প্রচণ্ডচণ্ডীত্রিশতী
{॥ প্রচণ্ডচণ্ডীত্রিশতী ॥}
প্রথমং শতকম্
প্রথমো মুকুলস্তবকঃ
বজ্রং জম্ভভিদঃ সর্বস্বং নভসঃ ।
বন্দে বৈরিসহং বিদ্যুজ্জ্যোতিরহম্ ॥ ১॥
সা শক্তির্মরুতামীশানস্য ততা ।
ব্যোমাগাররমা সা দেবী পরমা ॥ ২॥
সূক্ষ্মং ব্যাপিমহো দৃশ্যং বারিধরে ।
তত্ত্বং তে মরুতাং রাজ্ঞঃ পত্নিপরে ॥ ৩॥
দ্বাভ্যাং ত্বং বনিতারূপাভ্যাং লসসি ।
একা তত্র শচী চণ্ডাচণ্ড্যপরা ॥ ৪॥
একা কান্তিমতী ভর্তৃস্তল্পসখী ।
অন্যা বীর্যবতী প্রাযো যুদ্ধসখী ॥ ৫॥
একা মোহযতে শক্রং চন্দ্রমুখী ।
অন্যা ভীষযতে শত্রূনর্কমুখী ॥ ৬॥
একস্যাং তটিতো রম্যা দীপ্তিকলা ।
অন্যস্যাং সুতরামুগ্রা শক্তিকলা ॥ ৭॥
একস্যাঃ সদৃশী সৌন্দর্যে ন পরা ।
অন্যস্যাস্তু সমা বীর্যে নাস্ত্যপরা ॥ ৮॥
একা সঞ্চরতি স্বর্গে ভোগবতী ।
অন্যা ভাতি নভোরঙ্গে যোগবতী ॥ ৯॥
একা বা দশযোঃ ভেদেন দ্বিবিধা ।
ইন্দ্রাণী বিবুধৈঃ গীতা পুণ্যকথা ॥ ১০॥
চণ্ডি ত্বং বরদে পিণ্ডে কুণ্ডলিনী ।
গীতা চ্ছিন্নশিরাঃ প্রাজ্ঞৈর্বৈভবিনী ॥ ১১॥
আহুঃ কুণ্ডলিনীং যন্মূধ্র্না বিযুতাম্ ।
চিত্রা সা বচসো ভঙ্গী বুদ্ধিমতাম্ ॥ ১২॥
পুত্রাচ্ছিন্নশিরাঃ পুণ্যাযাঽব্জমুখী ।
আবিক্ষত্ কিল তাং শক্তিঃ শক্রসখী ॥ ১৩॥
তস্মাদ্বাযমবচ্চিত্তাম্ভোজরমা ।
উক্তা কৃত্তশিরাঃ সা শক্তিঃ পরমা ॥ ১৪॥
ওজীযস্যবলা তুল্যা কাপি নতে ।
রাজারের্জননি স্বর্নারীবিনুতে ॥ ১৫॥
যাবন্তোঽবতরাঃ শক্তের্ভূমিতলা ।
বীর্যেণাস্যধিকা তেষু ত্বং বিমলে ॥ ১৬॥
প্রাগেব ত্বযি সত্যৈন্দ্রীশক্তিকলা ।
ব্যক্তাঽভূচ্ছিরসি চ্ছিন্নে ভূরিবলা ॥ ১৭॥
ত্বং ছিন্নে মহসাং রাশিঃ শক্তিরসি ।
হুঙ্কারেণ রিপুব্রাতং নির্দহসি ॥ ১৮॥
ভোগাসক্তরতিগ্রাহাঙ্কাসনগা ।
বালার্কদ্যুতিভৃত্পাদাম্ভোজযুবা ॥ ১৯॥
ছিন্নং পাণিতলে মূর্ধানং দধতী ।
প্রাণানাত্মবশে সংস্থাপ্যানহতী ॥ ২০॥
স্ফারাস্যেন পিবন্ত্যুল্লোলানসৃজঃ ।
ধ্বস্তানাদধতী দৃপ্তান্ ভূমিভুজঃ ॥ ২১॥
ডাকিন্যাঽনঘযা বর্ণিন্যা চ যুতা ।
রামাম্বাঽবতু মাং দিব্যং ভাবমিতা ॥ ২২॥
কার্যং সাধযিতুং বীর্যং বর্ধয মে ।
চিত্তং স্বাত্মনি চ চ্ছিন্নে স্থাপয মে ॥ ২৩॥
যোগং মে বিষযারাত্যব্ধিং তরিতুম্ ।
চিত্তং দেবি কুরু ত্বং সাক্ষাদ্দিতুম্ ॥ ২৪॥
মান্দারৈরিব মে গাযত্রৈর্বিমলৈঃ ।
ছিন্নে সিধ্যতু তে পাদার্চা মুকুলৈঃ ॥ ২৫॥
দ্বিতীযো বৃহতীস্তবকঃ
নিখিলামযতাপহরী নিজসেবকভব্যকরী ।
গগনামৃতদীপ্তিঝরী জযতীশ্বরচিল্লহরী ॥ ২৬॥
বিপিনে বিপিনে বিনুতা নগরে নগরে নমিতা ।
জযতি স্থিরচিত্তহিতা জগতাং নৃপতের্দযিতা ॥ ২৭॥
মতিকৈরবিণীন্দুকলা মুনিহৃত্কমলে কমলা ।
জযতি স্তুতিদূরবলা জগদীশবধূর্বিমলা ॥ ২৮॥
কলিপক্ষজুষাং দমনী কলুষপ্রততেঃ শমনী ।
জযতি স্তুবতামবনী সদযা জগতো জননী ॥ ২৯॥
অতিচণ্ডিসুপর্বনুতে বলপৌরুষযোরমিতে ।
জননং সুজনাবনিতে জগতামুপকারকৃতে ॥ ৩০॥
সকলামযনাশচণে সততং স্মরতঃ সুগুণে ।
মম কার্যগতেঃ প্রথমং মরণং ন ভবত্বধমম্ ॥ ৩১॥
মরণস্য ভযং তরিতুং করুণারসবাহিনি তে ।
স্মরণাদ্রসযামি গলচ্চরণাম্বুরুহাদমৃতম্ ॥ ৩২॥
বনিতাবপুষধ্রণং জগদম্ব ন বেদ্মি তব ।
বিযদগ্নিতনোধ্রণং শিরসেহ বহামি সদা ॥ ৩৩॥
শতশঃ প্রসৃতৈধ্রণৈঃ মুনিমস্তকবীথিষু সা ।
বিপুলে গগনে বিততা চরতি ত্রিদশেশসখী ॥ ৩৪॥
বিশতি প্রবিধায পথশ্চরণস্য বিভাম্বগুহাম্ ।
বিহিতস্য মমেহশিরস্যজরে জগদীশ্বরি তে ॥ ৩৫॥
চরণস্য বিভা কিমু তে তব কাচন বীচিরুত ।
বিবিধা বিদধাতি কথাঃ প্রবিশন্ত্যযি ভক্ত্গুহাম্ ॥ ৩৬॥
নিজবীচিবিলাসপদং মম কাযমিদং জগতি ।
করণং সুরকার্যকৃতে তব নিস্তুলভে ভবতু ॥ ৩৭॥
মম বর্ষ্মণি হীনবলে যদি কশ্চন লোপ ইব ।
তমপোহ্যপটিষ্ঠতমং কুরু বিষ্টপমাতরিদম্ ॥ ৩৮॥
সহতামিদমম্ববপুস্তব নাট্যমপারজবম্ ।
বহিরন্তরশত্রুসহং ভজতাং বহুলং চ বলম্ ॥ ৩৯॥
পৃথিবী চ সহেত ন তে তটিদীশ্বরি নাট্যজবম্ ।
করুণা যদি দেবি ন তে বপুষামিহ কা নু কথা ॥ ৪০॥
তব শক্তিঝরীপতনং বহিরদ্ভুতবৃষ্টিরিব ।
ইদমন্তরনন্তবলে মদিরারসপানমিব ॥ ৪১॥
পরমিক্ষুরসো মধুরো মদিরামদকৃত্পরমা ।
মধুরা মদকৃচ্চ ভৃশং তব শক্তিকলালহরী ॥ ৪২॥
রসনেন্দ্রিযমাত্রামুদং বর ইক্ষুরসঃ কুরুতে ।
বহিরন্তরপি প্রমদং তব শক্তিকলালহরী ॥ ৪৩॥
বপুষো মনসশ্চধিযো বলমদ্ভুতমাদধতী ।
প্রমদং চ জযত্যজরে তব শক্তিকলালহরী ॥ ৪৪॥
তব শক্তিকলালহরী পরিশোধযতে ভুবি যম্ ।
বিদুরাগমসারবিদঃ সনিমেষমমর্ত্যমিমম্ ॥ ৪৫॥
লহরীমখিলাম্ব বিনা তব যোঽনুভবং বদতি ।
অযি বঞ্চিত এষ মৃষা বিষযেণ মহাবিভবে ॥ ৪৬॥
সততালহরী যদি তে বহিরন্তরপি প্রগুণা ।
ভববন্ধচযঃ শিথিলো ভুবি জীবত এব ভবেত্ ॥ ৪৭॥
ইহ তাবদপারবলে সকলা অপি যোগকথাঃ ।
তব যাবদনন্তজুষো ন পবিত্রঝরীপতনম্ ॥ ৪৮॥
বিষযারিবিনাশবিধৌ রমণীযমুপাযমজে ।
কথযেশ্বরি মে বিশদং তব নাম্ব ন সাধ্যমিদম্ ॥ ৪৯॥
গণনাথকবেঃ কৃতিভিঃ বৃহতীভিরিমাভিরজা ।
পরিতৃপ্যতু চণ্ডবধূঃ কপটাগগনাগ্নিকলা ॥ ৫০॥
তৃতীযঃ সুপ্রতিষ্ঠাস্তবকঃ
চণ্ডচণ্ডিকাং বালভানুভাম্ ।
নৌমি দেবতারাজবল্লভাম্ ॥ ৫১॥
নাভিমণ্ডলশ্বেতপদ্মগে ।
চণ্ডদীধিতের্মণ্ডলে স্থিতাম্ ॥ ৫২॥
সূক্ষ্মনাডিকাদেহধারিণীম্ ।
ঘোরপাতকব্রাতহারিণীম্ ॥ ৫৩॥
উগ্রবিক্রমচ্ছিন্নমস্তকাম্ ।
দগ্ধবাসনাঘাসজালকাম্ ॥ ৫৪॥
নৌমি সদ্ধিযং সিদ্ধসংস্তুতাম্ ।
বজ্রধারিণঃ শক্তিমদ্ভুতাম্ ॥ ৫৫॥
প্রাণিনাং তনৌ তন্তুসন্নিভাম্ ।
অম্বরস্থলে ব্যাপকপ্রভাম্ ॥ ৫৬॥
চারুবর্ণিনীপ্রীতিলালিতাম্ ।
ভীমডাকিনীবীর্যনন্দিতাম্ ॥ ৫৭॥
দীপ্যদক্ষিভাভীষিতাসুরাম্ ।
নৌমি বজ্রিণঃ শক্তিমক্ষরাম্ ॥ ৫৮॥
যা বিশত্তপোধ্বস্তপাতকাম্ ।
রেণুকাং সুতচ্ছিন্নমস্তকাম্ ॥ ৫৯॥
নৌমি তামরিব্রাতমর্দিনীম্ ।
নাকমেদিনীপালভামিনীম্ ॥ ৬০॥
দেবসুন্দরীমস্তলালিতম্ ।
অম্বিকাপদং ভাতু মে হিতম্ ॥ ৬১॥
শোধ্যতামযং সর্বধীপুষা ।
লোকধাত্রি তে পাদরোচিষা ॥ ৬২॥
কোটিশস্তব প্রাজ্যশক্ত্যঃ ।
বিদ্যুদম্বিকে পাদপঙ্ক্তযঃ ॥ ৬৩॥
তাসু বিক্রমাধাযিচেষ্টিতম্ ।
তাসু বিষ্টপজ্ঞানমদ্ভুতম্ ॥ ৬৪॥
সর্বতোঽম্ব তে পাদচেষ্টিতম্ ।
বেত্তি তত্কৃতী নো জডঃ কৃতম্ ॥ ৬৫॥
বেত্তি যঃ কৃতী তত্রা তদ্বলম্ ।
বেদ যো ননা তত্র নো ফলম্ ॥ ৬৬॥
অর্পযেত্তনুং যঃ সবিত্রি তে ।
শক্তিবৈভবং তত্র পণ্ডিতে ॥ ৬৭॥
পূরুষো ভবন্নূর্মিরচ্যুতে ।
মত্তনুং স্ত্রৈযং সম্ভুনক্তু তে ॥ ৬৮॥
সর্বতো গতির্ভামদম্ব তে ।
মদ্গুহান্তরে ভাতু বিশ্রুতে ॥ ৬৯॥
উগ্রবৈভবাশক্তিরন্তরে ।
ভাতু তে পদপ্রেযসঃপরে ॥ ৭০॥
চণ্ডি তে পুনশ্চেত্প্রচণ্ডতা ।
কীদৃগম্বিকে সা মহোগ্রতা ॥ ৭১॥
মর্ত্যহস্তিনং মস্তভেদিনী ।
শক্তিরম্ব তে পাতু পাবনী ॥ ৭২॥
উত্তমোত্তমা চিত্তচিন্ত্যতাম্ ।
কৃত্তমস্তকা মত্তকাশিনী ॥ ৭৩॥
আত্মবৈরিণাং নাশনে বিধিম্ ।
ব্রূহি মে জনন্যন্তরাবধিম্ ॥ ৭৪॥
চেতসোঽম্ব তে জাযতাং হিতম্ ।
সৌপ্রতিষ্ঠসদ্গীতমদ্ভুতম্ ॥ ৭৫॥
চতুর্থো নরমনোরমাস্তবকঃ
অমরপালিনী দিতিজনাশিনী ।
ভুবনভূপতের্জযতি ভামিনী ॥ ৭৬॥
অতিশুভা নভস্তলবিসারি ভা ।
জগদধীশিতুর্জযতি বল্লভা ॥ ৭৭॥
সুরমহীপতের্হৃদযমোহিনী ।
কপটকামিনী জযতি মাযিনী ॥ ৭৮॥
জযতি কুণ্ডলীপুরনিকেতনা ।
তটিদধীশ্বরী তরললোচনা ॥ ৭৯॥
বিমলমস্তকৈর্হৃদি বিধারিতা ।
দলিতমস্তকা জযতি দেবতা ॥ ৮০॥
জযতি বিদ্যুতো যুবতিভূমিকা ।
ইহ খলান্তকৃজ্জযতি রেণুকা ॥ ৮১॥
অমিতবিক্রমে জযজযাম্বিকে ।
পরশুধারিণো জননি রেণুকে ॥ ৮২॥
বিনতপালিকে ধরণিকালিকে ।
জনপতিদ্বিষো জননি পাহি মাম্ ॥ ৮৩॥
মম ক্তদম্বুজং তব পদাম্বুজে ।
ভজতু লীনতাং কপটনার্যজে ॥ ৮৪॥
১০৮
করুণযা ক্রিযাদ্ভগবতী শুভা ।
মম মুদাবহং মদমুদারভা ॥ ৮৫॥
তব মদে বৃষা জযতি দানবান্ ।
তব মদে হরো নটতি মোদবান্ ॥ ৮৬॥
তব মদে রবিস্তপতি তেজসা ।
তব মদে স্বভূরবতি চৌজসা ॥ ৮৭॥
তব মদে শশী রমযতেঽখিলম্ ।
তব মদেঽনিলঃ প্রথযতে বলম্ ॥ ৮৮॥
তব মদেঽনলো জগতি রাজতে ।
তব মদে মুনির্নিগমমীক্ষতে ॥ ৮৯॥
তব মদে ধরা ভ্রমতি মেদিনী ।
তব মদে তনুর্মম চ মোদিনী ॥ ৯০॥
দহনকীলবন্নিরুপমোগ্রতা ।
শশিমযূখবত্পরমসৌম্যতা ॥ ৯১॥
গগনদেশবত্স্থিতিরচঞ্চলা ।
তপনরশ্মিবদ্গতিরপঙ্কিলা ॥ ৯২॥
অমৃতবন্মদঃ পবনবদ্বলম্ ।
তব তরঙ্গকে কিমিব নো ফলম্ ॥ ৯৩॥
তব নবামহামদবিধাযিকা ।
অঘহরীসুরা জযতি বীচিকা ॥ ৯৪॥
তব সুচিত্তিকা জননি বীচিকা ।
অমৃতবর্ষিণী জযতি হর্ষিণী ॥ ৯৫॥
অমররাজ্ঞিদেব্যসুরবিঘ্নহা ।
অসুরুপাসকানবতি তে কলা ॥ ৯৬॥
অনুগৃহীতবাক্তব গভস্তিনা ।
সকলসিদ্ধিরাড্ ভবতি দেবিনা ॥ ৯৭॥
সততচিন্তনাত্তব গুহান্তরে ।
নিযতচেতসো জগদিদং করে ॥ ৯৮॥
জননি মে বিধিং কথয ভীষণে ।
বিষযশাত্রাবব্রজবিদারণে ॥ ৯৯॥
তব মনোরমে সুরপতেরিমাঃ ।
বিদধতাং মুদং নরমনোরমাঃ ॥ ১০০॥
দ্বিতীযং শতকম্
