ଇନ୍ଦ୍ରାଣୀସପ୍ତଶତୀ
{॥ ଇନ୍ଦ୍ରାଣୀସପ୍ତଶତୀ ॥}
॥ ପ୍ରଥମଂ ଗାଯତ୍ରଂ ଶତକମ୍ ॥
॥ ପ୍ରଥମଃ ଶଶିଵଦନାପାଦଃ ॥
ହରିଲଲନେ ମେ ପଥି ତିମିରାଣି ।
ହରଦରହାସଦ୍ଯୁତିଭିରିମାନି ॥ ୧॥
ଅଗତିମଵୀର୍ଯାମପଗତଧୈର୍ଯାମ୍ ।
ଅଵତୁ ଶଚୀ ମେ ଜନିଭୁଵମାର୍ଯାମ୍ ॥ ୨॥
ଶୃଣୁ କରୁଣାଵତ୍ଯଲଘୁମଖର୍ଵେ ।
ସ୍ତଵମହମାର୍ଯସ୍ତଵ ଶଚି କୁର୍ଵେ ॥ ୩॥
ତ୍ରିଜଗଦତୀତୋ ଵିଲସତି ନିତ୍ଯଃ ।
ଅଣୁରଣୁତୋ ଯୋ ଭଗଵତି ସତ୍ଯଃ ॥ ୪॥
ତ୍ଵମଖିଲକାର୍ଯେଷ୍ଵଯି ଧୃତସକ୍ତିଃ ।
ଉରୁଗତିରସ୍ଯ ପ୍ରଭୁତମଶକ୍ତିଃ ॥ ୫॥
ଵିଦୁରିମମେକେ ଜଗତି ମହେନ୍ଦ୍ରମ୍ ।
ଜଗୁରଯି କେଚିଜ୍ଜନନି ମହେଶମ୍ ॥ ୬॥
ଅଵଗତଵେଦୋ ଵଦତି ମହେନ୍ଦ୍ରମ୍ ।
ପରିଚିତତନ୍ତ୍ରୋ ଭଣତି ମହେଶମ୍ ॥ ୭॥
ଜନନି ଶଚି ତ୍ଵଂ ପ୍ରଥମଦଲସ୍ଯ ।
ଭଗଵତି ଦୁର୍ଗାସ୍ଯପରଦଲସ୍ଯ ॥ ୮॥
ନ ଶଚି ଶିଵାତସ୍ତ୍ଵମିତରଦୈଵମ୍ ।
ବହୁମୁନିଵାଣୀସମରସତୈଵମ୍ ॥ ୯॥
ଦିଵି ଚ ସିତାଦ୍ରୌ ଶଚିଵପୁଷୋର୍ଵାମ୍ ।
ପୃଥଗୁପଲମ୍ଭାଦଯି ଭିଦଯୋକ୍ତିଃ ॥ ୧୦॥
ତନୁଯୁଗମୂଲଂ ଵପୁରତିମାଯମ୍ ।
କରଚରଣାଦ୍ଯୈର୍ଵିଯୁତମମେଯମ୍ ॥ ୧୧॥
ତ୍ଵମୁଦରଵର୍ତିତ୍ରିଭୁଵନଜୀଵା ।
ଭଵସି ଶଚୀ ସା ଜନନି ଶିଵା ଵା ॥ ୧୨॥
ଵିଭୁଶୁଚିକୀଲାତତିରଯି ଧୂମମ୍ ।
ତ୍ଵମମରମାର୍ଗଂ ବତ ଵମସୀମମ୍ ॥ ୧୩॥
ଜଯସି ନଭସ୍ଥୋ ଜନନି ପରସ୍ତାତ୍ ।
ନଭସି ଚ ଭାନ୍ତୀ ଭଵସି ପୁରସ୍ତାତ୍ ॥ ୧୪॥
ତ୍ଵମତନୁରମ୍ବ ଜ୍ଵଲସି ପରସ୍ତାତ୍ ।
ଇହ ଖଶରୀରା ଲସସି ପୁରସ୍ତାତ୍ ॥ ୧୫॥
ଜନନି ପରସ୍ତାନ୍ମତିରସି ଭର୍ତୁଃ ।
ଅସି ଖଶରୀରା ପୃଥଗଵଗନ୍ତ୍ରୀ ॥ ୧୬॥
ଅଣୁଚଯରୂପଂ ଭଗଵତି ଶାନ୍ତମ୍ ।
ନ ଭଵତି ଶୂନ୍ଯଂ ତଦିଦମନନ୍ତମ୍ ॥ ୧୭॥
ଦିଵି ଦଧତୀଶେ ପୁରୁଷଶରୀରମ୍ ।
ଜନନି ପୁରନ୍ଧ୍ରୀ ତନୁରଭଵସ୍ତ୍ଵମ୍ ॥ ୧୮॥
ଦୃଶି ଵିଲସନ୍ତଂ ପ୍ରଭୁମୁପଯାନ୍ତୀ ।
ଭଵସି ଵିରାଟ୍ ତ୍ଵଂ ନୃତନୁଷୁ ଭାନ୍ତୀ ॥ ୧୯॥
ତଵ ଗୁଣଗାନଂ ଜନନି ଵିଧାତୁମ୍ ।
ଭଵତି ପଟୁଃ କୋ ଵିଯଦିଵ ମାତୁମ୍ ॥ ୨୦॥
ଭଗଵତି ତୃପ୍ତିର୍ଭଵତୁ ନ ଵା ତେ ।
ଅଭିଲଷିତାପ୍ତିର୍ଭଵତୁ ନ ଵା ମେ ॥ ୨୧॥
ଭଜତି ତଵାଙ୍ଘ୍ରିଂ ମମ ଖଲୁ ଭାଷା ।
ପତି ମନୁରାଗାତ୍ ପ୍ରିଯମିଵ ଯୋଷା ॥ ୨୨॥
ଅଘମପହର୍ତୁଂ ଶୁଭମପି କର୍ତୁମ୍ ।
ଅଲମଜରେ ତେ ଗୁଣଗଣଗାନମ୍ ॥ ୨୩॥
ଅଵସି ଜଗତ୍ତ୍ଵଂ କୁଲିଶିଭୁଜସ୍ଥା ।
ଅଵ ମୁନିଭୂମିଂ ଗଣପତିଧୀସ୍ଥା ॥ ୨୪॥
ଶଶିଵଦନାଭିର୍ଗଣପତିଜାଭିଃ ।
ଶଶିଵଦନାଦ୍ଯା ପରିଚରିତାଽସ୍ତୁ ॥ ୨୫॥
॥ ଦ୍ଵିତୀଯସ୍ତନୁମଧ୍ଯାପାଦଃ ॥
ଧ୍ଵାନ୍ତଂ ପରିହର୍ତୁଂ ତେଜାଂସ୍ଯପି ଭର୍ତୁମ୍ ।
ଅନ୍ତର୍ଜଗଦମ୍ବା ହାସଂ କୁରୁତାନ୍ମେ ॥ ୨୬॥
ଭୀତାମରିଧୂତାମାର୍ଯାଵନିମେତାମ୍ ।
ସମ୍ରାଜ୍ଞି ବୁଧାନାଂ ଦୂନାମଵ ଦୀନାମ୍ ॥ ୨୭॥
ଈଶସ୍ଯ ସହାଯାଂ ଵିଶ୍ଵସ୍ଯ ଵିଧାନେ ।
ଆକାଶଶରୀରାମମ୍ବାଂ ପ୍ରଣମାମଃ ॥ ୨୮॥
କର୍ତୁର୍ଭୁଵନାନାଂ ମାଯାସି ଶଚି ତ୍ଵମ୍ ।
ସତ୍ଯସ୍ଯ ତପୋଽସି ଜ୍ଞସ୍ଯାସି ମନୀଷା ॥ ୨୯॥
ଆଜ୍ଞାସି ଵିନେତୁସ୍ତେଜୋଽସି ଵିଭାତଃ ।
ନିର୍ଯତ୍ନସମାଧେରାନନ୍ଦରସୋଽସି ॥ ୩୦॥
ତସ୍ଯ ତ୍ଵମନନ୍ଯାଽପ୍ଯନ୍ଯେଵ ଖକାଯା ।
ଅତ୍ଯଦ୍ଭୁତମାଯା ଜାଯାଽସି ସହାଯା ॥ ୩୧॥
ଆକାଶଶରୀରାଂ ଜାଯାମଶରୀରଃ ।
ଆଲିଙ୍ଗ୍ଯ ଵିଭୁସ୍ତ୍ଵାଂ ନନ୍ଦତ୍ଯଯି ଚିତ୍ରମ୍ ॥ ୩୨॥
ଵଜ୍ରେଶ୍ଵରି ଘସ୍ରେ ଯଦ୍ଵନ୍ମୁକୁଟେନ ।
ଦୀପ୍ତେନ ସଵିତ୍ର ମୂର୍ଧା ତଵ ଭାତି ॥ ୩୩॥
ନକ୍ଷତ୍ରସହସ୍ରୈଶ୍ଶୁଭ୍ରଦ୍ଯୁତିଭିସ୍ତେ ।
ପୁଷ୍ପାଯିତମେତୈର୍ମାତର୍ନିଶିମସ୍ତେ ॥ ୩୪॥
ଘସ୍ରଃ ଖଲୁ କାଲୋ ରାଜ୍ଯଂ ନନୁ କର୍ତୁମ୍ ।
ରାତ୍ରିଃ ଖଲୁ କାଲୋ ରନ୍ତୁଂ ରମଣେନ ॥ ୩୫॥
ନିଃଶବ୍ଦତରଙ୍ଗାସ୍ଵଗ୍ଲୌଷୁ ନିଶାସୁ ।
ନୂନଂ ଖଶରୀରେ କାନ୍ତଂ ରମଯନ୍ତୀ ॥ ୩୬॥
ସାନ୍ଦ୍ରୋଡୁସୁମସ୍ରଗ୍ଵିଭ୍ରାଜିତକେଶା ।
ଧ୍ଵାନ୍ତାସିତଚେଲା ଶାନ୍ତାଽପ୍ଯସି ଭୀମା ॥ ୩୭॥
ରାଜନ୍ମିତତାରାମନ୍ଦାରଵତଂସାମ୍ ।
ମାତସ୍ସିତଭାସା ସ୍ମେରାଂ ହସିତେନ ॥ ୩୮॥
ଜ୍ଯୋତ୍ସ୍ନା ଘନସାରଦ୍ରାଵୈରନୁଲିପ୍ତାମ୍ ।
ତ୍ଵାଂ ଵୀକ୍ଷ୍ଯ ନ ଶାନ୍ତିଃ କସ୍ଯ କ୍ଷଣଦାସୁ ॥ ୩୯॥
ବାଲାରୁଣରୋଚିଃ କାଶ୍ମୀରରଜୋଭିଃ ।
ଆଲିପ୍ତମୁଖୀଂ ତ୍ଵାଂ ପ୍ରାତଃ ପ୍ରଣମାମି ॥ ୪୦॥
ସାଯଂ ସମଯଶ୍ରୀ ଲାକ୍ଷାରସରକ୍ତମ୍ ।
ପ୍ରତ୍ଯକ୍ ପ୍ରସୃତଂ ତେ ଵନ୍ଦେ ଵରଦେଽଙ୍ଘ୍ରିମ୍ ॥ ୪୧॥
ଦୀପ୍ତାର୍କକିରୀଟାଂ ସର୍ଵାନ୍ ଵିନଯନ୍ତୀମ୍ ।
ଵନ୍ଦେ ଭୁଵନାନାଂ ରାଜ୍ଞୀମସମାନାମ୍ ॥ ୪୨॥
ଧୂତାଖିଲରୋଗାଃ ଶ୍ଵାସାସ୍ତଵ ଵାତାଃ ।
ମାତର୍ଵିତରନ୍ତୁ ପ୍ରାଣସ୍ଯ ବଲଂ ନଃ ॥ ୪୩॥
ପ୍ରାଞ୍ଚସ୍ତଵ ଵାତାଃ ସ୍ଵାସାଃ ଶମୁଶନ୍ତୁ ।
ପ୍ରତ୍ଯଞ୍ଚ ଏମେ ନଃ ପାପଂ ଶମଯନ୍ତୁ ॥ ୪୪॥
ମନ୍ମାତରଵାଞ୍ଚୋ ଵୀର୍ଯଂ ଵିତରନ୍ତୁ ।
ସନ୍ତାପମୁଦଞ୍ଚଃ ସର୍ଵଂ ଚ ହରନ୍ତୁ ॥ ୪୫॥
ଅସ୍ଯା ଇଵ ଭୂମେର୍ଭୂତପ୍ରସଵାଯାଃ ।
ଏକୈକଶ ଆହୁର୍ଯେଷାଂ ମହିମାନମ୍ ॥ ୪୬॥
ଅଦ୍ରେରୁପଲାନାଂ ନଦ୍ଯାଃ ସିକତାନାମ୍ ।
ଯେଷାଂ ଚ ନ କଧ୍ଚ୍ଛିକ୍ତୋ ଗଣନାଯାମ୍ ॥ ୪୭॥
ରୋମାଯିତମେତୈର୍ଗୋଲୈସ୍ତଵ କାଯେ ।
ଵ୍ଯାଖ୍ଯାତମନେନ ଶ୍ଲାଘ୍ଯଂ ତଵ ଭାଗ୍ଯମ୍ ॥ ୪୮॥
ଵିଶ୍ଵଂ ଵହସୀଦଂ ଜମ୍ଭାରିଭୁଜସ୍ଥା ।
ଆର୍ଯାନ୍ଵହମାତର୍ଵାସିଷ୍ଠମତିସ୍ଥା ॥ ୪୯॥
ଆଦ୍ଯାଂ ଭୁଵନାନାଂ ଭର୍ତୁସ୍ତନୁମଧ୍ଯାମ୍ ।
ଭକ୍ତ୍ସ୍ଯ ଭଜନ୍ତାମେତାସ୍ତନୁମଧ୍ଯାଃ ॥ ୫୦॥
॥ ତୃତୀଯୋ ମୁକୁଲପାଦଃ ॥
ହାସାଃ ଶକ୍ରଗୃହେଶ୍ଵର୍ଯାଶ୍ଚନ୍ଦ୍ରରୁଚଃ ।
ଭୂଯାସୁର୍ଵିମଲପ୍ରଜ୍ଞାଯୈ ହୃଦି ମେ ॥ ୫୧॥
ଇନ୍ଦ୍ରାଣ୍ଯାଃ କରୁଣା ଲୋକାଶ୍ଶୋକହୃତଃ ।
ଭୂଯାସୁର୍ଭରତକ୍ଷ୍ମାଯୈ କ୍ଷେମକୃତଃ ॥ ୫୨॥
ଵ୍ଯକ୍ତିର୍ଵ୍ଯୋମତନୁଃ ଶକ୍ତିତ୍ଵାଦ୍ଵନିତା ।
ଜ୍ଞାତୃତ୍ଵାତ୍ପୁରୁଷଃ କେଷାଞ୍ଚିଦ୍ଵିଦୁଷାମ୍ ॥ ୫୩॥
ଵ୍ଯକ୍ତିଂ ଵ୍ଯୋମତନୁଂ ଯେ ପ୍ରାହୁଃ ପୁରୁଷମ୍ ।
ତେଷାଂ ତତ୍ତ୍ଵଵିଦାଂ କଲ୍ପସ୍ସ୍ଯାତ୍ ତ୍ରିଵିଧଃ ॥ ୫୪॥
ରୁଦ୍ରଂ କେଽପି ଜଗୁଃ ଶକ୍ରଂ କେଽପି ଵିଦୁଃ ।
ଭାଷନ୍ତେ ଭୁଵନପ୍ରାଣଂ କେଽପି ଵିଦଃ ॥ ୫୫॥
ଵ୍ଯକ୍ତିଂ ଵ୍ଯୋମତନୁଂ ପ୍ରାହୁର୍ଯେ ଵନିତାମ୍ ।
ତେଷାଂ ଚ ତ୍ରିଵିଧଃ କଲ୍ପଶ୍ଶାସ୍ତ୍ରଵିଦାମ୍ ॥ ୫୬॥
ଦୁର୍ଗା ସୂରିଵରୈଃ କୈଶ୍ଚିତ୍ସା ଗଦିତା ।
ଶଚ୍ଯନ୍ଯୈର୍ଵିବୁଧୈର୍ଜ୍ଞୈରନ୍ଯୈରଦିତିଃ ॥ ୫୭॥
ଏକେଷାଂ ଵିଦୁଷାଂ ଵ୍ଯକ୍ତିର୍ଵ୍ଯୋମତନୁଃ ।
ନ ସ୍ତ୍ରୀ ନୋ ପୁରୁଷୋ ବ୍ରହ୍ମୈତତ୍ସଗୁଣମ୍ ॥ ୫୮॥
ତ୍ଵଂ ଵିଶ୍ଵସ୍ଯ ମହାନ୍ ପ୍ରାଣଃ କଃ ପରମେ ।
ତ୍ଵଂ ରୁଦ୍ରଃ ପ୍ରଣଵସ୍ତ୍ଵଂ ଶକ୍ରୋଽଭ୍ରଶିଖୀ ॥ ୫୯॥
ତ୍ଵଂ କସ୍ଯାସ୍ଯଦିତିସ୍ତ୍ଵଂ ରୁଦ୍ରସ୍ଯ ଶିଵା ।
ତ୍ଵଂ ଶକ୍ରସ୍ଯ ଶଚୀ ଶକ୍ତିର୍ଦେଵନୁତେ ॥ ୬୦॥
ପ୍ରାଣଶ୍ଚ ପ୍ରଣଵୋ ଜ୍ଯୋତିଶ୍ଚାମ୍ବରଗମ୍ ।
ଵସ୍ତ୍ଵେକଂ ତ୍ରିଗୁଣଂ ନୋ ଵସ୍ତୁ ତ୍ରିତଯମ୍ ॥ ୬୧॥
ଶକ୍ତେରମ୍ବପରେ ଶକ୍ତ୍ସ୍ଯାପି ଭିଦା ।
ଜ୍ଵାଲା ପାଵକଵଦ୍ଭାଷା ଭେଦକୃତା ॥ ୬୨॥
ସର୍ଵଂ ଦୃଶ୍ଯମିଦଂ ଭୁଞ୍ଜାନେ ପରମେ ।
ପୁଂନାମସ୍ତୁତଯୋ ଯୁଜ୍ଯନ୍ତେ ଖଲୁ ତେ ॥ ୬୩॥
କୁର୍ଵାଣେମ୍ବସତସ୍ସନ୍ତୋଷଂ ସତତମ୍ ।
ସ୍ତ୍ରୀନାମସ୍ତୁତଯଃ ଶୋଭାଂ ତେ ଦଧତେ ॥ ୬୪॥
ସଦ୍ବ୍ରହ୍ମ ବ୍ରୁଵତେ ଵିଦ୍ଵାଂସୋ ଵିଗୁଣମ୍ ।
ତ୍ଵଂ ମାତସ୍ସଗୁଣଂ ବ୍ରହ୍ମାସି ପ୍ରଥିତେ ॥ ୬୫॥
ଶବ୍ଦାଦ୍ଯୈର୍ଵିଯୁତଂ ସଦ୍ବ୍ରହ୍ମାମଲିନମ୍ ।
ଶବ୍ଦାଦ୍ଯୈଃ ସହିତା ତ୍ଵଂ ଦେଵ୍ଯଚ୍ଛହିତା ॥ ୬୬॥
ସାକ୍ଷି ବ୍ରହ୍ମ ପରଂ ତ୍ଵଂ ମାତଃ କୁରୁଷେ ।
ସର୍ଵେଷାଂ ଜଗତାଂ କାର୍ଯଂ ସର୍ଵଵିଧମ୍ ॥ ୬୭॥
ଦ୍ଯୌର୍ମାତା ଜଗତୋ ଦ୍ଯୌରେଵାସ୍ଯ ପିତା ।
ଵ୍ଯାପ୍ତଂ ଭାତି ଜଗଦ୍ଦ୍ଯାଵା ସର୍ଵମିଦମ୍ ॥ ୬୮॥
ଆକାଶାଦ୍ରଜସୋ ଦ୍ଯୌରନ୍ଯା ଵିରଜାଃ ।
ଆକାଶେଽସ୍ତି ପୁନସ୍ତତ୍ପାରେ ଚ ପରା ॥ ୬୯॥
ଦ୍ଯାଵଂ ତାଂ ଜଗତୋ ରଙ୍ଗେ ଵ୍ଯୋମତନୁମ୍ ।
ପାରେ ଶୁଦ୍ଧତମାଂ ଵିଦ୍ମସ୍ତ୍ଵାଂ ପରମେ ॥ ୭୦॥
ତ୍ଵାଂ ପୂର୍ଣାମଦିତିଂ ଶକ୍ତିଂ ଦେଵି ଶଚୀମ୍ ।
ନିତ୍ଯଂ ଶବ୍ଦଵତୀଂ ଗୌରୀଂ ପ୍ରବ୍ରୁଵତେ ॥ ୭୧॥
ପୁଂନାମା ଭଵତୁ ସ୍ତ୍ରୀନାମାସ୍ତ୍ଵଥଵା ।
ଵ୍ଯକ୍ତିର୍ଵ୍ଯୋମତନୁର୍ଲୋକଂ ପାତ୍ଯଖିଲମ୍ ॥ ୭୨॥
ନାକେ ସା କିଲ ଭାତ୍ଯୈନ୍ଦ୍ରୀ ରାଜ୍ଯରମା ।
ଵିଭ୍ରାଣା ଲଲିତଂ ସ୍ତ୍ରୀରୂପଂ ପରମା ॥ ୭୩॥
ଶକ୍ତାଂ ଦେଵି ଵିଧେହ୍ଯାର୍ତାନାମଵନେ ।
ଇନ୍ଦ୍ରସ୍ଯେଵ ଭୁଜାଂ ଵାସିଷ୍ଠସ୍ଯ ମତିମ୍ ॥ ୭୪॥
ପୂଜାଶକ୍ରତରୁଣ୍ଯୈତୈସ୍ସିଧ୍ଯତୁ ତେ ।
ଗାତୃଣାଂ ଵରଦେ ଗାଯତ୍ରୌର୍ମୁକୁଲୈଃ ॥ ୭୫॥
॥ ଚତୁର୍ଥୋ ଵସୁମତୀପାଦଃ ॥
ମୋହଂ ପରିହରନ୍ ଯୋଗଂ ଵିତନୁତାମ୍ ।
ଦେଵେନ୍ଦ୍ରଦଯିତା ହାସୋ ମମ ହୃଦି ॥ ୭୬॥
ଆଭାତୁ କରୁଣା ସା ଭାରତଭୁଵି ।
ସୁତ୍ରାମସୁଦୃଶୋ ଯଦ୍ଵନ୍ନିଜଦିଵି ॥ ୭୭॥
ଵନ୍ଦାରୁଜନତାମନ୍ଦାରଲତିକାମ୍ ।
ଵନ୍ଦେ ହରିହଯପ୍ରାଣପ୍ରିଯତମାମ୍ ॥ ୭୮॥
ଶୋକସ୍ଯ ଦମନୀଂ ଲୋକସ୍ଯ ଜନନୀମ୍ ।
ଗାଯାମି ଲଲିତାଂ ଶକ୍ରସ୍ଯ ଦଯିତାମ୍ ॥ ୭୯॥
ରମ୍ଯା ସୁମନସାଂ ଭୂପସ୍ଯ ମହିଷୀ ।
ସୌମ୍ଯା ଜନିମତାଂ ମାତା ଵିଜଯତେ ॥ ୮୦॥
ଵୀର୍ଯସ୍ଯ ଚ ଧିଯସ୍ତ୍ରୈଲୋକ୍ଯଭରଣେ ।
ଦାତ୍ରୀ ମଘଵତେ ଦେଵୀ ଵିଜଯତେ ॥ ୮୧॥
ଵ୍ଯାପ୍ତା ଜଗଦିଦଂ ଗୁପ୍ତା ହୃଦି ନୃଣାମ୍ ।
ଆପ୍ତା ସୁକୃତିନାଂ ଦୈଵଂ ମମ ଶଚୀ ॥ ୮୨॥
ଖେ ଶକ୍ତିରତୁଲା ପାରେ ଚିଦମଲା ।
ସ୍ଵଶ୍ଚାରୁମହିଲା ଦୈଵଂ ମମ ଶଚୀ ॥ ୮୩॥
ଶସ୍ତ୍ରଂ ମଘଵତଃ ଶାସ୍ତ୍ରଂ ଯମଵତାମ୍ ।
ଵସ୍ତ୍ରଂ ତ୍ରିଜଗତୋ ଦୈଵଂ ମମ ଶଚୀ ॥ ୮୪॥
ଯୁକ୍ତ୍ସ୍ଯ ଭଜତଃ ଶର୍ମାନ୍ତରତୁଲମ୍ ।
ଵର୍ମାପି ଚ ବହିର୍ଦୈଵଂ ମମ ଶଚୀ ॥ ୮୫॥
ଵୀର୍ଯଂ ବଲଵତାଂ ବୁଦ୍ଧିର୍ମତିମତାମ୍ ।
ତେଜୋ ଦ୍ଯୁତିମତାଂ ଦୈଵଂ ମମ ଶଚୀ ॥ ୮୬॥
ଏକୈଵ ଜନଯନ୍ତ୍ଯେକୈଵ ଦଧତୀ ।
ଏକୈଵ ଲଯକୃଦ୍ଦୈଵଂ ମମ ଶଚୀ ॥ ୮୭॥
ଶକ୍ତୀରଵିତଥାଃ କ୍ଷେତ୍ରୋଷୁ ଦଧତୀ ।
ବୀଜେଷୁ ଚ ପରା ଦୈଵଂ ମମ ଶଚୀ ॥ ୮୮॥
ଚିନ୍ଵନ୍ତ୍ଯପି ପଚନ୍ତ୍ଯେକା ପଶୁଗଣମ୍ ।
ଖାଦନ୍ତ୍ଯପି ଭଵେ ଦୈଵଂ ମମ ଶଚୀ ॥ ୮୯॥
ଦୃଷ୍ଟୌ ଧୃତଚିତିର୍ଦୃଶ୍ଯେ ତତଗୁଣା ।
ଵିଶ୍ଵାତ୍ମମହିଷୀ ଦୈଵଂ ମମ ଶଚୀ ॥ ୯୦॥
ରାକାଶଶିମୁଖୀ ରାଜୀଵନଯନା ।
ସ୍ଵଃ କାପି ଲଲନା ଦୈଵଂ ମମ ଶଚୀ ॥ ୯୧॥
ସ୍ଥାଣାଵପି ଚରେ ସର୍ଵତ୍ର ଵିତତା ।
ସାକ୍ଷାଦ୍ଭଵତୁ ମେ ସ୍ଵର୍ନାଥଦଯିତା ॥ ୯୨॥
ଯନ୍ମାତରନୃତଂ ଧ୍ଯାତଂ ଚ ଗଦିତମ୍ ।
ଜୁଷ୍ଟଂ ଚ ହର ମେ ତଦ୍ଦେଵି ଦୁରିତମ୍ ॥ ୯୩॥
ମାଂ ମୋଚଯ ଋଣାଦିନ୍ଦ୍ରାଣି ସୁଭୁଜେ ।
ମାମଲ୍ପମତଯୋ ମା ନିନ୍ଦିଷୁରଜେ ॥ ୯୪॥
ଶତ୍ରୁଶ୍ଚ ଶଚି ମେ ସଖ୍ଯାଯ ଯତତାମ୍ ।
ଦୃପ୍ତଶ୍ଚ ଇମନୁଜୋ ମାମମ୍ବ ଭଜତାମ୍ ॥ ୯୫॥
କଷ୍ଟଂ ଶଚି ଵିଧୂଯେଷ୍ଟଂ ଵିଦଧତୀ ।
ଆନନ୍ଦଯ ଜନଂ ପ୍ରେଯାଂସମଯି ମେ ॥ ୯୬॥
ଅସ୍ତ୍ରଂ ମମ ଭଵ ଧ୍ଵଂସାଯ ରଟତାମ୍ ।
ସୁତ୍ରାମରମଣି ଶ୍ରୀମାତରସତାମ୍ ॥ ୯୭॥
ସମ୍ପୂରଯତୁ ମେ ସର୍ଵଂ ସୁରନୁତା ।
ସ୍ଵର୍ଗକ୍ଷିତିପତେଶ୍ଶୁଦ୍ଧାନ୍ତଵନିତା ॥ ୯୮॥
ସଂଵର୍ଧଯ ଶଚି ସ୍ଵଂ ଦେଶମଵିତୁମ୍ ।
ବାହୋରିଵ ହରେର୍ବୁଦ୍ଧେର୍ମମ ବଲମ୍ ॥ ୯୯॥
ଏତୈର୍ଵସୁମତୀଵୃତ୍ତୈର୍ନଵସୁମୈଃ ।
ଭୂଯାଚ୍ଚରଣଯୋଃ ପୂଜା ଜନନି ତେ ॥ ୧୦୦॥
॥ ପ୍ରଥମଂ ଗାଯତ୍ରଂ ଶତକଂ ସମାପ୍ତମ୍ ॥
॥ ଅଥ ଦ୍ଵିତୀଯମୌଷ୍ଣିହଂ ଶତକମ୍ ॥
॥ ପ୍ରଥମଃ କୁମାରଲଲିତାପାଦଃ ॥
ସୁରେଶ୍ଵରମହିଷ୍ଯାଃ ସ୍ମିତଂ ଶଶିସିତଂ ମେ ।
ତନୋତୁ ମତିମଚ୍ଛାଂ କରୋତୁ ବଲମଗ୍ରଯ୍ମ୍ ॥ ୧୦୧॥
ଵିଧାଯ ରିପୁଧୂତିଂ ନିଧାଯ ସୁଦଶାଯାମ୍ ।
ପୁଲୋମତନୁଜାତା ଧିନୋତୁ ଭରତକ୍ଷ୍ମାମ୍ ॥ ୧୦୨॥
ପଦପ୍ରଣତରକ୍ଷା ଵିଧାନଧୃତଦୀକ୍ଷା ।
ଜଗଦ୍ଭରଣଦକ୍ଷା ପରା ଜଯତି ଶକ୍ତିଃ ॥ ୧୦୩॥
ସ୍ଵରତ୍ଯଵିରତଂ ସା ଶନୈର୍ନଭସି ରଙ୍ଗେ ।
ଜ୍ଵଲତ୍ଯଧିକସୂକ୍ଷ୍ମଂ ଜଗତ୍ପ୍ରଭଵଶକ୍ତିଃ ॥ ୧୦୪॥
ମହସ୍ତଵ ସୁସୂକ୍ଷ୍ମଂ ନିଦାନମଖିଲାନାମ୍ ।
ଭଵତ୍ଯଖିଲମାତର୍ଜଗତ୍ଯନୁଭଵାନାମ୍ ॥ ୧୦୫॥
ଜନନ୍ଯନୁଭଵାନାଂ ମତିତ୍ଵପରିଣାମେ ।
ସ୍ଵରୋ ଭଵତି ମୂଲଂ ତଵାଭ୍ରହଯରାମେ ॥ ୧୦୬॥
ଯ ଈଶ୍ଵରି ନିଦାନଂ ସମସ୍ତମତିଭାନେ ।
ସ୍ଵରୋ ଗତିଵିଶେଷାତ୍ସ ଏଵ ଖଲୁ କାଲଃ ॥ ୧୦୭॥
ଜ୍ଵଲନ୍ତ୍ଯଭିହିତା ତ୍ଵଂ ଵିହାଯସି ଵିଶାଲେ ।
ପ୍ରଚଣ୍ଡପଦପୂର୍ଵା ପ୍ରପଞ୍ଚକରିଚଣ୍ଡୀ ॥ ୧୦୮॥
ସ୍ଵରନ୍ତ୍ଯଖିଲବୁଦ୍ଧିପ୍ରଦା ଭଵସି ଗୌରୀ ।
ତ୍ରିକାଲତନୁରମ୍ବ ସ୍ମୃତା ତ୍ଵମିହ କାଲୀ ॥ ୧୦୯॥
ମହସ୍ସ୍ଵର ଇତୀଦଂ ଦ୍ଵଯଂ ତଦତିସୂକ୍ଷ୍ମମ୍ ।
ମହେଶ୍ଵରି ତଵାଂଶଦ୍ଵଯଂ ପରମମୁକ୍ତମ୍ ॥ ୧୧୦॥
ମହୋଽତିଶଯମାପ୍ତଂ ତ୍ଵଯି ତ୍ରିଦିଵଗାଯାମ୍ ।
ସ୍ଵରୋଽତିଶଯମାପ୍ତଃ ସିତାଦ୍ରିନିଲଯାଯାମ୍ ॥ ୧୧୧॥
ଦିଵଂ ନଯତି ପୂର୍ଵା ଭୁଵଂ ଯୁଵତିରନ୍ଯା ।
ଦ୍ଵଯୋଃ ପ୍ରକୃତିରଭ୍ରଂ ଵିଶାଲମତିମାନ୍ଯା ॥ ୧୧୨॥
ନ ତେ ଦିଵି ଲସନ୍ତ୍ଯାଃ ପିତା ତନୁଭୃଦନ୍ଯଃ ।
ସ୍ଵଯଂ ଭୁଵମିମାଂ ତ୍ଵାଂ ସତାମଵନି ଵିଦ୍ମଃ ॥ ୧୧୩॥
ସୁରାରିକୁଲଜନ୍ମା ତଵେଶ୍ଵରି ପୁଲୋମା ।
ପିତେତି କଵିଭାଷା ପରୋକ୍ଷଗତିରେଷା ॥ ୧୧୪॥
ଵଦନ୍ତ୍ଯସୁରଶବ୍ଦୈର୍ଘନଂ ସଜଲମେତମ୍ ।
ପୁଲୋମପଦମେକଂ ପୁରାଣସତିତେଷୁ ॥ ୧୧୫॥
ପ୍ରକୃଷ୍ଟତରଦୀପ୍ତିର୍ଗଭୀରତରନାଦା ।
ଇତୋ ହି ଭଵସି ତ୍ଵଂ ତଟିତ୍ତନୁରମେଯେ ॥ ୧୧୬॥
ଅରାତିରସୁରୋଽଯଂ ଵିଭୋର୍ନିଗଦିତସ୍ତେ ।
ହଯଶ୍ଚ ବତଗୀତଃ ପିତା ତଵ ପଯୋଦଃ ॥ ୧୧୭॥
ପ୍ରିଯୈଃ କିଲ ପରେ ଵାଂ ପରୋକ୍ଷଵଚନୌଘୈଃ ।
ପ୍ରତାରିତମିଵେଲା ଜଗନ୍ମୁନିଗଣେନ ॥ ୧୧୮॥
ନିକୃଷ୍ଟମପି ରମ୍ଯଂ ଯଦି ତ୍ରିଦିଵଲୋକେ ।
ତଵାମ୍ବ କିମୁ ଵାଚ୍ଯା ରୁଚିସ୍ତ୍ରିଦିଵନାଥେ ॥ ୧୧୯॥
ତ୍ଵମମ୍ବ ରମଣୀଯା ଵଧୂସ୍ତ୍ଵମିଵ ନାକେ ।
ତ୍ଵଯା କ ଇଵ ତୁଲ୍ଯାଂ ମୃଦୋ ଵଦତୁ ଲୋକେ ॥ ୧୨୦॥
ଵିନୀଲମିଵ ଖାଂଶଂ ଵିଦୁସ୍ତ୍ରିଦିଵମେକେ ।
ପରସ୍ତୁ ଵଦସି ସ୍ଵଃ କଵିଃ କମଲବନ୍ଧୁମ୍ ॥ ୧୨୧॥
ଅମୁତ୍ରଗତଶୋକେ ମହାମହସି ନାକେ ।
ନମାମ୍ଯଧିକୃତାଂ ତାଂ ପୁରାଣକୁଲକାନ୍ତାମ୍ ॥ ୧୨୨॥
ଯଦା ମମୁତପକ୍ଵଂ ମଦୀଯମଘମୁଗ୍ରମ୍ ।
ତଦିନ୍ଦ୍ରକୁଲକାନ୍ତେ ନିଵାରଯ ସମଗ୍ରମ୍ ॥ ୧୨୩॥
ଦଦାତୁ ଭରତକ୍ଷ୍ମାଵିଷାଦହରଣାଯ ।
ଅଲଂ ବଲମୁଦାରା ଜଯନ୍ତଜନନୀ ମେ ॥ ୧୨୪॥
ଅତୀଵ ଲଲିତାଭିଃ କୁମାରଲଲିତାଭିଃ ।
ଇମାଭିରମରେଶପ୍ରିଯା ଭଜତୁ ମୋଦମ୍ ॥ ୧୨୫॥
॥ ଦ୍ଵିତୀଯୋ ମଦଲେଖାପାଦଃ ॥
ପୌଲୋମ୍ଯାଃ ପରିଶୁଭ୍ରଜ୍ଯୋତ୍ସ୍ନାଦୃଶ୍ଯରୁଚୋ ମେ ।
ଶ୍ରୀମନ୍ତୋ ଦରହାସାଃ କଲ୍ପନ୍ତାଂ କୁଶଲାଯ ॥ ୧୨୬॥
କାରୁଣ୍ଯାମୃତସିକ୍ତା ଶକ୍ତା ଶକ୍ରମହିଷ୍ଯାଃ ।
ପ୍ରେକ୍ଷା ଭାରତଭୂମେର୍ଦୌର୍ବଲ୍ଯଂ ଵିଧୁନୋତୁ ॥ ୧୨୭॥
ଵନ୍ଦେ ନିର୍ଜରରାଜ୍ଞୀଂ ସଙ୍କ୍ଲ୍ପେ ସତି ଯସ୍ଯାଃ ।
ସାଧ୍ଯାସାଧ୍ଯଵିଚାରୋ ନୈଵ ସ୍ଯାଦଣୁକୋଽପି ॥ ୧୨୮॥
ସଙ୍କ୍ଲ୍ପସ୍ତଵ କଶ୍ଚ୍ଚିଚତ୍ତେ ଚେଦ୍ଦିଵ ଈଶେ ।
ସ୍ଯାଦୁଲ୍ଲଙ୍ଘ୍ଯ ନିସର୍ଗଂ ସିଦ୍ଧିର୍ନିଷ୍ଫଲତା ଚ ॥ ୧୨୯॥
ମୂଢୋଽପ୍ଯୁତ୍ତମରୀତ୍ଯା ସିଧ୍ଯେଦଧ୍ଯଯନେଷୁ ।
ମେଧାଵୀ ଚ ନିତାନ୍ତଂ ନୈଵ ସ୍ଯାତ୍କୃତକୃତ୍ଯଃ ॥ ୧୩୦॥
ଉତ୍ପଦ୍ଯେତ ମହେଶ୍ଵର୍ଯପ୍ରାଜ୍ଞାଦପି ଶାସ୍ତ୍ରମ୍ ।
ଯାଯାନ୍ମାତରକସ୍ମାଦ୍ଵିଭ୍ରାନ୍ତିଂ ଵିବୁଧୋଽପି ॥ ୧୩୧॥
ଅଲ୍ପାନାମବଲାନାଂ ସଙ୍ଗ୍ରାମେ ଵିଜଯଃ ସ୍ଯାତ୍ ।
ଶକ୍ତାନାଂ ବହୁଲାନାଂ ଘୋରା ସ୍ଯାତ୍ପରିଭୂତିଃ ॥ ୧୩୨॥
ରାଜେରନ୍ନୃପପୀଠେଷ୍ଵଖ୍ଯାତାନି କୁଲାନି ।
ସ୍ଯାଦ୍ଦୁର୍ଧର୍ଷବଲାନାଂ ପାତୋ ରାଜକୁଲାନାମ୍ ॥ ୧୩୩॥
ନିର୍ଯତ୍ନୋଽପି ସମାଧେର୍ଵିନ୍ଦେଦ୍ଦେଵି ସମୃଦ୍ଧିମ୍ ।
ଯୋଗସ୍ଯାମ୍ବ ନ ପଶ୍ଯେଦଭ୍ଯସ୍ଯନ୍ନପି ସିଦ୍ଧିମ୍ ॥ ୧୩୪॥
ଅତ୍ଯନ୍ତଂ ଯଦସାଧ୍ଯଂ ନେଦିଷ୍ଠଂ ଭଵତୀଦମ୍ ।
ସାଧ୍ଯଂ ସର୍ଵଵିଧାଭିଃ ସ୍ଯାଦିନ୍ଦ୍ରାଣି ଦଵିଷ୍ଠମ୍ ॥ ୧୩୫॥
ଗାଯାମୋ ମୁନିସଙ୍ଘୈର୍ଗେଯାଂ କାମପି ମାଯାମ୍ ।
ଇନ୍ଦ୍ରସ୍ଯାପି ଵିନେତ୍ରୀଂ ତ୍ରୈଲୋକ୍ଯସ୍ଯ ଚ ଧାତ୍ରୀମ୍ ॥ ୧୩୬॥
ଵିଦ୍ଯାନାମଧିନାଥେ କାଂ ଵିଦ୍ଯାଂ ଶ୍ରଯସେ ତ୍ଵମ୍ ।
ଇନ୍ଦ୍ରଂ କର୍ତୁମଧୀନଂ ଵିଶ୍ଵସ୍ମାଦଧିକଂ ତମ୍ ॥ ୧୩୭॥
ନିତ୍ଯାଲିର୍ମିନୀଷେ ସ୍ତ୍ରୀମୋହୋ ନ ଵିତର୍କ୍ଯଃ ।
ଭ୍ରୂଚେଷ୍ଟାନୁଚରତ୍ଵାଦନ୍ଯା ସ୍ଯାଦନୁକମ୍ପା ॥ ୧୩୮॥
ସୌନ୍ଦର୍ଯଂ ପରମନ୍ଯଦ୍ଵଜେରଦ୍ଦର୍ଯଥଵା ତେ ।
ହର୍ତୁଂ ଯତ୍ସୁଖମୀଷ୍ଟେ ତାଦୃକ୍ତସ୍ଯ ଚ ଚିତ୍ତମ୍ ॥ ୧୩୯॥
ଚକ୍ଷୁର୍ଦର୍ଶନମାତ୍ରନ୍ନିସ୍ତେଜୋ ଵିଦଧାନମ୍ ।
ଚିତ୍ତଂ ଚୋଜ୍ଝିତଧୈର୍ଯଂ ମତ୍ତାନାଂ ଦନୁଜାନାମ୍ ॥ ୧୪୦॥
ଗର୍ତେ ଦୁର୍ଜନଦେହେ ମଗ୍ନାନ୍ ପଙ୍କ୍ଵିଲଗ୍ନାନ୍ ।
ପ୍ରାଣାନାତ୍ମସଜାତୀନୁଦ୍ଧର୍ତୁଂ ଧୃତଦୀକ୍ଷମ୍ ॥ ୧୪୧॥
ଵଜ୍ରଂ ନିର୍ଜରରାଜୋ ଯଦ୍ଧତ୍ତେ ସମରେଷୁ ।
ତ୍ଵଚ୍ଛକ୍ତେଃ କଲଯୈତନ୍ମନ୍ମାତର୍ନିରମାଯି ॥ ୧୪୨॥
ରାଜ୍ଞୀତ୍ଵାତ୍ପରମେତେ ରାଜତ୍ଵଂ ଶତମନ୍ଯୋଃ ।
ନିଶ୍ଶକ୍ତିସ୍ସ ଵିନା ତ୍ଵାଂ କାମାଜ୍ଞାଂ କୁରୁତାଂ ନଃ ॥ ୧୪୩॥
ସର୍ଵଂ ଶକ୍ରନିଶାନ୍ତସ୍ଯେଶାନେ ତଵ ହସ୍ତେ ।
ଅସ୍ମାକଂ ତୁ ଧିଯେଦଂ ସ୍ତୋତ୍ରଂ ସଙ୍ଗ୍ରହତସ୍ତେ ॥ ୧୪୪॥
ଗନ୍ତଵ୍ଯଂ ସ୍ଵରଧୀଶେ ନିଶ୍ଶେଷାର୍ପଣଶୂରମ୍ ।
ବିଭ୍ରାଣା ନଯସି ତ୍ଵଂ ମାର୍ଜାଲୀଵ କିଶୋରମ୍ ॥ ୧୪୫॥
ଗୃହ୍ଣ୍ନ୍ନମ୍ବରନାଥାମମ୍ବାମଶ୍ଲଥମନ୍ଧଃ ।
କୀଶସ୍ଯେଵ କିଶୋରୋ ଯୋଗୀ ଗଚ୍ଛତି ଗମ୍ଯମ୍ ॥ ୧୪୬॥
ପୂର୍ଣାତ୍ମାର୍ପଣହୀନୋଽପ୍ଯଜ୍ଞାତାଽପି ସମାଧେଃ ।
ନିତ୍ଯଂ ଯୋ ଜଗଦମ୍ବ ତ୍ଵାଂ ସେଵେତ ଜପାଦ୍ଯୈଃ ॥ ୧୪୭॥
ତଂ ଚାଚଞ୍ଚଲଭକ୍ତିଂ କୃତ୍ଵା ପୂରିତକାମମ୍ ।
ନିଷ୍ଠାଂ ଦାସ୍ଯସି ତସ୍ମୈ ପୌଲୋମି କ୍ରମଶସ୍ତ୍ଵମ୍ ॥ ୧୪୮॥
ଭିନ୍ନାଂ ସଙ୍ଘସହସ୍ତ୍ରୈଃ ଖିନ୍ନାଂ ଶତ୍ରୁଭରେଣ ।
ପାତୁଂ ଭାରତଭୂମିଂ ମାତର୍ଦେହି ବଲଂ ମେ ॥ ୧୪୯॥
ତ୍ର୍ଯୈଲୋକ୍ଯାଵନଭାରଶ୍ରାନ୍ତାଂ ଵାସଵକାନ୍ତାମ୍ ।
ହୈରମ୍ବ୍ଯୋ ମଦଲେଖାଃ ସମ୍ଯକ୍ ସମ୍ମଦଯନ୍ତୁ ॥ ୧୫୦॥
॥ ତୃତୀଯୋ ହଂସମାଲାପାଦଃ ॥
ସୁରୁଚିର୍ଵଜ୍ରପାଣେସ୍ସୁଦୃଶୋ ମନ୍ଦହାସଃ ।
ହରତାନ୍ମୋହମୂଲଂ ହୃଦଯସ୍ଥଂ ତମୋ ମେ ॥ ୧୫୧॥
ଅମୃତଂ ସଙ୍କିରନ୍ତ୍ଯା ପ୍ରସରନ୍ତ୍ଯେହ ଦୃଷ୍ଟ୍ଯା ।
ସୁରରାଜ୍ଞୀ ବଲାଢ୍ଯାଂ ଭରତକ୍ଷ୍ମାଂ କରୋତୁ ॥ ୧୫୨॥
ଅମୃତାମ୍ଭଃ କିରନ୍ତୀ କରୁଣାମ୍ଭୋ ଵହନ୍ତୀ ।
ନତରକ୍ଷାତ୍ତଦୀକ୍ଷା ଶଚି ମାତସ୍ତଵେକ୍ଷା ॥ ୧୫୩॥
କୃତପୀଯୂଷଵୃଷ୍ଟିସ୍ତତକଲ୍ଯାଣସୃଷ୍ଟିଃ ।
ଵିହିତୈନୋଵିନଷ୍ଟିର୍ଧୃତଵିଜ୍ଞାନପୁଷ୍ଟିଃ ॥ ୧୫୪॥
ଭୃତଦେଵେନ୍ଦ୍ରତୁଷ୍ଟିର୍ଯମିନାଂ ଦେଵଗୃଷ୍ଟିଃ ।
ମମ କାମ୍ଯାନି ଦେଯାତ୍ତଵ ଵିଶ୍ଵାମ୍ବ ଦୃଷ୍ଟିଃ ॥ ୧୫୫॥
ଜଗତାଂ ଚକ୍ରଵର୍ତିନ୍ଯସିତସ୍ତେ କଟାକ୍ଷଃ ।
ଜଲଦୋ ଭକ୍ତିଭାଜାଂ ଶିଖିନାଂ ନର୍ତନାଯ ॥ ୧୫୬॥
ସୁକୃତୀ କୋଽପି ନାଟ୍ଯେ ବହୁଲେ ତତ୍ର ମାତଃ ।
ଜଗତେ ସାରଭୂତାନୁପଦେଶାନ୍କରୋତି ॥ ୧୫୭॥
ଅପରୋ ନଵ୍ଯକାଵ୍ଯାନ୍ଯନଵଦ୍ଯାନି ଧନ୍ଯଃ ।
ଵିଦଧାତ୍ଯପ୍ରଯତ୍ନାଦ୍ବୁଧଭୋଗକ୍ଷମାଣି ॥ ୧୫୮॥
ଇତରୋ ଭାଗ୍ଯଶାଲୀ ରମଣୀଯୈଃ ପ୍ରସଙ୍ଗୈଃ ।
ଵିତନୋତି ସ୍ଵଜାତିଂ ଜଗତି ଶ୍ରେଷ୍ଠନୀତିମ୍ ॥ ୧୫୯॥
ଜଗତାଂ ମାତରେକୋ ମହସା ପୁଣ୍ଯଶାଲୀ ।
ଵିଧୁତାରିଃ ସ୍ଵଦେଶଂ କୁରୁତେ ଵୀତପାଶମ୍ ॥ ୧୬୦॥
ପର ଇନ୍ଦ୍ରାଣି ସାଧୁର୍ବତ ଵିସ୍ମୃତ୍ଯ ଵିଶ୍ଵମ୍ ।
ରମତେ ସିକ୍ତଗଣ୍ଡଃ ପ୍ରମଦାଶ୍ରୁପ୍ରଦାନୈଃ ॥ ୧୬୧॥
ତଵ ରାଗାର୍ଦ୍ରଦୃଷ୍ଟ୍ଯା ଦିଵି ଶକ୍ରସ୍ଯ ନାଟ୍ଯମ୍ ।
କରୁଣାସିକ୍ତଦୃଷ୍ଟଯା ଭୁଵି ଭକ୍ତ୍ସ୍ଯ ନାଟ୍ଯମ୍ ॥ ୧୬୨॥
ତଵ ସପ୍ରେମଦୃଷ୍ଟିର୍ବଲମିନ୍ଦ୍ରେ ଦଧାତି ।
ତଵ କାରୁଣ୍ଯଦୃଷ୍ଟିର୍ବଲମସ୍ମାସୁ ଧତ୍ତାମ୍ ॥ ୧୬୩॥
ତଵ ଵାମାଃ କଟାକ୍ଷାଃ ପ୍ରଭୁମାନନ୍ଦଯନ୍ତୁ ।
ଉଚିତୋ ଦକ୍ଷିଣାନାମଯମସ୍ତ୍ଵୀକ୍ଷଣାନାମ୍ ॥ ୧୬୪॥
ସୁକୃତାନାଂ ପ୍ରପୋଷଂ ଦୁରିତାନାଂ ଵିଶୋଷମ୍ ।
କରୁଣାର୍ଦ୍ରା ଵିଭାନ୍ତୀ ତଵ ଦୃଷ୍ଟିଃ କ୍ରିଯାନ୍ନଃ ॥ ୧୬୫॥
କୁରୁ ପାଦାବ୍ଜବନ୍ଧୋଃ ସରଣିଂ ନିସ୍ତମସ୍କାମ୍ ।
ଶଚି ଵିଜ୍ଞାନତେଜଃ କିରତାଵୀକ୍ଷିତେନ ॥ ୧୬୬॥
କ୍ରିଯଯାରାଧଯନ୍ତୋ ଭୁଵନେ ତେ ଵିଭୂତୀଃ ।
ଇହ କେଚିଲ୍ଲଭନ୍ତେ ତଵ ମାତଃ କଟାକ୍ଷାନ୍ ॥ ୧୬୭॥
ସ୍ଫୁଟଵିଜ୍ଞାନପୂର୍ଵଂ ପ୍ରଭଜେରନ୍ ଯଦି ତ୍ଵାମ୍ ।
ସ୍ଥିରଯା ଦେଵି ଭକ୍ତ୍ଯା କିମୁ ଵକ୍ତଵ୍ଯମୀଶେ ॥ ୧୬୮॥
କୁଵିଧେର୍ଵିସ୍ମରନ୍ତୀ ଭରତକ୍ଷ୍ମା ଶଚି ତ୍ଵାମ୍ ।
ବହୁକାଲାଦଭାଗ୍ଯେ ପତିତା ଦେଵ୍ଯଯୋଗ୍ଯେ ॥ ୧୬୯॥
ଅଭିଷିକ୍ତ୍ସ୍ଯ ମାତା ତଵ ତେଜୋଂଶଭୂତା ।
ସୁଦଶାଂ ସେଵମାନାମନଯତ୍ପଶ୍ଚିମାଶାମ୍ ॥ ୧୭୦॥
ଅଯି କାଲଂ କିଯନ୍ତଂ ଦଯସେ ପଶ୍ଚିମସ୍ଯାମ୍ ।
ଇତ ଇନ୍ଦ୍ରାଣି ପୂର୍ଵାମଵଲୋକସ୍ଵ ଦୀନାମ୍ ॥ ୧୭୧ ॥
ନ ଵଯଂ ପଶ୍ଚିମସ୍ଯାଶ୍ଶଚି ଯାଚାମନାଶମ୍ ।
କୃପଯୈତାଂ ଚ ପୂର୍ଵାଂ ନିହତାଶାମଵାଶାମ୍ ॥ ୧୭୨॥
ସକଲଂ ଵ୍ଯର୍ଥମାସୀଦଯି ଦୀନେଷୁ ଦୃଷ୍ଟା ।
ତଵ ଵିଶ୍ଵସ୍ଯ ମାତଃ କରୁଣୈକାଵଶିଷ୍ଟା ॥ ୧୭୩॥
ସୁରରାଜସ୍ଯ କାନ୍ତେ ନରସିଂହସ୍ଯ ସୂନୁମ୍ ।
ବଲଵନ୍ତଂ କୁରୁ ତ୍ଵଂ ଭରତକ୍ଷ୍ମାଵନାଯ ॥ ୧୭୪॥
ରୁଚିରାଭିର୍ନିଜାଭିର୍ଗତିଭିର୍ହର୍ଷଯନ୍ତୁ ।
ମରୁତାଂ ଭର୍ତୁରେତାସ୍ତରୁଣୀଂ ହଂସମାଲାଃ ॥ ୧୭୫॥
॥ ଚତୁର୍ଥୋ ମଧୁମତୀପାଦଃ ॥
ଦିଶି ଦିଶି ପ୍ରସରଦ୍ରୁଚିତମୋଦମନମ୍ ।
ହରତୁ ମେ ଦୁରିତଂ ହରିଵଧୂହସିତମ୍ ॥ ୧୭୬॥
ହରତୁ ଦୁଃଖଭରପ୍ରସୃତମଶ୍ରୁଜଲମ୍ ।
ଭରତଭୂସୁଦୃଶୋ ବଲଜିତୋ ରମଣୀ ॥ ୧୭୭॥
ଅତିତରାଂ ମହିତା ସୁରପତେର୍ଵନିତା ।
କରୁଣଯା କଲିତା ମମ ଶଚୀ ଶରଣମ୍ ॥ ୧୭୮॥
ତ୍ରିଭୁଵନକ୍ଷିତିରାଡ୍ଭୁଵନଭୂଷଣଭା ।
ଅଖିଲଭାସକଭା ମମ ଶଚୀ ଶରଣମ୍ ॥ ୧୭୯॥
ସତତଯୁକ୍ତସୁଧୀହୃଦଯଦୀପକଭା ।
ନିଖିଲପାଚକଭା ମମ ଶଚୀ ଶରଣମ୍ ॥ ୧୮୦॥
ରଵିଵିରୋଚକଭା ଶଶିଵିରାଜକଭା ।
ଭଗଣଶୋଭକଭା ମମ ଶଚୀ ଶରଣମ୍ ॥ ୧୮୧॥
ଗଗନଖେଲକଭା ସକଲଚାଲକଭା ।
ଅଭଯଦାଽତିଶୁଭା ମମ ଶଚୀ ଶରଣମ୍ ॥ ୧୮୨॥
ରୁଚିଲଵଙ୍ଗତଯା ଯଦନଘାଂଶୁନିଧେଃ ।
ହୃତତମୋଭଵନଂ ଭଵତି ଦୀପିକଯା ॥ ୧୮୩॥
ସ୍ଫୁରତି ଚାରୁ ଯତଃ କିରଣମେକମିତା ।
ଜଲଦସୌଧତଲେ ମୁହୁରିଯଂ ଚପଲା ॥ ୧୮୪॥
ଭଵତି ଯଦ୍ଦ୍ଯୁତିତଃ କମପି ଭାଗମିତଃ ।
ପଵିରରାତିହରଃ ପ୍ରହରଣେଶପଦମ୍ ॥ ୧୮୫॥
ଭଵତି ଯତ୍ସୁରୁଚେରଣୁତମାଂଶମିତା ।
ଯୁଵମନୋମଦନୀ ସୁଵଦନାସ୍ମିତଭା ॥ ୧୮୬॥
ଵିତତସୂକ୍ଷ୍ମତନୁର୍ମହତି ସା ଗଗନେ ।
ପରମପୂରୁଷଭା ମମ ଶଚୀ ଶରଣମ୍ ॥ ୧୮୭॥
ଅମରନାଥସଖୀ ରୁଚିନିଧାନମୁଖୀ ।
ଅମୃତଵର୍ଷକଦୃଙ୍ ମମ ଶଚୀ ଶରଣମ୍ ॥ ୧୮୮॥
ଅଵିଧଵା ସତତଂ ଯୁଵତିରେଵ ସଦା ।
ଅନଘଵୀରସୁତା ମମ ଶଚୀ ଶରଣମ୍ ॥ ୧୮୯॥
ଅମୃତଵତ୍ଯଧରେ ସୁରଧରାପତଯେ ।
ଚରଣଯୋର୍ଭଜତେ ମମ ଶଚୀ ଶରଣମ୍ ॥ ୧୯୦॥
ସ୍ମିତଲଵେଷୁ ସିତା ଶିରସିଜେଷ୍ଵସିତା ।
ଚରଣଯୋରରୁଣା ବହିରପି ତ୍ରିଗୁଣା ॥ ୧୯୧ ॥
କପଟଚନ୍ଦ୍ରମୁଖୀ ପ୍ରକୃତିରିନ୍ଦ୍ରସଖୀ ।
ମୃତିଜରାରହିତା ମମ ଶଚୀ ଶରଣମ୍ ॥ ୧୯୨ ॥
କୃଶତମେପ୍ଯୁଦରେ ତ୍ରିଭୁଵନଂ ଦଧତୀ ।
ଜନିମତାଂ ଜନନୀ ମମ ଶଚୀ ଶରଣମ୍ ॥ ୧୯୩ ॥
ସ୍ଥିରତରା ମନସି ସ୍ଥିରତମା ଵଚସି ।
ନଯନଯୋସ୍ତରଲା ମମ ଶଚୀ ଶରଣମ୍ ॥ ୧୯୪॥
ମୃଦୁତରା କରଯୋର୍ମୃଦୁତମା ଵଚସି ।
ଭୁଜବଲେ କଠିନା ମମ ଶଚୀ ଶରଣମ୍ ॥ ୧୯୫॥
ମୃଦୁଲବାହୁଲତାଽପ୍ଯମିତଭୀମବଲା ।
ଅସୁରଦର୍ପହରୀ ମମ ଶଚୀ ଶରଣମ୍ ॥ ୧୯୬॥
ଅବଲଯାଽପି ଯଯା ନ ସଦୃଶୋଽସ୍ତି ବଲେ ।
ଜଗତି କଶ୍ଚିଦସୌ ମମ ଶଚୀ ଶରଣମ୍ ॥ ୧୯୭॥
ଅତିତରାଂ ସଦଯା ପଦରତେ ମନୁଜେ ।
ଖଲଜନେ ପରୁଷା ମମ ଶଚୀ ଶରଣମ୍ ॥ ୧୯୮॥
ଗଣପତିଂ କୁରୁତାଦ୍ଭରତଭୂମ୍ଯଵନେ ।
ଅମରଭୂମିପତେଃ ପ୍ରିଯତମା ସବଲମ୍ ॥ ୧୯୯॥
ମଧୁରଶବ୍ଦତତୀର୍ମଧୁମତୀରଜରା ।
ଗଣପତେଶ୍ଶୃଣୁଯାତ୍ସୁରପତେସ୍ତରୁଣୀ ॥ ୨୦୦॥
॥ ଦ୍ଵିତୀଯମୌଷ୍ଣିହଂ ଶତକଂ ସମାପ୍ତମ୍ ॥
॥ ଅଥ ତୃତୀଯମାନୁଷ୍ଟୁଭଂ ଶତକମ୍ ॥
॥ ପ୍ରଥମଃ ପଥ୍ଯାଵକ୍ତ୍ରପାଦଃ ॥
ହସିତଂ ତନ୍ମହାଶକ୍ତେରସ୍ମାକଂ ହରତୁ ଭ୍ରମମ୍ ।
ଯତ ଏଵ ମହଚ୍ଚିତ୍ରଂ ଵିଶ୍ଵମେତଦ୍ଵିଜୃମ୍ଭତେ ॥ ୨୦୧॥
ରାଜନ୍ତୀ ସର୍ଵଭୂତେଷୁ ସର୍ଵାଵସ୍ଥାସୁ ସର୍ଵଦା ।
ମାତା ସର୍ଗସ୍ଯ ଚିତ୍ପାଯାତ୍ ପୌଲୋମୀ ଭାରତକ୍ଷିତିମ୍ ॥ ୨୦୨॥
ଧର୍ମିଜ୍ଞାନଂ ଵିଭୋସ୍ତତ୍ତ୍ଵଂ ଧର୍ମୋ ଜ୍ଞାନଂ ସଵିତ୍ରି ତେ ।
ଵ୍ଯଵହୃତ୍ଯୈ ଵିଭାଗୋଽଯଂ ଵସ୍ତ୍ଵେକଂ ତତ୍ତ୍ଵତୋ ଯୁଵାମ୍ ॥ ୨୦୩॥
ଇନ୍ଦ୍ରେଶଵାସୁଦେଵାଦ୍ଯୈଃ ପଦୈଃ ସଙ୍କୀତ୍ର୍ଯତେ ଵିଭୁଃ ।
ଶଚୀ ଶିଵା ମହାଲକ୍ଷ୍ମୀପ୍ରମୁଖୈର୍ଭଵତୀ ପଦୈଃ ॥ ୨୦୪॥
ଅନ୍ତରଂ ଵସ୍ତୁନୋ ଜ୍ଞାତୃ ତଚ୍ଛକ୍ତଂ ପରିଚକ୍ଷତେ ।
ଶାଖାଃ ସମନ୍ତତୋ ଜ୍ଞାନଂ ଶକ୍ତିଂ ସଙ୍କୀର୍ତଯନ୍ତି ତାମ୍ ॥ ୨୦୫॥
ଅନ୍ତରସ୍ଯ ଚ ଶାଖାନାମୈକ୍ଯଂ ନିର୍ଵିଷଯସ୍ଥିତୌ ।
ଵିଷଯଗ୍ରହଣେଷ୍ଵେଵ ସଵିଭାଗଃ ପ୍ରଦୃଶ୍ଯତେ ॥ ୨୦୬॥
ସ୍ଯାଦେଵଂ ଵିଷଯାପେକ୍ଷୀ ଶାଖାନାମନ୍ତରସ୍ଯ ଚ ।
ଅଵିଭକ୍ତୈକରୂପାଣାଂ ଵିଭାଗୋ ହରିତାମିଵ ॥ ୨୦୭॥
ଲକ୍ଷ୍ଯମନ୍ତର୍ଵଯଂ ଚକ୍ରେ ଧ୍ଯାଯାମୋ ଯତ୍ର ନିଷ୍ଠିତାଃ ।
ଅନ୍ତରୀଭାଵତସ୍ତସ୍ଯ ନାନ୍ତରଂ ତୁ ଵିଲକ୍ଷଣମ୍ ॥ ୨୦୮॥
ଅହଙ୍କୃତେର୍ଵଯଂ ନାନ୍ଯେ ଯତ୍ରାହଙ୍କୃତିସମ୍ଭଵଃ ।
ସମ୍ପଦ୍ଯେତାନ୍ତରଂ ତତ୍ର ଜ୍ଞାନସ୍ଯ ଜ୍ଞାତୃତାଵହମ୍ ॥ ୨୦୯॥
ଅନ୍ତରାଵର୍ତଭୂଯସ୍ତ୍ଵାଦେକସ୍ମିନ୍ ବୋଧସାଗରେ ।
ବୋଦ୍ଧାରୋ ବହଵୋଽଭୂଵନ୍ ଵସ୍ତୁ ନୈଵ ତୁ ଭିଦ୍ଯତେ ॥ ୨୧୦॥
ଚିଦ୍ରୂପେ ମାତରେଵଂ ତ୍ଵଂ ପରସ୍ମାଦ୍ବ୍ରହ୍ମଣୋ ଯଥା ।
ନ ଦେଵି ଦେଵତାତ୍ମଭ୍ଯୋ ଜୀଵାତ୍ମଭ୍ଯଶ୍ଚ ଭିଦ୍ଯସେ ॥ ୨୧୧॥
ସମସ୍ତଭୂତବୀଜାନାଂ ଗୂଢାନାମନ୍ତରାତ୍ମନି ।
ତଵୋଦ୍ଗାରୋଽଯମାକାଶୋ ମାତସ୍ସୂକ୍ଷ୍ମରଜୋମଯଃ ॥ ୨୧୨॥
ନ ସର୍ଵଭୂତବୀଜାନି ଵସ୍ତୂନି ସ୍ଯୁଃ ପୃଥକ୍ ପୃଥକ୍ ।
ତ୍ଵଯି ପ୍ରାଗଵିଭକ୍ତାନି ବଭୂଵୁରିତି ଵିଶ୍ରୁତିଃ ॥ ୨୧୩॥
ଯଥାମ୍ବସ୍ମୃତିବୀଜାନାଂ ପ୍ରଜ୍ଞାଯାମଵିଶେଷତଃ ।
ତଥା ସ୍ଯାଦ୍ଭୂତବୀଜାନାମଵିଭକ୍ତ୍ସ୍ଥିତିସ୍ତ୍ଵଯି ॥ ୨୧୪॥
ନାଣୂନି ଭୂତବୀଜାନି ପ୍ରାକ୍ସର୍ଗାତ୍ତ୍ଵଯି ସଂସ୍ଥିତୌ ।
ଚିତିଶକ୍ତ୍ଯାତ୍ମକାନ୍ଯେଵ ନିରାକାରାଣି ସର୍ଵଥା ॥ ୨୧୫॥
ଅନାଦି ଚେଦିଦଂ ଵିଶ୍ଵଂ ସ୍ମରଣ୍ଣାତ୍ତଵ ସର୍ଜନମ୍ ।
ସାଦି ଚେଦାଦିମଃ ସର୍ଗୋ ଵକ୍ତ୍ଵ୍ଯସ୍ତଵ କଲ୍ପନାତ୍ ॥ ୨୧୬॥
ଵିଧାତୁଂ ଶକ୍ନୁଯାତ୍ସଂଵିଦଭୂତସ୍ଯାପି କଲ୍ପନମ୍ ।
କଲ୍ପିତସ୍ଯୈକଦା ଭୂଯଃ ସର୍ଜନାଵସରେ ସ୍ମୃତିଃ ॥ ୨୧୭॥
ଚିତେରସ୍ମାଦୃଶାଂ ଵୀର୍ଯଂ ସ୍ଵପ୍ନେ ଚେଦ୍ଵିଶ୍ଵକାରଣମ୍ ।
