{॥ ఇన్ద్రాణీసప్తశతీ ॥}
॥ ప్రథమం గాయత్రం శతకమ్ ॥
॥ ప్రథమః శశివదనాపాదః ॥
హరిలలనే మే పథి తిమిరాణి ।
హరదరహాసద్యుతిభిరిమాని ॥ ౧॥

అగతిమవీర్యామపగతధైర్యామ్ ।
అవతు శచీ మే జనిభువమార్యామ్ ॥ ౨॥

శృణు కరుణావత్యలఘుమఖర్వే ।
స్తవమహమార్యస్తవ శచి కుర్వే ॥ ౩॥

త్రిజగదతీతో విలసతి నిత్యః ।
అణురణుతో యో భగవతి సత్యః ॥ ౪॥

త్వమఖిలకార్యేష్వయి ధృతసక్తిః ।
ఉరుగతిరస్య ప్రభుతమశక్తిః ॥ ౫॥

విదురిమమేకే జగతి మహేన్ద్రమ్ ।
జగురయి కేచిజ్జనని మహేశమ్ ॥ ౬॥

అవగతవేదో వదతి మహేన్ద్రమ్ ।
పరిచితతన్త్రో భణతి మహేశమ్ ॥ ౭॥

జనని శచి త్వం ప్రథమదలస్య ।
భగవతి దుర్గాస్యపరదలస్య ॥ ౮॥

న శచి శివాతస్త్వమితరదైవమ్ ।
బహుమునివాణీసమరసతైవమ్ ॥ ౯॥

దివి చ సితాద్రౌ శచివపుషోర్వామ్ ।
పృథగుపలమ్భాదయి భిదయోక్తిః ॥ ౧౦॥

తనుయుగమూలం వపురతిమాయమ్ ।
కరచరణాద్యైర్వియుతమమేయమ్ ॥ ౧౧॥

త్వముదరవర్తిత్రిభువనజీవా ।
భవసి శచీ సా జనని శివా వా ॥ ౧౨॥

విభుశుచికీలాతతిరయి ధూమమ్ ।
త్వమమరమార్గం బత వమసీమమ్ ॥ ౧౩॥

జయసి నభస్థో జనని పరస్తాత్ ।
నభసి చ భాన్తీ భవసి పురస్తాత్ ॥ ౧౪॥

త్వమతనురమ్బ జ్వలసి పరస్తాత్ ।
ఇహ ఖశరీరా లససి పురస్తాత్ ॥ ౧౫॥

జనని పరస్తాన్మతిరసి భర్తుః ।
అసి ఖశరీరా పృథగవగన్త్రీ ॥ ౧౬॥

అణుచయరూపం భగవతి శాన్తమ్ ।
న భవతి శూన్యం తదిదమనన్తమ్ ॥ ౧౭॥

దివి దధతీశే పురుషశరీరమ్ ।
జనని పురన్ధ్రీ తనురభవస్త్వమ్ ॥ ౧౮॥

దృశి విలసన్తం ప్రభుముపయాన్తీ ।
భవసి విరాట్ త్వం నృతనుషు భాన్తీ ॥ ౧౯॥

తవ గుణగానం జనని విధాతుమ్ ।
భవతి పటుః కో వియదివ మాతుమ్ ॥ ౨౦॥

భగవతి తృప్తిర్భవతు న వా తే ।
అభిలషితాప్తిర్భవతు న వా మే ॥ ౨౧॥

భజతి తవాఙ్ఘ్రిం మమ ఖలు భాషా ।
పతి మనురాగాత్ ప్రియమివ యోషా ॥ ౨౨॥

అఘమపహర్తుం శుభమపి కర్తుమ్ ।
అలమజరే తే గుణగణగానమ్ ॥ ౨౩॥

అవసి జగత్త్వం కులిశిభుజస్థా ।
అవ మునిభూమిం గణపతిధీస్థా ॥ ౨౪॥

శశివదనాభిర్గణపతిజాభిః ।
శశివదనాద్యా పరిచరితాఽస్తు ॥ ౨౫॥

॥ ద్వితీయస్తనుమధ్యాపాదః ॥
ధ్వాన్తం పరిహర్తుం తేజాంస్యపి భర్తుమ్ ।
అన్తర్జగదమ్బా హాసం కురుతాన్మే ॥ ౨౬॥

భీతామరిధూతామార్యావనిమేతామ్ ।
సమ్రాజ్ఞి బుధానాం దూనామవ దీనామ్ ॥ ౨౭॥

ఈశస్య సహాయాం విశ్వస్య విధానే ।
ఆకాశశరీరామమ్బాం ప్రణమామః ॥ ౨౮॥

కర్తుర్భువనానాం మాయాసి శచి త్వమ్ ।
సత్యస్య తపోఽసి జ్ఞస్యాసి మనీషా ॥ ౨౯॥

ఆజ్ఞాసి వినేతుస్తేజోఽసి విభాతః ।
నిర్యత్నసమాధేరానన్దరసోఽసి ॥ ౩౦॥

తస్య త్వమనన్యాఽప్యన్యేవ ఖకాయా ।
అత్యద్భుతమాయా జాయాఽసి సహాయా ॥ ౩౧॥

ఆకాశశరీరాం జాయామశరీరః ।
ఆలిఙ్గ్య విభుస్త్వాం నన్దత్యయి చిత్రమ్ ॥ ౩౨॥

వజ్రేశ్వరి ఘస్రే యద్వన్ముకుటేన ।
దీప్తేన సవిత్ర మూర్ధా తవ భాతి ॥ ౩౩॥

నక్షత్రసహస్రైశ్శుభ్రద్యుతిభిస్తే ।
పుష్పాయితమేతైర్మాతర్నిశిమస్తే ॥ ౩౪॥

ఘస్రః ఖలు కాలో రాజ్యం నను కర్తుమ్ ।
రాత్రిః ఖలు కాలో రన్తుం రమణేన ॥ ౩౫॥

నిఃశబ్దతరఙ్గాస్వగ్లౌషు నిశాసు ।
నూనం ఖశరీరే కాన్తం రమయన్తీ ॥ ౩౬॥

సాన్ద్రోడుసుమస్రగ్విభ్రాజితకేశా ।
ధ్వాన్తాసితచేలా శాన్తాఽప్యసి భీమా ॥ ౩౭॥

రాజన్మితతారామన్దారవతంసామ్ ।
మాతస్సితభాసా స్మేరాం హసితేన ॥ ౩౮॥

జ్యోత్స్నా ఘనసారద్రావైరనులిప్తామ్ ।
త్వాం వీక్ష్య న శాన్తిః కస్య క్షణదాసు ॥ ౩౯॥

బాలారుణరోచిః కాశ్మీరరజోభిః ।
ఆలిప్తముఖీం త్వాం ప్రాతః ప్రణమామి ॥ ౪౦॥

సాయం సమయశ్రీ లాక్షారసరక్తమ్ ।
ప్రత్యక్ ప్రసృతం తే వన్దే వరదేఽఙ్ఘ్రిమ్ ॥ ౪౧॥

దీప్తార్కకిరీటాం సర్వాన్ వినయన్తీమ్ ।
వన్దే భువనానాం రాజ్ఞీమసమానామ్ ॥ ౪౨॥

ధూతాఖిలరోగాః శ్వాసాస్తవ వాతాః ।
మాతర్వితరన్తు ప్రాణస్య బలం నః ॥ ౪౩॥

ప్రాఞ్చస్తవ వాతాః స్వాసాః శముశన్తు ।
ప్రత్యఞ్చ ఏమే నః పాపం శమయన్తు ॥ ౪౪॥

మన్మాతరవాఞ్చో వీర్యం వితరన్తు ।
సన్తాపముదఞ్చః సర్వం చ హరన్తు ॥ ౪౫॥

అస్యా ఇవ భూమేర్భూతప్రసవాయాః ।
ఏకైకశ ఆహుర్యేషాం మహిమానమ్ ॥ ౪౬॥

అద్రేరుపలానాం నద్యాః సికతానామ్ ।
యేషాం చ న కధ్చ్ఛిక్తో గణనాయామ్ ॥ ౪౭॥

రోమాయితమేతైర్గోలైస్తవ కాయే ।
వ్యాఖ్యాతమనేన శ్లాఘ్యం తవ భాగ్యమ్ ॥ ౪౮॥

విశ్వం వహసీదం జమ్భారిభుజస్థా ।
ఆర్యాన్వహమాతర్వాసిష్ఠమతిస్థా ॥ ౪౯॥

ఆద్యాం భువనానాం భర్తుస్తనుమధ్యామ్ ।
భక్త్స్య భజన్తామేతాస్తనుమధ్యాః ॥ ౫౦॥

॥ తృతీయో ముకులపాదః ॥
హాసాః శక్రగృహేశ్వర్యాశ్చన్ద్రరుచః ।
భూయాసుర్విమలప్రజ్ఞాయై హృది మే ॥ ౫౧॥

ఇన్ద్రాణ్యాః కరుణా లోకాశ్శోకహృతః ।
భూయాసుర్భరతక్ష్మాయై క్షేమకృతః ॥ ౫౨॥

వ్యక్తిర్వ్యోమతనుః శక్తిత్వాద్వనితా ।
జ్ఞాతృత్వాత్పురుషః కేషాఞ్చిద్విదుషామ్ ॥ ౫౩॥

వ్యక్తిం వ్యోమతనుం యే ప్రాహుః పురుషమ్ ।
తేషాం తత్త్వవిదాం కల్పస్స్యాత్ త్రివిధః ॥ ౫౪॥

రుద్రం కేఽపి జగుః శక్రం కేఽపి విదుః ।
భాషన్తే భువనప్రాణం కేఽపి విదః ॥ ౫౫॥

వ్యక్తిం వ్యోమతనుం ప్రాహుర్యే వనితామ్ ।
తేషాం చ త్రివిధః కల్పశ్శాస్త్రవిదామ్ ॥ ౫౬॥

దుర్గా సూరివరైః కైశ్చిత్సా గదితా ।
శచ్యన్యైర్విబుధైర్జ్ఞైరన్యైరదితిః ॥ ౫౭॥

ఏకేషాం విదుషాం వ్యక్తిర్వ్యోమతనుః ।
న స్త్రీ నో పురుషో బ్రహ్మైతత్సగుణమ్ ॥ ౫౮॥

త్వం విశ్వస్య మహాన్ ప్రాణః కః పరమే ।
త్వం రుద్రః ప్రణవస్త్వం శక్రోఽభ్రశిఖీ ॥ ౫౯॥

త్వం కస్యాస్యదితిస్త్వం రుద్రస్య శివా ।
త్వం శక్రస్య శచీ శక్తిర్దేవనుతే ॥ ౬౦॥

ప్రాణశ్చ ప్రణవో జ్యోతిశ్చామ్బరగమ్ ।
వస్త్వేకం త్రిగుణం నో వస్తు త్రితయమ్ ॥ ౬౧॥

శక్తేరమ్బపరే శక్త్స్యాపి భిదా ।
జ్వాలా పావకవద్భాషా భేదకృతా ॥ ౬౨॥

సర్వం దృశ్యమిదం భుఞ్జానే పరమే ।
పుంనామస్తుతయో యుజ్యన్తే ఖలు తే ॥ ౬౩॥

కుర్వాణేమ్బసతస్సన్తోషం సతతమ్ ।
స్త్రీనామస్తుతయః శోభాం తే దధతే ॥ ౬౪॥

సద్బ్రహ్మ బ్రువతే విద్వాంసో విగుణమ్ ।
త్వం మాతస్సగుణం బ్రహ్మాసి ప్రథితే ॥ ౬౫॥

శబ్దాద్యైర్వియుతం సద్బ్రహ్మామలినమ్ ।
శబ్దాద్యైః సహితా త్వం దేవ్యచ్ఛహితా ॥ ౬౬॥

సాక్షి బ్రహ్మ పరం త్వం మాతః కురుషే ।
సర్వేషాం జగతాం కార్యం సర్వవిధమ్ ॥ ౬౭॥

ద్యౌర్మాతా జగతో ద్యౌరేవాస్య పితా ।
వ్యాప్తం భాతి జగద్ద్యావా సర్వమిదమ్ ॥ ౬౮॥

ఆకాశాద్రజసో ద్యౌరన్యా విరజాః ।
ఆకాశేఽస్తి పునస్తత్పారే చ పరా ॥ ౬౯॥

ద్యావం తాం జగతో రఙ్గే వ్యోమతనుమ్ ।
పారే శుద్ధతమాం విద్మస్త్వాం పరమే ॥ ౭౦॥

త్వాం పూర్ణామదితిం శక్తిం దేవి శచీమ్ ।
నిత్యం శబ్దవతీం గౌరీం ప్రబ్రువతే ॥ ౭౧॥

పుంనామా భవతు స్త్రీనామాస్త్వథవా ।
వ్యక్తిర్వ్యోమతనుర్లోకం పాత్యఖిలమ్ ॥ ౭౨॥

నాకే సా కిల భాత్యైన్ద్రీ రాజ్యరమా ।
విభ్రాణా లలితం స్త్రీరూపం పరమా ॥ ౭౩॥

శక్తాం దేవి విధేహ్యార్తానామవనే ।
ఇన్ద్రస్యేవ భుజాం వాసిష్ఠస్య మతిమ్ ॥ ౭౪॥

పూజాశక్రతరుణ్యైతైస్సిధ్యతు తే ।
గాతృణాం వరదే గాయత్రౌర్ముకులైః ॥ ౭౫॥

॥ చతుర్థో వసుమతీపాదః ॥
మోహం పరిహరన్ యోగం వితనుతామ్ ।
దేవేన్ద్రదయితా హాసో మమ హృది ॥ ౭౬॥

ఆభాతు కరుణా సా భారతభువి ।
సుత్రామసుదృశో యద్వన్నిజదివి ॥ ౭౭॥

వన్దారుజనతామన్దారలతికామ్ ।
వన్దే హరిహయప్రాణప్రియతమామ్ ॥ ౭౮॥

శోకస్య దమనీం లోకస్య జననీమ్ ।
గాయామి లలితాం శక్రస్య దయితామ్ ॥ ౭౯॥

రమ్యా సుమనసాం భూపస్య మహిషీ ।
సౌమ్యా జనిమతాం మాతా విజయతే ॥ ౮౦॥

వీర్యస్య చ ధియస్త్రైలోక్యభరణే ।
దాత్రీ మఘవతే దేవీ విజయతే ॥ ౮౧॥

వ్యాప్తా జగదిదం గుప్తా హృది నృణామ్ ।
ఆప్తా సుకృతినాం దైవం మమ శచీ ॥ ౮౨॥

ఖే శక్తిరతులా పారే చిదమలా ।
స్వశ్చారుమహిలా దైవం మమ శచీ ॥ ౮౩॥

శస్త్రం మఘవతః శాస్త్రం యమవతామ్ ।
వస్త్రం త్రిజగతో దైవం మమ శచీ ॥ ౮౪॥

యుక్త్స్య భజతః శర్మాన్తరతులమ్ ।
వర్మాపి చ బహిర్దైవం మమ శచీ ॥ ౮౫॥

వీర్యం బలవతాం బుద్ధిర్మతిమతామ్ ।
తేజో ద్యుతిమతాం దైవం మమ శచీ ॥ ౮౬॥

ఏకైవ జనయన్త్యేకైవ దధతీ ।
ఏకైవ లయకృద్దైవం మమ శచీ ॥ ౮౭॥

శక్తీరవితథాః క్షేత్రోషు దధతీ ।
బీజేషు చ పరా దైవం మమ శచీ ॥ ౮౮॥

చిన్వన్త్యపి పచన్త్యేకా పశుగణమ్ ।
ఖాదన్త్యపి భవే దైవం మమ శచీ ॥ ౮౯॥

దృష్టౌ ధృతచితిర్దృశ్యే తతగుణా ।
విశ్వాత్మమహిషీ దైవం మమ శచీ ॥ ౯౦॥

రాకాశశిముఖీ రాజీవనయనా ।
స్వః కాపి లలనా దైవం మమ శచీ ॥ ౯౧॥

స్థాణావపి చరే సర్వత్ర వితతా ।
సాక్షాద్భవతు మే స్వర్నాథదయితా ॥ ౯౨॥

యన్మాతరనృతం ధ్యాతం చ గదితమ్ ।
జుష్టం చ హర మే తద్దేవి దురితమ్ ॥ ౯౩॥

మాం మోచయ ఋణాదిన్ద్రాణి సుభుజే ।
మామల్పమతయో మా నిన్దిషురజే ॥ ౯౪॥

శత్రుశ్చ శచి మే సఖ్యాయ యతతామ్ ।
దృప్తశ్చ ఇమనుజో మామమ్బ భజతామ్ ॥ ౯౫॥

కష్టం శచి విధూయేష్టం విదధతీ ।
ఆనన్దయ జనం ప్రేయాంసమయి మే ॥ ౯౬॥

అస్త్రం మమ భవ ధ్వంసాయ రటతామ్ ।
సుత్రామరమణి శ్రీమాతరసతామ్ ॥ ౯౭॥

సమ్పూరయతు మే సర్వం సురనుతా ।
స్వర్గక్షితిపతేశ్శుద్ధాన్తవనితా ॥ ౯౮॥

సంవర్ధయ శచి స్వం దేశమవితుమ్ ।
బాహోరివ హరేర్బుద్ధేర్మమ బలమ్ ॥ ౯౯॥

ఏతైర్వసుమతీవృత్తైర్నవసుమైః ।
భూయాచ్చరణయోః పూజా జనని తే ॥ ౧౦౦॥

॥ ప్రథమం గాయత్రం శతకం సమాప్తమ్ ॥

॥ అథ ద్వితీయమౌష్ణిహం శతకమ్ ॥
॥ ప్రథమః కుమారలలితాపాదః ॥
సురేశ్వరమహిష్యాః స్మితం శశిసితం మే ।
తనోతు మతిమచ్ఛాం కరోతు బలమగ్రయ్మ్ ॥ ౧౦౧॥

