಭಕ್ತಾನಿ ಬಭೂವುರಿತಿ ವಿಶ್ರುತಿಃ ॥ ೨೧೩॥
ಯಥಾಮ್ಬಸ್ಮೃತಿಬೀಜಾನಾಂ ಪ್ರಜ್ಞಾಯಾಮವಿಶೇಷತಃ ।
ತಥಾ ಸ್ಯಾದ್ಭೂತಬೀಜಾನಾಮವಿಭಕ್ತ್ಸ್ಥಿತಿಸ್ತ್ವಯಿ ॥ ೨೧೪॥
ನಾಣೂನಿ ಭೂತಬೀಜಾನಿ ಪ್ರಾಕ್ಸರ್ಗಾತ್ತ್ವಯಿ ಸಂಸ್ಥಿತೌ ।
ಚಿತಿಶಕ್ತ್ಯಾತ್ಮಕಾನ್ಯೇವ ನಿರಾಕಾರಾಣಿ ಸರ್ವಥಾ ॥ ೨೧೫॥
ಅನಾದಿ ಚೇದಿದಂ ವಿಶ್ವಂ ಸ್ಮರಣ್ಣಾತ್ತವ ಸರ್ಜನಮ್ ।
ಸಾದಿ ಚೇದಾದಿಮಃ ಸರ್ಗೋ ವಕ್ತ್ವ್ಯಸ್ತವ ಕಲ್ಪನಾತ್ ॥ ೨೧೬॥
ವಿಧಾತುಂ ಶಕ್ನುಯಾತ್ಸಂವಿದಭೂತಸ್ಯಾಪಿ ಕಲ್ಪನಮ್ ।
ಕಲ್ಪಿತಸ್ಯೈಕದಾ ಭೂಯಃ ಸರ್ಜನಾವಸರೇ ಸ್ಮೃತಿಃ ॥ ೨೧೭॥
ಚಿತೇರಸ್ಮಾದೃಶಾಂ ವೀರ್ಯಂ ಸ್ವಪ್ನೇ ಚೇದ್ವಿಶ್ವಕಾರಣಮ್ ।
ಚಿತೇಸ್ಸಮಷ್ಟಿಭೂತಾಯಾಃ ಪ್ರಭಾವೇ ಸಂಶಯಃ ಕುತಃ ॥ ೨೧೮॥
ಮಾತಸ್ಸಮಷ್ಟಿಚಿದ್ರೂಪೇ ವಿಭೂತಿರ್ಭುವನಂ ತವ ।
ಇಹ ವ್ಯಷ್ಟಿ ಶರೀರೇಷು ಭಾನ್ತೀ ತದನುಪಶ್ಯಸಿ ॥ ೨೧೯॥
ತ್ವಂ ಬಹ್ಮ ತ್ವಂ ಪರಾಶಕ್ತಿಸ್ತ್ವಂ ಸರ್ವಾ ಅಪಿ ದೇವತಾಃ ।
ತ್ವಂ ಜೀವಾಸ್ತ್ವಂ ಜಗತ್ಸರ್ವಂ ತ್ವದನ್ಯನ್ನಾಸ್ತಿ ಕಿಞ್ಚನ ॥ ೨೨೦॥
ಸತೀ ಚಿದಮ್ಬ ನೈವ ತ್ವಂ ಭಾವಾಭಾವವಿಲಕ್ಷಣಾ ।
ಶಕ್ತಿಶಕ್ತಿಮತೋರ್ಭೇದದರ್ಶನಾದೇಷ ವಿಭ್ರಮಃ ॥ ೨೨೧॥
ತವಾಮ್ಬ ಜಗತಧಾಸ್ಯ ಮೃತ್ತಿಕಾಘಟಯೋರೇವ ।
ಸಮ್ಬನ್ಧೋ ವೇದಿತವ್ಯಃ ಸ್ಯಾನ್ನ ರಜ್ಜೌಫಣಿನೋರಿವ ॥ ೨೨೨॥
ತ್ವಂ ಶಕ್ತಿರಸ್ಯವಿಚ್ಛಿನ್ನಾ ಭಾವೈರಾತ್ಮವಿಭೂತಿಭಿಃ ।
ಅನ್ತರಾಸ್ತು ಮಹೇನ್ದ್ರಸ್ಯ ಶಕ್ತ್ಸ್ಯ ಪ್ರತಿಬಿಮ್ಬವತ್ ॥ ೨೨೩॥
ಶಕ್ತಿರ್ಗಣಪತೇಃ ಕಾಯೇ ಪ್ರವಹನ್ತೀ ಸನಾತನೀ ।
ಭಾರತಸ್ಯ ಕ್ರಿಯಾದಸ್ಯ ಬಾಧ್ಯಮಾನಸ್ಯ ರಕ್ಷಣಮ್ ॥ ೨೨೪॥
ಇಮಾನಿ ತತ್ತ್ವವಾದೀನಿ ವಾಸಿಷ್ಠಸ್ಯ ಮಹಾಮುನೇಃ ।
ಪಥ್ಯಾವಕ್ತ್ರಣಿ ಸೇವನ್ತಾಮನನ್ತಾಮಭವಾಂ ಚಿತಿಮ್ ॥ ೨೨೫॥
॥ ದ್ವಿತೀಯೋ ಮಾಣವಕಪಾದಃ ॥
ಶಕ್ತ್ತಮಾ ಶಕ್ರವಧೂ ಹಾಸವಿಭಾ ಮೇ ಹರತು ।
ಮಾನಸಮಾರ್ಗಾವರಕಂ ಜೇತುಮಶಕ್ಯಂ ತಿಮಿರಮ್ ॥ ೨೨೬॥
ಭಾರತಭೂಪದ್ಮದೃಶೋ ದುರ್ದಶಯಾ ಕ್ಷೀಣತನೋಃ ।
ಬಾಷ್ಪಮಜಸ್ರಂ ವಿಗಲದ್ವಾಸವಭಾಮಾ ಹರತು ॥ ೨೨೭॥
ದಣ್ಡಿತರಕ್ಷೋಜನತಾ ಪಣ್ಡಿತಗೀತಾವನಿತಾ ।
ಮಣ್ಡಿತಮಾಹೇನ್ದ್ರಗೃಹಾ ಖಣ್ಡಿತಪಾಪಾ ಜಯತಿ ॥ ೨೨೮॥
ಸದ್ಗುಣಸಮ್ಪತ್ಕಲಿತಂ ಸರ್ವಶರೀರೇ ಲಲಿತಮ್ ।
ದೇವಪತೇಃ ಪುಣ್ಯಫಲಂ ಪುಷ್ಯತು ಮೇ ಬುದ್ಧಿಬಲಮ್ ॥ ೨೨೯॥
ಹಾಸವಿಶೇಷೈರಲಸೈರ್ದಿಕ್ಷು ಕಿರನ್ತ್ಯಚ್ಛಸುಧಾಮ್ ।
ಇನ್ದ್ರದೃಗಾನನ್ದಕರೀ ಚನ್ದ್ರಮುಖೀ ಮಾಮವತು ॥ ೨೩೦॥
ಪ್ರೇಮತರಙ್ಗಪ್ರತಿಮೈಃ ಶೀತಲದೃಷ್ಟಿಪ್ರಕರೈಃ ।
ಶಕ್ರಮನೋಮೋಹಕರೀ ವಕ್ರಕಚಾ ಮಾಮವತು ॥ ೨೩೧॥
ಗಾಢರಸೈಶ್ಚಾರುಪದೈರ್ಗೂಢತರಾರ್ಥೈರ್ವಚನೈಃ ।
ಕಾಮಕರೀ ವೃತ್ರಜಿತೋ ಹೇಮತನುರ್ಮಾಮವತು ॥ ೨೩೨॥
ಮೃತ್ಯುತನುಃ ಕಾಲತನೋರ್ವಿಶ್ವಪತೇಃ ಪಾರ್ಶ್ವಚರೀ ।
ಪ್ರೇತಜಗದ್ರಕ್ಷತಿ ಯಾ ಸಾ ತರುಣೀ ಮಾಮವತು ॥ ೨೩೩॥
ಪ್ರೇತಜಗತ್ಕೇಚಿದಧೋ ಲೋಕಮಪುಣ್ಯಂ ಬ್ರುವತೇ ।
ಶೀತರುಚೇರ್ದೇವಿ ಪರೋ ನೇತರದೇತದ್ ವದತಿ ॥ ೨೩೪॥
ಭೂರಿಯಮುರ್ವೀ ವಸುಧಾ ವಾರಿಜವೈರ್ಯೇಷಭುವಃ ।
ಸ್ವರ್ಮಹಸಾಂ ರಾಶಿರಸೌ ಯೇಷು ನರಪ್ರೇತಸುರಾಃ ॥ ೨೩೫॥
ರಾಜತಶೈಲಂ ಶಶಿನಃ ಕೇಚಿದಭಿನ್ನಂ ಬ್ರುವತೇ ।
ಮೃತ್ಯುಯಮಾವೇವ ಶಿವಾವೀಶ್ವರಿ ತೇಷಾಂ ತು ಮತೇ ॥ ೨೩೬॥
ರಾಜತಶೈಲಃ ಪಿತೃಭೂರೋಷಧಿರಾಡೇಷ ಯದಿ ।
ಕಾಞ್ಚನಶೈಲಃ ಸುರಭೂರ್ಬನ್ಧುರಸೌ ವಾರಿರುಹಾಮ್ ॥ ೨೩೭॥
ಪಾವಯ ಭೂಮಿಂ ದಧತಃ ಪಾವಕಕಾಯಸ್ಯ ವಿಭೋಃ ।
ಭಾಮಿನಿ ಭಾವಾನುಗುಣೇ ಸೇವಕಮಗ್ನಾಯಿ ತವ ॥ ೨೩೮॥
ಯಸ್ಯ ಯಮೋ ಭೂತಪತಿರ್ಬುದ್ಧಿಮತಸ್ತಸ್ಯ ಮತೇ ।
ಆಗ್ನಿರುಪೇನ್ದ್ರೋ ಮಘವಾ ಕಾಞ್ಚನಗರ್ಭೋ ಭಗವಾನ್ ॥ ೨೩೯॥
ಯಸ್ಯ ಮಹಾಕಾಲವಧೂರ್ಮೃತ್ಯುರಪಿ ದ್ವೇ ನ ವಿದಃ ।
ತ್ವಂ ಶಚಿ ಮೇಧಾಽಸ್ಯಮತೇ ಪಾವಕಶಕ್ತಿಃ ಕಮಲಾ ॥ ೨೪೦॥
ನಾಮಸು ಭೇದೋಽಸ್ತು ಧಿಯಾಮೀಶ್ವರಿ ನಿಷ್ಕೃಷ್ಟಮಿದಮ್ ।
ಸೂರ್ಯಧರೇನ್ದುಷ್ವಜರೇ ತ್ವಂ ತ್ರಿತನುರ್ಭಾಸಿ ಪರೇ ॥ ೨೪೧॥
ಸಾತ್ತ್ವಿಕಶಕ್ತಿಃ ಸವಿತರ್ಯಾದಿಮರಾಮೇ ಭವಸಿ ।
ರಾಜಸಶಕ್ತಿರ್ಭುವಿ ನಸ್ತಾಮಸಶಕ್ತಿಃ ಶಶಿನಿ ॥ ೨೪೨॥
ಸರ್ವಗುಣಾ ಸರ್ವವಿಭಾ ಸರ್ವಬಲಾ ಸರ್ವರಸಾ ।
ಸರ್ವಮಿದಂ ವ್ಯಾಪ್ಯ ಜಗತ್ಕಾಪಿ ವಿಭಾನ್ತೀ ಪರಮಾ ॥ ೨೪೩॥
ವ್ಯೋಮತನುರ್ನಿರ್ವಪುಷೋ ದೇವಿ ಸತಸ್ತ್ವಂ ದಯಿತಾ ।
ಅಸ್ಯಭಿಯುಕ್ತೈರ್ವಿಬುಧೈರಮ್ಬ ಮಹೇಶ್ವರ್ಯುದಿತಾ ॥ ೨೪೪॥
ಸಾ ಖಲು ಮಾಯಾ ಪರಮಾ ಕಾರಣಮೀಶಂ ವದತಾಮ್ ।
ಸಾ ಪ್ರಕೃತಿಃ ಸಾಙ್ಖ್ಯವಿದಾಂ ಸಾ ಯಮಿನಾಂ ಕುಣ್ಡಲಿನೀ ॥ ೨೪೫॥
ಸಾ ಲಲಿತಾ ಪಞ್ಚದಶೀಮುತ್ತಮವಿದ್ಯಾಂ ಜಪತಾಮ್ ।
ಸಾ ಖಲು ಚಣ್ಡೀ ಜನನೀ ಸಾಧುನವಾರ್ಣಂ ಭಜತಾಮ್ ॥ ೨೪೬॥
ಸಾ ಮಮ ಶಚ್ಯಾಃ ಪರಮಂ ಕಾರಣರೂಪಂ ಭವತಿ ।
ಕಾರ್ಯತನುರ್ದಿವಿ ಶಕ್ರಂ ಸಮ್ಮದಯನ್ತೀ ಲಸತಿ ॥ ೨೪೭॥
ವ್ಯೋಮತನೋಃ ಸರ್ವಜಗಚ್ಚಾಲನಸೂತ್ರಂ ತು ವಶೇ ।
ನಿರ್ವಹಣೇ ತಸ್ಯ ಪುನರ್ದಿವ್ಯತನುಸ್ತ್ರೀತ್ರಿತಯಮ್ ॥ ೨೪೮॥
ಪಾತುಮಿಮಂ ಸ್ವಂ ವಿಷಯಂ ಹನ್ತ ಚಿರಾನ್ನಿರ್ವಿಜಯಮ್ ।
ಕಿಙ್ಕ್ರಮೀಶೇ ವಿಭಯಂ ಮಾಂ ಕುರು ಪರ್ಯಾರ್ಶಿಯಮ್ ॥ ೨೪೯॥
ಚಾರುಪದಕ್ರೀಡನಕೈರ್ಮಾತರಿಮೈರ್ಮಾಣವಕೈಃ ।
ಚೇತಸಿ ತೇ ದೇವನುತೇ ಪ್ರೀತಿರಮೋಘಾ ಭವತು ॥ ೨೫೦॥
॥ ತೃತೀಯಶ್ಚಿತ್ರಪದಾಪಾದಃ ॥
ಅಪ್ಯಲಸೋ ಹರಿದನ್ತಧ್ವಾನ್ತತತೇರಪಿ ಹರ್ತಾ ।
ಅಸ್ತು ಮಮೇನ್ದ್ರಪುರನ್ಧ್ರೀ ಹಾಸಲವಃ ಶುಭಕರ್ತಾ ॥ ೨೫೧॥
ಪಾಹಿ ಪರೈರ್ಹೃತಸಾರಾಂ ನೇತ್ರಗಲಜ್ಜಲಧಾರಾಮ್ ।
ಭಾರತಭೂಮಿಮನಾಥಾಂ ದೇವಿ ವಿಧಾಯ ಸನಾಥಾಮ್ ॥ ೨೫೨॥
ಚಾಲಯತಾ ಸುರರಾಜಂ ಪಾಲಯತಾ ಭುವನಾನಿ ।
ಶೀಲಯತಾ ನತರಕ್ಷಾಂ ಕಾಲಯತಾ ವೃಜಿನಾನಿ ॥ ೨೫೩॥
ಲಾಲಯತಾ ಮುನಿಸಙ್ಘಂ ಕೀಲಯತಾ ದಿವಿ ಭದ್ರಮ್ ।
ಪಾವಯ ಮಾಂ ಸಕೃದೀಶೇ ಭಾಸುರದೃಕ್ಪ್ರಸರೇಣ ॥ ೨೫೪॥
ಸರ್ವರುಚಾಮಾಪಿ ಶಾಲಾಂ ತ್ವಾಂ ಶಚಿ ಮಙ್ಗಲಲೀಲಾಮ್ ।
ಕಾಲಕಚಾಮುತ ಕಾಲೀಂ ಪದ್ಮಮುಖೀಮುತ ಪದ್ಮಾಮ್ ॥ ೨೫೫॥
ಯಃ ಸ್ಮರತಿ ಪ್ರತಿಕಲ್ಯಂ ಭಕ್ತಿಭರೇಣ ಪರೇಣ ।
ತಸ್ಯ ಸುರೇಶ್ವರಿ ಸಾಧೋರಸ್ಮಿ ಪದಾಬ್ಜಭುಜಿಷ್ಯಃ ॥ ೨೫೬॥
ಯಸ್ತವ ನಾಮಪವಿತ್ರಂ ಕೀರ್ತಯತೇ ಸುಕೃತೀ ನಾ ।
ವಾಸವಸುನ್ದರಿ ದಾಸಸ್ತಚ್ಚರಣಸ್ಯ ಸದಾಽಹಮ್ ॥ ೨೫೭॥
ಪಾವಕಸಾಗರಕೋಣಂ ಯಸ್ತವ ಪಾವನಯನ್ತ್ರಮ್ ।
ಪೂಜಯತಿ ಪ್ರತಿಘಸ್ರಂ ದೇವಿ ಭಜಾಮಿ ತದಙ್ಧ್ರಿಮ್ ॥ ೨೫೮॥
ಯಸ್ತವ ಮನ್ತ್ರಮುದಾರಪ್ರಾಭವಮಾಗಮಸಾರಮ್ ।
ಪಾವನಿ ಕೂರ್ಚಮುಪಾಸ್ತೇ ತಸ್ಯ ನಮಧ್ರಣಾಯ ॥ ೨೫೯॥
ಶಾನ್ತಧಿಯೇತರಚಿನ್ತಾಸನ್ತತಿಮಮ್ಬ ವಿಧೂಯ ।
ಚಿನ್ತಯತಾಂ ತವ ಪಾದಾವಸ್ಮಿ ಸತಾಮನುಯಾಯೀ ॥ ೨೬೦॥
ಶೋಧಯತಾಂ ನಿಜತತ್ತ್ವಂ ಸಾಧಯತಾಂ ಮಹಿಮಾನಮ್ ।
ಭಾವಯತಾಂ ಚರಣಂ ತೇ ದೇವಿ ಪದಾನುಚರೋಽಹಮ್ ॥ ೨೬೧॥
ಯೋಽನುಭವೇನ್ನಿಜದೇಹೇ ತ್ವಾಮಜರೇ ಪ್ರವಹನ್ತೀಮ್ ।
ಸನ್ತತಚಿನ್ತನಯೋಗಾತ್ತಸ್ಯ ನಮಾಮಿ ಪದಾಬ್ಜಮ್ ॥ ೨೬೨॥
ಬೋಧಯತೇ ಭವತೀಂ ಯಃ ಪ್ರಾಣಗತಾಗತದರ್ಶೀ ।
ಕುಣ್ಡಲಿನೀಂ ಕುಲಕುಣ್ಡಾತ್ತಂ ತ್ರಿದಿವೇಶ್ವರಿ ವನ್ದೇ ॥ ೨೬೩॥
ಲೋಚನಮಣ್ಡಲಸೌಧಾಂ ಲೋಕನಮೂಲವಿಚಾರೀ ।
ವಿನ್ದತಿ ಯಃ ಪರಮೇ ತ್ವಾಂ ವನ್ದನಮಸ್ಯ ಕರೋಮಿ ॥ ೨೬೪॥
ಮಾನಿನಿ ಜಮ್ಭಜಿತಸ್ತ್ವಾಂ ಮಾನಸಮೂಲವಿತರ್ಕೀ ।
ವೇದಹೃದಮ್ಬುರುಹೇ ಯಃ ಪಾದಮಮುಷ್ಯ ನಮಾಮಿ ॥ ೨೬೫॥
ಅನ್ತರನಾದವಿಮರ್ಶೀ ಪಶ್ಯತಿ ಯಃ ಸುಕೃತೀ ತೇ ।
ವೈಭವಮಮ್ಬ ವಿಶುದ್ಧೇ ತೇನ ವಯಂ ಪರವನ್ತಃ ॥ ೨೬೬॥
ಇನ್ದ್ರಪದಸ್ಥಿತಚಿತ್ತಶ್ಶೀರ್ಷಸುಧಾರಸಮತ್ತಃ ।
ಯೋ ಭಜತೇ ಜನನಿ ತ್ವಾಂ ತಚ್ಚರಣಂ ಪ್ರಣಮಾಮಿ ॥ ೨೬೭॥
ರಾಸನವಾರಿಣಿ ಲಗ್ನಃ ಸಮ್ಮದವೀಚಿಷು ಮಗ್ನಃ ।
ಧ್ಯಾಯತಿ ಯಃ ಪರಮೇ ತ್ವಾಂ ತಸ್ಯ ಪದಂ ಮಮ ವನ್ದ್ಯಮ್ ॥ ೨೬೮॥
ತ್ವಾಂ ಸದಹಞಙ್ಕೃತಿರೂಪಾಂ ಯೋಗಿನುತೇ ಹತಪಾಪಾಮ್ ।
ಧಾರಯತೇ ಹೃದಯೇ ಯಸ್ತಸ್ಯ ಸದಾಽಸ್ಮಿ ವಿಧೇಯಃ ॥ ೨೬೯॥
ಧೂತಸಮಸ್ತವಿಕಲ್ಪೋ ಯಸ್ತವ ಪಾವನಲೀಲಾಮ್ ।
ಶೋಧಯತಿ ಸ್ವಗುಹಾಯಾಂ ತಸ್ಯ ಭವಾಮ್ಯನುಜೀವೀ ॥ ೨೭೦॥
ಯೋ ಭಜತೇ ನಿಜದೃಟಿಂ ರೂಪಪರಿಗ್ರಹಣೇಷು ।
ಕಾಮಪಿ ದೇವಿ ಕಲಾಂ ತೇ ತಸ್ಯ ಪದೇ ನಿಪತೇಯಮ್ ॥ ೨೭೧॥
ಕರ್ಮಣಿ ಕರ್ಮಣಿ ಚೇಷ್ಟಾಮಮ್ಬ ತವೈವ ವಿಭೂತಿಮ್ ।
ಯಃ ಶಿತಬುದ್ಧಿರುಪಾಸ್ತೇ ತತ್ಪದಮೇಷ ಉಪಾಸ್ತೇ ॥ ೨೭೨॥
ವಸ್ತುನಿ ವಸ್ತುನಿ ಸತ್ತಾಂ ಯೋ ಭವತೀಂ ಸಮುಪಾಸ್ತೇ ।
ಮಾತರಮುಷ್ಯ ವಹೇಯಂ ಪಾದಯುಗಂ ಶಿರಸಾಽಹಮ್ ॥ ೨೭೩॥
ಪಾತುಮಿಮಂ ನಿಜದೇಶಂ ಸರ್ವದಿಶಾಸು ಸಪಾಶಮ್ ।
ಅಮ್ಬ ವಿಧಾಯ ಸಮರ್ಥಂ ಮಾಂ ಕುರು ದೇವಿ ಕೃತಾರ್ಥಮ್ ॥ ೨೭೪॥
ಚಿತ್ರಪದಾಭಿರಿಮಾಭಿಶ್ಚಿತ್ರವಿಚಿತ್ರಚರಿತ್ರಾ ।
ಸಮ್ಮದಮೇತು ಮಘೋನಃ ಪ್ರಾಣಸಖೀ ಮೃಗನೇತ್ರ ॥ ೨೭೫॥
॥ ಚತುರ್ಥೋ ನಾರಾಚಿಕಾಪಾದಃ ॥
ಅನ್ತರ್ವಿಧುನ್ವತಾ ತಮಃ ಪ್ರಾಣಸ್ಯ ತನ್ವತಾ ಬಲಮ್ ।
ಮನ್ದಸ್ಮಿತೇನ ದೇವತಾರಾಜ್ಞೀ ಕರೋತು ಮೇ ಶಿವಮ್ ॥ ೨೭೬॥
ಉತ್ಥಾಪ್ಯ ಪುಣ್ಯಸಞ್ಚಯಂ ಸಮ್ಮದ್ರ್ಯ ಪಾಪಸಂಹತಿಮ್ ।
ಸಾ ಭಾರತಸ್ಯ ಸಮ್ಪದೇ ಭೂಯಾದ್ಬಲಾರಿಭಾಮಿನೀ ॥ ೨೭೭॥
ಲೀಲಾಸಖೀ ಬಿಡೌಜಸಸ್ಸ್ವರ್ವಾಟಿಕಾಸು ಖೇಲನೇ ।
ಪೀಯುಷಭಾನುಜಿನ್ಮುಖೀ ದೇವೀ ಶಚೀ ವಿರಾಜತೇ ॥ ೨೭೮॥
ಪಕ್ಷಃ ಪರೋ ಮರುತ್ವತೋ ರಕ್ಷಃ ಪ್ರವೀರಮರ್ದನೇ ।
ಭಾಮಾಲಿ ಭಾಸುರಾನನಾ ದೇವೀ ಶಚೀ ವಿರಾಜತೇ ॥ ೨೭೯॥
ಭೀತಿಂ ನಿಶಾಟಸಂಹತೇಃ ಪ್ರೀತಿಂ ಸುಪರ್ವಣಾಂ ತತೇಃ ।
ಜ್ಯಾಟಙ್ಕೃತೈರ್ವಿತನ್ವತೀ ದೇವೀ ಶಚೀ ವಿರಾಜತೇ ॥ ೨೮೦॥
ದೇವೇನ್ದ್ರಶಕ್ತಿಧಾರಿಣೀ ಶತ್ರುಪ್ರಸಕ್ತಿವಾರಿಣೀ ।
ಮೌನೀನ್ದ್ರಮುಕ್ತಿಕಾರಿಣೀ ದೇವೀ ಶಚೀ ಗತಿರ್ಮಮ ॥ ೨೮೧॥
ಸನ್ನಸ್ವದೇಶದರ್ಶನಾದ್ಭಿನ್ನಸ್ವಜಾತಿವೀಕ್ಷಣಾತ್ ।
ಖಿನ್ನಸ್ಯ ಸಂಶ್ರಿತಾವನೀ ದೇವೀ ಶಚೀ ಗತಿರ್ಮಮ ॥ ೨೮೨॥
ಸಙ್ಘೇ ಸಹಸ್ರಧಾಕೃತೇ ದೇಶೇ ನಿಕೃಷ್ಟತಾಂ ಗತೇ ।
ಶೋಕಾಕುಲಸ್ಯ ಲೋಕಭೃದ್ದೇವೀ ಶಚೀ ಗತಿರ್ಮಮ ॥ ೨೮೩॥
ಸಾ ಸಂವಿದೋಽಧಿದೇವತಾ ತಸ್ಯಾಸ್ಸ್ವರಃ ಪರೋ ವಶೇ ।
ಸರ್ವಂ ವಿಧೀಯತೇ ತಯಾ ತಸ್ಮಾತ್ಪರಾ ಮತಾ ಶಚೀ ॥ ೨೮೪॥
ಸಾ ಯಾತಿ ಸೂಕ್ಷ್ಮಮಪ್ಯಲಂ ಸಾ ಭಾತಿ ಸರ್ವವಸ್ತುಷು ।
ಸಾ ಮಾತಿ ಖಂ ಚ ನಿಸ್ತುಲಂ ತಸ್ಮಾತ್ಪರಾ ಮತಾ ಶಚೀ ॥ ೨೮೫॥
ಸಾ ಸರ್ವಲೋಕನಾಯಿಕಾ ಸಾ ಸರ್ವಗೋಲಪಾಲಿಕಾ ।
ಸಾ ಸರ್ವದೇಹಚಾಲಿಕಾ ತಸ್ಮಾತ್ಪರಾ ಮತಾ ಶಚೀ ॥ ೨೮೬॥
ಯಸ್ಯಾಃ ಕೃತಿರ್ಜಗತ್ತ್ರಯಂ ಯಾ ತದ್ಬಿಭರ್ತಿ ಲೀಲಯಾ ।
ಯಸ್ಯಾಂ ಪ್ರಯಾತಿ ತಲ್ಲಯಂ ಸಾ ವಿಶ್ವನಾಯಿಕಾ ಶಚೀ ॥ ೨೮೭॥
ಧರ್ಮೇ ಪರಿಕ್ಷಯಂ ಗತೇ ಯಾಽವಿಶ್ಯ ನಿರ್ಮಲಂ ಜನಮ್ ।
ತದ್ರಕ್ಷಣಾಯ ಜಾಯತೇ ಸಾ ವಿಶ್ವನಾಯಿಕಾ ಶಚೀ ॥ ೨೮೮॥
ವೇಧಾ ಋತಸ್ಯ ಯೋದಿತಾ ಮನ್ತ್ರೇಣ ಸತ್ಯವಾದಿನಾ ।
ಬಾಧಾನಿವಾರಿಣೀ ಸತಾಂ ಸಾ ವಿಶ್ವನಾಯಿಕಾ ಶಚೀ ॥ ೨೮೯॥
ಯಜ್ಞೋ ಯಯಾ ವಿನೀಯತೇ ಯುದ್ಧಂ ತಥಾ ಪೃಥಗ್ವಿಧಭ್ ।
ತಾಂ ದೇವರಾಜಮೋಹಿನೀಂ ನಾರೀಂ ನುಮಃ ಪುರಾತನೀಮ್ ॥ ೨೯೦॥
ಯಸ್ಯಾಸ್ಸುತೋ ವೃಷಾಕಪಿರ್ದೇವೋಽಸತಾಂ ಪ್ರಶಾಸಿತಾ ।
ತಾಂ ಸರ್ವದಾ ಸುವಾಸಿನೀಂ ನಾರೀಂ ನುಮಃ ಪುರಾತನೀಮ್ ॥ ೨೯೧॥
ಯಸ್ಯಾಸ್ಸಮಾ ನಿತಮ್ಬಿನೀ ಕಾಚಿನ್ನ ವಿಷ್ಟಪತ್ರಯೇ ।
ತಾಂ ನಿತ್ಯಚಾರು ಯೌವನಾಂ ನಾರೀಂ ನುಮಃ ಪುರಾತನೀಮ್ ॥ ೨೯೨॥
ಯಚ್ಚಾರುತಾ ನ ದೃಶ್ಯತೇ ಮನ್ದಾರಪಲ್ಲವೇಷ್ವಪಿ ।
ತತ್ಸುನ್ದರಾಚ್ಚಸುನ್ದರಂ ಶಚ್ಯಾಃ ಪದಾಮ್ಬುಜಂ ಶ್ರಯೇ ॥ ೨೯೩॥
ಯಸ್ಯ ಪ್ರಭಾ ನ ವಿದ್ಯತೇ ಮಾಣಿಕ್ಯತಲ್ಲ್ಜೇಷ್ವಪಿ ।
ತದ್ಭಾಸುರಾಚ್ಚ ಭಾಸುರಂ ಶಚ್ಯಾಃ ಪದಾಮ್ಬುಜಂ ಶ್ರಯೇ ॥ ೨೯೪॥
ನ ಸ್ಯಾದಘೈಸ್ತಿರಸ್ಕೃತೋ ಯಚ್ಚಿನ್ತಕೋ ನರಃ ಕೃತೀ ।
ತತ್ಪಾವನಾಚ್ಚ ಪಾವನಂ ಶಚ್ಯಾಃ ಪದಾಮ್ಬುಜಂ ಶ್ರಯೇ ॥ ೨೯೫॥
ರಾಜನ್ನಖೇನ್ದುಭಾನುಭಿಸ್ಸರ್ವಂ ತಮೋ ವಿಧುನ್ವತೇ ।
ಬೃನ್ದಾರಕೇನ್ದ್ರಸುನ್ದರೀಪಾದಾಮ್ಬುಜಾಯ ಮಙ್ಗಲಮ್ ॥ ೨೯೬॥
ಗೀರ್ವಾಣಮೌಲಿರೀಭಾ ಸಙ್ಕ್ಷಾಲಿತಾಯ ದೀಪ್ಯತೇ ।
ಸ್ವರ್ಗಾಧಿನಾಥಭಾಮಿನಿಪಾದಾಮ್ಬುಜಾಯ ಮಙ್ಗಲಮ್ ॥ ೨೯೭॥
ಬಾಲಾರ್ಕಬಿಮ್ಬರೋಚಿಷೇ ಯೋಗೀನ್ದ್ರ ಹೃದ್ಗುಹಾಜುಷೇ ।
ಪಾಕಾರಿಜೀವಿತೇಶ್ವರೀಪಾದಾಮ್ಬುಜಾಯ ಮಙ್ಗಲಮ್ ॥ ೨೯೮॥
ಆತ್ಮೀಯದೇಶರಕ್ಷಣೇ ಶಕ್ತಂ ಕರೋತು ಸರ್ವಥಾ ।
ಪಾಪದ್ವಿಷಾಂ ಪ್ರಿಯಙ್ಕರೀ ವಾಸಿಷ್ಠಮಿನ್ದ್ರಸುನ್ದರೀ ॥ ೨೯೯॥
ವಾಸಿಷ್ಠವಾಕ್ಪ್ರದೀಪ್ತಿರ್ಭಿನಾರಾಚಿಕಾಭಿರೀಶ್ವರೀ ।
ಗೀರ್ವಾಣಚಕ್ರವರ್ತಿನಸ್ಸಮ್ಮೋದಮೇತು ಸುನ್ದರೀ ॥ ೩೦೦॥
॥ ತೃತೀಯಮಾನುಷ್ಟುಭಂ ಶತಕಂ ಸಮಾಪ್ತಮ್ ॥
॥ ಅಥ ಚತುರ್ಥಂ ಬಾರ್ಹತಂ ಶತಕಮ್ ॥
॥ ಪ್ರಥಮೋ ಹಲಮುಖೀಪಾದಃ ॥
ಕ್ಷೀರವೀಚಿಪೃಷತಸಿತಂ ಪ್ರೇಮಧಾರಿದರಹಸಿತಮ್ ।
ನಾಕರಾಜನಲಿನದೃಶಃ ಶೋಕಹಾರಿ ಮಮ ಭವತು ॥ ೩೦೧॥
ಅಧ್ವನೋ ಗಲಿತಚರಣಾಮಧ್ವರಕ್ಷಿತಿಮವಿಭವಾಮ್ ।
ಆದಧಾತು ಪಥಿ ವಿಮಲೇ ವೈಭವೇ ಚ ಹರಿತರುಣೀ ॥ ೩೦೨॥
ಬ್ರಹ್ಮಣಶ್ವಿತಿರಥನಭಃ ಕಾಯಭಾಗವಗತಿಮತೀ ।
ಯಾ ತದಾ ಪೃಥಗಿವ ಬಭೌ ಧರ್ಮಿತಾಂ ಸ್ವಯಮಪಿ ಗತಾ ॥ ೩೦೩॥
ಮೋದಬೋಧವಿಭವಕೃತಪ್ರಾಕೃತೇತರವರತನು ।
ಸರ್ವಸದ್ಗುಣಗಣಯುತಂ ಯಾ ಸಸರ್ಜ ಸುರಮಿಥುನಮ್ ॥ ೩೦೪॥
ಪುಂಸಿ ದೀಪ್ತವಪುಷಿ ತಯೋರ್ಬ್ರಹ್ಮ ಸೋಽಹಮಿತಿ ಲಸತಿ ।
ಯೋಷಿತೇ ಕಿಲ ಧಿಯಮದಾತ್ತಸ್ಯ ಶಕ್ತಿರಹಮಿತಿ ಯಾ ॥ ೩೦೫॥
ಯಾಭಿಮಾನಬಲವಶತಸ್ತಾಮುದಾರತಮವಿಭವಾಮ್ ।
ಮನ್ಯತೇ ಸ್ಮ ವರವನಿತಾಂ ಸ್ವಾಧಿದೈವಿಕತನುರಿತಿ ॥ ೩೦೬॥
ಆದಿಪುಂಸಿ ಗಗನತನುರ್ಯಾ ತನೋತಿ ತನುಜಮತಿಮ್ ।
ಆದಧಾತಿ ಯುವತಿತನುಃ ಪ್ರಾಣನಾಯಕ ಇತಿ ರತಿಮ್ ॥ ೩೦೭॥
ತಾಂ ಪರಾಂ ಭುವನಜನನೀಂ ಸರ್ವಪಾಪತತಿಶಮನೀಮ್ ।
ತನ್ತ್ರಜಾಲವಿನುತಬಲಾಂ ಸ್ತೌಮಿ ಸರ್ವಮತಿಮಮಲಾಮ್ ॥ ೩೦೮॥
ಸಾ ಮತಿರ್ವಿದಿತವಿಷಯಾ ಸಾ ರುಚಿರ್ವಿತತವಿಷಯಾ ।
ಸಾ ರತಿರ್ವಿನುತವಿಷಯಾ ಸಾ ಸ್ಥಿತಿರ್ವಿಧುತವಿಷಯಾ ॥ ೩೦೯॥
ಯತ್ರ ಯತ್ರ ಮಮ ಧಿಷಣಾ ಗ್ರಾಹ್ಯವಸ್ತುನಿ ಗತಿಮತೀ ।
ತತ್ರ ತತ್ರ ವಿಲಸತು ಸಾ ಸರ್ವಗಾ ಸಕಲಚರಿತಾ ॥ ೩೧೦॥
ದುರ್ಬಲಸ್ಯ ಬಹುಲಬಲೈರರ್ದಿತಸ್ಯ ಜಗತಿ ಖಲೈಃ ।
ಆದಿದೇವಿ ತವ ಚರಣಂ ಪಾವನಂ ಭವತಿ ಶರಣಮ್ ॥ ೩೧೧॥
ಪೌರುಷೇ ಭವತಿ ವಿಫಲೇ ತ್ವಾಮಯಂ ಜನನಿ ಭಜತೇ ।
ಕಿಂ ನುತೇ ಯದಿ ವಿಮುಖತಾ ಪೌರುಷಂ ಕಥಯ ಭಜತಾಮ್ ॥ ೩೧೨॥
ಕರ್ತುರಪ್ರತಿಹತಗಿರಃ ಪೌರುಷಾಚ್ಛತಗುಣಮಿದಮ್ ।
ಧ್ಯಾತುರಸ್ಖಲಿತಮನಸಃ ಕಾರ್ಯಸಿದ್ಧಿಷು ತವ ಪದಮ್ ॥ ೩೧೩॥
ಪೌರುಷಂ ವಿದಿತಮಫಲಂ ಕಾಙ್ಕ್ಷಿತೇ ಮಮ ಸುರನುತೇ ।
ಶಕ್ತಮೀದೃಶಿ ತು ಸಮಯೇ ಶ್ರದ್ದಧಾಮಿ ತವ ಚರಣಮ್ ॥ ೩೧೪॥
ಪೌರುಷಂ ಯದಿ ಕವಿಮತಂ ದೇವಿ ತೇಽಪಿ ಪದಭಜನಮ್ ।
ದೈವವಾದಪಟುವಚಸೋ ಮೂಕತೈವ ಮಮ ಶರಣಮ್ ॥ ೩೧೫॥
ಪೂರ್ವಜನ್ಮಸುಕೃತಫಲಂ ದೈವಮಮ್ಬ ನಿಗದತಿ ಯಃ ।
ಭಕ್ತಿಪೌರುಷವಿರಹಿಣೋ ಭಾವಿತಸ್ಯ ರಿಪುದಯಿತಮ್ ॥ ೩೧೬॥
ಉದ್ಯತಸ್ಯ ತವ ಚರಣಂ ಸಂಶ್ರಿತಸ್ಯ ಚ ಸುರನುತೇ ।
ಪೂರ್ವಜನ್ಮಸುಕೃತಬಲಶ್ರದ್ಧಯಾಽಲಮಹೃದಯಯಾ ॥ ೩೧೭॥
ಅಸ್ತು ಪೂರ್ವಭವಸುಕೃತಂ ಮಾಸ್ತು ವಾ ಜನನಿ ಜಗತಾಮ್ ।
ಸಾಮ್ಪ್ರತಂ ತವ ಪದಯುಗಂ ಸಂಶ್ರಿತೋಸ್ಮ್ಯವ ವಿಸೃಜ ವಾ ॥ ೩೧೮॥
ನಾಸ್ತಿ ಸಮ್ಪ್ರತಿ ಕಿಮಪಿ ಕಿಂ ಭೂತಿಮಾಪ್ಸ್ಯಸಿ ಕಿಮು ತತಃ ।
ಅನ್ಯಜನ್ಮನಿ ವಿತರಣೇ ಕಾ ಪ್ರಸಕ್ತಿರಮರನುತೇ ॥ ೩೧೯॥
ನಾನ್ಯಜನ್ಮನಿ ಬಹುಶಿವಂ ನಾಪಿ ನಾಕಭುವನಸುಖಮ್ ।
ಕಾಮಯೇ ಫಲಮಭಿಮತಂ ದೇಹಿ ಸಮ್ಪ್ರತಿ ಶಚಿ ನ ವಾ ॥ ೩೨೦॥
ಮೇದಿನೀ ಭುವನತಲತೋ ನಿಸ್ತುಲಾದುತ ಗಗನತಃ ।
ಭಾಸ್ಕರಾದುತ ರುಚಿನಿಧೇಃ ಕಾಮ್ಯಮೀಶ್ವರಿ ವಿತರ ಮೇ ॥ ೩೨೧॥
ವಿಷ್ಟಪೇ ಕ್ವಚನ ವರದೇ ದಾತುಮೀಶ್ವರಿ ಕೃತಮತಿಮ್ ।
ವಾರಯೇಜ್ಜನನಿ ನ ಪರಸ್ತ್ವಾಂ ಜನಸ್ತವ ಪತಿಮಿವ ॥ ೩೨೨॥
ದೇಹಿ ವಾ ಭಗವತಿ ನ ವಾ ಪಾಹಿ ವಾ ಶಶಿಮುಖಿ ನ ವಾ ।
ಪಾವನಂ ತವ ಪದಯುಗಂ ನ ತ್ಯಜಾನಿ ಹರಿದಯಿತೇ ॥ ೩೨೩॥
ರಕ್ಷಿತುಂ ಭರತವಿಷಯಂ ಶಕ್ತಮಿನ್ದ್ರಹೃದಯಸಖೀ ।
ಚನ್ದ್ರಬಿಮ್ಬರುಚಿರಮುಖೀ ಸಾ ಕ್ರಿಯಾದ್ಭುವಿ ಗಣಪತಿಮ್ ॥ ೩೨೪॥
ಸಮ್ಪ್ರಹೃಷ್ಯತು ಹಲಮುಖೀರ್ಭಾಸ್ವತೀರ್ಗಣಪತಿಮುನೇಃ ।
ಸಾ ನಿಶಮ್ಯ ಸುರನೃಪತೇರ್ಮೋಹಿನೀ ಸದಯಹೃದಯಾ ॥ ೩೨೫॥
॥ ದ್ವಿತೀಯೋ ಭುಜಗಶಿಶುಭೃತಾಪಾದಃ ॥
ಮರುದಧಿಪಮನೋನಾಥಾ ಮಧುಕರಚಿಕುರಾಸ್ಮಾಕಮ್ ।
ವೃಜಿನವಿಧುತಿಮಾಧತ್ತಾಂ ವಿಶದಹಸಿತಲೇಶೇನ ॥ ೩೨೬॥
ಅಖಿಲನಿಗಮಸಿದ್ಧಾನ್ತೋ ಬಹುಮುನಿವರಬುದ್ಧಾನ್ತಃ ।
ಸುರಪರಿಬೃಢಶುದ್ಧಾನ್ತೋ ಭರತವಸುಮತೀಮವ್ಯಾತ್ ॥ ೩೨೭॥
ಭಗವತಿ ಭವತೀಚೇತೋ ರತಿಕೃದಭವದಿನ್ದ್ರಸ್ಯ ।
ಸ ತವ ಜನನಿ ಸನ್ತಾನದ್ರುಮವನಮತಿರಮ್ಯಂ ವಾಮ್ ॥ ೩೨೮॥
ಪತಿರಖಿಲಯುವಶ್ರೇಷ್ಠಃ ಕಿಮಪಿ ಯುವತಿರತ್ನಂ ತ್ವಮ್ ।
ವನವಿಹೃತಿಷು ವಾಂ ಚೇತೋ ಹರಣಮಭವದನ್ಯೋನ್ಯಮ್ ॥ ೩೨೯॥
ಮಧುರಲಲಿತಗಮ್ಭೀರೈಸ್ತವ ಹೃದಯಮುಪನ್ಯಾಸೈಃ ।
ವನವಿಹರಣಲೀಲಾಯಾಮಹರದಯಿ ದಿವೋ ರಾಜಾ ॥ ೩೩೦॥
ಕಲವಚನವಿಲಾಸೇನ ಪ್ರಗುಣಮುಖವಿಕಾಸೇನ ।
ಭುವನಮಪಿಮನೋಽಹಾರ್ಷೀರ್ಜನನಿ ವನವಿಹಾರೇ ತ್ವಮ್ ॥ ೩೩೧॥
ಕನಕಕಮಲಕಾನ್ತಾಸ್ಯಾ ಧವಲಕಿರಣವಕ್ತ್ರೇಣ ।
ಅಸಿತಜಲಜಪತ್ರಾಕ್ಷೀ ಸಿತನಲಿನದಲಾಕ್ಷೇಣ ॥ ೩೩೨॥
ಅಲಿಚಯನಿಜಧಮ್ಮಿಲ್ಲಾ ನವಜಲಧರಕೇಶೇನ ।
ಮೃದುಲತಮಭುಜಾವಲ್ಲೀ ದೃಢತಮಭುಜದಣ್ಡೇನ ॥ ೩೩೩॥
ಅಮೃತನಿಲಯಬಿಮ್ಬೋಷ್ಠೀ ರುಚಿರಧವಲದನ್ತೇನ ।
ಅತಿಮುಕುರಲಸದ್ಗಣ್ಡಾ ವಿಕಚಜಲಜಹಸ್ತೇನ ॥ ೩೩೪॥
ಯುವತಿರತಿತರಾಂ ರಮ್ಯಾ ಸುಲಲಿತವಪುಷಾ ಯೂನಾ ।
ಭಗವತಿ ಶಚಿ ಯುಕ್ತಾ ತ್ವಂ ತ್ರಿಭುವನವಿಭುನೇನ್ದ್ರೇಣ ॥ ೩೩೫॥
ವಿಕಚಕುಸುಮಮನ್ದಾರದ್ರಷ್ಠ್ಹಮವನವರವಾಟೀಷು ।
ವಿಹರಣಮಯಿ ಕುರ್ವಾಣಾ ಮನಸಿಜಮನುಗೃಹ್ಣಾಸಿ ॥ ೩೩೬॥
ತವ ಶಚಿ ಚಿಕುರೇ ರಾಜತ್ಕುಸುಮಮಮರವೃಕ್ಷಸ್ಯ ।
ನವ ಸಲಿಲಭೃತೋ ಮಧ್ಯೇ ಸ್ಫುರದಿವ ನವನಕ್ಷತ್ರಮ್ ॥ ೩೩೭॥
ಅಭಜತತರುರೌದಾರ್ಯಂ ವಿಭವಮಪಿ ಮಹಾನ್ತಂ ಸಃ ।
ವಿಕಚಕುಸುಮಸಮ್ಪತ್ತ್ಯಾ ಭಗವತಿ ಭಜತೇ ಯಸ್ತ್ವಾಮ್ ॥ ೩೩೮॥
ಅಮರನೃಪತಿನಾ ಸಾಕಂ ಕುಸುಮಿತವನವಾಟೀಷು ।
ಭಗವತಿ ತವ ವಿಶ್ರಾನ್ತೇಃ ಸ ಜಯತಿ ಸಮಯಃ ಕೋಽಪಿ ॥ ೩೩೯॥
ಅಮರತರುವರಚ್ಛಾಯಾಸ್ವಯಿ ಮುಹುರುಪವಿಶ್ಯ ತ್ವಮ್ ।
ಶಚಿ ಕೃತಿಜನರಕ್ಷಾಯೈ ಮನಸಿ ವಿತನುಷು ಚರ್ಚಾಮ್ ॥ ೩೪೦॥
ಕಿಮು ವಸು ವಿತರಾಣ್ಯಸ್ಮೈ ಸುಮತಿಮುತ ದದಾನ್ಯಸ್ಮೈ ।
ಕ್ಷಮತಮಮಥವಾಽಮುಷ್ಮಿನ್ ಬಲಮುರುಘಟಯಾನೀತಿ ॥ ೩೪೧॥
ಹರಿತರುಣಿ ಕದಾ ವಾಮೇ ವಿನಮದವನಚರ್ಚಾಸು ।
ಸ್ಮರಣಸಮಯ ಆಯಾಸ್ಯತ್ಯಮಲಹೃದಯರಙ್ಗೇ ತೇ ॥ ೩೪೨॥
ಶಚಿ ಭಗವತಿ ಸಾಕ್ಷಾತ್ತೇ ಚರಣಕಮಲದಾಸೋಽಹಮ್ ।
ಇಹ ತು ವಸುಮತೀಲೋಕೇ ಸ್ಮರ ಮಮ ವಿಷಯಂ ಪೂರ್ವಮ್ ॥ ೩೪೩॥
ನ ಯದಿ ತವ ಮನೋ ದಾತುಂ ಸ್ವಯಮಯಿ ಲಘವೇ ಮಹ್ಯಮ್ ।
ಉಪವನತರುಕರ್ಣೇ ವಾ ವದ ಮದಭಿಮತಂ ಕರ್ತುಮ್ ॥ ೩೪೪॥
ನಿಜವಿಷಯಮತಿಶ್ರೇಷ್ಠಂ ವಿಪದಿ ನಿಪತಿತಂ ತ್ರಾತುಮ್ ।
ಸ್ವಕುಲಮಪಿ ಸದಧ್ವಾನಂ ಗಮಯಿತುಮಪಥೇ ಶ್ರಾನ್ತಮ್ ॥ ೩೪೫॥
ಅಖಿಲಭುವನಸಮ್ರಾಜಃ ಪ್ರಿಯತರುಣಿ ಭವತ್ಯೈವ ।
ಮತಿಬಲಪರಿಪೂರ್ಣೋಏಽಯಂ ಗಣಪತಿಮುನಿರಾಧೇಯಃ ॥ ೩೪೬॥
ನ ಕಿಮು ಭವತಿ ಶಂ ದೇಶೇ ಗತವತಿ ಕಲುಷೇ ಕಾಲೇ ।
ತವ ಭಜನಮಘಂ ಸದ್ಯೋ ಹರಿಹಯಲಲನೇ ಜೇತುಮ್ ॥ ೩೪೭॥
ತ್ರಿಜಗತಿ ಸಕಲಂ ಯಸ್ಯ ಪ್ರಭವತಿ ಪೃಥುಲೇ ಹಸ್ತೇ ।
ಸ ಬಹುಲಮಹಿಮಾ ಕಾಲೋ ಮಮ ಜನನಿ ವಿಭೂತಿಸ್ತೇ ॥ ೩೪೮॥
ಅನವರತಗಲದ್ಬಾಷ್ಪಾಂ ಭರತವಸುಮತೀಂ ತ್ರಾತುಮ್ ।
ವಿತರತು ದಯಿತಾಜಿಷ್ಣೋರ್ಗಣಪತಿಮುನಯೇ ಶಕ್ತಿಮ್ ॥ ೩೪೯॥
ಭುಜಗಶಿಶುಭೃತಾ ಏತಾಃ ಕವಿಗಣಪತಿನಾ ಗೀತಾಃ ।
ವಿದಧತು ಮುದಿತಾಂ ದೇವೀಂ ವಿಬುಧಪತಿಮನೋನಾಥಾಮ್ ॥ ೩೫೦॥
॥ ತೃತೀಯೋ ಮಣಿಮಧ್ಯಾಪಾದಃ ॥
ಮಙ್ಗಲಧಾಯೀ ಪುಣ್ಯವತಾಂ ಮನ್ಮಥಧಾಯೀ ದೇವಪತೇಃ ।
ವಿಷ್ಟಪರಾಜ್ಞೀಹಾಸಲವೋ ವಿಕ್ರಮಧಾಯೀ ಮೇ ಭವತು ॥ ೩೫೧॥
ದೃಷ್ಟಿವಿಶೇಷೈಶ್ಶೀತತರೈರ್ಭೂರ್ಯನುಕಮ್ಪೈಃ ಪುಣ್ಯತಮೈಃ ।
ಭಾರತಭೂಮೇಸ್ತಾಪತತಿಂ ವಾಸವಕಾನ್ತಾ ಸಾ ಹರತು ॥ ೩೫೨॥
ಪಾವನದೃಷ್ಟಿರ್ಯೋಗಿಹಿತಾ ಭಾಸುರದೃಷ್ಟಿರ್ದೇವಹಿತಾ ।
ಶೀತಲದೃಷ್ಟಿರ್ಭಕ್ಥಿತಾ ಮೋಹನದೃಷ್ಟಿಶ್ಶಕ್ರಹಿತಾ ॥ ೩೫೩॥
ಉಜ್ಜ್ವಲವಾಣೀ ವಿಕ್ರಮದಾ ವತ್ಸಲವಾಣೀ ಸಾನ್ತ್ವನದಾ ।
ಮಞ್ಜುಲವಾಣೀ ಸಮ್ಮದದಾ ಪನ್ನಗವೇಣೀ ಸಾ ಜಯತಿ ॥ ೩೫೪॥
ಶಾರದರಾಕಾಚನ್ದ್ರಮುಖೀ ತೋಯದಮಾಲಾಕಾರಕಚಾ ।
ಮೇಚಕಪಾಥೋಜಾತದಲಶ್ರೀಹರಚಕ್ಷುರ್ವಾಸಿಕೃಪಾ ॥ ೩೫೫॥
ಚಮ್ಪಕನಾಸಾಗಣ್ಡವಿಭಾಮಣ್ಡಲಖೇಲತ್ಕುಣ್ಡಲಭಾ ।
ಉಕ್ತಿಷು ವೀಣಾಬಿಮ್ಬಫಲಶ್ರೀಹರದನ್ತಪ್ರಾವರಣಾ ॥ ೩೫೬॥
ನಿರ್ಮಲಹಾಸಕ್ಷಾಲಿತದಿಗ್ಭಿತ್ತಿಸಮೂಹಾ ಮೋಹಹರೀ ।
ಕಾಞ್ಚನಮಾಲಾಶೋಭಿಗಲಾ ಸನ್ತತಲೀಲಾ ಬುದ್ಧಿಕಲಾ ॥ ೩೫೭॥
ವಿಷ್ಟಪಧಾರಿ ಕ್ಷೀರಧರಸ್ವರ್ಣಘಟಶ್ರೀಹಾರಿಕುಚಾ ।
ಕಾಪಿ ಬಿಡೌಜೋ ರಾಜ್ಯರಮಾ ಚೇತಸಿ ಮಾತಾ ಭಾತು ಮಮ ॥ ೩೫೮॥
ದಿವ್ಯಸುಧೋರ್ಮಿರ್ಭಕ್ತಿಮತಾಂ ಪಾವಕಕೀಲಾ ಪಾಪಕೃತಾಮ್ ।
ವ್ಯೋಮ್ನಿ ಚರನ್ತೀ ಶಕ್ರಸಖೀ ಶಕ್ತಿರಮೋಘಾ ಮಾಮವತು ॥ ೩೫೯॥
ಸಮ್ಮದಯನ್ತೀ ಸರ್ವತನುಂ ಸಂಶಮಯನ್ತೀ ಪಾಪತತಿಮ್ ।
ಸಮ್ಪ್ರಥಯನ್ತೀ ಸರ್ವಮತೀಸ್ಸಙ್ಘಟಯನ್ತೀ ಪ್ರಾಣಬಲಮ್ ॥ ೩೬೦॥
ನಿರ್ಜಿತಶೋಕಾಧೂತತಮಾಸ್ಸಂಸ್ಕೃತಚಿತ್ತಾ ಶುದ್ಧತಮಾ ।
ವಾಸವಶಕ್ತೇರ್ವ್ಯೋಮಜುಷಃ ಕಾಚನ ವೀಚಿರ್ಮಾಂ ವಿಶತು ॥ ೩೬೧॥
ಉದ್ಗತಕೀಲಂ ಮೂಲಮಿದಂ ಭಿನ್ನಕಪಾಲಂ ಶೀರ್ಷಮಿದಮ್ ।
ಉಜ್ಝಿತ ಮೋಹಂ ಚಿತ್ತಮಿದಂ ವಾಸವಶಕ್ತಿರ್ಮಾಂ ವಿಶತು ॥ ೩೬೨॥
ದೃಶ್ಯವಿರಕ್ತಂ ಚಕ್ಷುರಿದಂ ಭೋಗವಿರಕ್ತಂ ಕಾಯಮಿದಮ್ ।
ಧ್ಯೇಯವಿರಕ್ತಾ ಬುದ್ಧಿರಿಯಂ ವಾಸವಶಕ್ತಿರ್ಮಾಂ ವಿಶತು ॥ ೩೬೩॥
ಚಕ್ಷುರದೃಶ್ಯಜ್ವಾಲಭೃತಾ ವ್ಯಾಪಕಖೇನ ಪ್ರೋಲ್ಲಸತಾ ।
ವಿಸ್ಮೃತಕಾಯಂ ಸನ್ದಧತೀ ವಾಸವಶಕ್ತಿರ್ಮಾಂ ವಿಶತು ॥ ೩೬೪॥
ಕಾಯಮಜಸ್ರಂ ವಜ್ರದೃಢಂ ಬುದ್ಧಿಮಶೇಷೇ ವ್ಯಾಪ್ತಿಮತೀಮ್ ।
ದಿವ್ಯತರಙ್ಗೈರಾದಧತೀ ವಾಸವಶಕ್ತಿರ್ಮಾಂ ವಿಶತು ॥ ೩೬೫॥
ಮೂರ್ಧ್ನಿ ಪತನ್ತೀ ವ್ಯೋಮತಲಾತ್ಸನ್ತತಮನ್ತಃ ಸರ್ವತನೌ ।
ಸಮ್ಪ್ರವಹನ್ತೀ ದಿವ್ಯಝರೈರ್ವಾಸವಶಕ್ತಿರ್ಮಾಂ ವಿಶತು ॥ ೩೬೬॥
ಭಾನುವಿಭಾಯಾಂ ಭಾಸಕತಾ ದಿವ್ಯಸುಧಾಯಾಂ ಮೋದಕತಾ ।
ಕಾಽಪಿ ಸುರಾಯಾಂ ಮಾದಕತಾ ವಾಸವಶಕ್ತ್ಯಾಂ ತತ್ತ್ರಿತಯಮ್ ॥ ೩೬೭॥
ಭಾಸಯತಾನ್ಮೇ ಸಮ್ಯಗೃತಂ ಮೋದಮುದಾರಂ ಪುಷ್ಯತು ಮೇ ।
ಸಾಧುಮದಂ ಮೇ ವರ್ಧಯತಾನ್ನಿರ್ಜರಭರ್ತುಃ ಶಕ್ತಿರಜಾ ॥ ೩೬೮॥
ಕಶ್ಚನ ಶಕ್ತಿಂ ಯೋಗಬಲಾದಾತ್ಮಶರೀರೇ ವರ್ಧಯತಿ ।
ಏಷಿ ವಿವೃದ್ಧಿಂ ಭಕ್ತಿಮತಃ ಕಸ್ಯಚಿದೇಶೇ ತ್ವಂ ವಪುಷಿ ॥ ೩೬೯॥
ಸಾಧಯತಾಂ ವಾ ಯೋಗವಿದಾಂ ಕೀರ್ತಯತಾಂ ವಾ ಭಕ್ತಿಮತಾಮ್ ।
ವತ್ಸಲಭಾವಾದಿನ್ದ್ರವಧೂರ್ಗರ್ಭಭುವಾಂ ವಾ ಯಾತಿ ವಶಮ್ ॥ ೩೭೦॥
ಯಸ್ಯ ಸಮಾಧಿಃ ಕೋಽಪಿ ಭವೇದಾತ್ಮಮನೀಷಾ ತಸ್ಯ ಬಲಮ್ ।
ಯಸ್ತವ ಪಾದಾಮ್ಭೋಜರತಸ್ತಸ್ಯ ಖಲು ತ್ವಂ ದೇವಿ ಬಲಮ್ ॥ ೩೭೧॥
ದ್ವಾದಶವರ್ಷೀ ಯೋಗಬಲಾದ್ಯಾ ಖಲು ಶಕ್ತಿರ್ಯುಕ್ತಮತೇಃ ।
ತಾಂ ಶಚಿ ದಾತುಂ ಭಕ್ತಿಮತೇ ಕಾಪಿ ಘಟೀ ತೇ ಮಾತರಲಮ್ ॥ ೩೭೨॥
ಯೋಗಬಲಾದ್ವಾ ಧ್ಯಾನಕೃತೋ ಭಕ್ತಿಬಲಾದ್ವಾ ಕೀರ್ತಯತಃ ।
ಯಾತು ವಿವೃದ್ಧಿಂ ವಿಶ್ವಹಿತಾ ವಾಸವಶಕ್ತಿರ್ಮೇ ವಪುಷಿ ॥ ೩೭೩॥
ದುಃಖಿತಮೇತಚ್ಛ್ರೀರಹಿತಂ ಭಾರತಖಣ್ಡಂ ಸರ್ವಹಿತಮ್ ।
ತ್ರಾತುಮಧೀಶಾ ಸ್ವರ್ಜಗತಃ ಸುಕ್ಷಮಬುದ್ಧಿಂ ಮಾಂ ಕುರುತಾಮ್ ॥ ೩೭೪॥
ಸನ್ತು ಕವೀನಾಂ ಭರ್ತುರಿಮೇ ಸುನ್ದರಬನ್ಧಾಶುದ್ಧತಮಾಃ ।
ಸನ್ಮಣಿಮಧ್ಯಾಃ ಸ್ವರ್ಜಗತೋ ರಾಜಮಹಿಷ್ಯಾಃ ಕರ್ಣಸುಖಾಃ ॥ ೩೭೫॥
॥ ಚತುರ್ಥೋ ಮಾತ್ರಸಮಕಪಾದಃ ॥
ಶುಕ್ಲ್ಜ್ಯೋತಿಃ ಪ್ರಕರೈರ್ವ್ಯಾಪ್ತಃ ಸೂಕ್ಷ್ಮೋಽಪ್ಯನ್ತಾನ್ ಹರಿತಾಂ ಹಾಸಃ ।