ଚିତେସ୍ସମଷ୍ଟିଭୂତାଯାଃ ପ୍ରଭାଵେ ସଂଶଯଃ କୁତଃ ॥ ୨୧୮॥
ମାତସ୍ସମଷ୍ଟିଚିଦ୍ରୂପେ ଵିଭୂତିର୍ଭୁଵନଂ ତଵ ।
ଇହ ଵ୍ଯଷ୍ଟି ଶରୀରେଷୁ ଭାନ୍ତୀ ତଦନୁପଶ୍ଯସି ॥ ୨୧୯॥
ତ୍ଵଂ ବହ୍ମ ତ୍ଵଂ ପରାଶକ୍ତିସ୍ତ୍ଵଂ ସର୍ଵା ଅପି ଦେଵତାଃ ।
ତ୍ଵଂ ଜୀଵାସ୍ତ୍ଵଂ ଜଗତ୍ସର୍ଵଂ ତ୍ଵଦନ୍ଯନ୍ନାସ୍ତି କିଞ୍ଚନ ॥ ୨୨୦॥
ସତୀ ଚିଦମ୍ବ ନୈଵ ତ୍ଵଂ ଭାଵାଭାଵଵିଲକ୍ଷଣା ।
ଶକ୍ତିଶକ୍ତିମତୋର୍ଭେଦଦର୍ଶନାଦେଷ ଵିଭ୍ରମଃ ॥ ୨୨୧॥
ତଵାମ୍ବ ଜଗତଧାସ୍ଯ ମୃତ୍ତିକାଘଟଯୋରେଵ ।
ସମ୍ବନ୍ଧୋ ଵେଦିତଵ୍ଯଃ ସ୍ଯାନ୍ନ ରଜ୍ଜୌଫଣିନୋରିଵ ॥ ୨୨୨॥
ତ୍ଵଂ ଶକ୍ତିରସ୍ଯଵିଚ୍ଛିନ୍ନା ଭାଵୈରାତ୍ମଵିଭୂତିଭିଃ ।
ଅନ୍ତରାସ୍ତୁ ମହେନ୍ଦ୍ରସ୍ଯ ଶକ୍ତ୍ସ୍ଯ ପ୍ରତିବିମ୍ବଵତ୍ ॥ ୨୨୩॥
ଶକ୍ତିର୍ଗଣପତେଃ କାଯେ ପ୍ରଵହନ୍ତୀ ସନାତନୀ ।
ଭାରତସ୍ଯ କ୍ରିଯାଦସ୍ଯ ବାଧ୍ଯମାନସ୍ଯ ରକ୍ଷଣମ୍ ॥ ୨୨୪॥
ଇମାନି ତତ୍ତ୍ଵଵାଦୀନି ଵାସିଷ୍ଠସ୍ଯ ମହାମୁନେଃ ।
ପଥ୍ଯାଵକ୍ତ୍ରଣି ସେଵନ୍ତାମନନ୍ତାମଭଵାଂ ଚିତିମ୍ ॥ ୨୨୫॥
॥ ଦ୍ଵିତୀଯୋ ମାଣଵକପାଦଃ ॥
ଶକ୍ତ୍ତମା ଶକ୍ରଵଧୂ ହାସଵିଭା ମେ ହରତୁ ।
ମାନସମାର୍ଗାଵରକଂ ଜେତୁମଶକ୍ଯଂ ତିମିରମ୍ ॥ ୨୨୬॥
ଭାରତଭୂପଦ୍ମଦୃଶୋ ଦୁର୍ଦଶଯା କ୍ଷୀଣତନୋଃ ।
ବାଷ୍ପମଜସ୍ରଂ ଵିଗଲଦ୍ଵାସଵଭାମା ହରତୁ ॥ ୨୨୭॥
ଦଣ୍ଡିତରକ୍ଷୋଜନତା ପଣ୍ଡିତଗୀତାଵନିତା ।
ମଣ୍ଡିତମାହେନ୍ଦ୍ରଗୃହା ଖଣ୍ଡିତପାପା ଜଯତି ॥ ୨୨୮॥
ସଦ୍ଗୁଣସମ୍ପତ୍କଲିତଂ ସର୍ଵଶରୀରେ ଲଲିତମ୍ ।
ଦେଵପତେଃ ପୁଣ୍ଯଫଲଂ ପୁଷ୍ଯତୁ ମେ ବୁଦ୍ଧିବଲମ୍ ॥ ୨୨୯॥
ହାସଵିଶେଷୈରଲସୈର୍ଦିକ୍ଷୁ କିରନ୍ତ୍ଯଚ୍ଛସୁଧାମ୍ ।
ଇନ୍ଦ୍ରଦୃଗାନନ୍ଦକରୀ ଚନ୍ଦ୍ରମୁଖୀ ମାମଵତୁ ॥ ୨୩୦॥
ପ୍ରେମତରଙ୍ଗପ୍ରତିମୈଃ ଶୀତଲଦୃଷ୍ଟିପ୍ରକରୈଃ ।
ଶକ୍ରମନୋମୋହକରୀ ଵକ୍ରକଚା ମାମଵତୁ ॥ ୨୩୧॥
ଗାଢରସୈଶ୍ଚାରୁପଦୈର୍ଗୂଢତରାର୍ଥୈର୍ଵଚନୈଃ ।
କାମକରୀ ଵୃତ୍ରଜିତୋ ହେମତନୁର୍ମାମଵତୁ ॥ ୨୩୨॥
ମୃତ୍ଯୁତନୁଃ କାଲତନୋର୍ଵିଶ୍ଵପତେଃ ପାର୍ଶ୍ଵଚରୀ ।
ପ୍ରେତଜଗଦ୍ରକ୍ଷତି ଯା ସା ତରୁଣୀ ମାମଵତୁ ॥ ୨୩୩॥
ପ୍ରେତଜଗତ୍କେଚିଦଧୋ ଲୋକମପୁଣ୍ଯଂ ବ୍ରୁଵତେ ।
ଶୀତରୁଚେର୍ଦେଵି ପରୋ ନେତରଦେତଦ୍ ଵଦତି ॥ ୨୩୪॥
ଭୂରିଯମୁର୍ଵୀ ଵସୁଧା ଵାରିଜଵୈର୍ଯେଷଭୁଵଃ ।
ସ୍ଵର୍ମହସାଂ ରାଶିରସୌ ଯେଷୁ ନରପ୍ରେତସୁରାଃ ॥ ୨୩୫॥
ରାଜତଶୈଲଂ ଶଶିନଃ କେଚିଦଭିନ୍ନଂ ବ୍ରୁଵତେ ।
ମୃତ୍ଯୁଯମାଵେଵ ଶିଵାଵୀଶ୍ଵରି ତେଷାଂ ତୁ ମତେ ॥ ୨୩୬॥
ରାଜତଶୈଲଃ ପିତୃଭୂରୋଷଧିରାଡେଷ ଯଦି ।
କାଞ୍ଚନଶୈଲଃ ସୁରଭୂର୍ବନ୍ଧୁରସୌ ଵାରିରୁହାମ୍ ॥ ୨୩୭॥
ପାଵଯ ଭୂମିଂ ଦଧତଃ ପାଵକକାଯସ୍ଯ ଵିଭୋଃ ।
ଭାମିନି ଭାଵାନୁଗୁଣେ ସେଵକମଗ୍ନାଯି ତଵ ॥ ୨୩୮॥
ଯସ୍ଯ ଯମୋ ଭୂତପତିର୍ବୁଦ୍ଧିମତସ୍ତସ୍ଯ ମତେ ।
ଆଗ୍ନିରୁପେନ୍ଦ୍ରୋ ମଘଵା କାଞ୍ଚନଗର୍ଭୋ ଭଗଵାନ୍ ॥ ୨୩୯॥
ଯସ୍ଯ ମହାକାଲଵଧୂର୍ମୃତ୍ଯୁରପି ଦ୍ଵେ ନ ଵିଦଃ ।
ତ୍ଵଂ ଶଚି ମେଧାଽସ୍ଯମତେ ପାଵକଶକ୍ତିଃ କମଲା ॥ ୨୪୦॥
ନାମସୁ ଭେଦୋଽସ୍ତୁ ଧିଯାମୀଶ୍ଵରି ନିଷ୍କୃଷ୍ଟମିଦମ୍ ।
ସୂର୍ଯଧରେନ୍ଦୁଷ୍ଵଜରେ ତ୍ଵଂ ତ୍ରିତନୁର୍ଭାସି ପରେ ॥ ୨୪୧॥
ସାତ୍ତ୍ଵିକଶକ୍ତିଃ ସଵିତର୍ଯାଦିମରାମେ ଭଵସି ।
ରାଜସଶକ୍ତିର୍ଭୁଵି ନସ୍ତାମସଶକ୍ତିଃ ଶଶିନି ॥ ୨୪୨॥
ସର୍ଵଗୁଣା ସର୍ଵଵିଭା ସର୍ଵବଲା ସର୍ଵରସା ।
ସର୍ଵମିଦଂ ଵ୍ଯାପ୍ଯ ଜଗତ୍କାପି ଵିଭାନ୍ତୀ ପରମା ॥ ୨୪୩॥
ଵ୍ଯୋମତନୁର୍ନିର୍ଵପୁଷୋ ଦେଵି ସତସ୍ତ୍ଵଂ ଦଯିତା ।
ଅସ୍ଯଭିଯୁକ୍ତୈର୍ଵିବୁଧୈରମ୍ବ ମହେଶ୍ଵର୍ଯୁଦିତା ॥ ୨୪୪॥
ସା ଖଲୁ ମାଯା ପରମା କାରଣମୀଶଂ ଵଦତାମ୍ ।
ସା ପ୍ରକୃତିଃ ସାଙ୍ଖ୍ଯଵିଦାଂ ସା ଯମିନାଂ କୁଣ୍ଡଲିନୀ ॥ ୨୪୫॥
ସା ଲଲିତା ପଞ୍ଚଦଶୀମୁତ୍ତମଵିଦ୍ଯାଂ ଜପତାମ୍ ।
ସା ଖଲୁ ଚଣ୍ଡୀ ଜନନୀ ସାଧୁନଵାର୍ଣଂ ଭଜତାମ୍ ॥ ୨୪୬॥
ସା ମମ ଶଚ୍ଯାଃ ପରମଂ କାରଣରୂପଂ ଭଵତି ।
କାର୍ଯତନୁର୍ଦିଵି ଶକ୍ରଂ ସମ୍ମଦଯନ୍ତୀ ଲସତି ॥ ୨୪୭॥
ଵ୍ଯୋମତନୋଃ ସର୍ଵଜଗଚ୍ଚାଲନସୂତ୍ରଂ ତୁ ଵଶେ ।
ନିର୍ଵହଣେ ତସ୍ଯ ପୁନର୍ଦିଵ୍ଯତନୁସ୍ତ୍ରୀତ୍ରିତଯମ୍ ॥ ୨୪୮॥
ପାତୁମିମଂ ସ୍ଵଂ ଵିଷଯଂ ହନ୍ତ ଚିରାନ୍ନିର୍ଵିଜଯମ୍ ।
କିଙ୍କ୍ରମୀଶେ ଵିଭଯଂ ମାଂ କୁରୁ ପର୍ଯାର୍ଶିଯମ୍ ॥ ୨୪୯॥
ଚାରୁପଦକ୍ରୀଡନକୈର୍ମାତରିମୈର୍ମାଣଵକୈଃ ।
ଚେତସି ତେ ଦେଵନୁତେ ପ୍ରୀତିରମୋଘା ଭଵତୁ ॥ ୨୫୦॥
॥ ତୃତୀଯଶ୍ଚିତ୍ରପଦାପାଦଃ ॥
ଅପ୍ଯଲସୋ ହରିଦନ୍ତଧ୍ଵାନ୍ତତତେରପି ହର୍ତା ।
ଅସ୍ତୁ ମମେନ୍ଦ୍ରପୁରନ୍ଧ୍ରୀ ହାସଲଵଃ ଶୁଭକର୍ତା ॥ ୨୫୧॥
ପାହି ପରୈର୍ହୃତସାରାଂ ନେତ୍ରଗଲଜ୍ଜଲଧାରାମ୍ ।
ଭାରତଭୂମିମନାଥାଂ ଦେଵି ଵିଧାଯ ସନାଥାମ୍ ॥ ୨୫୨॥
ଚାଲଯତା ସୁରରାଜଂ ପାଲଯତା ଭୁଵନାନି ।
ଶୀଲଯତା ନତରକ୍ଷାଂ କାଲଯତା ଵୃଜିନାନି ॥ ୨୫୩॥
ଲାଲଯତା ମୁନିସଙ୍ଘଂ କୀଲଯତା ଦିଵି ଭଦ୍ରମ୍ ।
ପାଵଯ ମାଂ ସକୃଦୀଶେ ଭାସୁରଦୃକ୍ପ୍ରସରେଣ ॥ ୨୫୪॥
ସର୍ଵରୁଚାମାପି ଶାଲାଂ ତ୍ଵାଂ ଶଚି ମଙ୍ଗଲଲୀଲାମ୍ ।
କାଲକଚାମୁତ କାଲୀଂ ପଦ୍ମମୁଖୀମୁତ ପଦ୍ମାମ୍ ॥ ୨୫୫॥
ଯଃ ସ୍ମରତି ପ୍ରତିକଲ୍ଯଂ ଭକ୍ତିଭରେଣ ପରେଣ ।
ତସ୍ଯ ସୁରେଶ୍ଵରି ସାଧୋରସ୍ମି ପଦାବ୍ଜଭୁଜିଷ୍ଯଃ ॥ ୨୫୬॥
ଯସ୍ତଵ ନାମପଵିତ୍ରଂ କୀର୍ତଯତେ ସୁକୃତୀ ନା ।
ଵାସଵସୁନ୍ଦରି ଦାସସ୍ତଚ୍ଚରଣସ୍ଯ ସଦାଽହମ୍ ॥ ୨୫୭॥
ପାଵକସାଗରକୋଣଂ ଯସ୍ତଵ ପାଵନଯନ୍ତ୍ରମ୍ ।
ପୂଜଯତି ପ୍ରତିଘସ୍ରଂ ଦେଵି ଭଜାମି ତଦଙ୍ଧ୍ରିମ୍ ॥ ୨୫୮॥
ଯସ୍ତଵ ମନ୍ତ୍ରମୁଦାରପ୍ରାଭଵମାଗମସାରମ୍ ।
ପାଵନି କୂର୍ଚମୁପାସ୍ତେ ତସ୍ଯ ନମଧ୍ରଣାଯ ॥ ୨୫୯॥
ଶାନ୍ତଧିଯେତରଚିନ୍ତାସନ୍ତତିମମ୍ବ ଵିଧୂଯ ।
ଚିନ୍ତଯତାଂ ତଵ ପାଦାଵସ୍ମି ସତାମନୁଯାଯୀ ॥ ୨୬୦॥
ଶୋଧଯତାଂ ନିଜତତ୍ତ୍ଵଂ ସାଧଯତାଂ ମହିମାନମ୍ ।
ଭାଵଯତାଂ ଚରଣଂ ତେ ଦେଵି ପଦାନୁଚରୋଽହମ୍ ॥ ୨୬୧॥
ଯୋଽନୁଭଵେନ୍ନିଜଦେହେ ତ୍ଵାମଜରେ ପ୍ରଵହନ୍ତୀମ୍ ।
ସନ୍ତତଚିନ୍ତନଯୋଗାତ୍ତସ୍ଯ ନମାମି ପଦାବ୍ଜମ୍ ॥ ୨୬୨॥
ବୋଧଯତେ ଭଵତୀଂ ଯଃ ପ୍ରାଣଗତାଗତଦର୍ଶୀ ।
କୁଣ୍ଡଲିନୀଂ କୁଲକୁଣ୍ଡାତ୍ତଂ ତ୍ରିଦିଵେଶ୍ଵରି ଵନ୍ଦେ ॥ ୨୬୩॥
ଲୋଚନମଣ୍ଡଲସୌଧାଂ ଲୋକନମୂଲଵିଚାରୀ ।
ଵିନ୍ଦତି ଯଃ ପରମେ ତ୍ଵାଂ ଵନ୍ଦନମସ୍ଯ କରୋମି ॥ ୨୬୪॥
ମାନିନି ଜମ୍ଭଜିତସ୍ତ୍ଵାଂ ମାନସମୂଲଵିତର୍କୀ ।
ଵେଦହୃଦମ୍ବୁରୁହେ ଯଃ ପାଦମମୁଷ୍ଯ ନମାମି ॥ ୨୬୫॥
ଅନ୍ତରନାଦଵିମର୍ଶୀ ପଶ୍ଯତି ଯଃ ସୁକୃତୀ ତେ ।
ଵୈଭଵମମ୍ବ ଵିଶୁଦ୍ଧେ ତେନ ଵଯଂ ପରଵନ୍ତଃ ॥ ୨୬୬॥
ଇନ୍ଦ୍ରପଦସ୍ଥିତଚିତ୍ତଶ୍ଶୀର୍ଷସୁଧାରସମତ୍ତଃ ।
ଯୋ ଭଜତେ ଜନନି ତ୍ଵାଂ ତଚ୍ଚରଣଂ ପ୍ରଣମାମି ॥ ୨୬୭॥
ରାସନଵାରିଣି ଲଗ୍ନଃ ସମ୍ମଦଵୀଚିଷୁ ମଗ୍ନଃ ।
ଧ୍ଯାଯତି ଯଃ ପରମେ ତ୍ଵାଂ ତସ୍ଯ ପଦଂ ମମ ଵନ୍ଦ୍ଯମ୍ ॥ ୨୬୮॥
ତ୍ଵାଂ ସଦହଞଙ୍କୃତିରୂପାଂ ଯୋଗିନୁତେ ହତପାପାମ୍ ।
ଧାରଯତେ ହୃଦଯେ ଯସ୍ତସ୍ଯ ସଦାଽସ୍ମି ଵିଧେଯଃ ॥ ୨୬୯॥
ଧୂତସମସ୍ତଵିକଲ୍ପୋ ଯସ୍ତଵ ପାଵନଲୀଲାମ୍ ।
ଶୋଧଯତି ସ୍ଵଗୁହାଯାଂ ତସ୍ଯ ଭଵାମ୍ଯନୁଜୀଵୀ ॥ ୨୭୦॥
ଯୋ ଭଜତେ ନିଜଦୃଟିଂ ରୂପପରିଗ୍ରହଣେଷୁ ।
କାମପି ଦେଵି କଲାଂ ତେ ତସ୍ଯ ପଦେ ନିପତେଯମ୍ ॥ ୨୭୧॥
କର୍ମଣି କର୍ମଣି ଚେଷ୍ଟାମମ୍ବ ତଵୈଵ ଵିଭୂତିମ୍ ।
ଯଃ ଶିତବୁଦ୍ଧିରୁପାସ୍ତେ ତତ୍ପଦମେଷ ଉପାସ୍ତେ ॥ ୨୭୨॥
ଵସ୍ତୁନି ଵସ୍ତୁନି ସତ୍ତାଂ ଯୋ ଭଵତୀଂ ସମୁପାସ୍ତେ ।
ମାତରମୁଷ୍ଯ ଵହେଯଂ ପାଦଯୁଗଂ ଶିରସାଽହମ୍ ॥ ୨୭୩॥
ପାତୁମିମଂ ନିଜଦେଶଂ ସର୍ଵଦିଶାସୁ ସପାଶମ୍ ।
ଅମ୍ବ ଵିଧାଯ ସମର୍ଥଂ ମାଂ କୁରୁ ଦେଵି କୃତାର୍ଥମ୍ ॥ ୨୭୪॥
ଚିତ୍ରପଦାଭିରିମାଭିଶ୍ଚିତ୍ରଵିଚିତ୍ରଚରିତ୍ରା ।
ସମ୍ମଦମେତୁ ମଘୋନଃ ପ୍ରାଣସଖୀ ମୃଗନେତ୍ର ॥ ୨୭୫॥
॥ ଚତୁର୍ଥୋ ନାରାଚିକାପାଦଃ ॥
ଅନ୍ତର୍ଵିଧୁନ୍ଵତା ତମଃ ପ୍ରାଣସ୍ଯ ତନ୍ଵତା ବଲମ୍ ।
ମନ୍ଦସ୍ମିତେନ ଦେଵତାରାଜ୍ଞୀ କରୋତୁ ମେ ଶିଵମ୍ ॥ ୨୭୬॥
ଉତ୍ଥାପ୍ଯ ପୁଣ୍ଯସଞ୍ଚଯଂ ସମ୍ମଦ୍ର୍ଯ ପାପସଂହତିମ୍ ।
ସା ଭାରତସ୍ଯ ସମ୍ପଦେ ଭୂଯାଦ୍ବଲାରିଭାମିନୀ ॥ ୨୭୭॥
ଲୀଲାସଖୀ ବିଡୌଜସସ୍ସ୍ଵର୍ଵାଟିକାସୁ ଖେଲନେ ।
ପୀଯୁଷଭାନୁଜିନ୍ମୁଖୀ ଦେଵୀ ଶଚୀ ଵିରାଜତେ ॥ ୨୭୮॥
ପକ୍ଷଃ ପରୋ ମରୁତ୍ଵତୋ ରକ୍ଷଃ ପ୍ରଵୀରମର୍ଦନେ ।
ଭାମାଲି ଭାସୁରାନନା ଦେଵୀ ଶଚୀ ଵିରାଜତେ ॥ ୨୭୯॥
ଭୀତିଂ ନିଶାଟସଂହତେଃ ପ୍ରୀତିଂ ସୁପର୍ଵଣାଂ ତତେଃ ।
ଜ୍ଯାଟଙ୍କୃତୈର୍ଵିତନ୍ଵତୀ ଦେଵୀ ଶଚୀ ଵିରାଜତେ ॥ ୨୮୦॥
ଦେଵେନ୍ଦ୍ରଶକ୍ତିଧାରିଣୀ ଶତ୍ରୁପ୍ରସକ୍ତିଵାରିଣୀ ।
ମୌନୀନ୍ଦ୍ରମୁକ୍ତିକାରିଣୀ ଦେଵୀ ଶଚୀ ଗତିର୍ମମ ॥ ୨୮୧॥
ସନ୍ନସ୍ଵଦେଶଦର୍ଶନାଦ୍ଭିନ୍ନସ୍ଵଜାତିଵୀକ୍ଷଣାତ୍ ।
ଖିନ୍ନସ୍ଯ ସଂଶ୍ରିତାଵନୀ ଦେଵୀ ଶଚୀ ଗତିର୍ମମ ॥ ୨୮୨॥
ସଙ୍ଘେ ସହସ୍ରଧାକୃତେ ଦେଶେ ନିକୃଷ୍ଟତାଂ ଗତେ ।
ଶୋକାକୁଲସ୍ଯ ଲୋକଭୃଦ୍ଦେଵୀ ଶଚୀ ଗତିର୍ମମ ॥ ୨୮୩॥
ସା ସଂଵିଦୋଽଧିଦେଵତା ତସ୍ଯାସ୍ସ୍ଵରଃ ପରୋ ଵଶେ ।
ସର୍ଵଂ ଵିଧୀଯତେ ତଯା ତସ୍ମାତ୍ପରା ମତା ଶଚୀ ॥ ୨୮୪॥
ସା ଯାତି ସୂକ୍ଷ୍ମମପ୍ଯଲଂ ସା ଭାତି ସର୍ଵଵସ୍ତୁଷୁ ।
ସା ମାତି ଖଂ ଚ ନିସ୍ତୁଲଂ ତସ୍ମାତ୍ପରା ମତା ଶଚୀ ॥ ୨୮୫॥
ସା ସର୍ଵଲୋକନାଯିକା ସା ସର୍ଵଗୋଲପାଲିକା ।
ସା ସର୍ଵଦେହଚାଲିକା ତସ୍ମାତ୍ପରା ମତା ଶଚୀ ॥ ୨୮୬॥
ଯସ୍ଯାଃ କୃତିର୍ଜଗତ୍ତ୍ରଯଂ ଯା ତଦ୍ବିଭର୍ତି ଲୀଲଯା ।
ଯସ୍ଯାଂ ପ୍ରଯାତି ତଲ୍ଲଯଂ ସା ଵିଶ୍ଵନାଯିକା ଶଚୀ ॥ ୨୮୭॥
ଧର୍ମେ ପରିକ୍ଷଯଂ ଗତେ ଯାଽଵିଶ୍ଯ ନିର୍ମଲଂ ଜନମ୍ ।
ତଦ୍ରକ୍ଷଣାଯ ଜାଯତେ ସା ଵିଶ୍ଵନାଯିକା ଶଚୀ ॥ ୨୮୮॥
ଵେଧା ଋତସ୍ଯ ଯୋଦିତା ମନ୍ତ୍ରେଣ ସତ୍ଯଵାଦିନା ।
ବାଧାନିଵାରିଣୀ ସତାଂ ସା ଵିଶ୍ଵନାଯିକା ଶଚୀ ॥ ୨୮୯॥
ଯଜ୍ଞୋ ଯଯା ଵିନୀଯତେ ଯୁଦ୍ଧଂ ତଥା ପୃଥଗ୍ଵିଧଭ୍ ।
ତାଂ ଦେଵରାଜମୋହିନୀଂ ନାରୀଂ ନୁମଃ ପୁରାତନୀମ୍ ॥ ୨୯୦॥
ଯସ୍ଯାସ୍ସୁତୋ ଵୃଷାକପିର୍ଦେଵୋଽସତାଂ ପ୍ରଶାସିତା ।
ତାଂ ସର୍ଵଦା ସୁଵାସିନୀଂ ନାରୀଂ ନୁମଃ ପୁରାତନୀମ୍ ॥ ୨୯୧॥
ଯସ୍ଯାସ୍ସମା ନିତମ୍ବିନୀ କାଚିନ୍ନ ଵିଷ୍ଟପତ୍ରଯେ ।
ତାଂ ନିତ୍ଯଚାରୁ ଯୌଵନାଂ ନାରୀଂ ନୁମଃ ପୁରାତନୀମ୍ ॥ ୨୯୨॥
ଯଚ୍ଚାରୁତା ନ ଦୃଶ୍ଯତେ ମନ୍ଦାରପଲ୍ଲଵେଷ୍ଵପି ।
ତତ୍ସୁନ୍ଦରାଚ୍ଚସୁନ୍ଦରଂ ଶଚ୍ଯାଃ ପଦାମ୍ବୁଜଂ ଶ୍ରଯେ ॥ ୨୯୩॥
ଯସ୍ଯ ପ୍ରଭା ନ ଵିଦ୍ଯତେ ମାଣିକ୍ଯତଲ୍ଲ୍ଜେଷ୍ଵପି ।
ତଦ୍ଭାସୁରାଚ୍ଚ ଭାସୁରଂ ଶଚ୍ଯାଃ ପଦାମ୍ବୁଜଂ ଶ୍ରଯେ ॥ ୨୯୪॥
ନ ସ୍ଯାଦଘୈସ୍ତିରସ୍କୃତୋ ଯଚ୍ଚିନ୍ତକୋ ନରଃ କୃତୀ ।
ତତ୍ପାଵନାଚ୍ଚ ପାଵନଂ ଶଚ୍ଯାଃ ପଦାମ୍ବୁଜଂ ଶ୍ରଯେ ॥ ୨୯୫॥
ରାଜନ୍ନଖେନ୍ଦୁଭାନୁଭିସ୍ସର୍ଵଂ ତମୋ ଵିଧୁନ୍ଵତେ ।
ବୃନ୍ଦାରକେନ୍ଦ୍ରସୁନ୍ଦରୀପାଦାମ୍ବୁଜାଯ ମଙ୍ଗଲମ୍ ॥ ୨୯୬॥
ଗୀର୍ଵାଣମୌଲିରୀଭା ସଙ୍କ୍ଷାଲିତାଯ ଦୀପ୍ଯତେ ।
ସ୍ଵର୍ଗାଧିନାଥଭାମିନିପାଦାମ୍ବୁଜାଯ ମଙ୍ଗଲମ୍ ॥ ୨୯୭॥
ବାଲାର୍କବିମ୍ବରୋଚିଷେ ଯୋଗୀନ୍ଦ୍ର ହୃଦ୍ଗୁହାଜୁଷେ ।
ପାକାରିଜୀଵିତେଶ୍ଵରୀପାଦାମ୍ବୁଜାଯ ମଙ୍ଗଲମ୍ ॥ ୨୯୮॥
ଆତ୍ମୀଯଦେଶରକ୍ଷଣେ ଶକ୍ତଂ କରୋତୁ ସର୍ଵଥା ।
ପାପଦ୍ଵିଷାଂ ପ୍ରିଯଙ୍କରୀ ଵାସିଷ୍ଠମିନ୍ଦ୍ରସୁନ୍ଦରୀ ॥ ୨୯୯॥
ଵାସିଷ୍ଠଵାକ୍ପ୍ରଦୀପ୍ତିର୍ଭିନାରାଚିକାଭିରୀଶ୍ଵରୀ ।
ଗୀର୍ଵାଣଚକ୍ରଵର୍ତିନସ୍ସମ୍ମୋଦମେତୁ ସୁନ୍ଦରୀ ॥ ୩୦୦॥
॥ ତୃତୀଯମାନୁଷ୍ଟୁଭଂ ଶତକଂ ସମାପ୍ତମ୍ ॥
॥ ଅଥ ଚତୁର୍ଥଂ ବାର୍ହତଂ ଶତକମ୍ ॥
॥ ପ୍ରଥମୋ ହଲମୁଖୀପାଦଃ ॥
କ୍ଷୀରଵୀଚିପୃଷତସିତଂ ପ୍ରେମଧାରିଦରହସିତମ୍ ।
ନାକରାଜନଲିନଦୃଶଃ ଶୋକହାରି ମମ ଭଵତୁ ॥ ୩୦୧॥
ଅଧ୍ଵନୋ ଗଲିତଚରଣାମଧ୍ଵରକ୍ଷିତିମଵିଭଵାମ୍ ।
ଆଦଧାତୁ ପଥି ଵିମଲେ ଵୈଭଵେ ଚ ହରିତରୁଣୀ ॥ ୩୦୨॥
ବ୍ରହ୍ମଣଶ୍ଵିତିରଥନଭଃ କାଯଭାଗଵଗତିମତୀ ।
ଯା ତଦା ପୃଥଗିଵ ବଭୌ ଧର୍ମିତାଂ ସ୍ଵଯମପି ଗତା ॥ ୩୦୩॥
ମୋଦବୋଧଵିଭଵକୃତପ୍ରାକୃତେତରଵରତନୁ ।
ସର୍ଵସଦ୍ଗୁଣଗଣଯୁତଂ ଯା ସସର୍ଜ ସୁରମିଥୁନମ୍ ॥ ୩୦୪॥
ପୁଂସି ଦୀପ୍ତଵପୁଷି ତଯୋର୍ବ୍ରହ୍ମ ସୋଽହମିତି ଲସତି ।
ଯୋଷିତେ କିଲ ଧିଯମଦାତ୍ତସ୍ଯ ଶକ୍ତିରହମିତି ଯା ॥ ୩୦୫॥
ଯାଭିମାନବଲଵଶତସ୍ତାମୁଦାରତମଵିଭଵାମ୍ ।
ମନ୍ଯତେ ସ୍ମ ଵରଵନିତାଂ ସ୍ଵାଧିଦୈଵିକତନୁରିତି ॥ ୩୦୬॥
ଆଦିପୁଂସି ଗଗନତନୁର୍ଯା ତନୋତି ତନୁଜମତିମ୍ ।
ଆଦଧାତି ଯୁଵତିତନୁଃ ପ୍ରାଣନାଯକ ଇତି ରତିମ୍ ॥ ୩୦୭॥
ତାଂ ପରାଂ ଭୁଵନଜନନୀଂ ସର୍ଵପାପତତିଶମନୀମ୍ ।
ତନ୍ତ୍ରଜାଲଵିନୁତବଲାଂ ସ୍ତୌମି ସର୍ଵମତିମମଲାମ୍ ॥ ୩୦୮॥
ସା ମତିର୍ଵିଦିତଵିଷଯା ସା ରୁଚିର୍ଵିତତଵିଷଯା ।
ସା ରତିର୍ଵିନୁତଵିଷଯା ସା ସ୍ଥିତିର୍ଵିଧୁତଵିଷଯା ॥ ୩୦୯॥
ଯତ୍ର ଯତ୍ର ମମ ଧିଷଣା ଗ୍ରାହ୍ଯଵସ୍ତୁନି ଗତିମତୀ ।
ତତ୍ର ତତ୍ର ଵିଲସତୁ ସା ସର୍ଵଗା ସକଲଚରିତା ॥ ୩୧୦॥
ଦୁର୍ବଲସ୍ଯ ବହୁଲବଲୈରର୍ଦିତସ୍ଯ ଜଗତି ଖଲୈଃ ।
ଆଦିଦେଵି ତଵ ଚରଣଂ ପାଵନଂ ଭଵତି ଶରଣମ୍ ॥ ୩୧୧॥
ପୌରୁଷେ ଭଵତି ଵିଫଲେ ତ୍ଵାମଯଂ ଜନନି ଭଜତେ ।
କିଂ ନୁତେ ଯଦି ଵିମୁଖତା ପୌରୁଷଂ କଥଯ ଭଜତାମ୍ ॥ ୩୧୨॥
କର୍ତୁରପ୍ରତିହତଗିରଃ ପୌରୁଷାଚ୍ଛତଗୁଣମିଦମ୍ ।
ଧ୍ଯାତୁରସ୍ଖଲିତମନସଃ କାର୍ଯସିଦ୍ଧିଷୁ ତଵ ପଦମ୍ ॥ ୩୧୩॥
ପୌରୁଷଂ ଵିଦିତମଫଲଂ କାଙ୍କ୍ଷିତେ ମମ ସୁରନୁତେ ।
ଶକ୍ତମୀଦୃଶି ତୁ ସମଯେ ଶ୍ରଦ୍ଦଧାମି ତଵ ଚରଣମ୍ ॥ ୩୧୪॥
ପୌରୁଷଂ ଯଦି କଵିମତଂ ଦେଵି ତେଽପି ପଦଭଜନମ୍ ।
ଦୈଵଵାଦପଟୁଵଚସୋ ମୂକତୈଵ ମମ ଶରଣମ୍ ॥ ୩୧୫॥
ପୂର୍ଵଜନ୍ମସୁକୃତଫଲଂ ଦୈଵମମ୍ବ ନିଗଦତି ଯଃ ।
ଭକ୍ତିପୌରୁଷଵିରହିଣୋ ଭାଵିତସ୍ଯ ରିପୁଦଯିତମ୍ ॥ ୩୧୬॥
ଉଦ୍ଯତସ୍ଯ ତଵ ଚରଣଂ ସଂଶ୍ରିତସ୍ଯ ଚ ସୁରନୁତେ ।
ପୂର୍ଵଜନ୍ମସୁକୃତବଲଶ୍ରଦ୍ଧଯାଽଲମହୃଦଯଯା ॥ ୩୧୭॥
ଅସ୍ତୁ ପୂର୍ଵଭଵସୁକୃତଂ ମାସ୍ତୁ ଵା ଜନନି ଜଗତାମ୍ ।
ସାମ୍ପ୍ରତଂ ତଵ ପଦଯୁଗଂ ସଂଶ୍ରିତୋସ୍ମ୍ଯଵ ଵିସୃଜ ଵା ॥ ୩୧୮॥
ନାସ୍ତି ସମ୍ପ୍ରତି କିମପି କିଂ ଭୂତିମାପ୍ସ୍ଯସି କିମୁ ତତଃ ।
ଅନ୍ଯଜନ୍ମନି ଵିତରଣେ କା ପ୍ରସକ୍ତିରମରନୁତେ ॥ ୩୧୯॥
ନାନ୍ଯଜନ୍ମନି ବହୁଶିଵଂ ନାପି ନାକଭୁଵନସୁଖମ୍ ।
କାମଯେ ଫଲମଭିମତଂ ଦେହି ସମ୍ପ୍ରତି ଶଚି ନ ଵା ॥ ୩୨୦॥
ମେଦିନୀ ଭୁଵନତଲତୋ ନିସ୍ତୁଲାଦୁତ ଗଗନତଃ ।
ଭାସ୍କରାଦୁତ ରୁଚିନିଧେଃ କାମ୍ଯମୀଶ୍ଵରି ଵିତର ମେ ॥ ୩୨୧॥
ଵିଷ୍ଟପେ କ୍ଵଚନ ଵରଦେ ଦାତୁମୀଶ୍ଵରି କୃତମତିମ୍ ।
ଵାରଯେଜ୍ଜନନି ନ ପରସ୍ତ୍ଵାଂ ଜନସ୍ତଵ ପତିମିଵ ॥ ୩୨୨॥
ଦେହି ଵା ଭଗଵତି ନ ଵା ପାହି ଵା ଶଶିମୁଖି ନ ଵା ।
ପାଵନଂ ତଵ ପଦଯୁଗଂ ନ ତ୍ଯଜାନି ହରିଦଯିତେ ॥ ୩୨୩॥
ରକ୍ଷିତୁଂ ଭରତଵିଷଯଂ ଶକ୍ତମିନ୍ଦ୍ରହୃଦଯସଖୀ ।
ଚନ୍ଦ୍ରବିମ୍ବରୁଚିରମୁଖୀ ସା କ୍ରିଯାଦ୍ଭୁଵି ଗଣପତିମ୍ ॥ ୩୨୪॥
ସମ୍ପ୍ରହୃଷ୍ଯତୁ ହଲମୁଖୀର୍ଭାସ୍ଵତୀର୍ଗଣପତିମୁନେଃ ।
ସା ନିଶମ୍ଯ ସୁରନୃପତେର୍ମୋହିନୀ ସଦଯହୃଦଯା ॥ ୩୨୫॥
॥ ଦ୍ଵିତୀଯୋ ଭୁଜଗଶିଶୁଭୃତାପାଦଃ ॥
ମରୁଦଧିପମନୋନାଥା ମଧୁକରଚିକୁରାସ୍ମାକମ୍ ।
ଵୃଜିନଵିଧୁତିମାଧତ୍ତାଂ ଵିଶଦହସିତଲେଶେନ ॥ ୩୨୬॥
ଅଖିଲନିଗମସିଦ୍ଧାନ୍ତୋ ବହୁମୁନିଵରବୁଦ୍ଧାନ୍ତଃ ।
ସୁରପରିବୃଢଶୁଦ୍ଧାନ୍ତୋ ଭରତଵସୁମତୀମଵ୍ଯାତ୍ ॥ ୩୨୭॥
ଭଗଵତି ଭଵତୀଚେତୋ ରତିକୃଦଭଵଦିନ୍ଦ୍ରସ୍ଯ ।
ସ ତଵ ଜନନି ସନ୍ତାନଦ୍ରୁମଵନମତିରମ୍ଯଂ ଵାମ୍ ॥ ୩୨୮॥
ପତିରଖିଲଯୁଵଶ୍ରେଷ୍ଠଃ କିମପି ଯୁଵତିରତ୍ନଂ ତ୍ଵମ୍ ।
ଵନଵିହୃତିଷୁ ଵାଂ ଚେତୋ ହରଣମଭଵଦନ୍ଯୋନ୍ଯମ୍ ॥ ୩୨୯॥
ମଧୁରଲଲିତଗମ୍ଭୀରୈସ୍ତଵ ହୃଦଯମୁପନ୍ଯାସୈଃ ।
ଵନଵିହରଣଲୀଲାଯାମହରଦଯି ଦିଵୋ ରାଜା ॥ ୩୩୦॥
କଲଵଚନଵିଲାସେନ ପ୍ରଗୁଣମୁଖଵିକାସେନ ।
ଭୁଵନମପିମନୋଽହାର୍ଷୀର୍ଜନନି ଵନଵିହାରେ ତ୍ଵମ୍ ॥ ୩୩୧॥
କନକକମଲକାନ୍ତାସ୍ଯା ଧଵଲକିରଣଵକ୍ତ୍ରେଣ ।
ଅସିତଜଲଜପତ୍ରାକ୍ଷୀ ସିତନଲିନଦଲାକ୍ଷେଣ ॥ ୩୩୨॥
ଅଲିଚଯନିଜଧମ୍ମିଲ୍ଲା ନଵଜଲଧରକେଶେନ ।
ମୃଦୁଲତମଭୁଜାଵଲ୍ଲୀ ଦୃଢତମଭୁଜଦଣ୍ଡେନ ॥ ୩୩୩॥
ଅମୃତନିଲଯବିମ୍ବୋଷ୍ଠୀ ରୁଚିରଧଵଲଦନ୍ତେନ ।
ଅତିମୁକୁରଲସଦ୍ଗଣ୍ଡା ଵିକଚଜଲଜହସ୍ତେନ ॥ ୩୩୪॥
ଯୁଵତିରତିତରାଂ ରମ୍ଯା ସୁଲଲିତଵପୁଷା ଯୂନା ।
ଭଗଵତି ଶଚି ଯୁକ୍ତା ତ୍ଵଂ ତ୍ରିଭୁଵନଵିଭୁନେନ୍ଦ୍ରେଣ ॥ ୩୩୫॥
ଵିକଚକୁସୁମମନ୍ଦାରଦ୍ରଷ୍ଠ୍ହମଵନଵରଵାଟୀଷୁ ।
ଵିହରଣମଯି କୁର୍ଵାଣା ମନସିଜମନୁଗୃହ୍ଣାସି ॥ ୩୩୬॥
ତଵ ଶଚି ଚିକୁରେ ରାଜତ୍କୁସୁମମମରଵୃକ୍ଷସ୍ଯ ।
ନଵ ସଲିଲଭୃତୋ ମଧ୍ଯେ ସ୍ଫୁରଦିଵ ନଵନକ୍ଷତ୍ରମ୍ ॥ ୩୩୭॥
ଅଭଜତତରୁରୌଦାର୍ଯଂ ଵିଭଵମପି ମହାନ୍ତଂ ସଃ ।
ଵିକଚକୁସୁମସମ୍ପତ୍ତ୍ଯା ଭଗଵତି ଭଜତେ ଯସ୍ତ୍ଵାମ୍ ॥ ୩୩୮॥
ଅମରନୃପତିନା ସାକଂ କୁସୁମିତଵନଵାଟୀଷୁ ।
ଭଗଵତି ତଵ ଵିଶ୍ରାନ୍ତେଃ ସ ଜଯତି ସମଯଃ କୋଽପି ॥ ୩୩୯॥
ଅମରତରୁଵରଚ୍ଛାଯାସ୍ଵଯି ମୁହୁରୁପଵିଶ୍ଯ ତ୍ଵମ୍ ।
ଶଚି କୃତିଜନରକ୍ଷାଯୈ ମନସି ଵିତନୁଷୁ ଚର୍ଚାମ୍ ॥ ୩୪୦॥
କିମୁ ଵସୁ ଵିତରାଣ୍ଯସ୍ମୈ ସୁମତିମୁତ ଦଦାନ୍ଯସ୍ମୈ ।
କ୍ଷମତମମଥଵାଽମୁଷ୍ମିନ୍ ବଲମୁରୁଘଟଯାନୀତି ॥ ୩୪୧॥
ହରିତରୁଣି କଦା ଵାମେ ଵିନମଦଵନଚର୍ଚାସୁ ।
ସ୍ମରଣସମଯ ଆଯାସ୍ଯତ୍ଯମଲହୃଦଯରଙ୍ଗେ ତେ ॥ ୩୪୨॥
ଶଚି ଭଗଵତି ସାକ୍ଷାତ୍ତେ ଚରଣକମଲଦାସୋଽହମ୍ ।
ଇହ ତୁ ଵସୁମତୀଲୋକେ ସ୍ମର ମମ ଵିଷଯଂ ପୂର୍ଵମ୍ ॥ ୩୪୩॥
ନ ଯଦି ତଵ ମନୋ ଦାତୁଂ ସ୍ଵଯମଯି ଲଘଵେ ମହ୍ଯମ୍ ।
ଉପଵନତରୁକର୍ଣେ ଵା ଵଦ ମଦଭିମତଂ କର୍ତୁମ୍ ॥ ୩୪୪॥
ନିଜଵିଷଯମତିଶ୍ରେଷ୍ଠଂ ଵିପଦି ନିପତିତଂ ତ୍ରାତୁମ୍ ।
ସ୍ଵକୁଲମପି ସଦଧ୍ଵାନଂ ଗମଯିତୁମପଥେ ଶ୍ରାନ୍ତମ୍ ॥ ୩୪୫॥
ଅଖିଲଭୁଵନସମ୍ରାଜଃ ପ୍ରିଯତରୁଣି ଭଵତ୍ଯୈଵ ।
ମତିବଲପରିପୂର୍ଣୋଏଽଯଂ ଗଣପତିମୁନିରାଧେଯଃ ॥ ୩୪୬॥
ନ କିମୁ ଭଵତି ଶଂ ଦେଶେ ଗତଵତି କଲୁଷେ କାଲେ ।
ତଵ ଭଜନମଘଂ ସଦ୍ଯୋ ହରିହଯଲଲନେ ଜେତୁମ୍ ॥ ୩୪୭॥
ତ୍ରିଜଗତି ସକଲଂ ଯସ୍ଯ ପ୍ରଭଵତି ପୃଥୁଲେ ହସ୍ତେ ।
ସ ବହୁଲମହିମା କାଲୋ ମମ ଜନନି ଵିଭୂତିସ୍ତେ ॥ ୩୪୮॥
ଅନଵରତଗଲଦ୍ବାଷ୍ପାଂ ଭରତଵସୁମତୀଂ ତ୍ରାତୁମ୍ ।
ଵିତରତୁ ଦଯିତାଜିଷ୍ଣୋର୍ଗଣପତିମୁନଯେ ଶକ୍ତିମ୍ ॥ ୩୪୯॥
ଭୁଜଗଶିଶୁଭୃତା ଏତାଃ କଵିଗଣପତିନା ଗୀତାଃ ।
ଵିଦଧତୁ ମୁଦିତାଂ ଦେଵୀଂ ଵିବୁଧପତିମନୋନାଥାମ୍ ॥ ୩୫୦॥
॥ ତୃତୀଯୋ ମଣିମଧ୍ଯାପାଦଃ ॥
ମଙ୍ଗଲଧାଯୀ ପୁଣ୍ଯଵତାଂ ମନ୍ମଥଧାଯୀ ଦେଵପତେଃ ।
ଵିଷ୍ଟପରାଜ୍ଞୀହାସଲଵୋ ଵିକ୍ରମଧାଯୀ ମେ ଭଵତୁ ॥ ୩୫୧॥
ଦୃଷ୍ଟିଵିଶେଷୈଶ୍ଶୀତତରୈର୍ଭୂର୍ଯନୁକମ୍ପୈଃ ପୁଣ୍ଯତମୈଃ ।
ଭାରତଭୂମେସ୍ତାପତତିଂ ଵାସଵକାନ୍ତା ସା ହରତୁ ॥ ୩୫୨॥
ପାଵନଦୃଷ୍ଟିର୍ଯୋଗିହିତା ଭାସୁରଦୃଷ୍ଟିର୍ଦେଵହିତା ।
ଶୀତଲଦୃଷ୍ଟିର୍ଭକ୍ଥିତା ମୋହନଦୃଷ୍ଟିଶ୍ଶକ୍ରହିତା ॥ ୩୫୩॥
ଉଜ୍ଜ୍ଵଲଵାଣୀ ଵିକ୍ରମଦା ଵତ୍ସଲଵାଣୀ ସାନ୍ତ୍ଵନଦା ।
ମଞ୍ଜୁଲଵାଣୀ ସମ୍ମଦଦା ପନ୍ନଗଵେଣୀ ସା ଜଯତି ॥ ୩୫୪॥
ଶାରଦରାକାଚନ୍ଦ୍ରମୁଖୀ ତୋଯଦମାଲାକାରକଚା ।
ମେଚକପାଥୋଜାତଦଲଶ୍ରୀହରଚକ୍ଷୁର୍ଵାସିକୃପା ॥ ୩୫୫॥
ଚମ୍ପକନାସାଗଣ୍ଡଵିଭାମଣ୍ଡଲଖେଲତ୍କୁଣ୍ଡଲଭା ।
ଉକ୍ତିଷୁ ଵୀଣାବିମ୍ବଫଲଶ୍ରୀହରଦନ୍ତପ୍ରାଵରଣା ॥ ୩୫୬॥
ନିର୍ମଲହାସକ୍ଷାଲିତଦିଗ୍ଭିତ୍ତିସମୂହା ମୋହହରୀ ।
କାଞ୍ଚନମାଲାଶୋଭିଗଲା ସନ୍ତତଲୀଲା ବୁଦ୍ଧିକଲା ॥ ୩୫୭॥
ଵିଷ୍ଟପଧାରି କ୍ଷୀରଧରସ୍ଵର୍ଣଘଟଶ୍ରୀହାରିକୁଚା ।
କାପି ବିଡୌଜୋ ରାଜ୍ଯରମା ଚେତସି ମାତା ଭାତୁ ମମ ॥ ୩୫୮॥
ଦିଵ୍ଯସୁଧୋର୍ମିର୍ଭକ୍ତିମତାଂ ପାଵକକୀଲା ପାପକୃତାମ୍ ।
ଵ୍ଯୋମ୍ନି ଚରନ୍ତୀ ଶକ୍ରସଖୀ ଶକ୍ତିରମୋଘା ମାମଵତୁ ॥ ୩୫୯॥
ସମ୍ମଦଯନ୍ତୀ ସର୍ଵତନୁଂ ସଂଶମଯନ୍ତୀ ପାପତତିମ୍ ।
ସମ୍ପ୍ରଥଯନ୍ତୀ ସର୍ଵମତୀସ୍ସଙ୍ଘଟଯନ୍ତୀ ପ୍ରାଣବଲମ୍ ॥ ୩୬୦॥
ନିର୍ଜିତଶୋକାଧୂତତମାସ୍ସଂସ୍କୃତଚିତ୍ତା ଶୁଦ୍ଧତମା ।
ଵାସଵଶକ୍ତେର୍ଵ୍ଯୋମଜୁଷଃ କାଚନ ଵୀଚିର୍ମାଂ ଵିଶତୁ ॥ ୩୬୧॥
ଉଦ୍ଗତକୀଲଂ ମୂଲମିଦଂ ଭିନ୍ନକପାଲଂ ଶୀର୍ଷମିଦମ୍ ।
ଉଜ୍ଝିତ ମୋହଂ ଚିତ୍ତମିଦଂ ଵାସଵଶକ୍ତିର୍ମାଂ ଵିଶତୁ ॥ ୩୬୨॥
ଦୃଶ୍ଯଵିରକ୍ତଂ ଚକ୍ଷୁରିଦଂ ଭୋଗଵିରକ୍ତଂ କାଯମିଦମ୍ ।
ଧ୍ଯେଯଵିରକ୍ତା ବୁଦ୍ଧିରିଯଂ ଵାସଵଶକ୍ତିର୍ମାଂ ଵିଶତୁ ॥ ୩୬୩॥
ଚକ୍ଷୁରଦୃଶ୍ଯଜ୍ଵାଲଭୃତା ଵ୍ଯାପକଖେନ ପ୍ରୋଲ୍ଲସତା ।
ଵିସ୍ମୃତକାଯଂ ସନ୍ଦଧତୀ ଵାସଵଶକ୍ତିର୍ମାଂ ଵିଶତୁ ॥ ୩୬୪॥
କାଯମଜସ୍ରଂ ଵଜ୍ରଦୃଢଂ ବୁଦ୍ଧିମଶେଷେ ଵ୍ଯାପ୍ତିମତୀମ୍ ।
ଦିଵ୍ଯତରଙ୍ଗୈରାଦଧତୀ ଵାସଵଶକ୍ତିର୍ମାଂ ଵିଶତୁ ॥ ୩୬୫॥
ମୂର୍ଧ୍ନି ପତନ୍ତୀ ଵ୍ଯୋମତଲାତ୍ସନ୍ତତମନ୍ତଃ ସର୍ଵତନୌ ।
ସମ୍ପ୍ରଵହନ୍ତୀ ଦିଵ୍ଯଝରୈର୍ଵାସଵଶକ୍ତିର୍ମାଂ ଵିଶତୁ ॥ ୩୬୬॥
ଭାନୁଵିଭାଯାଂ ଭାସକତା ଦିଵ୍ଯସୁଧାଯାଂ ମୋଦକତା ।
କାଽପି ସୁରାଯାଂ ମାଦକତା ଵାସଵଶକ୍ତ୍ଯାଂ ତତ୍ତ୍ରିତଯମ୍ ॥ ୩୬୭॥
ଭାସଯତାନ୍ମେ ସମ୍ଯଗୃତଂ ମୋଦମୁଦାରଂ ପୁଷ୍ଯତୁ ମେ ।
ସାଧୁମଦଂ ମେ ଵର୍ଧଯତାନ୍ନିର୍ଜରଭର୍ତୁଃ ଶକ୍ତିରଜା ॥ ୩୬୮॥
କଶ୍ଚନ ଶକ୍ତିଂ ଯୋଗବଲାଦାତ୍ମଶରୀରେ ଵର୍ଧଯତି ।
ଏଷି ଵିଵୃଦ୍ଧିଂ ଭକ୍ତିମତଃ କସ୍ଯଚିଦେଶେ ତ୍ଵଂ ଵପୁଷି ॥ ୩୬୯॥
ସାଧଯତାଂ ଵା ଯୋଗଵିଦାଂ କୀର୍ତଯତାଂ ଵା ଭକ୍ତିମତାମ୍ ।
ଵତ୍ସଲଭାଵାଦିନ୍ଦ୍ରଵଧୂର୍ଗର୍ଭଭୁଵାଂ ଵା ଯାତି ଵଶମ୍ ॥ ୩୭୦॥
ଯସ୍ଯ ସମାଧିଃ କୋଽପି ଭଵେଦାତ୍ମମନୀଷା ତସ୍ଯ ବଲମ୍ ।
ଯସ୍ତଵ ପାଦାମ୍ଭୋଜରତସ୍ତସ୍ଯ ଖଲୁ ତ୍ଵଂ ଦେଵି ବଲମ୍ ॥ ୩୭୧॥
ଦ୍ଵାଦଶଵର୍ଷୀ ଯୋଗବଲାଦ୍ଯା ଖଲୁ ଶକ୍ତିର୍ଯୁକ୍ତମତେଃ ।
ତାଂ ଶଚି ଦାତୁଂ ଭକ୍ତିମତେ କାପି ଘଟୀ ତେ ମାତରଲମ୍ ॥ ୩୭୨॥
ଯୋଗବଲାଦ୍ଵା ଧ୍ଯାନକୃତୋ ଭକ୍ତିବଲାଦ୍ଵା କୀର୍ତଯତଃ ।
ଯାତୁ ଵିଵୃଦ୍ଧିଂ ଵିଶ୍ଵହିତା ଵାସଵଶକ୍ତିର୍ମେ ଵପୁଷି ॥ ୩୭୩॥
ଦୁଃଖିତମେତଚ୍ଛ୍ରୀରହିତଂ ଭାରତଖଣ୍ଡଂ ସର୍ଵହିତମ୍ ।
ତ୍ରାତୁମଧୀଶା ସ୍ଵର୍ଜଗତଃ ସୁକ୍ଷମବୁଦ୍ଧିଂ ମାଂ କୁରୁତାମ୍ ॥ ୩୭୪॥
ସନ୍ତୁ କଵୀନାଂ ଭର୍ତୁରିମେ ସୁନ୍ଦରବନ୍ଧାଶୁଦ୍ଧତମାଃ ।
ସନ୍ମଣିମଧ୍ଯାଃ ସ୍ଵର୍ଜଗତୋ ରାଜମହିଷ୍ଯାଃ କର୍ଣସୁଖାଃ ॥ ୩୭୫॥
॥ ଚତୁର୍ଥୋ ମାତ୍ରସମକପାଦଃ ॥
ଶୁକ୍ଲ୍ଜ୍ଯୋତିଃ ପ୍ରକରୈର୍ଵ୍ଯାପ୍ତଃ ସୂକ୍ଷ୍ମୋଽପ୍ଯନ୍ତାନ୍ ହରିତାଂ ହାସଃ ।
ଜିଷ୍ଣୋଃ ପତ୍ନ୍ଯାସ୍ତିମିରାରାତିର୍ନିଶ୍ଶେଷଂ ମେ ହରତାନ୍ମୋହମ୍ ॥ ୩୭୬॥
ଶୃଣ୍ଵତ୍କର୍ଣା ସଦଯାଲୋକା ଲୋକେନ୍ଦ୍ରସ୍ଯ ପ୍ରିଯନାରୀ ସା ।
ନିତ୍ଯାକ୍ରୋଶୈର୍ଵିରୁଦଦ୍ଵାଣୀଂ ପାଯାଦେତାଂ ଭରତକ୍ଷୋଣୀମ୍ ॥ ୩୭୭॥
ଦେଵେଷୁ ସ୍ଵଃ ପରିଦୀପ୍ଯନ୍ତୀ ଭୂତେଷ୍ଵିନ୍ଦୌ ପରିଖେଲନ୍ତୀ ।
ଶକ୍ତିର୍ଜିଷ୍ଣୋର୍ଦ୍ଵପଦାଂ ସଙ୍ଘେ ହନ୍ତୈତସ୍ଯାଂ ଭୁଵି ନିଦ୍ରାତି ॥ ୩୭୮॥
ନିଦ୍ରାଣାଯା ଅପି ତେ ଜ୍ଯୋତିର୍ଗନ୍ଧାଦେତେ ଧରଣୀଲୋକେ ।
ମର୍ତ୍ଯାଃ କିଞ୍ଚତ୍ପ୍ରଭଵନ୍ତୀଶେ ତ୍ଵଂ ବୁଦ୍ଧା ଚେତ୍କିମୁ ଵକ୍ତ୍ଵ୍ଯମ୍ ॥ ୩୭୯॥
ମେଘଚ୍ଛନ୍ନୋଽପ୍ଯରୁଣସ୍ତେଜୋ ଦଦ୍ଯାଦେଵ ପ୍ରମଦେ ଜିଷ୍ଣୋଃ ।
ଅତ୍ରସ୍ଥାନାଂ ଭଵତୀଗ୍ରନ୍ଥିଚ୍ଛନ୍ନାପ୍ଯେଵଂ କୁରୁତେ ପ୍ରଜ୍ଞାମ୍ ॥ ୩୮୦॥
ଧ୍ଯାଯାମୋ ଯତ୍କଥଯାମୋ ଯତ୍ପଶ୍ଯାମୋ ଯଚ୍ଛୃଣୁମୋ ଯଚ୍ଚ ।
ଜୀଵାମୋ ଵା ତଦିଦଂ ସର୍ଵଂ ନିଦ୍ରାଣାଯା ଅପି ତେ ଭାସା ॥ ୩୮୧॥
ନାଡୀବନ୍ଧାଦଭିମାନାଚ୍ଚ ଚ୍ଛନ୍ନା ମାତର୍ଭଵତୀ ଦେହେ ।
ଏକାପାଯାଦିତରୋ ନଶ୍ଯେତ୍ତସ୍ମାଦ୍ଦ୍ଵେଧା ତପସଃ ପନ୍ଥାଃ ॥ ୩୮୨॥
ଚିତ୍ତଂ ଯସ୍ଯ ସ୍ଵଜନିସ୍ଥାନେ ପ୍ରଜ୍ଞା ବାହ୍ଯା ନ ଭଵେଦ୍ଯସ୍ଯ ।
ଆଧତ୍ସେ ତ୍ଵଂ ଭୁଵନାଧୀଶେ ବୁଦ୍ଧା କ୍ରୀଡାଂ ହୃଦଯେ ତସ୍ଯ ॥ ୩୮୩॥
ଵାଣୀ ଯସ୍ଯ ସ୍ଵଜନିସ୍ଥାନେ ଦୂରେ କୃତ୍ଵା ମନସା ସଙ୍ଗମ୍ ।
ମାତସ୍ତତ୍ର ପ୍ରତିବୁଦ୍ଧା ତ୍ଵଂ ଶ୍ଲୋକୈର୍ଲୋକଂ କୁରୁଷେ ବୁଦ୍ଧମ୍ ॥ ୩୮୪॥
ହିତ୍ଵା ଦୃଶ୍ଯାନ୍ଯତିସୂକ୍ଷ୍ମାଯାଂ ଚକ୍ଷୁର୍ଯସ୍ଯ ସ୍ଵମହୋ ଵୃତ୍ତୌ ।
ଵିଶ୍ଵାଽଲିପ୍ତା ଜଗତାଂ ମାତର୍ଜାଗ୍ରତ୍ଯସ୍ମିନ୍ନଚଲା ଭାସି ॥ ୩୮୫॥
ଶୃଣ୍ଵନ୍ କର୍ଣୋ ଦଯିତେ ଜିଷ୍ଣୋରନ୍ତଃ ଶବ୍ଦଂ ଧ୍ରିଯତେ ଯସ୍ଯ ।
ବୁଦ୍ଧା ଭୂତ୍ଵା ଵିଯତା ସାଧୋରେକୀଭାଵଂ କୁରୁଷେ ତସ୍ଯ ॥ ୩୮୬॥
ଯାତାଯାତଂ ସତତଂ ପଶ୍ଯେଦ୍ଯଃ ପ୍ରାଣସ୍ଯ ପ୍ରଯତୋ ମର୍ତ୍ଯଃ ।
ଵିଶ୍ଵସ୍ଯେଷ୍ଟାଂ ତନୁଷେ କ୍ରୀଡାଂ ତସ୍ମିନ୍ ବୁଦ୍ଧା ତରୁଣୀନ୍ଦ୍ରସ୍ଯ ॥ ୩୮୭॥
ସ୍ଵାନ୍ତଂ ଯସ୍ଯ ପ୍ରଭଵେତ୍କାର୍ଯେଷ୍ଵମ୍ବୈତସ୍ମିନ୍ନଯି ନିଦ୍ରାସି ।
ଆତ୍ମା ଯସ୍ଯ ପ୍ରଭଵେତ୍କାର୍ଯେଷ୍ଵମ୍ବୈତସ୍ମିନ୍ନଯି ଜାଗର୍ଷି ॥ ୩୮୮॥
ଯସ୍ଯାଽହନ୍ତା ଭଵତି ସ୍ଵାନ୍ତେ ତସ୍ଯ ସ୍ଵାନ୍ତଂ ପ୍ରଭଵେତ୍କର୍ତୁମ୍ ।
ଯସ୍ଯାଽହନ୍ତା ଭଵତି ସ୍ଵାତ୍ମନ୍ଯାତ୍ମା ତସ୍ଯ ପ୍ରଭଵେତ୍କର୍ତୁମ୍ ॥ ୩୮୯॥
ସ୍ଵାନ୍ତଂ ଯସ୍ଯ ପ୍ରଭଵେତ୍କର୍ତୁଂ ତତ୍କର୍ମାଲ୍ପଂ ଭଵତି ଵ୍ଯଷ୍ଟେଃ ।
ଆତ୍ମା ଯସ୍ଯ ପ୍ରଭଵେତ୍କର୍ତୁଂ ତଚ୍ଛ୍ଲାଧ୍ଯଂ ତେ ବଲଜିତ୍କାନ୍ତେ ॥ ୩୯୦॥
ଏତତ୍ସ୍ଵାନ୍ତଂ ହୃଦଯାଜ୍ଜାତଂ ଶୀର୍ଷେ ଵାସଂ ପୃଥଗାଧାଯ ।
ହାର୍ଦାହନ୍ତାଂ ସ୍ଵଯମାକ୍ରମ୍ଯ ଭ୍ରାନ୍ତାନସ୍ମାନ୍ କୁରୁତେ ମାତଃ ॥ ୩୯୧॥
ଅସ୍ମାକଂ ଭୋଃ କୁରୁତେ ବାଧାମସ୍ମଜ୍ଯୋତିର୍ଜନନି ପ୍ରାପ୍ଯ ।
ସ୍ଵାନ୍ତେ ନୈତତ୍କୃତମନ୍ଯାଯ୍ଯଂ କାନ୍ତେ ଜିଷ୍ଣୋଃ ଶୃଣୁ ରାଜ୍ଞି ତ୍ଵମ୍ ॥ ୩୯୨॥
ସ୍ଵାନ୍ତେ ତେଜୋ ହୃଦଯାଦାଯାଚ୍ଚନ୍ଦ୍ରେ ତେଜୋ ଦିନଭର୍ତୁର୍ଵା ।
ଆଶ୍ରାନ୍ତଂ ଯୋ ମନୁତେ ଧୀରସ୍ତସ୍ଯ ସ୍ଵାନ୍ତଂ ହୃଦି ଲୀନଂ ସ୍ଯାତ୍ ॥ ୩୯୩॥
ମୂଲାନ୍ଵେଷିସ୍ଫୁରଦାଵୃତ୍ତଂ ନୀଚୈରାଯାତ୍କବଲୀକୃତ୍ଯ ।
ଜାନନ୍ତ୍ଯେକା ହୃଦଯସ୍ଥାନେ ଯୁଞ୍ଜାନାନାଂ ଜ୍ଵଲସୀଶାନେ ॥ ୩୯୪॥
ଶୀର୍ଷେ ଚନ୍ଦ୍ରୋ ହୃଦଯେ ଭାନୁର୍ନେତ୍ରୋ ଵିଦ୍ଯୁତ୍କୁଲକୁଣ୍ଡେଽଗ୍ନିଃ ।
ସମ୍ପଦ୍ଯନ୍ତେ ମହସାଽଶୈସ୍ତେ ଜିଷ୍ଣୋଃ କାନ୍ତେ ସୁତରାଂ ଶସ୍ତେ ॥ ୩୯୫॥
ମନ୍ଵାନାଂ ତ୍ଵାଂ ଶିରସି ସ୍ଥାନେ ପଶ୍ଯନ୍ତୀଂ ଵା ନଯନସ୍ଥାନେ ।
ଚେତନ୍ତୀଂ ଵା ହୃଦଯସ୍ଥାନେ ରାଜନ୍ତୀଂ ଵା ଜ୍ଵଲନସ୍ଥାନେ ॥ ୩୯୬॥
ଯୋ ନା ଧ୍ଯାଯେଜ୍ଜଗତାଂ ମାତଃ କଶ୍ଚିଚ୍ଛ୍ରେଯାନଵନୌ ନାଽତଃ ।
ପୂତଂ ଵନ୍ଦ୍ଯଂ ଚରଣଂ ତସ୍ଯ ଶ୍ରେଷ୍ଠଂ ଵର୍ଣ୍ଯଂ ଚରିତଂ ତସ୍ଯ ॥ ୩୯୭॥
