{॥ ശ്രീമൂകപഞ്ചശതീ ॥}
{മാതാ മരകതശ്യാമാ മാതങ്ഗീ മദശാലിനീ ।}
{കുര്യാത് കടാക്ഷം കല്യാണീ കദമ്ബവനവാസിനീ ॥}

{॥ ശ്രീഃ ॥}
{॥ ശ്രീചന്ദ്രമൌലീശ്വരായ നമഃ ॥}
{॥ ശ്രീകാരണപരചിദ്രൂപായൈ നമഃ ॥}
{ശ്രീമൂകമഹാകവിപ്രണീതാ}
{॥ ശ്രീഃ ॥}
{॥ ശ്രീമൂകപഞ്ചശതീ ॥}
{ശ്രീകാമാക്ഷീപരദേവതായാഃ പാദാരവിന്ദയോഃ}
{ഭക്തിഭരേണ സമര്പിതമ് ॥}

ആര്യാമേവ വിഭാവയന്മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിമ് ।
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാ-
മാരോഹത്യപവര്ഗസൌധവലഭീമാനന്ദവീചീമയീമ്॥

[മന്ദസ്മിത ൧൦൧ ]
ശ്രീമത്പരമഹംസപരിവ്രാജകാചാര്യവര്യ ശ്രീകാമകോടിപീഠാധീശ്വര-
ജഗദ്ഗുരു ശ്രീമത് ചന്ദ്രശേഖരേന്ദ്രസരസ്വതീ ശ്രീപാദാനാം
ശ്രീമുഖേന സമദ്ഭാസിതാ


{॥ ശ്രീഃ ॥}
{॥ ശ്രീചന്ദ്രമൌലീശ്വര ॥}
{മുദ്രാ}
സ്വസ്തി ശ്രീമദഖിലഭൂമണ്ഡലാലംകാര-ത്രയസ്ത്രിംശത്കോടി-
ദേവതാസേവിത ശ്രീകാമാക്ഷീദേവീസനാഥ-ശ്രീമദേകാമ്രനാഥ-
ശ്രീമഹാദേവീസനാഥ-ശ്രീഹസ്തിനിരിനാഥ-സാക്ഷാത്കാരപരമ-
അധിഷ്ഠാനസത്യവ്രതനാമാങ്കിത-കാഞ്ചീദിവ്യക്ഷേത്രേ ശാരദാ-
മഠസുസ്ഥിതാനാമ്, അതുലിതസുധാരസമാധുര്യകമലാസനകാമിനീ-
ധമ്മില്ല സമ്ഫുല്ലമല്ലികാമാലികാനിഷ്യന്ദമകരന്ദഝരീ-
സൌവസ്തികവാങ്നിഗുമ്ഭവിജൃമ്ഭണാനന്ദതുന്ദിലിതമണീഷി-
മണ്ഡലാനാമ്, അനവരതാദ്വൈതവിദ്യാവിനോദരസികാനാമ്,
നിരന്തരാലംകൃതീകൃതശാന്തിദാന്തിഭൂമ്നാമ്, സകലഭുവന-
ചക്രപ്രതിഷ്ഠാപക ശ്രീചക്രപ്രതിഷ്ഠാവിഖ്യാതയശോഽലംകൃതാനാമ്,
നിഖിലപാഷണ്ഡഷണ്ഡകണ്ടകോദ്ധാടനേന വിശദീകൃതവേദവേദാന്ത-
മാര്ഗഷണ്മതപ്രതിഷ്ഠാപകാചാര്യാണാമ്, ശ്രീമത്പരമഹംസപരിവ്രാജക-
ആചാര്യവര്യ-ശ്രീജഗദ്ഗുരു ശ്രീമച്ഛംകരഭഗവത്പാദാചാര്യാണാമ്
അധിഷ്ഠാനേ സിംഹാസനാഭിഷിക്ത ശ്രീമന്മഹാദേവേന്ദ്രസരസ്വതീ-
സംയമീന്ദ്രാണാമ്, അന്തേവാസിവര്യ ശ്രീമച്ചന്ദ്രശേഖരേന്ദ്രസരസ്വതീ
ശ്രീപാദൈഃ ।
{ക്രിയതേ നാരായണസ്മൃതിഃ}
തത്രഭവാന് മൂക ഇതി സുപ്രസിദ്ധഃ മഹാകവിശിരോമണിഃ
ശ്രീകാമാക്ഷീദേവീകരുണാകടാക്ഷതരങ്ഗിതപുണ്യകവിതാരസപൂരഃ
`മൂകപഞ്ചശതീ' ഇതി കര്തുര്നാമ്നാ പ്രസിദ്ധമിമം ലോകോത്തരം
ഗ്രന്ഥം പ്രണീയ ഭൂമണ്ഡലേഽനുത്തമം പുണ്യയശോവിശേഷം ശാശ്വതീം
പരാനന്ദാനുഭൂതിം ച ലബ്ധവാനിതി സുവിദിതമേവ । സ്തോത്രരത്നേ
ചാസ്മിന് കാഞ്ചീമധ്യഗത കാമകോടിപീഠാധിഷ്ഠാത്രീമ്
ഇന്ദുമൌലേരൈശ്വര്യരൂപാം ശ്രീകാമാക്ഷീം പരദേവതാമ്,
ആരൂഢയൌവനാടോപാ, തരുണിമസര്വസ്വം, നിത്യതരുണീ,
ലാവണ്യാമൃതതരങ്ഗമാലാ, വിഭ്രമസമവായസാരസന്നാഹാ,
ശൃങ്ഗാരാദ്വൈതതന്ത്രസിദ്ധാന്തം, മീനധ്വജതന്ത്രപരമതാത്പര്യം\,
കന്ദര്പസൂതികാപാങ്ഗീ, മനസിജസാമ്രാജ്യഗര്വബീജം,
പുഷ്പായുധവീര്യസരസപരിപാടീ, മദനാഗമസമയദീക്ഷിത-
കടാക്ഷാ, കുസുമശരഗര്വസമ്പത്കോശഗൃഹമ്, അനങ്ഗബ്രഹ്മതത്ത്വ-
ബോധസിരാ, പഞ്ചശരശാസ്ത്രബോധനപരമാചാര്യദൃഷ്ടിപാതാ
ഇത്യാദിരൂപേണ വര്ണയന് പുനഃ ലാവണ്യമൃതപരകാഷ്ഠാഭൂതാം
താമേവ പരദേവതാം, കാരണപരചിദ്രൂപാ, കൈവല്യാനന്ദകന്ദഃ,
ആമ്നായരഹസ്യമ്, ഉപനിഷദരവിന്ദകുഹരമധുധാരാ,
വാങ്മനോഽതീതാ, ആനന്ദാദ്വൈതകന്ദലീ, മുക്തിബീജമ്,
ആഗമസല്ലാപസാരയാഥാര്ഥ്യം, ബോധാമൃതവീചീ, അഭിദാകൃതിഃ,
ഐകാത്മ്യപ്രകൃതിഃ, നിഗമവചസ്സിദ്ധാന്തഃ, ഗുരുമൂര്തിഃ, ഇത്യേവം-
രൂപേണ സാക്ഷത്കുര്വന് യൌവനശൃങ്ഗാരാദിവിഷയരസാനുഭവ-
സാമഗ്രീം ജ്ഞാനവൈരാഗ്യാദിബ്രഹ്മാനന്ദാനുഭവസാമഗ്രീത്വേന
സമ്പാദയന് -
"ശിവ ശിവ പശ്യന്തി സമം ശ്രീകാമാക്ഷീകടാക്ഷിതാഃ പുരുഷാഃ ।
വിപിനം ഭവനമമിത്രം മിത്രം ലോഷ്ടം ച യുവതിബിമ്ബോഷ്ഠമ് ॥"

ഇതി പരദേവതാനുഗ്രഹഫലീഭൂതാം പരവൈരാഗ്യകാഷ്ഠാം പ്രകടയതി ।
[ആര്യാ ൪൮ ]
പദ്മപഞ്ചശതകാത്മകേഽത്ര ഗ്രന്ഥേ ശതകാനാം യാ ആനുപൂര്വീ
തസ്യാമയം വിശേഷോ ദൃശ്യതേ । യഥാ കശ്ചന ശിശുഃ ചക്ഷുരാദി
ഇന്ദ്രിയപ്രാഗല്ഭ്യാവിര്ഭാവാത്പൂര്വം മനോവൃത്തിമാത്രേണ കലയതി
സ്വേപ്സിതമ് ; ഏവമാര്യാശതകേ ഭക്തശിശോഃ മനഃ പ്രവൃത്തിമ്
അമ്ബികായാഃ സ്വരൂപാനുസന്ധാനപടീയസീം സമ്പാദയതി
കവിപുങ്ഗവഃ ; അയമാശയഃ -
"അന്തരപി ബഹിരപി ത്വം ജന്തുതതേരന്തകാന്തകൃദഹന്തേ ।
ചിന്തിതസന്താനവതാം സന്തതമപി തന്തനീഷി മഹിമാനമ് ॥"

ഇതി ശ്ലോകേന സൂചിതഃ ॥ [ആര്യാ ൯൮ ]

ദ്വിതീയശതകേ താവത് യഥാ കിഞ്ചിത്പ്രവൃദ്ധഗ്രഹണശക്തിഃ
ബാലകഃ ഖാന്തികേ വിദ്യമാനസ്യ വസ്തുനഃ ദര്ശന-
സ്പര്ശനാദിഭിഃ ആഹ്ലാദമധിഗച്ഛതി തദ്വത് ഭക്തബാലകഃ
അത്യന്തമധോഭാഗേ വിദ്യമാനസ്യ സ്വസ്യാന്തികത്വേനൈവ
ജഗന്മാതുഃ നിരന്തരധ്യാനഫലീഭൂത പാദാരവിന്ദ ദര്ശന-
ആനന്ദമനുഭവതീത്യയമാശയഃ -
"മരാലീനാം യാനാഭ്യസനകലനാമൂലഗുരവേ
ദരിദ്രാണാം ത്രാണവ്യതികരസുരോദ്യാനതരവേ ।
തമസ്കാണ്ഡപ്രൌഢിപ്രകടനതിരസ്കാരപടവേ
ജനോഽയം കാമാക്ഷ്യാശ്ചരണനലിനായ സ്പൃഹയതേ ॥"

ഇതി ശ്ലോകേന സൂചിതഃ ॥ [പാദാരവിന്ദ ൩ ]

യഥാ മനസഃ ജ്ഞാനേന്ദ്രിയാണാം ച സ്ഫൂര്ത്യനന്തരമേവ
വാക്പ്രസരതി, തഥൈവ ആര്യാപാദാരവിന്ദശതകയോരനന്തരം
സ്വപ്രേമാസ്പദം വസ്തു നിരര്ഗലം സ്തോതുമാരഭതേ -
"പാണ്ഡിത്യം പരമേശ്വരി സ്തുതിവിധൌ നൈവാശ്രയന്തേ ഗിരാം
വൈരിഞ്ചാന്യപി ഗുമ്ഫനാനി വിഗലദ്ഗര്വാണി ശര്വാണി തേ ।
സ്തോതും ത്വാം പരിഫുല്ലനീലനലിനശ്യാമാക്ഷി കാമാക്ഷി മാം
വാചാലീകുരുതേ തഥാപി നിതരാം ത്വത്പാദസേവാദരഃ ॥"

ഇതാദിനാ സ്തുതിശതകേന । [സ്തുതി ൧ ]
ലൌകികാവിദ്യാദിഷു കുശലഃ കശ്ചന യഥാ ലൌകികസമ്പദഃ
പ്രാപ്തുര്മഹോ ഭവതി തദ്വത് പൂര്വകൃതസ്തുതിഫലത്വേന ഭക്തഃ
അമ്ബികായാഃ കടാക്ഷവിശേഷമധിഗമ്യ പരസംവിദനുഭൂത്യ-
ഉചിതതേജഃപുഷ്ട്യാദിപാത്രം ഭവതീത്യയമാശയഃ-
"അസ്തം ക്ഷണാന്നയതു മേ പരിതാപസൂര്യ-
മാനന്ദചന്ദ്രമസമാനയതാം പ്രകാശമ് ।
കാലാന്ധകാരസുഷമാം കലയന് ദിഗന്തേ
കാമാക്ഷി കോമലകടാക്ഷനിശാഗമസ്തേ ॥"

ഇത്യാദിഭിര്വര്ണനൈഃ കടാക്ഷശതകേ സൂചിതഃ ॥ [കടാക്ഷ ൬ ]

യഥാ ലൌകികസമ്പത്സമ്പൂര്ണഃ കശ്ചന സമഗ്രയൌവനഃ
ലൌകികശൃങ്ഗാരസുഖാനുഭവായ പാത്രം ഭവതി, തദ്വത്
ദേവ്യാഃ പരമാനുഗ്രഹപാത്രീഭൂതഃ തദീയമന്ദസ്മിത-
ചന്ദ്രികാസനാഥഃ ആനന്ദചന്ദ്ര ഇവ അലൌകിക-
നിരതിശയാനന്ദാനുഭവാത്മകഃ പ്രകാശത ഇതി
അമൂമേവ ഭാവപ്രണാലികാം മഹാകവിഃ സ്വയമേവ
പഞ്ചശതീപുര്തിമ്പദ്യേന ആവിഷ്യകരോതി । യഥാ -
"ആര്യാമേവ വിഭാവയന്മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിമ് ।
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാ-
മാരോഹത്യപവര്ഗസൌധവലഭീമാനന്ദവീചീമയീമ് ॥"

ഇതി । [മന്ദസ്മിത ൧൦൧ ]
അസ്യാ ലോകോത്തരായാഃ സ്തുതേഃ പഠനമാത്രേണ തത്ക്ഷണേ
മഹാകവിനാഽമുനാ അന്തതഃ പരദേവതയൈവ വാ
ഐകാത്മ്യമനുഭവതീവ സാധകഃ ।
തദിദം ഗ്രന്ഥരത്നം ദ്രാവിഡഭാഷാമയാര്ഥാനുവാദ-
സഹിതമചിരാദേവ മഹതാ പരിശ്രമേണ ഭക്തിഭരേണ
മുദ്രാപ്യ ശ്രീ കാമാക്ഷീ ദേവീ കുമ്ഭാഭിഷേക ശുഭ-
മുഹൂര്ത ഏവ ഉപഹാരീകൃതവതേ, മുദ്രാപണദിവിഷയേ പരമം
സാഹായ്യമാചരിതവദ്ഭയഃ, തദ്ഗ്രന്ഥപഠിതൃഭ്യശ്ച
ഭക്തപുങ്ഗവേഭ്യഃ ശ്രീകാമാക്ഷീകടാക്ഷാഃ സമുല്ല-
സന്ത്വിത്യാശാസ്മഹേ॥

{॥ ഇതി നാരായണസ്മൃതിഃ ॥}


{॥ ആര്യാശതകമ് ॥}
കാരണപരചിദ്രൂപാ കാഞ്ചീപുരസീമ്നി കാമപീഠഗതാ ।
കാചന വിഹരതി കരുണാ കാശ്മീരസ്തബകകോമലാങ്ഗലതാ ॥ ൧॥

കംചന കാഞ്ചീനിലയം കരധൃതകോദണ്ഡബാണസൃണിപാശമ് ।
കഠിനസ്തനഭരനമ്രം കൈവല്യാനന്ദകന്ദമവലമ്ബേ ॥ ൨॥

ചിന്തിതഫലപരിപോഷണചിന്താമണിരേവ കാഞ്ചിനിലയാ മേ ।
ചിരതരസുചരിതസുലഭാ ചിത്തം ശിശിരയതു ചിത്സുഖാധാരാ ॥ ൩॥

കുടിലകചം കഠിനകുചം കുന്ദസ്മിതകാന്തി കുങ്കുമച്ഛായമ് ।
കുരുതേ വിഹൃതിം കാഞ്ച്യാം കുലപര്വതസാര്വഭൌമസര്വസ്വമ് ॥ ൪॥

പഞ്ചശരശാസ്ത്രബോധനപരമാചാര്യേണ ദൃഷ്ടിപാതേന ।
കാഞ്ചീസീമ്നി കുമാരീ കാചന മോഹയതി കാമജേതാരമ് ॥ ൫॥

പരയാ കാഞ്ചീപുരയാ പര്വതപര്യായപീനകുചഭരയാ ।
പരതന്ത്രാ വയമനയാ പങ്കജസബ്രഹ്മചാരിലോചനയാ ॥ ൬॥

ഐശ്വര്യമിന്ദുമൌലേരൈകാത്മ്യപ്രകൃതി കാഞ്ചിമധ്യഗതമ് ।
ഐന്ദവകിശോരശേഖരമൈദമ്പര്യം ചകാസ്തി നിഗമാനാമ് ॥ ൭॥

ശ്രിതകമ്പസീമാനം ശിഥിലിതപരമശിവധൈര്യമഹിമാനമ് ।
കലയേ പടലിമാനം കംചന കഞ്ചുകിതഭുവനഭൂമാനമ് ॥ ൮॥

ആദൃതകാഞ്ചീനിലയമാദ്യാമാരൂഢയൌവനാടോപാമ് ।
ആഗമവതംസകലികാമാനന്ദാദ്വൈതകന്ദലീം വന്ദേ ॥ ൯॥

തുങ്ഗാഭിരാമകുചഭരശൃങ്ഗാരിതമാശ്രയാമി കാഞ്ചിഗതമ് ।
ഗങ്ഗാധരപരതന്ത്രം ശൃങ്ഗാരാദ്വൈതതന്ത്രസിദ്ധാന്തമ് ॥ ൧൦॥

കാഞ്ചീരത്നവിഭൂഷാം കാമപി കന്ദര്പസൂതികാപാങ്ഗീമ് ।
പരമാം കലാമുപാസേ പരശിവവാമാങ്കപീഠികാസീനാമ് ॥ ൧൧॥

കമ്പാതീചരാണാം കരുണാകോരകിതദൃഷ്ടിപാതാനാമ് ।
കേലീവനം മനോ മേ കേഷാംചിദ്ഭവതു ചിദ്വിലാസാനാമ് ॥ ൧൨॥

ആമ്രതരുമൂലവസതേരാദിമപുരുഷസ്യ നയനപീയൂഷമ് ।
ആരബ്ധയൌവനോത്സവമാമ്നായരഹസ്യമന്തരവലമ്ബേ ॥ ൧൩॥

അധികാഞ്ചി പരമയോഗിഭിരാദിമപരപീഠസീമ്നി ദൃശ്യേന ।
അനുബദ്ധം മമ മാനസമരുണിമസര്വസ്വസമ്പ്രദായേന ॥ ൧൪॥

അങ്കിതശംകരദേഹാമങ്കുരിതോരോജകങ്കണാശ്ലേഷൈഃ ।
അധികാഞ്ചി നിത്യതരുണീമദ്രാക്ഷം കാംചിദദ്ഭുതാം ബാലാമ് ॥ ൧൫॥

മധുരധനുഷാ മഹീധരജനുഷാ നന്ദാമി സുരഭിബാണജുഷാ ।
ചിദ്വപുഷാ കാഞ്ചിപുരേ കേലിജുഷാ ബന്ധുജീവകാന്തിമുഷാ ॥ ൧൬॥

മധുരസ്മിതേന രമതേ മാംസലകുചഭാരമന്ദഗമനേന ।
മധ്യേകാഞ്ചി മനോ മേ മനസിജസാമ്രാജ്യഗര്വബീജേന ॥ ൧൭॥

ധരണിമയീം തരണിമയീം പവനമയീം ഗഗനദഹനഹോതൃമയീമ് ।
അമ്ബുമയീമിന്ദുമയീമമ്ബാമനുകമ്പമാദിമാമീക്ഷേ ॥ ൧൮॥

ലീനസ്ഥിതി മുനിഹൃദയേ ധ്യാനസ്തിമിതം തപസ്യദുപകമ്പമ് ।
പീനസ്തനഭരമീഡേ മീനധ്വജതന്ത്രപരമതാത്പര്യമ് ॥ ൧൯॥

ശ്വേതാ മന്ഥരഹസിതേ ശാതാ മധ്യേ ച വാഡ്ഭനോഽതീതാ ।
ശീതാ ലോചനപാതേ സ്ഫീതാ കുചസീമ്നി ശാശ്വതീ മാതാ ॥ ൨൦॥

പുരതഃ കദാ ന കരവൈ പുരവൈരിവിമര്ദപുലകിതാങ്ഗലതാമ് ।
പുനതീം കാഞ്ചീദേശം പുഷ്പായുധവീര്യസരസപരിപാടീമ് ॥ ൨൧॥

പുണ്യാ കാഽപി പുരന്ധ്രീ പുങ്ഖിതകന്ദര്പസമ്പദാ വപുഷാ ।
പുലിനചരീ കമ്പായാഃ പുരമഥനം പുലകനിചുലിതം കുരുതേ ॥ ൨൨॥

തനിമാദ്വൈതവലഗ്നം തരുണാരുണസമ്പ്രദായതനുലേഖമ് ।
തടസീമനി കമ്പായാസ്തരുണിമസര്വസ്വമാദ്യമദ്രാക്ഷമ് ॥ ൨൩॥