ಜಿಷ್ಣೋಃ ಪತ್ನ್ಯಾಸ್ತಿಮಿರಾರಾತಿರ್ನಿಶ್ಶೇಷಂ ಮೇ ಹರತಾನ್ಮೋಹಮ್ ॥ ೩೭೬॥
ಶೃಣ್ವತ್ಕರ್ಣಾ ಸದಯಾಲೋಕಾ ಲೋಕೇನ್ದ್ರಸ್ಯ ಪ್ರಿಯನಾರೀ ಸಾ ।
ನಿತ್ಯಾಕ್ರೋಶೈರ್ವಿರುದದ್ವಾಣೀಂ ಪಾಯಾದೇತಾಂ ಭರತಕ್ಷೋಣೀಮ್ ॥ ೩೭೭॥
ದೇವೇಷು ಸ್ವಃ ಪರಿದೀಪ್ಯನ್ತೀ ಭೂತೇಷ್ವಿನ್ದೌ ಪರಿಖೇಲನ್ತೀ ।
ಶಕ್ತಿರ್ಜಿಷ್ಣೋರ್ದ್ವಪದಾಂ ಸಙ್ಘೇ ಹನ್ತೈತಸ್ಯಾಂ ಭುವಿ ನಿದ್ರಾತಿ ॥ ೩೭೮॥
ನಿದ್ರಾಣಾಯಾ ಅಪಿ ತೇ ಜ್ಯೋತಿರ್ಗನ್ಧಾದೇತೇ ಧರಣೀಲೋಕೇ ।
ಮರ್ತ್ಯಾಃ ಕಿಞ್ಚತ್ಪ್ರಭವನ್ತೀಶೇ ತ್ವಂ ಬುದ್ಧಾ ಚೇತ್ಕಿಮು ವಕ್ತ್ವ್ಯಮ್ ॥ ೩೭೯॥
ಮೇಘಚ್ಛನ್ನೋಽಪ್ಯರುಣಸ್ತೇಜೋ ದದ್ಯಾದೇವ ಪ್ರಮದೇ ಜಿಷ್ಣೋಃ ।
ಅತ್ರಸ್ಥಾನಾಂ ಭವತೀಗ್ರನ್ಥಿಚ್ಛನ್ನಾಪ್ಯೇವಂ ಕುರುತೇ ಪ್ರಜ್ಞಾಮ್ ॥ ೩೮೦॥
ಧ್ಯಾಯಾಮೋ ಯತ್ಕಥಯಾಮೋ ಯತ್ಪಶ್ಯಾಮೋ ಯಚ್ಛೃಣುಮೋ ಯಚ್ಚ ।
ಜೀವಾಮೋ ವಾ ತದಿದಂ ಸರ್ವಂ ನಿದ್ರಾಣಾಯಾ ಅಪಿ ತೇ ಭಾಸಾ ॥ ೩೮೧॥
ನಾಡೀಬನ್ಧಾದಭಿಮಾನಾಚ್ಚ ಚ್ಛನ್ನಾ ಮಾತರ್ಭವತೀ ದೇಹೇ ।
ಏಕಾಪಾಯಾದಿತರೋ ನಶ್ಯೇತ್ತಸ್ಮಾದ್ದ್ವೇಧಾ ತಪಸಃ ಪನ್ಥಾಃ ॥ ೩೮೨॥
ಚಿತ್ತಂ ಯಸ್ಯ ಸ್ವಜನಿಸ್ಥಾನೇ ಪ್ರಜ್ಞಾ ಬಾಹ್ಯಾ ನ ಭವೇದ್ಯಸ್ಯ ।
ಆಧತ್ಸೇ ತ್ವಂ ಭುವನಾಧೀಶೇ ಬುದ್ಧಾ ಕ್ರೀಡಾಂ ಹೃದಯೇ ತಸ್ಯ ॥ ೩೮೩॥
ವಾಣೀ ಯಸ್ಯ ಸ್ವಜನಿಸ್ಥಾನೇ ದೂರೇ ಕೃತ್ವಾ ಮನಸಾ ಸಙ್ಗಮ್ ।
ಮಾತಸ್ತತ್ರ ಪ್ರತಿಬುದ್ಧಾ ತ್ವಂ ಶ್ಲೋಕೈರ್ಲೋಕಂ ಕುರುಷೇ ಬುದ್ಧಮ್ ॥ ೩೮೪॥
ಹಿತ್ವಾ ದೃಶ್ಯಾನ್ಯತಿಸೂಕ್ಷ್ಮಾಯಾಂ ಚಕ್ಷುರ್ಯಸ್ಯ ಸ್ವಮಹೋ ವೃತ್ತೌ ।
ವಿಶ್ವಾಽಲಿಪ್ತಾ ಜಗತಾಂ ಮಾತರ್ಜಾಗ್ರತ್ಯಸ್ಮಿನ್ನಚಲಾ ಭಾಸಿ ॥ ೩೮೫॥
ಶೃಣ್ವನ್ ಕರ್ಣೋ ದಯಿತೇ ಜಿಷ್ಣೋರನ್ತಃ ಶಬ್ದಂ ಧ್ರಿಯತೇ ಯಸ್ಯ ।
ಬುದ್ಧಾ ಭೂತ್ವಾ ವಿಯತಾ ಸಾಧೋರೇಕೀಭಾವಂ ಕುರುಷೇ ತಸ್ಯ ॥ ೩೮೬॥
ಯಾತಾಯಾತಂ ಸತತಂ ಪಶ್ಯೇದ್ಯಃ ಪ್ರಾಣಸ್ಯ ಪ್ರಯತೋ ಮರ್ತ್ಯಃ ।
ವಿಶ್ವಸ್ಯೇಷ್ಟಾಂ ತನುಷೇ ಕ್ರೀಡಾಂ ತಸ್ಮಿನ್ ಬುದ್ಧಾ ತರುಣೀನ್ದ್ರಸ್ಯ ॥ ೩೮೭॥
ಸ್ವಾನ್ತಂ ಯಸ್ಯ ಪ್ರಭವೇತ್ಕಾರ್ಯೇಷ್ವಮ್ಬೈತಸ್ಮಿನ್ನಯಿ ನಿದ್ರಾಸಿ ।
ಆತ್ಮಾ ಯಸ್ಯ ಪ್ರಭವೇತ್ಕಾರ್ಯೇಷ್ವಮ್ಬೈತಸ್ಮಿನ್ನಯಿ ಜಾಗರ್ಷಿ ॥ ೩೮೮॥
ಯಸ್ಯಾಽಹನ್ತಾ ಭವತಿ ಸ್ವಾನ್ತೇ ತಸ್ಯ ಸ್ವಾನ್ತಂ ಪ್ರಭವೇತ್ಕರ್ತುಮ್ ।
ಯಸ್ಯಾಽಹನ್ತಾ ಭವತಿ ಸ್ವಾತ್ಮನ್ಯಾತ್ಮಾ ತಸ್ಯ ಪ್ರಭವೇತ್ಕರ್ತುಮ್ ॥ ೩೮೯॥
ಸ್ವಾನ್ತಂ ಯಸ್ಯ ಪ್ರಭವೇತ್ಕರ್ತುಂ ತತ್ಕರ್ಮಾಲ್ಪಂ ಭವತಿ ವ್ಯಷ್ಟೇಃ ।
ಆತ್ಮಾ ಯಸ್ಯ ಪ್ರಭವೇತ್ಕರ್ತುಂ ತಚ್ಛ್ಲಾಧ್ಯಂ ತೇ ಬಲಜಿತ್ಕಾನ್ತೇ ॥ ೩೯೦॥
ಏತತ್ಸ್ವಾನ್ತಂ ಹೃದಯಾಜ್ಜಾತಂ ಶೀರ್ಷೇ ವಾಸಂ ಪೃಥಗಾಧಾಯ ।
ಹಾರ್ದಾಹನ್ತಾಂ ಸ್ವಯಮಾಕ್ರಮ್ಯ ಭ್ರಾನ್ತಾನಸ್ಮಾನ್ ಕುರುತೇ ಮಾತಃ ॥ ೩೯೧॥
ಅಸ್ಮಾಕಂ ಭೋಃ ಕುರುತೇ ಬಾಧಾಮಸ್ಮಜ್ಯೋತಿರ್ಜನನಿ ಪ್ರಾಪ್ಯ ।
ಸ್ವಾನ್ತೇ ನೈತತ್ಕೃತಮನ್ಯಾಯ್ಯಂ ಕಾನ್ತೇ ಜಿಷ್ಣೋಃ ಶೃಣು ರಾಜ್ಞಿ ತ್ವಮ್ ॥ ೩೯೨॥
ಸ್ವಾನ್ತೇ ತೇಜೋ ಹೃದಯಾದಾಯಾಚ್ಚನ್ದ್ರೇ ತೇಜೋ ದಿನಭರ್ತುರ್ವಾ ।
ಆಶ್ರಾನ್ತಂ ಯೋ ಮನುತೇ ಧೀರಸ್ತಸ್ಯ ಸ್ವಾನ್ತಂ ಹೃದಿ ಲೀನಂ ಸ್ಯಾತ್ ॥ ೩೯೩॥
ಮೂಲಾನ್ವೇಷಿಸ್ಫುರದಾವೃತ್ತಂ ನೀಚೈರಾಯಾತ್ಕಬಲೀಕೃತ್ಯ ।
ಜಾನನ್ತ್ಯೇಕಾ ಹೃದಯಸ್ಥಾನೇ ಯುಞ್ಜಾನಾನಾಂ ಜ್ವಲಸೀಶಾನೇ ॥ ೩೯೪॥
ಶೀರ್ಷೇ ಚನ್ದ್ರೋ ಹೃದಯೇ ಭಾನುರ್ನೇತ್ರೋ ವಿದ್ಯುತ್ಕುಲಕುಣ್ಡೇಽಗ್ನಿಃ ।
ಸಮ್ಪದ್ಯನ್ತೇ ಮಹಸಾಽಶೈಸ್ತೇ ಜಿಷ್ಣೋಃ ಕಾನ್ತೇ ಸುತರಾಂ ಶಸ್ತೇ ॥ ೩೯೫॥
ಮನ್ವಾನಾಂ ತ್ವಾಂ ಶಿರಸಿ ಸ್ಥಾನೇ ಪಶ್ಯನ್ತೀಂ ವಾ ನಯನಸ್ಥಾನೇ ।
ಚೇತನ್ತೀಂ ವಾ ಹೃದಯಸ್ಥಾನೇ ರಾಜನ್ತೀಂ ವಾ ಜ್ವಲನಸ್ಥಾನೇ ॥ ೩೯೬॥
ಯೋ ನಾ ಧ್ಯಾಯೇಜ್ಜಗತಾಂ ಮಾತಃ ಕಶ್ಚಿಚ್ಛ್ರೇಯಾನವನೌ ನಾಽತಃ ।
ಪೂತಂ ವನ್ದ್ಯಂ ಚರಣಂ ತಸ್ಯ ಶ್ರೇಷ್ಠಂ ವರ್ಣ್ಯಂ ಚರಿತಂ ತಸ್ಯ ॥ ೩೯೭॥
ದೋಗ್ಧ್ರೀಂ ಮಾಯಾಂ ರಸನಾಂ ವಾ ಯೋ ಮನ್ತ್ರಂ ಮಾತರ್ಜಪತಿ ಪ್ರಾಜ್ಞಃ ।
ಸೋಽಯಂ ಪಾತ್ರಂ ಕರುಣಾಯಾಸ್ತೇ ಸರ್ವಂ ಕಾಮ್ಯಂ ಲಭತೇ ಹಸ್ತೇ ॥ ೩೯೮॥
ಛಿನ್ನಾಂ ಭಿನ್ನಾಂ ಸುತರಾಂ ಸನ್ನಾಮನ್ನಾಭಾವಾದಭಿತಃ ಖಿನ್ನಾಮ್ ।
ಏತಾಂ ಪಾತುಂ ಭರತಕ್ಷೋಣೀಂ ಜಾಯೇ ಜಿಷ್ಣೋಃ ಕುರು ಮಾಂ ಶಕ್ತಮ್ ॥ ೩೯೯॥
ಕ್ಲೃಪ್ತೈಃ ಸಮ್ಯಗ್ಬೃಹತೀಛನ್ದಸ್ಯೇತೈರ್ಮಾತ್ರಸಮಕೈರ್ವೃತ್ತೈಃ ।
ಕರ್ಣಾಧ್ವಾನಂ ಪ್ರವಿಶದ್ಭಿಸ್ಸಾ ಪೌಲೋಮ್ಯಮ್ಬಾಪರಿತೃಪ್ತಾಸ್ತು ॥ ೪೦೦॥
॥ ಚತುರ್ಥಂ ಬಾರ್ಹತಂ ಶತಕಂ ಸಮಾಪ್ತಮ್ ॥
॥ ಅಥ ಪಞ್ಚಮಂ ಪಾಙ್ಕ್ತಂ ಶತಕಮ್ ॥
॥ ಪ್ರಥಮೋ ಮಯೂರಸಾರಿಣೀಪಾದಃ ॥
ಪ್ರೇಮವಾಸಭೂಮಿರಚ್ಛಭಾವಸ್ಥಾನಮಾನಮಜ್ಜನಾಘಹಾ ಮೇ ।
ಇನ್ದ್ರಸುನ್ದರೀ ಮುಖಾಬ್ಜಭಾಸೀ ಮನ್ದಹಾಸ ಆಪದಂ ಧುನೋತು ॥ ೪೦೧॥
ವೀಕ್ಷಿತೈಃ ಕೃಪಾನ್ವಿತೈರ್ಹರನ್ತೀ ಪಾತಕಾನಿ ಮಙ್ಗಲಂ ಭಣನ್ತೀ ।
ಜಮ್ಭಭೇದಿಜೀವಿತೇಶ್ವರೀ ಮೇ ಜನ್ಮದೇಶಮುಜ್ಜ್ವಲಂ ಕರೋತು ॥ ೪೦೨॥
ಅಮ್ಬರಂ ಚ ದೇವತಾನತಭ್ರೂರಮ್ಬ ತೇ ತನುದ್ವಯಂ ಯದುಕ್ತಮ್ ।
ಆದಿಮಾ ತಯೋರ್ವೃಷಾಕಪಿಂ ತಂ ದೇವ್ಯಜೀಜನತ್ಪರಾ ಜಯನ್ತಮ್ ॥ ೪೦೩॥
ಏತಮೇವ ದೇವಿ ಲೋಕಬನ್ಧುಂ ಸೂರಯೋ ವೃಷಾಕಪಿಂ ಭಣನ್ತಿ ।
ವರ್ಷಹೇತುದೀಧಿತಿರ್ವೃಷಾಯಂ ಕಂ ಪಿಬನ್ ಕರೈಃ ಕಪಿರ್ನಿರುಕ್ತ್ಃ ॥ ೪೦೪॥
ಕೇಚಿದಿನ್ದ್ರನಾರಿ ಚನ್ದ್ರರೇಖಾಶೇಖರಂ ವೃಷಾಕಪಿಂ ಗದನ್ತಿ ।
ಪಣ್ಡಿತಾಃ ಪರೇ ತು ಶೇಷಶಯ್ಯಾಶಾಯಿನಂ ವೃಷಾಕಪಿಂ ತಮಾಹುಃ ॥ ೪೦೫॥
ಬ್ರಹ್ಮಣಸ್ಪತಿಂ ತು ವೈದ್ಯುತಾಗ್ನೇರಂಶಜಂ ಮರುದ್ಗಣೇಷು ಮುಖ್ಯಮ್ ।
ವಿಶ್ವರಾಜ್ಞಿ ವಿಘ್ನರಾಜಮೇಕೇ ವಿಶ್ರುತಂ ವೃಷಾಕಪಿಂ ವದನ್ತಿ ॥ ೪೦೬॥
ಭಾಸ್ಕರಶ್ಚ ಶಙ್ಕ್ರಶ್ಚ ಮಾತರ್ಮಾಧವಶ್ಚ ಮನ್ತ್ರನಾಯಕಶ್ಚ ।
ಆತ್ಮಜೇಷು ತೇ ನ ಸನ್ತಿ ನಾನ್ತರ್ವ್ಯಾಪಕಾನ್ತರಿಕ್ಷವಿಗ್ರಹಾಯಾಃ ॥ ೪೦೭॥
ವಾಸವೋಽಪಿ ದೇವಿ ದೇವತಾತ್ಮಾ ವಲ್ಲಭಸ್ತವ ಚ್ಛಲಾಙ್ಗನಾಯಾಃ ।
ಆತ್ಮಜಾತ ಏವ ಕೀರ್ತನೀಯೋ ದೇವತಾಪಥೇನ ದೇಹವತ್ಯಾಃ ॥ ೪೦೮॥
ಸಾಶವಸ್ಯುದೀರಿತಾಸಿ ಧೀರೈರ್ದೇಹಿನೀ ವಿಹಾಯಸೇನ್ದ್ರಸೂಸ್ತ್ವಮ್ ।
ಲಿಙ್ಗಭೇದತೋಽನುರೂಪತಸ್ತತ್ಕೀರ್ತನಂ ಶವೋ ಹಿ ಶಕ್ತಿವಾಚಿ ॥ ೪೦೯॥
ನಾದಿತಿರ್ವಿಭಿದ್ಯತೇ ಶವಸ್ಯಾಸ್ಸರ್ವದೇವ ಮಾತರಂ ವಿದುರ್ಯಾಮ್ ।
ಸಾ ಮರುತ್ಪ್ರಸೂರಭಾಣಿ ಪೃಶ್ನಿಃ ಸಾಪಿ ಭಿದ್ಯತೇ ತತೋ ನ ದೇವ್ಯಾಃ ॥ ೪೧೦॥
ಶಕ್ತಿರೇವ ಸಾ ನ್ಯಗಾದಿ ಪೃಶ್ನಿಶ್ಶಕ್ತಿರೇವ ಸಾಽದಿತಿರ್ನ್ಯಭಾಣಿ ।
ಶಕ್ತಿರೇವ ಸಾಽಭ್ಯಧಾಯಿ ಭದ್ರಾ ಶಕ್ತಿರೇವ ಸಾ ಶವಸ್ಯವಾದಿ ॥ ೪೧೧॥
ವಿಜ್ಜನಃ ಪ್ರಕೃಷ್ಟಶಕ್ತಿಭಾಗಂ ಶಬ್ದಮೇವ ಪೃಶ್ನಿಮಾಹ ಧೇನುಮ್ ।
ಯಾ ಪರೈರ್ಬುಧೈರಭಾಣಿ ಗೌರೀ ಮಾನವೇಷ್ಟಭಾಷಯೈವ ನಾರೀ ॥ ೪೧೨॥
ವ್ಯಾಪಕತ್ವಕಲ್ಪಿತಂ ವಿಶಾಲಂ ದೇಶಮೇವ ಶಕ್ತಿಭಾಗಮಾಹುಃ ।
ಬುದ್ಧಿಶಾಲಿನೋಽದಿತಿಂ ಸವಿತ್ರೀಂ ಯಾ ಪರೈರ್ವಿಚಕ್ಷಣೈಃ ಸ್ಮೃತಾ ದ್ಯೌಃ ॥ ೪೧೩॥
ನಿತ್ಯಮೋದರೂಪಶಕ್ತಿಭಾಗಂ ಪಣ್ಡಿತಾಃ ಪ್ರಕೀರ್ತಯನ್ತಿ ಭದ್ರಾಮ್ ।
ಉಕ್ತಿಭೇದಚಾತುರೀಪ್ರಲುಬ್ಧಾಃ ಸೂರಯಃ ಪರೇ ಶಿವಾಂ ಜುಗುರ್ಯಾಮ್ ॥ ೪೧೪॥
ವೀರ್ಯರೂಪಭಾಗ ಏವ ಗಣ್ಯಃ ಪಣ್ಡಿತೈಃ ಶವಸ್ಯಭಾಣಿ ಶಕ್ತೇಃ ।
ಓಜಸೋ ನ ಸೋಽತಿರಿಚ್ಯ ತೇಂಶೋ ಭಿದ್ಯತೇ ತತೋ ನ ವಜ್ರಮುಗ್ರಮ್ ॥ ೪೧೫॥
ವಜ್ರಮೇವ ಭಾಷಯಾ ಪರೇಷಾಮುಚ್ಯತೇ ಪ್ರಚಣ್ಡಚಣ್ಡಿಕೇತಿ ।
ಯದ್ವಿಭೂತಿಲೇಶಚುಮ್ಬಿತಾತ್ಮಾ ಜೀಯತೇ ನ ಕೇನಚಿತ್ಪೃಥಿವ್ಯಾಮ್ ॥ ೪೧೬॥
ಸರ್ವತೋ ಗತಿಶ್ಶಚೀತಿ ಶಕ್ತಿಃ ಕೀರ್ತ್ಯತೇ ಬುಧೈರುದಾರಕೀರ್ತಿಃ ।
ಸರ್ವಭಾಗವಾಚಕಂ ಪದಂ ತತ್ ಪಾವನಂ ಪುರಾತನಂ ಪ್ರಿಯಂ ನಃ ॥ ೪೧೭॥
ಯಶ್ಶಚೀತಿ ನಾಮಕೀರ್ತಯೇನ್ನಾ ಪುಷ್ಕರೇಣ ತೇ ಶರೀರವತ್ಯಾಃ ।
ದಿವ್ಯಸುನ್ದರೀ ತನೋರುತಾಹೋ ತಂ ಪರಾಭವೇನ್ನ ದೇವಿ ಪಾಪಮ್ ॥ ೪೧೮॥
ಅಮ್ಬರಂ ವರಂ ತವಾಮ್ಬ ಕಾಯಂ ಯಸ್ಸದಾ ವಿಲೋಕಯನ್ನೌಪಾಸ್ತೇ ।
ಲೋಕಜಾಲಚಕ್ರವರ್ತಿಜಾಯೇ ತಂ ಪರಾಭವೇನ್ನ ದೇವಿ ಪಾಪಮ್ ॥ ೪೧೯॥
ಪೂರ್ಣಿಮಾಸುಧಾಂಶುಬಿಮ್ಬವಕ್ತ್ರಂ ಫುರ್ವಿಂಆರಿಜಾತಪತ್ರನೇತ್ರಮ್ ।
ಶುಭ್ರತಾನಿಧಾನಮನ್ದಹಾಸಂ ಕಾಲಮೇಘಕಲ್ಪಕೇಶಪಾಶಮ್ ॥ ೪೨೦॥
ರತ್ನ್ದರ್ಪಣಾಭಮಞ್ಜುಗಣ್ಡಂ ಚಮ್ಪಕಪ್ರಸೂನಚಾರುನಾಸಮ್ ।
ಕುನ್ದಕುಡ್ಮಲಾಭಕಾನ್ತದನ್ತಂ ಕಲ್ಪಪರ್ವಿಂಆಭದನ್ತಚೇಲಮ್ ॥ ೪೨೧॥
ಸದ್ವರಾಭಯಪ್ರದಾಯಿಹಸ್ತಂ ಸರ್ವದೇವವನ್ದ್ಯಪಾದಕಞ್ಜಮ್ ।
ದಿವ್ಯರತ್ನಭೂಷಣೈರನರ್ಘೈರ್ಭೂಷಿತಂ ಕನತ್ಸುವರ್ಣವರ್ಣಮ್ ॥ ೪೨೨॥
ದಿವ್ಯಶುಕ್ಲ್ವಸ್ತ್ರಯುಗ್ಮಧಾರಿ ಸ್ವರ್ಗಸಾರ್ವಭೋಮನೇತ್ರಹಾರಿ ।
ಯಃ ಸ್ಮರೇದ್ವರಾಙ್ಗನಾವಪುಸ್ತೇ ತಂ ಪರಾಭವೇನ್ನ ದೇವಿ ಪಾಪಮ್ ॥ ೪೨೩॥
ಭಾರತಕ್ಷಿತೇರಿದಂ ಜನನ್ಯಾಶ್ಶೋಕಜನ್ಯಬಾಷ್ಪವಾರಿ ಹರ್ತುಮ್ ।
ದೇಹಿ ಶಕ್ತಿಮಾಶ್ರಿತಾಯ ಮಹ್ಯಂ ಪಾಹಿ ಧರ್ಮಮಿನ್ದ್ರಚಿತ್ತನಾಥೇ ॥ ೪೨೪॥
ಸದ್ವಸಿಷ್ಠಸನ್ತತೇರಿಮಾಭಿಸ್ಸತ್ಕವೇರ್ಮಯೂರಸಾರಿಣೀಭಿಃ ।
ಸಮ್ಮದಂ ಪ್ರಯಾತು ಶಕ್ರಚೇತಸ್ಸಮ್ಪ್ರಮೋಹಿನೀಸರೋಜನೇತ್ರ ॥ ೪೨೫॥
॥ ದ್ವಿತೀಯೋ ಮನೋರಮಾಪಾದಃ ॥
ಹಸಿತಮಾತತಾಯಿಪಾತಕಪ್ರಮಥನಪ್ರಸಿದ್ಧವಿಕ್ರಮಮ್ ।
ಅಮರಭೂಮಿಪಾಲಯೋಷಿತೋ ಮಮ ಕರೋತು ಭೂರಿಮಙ್ಗಲಮ್ ॥ ೪೨೬॥
ಕರುಣಯಾ ಪ್ರಚೋದಿತಾ ಕ್ರಿಯಾದ್ಭರತಭೂಮಿಮಕ್ಷಯಶ್ರಿಯಮ್ ।
ಚರಣಕಞ್ಜರಾಜದಿನ್ದಿರಾ ಸುರನರೇಶ್ವರಸ್ಯ ಸುನ್ದರೀ ॥ ೪೨೭॥
ನ ಭವನಂ ನ ವಾ ಜಗತ್ಪೃಥಙ್ನಿವಸನಾಯ ತೇ ಸುರಾರ್ಚತೇ ।
ಯದಖಿಲಾನಿ ವಿಷ್ಟಪಾನಿ ತೇ ವಪುಷಿ ಸರ್ವಮನ್ದಿರಾಣಿ ಚ ॥ ೪೨೮॥
ಮತಿದವಿಷ್ಠಸೀಮಭಾಸುರಂ ತವ ಶರೀರಮೇವ ಪುಷ್ಕರಮ್ ।
ಪರಮಪೂರುಷಸ್ಯ ವಲ್ಲಭೇ ಭುವನಮೇಕಮುಚ್ಯತೇ ಬುಧೈಃ ॥ ೪೨೯॥
ತರಣಯಸ್ಸುಧಾಂಶವಸ್ತಥಾ ಸಹ ಭುವಾ ಗ್ರಹಾಃ ಸಹಸ್ರಶಃ ।
ಅಯಿ ಜಗನ್ತಿ ವಿಸ್ತೃತಾನಿ ತೇ ವಪುಷಿ ಪುಷ್ಕರೇ ಜಗತ್ಯಜೇ ॥ ೪೩೦॥
ಬಹುಭಿರುಷ್ಣಭಾನುಭಿಕ್ರ್ತತಾತ್ ಬಹುಭಿರಿನ್ದುಭಿರ್ವಶೀಕೃತಾತ್ ।
ವಿಯತಿ ಲೋಕಜಾಲಧಾತ್ರಿ ತೇ ಶತಗುಣಂ ಬಲಂ ಪ್ರಶಿಶ್ಯತೇ ॥ ೪೩೧॥
ನ ವಿಭುರೇಕಕಸ್ಯ ಭಾಸ್ವತೋ ವಿಭವಮೇವ ನಾ ಪ್ರಭಾಷಿತುಮ್ ।
ಕಿಮುತ ತೇ ದಧಾಸಿ ಯೋದರೇ ದ್ಯುತಿಮತಾಂ ಶತಾನಿ ತಾದೃಶಾಮ್ ॥ ೪೩೨॥
ಇಹ ವಿಹಾಯಸಾ ಶರೀರಿಣೀಮತಿಸಮೀಪವಾಸಿನೀಮಪಿ ।
ನ ಖಲು ಕೋಽಪಿ ಲೋಕಿತುಂ ಪ್ರಭುರ್ಭಗವತೀಂ ಪರಾಮಯುಕ್ತಧೀಃ ॥ ೪೩೩॥
ತದಿದಮುಚ್ಯತೇ ಜನೋ ಜಗದ್ವಪುರಮೇಯಮಾದಿದೇವಿ ತೇ ।
ಜನಯತೇ ಯತೋಽಖಿಲಂ ದೃಶೋರ್ವಿಷಯಭೂತಮೇತದಾತತಮ್ ॥ ೪೩೪॥
ಬಹುಲತಾರಕಾಗಣೈರ್ಯುತಂ ಕಿಮಪಿ ಖಂ ತವೇಹ ವರ್ಷ್ಮಣಿ ।
ಶಚಿ ವಿಭಜ್ಯ ಭಾಷಯೈಕಯಾ ಸುಕವಯೋ ಮಹೋಜಗದ್ವಿದುಃ ॥ ೪೩೫॥
ಇದಮಿನೇನ್ದುಭೂವಿಲಕ್ಷಣೈರ್ದಿನಕರೈಸ್ಸುಧಾಕರೈರ್ಗ್ರಹೈಃ ।
ಬಹುಜಗದ್ಭಿರನ್ವಿತಂ ಮಹೋಜಗದಶೇಷಧಾತ್ರಿ ನೈಕಕಮ್ ॥ ೪೩೬॥
ಅಜರಮವ್ಯಯಂ ಸನಾತನಂ ಮುನಿಜನೈಕವೇದ್ಯವೈಭವಮ್ ।
ನ ಭವತೀಂ ವಿನಾ ತಪೋಜಗತ್ಪೃಥಗಶೇಷನಾಥನಾಯಿಕೇ ॥ ೪೩೭॥
ಸಕಲದೃಶ್ಯಮೂಲಕಾರಣಂ ತವ ಚ ಸಂಶ್ರಯೋ ನಿರಾಶ್ರಯಃ ।
ಜನನಿ ಸತ್ಯಲೋಕ ಸಂಜ್ಞಯಾ ಪರಮಪೂರುಷೋಽಭಿಧೀಯತೇ ॥ ೪೩೮॥
ಅಯಿ ಪುರಾತನರ್ಷಿಭಾಷಯಾ ಗಗನಮೇತದಾಪ ಈರಿತಾಃ ।
ಅಥ ಯದಾಸುವೀರ್ಯಮುಜ್ಝಿತಂ ಭಗವತಸ್ತ್ವಮೇವ ತತ್ಪರೇ ॥ ೪೩೯॥
ಶಚಿ ವಿರಾಡ್ಭವತ್ಯಭಾಷತ ಶ್ರುತಿರಪೀದಮೇವ ನಾಮ ತೇ ।
ವಿತತವಿಶ್ವವಿಗ್ರಹಾತ್ಮನಿ ಪ್ರಥಿತಮೇತದಾಹ್ಮಯಂ ಪರಮ್ ॥ ೪೪೦॥
ಉಪನಿಷದ್ಗಿರಾ ವಿರಾಡ್ವಧೂಃ ಪುರುಷ ಏಷ ಭಾಷಯಾನ್ಯಯಾ ।
ಉಭಯಥಾಪಿ ಸಾಧು ತತ್ಪದಂ ಭವತಿ ತೇ ನ ಸಂಶಯಾಸ್ಪದಮ್ ॥ ೪೪೧॥
ನ ವನಿತಾ ನ ವಾ ಪುಮಾನ್ ಭವೇಜ್ಜಗತಿ ಯೋಽನ್ತರಶ್ಶರೀರಿಣಾಮ್ ।
ತನುಷು ಲಿಙ್ಗಭೇದದರ್ಶನಾತ್ ತನುಮತಶ್ಚ ಲಿಙ್ಗಮುಚ್ಯತೇ ॥ ೪೪೨॥
ಅಖಿಲನಾಥವೀರ್ಯಧಾರಣಾನ್ನ್ಗನಭೂಮಿರಙ್ಗನಾಮತಾ ।
ಸಕಲಲೋಕಬೀಜಭೃತ್ತ್ವತೋ ಗಗನದೇಶ ಏಷ ಪೂರುಷಃ ॥ ೪೪೩॥
ಸ್ಫುಟವಿಭಕ್ತಗಾತ್ರಲಕ್ಷ್ಮಣಾಂ ನಿಯತವಾದಿನಾಮದರ್ಶನಾತ್ ।
ನ ಪುರುಷೋ ವಿಯದ್ಯಥಾ ವಯಂ ನ ವನಿತಾ ವಿಯದ್ಯಥೈವ ನಃ ॥ ೪೪೪॥
ಅಭಿವಿಮಾನತೋಽಥ ವಾ ಶಚೀ ವಿಬುಧರಾಜಯೋರ್ವಿಲಕ್ಷಣಾತ್ ।
ವರವಿಲಸಿನೀ ವಿಯತ್ತನುಸ್ಸದವಿಕಾರಮುತ್ತಮಃ ಪುಮಾನ್ ॥ ೪೪೫॥
ಹೃದಯಮಲ್ಪಮಪ್ಯದೋ ಜನನ್ಯನವಮಂ ವಿಶಾಲಪುಷ್ಕರಾತ್ ।
ವಿಮಲದೇಹದುರ್ಗಮಧ್ಯಗಂ ಸಕಲರಾಜ್ಞಿ ಸೌಧಮಸ್ತು ತೇ ॥ ೪೪೬॥
ವಿಕಸಿತಂ ನಿಜಾಂಶುವೀಚಿಭಿಕ್ರ್ತದಯಮಾಲಯಂ ವಿಶಾಮ್ಬ ಮೇ ।
ವಿಕಚಮುಷ್ಣಭಾನುಭಾನುಭಿರ್ದಶಶತಚ್ಛದಂ ಯಥಾ ರಮಾ ॥ ೪೪೭॥
ಹೃದಯಸಾಧುಸೌಧಶಾಯಿನೀಂ ನಯನರಮ್ಯಹರ್ಮ್ಯಚಾರಿಣೀಮ್ ।
ಭುವನರಾಜಚಿತ್ತಮೋಹಿನೀಂ ನಮತ ತಾಂ ಪರಾಂ ವಿಲಾಸಿನೀಮ್ ॥ ೪೪೮॥
ತವ ಪರೇ ಮರೀಚಿವೀಚಯಸ್ತನುಗುಹಾಂ ಪ್ರವಿಶ್ಯ ವಿಶ್ರುತೇ ।
ಭರತಭೂಮಿರಕ್ಷಣೋದ್ಯತಂ ಗಣಪತಿಂ ಕ್ರಿಯಾಸುರುಜ್ಜ್ವಲಮ್ ॥ ೪೪೯॥
ಗಣಪತೇರ್ಮನೋರಮಾ ಇಮಾಸ್ಸುಗುಣವೇದಿನಾಂ ಮನೋರಮಾಃ ।
ಅವಹಿತಾ ಶೃಣೋತು ಸಾದರಂ ಸುರಮಹೀಪತೇರ್ಮನೋರಮಾಃ ॥ ೪೫೦॥
॥ ತೃತೀಯೋ ಮಣಿರಾಗಪಾದಃ ॥
ಜ್ಯೋತಿಷಾಂ ನೃಪತಿಃ ಸಕಲಾನಾಂ ಶಾನ್ತಿಮೇವ ಸದಾಭಿದಧಾನಃ ।
ನಿರ್ಮಲೋ ಹರತಾತ್ಸುರರಾಜ್ಞೀಮನ್ದಹಾಸಲವೋ ಮಮ ಪಾಪಮ್ ॥ ೪೫೧॥
ದುಷ್ಟಲೋಕದವಿಷ್ಠಪದಾಬ್ಜಾ ಶಿಷ್ಟಶೋಕನಿವಾರಣದಕ್ಷಾ ।
ನಾಕಲೋಕಮಹೀಪತಿರಾಮಾ ಭಾರತಸ್ಯ ಧುನೋತ್ವಸುಖಾನಿ ॥ ೪೫೨॥
ದೇವಮೌಲಿಮಣೀಕಿರಣೇಭ್ಯೋ ವಿಕ್ರಮಂ ಸ್ವಯಮೇವ ದದಾನಾ ।
ದೇವರಾಜವಧೂಪದಪದ್ಮಶ್ರೀಸ್ತನೋತು ಸದಾ ಮಮ ಭದ್ರಮ್ ॥ ೪೫೩॥
ದೇವಿ ತೇ ವದನಂ ಬಹುಕಾನ್ತಂ ಸಾಕ್ಷಿ ತತ್ರ ಪುರನ್ದರಚೇತಃ ।
ಅಮ್ಬ ತೇ ಚರಣಾವತಿಕಾನ್ತಾವತ್ರ ಸಾಕ್ಷಿ ಮನಃ ಸ್ಮರತಾಂ ನಃ ॥ ೪೫೪॥
ಭಾಸುರಂ ಸುರಸಂಹತಿವನ್ದ್ಯಂ ಸುನ್ದರಂ ಹರಿಲೋಚನಹಾರಿ ।
ಪಾವನಂ ನತಪಾಪವಿದಾರಿ ಸ್ವರ್ಗರಾಜ್ಞಿ ಪದಂ ತವ ಸೇವೇ ॥ ೪೫೫॥
ಜಙ್ಘಿಕೇ ಜಯತಸ್ತವ ಮಾತಃ ಸ೪ ಏವ ರುಚಾಂ ಯದಧೀನಃ ।
ವಾಸವಸ್ಯ ದೃಶಾಂ ಚ ಸಹಸ್ರಂ ಯದ್ವಿಲೋಕನಲೋಭವಿನಮ್ರಮ್ ॥ ೪೫೬॥
ಸಕ್ಥಿನೀ ತವ ವಾಸವಕಾನ್ತೇ ರಾಮಣೀಯಕಸಾರನಿಶಾನ್ತೇ ।
ವನ್ದತೇ ವಿನಯೇನ ಮಮೇಯಂ ವನ್ದಿನಸ್ತವ ಪಾವನಿ ವಾಣೀ ॥ ೪೫೭॥
ಇನ್ದ್ರನಾರಿ ಕಟಿಸ್ತವ ಪೃಥ್ವೀಮಣ್ಡಲಸ್ಯತುಲಾ ಮಹನೀಯೇ ।
ಮಧ್ಯಮೋ ನಭಸಃ ಪ್ರತಿಮಾನಂ ಭೋಗಿನಾಂ ಭುವನಸ್ಯ ಚ ನಾಭಿಃ ॥ ೪೫೮॥
ಧೀರತಾಂ ಕುರುತೇ ವಿಗತಾಸುಂ ಸಾ ಸುಪರ್ವಪತೇರ್ನಿಶಿತಾಗ್ರಾ ।
ಸಾ ತವಾಮ್ಬ ಮನೋಭವಶಸ್ತ್ರೀ ರೋಮರಾಜಿರಘಂ ಮಮ ಹನ್ತು ॥ ೪೫೯॥
ರೋಮರಾಜಿಭುಜಙ್ಗಶಿಶುಸ್ತೇ ದೇವಿ ದೇವಪತೇರ್ಹೃದಯಸ್ಯ ।
ದಂಶನೇನ ಕರೋತ್ಯಯಿ ಮೋಹಂ ಜೀವಿತಾಯ ಚಿರಾಯ ವಿಚಿತ್ರಮ್ ॥ ೪೬೦॥
ಪೂರ್ಣಹೇಮಘಟವಿವ ಶಕ್ರಾವಾಹಿತಾಂ ದಧತಾವಯಿ ಶಕ್ತಿಮ್ ।
ವಿಶ್ವಪೋಷಣಕರ್ಮಣಿ ದಕ್ಷಾವಮ್ಬ ದುಗ್ಧಧರೌ ಜಯತಸ್ತೇ ॥ ೪೬೧॥
ಲೋಕಮಾತರುರೋರುಹಪೂರ್ಣಸ್ವರ್ಣಕುಮ್ಭಗತಾ ತವ ಶಕ್ತಿಃ ।
ಲೋಕಪಾಲನಕರ್ಮಣಿ ವೀರ್ಯಂ ದೇವಿ ವಜ್ರಧರಸ್ಯ ಬಿಭರ್ತಿ ॥ ೪೬೨॥
ಅಕ್ಷಯಾಮೃತಪೂರ್ಣಘಟೌ ತೇ ಶಕ್ರಪತ್ನಿ ಕುಚೈ ತವ ಪೀತ್ವಾ ।
ಲೋಕಬಾಧಕಭೀಕರರಕ್ಷೋ ಧೂನನೇ ಪ್ರಬಭೂವ ಜಯನ್ತಃ ॥ ೪೬೩॥
ಹಸ್ತಯೋಸ್ತವ ಮಾರ್ದವಮಿನ್ದ್ರೋ ಭಾಷತಾಂ ಸುಷಮಾಮಪಿ ದೇವಃ ।
ದಾತೃತಾಮನಯೋರ್ಮುನಿವರ್ಗೋ ವರ್ಣಯತ್ಯಜರೇ ಪಟುತಾಂ ಚ ॥ ೪೬೪॥
ಪುಷ್ಪಮಾಲ್ಯಮೃದೋರಪಿ ಬಾಹೋಃ ಶಕ್ತಿರುಗ್ರತಮಾಶರನಾಶೇ ।
ದೃಶ್ಯತೇ ಜಗತಾಮಧಿಪೇ ತೇ ಭಾಷತಾಂ ತವ ಕಸ್ತನುತತ್ತ್ವಮ್ ॥ ೪೬೫॥
ಕಮ್ಬುಕಣ್ಠಿ ತವೇಶ್ವರಿ ಕಣ್ಠಸ್ತಾರಹಾರವಿತಾನವಿರಾಜೀ ।
ದೇವರಾಡ್ಭುಜಲೋಚನಪಥ್ಯೋ ದೇವಿ ಮೇ ಭಣತಾದ್ಬಹುಭದ್ರಮ್ ॥ ೪೬೬॥
ಆನನಸ್ಯ ಗಭಸ್ತಿನಿಧೇಸ್ತೇ ರಾಮಣೀಯಕಮದ್ಭುತಮೀಷ್ಟೇ ।
ಅಪ್ಯಮರ್ತ್ಯನುತಾಖಿಲಸಿದ್ಧೇರ್ವಾಸವಸ್ಯ ವಶೀಕರಣಾಯ ॥ ೪೬೭॥
ನ ಪ್ರಸನ್ನಮಲಂ ರವಿಬಿಮ್ಬಿಂ ಚನ್ದ್ರಬಿಮ್ಬಮತೀವ ನ ಭಾತಿ ।
ಸುಪ್ರಸನ್ನಮಹೋಜ್ಜ್ವಲಮಾಸ್ಯಂ ಕೇನ ಪಾವನಿ ತೇ ತುಲಯಾಮಃ ॥ ೪೬೮॥
ಲೋಚನೇ ತವ ಲೋಕಸವಿತ್ರಿ ಜ್ಯೋತಿಷಃ ಶವಸಶ್ಚ ನಿಧಾನೇ ।
ವಕ್ತುಮಬ್ಜಸಮೇ ನನು ಲಜ್ಜೇ ಧೋರಣೀಮನುಸೃತ್ಯ ಕವೀನಾಮ್ ॥ ೪೬೯॥
ಆಯತೋಜ್ಜ್ವಲಪಕ್ಷ್ಮಲನೇತ್ರಾ ಚಮ್ಪಕಪ್ರಸವೋಪಮನಾಸಾ ।
ರತ್ನದರ್ಪಣರಮ್ಯಕಪೋಲಾ ಶ್ರೀಲಿಪಿದ್ಯುತಿಸುನ್ದರಕರ್ಣಾ ॥ ೪೭೦॥
ಅಷ್ಟಮೀಶಶಿಭಾಸುರಭಾಲಾ ವಿಷ್ಟಪತ್ರಯಚಾಲಕಲೀಲಾ ।
ಸ್ಮೇರಚಾರುಮುಖೀ ಸುರಭರ್ತುಃ ಪ್ರೇಯಸೀ ವಿದಧಾತು ಶಿವಂ ಮೇ ॥ ೪೭೧॥
ಮನ್ದಹಾಸಲವೇಷು ವಲಕ್ಷಾ ಮೇಚಕಾ ಚಿಕುರಪ್ರಕರೇಷು ।
ಶೋಣತಾಮಧರೇ ದಧತೀ ಸಾ ರಕ್ಷತು ಪ್ರಕೃತಿಸ್ತ್ರಿಗುಣಾ ನಃ ॥ ೪೭೨॥
ಸರ್ವಲೋಕವಧೂಜನಮಧ್ಯೇ ಯಾಂ ಶ್ರುತಿಸ್ಸುಭಗಾಮಭಿಧತ್ತೇ ।
ಯಾ ದಿವೋ ಜಗತೋ ರುಚಿಸಾರಸ್ತಾಂ ನಮಾಮಿ ಪುರನ್ದರರಾಮಾಮ್ ॥ ೪೭೩॥
ಸ್ವರ್ಗಭೂಪತಿಲೋಚನಭಾಗ್ಯಶ್ರೀಶ್ಶರೀರವತೀ ಜಲಜಾಕ್ಷೀ ।
ಭಾರತಸ್ಯ ಕರೋತು ಸಮರ್ಥಂ ರಕ್ಷಣೇ ನರಸಿಂಹತನೂಜಮ್ ॥ ೪೭೪॥
ಲೋಕಮಾತುರಿಮೇ ರಮಣೀಯಾಃ ಪಾಕಶಾಸನಚಿತ್ತರಮಣ್ಯಾಃ ।
ಅರ್ಪಿತಾಃ ಪದಯೋರ್ವಿಜಯನ್ತಾಂ ಸತ್ಕವೇಃ ಕೃತಯೋ ಮಣಿರಾಗಾಃ ॥ ೪೭೫॥
॥ ಚತುರ್ಥೋ ಮೇಘವಿತಾನಪಾದಃ ॥
ಅಮರಕ್ಷಿತಿಪಾಲಕಚೇತೋ ಮದನಂ ಸದನಂ ಶುಚಿತಾಯಾಃ ।
ಸ್ಮಿತಮಾದಿವಧೂವದನೋತ್ತ್ಥಂ ಹರತಾದಖಿಲಂ ಕಲುಷಂ ಮೇ ॥ ೪೭೬॥
ಸುತರಾಮಧನಾಮತಿಖಿನ್ನಾಮಧುನಾ ಬಹುಲಂ ವಿಲಪನ್ತೀಮ್ ।
ಪರಿಪಾತು ಜಗತ್ತ್ರಯನೇತ್ರೀ ಭರತಕ್ಷಿತಿಮಿನ್ದ್ರಪುರನ್ಧ್ರೀ ॥ ೪೭೭॥
ಸ್ಥಲಮೇತದಮರ್ತ್ಯನೃಪಾಲಪ್ರಮದೇ ತವ ಮೇಘವಿತಾನಮ್ ।
ಅಯಿ ಯತ್ರ ಪರಿಸ್ಫುಸೀಶೇ ತಟಿದುಜ್ಜ್ವಲವೇಷಧರಾ ತ್ವಮ್ ॥ ೪೭೮॥
ತಟಿತಾ ತವ ಭೌತಿಕತನ್ವಾ ಜಿತಮಮ್ಬುಧರೇ ವಿಲಸನ್ತ್ಯಾ ।
ಉಪಮಾ ಭುವಿ ಯಾ ಲಲಿತಾನಾಂ ಯುವಚಿತ್ತಹೃತಾಂ ವನಿತಾನಾಮ್ ॥ ೪೭೯॥
ಸ್ಫುರಿತಂ ತವ ಲೋಚನಹಾರಿ ಸ್ತನಿತಂ ತವ ಧೀರಗಭೀರಮ್ ।
ರಮಣೀಯತಯಾ ಮಿಲಿತಾ ತೇ ಶಚಿ ಭೀಕರತಾ ಚಪಲಾಯಾಃ ॥ ೪೮೦॥
ಚಪಲೇ ಶಚಿ ವಿಸ್ಫುರಸೀನ್ದ್ರಂ ಘನಜಾಲಪತಿಂ ಮದಯನ್ತೀ ।
ದಿತಿಜಾತಮವಗ್ರಹಸಂಜ್ಞಂ ಜನದುಃಖಕರಂ ದಮಯನ್ತೀ ॥ ೪೮೧॥
ಪ್ರಭುಮಭ್ರಪತಿಂ ರಮಯನ್ತೀ ದುರಿತಂ ನಮತಾಂ ಶಮಯನ್ತೀ ।
ಹರಿತಾಂ ತಿಮಿರಾಣಿ ಹರನ್ತೀ ಪವಮಾನಪಥೇ ವಿಲಸನ್ತೀ ॥ ೪೮೨॥
ಅಲಘುಸ್ತನಿತಂ ವಿದಧಾನಾ ಬಲಮುಗ್ರತಮಂ ಚ ದಧಾನಾ ।
ಹೃದಯಾವರಕಂ ಮಮ ಮಾಯಾಪಟಲಂ ತಟಿದಾಶು ಧುನೋತು ॥ ೪೮೩॥
ಸುರಪಾರ್ಥವಜೀವಿತನಾಥೇ ನಿಖಿಲೇ ಗಗನೇ ಪ್ರವಹನ್ತ್ಯಾಃ ।
ತಟಿತಸ್ತವ ವೀಚಿಷು ಕಾಚಿಚ್ಚಪಲಾ ಲಸತೀಹ ಪಯೋದೇ ॥ ೪೮೪॥
ವಿಬುಧಪ್ರಣುತೇ ಧನಿಕಾನಾಂ ಭವನೇಷು ಭವನ್ತ್ಯಯಿ ದೀಪಾಃ ।
ಪಟುಯನ್ತ್ರಬಲಾದುದಿತಾನಾಂ ತವ ದೇವಿ ಲವಾಃ ಕಿರಣಾನಾಮ್ ॥ ೪೮೫॥
ವ್ಯಜನಾನಿ ಚ ಚಾಲಯಸಿ ತ್ವಂ ಬತ ಸರ್ವಜಗನ್ನಋಪಜಾಯೇ ।
ವಿಬುಧೋಽಭಿದಧಾತ್ವಥವಾ ಕೋ ಮಹತಾಂ ಚರಿತಸ್ಯ ರಹಸ್ಯಮ್ ॥ ೪೮೬॥
ಇಹ ಚಾಲಿತ ಈಡ್ಯಮನೀಷೈರಯಿ ಯನ್ತ್ರವಿಶೇಷವಿಧಿಜ್ಞೈಃ ।
ಬಹುಲಾದ್ಭುತಕಾರ್ಯಕಲಾಪಸ್ತಟಿತಸ್ತವ ಮಾತರಧೀನಃ ॥ ೪೮೭॥
ಅಚರಸ್ತರುಗುಲ್ಮಲತಾದಿಃ ಸಕಲಶ್ಚ ಚರೋ ಭುವಿ ಜನ್ತುಃ ।
ಅನಿತಿ ಪ್ರಮದೇ ಸುರಭರ್ತುಸ್ತಟಿತಸ್ತವ ದೇವಿ ಬಲೇನ ॥ ೪೮೮॥
ಮನುತೇ ನಿಖಿಲೋಽಪಿ ಭವತ್ಯಾ ಮನುಜೋಽನಿತಿ ವಕ್ತಿಶೃಣೋತಿ ।
ಅವಲೋಕಯತೇ ಚ ಭಣಾಮಃ ಕಿಮು ತೇ ಜಗದಮ್ಬ ವಿಭೂತಿಮ್ ॥ ೪೮೯॥
ಅತಿಸೂಕ್ಷ್ಮಪವಿತ್ರಸುಷುಮ್ಣಾಪಥತಸ್ತನುಷು ಪ್ರಯತಾನಾಮ್ ।
ಕುಲಕುಣ್ಡಕೃಶಾನುಶಿಖಾ ತ್ವಂ ಜ್ವಲಸಿ ತ್ರಿದಶಾಲಯನಾಥೇ ॥ ೪೯೦॥
ಇತರೋ ನ ಸುರಕ್ಷಿತಿಪಾಲಾತ್ಕುಲಕುಣ್ಡಗತೋ ಜ್ವಲನೋಽಯಮ್ ।
ಇತರೇನ್ದ್ರವಿಲಾಸಿನಿ ನ ತ್ವತ್ಕುಲಕುಣ್ಡಕೃಶಾನುಶಿಖೇಯಮ್ ॥ ೪೯೧॥
ಕುಲಕುಣ್ಡಕೃಶಾನುಶಿಖಾಯಾಃ ಕಿರಣೈಃ ಶಿರಸಿ ಸ್ಥಿತ ಏಷಃ ।
ದ್ರವತೀನ್ದುರನಾರತಮೇತದ್ವಪುರಾತ್ಮಮಯಂ ವಿದಧಾನಃ ॥ ೪೯೨॥
ಮದಕೃದ್ಬಹುಲಾಮೃತಧಾರಾಪರಿಪೂತಮಿದಂ ಮಮ ಕಾಯಮ್ ।
ವಿದಧಾಸಿ ಭಜನ್ಮನುಜಾಪ್ತೇ ಕುಲಕುಣ್ಡಧನಂಜಯದೀಪ್ತೇ ॥ ೪೯೩॥
ಶಿರಸೀಹ ಸತಃ ಸಿತಭಾನೋರಮೃತೇನ ವಪುರ್ಮದಮೇತಿ ।
ಹೃದಿ ಭಾತ ಇನಸ್ಯ ಚ ಭಾಸಾ ಮತಿಮೇತು ಪರಾಂ ಶಚಿ ಚೇತಃ ॥ ೪೯೪॥
ಮಮ ಯೋಗಮದೇನ ನ ತೃಪ್ತಿನಿಜದೇಶದಶಾವ್ಯಥಿತಸ್ಯ ।
ಅವಗನ್ತುಮುಪಾಯಮಮೋಘಂ ಶಚಿ ಭಾಸಯ ಮೇ ಹೃದಿ ಭಾನುಮ್ ॥ ೪೯೫॥
ವಿದಿತಃ ಪ್ರಮದಸ್ಯ ವಿಧಾತುಃ ಶಶಿನೋ ಜನಯಿತ್ರಿ ವಿಲಾಸಃ ।
ಅಹಮುತ್ಸುಕ ಈಶ್ವರಿ ಭಾನೋರ್ವಿಭವಸ್ಯ ಚ ವೇತ್ತುಮಿಯತ್ತಾಮ್ ॥ ೪೯೬॥
ವರುಣಸ್ಯ ದಿಶಿ ಪ್ರವಹನ್ತೀ ಮದಮಮ್ಬ ಕರೋಷಿ ಮಹಾನ್ತಮ್ ।
ದಿಶಿ ವಜ್ರಭೃತಃ ಪ್ರವಹನ್ತೀ ಕುರು ಬುದ್ಧಿಮಕುಣ್ಠಿತಸಿದ್ಧಿಮ್ ॥ ೪೯೭॥
ಅಮಲಾಮಧಿರುಹ್ಯ ಸುಷುಮ್ಣಾಂ ಪ್ರವಹಸ್ಯಧುನಾಮ್ಬ ಮದಾಯ ।
ಅಮೃತಾಮಧಿರುಹ್ಯ ಚ ಕಿಞ್ಚಿತ್ಪ್ರಿವಹೇಶ್ವರಿ ಬುದ್ಧಿಬಲಾಯ ॥ ೪೯೮॥
ಭರತಕ್ಷಿತಿಕ್ಷಣಕರ್ಮಣ್ಯಭಿಧಾಯ ಮನೋಜ್ಞಮುಪಾಯಮ್ ।
ಅಥ ದೇವಿ ವಿಧಾಯ ಚ ಶಕ್ತಂ ಕುರು ಮಾಂ ಕೃತಿನಂ ಶಚಿ ಭಕ್ತಮ್ ॥ ೪೯೯॥
ನರಸಿಂಹಸುತೇನ ಕವೀನಾಂ ವಿಭುನಾ ರಚಿತೈಃ ಕಮನೀಯೈಃ ।
ಪರಿತೃಪ್ಯತು ಮೇಘವಿತಾನೈರ್ಮರುತಾಮಧಿಪಸ್ಯ ಪುರನ್ಧ್ರೀ ॥ ೫೦೦॥
॥ ಪಞ್ಚಮಂ ಪಾಙ್ಕ್ತಂ ಶತಕಂ ಸಮಾಪ್ತಮ್ ॥
॥ ಅಥ ಷಷ್ಠಂ ತ್ರೈಷ್ಟುಭಂ ಶತಕಮ್ ॥
॥ ಪ್ರಥಮ ಉಪಜಾತಿಪಾದಃ ॥
ಮನ್ದೋಽಪಿ ಬೋಧಂ ವಿದಧನ್ಮುನೀನಾಂ ಸ್ವಚ್ಛೋಽಪಿ ರಾಗಂ ತ್ರಿದಶೇಶ್ವರಸ್ಯ ।
ಅಲ್ಪೋಽಪಿ ಧುನ್ವನ್ಹರಿತಾಂ ತಮಾಂಸಿ ಸ್ಮಿತಾಙ್ಕುರೋ ಭಾತು ಜಯನ್ತಮಾತುಃ ॥ ೫೦೧॥
ಅಶೇಷಪಾಪೌಘನಿವಾರಣಾಯ ಭಾಗ್ಯಸ್ಯ ಪಾಕಾಯ ಚ ದೇವರಾಜ್ಞೀ ।
ಶೋಕಾಕುಲಾಂ ಭಾರತಭೂಮಿಮೇತಾಂ ಲೋಕಸ್ಯ ಮಾತಾ ಹೃದಯೇ ಕರೋತು ॥ ೫೦೨॥
ಧರ್ಮದ್ವಿಷಾಮಿನ್ದ್ರನಿರಾದರಾಣಾಂ ಸಂಹಾರಕರ್ಮಣ್ಯತಿಜಾಗರೂಕಾಮ್ ।
ದೇವೀಂ ಪರಾಂ ದೇವಪಥೇ ಜ್ವಲನ್ತೀಂ ಪ್ರಚಣ್ಡಚಣ್ಡೀಂ ಮನಸಾ ಸ್ಮರಾಮಿ ॥ ೫೦೩॥
ವ್ಯಾಪ್ತಾ ತಟಿದ್ವಾ ಗಗನೇ ನಿಗೂಢಾ ನಾರೀ ಸುರೇಶಾನಮನೋರಮಾ ವಾ ।
ಶಕ್ತಿಃ ಸುಷುಮ್ಣಾಪಥಚಾರಿಣೀ ವಾ ಪ್ರಚಣ್ಡಚಣ್ಡೀತಿ ಪದಸ್ಯ ಭಾವಃ ॥ ೫೦೪॥
ಸಮಸ್ತಲೋಕಾವನಿನಾಯಿಕಾಯಾಃ ಸುಪರ್ವಮಾರ್ಗೇಣ ಶರೀರವತ್ಯಾಃ ।
ಮಾತುರ್ಮಹೋಂಶಂ ಮಹನೀಯಸಾರಂ ವಿಜ್ಞಾನವನ್ತಸ್ತಟಿತಂ ಭಣನ್ತಿ ॥ ೫೦೫॥
ನಿಗೂಢತೇಜಸ್ತನುರಮ್ಬಿಕೇಯಂ ಪ್ರಚಣ್ಡಚಣ್ಡೀ ಪರಿತೋ ಲಸನ್ತೀ ।
ಅವ್ಯಕ್ತ್ಶಬ್ದೇನ ಶರೀರವತ್ಯಾಃ ಕಾಲ್ಯಾಃ ಕವೀನಾಂ ವಚನೇಷು ಭಿನ್ನಾ ॥ ೫೦೬॥
ಶಬ್ದಂ ವಿನಾ ನೈವ ಕದಾಪಿ ತೇಜಸ್ತೇಜೋ ವಿನಾ ನೈವ ಕದಾಪಿ ಶಬ್ದಃ ।
ಶಕ್ತಿದ್ವಯಂ ಸನ್ತತಯುಕ್ತಮೇತತ್ಕಥಂ ಸ್ವರೂಪೇಣ ಭವೇದ್ವಿಭಕ್ತಮ್ ॥ ೫೦೭॥
ಏಕೈವ ಶಕ್ತಿರ್ಜ್ವಲತಿ ಪ್ರಕೃಷ್ಟಾ ಸ್ವರತ್ಯಪಿ ಪ್ರಾಭವತಃ ಸಮನ್ತಾತ್ ।
ಕ್ರಿಯಾವಿಭೇದಾದಿಹ ಪಣ್ಡಿತಾನಾಂ ಶಕ್ತಿದ್ವಯೋಕ್ತಿಸ್ತು ಸಮರ್ಥನೀಯಾ ॥ ೫೦೮॥
ಏಕಕ್ರಿಯಾಯಾಶ್ಚ ಫಲಪ್ರಭೇದಾತ್ಪುನರ್ವಿಭಾಗಃ ಕ್ರಿಯತೇ ಬಹುಜ್ಞೈಃ ।
ಕಾಲೀಂ ಚ ತಾರಾಂ ಸ್ವರಮಗ್ರ್ಯಮಾಹುಃ ಪ್ರಚಣ್ಡಚಣ್ಡೀಂ ಲಲಿತಾಂ ಚ ತೇಜಃ ॥ ೫೦೯॥
ಸಮ್ಪದ್ಯತೇ ಶಬ್ದಗತೇರ್ಹಿ ಕಾಲಃ ಶಬ್ದೋ ವರೇಣ್ಯಸ್ತದಭಾಣಿ ಕಾಲೀ ।
ಧ್ಯಾತೇನ ಶಬ್ದೇನ ಭವಂ ತರೇದ್ಯದ್ಸುಧಾಸ್ತತಃ ಶಬ್ದಮುಶನ್ತಿ ತಾರಾಮ್ ॥ ೫೧೦॥
ಯದಕ್ಷರಂ ವೇದವಿದಾಮೃಷೀಣಾಂ ವೇದಾನ್ತಿನಾಂ ಯಃ ಪ್ರಣವೋ ಮುನೀನಾಮ್ ।
ಗೌರೀ ಪುರಾಣೇಷು ವಿಪಶ್ಚಿತಾಂ ಯಾ ಸಾ ತಾನ್ತ್ರಿಕಾಣಾಂ ವಚನೇನ ತಾರಾ ॥ ೫೧೧॥
ಸಮ್ಪದ್ಯತೇ ಸಂಹೃತಿರೋಜಸಾ ಯತ್ಪ್ರಚಣ್ಡಚಣ್ಡೀ ತದುದೀರಿತೌಜಃ ।
ಸಿಧ್ಯೇದಶೇಷೋಽನುಭವೋ ಯದೋಜಸ್ಯತೋ ಬುಧಾಸ್ತಾಂ ಲಲಿತಾಂ ವದನ್ತಿ ॥ ೫೧೨॥
ಪ್ರಚಣ್ಡಚಣ್ಡೀಂ ಲಘುನಾ ಪದೇನ ಚಣ್ಡೀಂ ವಿದುಃ ಕೇಚನ ಬುದ್ಧಿಮನ್ತಃ ।