পঞ্চমো রথোদ্ধতাস্তবকঃ
কৃত্তমস্তমপিশাতকর্তরীং পাণিপদ্মযুগলেন বিভ্রতীম্ ।
সংস্মরামি তরুণার্করোচিষং যোষিতং মনসি চণ্ডচণ্ডিকাম্ ॥ ১০১॥
চণ্ডচণ্ডি তব পাণিপঙ্কজে যন্নিজং লসতি কৃত্তমস্তকম্ ।
দেবি সূচযতি চিত্তনাশনং তত্তবেন্দ্রহৃদযাধিনাযিকে ॥ ১০২॥
দীপ্তিবিগ্রহলতাং মহাবলাং বহ্নিকীলনিভরক্তকুন্তলাম্ ।
সংস্মরামি রতিমন্মথাসনাং দেবতাং তরুণভাস্করাননাম্ ॥ ১০৩॥
রশ্মিভিস্তব তনূলতাকৃতা রশ্মিভিস্তব কৃতাশ্চ কুন্তলাঃ ।
রশ্মিভিস্তব কৃতং জ্বলন্মুখং রশ্মিভিস্তব কৃতে চ লোচনে ॥ ১০৪॥
দেবি রশ্মিকৃতসর্ববিগ্রহে দৃষ্টিপাতকৃতসাধ্বনুগ্রহে ।
অম্বরোদবসিতে শরীরিণামম্ব পাহি রবিবিম্বচালিকে ॥ ১০৫॥
যত্তবাসনমশেষমোহনৌ বিদ্যুদক্ষিরতিসূনসাযকৌ ।
এতদিন্দ্রসখি ভাষতে ত্বযা তাবুভাবপি বলাদধঃ কৃতৌ ॥ ১০৬॥
দৃষ্টিরেব তব শস্ত্রমাহবে শাত্রবস্তু তব ন ক্ষমঃ পুরঃ ।
বস্ত্রমম্ব দিশ এব নির্মলাঃ প্রেক্ষিতুং ভবতি ন প্রভুঃ পরঃ ॥ ১০৭॥
চক্ষুষাং দশশতানি তে রুচিং পাতুমেব পরমস্য বজ্রিণঃ ।
ভাস্বতঃ করসহস্রমম্বিকে লালনায তব পাদপদ্মযোঃ ॥ ১০৮॥
শূলমগ্নিতিলকস্য ধূর্জটেঃ চক্রমচ্ছজলজাতচক্ষুষঃ ।
বজ্রমম্ব মরুতাং চ ভূপতেঃ তেজসস্তব কৃতানি ভাগকৈঃ ॥ ১০৯॥
ভৈরবীচরণভক্ত্বান্ধবী তারিণী চ সুরপক্ষধারিণী ।
কালিকা চ নতপালিকাঽপরাশ্চণ্ডচণ্ডি তব ভীমভূমিকাঃ ॥ ১১০॥
রক্ষ মে কুলমতীন্দ্রিযে ততে রাক্ষসাদিনি সুরৈঃ সমর্চিতে ।
পুত্রাশিষ্যসহিতোঽহমম্ব তে পাবনং পদসরোরুহং শ্রযে ॥ ১১১॥
ঐন্দ্রিদেবি ভবতী মহাবলা ছিন্নমস্তযুবতিস্তু তে কলা ।
সর্বলোকবলবিত্তশেবধেঃ পেরক্ষিতাঽস্তি তব কো বলাবধেঃ ॥ ১১২॥
যেযমম্ব রুচিরুজ্জ্বলাননে যা চ কাচন বিভা বিভাবসৌ ।
তদ্দ্বযং তব সবিত্রি তেজসো ভূমিনাকনিলযস্য বৈভবম্ ॥ ১১৩॥
প্রাণদা তব রুচির্জগত্ত্রাযে প্রাণহৃচ্চ বত কার্যভেদতঃ ।
বৈভবং ভুবনচক্রপালিকে কো নু বর্ণযিতুমীশ্বরস্তব ॥ ১১৪॥
উদ্ভবস্তববিপাকবৈভবে নাশনং চ জগদম্ব দেহিনাম্ ।
যৌবনং নযনহারিনির্মলং বার্ধকং চ বিততাতুলপ্রভে ॥ ১১৫॥
নির্বলো ভবতি ভূতলে যুবা যচ্চ দেবি জরঠো ভবেদ্বলী ।
তদ্বযং তব বিচিত্রপাকতঃ পাকশাসনসখি ক্ষরেতরে ॥ ১১৬॥
বার্ধকেন বলকান্তিহারিণা দারুণেন কটুকার্যকারিণা ।
গ্রস্তমেতমধুনা পুনঃ কুরু ত্রাণদে যুবকবত্পদাশ্রিতম্ ॥ ১১৭॥
ভোগলালসতযা ন নূতনং দেবি বিক্রমমপারমর্থযে ।
অত্র মে বপুষি লাস্যমম্ব তে সোঢুমেব মম সেযমর্থনা ॥ ১১৮॥
শক্তিরম্ব মম কাচিদন্তরে যা ত্বযৈব নিহিতালমল্পকা ।
বৃদ্ধিমেত্য সহতামিযং পরাং বাহ্যশক্তিমিহ নির্গলজ্ঝরাম্ ॥ ১১৯॥
অম্ব তে নরসুরাসুরস্তুতে দিব্যশক্তিলহরীবিশোধিতম্ ।
পাতকানি জহতীব মামিমং কামযন্ত ইব সর্বসিদ্ধযঃ ॥ ১২০॥
শক্তিরিন্দ্রসখি চেন্ন তে মৃষা ভক্তিরীশ্বরি ন মে মৃষা যদি ।
উল্লসন্তু রতিকন্তুপীঠিকে শীধ্রমেব মযি যোগসিদ্ধযঃ ॥ ১২১॥
অস্তু ভক্তিরখিলাম্ব মে ন বা শক্তিরেব তব সম্প্রশোধ্য মাম্ ।
দেবকার্যকরণক্ষমং বলাদাদধাতু বিদধাতু চামৃতম্ ॥ ১২২॥
আস্যমম্ব তব যদ্যপীক্ষিতং লাস্যমেতদনুভূযতে মযা ।
পাদঘাতততিচূর্ণিতান্যজে যত্র যান্তি দুরিতানি সঙ্ক্ষযম্ ॥ ১২৩॥
স্বীযশক্তিলহরীবিলাসিনে কিঙ্করায পদপদ্মলম্বিনে ।
ভাষতাং বিষযবৈরিদারণে ভঙ্গবর্জিতমুপাযমম্বিকা ॥ ১২৪॥
নির্মলে করুণযা প্রপূরিতে সন্ততং বিকসিতে মহামহে ।
অম্বিকাহৃদি বিতন্বতামিমাঃ সম্প্রসাদমতুলং রথোদ্ধতাঃ ॥ ১২৫॥
ষষ্ঠঃ স্বাগতাস্তবকঃ
যোগিনে বলমলং বিদধানা সেবকায কুশলানি দদানা ।
অস্তু মে সুরধরাপতিশক্তিশ্চেতসশ্চ বপুষশ্চ সুখায ॥ ১২৬॥
কার্যমস্তি মম কিঞ্চন সত্যং তজ্জযায বিলপামি চ সত্যম্ ।
এবমপ্যকপটৈব রতির্মে বজ্রপাণিসখি তে পদপদ্মে ॥ ১২৭॥
শ্রদ্ধযা তব নুতিং বিদধামি শ্রদ্ধযা তব মনুং প্রজপামি ।
শ্রদ্ধযা তব বিজৃভিতমীক্ষে শ্রদ্ধযা তব কৃপাং চ নিরীক্ষে ॥ ১২৮॥
বিদ্যুদেব ভবতী চ মরুত্বান্ বিদ্যুদেব গিরিশো গিরিজা চ ।
বিদ্যুদেব গণপঃ সহ সিদ্ধঞ্যা ষট্কভেদ ইহ কার্যবিশেষৈঃ ॥ ১২৯॥
পূরুষশ্চ বনিতেতি বিভেদঃ শক্তশক্তিভিদযা বচনেষু ।
তেজ এব খলু বিদ্যুতি শক্তং বীর্য এব জগদীশ্বরি শক্তিঃ ॥ ১৩০॥
বিদ্যুদম্বরভুবি জ্বলতীশে শব্দমম্ব কুরু তে চ সুসূক্ষ্মম্ ।
ইন্দ্ররুদ্রযুগলব্যবহারে কর্মযুগ্মমিদমীশ্বরি বীজম্ ॥ ১৩১॥
বৈদ্যুতস্য ভবসি জ্বলতোঽগ্নেরম্ব শক্তিরসতাং দমনি ত্বম্ ।
তস্য নাদবত আগমগীতা কালিকা ভবতি শক্তিরভীতা ॥ ১৩২॥
তেজসো রুচিরভীমকলাভ্যাং যদ্বদীশ্বরি শচী ভবতী চ ।
এবমাশ্রিতজনাবনি গৌরী কালিকা চ নিনদস্য কলাভ্যাম্ ॥ ১৩৩॥
বৈদ্যুতোঽগ্নিরখিলেশ্বরি পিণ্ডে মূলতামরসপীঠনিষণ্ণঃ ।
ইন্দ্রিযং ভবতি বাগিতি দেবং যং বিদো গণপতিং কথযন্তি ॥ ১৩৪॥
গ্রন্থিভেদবিকচে সরসীজে জৃম্ভমাণমিহ বৈদ্যুতবহ্নিঃ ।
যাং রুচিং প্রকটযত্যতিবীর্যাং সৈব সিদ্ধিরিতি কাচন লক্ষ্মীঃ ॥ ১৩৫॥
বিদ্যুদেব ভবতী ননু ভান্তী বিদ্যুদেব নগজা নিনদন্তী ।
বিদ্যুদেব তপসো বিলসন্তী বিগ্রহেষু পরমেশ্বরি সিদ্ধিঃ ॥ ১৩৬॥
নৈব কেবলমুদারচরিত্রে বিদ্যুদদ্ভুততমা ত্রিবিভূতিঃ ।
বৈভবং বহু সহস্রবিভেদং কো নু বর্ণযতু পাবনি তস্যাঃ ॥ ১৩৭॥
বৈদ্যুতং জ্বলনমীশ্বরি হিত্বা নৈব দৈবতমভীষ্টতমং নঃ ।
তদ্বিভূতিগুণগানবিলোলা ভারতী জযতু মে বহুলীলা ॥ ১৩৮॥
তেজসশ্চ সহসশ্চ বিভেদাদ্যা তনুস্তব ভবত্যুভযাত্মা ।
তদ্বযং চ মযি চিত্রচরিত্রে জৃম্ভতাং নরজগত্কুশলায ॥ ১৩৯॥
প্রাযশো নিগমবাচি পুমাখ্যা তন্ত্রাবাচি বরদে বনিতাখ্যা ।
প্রাণিনাং জননি তে বিবুধানাং তত্র হেতুরজরে রুচিভেদঃ ॥ ১৪০॥
অত্র সিদ্ধিরুদিতা মম দেহে ভূমিকা ভুবনধাত্রি তবান্যা ।
আহ্বযত্যধিকশক্তিকৃতে ত্বাং ত্বং চ সম্প্রবিশ দেহগুহাং নঃ ॥ ১৪১॥
জৃম্ভতামিযমিতঃ কুলকুণ্ডাদন্তরিক্ষতলতোঽবতর ত্বম্ ।
উল্লসন্ত্ববলসন্তু চ দেহে বীচযোঽত্র ভগিনীদ্বিতযস্য ॥ ১৪২॥
কেবলং ন সহসা মহনীযে তেজসা চ বরদেঽবতর ত্বম্ ।
অত্র সিদ্ধিমপি কেবলবীর্যোল্লাসিনীং জননি যোজয ভাসা ॥ ১৪৩॥
ছিন্নমুজ্জ্বলতটিত্প্রভনেত্রং কণ্ঠরক্ত্জলসীংগ্রহপাত্রম্ ।
মস্তকং তব সহেশ্বরি ধন্যং মস্তকং মম করোতু বিশূন্যম্ ॥ ১৪৪॥
মোচিতাশ্রিতগুহান্তরবন্ধঃ প্রাণবাংস্তব সবিত্রি কবন্ধঃ ।
বাসনাকুসুমতল্পকসুপ্তাং সম্প্রবোধযতু মে মতিমাপ্তাম্ ॥ ১৪৫॥
দেবপূজ্যচরণা তব চেটী নির্বিবন্ধকরুণাপরিপাটী ।
বজ্রপাণিসখি শোকদরিদ্রং বর্ণিনী ভণতু মে বহুভদ্রম্ ॥ ১৪৬॥
চণ্ডচণ্ডি তব যুদ্ধবযস্যা যোগিবেদ্যনিজবীর্যরহস্যা ।
চেতসশ্চ ভুজযোশ্চ সমগ্রং ডাকিনী দিশতু মে বলমুগ্রম্ ॥ ১৪৭॥
মন্মথেন সহ রাগরসার্দ্রা পূরুষাযিতরতা রতিরীড্যা ।
আসনং তব বশীকুরুতান্মে সর্বলোকমপি বজ্রশরীরে ॥ ১৪৮॥
দৃপ্যতাং বিষযবৈরিগণানাং মর্দনায রমণীযমুপাযম্ ।
অম্ব শীঘ্রমভিধায নয ত্বং মামিমং চরণপঙ্কজবন্ধুম্ ॥ ১৪৯॥
তেজসা চ সহসা চ বিভান্তী পুষ্করে চ যমিনাং চ তনূষু ।
সম্মদং ভজতু বাসবশক্তিঃ স্বাগতাভিরমলাভিরিমাভিঃ ॥ ১৫০॥
সপ্তম ইন্দ্রবজ্রাস্তবকঃ
জ্ঞানায হানায চ দুর্গুণানাং ভানায তত্ত্বস্য পরস্য সাক্ষাত্ ।
দেবীং প্রপদ্যে সুরপালশক্তিমেকামনংশামভিতো বিভান্তীম্ ॥ ১৫১॥
ঈশোঽশরীরো জগতাং পরস্তাত্ দেবী খকাযা পরিতো জগন্তি ।
পূর্বো বিশুদ্ধো গুণগন্ধশূন্যঃ স্থানং গুণানামপরাঽখিলানাম্ ॥ ১৫২॥
আক্রম্য লোকং সকলং বিভাতি নো কেবলং ভূরি বিভূতিরম্বা ।
শুদ্ধা পরস্তাদপি নাথচিত্তি রূপা বিপাপা পরিতশ্চকাস্তি ॥ ১৫৩॥
ত্রৌলোক্যভূজানিরণোরণিষ্ঠস্তস্যাত্মশক্তির্মহতো মহিষ্ঠা ।
এতদ্রহস্যং ভুবি বেদ যো না তত্ত্বপ্রসঙ্গএষু ন তস্য মোহঃ ॥ ১৫৪॥
জ্ঞানং পরং ধর্মবদীশতত্ত্বং ধর্মাত্মকং জ্ঞানমজাস্বরূপম্ ।
শক্তীশযোর্ভক্তুমশক্যযোরপ্যেবং বিভাগো বচসা ব্যধাযি ॥ ১৫৫॥
দৃশ্যস্য সর্বস্য চ ভোগকালে ধর্মী চ ধর্মশ্চ বিভাতি বোধঃ ।
অন্তঃ সমাধাবযমেকরূপঃ শক্তীশভেদস্তদসাবনিত্যঃ ॥ ১৫৬॥
ধর্মঃ পরস্তাত্পরমেশ্বরী যা ধর্মিত্বমেষা জগতি প্রযাতি ।
যাবজ্জগজ্জীবিতমপ্রণাশমাকাশমাশ্রিত্য মহচ্ছরীরম্ ॥ ১৫৭॥
ব্যক্তিং খকাযাং প্রজগুঃ পুমাংসমেকে পরে ক্লীবমুদাহরন্তি ।
অস্মাকমেষা পরমাত্মশক্তির্মাতা সমস্তস্য চ কাঽপি নারী ॥ ১৫৮॥
চিদ্রূপমত্যন্তসুসূক্ষ্মমেতত্ জ্যোতির্যদাকাশশরীরমগ্র্যম্ ।
প্রাণঃ স এব প্রণবঃ স এব বহ্নিঃ স এবাম্বরদেশবাসী ॥ ১৫৯॥
বাযুশ্চ রুদ্রশ্চ পুরন্দরশ্চ তস্যৈব বিশ্বং দধতঃ পুমাখ্যাঃ ।
শক্তিশ্চ কালী চ মহাপ্রচণ্ডচণ্ডী চ যোষিত্প্রবরাহ্বযানি ॥ ১৬০॥
অত্রাপি ধর্মী পুরুষঃ পরেষাং ধর্মস্তু নারী বিদুষাং মতেন ।
এষোঽপি বাচৈব ভবেদ্বিভাগঃ শক্যো বিধাতুং ন তু বস্তুভেদাত্ ॥ ১৬১॥
ত্বং দেবি হন্ত্রী মহিষাসুরস্য শুম্ভং সবন্ধুং হতবত্যসি ত্বম্ ।