ଦୋଗ୍ଧ୍ରୀଂ ମାଯାଂ ରସନାଂ ଵା ଯୋ ମନ୍ତ୍ରଂ ମାତର୍ଜପତି ପ୍ରାଜ୍ଞଃ ।
ସୋଽଯଂ ପାତ୍ରଂ କରୁଣାଯାସ୍ତେ ସର୍ଵଂ କାମ୍ଯଂ ଲଭତେ ହସ୍ତେ ॥ ୩୯୮॥
ଛିନ୍ନାଂ ଭିନ୍ନାଂ ସୁତରାଂ ସନ୍ନାମନ୍ନାଭାଵାଦଭିତଃ ଖିନ୍ନାମ୍ ।
ଏତାଂ ପାତୁଂ ଭରତକ୍ଷୋଣୀଂ ଜାଯେ ଜିଷ୍ଣୋଃ କୁରୁ ମାଂ ଶକ୍ତମ୍ ॥ ୩୯୯॥
କ୍ଲୃପ୍ତୈଃ ସମ୍ଯଗ୍ବୃହତୀଛନ୍ଦସ୍ଯେତୈର୍ମାତ୍ରସମକୈର୍ଵୃତ୍ତୈଃ ।
କର୍ଣାଧ୍ଵାନଂ ପ୍ରଵିଶଦ୍ଭିସ୍ସା ପୌଲୋମ୍ଯମ୍ବାପରିତୃପ୍ତାସ୍ତୁ ॥ ୪୦୦॥
॥ ଚତୁର୍ଥଂ ବାର୍ହତଂ ଶତକଂ ସମାପ୍ତମ୍ ॥
॥ ଅଥ ପଞ୍ଚମଂ ପାଙ୍କ୍ତଂ ଶତକମ୍ ॥
॥ ପ୍ରଥମୋ ମଯୂରସାରିଣୀପାଦଃ ॥
ପ୍ରେମଵାସଭୂମିରଚ୍ଛଭାଵସ୍ଥାନମାନମଜ୍ଜନାଘହା ମେ ।
ଇନ୍ଦ୍ରସୁନ୍ଦରୀ ମୁଖାବ୍ଜଭାସୀ ମନ୍ଦହାସ ଆପଦଂ ଧୁନୋତୁ ॥ ୪୦୧॥
ଵୀକ୍ଷିତୈଃ କୃପାନ୍ଵିତୈର୍ହରନ୍ତୀ ପାତକାନି ମଙ୍ଗଲଂ ଭଣନ୍ତୀ ।
ଜମ୍ଭଭେଦିଜୀଵିତେଶ୍ଵରୀ ମେ ଜନ୍ମଦେଶମୁଜ୍ଜ୍ଵଲଂ କରୋତୁ ॥ ୪୦୨॥
ଅମ୍ବରଂ ଚ ଦେଵତାନତଭ୍ରୂରମ୍ବ ତେ ତନୁଦ୍ଵଯଂ ଯଦୁକ୍ତମ୍ ।
ଆଦିମା ତଯୋର୍ଵୃଷାକପିଂ ତଂ ଦେଵ୍ଯଜୀଜନତ୍ପରା ଜଯନ୍ତମ୍ ॥ ୪୦୩॥
ଏତମେଵ ଦେଵି ଲୋକବନ୍ଧୁଂ ସୂରଯୋ ଵୃଷାକପିଂ ଭଣନ୍ତି ।
ଵର୍ଷହେତୁଦୀଧିତିର୍ଵୃଷାଯଂ କଂ ପିବନ୍ କରୈଃ କପିର୍ନିରୁକ୍ତ୍ଃ ॥ ୪୦୪॥
କେଚିଦିନ୍ଦ୍ରନାରି ଚନ୍ଦ୍ରରେଖାଶେଖରଂ ଵୃଷାକପିଂ ଗଦନ୍ତି ।
ପଣ୍ଡିତାଃ ପରେ ତୁ ଶେଷଶଯ୍ଯାଶାଯିନଂ ଵୃଷାକପିଂ ତମାହୁଃ ॥ ୪୦୫॥
ବ୍ରହ୍ମଣସ୍ପତିଂ ତୁ ଵୈଦ୍ଯୁତାଗ୍ନେରଂଶଜଂ ମରୁଦ୍ଗଣେଷୁ ମୁଖ୍ଯମ୍ ।
ଵିଶ୍ଵରାଜ୍ଞି ଵିଘ୍ନରାଜମେକେ ଵିଶ୍ରୁତଂ ଵୃଷାକପିଂ ଵଦନ୍ତି ॥ ୪୦୬॥
ଭାସ୍କରଶ୍ଚ ଶଙ୍କ୍ରଶ୍ଚ ମାତର୍ମାଧଵଶ୍ଚ ମନ୍ତ୍ରନାଯକଶ୍ଚ ।
ଆତ୍ମଜେଷୁ ତେ ନ ସନ୍ତି ନାନ୍ତର୍ଵ୍ଯାପକାନ୍ତରିକ୍ଷଵିଗ୍ରହାଯାଃ ॥ ୪୦୭॥
ଵାସଵୋଽପି ଦେଵି ଦେଵତାତ୍ମା ଵଲ୍ଲଭସ୍ତଵ ଚ୍ଛଲାଙ୍ଗନାଯାଃ ।
ଆତ୍ମଜାତ ଏଵ କୀର୍ତନୀଯୋ ଦେଵତାପଥେନ ଦେହଵତ୍ଯାଃ ॥ ୪୦୮॥
ସାଶଵସ୍ଯୁଦୀରିତାସି ଧୀରୈର୍ଦେହିନୀ ଵିହାଯସେନ୍ଦ୍ରସୂସ୍ତ୍ଵମ୍ ।
ଲିଙ୍ଗଭେଦତୋଽନୁରୂପତସ୍ତତ୍କୀର୍ତନଂ ଶଵୋ ହି ଶକ୍ତିଵାଚି ॥ ୪୦୯॥
ନାଦିତିର୍ଵିଭିଦ୍ଯତେ ଶଵସ୍ଯାସ୍ସର୍ଵଦେଵ ମାତରଂ ଵିଦୁର୍ଯାମ୍ ।
ସା ମରୁତ୍ପ୍ରସୂରଭାଣି ପୃଶ୍ନିଃ ସାପି ଭିଦ୍ଯତେ ତତୋ ନ ଦେଵ୍ଯାଃ ॥ ୪୧୦॥
ଶକ୍ତିରେଵ ସା ନ୍ଯଗାଦି ପୃଶ୍ନିଶ୍ଶକ୍ତିରେଵ ସାଽଦିତିର୍ନ୍ଯଭାଣି ।
ଶକ୍ତିରେଵ ସାଽଭ୍ଯଧାଯି ଭଦ୍ରା ଶକ୍ତିରେଵ ସା ଶଵସ୍ଯଵାଦି ॥ ୪୧୧॥
ଵିଜ୍ଜନଃ ପ୍ରକୃଷ୍ଟଶକ୍ତିଭାଗଂ ଶବ୍ଦମେଵ ପୃଶ୍ନିମାହ ଧେନୁମ୍ ।
ଯା ପରୈର୍ବୁଧୈରଭାଣି ଗୌରୀ ମାନଵେଷ୍ଟଭାଷଯୈଵ ନାରୀ ॥ ୪୧୨॥
ଵ୍ଯାପକତ୍ଵକଲ୍ପିତଂ ଵିଶାଲଂ ଦେଶମେଵ ଶକ୍ତିଭାଗମାହୁଃ ।
ବୁଦ୍ଧିଶାଲିନୋଽଦିତିଂ ସଵିତ୍ରୀଂ ଯା ପରୈର୍ଵିଚକ୍ଷଣୈଃ ସ୍ମୃତା ଦ୍ଯୌଃ ॥ ୪୧୩॥
ନିତ୍ଯମୋଦରୂପଶକ୍ତିଭାଗଂ ପଣ୍ଡିତାଃ ପ୍ରକୀର୍ତଯନ୍ତି ଭଦ୍ରାମ୍ ।
ଉକ୍ତିଭେଦଚାତୁରୀପ୍ରଲୁବ୍ଧାଃ ସୂରଯଃ ପରେ ଶିଵାଂ ଜୁଗୁର୍ଯାମ୍ ॥ ୪୧୪॥
ଵୀର୍ଯରୂପଭାଗ ଏଵ ଗଣ୍ଯଃ ପଣ୍ଡିତୈଃ ଶଵସ୍ଯଭାଣି ଶକ୍ତେଃ ।
ଓଜସୋ ନ ସୋଽତିରିଚ୍ଯ ତେଂଶୋ ଭିଦ୍ଯତେ ତତୋ ନ ଵଜ୍ରମୁଗ୍ରମ୍ ॥ ୪୧୫॥
ଵଜ୍ରମେଵ ଭାଷଯା ପରେଷାମୁଚ୍ଯତେ ପ୍ରଚଣ୍ଡଚଣ୍ଡିକେତି ।
ଯଦ୍ଵିଭୂତିଲେଶଚୁମ୍ବିତାତ୍ମା ଜୀଯତେ ନ କେନଚିତ୍ପୃଥିଵ୍ଯାମ୍ ॥ ୪୧୬॥
ସର୍ଵତୋ ଗତିଶ୍ଶଚୀତି ଶକ୍ତିଃ କୀର୍ତ୍ଯତେ ବୁଧୈରୁଦାରକୀର୍ତିଃ ।
ସର୍ଵଭାଗଵାଚକଂ ପଦଂ ତତ୍ ପାଵନଂ ପୁରାତନଂ ପ୍ରିଯଂ ନଃ ॥ ୪୧୭॥
ଯଶ୍ଶଚୀତି ନାମକୀର୍ତଯେନ୍ନା ପୁଷ୍କରେଣ ତେ ଶରୀରଵତ୍ଯାଃ ।
ଦିଵ୍ଯସୁନ୍ଦରୀ ତନୋରୁତାହୋ ତଂ ପରାଭଵେନ୍ନ ଦେଵି ପାପମ୍ ॥ ୪୧୮॥
ଅମ୍ବରଂ ଵରଂ ତଵାମ୍ବ କାଯଂ ଯସ୍ସଦା ଵିଲୋକଯନ୍ନୌପାସ୍ତେ ।
ଲୋକଜାଲଚକ୍ରଵର୍ତିଜାଯେ ତଂ ପରାଭଵେନ୍ନ ଦେଵି ପାପମ୍ ॥ ୪୧୯॥
ପୂର୍ଣିମାସୁଧାଂଶୁବିମ୍ବଵକ୍ତ୍ରଂ ଫୁର୍ଵିଂଆରିଜାତପତ୍ରନେତ୍ରମ୍ ।
ଶୁଭ୍ରତାନିଧାନମନ୍ଦହାସଂ କାଲମେଘକଲ୍ପକେଶପାଶମ୍ ॥ ୪୨୦॥
ରତ୍ନ୍ଦର୍ପଣାଭମଞ୍ଜୁଗଣ୍ଡଂ ଚମ୍ପକପ୍ରସୂନଚାରୁନାସମ୍ ।
କୁନ୍ଦକୁଡ୍ମଲାଭକାନ୍ତଦନ୍ତଂ କଲ୍ପପର୍ଵିଂଆଭଦନ୍ତଚେଲମ୍ ॥ ୪୨୧॥
ସଦ୍ଵରାଭଯପ୍ରଦାଯିହସ୍ତଂ ସର୍ଵଦେଵଵନ୍ଦ୍ଯପାଦକଞ୍ଜମ୍ ।
ଦିଵ୍ଯରତ୍ନଭୂଷଣୈରନର୍ଘୈର୍ଭୂଷିତଂ କନତ୍ସୁଵର୍ଣଵର୍ଣମ୍ ॥ ୪୨୨॥
ଦିଵ୍ଯଶୁକ୍ଲ୍ଵସ୍ତ୍ରଯୁଗ୍ମଧାରି ସ୍ଵର୍ଗସାର୍ଵଭୋମନେତ୍ରହାରି ।
ଯଃ ସ୍ମରେଦ୍ଵରାଙ୍ଗନାଵପୁସ୍ତେ ତଂ ପରାଭଵେନ୍ନ ଦେଵି ପାପମ୍ ॥ ୪୨୩॥
ଭାରତକ୍ଷିତେରିଦଂ ଜନନ୍ଯାଶ୍ଶୋକଜନ୍ଯବାଷ୍ପଵାରି ହର୍ତୁମ୍ ।
ଦେହି ଶକ୍ତିମାଶ୍ରିତାଯ ମହ୍ଯଂ ପାହି ଧର୍ମମିନ୍ଦ୍ରଚିତ୍ତନାଥେ ॥ ୪୨୪॥
ସଦ୍ଵସିଷ୍ଠସନ୍ତତେରିମାଭିସ୍ସତ୍କଵେର୍ମଯୂରସାରିଣୀଭିଃ ।
ସମ୍ମଦଂ ପ୍ରଯାତୁ ଶକ୍ରଚେତସ୍ସମ୍ପ୍ରମୋହିନୀସରୋଜନେତ୍ର ॥ ୪୨୫॥
॥ ଦ୍ଵିତୀଯୋ ମନୋରମାପାଦଃ ॥
ହସିତମାତତାଯିପାତକପ୍ରମଥନପ୍ରସିଦ୍ଧଵିକ୍ରମମ୍ ।
ଅମରଭୂମିପାଲଯୋଷିତୋ ମମ କରୋତୁ ଭୂରିମଙ୍ଗଲମ୍ ॥ ୪୨୬॥
କରୁଣଯା ପ୍ରଚୋଦିତା କ୍ରିଯାଦ୍ଭରତଭୂମିମକ୍ଷଯଶ୍ରିଯମ୍ ।
ଚରଣକଞ୍ଜରାଜଦିନ୍ଦିରା ସୁରନରେଶ୍ଵରସ୍ଯ ସୁନ୍ଦରୀ ॥ ୪୨୭॥
ନ ଭଵନଂ ନ ଵା ଜଗତ୍ପୃଥଙ୍ନିଵସନାଯ ତେ ସୁରାର୍ଚତେ ।
ଯଦଖିଲାନି ଵିଷ୍ଟପାନି ତେ ଵପୁଷି ସର୍ଵମନ୍ଦିରାଣି ଚ ॥ ୪୨୮॥
ମତିଦଵିଷ୍ଠସୀମଭାସୁରଂ ତଵ ଶରୀରମେଵ ପୁଷ୍କରମ୍ ।
ପରମପୂରୁଷସ୍ଯ ଵଲ୍ଲଭେ ଭୁଵନମେକମୁଚ୍ଯତେ ବୁଧୈଃ ॥ ୪୨୯॥
ତରଣଯସ୍ସୁଧାଂଶଵସ୍ତଥା ସହ ଭୁଵା ଗ୍ରହାଃ ସହସ୍ରଶଃ ।
ଅଯି ଜଗନ୍ତି ଵିସ୍ତୃତାନି ତେ ଵପୁଷି ପୁଷ୍କରେ ଜଗତ୍ଯଜେ ॥ ୪୩୦॥
ବହୁଭିରୁଷ୍ଣଭାନୁଭିକ୍ର୍ତତାତ୍ ବହୁଭିରିନ୍ଦୁଭିର୍ଵଶୀକୃତାତ୍ ।
ଵିଯତି ଲୋକଜାଲଧାତ୍ରି ତେ ଶତଗୁଣଂ ବଲଂ ପ୍ରଶିଶ୍ଯତେ ॥ ୪୩୧॥
ନ ଵିଭୁରେକକସ୍ଯ ଭାସ୍ଵତୋ ଵିଭଵମେଵ ନା ପ୍ରଭାଷିତୁମ୍ ।
କିମୁତ ତେ ଦଧାସି ଯୋଦରେ ଦ୍ଯୁତିମତାଂ ଶତାନି ତାଦୃଶାମ୍ ॥ ୪୩୨॥
ଇହ ଵିହାଯସା ଶରୀରିଣୀମତିସମୀପଵାସିନୀମପି ।
ନ ଖଲୁ କୋଽପି ଲୋକିତୁଂ ପ୍ରଭୁର୍ଭଗଵତୀଂ ପରାମଯୁକ୍ତଧୀଃ ॥ ୪୩୩॥
ତଦିଦମୁଚ୍ଯତେ ଜନୋ ଜଗଦ୍ଵପୁରମେଯମାଦିଦେଵି ତେ ।
ଜନଯତେ ଯତୋଽଖିଲଂ ଦୃଶୋର୍ଵିଷଯଭୂତମେତଦାତତମ୍ ॥ ୪୩୪॥
ବହୁଲତାରକାଗଣୈର୍ଯୁତଂ କିମପି ଖଂ ତଵେହ ଵର୍ଷ୍ମଣି ।
ଶଚି ଵିଭଜ୍ଯ ଭାଷଯୈକଯା ସୁକଵଯୋ ମହୋଜଗଦ୍ଵିଦୁଃ ॥ ୪୩୫॥
ଇଦମିନେନ୍ଦୁଭୂଵିଲକ୍ଷଣୈର୍ଦିନକରୈସ୍ସୁଧାକରୈର୍ଗ୍ରହୈଃ ।
ବହୁଜଗଦ୍ଭିରନ୍ଵିତଂ ମହୋଜଗଦଶେଷଧାତ୍ରି ନୈକକମ୍ ॥ ୪୩୬॥
ଅଜରମଵ୍ଯଯଂ ସନାତନଂ ମୁନିଜନୈକଵେଦ୍ଯଵୈଭଵମ୍ ।
ନ ଭଵତୀଂ ଵିନା ତପୋଜଗତ୍ପୃଥଗଶେଷନାଥନାଯିକେ ॥ ୪୩୭॥
ସକଲଦୃଶ୍ଯମୂଲକାରଣଂ ତଵ ଚ ସଂଶ୍ରଯୋ ନିରାଶ୍ରଯଃ ।
ଜନନି ସତ୍ଯଲୋକ ସଂଜ୍ଞଯା ପରମପୂରୁଷୋଽଭିଧୀଯତେ ॥ ୪୩୮॥
ଅଯି ପୁରାତନର୍ଷିଭାଷଯା ଗଗନମେତଦାପ ଈରିତାଃ ।
ଅଥ ଯଦାସୁଵୀର୍ଯମୁଜ୍ଝିତଂ ଭଗଵତସ୍ତ୍ଵମେଵ ତତ୍ପରେ ॥ ୪୩୯॥
ଶଚି ଵିରାଡ୍ଭଵତ୍ଯଭାଷତ ଶ୍ରୁତିରପୀଦମେଵ ନାମ ତେ ।
ଵିତତଵିଶ୍ଵଵିଗ୍ରହାତ୍ମନି ପ୍ରଥିତମେତଦାହ୍ମଯଂ ପରମ୍ ॥ ୪୪୦॥
ଉପନିଷଦ୍ଗିରା ଵିରାଡ୍ଵଧୂଃ ପୁରୁଷ ଏଷ ଭାଷଯାନ୍ଯଯା ।
ଉଭଯଥାପି ସାଧୁ ତତ୍ପଦଂ ଭଵତି ତେ ନ ସଂଶଯାସ୍ପଦମ୍ ॥ ୪୪୧॥
ନ ଵନିତା ନ ଵା ପୁମାନ୍ ଭଵେଜ୍ଜଗତି ଯୋଽନ୍ତରଶ୍ଶରୀରିଣାମ୍ ।
ତନୁଷୁ ଲିଙ୍ଗଭେଦଦର୍ଶନାତ୍ ତନୁମତଶ୍ଚ ଲିଙ୍ଗମୁଚ୍ଯତେ ॥ ୪୪୨॥
ଅଖିଲନାଥଵୀର୍ଯଧାରଣାନ୍ନ୍ଗନଭୂମିରଙ୍ଗନାମତା ।
ସକଲଲୋକବୀଜଭୃତ୍ତ୍ଵତୋ ଗଗନଦେଶ ଏଷ ପୂରୁଷଃ ॥ ୪୪୩॥
ସ୍ଫୁଟଵିଭକ୍ତଗାତ୍ରଲକ୍ଷ୍ମଣାଂ ନିଯତଵାଦିନାମଦର୍ଶନାତ୍ ।
ନ ପୁରୁଷୋ ଵିଯଦ୍ଯଥା ଵଯଂ ନ ଵନିତା ଵିଯଦ୍ଯଥୈଵ ନଃ ॥ ୪୪୪॥
ଅଭିଵିମାନତୋଽଥ ଵା ଶଚୀ ଵିବୁଧରାଜଯୋର୍ଵିଲକ୍ଷଣାତ୍ ।
ଵରଵିଲସିନୀ ଵିଯତ୍ତନୁସ୍ସଦଵିକାରମୁତ୍ତମଃ ପୁମାନ୍ ॥ ୪୪୫॥
ହୃଦଯମଲ୍ପମପ୍ଯଦୋ ଜନନ୍ଯନଵମଂ ଵିଶାଲପୁଷ୍କରାତ୍ ।
ଵିମଲଦେହଦୁର୍ଗମଧ୍ଯଗଂ ସକଲରାଜ୍ଞି ସୌଧମସ୍ତୁ ତେ ॥ ୪୪୬॥
ଵିକସିତଂ ନିଜାଂଶୁଵୀଚିଭିକ୍ର୍ତଦଯମାଲଯଂ ଵିଶାମ୍ବ ମେ ।
ଵିକଚମୁଷ୍ଣଭାନୁଭାନୁଭିର୍ଦଶଶତଚ୍ଛଦଂ ଯଥା ରମା ॥ ୪୪୭॥
ହୃଦଯସାଧୁସୌଧଶାଯିନୀଂ ନଯନରମ୍ଯହର୍ମ୍ଯଚାରିଣୀମ୍ ।
ଭୁଵନରାଜଚିତ୍ତମୋହିନୀଂ ନମତ ତାଂ ପରାଂ ଵିଲାସିନୀମ୍ ॥ ୪୪୮॥
ତଵ ପରେ ମରୀଚିଵୀଚଯସ୍ତନୁଗୁହାଂ ପ୍ରଵିଶ୍ଯ ଵିଶ୍ରୁତେ ।
ଭରତଭୂମିରକ୍ଷଣୋଦ୍ଯତଂ ଗଣପତିଂ କ୍ରିଯାସୁରୁଜ୍ଜ୍ଵଲମ୍ ॥ ୪୪୯॥
ଗଣପତେର୍ମନୋରମା ଇମାସ୍ସୁଗୁଣଵେଦିନାଂ ମନୋରମାଃ ।
ଅଵହିତା ଶୃଣୋତୁ ସାଦରଂ ସୁରମହୀପତେର୍ମନୋରମାଃ ॥ ୪୫୦॥
॥ ତୃତୀଯୋ ମଣିରାଗପାଦଃ ॥
ଜ୍ଯୋତିଷାଂ ନୃପତିଃ ସକଲାନାଂ ଶାନ୍ତିମେଵ ସଦାଭିଦଧାନଃ ।
ନିର୍ମଲୋ ହରତାତ୍ସୁରରାଜ୍ଞୀମନ୍ଦହାସଲଵୋ ମମ ପାପମ୍ ॥ ୪୫୧॥
ଦୁଷ୍ଟଲୋକଦଵିଷ୍ଠପଦାବ୍ଜା ଶିଷ୍ଟଶୋକନିଵାରଣଦକ୍ଷା ।
ନାକଲୋକମହୀପତିରାମା ଭାରତସ୍ଯ ଧୁନୋତ୍ଵସୁଖାନି ॥ ୪୫୨॥
ଦେଵମୌଲିମଣୀକିରଣେଭ୍ଯୋ ଵିକ୍ରମଂ ସ୍ଵଯମେଵ ଦଦାନା ।
ଦେଵରାଜଵଧୂପଦପଦ୍ମଶ୍ରୀସ୍ତନୋତୁ ସଦା ମମ ଭଦ୍ରମ୍ ॥ ୪୫୩॥
ଦେଵି ତେ ଵଦନଂ ବହୁକାନ୍ତଂ ସାକ୍ଷି ତତ୍ର ପୁରନ୍ଦରଚେତଃ ।
ଅମ୍ବ ତେ ଚରଣାଵତିକାନ୍ତାଵତ୍ର ସାକ୍ଷି ମନଃ ସ୍ମରତାଂ ନଃ ॥ ୪୫୪॥
ଭାସୁରଂ ସୁରସଂହତିଵନ୍ଦ୍ଯଂ ସୁନ୍ଦରଂ ହରିଲୋଚନହାରି ।
ପାଵନଂ ନତପାପଵିଦାରି ସ୍ଵର୍ଗରାଜ୍ଞି ପଦଂ ତଵ ସେଵେ ॥ ୪୫୫॥
ଜଙ୍ଘିକେ ଜଯତସ୍ତଵ ମାତଃ ସ୪ ଏଵ ରୁଚାଂ ଯଦଧୀନଃ ।
ଵାସଵସ୍ଯ ଦୃଶାଂ ଚ ସହସ୍ରଂ ଯଦ୍ଵିଲୋକନଲୋଭଵିନମ୍ରମ୍ ॥ ୪୫୬॥
ସକ୍ଥିନୀ ତଵ ଵାସଵକାନ୍ତେ ରାମଣୀଯକସାରନିଶାନ୍ତେ ।
ଵନ୍ଦତେ ଵିନଯେନ ମମେଯଂ ଵନ୍ଦିନସ୍ତଵ ପାଵନି ଵାଣୀ ॥ ୪୫୭॥
ଇନ୍ଦ୍ରନାରି କଟିସ୍ତଵ ପୃଥ୍ଵୀମଣ୍ଡଲସ୍ଯତୁଲା ମହନୀଯେ ।
ମଧ୍ଯମୋ ନଭସଃ ପ୍ରତିମାନଂ ଭୋଗିନାଂ ଭୁଵନସ୍ଯ ଚ ନାଭିଃ ॥ ୪୫୮॥
ଧୀରତାଂ କୁରୁତେ ଵିଗତାସୁଂ ସା ସୁପର୍ଵପତେର୍ନିଶିତାଗ୍ରା ।
ସା ତଵାମ୍ବ ମନୋଭଵଶସ୍ତ୍ରୀ ରୋମରାଜିରଘଂ ମମ ହନ୍ତୁ ॥ ୪୫୯॥
ରୋମରାଜିଭୁଜଙ୍ଗଶିଶୁସ୍ତେ ଦେଵି ଦେଵପତେର୍ହୃଦଯସ୍ଯ ।
ଦଂଶନେନ କରୋତ୍ଯଯି ମୋହଂ ଜୀଵିତାଯ ଚିରାଯ ଵିଚିତ୍ରମ୍ ॥ ୪୬୦॥
ପୂର୍ଣହେମଘଟଵିଵ ଶକ୍ରାଵାହିତାଂ ଦଧତାଵଯି ଶକ୍ତିମ୍ ।
ଵିଶ୍ଵପୋଷଣକର୍ମଣି ଦକ୍ଷାଵମ୍ବ ଦୁଗ୍ଧଧରୌ ଜଯତସ୍ତେ ॥ ୪୬୧॥
ଲୋକମାତରୁରୋରୁହପୂର୍ଣସ୍ଵର୍ଣକୁମ୍ଭଗତା ତଵ ଶକ୍ତିଃ ।
ଲୋକପାଲନକର୍ମଣି ଵୀର୍ଯଂ ଦେଵି ଵଜ୍ରଧରସ୍ଯ ବିଭର୍ତି ॥ ୪୬୨॥
ଅକ୍ଷଯାମୃତପୂର୍ଣଘଟୌ ତେ ଶକ୍ରପତ୍ନି କୁଚୈ ତଵ ପୀତ୍ଵା ।
ଲୋକବାଧକଭୀକରରକ୍ଷୋ ଧୂନନେ ପ୍ରବଭୂଵ ଜଯନ୍ତଃ ॥ ୪୬୩॥
ହସ୍ତଯୋସ୍ତଵ ମାର୍ଦଵମିନ୍ଦ୍ରୋ ଭାଷତାଂ ସୁଷମାମପି ଦେଵଃ ।
ଦାତୃତାମନଯୋର୍ମୁନିଵର୍ଗୋ ଵର୍ଣଯତ୍ଯଜରେ ପଟୁତାଂ ଚ ॥ ୪୬୪॥
ପୁଷ୍ପମାଲ୍ଯମୃଦୋରପି ବାହୋଃ ଶକ୍ତିରୁଗ୍ରତମାଶରନାଶେ ।
ଦୃଶ୍ଯତେ ଜଗତାମଧିପେ ତେ ଭାଷତାଂ ତଵ କସ୍ତନୁତତ୍ତ୍ଵମ୍ ॥ ୪୬୫॥
କମ୍ବୁକଣ୍ଠି ତଵେଶ୍ଵରି କଣ୍ଠସ୍ତାରହାରଵିତାନଵିରାଜୀ ।
ଦେଵରାଡ୍ଭୁଜଲୋଚନପଥ୍ଯୋ ଦେଵି ମେ ଭଣତାଦ୍ବହୁଭଦ୍ରମ୍ ॥ ୪୬୬॥
ଆନନସ୍ଯ ଗଭସ୍ତିନିଧେସ୍ତେ ରାମଣୀଯକମଦ୍ଭୁତମୀଷ୍ଟେ ।
ଅପ୍ଯମର୍ତ୍ଯନୁତାଖିଲସିଦ୍ଧେର୍ଵାସଵସ୍ଯ ଵଶୀକରଣାଯ ॥ ୪୬୭॥
ନ ପ୍ରସନ୍ନମଲଂ ରଵିବିମ୍ବିଂ ଚନ୍ଦ୍ରବିମ୍ବମତୀଵ ନ ଭାତି ।
ସୁପ୍ରସନ୍ନମହୋଜ୍ଜ୍ଵଲମାସ୍ଯଂ କେନ ପାଵନି ତେ ତୁଲଯାମଃ ॥ ୪୬୮॥
ଲୋଚନେ ତଵ ଲୋକସଵିତ୍ରି ଜ୍ଯୋତିଷଃ ଶଵସଶ୍ଚ ନିଧାନେ ।
ଵକ୍ତୁମବ୍ଜସମେ ନନୁ ଲଜ୍ଜେ ଧୋରଣୀମନୁସୃତ୍ଯ କଵୀନାମ୍ ॥ ୪୬୯॥
ଆଯତୋଜ୍ଜ୍ଵଲପକ୍ଷ୍ମଲନେତ୍ରା ଚମ୍ପକପ୍ରସଵୋପମନାସା ।
ରତ୍ନଦର୍ପଣରମ୍ଯକପୋଲା ଶ୍ରୀଲିପିଦ୍ଯୁତିସୁନ୍ଦରକର୍ଣା ॥ ୪୭୦॥
ଅଷ୍ଟମୀଶଶିଭାସୁରଭାଲା ଵିଷ୍ଟପତ୍ରଯଚାଲକଲୀଲା ।
ସ୍ମେରଚାରୁମୁଖୀ ସୁରଭର୍ତୁଃ ପ୍ରେଯସୀ ଵିଦଧାତୁ ଶିଵଂ ମେ ॥ ୪୭୧॥
ମନ୍ଦହାସଲଵେଷୁ ଵଲକ୍ଷା ମେଚକା ଚିକୁରପ୍ରକରେଷୁ ।
ଶୋଣତାମଧରେ ଦଧତୀ ସା ରକ୍ଷତୁ ପ୍ରକୃତିସ୍ତ୍ରିଗୁଣା ନଃ ॥ ୪୭୨॥
ସର୍ଵଲୋକଵଧୂଜନମଧ୍ଯେ ଯାଂ ଶ୍ରୁତିସ୍ସୁଭଗାମଭିଧତ୍ତେ ।
ଯା ଦିଵୋ ଜଗତୋ ରୁଚିସାରସ୍ତାଂ ନମାମି ପୁରନ୍ଦରରାମାମ୍ ॥ ୪୭୩॥
ସ୍ଵର୍ଗଭୂପତିଲୋଚନଭାଗ୍ଯଶ୍ରୀଶ୍ଶରୀରଵତୀ ଜଲଜାକ୍ଷୀ ।
ଭାରତସ୍ଯ କରୋତୁ ସମର୍ଥଂ ରକ୍ଷଣେ ନରସିଂହତନୂଜମ୍ ॥ ୪୭୪॥
ଲୋକମାତୁରିମେ ରମଣୀଯାଃ ପାକଶାସନଚିତ୍ତରମଣ୍ଯାଃ ।
ଅର୍ପିତାଃ ପଦଯୋର୍ଵିଜଯନ୍ତାଂ ସତ୍କଵେଃ କୃତଯୋ ମଣିରାଗାଃ ॥ ୪୭୫॥
॥ ଚତୁର୍ଥୋ ମେଘଵିତାନପାଦଃ ॥
ଅମରକ୍ଷିତିପାଲକଚେତୋ ମଦନଂ ସଦନଂ ଶୁଚିତାଯାଃ ।
ସ୍ମିତମାଦିଵଧୂଵଦନୋତ୍ତ୍ଥଂ ହରତାଦଖିଲଂ କଲୁଷଂ ମେ ॥ ୪୭୬॥
ସୁତରାମଧନାମତିଖିନ୍ନାମଧୁନା ବହୁଲଂ ଵିଲପନ୍ତୀମ୍ ।
ପରିପାତୁ ଜଗତ୍ତ୍ରଯନେତ୍ରୀ ଭରତକ୍ଷିତିମିନ୍ଦ୍ରପୁରନ୍ଧ୍ରୀ ॥ ୪୭୭॥
ସ୍ଥଲମେତଦମର୍ତ୍ଯନୃପାଲପ୍ରମଦେ ତଵ ମେଘଵିତାନମ୍ ।
ଅଯି ଯତ୍ର ପରିସ୍ଫୁସୀଶେ ତଟିଦୁଜ୍ଜ୍ଵଲଵେଷଧରା ତ୍ଵମ୍ ॥ ୪୭୮॥
ତଟିତା ତଵ ଭୌତିକତନ୍ଵା ଜିତମମ୍ବୁଧରେ ଵିଲସନ୍ତ୍ଯା ।
ଉପମା ଭୁଵି ଯା ଲଲିତାନାଂ ଯୁଵଚିତ୍ତହୃତାଂ ଵନିତାନାମ୍ ॥ ୪୭୯॥
ସ୍ଫୁରିତଂ ତଵ ଲୋଚନହାରି ସ୍ତନିତଂ ତଵ ଧୀରଗଭୀରମ୍ ।
ରମଣୀଯତଯା ମିଲିତା ତେ ଶଚି ଭୀକରତା ଚପଲାଯାଃ ॥ ୪୮୦॥
ଚପଲେ ଶଚି ଵିସ୍ଫୁରସୀନ୍ଦ୍ରଂ ଘନଜାଲପତିଂ ମଦଯନ୍ତୀ ।
ଦିତିଜାତମଵଗ୍ରହସଂଜ୍ଞଂ ଜନଦୁଃଖକରଂ ଦମଯନ୍ତୀ ॥ ୪୮୧॥
ପ୍ରଭୁମଭ୍ରପତିଂ ରମଯନ୍ତୀ ଦୁରିତଂ ନମତାଂ ଶମଯନ୍ତୀ ।
ହରିତାଂ ତିମିରାଣି ହରନ୍ତୀ ପଵମାନପଥେ ଵିଲସନ୍ତୀ ॥ ୪୮୨॥
ଅଲଘୁସ୍ତନିତଂ ଵିଦଧାନା ବଲମୁଗ୍ରତମଂ ଚ ଦଧାନା ।
ହୃଦଯାଵରକଂ ମମ ମାଯାପଟଲଂ ତଟିଦାଶୁ ଧୁନୋତୁ ॥ ୪୮୩॥
ସୁରପାର୍ଥଵଜୀଵିତନାଥେ ନିଖିଲେ ଗଗନେ ପ୍ରଵହନ୍ତ୍ଯାଃ ।
ତଟିତସ୍ତଵ ଵୀଚିଷୁ କାଚିଚ୍ଚପଲା ଲସତୀହ ପଯୋଦେ ॥ ୪୮୪॥
ଵିବୁଧପ୍ରଣୁତେ ଧନିକାନାଂ ଭଵନେଷୁ ଭଵନ୍ତ୍ଯଯି ଦୀପାଃ ।
ପଟୁଯନ୍ତ୍ରବଲାଦୁଦିତାନାଂ ତଵ ଦେଵି ଲଵାଃ କିରଣାନାମ୍ ॥ ୪୮୫॥
ଵ୍ଯଜନାନି ଚ ଚାଲଯସି ତ୍ଵଂ ବତ ସର୍ଵଜଗନ୍ନଋପଜାଯେ ।
ଵିବୁଧୋଽଭିଦଧାତ୍ଵଥଵା କୋ ମହତାଂ ଚରିତସ୍ଯ ରହସ୍ଯମ୍ ॥ ୪୮୬॥
ଇହ ଚାଲିତ ଈଡ୍ଯମନୀଷୈରଯି ଯନ୍ତ୍ରଵିଶେଷଵିଧିଜ୍ଞୈଃ ।
ବହୁଲାଦ୍ଭୁତକାର୍ଯକଲାପସ୍ତଟିତସ୍ତଵ ମାତରଧୀନଃ ॥ ୪୮୭॥
ଅଚରସ୍ତରୁଗୁଲ୍ମଲତାଦିଃ ସକଲଶ୍ଚ ଚରୋ ଭୁଵି ଜନ୍ତୁଃ ।
ଅନିତି ପ୍ରମଦେ ସୁରଭର୍ତୁସ୍ତଟିତସ୍ତଵ ଦେଵି ବଲେନ ॥ ୪୮୮॥
ମନୁତେ ନିଖିଲୋଽପି ଭଵତ୍ଯା ମନୁଜୋଽନିତି ଵକ୍ତିଶୃଣୋତି ।
ଅଵଲୋକଯତେ ଚ ଭଣାମଃ କିମୁ ତେ ଜଗଦମ୍ବ ଵିଭୂତିମ୍ ॥ ୪୮୯॥
ଅତିସୂକ୍ଷ୍ମପଵିତ୍ରସୁଷୁମ୍ଣାପଥତସ୍ତନୁଷୁ ପ୍ରଯତାନାମ୍ ।
କୁଲକୁଣ୍ଡକୃଶାନୁଶିଖା ତ୍ଵଂ ଜ୍ଵଲସି ତ୍ରିଦଶାଲଯନାଥେ ॥ ୪୯୦॥
ଇତରୋ ନ ସୁରକ୍ଷିତିପାଲାତ୍କୁଲକୁଣ୍ଡଗତୋ ଜ୍ଵଲନୋଽଯମ୍ ।
ଇତରେନ୍ଦ୍ରଵିଲାସିନି ନ ତ୍ଵତ୍କୁଲକୁଣ୍ଡକୃଶାନୁଶିଖେଯମ୍ ॥ ୪୯୧॥
କୁଲକୁଣ୍ଡକୃଶାନୁଶିଖାଯାଃ କିରଣୈଃ ଶିରସି ସ୍ଥିତ ଏଷଃ ।
ଦ୍ରଵତୀନ୍ଦୁରନାରତମେତଦ୍ଵପୁରାତ୍ମମଯଂ ଵିଦଧାନଃ ॥ ୪୯୨॥
ମଦକୃଦ୍ବହୁଲାମୃତଧାରାପରିପୂତମିଦଂ ମମ କାଯମ୍ ।
ଵିଦଧାସି ଭଜନ୍ମନୁଜାପ୍ତେ କୁଲକୁଣ୍ଡଧନଂଜଯଦୀପ୍ତେ ॥ ୪୯୩॥
ଶିରସୀହ ସତଃ ସିତଭାନୋରମୃତେନ ଵପୁର୍ମଦମେତି ।
ହୃଦି ଭାତ ଇନସ୍ଯ ଚ ଭାସା ମତିମେତୁ ପରାଂ ଶଚି ଚେତଃ ॥ ୪୯୪॥
ମମ ଯୋଗମଦେନ ନ ତୃପ୍ତିନିଜଦେଶଦଶାଵ୍ଯଥିତସ୍ଯ ।
ଅଵଗନ୍ତୁମୁପାଯମମୋଘଂ ଶଚି ଭାସଯ ମେ ହୃଦି ଭାନୁମ୍ ॥ ୪୯୫॥
ଵିଦିତଃ ପ୍ରମଦସ୍ଯ ଵିଧାତୁଃ ଶଶିନୋ ଜନଯିତ୍ରି ଵିଲାସଃ ।
ଅହମୁତ୍ସୁକ ଈଶ୍ଵରି ଭାନୋର୍ଵିଭଵସ୍ଯ ଚ ଵେତ୍ତୁମିଯତ୍ତାମ୍ ॥ ୪୯୬॥
ଵରୁଣସ୍ଯ ଦିଶି ପ୍ରଵହନ୍ତୀ ମଦମମ୍ବ କରୋଷି ମହାନ୍ତମ୍ ।
ଦିଶି ଵଜ୍ରଭୃତଃ ପ୍ରଵହନ୍ତୀ କୁରୁ ବୁଦ୍ଧିମକୁଣ୍ଠିତସିଦ୍ଧିମ୍ ॥ ୪୯୭॥
ଅମଲାମଧିରୁହ୍ଯ ସୁଷୁମ୍ଣାଂ ପ୍ରଵହସ୍ଯଧୁନାମ୍ବ ମଦାଯ ।
ଅମୃତାମଧିରୁହ୍ଯ ଚ କିଞ୍ଚିତ୍ପ୍ରିଵହେଶ୍ଵରି ବୁଦ୍ଧିବଲାଯ ॥ ୪୯୮॥
ଭରତକ୍ଷିତିକ୍ଷଣକର୍ମଣ୍ଯଭିଧାଯ ମନୋଜ୍ଞମୁପାଯମ୍ ।
ଅଥ ଦେଵି ଵିଧାଯ ଚ ଶକ୍ତଂ କୁରୁ ମାଂ କୃତିନଂ ଶଚି ଭକ୍ତମ୍ ॥ ୪୯୯॥
ନରସିଂହସୁତେନ କଵୀନାଂ ଵିଭୁନା ରଚିତୈଃ କମନୀଯୈଃ ।
ପରିତୃପ୍ଯତୁ ମେଘଵିତାନୈର୍ମରୁତାମଧିପସ୍ଯ ପୁରନ୍ଧ୍ରୀ ॥ ୫୦୦॥
॥ ପଞ୍ଚମଂ ପାଙ୍କ୍ତଂ ଶତକଂ ସମାପ୍ତମ୍ ॥
॥ ଅଥ ଷଷ୍ଠଂ ତ୍ରୈଷ୍ଟୁଭଂ ଶତକମ୍ ॥
॥ ପ୍ରଥମ ଉପଜାତିପାଦଃ ॥
ମନ୍ଦୋଽପି ବୋଧଂ ଵିଦଧନ୍ମୁନୀନାଂ ସ୍ଵଚ୍ଛୋଽପି ରାଗଂ ତ୍ରିଦଶେଶ୍ଵରସ୍ଯ ।
ଅଲ୍ପୋଽପି ଧୁନ୍ଵନ୍ହରିତାଂ ତମାଂସି ସ୍ମିତାଙ୍କୁରୋ ଭାତୁ ଜଯନ୍ତମାତୁଃ ॥ ୫୦୧॥
ଅଶେଷପାପୌଘନିଵାରଣାଯ ଭାଗ୍ଯସ୍ଯ ପାକାଯ ଚ ଦେଵରାଜ୍ଞୀ ।
ଶୋକାକୁଲାଂ ଭାରତଭୂମିମେତାଂ ଲୋକସ୍ଯ ମାତା ହୃଦଯେ କରୋତୁ ॥ ୫୦୨॥
ଧର୍ମଦ୍ଵିଷାମିନ୍ଦ୍ରନିରାଦରାଣାଂ ସଂହାରକର୍ମଣ୍ଯତିଜାଗରୂକାମ୍ ।
ଦେଵୀଂ ପରାଂ ଦେଵପଥେ ଜ୍ଵଲନ୍ତୀଂ ପ୍ରଚଣ୍ଡଚଣ୍ଡୀଂ ମନସା ସ୍ମରାମି ॥ ୫୦୩॥
ଵ୍ଯାପ୍ତା ତଟିଦ୍ଵା ଗଗନେ ନିଗୂଢା ନାରୀ ସୁରେଶାନମନୋରମା ଵା ।
ଶକ୍ତିଃ ସୁଷୁମ୍ଣାପଥଚାରିଣୀ ଵା ପ୍ରଚଣ୍ଡଚଣ୍ଡୀତି ପଦସ୍ଯ ଭାଵଃ ॥ ୫୦୪॥
ସମସ୍ତଲୋକାଵନିନାଯିକାଯାଃ ସୁପର୍ଵମାର୍ଗେଣ ଶରୀରଵତ୍ଯାଃ ।
ମାତୁର୍ମହୋଂଶଂ ମହନୀଯସାରଂ ଵିଜ୍ଞାନଵନ୍ତସ୍ତଟିତଂ ଭଣନ୍ତି ॥ ୫୦୫॥
ନିଗୂଢତେଜସ୍ତନୁରମ୍ବିକେଯଂ ପ୍ରଚଣ୍ଡଚଣ୍ଡୀ ପରିତୋ ଲସନ୍ତୀ ।
ଅଵ୍ଯକ୍ତ୍ଶବ୍ଦେନ ଶରୀରଵତ୍ଯାଃ କାଲ୍ଯାଃ କଵୀନାଂ ଵଚନେଷୁ ଭିନ୍ନା ॥ ୫୦୬॥
ଶବ୍ଦଂ ଵିନା ନୈଵ କଦାପି ତେଜସ୍ତେଜୋ ଵିନା ନୈଵ କଦାପି ଶବ୍ଦଃ ।
ଶକ୍ତିଦ୍ଵଯଂ ସନ୍ତତଯୁକ୍ତମେତତ୍କଥଂ ସ୍ଵରୂପେଣ ଭଵେଦ୍ଵିଭକ୍ତମ୍ ॥ ୫୦୭॥
ଏକୈଵ ଶକ୍ତିର୍ଜ୍ଵଲତି ପ୍ରକୃଷ୍ଟା ସ୍ଵରତ୍ଯପି ପ୍ରାଭଵତଃ ସମନ୍ତାତ୍ ।
କ୍ରିଯାଵିଭେଦାଦିହ ପଣ୍ଡିତାନାଂ ଶକ୍ତିଦ୍ଵଯୋକ୍ତିସ୍ତୁ ସମର୍ଥନୀଯା ॥ ୫୦୮॥
ଏକକ୍ରିଯାଯାଶ୍ଚ ଫଲପ୍ରଭେଦାତ୍ପୁନର୍ଵିଭାଗଃ କ୍ରିଯତେ ବହୁଜ୍ଞୈଃ ।
କାଲୀଂ ଚ ତାରାଂ ସ୍ଵରମଗ୍ର୍ଯମାହୁଃ ପ୍ରଚଣ୍ଡଚଣ୍ଡୀଂ ଲଲିତାଂ ଚ ତେଜଃ ॥ ୫୦୯॥
ସମ୍ପଦ୍ଯତେ ଶବ୍ଦଗତେର୍ହି କାଲଃ ଶବ୍ଦୋ ଵରେଣ୍ଯସ୍ତଦଭାଣି କାଲୀ ।
ଧ୍ଯାତେନ ଶବ୍ଦେନ ଭଵଂ ତରେଦ୍ଯଦ୍ସୁଧାସ୍ତତଃ ଶବ୍ଦମୁଶନ୍ତି ତାରାମ୍ ॥ ୫୧୦॥
ଯଦକ୍ଷରଂ ଵେଦଵିଦାମୃଷୀଣାଂ ଵେଦାନ୍ତିନାଂ ଯଃ ପ୍ରଣଵୋ ମୁନୀନାମ୍ ।
ଗୌରୀ ପୁରାଣେଷୁ ଵିପଶ୍ଚିତାଂ ଯା ସା ତାନ୍ତ୍ରିକାଣାଂ ଵଚନେନ ତାରା ॥ ୫୧୧॥
ସମ୍ପଦ୍ଯତେ ସଂହୃତିରୋଜସା ଯତ୍ପ୍ରଚଣ୍ଡଚଣ୍ଡୀ ତଦୁଦୀରିତୌଜଃ ।
ସିଧ୍ଯେଦଶେଷୋଽନୁଭଵୋ ଯଦୋଜସ୍ଯତୋ ବୁଧାସ୍ତାଂ ଲଲିତାଂ ଵଦନ୍ତି ॥ ୫୧୨॥
ପ୍ରଚଣ୍ଡଚଣ୍ଡୀଂ ଲଘୁନା ପଦେନ ଚଣ୍ଡୀଂ ଵିଦୁଃ କେଚନ ବୁଦ୍ଧିମନ୍ତଃ ।
ଏକେ ଵିଦଃ ଶ୍ରେଷ୍ଠମହୋମଯୀଂ ତାଂ ଲକ୍ଷ୍ମୀଂ ମହତ୍ପୂର୍ଵପଦାଂ ଵଦନ୍ତି ॥ ୫୧୩॥
ଅତୀଵ ସୌମ୍ଯଂ ଲଲିତେତି ଶବ୍ଦଂ ପ୍ରଚଣ୍ଡଚଣ୍ଡୀତି ପଦଂ ଚ ଭୀମମ୍ ।
ଦେଵୀ ଦଧାନା ସୁତରାଂ ମନୋଜ୍ଞା ଘୋରା ଚ ନିତ୍ଯଂ ହୃଦି ମେ ଵିଭାତୁ ॥ ୫୧୪॥
ପ୍ରଚଣ୍ଡଚଣ୍ଡୀଂ ତୁ ଶରୀରଭାଜାଂ ତନୂଷୁ ଯୋଗେନ ଵିଭିନ୍ନଶୀର୍ଷାମ୍ ।
ଶକ୍ତିଂ ସୁଷୁମ୍ଣାସରଣୌ ଚରନ୍ତୀଂ ତାଂ ଛିନ୍ନମସ୍ତାଂ ମୁନଯୋ ଵଦନ୍ତି ॥ ୫୧୫॥
କପାଲଭେଦୋ ଯଦି ଯୋଗଵୀର୍ଯାତ୍ସମ୍ପଦ୍ଯତେ ଜୀଵତ ଏଵ ସାଧୋଃ ।
ତମେଵ ସନ୍ତଃ ପ୍ରଵଦନ୍ତି ଶୀର୍ଷଚ୍ଛେଦଂ ଶରୀରାନ୍ତରଭାସି ଶକ୍ତେଃ ॥ ୫୧୬॥
ଉଦୀର୍ଯସେ ନିର୍ଜରରାଜପତ୍ନି ତ୍ଵଂ ଛିନ୍ନମସ୍ତା ଯମିନାଂ ତନୂଷୁ ।
ଉଜ୍ଜଋମ୍ଭଣେ ଵିଶ୍ଵସଵିତ୍ରି ଯସ୍ଯାଃ କାଯଂ ଭଵେଦ୍ଵୈଦ୍ଯୁତଯନ୍ତ୍ରତୁଲ୍ଯମ୍ ॥ ୫୧୭॥
ପିତୁର୍ନିଯୋଗାତ୍ତନଯେନ କୃତ୍ତେ ମସ୍ତେ ଜନନ୍ଯାଃ କିଲ ରେଣୁକାଯାଃ ।
ତ୍ଵମାଵିଶଃ ପାଵନି ତତ୍କବନ୍ଧଂ ତଦ୍ଵା ତ୍ଵମୁକ୍ତାସି ନିକୃତ୍ତମସ୍ତା ॥ ୫୧୮॥
ଛିନ୍ନଂ ଶିରଃ କୀର୍ଣକଚଂ ଦଧାନାଂ କରେଣ କଣ୍ଠୋଦ୍ଗତରକ୍ତଧାରାମ୍ ।
ରାମାମ୍ବିକାଂ ଦୁର୍ଜନକାଲରାତ୍ରିଂ ଦେଵୀଂ ପଵିତ୍ରଂ ମନସା ସ୍ମରାମି ॥ ୫୧୯॥
ଧ୍ରୁଵୋ ରମା ଚନ୍ଦ୍ରଧରସ୍ଯ ରାମା ଵାଗ୍ଵଜ୍ରଵୈରୋଚସଦୀର୍ଘନିର୍ଯେ ।
କୂର୍ଚଦ୍ଵଯଂ ଶସ୍ତ୍ରକୃଶାନୁଜାଯେ ଵିଦ୍ଯାନୃପାର୍ଣା ସୁରରାଜଶକ୍ତେଃ ॥ ୫୨୦॥
ମାଯାଦ୍ଵିଵାରଂ ଯଦି ସୈକଵର୍ଣା ଵିଦ୍ଯୈକଵର୍ଣା ଯଦି ଧେନୁରେକା ।
ଧେନ୍ଵାଦି ସମ୍ବୋଧନମସ୍ତ୍ରମଗ୍ନେର୍ଵିଲାସିନୀ ଚେତି ଧରେନ୍ଦୁଵର୍ଣା ॥ ୫୨୧॥
ଚତୁଷ୍ଟଯେତ୍ରନ୍ଯତମଂ ଗୃହୀତ୍ଵା ମନ୍ତ୍ରଂ ମହେନ୍ଦ୍ରସ୍ଯ ମନୋଧିନାଥାମ୍ ।
ଭଜେତ ଯସ୍ତାନ୍ତ୍ରିକଦିଵ୍ଯଭାଵମାଶ୍ରିତ୍ଯ ସିଦ୍ଵୀଃ ସକଲାଃ ସ ଵିନ୍ଦେତ୍ ॥ ୫୨୨॥
ସଂହୋତ୍ରମିତ୍ଯଦ୍ଭୁତଶକ୍ତିଯୁକ୍ତଂ ଵୃଷାକପେର୍ଦର୍ଶନମମ୍ବ ମନ୍ତ୍ରମ୍ ।
ଯୋ ଵୈଦିକଂ ତେ ମନୁଜୋ ଭଜେତ କିଞ୍ଚିନ୍ନ ତସ୍ଯେହ ଜଗତ୍ଯସାଧ୍ଯମ୍ ॥ ୫୨୩॥
ପ୍ରଚଣ୍ଡଚଣ୍ଡି ପ୍ରମଦେ ପୁରାଣି ପୁରାଣଵୀରସ୍ଯ ମନୋଧିନାଥେ ।
ପ୍ରଯଚ୍ଛ ପାତୁଂ ପଟୁତାଂ ପରାଂ ମେ ପୁଣ୍ଯାମିମାମାର୍ଯନିଵାସଭୂମିମ୍ ॥ ୫୨୪॥
ପ୍ରପଞ୍ଚରାଜ୍ଞୀଂ ପ୍ରଥିତପ୍ରଭାଵାଂ ପ୍ରଚଣ୍ଡଚଣ୍ଡୀଂ ପରିକୀର୍ତଯନ୍ତ୍ଯଃ ।
ଏତାଃ ପ୍ରମୋଦାଯ ଭଵନ୍ତୁ ଶକ୍ତେରୁପାସକାନାମୁପଜାତଯୋ ନଃ ॥ ୫୨୫॥
॥ ଦ୍ଵିତୀଯୋ ରଥୋଦ୍ଧତାପାଦଃ ॥
କ୍ଷାଲନାଯ ହରିତାଂ ଵିଭୂତଯେ ଵିଷ୍ଟପସ୍ଯ ମଦନାଯ ଵଜ୍ରିଣଃ ।
ତଜ୍ଜଯନ୍ତଜନନୀମୁଖାବ୍ଜତୋ ନିର୍ଗତଂ ସ୍ମିତମଘଂ ଧୁନୋତୁ ନଃ ॥ ୫୨୬॥
ଅନ୍ନଲୋପକୃଶଭୀରୁକପ୍ରଜାଂ ଭିନ୍ନଭାଵବଲହୀନନେତୃକାମ୍ ।
ଵାସଵସ୍ଯ ଵରଵର୍ଣିନୀ ପରୈରର୍ଦିତାମଵତୁ ଭାରତାଵନିମ୍ ॥ ୫୨୭॥
ପାଣିପାଦମନିମେଷରାଜ୍ଞି ତେ ପାରିଜାତନଵପଲ୍ଲଵୋପମମ୍ ।
ଅକ୍ଷପାଵିରହମଙ୍ଗଭାସରିଦ୍ଵାସିଚକ୍ରମିଥୁନଂ କୁଚଦ୍ଵଯମ୍ ॥ ୫୨୮॥
ପୂର୍ଣଚନ୍ଦ୍ରଯଶସୋଽପହାରକଂ ସମ୍ପ୍ରସାଦସୁଷମାସ୍ପଦଂ ମୁଖମ୍ ।
ଜ୍ଞାନଶକ୍ତିରୁଚିଶେଵଧୀଦୃଶୌ ରକ୍ତ୍ଵର୍ଣକସୁଧାଘନୋଽଧରଃ ॥ ୫୨୯॥
ମର୍ଦଯତ୍ତିମିରମୁଦ୍ଧତଂ ଦିଶାଂ ଅଲ୍ପମପ୍ଯଧିକଵୈଭଵଂ ସ୍ମିତମ୍ ।
ପ୍ରାଵୃଡନ୍ତଯମୁନାତରଙ୍ଗଵନ୍ନତ୍ନ୍ଲଚାରୁରତିପାଵନଃ କଚଃ ॥ ୫୩୦॥
ଵଲ୍ଲକୀଂ ଚ ପରୁଷଧ୍ଵନିଂ ଵଦନ୍ ଦୁଃଖିତସ୍ଯ ଚ ମୁଦାଵହଃ ସ୍ଵରଃ ।
ଚାରୁ ହାଵଶବଲାଽଲସା ଗତିଃ କାଯଧାମଵଚସାଂ ନ ପଦ୍ଧତୌ ॥ ୫୩୧॥
ଯୋଗସିଦ୍ଧିମତୁଲାଂ ଗତା ମତିଶ୍ଚାତୁରୀ ଚ ବୁଧମଣ୍ଡଲସ୍ତୁତା ।
ଵିଷ୍ଟପତ୍ରିତଯରାଜ୍ଯତୋଽପ୍ଯସି ତ୍ଵଂ ସୁଖାଯ ମହତେ ବିଡୌଜସଃ ॥ ୫୩୨॥
ତ୍ଵାମୁଦୀକ୍ଷ୍ଯ ଧୃତଦେଵତାତନୁଂ ଦୀପ୍ତପକ୍ଷ୍ମଲଵିଶାଲଲୋଚନାମ୍ ।
ଆଦିତୋ ଜନନି ଜନ୍ମିନାମଭୂଦ୍ ଵାସଵସ୍ଯ ରତିରାଦିମେ ରସେ ॥ ୫୩୩॥
ଆଦିମଂ ରସମନାଦିଵାସନା ଵାସିତୌ ପ୍ରଥମମନ୍ଵଗୃହ୍ଣତାମ୍ ।
ସମ୍ମଦସ୍ଯ ନିଧିମାଦିଦମ୍ପତୀ ସୋଽଚଲତ୍ତ୍ରିଭୁଵନେ ତତଃ କ୍ରମଃ ॥ ୫୩୪॥
ଜ୍ଯାଯସା ଦିଵିଷଦାଂ ପୁରାତନୀ ନୀଲକଞ୍ଜନଯନା ଵିଲାସିନୀ ।
ଯଦ୍ଵିହାରମତନୋତ୍ପ୍ରରୋଚନଂ ତତ୍ସତାମଭଵଦାଦିମେ ରସେ ॥ ୫୩୫॥
ନ ତ୍ଵଦମ୍ବ ନଲିନାନନାଽଧିକା ନାପି ନାକପତିତୋଽଧିକଃ ପୁମାନ୍ ।
ନାଧିକଂ ଚ ଵନମସ୍ତି ନନ୍ଦନାନ୍ନାଦିମାଦପି ରସୋଽଧିକୋ ରସାତ୍ ॥ ୫୩୬॥
ନାଯିକା ତ୍ଵମସମାନଚାରୁତା ନାଯକଃ ସ ମରୁତାଂ ମହୀପତିଃ ।
ନନ୍ଦନଂ ଚ ରସରଙ୍ଗଭୂଃ କଥଂ ମନ୍ମଥସ୍ଯ ନ ଭଵେଦିହୋତ୍ସଵଃ ॥ ୫୩୭॥
ଦେଵି ଵାଂ ମୃତିକଥୈଵ ଦୂରତୋ ଜାତୁଚିଦ୍ଗଲତି ନୈଵ ଯୌଵନମ୍ ।
କାଙ୍କ୍ଷିତଃ ପରିକରୋ ନ ଦୁର୍ଲଭଃ କିଂ ରସଃ ପରିଣମେଦିହାନ୍ଯଥା ॥ ୫୩୮॥
ଵିଷ୍ଟପସ୍ଯ ଯୁଵରାଜକେଶଵେ ତ୍ରାଣଭାରମଖିଲଂ ନିଧାଯ ଵାମ୍ ।
କ୍ରୀଡତୋରମରରାଜ୍ଞି ନନ୍ଦନେ କ୍ରୀଡିତାନି ମମ ସନ୍ତୁ ଭୂତଯେ ॥ ୫୩୯॥
ଯଦ୍ଯୁଵାମମରରାଜ୍ଞି ନନ୍ଦନେ କୁର୍ଵତୋ ରହସି ଦେଵି ମନ୍ତ୍ରଣମ୍ ।
ତତ୍ର ଚେନ୍ମମ କୃତିର୍ମନାଗିଯଂ ସ୍ପର୍ଶମେତି ଭୁଵି କୋ ନୁ ମତ୍କୃତୀ ॥ ୫୪୦॥
କ୍ରନ୍ଦନଂ ଯଦି ମମେହ ଵନ୍ଦିନୋ ନନ୍ଦନେ ଵିହରତୋଃ ସଵିତ୍ରି ଵାମ୍ ।
ଅନ୍ତରାଯକୃଦଥାବ୍ଜକାନ୍ତି ତେ ସମ୍ପ୍ରଗୃହ୍ଯ ଚରଣଂ କ୍ଷମାପଯେ ॥ ୫୪୧॥
ଯୋଷିତାମପି ଵିମୋହନାକୃତିର୍ମୋହନଂ ତୁ ପୁରୁଷସଂହତେରପି ।
ଇନ୍ଦ୍ରମମ୍ବରମଯାଂ ବଭୂଵିଥ ତ୍ଵଂ ରସାର୍ଦ୍ରହୃଦଯା ଲସଦ୍ରସମ୍ ॥ ୫୪୨॥
ଦିଵ୍ଯଚନ୍ଦନରସାନୁଲେପନୈଃ ପାରିଜାତସୁମତଲ୍ପକଲ୍ପନୈଃ ।
ଚାରୁଗୀତକୃତିଭିଶ୍ଚ ଭେଜିରେ ନାକଲୋକଵନଦେଵତାଶ୍ଚ ଵାମ୍ ॥ ୫୪୩॥
ସ୍ଵର୍ଣଦୀସଲିଲଶୀକରୋକ୍ଷିତାଃ ପାରିଜାତସୁମଗନ୍ଧଧାରିଣଃ ।
ନନ୍ଦନେ ତ୍ରିଦଶଲୋକରାଜ୍ଞି ଵାଂ କେପି ଭେଜୁରଲସାଃ ସମୀରଣାଃ ॥ ୫୪୪॥
ଆଦଧାସି ସକଲାଙ୍ଗନାଧିକେ ପଦ୍ମଗନ୍ଧିନି ସୁଧାଧରାଧରେ ।
ମଞ୍ଜୁଵାଣି ସୁକୁମାରି ସୁନ୍ଦରି ତ୍ଵଂ ସୁରେନ୍ଦ୍ରସକଲେନ୍ଦ୍ରିଯାର୍ଚନମ୍ ॥ ୫୪୫॥
ଆଦିଦେଵି ଵଦନଂ ତଵାଭଵତ୍ କାନ୍ତିଧାମ ମଦନଂ ଦିଵସ୍ପତେଃ ।
ଆନନାଦପି ରସାମୃତଂ କିରନ୍ନିଷ୍କ୍ରମଂ ଵିଲସିତଂ କଲଂ ଗିରାମ୍ ॥ ୫୪୬॥
ଚାରୁଵାଗ୍ଵିଲସିତାଚ୍ଚ ନିସ୍ତୁଲପ୍ରେମଵୀଚିରୁଚିରଂ ଵିଲୋକିତମ୍ ।
ଵୀକ୍ଷିତାଦପି ଵିଲାସଵିଶ୍ରମସ୍ଥାନମଲ୍ପମଲସଂ ଶୁଚିସ୍ମିତମ୍ ॥ ୫୪୭॥
ଭାସୁରେନ୍ଦ୍ରଦୃଢବାହୁପଞ୍ଜରେ ଲଜ୍ଜଯା ସହଜଯା ନମନ୍ମୁଖୀ ।
ତଦ୍ଵିଲୋଚନଵିକର୍ଷକାଲକା ପାତୁ ମାଂ ତ୍ରିଦିଵଲୋକନାଯିକା ॥ ୫୪୮॥
ଭାରତକ୍ଷିତିଵିଷାଦଵାରଣେ ତତ୍ସୁତଂ ଗଣପତିଂ କୃତୋଦ୍ଯମମ୍ ।
ଆଦଧାତୁ ପଟୁମର୍ଜୁନସ୍ମିତା ଦୁର୍ଜନପ୍ରମଥନକ୍ଷମା ଶଚୀ ॥ ୫୪୯॥
ଚାରୁଶବ୍ଦକଲିତାଃ କୃତୀରିମାଃ ସତ୍କଵିକ୍ଷିତିଭୁଜୋ ରଥୋଦ୍ଧତାଃ ।
ସା ଶୃଣୋତୁ ସୁରମେଦିନୀପତେର୍ନେତ୍ରଚିତ୍ତମଦନୀ ଵିଲାସିନୀ ॥ ୫୫୦॥
॥ ତୃତୀଯୋ ମୌକ୍ତିକମାଲାପାଦଃ ॥
ନିର୍ମଲଭାସାଂ ଦିଶି ଦିଶି କର୍ତା ପୁଣ୍ଯମତୀନାଂ ହୃଦି ହୃଦି ଧର୍ତା ।
ପାଲଯତାନ୍ମାମନଘଵିଲାସଃ ଶକ୍ରମହିଶ୍ଯାଃ ସିତଦରହାସଃ ॥ ୫୫୧॥
ପୁଣ୍ଯଚରିତ୍ରା ମୁନିଜନଗୀତା ଵାସଵକାନ୍ତା ତ୍ରିଭୁଵନମାତା ।