ಏಕೇ ವಿದಃ ಶ್ರೇಷ್ಠಮಹೋಮಯೀಂ ತಾಂ ಲಕ್ಷ್ಮೀಂ ಮಹತ್ಪೂರ್ವಪದಾಂ ವದನ್ತಿ ॥ ೫೧೩॥
ಅತೀವ ಸೌಮ್ಯಂ ಲಲಿತೇತಿ ಶಬ್ದಂ ಪ್ರಚಣ್ಡಚಣ್ಡೀತಿ ಪದಂ ಚ ಭೀಮಮ್ ।
ದೇವೀ ದಧಾನಾ ಸುತರಾಂ ಮನೋಜ್ಞಾ ಘೋರಾ ಚ ನಿತ್ಯಂ ಹೃದಿ ಮೇ ವಿಭಾತು ॥ ೫೧೪॥
ಪ್ರಚಣ್ಡಚಣ್ಡೀಂ ತು ಶರೀರಭಾಜಾಂ ತನೂಷು ಯೋಗೇನ ವಿಭಿನ್ನಶೀರ್ಷಾಮ್ ।
ಶಕ್ತಿಂ ಸುಷುಮ್ಣಾಸರಣೌ ಚರನ್ತೀಂ ತಾಂ ಛಿನ್ನಮಸ್ತಾಂ ಮುನಯೋ ವದನ್ತಿ ॥ ೫೧೫॥
ಕಪಾಲಭೇದೋ ಯದಿ ಯೋಗವೀರ್ಯಾತ್ಸಮ್ಪದ್ಯತೇ ಜೀವತ ಏವ ಸಾಧೋಃ ।
ತಮೇವ ಸನ್ತಃ ಪ್ರವದನ್ತಿ ಶೀರ್ಷಚ್ಛೇದಂ ಶರೀರಾನ್ತರಭಾಸಿ ಶಕ್ತೇಃ ॥ ೫೧೬॥
ಉದೀರ್ಯಸೇ ನಿರ್ಜರರಾಜಪತ್ನಿ ತ್ವಂ ಛಿನ್ನಮಸ್ತಾ ಯಮಿನಾಂ ತನೂಷು ।
ಉಜ್ಜಋಮ್ಭಣೇ ವಿಶ್ವಸವಿತ್ರಿ ಯಸ್ಯಾಃ ಕಾಯಂ ಭವೇದ್ವೈದ್ಯುತಯನ್ತ್ರತುಲ್ಯಮ್ ॥ ೫೧೭॥
ಪಿತುರ್ನಿಯೋಗಾತ್ತನಯೇನ ಕೃತ್ತೇ ಮಸ್ತೇ ಜನನ್ಯಾಃ ಕಿಲ ರೇಣುಕಾಯಾಃ ।
ತ್ವಮಾವಿಶಃ ಪಾವನಿ ತತ್ಕಬನ್ಧಂ ತದ್ವಾ ತ್ವಮುಕ್ತಾಸಿ ನಿಕೃತ್ತಮಸ್ತಾ ॥ ೫೧೮॥
ಛಿನ್ನಂ ಶಿರಃ ಕೀರ್ಣಕಚಂ ದಧಾನಾಂ ಕರೇಣ ಕಣ್ಠೋದ್ಗತರಕ್ತಧಾರಾಮ್ ।
ರಾಮಾಮ್ಬಿಕಾಂ ದುರ್ಜನಕಾಲರಾತ್ರಿಂ ದೇವೀಂ ಪವಿತ್ರಂ ಮನಸಾ ಸ್ಮರಾಮಿ ॥ ೫೧೯॥
ಧ್ರುವೋ ರಮಾ ಚನ್ದ್ರಧರಸ್ಯ ರಾಮಾ ವಾಗ್ವಜ್ರವೈರೋಚಸದೀರ್ಘನಿರ್ಯೇ ।
ಕೂರ್ಚದ್ವಯಂ ಶಸ್ತ್ರಕೃಶಾನುಜಾಯೇ ವಿದ್ಯಾನೃಪಾರ್ಣಾ ಸುರರಾಜಶಕ್ತೇಃ ॥ ೫೨೦॥
ಮಾಯಾದ್ವಿವಾರಂ ಯದಿ ಸೈಕವರ್ಣಾ ವಿದ್ಯೈಕವರ್ಣಾ ಯದಿ ಧೇನುರೇಕಾ ।
ಧೇನ್ವಾದಿ ಸಮ್ಬೋಧನಮಸ್ತ್ರಮಗ್ನೇರ್ವಿಲಾಸಿನೀ ಚೇತಿ ಧರೇನ್ದುವರ್ಣಾ ॥ ೫೨೧॥
ಚತುಷ್ಟಯೇತ್ರನ್ಯತಮಂ ಗೃಹೀತ್ವಾ ಮನ್ತ್ರಂ ಮಹೇನ್ದ್ರಸ್ಯ ಮನೋಧಿನಾಥಾಮ್ ।
ಭಜೇತ ಯಸ್ತಾನ್ತ್ರಿಕದಿವ್ಯಭಾವಮಾಶ್ರಿತ್ಯ ಸಿದ್ವೀಃ ಸಕಲಾಃ ಸ ವಿನ್ದೇತ್ ॥ ೫೨೨॥
ಸಂಹೋತ್ರಮಿತ್ಯದ್ಭುತಶಕ್ತಿಯುಕ್ತಂ ವೃಷಾಕಪೇರ್ದರ್ಶನಮಮ್ಬ ಮನ್ತ್ರಮ್ ।
ಯೋ ವೈದಿಕಂ ತೇ ಮನುಜೋ ಭಜೇತ ಕಿಞ್ಚಿನ್ನ ತಸ್ಯೇಹ ಜಗತ್ಯಸಾಧ್ಯಮ್ ॥ ೫೨೩॥
ಪ್ರಚಣ್ಡಚಣ್ಡಿ ಪ್ರಮದೇ ಪುರಾಣಿ ಪುರಾಣವೀರಸ್ಯ ಮನೋಧಿನಾಥೇ ।
ಪ್ರಯಚ್ಛ ಪಾತುಂ ಪಟುತಾಂ ಪರಾಂ ಮೇ ಪುಣ್ಯಾಮಿಮಾಮಾರ್ಯನಿವಾಸಭೂಮಿಮ್ ॥ ೫೨೪॥
ಪ್ರಪಞ್ಚರಾಜ್ಞೀಂ ಪ್ರಥಿತಪ್ರಭಾವಾಂ ಪ್ರಚಣ್ಡಚಣ್ಡೀಂ ಪರಿಕೀರ್ತಯನ್ತ್ಯಃ ।
ಏತಾಃ ಪ್ರಮೋದಾಯ ಭವನ್ತು ಶಕ್ತೇರುಪಾಸಕಾನಾಮುಪಜಾತಯೋ ನಃ ॥ ೫೨೫॥
॥ ದ್ವಿತೀಯೋ ರಥೋದ್ಧತಾಪಾದಃ ॥
ಕ್ಷಾಲನಾಯ ಹರಿತಾಂ ವಿಭೂತಯೇ ವಿಷ್ಟಪಸ್ಯ ಮದನಾಯ ವಜ್ರಿಣಃ ।
ತಜ್ಜಯನ್ತಜನನೀಮುಖಾಬ್ಜತೋ ನಿರ್ಗತಂ ಸ್ಮಿತಮಘಂ ಧುನೋತು ನಃ ॥ ೫೨೬॥
ಅನ್ನಲೋಪಕೃಶಭೀರುಕಪ್ರಜಾಂ ಭಿನ್ನಭಾವಬಲಹೀನನೇತೃಕಾಮ್ ।
ವಾಸವಸ್ಯ ವರವರ್ಣಿನೀ ಪರೈರರ್ದಿತಾಮವತು ಭಾರತಾವನಿಮ್ ॥ ೫೨೭॥
ಪಾಣಿಪಾದಮನಿಮೇಷರಾಜ್ಞಿ ತೇ ಪಾರಿಜಾತನವಪಲ್ಲವೋಪಮಮ್ ।
ಅಕ್ಷಪಾವಿರಹಮಙ್ಗಭಾಸರಿದ್ವಾಸಿಚಕ್ರಮಿಥುನಂ ಕುಚದ್ವಯಮ್ ॥ ೫೨೮॥
ಪೂರ್ಣಚನ್ದ್ರಯಶಸೋಽಪಹಾರಕಂ ಸಮ್ಪ್ರಸಾದಸುಷಮಾಸ್ಪದಂ ಮುಖಮ್ ।
ಜ್ಞಾನಶಕ್ತಿರುಚಿಶೇವಧೀದೃಶೌ ರಕ್ತ್ವರ್ಣಕಸುಧಾಘನೋಽಧರಃ ॥ ೫೨೯॥
ಮರ್ದಯತ್ತಿಮಿರಮುದ್ಧತಂ ದಿಶಾಂ ಅಲ್ಪಮಪ್ಯಧಿಕವೈಭವಂ ಸ್ಮಿತಮ್ ।
ಪ್ರಾವೃಡನ್ತಯಮುನಾತರಙ್ಗವನ್ನತ್ನ್ಲಚಾರುರತಿಪಾವನಃ ಕಚಃ ॥ ೫೩೦॥
ವಲ್ಲಕೀಂ ಚ ಪರುಷಧ್ವನಿಂ ವದನ್ ದುಃಖಿತಸ್ಯ ಚ ಮುದಾವಹಃ ಸ್ವರಃ ।
ಚಾರು ಹಾವಶಬಲಾಽಲಸಾ ಗತಿಃ ಕಾಯಧಾಮವಚಸಾಂ ನ ಪದ್ಧತೌ ॥ ೫೩೧॥
ಯೋಗಸಿದ್ಧಿಮತುಲಾಂ ಗತಾ ಮತಿಶ್ಚಾತುರೀ ಚ ಬುಧಮಣ್ಡಲಸ್ತುತಾ ।
ವಿಷ್ಟಪತ್ರಿತಯರಾಜ್ಯತೋಽಪ್ಯಸಿ ತ್ವಂ ಸುಖಾಯ ಮಹತೇ ಬಿಡೌಜಸಃ ॥ ೫೩೨॥
ತ್ವಾಮುದೀಕ್ಷ್ಯ ಧೃತದೇವತಾತನುಂ ದೀಪ್ತಪಕ್ಷ್ಮಲವಿಶಾಲಲೋಚನಾಮ್ ।
ಆದಿತೋ ಜನನಿ ಜನ್ಮಿನಾಮಭೂದ್ ವಾಸವಸ್ಯ ರತಿರಾದಿಮೇ ರಸೇ ॥ ೫೩೩॥
ಆದಿಮಂ ರಸಮನಾದಿವಾಸನಾ ವಾಸಿತೌ ಪ್ರಥಮಮನ್ವಗೃಹ್ಣತಾಮ್ ।
ಸಮ್ಮದಸ್ಯ ನಿಧಿಮಾದಿದಮ್ಪತೀ ಸೋಽಚಲತ್ತ್ರಿಭುವನೇ ತತಃ ಕ್ರಮಃ ॥ ೫೩೪॥
ಜ್ಯಾಯಸಾ ದಿವಿಷದಾಂ ಪುರಾತನೀ ನೀಲಕಞ್ಜನಯನಾ ವಿಲಾಸಿನೀ ।
ಯದ್ವಿಹಾರಮತನೋತ್ಪ್ರರೋಚನಂ ತತ್ಸತಾಮಭವದಾದಿಮೇ ರಸೇ ॥ ೫೩೫॥
ನ ತ್ವದಮ್ಬ ನಲಿನಾನನಾಽಧಿಕಾ ನಾಪಿ ನಾಕಪತಿತೋಽಧಿಕಃ ಪುಮಾನ್ ।
ನಾಧಿಕಂ ಚ ವನಮಸ್ತಿ ನನ್ದನಾನ್ನಾದಿಮಾದಪಿ ರಸೋಽಧಿಕೋ ರಸಾತ್ ॥ ೫೩೬॥
ನಾಯಿಕಾ ತ್ವಮಸಮಾನಚಾರುತಾ ನಾಯಕಃ ಸ ಮರುತಾಂ ಮಹೀಪತಿಃ ।
ನನ್ದನಂ ಚ ರಸರಙ್ಗಭೂಃ ಕಥಂ ಮನ್ಮಥಸ್ಯ ನ ಭವೇದಿಹೋತ್ಸವಃ ॥ ೫೩೭॥
ದೇವಿ ವಾಂ ಮೃತಿಕಥೈವ ದೂರತೋ ಜಾತುಚಿದ್ಗಲತಿ ನೈವ ಯೌವನಮ್ ।
ಕಾಙ್ಕ್ಷಿತಃ ಪರಿಕರೋ ನ ದುರ್ಲಭಃ ಕಿಂ ರಸಃ ಪರಿಣಮೇದಿಹಾನ್ಯಥಾ ॥ ೫೩೮॥
ವಿಷ್ಟಪಸ್ಯ ಯುವರಾಜಕೇಶವೇ ತ್ರಾಣಭಾರಮಖಿಲಂ ನಿಧಾಯ ವಾಮ್ ।
ಕ್ರೀಡತೋರಮರರಾಜ್ಞಿ ನನ್ದನೇ ಕ್ರೀಡಿತಾನಿ ಮಮ ಸನ್ತು ಭೂತಯೇ ॥ ೫೩೯॥
ಯದ್ಯುವಾಮಮರರಾಜ್ಞಿ ನನ್ದನೇ ಕುರ್ವತೋ ರಹಸಿ ದೇವಿ ಮನ್ತ್ರಣಮ್ ।
ತತ್ರ ಚೇನ್ಮಮ ಕೃತಿರ್ಮನಾಗಿಯಂ ಸ್ಪರ್ಶಮೇತಿ ಭುವಿ ಕೋ ನು ಮತ್ಕೃತೀ ॥ ೫೪೦॥
ಕ್ರನ್ದನಂ ಯದಿ ಮಮೇಹ ವನ್ದಿನೋ ನನ್ದನೇ ವಿಹರತೋಃ ಸವಿತ್ರಿ ವಾಮ್ ।
ಅನ್ತರಾಯಕೃದಥಾಬ್ಜಕಾನ್ತಿ ತೇ ಸಮ್ಪ್ರಗೃಹ್ಯ ಚರಣಂ ಕ್ಷಮಾಪಯೇ ॥ ೫೪೧॥
ಯೋಷಿತಾಮಪಿ ವಿಮೋಹನಾಕೃತಿರ್ಮೋಹನಂ ತು ಪುರುಷಸಂಹತೇರಪಿ ।
ಇನ್ದ್ರಮಮ್ಬರಮಯಾಂ ಬಭೂವಿಥ ತ್ವಂ ರಸಾರ್ದ್ರಹೃದಯಾ ಲಸದ್ರಸಮ್ ॥ ೫೪೨॥
ದಿವ್ಯಚನ್ದನರಸಾನುಲೇಪನೈಃ ಪಾರಿಜಾತಸುಮತಲ್ಪಕಲ್ಪನೈಃ ।
ಚಾರುಗೀತಕೃತಿಭಿಶ್ಚ ಭೇಜಿರೇ ನಾಕಲೋಕವನದೇವತಾಶ್ಚ ವಾಮ್ ॥ ೫೪೩॥
ಸ್ವರ್ಣದೀಸಲಿಲಶೀಕರೋಕ್ಷಿತಾಃ ಪಾರಿಜಾತಸುಮಗನ್ಧಧಾರಿಣಃ ।
ನನ್ದನೇ ತ್ರಿದಶಲೋಕರಾಜ್ಞಿ ವಾಂ ಕೇಪಿ ಭೇಜುರಲಸಾಃ ಸಮೀರಣಾಃ ॥ ೫೪೪॥
ಆದಧಾಸಿ ಸಕಲಾಙ್ಗನಾಧಿಕೇ ಪದ್ಮಗನ್ಧಿನಿ ಸುಧಾಧರಾಧರೇ ।
ಮಞ್ಜುವಾಣಿ ಸುಕುಮಾರಿ ಸುನ್ದರಿ ತ್ವಂ ಸುರೇನ್ದ್ರಸಕಲೇನ್ದ್ರಿಯಾರ್ಚನಮ್ ॥ ೫೪೫॥
ಆದಿದೇವಿ ವದನಂ ತವಾಭವತ್ ಕಾನ್ತಿಧಾಮ ಮದನಂ ದಿವಸ್ಪತೇಃ ।
ಆನನಾದಪಿ ರಸಾಮೃತಂ ಕಿರನ್ನಿಷ್ಕ್ರಮಂ ವಿಲಸಿತಂ ಕಲಂ ಗಿರಾಮ್ ॥ ೫೪೬॥
ಚಾರುವಾಗ್ವಿಲಸಿತಾಚ್ಚ ನಿಸ್ತುಲಪ್ರೇಮವೀಚಿರುಚಿರಂ ವಿಲೋಕಿತಮ್ ।
ವೀಕ್ಷಿತಾದಪಿ ವಿಲಾಸವಿಶ್ರಮಸ್ಥಾನಮಲ್ಪಮಲಸಂ ಶುಚಿಸ್ಮಿತಮ್ ॥ ೫೪೭॥
ಭಾಸುರೇನ್ದ್ರದೃಢಬಾಹುಪಞ್ಜರೇ ಲಜ್ಜಯಾ ಸಹಜಯಾ ನಮನ್ಮುಖೀ ।
ತದ್ವಿಲೋಚನವಿಕರ್ಷಕಾಲಕಾ ಪಾತು ಮಾಂ ತ್ರಿದಿವಲೋಕನಾಯಿಕಾ ॥ ೫೪೮॥
ಭಾರತಕ್ಷಿತಿವಿಷಾದವಾರಣೇ ತತ್ಸುತಂ ಗಣಪತಿಂ ಕೃತೋದ್ಯಮಮ್ ।
ಆದಧಾತು ಪಟುಮರ್ಜುನಸ್ಮಿತಾ ದುರ್ಜನಪ್ರಮಥನಕ್ಷಮಾ ಶಚೀ ॥ ೫೪೯॥
ಚಾರುಶಬ್ದಕಲಿತಾಃ ಕೃತೀರಿಮಾಃ ಸತ್ಕವಿಕ್ಷಿತಿಭುಜೋ ರಥೋದ್ಧತಾಃ ।
ಸಾ ಶೃಣೋತು ಸುರಮೇದಿನೀಪತೇರ್ನೇತ್ರಚಿತ್ತಮದನೀ ವಿಲಾಸಿನೀ ॥ ೫೫೦॥
॥ ತೃತೀಯೋ ಮೌಕ್ತಿಕಮಾಲಾಪಾದಃ ॥
ನಿರ್ಮಲಭಾಸಾಂ ದಿಶಿ ದಿಶಿ ಕರ್ತಾ ಪುಣ್ಯಮತೀನಾಂ ಹೃದಿ ಹೃದಿ ಧರ್ತಾ ।
ಪಾಲಯತಾನ್ಮಾಮನಘವಿಲಾಸಃ ಶಕ್ರಮಹಿಶ್ಯಾಃ ಸಿತದರಹಾಸಃ ॥ ೫೫೧॥
ಪುಣ್ಯಚರಿತ್ರಾ ಮುನಿಜನಗೀತಾ ವಾಸವಕಾನ್ತಾ ತ್ರಿಭುವನಮಾತಾ ।
ವತ್ಸಲಭಾವಾದವತು ವಿದೂನಾಂ ಭಾರತಭೂಮಿಂ ಧನಬಲಹೀನಾಮ್ ॥ ೫೫೨॥
ಕೋಟಿತಟಿದ್ವತ್ತವ ತನುಕಾನ್ತಿಃ ಪೂರ್ಣಸಮಾಧೇಸ್ತವ ಹೃದಿ ಶಾನ್ತಿಃ ।
ವಾಸವಭಾಮೇ ಭಗವತಿ ಘೋರಃ ಶತ್ರುವಿದಾರೀ ತವ ಭುಜಸಾರಃ ॥ ೫೫೩॥
ಆಶ್ರಯಭೂತಂ ಸುಮಧುರತಾಯಾ ಆಲಯಭೂತಂ ಜಲಧಿಸುತಾಯಾಃ ।
ವಾಸವದೃಷ್ಟೇಸ್ತವಮುಖಮಬ್ಜಂ ಕಿಙ್ಕ್ರದೃಷ್ಟೇಸ್ತವ ಪದಮಬ್ಜಮ್ ॥ ೫೫೪॥
ಪಾದಸರೋಜಂ ವೃಜಿನಹರಂ ತೇ ಯೋ ಭಜತೇ ನಾ ಸುರಪತಿಕಾನ್ತೇ ।
ತತ್ರ ಕಟಾಕ್ಷಾ ಅಯಿ ಶತಶಸ್ತೇ ತಸ್ಯ ಸಮಸ್ತಂ ಭಗವತಿ ಹಸ್ತೇ ॥ ೫೫೫॥
ಜ್ಞಾಪಕಶಕ್ತಿಃ ಪ್ರತಿನರಮಸ್ತಂ ಕಾರಕಶಕ್ತಿಃ ಪ್ರತಿನರಹಸ್ತಮ್ ।
ವಾಸವಚಕ್ಷುಸ್ಸುಕೃತಫಲಶ್ರೀರ್ಭಾತು ಮಮಾನ್ತಃ ಸುರಭುವನಶ್ರೀಃ ॥ ೫೫೬॥
ಮನ್ತ್ರಪರಾಣಾಂ ವಚಸಿ ವಸನ್ತೀ ಧ್ಯಾನಪರಾಣಾಂ ಮನಸಿ ಲಸನ್ತೀ ।
ಭಕ್ತಿಪರಾಣಾಂ ಹೃದಿ ವಿಹರನ್ತೀ ಭಾತಿ ಪರಾಮ್ಬಾ ನಭಸಿ ಚರನ್ತೀ ॥ ೫೫೭॥
ಸೇವಕಪಾಪಪ್ರಶಮನನಾಮಾ ದಿಕ್ತಿಮಿರೌಘಪ್ರಮಥನಧಾಮಾ ।
ಉಜ್ಜ್ವಲಶಸ್ತ್ರಾ ರಣಭುವಿ ಭೀಮಾ ಪಾತು ನತಂ ಮಾಂ ಹರಿಹಯರಾಮಾ ॥ ೫೫೮॥
ಯೋಗಿನಿ ಶಕ್ತಿರ್ವಿಲಸಸಿ ದಾನ್ತಿಃ ಯೋಷಿತಿ ಶಕ್ತಿರ್ವಿಲಸಸಿ ಕಾನ್ತಿಃ ।
ಜ್ಞಾನಿನಿ ಶಕ್ತಿರ್ವಿಲಸಸಿ ತುಷ್ಟಿಃ ಧನ್ವಿನಿ ಶಕ್ತಿರ್ವಿಲಸಸಿ ದೃಷ್ಟಿಃ ॥ ೫೫೯॥
ಸಙ್ಗಿನಿ ಶಕ್ತಿರ್ವಿಲಸಸಿ ನಿದ್ರಾ ಧ್ಯಾತರಿ ಶಕ್ತಿರ್ವಿಲಸಸಿ ಮುದ್ರಾ ।
ವಾಸವಕಾನ್ತೇ ಗಗನನಿಶಾನ್ತೇ ಭಾಷಿತುಮೀಶಃ ಕ್ವ ನು ವಿಭವಂ ತೇ ॥ ೫೬೦॥
ಯದ್ದಿತಿಜಾನಾಂ ದಮನಮವಕ್ರಂ ಕೇಶವಹಸ್ತೇ ವಿಲಸತಿ ಚಕ್ರಮ್ ।
ತತ್ರ ಕಲಾ ತೇ ಭಗವತಿ ಭದ್ರಾ ಕಾಚನ ಭಾರಂ ವಹತಿ ವಿನಿದ್ರಾ ॥ ೫೬೧॥
ದುಷ್ಟನಿಶಾಟಪ್ರಶಮನಶೀಲಂ ಯತ್ ಸಿತಭೂಭೃತ್ಪತಿಕರಶೂಲಮ್ ।
ತತ್ರ ಮರ್ಮಹೋಂಶಸ್ತವ ಜಗದೀಶೇ ರಾಜತಿ ಕಶ್ಚಿತ್ಪಟುರರಿನಾಶೇ ॥ ೫೬೨॥
ಯನ್ನಿಜರೋಚಿಕ್ರ್ತತರಿಪುಸಾರಂ ವಾಸವಹಸ್ತೇ ಕುಲಿಶಮುದಾರಮ್ ।
ತತ್ರ ತವಾಂಶೋ ವಿಲಸತಿ ದಿವ್ಯಃ ಕಶ್ಚನ ಭಾಸೋ ಭಗವತಿ ಭವ್ಯಃ ॥ ೫೬೩॥
ಅಮ್ಬರದೇಶೇ ಸುಮಹತಿ ಗುಪ್ತಾ ಪಙ್ಕ್ಜಬನ್ಧೌ ವಿಲಸತಿ ದೀಪ್ತಾ ।
ರಾಜಸಿ ಮಾತರ್ಹಿಮರುಚಿಶೀತಾ ವೇದಿಕೃಶಾನೌ ಕ್ರತುಭೃತಿಪೂತಾ ॥ ೫೬೪॥
ಸೂಕ್ಷ್ಮರಜೋಭಿರ್ವಿಹಿತಮುದಾರಂ ಯಜ್ಜಗದೇತನ್ನ್ಗಗನಮಪಾರಮ್ ।
ತತ್ತವವೇದಃ ಪ್ರವದತಿ ಕಾಯಂ ಪಾವನಿ ಭಾನುಸ್ತವ ತನುಜೋಽಯಮ್ ॥ ೫೬೫॥
ಈಶ್ವರಿ ನೈಕಸ್ತವ ಖರತೇಜಾಃ ತೇಽಪಿ ಚ ಸರ್ವೇ ಜನನಿ ತನೂಜಾಃ ।
ಉಜ್ವಲಖೇಟಾಃ ಕುವದತಿ ಕಾಯಾಃ ಪಾವನಿ ಕಸ್ತೇ ಪ್ರವದತು ಮಾಯಾಃ ॥ ೫೬೬॥
ಯಾ ಮಹಿಮಾನಂ ಪ್ರಥಯತಿ ಭೂಮಿಃ ಪಾವನಕೀರ್ತಿರ್ಜಲನಿಧಿನೇಮಿಃ ।
ಸೇಯಮಪೀಶೇ ಭವತಿ ಸುಪುತ್ರೀ ವಾಸವಜಾಯೇ ತವ ಜನಧಾತ್ರೀ ॥ ೫೬೭॥
ಅಙ್ಗ ಸಖಾಯೋ ವಿರಮತಸಙ್ಗಾಶ್ವಷ್ಠ್ಹರ್ವಿಷಯಾಣಾಂ ಕೃತಮತಿಭಙ್ಗಾತ್ ।
ಧ್ಯಾಯತ ಚಿತ್ತೇ ಧುತಭಯಬೀಜಂ ವಾಸವಜಾಯಾಚರಣಸರೋಜಮ್ ॥ ೫೬೮॥
ಪಾಪಮಶೇಷಂ ಸಪದಿ ವಿಹಾತುಂ ಶಕ್ತಿಮನಲ್ಪಾಮಪಿ ಪರಿಧಾತುಮ್ ।
ಚೇತಸಿ ಸಾಧೋ ಕುರು ಪರಿಪೂತಂ ವಾಸವಜಾಯಾಪದಜಲಜಾತಮ್ ॥ ೫೬೯॥
ಈಶ್ವರಿ ವನ್ದ್ಯದ್ಯುತಿಭೃತಿಮೇಧೇ ಕಾಙ್ಕ್ಷಿತನೀರಾಣ್ಯಸೃಜತಿ ಮೋಘೇ ।
ನಿರ್ಮಲಕೀರ್ತೇಸ್ತವ ಶಚಿ ಗಾನಂ ಶಕ್ಷ್ಯತಿ ಕರ್ತುಂ ತದುದಕದಾನಮ್ ॥ ೫೭೦॥
ಆಮಯವೀರ್ಯಾದ್ವಿಗಲತಿ ಸಾರೇ ಜೀವತಿ ಕಿಞ್ಚಿದ್ರಿಸನಗನೀರೇ ।
ರಕ್ಷತಿ ಜನ್ತುಂ ತವ ಶಚಿ ನಾಮ ಪ್ರಾಜ್ಞಜನೈರಪ್ಯಗಣಿತಧಾಮ ॥ ೫೭೧॥
ಮಧ್ಯಮಲೋಕೇ ಸ್ಯತಿ ಶುಚಿರುಗ್ರಾ ರಾಜಸಿ ನಾಕೇ ವಿಭವಸಮಗ್ರಾ ।
ಪ್ರಾಣಿಶರೀರೇ ಭವಸಿ ವಿಚಿತ್ರ ವಾಸವಜಾಯೇ ವಿವಿಧಚರಿತ್ರ ॥ ೫೭೨॥
ವ್ಯೋಮ್ನಿ ವಪುಸ್ತೇ ವಿನಿಹತಪಾಪಂ ವಿಶ್ರುತಲೀಲಂ ತವ ದಿವಿ ರೂಪಮ್ ।
ಕರ್ಮವಶಾತ್ತೇ ಭವತಿ ಸ ಭೋಗಃ ಪ್ರಾಣಿಶರೀರೇ ಭಗವತಿ ಭಾಗಃ ॥ ೫೭೩॥
ಭಾರತಭೂಮೇಃ ಶುಚಮಪಹನ್ತುಂ ಶ್ರೇಷ್ಠಮುಪಾಯಂ ಪುನರವಗನ್ತುಮ್ ।
ವಾಸವಜಾಯೇ ದಿಶ ಮಮ ಬುದ್ಧಿಂ ಪಾವನಿ ಮಾಯೇ ಕುರು ಕುರು ಸಿದ್ಧಿಮ್ ॥ ೫೭೪॥
ಸಮ್ಮದಯನ್ತೀರ್ಬುಧಜನಮೇತಾಃ ಸ್ವರ್ಗಧರಿತ್ರೀಪತಿಸತಿಪೂತಾಃ ।
ಮೌಕ್ತಿಕಮಾಲಾಃ ಶೃಣು ನುತಿಕರ್ತುರ್ಭಕ್ತಿನಿಬದ್ಧಾಃ ಕವಿಕುಲಭರ್ತುಃ ॥ ೫೭೫॥
॥ ಚತುರ್ಥಃ ಸುಮುಖೀಪಾದಃ ॥
ಅಜಿತಮಿನಾಗ್ನಿತಟಿಚ್ಛಶಿಭಿಃ ಮಮ ಹೃದಯಸ್ಯ ತಮಃ ಪ್ರಬಲಮ್ ।
ಅಮರಪತಿಪ್ರಮದಾಹಸಿತಂ ವಿಮಲಘೃಣಿಪ್ರಕರೈರ್ಹರತು ॥ ೫೭೬॥
ಸುರನೃಪತೇರ್ದಯಿತಾ ವಿನತಾಹಿತಶಮನೀ ಲುಲಿತಾಮಿತರೈಃ ।
ವರಕರುಣಾವರುಣಾಲಯದೃಙ್ಮಮ ಜನನೀಮವತಾದವನಿಮ್ ॥ ೫೭೭॥
ಪಟುತಪಸೋ ಜಮದಗ್ನಿಮುನೇರಿಹ ಸಹಧರ್ಮಚರೀಂ ಭುವನೇ ।
ತನಯನಿಕೃತ್ತಶಿರಃ ಕಮಲಾಂ ವರಮತಿಮಾವಿಶದಿನ್ದ್ರವಧೂಃ ॥ ೫೭೮॥
ಯದುಕುಲಕೀರ್ತಿವಿಲೋಪಭಿಯಾ ಬತವಿನಿಗೂಹ್ಯ ಋತಂ ಕವಯಃ ।
ಮುನಿಗೃಹಿಣೀ ವಧಹೇತುಕಥಾಮಿತರಪಥೇನ ಭಣನ್ತಿ ಮೃಷಾ ॥ ೫೭೯॥
ನ ಸುರಭಿರರ್ಜುನಭೂಮಿಪತಿರ್ಭೃಗುತಿಲಕಸ್ಯ ಜಹಾರ ಸ ಯಾಮ್ ।
ಇಯಮಮೃತಾಂಶುಮನೋಜ್ಞಮುಖೀ ಪರಶುಧರಸ್ಯ ಜನನ್ಯನಘಾ ॥ ೫೮೦॥
ಅತಿರಥಮರ್ಜುನಭೂಮಿಪತಿಂ ಸಹಪೃತನಂ ಜಮದಗ್ನಿಸುತಃ ।
ಯುಧಿ ಸ ವಿಜಿತ್ಯ ವಿಶಾಲಯಶಾಃ ಪುನರಪಿ ಮಾತರಮಾಹೃತವಾನ್ ॥ ೫೮೧॥
ಪರಗೃಹವಾಸಕಲಙ್ಕವಶಾನ್ನಿಜಗೃಹಿಣೀಂ ಜಮದಗ್ನಿಮುನಿಃ ।
ಬತವಿನಿಹನ್ತುಮನಾ ಕಲಯಂಸ್ತನುಭವಮಾದಿಶದುಗ್ರಮನಾಃ ॥ ೫೮೨॥
ಪಿತೃವಚನಾದತಿಭಕ್ತಿಮತಾಪ್ಯಸುರವದಾತ್ಮಸುತೇನ ಹತಾಮ್ ।
ಮುನಿಗೃಹಿಣೀಮನಘೇತಿವದಂಸ್ತವ ವರದೇಽವಿಶದಂಶ ಇಮಾಮ್ ॥ ೫೮೩॥
ಇದಮವಿಕಮ್ಪ್ಯಮತಿಪ್ರಬಲಂ ಪ್ರಭವತಿ ಕಾರಣಮಾರ್ಯನುತೇ ।
ಮುನಿಗೃಹಿಣೀಮನಘಾಂ ಭಣಿತುಂ ಶಚಿ ಕಲಯಾ ಯದಿ ಮಾಮವಿಶಃ ॥ ೫೮೪॥
ಖಲಜನಕಲ್ಪಿತದುಷ್ಟಕಥಾಶ್ರವಣವಶಾದ್ವ್ಯಥಿತಂ ಹೃದಯಮ್ ।
ಅಥ ಚರಿತೇಽವಗತೇ ವಿಮಲಸ್ಮೃತಿವಶತೋ ಮಮ ಯಾತಿ ಮುದಮ್ ॥ ೫೮೫॥
ತವ ಮಹಸಾ ವಿಶತಾ ಕೃಪಯಾ ಮಮ ಶಚಿ ಸೂಕ್ಷ್ಮಶರೀರಮಿದಮ್ ।
ನೃಪರಿಪುಮಾತೃಪವಿತ್ರಕಥಾ ಸ್ಮರಣಪಥಂ ಗಮಿತಾ ಸಪದಿ ॥ ೫೮೬॥
ವಿದಧತುರಾಸುರಕೃತ್ಯಮುಭೌ ಬಹುಲಗುಣಾಮಪಿ ಯದ್ಗೃಹಿಣೀಮ್ ।
ಸ ಮುನಿರಘಾತಯದಚ್ಛಕಥಾಂ ದಶರಥಜಶ್ಚ ಮುಮೋಚ ವನೇ ॥ ೫೮೭॥
ಅಪಿ ವಿನಿಕೃತ್ತಶಿರಾಃ ಶಚಿ ತೇ ವರಮಹಸಾ ವಿಶತಾ ಸಪದಿ ।
ಅಲಭತ ಜೀವಿತಮಮ್ಬ ಪುನರ್ಭುವನಶುಭಾಯ ಮುನೇಸ್ತರುಣೀ ॥ ೫೮೮॥
ಯದಿ ಶಿರಸಾ ರಹಿತೇ ವಪುಷಿ ಪ್ರಕಟತಯಾ ವಿಲಸನ್ತ್ಯಸವಃ ।
ಯದಿ ಹೃದಯಂ ಸಹಭಾತಿ ಧಿಯಾ ಕಿಮಿವ ವಿಚಿತ್ರಮಿತಶ್ಚರಿತಮ್ ॥ ೫೮೯॥
ಪರಶುಧರಸ್ಯ ಸವಿತ್ರಿ ಕಲಾ ತ್ವಯಿ ಪುರುಹೂತಸರೋಜದೃಶಃ ।
ಸ ಶಿರಸಿ ಕಾಚಿದಭೂದ್ರುಚಿರಾ ವಿಶಿರಸಿ ಭೀಮತಮಾ ಭವತಿ ॥ ೫೯೦॥
ಪರಶುಧರೋಽರ್ಜುನಭೂಮಿಪತಿಂ ಯದಜಯದಮ್ಬ ತಪೋಽತ್ರ ತವ ।
ಅಭಜತ ಕಾರಣತಾಮನಘೇ ವರಮುನಿಗೇಯಪವಿತ್ರಕಥೇ ॥ ೫೯೧॥
ಭಗವತಿ ಕೃತ್ತಶಿರೋ ಭವತೀ ಮಥಿತವತೀ ನೃಪತೀನಶುಭಾನ್ ।
ಪ್ರಥನಭುವಿ ಪ್ರಗುಣಂ ಭುಜಯೋಃ ಪರಶುಧರಾಯ ವಿತೀರ್ಯ ಬಲಮ್ ॥ ೫೯೨॥
ಶುಭತಮಕುಣ್ಡಲಪೂರ್ವಸತಿಃ ಪದನತಪಾತಕಸಂಶಮನೀ ।
ದಿಶತು ನಿಕೃತ್ತಶಿರಾಃ ಕುಶಲಂ ಮಮ ಸುರಪಾರ್ಥವಶಕ್ತಿಕಲಾ ॥ ೫೯೩॥
ನಿಜಸುತರಙ್ಗಪತೇರ್ನಿಕಟೇ ಕೃತವಸತಿರ್ನತಸಿದ್ಧಿಕರೀ ।
ದಲಿತಶಿರಾಃ ಪ್ರತನೋತು ಮಮ ಶ್ರಿಯಮಮರೇಶ್ವರಶಕ್ತಿಕಲಾ ॥ ೫೯೪॥
ಭುವಿ ತತಸಹ್ಯನಗಾನ್ತರಗೇ ಶುಭತಮಚನ್ದ್ರಗಿರೌ ವರದಾ ।
ಕೃತವಸತಿಃ ಕುರುತಾನ್ಮಮ ಶಂ ಭೃಗೂಕುಲರಾಮಜನನ್ಯಜರಾ ॥ ೫೯೫॥
ಅವತು ವಿಕೃತ್ತಶಿರಾಃ ಪದಯೋರ್ಭಜಕಮನಿನ್ದ್ಯವಿಚಿತ್ರಕಥಾ ।
ದಿನಕರಮಣ್ಡಲಮಧ್ಯಗೃಹಾ ಸುರಧರಣೀಪತಿಶಕ್ತಿಕಲಾ ॥ ೫೯೬॥
ಗಗನಚರಾರ್ಚಿತಪಾದುಕಯಾ ಪದನತಸನ್ಮತಿಬೋಧಿಕಯಾ ।
ಮಮ ಸತತಂ ಶುಚಿರೇಣುಕಯಾ ಪರವದಿದಂ ಕುಲಮಮ್ಬಿಕಯಾ ॥ ೫೯೭॥
ಶಮಯಿತುಮುಗ್ರತಮಂ ದುರಿತಂ ಪ್ರಥಯಿತುಮಾತ್ಮನಿಗೂಢಬಲಮ್ ।
ಗಮಯಿತುಮಗ್ರಯ್ದಶಾಂ ಸ್ವಕುಲಂ ತವ ಚರಣಾಮ್ಬುಜಮಮ್ಬ ಭಜೇ ॥ ೫೯೮॥
ಪರವಶಗಾಮಶಿವೇನ ವೃತಾಂ ಭರತಧರಾಂ ಪರಿಪಾತುಮಿಮಾಮ್ ।
ಪಟುಮತಿವಾಕ್ಕ್ರಿಯಮಾತನುತಾದ್ಗಣಪತಿಮಭ್ರಹಯಪ್ರಮದಾ ॥ ೫೯೯॥
ಗಣಪತಿದೇವಮರ್ಮಹೋಂಶಜುಷೋ ಗಣಪತಿನಾಮಕವಿಪ್ರಕವೇಃ ।
ಸುರಪತಿಜೀವಸಖೀಶೃಣುಯಾದ್ದಶಶತಪತ್ರಮುಖೀ ಸುಮುಖೀಃ ॥ ೬೦೦॥
॥ ಷಷ್ಠಂ ತ್ರೈಷ್ಟುಭಂ ಶತಕಂ ಸಮಾಪ್ತಮ್ ॥
॥ ಅಥ ಸಪ್ತಮಂ ಜಾಗತಂ ಶತಕಮ್ ॥
॥ ಪ್ರಥಮೋ ದ್ರುತವಿಲಮ್ಬಿತಪಾದಃ ॥
ಸುರಮಹೀರಮಣಸ್ಯ ವಿಲಾಸಿನೀ ಜಲಚರಧ್ವಜಜೀವಿತದಾಯಿನೀ ।
ಹರತು ಬೋಧದೃಗಾವರಣಂ ತಮೋ ಹೃದಯಗಂ ಹಸಿತೇನ ಸಿತೇನ ಮೇ ॥ ೬೦೧॥
ನಮದಮರ್ತ್ಯಕಿರೀಟಕೃತೈಃ ಕಿಣೈಃ ಕಮಠಪೃಷ್ಠನಿಭೇ ಪ್ರಪದೇಽಙ್ಕಿತಾ ।
ಪರಿಧುನೋತು ಶಚೀ ಭರತಕ್ಷಿತೇರ್ವೃಜಿನಜಾಲಮಜಾಲಮಕಮ್ಪನಮ್ ॥ ೬೦೨॥
ಅತಿತರಾಂ ನತಪಾಲನಲೋಲಯಾ ವಿಬುಧನಾಥಮನೋಹರಲೀಲಯಾ ।
ಕಿರಿಮುಖೀಮುಖಶಕ್ತ್ಯುಪಜೀವ್ಯಯಾ ವಿದಿತಯಾದಿತಯಾ ಗತಿಮಾನಹಮ್ ॥ ೬೦೩॥
ಘನಹಿರಣ್ಯಮದಾಪಹರೋಚಿಷಾ ವನರುಹಾನನಯಾಽವನದಕ್ಷಯಾ ।
ಗತಿಮದಿನ್ದ್ರಮನೋರಥನಾಥಯಾ ಭುವನಮೇವ ನ ಮೇ ಕುಲಮಾತ್ರಕಮ್ ॥ ೬೦೪॥
ತನುಷು ವಾಮನಮೂರ್ತಿಧರೇ ವಿಭೌ ತಮನುಯಾಚ ವಿರಾಜತಿ ವಾಮನೀ ।
ಶರಣವಾನನಯಾಮ್ಬಿಕಯಾ ಲಸತ್ ಕರುಣಯಾಽರುಣಯಾ ಪದಯೋರಹಮ್ ॥ ೬೦೫॥
ಸಕರುಣಾ ಕುಶಲಂ ಮಮ ರೇಣುಕಾತನುರಜಾ ತನುತಾದುದಿತೋ ಯತಃ ।
ಯುಧಿ ಮುನಿರ್ವಿದಧೌ ಪರಶುಂ ದಧಜ್ಜನಪತೀನಪತೀವ್ರಭುಜಾಮದಾನ್ ॥ ೬೦೬॥
ಸುಜನಶತ್ರುರಮಾಥಿ ಘನಧ್ವನಿಃ ಶಚಿ ಸರಾತ್ರಿಚರಸ್ತವ ತೇಜಸಾ ।
ಜನನಿ ರಾಮಸಹೋದರಸಾಯಕಂ ಪ್ರವಿಶತಾಽವಿಶತಾದಧಿಕೌಜಸಾ ॥ ೬೦೭॥
ತವ ಮಹಃಕಲಯಾಬಲಮಾಪ್ತಯಾ ಜನನಿ ಶುಮ್ಭನಿಶುಮ್ಭಮದಚ್ಛಿದಾ ।
ಜಗದರಕ್ಷ್ಯತ ಗೋಪಕುಲೇಶಿತುಸ್ತನುಜಯಾಽನುಜಯಾರ್ಜುನಸಾರಥೇಃ ॥ ೬೦೮॥
ನ ವಿನಿರೂಪಯಿತುಂ ಪ್ರಬಭೂವ ಯಾಂ ಕವಿಜನೋ ವಿವಿಧಂ ಕಥಯನ್ನಪಿ ।
ಮುನಿಹೃದಮ್ಬುಜಸೌಧತಲೇನ್ದಿರಾ ಜಯತಿ ಸಾ ಯತಿಸಾಧುಜನಾವನೀ ॥ ೬೦೯॥
ಇಮಮಯಿ ತ್ರಿದಿವೇಶ್ವರಿ ಕಲ್ಕಿನಂ ರುಷಮಪೋಹ್ಯ ಸವಿತ್ರಿ ವಿಲೋಕಿತೈಃ ।
ಸುರಪತೇರ್ದ್ವಿಷತೋಽಘವತೋ ಲಸನ್ ಮದನಕೈರವಕೈರವಲೋಚನೇ ॥ ೬೧೦॥
ಸ್ಮರದಮರ್ತ್ಯನೃಪಾಲವಿಲಾಸಿನೀಂ ಪ್ರಬಲಪಾತಕಭೀತಿವಿನಾಶಿನೀಮ್ ।
ಪ್ರವಣಯಾನ್ತರನನ್ಯಧಿಯಾ ಲಸದ್ವಿನಯಯಾನಯಯಾಮವತೀರ್ಮನಃ ॥ ೬೧೧॥
ಭಗವತೀಗಗನಸ್ಥಲಚಾರಿಣೀ ಜಯತಿ ಸಙ್ಗರರಙ್ಗವಿಹಾರಿಣೀ ।
ಸುಕೃತಶತ್ರುಮತಿಭ್ರಮಕಾರಿಣೀ ಹರಿಹಯಾರಿಹಯಾದಿವಿದಾರಿಣೀ ॥ ೬೧೨॥
ಶರಣವಾನಹಮರ್ಜುನಹಾಸಯಾ ಭುವನಭೂಪತಿಹಾರಿವಿಲಾಸಯಾ ।
ದಿವಿ ಪುಲೋಮಜಯಾ ಧವಲಾಚಲೇ ಗಿರಿಜಯಾಽರಿಜಯಾವಿತದೇವಯಾ ॥ ೬೧೩॥
ಚರಣಯೋರ್ಧೃತಯಾ ವಿಜಯಾಮಹೇ ವಯಮಶೇಷಜಗನ್ನೃಪಜಾಯಯಾ ।
ದಿವಿ ಪುಲೋಮಜಯಾ ಧವಲಾಚಲೇ ನಗಜಯಾ ಗಜಯಾನವಿಲಾಸಯಾ ॥ ೬೧೪॥
ಅರಿವಧಾಯ ವಿಧಾಯ ಬುಧಾಧಿಪಂ ಪಟುಭುಜಾಬಲಭೀಷಣಮಾಜಿಷು ।
ನ ಭವತೀ ಶಚಿ ಗಚ್ಛತಿ ದುರ್ಗತಃ ಕ್ವಚನ ಕಾಚನ ಕಾತರಧೀರಿವ ॥ ೬೧೫॥
ಸಪದಿ ಮಾನಸಧೈರ್ಯಹೃತೋ ಜಗಜ್ಜನನಿ ವಜ್ರತನೋರ್ಜ್ವಲಿತಾರ್ಚಿಷಃ ।
ಅರಿಜನೇ ಪ್ರಥಮಂ ತವ ವೀಕ್ಷಯಾ ಸುರಪತೇರಪತೇಜಸಿ ವಿ ಕ್ರಮಃ ॥ ೬೧೬॥
ನ ಮನನೋಚಿತಮಸ್ತಿ ಪರಂ ನೃಣಾಂ ವಿಬುಧರಾಜವಧೂಪದಪದ್ಮತಃ ।
ಜಗತಿ ದರ್ಶನಯೋಗ್ಯಮಿಹಾಪರಂ ನ ರಮಣೀ ರಮಣೀಯಮುಖಾಬ್ಜತಃ ॥ ೬೧೭॥
ಶರಣವಾನಹಮಸ್ಮಿ ಪುರಾತನಪ್ರಮದಯಾ ಮುನಿಗೇಯಚರಿತ್ರಯಾ ।
ಸ್ವಬಲಚಾಲಿತನಾಕಜಗನ್ನಭೋ ವಸುಧಯಾ ಸುಧಯಾ ಸುರರಾಡ್ದೃಶಾಮ್ ॥ ೬೧೮॥
ಅಯಮಹಂ ಗತಿಮಾನತಿಶಾನ್ತಯಾ ತ್ರಿದಿವಭೂಮಿಪತಿಪ್ರಿಯಕಾನ್ತಯಾ ।
ಮನಸಿ ಮೌನಿಜನೈರತಿಭಕ್ತಿತೋ ನಿಹಿತಯಾ ಹಿತಯಾ ಸುಕೃತಾತ್ಮನಾಮ್ ॥ ೬೧೯॥
ವಿನಯತಃ ಸ್ತುತಯಾ ಗಮಯಾಮ್ಯಹಂ ಜನಿಮತಾಂ ಜನಯಿತ್ರಿ ನಿಶಾಸ್ತ್ವಯಾ ।
ಪ್ರಸೃತಯಾ ಕುಲಕುಣ್ಡಧನಞ್ಜಯಾದ್ಧೃತತನೂತತನೂತನವೇಗಯಾ ॥ ೬೨೦॥
ಸಕೃದಮೋಘಸರಸ್ವತಿಸಾಧುಧೀ ಹೃದಯವೇದ್ಯಪದಾಮ್ಬುಜಸೌಷ್ಠವೇ ।
ಮಮ ಶಿವಂ ಸುಮನಃ ಪೃಥಿವೀಪತೇಃ ಸುವದನೇ ವದ ನೇತ್ರಲಸದ್ದಯೇ ॥ ೬೨೧॥
ದುರವಗಾಹಪಥೇ ಪತಿತಂ ಚಿರಾಜ್ಜನನಿ ಗಮ್ಯವಿಲೋಕನಲಾಲಸಮ್ ।
ಸ್ವಯಮಮರ್ತ್ಯನೃಪಾಲಮನೋರಮೇ ಸುನಯನೇ ನಯನೇಯಮಿಮಂ ಜನಮ್ ॥ ೬೨೨॥
ಅವತು ನಃ ಸ್ವಯಮೇವ ಪಟೂನ್ ವಿಪದ್ವಿಮಥನಾಯ ವಿಧಾಯ ಬುಧೇಶ್ವರೀ ।
ಸಕಲಮರ್ಮಸುವೀತದಯೈಃ ಪರೈರ್ವಿನಿಹತಾನಿಹ ತಾಪವತಃ ಶಚೀ ॥ ೬೨೩॥
ಸುರಧರಾಪತಿಜೀವಿತನಾಥಯಾ ಸ್ವಜನನಕ್ಷಿತಿರಕ್ಷಣಕರ್ಮಣಿ ।
ಪಟುತಮೋ ಜನ ಏಷ ವಿಧೀಯತಾಮಿಹ ತಯಾ ಹತಯಾ ತು ಸಮೂಹಯಾ ॥ ೬೨೪॥
ಗಣಪತೇಃ ಶೃಣುಯಾದಿಮಮುಜ್ವಲಂ ದ್ರುತವಿಲಮ್ಬಿತವೃತ್ತಗಣಂ ಶಚೀ ।
ಸಲಿಲರಾಶಿಸುತಾಭವನೀಭವದ್ಭುವನಪಾವನಪಾದಸರೋರುಹಾ ॥ ೬೨೫॥
॥ ದ್ವಿತೀಯೋ ಜಲೋದ್ಧತಗತಿಪಾದಃ ॥
ಹರಿತ್ಸು ಪರಿತಃ ಪ್ರಸಾದಮಧಿಕಂ ದಧಾನಮಮಲತ್ವಿಷಾಂ ಪ್ರಸರಣೈಃ ।
ಮಹೇನ್ದ್ರಮಹಿಲಾವಿಲಾಸಹಸಿತಂ ಮದನ್ತರತಮೋ ಧುನೋತು ವಿತತಮ್ ॥ ೬೨೬॥
ಪ್ರಸೂಸ್ತ್ರಿಜಗತಃ ಪ್ರಿಯಾ ಮಘವತಃ ಕೃಪಾಕಲಿತಯಾ ಕಟಾಕ್ಷಕಲಯಾ ।
ನಿತಾನ್ತಮಗತೇರ್ವಿಕುಣ್ಠಿತಮತೇರ್ಧುನೋತು ಭರತಕ್ಷಿತೇರಕುಶಲಮ್ ॥ ೬೨೭॥
ಪುರಾ ಶಚಿ ಮತಿಸ್ತ್ವಮೀಶಿತುರಥೋ ನಭಸ್ತನುಮಿತಾ ಪೃಥಙ್ಮತಿಮತೀ ।
ಅನನ್ತರಮಭೂಃ ಸರೋಜನಯನಾ ತನುಃ ಸುರಪತೇರ್ವಿಲೋಚನಸುಧಾ ॥ ೬೨೮॥
ಪರತ್ರ ವಿಗುಣಾ ಸತೋಽಸಿ ಧಿಷಣಾ ನಭಸ್ತನುರಿಹ ಪ್ರಪಞ್ಚಮವಸಿ ।
ಅಸಿ ಸ್ವರಬಲಾ ಪ್ರಿಯಾ ಸುರಪತೇರಿಯತ್ತವ ಶಚಿ ಸ್ವರೂಪಕಥನಮ್ ॥ ೬೨೯॥
ಪ್ರಜಾಪತಿಪದೇ ಪುರಾಣಪುರುಷೇ ಸ್ಮೃತಾ ತ್ವಮದಿತಿಃ ಸುರಾಸುರನುತೇ ।
ಜನಾರ್ದನಪದೇ ರಮಾಸಿ ಪರಮೇ ಸದಾಶಿವಪದೇ ಶಿವಾ ತ್ವಮಜರೇ ॥ ೬೩೦॥
ಉಷಾ ಇನಪದೇ ಸ್ವಧಾಽನಲಪದೇ ಪುರನ್ದರಪದೇ ತ್ವಮೀಶ್ವರಿ ಶಚೀ ।
ಯಥಾ ರುಚಿವಿದುಃ ಪದಾನಿ ಕವಯಶ್ಚಿತೈಶ್ಚ ಚಿತಿಮಾನ್ಯುವಾಮೃಜುಗಿರಾ ॥ ೬೩೧॥
ಅಮೇಯಮಮಲಂ ಪುರಾಣಪುರುಷಂ ತದೀಯವಿಭವಾಭಿಧಾಯಿಭಿರಿಮೇ ।
ವದನ್ತಿ ಕವಯಃ ಪದೈರ್ಬಹುವಿಧೈಸ್ತಥೈವ ಭವತೀಂ ತತೋ ಮತಭಿದಾಃ ॥ ೬೩೨॥
ನಭಶ್ಚ ಪವನಃ ಸ್ವರಶ್ಚ ಪರಮಸ್ತಟಿಚ್ಚ ವಿತತಾ ಪತಿಶ್ಚ ಮಹಸಾಮ್ ।
ಸುಧಾಂಶುರನಲೋ ಜಲಂ ಚ ಪೃಥಿವೀ ಸವಿತ್ರಿ ಯುವಯೋರ್ವಿಭೂತಿಪಟಲೀ ॥ ೬೩೩॥
ಅಪಾರಬಹುಲಪ್ರಮೋದಲಹರೀ ಸತಃ ಕಿಲಚಿತಿಃ ಪರತ್ರ ವಿತತಾ ।
ಪುನರ್ವಿಯದಿದಂ ಪರೀತ್ಯ ನಿಖಿಲಂ ಜಗನ್ತಿ ದಧತೀ ಪರಾ ವಿಜಯತೇ ॥ ೬೩೪॥
ನ ಯದ್ಯಪಿ ಪರಾತ್ಪರೇ ನಭಸಿ ತೇ ಸರೋಜನಯನಾ ವಪುಃ ಪೃಥಗಜೇ ।
ತಥಾಪಿ ನಮತಾಂ ಮತೀರನುಸರನ್ತ್ಯಮೇಯವಿಭವೇ ದಧಾಸಿ ಚ ತನೂಃ ॥ ೬೩೫॥
ಸಹ ತ್ರಿಭುವನಪ್ರಪಾಲನಕೃತಾ ಸಮಸ್ತಮರುತಾಂ ಗಣಸ್ಯ ವಿಭುನಾ ।
ಸದಾ ಶಶಿಮುಖೀ ಶರೀರಭೃದಜಾ ಜಗತ್ಯದುರಿತೇ ಶಚೀ ವಿಜಯತೇ ॥ ೬೩೬॥
ಕುಲಂ ಬಹುಭಿದಂ ಬಲಂ ನ ಭುಜಯೋಃ ಕಥಂ ನು ವಿಪದಸ್ತರೇಮ ಭರತಾಃ ।
ಸಮರ್ಥಮಧುನಾ ವಿಪದ್ವಿಧುತಯೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೩೭॥
ಸಮಸ್ತಮಪಿ ಚ ಸ್ವದೇಶವಿದುಷಾಂ ವಿಧಾನಪಟಲಂ ಬಭೂವ ವಿಫಲಮ್ ।
ಅಭಾಗ್ಯದಮನಕ್ಷಮಂ ತದಧುನಾ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೩೮॥
ನಿಜೋ ಮಮ ಜನೋ ನಿತಾನ್ತಮಗತಿರ್ನ ಕುಕ್ಷಿಭರಣೇಽಪ್ಯಯಂ ಪ್ರಭವತಿ ।
ಮಹೇಶ್ವರಿ ಕೃಪಾಮರನ್ದಮಧುನಾ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೩೯॥
ಅದೃಷ್ಟಕನಕಂ ಕುಲಂ ಮಮ ಚಿರಾನ್ನಿರಾಯುಧಮಿದಂ ನಿರಾಶಮಭಿತಃ ।
ಸ್ವಭಾವತ ಇವ ಪ್ರಬದ್ಧಮಭವತ್ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೦॥
ಅವೀರಚರಿತಂ ವಿಪಾಲಕಕಥಂ ನಿರಾರ್ಷವಿಭವಂ ಚಿರಾನ್ಮಮ ಕುಲಮ್ ।
ಇದಂ ಮಮ ಮನೋ ನಿಕೃನ್ತತಿ ಮುಹುಸ್ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೧॥
ಚಿರಾತ್ಸ್ಮೃತಿಪಥಾದಪಿ ಚ್ಯುತಮಜೇ ತಪೋಬಲಭವಂ ತಮಾರ್ಷವಿಭವಮ್ ।
ಸ್ವದೇಶಮಧುನಾ ಪುನರ್ಗಮಯಿತುಂ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೨॥
ಹತಂ ಚ ವಿಹತಂ ಧುತಂ ಚ ವಿಧುತಂ ರುದನ್ತಮಭಿತೋ ವಿಶಿಷ್ಟಕರುಣೇ ।
ಇಮಂ ಸ್ವವಿಷಯಂ ಶಿವಂ ಗಮಯಿತುಂ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೩॥
ಕ್ಷಯಾಯ ಸುಕೃತದ್ವಿಷಾಂ ವಿಹರತಾಂ ಶಿವಾಯ ಚ ಸತಾಂ ಪ್ರಪಞ್ಚಸುಹೃದಾಮ್ ।
ನಿಜಸ್ಯ ಮನಸೋ ಬಲಾಯ ಚ ಪರೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೪॥
ಜಯತ್ಸು ಸುಕೃತಂ ದ್ವಿಷತ್ಸು ಪರಿತಃ ಸತಾಮಪಿ ಕುಲೇ ಬಲೇನ ರಹಿತೇ ।