ত্বং যোগনিদ্রামধুসূদনস্য ভদ্রাসি শক্তির্বলবৈরিণস্ত্বম্ ॥ ১৬২॥
কালস্য লীলাসহচারিণী ত্বং বামাঙ্গমস্যন্ধকবৈরিণস্ত্বম্ ।
সিদ্ধিস্ত্বমশ্রাআন্ততপোভিগম্যা বুদ্ধিস্ত্বমক্ষুদ্রমনুষ্যনম্যা ॥ ১৬৩॥
বিদ্যুত্ত্বমাকাশপথে চরন্তী সূর্যপ্রভা ত্বং পরিতো লসন্তী ।
জ্বালা কৃশানোরসি ভীমলীলা বেলাতিগা ত্বং পরমস্য চিত্তিঃ ॥ ১৬৪॥
ভেদাঃ সহস্রং তব দেবি সন্তু ত্বং মূলশক্তির্মম মাতরেকা ।
স্তোত্রাণি তে বুদ্ধিমতাং বিভূতিদ্বারা বহূনীব বিভান্তি লোকে ॥ ১৬৫॥
উগ্রাণি রূপাণি সহস্রশস্তে সৌম্যানি চাশেষসবিত্রি সন্তি ।
ব্যক্তিত্বমেকং তব ভূরিশক্তিব্যক্তীঃ পৃথক্ চ প্রদদাতি তেভ্যঃ ॥ ১৬৬॥
কুর্বন্তি তাঃ পাবনি বিশ্বকার্যং সর্বং চ লোকাম্ব বিভূতযস্তে ।
স্বর্বৈরিণাং চ প্রতিসন্ধিকালং গর্বং হরন্তি ক্ষণদাচরাণাম্ ॥ ১৬৭॥
চণ্ডী প্রচণ্ডা তব যা বিভূতিঃ বজ্রাত্মিকা শক্তিরপারসারা ।
সা সম্প্রদাযাতুলমম্ব বীর্যং দেবী ক্রিযান্মাং কৃতদেবকার্যম্ ॥ ১৬৮॥
আবিশ্য যা মাং বপুষো গুহাযাং চিত্রাণি তে শক্তিরজে করোতি ।
সা কা তব প্রাজ্যবিভূতিমধ্যে সদ্ধ্যেযরূপে বিশদীকুরুষ্ব ॥ ১৬৯॥
সংশোধনাযৈব কৃতিঃ কিমস্যাঃ সঞ্চালনাযাপি কিমু ক্রিযাণাম্ ।
শক্ত্যৈ কিমেষা বিদধাতি চেষ্টামাহোস্বিদচ্ছাং চ মতিং প্রদাতুম্ ॥ ১৭০॥
প্রাণপ্রদা ভীমতমা চ শক্তির্যা কৃত্তশীর্ষাং সহসাবিবেশ ।
সা মে ক্রিযাত্প্রাণবলং প্রশস্তং হস্তং চ মে কার্যপটুং করোতু ॥ ১৭১॥
সন্দেহজালং প্রবিধূয তেজঃ সন্দাযিনী কৃত্তশিরাঃ করোতু ।
বৃন্দারকারাধিতপাদপদ্মা বন্দারুমন্দারলতা শুভং নঃ ॥ ১৭২॥
মামাবিশন্তী ভব বা ন বা ত্বং সম্পাদযেষ্টং মম বা ন বা ত্বম্ ।
দুর্জ্ঞেযসারে জননি প্রচণ্ডচণ্ডি ত্বমেকা কুলদৈবতং নঃ ॥ ১৭৩॥
নাশং বিধাতুং বিষযদ্বিষাং মে পাশত্রযান্মোচযিতুং চ দেহম্ ।
শেষাহিবর্ণ্যে পদকিঙ্করায ভাষস্ব যোগং জননি প্রচণ্ডে ॥ ১৭৪॥
সর্বাত্মশক্তেঃ পদবন্ধুগীতাঃ কুর্বন্তু ভূযাংসমিহ প্রমোদম্ ।
যুক্ত্স্য দেব্যাস্তটিতঃ সমাধিমত্তস্য চিত্তস্য মমেন্দ্রবজ্রাঃ ॥ ১৭৫॥
অষ্টমো ভযহারিস্তবকঃ
উগ্রতরনাদাং পাপহরপাদাম্ ।
নৌমি খলমারীং বজ্রধরনারীম্ ॥ ১৭৬॥
শক্তকরণানাং গুপ্তভরণানাম্ ।
ধ্বান্তহরবিদ্যুদ্বীচিকিরণানাম্ ॥ ১৭৭॥
নিত্যকরুণানাং ব্যোমশরণানাম্ ।
অস্মি গুণবন্দী মাতৃচরণানাম্ ॥ ১৭৮॥
কাচন শবর্যাং দেবি মুনিনার্যাম্ ।
পুণ্যবদধীতে মোহনকলা তে ॥ ১৭৯॥
কাচিদপি তস্যাং মৌনিজনগীতে ।
কৃত্তশিরসীশে ভীষণকলা তে ॥ ১৮০॥
মঞ্জুতরগুঞ্জাহারনিকরাযৈ ।
চাপশরযুক্ত্প্রোজ্জ্বলকরাযৈ ॥ ১৮১॥
সর্বজনচক্ষুস্তর্পণবিভাযৈ ।
জঙ্গমবিচিত্রাস্বর্ণলতিকাযৈ ॥ ১৮২॥
অভ্রচিকুরাযৈ শুভ্রহসিতাযৈ ।
মাদকমনোজ্ঞস্বাদুবচনাযৈ ॥ ১৮৩॥
ইন্দুবদনাযৈ কুন্দরদনাযৈ ।
মন্দরকুচাযৈ মন্দগমনাযৈ ॥ ১৮৪॥
অঞ্জলিরযং মে কঞ্জনযনাযৈ ।
মৌনিকুলনার্যৈ পাবনশবর্যৈ ॥ ১৮৫॥
পাবনচরিত্রাং মারমণপুত্রাম্ ।
ছিন্নশিরসং তাং নৌমি মুনিকান্তাম্ ॥ ১৮৬॥
মাতরযি বীর্যত্রাতবরধর্মে ।
মাঽস্তু হৃদি মোহঃ সন্ন্তিরিপুর্মে ॥ ১৮৭॥
দেবি মুনিচেতো রঙ্গলসদূর্মে ।
মাঽস্তু হৃদি কামঃ সুস্থিতিরিপুর্মে ॥ ১৮৮॥
দেবজনভর্তুঃ প্রাণসখি রামে ।
মাঽস্তু হৃদি ভীতির্বীর্যদমনী মে ॥ ১৮৯॥
ব্যোমচরি মাতর্ভামযি বিসীমে ।
মাঽস্তু হৃদি কোপো বুদ্ধিদমনো মে ॥ ১৯০॥
সাধ্ববনলোলে দেবি বহুলীলে ।
অস্তু মম ধৈর্যং চেতসি সুবীর্যম্ ॥ ১৯১॥
সর্বতনুপাকাধাযি তব ভব্যম্ ।
অস্তু বরতেজো নেতৃ মম দিব্যম্ ॥ ১৯২॥
ইচ্ছতি সবিত্রী যত্ প্রিযসুতায ।
তদ্বিতর সর্বং দেবি ভজকায ॥ ১৯৩॥
ইচ্ছতি মনুষ্যো যদ্রিপুজনায ।
মত্তদযি দূরে পালয বিধায ॥ ১৯৪॥
বর্ধযতু তেজো বর্ধযতু শক্তিম্ ।
বর্ধযতু মেঽম্বা বজ্রভৃতিভক্তিম্ ॥ ১৯৫॥
বজ্রমযি মাতর্বজ্রধরভক্ত্ঃ ।
অস্তু তব বীর্যাদত্র ভুবি শক্ত্ঃ ॥ ১৯৬॥
নশ্যতু সমস্তো বজ্রধরবৈরী ।
এতু জযমন্তর্বজ্রধরনারী ॥ ১৯৭॥
হস্তধৃতমুণ্ডঃ কশ্চন কবন্ধঃ ।
অস্তু মম ভিন্নগ্রন্থিচযবন্ধঃ ॥ ১৯৮॥
সাধয মদিষ্টং যোগমভিধায ।
দেবি বিষযারিব্রাতদমনায ॥ ১৯৯॥
সম্মদযতান্মে স্বাংশকৃতশম্বাম্ ।
চারুভযহারিচ্ছন্দ ইদমম্বাম্ ॥ ২০০॥
তৃতীযং শতকম্
নবমো মদলেখাস্তবকঃ
বন্দে বাসবশক্তেঃ পাদাব্জং প্রিযভক্ত্ম্ ।
প্রাতর্ভাস্কররক্তং পাপধ্বংসনশক্ত্ম্ ॥ ২০১॥
হুঙ্কারানলকীলাদগ্ধারাতিসমূহাম্ ।
বিদ্যুদ্ভাসুরবীক্ষানির্ধূতাশ্রিতমোহাম্ ॥ ২০২॥
দেবস্ত্রীনিটলেন্দুজ্যোত্স্নালালিতপাদাম্ ।
মেঘশ্রেণ্যুপজীব্যশ্রোত্রাকর্ষকনাদাম্ ॥ ২০৩॥
দীপ্তাং ভাস্করকোটিচ্ছাযাযামিব মগ্নাম্ ।
গাত্রালম্বিবিনৈবক্ষৌমং কিঞ্চিদিনগ্নাম্ ॥ ২০৪॥
কণ্ঠে কল্পিতহারাং মুণ্ডানাং শতকেন ।
জ্ঞেযামূল্যরহস্যাং নিব্র্যাজং ভজকেন ॥ ২০৫॥
স্বর্গস্য ক্ষিতিপালং পশ্যন্তীং প্রণযেন ।
ধুন্বানাং বিবুধানাং ভীতিং শক্তশযেন ॥ ২০৬॥
শক্তীনামধিরাজ্ঞীং মাযানামধিনাথাম্ ।
চণ্ডাং কামপিচণ্ডীং গাযাম্যদ্ভুতগাথাম্ ॥ ২০৭॥
ভিত্ত্বা মস্তকমেতত্ পাদাঘাতবলেন ।
আবিশ্যাখিলকাযং খেলত্পাবনলীলম্ ॥ ২০৮॥
বেগেনাবতরত্তে তেজোনাশিতপাশম্ ।
চণ্ডে চণ্ডি সমস্তং গোপ্যং ভাসযতান্মে ॥ ২০৯॥
অন্তঃ কিঞ্চ বহিস্তে মাতর্দারিতমস্তে ।
মামাবৃত্য সমন্তাত্তেজঃ কর্ম করোতু ॥ ২১০॥
ইন্দ্রাণীকলযা যত্কৃত্তামাবিশদুগ্রা ।
শক্যং বর্ণযিতুং তদ্দৃশ্যং কেন বুধেন ॥ ২১১॥
প্রাণাপেতশরীরাণ্যাবেষ্টুং প্রভবন্তঃ ।
ভেতালাস্তব ভৃত্যাশ্চণ্ডে চণ্ডি চরন্তঃ ॥ ২১২॥
ছিন্নাং সম্প্রবিশন্তীবজ্রেশ্বর্যতিশক্তা ।
নিঃশেষৈরতিভীমৈর্ভেতালৈরভিষিক্তা ॥ ২১৩॥
ভেতালাঃ পরমুগ্রাস্ত্বং তেষ্বপ্যধিকোগ্রা ।
তস্মাদাহুরযি ত্বাং চণ্ডামীশ্বরি চণ্ডীম্ ॥ ২১৪॥
আসীদ্ঘাতযিতুং ত্বাং সাধোর্ধীর্জমদগ্নেঃ ।
ভেতালপ্রভুসর্গাযোল্লঙ্ঘ্যৈব নিসর্গম্ ॥ ২১৫॥
আদেষ্টাশমবিত্তো হন্তাসাত্ত্বিকমৌলিঃ ।
বধ্যা নিশ্চলসাধ্বী শোচ্যেতশ্চ কথা কা ॥ ২১৬॥
নির্যদ্রক্তকণেভ্যঃ কণ্ঠাত্তে ভুবি জাতাঃ ।
মার্যাদ্যামযবীজীভূতস্তম্ববিশেষাঃ ॥ ২১৭॥
করাগারনিবাসাত্মাহিষ্মপত্যধিপস্য ।
জাতা ভার্গবশঙ্কা হত্যাযাস্তব মূলম্ ॥ ২১৮॥
সত্যং তেঽম্ব চরিত্রাং ভদ্মঃ কোঽপি নিগুহ্য ।
ত্রাতুং যাদবকীতিং মিথ্যাহেতুমবাদীত্ ॥ ২১৯॥
অন্যাগারনিবাসে হত্যা ত্যাগ উতাহো ।
স্ত্রীণাং চেত্পরুষং ধিগ্ভাবং পূরুষজাতেঃ ॥ ২২০॥
স্বাতন্ত্র্যং বনিতানাং ত্রাতুং মাতরধীশে ।
দূরীকর্তুমপারং দৈন্যং পঞ্চমজাতেঃ ॥ ২২১॥
ধর্মং ব্যাজমধর্মং ভূলোকে পরিহর্তুম্ ।
বেদার্থে চ গভীরে সন্দেহানপি হর্তুম্ ॥ ২২২॥
ঘোরং বর্ণবিভেদং কর্তুং চ স্মৃতিশেষম্ ।
উল্লাসং মতিশক্ত্যোর্মহ্যং দেহি মহান্তম্ ॥ ২২৩॥
যোগং মে বিষযারীন্ নির্মূলং পরিমার্ষ্টুম্ ।
শ্রীমাতঃ কুরু চিত্তং কারুণ্যেন নিদেষ্টুম্ ॥ ২২৪॥
চণ্ড্যাধ্ণ্ডতমাযাঃ চিত্তং সংযমমত্তম্ ।
ভূযঃ সম্মদযন্তাং হৈরম্ব্যো মদলেখাঃ ॥ ২২৫॥
দশমঃ পথ্যাবক্ত্রাস্তবকঃ
ইন্দ্রাণ্যাঃ পরমাং শক্তিং সর্বভূতাধিনাযিকাম্ ।
প্রচণ্ডচণ্ডিকাং দেবীং ছিন্নমস্তাং নমাম্যহম্ ॥ ২২৬॥
ইন্দ্রাণ্যাঃ শক্তিসারেণ প্রাদুর্ভূতে পরাত্পরে ।
প্রচণ্ডচণ্ডি বজ্রাত্মন্ বৈরোচনি নমোঽস্তু তে ॥ ২২৭॥
ত্বং বিশ্বধাত্রি বৃত্রারেঃ আযুধস্যাধিদেবতা ।
সর্বপ্রচণ্ডভাবানাং মধ্যে প্রকৃতিতঃ পরা ॥ ২২৮॥
সর্বস্মিন্নপি বিশ্বস্য সর্গেঽনর্গলবিক্রমে ।
ত্বত্তশ্চণ্ডতমো ভাবো ন ভূতো ন ভবিষ্যতি ॥ ২২৯॥
তটিতঃ শক্তিসারেণ বজ্রং নির্মিতমাযুধম্ ।
অভূত্তদ্বিনযদ্দেবং তটিদেব নিজাংশতঃ ॥ ২৩০॥
পর্বতশ্চ পুলোমা চ সজলোঽযং ঘনাঘনঃ ।
পার্বতীতি তটিদ্দেবীং পৌলোমীতি চ তদ্বিদুঃ ॥ ২৩১॥
শৈবানাং ভাষযা দেবি ত্বং তটিদ্দেবি পার্বতী ।
ঐন্দ্রাণাং ভাষযা মাতঃ পৌলোমী ত্বমনামযে ॥ ২৩২॥
পূর্বেষাং দযিতঃ শব্দো দুর্গেতি দুরিতাপহে ।
প্রচণ্ডচণ্ডিকাশব্দ উত্তরেষামতিপ্রিযঃ ॥ ২৩৩॥
বৈষ্ণবানাং গিরা দেবি যোগমাযা ত্বমদ্ভুতা ।
বাচা হৈরণ্যগর্ভাণাং সবিত্রি ত্বং সরস্বতী ॥ ২৩৪॥
দধানা ভুবনং সর্বং ব্যাপিকাপদ্বিবর্জিতা ।
তটিচ্ছব্দাযতে ব্যোম্নি প্রাণিত্যপি বিরাজতে ॥ ২৩৫॥
প্রচণ্ডচণ্ডিকা সেযং তটিত্সূক্ষ্মেণ তেজসা ।
বিশ্বস্মিন্নখিলান্ভাবান্মাতাঽনুভবতি স্বযম্ ॥ ২৩৬॥
ভাবানামনুভূতানাং বাক্যত্বেনাবভাসনম্ ।
ভবত্যব্যক্তশব্দেঽস্যাঃ সর্বংবিজ্ঞানশেবধৌ ॥ ২৩৭॥
যদি সা সর্বজগতাং প্রাণশ্চেতশ্চ শেমুষী ।
প্রাণচেতোমনীষাণাং তস্যাঃ কো নাম সংশযঃ ॥ ২৩৮॥
প্রাণন্তী চিন্তযন্তী সা রাজন্তী চ বিহাযসি ।
তটিচ্ছব্দাযমানা চ দেবী বিজযতেতরাম্ ॥ ২৩৯॥
সেচ্ছযা দধতী রূপং মোহনং কীর্ত্যতে শচী ।
প্রচণ্ডচণ্ডিকা গীতা বিভ্রাণা ভীষণং বপুঃ ॥ ২৪০॥