విధాయ రిపుధూతిం నిధాయ సుదశాయామ్ ।
పులోమతనుజాతా ధినోతు భరతక్ష్మామ్ ॥ ౧౦౨॥

పదప్రణతరక్షా విధానధృతదీక్షా ।
జగద్భరణదక్షా పరా జయతి శక్తిః ॥ ౧౦౩॥

స్వరత్యవిరతం సా శనైర్నభసి రఙ్గే ।
జ్వలత్యధికసూక్ష్మం జగత్ప్రభవశక్తిః ॥ ౧౦౪॥

మహస్తవ సుసూక్ష్మం నిదానమఖిలానామ్ ।
భవత్యఖిలమాతర్జగత్యనుభవానామ్ ॥ ౧౦౫॥

జనన్యనుభవానాం మతిత్వపరిణామే ।
స్వరో భవతి మూలం తవాభ్రహయరామే ॥ ౧౦౬॥

య ఈశ్వరి నిదానం సమస్తమతిభానే ।
స్వరో గతివిశేషాత్స ఏవ ఖలు కాలః ॥ ౧౦౭॥

జ్వలన్త్యభిహితా త్వం విహాయసి విశాలే ।
ప్రచణ్డపదపూర్వా ప్రపఞ్చకరిచణ్డీ ॥ ౧౦౮॥

స్వరన్త్యఖిలబుద్ధిప్రదా భవసి గౌరీ ।
త్రికాలతనురమ్బ స్మృతా త్వమిహ కాలీ ॥ ౧౦౯॥

మహస్స్వర ఇతీదం ద్వయం తదతిసూక్ష్మమ్ ।
మహేశ్వరి తవాంశద్వయం పరమముక్తమ్ ॥ ౧౧౦॥

మహోఽతిశయమాప్తం త్వయి త్రిదివగాయామ్ ।
స్వరోఽతిశయమాప్తః సితాద్రినిలయాయామ్ ॥ ౧౧౧॥

దివం నయతి పూర్వా భువం యువతిరన్యా ।
ద్వయోః ప్రకృతిరభ్రం విశాలమతిమాన్యా ॥ ౧౧౨॥

న తే దివి లసన్త్యాః పితా తనుభృదన్యః ।
స్వయం భువమిమాం త్వాం సతామవని విద్మః ॥ ౧౧౩॥

సురారికులజన్మా తవేశ్వరి పులోమా ।
పితేతి కవిభాషా పరోక్షగతిరేషా ॥ ౧౧౪॥

వదన్త్యసురశబ్దైర్ఘనం సజలమేతమ్ ।
పులోమపదమేకం పురాణసతితేషు ॥ ౧౧౫॥

ప్రకృష్టతరదీప్తిర్గభీరతరనాదా ।
ఇతో హి భవసి త్వం తటిత్తనురమేయే ॥ ౧౧౬॥

అరాతిరసురోఽయం విభోర్నిగదితస్తే ।
హయశ్చ బతగీతః పితా తవ పయోదః ॥ ౧౧౭॥

ప్రియైః కిల పరే వాం పరోక్షవచనౌఘైః ।
ప్రతారితమివేలా జగన్మునిగణేన ॥ ౧౧౮॥

నికృష్టమపి రమ్యం యది త్రిదివలోకే ।
తవామ్బ కిము వాచ్యా రుచిస్త్రిదివనాథే ॥ ౧౧౯॥

త్వమమ్బ రమణీయా వధూస్త్వమివ నాకే ।
త్వయా క ఇవ తుల్యాం మృదో వదతు లోకే ॥ ౧౨౦॥

వినీలమివ ఖాంశం విదుస్త్రిదివమేకే ।
పరస్తు వదసి స్వః కవిః కమలబన్ధుమ్ ॥ ౧౨౧॥

అముత్రగతశోకే మహామహసి నాకే ।
నమామ్యధికృతాం తాం పురాణకులకాన్తామ్ ॥ ౧౨౨॥

యదా మముతపక్వం మదీయమఘముగ్రమ్ ।
తదిన్ద్రకులకాన్తే నివారయ సమగ్రమ్ ॥ ౧౨౩॥

దదాతు భరతక్ష్మావిషాదహరణాయ ।
అలం బలముదారా జయన్తజననీ మే ॥ ౧౨౪॥

అతీవ లలితాభిః కుమారలలితాభిః ।
ఇమాభిరమరేశప్రియా భజతు మోదమ్ ॥ ౧౨౫॥

॥ ద్వితీయో మదలేఖాపాదః ॥
పౌలోమ్యాః పరిశుభ్రజ్యోత్స్నాదృశ్యరుచో మే ।
శ్రీమన్తో దరహాసాః కల్పన్తాం కుశలాయ ॥ ౧౨౬॥

కారుణ్యామృతసిక్తా శక్తా శక్రమహిష్యాః ।
ప్రేక్షా భారతభూమేర్దౌర్బల్యం విధునోతు ॥ ౧౨౭॥

వన్దే నిర్జరరాజ్ఞీం సఙ్క్ల్పే సతి యస్యాః ।
సాధ్యాసాధ్యవిచారో నైవ స్యాదణుకోఽపి ॥ ౧౨౮॥

సఙ్క్ల్పస్తవ కశ్చ్చిచత్తే చేద్దివ ఈశే ।
స్యాదుల్లఙ్ఘ్య నిసర్గం సిద్ధిర్నిష్ఫలతా చ ॥ ౧౨౯॥

మూఢోఽప్యుత్తమరీత్యా సిధ్యేదధ్యయనేషు ।
మేధావీ చ నితాన్తం నైవ స్యాత్కృతకృత్యః ॥ ౧౩౦॥

ఉత్పద్యేత మహేశ్వర్యప్రాజ్ఞాదపి శాస్త్రమ్ ।
యాయాన్మాతరకస్మాద్విభ్రాన్తిం విబుధోఽపి ॥ ౧౩౧॥

అల్పానామబలానాం సఙ్గ్రామే విజయః స్యాత్ ।
శక్తానాం బహులానాం ఘోరా స్యాత్పరిభూతిః ॥ ౧౩౨॥

రాజేరన్నృపపీఠేష్వఖ్యాతాని కులాని ।
స్యాద్దుర్ధర్షబలానాం పాతో రాజకులానామ్ ॥ ౧౩౩॥

నిర్యత్నోఽపి సమాధేర్విన్దేద్దేవి సమృద్ధిమ్ ।
యోగస్యామ్బ న పశ్యేదభ్యస్యన్నపి సిద్ధిమ్ ॥ ౧౩౪॥

అత్యన్తం యదసాధ్యం నేదిష్ఠం భవతీదమ్ ।
సాధ్యం సర్వవిధాభిః స్యాదిన్ద్రాణి దవిష్ఠమ్ ॥ ౧౩౫॥

గాయామో మునిసఙ్ఘైర్గేయాం కామపి మాయామ్ ।
ఇన్ద్రస్యాపి వినేత్రీం త్రైలోక్యస్య చ ధాత్రీమ్ ॥ ౧౩౬॥

విద్యానామధినాథే కాం విద్యాం శ్రయసే త్వమ్ ।
ఇన్ద్రం కర్తుమధీనం విశ్వస్మాదధికం తమ్ ॥ ౧౩౭॥

నిత్యాలిర్మినీషే స్త్రీమోహో న వితర్క్యః ।
భ్రూచేష్టానుచరత్వాదన్యా స్యాదనుకమ్పా ॥ ౧౩౮॥

సౌన్దర్యం పరమన్యద్వజేరద్దర్యథవా తే ।
హర్తుం యత్సుఖమీష్టే తాదృక్తస్య చ చిత్తమ్ ॥ ౧౩౯॥

చక్షుర్దర్శనమాత్రన్నిస్తేజో విదధానమ్ ।
చిత్తం చోజ్ఝితధైర్యం మత్తానాం దనుజానామ్ ॥ ౧౪౦॥

గర్తే దుర్జనదేహే మగ్నాన్ పఙ్క్విలగ్నాన్ ।
ప్రాణానాత్మసజాతీనుద్ధర్తుం ధృతదీక్షమ్ ॥ ౧౪౧॥

వజ్రం నిర్జరరాజో యద్ధత్తే సమరేషు ।
త్వచ్ఛక్తేః కలయైతన్మన్మాతర్నిరమాయి ॥ ౧౪౨॥

రాజ్ఞీత్వాత్పరమేతే రాజత్వం శతమన్యోః ।
నిశ్శక్తిస్స వినా త్వాం కామాజ్ఞాం కురుతాం నః ॥ ౧౪౩॥

సర్వం శక్రనిశాన్తస్యేశానే తవ హస్తే ।
అస్మాకం తు ధియేదం స్తోత్రం సఙ్గ్రహతస్తే ॥ ౧౪౪॥

గన్తవ్యం స్వరధీశే నిశ్శేషార్పణశూరమ్ ।
బిభ్రాణా నయసి త్వం మార్జాలీవ కిశోరమ్ ॥ ౧౪౫॥

గృహ్ణ్న్నమ్బరనాథామమ్బామశ్లథమన్ధః ।
కీశస్యేవ కిశోరో యోగీ గచ్ఛతి గమ్యమ్ ॥ ౧౪౬॥

పూర్ణాత్మార్పణహీనోఽప్యజ్ఞాతాఽపి సమాధేః ।
నిత్యం యో జగదమ్బ త్వాం సేవేత జపాద్యైః ॥ ౧౪౭॥

తం చాచఞ్చలభక్తిం కృత్వా పూరితకామమ్ ।
నిష్ఠాం దాస్యసి తస్మై పౌలోమి క్రమశస్త్వమ్ ॥ ౧౪౮॥

భిన్నాం సఙ్ఘసహస్త్రైః ఖిన్నాం శత్రుభరేణ ।
పాతుం భారతభూమిం మాతర్దేహి బలం మే ॥ ౧౪౯॥

త్ర్యైలోక్యావనభారశ్రాన్తాం వాసవకాన్తామ్ ।
హైరమ్బ్యో మదలేఖాః సమ్యక్ సమ్మదయన్తు ॥ ౧౫౦॥

॥ తృతీయో హంసమాలాపాదః ॥
సురుచిర్వజ్రపాణేస్సుదృశో మన్దహాసః ।
హరతాన్మోహమూలం హృదయస్థం తమో మే ॥ ౧౫౧॥

అమృతం సఙ్కిరన్త్యా ప్రసరన్త్యేహ దృష్ట్యా ।
సురరాజ్ఞీ బలాఢ్యాం భరతక్ష్మాం కరోతు ॥ ౧౫౨॥

అమృతామ్భః కిరన్తీ కరుణామ్భో వహన్తీ ।
నతరక్షాత్తదీక్షా శచి మాతస్తవేక్షా ॥ ౧౫౩॥

కృతపీయూషవృష్టిస్తతకల్యాణసృష్టిః ।
విహితైనోవినష్టిర్ధృతవిజ్ఞానపుష్టిః ॥ ౧౫౪॥

భృతదేవేన్ద్రతుష్టిర్యమినాం దేవగృష్టిః ।
మమ కామ్యాని దేయాత్తవ విశ్వామ్బ దృష్టిః ॥ ౧౫౫॥

జగతాం చక్రవర్తిన్యసితస్తే కటాక్షః ।
జలదో భక్తిభాజాం శిఖినాం నర్తనాయ ॥ ౧౫౬॥

సుకృతీ కోఽపి నాట్యే బహులే తత్ర మాతః ।
జగతే సారభూతానుపదేశాన్కరోతి ॥ ౧౫౭॥

అపరో నవ్యకావ్యాన్యనవద్యాని ధన్యః ।
విదధాత్యప్రయత్నాద్బుధభోగక్షమాణి ॥ ౧౫౮॥

ఇతరో భాగ్యశాలీ రమణీయైః ప్రసఙ్గైః ।
వితనోతి స్వజాతిం జగతి శ్రేష్ఠనీతిమ్ ॥ ౧౫౯॥

జగతాం మాతరేకో మహసా పుణ్యశాలీ ।
విధుతారిః స్వదేశం కురుతే వీతపాశమ్ ॥ ౧౬౦॥

పర ఇన్ద్రాణి సాధుర్బత విస్మృత్య విశ్వమ్ ।
రమతే సిక్తగణ్డః ప్రమదాశ్రుప్రదానైః ॥ ౧౬౧॥

తవ రాగార్ద్రదృష్ట్యా దివి శక్రస్య నాట్యమ్ ।
కరుణాసిక్తదృష్టయా భువి భక్త్స్య నాట్యమ్ ॥ ౧౬౨॥

తవ సప్రేమదృష్టిర్బలమిన్ద్రే దధాతి ।
తవ కారుణ్యదృష్టిర్బలమస్మాసు ధత్తామ్ ॥ ౧౬౩॥

తవ వామాః కటాక్షాః ప్రభుమానన్దయన్తు ।
ఉచితో దక్షిణానామయమస్త్వీక్షణానామ్ ॥ ౧౬౪॥

సుకృతానాం ప్రపోషం దురితానాం విశోషమ్ ।
కరుణార్ద్రా విభాన్తీ తవ దృష్టిః క్రియాన్నః ॥ ౧౬౫॥

కురు పాదాబ్జబన్ధోః సరణిం నిస్తమస్కామ్ ।
శచి విజ్ఞానతేజః కిరతావీక్షితేన ॥ ౧౬౬॥

క్రియయారాధయన్తో భువనే తే విభూతీః ।
ఇహ కేచిల్లభన్తే తవ మాతః కటాక్షాన్ ॥ ౧౬౭॥

స్ఫుటవిజ్ఞానపూర్వం ప్రభజేరన్ యది త్వామ్ ।
స్థిరయా దేవి భక్త్యా కిము వక్తవ్యమీశే ॥ ౧౬౮॥

కువిధేర్విస్మరన్తీ భరతక్ష్మా శచి త్వామ్ ।
బహుకాలాదభాగ్యే పతితా దేవ్యయోగ్యే ॥ ౧౬౯॥

అభిషిక్త్స్య మాతా తవ తేజోంశభూతా ।
సుదశాం సేవమానామనయత్పశ్చిమాశామ్ ॥ ౧౭౦॥

అయి కాలం కియన్తం దయసే పశ్చిమస్యామ్ ।
ఇత ఇన్ద్రాణి పూర్వామవలోకస్వ దీనామ్ ॥ ౧౭౧ ॥

న వయం పశ్చిమస్యాశ్శచి యాచామనాశమ్ ।
కృపయైతాం చ పూర్వాం నిహతాశామవాశామ్ ॥ ౧౭౨॥

సకలం వ్యర్థమాసీదయి దీనేషు దృష్టా ।
తవ విశ్వస్య మాతః కరుణైకావశిష్టా ॥ ౧౭౩॥

సురరాజస్య కాన్తే నరసింహస్య సూనుమ్ ।
బలవన్తం కురు త్వం భరతక్ష్మావనాయ ॥ ౧౭౪॥

రుచిరాభిర్నిజాభిర్గతిభిర్హర్షయన్తు ।
మరుతాం భర్తురేతాస్తరుణీం హంసమాలాః ॥ ౧౭౫॥

॥ చతుర్థో మధుమతీపాదః ॥
దిశి దిశి ప్రసరద్రుచితమోదమనమ్ ।
హరతు మే దురితం హరివధూహసితమ్ ॥ ౧౭౬॥

హరతు దుఃఖభరప్రసృతమశ్రుజలమ్ ।
భరతభూసుదృశో బలజితో రమణీ ॥ ౧౭౭॥

అతితరాం మహితా సురపతేర్వనితా ।
కరుణయా కలితా మమ శచీ శరణమ్ ॥ ౧౭౮॥

త్రిభువనక్షితిరాడ్భువనభూషణభా ।
అఖిలభాసకభా మమ శచీ శరణమ్ ॥ ౧౭౯॥

సతతయుక్తసుధీహృదయదీపకభా ।
నిఖిలపాచకభా మమ శచీ శరణమ్ ॥ ౧౮౦॥

రవివిరోచకభా శశివిరాజకభా ।
భగణశోభకభా మమ శచీ శరణమ్ ॥ ౧౮౧॥

గగనఖేలకభా సకలచాలకభా ।
అభయదాఽతిశుభా మమ శచీ శరణమ్ ॥ ౧౮౨॥

రుచిలవఙ్గతయా యదనఘాంశునిధేః ।
హృతతమోభవనం భవతి దీపికయా ॥ ౧౮౩॥

స్ఫురతి చారు యతః కిరణమేకమితా ।
జలదసౌధతలే ముహురియం చపలా ॥ ౧౮౪॥

భవతి యద్ద్యుతితః కమపి భాగమితః ।
పవిరరాతిహరః ప్రహరణేశపదమ్ ॥ ౧౮౫॥

భవతి యత్సురుచేరణుతమాంశమితా ।
యువమనోమదనీ సువదనాస్మితభా ॥ ౧౮౬॥

వితతసూక్ష్మతనుర్మహతి సా గగనే ।
పరమపూరుషభా మమ శచీ శరణమ్ ॥ ౧౮౭॥

అమరనాథసఖీ రుచినిధానముఖీ ।
అమృతవర్షకదృఙ్ మమ శచీ శరణమ్ ॥ ౧౮౮॥

అవిధవా సతతం యువతిరేవ సదా ।
అనఘవీరసుతా మమ శచీ శరణమ్ ॥ ౧౮౯॥

అమృతవత్యధరే సురధరాపతయే ।
చరణయోర్భజతే మమ శచీ శరణమ్ ॥ ౧౯౦॥

స్మితలవేషు సితా శిరసిజేష్వసితా ।
చరణయోరరుణా బహిరపి త్రిగుణా ॥ ౧౯౧ ॥

కపటచన్ద్రముఖీ ప్రకృతిరిన్ద్రసఖీ ।
మృతిజరారహితా మమ శచీ శరణమ్ ॥ ౧౯౨ ॥

కృశతమేప్యుదరే త్రిభువనం దధతీ ।
జనిమతాం జననీ మమ శచీ శరణమ్ ॥ ౧౯౩ ॥

స్థిరతరా మనసి స్థిరతమా వచసి ।
నయనయోస్తరలా మమ శచీ శరణమ్ ॥ ౧౯౪॥

మృదుతరా కరయోర్మృదుతమా వచసి ।
భుజబలే కఠినా మమ శచీ శరణమ్ ॥ ౧౯౫॥

మృదులబాహులతాఽప్యమితభీమబలా ।
అసురదర్పహరీ మమ శచీ శరణమ్ ॥ ౧౯౬॥

అబలయాఽపి యయా న సదృశోఽస్తి బలే ।
జగతి కశ్చిదసౌ మమ శచీ శరణమ్ ॥ ౧౯౭॥

అతితరాం సదయా పదరతే మనుజే ।
ఖలజనే పరుషా మమ శచీ శరణమ్ ॥ ౧౯౮॥

గణపతిం కురుతాద్భరతభూమ్యవనే ।
అమరభూమిపతేః ప్రియతమా సబలమ్ ॥ ౧౯౯॥

మధురశబ్దతతీర్మధుమతీరజరా ।
గణపతేశ్శృణుయాత్సురపతేస్తరుణీ ॥ ౨౦౦॥

॥ ద్వితీయమౌష్ణిహం శతకం సమాప్తమ్ ॥

॥ అథ తృతీయమానుష్టుభం శతకమ్ ॥
॥ ప్రథమః పథ్యావక్త్రపాదః ॥
హసితం తన్మహాశక్తేరస్మాకం హరతు భ్రమమ్ ।
యత ఏవ మహచ్చిత్రం విశ్వమేతద్విజృమ్భతే ॥ ౨౦౧॥

రాజన్తీ సర్వభూతేషు సర్వావస్థాసు సర్వదా ।
మాతా సర్గస్య చిత్పాయాత్ పౌలోమీ భారతక్షితిమ్ ॥ ౨౦౨॥

ధర్మిజ్ఞానం విభోస్తత్త్వం ధర్మో జ్ఞానం సవిత్రి తే ।
వ్యవహృత్యై విభాగోఽయం వస్త్వేకం తత్త్వతో యువామ్ ॥ ౨౦౩॥

ఇన్ద్రేశవాసుదేవాద్యైః పదైః సఙ్కీత్ర్యతే విభుః ।
శచీ శివా మహాలక్ష్మీప్రముఖైర్భవతీ పదైః ॥ ౨౦౪॥

అన్తరం వస్తునో జ్ఞాతృ తచ్ఛక్తం పరిచక్షతే ।
శాఖాః సమన్తతో జ్ఞానం శక్తిం సఙ్కీర్తయన్తి తామ్ ॥ ౨౦౫॥

అన్తరస్య చ శాఖానామైక్యం నిర్విషయస్థితౌ ।
విషయగ్రహణేష్వేవ సవిభాగః ప్రదృశ్యతే ॥ ౨౦౬॥

స్యాదేవం విషయాపేక్షీ శాఖానామన్తరస్య చ ।
అవిభక్తైకరూపాణాం విభాగో హరితామివ ॥ ౨౦౭॥

లక్ష్యమన్తర్వయం చక్రే ధ్యాయామో యత్ర నిష్ఠితాః ।
అన్తరీభావతస్తస్య నాన్తరం తు విలక్షణమ్ ॥ ౨౦౮॥

అహఙ్కృతేర్వయం నాన్యే యత్రాహఙ్కృతిసమ్భవః ।
సమ్పద్యేతాన్తరం తత్ర జ్ఞానస్య జ్ఞాతృతావహమ్ ॥ ౨౦౯॥

అన్తరావర్తభూయస్త్వాదేకస్మిన్ బోధసాగరే ।
బోద్ధారో బహవోఽభూవన్ వస్తు నైవ తు భిద్యతే ॥ ౨౧౦॥

చిద్రూపే మాతరేవం త్వం పరస్మాద్బ్రహ్మణో యథా ।
న దేవి దేవతాత్మభ్యో జీవాత్మభ్యశ్చ భిద్యసే ॥ ౨౧౧॥