ଵତ୍ସଲଭାଵାଦଵତୁ ଵିଦୂନାଂ ଭାରତଭୂମିଂ ଧନବଲହୀନାମ୍ ॥ ୫୫୨॥
କୋଟିତଟିଦ୍ଵତ୍ତଵ ତନୁକାନ୍ତିଃ ପୂର୍ଣସମାଧେସ୍ତଵ ହୃଦି ଶାନ୍ତିଃ ।
ଵାସଵଭାମେ ଭଗଵତି ଘୋରଃ ଶତ୍ରୁଵିଦାରୀ ତଵ ଭୁଜସାରଃ ॥ ୫୫୩॥
ଆଶ୍ରଯଭୂତଂ ସୁମଧୁରତାଯା ଆଲଯଭୂତଂ ଜଲଧିସୁତାଯାଃ ।
ଵାସଵଦୃଷ୍ଟେସ୍ତଵମୁଖମବ୍ଜଂ କିଙ୍କ୍ରଦୃଷ୍ଟେସ୍ତଵ ପଦମବ୍ଜମ୍ ॥ ୫୫୪॥
ପାଦସରୋଜଂ ଵୃଜିନହରଂ ତେ ଯୋ ଭଜତେ ନା ସୁରପତିକାନ୍ତେ ।
ତତ୍ର କଟାକ୍ଷା ଅଯି ଶତଶସ୍ତେ ତସ୍ଯ ସମସ୍ତଂ ଭଗଵତି ହସ୍ତେ ॥ ୫୫୫॥
ଜ୍ଞାପକଶକ୍ତିଃ ପ୍ରତିନରମସ୍ତଂ କାରକଶକ୍ତିଃ ପ୍ରତିନରହସ୍ତମ୍ ।
ଵାସଵଚକ୍ଷୁସ୍ସୁକୃତଫଲଶ୍ରୀର୍ଭାତୁ ମମାନ୍ତଃ ସୁରଭୁଵନଶ୍ରୀଃ ॥ ୫୫୬॥
ମନ୍ତ୍ରପରାଣାଂ ଵଚସି ଵସନ୍ତୀ ଧ୍ଯାନପରାଣାଂ ମନସି ଲସନ୍ତୀ ।
ଭକ୍ତିପରାଣାଂ ହୃଦି ଵିହରନ୍ତୀ ଭାତି ପରାମ୍ବା ନଭସି ଚରନ୍ତୀ ॥ ୫୫୭॥
ସେଵକପାପପ୍ରଶମନନାମା ଦିକ୍ତିମିରୌଘପ୍ରମଥନଧାମା ।
ଉଜ୍ଜ୍ଵଲଶସ୍ତ୍ରା ରଣଭୁଵି ଭୀମା ପାତୁ ନତଂ ମାଂ ହରିହଯରାମା ॥ ୫୫୮॥
ଯୋଗିନି ଶକ୍ତିର୍ଵିଲସସି ଦାନ୍ତିଃ ଯୋଷିତି ଶକ୍ତିର୍ଵିଲସସି କାନ୍ତିଃ ।
ଜ୍ଞାନିନି ଶକ୍ତିର୍ଵିଲସସି ତୁଷ୍ଟିଃ ଧନ୍ଵିନି ଶକ୍ତିର୍ଵିଲସସି ଦୃଷ୍ଟିଃ ॥ ୫୫୯॥
ସଙ୍ଗିନି ଶକ୍ତିର୍ଵିଲସସି ନିଦ୍ରା ଧ୍ଯାତରି ଶକ୍ତିର୍ଵିଲସସି ମୁଦ୍ରା ।
ଵାସଵକାନ୍ତେ ଗଗନନିଶାନ୍ତେ ଭାଷିତୁମୀଶଃ କ୍ଵ ନୁ ଵିଭଵଂ ତେ ॥ ୫୬୦॥
ଯଦ୍ଦିତିଜାନାଂ ଦମନମଵକ୍ରଂ କେଶଵହସ୍ତେ ଵିଲସତି ଚକ୍ରମ୍ ।
ତତ୍ର କଲା ତେ ଭଗଵତି ଭଦ୍ରା କାଚନ ଭାରଂ ଵହତି ଵିନିଦ୍ରା ॥ ୫୬୧॥
ଦୁଷ୍ଟନିଶାଟପ୍ରଶମନଶୀଲଂ ଯତ୍ ସିତଭୂଭୃତ୍ପତିକରଶୂଲମ୍ ।
ତତ୍ର ମର୍ମହୋଂଶସ୍ତଵ ଜଗଦୀଶେ ରାଜତି କଶ୍ଚିତ୍ପଟୁରରିନାଶେ ॥ ୫୬୨॥
ଯନ୍ନିଜରୋଚିକ୍ର୍ତତରିପୁସାରଂ ଵାସଵହସ୍ତେ କୁଲିଶମୁଦାରମ୍ ।
ତତ୍ର ତଵାଂଶୋ ଵିଲସତି ଦିଵ୍ଯଃ କଶ୍ଚନ ଭାସୋ ଭଗଵତି ଭଵ୍ଯଃ ॥ ୫୬୩॥
ଅମ୍ବରଦେଶେ ସୁମହତି ଗୁପ୍ତା ପଙ୍କ୍ଜବନ୍ଧୌ ଵିଲସତି ଦୀପ୍ତା ।
ରାଜସି ମାତର୍ହିମରୁଚିଶୀତା ଵେଦିକୃଶାନୌ କ୍ରତୁଭୃତିପୂତା ॥ ୫୬୪॥
ସୂକ୍ଷ୍ମରଜୋଭିର୍ଵିହିତମୁଦାରଂ ଯଜ୍ଜଗଦେତନ୍ନ୍ଗଗନମପାରମ୍ ।
ତତ୍ତଵଵେଦଃ ପ୍ରଵଦତି କାଯଂ ପାଵନି ଭାନୁସ୍ତଵ ତନୁଜୋଽଯମ୍ ॥ ୫୬୫॥
ଈଶ୍ଵରି ନୈକସ୍ତଵ ଖରତେଜାଃ ତେଽପି ଚ ସର୍ଵେ ଜନନି ତନୂଜାଃ ।
ଉଜ୍ଵଲଖେଟାଃ କୁଵଦତି କାଯାଃ ପାଵନି କସ୍ତେ ପ୍ରଵଦତୁ ମାଯାଃ ॥ ୫୬୬॥
ଯା ମହିମାନଂ ପ୍ରଥଯତି ଭୂମିଃ ପାଵନକୀର୍ତିର୍ଜଲନିଧିନେମିଃ ।
ସେଯମପୀଶେ ଭଵତି ସୁପୁତ୍ରୀ ଵାସଵଜାଯେ ତଵ ଜନଧାତ୍ରୀ ॥ ୫୬୭॥
ଅଙ୍ଗ ସଖାଯୋ ଵିରମତସଙ୍ଗାଶ୍ଵଷ୍ଠ୍ହର୍ଵିଷଯାଣାଂ କୃତମତିଭଙ୍ଗାତ୍ ।
ଧ୍ଯାଯତ ଚିତ୍ତେ ଧୁତଭଯବୀଜଂ ଵାସଵଜାଯାଚରଣସରୋଜମ୍ ॥ ୫୬୮॥
ପାପମଶେଷଂ ସପଦି ଵିହାତୁଂ ଶକ୍ତିମନଲ୍ପାମପି ପରିଧାତୁମ୍ ।
ଚେତସି ସାଧୋ କୁରୁ ପରିପୂତଂ ଵାସଵଜାଯାପଦଜଲଜାତମ୍ ॥ ୫୬୯॥
ଈଶ୍ଵରି ଵନ୍ଦ୍ଯଦ୍ଯୁତିଭୃତିମେଧେ କାଙ୍କ୍ଷିତନୀରାଣ୍ଯସୃଜତି ମୋଘେ ।
ନିର୍ମଲକୀର୍ତେସ୍ତଵ ଶଚି ଗାନଂ ଶକ୍ଷ୍ଯତି କର୍ତୁଂ ତଦୁଦକଦାନମ୍ ॥ ୫୭୦॥
ଆମଯଵୀର୍ଯାଦ୍ଵିଗଲତି ସାରେ ଜୀଵତି କିଞ୍ଚିଦ୍ରିସନଗନୀରେ ।
ରକ୍ଷତି ଜନ୍ତୁଂ ତଵ ଶଚି ନାମ ପ୍ରାଜ୍ଞଜନୈରପ୍ଯଗଣିତଧାମ ॥ ୫୭୧॥
ମଧ୍ଯମଲୋକେ ସ୍ଯତି ଶୁଚିରୁଗ୍ରା ରାଜସି ନାକେ ଵିଭଵସମଗ୍ରା ।
ପ୍ରାଣିଶରୀରେ ଭଵସି ଵିଚିତ୍ର ଵାସଵଜାଯେ ଵିଵିଧଚରିତ୍ର ॥ ୫୭୨॥
ଵ୍ଯୋମ୍ନି ଵପୁସ୍ତେ ଵିନିହତପାପଂ ଵିଶ୍ରୁତଲୀଲଂ ତଵ ଦିଵି ରୂପମ୍ ।
କର୍ମଵଶାତ୍ତେ ଭଵତି ସ ଭୋଗଃ ପ୍ରାଣିଶରୀରେ ଭଗଵତି ଭାଗଃ ॥ ୫୭୩॥
ଭାରତଭୂମେଃ ଶୁଚମପହନ୍ତୁଂ ଶ୍ରେଷ୍ଠମୁପାଯଂ ପୁନରଵଗନ୍ତୁମ୍ ।
ଵାସଵଜାଯେ ଦିଶ ମମ ବୁଦ୍ଧିଂ ପାଵନି ମାଯେ କୁରୁ କୁରୁ ସିଦ୍ଧିମ୍ ॥ ୫୭୪॥
ସମ୍ମଦଯନ୍ତୀର୍ବୁଧଜନମେତାଃ ସ୍ଵର୍ଗଧରିତ୍ରୀପତିସତିପୂତାଃ ।
ମୌକ୍ତିକମାଲାଃ ଶୃଣୁ ନୁତିକର୍ତୁର୍ଭକ୍ତିନିବଦ୍ଧାଃ କଵିକୁଲଭର୍ତୁଃ ॥ ୫୭୫॥
॥ ଚତୁର୍ଥଃ ସୁମୁଖୀପାଦଃ ॥
ଅଜିତମିନାଗ୍ନିତଟିଚ୍ଛଶିଭିଃ ମମ ହୃଦଯସ୍ଯ ତମଃ ପ୍ରବଲମ୍ ।
ଅମରପତିପ୍ରମଦାହସିତଂ ଵିମଲଘୃଣିପ୍ରକରୈର୍ହରତୁ ॥ ୫୭୬॥
ସୁରନୃପତେର୍ଦଯିତା ଵିନତାହିତଶମନୀ ଲୁଲିତାମିତରୈଃ ।
ଵରକରୁଣାଵରୁଣାଲଯଦୃଙ୍ମମ ଜନନୀମଵତାଦଵନିମ୍ ॥ ୫୭୭॥
ପଟୁତପସୋ ଜମଦଗ୍ନିମୁନେରିହ ସହଧର୍ମଚରୀଂ ଭୁଵନେ ।
ତନଯନିକୃତ୍ତଶିରଃ କମଲାଂ ଵରମତିମାଵିଶଦିନ୍ଦ୍ରଵଧୂଃ ॥ ୫୭୮॥
ଯଦୁକୁଲକୀର୍ତିଵିଲୋପଭିଯା ବତଵିନିଗୂହ୍ଯ ଋତଂ କଵଯଃ ।
ମୁନିଗୃହିଣୀ ଵଧହେତୁକଥାମିତରପଥେନ ଭଣନ୍ତି ମୃଷା ॥ ୫୭୯॥
ନ ସୁରଭିରର୍ଜୁନଭୂମିପତିର୍ଭୃଗୁତିଲକସ୍ଯ ଜହାର ସ ଯାମ୍ ।
ଇଯମମୃତାଂଶୁମନୋଜ୍ଞମୁଖୀ ପରଶୁଧରସ୍ଯ ଜନନ୍ଯନଘା ॥ ୫୮୦॥
ଅତିରଥମର୍ଜୁନଭୂମିପତିଂ ସହପୃତନଂ ଜମଦଗ୍ନିସୁତଃ ।
ଯୁଧି ସ ଵିଜିତ୍ଯ ଵିଶାଲଯଶାଃ ପୁନରପି ମାତରମାହୃତଵାନ୍ ॥ ୫୮୧॥
ପରଗୃହଵାସକଲଙ୍କଵଶାନ୍ନିଜଗୃହିଣୀଂ ଜମଦଗ୍ନିମୁନିଃ ।
ବତଵିନିହନ୍ତୁମନା କଲଯଂସ୍ତନୁଭଵମାଦିଶଦୁଗ୍ରମନାଃ ॥ ୫୮୨॥
ପିତୃଵଚନାଦତିଭକ୍ତିମତାପ୍ଯସୁରଵଦାତ୍ମସୁତେନ ହତାମ୍ ।
ମୁନିଗୃହିଣୀମନଘେତିଵଦଂସ୍ତଵ ଵରଦେଽଵିଶଦଂଶ ଇମାମ୍ ॥ ୫୮୩॥
ଇଦମଵିକମ୍ପ୍ଯମତିପ୍ରବଲଂ ପ୍ରଭଵତି କାରଣମାର୍ଯନୁତେ ।
ମୁନିଗୃହିଣୀମନଘାଂ ଭଣିତୁଂ ଶଚି କଲଯା ଯଦି ମାମଵିଶଃ ॥ ୫୮୪॥
ଖଲଜନକଲ୍ପିତଦୁଷ୍ଟକଥାଶ୍ରଵଣଵଶାଦ୍ଵ୍ଯଥିତଂ ହୃଦଯମ୍ ।
ଅଥ ଚରିତେଽଵଗତେ ଵିମଲସ୍ମୃତିଵଶତୋ ମମ ଯାତି ମୁଦମ୍ ॥ ୫୮୫॥
ତଵ ମହସା ଵିଶତା କୃପଯା ମମ ଶଚି ସୂକ୍ଷ୍ମଶରୀରମିଦମ୍ ।
ନୃପରିପୁମାତୃପଵିତ୍ରକଥା ସ୍ମରଣପଥଂ ଗମିତା ସପଦି ॥ ୫୮୬॥
ଵିଦଧତୁରାସୁରକୃତ୍ଯମୁଭୌ ବହୁଲଗୁଣାମପି ଯଦ୍ଗୃହିଣୀମ୍ ।
ସ ମୁନିରଘାତଯଦଚ୍ଛକଥାଂ ଦଶରଥଜଶ୍ଚ ମୁମୋଚ ଵନେ ॥ ୫୮୭॥
ଅପି ଵିନିକୃତ୍ତଶିରାଃ ଶଚି ତେ ଵରମହସା ଵିଶତା ସପଦି ।
ଅଲଭତ ଜୀଵିତମମ୍ବ ପୁନର୍ଭୁଵନଶୁଭାଯ ମୁନେସ୍ତରୁଣୀ ॥ ୫୮୮॥
ଯଦି ଶିରସା ରହିତେ ଵପୁଷି ପ୍ରକଟତଯା ଵିଲସନ୍ତ୍ଯସଵଃ ।
ଯଦି ହୃଦଯଂ ସହଭାତି ଧିଯା କିମିଵ ଵିଚିତ୍ରମିତଶ୍ଚରିତମ୍ ॥ ୫୮୯॥
ପରଶୁଧରସ୍ଯ ସଵିତ୍ରି କଲା ତ୍ଵଯି ପୁରୁହୂତସରୋଜଦୃଶଃ ।
ସ ଶିରସି କାଚିଦଭୂଦ୍ରୁଚିରା ଵିଶିରସି ଭୀମତମା ଭଵତି ॥ ୫୯୦॥
ପରଶୁଧରୋଽର୍ଜୁନଭୂମିପତିଂ ଯଦଜଯଦମ୍ବ ତପୋଽତ୍ର ତଵ ।
ଅଭଜତ କାରଣତାମନଘେ ଵରମୁନିଗେଯପଵିତ୍ରକଥେ ॥ ୫୯୧॥
ଭଗଵତି କୃତ୍ତଶିରୋ ଭଵତୀ ମଥିତଵତୀ ନୃପତୀନଶୁଭାନ୍ ।
ପ୍ରଥନଭୁଵି ପ୍ରଗୁଣଂ ଭୁଜଯୋଃ ପରଶୁଧରାଯ ଵିତୀର୍ଯ ବଲମ୍ ॥ ୫୯୨॥
ଶୁଭତମକୁଣ୍ଡଲପୂର୍ଵସତିଃ ପଦନତପାତକସଂଶମନୀ ।
ଦିଶତୁ ନିକୃତ୍ତଶିରାଃ କୁଶଲଂ ମମ ସୁରପାର୍ଥଵଶକ୍ତିକଲା ॥ ୫୯୩॥
ନିଜସୁତରଙ୍ଗପତେର୍ନିକଟେ କୃତଵସତିର୍ନତସିଦ୍ଧିକରୀ ।
ଦଲିତଶିରାଃ ପ୍ରତନୋତୁ ମମ ଶ୍ରିଯମମରେଶ୍ଵରଶକ୍ତିକଲା ॥ ୫୯୪॥
ଭୁଵି ତତସହ୍ଯନଗାନ୍ତରଗେ ଶୁଭତମଚନ୍ଦ୍ରଗିରୌ ଵରଦା ।
କୃତଵସତିଃ କୁରୁତାନ୍ମମ ଶଂ ଭୃଗୂକୁଲରାମଜନନ୍ଯଜରା ॥ ୫୯୫॥
ଅଵତୁ ଵିକୃତ୍ତଶିରାଃ ପଦଯୋର୍ଭଜକମନିନ୍ଦ୍ଯଵିଚିତ୍ରକଥା ।
ଦିନକରମଣ୍ଡଲମଧ୍ଯଗୃହା ସୁରଧରଣୀପତିଶକ୍ତିକଲା ॥ ୫୯୬॥
ଗଗନଚରାର୍ଚିତପାଦୁକଯା ପଦନତସନ୍ମତିବୋଧିକଯା ।
ମମ ସତତଂ ଶୁଚିରେଣୁକଯା ପରଵଦିଦଂ କୁଲମମ୍ବିକଯା ॥ ୫୯୭॥
ଶମଯିତୁମୁଗ୍ରତମଂ ଦୁରିତଂ ପ୍ରଥଯିତୁମାତ୍ମନିଗୂଢବଲମ୍ ।
ଗମଯିତୁମଗ୍ରଯ୍ଦଶାଂ ସ୍ଵକୁଲଂ ତଵ ଚରଣାମ୍ବୁଜମମ୍ବ ଭଜେ ॥ ୫୯୮॥
ପରଵଶଗାମଶିଵେନ ଵୃତାଂ ଭରତଧରାଂ ପରିପାତୁମିମାମ୍ ।
ପଟୁମତିଵାକ୍କ୍ରିଯମାତନୁତାଦ୍ଗଣପତିମଭ୍ରହଯପ୍ରମଦା ॥ ୫୯୯॥
ଗଣପତିଦେଵମର୍ମହୋଂଶଜୁଷୋ ଗଣପତିନାମକଵିପ୍ରକଵେଃ ।
ସୁରପତିଜୀଵସଖୀଶୃଣୁଯାଦ୍ଦଶଶତପତ୍ରମୁଖୀ ସୁମୁଖୀଃ ॥ ୬୦୦॥
॥ ଷଷ୍ଠଂ ତ୍ରୈଷ୍ଟୁଭଂ ଶତକଂ ସମାପ୍ତମ୍ ॥
॥ ଅଥ ସପ୍ତମଂ ଜାଗତଂ ଶତକମ୍ ॥
॥ ପ୍ରଥମୋ ଦ୍ରୁତଵିଲମ୍ବିତପାଦଃ ॥
ସୁରମହୀରମଣସ୍ଯ ଵିଲାସିନୀ ଜଲଚରଧ୍ଵଜଜୀଵିତଦାଯିନୀ ।
ହରତୁ ବୋଧଦୃଗାଵରଣଂ ତମୋ ହୃଦଯଗଂ ହସିତେନ ସିତେନ ମେ ॥ ୬୦୧॥
ନମଦମର୍ତ୍ଯକିରୀଟକୃତୈଃ କିଣୈଃ କମଠପୃଷ୍ଠନିଭେ ପ୍ରପଦେଽଙ୍କିତା ।
ପରିଧୁନୋତୁ ଶଚୀ ଭରତକ୍ଷିତେର୍ଵୃଜିନଜାଲମଜାଲମକମ୍ପନମ୍ ॥ ୬୦୨॥
ଅତିତରାଂ ନତପାଲନଲୋଲଯା ଵିବୁଧନାଥମନୋହରଲୀଲଯା ।
କିରିମୁଖୀମୁଖଶକ୍ତ୍ଯୁପଜୀଵ୍ଯଯା ଵିଦିତଯାଦିତଯା ଗତିମାନହମ୍ ॥ ୬୦୩॥
ଘନହିରଣ୍ଯମଦାପହରୋଚିଷା ଵନରୁହାନନଯାଽଵନଦକ୍ଷଯା ।
ଗତିମଦିନ୍ଦ୍ରମନୋରଥନାଥଯା ଭୁଵନମେଵ ନ ମେ କୁଲମାତ୍ରକମ୍ ॥ ୬୦୪॥
ତନୁଷୁ ଵାମନମୂର୍ତିଧରେ ଵିଭୌ ତମନୁଯାଚ ଵିରାଜତି ଵାମନୀ ।
ଶରଣଵାନନଯାମ୍ବିକଯା ଲସତ୍ କରୁଣଯାଽରୁଣଯା ପଦଯୋରହମ୍ ॥ ୬୦୫॥
ସକରୁଣା କୁଶଲଂ ମମ ରେଣୁକାତନୁରଜା ତନୁତାଦୁଦିତୋ ଯତଃ ।
ଯୁଧି ମୁନିର୍ଵିଦଧୌ ପରଶୁଂ ଦଧଜ୍ଜନପତୀନପତୀଵ୍ରଭୁଜାମଦାନ୍ ॥ ୬୦୬॥
ସୁଜନଶତ୍ରୁରମାଥି ଘନଧ୍ଵନିଃ ଶଚି ସରାତ୍ରିଚରସ୍ତଵ ତେଜସା ।
ଜନନି ରାମସହୋଦରସାଯକଂ ପ୍ରଵିଶତାଽଵିଶତାଦଧିକୌଜସା ॥ ୬୦୭॥
ତଵ ମହଃକଲଯାବଲମାପ୍ତଯା ଜନନି ଶୁମ୍ଭନିଶୁମ୍ଭମଦଚ୍ଛିଦା ।
ଜଗଦରକ୍ଷ୍ଯତ ଗୋପକୁଲେଶିତୁସ୍ତନୁଜଯାଽନୁଜଯାର୍ଜୁନସାରଥେଃ ॥ ୬୦୮॥
ନ ଵିନିରୂପଯିତୁଂ ପ୍ରବଭୂଵ ଯାଂ କଵିଜନୋ ଵିଵିଧଂ କଥଯନ୍ନପି ।
ମୁନିହୃଦମ୍ବୁଜସୌଧତଲେନ୍ଦିରା ଜଯତି ସା ଯତିସାଧୁଜନାଵନୀ ॥ ୬୦୯॥
ଇମମଯି ତ୍ରିଦିଵେଶ୍ଵରି କଲ୍କିନଂ ରୁଷମପୋହ୍ଯ ସଵିତ୍ରି ଵିଲୋକିତୈଃ ।
ସୁରପତେର୍ଦ୍ଵିଷତୋଽଘଵତୋ ଲସନ୍ ମଦନକୈରଵକୈରଵଲୋଚନେ ॥ ୬୧୦॥
ସ୍ମରଦମର୍ତ୍ଯନୃପାଲଵିଲାସିନୀଂ ପ୍ରବଲପାତକଭୀତିଵିନାଶିନୀମ୍ ।
ପ୍ରଵଣଯାନ୍ତରନନ୍ଯଧିଯା ଲସଦ୍ଵିନଯଯାନଯଯାମଵତୀର୍ମନଃ ॥ ୬୧୧॥
ଭଗଵତୀଗଗନସ୍ଥଲଚାରିଣୀ ଜଯତି ସଙ୍ଗରରଙ୍ଗଵିହାରିଣୀ ।
ସୁକୃତଶତ୍ରୁମତିଭ୍ରମକାରିଣୀ ହରିହଯାରିହଯାଦିଵିଦାରିଣୀ ॥ ୬୧୨॥
ଶରଣଵାନହମର୍ଜୁନହାସଯା ଭୁଵନଭୂପତିହାରିଵିଲାସଯା ।
ଦିଵି ପୁଲୋମଜଯା ଧଵଲାଚଲେ ଗିରିଜଯାଽରିଜଯାଵିତଦେଵଯା ॥ ୬୧୩॥
ଚରଣଯୋର୍ଧୃତଯା ଵିଜଯାମହେ ଵଯମଶେଷଜଗନ୍ନୃପଜାଯଯା ।
ଦିଵି ପୁଲୋମଜଯା ଧଵଲାଚଲେ ନଗଜଯା ଗଜଯାନଵିଲାସଯା ॥ ୬୧୪॥
ଅରିଵଧାଯ ଵିଧାଯ ବୁଧାଧିପଂ ପଟୁଭୁଜାବଲଭୀଷଣମାଜିଷୁ ।
ନ ଭଵତୀ ଶଚି ଗଚ୍ଛତି ଦୁର୍ଗତଃ କ୍ଵଚନ କାଚନ କାତରଧୀରିଵ ॥ ୬୧୫॥
ସପଦି ମାନସଧୈର୍ଯହୃତୋ ଜଗଜ୍ଜନନି ଵଜ୍ରତନୋର୍ଜ୍ଵଲିତାର୍ଚିଷଃ ।
ଅରିଜନେ ପ୍ରଥମଂ ତଵ ଵୀକ୍ଷଯା ସୁରପତେରପତେଜସି ଵି କ୍ରମଃ ॥ ୬୧୬॥
ନ ମନନୋଚିତମସ୍ତି ପରଂ ନୃଣାଂ ଵିବୁଧରାଜଵଧୂପଦପଦ୍ମତଃ ।
ଜଗତି ଦର୍ଶନଯୋଗ୍ଯମିହାପରଂ ନ ରମଣୀ ରମଣୀଯମୁଖାବ୍ଜତଃ ॥ ୬୧୭॥
ଶରଣଵାନହମସ୍ମି ପୁରାତନପ୍ରମଦଯା ମୁନିଗେଯଚରିତ୍ରଯା ।
ସ୍ଵବଲଚାଲିତନାକଜଗନ୍ନଭୋ ଵସୁଧଯା ସୁଧଯା ସୁରରାଡ୍ଦୃଶାମ୍ ॥ ୬୧୮॥
ଅଯମହଂ ଗତିମାନତିଶାନ୍ତଯା ତ୍ରିଦିଵଭୂମିପତିପ୍ରିଯକାନ୍ତଯା ।
ମନସି ମୌନିଜନୈରତିଭକ୍ତିତୋ ନିହିତଯା ହିତଯା ସୁକୃତାତ୍ମନାମ୍ ॥ ୬୧୯॥
ଵିନଯତଃ ସ୍ତୁତଯା ଗମଯାମ୍ଯହଂ ଜନିମତାଂ ଜନଯିତ୍ରି ନିଶାସ୍ତ୍ଵଯା ।
ପ୍ରସୃତଯା କୁଲକୁଣ୍ଡଧନଞ୍ଜଯାଦ୍ଧୃତତନୂତତନୂତନଵେଗଯା ॥ ୬୨୦॥
ସକୃଦମୋଘସରସ୍ଵତିସାଧୁଧୀ ହୃଦଯଵେଦ୍ଯପଦାମ୍ବୁଜସୌଷ୍ଠଵେ ।
ମମ ଶିଵଂ ସୁମନଃ ପୃଥିଵୀପତେଃ ସୁଵଦନେ ଵଦ ନେତ୍ରଲସଦ୍ଦଯେ ॥ ୬୨୧॥
ଦୁରଵଗାହପଥେ ପତିତଂ ଚିରାଜ୍ଜନନି ଗମ୍ଯଵିଲୋକନଲାଲସମ୍ ।
ସ୍ଵଯମମର୍ତ୍ଯନୃପାଲମନୋରମେ ସୁନଯନେ ନଯନେଯମିମଂ ଜନମ୍ ॥ ୬୨୨॥
ଅଵତୁ ନଃ ସ୍ଵଯମେଵ ପଟୂନ୍ ଵିପଦ୍ଵିମଥନାଯ ଵିଧାଯ ବୁଧେଶ୍ଵରୀ ।
ସକଲମର୍ମସୁଵୀତଦଯୈଃ ପରୈର୍ଵିନିହତାନିହ ତାପଵତଃ ଶଚୀ ॥ ୬୨୩॥
ସୁରଧରାପତିଜୀଵିତନାଥଯା ସ୍ଵଜନନକ୍ଷିତିରକ୍ଷଣକର୍ମଣି ।
ପଟୁତମୋ ଜନ ଏଷ ଵିଧୀଯତାମିହ ତଯା ହତଯା ତୁ ସମୂହଯା ॥ ୬୨୪॥
ଗଣପତେଃ ଶୃଣୁଯାଦିମମୁଜ୍ଵଲଂ ଦ୍ରୁତଵିଲମ୍ବିତଵୃତ୍ତଗଣଂ ଶଚୀ ।
ସଲିଲରାଶିସୁତାଭଵନୀଭଵଦ୍ଭୁଵନପାଵନପାଦସରୋରୁହା ॥ ୬୨୫॥
॥ ଦ୍ଵିତୀଯୋ ଜଲୋଦ୍ଧତଗତିପାଦଃ ॥
ହରିତ୍ସୁ ପରିତଃ ପ୍ରସାଦମଧିକଂ ଦଧାନମମଲତ୍ଵିଷାଂ ପ୍ରସରଣୈଃ ।
ମହେନ୍ଦ୍ରମହିଲାଵିଲାସହସିତଂ ମଦନ୍ତରତମୋ ଧୁନୋତୁ ଵିତତମ୍ ॥ ୬୨୬॥
ପ୍ରସୂସ୍ତ୍ରିଜଗତଃ ପ୍ରିଯା ମଘଵତଃ କୃପାକଲିତଯା କଟାକ୍ଷକଲଯା ।
ନିତାନ୍ତମଗତେର୍ଵିକୁଣ୍ଠିତମତେର୍ଧୁନୋତୁ ଭରତକ୍ଷିତେରକୁଶଲମ୍ ॥ ୬୨୭॥
ପୁରା ଶଚି ମତିସ୍ତ୍ଵମୀଶିତୁରଥୋ ନଭସ୍ତନୁମିତା ପୃଥଙ୍ମତିମତୀ ।
ଅନନ୍ତରମଭୂଃ ସରୋଜନଯନା ତନୁଃ ସୁରପତେର୍ଵିଲୋଚନସୁଧା ॥ ୬୨୮॥
ପରତ୍ର ଵିଗୁଣା ସତୋଽସି ଧିଷଣା ନଭସ୍ତନୁରିହ ପ୍ରପଞ୍ଚମଵସି ।
ଅସି ସ୍ଵରବଲା ପ୍ରିଯା ସୁରପତେରିଯତ୍ତଵ ଶଚି ସ୍ଵରୂପକଥନମ୍ ॥ ୬୨୯॥
ପ୍ରଜାପତିପଦେ ପୁରାଣପୁରୁଷେ ସ୍ମୃତା ତ୍ଵମଦିତିଃ ସୁରାସୁରନୁତେ ।
ଜନାର୍ଦନପଦେ ରମାସି ପରମେ ସଦାଶିଵପଦେ ଶିଵା ତ୍ଵମଜରେ ॥ ୬୩୦॥
ଉଷା ଇନପଦେ ସ୍ଵଧାଽନଲପଦେ ପୁରନ୍ଦରପଦେ ତ୍ଵମୀଶ୍ଵରି ଶଚୀ ।
ଯଥା ରୁଚିଵିଦୁଃ ପଦାନି କଵଯଶ୍ଚିତୈଶ୍ଚ ଚିତିମାନ୍ଯୁଵାମୃଜୁଗିରା ॥ ୬୩୧॥
ଅମେଯମମଲଂ ପୁରାଣପୁରୁଷଂ ତଦୀଯଵିଭଵାଭିଧାଯିଭିରିମେ ।
ଵଦନ୍ତି କଵଯଃ ପଦୈର୍ବହୁଵିଧୈସ୍ତଥୈଵ ଭଵତୀଂ ତତୋ ମତଭିଦାଃ ॥ ୬୩୨॥
ନଭଶ୍ଚ ପଵନଃ ସ୍ଵରଶ୍ଚ ପରମସ୍ତଟିଚ୍ଚ ଵିତତା ପତିଶ୍ଚ ମହସାମ୍ ।
ସୁଧାଂଶୁରନଲୋ ଜଲଂ ଚ ପୃଥିଵୀ ସଵିତ୍ରି ଯୁଵଯୋର୍ଵିଭୂତିପଟଲୀ ॥ ୬୩୩॥
ଅପାରବହୁଲପ୍ରମୋଦଲହରୀ ସତଃ କିଲଚିତିଃ ପରତ୍ର ଵିତତା ।
ପୁନର୍ଵିଯଦିଦଂ ପରୀତ୍ଯ ନିଖିଲଂ ଜଗନ୍ତି ଦଧତୀ ପରା ଵିଜଯତେ ॥ ୬୩୪॥
ନ ଯଦ୍ଯପି ପରାତ୍ପରେ ନଭସି ତେ ସରୋଜନଯନା ଵପୁଃ ପୃଥଗଜେ ।
ତଥାପି ନମତାଂ ମତୀରନୁସରନ୍ତ୍ଯମେଯଵିଭଵେ ଦଧାସି ଚ ତନୂଃ ॥ ୬୩୫॥
ସହ ତ୍ରିଭୁଵନପ୍ରପାଲନକୃତା ସମସ୍ତମରୁତାଂ ଗଣସ୍ଯ ଵିଭୁନା ।
ସଦା ଶଶିମୁଖୀ ଶରୀରଭୃଦଜା ଜଗତ୍ଯଦୁରିତେ ଶଚୀ ଵିଜଯତେ ॥ ୬୩୬॥
କୁଲଂ ବହୁଭିଦଂ ବଲଂ ନ ଭୁଜଯୋଃ କଥଂ ନୁ ଵିପଦସ୍ତରେମ ଭରତାଃ ।
ସମର୍ଥମଧୁନା ଵିପଦ୍ଵିଧୁତଯେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୩୭॥
ସମସ୍ତମପି ଚ ସ୍ଵଦେଶଵିଦୁଷାଂ ଵିଧାନପଟଲଂ ବଭୂଵ ଵିଫଲମ୍ ।
ଅଭାଗ୍ଯଦମନକ୍ଷମଂ ତଦଧୁନା ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୩୮॥
ନିଜୋ ମମ ଜନୋ ନିତାନ୍ତମଗତିର୍ନ କୁକ୍ଷିଭରଣେଽପ୍ଯଯଂ ପ୍ରଭଵତି ।
ମହେଶ୍ଵରି କୃପାମରନ୍ଦମଧୁନା ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୩୯॥
ଅଦୃଷ୍ଟକନକଂ କୁଲଂ ମମ ଚିରାନ୍ନିରାଯୁଧମିଦଂ ନିରାଶମଭିତଃ ।
ସ୍ଵଭାଵତ ଇଵ ପ୍ରବଦ୍ଧମଭଵତ୍ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୦॥
ଅଵୀରଚରିତଂ ଵିପାଲକକଥଂ ନିରାର୍ଷଵିଭଵଂ ଚିରାନ୍ମମ କୁଲମ୍ ।
ଇଦଂ ମମ ମନୋ ନିକୃନ୍ତତି ମୁହୁସ୍ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୧॥
ଚିରାତ୍ସ୍ମୃତିପଥାଦପି ଚ୍ଯୁତମଜେ ତପୋବଲଭଵଂ ତମାର୍ଷଵିଭଵମ୍ ।
ସ୍ଵଦେଶମଧୁନା ପୁନର୍ଗମଯିତୁଂ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୨॥
ହତଂ ଚ ଵିହତଂ ଧୁତଂ ଚ ଵିଧୁତଂ ରୁଦନ୍ତମଭିତୋ ଵିଶିଷ୍ଟକରୁଣେ ।
ଇମଂ ସ୍ଵଵିଷଯଂ ଶିଵଂ ଗମଯିତୁଂ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୩॥
କ୍ଷଯାଯ ସୁକୃତଦ୍ଵିଷାଂ ଵିହରତାଂ ଶିଵାଯ ଚ ସତାଂ ପ୍ରପଞ୍ଚସୁହୃଦାମ୍ ।
ନିଜସ୍ଯ ମନସୋ ବଲାଯ ଚ ପରେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୪॥
ଜଯତ୍ସୁ ସୁକୃତଂ ଦ୍ଵିଷତ୍ସୁ ପରିତଃ ସତାମପି କୁଲେ ବଲେନ ରହିତେ ।
ଖଲପ୍ରିଯଯୁଗେ କଲୌ ପରିଣତେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୫॥
ଅଭାତି ସୁକୃତେ ନିଗୂଢଵିଭଵେ ଵିଭାତି ଦୁରିତେ ଫଲାନି ଦିଶତି ।
ଵିଧାନଵିକଲେ ମନସ୍ଯଭଯଦେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୬॥
ପଟୌ ପ୍ରତିଭଟେ ଗଦେ ପ୍ରତିଭଯେ ନତାଵନଵିଧାଵତୀଵ ନିପୁଣମ୍ ।
ସୁପର୍ଵଭୁଵନକ୍ଷିତୀଶଦଯିତେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୭॥
ଅମର୍ତ୍ଯପଟଲୀକିରୀଟମଣିଭାଭୁଜଙ୍ଗକିରଣଂ ନିତାନ୍ତମରୁଣମ୍ ।
ଵିପତ୍ତିଦମନଂ ତମଃ ପ୍ରଶମନଂ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୮॥
ଵିନଷ୍ଟଵିଭଵାମିମାଂ ପୁନରପି ଶ୍ରିଯାଵିଲସିତାଂ ଵିଧାତୁମଜରେ ।
ସ୍ଵଜନ୍ମପୃଥିଵୀଂ ସ୍ଵରୀଶଦଯିତେ ଦିଶେର୍ଗଣପତେଃ କରାଯ ପଟୁତାମ୍ ॥ ୬୪୯॥
ସୁପର୍ଵଵସୁଧାଧିନାଥସୁଦୃଶୋ ଜଲୋଦ୍ଧତଗତିସ୍ତଵୋଽଯମନଘଃ ।
କୃତିର୍ଗଣପତେଃ କରୋତୁ ଵିଧୁତିଂ ଭଯସ୍ଯ ଭରତକ୍ଷମାତଲଜୁଷାମ୍ ॥ ୬୫୦॥
॥ ତୃତୀଯଃ ପ୍ରମିତାକ୍ଷରପାଦଃ ॥
ଉଦିତଂ ମହେନ୍ଦ୍ରମହିଲାଵଦନେ ପ୍ରସୃତଂ କରୈର୍ଦିଶି ଦିଶି ପ୍ରଗୁଣୈଃ ।
ଅହିତଂ ତମଃ ପ୍ରଶମଯଦ୍ଯମିନାଂ ହସିତଂ କରୋତୁ ମମ ଭୂରି ଶିଵମ୍ ॥ ୬୫୧॥
ଭରତକ୍ଷିତେସ୍ତିମିରମାଶୁ ହରତ୍ଵରିଚାତୁରୀକୃତଵିମୋହମତେଃ ।
ରଵିଲକ୍ଷତୋଽପ୍ଯଧିକମଂଶୁମତୀ ପଵିପାଣିଚିତ୍ତଦଯିତା ଵନିତା ॥ ୬୫୨॥
ଶଶିଲକ୍ଷଶୀତଲକଟାକ୍ଷସୁଧା ତରୁଣାର୍କକୋଟିରୁଚିପାଦଯୁଗା ।
ହୃଦି ମେ ଵିଭାତୁ ମୁନିଗେଯଗୁଣା ଵିବୁଧେନ୍ଦ୍ରଚିତ୍ତରମଣୀ ତରୁଣୀ ॥ ୬୫୩॥
କମନୀଯଦୀପ୍ତସୁକୁମାରତନୁର୍ମନନୀଯପାଵନପଦାମ୍ବୁରୁହା ।
ଵିଦଧାତୁ ମେ ଶିଵମସଦ୍ଵିମୁଖୀ ଵିବୁଧେନ୍ଦ୍ରଜୀଵିତସଖୀ ସୁମୁଖୀ ॥ ୬୫୪॥
ଅନୁମାନମୂଢପିତୃଵାକ୍ଯଵଶାତ୍ତନଯେନ ଦେଵି ଵିନିକୃତ୍ତଶିରାଃ ।
ତଵ ରେଣୁକା ଵିଲସିତା କଲଯା ଗଣନୀଯଶକ୍ତିରଭଵଦ୍ଦଶସୁ ॥ ୬୫୫॥
ସକଲାମଯପ୍ରଶମନଂ ଦୁରିତକ୍ଷଯକାରିକାଙ୍କ୍ଷିତକରଂ ଚ ଭଵେତ୍ ।
ସୁରସୁନ୍ଦରୀ ଜନସମର୍ଚତଯୋର୍ହୃଦି ରେଣୁକାଚରଣଯୋଃ କରଣମ୍ ॥ ୬୫୬॥
ଵିନିହନ୍ତି ପାପପଟଲଂ ସ୍ମରଣାଦ୍ଵିଧୁନୋତି ରୋଗନିଵହଂ ଭଜନାତ୍ ।
ଵିଦଘାତି ଵାଞ୍ଛିତତଫଲଂ ସ୍ତଵନାନ୍ମନୁଜସ୍ଯ ରାମଜନନୀ ଚରଣମ୍ ॥ ୬୫୭॥
ଶରଣଂ ଵ୍ରଜାମି ନଵରଵ୍ଯରୁଣଂ ଚରଣଂ ତଵାମ୍ବ ନୃପଜାତିରିପୋଃ ।
ଭରତକ୍ଷିତେରଵନତଃ ପ୍ରଥମଂ ମରଣଂ ମମେହ ନ ଭଵତ୍ଵଧମମ୍ ॥ ୬୫୮॥
ସ୍ମରଣଂ ଚିରାଦଵିରତଂ ଵିଦଧଚ୍ଚରଣସ୍ଯ ତେ ତରୁଣଭାନୁରୁଚଃ ।
ଅଯମସ୍ତୁ ରାମଜନଯିତ୍ରିପଟୁଃ ସୁରକାର୍ଯମାର୍ଯଵିନୁତେ ଚରିତୁମ୍ ॥ ୬୫୯॥
ଅଵ ଭାରତକ୍ଷିତିମମୋଘଦଯେ କରଣଂ ଭଵତ୍ଵିହ ତଵୈଷ ଜନଃ ।
ନିଜଯୋଃ ସଵିତ୍ରି ଚରଣାମ୍ବୁଜଯୋର୍ନ ଵିହାତୁମର୍ହସି ଚିରାଦ୍ଭଜକମ୍ ॥ ୬୬୦॥
ଅଵିଶସ୍ତ୍ଵମିନ୍ଦ୍ରଦଯିତେ କିଲତାମପି ଯଜ୍ଞସେନତନଯାଂ କଲଯା ।
ଅନଘଵ୍ରତାସୁ କଵଯଃ ପ୍ରଥମାଂ ପ୍ରଵଦନ୍ତି ଯାଂ ବହୁଲଵନ୍ଦ୍ଯଗୁଣାମ୍ ॥ ୬୬୧॥
ଭୁଵି ଭାରତଂ ପଠତି ଯଃ ସୁକୃତୀ କଲୁଷଂ ଧୁନୋତି ସକଲଂ କିଲ ସଃ ।
ଇଯମମ୍ବ ଶକ୍ତିକୁଲରାଜ୍ଞି ତଵ ଦ୍ରୁପଦସ୍ଯ ନନ୍ଦିନି କଥାମହିମା ॥ ୬୬୨॥
ଅଭିମନ୍ଯୁମାତରମନଲ୍ପଗୁଣାମତିଲଙ୍ଘ୍ଯ ଚୈକ୍ଷତ ହରିର୍ଭଵତୀମ୍ ।
ଅତିସୌହୃଦେନ ଯଦିହାର୍ଯନୁତେ ତଵ ହେତୁରୀଡ୍ଯତମଶକ୍ତିକଲା ॥ ୬୬୩॥
ଗୃହକାର୍ଯତନ୍ତ୍ରଚତୁରା ଗୃହୀଣୀ ସକଲୀନ୍ଦ୍ରିଯାମୃତଝରୀ ରମଣୀ ।
ଵରନୀତିମାର୍ଗକଥନେ ସଚିଵୋଽପ୍ଯଭଵସ୍ତ୍ଵମମ୍ବ କୁରୁ ଵଂଶଭୃତାମ୍ ॥ ୬୬୪॥
ନ ଯୁଧିଷ୍ଠିରସ୍ଯ ଵରଘୋରତପୋ ନ ଧନଞ୍ଜଯସ୍ଯ ପଟୁ ବାହୁବଲମ୍ ।
ଅରିସଙ୍କ୍ଷଯଂ କୃତଵତୀ ବହୁଲଂ ତଵ ଵେଣିକାଽପଚରିତା ଫଣିନୀ ॥ ୬୬୫॥
ଅସିତାପି କାନ୍ତିଵସତିର୍ମହତୀ ଵନିତାଜନସ୍ଯ ଚ ଵିମୋହକରୀ ।
କୁଶଲଂ ମମାଭ୍ରପତିଶକ୍ତିକଲା ଦ୍ରୁପଦକ୍ଷିତୀନ୍ଦ୍ରଦୁହିତା ଦିଶତୁ ॥ ୬୬୬॥
ଶିରସା ସମସ୍ତଜନପାପଭରଂ ଵହତୋ ଭଵାଯ ଭୁଵି ଯାମଵୃଣୋତ୍ ।
ଅମରାଧିପଃ ପତିତପାଵନି ତାଂ ଭୁଵି କନ୍ଯକାଂ ତଵ ଵିଵେଶ କଲା ॥ ୬୬୭॥
କଲଯା ତଵାତିବଲଯା କଲିତା ପୁରୁଷସ୍ଯ ଯୋଗମଖିଲାମ୍ବ ଵିନା ।
ଅଖିଲେଶ୍ଵରପ୍ରହିତତେଜ ଇଯଂ ସୁତଜନ୍ମନେ କିଲ ଦଧାଵନଘା ॥ ୬୬୮॥
ସୁରରକ୍ଷକସ୍ଯ ମଦଯିତ୍ରି ଦୃଶାଂ ନରରକ୍ଷକସ୍ଯ ଜନଯିତ୍ରି ପରେ ।
କୁଲରକ୍ଷଣାଯ କୃତବୁଦ୍ଧିମିମଂ କୁରୁ ଦକ୍ଷମଦ୍ଭୁତପଵିତ୍ରକଥେ ॥ ୬୬୯॥
ମୁମୁଚୁଃ କୁଲେ ମମ ସୁପର୍ଵପତେସ୍ତଵ ଚାଭିଧେଯମିହ ମନ୍ଦଧିଯଃ ।
ଅପରାଧମେତମତିଘୋରତରଂ ଜନନି କ୍ଷମସ୍ଵ ମମ ଵୀକ୍ଷ୍ଯ ମୁଖମ୍ ॥ ୬୭୦॥
ଇହ ଶାରଦେତି ଯତିଭିର୍ଵିନୁତା ପ୍ରଥିତା ସୁରେଶ୍ଵରମନୋଦଯିତା ।
ଭୁଵି ଭାତି କୀର୍ତିଵପୁଷା ଶଚି ଯା ସୁକଥାପି ସା ତଵ ସଵିତ୍ରି କଲା ॥ ୬୭୧॥
ଅରୁଣାଚଲେଶ୍ଵରଦରୀଵସତେସ୍ତପତୋ ମୁନେର୍ଗଣପତେଃ କୁଶଲମ୍ ।
ଵିଵିଧାଵତାରଵିଲସଚ୍ଚରିତା ଵିତନୋତୁ ସା ଵିବୁଧରାଡ୍ଵନିତା ॥ ୬୭୨॥
ଅରୁଣାଚଲସ୍ଯ ଵରକନ୍ଦରଯା ପ୍ରତିଘୋଷିତଂ କଲୁଷହାରି ଯଶଃ ।
ଵିବୁଧାଧିନାଥରମଣୀ ଶୃଣୁଯାଦ୍ଗଣନାଥଗୀତମତିଚାରୁନିଜମ୍ ॥ ୬୭୩॥
ଭରତକ୍ଷିତେଃ ଶୁଭଵିଧାଯିଷୁ ସା ଵିବୁଧକ୍ଷିତୀଶଦଯିତା ଦଯଯା ।
ଧନଶକ୍ତିବନ୍ଧୁବଲହୀନମପି ପ୍ରଥମଂ କରୋତୁ ଗଣନାଥମୁନିମ୍ ॥ ୬୭୪॥
ମୁଦିତାମିମା ଵିଦଧତୁ ପ୍ରମଦାଂ ତ୍ରିଦିଵାଧିପସ୍ଯ ନିପୁଣଶ୍ରଵଣାମ୍ ।
ଅମିତପ୍ରକାଶଗୁଣଶକ୍ତିମଜାଂ ପ୍ରମିତାକ୍ଷରାଃ ସୁକଵିଭୂମିପତେଃ ॥ ୬୭୫॥
॥ ଚତୁର୍ଥସ୍ତାମରସପାଦଃ ॥
ଦିଶତୁ ଶିଵଂ ମମ ଚନ୍ଦ୍ରଵଲକ୍ଷସ୍ତିମିରସମୂହନିଵାରଣଦକ୍ଷଃ ।
କୃତଗତିରୋଧକପାତକନାଶଃ ସୁରଧରଣୀଶଵଧୂସ୍ମିତଲେଶଃ ॥ ୬୭୬॥
ଅଵିଦିତମାର୍ଗତଯାତିଵିଷଣ୍ଣାଂ ଗତିମପହାଯ ଚିରାଯ ନିଷଣ୍ଣାମ୍ ।
ଭରତଧରାମନିମେଷଧରତ୍ରୀ ପତିଗୃହିଣୀ ପରିପାତୁ ସଵିତ୍ରୀ ॥ ୬୭୭॥
ଭୁଵନମିଦଂ ଭଵତଃ କିଲ ପୂର୍ଵଂ ଯଦମଲରୂପମନାକୃତିସର୍ଵମ୍ ।
ପ୍ରକୃତିରିଯଂ କୁରୁତାଦଦରିଦ୍ରାମତିମତିଶାତତରାଂ ମମ ଭଦ୍ରା ॥ ୬୭୮॥
ସୃଜତି ଜଗନ୍ତି ଵିଭୌ ପରମେ ଯା ସୁବହୁଲଶକ୍ତିରରାଜତ ମାଯା ।
ପ୍ରଦିଶତୁ ସା ମମ କଞ୍ଚନ ଯୋଗଂ ଝଟିତି ନିରାକୃତମାନସରୋଗମ୍ ॥ ୬୭୯॥
ପ୍ରତିଵିଷଯଂ ଵିକୃତୀତର ସତ୍ତା ଵିଲସତି ଯା ମତିମଦ୍ଭିରୁପାତ୍ତା ।
ଇଯମନଘା ପରିପାଲିତଜାତିଂ ଵିତରତୁ ମେ ଵିଵିଧାଂ ଚ ଵିଭୂତିମ୍ ॥ ୬୮୦॥
ପ୍ରତିଵିଷଯଗ୍ରହଣଂ ପରିପୂତାମତିରଖିଲସ୍ଯ ଜନସ୍ଯ ଚ ମାତା ।
ମମ ଵିଦଧାତୁ ଶୁଭଂ ଶୁଭନାମା ତ୍ରିଦିଵନିଵାସିନରେଶ୍ଵରରାମା ॥ ୬୮୧॥
ଗଗନତନୁର୍ଜଗତୋ ଵିପୁଲସ୍ଯ ପ୍ରଭୁପଦମଗ୍ରଯ୍ମିତା ସକଲସ୍ଯ ।
ପ୍ରତିଜନଦେହମଜା ପ୍ରଵହନ୍ତୀ ମମ ହୃଦି ନନ୍ଦତୁ ସା ଵିହରନ୍ତୀ ॥ ୬୮୨॥
ପଟୁକୁଲକୁଣ୍ଡଧନଞ୍ଜଯକୀଲା ସମୁଦିତହାର୍ଦଵିଭାକରଲୀଲା ।
ଦ୍ରୁତଶିର ଇନ୍ଦୁକଲାମୃତଧାରା ଜନମଵତାନ୍ନିଜଭକ୍ତମୁଦାରା ॥ ୬୮୩॥
ଵିଷଯସମାକୃତିରତ୍ର ପୁରସ୍ତାଦ୍ଵିମଲତମା କିଲ ତତ୍ର ପରସ୍ତାତ୍ ।
ଭୁଵନମଯୀ ଭୁଵନାଚ୍ଚ ଵିଭକ୍ତାମତିରନଘାଽଵତୁ ମାମତିଶକ୍ତା ॥ ୬୮୪॥
ଵିଷଯପରିଗ୍ରହଣେଷ୍ଵତିସକ୍ତା ଵିଷଯଵିଭୂତିଷୁ କାପି ଵିଵିକ୍ତା ।
ଅଖିଲପତେର୍ମଯି ଦୀଵ୍ଯତୁ ଶକ୍ତିର୍ଵିମଲତମା ଵିଧୁତେତରଶକ୍ତିଃ ॥ ୬୮୫॥
ଦୃଶି ଦୃଶି ଭାତି ଯଦୀଯମପାପଂ ଦିଶି ଦିଶି ଗନ୍ତୃ ଚ ଵେତ୍ତୃ ଚ ରୂପମ୍ ।
ଭଵତୁ ଶିଵାଯ ମମେଯମନିନ୍ଦ୍ଯା ଭୁଵନପତେର୍ଗୃହିଣୀ ମୁନିଵନ୍ଦ୍ଯା ॥ ୬୮୬॥
ଜଡକୁଲକୁଣ୍ଡଦରୀଷୁ ଶଯାନା ବୁଧକୁଲଵହ୍ନିଷୁ ଭୂରିଵିଭାନା ।
ହରିହଯଶକ୍ତିରମେଯଚରିତ୍ର ମମ କୁଶଲଂ ଵିଦଧାତୁ ପଵିତ୍ର ॥ ୬୮୭॥
ଦହରଗତାଖିଲମାକଲଯନ୍ତୀ ଦ୍ଵିଦଲଗତା ସକଲଂ ଵିନଯନ୍ତୀ ।
ଦଶଶତପତ୍ରଗତା ମଦଯନ୍ତୀ ଭଵତୁ ମଯୀନ୍ଦ୍ରଵଧୂର୍ଵିଲସନ୍ତୀ ॥ ୬୮୮॥
ଗୃହଯୁଗଲୀଶ୍ରିଯ ଆଶ୍ରିତଗମ୍ଯା ପଦକମଲଦ୍ଵିତଯୀ ବହୁରମ୍ଯା ।
ମମ ହୃଦି ଭାତ୍ଵଵିକୁଣ୍ଠିତଯାନା ହରିସୁଦୃଶସ୍ତରୁଣାରୁଣଭାନା ॥ ୬୮୯॥
ଉପରି ତତା କୁଲକୁଣ୍ଡନିଶାନ୍ତାଜ୍ଜ୍ଵଲିତଧନଞ୍ଜଯଦୀଧିତିକାନ୍ତାତ୍ ।
ହରିହଯଶକ୍ତିରିଯଂ ମମ ପୁଷ୍ଟା ଦ୍ରଵଯତୁ ମସ୍ତକଚନ୍ଦ୍ରମଦୁଷ୍ଟା ॥ ୬୯୦॥
ନଭସି ଵିରାଜତି ଯା ପରଶକ୍ତିର୍ମମ ହୃଦି ରାଜତି ଯା ଵରଶକ୍ତିଃ ।
ଉଭଯମିଦଂ ମିଲିତଂ ବହୁଵୀର୍ଯଂ ଭଵତୁ ସୁଖଂ ମମ ସାଧିତକାର୍ଯମ୍ ॥ ୬୯୧॥
ତ୍ରିଭୁଵନଭୂମିପତେଃ ପ୍ରିଯଯୋଷା ତ୍ରିମଲହରୀ ସୁରଵିଷ୍ଟପଭୂଷା ।
ମମ ଵିତନୋତୁ ମନୋରଥପୋଷଂ ଦୁରିତଵିପତ୍ତିତତେରପି ଶୋଷମ୍ ॥ ୬୯୨॥
ପଵନଜଗତ୍ପ୍ରଭୁପାଵନମୂର୍ତିର୍ଜଲଧରଚାଲନଵିଶ୍ରୁତକୀର୍ତିଃ ।
ମମ କୁଶଲାଯ ଭଵତ୍ଵରିଭୀମା ଜନନଵତାଂ ଜନନୀ ବହୁଧାମା ॥ ୬୯୩॥
ମମ ସୁରରାଜଵଧୂକଲଯୋଗ୍ରା ଖଲଜନଧୂନନଶକ୍ତନଖାଗ୍ରା ।
ଦମଯତୁ କୃତ୍ତଶିରାଃ କଲୁଷାଣି ପ୍ରକଟବଲା ହୃଦଯସ୍ଯ ଵିଷାଣି ॥ ୬୯୪॥
କୁଲିଶିଵଧୂକଲଯା ପରିପୁଷ୍ଟା ବୁଧନୁତସନ୍ନୁଣଜାଲଵିଶିଷ୍ଟା ।
ମମ ପରିତୋ ଵିଲସଦ୍ଵିଭଵାନି ଦ୍ରୁପଦସୁତା ଵିଦଧାତୁ ଶିଵାନି ॥ ୬୯୫॥
ସୁରଜନରାଡ୍ଦଯିତାଂଶଵିଦୀପ୍ତେ ପଦକମଲାଶ୍ରିତସାଧୁଜନାପ୍ତେ ।
ଦୁରିତଵଶାଦଭିତୋ ଗତଭାସଂ ମନୁଜକୁମାରଜନନ୍ଯଵଦାସମ୍ ॥ ୬୯୬॥
ଅମରନରେଶ୍ଵରମନ୍ଦିରନେତ୍ରୀ ସୁମଶରଜୀଵନସୁନ୍ଦରଗାତ୍ରୀ ।
ଭଵତୁ ଶଚୀ ଵିତତସ୍ଵଯଶସ୍ସୁ ପ୍ରତିଫଲିତା ଗଣନାଥଵଚସ୍ସୁ ॥ ୬୯୭॥
ଵିକସତୁ ମେ ହୃଦଯଂ ଜଲଜାତଂ ଵିଲସତୁ ତତ୍ର ଶଚୀସ୍ତୁତିଗୀତମ୍ ।
ସ୍ଫୁରତୁ ସମସ୍ତମିହେପ୍ସିତଵସ୍ତୁ ପ୍ରଥିତତମଂ ମମ ପାଟଵମସ୍ତୁ ॥ ୬୯୮॥
କୁରୁ କରୁଣାରସସିକ୍ତନିରୀକ୍ଷେ ଵଚନପଥାତିଗସନ୍ନୁଣଲକ୍ଷେ ।
ଶଚି ନରସିଂହଜମାହିତଗୀତଂ ଭରତଧରାମଵିତୁଂ ପଟୁମେତମ୍ ॥ ୬୯୯॥
ସୁଲଲିତତାମରସୈଃ ପ୍ରସମାପ୍ତଂ ଵରନୁତିବନ୍ଧମିମଂ ଶ୍ରଵଣାପ୍ତମ୍ ।
ଜନନି ନିଶମ୍ଯ ସୁସିଦ୍ଧମଶେଷଂ ହରିଲଲନେ ମମ କୁର୍ଵଭିଲାଷମ୍ ॥ ୭୦୦॥
॥ ଇତି ଶ୍ରୀଭଗଵନ୍ମହର୍ଷିରମଣାନ୍ତେଵାସିନୋ ଵାସିଷ୍ଠସ୍ଯ ନରସିଂହସୂନୋଃ
ଗଣପତେଃ କୃତୌ ଇନ୍ଦ୍ରାଣୀସପ୍ତଶତୀ ସମାପ୍ତା ॥
Complete Works of Ganapati Muni Vol 02-14
Proofread byDPD
Please send corrections to sanskrit@cheerful.com
Last updated ତ୍oday
http://sanskritdocuments.org
॥ ପ୍ରଥମଂ ଗାଯତ୍ରଂ ଶତକମ୍ ॥