পিণ্ডে কুণ্ডলিনীশক্তিঃ সৈব ব্রহ্নাণ্ডচালিকা ।
নিদ্রাতি জডদেহেষু যোগিদেহেষু খেলতি ॥ ২৪১॥
এষা বৈরোচনী দুর্গা জ্বলন্তী তপসা পরা ।
সমুল্লসতি যস্যান্তঃ স জীবন্নেব মুচ্যতে ॥ ২৪২॥
যোগিনো বোধযন্তী মাং যোগেন নিযতব্রতাঃ ।
সর্বার্পকস্য দেহে সা স্বযমেব সমুল্লসেত্ ॥ ২৪৩॥
শারীরশক্তিমাত্র্স্য যোগী সঞ্চালকো ভবেত্ ।
বাহ্যশারীরশক্ত্যোস্তু যোগো নানুগ্রহং বিনা ॥ ২৪৪॥
চণ্ডনারীস্বরূপেণ তটিদ্রূপেণ চাম্বরে ।
পিণ্ডে কুণ্ডলিনীতন্বা চরন্তী দেবি রাজসে ॥ ২৪৫॥
মস্তকস্থানমনসো মহাদেবি বিনাশনাত্ ।
রেণুকাযামুতাবেশাত্ কৃত্তমস্তেতি তে পদম্ ॥ ২৪৬॥
যদাবিশস্ত্বমুগ্রেঽম্ব রেণুকামুগ্রতেজসা ।
তদা পৃথঙ্মহাশক্তিঃ সা ব্যক্তিঃ সমপদ্যত ॥ ২৪৭॥
ব্যক্তীনাং দুর্জনঘ্নীনাং ত্বত্তেজোভাগজন্মনাম্ ।
বহুত্বেপি ত্বমেকৈব মূলশক্তিঃ সনাতনী ॥ ২৪৮॥
উপাযমভিধাযাম্বা বিষযারিবিদারণে ।
প্রচণ্ডচণ্ডিকা দেবী বিনযত্বঙ্ঘ্রিসেবিনম্ ॥ ২৪৯॥
রমযন্তামুপশ্লোকযন্তি যান্তি ক্তদন্তরম্ ।
পথ্যাবক্ত্রাণি পাপঘ্নীমেতানি চ্ছিন্নস্তকাম্ ॥ ২৫০॥
একাদশ উপজাতিস্তবকঃ
মেরূপমানস্তনভারতান্তাং শক্রস্য লীলাসহচারিণীং তাম্ ।
হর্তুং সমূলং হৃদযস্য মোহং প্রচণ্ডচণ্ডীমভিবাদযেঽহম্ ॥ ২৫১॥
বেদাদিবীজং জলজাক্ষজাযা প্রাণপ্রিযা শীতমযূখমৌলেঃ ।
কন্তুর্বিধাতুর্হৃদযাধিনাথা জলং জকারো দহনেন যুক্ত্ঃ ॥ ২৫২॥
তোযং পুনর্দ্বাদশবর্ণযুক্তং ত্রাযোদশেনাথ যুতঃ কৃশানুঃ ।
তালব্যবর্গপ্রথমো নকারঃ ততধ্তুর্থস্বরসম্প্রযুক্ত্ঃ ॥ ২৫৩॥
একাদশেনাথ যুতঃ সমীরঃ স ষষ্ঠবিন্দুঃ সরণিঃ সুরাণাম্ ।
তদেব বীজং পুনরস্ত্রমন্তে কৃপীটযোনের্মনসোঽধিনাথা ॥ ২৫৪॥
বিদ্যা ত্বিযং সর্দিশাক্ষরাঢ্যা স্বযং মহাকালমুখোপদিষ্টা ।
গোপ্যাসু গোপ্যা সুকৃতৈরবাপ্যা ষষ্ঠীবিনুত্যা পরমেষ্ঠিনাপি ॥ ২৫৫॥
স্থানে সহস্রচ্ছদসাযকস্য পুনর্যদীশানমনোধিনাথা ।
সর্বার্থদঃ সর্দিশাক্ষরোঽন্যঃ প্রচণ্ডচণ্ডী মনুরুত্তমঃ স্যাত্ ॥ ২৫৬॥
বেদাদিবীজেন বিহীনমাদ্যং পুনর্ভবানীবিযুতং দ্বিতীযম্ ।
মন্ত্রাবুভৌ ষোডশবর্ণযুক্তৌ প্রচণ্ডচণ্ড্যাঃ পবিনাযিকাযাঃ ॥ ২৫৭॥
মন্ত্রে তৃতীযে যদি কূর্চবীজং স্থানে রতের্জীবিতবল্লভ্স্য ।
মন্ত্রোঽপরঃ ষোডশবর্ণযুক্ত্ঃ প্রচণ্ডচণ্ড্যাঃ পটুশক্তিরুক্ত্ঃ ॥ ২৫৮॥
অযং হরের্বল্লভ্যা বিহীনো মন্ত্রোঽপরঃ পঞ্চদশাক্ষরঃ স্যাত্ ।
ক্রোধশ্চ সম্বোধনমস্ত্রমগ্নেঃ সীমন্তিনী চেতি ধরেন্দুবর্ণঃ ॥ ২৫৯॥
ধেনুঃ কৃশানোহৃদযেশ্বরী চ প্রচণ্ডচণ্ডী মনুরগ্নিবর্ণঃ ।
একৈব ধেনুঃ সুররাজশক্তেঃ একাক্ষরঃ কশ্চন মন্ত্ররাজঃ ॥ ২৬০॥
এতেষু তন্ত্রাপ্রণুতেষু ভক্তো মন্ত্রাং নবস্বন্যতমং গৃহীত্বা ।
যঃ সংশ্রযেতাশ্রিতকামধেনুং প্রচণ্ডচণ্ডীং স ভবেত্ কৃতার্থঃ ॥ ২৬১॥
বেদাদিরম্ভোরুহনেত্রজাযা মাযাঙ্কুশব্রহ্নমনোধিনাথাঃ ।
ইতীযমব্যাজরতিং জপন্তং পঞ্চাক্ষরী রক্ষতি রেণুকাযাঃ ॥ ২৬২॥
ঋষ্যাদিসঙ্কীর্তনমেষু মাঽস্তু করাঙ্গবিন্যাসবিধিশ্চ মাঽস্তু ।
মূর্তিং যথোক্তামুত দিব্যতত্ত্বং ধ্যাত্বা জপেত্ সিদ্ধিরসংশযং স্যাত্ ॥ ২৬৩॥
নাভিস্থশুক্লাব্জগসূর্যবিম্বে সংসক্তরত্যম্বুজবাণপীঠে ।
স্থিতাং পদেনান্যতরেণ সম্যগুত্ক্ষিপ্তদীপ্তান্যতরাঙ্ঘ্রিপদ্মাম্ ॥ ২৬৪॥
দিগম্বরামর্কসহস্রভাসমাচ্ছাদিতাং দীধিতিপঞ্জরেণ ।
কণ্ঠস্থলীভাসুরমুণ্ডমালাং লীলাসখীং দেবজনাধিপস্য ॥ ২৬৫॥
ছিন্নং শিরঃ কীর্ণকচং দধানাং করেণ কণ্ঠোদ্গতরক্ত্ধারাম্ ।
ধারাত্রযে তত্র চ মদ্যধারাং করস্থবক্ত্রেণ মুদা পিবন্তীম্ ॥ ২৬৬॥
পার্শ্বে সখীং ভাসুরবর্ণিনীং চ পার্শ্বান্তরে ভীষণডাকিনীং চ ।
অন্যে পিবন্ত্যাবসৃগম্বুধারে নিরীক্ষমাণামতিসম্মদেন ॥ ২৬৭॥
ভযঙ্করাহীশ্বরবদ্ধমৌলিং জ্বলদ্যুগান্তানলকীলকেশীম্ ।
স্ফুরত্প্রভাভাসুরবিদ্যুদক্ষীং চণ্ডীং প্রচণ্ডাং বিদধীত চিত্তে ॥ ২৬৮॥
গুঞ্জাফলাকল্পিতচারুহারা শীর্ষে শিখণ্ডং শিখিনো বহন্তী ।
ধনুশ্চ বাণান্দধতী করাভ্যাং সা রেণুকা বল্কলভৃত্বিচিন্ত্যা ॥ ২৬৯॥
তটিজ্ঝরীং কামপি সম্প্রশ্যন্ আকাশতঃ সর্বতনৌ পতন্তীম্ ।
মৌনেন তিষ্ঠেদ্যমিনাং বরিষ্ঠো যদ্যেতদম্বাস্মরণং প্রশস্তম্ ॥ ২৭০॥
দৃশ্যানশেষানপি বর্জযিত্বা দৃষ্টিং নিজাং সূক্ষ্মমহঃস্বরূপাম্ ।
নিভালযেদ্যন্মনসা বরীযানন্যোঽযমম্বাস্মরণস্য মার্গঃ ॥ ২৭১॥
বিনা প্রপত্তিং প্রথমো ন সিধ্যেত্ মার্গোঽনযোঃ কেবলভাবনাতঃ ।
হৃদিস্থলে যোগবলেন চিত্তের্নিষ্ঠাং বিনা সিধ্যতি ন দ্বিতীযঃ ॥ ২৭২॥
আরম্ভ এবাত্র পথোর্বিভেদঃ ফলে ন ভেদো রমণো যথাহ ।
স্থিতৌ ধিযো হস্তগতাপ্রপত্তিঃ প্রপত্তিসিদ্ধৌ সুলভৈব নিষ্ঠা ॥ ২৭৩॥
উপাযমেকং বিষযারিনাশবিধৌ বিধাযাবগতং মমাম্বা ।
কৃত্বা সমর্থং চ নিজানুকম্পাং প্রচণ্ডচণ্ডী প্রথযত্বপারাম্ ॥ ২৭৪॥
সধ্যানমার্গং বরমন্ত্রকল্পং প্রচণ্ডচণ্ড্যাঃ পরিকীর্তযন্ত্যঃ ।
ভবন্তু মোদাতিশযায শক্তেরুপাসকানামুপজাতযো নঃ ॥ ২৭৫॥
দ্বাদশো নারাচিকাস্তবকঃ
বীর্যে জবে চ পৌরুষে যোষাঽপি বিশ্বতোঽধিকা ।
মাং পাতু বিশ্বচালিকা মাতা প্রচণ্ডচণ্ডিকা ॥ ২৭৬॥
শুদ্ধা চিতিঃ সতঃ পুরা পশ্চান্নভঃ শরীরকা ।
যোষাতনুস্ততঃ পরং মাতা প্রচণ্ডচণ্ডিকা ॥ ২৭৭॥
পারে পরাত্মনঃ প্রমা খে শক্তিরুত্তমোত্তমা ।
পিণ্ডেষু কুণ্ডলিন্যজা মাতা প্রচণ্ডচণ্ডিকা ॥ ২৭৮॥
নাকে বিলাসশেবধির্নালীকলোচনা শচী ।
প্রাণপ্রকৃষ্টবিষ্টপে মাতা প্রচণ্ডচণ্ডিকা ॥ ২৭৯॥
একস্য সা মহেন্দিরা দেবী পরস্য কালিকা ।
অস্মাকমুজ্জ্বলাননা মাতা প্রচণ্ডচণ্ডিকা ॥ ২৮০॥
রাজীববান্ধবো দিবি হ্রাদিন্যপারপুষ্করে ।
অগ্নির্মনুষ্যবিষ্টপে মাতা প্রচণ্ডচণ্ডিকা ॥ ২৮১॥
তেজঃ সমস্তপাচকং চক্ষুঃ সমস্তলোককম্ ।
চিত্তং সমস্তচিন্তকং মাতা প্রচণ্ডচণ্ডিকা ॥ ২৮২॥
দ্যৌস্তেজসাং মহানিধিঃ ভূমিশ্চ ভূতধারিণী ।
আপশ্চ সূক্ষ্মবীচযো মাতা প্রচণ্ডচণ্ডিকা ॥ ২৮৩॥
নির্বাহুকস্য সা করো নির্মস্তকস্য সা মুখম্ ।
অন্ধস্য সা বিলোচনং মাতা প্রচণ্ডচণ্ডিকা ॥ ২৮৪॥
পাণিং বিনা করোতি সা জানাতি মানসং বিনা ।
চক্ষুর্বিনা চ বীক্ষতে মাতা প্রচণ্ডচণ্ডিকা ॥ ২৮৫॥
হস্তস্য হস্ত উত্তমঃ চিত্তস্য চিত্তমদ্ভুতম্ ।
নেত্রাস্য নেত্রামাযতং মাতা প্রচণ্ডচণ্ডিকা ॥ ২৮৬॥
সা ভারতী মনীষিণাং সা মানসং মহাত্মনাম্ ।
সা লোচনং প্রজানতাং মাতা প্রচণ্ডচণ্ডিকা ॥ ২৮৭॥
সক্তিঃ সমস্তবাধিকা যুক্তিঃ সমস্তসাধিকা ।
শক্তিঃ সমস্তচালিকা মাতা প্রচণ্ডচণ্ডিকা ॥ ২৮৮॥
ছিন্নাঽপি জীবধারিণী ভীমাঽপি শান্তিদাযিনী ।
যোষাঽপি বীর্যবর্ধনী মাতা প্রচণ্ডচণ্ডিকা ॥ ২৮৯॥
মাহেন্দ্রশক্তিরুত্তমা সূক্ষ্মাঽপি ভারবত্তমা ।
শাতাপি তেজসা ততা মাতা প্রচণ্ডচণ্ডিকা ॥ ২৯০॥
পুত্রেণ কৃত্তমস্তকামাবিশ্য রেণুকাতনুম্ ।
সা খেলতি ক্ষমাতলে মাতা প্রচণ্ডচণ্ডিকা ॥ ২৯১॥
মামুগ্রপাপহারিণী সর্বপ্রপঞ্চধারিণী ।
পাযাদপাযতোঽখিলান্ মাতা প্রচণ্ডচণ্ডিকা ॥ ২৯২॥
ইন্দ্রেসুরারিহর্তরি ত্রৈলোক্যভূমিভর্তরি ।
ভক্তিং তনোতু মে পরাং মাতা প্রচণ্ডচণ্ডিকা ॥ ২৯৩॥
নিষ্ঠামনন্যচালিতাং শ্রেষ্ঠাং ধিযং চ সর্বগাম্ ।
গীতা সুরৈর্দদাতু মে মাতা প্রচণ্ডচণ্ডিকা ॥ ২৯৪॥
সত্যাং গিরং দদাতু মে নিত্যাং করোতু চ স্থিতিম্ ।
ধূতাখিলাঽঘসন্ততিঃ মাতা প্রচণ্ডচণ্ডিকা ॥ ২৯৫॥
সর্বং চ মে কৃতাকৃতং কর্মাগ্র্যমল্পমেব বা ।
সম্পূরযত্বনামযা মাতা প্রচণ্ডচণ্ডিকা ॥ ২৯৬॥
তেজোঝরস্বরূপযা ভূযাদৃতস্য ধারযা ।
বিশ্বাবভাসিকেহ মে মাতা প্রচণ্ডচণ্ডিকা ॥ ২৯৭॥
সা মেঽল্পমর্ত্যতাশ্রিতাং হত্বাঽধমামহঙ্কৃতিম্ ।
আক্রম্য ভাতু মে তনুং মাতা প্রচণ্ডচণ্ডিকা ॥ ২৯৮॥
আত্মারিনাশনে বিধিং সা মেঽভিধাযবত্সলা ।
সর্বং ধুনোতু সংশযং মাতা প্রচণ্ডচণ্ডিকা ॥ ২৯৯॥
এতাভিরুত্তমাংশুভিঃ নারাচিকাভিরীশ্বরী ।
সন্তোষমেতু বর্ধতাং মাতা প্রচণ্ডচণ্ডিকা ॥ ৩০০॥
॥ ইতি শ্রীভগবন্মহর্ষিরমণান্তেবাসিনো বাসিষ্ঠস্য
নরসিংহসূনোর্গণপতেঃ কৃতিঃ প্রচণ্ডচণ্ডীত্রিশতী সমাপ্তা ॥
From Complete works of shri Vasishtha Ganapati Muni Vol. 2.15
Proofread by Kaushal S. Kaloo kaushalskaloo at gmail.com
Please send corrections to sanskrit@cheerful.com
Last updated ত্oday
http://sanskritdocuments.org
প্রথমং শতকম্
প্রথমো মুকুলস্তবকঃ
বজ্রং জম্ভভিদঃ সর্বস্বং নভসঃ ।
বন্দে বৈরিসহং বিদ্যুজ্জ্যোতিরহম্ ॥ ১॥
সা শক্তির্মরুতামীশানস্য ততা ।
ব্যোমাগাররমা সা দেবী পরমা ॥ ২॥
সূক্ষ্মং ব্যাপিমহো দৃশ্যং বারিধরে ।
তত্ত্বং তে মরুতাং রাজ্ঞঃ পত্নিপরে ॥ ৩॥
দ্বাভ্যাং ত্বং বনিতারূপাভ্যাং লসসি ।
একা তত্র শচী চণ্ডাচণ্ড্যপরা ॥ ৪॥
একা কান্তিমতী ভর্তৃস্তল্পসখী ।
অন্যা বীর্যবতী প্রাযো যুদ্ধসখী ॥ ৫॥