సమస్తభూతబీజానాం గూఢానామన్తరాత్మని ।
తవోద్గారోఽయమాకాశో మాతస్సూక్ష్మరజోమయః ॥ ౨౧౨॥

న సర్వభూతబీజాని వస్తూని స్యుః పృథక్ పృథక్ ।
త్వయి ప్రాగవిభక్తాని బభూవురితి విశ్రుతిః ॥ ౨౧౩॥

యథామ్బస్మృతిబీజానాం ప్రజ్ఞాయామవిశేషతః ।
తథా స్యాద్భూతబీజానామవిభక్త్స్థితిస్త్వయి ॥ ౨౧౪॥

నాణూని భూతబీజాని ప్రాక్సర్గాత్త్వయి సంస్థితౌ ।
చితిశక్త్యాత్మకాన్యేవ నిరాకారాణి సర్వథా ॥ ౨౧౫॥

అనాది చేదిదం విశ్వం స్మరణ్ణాత్తవ సర్జనమ్ ।
సాది చేదాదిమః సర్గో వక్త్వ్యస్తవ కల్పనాత్ ॥ ౨౧౬॥

విధాతుం శక్నుయాత్సంవిదభూతస్యాపి కల్పనమ్ ।
కల్పితస్యైకదా భూయః సర్జనావసరే స్మృతిః ॥ ౨౧౭॥

చితేరస్మాదృశాం వీర్యం స్వప్నే చేద్విశ్వకారణమ్ ।
చితేస్సమష్టిభూతాయాః ప్రభావే సంశయః కుతః ॥ ౨౧౮॥

మాతస్సమష్టిచిద్రూపే విభూతిర్భువనం తవ ।
ఇహ వ్యష్టి శరీరేషు భాన్తీ తదనుపశ్యసి ॥ ౨౧౯॥

త్వం బహ్మ త్వం పరాశక్తిస్త్వం సర్వా అపి దేవతాః ।
త్వం జీవాస్త్వం జగత్సర్వం త్వదన్యన్నాస్తి కిఞ్చన ॥ ౨౨౦॥

సతీ చిదమ్బ నైవ త్వం భావాభావవిలక్షణా ।
శక్తిశక్తిమతోర్భేదదర్శనాదేష విభ్రమః ॥ ౨౨౧॥

తవామ్బ జగతధాస్య మృత్తికాఘటయోరేవ ।
సమ్బన్ధో వేదితవ్యః స్యాన్న రజ్జౌఫణినోరివ ॥ ౨౨౨॥

త్వం శక్తిరస్యవిచ్ఛిన్నా భావైరాత్మవిభూతిభిః ।
అన్తరాస్తు మహేన్ద్రస్య శక్త్స్య ప్రతిబిమ్బవత్ ॥ ౨౨౩॥

శక్తిర్గణపతేః కాయే ప్రవహన్తీ సనాతనీ ।
భారతస్య క్రియాదస్య బాధ్యమానస్య రక్షణమ్ ॥ ౨౨౪॥

ఇమాని తత్త్వవాదీని వాసిష్ఠస్య మహామునేః ।
పథ్యావక్త్రణి సేవన్తామనన్తామభవాం చితిమ్ ॥ ౨౨౫॥

॥ ద్వితీయో మాణవకపాదః ॥
శక్త్తమా శక్రవధూ హాసవిభా మే హరతు ।
మానసమార్గావరకం జేతుమశక్యం తిమిరమ్ ॥ ౨౨౬॥

భారతభూపద్మదృశో దుర్దశయా క్షీణతనోః ।
బాష్పమజస్రం విగలద్వాసవభామా హరతు ॥ ౨౨౭॥

దణ్డితరక్షోజనతా పణ్డితగీతావనితా ।
మణ్డితమాహేన్ద్రగృహా ఖణ్డితపాపా జయతి ॥ ౨౨౮॥

సద్గుణసమ్పత్కలితం సర్వశరీరే లలితమ్ ।
దేవపతేః పుణ్యఫలం పుష్యతు మే బుద్ధిబలమ్ ॥ ౨౨౯॥

హాసవిశేషైరలసైర్దిక్షు కిరన్త్యచ్ఛసుధామ్ ।
ఇన్ద్రదృగానన్దకరీ చన్ద్రముఖీ మామవతు ॥ ౨౩౦॥

ప్రేమతరఙ్గప్రతిమైః శీతలదృష్టిప్రకరైః ।
శక్రమనోమోహకరీ వక్రకచా మామవతు ॥ ౨౩౧॥

గాఢరసైశ్చారుపదైర్గూఢతరార్థైర్వచనైః ।
కామకరీ వృత్రజితో హేమతనుర్మామవతు ॥ ౨౩౨॥

మృత్యుతనుః కాలతనోర్విశ్వపతేః పార్శ్వచరీ ।
ప్రేతజగద్రక్షతి యా సా తరుణీ మామవతు ॥ ౨౩౩॥

ప్రేతజగత్కేచిదధో లోకమపుణ్యం బ్రువతే ।
శీతరుచేర్దేవి పరో నేతరదేతద్ వదతి ॥ ౨౩౪॥

భూరియముర్వీ వసుధా వారిజవైర్యేషభువః ।
స్వర్మహసాం రాశిరసౌ యేషు నరప్రేతసురాః ॥ ౨౩౫॥

రాజతశైలం శశినః కేచిదభిన్నం బ్రువతే ।
మృత్యుయమావేవ శివావీశ్వరి తేషాం తు మతే ॥ ౨౩౬॥

రాజతశైలః పితృభూరోషధిరాడేష యది ।
కాఞ్చనశైలః సురభూర్బన్ధురసౌ వారిరుహామ్ ॥ ౨౩౭॥

పావయ భూమిం దధతః పావకకాయస్య విభోః ।
భామిని భావానుగుణే సేవకమగ్నాయి తవ ॥ ౨౩౮॥

యస్య యమో భూతపతిర్బుద్ధిమతస్తస్య మతే ।
ఆగ్నిరుపేన్ద్రో మఘవా కాఞ్చనగర్భో భగవాన్ ॥ ౨౩౯॥

యస్య మహాకాలవధూర్మృత్యురపి ద్వే న విదః ।
త్వం శచి మేధాఽస్యమతే పావకశక్తిః కమలా ॥ ౨౪౦॥

నామసు భేదోఽస్తు ధియామీశ్వరి నిష్కృష్టమిదమ్ ।
సూర్యధరేన్దుష్వజరే త్వం త్రితనుర్భాసి పరే ॥ ౨౪౧॥

సాత్త్వికశక్తిః సవితర్యాదిమరామే భవసి ।
రాజసశక్తిర్భువి నస్తామసశక్తిః శశిని ॥ ౨౪౨॥

సర్వగుణా సర్వవిభా సర్వబలా సర్వరసా ।
సర్వమిదం వ్యాప్య జగత్కాపి విభాన్తీ పరమా ॥ ౨౪౩॥

వ్యోమతనుర్నిర్వపుషో దేవి సతస్త్వం దయితా ।
అస్యభియుక్తైర్విబుధైరమ్బ మహేశ్వర్యుదితా ॥ ౨౪౪॥

సా ఖలు మాయా పరమా కారణమీశం వదతామ్ ।
సా ప్రకృతిః సాఙ్ఖ్యవిదాం సా యమినాం కుణ్డలినీ ॥ ౨౪౫॥

సా లలితా పఞ్చదశీముత్తమవిద్యాం జపతామ్ ।
సా ఖలు చణ్డీ జననీ సాధునవార్ణం భజతామ్ ॥ ౨౪౬॥

సా మమ శచ్యాః పరమం కారణరూపం భవతి ।
కార్యతనుర్దివి శక్రం సమ్మదయన్తీ లసతి ॥ ౨౪౭॥

వ్యోమతనోః సర్వజగచ్చాలనసూత్రం తు వశే ।
నిర్వహణే తస్య పునర్దివ్యతనుస్త్రీత్రితయమ్ ॥ ౨౪౮॥

పాతుమిమం స్వం విషయం హన్త చిరాన్నిర్విజయమ్ ।
కిఙ్క్రమీశే విభయం మాం కురు పర్యార్శియమ్ ॥ ౨౪౯॥

చారుపదక్రీడనకైర్మాతరిమైర్మాణవకైః ।
చేతసి తే దేవనుతే ప్రీతిరమోఘా భవతు ॥ ౨౫౦॥

॥ తృతీయశ్చిత్రపదాపాదః ॥
అప్యలసో హరిదన్తధ్వాన్తతతేరపి హర్తా ।
అస్తు మమేన్ద్రపురన్ధ్రీ హాసలవః శుభకర్తా ॥ ౨౫౧॥

పాహి పరైర్హృతసారాం నేత్రగలజ్జలధారామ్ ।
భారతభూమిమనాథాం దేవి విధాయ సనాథామ్ ॥ ౨౫౨॥

చాలయతా సురరాజం పాలయతా భువనాని ।
శీలయతా నతరక్షాం కాలయతా వృజినాని ॥ ౨౫౩॥

లాలయతా మునిసఙ్ఘం కీలయతా దివి భద్రమ్ ।
పావయ మాం సకృదీశే భాసురదృక్ప్రసరేణ ॥ ౨౫౪॥

సర్వరుచామాపి శాలాం త్వాం శచి మఙ్గలలీలామ్ ।
కాలకచాముత కాలీం పద్మముఖీముత పద్మామ్ ॥ ౨౫౫॥

యః స్మరతి ప్రతికల్యం భక్తిభరేణ పరేణ ।
తస్య సురేశ్వరి సాధోరస్మి పదాబ్జభుజిష్యః ॥ ౨౫౬॥

యస్తవ నామపవిత్రం కీర్తయతే సుకృతీ నా ।
వాసవసున్దరి దాసస్తచ్చరణస్య సదాఽహమ్ ॥ ౨౫౭॥

పావకసాగరకోణం యస్తవ పావనయన్త్రమ్ ।
పూజయతి ప్రతిఘస్రం దేవి భజామి తదఙ్ధ్రిమ్ ॥ ౨౫౮॥

యస్తవ మన్త్రముదారప్రాభవమాగమసారమ్ ।
పావని కూర్చముపాస్తే తస్య నమధ్రణాయ ॥ ౨౫౯॥

శాన్తధియేతరచిన్తాసన్తతిమమ్బ విధూయ ।
చిన్తయతాం తవ పాదావస్మి సతామనుయాయీ ॥ ౨౬౦॥

శోధయతాం నిజతత్త్వం సాధయతాం మహిమానమ్ ।
భావయతాం చరణం తే దేవి పదానుచరోఽహమ్ ॥ ౨౬౧॥

యోఽనుభవేన్నిజదేహే త్వామజరే ప్రవహన్తీమ్ ।
సన్తతచిన్తనయోగాత్తస్య నమామి పదాబ్జమ్ ॥ ౨౬౨॥

బోధయతే భవతీం యః ప్రాణగతాగతదర్శీ ।
కుణ్డలినీం కులకుణ్డాత్తం త్రిదివేశ్వరి వన్దే ॥ ౨౬౩॥

లోచనమణ్డలసౌధాం లోకనమూలవిచారీ ।
విన్దతి యః పరమే త్వాం వన్దనమస్య కరోమి ॥ ౨౬౪॥

మానిని జమ్భజితస్త్వాం మానసమూలవితర్కీ ।
వేదహృదమ్బురుహే యః పాదమముష్య నమామి ॥ ౨౬౫॥

అన్తరనాదవిమర్శీ పశ్యతి యః సుకృతీ తే ।
వైభవమమ్బ విశుద్ధే తేన వయం పరవన్తః ॥ ౨౬౬॥

ఇన్ద్రపదస్థితచిత్తశ్శీర్షసుధారసమత్తః ।
యో భజతే జనని త్వాం తచ్చరణం ప్రణమామి ॥ ౨౬౭॥

రాసనవారిణి లగ్నః సమ్మదవీచిషు మగ్నః ।
ధ్యాయతి యః పరమే త్వాం తస్య పదం మమ వన్ద్యమ్ ॥ ౨౬౮॥

త్వాం సదహఞఙ్కృతిరూపాం యోగినుతే హతపాపామ్ ।
ధారయతే హృదయే యస్తస్య సదాఽస్మి విధేయః ॥ ౨౬౯॥

ధూతసమస్తవికల్పో యస్తవ పావనలీలామ్ ।
శోధయతి స్వగుహాయాం తస్య భవామ్యనుజీవీ ॥ ౨౭౦॥

యో భజతే నిజదృటిం రూపపరిగ్రహణేషు ।
కామపి దేవి కలాం తే తస్య పదే నిపతేయమ్ ॥ ౨౭౧॥

కర్మణి కర్మణి చేష్టామమ్బ తవైవ విభూతిమ్ ।
యః శితబుద్ధిరుపాస్తే తత్పదమేష ఉపాస్తే ॥ ౨౭౨॥

వస్తుని వస్తుని సత్తాం యో భవతీం సముపాస్తే ।
మాతరముష్య వహేయం పాదయుగం శిరసాఽహమ్ ॥ ౨౭౩॥

పాతుమిమం నిజదేశం సర్వదిశాసు సపాశమ్ ।
అమ్బ విధాయ సమర్థం మాం కురు దేవి కృతార్థమ్ ॥ ౨౭౪॥

చిత్రపదాభిరిమాభిశ్చిత్రవిచిత్రచరిత్రా ।
సమ్మదమేతు మఘోనః ప్రాణసఖీ మృగనేత్ర ॥ ౨౭౫॥

॥ చతుర్థో నారాచికాపాదః ॥
అన్తర్విధున్వతా తమః ప్రాణస్య తన్వతా బలమ్ ।
మన్దస్మితేన దేవతారాజ్ఞీ కరోతు మే శివమ్ ॥ ౨౭౬॥

ఉత్థాప్య పుణ్యసఞ్చయం సమ్మద్ర్య పాపసంహతిమ్ ।
సా భారతస్య సమ్పదే భూయాద్బలారిభామినీ ॥ ౨౭౭॥

లీలాసఖీ బిడౌజసస్స్వర్వాటికాసు ఖేలనే ।
పీయుషభానుజిన్ముఖీ దేవీ శచీ విరాజతే ॥ ౨౭౮॥

పక్షః పరో మరుత్వతో రక్షః ప్రవీరమర్దనే ।
భామాలి భాసురాననా దేవీ శచీ విరాజతే ॥ ౨౭౯॥

భీతిం నిశాటసంహతేః ప్రీతిం సుపర్వణాం తతేః ।
జ్యాటఙ్కృతైర్వితన్వతీ దేవీ శచీ విరాజతే ॥ ౨౮౦॥

దేవేన్ద్రశక్తిధారిణీ శత్రుప్రసక్తివారిణీ ।
మౌనీన్ద్రముక్తికారిణీ దేవీ శచీ గతిర్మమ ॥ ౨౮౧॥

సన్నస్వదేశదర్శనాద్భిన్నస్వజాతివీక్షణాత్ ।
ఖిన్నస్య సంశ్రితావనీ దేవీ శచీ గతిర్మమ ॥ ౨౮౨॥

సఙ్ఘే సహస్రధాకృతే దేశే నికృష్టతాం గతే ।
శోకాకులస్య లోకభృద్దేవీ శచీ గతిర్మమ ॥ ౨౮౩॥

సా సంవిదోఽధిదేవతా తస్యాస్స్వరః పరో వశే ।
సర్వం విధీయతే తయా తస్మాత్పరా మతా శచీ ॥ ౨౮౪॥

సా యాతి సూక్ష్మమప్యలం సా భాతి సర్వవస్తుషు ।
సా మాతి ఖం చ నిస్తులం తస్మాత్పరా మతా శచీ ॥ ౨౮౫॥

సా సర్వలోకనాయికా సా సర్వగోలపాలికా ।
సా సర్వదేహచాలికా తస్మాత్పరా మతా శచీ ॥ ౨౮౬॥

యస్యాః కృతిర్జగత్త్రయం యా తద్బిభర్తి లీలయా ।
యస్యాం ప్రయాతి తల్లయం సా విశ్వనాయికా శచీ ॥ ౨౮౭॥

ధర్మే పరిక్షయం గతే యాఽవిశ్య నిర్మలం జనమ్ ।
తద్రక్షణాయ జాయతే సా విశ్వనాయికా శచీ ॥ ౨౮౮॥

వేధా ఋతస్య యోదితా మన్త్రేణ సత్యవాదినా ।
బాధానివారిణీ సతాం సా విశ్వనాయికా శచీ ॥ ౨౮౯॥

యజ్ఞో యయా వినీయతే యుద్ధం తథా పృథగ్విధభ్ ।
తాం దేవరాజమోహినీం నారీం నుమః పురాతనీమ్ ॥ ౨౯౦॥

యస్యాస్సుతో వృషాకపిర్దేవోఽసతాం ప్రశాసితా ।
తాం సర్వదా సువాసినీం నారీం నుమః పురాతనీమ్ ॥ ౨౯౧॥

యస్యాస్సమా నితమ్బినీ కాచిన్న విష్టపత్రయే ।
తాం నిత్యచారు యౌవనాం నారీం నుమః పురాతనీమ్ ॥ ౨౯౨॥

యచ్చారుతా న దృశ్యతే మన్దారపల్లవేష్వపి ।
తత్సున్దరాచ్చసున్దరం శచ్యాః పదామ్బుజం శ్రయే ॥ ౨౯౩॥

యస్య ప్రభా న విద్యతే మాణిక్యతల్ల్జేష్వపి ।
తద్భాసురాచ్చ భాసురం శచ్యాః పదామ్బుజం శ్రయే ॥ ౨౯౪॥

న స్యాదఘైస్తిరస్కృతో యచ్చిన్తకో నరః కృతీ ।
తత్పావనాచ్చ పావనం శచ్యాః పదామ్బుజం శ్రయే ॥ ౨౯౫॥

రాజన్నఖేన్దుభానుభిస్సర్వం తమో విధున్వతే ।
బృన్దారకేన్ద్రసున్దరీపాదామ్బుజాయ మఙ్గలమ్ ॥ ౨౯౬॥

గీర్వాణమౌలిరీభా సఙ్క్షాలితాయ దీప్యతే ।
స్వర్గాధినాథభామినిపాదామ్బుజాయ మఙ్గలమ్ ॥ ౨౯౭॥

బాలార్కబిమ్బరోచిషే యోగీన్ద్ర హృద్గుహాజుషే ।
పాకారిజీవితేశ్వరీపాదామ్బుజాయ మఙ్గలమ్ ॥ ౨౯౮॥

ఆత్మీయదేశరక్షణే శక్తం కరోతు సర్వథా ।
పాపద్విషాం ప్రియఙ్కరీ వాసిష్ఠమిన్ద్రసున్దరీ ॥ ౨౯౯॥

వాసిష్ఠవాక్ప్రదీప్తిర్భినారాచికాభిరీశ్వరీ ।
గీర్వాణచక్రవర్తినస్సమ్మోదమేతు సున్దరీ ॥ ౩౦౦॥

॥ తృతీయమానుష్టుభం శతకం సమాప్తమ్ ॥

॥ అథ చతుర్థం బార్హతం శతకమ్ ॥
॥ ప్రథమో హలముఖీపాదః ॥
క్షీరవీచిపృషతసితం ప్రేమధారిదరహసితమ్ ।
నాకరాజనలినదృశః శోకహారి మమ భవతు ॥ ౩౦౧॥

అధ్వనో గలితచరణామధ్వరక్షితిమవిభవామ్ ।
ఆదధాతు పథి విమలే వైభవే చ హరితరుణీ ॥ ౩౦౨॥

బ్రహ్మణశ్వితిరథనభః కాయభాగవగతిమతీ ।
యా తదా పృథగివ బభౌ ధర్మితాం స్వయమపి గతా ॥ ౩౦౩॥

మోదబోధవిభవకృతప్రాకృతేతరవరతను ।
సర్వసద్గుణగణయుతం యా ససర్జ సురమిథునమ్ ॥ ౩౦౪॥

పుంసి దీప్తవపుషి తయోర్బ్రహ్మ సోఽహమితి లసతి ।
యోషితే కిల ధియమదాత్తస్య శక్తిరహమితి యా ॥ ౩౦౫॥