ಖಲಪ್ರಿಯಯುಗೇ ಕಲೌ ಪರಿಣತೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೫॥
ಅಭಾತಿ ಸುಕೃತೇ ನಿಗೂಢವಿಭವೇ ವಿಭಾತಿ ದುರಿತೇ ಫಲಾನಿ ದಿಶತಿ ।
ವಿಧಾನವಿಕಲೇ ಮನಸ್ಯಭಯದೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೬॥
ಪಟೌ ಪ್ರತಿಭಟೇ ಗದೇ ಪ್ರತಿಭಯೇ ನತಾವನವಿಧಾವತೀವ ನಿಪುಣಮ್ ।
ಸುಪರ್ವಭುವನಕ್ಷಿತೀಶದಯಿತೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೭॥
ಅಮರ್ತ್ಯಪಟಲೀಕಿರೀಟಮಣಿಭಾಭುಜಙ್ಗಕಿರಣಂ ನಿತಾನ್ತಮರುಣಮ್ ।
ವಿಪತ್ತಿದಮನಂ ತಮಃ ಪ್ರಶಮನಂ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೮॥
ವಿನಷ್ಟವಿಭವಾಮಿಮಾಂ ಪುನರಪಿ ಶ್ರಿಯಾವಿಲಸಿತಾಂ ವಿಧಾತುಮಜರೇ ।
ಸ್ವಜನ್ಮಪೃಥಿವೀಂ ಸ್ವರೀಶದಯಿತೇ ದಿಶೇರ್ಗಣಪತೇಃ ಕರಾಯ ಪಟುತಾಮ್ ॥ ೬೪೯॥
ಸುಪರ್ವವಸುಧಾಧಿನಾಥಸುದೃಶೋ ಜಲೋದ್ಧತಗತಿಸ್ತವೋಽಯಮನಘಃ ।
ಕೃತಿರ್ಗಣಪತೇಃ ಕರೋತು ವಿಧುತಿಂ ಭಯಸ್ಯ ಭರತಕ್ಷಮಾತಲಜುಷಾಮ್ ॥ ೬೫೦॥
॥ ತೃತೀಯಃ ಪ್ರಮಿತಾಕ್ಷರಪಾದಃ ॥
ಉದಿತಂ ಮಹೇನ್ದ್ರಮಹಿಲಾವದನೇ ಪ್ರಸೃತಂ ಕರೈರ್ದಿಶಿ ದಿಶಿ ಪ್ರಗುಣೈಃ ।
ಅಹಿತಂ ತಮಃ ಪ್ರಶಮಯದ್ಯಮಿನಾಂ ಹಸಿತಂ ಕರೋತು ಮಮ ಭೂರಿ ಶಿವಮ್ ॥ ೬೫೧॥
ಭರತಕ್ಷಿತೇಸ್ತಿಮಿರಮಾಶು ಹರತ್ವರಿಚಾತುರೀಕೃತವಿಮೋಹಮತೇಃ ।
ರವಿಲಕ್ಷತೋಽಪ್ಯಧಿಕಮಂಶುಮತೀ ಪವಿಪಾಣಿಚಿತ್ತದಯಿತಾ ವನಿತಾ ॥ ೬೫೨॥
ಶಶಿಲಕ್ಷಶೀತಲಕಟಾಕ್ಷಸುಧಾ ತರುಣಾರ್ಕಕೋಟಿರುಚಿಪಾದಯುಗಾ ।
ಹೃದಿ ಮೇ ವಿಭಾತು ಮುನಿಗೇಯಗುಣಾ ವಿಬುಧೇನ್ದ್ರಚಿತ್ತರಮಣೀ ತರುಣೀ ॥ ೬೫೩॥
ಕಮನೀಯದೀಪ್ತಸುಕುಮಾರತನುರ್ಮನನೀಯಪಾವನಪದಾಮ್ಬುರುಹಾ ।
ವಿದಧಾತು ಮೇ ಶಿವಮಸದ್ವಿಮುಖೀ ವಿಬುಧೇನ್ದ್ರಜೀವಿತಸಖೀ ಸುಮುಖೀ ॥ ೬೫೪॥
ಅನುಮಾನಮೂಢಪಿತೃವಾಕ್ಯವಶಾತ್ತನಯೇನ ದೇವಿ ವಿನಿಕೃತ್ತಶಿರಾಃ ।
ತವ ರೇಣುಕಾ ವಿಲಸಿತಾ ಕಲಯಾ ಗಣನೀಯಶಕ್ತಿರಭವದ್ದಶಸು ॥ ೬೫೫॥
ಸಕಲಾಮಯಪ್ರಶಮನಂ ದುರಿತಕ್ಷಯಕಾರಿಕಾಙ್ಕ್ಷಿತಕರಂ ಚ ಭವೇತ್ ।
ಸುರಸುನ್ದರೀ ಜನಸಮರ್ಚತಯೋರ್ಹೃದಿ ರೇಣುಕಾಚರಣಯೋಃ ಕರಣಮ್ ॥ ೬೫೬॥
ವಿನಿಹನ್ತಿ ಪಾಪಪಟಲಂ ಸ್ಮರಣಾದ್ವಿಧುನೋತಿ ರೋಗನಿವಹಂ ಭಜನಾತ್ ।
ವಿದಘಾತಿ ವಾಞ್ಛಿತತಫಲಂ ಸ್ತವನಾನ್ಮನುಜಸ್ಯ ರಾಮಜನನೀ ಚರಣಮ್ ॥ ೬೫೭॥
ಶರಣಂ ವ್ರಜಾಮಿ ನವರವ್ಯರುಣಂ ಚರಣಂ ತವಾಮ್ಬ ನೃಪಜಾತಿರಿಪೋಃ ।
ಭರತಕ್ಷಿತೇರವನತಃ ಪ್ರಥಮಂ ಮರಣಂ ಮಮೇಹ ನ ಭವತ್ವಧಮಮ್ ॥ ೬೫೮॥
ಸ್ಮರಣಂ ಚಿರಾದವಿರತಂ ವಿದಧಚ್ಚರಣಸ್ಯ ತೇ ತರುಣಭಾನುರುಚಃ ।
ಅಯಮಸ್ತು ರಾಮಜನಯಿತ್ರಿಪಟುಃ ಸುರಕಾರ್ಯಮಾರ್ಯವಿನುತೇ ಚರಿತುಮ್ ॥ ೬೫೯॥
ಅವ ಭಾರತಕ್ಷಿತಿಮಮೋಘದಯೇ ಕರಣಂ ಭವತ್ವಿಹ ತವೈಷ ಜನಃ ।
ನಿಜಯೋಃ ಸವಿತ್ರಿ ಚರಣಾಮ್ಬುಜಯೋರ್ನ ವಿಹಾತುಮರ್ಹಸಿ ಚಿರಾದ್ಭಜಕಮ್ ॥ ೬೬೦॥
ಅವಿಶಸ್ತ್ವಮಿನ್ದ್ರದಯಿತೇ ಕಿಲತಾಮಪಿ ಯಜ್ಞಸೇನತನಯಾಂ ಕಲಯಾ ।
ಅನಘವ್ರತಾಸು ಕವಯಃ ಪ್ರಥಮಾಂ ಪ್ರವದನ್ತಿ ಯಾಂ ಬಹುಲವನ್ದ್ಯಗುಣಾಮ್ ॥ ೬೬೧॥
ಭುವಿ ಭಾರತಂ ಪಠತಿ ಯಃ ಸುಕೃತೀ ಕಲುಷಂ ಧುನೋತಿ ಸಕಲಂ ಕಿಲ ಸಃ ।
ಇಯಮಮ್ಬ ಶಕ್ತಿಕುಲರಾಜ್ಞಿ ತವ ದ್ರುಪದಸ್ಯ ನನ್ದಿನಿ ಕಥಾಮಹಿಮಾ ॥ ೬೬೨॥
ಅಭಿಮನ್ಯುಮಾತರಮನಲ್ಪಗುಣಾಮತಿಲಙ್ಘ್ಯ ಚೈಕ್ಷತ ಹರಿರ್ಭವತೀಮ್ ।
ಅತಿಸೌಹೃದೇನ ಯದಿಹಾರ್ಯನುತೇ ತವ ಹೇತುರೀಡ್ಯತಮಶಕ್ತಿಕಲಾ ॥ ೬೬೩॥
ಗೃಹಕಾರ್ಯತನ್ತ್ರಚತುರಾ ಗೃಹೀಣೀ ಸಕಲೀನ್ದ್ರಿಯಾಮೃತಝರೀ ರಮಣೀ ।
ವರನೀತಿಮಾರ್ಗಕಥನೇ ಸಚಿವೋಽಪ್ಯಭವಸ್ತ್ವಮಮ್ಬ ಕುರು ವಂಶಭೃತಾಮ್ ॥ ೬೬೪॥
ನ ಯುಧಿಷ್ಠಿರಸ್ಯ ವರಘೋರತಪೋ ನ ಧನಞ್ಜಯಸ್ಯ ಪಟು ಬಾಹುಬಲಮ್ ।
ಅರಿಸಙ್ಕ್ಷಯಂ ಕೃತವತೀ ಬಹುಲಂ ತವ ವೇಣಿಕಾಽಪಚರಿತಾ ಫಣಿನೀ ॥ ೬೬೫॥
ಅಸಿತಾಪಿ ಕಾನ್ತಿವಸತಿರ್ಮಹತೀ ವನಿತಾಜನಸ್ಯ ಚ ವಿಮೋಹಕರೀ ।
ಕುಶಲಂ ಮಮಾಭ್ರಪತಿಶಕ್ತಿಕಲಾ ದ್ರುಪದಕ್ಷಿತೀನ್ದ್ರದುಹಿತಾ ದಿಶತು ॥ ೬೬೬॥
ಶಿರಸಾ ಸಮಸ್ತಜನಪಾಪಭರಂ ವಹತೋ ಭವಾಯ ಭುವಿ ಯಾಮವೃಣೋತ್ ।
ಅಮರಾಧಿಪಃ ಪತಿತಪಾವನಿ ತಾಂ ಭುವಿ ಕನ್ಯಕಾಂ ತವ ವಿವೇಶ ಕಲಾ ॥ ೬೬೭॥
ಕಲಯಾ ತವಾತಿಬಲಯಾ ಕಲಿತಾ ಪುರುಷಸ್ಯ ಯೋಗಮಖಿಲಾಮ್ಬ ವಿನಾ ।
ಅಖಿಲೇಶ್ವರಪ್ರಹಿತತೇಜ ಇಯಂ ಸುತಜನ್ಮನೇ ಕಿಲ ದಧಾವನಘಾ ॥ ೬೬೮॥
ಸುರರಕ್ಷಕಸ್ಯ ಮದಯಿತ್ರಿ ದೃಶಾಂ ನರರಕ್ಷಕಸ್ಯ ಜನಯಿತ್ರಿ ಪರೇ ।
ಕುಲರಕ್ಷಣಾಯ ಕೃತಬುದ್ಧಿಮಿಮಂ ಕುರು ದಕ್ಷಮದ್ಭುತಪವಿತ್ರಕಥೇ ॥ ೬೬೯॥
ಮುಮುಚುಃ ಕುಲೇ ಮಮ ಸುಪರ್ವಪತೇಸ್ತವ ಚಾಭಿಧೇಯಮಿಹ ಮನ್ದಧಿಯಃ ।
ಅಪರಾಧಮೇತಮತಿಘೋರತರಂ ಜನನಿ ಕ್ಷಮಸ್ವ ಮಮ ವೀಕ್ಷ್ಯ ಮುಖಮ್ ॥ ೬೭೦॥
ಇಹ ಶಾರದೇತಿ ಯತಿಭಿರ್ವಿನುತಾ ಪ್ರಥಿತಾ ಸುರೇಶ್ವರಮನೋದಯಿತಾ ।
ಭುವಿ ಭಾತಿ ಕೀರ್ತಿವಪುಷಾ ಶಚಿ ಯಾ ಸುಕಥಾಪಿ ಸಾ ತವ ಸವಿತ್ರಿ ಕಲಾ ॥ ೬೭೧॥
ಅರುಣಾಚಲೇಶ್ವರದರೀವಸತೇಸ್ತಪತೋ ಮುನೇರ್ಗಣಪತೇಃ ಕುಶಲಮ್ ।
ವಿವಿಧಾವತಾರವಿಲಸಚ್ಚರಿತಾ ವಿತನೋತು ಸಾ ವಿಬುಧರಾಡ್ವನಿತಾ ॥ ೬೭೨॥
ಅರುಣಾಚಲಸ್ಯ ವರಕನ್ದರಯಾ ಪ್ರತಿಘೋಷಿತಂ ಕಲುಷಹಾರಿ ಯಶಃ ।
ವಿಬುಧಾಧಿನಾಥರಮಣೀ ಶೃಣುಯಾದ್ಗಣನಾಥಗೀತಮತಿಚಾರುನಿಜಮ್ ॥ ೬೭೩॥
ಭರತಕ್ಷಿತೇಃ ಶುಭವಿಧಾಯಿಷು ಸಾ ವಿಬುಧಕ್ಷಿತೀಶದಯಿತಾ ದಯಯಾ ।
ಧನಶಕ್ತಿಬನ್ಧುಬಲಹೀನಮಪಿ ಪ್ರಥಮಂ ಕರೋತು ಗಣನಾಥಮುನಿಮ್ ॥ ೬೭೪॥
ಮುದಿತಾಮಿಮಾ ವಿದಧತು ಪ್ರಮದಾಂ ತ್ರಿದಿವಾಧಿಪಸ್ಯ ನಿಪುಣಶ್ರವಣಾಮ್ ।
ಅಮಿತಪ್ರಕಾಶಗುಣಶಕ್ತಿಮಜಾಂ ಪ್ರಮಿತಾಕ್ಷರಾಃ ಸುಕವಿಭೂಮಿಪತೇಃ ॥ ೬೭೫॥
॥ ಚತುರ್ಥಸ್ತಾಮರಸಪಾದಃ ॥
ದಿಶತು ಶಿವಂ ಮಮ ಚನ್ದ್ರವಲಕ್ಷಸ್ತಿಮಿರಸಮೂಹನಿವಾರಣದಕ್ಷಃ ।
ಕೃತಗತಿರೋಧಕಪಾತಕನಾಶಃ ಸುರಧರಣೀಶವಧೂಸ್ಮಿತಲೇಶಃ ॥ ೬೭೬॥
ಅವಿದಿತಮಾರ್ಗತಯಾತಿವಿಷಣ್ಣಾಂ ಗತಿಮಪಹಾಯ ಚಿರಾಯ ನಿಷಣ್ಣಾಮ್ ।
ಭರತಧರಾಮನಿಮೇಷಧರತ್ರೀ ಪತಿಗೃಹಿಣೀ ಪರಿಪಾತು ಸವಿತ್ರೀ ॥ ೬೭೭॥
ಭುವನಮಿದಂ ಭವತಃ ಕಿಲ ಪೂರ್ವಂ ಯದಮಲರೂಪಮನಾಕೃತಿಸರ್ವಮ್ ।
ಪ್ರಕೃತಿರಿಯಂ ಕುರುತಾದದರಿದ್ರಾಮತಿಮತಿಶಾತತರಾಂ ಮಮ ಭದ್ರಾ ॥ ೬೭೮॥
ಸೃಜತಿ ಜಗನ್ತಿ ವಿಭೌ ಪರಮೇ ಯಾ ಸುಬಹುಲಶಕ್ತಿರರಾಜತ ಮಾಯಾ ।
ಪ್ರದಿಶತು ಸಾ ಮಮ ಕಞ್ಚನ ಯೋಗಂ ಝಟಿತಿ ನಿರಾಕೃತಮಾನಸರೋಗಮ್ ॥ ೬೭೯॥
ಪ್ರತಿವಿಷಯಂ ವಿಕೃತೀತರ ಸತ್ತಾ ವಿಲಸತಿ ಯಾ ಮತಿಮದ್ಭಿರುಪಾತ್ತಾ ।
ಇಯಮನಘಾ ಪರಿಪಾಲಿತಜಾತಿಂ ವಿತರತು ಮೇ ವಿವಿಧಾಂ ಚ ವಿಭೂತಿಮ್ ॥ ೬೮೦॥
ಪ್ರತಿವಿಷಯಗ್ರಹಣಂ ಪರಿಪೂತಾಮತಿರಖಿಲಸ್ಯ ಜನಸ್ಯ ಚ ಮಾತಾ ।
ಮಮ ವಿದಧಾತು ಶುಭಂ ಶುಭನಾಮಾ ತ್ರಿದಿವನಿವಾಸಿನರೇಶ್ವರರಾಮಾ ॥ ೬೮೧॥
ಗಗನತನುರ್ಜಗತೋ ವಿಪುಲಸ್ಯ ಪ್ರಭುಪದಮಗ್ರಯ್ಮಿತಾ ಸಕಲಸ್ಯ ।
ಪ್ರತಿಜನದೇಹಮಜಾ ಪ್ರವಹನ್ತೀ ಮಮ ಹೃದಿ ನನ್ದತು ಸಾ ವಿಹರನ್ತೀ ॥ ೬೮೨॥
ಪಟುಕುಲಕುಣ್ಡಧನಞ್ಜಯಕೀಲಾ ಸಮುದಿತಹಾರ್ದವಿಭಾಕರಲೀಲಾ ।
ದ್ರುತಶಿರ ಇನ್ದುಕಲಾಮೃತಧಾರಾ ಜನಮವತಾನ್ನಿಜಭಕ್ತಮುದಾರಾ ॥ ೬೮೩॥
ವಿಷಯಸಮಾಕೃತಿರತ್ರ ಪುರಸ್ತಾದ್ವಿಮಲತಮಾ ಕಿಲ ತತ್ರ ಪರಸ್ತಾತ್ ।
ಭುವನಮಯೀ ಭುವನಾಚ್ಚ ವಿಭಕ್ತಾಮತಿರನಘಾಽವತು ಮಾಮತಿಶಕ್ತಾ ॥ ೬೮೪॥
ವಿಷಯಪರಿಗ್ರಹಣೇಷ್ವತಿಸಕ್ತಾ ವಿಷಯವಿಭೂತಿಷು ಕಾಪಿ ವಿವಿಕ್ತಾ ।
ಅಖಿಲಪತೇರ್ಮಯಿ ದೀವ್ಯತು ಶಕ್ತಿರ್ವಿಮಲತಮಾ ವಿಧುತೇತರಶಕ್ತಿಃ ॥ ೬೮೫॥
ದೃಶಿ ದೃಶಿ ಭಾತಿ ಯದೀಯಮಪಾಪಂ ದಿಶಿ ದಿಶಿ ಗನ್ತೃ ಚ ವೇತ್ತೃ ಚ ರೂಪಮ್ ।
ಭವತು ಶಿವಾಯ ಮಮೇಯಮನಿನ್ದ್ಯಾ ಭುವನಪತೇರ್ಗೃಹಿಣೀ ಮುನಿವನ್ದ್ಯಾ ॥ ೬೮೬॥
ಜಡಕುಲಕುಣ್ಡದರೀಷು ಶಯಾನಾ ಬುಧಕುಲವಹ್ನಿಷು ಭೂರಿವಿಭಾನಾ ।
ಹರಿಹಯಶಕ್ತಿರಮೇಯಚರಿತ್ರ ಮಮ ಕುಶಲಂ ವಿದಧಾತು ಪವಿತ್ರ ॥ ೬೮೭॥
ದಹರಗತಾಖಿಲಮಾಕಲಯನ್ತೀ ದ್ವಿದಲಗತಾ ಸಕಲಂ ವಿನಯನ್ತೀ ।
ದಶಶತಪತ್ರಗತಾ ಮದಯನ್ತೀ ಭವತು ಮಯೀನ್ದ್ರವಧೂರ್ವಿಲಸನ್ತೀ ॥ ೬೮೮॥
ಗೃಹಯುಗಲೀಶ್ರಿಯ ಆಶ್ರಿತಗಮ್ಯಾ ಪದಕಮಲದ್ವಿತಯೀ ಬಹುರಮ್ಯಾ ।
ಮಮ ಹೃದಿ ಭಾತ್ವವಿಕುಣ್ಠಿತಯಾನಾ ಹರಿಸುದೃಶಸ್ತರುಣಾರುಣಭಾನಾ ॥ ೬೮೯॥
ಉಪರಿ ತತಾ ಕುಲಕುಣ್ಡನಿಶಾನ್ತಾಜ್ಜ್ವಲಿತಧನಞ್ಜಯದೀಧಿತಿಕಾನ್ತಾತ್ ।
ಹರಿಹಯಶಕ್ತಿರಿಯಂ ಮಮ ಪುಷ್ಟಾ ದ್ರವಯತು ಮಸ್ತಕಚನ್ದ್ರಮದುಷ್ಟಾ ॥ ೬೯೦॥
ನಭಸಿ ವಿರಾಜತಿ ಯಾ ಪರಶಕ್ತಿರ್ಮಮ ಹೃದಿ ರಾಜತಿ ಯಾ ವರಶಕ್ತಿಃ ।
ಉಭಯಮಿದಂ ಮಿಲಿತಂ ಬಹುವೀರ್ಯಂ ಭವತು ಸುಖಂ ಮಮ ಸಾಧಿತಕಾರ್ಯಮ್ ॥ ೬೯೧॥
ತ್ರಿಭುವನಭೂಮಿಪತೇಃ ಪ್ರಿಯಯೋಷಾ ತ್ರಿಮಲಹರೀ ಸುರವಿಷ್ಟಪಭೂಷಾ ।
ಮಮ ವಿತನೋತು ಮನೋರಥಪೋಷಂ ದುರಿತವಿಪತ್ತಿತತೇರಪಿ ಶೋಷಮ್ ॥ ೬೯೨॥
ಪವನಜಗತ್ಪ್ರಭುಪಾವನಮೂರ್ತಿರ್ಜಲಧರಚಾಲನವಿಶ್ರುತಕೀರ್ತಿಃ ।
ಮಮ ಕುಶಲಾಯ ಭವತ್ವರಿಭೀಮಾ ಜನನವತಾಂ ಜನನೀ ಬಹುಧಾಮಾ ॥ ೬೯೩॥
ಮಮ ಸುರರಾಜವಧೂಕಲಯೋಗ್ರಾ ಖಲಜನಧೂನನಶಕ್ತನಖಾಗ್ರಾ ।
ದಮಯತು ಕೃತ್ತಶಿರಾಃ ಕಲುಷಾಣಿ ಪ್ರಕಟಬಲಾ ಹೃದಯಸ್ಯ ವಿಷಾಣಿ ॥ ೬೯೪॥
ಕುಲಿಶಿವಧೂಕಲಯಾ ಪರಿಪುಷ್ಟಾ ಬುಧನುತಸನ್ನುಣಜಾಲವಿಶಿಷ್ಟಾ ।
ಮಮ ಪರಿತೋ ವಿಲಸದ್ವಿಭವಾನಿ ದ್ರುಪದಸುತಾ ವಿದಧಾತು ಶಿವಾನಿ ॥ ೬೯೫॥
ಸುರಜನರಾಡ್ದಯಿತಾಂಶವಿದೀಪ್ತೇ ಪದಕಮಲಾಶ್ರಿತಸಾಧುಜನಾಪ್ತೇ ।
ದುರಿತವಶಾದಭಿತೋ ಗತಭಾಸಂ ಮನುಜಕುಮಾರಜನನ್ಯವದಾಸಮ್ ॥ ೬೯೬॥
ಅಮರನರೇಶ್ವರಮನ್ದಿರನೇತ್ರೀ ಸುಮಶರಜೀವನಸುನ್ದರಗಾತ್ರೀ ।
ಭವತು ಶಚೀ ವಿತತಸ್ವಯಶಸ್ಸು ಪ್ರತಿಫಲಿತಾ ಗಣನಾಥವಚಸ್ಸು ॥ ೬೯೭॥
ವಿಕಸತು ಮೇ ಹೃದಯಂ ಜಲಜಾತಂ ವಿಲಸತು ತತ್ರ ಶಚೀಸ್ತುತಿಗೀತಮ್ ।
ಸ್ಫುರತು ಸಮಸ್ತಮಿಹೇಪ್ಸಿತವಸ್ತು ಪ್ರಥಿತತಮಂ ಮಮ ಪಾಟವಮಸ್ತು ॥ ೬೯೮॥
ಕುರು ಕರುಣಾರಸಸಿಕ್ತನಿರೀಕ್ಷೇ ವಚನಪಥಾತಿಗಸನ್ನುಣಲಕ್ಷೇ ।
ಶಚಿ ನರಸಿಂಹಜಮಾಹಿತಗೀತಂ ಭರತಧರಾಮವಿತುಂ ಪಟುಮೇತಮ್ ॥ ೬೯೯॥
ಸುಲಲಿತತಾಮರಸೈಃ ಪ್ರಸಮಾಪ್ತಂ ವರನುತಿಬನ್ಧಮಿಮಂ ಶ್ರವಣಾಪ್ತಮ್ ।
ಜನನಿ ನಿಶಮ್ಯ ಸುಸಿದ್ಧಮಶೇಷಂ ಹರಿಲಲನೇ ಮಮ ಕುರ್ವಭಿಲಾಷಮ್ ॥ ೭೦೦॥
॥ ಇತಿ ಶ್ರೀಭಗವನ್ಮಹರ್ಷಿರಮಣಾನ್ತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋಃ
ಗಣಪತೇಃ ಕೃತೌ ಇನ್ದ್ರಾಣೀಸಪ್ತಶತೀ ಸಮಾಪ್ತಾ ॥
Complete Works of Ganapati Muni Vol 02-14
Proofread byDPD
Please send corrections to sanskrit@cheerful.com
Last updated ತ್oday
http://sanskritdocuments.org
॥ ಪ್ರಥಮಂ ಗಾಯತ್ರಂ ಶತಕಮ್ ॥
॥ ಪ್ರಥಮಃ ಶಶಿವದನಾಪಾದಃ ॥
ಹರಿಲಲನೇ ಮೇ ಪಥಿ ತಿಮಿರಾಣಿ ।
ಹರದರಹಾಸದ್ಯುತಿಭಿರಿಮಾನಿ ॥ ೧॥
ಅಗತಿಮವೀರ್ಯಾಮಪಗತಧೈರ್ಯಾಮ್ ।
ಅವತು ಶಚೀ ಮೇ ಜನಿಭುವಮಾರ್ಯಾಮ್ ॥ ೨॥
ಶೃಣು ಕರುಣಾವತ್ಯಲಘುಮಖರ್ವೇ ।
ಸ್ತವಮಹಮಾರ್ಯಸ್ತವ ಶಚಿ ಕುರ್ವೇ ॥ ೩॥
ತ್ರಿಜಗದತೀತೋ ವಿಲಸತಿ ನಿತ್ಯಃ ।
ಅಣುರಣುತೋ ಯೋ ಭಗವತಿ ಸತ್ಯಃ ॥ ೪॥
ತ್ವಮಖಿಲಕಾರ್ಯೇಷ್ವಯಿ ಧೃತಸಕ್ತಿಃ ।
ಉರುಗತಿರಸ್ಯ ಪ್ರಭುತಮಶಕ್ತಿಃ ॥ ೫॥
ವಿದುರಿಮಮೇಕೇ ಜಗತಿ ಮಹೇನ್ದ್ರಮ್ ।
ಜಗುರಯಿ ಕೇಚಿಜ್ಜನನಿ ಮಹೇಶಮ್ ॥ ೬॥
ಅವಗತವೇದೋ ವದತಿ ಮಹೇನ್ದ್ರಮ್ ।
ಪರಿಚಿತತನ್ತ್ರೋ ಭಣತಿ ಮಹೇಶಮ್ ॥ ೭॥
ಜನನಿ ಶಚಿ ತ್ವಂ ಪ್ರಥಮದಲಸ್ಯ ।
ಭಗವತಿ ದುರ್ಗಾಸ್ಯಪರದಲಸ್ಯ ॥ ೮॥
ನ ಶಚಿ ಶಿವಾತಸ್ತ್ವಮಿತರದೈವಮ್ ।
ಬಹುಮುನಿವಾಣೀಸಮರಸತೈವಮ್ ॥ ೯॥
ದಿವಿ ಚ ಸಿತಾದ್ರೌ ಶಚಿವಪುಷೋರ್ವಾಮ್ ।
ಪೃಥಗುಪಲಮ್ಭಾದಯಿ ಭಿದಯೋಕ್ತಿಃ ॥ ೧೦॥
ತನುಯುಗಮೂಲಂ ವಪುರತಿಮಾಯಮ್ ।
ಕರಚರಣಾದ್ಯೈರ್ವಿಯುತಮಮೇಯಮ್ ॥ ೧೧॥
ತ್ವಮುದರವರ್ತಿತ್ರಿಭುವನಜೀವಾ ।
ಭವಸಿ ಶಚೀ ಸಾ ಜನನಿ ಶಿವಾ ವಾ ॥ ೧೨॥
ವಿಭುಶುಚಿಕೀಲಾತತಿರಯಿ ಧೂಮಮ್ ।
ತ್ವಮಮರಮಾರ್ಗಂ ಬತ ವಮಸೀಮಮ್ ॥ ೧೩॥
ಜಯಸಿ ನಭಸ್ಥೋ ಜನನಿ ಪರಸ್ತಾತ್ ।
ನಭಸಿ ಚ ಭಾನ್ತೀ ಭವಸಿ ಪುರಸ್ತಾತ್ ॥ ೧೪॥
ತ್ವಮತನುರಮ್ಬ ಜ್ವಲಸಿ ಪರಸ್ತಾತ್ ।
ಇಹ ಖಶರೀರಾ ಲಸಸಿ ಪುರಸ್ತಾತ್ ॥ ೧೫॥
ಜನನಿ ಪರಸ್ತಾನ್ಮತಿರಸಿ ಭರ್ತುಃ ।
ಅಸಿ ಖಶರೀರಾ ಪೃಥಗವಗನ್ತ್ರೀ ॥ ೧೬॥
ಅಣುಚಯರೂಪಂ ಭಗವತಿ ಶಾನ್ತಮ್ ।
ನ ಭವತಿ ಶೂನ್ಯಂ ತದಿದಮನನ್ತಮ್ ॥ ೧೭॥
ದಿವಿ ದಧತೀಶೇ ಪುರುಷಶರೀರಮ್ ।
ಜನನಿ ಪುರನ್ಧ್ರೀ ತನುರಭವಸ್ತ್ವಮ್ ॥ ೧೮॥
ದೃಶಿ ವಿಲಸನ್ತಂ ಪ್ರಭುಮುಪಯಾನ್ತೀ ।
ಭವಸಿ ವಿರಾಟ್ ತ್ವಂ ನೃತನುಷು ಭಾನ್ತೀ ॥ ೧೯॥
ತವ ಗುಣಗಾನಂ ಜನನಿ ವಿಧಾತುಮ್ ।
ಭವತಿ ಪಟುಃ ಕೋ ವಿಯದಿವ ಮಾತುಮ್ ॥ ೨೦॥
ಭಗವತಿ ತೃಪ್ತಿರ್ಭವತು ನ ವಾ ತೇ ।
ಅಭಿಲಷಿತಾಪ್ತಿರ್ಭವತು ನ ವಾ ಮೇ ॥ ೨೧॥
ಭಜತಿ ತವಾಙ್ಘ್ರಿಂ ಮಮ ಖಲು ಭಾಷಾ ।
ಪತಿ ಮನುರಾಗಾತ್ ಪ್ರಿಯಮಿವ ಯೋಷಾ ॥ ೨೨॥
ಅಘಮಪಹರ್ತುಂ ಶುಭಮಪಿ ಕರ್ತುಮ್ ।
ಅಲಮಜರೇ ತೇ ಗುಣಗಣಗಾನಮ್ ॥ ೨೩॥
ಅವಸಿ ಜಗತ್ತ್ವಂ ಕುಲಿಶಿಭುಜಸ್ಥಾ ।
ಅವ ಮುನಿಭೂಮಿಂ ಗಣಪತಿಧೀಸ್ಥಾ ॥ ೨೪॥
ಶಶಿವದನಾಭಿರ್ಗಣಪತಿಜಾಭಿಃ ।
ಶಶಿವದನಾದ್ಯಾ ಪರಿಚರಿತಾಽಸ್ತು ॥ ೨೫॥
॥ ದ್ವಿತೀಯಸ್ತನುಮಧ್ಯಾಪಾದಃ ॥
ಧ್ವಾನ್ತಂ ಪರಿಹರ್ತುಂ ತೇಜಾಂಸ್ಯಪಿ ಭರ್ತುಮ್ ।
ಅನ್ತರ್ಜಗದಮ್ಬಾ ಹಾಸಂ ಕುರುತಾನ್ಮೇ ॥ ೨೬॥
ಭೀತಾಮರಿಧೂತಾಮಾರ್ಯಾವನಿಮೇತಾಮ್ ।
ಸಮ್ರಾಜ್ಞಿ ಬುಧಾನಾಂ ದೂನಾಮವ ದೀನಾಮ್ ॥ ೨೭॥
ಈಶಸ್ಯ ಸಹಾಯಾಂ ವಿಶ್ವಸ್ಯ ವಿಧಾನೇ ।
ಆಕಾಶಶರೀರಾಮಮ್ಬಾಂ ಪ್ರಣಮಾಮಃ ॥ ೨೮॥
ಕರ್ತುರ್ಭುವನಾನಾಂ ಮಾಯಾಸಿ ಶಚಿ ತ್ವಮ್ ।
ಸತ್ಯಸ್ಯ ತಪೋಽಸಿ ಜ್ಞಸ್ಯಾಸಿ ಮನೀಷಾ ॥ ೨೯॥
ಆಜ್ಞಾಸಿ ವಿನೇತುಸ್ತೇಜೋಽಸಿ ವಿಭಾತಃ ।
ನಿರ್ಯತ್ನಸಮಾಧೇರಾನನ್ದರಸೋಽಸಿ ॥ ೩೦॥
ತಸ್ಯ ತ್ವಮನನ್ಯಾಽಪ್ಯನ್ಯೇವ ಖಕಾಯಾ ।
ಅತ್ಯದ್ಭುತಮಾಯಾ ಜಾಯಾಽಸಿ ಸಹಾಯಾ ॥ ೩೧॥
ಆಕಾಶಶರೀರಾಂ ಜಾಯಾಮಶರೀರಃ ।
ಆಲಿಙ್ಗ್ಯ ವಿಭುಸ್ತ್ವಾಂ ನನ್ದತ್ಯಯಿ ಚಿತ್ರಮ್ ॥ ೩೨॥
ವಜ್ರೇಶ್ವರಿ ಘಸ್ರೇ ಯದ್ವನ್ಮುಕುಟೇನ ।
ದೀಪ್ತೇನ ಸವಿತ್ರ ಮೂರ್ಧಾ ತವ ಭಾತಿ ॥ ೩೩॥
ನಕ್ಷತ್ರಸಹಸ್ರೈಶ್ಶುಭ್ರದ್ಯುತಿಭಿಸ್ತೇ ।
ಪುಷ್ಪಾಯಿತಮೇತೈರ್ಮಾತರ್ನಿಶಿಮಸ್ತೇ ॥ ೩೪॥
ಘಸ್ರಃ ಖಲು ಕಾಲೋ ರಾಜ್ಯಂ ನನು ಕರ್ತುಮ್ ।
ರಾತ್ರಿಃ ಖಲು ಕಾಲೋ ರನ್ತುಂ ರಮಣೇನ ॥ ೩೫॥
ನಿಃಶಬ್ದತರಙ್ಗಾಸ್ವಗ್ಲೌಷು ನಿಶಾಸು ।
ನೂನಂ ಖಶರೀರೇ ಕಾನ್ತಂ ರಮಯನ್ತೀ ॥ ೩೬॥
ಸಾನ್ದ್ರೋಡುಸುಮಸ್ರಗ್ವಿಭ್ರಾಜಿತಕೇಶಾ ।
ಧ್ವಾನ್ತಾಸಿತಚೇಲಾ ಶಾನ್ತಾಽಪ್ಯಸಿ ಭೀಮಾ ॥ ೩೭॥
ರಾಜನ್ಮಿತತಾರಾಮನ್ದಾರವತಂಸಾಮ್ ।
ಮಾತಸ್ಸಿತಭಾಸಾ ಸ್ಮೇರಾಂ ಹಸಿತೇನ ॥ ೩೮॥
ಜ್ಯೋತ್ಸ್ನಾ ಘನಸಾರದ್ರಾವೈರನುಲಿಪ್ತಾಮ್ ।
ತ್ವಾಂ ವೀಕ್ಷ್ಯ ನ ಶಾನ್ತಿಃ ಕಸ್ಯ ಕ್ಷಣದಾಸು ॥ ೩೯॥
ಬಾಲಾರುಣರೋಚಿಃ ಕಾಶ್ಮೀರರಜೋಭಿಃ ।
ಆಲಿಪ್ತಮುಖೀಂ ತ್ವಾಂ ಪ್ರಾತಃ ಪ್ರಣಮಾಮಿ ॥ ೪೦॥
ಸಾಯಂ ಸಮಯಶ್ರೀ ಲಾಕ್ಷಾರಸರಕ್ತಮ್ ।
ಪ್ರತ್ಯಕ್ ಪ್ರಸೃತಂ ತೇ ವನ್ದೇ ವರದೇಽಙ್ಘ್ರಿಮ್ ॥ ೪೧॥
ದೀಪ್ತಾರ್ಕಕಿರೀಟಾಂ ಸರ್ವಾನ್ ವಿನಯನ್ತೀಮ್ ।
ವನ್ದೇ ಭುವನಾನಾಂ ರಾಜ್ಞೀಮಸಮಾನಾಮ್ ॥ ೪೨॥
ಧೂತಾಖಿಲರೋಗಾಃ ಶ್ವಾಸಾಸ್ತವ ವಾತಾಃ ।
ಮಾತರ್ವಿತರನ್ತು ಪ್ರಾಣಸ್ಯ ಬಲಂ ನಃ ॥ ೪೩॥
ಪ್ರಾಞ್ಚಸ್ತವ ವಾತಾಃ ಸ್ವಾಸಾಃ ಶಮುಶನ್ತು ।
ಪ್ರತ್ಯಞ್ಚ ಏಮೇ ನಃ ಪಾಪಂ ಶಮಯನ್ತು ॥ ೪೪॥
ಮನ್ಮಾತರವಾಞ್ಚೋ ವೀರ್ಯಂ ವಿತರನ್ತು ।
ಸನ್ತಾಪಮುದಞ್ಚಃ ಸರ್ವಂ ಚ ಹರನ್ತು ॥ ೪೫॥
ಅಸ್ಯಾ ಇವ ಭೂಮೇರ್ಭೂತಪ್ರಸವಾಯಾಃ ।
ಏಕೈಕಶ ಆಹುರ್ಯೇಷಾಂ ಮಹಿಮಾನಮ್ ॥ ೪೬॥
ಅದ್ರೇರುಪಲಾನಾಂ ನದ್ಯಾಃ ಸಿಕತಾನಾಮ್ ।
ಯೇಷಾಂ ಚ ನ ಕಧ್ಚ್ಛಿಕ್ತೋ ಗಣನಾಯಾಮ್ ॥ ೪೭॥
ರೋಮಾಯಿತಮೇತೈರ್ಗೋಲೈಸ್ತವ ಕಾಯೇ ।
ವ್ಯಾಖ್ಯಾತಮನೇನ ಶ್ಲಾಘ್ಯಂ ತವ ಭಾಗ್ಯಮ್ ॥ ೪೮॥
ವಿಶ್ವಂ ವಹಸೀದಂ ಜಮ್ಭಾರಿಭುಜಸ್ಥಾ ।
ಆರ್ಯಾನ್ವಹಮಾತರ್ವಾಸಿಷ್ಠಮತಿಸ್ಥಾ ॥ ೪೯॥
ಆದ್ಯಾಂ ಭುವನಾನಾಂ ಭರ್ತುಸ್ತನುಮಧ್ಯಾಮ್ ।
ಭಕ್ತ್ಸ್ಯ ಭಜನ್ತಾಮೇತಾಸ್ತನುಮಧ್ಯಾಃ ॥ ೫೦॥
॥ ತೃತೀಯೋ ಮುಕುಲಪಾದಃ ॥
ಹಾಸಾಃ ಶಕ್ರಗೃಹೇಶ್ವರ್ಯಾಶ್ಚನ್ದ್ರರುಚಃ ।
ಭೂಯಾಸುರ್ವಿಮಲಪ್ರಜ್ಞಾಯೈ ಹೃದಿ ಮೇ ॥ ೫೧॥
ಇನ್ದ್ರಾಣ್ಯಾಃ ಕರುಣಾ ಲೋಕಾಶ್ಶೋಕಹೃತಃ ।
ಭೂಯಾಸುರ್ಭರತಕ್ಷ್ಮಾಯೈ ಕ್ಷೇಮಕೃತಃ ॥ ೫೨॥
ವ್ಯಕ್ತಿರ್ವ್ಯೋಮತನುಃ ಶಕ್ತಿತ್ವಾದ್ವನಿತಾ ।
ಜ್ಞಾತೃತ್ವಾತ್ಪುರುಷಃ ಕೇಷಾಞ್ಚಿದ್ವಿದುಷಾಮ್ ॥ ೫೩॥
ವ್ಯಕ್ತಿಂ ವ್ಯೋಮತನುಂ ಯೇ ಪ್ರಾಹುಃ ಪುರುಷಮ್ ।
ತೇಷಾಂ ತತ್ತ್ವವಿದಾಂ ಕಲ್ಪಸ್ಸ್ಯಾತ್ ತ್ರಿವಿಧಃ ॥ ೫೪॥
ರುದ್ರಂ ಕೇಽಪಿ ಜಗುಃ ಶಕ್ರಂ ಕೇಽಪಿ ವಿದುಃ ।
ಭಾಷನ್ತೇ ಭುವನಪ್ರಾಣಂ ಕೇಽಪಿ ವಿದಃ ॥ ೫೫॥
ವ್ಯಕ್ತಿಂ ವ್ಯೋಮತನುಂ ಪ್ರಾಹುರ್ಯೇ ವನಿತಾಮ್ ।
ತೇಷಾಂ ಚ ತ್ರಿವಿಧಃ ಕಲ್ಪಶ್ಶಾಸ್ತ್ರವಿದಾಮ್ ॥ ೫೬॥
ದುರ್ಗಾ ಸೂರಿವರೈಃ ಕೈಶ್ಚಿತ್ಸಾ ಗದಿತಾ ।
ಶಚ್ಯನ್ಯೈರ್ವಿಬುಧೈರ್ಜ್ಞೈರನ್ಯೈರದಿತಿಃ ॥ ೫೭॥
ಏಕೇಷಾಂ ವಿದುಷಾಂ ವ್ಯಕ್ತಿರ್ವ್ಯೋಮತನುಃ ।
ನ ಸ್ತ್ರೀ ನೋ ಪುರುಷೋ ಬ್ರಹ್ಮೈತತ್ಸಗುಣಮ್ ॥ ೫೮॥
ತ್ವಂ ವಿಶ್ವಸ್ಯ ಮಹಾನ್ ಪ್ರಾಣಃ ಕಃ ಪರಮೇ ।
ತ್ವಂ ರುದ್ರಃ ಪ್ರಣವಸ್ತ್ವಂ ಶಕ್ರೋಽಭ್ರಶಿಖೀ ॥ ೫೯॥
ತ್ವಂ ಕಸ್ಯಾಸ್ಯದಿತಿಸ್ತ್ವಂ ರುದ್ರಸ್ಯ ಶಿವಾ ।
ತ್ವಂ ಶಕ್ರಸ್ಯ ಶಚೀ ಶಕ್ತಿರ್ದೇವನುತೇ ॥ ೬೦॥
ಪ್ರಾಣಶ್ಚ ಪ್ರಣವೋ ಜ್ಯೋತಿಶ್ಚಾಮ್ಬರಗಮ್ ।
ವಸ್ತ್ವೇಕಂ ತ್ರಿಗುಣಂ ನೋ ವಸ್ತು ತ್ರಿತಯಮ್ ॥ ೬೧॥
ಶಕ್ತೇರಮ್ಬಪರೇ ಶಕ್ತ್ಸ್ಯಾಪಿ ಭಿದಾ ।
ಜ್ವಾಲಾ ಪಾವಕವದ್ಭಾಷಾ ಭೇದಕೃತಾ ॥ ೬೨॥
ಸರ್ವಂ ದೃಶ್ಯಮಿದಂ ಭುಞ್ಜಾನೇ ಪರಮೇ ।
ಪುಂನಾಮಸ್ತುತಯೋ ಯುಜ್ಯನ್ತೇ ಖಲು ತೇ ॥ ೬೩॥
ಕುರ್ವಾಣೇಮ್ಬಸತಸ್ಸನ್ತೋಷಂ ಸತತಮ್ ।
ಸ್ತ್ರೀನಾಮಸ್ತುತಯಃ ಶೋಭಾಂ ತೇ ದಧತೇ ॥ ೬೪॥
ಸದ್ಬ್ರಹ್ಮ ಬ್ರುವತೇ ವಿದ್ವಾಂಸೋ ವಿಗುಣಮ್ ।
ತ್ವಂ ಮಾತಸ್ಸಗುಣಂ ಬ್ರಹ್ಮಾಸಿ ಪ್ರಥಿತೇ ॥ ೬೫॥
ಶಬ್ದಾದ್ಯೈರ್ವಿಯುತಂ ಸದ್ಬ್ರಹ್ಮಾಮಲಿನಮ್ ।
ಶಬ್ದಾದ್ಯೈಃ ಸಹಿತಾ ತ್ವಂ ದೇವ್ಯಚ್ಛಹಿತಾ ॥ ೬೬॥
ಸಾಕ್ಷಿ ಬ್ರಹ್ಮ ಪರಂ ತ್ವಂ ಮಾತಃ ಕುರುಷೇ ।
ಸರ್ವೇಷಾಂ ಜಗತಾಂ ಕಾರ್ಯಂ ಸರ್ವವಿಧಮ್ ॥ ೬೭॥
ದ್ಯೌರ್ಮಾತಾ ಜಗತೋ ದ್ಯೌರೇವಾಸ್ಯ ಪಿತಾ ।
ವ್ಯಾಪ್ತಂ ಭಾತಿ ಜಗದ್ದ್ಯಾವಾ ಸರ್ವಮಿದಮ್ ॥ ೬೮॥
ಆಕಾಶಾದ್ರಜಸೋ ದ್ಯೌರನ್ಯಾ ವಿರಜಾಃ ।
ಆಕಾಶೇಽಸ್ತಿ ಪುನಸ್ತತ್ಪಾರೇ ಚ ಪರಾ ॥ ೬೯॥
ದ್ಯಾವಂ ತಾಂ ಜಗತೋ ರಙ್ಗೇ ವ್ಯೋಮತನುಮ್ ।
ಪಾರೇ ಶುದ್ಧತಮಾಂ ವಿದ್ಮಸ್ತ್ವಾಂ ಪರಮೇ ॥ ೭೦॥
ತ್ವಾಂ ಪೂರ್ಣಾಮದಿತಿಂ ಶಕ್ತಿಂ ದೇವಿ ಶಚೀಮ್ ।
ನಿತ್ಯಂ ಶಬ್ದವತೀಂ ಗೌರೀಂ ಪ್ರಬ್ರುವತೇ ॥ ೭೧॥
ಪುಂನಾಮಾ ಭವತು ಸ್ತ್ರೀನಾಮಾಸ್ತ್ವಥವಾ ।
ವ್ಯಕ್ತಿರ್ವ್ಯೋಮತನುರ್ಲೋಕಂ ಪಾತ್ಯಖಿಲಮ್ ॥ ೭೨॥
ನಾಕೇ ಸಾ ಕಿಲ ಭಾತ್ಯೈನ್ದ್ರೀ ರಾಜ್ಯರಮಾ ।
ವಿಭ್ರಾಣಾ ಲಲಿತಂ ಸ್ತ್ರೀರೂಪಂ ಪರಮಾ ॥ ೭೩॥
ಶಕ್ತಾಂ ದೇವಿ ವಿಧೇಹ್ಯಾರ್ತಾನಾಮವನೇ ।
ಇನ್ದ್ರಸ್ಯೇವ ಭುಜಾಂ ವಾಸಿಷ್ಠಸ್ಯ ಮತಿಮ್ ॥ ೭೪॥
ಪೂಜಾಶಕ್ರತರುಣ್ಯೈತೈಸ್ಸಿಧ್ಯತು ತೇ ।
ಗಾತೃಣಾಂ ವರದೇ ಗಾಯತ್ರೌರ್ಮುಕುಲೈಃ ॥ ೭೫॥
॥ ಚತುರ್ಥೋ ವಸುಮತೀಪಾದಃ ॥
ಮೋಹಂ ಪರಿಹರನ್ ಯೋಗಂ ವಿತನುತಾಮ್ ।
ದೇವೇನ್ದ್ರದಯಿತಾ ಹಾಸೋ ಮಮ ಹೃದಿ ॥ ೭೬॥
ಆಭಾತು ಕರುಣಾ ಸಾ ಭಾರತಭುವಿ ।
ಸುತ್ರಾಮಸುದೃಶೋ ಯದ್ವನ್ನಿಜದಿವಿ ॥ ೭೭॥
ವನ್ದಾರುಜನತಾಮನ್ದಾರಲತಿಕಾಮ್ ।
ವನ್ದೇ ಹರಿಹಯಪ್ರಾಣಪ್ರಿಯತಮಾಮ್ ॥ ೭೮॥
ಶೋಕಸ್ಯ ದಮನೀಂ ಲೋಕಸ್ಯ ಜನನೀಮ್ ।
ಗಾಯಾಮಿ ಲಲಿತಾಂ ಶಕ್ರಸ್ಯ ದಯಿತಾಮ್ ॥ ೭೯॥
ರಮ್ಯಾ ಸುಮನಸಾಂ ಭೂಪಸ್ಯ ಮಹಿಷೀ ।
ಸೌಮ್ಯಾ ಜನಿಮತಾಂ ಮಾತಾ ವಿಜಯತೇ ॥ ೮೦॥
ವೀರ್ಯಸ್ಯ ಚ ಧಿಯಸ್ತ್ರೈಲೋಕ್ಯಭರಣೇ ।
ದಾತ್ರೀ ಮಘವತೇ ದೇವೀ ವಿಜಯತೇ ॥ ೮೧॥
ವ್ಯಾಪ್ತಾ ಜಗದಿದಂ ಗುಪ್ತಾ ಹೃದಿ ನೃಣಾಮ್ ।
ಆಪ್ತಾ ಸುಕೃತಿನಾಂ ದೈವಂ ಮಮ ಶಚೀ ॥ ೮೨॥
ಖೇ ಶಕ್ತಿರತುಲಾ ಪಾರೇ ಚಿದಮಲಾ ।
ಸ್ವಶ್ಚಾರುಮಹಿಲಾ ದೈವಂ ಮಮ ಶಚೀ ॥ ೮೩॥
ಶಸ್ತ್ರಂ ಮಘವತಃ ಶಾಸ್ತ್ರಂ ಯಮವತಾಮ್ ।
ವಸ್ತ್ರಂ ತ್ರಿಜಗತೋ ದೈವಂ ಮಮ ಶಚೀ ॥ ೮೪॥
ಯುಕ್ತ್ಸ್ಯ ಭಜತಃ ಶರ್ಮಾನ್ತರತುಲಮ್ ।
ವರ್ಮಾಪಿ ಚ ಬಹಿರ್ದೈವಂ ಮಮ ಶಚೀ ॥ ೮೫॥
ವೀರ್ಯಂ ಬಲವತಾಂ ಬುದ್ಧಿರ್ಮತಿಮತಾಮ್ ।
ತೇಜೋ ದ್ಯುತಿಮತಾಂ ದೈವಂ ಮಮ ಶಚೀ ॥ ೮೬॥
ಏಕೈವ ಜನಯನ್ತ್ಯೇಕೈವ ದಧತೀ ।
ಏಕೈವ ಲಯಕೃದ್ದೈವಂ ಮಮ ಶಚೀ ॥ ೮೭॥
ಶಕ್ತೀರವಿತಥಾಃ ಕ್ಷೇತ್ರೋಷು ದಧತೀ ।
ಬೀಜೇಷು ಚ ಪರಾ ದೈವಂ ಮಮ ಶಚೀ ॥ ೮೮॥
ಚಿನ್ವನ್ತ್ಯಪಿ ಪಚನ್ತ್ಯೇಕಾ ಪಶುಗಣಮ್ ।
ಖಾದನ್ತ್ಯಪಿ ಭವೇ ದೈವಂ ಮಮ ಶಚೀ ॥ ೮೯॥
ದೃಷ್ಟೌ ಧೃತಚಿತಿರ್ದೃಶ್ಯೇ ತತಗುಣಾ ।
ವಿಶ್ವಾತ್ಮಮಹಿಷೀ ದೈವಂ ಮಮ ಶಚೀ ॥ ೯೦॥
ರಾಕಾಶಶಿಮುಖೀ ರಾಜೀವನಯನಾ ।
ಸ್ವಃ ಕಾಪಿ ಲಲನಾ ದೈವಂ ಮಮ ಶಚೀ ॥ ೯೧॥
ಸ್ಥಾಣಾವಪಿ ಚರೇ ಸರ್ವತ್ರ ವಿತತಾ ।
ಸಾಕ್ಷಾದ್ಭವತು ಮೇ ಸ್ವರ್ನಾಥದಯಿತಾ ॥ ೯೨॥
ಯನ್ಮಾತರನೃತಂ ಧ್ಯಾತಂ ಚ ಗದಿತಮ್ ।
ಜುಷ್ಟಂ ಚ ಹರ ಮೇ ತದ್ದೇವಿ ದುರಿತಮ್ ॥ ೯೩॥
ಮಾಂ ಮೋಚಯ ಋಣಾದಿನ್ದ್ರಾಣಿ ಸುಭುಜೇ ।
ಮಾಮಲ್ಪಮತಯೋ ಮಾ ನಿನ್ದಿಷುರಜೇ ॥ ೯೪॥
ಶತ್ರುಶ್ಚ ಶಚಿ ಮೇ ಸಖ್ಯಾಯ ಯತತಾಮ್ ।
ದೃಪ್ತಶ್ಚ ಇಮನುಜೋ ಮಾಮಮ್ಬ ಭಜತಾಮ್ ॥ ೯೫॥
ಕಷ್ಟಂ ಶಚಿ ವಿಧೂಯೇಷ್ಟಂ ವಿದಧತೀ ।
ಆನನ್ದಯ ಜನಂ ಪ್ರೇಯಾಂಸಮಯಿ ಮೇ ॥ ೯೬॥
ಅಸ್ತ್ರಂ ಮಮ ಭವ ಧ್ವಂಸಾಯ ರಟತಾಮ್ ।
ಸುತ್ರಾಮರಮಣಿ ಶ್ರೀಮಾತರಸತಾಮ್ ॥ ೯೭॥
ಸಮ್ಪೂರಯತು ಮೇ ಸರ್ವಂ ಸುರನುತಾ ।
ಸ್ವರ್ಗಕ್ಷಿತಿಪತೇಶ್ಶುದ್ಧಾನ್ತವನಿತಾ ॥ ೯೮॥
ಸಂವರ್ಧಯ ಶಚಿ ಸ್ವಂ ದೇಶಮವಿತುಮ್ ।
ಬಾಹೋರಿವ ಹರೇರ್ಬುದ್ಧೇರ್ಮಮ ಬಲಮ್ ॥ ೯೯॥
ಏತೈರ್ವಸುಮತೀವೃತ್ತೈರ್ನವಸುಮೈಃ ।
ಭೂಯಾಚ್ಚರಣಯೋಃ ಪೂಜಾ ಜನನಿ ತೇ ॥ ೧೦೦॥
॥ ಪ್ರಥಮಂ ಗಾಯತ್ರಂ ಶತಕಂ ಸಮಾಪ್ತಮ್ ॥
॥ ಅಥ ದ್ವಿತೀಯಮೌಷ್ಣಿಹಂ ಶತಕಮ್ ॥
॥ ಪ್ರಥಮಃ ಕುಮಾರಲಲಿತಾಪಾದಃ ॥
ಸುರೇಶ್ವರಮಹಿಷ್ಯಾಃ ಸ್ಮಿತಂ ಶಶಿಸಿತಂ ಮೇ ।
ತನೋತು ಮತಿಮಚ್ಛಾಂ ಕರೋತು ಬಲಮಗ್ರಯ್ಮ್ ॥ ೧೦೧॥
ವಿಧಾಯ ರಿಪುಧೂತಿಂ ನಿಧಾಯ ಸುದಶಾಯಾಮ್ ।
ಪುಲೋಮತನುಜಾತಾ ಧಿನೋತು ಭರತಕ್ಷ್ಮಾಮ್ ॥ ೧೦೨॥
ಪದಪ್ರಣತರಕ್ಷಾ ವಿಧಾನಧೃತದೀಕ್ಷಾ ।
ಜಗದ್ಭರಣದಕ್ಷಾ ಪರಾ ಜಯತಿ ಶಕ್ತಿಃ ॥ ೧೦೩॥
ಸ್ವರತ್ಯವಿರತಂ ಸಾ ಶನೈರ್ನಭಸಿ ರಙ್ಗೇ ।
ಜ್ವಲತ್ಯಧಿಕಸೂಕ್ಷ್ಮಂ ಜಗತ್ಪ್ರಭವಶಕ್ತಿಃ ॥ ೧೦೪॥
ಮಹಸ್ತವ ಸುಸೂಕ್ಷ್ಮಂ ನಿದಾನಮಖಿಲಾನಾಮ್ ।
ಭವತ್ಯಖಿಲಮಾತರ್ಜಗತ್ಯನುಭವಾನಾಮ್ ॥ ೧೦೫॥
ಜನನ್ಯನುಭವಾನಾಂ ಮತಿತ್ವಪರಿಣಾಮೇ ।
ಸ್ವರೋ ಭವತಿ ಮೂಲಂ ತವಾಭ್ರಹಯರಾಮೇ ॥ ೧೦೬॥
ಯ ಈಶ್ವರಿ ನಿದಾನಂ ಸಮಸ್ತಮತಿಭಾನೇ ।
ಸ್ವರೋ ಗತಿವಿಶೇಷಾತ್ಸ ಏವ ಖಲು ಕಾಲಃ ॥ ೧೦೭॥
ಜ್ವಲನ್ತ್ಯಭಿಹಿತಾ ತ್ವಂ ವಿಹಾಯಸಿ ವಿಶಾಲೇ ।
ಪ್ರಚಣ್ಡಪದಪೂರ್ವಾ ಪ್ರಪಞ್ಚಕರಿಚಣ್ಡೀ ॥ ೧೦೮॥
ಸ್ವರನ್ತ್ಯಖಿಲಬುದ್ಧಿಪ್ರದಾ ಭವಸಿ ಗೌರೀ ।
ತ್ರಿಕಾಲತನುರಮ್ಬ ಸ್ಮೃತಾ ತ್ವಮಿಹ ಕಾಲೀ ॥ ೧೦೯॥
ಮಹಸ್ಸ್ವರ ಇತೀದಂ ದ್ವಯಂ ತದತಿಸೂಕ್ಷ್ಮಮ್ ।
ಮಹೇಶ್ವರಿ ತವಾಂಶದ್ವಯಂ ಪರಮಮುಕ್ತಮ್ ॥ ೧೧೦॥
ಮಹೋಽತಿಶಯಮಾಪ್ತಂ ತ್ವಯಿ ತ್ರಿದಿವಗಾಯಾಮ್ ।
ಸ್ವರೋಽತಿಶಯಮಾಪ್ತಃ ಸಿತಾದ್ರಿನಿಲಯಾಯಾಮ್ ॥ ೧೧೧॥
ದಿವಂ ನಯತಿ ಪೂರ್ವಾ ಭುವಂ ಯುವತಿರನ್ಯಾ ।
ದ್ವಯೋಃ ಪ್ರಕೃತಿರಭ್ರಂ ವಿಶಾಲಮತಿಮಾನ್ಯಾ ॥ ೧೧೨॥
ನ ತೇ ದಿವಿ ಲಸನ್ತ್ಯಾಃ ಪಿತಾ ತನುಭೃದನ್ಯಃ ।
ಸ್ವಯಂ ಭುವಮಿಮಾಂ ತ್ವಾಂ ಸತಾಮವನಿ ವಿದ್ಮಃ ॥ ೧೧೩॥