একা মোহযতে শক্রং চন্দ্রমুখী ।
অন্যা ভীষযতে শত্রূনর্কমুখী ॥ ৬॥
একস্যাং তটিতো রম্যা দীপ্তিকলা ।
অন্যস্যাং সুতরামুগ্রা শক্তিকলা ॥ ৭॥
একস্যাঃ সদৃশী সৌন্দর্যে ন পরা ।
অন্যস্যাস্তু সমা বীর্যে নাস্ত্যপরা ॥ ৮॥
একা সঞ্চরতি স্বর্গে ভোগবতী ।
অন্যা ভাতি নভোরঙ্গে যোগবতী ॥ ৯॥
একা বা দশযোঃ ভেদেন দ্বিবিধা ।
ইন্দ্রাণী বিবুধৈঃ গীতা পুণ্যকথা ॥ ১০॥
চণ্ডি ত্বং বরদে পিণ্ডে কুণ্ডলিনী ।
গীতা চ্ছিন্নশিরাঃ প্রাজ্ঞৈর্বৈভবিনী ॥ ১১॥
আহুঃ কুণ্ডলিনীং যন্মূধ্র্না বিযুতাম্ ।
চিত্রা সা বচসো ভঙ্গী বুদ্ধিমতাম্ ॥ ১২॥
পুত্রাচ্ছিন্নশিরাঃ পুণ্যাযাঽব্জমুখী ।
আবিক্ষত্ কিল তাং শক্তিঃ শক্রসখী ॥ ১৩॥
তস্মাদ্বাযমবচ্চিত্তাম্ভোজরমা ।
উক্তা কৃত্তশিরাঃ সা শক্তিঃ পরমা ॥ ১৪॥
ওজীযস্যবলা তুল্যা কাপি নতে ।
রাজারের্জননি স্বর্নারীবিনুতে ॥ ১৫॥
যাবন্তোঽবতরাঃ শক্তের্ভূমিতলা ।
বীর্যেণাস্যধিকা তেষু ত্বং বিমলে ॥ ১৬॥
প্রাগেব ত্বযি সত্যৈন্দ্রীশক্তিকলা ।
ব্যক্তাঽভূচ্ছিরসি চ্ছিন্নে ভূরিবলা ॥ ১৭॥
ত্বং ছিন্নে মহসাং রাশিঃ শক্তিরসি ।
হুঙ্কারেণ রিপুব্রাতং নির্দহসি ॥ ১৮॥
ভোগাসক্তরতিগ্রাহাঙ্কাসনগা ।
বালার্কদ্যুতিভৃত্পাদাম্ভোজযুবা ॥ ১৯॥
ছিন্নং পাণিতলে মূর্ধানং দধতী ।
প্রাণানাত্মবশে সংস্থাপ্যানহতী ॥ ২০॥
স্ফারাস্যেন পিবন্ত্যুল্লোলানসৃজঃ ।
ধ্বস্তানাদধতী দৃপ্তান্ ভূমিভুজঃ ॥ ২১॥
ডাকিন্যাঽনঘযা বর্ণিন্যা চ যুতা ।
রামাম্বাঽবতু মাং দিব্যং ভাবমিতা ॥ ২২॥
কার্যং সাধযিতুং বীর্যং বর্ধয মে ।
চিত্তং স্বাত্মনি চ চ্ছিন্নে স্থাপয মে ॥ ২৩॥
যোগং মে বিষযারাত্যব্ধিং তরিতুম্ ।
চিত্তং দেবি কুরু ত্বং সাক্ষাদ্দিতুম্ ॥ ২৪॥
মান্দারৈরিব মে গাযত্রৈর্বিমলৈঃ ।
ছিন্নে সিধ্যতু তে পাদার্চা মুকুলৈঃ ॥ ২৫॥
দ্বিতীযো বৃহতীস্তবকঃ
নিখিলামযতাপহরী নিজসেবকভব্যকরী ।
গগনামৃতদীপ্তিঝরী জযতীশ্বরচিল্লহরী ॥ ২৬॥
বিপিনে বিপিনে বিনুতা নগরে নগরে নমিতা ।
জযতি স্থিরচিত্তহিতা জগতাং নৃপতের্দযিতা ॥ ২৭॥
মতিকৈরবিণীন্দুকলা মুনিহৃত্কমলে কমলা ।
জযতি স্তুতিদূরবলা জগদীশবধূর্বিমলা ॥ ২৮॥
কলিপক্ষজুষাং দমনী কলুষপ্রততেঃ শমনী ।
জযতি স্তুবতামবনী সদযা জগতো জননী ॥ ২৯॥
অতিচণ্ডিসুপর্বনুতে বলপৌরুষযোরমিতে ।
জননং সুজনাবনিতে জগতামুপকারকৃতে ॥ ৩০॥
সকলামযনাশচণে সততং স্মরতঃ সুগুণে ।
মম কার্যগতেঃ প্রথমং মরণং ন ভবত্বধমম্ ॥ ৩১॥
মরণস্য ভযং তরিতুং করুণারসবাহিনি তে ।
স্মরণাদ্রসযামি গলচ্চরণাম্বুরুহাদমৃতম্ ॥ ৩২॥
বনিতাবপুষধ্রণং জগদম্ব ন বেদ্মি তব ।
বিযদগ্নিতনোধ্রণং শিরসেহ বহামি সদা ॥ ৩৩॥
শতশঃ প্রসৃতৈধ্রণৈঃ মুনিমস্তকবীথিষু সা ।
বিপুলে গগনে বিততা চরতি ত্রিদশেশসখী ॥ ৩৪॥
বিশতি প্রবিধায পথশ্চরণস্য বিভাম্বগুহাম্ ।
বিহিতস্য মমেহশিরস্যজরে জগদীশ্বরি তে ॥ ৩৫॥
চরণস্য বিভা কিমু তে তব কাচন বীচিরুত ।
বিবিধা বিদধাতি কথাঃ প্রবিশন্ত্যযি ভক্ত্গুহাম্ ॥ ৩৬॥
নিজবীচিবিলাসপদং মম কাযমিদং জগতি ।
করণং সুরকার্যকৃতে তব নিস্তুলভে ভবতু ॥ ৩৭॥
মম বর্ষ্মণি হীনবলে যদি কশ্চন লোপ ইব ।
তমপোহ্যপটিষ্ঠতমং কুরু বিষ্টপমাতরিদম্ ॥ ৩৮॥
সহতামিদমম্ববপুস্তব নাট্যমপারজবম্ ।
বহিরন্তরশত্রুসহং ভজতাং বহুলং চ বলম্ ॥ ৩৯॥
পৃথিবী চ সহেত ন তে তটিদীশ্বরি নাট্যজবম্ ।
করুণা যদি দেবি ন তে বপুষামিহ কা নু কথা ॥ ৪০॥
তব শক্তিঝরীপতনং বহিরদ্ভুতবৃষ্টিরিব ।
ইদমন্তরনন্তবলে মদিরারসপানমিব ॥ ৪১॥
পরমিক্ষুরসো মধুরো মদিরামদকৃত্পরমা ।
মধুরা মদকৃচ্চ ভৃশং তব শক্তিকলালহরী ॥ ৪২॥
রসনেন্দ্রিযমাত্রামুদং বর ইক্ষুরসঃ কুরুতে ।
বহিরন্তরপি প্রমদং তব শক্তিকলালহরী ॥ ৪৩॥
বপুষো মনসশ্চধিযো বলমদ্ভুতমাদধতী ।
প্রমদং চ জযত্যজরে তব শক্তিকলালহরী ॥ ৪৪॥
তব শক্তিকলালহরী পরিশোধযতে ভুবি যম্ ।
বিদুরাগমসারবিদঃ সনিমেষমমর্ত্যমিমম্ ॥ ৪৫॥
লহরীমখিলাম্ব বিনা তব যোঽনুভবং বদতি ।
অযি বঞ্চিত এষ মৃষা বিষযেণ মহাবিভবে ॥ ৪৬॥
সততালহরী যদি তে বহিরন্তরপি প্রগুণা ।
ভববন্ধচযঃ শিথিলো ভুবি জীবত এব ভবেত্ ॥ ৪৭॥
ইহ তাবদপারবলে সকলা অপি যোগকথাঃ ।
তব যাবদনন্তজুষো ন পবিত্রঝরীপতনম্ ॥ ৪৮॥
বিষযারিবিনাশবিধৌ রমণীযমুপাযমজে ।
কথযেশ্বরি মে বিশদং তব নাম্ব ন সাধ্যমিদম্ ॥ ৪৯॥
গণনাথকবেঃ কৃতিভিঃ বৃহতীভিরিমাভিরজা ।
পরিতৃপ্যতু চণ্ডবধূঃ কপটাগগনাগ্নিকলা ॥ ৫০॥
তৃতীযঃ সুপ্রতিষ্ঠাস্তবকঃ
চণ্ডচণ্ডিকাং বালভানুভাম্ ।
নৌমি দেবতারাজবল্লভাম্ ॥ ৫১॥
নাভিমণ্ডলশ্বেতপদ্মগে ।
চণ্ডদীধিতের্মণ্ডলে স্থিতাম্ ॥ ৫২॥
সূক্ষ্মনাডিকাদেহধারিণীম্ ।
ঘোরপাতকব্রাতহারিণীম্ ॥ ৫৩॥
উগ্রবিক্রমচ্ছিন্নমস্তকাম্ ।
দগ্ধবাসনাঘাসজালকাম্ ॥ ৫৪॥
নৌমি সদ্ধিযং সিদ্ধসংস্তুতাম্ ।
বজ্রধারিণঃ শক্তিমদ্ভুতাম্ ॥ ৫৫॥
প্রাণিনাং তনৌ তন্তুসন্নিভাম্ ।
অম্বরস্থলে ব্যাপকপ্রভাম্ ॥ ৫৬॥
চারুবর্ণিনীপ্রীতিলালিতাম্ ।
ভীমডাকিনীবীর্যনন্দিতাম্ ॥ ৫৭॥
দীপ্যদক্ষিভাভীষিতাসুরাম্ ।
নৌমি বজ্রিণঃ শক্তিমক্ষরাম্ ॥ ৫৮॥
যা বিশত্তপোধ্বস্তপাতকাম্ ।
রেণুকাং সুতচ্ছিন্নমস্তকাম্ ॥ ৫৯॥
নৌমি তামরিব্রাতমর্দিনীম্ ।
নাকমেদিনীপালভামিনীম্ ॥ ৬০॥
দেবসুন্দরীমস্তলালিতম্ ।
অম্বিকাপদং ভাতু মে হিতম্ ॥ ৬১॥
শোধ্যতামযং সর্বধীপুষা ।
লোকধাত্রি তে পাদরোচিষা ॥ ৬২॥
কোটিশস্তব প্রাজ্যশক্ত্যঃ ।
বিদ্যুদম্বিকে পাদপঙ্ক্তযঃ ॥ ৬৩॥
তাসু বিক্রমাধাযিচেষ্টিতম্ ।
তাসু বিষ্টপজ্ঞানমদ্ভুতম্ ॥ ৬৪॥
সর্বতোঽম্ব তে পাদচেষ্টিতম্ ।
বেত্তি তত্কৃতী নো জডঃ কৃতম্ ॥ ৬৫॥
বেত্তি যঃ কৃতী তত্রা তদ্বলম্ ।
বেদ যো ননা তত্র নো ফলম্ ॥ ৬৬॥
অর্পযেত্তনুং যঃ সবিত্রি তে ।
শক্তিবৈভবং তত্র পণ্ডিতে ॥ ৬৭॥
পূরুষো ভবন্নূর্মিরচ্যুতে ।
মত্তনুং স্ত্রৈযং সম্ভুনক্তু তে ॥ ৬৮॥
সর্বতো গতির্ভামদম্ব তে ।
মদ্গুহান্তরে ভাতু বিশ্রুতে ॥ ৬৯॥
উগ্রবৈভবাশক্তিরন্তরে ।
ভাতু তে পদপ্রেযসঃপরে ॥ ৭০॥
চণ্ডি তে পুনশ্চেত্প্রচণ্ডতা ।
কীদৃগম্বিকে সা মহোগ্রতা ॥ ৭১॥
মর্ত্যহস্তিনং মস্তভেদিনী ।
শক্তিরম্ব তে পাতু পাবনী ॥ ৭২॥
উত্তমোত্তমা চিত্তচিন্ত্যতাম্ ।
কৃত্তমস্তকা মত্তকাশিনী ॥ ৭৩॥
আত্মবৈরিণাং নাশনে বিধিম্ ।
ব্রূহি মে জনন্যন্তরাবধিম্ ॥ ৭৪॥
চেতসোঽম্ব তে জাযতাং হিতম্ ।
সৌপ্রতিষ্ঠসদ্গীতমদ্ভুতম্ ॥ ৭৫॥
চতুর্থো নরমনোরমাস্তবকঃ
অমরপালিনী দিতিজনাশিনী ।
ভুবনভূপতের্জযতি ভামিনী ॥ ৭৬॥
অতিশুভা নভস্তলবিসারি ভা ।
জগদধীশিতুর্জযতি বল্লভা ॥ ৭৭॥
সুরমহীপতের্হৃদযমোহিনী ।
কপটকামিনী জযতি মাযিনী ॥ ৭৮॥
জযতি কুণ্ডলীপুরনিকেতনা ।
তটিদধীশ্বরী তরললোচনা ॥ ৭৯॥
বিমলমস্তকৈর্হৃদি বিধারিতা ।
দলিতমস্তকা জযতি দেবতা ॥ ৮০॥
জযতি বিদ্যুতো যুবতিভূমিকা ।
ইহ খলান্তকৃজ্জযতি রেণুকা ॥ ৮১॥
অমিতবিক্রমে জযজযাম্বিকে ।
পরশুধারিণো জননি রেণুকে ॥ ৮২॥
বিনতপালিকে ধরণিকালিকে ।
জনপতিদ্বিষো জননি পাহি মাম্ ॥ ৮৩॥
মম ক্তদম্বুজং তব পদাম্বুজে ।
ভজতু লীনতাং কপটনার্যজে ॥ ৮৪॥
১০৮
করুণযা ক্রিযাদ্ভগবতী শুভা ।
মম মুদাবহং মদমুদারভা ॥ ৮৫॥
তব মদে বৃষা জযতি দানবান্ ।
তব মদে হরো নটতি মোদবান্ ॥ ৮৬॥
তব মদে রবিস্তপতি তেজসা ।
তব মদে স্বভূরবতি চৌজসা ॥ ৮৭॥
তব মদে শশী রমযতেঽখিলম্ ।
তব মদেঽনিলঃ প্রথযতে বলম্ ॥ ৮৮॥
তব মদেঽনলো জগতি রাজতে ।
তব মদে মুনির্নিগমমীক্ষতে ॥ ৮৯॥
তব মদে ধরা ভ্রমতি মেদিনী ।
তব মদে তনুর্মম চ মোদিনী ॥ ৯০॥
দহনকীলবন্নিরুপমোগ্রতা ।
শশিমযূখবত্পরমসৌম্যতা ॥ ৯১॥
গগনদেশবত্স্থিতিরচঞ্চলা ।
তপনরশ্মিবদ্গতিরপঙ্কিলা ॥ ৯২॥
অমৃতবন্মদঃ পবনবদ্বলম্ ।
তব তরঙ্গকে কিমিব নো ফলম্ ॥ ৯৩॥
তব নবামহামদবিধাযিকা ।
অঘহরীসুরা জযতি বীচিকা ॥ ৯৪॥
তব সুচিত্তিকা জননি বীচিকা ।
অমৃতবর্ষিণী জযতি হর্ষিণী ॥ ৯৫॥
অমররাজ্ঞিদেব্যসুরবিঘ্নহা ।
অসুরুপাসকানবতি তে কলা ॥ ৯৬॥
অনুগৃহীতবাক্তব গভস্তিনা ।
সকলসিদ্ধিরাড্ ভবতি দেবিনা ॥ ৯৭॥
সততচিন্তনাত্তব গুহান্তরে ।
নিযতচেতসো জগদিদং করে ॥ ৯৮॥
জননি মে বিধিং কথয ভীষণে ।
বিষযশাত্রাবব্রজবিদারণে ॥ ৯৯॥
তব মনোরমে সুরপতেরিমাঃ ।
বিদধতাং মুদং নরমনোরমাঃ ॥ ১০০॥
দ্বিতীযং শতকম্
পঞ্চমো রথোদ্ধতাস্তবকঃ
কৃত্তমস্তমপিশাতকর্তরীং পাণিপদ্মযুগলেন বিভ্রতীম্ ।
সংস্মরামি তরুণার্করোচিষং যোষিতং মনসি চণ্ডচণ্ডিকাম্ ॥ ১০১॥
চণ্ডচণ্ডি তব পাণিপঙ্কজে যন্নিজং লসতি কৃত্তমস্তকম্ ।
দেবি সূচযতি চিত্তনাশনং তত্তবেন্দ্রহৃদযাধিনাযিকে ॥ ১০২॥
দীপ্তিবিগ্রহলতাং মহাবলাং বহ্নিকীলনিভরক্তকুন্তলাম্ ।
সংস্মরামি রতিমন্মথাসনাং দেবতাং তরুণভাস্করাননাম্ ॥ ১০৩॥
রশ্মিভিস্তব তনূলতাকৃতা রশ্মিভিস্তব কৃতাশ্চ কুন্তলাঃ ।