యాభిమానబలవశతస్తాముదారతమవిభవామ్ ।
మన్యతే స్మ వరవనితాం స్వాధిదైవికతనురితి ॥ ౩౦౬॥

ఆదిపుంసి గగనతనుర్యా తనోతి తనుజమతిమ్ ।
ఆదధాతి యువతితనుః ప్రాణనాయక ఇతి రతిమ్ ॥ ౩౦౭॥

తాం పరాం భువనజననీం సర్వపాపతతిశమనీమ్ ।
తన్త్రజాలవినుతబలాం స్తౌమి సర్వమతిమమలామ్ ॥ ౩౦౮॥

సా మతిర్విదితవిషయా సా రుచిర్వితతవిషయా ।
సా రతిర్వినుతవిషయా సా స్థితిర్విధుతవిషయా ॥ ౩౦౯॥

యత్ర యత్ర మమ ధిషణా గ్రాహ్యవస్తుని గతిమతీ ।
తత్ర తత్ర విలసతు సా సర్వగా సకలచరితా ॥ ౩౧౦॥

దుర్బలస్య బహులబలైరర్దితస్య జగతి ఖలైః ।
ఆదిదేవి తవ చరణం పావనం భవతి శరణమ్ ॥ ౩౧౧॥

పౌరుషే భవతి విఫలే త్వామయం జనని భజతే ।
కిం నుతే యది విముఖతా పౌరుషం కథయ భజతామ్ ॥ ౩౧౨॥

కర్తురప్రతిహతగిరః పౌరుషాచ్ఛతగుణమిదమ్ ।
ధ్యాతురస్ఖలితమనసః కార్యసిద్ధిషు తవ పదమ్ ॥ ౩౧౩॥

పౌరుషం విదితమఫలం కాఙ్క్షితే మమ సురనుతే ।
శక్తమీదృశి తు సమయే శ్రద్దధామి తవ చరణమ్ ॥ ౩౧౪॥

పౌరుషం యది కవిమతం దేవి తేఽపి పదభజనమ్ ।
దైవవాదపటువచసో మూకతైవ మమ శరణమ్ ॥ ౩౧౫॥

పూర్వజన్మసుకృతఫలం దైవమమ్బ నిగదతి యః ।
భక్తిపౌరుషవిరహిణో భావితస్య రిపుదయితమ్ ॥ ౩౧౬॥

ఉద్యతస్య తవ చరణం సంశ్రితస్య చ సురనుతే ।
పూర్వజన్మసుకృతబలశ్రద్ధయాఽలమహృదయయా ॥ ౩౧౭॥

అస్తు పూర్వభవసుకృతం మాస్తు వా జనని జగతామ్ ।
సామ్ప్రతం తవ పదయుగం సంశ్రితోస్మ్యవ విసృజ వా ॥ ౩౧౮॥

నాస్తి సమ్ప్రతి కిమపి కిం భూతిమాప్స్యసి కిము తతః ।
అన్యజన్మని వితరణే కా ప్రసక్తిరమరనుతే ॥ ౩౧౯॥

నాన్యజన్మని బహుశివం నాపి నాకభువనసుఖమ్ ।
కామయే ఫలమభిమతం దేహి సమ్ప్రతి శచి న వా ॥ ౩౨౦॥

మేదినీ భువనతలతో నిస్తులాదుత గగనతః ।
భాస్కరాదుత రుచినిధేః కామ్యమీశ్వరి వితర మే ॥ ౩౨౧॥

విష్టపే క్వచన వరదే దాతుమీశ్వరి కృతమతిమ్ ।
వారయేజ్జనని న పరస్త్వాం జనస్తవ పతిమివ ॥ ౩౨౨॥

దేహి వా భగవతి న వా పాహి వా శశిముఖి న వా ।
పావనం తవ పదయుగం న త్యజాని హరిదయితే ॥ ౩౨౩॥

రక్షితుం భరతవిషయం శక్తమిన్ద్రహృదయసఖీ ।
చన్ద్రబిమ్బరుచిరముఖీ సా క్రియాద్భువి గణపతిమ్ ॥ ౩౨౪॥

సమ్ప్రహృష్యతు హలముఖీర్భాస్వతీర్గణపతిమునేః ।
సా నిశమ్య సురనృపతేర్మోహినీ సదయహృదయా ॥ ౩౨౫॥

॥ ద్వితీయో భుజగశిశుభృతాపాదః ॥
మరుదధిపమనోనాథా మధుకరచికురాస్మాకమ్ ।
వృజినవిధుతిమాధత్తాం విశదహసితలేశేన ॥ ౩౨౬॥

అఖిలనిగమసిద్ధాన్తో బహుమునివరబుద్ధాన్తః ।
సురపరిబృఢశుద్ధాన్తో భరతవసుమతీమవ్యాత్ ॥ ౩౨౭॥

భగవతి భవతీచేతో రతికృదభవదిన్ద్రస్య ।
స తవ జనని సన్తానద్రుమవనమతిరమ్యం వామ్ ॥ ౩౨౮॥

పతిరఖిలయువశ్రేష్ఠః కిమపి యువతిరత్నం త్వమ్ ।
వనవిహృతిషు వాం చేతో హరణమభవదన్యోన్యమ్ ॥ ౩౨౯॥

మధురలలితగమ్భీరైస్తవ హృదయముపన్యాసైః ।
వనవిహరణలీలాయామహరదయి దివో రాజా ॥ ౩౩౦॥

కలవచనవిలాసేన ప్రగుణముఖవికాసేన ।
భువనమపిమనోఽహార్షీర్జనని వనవిహారే త్వమ్ ॥ ౩౩౧॥

కనకకమలకాన్తాస్యా ధవలకిరణవక్త్రేణ ।
అసితజలజపత్రాక్షీ సితనలినదలాక్షేణ ॥ ౩౩౨॥

అలిచయనిజధమ్మిల్లా నవజలధరకేశేన ।
మృదులతమభుజావల్లీ దృఢతమభుజదణ్డేన ॥ ౩౩౩॥

అమృతనిలయబిమ్బోష్ఠీ రుచిరధవలదన్తేన ।
అతిముకురలసద్గణ్డా వికచజలజహస్తేన ॥ ౩౩౪॥

యువతిరతితరాం రమ్యా సులలితవపుషా యూనా ।
భగవతి శచి యుక్తా త్వం త్రిభువనవిభునేన్ద్రేణ ॥ ౩౩౫॥

వికచకుసుమమన్దారద్రష్ఠ్హమవనవరవాటీషు ।
విహరణమయి కుర్వాణా మనసిజమనుగృహ్ణాసి ॥ ౩౩౬॥

తవ శచి చికురే రాజత్కుసుమమమరవృక్షస్య ।
నవ సలిలభృతో మధ్యే స్ఫురదివ నవనక్షత్రమ్ ॥ ౩౩౭॥

అభజతతరురౌదార్యం విభవమపి మహాన్తం సః ।
వికచకుసుమసమ్పత్త్యా భగవతి భజతే యస్త్వామ్ ॥ ౩౩౮॥

అమరనృపతినా సాకం కుసుమితవనవాటీషు ।
భగవతి తవ విశ్రాన్తేః స జయతి సమయః కోఽపి ॥ ౩౩౯॥

అమరతరువరచ్ఛాయాస్వయి ముహురుపవిశ్య త్వమ్ ।
శచి కృతిజనరక్షాయై మనసి వితనుషు చర్చామ్ ॥ ౩౪౦॥

కిము వసు వితరాణ్యస్మై సుమతిముత దదాన్యస్మై ।
క్షమతమమథవాఽముష్మిన్ బలమురుఘటయానీతి ॥ ౩౪౧॥

హరితరుణి కదా వామే వినమదవనచర్చాసు ।
స్మరణసమయ ఆయాస్యత్యమలహృదయరఙ్గే తే ॥ ౩౪౨॥

శచి భగవతి సాక్షాత్తే చరణకమలదాసోఽహమ్ ।
ఇహ తు వసుమతీలోకే స్మర మమ విషయం పూర్వమ్ ॥ ౩౪౩॥

న యది తవ మనో దాతుం స్వయమయి లఘవే మహ్యమ్ ।
ఉపవనతరుకర్ణే వా వద మదభిమతం కర్తుమ్ ॥ ౩౪౪॥

నిజవిషయమతిశ్రేష్ఠం విపది నిపతితం త్రాతుమ్ ।
స్వకులమపి సదధ్వానం గమయితుమపథే శ్రాన్తమ్ ॥ ౩౪౫॥

అఖిలభువనసమ్రాజః ప్రియతరుణి భవత్యైవ ।
మతిబలపరిపూర్ణోఏఽయం గణపతిమునిరాధేయః ॥ ౩౪౬॥

న కిము భవతి శం దేశే గతవతి కలుషే కాలే ।
తవ భజనమఘం సద్యో హరిహయలలనే జేతుమ్ ॥ ౩౪౭॥

త్రిజగతి సకలం యస్య ప్రభవతి పృథులే హస్తే ।
స బహులమహిమా కాలో మమ జనని విభూతిస్తే ॥ ౩౪౮॥

అనవరతగలద్బాష్పాం భరతవసుమతీం త్రాతుమ్ ।
వితరతు దయితాజిష్ణోర్గణపతిమునయే శక్తిమ్ ॥ ౩౪౯॥

భుజగశిశుభృతా ఏతాః కవిగణపతినా గీతాః ।
విదధతు ముదితాం దేవీం విబుధపతిమనోనాథామ్ ॥ ౩౫౦॥

॥ తృతీయో మణిమధ్యాపాదః ॥
మఙ్గలధాయీ పుణ్యవతాం మన్మథధాయీ దేవపతేః ।
విష్టపరాజ్ఞీహాసలవో విక్రమధాయీ మే భవతు ॥ ౩౫౧॥

దృష్టివిశేషైశ్శీతతరైర్భూర్యనుకమ్పైః పుణ్యతమైః ।
భారతభూమేస్తాపతతిం వాసవకాన్తా సా హరతు ॥ ౩౫౨॥

పావనదృష్టిర్యోగిహితా భాసురదృష్టిర్దేవహితా ।
శీతలదృష్టిర్భక్థితా మోహనదృష్టిశ్శక్రహితా ॥ ౩౫౩॥

ఉజ్జ్వలవాణీ విక్రమదా వత్సలవాణీ సాన్త్వనదా ।
మఞ్జులవాణీ సమ్మదదా పన్నగవేణీ సా జయతి ॥ ౩౫౪॥

శారదరాకాచన్ద్రముఖీ తోయదమాలాకారకచా ।
మేచకపాథోజాతదలశ్రీహరచక్షుర్వాసికృపా ॥ ౩౫౫॥

చమ్పకనాసాగణ్డవిభామణ్డలఖేలత్కుణ్డలభా ।
ఉక్తిషు వీణాబిమ్బఫలశ్రీహరదన్తప్రావరణా ॥ ౩౫౬॥

నిర్మలహాసక్షాలితదిగ్భిత్తిసమూహా మోహహరీ ।
కాఞ్చనమాలాశోభిగలా సన్తతలీలా బుద్ధికలా ॥ ౩౫౭॥

విష్టపధారి క్షీరధరస్వర్ణఘటశ్రీహారికుచా ।
కాపి బిడౌజో రాజ్యరమా చేతసి మాతా భాతు మమ ॥ ౩౫౮॥

దివ్యసుధోర్మిర్భక్తిమతాం పావకకీలా పాపకృతామ్ ।
వ్యోమ్ని చరన్తీ శక్రసఖీ శక్తిరమోఘా మామవతు ॥ ౩౫౯॥

సమ్మదయన్తీ సర్వతనుం సంశమయన్తీ పాపతతిమ్ ।
సమ్ప్రథయన్తీ సర్వమతీస్సఙ్ఘటయన్తీ ప్రాణబలమ్ ॥ ౩౬౦॥

నిర్జితశోకాధూతతమాస్సంస్కృతచిత్తా శుద్ధతమా ।
వాసవశక్తేర్వ్యోమజుషః కాచన వీచిర్మాం విశతు ॥ ౩౬౧॥

ఉద్గతకీలం మూలమిదం భిన్నకపాలం శీర్షమిదమ్ ।
ఉజ్ఝిత మోహం చిత్తమిదం వాసవశక్తిర్మాం విశతు ॥ ౩౬౨॥

దృశ్యవిరక్తం చక్షురిదం భోగవిరక్తం కాయమిదమ్ ।
ధ్యేయవిరక్తా బుద్ధిరియం వాసవశక్తిర్మాం విశతు ॥ ౩౬౩॥

చక్షురదృశ్యజ్వాలభృతా వ్యాపకఖేన ప్రోల్లసతా ।
విస్మృతకాయం సన్దధతీ వాసవశక్తిర్మాం విశతు ॥ ౩౬౪॥

కాయమజస్రం వజ్రదృఢం బుద్ధిమశేషే వ్యాప్తిమతీమ్ ।
దివ్యతరఙ్గైరాదధతీ వాసవశక్తిర్మాం విశతు ॥ ౩౬౫॥

మూర్ధ్ని పతన్తీ వ్యోమతలాత్సన్తతమన్తః సర్వతనౌ ।
సమ్ప్రవహన్తీ దివ్యఝరైర్వాసవశక్తిర్మాం విశతు ॥ ౩౬౬॥

భానువిభాయాం భాసకతా దివ్యసుధాయాం మోదకతా ।
కాఽపి సురాయాం మాదకతా వాసవశక్త్యాం తత్త్రితయమ్ ॥ ౩౬౭॥

భాసయతాన్మే సమ్యగృతం మోదముదారం పుష్యతు మే ।
సాధుమదం మే వర్ధయతాన్నిర్జరభర్తుః శక్తిరజా ॥ ౩౬౮॥

కశ్చన శక్తిం యోగబలాదాత్మశరీరే వర్ధయతి ।
ఏషి వివృద్ధిం భక్తిమతః కస్యచిదేశే త్వం వపుషి ॥ ౩౬౯॥

సాధయతాం వా యోగవిదాం కీర్తయతాం వా భక్తిమతామ్ ।
వత్సలభావాదిన్ద్రవధూర్గర్భభువాం వా యాతి వశమ్ ॥ ౩౭౦॥

యస్య సమాధిః కోఽపి భవేదాత్మమనీషా తస్య బలమ్ ।
యస్తవ పాదామ్భోజరతస్తస్య ఖలు త్వం దేవి బలమ్ ॥ ౩౭౧॥

ద్వాదశవర్షీ యోగబలాద్యా ఖలు శక్తిర్యుక్తమతేః ।
తాం శచి దాతుం భక్తిమతే కాపి ఘటీ తే మాతరలమ్ ॥ ౩౭౨॥

యోగబలాద్వా ధ్యానకృతో భక్తిబలాద్వా కీర్తయతః ।
యాతు వివృద్ధిం విశ్వహితా వాసవశక్తిర్మే వపుషి ॥ ౩౭౩॥

దుఃఖితమేతచ్ఛ్రీరహితం భారతఖణ్డం సర్వహితమ్ ।
త్రాతుమధీశా స్వర్జగతః సుక్షమబుద్ధిం మాం కురుతామ్ ॥ ౩౭౪॥

సన్తు కవీనాం భర్తురిమే సున్దరబన్ధాశుద్ధతమాః ।
సన్మణిమధ్యాః స్వర్జగతో రాజమహిష్యాః కర్ణసుఖాః ॥ ౩౭౫॥

॥ చతుర్థో మాత్రసమకపాదః ॥
శుక్ల్జ్యోతిః ప్రకరైర్వ్యాప్తః సూక్ష్మోఽప్యన్తాన్ హరితాం హాసః ।
జిష్ణోః పత్న్యాస్తిమిరారాతిర్నిశ్శేషం మే హరతాన్మోహమ్ ॥ ౩౭౬॥

శృణ్వత్కర్ణా సదయాలోకా లోకేన్ద్రస్య ప్రియనారీ సా ।
నిత్యాక్రోశైర్విరుదద్వాణీం పాయాదేతాం భరతక్షోణీమ్ ॥ ౩౭౭॥

దేవేషు స్వః పరిదీప్యన్తీ భూతేష్విన్దౌ పరిఖేలన్తీ ।
శక్తిర్జిష్ణోర్ద్వపదాం సఙ్ఘే హన్తైతస్యాం భువి నిద్రాతి ॥ ౩౭౮॥

నిద్రాణాయా అపి తే జ్యోతిర్గన్ధాదేతే ధరణీలోకే ।
మర్త్యాః కిఞ్చత్ప్రభవన్తీశే త్వం బుద్ధా చేత్కిము వక్త్వ్యమ్ ॥ ౩౭౯॥

మేఘచ్ఛన్నోఽప్యరుణస్తేజో దద్యాదేవ ప్రమదే జిష్ణోః ।
అత్రస్థానాం భవతీగ్రన్థిచ్ఛన్నాప్యేవం కురుతే ప్రజ్ఞామ్ ॥ ౩౮౦॥

ధ్యాయామో యత్కథయామో యత్పశ్యామో యచ్ఛృణుమో యచ్చ ।
జీవామో వా తదిదం సర్వం నిద్రాణాయా అపి తే భాసా ॥ ౩౮౧॥

నాడీబన్ధాదభిమానాచ్చ చ్ఛన్నా మాతర్భవతీ దేహే ।
ఏకాపాయాదితరో నశ్యేత్తస్మాద్ద్వేధా తపసః పన్థాః ॥ ౩౮౨॥

చిత్తం యస్య స్వజనిస్థానే ప్రజ్ఞా బాహ్యా న భవేద్యస్య ।
ఆధత్సే త్వం భువనాధీశే బుద్ధా క్రీడాం హృదయే తస్య ॥ ౩౮౩॥

వాణీ యస్య స్వజనిస్థానే దూరే కృత్వా మనసా సఙ్గమ్ ।
మాతస్తత్ర ప్రతిబుద్ధా త్వం శ్లోకైర్లోకం కురుషే బుద్ధమ్ ॥ ౩౮౪॥

హిత్వా దృశ్యాన్యతిసూక్ష్మాయాం చక్షుర్యస్య స్వమహో వృత్తౌ ।
విశ్వాఽలిప్తా జగతాం మాతర్జాగ్రత్యస్మిన్నచలా భాసి ॥ ౩౮౫॥

శృణ్వన్ కర్ణో దయితే జిష్ణోరన్తః శబ్దం ధ్రియతే యస్య ।
బుద్ధా భూత్వా వియతా సాధోరేకీభావం కురుషే తస్య ॥ ౩౮౬॥

యాతాయాతం సతతం పశ్యేద్యః ప్రాణస్య ప్రయతో మర్త్యః ।
విశ్వస్యేష్టాం తనుషే క్రీడాం తస్మిన్ బుద్ధా తరుణీన్ద్రస్య ॥ ౩౮౭॥

స్వాన్తం యస్య ప్రభవేత్కార్యేష్వమ్బైతస్మిన్నయి నిద్రాసి ।
ఆత్మా యస్య ప్రభవేత్కార్యేష్వమ్బైతస్మిన్నయి జాగర్షి ॥ ౩౮౮॥

యస్యాఽహన్తా భవతి స్వాన్తే తస్య స్వాన్తం ప్రభవేత్కర్తుమ్ ।
యస్యాఽహన్తా భవతి స్వాత్మన్యాత్మా తస్య ప్రభవేత్కర్తుమ్ ॥ ౩౮౯॥

స్వాన్తం యస్య ప్రభవేత్కర్తుం తత్కర్మాల్పం భవతి వ్యష్టేః ।
ఆత్మా యస్య ప్రభవేత్కర్తుం తచ్ఛ్లాధ్యం తే బలజిత్కాన్తే ॥ ౩౯౦॥

ఏతత్స్వాన్తం హృదయాజ్జాతం శీర్షే వాసం పృథగాధాయ ।
హార్దాహన్తాం స్వయమాక్రమ్య భ్రాన్తానస్మాన్ కురుతే మాతః ॥ ౩౯౧॥