പൌഷ്ടികകര്മവിപാകം പൌഷ്പശരം സവിധസീമ്നി കമ്പായാഃ ।
അദ്രാക്ഷമാത്തയൌവനമഭ്യുദയം കംചിദര്ധശശിമൌലൈഃ ॥ ൨൪॥

സംശ്രിതകാഞ്ചീദേശേ സരസിജദൌര്ഭാഗ്യജാഗ്രദുത്തംസേ ।
സംവിന്മയേ വിലീയേ സാരസ്വതപുരുഷകാരസാമ്രാജ്യേ ॥ ൨൫॥

മോദിതമധുകരവിശിഖം സ്വാദിമസമുദായസാരകോദണ്ഡമ് ।
ആദൃതകാഞ്ചീഖേലനമാദിമമാരുണ്യഭേദമാകലയേ ॥ ൨൬॥

ഉരരീകൃതകാഞ്ചിപുരീമുപനിഷദരവിന്ദകുഹരമധുധാരാമ് ।
ഉന്നമ്രസ്തനകലശീമുത്സവലഹരീമുപാസ്മഹേ ശമ്ഭോഃ ॥ ൨൭॥

ഏണശിശുദീര്ഘലോചനമേനഃപരിപന്ഥി സന്തതം ഭജതാമ് ।
ഏകാമ്രനാഥജീവിതമേവമ്പദദൂരമേകമവലമ്ബേ ॥ ൨൮॥

സ്മയമാനമുഖം കാഞ്ചീഭയമാനം കമപി ദേവതാഭേദമ് ।
ദയമാനം വീക്ഷ്യ മുഹുര്വയമാനന്ദാമൃതാമ്ബുധൌ മഗ്നാഃ ॥ ൨൯॥

കുതുകജുഷി കാഞ്ചിദേശേ കുമുദതപോരാശിപാകശേഖരിതേ ।
കുരുതേ മനോവിഹാരം കുലഗിരിപരിബൃഢകുലൈകമണിദീപേ ॥ ൩൦॥

വീക്ഷേമഹി കാഞ്ചിപുരേ വിപുലസ്തനകലശഗരിമപരവശിതമ് ।
വിദ്രുമസഹചരദേഹം വിഭ്രമസമവായസാരസന്നാഹമ് ॥ ൩൧॥

കുരുവിന്ദഗോത്രഗാത്രം കൂലചരം കമപി നൌമി കമ്പായാഃ ।
കൂലംകഷകുചകുമ്ഭം കുസുമായുധവീര്യസാരസംരമ്ഭമ് ॥ ൩൨॥

കുഡൂമലിതകുചകിശോരൈഃ കുര്വാണൈഃ കാഞ്ചിദേശസൌഹാര്ദമ് ।
കുങ്കുമശോണൈര്നിചിതം കുശലപഥം ശമ്ഭുസുകൃതസമ്ഭാരൈഃ ॥ ൩൩॥

അങ്കിതകചേന കേനചിദന്ധംകരണൌഷധേന കമലാനാമ് ।
അന്തഃപുരേണ ശമ്ഭോരലംക്രിയാ കാഽപി കല്പ്യതേ കാഞ്ച്യാമ് ॥ ൩൪॥

ഊരീകരോമി സന്തതമൂഷ്മലഫാലേന ലലിതം പുംസാ ।
ഉപകമ്പമുചിതഖേലനമുര്വീധരവംശസമ്പദുന്മേഷമ് ॥ ൩൫॥

അങ്കുരിതസ്തനകോരകമങ്കാലംകാരമേകചൂതപതേഃ ।
ആലോകേമഹി കോമലമാഗമസംലാപസാരയാഥാര്ഥ്യമ് ॥ ൩൬॥

പുഞ്ജിതകരുണമുദഞ്ചിതശിഞ്ജിതമണികാഞ്ചി കിമപി കാഞ്ചിപുരേ ।
മഞ്ജരിതമൃദുലഹാസം പിഞ്ജരതനുരുചി പിനാകിമൂലധനമ് ॥ ൩൭॥

ലോലഹൃദയോഽസ്തി ശമ്ഭോര്ലോചനയുഗലേന ലേഹ്യമാനായാമ് ।
ലലിതപരമശിവായാം ലാവണ്യാമൃതതരങ്ഗമാലായാമ് ॥ ൩൮॥

മധുകരസഹചരചികുരൈര്മദനാഗമസമയദീക്ഷിതകടാക്ഷൈഃ ।
മണ്ഡിതകമ്പാതീരൈര്മങ്ഗലകന്ദൈര്മമാസ്തു സാരൂപ്യമ് ॥ ൩൯॥

വദനാരവിന്ദവക്ഷോവാമാങ്കതടീവശംവദീഭൂതാ ।
പൂരുഷത്രിതയേ ത്രേധാ പുരന്ധ്രിരൂപാ ത്വമേവ കാമാക്ഷി ॥ ൪൦॥

ബാധാകരീം ഭവാബ്ധേരാധാരാദ്യമ്ബുജേഷു വിചരന്തീമ് ।
ആധാരീകൃതകാഞ്ചീ ബോധാമൃതവീചിമേവ വിമൃശാമഃ ॥ ൪൧॥

കലയാമ്യന്തഃ ശശധരകലയാഽങ്കിതമൌലിമമലചിദ്വലയാമ് ।
അലയാമാഗമപീഠീനിലയാം വലയാങ്കസുന്ദരീമമ്ബാമ് ॥ ൪൨॥

ശര്വാദിപരമസാധകഗുര്വാനീതായ കാമപീഠജുഷേ ।
സര്വാകൃതയേ ശോണിമഗര്വായാസ്മൈ സമര്പ്യതേ ഹൃദയമ് ॥ ൪൩॥

സമയാ സാന്ധ്യമയൂഖൈഃ സമയാ ബുദ്ധയാ സദൈവ ശീലിതയാ ।
ഉമയാ കാഞ്ചീരതയാ ന മയാ ലഭ്യതേ കിം നു താദാത്മ്യമ് ॥ ൪൪॥

ജന്തോസ്തവ പദപൂജനസന്തോഷതരങ്ഗിതസ്യ കാമാക്ഷി ।
വന്ധോ യദി ഭവതി പുനഃ സിന്ധോരമ്ഭസ്സു ബമ്ഭ്രമീതി ശിലാ ॥ ൪൫॥

കുണ്ഡലി കുമാരി കുടിലേ ചണ്ഡി ചരാചരസവിത്രി ചാമുണ്ഡേ ।
ഗുണിനി ഗുഹാരിണി ഗുഹ്യേ ഗുരുമൂര്തേ ത്വാം നമാമി കാമാക്ഷി ॥ ൪൬॥

അഭിദാകൃതിര്ഭിദാകൃതിരചിദാകൃതിരപി ചിദാകൃതിര്മാതഃ ।
അനഹന്താ ത്വമഹന്താ ഭ്രമയസി കാമാക്ഷി ശാശ്വതീ വിശ്വമ് ॥ ൪൭॥

ശിവ ശിവ പശ്യന്തി സമം ശ്രീകാമാക്ഷീകടാക്ഷിതാഃ പുരുഷാഃ ।
വിപിനം ഭവനമമിത്രം മിത്രം ലോഷ്ടം ച യുവതിബിമ്ബോഷ്ഠമ് ॥ ൪൮॥

കാമപരിപന്ഥികാമിനി കാമേശ്വരി കാമപീഠമധ്യഗതേ ।
കാമദുഘാ ഭവ കമലേ കാമകലേ കാമകോടി കാമാക്ഷി ॥ ൪൯॥

മധ്യേഹൃദയം മധ്യേനിടിലം മധ്യേശിരോഽപി വാസ്തവ്യാമ് ।
ചണ്ഡകരശക്രകാര്മുകചന്ദ്രസമാഭാം നമാമി കാമാക്ഷീമ് ॥ ൫൦॥

അധികാഞ്ചി കേലിലോലൈരഖിലാഗമയന്ത്രതന്ത്രമയൈഃ ।
അതിശീതം മമ മാനസമസമശരദ്രോഹിജീവനോപായൈഃ ॥ ൫൧॥

നന്ദതി മമ ഹൃദി കാചന മന്ദിരയന്താ നിരന്തരം കാഞ്ചീമ് ।
ഇന്ദുരവിമണ്ഡലകുചാ ബിന്ദുവിയന്നാദപരിണതാ തരുണീ ॥ ൫൨॥

ശമ്പാലതാസവര്ണം സമ്പാദയിതും ഭവജ്വരചികിത്സാമ് ।
ലിമ്പാമി മനസി കിംചന കമ്പാതടരോഹി സിദ്ധഭൈഷജ്യമ് ॥ ൫൩॥

അനുമിതകുചകാഠിന്യാമധിവക്ഷഃപീഠമങ്ഗജന്മരിപോഃ ।
ആനന്ദദാം ഭജേ താമാനങ്ഗബ്രഹ്മതത്വബോധസിരാമ് ॥ ൫൪॥

ഐക്ഷിഷി പാശാങ്കുശധരഹസ്താന്തം വിസ്മയാര്ഹവൃത്താന്തമ് ।
അധികാഞ്ചി നിഗമവാചാം സിദ്ധാന്തം ശൂലപാണിശുദ്ധാന്തമ് ॥ ൫൫॥

ആഹിതവിലാസഭങ്ഗീമാബ്രഹ്മസ്തമ്ബശില്പകല്പനയാ ।
ആശ്രിതകാഞ്ചീമതുലാമാദ്യാം വിസ്ഫൂര്തിമാദ്രിയേ വിദ്യാമ് ॥ ൫൬॥

മൂകോഽപി ജടിലദുര്ഗതിശോകോഽപി സ്മരതി യഃ ക്ഷണം ഭവതീമ് ।
ഏകോ ഭവതി സ ജന്തുര്ലോകോത്തരകീര്തിരേവ കാമാക്ഷി ॥ ൫൭॥

പഞ്ചദശവര്ണരൂപം കംചന കാഞ്ചീവിഹാരധൌരേയമ് ।
പഞ്ചശരീയം ശമ്ഭോര്വഞ്ചനവൈദഗ്ധ്യമൂലമവലമ്ബേ ॥ ൫൮॥

പരിണതിമതീം ചതുര്ധാ പദവീം സുധിയാം സമേത്യ സൌഷുമ്നീമ് ।
പഞ്ചാശദര്ണകല്പിതമദശില്പാം ത്വാം നമാമി കാമാക്ഷി ॥ ൫൯॥

ആദിക്ഷന്മമ ഗുരുരാഡാദിക്ഷാന്താക്ഷരാത്മികാം വിദ്യാമ് ।
സ്വാദിഷ്ഠചാപദണ്ഡാം നേദിഷ്ഠാമേവ കാമപീഠഗതാമ് ॥ ൬൦॥

തുഷ്യാമി ഹര്ഷിതസ്മരശാസനയാ കാഞ്ചിപുരകൃതാസനയാ ।
സ്വാസനയാ സകലജഗദ്ഭാസനയാ കലിതശമ്ബരാസനയാ ॥ ൬൧॥

പ്രേമവതീ കമ്പായാം സ്ഥേമവതീ യതിമനസ്സു ഭൂമവതീ ।
സാമവതീ നിത്യഗിരാ സോമവതീ ശിരസി ഭാതി ഹൈമവതീ ॥ ൬൨॥

കൌതുകിനാ കമ്പായാം കൌസുമചാപേന കീലിതേനാന്തഃ ।
കുലദൈവതേന മഹതാ കുഡ്മലമുദ്രാം ധുനോതു നഃപ്രതിഭാ ॥ ൬൩॥

യൂനാ കേനാപി മിലദ്ദേഹാ സ്വാഹാസഹായതിലകേന ।
സഹകാരമൂലദേശേ സംവിദ്രൂപാ കുടുമ്ബിനീ രമതേ ॥ ൬൪॥

കുസുമശരഗര്വസമ്പത്കോശഗൃഹം ഭാതി കാഞ്ചിദേശഗതമ് ।
സ്ഥാപിതമസ്മിന്കഥമപി ഗോപിതമന്തര്മയാ മനോരത്നമ് ॥ ൬൫॥

ദഗ്ധഷഡധ്വാരണ്യം ദരദലിതകുസുമ്ഭസമ്ഭൃതാരുണ്യമ് ।
കലയേ നവതാരുണ്യം കമ്പാതടസീമ്നി കിമപി കാരുണ്യമ് ॥ ൬൬॥

അധികാഞ്ചി വര്ധമാനാമതുലാം കരവാണി പാരണാമക്ഷ്ണോഃ ।
ആനന്ദപാകഭേദാമരുണിമപരിണാമഗര്വപല്ലവിതാമ് ॥ ൬൭॥

ബാണസൃണിപാശകാര്മുകപാണിമമും കമപി കാമപീഠഗതമ് ।
ഏണധരകോണചൂഡം ശോണിമപരിപാകഭേദമാകലയേ ॥ ൬൮॥

കിം വാ ഫലതി മമാന്യൌര്ബിമ്ബാധരചുമ്ബിമന്ദഹാസമുഖീ ।
സമ്ബാധകരീ തമസാമമ്ബാ ജാഗര്തി മനസി കാമാക്ഷീ ॥ ൬൯॥

മഞ്ചേ സദാശിവമയേ പരിശിവമയലലിതപൌഷ്പപര്യങ്കേ ।
അധിചക്രമധ്യമാസ്തേ കാമാക്ഷീ നാമ കിമപി മമ ഭാഗ്യമ് ॥ ൭൦॥

രക്ഷ്യോഽസ്മി കാമപീഠീലാസികയാ ഘനകൃപാമ്ബുരാശികയാ ।
ശ്രുതിയുവതികുന്തലീമണിമാലികയാ തുഹിനശൈലബാലികയാ ॥ ൭൧॥

ലീയേ പുരഹരജായേ മായേ തവ തരുണപല്ലവച്ഛായേ ।
ചരണേ ചന്ദ്രാഭരണേ കാഞ്ചീശരണേ നതാര്തിസംഹരണേ ॥ ൭൨॥

മൂര്തിമതി മുക്തിബീജേ മൂര്ധ്നി സ്തബകിതചകോരസാമ്രാജ്യേ ।
മോദിതകമ്പാകൂലേ മുഹുര്മുഹുര്മനസി മുമുദിഷാഽസ്മാകമ് ॥ ൭൩॥

വേദമയീം നാദമയീം ബിന്ദുമയീം പരപദോദ്യദിന്ദുമയീമ് ।
മന്ത്രമയീം തന്ത്രമയീം പ്രകൃതിമയീം നൌമി വിശ്വവികൃതിമയീമ് ॥ ൭൪॥

പുരമഥനപുണ്യകോടീ പുഞ്ജിതകവിലോകസൂക്തിരസധാടീ ।
മനസി മമ കാമകോടീ വിഹരതു കരുണാവിപാകപരിപാടീ ॥ ൭൫॥

കുടിലം ചടുലം പൃഥുലം മൃദുലം കചനയനജഘനചരണേഷു ।
അവലോകിതമവലമ്ബിതമധികമ്പാതടമമേയമസ്മാഭിഃ ॥ ൭൬॥

പ്രത്യങ്മുഖ്യാ ദൃഷ്ടയാ പ്രസാദദീപാങ്കുരേണ കാമാക്ഷ്യാഃ ।
പശ്യാമി നിസ്തുലമഹോ പചേലിമം കമപി പരശിവോല്ലാസമ് ॥ ൭൭॥

വിദ്യേ വിധാതൃവിഷയേ കാത്യായനി കാലി കാമകോടികലേ ।
ഭാരതി ഭൈരവി ഭദ്രേ ശാകിനി ശാമ്ഭവി ശിവേ സ്തുവേ ഭവതീമ് ॥ ൭൮॥

മാലിനി മഹേശചാലിനി കാഞ്ചീഖേലിനി വിപക്ഷകാലിനി തേ ।
ശൂലിനി വിദ്രുമശാലിനി സുരജനപാലിനി കപാലിനി നമോഽസ്തു ॥ ൭൯॥

ദേശിക ഇതി കിം ശംകേ തത്താദൃക്തവ നു തരുണിമോന്മേഷഃ ।
കാമാക്ഷി ശൂലപാണേഃ കാമാഗമസമയദീക്ഷായാമ് ॥ ൮൦॥

വേതണ്ഡകുമ്ഭഡമ്ബരവൈതണ്ഡികകുചഭരാര്തമധ്യായ ।
കുങ്കുമരുചേ നമസ്യാം ശംകരനയനാമൃതായ രചയാമഃ ॥ ൮൧॥

അധികാഞ്ചിതമണികാഞ്ചനകാഞ്ചീമധികാഞ്ചി കാംചിദദ്രാക്ഷമ് ।
അവനതജനാനുകമ്പാമനുകമ്പാകൂലമസ്മദനുകൂലാമ് ॥ ൮൨॥

പരിചിതകമ്പാതീരം പര്വതരാജന്യസുകൃതസന്നാഹമ് ।
പരഗുരുകൃപയാ വീക്ഷേ പരമശിവോത്സങ്ഗമങ്ഗലാഭരണമ് ॥ ൮൩॥

ദഗ്ധമദനസ്യ ശമ്ഭോഃ പ്രഥീയസീം ബ്രഹ്മചര്യവൈദഗ്ധീമ് ।
തവ ദേവി തരുണിമശ്രീചതുരിമപാകോ ന ചക്ഷമേ മാതഃ ॥ ൮൪॥

മദജലതമാലപത്രാ വസനിതപത്രാ കരാദൃതഖാനിത്രാ ।
വിഹരതി പുലിന്ദയോഷാ ഗുഞ്ജാഭൂഷാ ഫണീന്ദ്രകൃതവേഷാ ॥ ൮൫॥

അങ്കേ ശുകിനീ ഗീതേ കൌതുകിനീ പരിസരേ ച ഗായകിനീ ।
ജയസി സവിധേഽമ്ബ ഭൈരവമണ്ഡലിനീ ശ്രവസി ശങ്ഖകുന്ഡലിനീ ॥ ൮൬॥

പ്രണതജനതാപവര്ഗാ കൃതബഹുസര്ഗാ സസിംഹസംസര്ഗാ ।
കാമാക്ഷി മുദിതഭര്ഗാ ഹതരിപുവര്ഗാ ത്വമേവ സാ ദുര്ഗാ ॥ ൮൭॥

ശ്രവണചലദ്വേതണ്ഡാ സമരോദ്ദണ്ഡാ ധുതാസുരശിഖണ്ഡാ ।
ദേവി കലിതാന്ത്രഷണ്ഡാ ധൃതനരമുണ്ഡാ ത്വമേവ ചാമുണ്ഡാ ॥ ൮൮॥

ഉര്വീധരേന്ദ്രകന്യേ ദര്വീഭരിതേന ഭക്തപൂരേണ ।
ഗുര്വീമകിംചനാര്തി ഖര്വീകുരുഷേ ത്വമേവ കാമാക്ഷി ॥ ൮൯॥

താഡിതരിപുപരിപീഡനഭയഹരണ നിപുണഹലമുസലാ ।
ക്രോഡപതിഭീഷണമുഖീ ക്രീഡസി ജഗതി ത്വമേവ കാമാക്ഷി ॥ ൯൦॥

സ്മരമഥനവരണലോലാ മന്മഥഹേലാവിലാസമണിശാലാ ।
കനകരുചിചൌര്യശീലാ ത്വമമ്ബ ബാലാ കരാബ്ജധൃതമാലാ ॥ ൯൧॥

വിമലപടീ കമലകുടീ പുസ്തകരുദ്രാക്ഷശസ്തഹസ്തപുടീ ।
കാമാക്ഷി പക്ഷ്മലാക്ഷീ കലിതവിപഞ്ചീ വിഭാസി വൈരിഞ്ചീ ॥ ൯൨॥

കുങ്കുമരുചിപിങ്ഗമസൃക്പങ്കിലമുണ്ഡാലിമണ്ഡിതം മാതഃ ।
ശ്രീകാമാക്ഷി തദീയസങ്ഗമകലാമന്ദീഭവത്കൌതുകഃ
ജയതി തവ രൂപധേയം ജപപടപുസ്തകവരാഭയകരാബ്ജമ് ॥ ൯൩॥

കനകമണികലിതഭൂഷാം കാലായസകലഹശീലകാന്തികലാമ് ।
കാമാക്ഷി ശീലയേ ത്വാം കപാലശൂലാഭിരാമകരകമലാമ് ॥ ൯൪॥

ലോഹിതിമപുഞ്ജമധ്യേ മോഹിതഭുവനേ മുദാ നിരീക്ഷന്തേ ।
വദനം തവ കുവയുഗലം കാഞ്ചീസീമാം ച കേഽപി കാമാക്ഷി ॥ ൯൫॥

ജലധിദ്വിഗുണിതഹുതബഹദിശാദിനേശ്വരകലാശ്വിനേയദലൈഃ ।
നലിനൈര്മഹേശി ഗച്ഛസി സര്വോത്തരകരകമലദലമമലമ് ॥ ൯൬॥