রশ্মিভিস্তব কৃতং জ্বলন্মুখং রশ্মিভিস্তব কৃতে চ লোচনে ॥ ১০৪॥
দেবি রশ্মিকৃতসর্ববিগ্রহে দৃষ্টিপাতকৃতসাধ্বনুগ্রহে ।
অম্বরোদবসিতে শরীরিণামম্ব পাহি রবিবিম্বচালিকে ॥ ১০৫॥
যত্তবাসনমশেষমোহনৌ বিদ্যুদক্ষিরতিসূনসাযকৌ ।
এতদিন্দ্রসখি ভাষতে ত্বযা তাবুভাবপি বলাদধঃ কৃতৌ ॥ ১০৬॥
দৃষ্টিরেব তব শস্ত্রমাহবে শাত্রবস্তু তব ন ক্ষমঃ পুরঃ ।
বস্ত্রমম্ব দিশ এব নির্মলাঃ প্রেক্ষিতুং ভবতি ন প্রভুঃ পরঃ ॥ ১০৭॥
চক্ষুষাং দশশতানি তে রুচিং পাতুমেব পরমস্য বজ্রিণঃ ।
ভাস্বতঃ করসহস্রমম্বিকে লালনায তব পাদপদ্মযোঃ ॥ ১০৮॥
শূলমগ্নিতিলকস্য ধূর্জটেঃ চক্রমচ্ছজলজাতচক্ষুষঃ ।
বজ্রমম্ব মরুতাং চ ভূপতেঃ তেজসস্তব কৃতানি ভাগকৈঃ ॥ ১০৯॥
ভৈরবীচরণভক্ত্বান্ধবী তারিণী চ সুরপক্ষধারিণী ।
কালিকা চ নতপালিকাঽপরাশ্চণ্ডচণ্ডি তব ভীমভূমিকাঃ ॥ ১১০॥
রক্ষ মে কুলমতীন্দ্রিযে ততে রাক্ষসাদিনি সুরৈঃ সমর্চিতে ।
পুত্রাশিষ্যসহিতোঽহমম্ব তে পাবনং পদসরোরুহং শ্রযে ॥ ১১১॥
ঐন্দ্রিদেবি ভবতী মহাবলা ছিন্নমস্তযুবতিস্তু তে কলা ।
সর্বলোকবলবিত্তশেবধেঃ পেরক্ষিতাঽস্তি তব কো বলাবধেঃ ॥ ১১২॥
যেযমম্ব রুচিরুজ্জ্বলাননে যা চ কাচন বিভা বিভাবসৌ ।
তদ্দ্বযং তব সবিত্রি তেজসো ভূমিনাকনিলযস্য বৈভবম্ ॥ ১১৩॥
প্রাণদা তব রুচির্জগত্ত্রাযে প্রাণহৃচ্চ বত কার্যভেদতঃ ।
বৈভবং ভুবনচক্রপালিকে কো নু বর্ণযিতুমীশ্বরস্তব ॥ ১১৪॥
উদ্ভবস্তববিপাকবৈভবে নাশনং চ জগদম্ব দেহিনাম্ ।
যৌবনং নযনহারিনির্মলং বার্ধকং চ বিততাতুলপ্রভে ॥ ১১৫॥
নির্বলো ভবতি ভূতলে যুবা যচ্চ দেবি জরঠো ভবেদ্বলী ।
তদ্বযং তব বিচিত্রপাকতঃ পাকশাসনসখি ক্ষরেতরে ॥ ১১৬॥
বার্ধকেন বলকান্তিহারিণা দারুণেন কটুকার্যকারিণা ।
গ্রস্তমেতমধুনা পুনঃ কুরু ত্রাণদে যুবকবত্পদাশ্রিতম্ ॥ ১১৭॥
ভোগলালসতযা ন নূতনং দেবি বিক্রমমপারমর্থযে ।
অত্র মে বপুষি লাস্যমম্ব তে সোঢুমেব মম সেযমর্থনা ॥ ১১৮॥
শক্তিরম্ব মম কাচিদন্তরে যা ত্বযৈব নিহিতালমল্পকা ।
বৃদ্ধিমেত্য সহতামিযং পরাং বাহ্যশক্তিমিহ নির্গলজ্ঝরাম্ ॥ ১১৯॥
অম্ব তে নরসুরাসুরস্তুতে দিব্যশক্তিলহরীবিশোধিতম্ ।
পাতকানি জহতীব মামিমং কামযন্ত ইব সর্বসিদ্ধযঃ ॥ ১২০॥
শক্তিরিন্দ্রসখি চেন্ন তে মৃষা ভক্তিরীশ্বরি ন মে মৃষা যদি ।
উল্লসন্তু রতিকন্তুপীঠিকে শীধ্রমেব মযি যোগসিদ্ধযঃ ॥ ১২১॥
অস্তু ভক্তিরখিলাম্ব মে ন বা শক্তিরেব তব সম্প্রশোধ্য মাম্ ।
দেবকার্যকরণক্ষমং বলাদাদধাতু বিদধাতু চামৃতম্ ॥ ১২২॥
আস্যমম্ব তব যদ্যপীক্ষিতং লাস্যমেতদনুভূযতে মযা ।
পাদঘাতততিচূর্ণিতান্যজে যত্র যান্তি দুরিতানি সঙ্ক্ষযম্ ॥ ১২৩॥
স্বীযশক্তিলহরীবিলাসিনে কিঙ্করায পদপদ্মলম্বিনে ।
ভাষতাং বিষযবৈরিদারণে ভঙ্গবর্জিতমুপাযমম্বিকা ॥ ১২৪॥
নির্মলে করুণযা প্রপূরিতে সন্ততং বিকসিতে মহামহে ।
অম্বিকাহৃদি বিতন্বতামিমাঃ সম্প্রসাদমতুলং রথোদ্ধতাঃ ॥ ১২৫॥
ষষ্ঠঃ স্বাগতাস্তবকঃ
যোগিনে বলমলং বিদধানা সেবকায কুশলানি দদানা ।
অস্তু মে সুরধরাপতিশক্তিশ্চেতসশ্চ বপুষশ্চ সুখায ॥ ১২৬॥
কার্যমস্তি মম কিঞ্চন সত্যং তজ্জযায বিলপামি চ সত্যম্ ।
এবমপ্যকপটৈব রতির্মে বজ্রপাণিসখি তে পদপদ্মে ॥ ১২৭॥
শ্রদ্ধযা তব নুতিং বিদধামি শ্রদ্ধযা তব মনুং প্রজপামি ।
শ্রদ্ধযা তব বিজৃভিতমীক্ষে শ্রদ্ধযা তব কৃপাং চ নিরীক্ষে ॥ ১২৮॥
বিদ্যুদেব ভবতী চ মরুত্বান্ বিদ্যুদেব গিরিশো গিরিজা চ ।
বিদ্যুদেব গণপঃ সহ সিদ্ধঞ্যা ষট্কভেদ ইহ কার্যবিশেষৈঃ ॥ ১২৯॥
পূরুষশ্চ বনিতেতি বিভেদঃ শক্তশক্তিভিদযা বচনেষু ।
তেজ এব খলু বিদ্যুতি শক্তং বীর্য এব জগদীশ্বরি শক্তিঃ ॥ ১৩০॥
বিদ্যুদম্বরভুবি জ্বলতীশে শব্দমম্ব কুরু তে চ সুসূক্ষ্মম্ ।
ইন্দ্ররুদ্রযুগলব্যবহারে কর্মযুগ্মমিদমীশ্বরি বীজম্ ॥ ১৩১॥
বৈদ্যুতস্য ভবসি জ্বলতোঽগ্নেরম্ব শক্তিরসতাং দমনি ত্বম্ ।
তস্য নাদবত আগমগীতা কালিকা ভবতি শক্তিরভীতা ॥ ১৩২॥
তেজসো রুচিরভীমকলাভ্যাং যদ্বদীশ্বরি শচী ভবতী চ ।
এবমাশ্রিতজনাবনি গৌরী কালিকা চ নিনদস্য কলাভ্যাম্ ॥ ১৩৩॥
বৈদ্যুতোঽগ্নিরখিলেশ্বরি পিণ্ডে মূলতামরসপীঠনিষণ্ণঃ ।
ইন্দ্রিযং ভবতি বাগিতি দেবং যং বিদো গণপতিং কথযন্তি ॥ ১৩৪॥
গ্রন্থিভেদবিকচে সরসীজে জৃম্ভমাণমিহ বৈদ্যুতবহ্নিঃ ।
যাং রুচিং প্রকটযত্যতিবীর্যাং সৈব সিদ্ধিরিতি কাচন লক্ষ্মীঃ ॥ ১৩৫॥
বিদ্যুদেব ভবতী ননু ভান্তী বিদ্যুদেব নগজা নিনদন্তী ।
বিদ্যুদেব তপসো বিলসন্তী বিগ্রহেষু পরমেশ্বরি সিদ্ধিঃ ॥ ১৩৬॥
নৈব কেবলমুদারচরিত্রে বিদ্যুদদ্ভুততমা ত্রিবিভূতিঃ ।
বৈভবং বহু সহস্রবিভেদং কো নু বর্ণযতু পাবনি তস্যাঃ ॥ ১৩৭॥
বৈদ্যুতং জ্বলনমীশ্বরি হিত্বা নৈব দৈবতমভীষ্টতমং নঃ ।
তদ্বিভূতিগুণগানবিলোলা ভারতী জযতু মে বহুলীলা ॥ ১৩৮॥
তেজসশ্চ সহসশ্চ বিভেদাদ্যা তনুস্তব ভবত্যুভযাত্মা ।
তদ্বযং চ মযি চিত্রচরিত্রে জৃম্ভতাং নরজগত্কুশলায ॥ ১৩৯॥
প্রাযশো নিগমবাচি পুমাখ্যা তন্ত্রাবাচি বরদে বনিতাখ্যা ।
প্রাণিনাং জননি তে বিবুধানাং তত্র হেতুরজরে রুচিভেদঃ ॥ ১৪০॥
অত্র সিদ্ধিরুদিতা মম দেহে ভূমিকা ভুবনধাত্রি তবান্যা ।
আহ্বযত্যধিকশক্তিকৃতে ত্বাং ত্বং চ সম্প্রবিশ দেহগুহাং নঃ ॥ ১৪১॥
জৃম্ভতামিযমিতঃ কুলকুণ্ডাদন্তরিক্ষতলতোঽবতর ত্বম্ ।
উল্লসন্ত্ববলসন্তু চ দেহে বীচযোঽত্র ভগিনীদ্বিতযস্য ॥ ১৪২॥
কেবলং ন সহসা মহনীযে তেজসা চ বরদেঽবতর ত্বম্ ।
অত্র সিদ্ধিমপি কেবলবীর্যোল্লাসিনীং জননি যোজয ভাসা ॥ ১৪৩॥
ছিন্নমুজ্জ্বলতটিত্প্রভনেত্রং কণ্ঠরক্ত্জলসীংগ্রহপাত্রম্ ।
মস্তকং তব সহেশ্বরি ধন্যং মস্তকং মম করোতু বিশূন্যম্ ॥ ১৪৪॥
মোচিতাশ্রিতগুহান্তরবন্ধঃ প্রাণবাংস্তব সবিত্রি কবন্ধঃ ।
বাসনাকুসুমতল্পকসুপ্তাং সম্প্রবোধযতু মে মতিমাপ্তাম্ ॥ ১৪৫॥
দেবপূজ্যচরণা তব চেটী নির্বিবন্ধকরুণাপরিপাটী ।
বজ্রপাণিসখি শোকদরিদ্রং বর্ণিনী ভণতু মে বহুভদ্রম্ ॥ ১৪৬॥
চণ্ডচণ্ডি তব যুদ্ধবযস্যা যোগিবেদ্যনিজবীর্যরহস্যা ।
চেতসশ্চ ভুজযোশ্চ সমগ্রং ডাকিনী দিশতু মে বলমুগ্রম্ ॥ ১৪৭॥
মন্মথেন সহ রাগরসার্দ্রা পূরুষাযিতরতা রতিরীড্যা ।
আসনং তব বশীকুরুতান্মে সর্বলোকমপি বজ্রশরীরে ॥ ১৪৮॥
দৃপ্যতাং বিষযবৈরিগণানাং মর্দনায রমণীযমুপাযম্ ।
অম্ব শীঘ্রমভিধায নয ত্বং মামিমং চরণপঙ্কজবন্ধুম্ ॥ ১৪৯॥
তেজসা চ সহসা চ বিভান্তী পুষ্করে চ যমিনাং চ তনূষু ।
সম্মদং ভজতু বাসবশক্তিঃ স্বাগতাভিরমলাভিরিমাভিঃ ॥ ১৫০॥
সপ্তম ইন্দ্রবজ্রাস্তবকঃ
জ্ঞানায হানায চ দুর্গুণানাং ভানায তত্ত্বস্য পরস্য সাক্ষাত্ ।
দেবীং প্রপদ্যে সুরপালশক্তিমেকামনংশামভিতো বিভান্তীম্ ॥ ১৫১॥
ঈশোঽশরীরো জগতাং পরস্তাত্ দেবী খকাযা পরিতো জগন্তি ।
পূর্বো বিশুদ্ধো গুণগন্ধশূন্যঃ স্থানং গুণানামপরাঽখিলানাম্ ॥ ১৫২॥
আক্রম্য লোকং সকলং বিভাতি নো কেবলং ভূরি বিভূতিরম্বা ।
শুদ্ধা পরস্তাদপি নাথচিত্তি রূপা বিপাপা পরিতশ্চকাস্তি ॥ ১৫৩॥
ত্রৌলোক্যভূজানিরণোরণিষ্ঠস্তস্যাত্মশক্তির্মহতো মহিষ্ঠা ।
এতদ্রহস্যং ভুবি বেদ যো না তত্ত্বপ্রসঙ্গএষু ন তস্য মোহঃ ॥ ১৫৪॥
জ্ঞানং পরং ধর্মবদীশতত্ত্বং ধর্মাত্মকং জ্ঞানমজাস্বরূপম্ ।
শক্তীশযোর্ভক্তুমশক্যযোরপ্যেবং বিভাগো বচসা ব্যধাযি ॥ ১৫৫॥
দৃশ্যস্য সর্বস্য চ ভোগকালে ধর্মী চ ধর্মশ্চ বিভাতি বোধঃ ।
অন্তঃ সমাধাবযমেকরূপঃ শক্তীশভেদস্তদসাবনিত্যঃ ॥ ১৫৬॥
ধর্মঃ পরস্তাত্পরমেশ্বরী যা ধর্মিত্বমেষা জগতি প্রযাতি ।
যাবজ্জগজ্জীবিতমপ্রণাশমাকাশমাশ্রিত্য মহচ্ছরীরম্ ॥ ১৫৭॥
ব্যক্তিং খকাযাং প্রজগুঃ পুমাংসমেকে পরে ক্লীবমুদাহরন্তি ।
অস্মাকমেষা পরমাত্মশক্তির্মাতা সমস্তস্য চ কাঽপি নারী ॥ ১৫৮॥
চিদ্রূপমত্যন্তসুসূক্ষ্মমেতত্ জ্যোতির্যদাকাশশরীরমগ্র্যম্ ।
প্রাণঃ স এব প্রণবঃ স এব বহ্নিঃ স এবাম্বরদেশবাসী ॥ ১৫৯॥
বাযুশ্চ রুদ্রশ্চ পুরন্দরশ্চ তস্যৈব বিশ্বং দধতঃ পুমাখ্যাঃ ।
শক্তিশ্চ কালী চ মহাপ্রচণ্ডচণ্ডী চ যোষিত্প্রবরাহ্বযানি ॥ ১৬০॥
অত্রাপি ধর্মী পুরুষঃ পরেষাং ধর্মস্তু নারী বিদুষাং মতেন ।
এষোঽপি বাচৈব ভবেদ্বিভাগঃ শক্যো বিধাতুং ন তু বস্তুভেদাত্ ॥ ১৬১॥
ত্বং দেবি হন্ত্রী মহিষাসুরস্য শুম্ভং সবন্ধুং হতবত্যসি ত্বম্ ।
ত্বং যোগনিদ্রামধুসূদনস্য ভদ্রাসি শক্তির্বলবৈরিণস্ত্বম্ ॥ ১৬২॥
কালস্য লীলাসহচারিণী ত্বং বামাঙ্গমস্যন্ধকবৈরিণস্ত্বম্ ।
সিদ্ধিস্ত্বমশ্রাআন্ততপোভিগম্যা বুদ্ধিস্ত্বমক্ষুদ্রমনুষ্যনম্যা ॥ ১৬৩॥
বিদ্যুত্ত্বমাকাশপথে চরন্তী সূর্যপ্রভা ত্বং পরিতো লসন্তী ।
জ্বালা কৃশানোরসি ভীমলীলা বেলাতিগা ত্বং পরমস্য চিত্তিঃ ॥ ১৬৪॥
ভেদাঃ সহস্রং তব দেবি সন্তু ত্বং মূলশক্তির্মম মাতরেকা ।
স্তোত্রাণি তে বুদ্ধিমতাং বিভূতিদ্বারা বহূনীব বিভান্তি লোকে ॥ ১৬৫॥