అస్మాకం భోః కురుతే బాధామస్మజ్యోతిర్జనని ప్రాప్య ।
స్వాన్తే నైతత్కృతమన్యాయ్యం కాన్తే జిష్ణోః శృణు రాజ్ఞి త్వమ్ ॥ ౩౯౨॥

స్వాన్తే తేజో హృదయాదాయాచ్చన్ద్రే తేజో దినభర్తుర్వా ।
ఆశ్రాన్తం యో మనుతే ధీరస్తస్య స్వాన్తం హృది లీనం స్యాత్ ॥ ౩౯౩॥

మూలాన్వేషిస్ఫురదావృత్తం నీచైరాయాత్కబలీకృత్య ।
జానన్త్యేకా హృదయస్థానే యుఞ్జానానాం జ్వలసీశానే ॥ ౩౯౪॥

శీర్షే చన్ద్రో హృదయే భానుర్నేత్రో విద్యుత్కులకుణ్డేఽగ్నిః ।
సమ్పద్యన్తే మహసాఽశైస్తే జిష్ణోః కాన్తే సుతరాం శస్తే ॥ ౩౯౫॥

మన్వానాం త్వాం శిరసి స్థానే పశ్యన్తీం వా నయనస్థానే ।
చేతన్తీం వా హృదయస్థానే రాజన్తీం వా జ్వలనస్థానే ॥ ౩౯౬॥

యో నా ధ్యాయేజ్జగతాం మాతః కశ్చిచ్ఛ్రేయానవనౌ నాఽతః ।
పూతం వన్ద్యం చరణం తస్య శ్రేష్ఠం వర్ణ్యం చరితం తస్య ॥ ౩౯౭॥

దోగ్ధ్రీం మాయాం రసనాం వా యో మన్త్రం మాతర్జపతి ప్రాజ్ఞః ।
సోఽయం పాత్రం కరుణాయాస్తే సర్వం కామ్యం లభతే హస్తే ॥ ౩౯౮॥

ఛిన్నాం భిన్నాం సుతరాం సన్నామన్నాభావాదభితః ఖిన్నామ్ ।
ఏతాం పాతుం భరతక్షోణీం జాయే జిష్ణోః కురు మాం శక్తమ్ ॥ ౩౯౯॥

క్లృప్తైః సమ్యగ్బృహతీఛన్దస్యేతైర్మాత్రసమకైర్వృత్తైః ।
కర్ణాధ్వానం ప్రవిశద్భిస్సా పౌలోమ్యమ్బాపరితృప్తాస్తు ॥ ౪౦౦॥

॥ చతుర్థం బార్హతం శతకం సమాప్తమ్ ॥

॥ అథ పఞ్చమం పాఙ్క్తం శతకమ్ ॥
॥ ప్రథమో మయూరసారిణీపాదః ॥
ప్రేమవాసభూమిరచ్ఛభావస్థానమానమజ్జనాఘహా మే ।
ఇన్ద్రసున్దరీ ముఖాబ్జభాసీ మన్దహాస ఆపదం ధునోతు ॥ ౪౦౧॥

వీక్షితైః కృపాన్వితైర్హరన్తీ పాతకాని మఙ్గలం భణన్తీ ।
జమ్భభేదిజీవితేశ్వరీ మే జన్మదేశముజ్జ్వలం కరోతు ॥ ౪౦౨॥

అమ్బరం చ దేవతానతభ్రూరమ్బ తే తనుద్వయం యదుక్తమ్ ।
ఆదిమా తయోర్వృషాకపిం తం దేవ్యజీజనత్పరా జయన్తమ్ ॥ ౪౦౩॥

ఏతమేవ దేవి లోకబన్ధుం సూరయో వృషాకపిం భణన్తి ।
వర్షహేతుదీధితిర్వృషాయం కం పిబన్ కరైః కపిర్నిరుక్త్ః ॥ ౪౦౪॥

కేచిదిన్ద్రనారి చన్ద్రరేఖాశేఖరం వృషాకపిం గదన్తి ।
పణ్డితాః పరే తు శేషశయ్యాశాయినం వృషాకపిం తమాహుః ॥ ౪౦౫॥

బ్రహ్మణస్పతిం తు వైద్యుతాగ్నేరంశజం మరుద్గణేషు ముఖ్యమ్ ।
విశ్వరాజ్ఞి విఘ్నరాజమేకే విశ్రుతం వృషాకపిం వదన్తి ॥ ౪౦౬॥

భాస్కరశ్చ శఙ్క్రశ్చ మాతర్మాధవశ్చ మన్త్రనాయకశ్చ ।
ఆత్మజేషు తే న సన్తి నాన్తర్వ్యాపకాన్తరిక్షవిగ్రహాయాః ॥ ౪౦౭॥

వాసవోఽపి దేవి దేవతాత్మా వల్లభస్తవ చ్ఛలాఙ్గనాయాః ।
ఆత్మజాత ఏవ కీర్తనీయో దేవతాపథేన దేహవత్యాః ॥ ౪౦౮॥

సాశవస్యుదీరితాసి ధీరైర్దేహినీ విహాయసేన్ద్రసూస్త్వమ్ ।
లిఙ్గభేదతోఽనురూపతస్తత్కీర్తనం శవో హి శక్తివాచి ॥ ౪౦౯॥

నాదితిర్విభిద్యతే శవస్యాస్సర్వదేవ మాతరం విదుర్యామ్ ।
సా మరుత్ప్రసూరభాణి పృశ్నిః సాపి భిద్యతే తతో న దేవ్యాః ॥ ౪౧౦॥

శక్తిరేవ సా న్యగాది పృశ్నిశ్శక్తిరేవ సాఽదితిర్న్యభాణి ।
శక్తిరేవ సాఽభ్యధాయి భద్రా శక్తిరేవ సా శవస్యవాది ॥ ౪౧౧॥

విజ్జనః ప్రకృష్టశక్తిభాగం శబ్దమేవ పృశ్నిమాహ ధేనుమ్ ।
యా పరైర్బుధైరభాణి గౌరీ మానవేష్టభాషయైవ నారీ ॥ ౪౧౨॥

వ్యాపకత్వకల్పితం విశాలం దేశమేవ శక్తిభాగమాహుః ।
బుద్ధిశాలినోఽదితిం సవిత్రీం యా పరైర్విచక్షణైః స్మృతా ద్యౌః ॥ ౪౧౩॥

నిత్యమోదరూపశక్తిభాగం పణ్డితాః ప్రకీర్తయన్తి భద్రామ్ ।
ఉక్తిభేదచాతురీప్రలుబ్ధాః సూరయః పరే శివాం జుగుర్యామ్ ॥ ౪౧౪॥

వీర్యరూపభాగ ఏవ గణ్యః పణ్డితైః శవస్యభాణి శక్తేః ।
ఓజసో న సోఽతిరిచ్య తేంశో భిద్యతే తతో న వజ్రముగ్రమ్ ॥ ౪౧౫॥

వజ్రమేవ భాషయా పరేషాముచ్యతే ప్రచణ్డచణ్డికేతి ।
యద్విభూతిలేశచుమ్బితాత్మా జీయతే న కేనచిత్పృథివ్యామ్ ॥ ౪౧౬॥

సర్వతో గతిశ్శచీతి శక్తిః కీర్త్యతే బుధైరుదారకీర్తిః ।
సర్వభాగవాచకం పదం తత్ పావనం పురాతనం ప్రియం నః ॥ ౪౧౭॥

యశ్శచీతి నామకీర్తయేన్నా పుష్కరేణ తే శరీరవత్యాః ।
దివ్యసున్దరీ తనోరుతాహో తం పరాభవేన్న దేవి పాపమ్ ॥ ౪౧౮॥

అమ్బరం వరం తవామ్బ కాయం యస్సదా విలోకయన్నౌపాస్తే ।
లోకజాలచక్రవర్తిజాయే తం పరాభవేన్న దేవి పాపమ్ ॥ ౪౧౯॥

పూర్ణిమాసుధాంశుబిమ్బవక్త్రం ఫుర్వింఆరిజాతపత్రనేత్రమ్ ।
శుభ్రతానిధానమన్దహాసం కాలమేఘకల్పకేశపాశమ్ ॥ ౪౨౦॥

రత్న్దర్పణాభమఞ్జుగణ్డం చమ్పకప్రసూనచారునాసమ్ ।
కున్దకుడ్మలాభకాన్తదన్తం కల్పపర్వింఆభదన్తచేలమ్ ॥ ౪౨౧॥

సద్వరాభయప్రదాయిహస్తం సర్వదేవవన్ద్యపాదకఞ్జమ్ ।
దివ్యరత్నభూషణైరనర్ఘైర్భూషితం కనత్సువర్ణవర్ణమ్ ॥ ౪౨౨॥

దివ్యశుక్ల్వస్త్రయుగ్మధారి స్వర్గసార్వభోమనేత్రహారి ।
యః స్మరేద్వరాఙ్గనావపుస్తే తం పరాభవేన్న దేవి పాపమ్ ॥ ౪౨౩॥

భారతక్షితేరిదం జనన్యాశ్శోకజన్యబాష్పవారి హర్తుమ్ ।
దేహి శక్తిమాశ్రితాయ మహ్యం పాహి ధర్మమిన్ద్రచిత్తనాథే ॥ ౪౨౪॥

సద్వసిష్ఠసన్తతేరిమాభిస్సత్కవేర్మయూరసారిణీభిః ।
సమ్మదం ప్రయాతు శక్రచేతస్సమ్ప్రమోహినీసరోజనేత్ర ॥ ౪౨౫॥

॥ ద్వితీయో మనోరమాపాదః ॥
హసితమాతతాయిపాతకప్రమథనప్రసిద్ధవిక్రమమ్ ।
అమరభూమిపాలయోషితో మమ కరోతు భూరిమఙ్గలమ్ ॥ ౪౨౬॥

కరుణయా ప్రచోదితా క్రియాద్భరతభూమిమక్షయశ్రియమ్ ।
చరణకఞ్జరాజదిన్దిరా సురనరేశ్వరస్య సున్దరీ ॥ ౪౨౭॥

న భవనం న వా జగత్పృథఙ్నివసనాయ తే సురార్చతే ।
యదఖిలాని విష్టపాని తే వపుషి సర్వమన్దిరాణి చ ॥ ౪౨౮॥

మతిదవిష్ఠసీమభాసురం తవ శరీరమేవ పుష్కరమ్ ।
పరమపూరుషస్య వల్లభే భువనమేకముచ్యతే బుధైః ॥ ౪౨౯॥

తరణయస్సుధాంశవస్తథా సహ భువా గ్రహాః సహస్రశః ।
అయి జగన్తి విస్తృతాని తే వపుషి పుష్కరే జగత్యజే ॥ ౪౩౦॥

బహుభిరుష్ణభానుభిక్ర్తతాత్ బహుభిరిన్దుభిర్వశీకృతాత్ ।
వియతి లోకజాలధాత్రి తే శతగుణం బలం ప్రశిశ్యతే ॥ ౪౩౧॥

న విభురేకకస్య భాస్వతో విభవమేవ నా ప్రభాషితుమ్ ।
కిముత తే దధాసి యోదరే ద్యుతిమతాం శతాని తాదృశామ్ ॥ ౪౩౨॥

ఇహ విహాయసా శరీరిణీమతిసమీపవాసినీమపి ।
న ఖలు కోఽపి లోకితుం ప్రభుర్భగవతీం పరామయుక్తధీః ॥ ౪౩౩॥

తదిదముచ్యతే జనో జగద్వపురమేయమాదిదేవి తే ।
జనయతే యతోఽఖిలం దృశోర్విషయభూతమేతదాతతమ్ ॥ ౪౩౪॥

బహులతారకాగణైర్యుతం కిమపి ఖం తవేహ వర్ష్మణి ।
శచి విభజ్య భాషయైకయా సుకవయో మహోజగద్విదుః ॥ ౪౩౫॥

ఇదమినేన్దుభూవిలక్షణైర్దినకరైస్సుధాకరైర్గ్రహైః ।
బహుజగద్భిరన్వితం మహోజగదశేషధాత్రి నైకకమ్ ॥ ౪౩౬॥

అజరమవ్యయం సనాతనం మునిజనైకవేద్యవైభవమ్ ।
న భవతీం వినా తపోజగత్పృథగశేషనాథనాయికే ॥ ౪౩౭॥

సకలదృశ్యమూలకారణం తవ చ సంశ్రయో నిరాశ్రయః ।
జనని సత్యలోక సంజ్ఞయా పరమపూరుషోఽభిధీయతే ॥ ౪౩౮॥

అయి పురాతనర్షిభాషయా గగనమేతదాప ఈరితాః ।
అథ యదాసువీర్యముజ్ఝితం భగవతస్త్వమేవ తత్పరే ॥ ౪౩౯॥

శచి విరాడ్భవత్యభాషత శ్రుతిరపీదమేవ నామ తే ।
వితతవిశ్వవిగ్రహాత్మని ప్రథితమేతదాహ్మయం పరమ్ ॥ ౪౪౦॥

ఉపనిషద్గిరా విరాడ్వధూః పురుష ఏష భాషయాన్యయా ।
ఉభయథాపి సాధు తత్పదం భవతి తే న సంశయాస్పదమ్ ॥ ౪౪౧॥

న వనితా న వా పుమాన్ భవేజ్జగతి యోఽన్తరశ్శరీరిణామ్ ।
తనుషు లిఙ్గభేదదర్శనాత్ తనుమతశ్చ లిఙ్గముచ్యతే ॥ ౪౪౨॥

అఖిలనాథవీర్యధారణాన్న్గనభూమిరఙ్గనామతా ।
సకలలోకబీజభృత్త్వతో గగనదేశ ఏష పూరుషః ॥ ౪౪౩॥

స్ఫుటవిభక్తగాత్రలక్ష్మణాం నియతవాదినామదర్శనాత్ ।
న పురుషో వియద్యథా వయం న వనితా వియద్యథైవ నః ॥ ౪౪౪॥

అభివిమానతోఽథ వా శచీ విబుధరాజయోర్విలక్షణాత్ ।
వరవిలసినీ వియత్తనుస్సదవికారముత్తమః పుమాన్ ॥ ౪౪౫॥

హృదయమల్పమప్యదో జనన్యనవమం విశాలపుష్కరాత్ ।
విమలదేహదుర్గమధ్యగం సకలరాజ్ఞి సౌధమస్తు తే ॥ ౪౪౬॥

వికసితం నిజాంశువీచిభిక్ర్తదయమాలయం విశామ్బ మే ।
వికచముష్ణభానుభానుభిర్దశశతచ్ఛదం యథా రమా ॥ ౪౪౭॥

హృదయసాధుసౌధశాయినీం నయనరమ్యహర్మ్యచారిణీమ్ ।
భువనరాజచిత్తమోహినీం నమత తాం పరాం విలాసినీమ్ ॥ ౪౪౮॥

తవ పరే మరీచివీచయస్తనుగుహాం ప్రవిశ్య విశ్రుతే ।
భరతభూమిరక్షణోద్యతం గణపతిం క్రియాసురుజ్జ్వలమ్ ॥ ౪౪౯॥

గణపతేర్మనోరమా ఇమాస్సుగుణవేదినాం మనోరమాః ।
అవహితా శృణోతు సాదరం సురమహీపతేర్మనోరమాః ॥ ౪౫౦॥

॥ తృతీయో మణిరాగపాదః ॥
జ్యోతిషాం నృపతిః సకలానాం శాన్తిమేవ సదాభిదధానః ।
నిర్మలో హరతాత్సురరాజ్ఞీమన్దహాసలవో మమ పాపమ్ ॥ ౪౫౧॥

దుష్టలోకదవిష్ఠపదాబ్జా శిష్టశోకనివారణదక్షా ।
నాకలోకమహీపతిరామా భారతస్య ధునోత్వసుఖాని ॥ ౪౫౨॥

దేవమౌలిమణీకిరణేభ్యో విక్రమం స్వయమేవ దదానా ।
దేవరాజవధూపదపద్మశ్రీస్తనోతు సదా మమ భద్రమ్ ॥ ౪౫౩॥

దేవి తే వదనం బహుకాన్తం సాక్షి తత్ర పురన్దరచేతః ।
అమ్బ తే చరణావతికాన్తావత్ర సాక్షి మనః స్మరతాం నః ॥ ౪౫౪॥

భాసురం సురసంహతివన్ద్యం సున్దరం హరిలోచనహారి ।
పావనం నతపాపవిదారి స్వర్గరాజ్ఞి పదం తవ సేవే ॥ ౪౫౫॥

జఙ్ఘికే జయతస్తవ మాతః స౪ ఏవ రుచాం యదధీనః ।
వాసవస్య దృశాం చ సహస్రం యద్విలోకనలోభవినమ్రమ్ ॥ ౪౫౬॥

సక్థినీ తవ వాసవకాన్తే రామణీయకసారనిశాన్తే ।
వన్దతే వినయేన మమేయం వన్దినస్తవ పావని వాణీ ॥ ౪౫౭॥

ఇన్ద్రనారి కటిస్తవ పృథ్వీమణ్డలస్యతులా మహనీయే ।
మధ్యమో నభసః ప్రతిమానం భోగినాం భువనస్య చ నాభిః ॥ ౪౫౮॥

ధీరతాం కురుతే విగతాసుం సా సుపర్వపతేర్నిశితాగ్రా ।
సా తవామ్బ మనోభవశస్త్రీ రోమరాజిరఘం మమ హన్తు ॥ ౪౫౯॥

రోమరాజిభుజఙ్గశిశుస్తే దేవి దేవపతేర్హృదయస్య ।
దంశనేన కరోత్యయి మోహం జీవితాయ చిరాయ విచిత్రమ్ ॥ ౪౬౦॥

పూర్ణహేమఘటవివ శక్రావాహితాం దధతావయి శక్తిమ్ ।
విశ్వపోషణకర్మణి దక్షావమ్బ దుగ్ధధరౌ జయతస్తే ॥ ౪౬౧॥

లోకమాతరురోరుహపూర్ణస్వర్ణకుమ్భగతా తవ శక్తిః ।
లోకపాలనకర్మణి వీర్యం దేవి వజ్రధరస్య బిభర్తి ॥ ౪౬౨॥

అక్షయామృతపూర్ణఘటౌ తే శక్రపత్ని కుచై తవ పీత్వా ।
లోకబాధకభీకరరక్షో ధూననే ప్రబభూవ జయన్తః ॥ ౪౬౩॥

హస్తయోస్తవ మార్దవమిన్ద్రో భాషతాం సుషమామపి దేవః ।
దాతృతామనయోర్మునివర్గో వర్ణయత్యజరే పటుతాం చ ॥ ౪౬౪॥

పుష్పమాల్యమృదోరపి బాహోః శక్తిరుగ్రతమాశరనాశే ।
దృశ్యతే జగతామధిపే తే భాషతాం తవ కస్తనుతత్త్వమ్ ॥ ౪౬౫॥

కమ్బుకణ్ఠి తవేశ్వరి కణ్ఠస్తారహారవితానవిరాజీ ।
దేవరాడ్భుజలోచనపథ్యో దేవి మే భణతాద్బహుభద్రమ్ ॥ ౪౬౬॥

ఆననస్య గభస్తినిధేస్తే రామణీయకమద్భుతమీష్టే ।
అప్యమర్త్యనుతాఖిలసిద్ధేర్వాసవస్య వశీకరణాయ ॥ ౪౬౭॥

న ప్రసన్నమలం రవిబిమ్బిం చన్ద్రబిమ్బమతీవ న భాతి ।
సుప్రసన్నమహోజ్జ్వలమాస్యం కేన పావని తే తులయామః ॥ ౪౬౮॥

లోచనే తవ లోకసవిత్రి జ్యోతిషః శవసశ్చ నిధానే ।
వక్తుమబ్జసమే నను లజ్జే ధోరణీమనుసృత్య కవీనామ్ ॥ ౪౬౯॥

ఆయతోజ్జ్వలపక్ష్మలనేత్రా చమ్పకప్రసవోపమనాసా ।
రత్నదర్పణరమ్యకపోలా శ్రీలిపిద్యుతిసున్దరకర్ణా ॥ ౪౭౦॥