ಸುರಾರಿಕುಲಜನ್ಮಾ ತವೇಶ್ವರಿ ಪುಲೋಮಾ ।
ಪಿತೇತಿ ಕವಿಭಾಷಾ ಪರೋಕ್ಷಗತಿರೇಷಾ ॥ ೧೧೪॥
ವದನ್ತ್ಯಸುರಶಬ್ದೈರ್ಘನಂ ಸಜಲಮೇತಮ್ ।
ಪುಲೋಮಪದಮೇಕಂ ಪುರಾಣಸತಿತೇಷು ॥ ೧೧೫॥
ಪ್ರಕೃಷ್ಟತರದೀಪ್ತಿರ್ಗಭೀರತರನಾದಾ ।
ಇತೋ ಹಿ ಭವಸಿ ತ್ವಂ ತಟಿತ್ತನುರಮೇಯೇ ॥ ೧೧೬॥
ಅರಾತಿರಸುರೋಽಯಂ ವಿಭೋರ್ನಿಗದಿತಸ್ತೇ ।
ಹಯಶ್ಚ ಬತಗೀತಃ ಪಿತಾ ತವ ಪಯೋದಃ ॥ ೧೧೭॥
ಪ್ರಿಯೈಃ ಕಿಲ ಪರೇ ವಾಂ ಪರೋಕ್ಷವಚನೌಘೈಃ ।
ಪ್ರತಾರಿತಮಿವೇಲಾ ಜಗನ್ಮುನಿಗಣೇನ ॥ ೧೧೮॥
ನಿಕೃಷ್ಟಮಪಿ ರಮ್ಯಂ ಯದಿ ತ್ರಿದಿವಲೋಕೇ ।
ತವಾಮ್ಬ ಕಿಮು ವಾಚ್ಯಾ ರುಚಿಸ್ತ್ರಿದಿವನಾಥೇ ॥ ೧೧೯॥
ತ್ವಮಮ್ಬ ರಮಣೀಯಾ ವಧೂಸ್ತ್ವಮಿವ ನಾಕೇ ।
ತ್ವಯಾ ಕ ಇವ ತುಲ್ಯಾಂ ಮೃದೋ ವದತು ಲೋಕೇ ॥ ೧೨೦॥
ವಿನೀಲಮಿವ ಖಾಂಶಂ ವಿದುಸ್ತ್ರಿದಿವಮೇಕೇ ।
ಪರಸ್ತು ವದಸಿ ಸ್ವಃ ಕವಿಃ ಕಮಲಬನ್ಧುಮ್ ॥ ೧೨೧॥
ಅಮುತ್ರಗತಶೋಕೇ ಮಹಾಮಹಸಿ ನಾಕೇ ।
ನಮಾಮ್ಯಧಿಕೃತಾಂ ತಾಂ ಪುರಾಣಕುಲಕಾನ್ತಾಮ್ ॥ ೧೨೨॥
ಯದಾ ಮಮುತಪಕ್ವಂ ಮದೀಯಮಘಮುಗ್ರಮ್ ।
ತದಿನ್ದ್ರಕುಲಕಾನ್ತೇ ನಿವಾರಯ ಸಮಗ್ರಮ್ ॥ ೧೨೩॥
ದದಾತು ಭರತಕ್ಷ್ಮಾವಿಷಾದಹರಣಾಯ ।
ಅಲಂ ಬಲಮುದಾರಾ ಜಯನ್ತಜನನೀ ಮೇ ॥ ೧೨೪॥
ಅತೀವ ಲಲಿತಾಭಿಃ ಕುಮಾರಲಲಿತಾಭಿಃ ।
ಇಮಾಭಿರಮರೇಶಪ್ರಿಯಾ ಭಜತು ಮೋದಮ್ ॥ ೧೨೫॥
॥ ದ್ವಿತೀಯೋ ಮದಲೇಖಾಪಾದಃ ॥
ಪೌಲೋಮ್ಯಾಃ ಪರಿಶುಭ್ರಜ್ಯೋತ್ಸ್ನಾದೃಶ್ಯರುಚೋ ಮೇ ।
ಶ್ರೀಮನ್ತೋ ದರಹಾಸಾಃ ಕಲ್ಪನ್ತಾಂ ಕುಶಲಾಯ ॥ ೧೨೬॥
ಕಾರುಣ್ಯಾಮೃತಸಿಕ್ತಾ ಶಕ್ತಾ ಶಕ್ರಮಹಿಷ್ಯಾಃ ।
ಪ್ರೇಕ್ಷಾ ಭಾರತಭೂಮೇರ್ದೌರ್ಬಲ್ಯಂ ವಿಧುನೋತು ॥ ೧೨೭॥
ವನ್ದೇ ನಿರ್ಜರರಾಜ್ಞೀಂ ಸಙ್ಕ್ಲ್ಪೇ ಸತಿ ಯಸ್ಯಾಃ ।
ಸಾಧ್ಯಾಸಾಧ್ಯವಿಚಾರೋ ನೈವ ಸ್ಯಾದಣುಕೋಽಪಿ ॥ ೧೨೮॥
ಸಙ್ಕ್ಲ್ಪಸ್ತವ ಕಶ್ಚ್ಚಿಚತ್ತೇ ಚೇದ್ದಿವ ಈಶೇ ।
ಸ್ಯಾದುಲ್ಲಙ್ಘ್ಯ ನಿಸರ್ಗಂ ಸಿದ್ಧಿರ್ನಿಷ್ಫಲತಾ ಚ ॥ ೧೨೯॥
ಮೂಢೋಽಪ್ಯುತ್ತಮರೀತ್ಯಾ ಸಿಧ್ಯೇದಧ್ಯಯನೇಷು ।
ಮೇಧಾವೀ ಚ ನಿತಾನ್ತಂ ನೈವ ಸ್ಯಾತ್ಕೃತಕೃತ್ಯಃ ॥ ೧೩೦॥
ಉತ್ಪದ್ಯೇತ ಮಹೇಶ್ವರ್ಯಪ್ರಾಜ್ಞಾದಪಿ ಶಾಸ್ತ್ರಮ್ ।
ಯಾಯಾನ್ಮಾತರಕಸ್ಮಾದ್ವಿಭ್ರಾನ್ತಿಂ ವಿಬುಧೋಽಪಿ ॥ ೧೩೧॥
ಅಲ್ಪಾನಾಮಬಲಾನಾಂ ಸಙ್ಗ್ರಾಮೇ ವಿಜಯಃ ಸ್ಯಾತ್ ।
ಶಕ್ತಾನಾಂ ಬಹುಲಾನಾಂ ಘೋರಾ ಸ್ಯಾತ್ಪರಿಭೂತಿಃ ॥ ೧೩೨॥
ರಾಜೇರನ್ನೃಪಪೀಠೇಷ್ವಖ್ಯಾತಾನಿ ಕುಲಾನಿ ।
ಸ್ಯಾದ್ದುರ್ಧರ್ಷಬಲಾನಾಂ ಪಾತೋ ರಾಜಕುಲಾನಾಮ್ ॥ ೧೩೩॥
ನಿರ್ಯತ್ನೋಽಪಿ ಸಮಾಧೇರ್ವಿನ್ದೇದ್ದೇವಿ ಸಮೃದ್ಧಿಮ್ ।
ಯೋಗಸ್ಯಾಮ್ಬ ನ ಪಶ್ಯೇದಭ್ಯಸ್ಯನ್ನಪಿ ಸಿದ್ಧಿಮ್ ॥ ೧೩೪॥
ಅತ್ಯನ್ತಂ ಯದಸಾಧ್ಯಂ ನೇದಿಷ್ಠಂ ಭವತೀದಮ್ ।
ಸಾಧ್ಯಂ ಸರ್ವವಿಧಾಭಿಃ ಸ್ಯಾದಿನ್ದ್ರಾಣಿ ದವಿಷ್ಠಮ್ ॥ ೧೩೫॥
ಗಾಯಾಮೋ ಮುನಿಸಙ್ಘೈರ್ಗೇಯಾಂ ಕಾಮಪಿ ಮಾಯಾಮ್ ।
ಇನ್ದ್ರಸ್ಯಾಪಿ ವಿನೇತ್ರೀಂ ತ್ರೈಲೋಕ್ಯಸ್ಯ ಚ ಧಾತ್ರೀಮ್ ॥ ೧೩೬॥
ವಿದ್ಯಾನಾಮಧಿನಾಥೇ ಕಾಂ ವಿದ್ಯಾಂ ಶ್ರಯಸೇ ತ್ವಮ್ ।
ಇನ್ದ್ರಂ ಕರ್ತುಮಧೀನಂ ವಿಶ್ವಸ್ಮಾದಧಿಕಂ ತಮ್ ॥ ೧೩೭॥
ನಿತ್ಯಾಲಿರ್ಮಿನೀಷೇ ಸ್ತ್ರೀಮೋಹೋ ನ ವಿತರ್ಕ್ಯಃ ।
ಭ್ರೂಚೇಷ್ಟಾನುಚರತ್ವಾದನ್ಯಾ ಸ್ಯಾದನುಕಮ್ಪಾ ॥ ೧೩೮॥
ಸೌನ್ದರ್ಯಂ ಪರಮನ್ಯದ್ವಜೇರದ್ದರ್ಯಥವಾ ತೇ ।
ಹರ್ತುಂ ಯತ್ಸುಖಮೀಷ್ಟೇ ತಾದೃಕ್ತಸ್ಯ ಚ ಚಿತ್ತಮ್ ॥ ೧೩೯॥
ಚಕ್ಷುರ್ದರ್ಶನಮಾತ್ರನ್ನಿಸ್ತೇಜೋ ವಿದಧಾನಮ್ ।
ಚಿತ್ತಂ ಚೋಜ್ಝಿತಧೈರ್ಯಂ ಮತ್ತಾನಾಂ ದನುಜಾನಾಮ್ ॥ ೧೪೦॥
ಗರ್ತೇ ದುರ್ಜನದೇಹೇ ಮಗ್ನಾನ್ ಪಙ್ಕ್ವಿಲಗ್ನಾನ್ ।
ಪ್ರಾಣಾನಾತ್ಮಸಜಾತೀನುದ್ಧರ್ತುಂ ಧೃತದೀಕ್ಷಮ್ ॥ ೧೪೧॥
ವಜ್ರಂ ನಿರ್ಜರರಾಜೋ ಯದ್ಧತ್ತೇ ಸಮರೇಷು ।
ತ್ವಚ್ಛಕ್ತೇಃ ಕಲಯೈತನ್ಮನ್ಮಾತರ್ನಿರಮಾಯಿ ॥ ೧೪೨॥
ರಾಜ್ಞೀತ್ವಾತ್ಪರಮೇತೇ ರಾಜತ್ವಂ ಶತಮನ್ಯೋಃ ।
ನಿಶ್ಶಕ್ತಿಸ್ಸ ವಿನಾ ತ್ವಾಂ ಕಾಮಾಜ್ಞಾಂ ಕುರುತಾಂ ನಃ ॥ ೧೪೩॥
ಸರ್ವಂ ಶಕ್ರನಿಶಾನ್ತಸ್ಯೇಶಾನೇ ತವ ಹಸ್ತೇ ।
ಅಸ್ಮಾಕಂ ತು ಧಿಯೇದಂ ಸ್ತೋತ್ರಂ ಸಙ್ಗ್ರಹತಸ್ತೇ ॥ ೧೪೪॥
ಗನ್ತವ್ಯಂ ಸ್ವರಧೀಶೇ ನಿಶ್ಶೇಷಾರ್ಪಣಶೂರಮ್ ।
ಬಿಭ್ರಾಣಾ ನಯಸಿ ತ್ವಂ ಮಾರ್ಜಾಲೀವ ಕಿಶೋರಮ್ ॥ ೧೪೫॥
ಗೃಹ್ಣ್ನ್ನಮ್ಬರನಾಥಾಮಮ್ಬಾಮಶ್ಲಥಮನ್ಧಃ ।
ಕೀಶಸ್ಯೇವ ಕಿಶೋರೋ ಯೋಗೀ ಗಚ್ಛತಿ ಗಮ್ಯಮ್ ॥ ೧೪೬॥
ಪೂರ್ಣಾತ್ಮಾರ್ಪಣಹೀನೋಽಪ್ಯಜ್ಞಾತಾಽಪಿ ಸಮಾಧೇಃ ।
ನಿತ್ಯಂ ಯೋ ಜಗದಮ್ಬ ತ್ವಾಂ ಸೇವೇತ ಜಪಾದ್ಯೈಃ ॥ ೧೪೭॥
ತಂ ಚಾಚಞ್ಚಲಭಕ್ತಿಂ ಕೃತ್ವಾ ಪೂರಿತಕಾಮಮ್ ।
ನಿಷ್ಠಾಂ ದಾಸ್ಯಸಿ ತಸ್ಮೈ ಪೌಲೋಮಿ ಕ್ರಮಶಸ್ತ್ವಮ್ ॥ ೧೪೮॥
ಭಿನ್ನಾಂ ಸಙ್ಘಸಹಸ್ತ್ರೈಃ ಖಿನ್ನಾಂ ಶತ್ರುಭರೇಣ ।
ಪಾತುಂ ಭಾರತಭೂಮಿಂ ಮಾತರ್ದೇಹಿ ಬಲಂ ಮೇ ॥ ೧೪೯॥
ತ್ರ್ಯೈಲೋಕ್ಯಾವನಭಾರಶ್ರಾನ್ತಾಂ ವಾಸವಕಾನ್ತಾಮ್ ।
ಹೈರಮ್ಬ್ಯೋ ಮದಲೇಖಾಃ ಸಮ್ಯಕ್ ಸಮ್ಮದಯನ್ತು ॥ ೧೫೦॥
॥ ತೃತೀಯೋ ಹಂಸಮಾಲಾಪಾದಃ ॥
ಸುರುಚಿರ್ವಜ್ರಪಾಣೇಸ್ಸುದೃಶೋ ಮನ್ದಹಾಸಃ ।
ಹರತಾನ್ಮೋಹಮೂಲಂ ಹೃದಯಸ್ಥಂ ತಮೋ ಮೇ ॥ ೧೫೧॥
ಅಮೃತಂ ಸಙ್ಕಿರನ್ತ್ಯಾ ಪ್ರಸರನ್ತ್ಯೇಹ ದೃಷ್ಟ್ಯಾ ।
ಸುರರಾಜ್ಞೀ ಬಲಾಢ್ಯಾಂ ಭರತಕ್ಷ್ಮಾಂ ಕರೋತು ॥ ೧೫೨॥
ಅಮೃತಾಮ್ಭಃ ಕಿರನ್ತೀ ಕರುಣಾಮ್ಭೋ ವಹನ್ತೀ ।
ನತರಕ್ಷಾತ್ತದೀಕ್ಷಾ ಶಚಿ ಮಾತಸ್ತವೇಕ್ಷಾ ॥ ೧೫೩॥
ಕೃತಪೀಯೂಷವೃಷ್ಟಿಸ್ತತಕಲ್ಯಾಣಸೃಷ್ಟಿಃ ।
ವಿಹಿತೈನೋವಿನಷ್ಟಿರ್ಧೃತವಿಜ್ಞಾನಪುಷ್ಟಿಃ ॥ ೧೫೪॥
ಭೃತದೇವೇನ್ದ್ರತುಷ್ಟಿರ್ಯಮಿನಾಂ ದೇವಗೃಷ್ಟಿಃ ।
ಮಮ ಕಾಮ್ಯಾನಿ ದೇಯಾತ್ತವ ವಿಶ್ವಾಮ್ಬ ದೃಷ್ಟಿಃ ॥ ೧೫೫॥
ಜಗತಾಂ ಚಕ್ರವರ್ತಿನ್ಯಸಿತಸ್ತೇ ಕಟಾಕ್ಷಃ ।
ಜಲದೋ ಭಕ್ತಿಭಾಜಾಂ ಶಿಖಿನಾಂ ನರ್ತನಾಯ ॥ ೧೫೬॥
ಸುಕೃತೀ ಕೋಽಪಿ ನಾಟ್ಯೇ ಬಹುಲೇ ತತ್ರ ಮಾತಃ ।
ಜಗತೇ ಸಾರಭೂತಾನುಪದೇಶಾನ್ಕರೋತಿ ॥ ೧೫೭॥
ಅಪರೋ ನವ್ಯಕಾವ್ಯಾನ್ಯನವದ್ಯಾನಿ ಧನ್ಯಃ ।
ವಿದಧಾತ್ಯಪ್ರಯತ್ನಾದ್ಬುಧಭೋಗಕ್ಷಮಾಣಿ ॥ ೧೫೮॥
ಇತರೋ ಭಾಗ್ಯಶಾಲೀ ರಮಣೀಯೈಃ ಪ್ರಸಙ್ಗೈಃ ।
ವಿತನೋತಿ ಸ್ವಜಾತಿಂ ಜಗತಿ ಶ್ರೇಷ್ಠನೀತಿಮ್ ॥ ೧೫೯॥
ಜಗತಾಂ ಮಾತರೇಕೋ ಮಹಸಾ ಪುಣ್ಯಶಾಲೀ ।
ವಿಧುತಾರಿಃ ಸ್ವದೇಶಂ ಕುರುತೇ ವೀತಪಾಶಮ್ ॥ ೧೬೦॥
ಪರ ಇನ್ದ್ರಾಣಿ ಸಾಧುರ್ಬತ ವಿಸ್ಮೃತ್ಯ ವಿಶ್ವಮ್ ।
ರಮತೇ ಸಿಕ್ತಗಣ್ಡಃ ಪ್ರಮದಾಶ್ರುಪ್ರದಾನೈಃ ॥ ೧೬೧॥
ತವ ರಾಗಾರ್ದ್ರದೃಷ್ಟ್ಯಾ ದಿವಿ ಶಕ್ರಸ್ಯ ನಾಟ್ಯಮ್ ।
ಕರುಣಾಸಿಕ್ತದೃಷ್ಟಯಾ ಭುವಿ ಭಕ್ತ್ಸ್ಯ ನಾಟ್ಯಮ್ ॥ ೧೬೨॥
ತವ ಸಪ್ರೇಮದೃಷ್ಟಿರ್ಬಲಮಿನ್ದ್ರೇ ದಧಾತಿ ।
ತವ ಕಾರುಣ್ಯದೃಷ್ಟಿರ್ಬಲಮಸ್ಮಾಸು ಧತ್ತಾಮ್ ॥ ೧೬೩॥
ತವ ವಾಮಾಃ ಕಟಾಕ್ಷಾಃ ಪ್ರಭುಮಾನನ್ದಯನ್ತು ।
ಉಚಿತೋ ದಕ್ಷಿಣಾನಾಮಯಮಸ್ತ್ವೀಕ್ಷಣಾನಾಮ್ ॥ ೧೬೪॥
ಸುಕೃತಾನಾಂ ಪ್ರಪೋಷಂ ದುರಿತಾನಾಂ ವಿಶೋಷಮ್ ।
ಕರುಣಾರ್ದ್ರಾ ವಿಭಾನ್ತೀ ತವ ದೃಷ್ಟಿಃ ಕ್ರಿಯಾನ್ನಃ ॥ ೧೬೫॥
ಕುರು ಪಾದಾಬ್ಜಬನ್ಧೋಃ ಸರಣಿಂ ನಿಸ್ತಮಸ್ಕಾಮ್ ।
ಶಚಿ ವಿಜ್ಞಾನತೇಜಃ ಕಿರತಾವೀಕ್ಷಿತೇನ ॥ ೧೬೬॥
ಕ್ರಿಯಯಾರಾಧಯನ್ತೋ ಭುವನೇ ತೇ ವಿಭೂತೀಃ ।
ಇಹ ಕೇಚಿಲ್ಲಭನ್ತೇ ತವ ಮಾತಃ ಕಟಾಕ್ಷಾನ್ ॥ ೧೬೭॥
ಸ್ಫುಟವಿಜ್ಞಾನಪೂರ್ವಂ ಪ್ರಭಜೇರನ್ ಯದಿ ತ್ವಾಮ್ ।
ಸ್ಥಿರಯಾ ದೇವಿ ಭಕ್ತ್ಯಾ ಕಿಮು ವಕ್ತವ್ಯಮೀಶೇ ॥ ೧೬೮॥
ಕುವಿಧೇರ್ವಿಸ್ಮರನ್ತೀ ಭರತಕ್ಷ್ಮಾ ಶಚಿ ತ್ವಾಮ್ ।
ಬಹುಕಾಲಾದಭಾಗ್ಯೇ ಪತಿತಾ ದೇವ್ಯಯೋಗ್ಯೇ ॥ ೧೬೯॥
ಅಭಿಷಿಕ್ತ್ಸ್ಯ ಮಾತಾ ತವ ತೇಜೋಂಶಭೂತಾ ।
ಸುದಶಾಂ ಸೇವಮಾನಾಮನಯತ್ಪಶ್ಚಿಮಾಶಾಮ್ ॥ ೧೭೦॥
ಅಯಿ ಕಾಲಂ ಕಿಯನ್ತಂ ದಯಸೇ ಪಶ್ಚಿಮಸ್ಯಾಮ್ ।
ಇತ ಇನ್ದ್ರಾಣಿ ಪೂರ್ವಾಮವಲೋಕಸ್ವ ದೀನಾಮ್ ॥ ೧೭೧ ॥
ನ ವಯಂ ಪಶ್ಚಿಮಸ್ಯಾಶ್ಶಚಿ ಯಾಚಾಮನಾಶಮ್ ।
ಕೃಪಯೈತಾಂ ಚ ಪೂರ್ವಾಂ ನಿಹತಾಶಾಮವಾಶಾಮ್ ॥ ೧೭೨॥
ಸಕಲಂ ವ್ಯರ್ಥಮಾಸೀದಯಿ ದೀನೇಷು ದೃಷ್ಟಾ ।
ತವ ವಿಶ್ವಸ್ಯ ಮಾತಃ ಕರುಣೈಕಾವಶಿಷ್ಟಾ ॥ ೧೭೩॥
ಸುರರಾಜಸ್ಯ ಕಾನ್ತೇ ನರಸಿಂಹಸ್ಯ ಸೂನುಮ್ ।
ಬಲವನ್ತಂ ಕುರು ತ್ವಂ ಭರತಕ್ಷ್ಮಾವನಾಯ ॥ ೧೭೪॥
ರುಚಿರಾಭಿರ್ನಿಜಾಭಿರ್ಗತಿಭಿರ್ಹರ್ಷಯನ್ತು ।
ಮರುತಾಂ ಭರ್ತುರೇತಾಸ್ತರುಣೀಂ ಹಂಸಮಾಲಾಃ ॥ ೧೭೫॥
॥ ಚತುರ್ಥೋ ಮಧುಮತೀಪಾದಃ ॥
ದಿಶಿ ದಿಶಿ ಪ್ರಸರದ್ರುಚಿತಮೋದಮನಮ್ ।
ಹರತು ಮೇ ದುರಿತಂ ಹರಿವಧೂಹಸಿತಮ್ ॥ ೧೭೬॥
ಹರತು ದುಃಖಭರಪ್ರಸೃತಮಶ್ರುಜಲಮ್ ।
ಭರತಭೂಸುದೃಶೋ ಬಲಜಿತೋ ರಮಣೀ ॥ ೧೭೭॥
ಅತಿತರಾಂ ಮಹಿತಾ ಸುರಪತೇರ್ವನಿತಾ ।
ಕರುಣಯಾ ಕಲಿತಾ ಮಮ ಶಚೀ ಶರಣಮ್ ॥ ೧೭೮॥
ತ್ರಿಭುವನಕ್ಷಿತಿರಾಡ್ಭುವನಭೂಷಣಭಾ ।
ಅಖಿಲಭಾಸಕಭಾ ಮಮ ಶಚೀ ಶರಣಮ್ ॥ ೧೭೯॥
ಸತತಯುಕ್ತಸುಧೀಹೃದಯದೀಪಕಭಾ ।
ನಿಖಿಲಪಾಚಕಭಾ ಮಮ ಶಚೀ ಶರಣಮ್ ॥ ೧೮೦॥
ರವಿವಿರೋಚಕಭಾ ಶಶಿವಿರಾಜಕಭಾ ।
ಭಗಣಶೋಭಕಭಾ ಮಮ ಶಚೀ ಶರಣಮ್ ॥ ೧೮೧॥
ಗಗನಖೇಲಕಭಾ ಸಕಲಚಾಲಕಭಾ ।
ಅಭಯದಾಽತಿಶುಭಾ ಮಮ ಶಚೀ ಶರಣಮ್ ॥ ೧೮೨॥
ರುಚಿಲವಙ್ಗತಯಾ ಯದನಘಾಂಶುನಿಧೇಃ ।
ಹೃತತಮೋಭವನಂ ಭವತಿ ದೀಪಿಕಯಾ ॥ ೧೮೩॥
ಸ್ಫುರತಿ ಚಾರು ಯತಃ ಕಿರಣಮೇಕಮಿತಾ ।
ಜಲದಸೌಧತಲೇ ಮುಹುರಿಯಂ ಚಪಲಾ ॥ ೧೮೪॥
ಭವತಿ ಯದ್ದ್ಯುತಿತಃ ಕಮಪಿ ಭಾಗಮಿತಃ ।
ಪವಿರರಾತಿಹರಃ ಪ್ರಹರಣೇಶಪದಮ್ ॥ ೧೮೫॥
ಭವತಿ ಯತ್ಸುರುಚೇರಣುತಮಾಂಶಮಿತಾ ।
ಯುವಮನೋಮದನೀ ಸುವದನಾಸ್ಮಿತಭಾ ॥ ೧೮೬॥
ವಿತತಸೂಕ್ಷ್ಮತನುರ್ಮಹತಿ ಸಾ ಗಗನೇ ।
ಪರಮಪೂರುಷಭಾ ಮಮ ಶಚೀ ಶರಣಮ್ ॥ ೧೮೭॥
ಅಮರನಾಥಸಖೀ ರುಚಿನಿಧಾನಮುಖೀ ।
ಅಮೃತವರ್ಷಕದೃಙ್ ಮಮ ಶಚೀ ಶರಣಮ್ ॥ ೧೮೮॥
ಅವಿಧವಾ ಸತತಂ ಯುವತಿರೇವ ಸದಾ ।
ಅನಘವೀರಸುತಾ ಮಮ ಶಚೀ ಶರಣಮ್ ॥ ೧೮೯॥
ಅಮೃತವತ್ಯಧರೇ ಸುರಧರಾಪತಯೇ ।
ಚರಣಯೋರ್ಭಜತೇ ಮಮ ಶಚೀ ಶರಣಮ್ ॥ ೧೯೦॥
ಸ್ಮಿತಲವೇಷು ಸಿತಾ ಶಿರಸಿಜೇಷ್ವಸಿತಾ ।
ಚರಣಯೋರರುಣಾ ಬಹಿರಪಿ ತ್ರಿಗುಣಾ ॥ ೧೯೧ ॥
ಕಪಟಚನ್ದ್ರಮುಖೀ ಪ್ರಕೃತಿರಿನ್ದ್ರಸಖೀ ।
ಮೃತಿಜರಾರಹಿತಾ ಮಮ ಶಚೀ ಶರಣಮ್ ॥ ೧೯೨ ॥
ಕೃಶತಮೇಪ್ಯುದರೇ ತ್ರಿಭುವನಂ ದಧತೀ ।
ಜನಿಮತಾಂ ಜನನೀ ಮಮ ಶಚೀ ಶರಣಮ್ ॥ ೧೯೩ ॥
ಸ್ಥಿರತರಾ ಮನಸಿ ಸ್ಥಿರತಮಾ ವಚಸಿ ।
ನಯನಯೋಸ್ತರಲಾ ಮಮ ಶಚೀ ಶರಣಮ್ ॥ ೧೯೪॥
ಮೃದುತರಾ ಕರಯೋರ್ಮೃದುತಮಾ ವಚಸಿ ।
ಭುಜಬಲೇ ಕಠಿನಾ ಮಮ ಶಚೀ ಶರಣಮ್ ॥ ೧೯೫॥
ಮೃದುಲಬಾಹುಲತಾಽಪ್ಯಮಿತಭೀಮಬಲಾ ।
ಅಸುರದರ್ಪಹರೀ ಮಮ ಶಚೀ ಶರಣಮ್ ॥ ೧೯೬॥
ಅಬಲಯಾಽಪಿ ಯಯಾ ನ ಸದೃಶೋಽಸ್ತಿ ಬಲೇ ।
ಜಗತಿ ಕಶ್ಚಿದಸೌ ಮಮ ಶಚೀ ಶರಣಮ್ ॥ ೧೯೭॥
ಅತಿತರಾಂ ಸದಯಾ ಪದರತೇ ಮನುಜೇ ।
ಖಲಜನೇ ಪರುಷಾ ಮಮ ಶಚೀ ಶರಣಮ್ ॥ ೧೯೮॥
ಗಣಪತಿಂ ಕುರುತಾದ್ಭರತಭೂಮ್ಯವನೇ ।
ಅಮರಭೂಮಿಪತೇಃ ಪ್ರಿಯತಮಾ ಸಬಲಮ್ ॥ ೧೯೯॥
ಮಧುರಶಬ್ದತತೀರ್ಮಧುಮತೀರಜರಾ ।
ಗಣಪತೇಶ್ಶೃಣುಯಾತ್ಸುರಪತೇಸ್ತರುಣೀ ॥ ೨೦೦॥
॥ ದ್ವಿತೀಯಮೌಷ್ಣಿಹಂ ಶತಕಂ ಸಮಾಪ್ತಮ್ ॥
॥ ಅಥ ತೃತೀಯಮಾನುಷ್ಟುಭಂ ಶತಕಮ್ ॥
॥ ಪ್ರಥಮಃ ಪಥ್ಯಾವಕ್ತ್ರಪಾದಃ ॥
ಹಸಿತಂ ತನ್ಮಹಾಶಕ್ತೇರಸ್ಮಾಕಂ ಹರತು ಭ್ರಮಮ್ ।
ಯತ ಏವ ಮಹಚ್ಚಿತ್ರಂ ವಿಶ್ವಮೇತದ್ವಿಜೃಮ್ಭತೇ ॥ ೨೦೧॥
ರಾಜನ್ತೀ ಸರ್ವಭೂತೇಷು ಸರ್ವಾವಸ್ಥಾಸು ಸರ್ವದಾ ।
ಮಾತಾ ಸರ್ಗಸ್ಯ ಚಿತ್ಪಾಯಾತ್ ಪೌಲೋಮೀ ಭಾರತಕ್ಷಿತಿಮ್ ॥ ೨೦೨॥
ಧರ್ಮಿಜ್ಞಾನಂ ವಿಭೋಸ್ತತ್ತ್ವಂ ಧರ್ಮೋ ಜ್ಞಾನಂ ಸವಿತ್ರಿ ತೇ ।
ವ್ಯವಹೃತ್ಯೈ ವಿಭಾಗೋಽಯಂ ವಸ್ತ್ವೇಕಂ ತತ್ತ್ವತೋ ಯುವಾಮ್ ॥ ೨೦೩॥
ಇನ್ದ್ರೇಶವಾಸುದೇವಾದ್ಯೈಃ ಪದೈಃ ಸಙ್ಕೀತ್ರ್ಯತೇ ವಿಭುಃ ।
ಶಚೀ ಶಿವಾ ಮಹಾಲಕ್ಷ್ಮೀಪ್ರಮುಖೈರ್ಭವತೀ ಪದೈಃ ॥ ೨೦೪॥
ಅನ್ತರಂ ವಸ್ತುನೋ ಜ್ಞಾತೃ ತಚ್ಛಕ್ತಂ ಪರಿಚಕ್ಷತೇ ।
ಶಾಖಾಃ ಸಮನ್ತತೋ ಜ್ಞಾನಂ ಶಕ್ತಿಂ ಸಙ್ಕೀರ್ತಯನ್ತಿ ತಾಮ್ ॥ ೨೦೫॥
ಅನ್ತರಸ್ಯ ಚ ಶಾಖಾನಾಮೈಕ್ಯಂ ನಿರ್ವಿಷಯಸ್ಥಿತೌ ।
ವಿಷಯಗ್ರಹಣೇಷ್ವೇವ ಸವಿಭಾಗಃ ಪ್ರದೃಶ್ಯತೇ ॥ ೨೦೬॥
ಸ್ಯಾದೇವಂ ವಿಷಯಾಪೇಕ್ಷೀ ಶಾಖಾನಾಮನ್ತರಸ್ಯ ಚ ।
ಅವಿಭಕ್ತೈಕರೂಪಾಣಾಂ ವಿಭಾಗೋ ಹರಿತಾಮಿವ ॥ ೨೦೭॥
ಲಕ್ಷ್ಯಮನ್ತರ್ವಯಂ ಚಕ್ರೇ ಧ್ಯಾಯಾಮೋ ಯತ್ರ ನಿಷ್ಠಿತಾಃ ।
ಅನ್ತರೀಭಾವತಸ್ತಸ್ಯ ನಾನ್ತರಂ ತು ವಿಲಕ್ಷಣಮ್ ॥ ೨೦೮॥
ಅಹಙ್ಕೃತೇರ್ವಯಂ ನಾನ್ಯೇ ಯತ್ರಾಹಙ್ಕೃತಿಸಮ್ಭವಃ ।
ಸಮ್ಪದ್ಯೇತಾನ್ತರಂ ತತ್ರ ಜ್ಞಾನಸ್ಯ ಜ್ಞಾತೃತಾವಹಮ್ ॥ ೨೦೯॥
ಅನ್ತರಾವರ್ತಭೂಯಸ್ತ್ವಾದೇಕಸ್ಮಿನ್ ಬೋಧಸಾಗರೇ ।
ಬೋದ್ಧಾರೋ ಬಹವೋಽಭೂವನ್ ವಸ್ತು ನೈವ ತು ಭಿದ್ಯತೇ ॥ ೨೧೦॥
ಚಿದ್ರೂಪೇ ಮಾತರೇವಂ ತ್ವಂ ಪರಸ್ಮಾದ್ಬ್ರಹ್ಮಣೋ ಯಥಾ ।
ನ ದೇವಿ ದೇವತಾತ್ಮಭ್ಯೋ ಜೀವಾತ್ಮಭ್ಯಶ್ಚ ಭಿದ್ಯಸೇ ॥ ೨೧೧॥
ಸಮಸ್ತಭೂತಬೀಜಾನಾಂ ಗೂಢಾನಾಮನ್ತರಾತ್ಮನಿ ।
ತವೋದ್ಗಾರೋಽಯಮಾಕಾಶೋ ಮಾತಸ್ಸೂಕ್ಷ್ಮರಜೋಮಯಃ ॥ ೨೧೨॥
ನ ಸರ್ವಭೂತಬೀಜಾನಿ ವಸ್ತೂನಿ ಸ್ಯುಃ ಪೃಥಕ್ ಪೃಥಕ್ ।
ತ್ವಯಿ ಪ್ರಾಗವಿಭಕ್ತಾನಿ ಬಭೂವುರಿತಿ ವಿಶ್ರುತಿಃ ॥ ೨೧೩॥
ಯಥಾಮ್ಬಸ್ಮೃತಿಬೀಜಾನಾಂ ಪ್ರಜ್ಞಾಯಾಮವಿಶೇಷತಃ ।
ತಥಾ ಸ್ಯಾದ್ಭೂತಬೀಜಾನಾಮವಿಭಕ್ತ್ಸ್ಥಿತಿಸ್ತ್ವಯಿ ॥ ೨೧೪॥
ನಾಣೂನಿ ಭೂತಬೀಜಾನಿ ಪ್ರಾಕ್ಸರ್ಗಾತ್ತ್ವಯಿ ಸಂಸ್ಥಿತೌ ।
ಚಿತಿಶಕ್ತ್ಯಾತ್ಮಕಾನ್ಯೇವ ನಿರಾಕಾರಾಣಿ ಸರ್ವಥಾ ॥ ೨೧೫॥
ಅನಾದಿ ಚೇದಿದಂ ವಿಶ್ವಂ ಸ್ಮರಣ್ಣಾತ್ತವ ಸರ್ಜನಮ್ ।
ಸಾದಿ ಚೇದಾದಿಮಃ ಸರ್ಗೋ ವಕ್ತ್ವ್ಯಸ್ತವ ಕಲ್ಪನಾತ್ ॥ ೨೧೬॥
ವಿಧಾತುಂ ಶಕ್ನುಯಾತ್ಸಂವಿದಭೂತಸ್ಯಾಪಿ ಕಲ್ಪನಮ್ ।
ಕಲ್ಪಿತಸ್ಯೈಕದಾ ಭೂಯಃ ಸರ್ಜನಾವಸರೇ ಸ್ಮೃತಿಃ ॥ ೨೧೭॥
ಚಿತೇರಸ್ಮಾದೃಶಾಂ ವೀರ್ಯಂ ಸ್ವಪ್ನೇ ಚೇದ್ವಿಶ್ವಕಾರಣಮ್ ।
ಚಿತೇಸ್ಸಮಷ್ಟಿಭೂತಾಯಾಃ ಪ್ರಭಾವೇ ಸಂಶಯಃ ಕುತಃ ॥ ೨೧೮॥
ಮಾತಸ್ಸಮಷ್ಟಿಚಿದ್ರೂಪೇ ವಿಭೂತಿರ್ಭುವನಂ ತವ ।
ಇಹ ವ್ಯಷ್ಟಿ ಶರೀರೇಷು ಭಾನ್ತೀ ತದನುಪಶ್ಯಸಿ ॥ ೨೧೯॥
ತ್ವಂ ಬಹ್ಮ ತ್ವಂ ಪರಾಶಕ್ತಿಸ್ತ್ವಂ ಸರ್ವಾ ಅಪಿ ದೇವತಾಃ ।
ತ್ವಂ ಜೀವಾಸ್ತ್ವಂ ಜಗತ್ಸರ್ವಂ ತ್ವದನ್ಯನ್ನಾಸ್ತಿ ಕಿಞ್ಚನ ॥ ೨೨೦॥
ಸತೀ ಚಿದಮ್ಬ ನೈವ ತ್ವಂ ಭಾವಾಭಾವವಿಲಕ್ಷಣಾ ।
ಶಕ್ತಿಶಕ್ತಿಮತೋರ್ಭೇದದರ್ಶನಾದೇಷ ವಿಭ್ರಮಃ ॥ ೨೨೧॥
ತವಾಮ್ಬ ಜಗತಧಾಸ್ಯ ಮೃತ್ತಿಕಾಘಟಯೋರೇವ ।
ಸಮ್ಬನ್ಧೋ ವೇದಿತವ್ಯಃ ಸ್ಯಾನ್ನ ರಜ್ಜೌಫಣಿನೋರಿವ ॥ ೨೨೨॥
ತ್ವಂ ಶಕ್ತಿರಸ್ಯವಿಚ್ಛಿನ್ನಾ ಭಾವೈರಾತ್ಮವಿಭೂತಿಭಿಃ ।
ಅನ್ತರಾಸ್ತು ಮಹೇನ್ದ್ರಸ್ಯ ಶಕ್ತ್ಸ್ಯ ಪ್ರತಿಬಿಮ್ಬವತ್ ॥ ೨೨೩॥
ಶಕ್ತಿರ್ಗಣಪತೇಃ ಕಾಯೇ ಪ್ರವಹನ್ತೀ ಸನಾತನೀ ।
ಭಾರತಸ್ಯ ಕ್ರಿಯಾದಸ್ಯ ಬಾಧ್ಯಮಾನಸ್ಯ ರಕ್ಷಣಮ್ ॥ ೨೨೪॥
ಇಮಾನಿ ತತ್ತ್ವವಾದೀನಿ ವಾಸಿಷ್ಠಸ್ಯ ಮಹಾಮುನೇಃ ।
ಪಥ್ಯಾವಕ್ತ್ರಣಿ ಸೇವನ್ತಾಮನನ್ತಾಮಭವಾಂ ಚಿತಿಮ್ ॥ ೨೨೫॥
॥ ದ್ವಿತೀಯೋ ಮಾಣವಕಪಾದಃ ॥
ಶಕ್ತ್ತಮಾ ಶಕ್ರವಧೂ ಹಾಸವಿಭಾ ಮೇ ಹರತು ।
ಮಾನಸಮಾರ್ಗಾವರಕಂ ಜೇತುಮಶಕ್ಯಂ ತಿಮಿರಮ್ ॥ ೨೨೬॥
ಭಾರತಭೂಪದ್ಮದೃಶೋ ದುರ್ದಶಯಾ ಕ್ಷೀಣತನೋಃ ।
ಬಾಷ್ಪಮಜಸ್ರಂ ವಿಗಲದ್ವಾಸವಭಾಮಾ ಹರತು ॥ ೨೨೭॥
ದಣ್ಡಿತರಕ್ಷೋಜನತಾ ಪಣ್ಡಿತಗೀತಾವನಿತಾ ।
ಮಣ್ಡಿತಮಾಹೇನ್ದ್ರಗೃಹಾ ಖಣ್ಡಿತಪಾಪಾ ಜಯತಿ ॥ ೨೨೮॥
ಸದ್ಗುಣಸಮ್ಪತ್ಕಲಿತಂ ಸರ್ವಶರೀರೇ ಲಲಿತಮ್ ।
ದೇವಪತೇಃ ಪುಣ್ಯಫಲಂ ಪುಷ್ಯತು ಮೇ ಬುದ್ಧಿಬಲಮ್ ॥ ೨೨೯॥
ಹಾಸವಿಶೇಷೈರಲಸೈರ್ದಿಕ್ಷು ಕಿರನ್ತ್ಯಚ್ಛಸುಧಾಮ್ ।
ಇನ್ದ್ರದೃಗಾನನ್ದಕರೀ ಚನ್ದ್ರಮುಖೀ ಮಾಮವತು ॥ ೨೩೦॥
ಪ್ರೇಮತರಙ್ಗಪ್ರತಿಮೈಃ ಶೀತಲದೃಷ್ಟಿಪ್ರಕರೈಃ ।
ಶಕ್ರಮನೋಮೋಹಕರೀ ವಕ್ರಕಚಾ ಮಾಮವತು ॥ ೨೩೧॥
ಗಾಢರಸೈಶ್ಚಾರುಪದೈರ್ಗೂಢತರಾರ್ಥೈರ್ವಚನೈಃ ।
ಕಾಮಕರೀ ವೃತ್ರಜಿತೋ ಹೇಮತನುರ್ಮಾಮವತು ॥ ೨೩೨॥
ಮೃತ್ಯುತನುಃ ಕಾಲತನೋರ್ವಿಶ್ವಪತೇಃ ಪಾರ್ಶ್ವಚರೀ ।
ಪ್ರೇತಜಗದ್ರಕ್ಷತಿ ಯಾ ಸಾ ತರುಣೀ ಮಾಮವತು ॥ ೨೩೩॥
ಪ್ರೇತಜಗತ್ಕೇಚಿದಧೋ ಲೋಕಮಪುಣ್ಯಂ ಬ್ರುವತೇ ।
ಶೀತರುಚೇರ್ದೇವಿ ಪರೋ ನೇತರದೇತದ್ ವದತಿ ॥ ೨೩೪॥
ಭೂರಿಯಮುರ್ವೀ ವಸುಧಾ ವಾರಿಜವೈರ್ಯೇಷಭುವಃ ।
ಸ್ವರ್ಮಹಸಾಂ ರಾಶಿರಸೌ ಯೇಷು ನರಪ್ರೇತಸುರಾಃ ॥ ೨೩೫॥
ರಾಜತಶೈಲಂ ಶಶಿನಃ ಕೇಚಿದಭಿನ್ನಂ ಬ್ರುವತೇ ।
ಮೃತ್ಯುಯಮಾವೇವ ಶಿವಾವೀಶ್ವರಿ ತೇಷಾಂ ತು ಮತೇ ॥ ೨೩೬॥
ರಾಜತಶೈಲಃ ಪಿತೃಭೂರೋಷಧಿರಾಡೇಷ ಯದಿ ।
ಕಾಞ್ಚನಶೈಲಃ ಸುರಭೂರ್ಬನ್ಧುರಸೌ ವಾರಿರುಹಾಮ್ ॥ ೨೩೭॥
ಪಾವಯ ಭೂಮಿಂ ದಧತಃ ಪಾವಕಕಾಯಸ್ಯ ವಿಭೋಃ ।
ಭಾಮಿನಿ ಭಾವಾನುಗುಣೇ ಸೇವಕಮಗ್ನಾಯಿ ತವ ॥ ೨೩೮॥
ಯಸ್ಯ ಯಮೋ ಭೂತಪತಿರ್ಬುದ್ಧಿಮತಸ್ತಸ್ಯ ಮತೇ ।
ಆಗ್ನಿರುಪೇನ್ದ್ರೋ ಮಘವಾ ಕಾಞ್ಚನಗರ್ಭೋ ಭಗವಾನ್ ॥ ೨೩೯॥
ಯಸ್ಯ ಮಹಾಕಾಲವಧೂರ್ಮೃತ್ಯುರಪಿ ದ್ವೇ ನ ವಿದಃ ।
ತ್ವಂ ಶಚಿ ಮೇಧಾಽಸ್ಯಮತೇ ಪಾವಕಶಕ್ತಿಃ ಕಮಲಾ ॥ ೨೪೦॥
ನಾಮಸು ಭೇದೋಽಸ್ತು ಧಿಯಾಮೀಶ್ವರಿ ನಿಷ್ಕೃಷ್ಟಮಿದಮ್ ।
ಸೂರ್ಯಧರೇನ್ದುಷ್ವಜರೇ ತ್ವಂ ತ್ರಿತನುರ್ಭಾಸಿ ಪರೇ ॥ ೨೪೧॥
ಸಾತ್ತ್ವಿಕಶಕ್ತಿಃ ಸವಿತರ್ಯಾದಿಮರಾಮೇ ಭವಸಿ ।
ರಾಜಸಶಕ್ತಿರ್ಭುವಿ ನಸ್ತಾಮಸಶಕ್ತಿಃ ಶಶಿನಿ ॥ ೨೪೨॥
ಸರ್ವಗುಣಾ ಸರ್ವವಿಭಾ ಸರ್ವಬಲಾ ಸರ್ವರಸಾ ।
ಸರ್ವಮಿದಂ ವ್ಯಾಪ್ಯ ಜಗತ್ಕಾಪಿ ವಿಭಾನ್ತೀ ಪರಮಾ ॥ ೨೪೩॥
ವ್ಯೋಮತನುರ್ನಿರ್ವಪುಷೋ ದೇವಿ ಸತಸ್ತ್ವಂ ದಯಿತಾ ।
ಅಸ್ಯಭಿಯುಕ್ತೈರ್ವಿಬುಧೈರಮ್ಬ ಮಹೇಶ್ವರ್ಯುದಿತಾ ॥ ೨೪೪॥
ಸಾ ಖಲು ಮಾಯಾ ಪರಮಾ ಕಾರಣಮೀಶಂ ವದತಾಮ್ ।
ಸಾ ಪ್ರಕೃತಿಃ ಸಾಙ್ಖ್ಯವಿದಾಂ ಸಾ ಯಮಿನಾಂ ಕುಣ್ಡಲಿನೀ ॥ ೨೪೫॥
ಸಾ ಲಲಿತಾ ಪಞ್ಚದಶೀಮುತ್ತಮವಿದ್ಯಾಂ ಜಪತಾಮ್ ।
ಸಾ ಖಲು ಚಣ್ಡೀ ಜನನೀ ಸಾಧುನವಾರ್ಣಂ ಭಜತಾಮ್ ॥ ೨೪೬॥
ಸಾ ಮಮ ಶಚ್ಯಾಃ ಪರಮಂ ಕಾರಣರೂಪಂ ಭವತಿ ।
ಕಾರ್ಯತನುರ್ದಿವಿ ಶಕ್ರಂ ಸಮ್ಮದಯನ್ತೀ ಲಸತಿ ॥ ೨೪೭॥
ವ್ಯೋಮತನೋಃ ಸರ್ವಜಗಚ್ಚಾಲನಸೂತ್ರಂ ತು ವಶೇ ।
ನಿರ್ವಹಣೇ ತಸ್ಯ ಪುನರ್ದಿವ್ಯತನುಸ್ತ್ರೀತ್ರಿತಯಮ್ ॥ ೨೪೮॥
ಪಾತುಮಿಮಂ ಸ್ವಂ ವಿಷಯಂ ಹನ್ತ ಚಿರಾನ್ನಿರ್ವಿಜಯಮ್ ।
ಕಿಙ್ಕ್ರಮೀಶೇ ವಿಭಯಂ ಮಾಂ ಕುರು ಪರ್ಯಾರ್ಶಿಯಮ್ ॥ ೨೪೯॥
ಚಾರುಪದಕ್ರೀಡನಕೈರ್ಮಾತರಿಮೈರ್ಮಾಣವಕೈಃ ।
ಚೇತಸಿ ತೇ ದೇವನುತೇ ಪ್ರೀತಿರಮೋಘಾ ಭವತು ॥ ೨೫೦॥
॥ ತೃತೀಯಶ್ಚಿತ್ರಪದಾಪಾದಃ ॥
ಅಪ್ಯಲಸೋ ಹರಿದನ್ತಧ್ವಾನ್ತತತೇರಪಿ ಹರ್ತಾ ।
ಅಸ್ತು ಮಮೇನ್ದ್ರಪುರನ್ಧ್ರೀ ಹಾಸಲವಃ ಶುಭಕರ್ತಾ ॥ ೨೫೧॥
ಪಾಹಿ ಪರೈರ್ಹೃತಸಾರಾಂ ನೇತ್ರಗಲಜ್ಜಲಧಾರಾಮ್ ।
ಭಾರತಭೂಮಿಮನಾಥಾಂ ದೇವಿ ವಿಧಾಯ ಸನಾಥಾಮ್ ॥ ೨೫೨॥
ಚಾಲಯತಾ ಸುರರಾಜಂ ಪಾಲಯತಾ ಭುವನಾನಿ ।
ಶೀಲಯತಾ ನತರಕ್ಷಾಂ ಕಾಲಯತಾ ವೃಜಿನಾನಿ ॥ ೨೫೩॥
ಲಾಲಯತಾ ಮುನಿಸಙ್ಘಂ ಕೀಲಯತಾ ದಿವಿ ಭದ್ರಮ್ ।
ಪಾವಯ ಮಾಂ ಸಕೃದೀಶೇ ಭಾಸುರದೃಕ್ಪ್ರಸರೇಣ ॥ ೨೫೪॥
ಸರ್ವರುಚಾಮಾಪಿ ಶಾಲಾಂ ತ್ವಾಂ ಶಚಿ ಮಙ್ಗಲಲೀಲಾಮ್ ।
ಕಾಲಕಚಾಮುತ ಕಾಲೀಂ ಪದ್ಮಮುಖೀಮುತ ಪದ್ಮಾಮ್ ॥ ೨೫೫॥
ಯಃ ಸ್ಮರತಿ ಪ್ರತಿಕಲ್ಯಂ ಭಕ್ತಿಭರೇಣ ಪರೇಣ ।
ತಸ್ಯ ಸುರೇಶ್ವರಿ ಸಾಧೋರಸ್ಮಿ ಪದಾಬ್ಜಭುಜಿಷ್ಯಃ ॥ ೨೫೬॥
ಯಸ್ತವ ನಾಮಪವಿತ್ರಂ ಕೀರ್ತಯತೇ ಸುಕೃತೀ ನಾ ।
ವಾಸವಸುನ್ದರಿ ದಾಸಸ್ತಚ್ಚರಣಸ್ಯ ಸದಾಽಹಮ್ ॥ ೨೫೭॥
ಪಾವಕಸಾಗರಕೋಣಂ ಯಸ್ತವ ಪಾವನಯನ್ತ್ರಮ್ ।
ಪೂಜಯತಿ ಪ್ರತಿಘಸ್ರಂ ದೇವಿ ಭಜಾಮಿ ತದಙ್ಧ್ರಿಮ್ ॥ ೨೫೮॥
ಯಸ್ತವ ಮನ್ತ್ರಮುದಾರಪ್ರಾಭವಮಾಗಮಸಾರಮ್ ।
ಪಾವನಿ ಕೂರ್ಚಮುಪಾಸ್ತೇ ತಸ್ಯ ನಮಧ್ರಣಾಯ ॥ ೨೫೯॥
ಶಾನ್ತಧಿಯೇತರಚಿನ್ತಾಸನ್ತತಿಮಮ್ಬ ವಿಧೂಯ ।
ಚಿನ್ತಯತಾಂ ತವ ಪಾದಾವಸ್ಮಿ ಸತಾಮನುಯಾಯೀ ॥ ೨೬೦॥
ಶೋಧಯತಾಂ ನಿಜತತ್ತ್ವಂ ಸಾಧಯತಾಂ ಮಹಿಮಾನಮ್ ।
ಭಾವಯತಾಂ ಚರಣಂ ತೇ ದೇವಿ ಪದಾನುಚರೋಽಹಮ್ ॥ ೨೬೧॥
ಯೋಽನುಭವೇನ್ನಿಜದೇಹೇ ತ್ವಾಮಜರೇ ಪ್ರವಹನ್ತೀಮ್ ।
ಸನ್ತತಚಿನ್ತನಯೋಗಾತ್ತಸ್ಯ ನಮಾಮಿ ಪದಾಬ್ಜಮ್ ॥ ೨೬೨॥
ಬೋಧಯತೇ ಭವತೀಂ ಯಃ ಪ್ರಾಣಗತಾಗತದರ್ಶೀ ।
ಕುಣ್ಡಲಿನೀಂ ಕುಲಕುಣ್ಡಾತ್ತಂ ತ್ರಿದಿವೇಶ್ವರಿ ವನ್ದೇ ॥ ೨೬೩॥
ಲೋಚನಮಣ್ಡಲಸೌಧಾಂ ಲೋಕನಮೂಲವಿಚಾರೀ ।
ವಿನ್ದತಿ ಯಃ ಪರಮೇ ತ್ವಾಂ ವನ್ದನಮಸ್ಯ ಕರೋಮಿ ॥ ೨೬೪॥
ಮಾನಿನಿ ಜಮ್ಭಜಿತಸ್ತ್ವಾಂ ಮಾನಸಮೂಲವಿತರ್ಕೀ ।
ವೇದಹೃದಮ್ಬುರುಹೇ ಯಃ ಪಾದಮಮುಷ್ಯ ನಮಾಮಿ ॥ ೨೬೫॥
ಅನ್ತರನಾದವಿಮರ್ಶೀ ಪಶ್ಯತಿ ಯಃ ಸುಕೃತೀ ತೇ ।
ವೈಭವಮಮ್ಬ ವಿಶುದ್ಧೇ ತೇನ ವಯಂ ಪರವನ್ತಃ ॥ ೨೬೬॥
ಇನ್ದ್ರಪದಸ್ಥಿತಚಿತ್ತಶ್ಶೀರ್ಷಸುಧಾರಸಮತ್ತಃ ।
ಯೋ ಭಜತೇ ಜನನಿ ತ್ವಾಂ ತಚ್ಚರಣಂ ಪ್ರಣಮಾಮಿ ॥ ೨೬೭॥
ರಾಸನವಾರಿಣಿ ಲಗ್ನಃ ಸಮ್ಮದವೀಚಿಷು ಮಗ್ನಃ ।
ಧ್ಯಾಯತಿ ಯಃ ಪರಮೇ ತ್ವಾಂ ತಸ್ಯ ಪದಂ ಮಮ ವನ್ದ್ಯಮ್ ॥ ೨೬೮॥
ತ್ವಾಂ ಸದಹಞಙ್ಕೃತಿರೂಪಾಂ ಯೋಗಿನುತೇ ಹತಪಾಪಾಮ್ ।
ಧಾರಯತೇ ಹೃದಯೇ ಯಸ್ತಸ್ಯ ಸದಾಽಸ್ಮಿ ವಿಧೇಯಃ ॥ ೨೬೯॥
ಧೂತಸಮಸ್ತವಿಕಲ್ಪೋ ಯಸ್ತವ ಪಾವನಲೀಲಾಮ್ ।
ಶೋಧಯತಿ ಸ್ವಗುಹಾಯಾಂ ತಸ್ಯ ಭವಾಮ್ಯನುಜೀವೀ ॥ ೨೭೦॥
ಯೋ ಭಜತೇ ನಿಜದೃಟಿಂ ರೂಪಪರಿಗ್ರಹಣೇಷು ।
ಕಾಮಪಿ ದೇವಿ ಕಲಾಂ ತೇ ತಸ್ಯ ಪದೇ ನಿಪತೇಯಮ್ ॥ ೨೭೧॥
ಕರ್ಮಣಿ ಕರ್ಮಣಿ ಚೇಷ್ಟಾಮಮ್ಬ ತವೈವ ವಿಭೂತಿಮ್ ।
ಯಃ ಶಿತಬುದ್ಧಿರುಪಾಸ್ತೇ ತತ್ಪದಮೇಷ ಉಪಾಸ್ತೇ ॥ ೨೭೨॥
ವಸ್ತುನಿ ವಸ್ತುನಿ ಸತ್ತಾಂ ಯೋ ಭವತೀಂ ಸಮುಪಾಸ್ತೇ ।
ಮಾತರಮುಷ್ಯ ವಹೇಯಂ ಪಾದಯುಗಂ ಶಿರಸಾಽಹಮ್ ॥ ೨೭೩॥
ಪಾತುಮಿಮಂ ನಿಜದೇಶಂ ಸರ್ವದಿಶಾಸು ಸಪಾಶಮ್ ।
ಅಮ್ಬ ವಿಧಾಯ ಸಮರ್ಥಂ ಮಾಂ ಕುರು ದೇವಿ ಕೃತಾರ್ಥಮ್ ॥ ೨೭೪॥
ಚಿತ್ರಪದಾಭಿರಿಮಾಭಿಶ್ಚಿತ್ರವಿಚಿತ್ರಚರಿತ್ರಾ ।
ಸಮ್ಮದಮೇತು ಮಘೋನಃ ಪ್ರಾಣಸಖೀ ಮೃಗನೇತ್ರ ॥ ೨೭೫॥
॥ ಚತುರ್ಥೋ ನಾರಾಚಿಕಾಪಾದಃ ॥
ಅನ್ತರ್ವಿಧುನ್ವತಾ ತಮಃ ಪ್ರಾಣಸ್ಯ ತನ್ವತಾ ಬಲಮ್ ।
ಮನ್ದಸ್ಮಿತೇನ ದೇವತಾರಾಜ್ಞೀ ಕರೋತು ಮೇ ಶಿವಮ್ ॥ ೨೭೬॥
ಉತ್ಥಾಪ್ಯ ಪುಣ್ಯಸಞ್ಚಯಂ ಸಮ್ಮದ್ರ್ಯ ಪಾಪಸಂಹತಿಮ್ ।
ಸಾ ಭಾರತಸ್ಯ ಸಮ್ಪದೇ ಭೂಯಾದ್ಬಲಾರಿಭಾಮಿನೀ ॥ ೨೭೭॥
ಲೀಲಾಸಖೀ ಬಿಡೌಜಸಸ್ಸ್ವರ್ವಾಟಿಕಾಸು ಖೇಲನೇ ।
ಪೀಯುಷಭಾನುಜಿನ್ಮುಖೀ ದೇವೀ ಶಚೀ ವಿರಾಜತೇ ॥ ೨೭೮॥
ಪಕ್ಷಃ ಪರೋ ಮರುತ್ವತೋ ರಕ್ಷಃ ಪ್ರವೀರಮರ್ದನೇ ।
ಭಾಮಾಲಿ ಭಾಸುರಾನನಾ ದೇವೀ ಶಚೀ ವಿರಾಜತೇ ॥ ೨೭೯॥
ಭೀತಿಂ ನಿಶಾಟಸಂಹತೇಃ ಪ್ರೀತಿಂ ಸುಪರ್ವಣಾಂ ತತೇಃ ।
ಜ್ಯಾಟಙ್ಕೃತೈರ್ವಿತನ್ವತೀ ದೇವೀ ಶಚೀ ವಿರಾಜತೇ ॥ ೨೮೦॥
ದೇವೇನ್ದ್ರಶಕ್ತಿಧಾರಿಣೀ ಶತ್ರುಪ್ರಸಕ್ತಿವಾರಿಣೀ ।
ಮೌನೀನ್ದ್ರಮುಕ್ತಿಕಾರಿಣೀ ದೇವೀ ಶಚೀ ಗತಿರ್ಮಮ ॥ ೨೮೧॥
ಸನ್ನಸ್ವದೇಶದರ್ಶನಾದ್ಭಿನ್ನಸ್ವಜಾತಿವೀಕ್ಷಣಾತ್ ।
ಖಿನ್ನಸ್ಯ ಸಂಶ್ರಿತಾವನೀ ದೇವೀ ಶಚೀ ಗತಿರ್ಮಮ ॥ ೨೮೨॥
ಸಙ್ಘೇ ಸಹಸ್ರಧಾಕೃತೇ ದೇಶೇ ನಿಕೃಷ್ಟತಾಂ ಗತೇ ।
ಶೋಕಾಕುಲಸ್ಯ ಲೋಕಭೃದ್ದೇವೀ ಶಚೀ ಗತಿರ್ಮಮ ॥ ೨೮೩॥
ಸಾ ಸಂವಿದೋಽಧಿದೇವತಾ ತಸ್ಯಾಸ್ಸ್ವರಃ ಪರೋ ವಶೇ ।
ಸರ್ವಂ ವಿಧೀಯತೇ ತಯಾ ತಸ್ಮಾತ್ಪರಾ ಮತಾ ಶಚೀ ॥ ೨೮೪॥
ಸಾ ಯಾತಿ ಸೂಕ್ಷ್ಮಮಪ್ಯಲಂ ಸಾ ಭಾತಿ ಸರ್ವವಸ್ತುಷು ।
ಸಾ ಮಾತಿ ಖಂ ಚ ನಿಸ್ತುಲಂ ತಸ್ಮಾತ್ಪರಾ ಮತಾ ಶಚೀ ॥ ೨೮೫॥
ಸಾ ಸರ್ವಲೋಕನಾಯಿಕಾ ಸಾ ಸರ್ವಗೋಲಪಾಲಿಕಾ ।
ಸಾ ಸರ್ವದೇಹಚಾಲಿಕಾ ತಸ್ಮಾತ್ಪರಾ ಮತಾ ಶಚೀ ॥ ೨೮೬॥
ಯಸ್ಯಾಃ ಕೃತಿರ್ಜಗತ್ತ್ರಯಂ ಯಾ ತದ್ಬಿಭರ್ತಿ ಲೀಲಯಾ ।
ಯಸ್ಯಾಂ ಪ್ರಯಾತಿ ತಲ್ಲಯಂ ಸಾ ವಿಶ್ವನಾಯಿಕಾ ಶಚೀ ॥ ೨೮೭॥
ಧರ್ಮೇ ಪರಿಕ್ಷಯಂ ಗತೇ ಯಾಽವಿಶ್ಯ ನಿರ್ಮಲಂ ಜನಮ್ ।