സത്കൃതദേശികചരണാഃ സബീജനിര്ബീജയോഗനിശ്രേണ്യാ ।
അപവര്ഗസൌധവലഭീമാരോഹന്ത്യമ്ബ കേഽപി തവ കൃപയാ ॥ ൯൭॥

അന്തരപി ബഹിരപി ത്വം ജന്തുതതേരന്തകാന്തകൃദഹന്തേ ।
ചിന്തിതസന്താനവതാം സന്തതമപി തന്തനീഷി മഹിമാനമ് ॥ ൯൮॥

കലമഞ്ജുലവാഗനുമിതഗലപഞ്ജരഗതശുകഗ്രഹൌത്കണ്ഠ്യാത് ।
അമ്ബ രദനാമ്ബരം തേ ബിമ്ബഫലം ശമ്ബരാരിണാ ന്യസ്തമ് ॥ ൯൯॥

ജയ ജയ ജഗദമ്ബ ശിവേ ജയ ജയ കാമാക്ഷി ജയ ജയാദ്രിസുതേ ।
ജയ ജയ മഹേശദയിതേ ജയ ജയ ചിദ്ഗഗനകൌമുദീധാരേ ॥ ൧൦൦॥

ആര്യാശതകം ഭക്ത്യാ പഠതാമാര്യാകടാക്ഷേണ ।
നിസ്സരതി വദനകമലാദ്വാണീ പീയൂഷധോരണീ ദിവ്യാ ॥ ൧൦൧॥

{ആര്യാശതകം സമ്പൂര്ണമ് ॥}



{॥ പാദാരവിന്ദശതകമ് ॥}
മഹിമ്നഃ പന്ഥാനം മദനപരിപന്ഥിപ്രണയിനി
പ്രഭുര്നിര്ണേതും തേ ഭവതി യതമാനോഽപി കതമഃ ।
തഥാപി ശ്രീകാഞ്ചീവിഹൃതിരസികേ കോഽപി മനസോ
വിപാകസ്ത്വത്പാദസ്തുതിവിധിഷു ജല്പാകയതി മാമ് ॥ ൧॥

ഗലഗ്രാഹീ പൌരന്ദരപുരവനീപല്ലവരുചാം
ധൃതപാഥമ്യാനാമരുണമഹസാമാദിമഗുരുഃ ।
സമിന്ധേ ബന്ധൂകസ്തബകസഹയുധ്വാ ദിശി ദിശി
പ്രസര്പന്കാമാക്ഷ്യാശ്ചരണകിരണാനാമരുണിമാ ॥ ൨॥

മരാലീനാം യാനാഭ്യസനകലനാമൂലഗുരവേ
ദരിദ്രാണാം ത്രാണവ്യതികരസുരോദ്യാനതരവേ ।
തമസ്കാണ്ഡപ്രൌഢിപ്രകടനതിരസ്കാരപടവേ
ജനോഽയം കാമാക്ഷ്യാശ്ചരണനലിനായ സ്പൃഹയതേ ॥ ൩॥

വഹന്തീ സൈന്ദൂരീം സരണിമവനമ്രാമരപുറീ-
പുരന്ധ്രീസീമന്തേ കവികമലബാലാര്കസുഷമാ ।
ത്രയീസീമന്തിന്യാഃ സ്തനതടനിചോലാരുണപടീ
വിഭാന്തീ കാമാക്ഷ്യാഃ പദനലിനകാന്തിര്വിജയതേ ॥ ൪॥

പ്രണമ്രീഭൂതസ്യ പ്രണയകലഹത്രസ്തമനസഃ
സ്മരാരാതേശ്ചൂഡാവിയതി ഗൃഹമേധീ ഹിമകരഃ ।
യയോഃ സാന്ധ്യാം കാന്തിം വഹതി സുഷമാഭിശ്ചരണയോഃ
തയോര്മേ കാമാക്ഷ്യാ ഹൃദയമപതന്ദ്രം വിഹരതാമ് ॥ ൫॥

യയോഃ പീഠായന്തേ വിബുധമുകുടീനാം പടലികാ
യയോഃ സൌധായന്തേ സ്വയമുദയഭാജോ ഭണിതയഃ ।
യയോഃ ദാസായന്തേ സരസിജഭവാദ്യാശ്ചരണയോഃ
തയോര്മേ കാമാക്ഷ്യാ ദിനമനു വരീവര്തു ഹൃദയമ് ॥ ൬॥

നയന്തീ സംകോചം സരസിജരുചം ദിക്പരിസരേ
സൃജന്തീ ലൌഹിത്യം നഖകിരണചന്ദ്രാര്ധഖചിതാ ।
കവീന്ദ്രാണാം ഹൃത്കൈരവവികസനോദ്യോഗജനനീ
സ്ഫുരന്തീ കാമാക്ഷ്യാഃ ചരണരുചിസന്ധ്യാ വിജയതേ ॥ ൭॥

വിരാവൈര്മാഞ്ജീരൈഃ കിമപി കഥയന്തീവ മധുരം
പുരസ്താദാനമ്രേ പുരവിജയിനി സ്മേരവദനേ ।
വയസ്യേവ പ്രൌഢാ ശിഥിലയതി യാ പ്രേമകലഹ-
പ്രരോഹം കാമാക്ഷ്യാഃ ചരണയുഗലീ സാ വിജയതേ ॥ ൮॥

സുപര്വസ്ത്രീലോലാലകപരിചിതം ഷട്പദകുലൈഃ
സ്ഫുരല്ലാക്ഷാരാഗം തരുണതരണിജ്യോതിരരുണൈഃ ।
ഭൃതം കാന്ത്യമ്ഭോഭിഃ വിസൃമരമരന്ദൈഃ സരസിജൈഃ
വിധത്തേ കാമാക്ഷ്യാഃ ചരണയുഗലം ബന്ധുപദവീമ് ॥ ൯॥

രജഃസംസര്ഗേഽപി സ്ഥിതമരജസാമേവ ഹൃദയേ
പരം രക്തത്വേന സ്ഥിതമപി വിരക്തൈകശരണമ് ।
അലഭ്യം മന്ദാനാം ദധദപി സദാ മന്ദഗതിതാം
വിധത്തേ കാമാക്ഷ്യാഃ ചരണയുഗമാശ്ചര്യലഹരീമ് ॥ ൧൦॥

ജടാലാ മഞ്ജീരസ്ഫുരദരുണരത്നാംശുനികരൈഃ
നിഷിദന്തീ മധ്യേ നഖരുചിഝരീഗാങ്ഗപയസാമ് ।
ജഗത്ത്രാണം കര്തും ജനനി മമ കാമാക്ഷി നിയതം
തപശ്ചര്യാം ധത്തേ തവ ചരണപാഥോജയുഗലീ ॥ ൧൧॥

തുലാകോടിദ്വന്ദ്വക്കണിതഭണിതാഭീതിവചസോഃ
വിനമ്രം കാമാക്ഷീ വിസൃമരമഹഃപാടലിതയോഃ ।
ക്ഷണം വിന്യാസേന ക്ഷപിതതമസോര്മേ ലലിതയോഃ
പുനീയാന്മൂര്ധാനം പുരഹരപുരന്ധ്രീ ചരണയോഃ ॥ ൧൨॥

ഭവാനി ദ്രുഹ്യേതാം ഭവനിബിഡിതേഭ്യോ മമ മുഹു-
സ്തമോവ്യാമോഹേഭ്യസ്തവ ജനനി കാമാക്ഷി ചരണൌ ।
യയോര്ലാക്ഷാബിന്ദുസ്ഫുരണധരണാദ്ധ്വര്ജടിജടാ-
കുടീരാ ശോണാങ്കം വഹതി വപുരേണാങ്കകലികാ ॥ ൧൩॥

പവിത്രീകുര്യുര്നുഃ പദതലഭുവഃ പാടലരുചഃ
പരാഗാസ്തേ പാപപ്രശമനധുരീണാഃ പരശിവേ ।
കണം ലബ്ധും യേഷാം നിജശിരസി കാമാക്ഷി വിവശാ
വലന്തോ വ്യാതന്വന്ത്യഹമഹമികാം മാധവമുഖാഃ ॥ ൧൪॥

ബലാകാമാലാഭിര്നഖരുചിമയീഭിഃ പരിവൃതേ
വിനമ്രസ്വര്നാരീവികചകചകാലാമ്ബുദകുലേ ।
സ്ഫുരന്തഃ കാമാക്ഷി സ്ഫുടദലിതബന്ധൂകസുഹൃദ-
സ്തടില്ലേഖായന്തേ തവ ചരണപാഥോജകിരണാഃ ॥ ൧൫॥

സരാഗഃ സദ്വേഷഃ പ്രസൃമരസരോജേ പ്രതിദിനം
നിസര്ഗാദാക്രാമന്വിബുധജനമൂര്ധാനമധികമ് ।
കഥംകാരം മാതഃ കഥയ പദപദ്മസ്തവ സതാം
നതാനാം കാമാക്ഷി പ്രകടയതി കൈവല്യസരണിമ് ॥ ൧൬॥

ജപാലക്ഷ്മീശോണോ ജനിതപരമജ്ഞാനനലിനീ-
വികാസവ്യാസങ്ഗോ വിഫലിതജഗജ്ജാഡ്യഗരിമാ ।
മനഃപൂര്വാദ്രിം മേ തിലകയതു കാമാക്ഷി തരസാ
തമസ്കാണ്ഡദ്രോഹീ തവ ചരണപാഥോജരമണഃ ॥ ൧൭॥

നമസ്കുര്മഃ പ്രേങ്ഖന്മണികടകനീലോത്പലമഹഃ-
പയോധൌ രിങ്ഖദ്ഭിര്നഖകിരണഫേനൈര്ധവലിതേ ।
സ്ഫുടം കുര്വാണായ പ്രബലചലദൌര്വാനലശിഖാ-
വിതര്കം കാമാക്ഷ്യാഃ സതതമരുണിമ്നേ ചരണയോഃ ॥ ൧൮॥

ശിവേ പാശായേതാമലഘുനി തമഃകൂപകുഹരേ
ദിനാധീശായേതാം മമ ഹൃദയപാഥോജവിപിനേ ।
നഭോമാസായേതാം സരസകവിതാരീതിസരിതി
ത്വദീയൌ കാമാക്ഷി പ്രസൃതകിരണൌ ദേവി ചരണൌ ॥ ൧൯॥

നിഷക്തം ശ്രുത്യന്തേ നയനമിവ സദ്വൃത്തരുചിരൈഃ
സമൈര്ജുഷ്ടം ശുദ്ധൈരധരമിവ രമ്യൈര്ദ്വിജഗണൈഃ ।
ശിവേ വക്ഷോജന്മദ്വിതയമിവ മുക്താശ്രിതമുമേ
ത്വദീയം കാമാക്ഷി പ്രണതശരണം നൌമി ചരണമ് ॥ ൨൦॥

നമസ്യാസംസജ്ജന്നമുചിപരിപന്ഥിപ്രണയിനീ-
നിസര്ഗപ്രേങ്ഖോലത്കുരലകുലകാലാഹിശബലേ ।
നഖച്ഛായാദുഗ്ധോദധിപയസി തേ വൈദ്രുമരുചാം
പ്രചാരം കാമാക്ഷി പ്രചുരയതി പാദാബ്ജസുഷമാ ॥ ൨൧॥

കദാ ദൂരീകര്തും കടുദുരിതകാകോലജനിതം
മഹാന്തം സന്താപം മദനപരിപന്ഥിപ്രിയതമേ ।
ക്ഷണാത്തേ കാമാക്ഷി ത്രിഭുവനപരീതാപഹരണേ
പടീയാംസം ലപ്സ്യേ പദകമലസേവാമൃതരസമ് ॥ ൨൨॥

യയോഃ സാന്ധ്യം രോചിഃ സതതമരുണിമ്നേ സ്പൃഹയതേ
യയോശ്ചാന്ദ്രീ കാന്തിഃ പരിപതതി ദൃഷ്ട്വാ നഖരുചിമ് ।
യയോഃ പാകോദ്രേകം പിപഠിഷതി ഭക്ത്യാ കിസലയം
മ്രദിമ്നഃ കാമാക്ഷ്യാ മനസി ചരണൌ തൌ തനുമഹേ ॥ ൨൩॥

ജഗന്നേദം നേദം പരമിതി പരിത്യജ്യ യതിഭിഃ
കുശാഗ്രീയസ്വാന്തൈഃ കുശലധിഷണൈഃ ശാസ്ത്രസരണൌ ।
ഗവേഷ്യം കാമാക്ഷി ധ്രുവമകൃതകാനാം ഗിരിസുതേ
ഗിരാമൈദമ്പര്യം തവ ചരണപദ്മം വിജയതേ ॥ ൨൪॥

കൃതസ്നാനം ശാസ്ത്രാമൃതസരസി കാമാക്ഷി നിതരാം
ദധാനം വൈശദ്യം കലിതരസമാനന്ദസുധയാ ।
അലംകാരം ഭൂമേര്മുനിജനമനശ്ചിന്മയമഹാ-
പയോധേരന്തസ്സ്ഥം തവ ചരണരത്നം മൃഗയതേ ॥ ൨൫॥

മനോഗേഹേ മോഹോദ്ഭവതിമിരപൂര്ണേ മമ മുഹുഃ
ദരിദ്രാണീകുര്വന്ദിനകരസഹസ്രാണി കിരണൈഃ ।
വിധത്താം കാമാക്ഷി പ്രസൃമരതമോവഞ്ചനചണഃ
ക്ഷണാര്ധം സാന്നിധ്യം ചരണമണിദീപോ ജനനി തേ ॥ ൨൬॥

കവീനാം ചേതോവന്നഖരരുചിസമ്പര്കി വിബുധ-
സ്രവന്തീസ്രോതോവത്പടുമുഖരിതം ഹംസകരവൈഃ ।
ദിനാരമ്ഭശ്രീവന്നിയതമരുണച്ഛായസുഭഗം
മദന്തഃ കാമാക്ഷ്യാഃ സ്ഫുരതു പദപങ്കേരുഹയുഗമ് ॥ ൨൭॥

സദാ കിം സമ്പര്കാത്പ്രകൃതികഠിനൈര്നാകിമുകുടൈഃ
തടൈര്നീഹാരാദ്രേരധികമണുനാ യോഗിമനസാ ।
വിഭിന്തേ സംമോഹം ശിശിരയതി ഭക്താനപി ദൃശാമ്
അദൃശ്യം കാമാക്ഷി പ്രകടയതി തേ പാദയുഗലമ് ॥ ൨൮॥

പവിത്രാഭ്യാമമ്ബ പ്രകൃതിമൃദുലാഭ്യാം തവ ശിവേ
പദാഭ്യാം കാമാക്ഷി പ്രസഭമഭിഭൂതൈഃ സചകിതൈഃ ।
പ്രവാലൈരമ്ഭോജൈരപി ച വനവാസവ്രതദശാഃ
സദൈവാരഭ്യന്തേ പരിചരിതനാനാദ്വിജഗണൈഃ ॥ ൨൯॥

ചിരാദ്ദൃശ്യാ ഹംസൈഃ കഥമപി സദാ ഹംസസുലഭം
നിരസ്യന്തീ ജാഡ്യം നിയതജഡമധ്യൈകശരണമ് ।
അദോഷവ്യാസങ്ഗാ സതതമപി ദോഷാപ്തിമലിനം
പയോജം കാമാക്ഷ്യാഃ പരിഹസതി പാദാബ്ജയുഗലീ ॥ ൩൦॥

സുരാണാമാനന്ദപ്രബലനതയാ മണ്ഡനതയാ
നഖേന്ദുജ്യോത്സ്നാഭിര്വിസൃമരതമഃഖണ്ഡനതയാ ।
പയോജശ്രീദ്വേഷവ്രതരതതയാ ത്വച്ചരണയോഃ
വിലാസഃ കാമാക്ഷി പ്രകടയതി നൈശാകരദശാമ് ॥ ൩൧॥

സിതിമ്നാ കാന്തീനാം നഖരജനുഷാം പാദനലിന-
ച്ഛവീനാം ശോണിമ്നാ തവ ജനനി കാമാക്ഷി നമനേ ।
ലഭന്തേ മന്ദാരഗ്രഥിതനവബന്ധൂകകുസുമ-
സ്രജാം സാമീചീന്യം സുരപുരപുരന്ധ്രീകചഭരാഃ ॥ ൩൨॥

സ്ഫുരന്മധ്യേ ശുദ്ധേ നഖകിരണദുഗ്ധാബ്ധിപയസാം
വഹന്നബ്ജം ചക്രം ദരമപി ച ലേഖാത്മകതയാ ।
ശ്രിതോ മാത്സ്യം രൂപം ശ്രിയമപി ദധാനോ നിരുപമാം
ത്രിധാമാ കാമാക്ഷ്യാഃ പദനലിനനാമാ വിജയതേ ॥ ൩൩॥

നഖശ്രീസന്നദ്ധസ്തബകനിചിതഃ സ്വൈശ്ച കിരണൈഃ
പിശങ്ഗൈഃ കാമാക്ഷി പ്രകടിതലസത്പല്ലവരുചിഃ ।
സതാം ഗമ്യഃ ശങ്കേ സകലഫലദാതാ സുരതരുഃ
ത്വദീയഃ പാദോഽയം തുഹിനഗിരിരാജന്യതനയേ ॥ ൩൪॥

വഷട്കുര്വന്മാഞ്ജീരകലകലൈഃ കര്മലഹരീ-
ഹവീംഷി പ്രൌദ്ദണ്ഡം ജ്വലതി പരമജ്ഞാനദഹനേ ।
മഹീയാന്കാമാക്ഷി സ്ഫുടമഹസി ജോഹോതി സുധിയാം
മനോവേദ്യാം മാതസ്തവ ചരണയജ്വാ ഗിരിസുതേ ॥ ൩൫॥

മഹാമന്ത്രം കിംചിന്മണികടകനാദൈര്മൃദു ജപന്
ക്ഷിപന്ദിക്ഷു സ്വച്ഛം നഖരുചിമയം ഭാസ്മനരജഃ ।
നതാനാം കാമാക്ഷി പ്രകൃതിപടുരച്ചാട്യ മമതാ-
പിശാചീം പാദോഽയം പ്രകടയതി തേ മാന്ത്രികദശാമ് ॥ ൩൬॥

ഉദീതേ ബോധേന്ദൌ തമസി നിതരാം ജഗ്മുഷി ദശാം
ദരിദ്രാം കാമാക്ഷി പ്രകടമനുരാഗം വിദധതീ ।
സിതേനാച്ഛാദ്യാങ്ഗം നഖരുചിപടേനാങ്ഘ്രിയുഗലീ-
പുരന്ധ്രീ തേ മാതഃ സ്വയമഭിസരത്യേവ ഹൃദയമ് ॥ ൩൭॥

ദിനാരമ്ഭഃ സമ്പന്നലിനവിപിനാനാമഭിനവോ
വികാസോ വാസന്തഃ സുകവിപികലോകസ്യ നിയതഃ ।
പ്രദോഷഃ കാമാക്ഷി പ്രകടപരമജ്ഞാനശശിന-
ശ്ചകാസ്തി ത്വത്പാദസ്മരണമഹിമാ ശൈലതനയേ ॥ ൩൮॥

ധൃതച്ഛായം നിത്യം സരസിരുഹമൈത്രീപരിചിതം
നിധാനം ദീപ്തീനാം നിഖിലജഗതാം ബോധജനകമ് ।
മുമുക്ഷൂണാം മാര്ഗപ്രഥനപടു കാമാക്ഷി പദവീം
പദം തേ പാതങ്ഗീം പരികലയതേ പര്വതസുതേ ॥ ൩൯॥

ശനൈസ്തീര്ത്വാ മോഹാമ്ബുധിമഥ സമാരോഢുമനസഃ
ക്രമാത്കൈവല്യാഖ്യാം സുകൃതിസുലഭാം സൌധവലഭീമ് ।
ലഭന്തേ നിഃശ്രേണീമിവ ഝടിതി കാമാക്ഷി ചരണം
പുരശ്ചര്യാഭിസ്തേ പുരമഥനസീമന്തിനി ജനാഃ ॥ ൪൦॥

പ്രചണ്ഡാര്തിക്ഷോഭപ്രമഥനകൃതേ പ്രാതിഭസരി-
ത്പ്രവാഹപ്രോദ്ദണ്ഡീകരണജലദായ പ്രണമതാമ് ।
പ്രദീപായ പ്രൌഢേ ഭവതമസി കാമാക്ഷി ചരണ-
പ്രസാദൌന്മുഖ്യായ സ്പൃഹയതി ജനോഽയം ജനനി തേ ॥ ൪൧॥

മരുദ്ഭിഃ സംസേവ്യാ സതതമപി ചാഞ്ചല്യരഹിതാ
സദാരുണ്യം യാന്തീ പരിണതിദരിദ്രാണസുഷമാ ।
ഗുണോത്കര്ഷാന്മാഞ്ജീരകകലകലൈസ്തര്ജനപടുഃ
പ്രവാലം കാമാക്ഷ്യാഃ പരിഹസതി പാദാബ്ജയുഗലീ ॥ ൪൨॥