॥ ପ୍ରଥମଃ ଶଶିଵଦନାପାଦଃ ॥
ହରିଲଲନେ ମେ ପଥି ତିମିରାଣି ।
ହରଦରହାସଦ୍ଯୁତିଭିରିମାନି ॥ ୧॥
ଅଗତିମଵୀର୍ଯାମପଗତଧୈର୍ଯାମ୍ ।
ଅଵତୁ ଶଚୀ ମେ ଜନିଭୁଵମାର୍ଯାମ୍ ॥ ୨॥
ଶୃଣୁ କରୁଣାଵତ୍ଯଲଘୁମଖର୍ଵେ ।
ସ୍ତଵମହମାର୍ଯସ୍ତଵ ଶଚି କୁର୍ଵେ ॥ ୩॥
ତ୍ରିଜଗଦତୀତୋ ଵିଲସତି ନିତ୍ଯଃ ।
ଅଣୁରଣୁତୋ ଯୋ ଭଗଵତି ସତ୍ଯଃ ॥ ୪॥
ତ୍ଵମଖିଲକାର୍ଯେଷ୍ଵଯି ଧୃତସକ୍ତିଃ ।
ଉରୁଗତିରସ୍ଯ ପ୍ରଭୁତମଶକ୍ତିଃ ॥ ୫॥
ଵିଦୁରିମମେକେ ଜଗତି ମହେନ୍ଦ୍ରମ୍ ।
ଜଗୁରଯି କେଚିଜ୍ଜନନି ମହେଶମ୍ ॥ ୬॥
ଅଵଗତଵେଦୋ ଵଦତି ମହେନ୍ଦ୍ରମ୍ ।
ପରିଚିତତନ୍ତ୍ରୋ ଭଣତି ମହେଶମ୍ ॥ ୭॥
ଜନନି ଶଚି ତ୍ଵଂ ପ୍ରଥମଦଲସ୍ଯ ।
ଭଗଵତି ଦୁର୍ଗାସ୍ଯପରଦଲସ୍ଯ ॥ ୮॥
ନ ଶଚି ଶିଵାତସ୍ତ୍ଵମିତରଦୈଵମ୍ ।
ବହୁମୁନିଵାଣୀସମରସତୈଵମ୍ ॥ ୯॥
ଦିଵି ଚ ସିତାଦ୍ରୌ ଶଚିଵପୁଷୋର୍ଵାମ୍ ।
ପୃଥଗୁପଲମ୍ଭାଦଯି ଭିଦଯୋକ୍ତିଃ ॥ ୧୦॥
ତନୁଯୁଗମୂଲଂ ଵପୁରତିମାଯମ୍ ।
କରଚରଣାଦ୍ଯୈର୍ଵିଯୁତମମେଯମ୍ ॥ ୧୧॥
ତ୍ଵମୁଦରଵର୍ତିତ୍ରିଭୁଵନଜୀଵା ।
ଭଵସି ଶଚୀ ସା ଜନନି ଶିଵା ଵା ॥ ୧୨॥
ଵିଭୁଶୁଚିକୀଲାତତିରଯି ଧୂମମ୍ ।
ତ୍ଵମମରମାର୍ଗଂ ବତ ଵମସୀମମ୍ ॥ ୧୩॥
ଜଯସି ନଭସ୍ଥୋ ଜନନି ପରସ୍ତାତ୍ ।
ନଭସି ଚ ଭାନ୍ତୀ ଭଵସି ପୁରସ୍ତାତ୍ ॥ ୧୪॥
ତ୍ଵମତନୁରମ୍ବ ଜ୍ଵଲସି ପରସ୍ତାତ୍ ।
ଇହ ଖଶରୀରା ଲସସି ପୁରସ୍ତାତ୍ ॥ ୧୫॥
ଜନନି ପରସ୍ତାନ୍ମତିରସି ଭର୍ତୁଃ ।
ଅସି ଖଶରୀରା ପୃଥଗଵଗନ୍ତ୍ରୀ ॥ ୧୬॥
ଅଣୁଚଯରୂପଂ ଭଗଵତି ଶାନ୍ତମ୍ ।
ନ ଭଵତି ଶୂନ୍ଯଂ ତଦିଦମନନ୍ତମ୍ ॥ ୧୭॥
ଦିଵି ଦଧତୀଶେ ପୁରୁଷଶରୀରମ୍ ।
ଜନନି ପୁରନ୍ଧ୍ରୀ ତନୁରଭଵସ୍ତ୍ଵମ୍ ॥ ୧୮॥
ଦୃଶି ଵିଲସନ୍ତଂ ପ୍ରଭୁମୁପଯାନ୍ତୀ ।
ଭଵସି ଵିରାଟ୍ ତ୍ଵଂ ନୃତନୁଷୁ ଭାନ୍ତୀ ॥ ୧୯॥
ତଵ ଗୁଣଗାନଂ ଜନନି ଵିଧାତୁମ୍ ।
ଭଵତି ପଟୁଃ କୋ ଵିଯଦିଵ ମାତୁମ୍ ॥ ୨୦॥
ଭଗଵତି ତୃପ୍ତିର୍ଭଵତୁ ନ ଵା ତେ ।
ଅଭିଲଷିତାପ୍ତିର୍ଭଵତୁ ନ ଵା ମେ ॥ ୨୧॥
ଭଜତି ତଵାଙ୍ଘ୍ରିଂ ମମ ଖଲୁ ଭାଷା ।
ପତି ମନୁରାଗାତ୍ ପ୍ରିଯମିଵ ଯୋଷା ॥ ୨୨॥
ଅଘମପହର୍ତୁଂ ଶୁଭମପି କର୍ତୁମ୍ ।
ଅଲମଜରେ ତେ ଗୁଣଗଣଗାନମ୍ ॥ ୨୩॥
ଅଵସି ଜଗତ୍ତ୍ଵଂ କୁଲିଶିଭୁଜସ୍ଥା ।
ଅଵ ମୁନିଭୂମିଂ ଗଣପତିଧୀସ୍ଥା ॥ ୨୪॥
ଶଶିଵଦନାଭିର୍ଗଣପତିଜାଭିଃ ।
ଶଶିଵଦନାଦ୍ଯା ପରିଚରିତାଽସ୍ତୁ ॥ ୨୫॥
॥ ଦ୍ଵିତୀଯସ୍ତନୁମଧ୍ଯାପାଦଃ ॥
ଧ୍ଵାନ୍ତଂ ପରିହର୍ତୁଂ ତେଜାଂସ୍ଯପି ଭର୍ତୁମ୍ ।
ଅନ୍ତର୍ଜଗଦମ୍ବା ହାସଂ କୁରୁତାନ୍ମେ ॥ ୨୬॥
ଭୀତାମରିଧୂତାମାର୍ଯାଵନିମେତାମ୍ ।
ସମ୍ରାଜ୍ଞି ବୁଧାନାଂ ଦୂନାମଵ ଦୀନାମ୍ ॥ ୨୭॥
ଈଶସ୍ଯ ସହାଯାଂ ଵିଶ୍ଵସ୍ଯ ଵିଧାନେ ।
ଆକାଶଶରୀରାମମ୍ବାଂ ପ୍ରଣମାମଃ ॥ ୨୮॥
କର୍ତୁର୍ଭୁଵନାନାଂ ମାଯାସି ଶଚି ତ୍ଵମ୍ ।
ସତ୍ଯସ୍ଯ ତପୋଽସି ଜ୍ଞସ୍ଯାସି ମନୀଷା ॥ ୨୯॥
ଆଜ୍ଞାସି ଵିନେତୁସ୍ତେଜୋଽସି ଵିଭାତଃ ।
ନିର୍ଯତ୍ନସମାଧେରାନନ୍ଦରସୋଽସି ॥ ୩୦॥
ତସ୍ଯ ତ୍ଵମନନ୍ଯାଽପ୍ଯନ୍ଯେଵ ଖକାଯା ।
ଅତ୍ଯଦ୍ଭୁତମାଯା ଜାଯାଽସି ସହାଯା ॥ ୩୧॥
ଆକାଶଶରୀରାଂ ଜାଯାମଶରୀରଃ ।
ଆଲିଙ୍ଗ୍ଯ ଵିଭୁସ୍ତ୍ଵାଂ ନନ୍ଦତ୍ଯଯି ଚିତ୍ରମ୍ ॥ ୩୨॥
ଵଜ୍ରେଶ୍ଵରି ଘସ୍ରେ ଯଦ୍ଵନ୍ମୁକୁଟେନ ।
ଦୀପ୍ତେନ ସଵିତ୍ର ମୂର୍ଧା ତଵ ଭାତି ॥ ୩୩॥
ନକ୍ଷତ୍ରସହସ୍ରୈଶ୍ଶୁଭ୍ରଦ୍ଯୁତିଭିସ୍ତେ ।
ପୁଷ୍ପାଯିତମେତୈର୍ମାତର୍ନିଶିମସ୍ତେ ॥ ୩୪॥
ଘସ୍ରଃ ଖଲୁ କାଲୋ ରାଜ୍ଯଂ ନନୁ କର୍ତୁମ୍ ।
ରାତ୍ରିଃ ଖଲୁ କାଲୋ ରନ୍ତୁଂ ରମଣେନ ॥ ୩୫॥
ନିଃଶବ୍ଦତରଙ୍ଗାସ୍ଵଗ୍ଲୌଷୁ ନିଶାସୁ ।
ନୂନଂ ଖଶରୀରେ କାନ୍ତଂ ରମଯନ୍ତୀ ॥ ୩୬॥
ସାନ୍ଦ୍ରୋଡୁସୁମସ୍ରଗ୍ଵିଭ୍ରାଜିତକେଶା ।
ଧ୍ଵାନ୍ତାସିତଚେଲା ଶାନ୍ତାଽପ୍ଯସି ଭୀମା ॥ ୩୭॥
ରାଜନ୍ମିତତାରାମନ୍ଦାରଵତଂସାମ୍ ।
ମାତସ୍ସିତଭାସା ସ୍ମେରାଂ ହସିତେନ ॥ ୩୮॥
ଜ୍ଯୋତ୍ସ୍ନା ଘନସାରଦ୍ରାଵୈରନୁଲିପ୍ତାମ୍ ।
ତ୍ଵାଂ ଵୀକ୍ଷ୍ଯ ନ ଶାନ୍ତିଃ କସ୍ଯ କ୍ଷଣଦାସୁ ॥ ୩୯॥
ବାଲାରୁଣରୋଚିଃ କାଶ୍ମୀରରଜୋଭିଃ ।
ଆଲିପ୍ତମୁଖୀଂ ତ୍ଵାଂ ପ୍ରାତଃ ପ୍ରଣମାମି ॥ ୪୦॥
ସାଯଂ ସମଯଶ୍ରୀ ଲାକ୍ଷାରସରକ୍ତମ୍ ।
ପ୍ରତ୍ଯକ୍ ପ୍ରସୃତଂ ତେ ଵନ୍ଦେ ଵରଦେଽଙ୍ଘ୍ରିମ୍ ॥ ୪୧॥
ଦୀପ୍ତାର୍କକିରୀଟାଂ ସର୍ଵାନ୍ ଵିନଯନ୍ତୀମ୍ ।
ଵନ୍ଦେ ଭୁଵନାନାଂ ରାଜ୍ଞୀମସମାନାମ୍ ॥ ୪୨॥
ଧୂତାଖିଲରୋଗାଃ ଶ୍ଵାସାସ୍ତଵ ଵାତାଃ ।
ମାତର୍ଵିତରନ୍ତୁ ପ୍ରାଣସ୍ଯ ବଲଂ ନଃ ॥ ୪୩॥
ପ୍ରାଞ୍ଚସ୍ତଵ ଵାତାଃ ସ୍ଵାସାଃ ଶମୁଶନ୍ତୁ ।
ପ୍ରତ୍ଯଞ୍ଚ ଏମେ ନଃ ପାପଂ ଶମଯନ୍ତୁ ॥ ୪୪॥
ମନ୍ମାତରଵାଞ୍ଚୋ ଵୀର୍ଯଂ ଵିତରନ୍ତୁ ।
ସନ୍ତାପମୁଦଞ୍ଚଃ ସର୍ଵଂ ଚ ହରନ୍ତୁ ॥ ୪୫॥
ଅସ୍ଯା ଇଵ ଭୂମେର୍ଭୂତପ୍ରସଵାଯାଃ ।
ଏକୈକଶ ଆହୁର୍ଯେଷାଂ ମହିମାନମ୍ ॥ ୪୬॥
ଅଦ୍ରେରୁପଲାନାଂ ନଦ୍ଯାଃ ସିକତାନାମ୍ ।
ଯେଷାଂ ଚ ନ କଧ୍ଚ୍ଛିକ୍ତୋ ଗଣନାଯାମ୍ ॥ ୪୭॥
ରୋମାଯିତମେତୈର୍ଗୋଲୈସ୍ତଵ କାଯେ ।
ଵ୍ଯାଖ୍ଯାତମନେନ ଶ୍ଲାଘ୍ଯଂ ତଵ ଭାଗ୍ଯମ୍ ॥ ୪୮॥
ଵିଶ୍ଵଂ ଵହସୀଦଂ ଜମ୍ଭାରିଭୁଜସ୍ଥା ।
ଆର୍ଯାନ୍ଵହମାତର୍ଵାସିଷ୍ଠମତିସ୍ଥା ॥ ୪୯॥
ଆଦ୍ଯାଂ ଭୁଵନାନାଂ ଭର୍ତୁସ୍ତନୁମଧ୍ଯାମ୍ ।
ଭକ୍ତ୍ସ୍ଯ ଭଜନ୍ତାମେତାସ୍ତନୁମଧ୍ଯାଃ ॥ ୫୦॥
॥ ତୃତୀଯୋ ମୁକୁଲପାଦଃ ॥
ହାସାଃ ଶକ୍ରଗୃହେଶ୍ଵର୍ଯାଶ୍ଚନ୍ଦ୍ରରୁଚଃ ।
ଭୂଯାସୁର୍ଵିମଲପ୍ରଜ୍ଞାଯୈ ହୃଦି ମେ ॥ ୫୧॥
ଇନ୍ଦ୍ରାଣ୍ଯାଃ କରୁଣା ଲୋକାଶ୍ଶୋକହୃତଃ ।
ଭୂଯାସୁର୍ଭରତକ୍ଷ୍ମାଯୈ କ୍ଷେମକୃତଃ ॥ ୫୨॥
ଵ୍ଯକ୍ତିର୍ଵ୍ଯୋମତନୁଃ ଶକ୍ତିତ୍ଵାଦ୍ଵନିତା ।
ଜ୍ଞାତୃତ୍ଵାତ୍ପୁରୁଷଃ କେଷାଞ୍ଚିଦ୍ଵିଦୁଷାମ୍ ॥ ୫୩॥
ଵ୍ଯକ୍ତିଂ ଵ୍ଯୋମତନୁଂ ଯେ ପ୍ରାହୁଃ ପୁରୁଷମ୍ ।
ତେଷାଂ ତତ୍ତ୍ଵଵିଦାଂ କଲ୍ପସ୍ସ୍ଯାତ୍ ତ୍ରିଵିଧଃ ॥ ୫୪॥
ରୁଦ୍ରଂ କେଽପି ଜଗୁଃ ଶକ୍ରଂ କେଽପି ଵିଦୁଃ ।
ଭାଷନ୍ତେ ଭୁଵନପ୍ରାଣଂ କେଽପି ଵିଦଃ ॥ ୫୫॥
ଵ୍ଯକ୍ତିଂ ଵ୍ଯୋମତନୁଂ ପ୍ରାହୁର୍ଯେ ଵନିତାମ୍ ।
ତେଷାଂ ଚ ତ୍ରିଵିଧଃ କଲ୍ପଶ୍ଶାସ୍ତ୍ରଵିଦାମ୍ ॥ ୫୬॥
ଦୁର୍ଗା ସୂରିଵରୈଃ କୈଶ୍ଚିତ୍ସା ଗଦିତା ।
ଶଚ୍ଯନ୍ଯୈର୍ଵିବୁଧୈର୍ଜ୍ଞୈରନ୍ଯୈରଦିତିଃ ॥ ୫୭॥
ଏକେଷାଂ ଵିଦୁଷାଂ ଵ୍ଯକ୍ତିର୍ଵ୍ଯୋମତନୁଃ ।
ନ ସ୍ତ୍ରୀ ନୋ ପୁରୁଷୋ ବ୍ରହ୍ମୈତତ୍ସଗୁଣମ୍ ॥ ୫୮॥
ତ୍ଵଂ ଵିଶ୍ଵସ୍ଯ ମହାନ୍ ପ୍ରାଣଃ କଃ ପରମେ ।
ତ୍ଵଂ ରୁଦ୍ରଃ ପ୍ରଣଵସ୍ତ୍ଵଂ ଶକ୍ରୋଽଭ୍ରଶିଖୀ ॥ ୫୯॥
ତ୍ଵଂ କସ୍ଯାସ୍ଯଦିତିସ୍ତ୍ଵଂ ରୁଦ୍ରସ୍ଯ ଶିଵା ।
ତ୍ଵଂ ଶକ୍ରସ୍ଯ ଶଚୀ ଶକ୍ତିର୍ଦେଵନୁତେ ॥ ୬୦॥
ପ୍ରାଣଶ୍ଚ ପ୍ରଣଵୋ ଜ୍ଯୋତିଶ୍ଚାମ୍ବରଗମ୍ ।
ଵସ୍ତ୍ଵେକଂ ତ୍ରିଗୁଣଂ ନୋ ଵସ୍ତୁ ତ୍ରିତଯମ୍ ॥ ୬୧॥
ଶକ୍ତେରମ୍ବପରେ ଶକ୍ତ୍ସ୍ଯାପି ଭିଦା ।
ଜ୍ଵାଲା ପାଵକଵଦ୍ଭାଷା ଭେଦକୃତା ॥ ୬୨॥
ସର୍ଵଂ ଦୃଶ୍ଯମିଦଂ ଭୁଞ୍ଜାନେ ପରମେ ।
ପୁଂନାମସ୍ତୁତଯୋ ଯୁଜ୍ଯନ୍ତେ ଖଲୁ ତେ ॥ ୬୩॥
କୁର୍ଵାଣେମ୍ବସତସ୍ସନ୍ତୋଷଂ ସତତମ୍ ।
ସ୍ତ୍ରୀନାମସ୍ତୁତଯଃ ଶୋଭାଂ ତେ ଦଧତେ ॥ ୬୪॥
ସଦ୍ବ୍ରହ୍ମ ବ୍ରୁଵତେ ଵିଦ୍ଵାଂସୋ ଵିଗୁଣମ୍ ।
ତ୍ଵଂ ମାତସ୍ସଗୁଣଂ ବ୍ରହ୍ମାସି ପ୍ରଥିତେ ॥ ୬୫॥
ଶବ୍ଦାଦ୍ଯୈର୍ଵିଯୁତଂ ସଦ୍ବ୍ରହ୍ମାମଲିନମ୍ ।
ଶବ୍ଦାଦ୍ଯୈଃ ସହିତା ତ୍ଵଂ ଦେଵ୍ଯଚ୍ଛହିତା ॥ ୬୬॥
ସାକ୍ଷି ବ୍ରହ୍ମ ପରଂ ତ୍ଵଂ ମାତଃ କୁରୁଷେ ।
ସର୍ଵେଷାଂ ଜଗତାଂ କାର୍ଯଂ ସର୍ଵଵିଧମ୍ ॥ ୬୭॥
ଦ୍ଯୌର୍ମାତା ଜଗତୋ ଦ୍ଯୌରେଵାସ୍ଯ ପିତା ।
ଵ୍ଯାପ୍ତଂ ଭାତି ଜଗଦ୍ଦ୍ଯାଵା ସର୍ଵମିଦମ୍ ॥ ୬୮॥
ଆକାଶାଦ୍ରଜସୋ ଦ୍ଯୌରନ୍ଯା ଵିରଜାଃ ।
ଆକାଶେଽସ୍ତି ପୁନସ୍ତତ୍ପାରେ ଚ ପରା ॥ ୬୯॥
ଦ୍ଯାଵଂ ତାଂ ଜଗତୋ ରଙ୍ଗେ ଵ୍ଯୋମତନୁମ୍ ।
ପାରେ ଶୁଦ୍ଧତମାଂ ଵିଦ୍ମସ୍ତ୍ଵାଂ ପରମେ ॥ ୭୦॥
ତ୍ଵାଂ ପୂର୍ଣାମଦିତିଂ ଶକ୍ତିଂ ଦେଵି ଶଚୀମ୍ ।
ନିତ୍ଯଂ ଶବ୍ଦଵତୀଂ ଗୌରୀଂ ପ୍ରବ୍ରୁଵତେ ॥ ୭୧॥
ପୁଂନାମା ଭଵତୁ ସ୍ତ୍ରୀନାମାସ୍ତ୍ଵଥଵା ।
ଵ୍ଯକ୍ତିର୍ଵ୍ଯୋମତନୁର୍ଲୋକଂ ପାତ୍ଯଖିଲମ୍ ॥ ୭୨॥
ନାକେ ସା କିଲ ଭାତ୍ଯୈନ୍ଦ୍ରୀ ରାଜ୍ଯରମା ।
ଵିଭ୍ରାଣା ଲଲିତଂ ସ୍ତ୍ରୀରୂପଂ ପରମା ॥ ୭୩॥
ଶକ୍ତାଂ ଦେଵି ଵିଧେହ୍ଯାର୍ତାନାମଵନେ ।
ଇନ୍ଦ୍ରସ୍ଯେଵ ଭୁଜାଂ ଵାସିଷ୍ଠସ୍ଯ ମତିମ୍ ॥ ୭୪॥
ପୂଜାଶକ୍ରତରୁଣ୍ଯୈତୈସ୍ସିଧ୍ଯତୁ ତେ ।
ଗାତୃଣାଂ ଵରଦେ ଗାଯତ୍ରୌର୍ମୁକୁଲୈଃ ॥ ୭୫॥
॥ ଚତୁର୍ଥୋ ଵସୁମତୀପାଦଃ ॥
ମୋହଂ ପରିହରନ୍ ଯୋଗଂ ଵିତନୁତାମ୍ ।
ଦେଵେନ୍ଦ୍ରଦଯିତା ହାସୋ ମମ ହୃଦି ॥ ୭୬॥
ଆଭାତୁ କରୁଣା ସା ଭାରତଭୁଵି ।
ସୁତ୍ରାମସୁଦୃଶୋ ଯଦ୍ଵନ୍ନିଜଦିଵି ॥ ୭୭॥
ଵନ୍ଦାରୁଜନତାମନ୍ଦାରଲତିକାମ୍ ।
ଵନ୍ଦେ ହରିହଯପ୍ରାଣପ୍ରିଯତମାମ୍ ॥ ୭୮॥
ଶୋକସ୍ଯ ଦମନୀଂ ଲୋକସ୍ଯ ଜନନୀମ୍ ।
ଗାଯାମି ଲଲିତାଂ ଶକ୍ରସ୍ଯ ଦଯିତାମ୍ ॥ ୭୯॥
ରମ୍ଯା ସୁମନସାଂ ଭୂପସ୍ଯ ମହିଷୀ ।
ସୌମ୍ଯା ଜନିମତାଂ ମାତା ଵିଜଯତେ ॥ ୮୦॥
ଵୀର୍ଯସ୍ଯ ଚ ଧିଯସ୍ତ୍ରୈଲୋକ୍ଯଭରଣେ ।
ଦାତ୍ରୀ ମଘଵତେ ଦେଵୀ ଵିଜଯତେ ॥ ୮୧॥
ଵ୍ଯାପ୍ତା ଜଗଦିଦଂ ଗୁପ୍ତା ହୃଦି ନୃଣାମ୍ ।
ଆପ୍ତା ସୁକୃତିନାଂ ଦୈଵଂ ମମ ଶଚୀ ॥ ୮୨॥
ଖେ ଶକ୍ତିରତୁଲା ପାରେ ଚିଦମଲା ।
ସ୍ଵଶ୍ଚାରୁମହିଲା ଦୈଵଂ ମମ ଶଚୀ ॥ ୮୩॥
ଶସ୍ତ୍ରଂ ମଘଵତଃ ଶାସ୍ତ୍ରଂ ଯମଵତାମ୍ ।
ଵସ୍ତ୍ରଂ ତ୍ରିଜଗତୋ ଦୈଵଂ ମମ ଶଚୀ ॥ ୮୪॥
ଯୁକ୍ତ୍ସ୍ଯ ଭଜତଃ ଶର୍ମାନ୍ତରତୁଲମ୍ ।
ଵର୍ମାପି ଚ ବହିର୍ଦୈଵଂ ମମ ଶଚୀ ॥ ୮୫॥
ଵୀର୍ଯଂ ବଲଵତାଂ ବୁଦ୍ଧିର୍ମତିମତାମ୍ ।
ତେଜୋ ଦ୍ଯୁତିମତାଂ ଦୈଵଂ ମମ ଶଚୀ ॥ ୮୬॥
ଏକୈଵ ଜନଯନ୍ତ୍ଯେକୈଵ ଦଧତୀ ।
ଏକୈଵ ଲଯକୃଦ୍ଦୈଵଂ ମମ ଶଚୀ ॥ ୮୭॥
ଶକ୍ତୀରଵିତଥାଃ କ୍ଷେତ୍ରୋଷୁ ଦଧତୀ ।
ବୀଜେଷୁ ଚ ପରା ଦୈଵଂ ମମ ଶଚୀ ॥ ୮୮॥
ଚିନ୍ଵନ୍ତ୍ଯପି ପଚନ୍ତ୍ଯେକା ପଶୁଗଣମ୍ ।
ଖାଦନ୍ତ୍ଯପି ଭଵେ ଦୈଵଂ ମମ ଶଚୀ ॥ ୮୯॥
ଦୃଷ୍ଟୌ ଧୃତଚିତିର୍ଦୃଶ୍ଯେ ତତଗୁଣା ।
ଵିଶ୍ଵାତ୍ମମହିଷୀ ଦୈଵଂ ମମ ଶଚୀ ॥ ୯୦॥
ରାକାଶଶିମୁଖୀ ରାଜୀଵନଯନା ।
ସ୍ଵଃ କାପି ଲଲନା ଦୈଵଂ ମମ ଶଚୀ ॥ ୯୧॥
ସ୍ଥାଣାଵପି ଚରେ ସର୍ଵତ୍ର ଵିତତା ।
ସାକ୍ଷାଦ୍ଭଵତୁ ମେ ସ୍ଵର୍ନାଥଦଯିତା ॥ ୯୨॥
ଯନ୍ମାତରନୃତଂ ଧ୍ଯାତଂ ଚ ଗଦିତମ୍ ।
ଜୁଷ୍ଟଂ ଚ ହର ମେ ତଦ୍ଦେଵି ଦୁରିତମ୍ ॥ ୯୩॥
ମାଂ ମୋଚଯ ଋଣାଦିନ୍ଦ୍ରାଣି ସୁଭୁଜେ ।
ମାମଲ୍ପମତଯୋ ମା ନିନ୍ଦିଷୁରଜେ ॥ ୯୪॥
ଶତ୍ରୁଶ୍ଚ ଶଚି ମେ ସଖ୍ଯାଯ ଯତତାମ୍ ।
ଦୃପ୍ତଶ୍ଚ ଇମନୁଜୋ ମାମମ୍ବ ଭଜତାମ୍ ॥ ୯୫॥
କଷ୍ଟଂ ଶଚି ଵିଧୂଯେଷ୍ଟଂ ଵିଦଧତୀ ।
ଆନନ୍ଦଯ ଜନଂ ପ୍ରେଯାଂସମଯି ମେ ॥ ୯୬॥
ଅସ୍ତ୍ରଂ ମମ ଭଵ ଧ୍ଵଂସାଯ ରଟତାମ୍ ।
ସୁତ୍ରାମରମଣି ଶ୍ରୀମାତରସତାମ୍ ॥ ୯୭॥
ସମ୍ପୂରଯତୁ ମେ ସର୍ଵଂ ସୁରନୁତା ।
ସ୍ଵର୍ଗକ୍ଷିତିପତେଶ୍ଶୁଦ୍ଧାନ୍ତଵନିତା ॥ ୯୮॥
ସଂଵର୍ଧଯ ଶଚି ସ୍ଵଂ ଦେଶମଵିତୁମ୍ ।
ବାହୋରିଵ ହରେର୍ବୁଦ୍ଧେର୍ମମ ବଲମ୍ ॥ ୯୯॥
ଏତୈର୍ଵସୁମତୀଵୃତ୍ତୈର୍ନଵସୁମୈଃ ।
ଭୂଯାଚ୍ଚରଣଯୋଃ ପୂଜା ଜନନି ତେ ॥ ୧୦୦॥
॥ ପ୍ରଥମଂ ଗାଯତ୍ରଂ ଶତକଂ ସମାପ୍ତମ୍ ॥
॥ ଅଥ ଦ୍ଵିତୀଯମୌଷ୍ଣିହଂ ଶତକମ୍ ॥
॥ ପ୍ରଥମଃ କୁମାରଲଲିତାପାଦଃ ॥
ସୁରେଶ୍ଵରମହିଷ୍ଯାଃ ସ୍ମିତଂ ଶଶିସିତଂ ମେ ।
ତନୋତୁ ମତିମଚ୍ଛାଂ କରୋତୁ ବଲମଗ୍ରଯ୍ମ୍ ॥ ୧୦୧॥
ଵିଧାଯ ରିପୁଧୂତିଂ ନିଧାଯ ସୁଦଶାଯାମ୍ ।
ପୁଲୋମତନୁଜାତା ଧିନୋତୁ ଭରତକ୍ଷ୍ମାମ୍ ॥ ୧୦୨॥
ପଦପ୍ରଣତରକ୍ଷା ଵିଧାନଧୃତଦୀକ୍ଷା ।
ଜଗଦ୍ଭରଣଦକ୍ଷା ପରା ଜଯତି ଶକ୍ତିଃ ॥ ୧୦୩॥
ସ୍ଵରତ୍ଯଵିରତଂ ସା ଶନୈର୍ନଭସି ରଙ୍ଗେ ।
ଜ୍ଵଲତ୍ଯଧିକସୂକ୍ଷ୍ମଂ ଜଗତ୍ପ୍ରଭଵଶକ୍ତିଃ ॥ ୧୦୪॥
ମହସ୍ତଵ ସୁସୂକ୍ଷ୍ମଂ ନିଦାନମଖିଲାନାମ୍ ।
ଭଵତ୍ଯଖିଲମାତର୍ଜଗତ୍ଯନୁଭଵାନାମ୍ ॥ ୧୦୫॥
ଜନନ୍ଯନୁଭଵାନାଂ ମତିତ୍ଵପରିଣାମେ ।
ସ୍ଵରୋ ଭଵତି ମୂଲଂ ତଵାଭ୍ରହଯରାମେ ॥ ୧୦୬॥
ଯ ଈଶ୍ଵରି ନିଦାନଂ ସମସ୍ତମତିଭାନେ ।
ସ୍ଵରୋ ଗତିଵିଶେଷାତ୍ସ ଏଵ ଖଲୁ କାଲଃ ॥ ୧୦୭॥
ଜ୍ଵଲନ୍ତ୍ଯଭିହିତା ତ୍ଵଂ ଵିହାଯସି ଵିଶାଲେ ।
ପ୍ରଚଣ୍ଡପଦପୂର୍ଵା ପ୍ରପଞ୍ଚକରିଚଣ୍ଡୀ ॥ ୧୦୮॥
ସ୍ଵରନ୍ତ୍ଯଖିଲବୁଦ୍ଧିପ୍ରଦା ଭଵସି ଗୌରୀ ।
ତ୍ରିକାଲତନୁରମ୍ବ ସ୍ମୃତା ତ୍ଵମିହ କାଲୀ ॥ ୧୦୯॥
ମହସ୍ସ୍ଵର ଇତୀଦଂ ଦ୍ଵଯଂ ତଦତିସୂକ୍ଷ୍ମମ୍ ।
ମହେଶ୍ଵରି ତଵାଂଶଦ୍ଵଯଂ ପରମମୁକ୍ତମ୍ ॥ ୧୧୦॥
ମହୋଽତିଶଯମାପ୍ତଂ ତ୍ଵଯି ତ୍ରିଦିଵଗାଯାମ୍ ।
ସ୍ଵରୋଽତିଶଯମାପ୍ତଃ ସିତାଦ୍ରିନିଲଯାଯାମ୍ ॥ ୧୧୧॥
ଦିଵଂ ନଯତି ପୂର୍ଵା ଭୁଵଂ ଯୁଵତିରନ୍ଯା ।
ଦ୍ଵଯୋଃ ପ୍ରକୃତିରଭ୍ରଂ ଵିଶାଲମତିମାନ୍ଯା ॥ ୧୧୨॥
ନ ତେ ଦିଵି ଲସନ୍ତ୍ଯାଃ ପିତା ତନୁଭୃଦନ୍ଯଃ ।
ସ୍ଵଯଂ ଭୁଵମିମାଂ ତ୍ଵାଂ ସତାମଵନି ଵିଦ୍ମଃ ॥ ୧୧୩॥
ସୁରାରିକୁଲଜନ୍ମା ତଵେଶ୍ଵରି ପୁଲୋମା ।
ପିତେତି କଵିଭାଷା ପରୋକ୍ଷଗତିରେଷା ॥ ୧୧୪॥
ଵଦନ୍ତ୍ଯସୁରଶବ୍ଦୈର୍ଘନଂ ସଜଲମେତମ୍ ।
ପୁଲୋମପଦମେକଂ ପୁରାଣସତିତେଷୁ ॥ ୧୧୫॥
ପ୍ରକୃଷ୍ଟତରଦୀପ୍ତିର୍ଗଭୀରତରନାଦା ।
ଇତୋ ହି ଭଵସି ତ୍ଵଂ ତଟିତ୍ତନୁରମେଯେ ॥ ୧୧୬॥
ଅରାତିରସୁରୋଽଯଂ ଵିଭୋର୍ନିଗଦିତସ୍ତେ ।
ହଯଶ୍ଚ ବତଗୀତଃ ପିତା ତଵ ପଯୋଦଃ ॥ ୧୧୭॥
ପ୍ରିଯୈଃ କିଲ ପରେ ଵାଂ ପରୋକ୍ଷଵଚନୌଘୈଃ ।
ପ୍ରତାରିତମିଵେଲା ଜଗନ୍ମୁନିଗଣେନ ॥ ୧୧୮॥
ନିକୃଷ୍ଟମପି ରମ୍ଯଂ ଯଦି ତ୍ରିଦିଵଲୋକେ ।
ତଵାମ୍ବ କିମୁ ଵାଚ୍ଯା ରୁଚିସ୍ତ୍ରିଦିଵନାଥେ ॥ ୧୧୯॥
ତ୍ଵମମ୍ବ ରମଣୀଯା ଵଧୂସ୍ତ୍ଵମିଵ ନାକେ ।
ତ୍ଵଯା କ ଇଵ ତୁଲ୍ଯାଂ ମୃଦୋ ଵଦତୁ ଲୋକେ ॥ ୧୨୦॥
ଵିନୀଲମିଵ ଖାଂଶଂ ଵିଦୁସ୍ତ୍ରିଦିଵମେକେ ।
ପରସ୍ତୁ ଵଦସି ସ୍ଵଃ କଵିଃ କମଲବନ୍ଧୁମ୍ ॥ ୧୨୧॥
ଅମୁତ୍ରଗତଶୋକେ ମହାମହସି ନାକେ ।
ନମାମ୍ଯଧିକୃତାଂ ତାଂ ପୁରାଣକୁଲକାନ୍ତାମ୍ ॥ ୧୨୨॥
ଯଦା ମମୁତପକ୍ଵଂ ମଦୀଯମଘମୁଗ୍ରମ୍ ।
ତଦିନ୍ଦ୍ରକୁଲକାନ୍ତେ ନିଵାରଯ ସମଗ୍ରମ୍ ॥ ୧୨୩॥
ଦଦାତୁ ଭରତକ୍ଷ୍ମାଵିଷାଦହରଣାଯ ।
ଅଲଂ ବଲମୁଦାରା ଜଯନ୍ତଜନନୀ ମେ ॥ ୧୨୪॥
ଅତୀଵ ଲଲିତାଭିଃ କୁମାରଲଲିତାଭିଃ ।
ଇମାଭିରମରେଶପ୍ରିଯା ଭଜତୁ ମୋଦମ୍ ॥ ୧୨୫॥
॥ ଦ୍ଵିତୀଯୋ ମଦଲେଖାପାଦଃ ॥
ପୌଲୋମ୍ଯାଃ ପରିଶୁଭ୍ରଜ୍ଯୋତ୍ସ୍ନାଦୃଶ୍ଯରୁଚୋ ମେ ।
ଶ୍ରୀମନ୍ତୋ ଦରହାସାଃ କଲ୍ପନ୍ତାଂ କୁଶଲାଯ ॥ ୧୨୬॥
କାରୁଣ୍ଯାମୃତସିକ୍ତା ଶକ୍ତା ଶକ୍ରମହିଷ୍ଯାଃ ।
ପ୍ରେକ୍ଷା ଭାରତଭୂମେର୍ଦୌର୍ବଲ୍ଯଂ ଵିଧୁନୋତୁ ॥ ୧୨୭॥
ଵନ୍ଦେ ନିର୍ଜରରାଜ୍ଞୀଂ ସଙ୍କ୍ଲ୍ପେ ସତି ଯସ୍ଯାଃ ।
ସାଧ୍ଯାସାଧ୍ଯଵିଚାରୋ ନୈଵ ସ୍ଯାଦଣୁକୋଽପି ॥ ୧୨୮॥
ସଙ୍କ୍ଲ୍ପସ୍ତଵ କଶ୍ଚ୍ଚିଚତ୍ତେ ଚେଦ୍ଦିଵ ଈଶେ ।
ସ୍ଯାଦୁଲ୍ଲଙ୍ଘ୍ଯ ନିସର୍ଗଂ ସିଦ୍ଧିର୍ନିଷ୍ଫଲତା ଚ ॥ ୧୨୯॥
ମୂଢୋଽପ୍ଯୁତ୍ତମରୀତ୍ଯା ସିଧ୍ଯେଦଧ୍ଯଯନେଷୁ ।
ମେଧାଵୀ ଚ ନିତାନ୍ତଂ ନୈଵ ସ୍ଯାତ୍କୃତକୃତ୍ଯଃ ॥ ୧୩୦॥
ଉତ୍ପଦ୍ଯେତ ମହେଶ୍ଵର୍ଯପ୍ରାଜ୍ଞାଦପି ଶାସ୍ତ୍ରମ୍ ।
ଯାଯାନ୍ମାତରକସ୍ମାଦ୍ଵିଭ୍ରାନ୍ତିଂ ଵିବୁଧୋଽପି ॥ ୧୩୧॥
ଅଲ୍ପାନାମବଲାନାଂ ସଙ୍ଗ୍ରାମେ ଵିଜଯଃ ସ୍ଯାତ୍ ।
ଶକ୍ତାନାଂ ବହୁଲାନାଂ ଘୋରା ସ୍ଯାତ୍ପରିଭୂତିଃ ॥ ୧୩୨॥
ରାଜେରନ୍ନୃପପୀଠେଷ୍ଵଖ୍ଯାତାନି କୁଲାନି ।
ସ୍ଯାଦ୍ଦୁର୍ଧର୍ଷବଲାନାଂ ପାତୋ ରାଜକୁଲାନାମ୍ ॥ ୧୩୩॥
ନିର୍ଯତ୍ନୋଽପି ସମାଧେର୍ଵିନ୍ଦେଦ୍ଦେଵି ସମୃଦ୍ଧିମ୍ ।
ଯୋଗସ୍ଯାମ୍ବ ନ ପଶ୍ଯେଦଭ୍ଯସ୍ଯନ୍ନପି ସିଦ୍ଧିମ୍ ॥ ୧୩୪॥
ଅତ୍ଯନ୍ତଂ ଯଦସାଧ୍ଯଂ ନେଦିଷ୍ଠଂ ଭଵତୀଦମ୍ ।
ସାଧ୍ଯଂ ସର୍ଵଵିଧାଭିଃ ସ୍ଯାଦିନ୍ଦ୍ରାଣି ଦଵିଷ୍ଠମ୍ ॥ ୧୩୫॥
ଗାଯାମୋ ମୁନିସଙ୍ଘୈର୍ଗେଯାଂ କାମପି ମାଯାମ୍ ।
ଇନ୍ଦ୍ରସ୍ଯାପି ଵିନେତ୍ରୀଂ ତ୍ରୈଲୋକ୍ଯସ୍ଯ ଚ ଧାତ୍ରୀମ୍ ॥ ୧୩୬॥
ଵିଦ୍ଯାନାମଧିନାଥେ କାଂ ଵିଦ୍ଯାଂ ଶ୍ରଯସେ ତ୍ଵମ୍ ।
ଇନ୍ଦ୍ରଂ କର୍ତୁମଧୀନଂ ଵିଶ୍ଵସ୍ମାଦଧିକଂ ତମ୍ ॥ ୧୩୭॥
ନିତ୍ଯାଲିର୍ମିନୀଷେ ସ୍ତ୍ରୀମୋହୋ ନ ଵିତର୍କ୍ଯଃ ।
ଭ୍ରୂଚେଷ୍ଟାନୁଚରତ୍ଵାଦନ୍ଯା ସ୍ଯାଦନୁକମ୍ପା ॥ ୧୩୮॥
ସୌନ୍ଦର୍ଯଂ ପରମନ୍ଯଦ୍ଵଜେରଦ୍ଦର୍ଯଥଵା ତେ ।
ହର୍ତୁଂ ଯତ୍ସୁଖମୀଷ୍ଟେ ତାଦୃକ୍ତସ୍ଯ ଚ ଚିତ୍ତମ୍ ॥ ୧୩୯॥
ଚକ୍ଷୁର୍ଦର୍ଶନମାତ୍ରନ୍ନିସ୍ତେଜୋ ଵିଦଧାନମ୍ ।
ଚିତ୍ତଂ ଚୋଜ୍ଝିତଧୈର୍ଯଂ ମତ୍ତାନାଂ ଦନୁଜାନାମ୍ ॥ ୧୪୦॥
ଗର୍ତେ ଦୁର୍ଜନଦେହେ ମଗ୍ନାନ୍ ପଙ୍କ୍ଵିଲଗ୍ନାନ୍ ।
ପ୍ରାଣାନାତ୍ମସଜାତୀନୁଦ୍ଧର୍ତୁଂ ଧୃତଦୀକ୍ଷମ୍ ॥ ୧୪୧॥
ଵଜ୍ରଂ ନିର୍ଜରରାଜୋ ଯଦ୍ଧତ୍ତେ ସମରେଷୁ ।
ତ୍ଵଚ୍ଛକ୍ତେଃ କଲଯୈତନ୍ମନ୍ମାତର୍ନିରମାଯି ॥ ୧୪୨॥
ରାଜ୍ଞୀତ୍ଵାତ୍ପରମେତେ ରାଜତ୍ଵଂ ଶତମନ୍ଯୋଃ ।
ନିଶ୍ଶକ୍ତିସ୍ସ ଵିନା ତ୍ଵାଂ କାମାଜ୍ଞାଂ କୁରୁତାଂ ନଃ ॥ ୧୪୩॥
ସର୍ଵଂ ଶକ୍ରନିଶାନ୍ତସ୍ଯେଶାନେ ତଵ ହସ୍ତେ ।
ଅସ୍ମାକଂ ତୁ ଧିଯେଦଂ ସ୍ତୋତ୍ରଂ ସଙ୍ଗ୍ରହତସ୍ତେ ॥ ୧୪୪॥
ଗନ୍ତଵ୍ଯଂ ସ୍ଵରଧୀଶେ ନିଶ୍ଶେଷାର୍ପଣଶୂରମ୍ ।
ବିଭ୍ରାଣା ନଯସି ତ୍ଵଂ ମାର୍ଜାଲୀଵ କିଶୋରମ୍ ॥ ୧୪୫॥
ଗୃହ୍ଣ୍ନ୍ନମ୍ବରନାଥାମମ୍ବାମଶ୍ଲଥମନ୍ଧଃ ।
କୀଶସ୍ଯେଵ କିଶୋରୋ ଯୋଗୀ ଗଚ୍ଛତି ଗମ୍ଯମ୍ ॥ ୧୪୬॥
ପୂର୍ଣାତ୍ମାର୍ପଣହୀନୋଽପ୍ଯଜ୍ଞାତାଽପି ସମାଧେଃ ।
ନିତ୍ଯଂ ଯୋ ଜଗଦମ୍ବ ତ୍ଵାଂ ସେଵେତ ଜପାଦ୍ଯୈଃ ॥ ୧୪୭॥
ତଂ ଚାଚଞ୍ଚଲଭକ୍ତିଂ କୃତ୍ଵା ପୂରିତକାମମ୍ ।
ନିଷ୍ଠାଂ ଦାସ୍ଯସି ତସ୍ମୈ ପୌଲୋମି କ୍ରମଶସ୍ତ୍ଵମ୍ ॥ ୧୪୮॥
ଭିନ୍ନାଂ ସଙ୍ଘସହସ୍ତ୍ରୈଃ ଖିନ୍ନାଂ ଶତ୍ରୁଭରେଣ ।
ପାତୁଂ ଭାରତଭୂମିଂ ମାତର୍ଦେହି ବଲଂ ମେ ॥ ୧୪୯॥
ତ୍ର୍ଯୈଲୋକ୍ଯାଵନଭାରଶ୍ରାନ୍ତାଂ ଵାସଵକାନ୍ତାମ୍ ।
ହୈରମ୍ବ୍ଯୋ ମଦଲେଖାଃ ସମ୍ଯକ୍ ସମ୍ମଦଯନ୍ତୁ ॥ ୧୫୦॥
॥ ତୃତୀଯୋ ହଂସମାଲାପାଦଃ ॥
ସୁରୁଚିର୍ଵଜ୍ରପାଣେସ୍ସୁଦୃଶୋ ମନ୍ଦହାସଃ ।
ହରତାନ୍ମୋହମୂଲଂ ହୃଦଯସ୍ଥଂ ତମୋ ମେ ॥ ୧୫୧॥
ଅମୃତଂ ସଙ୍କିରନ୍ତ୍ଯା ପ୍ରସରନ୍ତ୍ଯେହ ଦୃଷ୍ଟ୍ଯା ।
ସୁରରାଜ୍ଞୀ ବଲାଢ୍ଯାଂ ଭରତକ୍ଷ୍ମାଂ କରୋତୁ ॥ ୧୫୨॥
ଅମୃତାମ୍ଭଃ କିରନ୍ତୀ କରୁଣାମ୍ଭୋ ଵହନ୍ତୀ ।
ନତରକ୍ଷାତ୍ତଦୀକ୍ଷା ଶଚି ମାତସ୍ତଵେକ୍ଷା ॥ ୧୫୩॥
କୃତପୀଯୂଷଵୃଷ୍ଟିସ୍ତତକଲ୍ଯାଣସୃଷ୍ଟିଃ ।
ଵିହିତୈନୋଵିନଷ୍ଟିର୍ଧୃତଵିଜ୍ଞାନପୁଷ୍ଟିଃ ॥ ୧୫୪॥
ଭୃତଦେଵେନ୍ଦ୍ରତୁଷ୍ଟିର୍ଯମିନାଂ ଦେଵଗୃଷ୍ଟିଃ ।
ମମ କାମ୍ଯାନି ଦେଯାତ୍ତଵ ଵିଶ୍ଵାମ୍ବ ଦୃଷ୍ଟିଃ ॥ ୧୫୫॥
ଜଗତାଂ ଚକ୍ରଵର୍ତିନ୍ଯସିତସ୍ତେ କଟାକ୍ଷଃ ।
ଜଲଦୋ ଭକ୍ତିଭାଜାଂ ଶିଖିନାଂ ନର୍ତନାଯ ॥ ୧୫୬॥
ସୁକୃତୀ କୋଽପି ନାଟ୍ଯେ ବହୁଲେ ତତ୍ର ମାତଃ ।
ଜଗତେ ସାରଭୂତାନୁପଦେଶାନ୍କରୋତି ॥ ୧୫୭॥
ଅପରୋ ନଵ୍ଯକାଵ୍ଯାନ୍ଯନଵଦ୍ଯାନି ଧନ୍ଯଃ ।
ଵିଦଧାତ୍ଯପ୍ରଯତ୍ନାଦ୍ବୁଧଭୋଗକ୍ଷମାଣି ॥ ୧୫୮॥
ଇତରୋ ଭାଗ୍ଯଶାଲୀ ରମଣୀଯୈଃ ପ୍ରସଙ୍ଗୈଃ ।
ଵିତନୋତି ସ୍ଵଜାତିଂ ଜଗତି ଶ୍ରେଷ୍ଠନୀତିମ୍ ॥ ୧୫୯॥
ଜଗତାଂ ମାତରେକୋ ମହସା ପୁଣ୍ଯଶାଲୀ ।
ଵିଧୁତାରିଃ ସ୍ଵଦେଶଂ କୁରୁତେ ଵୀତପାଶମ୍ ॥ ୧୬୦॥
ପର ଇନ୍ଦ୍ରାଣି ସାଧୁର୍ବତ ଵିସ୍ମୃତ୍ଯ ଵିଶ୍ଵମ୍ ।
ରମତେ ସିକ୍ତଗଣ୍ଡଃ ପ୍ରମଦାଶ୍ରୁପ୍ରଦାନୈଃ ॥ ୧୬୧॥
ତଵ ରାଗାର୍ଦ୍ରଦୃଷ୍ଟ୍ଯା ଦିଵି ଶକ୍ରସ୍ଯ ନାଟ୍ଯମ୍ ।
କରୁଣାସିକ୍ତଦୃଷ୍ଟଯା ଭୁଵି ଭକ୍ତ୍ସ୍ଯ ନାଟ୍ଯମ୍ ॥ ୧୬୨॥
ତଵ ସପ୍ରେମଦୃଷ୍ଟିର୍ବଲମିନ୍ଦ୍ରେ ଦଧାତି ।
ତଵ କାରୁଣ୍ଯଦୃଷ୍ଟିର୍ବଲମସ୍ମାସୁ ଧତ୍ତାମ୍ ॥ ୧୬୩॥
ତଵ ଵାମାଃ କଟାକ୍ଷାଃ ପ୍ରଭୁମାନନ୍ଦଯନ୍ତୁ ।
ଉଚିତୋ ଦକ୍ଷିଣାନାମଯମସ୍ତ୍ଵୀକ୍ଷଣାନାମ୍ ॥ ୧୬୪॥
ସୁକୃତାନାଂ ପ୍ରପୋଷଂ ଦୁରିତାନାଂ ଵିଶୋଷମ୍ ।
କରୁଣାର୍ଦ୍ରା ଵିଭାନ୍ତୀ ତଵ ଦୃଷ୍ଟିଃ କ୍ରିଯାନ୍ନଃ ॥ ୧୬୫॥
କୁରୁ ପାଦାବ୍ଜବନ୍ଧୋଃ ସରଣିଂ ନିସ୍ତମସ୍କାମ୍ ।
ଶଚି ଵିଜ୍ଞାନତେଜଃ କିରତାଵୀକ୍ଷିତେନ ॥ ୧୬୬॥
କ୍ରିଯଯାରାଧଯନ୍ତୋ ଭୁଵନେ ତେ ଵିଭୂତୀଃ ।
ଇହ କେଚିଲ୍ଲଭନ୍ତେ ତଵ ମାତଃ କଟାକ୍ଷାନ୍ ॥ ୧୬୭॥
ସ୍ଫୁଟଵିଜ୍ଞାନପୂର୍ଵଂ ପ୍ରଭଜେରନ୍ ଯଦି ତ୍ଵାମ୍ ।
ସ୍ଥିରଯା ଦେଵି ଭକ୍ତ୍ଯା କିମୁ ଵକ୍ତଵ୍ଯମୀଶେ ॥ ୧୬୮॥
କୁଵିଧେର୍ଵିସ୍ମରନ୍ତୀ ଭରତକ୍ଷ୍ମା ଶଚି ତ୍ଵାମ୍ ।
ବହୁକାଲାଦଭାଗ୍ଯେ ପତିତା ଦେଵ୍ଯଯୋଗ୍ଯେ ॥ ୧୬୯॥
ଅଭିଷିକ୍ତ୍ସ୍ଯ ମାତା ତଵ ତେଜୋଂଶଭୂତା ।
ସୁଦଶାଂ ସେଵମାନାମନଯତ୍ପଶ୍ଚିମାଶାମ୍ ॥ ୧୭୦॥
ଅଯି କାଲଂ କିଯନ୍ତଂ ଦଯସେ ପଶ୍ଚିମସ୍ଯାମ୍ ।
ଇତ ଇନ୍ଦ୍ରାଣି ପୂର୍ଵାମଵଲୋକସ୍ଵ ଦୀନାମ୍ ॥ ୧୭୧ ॥
ନ ଵଯଂ ପଶ୍ଚିମସ୍ଯାଶ୍ଶଚି ଯାଚାମନାଶମ୍ ।
କୃପଯୈତାଂ ଚ ପୂର୍ଵାଂ ନିହତାଶାମଵାଶାମ୍ ॥ ୧୭୨॥
ସକଲଂ ଵ୍ଯର୍ଥମାସୀଦଯି ଦୀନେଷୁ ଦୃଷ୍ଟା ।
ତଵ ଵିଶ୍ଵସ୍ଯ ମାତଃ କରୁଣୈକାଵଶିଷ୍ଟା ॥ ୧୭୩॥
ସୁରରାଜସ୍ଯ କାନ୍ତେ ନରସିଂହସ୍ଯ ସୂନୁମ୍ ।
ବଲଵନ୍ତଂ କୁରୁ ତ୍ଵଂ ଭରତକ୍ଷ୍ମାଵନାଯ ॥ ୧୭୪॥
ରୁଚିରାଭିର୍ନିଜାଭିର୍ଗତିଭିର୍ହର୍ଷଯନ୍ତୁ ।
ମରୁତାଂ ଭର୍ତୁରେତାସ୍ତରୁଣୀଂ ହଂସମାଲାଃ ॥ ୧୭୫॥
॥ ଚତୁର୍ଥୋ ମଧୁମତୀପାଦଃ ॥
ଦିଶି ଦିଶି ପ୍ରସରଦ୍ରୁଚିତମୋଦମନମ୍ ।
ହରତୁ ମେ ଦୁରିତଂ ହରିଵଧୂହସିତମ୍ ॥ ୧୭୬॥
ହରତୁ ଦୁଃଖଭରପ୍ରସୃତମଶ୍ରୁଜଲମ୍ ।
ଭରତଭୂସୁଦୃଶୋ ବଲଜିତୋ ରମଣୀ ॥ ୧୭୭॥
ଅତିତରାଂ ମହିତା ସୁରପତେର୍ଵନିତା ।
କରୁଣଯା କଲିତା ମମ ଶଚୀ ଶରଣମ୍ ॥ ୧୭୮॥
ତ୍ରିଭୁଵନକ୍ଷିତିରାଡ୍ଭୁଵନଭୂଷଣଭା ।
ଅଖିଲଭାସକଭା ମମ ଶଚୀ ଶରଣମ୍ ॥ ୧୭୯॥
ସତତଯୁକ୍ତସୁଧୀହୃଦଯଦୀପକଭା ।
ନିଖିଲପାଚକଭା ମମ ଶଚୀ ଶରଣମ୍ ॥ ୧୮୦॥
ରଵିଵିରୋଚକଭା ଶଶିଵିରାଜକଭା ।
ଭଗଣଶୋଭକଭା ମମ ଶଚୀ ଶରଣମ୍ ॥ ୧୮୧॥
ଗଗନଖେଲକଭା ସକଲଚାଲକଭା ।
ଅଭଯଦାଽତିଶୁଭା ମମ ଶଚୀ ଶରଣମ୍ ॥ ୧୮୨॥
ରୁଚିଲଵଙ୍ଗତଯା ଯଦନଘାଂଶୁନିଧେଃ ।
ହୃତତମୋଭଵନଂ ଭଵତି ଦୀପିକଯା ॥ ୧୮୩॥
ସ୍ଫୁରତି ଚାରୁ ଯତଃ କିରଣମେକମିତା ।
ଜଲଦସୌଧତଲେ ମୁହୁରିଯଂ ଚପଲା ॥ ୧୮୪॥
ଭଵତି ଯଦ୍ଦ୍ଯୁତିତଃ କମପି ଭାଗମିତଃ ।
ପଵିରରାତିହରଃ ପ୍ରହରଣେଶପଦମ୍ ॥ ୧୮୫॥
ଭଵତି ଯତ୍ସୁରୁଚେରଣୁତମାଂଶମିତା ।
ଯୁଵମନୋମଦନୀ ସୁଵଦନାସ୍ମିତଭା ॥ ୧୮୬॥
ଵିତତସୂକ୍ଷ୍ମତନୁର୍ମହତି ସା ଗଗନେ ।
ପରମପୂରୁଷଭା ମମ ଶଚୀ ଶରଣମ୍ ॥ ୧୮୭॥
ଅମରନାଥସଖୀ ରୁଚିନିଧାନମୁଖୀ ।
ଅମୃତଵର୍ଷକଦୃଙ୍ ମମ ଶଚୀ ଶରଣମ୍ ॥ ୧୮୮॥
ଅଵିଧଵା ସତତଂ ଯୁଵତିରେଵ ସଦା ।
ଅନଘଵୀରସୁତା ମମ ଶଚୀ ଶରଣମ୍ ॥ ୧୮୯॥
ଅମୃତଵତ୍ଯଧରେ ସୁରଧରାପତଯେ ।
ଚରଣଯୋର୍ଭଜତେ ମମ ଶଚୀ ଶରଣମ୍ ॥ ୧୯୦॥
ସ୍ମିତଲଵେଷୁ ସିତା ଶିରସିଜେଷ୍ଵସିତା ।
ଚରଣଯୋରରୁଣା ବହିରପି ତ୍ରିଗୁଣା ॥ ୧୯୧ ॥
କପଟଚନ୍ଦ୍ରମୁଖୀ ପ୍ରକୃତିରିନ୍ଦ୍ରସଖୀ ।
ମୃତିଜରାରହିତା ମମ ଶଚୀ ଶରଣମ୍ ॥ ୧୯୨ ॥
କୃଶତମେପ୍ଯୁଦରେ ତ୍ରିଭୁଵନଂ ଦଧତୀ ।
ଜନିମତାଂ ଜନନୀ ମମ ଶଚୀ ଶରଣମ୍ ॥ ୧୯୩ ॥
ସ୍ଥିରତରା ମନସି ସ୍ଥିରତମା ଵଚସି ।
ନଯନଯୋସ୍ତରଲା ମମ ଶଚୀ ଶରଣମ୍ ॥ ୧୯୪॥
ମୃଦୁତରା କରଯୋର୍ମୃଦୁତମା ଵଚସି ।
ଭୁଜବଲେ କଠିନା ମମ ଶଚୀ ଶରଣମ୍ ॥ ୧୯୫॥
ମୃଦୁଲବାହୁଲତାଽପ୍ଯମିତଭୀମବଲା ।
ଅସୁରଦର୍ପହରୀ ମମ ଶଚୀ ଶରଣମ୍ ॥ ୧୯୬॥
ଅବଲଯାଽପି ଯଯା ନ ସଦୃଶୋଽସ୍ତି ବଲେ ।
ଜଗତି କଶ୍ଚିଦସୌ ମମ ଶଚୀ ଶରଣମ୍ ॥ ୧୯୭॥
ଅତିତରାଂ ସଦଯା ପଦରତେ ମନୁଜେ ।
ଖଲଜନେ ପରୁଷା ମମ ଶଚୀ ଶରଣମ୍ ॥ ୧୯୮॥
ଗଣପତିଂ କୁରୁତାଦ୍ଭରତଭୂମ୍ଯଵନେ ।
ଅମରଭୂମିପତେଃ ପ୍ରିଯତମା ସବଲମ୍ ॥ ୧୯୯॥
ମଧୁରଶବ୍ଦତତୀର୍ମଧୁମତୀରଜରା ।
ଗଣପତେଶ୍ଶୃଣୁଯାତ୍ସୁରପତେସ୍ତରୁଣୀ ॥ ୨୦୦॥
॥ ଦ୍ଵିତୀଯମୌଷ୍ଣିହଂ ଶତକଂ ସମାପ୍ତମ୍ ॥
॥ ଅଥ ତୃତୀଯମାନୁଷ୍ଟୁଭଂ ଶତକମ୍ ॥
॥ ପ୍ରଥମଃ ପଥ୍ଯାଵକ୍ତ୍ରପାଦଃ ॥
ହସିତଂ ତନ୍ମହାଶକ୍ତେରସ୍ମାକଂ ହରତୁ ଭ୍ରମମ୍ ।
ଯତ ଏଵ ମହଚ୍ଚିତ୍ରଂ ଵିଶ୍ଵମେତଦ୍ଵିଜୃମ୍ଭତେ ॥ ୨୦୧॥
ରାଜନ୍ତୀ ସର୍ଵଭୂତେଷୁ ସର୍ଵାଵସ୍ଥାସୁ ସର୍ଵଦା ।
ମାତା ସର୍ଗସ୍ଯ ଚିତ୍ପାଯାତ୍ ପୌଲୋମୀ ଭାରତକ୍ଷିତିମ୍ ॥ ୨୦୨॥
ଧର୍ମିଜ୍ଞାନଂ ଵିଭୋସ୍ତତ୍ତ୍ଵଂ ଧର୍ମୋ ଜ୍ଞାନଂ ସଵିତ୍ରି ତେ ।
ଵ୍ଯଵହୃତ୍ଯୈ ଵିଭାଗୋଽଯଂ ଵସ୍ତ୍ଵେକଂ ତତ୍ତ୍ଵତୋ ଯୁଵାମ୍ ॥ ୨୦୩॥
ଇନ୍ଦ୍ରେଶଵାସୁଦେଵାଦ୍ଯୈଃ ପଦୈଃ ସଙ୍କୀତ୍ର୍ଯତେ ଵିଭୁଃ ।
ଶଚୀ ଶିଵା ମହାଲକ୍ଷ୍ମୀପ୍ରମୁଖୈର୍ଭଵତୀ ପଦୈଃ ॥ ୨୦୪॥
ଅନ୍ତରଂ ଵସ୍ତୁନୋ ଜ୍ଞାତୃ ତଚ୍ଛକ୍ତଂ ପରିଚକ୍ଷତେ ।
ଶାଖାଃ ସମନ୍ତତୋ ଜ୍ଞାନଂ ଶକ୍ତିଂ ସଙ୍କୀର୍ତଯନ୍ତି ତାମ୍ ॥ ୨୦୫॥
ଅନ୍ତରସ୍ଯ ଚ ଶାଖାନାମୈକ୍ଯଂ ନିର୍ଵିଷଯସ୍ଥିତୌ ।
ଵିଷଯଗ୍ରହଣେଷ୍ଵେଵ ସଵିଭାଗଃ ପ୍ରଦୃଶ୍ଯତେ ॥ ୨୦୬॥
ସ୍ଯାଦେଵଂ ଵିଷଯାପେକ୍ଷୀ ଶାଖାନାମନ୍ତରସ୍ଯ ଚ ।
ଅଵିଭକ୍ତୈକରୂପାଣାଂ ଵିଭାଗୋ ହରିତାମିଵ ॥ ୨୦୭॥
ଲକ୍ଷ୍ଯମନ୍ତର୍ଵଯଂ ଚକ୍ରେ ଧ୍ଯାଯାମୋ ଯତ୍ର ନିଷ୍ଠିତାଃ ।
ଅନ୍ତରୀଭାଵତସ୍ତସ୍ଯ ନାନ୍ତରଂ ତୁ ଵିଲକ୍ଷଣମ୍ ॥ ୨୦୮॥
ଅହଙ୍କୃତେର୍ଵଯଂ ନାନ୍ଯେ ଯତ୍ରାହଙ୍କୃତିସମ୍ଭଵଃ ।
ସମ୍ପଦ୍ଯେତାନ୍ତରଂ ତତ୍ର ଜ୍ଞାନସ୍ଯ ଜ୍ଞାତୃତାଵହମ୍ ॥ ୨୦୯॥
ଅନ୍ତରାଵର୍ତଭୂଯସ୍ତ୍ଵାଦେକସ୍ମିନ୍ ବୋଧସାଗରେ ।
ବୋଦ୍ଧାରୋ ବହଵୋଽଭୂଵନ୍ ଵସ୍ତୁ ନୈଵ ତୁ ଭିଦ୍ଯତେ ॥ ୨୧୦॥
ଚିଦ୍ରୂପେ ମାତରେଵଂ ତ୍ଵଂ ପରସ୍ମାଦ୍ବ୍ରହ୍ମଣୋ ଯଥା ।
ନ ଦେଵି ଦେଵତାତ୍ମଭ୍ଯୋ ଜୀଵାତ୍ମଭ୍ଯଶ୍ଚ ଭିଦ୍ଯସେ ॥ ୨୧୧॥
ସମସ୍ତଭୂତବୀଜାନାଂ ଗୂଢାନାମନ୍ତରାତ୍ମନି ।
ତଵୋଦ୍ଗାରୋଽଯମାକାଶୋ ମାତସ୍ସୂକ୍ଷ୍ମରଜୋମଯଃ ॥ ୨୧୨॥
ନ ସର୍ଵଭୂତବୀଜାନି ଵସ୍ତୂନି ସ୍ଯୁଃ ପୃଥକ୍ ପୃଥକ୍ ।
ତ୍ଵଯି ପ୍ରାଗଵିଭକ୍ତାନି ବଭୂଵୁରିତି ଵିଶ୍ରୁତିଃ ॥ ୨୧୩॥
ଯଥାମ୍ବସ୍ମୃତିବୀଜାନାଂ ପ୍ରଜ୍ଞାଯାମଵିଶେଷତଃ ।
ତଥା ସ୍ଯାଦ୍ଭୂତବୀଜାନାମଵିଭକ୍ତ୍ସ୍ଥିତିସ୍ତ୍ଵଯି ॥ ୨୧୪॥
ନାଣୂନି ଭୂତବୀଜାନି ପ୍ରାକ୍ସର୍ଗାତ୍ତ୍ଵଯି ସଂସ୍ଥିତୌ ।
ଚିତିଶକ୍ତ୍ଯାତ୍ମକାନ୍ଯେଵ ନିରାକାରାଣି ସର୍ଵଥା ॥ ୨୧୫॥
ଅନାଦି ଚେଦିଦଂ ଵିଶ୍ଵଂ ସ୍ମରଣ୍ଣାତ୍ତଵ ସର୍ଜନମ୍ ।
ସାଦି ଚେଦାଦିମଃ ସର୍ଗୋ ଵକ୍ତ୍ଵ୍ଯସ୍ତଵ କଲ୍ପନାତ୍ ॥ ୨୧୬॥
ଵିଧାତୁଂ ଶକ୍ନୁଯାତ୍ସଂଵିଦଭୂତସ୍ଯାପି କଲ୍ପନମ୍ ।
କଲ୍ପିତସ୍ଯୈକଦା ଭୂଯଃ ସର୍ଜନାଵସରେ ସ୍ମୃତିଃ ॥ ୨୧୭॥
ଚିତେରସ୍ମାଦୃଶାଂ ଵୀର୍ଯଂ ସ୍ଵପ୍ନେ ଚେଦ୍ଵିଶ୍ଵକାରଣମ୍ ।
ଚିତେସ୍ସମଷ୍ଟିଭୂତାଯାଃ ପ୍ରଭାଵେ ସଂଶଯଃ କୁତଃ ॥ ୨୧୮॥