উগ্রাণি রূপাণি সহস্রশস্তে সৌম্যানি চাশেষসবিত্রি সন্তি ।
ব্যক্তিত্বমেকং তব ভূরিশক্তিব্যক্তীঃ পৃথক্ চ প্রদদাতি তেভ্যঃ ॥ ১৬৬॥
কুর্বন্তি তাঃ পাবনি বিশ্বকার্যং সর্বং চ লোকাম্ব বিভূতযস্তে ।
স্বর্বৈরিণাং চ প্রতিসন্ধিকালং গর্বং হরন্তি ক্ষণদাচরাণাম্ ॥ ১৬৭॥
চণ্ডী প্রচণ্ডা তব যা বিভূতিঃ বজ্রাত্মিকা শক্তিরপারসারা ।
সা সম্প্রদাযাতুলমম্ব বীর্যং দেবী ক্রিযান্মাং কৃতদেবকার্যম্ ॥ ১৬৮॥
আবিশ্য যা মাং বপুষো গুহাযাং চিত্রাণি তে শক্তিরজে করোতি ।
সা কা তব প্রাজ্যবিভূতিমধ্যে সদ্ধ্যেযরূপে বিশদীকুরুষ্ব ॥ ১৬৯॥
সংশোধনাযৈব কৃতিঃ কিমস্যাঃ সঞ্চালনাযাপি কিমু ক্রিযাণাম্ ।
শক্ত্যৈ কিমেষা বিদধাতি চেষ্টামাহোস্বিদচ্ছাং চ মতিং প্রদাতুম্ ॥ ১৭০॥
প্রাণপ্রদা ভীমতমা চ শক্তির্যা কৃত্তশীর্ষাং সহসাবিবেশ ।
সা মে ক্রিযাত্প্রাণবলং প্রশস্তং হস্তং চ মে কার্যপটুং করোতু ॥ ১৭১॥
সন্দেহজালং প্রবিধূয তেজঃ সন্দাযিনী কৃত্তশিরাঃ করোতু ।
বৃন্দারকারাধিতপাদপদ্মা বন্দারুমন্দারলতা শুভং নঃ ॥ ১৭২॥
মামাবিশন্তী ভব বা ন বা ত্বং সম্পাদযেষ্টং মম বা ন বা ত্বম্ ।
দুর্জ্ঞেযসারে জননি প্রচণ্ডচণ্ডি ত্বমেকা কুলদৈবতং নঃ ॥ ১৭৩॥
নাশং বিধাতুং বিষযদ্বিষাং মে পাশত্রযান্মোচযিতুং চ দেহম্ ।
শেষাহিবর্ণ্যে পদকিঙ্করায ভাষস্ব যোগং জননি প্রচণ্ডে ॥ ১৭৪॥
সর্বাত্মশক্তেঃ পদবন্ধুগীতাঃ কুর্বন্তু ভূযাংসমিহ প্রমোদম্ ।
যুক্ত্স্য দেব্যাস্তটিতঃ সমাধিমত্তস্য চিত্তস্য মমেন্দ্রবজ্রাঃ ॥ ১৭৫॥
অষ্টমো ভযহারিস্তবকঃ
উগ্রতরনাদাং পাপহরপাদাম্ ।
নৌমি খলমারীং বজ্রধরনারীম্ ॥ ১৭৬॥
শক্তকরণানাং গুপ্তভরণানাম্ ।
ধ্বান্তহরবিদ্যুদ্বীচিকিরণানাম্ ॥ ১৭৭॥
নিত্যকরুণানাং ব্যোমশরণানাম্ ।
অস্মি গুণবন্দী মাতৃচরণানাম্ ॥ ১৭৮॥
কাচন শবর্যাং দেবি মুনিনার্যাম্ ।
পুণ্যবদধীতে মোহনকলা তে ॥ ১৭৯॥
কাচিদপি তস্যাং মৌনিজনগীতে ।
কৃত্তশিরসীশে ভীষণকলা তে ॥ ১৮০॥
মঞ্জুতরগুঞ্জাহারনিকরাযৈ ।
চাপশরযুক্ত্প্রোজ্জ্বলকরাযৈ ॥ ১৮১॥
সর্বজনচক্ষুস্তর্পণবিভাযৈ ।
জঙ্গমবিচিত্রাস্বর্ণলতিকাযৈ ॥ ১৮২॥
অভ্রচিকুরাযৈ শুভ্রহসিতাযৈ ।
মাদকমনোজ্ঞস্বাদুবচনাযৈ ॥ ১৮৩॥
ইন্দুবদনাযৈ কুন্দরদনাযৈ ।
মন্দরকুচাযৈ মন্দগমনাযৈ ॥ ১৮৪॥
অঞ্জলিরযং মে কঞ্জনযনাযৈ ।
মৌনিকুলনার্যৈ পাবনশবর্যৈ ॥ ১৮৫॥
পাবনচরিত্রাং মারমণপুত্রাম্ ।
ছিন্নশিরসং তাং নৌমি মুনিকান্তাম্ ॥ ১৮৬॥
মাতরযি বীর্যত্রাতবরধর্মে ।
মাঽস্তু হৃদি মোহঃ সন্ন্তিরিপুর্মে ॥ ১৮৭॥
দেবি মুনিচেতো রঙ্গলসদূর্মে ।
মাঽস্তু হৃদি কামঃ সুস্থিতিরিপুর্মে ॥ ১৮৮॥
দেবজনভর্তুঃ প্রাণসখি রামে ।
মাঽস্তু হৃদি ভীতির্বীর্যদমনী মে ॥ ১৮৯॥
ব্যোমচরি মাতর্ভামযি বিসীমে ।
মাঽস্তু হৃদি কোপো বুদ্ধিদমনো মে ॥ ১৯০॥
সাধ্ববনলোলে দেবি বহুলীলে ।
অস্তু মম ধৈর্যং চেতসি সুবীর্যম্ ॥ ১৯১॥
সর্বতনুপাকাধাযি তব ভব্যম্ ।
অস্তু বরতেজো নেতৃ মম দিব্যম্ ॥ ১৯২॥
ইচ্ছতি সবিত্রী যত্ প্রিযসুতায ।
তদ্বিতর সর্বং দেবি ভজকায ॥ ১৯৩॥
ইচ্ছতি মনুষ্যো যদ্রিপুজনায ।
মত্তদযি দূরে পালয বিধায ॥ ১৯৪॥
বর্ধযতু তেজো বর্ধযতু শক্তিম্ ।
বর্ধযতু মেঽম্বা বজ্রভৃতিভক্তিম্ ॥ ১৯৫॥
বজ্রমযি মাতর্বজ্রধরভক্ত্ঃ ।
অস্তু তব বীর্যাদত্র ভুবি শক্ত্ঃ ॥ ১৯৬॥
নশ্যতু সমস্তো বজ্রধরবৈরী ।
এতু জযমন্তর্বজ্রধরনারী ॥ ১৯৭॥
হস্তধৃতমুণ্ডঃ কশ্চন কবন্ধঃ ।
অস্তু মম ভিন্নগ্রন্থিচযবন্ধঃ ॥ ১৯৮॥
সাধয মদিষ্টং যোগমভিধায ।
দেবি বিষযারিব্রাতদমনায ॥ ১৯৯॥
সম্মদযতান্মে স্বাংশকৃতশম্বাম্ ।
চারুভযহারিচ্ছন্দ ইদমম্বাম্ ॥ ২০০॥
তৃতীযং শতকম্
নবমো মদলেখাস্তবকঃ
বন্দে বাসবশক্তেঃ পাদাব্জং প্রিযভক্ত্ম্ ।
প্রাতর্ভাস্কররক্তং পাপধ্বংসনশক্ত্ম্ ॥ ২০১॥
হুঙ্কারানলকীলাদগ্ধারাতিসমূহাম্ ।
বিদ্যুদ্ভাসুরবীক্ষানির্ধূতাশ্রিতমোহাম্ ॥ ২০২॥
দেবস্ত্রীনিটলেন্দুজ্যোত্স্নালালিতপাদাম্ ।
মেঘশ্রেণ্যুপজীব্যশ্রোত্রাকর্ষকনাদাম্ ॥ ২০৩॥
দীপ্তাং ভাস্করকোটিচ্ছাযাযামিব মগ্নাম্ ।
গাত্রালম্বিবিনৈবক্ষৌমং কিঞ্চিদিনগ্নাম্ ॥ ২০৪॥
কণ্ঠে কল্পিতহারাং মুণ্ডানাং শতকেন ।
জ্ঞেযামূল্যরহস্যাং নিব্র্যাজং ভজকেন ॥ ২০৫॥
স্বর্গস্য ক্ষিতিপালং পশ্যন্তীং প্রণযেন ।
ধুন্বানাং বিবুধানাং ভীতিং শক্তশযেন ॥ ২০৬॥
শক্তীনামধিরাজ্ঞীং মাযানামধিনাথাম্ ।
চণ্ডাং কামপিচণ্ডীং গাযাম্যদ্ভুতগাথাম্ ॥ ২০৭॥
ভিত্ত্বা মস্তকমেতত্ পাদাঘাতবলেন ।
আবিশ্যাখিলকাযং খেলত্পাবনলীলম্ ॥ ২০৮॥
বেগেনাবতরত্তে তেজোনাশিতপাশম্ ।
চণ্ডে চণ্ডি সমস্তং গোপ্যং ভাসযতান্মে ॥ ২০৯॥
অন্তঃ কিঞ্চ বহিস্তে মাতর্দারিতমস্তে ।
মামাবৃত্য সমন্তাত্তেজঃ কর্ম করোতু ॥ ২১০॥
ইন্দ্রাণীকলযা যত্কৃত্তামাবিশদুগ্রা ।
শক্যং বর্ণযিতুং তদ্দৃশ্যং কেন বুধেন ॥ ২১১॥
প্রাণাপেতশরীরাণ্যাবেষ্টুং প্রভবন্তঃ ।
ভেতালাস্তব ভৃত্যাশ্চণ্ডে চণ্ডি চরন্তঃ ॥ ২১২॥
ছিন্নাং সম্প্রবিশন্তীবজ্রেশ্বর্যতিশক্তা ।
নিঃশেষৈরতিভীমৈর্ভেতালৈরভিষিক্তা ॥ ২১৩॥
ভেতালাঃ পরমুগ্রাস্ত্বং তেষ্বপ্যধিকোগ্রা ।
তস্মাদাহুরযি ত্বাং চণ্ডামীশ্বরি চণ্ডীম্ ॥ ২১৪॥
আসীদ্ঘাতযিতুং ত্বাং সাধোর্ধীর্জমদগ্নেঃ ।
ভেতালপ্রভুসর্গাযোল্লঙ্ঘ্যৈব নিসর্গম্ ॥ ২১৫॥
আদেষ্টাশমবিত্তো হন্তাসাত্ত্বিকমৌলিঃ ।
বধ্যা নিশ্চলসাধ্বী শোচ্যেতশ্চ কথা কা ॥ ২১৬॥
নির্যদ্রক্তকণেভ্যঃ কণ্ঠাত্তে ভুবি জাতাঃ ।
মার্যাদ্যামযবীজীভূতস্তম্ববিশেষাঃ ॥ ২১৭॥
করাগারনিবাসাত্মাহিষ্মপত্যধিপস্য ।
জাতা ভার্গবশঙ্কা হত্যাযাস্তব মূলম্ ॥ ২১৮॥
সত্যং তেঽম্ব চরিত্রাং ভদ্মঃ কোঽপি নিগুহ্য ।
ত্রাতুং যাদবকীতিং মিথ্যাহেতুমবাদীত্ ॥ ২১৯॥
অন্যাগারনিবাসে হত্যা ত্যাগ উতাহো ।
স্ত্রীণাং চেত্পরুষং ধিগ্ভাবং পূরুষজাতেঃ ॥ ২২০॥
স্বাতন্ত্র্যং বনিতানাং ত্রাতুং মাতরধীশে ।
দূরীকর্তুমপারং দৈন্যং পঞ্চমজাতেঃ ॥ ২২১॥
ধর্মং ব্যাজমধর্মং ভূলোকে পরিহর্তুম্ ।
বেদার্থে চ গভীরে সন্দেহানপি হর্তুম্ ॥ ২২২॥
ঘোরং বর্ণবিভেদং কর্তুং চ স্মৃতিশেষম্ ।
উল্লাসং মতিশক্ত্যোর্মহ্যং দেহি মহান্তম্ ॥ ২২৩॥
যোগং মে বিষযারীন্ নির্মূলং পরিমার্ষ্টুম্ ।
শ্রীমাতঃ কুরু চিত্তং কারুণ্যেন নিদেষ্টুম্ ॥ ২২৪॥
চণ্ড্যাধ্ণ্ডতমাযাঃ চিত্তং সংযমমত্তম্ ।
ভূযঃ সম্মদযন্তাং হৈরম্ব্যো মদলেখাঃ ॥ ২২৫॥
দশমঃ পথ্যাবক্ত্রাস্তবকঃ
ইন্দ্রাণ্যাঃ পরমাং শক্তিং সর্বভূতাধিনাযিকাম্ ।
প্রচণ্ডচণ্ডিকাং দেবীং ছিন্নমস্তাং নমাম্যহম্ ॥ ২২৬॥
ইন্দ্রাণ্যাঃ শক্তিসারেণ প্রাদুর্ভূতে পরাত্পরে ।
প্রচণ্ডচণ্ডি বজ্রাত্মন্ বৈরোচনি নমোঽস্তু তে ॥ ২২৭॥
ত্বং বিশ্বধাত্রি বৃত্রারেঃ আযুধস্যাধিদেবতা ।
সর্বপ্রচণ্ডভাবানাং মধ্যে প্রকৃতিতঃ পরা ॥ ২২৮॥
সর্বস্মিন্নপি বিশ্বস্য সর্গেঽনর্গলবিক্রমে ।
ত্বত্তশ্চণ্ডতমো ভাবো ন ভূতো ন ভবিষ্যতি ॥ ২২৯॥
তটিতঃ শক্তিসারেণ বজ্রং নির্মিতমাযুধম্ ।
অভূত্তদ্বিনযদ্দেবং তটিদেব নিজাংশতঃ ॥ ২৩০॥
পর্বতশ্চ পুলোমা চ সজলোঽযং ঘনাঘনঃ ।
পার্বতীতি তটিদ্দেবীং পৌলোমীতি চ তদ্বিদুঃ ॥ ২৩১॥
শৈবানাং ভাষযা দেবি ত্বং তটিদ্দেবি পার্বতী ।
ঐন্দ্রাণাং ভাষযা মাতঃ পৌলোমী ত্বমনামযে ॥ ২৩২॥
পূর্বেষাং দযিতঃ শব্দো দুর্গেতি দুরিতাপহে ।
প্রচণ্ডচণ্ডিকাশব্দ উত্তরেষামতিপ্রিযঃ ॥ ২৩৩॥
বৈষ্ণবানাং গিরা দেবি যোগমাযা ত্বমদ্ভুতা ।
বাচা হৈরণ্যগর্ভাণাং সবিত্রি ত্বং সরস্বতী ॥ ২৩৪॥
দধানা ভুবনং সর্বং ব্যাপিকাপদ্বিবর্জিতা ।
তটিচ্ছব্দাযতে ব্যোম্নি প্রাণিত্যপি বিরাজতে ॥ ২৩৫॥
প্রচণ্ডচণ্ডিকা সেযং তটিত্সূক্ষ্মেণ তেজসা ।
বিশ্বস্মিন্নখিলান্ভাবান্মাতাঽনুভবতি স্বযম্ ॥ ২৩৬॥
ভাবানামনুভূতানাং বাক্যত্বেনাবভাসনম্ ।
ভবত্যব্যক্তশব্দেঽস্যাঃ সর্বংবিজ্ঞানশেবধৌ ॥ ২৩৭॥
যদি সা সর্বজগতাং প্রাণশ্চেতশ্চ শেমুষী ।
প্রাণচেতোমনীষাণাং তস্যাঃ কো নাম সংশযঃ ॥ ২৩৮॥
প্রাণন্তী চিন্তযন্তী সা রাজন্তী চ বিহাযসি ।
তটিচ্ছব্দাযমানা চ দেবী বিজযতেতরাম্ ॥ ২৩৯॥
সেচ্ছযা দধতী রূপং মোহনং কীর্ত্যতে শচী ।
প্রচণ্ডচণ্ডিকা গীতা বিভ্রাণা ভীষণং বপুঃ ॥ ২৪০॥
পিণ্ডে কুণ্ডলিনীশক্তিঃ সৈব ব্রহ্নাণ্ডচালিকা ।
নিদ্রাতি জডদেহেষু যোগিদেহেষু খেলতি ॥ ২৪১॥
এষা বৈরোচনী দুর্গা জ্বলন্তী তপসা পরা ।
সমুল্লসতি যস্যান্তঃ স জীবন্নেব মুচ্যতে ॥ ২৪২॥
যোগিনো বোধযন্তী মাং যোগেন নিযতব্রতাঃ ।
সর্বার্পকস্য দেহে সা স্বযমেব সমুল্লসেত্ ॥ ২৪৩॥
শারীরশক্তিমাত্র্স্য যোগী সঞ্চালকো ভবেত্ ।
বাহ্যশারীরশক্ত্যোস্তু যোগো নানুগ্রহং বিনা ॥ ২৪৪॥
চণ্ডনারীস্বরূপেণ তটিদ্রূপেণ চাম্বরে ।
পিণ্ডে কুণ্ডলিনীতন্বা চরন্তী দেবি রাজসে ॥ ২৪৫॥