ജഗദ്രക്ഷാദക്ഷാ ജലജരുചിശിക്ഷാപടുതരാ
സമൈര്നമ്യാ രമ്യാ സതതമഭിഗമ്യാ ബുധജനൈഃ ।
ദ്വയീ ലീലാലോലാ ശ്രുതിഷു സുരപാലാദിമുകുടീ-
തടീസീമാധാമാ തവ ജനനി കാമാക്ഷി പദയോഃ ॥ ൪൩॥

ഗിരാം ദൂരൌ ചോരൌ ജഡിമതിമിരാണാം കൃതജഗ-
ത്പരിത്രാണൌ ശോണൌ മുനിഹൃദയലീലൈകനിപുണൌ ।
നഖൈഃ സ്മേരൌ സാരൌ നിഗമവചസാം ഖണ്ഡിതഭവ-
ഗ്രഹോന്മാദൌ പാദൌ തവ ജനനി കാമാക്ഷി കലയേ ॥ ൪൪॥

അവിശ്രാന്തം പങ്കം യദപി കലയന്യാവകമയം
നിരസ്യന്കാമാക്ഷി പ്രണമനജുഷാം പങ്കമഖിലമ് ।
തുലാകോടിദ്വന്ദം ദധദപി ച ഗച്ഛന്നതുലതാം
ഗിരാം മാര്ഗം പാദോ ഗിരിവരസുതേ ലങ്ഘയതി തേ ॥ ൪൫॥

പ്രവാലം സവ്രീലം വിപിനവിവരേ വേപയതി യാ
സ്ഫുരല്ലീലം ബാലാതപമധികബാലം വദതി യാ ।
രുചിം സാന്ധ്യാം വന്ധ്യാം വിരചയതി യാ വര്ധയതു സാ
ശിവം മേ കാമാക്ഷ്യാഃ പദനലിനപാടല്യലഹരീ ॥ ൪൬॥

കിരഞ്ജ്യോത്സ്നാരീതിം നഖമുഖരുചാ ഹംസമനസാം
വിതന്വാനഃ പ്രീതിം വികചതരുണാമ്ഭോരുഹരുചിഃ ।
പ്രകാശഃ ശ്രീപാദസ്തവ ജനനി കാമാക്ഷി തനുതേ
ശരത്കാലപ്രൌഢിം ശശിശകലചൂഡപ്രിയതമേ ॥ ൪൭॥

നഖാങ്കൂരസ്മേരദ്യുതിവിമലഗങ്ഗാമ്ഭസി സുഖം
കൃതസ്നാനം ജ്ഞാനാമൃതമമലമാസ്വാദ്യ നിയതമ് ।
ഉദഞ്ചന്മഞ്ജീരസ്ഫുരണമണിദീപേ മമ മനോ
മനോജ്ഞേ കാമാക്ഷ്യാശ്ചരണമണിഹര്മ്യേ വിഹരതാമ് ॥ ൪൮॥

ഭവാമ്ഭോധൌ നൌകാം ജഡിമവിപിനേ പാവകശിഖാ-
മമര്ത്യേന്ദ്രാദീനാമധിമുകുടമുത്തംസകലികാമ് ।
ജഗത്താപേ ജ്യോത്സ്നാമകൃതകവചഃപഞ്ജരപുടേ
ശുകസ്ത്രീം കാമാക്ഷ്യാ മനസി കലയേ പാദയുഗലീമ് ॥ ൪൯॥

പരത്മപ്രാകാശ്യപ്രതിഫലനചുഞ്ചുഃ പ്രണമതാം
മനോജ്ഞസ്ത്വത്പാദോ മണിമുകുരമുദ്രാം കലയതേ ।
യദീയാം കാമാക്ഷി പ്രകൃതിമസൃണാഃ ശോധകദശാം
വിധാതും ചേഷ്ഠന്തേ ബലരിപുവധൂടീകചഭരാഃ ॥ ൫൦॥

അവിശ്രാന്തം തിഷ്ഠന്നകൃതകവചഃകന്ദരപുടീ-
കുടീരാന്തഃ പ്രൌഢം നഖരുചിസടാലീം പ്രകടയന് ।
പ്രചണ്ഡം ഖണ്ഡത്വം നയതു മമ കാമാക്ഷി തരസാ
തമോവേതണ്ഡേന്ദ്രം തവ ചരണകണ്ഠീരവപതിഃ ॥ ൫൧॥

പുരസ്താത്കാമാക്ഷി പ്രചുരരസമാഖണ്ഡലപുരീ-
പുരന്ധ്രീണാം ലാസ്യം തവ ലലിതമാലോക്യ ശനകൈഃ ।
നഖശ്രീഭിഃ സ്മേരാ ബഹു വിതനുതേ നൂപുരരവൈ-
ശ്ചമത്കൃത്യാ ശങ്കേ ചരണയുഗലീ ചാടുരചനാഃ ॥ ൫൨॥

സരോജം നിന്ദന്തീ നഖകിരണകര്പൂരശിശിരാ
നിഷിക്താ മാരാരേര്മുകുടശശിരേഖാഹിമജലൈഃ ।
സ്ഫുരന്തീ കാമാക്ഷി സ്ഫുടരുചിമയേ പല്ലവചയേ
തവാധത്തേ മൈത്രീം പഥികസുദൃശാ പാദയുഗലീ ॥ ൫൩॥

നതാനാം സമ്പത്തേരനവരതമാകര്ഷണജപഃ
പ്രരോഹത്സംസാരപ്രസരഗരിമസ്തമ്ഭനജപഃ ।
ത്വദീയഃ കാമാക്ഷി സ്മരഹരമനോമോഹനജപഃ
പടീയാന്നഃ പായാത്പദനലിനമഞ്ജീരനിനദഃ ॥ ൫൪॥

വിതന്വീഥാ നാഥേ മമ ശിരസി കാമാക്ഷി കൃപയാ
പദാമ്ഭോജന്യാസം പശുപരിബൃഢപ്രാണദയിതേ ।
പിബന്തോ യന്മുദ്രാം പ്രകടമുപകമ്പാപരിസരം
ദൃശാ നാനന്ദ്യന്തേ നലിനഭവനാരായണമുഖാഃ ॥ ൫൫॥

പ്രണാമോദ്യദ്ബൃന്ദാരമുകുടമന്ദാരകലികാ-
വിലോലല്ലോലമ്ബപ്രകരമയധൂമപ്രചുരിമാ ।
പ്രദീപ്തഃ പാദാബ്ജദ്യുതിവിതതിപാടല്യലഹരീ-
കൃശാനുഃ കാമാക്ഷ്യാ മമ ദഹതു സംസാരവിപിനമ് ॥ ൫൬॥

വലക്ഷശ്രീരൃക്ഷാധിപശിശുസദൃക്ഷൈസ്തവ നഖൈഃ
ജിഘൃക്ഷുര്ദക്ഷത്വം സരസിരുഹഭിക്ഷുത്വകരണേ ।
ക്ഷണാന്മേ കാമാക്ഷി ക്ഷപിതഭവസംക്ഷോഭഗരിമാ
വചോവൈചക്ഷന്യം ചരണയുഗലീ പക്ഷ്മലയതാത് ॥ ൫൭॥

സമന്താത്കാമാക്ഷി ക്ഷതതിമിരസന്താനസുഭഗാന്
അനന്താഭിര്ഭാഭിര്ദിനമനു ദിഗന്താന്വിരചയന് ।
അഹന്തായാ ഹന്താ മമ ജഡിമദന്താവലഹരിഃ
വിഭിന്താം സന്താപം തവ ചരണചിന്താമണിരസൌ ॥ ൫൮॥

ദധാനോ ഭാസ്വത്താമമൃതനിലയോ ലോഹിതവപുഃ
വിനമ്രാണാം സൌമ്യോ ഗുരുരപി കവിത്വം ച കലയന് ।
ഗതൌ മന്ദോ ഗങ്ഗാധരമഹിഷി കാമാക്ഷി ഭജതാം
തമഃകേതുര്മാതസ്തവ ചരണപദ്മോ വിജയതേ ॥ ൫൯॥

നയന്തീം ദാസത്വം നലിനഭവമുഖ്യാനസുലഭ-
പ്രദാനാദ്ദീനാനാമമരതരുദൌര്ഭാഗ്യജനനീമ് ।
ജഗജ്ജന്മക്ഷേമക്ഷയവിധിഷു കാമാക്ഷി പദയോ-
ര്ധുരീണാമീഷ്ടേ കരസ്തവ ഭണിതുമാഹോപുരുഷികാമ് ॥ ൬൦॥

ജനോഽയം സന്തപ്തോ ജനനി ഭവചണ്ഡാംശുകിരണൈഃ
അലബ്ധവൈകം ശീതം കണമപി പരജ്ഞാനപയസഃ ।
തമോമാര്ഗേ പാന്ഥസ്തവ ഝടിതി കാമാക്ഷി ശിശിരാം
പദാമ്ഭോജച്ഛായാം പരമശിവജായേ മൃഗയതേ ॥ ൬൧॥

ജയത്യമ്ബ ശ്രീമന്നഖകിരണചീനാംശുകമയം
വിതാനം ബിഭ്രാണേ സുരമുകുടസംഘട്ടമസൃണേ ।
നിജാരുണ്യക്ഷൌമാസ്തരണവതി കാമാക്ഷി സുലഭാ
ബുധൈഃ സംവിന്നാരീ തവ ചരണമാണിക്യഭവനേ ॥ ൬൨॥

പ്രതീമഃ കാമാക്ഷി സ്ഫുരിതതരുണാദിത്യകിരണ-
ശ്രിയോ മൂലദ്രവ്യം തവ ചരണമദ്രീന്ദ്രതനയേ ।
സുരേന്ദ്രാശാമാപൂരയതി യദസൌ ധ്വാന്തമഖിലം
ധുനീതേ ദിഗ്ഭാഗാനപി ച മഹസാ പാടലയതേ ॥ ൬൩॥

മഹാഭാഷ്യവ്യാഖ്യാപടുശയനമാരോപയതി വാ
സ്മരവ്യാപാരേര്ഷ്യാപിശുനനിടിലം കാരയതി വാ ।
ദ്വിരേഫാണാമധ്യാസയതി സതതം വാധിവസതിം
പ്രണമ്രാന്കാമാക്ഷ്യാഃ പദനലിനമാഹാത്മ്യഗരിമാ ॥ ൬൪॥

വിവേകാമ്ഭസ്സ്രോതസ്സ്നപനപരിപാടീശിശിരിതേ
സമീഭൂതേ ശാസ്ത്രസ്മരണഹലസംകര്ഷണവശാത് ।
സതാം ചേതഃക്ഷേത്രേ വപതി തവ കാമാക്ഷി ചരണോ
മഹാസംവിത്സസ്യപ്രകരവരബീജം ഗിരിസുതേ ॥ ൬൫॥

ദധാനോ മന്ദാരസ്തബകപരിപാടീം നഖരുചാ
വഹന്ദീപ്താം ശോണാങ്ഗുലിപടലചാമ്പേയകലികാമ് ।
അശോകോല്ലാസം നഃ പ്രചുരയതു കാമാക്ഷി ചരണോ
വികാസീ വാസന്തഃ സമയ ഇവ തേ ശര്വദയിതേ ॥ ൬൬॥

നഖാംശുപ്രാചുര്യപ്രസൃമരമരാലാലിധവലഃ
സ്ഫുരന്മഞ്ജീരോദ്യന്മരകതമഹശ്ശൈവലയുതഃ ।
ഭവത്യാഃ കാമാക്ഷി സ്ഫുടചരണപാടല്യകപടോ
നദഃ ശോണാഭിഖ്യോ നഗപതിതനൂജേ വിജയതേ ॥ ൬൭॥

ധുനാനം പങ്കൌഘം പരമസുലഭം കണ്ടകകുലൈഃ
വികാസവ്യാസങ്ഗം വിദധദപരാധീനമനിശമ് ।
നഖേന്ദുജ്യോത്സ്നാഭിര്വിശദരുചി കാമാക്ഷി നിതരാമ്
അസാമാന്യം മന്യേ സരസിജമിദം തേ പദയുഗമ് ॥ ൬൮॥

കരീന്ദ്രായ ദ്രുഹ്യത്യലസഗതിലീലാസു വിമലൈഃ
പയോജൈര്മാത്സര്യം പ്രകടയതി കാമം കലയതേ ।
പദാമ്ഭോജദ്വന്ദ്വം തവ തദപി കാമാക്ഷി ഹൃദയം
മുനീനാം ശാന്താനാം കഥമനിശമസ്മൈ സ്പൃഹയതേ ॥ ൬൯॥

നിരസ്താ ശോണിമ്നാ ചരണകിരണാനാം തവ ശിവേ
സമിന്ധാനാ സന്ധ്യാരുചിരചലരാജന്യതനയേ ।
അസാമര്ഥ്യാദേനം പരിഭവിതുമേതത്സമരുചാം
സരോജാനാം ജാനേ മുകുലയതി ശോഭാം പ്രതിദിനമ് ॥ ൭൦॥

ഉപാദിക്ഷദ്ദാക്ഷ്യം തവ ചരണനാമാ ഗുരുരസൌ
മരാലാനാം ശങ്കേ മസൃണഗതിലാലിത്യസരണൌ ।
അതസ്തേ നിസ്തന്ദ്രം നിയതമമുനാ സഖ്യപദവീം
പ്രപന്നം പാഥോജം പ്രതി ദധതി കാമാക്ഷി കുതുകമ് ॥ ൭൧॥

ദധാനൈഃ സംസര്ഗം പ്രകൃതിമലിനൈഃ ഷട്പദകുലൈഃ
ദ്വിജാധീശശ്ലാഘാവിധിഷു വിദധദ്ഭിര്മുകുലതാമ് ।
രജോമിശ്രൈഃ പദ്മൈര്നിയതമപി കാമാക്ഷി പദയോഃ
വിരോധസ്തേ യുക്തോ വിഷമശരവൈരിപ്രിയതമേ ॥ ൭൨॥

കവിത്വശ്രീമിശ്രീകരണനിപുണൌ രക്ഷണചണൌ
വിപന്നാനാം ശ്രീമന്നലിനമസൃണൌ ശോണകിരണൌ ।
മുനീന്ദ്രാണാമന്തഃകരണശരണൌ മന്ദസരണൌ
മനോജ്ഞൌ കാമാക്ഷ്യാ ദുരിതഹരണൌ നൌമി ചരണൌ ॥ ൭൩॥

പരസ്മാത്സര്വസ്മാദപി ച പരയോര്മുക്തികരയോഃ
നഖശ്രീഭിര്ജ്യോത്സ്നാകലിതതുലയോസ്താമ്രതലയോഃ ।
നിലീയേ കാമാക്ഷ്യാ നിഗമനുതയോര്നാകിനതയോഃ
നിരസ്തപ്രോന്മീലന്നലിനമദയോരേവ പദയോഃ ॥ ൭൪॥

സ്വഭാവാദന്യോന്യം കിസലയമപീദം തവ പദം
മ്രദിമ്നാ ശോണിമ്നാ ഭഗവതി ദധാതേ സദൃശതാമ് ।
വനേ പൂര്വസ്യേച്ഛാ സതതമവനേ കിം തു ജഗതാം
പരസ്യേത്ഥം ഭേദഃ സ്ഫുരതി ഹൃദി കാമാക്ഷി സുധിയാമ് ॥ ൭൫॥

കഥം വാചാലോഽപി പ്രകടമണിമഞ്ജീരനിനദൈഃ
സദൈവാനന്ദാര്ദ്രാന്വിരചയതി വാചംയമജനാന് ।
പ്രകൃത്യാ തേ ശോണച്ഛവിരപി ച കാമാക്ഷി ചരണോ
മനീഷാനൈര്മല്യം കഥമിവ നൃണാം മാംസലയതേ ॥ ൭൬॥

ചലത്തൃഷ്ണാവീചീപരിചലനപര്യാകുലതയാ
മുഹുര്ഭ്രാന്തസ്താന്തഃ പരമശിവവാമാക്ഷി പരവാന് ।
തിതീര്ഷുഃ കാമാക്ഷി പ്രചുരതരകര്മാമ്ബുധിമമും
കദാഹം ലപ്സ്യേ തേ ചരണമണിസേതും ഗിരിസുതേ ॥ ൭൭॥

വിശുഷ്യന്ത്യാം പ്രജ്ഞാസരിതി ദുരിതഗ്രീഷ്മസമയ-
പ്രഭാവേണ ക്ഷീണേ സതി മമ മനഃകേകിനി ശുചാ ।
ത്വദീയഃ കാമാക്ഷി സ്ഫുരിതചരണാമ്ഭോദമഹിമാ
നഭോമാസാടോപം നഗപതിസുതേ കിം ന കുരുതേ ॥ ൭൮॥

വിനമ്രാണാം ചേതോഭവനവലഭീസീമ്നി ചരണ-
പ്രദീപേ പ്രാകാശ്യം ദധതി തവ നിര്ധൂതതമസി ।
അസീമാ കാമാക്ഷി സ്വയമലഘുദുഷ്കര്മലഹരീ
വിഘൂര്ണന്തീ ശാന്തിം ശലഭപരിപാടീവ ഭജതേ ॥ ൭൯॥

വിരാജന്തീ ശുക്തിര്നഖകിരണമുക്താമണിതതേഃ
വിപത്പാഥോരാശൌ തരിരപി നരാണാം പ്രണമതാമ് ।
ത്വദീയഃ കാമാക്ഷി ധ്രുവമലഘുവഹ്നിര്ഭവവനേ
മുനീനാം ജ്ഞാനാഗ്നേരരണിരയമങ്ഘിര്വിജയതേ ॥ ൮൦॥

സമസ്തൈഃ സംസേവ്യഃ സതതമപി കാമാക്ഷി വിബുധൈഃ
സ്തുതോ ഗന്ധര്വസ്ത്രീസുലലിതവിപഞ്ചീകലരവൈഃ ।
ഭവത്യാ ഭിന്ദാനോ ഭവഗിരികുലം ജൃമ്ഭിതതമോ-
ബലദ്രോഹീ മാതശ്ചരണപുരുഹൂതോ വിജയതേ ॥ ൮൧॥

വസന്തം ഭക്താനാമപി മനസി നിത്യം പരിലസദ്-
ഘനച്ഛായാപൂര്ണം ശുചിമപി നൃണാം താപശമനമ് ।
നഖേന്ദുജ്യോത്സ്നാഭിഃ ശിശിരമപി പദ്മോദയകരം
നമാമഃ കാമാക്ഷ്യാശ്ചരണമധികാശ്ചര്യകരണമ് ॥ ൮൨॥

കവീന്ദ്രാണാം നാനാഭണിതിഗുണചിത്രീകൃതവചഃ-
പ്രപഞ്ചവ്യാപാരപ്രകടനകലാകൌശലനിധിഃ ।
അധഃകുര്വന്നബ്ജം സനകഭൃഗുമുഖ്യൈര്മുനിജനൈഃ
നമസ്യഃ കാമാക്ഷ്യാശ്ചരണപരമേഷ്ഠീ വിജയതേ ॥ ൮൩॥

ഭവത്യാഃ കാമാക്ഷി സ്ഫുരിതപദപങ്കേരുഹഭുവാം
പരാഗാണാം പൂരൈഃ പരിഹൃതകലങ്കവ്യതികരൈഃ ।
നതാനാമാമൃഷ്ടേ ഹൃദയമുകുരേ നിര്മലരുചി
പ്രസന്നേ നിശ്ശേഷം പ്രതിഫലതി വിശ്വം ഗിരിസുതേ ॥ ൮൪॥

തവ ത്രസ്തം പാദാത്കിസലയമരണ്യാന്തരമഗാത്
പരം രേഖാരൂപം കമലമമുമേവാശ്രിതമഭൂത് ।
ജിതാനാം കാമാക്ഷി ദ്വിതയമപി യുക്തം പരിഭവേ
വിദേശേ വാസോ വാ ശരണഗമനം വാ നിജരിപോഃ ॥ ൮൫॥

ഗൃഹീത്വാ യാഥാര്ഥ്യം നിഗമവചസാം ദേശികകൃപാ-
കടാക്ഷര്കജ്യോതിശ്ശമിതമമതാബന്ധതമസഃ ।
യതന്തേ കാമാക്ഷി പ്രതിദിവസമന്തര്ദ്രഢയിതും
ത്വദീയം പാദാബ്ജം സുകൃതപരിപാകേന സുജനാഃ ॥ ൮൬॥

ജഡാനാമപ്യമ്ബ സ്മരണസമയേ തവച്ചരണയോഃ
ഭ്രമന്മന്ഥക്ഷ്മാഭൃദ്ധുമുഘുമിതസിന്ധുപ്രതിഭടാഃ ।
പ്രസന്നാഃ കാമാക്ഷി പ്രസഭമധരസ്പന്ദനകരാ
ഭവന്തി സ്വച്ഛന്ദം പ്രകൃതിപരിപക്കാ ഭണിതയഃ ॥ ൮൭॥