ತದ್ರಕ್ಷಣಾಯ ಜಾಯತೇ ಸಾ ವಿಶ್ವನಾಯಿಕಾ ಶಚೀ ॥ ೨೮೮॥
ವೇಧಾ ಋತಸ್ಯ ಯೋದಿತಾ ಮನ್ತ್ರೇಣ ಸತ್ಯವಾದಿನಾ ।
ಬಾಧಾನಿವಾರಿಣೀ ಸತಾಂ ಸಾ ವಿಶ್ವನಾಯಿಕಾ ಶಚೀ ॥ ೨೮೯॥
ಯಜ್ಞೋ ಯಯಾ ವಿನೀಯತೇ ಯುದ್ಧಂ ತಥಾ ಪೃಥಗ್ವಿಧಭ್ ।
ತಾಂ ದೇವರಾಜಮೋಹಿನೀಂ ನಾರೀಂ ನುಮಃ ಪುರಾತನೀಮ್ ॥ ೨೯೦॥
ಯಸ್ಯಾಸ್ಸುತೋ ವೃಷಾಕಪಿರ್ದೇವೋಽಸತಾಂ ಪ್ರಶಾಸಿತಾ ।
ತಾಂ ಸರ್ವದಾ ಸುವಾಸಿನೀಂ ನಾರೀಂ ನುಮಃ ಪುರಾತನೀಮ್ ॥ ೨೯೧॥
ಯಸ್ಯಾಸ್ಸಮಾ ನಿತಮ್ಬಿನೀ ಕಾಚಿನ್ನ ವಿಷ್ಟಪತ್ರಯೇ ।
ತಾಂ ನಿತ್ಯಚಾರು ಯೌವನಾಂ ನಾರೀಂ ನುಮಃ ಪುರಾತನೀಮ್ ॥ ೨೯೨॥
ಯಚ್ಚಾರುತಾ ನ ದೃಶ್ಯತೇ ಮನ್ದಾರಪಲ್ಲವೇಷ್ವಪಿ ।
ತತ್ಸುನ್ದರಾಚ್ಚಸುನ್ದರಂ ಶಚ್ಯಾಃ ಪದಾಮ್ಬುಜಂ ಶ್ರಯೇ ॥ ೨೯೩॥
ಯಸ್ಯ ಪ್ರಭಾ ನ ವಿದ್ಯತೇ ಮಾಣಿಕ್ಯತಲ್ಲ್ಜೇಷ್ವಪಿ ।
ತದ್ಭಾಸುರಾಚ್ಚ ಭಾಸುರಂ ಶಚ್ಯಾಃ ಪದಾಮ್ಬುಜಂ ಶ್ರಯೇ ॥ ೨೯೪॥
ನ ಸ್ಯಾದಘೈಸ್ತಿರಸ್ಕೃತೋ ಯಚ್ಚಿನ್ತಕೋ ನರಃ ಕೃತೀ ।
ತತ್ಪಾವನಾಚ್ಚ ಪಾವನಂ ಶಚ್ಯಾಃ ಪದಾಮ್ಬುಜಂ ಶ್ರಯೇ ॥ ೨೯೫॥
ರಾಜನ್ನಖೇನ್ದುಭಾನುಭಿಸ್ಸರ್ವಂ ತಮೋ ವಿಧುನ್ವತೇ ।
ಬೃನ್ದಾರಕೇನ್ದ್ರಸುನ್ದರೀಪಾದಾಮ್ಬುಜಾಯ ಮಙ್ಗಲಮ್ ॥ ೨೯೬॥
ಗೀರ್ವಾಣಮೌಲಿರೀಭಾ ಸಙ್ಕ್ಷಾಲಿತಾಯ ದೀಪ್ಯತೇ ।
ಸ್ವರ್ಗಾಧಿನಾಥಭಾಮಿನಿಪಾದಾಮ್ಬುಜಾಯ ಮಙ್ಗಲಮ್ ॥ ೨೯೭॥
ಬಾಲಾರ್ಕಬಿಮ್ಬರೋಚಿಷೇ ಯೋಗೀನ್ದ್ರ ಹೃದ್ಗುಹಾಜುಷೇ ।
ಪಾಕಾರಿಜೀವಿತೇಶ್ವರೀಪಾದಾಮ್ಬುಜಾಯ ಮಙ್ಗಲಮ್ ॥ ೨೯೮॥
ಆತ್ಮೀಯದೇಶರಕ್ಷಣೇ ಶಕ್ತಂ ಕರೋತು ಸರ್ವಥಾ ।
ಪಾಪದ್ವಿಷಾಂ ಪ್ರಿಯಙ್ಕರೀ ವಾಸಿಷ್ಠಮಿನ್ದ್ರಸುನ್ದರೀ ॥ ೨೯೯॥
ವಾಸಿಷ್ಠವಾಕ್ಪ್ರದೀಪ್ತಿರ್ಭಿನಾರಾಚಿಕಾಭಿರೀಶ್ವರೀ ।
ಗೀರ್ವಾಣಚಕ್ರವರ್ತಿನಸ್ಸಮ್ಮೋದಮೇತು ಸುನ್ದರೀ ॥ ೩೦೦॥
॥ ತೃತೀಯಮಾನುಷ್ಟುಭಂ ಶತಕಂ ಸಮಾಪ್ತಮ್ ॥
॥ ಅಥ ಚತುರ್ಥಂ ಬಾರ್ಹತಂ ಶತಕಮ್ ॥
॥ ಪ್ರಥಮೋ ಹಲಮುಖೀಪಾದಃ ॥
ಕ್ಷೀರವೀಚಿಪೃಷತಸಿತಂ ಪ್ರೇಮಧಾರಿದರಹಸಿತಮ್ ।
ನಾಕರಾಜನಲಿನದೃಶಃ ಶೋಕಹಾರಿ ಮಮ ಭವತು ॥ ೩೦೧॥
ಅಧ್ವನೋ ಗಲಿತಚರಣಾಮಧ್ವರಕ್ಷಿತಿಮವಿಭವಾಮ್ ।
ಆದಧಾತು ಪಥಿ ವಿಮಲೇ ವೈಭವೇ ಚ ಹರಿತರುಣೀ ॥ ೩೦೨॥
ಬ್ರಹ್ಮಣಶ್ವಿತಿರಥನಭಃ ಕಾಯಭಾಗವಗತಿಮತೀ ।
ಯಾ ತದಾ ಪೃಥಗಿವ ಬಭೌ ಧರ್ಮಿತಾಂ ಸ್ವಯಮಪಿ ಗತಾ ॥ ೩೦೩॥
ಮೋದಬೋಧವಿಭವಕೃತಪ್ರಾಕೃತೇತರವರತನು ।
ಸರ್ವಸದ್ಗುಣಗಣಯುತಂ ಯಾ ಸಸರ್ಜ ಸುರಮಿಥುನಮ್ ॥ ೩೦೪॥
ಪುಂಸಿ ದೀಪ್ತವಪುಷಿ ತಯೋರ್ಬ್ರಹ್ಮ ಸೋಽಹಮಿತಿ ಲಸತಿ ।
ಯೋಷಿತೇ ಕಿಲ ಧಿಯಮದಾತ್ತಸ್ಯ ಶಕ್ತಿರಹಮಿತಿ ಯಾ ॥ ೩೦೫॥
ಯಾಭಿಮಾನಬಲವಶತಸ್ತಾಮುದಾರತಮವಿಭವಾಮ್ ।
ಮನ್ಯತೇ ಸ್ಮ ವರವನಿತಾಂ ಸ್ವಾಧಿದೈವಿಕತನುರಿತಿ ॥ ೩೦೬॥
ಆದಿಪುಂಸಿ ಗಗನತನುರ್ಯಾ ತನೋತಿ ತನುಜಮತಿಮ್ ।
ಆದಧಾತಿ ಯುವತಿತನುಃ ಪ್ರಾಣನಾಯಕ ಇತಿ ರತಿಮ್ ॥ ೩೦೭॥
ತಾಂ ಪರಾಂ ಭುವನಜನನೀಂ ಸರ್ವಪಾಪತತಿಶಮನೀಮ್ ।
ತನ್ತ್ರಜಾಲವಿನುತಬಲಾಂ ಸ್ತೌಮಿ ಸರ್ವಮತಿಮಮಲಾಮ್ ॥ ೩೦೮॥
ಸಾ ಮತಿರ್ವಿದಿತವಿಷಯಾ ಸಾ ರುಚಿರ್ವಿತತವಿಷಯಾ ।
ಸಾ ರತಿರ್ವಿನುತವಿಷಯಾ ಸಾ ಸ್ಥಿತಿರ್ವಿಧುತವಿಷಯಾ ॥ ೩೦೯॥
ಯತ್ರ ಯತ್ರ ಮಮ ಧಿಷಣಾ ಗ್ರಾಹ್ಯವಸ್ತುನಿ ಗತಿಮತೀ ।
ತತ್ರ ತತ್ರ ವಿಲಸತು ಸಾ ಸರ್ವಗಾ ಸಕಲಚರಿತಾ ॥ ೩೧೦॥
ದುರ್ಬಲಸ್ಯ ಬಹುಲಬಲೈರರ್ದಿತಸ್ಯ ಜಗತಿ ಖಲೈಃ ।
ಆದಿದೇವಿ ತವ ಚರಣಂ ಪಾವನಂ ಭವತಿ ಶರಣಮ್ ॥ ೩೧೧॥
ಪೌರುಷೇ ಭವತಿ ವಿಫಲೇ ತ್ವಾಮಯಂ ಜನನಿ ಭಜತೇ ।
ಕಿಂ ನುತೇ ಯದಿ ವಿಮುಖತಾ ಪೌರುಷಂ ಕಥಯ ಭಜತಾಮ್ ॥ ೩೧೨॥
ಕರ್ತುರಪ್ರತಿಹತಗಿರಃ ಪೌರುಷಾಚ್ಛತಗುಣಮಿದಮ್ ।
ಧ್ಯಾತುರಸ್ಖಲಿತಮನಸಃ ಕಾರ್ಯಸಿದ್ಧಿಷು ತವ ಪದಮ್ ॥ ೩೧೩॥
ಪೌರುಷಂ ವಿದಿತಮಫಲಂ ಕಾಙ್ಕ್ಷಿತೇ ಮಮ ಸುರನುತೇ ।
ಶಕ್ತಮೀದೃಶಿ ತು ಸಮಯೇ ಶ್ರದ್ದಧಾಮಿ ತವ ಚರಣಮ್ ॥ ೩೧೪॥
ಪೌರುಷಂ ಯದಿ ಕವಿಮತಂ ದೇವಿ ತೇಽಪಿ ಪದಭಜನಮ್ ।
ದೈವವಾದಪಟುವಚಸೋ ಮೂಕತೈವ ಮಮ ಶರಣಮ್ ॥ ೩೧೫॥
ಪೂರ್ವಜನ್ಮಸುಕೃತಫಲಂ ದೈವಮಮ್ಬ ನಿಗದತಿ ಯಃ ।
ಭಕ್ತಿಪೌರುಷವಿರಹಿಣೋ ಭಾವಿತಸ್ಯ ರಿಪುದಯಿತಮ್ ॥ ೩೧೬॥
ಉದ್ಯತಸ್ಯ ತವ ಚರಣಂ ಸಂಶ್ರಿತಸ್ಯ ಚ ಸುರನುತೇ ।
ಪೂರ್ವಜನ್ಮಸುಕೃತಬಲಶ್ರದ್ಧಯಾಽಲಮಹೃದಯಯಾ ॥ ೩೧೭॥
ಅಸ್ತು ಪೂರ್ವಭವಸುಕೃತಂ ಮಾಸ್ತು ವಾ ಜನನಿ ಜಗತಾಮ್ ।
ಸಾಮ್ಪ್ರತಂ ತವ ಪದಯುಗಂ ಸಂಶ್ರಿತೋಸ್ಮ್ಯವ ವಿಸೃಜ ವಾ ॥ ೩೧೮॥
ನಾಸ್ತಿ ಸಮ್ಪ್ರತಿ ಕಿಮಪಿ ಕಿಂ ಭೂತಿಮಾಪ್ಸ್ಯಸಿ ಕಿಮು ತತಃ ।
ಅನ್ಯಜನ್ಮನಿ ವಿತರಣೇ ಕಾ ಪ್ರಸಕ್ತಿರಮರನುತೇ ॥ ೩೧೯॥
ನಾನ್ಯಜನ್ಮನಿ ಬಹುಶಿವಂ ನಾಪಿ ನಾಕಭುವನಸುಖಮ್ ।
ಕಾಮಯೇ ಫಲಮಭಿಮತಂ ದೇಹಿ ಸಮ್ಪ್ರತಿ ಶಚಿ ನ ವಾ ॥ ೩೨೦॥
ಮೇದಿನೀ ಭುವನತಲತೋ ನಿಸ್ತುಲಾದುತ ಗಗನತಃ ।
ಭಾಸ್ಕರಾದುತ ರುಚಿನಿಧೇಃ ಕಾಮ್ಯಮೀಶ್ವರಿ ವಿತರ ಮೇ ॥ ೩೨೧॥
ವಿಷ್ಟಪೇ ಕ್ವಚನ ವರದೇ ದಾತುಮೀಶ್ವರಿ ಕೃತಮತಿಮ್ ।
ವಾರಯೇಜ್ಜನನಿ ನ ಪರಸ್ತ್ವಾಂ ಜನಸ್ತವ ಪತಿಮಿವ ॥ ೩೨೨॥
ದೇಹಿ ವಾ ಭಗವತಿ ನ ವಾ ಪಾಹಿ ವಾ ಶಶಿಮುಖಿ ನ ವಾ ।
ಪಾವನಂ ತವ ಪದಯುಗಂ ನ ತ್ಯಜಾನಿ ಹರಿದಯಿತೇ ॥ ೩೨೩॥
ರಕ್ಷಿತುಂ ಭರತವಿಷಯಂ ಶಕ್ತಮಿನ್ದ್ರಹೃದಯಸಖೀ ।
ಚನ್ದ್ರಬಿಮ್ಬರುಚಿರಮುಖೀ ಸಾ ಕ್ರಿಯಾದ್ಭುವಿ ಗಣಪತಿಮ್ ॥ ೩೨೪॥
ಸಮ್ಪ್ರಹೃಷ್ಯತು ಹಲಮುಖೀರ್ಭಾಸ್ವತೀರ್ಗಣಪತಿಮುನೇಃ ।
ಸಾ ನಿಶಮ್ಯ ಸುರನೃಪತೇರ್ಮೋಹಿನೀ ಸದಯಹೃದಯಾ ॥ ೩೨೫॥
॥ ದ್ವಿತೀಯೋ ಭುಜಗಶಿಶುಭೃತಾಪಾದಃ ॥
ಮರುದಧಿಪಮನೋನಾಥಾ ಮಧುಕರಚಿಕುರಾಸ್ಮಾಕಮ್ ।
ವೃಜಿನವಿಧುತಿಮಾಧತ್ತಾಂ ವಿಶದಹಸಿತಲೇಶೇನ ॥ ೩೨೬॥
ಅಖಿಲನಿಗಮಸಿದ್ಧಾನ್ತೋ ಬಹುಮುನಿವರಬುದ್ಧಾನ್ತಃ ।
ಸುರಪರಿಬೃಢಶುದ್ಧಾನ್ತೋ ಭರತವಸುಮತೀಮವ್ಯಾತ್ ॥ ೩೨೭॥
ಭಗವತಿ ಭವತೀಚೇತೋ ರತಿಕೃದಭವದಿನ್ದ್ರಸ್ಯ ।
ಸ ತವ ಜನನಿ ಸನ್ತಾನದ್ರುಮವನಮತಿರಮ್ಯಂ ವಾಮ್ ॥ ೩೨೮॥
ಪತಿರಖಿಲಯುವಶ್ರೇಷ್ಠಃ ಕಿಮಪಿ ಯುವತಿರತ್ನಂ ತ್ವಮ್ ।
ವನವಿಹೃತಿಷು ವಾಂ ಚೇತೋ ಹರಣಮಭವದನ್ಯೋನ್ಯಮ್ ॥ ೩೨೯॥
ಮಧುರಲಲಿತಗಮ್ಭೀರೈಸ್ತವ ಹೃದಯಮುಪನ್ಯಾಸೈಃ ।
ವನವಿಹರಣಲೀಲಾಯಾಮಹರದಯಿ ದಿವೋ ರಾಜಾ ॥ ೩೩೦॥
ಕಲವಚನವಿಲಾಸೇನ ಪ್ರಗುಣಮುಖವಿಕಾಸೇನ ।
ಭುವನಮಪಿಮನೋಽಹಾರ್ಷೀರ್ಜನನಿ ವನವಿಹಾರೇ ತ್ವಮ್ ॥ ೩೩೧॥
ಕನಕಕಮಲಕಾನ್ತಾಸ್ಯಾ ಧವಲಕಿರಣವಕ್ತ್ರೇಣ ।
ಅಸಿತಜಲಜಪತ್ರಾಕ್ಷೀ ಸಿತನಲಿನದಲಾಕ್ಷೇಣ ॥ ೩೩೨॥
ಅಲಿಚಯನಿಜಧಮ್ಮಿಲ್ಲಾ ನವಜಲಧರಕೇಶೇನ ।
ಮೃದುಲತಮಭುಜಾವಲ್ಲೀ ದೃಢತಮಭುಜದಣ್ಡೇನ ॥ ೩೩೩॥
ಅಮೃತನಿಲಯಬಿಮ್ಬೋಷ್ಠೀ ರುಚಿರಧವಲದನ್ತೇನ ।
ಅತಿಮುಕುರಲಸದ್ಗಣ್ಡಾ ವಿಕಚಜಲಜಹಸ್ತೇನ ॥ ೩೩೪॥
ಯುವತಿರತಿತರಾಂ ರಮ್ಯಾ ಸುಲಲಿತವಪುಷಾ ಯೂನಾ ।
ಭಗವತಿ ಶಚಿ ಯುಕ್ತಾ ತ್ವಂ ತ್ರಿಭುವನವಿಭುನೇನ್ದ್ರೇಣ ॥ ೩೩೫॥
ವಿಕಚಕುಸುಮಮನ್ದಾರದ್ರಷ್ಠ್ಹಮವನವರವಾಟೀಷು ।
ವಿಹರಣಮಯಿ ಕುರ್ವಾಣಾ ಮನಸಿಜಮನುಗೃಹ್ಣಾಸಿ ॥ ೩೩೬॥
ತವ ಶಚಿ ಚಿಕುರೇ ರಾಜತ್ಕುಸುಮಮಮರವೃಕ್ಷಸ್ಯ ।
ನವ ಸಲಿಲಭೃತೋ ಮಧ್ಯೇ ಸ್ಫುರದಿವ ನವನಕ್ಷತ್ರಮ್ ॥ ೩೩೭॥
ಅಭಜತತರುರೌದಾರ್ಯಂ ವಿಭವಮಪಿ ಮಹಾನ್ತಂ ಸಃ ।
ವಿಕಚಕುಸುಮಸಮ್ಪತ್ತ್ಯಾ ಭಗವತಿ ಭಜತೇ ಯಸ್ತ್ವಾಮ್ ॥ ೩೩೮॥
ಅಮರನೃಪತಿನಾ ಸಾಕಂ ಕುಸುಮಿತವನವಾಟೀಷು ।
ಭಗವತಿ ತವ ವಿಶ್ರಾನ್ತೇಃ ಸ ಜಯತಿ ಸಮಯಃ ಕೋಽಪಿ ॥ ೩೩೯॥
ಅಮರತರುವರಚ್ಛಾಯಾಸ್ವಯಿ ಮುಹುರುಪವಿಶ್ಯ ತ್ವಮ್ ।
ಶಚಿ ಕೃತಿಜನರಕ್ಷಾಯೈ ಮನಸಿ ವಿತನುಷು ಚರ್ಚಾಮ್ ॥ ೩೪೦॥
ಕಿಮು ವಸು ವಿತರಾಣ್ಯಸ್ಮೈ ಸುಮತಿಮುತ ದದಾನ್ಯಸ್ಮೈ ।
ಕ್ಷಮತಮಮಥವಾಽಮುಷ್ಮಿನ್ ಬಲಮುರುಘಟಯಾನೀತಿ ॥ ೩೪೧॥
ಹರಿತರುಣಿ ಕದಾ ವಾಮೇ ವಿನಮದವನಚರ್ಚಾಸು ।
ಸ್ಮರಣಸಮಯ ಆಯಾಸ್ಯತ್ಯಮಲಹೃದಯರಙ್ಗೇ ತೇ ॥ ೩೪೨॥
ಶಚಿ ಭಗವತಿ ಸಾಕ್ಷಾತ್ತೇ ಚರಣಕಮಲದಾಸೋಽಹಮ್ ।
ಇಹ ತು ವಸುಮತೀಲೋಕೇ ಸ್ಮರ ಮಮ ವಿಷಯಂ ಪೂರ್ವಮ್ ॥ ೩೪೩॥
ನ ಯದಿ ತವ ಮನೋ ದಾತುಂ ಸ್ವಯಮಯಿ ಲಘವೇ ಮಹ್ಯಮ್ ।
ಉಪವನತರುಕರ್ಣೇ ವಾ ವದ ಮದಭಿಮತಂ ಕರ್ತುಮ್ ॥ ೩೪೪॥
ನಿಜವಿಷಯಮತಿಶ್ರೇಷ್ಠಂ ವಿಪದಿ ನಿಪತಿತಂ ತ್ರಾತುಮ್ ।
ಸ್ವಕುಲಮಪಿ ಸದಧ್ವಾನಂ ಗಮಯಿತುಮಪಥೇ ಶ್ರಾನ್ತಮ್ ॥ ೩೪೫॥
ಅಖಿಲಭುವನಸಮ್ರಾಜಃ ಪ್ರಿಯತರುಣಿ ಭವತ್ಯೈವ ।
ಮತಿಬಲಪರಿಪೂರ್ಣೋಏಽಯಂ ಗಣಪತಿಮುನಿರಾಧೇಯಃ ॥ ೩೪೬॥
ನ ಕಿಮು ಭವತಿ ಶಂ ದೇಶೇ ಗತವತಿ ಕಲುಷೇ ಕಾಲೇ ।
ತವ ಭಜನಮಘಂ ಸದ್ಯೋ ಹರಿಹಯಲಲನೇ ಜೇತುಮ್ ॥ ೩೪೭॥
ತ್ರಿಜಗತಿ ಸಕಲಂ ಯಸ್ಯ ಪ್ರಭವತಿ ಪೃಥುಲೇ ಹಸ್ತೇ ।
ಸ ಬಹುಲಮಹಿಮಾ ಕಾಲೋ ಮಮ ಜನನಿ ವಿಭೂತಿಸ್ತೇ ॥ ೩೪೮॥
ಅನವರತಗಲದ್ಬಾಷ್ಪಾಂ ಭರತವಸುಮತೀಂ ತ್ರಾತುಮ್ ।
ವಿತರತು ದಯಿತಾಜಿಷ್ಣೋರ್ಗಣಪತಿಮುನಯೇ ಶಕ್ತಿಮ್ ॥ ೩೪೯॥
ಭುಜಗಶಿಶುಭೃತಾ ಏತಾಃ ಕವಿಗಣಪತಿನಾ ಗೀತಾಃ ।
ವಿದಧತು ಮುದಿತಾಂ ದೇವೀಂ ವಿಬುಧಪತಿಮನೋನಾಥಾಮ್ ॥ ೩೫೦॥
॥ ತೃತೀಯೋ ಮಣಿಮಧ್ಯಾಪಾದಃ ॥
ಮಙ್ಗಲಧಾಯೀ ಪುಣ್ಯವತಾಂ ಮನ್ಮಥಧಾಯೀ ದೇವಪತೇಃ ।
ವಿಷ್ಟಪರಾಜ್ಞೀಹಾಸಲವೋ ವಿಕ್ರಮಧಾಯೀ ಮೇ ಭವತು ॥ ೩೫೧॥
ದೃಷ್ಟಿವಿಶೇಷೈಶ್ಶೀತತರೈರ್ಭೂರ್ಯನುಕಮ್ಪೈಃ ಪುಣ್ಯತಮೈಃ ।
ಭಾರತಭೂಮೇಸ್ತಾಪತತಿಂ ವಾಸವಕಾನ್ತಾ ಸಾ ಹರತು ॥ ೩೫೨॥
ಪಾವನದೃಷ್ಟಿರ್ಯೋಗಿಹಿತಾ ಭಾಸುರದೃಷ್ಟಿರ್ದೇವಹಿತಾ ।
ಶೀತಲದೃಷ್ಟಿರ್ಭಕ್ಥಿತಾ ಮೋಹನದೃಷ್ಟಿಶ್ಶಕ್ರಹಿತಾ ॥ ೩೫೩॥
ಉಜ್ಜ್ವಲವಾಣೀ ವಿಕ್ರಮದಾ ವತ್ಸಲವಾಣೀ ಸಾನ್ತ್ವನದಾ ।
ಮಞ್ಜುಲವಾಣೀ ಸಮ್ಮದದಾ ಪನ್ನಗವೇಣೀ ಸಾ ಜಯತಿ ॥ ೩೫೪॥
ಶಾರದರಾಕಾಚನ್ದ್ರಮುಖೀ ತೋಯದಮಾಲಾಕಾರಕಚಾ ।
ಮೇಚಕಪಾಥೋಜಾತದಲಶ್ರೀಹರಚಕ್ಷುರ್ವಾಸಿಕೃಪಾ ॥ ೩೫೫॥
ಚಮ್ಪಕನಾಸಾಗಣ್ಡವಿಭಾಮಣ್ಡಲಖೇಲತ್ಕುಣ್ಡಲಭಾ ।
ಉಕ್ತಿಷು ವೀಣಾಬಿಮ್ಬಫಲಶ್ರೀಹರದನ್ತಪ್ರಾವರಣಾ ॥ ೩೫೬॥
ನಿರ್ಮಲಹಾಸಕ್ಷಾಲಿತದಿಗ್ಭಿತ್ತಿಸಮೂಹಾ ಮೋಹಹರೀ ।
ಕಾಞ್ಚನಮಾಲಾಶೋಭಿಗಲಾ ಸನ್ತತಲೀಲಾ ಬುದ್ಧಿಕಲಾ ॥ ೩೫೭॥
ವಿಷ್ಟಪಧಾರಿ ಕ್ಷೀರಧರಸ್ವರ್ಣಘಟಶ್ರೀಹಾರಿಕುಚಾ ।
ಕಾಪಿ ಬಿಡೌಜೋ ರಾಜ್ಯರಮಾ ಚೇತಸಿ ಮಾತಾ ಭಾತು ಮಮ ॥ ೩೫೮॥
ದಿವ್ಯಸುಧೋರ್ಮಿರ್ಭಕ್ತಿಮತಾಂ ಪಾವಕಕೀಲಾ ಪಾಪಕೃತಾಮ್ ।
ವ್ಯೋಮ್ನಿ ಚರನ್ತೀ ಶಕ್ರಸಖೀ ಶಕ್ತಿರಮೋಘಾ ಮಾಮವತು ॥ ೩೫೯॥
ಸಮ್ಮದಯನ್ತೀ ಸರ್ವತನುಂ ಸಂಶಮಯನ್ತೀ ಪಾಪತತಿಮ್ ।
ಸಮ್ಪ್ರಥಯನ್ತೀ ಸರ್ವಮತೀಸ್ಸಙ್ಘಟಯನ್ತೀ ಪ್ರಾಣಬಲಮ್ ॥ ೩೬೦॥
ನಿರ್ಜಿತಶೋಕಾಧೂತತಮಾಸ್ಸಂಸ್ಕೃತಚಿತ್ತಾ ಶುದ್ಧತಮಾ ।
ವಾಸವಶಕ್ತೇರ್ವ್ಯೋಮಜುಷಃ ಕಾಚನ ವೀಚಿರ್ಮಾಂ ವಿಶತು ॥ ೩೬೧॥
ಉದ್ಗತಕೀಲಂ ಮೂಲಮಿದಂ ಭಿನ್ನಕಪಾಲಂ ಶೀರ್ಷಮಿದಮ್ ।
ಉಜ್ಝಿತ ಮೋಹಂ ಚಿತ್ತಮಿದಂ ವಾಸವಶಕ್ತಿರ್ಮಾಂ ವಿಶತು ॥ ೩೬೨॥
ದೃಶ್ಯವಿರಕ್ತಂ ಚಕ್ಷುರಿದಂ ಭೋಗವಿರಕ್ತಂ ಕಾಯಮಿದಮ್ ।
ಧ್ಯೇಯವಿರಕ್ತಾ ಬುದ್ಧಿರಿಯಂ ವಾಸವಶಕ್ತಿರ್ಮಾಂ ವಿಶತು ॥ ೩೬೩॥
ಚಕ್ಷುರದೃಶ್ಯಜ್ವಾಲಭೃತಾ ವ್ಯಾಪಕಖೇನ ಪ್ರೋಲ್ಲಸತಾ ।
ವಿಸ್ಮೃತಕಾಯಂ ಸನ್ದಧತೀ ವಾಸವಶಕ್ತಿರ್ಮಾಂ ವಿಶತು ॥ ೩೬೪॥
ಕಾಯಮಜಸ್ರಂ ವಜ್ರದೃಢಂ ಬುದ್ಧಿಮಶೇಷೇ ವ್ಯಾಪ್ತಿಮತೀಮ್ ।
ದಿವ್ಯತರಙ್ಗೈರಾದಧತೀ ವಾಸವಶಕ್ತಿರ್ಮಾಂ ವಿಶತು ॥ ೩೬೫॥
ಮೂರ್ಧ್ನಿ ಪತನ್ತೀ ವ್ಯೋಮತಲಾತ್ಸನ್ತತಮನ್ತಃ ಸರ್ವತನೌ ।
ಸಮ್ಪ್ರವಹನ್ತೀ ದಿವ್ಯಝರೈರ್ವಾಸವಶಕ್ತಿರ್ಮಾಂ ವಿಶತು ॥ ೩೬೬॥
ಭಾನುವಿಭಾಯಾಂ ಭಾಸಕತಾ ದಿವ್ಯಸುಧಾಯಾಂ ಮೋದಕತಾ ।
ಕಾಽಪಿ ಸುರಾಯಾಂ ಮಾದಕತಾ ವಾಸವಶಕ್ತ್ಯಾಂ ತತ್ತ್ರಿತಯಮ್ ॥ ೩೬೭॥
ಭಾಸಯತಾನ್ಮೇ ಸಮ್ಯಗೃತಂ ಮೋದಮುದಾರಂ ಪುಷ್ಯತು ಮೇ ।
ಸಾಧುಮದಂ ಮೇ ವರ್ಧಯತಾನ್ನಿರ್ಜರಭರ್ತುಃ ಶಕ್ತಿರಜಾ ॥ ೩೬೮॥
ಕಶ್ಚನ ಶಕ್ತಿಂ ಯೋಗಬಲಾದಾತ್ಮಶರೀರೇ ವರ್ಧಯತಿ ।
ಏಷಿ ವಿವೃದ್ಧಿಂ ಭಕ್ತಿಮತಃ ಕಸ್ಯಚಿದೇಶೇ ತ್ವಂ ವಪುಷಿ ॥ ೩೬೯॥
ಸಾಧಯತಾಂ ವಾ ಯೋಗವಿದಾಂ ಕೀರ್ತಯತಾಂ ವಾ ಭಕ್ತಿಮತಾಮ್ ।
ವತ್ಸಲಭಾವಾದಿನ್ದ್ರವಧೂರ್ಗರ್ಭಭುವಾಂ ವಾ ಯಾತಿ ವಶಮ್ ॥ ೩೭೦॥
ಯಸ್ಯ ಸಮಾಧಿಃ ಕೋಽಪಿ ಭವೇದಾತ್ಮಮನೀಷಾ ತಸ್ಯ ಬಲಮ್ ।
ಯಸ್ತವ ಪಾದಾಮ್ಭೋಜರತಸ್ತಸ್ಯ ಖಲು ತ್ವಂ ದೇವಿ ಬಲಮ್ ॥ ೩೭೧॥
ದ್ವಾದಶವರ್ಷೀ ಯೋಗಬಲಾದ್ಯಾ ಖಲು ಶಕ್ತಿರ್ಯುಕ್ತಮತೇಃ ।
ತಾಂ ಶಚಿ ದಾತುಂ ಭಕ್ತಿಮತೇ ಕಾಪಿ ಘಟೀ ತೇ ಮಾತರಲಮ್ ॥ ೩೭೨॥
ಯೋಗಬಲಾದ್ವಾ ಧ್ಯಾನಕೃತೋ ಭಕ್ತಿಬಲಾದ್ವಾ ಕೀರ್ತಯತಃ ।
ಯಾತು ವಿವೃದ್ಧಿಂ ವಿಶ್ವಹಿತಾ ವಾಸವಶಕ್ತಿರ್ಮೇ ವಪುಷಿ ॥ ೩೭೩॥
ದುಃಖಿತಮೇತಚ್ಛ್ರೀರಹಿತಂ ಭಾರತಖಣ್ಡಂ ಸರ್ವಹಿತಮ್ ।
ತ್ರಾತುಮಧೀಶಾ ಸ್ವರ್ಜಗತಃ ಸುಕ್ಷಮಬುದ್ಧಿಂ ಮಾಂ ಕುರುತಾಮ್ ॥ ೩೭೪॥
ಸನ್ತು ಕವೀನಾಂ ಭರ್ತುರಿಮೇ ಸುನ್ದರಬನ್ಧಾಶುದ್ಧತಮಾಃ ।
ಸನ್ಮಣಿಮಧ್ಯಾಃ ಸ್ವರ್ಜಗತೋ ರಾಜಮಹಿಷ್ಯಾಃ ಕರ್ಣಸುಖಾಃ ॥ ೩೭೫॥
॥ ಚತುರ್ಥೋ ಮಾತ್ರಸಮಕಪಾದಃ ॥
ಶುಕ್ಲ್ಜ್ಯೋತಿಃ ಪ್ರಕರೈರ್ವ್ಯಾಪ್ತಃ ಸೂಕ್ಷ್ಮೋಽಪ್ಯನ್ತಾನ್ ಹರಿತಾಂ ಹಾಸಃ ।
ಜಿಷ್ಣೋಃ ಪತ್ನ್ಯಾಸ್ತಿಮಿರಾರಾತಿರ್ನಿಶ್ಶೇಷಂ ಮೇ ಹರತಾನ್ಮೋಹಮ್ ॥ ೩೭೬॥
ಶೃಣ್ವತ್ಕರ್ಣಾ ಸದಯಾಲೋಕಾ ಲೋಕೇನ್ದ್ರಸ್ಯ ಪ್ರಿಯನಾರೀ ಸಾ ।
ನಿತ್ಯಾಕ್ರೋಶೈರ್ವಿರುದದ್ವಾಣೀಂ ಪಾಯಾದೇತಾಂ ಭರತಕ್ಷೋಣೀಮ್ ॥ ೩೭೭॥
ದೇವೇಷು ಸ್ವಃ ಪರಿದೀಪ್ಯನ್ತೀ ಭೂತೇಷ್ವಿನ್ದೌ ಪರಿಖೇಲನ್ತೀ ।
ಶಕ್ತಿರ್ಜಿಷ್ಣೋರ್ದ್ವಪದಾಂ ಸಙ್ಘೇ ಹನ್ತೈತಸ್ಯಾಂ ಭುವಿ ನಿದ್ರಾತಿ ॥ ೩೭೮॥
ನಿದ್ರಾಣಾಯಾ ಅಪಿ ತೇ ಜ್ಯೋತಿರ್ಗನ್ಧಾದೇತೇ ಧರಣೀಲೋಕೇ ।
ಮರ್ತ್ಯಾಃ ಕಿಞ್ಚತ್ಪ್ರಭವನ್ತೀಶೇ ತ್ವಂ ಬುದ್ಧಾ ಚೇತ್ಕಿಮು ವಕ್ತ್ವ್ಯಮ್ ॥ ೩೭೯॥
ಮೇಘಚ್ಛನ್ನೋಽಪ್ಯರುಣಸ್ತೇಜೋ ದದ್ಯಾದೇವ ಪ್ರಮದೇ ಜಿಷ್ಣೋಃ ।
ಅತ್ರಸ್ಥಾನಾಂ ಭವತೀಗ್ರನ್ಥಿಚ್ಛನ್ನಾಪ್ಯೇವಂ ಕುರುತೇ ಪ್ರಜ್ಞಾಮ್ ॥ ೩೮೦॥
ಧ್ಯಾಯಾಮೋ ಯತ್ಕಥಯಾಮೋ ಯತ್ಪಶ್ಯಾಮೋ ಯಚ್ಛೃಣುಮೋ ಯಚ್ಚ ।
ಜೀವಾಮೋ ವಾ ತದಿದಂ ಸರ್ವಂ ನಿದ್ರಾಣಾಯಾ ಅಪಿ ತೇ ಭಾಸಾ ॥ ೩೮೧॥
ನಾಡೀಬನ್ಧಾದಭಿಮಾನಾಚ್ಚ ಚ್ಛನ್ನಾ ಮಾತರ್ಭವತೀ ದೇಹೇ ।
ಏಕಾಪಾಯಾದಿತರೋ ನಶ್ಯೇತ್ತಸ್ಮಾದ್ದ್ವೇಧಾ ತಪಸಃ ಪನ್ಥಾಃ ॥ ೩೮೨॥
ಚಿತ್ತಂ ಯಸ್ಯ ಸ್ವಜನಿಸ್ಥಾನೇ ಪ್ರಜ್ಞಾ ಬಾಹ್ಯಾ ನ ಭವೇದ್ಯಸ್ಯ ।
ಆಧತ್ಸೇ ತ್ವಂ ಭುವನಾಧೀಶೇ ಬುದ್ಧಾ ಕ್ರೀಡಾಂ ಹೃದಯೇ ತಸ್ಯ ॥ ೩೮೩॥
ವಾಣೀ ಯಸ್ಯ ಸ್ವಜನಿಸ್ಥಾನೇ ದೂರೇ ಕೃತ್ವಾ ಮನಸಾ ಸಙ್ಗಮ್ ।
ಮಾತಸ್ತತ್ರ ಪ್ರತಿಬುದ್ಧಾ ತ್ವಂ ಶ್ಲೋಕೈರ್ಲೋಕಂ ಕುರುಷೇ ಬುದ್ಧಮ್ ॥ ೩೮೪॥
ಹಿತ್ವಾ ದೃಶ್ಯಾನ್ಯತಿಸೂಕ್ಷ್ಮಾಯಾಂ ಚಕ್ಷುರ್ಯಸ್ಯ ಸ್ವಮಹೋ ವೃತ್ತೌ ।
ವಿಶ್ವಾಽಲಿಪ್ತಾ ಜಗತಾಂ ಮಾತರ್ಜಾಗ್ರತ್ಯಸ್ಮಿನ್ನಚಲಾ ಭಾಸಿ ॥ ೩೮೫॥
ಶೃಣ್ವನ್ ಕರ್ಣೋ ದಯಿತೇ ಜಿಷ್ಣೋರನ್ತಃ ಶಬ್ದಂ ಧ್ರಿಯತೇ ಯಸ್ಯ ।
ಬುದ್ಧಾ ಭೂತ್ವಾ ವಿಯತಾ ಸಾಧೋರೇಕೀಭಾವಂ ಕುರುಷೇ ತಸ್ಯ ॥ ೩೮೬॥
ಯಾತಾಯಾತಂ ಸತತಂ ಪಶ್ಯೇದ್ಯಃ ಪ್ರಾಣಸ್ಯ ಪ್ರಯತೋ ಮರ್ತ್ಯಃ ।
ವಿಶ್ವಸ್ಯೇಷ್ಟಾಂ ತನುಷೇ ಕ್ರೀಡಾಂ ತಸ್ಮಿನ್ ಬುದ್ಧಾ ತರುಣೀನ್ದ್ರಸ್ಯ ॥ ೩೮೭॥
ಸ್ವಾನ್ತಂ ಯಸ್ಯ ಪ್ರಭವೇತ್ಕಾರ್ಯೇಷ್ವಮ್ಬೈತಸ್ಮಿನ್ನಯಿ ನಿದ್ರಾಸಿ ।
ಆತ್ಮಾ ಯಸ್ಯ ಪ್ರಭವೇತ್ಕಾರ್ಯೇಷ್ವಮ್ಬೈತಸ್ಮಿನ್ನಯಿ ಜಾಗರ್ಷಿ ॥ ೩೮೮॥
ಯಸ್ಯಾಽಹನ್ತಾ ಭವತಿ ಸ್ವಾನ್ತೇ ತಸ್ಯ ಸ್ವಾನ್ತಂ ಪ್ರಭವೇತ್ಕರ್ತುಮ್ ।
ಯಸ್ಯಾಽಹನ್ತಾ ಭವತಿ ಸ್ವಾತ್ಮನ್ಯಾತ್ಮಾ ತಸ್ಯ ಪ್ರಭವೇತ್ಕರ್ತುಮ್ ॥ ೩೮೯॥
ಸ್ವಾನ್ತಂ ಯಸ್ಯ ಪ್ರಭವೇತ್ಕರ್ತುಂ ತತ್ಕರ್ಮಾಲ್ಪಂ ಭವತಿ ವ್ಯಷ್ಟೇಃ ।
ಆತ್ಮಾ ಯಸ್ಯ ಪ್ರಭವೇತ್ಕರ್ತುಂ ತಚ್ಛ್ಲಾಧ್ಯಂ ತೇ ಬಲಜಿತ್ಕಾನ್ತೇ ॥ ೩೯೦॥
ಏತತ್ಸ್ವಾನ್ತಂ ಹೃದಯಾಜ್ಜಾತಂ ಶೀರ್ಷೇ ವಾಸಂ ಪೃಥಗಾಧಾಯ ।
ಹಾರ್ದಾಹನ್ತಾಂ ಸ್ವಯಮಾಕ್ರಮ್ಯ ಭ್ರಾನ್ತಾನಸ್ಮಾನ್ ಕುರುತೇ ಮಾತಃ ॥ ೩೯೧॥
ಅಸ್ಮಾಕಂ ಭೋಃ ಕುರುತೇ ಬಾಧಾಮಸ್ಮಜ್ಯೋತಿರ್ಜನನಿ ಪ್ರಾಪ್ಯ ।
ಸ್ವಾನ್ತೇ ನೈತತ್ಕೃತಮನ್ಯಾಯ್ಯಂ ಕಾನ್ತೇ ಜಿಷ್ಣೋಃ ಶೃಣು ರಾಜ್ಞಿ ತ್ವಮ್ ॥ ೩೯೨॥
ಸ್ವಾನ್ತೇ ತೇಜೋ ಹೃದಯಾದಾಯಾಚ್ಚನ್ದ್ರೇ ತೇಜೋ ದಿನಭರ್ತುರ್ವಾ ।
ಆಶ್ರಾನ್ತಂ ಯೋ ಮನುತೇ ಧೀರಸ್ತಸ್ಯ ಸ್ವಾನ್ತಂ ಹೃದಿ ಲೀನಂ ಸ್ಯಾತ್ ॥ ೩೯೩॥
ಮೂಲಾನ್ವೇಷಿಸ್ಫುರದಾವೃತ್ತಂ ನೀಚೈರಾಯಾತ್ಕಬಲೀಕೃತ್ಯ ।
ಜಾನನ್ತ್ಯೇಕಾ ಹೃದಯಸ್ಥಾನೇ ಯುಞ್ಜಾನಾನಾಂ ಜ್ವಲಸೀಶಾನೇ ॥ ೩೯೪॥
ಶೀರ್ಷೇ ಚನ್ದ್ರೋ ಹೃದಯೇ ಭಾನುರ್ನೇತ್ರೋ ವಿದ್ಯುತ್ಕುಲಕುಣ್ಡೇಽಗ್ನಿಃ ।
ಸಮ್ಪದ್ಯನ್ತೇ ಮಹಸಾಽಶೈಸ್ತೇ ಜಿಷ್ಣೋಃ ಕಾನ್ತೇ ಸುತರಾಂ ಶಸ್ತೇ ॥ ೩೯೫॥
ಮನ್ವಾನಾಂ ತ್ವಾಂ ಶಿರಸಿ ಸ್ಥಾನೇ ಪಶ್ಯನ್ತೀಂ ವಾ ನಯನಸ್ಥಾನೇ ।
ಚೇತನ್ತೀಂ ವಾ ಹೃದಯಸ್ಥಾನೇ ರಾಜನ್ತೀಂ ವಾ ಜ್ವಲನಸ್ಥಾನೇ ॥ ೩೯೬॥
ಯೋ ನಾ ಧ್ಯಾಯೇಜ್ಜಗತಾಂ ಮಾತಃ ಕಶ್ಚಿಚ್ಛ್ರೇಯಾನವನೌ ನಾಽತಃ ।
ಪೂತಂ ವನ್ದ್ಯಂ ಚರಣಂ ತಸ್ಯ ಶ್ರೇಷ್ಠಂ ವರ್ಣ್ಯಂ ಚರಿತಂ ತಸ್ಯ ॥ ೩೯೭॥
ದೋಗ್ಧ್ರೀಂ ಮಾಯಾಂ ರಸನಾಂ ವಾ ಯೋ ಮನ್ತ್ರಂ ಮಾತರ್ಜಪತಿ ಪ್ರಾಜ್ಞಃ ।
ಸೋಽಯಂ ಪಾತ್ರಂ ಕರುಣಾಯಾಸ್ತೇ ಸರ್ವಂ ಕಾಮ್ಯಂ ಲಭತೇ ಹಸ್ತೇ ॥ ೩೯೮॥
ಛಿನ್ನಾಂ ಭಿನ್ನಾಂ ಸುತರಾಂ ಸನ್ನಾಮನ್ನಾಭಾವಾದಭಿತಃ ಖಿನ್ನಾಮ್ ।
ಏತಾಂ ಪಾತುಂ ಭರತಕ್ಷೋಣೀಂ ಜಾಯೇ ಜಿಷ್ಣೋಃ ಕುರು ಮಾಂ ಶಕ್ತಮ್ ॥ ೩೯೯॥
ಕ್ಲೃಪ್ತೈಃ ಸಮ್ಯಗ್ಬೃಹತೀಛನ್ದಸ್ಯೇತೈರ್ಮಾತ್ರಸಮಕೈರ್ವೃತ್ತೈಃ ।
ಕರ್ಣಾಧ್ವಾನಂ ಪ್ರವಿಶದ್ಭಿಸ್ಸಾ ಪೌಲೋಮ್ಯಮ್ಬಾಪರಿತೃಪ್ತಾಸ್ತು ॥ ೪೦೦॥
॥ ಚತುರ್ಥಂ ಬಾರ್ಹತಂ ಶತಕಂ ಸಮಾಪ್ತಮ್ ॥
॥ ಅಥ ಪಞ್ಚಮಂ ಪಾಙ್ಕ್ತಂ ಶತಕಮ್ ॥
॥ ಪ್ರಥಮೋ ಮಯೂರಸಾರಿಣೀಪಾದಃ ॥
ಪ್ರೇಮವಾಸಭೂಮಿರಚ್ಛಭಾವಸ್ಥಾನಮಾನಮಜ್ಜನಾಘಹಾ ಮೇ ।
ಇನ್ದ್ರಸುನ್ದರೀ ಮುಖಾಬ್ಜಭಾಸೀ ಮನ್ದಹಾಸ ಆಪದಂ ಧುನೋತು ॥ ೪೦೧॥
ವೀಕ್ಷಿತೈಃ ಕೃಪಾನ್ವಿತೈರ್ಹರನ್ತೀ ಪಾತಕಾನಿ ಮಙ್ಗಲಂ ಭಣನ್ತೀ ।
ಜಮ್ಭಭೇದಿಜೀವಿತೇಶ್ವರೀ ಮೇ ಜನ್ಮದೇಶಮುಜ್ಜ್ವಲಂ ಕರೋತು ॥ ೪೦೨॥
ಅಮ್ಬರಂ ಚ ದೇವತಾನತಭ್ರೂರಮ್ಬ ತೇ ತನುದ್ವಯಂ ಯದುಕ್ತಮ್ ।
ಆದಿಮಾ ತಯೋರ್ವೃಷಾಕಪಿಂ ತಂ ದೇವ್ಯಜೀಜನತ್ಪರಾ ಜಯನ್ತಮ್ ॥ ೪೦೩॥
ಏತಮೇವ ದೇವಿ ಲೋಕಬನ್ಧುಂ ಸೂರಯೋ ವೃಷಾಕಪಿಂ ಭಣನ್ತಿ ।
ವರ್ಷಹೇತುದೀಧಿತಿರ್ವೃಷಾಯಂ ಕಂ ಪಿಬನ್ ಕರೈಃ ಕಪಿರ್ನಿರುಕ್ತ್ಃ ॥ ೪೦೪॥
ಕೇಚಿದಿನ್ದ್ರನಾರಿ ಚನ್ದ್ರರೇಖಾಶೇಖರಂ ವೃಷಾಕಪಿಂ ಗದನ್ತಿ ।
ಪಣ್ಡಿತಾಃ ಪರೇ ತು ಶೇಷಶಯ್ಯಾಶಾಯಿನಂ ವೃಷಾಕಪಿಂ ತಮಾಹುಃ ॥ ೪೦೫॥
ಬ್ರಹ್ಮಣಸ್ಪತಿಂ ತು ವೈದ್ಯುತಾಗ್ನೇರಂಶಜಂ ಮರುದ್ಗಣೇಷು ಮುಖ್ಯಮ್ ।
ವಿಶ್ವರಾಜ್ಞಿ ವಿಘ್ನರಾಜಮೇಕೇ ವಿಶ್ರುತಂ ವೃಷಾಕಪಿಂ ವದನ್ತಿ ॥ ೪೦೬॥
ಭಾಸ್ಕರಶ್ಚ ಶಙ್ಕ್ರಶ್ಚ ಮಾತರ್ಮಾಧವಶ್ಚ ಮನ್ತ್ರನಾಯಕಶ್ಚ ।
ಆತ್ಮಜೇಷು ತೇ ನ ಸನ್ತಿ ನಾನ್ತರ್ವ್ಯಾಪಕಾನ್ತರಿಕ್ಷವಿಗ್ರಹಾಯಾಃ ॥ ೪೦೭॥
ವಾಸವೋಽಪಿ ದೇವಿ ದೇವತಾತ್ಮಾ ವಲ್ಲಭಸ್ತವ ಚ್ಛಲಾಙ್ಗನಾಯಾಃ ।
ಆತ್ಮಜಾತ ಏವ ಕೀರ್ತನೀಯೋ ದೇವತಾಪಥೇನ ದೇಹವತ್ಯಾಃ ॥ ೪೦೮॥
ಸಾಶವಸ್ಯುದೀರಿತಾಸಿ ಧೀರೈರ್ದೇಹಿನೀ ವಿಹಾಯಸೇನ್ದ್ರಸೂಸ್ತ್ವಮ್ ।
ಲಿಙ್ಗಭೇದತೋಽನುರೂಪತಸ್ತತ್ಕೀರ್ತನಂ ಶವೋ ಹಿ ಶಕ್ತಿವಾಚಿ ॥ ೪೦೯॥
ನಾದಿತಿರ್ವಿಭಿದ್ಯತೇ ಶವಸ್ಯಾಸ್ಸರ್ವದೇವ ಮಾತರಂ ವಿದುರ್ಯಾಮ್ ।
ಸಾ ಮರುತ್ಪ್ರಸೂರಭಾಣಿ ಪೃಶ್ನಿಃ ಸಾಪಿ ಭಿದ್ಯತೇ ತತೋ ನ ದೇವ್ಯಾಃ ॥ ೪೧೦॥
ಶಕ್ತಿರೇವ ಸಾ ನ್ಯಗಾದಿ ಪೃಶ್ನಿಶ್ಶಕ್ತಿರೇವ ಸಾಽದಿತಿರ್ನ್ಯಭಾಣಿ ।
ಶಕ್ತಿರೇವ ಸಾಽಭ್ಯಧಾಯಿ ಭದ್ರಾ ಶಕ್ತಿರೇವ ಸಾ ಶವಸ್ಯವಾದಿ ॥ ೪೧೧॥
ವಿಜ್ಜನಃ ಪ್ರಕೃಷ್ಟಶಕ್ತಿಭಾಗಂ ಶಬ್ದಮೇವ ಪೃಶ್ನಿಮಾಹ ಧೇನುಮ್ ।
ಯಾ ಪರೈರ್ಬುಧೈರಭಾಣಿ ಗೌರೀ ಮಾನವೇಷ್ಟಭಾಷಯೈವ ನಾರೀ ॥ ೪೧೨॥
ವ್ಯಾಪಕತ್ವಕಲ್ಪಿತಂ ವಿಶಾಲಂ ದೇಶಮೇವ ಶಕ್ತಿಭಾಗಮಾಹುಃ ।
ಬುದ್ಧಿಶಾಲಿನೋಽದಿತಿಂ ಸವಿತ್ರೀಂ ಯಾ ಪರೈರ್ವಿಚಕ್ಷಣೈಃ ಸ್ಮೃತಾ ದ್ಯೌಃ ॥ ೪೧೩॥
ನಿತ್ಯಮೋದರೂಪಶಕ್ತಿಭಾಗಂ ಪಣ್ಡಿತಾಃ ಪ್ರಕೀರ್ತಯನ್ತಿ ಭದ್ರಾಮ್ ।
ಉಕ್ತಿಭೇದಚಾತುರೀಪ್ರಲುಬ್ಧಾಃ ಸೂರಯಃ ಪರೇ ಶಿವಾಂ ಜುಗುರ್ಯಾಮ್ ॥ ೪೧೪॥
ವೀರ್ಯರೂಪಭಾಗ ಏವ ಗಣ್ಯಃ ಪಣ್ಡಿತೈಃ ಶವಸ್ಯಭಾಣಿ ಶಕ್ತೇಃ ।
ಓಜಸೋ ನ ಸೋಽತಿರಿಚ್ಯ ತೇಂಶೋ ಭಿದ್ಯತೇ ತತೋ ನ ವಜ್ರಮುಗ್ರಮ್ ॥ ೪೧೫॥
ವಜ್ರಮೇವ ಭಾಷಯಾ ಪರೇಷಾಮುಚ್ಯತೇ ಪ್ರಚಣ್ಡಚಣ್ಡಿಕೇತಿ ।
ಯದ್ವಿಭೂತಿಲೇಶಚುಮ್ಬಿತಾತ್ಮಾ ಜೀಯತೇ ನ ಕೇನಚಿತ್ಪೃಥಿವ್ಯಾಮ್ ॥ ೪೧೬॥
ಸರ್ವತೋ ಗತಿಶ್ಶಚೀತಿ ಶಕ್ತಿಃ ಕೀರ್ತ್ಯತೇ ಬುಧೈರುದಾರಕೀರ್ತಿಃ ।
ಸರ್ವಭಾಗವಾಚಕಂ ಪದಂ ತತ್ ಪಾವನಂ ಪುರಾತನಂ ಪ್ರಿಯಂ ನಃ ॥ ೪೧೭॥
ಯಶ್ಶಚೀತಿ ನಾಮಕೀರ್ತಯೇನ್ನಾ ಪುಷ್ಕರೇಣ ತೇ ಶರೀರವತ್ಯಾಃ ।
ದಿವ್ಯಸುನ್ದರೀ ತನೋರುತಾಹೋ ತಂ ಪರಾಭವೇನ್ನ ದೇವಿ ಪಾಪಮ್ ॥ ೪೧೮॥
ಅಮ್ಬರಂ ವರಂ ತವಾಮ್ಬ ಕಾಯಂ ಯಸ್ಸದಾ ವಿಲೋಕಯನ್ನೌಪಾಸ್ತೇ ।
ಲೋಕಜಾಲಚಕ್ರವರ್ತಿಜಾಯೇ ತಂ ಪರಾಭವೇನ್ನ ದೇವಿ ಪಾಪಮ್ ॥ ೪೧೯॥
ಪೂರ್ಣಿಮಾಸುಧಾಂಶುಬಿಮ್ಬವಕ್ತ್ರಂ ಫುರ್ವಿಂಆರಿಜಾತಪತ್ರನೇತ್ರಮ್ ।
ಶುಭ್ರತಾನಿಧಾನಮನ್ದಹಾಸಂ ಕಾಲಮೇಘಕಲ್ಪಕೇಶಪಾಶಮ್ ॥ ೪೨೦॥
ರತ್ನ್ದರ್ಪಣಾಭಮಞ್ಜುಗಣ್ಡಂ ಚಮ್ಪಕಪ್ರಸೂನಚಾರುನಾಸಮ್ ।
ಕುನ್ದಕುಡ್ಮಲಾಭಕಾನ್ತದನ್ತಂ ಕಲ್ಪಪರ್ವಿಂಆಭದನ್ತಚೇಲಮ್ ॥ ೪೨೧॥
ಸದ್ವರಾಭಯಪ್ರದಾಯಿಹಸ್ತಂ ಸರ್ವದೇವವನ್ದ್ಯಪಾದಕಞ್ಜಮ್ ।
ದಿವ್ಯರತ್ನಭೂಷಣೈರನರ್ಘೈರ್ಭೂಷಿತಂ ಕನತ್ಸುವರ್ಣವರ್ಣಮ್ ॥ ೪೨೨॥
ದಿವ್ಯಶುಕ್ಲ್ವಸ್ತ್ರಯುಗ್ಮಧಾರಿ ಸ್ವರ್ಗಸಾರ್ವಭೋಮನೇತ್ರಹಾರಿ ।
ಯಃ ಸ್ಮರೇದ್ವರಾಙ್ಗನಾವಪುಸ್ತೇ ತಂ ಪರಾಭವೇನ್ನ ದೇವಿ ಪಾಪಮ್ ॥ ೪೨೩॥
ಭಾರತಕ್ಷಿತೇರಿದಂ ಜನನ್ಯಾಶ್ಶೋಕಜನ್ಯಬಾಷ್ಪವಾರಿ ಹರ್ತುಮ್ ।
ದೇಹಿ ಶಕ್ತಿಮಾಶ್ರಿತಾಯ ಮಹ್ಯಂ ಪಾಹಿ ಧರ್ಮಮಿನ್ದ್ರಚಿತ್ತನಾಥೇ ॥ ೪೨೪॥
ಸದ್ವಸಿಷ್ಠಸನ್ತತೇರಿಮಾಭಿಸ್ಸತ್ಕವೇರ್ಮಯೂರಸಾರಿಣೀಭಿಃ ।
ಸಮ್ಮದಂ ಪ್ರಯಾತು ಶಕ್ರಚೇತಸ್ಸಮ್ಪ್ರಮೋಹಿನೀಸರೋಜನೇತ್ರ ॥ ೪೨೫॥
॥ ದ್ವಿತೀಯೋ ಮನೋರಮಾಪಾದಃ ॥
ಹಸಿತಮಾತತಾಯಿಪಾತಕಪ್ರಮಥನಪ್ರಸಿದ್ಧವಿಕ್ರಮಮ್ ।
ಅಮರಭೂಮಿಪಾಲಯೋಷಿತೋ ಮಮ ಕರೋತು ಭೂರಿಮಙ್ಗಲಮ್ ॥ ೪೨೬॥
ಕರುಣಯಾ ಪ್ರಚೋದಿತಾ ಕ್ರಿಯಾದ್ಭರತಭೂಮಿಮಕ್ಷಯಶ್ರಿಯಮ್ ।
ಚರಣಕಞ್ಜರಾಜದಿನ್ದಿರಾ ಸುರನರೇಶ್ವರಸ್ಯ ಸುನ್ದರೀ ॥ ೪೨೭॥
ನ ಭವನಂ ನ ವಾ ಜಗತ್ಪೃಥಙ್ನಿವಸನಾಯ ತೇ ಸುರಾರ್ಚತೇ ।
ಯದಖಿಲಾನಿ ವಿಷ್ಟಪಾನಿ ತೇ ವಪುಷಿ ಸರ್ವಮನ್ದಿರಾಣಿ ಚ ॥ ೪೨೮॥
ಮತಿದವಿಷ್ಠಸೀಮಭಾಸುರಂ ತವ ಶರೀರಮೇವ ಪುಷ್ಕರಮ್ ।
ಪರಮಪೂರುಷಸ್ಯ ವಲ್ಲಭೇ ಭುವನಮೇಕಮುಚ್ಯತೇ ಬುಧೈಃ ॥ ೪೨೯॥
ತರಣಯಸ್ಸುಧಾಂಶವಸ್ತಥಾ ಸಹ ಭುವಾ ಗ್ರಹಾಃ ಸಹಸ್ರಶಃ ।
ಅಯಿ ಜಗನ್ತಿ ವಿಸ್ತೃತಾನಿ ತೇ ವಪುಷಿ ಪುಷ್ಕರೇ ಜಗತ್ಯಜೇ ॥ ೪೩೦॥
ಬಹುಭಿರುಷ್ಣಭಾನುಭಿಕ್ರ್ತತಾತ್ ಬಹುಭಿರಿನ್ದುಭಿರ್ವಶೀಕೃತಾತ್ ।
ವಿಯತಿ ಲೋಕಜಾಲಧಾತ್ರಿ ತೇ ಶತಗುಣಂ ಬಲಂ ಪ್ರಶಿಶ್ಯತೇ ॥ ೪೩೧॥
ನ ವಿಭುರೇಕಕಸ್ಯ ಭಾಸ್ವತೋ ವಿಭವಮೇವ ನಾ ಪ್ರಭಾಷಿತುಮ್ ।
ಕಿಮುತ ತೇ ದಧಾಸಿ ಯೋದರೇ ದ್ಯುತಿಮತಾಂ ಶತಾನಿ ತಾದೃಶಾಮ್ ॥ ೪೩೨॥
ಇಹ ವಿಹಾಯಸಾ ಶರೀರಿಣೀಮತಿಸಮೀಪವಾಸಿನೀಮಪಿ ।
ನ ಖಲು ಕೋಽಪಿ ಲೋಕಿತುಂ ಪ್ರಭುರ್ಭಗವತೀಂ ಪರಾಮಯುಕ್ತಧೀಃ ॥ ೪೩೩॥
ತದಿದಮುಚ್ಯತೇ ಜನೋ ಜಗದ್ವಪುರಮೇಯಮಾದಿದೇವಿ ತೇ ।
ಜನಯತೇ ಯತೋಽಖಿಲಂ ದೃಶೋರ್ವಿಷಯಭೂತಮೇತದಾತತಮ್ ॥ ೪೩೪॥
ಬಹುಲತಾರಕಾಗಣೈರ್ಯುತಂ ಕಿಮಪಿ ಖಂ ತವೇಹ ವರ್ಷ್ಮಣಿ ।