అష్టమీశశిభాసురభాలా విష్టపత్రయచాలకలీలా ।
స్మేరచారుముఖీ సురభర్తుః ప్రేయసీ విదధాతు శివం మే ॥ ౪౭౧॥

మన్దహాసలవేషు వలక్షా మేచకా చికురప్రకరేషు ।
శోణతామధరే దధతీ సా రక్షతు ప్రకృతిస్త్రిగుణా నః ॥ ౪౭౨॥

సర్వలోకవధూజనమధ్యే యాం శ్రుతిస్సుభగామభిధత్తే ।
యా దివో జగతో రుచిసారస్తాం నమామి పురన్దరరామామ్ ॥ ౪౭౩॥

స్వర్గభూపతిలోచనభాగ్యశ్రీశ్శరీరవతీ జలజాక్షీ ।
భారతస్య కరోతు సమర్థం రక్షణే నరసింహతనూజమ్ ॥ ౪౭౪॥

లోకమాతురిమే రమణీయాః పాకశాసనచిత్తరమణ్యాః ।
అర్పితాః పదయోర్విజయన్తాం సత్కవేః కృతయో మణిరాగాః ॥ ౪౭౫॥

॥ చతుర్థో మేఘవితానపాదః ॥
అమరక్షితిపాలకచేతో మదనం సదనం శుచితాయాః ।
స్మితమాదివధూవదనోత్త్థం హరతాదఖిలం కలుషం మే ॥ ౪౭౬॥

సుతరామధనామతిఖిన్నామధునా బహులం విలపన్తీమ్ ।
పరిపాతు జగత్త్రయనేత్రీ భరతక్షితిమిన్ద్రపురన్ధ్రీ ॥ ౪౭౭॥

స్థలమేతదమర్త్యనృపాలప్రమదే తవ మేఘవితానమ్ ।
అయి యత్ర పరిస్ఫుసీశే తటిదుజ్జ్వలవేషధరా త్వమ్ ॥ ౪౭౮॥

తటితా తవ భౌతికతన్వా జితమమ్బుధరే విలసన్త్యా ।
ఉపమా భువి యా లలితానాం యువచిత్తహృతాం వనితానామ్ ॥ ౪౭౯॥

స్ఫురితం తవ లోచనహారి స్తనితం తవ ధీరగభీరమ్ ।
రమణీయతయా మిలితా తే శచి భీకరతా చపలాయాః ॥ ౪౮౦॥

చపలే శచి విస్ఫురసీన్ద్రం ఘనజాలపతిం మదయన్తీ ।
దితిజాతమవగ్రహసంజ్ఞం జనదుఃఖకరం దమయన్తీ ॥ ౪౮౧॥

ప్రభుమభ్రపతిం రమయన్తీ దురితం నమతాం శమయన్తీ ।
హరితాం తిమిరాణి హరన్తీ పవమానపథే విలసన్తీ ॥ ౪౮౨॥

అలఘుస్తనితం విదధానా బలముగ్రతమం చ దధానా ।
హృదయావరకం మమ మాయాపటలం తటిదాశు ధునోతు ॥ ౪౮౩॥

సురపార్థవజీవితనాథే నిఖిలే గగనే ప్రవహన్త్యాః ।
తటితస్తవ వీచిషు కాచిచ్చపలా లసతీహ పయోదే ॥ ౪౮౪॥

విబుధప్రణుతే ధనికానాం భవనేషు భవన్త్యయి దీపాః ।
పటుయన్త్రబలాదుదితానాం తవ దేవి లవాః కిరణానామ్ ॥ ౪౮౫॥

వ్యజనాని చ చాలయసి త్వం బత సర్వజగన్నఋపజాయే ।
విబుధోఽభిదధాత్వథవా కో మహతాం చరితస్య రహస్యమ్ ॥ ౪౮౬॥

ఇహ చాలిత ఈడ్యమనీషైరయి యన్త్రవిశేషవిధిజ్ఞైః ।
బహులాద్భుతకార్యకలాపస్తటితస్తవ మాతరధీనః ॥ ౪౮౭॥

అచరస్తరుగుల్మలతాదిః సకలశ్చ చరో భువి జన్తుః ।
అనితి ప్రమదే సురభర్తుస్తటితస్తవ దేవి బలేన ॥ ౪౮౮॥

మనుతే నిఖిలోఽపి భవత్యా మనుజోఽనితి వక్తిశృణోతి ।
అవలోకయతే చ భణామః కిము తే జగదమ్బ విభూతిమ్ ॥ ౪౮౯॥

అతిసూక్ష్మపవిత్రసుషుమ్ణాపథతస్తనుషు ప్రయతానామ్ ।
కులకుణ్డకృశానుశిఖా త్వం జ్వలసి త్రిదశాలయనాథే ॥ ౪౯౦॥

ఇతరో న సురక్షితిపాలాత్కులకుణ్డగతో జ్వలనోఽయమ్ ।
ఇతరేన్ద్రవిలాసిని న త్వత్కులకుణ్డకృశానుశిఖేయమ్ ॥ ౪౯౧॥

కులకుణ్డకృశానుశిఖాయాః కిరణైః శిరసి స్థిత ఏషః ।
ద్రవతీన్దురనారతమేతద్వపురాత్మమయం విదధానః ॥ ౪౯౨॥

మదకృద్బహులామృతధారాపరిపూతమిదం మమ కాయమ్ ।
విదధాసి భజన్మనుజాప్తే కులకుణ్డధనంజయదీప్తే ॥ ౪౯౩॥

శిరసీహ సతః సితభానోరమృతేన వపుర్మదమేతి ।
హృది భాత ఇనస్య చ భాసా మతిమేతు పరాం శచి చేతః ॥ ౪౯౪॥

మమ యోగమదేన న తృప్తినిజదేశదశావ్యథితస్య ।
అవగన్తుముపాయమమోఘం శచి భాసయ మే హృది భానుమ్ ॥ ౪౯౫॥

విదితః ప్రమదస్య విధాతుః శశినో జనయిత్రి విలాసః ।
అహముత్సుక ఈశ్వరి భానోర్విభవస్య చ వేత్తుమియత్తామ్ ॥ ౪౯౬॥

వరుణస్య దిశి ప్రవహన్తీ మదమమ్బ కరోషి మహాన్తమ్ ।
దిశి వజ్రభృతః ప్రవహన్తీ కురు బుద్ధిమకుణ్ఠితసిద్ధిమ్ ॥ ౪౯౭॥

అమలామధిరుహ్య సుషుమ్ణాం ప్రవహస్యధునామ్బ మదాయ ।
అమృతామధిరుహ్య చ కిఞ్చిత్ప్రివహేశ్వరి బుద్ధిబలాయ ॥ ౪౯౮॥

భరతక్షితిక్షణకర్మణ్యభిధాయ మనోజ్ఞముపాయమ్ ।
అథ దేవి విధాయ చ శక్తం కురు మాం కృతినం శచి భక్తమ్ ॥ ౪౯౯॥

నరసింహసుతేన కవీనాం విభునా రచితైః కమనీయైః ।
పరితృప్యతు మేఘవితానైర్మరుతామధిపస్య పురన్ధ్రీ ॥ ౫౦౦॥

॥ పఞ్చమం పాఙ్క్తం శతకం సమాప్తమ్ ॥

॥ అథ షష్ఠం త్రైష్టుభం శతకమ్ ॥
॥ ప్రథమ ఉపజాతిపాదః ॥
మన్దోఽపి బోధం విదధన్మునీనాం స్వచ్ఛోఽపి రాగం త్రిదశేశ్వరస్య ।
అల్పోఽపి ధున్వన్హరితాం తమాంసి స్మితాఙ్కురో భాతు జయన్తమాతుః ॥ ౫౦౧॥

అశేషపాపౌఘనివారణాయ భాగ్యస్య పాకాయ చ దేవరాజ్ఞీ ।
శోకాకులాం భారతభూమిమేతాం లోకస్య మాతా హృదయే కరోతు ॥ ౫౦౨॥

ధర్మద్విషామిన్ద్రనిరాదరాణాం సంహారకర్మణ్యతిజాగరూకామ్ ।
దేవీం పరాం దేవపథే జ్వలన్తీం ప్రచణ్డచణ్డీం మనసా స్మరామి ॥ ౫౦౩॥

వ్యాప్తా తటిద్వా గగనే నిగూఢా నారీ సురేశానమనోరమా వా ।
శక్తిః సుషుమ్ణాపథచారిణీ వా ప్రచణ్డచణ్డీతి పదస్య భావః ॥ ౫౦౪॥

సమస్తలోకావనినాయికాయాః సుపర్వమార్గేణ శరీరవత్యాః ।
మాతుర్మహోంశం మహనీయసారం విజ్ఞానవన్తస్తటితం భణన్తి ॥ ౫౦౫॥

నిగూఢతేజస్తనురమ్బికేయం ప్రచణ్డచణ్డీ పరితో లసన్తీ ।
అవ్యక్త్శబ్దేన శరీరవత్యాః కాల్యాః కవీనాం వచనేషు భిన్నా ॥ ౫౦౬॥

శబ్దం వినా నైవ కదాపి తేజస్తేజో వినా నైవ కదాపి శబ్దః ।
శక్తిద్వయం సన్తతయుక్తమేతత్కథం స్వరూపేణ భవేద్విభక్తమ్ ॥ ౫౦౭॥

ఏకైవ శక్తిర్జ్వలతి ప్రకృష్టా స్వరత్యపి ప్రాభవతః సమన్తాత్ ।
క్రియావిభేదాదిహ పణ్డితానాం శక్తిద్వయోక్తిస్తు సమర్థనీయా ॥ ౫౦౮॥

ఏకక్రియాయాశ్చ ఫలప్రభేదాత్పునర్విభాగః క్రియతే బహుజ్ఞైః ।
కాలీం చ తారాం స్వరమగ్ర్యమాహుః ప్రచణ్డచణ్డీం లలితాం చ తేజః ॥ ౫౦౯॥

సమ్పద్యతే శబ్దగతేర్హి కాలః శబ్దో వరేణ్యస్తదభాణి కాలీ ।
ధ్యాతేన శబ్దేన భవం తరేద్యద్సుధాస్తతః శబ్దముశన్తి తారామ్ ॥ ౫౧౦॥

యదక్షరం వేదవిదామృషీణాం వేదాన్తినాం యః ప్రణవో మునీనామ్ ।
గౌరీ పురాణేషు విపశ్చితాం యా సా తాన్త్రికాణాం వచనేన తారా ॥ ౫౧౧॥

సమ్పద్యతే సంహృతిరోజసా యత్ప్రచణ్డచణ్డీ తదుదీరితౌజః ।
సిధ్యేదశేషోఽనుభవో యదోజస్యతో బుధాస్తాం లలితాం వదన్తి ॥ ౫౧౨॥

ప్రచణ్డచణ్డీం లఘునా పదేన చణ్డీం విదుః కేచన బుద్ధిమన్తః ।
ఏకే విదః శ్రేష్ఠమహోమయీం తాం లక్ష్మీం మహత్పూర్వపదాం వదన్తి ॥ ౫౧౩॥

అతీవ సౌమ్యం లలితేతి శబ్దం ప్రచణ్డచణ్డీతి పదం చ భీమమ్ ।
దేవీ దధానా సుతరాం మనోజ్ఞా ఘోరా చ నిత్యం హృది మే విభాతు ॥ ౫౧౪॥

ప్రచణ్డచణ్డీం తు శరీరభాజాం తనూషు యోగేన విభిన్నశీర్షామ్ ।
శక్తిం సుషుమ్ణాసరణౌ చరన్తీం తాం ఛిన్నమస్తాం మునయో వదన్తి ॥ ౫౧౫॥

కపాలభేదో యది యోగవీర్యాత్సమ్పద్యతే జీవత ఏవ సాధోః ।
తమేవ సన్తః ప్రవదన్తి శీర్షచ్ఛేదం శరీరాన్తరభాసి శక్తేః ॥ ౫౧౬॥

ఉదీర్యసే నిర్జరరాజపత్ని త్వం ఛిన్నమస్తా యమినాం తనూషు ।
ఉజ్జఋమ్భణే విశ్వసవిత్రి యస్యాః కాయం భవేద్వైద్యుతయన్త్రతుల్యమ్ ॥ ౫౧౭॥

పితుర్నియోగాత్తనయేన కృత్తే మస్తే జనన్యాః కిల రేణుకాయాః ।
త్వమావిశః పావని తత్కబన్ధం తద్వా త్వముక్తాసి నికృత్తమస్తా ॥ ౫౧౮॥

ఛిన్నం శిరః కీర్ణకచం దధానాం కరేణ కణ్ఠోద్గతరక్తధారామ్ ।
రామామ్బికాం దుర్జనకాలరాత్రిం దేవీం పవిత్రం మనసా స్మరామి ॥ ౫౧౯॥

ధ్రువో రమా చన్ద్రధరస్య రామా వాగ్వజ్రవైరోచసదీర్ఘనిర్యే ।
కూర్చద్వయం శస్త్రకృశానుజాయే విద్యానృపార్ణా సురరాజశక్తేః ॥ ౫౨౦॥

మాయాద్వివారం యది సైకవర్ణా విద్యైకవర్ణా యది ధేనురేకా ।
ధేన్వాది సమ్బోధనమస్త్రమగ్నేర్విలాసినీ చేతి ధరేన్దువర్ణా ॥ ౫౨౧॥

చతుష్టయేత్రన్యతమం గృహీత్వా మన్త్రం మహేన్ద్రస్య మనోధినాథామ్ ।
భజేత యస్తాన్త్రికదివ్యభావమాశ్రిత్య సిద్వీః సకలాః స విన్దేత్ ॥ ౫౨౨॥

సంహోత్రమిత్యద్భుతశక్తియుక్తం వృషాకపేర్దర్శనమమ్బ మన్త్రమ్ ।
యో వైదికం తే మనుజో భజేత కిఞ్చిన్న తస్యేహ జగత్యసాధ్యమ్ ॥ ౫౨౩॥

ప్రచణ్డచణ్డి ప్రమదే పురాణి పురాణవీరస్య మనోధినాథే ।
ప్రయచ్ఛ పాతుం పటుతాం పరాం మే పుణ్యామిమామార్యనివాసభూమిమ్ ॥ ౫౨౪॥

ప్రపఞ్చరాజ్ఞీం ప్రథితప్రభావాం ప్రచణ్డచణ్డీం పరికీర్తయన్త్యః ।
ఏతాః ప్రమోదాయ భవన్తు శక్తేరుపాసకానాముపజాతయో నః ॥ ౫౨౫॥

॥ ద్వితీయో రథోద్ధతాపాదః ॥
క్షాలనాయ హరితాం విభూతయే విష్టపస్య మదనాయ వజ్రిణః ।
తజ్జయన్తజననీముఖాబ్జతో నిర్గతం స్మితమఘం ధునోతు నః ॥ ౫౨౬॥

అన్నలోపకృశభీరుకప్రజాం భిన్నభావబలహీననేతృకామ్ ।
వాసవస్య వరవర్ణినీ పరైరర్దితామవతు భారతావనిమ్ ॥ ౫౨౭॥

పాణిపాదమనిమేషరాజ్ఞి తే పారిజాతనవపల్లవోపమమ్ ।
అక్షపావిరహమఙ్గభాసరిద్వాసిచక్రమిథునం కుచద్వయమ్ ॥ ౫౨౮॥

పూర్ణచన్ద్రయశసోఽపహారకం సమ్ప్రసాదసుషమాస్పదం ముఖమ్ ।
జ్ఞానశక్తిరుచిశేవధీదృశౌ రక్త్వర్ణకసుధాఘనోఽధరః ॥ ౫౨౯॥

మర్దయత్తిమిరముద్ధతం దిశాం అల్పమప్యధికవైభవం స్మితమ్ ।
ప్రావృడన్తయమునాతరఙ్గవన్నత్న్లచారురతిపావనః కచః ॥ ౫౩౦॥

వల్లకీం చ పరుషధ్వనిం వదన్ దుఃఖితస్య చ ముదావహః స్వరః ।
చారు హావశబలాఽలసా గతిః కాయధామవచసాం న పద్ధతౌ ॥ ౫౩౧॥

యోగసిద్ధిమతులాం గతా మతిశ్చాతురీ చ బుధమణ్డలస్తుతా ।
విష్టపత్రితయరాజ్యతోఽప్యసి త్వం సుఖాయ మహతే బిడౌజసః ॥ ౫౩౨॥

త్వాముదీక్ష్య ధృతదేవతాతనుం దీప్తపక్ష్మలవిశాలలోచనామ్ ।
ఆదితో జనని జన్మినామభూద్ వాసవస్య రతిరాదిమే రసే ॥ ౫౩౩॥

ఆదిమం రసమనాదివాసనా వాసితౌ ప్రథమమన్వగృహ్ణతామ్ ।
సమ్మదస్య నిధిమాదిదమ్పతీ సోఽచలత్త్రిభువనే తతః క్రమః ॥ ౫౩౪॥

జ్యాయసా దివిషదాం పురాతనీ నీలకఞ్జనయనా విలాసినీ ।
యద్విహారమతనోత్ప్రరోచనం తత్సతామభవదాదిమే రసే ॥ ౫౩౫॥

న త్వదమ్బ నలినాననాఽధికా నాపి నాకపతితోఽధికః పుమాన్ ।
నాధికం చ వనమస్తి నన్దనాన్నాదిమాదపి రసోఽధికో రసాత్ ॥ ౫౩౬॥

నాయికా త్వమసమానచారుతా నాయకః స మరుతాం మహీపతిః ।
నన్దనం చ రసరఙ్గభూః కథం మన్మథస్య న భవేదిహోత్సవః ॥ ౫౩౭॥

దేవి వాం మృతికథైవ దూరతో జాతుచిద్గలతి నైవ యౌవనమ్ ।
కాఙ్క్షితః పరికరో న దుర్లభః కిం రసః పరిణమేదిహాన్యథా ॥ ౫౩౮॥

విష్టపస్య యువరాజకేశవే త్రాణభారమఖిలం నిధాయ వామ్ ।
క్రీడతోరమరరాజ్ఞి నన్దనే క్రీడితాని మమ సన్తు భూతయే ॥ ౫౩౯॥

యద్యువామమరరాజ్ఞి నన్దనే కుర్వతో రహసి దేవి మన్త్రణమ్ ।
తత్ర చేన్మమ కృతిర్మనాగియం స్పర్శమేతి భువి కో ను మత్కృతీ ॥ ౫౪౦॥

క్రన్దనం యది మమేహ వన్దినో నన్దనే విహరతోః సవిత్రి వామ్ ।
అన్తరాయకృదథాబ్జకాన్తి తే సమ్ప్రగృహ్య చరణం క్షమాపయే ॥ ౫౪౧॥

యోషితామపి విమోహనాకృతిర్మోహనం తు పురుషసంహతేరపి ।
ఇన్ద్రమమ్బరమయాం బభూవిథ త్వం రసార్ద్రహృదయా లసద్రసమ్ ॥ ౫౪౨॥

దివ్యచన్దనరసానులేపనైః పారిజాతసుమతల్పకల్పనైః ।
చారుగీతకృతిభిశ్చ భేజిరే నాకలోకవనదేవతాశ్చ వామ్ ॥ ౫౪౩॥

స్వర్ణదీసలిలశీకరోక్షితాః పారిజాతసుమగన్ధధారిణః ।
నన్దనే త్రిదశలోకరాజ్ఞి వాం కేపి భేజురలసాః సమీరణాః ॥ ౫౪౪॥

ఆదధాసి సకలాఙ్గనాధికే పద్మగన్ధిని సుధాధరాధరే ।
మఞ్జువాణి సుకుమారి సున్దరి త్వం సురేన్ద్రసకలేన్ద్రియార్చనమ్ ॥ ౫౪౫॥

ఆదిదేవి వదనం తవాభవత్ కాన్తిధామ మదనం దివస్పతేః ।
ఆననాదపి రసామృతం కిరన్నిష్క్రమం విలసితం కలం గిరామ్ ॥ ౫౪౬॥