വഹന്നപ്യശ്രാന്തം മധുരനിനദം ഹംസകമസൌ
തമേവാധഃ കര്തും കിമിവ യതതേ കേലിഗമനേ ।
ഭവസ്യൈവാനന്ദം വിദധദപി കാമാക്ഷി ചരണോ
ഭവത്യാസ്തദ്ദ്രോഹം ഭഗവതി കിമേവം വിതനുതേ ॥ ൮൮॥

യദത്യന്തം താമ്യത്യലസഗതിവാര്താസ്വപി ശിവേ
തദേതത്കാമാക്ഷി പ്രകൃതിമൃദുലം തേ പദയുഗമ് ।
കിരീടൈഃ സംഘട്ടം കഥമിവ സുരൌഘസ്യ സഹതേ
മുനീന്ദ്രാണാമാസ്തേ മനസി ച കഥം സൂചിനിശിതേ ॥ ൮൯॥

മനോരങ്ഗേ മത്കേ വിബുധജനസംമോദജനനീ
സരാഗവ്യാസങ്ഗം സരസമൃദുസംചാരസുഭഗാ ।
മനോജ്ഞാ കാമാക്ഷി പ്രകടയതു ലാസ്യപ്രകരണം
രണന്മഞ്ജീരാ തേ ചരണയുഗലീനര്തകവധൂഃ ॥ ൯൦॥

പരിഷ്കുര്വന്മാതഃ പശുപതികപര്ദം ചരണരാട്
പരാചാം ഹൃത്പദ്മം പരമഭണിതീനാം ച മകുടമ് ।
ഭവാഖ്യേ പാഥോധൌ പരിഹരതു കാമാക്ഷി മമതാ-
പരാധീനത്വം മേ പരിമുഷിതപാഥോജമഹിമാ ॥ ൯൧॥

പ്രസൂനൈഃ സമ്പര്കാദമരതരുണീകുന്തലഭവൈഃ
അഭീഷ്ടാനാം ദാനാദനിശമപി കാമാക്ഷി നമതാമ് ।
സ്വസങ്ഗാത്കങ്കേലിപ്രസവജനകത്വേന ച ശിവേ
ത്രിധാ ധത്തേ വാര്താം സുരഭിരിതി പാദോ ഗിരിസുതേ ॥ ൯൨॥

മഹാമോഹസ്തേനവ്യതികരഭയാത്പാലയതി യോ
വിനിക്ഷിപ്തം സ്വസ്മിന്നിജജനമനോരത്നമനിശമ് ।
സ രാഗസ്യോദ്രേകാത്സതതമപി കാമാക്ഷി തരസാ
കിമേവം പാദോഽസൌ കിസലയരുചിം ചോരയതി തേ ॥ ൯൩॥

സദാ സ്വാദുംകാരം വിഷയലഹരീശാലികണികാം
സമാസ്വാദ്യ ശ്രാന്തം ഹൃദയശുകപോതം ജനനി മേ ।
കൃപാജാലേ ഫാലേക്ഷണമഹിഷി കാമാക്ഷി രഭസാത്
ഗൃഹീത്വാ രുന്ധീഥാരസ്തവ പദയുഗീപഞ്ജരപുടേ ॥ ൯൪॥

ധുനാനം കാമാക്ഷി സ്മരണലവമാത്രേണ ജഡിമ-
ജ്വരപ്രൌഢിം ഗൂഢസ്ഥിതി നിഗമനൈകുഞ്ജകുഹരേ ।
അലഭ്യം സര്വേഷാം കതിചന ലഭന്തേ സുകൃതിനഃ
ചിരാദന്വിഷ്യന്തസ്തവ ചരണസിദ്ധൌഷധമിദമ് ॥ ൯൫॥

രണന്മഞ്ജീരാഭ്യാം ലലിതഗമനാഭ്യാം സുകൃതിനാം
മനോവാസ്തവ്യാഭ്യാം മഥിതതിമിരാഭ്യാം നഖരുചാ ।
നിധേയാഭ്യാം പത്യാ നിജശിരസി കാമാക്ഷി സതതം
നമസ്തേ പാദാഭ്യാം നലിനമൃദുലാഭ്യാം ഗിരിസുതേ ॥ ൯൬॥

സുരാഗേ രാകേന്ദുപ്രതിനിധിമുഖേ പര്വതസുതേ
ചിരാല്ലഭ്യേ ഭക്ത്യാ ശമധനജനാനാം പരിഷദാ ।
മനോഭൃങ്ഗോ മത്കഃ പദകമലയുഗ്മേ ജനനി തേ
പ്രകാമം കാമാക്ഷി ത്രിപുരഹരവാമാക്ഷി രമതാമ് ॥ ൯൭॥

ശിവേ സംവിദ്രൂപേ ശശിശകലചൂഡപ്രിയതമേ
ശനൈര്ഗത്യാഗത്യാ ജിതസുരവരേഭേ ഗിരിസുതേ ।
യതന്തേ സന്തസ്തേ ചരണനലിനാലാനയുഗലേ
സദാ ബദ്ധം ചിത്തപ്രമദകരിയൂഥം ദൃഢതരമ് ॥ ൯൮॥

യശഃ സൂതേ മാതര്മധുരകവിതാം പക്ഷ്മലയതേ
ശ്രിയം ദത്തേ ചിത്തേ കമപി പരിപാകം പ്രഥയതേ ।
സതാം പാശഗ്രന്ഥിം ശിഥിലയതി കിം കിം ന കുരുതേ
പ്രപന്നേ കാമാക്ഷ്യാഃ പ്രണതിപരിപാടീ ചരണയോഃ ॥ ൯൯॥

മനീഷാം മാഹേന്ദ്രീം കകുഭമിവ തേ കാമപി ദശാം
പ്രധത്തേ കാമാക്ഷ്യാശ്ചരണതരുണാദിത്യകിരണഃ ।
യദീയേ സമ്പര്കേ ധൃതരസമരന്ദാ കവയതാം
പരീപാകം ധത്തേ പരിമലവതീ സൂക്തിനലിനീ ॥ ൧൦൦॥

പുരാ മാരാരാതിഃ പുരമജയദമ്ബ സ്തവശതൈഃ
പ്രസന്നായാം സത്യാം ത്വയി തുഹിനശൈലേന്ദ്രതനയേ ।
അതസ്തേ കാമാക്ഷി സ്ഫുരതു തരസാ കാലസമയേ
സമായാതേ മാതര്മമ മനസി പാദാബ്ജയുഗലമ് ॥ ൧൦൧॥

പദദ്വന്ദ്വം മന്ദം ഗതിഷു നിവസന്തം ഹൃദി സതാം
ഗിരാമന്തേ ഭ്രാന്തം കൃതകരഹിതാനാം പരിബൃഢേ ।
ജനാനാമാനന്ദം ജനനി ജനയന്തം പ്രണമതാം
ത്വദീയം കാമാക്ഷി പ്രതിദിനമഹം നൌമി വിമലമ് ॥ ൧൦൨॥

ഇദം യഃ കാമാക്ഷ്യാശ്ചരണനലിനസ്തോത്രശതകം
ജപേന്നിത്യം ഭക്ത്യാ നിഖിലജഗദാഹ്ലാദജനകമ് ।
സ വിശ്വേഷാം വന്ദ്യഃ സകലകവിലോകൈകതിലകഃ
ചിരം ഭുക്ത്വാ ഭോഗാന്പരിണമതി ചിദ്രൂപകലയാ ॥ ൧൦൩॥

{പാദാരവിന്ദശതകം സമ്പൂര്ണമ് ॥}



{॥ സ്തുതിശതകമ് ॥}
പാണ്ഡിത്യം പരമേശ്വരി സ്തുതിവിധൌ നൈവാശ്രയന്തേ ഗിരാം
വൈരിഞ്ചാന്യപി ഗുമ്ഫനാനി വിഗലദ്ഗര്വാണി ശര്വാണി തേ ।
സ്തോതും ത്വാം പരിഫുല്ലനീലനലിനശ്യാമാക്ഷി കാമാക്ഷി മാം
വാചാലീകുരുതേ തഥാപി നിതരാം ത്വത്പാദസേവാദരഃ ॥ ൧॥

താപിഞ്ഛസ്തബകത്വിഷേ തനുഭൃതാം ദാരിദ്ര്യമുദ്രാദ്വിഷേ
സംസാരാഖ്യതമോമുഷേ പുരരിപോര്വാമാങ്കസീമാജുഷേ ।
കമ്പാതീരമുപേയുഷേ കവയതാം ജിഹ്വാകുടീം ജഗ്മുഷേ
വിശ്വത്രാണപുഷേ നമോഽസ്തു സതതം തസ്മൈ പരംജ്യോതിഷേ ॥ ൨॥

യേ സന്ധ്യാരുണയന്തി ശംകരജടാകാന്താരചന്രാര്ഭകം
സിന്ദൂരന്തി ച യേ പുരന്ദരവധൂസീമന്തസീമാന്തരേ ।
പുണ്യം യേ പരിപക്കയന്തി ഭജതാം കാഞ്ചീപുരേ മാമമീ
പായാസുഃ പരമേശ്വരപ്രണയിനീപാദോദ്ഭവാഃ പാംസവഃ ॥ ൩॥

കാമാഡമ്ബരപൂരയാ ശശിരുചാ കമ്രസ്മിതാനാം ത്വിഷാ
കാമാരേരനുരാഗസിന്ധുമധികം കല്ലോലിതം തന്വതീ ।
കാമാക്ഷീതി സമസ്തസജ്ജനനുതാ കല്യാണദാത്രീ നൃണാം
കാരുണ്യാകുലമാനസാ ഭഗവതീ കമ്പാതടേ ജൃമ്ഭതേ ॥ ൪॥

കാമാക്ഷീണപരാക്രമപ്രകടനം സമ്ഭാവയന്തീ ദൃശാ
ശ്യാമാ ക്ഷീരസഹോദരസ്മിതരുചിപ്രക്ഷാലിതാശാന്തരാ ।
കാമാക്ഷീജനമൌലിഭൂഷണമണിര്വാചാം പരാ ദേവതാ
കാമാക്ഷീതി വിഭാതി കാപി കരുണാ കമ്പാതടിന്യാസ്തടേ ॥ ൫॥

ശ്യാമാ കാചന ചന്ദ്രികാ ത്രിഭുവനേ പുണ്യാത്മനാമാനനേ
സീമാശൂന്യകവിത്വവര്ഷജനനീ യാ കാപി കാദമ്ബിനീ ।
മാരാരാതിമനോവിമോഹനവിധൌ കാചിതത്തമഃകന്ദലീ
കാമാക്ഷ്യാഃ കരുണാകടാക്ഷലഹരീ കാമായ മേ കല്പതാമ് ॥ ൬॥

പ്രൌഢധ്വാന്തകദമ്ബകേ കുമുദിനീപുണ്യാംകുരം ദര്ശയന്
ജ്യോത്സ്നാസംഗമനേഽപി കോകമിഥുനം മിശ്രം സമുദ്ഭാവയന് ।
കാലിന്ദീലഹരീദശാം പ്രകടയന്കമ്രാം നഭസ്യദ്ഭുതാം
കശ്ചിന്നേത്രമഹോത്സവോ വിജയതേ കാഞ്ചീപുരേ ശൂലിനഃ ॥ ൭॥

തന്ദ്രാഹീനതമാലനീലസുഷമൈസ്താരുണ്യലീലാഗൃഹൈഃ
താരാനാഥകിശോരലാഞ്ഛിതകചൈസ്താമ്രാരവിന്ദേക്ഷണൈഃ ।
മാതഃ സംശ്രയതാം മനോ മനസിജപ്രാഗല്ഭ്യനാഡിന്ധമൈഃ
കമ്പാതീരചരൈര്ഘനസ്തനഭരൈഃ പുണ്യാങ്കരൈഃ ശാംകരൈഃ ॥ ൮॥

നിത്യം നിശ്ചലതാമുപേത്യ മരുതാം രക്ഷാവിധിം പുഷ്ണതീ
തേജസ്സംചയപാടവേന കിരണാനുഷ്ണദ്യുതേര്മുഷ്ണതീ ।
കാഞ്ചീമധ്യഗതാപി ദീപ്തിജനനീ വിശ്വാന്തരേ ജൃമ്ഭതേ
കാചിച്ചിത്രമഹോ സ്മൃതാപി തമസാം നിര്വാപികാ ദീപികാ ॥ ൯॥

കാന്തൈഃ കേശരുചാം ചയൈര്ഭ്രമരിതം മന്ദസ്മിതൈഃ പുഷ്പിതം
കാന്ത്യാ പല്ലവിതം പദാമ്ബുരുഹയോര്നേത്രത്വിഷാ പത്രിതമ് ।
കമ്പാതീരവനാന്തരം വിദധതീ കല്യാണജന്മസ്ഥലീ
കാഞ്ചീമധ്യമഹാമണിര്വിജയതേ കാചിത്കൃപാകന്ദലീ ॥ ൧൦॥

രാകാചന്ദ്രസമാനകാന്തിവദനാ നാകാധിരാജസ്തുതാ
മൂകാനാമപി കുര്വതീ സുരധുനീനീകാശവാഗ്വൈഭവമ് ।
ശ്രീകാഞ്ചീനഗരീവിഹാരരസികാ ശോകാപഹന്ത്രീ സതാമ്
ഏകാ പുണ്യപരമ്പരാ പശുപതേരാകാരിണീ രാജതേ ॥ ൧൧॥

ജാതാ ശീതലശൈലതഃ സുകൃതിനാം ദൃശ്യാ പരം ദേഹിനാം
ലോകാനാം ക്ഷണമാത്രസംസ്മരണതഃ സന്താപവിച്ഛേദിനീ ।
ആശ്ചര്യം ബഹു ഖേലനം വിതനുതേ നൈശ്ചല്യമാബിഭ്രതീ
കമ്പായാസ്തടസീമ്നി കാപി തടിനീ കാരുണ്യപാഥോമയീ ॥ ൧൨॥

ഐക്യം യേന വിരച്യതേ ഹരതനൌ ദമ്ഭാവപുമ്ഭാവുകേ
രേഖാ യത്കചസീമ്നി ശേഖരദശാം നൈശാകരീ ഗാഹതേ ।
ഔന്നത്യം മുഹുരേതി യേന സ മഹാന്മേനാസഖഃ സാനുമാന്
കമ്പാതീരവിഹാരിണാ സശരണാസ്തേനൈവ ധാമ്നാ വയമ് ॥ ൧൩॥

അക്ഷ്ണോശ്ച സ്തനയോഃ ശ്രിയാ ശ്രവണയോര്ബാഹ്വോശ്ച മൂലം സ്പൃശന്
ഉത്തംസേന മുഖേന ച പ്രതിദിനം ദ്രുഹ്യന്പയോജന്മനേ ।
മാധുര്യേണ ഗിരാം ഗതേന മൃദുനാ ഹംസാങ്ഗനാം ഹ്രേപയന്
കാഞ്ചീസീമ്നി ചകാസ്തി കോഽപി കവിതാസന്താനബീജാങ്കുരഃ ॥ ൧൪॥

ഖണ്ഡം ചാന്ദ്രമസം വതംസമനിശം കാഞ്ചീപുരേ ഖേലനം
കാലായശ്ഛവിതസ്കരീം തനുരുചിം കര്ണജപേ ലോചനേ ।
താരുണ്യോഷ്മനഖമ്പചം സ്തനഭരം ജങ്ഘാസ്പൃശം കുന്തലം
ഭാഗ്യം ദേശികസംചിതം മമ കദാ സമ്പാദയേദമ്ബികേ ॥ ൧൫॥

തന്വാനം നിജകേലിസൌധസരണിം നൈസര്ഗികീണാം ഗിരാം
കേദാരം കവിമല്ലസൂക്തിലഹരീസസ്യശ്രിയാം ശാശ്വതമ് ।
അംഹോവഞ്ചനചുഞ്ചു കിംചന ഭജേ കാഞ്ചീപുരീമണ്ഡനം
പര്യായച്ഛവി പാകശാസനമണേഃ പൌഷ്പേഷവം പൌരുഷമ് ॥ ൧൬॥

ആലോകേ മുഖപങ്കജേ ച ദധതീ സൌധാകരീം ചാതുരീം
ചൂഡാലംക്രിയമാണപങ്കജവനീവൈരാഗമപ്രക്രിയാ ।
മുഗ്ധസ്മേരമുഖീ ഘന്സതനതടീമൂര്ച്ഛാലമധ്യാഞ്ചിതാ
കാഞ്ചീസീമനി കാമിനീ വിജയതേ കാചിജ്ജഗന്മോഹിനീ ॥ ൧൭॥

യസ്മിന്നമ്ബ ഭവത്കടാക്ഷരജനീ മന്ദേഽപി മന്ദസ്മിത-
ജ്യോത്സ്നാസംസ്നപിതാ ഭവത്യഭിമുഖീ തം പ്രത്യഹോ ദേഹിനമ് ।
ദ്രക്ഷാമാക്ഷികമാധുരീമദഭരവ്രീഡാകരീ വൈഖരീ
കാമാക്ഷി സ്വയമാതനോത്യഭിസൃതിം വാമേക്ഷണേവ ക്ഷണമ് ॥ ൧൮॥

കാലിന്ദീജലകാന്തയഃ സ്മിതരുചിസ്വര്വാഹിനീപാഥസി
പ്രൌഢധ്വാന്തരുചഃ സ്ഫുടാധരമഹോലൌഹിത്യസന്ധ്യോദയേ ।
മണിക്യോപലകുണ്ഡലാംശുശിഖിനി വ്യാമിശ്രധൂമശ്രിയഃ
കല്യാണൈകഭുവഃ കടാക്ഷസുഷമാഃ കാമാക്ഷി രാജന്തി തേ ॥ ൧൯॥

കലകലരണത്കാഞ്ചീ കാഞ്ചീവിഭൂഷണമാലികാ
കചഭരലസച്ചന്ദ്രാ ചന്ദ്രാവതംസസധര്മിണീ ।
കവികുലഗിര്ഃ ശ്രാവംശ്രാവം മിലത്പുലകാംകുരാ
വിരചിതശിരഃകമ്പാ കമ്പാതടേ പരിശോഭതേ ॥ ൨൦॥

സരസവചസാം വീചീ നീചീഭവന്മധുമാധുരീ
ഭരിതഭുവനാ കീര്തിര്മൂര്തിര്മനോഭവജിത്വരീ ।
ജനനി മനസോ യോഗ്യം ഭോഗ്യം നൃണാം തവ ജായതേ
കഥമിവ വിനാ കാഞ്ചീഭൂഷേ കടാക്ഷതരങ്ഗിതമ് ॥ ൨൧॥

ഭ്രമരിതസരിത്കൂലോ നീലോത്പലപ്രഭയാഽഽഭയാ
നതജനതമഃഖണ്ഡീ തുണ്ഡീരസീമ്നി വിജൃമ്ഭതേ ।
അചലതപസാമേകഃ പാകഃ പ്രസൂനശരാസന-
പ്രതിഭടമനോഹാരീ നാരീകുലൈകശിഖാമണിഃ ॥ ൨൨॥

മധുരവചസോ മന്ദസ്മേരാ മതങ്ഗജഗാമിനഃ
തരുണിമജുഷസ്താപിച്ഛാഭാസ്തമഃപരിപന്ഥിനഃ ।
കുചഭരനതാഃ കുര്യുര്ഭദ്രം കുരങ്ഗവിലോചനാഃ
കലിതകരുണാഃ കാഞ്ചീഭാജഃ കപാലിമഹോത്സവാഃ ॥ ൨൩॥

കമലസുഷമാക്ഷ്യാരോഹേ വിചക്ഷണവീക്ഷണാഃ
കുമുദസുകൃതക്രീഡാചൂഡാലകുന്തലബന്ധുരാഃ ।
രുചിരരുചിഭിസ്താപിച്ഛശ്രീപ്രപഞ്ചനചുഞ്ചവഃ
പുരവിജയിനഃ കമ്പാതീരേ സ്ഫുരന്തി മനോരഥാഃ ॥ ൨൪॥

കലിതരതയഃ കാഞ്ചീലീലാവിധൌ കവിമണ്ഡലീ-
വചനലഹരീവാസന്തീനാം വസന്തവിഭൂതയഃ ।
കുശലവിധയേ ഭൂയാസുര്മേ കുരങ്ഗവിലോചനാഃ
കുസുമവിശിഖാരാതേരക്ഷ്ണാം കുതൂഹലവിഭ്രമാഃ ॥ ൨൫॥

കബലിതതമസ്കാണ്ഡാസ്തുണ്ഡീരമണ്ഡലമണ്ഡനാഃ
സരസിജവനീസന്താനാനാമരുന്തുദശേഖരാഃ ।
നയനസരണേര്നേദീയംസഃ കദാ നു ഭവന്തി മേ
തരുണജലദശ്യാമാഃ ശമ്ഭോസ്തപഃഫലവിഭ്രമാഃ ॥ ൨൬॥

അചരമമിഷും ദീനം മീനധ്വജസ്യ മുഖശ്രിയാ
സരസിജഭുവോ യാനം മ്ലാനം ഗതേന ച മഞ്ജുനാ ।
ത്രിദശസദസാമന്നം ഖിന്നം ഗിരാ ച വിതന്വതീ
തിലകയതി സാ കമ്പാതീരം ത്രിലോചനസുന്ദരീ ॥ ൨൭॥