ମାତସ୍ସମଷ୍ଟିଚିଦ୍ରୂପେ ଵିଭୂତିର୍ଭୁଵନଂ ତଵ ।
ଇହ ଵ୍ଯଷ୍ଟି ଶରୀରେଷୁ ଭାନ୍ତୀ ତଦନୁପଶ୍ଯସି ॥ ୨୧୯॥
ତ୍ଵଂ ବହ୍ମ ତ୍ଵଂ ପରାଶକ୍ତିସ୍ତ୍ଵଂ ସର୍ଵା ଅପି ଦେଵତାଃ ।
ତ୍ଵଂ ଜୀଵାସ୍ତ୍ଵଂ ଜଗତ୍ସର୍ଵଂ ତ୍ଵଦନ୍ଯନ୍ନାସ୍ତି କିଞ୍ଚନ ॥ ୨୨୦॥
ସତୀ ଚିଦମ୍ବ ନୈଵ ତ୍ଵଂ ଭାଵାଭାଵଵିଲକ୍ଷଣା ।
ଶକ୍ତିଶକ୍ତିମତୋର୍ଭେଦଦର୍ଶନାଦେଷ ଵିଭ୍ରମଃ ॥ ୨୨୧॥
ତଵାମ୍ବ ଜଗତଧାସ୍ଯ ମୃତ୍ତିକାଘଟଯୋରେଵ ।
ସମ୍ବନ୍ଧୋ ଵେଦିତଵ୍ଯଃ ସ୍ଯାନ୍ନ ରଜ୍ଜୌଫଣିନୋରିଵ ॥ ୨୨୨॥
ତ୍ଵଂ ଶକ୍ତିରସ୍ଯଵିଚ୍ଛିନ୍ନା ଭାଵୈରାତ୍ମଵିଭୂତିଭିଃ ।
ଅନ୍ତରାସ୍ତୁ ମହେନ୍ଦ୍ରସ୍ଯ ଶକ୍ତ୍ସ୍ଯ ପ୍ରତିବିମ୍ବଵତ୍ ॥ ୨୨୩॥
ଶକ୍ତିର୍ଗଣପତେଃ କାଯେ ପ୍ରଵହନ୍ତୀ ସନାତନୀ ।
ଭାରତସ୍ଯ କ୍ରିଯାଦସ୍ଯ ବାଧ୍ଯମାନସ୍ଯ ରକ୍ଷଣମ୍ ॥ ୨୨୪॥
ଇମାନି ତତ୍ତ୍ଵଵାଦୀନି ଵାସିଷ୍ଠସ୍ଯ ମହାମୁନେଃ ।
ପଥ୍ଯାଵକ୍ତ୍ରଣି ସେଵନ୍ତାମନନ୍ତାମଭଵାଂ ଚିତିମ୍ ॥ ୨୨୫॥
॥ ଦ୍ଵିତୀଯୋ ମାଣଵକପାଦଃ ॥
ଶକ୍ତ୍ତମା ଶକ୍ରଵଧୂ ହାସଵିଭା ମେ ହରତୁ ।
ମାନସମାର୍ଗାଵରକଂ ଜେତୁମଶକ୍ଯଂ ତିମିରମ୍ ॥ ୨୨୬॥
ଭାରତଭୂପଦ୍ମଦୃଶୋ ଦୁର୍ଦଶଯା କ୍ଷୀଣତନୋଃ ।
ବାଷ୍ପମଜସ୍ରଂ ଵିଗଲଦ୍ଵାସଵଭାମା ହରତୁ ॥ ୨୨୭॥
ଦଣ୍ଡିତରକ୍ଷୋଜନତା ପଣ୍ଡିତଗୀତାଵନିତା ।
ମଣ୍ଡିତମାହେନ୍ଦ୍ରଗୃହା ଖଣ୍ଡିତପାପା ଜଯତି ॥ ୨୨୮॥
ସଦ୍ଗୁଣସମ୍ପତ୍କଲିତଂ ସର୍ଵଶରୀରେ ଲଲିତମ୍ ।
ଦେଵପତେଃ ପୁଣ୍ଯଫଲଂ ପୁଷ୍ଯତୁ ମେ ବୁଦ୍ଧିବଲମ୍ ॥ ୨୨୯॥
ହାସଵିଶେଷୈରଲସୈର୍ଦିକ୍ଷୁ କିରନ୍ତ୍ଯଚ୍ଛସୁଧାମ୍ ।
ଇନ୍ଦ୍ରଦୃଗାନନ୍ଦକରୀ ଚନ୍ଦ୍ରମୁଖୀ ମାମଵତୁ ॥ ୨୩୦॥
ପ୍ରେମତରଙ୍ଗପ୍ରତିମୈଃ ଶୀତଲଦୃଷ୍ଟିପ୍ରକରୈଃ ।
ଶକ୍ରମନୋମୋହକରୀ ଵକ୍ରକଚା ମାମଵତୁ ॥ ୨୩୧॥
ଗାଢରସୈଶ୍ଚାରୁପଦୈର୍ଗୂଢତରାର୍ଥୈର୍ଵଚନୈଃ ।
କାମକରୀ ଵୃତ୍ରଜିତୋ ହେମତନୁର୍ମାମଵତୁ ॥ ୨୩୨॥
ମୃତ୍ଯୁତନୁଃ କାଲତନୋର୍ଵିଶ୍ଵପତେଃ ପାର୍ଶ୍ଵଚରୀ ।
ପ୍ରେତଜଗଦ୍ରକ୍ଷତି ଯା ସା ତରୁଣୀ ମାମଵତୁ ॥ ୨୩୩॥
ପ୍ରେତଜଗତ୍କେଚିଦଧୋ ଲୋକମପୁଣ୍ଯଂ ବ୍ରୁଵତେ ।
ଶୀତରୁଚେର୍ଦେଵି ପରୋ ନେତରଦେତଦ୍ ଵଦତି ॥ ୨୩୪॥
ଭୂରିଯମୁର୍ଵୀ ଵସୁଧା ଵାରିଜଵୈର୍ଯେଷଭୁଵଃ ।
ସ୍ଵର୍ମହସାଂ ରାଶିରସୌ ଯେଷୁ ନରପ୍ରେତସୁରାଃ ॥ ୨୩୫॥
ରାଜତଶୈଲଂ ଶଶିନଃ କେଚିଦଭିନ୍ନଂ ବ୍ରୁଵତେ ।
ମୃତ୍ଯୁଯମାଵେଵ ଶିଵାଵୀଶ୍ଵରି ତେଷାଂ ତୁ ମତେ ॥ ୨୩୬॥
ରାଜତଶୈଲଃ ପିତୃଭୂରୋଷଧିରାଡେଷ ଯଦି ।
କାଞ୍ଚନଶୈଲଃ ସୁରଭୂର୍ବନ୍ଧୁରସୌ ଵାରିରୁହାମ୍ ॥ ୨୩୭॥
ପାଵଯ ଭୂମିଂ ଦଧତଃ ପାଵକକାଯସ୍ଯ ଵିଭୋଃ ।
ଭାମିନି ଭାଵାନୁଗୁଣେ ସେଵକମଗ୍ନାଯି ତଵ ॥ ୨୩୮॥
ଯସ୍ଯ ଯମୋ ଭୂତପତିର୍ବୁଦ୍ଧିମତସ୍ତସ୍ଯ ମତେ ।
ଆଗ୍ନିରୁପେନ୍ଦ୍ରୋ ମଘଵା କାଞ୍ଚନଗର୍ଭୋ ଭଗଵାନ୍ ॥ ୨୩୯॥
ଯସ୍ଯ ମହାକାଲଵଧୂର୍ମୃତ୍ଯୁରପି ଦ୍ଵେ ନ ଵିଦଃ ।
ତ୍ଵଂ ଶଚି ମେଧାଽସ୍ଯମତେ ପାଵକଶକ୍ତିଃ କମଲା ॥ ୨୪୦॥
ନାମସୁ ଭେଦୋଽସ୍ତୁ ଧିଯାମୀଶ୍ଵରି ନିଷ୍କୃଷ୍ଟମିଦମ୍ ।
ସୂର୍ଯଧରେନ୍ଦୁଷ୍ଵଜରେ ତ୍ଵଂ ତ୍ରିତନୁର୍ଭାସି ପରେ ॥ ୨୪୧॥
ସାତ୍ତ୍ଵିକଶକ୍ତିଃ ସଵିତର୍ଯାଦିମରାମେ ଭଵସି ।
ରାଜସଶକ୍ତିର୍ଭୁଵି ନସ୍ତାମସଶକ୍ତିଃ ଶଶିନି ॥ ୨୪୨॥
ସର୍ଵଗୁଣା ସର୍ଵଵିଭା ସର୍ଵବଲା ସର୍ଵରସା ।
ସର୍ଵମିଦଂ ଵ୍ଯାପ୍ଯ ଜଗତ୍କାପି ଵିଭାନ୍ତୀ ପରମା ॥ ୨୪୩॥
ଵ୍ଯୋମତନୁର୍ନିର୍ଵପୁଷୋ ଦେଵି ସତସ୍ତ୍ଵଂ ଦଯିତା ।
ଅସ୍ଯଭିଯୁକ୍ତୈର୍ଵିବୁଧୈରମ୍ବ ମହେଶ୍ଵର୍ଯୁଦିତା ॥ ୨୪୪॥
ସା ଖଲୁ ମାଯା ପରମା କାରଣମୀଶଂ ଵଦତାମ୍ ।
ସା ପ୍ରକୃତିଃ ସାଙ୍ଖ୍ଯଵିଦାଂ ସା ଯମିନାଂ କୁଣ୍ଡଲିନୀ ॥ ୨୪୫॥
ସା ଲଲିତା ପଞ୍ଚଦଶୀମୁତ୍ତମଵିଦ୍ଯାଂ ଜପତାମ୍ ।
ସା ଖଲୁ ଚଣ୍ଡୀ ଜନନୀ ସାଧୁନଵାର୍ଣଂ ଭଜତାମ୍ ॥ ୨୪୬॥
ସା ମମ ଶଚ୍ଯାଃ ପରମଂ କାରଣରୂପଂ ଭଵତି ।
କାର୍ଯତନୁର୍ଦିଵି ଶକ୍ରଂ ସମ୍ମଦଯନ୍ତୀ ଲସତି ॥ ୨୪୭॥
ଵ୍ଯୋମତନୋଃ ସର୍ଵଜଗଚ୍ଚାଲନସୂତ୍ରଂ ତୁ ଵଶେ ।
ନିର୍ଵହଣେ ତସ୍ଯ ପୁନର୍ଦିଵ୍ଯତନୁସ୍ତ୍ରୀତ୍ରିତଯମ୍ ॥ ୨୪୮॥
ପାତୁମିମଂ ସ୍ଵଂ ଵିଷଯଂ ହନ୍ତ ଚିରାନ୍ନିର୍ଵିଜଯମ୍ ।
କିଙ୍କ୍ରମୀଶେ ଵିଭଯଂ ମାଂ କୁରୁ ପର୍ଯାର୍ଶିଯମ୍ ॥ ୨୪୯॥
ଚାରୁପଦକ୍ରୀଡନକୈର୍ମାତରିମୈର୍ମାଣଵକୈଃ ।
ଚେତସି ତେ ଦେଵନୁତେ ପ୍ରୀତିରମୋଘା ଭଵତୁ ॥ ୨୫୦॥
॥ ତୃତୀଯଶ୍ଚିତ୍ରପଦାପାଦଃ ॥
ଅପ୍ଯଲସୋ ହରିଦନ୍ତଧ୍ଵାନ୍ତତତେରପି ହର୍ତା ।
ଅସ୍ତୁ ମମେନ୍ଦ୍ରପୁରନ୍ଧ୍ରୀ ହାସଲଵଃ ଶୁଭକର୍ତା ॥ ୨୫୧॥
ପାହି ପରୈର୍ହୃତସାରାଂ ନେତ୍ରଗଲଜ୍ଜଲଧାରାମ୍ ।
ଭାରତଭୂମିମନାଥାଂ ଦେଵି ଵିଧାଯ ସନାଥାମ୍ ॥ ୨୫୨॥
ଚାଲଯତା ସୁରରାଜଂ ପାଲଯତା ଭୁଵନାନି ।
ଶୀଲଯତା ନତରକ୍ଷାଂ କାଲଯତା ଵୃଜିନାନି ॥ ୨୫୩॥
ଲାଲଯତା ମୁନିସଙ୍ଘଂ କୀଲଯତା ଦିଵି ଭଦ୍ରମ୍ ।
ପାଵଯ ମାଂ ସକୃଦୀଶେ ଭାସୁରଦୃକ୍ପ୍ରସରେଣ ॥ ୨୫୪॥
ସର୍ଵରୁଚାମାପି ଶାଲାଂ ତ୍ଵାଂ ଶଚି ମଙ୍ଗଲଲୀଲାମ୍ ।
କାଲକଚାମୁତ କାଲୀଂ ପଦ୍ମମୁଖୀମୁତ ପଦ୍ମାମ୍ ॥ ୨୫୫॥
ଯଃ ସ୍ମରତି ପ୍ରତିକଲ୍ଯଂ ଭକ୍ତିଭରେଣ ପରେଣ ।
ତସ୍ଯ ସୁରେଶ୍ଵରି ସାଧୋରସ୍ମି ପଦାବ୍ଜଭୁଜିଷ୍ଯଃ ॥ ୨୫୬॥
ଯସ୍ତଵ ନାମପଵିତ୍ରଂ କୀର୍ତଯତେ ସୁକୃତୀ ନା ।
ଵାସଵସୁନ୍ଦରି ଦାସସ୍ତଚ୍ଚରଣସ୍ଯ ସଦାଽହମ୍ ॥ ୨୫୭॥
ପାଵକସାଗରକୋଣଂ ଯସ୍ତଵ ପାଵନଯନ୍ତ୍ରମ୍ ।
ପୂଜଯତି ପ୍ରତିଘସ୍ରଂ ଦେଵି ଭଜାମି ତଦଙ୍ଧ୍ରିମ୍ ॥ ୨୫୮॥
ଯସ୍ତଵ ମନ୍ତ୍ରମୁଦାରପ୍ରାଭଵମାଗମସାରମ୍ ।
ପାଵନି କୂର୍ଚମୁପାସ୍ତେ ତସ୍ଯ ନମଧ୍ରଣାଯ ॥ ୨୫୯॥
ଶାନ୍ତଧିଯେତରଚିନ୍ତାସନ୍ତତିମମ୍ବ ଵିଧୂଯ ।
ଚିନ୍ତଯତାଂ ତଵ ପାଦାଵସ୍ମି ସତାମନୁଯାଯୀ ॥ ୨୬୦॥
ଶୋଧଯତାଂ ନିଜତତ୍ତ୍ଵଂ ସାଧଯତାଂ ମହିମାନମ୍ ।
ଭାଵଯତାଂ ଚରଣଂ ତେ ଦେଵି ପଦାନୁଚରୋଽହମ୍ ॥ ୨୬୧॥
ଯୋଽନୁଭଵେନ୍ନିଜଦେହେ ତ୍ଵାମଜରେ ପ୍ରଵହନ୍ତୀମ୍ ।
ସନ୍ତତଚିନ୍ତନଯୋଗାତ୍ତସ୍ଯ ନମାମି ପଦାବ୍ଜମ୍ ॥ ୨୬୨॥
ବୋଧଯତେ ଭଵତୀଂ ଯଃ ପ୍ରାଣଗତାଗତଦର୍ଶୀ ।
କୁଣ୍ଡଲିନୀଂ କୁଲକୁଣ୍ଡାତ୍ତଂ ତ୍ରିଦିଵେଶ୍ଵରି ଵନ୍ଦେ ॥ ୨୬୩॥
ଲୋଚନମଣ୍ଡଲସୌଧାଂ ଲୋକନମୂଲଵିଚାରୀ ।
ଵିନ୍ଦତି ଯଃ ପରମେ ତ୍ଵାଂ ଵନ୍ଦନମସ୍ଯ କରୋମି ॥ ୨୬୪॥
ମାନିନି ଜମ୍ଭଜିତସ୍ତ୍ଵାଂ ମାନସମୂଲଵିତର୍କୀ ।
ଵେଦହୃଦମ୍ବୁରୁହେ ଯଃ ପାଦମମୁଷ୍ଯ ନମାମି ॥ ୨୬୫॥
ଅନ୍ତରନାଦଵିମର୍ଶୀ ପଶ୍ଯତି ଯଃ ସୁକୃତୀ ତେ ।
ଵୈଭଵମମ୍ବ ଵିଶୁଦ୍ଧେ ତେନ ଵଯଂ ପରଵନ୍ତଃ ॥ ୨୬୬॥
ଇନ୍ଦ୍ରପଦସ୍ଥିତଚିତ୍ତଶ୍ଶୀର୍ଷସୁଧାରସମତ୍ତଃ ।
ଯୋ ଭଜତେ ଜନନି ତ୍ଵାଂ ତଚ୍ଚରଣଂ ପ୍ରଣମାମି ॥ ୨୬୭॥
ରାସନଵାରିଣି ଲଗ୍ନଃ ସମ୍ମଦଵୀଚିଷୁ ମଗ୍ନଃ ।
ଧ୍ଯାଯତି ଯଃ ପରମେ ତ୍ଵାଂ ତସ୍ଯ ପଦଂ ମମ ଵନ୍ଦ୍ଯମ୍ ॥ ୨୬୮॥
ତ୍ଵାଂ ସଦହଞଙ୍କୃତିରୂପାଂ ଯୋଗିନୁତେ ହତପାପାମ୍ ।
ଧାରଯତେ ହୃଦଯେ ଯସ୍ତସ୍ଯ ସଦାଽସ୍ମି ଵିଧେଯଃ ॥ ୨୬୯॥
ଧୂତସମସ୍ତଵିକଲ୍ପୋ ଯସ୍ତଵ ପାଵନଲୀଲାମ୍ ।
ଶୋଧଯତି ସ୍ଵଗୁହାଯାଂ ତସ୍ଯ ଭଵାମ୍ଯନୁଜୀଵୀ ॥ ୨୭୦॥
ଯୋ ଭଜତେ ନିଜଦୃଟିଂ ରୂପପରିଗ୍ରହଣେଷୁ ।
କାମପି ଦେଵି କଲାଂ ତେ ତସ୍ଯ ପଦେ ନିପତେଯମ୍ ॥ ୨୭୧॥
କର୍ମଣି କର୍ମଣି ଚେଷ୍ଟାମମ୍ବ ତଵୈଵ ଵିଭୂତିମ୍ ।
ଯଃ ଶିତବୁଦ୍ଧିରୁପାସ୍ତେ ତତ୍ପଦମେଷ ଉପାସ୍ତେ ॥ ୨୭୨॥
ଵସ୍ତୁନି ଵସ୍ତୁନି ସତ୍ତାଂ ଯୋ ଭଵତୀଂ ସମୁପାସ୍ତେ ।
ମାତରମୁଷ୍ଯ ଵହେଯଂ ପାଦଯୁଗଂ ଶିରସାଽହମ୍ ॥ ୨୭୩॥
ପାତୁମିମଂ ନିଜଦେଶଂ ସର୍ଵଦିଶାସୁ ସପାଶମ୍ ।
ଅମ୍ବ ଵିଧାଯ ସମର୍ଥଂ ମାଂ କୁରୁ ଦେଵି କୃତାର୍ଥମ୍ ॥ ୨୭୪॥
ଚିତ୍ରପଦାଭିରିମାଭିଶ୍ଚିତ୍ରଵିଚିତ୍ରଚରିତ୍ରା ।
ସମ୍ମଦମେତୁ ମଘୋନଃ ପ୍ରାଣସଖୀ ମୃଗନେତ୍ର ॥ ୨୭୫॥
॥ ଚତୁର୍ଥୋ ନାରାଚିକାପାଦଃ ॥
ଅନ୍ତର୍ଵିଧୁନ୍ଵତା ତମଃ ପ୍ରାଣସ୍ଯ ତନ୍ଵତା ବଲମ୍ ।
ମନ୍ଦସ୍ମିତେନ ଦେଵତାରାଜ୍ଞୀ କରୋତୁ ମେ ଶିଵମ୍ ॥ ୨୭୬॥
ଉତ୍ଥାପ୍ଯ ପୁଣ୍ଯସଞ୍ଚଯଂ ସମ୍ମଦ୍ର୍ଯ ପାପସଂହତିମ୍ ।
ସା ଭାରତସ୍ଯ ସମ୍ପଦେ ଭୂଯାଦ୍ବଲାରିଭାମିନୀ ॥ ୨୭୭॥
ଲୀଲାସଖୀ ବିଡୌଜସସ୍ସ୍ଵର୍ଵାଟିକାସୁ ଖେଲନେ ।
ପୀଯୁଷଭାନୁଜିନ୍ମୁଖୀ ଦେଵୀ ଶଚୀ ଵିରାଜତେ ॥ ୨୭୮॥
ପକ୍ଷଃ ପରୋ ମରୁତ୍ଵତୋ ରକ୍ଷଃ ପ୍ରଵୀରମର୍ଦନେ ।
ଭାମାଲି ଭାସୁରାନନା ଦେଵୀ ଶଚୀ ଵିରାଜତେ ॥ ୨୭୯॥
ଭୀତିଂ ନିଶାଟସଂହତେଃ ପ୍ରୀତିଂ ସୁପର୍ଵଣାଂ ତତେଃ ।
ଜ୍ଯାଟଙ୍କୃତୈର୍ଵିତନ୍ଵତୀ ଦେଵୀ ଶଚୀ ଵିରାଜତେ ॥ ୨୮୦॥
ଦେଵେନ୍ଦ୍ରଶକ୍ତିଧାରିଣୀ ଶତ୍ରୁପ୍ରସକ୍ତିଵାରିଣୀ ।
ମୌନୀନ୍ଦ୍ରମୁକ୍ତିକାରିଣୀ ଦେଵୀ ଶଚୀ ଗତିର୍ମମ ॥ ୨୮୧॥
ସନ୍ନସ୍ଵଦେଶଦର୍ଶନାଦ୍ଭିନ୍ନସ୍ଵଜାତିଵୀକ୍ଷଣାତ୍ ।
ଖିନ୍ନସ୍ଯ ସଂଶ୍ରିତାଵନୀ ଦେଵୀ ଶଚୀ ଗତିର୍ମମ ॥ ୨୮୨॥
ସଙ୍ଘେ ସହସ୍ରଧାକୃତେ ଦେଶେ ନିକୃଷ୍ଟତାଂ ଗତେ ।
ଶୋକାକୁଲସ୍ଯ ଲୋକଭୃଦ୍ଦେଵୀ ଶଚୀ ଗତିର୍ମମ ॥ ୨୮୩॥
ସା ସଂଵିଦୋଽଧିଦେଵତା ତସ୍ଯାସ୍ସ୍ଵରଃ ପରୋ ଵଶେ ।
ସର୍ଵଂ ଵିଧୀଯତେ ତଯା ତସ୍ମାତ୍ପରା ମତା ଶଚୀ ॥ ୨୮୪॥
ସା ଯାତି ସୂକ୍ଷ୍ମମପ୍ଯଲଂ ସା ଭାତି ସର୍ଵଵସ୍ତୁଷୁ ।
ସା ମାତି ଖଂ ଚ ନିସ୍ତୁଲଂ ତସ୍ମାତ୍ପରା ମତା ଶଚୀ ॥ ୨୮୫॥
ସା ସର୍ଵଲୋକନାଯିକା ସା ସର୍ଵଗୋଲପାଲିକା ।
ସା ସର୍ଵଦେହଚାଲିକା ତସ୍ମାତ୍ପରା ମତା ଶଚୀ ॥ ୨୮୬॥
ଯସ୍ଯାଃ କୃତିର୍ଜଗତ୍ତ୍ରଯଂ ଯା ତଦ୍ବିଭର୍ତି ଲୀଲଯା ।
ଯସ୍ଯାଂ ପ୍ରଯାତି ତଲ୍ଲଯଂ ସା ଵିଶ୍ଵନାଯିକା ଶଚୀ ॥ ୨୮୭॥
ଧର୍ମେ ପରିକ୍ଷଯଂ ଗତେ ଯାଽଵିଶ୍ଯ ନିର୍ମଲଂ ଜନମ୍ ।
ତଦ୍ରକ୍ଷଣାଯ ଜାଯତେ ସା ଵିଶ୍ଵନାଯିକା ଶଚୀ ॥ ୨୮୮॥
ଵେଧା ଋତସ୍ଯ ଯୋଦିତା ମନ୍ତ୍ରେଣ ସତ୍ଯଵାଦିନା ।
ବାଧାନିଵାରିଣୀ ସତାଂ ସା ଵିଶ୍ଵନାଯିକା ଶଚୀ ॥ ୨୮୯॥
ଯଜ୍ଞୋ ଯଯା ଵିନୀଯତେ ଯୁଦ୍ଧଂ ତଥା ପୃଥଗ୍ଵିଧଭ୍ ।
ତାଂ ଦେଵରାଜମୋହିନୀଂ ନାରୀଂ ନୁମଃ ପୁରାତନୀମ୍ ॥ ୨୯୦॥
ଯସ୍ଯାସ୍ସୁତୋ ଵୃଷାକପିର୍ଦେଵୋଽସତାଂ ପ୍ରଶାସିତା ।
ତାଂ ସର୍ଵଦା ସୁଵାସିନୀଂ ନାରୀଂ ନୁମଃ ପୁରାତନୀମ୍ ॥ ୨୯୧॥
ଯସ୍ଯାସ୍ସମା ନିତମ୍ବିନୀ କାଚିନ୍ନ ଵିଷ୍ଟପତ୍ରଯେ ।
ତାଂ ନିତ୍ଯଚାରୁ ଯୌଵନାଂ ନାରୀଂ ନୁମଃ ପୁରାତନୀମ୍ ॥ ୨୯୨॥
ଯଚ୍ଚାରୁତା ନ ଦୃଶ୍ଯତେ ମନ୍ଦାରପଲ୍ଲଵେଷ୍ଵପି ।
ତତ୍ସୁନ୍ଦରାଚ୍ଚସୁନ୍ଦରଂ ଶଚ୍ଯାଃ ପଦାମ୍ବୁଜଂ ଶ୍ରଯେ ॥ ୨୯୩॥
ଯସ୍ଯ ପ୍ରଭା ନ ଵିଦ୍ଯତେ ମାଣିକ୍ଯତଲ୍ଲ୍ଜେଷ୍ଵପି ।
ତଦ୍ଭାସୁରାଚ୍ଚ ଭାସୁରଂ ଶଚ୍ଯାଃ ପଦାମ୍ବୁଜଂ ଶ୍ରଯେ ॥ ୨୯୪॥
ନ ସ୍ଯାଦଘୈସ୍ତିରସ୍କୃତୋ ଯଚ୍ଚିନ୍ତକୋ ନରଃ କୃତୀ ।
ତତ୍ପାଵନାଚ୍ଚ ପାଵନଂ ଶଚ୍ଯାଃ ପଦାମ୍ବୁଜଂ ଶ୍ରଯେ ॥ ୨୯୫॥
ରାଜନ୍ନଖେନ୍ଦୁଭାନୁଭିସ୍ସର୍ଵଂ ତମୋ ଵିଧୁନ୍ଵତେ ।
ବୃନ୍ଦାରକେନ୍ଦ୍ରସୁନ୍ଦରୀପାଦାମ୍ବୁଜାଯ ମଙ୍ଗଲମ୍ ॥ ୨୯୬॥
ଗୀର୍ଵାଣମୌଲିରୀଭା ସଙ୍କ୍ଷାଲିତାଯ ଦୀପ୍ଯତେ ।
ସ୍ଵର୍ଗାଧିନାଥଭାମିନିପାଦାମ୍ବୁଜାଯ ମଙ୍ଗଲମ୍ ॥ ୨୯୭॥
ବାଲାର୍କବିମ୍ବରୋଚିଷେ ଯୋଗୀନ୍ଦ୍ର ହୃଦ୍ଗୁହାଜୁଷେ ।
ପାକାରିଜୀଵିତେଶ୍ଵରୀପାଦାମ୍ବୁଜାଯ ମଙ୍ଗଲମ୍ ॥ ୨୯୮॥
ଆତ୍ମୀଯଦେଶରକ୍ଷଣେ ଶକ୍ତଂ କରୋତୁ ସର୍ଵଥା ।
ପାପଦ୍ଵିଷାଂ ପ୍ରିଯଙ୍କରୀ ଵାସିଷ୍ଠମିନ୍ଦ୍ରସୁନ୍ଦରୀ ॥ ୨୯୯॥
ଵାସିଷ୍ଠଵାକ୍ପ୍ରଦୀପ୍ତିର୍ଭିନାରାଚିକାଭିରୀଶ୍ଵରୀ ।
ଗୀର୍ଵାଣଚକ୍ରଵର୍ତିନସ୍ସମ୍ମୋଦମେତୁ ସୁନ୍ଦରୀ ॥ ୩୦୦॥
॥ ତୃତୀଯମାନୁଷ୍ଟୁଭଂ ଶତକଂ ସମାପ୍ତମ୍ ॥
॥ ଅଥ ଚତୁର୍ଥଂ ବାର୍ହତଂ ଶତକମ୍ ॥
॥ ପ୍ରଥମୋ ହଲମୁଖୀପାଦଃ ॥
କ୍ଷୀରଵୀଚିପୃଷତସିତଂ ପ୍ରେମଧାରିଦରହସିତମ୍ ।
ନାକରାଜନଲିନଦୃଶଃ ଶୋକହାରି ମମ ଭଵତୁ ॥ ୩୦୧॥
ଅଧ୍ଵନୋ ଗଲିତଚରଣାମଧ୍ଵରକ୍ଷିତିମଵିଭଵାମ୍ ।
ଆଦଧାତୁ ପଥି ଵିମଲେ ଵୈଭଵେ ଚ ହରିତରୁଣୀ ॥ ୩୦୨॥
ବ୍ରହ୍ମଣଶ୍ଵିତିରଥନଭଃ କାଯଭାଗଵଗତିମତୀ ।
ଯା ତଦା ପୃଥଗିଵ ବଭୌ ଧର୍ମିତାଂ ସ୍ଵଯମପି ଗତା ॥ ୩୦୩॥
ମୋଦବୋଧଵିଭଵକୃତପ୍ରାକୃତେତରଵରତନୁ ।
ସର୍ଵସଦ୍ଗୁଣଗଣଯୁତଂ ଯା ସସର୍ଜ ସୁରମିଥୁନମ୍ ॥ ୩୦୪॥
ପୁଂସି ଦୀପ୍ତଵପୁଷି ତଯୋର୍ବ୍ରହ୍ମ ସୋଽହମିତି ଲସତି ।
ଯୋଷିତେ କିଲ ଧିଯମଦାତ୍ତସ୍ଯ ଶକ୍ତିରହମିତି ଯା ॥ ୩୦୫॥
ଯାଭିମାନବଲଵଶତସ୍ତାମୁଦାରତମଵିଭଵାମ୍ ।
ମନ୍ଯତେ ସ୍ମ ଵରଵନିତାଂ ସ୍ଵାଧିଦୈଵିକତନୁରିତି ॥ ୩୦୬॥
ଆଦିପୁଂସି ଗଗନତନୁର୍ଯା ତନୋତି ତନୁଜମତିମ୍ ।
ଆଦଧାତି ଯୁଵତିତନୁଃ ପ୍ରାଣନାଯକ ଇତି ରତିମ୍ ॥ ୩୦୭॥
ତାଂ ପରାଂ ଭୁଵନଜନନୀଂ ସର୍ଵପାପତତିଶମନୀମ୍ ।
ତନ୍ତ୍ରଜାଲଵିନୁତବଲାଂ ସ୍ତୌମି ସର୍ଵମତିମମଲାମ୍ ॥ ୩୦୮॥
ସା ମତିର୍ଵିଦିତଵିଷଯା ସା ରୁଚିର୍ଵିତତଵିଷଯା ।
ସା ରତିର୍ଵିନୁତଵିଷଯା ସା ସ୍ଥିତିର୍ଵିଧୁତଵିଷଯା ॥ ୩୦୯॥
ଯତ୍ର ଯତ୍ର ମମ ଧିଷଣା ଗ୍ରାହ୍ଯଵସ୍ତୁନି ଗତିମତୀ ।
ତତ୍ର ତତ୍ର ଵିଲସତୁ ସା ସର୍ଵଗା ସକଲଚରିତା ॥ ୩୧୦॥
ଦୁର୍ବଲସ୍ଯ ବହୁଲବଲୈରର୍ଦିତସ୍ଯ ଜଗତି ଖଲୈଃ ।
ଆଦିଦେଵି ତଵ ଚରଣଂ ପାଵନଂ ଭଵତି ଶରଣମ୍ ॥ ୩୧୧॥
ପୌରୁଷେ ଭଵତି ଵିଫଲେ ତ୍ଵାମଯଂ ଜନନି ଭଜତେ ।
କିଂ ନୁତେ ଯଦି ଵିମୁଖତା ପୌରୁଷଂ କଥଯ ଭଜତାମ୍ ॥ ୩୧୨॥
କର୍ତୁରପ୍ରତିହତଗିରଃ ପୌରୁଷାଚ୍ଛତଗୁଣମିଦମ୍ ।
ଧ୍ଯାତୁରସ୍ଖଲିତମନସଃ କାର୍ଯସିଦ୍ଧିଷୁ ତଵ ପଦମ୍ ॥ ୩୧୩॥
ପୌରୁଷଂ ଵିଦିତମଫଲଂ କାଙ୍କ୍ଷିତେ ମମ ସୁରନୁତେ ।
ଶକ୍ତମୀଦୃଶି ତୁ ସମଯେ ଶ୍ରଦ୍ଦଧାମି ତଵ ଚରଣମ୍ ॥ ୩୧୪॥
ପୌରୁଷଂ ଯଦି କଵିମତଂ ଦେଵି ତେଽପି ପଦଭଜନମ୍ ।
ଦୈଵଵାଦପଟୁଵଚସୋ ମୂକତୈଵ ମମ ଶରଣମ୍ ॥ ୩୧୫॥
ପୂର୍ଵଜନ୍ମସୁକୃତଫଲଂ ଦୈଵମମ୍ବ ନିଗଦତି ଯଃ ।
ଭକ୍ତିପୌରୁଷଵିରହିଣୋ ଭାଵିତସ୍ଯ ରିପୁଦଯିତମ୍ ॥ ୩୧୬॥
ଉଦ୍ଯତସ୍ଯ ତଵ ଚରଣଂ ସଂଶ୍ରିତସ୍ଯ ଚ ସୁରନୁତେ ।
ପୂର୍ଵଜନ୍ମସୁକୃତବଲଶ୍ରଦ୍ଧଯାଽଲମହୃଦଯଯା ॥ ୩୧୭॥
ଅସ୍ତୁ ପୂର୍ଵଭଵସୁକୃତଂ ମାସ୍ତୁ ଵା ଜନନି ଜଗତାମ୍ ।
ସାମ୍ପ୍ରତଂ ତଵ ପଦଯୁଗଂ ସଂଶ୍ରିତୋସ୍ମ୍ଯଵ ଵିସୃଜ ଵା ॥ ୩୧୮॥
ନାସ୍ତି ସମ୍ପ୍ରତି କିମପି କିଂ ଭୂତିମାପ୍ସ୍ଯସି କିମୁ ତତଃ ।
ଅନ୍ଯଜନ୍ମନି ଵିତରଣେ କା ପ୍ରସକ୍ତିରମରନୁତେ ॥ ୩୧୯॥
ନାନ୍ଯଜନ୍ମନି ବହୁଶିଵଂ ନାପି ନାକଭୁଵନସୁଖମ୍ ।
କାମଯେ ଫଲମଭିମତଂ ଦେହି ସମ୍ପ୍ରତି ଶଚି ନ ଵା ॥ ୩୨୦॥
ମେଦିନୀ ଭୁଵନତଲତୋ ନିସ୍ତୁଲାଦୁତ ଗଗନତଃ ।
ଭାସ୍କରାଦୁତ ରୁଚିନିଧେଃ କାମ୍ଯମୀଶ୍ଵରି ଵିତର ମେ ॥ ୩୨୧॥
ଵିଷ୍ଟପେ କ୍ଵଚନ ଵରଦେ ଦାତୁମୀଶ୍ଵରି କୃତମତିମ୍ ।
ଵାରଯେଜ୍ଜନନି ନ ପରସ୍ତ୍ଵାଂ ଜନସ୍ତଵ ପତିମିଵ ॥ ୩୨୨॥
ଦେହି ଵା ଭଗଵତି ନ ଵା ପାହି ଵା ଶଶିମୁଖି ନ ଵା ।
ପାଵନଂ ତଵ ପଦଯୁଗଂ ନ ତ୍ଯଜାନି ହରିଦଯିତେ ॥ ୩୨୩॥
ରକ୍ଷିତୁଂ ଭରତଵିଷଯଂ ଶକ୍ତମିନ୍ଦ୍ରହୃଦଯସଖୀ ।
ଚନ୍ଦ୍ରବିମ୍ବରୁଚିରମୁଖୀ ସା କ୍ରିଯାଦ୍ଭୁଵି ଗଣପତିମ୍ ॥ ୩୨୪॥
ସମ୍ପ୍ରହୃଷ୍ଯତୁ ହଲମୁଖୀର୍ଭାସ୍ଵତୀର୍ଗଣପତିମୁନେଃ ।
ସା ନିଶମ୍ଯ ସୁରନୃପତେର୍ମୋହିନୀ ସଦଯହୃଦଯା ॥ ୩୨୫॥
॥ ଦ୍ଵିତୀଯୋ ଭୁଜଗଶିଶୁଭୃତାପାଦଃ ॥
ମରୁଦଧିପମନୋନାଥା ମଧୁକରଚିକୁରାସ୍ମାକମ୍ ।
ଵୃଜିନଵିଧୁତିମାଧତ୍ତାଂ ଵିଶଦହସିତଲେଶେନ ॥ ୩୨୬॥
ଅଖିଲନିଗମସିଦ୍ଧାନ୍ତୋ ବହୁମୁନିଵରବୁଦ୍ଧାନ୍ତଃ ।
ସୁରପରିବୃଢଶୁଦ୍ଧାନ୍ତୋ ଭରତଵସୁମତୀମଵ୍ଯାତ୍ ॥ ୩୨୭॥
ଭଗଵତି ଭଵତୀଚେତୋ ରତିକୃଦଭଵଦିନ୍ଦ୍ରସ୍ଯ ।
ସ ତଵ ଜନନି ସନ୍ତାନଦ୍ରୁମଵନମତିରମ୍ଯଂ ଵାମ୍ ॥ ୩୨୮॥
ପତିରଖିଲଯୁଵଶ୍ରେଷ୍ଠଃ କିମପି ଯୁଵତିରତ୍ନଂ ତ୍ଵମ୍ ।
ଵନଵିହୃତିଷୁ ଵାଂ ଚେତୋ ହରଣମଭଵଦନ୍ଯୋନ୍ଯମ୍ ॥ ୩୨୯॥
ମଧୁରଲଲିତଗମ୍ଭୀରୈସ୍ତଵ ହୃଦଯମୁପନ୍ଯାସୈଃ ।
ଵନଵିହରଣଲୀଲାଯାମହରଦଯି ଦିଵୋ ରାଜା ॥ ୩୩୦॥
କଲଵଚନଵିଲାସେନ ପ୍ରଗୁଣମୁଖଵିକାସେନ ।
ଭୁଵନମପିମନୋଽହାର୍ଷୀର୍ଜନନି ଵନଵିହାରେ ତ୍ଵମ୍ ॥ ୩୩୧॥
କନକକମଲକାନ୍ତାସ୍ଯା ଧଵଲକିରଣଵକ୍ତ୍ରେଣ ।
ଅସିତଜଲଜପତ୍ରାକ୍ଷୀ ସିତନଲିନଦଲାକ୍ଷେଣ ॥ ୩୩୨॥
ଅଲିଚଯନିଜଧମ୍ମିଲ୍ଲା ନଵଜଲଧରକେଶେନ ।
ମୃଦୁଲତମଭୁଜାଵଲ୍ଲୀ ଦୃଢତମଭୁଜଦଣ୍ଡେନ ॥ ୩୩୩॥
ଅମୃତନିଲଯବିମ୍ବୋଷ୍ଠୀ ରୁଚିରଧଵଲଦନ୍ତେନ ।
ଅତିମୁକୁରଲସଦ୍ଗଣ୍ଡା ଵିକଚଜଲଜହସ୍ତେନ ॥ ୩୩୪॥
ଯୁଵତିରତିତରାଂ ରମ୍ଯା ସୁଲଲିତଵପୁଷା ଯୂନା ।
ଭଗଵତି ଶଚି ଯୁକ୍ତା ତ୍ଵଂ ତ୍ରିଭୁଵନଵିଭୁନେନ୍ଦ୍ରେଣ ॥ ୩୩୫॥
ଵିକଚକୁସୁମମନ୍ଦାରଦ୍ରଷ୍ଠ୍ହମଵନଵରଵାଟୀଷୁ ।
ଵିହରଣମଯି କୁର୍ଵାଣା ମନସିଜମନୁଗୃହ୍ଣାସି ॥ ୩୩୬॥
ତଵ ଶଚି ଚିକୁରେ ରାଜତ୍କୁସୁମମମରଵୃକ୍ଷସ୍ଯ ।
ନଵ ସଲିଲଭୃତୋ ମଧ୍ଯେ ସ୍ଫୁରଦିଵ ନଵନକ୍ଷତ୍ରମ୍ ॥ ୩୩୭॥
ଅଭଜତତରୁରୌଦାର୍ଯଂ ଵିଭଵମପି ମହାନ୍ତଂ ସଃ ।
ଵିକଚକୁସୁମସମ୍ପତ୍ତ୍ଯା ଭଗଵତି ଭଜତେ ଯସ୍ତ୍ଵାମ୍ ॥ ୩୩୮॥
ଅମରନୃପତିନା ସାକଂ କୁସୁମିତଵନଵାଟୀଷୁ ।
ଭଗଵତି ତଵ ଵିଶ୍ରାନ୍ତେଃ ସ ଜଯତି ସମଯଃ କୋଽପି ॥ ୩୩୯॥
ଅମରତରୁଵରଚ୍ଛାଯାସ୍ଵଯି ମୁହୁରୁପଵିଶ୍ଯ ତ୍ଵମ୍ ।
ଶଚି କୃତିଜନରକ୍ଷାଯୈ ମନସି ଵିତନୁଷୁ ଚର୍ଚାମ୍ ॥ ୩୪୦॥
କିମୁ ଵସୁ ଵିତରାଣ୍ଯସ୍ମୈ ସୁମତିମୁତ ଦଦାନ୍ଯସ୍ମୈ ।
କ୍ଷମତମମଥଵାଽମୁଷ୍ମିନ୍ ବଲମୁରୁଘଟଯାନୀତି ॥ ୩୪୧॥
ହରିତରୁଣି କଦା ଵାମେ ଵିନମଦଵନଚର୍ଚାସୁ ।
ସ୍ମରଣସମଯ ଆଯାସ୍ଯତ୍ଯମଲହୃଦଯରଙ୍ଗେ ତେ ॥ ୩୪୨॥
ଶଚି ଭଗଵତି ସାକ୍ଷାତ୍ତେ ଚରଣକମଲଦାସୋଽହମ୍ ।
ଇହ ତୁ ଵସୁମତୀଲୋକେ ସ୍ମର ମମ ଵିଷଯଂ ପୂର୍ଵମ୍ ॥ ୩୪୩॥
ନ ଯଦି ତଵ ମନୋ ଦାତୁଂ ସ୍ଵଯମଯି ଲଘଵେ ମହ୍ଯମ୍ ।
ଉପଵନତରୁକର୍ଣେ ଵା ଵଦ ମଦଭିମତଂ କର୍ତୁମ୍ ॥ ୩୪୪॥
ନିଜଵିଷଯମତିଶ୍ରେଷ୍ଠଂ ଵିପଦି ନିପତିତଂ ତ୍ରାତୁମ୍ ।
ସ୍ଵକୁଲମପି ସଦଧ୍ଵାନଂ ଗମଯିତୁମପଥେ ଶ୍ରାନ୍ତମ୍ ॥ ୩୪୫॥
ଅଖିଲଭୁଵନସମ୍ରାଜଃ ପ୍ରିଯତରୁଣି ଭଵତ୍ଯୈଵ ।
ମତିବଲପରିପୂର୍ଣୋଏଽଯଂ ଗଣପତିମୁନିରାଧେଯଃ ॥ ୩୪୬॥
ନ କିମୁ ଭଵତି ଶଂ ଦେଶେ ଗତଵତି କଲୁଷେ କାଲେ ।
ତଵ ଭଜନମଘଂ ସଦ୍ଯୋ ହରିହଯଲଲନେ ଜେତୁମ୍ ॥ ୩୪୭॥
ତ୍ରିଜଗତି ସକଲଂ ଯସ୍ଯ ପ୍ରଭଵତି ପୃଥୁଲେ ହସ୍ତେ ।
ସ ବହୁଲମହିମା କାଲୋ ମମ ଜନନି ଵିଭୂତିସ୍ତେ ॥ ୩୪୮॥
ଅନଵରତଗଲଦ୍ବାଷ୍ପାଂ ଭରତଵସୁମତୀଂ ତ୍ରାତୁମ୍ ।
ଵିତରତୁ ଦଯିତାଜିଷ୍ଣୋର୍ଗଣପତିମୁନଯେ ଶକ୍ତିମ୍ ॥ ୩୪୯॥
ଭୁଜଗଶିଶୁଭୃତା ଏତାଃ କଵିଗଣପତିନା ଗୀତାଃ ।
ଵିଦଧତୁ ମୁଦିତାଂ ଦେଵୀଂ ଵିବୁଧପତିମନୋନାଥାମ୍ ॥ ୩୫୦॥
॥ ତୃତୀଯୋ ମଣିମଧ୍ଯାପାଦଃ ॥
ମଙ୍ଗଲଧାଯୀ ପୁଣ୍ଯଵତାଂ ମନ୍ମଥଧାଯୀ ଦେଵପତେଃ ।
ଵିଷ୍ଟପରାଜ୍ଞୀହାସଲଵୋ ଵିକ୍ରମଧାଯୀ ମେ ଭଵତୁ ॥ ୩୫୧॥
ଦୃଷ୍ଟିଵିଶେଷୈଶ୍ଶୀତତରୈର୍ଭୂର୍ଯନୁକମ୍ପୈଃ ପୁଣ୍ଯତମୈଃ ।
ଭାରତଭୂମେସ୍ତାପତତିଂ ଵାସଵକାନ୍ତା ସା ହରତୁ ॥ ୩୫୨॥
ପାଵନଦୃଷ୍ଟିର୍ଯୋଗିହିତା ଭାସୁରଦୃଷ୍ଟିର୍ଦେଵହିତା ।
ଶୀତଲଦୃଷ୍ଟିର୍ଭକ୍ଥିତା ମୋହନଦୃଷ୍ଟିଶ୍ଶକ୍ରହିତା ॥ ୩୫୩॥
ଉଜ୍ଜ୍ଵଲଵାଣୀ ଵିକ୍ରମଦା ଵତ୍ସଲଵାଣୀ ସାନ୍ତ୍ଵନଦା ।
ମଞ୍ଜୁଲଵାଣୀ ସମ୍ମଦଦା ପନ୍ନଗଵେଣୀ ସା ଜଯତି ॥ ୩୫୪॥
ଶାରଦରାକାଚନ୍ଦ୍ରମୁଖୀ ତୋଯଦମାଲାକାରକଚା ।
ମେଚକପାଥୋଜାତଦଲଶ୍ରୀହରଚକ୍ଷୁର୍ଵାସିକୃପା ॥ ୩୫୫॥
ଚମ୍ପକନାସାଗଣ୍ଡଵିଭାମଣ୍ଡଲଖେଲତ୍କୁଣ୍ଡଲଭା ।
ଉକ୍ତିଷୁ ଵୀଣାବିମ୍ବଫଲଶ୍ରୀହରଦନ୍ତପ୍ରାଵରଣା ॥ ୩୫୬॥
ନିର୍ମଲହାସକ୍ଷାଲିତଦିଗ୍ଭିତ୍ତିସମୂହା ମୋହହରୀ ।
କାଞ୍ଚନମାଲାଶୋଭିଗଲା ସନ୍ତତଲୀଲା ବୁଦ୍ଧିକଲା ॥ ୩୫୭॥
ଵିଷ୍ଟପଧାରି କ୍ଷୀରଧରସ୍ଵର୍ଣଘଟଶ୍ରୀହାରିକୁଚା ।
କାପି ବିଡୌଜୋ ରାଜ୍ଯରମା ଚେତସି ମାତା ଭାତୁ ମମ ॥ ୩୫୮॥
ଦିଵ୍ଯସୁଧୋର୍ମିର୍ଭକ୍ତିମତାଂ ପାଵକକୀଲା ପାପକୃତାମ୍ ।
ଵ୍ଯୋମ୍ନି ଚରନ୍ତୀ ଶକ୍ରସଖୀ ଶକ୍ତିରମୋଘା ମାମଵତୁ ॥ ୩୫୯॥
ସମ୍ମଦଯନ୍ତୀ ସର୍ଵତନୁଂ ସଂଶମଯନ୍ତୀ ପାପତତିମ୍ ।
ସମ୍ପ୍ରଥଯନ୍ତୀ ସର୍ଵମତୀସ୍ସଙ୍ଘଟଯନ୍ତୀ ପ୍ରାଣବଲମ୍ ॥ ୩୬୦॥
ନିର୍ଜିତଶୋକାଧୂତତମାସ୍ସଂସ୍କୃତଚିତ୍ତା ଶୁଦ୍ଧତମା ।
ଵାସଵଶକ୍ତେର୍ଵ୍ଯୋମଜୁଷଃ କାଚନ ଵୀଚିର୍ମାଂ ଵିଶତୁ ॥ ୩୬୧॥
ଉଦ୍ଗତକୀଲଂ ମୂଲମିଦଂ ଭିନ୍ନକପାଲଂ ଶୀର୍ଷମିଦମ୍ ।
ଉଜ୍ଝିତ ମୋହଂ ଚିତ୍ତମିଦଂ ଵାସଵଶକ୍ତିର୍ମାଂ ଵିଶତୁ ॥ ୩୬୨॥
ଦୃଶ୍ଯଵିରକ୍ତଂ ଚକ୍ଷୁରିଦଂ ଭୋଗଵିରକ୍ତଂ କାଯମିଦମ୍ ।
ଧ୍ଯେଯଵିରକ୍ତା ବୁଦ୍ଧିରିଯଂ ଵାସଵଶକ୍ତିର୍ମାଂ ଵିଶତୁ ॥ ୩୬୩॥
ଚକ୍ଷୁରଦୃଶ୍ଯଜ୍ଵାଲଭୃତା ଵ୍ଯାପକଖେନ ପ୍ରୋଲ୍ଲସତା ।
ଵିସ୍ମୃତକାଯଂ ସନ୍ଦଧତୀ ଵାସଵଶକ୍ତିର୍ମାଂ ଵିଶତୁ ॥ ୩୬୪॥
କାଯମଜସ୍ରଂ ଵଜ୍ରଦୃଢଂ ବୁଦ୍ଧିମଶେଷେ ଵ୍ଯାପ୍ତିମତୀମ୍ ।
ଦିଵ୍ଯତରଙ୍ଗୈରାଦଧତୀ ଵାସଵଶକ୍ତିର୍ମାଂ ଵିଶତୁ ॥ ୩୬୫॥
ମୂର୍ଧ୍ନି ପତନ୍ତୀ ଵ୍ଯୋମତଲାତ୍ସନ୍ତତମନ୍ତଃ ସର୍ଵତନୌ ।
ସମ୍ପ୍ରଵହନ୍ତୀ ଦିଵ୍ଯଝରୈର୍ଵାସଵଶକ୍ତିର୍ମାଂ ଵିଶତୁ ॥ ୩୬୬॥
ଭାନୁଵିଭାଯାଂ ଭାସକତା ଦିଵ୍ଯସୁଧାଯାଂ ମୋଦକତା ।
କାଽପି ସୁରାଯାଂ ମାଦକତା ଵାସଵଶକ୍ତ୍ଯାଂ ତତ୍ତ୍ରିତଯମ୍ ॥ ୩୬୭॥
ଭାସଯତାନ୍ମେ ସମ୍ଯଗୃତଂ ମୋଦମୁଦାରଂ ପୁଷ୍ଯତୁ ମେ ।
ସାଧୁମଦଂ ମେ ଵର୍ଧଯତାନ୍ନିର୍ଜରଭର୍ତୁଃ ଶକ୍ତିରଜା ॥ ୩୬୮॥
କଶ୍ଚନ ଶକ୍ତିଂ ଯୋଗବଲାଦାତ୍ମଶରୀରେ ଵର୍ଧଯତି ।
ଏଷି ଵିଵୃଦ୍ଧିଂ ଭକ୍ତିମତଃ କସ୍ଯଚିଦେଶେ ତ୍ଵଂ ଵପୁଷି ॥ ୩୬୯॥
ସାଧଯତାଂ ଵା ଯୋଗଵିଦାଂ କୀର୍ତଯତାଂ ଵା ଭକ୍ତିମତାମ୍ ।
ଵତ୍ସଲଭାଵାଦିନ୍ଦ୍ରଵଧୂର୍ଗର୍ଭଭୁଵାଂ ଵା ଯାତି ଵଶମ୍ ॥ ୩୭୦॥
ଯସ୍ଯ ସମାଧିଃ କୋଽପି ଭଵେଦାତ୍ମମନୀଷା ତସ୍ଯ ବଲମ୍ ।
ଯସ୍ତଵ ପାଦାମ୍ଭୋଜରତସ୍ତସ୍ଯ ଖଲୁ ତ୍ଵଂ ଦେଵି ବଲମ୍ ॥ ୩୭୧॥
ଦ୍ଵାଦଶଵର୍ଷୀ ଯୋଗବଲାଦ୍ଯା ଖଲୁ ଶକ୍ତିର୍ଯୁକ୍ତମତେଃ ।
ତାଂ ଶଚି ଦାତୁଂ ଭକ୍ତିମତେ କାପି ଘଟୀ ତେ ମାତରଲମ୍ ॥ ୩୭୨॥
ଯୋଗବଲାଦ୍ଵା ଧ୍ଯାନକୃତୋ ଭକ୍ତିବଲାଦ୍ଵା କୀର୍ତଯତଃ ।
ଯାତୁ ଵିଵୃଦ୍ଧିଂ ଵିଶ୍ଵହିତା ଵାସଵଶକ୍ତିର୍ମେ ଵପୁଷି ॥ ୩୭୩॥
ଦୁଃଖିତମେତଚ୍ଛ୍ରୀରହିତଂ ଭାରତଖଣ୍ଡଂ ସର୍ଵହିତମ୍ ।
ତ୍ରାତୁମଧୀଶା ସ୍ଵର୍ଜଗତଃ ସୁକ୍ଷମବୁଦ୍ଧିଂ ମାଂ କୁରୁତାମ୍ ॥ ୩୭୪॥
ସନ୍ତୁ କଵୀନାଂ ଭର୍ତୁରିମେ ସୁନ୍ଦରବନ୍ଧାଶୁଦ୍ଧତମାଃ ।
ସନ୍ମଣିମଧ୍ଯାଃ ସ୍ଵର୍ଜଗତୋ ରାଜମହିଷ୍ଯାଃ କର୍ଣସୁଖାଃ ॥ ୩୭୫॥
॥ ଚତୁର୍ଥୋ ମାତ୍ରସମକପାଦଃ ॥
ଶୁକ୍ଲ୍ଜ୍ଯୋତିଃ ପ୍ରକରୈର୍ଵ୍ଯାପ୍ତଃ ସୂକ୍ଷ୍ମୋଽପ୍ଯନ୍ତାନ୍ ହରିତାଂ ହାସଃ ।
ଜିଷ୍ଣୋଃ ପତ୍ନ୍ଯାସ୍ତିମିରାରାତିର୍ନିଶ୍ଶେଷଂ ମେ ହରତାନ୍ମୋହମ୍ ॥ ୩୭୬॥
ଶୃଣ୍ଵତ୍କର୍ଣା ସଦଯାଲୋକା ଲୋକେନ୍ଦ୍ରସ୍ଯ ପ୍ରିଯନାରୀ ସା ।
ନିତ୍ଯାକ୍ରୋଶୈର୍ଵିରୁଦଦ୍ଵାଣୀଂ ପାଯାଦେତାଂ ଭରତକ୍ଷୋଣୀମ୍ ॥ ୩୭୭॥
ଦେଵେଷୁ ସ୍ଵଃ ପରିଦୀପ୍ଯନ୍ତୀ ଭୂତେଷ୍ଵିନ୍ଦୌ ପରିଖେଲନ୍ତୀ ।
ଶକ୍ତିର୍ଜିଷ୍ଣୋର୍ଦ୍ଵପଦାଂ ସଙ୍ଘେ ହନ୍ତୈତସ୍ଯାଂ ଭୁଵି ନିଦ୍ରାତି ॥ ୩୭୮॥
ନିଦ୍ରାଣାଯା ଅପି ତେ ଜ୍ଯୋତିର୍ଗନ୍ଧାଦେତେ ଧରଣୀଲୋକେ ।
ମର୍ତ୍ଯାଃ କିଞ୍ଚତ୍ପ୍ରଭଵନ୍ତୀଶେ ତ୍ଵଂ ବୁଦ୍ଧା ଚେତ୍କିମୁ ଵକ୍ତ୍ଵ୍ଯମ୍ ॥ ୩୭୯॥
ମେଘଚ୍ଛନ୍ନୋଽପ୍ଯରୁଣସ୍ତେଜୋ ଦଦ୍ଯାଦେଵ ପ୍ରମଦେ ଜିଷ୍ଣୋଃ ।
ଅତ୍ରସ୍ଥାନାଂ ଭଵତୀଗ୍ରନ୍ଥିଚ୍ଛନ୍ନାପ୍ଯେଵଂ କୁରୁତେ ପ୍ରଜ୍ଞାମ୍ ॥ ୩୮୦॥
ଧ୍ଯାଯାମୋ ଯତ୍କଥଯାମୋ ଯତ୍ପଶ୍ଯାମୋ ଯଚ୍ଛୃଣୁମୋ ଯଚ୍ଚ ।
ଜୀଵାମୋ ଵା ତଦିଦଂ ସର୍ଵଂ ନିଦ୍ରାଣାଯା ଅପି ତେ ଭାସା ॥ ୩୮୧॥
ନାଡୀବନ୍ଧାଦଭିମାନାଚ୍ଚ ଚ୍ଛନ୍ନା ମାତର୍ଭଵତୀ ଦେହେ ।
ଏକାପାଯାଦିତରୋ ନଶ୍ଯେତ୍ତସ୍ମାଦ୍ଦ୍ଵେଧା ତପସଃ ପନ୍ଥାଃ ॥ ୩୮୨॥
ଚିତ୍ତଂ ଯସ୍ଯ ସ୍ଵଜନିସ୍ଥାନେ ପ୍ରଜ୍ଞା ବାହ୍ଯା ନ ଭଵେଦ୍ଯସ୍ଯ ।
ଆଧତ୍ସେ ତ୍ଵଂ ଭୁଵନାଧୀଶେ ବୁଦ୍ଧା କ୍ରୀଡାଂ ହୃଦଯେ ତସ୍ଯ ॥ ୩୮୩॥
ଵାଣୀ ଯସ୍ଯ ସ୍ଵଜନିସ୍ଥାନେ ଦୂରେ କୃତ୍ଵା ମନସା ସଙ୍ଗମ୍ ।
ମାତସ୍ତତ୍ର ପ୍ରତିବୁଦ୍ଧା ତ୍ଵଂ ଶ୍ଲୋକୈର୍ଲୋକଂ କୁରୁଷେ ବୁଦ୍ଧମ୍ ॥ ୩୮୪॥
ହିତ୍ଵା ଦୃଶ୍ଯାନ୍ଯତିସୂକ୍ଷ୍ମାଯାଂ ଚକ୍ଷୁର୍ଯସ୍ଯ ସ୍ଵମହୋ ଵୃତ୍ତୌ ।
ଵିଶ୍ଵାଽଲିପ୍ତା ଜଗତାଂ ମାତର୍ଜାଗ୍ରତ୍ଯସ୍ମିନ୍ନଚଲା ଭାସି ॥ ୩୮୫॥
ଶୃଣ୍ଵନ୍ କର୍ଣୋ ଦଯିତେ ଜିଷ୍ଣୋରନ୍ତଃ ଶବ୍ଦଂ ଧ୍ରିଯତେ ଯସ୍ଯ ।
ବୁଦ୍ଧା ଭୂତ୍ଵା ଵିଯତା ସାଧୋରେକୀଭାଵଂ କୁରୁଷେ ତସ୍ଯ ॥ ୩୮୬॥
ଯାତାଯାତଂ ସତତଂ ପଶ୍ଯେଦ୍ଯଃ ପ୍ରାଣସ୍ଯ ପ୍ରଯତୋ ମର୍ତ୍ଯଃ ।
ଵିଶ୍ଵସ୍ଯେଷ୍ଟାଂ ତନୁଷେ କ୍ରୀଡାଂ ତସ୍ମିନ୍ ବୁଦ୍ଧା ତରୁଣୀନ୍ଦ୍ରସ୍ଯ ॥ ୩୮୭॥
ସ୍ଵାନ୍ତଂ ଯସ୍ଯ ପ୍ରଭଵେତ୍କାର୍ଯେଷ୍ଵମ୍ବୈତସ୍ମିନ୍ନଯି ନିଦ୍ରାସି ।
ଆତ୍ମା ଯସ୍ଯ ପ୍ରଭଵେତ୍କାର୍ଯେଷ୍ଵମ୍ବୈତସ୍ମିନ୍ନଯି ଜାଗର୍ଷି ॥ ୩୮୮॥
ଯସ୍ଯାଽହନ୍ତା ଭଵତି ସ୍ଵାନ୍ତେ ତସ୍ଯ ସ୍ଵାନ୍ତଂ ପ୍ରଭଵେତ୍କର୍ତୁମ୍ ।
ଯସ୍ଯାଽହନ୍ତା ଭଵତି ସ୍ଵାତ୍ମନ୍ଯାତ୍ମା ତସ୍ଯ ପ୍ରଭଵେତ୍କର୍ତୁମ୍ ॥ ୩୮୯॥
ସ୍ଵାନ୍ତଂ ଯସ୍ଯ ପ୍ରଭଵେତ୍କର୍ତୁଂ ତତ୍କର୍ମାଲ୍ପଂ ଭଵତି ଵ୍ଯଷ୍ଟେଃ ।
ଆତ୍ମା ଯସ୍ଯ ପ୍ରଭଵେତ୍କର୍ତୁଂ ତଚ୍ଛ୍ଲାଧ୍ଯଂ ତେ ବଲଜିତ୍କାନ୍ତେ ॥ ୩୯୦॥
ଏତତ୍ସ୍ଵାନ୍ତଂ ହୃଦଯାଜ୍ଜାତଂ ଶୀର୍ଷେ ଵାସଂ ପୃଥଗାଧାଯ ।
ହାର୍ଦାହନ୍ତାଂ ସ୍ଵଯମାକ୍ରମ୍ଯ ଭ୍ରାନ୍ତାନସ୍ମାନ୍ କୁରୁତେ ମାତଃ ॥ ୩୯୧॥
ଅସ୍ମାକଂ ଭୋଃ କୁରୁତେ ବାଧାମସ୍ମଜ୍ଯୋତିର୍ଜନନି ପ୍ରାପ୍ଯ ।
ସ୍ଵାନ୍ତେ ନୈତତ୍କୃତମନ୍ଯାଯ୍ଯଂ କାନ୍ତେ ଜିଷ୍ଣୋଃ ଶୃଣୁ ରାଜ୍ଞି ତ୍ଵମ୍ ॥ ୩୯୨॥
ସ୍ଵାନ୍ତେ ତେଜୋ ହୃଦଯାଦାଯାଚ୍ଚନ୍ଦ୍ରେ ତେଜୋ ଦିନଭର୍ତୁର୍ଵା ।
ଆଶ୍ରାନ୍ତଂ ଯୋ ମନୁତେ ଧୀରସ୍ତସ୍ଯ ସ୍ଵାନ୍ତଂ ହୃଦି ଲୀନଂ ସ୍ଯାତ୍ ॥ ୩୯୩॥
ମୂଲାନ୍ଵେଷିସ୍ଫୁରଦାଵୃତ୍ତଂ ନୀଚୈରାଯାତ୍କବଲୀକୃତ୍ଯ ।
ଜାନନ୍ତ୍ଯେକା ହୃଦଯସ୍ଥାନେ ଯୁଞ୍ଜାନାନାଂ ଜ୍ଵଲସୀଶାନେ ॥ ୩୯୪॥
ଶୀର୍ଷେ ଚନ୍ଦ୍ରୋ ହୃଦଯେ ଭାନୁର୍ନେତ୍ରୋ ଵିଦ୍ଯୁତ୍କୁଲକୁଣ୍ଡେଽଗ୍ନିଃ ।
ସମ୍ପଦ୍ଯନ୍ତେ ମହସାଽଶୈସ୍ତେ ଜିଷ୍ଣୋଃ କାନ୍ତେ ସୁତରାଂ ଶସ୍ତେ ॥ ୩୯୫॥
ମନ୍ଵାନାଂ ତ୍ଵାଂ ଶିରସି ସ୍ଥାନେ ପଶ୍ଯନ୍ତୀଂ ଵା ନଯନସ୍ଥାନେ ।
ଚେତନ୍ତୀଂ ଵା ହୃଦଯସ୍ଥାନେ ରାଜନ୍ତୀଂ ଵା ଜ୍ଵଲନସ୍ଥାନେ ॥ ୩୯୬॥
ଯୋ ନା ଧ୍ଯାଯେଜ୍ଜଗତାଂ ମାତଃ କଶ୍ଚିଚ୍ଛ୍ରେଯାନଵନୌ ନାଽତଃ ।
ପୂତଂ ଵନ୍ଦ୍ଯଂ ଚରଣଂ ତସ୍ଯ ଶ୍ରେଷ୍ଠଂ ଵର୍ଣ୍ଯଂ ଚରିତଂ ତସ୍ଯ ॥ ୩୯୭॥
ଦୋଗ୍ଧ୍ରୀଂ ମାଯାଂ ରସନାଂ ଵା ଯୋ ମନ୍ତ୍ରଂ ମାତର୍ଜପତି ପ୍ରାଜ୍ଞଃ ।