చారువాగ్విలసితాచ్చ నిస్తులప్రేమవీచిరుచిరం విలోకితమ్ ।
వీక్షితాదపి విలాసవిశ్రమస్థానమల్పమలసం శుచిస్మితమ్ ॥ ౫౪౭॥

భాసురేన్ద్రదృఢబాహుపఞ్జరే లజ్జయా సహజయా నమన్ముఖీ ।
తద్విలోచనవికర్షకాలకా పాతు మాం త్రిదివలోకనాయికా ॥ ౫౪౮॥

భారతక్షితివిషాదవారణే తత్సుతం గణపతిం కృతోద్యమమ్ ।
ఆదధాతు పటుమర్జునస్మితా దుర్జనప్రమథనక్షమా శచీ ॥ ౫౪౯॥

చారుశబ్దకలితాః కృతీరిమాః సత్కవిక్షితిభుజో రథోద్ధతాః ।
సా శృణోతు సురమేదినీపతేర్నేత్రచిత్తమదనీ విలాసినీ ॥ ౫౫౦॥

॥ తృతీయో మౌక్తికమాలాపాదః ॥
నిర్మలభాసాం దిశి దిశి కర్తా పుణ్యమతీనాం హృది హృది ధర్తా ।
పాలయతాన్మామనఘవిలాసః శక్రమహిశ్యాః సితదరహాసః ॥ ౫౫౧॥

పుణ్యచరిత్రా మునిజనగీతా వాసవకాన్తా త్రిభువనమాతా ।
వత్సలభావాదవతు విదూనాం భారతభూమిం ధనబలహీనామ్ ॥ ౫౫౨॥

కోటితటిద్వత్తవ తనుకాన్తిః పూర్ణసమాధేస్తవ హృది శాన్తిః ।
వాసవభామే భగవతి ఘోరః శత్రువిదారీ తవ భుజసారః ॥ ౫౫౩॥

ఆశ్రయభూతం సుమధురతాయా ఆలయభూతం జలధిసుతాయాః ।
వాసవదృష్టేస్తవముఖమబ్జం కిఙ్క్రదృష్టేస్తవ పదమబ్జమ్ ॥ ౫౫౪॥

పాదసరోజం వృజినహరం తే యో భజతే నా సురపతికాన్తే ।
తత్ర కటాక్షా అయి శతశస్తే తస్య సమస్తం భగవతి హస్తే ॥ ౫౫౫॥

జ్ఞాపకశక్తిః ప్రతినరమస్తం కారకశక్తిః ప్రతినరహస్తమ్ ।
వాసవచక్షుస్సుకృతఫలశ్రీర్భాతు మమాన్తః సురభువనశ్రీః ॥ ౫౫౬॥

మన్త్రపరాణాం వచసి వసన్తీ ధ్యానపరాణాం మనసి లసన్తీ ।
భక్తిపరాణాం హృది విహరన్తీ భాతి పరామ్బా నభసి చరన్తీ ॥ ౫౫౭॥

సేవకపాపప్రశమననామా దిక్తిమిరౌఘప్రమథనధామా ।
ఉజ్జ్వలశస్త్రా రణభువి భీమా పాతు నతం మాం హరిహయరామా ॥ ౫౫౮॥

యోగిని శక్తిర్విలససి దాన్తిః యోషితి శక్తిర్విలససి కాన్తిః ।
జ్ఞానిని శక్తిర్విలససి తుష్టిః ధన్విని శక్తిర్విలససి దృష్టిః ॥ ౫౫౯॥

సఙ్గిని శక్తిర్విలససి నిద్రా ధ్యాతరి శక్తిర్విలససి ముద్రా ।
వాసవకాన్తే గగననిశాన్తే భాషితుమీశః క్వ ను విభవం తే ॥ ౫౬౦॥

యద్దితిజానాం దమనమవక్రం కేశవహస్తే విలసతి చక్రమ్ ।
తత్ర కలా తే భగవతి భద్రా కాచన భారం వహతి వినిద్రా ॥ ౫౬౧॥

దుష్టనిశాటప్రశమనశీలం యత్ సితభూభృత్పతికరశూలమ్ ।
తత్ర మర్మహోంశస్తవ జగదీశే రాజతి కశ్చిత్పటురరినాశే ॥ ౫౬౨॥

యన్నిజరోచిక్ర్తతరిపుసారం వాసవహస్తే కులిశముదారమ్ ।
తత్ర తవాంశో విలసతి దివ్యః కశ్చన భాసో భగవతి భవ్యః ॥ ౫౬౩॥

అమ్బరదేశే సుమహతి గుప్తా పఙ్క్జబన్ధౌ విలసతి దీప్తా ।
రాజసి మాతర్హిమరుచిశీతా వేదికృశానౌ క్రతుభృతిపూతా ॥ ౫౬౪॥

సూక్ష్మరజోభిర్విహితముదారం యజ్జగదేతన్న్గగనమపారమ్ ।
తత్తవవేదః ప్రవదతి కాయం పావని భానుస్తవ తనుజోఽయమ్ ॥ ౫౬౫॥

ఈశ్వరి నైకస్తవ ఖరతేజాః తేఽపి చ సర్వే జనని తనూజాః ।
ఉజ్వలఖేటాః కువదతి కాయాః పావని కస్తే ప్రవదతు మాయాః ॥ ౫౬౬॥

యా మహిమానం ప్రథయతి భూమిః పావనకీర్తిర్జలనిధినేమిః ।
సేయమపీశే భవతి సుపుత్రీ వాసవజాయే తవ జనధాత్రీ ॥ ౫౬౭॥

అఙ్గ సఖాయో విరమతసఙ్గాశ్వష్ఠ్హర్విషయాణాం కృతమతిభఙ్గాత్ ।
ధ్యాయత చిత్తే ధుతభయబీజం వాసవజాయాచరణసరోజమ్ ॥ ౫౬౮॥

పాపమశేషం సపది విహాతుం శక్తిమనల్పామపి పరిధాతుమ్ ।
చేతసి సాధో కురు పరిపూతం వాసవజాయాపదజలజాతమ్ ॥ ౫౬౯॥

ఈశ్వరి వన్ద్యద్యుతిభృతిమేధే కాఙ్క్షితనీరాణ్యసృజతి మోఘే ।
నిర్మలకీర్తేస్తవ శచి గానం శక్ష్యతి కర్తుం తదుదకదానమ్ ॥ ౫౭౦॥

ఆమయవీర్యాద్విగలతి సారే జీవతి కిఞ్చిద్రిసనగనీరే ।
రక్షతి జన్తుం తవ శచి నామ ప్రాజ్ఞజనైరప్యగణితధామ ॥ ౫౭౧॥

మధ్యమలోకే స్యతి శుచిరుగ్రా రాజసి నాకే విభవసమగ్రా ।
ప్రాణిశరీరే భవసి విచిత్ర వాసవజాయే వివిధచరిత్ర ॥ ౫౭౨॥

వ్యోమ్ని వపుస్తే వినిహతపాపం విశ్రుతలీలం తవ దివి రూపమ్ ।
కర్మవశాత్తే భవతి స భోగః ప్రాణిశరీరే భగవతి భాగః ॥ ౫౭౩॥

భారతభూమేః శుచమపహన్తుం శ్రేష్ఠముపాయం పునరవగన్తుమ్ ।
వాసవజాయే దిశ మమ బుద్ధిం పావని మాయే కురు కురు సిద్ధిమ్ ॥ ౫౭౪॥

సమ్మదయన్తీర్బుధజనమేతాః స్వర్గధరిత్రీపతిసతిపూతాః ।
మౌక్తికమాలాః శృణు నుతికర్తుర్భక్తినిబద్ధాః కవికులభర్తుః ॥ ౫౭౫॥

॥ చతుర్థః సుముఖీపాదః ॥
అజితమినాగ్నితటిచ్ఛశిభిః మమ హృదయస్య తమః ప్రబలమ్ ।
అమరపతిప్రమదాహసితం విమలఘృణిప్రకరైర్హరతు ॥ ౫౭౬॥

సురనృపతేర్దయితా వినతాహితశమనీ లులితామితరైః ।
వరకరుణావరుణాలయదృఙ్మమ జననీమవతాదవనిమ్ ॥ ౫౭౭॥

పటుతపసో జమదగ్నిమునేరిహ సహధర్మచరీం భువనే ।
తనయనికృత్తశిరః కమలాం వరమతిమావిశదిన్ద్రవధూః ॥ ౫౭౮॥

యదుకులకీర్తివిలోపభియా బతవినిగూహ్య ఋతం కవయః ।
మునిగృహిణీ వధహేతుకథామితరపథేన భణన్తి మృషా ॥ ౫౭౯॥

న సురభిరర్జునభూమిపతిర్భృగుతిలకస్య జహార స యామ్ ।
ఇయమమృతాంశుమనోజ్ఞముఖీ పరశుధరస్య జనన్యనఘా ॥ ౫౮౦॥

అతిరథమర్జునభూమిపతిం సహపృతనం జమదగ్నిసుతః ।
యుధి స విజిత్య విశాలయశాః పునరపి మాతరమాహృతవాన్ ॥ ౫౮౧॥

పరగృహవాసకలఙ్కవశాన్నిజగృహిణీం జమదగ్నిమునిః ।
బతవినిహన్తుమనా కలయంస్తనుభవమాదిశదుగ్రమనాః ॥ ౫౮౨॥

పితృవచనాదతిభక్తిమతాప్యసురవదాత్మసుతేన హతామ్ ।
మునిగృహిణీమనఘేతివదంస్తవ వరదేఽవిశదంశ ఇమామ్ ॥ ౫౮౩॥

ఇదమవికమ్ప్యమతిప్రబలం ప్రభవతి కారణమార్యనుతే ।
మునిగృహిణీమనఘాం భణితుం శచి కలయా యది మామవిశః ॥ ౫౮౪॥

ఖలజనకల్పితదుష్టకథాశ్రవణవశాద్వ్యథితం హృదయమ్ ।
అథ చరితేఽవగతే విమలస్మృతివశతో మమ యాతి ముదమ్ ॥ ౫౮౫॥

తవ మహసా విశతా కృపయా మమ శచి సూక్ష్మశరీరమిదమ్ ।
నృపరిపుమాతృపవిత్రకథా స్మరణపథం గమితా సపది ॥ ౫౮౬॥

విదధతురాసురకృత్యముభౌ బహులగుణామపి యద్గృహిణీమ్ ।
స మునిరఘాతయదచ్ఛకథాం దశరథజశ్చ ముమోచ వనే ॥ ౫౮౭॥

అపి వినికృత్తశిరాః శచి తే వరమహసా విశతా సపది ।
అలభత జీవితమమ్బ పునర్భువనశుభాయ మునేస్తరుణీ ॥ ౫౮౮॥

యది శిరసా రహితే వపుషి ప్రకటతయా విలసన్త్యసవః ।
యది హృదయం సహభాతి ధియా కిమివ విచిత్రమితశ్చరితమ్ ॥ ౫౮౯॥

పరశుధరస్య సవిత్రి కలా త్వయి పురుహూతసరోజదృశః ।
స శిరసి కాచిదభూద్రుచిరా విశిరసి భీమతమా భవతి ॥ ౫౯౦॥

పరశుధరోఽర్జునభూమిపతిం యదజయదమ్బ తపోఽత్ర తవ ।
అభజత కారణతామనఘే వరమునిగేయపవిత్రకథే ॥ ౫౯౧॥

భగవతి కృత్తశిరో భవతీ మథితవతీ నృపతీనశుభాన్ ।
ప్రథనభువి ప్రగుణం భుజయోః పరశుధరాయ వితీర్య బలమ్ ॥ ౫౯౨॥

శుభతమకుణ్డలపూర్వసతిః పదనతపాతకసంశమనీ ।
దిశతు నికృత్తశిరాః కుశలం మమ సురపార్థవశక్తికలా ॥ ౫౯౩॥

నిజసుతరఙ్గపతేర్నికటే కృతవసతిర్నతసిద్ధికరీ ।
దలితశిరాః ప్రతనోతు మమ శ్రియమమరేశ్వరశక్తికలా ॥ ౫౯౪॥

భువి తతసహ్యనగాన్తరగే శుభతమచన్ద్రగిరౌ వరదా ।
కృతవసతిః కురుతాన్మమ శం భృగూకులరామజనన్యజరా ॥ ౫౯౫॥

అవతు వికృత్తశిరాః పదయోర్భజకమనిన్ద్యవిచిత్రకథా ।
దినకరమణ్డలమధ్యగృహా సురధరణీపతిశక్తికలా ॥ ౫౯౬॥

గగనచరార్చితపాదుకయా పదనతసన్మతిబోధికయా ।
మమ సతతం శుచిరేణుకయా పరవదిదం కులమమ్బికయా ॥ ౫౯౭॥

శమయితుముగ్రతమం దురితం ప్రథయితుమాత్మనిగూఢబలమ్ ।
గమయితుమగ్రయ్దశాం స్వకులం తవ చరణామ్బుజమమ్బ భజే ॥ ౫౯౮॥

పరవశగామశివేన వృతాం భరతధరాం పరిపాతుమిమామ్ ।
పటుమతివాక్క్రియమాతనుతాద్గణపతిమభ్రహయప్రమదా ॥ ౫౯౯॥

గణపతిదేవమర్మహోంశజుషో గణపతినామకవిప్రకవేః ।
సురపతిజీవసఖీశృణుయాద్దశశతపత్రముఖీ సుముఖీః ॥ ౬౦౦॥

॥ షష్ఠం త్రైష్టుభం శతకం సమాప్తమ్ ॥

॥ అథ సప్తమం జాగతం శతకమ్ ॥
॥ ప్రథమో ద్రుతవిలమ్బితపాదః ॥
సురమహీరమణస్య విలాసినీ జలచరధ్వజజీవితదాయినీ ।
హరతు బోధదృగావరణం తమో హృదయగం హసితేన సితేన మే ॥ ౬౦౧॥

నమదమర్త్యకిరీటకృతైః కిణైః కమఠపృష్ఠనిభే ప్రపదేఽఙ్కితా ।
పరిధునోతు శచీ భరతక్షితేర్వృజినజాలమజాలమకమ్పనమ్ ॥ ౬౦౨॥

అతితరాం నతపాలనలోలయా విబుధనాథమనోహరలీలయా ।
కిరిముఖీముఖశక్త్యుపజీవ్యయా విదితయాదితయా గతిమానహమ్ ॥ ౬౦౩॥

ఘనహిరణ్యమదాపహరోచిషా వనరుహాననయాఽవనదక్షయా ।
గతిమదిన్ద్రమనోరథనాథయా భువనమేవ న మే కులమాత్రకమ్ ॥ ౬౦౪॥

తనుషు వామనమూర్తిధరే విభౌ తమనుయాచ విరాజతి వామనీ ।
శరణవాననయామ్బికయా లసత్ కరుణయాఽరుణయా పదయోరహమ్ ॥ ౬౦౫॥

సకరుణా కుశలం మమ రేణుకాతనురజా తనుతాదుదితో యతః ।
యుధి మునిర్విదధౌ పరశుం దధజ్జనపతీనపతీవ్రభుజామదాన్ ॥ ౬౦౬॥

సుజనశత్రురమాథి ఘనధ్వనిః శచి సరాత్రిచరస్తవ తేజసా ।
జనని రామసహోదరసాయకం ప్రవిశతాఽవిశతాదధికౌజసా ॥ ౬౦౭॥

తవ మహఃకలయాబలమాప్తయా జనని శుమ్భనిశుమ్భమదచ్ఛిదా ।
జగదరక్ష్యత గోపకులేశితుస్తనుజయాఽనుజయార్జునసారథేః ॥ ౬౦౮॥

న వినిరూపయితుం ప్రబభూవ యాం కవిజనో వివిధం కథయన్నపి ।
మునిహృదమ్బుజసౌధతలేన్దిరా జయతి సా యతిసాధుజనావనీ ॥ ౬౦౯॥

ఇమమయి త్రిదివేశ్వరి కల్కినం రుషమపోహ్య సవిత్రి విలోకితైః ।
సురపతేర్ద్విషతోఽఘవతో లసన్ మదనకైరవకైరవలోచనే ॥ ౬౧౦॥

స్మరదమర్త్యనృపాలవిలాసినీం ప్రబలపాతకభీతివినాశినీమ్ ।
ప్రవణయాన్తరనన్యధియా లసద్వినయయానయయామవతీర్మనః ॥ ౬౧౧॥

భగవతీగగనస్థలచారిణీ జయతి సఙ్గరరఙ్గవిహారిణీ ।
సుకృతశత్రుమతిభ్రమకారిణీ హరిహయారిహయాదివిదారిణీ ॥ ౬౧౨॥

శరణవానహమర్జునహాసయా భువనభూపతిహారివిలాసయా ।
దివి పులోమజయా ధవలాచలే గిరిజయాఽరిజయావితదేవయా ॥ ౬౧౩॥

చరణయోర్ధృతయా విజయామహే వయమశేషజగన్నృపజాయయా ।
దివి పులోమజయా ధవలాచలే నగజయా గజయానవిలాసయా ॥ ౬౧౪॥

అరివధాయ విధాయ బుధాధిపం పటుభుజాబలభీషణమాజిషు ।
న భవతీ శచి గచ్ఛతి దుర్గతః క్వచన కాచన కాతరధీరివ ॥ ౬౧౫॥

సపది మానసధైర్యహృతో జగజ్జనని వజ్రతనోర్జ్వలితార్చిషః ।
అరిజనే ప్రథమం తవ వీక్షయా సురపతేరపతేజసి వి క్రమః ॥ ౬౧౬॥

న మననోచితమస్తి పరం నృణాం విబుధరాజవధూపదపద్మతః ।
జగతి దర్శనయోగ్యమిహాపరం న రమణీ రమణీయముఖాబ్జతః ॥ ౬౧౭॥

శరణవానహమస్మి పురాతనప్రమదయా మునిగేయచరిత్రయా ।
స్వబలచాలితనాకజగన్నభో వసుధయా సుధయా సురరాడ్దృశామ్ ॥ ౬౧౮॥

అయమహం గతిమానతిశాన్తయా త్రిదివభూమిపతిప్రియకాన్తయా ।
మనసి మౌనిజనైరతిభక్తితో నిహితయా హితయా సుకృతాత్మనామ్ ॥ ౬౧౯॥

వినయతః స్తుతయా గమయామ్యహం జనిమతాం జనయిత్రి నిశాస్త్వయా ।
ప్రసృతయా కులకుణ్డధనఞ్జయాద్ధృతతనూతతనూతనవేగయా ॥ ౬౨౦॥

సకృదమోఘసరస్వతిసాధుధీ హృదయవేద్యపదామ్బుజసౌష్ఠవే ।
మమ శివం సుమనః పృథివీపతేః సువదనే వద నేత్రలసద్దయే ॥ ౬౨౧॥

దురవగాహపథే పతితం చిరాజ్జనని గమ్యవిలోకనలాలసమ్ ।
స్వయమమర్త్యనృపాలమనోరమే సునయనే నయనేయమిమం జనమ్ ॥ ౬౨౨॥

అవతు నః స్వయమేవ పటూన్ విపద్విమథనాయ విధాయ బుధేశ్వరీ ।
సకలమర్మసువీతదయైః పరైర్వినిహతానిహ తాపవతః శచీ ॥ ౬౨౩॥

సురధరాపతిజీవితనాథయా స్వజననక్షితిరక్షణకర్మణి ।
పటుతమో జన ఏష విధీయతామిహ తయా హతయా తు సమూహయా ॥ ౬౨౪॥

గణపతేః శృణుయాదిమముజ్వలం ద్రుతవిలమ్బితవృత్తగణం శచీ ।
సలిలరాశిసుతాభవనీభవద్భువనపావనపాదసరోరుహా ॥ ౬౨౫॥

॥ ద్వితీయో జలోద్ధతగతిపాదః ॥
హరిత్సు పరితః ప్రసాదమధికం దధానమమలత్విషాం ప్రసరణైః ।
మహేన్ద్రమహిలావిలాసహసితం మదన్తరతమో ధునోతు వితతమ్ ॥ ౬౨౬॥