ജനനി ഭുവനേ ചങ്ക്രമ്യേഽഹം കിയന്തമനേഹസം
കുപുരുഷകരഭ്രഷ്ടൈര്ദുഷ്ടൈര്ധനൈരുദരമ്ഭരിഃ ।
തരുണകരുണേ തന്ദ്രാശൂന്യേ തരങ്ഗയ ലോചനേ
നമതി മയി തേ കിംചിത്കാഞ്ചീപുരീമണിദീപികേ ॥ ൨൮॥

മുനിജനമനഃപേടീരത്നം സ്ഫുരത്കരുണാനടീ-
വിഹരണകലാഗേഹം കാഞ്ചീപുരീമണിഭൂഷണമ് ।
ജഗതി മഹതോ മോഹവ്യാധേര്നൃണാം പരമൌഷധം
പുരഹരദൃശാം സാഫല്യം മേ പുരഃ പരിജൃമ്ഭതാമ് ॥ ൨൯॥

മുനിജനമോധാമ്നേ ധാമ്നേ വചോമയജാഹ്നവീ-
ഹിമഗിരിതടപ്രാഗ്ഭാരായാക്ഷരായ പരാത്മനേ ।
വിഹരണജുഷേ കാഞ്ചീദേശേ മഹേശ്വരലോചന-
ത്രിതയസരസക്രീഡാസൌധാങ്ഗണായ നമോ നമഃ ॥ ൩൦॥

മരകതരുചാം പ്രത്യാദേശം മഹേശ്വരചക്ഷുഷാമ്
അമൃതലഹരീപൂരം പാരം ഭവാഖ്യപയോനിധേഃ ।
സുചരിതഫലം കാഞ്ചീഭാജോ ജനസ്യ പചേലിമം
ഹിമശിഖരിണോ വംശസ്യൈകം വതംസമുപാസ്മഹേ ॥ ൩൧॥

പ്രണമനദിനാരമ്ഭേ കമ്പാനദീസഖി താവകേ
സരസകവിതോന്മേഷഃ പൂഷാ സതാം സമുദഞ്ചിതഃ ।
പ്രതിഭടമഹാപ്രൌഢപ്രോദ്യത്കവിത്വകുമുദ്വതീം
നയതി തരസാ നിദ്രാമുദ്രാം നഗേശ്വരകന്യകേ ॥ ൩൨॥

ശമിതജഡിമാരമ്ഭാ കമ്പാതടീനികടേചരീ
നിഹതദുരിതസ്തോമാ സോമാര്ധമുദ്രിതകുന്തലാ ।
ഫലിതസുമനോവാഞ്ഛാ പാഞ്ചായുധീ പരദേവതാ
സഫലയതു മേ നേത്രേ ഗോത്രേശ്വരപ്രിയനന്ദിനീ ॥ ൩൩॥

മമ തു ധിഷണാ പീഡ്യാ ജാഡ്യാതിരേക കഥം ത്വയാ
കുമുദസുഷമാമൈത്രീപാത്രീവതംസിതകുന്തലാമ് ।
ജഗതി ശമിതസ്തമ്ഭാം കമ്പാനദീനിലയാമസൌ
ശ്രിയതി ഹി ഗലത്തന്ദ്രാ ചന്ദ്രാവതംസസധര്മിണീമ് ॥ ൩൪॥

പരിമലപരീപാകോദ്രേകം പയോമുചി കാഞ്ചനേ
ശിഖരിണി പുനര്ദ്ബൈധീഭാവം ശശിന്യരുണാതപമ് ।
അപി ച ജനയന്കമ്ബോര്ലക്ഷ്മീമനമ്ബുനി കോഽപ്യസൌ
കുസുമധനുഷഃ കാഞ്ചീദേശേ ചകാസ്തി പരാക്രമഃ ॥ ൩൫॥

പുരദമയിതുര്വാമോത്സങ്ഗസ്ഥലേന രസജ്ഞയാ
സരസകവിതാഭാജാ കാഞ്ചീപുരോദരസീമയാ ।
തടപരിസരൈര്നീഹാരാദ്രേര്വചോഭിരകൃത്രിമൈഃ
കിമിവ ന തുലാമസ്മച്ചേതോ മഹേശ്വരി ഗാഹതേ ॥ ൩൬॥

നയനയുഗലീമാസ്മാകീനാം കദാ നു ഫലേഗ്രഹീം
വിദധതി ഗതൌ വ്യാകുര്വാണാ ഗജേന്ദ്രചമത്ക്രിയാമ് ।
മരതകരുചോ മാഹേശാനാ ഘനസ്തനനമ്രിതാഃ
സുകൃതവിഭവാഃ പ്രാഞ്ചഃ കാഞ്ചീവതംസധുരന്ധരാഃ ॥ ൩൭॥

മനസിജയശഃപാരമ്പര്യം മരന്ദഝരീസുവാം
കവികുലഗിരാം കന്ദം കമ്പാനദീതടമണ്ഡനമ് ।
മധുരലലിതം മത്കം ചക്ഷുര്മനീഷിമനോഹരം
പുരവിജയിനഃ സര്വസ്വം തത്പുരസ്കുരുതേ കദാ ॥ ൩൮॥

ശിഥിലിതതമോലീലാം നീലാരവിന്ദവിലോചനാം
ദഹനവിലസത്ഫാലാം ശ്രീകാമകോടിമുപാസ്മഹേ ।
കരധൃതസച്ഛൂലാം കാലാരിചിത്തഹരാം പരാം
മനസിജകൃപാലീലാം ലോലാലകാമലികേക്ഷണാമ് ॥ ൩൯॥

കലാലീലാശാലാ കവികുലവചഃകൈരവവനീ-
ശരജ്ജ്യോത്സ്നാധാരാ ശശധരശിശുശ്ലാഘ്യമുകുടീ ।
പുനീതേ നഃ കമ്പാപുലിനതടസൌഹാര്ദതരലാ
കദാ ചക്ഷുര്മാര്ഗം കനകഗിരിധാനുഷ്കമഹിഷീ ॥ ൪൦॥

നമഃ സ്താന്നമ്രേഭ്യഃ സ്തനഗരിമഗര്വേണ ഗുരുണാ
ദധാനേഭ്യശ്ചൂഡാഭരണമമൃതസ്യന്ദി ശിശിരമ് ।
സദാ വാസ്തവേഭ്യഃ സുവിധഭുവി കമ്പാഖ്യസരിതേ
യശോവ്യാപാരേഭ്യഃ സുകൃതവിഭവേഭ്യോ രതിപതേഃ ॥ ൪൧॥

അസൂയന്തീ കാചിന്മരകതരുചോ നാകിമുകുടീ-
കദമ്ബം ചുമ്ബന്തീ ചരണനഖചന്ദ്രാംശുപടലൈഃ ।
തമോമുദ്രാം വിദ്രാവയതു മമ കാഞ്ചീര്നിലയനാ
ഹരോത്സങ്ഗശ്രീമന്മണിഗൃഹമഹാദീപകലികാ ॥ ൪൨॥

അനാദ്യന്താ കാചിത്സുജനനയനാനന്ദജനനീ
നിരുന്ധാനാ കാന്തിം നിജരുചിവിലാസൈര്ജലമുചാമ് ।
സ്മരാരേസ്താരല്യം മനസി ജനയന്തീ സ്വയമഹോ
ഗലത്കമ്പാ ശമ്പാ പരിലസതി കമ്പാപരിസരേ ॥ ൪൩॥

സുധാഡിണ്ഡീരശ്രീഃ സ്മിതരുചിഷു തുണ്ഡീരവിഷയം
പരിഷ്കുര്വാണാസൌ പരിഹസിതനീലോത്പലരുചിഃ ।
സ്തനാഭ്യാമാനമ്രാ സ്തബകയതു മേ കാങ്ക്ഷിതതരും
ദൃശാമൈശാനീനാം സുകൃതഫലപാണ്ഡിത്യഗരിമാ ॥ ൪൪॥

കൃപാധാരാദ്രോണീ കൃപണധിഷണാനാം പ്രണമതാം
നിഹന്ത്രീ സന്താപം നിഗമമുകുടോത്തംസകലികാ ।
പരാ കാഞ്ചീലീലാപരിചയവതീ പര്വതസുതാ
ഗിരാം നീവീ ദേവീ ഗിരിശപരതന്ത്രാ വിജയതേ ॥ ൪൫॥

കവിത്വശ്രീകന്ദഃ സുകൃതപരിപാടീ ഹിമഗിരേഃ
വിധാത്രീ വിശ്വേഷാം വിഷമശരവീരധ്വജപടീ ।
സഖീ കമ്പാനദ്യാഃ പദഹസിതപാഥോജയുഗലീ
പുരാണോ പായാന്നഃ പുരമഥനസാമ്രാജ്യപദവീ ॥ ൪൬॥

ദരിദ്രാണാ മധ്യേ ദരദലിതതാപിച്ഛസുഷമാഃ
സ്തനാഭോഗക്കാന്താസ്തരുണഹരിണാങ്കാങ്കിതകചാഃ ।
ഹരാധീനാ നാനാവിബുധമുകുടീചുമ്ബിതപദാഃ
കദാ കമ്പാതീരേ കഥയ വിഹരാമോ ഗിരിസുതേ ॥ ൪൭॥

വരീവര്തു സ്ഥേമാ ത്വയി മമ ഗിരാം ദേവി മനസോ
നരീനര്തു പ്രൌഢാ വദനകമലേ വാക്യലഹരീ ।
ചരീചര്തു പ്രജ്ഞാജനനി ജഡിമാനഃ പരജനേ
സരീസര്തു സ്വൈരം ജനനി മയി കാമാക്ഷി കരുണാ ॥ ൪൮॥

ക്ഷണാത്തേ കാമാക്ഷി ഭ്രമരസുഷമാശിക്ഷണഗുരുഃ
കടാക്ഷവ്യാക്ഷേപോ മമ ഭവതു മോക്ഷായ വിപദാമ് ।
നരീനര്തു സ്വൈരം വചനലഹരീ നിര്ജരപുരീ-
സരിദ്വീചീനീചീകരണപടുരാസ്യേ മമ സദാ ॥ ൪൯॥

പുരസ്താന്മേ ഭൂയഃപ്രശമനപരഃ സ്താന്മമ രുജാം
പ്രചാരസ്തേ കമ്പാതടവിഹൃതിസമ്പാദിനി ദൃശോഃ ।
ഇമാം യാച്ഞാമൂരീകുരു സപദി ദൂരീകുരു തമഃ-
പരീപാകം മത്കം സപദി ബുധലോകം ച നയ മാമ് ॥ ൫൦॥

ഉദഞ്ചന്തീ കാഞ്ചീനഗരനിലയേ ത്വത്കരുണയാ
സമൃദ്ധാ വാഗ്ധാടീ പരിഹസിതമാധ്വീ കവയതാമ് ।
ഉപാദത്തേ മാരപ്രതിഭടജടാജൂടമുകുടീ-
കുടീരോല്ലാസിന്യാഃ ശതമഖതടിന്യാ ജയപടീമ് ॥ ൫൧॥

ശ്രിയം വിദ്യാം ദദ്യാജ്ജനനി നമതാം കീര്തിമമിതാം
സുപുത്രാന് പ്രാദത്തേ തവ ഝടിതി കാമാക്ഷി കരുണാ ।
ത്രിലോക്യാമാധിക്യം ത്രിപുരപരിപന്ഥിപ്രണയിനി
പ്രണാമസ്ത്വത്പാദേ ശമിതദുരിതേ കിം ന കുരുതേ ॥ ൫൨॥

മനഃസ്തമ്ഭം സ്തമ്ഭം ഗമയദുപകമ്പം പ്രണമതാം
സദാ ലോലം നീലം ചികുരജിതലോലമ്ബനികരമ് ।
ഗിരാം ദൂരം സ്മേരം ധൃതശശികിശോരം പശുപതേഃ
ദൃശാം യോഗ്യം ഭോഗ്യം തുഹിനഗിരിഭാഗ്യം വിജയതേ ॥ ൫൩॥

ഘനശ്യാമാന്കാമാന്തകമഹിഷി കാമാക്ഷി മധുരാന്
ദൃശാം പാതാനേതാനമൃതജലശീതാനനുപമാന് ।
ഭവോത്പാതേ ഭീതേ മയി വിതര നാഥേ ദൃഢഭവ-
ന്മനശ്ശോകേ മൂകേ ഹിമഗിരിപതാകേ കരുണയാ ॥ ൫൪॥

നതാനാം മന്ദാനാം ഭവനിഗലബന്ധാകുലധിയാം
മഹാന്ധ്യാം രുന്ധാനാമഭിലഷിതസന്താനലതികാമ് ।
ചരന്തീം കമ്പായാസ്തടഭുവി സവിത്രീം ത്രിജഗതാം
സ്മരാമസ്താം നിത്യം സ്മരമഥനജീവാതുകലികാമ് ॥ ൫൫॥

പരാ വിദ്യാ ഹൃദ്യാശ്രിതമദനവിദ്യാ മരകത-
പ്രഭാനീലാ ലീലാപരവശിതശൂലായുധമനാഃ ।
തമഃപൂരം ദൂരം ചരണനതപൌരന്ദരപുരീ-
മൃഗാക്ഷീ കാമാക്ഷീ കമലതരലാക്ഷീ നയതു മേ ॥ ൫൬॥

അഹന്താഖ്യാ മത്കം കബലയതി ഹാ ഹന്ത ഹരിണീ
ഹഠാത്സംവിദ്രൂപം ഹരമഹിഷി സസ്യാങ്കുരമസൌ ।
കടാക്ഷവ്യാക്ഷേപപ്രകടഹരിപാഷാണപടലൈഃ
ഇമാമുച്ചൈരുച്ചാടയ ഝടിതി കാമാക്ഷി കൃപയാ ॥ ൫൭॥

ബുധേ വാ മൂകേ വാ തവ പതതി യസ്മിന്ക്ഷണമസൌ
കടാക്ഷഃ കാമാക്ഷി പ്രകടജഡിമക്ഷോദപടിമാ ।
കഥംകാരം നാസ്മൈ കരമുകുലചൂഡാലമുകുടാ
നമോവാകം ബ്രൂയുര്നമുചിപരിപന്ഥിപ്രഭൃതയഃ ॥ ൫൮॥

പ്രതീചീം പശ്യാമഃ പ്രകടരുചിനീവാരകമണി-
പ്രഭാസധ്രീചീനാം പ്രദലിതഷഡാധാരകമലാമ് ।
ചരന്തീം സൌഷുമ്നേ പഥി പരപദേന്ദുപ്രവിഗല-
ത്സുധാര്ദ്രാം കാമാക്ഷീം പരിണതപരംജ്യോതിരുദയാമ് ॥ ൫൯॥

ജമ്ഭാരാതിപ്രഭൃതിമുകുടീഃ പാദയോഃ പീഠയന്തീ
ഗുമ്ഫാന്വാചാം കവിജനകൃതാന്സ്വൈരമാരാമയന്തീ ।
ശമ്പാലക്ഷ്മീം മണിഗണരുചാപാടലൈഃ പ്രാപയന്തീ
കമ്പാതീരേ കവിപരിഷദാം ജൃമ്ഭതേ ഭാഗ്യസീമാ ॥ ൬൦॥

ചന്ദ്രാപീഡാം ചതുരവദനാം ചഞ്ചലാപാങ്ഗലീലാം
കുന്ദസ്മേരാം കുചഭരനതാം കുന്തലോദ്ധൂതഭൃങ്ഗാമ് ।
മാരാരാതേര്മദനശിഖിനം മാംസലം ദീപയന്തീം
കാമാക്ഷീം താം കവികുലഗിരാം കല്പവല്ലീമുപാസേ ॥ ൬൧॥

കാലാമ്ഭോദപ്രകരസുഷമാം കാന്തിഭിസ്തിര്ജയന്തീ
കല്യാണാനാമുദയസരണിഃ കല്പവല്ലീ കവീനാമ് ।
കന്ദര്പാരേഃ പ്രിയസഹചരീ കല്മഷാണാം നിഹന്ത്രീ
കാഞ്ചീദേശം തിലകയതി സാ കാപി കാരുണ്യസീമാ ॥ ൬൨॥

ഊരീകുര്വന്നുരസിജതടേ ചാതുരീം ഭൂധരാണാം
പാഥോജാനാം നയനയുഗലേ പരിപന്ഥ്യം വിതന്വന് ।
കമ്പാതീരേ വിഹരതി രുചാ മോഘയന്മേഘശൈലീം
കോകദ്വേഷം ശിരസി കലയന്കോഽപി വിദ്യാവിശേഷഃ ॥ ൬൩॥

കാഞ്ചീലീലാപരിചയവതീ കാപി താപിച്ഛലക്ഷ്മീഃ
ജാഡ്യാരണ്യേ ഹുതവഹശിഖാ ജന്മഭൂമിഃ കൃപായാഃ ।
മാകന്ദശ്രീര്മധുരകവിതാചാതുരീ കോകിലാനാം
മാര്ഗേ ഭൂയാന്മമ നയനയോര്മാന്മഥീ കാപി വിദ്യാ ॥ ൬൪॥

സേതുര്മാതര്മരതകമയോ ഭക്തിഭാജാം ഭവാബ്ധൌ
ലീലാലോലാ കുവലയമയീ മാന്മഥീ വൈജയന്തീ ।
കാഞ്ചീഭൂഷാ പശുപതിദൃശാം കാപി കാലാഞ്ജനാലീ
മത്കം ദുഃഖം ശിഥിലയതു തേ മഞ്ജുലാപാങ്ഗമാലാ ॥ ൬൫॥

വ്യാവൃണ്വാനാഃ കുവലയദലപ്രക്രിയാവൈരമുദ്രാം
വ്യാകുര്വാണാ മനസിജമഹാരാജസാമ്രാജ്യലക്ഷ്മീമ് ।
കാഞ്ചീലീലാവിഹൃതിരസികേ കാങ്ക്ഷിതം നഃ ക്രിയാസുഃ
ബന്ധച്ഛേദേ തവ നിയമിനാം ബദ്ധദീക്ഷാഃ കടാക്ഷാഃ ॥ ൬൬॥

കാലാമ്ഭോദേ ശശിരുചി ദലം കൈതകം ദര്ശയന്തീ
മധ്യേസൌദാമിനി മധുലിഹാം മാലികാം രാജയന്തീ ।
ഹംസാരാവം വികചകമലേ മഞ്ജുമുല്ലാസയന്തീ
കമ്പാതീരേ വിലസതി നവാ കാപി കാരുണ്യലക്ഷ്മീഃ ॥ ൬൭॥

ചിത്രം ചിത്രം നിജമൃദുതയാ ഭര്ത്സയന്പല്ലവാലീം
പുംസാം കാമാന്ഭുവി ച നിയതം പൂരയന്പുണ്യഭാജാമ് ।
ജാതഃ ശൈലാന്ന തു ജലനിധേഃ സ്വൈരസംചാരശീലഃ
കാഞ്ചീഭൂഷാ കലയതു ശിവം കോഽപി ചിന്താമണിര്മേ ॥ ൬൮॥

താമ്രാമ്ഭോജം ജലദനികടേ തത്ര ബന്ധൂകപുഷ്പം
തസ്മിന്മല്ലീകുസുമസുഷമാം തത്ര വീണാനിനാദമ് ।
വ്യാവൃന്വാനാ സുകൃതലഹരീ കാപി കാഞ്ചിനഗര്യാമ്
ഐശാനീ സാ കലയതിതരാമൈന്ദ്രജാലം വിലാസമ് ॥ ൬൯॥

ആഹാരാംശം ത്രിദശസദസാമാശ്രയേ ചാതകാനാമ്
ആകാശോപര്യപി ച കലയന്നാലയം തുങ്ഗമേഷാമ് ।
കമ്പാതീരേ വിഹരതിതരാം കാമധേനുഃ കവീനാം
മന്ദസ്മേരോ മദനനിഗമപ്രക്രിയാസമ്പ്രദായഃ ॥ ൭൦॥

ആര്ദ്രീഭൂതൈരവിരലകൃപൈരാത്തലീലാവിലാസൈഃ
ആസ്ഥാപൂര്ണൈരധികചപലൈരഞ്ചിതാമ്ഭോജശില്പൈഃ ।
കാന്തൈര്ലക്ഷ്മീലലിതഭവനൈഃ കാന്തികൈവല്യസാരൈഃ
കാശ്മല്യം നഃ കബലയതു സാ കാമകോടീ കടാക്ഷൈഃ ॥ ൭൧॥

ആധൂന്വന്ത്യൈ തരലനയനൈരാങ്ഗജീം വൈജയന്തീമ്
ആനന്ദിന്യൈ നിജപദജുഷാമാത്തകാഞ്ചീപുരായൈ ।
ആസ്മാകീനം ഹൃദയമഖിലൈരാഗമാനാം പ്രപഞ്ചൈഃ
ആരാധ്യായൈ സ്പൃഹയതിതരാമദിമായൈ ജനന്യൈ ॥ ൭൨॥