ସୋଽଯଂ ପାତ୍ରଂ କରୁଣାଯାସ୍ତେ ସର୍ଵଂ କାମ୍ଯଂ ଲଭତେ ହସ୍ତେ ॥ ୩୯୮॥
ଛିନ୍ନାଂ ଭିନ୍ନାଂ ସୁତରାଂ ସନ୍ନାମନ୍ନାଭାଵାଦଭିତଃ ଖିନ୍ନାମ୍ ।
ଏତାଂ ପାତୁଂ ଭରତକ୍ଷୋଣୀଂ ଜାଯେ ଜିଷ୍ଣୋଃ କୁରୁ ମାଂ ଶକ୍ତମ୍ ॥ ୩୯୯॥
କ୍ଲୃପ୍ତୈଃ ସମ୍ଯଗ୍ବୃହତୀଛନ୍ଦସ୍ଯେତୈର୍ମାତ୍ରସମକୈର୍ଵୃତ୍ତୈଃ ।
କର୍ଣାଧ୍ଵାନଂ ପ୍ରଵିଶଦ୍ଭିସ୍ସା ପୌଲୋମ୍ଯମ୍ବାପରିତୃପ୍ତାସ୍ତୁ ॥ ୪୦୦॥
॥ ଚତୁର୍ଥଂ ବାର୍ହତଂ ଶତକଂ ସମାପ୍ତମ୍ ॥
॥ ଅଥ ପଞ୍ଚମଂ ପାଙ୍କ୍ତଂ ଶତକମ୍ ॥
॥ ପ୍ରଥମୋ ମଯୂରସାରିଣୀପାଦଃ ॥
ପ୍ରେମଵାସଭୂମିରଚ୍ଛଭାଵସ୍ଥାନମାନମଜ୍ଜନାଘହା ମେ ।
ଇନ୍ଦ୍ରସୁନ୍ଦରୀ ମୁଖାବ୍ଜଭାସୀ ମନ୍ଦହାସ ଆପଦଂ ଧୁନୋତୁ ॥ ୪୦୧॥
ଵୀକ୍ଷିତୈଃ କୃପାନ୍ଵିତୈର୍ହରନ୍ତୀ ପାତକାନି ମଙ୍ଗଲଂ ଭଣନ୍ତୀ ।
ଜମ୍ଭଭେଦିଜୀଵିତେଶ୍ଵରୀ ମେ ଜନ୍ମଦେଶମୁଜ୍ଜ୍ଵଲଂ କରୋତୁ ॥ ୪୦୨॥
ଅମ୍ବରଂ ଚ ଦେଵତାନତଭ୍ରୂରମ୍ବ ତେ ତନୁଦ୍ଵଯଂ ଯଦୁକ୍ତମ୍ ।
ଆଦିମା ତଯୋର୍ଵୃଷାକପିଂ ତଂ ଦେଵ୍ଯଜୀଜନତ୍ପରା ଜଯନ୍ତମ୍ ॥ ୪୦୩॥
ଏତମେଵ ଦେଵି ଲୋକବନ୍ଧୁଂ ସୂରଯୋ ଵୃଷାକପିଂ ଭଣନ୍ତି ।
ଵର୍ଷହେତୁଦୀଧିତିର୍ଵୃଷାଯଂ କଂ ପିବନ୍ କରୈଃ କପିର୍ନିରୁକ୍ତ୍ଃ ॥ ୪୦୪॥
କେଚିଦିନ୍ଦ୍ରନାରି ଚନ୍ଦ୍ରରେଖାଶେଖରଂ ଵୃଷାକପିଂ ଗଦନ୍ତି ।
ପଣ୍ଡିତାଃ ପରେ ତୁ ଶେଷଶଯ୍ଯାଶାଯିନଂ ଵୃଷାକପିଂ ତମାହୁଃ ॥ ୪୦୫॥
ବ୍ରହ୍ମଣସ୍ପତିଂ ତୁ ଵୈଦ୍ଯୁତାଗ୍ନେରଂଶଜଂ ମରୁଦ୍ଗଣେଷୁ ମୁଖ୍ଯମ୍ ।
ଵିଶ୍ଵରାଜ୍ଞି ଵିଘ୍ନରାଜମେକେ ଵିଶ୍ରୁତଂ ଵୃଷାକପିଂ ଵଦନ୍ତି ॥ ୪୦୬॥
ଭାସ୍କରଶ୍ଚ ଶଙ୍କ୍ରଶ୍ଚ ମାତର୍ମାଧଵଶ୍ଚ ମନ୍ତ୍ରନାଯକଶ୍ଚ ।
ଆତ୍ମଜେଷୁ ତେ ନ ସନ୍ତି ନାନ୍ତର୍ଵ୍ଯାପକାନ୍ତରିକ୍ଷଵିଗ୍ରହାଯାଃ ॥ ୪୦୭॥
ଵାସଵୋଽପି ଦେଵି ଦେଵତାତ୍ମା ଵଲ୍ଲଭସ୍ତଵ ଚ୍ଛଲାଙ୍ଗନାଯାଃ ।
ଆତ୍ମଜାତ ଏଵ କୀର୍ତନୀଯୋ ଦେଵତାପଥେନ ଦେହଵତ୍ଯାଃ ॥ ୪୦୮॥
ସାଶଵସ୍ଯୁଦୀରିତାସି ଧୀରୈର୍ଦେହିନୀ ଵିହାଯସେନ୍ଦ୍ରସୂସ୍ତ୍ଵମ୍ ।
ଲିଙ୍ଗଭେଦତୋଽନୁରୂପତସ୍ତତ୍କୀର୍ତନଂ ଶଵୋ ହି ଶକ୍ତିଵାଚି ॥ ୪୦୯॥
ନାଦିତିର୍ଵିଭିଦ୍ଯତେ ଶଵସ୍ଯାସ୍ସର୍ଵଦେଵ ମାତରଂ ଵିଦୁର୍ଯାମ୍ ।
ସା ମରୁତ୍ପ୍ରସୂରଭାଣି ପୃଶ୍ନିଃ ସାପି ଭିଦ୍ଯତେ ତତୋ ନ ଦେଵ୍ଯାଃ ॥ ୪୧୦॥
ଶକ୍ତିରେଵ ସା ନ୍ଯଗାଦି ପୃଶ୍ନିଶ୍ଶକ୍ତିରେଵ ସାଽଦିତିର୍ନ୍ଯଭାଣି ।
ଶକ୍ତିରେଵ ସାଽଭ୍ଯଧାଯି ଭଦ୍ରା ଶକ୍ତିରେଵ ସା ଶଵସ୍ଯଵାଦି ॥ ୪୧୧॥
ଵିଜ୍ଜନଃ ପ୍ରକୃଷ୍ଟଶକ୍ତିଭାଗଂ ଶବ୍ଦମେଵ ପୃଶ୍ନିମାହ ଧେନୁମ୍ ।
ଯା ପରୈର୍ବୁଧୈରଭାଣି ଗୌରୀ ମାନଵେଷ୍ଟଭାଷଯୈଵ ନାରୀ ॥ ୪୧୨॥
ଵ୍ଯାପକତ୍ଵକଲ୍ପିତଂ ଵିଶାଲଂ ଦେଶମେଵ ଶକ୍ତିଭାଗମାହୁଃ ।
ବୁଦ୍ଧିଶାଲିନୋଽଦିତିଂ ସଵିତ୍ରୀଂ ଯା ପରୈର୍ଵିଚକ୍ଷଣୈଃ ସ୍ମୃତା ଦ୍ଯୌଃ ॥ ୪୧୩॥
ନିତ୍ଯମୋଦରୂପଶକ୍ତିଭାଗଂ ପଣ୍ଡିତାଃ ପ୍ରକୀର୍ତଯନ୍ତି ଭଦ୍ରାମ୍ ।
ଉକ୍ତିଭେଦଚାତୁରୀପ୍ରଲୁବ୍ଧାଃ ସୂରଯଃ ପରେ ଶିଵାଂ ଜୁଗୁର୍ଯାମ୍ ॥ ୪୧୪॥
ଵୀର୍ଯରୂପଭାଗ ଏଵ ଗଣ୍ଯଃ ପଣ୍ଡିତୈଃ ଶଵସ୍ଯଭାଣି ଶକ୍ତେଃ ।
ଓଜସୋ ନ ସୋଽତିରିଚ୍ଯ ତେଂଶୋ ଭିଦ୍ଯତେ ତତୋ ନ ଵଜ୍ରମୁଗ୍ରମ୍ ॥ ୪୧୫॥
ଵଜ୍ରମେଵ ଭାଷଯା ପରେଷାମୁଚ୍ଯତେ ପ୍ରଚଣ୍ଡଚଣ୍ଡିକେତି ।
ଯଦ୍ଵିଭୂତିଲେଶଚୁମ୍ବିତାତ୍ମା ଜୀଯତେ ନ କେନଚିତ୍ପୃଥିଵ୍ଯାମ୍ ॥ ୪୧୬॥
ସର୍ଵତୋ ଗତିଶ୍ଶଚୀତି ଶକ୍ତିଃ କୀର୍ତ୍ଯତେ ବୁଧୈରୁଦାରକୀର୍ତିଃ ।
ସର୍ଵଭାଗଵାଚକଂ ପଦଂ ତତ୍ ପାଵନଂ ପୁରାତନଂ ପ୍ରିଯଂ ନଃ ॥ ୪୧୭॥
ଯଶ୍ଶଚୀତି ନାମକୀର୍ତଯେନ୍ନା ପୁଷ୍କରେଣ ତେ ଶରୀରଵତ୍ଯାଃ ।
ଦିଵ୍ଯସୁନ୍ଦରୀ ତନୋରୁତାହୋ ତଂ ପରାଭଵେନ୍ନ ଦେଵି ପାପମ୍ ॥ ୪୧୮॥
ଅମ୍ବରଂ ଵରଂ ତଵାମ୍ବ କାଯଂ ଯସ୍ସଦା ଵିଲୋକଯନ୍ନୌପାସ୍ତେ ।
ଲୋକଜାଲଚକ୍ରଵର୍ତିଜାଯେ ତଂ ପରାଭଵେନ୍ନ ଦେଵି ପାପମ୍ ॥ ୪୧୯॥
ପୂର୍ଣିମାସୁଧାଂଶୁବିମ୍ବଵକ୍ତ୍ରଂ ଫୁର୍ଵିଂଆରିଜାତପତ୍ରନେତ୍ରମ୍ ।
ଶୁଭ୍ରତାନିଧାନମନ୍ଦହାସଂ କାଲମେଘକଲ୍ପକେଶପାଶମ୍ ॥ ୪୨୦॥
ରତ୍ନ୍ଦର୍ପଣାଭମଞ୍ଜୁଗଣ୍ଡଂ ଚମ୍ପକପ୍ରସୂନଚାରୁନାସମ୍ ।
କୁନ୍ଦକୁଡ୍ମଲାଭକାନ୍ତଦନ୍ତଂ କଲ୍ପପର୍ଵିଂଆଭଦନ୍ତଚେଲମ୍ ॥ ୪୨୧॥
ସଦ୍ଵରାଭଯପ୍ରଦାଯିହସ୍ତଂ ସର୍ଵଦେଵଵନ୍ଦ୍ଯପାଦକଞ୍ଜମ୍ ।
ଦିଵ୍ଯରତ୍ନଭୂଷଣୈରନର୍ଘୈର୍ଭୂଷିତଂ କନତ୍ସୁଵର୍ଣଵର୍ଣମ୍ ॥ ୪୨୨॥
ଦିଵ୍ଯଶୁକ୍ଲ୍ଵସ୍ତ୍ରଯୁଗ୍ମଧାରି ସ୍ଵର୍ଗସାର୍ଵଭୋମନେତ୍ରହାରି ।
ଯଃ ସ୍ମରେଦ୍ଵରାଙ୍ଗନାଵପୁସ୍ତେ ତଂ ପରାଭଵେନ୍ନ ଦେଵି ପାପମ୍ ॥ ୪୨୩॥
ଭାରତକ୍ଷିତେରିଦଂ ଜନନ୍ଯାଶ୍ଶୋକଜନ୍ଯବାଷ୍ପଵାରି ହର୍ତୁମ୍ ।
ଦେହି ଶକ୍ତିମାଶ୍ରିତାଯ ମହ୍ଯଂ ପାହି ଧର୍ମମିନ୍ଦ୍ରଚିତ୍ତନାଥେ ॥ ୪୨୪॥
ସଦ୍ଵସିଷ୍ଠସନ୍ତତେରିମାଭିସ୍ସତ୍କଵେର୍ମଯୂରସାରିଣୀଭିଃ ।
ସମ୍ମଦଂ ପ୍ରଯାତୁ ଶକ୍ରଚେତସ୍ସମ୍ପ୍ରମୋହିନୀସରୋଜନେତ୍ର ॥ ୪୨୫॥
॥ ଦ୍ଵିତୀଯୋ ମନୋରମାପାଦଃ ॥
ହସିତମାତତାଯିପାତକପ୍ରମଥନପ୍ରସିଦ୍ଧଵିକ୍ରମମ୍ ।
ଅମରଭୂମିପାଲଯୋଷିତୋ ମମ କରୋତୁ ଭୂରିମଙ୍ଗଲମ୍ ॥ ୪୨୬॥
କରୁଣଯା ପ୍ରଚୋଦିତା କ୍ରିଯାଦ୍ଭରତଭୂମିମକ୍ଷଯଶ୍ରିଯମ୍ ।
ଚରଣକଞ୍ଜରାଜଦିନ୍ଦିରା ସୁରନରେଶ୍ଵରସ୍ଯ ସୁନ୍ଦରୀ ॥ ୪୨୭॥
ନ ଭଵନଂ ନ ଵା ଜଗତ୍ପୃଥଙ୍ନିଵସନାଯ ତେ ସୁରାର୍ଚତେ ।
ଯଦଖିଲାନି ଵିଷ୍ଟପାନି ତେ ଵପୁଷି ସର୍ଵମନ୍ଦିରାଣି ଚ ॥ ୪୨୮॥
ମତିଦଵିଷ୍ଠସୀମଭାସୁରଂ ତଵ ଶରୀରମେଵ ପୁଷ୍କରମ୍ ।
ପରମପୂରୁଷସ୍ଯ ଵଲ୍ଲଭେ ଭୁଵନମେକମୁଚ୍ଯତେ ବୁଧୈଃ ॥ ୪୨୯॥
ତରଣଯସ୍ସୁଧାଂଶଵସ୍ତଥା ସହ ଭୁଵା ଗ୍ରହାଃ ସହସ୍ରଶଃ ।
ଅଯି ଜଗନ୍ତି ଵିସ୍ତୃତାନି ତେ ଵପୁଷି ପୁଷ୍କରେ ଜଗତ୍ଯଜେ ॥ ୪୩୦॥
ବହୁଭିରୁଷ୍ଣଭାନୁଭିକ୍ର୍ତତାତ୍ ବହୁଭିରିନ୍ଦୁଭିର୍ଵଶୀକୃତାତ୍ ।
ଵିଯତି ଲୋକଜାଲଧାତ୍ରି ତେ ଶତଗୁଣଂ ବଲଂ ପ୍ରଶିଶ୍ଯତେ ॥ ୪୩୧॥
ନ ଵିଭୁରେକକସ୍ଯ ଭାସ୍ଵତୋ ଵିଭଵମେଵ ନା ପ୍ରଭାଷିତୁମ୍ ।
କିମୁତ ତେ ଦଧାସି ଯୋଦରେ ଦ୍ଯୁତିମତାଂ ଶତାନି ତାଦୃଶାମ୍ ॥ ୪୩୨॥
ଇହ ଵିହାଯସା ଶରୀରିଣୀମତିସମୀପଵାସିନୀମପି ।
ନ ଖଲୁ କୋଽପି ଲୋକିତୁଂ ପ୍ରଭୁର୍ଭଗଵତୀଂ ପରାମଯୁକ୍ତଧୀଃ ॥ ୪୩୩॥
ତଦିଦମୁଚ୍ଯତେ ଜନୋ ଜଗଦ୍ଵପୁରମେଯମାଦିଦେଵି ତେ ।
ଜନଯତେ ଯତୋଽଖିଲଂ ଦୃଶୋର୍ଵିଷଯଭୂତମେତଦାତତମ୍ ॥ ୪୩୪॥
ବହୁଲତାରକାଗଣୈର୍ଯୁତଂ କିମପି ଖଂ ତଵେହ ଵର୍ଷ୍ମଣି ।
ଶଚି ଵିଭଜ୍ଯ ଭାଷଯୈକଯା ସୁକଵଯୋ ମହୋଜଗଦ୍ଵିଦୁଃ ॥ ୪୩୫॥
ଇଦମିନେନ୍ଦୁଭୂଵିଲକ୍ଷଣୈର୍ଦିନକରୈସ୍ସୁଧାକରୈର୍ଗ୍ରହୈଃ ।
ବହୁଜଗଦ୍ଭିରନ୍ଵିତଂ ମହୋଜଗଦଶେଷଧାତ୍ରି ନୈକକମ୍ ॥ ୪୩୬॥
ଅଜରମଵ୍ଯଯଂ ସନାତନଂ ମୁନିଜନୈକଵେଦ୍ଯଵୈଭଵମ୍ ।
ନ ଭଵତୀଂ ଵିନା ତପୋଜଗତ୍ପୃଥଗଶେଷନାଥନାଯିକେ ॥ ୪୩୭॥
ସକଲଦୃଶ୍ଯମୂଲକାରଣଂ ତଵ ଚ ସଂଶ୍ରଯୋ ନିରାଶ୍ରଯଃ ।
ଜନନି ସତ୍ଯଲୋକ ସଂଜ୍ଞଯା ପରମପୂରୁଷୋଽଭିଧୀଯତେ ॥ ୪୩୮॥
ଅଯି ପୁରାତନର୍ଷିଭାଷଯା ଗଗନମେତଦାପ ଈରିତାଃ ।
ଅଥ ଯଦାସୁଵୀର୍ଯମୁଜ୍ଝିତଂ ଭଗଵତସ୍ତ୍ଵମେଵ ତତ୍ପରେ ॥ ୪୩୯॥
ଶଚି ଵିରାଡ୍ଭଵତ୍ଯଭାଷତ ଶ୍ରୁତିରପୀଦମେଵ ନାମ ତେ ।
ଵିତତଵିଶ୍ଵଵିଗ୍ରହାତ୍ମନି ପ୍ରଥିତମେତଦାହ୍ମଯଂ ପରମ୍ ॥ ୪୪୦॥
ଉପନିଷଦ୍ଗିରା ଵିରାଡ୍ଵଧୂଃ ପୁରୁଷ ଏଷ ଭାଷଯାନ୍ଯଯା ।
ଉଭଯଥାପି ସାଧୁ ତତ୍ପଦଂ ଭଵତି ତେ ନ ସଂଶଯାସ୍ପଦମ୍ ॥ ୪୪୧॥
ନ ଵନିତା ନ ଵା ପୁମାନ୍ ଭଵେଜ୍ଜଗତି ଯୋଽନ୍ତରଶ୍ଶରୀରିଣାମ୍ ।
ତନୁଷୁ ଲିଙ୍ଗଭେଦଦର୍ଶନାତ୍ ତନୁମତଶ୍ଚ ଲିଙ୍ଗମୁଚ୍ଯତେ ॥ ୪୪୨॥
ଅଖିଲନାଥଵୀର୍ଯଧାରଣାନ୍ନ୍ଗନଭୂମିରଙ୍ଗନାମତା ।
ସକଲଲୋକବୀଜଭୃତ୍ତ୍ଵତୋ ଗଗନଦେଶ ଏଷ ପୂରୁଷଃ ॥ ୪୪୩॥
ସ୍ଫୁଟଵିଭକ୍ତଗାତ୍ରଲକ୍ଷ୍ମଣାଂ ନିଯତଵାଦିନାମଦର୍ଶନାତ୍ ।
ନ ପୁରୁଷୋ ଵିଯଦ୍ଯଥା ଵଯଂ ନ ଵନିତା ଵିଯଦ୍ଯଥୈଵ ନଃ ॥ ୪୪୪॥
ଅଭିଵିମାନତୋଽଥ ଵା ଶଚୀ ଵିବୁଧରାଜଯୋର୍ଵିଲକ୍ଷଣାତ୍ ।
ଵରଵିଲସିନୀ ଵିଯତ୍ତନୁସ୍ସଦଵିକାରମୁତ୍ତମଃ ପୁମାନ୍ ॥ ୪୪୫॥
ହୃଦଯମଲ୍ପମପ୍ଯଦୋ ଜନନ୍ଯନଵମଂ ଵିଶାଲପୁଷ୍କରାତ୍ ।
ଵିମଲଦେହଦୁର୍ଗମଧ୍ଯଗଂ ସକଲରାଜ୍ଞି ସୌଧମସ୍ତୁ ତେ ॥ ୪୪୬॥
ଵିକସିତଂ ନିଜାଂଶୁଵୀଚିଭିକ୍ର୍ତଦଯମାଲଯଂ ଵିଶାମ୍ବ ମେ ।
ଵିକଚମୁଷ୍ଣଭାନୁଭାନୁଭିର୍ଦଶଶତଚ୍ଛଦଂ ଯଥା ରମା ॥ ୪୪୭॥
ହୃଦଯସାଧୁସୌଧଶାଯିନୀଂ ନଯନରମ୍ଯହର୍ମ୍ଯଚାରିଣୀମ୍ ।
ଭୁଵନରାଜଚିତ୍ତମୋହିନୀଂ ନମତ ତାଂ ପରାଂ ଵିଲାସିନୀମ୍ ॥ ୪୪୮॥
ତଵ ପରେ ମରୀଚିଵୀଚଯସ୍ତନୁଗୁହାଂ ପ୍ରଵିଶ୍ଯ ଵିଶ୍ରୁତେ ।
ଭରତଭୂମିରକ୍ଷଣୋଦ୍ଯତଂ ଗଣପତିଂ କ୍ରିଯାସୁରୁଜ୍ଜ୍ଵଲମ୍ ॥ ୪୪୯॥
ଗଣପତେର୍ମନୋରମା ଇମାସ୍ସୁଗୁଣଵେଦିନାଂ ମନୋରମାଃ ।
ଅଵହିତା ଶୃଣୋତୁ ସାଦରଂ ସୁରମହୀପତେର୍ମନୋରମାଃ ॥ ୪୫୦॥
॥ ତୃତୀଯୋ ମଣିରାଗପାଦଃ ॥
ଜ୍ଯୋତିଷାଂ ନୃପତିଃ ସକଲାନାଂ ଶାନ୍ତିମେଵ ସଦାଭିଦଧାନଃ ।
ନିର୍ମଲୋ ହରତାତ୍ସୁରରାଜ୍ଞୀମନ୍ଦହାସଲଵୋ ମମ ପାପମ୍ ॥ ୪୫୧॥
ଦୁଷ୍ଟଲୋକଦଵିଷ୍ଠପଦାବ୍ଜା ଶିଷ୍ଟଶୋକନିଵାରଣଦକ୍ଷା ।
ନାକଲୋକମହୀପତିରାମା ଭାରତସ୍ଯ ଧୁନୋତ୍ଵସୁଖାନି ॥ ୪୫୨॥
ଦେଵମୌଲିମଣୀକିରଣେଭ୍ଯୋ ଵିକ୍ରମଂ ସ୍ଵଯମେଵ ଦଦାନା ।
ଦେଵରାଜଵଧୂପଦପଦ୍ମଶ୍ରୀସ୍ତନୋତୁ ସଦା ମମ ଭଦ୍ରମ୍ ॥ ୪୫୩॥
ଦେଵି ତେ ଵଦନଂ ବହୁକାନ୍ତଂ ସାକ୍ଷି ତତ୍ର ପୁରନ୍ଦରଚେତଃ ।
ଅମ୍ବ ତେ ଚରଣାଵତିକାନ୍ତାଵତ୍ର ସାକ୍ଷି ମନଃ ସ୍ମରତାଂ ନଃ ॥ ୪୫୪॥
ଭାସୁରଂ ସୁରସଂହତିଵନ୍ଦ୍ଯଂ ସୁନ୍ଦରଂ ହରିଲୋଚନହାରି ।
ପାଵନଂ ନତପାପଵିଦାରି ସ୍ଵର୍ଗରାଜ୍ଞି ପଦଂ ତଵ ସେଵେ ॥ ୪୫୫॥
ଜଙ୍ଘିକେ ଜଯତସ୍ତଵ ମାତଃ ସ୪ ଏଵ ରୁଚାଂ ଯଦଧୀନଃ ।
ଵାସଵସ୍ଯ ଦୃଶାଂ ଚ ସହସ୍ରଂ ଯଦ୍ଵିଲୋକନଲୋଭଵିନମ୍ରମ୍ ॥ ୪୫୬॥
ସକ୍ଥିନୀ ତଵ ଵାସଵକାନ୍ତେ ରାମଣୀଯକସାରନିଶାନ୍ତେ ।
ଵନ୍ଦତେ ଵିନଯେନ ମମେଯଂ ଵନ୍ଦିନସ୍ତଵ ପାଵନି ଵାଣୀ ॥ ୪୫୭॥
ଇନ୍ଦ୍ରନାରି କଟିସ୍ତଵ ପୃଥ୍ଵୀମଣ୍ଡଲସ୍ଯତୁଲା ମହନୀଯେ ।
ମଧ୍ଯମୋ ନଭସଃ ପ୍ରତିମାନଂ ଭୋଗିନାଂ ଭୁଵନସ୍ଯ ଚ ନାଭିଃ ॥ ୪୫୮॥
ଧୀରତାଂ କୁରୁତେ ଵିଗତାସୁଂ ସା ସୁପର୍ଵପତେର୍ନିଶିତାଗ୍ରା ।
ସା ତଵାମ୍ବ ମନୋଭଵଶସ୍ତ୍ରୀ ରୋମରାଜିରଘଂ ମମ ହନ୍ତୁ ॥ ୪୫୯॥
ରୋମରାଜିଭୁଜଙ୍ଗଶିଶୁସ୍ତେ ଦେଵି ଦେଵପତେର୍ହୃଦଯସ୍ଯ ।
ଦଂଶନେନ କରୋତ୍ଯଯି ମୋହଂ ଜୀଵିତାଯ ଚିରାଯ ଵିଚିତ୍ରମ୍ ॥ ୪୬୦॥
ପୂର୍ଣହେମଘଟଵିଵ ଶକ୍ରାଵାହିତାଂ ଦଧତାଵଯି ଶକ୍ତିମ୍ ।
ଵିଶ୍ଵପୋଷଣକର୍ମଣି ଦକ୍ଷାଵମ୍ବ ଦୁଗ୍ଧଧରୌ ଜଯତସ୍ତେ ॥ ୪୬୧॥
ଲୋକମାତରୁରୋରୁହପୂର୍ଣସ୍ଵର୍ଣକୁମ୍ଭଗତା ତଵ ଶକ୍ତିଃ ।
ଲୋକପାଲନକର୍ମଣି ଵୀର୍ଯଂ ଦେଵି ଵଜ୍ରଧରସ୍ଯ ବିଭର୍ତି ॥ ୪୬୨॥
ଅକ୍ଷଯାମୃତପୂର୍ଣଘଟୌ ତେ ଶକ୍ରପତ୍ନି କୁଚୈ ତଵ ପୀତ୍ଵା ।
ଲୋକବାଧକଭୀକରରକ୍ଷୋ ଧୂନନେ ପ୍ରବଭୂଵ ଜଯନ୍ତଃ ॥ ୪୬୩॥
ହସ୍ତଯୋସ୍ତଵ ମାର୍ଦଵମିନ୍ଦ୍ରୋ ଭାଷତାଂ ସୁଷମାମପି ଦେଵଃ ।
ଦାତୃତାମନଯୋର୍ମୁନିଵର୍ଗୋ ଵର୍ଣଯତ୍ଯଜରେ ପଟୁତାଂ ଚ ॥ ୪୬୪॥
ପୁଷ୍ପମାଲ୍ଯମୃଦୋରପି ବାହୋଃ ଶକ୍ତିରୁଗ୍ରତମାଶରନାଶେ ।
ଦୃଶ୍ଯତେ ଜଗତାମଧିପେ ତେ ଭାଷତାଂ ତଵ କସ୍ତନୁତତ୍ତ୍ଵମ୍ ॥ ୪୬୫॥
କମ୍ବୁକଣ୍ଠି ତଵେଶ୍ଵରି କଣ୍ଠସ୍ତାରହାରଵିତାନଵିରାଜୀ ।
ଦେଵରାଡ୍ଭୁଜଲୋଚନପଥ୍ଯୋ ଦେଵି ମେ ଭଣତାଦ୍ବହୁଭଦ୍ରମ୍ ॥ ୪୬୬॥
ଆନନସ୍ଯ ଗଭସ୍ତିନିଧେସ୍ତେ ରାମଣୀଯକମଦ୍ଭୁତମୀଷ୍ଟେ ।
ଅପ୍ଯମର୍ତ୍ଯନୁତାଖିଲସିଦ୍ଧେର୍ଵାସଵସ୍ଯ ଵଶୀକରଣାଯ ॥ ୪୬୭॥
ନ ପ୍ରସନ୍ନମଲଂ ରଵିବିମ୍ବିଂ ଚନ୍ଦ୍ରବିମ୍ବମତୀଵ ନ ଭାତି ।
ସୁପ୍ରସନ୍ନମହୋଜ୍ଜ୍ଵଲମାସ୍ଯଂ କେନ ପାଵନି ତେ ତୁଲଯାମଃ ॥ ୪୬୮॥
ଲୋଚନେ ତଵ ଲୋକସଵିତ୍ରି ଜ୍ଯୋତିଷଃ ଶଵସଶ୍ଚ ନିଧାନେ ।
ଵକ୍ତୁମବ୍ଜସମେ ନନୁ ଲଜ୍ଜେ ଧୋରଣୀମନୁସୃତ୍ଯ କଵୀନାମ୍ ॥ ୪୬୯॥
ଆଯତୋଜ୍ଜ୍ଵଲପକ୍ଷ୍ମଲନେତ୍ରା ଚମ୍ପକପ୍ରସଵୋପମନାସା ।
ରତ୍ନଦର୍ପଣରମ୍ଯକପୋଲା ଶ୍ରୀଲିପିଦ୍ଯୁତିସୁନ୍ଦରକର୍ଣା ॥ ୪୭୦॥
ଅଷ୍ଟମୀଶଶିଭାସୁରଭାଲା ଵିଷ୍ଟପତ୍ରଯଚାଲକଲୀଲା ।
ସ୍ମେରଚାରୁମୁଖୀ ସୁରଭର୍ତୁଃ ପ୍ରେଯସୀ ଵିଦଧାତୁ ଶିଵଂ ମେ ॥ ୪୭୧॥
ମନ୍ଦହାସଲଵେଷୁ ଵଲକ୍ଷା ମେଚକା ଚିକୁରପ୍ରକରେଷୁ ।
ଶୋଣତାମଧରେ ଦଧତୀ ସା ରକ୍ଷତୁ ପ୍ରକୃତିସ୍ତ୍ରିଗୁଣା ନଃ ॥ ୪୭୨॥
ସର୍ଵଲୋକଵଧୂଜନମଧ୍ଯେ ଯାଂ ଶ୍ରୁତିସ୍ସୁଭଗାମଭିଧତ୍ତେ ।
ଯା ଦିଵୋ ଜଗତୋ ରୁଚିସାରସ୍ତାଂ ନମାମି ପୁରନ୍ଦରରାମାମ୍ ॥ ୪୭୩॥
ସ୍ଵର୍ଗଭୂପତିଲୋଚନଭାଗ୍ଯଶ୍ରୀଶ୍ଶରୀରଵତୀ ଜଲଜାକ୍ଷୀ ।
ଭାରତସ୍ଯ କରୋତୁ ସମର୍ଥଂ ରକ୍ଷଣେ ନରସିଂହତନୂଜମ୍ ॥ ୪୭୪॥
ଲୋକମାତୁରିମେ ରମଣୀଯାଃ ପାକଶାସନଚିତ୍ତରମଣ୍ଯାଃ ।
ଅର୍ପିତାଃ ପଦଯୋର୍ଵିଜଯନ୍ତାଂ ସତ୍କଵେଃ କୃତଯୋ ମଣିରାଗାଃ ॥ ୪୭୫॥
॥ ଚତୁର୍ଥୋ ମେଘଵିତାନପାଦଃ ॥
ଅମରକ୍ଷିତିପାଲକଚେତୋ ମଦନଂ ସଦନଂ ଶୁଚିତାଯାଃ ।
ସ୍ମିତମାଦିଵଧୂଵଦନୋତ୍ତ୍ଥଂ ହରତାଦଖିଲଂ କଲୁଷଂ ମେ ॥ ୪୭୬॥
ସୁତରାମଧନାମତିଖିନ୍ନାମଧୁନା ବହୁଲଂ ଵିଲପନ୍ତୀମ୍ ।
ପରିପାତୁ ଜଗତ୍ତ୍ରଯନେତ୍ରୀ ଭରତକ୍ଷିତିମିନ୍ଦ୍ରପୁରନ୍ଧ୍ରୀ ॥ ୪୭୭॥
ସ୍ଥଲମେତଦମର୍ତ୍ଯନୃପାଲପ୍ରମଦେ ତଵ ମେଘଵିତାନମ୍ ।
ଅଯି ଯତ୍ର ପରିସ୍ଫୁସୀଶେ ତଟିଦୁଜ୍ଜ୍ଵଲଵେଷଧରା ତ୍ଵମ୍ ॥ ୪୭୮॥
ତଟିତା ତଵ ଭୌତିକତନ୍ଵା ଜିତମମ୍ବୁଧରେ ଵିଲସନ୍ତ୍ଯା ।
ଉପମା ଭୁଵି ଯା ଲଲିତାନାଂ ଯୁଵଚିତ୍ତହୃତାଂ ଵନିତାନାମ୍ ॥ ୪୭୯॥
ସ୍ଫୁରିତଂ ତଵ ଲୋଚନହାରି ସ୍ତନିତଂ ତଵ ଧୀରଗଭୀରମ୍ ।
ରମଣୀଯତଯା ମିଲିତା ତେ ଶଚି ଭୀକରତା ଚପଲାଯାଃ ॥ ୪୮୦॥
ଚପଲେ ଶଚି ଵିସ୍ଫୁରସୀନ୍ଦ୍ରଂ ଘନଜାଲପତିଂ ମଦଯନ୍ତୀ ।
ଦିତିଜାତମଵଗ୍ରହସଂଜ୍ଞଂ ଜନଦୁଃଖକରଂ ଦମଯନ୍ତୀ ॥ ୪୮୧॥
ପ୍ରଭୁମଭ୍ରପତିଂ ରମଯନ୍ତୀ ଦୁରିତଂ ନମତାଂ ଶମଯନ୍ତୀ ।
ହରିତାଂ ତିମିରାଣି ହରନ୍ତୀ ପଵମାନପଥେ ଵିଲସନ୍ତୀ ॥ ୪୮୨॥
ଅଲଘୁସ୍ତନିତଂ ଵିଦଧାନା ବଲମୁଗ୍ରତମଂ ଚ ଦଧାନା ।
ହୃଦଯାଵରକଂ ମମ ମାଯାପଟଲଂ ତଟିଦାଶୁ ଧୁନୋତୁ ॥ ୪୮୩॥
ସୁରପାର୍ଥଵଜୀଵିତନାଥେ ନିଖିଲେ ଗଗନେ ପ୍ରଵହନ୍ତ୍ଯାଃ ।
ତଟିତସ୍ତଵ ଵୀଚିଷୁ କାଚିଚ୍ଚପଲା ଲସତୀହ ପଯୋଦେ ॥ ୪୮୪॥
ଵିବୁଧପ୍ରଣୁତେ ଧନିକାନାଂ ଭଵନେଷୁ ଭଵନ୍ତ୍ଯଯି ଦୀପାଃ ।
ପଟୁଯନ୍ତ୍ରବଲାଦୁଦିତାନାଂ ତଵ ଦେଵି ଲଵାଃ କିରଣାନାମ୍ ॥ ୪୮୫॥
ଵ୍ଯଜନାନି ଚ ଚାଲଯସି ତ୍ଵଂ ବତ ସର୍ଵଜଗନ୍ନଋପଜାଯେ ।
ଵିବୁଧୋଽଭିଦଧାତ୍ଵଥଵା କୋ ମହତାଂ ଚରିତସ୍ଯ ରହସ୍ଯମ୍ ॥ ୪୮୬॥
ଇହ ଚାଲିତ ଈଡ୍ଯମନୀଷୈରଯି ଯନ୍ତ୍ରଵିଶେଷଵିଧିଜ୍ଞୈଃ ।
ବହୁଲାଦ୍ଭୁତକାର୍ଯକଲାପସ୍ତଟିତସ୍ତଵ ମାତରଧୀନଃ ॥ ୪୮୭॥
ଅଚରସ୍ତରୁଗୁଲ୍ମଲତାଦିଃ ସକଲଶ୍ଚ ଚରୋ ଭୁଵି ଜନ୍ତୁଃ ।
ଅନିତି ପ୍ରମଦେ ସୁରଭର୍ତୁସ୍ତଟିତସ୍ତଵ ଦେଵି ବଲେନ ॥ ୪୮୮॥
ମନୁତେ ନିଖିଲୋଽପି ଭଵତ୍ଯା ମନୁଜୋଽନିତି ଵକ୍ତିଶୃଣୋତି ।
ଅଵଲୋକଯତେ ଚ ଭଣାମଃ କିମୁ ତେ ଜଗଦମ୍ବ ଵିଭୂତିମ୍ ॥ ୪୮୯॥
ଅତିସୂକ୍ଷ୍ମପଵିତ୍ରସୁଷୁମ୍ଣାପଥତସ୍ତନୁଷୁ ପ୍ରଯତାନାମ୍ ।
କୁଲକୁଣ୍ଡକୃଶାନୁଶିଖା ତ୍ଵଂ ଜ୍ଵଲସି ତ୍ରିଦଶାଲଯନାଥେ ॥ ୪୯୦॥
ଇତରୋ ନ ସୁରକ୍ଷିତିପାଲାତ୍କୁଲକୁଣ୍ଡଗତୋ ଜ୍ଵଲନୋଽଯମ୍ ।
ଇତରେନ୍ଦ୍ରଵିଲାସିନି ନ ତ୍ଵତ୍କୁଲକୁଣ୍ଡକୃଶାନୁଶିଖେଯମ୍ ॥ ୪୯୧॥
କୁଲକୁଣ୍ଡକୃଶାନୁଶିଖାଯାଃ କିରଣୈଃ ଶିରସି ସ୍ଥିତ ଏଷଃ ।
ଦ୍ରଵତୀନ୍ଦୁରନାରତମେତଦ୍ଵପୁରାତ୍ମମଯଂ ଵିଦଧାନଃ ॥ ୪୯୨॥
ମଦକୃଦ୍ବହୁଲାମୃତଧାରାପରିପୂତମିଦଂ ମମ କାଯମ୍ ।
ଵିଦଧାସି ଭଜନ୍ମନୁଜାପ୍ତେ କୁଲକୁଣ୍ଡଧନଂଜଯଦୀପ୍ତେ ॥ ୪୯୩॥
ଶିରସୀହ ସତଃ ସିତଭାନୋରମୃତେନ ଵପୁର୍ମଦମେତି ।
ହୃଦି ଭାତ ଇନସ୍ଯ ଚ ଭାସା ମତିମେତୁ ପରାଂ ଶଚି ଚେତଃ ॥ ୪୯୪॥
ମମ ଯୋଗମଦେନ ନ ତୃପ୍ତିନିଜଦେଶଦଶାଵ୍ଯଥିତସ୍ଯ ।
ଅଵଗନ୍ତୁମୁପାଯମମୋଘଂ ଶଚି ଭାସଯ ମେ ହୃଦି ଭାନୁମ୍ ॥ ୪୯୫॥
ଵିଦିତଃ ପ୍ରମଦସ୍ଯ ଵିଧାତୁଃ ଶଶିନୋ ଜନଯିତ୍ରି ଵିଲାସଃ ।
ଅହମୁତ୍ସୁକ ଈଶ୍ଵରି ଭାନୋର୍ଵିଭଵସ୍ଯ ଚ ଵେତ୍ତୁମିଯତ୍ତାମ୍ ॥ ୪୯୬॥
ଵରୁଣସ୍ଯ ଦିଶି ପ୍ରଵହନ୍ତୀ ମଦମମ୍ବ କରୋଷି ମହାନ୍ତମ୍ ।
ଦିଶି ଵଜ୍ରଭୃତଃ ପ୍ରଵହନ୍ତୀ କୁରୁ ବୁଦ୍ଧିମକୁଣ୍ଠିତସିଦ୍ଧିମ୍ ॥ ୪୯୭॥
ଅମଲାମଧିରୁହ୍ଯ ସୁଷୁମ୍ଣାଂ ପ୍ରଵହସ୍ଯଧୁନାମ୍ବ ମଦାଯ ।
ଅମୃତାମଧିରୁହ୍ଯ ଚ କିଞ୍ଚିତ୍ପ୍ରିଵହେଶ୍ଵରି ବୁଦ୍ଧିବଲାଯ ॥ ୪୯୮॥
ଭରତକ୍ଷିତିକ୍ଷଣକର୍ମଣ୍ଯଭିଧାଯ ମନୋଜ୍ଞମୁପାଯମ୍ ।
ଅଥ ଦେଵି ଵିଧାଯ ଚ ଶକ୍ତଂ କୁରୁ ମାଂ କୃତିନଂ ଶଚି ଭକ୍ତମ୍ ॥ ୪୯୯॥
ନରସିଂହସୁତେନ କଵୀନାଂ ଵିଭୁନା ରଚିତୈଃ କମନୀଯୈଃ ।
ପରିତୃପ୍ଯତୁ ମେଘଵିତାନୈର୍ମରୁତାମଧିପସ୍ଯ ପୁରନ୍ଧ୍ରୀ ॥ ୫୦୦॥
॥ ପଞ୍ଚମଂ ପାଙ୍କ୍ତଂ ଶତକଂ ସମାପ୍ତମ୍ ॥
॥ ଅଥ ଷଷ୍ଠଂ ତ୍ରୈଷ୍ଟୁଭଂ ଶତକମ୍ ॥
॥ ପ୍ରଥମ ଉପଜାତିପାଦଃ ॥
ମନ୍ଦୋଽପି ବୋଧଂ ଵିଦଧନ୍ମୁନୀନାଂ ସ୍ଵଚ୍ଛୋଽପି ରାଗଂ ତ୍ରିଦଶେଶ୍ଵରସ୍ଯ ।
ଅଲ୍ପୋଽପି ଧୁନ୍ଵନ୍ହରିତାଂ ତମାଂସି ସ୍ମିତାଙ୍କୁରୋ ଭାତୁ ଜଯନ୍ତମାତୁଃ ॥ ୫୦୧॥
ଅଶେଷପାପୌଘନିଵାରଣାଯ ଭାଗ୍ଯସ୍ଯ ପାକାଯ ଚ ଦେଵରାଜ୍ଞୀ ।
ଶୋକାକୁଲାଂ ଭାରତଭୂମିମେତାଂ ଲୋକସ୍ଯ ମାତା ହୃଦଯେ କରୋତୁ ॥ ୫୦୨॥
ଧର୍ମଦ୍ଵିଷାମିନ୍ଦ୍ରନିରାଦରାଣାଂ ସଂହାରକର୍ମଣ୍ଯତିଜାଗରୂକାମ୍ ।
ଦେଵୀଂ ପରାଂ ଦେଵପଥେ ଜ୍ଵଲନ୍ତୀଂ ପ୍ରଚଣ୍ଡଚଣ୍ଡୀଂ ମନସା ସ୍ମରାମି ॥ ୫୦୩॥
ଵ୍ଯାପ୍ତା ତଟିଦ୍ଵା ଗଗନେ ନିଗୂଢା ନାରୀ ସୁରେଶାନମନୋରମା ଵା ।
ଶକ୍ତିଃ ସୁଷୁମ୍ଣାପଥଚାରିଣୀ ଵା ପ୍ରଚଣ୍ଡଚଣ୍ଡୀତି ପଦସ୍ଯ ଭାଵଃ ॥ ୫୦୪॥
ସମସ୍ତଲୋକାଵନିନାଯିକାଯାଃ ସୁପର୍ଵମାର୍ଗେଣ ଶରୀରଵତ୍ଯାଃ ।
ମାତୁର୍ମହୋଂଶଂ ମହନୀଯସାରଂ ଵିଜ୍ଞାନଵନ୍ତସ୍ତଟିତଂ ଭଣନ୍ତି ॥ ୫୦୫॥
ନିଗୂଢତେଜସ୍ତନୁରମ୍ବିକେଯଂ ପ୍ରଚଣ୍ଡଚଣ୍ଡୀ ପରିତୋ ଲସନ୍ତୀ ।
ଅଵ୍ଯକ୍ତ୍ଶବ୍ଦେନ ଶରୀରଵତ୍ଯାଃ କାଲ୍ଯାଃ କଵୀନାଂ ଵଚନେଷୁ ଭିନ୍ନା ॥ ୫୦୬॥
ଶବ୍ଦଂ ଵିନା ନୈଵ କଦାପି ତେଜସ୍ତେଜୋ ଵିନା ନୈଵ କଦାପି ଶବ୍ଦଃ ।
ଶକ୍ତିଦ୍ଵଯଂ ସନ୍ତତଯୁକ୍ତମେତତ୍କଥଂ ସ୍ଵରୂପେଣ ଭଵେଦ୍ଵିଭକ୍ତମ୍ ॥ ୫୦୭॥
ଏକୈଵ ଶକ୍ତିର୍ଜ୍ଵଲତି ପ୍ରକୃଷ୍ଟା ସ୍ଵରତ୍ଯପି ପ୍ରାଭଵତଃ ସମନ୍ତାତ୍ ।
କ୍ରିଯାଵିଭେଦାଦିହ ପଣ୍ଡିତାନାଂ ଶକ୍ତିଦ୍ଵଯୋକ୍ତିସ୍ତୁ ସମର୍ଥନୀଯା ॥ ୫୦୮॥
ଏକକ୍ରିଯାଯାଶ୍ଚ ଫଲପ୍ରଭେଦାତ୍ପୁନର୍ଵିଭାଗଃ କ୍ରିଯତେ ବହୁଜ୍ଞୈଃ ।
କାଲୀଂ ଚ ତାରାଂ ସ୍ଵରମଗ୍ର୍ଯମାହୁଃ ପ୍ରଚଣ୍ଡଚଣ୍ଡୀଂ ଲଲିତାଂ ଚ ତେଜଃ ॥ ୫୦୯॥
ସମ୍ପଦ୍ଯତେ ଶବ୍ଦଗତେର୍ହି କାଲଃ ଶବ୍ଦୋ ଵରେଣ୍ଯସ୍ତଦଭାଣି କାଲୀ ।
ଧ୍ଯାତେନ ଶବ୍ଦେନ ଭଵଂ ତରେଦ୍ଯଦ୍ସୁଧାସ୍ତତଃ ଶବ୍ଦମୁଶନ୍ତି ତାରାମ୍ ॥ ୫୧୦॥
ଯଦକ୍ଷରଂ ଵେଦଵିଦାମୃଷୀଣାଂ ଵେଦାନ୍ତିନାଂ ଯଃ ପ୍ରଣଵୋ ମୁନୀନାମ୍ ।
ଗୌରୀ ପୁରାଣେଷୁ ଵିପଶ୍ଚିତାଂ ଯା ସା ତାନ୍ତ୍ରିକାଣାଂ ଵଚନେନ ତାରା ॥ ୫୧୧॥
ସମ୍ପଦ୍ଯତେ ସଂହୃତିରୋଜସା ଯତ୍ପ୍ରଚଣ୍ଡଚଣ୍ଡୀ ତଦୁଦୀରିତୌଜଃ ।
ସିଧ୍ଯେଦଶେଷୋଽନୁଭଵୋ ଯଦୋଜସ୍ଯତୋ ବୁଧାସ୍ତାଂ ଲଲିତାଂ ଵଦନ୍ତି ॥ ୫୧୨॥
ପ୍ରଚଣ୍ଡଚଣ୍ଡୀଂ ଲଘୁନା ପଦେନ ଚଣ୍ଡୀଂ ଵିଦୁଃ କେଚନ ବୁଦ୍ଧିମନ୍ତଃ ।
ଏକେ ଵିଦଃ ଶ୍ରେଷ୍ଠମହୋମଯୀଂ ତାଂ ଲକ୍ଷ୍ମୀଂ ମହତ୍ପୂର୍ଵପଦାଂ ଵଦନ୍ତି ॥ ୫୧୩॥
ଅତୀଵ ସୌମ୍ଯଂ ଲଲିତେତି ଶବ୍ଦଂ ପ୍ରଚଣ୍ଡଚଣ୍ଡୀତି ପଦଂ ଚ ଭୀମମ୍ ।
ଦେଵୀ ଦଧାନା ସୁତରାଂ ମନୋଜ୍ଞା ଘୋରା ଚ ନିତ୍ଯଂ ହୃଦି ମେ ଵିଭାତୁ ॥ ୫୧୪॥
ପ୍ରଚଣ୍ଡଚଣ୍ଡୀଂ ତୁ ଶରୀରଭାଜାଂ ତନୂଷୁ ଯୋଗେନ ଵିଭିନ୍ନଶୀର୍ଷାମ୍ ।
ଶକ୍ତିଂ ସୁଷୁମ୍ଣାସରଣୌ ଚରନ୍ତୀଂ ତାଂ ଛିନ୍ନମସ୍ତାଂ ମୁନଯୋ ଵଦନ୍ତି ॥ ୫୧୫॥
କପାଲଭେଦୋ ଯଦି ଯୋଗଵୀର୍ଯାତ୍ସମ୍ପଦ୍ଯତେ ଜୀଵତ ଏଵ ସାଧୋଃ ।
ତମେଵ ସନ୍ତଃ ପ୍ରଵଦନ୍ତି ଶୀର୍ଷଚ୍ଛେଦଂ ଶରୀରାନ୍ତରଭାସି ଶକ୍ତେଃ ॥ ୫୧୬॥
ଉଦୀର୍ଯସେ ନିର୍ଜରରାଜପତ୍ନି ତ୍ଵଂ ଛିନ୍ନମସ୍ତା ଯମିନାଂ ତନୂଷୁ ।
ଉଜ୍ଜଋମ୍ଭଣେ ଵିଶ୍ଵସଵିତ୍ରି ଯସ୍ଯାଃ କାଯଂ ଭଵେଦ୍ଵୈଦ୍ଯୁତଯନ୍ତ୍ରତୁଲ୍ଯମ୍ ॥ ୫୧୭॥
ପିତୁର୍ନିଯୋଗାତ୍ତନଯେନ କୃତ୍ତେ ମସ୍ତେ ଜନନ୍ଯାଃ କିଲ ରେଣୁକାଯାଃ ।
ତ୍ଵମାଵିଶଃ ପାଵନି ତତ୍କବନ୍ଧଂ ତଦ୍ଵା ତ୍ଵମୁକ୍ତାସି ନିକୃତ୍ତମସ୍ତା ॥ ୫୧୮॥
ଛିନ୍ନଂ ଶିରଃ କୀର୍ଣକଚଂ ଦଧାନାଂ କରେଣ କଣ୍ଠୋଦ୍ଗତରକ୍ତଧାରାମ୍ ।
ରାମାମ୍ବିକାଂ ଦୁର୍ଜନକାଲରାତ୍ରିଂ ଦେଵୀଂ ପଵିତ୍ରଂ ମନସା ସ୍ମରାମି ॥ ୫୧୯॥
ଧ୍ରୁଵୋ ରମା ଚନ୍ଦ୍ରଧରସ୍ଯ ରାମା ଵାଗ୍ଵଜ୍ରଵୈରୋଚସଦୀର୍ଘନିର୍ଯେ ।
କୂର୍ଚଦ୍ଵଯଂ ଶସ୍ତ୍ରକୃଶାନୁଜାଯେ ଵିଦ୍ଯାନୃପାର୍ଣା ସୁରରାଜଶକ୍ତେଃ ॥ ୫୨୦॥
ମାଯାଦ୍ଵିଵାରଂ ଯଦି ସୈକଵର୍ଣା ଵିଦ୍ଯୈକଵର୍ଣା ଯଦି ଧେନୁରେକା ।
ଧେନ୍ଵାଦି ସମ୍ବୋଧନମସ୍ତ୍ରମଗ୍ନେର୍ଵିଲାସିନୀ ଚେତି ଧରେନ୍ଦୁଵର୍ଣା ॥ ୫୨୧॥
ଚତୁଷ୍ଟଯେତ୍ରନ୍ଯତମଂ ଗୃହୀତ୍ଵା ମନ୍ତ୍ରଂ ମହେନ୍ଦ୍ରସ୍ଯ ମନୋଧିନାଥାମ୍ ।
ଭଜେତ ଯସ୍ତାନ୍ତ୍ରିକଦିଵ୍ଯଭାଵମାଶ୍ରିତ୍ଯ ସିଦ୍ଵୀଃ ସକଲାଃ ସ ଵିନ୍ଦେତ୍ ॥ ୫୨୨॥
ସଂହୋତ୍ରମିତ୍ଯଦ୍ଭୁତଶକ୍ତିଯୁକ୍ତଂ ଵୃଷାକପେର୍ଦର୍ଶନମମ୍ବ ମନ୍ତ୍ରମ୍ ।
ଯୋ ଵୈଦିକଂ ତେ ମନୁଜୋ ଭଜେତ କିଞ୍ଚିନ୍ନ ତସ୍ଯେହ ଜଗତ୍ଯସାଧ୍ଯମ୍ ॥ ୫୨୩॥
ପ୍ରଚଣ୍ଡଚଣ୍ଡି ପ୍ରମଦେ ପୁରାଣି ପୁରାଣଵୀରସ୍ଯ ମନୋଧିନାଥେ ।
ପ୍ରଯଚ୍ଛ ପାତୁଂ ପଟୁତାଂ ପରାଂ ମେ ପୁଣ୍ଯାମିମାମାର୍ଯନିଵାସଭୂମିମ୍ ॥ ୫୨୪॥
ପ୍ରପଞ୍ଚରାଜ୍ଞୀଂ ପ୍ରଥିତପ୍ରଭାଵାଂ ପ୍ରଚଣ୍ଡଚଣ୍ଡୀଂ ପରିକୀର୍ତଯନ୍ତ୍ଯଃ ।
ଏତାଃ ପ୍ରମୋଦାଯ ଭଵନ୍ତୁ ଶକ୍ତେରୁପାସକାନାମୁପଜାତଯୋ ନଃ ॥ ୫୨୫॥
॥ ଦ୍ଵିତୀଯୋ ରଥୋଦ୍ଧତାପାଦଃ ॥
କ୍ଷାଲନାଯ ହରିତାଂ ଵିଭୂତଯେ ଵିଷ୍ଟପସ୍ଯ ମଦନାଯ ଵଜ୍ରିଣଃ ।
ତଜ୍ଜଯନ୍ତଜନନୀମୁଖାବ୍ଜତୋ ନିର୍ଗତଂ ସ୍ମିତମଘଂ ଧୁନୋତୁ ନଃ ॥ ୫୨୬॥
ଅନ୍ନଲୋପକୃଶଭୀରୁକପ୍ରଜାଂ ଭିନ୍ନଭାଵବଲହୀନନେତୃକାମ୍ ।
ଵାସଵସ୍ଯ ଵରଵର୍ଣିନୀ ପରୈରର୍ଦିତାମଵତୁ ଭାରତାଵନିମ୍ ॥ ୫୨୭॥
ପାଣିପାଦମନିମେଷରାଜ୍ଞି ତେ ପାରିଜାତନଵପଲ୍ଲଵୋପମମ୍ ।
ଅକ୍ଷପାଵିରହମଙ୍ଗଭାସରିଦ୍ଵାସିଚକ୍ରମିଥୁନଂ କୁଚଦ୍ଵଯମ୍ ॥ ୫୨୮॥
ପୂର୍ଣଚନ୍ଦ୍ରଯଶସୋଽପହାରକଂ ସମ୍ପ୍ରସାଦସୁଷମାସ୍ପଦଂ ମୁଖମ୍ ।
ଜ୍ଞାନଶକ୍ତିରୁଚିଶେଵଧୀଦୃଶୌ ରକ୍ତ୍ଵର୍ଣକସୁଧାଘନୋଽଧରଃ ॥ ୫୨୯॥
ମର୍ଦଯତ୍ତିମିରମୁଦ୍ଧତଂ ଦିଶାଂ ଅଲ୍ପମପ୍ଯଧିକଵୈଭଵଂ ସ୍ମିତମ୍ ।
ପ୍ରାଵୃଡନ୍ତଯମୁନାତରଙ୍ଗଵନ୍ନତ୍ନ୍ଲଚାରୁରତିପାଵନଃ କଚଃ ॥ ୫୩୦॥
ଵଲ୍ଲକୀଂ ଚ ପରୁଷଧ୍ଵନିଂ ଵଦନ୍ ଦୁଃଖିତସ୍ଯ ଚ ମୁଦାଵହଃ ସ୍ଵରଃ ।
ଚାରୁ ହାଵଶବଲାଽଲସା ଗତିଃ କାଯଧାମଵଚସାଂ ନ ପଦ୍ଧତୌ ॥ ୫୩୧॥
ଯୋଗସିଦ୍ଧିମତୁଲାଂ ଗତା ମତିଶ୍ଚାତୁରୀ ଚ ବୁଧମଣ୍ଡଲସ୍ତୁତା ।
ଵିଷ୍ଟପତ୍ରିତଯରାଜ୍ଯତୋଽପ୍ଯସି ତ୍ଵଂ ସୁଖାଯ ମହତେ ବିଡୌଜସଃ ॥ ୫୩୨॥
ତ୍ଵାମୁଦୀକ୍ଷ୍ଯ ଧୃତଦେଵତାତନୁଂ ଦୀପ୍ତପକ୍ଷ୍ମଲଵିଶାଲଲୋଚନାମ୍ ।
ଆଦିତୋ ଜନନି ଜନ୍ମିନାମଭୂଦ୍ ଵାସଵସ୍ଯ ରତିରାଦିମେ ରସେ ॥ ୫୩୩॥
ଆଦିମଂ ରସମନାଦିଵାସନା ଵାସିତୌ ପ୍ରଥମମନ୍ଵଗୃହ୍ଣତାମ୍ ।
ସମ୍ମଦସ୍ଯ ନିଧିମାଦିଦମ୍ପତୀ ସୋଽଚଲତ୍ତ୍ରିଭୁଵନେ ତତଃ କ୍ରମଃ ॥ ୫୩୪॥
ଜ୍ଯାଯସା ଦିଵିଷଦାଂ ପୁରାତନୀ ନୀଲକଞ୍ଜନଯନା ଵିଲାସିନୀ ।
ଯଦ୍ଵିହାରମତନୋତ୍ପ୍ରରୋଚନଂ ତତ୍ସତାମଭଵଦାଦିମେ ରସେ ॥ ୫୩୫॥
ନ ତ୍ଵଦମ୍ବ ନଲିନାନନାଽଧିକା ନାପି ନାକପତିତୋଽଧିକଃ ପୁମାନ୍ ।
ନାଧିକଂ ଚ ଵନମସ୍ତି ନନ୍ଦନାନ୍ନାଦିମାଦପି ରସୋଽଧିକୋ ରସାତ୍ ॥ ୫୩୬॥
ନାଯିକା ତ୍ଵମସମାନଚାରୁତା ନାଯକଃ ସ ମରୁତାଂ ମହୀପତିଃ ।
ନନ୍ଦନଂ ଚ ରସରଙ୍ଗଭୂଃ କଥଂ ମନ୍ମଥସ୍ଯ ନ ଭଵେଦିହୋତ୍ସଵଃ ॥ ୫୩୭॥
ଦେଵି ଵାଂ ମୃତିକଥୈଵ ଦୂରତୋ ଜାତୁଚିଦ୍ଗଲତି ନୈଵ ଯୌଵନମ୍ ।
କାଙ୍କ୍ଷିତଃ ପରିକରୋ ନ ଦୁର୍ଲଭଃ କିଂ ରସଃ ପରିଣମେଦିହାନ୍ଯଥା ॥ ୫୩୮॥
ଵିଷ୍ଟପସ୍ଯ ଯୁଵରାଜକେଶଵେ ତ୍ରାଣଭାରମଖିଲଂ ନିଧାଯ ଵାମ୍ ।
କ୍ରୀଡତୋରମରରାଜ୍ଞି ନନ୍ଦନେ କ୍ରୀଡିତାନି ମମ ସନ୍ତୁ ଭୂତଯେ ॥ ୫୩୯॥
ଯଦ୍ଯୁଵାମମରରାଜ୍ଞି ନନ୍ଦନେ କୁର୍ଵତୋ ରହସି ଦେଵି ମନ୍ତ୍ରଣମ୍ ।
ତତ୍ର ଚେନ୍ମମ କୃତିର୍ମନାଗିଯଂ ସ୍ପର୍ଶମେତି ଭୁଵି କୋ ନୁ ମତ୍କୃତୀ ॥ ୫୪୦॥
କ୍ରନ୍ଦନଂ ଯଦି ମମେହ ଵନ୍ଦିନୋ ନନ୍ଦନେ ଵିହରତୋଃ ସଵିତ୍ରି ଵାମ୍ ।
ଅନ୍ତରାଯକୃଦଥାବ୍ଜକାନ୍ତି ତେ ସମ୍ପ୍ରଗୃହ୍ଯ ଚରଣଂ କ୍ଷମାପଯେ ॥ ୫୪୧॥
ଯୋଷିତାମପି ଵିମୋହନାକୃତିର୍ମୋହନଂ ତୁ ପୁରୁଷସଂହତେରପି ।
ଇନ୍ଦ୍ରମମ୍ବରମଯାଂ ବଭୂଵିଥ ତ୍ଵଂ ରସାର୍ଦ୍ରହୃଦଯା ଲସଦ୍ରସମ୍ ॥ ୫୪୨॥
ଦିଵ୍ଯଚନ୍ଦନରସାନୁଲେପନୈଃ ପାରିଜାତସୁମତଲ୍ପକଲ୍ପନୈଃ ।
ଚାରୁଗୀତକୃତିଭିଶ୍ଚ ଭେଜିରେ ନାକଲୋକଵନଦେଵତାଶ୍ଚ ଵାମ୍ ॥ ୫୪୩॥
ସ୍ଵର୍ଣଦୀସଲିଲଶୀକରୋକ୍ଷିତାଃ ପାରିଜାତସୁମଗନ୍ଧଧାରିଣଃ ।
ନନ୍ଦନେ ତ୍ରିଦଶଲୋକରାଜ୍ଞି ଵାଂ କେପି ଭେଜୁରଲସାଃ ସମୀରଣାଃ ॥ ୫୪୪॥
ଆଦଧାସି ସକଲାଙ୍ଗନାଧିକେ ପଦ୍ମଗନ୍ଧିନି ସୁଧାଧରାଧରେ ।
ମଞ୍ଜୁଵାଣି ସୁକୁମାରି ସୁନ୍ଦରି ତ୍ଵଂ ସୁରେନ୍ଦ୍ରସକଲେନ୍ଦ୍ରିଯାର୍ଚନମ୍ ॥ ୫୪୫॥
ଆଦିଦେଵି ଵଦନଂ ତଵାଭଵତ୍ କାନ୍ତିଧାମ ମଦନଂ ଦିଵସ୍ପତେଃ ।
ଆନନାଦପି ରସାମୃତଂ କିରନ୍ନିଷ୍କ୍ରମଂ ଵିଲସିତଂ କଲଂ ଗିରାମ୍ ॥ ୫୪୬॥
ଚାରୁଵାଗ୍ଵିଲସିତାଚ୍ଚ ନିସ୍ତୁଲପ୍ରେମଵୀଚିରୁଚିରଂ ଵିଲୋକିତମ୍ ।
ଵୀକ୍ଷିତାଦପି ଵିଲାସଵିଶ୍ରମସ୍ଥାନମଲ୍ପମଲସଂ ଶୁଚିସ୍ମିତମ୍ ॥ ୫୪୭॥
ଭାସୁରେନ୍ଦ୍ରଦୃଢବାହୁପଞ୍ଜରେ ଲଜ୍ଜଯା ସହଜଯା ନମନ୍ମୁଖୀ ।
ତଦ୍ଵିଲୋଚନଵିକର୍ଷକାଲକା ପାତୁ ମାଂ ତ୍ରିଦିଵଲୋକନାଯିକା ॥ ୫୪୮॥
ଭାରତକ୍ଷିତିଵିଷାଦଵାରଣେ ତତ୍ସୁତଂ ଗଣପତିଂ କୃତୋଦ୍ଯମମ୍ ।
ଆଦଧାତୁ ପଟୁମର୍ଜୁନସ୍ମିତା ଦୁର୍ଜନପ୍ରମଥନକ୍ଷମା ଶଚୀ ॥ ୫୪୯॥
ଚାରୁଶବ୍ଦକଲିତାଃ କୃତୀରିମାଃ ସତ୍କଵିକ୍ଷିତିଭୁଜୋ ରଥୋଦ୍ଧତାଃ ।
ସା ଶୃଣୋତୁ ସୁରମେଦିନୀପତେର୍ନେତ୍ରଚିତ୍ତମଦନୀ ଵିଲାସିନୀ ॥ ୫୫୦॥
॥ ତୃତୀଯୋ ମୌକ୍ତିକମାଲାପାଦଃ ॥
ନିର୍ମଲଭାସାଂ ଦିଶି ଦିଶି କର୍ତା ପୁଣ୍ଯମତୀନାଂ ହୃଦି ହୃଦି ଧର୍ତା ।
ପାଲଯତାନ୍ମାମନଘଵିଲାସଃ ଶକ୍ରମହିଶ୍ଯାଃ ସିତଦରହାସଃ ॥ ୫୫୧॥
ପୁଣ୍ଯଚରିତ୍ରା ମୁନିଜନଗୀତା ଵାସଵକାନ୍ତା ତ୍ରିଭୁଵନମାତା ।
ଵତ୍ସଲଭାଵାଦଵତୁ ଵିଦୂନାଂ ଭାରତଭୂମିଂ ଧନବଲହୀନାମ୍ ॥ ୫୫୨॥
କୋଟିତଟିଦ୍ଵତ୍ତଵ ତନୁକାନ୍ତିଃ ପୂର୍ଣସମାଧେସ୍ତଵ ହୃଦି ଶାନ୍ତିଃ ।