মস্তকস্থানমনসো মহাদেবি বিনাশনাত্ ।
রেণুকাযামুতাবেশাত্ কৃত্তমস্তেতি তে পদম্ ॥ ২৪৬॥
যদাবিশস্ত্বমুগ্রেঽম্ব রেণুকামুগ্রতেজসা ।
তদা পৃথঙ্মহাশক্তিঃ সা ব্যক্তিঃ সমপদ্যত ॥ ২৪৭॥
ব্যক্তীনাং দুর্জনঘ্নীনাং ত্বত্তেজোভাগজন্মনাম্ ।
বহুত্বেপি ত্বমেকৈব মূলশক্তিঃ সনাতনী ॥ ২৪৮॥
উপাযমভিধাযাম্বা বিষযারিবিদারণে ।
প্রচণ্ডচণ্ডিকা দেবী বিনযত্বঙ্ঘ্রিসেবিনম্ ॥ ২৪৯॥
রমযন্তামুপশ্লোকযন্তি যান্তি ক্তদন্তরম্ ।
পথ্যাবক্ত্রাণি পাপঘ্নীমেতানি চ্ছিন্নস্তকাম্ ॥ ২৫০॥
একাদশ উপজাতিস্তবকঃ
মেরূপমানস্তনভারতান্তাং শক্রস্য লীলাসহচারিণীং তাম্ ।
হর্তুং সমূলং হৃদযস্য মোহং প্রচণ্ডচণ্ডীমভিবাদযেঽহম্ ॥ ২৫১॥
বেদাদিবীজং জলজাক্ষজাযা প্রাণপ্রিযা শীতমযূখমৌলেঃ ।
কন্তুর্বিধাতুর্হৃদযাধিনাথা জলং জকারো দহনেন যুক্ত্ঃ ॥ ২৫২॥
তোযং পুনর্দ্বাদশবর্ণযুক্তং ত্রাযোদশেনাথ যুতঃ কৃশানুঃ ।
তালব্যবর্গপ্রথমো নকারঃ ততধ্তুর্থস্বরসম্প্রযুক্ত্ঃ ॥ ২৫৩॥
একাদশেনাথ যুতঃ সমীরঃ স ষষ্ঠবিন্দুঃ সরণিঃ সুরাণাম্ ।
তদেব বীজং পুনরস্ত্রমন্তে কৃপীটযোনের্মনসোঽধিনাথা ॥ ২৫৪॥
বিদ্যা ত্বিযং সর্দিশাক্ষরাঢ্যা স্বযং মহাকালমুখোপদিষ্টা ।
গোপ্যাসু গোপ্যা সুকৃতৈরবাপ্যা ষষ্ঠীবিনুত্যা পরমেষ্ঠিনাপি ॥ ২৫৫॥
স্থানে সহস্রচ্ছদসাযকস্য পুনর্যদীশানমনোধিনাথা ।
সর্বার্থদঃ সর্দিশাক্ষরোঽন্যঃ প্রচণ্ডচণ্ডী মনুরুত্তমঃ স্যাত্ ॥ ২৫৬॥
বেদাদিবীজেন বিহীনমাদ্যং পুনর্ভবানীবিযুতং দ্বিতীযম্ ।
মন্ত্রাবুভৌ ষোডশবর্ণযুক্তৌ প্রচণ্ডচণ্ড্যাঃ পবিনাযিকাযাঃ ॥ ২৫৭॥
মন্ত্রে তৃতীযে যদি কূর্চবীজং স্থানে রতের্জীবিতবল্লভ্স্য ।
মন্ত্রোঽপরঃ ষোডশবর্ণযুক্ত্ঃ প্রচণ্ডচণ্ড্যাঃ পটুশক্তিরুক্ত্ঃ ॥ ২৫৮॥
অযং হরের্বল্লভ্যা বিহীনো মন্ত্রোঽপরঃ পঞ্চদশাক্ষরঃ স্যাত্ ।
ক্রোধশ্চ সম্বোধনমস্ত্রমগ্নেঃ সীমন্তিনী চেতি ধরেন্দুবর্ণঃ ॥ ২৫৯॥
ধেনুঃ কৃশানোহৃদযেশ্বরী চ প্রচণ্ডচণ্ডী মনুরগ্নিবর্ণঃ ।
একৈব ধেনুঃ সুররাজশক্তেঃ একাক্ষরঃ কশ্চন মন্ত্ররাজঃ ॥ ২৬০॥
এতেষু তন্ত্রাপ্রণুতেষু ভক্তো মন্ত্রাং নবস্বন্যতমং গৃহীত্বা ।
যঃ সংশ্রযেতাশ্রিতকামধেনুং প্রচণ্ডচণ্ডীং স ভবেত্ কৃতার্থঃ ॥ ২৬১॥
বেদাদিরম্ভোরুহনেত্রজাযা মাযাঙ্কুশব্রহ্নমনোধিনাথাঃ ।
ইতীযমব্যাজরতিং জপন্তং পঞ্চাক্ষরী রক্ষতি রেণুকাযাঃ ॥ ২৬২॥
ঋষ্যাদিসঙ্কীর্তনমেষু মাঽস্তু করাঙ্গবিন্যাসবিধিশ্চ মাঽস্তু ।
মূর্তিং যথোক্তামুত দিব্যতত্ত্বং ধ্যাত্বা জপেত্ সিদ্ধিরসংশযং স্যাত্ ॥ ২৬৩॥
নাভিস্থশুক্লাব্জগসূর্যবিম্বে সংসক্তরত্যম্বুজবাণপীঠে ।
স্থিতাং পদেনান্যতরেণ সম্যগুত্ক্ষিপ্তদীপ্তান্যতরাঙ্ঘ্রিপদ্মাম্ ॥ ২৬৪॥
দিগম্বরামর্কসহস্রভাসমাচ্ছাদিতাং দীধিতিপঞ্জরেণ ।
কণ্ঠস্থলীভাসুরমুণ্ডমালাং লীলাসখীং দেবজনাধিপস্য ॥ ২৬৫॥
ছিন্নং শিরঃ কীর্ণকচং দধানাং করেণ কণ্ঠোদ্গতরক্ত্ধারাম্ ।
ধারাত্রযে তত্র চ মদ্যধারাং করস্থবক্ত্রেণ মুদা পিবন্তীম্ ॥ ২৬৬॥
পার্শ্বে সখীং ভাসুরবর্ণিনীং চ পার্শ্বান্তরে ভীষণডাকিনীং চ ।
অন্যে পিবন্ত্যাবসৃগম্বুধারে নিরীক্ষমাণামতিসম্মদেন ॥ ২৬৭॥
ভযঙ্করাহীশ্বরবদ্ধমৌলিং জ্বলদ্যুগান্তানলকীলকেশীম্ ।
স্ফুরত্প্রভাভাসুরবিদ্যুদক্ষীং চণ্ডীং প্রচণ্ডাং বিদধীত চিত্তে ॥ ২৬৮॥
গুঞ্জাফলাকল্পিতচারুহারা শীর্ষে শিখণ্ডং শিখিনো বহন্তী ।
ধনুশ্চ বাণান্দধতী করাভ্যাং সা রেণুকা বল্কলভৃত্বিচিন্ত্যা ॥ ২৬৯॥
তটিজ্ঝরীং কামপি সম্প্রশ্যন্ আকাশতঃ সর্বতনৌ পতন্তীম্ ।
মৌনেন তিষ্ঠেদ্যমিনাং বরিষ্ঠো যদ্যেতদম্বাস্মরণং প্রশস্তম্ ॥ ২৭০॥
দৃশ্যানশেষানপি বর্জযিত্বা দৃষ্টিং নিজাং সূক্ষ্মমহঃস্বরূপাম্ ।
নিভালযেদ্যন্মনসা বরীযানন্যোঽযমম্বাস্মরণস্য মার্গঃ ॥ ২৭১॥
বিনা প্রপত্তিং প্রথমো ন সিধ্যেত্ মার্গোঽনযোঃ কেবলভাবনাতঃ ।
হৃদিস্থলে যোগবলেন চিত্তের্নিষ্ঠাং বিনা সিধ্যতি ন দ্বিতীযঃ ॥ ২৭২॥
আরম্ভ এবাত্র পথোর্বিভেদঃ ফলে ন ভেদো রমণো যথাহ ।
স্থিতৌ ধিযো হস্তগতাপ্রপত্তিঃ প্রপত্তিসিদ্ধৌ সুলভৈব নিষ্ঠা ॥ ২৭৩॥
উপাযমেকং বিষযারিনাশবিধৌ বিধাযাবগতং মমাম্বা ।
কৃত্বা সমর্থং চ নিজানুকম্পাং প্রচণ্ডচণ্ডী প্রথযত্বপারাম্ ॥ ২৭৪॥
সধ্যানমার্গং বরমন্ত্রকল্পং প্রচণ্ডচণ্ড্যাঃ পরিকীর্তযন্ত্যঃ ।
ভবন্তু মোদাতিশযায শক্তেরুপাসকানামুপজাতযো নঃ ॥ ২৭৫॥
দ্বাদশো নারাচিকাস্তবকঃ
বীর্যে জবে চ পৌরুষে যোষাঽপি বিশ্বতোঽধিকা ।
মাং পাতু বিশ্বচালিকা মাতা প্রচণ্ডচণ্ডিকা ॥ ২৭৬॥
শুদ্ধা চিতিঃ সতঃ পুরা পশ্চান্নভঃ শরীরকা ।
যোষাতনুস্ততঃ পরং মাতা প্রচণ্ডচণ্ডিকা ॥ ২৭৭॥
পারে পরাত্মনঃ প্রমা খে শক্তিরুত্তমোত্তমা ।
পিণ্ডেষু কুণ্ডলিন্যজা মাতা প্রচণ্ডচণ্ডিকা ॥ ২৭৮॥
নাকে বিলাসশেবধির্নালীকলোচনা শচী ।
প্রাণপ্রকৃষ্টবিষ্টপে মাতা প্রচণ্ডচণ্ডিকা ॥ ২৭৯॥
একস্য সা মহেন্দিরা দেবী পরস্য কালিকা ।
অস্মাকমুজ্জ্বলাননা মাতা প্রচণ্ডচণ্ডিকা ॥ ২৮০॥
রাজীববান্ধবো দিবি হ্রাদিন্যপারপুষ্করে ।
অগ্নির্মনুষ্যবিষ্টপে মাতা প্রচণ্ডচণ্ডিকা ॥ ২৮১॥
তেজঃ সমস্তপাচকং চক্ষুঃ সমস্তলোককম্ ।
চিত্তং সমস্তচিন্তকং মাতা প্রচণ্ডচণ্ডিকা ॥ ২৮২॥
দ্যৌস্তেজসাং মহানিধিঃ ভূমিশ্চ ভূতধারিণী ।
আপশ্চ সূক্ষ্মবীচযো মাতা প্রচণ্ডচণ্ডিকা ॥ ২৮৩॥
নির্বাহুকস্য সা করো নির্মস্তকস্য সা মুখম্ ।
অন্ধস্য সা বিলোচনং মাতা প্রচণ্ডচণ্ডিকা ॥ ২৮৪॥
পাণিং বিনা করোতি সা জানাতি মানসং বিনা ।
চক্ষুর্বিনা চ বীক্ষতে মাতা প্রচণ্ডচণ্ডিকা ॥ ২৮৫॥
হস্তস্য হস্ত উত্তমঃ চিত্তস্য চিত্তমদ্ভুতম্ ।
নেত্রাস্য নেত্রামাযতং মাতা প্রচণ্ডচণ্ডিকা ॥ ২৮৬॥
সা ভারতী মনীষিণাং সা মানসং মহাত্মনাম্ ।
সা লোচনং প্রজানতাং মাতা প্রচণ্ডচণ্ডিকা ॥ ২৮৭॥
সক্তিঃ সমস্তবাধিকা যুক্তিঃ সমস্তসাধিকা ।
শক্তিঃ সমস্তচালিকা মাতা প্রচণ্ডচণ্ডিকা ॥ ২৮৮॥
ছিন্নাঽপি জীবধারিণী ভীমাঽপি শান্তিদাযিনী ।
যোষাঽপি বীর্যবর্ধনী মাতা প্রচণ্ডচণ্ডিকা ॥ ২৮৯॥
মাহেন্দ্রশক্তিরুত্তমা সূক্ষ্মাঽপি ভারবত্তমা ।
শাতাপি তেজসা ততা মাতা প্রচণ্ডচণ্ডিকা ॥ ২৯০॥
পুত্রেণ কৃত্তমস্তকামাবিশ্য রেণুকাতনুম্ ।
সা খেলতি ক্ষমাতলে মাতা প্রচণ্ডচণ্ডিকা ॥ ২৯১॥
মামুগ্রপাপহারিণী সর্বপ্রপঞ্চধারিণী ।
পাযাদপাযতোঽখিলান্ মাতা প্রচণ্ডচণ্ডিকা ॥ ২৯২॥
ইন্দ্রেসুরারিহর্তরি ত্রৈলোক্যভূমিভর্তরি ।
ভক্তিং তনোতু মে পরাং মাতা প্রচণ্ডচণ্ডিকা ॥ ২৯৩॥
নিষ্ঠামনন্যচালিতাং শ্রেষ্ঠাং ধিযং চ সর্বগাম্ ।
গীতা সুরৈর্দদাতু মে মাতা প্রচণ্ডচণ্ডিকা ॥ ২৯৪॥
সত্যাং গিরং দদাতু মে নিত্যাং করোতু চ স্থিতিম্ ।
ধূতাখিলাঽঘসন্ততিঃ মাতা প্রচণ্ডচণ্ডিকা ॥ ২৯৫॥
সর্বং চ মে কৃতাকৃতং কর্মাগ্র্যমল্পমেব বা ।
সম্পূরযত্বনামযা মাতা প্রচণ্ডচণ্ডিকা ॥ ২৯৬॥
তেজোঝরস্বরূপযা ভূযাদৃতস্য ধারযা ।
বিশ্বাবভাসিকেহ মে মাতা প্রচণ্ডচণ্ডিকা ॥ ২৯৭॥
সা মেঽল্পমর্ত্যতাশ্রিতাং হত্বাঽধমামহঙ্কৃতিম্ ।
আক্রম্য ভাতু মে তনুং মাতা প্রচণ্ডচণ্ডিকা ॥ ২৯৮॥
আত্মারিনাশনে বিধিং সা মেঽভিধাযবত্সলা ।
সর্বং ধুনোতু সংশযং মাতা প্রচণ্ডচণ্ডিকা ॥ ২৯৯॥
এতাভিরুত্তমাংশুভিঃ নারাচিকাভিরীশ্বরী ।
সন্তোষমেতু বর্ধতাং মাতা প্রচণ্ডচণ্ডিকা ॥ ৩০০॥
॥ ইতি শ্রীভগবন্মহর্ষিরমণান্তেবাসিনো বাসিষ্ঠস্য
নরসিংহসূনোর্গণপতেঃ কৃতিঃ প্রচণ্ডচণ্ডীত্রিশতী সমাপ্তা ॥
From Complete works of shri Vasishtha Ganapati Muni Vol. 2.15
Proofread by Kaushal S. Kaloo kaushalskaloo at gmail.com
Please send corrections to sanskrit@cheerful.com
Last updated ত্oday
http://sanskritdocuments.org
Prachanda Chandi Trishati Lyrics in Bengali PDF
% File name : prachaNDachaNDItrishatI.itx
% Category : trishati
% Location : doc\_devii
% Author : Shri Vasishtha Ganapati Muni
% Language : Sanskrit
% Subject : philosophy/hinduism/religion
% Proofread by : Kaushal S. Kaloo kaushalskaloo at gmail.com
% Description-comments : From Complete works. Vol 2.15
% Latest update : July 3, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : prachaNDachaNDItrishatI.itx
% Category : trishati
% Location : doc\_devii
% Author : Shri Vasishtha Ganapati Muni
% Language : Sanskrit
% Subject : philosophy/hinduism/religion
% Proofread by : Kaushal S. Kaloo kaushalskaloo at gmail.com
% Description-comments : From Complete works. Vol 2.15
% Latest update : July 3, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website