ദൂരം വാചാം ത്രിദശസദസാം ദുഃഖസിന്ധോസ്തരിത്രം
മോഹക്ഷ്വേലക്ഷിതിരുഹവനേ ക്രൂരധാരം കുഠാരമ് ।
കമ്പാതീരപ്രണയി കവിഭിര്വര്ണിതോദ്യച്ചരിത്രം
ശാന്ത്യൈ സേവേ സകലവിപദാം ശാംകരം തത്കലത്രമ് ॥ ൭൩॥

ഖണ്ഡീകൃത്യ പ്രകൃതികുടിലം കല്മഷം പ്രാതിഭശ്രീ-
ശുണ്ഡീരത്വം നിജപദജുഷാം ശൂന്യതന്ദ്രം ദിശന്തീ ।
തുണ്ഡീരാഖ്യൈ മഹതി വിഷയേ സ്വര്ണവൃഷ്ടിപ്രദാത്രീ
ചണ്ഡീ ദേവീ കലയതി രതിം ചന്ദ്രചൂഡാലചൂഡേ ॥ ൭൪॥

യേന ഖ്യാതോ ഭവതി സ ഗൃഹീ പൂരുഷോ മേരുധന്വാ
യദ്ദൃക്കോണേ മദനനിഗമപ്രാഭവം ബോഭവീതി ।
യത്പ്രീത്യൈവ ത്രിജഗദധിപോ ജൃമ്ഭതേ കിമ്പചാനഃ
കമ്പാതീരേ സ ജയതി മഹാന്കശ്ചിദോജോവിശേഷഃ ॥ ൭൫॥

ധന്യാ ധന്യാ ഗതിരിഹ ഗിരാം ദേവി കാമാക്ഷി യന്മേ
നിന്ദ്യാം ഭിന്ദ്യാത്സപദി ജഡതാം കല്മഷാദുന്മിഷന്തീമ് ।
സാധ്വീ മാധ്വീരസമധുരതാഭഞ്ജിനീ മഞ്ജുരീതിഃ
വാണീവേണീ ഝടിതി വൃണുതാത്സ്വര്ധുനീസ്പര്ധിനീ മാമ് ॥ ൭൬॥

യസ്യാ വാടീ ഹൃദയകമലം കൌസുമീ യോഗഭാജാം
യസ്യാഃ പീഠീ സതതശിശിരാ ശീകരൈര്മാകരന്ദൈഃ ।
യസ്യാഃ പേടീ ശ്രുതിപരിചലന്മൌലിരത്നസ്യ കാഞ്ചീ
സാ മേ സോമാഭരണമഹിഷീ സാധയേത്കാങ്ക്ഷിതാനി ॥ ൭൭॥

ഏകാ മാതാ സകലജഗതാമീയുഷീ ധ്യാനമുദ്രാമ്
ഏകാമ്രാധീശ്വരചരണയോരേകതാനാം സമിന്ധേ ।
താടങ്കോദ്യന്മണിഗണരുചാ താമ്രകര്ണപ്രദേശാ
താരുണ്യശ്രീസ്തബകിതതനുസ്താപസീ കാപി ബാലാ ॥ ൭൮॥

ദന്താദന്തിപ്രകടനകരീ ദന്തിഭിര്മന്ദയാനൈഃ
മന്ദാരാണാം മദപരിണതിം മഥ്നതീ മന്ദഹാസൈഃ ।
അങ്കൂരാഭ്യാം മനസിജതരോരങ്കിതോരാഃ കുചാഭ്യാ-
മന്തഃകാഞ്ചി സ്ഫുരതി ജഗതാമാദിമാ കാപി മാതാ ॥ ൭൯॥

ത്രിയമ്ബകകുടുമ്ബിനീം ത്രിപുരസുന്ദരീമിന്ദിരാം
പുലിന്ദപതിസുന്ദരീം ത്രിപുരഭൈരവീം ഭാരതീമ് ।
മതങ്ഗകുലനായികാം മഹിഷമര്ദനീം മാതൃകാം
ഭണന്തി വിബുധോത്തമാ വിഹൃതിമേവ കാമാക്ഷി തേ ॥ ൮൦॥

മഹാമുനിമനോനടീ മഹിതരമ്യകമ്പാതടീ-
കുടീരകവിഹാരിണീ കുടിലബോധസംഹാരിണീ ।
സദാ ഭവതു കാമിനീ സകലദേഹിനാം സ്വാമിനീ
കൃപാതിശയകിംകരീ മമ വിഭൂതയേ ശാംകരീ ॥ ൮൧॥

ജഡാഃ പ്രകൃതിനിര്ധനാ ജനവിലോചനാരുന്തുദാ
നരാ ജനനി വീക്ഷണം ക്ഷണമവാപ്യ കാമാക്ഷി തേ ।
വചസ്സു മധുമാധുരീം പ്രകടയന്തി പൌരന്ദരീ-
വിഭൂതിഷു വിഡമ്ബനാം വപുഷി മാന്മഥീം പ്രക്രിയാമ് ॥ ൮൨॥

ഘന്സതനതടസ്ഫുടസ്ഫുരിതകഞ്ചുലീചഞ്ചലീ-
കൃതത്രിപുരശാസനാ സുജനശീലിതോപാസനാ ।
ദൃശോഃ സരണിമശ്നുതേ മമ കദാ നു കാഞ്ചീപുരേ
പരാ പരമയോഗിനാം മനസി ചിത്കുലാ പുഷ്കലാ ॥ ൮൩॥

കവീന്ദ്രഹൃദയേചരീ പരിഗൃഹീതകാഞ്ചീപുരീ
നിരൂഢകരുണാഝരീ നിഖിലലോകരക്ഷാകരീ ।
മനഃപഥദവീയസീ മദനശാസനപ്രേയസീ
മഹാഗുണഗരീയസീ മമ ദൃശോഽസ്തു നേദീയസീ ॥ ൮൪॥

ധനേന ന രമാമഹേ ഖലജനാന്ന സേവാമഹേ
ന ചാപലമയാമഹേ ഭവഭയാന്ന ദൂയാമഹേ ।
സ്ഥിരാം തനുമഹേതരാം മനസി കിം ച കാഞ്ചീരത-
സ്മരാന്തകകുടുമ്ബിനീചരണപല്ലവോപാസനാമ് ॥ ൮൫॥

സുരാഃ പരിജനാ വപുര്മനസിജായ വൈരായതേ
ത്രിവിഷ്ടപനിതമ്ബിനീകുചതടീ ച കേലീഗിരിഃ ।
ഗിരഃ സുരഭയോ വയസ്തരുണിമാ ദരിദ്രസ്യ വാ
കടാക്ഷസരണൌ ക്ഷണം നിപതിതസ്യ കാമാക്ഷി തേ ॥ ൮൬॥

പവിത്രയ ജഗത്ത്രയീവിബുധബോധജീവാതുഭിഃ
പുരത്രയവിമര്ദിനഃ പുലകകഞ്ചുലീദായിഭിഃ ।
ഭവക്ഷയവിചക്ഷണൈര്വ്യസനമോക്ഷണൈര്വീക്ഷണൈഃ
നിരക്ഷരശിരോമണിം കരുണയൈവ കാമാക്ഷി മാമ് ॥ ൮൭॥

കദാ കലിതഖേലനാഃ കരുണയൈവ കാഞ്ചീപുരേ
കലായമുകുലത്വിഷഃ ശുഭകദമ്ബപൂര്ണാങ്കുരാഃ ।
പയോധരഭരാലസാഃ കവിജനേഷു തേ ബന്ധുരാഃ
പചേലിമകൃപാരസാ പരിപതന്തി മാര്ഗേ ദൃശോഃ ॥ ൮൮॥

അശോധ്യമചലോദ്ഭവം ഹൃദയനന്ദനം ദേഹിനാമ്
അനര്ഘമധികാഞ്ചി തത്കിമപി രത്നമുദ്ദ്യോതതേ ।
അനേന സമലംകൃതാ ജയതി ശങ്കരാങ്കസ്ഥലീ
കദാസ്യ മമ മാനസം വ്രജതി പേടികാവിഭ്രമമ് ॥ ൮൯॥

പരാമൃതഝരീപ്ലുതാ ജയതി നിത്യമന്തശ്ചരീ
ഭുവാമപി ബഹിശ്ചരീ പരമസംവിദേകാത്മികാ ।
മഹദ്ഭിരപരോക്ഷിതാ സതതമേവ കാഞ്ചീപുരേ
മമാന്വഹമഹംമതിര്മനസി ഭാതു മാഹേശ്വരീ ॥ ൯൦॥

തമോവിപിനധാവിനം സതതമേവ കാഞ്ചീപുരേ
വിഹാരരസികാ പരാ പരമസംവിദുര്വീരുഹേ ।
കടാക്ഷനിഗലൈര്ദൃഢം ഹൃദയദുഷ്ടദന്താവലം
ചിരം നയതു മാമകം ത്രിപുരവൈരിസീമന്തിനീ ॥ ൯൧॥

ത്വമേവ സതി ചണ്ഡികാ ത്വമസി ദേവി ചാമുണ്ഡികാ
ത്വമേവ പരമാതൃകാ ത്വമപി യോഗിനീരൂപിണീ ।
ത്വമേവ കില ശാമ്ഭവീ ത്വമസി കാമകോടീ ജയാ
ത്വമേവ വിജയാ ത്വയി ത്രിജഗദമ്ബ കിം ബ്രൂമഹേ ॥ ൯൨॥

പരേ ജനനി പാര്വതി പ്രണതപാലിനി പ്രാതിഭ-
പ്രദാത്രി പരമേശ്വരി ത്രിജഗദാശ്രിതേ ശാശ്വതേ ।
ത്രിയമ്ബകകുടുമ്ബിനി ത്രിപദസങ്ഗിനി ത്രീക്ഷണേ
ത്രിശക്തിമയി വീക്ഷണം മയി നിധേഹി കാമാക്ഷി തേ ॥ ൯൩॥

മനോമധുകരോത്സവം വിദധതീ മനീഷാജുഷാം
സ്വയമ്പ്രഭവവൈഖരീവിപിനവീഥികാലമ്ബിനീ ।
അഹോ ശിശിരിതാ കൃപാമധുരസേന കമ്പാതടേ
ചരാചരവിധായിനീ ചലതി കാപി ചിന്മഞ്ജരീ ॥ ൯൪॥

കലാവതി കലാഭൃതോ മുകുടസീമ്നി ലീലാവതി
സ്പൃഹാവതി മഹേശ്വരേ ഭുവനമോഹനേ ഭാസ്വതി ।
പ്രഭാവതി രമേ സദാ മഹിതരൂപശോഭാവതി
ത്വരാവതി പരേ സതാം ഗുരുകൃപാമ്ബുധാരാവതി ॥ ൯൫॥

ത്വയൈവ ജഗദമ്ബയാ ഭുവനമണ്ഡലം സൂയതേ
ത്വയൈവ കരുണാര്ദ്രയാ തദപി രക്ഷണം നീയതേ ।
ത്വയൈവ ഖരകോപയാ നയനപാവകേ ഹൂയതേ
ത്വയൈവ കില നിത്യയാ ജഗതി സന്തതം സ്ഥീയതേ ॥ ൯൬॥

ചരാചരജഗന്മയീം സകലഹൃന്മയീം ചിന്മയീം
ഗുണത്രയമയീം ജഗത്ത്രയമയീം ത്രിധാമാമയീമ് ।
പരാപരമയീം സദാ ദശദിശാം നിശാഹര്മയീം
പരാം സതതസന്മയീം മനസി ചിന്മയീം ശീലയേ ॥ ൯൭॥

ജയ ജഗദമ്ബികേ ഹരകുടുമ്ബിനി വക്ത്രരുചാ
ജിതശരദമ്ബുജേ ഘനവിഡമ്ബിനി കേശരുചാ ।
പരമവലമ്ബനം കുരു സദാ പരരൂപധരേ
മമ ഗതസംവിദോ ജഡിമഡമ്ബരതാണ്ഡവിനഃ ॥ ൯൮॥

ഭുവനജനനി ഭൂഷാഭൂതചന്ദ്രേ നമസ്തേ
കലുഷശമനി കമ്പാതീരഗേഹേ നമസ്തേ ।
നിഖിലനിഗമവേദ്യേ നിത്യരൂപേ നമസ്തേ
പരശിവമയി പാശച്ഛേദഹസ്തേ നമസ്തേ ॥ ൯൯॥

ക്വണത്കാഞ്ചീ കാഞ്ചീപുരമണിവിപഞ്ചീലയഝരീ-
ശിരഃകമ്പാ കമ്പാവസതിരനുകമ്പാജലനിധിഃ ।
ഘനശ്യാമാ ശ്യാമാ കഠിനകുചസീമാ മനസി മേ
മൃഗാക്ഷീ കാമാക്ഷീ ഹരനടനസാക്ഷീ വിഹരതാത് ॥ ൧൦൦॥

സമരവിജയകോടീ സാധകാനന്ദധാടീ
മൃദുഗുണപരിപേടീ മുഖ്യകാദമ്ബവാടീ ।
മുനിനുതപരിപാടീ മോഹിതാജാണ്ഡകോടീ
പരമശിവവധൂടീ പാതു മാം കാമകോടീ ॥ ൧൦൧॥

ഇമം പരവരപ്രദം പ്രകൃതിപേശലം പാവനം
പരാപരചിദാകൃതിപ്രകടനപ്രദീപായിതമ് ।
സ്തവം പഠതി നിത്യദാ മനസി ഭാവയന്നമ്ബികാം
ജപൈരലമലം മഖൈരധികദേഹസംശോഷണൈഃ ॥ ൧൦൨॥

{സ്തുതിശതകം സമ്പൂര്ണമ് ॥}



{॥ കടാക്ഷശതകമ് ॥}
മോഹാന്ധകാരനിവഹം വിനിഹന്തുമീഡേ
മൂകാത്മനാമപി മഹാകവിതാവദാന്യാന് ।
ശ്രീകാഞ്ചിദേശശിശിരീകൃതിജാഗരൂകാന്
ഏകാമ്രനാഥതരുണീകരുണാവലോകാന് ॥ ൧॥

മാതര്ജയന്തി മമതാഗ്രഹമോക്ഷണാനി
മാഹേന്ദ്രനീലരുചിശിക്ഷണദക്ഷിണാനി ।
കാമാക്ഷി കല്പിതജഗത്ത്രയരക്ഷണാനി
ത്വദ്വീക്ഷണാനി വരദാനവിചക്ഷണാനി ॥ ൨॥

ആനങ്ഗതന്ത്രവിധിദര്ശിതകൌശലാനാമ്
ആനന്ദമന്ദപരിഘൂര്ണിതമന്ഥരാണാമ് ।
താരല്യമമ്ബ തവ താഡിതകര്ണസീമ്നാം
കാമാക്ഷി ഖേലതി കടാക്ഷനിരീക്ഷണാനാമ് ॥ ൩॥

കല്ലോലിതേന കരുണാരസവേല്ലിതേന
കല്മാഷിതേന കമനീയമൃദുസ്മിതേന ।
മാമഞ്ചിതേന തവ കിംചന കുഞ്ചിതേന
കാമാക്ഷി തേന ശിശിരീകുരു വീക്ഷിതേന ॥ ൪॥

സാഹായ്യകം ഗതവതീ മുഹുരര്ജനസ്യ
മന്ദസ്മിതസ്യ പരിതോഷിതഭീമചേതാഃ ।
കാമാക്ഷി പാണ്ഡവചമൂരിവ താവകീനാ
കര്ണാന്തികം ചലതി ഹന്ത കടാക്ഷലക്ഷ്മീഃ ॥ ൫॥

അസ്തം ക്ഷണാന്നയതു മേ പരിതാപസൂര്യമ്
ആനന്ദചന്ദ്രമസമാനയതാം പ്രകാശമ് ।
കാലാന്ധകാരസുഷുമാം കലയന്ദിഗന്തേ
കാമാക്ഷി കോമലകടാക്ഷനിശാഗമസ്തേ ॥ ൬॥

താടാങ്കമൌക്തികരുചാങ്കുരദന്തകാന്തിഃ
കാരുണ്യഹസ്തിപശിഖാമണിനാധിരൂഢഃ ।
ഉന്മൂലയത്വശുഭപാദപമസ്മദീയം
കാമാക്ഷി താവകകടാക്ഷമതങ്ഗജേതന്ദ്രഃ ॥ ൭॥

ഛായാഭരണേ ജഗതാം പരിതാപഹാരീ
താടങ്കരത്നമണിതല്ലജപല്ലവശ്രീഃ ।
കാരുണ്യനാമ വികിരന്മകരന്ദജാലം
കാമാക്ഷി രാജതി കടാക്ഷസുരദ്രുമസ്തേ ॥ ൮॥

സൂര്യാശ്രയപ്രണയിനീ മണികുണ്ഡലാംശു-
ലൌഹിത്യകോകനദകാനനമാനനീയാ ।
യാന്തീ തവ സ്മരഹരാനനകാന്തിസിന്ധും
കാമാക്ഷി രാജതി കടാക്ഷകലിന്ദകന്യാ ॥ ൯॥

പ്രാപ്നോതി യം സുകൃതിനം തവ പക്ഷപാതാത്
കാമാക്ഷി വീക്ഷണവിലാസകലാപുരന്ധ്രീ ।
സദ്യസ്തമേവ കില മുക്തിവധൂര്വൃണീതേ
തസ്മാന്നിതാന്തമനയോരിദമൈകമത്യമ് ॥ ൧൦॥

യാന്തീ സദൈവ മരുതാമനുകൂലഭാവം
ഭ്രൂവല്ലിശക്രധനുരുല്ലസിതാ രസാര്ദ്രാ ।
കാമാക്ഷി കൌതുകതരങ്ഗിതനീലകണ്ഠാ
കാദമ്ബിനീവ തവ ഭാതി കടാക്ഷമാലാ ॥ ൧൧॥

ഗങ്ഗാമ്ഭസി സ്മിതമയേ തപനാത്മജേവ
ഗങ്ഗാധരോരസി നവോത്പലമാലികേവ ।
വക്ത്രപ്രഭാസരസി ശൈവലമണ്ഡലീവ
കാമാക്ഷി രാജതി കടാക്ഷരുചിച്ഛടാ തേ ॥ ൧൨॥

സംസ്കാരതഃ കിമപി കന്ദലിതാന് രസജ്ഞ-
കേദാരസീമ്നി സുധിയാമുപഭോഗയോഗ്യാന് ।
കല്യാണസൂക്തിലഹരീകലമാംകുരാന്നഃ
കാമാക്ഷി പക്ഷ്മലയതു ത്വദപാങ്ഗമേഘഃ ॥ ൧൩॥

ചാഞ്ചല്യമേവ നിയതം കലയന്പ്രകൃത്യാ
മാലിന്യഭൂഃ ശ്രതിപഥാക്രമജാഗരൂകഃ ।
കൈവല്യമേവ കിമു കല്പയതേ നതാനാം
കാമാക്ഷി ചിത്രമപി തേ കരുണാകടാക്ഷഃ ॥ ൧൪॥

സംജീവനേ ജനനി ചൂതശിലീമുഖസ്യ
സംമോഹനേ ശശികിശോരകശേഖരസ്യ ।
സംസ്തമ്ഭനേ ച മമതാഗ്രഹചേഷ്ടിതസ്യ
കാമാക്ഷി വീക്ഷണകലാ പരമൌഷധം തേ ॥ ൧൫॥

നീലോഽപി രാഗമധികം ജനയന്പുരാരേഃ
ലോലോഽപി ഭക്തിമധികാം ദൃഢയന്നരാണാമ് ।
വക്രോഽപി ദേവി നമതാം സമതാം വിതന്വന്
കാമാക്ഷി നൃത്യതു മയി ത്വദപാങ്ഗപാതഃ ॥ ൧൬॥

കാമദ്രുഹോ ഹൃദയയന്ത്രണജാഗരൂകാ
കാമാക്ഷി ചഞ്ചലദൃഗഞ്ചലമേഖലാ തേ ।
ആശ്ചര്യമമ്ബ ഭജതാം ഝടിതി സ്വകീയ-
സമ്പര്ക ഏവ വിധുനോതി സമസ്തബന്ധാന് ॥ ൧൭॥

കുണ്ഠീകരോതു വിപദം മമ കുഞ്ചിതഭ്രൂ-
ചാപാഞ്ചിതഃ ശ്രിതവിദേഹഭവാനുരാഗഃ ।
രക്ഷോപകാരമനിശം ജനയഞ്ജഗത്യാം
കാമാക്ഷി രാമ ഇവ തേ കരുണാകടാക്ഷഃ ॥ ൧൮॥

ശ്രീകാമകോടി ശിവലോചനശോഷിതസ്യ
ശൃങ്ഗാരബീജവിഭവസ്യ പുനഃപ്രരോഹേ ।
പ്രേമാമ്ഭസാര്ദ്രമചിരാത്പ്രചുരേണ ശങ്കേ
കേദാരമമ്ബ തവ കേവലദൃഷ്ടിപാതമ് ॥ ൧൯॥