ଵାସଵଭାମେ ଭଗଵତି ଘୋରଃ ଶତ୍ରୁଵିଦାରୀ ତଵ ଭୁଜସାରଃ ॥ ୫୫୩॥
ଆଶ୍ରଯଭୂତଂ ସୁମଧୁରତାଯା ଆଲଯଭୂତଂ ଜଲଧିସୁତାଯାଃ ।
ଵାସଵଦୃଷ୍ଟେସ୍ତଵମୁଖମବ୍ଜଂ କିଙ୍କ୍ରଦୃଷ୍ଟେସ୍ତଵ ପଦମବ୍ଜମ୍ ॥ ୫୫୪॥
ପାଦସରୋଜଂ ଵୃଜିନହରଂ ତେ ଯୋ ଭଜତେ ନା ସୁରପତିକାନ୍ତେ ।
ତତ୍ର କଟାକ୍ଷା ଅଯି ଶତଶସ୍ତେ ତସ୍ଯ ସମସ୍ତଂ ଭଗଵତି ହସ୍ତେ ॥ ୫୫୫॥
ଜ୍ଞାପକଶକ୍ତିଃ ପ୍ରତିନରମସ୍ତଂ କାରକଶକ୍ତିଃ ପ୍ରତିନରହସ୍ତମ୍ ।
ଵାସଵଚକ୍ଷୁସ୍ସୁକୃତଫଲଶ୍ରୀର୍ଭାତୁ ମମାନ୍ତଃ ସୁରଭୁଵନଶ୍ରୀଃ ॥ ୫୫୬॥
ମନ୍ତ୍ରପରାଣାଂ ଵଚସି ଵସନ୍ତୀ ଧ୍ଯାନପରାଣାଂ ମନସି ଲସନ୍ତୀ ।
ଭକ୍ତିପରାଣାଂ ହୃଦି ଵିହରନ୍ତୀ ଭାତି ପରାମ୍ବା ନଭସି ଚରନ୍ତୀ ॥ ୫୫୭॥
ସେଵକପାପପ୍ରଶମନନାମା ଦିକ୍ତିମିରୌଘପ୍ରମଥନଧାମା ।
ଉଜ୍ଜ୍ଵଲଶସ୍ତ୍ରା ରଣଭୁଵି ଭୀମା ପାତୁ ନତଂ ମାଂ ହରିହଯରାମା ॥ ୫୫୮॥
ଯୋଗିନି ଶକ୍ତିର୍ଵିଲସସି ଦାନ୍ତିଃ ଯୋଷିତି ଶକ୍ତିର୍ଵିଲସସି କାନ୍ତିଃ ।
ଜ୍ଞାନିନି ଶକ୍ତିର୍ଵିଲସସି ତୁଷ୍ଟିଃ ଧନ୍ଵିନି ଶକ୍ତିର୍ଵିଲସସି ଦୃଷ୍ଟିଃ ॥ ୫୫୯॥
ସଙ୍ଗିନି ଶକ୍ତିର୍ଵିଲସସି ନିଦ୍ରା ଧ୍ଯାତରି ଶକ୍ତିର୍ଵିଲସସି ମୁଦ୍ରା ।
ଵାସଵକାନ୍ତେ ଗଗନନିଶାନ୍ତେ ଭାଷିତୁମୀଶଃ କ୍ଵ ନୁ ଵିଭଵଂ ତେ ॥ ୫୬୦॥
ଯଦ୍ଦିତିଜାନାଂ ଦମନମଵକ୍ରଂ କେଶଵହସ୍ତେ ଵିଲସତି ଚକ୍ରମ୍ ।
ତତ୍ର କଲା ତେ ଭଗଵତି ଭଦ୍ରା କାଚନ ଭାରଂ ଵହତି ଵିନିଦ୍ରା ॥ ୫୬୧॥
ଦୁଷ୍ଟନିଶାଟପ୍ରଶମନଶୀଲଂ ଯତ୍ ସିତଭୂଭୃତ୍ପତିକରଶୂଲମ୍ ।
ତତ୍ର ମର୍ମହୋଂଶସ୍ତଵ ଜଗଦୀଶେ ରାଜତି କଶ୍ଚିତ୍ପଟୁରରିନାଶେ ॥ ୫୬୨॥
ଯନ୍ନିଜରୋଚିକ୍ର୍ତତରିପୁସାରଂ ଵାସଵହସ୍ତେ କୁଲିଶମୁଦାରମ୍ ।
ତତ୍ର ତଵାଂଶୋ ଵିଲସତି ଦିଵ୍ଯଃ କଶ୍ଚନ ଭାସୋ ଭଗଵତି ଭଵ୍ଯଃ ॥ ୫୬୩॥
ଅମ୍ବରଦେଶେ ସୁମହତି ଗୁପ୍ତା ପଙ୍କ୍ଜବନ୍ଧୌ ଵିଲସତି ଦୀପ୍ତା ।
ରାଜସି ମାତର୍ହିମରୁଚିଶୀତା ଵେଦିକୃଶାନୌ କ୍ରତୁଭୃତିପୂତା ॥ ୫୬୪॥
ସୂକ୍ଷ୍ମରଜୋଭିର୍ଵିହିତମୁଦାରଂ ଯଜ୍ଜଗଦେତନ୍ନ୍ଗଗନମପାରମ୍ ।
ତତ୍ତଵଵେଦଃ ପ୍ରଵଦତି କାଯଂ ପାଵନି ଭାନୁସ୍ତଵ ତନୁଜୋଽଯମ୍ ॥ ୫୬୫॥
ଈଶ୍ଵରି ନୈକସ୍ତଵ ଖରତେଜାଃ ତେଽପି ଚ ସର୍ଵେ ଜନନି ତନୂଜାଃ ।
ଉଜ୍ଵଲଖେଟାଃ କୁଵଦତି କାଯାଃ ପାଵନି କସ୍ତେ ପ୍ରଵଦତୁ ମାଯାଃ ॥ ୫୬୬॥
ଯା ମହିମାନଂ ପ୍ରଥଯତି ଭୂମିଃ ପାଵନକୀର୍ତିର୍ଜଲନିଧିନେମିଃ ।
ସେଯମପୀଶେ ଭଵତି ସୁପୁତ୍ରୀ ଵାସଵଜାଯେ ତଵ ଜନଧାତ୍ରୀ ॥ ୫୬୭॥
ଅଙ୍ଗ ସଖାଯୋ ଵିରମତସଙ୍ଗାଶ୍ଵଷ୍ଠ୍ହର୍ଵିଷଯାଣାଂ କୃତମତିଭଙ୍ଗାତ୍ ।
ଧ୍ଯାଯତ ଚିତ୍ତେ ଧୁତଭଯବୀଜଂ ଵାସଵଜାଯାଚରଣସରୋଜମ୍ ॥ ୫୬୮॥
ପାପମଶେଷଂ ସପଦି ଵିହାତୁଂ ଶକ୍ତିମନଲ୍ପାମପି ପରିଧାତୁମ୍ ।
ଚେତସି ସାଧୋ କୁରୁ ପରିପୂତଂ ଵାସଵଜାଯାପଦଜଲଜାତମ୍ ॥ ୫୬୯॥
ଈଶ୍ଵରି ଵନ୍ଦ୍ଯଦ୍ଯୁତିଭୃତିମେଧେ କାଙ୍କ୍ଷିତନୀରାଣ୍ଯସୃଜତି ମୋଘେ ।
ନିର୍ମଲକୀର୍ତେସ୍ତଵ ଶଚି ଗାନଂ ଶକ୍ଷ୍ଯତି କର୍ତୁଂ ତଦୁଦକଦାନମ୍ ॥ ୫୭୦॥
ଆମଯଵୀର୍ଯାଦ୍ଵିଗଲତି ସାରେ ଜୀଵତି କିଞ୍ଚିଦ୍ରିସନଗନୀରେ ।
ରକ୍ଷତି ଜନ୍ତୁଂ ତଵ ଶଚି ନାମ ପ୍ରାଜ୍ଞଜନୈରପ୍ଯଗଣିତଧାମ ॥ ୫୭୧॥
ମଧ୍ଯମଲୋକେ ସ୍ଯତି ଶୁଚିରୁଗ୍ରା ରାଜସି ନାକେ ଵିଭଵସମଗ୍ରା ।
ପ୍ରାଣିଶରୀରେ ଭଵସି ଵିଚିତ୍ର ଵାସଵଜାଯେ ଵିଵିଧଚରିତ୍ର ॥ ୫୭୨॥
ଵ୍ଯୋମ୍ନି ଵପୁସ୍ତେ ଵିନିହତପାପଂ ଵିଶ୍ରୁତଲୀଲଂ ତଵ ଦିଵି ରୂପମ୍ ।
କର୍ମଵଶାତ୍ତେ ଭଵତି ସ ଭୋଗଃ ପ୍ରାଣିଶରୀରେ ଭଗଵତି ଭାଗଃ ॥ ୫୭୩॥
ଭାରତଭୂମେଃ ଶୁଚମପହନ୍ତୁଂ ଶ୍ରେଷ୍ଠମୁପାଯଂ ପୁନରଵଗନ୍ତୁମ୍ ।
ଵାସଵଜାଯେ ଦିଶ ମମ ବୁଦ୍ଧିଂ ପାଵନି ମାଯେ କୁରୁ କୁରୁ ସିଦ୍ଧିମ୍ ॥ ୫୭୪॥
ସମ୍ମଦଯନ୍ତୀର୍ବୁଧଜନମେତାଃ ସ୍ଵର୍ଗଧରିତ୍ରୀପତିସତିପୂତାଃ ।
ମୌକ୍ତିକମାଲାଃ ଶୃଣୁ ନୁତିକର୍ତୁର୍ଭକ୍ତିନିବଦ୍ଧାଃ କଵିକୁଲଭର୍ତୁଃ ॥ ୫୭୫॥
॥ ଚତୁର୍ଥଃ ସୁମୁଖୀପାଦଃ ॥
ଅଜିତମିନାଗ୍ନିତଟିଚ୍ଛଶିଭିଃ ମମ ହୃଦଯସ୍ଯ ତମଃ ପ୍ରବଲମ୍ ।
ଅମରପତିପ୍ରମଦାହସିତଂ ଵିମଲଘୃଣିପ୍ରକରୈର୍ହରତୁ ॥ ୫୭୬॥
ସୁରନୃପତେର୍ଦଯିତା ଵିନତାହିତଶମନୀ ଲୁଲିତାମିତରୈଃ ।
ଵରକରୁଣାଵରୁଣାଲଯଦୃଙ୍ମମ ଜନନୀମଵତାଦଵନିମ୍ ॥ ୫୭୭॥
ପଟୁତପସୋ ଜମଦଗ୍ନିମୁନେରିହ ସହଧର୍ମଚରୀଂ ଭୁଵନେ ।
ତନଯନିକୃତ୍ତଶିରଃ କମଲାଂ ଵରମତିମାଵିଶଦିନ୍ଦ୍ରଵଧୂଃ ॥ ୫୭୮॥
ଯଦୁକୁଲକୀର୍ତିଵିଲୋପଭିଯା ବତଵିନିଗୂହ୍ଯ ଋତଂ କଵଯଃ ।
ମୁନିଗୃହିଣୀ ଵଧହେତୁକଥାମିତରପଥେନ ଭଣନ୍ତି ମୃଷା ॥ ୫୭୯॥
ନ ସୁରଭିରର୍ଜୁନଭୂମିପତିର୍ଭୃଗୁତିଲକସ୍ଯ ଜହାର ସ ଯାମ୍ ।
ଇଯମମୃତାଂଶୁମନୋଜ୍ଞମୁଖୀ ପରଶୁଧରସ୍ଯ ଜନନ୍ଯନଘା ॥ ୫୮୦॥
ଅତିରଥମର୍ଜୁନଭୂମିପତିଂ ସହପୃତନଂ ଜମଦଗ୍ନିସୁତଃ ।
ଯୁଧି ସ ଵିଜିତ୍ଯ ଵିଶାଲଯଶାଃ ପୁନରପି ମାତରମାହୃତଵାନ୍ ॥ ୫୮୧॥
ପରଗୃହଵାସକଲଙ୍କଵଶାନ୍ନିଜଗୃହିଣୀଂ ଜମଦଗ୍ନିମୁନିଃ ।
ବତଵିନିହନ୍ତୁମନା କଲଯଂସ୍ତନୁଭଵମାଦିଶଦୁଗ୍ରମନାଃ ॥ ୫୮୨॥
ପିତୃଵଚନାଦତିଭକ୍ତିମତାପ୍ଯସୁରଵଦାତ୍ମସୁତେନ ହତାମ୍ ।
ମୁନିଗୃହିଣୀମନଘେତିଵଦଂସ୍ତଵ ଵରଦେଽଵିଶଦଂଶ ଇମାମ୍ ॥ ୫୮୩॥
ଇଦମଵିକମ୍ପ୍ଯମତିପ୍ରବଲଂ ପ୍ରଭଵତି କାରଣମାର୍ଯନୁତେ ।
ମୁନିଗୃହିଣୀମନଘାଂ ଭଣିତୁଂ ଶଚି କଲଯା ଯଦି ମାମଵିଶଃ ॥ ୫୮୪॥
ଖଲଜନକଲ୍ପିତଦୁଷ୍ଟକଥାଶ୍ରଵଣଵଶାଦ୍ଵ୍ଯଥିତଂ ହୃଦଯମ୍ ।
ଅଥ ଚରିତେଽଵଗତେ ଵିମଲସ୍ମୃତିଵଶତୋ ମମ ଯାତି ମୁଦମ୍ ॥ ୫୮୫॥
ତଵ ମହସା ଵିଶତା କୃପଯା ମମ ଶଚି ସୂକ୍ଷ୍ମଶରୀରମିଦମ୍ ।
ନୃପରିପୁମାତୃପଵିତ୍ରକଥା ସ୍ମରଣପଥଂ ଗମିତା ସପଦି ॥ ୫୮୬॥
ଵିଦଧତୁରାସୁରକୃତ୍ଯମୁଭୌ ବହୁଲଗୁଣାମପି ଯଦ୍ଗୃହିଣୀମ୍ ।
ସ ମୁନିରଘାତଯଦଚ୍ଛକଥାଂ ଦଶରଥଜଶ୍ଚ ମୁମୋଚ ଵନେ ॥ ୫୮୭॥
ଅପି ଵିନିକୃତ୍ତଶିରାଃ ଶଚି ତେ ଵରମହସା ଵିଶତା ସପଦି ।
ଅଲଭତ ଜୀଵିତମମ୍ବ ପୁନର୍ଭୁଵନଶୁଭାଯ ମୁନେସ୍ତରୁଣୀ ॥ ୫୮୮॥
ଯଦି ଶିରସା ରହିତେ ଵପୁଷି ପ୍ରକଟତଯା ଵିଲସନ୍ତ୍ଯସଵଃ ।
ଯଦି ହୃଦଯଂ ସହଭାତି ଧିଯା କିମିଵ ଵିଚିତ୍ରମିତଶ୍ଚରିତମ୍ ॥ ୫୮୯॥
ପରଶୁଧରସ୍ଯ ସଵିତ୍ରି କଲା ତ୍ଵଯି ପୁରୁହୂତସରୋଜଦୃଶଃ ।
ସ ଶିରସି କାଚିଦଭୂଦ୍ରୁଚିରା ଵିଶିରସି ଭୀମତମା ଭଵତି ॥ ୫୯୦॥
ପରଶୁଧରୋଽର୍ଜୁନଭୂମିପତିଂ ଯଦଜଯଦମ୍ବ ତପୋଽତ୍ର ତଵ ।
ଅଭଜତ କାରଣତାମନଘେ ଵରମୁନିଗେଯପଵିତ୍ରକଥେ ॥ ୫୯୧॥
ଭଗଵତି କୃତ୍ତଶିରୋ ଭଵତୀ ମଥିତଵତୀ ନୃପତୀନଶୁଭାନ୍ ।
ପ୍ରଥନଭୁଵି ପ୍ରଗୁଣଂ ଭୁଜଯୋଃ ପରଶୁଧରାଯ ଵିତୀର୍ଯ ବଲମ୍ ॥ ୫୯୨॥
ଶୁଭତମକୁଣ୍ଡଲପୂର୍ଵସତିଃ ପଦନତପାତକସଂଶମନୀ ।
ଦିଶତୁ ନିକୃତ୍ତଶିରାଃ କୁଶଲଂ ମମ ସୁରପାର୍ଥଵଶକ୍ତିକଲା ॥ ୫୯୩॥
ନିଜସୁତରଙ୍ଗପତେର୍ନିକଟେ କୃତଵସତିର୍ନତସିଦ୍ଧିକରୀ ।
ଦଲିତଶିରାଃ ପ୍ରତନୋତୁ ମମ ଶ୍ରିଯମମରେଶ୍ଵରଶକ୍ତିକଲା ॥ ୫୯୪॥
ଭୁଵି ତତସହ୍ଯନଗାନ୍ତରଗେ ଶୁଭତମଚନ୍ଦ୍ରଗିରୌ ଵରଦା ।
କୃତଵସତିଃ କୁରୁତାନ୍ମମ ଶଂ ଭୃଗୂକୁଲରାମଜନନ୍ଯଜରା ॥ ୫୯୫॥
ଅଵତୁ ଵିକୃତ୍ତଶିରାଃ ପଦଯୋର୍ଭଜକମନିନ୍ଦ୍ଯଵିଚିତ୍ରକଥା ।
ଦିନକରମଣ୍ଡଲମଧ୍ଯଗୃହା ସୁରଧରଣୀପତିଶକ୍ତିକଲା ॥ ୫୯୬॥
ଗଗନଚରାର୍ଚିତପାଦୁକଯା ପଦନତସନ୍ମତିବୋଧିକଯା ।
ମମ ସତତଂ ଶୁଚିରେଣୁକଯା ପରଵଦିଦଂ କୁଲମମ୍ବିକଯା ॥ ୫୯୭॥
ଶମଯିତୁମୁଗ୍ରତମଂ ଦୁରିତଂ ପ୍ରଥଯିତୁମାତ୍ମନିଗୂଢବଲମ୍ ।
ଗମଯିତୁମଗ୍ରଯ୍ଦଶାଂ ସ୍ଵକୁଲଂ ତଵ ଚରଣାମ୍ବୁଜମମ୍ବ ଭଜେ ॥ ୫୯୮॥
ପରଵଶଗାମଶିଵେନ ଵୃତାଂ ଭରତଧରାଂ ପରିପାତୁମିମାମ୍ ।
ପଟୁମତିଵାକ୍କ୍ରିଯମାତନୁତାଦ୍ଗଣପତିମଭ୍ରହଯପ୍ରମଦା ॥ ୫୯୯॥
ଗଣପତିଦେଵମର୍ମହୋଂଶଜୁଷୋ ଗଣପତିନାମକଵିପ୍ରକଵେଃ ।
ସୁରପତିଜୀଵସଖୀଶୃଣୁଯାଦ୍ଦଶଶତପତ୍ରମୁଖୀ ସୁମୁଖୀଃ ॥ ୬୦୦॥
॥ ଷଷ୍ଠଂ ତ୍ରୈଷ୍ଟୁଭଂ ଶତକଂ ସମାପ୍ତମ୍ ॥
॥ ଅଥ ସପ୍ତମଂ ଜାଗତଂ ଶତକମ୍ ॥
॥ ପ୍ରଥମୋ ଦ୍ରୁତଵିଲମ୍ବିତପାଦଃ ॥
ସୁରମହୀରମଣସ୍ଯ ଵିଲାସିନୀ ଜଲଚରଧ୍ଵଜଜୀଵିତଦାଯିନୀ ।
ହରତୁ ବୋଧଦୃଗାଵରଣଂ ତମୋ ହୃଦଯଗଂ ହସିତେନ ସିତେନ ମେ ॥ ୬୦୧॥
ନମଦମର୍ତ୍ଯକିରୀଟକୃତୈଃ କିଣୈଃ କମଠପୃଷ୍ଠନିଭେ ପ୍ରପଦେଽଙ୍କିତା ।
ପରିଧୁନୋତୁ ଶଚୀ ଭରତକ୍ଷିତେର୍ଵୃଜିନଜାଲମଜାଲମକମ୍ପନମ୍ ॥ ୬୦୨॥
ଅତିତରାଂ ନତପାଲନଲୋଲଯା ଵିବୁଧନାଥମନୋହରଲୀଲଯା ।
କିରିମୁଖୀମୁଖଶକ୍ତ୍ଯୁପଜୀଵ୍ଯଯା ଵିଦିତଯାଦିତଯା ଗତିମାନହମ୍ ॥ ୬୦୩॥
ଘନହିରଣ୍ଯମଦାପହରୋଚିଷା ଵନରୁହାନନଯାଽଵନଦକ୍ଷଯା ।
ଗତିମଦିନ୍ଦ୍ରମନୋରଥନାଥଯା ଭୁଵନମେଵ ନ ମେ କୁଲମାତ୍ରକମ୍ ॥ ୬୦୪॥
ତନୁଷୁ ଵାମନମୂର୍ତିଧରେ ଵିଭୌ ତମନୁଯାଚ ଵିରାଜତି ଵାମନୀ ।
ଶରଣଵାନନଯାମ୍ବିକଯା ଲସତ୍ କରୁଣଯାଽରୁଣଯା ପଦଯୋରହମ୍ ॥ ୬୦୫॥
ସକରୁଣା କୁଶଲଂ ମମ ରେଣୁକାତନୁରଜା ତନୁତାଦୁଦିତୋ ଯତଃ ।
ଯୁଧି ମୁନିର୍ଵିଦଧୌ ପରଶୁଂ ଦଧଜ୍ଜନପତୀନପତୀଵ୍ରଭୁଜାମଦାନ୍ ॥ ୬୦୬॥
ସୁଜନଶତ୍ରୁରମାଥି ଘନଧ୍ଵନିଃ ଶଚି ସରାତ୍ରିଚରସ୍ତଵ ତେଜସା ।
ଜନନି ରାମସହୋଦରସାଯକଂ ପ୍ରଵିଶତାଽଵିଶତାଦଧିକୌଜସା ॥ ୬୦୭॥
ତଵ ମହଃକଲଯାବଲମାପ୍ତଯା ଜନନି ଶୁମ୍ଭନିଶୁମ୍ଭମଦଚ୍ଛିଦା ।
ଜଗଦରକ୍ଷ୍ଯତ ଗୋପକୁଲେଶିତୁସ୍ତନୁଜଯାଽନୁଜଯାର୍ଜୁନସାରଥେଃ ॥ ୬୦୮॥
ନ ଵିନିରୂପଯିତୁଂ ପ୍ରବଭୂଵ ଯାଂ କଵିଜନୋ ଵିଵିଧଂ କଥଯନ୍ନପି ।
ମୁନିହୃଦମ୍ବୁଜସୌଧତଲେନ୍ଦିରା ଜଯତି ସା ଯତିସାଧୁଜନାଵନୀ ॥ ୬୦୯॥
ଇମମଯି ତ୍ରିଦିଵେଶ୍ଵରି କଲ୍କିନଂ ରୁଷମପୋହ୍ଯ ସଵିତ୍ରି ଵିଲୋକିତୈଃ ।
ସୁରପତେର୍ଦ୍ଵିଷତୋଽଘଵତୋ ଲସନ୍ ମଦନକୈରଵକୈରଵଲୋଚନେ ॥ ୬୧୦॥
ସ୍ମରଦମର୍ତ୍ଯନୃପାଲଵିଲାସିନୀଂ ପ୍ରବଲପାତକଭୀତିଵିନାଶିନୀମ୍ ।
ପ୍ରଵଣଯାନ୍ତରନନ୍ଯଧିଯା ଲସଦ୍ଵିନଯଯାନଯଯାମଵତୀର୍ମନଃ ॥ ୬୧୧॥
ଭଗଵତୀଗଗନସ୍ଥଲଚାରିଣୀ ଜଯତି ସଙ୍ଗରରଙ୍ଗଵିହାରିଣୀ ।
ସୁକୃତଶତ୍ରୁମତିଭ୍ରମକାରିଣୀ ହରିହଯାରିହଯାଦିଵିଦାରିଣୀ ॥ ୬୧୨॥
ଶରଣଵାନହମର୍ଜୁନହାସଯା ଭୁଵନଭୂପତିହାରିଵିଲାସଯା ।
ଦିଵି ପୁଲୋମଜଯା ଧଵଲାଚଲେ ଗିରିଜଯାଽରିଜଯାଵିତଦେଵଯା ॥ ୬୧୩॥
ଚରଣଯୋର୍ଧୃତଯା ଵିଜଯାମହେ ଵଯମଶେଷଜଗନ୍ନୃପଜାଯଯା ।
ଦିଵି ପୁଲୋମଜଯା ଧଵଲାଚଲେ ନଗଜଯା ଗଜଯାନଵିଲାସଯା ॥ ୬୧୪॥
ଅରିଵଧାଯ ଵିଧାଯ ବୁଧାଧିପଂ ପଟୁଭୁଜାବଲଭୀଷଣମାଜିଷୁ ।
ନ ଭଵତୀ ଶଚି ଗଚ୍ଛତି ଦୁର୍ଗତଃ କ୍ଵଚନ କାଚନ କାତରଧୀରିଵ ॥ ୬୧୫॥
ସପଦି ମାନସଧୈର୍ଯହୃତୋ ଜଗଜ୍ଜନନି ଵଜ୍ରତନୋର୍ଜ୍ଵଲିତାର୍ଚିଷଃ ।
ଅରିଜନେ ପ୍ରଥମଂ ତଵ ଵୀକ୍ଷଯା ସୁରପତେରପତେଜସି ଵି କ୍ରମଃ ॥ ୬୧୬॥
ନ ମନନୋଚିତମସ୍ତି ପରଂ ନୃଣାଂ ଵିବୁଧରାଜଵଧୂପଦପଦ୍ମତଃ ।
ଜଗତି ଦର୍ଶନଯୋଗ୍ଯମିହାପରଂ ନ ରମଣୀ ରମଣୀଯମୁଖାବ୍ଜତଃ ॥ ୬୧୭॥
ଶରଣଵାନହମସ୍ମି ପୁରାତନପ୍ରମଦଯା ମୁନିଗେଯଚରିତ୍ରଯା ।
ସ୍ଵବଲଚାଲିତନାକଜଗନ୍ନଭୋ ଵସୁଧଯା ସୁଧଯା ସୁରରାଡ୍ଦୃଶାମ୍ ॥ ୬୧୮॥
ଅଯମହଂ ଗତିମାନତିଶାନ୍ତଯା ତ୍ରିଦିଵଭୂମିପତିପ୍ରିଯକାନ୍ତଯା ।
ମନସି ମୌନିଜନୈରତିଭକ୍ତିତୋ ନିହିତଯା ହିତଯା ସୁକୃତାତ୍ମନାମ୍ ॥ ୬୧୯॥
ଵିନଯତଃ ସ୍ତୁତଯା ଗମଯାମ୍ଯହଂ ଜନିମତାଂ ଜନଯିତ୍ରି ନିଶାସ୍ତ୍ଵଯା ।
ପ୍ରସୃତଯା କୁଲକୁଣ୍ଡଧନଞ୍ଜଯାଦ୍ଧୃତତନୂତତନୂତନଵେଗଯା ॥ ୬୨୦॥
ସକୃଦମୋଘସରସ୍ଵତିସାଧୁଧୀ ହୃଦଯଵେଦ୍ଯପଦାମ୍ବୁଜସୌଷ୍ଠଵେ ।
ମମ ଶିଵଂ ସୁମନଃ ପୃଥିଵୀପତେଃ ସୁଵଦନେ ଵଦ ନେତ୍ରଲସଦ୍ଦଯେ ॥ ୬୨୧॥
ଦୁରଵଗାହପଥେ ପତିତଂ ଚିରାଜ୍ଜନନି ଗମ୍ଯଵିଲୋକନଲାଲସମ୍ ।
ସ୍ଵଯମମର୍ତ୍ଯନୃପାଲମନୋରମେ ସୁନଯନେ ନଯନେଯମିମଂ ଜନମ୍ ॥ ୬୨୨॥
ଅଵତୁ ନଃ ସ୍ଵଯମେଵ ପଟୂନ୍ ଵିପଦ୍ଵିମଥନାଯ ଵିଧାଯ ବୁଧେଶ୍ଵରୀ ।
ସକଲମର୍ମସୁଵୀତଦଯୈଃ ପରୈର୍ଵିନିହତାନିହ ତାପଵତଃ ଶଚୀ ॥ ୬୨୩॥
ସୁରଧରାପତିଜୀଵିତନାଥଯା ସ୍ଵଜନନକ୍ଷିତିରକ୍ଷଣକର୍ମଣି ।
ପଟୁତମୋ ଜନ ଏଷ ଵିଧୀଯତାମିହ ତଯା ହତଯା ତୁ ସମୂହଯା ॥ ୬୨୪॥
ଗଣପତେଃ ଶୃଣୁଯାଦିମମୁଜ୍ଵଲଂ ଦ୍ରୁତଵିଲମ୍ବିତଵୃତ୍ତଗଣଂ ଶଚୀ ।
ସଲିଲରାଶିସୁତାଭଵନୀଭଵଦ୍ଭୁଵନପାଵନପାଦସରୋରୁହା ॥ ୬୨୫॥
॥ ଦ୍ଵିତୀଯୋ ଜଲୋଦ୍ଧତଗତିପାଦଃ ॥
ହରିତ୍ସୁ ପରିତଃ ପ୍ରସାଦମଧିକଂ ଦଧାନମମଲତ୍ଵିଷାଂ ପ୍ରସରଣୈଃ ।
ମହେନ୍ଦ୍ରମହିଲାଵିଲାସହସିତଂ ମଦନ୍ତରତମୋ ଧୁନୋତୁ ଵିତତମ୍ ॥ ୬୨୬॥
ପ୍ରସୂସ୍ତ୍ରିଜଗତଃ ପ୍ରିଯା ମଘଵତଃ କୃପାକଲିତଯା କଟାକ୍ଷକଲଯା ।
ନିତାନ୍ତମଗତେର୍ଵିକୁଣ୍ଠିତମତେର୍ଧୁନୋତୁ ଭରତକ୍ଷିତେରକୁଶଲମ୍ ॥ ୬୨୭॥
ପୁରା ଶଚି ମତିସ୍ତ୍ଵମୀଶିତୁରଥୋ ନଭସ୍ତନୁମିତା ପୃଥଙ୍ମତିମତୀ ।
ଅନନ୍ତରମଭୂଃ ସରୋଜନଯନା ତନୁଃ ସୁରପତେର୍ଵିଲୋଚନସୁଧା ॥ ୬୨୮॥
ପରତ୍ର ଵିଗୁଣା ସତୋଽସି ଧିଷଣା ନଭସ୍ତନୁରିହ ପ୍ରପଞ୍ଚମଵସି ।
ଅସି ସ୍ଵରବଲା ପ୍ରିଯା ସୁରପତେରିଯତ୍ତଵ ଶଚି ସ୍ଵରୂପକଥନମ୍ ॥ ୬୨୯॥
ପ୍ରଜାପତିପଦେ ପୁରାଣପୁରୁଷେ ସ୍ମୃତା ତ୍ଵମଦିତିଃ ସୁରାସୁରନୁତେ ।
ଜନାର୍ଦନପଦେ ରମାସି ପରମେ ସଦାଶିଵପଦେ ଶିଵା ତ୍ଵମଜରେ ॥ ୬୩୦॥
ଉଷା ଇନପଦେ ସ୍ଵଧାଽନଲପଦେ ପୁରନ୍ଦରପଦେ ତ୍ଵମୀଶ୍ଵରି ଶଚୀ ।
ଯଥା ରୁଚିଵିଦୁଃ ପଦାନି କଵଯଶ୍ଚିତୈଶ୍ଚ ଚିତିମାନ୍ଯୁଵାମୃଜୁଗିରା ॥ ୬୩୧॥
ଅମେଯମମଲଂ ପୁରାଣପୁରୁଷଂ ତଦୀଯଵିଭଵାଭିଧାଯିଭିରିମେ ।
ଵଦନ୍ତି କଵଯଃ ପଦୈର୍ବହୁଵିଧୈସ୍ତଥୈଵ ଭଵତୀଂ ତତୋ ମତଭିଦାଃ ॥ ୬୩୨॥
ନଭଶ୍ଚ ପଵନଃ ସ୍ଵରଶ୍ଚ ପରମସ୍ତଟିଚ୍ଚ ଵିତତା ପତିଶ୍ଚ ମହସାମ୍ ।
ସୁଧାଂଶୁରନଲୋ ଜଲଂ ଚ ପୃଥିଵୀ ସଵିତ୍ରି ଯୁଵଯୋର୍ଵିଭୂତିପଟଲୀ ॥ ୬୩୩॥
ଅପାରବହୁଲପ୍ରମୋଦଲହରୀ ସତଃ କିଲଚିତିଃ ପରତ୍ର ଵିତତା ।
ପୁନର୍ଵିଯଦିଦଂ ପରୀତ୍ଯ ନିଖିଲଂ ଜଗନ୍ତି ଦଧତୀ ପରା ଵିଜଯତେ ॥ ୬୩୪॥
ନ ଯଦ୍ଯପି ପରାତ୍ପରେ ନଭସି ତେ ସରୋଜନଯନା ଵପୁଃ ପୃଥଗଜେ ।
ତଥାପି ନମତାଂ ମତୀରନୁସରନ୍ତ୍ଯମେଯଵିଭଵେ ଦଧାସି ଚ ତନୂଃ ॥ ୬୩୫॥
ସହ ତ୍ରିଭୁଵନପ୍ରପାଲନକୃତା ସମସ୍ତମରୁତାଂ ଗଣସ୍ଯ ଵିଭୁନା ।
ସଦା ଶଶିମୁଖୀ ଶରୀରଭୃଦଜା ଜଗତ୍ଯଦୁରିତେ ଶଚୀ ଵିଜଯତେ ॥ ୬୩୬॥
କୁଲଂ ବହୁଭିଦଂ ବଲଂ ନ ଭୁଜଯୋଃ କଥଂ ନୁ ଵିପଦସ୍ତରେମ ଭରତାଃ ।
ସମର୍ଥମଧୁନା ଵିପଦ୍ଵିଧୁତଯେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୩୭॥
ସମସ୍ତମପି ଚ ସ୍ଵଦେଶଵିଦୁଷାଂ ଵିଧାନପଟଲଂ ବଭୂଵ ଵିଫଲମ୍ ।
ଅଭାଗ୍ଯଦମନକ୍ଷମଂ ତଦଧୁନା ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୩୮॥
ନିଜୋ ମମ ଜନୋ ନିତାନ୍ତମଗତିର୍ନ କୁକ୍ଷିଭରଣେଽପ୍ଯଯଂ ପ୍ରଭଵତି ।
ମହେଶ୍ଵରି କୃପାମରନ୍ଦମଧୁନା ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୩୯॥
ଅଦୃଷ୍ଟକନକଂ କୁଲଂ ମମ ଚିରାନ୍ନିରାଯୁଧମିଦଂ ନିରାଶମଭିତଃ ।
ସ୍ଵଭାଵତ ଇଵ ପ୍ରବଦ୍ଧମଭଵତ୍ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୦॥
ଅଵୀରଚରିତଂ ଵିପାଲକକଥଂ ନିରାର୍ଷଵିଭଵଂ ଚିରାନ୍ମମ କୁଲମ୍ ।
ଇଦଂ ମମ ମନୋ ନିକୃନ୍ତତି ମୁହୁସ୍ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୧॥
ଚିରାତ୍ସ୍ମୃତିପଥାଦପି ଚ୍ଯୁତମଜେ ତପୋବଲଭଵଂ ତମାର୍ଷଵିଭଵମ୍ ।
ସ୍ଵଦେଶମଧୁନା ପୁନର୍ଗମଯିତୁଂ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୨॥
ହତଂ ଚ ଵିହତଂ ଧୁତଂ ଚ ଵିଧୁତଂ ରୁଦନ୍ତମଭିତୋ ଵିଶିଷ୍ଟକରୁଣେ ।
ଇମଂ ସ୍ଵଵିଷଯଂ ଶିଵଂ ଗମଯିତୁଂ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୩॥
କ୍ଷଯାଯ ସୁକୃତଦ୍ଵିଷାଂ ଵିହରତାଂ ଶିଵାଯ ଚ ସତାଂ ପ୍ରପଞ୍ଚସୁହୃଦାମ୍ ।
ନିଜସ୍ଯ ମନସୋ ବଲାଯ ଚ ପରେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୪॥
ଜଯତ୍ସୁ ସୁକୃତଂ ଦ୍ଵିଷତ୍ସୁ ପରିତଃ ସତାମପି କୁଲେ ବଲେନ ରହିତେ ।
ଖଲପ୍ରିଯଯୁଗେ କଲୌ ପରିଣତେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୫॥
ଅଭାତି ସୁକୃତେ ନିଗୂଢଵିଭଵେ ଵିଭାତି ଦୁରିତେ ଫଲାନି ଦିଶତି ।
ଵିଧାନଵିକଲେ ମନସ୍ଯଭଯଦେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୬॥
ପଟୌ ପ୍ରତିଭଟେ ଗଦେ ପ୍ରତିଭଯେ ନତାଵନଵିଧାଵତୀଵ ନିପୁଣମ୍ ।
ସୁପର୍ଵଭୁଵନକ୍ଷିତୀଶଦଯିତେ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୭॥
ଅମର୍ତ୍ଯପଟଲୀକିରୀଟମଣିଭାଭୁଜଙ୍ଗକିରଣଂ ନିତାନ୍ତମରୁଣମ୍ ।
ଵିପତ୍ତିଦମନଂ ତମଃ ପ୍ରଶମନଂ ତଵାମ୍ବ ଚରଣଂ ଵ୍ରଜାମି ଶରଣମ୍ ॥ ୬୪୮॥
ଵିନଷ୍ଟଵିଭଵାମିମାଂ ପୁନରପି ଶ୍ରିଯାଵିଲସିତାଂ ଵିଧାତୁମଜରେ ।
ସ୍ଵଜନ୍ମପୃଥିଵୀଂ ସ୍ଵରୀଶଦଯିତେ ଦିଶେର୍ଗଣପତେଃ କରାଯ ପଟୁତାମ୍ ॥ ୬୪୯॥
ସୁପର୍ଵଵସୁଧାଧିନାଥସୁଦୃଶୋ ଜଲୋଦ୍ଧତଗତିସ୍ତଵୋଽଯମନଘଃ ।
କୃତିର୍ଗଣପତେଃ କରୋତୁ ଵିଧୁତିଂ ଭଯସ୍ଯ ଭରତକ୍ଷମାତଲଜୁଷାମ୍ ॥ ୬୫୦॥
॥ ତୃତୀଯଃ ପ୍ରମିତାକ୍ଷରପାଦଃ ॥
ଉଦିତଂ ମହେନ୍ଦ୍ରମହିଲାଵଦନେ ପ୍ରସୃତଂ କରୈର୍ଦିଶି ଦିଶି ପ୍ରଗୁଣୈଃ ।
ଅହିତଂ ତମଃ ପ୍ରଶମଯଦ୍ଯମିନାଂ ହସିତଂ କରୋତୁ ମମ ଭୂରି ଶିଵମ୍ ॥ ୬୫୧॥
ଭରତକ୍ଷିତେସ୍ତିମିରମାଶୁ ହରତ୍ଵରିଚାତୁରୀକୃତଵିମୋହମତେଃ ।
ରଵିଲକ୍ଷତୋଽପ୍ଯଧିକମଂଶୁମତୀ ପଵିପାଣିଚିତ୍ତଦଯିତା ଵନିତା ॥ ୬୫୨॥
ଶଶିଲକ୍ଷଶୀତଲକଟାକ୍ଷସୁଧା ତରୁଣାର୍କକୋଟିରୁଚିପାଦଯୁଗା ।
ହୃଦି ମେ ଵିଭାତୁ ମୁନିଗେଯଗୁଣା ଵିବୁଧେନ୍ଦ୍ରଚିତ୍ତରମଣୀ ତରୁଣୀ ॥ ୬୫୩॥
କମନୀଯଦୀପ୍ତସୁକୁମାରତନୁର୍ମନନୀଯପାଵନପଦାମ୍ବୁରୁହା ।
ଵିଦଧାତୁ ମେ ଶିଵମସଦ୍ଵିମୁଖୀ ଵିବୁଧେନ୍ଦ୍ରଜୀଵିତସଖୀ ସୁମୁଖୀ ॥ ୬୫୪॥
ଅନୁମାନମୂଢପିତୃଵାକ୍ଯଵଶାତ୍ତନଯେନ ଦେଵି ଵିନିକୃତ୍ତଶିରାଃ ।
ତଵ ରେଣୁକା ଵିଲସିତା କଲଯା ଗଣନୀଯଶକ୍ତିରଭଵଦ୍ଦଶସୁ ॥ ୬୫୫॥
ସକଲାମଯପ୍ରଶମନଂ ଦୁରିତକ୍ଷଯକାରିକାଙ୍କ୍ଷିତକରଂ ଚ ଭଵେତ୍ ।
ସୁରସୁନ୍ଦରୀ ଜନସମର୍ଚତଯୋର୍ହୃଦି ରେଣୁକାଚରଣଯୋଃ କରଣମ୍ ॥ ୬୫୬॥
ଵିନିହନ୍ତି ପାପପଟଲଂ ସ୍ମରଣାଦ୍ଵିଧୁନୋତି ରୋଗନିଵହଂ ଭଜନାତ୍ ।
ଵିଦଘାତି ଵାଞ୍ଛିତତଫଲଂ ସ୍ତଵନାନ୍ମନୁଜସ୍ଯ ରାମଜନନୀ ଚରଣମ୍ ॥ ୬୫୭॥
ଶରଣଂ ଵ୍ରଜାମି ନଵରଵ୍ଯରୁଣଂ ଚରଣଂ ତଵାମ୍ବ ନୃପଜାତିରିପୋଃ ।
ଭରତକ୍ଷିତେରଵନତଃ ପ୍ରଥମଂ ମରଣଂ ମମେହ ନ ଭଵତ୍ଵଧମମ୍ ॥ ୬୫୮॥
ସ୍ମରଣଂ ଚିରାଦଵିରତଂ ଵିଦଧଚ୍ଚରଣସ୍ଯ ତେ ତରୁଣଭାନୁରୁଚଃ ।
ଅଯମସ୍ତୁ ରାମଜନଯିତ୍ରିପଟୁଃ ସୁରକାର୍ଯମାର୍ଯଵିନୁତେ ଚରିତୁମ୍ ॥ ୬୫୯॥
ଅଵ ଭାରତକ୍ଷିତିମମୋଘଦଯେ କରଣଂ ଭଵତ୍ଵିହ ତଵୈଷ ଜନଃ ।
ନିଜଯୋଃ ସଵିତ୍ରି ଚରଣାମ୍ବୁଜଯୋର୍ନ ଵିହାତୁମର୍ହସି ଚିରାଦ୍ଭଜକମ୍ ॥ ୬୬୦॥
ଅଵିଶସ୍ତ୍ଵମିନ୍ଦ୍ରଦଯିତେ କିଲତାମପି ଯଜ୍ଞସେନତନଯାଂ କଲଯା ।
ଅନଘଵ୍ରତାସୁ କଵଯଃ ପ୍ରଥମାଂ ପ୍ରଵଦନ୍ତି ଯାଂ ବହୁଲଵନ୍ଦ୍ଯଗୁଣାମ୍ ॥ ୬୬୧॥
ଭୁଵି ଭାରତଂ ପଠତି ଯଃ ସୁକୃତୀ କଲୁଷଂ ଧୁନୋତି ସକଲଂ କିଲ ସଃ ।
ଇଯମମ୍ବ ଶକ୍ତିକୁଲରାଜ୍ଞି ତଵ ଦ୍ରୁପଦସ୍ଯ ନନ୍ଦିନି କଥାମହିମା ॥ ୬୬୨॥
ଅଭିମନ୍ଯୁମାତରମନଲ୍ପଗୁଣାମତିଲଙ୍ଘ୍ଯ ଚୈକ୍ଷତ ହରିର୍ଭଵତୀମ୍ ।
ଅତିସୌହୃଦେନ ଯଦିହାର୍ଯନୁତେ ତଵ ହେତୁରୀଡ୍ଯତମଶକ୍ତିକଲା ॥ ୬୬୩॥
ଗୃହକାର୍ଯତନ୍ତ୍ରଚତୁରା ଗୃହୀଣୀ ସକଲୀନ୍ଦ୍ରିଯାମୃତଝରୀ ରମଣୀ ।
ଵରନୀତିମାର୍ଗକଥନେ ସଚିଵୋଽପ୍ଯଭଵସ୍ତ୍ଵମମ୍ବ କୁରୁ ଵଂଶଭୃତାମ୍ ॥ ୬୬୪॥
ନ ଯୁଧିଷ୍ଠିରସ୍ଯ ଵରଘୋରତପୋ ନ ଧନଞ୍ଜଯସ୍ଯ ପଟୁ ବାହୁବଲମ୍ ।
ଅରିସଙ୍କ୍ଷଯଂ କୃତଵତୀ ବହୁଲଂ ତଵ ଵେଣିକାଽପଚରିତା ଫଣିନୀ ॥ ୬୬୫॥
ଅସିତାପି କାନ୍ତିଵସତିର୍ମହତୀ ଵନିତାଜନସ୍ଯ ଚ ଵିମୋହକରୀ ।
କୁଶଲଂ ମମାଭ୍ରପତିଶକ୍ତିକଲା ଦ୍ରୁପଦକ୍ଷିତୀନ୍ଦ୍ରଦୁହିତା ଦିଶତୁ ॥ ୬୬୬॥
ଶିରସା ସମସ୍ତଜନପାପଭରଂ ଵହତୋ ଭଵାଯ ଭୁଵି ଯାମଵୃଣୋତ୍ ।
ଅମରାଧିପଃ ପତିତପାଵନି ତାଂ ଭୁଵି କନ୍ଯକାଂ ତଵ ଵିଵେଶ କଲା ॥ ୬୬୭॥
କଲଯା ତଵାତିବଲଯା କଲିତା ପୁରୁଷସ୍ଯ ଯୋଗମଖିଲାମ୍ବ ଵିନା ।
ଅଖିଲେଶ୍ଵରପ୍ରହିତତେଜ ଇଯଂ ସୁତଜନ୍ମନେ କିଲ ଦଧାଵନଘା ॥ ୬୬୮॥
ସୁରରକ୍ଷକସ୍ଯ ମଦଯିତ୍ରି ଦୃଶାଂ ନରରକ୍ଷକସ୍ଯ ଜନଯିତ୍ରି ପରେ ।
କୁଲରକ୍ଷଣାଯ କୃତବୁଦ୍ଧିମିମଂ କୁରୁ ଦକ୍ଷମଦ୍ଭୁତପଵିତ୍ରକଥେ ॥ ୬୬୯॥
ମୁମୁଚୁଃ କୁଲେ ମମ ସୁପର୍ଵପତେସ୍ତଵ ଚାଭିଧେଯମିହ ମନ୍ଦଧିଯଃ ।
ଅପରାଧମେତମତିଘୋରତରଂ ଜନନି କ୍ଷମସ୍ଵ ମମ ଵୀକ୍ଷ୍ଯ ମୁଖମ୍ ॥ ୬୭୦॥
ଇହ ଶାରଦେତି ଯତିଭିର୍ଵିନୁତା ପ୍ରଥିତା ସୁରେଶ୍ଵରମନୋଦଯିତା ।
ଭୁଵି ଭାତି କୀର୍ତିଵପୁଷା ଶଚି ଯା ସୁକଥାପି ସା ତଵ ସଵିତ୍ରି କଲା ॥ ୬୭୧॥
ଅରୁଣାଚଲେଶ୍ଵରଦରୀଵସତେସ୍ତପତୋ ମୁନେର୍ଗଣପତେଃ କୁଶଲମ୍ ।
ଵିଵିଧାଵତାରଵିଲସଚ୍ଚରିତା ଵିତନୋତୁ ସା ଵିବୁଧରାଡ୍ଵନିତା ॥ ୬୭୨॥
ଅରୁଣାଚଲସ୍ଯ ଵରକନ୍ଦରଯା ପ୍ରତିଘୋଷିତଂ କଲୁଷହାରି ଯଶଃ ।
ଵିବୁଧାଧିନାଥରମଣୀ ଶୃଣୁଯାଦ୍ଗଣନାଥଗୀତମତିଚାରୁନିଜମ୍ ॥ ୬୭୩॥
ଭରତକ୍ଷିତେଃ ଶୁଭଵିଧାଯିଷୁ ସା ଵିବୁଧକ୍ଷିତୀଶଦଯିତା ଦଯଯା ।
ଧନଶକ୍ତିବନ୍ଧୁବଲହୀନମପି ପ୍ରଥମଂ କରୋତୁ ଗଣନାଥମୁନିମ୍ ॥ ୬୭୪॥
ମୁଦିତାମିମା ଵିଦଧତୁ ପ୍ରମଦାଂ ତ୍ରିଦିଵାଧିପସ୍ଯ ନିପୁଣଶ୍ରଵଣାମ୍ ।
ଅମିତପ୍ରକାଶଗୁଣଶକ୍ତିମଜାଂ ପ୍ରମିତାକ୍ଷରାଃ ସୁକଵିଭୂମିପତେଃ ॥ ୬୭୫॥
॥ ଚତୁର୍ଥସ୍ତାମରସପାଦଃ ॥
ଦିଶତୁ ଶିଵଂ ମମ ଚନ୍ଦ୍ରଵଲକ୍ଷସ୍ତିମିରସମୂହନିଵାରଣଦକ୍ଷଃ ।
କୃତଗତିରୋଧକପାତକନାଶଃ ସୁରଧରଣୀଶଵଧୂସ୍ମିତଲେଶଃ ॥ ୬୭୬॥
ଅଵିଦିତମାର୍ଗତଯାତିଵିଷଣ୍ଣାଂ ଗତିମପହାଯ ଚିରାଯ ନିଷଣ୍ଣାମ୍ ।
ଭରତଧରାମନିମେଷଧରତ୍ରୀ ପତିଗୃହିଣୀ ପରିପାତୁ ସଵିତ୍ରୀ ॥ ୬୭୭॥
ଭୁଵନମିଦଂ ଭଵତଃ କିଲ ପୂର୍ଵଂ ଯଦମଲରୂପମନାକୃତିସର୍ଵମ୍ ।
ପ୍ରକୃତିରିଯଂ କୁରୁତାଦଦରିଦ୍ରାମତିମତିଶାତତରାଂ ମମ ଭଦ୍ରା ॥ ୬୭୮॥
ସୃଜତି ଜଗନ୍ତି ଵିଭୌ ପରମେ ଯା ସୁବହୁଲଶକ୍ତିରରାଜତ ମାଯା ।
ପ୍ରଦିଶତୁ ସା ମମ କଞ୍ଚନ ଯୋଗଂ ଝଟିତି ନିରାକୃତମାନସରୋଗମ୍ ॥ ୬୭୯॥
ପ୍ରତିଵିଷଯଂ ଵିକୃତୀତର ସତ୍ତା ଵିଲସତି ଯା ମତିମଦ୍ଭିରୁପାତ୍ତା ।
ଇଯମନଘା ପରିପାଲିତଜାତିଂ ଵିତରତୁ ମେ ଵିଵିଧାଂ ଚ ଵିଭୂତିମ୍ ॥ ୬୮୦॥
ପ୍ରତିଵିଷଯଗ୍ରହଣଂ ପରିପୂତାମତିରଖିଲସ୍ଯ ଜନସ୍ଯ ଚ ମାତା ।
ମମ ଵିଦଧାତୁ ଶୁଭଂ ଶୁଭନାମା ତ୍ରିଦିଵନିଵାସିନରେଶ୍ଵରରାମା ॥ ୬୮୧॥
ଗଗନତନୁର୍ଜଗତୋ ଵିପୁଲସ୍ଯ ପ୍ରଭୁପଦମଗ୍ରଯ୍ମିତା ସକଲସ୍ଯ ।
ପ୍ରତିଜନଦେହମଜା ପ୍ରଵହନ୍ତୀ ମମ ହୃଦି ନନ୍ଦତୁ ସା ଵିହରନ୍ତୀ ॥ ୬୮୨॥
ପଟୁକୁଲକୁଣ୍ଡଧନଞ୍ଜଯକୀଲା ସମୁଦିତହାର୍ଦଵିଭାକରଲୀଲା ।
ଦ୍ରୁତଶିର ଇନ୍ଦୁକଲାମୃତଧାରା ଜନମଵତାନ୍ନିଜଭକ୍ତମୁଦାରା ॥ ୬୮୩॥
ଵିଷଯସମାକୃତିରତ୍ର ପୁରସ୍ତାଦ୍ଵିମଲତମା କିଲ ତତ୍ର ପରସ୍ତାତ୍ ।
ଭୁଵନମଯୀ ଭୁଵନାଚ୍ଚ ଵିଭକ୍ତାମତିରନଘାଽଵତୁ ମାମତିଶକ୍ତା ॥ ୬୮୪॥
ଵିଷଯପରିଗ୍ରହଣେଷ୍ଵତିସକ୍ତା ଵିଷଯଵିଭୂତିଷୁ କାପି ଵିଵିକ୍ତା ।
ଅଖିଲପତେର୍ମଯି ଦୀଵ୍ଯତୁ ଶକ୍ତିର୍ଵିମଲତମା ଵିଧୁତେତରଶକ୍ତିଃ ॥ ୬୮୫॥
ଦୃଶି ଦୃଶି ଭାତି ଯଦୀଯମପାପଂ ଦିଶି ଦିଶି ଗନ୍ତୃ ଚ ଵେତ୍ତୃ ଚ ରୂପମ୍ ।
ଭଵତୁ ଶିଵାଯ ମମେଯମନିନ୍ଦ୍ଯା ଭୁଵନପତେର୍ଗୃହିଣୀ ମୁନିଵନ୍ଦ୍ଯା ॥ ୬୮୬॥
ଜଡକୁଲକୁଣ୍ଡଦରୀଷୁ ଶଯାନା ବୁଧକୁଲଵହ୍ନିଷୁ ଭୂରିଵିଭାନା ।
ହରିହଯଶକ୍ତିରମେଯଚରିତ୍ର ମମ କୁଶଲଂ ଵିଦଧାତୁ ପଵିତ୍ର ॥ ୬୮୭॥
ଦହରଗତାଖିଲମାକଲଯନ୍ତୀ ଦ୍ଵିଦଲଗତା ସକଲଂ ଵିନଯନ୍ତୀ ।
ଦଶଶତପତ୍ରଗତା ମଦଯନ୍ତୀ ଭଵତୁ ମଯୀନ୍ଦ୍ରଵଧୂର୍ଵିଲସନ୍ତୀ ॥ ୬୮୮॥
ଗୃହଯୁଗଲୀଶ୍ରିଯ ଆଶ୍ରିତଗମ୍ଯା ପଦକମଲଦ୍ଵିତଯୀ ବହୁରମ୍ଯା ।
ମମ ହୃଦି ଭାତ୍ଵଵିକୁଣ୍ଠିତଯାନା ହରିସୁଦୃଶସ୍ତରୁଣାରୁଣଭାନା ॥ ୬୮୯॥
ଉପରି ତତା କୁଲକୁଣ୍ଡନିଶାନ୍ତାଜ୍ଜ୍ଵଲିତଧନଞ୍ଜଯଦୀଧିତିକାନ୍ତାତ୍ ।
ହରିହଯଶକ୍ତିରିଯଂ ମମ ପୁଷ୍ଟା ଦ୍ରଵଯତୁ ମସ୍ତକଚନ୍ଦ୍ରମଦୁଷ୍ଟା ॥ ୬୯୦॥
ନଭସି ଵିରାଜତି ଯା ପରଶକ୍ତିର୍ମମ ହୃଦି ରାଜତି ଯା ଵରଶକ୍ତିଃ ।
ଉଭଯମିଦଂ ମିଲିତଂ ବହୁଵୀର୍ଯଂ ଭଵତୁ ସୁଖଂ ମମ ସାଧିତକାର୍ଯମ୍ ॥ ୬୯୧॥
ତ୍ରିଭୁଵନଭୂମିପତେଃ ପ୍ରିଯଯୋଷା ତ୍ରିମଲହରୀ ସୁରଵିଷ୍ଟପଭୂଷା ।
ମମ ଵିତନୋତୁ ମନୋରଥପୋଷଂ ଦୁରିତଵିପତ୍ତିତତେରପି ଶୋଷମ୍ ॥ ୬୯୨॥
ପଵନଜଗତ୍ପ୍ରଭୁପାଵନମୂର୍ତିର୍ଜଲଧରଚାଲନଵିଶ୍ରୁତକୀର୍ତିଃ ।
ମମ କୁଶଲାଯ ଭଵତ୍ଵରିଭୀମା ଜନନଵତାଂ ଜନନୀ ବହୁଧାମା ॥ ୬୯୩॥
ମମ ସୁରରାଜଵଧୂକଲଯୋଗ୍ରା ଖଲଜନଧୂନନଶକ୍ତନଖାଗ୍ରା ।
ଦମଯତୁ କୃତ୍ତଶିରାଃ କଲୁଷାଣି ପ୍ରକଟବଲା ହୃଦଯସ୍ଯ ଵିଷାଣି ॥ ୬୯୪॥
କୁଲିଶିଵଧୂକଲଯା ପରିପୁଷ୍ଟା ବୁଧନୁତସନ୍ନୁଣଜାଲଵିଶିଷ୍ଟା ।
ମମ ପରିତୋ ଵିଲସଦ୍ଵିଭଵାନି ଦ୍ରୁପଦସୁତା ଵିଦଧାତୁ ଶିଵାନି ॥ ୬୯୫॥
ସୁରଜନରାଡ୍ଦଯିତାଂଶଵିଦୀପ୍ତେ ପଦକମଲାଶ୍ରିତସାଧୁଜନାପ୍ତେ ।
ଦୁରିତଵଶାଦଭିତୋ ଗତଭାସଂ ମନୁଜକୁମାରଜନନ୍ଯଵଦାସମ୍ ॥ ୬୯୬॥
ଅମରନରେଶ୍ଵରମନ୍ଦିରନେତ୍ରୀ ସୁମଶରଜୀଵନସୁନ୍ଦରଗାତ୍ରୀ ।
ଭଵତୁ ଶଚୀ ଵିତତସ୍ଵଯଶସ୍ସୁ ପ୍ରତିଫଲିତା ଗଣନାଥଵଚସ୍ସୁ ॥ ୬୯୭॥
ଵିକସତୁ ମେ ହୃଦଯଂ ଜଲଜାତଂ ଵିଲସତୁ ତତ୍ର ଶଚୀସ୍ତୁତିଗୀତମ୍ ।
ସ୍ଫୁରତୁ ସମସ୍ତମିହେପ୍ସିତଵସ୍ତୁ ପ୍ରଥିତତମଂ ମମ ପାଟଵମସ୍ତୁ ॥ ୬୯୮॥
କୁରୁ କରୁଣାରସସିକ୍ତନିରୀକ୍ଷେ ଵଚନପଥାତିଗସନ୍ନୁଣଲକ୍ଷେ ।
ଶଚି ନରସିଂହଜମାହିତଗୀତଂ ଭରତଧରାମଵିତୁଂ ପଟୁମେତମ୍ ॥ ୬୯୯॥
ସୁଲଲିତତାମରସୈଃ ପ୍ରସମାପ୍ତଂ ଵରନୁତିବନ୍ଧମିମଂ ଶ୍ରଵଣାପ୍ତମ୍ ।
ଜନନି ନିଶମ୍ଯ ସୁସିଦ୍ଧମଶେଷଂ ହରିଲଲନେ ମମ କୁର୍ଵଭିଲାଷମ୍ ॥ ୭୦୦॥
॥ ଇତି ଶ୍ରୀଭଗଵନ୍ମହର୍ଷିରମଣାନ୍ତେଵାସିନୋ ଵାସିଷ୍ଠସ୍ଯ ନରସିଂହସୂନୋଃ
ଗଣପତେଃ କୃତୌ ଇନ୍ଦ୍ରାଣୀସପ୍ତଶତୀ ସମାପ୍ତା ॥
Complete Works of Ganapati Muni Vol 02-14
Proofread byDPD
Please send corrections to sanskrit@cheerful.com
Last updated ତ୍oday
http://sanskritdocuments.org
Indrani Saptashati Lyrics in Oriya PDF
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website