ప్రసూస్త్రిజగతః ప్రియా మఘవతః కృపాకలితయా కటాక్షకలయా ।
నితాన్తమగతేర్వికుణ్ఠితమతేర్ధునోతు భరతక్షితేరకుశలమ్ ॥ ౬౨౭॥

పురా శచి మతిస్త్వమీశితురథో నభస్తనుమితా పృథఙ్మతిమతీ ।
అనన్తరమభూః సరోజనయనా తనుః సురపతేర్విలోచనసుధా ॥ ౬౨౮॥

పరత్ర విగుణా సతోఽసి ధిషణా నభస్తనురిహ ప్రపఞ్చమవసి ।
అసి స్వరబలా ప్రియా సురపతేరియత్తవ శచి స్వరూపకథనమ్ ॥ ౬౨౯॥

ప్రజాపతిపదే పురాణపురుషే స్మృతా త్వమదితిః సురాసురనుతే ।
జనార్దనపదే రమాసి పరమే సదాశివపదే శివా త్వమజరే ॥ ౬౩౦॥

ఉషా ఇనపదే స్వధాఽనలపదే పురన్దరపదే త్వమీశ్వరి శచీ ।
యథా రుచివిదుః పదాని కవయశ్చితైశ్చ చితిమాన్యువామృజుగిరా ॥ ౬౩౧॥

అమేయమమలం పురాణపురుషం తదీయవిభవాభిధాయిభిరిమే ।
వదన్తి కవయః పదైర్బహువిధైస్తథైవ భవతీం తతో మతభిదాః ॥ ౬౩౨॥

నభశ్చ పవనః స్వరశ్చ పరమస్తటిచ్చ వితతా పతిశ్చ మహసామ్ ।
సుధాంశురనలో జలం చ పృథివీ సవిత్రి యువయోర్విభూతిపటలీ ॥ ౬౩౩॥

అపారబహులప్రమోదలహరీ సతః కిలచితిః పరత్ర వితతా ।
పునర్వియదిదం పరీత్య నిఖిలం జగన్తి దధతీ పరా విజయతే ॥ ౬౩౪॥

న యద్యపి పరాత్పరే నభసి తే సరోజనయనా వపుః పృథగజే ।
తథాపి నమతాం మతీరనుసరన్త్యమేయవిభవే దధాసి చ తనూః ॥ ౬౩౫॥

సహ త్రిభువనప్రపాలనకృతా సమస్తమరుతాం గణస్య విభునా ।
సదా శశిముఖీ శరీరభృదజా జగత్యదురితే శచీ విజయతే ॥ ౬౩౬॥

కులం బహుభిదం బలం న భుజయోః కథం ను విపదస్తరేమ భరతాః ।
సమర్థమధునా విపద్విధుతయే తవామ్బ చరణం వ్రజామి శరణమ్ ॥ ౬౩౭॥

సమస్తమపి చ స్వదేశవిదుషాం విధానపటలం బభూవ విఫలమ్ ।
అభాగ్యదమనక్షమం తదధునా తవామ్బ చరణం వ్రజామి శరణమ్ ॥ ౬౩౮॥

నిజో మమ జనో నితాన్తమగతిర్న కుక్షిభరణేఽప్యయం ప్రభవతి ।
మహేశ్వరి కృపామరన్దమధునా తవామ్బ చరణం వ్రజామి శరణమ్ ॥ ౬౩౯॥

అదృష్టకనకం కులం మమ చిరాన్నిరాయుధమిదం నిరాశమభితః ।
స్వభావత ఇవ ప్రబద్ధమభవత్తవామ్బ చరణం వ్రజామి శరణమ్ ॥ ౬౪౦॥

అవీరచరితం విపాలకకథం నిరార్షవిభవం చిరాన్మమ కులమ్ ।
ఇదం మమ మనో నికృన్తతి ముహుస్తవామ్బ చరణం వ్రజామి శరణమ్ ॥ ౬౪౧॥

చిరాత్స్మృతిపథాదపి చ్యుతమజే తపోబలభవం తమార్షవిభవమ్ ।
స్వదేశమధునా పునర్గమయితుం తవామ్బ చరణం వ్రజామి శరణమ్ ॥ ౬౪౨॥

హతం చ విహతం ధుతం చ విధుతం రుదన్తమభితో విశిష్టకరుణే ।
ఇమం స్వవిషయం శివం గమయితుం తవామ్బ చరణం వ్రజామి శరణమ్ ॥ ౬౪౩॥

క్షయాయ సుకృతద్విషాం విహరతాం శివాయ చ సతాం ప్రపఞ్చసుహృదామ్ ।
నిజస్య మనసో బలాయ చ పరే తవామ్బ చరణం వ్రజామి శరణమ్ ॥ ౬౪౪॥

జయత్సు సుకృతం ద్విషత్సు పరితః సతామపి కులే బలేన రహితే ।
ఖలప్రియయుగే కలౌ పరిణతే తవామ్బ చరణం వ్రజామి శరణమ్ ॥ ౬౪౫॥

అభాతి సుకృతే నిగూఢవిభవే విభాతి దురితే ఫలాని దిశతి ।
విధానవికలే మనస్యభయదే తవామ్బ చరణం వ్రజామి శరణమ్ ॥ ౬౪౬॥

పటౌ ప్రతిభటే గదే ప్రతిభయే నతావనవిధావతీవ నిపుణమ్ ।
సుపర్వభువనక్షితీశదయితే తవామ్బ చరణం వ్రజామి శరణమ్ ॥ ౬౪౭॥

అమర్త్యపటలీకిరీటమణిభాభుజఙ్గకిరణం నితాన్తమరుణమ్ ।
విపత్తిదమనం తమః ప్రశమనం తవామ్బ చరణం వ్రజామి శరణమ్ ॥ ౬౪౮॥

వినష్టవిభవామిమాం పునరపి శ్రియావిలసితాం విధాతుమజరే ।
స్వజన్మపృథివీం స్వరీశదయితే దిశేర్గణపతేః కరాయ పటుతామ్ ॥ ౬౪౯॥

సుపర్వవసుధాధినాథసుదృశో జలోద్ధతగతిస్తవోఽయమనఘః ।
కృతిర్గణపతేః కరోతు విధుతిం భయస్య భరతక్షమాతలజుషామ్ ॥ ౬౫౦॥

॥ తృతీయః ప్రమితాక్షరపాదః ॥
ఉదితం మహేన్ద్రమహిలావదనే ప్రసృతం కరైర్దిశి దిశి ప్రగుణైః ।
అహితం తమః ప్రశమయద్యమినాం హసితం కరోతు మమ భూరి శివమ్ ॥ ౬౫౧॥

భరతక్షితేస్తిమిరమాశు హరత్వరిచాతురీకృతవిమోహమతేః ।
రవిలక్షతోఽప్యధికమంశుమతీ పవిపాణిచిత్తదయితా వనితా ॥ ౬౫౨॥

శశిలక్షశీతలకటాక్షసుధా తరుణార్కకోటిరుచిపాదయుగా ।
హృది మే విభాతు మునిగేయగుణా విబుధేన్ద్రచిత్తరమణీ తరుణీ ॥ ౬౫౩॥

కమనీయదీప్తసుకుమారతనుర్మననీయపావనపదామ్బురుహా ।
విదధాతు మే శివమసద్విముఖీ విబుధేన్ద్రజీవితసఖీ సుముఖీ ॥ ౬౫౪॥

అనుమానమూఢపితృవాక్యవశాత్తనయేన దేవి వినికృత్తశిరాః ।
తవ రేణుకా విలసితా కలయా గణనీయశక్తిరభవద్దశసు ॥ ౬౫౫॥

సకలామయప్రశమనం దురితక్షయకారికాఙ్క్షితకరం చ భవేత్ ।
సురసున్దరీ జనసమర్చతయోర్హృది రేణుకాచరణయోః కరణమ్ ॥ ౬౫౬॥

వినిహన్తి పాపపటలం స్మరణాద్విధునోతి రోగనివహం భజనాత్ ।
విదఘాతి వాఞ్ఛితతఫలం స్తవనాన్మనుజస్య రామజననీ చరణమ్ ॥ ౬౫౭॥

శరణం వ్రజామి నవరవ్యరుణం చరణం తవామ్బ నృపజాతిరిపోః ।
భరతక్షితేరవనతః ప్రథమం మరణం మమేహ న భవత్వధమమ్ ॥ ౬౫౮॥

స్మరణం చిరాదవిరతం విదధచ్చరణస్య తే తరుణభానురుచః ।
అయమస్తు రామజనయిత్రిపటుః సురకార్యమార్యవినుతే చరితుమ్ ॥ ౬౫౯॥

అవ భారతక్షితిమమోఘదయే కరణం భవత్విహ తవైష జనః ।
నిజయోః సవిత్రి చరణామ్బుజయోర్న విహాతుమర్హసి చిరాద్భజకమ్ ॥ ౬౬౦॥

అవిశస్త్వమిన్ద్రదయితే కిలతామపి యజ్ఞసేనతనయాం కలయా ।
అనఘవ్రతాసు కవయః ప్రథమాం ప్రవదన్తి యాం బహులవన్ద్యగుణామ్ ॥ ౬౬౧॥

భువి భారతం పఠతి యః సుకృతీ కలుషం ధునోతి సకలం కిల సః ।
ఇయమమ్బ శక్తికులరాజ్ఞి తవ ద్రుపదస్య నన్దిని కథామహిమా ॥ ౬౬౨॥

అభిమన్యుమాతరమనల్పగుణామతిలఙ్ఘ్య చైక్షత హరిర్భవతీమ్ ।
అతిసౌహృదేన యదిహార్యనుతే తవ హేతురీడ్యతమశక్తికలా ॥ ౬౬౩॥

గృహకార్యతన్త్రచతురా గృహీణీ సకలీన్ద్రియామృతఝరీ రమణీ ।
వరనీతిమార్గకథనే సచివోఽప్యభవస్త్వమమ్బ కురు వంశభృతామ్ ॥ ౬౬౪॥

న యుధిష్ఠిరస్య వరఘోరతపో న ధనఞ్జయస్య పటు బాహుబలమ్ ।
అరిసఙ్క్షయం కృతవతీ బహులం తవ వేణికాఽపచరితా ఫణినీ ॥ ౬౬౫॥

అసితాపి కాన్తివసతిర్మహతీ వనితాజనస్య చ విమోహకరీ ।
కుశలం మమాభ్రపతిశక్తికలా ద్రుపదక్షితీన్ద్రదుహితా దిశతు ॥ ౬౬౬॥

శిరసా సమస్తజనపాపభరం వహతో భవాయ భువి యామవృణోత్ ।
అమరాధిపః పతితపావని తాం భువి కన్యకాం తవ వివేశ కలా ॥ ౬౬౭॥

కలయా తవాతిబలయా కలితా పురుషస్య యోగమఖిలామ్బ వినా ।
అఖిలేశ్వరప్రహితతేజ ఇయం సుతజన్మనే కిల దధావనఘా ॥ ౬౬౮॥

సురరక్షకస్య మదయిత్రి దృశాం నరరక్షకస్య జనయిత్రి పరే ।
కులరక్షణాయ కృతబుద్ధిమిమం కురు దక్షమద్భుతపవిత్రకథే ॥ ౬౬౯॥

ముముచుః కులే మమ సుపర్వపతేస్తవ చాభిధేయమిహ మన్దధియః ।
అపరాధమేతమతిఘోరతరం జనని క్షమస్వ మమ వీక్ష్య ముఖమ్ ॥ ౬౭౦॥

ఇహ శారదేతి యతిభిర్వినుతా ప్రథితా సురేశ్వరమనోదయితా ।
భువి భాతి కీర్తివపుషా శచి యా సుకథాపి సా తవ సవిత్రి కలా ॥ ౬౭౧॥

అరుణాచలేశ్వరదరీవసతేస్తపతో మునేర్గణపతేః కుశలమ్ ।
వివిధావతారవిలసచ్చరితా వితనోతు సా విబుధరాడ్వనితా ॥ ౬౭౨॥

అరుణాచలస్య వరకన్దరయా ప్రతిఘోషితం కలుషహారి యశః ।
విబుధాధినాథరమణీ శృణుయాద్గణనాథగీతమతిచారునిజమ్ ॥ ౬౭౩॥

భరతక్షితేః శుభవిధాయిషు సా విబుధక్షితీశదయితా దయయా ।
ధనశక్తిబన్ధుబలహీనమపి ప్రథమం కరోతు గణనాథమునిమ్ ॥ ౬౭౪॥

ముదితామిమా విదధతు ప్రమదాం త్రిదివాధిపస్య నిపుణశ్రవణామ్ ।
అమితప్రకాశగుణశక్తిమజాం ప్రమితాక్షరాః సుకవిభూమిపతేః ॥ ౬౭౫॥

॥ చతుర్థస్తామరసపాదః ॥
దిశతు శివం మమ చన్ద్రవలక్షస్తిమిరసమూహనివారణదక్షః ।
కృతగతిరోధకపాతకనాశః సురధరణీశవధూస్మితలేశః ॥ ౬౭౬॥

అవిదితమార్గతయాతివిషణ్ణాం గతిమపహాయ చిరాయ నిషణ్ణామ్ ।
భరతధరామనిమేషధరత్రీ పతిగృహిణీ పరిపాతు సవిత్రీ ॥ ౬౭౭॥

భువనమిదం భవతః కిల పూర్వం యదమలరూపమనాకృతిసర్వమ్ ।
ప్రకృతిరియం కురుతాదదరిద్రామతిమతిశాతతరాం మమ భద్రా ॥ ౬౭౮॥

సృజతి జగన్తి విభౌ పరమే యా సుబహులశక్తిరరాజత మాయా ।
ప్రదిశతు సా మమ కఞ్చన యోగం ఝటితి నిరాకృతమానసరోగమ్ ॥ ౬౭౯॥

ప్రతివిషయం వికృతీతర సత్తా విలసతి యా మతిమద్భిరుపాత్తా ।
ఇయమనఘా పరిపాలితజాతిం వితరతు మే వివిధాం చ విభూతిమ్ ॥ ౬౮౦॥

ప్రతివిషయగ్రహణం పరిపూతామతిరఖిలస్య జనస్య చ మాతా ।
మమ విదధాతు శుభం శుభనామా త్రిదివనివాసినరేశ్వరరామా ॥ ౬౮౧॥

గగనతనుర్జగతో విపులస్య ప్రభుపదమగ్రయ్మితా సకలస్య ।
ప్రతిజనదేహమజా ప్రవహన్తీ మమ హృది నన్దతు సా విహరన్తీ ॥ ౬౮౨॥

పటుకులకుణ్డధనఞ్జయకీలా సముదితహార్దవిభాకరలీలా ।
ద్రుతశిర ఇన్దుకలామృతధారా జనమవతాన్నిజభక్తముదారా ॥ ౬౮౩॥

విషయసమాకృతిరత్ర పురస్తాద్విమలతమా కిల తత్ర పరస్తాత్ ।
భువనమయీ భువనాచ్చ విభక్తామతిరనఘాఽవతు మామతిశక్తా ॥ ౬౮౪॥

విషయపరిగ్రహణేష్వతిసక్తా విషయవిభూతిషు కాపి వివిక్తా ।
అఖిలపతేర్మయి దీవ్యతు శక్తిర్విమలతమా విధుతేతరశక్తిః ॥ ౬౮౫॥

దృశి దృశి భాతి యదీయమపాపం దిశి దిశి గన్తృ చ వేత్తృ చ రూపమ్ ।
భవతు శివాయ మమేయమనిన్ద్యా భువనపతేర్గృహిణీ మునివన్ద్యా ॥ ౬౮౬॥

జడకులకుణ్డదరీషు శయానా బుధకులవహ్నిషు భూరివిభానా ।
హరిహయశక్తిరమేయచరిత్ర మమ కుశలం విదధాతు పవిత్ర ॥ ౬౮౭॥

దహరగతాఖిలమాకలయన్తీ ద్విదలగతా సకలం వినయన్తీ ।
దశశతపత్రగతా మదయన్తీ భవతు మయీన్ద్రవధూర్విలసన్తీ ॥ ౬౮౮॥

గృహయుగలీశ్రియ ఆశ్రితగమ్యా పదకమలద్వితయీ బహురమ్యా ।
మమ హృది భాత్వవికుణ్ఠితయానా హరిసుదృశస్తరుణారుణభానా ॥ ౬౮౯॥

ఉపరి తతా కులకుణ్డనిశాన్తాజ్జ్వలితధనఞ్జయదీధితికాన్తాత్ ।
హరిహయశక్తిరియం మమ పుష్టా ద్రవయతు మస్తకచన్ద్రమదుష్టా ॥ ౬౯౦॥

నభసి విరాజతి యా పరశక్తిర్మమ హృది రాజతి యా వరశక్తిః ।
ఉభయమిదం మిలితం బహువీర్యం భవతు సుఖం మమ సాధితకార్యమ్ ॥ ౬౯౧॥

త్రిభువనభూమిపతేః ప్రియయోషా త్రిమలహరీ సురవిష్టపభూషా ।
మమ వితనోతు మనోరథపోషం దురితవిపత్తితతేరపి శోషమ్ ॥ ౬౯౨॥

పవనజగత్ప్రభుపావనమూర్తిర్జలధరచాలనవిశ్రుతకీర్తిః ।
మమ కుశలాయ భవత్వరిభీమా జననవతాం జననీ బహుధామా ॥ ౬౯౩॥

మమ సురరాజవధూకలయోగ్రా ఖలజనధూననశక్తనఖాగ్రా ।
దమయతు కృత్తశిరాః కలుషాణి ప్రకటబలా హృదయస్య విషాణి ॥ ౬౯౪॥

కులిశివధూకలయా పరిపుష్టా బుధనుతసన్నుణజాలవిశిష్టా ।
మమ పరితో విలసద్విభవాని ద్రుపదసుతా విదధాతు శివాని ॥ ౬౯౫॥

సురజనరాడ్దయితాంశవిదీప్తే పదకమలాశ్రితసాధుజనాప్తే ।
దురితవశాదభితో గతభాసం మనుజకుమారజనన్యవదాసమ్ ॥ ౬౯౬॥

అమరనరేశ్వరమన్దిరనేత్రీ సుమశరజీవనసున్దరగాత్రీ ।
భవతు శచీ వితతస్వయశస్సు ప్రతిఫలితా గణనాథవచస్సు ॥ ౬౯౭॥

వికసతు మే హృదయం జలజాతం విలసతు తత్ర శచీస్తుతిగీతమ్ ।
స్ఫురతు సమస్తమిహేప్సితవస్తు ప్రథితతమం మమ పాటవమస్తు ॥ ౬౯౮॥

కురు కరుణారససిక్తనిరీక్షే వచనపథాతిగసన్నుణలక్షే ।
శచి నరసింహజమాహితగీతం భరతధరామవితుం పటుమేతమ్ ॥ ౬౯౯॥

సులలితతామరసైః ప్రసమాప్తం వరనుతిబన్ధమిమం శ్రవణాప్తమ్ ।
జనని నిశమ్య సుసిద్ధమశేషం హరిలలనే మమ కుర్వభిలాషమ్ ॥ ౭౦౦॥

॥ ఇతి శ్రీభగవన్మహర్షిరమణాన్తేవాసినో వాసిష్ఠస్య నరసింహసూనోః

గణపతేః కృతౌ ఇన్ద్రాణీసప్తశతీ సమాప్తా ॥


Complete Works of Ganapati Muni Vol 02-14
Proofread byDPD

Please send corrections to sanskrit@cheerful.com
Last updated త్oday
http://sanskritdocuments.org

Indrani Saptashati Lyrics in Telugu PDF
% File name : indrANIsaptashatI.itx
% Location : doc\_devii
% Language : Sanskrit
% Subject : philosophy/hinduism/religion
% Proofread by : DPD
% Description-comments : Complete Works of Ganapati Muni Vol 02-14
% Latest update : September 7, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website