ಶಚಿ ವಿಭಜ್ಯ ಭಾಷಯೈಕಯಾ ಸುಕವಯೋ ಮಹೋಜಗದ್ವಿದುಃ ॥ ೪೩೫॥
ಇದಮಿನೇನ್ದುಭೂವಿಲಕ್ಷಣೈರ್ದಿನಕರೈಸ್ಸುಧಾಕರೈರ್ಗ್ರಹೈಃ ।
ಬಹುಜಗದ್ಭಿರನ್ವಿತಂ ಮಹೋಜಗದಶೇಷಧಾತ್ರಿ ನೈಕಕಮ್ ॥ ೪೩೬॥
ಅಜರಮವ್ಯಯಂ ಸನಾತನಂ ಮುನಿಜನೈಕವೇದ್ಯವೈಭವಮ್ ।
ನ ಭವತೀಂ ವಿನಾ ತಪೋಜಗತ್ಪೃಥಗಶೇಷನಾಥನಾಯಿಕೇ ॥ ೪೩೭॥
ಸಕಲದೃಶ್ಯಮೂಲಕಾರಣಂ ತವ ಚ ಸಂಶ್ರಯೋ ನಿರಾಶ್ರಯಃ ।
ಜನನಿ ಸತ್ಯಲೋಕ ಸಂಜ್ಞಯಾ ಪರಮಪೂರುಷೋಽಭಿಧೀಯತೇ ॥ ೪೩೮॥
ಅಯಿ ಪುರಾತನರ್ಷಿಭಾಷಯಾ ಗಗನಮೇತದಾಪ ಈರಿತಾಃ ।
ಅಥ ಯದಾಸುವೀರ್ಯಮುಜ್ಝಿತಂ ಭಗವತಸ್ತ್ವಮೇವ ತತ್ಪರೇ ॥ ೪೩೯॥
ಶಚಿ ವಿರಾಡ್ಭವತ್ಯಭಾಷತ ಶ್ರುತಿರಪೀದಮೇವ ನಾಮ ತೇ ।
ವಿತತವಿಶ್ವವಿಗ್ರಹಾತ್ಮನಿ ಪ್ರಥಿತಮೇತದಾಹ್ಮಯಂ ಪರಮ್ ॥ ೪೪೦॥
ಉಪನಿಷದ್ಗಿರಾ ವಿರಾಡ್ವಧೂಃ ಪುರುಷ ಏಷ ಭಾಷಯಾನ್ಯಯಾ ।
ಉಭಯಥಾಪಿ ಸಾಧು ತತ್ಪದಂ ಭವತಿ ತೇ ನ ಸಂಶಯಾಸ್ಪದಮ್ ॥ ೪೪೧॥
ನ ವನಿತಾ ನ ವಾ ಪುಮಾನ್ ಭವೇಜ್ಜಗತಿ ಯೋಽನ್ತರಶ್ಶರೀರಿಣಾಮ್ ।
ತನುಷು ಲಿಙ್ಗಭೇದದರ್ಶನಾತ್ ತನುಮತಶ್ಚ ಲಿಙ್ಗಮುಚ್ಯತೇ ॥ ೪೪೨॥
ಅಖಿಲನಾಥವೀರ್ಯಧಾರಣಾನ್ನ್ಗನಭೂಮಿರಙ್ಗನಾಮತಾ ।
ಸಕಲಲೋಕಬೀಜಭೃತ್ತ್ವತೋ ಗಗನದೇಶ ಏಷ ಪೂರುಷಃ ॥ ೪೪೩॥
ಸ್ಫುಟವಿಭಕ್ತಗಾತ್ರಲಕ್ಷ್ಮಣಾಂ ನಿಯತವಾದಿನಾಮದರ್ಶನಾತ್ ।
ನ ಪುರುಷೋ ವಿಯದ್ಯಥಾ ವಯಂ ನ ವನಿತಾ ವಿಯದ್ಯಥೈವ ನಃ ॥ ೪೪೪॥
ಅಭಿವಿಮಾನತೋಽಥ ವಾ ಶಚೀ ವಿಬುಧರಾಜಯೋರ್ವಿಲಕ್ಷಣಾತ್ ।
ವರವಿಲಸಿನೀ ವಿಯತ್ತನುಸ್ಸದವಿಕಾರಮುತ್ತಮಃ ಪುಮಾನ್ ॥ ೪೪೫॥
ಹೃದಯಮಲ್ಪಮಪ್ಯದೋ ಜನನ್ಯನವಮಂ ವಿಶಾಲಪುಷ್ಕರಾತ್ ।
ವಿಮಲದೇಹದುರ್ಗಮಧ್ಯಗಂ ಸಕಲರಾಜ್ಞಿ ಸೌಧಮಸ್ತು ತೇ ॥ ೪೪೬॥
ವಿಕಸಿತಂ ನಿಜಾಂಶುವೀಚಿಭಿಕ್ರ್ತದಯಮಾಲಯಂ ವಿಶಾಮ್ಬ ಮೇ ।
ವಿಕಚಮುಷ್ಣಭಾನುಭಾನುಭಿರ್ದಶಶತಚ್ಛದಂ ಯಥಾ ರಮಾ ॥ ೪೪೭॥
ಹೃದಯಸಾಧುಸೌಧಶಾಯಿನೀಂ ನಯನರಮ್ಯಹರ್ಮ್ಯಚಾರಿಣೀಮ್ ।
ಭುವನರಾಜಚಿತ್ತಮೋಹಿನೀಂ ನಮತ ತಾಂ ಪರಾಂ ವಿಲಾಸಿನೀಮ್ ॥ ೪೪೮॥
ತವ ಪರೇ ಮರೀಚಿವೀಚಯಸ್ತನುಗುಹಾಂ ಪ್ರವಿಶ್ಯ ವಿಶ್ರುತೇ ।
ಭರತಭೂಮಿರಕ್ಷಣೋದ್ಯತಂ ಗಣಪತಿಂ ಕ್ರಿಯಾಸುರುಜ್ಜ್ವಲಮ್ ॥ ೪೪೯॥
ಗಣಪತೇರ್ಮನೋರಮಾ ಇಮಾಸ್ಸುಗುಣವೇದಿನಾಂ ಮನೋರಮಾಃ ।
ಅವಹಿತಾ ಶೃಣೋತು ಸಾದರಂ ಸುರಮಹೀಪತೇರ್ಮನೋರಮಾಃ ॥ ೪೫೦॥
॥ ತೃತೀಯೋ ಮಣಿರಾಗಪಾದಃ ॥
ಜ್ಯೋತಿಷಾಂ ನೃಪತಿಃ ಸಕಲಾನಾಂ ಶಾನ್ತಿಮೇವ ಸದಾಭಿದಧಾನಃ ।
ನಿರ್ಮಲೋ ಹರತಾತ್ಸುರರಾಜ್ಞೀಮನ್ದಹಾಸಲವೋ ಮಮ ಪಾಪಮ್ ॥ ೪೫೧॥
ದುಷ್ಟಲೋಕದವಿಷ್ಠಪದಾಬ್ಜಾ ಶಿಷ್ಟಶೋಕನಿವಾರಣದಕ್ಷಾ ।
ನಾಕಲೋಕಮಹೀಪತಿರಾಮಾ ಭಾರತಸ್ಯ ಧುನೋತ್ವಸುಖಾನಿ ॥ ೪೫೨॥
ದೇವಮೌಲಿಮಣೀಕಿರಣೇಭ್ಯೋ ವಿಕ್ರಮಂ ಸ್ವಯಮೇವ ದದಾನಾ ।
ದೇವರಾಜವಧೂಪದಪದ್ಮಶ್ರೀಸ್ತನೋತು ಸದಾ ಮಮ ಭದ್ರಮ್ ॥ ೪೫೩॥
ದೇವಿ ತೇ ವದನಂ ಬಹುಕಾನ್ತಂ ಸಾಕ್ಷಿ ತತ್ರ ಪುರನ್ದರಚೇತಃ ।
ಅಮ್ಬ ತೇ ಚರಣಾವತಿಕಾನ್ತಾವತ್ರ ಸಾಕ್ಷಿ ಮನಃ ಸ್ಮರತಾಂ ನಃ ॥ ೪೫೪॥
ಭಾಸುರಂ ಸುರಸಂಹತಿವನ್ದ್ಯಂ ಸುನ್ದರಂ ಹರಿಲೋಚನಹಾರಿ ।
ಪಾವನಂ ನತಪಾಪವಿದಾರಿ ಸ್ವರ್ಗರಾಜ್ಞಿ ಪದಂ ತವ ಸೇವೇ ॥ ೪೫೫॥
ಜಙ್ಘಿಕೇ ಜಯತಸ್ತವ ಮಾತಃ ಸ೪ ಏವ ರುಚಾಂ ಯದಧೀನಃ ।
ವಾಸವಸ್ಯ ದೃಶಾಂ ಚ ಸಹಸ್ರಂ ಯದ್ವಿಲೋಕನಲೋಭವಿನಮ್ರಮ್ ॥ ೪೫೬॥
ಸಕ್ಥಿನೀ ತವ ವಾಸವಕಾನ್ತೇ ರಾಮಣೀಯಕಸಾರನಿಶಾನ್ತೇ ।
ವನ್ದತೇ ವಿನಯೇನ ಮಮೇಯಂ ವನ್ದಿನಸ್ತವ ಪಾವನಿ ವಾಣೀ ॥ ೪೫೭॥
ಇನ್ದ್ರನಾರಿ ಕಟಿಸ್ತವ ಪೃಥ್ವೀಮಣ್ಡಲಸ್ಯತುಲಾ ಮಹನೀಯೇ ।
ಮಧ್ಯಮೋ ನಭಸಃ ಪ್ರತಿಮಾನಂ ಭೋಗಿನಾಂ ಭುವನಸ್ಯ ಚ ನಾಭಿಃ ॥ ೪೫೮॥
ಧೀರತಾಂ ಕುರುತೇ ವಿಗತಾಸುಂ ಸಾ ಸುಪರ್ವಪತೇರ್ನಿಶಿತಾಗ್ರಾ ।
ಸಾ ತವಾಮ್ಬ ಮನೋಭವಶಸ್ತ್ರೀ ರೋಮರಾಜಿರಘಂ ಮಮ ಹನ್ತು ॥ ೪೫೯॥
ರೋಮರಾಜಿಭುಜಙ್ಗಶಿಶುಸ್ತೇ ದೇವಿ ದೇವಪತೇರ್ಹೃದಯಸ್ಯ ।
ದಂಶನೇನ ಕರೋತ್ಯಯಿ ಮೋಹಂ ಜೀವಿತಾಯ ಚಿರಾಯ ವಿಚಿತ್ರಮ್ ॥ ೪೬೦॥
ಪೂರ್ಣಹೇಮಘಟವಿವ ಶಕ್ರಾವಾಹಿತಾಂ ದಧತಾವಯಿ ಶಕ್ತಿಮ್ ।
ವಿಶ್ವಪೋಷಣಕರ್ಮಣಿ ದಕ್ಷಾವಮ್ಬ ದುಗ್ಧಧರೌ ಜಯತಸ್ತೇ ॥ ೪೬೧॥
ಲೋಕಮಾತರುರೋರುಹಪೂರ್ಣಸ್ವರ್ಣಕುಮ್ಭಗತಾ ತವ ಶಕ್ತಿಃ ।
ಲೋಕಪಾಲನಕರ್ಮಣಿ ವೀರ್ಯಂ ದೇವಿ ವಜ್ರಧರಸ್ಯ ಬಿಭರ್ತಿ ॥ ೪೬೨॥
ಅಕ್ಷಯಾಮೃತಪೂರ್ಣಘಟೌ ತೇ ಶಕ್ರಪತ್ನಿ ಕುಚೈ ತವ ಪೀತ್ವಾ ।
ಲೋಕಬಾಧಕಭೀಕರರಕ್ಷೋ ಧೂನನೇ ಪ್ರಬಭೂವ ಜಯನ್ತಃ ॥ ೪೬೩॥
ಹಸ್ತಯೋಸ್ತವ ಮಾರ್ದವಮಿನ್ದ್ರೋ ಭಾಷತಾಂ ಸುಷಮಾಮಪಿ ದೇವಃ ।
ದಾತೃತಾಮನಯೋರ್ಮುನಿವರ್ಗೋ ವರ್ಣಯತ್ಯಜರೇ ಪಟುತಾಂ ಚ ॥ ೪೬೪॥
ಪುಷ್ಪಮಾಲ್ಯಮೃದೋರಪಿ ಬಾಹೋಃ ಶಕ್ತಿರುಗ್ರತಮಾಶರನಾಶೇ ।
ದೃಶ್ಯತೇ ಜಗತಾಮಧಿಪೇ ತೇ ಭಾಷತಾಂ ತವ ಕಸ್ತನುತತ್ತ್ವಮ್ ॥ ೪೬೫॥
ಕಮ್ಬುಕಣ್ಠಿ ತವೇಶ್ವರಿ ಕಣ್ಠಸ್ತಾರಹಾರವಿತಾನವಿರಾಜೀ ।
ದೇವರಾಡ್ಭುಜಲೋಚನಪಥ್ಯೋ ದೇವಿ ಮೇ ಭಣತಾದ್ಬಹುಭದ್ರಮ್ ॥ ೪೬೬॥
ಆನನಸ್ಯ ಗಭಸ್ತಿನಿಧೇಸ್ತೇ ರಾಮಣೀಯಕಮದ್ಭುತಮೀಷ್ಟೇ ।
ಅಪ್ಯಮರ್ತ್ಯನುತಾಖಿಲಸಿದ್ಧೇರ್ವಾಸವಸ್ಯ ವಶೀಕರಣಾಯ ॥ ೪೬೭॥
ನ ಪ್ರಸನ್ನಮಲಂ ರವಿಬಿಮ್ಬಿಂ ಚನ್ದ್ರಬಿಮ್ಬಮತೀವ ನ ಭಾತಿ ।
ಸುಪ್ರಸನ್ನಮಹೋಜ್ಜ್ವಲಮಾಸ್ಯಂ ಕೇನ ಪಾವನಿ ತೇ ತುಲಯಾಮಃ ॥ ೪೬೮॥
ಲೋಚನೇ ತವ ಲೋಕಸವಿತ್ರಿ ಜ್ಯೋತಿಷಃ ಶವಸಶ್ಚ ನಿಧಾನೇ ।
ವಕ್ತುಮಬ್ಜಸಮೇ ನನು ಲಜ್ಜೇ ಧೋರಣೀಮನುಸೃತ್ಯ ಕವೀನಾಮ್ ॥ ೪೬೯॥
ಆಯತೋಜ್ಜ್ವಲಪಕ್ಷ್ಮಲನೇತ್ರಾ ಚಮ್ಪಕಪ್ರಸವೋಪಮನಾಸಾ ।
ರತ್ನದರ್ಪಣರಮ್ಯಕಪೋಲಾ ಶ್ರೀಲಿಪಿದ್ಯುತಿಸುನ್ದರಕರ್ಣಾ ॥ ೪೭೦॥
ಅಷ್ಟಮೀಶಶಿಭಾಸುರಭಾಲಾ ವಿಷ್ಟಪತ್ರಯಚಾಲಕಲೀಲಾ ।
ಸ್ಮೇರಚಾರುಮುಖೀ ಸುರಭರ್ತುಃ ಪ್ರೇಯಸೀ ವಿದಧಾತು ಶಿವಂ ಮೇ ॥ ೪೭೧॥
ಮನ್ದಹಾಸಲವೇಷು ವಲಕ್ಷಾ ಮೇಚಕಾ ಚಿಕುರಪ್ರಕರೇಷು ।
ಶೋಣತಾಮಧರೇ ದಧತೀ ಸಾ ರಕ್ಷತು ಪ್ರಕೃತಿಸ್ತ್ರಿಗುಣಾ ನಃ ॥ ೪೭೨॥
ಸರ್ವಲೋಕವಧೂಜನಮಧ್ಯೇ ಯಾಂ ಶ್ರುತಿಸ್ಸುಭಗಾಮಭಿಧತ್ತೇ ।
ಯಾ ದಿವೋ ಜಗತೋ ರುಚಿಸಾರಸ್ತಾಂ ನಮಾಮಿ ಪುರನ್ದರರಾಮಾಮ್ ॥ ೪೭೩॥
ಸ್ವರ್ಗಭೂಪತಿಲೋಚನಭಾಗ್ಯಶ್ರೀಶ್ಶರೀರವತೀ ಜಲಜಾಕ್ಷೀ ।
ಭಾರತಸ್ಯ ಕರೋತು ಸಮರ್ಥಂ ರಕ್ಷಣೇ ನರಸಿಂಹತನೂಜಮ್ ॥ ೪೭೪॥
ಲೋಕಮಾತುರಿಮೇ ರಮಣೀಯಾಃ ಪಾಕಶಾಸನಚಿತ್ತರಮಣ್ಯಾಃ ।
ಅರ್ಪಿತಾಃ ಪದಯೋರ್ವಿಜಯನ್ತಾಂ ಸತ್ಕವೇಃ ಕೃತಯೋ ಮಣಿರಾಗಾಃ ॥ ೪೭೫॥
॥ ಚತುರ್ಥೋ ಮೇಘವಿತಾನಪಾದಃ ॥
ಅಮರಕ್ಷಿತಿಪಾಲಕಚೇತೋ ಮದನಂ ಸದನಂ ಶುಚಿತಾಯಾಃ ।
ಸ್ಮಿತಮಾದಿವಧೂವದನೋತ್ತ್ಥಂ ಹರತಾದಖಿಲಂ ಕಲುಷಂ ಮೇ ॥ ೪೭೬॥
ಸುತರಾಮಧನಾಮತಿಖಿನ್ನಾಮಧುನಾ ಬಹುಲಂ ವಿಲಪನ್ತೀಮ್ ।
ಪರಿಪಾತು ಜಗತ್ತ್ರಯನೇತ್ರೀ ಭರತಕ್ಷಿತಿಮಿನ್ದ್ರಪುರನ್ಧ್ರೀ ॥ ೪೭೭॥
ಸ್ಥಲಮೇತದಮರ್ತ್ಯನೃಪಾಲಪ್ರಮದೇ ತವ ಮೇಘವಿತಾನಮ್ ।
ಅಯಿ ಯತ್ರ ಪರಿಸ್ಫುಸೀಶೇ ತಟಿದುಜ್ಜ್ವಲವೇಷಧರಾ ತ್ವಮ್ ॥ ೪೭೮॥
ತಟಿತಾ ತವ ಭೌತಿಕತನ್ವಾ ಜಿತಮಮ್ಬುಧರೇ ವಿಲಸನ್ತ್ಯಾ ।
ಉಪಮಾ ಭುವಿ ಯಾ ಲಲಿತಾನಾಂ ಯುವಚಿತ್ತಹೃತಾಂ ವನಿತಾನಾಮ್ ॥ ೪೭೯॥
ಸ್ಫುರಿತಂ ತವ ಲೋಚನಹಾರಿ ಸ್ತನಿತಂ ತವ ಧೀರಗಭೀರಮ್ ।
ರಮಣೀಯತಯಾ ಮಿಲಿತಾ ತೇ ಶಚಿ ಭೀಕರತಾ ಚಪಲಾಯಾಃ ॥ ೪೮೦॥
ಚಪಲೇ ಶಚಿ ವಿಸ್ಫುರಸೀನ್ದ್ರಂ ಘನಜಾಲಪತಿಂ ಮದಯನ್ತೀ ।
ದಿತಿಜಾತಮವಗ್ರಹಸಂಜ್ಞಂ ಜನದುಃಖಕರಂ ದಮಯನ್ತೀ ॥ ೪೮೧॥
ಪ್ರಭುಮಭ್ರಪತಿಂ ರಮಯನ್ತೀ ದುರಿತಂ ನಮತಾಂ ಶಮಯನ್ತೀ ।
ಹರಿತಾಂ ತಿಮಿರಾಣಿ ಹರನ್ತೀ ಪವಮಾನಪಥೇ ವಿಲಸನ್ತೀ ॥ ೪೮೨॥
ಅಲಘುಸ್ತನಿತಂ ವಿದಧಾನಾ ಬಲಮುಗ್ರತಮಂ ಚ ದಧಾನಾ ।
ಹೃದಯಾವರಕಂ ಮಮ ಮಾಯಾಪಟಲಂ ತಟಿದಾಶು ಧುನೋತು ॥ ೪೮೩॥
ಸುರಪಾರ್ಥವಜೀವಿತನಾಥೇ ನಿಖಿಲೇ ಗಗನೇ ಪ್ರವಹನ್ತ್ಯಾಃ ।
ತಟಿತಸ್ತವ ವೀಚಿಷು ಕಾಚಿಚ್ಚಪಲಾ ಲಸತೀಹ ಪಯೋದೇ ॥ ೪೮೪॥
ವಿಬುಧಪ್ರಣುತೇ ಧನಿಕಾನಾಂ ಭವನೇಷು ಭವನ್ತ್ಯಯಿ ದೀಪಾಃ ।
ಪಟುಯನ್ತ್ರಬಲಾದುದಿತಾನಾಂ ತವ ದೇವಿ ಲವಾಃ ಕಿರಣಾನಾಮ್ ॥ ೪೮೫॥
ವ್ಯಜನಾನಿ ಚ ಚಾಲಯಸಿ ತ್ವಂ ಬತ ಸರ್ವಜಗನ್ನಋಪಜಾಯೇ ।
ವಿಬುಧೋಽಭಿದಧಾತ್ವಥವಾ ಕೋ ಮಹತಾಂ ಚರಿತಸ್ಯ ರಹಸ್ಯಮ್ ॥ ೪೮೬॥
ಇಹ ಚಾಲಿತ ಈಡ್ಯಮನೀಷೈರಯಿ ಯನ್ತ್ರವಿಶೇಷವಿಧಿಜ್ಞೈಃ ।
ಬಹುಲಾದ್ಭುತಕಾರ್ಯಕಲಾಪಸ್ತಟಿತಸ್ತವ ಮಾತರಧೀನಃ ॥ ೪೮೭॥
ಅಚರಸ್ತರುಗುಲ್ಮಲತಾದಿಃ ಸಕಲಶ್ಚ ಚರೋ ಭುವಿ ಜನ್ತುಃ ।
ಅನಿತಿ ಪ್ರಮದೇ ಸುರಭರ್ತುಸ್ತಟಿತಸ್ತವ ದೇವಿ ಬಲೇನ ॥ ೪೮೮॥
ಮನುತೇ ನಿಖಿಲೋಽಪಿ ಭವತ್ಯಾ ಮನುಜೋಽನಿತಿ ವಕ್ತಿಶೃಣೋತಿ ।
ಅವಲೋಕಯತೇ ಚ ಭಣಾಮಃ ಕಿಮು ತೇ ಜಗದಮ್ಬ ವಿಭೂತಿಮ್ ॥ ೪೮೯॥
ಅತಿಸೂಕ್ಷ್ಮಪವಿತ್ರಸುಷುಮ್ಣಾಪಥತಸ್ತನುಷು ಪ್ರಯತಾನಾಮ್ ।
ಕುಲಕುಣ್ಡಕೃಶಾನುಶಿಖಾ ತ್ವಂ ಜ್ವಲಸಿ ತ್ರಿದಶಾಲಯನಾಥೇ ॥ ೪೯೦॥
ಇತರೋ ನ ಸುರಕ್ಷಿತಿಪಾಲಾತ್ಕುಲಕುಣ್ಡಗತೋ ಜ್ವಲನೋಽಯಮ್ ।
ಇತರೇನ್ದ್ರವಿಲಾಸಿನಿ ನ ತ್ವತ್ಕುಲಕುಣ್ಡಕೃಶಾನುಶಿಖೇಯಮ್ ॥ ೪೯೧॥
ಕುಲಕುಣ್ಡಕೃಶಾನುಶಿಖಾಯಾಃ ಕಿರಣೈಃ ಶಿರಸಿ ಸ್ಥಿತ ಏಷಃ ।
ದ್ರವತೀನ್ದುರನಾರತಮೇತದ್ವಪುರಾತ್ಮಮಯಂ ವಿದಧಾನಃ ॥ ೪೯೨॥
ಮದಕೃದ್ಬಹುಲಾಮೃತಧಾರಾಪರಿಪೂತಮಿದಂ ಮಮ ಕಾಯಮ್ ।
ವಿದಧಾಸಿ ಭಜನ್ಮನುಜಾಪ್ತೇ ಕುಲಕುಣ್ಡಧನಂಜಯದೀಪ್ತೇ ॥ ೪೯೩॥
ಶಿರಸೀಹ ಸತಃ ಸಿತಭಾನೋರಮೃತೇನ ವಪುರ್ಮದಮೇತಿ ।
ಹೃದಿ ಭಾತ ಇನಸ್ಯ ಚ ಭಾಸಾ ಮತಿಮೇತು ಪರಾಂ ಶಚಿ ಚೇತಃ ॥ ೪೯೪॥
ಮಮ ಯೋಗಮದೇನ ನ ತೃಪ್ತಿನಿಜದೇಶದಶಾವ್ಯಥಿತಸ್ಯ ।
ಅವಗನ್ತುಮುಪಾಯಮಮೋಘಂ ಶಚಿ ಭಾಸಯ ಮೇ ಹೃದಿ ಭಾನುಮ್ ॥ ೪೯೫॥
ವಿದಿತಃ ಪ್ರಮದಸ್ಯ ವಿಧಾತುಃ ಶಶಿನೋ ಜನಯಿತ್ರಿ ವಿಲಾಸಃ ।
ಅಹಮುತ್ಸುಕ ಈಶ್ವರಿ ಭಾನೋರ್ವಿಭವಸ್ಯ ಚ ವೇತ್ತುಮಿಯತ್ತಾಮ್ ॥ ೪೯೬॥
ವರುಣಸ್ಯ ದಿಶಿ ಪ್ರವಹನ್ತೀ ಮದಮಮ್ಬ ಕರೋಷಿ ಮಹಾನ್ತಮ್ ।
ದಿಶಿ ವಜ್ರಭೃತಃ ಪ್ರವಹನ್ತೀ ಕುರು ಬುದ್ಧಿಮಕುಣ್ಠಿತಸಿದ್ಧಿಮ್ ॥ ೪೯೭॥
ಅಮಲಾಮಧಿರುಹ್ಯ ಸುಷುಮ್ಣಾಂ ಪ್ರವಹಸ್ಯಧುನಾಮ್ಬ ಮದಾಯ ।
ಅಮೃತಾಮಧಿರುಹ್ಯ ಚ ಕಿಞ್ಚಿತ್ಪ್ರಿವಹೇಶ್ವರಿ ಬುದ್ಧಿಬಲಾಯ ॥ ೪೯೮॥
ಭರತಕ್ಷಿತಿಕ್ಷಣಕರ್ಮಣ್ಯಭಿಧಾಯ ಮನೋಜ್ಞಮುಪಾಯಮ್ ।
ಅಥ ದೇವಿ ವಿಧಾಯ ಚ ಶಕ್ತಂ ಕುರು ಮಾಂ ಕೃತಿನಂ ಶಚಿ ಭಕ್ತಮ್ ॥ ೪೯೯॥
ನರಸಿಂಹಸುತೇನ ಕವೀನಾಂ ವಿಭುನಾ ರಚಿತೈಃ ಕಮನೀಯೈಃ ।
ಪರಿತೃಪ್ಯತು ಮೇಘವಿತಾನೈರ್ಮರುತಾಮಧಿಪಸ್ಯ ಪುರನ್ಧ್ರೀ ॥ ೫೦೦॥
॥ ಪಞ್ಚಮಂ ಪಾಙ್ಕ್ತಂ ಶತಕಂ ಸಮಾಪ್ತಮ್ ॥
॥ ಅಥ ಷಷ್ಠಂ ತ್ರೈಷ್ಟುಭಂ ಶತಕಮ್ ॥
॥ ಪ್ರಥಮ ಉಪಜಾತಿಪಾದಃ ॥
ಮನ್ದೋಽಪಿ ಬೋಧಂ ವಿದಧನ್ಮುನೀನಾಂ ಸ್ವಚ್ಛೋಽಪಿ ರಾಗಂ ತ್ರಿದಶೇಶ್ವರಸ್ಯ ।
ಅಲ್ಪೋಽಪಿ ಧುನ್ವನ್ಹರಿತಾಂ ತಮಾಂಸಿ ಸ್ಮಿತಾಙ್ಕುರೋ ಭಾತು ಜಯನ್ತಮಾತುಃ ॥ ೫೦೧॥
ಅಶೇಷಪಾಪೌಘನಿವಾರಣಾಯ ಭಾಗ್ಯಸ್ಯ ಪಾಕಾಯ ಚ ದೇವರಾಜ್ಞೀ ।
ಶೋಕಾಕುಲಾಂ ಭಾರತಭೂಮಿಮೇತಾಂ ಲೋಕಸ್ಯ ಮಾತಾ ಹೃದಯೇ ಕರೋತು ॥ ೫೦೨॥
ಧರ್ಮದ್ವಿಷಾಮಿನ್ದ್ರನಿರಾದರಾಣಾಂ ಸಂಹಾರಕರ್ಮಣ್ಯತಿಜಾಗರೂಕಾಮ್ ।
ದೇವೀಂ ಪರಾಂ ದೇವಪಥೇ ಜ್ವಲನ್ತೀಂ ಪ್ರಚಣ್ಡಚಣ್ಡೀಂ ಮನಸಾ ಸ್ಮರಾಮಿ ॥ ೫೦೩॥
ವ್ಯಾಪ್ತಾ ತಟಿದ್ವಾ ಗಗನೇ ನಿಗೂಢಾ ನಾರೀ ಸುರೇಶಾನಮನೋರಮಾ ವಾ ।
ಶಕ್ತಿಃ ಸುಷುಮ್ಣಾಪಥಚಾರಿಣೀ ವಾ ಪ್ರಚಣ್ಡಚಣ್ಡೀತಿ ಪದಸ್ಯ ಭಾವಃ ॥ ೫೦೪॥
ಸಮಸ್ತಲೋಕಾವನಿನಾಯಿಕಾಯಾಃ ಸುಪರ್ವಮಾರ್ಗೇಣ ಶರೀರವತ್ಯಾಃ ।
ಮಾತುರ್ಮಹೋಂಶಂ ಮಹನೀಯಸಾರಂ ವಿಜ್ಞಾನವನ್ತಸ್ತಟಿತಂ ಭಣನ್ತಿ ॥ ೫೦೫॥
ನಿಗೂಢತೇಜಸ್ತನುರಮ್ಬಿಕೇಯಂ ಪ್ರಚಣ್ಡಚಣ್ಡೀ ಪರಿತೋ ಲಸನ್ತೀ ।
ಅವ್ಯಕ್ತ್ಶಬ್ದೇನ ಶರೀರವತ್ಯಾಃ ಕಾಲ್ಯಾಃ ಕವೀನಾಂ ವಚನೇಷು ಭಿನ್ನಾ ॥ ೫೦೬॥
ಶಬ್ದಂ ವಿನಾ ನೈವ ಕದಾಪಿ ತೇಜಸ್ತೇಜೋ ವಿನಾ ನೈವ ಕದಾಪಿ ಶಬ್ದಃ ।
ಶಕ್ತಿದ್ವಯಂ ಸನ್ತತಯುಕ್ತಮೇತತ್ಕಥಂ ಸ್ವರೂಪೇಣ ಭವೇದ್ವಿಭಕ್ತಮ್ ॥ ೫೦೭॥
ಏಕೈವ ಶಕ್ತಿರ್ಜ್ವಲತಿ ಪ್ರಕೃಷ್ಟಾ ಸ್ವರತ್ಯಪಿ ಪ್ರಾಭವತಃ ಸಮನ್ತಾತ್ ।
ಕ್ರಿಯಾವಿಭೇದಾದಿಹ ಪಣ್ಡಿತಾನಾಂ ಶಕ್ತಿದ್ವಯೋಕ್ತಿಸ್ತು ಸಮರ್ಥನೀಯಾ ॥ ೫೦೮॥
ಏಕಕ್ರಿಯಾಯಾಶ್ಚ ಫಲಪ್ರಭೇದಾತ್ಪುನರ್ವಿಭಾಗಃ ಕ್ರಿಯತೇ ಬಹುಜ್ಞೈಃ ।
ಕಾಲೀಂ ಚ ತಾರಾಂ ಸ್ವರಮಗ್ರ್ಯಮಾಹುಃ ಪ್ರಚಣ್ಡಚಣ್ಡೀಂ ಲಲಿತಾಂ ಚ ತೇಜಃ ॥ ೫೦೯॥
ಸಮ್ಪದ್ಯತೇ ಶಬ್ದಗತೇರ್ಹಿ ಕಾಲಃ ಶಬ್ದೋ ವರೇಣ್ಯಸ್ತದಭಾಣಿ ಕಾಲೀ ।
ಧ್ಯಾತೇನ ಶಬ್ದೇನ ಭವಂ ತರೇದ್ಯದ್ಸುಧಾಸ್ತತಃ ಶಬ್ದಮುಶನ್ತಿ ತಾರಾಮ್ ॥ ೫೧೦॥
ಯದಕ್ಷರಂ ವೇದವಿದಾಮೃಷೀಣಾಂ ವೇದಾನ್ತಿನಾಂ ಯಃ ಪ್ರಣವೋ ಮುನೀನಾಮ್ ।
ಗೌರೀ ಪುರಾಣೇಷು ವಿಪಶ್ಚಿತಾಂ ಯಾ ಸಾ ತಾನ್ತ್ರಿಕಾಣಾಂ ವಚನೇನ ತಾರಾ ॥ ೫೧೧॥
ಸಮ್ಪದ್ಯತೇ ಸಂಹೃತಿರೋಜಸಾ ಯತ್ಪ್ರಚಣ್ಡಚಣ್ಡೀ ತದುದೀರಿತೌಜಃ ।
ಸಿಧ್ಯೇದಶೇಷೋಽನುಭವೋ ಯದೋಜಸ್ಯತೋ ಬುಧಾಸ್ತಾಂ ಲಲಿತಾಂ ವದನ್ತಿ ॥ ೫೧೨॥
ಪ್ರಚಣ್ಡಚಣ್ಡೀಂ ಲಘುನಾ ಪದೇನ ಚಣ್ಡೀಂ ವಿದುಃ ಕೇಚನ ಬುದ್ಧಿಮನ್ತಃ ।
ಏಕೇ ವಿದಃ ಶ್ರೇಷ್ಠಮಹೋಮಯೀಂ ತಾಂ ಲಕ್ಷ್ಮೀಂ ಮಹತ್ಪೂರ್ವಪದಾಂ ವದನ್ತಿ ॥ ೫೧೩॥
ಅತೀವ ಸೌಮ್ಯಂ ಲಲಿತೇತಿ ಶಬ್ದಂ ಪ್ರಚಣ್ಡಚಣ್ಡೀತಿ ಪದಂ ಚ ಭೀಮಮ್ ।
ದೇವೀ ದಧಾನಾ ಸುತರಾಂ ಮನೋಜ್ಞಾ ಘೋರಾ ಚ ನಿತ್ಯಂ ಹೃದಿ ಮೇ ವಿಭಾತು ॥ ೫೧೪॥
ಪ್ರಚಣ್ಡಚಣ್ಡೀಂ ತು ಶರೀರಭಾಜಾಂ ತನೂಷು ಯೋಗೇನ ವಿಭಿನ್ನಶೀರ್ಷಾಮ್ ।
ಶಕ್ತಿಂ ಸುಷುಮ್ಣಾಸರಣೌ ಚರನ್ತೀಂ ತಾಂ ಛಿನ್ನಮಸ್ತಾಂ ಮುನಯೋ ವದನ್ತಿ ॥ ೫೧೫॥
ಕಪಾಲಭೇದೋ ಯದಿ ಯೋಗವೀರ್ಯಾತ್ಸಮ್ಪದ್ಯತೇ ಜೀವತ ಏವ ಸಾಧೋಃ ।
ತಮೇವ ಸನ್ತಃ ಪ್ರವದನ್ತಿ ಶೀರ್ಷಚ್ಛೇದಂ ಶರೀರಾನ್ತರಭಾಸಿ ಶಕ್ತೇಃ ॥ ೫೧೬॥
ಉದೀರ್ಯಸೇ ನಿರ್ಜರರಾಜಪತ್ನಿ ತ್ವಂ ಛಿನ್ನಮಸ್ತಾ ಯಮಿನಾಂ ತನೂಷು ।
ಉಜ್ಜಋಮ್ಭಣೇ ವಿಶ್ವಸವಿತ್ರಿ ಯಸ್ಯಾಃ ಕಾಯಂ ಭವೇದ್ವೈದ್ಯುತಯನ್ತ್ರತುಲ್ಯಮ್ ॥ ೫೧೭॥
ಪಿತುರ್ನಿಯೋಗಾತ್ತನಯೇನ ಕೃತ್ತೇ ಮಸ್ತೇ ಜನನ್ಯಾಃ ಕಿಲ ರೇಣುಕಾಯಾಃ ।
ತ್ವಮಾವಿಶಃ ಪಾವನಿ ತತ್ಕಬನ್ಧಂ ತದ್ವಾ ತ್ವಮುಕ್ತಾಸಿ ನಿಕೃತ್ತಮಸ್ತಾ ॥ ೫೧೮॥
ಛಿನ್ನಂ ಶಿರಃ ಕೀರ್ಣಕಚಂ ದಧಾನಾಂ ಕರೇಣ ಕಣ್ಠೋದ್ಗತರಕ್ತಧಾರಾಮ್ ।
ರಾಮಾಮ್ಬಿಕಾಂ ದುರ್ಜನಕಾಲರಾತ್ರಿಂ ದೇವೀಂ ಪವಿತ್ರಂ ಮನಸಾ ಸ್ಮರಾಮಿ ॥ ೫೧೯॥
ಧ್ರುವೋ ರಮಾ ಚನ್ದ್ರಧರಸ್ಯ ರಾಮಾ ವಾಗ್ವಜ್ರವೈರೋಚಸದೀರ್ಘನಿರ್ಯೇ ।
ಕೂರ್ಚದ್ವಯಂ ಶಸ್ತ್ರಕೃಶಾನುಜಾಯೇ ವಿದ್ಯಾನೃಪಾರ್ಣಾ ಸುರರಾಜಶಕ್ತೇಃ ॥ ೫೨೦॥
ಮಾಯಾದ್ವಿವಾರಂ ಯದಿ ಸೈಕವರ್ಣಾ ವಿದ್ಯೈಕವರ್ಣಾ ಯದಿ ಧೇನುರೇಕಾ ।
ಧೇನ್ವಾದಿ ಸಮ್ಬೋಧನಮಸ್ತ್ರಮಗ್ನೇರ್ವಿಲಾಸಿನೀ ಚೇತಿ ಧರೇನ್ದುವರ್ಣಾ ॥ ೫೨೧॥
ಚತುಷ್ಟಯೇತ್ರನ್ಯತಮಂ ಗೃಹೀತ್ವಾ ಮನ್ತ್ರಂ ಮಹೇನ್ದ್ರಸ್ಯ ಮನೋಧಿನಾಥಾಮ್ ।
ಭಜೇತ ಯಸ್ತಾನ್ತ್ರಿಕದಿವ್ಯಭಾವಮಾಶ್ರಿತ್ಯ ಸಿದ್ವೀಃ ಸಕಲಾಃ ಸ ವಿನ್ದೇತ್ ॥ ೫೨೨॥
ಸಂಹೋತ್ರಮಿತ್ಯದ್ಭುತಶಕ್ತಿಯುಕ್ತಂ ವೃಷಾಕಪೇರ್ದರ್ಶನಮಮ್ಬ ಮನ್ತ್ರಮ್ ।
ಯೋ ವೈದಿಕಂ ತೇ ಮನುಜೋ ಭಜೇತ ಕಿಞ್ಚಿನ್ನ ತಸ್ಯೇಹ ಜಗತ್ಯಸಾಧ್ಯಮ್ ॥ ೫೨೩॥
ಪ್ರಚಣ್ಡಚಣ್ಡಿ ಪ್ರಮದೇ ಪುರಾಣಿ ಪುರಾಣವೀರಸ್ಯ ಮನೋಧಿನಾಥೇ ।
ಪ್ರಯಚ್ಛ ಪಾತುಂ ಪಟುತಾಂ ಪರಾಂ ಮೇ ಪುಣ್ಯಾಮಿಮಾಮಾರ್ಯನಿವಾಸಭೂಮಿಮ್ ॥ ೫೨೪॥
ಪ್ರಪಞ್ಚರಾಜ್ಞೀಂ ಪ್ರಥಿತಪ್ರಭಾವಾಂ ಪ್ರಚಣ್ಡಚಣ್ಡೀಂ ಪರಿಕೀರ್ತಯನ್ತ್ಯಃ ।
ಏತಾಃ ಪ್ರಮೋದಾಯ ಭವನ್ತು ಶಕ್ತೇರುಪಾಸಕಾನಾಮುಪಜಾತಯೋ ನಃ ॥ ೫೨೫॥
॥ ದ್ವಿತೀಯೋ ರಥೋದ್ಧತಾಪಾದಃ ॥
ಕ್ಷಾಲನಾಯ ಹರಿತಾಂ ವಿಭೂತಯೇ ವಿಷ್ಟಪಸ್ಯ ಮದನಾಯ ವಜ್ರಿಣಃ ।
ತಜ್ಜಯನ್ತಜನನೀಮುಖಾಬ್ಜತೋ ನಿರ್ಗತಂ ಸ್ಮಿತಮಘಂ ಧುನೋತು ನಃ ॥ ೫೨೬॥
ಅನ್ನಲೋಪಕೃಶಭೀರುಕಪ್ರಜಾಂ ಭಿನ್ನಭಾವಬಲಹೀನನೇತೃಕಾಮ್ ।
ವಾಸವಸ್ಯ ವರವರ್ಣಿನೀ ಪರೈರರ್ದಿತಾಮವತು ಭಾರತಾವನಿಮ್ ॥ ೫೨೭॥
ಪಾಣಿಪಾದಮನಿಮೇಷರಾಜ್ಞಿ ತೇ ಪಾರಿಜಾತನವಪಲ್ಲವೋಪಮಮ್ ।
ಅಕ್ಷಪಾವಿರಹಮಙ್ಗಭಾಸರಿದ್ವಾಸಿಚಕ್ರಮಿಥುನಂ ಕುಚದ್ವಯಮ್ ॥ ೫೨೮॥
ಪೂರ್ಣಚನ್ದ್ರಯಶಸೋಽಪಹಾರಕಂ ಸಮ್ಪ್ರಸಾದಸುಷಮಾಸ್ಪದಂ ಮುಖಮ್ ।
ಜ್ಞಾನಶಕ್ತಿರುಚಿಶೇವಧೀದೃಶೌ ರಕ್ತ್ವರ್ಣಕಸುಧಾಘನೋಽಧರಃ ॥ ೫೨೯॥
ಮರ್ದಯತ್ತಿಮಿರಮುದ್ಧತಂ ದಿಶಾಂ ಅಲ್ಪಮಪ್ಯಧಿಕವೈಭವಂ ಸ್ಮಿತಮ್ ।
ಪ್ರಾವೃಡನ್ತಯಮುನಾತರಙ್ಗವನ್ನತ್ನ್ಲಚಾರುರತಿಪಾವನಃ ಕಚಃ ॥ ೫೩೦॥
ವಲ್ಲಕೀಂ ಚ ಪರುಷಧ್ವನಿಂ ವದನ್ ದುಃಖಿತಸ್ಯ ಚ ಮುದಾವಹಃ ಸ್ವರಃ ।
ಚಾರು ಹಾವಶಬಲಾಽಲಸಾ ಗತಿಃ ಕಾಯಧಾಮವಚಸಾಂ ನ ಪದ್ಧತೌ ॥ ೫೩೧॥
ಯೋಗಸಿದ್ಧಿಮತುಲಾಂ ಗತಾ ಮತಿಶ್ಚಾತುರೀ ಚ ಬುಧಮಣ್ಡಲಸ್ತುತಾ ।
ವಿಷ್ಟಪತ್ರಿತಯರಾಜ್ಯತೋಽಪ್ಯಸಿ ತ್ವಂ ಸುಖಾಯ ಮಹತೇ ಬಿಡೌಜಸಃ ॥ ೫೩೨॥
ತ್ವಾಮುದೀಕ್ಷ್ಯ ಧೃತದೇವತಾತನುಂ ದೀಪ್ತಪಕ್ಷ್ಮಲವಿಶಾಲಲೋಚನಾಮ್ ।
ಆದಿತೋ ಜನನಿ ಜನ್ಮಿನಾಮಭೂದ್ ವಾಸವಸ್ಯ ರತಿರಾದಿಮೇ ರಸೇ ॥ ೫೩೩॥
ಆದಿಮಂ ರಸಮನಾದಿವಾಸನಾ ವಾಸಿತೌ ಪ್ರಥಮಮನ್ವಗೃಹ್ಣತಾಮ್ ।
ಸಮ್ಮದಸ್ಯ ನಿಧಿಮಾದಿದಮ್ಪತೀ ಸೋಽಚಲತ್ತ್ರಿಭುವನೇ ತತಃ ಕ್ರಮಃ ॥ ೫೩೪॥
ಜ್ಯಾಯಸಾ ದಿವಿಷದಾಂ ಪುರಾತನೀ ನೀಲಕಞ್ಜನಯನಾ ವಿಲಾಸಿನೀ ।
ಯದ್ವಿಹಾರಮತನೋತ್ಪ್ರರೋಚನಂ ತತ್ಸತಾಮಭವದಾದಿಮೇ ರಸೇ ॥ ೫೩೫॥
ನ ತ್ವದಮ್ಬ ನಲಿನಾನನಾಽಧಿಕಾ ನಾಪಿ ನಾಕಪತಿತೋಽಧಿಕಃ ಪುಮಾನ್ ।
ನಾಧಿಕಂ ಚ ವನಮಸ್ತಿ ನನ್ದನಾನ್ನಾದಿಮಾದಪಿ ರಸೋಽಧಿಕೋ ರಸಾತ್ ॥ ೫೩೬॥
ನಾಯಿಕಾ ತ್ವಮಸಮಾನಚಾರುತಾ ನಾಯಕಃ ಸ ಮರುತಾಂ ಮಹೀಪತಿಃ ।
ನನ್ದನಂ ಚ ರಸರಙ್ಗಭೂಃ ಕಥಂ ಮನ್ಮಥಸ್ಯ ನ ಭವೇದಿಹೋತ್ಸವಃ ॥ ೫೩೭॥
ದೇವಿ ವಾಂ ಮೃತಿಕಥೈವ ದೂರತೋ ಜಾತುಚಿದ್ಗಲತಿ ನೈವ ಯೌವನಮ್ ।
ಕಾಙ್ಕ್ಷಿತಃ ಪರಿಕರೋ ನ ದುರ್ಲಭಃ ಕಿಂ ರಸಃ ಪರಿಣಮೇದಿಹಾನ್ಯಥಾ ॥ ೫೩೮॥
ವಿಷ್ಟಪಸ್ಯ ಯುವರಾಜಕೇಶವೇ ತ್ರಾಣಭಾರಮಖಿಲಂ ನಿಧಾಯ ವಾಮ್ ।
ಕ್ರೀಡತೋರಮರರಾಜ್ಞಿ ನನ್ದನೇ ಕ್ರೀಡಿತಾನಿ ಮಮ ಸನ್ತು ಭೂತಯೇ ॥ ೫೩೯॥
ಯದ್ಯುವಾಮಮರರಾಜ್ಞಿ ನನ್ದನೇ ಕುರ್ವತೋ ರಹಸಿ ದೇವಿ ಮನ್ತ್ರಣಮ್ ।
ತತ್ರ ಚೇನ್ಮಮ ಕೃತಿರ್ಮನಾಗಿಯಂ ಸ್ಪರ್ಶಮೇತಿ ಭುವಿ ಕೋ ನು ಮತ್ಕೃತೀ ॥ ೫೪೦॥
ಕ್ರನ್ದನಂ ಯದಿ ಮಮೇಹ ವನ್ದಿನೋ ನನ್ದನೇ ವಿಹರತೋಃ ಸವಿತ್ರಿ ವಾಮ್ ।
ಅನ್ತರಾಯಕೃದಥಾಬ್ಜಕಾನ್ತಿ ತೇ ಸಮ್ಪ್ರಗೃಹ್ಯ ಚರಣಂ ಕ್ಷಮಾಪಯೇ ॥ ೫೪೧॥
ಯೋಷಿತಾಮಪಿ ವಿಮೋಹನಾಕೃತಿರ್ಮೋಹನಂ ತು ಪುರುಷಸಂಹತೇರಪಿ ।
ಇನ್ದ್ರಮಮ್ಬರಮಯಾಂ ಬಭೂವಿಥ ತ್ವಂ ರಸಾರ್ದ್ರಹೃದಯಾ ಲಸದ್ರಸಮ್ ॥ ೫೪೨॥
ದಿವ್ಯಚನ್ದನರಸಾನುಲೇಪನೈಃ ಪಾರಿಜಾತಸುಮತಲ್ಪಕಲ್ಪನೈಃ ।
ಚಾರುಗೀತಕೃತಿಭಿಶ್ಚ ಭೇಜಿರೇ ನಾಕಲೋಕವನದೇವತಾಶ್ಚ ವಾಮ್ ॥ ೫೪೩॥
ಸ್ವರ್ಣದೀಸಲಿಲಶೀಕರೋಕ್ಷಿತಾಃ ಪಾರಿಜಾತಸುಮಗನ್ಧಧಾರಿಣಃ ।
ನನ್ದನೇ ತ್ರಿದಶಲೋಕರಾಜ್ಞಿ ವಾಂ ಕೇಪಿ ಭೇಜುರಲಸಾಃ ಸಮೀರಣಾಃ ॥ ೫೪೪॥
ಆದಧಾಸಿ ಸಕಲಾಙ್ಗನಾಧಿಕೇ ಪದ್ಮಗನ್ಧಿನಿ ಸುಧಾಧರಾಧರೇ ।
ಮಞ್ಜುವಾಣಿ ಸುಕುಮಾರಿ ಸುನ್ದರಿ ತ್ವಂ ಸುರೇನ್ದ್ರಸಕಲೇನ್ದ್ರಿಯಾರ್ಚನಮ್ ॥ ೫೪೫॥
ಆದಿದೇವಿ ವದನಂ ತವಾಭವತ್ ಕಾನ್ತಿಧಾಮ ಮದನಂ ದಿವಸ್ಪತೇಃ ।
ಆನನಾದಪಿ ರಸಾಮೃತಂ ಕಿರನ್ನಿಷ್ಕ್ರಮಂ ವಿಲಸಿತಂ ಕಲಂ ಗಿರಾಮ್ ॥ ೫೪೬॥
ಚಾರುವಾಗ್ವಿಲಸಿತಾಚ್ಚ ನಿಸ್ತುಲಪ್ರೇಮವೀಚಿರುಚಿರಂ ವಿಲೋಕಿತಮ್ ।
ವೀಕ್ಷಿತಾದಪಿ ವಿಲಾಸವಿಶ್ರಮಸ್ಥಾನಮಲ್ಪಮಲಸಂ ಶುಚಿಸ್ಮಿತಮ್ ॥ ೫೪೭॥
ಭಾಸುರೇನ್ದ್ರದೃಢಬಾಹುಪಞ್ಜರೇ ಲಜ್ಜಯಾ ಸಹಜಯಾ ನಮನ್ಮುಖೀ ।
ತದ್ವಿಲೋಚನವಿಕರ್ಷಕಾಲಕಾ ಪಾತು ಮಾಂ ತ್ರಿದಿವಲೋಕನಾಯಿಕಾ ॥ ೫೪೮॥
ಭಾರತಕ್ಷಿತಿವಿಷಾದವಾರಣೇ ತತ್ಸುತಂ ಗಣಪತಿಂ ಕೃತೋದ್ಯಮಮ್ ।
ಆದಧಾತು ಪಟುಮರ್ಜುನಸ್ಮಿತಾ ದುರ್ಜನಪ್ರಮಥನಕ್ಷಮಾ ಶಚೀ ॥ ೫೪೯॥
ಚಾರುಶಬ್ದಕಲಿತಾಃ ಕೃತೀರಿಮಾಃ ಸತ್ಕವಿಕ್ಷಿತಿಭುಜೋ ರಥೋದ್ಧತಾಃ ।
ಸಾ ಶೃಣೋತು ಸುರಮೇದಿನೀಪತೇರ್ನೇತ್ರಚಿತ್ತಮದನೀ ವಿಲಾಸಿನೀ ॥ ೫೫೦॥
॥ ತೃತೀಯೋ ಮೌಕ್ತಿಕಮಾಲಾಪಾದಃ ॥
ನಿರ್ಮಲಭಾಸಾಂ ದಿಶಿ ದಿಶಿ ಕರ್ತಾ ಪುಣ್ಯಮತೀನಾಂ ಹೃದಿ ಹೃದಿ ಧರ್ತಾ ।
ಪಾಲಯತಾನ್ಮಾಮನಘವಿಲಾಸಃ ಶಕ್ರಮಹಿಶ್ಯಾಃ ಸಿತದರಹಾಸಃ ॥ ೫೫೧॥
ಪುಣ್ಯಚರಿತ್ರಾ ಮುನಿಜನಗೀತಾ ವಾಸವಕಾನ್ತಾ ತ್ರಿಭುವನಮಾತಾ ।
ವತ್ಸಲಭಾವಾದವತು ವಿದೂನಾಂ ಭಾರತಭೂಮಿಂ ಧನಬಲಹೀನಾಮ್ ॥ ೫೫೨॥
ಕೋಟಿತಟಿದ್ವತ್ತವ ತನುಕಾನ್ತಿಃ ಪೂರ್ಣಸಮಾಧೇಸ್ತವ ಹೃದಿ ಶಾನ್ತಿಃ ।
ವಾಸವಭಾಮೇ ಭಗವತಿ ಘೋರಃ ಶತ್ರುವಿದಾರೀ ತವ ಭುಜಸಾರಃ ॥ ೫೫೩॥
ಆಶ್ರಯಭೂತಂ ಸುಮಧುರತಾಯಾ ಆಲಯಭೂತಂ ಜಲಧಿಸುತಾಯಾಃ ।
ವಾಸವದೃಷ್ಟೇಸ್ತವಮುಖಮಬ್ಜಂ ಕಿಙ್ಕ್ರದೃಷ್ಟೇಸ್ತವ ಪದಮಬ್ಜಮ್ ॥ ೫೫೪॥
ಪಾದಸರೋಜಂ ವೃಜಿನಹರಂ ತೇ ಯೋ ಭಜತೇ ನಾ ಸುರಪತಿಕಾನ್ತೇ ।
ತತ್ರ ಕಟಾಕ್ಷಾ ಅಯಿ ಶತಶಸ್ತೇ ತಸ್ಯ ಸಮಸ್ತಂ ಭಗವತಿ ಹಸ್ತೇ ॥ ೫೫೫॥
ಜ್ಞಾಪಕಶಕ್ತಿಃ ಪ್ರತಿನರಮಸ್ತಂ ಕಾರಕಶಕ್ತಿಃ ಪ್ರತಿನರಹಸ್ತಮ್ ।
ವಾಸವಚಕ್ಷುಸ್ಸುಕೃತಫಲಶ್ರೀರ್ಭಾತು ಮಮಾನ್ತಃ ಸುರಭುವನಶ್ರೀಃ ॥ ೫೫೬॥
ಮನ್ತ್ರಪರಾಣಾಂ ವಚಸಿ ವಸನ್ತೀ ಧ್ಯಾನಪರಾಣಾಂ ಮನಸಿ ಲಸನ್ತೀ ।
ಭಕ್ತಿಪರಾಣಾಂ ಹೃದಿ ವಿಹರನ್ತೀ ಭಾತಿ ಪರಾಮ್ಬಾ ನಭಸಿ ಚರನ್ತೀ ॥ ೫೫೭॥
ಸೇವಕಪಾಪಪ್ರಶಮನನಾಮಾ ದಿಕ್ತಿಮಿರೌಘಪ್ರಮಥನಧಾಮಾ ।
ಉಜ್ಜ್ವಲಶಸ್ತ್ರಾ ರಣಭುವಿ ಭೀಮಾ ಪಾತು ನತಂ ಮಾಂ ಹರಿಹಯರಾಮಾ ॥ ೫೫೮॥
ಯೋಗಿನಿ ಶಕ್ತಿರ್ವಿಲಸಸಿ ದಾನ್ತಿಃ ಯೋಷಿತಿ ಶಕ್ತಿರ್ವಿಲಸಸಿ ಕಾನ್ತಿಃ ।
ಜ್ಞಾನಿನಿ ಶಕ್ತಿರ್ವಿಲಸಸಿ ತುಷ್ಟಿಃ ಧನ್ವಿನಿ ಶಕ್ತಿರ್ವಿಲಸಸಿ ದೃಷ್ಟಿಃ ॥ ೫೫೯॥
ಸಙ್ಗಿನಿ ಶಕ್ತಿರ್ವಿಲಸಸಿ ನಿದ್ರಾ ಧ್ಯಾತರಿ ಶಕ್ತಿರ್ವಿಲಸಸಿ ಮುದ್ರಾ ।
ವಾಸವಕಾನ್ತೇ ಗಗನನಿಶಾನ್ತೇ ಭಾಷಿತುಮೀಶಃ ಕ್ವ ನು ವಿಭವಂ ತೇ ॥ ೫೬೦॥
ಯದ್ದಿತಿಜಾನಾಂ ದಮನಮವಕ್ರಂ ಕೇಶವಹಸ್ತೇ ವಿಲಸತಿ ಚಕ್ರಮ್ ।
ತತ್ರ ಕಲಾ ತೇ ಭಗವತಿ ಭದ್ರಾ ಕಾಚನ ಭಾರಂ ವಹತಿ ವಿನಿದ್ರಾ ॥ ೫೬೧॥
ದುಷ್ಟನಿಶಾಟಪ್ರಶಮನಶೀಲಂ ಯತ್ ಸಿತಭೂಭೃತ್ಪತಿಕರಶೂಲಮ್ ।
ತತ್ರ ಮರ್ಮಹೋಂಶಸ್ತವ ಜಗದೀಶೇ ರಾಜತಿ ಕಶ್ಚಿತ್ಪಟುರರಿನಾಶೇ ॥ ೫೬೨॥
ಯನ್ನಿಜರೋಚಿಕ್ರ್ತತರಿಪುಸಾರಂ ವಾಸವಹಸ್ತೇ ಕುಲಿಶಮುದಾರಮ್ ।
ತತ್ರ ತವಾಂಶೋ ವಿಲಸತಿ ದಿವ್ಯಃ ಕಶ್ಚನ ಭಾಸೋ ಭಗವತಿ ಭವ್ಯಃ ॥ ೫೬೩॥
ಅಮ್ಬರದೇಶೇ ಸುಮಹತಿ ಗುಪ್ತಾ ಪಙ್ಕ್ಜಬನ್ಧೌ ವಿಲಸತಿ ದೀಪ್ತಾ ।
ರಾಜಸಿ ಮಾತರ್ಹಿಮರುಚಿಶೀತಾ ವೇದಿಕೃಶಾನೌ ಕ್ರತುಭೃತಿಪೂತಾ ॥ ೫೬೪॥
ಸೂಕ್ಷ್ಮರಜೋಭಿರ್ವಿಹಿತಮುದಾರಂ ಯಜ್ಜಗದೇತನ್ನ್ಗಗನಮಪಾರಮ್ ।
ತತ್ತವವೇದಃ ಪ್ರವದತಿ ಕಾಯಂ ಪಾವನಿ ಭಾನುಸ್ತವ ತನುಜೋಽಯಮ್ ॥ ೫೬೫॥
ಈಶ್ವರಿ ನೈಕಸ್ತವ ಖರತೇಜಾಃ ತೇಽಪಿ ಚ ಸರ್ವೇ ಜನನಿ ತನೂಜಾಃ ।
ಉಜ್ವಲಖೇಟಾಃ ಕುವದತಿ ಕಾಯಾಃ ಪಾವನಿ ಕಸ್ತೇ ಪ್ರವದತು ಮಾಯಾಃ ॥ ೫೬೬॥
ಯಾ ಮಹಿಮಾನಂ ಪ್ರಥಯತಿ ಭೂಮಿಃ ಪಾವನಕೀರ್ತಿರ್ಜಲನಿಧಿನೇಮಿಃ ।
ಸೇಯಮಪೀಶೇ ಭವತಿ ಸುಪುತ್ರೀ ವಾಸವಜಾಯೇ ತವ ಜನಧಾತ್ರೀ ॥ ೫೬೭॥
ಅಙ್ಗ ಸಖಾಯೋ ವಿರಮತಸಙ್ಗಾಶ್ವಷ್ಠ್ಹರ್ವಿಷಯಾಣಾಂ ಕೃತಮತಿಭಙ್ಗಾತ್ ।
ಧ್ಯಾಯತ ಚಿತ್ತೇ ಧುತಭಯಬೀಜಂ ವಾಸವಜಾಯಾಚರಣಸರೋಜಮ್ ॥ ೫೬೮॥
ಪಾಪಮಶೇಷಂ ಸಪದಿ ವಿಹಾತುಂ ಶಕ್ತಿಮನಲ್ಪಾಮಪಿ ಪರಿಧಾತುಮ್ ।
ಚೇತಸಿ ಸಾಧೋ ಕುರು ಪರಿಪೂತಂ ವಾಸವಜಾಯಾಪದಜಲಜಾತಮ್ ॥ ೫೬೯॥
ಈಶ್ವರಿ ವನ್ದ್ಯದ್ಯುತಿಭೃತಿಮೇಧೇ ಕಾಙ್ಕ್ಷಿತನೀರಾಣ್ಯಸೃಜತಿ ಮೋಘೇ ।
ನಿರ್ಮಲಕೀರ್ತೇಸ್ತವ ಶಚಿ ಗಾನಂ ಶಕ್ಷ್ಯತಿ ಕರ್ತುಂ ತದುದಕದಾನಮ್ ॥ ೫೭೦॥
ಆಮಯವೀರ್ಯಾದ್ವಿಗಲತಿ ಸಾರೇ ಜೀವತಿ ಕಿಞ್ಚಿದ್ರಿಸನಗನೀರೇ ।
ರಕ್ಷತಿ ಜನ್ತುಂ ತವ ಶಚಿ ನಾಮ ಪ್ರಾಜ್ಞಜನೈರಪ್ಯಗಣಿತಧಾಮ ॥ ೫೭೧॥
ಮಧ್ಯಮಲೋಕೇ ಸ್ಯತಿ ಶುಚಿರುಗ್ರಾ ರಾಜಸಿ ನಾಕೇ ವಿಭವಸಮಗ್ರಾ ।
ಪ್ರಾಣಿಶರೀರೇ ಭವಸಿ ವಿಚಿತ್ರ ವಾಸವಜಾಯೇ ವಿವಿಧಚರಿತ್ರ ॥ ೫೭೨॥
ವ್ಯೋಮ್ನಿ ವಪುಸ್ತೇ ವಿನಿಹತಪಾಪಂ ವಿಶ್ರುತಲೀಲಂ ತವ ದಿವಿ ರೂಪಮ್ ।
ಕರ್ಮವಶಾತ್ತೇ ಭವತಿ ಸ ಭೋಗಃ ಪ್ರಾಣಿಶರೀರೇ ಭಗವತಿ ಭಾಗಃ ॥ ೫೭೩॥
ಭಾರತಭೂಮೇಃ ಶುಚಮಪಹನ್ತುಂ ಶ್ರೇಷ್ಠಮುಪಾಯಂ ಪುನರವಗನ್ತುಮ್ ।
ವಾಸವಜಾಯೇ ದಿಶ ಮಮ ಬುದ್ಧಿಂ ಪಾವನಿ ಮಾಯೇ ಕುರು ಕುರು ಸಿದ್ಧಿಮ್ ॥ ೫೭೪॥
ಸಮ್ಮದಯನ್ತೀರ್ಬುಧಜನಮೇತಾಃ ಸ್ವರ್ಗಧರಿತ್ರೀಪತಿಸತಿಪೂತಾಃ ।
ಮೌಕ್ತಿಕಮಾಲಾಃ ಶೃಣು ನುತಿಕರ್ತುರ್ಭಕ್ತಿನಿಬದ್ಧಾಃ ಕವಿಕುಲಭರ್ತುಃ ॥ ೫೭೫॥
॥ ಚತುರ್ಥಃ ಸುಮುಖೀಪಾದಃ ॥
ಅಜಿತಮಿನಾಗ್ನಿತಟಿಚ್ಛಶಿಭಿಃ ಮಮ ಹೃದಯಸ್ಯ ತಮಃ ಪ್ರಬಲಮ್ ।
ಅಮರಪತಿಪ್ರಮದಾಹಸಿತಂ ವಿಮಲಘೃಣಿಪ್ರಕರೈರ್ಹರತು ॥ ೫೭೬॥
ಸುರನೃಪತೇರ್ದಯಿತಾ ವಿನತಾಹಿತಶಮನೀ ಲುಲಿತಾಮಿತರೈಃ ।
ವರಕರುಣಾವರುಣಾಲಯದೃಙ್ಮಮ ಜನನೀಮವತಾದವನಿಮ್ ॥ ೫೭೭॥
ಪಟುತಪಸೋ ಜಮದಗ್ನಿಮುನೇರಿಹ ಸಹಧರ್ಮಚರೀಂ ಭುವನೇ ।
ತನಯನಿಕೃತ್ತಶಿರಃ ಕಮಲಾಂ ವರಮತಿಮಾವಿಶದಿನ್ದ್ರವಧೂಃ ॥ ೫೭೮॥
ಯದುಕುಲಕೀರ್ತಿವಿಲೋಪಭಿಯಾ ಬತವಿನಿಗೂಹ್ಯ ಋತಂ ಕವಯಃ ।
ಮುನಿಗೃಹಿಣೀ ವಧಹೇತುಕಥಾಮಿತರಪಥೇನ ಭಣನ್ತಿ ಮೃಷಾ ॥ ೫೭೯॥
ನ ಸುರಭಿರರ್ಜುನಭೂಮಿಪತಿರ್ಭೃಗುತಿಲಕಸ್ಯ ಜಹಾರ ಸ ಯಾಮ್ ।
ಇಯಮಮೃತಾಂಶುಮನೋಜ್ಞಮುಖೀ ಪರಶುಧರಸ್ಯ ಜನನ್ಯನಘಾ ॥ ೫೮೦॥
ಅತಿರಥಮರ್ಜುನಭೂಮಿಪತಿಂ ಸಹಪೃತನಂ ಜಮದಗ್ನಿಸುತಃ ।
ಯುಧಿ ಸ ವಿಜಿತ್ಯ ವಿಶಾಲಯಶಾಃ ಪುನರಪಿ ಮಾತರಮಾಹೃತವಾನ್ ॥ ೫೮೧॥
ಪರಗೃಹವಾಸಕಲಙ್ಕವಶಾನ್ನಿಜಗೃಹಿಣೀಂ ಜಮದಗ್ನಿಮುನಿಃ ।
ಬತವಿನಿಹನ್ತುಮನಾ ಕಲಯಂಸ್ತನುಭವಮಾದಿಶದುಗ್ರಮನಾಃ ॥ ೫೮೨॥
ಪಿತೃವಚನಾದತಿಭಕ್ತಿಮತಾಪ್ಯಸುರವದಾತ್ಮಸುತೇನ ಹತಾಮ್ ।
ಮುನಿಗೃಹಿಣೀಮನಘೇತಿವದಂಸ್ತವ ವರದೇಽವಿಶದಂಶ ಇಮಾಮ್ ॥ ೫೮೩॥
ಇದಮವಿಕಮ್ಪ್ಯಮತಿಪ್ರಬಲಂ ಪ್ರಭವತಿ ಕಾರಣಮಾರ್ಯನುತೇ ।
ಮುನಿಗೃಹಿಣೀಮನಘಾಂ ಭಣಿತುಂ ಶಚಿ ಕಲಯಾ ಯದಿ ಮಾಮವಿಶಃ ॥ ೫೮೪॥
ಖಲಜನಕಲ್ಪಿತದುಷ್ಟಕಥಾಶ್ರವಣವಶಾದ್ವ್ಯಥಿತಂ ಹೃದಯಮ್ ।
ಅಥ ಚರಿತೇಽವಗತೇ ವಿಮಲಸ್ಮೃತಿವಶತೋ ಮಮ ಯಾತಿ ಮುದಮ್ ॥ ೫೮೫॥
ತವ ಮಹಸಾ ವಿಶತಾ ಕೃಪಯಾ ಮಮ ಶಚಿ ಸೂಕ್ಷ್ಮಶರೀರಮಿದಮ್ ।
ನೃಪರಿಪುಮಾತೃಪವಿತ್ರಕಥಾ ಸ್ಮರಣಪಥಂ ಗಮಿತಾ ಸಪದಿ ॥ ೫೮೬॥
ವಿದಧತುರಾಸುರಕೃತ್ಯಮುಭೌ ಬಹುಲಗುಣಾಮಪಿ ಯದ್ಗೃಹಿಣೀಮ್ ।
ಸ ಮುನಿರಘಾತಯದಚ್ಛಕಥಾಂ ದಶರಥಜಶ್ಚ ಮುಮೋಚ ವನೇ ॥ ೫೮೭॥
ಅಪಿ ವಿನಿಕೃತ್ತಶಿರಾಃ ಶಚಿ ತೇ ವರಮಹಸಾ ವಿಶತಾ ಸಪದಿ ।
ಅಲಭತ ಜೀವಿತಮಮ್ಬ ಪುನರ್ಭುವನಶುಭಾಯ ಮುನೇಸ್ತರುಣೀ ॥ ೫೮೮॥
ಯದಿ ಶಿರಸಾ ರಹಿತೇ ವಪುಷಿ ಪ್ರಕಟತಯಾ ವಿಲಸನ್ತ್ಯಸವಃ ।
ಯದಿ ಹೃದಯಂ ಸಹಭಾತಿ ಧಿಯಾ ಕಿಮಿವ ವಿಚಿತ್ರಮಿತಶ್ಚರಿತಮ್ ॥ ೫೮೯॥
ಪರಶುಧರಸ್ಯ ಸವಿತ್ರಿ ಕಲಾ ತ್ವಯಿ ಪುರುಹೂತಸರೋಜದೃಶಃ ।
ಸ ಶಿರಸಿ ಕಾಚಿದಭೂದ್ರುಚಿರಾ ವಿಶಿರಸಿ ಭೀಮತಮಾ ಭವತಿ ॥ ೫೯೦॥
ಪರಶುಧರೋಽರ್ಜುನಭೂಮಿಪತಿಂ ಯದಜಯದಮ್ಬ ತಪೋಽತ್ರ ತವ ।
ಅಭಜತ ಕಾರಣತಾಮನಘೇ ವರಮುನಿಗೇಯಪವಿತ್ರಕಥೇ ॥ ೫೯೧॥
ಭಗವತಿ ಕೃತ್ತಶಿರೋ ಭವತೀ ಮಥಿತವತೀ ನೃಪತೀನಶುಭಾನ್ ।
ಪ್ರಥನಭುವಿ ಪ್ರಗುಣಂ ಭುಜಯೋಃ ಪರಶುಧರಾಯ ವಿತೀರ್ಯ ಬಲಮ್ ॥ ೫೯೨॥
ಶುಭತಮಕುಣ್ಡಲಪೂರ್ವಸತಿಃ ಪದನತಪಾತಕಸಂಶಮನೀ ।
ದಿಶತು ನಿಕೃತ್ತಶಿರಾಃ ಕುಶಲಂ ಮಮ ಸುರಪಾರ್ಥವಶಕ್ತಿಕಲಾ ॥ ೫೯೩॥
ನಿಜಸುತರಙ್ಗಪತೇರ್ನಿಕಟೇ ಕೃತವಸತಿರ್ನತಸಿದ್ಧಿಕರೀ ।
ದಲಿತಶಿರಾಃ ಪ್ರತನೋತು ಮಮ ಶ್ರಿಯಮಮರೇಶ್ವರಶಕ್ತಿಕಲಾ ॥ ೫೯೪॥
ಭುವಿ ತತಸಹ್ಯನಗಾನ್ತರಗೇ ಶುಭತಮಚನ್ದ್ರಗಿರೌ ವರದಾ ।
ಕೃತವಸತಿಃ ಕುರುತಾನ್ಮಮ ಶಂ ಭೃಗೂಕುಲರಾಮಜನನ್ಯಜರಾ ॥ ೫೯೫॥
ಅವತು ವಿಕೃತ್ತಶಿರಾಃ ಪದಯೋರ್ಭಜಕಮನಿನ್ದ್ಯವಿಚಿತ್ರಕಥಾ ।
ದಿನಕರಮಣ್ಡಲಮಧ್ಯಗೃಹಾ ಸುರಧರಣೀಪತಿಶಕ್ತಿಕಲಾ ॥ ೫೯೬॥
ಗಗನಚರಾರ್ಚಿತಪಾದುಕಯಾ ಪದನತಸನ್ಮತಿಬೋಧಿಕಯಾ ।
ಮಮ ಸತತಂ ಶುಚಿರೇಣುಕಯಾ ಪರವದಿದಂ ಕುಲಮಮ್ಬಿಕಯಾ ॥ ೫೯೭॥
ಶಮಯಿತುಮುಗ್ರತಮಂ ದುರಿತಂ ಪ್ರಥಯಿತುಮಾತ್ಮನಿಗೂಢಬಲಮ್ ।
ಗಮಯಿತುಮಗ್ರಯ್ದಶಾಂ ಸ್ವಕುಲಂ ತವ ಚರಣಾಮ್ಬುಜಮಮ್ಬ ಭಜೇ ॥ ೫೯೮॥
ಪರವಶಗಾಮಶಿವೇನ ವೃತಾಂ ಭರತಧರಾಂ ಪರಿಪಾತುಮಿಮಾಮ್ ।
ಪಟುಮತಿವಾಕ್ಕ್ರಿಯಮಾತನುತಾದ್ಗಣಪತಿಮಭ್ರಹಯಪ್ರಮದಾ ॥ ೫೯೯॥
ಗಣಪತಿದೇವಮರ್ಮಹೋಂಶಜುಷೋ ಗಣಪತಿನಾಮಕವಿಪ್ರಕವೇಃ ।
ಸುರಪತಿಜೀವಸಖೀಶೃಣುಯಾದ್ದಶಶತಪತ್ರಮುಖೀ ಸುಮುಖೀಃ ॥ ೬೦೦॥
॥ ಷಷ್ಠಂ ತ್ರೈಷ್ಟುಭಂ ಶತಕಂ ಸಮಾಪ್ತಮ್ ॥
॥ ಅಥ ಸಪ್ತಮಂ ಜಾಗತಂ ಶತಕಮ್ ॥
॥ ಪ್ರಥಮೋ ದ್ರುತವಿಲಮ್ಬಿತಪಾದಃ ॥
ಸುರಮಹೀರಮಣಸ್ಯ ವಿಲಾಸಿನೀ ಜಲಚರಧ್ವಜಜೀವಿತದಾಯಿನೀ ।
ಹರತು ಬೋಧದೃಗಾವರಣಂ ತಮೋ ಹೃದಯಗಂ ಹಸಿತೇನ ಸಿತೇನ ಮೇ ॥ ೬೦೧॥
ನಮದಮರ್ತ್ಯಕಿರೀಟಕೃತೈಃ ಕಿಣೈಃ ಕಮಠಪೃಷ್ಠನಿಭೇ ಪ್ರಪದೇಽಙ್ಕಿತಾ ।
ಪರಿಧುನೋತು ಶಚೀ ಭರತಕ್ಷಿತೇರ್ವೃಜಿನಜಾಲಮಜಾಲಮಕಮ್ಪನಮ್ ॥ ೬೦೨॥
ಅತಿತರಾಂ ನತಪಾಲನಲೋಲಯಾ ವಿಬುಧನಾಥಮನೋಹರಲೀಲಯಾ ।
ಕಿರಿಮುಖೀಮುಖಶಕ್ತ್ಯುಪಜೀವ್ಯಯಾ ವಿದಿತಯಾದಿತಯಾ ಗತಿಮಾನಹಮ್ ॥ ೬೦೩॥
ಘನಹಿರಣ್ಯಮದಾಪಹರೋಚಿಷಾ ವನರುಹಾನನಯಾಽವನದಕ್ಷಯಾ ।
ಗತಿಮದಿನ್ದ್ರಮನೋರಥನಾಥಯಾ ಭುವನಮೇವ ನ ಮೇ ಕುಲಮಾತ್ರಕಮ್ ॥ ೬೦೪॥
ತನುಷು ವಾಮನಮೂರ್ತಿಧರೇ ವಿಭೌ ತಮನುಯಾಚ ವಿರಾಜತಿ ವಾಮನೀ ।
ಶರಣವಾನನಯಾಮ್ಬಿಕಯಾ ಲಸತ್ ಕರುಣಯಾಽರುಣಯಾ ಪದಯೋರಹಮ್ ॥ ೬೦೫॥
ಸಕರುಣಾ ಕುಶಲಂ ಮಮ ರೇಣುಕಾತನುರಜಾ ತನುತಾದುದಿತೋ ಯತಃ ।
ಯುಧಿ ಮುನಿರ್ವಿದಧೌ ಪರಶುಂ ದಧಜ್ಜನಪತೀನಪತೀವ್ರಭುಜಾಮದಾನ್ ॥ ೬೦೬॥
ಸುಜನಶತ್ರುರಮಾಥಿ ಘನಧ್ವನಿಃ ಶಚಿ ಸರಾತ್ರಿಚರಸ್ತವ ತೇಜಸಾ ।
ಜನನಿ ರಾಮಸಹೋದರಸಾಯಕಂ ಪ್ರವಿಶತಾಽವಿಶತಾದಧಿಕೌಜಸಾ ॥ ೬೦೭॥
ತವ ಮಹಃಕಲಯಾಬಲಮಾಪ್ತಯಾ ಜನನಿ ಶುಮ್ಭನಿಶುಮ್ಭಮದಚ್ಛಿದಾ ।
ಜಗದರಕ್ಷ್ಯತ ಗೋಪಕುಲೇಶಿತುಸ್ತನುಜಯಾಽನುಜಯಾರ್ಜುನಸಾರಥೇಃ ॥ ೬೦೮॥
ನ ವಿನಿರೂಪಯಿತುಂ ಪ್ರಬಭೂವ ಯಾಂ ಕವಿಜನೋ ವಿವಿಧಂ ಕಥಯನ್ನಪಿ ।
ಮುನಿಹೃದಮ್ಬುಜಸೌಧತಲೇನ್ದಿರಾ ಜಯತಿ ಸಾ ಯತಿಸಾಧುಜನಾವನೀ ॥ ೬೦೯॥
ಇಮಮಯಿ ತ್ರಿದಿವೇಶ್ವರಿ ಕಲ್ಕಿನಂ ರುಷಮಪೋಹ್ಯ ಸವಿತ್ರಿ ವಿಲೋಕಿತೈಃ ।
ಸುರಪತೇರ್ದ್ವಿಷತೋಽಘವತೋ ಲಸನ್ ಮದನಕೈರವಕೈರವಲೋಚನೇ ॥ ೬೧೦॥
ಸ್ಮರದಮರ್ತ್ಯನೃಪಾಲವಿಲಾಸಿನೀಂ ಪ್ರಬಲಪಾತಕಭೀತಿವಿನಾಶಿನೀಮ್ ।
ಪ್ರವಣಯಾನ್ತರನನ್ಯಧಿಯಾ ಲಸದ್ವಿನಯಯಾನಯಯಾಮವತೀರ್ಮನಃ ॥ ೬೧೧॥
ಭಗವತೀಗಗನಸ್ಥಲಚಾರಿಣೀ ಜಯತಿ ಸಙ್ಗರರಙ್ಗವಿಹಾರಿಣೀ ।
ಸುಕೃತಶತ್ರುಮತಿಭ್ರಮಕಾರಿಣೀ ಹರಿಹಯಾರಿಹಯಾದಿವಿದಾರಿಣೀ ॥ ೬೧೨॥
ಶರಣವಾನಹಮರ್ಜುನಹಾಸಯಾ ಭುವನಭೂಪತಿಹಾರಿವಿಲಾಸಯಾ ।
ದಿವಿ ಪುಲೋಮಜಯಾ ಧವಲಾಚಲೇ ಗಿರಿಜಯಾಽರಿಜಯಾವಿತದೇವಯಾ ॥ ೬೧೩॥
ಚರಣಯೋರ್ಧೃತಯಾ ವಿಜಯಾಮಹೇ ವಯಮಶೇಷಜಗನ್ನೃಪಜಾಯಯಾ ।
ದಿವಿ ಪುಲೋಮಜಯಾ ಧವಲಾಚಲೇ ನಗಜಯಾ ಗಜಯಾನವಿಲಾಸಯಾ ॥ ೬೧೪॥
ಅರಿವಧಾಯ ವಿಧಾಯ ಬುಧಾಧಿಪಂ ಪಟುಭುಜಾಬಲಭೀಷಣಮಾಜಿಷು ।
ನ ಭವತೀ ಶಚಿ ಗಚ್ಛತಿ ದುರ್ಗತಃ ಕ್ವಚನ ಕಾಚನ ಕಾತರಧೀರಿವ ॥ ೬೧೫॥
ಸಪದಿ ಮಾನಸಧೈರ್ಯಹೃತೋ ಜಗಜ್ಜನನಿ ವಜ್ರತನೋರ್ಜ್ವಲಿತಾರ್ಚಿಷಃ ।
ಅರಿಜನೇ ಪ್ರಥಮಂ ತವ ವೀಕ್ಷಯಾ ಸುರಪತೇರಪತೇಜಸಿ ವಿ ಕ್ರಮಃ ॥ ೬೧೬॥
ನ ಮನನೋಚಿತಮಸ್ತಿ ಪರಂ ನೃಣಾಂ ವಿಬುಧರಾಜವಧೂಪದಪದ್ಮತಃ ।
ಜಗತಿ ದರ್ಶನಯೋಗ್ಯಮಿಹಾಪರಂ ನ ರಮಣೀ ರಮಣೀಯಮುಖಾಬ್ಜತಃ ॥ ೬೧೭॥
ಶರಣವಾನಹಮಸ್ಮಿ ಪುರಾತನಪ್ರಮದಯಾ ಮುನಿಗೇಯಚರಿತ್ರಯಾ ।
ಸ್ವಬಲಚಾಲಿತನಾಕಜಗನ್ನಭೋ ವಸುಧಯಾ ಸುಧಯಾ ಸುರರಾಡ್ದೃಶಾಮ್ ॥ ೬೧೮॥
ಅಯಮಹಂ ಗತಿಮಾನತಿಶಾನ್ತಯಾ ತ್ರಿದಿವಭೂಮಿಪತಿಪ್ರಿಯಕಾನ್ತಯಾ ।
ಮನಸಿ ಮೌನಿಜನೈರತಿಭಕ್ತಿತೋ ನಿಹಿತಯಾ ಹಿತಯಾ ಸುಕೃತಾತ್ಮನಾಮ್ ॥ ೬೧೯॥
ವಿನಯತಃ ಸ್ತುತಯಾ ಗಮಯಾಮ್ಯಹಂ ಜನಿಮತಾಂ ಜನಯಿತ್ರಿ ನಿಶಾಸ್ತ್ವಯಾ ।
ಪ್ರಸೃತಯಾ ಕುಲಕುಣ್ಡಧನಞ್ಜಯಾದ್ಧೃತತನೂತತನೂತನವೇಗಯಾ ॥ ೬೨೦॥
ಸಕೃದಮೋಘಸರಸ್ವತಿಸಾಧುಧೀ ಹೃದಯವೇದ್ಯಪದಾಮ್ಬುಜಸೌಷ್ಠವೇ ।
ಮಮ ಶಿವಂ ಸುಮನಃ ಪೃಥಿವೀಪತೇಃ ಸುವದನೇ ವದ ನೇತ್ರಲಸದ್ದಯೇ ॥ ೬೨೧॥
ದುರವಗಾಹಪಥೇ ಪತಿತಂ ಚಿರಾಜ್ಜನನಿ ಗಮ್ಯವಿಲೋಕನಲಾಲಸಮ್ ।
ಸ್ವಯಮಮರ್ತ್ಯನೃಪಾಲಮನೋರಮೇ ಸುನಯನೇ ನಯನೇಯಮಿಮಂ ಜನಮ್ ॥ ೬೨೨॥
ಅವತು ನಃ ಸ್ವಯಮೇವ ಪಟೂನ್ ವಿಪದ್ವಿಮಥನಾಯ ವಿಧಾಯ ಬುಧೇಶ್ವರೀ ।
ಸಕಲಮರ್ಮಸುವೀತದಯೈಃ ಪರೈರ್ವಿನಿಹತಾನಿಹ ತಾಪವತಃ ಶಚೀ ॥ ೬೨೩॥
ಸುರಧರಾಪತಿಜೀವಿತನಾಥಯಾ ಸ್ವಜನನಕ್ಷಿತಿರಕ್ಷಣಕರ್ಮಣಿ ।
ಪಟುತಮೋ ಜನ ಏಷ ವಿಧೀಯತಾಮಿಹ ತಯಾ ಹತಯಾ ತು ಸಮೂಹಯಾ ॥ ೬೨೪॥
ಗಣಪತೇಃ ಶೃಣುಯಾದಿಮಮುಜ್ವಲಂ ದ್ರುತವಿಲಮ್ಬಿತವೃತ್ತಗಣಂ ಶಚೀ ।
ಸಲಿಲರಾಶಿಸುತಾಭವನೀಭವದ್ಭುವನಪಾವನಪಾದಸರೋರುಹಾ ॥ ೬೨೫॥
॥ ದ್ವಿತೀಯೋ ಜಲೋದ್ಧತಗತಿಪಾದಃ ॥
ಹರಿತ್ಸು ಪರಿತಃ ಪ್ರಸಾದಮಧಿಕಂ ದಧಾನಮಮಲತ್ವಿಷಾಂ ಪ್ರಸರಣೈಃ ।
ಮಹೇನ್ದ್ರಮಹಿಲಾವಿಲಾಸಹಸಿತಂ ಮದನ್ತರತಮೋ ಧುನೋತು ವಿತತಮ್ ॥ ೬೨೬॥
ಪ್ರಸೂಸ್ತ್ರಿಜಗತಃ ಪ್ರಿಯಾ ಮಘವತಃ ಕೃಪಾಕಲಿತಯಾ ಕಟಾಕ್ಷಕಲಯಾ ।
ನಿತಾನ್ತಮಗತೇರ್ವಿಕುಣ್ಠಿತಮತೇರ್ಧುನೋತು ಭರತಕ್ಷಿತೇರಕುಶಲಮ್ ॥ ೬೨೭॥
ಪುರಾ ಶಚಿ ಮತಿಸ್ತ್ವಮೀಶಿತುರಥೋ ನಭಸ್ತನುಮಿತಾ ಪೃಥಙ್ಮತಿಮತೀ ।
ಅನನ್ತರಮಭೂಃ ಸರೋಜನಯನಾ ತನುಃ ಸುರಪತೇರ್ವಿಲೋಚನಸುಧಾ ॥ ೬೨೮॥
ಪರತ್ರ ವಿಗುಣಾ ಸತೋಽಸಿ ಧಿಷಣಾ ನಭಸ್ತನುರಿಹ ಪ್ರಪಞ್ಚಮವಸಿ ।
ಅಸಿ ಸ್ವರಬಲಾ ಪ್ರಿಯಾ ಸುರಪತೇರಿಯತ್ತವ ಶಚಿ ಸ್ವರೂಪಕಥನಮ್ ॥ ೬೨೯॥
ಪ್ರಜಾಪತಿಪದೇ ಪುರಾಣಪುರುಷೇ ಸ್ಮೃತಾ ತ್ವಮದಿತಿಃ ಸುರಾಸುರನುತೇ ।
ಜನಾರ್ದನಪದೇ ರಮಾಸಿ ಪರಮೇ ಸದಾಶಿವಪದೇ ಶಿವಾ ತ್ವಮಜರೇ ॥ ೬೩೦॥
ಉಷಾ ಇನಪದೇ ಸ್ವಧಾಽನಲಪದೇ ಪುರನ್ದರಪದೇ ತ್ವಮೀಶ್ವರಿ ಶಚೀ ।
ಯಥಾ ರುಚಿವಿದುಃ ಪದಾನಿ ಕವಯಶ್ಚಿತೈಶ್ಚ ಚಿತಿಮಾನ್ಯುವಾಮೃಜುಗಿರಾ ॥ ೬೩೧॥
ಅಮೇಯಮಮಲಂ ಪುರಾಣಪುರುಷಂ ತದೀಯವಿಭವಾಭಿಧಾಯಿಭಿರಿಮೇ ।
ವದನ್ತಿ ಕವಯಃ ಪದೈರ್ಬಹುವಿಧೈಸ್ತಥೈವ ಭವತೀಂ ತತೋ ಮತಭಿದಾಃ ॥ ೬೩೨॥
ನಭಶ್ಚ ಪವನಃ ಸ್ವರಶ್ಚ ಪರಮಸ್ತಟಿಚ್ಚ ವಿತತಾ ಪತಿಶ್ಚ ಮಹಸಾಮ್ ।
ಸುಧಾಂಶುರನಲೋ ಜಲಂ ಚ ಪೃಥಿವೀ ಸವಿತ್ರಿ ಯುವಯೋರ್ವಿಭೂತಿಪಟಲೀ ॥ ೬೩೩॥
ಅಪಾರಬಹುಲಪ್ರಮೋದಲಹರೀ ಸತಃ ಕಿಲಚಿತಿಃ ಪರತ್ರ ವಿತತಾ ।
ಪುನರ್ವಿಯದಿದಂ ಪರೀತ್ಯ ನಿಖಿಲಂ ಜಗನ್ತಿ ದಧತೀ ಪರಾ ವಿಜಯತೇ ॥ ೬೩೪॥
ನ ಯದ್ಯಪಿ ಪರಾತ್ಪರೇ ನಭಸಿ ತೇ ಸರೋಜನಯನಾ ವಪುಃ ಪೃಥಗಜೇ ।
ತಥಾಪಿ ನಮತಾಂ ಮತೀರನುಸರನ್ತ್ಯಮೇಯವಿಭವೇ ದಧಾಸಿ ಚ ತನೂಃ ॥ ೬೩೫॥
ಸಹ ತ್ರಿಭುವನಪ್ರಪಾಲನಕೃತಾ ಸಮಸ್ತಮರುತಾಂ ಗಣಸ್ಯ ವಿಭುನಾ ।
ಸದಾ ಶಶಿಮುಖೀ ಶರೀರಭೃದಜಾ ಜಗತ್ಯದುರಿತೇ ಶಚೀ ವಿಜಯತೇ ॥ ೬೩೬॥
ಕುಲಂ ಬಹುಭಿದಂ ಬಲಂ ನ ಭುಜಯೋಃ ಕಥಂ ನು ವಿಪದಸ್ತರೇಮ ಭರತಾಃ ।
ಸಮರ್ಥಮಧುನಾ ವಿಪದ್ವಿಧುತಯೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೩೭॥
ಸಮಸ್ತಮಪಿ ಚ ಸ್ವದೇಶವಿದುಷಾಂ ವಿಧಾನಪಟಲಂ ಬಭೂವ ವಿಫಲಮ್ ।
ಅಭಾಗ್ಯದಮನಕ್ಷಮಂ ತದಧುನಾ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೩೮॥
ನಿಜೋ ಮಮ ಜನೋ ನಿತಾನ್ತಮಗತಿರ್ನ ಕುಕ್ಷಿಭರಣೇಽಪ್ಯಯಂ ಪ್ರಭವತಿ ।
ಮಹೇಶ್ವರಿ ಕೃಪಾಮರನ್ದಮಧುನಾ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೩೯॥
ಅದೃಷ್ಟಕನಕಂ ಕುಲಂ ಮಮ ಚಿರಾನ್ನಿರಾಯುಧಮಿದಂ ನಿರಾಶಮಭಿತಃ ।
ಸ್ವಭಾವತ ಇವ ಪ್ರಬದ್ಧಮಭವತ್ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೦॥
ಅವೀರಚರಿತಂ ವಿಪಾಲಕಕಥಂ ನಿರಾರ್ಷವಿಭವಂ ಚಿರಾನ್ಮಮ ಕುಲಮ್ ।
ಇದಂ ಮಮ ಮನೋ ನಿಕೃನ್ತತಿ ಮುಹುಸ್ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೧॥
ಚಿರಾತ್ಸ್ಮೃತಿಪಥಾದಪಿ ಚ್ಯುತಮಜೇ ತಪೋಬಲಭವಂ ತಮಾರ್ಷವಿಭವಮ್ ।
ಸ್ವದೇಶಮಧುನಾ ಪುನರ್ಗಮಯಿತುಂ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೨॥
ಹತಂ ಚ ವಿಹತಂ ಧುತಂ ಚ ವಿಧುತಂ ರುದನ್ತಮಭಿತೋ ವಿಶಿಷ್ಟಕರುಣೇ ।
ಇಮಂ ಸ್ವವಿಷಯಂ ಶಿವಂ ಗಮಯಿತುಂ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೩॥
ಕ್ಷಯಾಯ ಸುಕೃತದ್ವಿಷಾಂ ವಿಹರತಾಂ ಶಿವಾಯ ಚ ಸತಾಂ ಪ್ರಪಞ್ಚಸುಹೃದಾಮ್ ।
ನಿಜಸ್ಯ ಮನಸೋ ಬಲಾಯ ಚ ಪರೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೪॥
ಜಯತ್ಸು ಸುಕೃತಂ ದ್ವಿಷತ್ಸು ಪರಿತಃ ಸತಾಮಪಿ ಕುಲೇ ಬಲೇನ ರಹಿತೇ ।
ಖಲಪ್ರಿಯಯುಗೇ ಕಲೌ ಪರಿಣತೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೫॥
ಅಭಾತಿ ಸುಕೃತೇ ನಿಗೂಢವಿಭವೇ ವಿಭಾತಿ ದುರಿತೇ ಫಲಾನಿ ದಿಶತಿ ।
ವಿಧಾನವಿಕಲೇ ಮನಸ್ಯಭಯದೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೬॥
ಪಟೌ ಪ್ರತಿಭಟೇ ಗದೇ ಪ್ರತಿಭಯೇ ನತಾವನವಿಧಾವತೀವ ನಿಪುಣಮ್ ।
ಸುಪರ್ವಭುವನಕ್ಷಿತೀಶದಯಿತೇ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೭॥
ಅಮರ್ತ್ಯಪಟಲೀಕಿರೀಟಮಣಿಭಾಭುಜಙ್ಗಕಿರಣಂ ನಿತಾನ್ತಮರುಣಮ್ ।
ವಿಪತ್ತಿದಮನಂ ತಮಃ ಪ್ರಶಮನಂ ತವಾಮ್ಬ ಚರಣಂ ವ್ರಜಾಮಿ ಶರಣಮ್ ॥ ೬೪೮॥
ವಿನಷ್ಟವಿಭವಾಮಿಮಾಂ ಪುನರಪಿ ಶ್ರಿಯಾವಿಲಸಿತಾಂ ವಿಧಾತುಮಜರೇ ।
ಸ್ವಜನ್ಮಪೃಥಿವೀಂ ಸ್ವರೀಶದಯಿತೇ ದಿಶೇರ್ಗಣಪತೇಃ ಕರಾಯ ಪಟುತಾಮ್ ॥ ೬೪೯॥
ಸುಪರ್ವವಸುಧಾಧಿನಾಥಸುದೃಶೋ ಜಲೋದ್ಧತಗತಿಸ್ತವೋಽಯಮನಘಃ ।
ಕೃತಿರ್ಗಣಪತೇಃ ಕರೋತು ವಿಧುತಿಂ ಭಯಸ್ಯ ಭರತಕ್ಷಮಾತಲಜುಷಾಮ್ ॥ ೬೫೦॥
॥ ತೃತೀಯಃ ಪ್ರಮಿತಾಕ್ಷರಪಾದಃ ॥
ಉದಿತಂ ಮಹೇನ್ದ್ರಮಹಿಲಾವದನೇ ಪ್ರಸೃತಂ ಕರೈರ್ದಿಶಿ ದಿಶಿ ಪ್ರಗುಣೈಃ ।
ಅಹಿತಂ ತಮಃ ಪ್ರಶಮಯದ್ಯಮಿನಾಂ ಹಸಿತಂ ಕರೋತು ಮಮ ಭೂರಿ ಶಿವಮ್ ॥ ೬೫೧॥
ಭರತಕ್ಷಿತೇಸ್ತಿಮಿರಮಾಶು ಹರತ್ವರಿಚಾತುರೀಕೃತವಿಮೋಹಮತೇಃ ।
ರವಿಲಕ್ಷತೋಽಪ್ಯಧಿಕಮಂಶುಮತೀ ಪವಿಪಾಣಿಚಿತ್ತದಯಿತಾ ವನಿತಾ ॥ ೬೫೨॥
ಶಶಿಲಕ್ಷಶೀತಲಕಟಾಕ್ಷಸುಧಾ ತರುಣಾರ್ಕಕೋಟಿರುಚಿಪಾದಯುಗಾ ।
ಹೃದಿ ಮೇ ವಿಭಾತು ಮುನಿಗೇಯಗುಣಾ ವಿಬುಧೇನ್ದ್ರಚಿತ್ತರಮಣೀ ತರುಣೀ ॥ ೬೫೩॥
ಕಮನೀಯದೀಪ್ತಸುಕುಮಾರತನುರ್ಮನನೀಯಪಾವನಪದಾಮ್ಬುರುಹಾ ।
ವಿದಧಾತು ಮೇ ಶಿವಮಸದ್ವಿಮುಖೀ ವಿಬುಧೇನ್ದ್ರಜೀವಿತಸಖೀ ಸುಮುಖೀ ॥ ೬೫೪॥
ಅನುಮಾನಮೂಢಪಿತೃವಾಕ್ಯವಶಾತ್ತನಯೇನ ದೇವಿ ವಿನಿಕೃತ್ತಶಿರಾಃ ।
ತವ ರೇಣುಕಾ ವಿಲಸಿತಾ ಕಲಯಾ ಗಣನೀಯಶಕ್ತಿರಭವದ್ದಶಸು ॥ ೬೫೫॥
ಸಕಲಾಮಯಪ್ರಶಮನಂ ದುರಿತಕ್ಷಯಕಾರಿಕಾಙ್ಕ್ಷಿತಕರಂ ಚ ಭವೇತ್ ।
ಸುರಸುನ್ದರೀ ಜನಸಮರ್ಚತಯೋರ್ಹೃದಿ ರೇಣುಕಾಚರಣಯೋಃ ಕರಣಮ್ ॥ ೬೫೬॥
ವಿನಿಹನ್ತಿ ಪಾಪಪಟಲಂ ಸ್ಮರಣಾದ್ವಿಧುನೋತಿ ರೋಗನಿವಹಂ ಭಜನಾತ್ ।
ವಿದಘಾತಿ ವಾಞ್ಛಿತತಫಲಂ ಸ್ತವನಾನ್ಮನುಜಸ್ಯ ರಾಮಜನನೀ ಚರಣಮ್ ॥ ೬೫೭॥
ಶರಣಂ ವ್ರಜಾಮಿ ನವರವ್ಯರುಣಂ ಚರಣಂ ತವಾಮ್ಬ ನೃಪಜಾತಿರಿಪೋಃ ।
ಭರತಕ್ಷಿತೇರವನತಃ ಪ್ರಥಮಂ ಮರಣಂ ಮಮೇಹ ನ ಭವತ್ವಧಮಮ್ ॥ ೬೫೮॥
ಸ್ಮರಣಂ ಚಿರಾದವಿರತಂ ವಿದಧಚ್ಚರಣಸ್ಯ ತೇ ತರುಣಭಾನುರುಚಃ ।
ಅಯಮಸ್ತು ರಾಮಜನಯಿತ್ರಿಪಟುಃ ಸುರಕಾರ್ಯಮಾರ್ಯವಿನುತೇ ಚರಿತುಮ್ ॥ ೬೫೯॥
ಅವ ಭಾರತಕ್ಷಿತಿಮಮೋಘದಯೇ ಕರಣಂ ಭವತ್ವಿಹ ತವೈಷ ಜನಃ ।
ನಿಜಯೋಃ ಸವಿತ್ರಿ ಚರಣಾಮ್ಬುಜಯೋರ್ನ ವಿಹಾತುಮರ್ಹಸಿ ಚಿರಾದ್ಭಜಕಮ್ ॥ ೬೬೦॥
ಅವಿಶಸ್ತ್ವಮಿನ್ದ್ರದಯಿತೇ ಕಿಲತಾಮಪಿ ಯಜ್ಞಸೇನತನಯಾಂ ಕಲಯಾ ।
ಅನಘವ್ರತಾಸು ಕವಯಃ ಪ್ರಥಮಾಂ ಪ್ರವದನ್ತಿ ಯಾಂ ಬಹುಲವನ್ದ್ಯಗುಣಾಮ್ ॥ ೬೬೧॥
ಭುವಿ ಭಾರತಂ ಪಠತಿ ಯಃ ಸುಕೃತೀ ಕಲುಷಂ ಧುನೋತಿ ಸಕಲಂ ಕಿಲ ಸಃ ।
ಇಯಮಮ್ಬ ಶಕ್ತಿಕುಲರಾಜ್ಞಿ ತವ ದ್ರುಪದಸ್ಯ ನನ್ದಿನಿ ಕಥಾಮಹಿಮಾ ॥ ೬೬೨॥
ಅಭಿಮನ್ಯುಮಾತರಮನಲ್ಪಗುಣಾಮತಿಲಙ್ಘ್ಯ ಚೈಕ್ಷತ ಹರಿರ್ಭವತೀಮ್ ।
ಅತಿಸೌಹೃದೇನ ಯದಿಹಾರ್ಯನುತೇ ತವ ಹೇತುರೀಡ್ಯತಮಶಕ್ತಿಕಲಾ ॥ ೬೬೩॥
ಗೃಹಕಾರ್ಯತನ್ತ್ರಚತುರಾ ಗೃಹೀಣೀ ಸಕಲೀನ್ದ್ರಿಯಾಮೃತಝರೀ ರಮಣೀ ।
ವರನೀತಿಮಾರ್ಗಕಥನೇ ಸಚಿವೋಽಪ್ಯಭವಸ್ತ್ವಮಮ್ಬ ಕುರು ವಂಶಭೃತಾಮ್ ॥ ೬೬೪॥
ನ ಯುಧಿಷ್ಠಿರಸ್ಯ ವರಘೋರತಪೋ ನ ಧನಞ್ಜಯಸ್ಯ ಪಟು ಬಾಹುಬಲಮ್ ।
ಅರಿಸಙ್ಕ್ಷಯಂ ಕೃತವತೀ ಬಹುಲಂ ತವ ವೇಣಿಕಾಽಪಚರಿತಾ ಫಣಿನೀ ॥ ೬೬೫॥
ಅಸಿತಾಪಿ ಕಾನ್ತಿವಸತಿರ್ಮಹತೀ ವನಿತಾಜನಸ್ಯ ಚ ವಿಮೋಹಕರೀ ।
ಕುಶಲಂ ಮಮಾಭ್ರಪತಿಶಕ್ತಿಕಲಾ ದ್ರುಪದಕ್ಷಿತೀನ್ದ್ರದುಹಿತಾ ದಿಶತು ॥ ೬೬೬॥
ಶಿರಸಾ ಸಮಸ್ತಜನಪಾಪಭರಂ ವಹತೋ ಭವಾಯ ಭುವಿ ಯಾಮವೃಣೋತ್ ।
ಅಮರಾಧಿಪಃ ಪತಿತಪಾವನಿ ತಾಂ ಭುವಿ ಕನ್ಯಕಾಂ ತವ ವಿವೇಶ ಕಲಾ ॥ ೬೬೭॥
ಕಲಯಾ ತವಾತಿಬಲಯಾ ಕಲಿತಾ ಪುರುಷಸ್ಯ ಯೋಗಮಖಿಲಾಮ್ಬ ವಿನಾ ।
ಅಖಿಲೇಶ್ವರಪ್ರಹಿತತೇಜ ಇಯಂ ಸುತಜನ್ಮನೇ ಕಿಲ ದಧಾವನಘಾ ॥ ೬೬೮॥
ಸುರರಕ್ಷಕಸ್ಯ ಮದಯಿತ್ರಿ ದೃಶಾಂ ನರರಕ್ಷಕಸ್ಯ ಜನಯಿತ್ರಿ ಪರೇ ।
ಕುಲರಕ್ಷಣಾಯ ಕೃತಬುದ್ಧಿಮಿಮಂ ಕುರು ದಕ್ಷಮದ್ಭುತಪವಿತ್ರಕಥೇ ॥ ೬೬೯॥
ಮುಮುಚುಃ ಕುಲೇ ಮಮ ಸುಪರ್ವಪತೇಸ್ತವ ಚಾಭಿಧೇಯಮಿಹ ಮನ್ದಧಿಯಃ ।
ಅಪರಾಧಮೇತಮತಿಘೋರತರಂ ಜನನಿ ಕ್ಷಮಸ್ವ ಮಮ ವೀಕ್ಷ್ಯ ಮುಖಮ್ ॥ ೬೭೦॥
ಇಹ ಶಾರದೇತಿ ಯತಿಭಿರ್ವಿನುತಾ ಪ್ರಥಿತಾ ಸುರೇಶ್ವರಮನೋದಯಿತಾ ।
ಭುವಿ ಭಾತಿ ಕೀರ್ತಿವಪುಷಾ ಶಚಿ ಯಾ ಸುಕಥಾಪಿ ಸಾ ತವ ಸವಿತ್ರಿ ಕಲಾ ॥ ೬೭೧॥
ಅರುಣಾಚಲೇಶ್ವರದರೀವಸತೇಸ್ತಪತೋ ಮುನೇರ್ಗಣಪತೇಃ ಕುಶಲಮ್ ।
ವಿವಿಧಾವತಾರವಿಲಸಚ್ಚರಿತಾ ವಿತನೋತು ಸಾ ವಿಬುಧರಾಡ್ವನಿತಾ ॥ ೬೭೨॥
ಅರುಣಾಚಲಸ್ಯ ವರಕನ್ದರಯಾ ಪ್ರತಿಘೋಷಿತಂ ಕಲುಷಹಾರಿ ಯಶಃ ।
ವಿಬುಧಾಧಿನಾಥರಮಣೀ ಶೃಣುಯಾದ್ಗಣನಾಥಗೀತಮತಿಚಾರುನಿಜಮ್ ॥ ೬೭೩॥
ಭರತಕ್ಷಿತೇಃ ಶುಭವಿಧಾಯಿಷು ಸಾ ವಿಬುಧಕ್ಷಿತೀಶದಯಿತಾ ದಯಯಾ ।
ಧನಶಕ್ತಿಬನ್ಧುಬಲಹೀನಮಪಿ ಪ್ರಥಮಂ ಕರೋತು ಗಣನಾಥಮುನಿಮ್ ॥ ೬೭೪॥
ಮುದಿತಾಮಿಮಾ ವಿದಧತು ಪ್ರಮದಾಂ ತ್ರಿದಿವಾಧಿಪಸ್ಯ ನಿಪುಣಶ್ರವಣಾಮ್ ।
ಅಮಿತಪ್ರಕಾಶಗುಣಶಕ್ತಿಮಜಾಂ ಪ್ರಮಿತಾಕ್ಷರಾಃ ಸುಕವಿಭೂಮಿಪತೇಃ ॥ ೬೭೫॥
॥ ಚತುರ್ಥಸ್ತಾಮರಸಪಾದಃ ॥
ದಿಶತು ಶಿವಂ ಮಮ ಚನ್ದ್ರವಲಕ್ಷಸ್ತಿಮಿರಸಮೂಹನಿವಾರಣದಕ್ಷಃ ।
ಕೃತಗತಿರೋಧಕಪಾತಕನಾಶಃ ಸುರಧರಣೀಶವಧೂಸ್ಮಿತಲೇಶಃ ॥ ೬೭೬॥
ಅವಿದಿತಮಾರ್ಗತಯಾತಿವಿಷಣ್ಣಾಂ ಗತಿಮಪಹಾಯ ಚಿರಾಯ ನಿಷಣ್ಣಾಮ್ ।
ಭರತಧರಾಮನಿಮೇಷಧರತ್ರೀ ಪತಿಗೃಹಿಣೀ ಪರಿಪಾತು ಸವಿತ್ರೀ ॥ ೬೭೭॥
ಭುವನಮಿದಂ ಭವತಃ ಕಿಲ ಪೂರ್ವಂ ಯದಮಲರೂಪಮನಾಕೃತಿಸರ್ವಮ್ ।
ಪ್ರಕೃತಿರಿಯಂ ಕುರುತಾದದರಿದ್ರಾಮತಿಮತಿಶಾತತರಾಂ ಮಮ ಭದ್ರಾ ॥ ೬೭೮॥
ಸೃಜತಿ ಜಗನ್ತಿ ವಿಭೌ ಪರಮೇ ಯಾ ಸುಬಹುಲಶಕ್ತಿರರಾಜತ ಮಾಯಾ ।
ಪ್ರದಿಶತು ಸಾ ಮಮ ಕಞ್ಚನ ಯೋಗಂ ಝಟಿತಿ ನಿರಾಕೃತಮಾನಸರೋಗಮ್ ॥ ೬೭೯॥
ಪ್ರತಿವಿಷಯಂ ವಿಕೃತೀತರ ಸತ್ತಾ ವಿಲಸತಿ ಯಾ ಮತಿಮದ್ಭಿರುಪಾತ್ತಾ ।
ಇಯಮನಘಾ ಪರಿಪಾಲಿತಜಾತಿಂ ವಿತರತು ಮೇ ವಿವಿಧಾಂ ಚ ವಿಭೂತಿಮ್ ॥ ೬೮೦॥
ಪ್ರತಿವಿಷಯಗ್ರಹಣಂ ಪರಿಪೂತಾಮತಿರಖಿಲಸ್ಯ ಜನಸ್ಯ ಚ ಮಾತಾ ।
ಮಮ ವಿದಧಾತು ಶುಭಂ ಶುಭನಾಮಾ ತ್ರಿದಿವನಿವಾಸಿನರೇಶ್ವರರಾಮಾ ॥ ೬೮೧॥
ಗಗನತನುರ್ಜಗತೋ ವಿಪುಲಸ್ಯ ಪ್ರಭುಪದಮಗ್ರಯ್ಮಿತಾ ಸಕಲಸ್ಯ ।
ಪ್ರತಿಜನದೇಹಮಜಾ ಪ್ರವಹನ್ತೀ ಮಮ ಹೃದಿ ನನ್ದತು ಸಾ ವಿಹರನ್ತೀ ॥ ೬೮೨॥
ಪಟುಕುಲಕುಣ್ಡಧನಞ್ಜಯಕೀಲಾ ಸಮುದಿತಹಾರ್ದವಿಭಾಕರಲೀಲಾ ।
ದ್ರುತಶಿರ ಇನ್ದುಕಲಾಮೃತಧಾರಾ ಜನಮವತಾನ್ನಿಜಭಕ್ತಮುದಾರಾ ॥ ೬೮೩॥
ವಿಷಯಸಮಾಕೃತಿರತ್ರ ಪುರಸ್ತಾದ್ವಿಮಲತಮಾ ಕಿಲ ತತ್ರ ಪರಸ್ತಾತ್ ।
ಭುವನಮಯೀ ಭುವನಾಚ್ಚ ವಿಭಕ್ತಾಮತಿರನಘಾಽವತು ಮಾಮತಿಶಕ್ತಾ ॥ ೬೮೪॥
ವಿಷಯಪರಿಗ್ರಹಣೇಷ್ವತಿಸಕ್ತಾ ವಿಷಯವಿಭೂತಿಷು ಕಾಪಿ ವಿವಿಕ್ತಾ ।
ಅಖಿಲಪತೇರ್ಮಯಿ ದೀವ್ಯತು ಶಕ್ತಿರ್ವಿಮಲತಮಾ ವಿಧುತೇತರಶಕ್ತಿಃ ॥ ೬೮೫॥
ದೃಶಿ ದೃಶಿ ಭಾತಿ ಯದೀಯಮಪಾಪಂ ದಿಶಿ ದಿಶಿ ಗನ್ತೃ ಚ ವೇತ್ತೃ ಚ ರೂಪಮ್ ।
ಭವತು ಶಿವಾಯ ಮಮೇಯಮನಿನ್ದ್ಯಾ ಭುವನಪತೇರ್ಗೃಹಿಣೀ ಮುನಿವನ್ದ್ಯಾ ॥ ೬೮೬॥
ಜಡಕುಲಕುಣ್ಡದರೀಷು ಶಯಾನಾ ಬುಧಕುಲವಹ್ನಿಷು ಭೂರಿವಿಭಾನಾ ।
ಹರಿಹಯಶಕ್ತಿರಮೇಯಚರಿತ್ರ ಮಮ ಕುಶಲಂ ವಿದಧಾತು ಪವಿತ್ರ ॥ ೬೮೭॥
ದಹರಗತಾಖಿಲಮಾಕಲಯನ್ತೀ ದ್ವಿದಲಗತಾ ಸಕಲಂ ವಿನಯನ್ತೀ ।
ದಶಶತಪತ್ರಗತಾ ಮದಯನ್ತೀ ಭವತು ಮಯೀನ್ದ್ರವಧೂರ್ವಿಲಸನ್ತೀ ॥ ೬೮೮॥
ಗೃಹಯುಗಲೀಶ್ರಿಯ ಆಶ್ರಿತಗಮ್ಯಾ ಪದಕಮಲದ್ವಿತಯೀ ಬಹುರಮ್ಯಾ ।
ಮಮ ಹೃದಿ ಭಾತ್ವವಿಕುಣ್ಠಿತಯಾನಾ ಹರಿಸುದೃಶಸ್ತರುಣಾರುಣಭಾನಾ ॥ ೬೮೯॥
ಉಪರಿ ತತಾ ಕುಲಕುಣ್ಡನಿಶಾನ್ತಾಜ್ಜ್ವಲಿತಧನಞ್ಜಯದೀಧಿತಿಕಾನ್ತಾತ್ ।
ಹರಿಹಯಶಕ್ತಿರಿಯಂ ಮಮ ಪುಷ್ಟಾ ದ್ರವಯತು ಮಸ್ತಕಚನ್ದ್ರಮದುಷ್ಟಾ ॥ ೬೯೦॥
ನಭಸಿ ವಿರಾಜತಿ ಯಾ ಪರಶಕ್ತಿರ್ಮಮ ಹೃದಿ ರಾಜತಿ ಯಾ ವರಶಕ್ತಿಃ ।
ಉಭಯಮಿದಂ ಮಿಲಿತಂ ಬಹುವೀರ್ಯಂ ಭವತು ಸುಖಂ ಮಮ ಸಾಧಿತಕಾರ್ಯಮ್ ॥ ೬೯೧॥
ತ್ರಿಭುವನಭೂಮಿಪತೇಃ ಪ್ರಿಯಯೋಷಾ ತ್ರಿಮಲಹರೀ ಸುರವಿಷ್ಟಪಭೂಷಾ ।
ಮಮ ವಿತನೋತು ಮನೋರಥಪೋಷಂ ದುರಿತವಿಪತ್ತಿತತೇರಪಿ ಶೋಷಮ್ ॥ ೬೯೨॥
ಪವನಜಗತ್ಪ್ರಭುಪಾವನಮೂರ್ತಿರ್ಜಲಧರಚಾಲನವಿಶ್ರುತಕೀರ್ತಿಃ ।
ಮಮ ಕುಶಲಾಯ ಭವತ್ವರಿಭೀಮಾ ಜನನವತಾಂ ಜನನೀ ಬಹುಧಾಮಾ ॥ ೬೯೩॥
ಮಮ ಸುರರಾಜವಧೂಕಲಯೋಗ್ರಾ ಖಲಜನಧೂನನಶಕ್ತನಖಾಗ್ರಾ ।
ದಮಯತು ಕೃತ್ತಶಿರಾಃ ಕಲುಷಾಣಿ ಪ್ರಕಟಬಲಾ ಹೃದಯಸ್ಯ ವಿಷಾಣಿ ॥ ೬೯೪॥
ಕುಲಿಶಿವಧೂಕಲಯಾ ಪರಿಪುಷ್ಟಾ ಬುಧನುತಸನ್ನುಣಜಾಲವಿಶಿಷ್ಟಾ ।
ಮಮ ಪರಿತೋ ವಿಲಸದ್ವಿಭವಾನಿ ದ್ರುಪದಸುತಾ ವಿದಧಾತು ಶಿವಾನಿ ॥ ೬೯೫॥
ಸುರಜನರಾಡ್ದಯಿತಾಂಶವಿದೀಪ್ತೇ ಪದಕಮಲಾಶ್ರಿತಸಾಧುಜನಾಪ್ತೇ ।
ದುರಿತವಶಾದಭಿತೋ ಗತಭಾಸಂ ಮನುಜಕುಮಾರಜನನ್ಯವದಾಸಮ್ ॥ ೬೯೬॥
ಅಮರನರೇಶ್ವರಮನ್ದಿರನೇತ್ರೀ ಸುಮಶರಜೀವನಸುನ್ದರಗಾತ್ರೀ ।
ಭವತು ಶಚೀ ವಿತತಸ್ವಯಶಸ್ಸು ಪ್ರತಿಫಲಿತಾ ಗಣನಾಥವಚಸ್ಸು ॥ ೬೯೭॥
ವಿಕಸತು ಮೇ ಹೃದಯಂ ಜಲಜಾತಂ ವಿಲಸತು ತತ್ರ ಶಚೀಸ್ತುತಿಗೀತಮ್ ।
ಸ್ಫುರತು ಸಮಸ್ತಮಿಹೇಪ್ಸಿತವಸ್ತು ಪ್ರಥಿತತಮಂ ಮಮ ಪಾಟವಮಸ್ತು ॥ ೬೯೮॥
ಕುರು ಕರುಣಾರಸಸಿಕ್ತನಿರೀಕ್ಷೇ ವಚನಪಥಾತಿಗಸನ್ನುಣಲಕ್ಷೇ ।
ಶಚಿ ನರಸಿಂಹಜಮಾಹಿತಗೀತಂ ಭರತಧರಾಮವಿತುಂ ಪಟುಮೇತಮ್ ॥ ೬೯೯॥
ಸುಲಲಿತತಾಮರಸೈಃ ಪ್ರಸಮಾಪ್ತಂ ವರನುತಿಬನ್ಧಮಿಮಂ ಶ್ರವಣಾಪ್ತಮ್ ।
ಜನನಿ ನಿಶಮ್ಯ ಸುಸಿದ್ಧಮಶೇಷಂ ಹರಿಲಲನೇ ಮಮ ಕುರ್ವಭಿಲಾಷಮ್ ॥ ೭೦೦॥
॥ ಇತಿ ಶ್ರೀಭಗವನ್ಮಹರ್ಷಿರಮಣಾನ್ತೇವಾಸಿನೋ ವಾಸಿಷ್ಠಸ್ಯ ನರಸಿಂಹಸೂನೋಃ
ಗಣಪತೇಃ ಕೃತೌ ಇನ್ದ್ರಾಣೀಸಪ್ತಶತೀ ಸಮಾಪ್ತಾ ॥
Complete Works of Ganapati Muni Vol 02-14
Proofread byDPD
Please send corrections to sanskrit@cheerful.com
Last updated ತ್oday
http://sanskritdocuments.org
Indrani Saptashati Lyrics in Kannada PDF
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website