മാഹാത്മ്യശേവധിരസൌ തവ ദുര്വിലങ്ഘ്യ-
സംസാരവിന്ധ്യഗിരികുണ്ഠനകേലിചുഞ്ചുഃ ।
ധൈര്യാമ്ബുധിം പശുപതേശ്ചുലകീകരോതി
കാമാക്ഷി വീക്ഷണവിജൃമ്ഭണകുമ്ഭജന്മാ ॥ ൨൦॥

പീയൂഷവര്ഷവശിശിരാ സ്ഫുടദുത്പലശ്രീ-
മൈത്രീ നിസര്ഗമധുരാ കൃതതാരകാപ്തിഃ ।
കാമാക്ഷി സംശ്രിതവതീ വപുരഷ്ടമൂര്തേഃ
ജ്യോത്സ്നായതേ ഭഗവതി ത്വദപാങ്ഗമാലാ ॥ ൨൧॥

അമ്ബ സ്മരപ്രതിഭടസ്യ വപുര്മനോജ്ഞമ്
അമ്ഭോജകാനനമിവാഞ്ചിതകണ്ടകാഭമ് ।
ഭൃങ്ഗീവ ചുമ്ബതി സദൈവ സപക്ഷപാതാ
കാമാക്ഷി കോമലരുചിസ്ത്വദപാങ്ഗമാലാ ॥ ൨൨॥

കേശപ്രഭാപടലനീലവിതാനജാലേ
കാമാക്ഷി കുണ്ഡലമണിച്ഛവിദീപശോഭേ ।
ശങ്കേ കടാക്ഷരുചിരങ്ഗതലേ കൃപാഖ്യാ
ശൈലൂഷികാ നടതി ശംകരവല്ലഭേ തേ ॥ ൨൩॥

അത്യന്തശീതലമതന്ദ്രയതു ക്ഷണാര്ധമ്
അസ്തോകവിഭ്രമമനങ്ഗവിലാസകന്ദമ് ।
അല്പസ്മിതാദൃതമപാരകൃപാപ്രവാഹമ്
അക്ഷിപ്രരോഹമചിരാന്മയി കാമകോടി ॥ ൨൪॥

മന്ദാക്ഷരാഗതരലീകൃതിപാരതന്ത്ര്യാത്
കാമാക്ഷി മന്ഥരതരാം ത്വദപാങ്ഗഡോലാമ് ।
ആരുഹ്യ മന്ദമതികൌതുകശാലി ചക്ഷുഃ
ആനന്ദമേതി മുഹുരര്ധശശാങ്കമൌലേഃ ॥ ൨൫॥

ത്രൈയമ്ബകം ത്രിപുരസുന്ദരി ഹര്മ്യഭൂമി-
രങ്ഗം വിഹാരസരസീ കരുണാപ്രവാഹഃ ।
ദാസാശ്ച വാസവമുഖാഃ പരിപാലനീയം
കാമാക്ഷി വിശ്വമപി വീക്ഷണഭൂഭൃതസ്തേ ॥ ൨൬॥

വാഗീശ്വരീ സഹചരീ നിയമേന ലക്ഷ്മീഃ
ഭ്രൂവല്ലരീവശകരീ ഭുവനാനി ഗേഹമ് ।
രൂപം ത്രിലോകനയനാമൃതമമ്ബ തേഷാം
കാമാക്ഷി യേഷു തവ വീക്ഷണപാരതന്ത്രീ ॥ ൨൭॥

മാഹേശ്വരം ഝടിതി മാനസമീനമമ്ബ
കാമാക്ഷി ധൈര്യജലധൌ നിതരാം നിമഗ്നമ് ।
ജാലേന ശൃങ്ഖലയതി ത്വദപാങ്ഗനാമ്നാ
വിസ്താരിതേന വിഷമായുധദാശകോഽസൌ ॥ ൨൮॥

ഉന്മഥ്യ ബോധകമലാകാരമമ്ബ ജാഡ്യ-
സ്തമ്ബേരമം മമ മനോവിപിനേ ഭ്രമന്തമ് ।
കുണ്ഠീകുരുഷ്വ തരസാ കുടിലാഗ്രസീമ്നാ
കാമാക്ഷി താവകകടാക്ഷമഹാങ്കുശേന ॥ ൨൯॥

ഉദ്വേല്ലിതസ്തബകിതൈര്ലലിതൈര്വിലാസൈഃ
ഉത്ഥായ ദേവി തവ ഗാഢകടാക്ഷകുഞ്ജാത് ।
ദൂരം പലായയതു മോഹമൃഗീകുലം മേ
കാമാക്ഷി സ്തവരമനുഗ്രഹകേസരീന്ദ്രഃ ॥ ൩൦॥

സ്നേഹാദൃതാം വിദലിതോത്പലകന്തിചോരാം
ജേതാരമേവ ജഗദീശ്വരി ജേതുകാമഃ ।
മാനോദ്ധതോ മകരകേതുരസൌ ധുനീതേ
കാമാക്ഷി താവകകടാക്ഷകൃപാണവല്ലീമ് ॥ ൩൧॥

ശ്രൌതീം വ്രജന്നപി സദാ സരണിം മുനീനാം
കാമാക്ഷി സന്തതമപി സ്മൃതിമാര്ഗഗാമീ ।
കൌടില്യമമ്ബ കഥമസ്ഥിരതാം ച ധത്തേ
ചൌര്യം ച പങ്കജരുചാം ത്വദപാങ്ഗപാതഃ ॥ ൩൨॥

നിത്യം ശ്രേതുഃ പരിചിതൌ യതമാനമേവ
നീലോത്പലം നിജസമീപനിവാസലോലമ് ।
പ്രീത്യൈവ പാഠയതി വീക്ഷണദേശികേന്ദ്രഃ
കാമാക്ഷീ കിന്തു തവ കാലിമസമ്പ്രദായമ് ॥ ൩൩॥

ഭ്രാന്ത്വാ മുഹുഃ സ്തബകിതസ്മിതഫേനരാശൌ
കാമാക്ഷി വക്ത്രരുചിസംചയവാരിരാശൌ ।
ആനന്ദതി ത്രിപുരമര്ദനനേത്രലക്ഷ്മീഃ
ആലമ്ബ്യ ദേവി തവ മന്ദമപാങ്ഗസേതുമ് ॥ ൩൪॥

ശ്യാമാ തവ ത്രിപുരസുന്ദരി ലോചനശ്രീഃ
കാമാക്ഷി കന്ദലിതമേദുരതാരകാന്തിഃ ।
ജ്യോത്സ്നാവതീ സ്മിതരുചാപി കഥം തനോതി
സ്പര്ധാമഹോ കുവലയൈശ്ച തഥാ ചകോരൈഃ ॥ ൩൫॥

കാലാഞ്ജനം ച തവ ദേവി നിരീക്ഷണം ച
കാമാക്ഷി സാമ്യസരണിം സമുപൈതി കാന്ത്യാ ।
നിശ്ശേഷനേത്രസുലഭം ജഗതീഷു പൂര്വ-
മന്യത്ത്രിനേത്രസുലഭം തുഹിനാദ്രികന്യേ ॥ ൩൬॥

ധൂമാങ്കുരോ മകരകേതനപാവകസ്യ
കാമാക്ഷി നേത്രരുചിനീലിമചാതുരീ തേ ।
അത്യന്തമദ്ഭുതമിദം നയനത്രയസ്യ
ഹര്ഷോദയം ജനയതേ ഹരുണാങ്കമൌലേഃ ॥൩൭॥

ആരഭ്ഭലേശസമയേ തവ വീക്ഷണസ്സ
കാമാക്ഷി മൂകമപി വീക്ഷണമാത്രനമ്രമ് ।
സര്വജ്ഞതാ സകലലോകസമക്ഷമേവ
കീര്തിസ്വയംവരണമാല്യവതീ വൃണീതേ ॥ ൩൮॥

കാലാമ്ബുവാഹ ഉവ തേ പരിതാപഹാരീ
കാമാക്ഷി പുഷ്കരമധഃകുരുതേ കടാ്ഷഃ ।
പൂര്വഃ പരം ക്ഷണരുചാ സമുപൈതി മൈത്രീ-
മന്യസ്തു സ।തതരുചിം പ്രകടീകരോതി ॥ ൩൯॥

സൂക്ഷ്മേഽപി ദുര്ഗമതരേഽപി ഗുരുപ്രസാദ-
സാഹായ്യകേന വിചരന്നപവര്ഗമാര്ഗേ ।
സംസാരപങ്കനിചയേ ന പതത്യമൂം തേ
കാമാക്ഷി ഗാഢമവലമ്ബ്യ കടാക്ഷയഷ്ടിമ് ॥ ൪൦॥

കാമാക്ഷി സന്തതമസൌ ഹരിനീലരത്ന-
സ്തമ്ഭേ കടാക്ഷരുചിപുഞ്ജമയേ ഭവത്യാഃ ।
ബദ്ധോഽപി ഭക്തിനിഗലൈര്മമ ചിത്തഹസ്തീ
സ്തമ്ഭം ച ബന്ധമപി മുഞ്ചതി ഹന്ത ചിത്രമ് ॥ ൪൧॥

കാമാക്ഷി കാഷ്ണര്യമപി സന്തതമഞ്ജനം ച
ബിഭ്രന്നിസര്ഗതരലോഽപി ഭവത്കടാക്ഷഃ ।
വൈമല്യമന്വഹമനഞ്ജനതാ ച ഭൂയഃ
സ്ഥൈര്യം ച ഭക്തഹൃദയായ കഥം ദദാതി ॥ ൪൨॥

മന്ദസ്മിതസ്തബകിതം മണികുണ്ഡലാംശു-
സ്തോമപ്രവാലരുചിരം ശിശിരീകൃതാശമ് ।
കാമാക്ഷി രാജതി കടാക്ഷരുചേഃ കദമ്ബമ്
ഉദ്യാനമമ്ബ കരുണാഹരിണേക്ഷണായാഃ ॥ ൪൩॥

കാമാക്ഷി താവകകടാക്ഷമഹേന്ദ്രനീല-
സിംഹാസനം ശ്രിതവതോ മകരധ്വജസ്യ ।
സാമ്രാജ്യമങ്ഗലവിധൌ മുണികുണ്ഡലശ്രീഃ
നീരാജനോത്സവതരങ്ഗിതദീപമാലാ ॥ ൪൪॥

മാതഃ ക്ഷണം സ്നപയ മാം തവ വീക്ഷിതേന
മന്ദാക്ഷിതേന സുജനൈരപരോക്ഷിതേന ।
കാമാക്ഷി കര്മതിമിരോത്കരഭാസ്കരേണ
ശ്രേയസ്കരേണ മധുപദ്യുതിതസ്കരേണ ॥ ൪൫॥

പ്രേമാപഗാപയസി മജ്ജനമാരചയ്യ
യുക്തഃ സ്മിതാംശുകൃതഭസ്മവിലേപനേന ।
കാമാക്ഷി കുണ്ഡലമണിദ്യുതിഭിര്ജടാലഃ
ശ്രീകണ്ഠമേവ ഭജതേ തവ ദൃഷ്ടിപാതഃ ॥ ൪൬॥

കൈവല്യദായ കരുണാരസകിംകരായ
കാമാക്ഷി കന്ദലിതവിഭ്രമശംകരായ ।
ആലോകനായ തവ ഭക്തശിവംകരായ
മാതര്നമോഽസ്തു പരതന്ത്രിതശംകരായ ॥ ൪൭॥

സാമ്രാജ്യമങ്ഗലവിധൌ മകരധ്വജസ്യ
ലോലാലകാലികൃതതോരണമാല്യശോഭേ ।
കാമേശ്വരി പ്രചലദുത്പലവൈജയന്തീ-
ചാതുര്യമേതി തവ ചഞ്ചലദൃഷ്ടിപാതഃ ॥ ൪൮॥

മാര്ഗേണ മഞ്ജുകചകാന്തിതമോവൃതേന
മന്ദായമാനഗമനാ മദനാതുരാസൌ ।
കാമാക്ഷി ദൃഷ്ടിരയതേ തവ ശംകരായ
സംകേതഭൂമിമചിരാദഭിസാരികേവ ॥ ൪൯॥

വ്രീഡനുവൃത്തിരമണീകൃതസാഹചര്യാ
ശൈവാലിതാം ഗലരുചാ ശശിശേഖരസ്യ ।
കാമാക്ഷി കാന്തിസരസീം ത്വദപാങ്ഗലക്ഷ്മീഃ
മന്ദം സമാശ്രയതി മജ്ജനഖേലനായ ॥ ൫൦॥

കാഷായമംശുകമിവ പ്രകടം ദധാനോ
മാണിക്യകുണ്ഡലരുചിം മമതാവിരോധീ ।
ശ്രുത്യന്തസീമനി രതഃ സുതരാം ചകാസ്തി
കാമാക്ഷി താവകകടാക്ഷയതീശ്വരോഽസൌ ॥ ൫൧॥

പാഷാണ ഏവ ഹരിനീലമണിര്ദിനേഷു
പ്രമ്ലനതാം കുവലയം പ്രകടീകരോതി ।
നൌമിത്തികോ ജലദമേചകിമാ തതസ്തേ
കാമാക്ഷി ശൂന്യമുപമനമപാങ്ഗലക്ഷ്മ്യാഃ ॥ ൫൨॥

ശൃങ്ഗാരവിഭ്രമവതീ സുതരാം സലജ്ജാ
നാസാഗ്രമൌക്തികരുചാ കൃതമന്ദഹാസാ ।
ശ്യാമാ കടാക്ഷസുഷമാ തവ യുക്തമേതത്
കാമാക്ഷി ചുമ്ബതി ദിഗമ്ബരവക്ത്രബിമ്ബമ് ॥ ൫൩॥

നീലോത്പലേന മധുപേന ച ദൃഷ്ടിപാതഃ
കാമാക്ഷി തുല്യ ഇതി തേ കഥമാമനന്തി ।
ശൈത്യേന നിന്ദയതി യദന്വഹമിന്ദുപാദാന്
പാഥോരുഹേണ യദസൌ കലഹായതേ ച ॥ ൫൪॥

ഓഷ്ഠപ്രഭാപടലവിദ്രുമമുദ്രിതേ തേ
ഭ്രൂവല്ലിവീചിസുഭഗേ മുഖകാന്തിസിന്ധൌ ।
കാമാക്ഷി വാരിഭരപൂരണലമ്ബമാന-
കാലാമ്ബുവാഹസരണിം ലഭതേ കടാക്ഷഃ ॥ ൫൫॥

മന്ദസ്മിതൈര്ധവലിതാ മണികുണ്ഡലാംശു-
സമ്പര്കലോഹിതരുചിസ്ത്വദപാങ്ഗധാരാ ।
കാമാക്ഷി മല്ലികുസുമൈര്നവപല്ലവൈശ്ച
നീലോത്പലൈശ്ച രചിതേവ വിഭാതി മാലാ ॥ ൫൬॥

കാമാക്ഷി ശീതലകൃപാരസനിര്ഝരാമ്ഭഃ-
സമ്പര്കപക്ഷ്മലരുചിസ്ത്വദപാങ്ഗമാലാ ।
ഗോഭിഃ സദാ പുരരിപോരഭിലഷ്യമാണാ
ദൂര്വാകദമ്ബകവിഡമ്ബനമാതനോതി ॥ ൫൭॥

ഹൃത്പങ്കജം മമ വികാസയതു പ്രമുഷ്ണ-
ന്നുല്ലാസമുത്പലരുചേസ്തമസാം നിരോദ്ധാ ।
ദോഷാനുഷങ്ഗജഡതാം ജഗതാം ധുനാനഃ
കാമാക്ഷി വീക്ഷണവിലാസദിനോദയസ്തേ ॥ ൫൮॥

ചക്ഷുര്വിമോഹയതി ചന്ദ്രവിഭൂഷണസ്യ
കാമാക്ഷി താവകകടാക്ഷതമഃപ്രരോഹഃ ।
പ്രത്യങ്മുഖം തു നയനം സ്തിമിതം മുനീനാം
പ്രാകാശ്യമേവ നയതീതി പരം വിചിത്രമ് ॥ ൫൯॥

കാമാക്ഷി വീക്ഷണരുചാ യുധി നിര്ജിതം തേ
നീലോത്പലം നിരവശേഷഗതാഭിമാനമ് ।
ആഗത്യ തത്പരിസരം ശ്രവണവതംസ-
വ്യോജേന നൂനമഭയാര്ഥനമാതനോതി ॥ ൬൦॥

ആശ്ചര്യമമ്ബ മദാനാഭ്യുദയാവലമ്ബഃ
കാമാക്ഷി ചഞ്ചലനിരീക്ഷണവിഭ്രമസ്തേ ।
ധൈര്യം വിധൂയ തനുതേ ഹൃദി രാഗബന്ധം
ശമ്ഭോസ്തദേവ വിപരീതതയാ മുനീനാമ് ॥ ൬൧॥

ജന്തോഃ സകൃത്പ്രണമതോ ജഗദീഡ്യതാം ച
തേജാസ്വിതാം ച നിശിതാം ച മതിം സഭായാമ് ।
കാമാക്ഷി മാക്ഷികഝരീമിവ വൈഖരീം ച
ലക്ഷ്മീം ച പക്ഷ്മലയതി ക്ഷണവീക്ഷണം തേ ॥ ൬൨॥

കാദമ്ബിനീ കിമയതേ ന ജലാനുഷങ്ഗം
ഭൃങ്ഗാവലീ കിമുരരീകുരുതേ ന പദ്മമ് ।
കിം വാ കലിന്ദതനയാ സഹതേ ന ഭങ്ഗം
കാമാക്ഷി നിശ്ചയപദം ന തവാക്ഷിലക്ഷ്മീഃ ॥ ൬൩॥

കാകോലപാവകതൃണീകരണേഽപി ദക്ഷഃ
കാമാക്ഷി ബാലകസുധാകരശേഖരസ്യ ।
അത്യന്തശീതലതമോഽപ്യനുപാരതം തേ
ചിത്തം വിമോഹയതി ചിത്രമയം കടാക്ഷഃ ॥ ൬൪॥

കാര്പണ്യപൂരപരിവര്ധിതമമ്ബ മോഹ-
കന്ദോദ്ഗതം ഭവമയം വിഷപാദപം മേ ।
തുങ്ഗം ഛിനത്തു തുഹിനാദ്രിസുതേ ഭവത്യാഃ
കാഞ്ചീപുരേശ്വരി കടാക്ഷകുഠാരധാരാ ॥ ൬൫॥

കാമാക്ഷി ഘോരഭവരോഗചികിത്സനാര്ഥ-
മഭ്യര്ഥ്യ ദേശികകടാക്ഷഭിഷക്പ്രസാദാത് ।
തത്രാപി ദേവി ലഭതേ സുകൃതീ കദാചി-
ദന്യസ്യ ദുര്ലഭമപാങ്ഗമഹൌഷധം തേ ॥ ൬൬॥

കാമാക്ഷി ദേശികകൃപാംകുരമാശ്രയന്തോ
നാനാതപോനിയമനാശിതപാശബന്ധാഃ ।
വാസാലയം തവ കടാക്ഷമമും മഹാന്തോ
ലബ്ധ്വാ സുഖം സമാധിയോ വിചരന്തി ലോകേ ॥ ൬൭॥

സാകൂതസംലപിതസമ്ഭൃതമുഗ്ധഹാസം
വ്രീഡാനുരാഗസഹചാരി വിലോകനം തേ ।
കാമാക്ഷി കാമപരിപന്ഥിനി മാരവീര-
സാമ്രാജ്യവിഭ്രമദശാം സഫലീകരോതി ॥ ൬൮॥

കാമാക്ഷി വിഭ്രമബലൈകനിധിര്വിധായ
ഭ്രൂവല്ലിചാപകുടിലീകൃതിമേവ ചിത്രമ് ।
സ്വാധീനതാം തവ നിനായ ശശാങ്കമൌലേ-
രങ്ഗാര്ധരാജ്യസുഖലാഭമപാങ്ഗവീരഃ ॥ ൬൯॥

കാമാംകുരൈകനിലയസ്തവ ദൃഷ്ടിപാതഃ
കാമാക്ഷി ഭക്തമനസാം പ്രദദാതു കാമാന് ।
രാഗാന്വിതഃ സ്വയമപി പ്രകടീകരോതി
വൈരാഗ്യമേവ കഥമേഷ മഹാമുനീനാമ് ॥ ൭൦॥

കാലാമ്ബുവാഹനിവഹൈഃ കലഹായതേ തേ
കാമാക്ഷി കാലിമമദേന സദാ കടാക്ഷഃ ।
ചിത്രം തഥാപി നിതരാമമുമേവ ദൃഷ്ട്വാ
സോത്കണ്ഠ ഏവ രമതേ കില നീലകണ്ഠഃ ॥ ൭൧॥

കാമാക്ഷി മന്മഥരിപും പ്രതി മാരതാപ-
മോഹാന്ധകാരജലദാഗമനേന നൃത്യന് ।
ദുഷ്കര്മകഞ്ചുകികുലം കബലീകരോതു
വ്യാമിശ്രമേചകരുചിസ്ത്വദപാങ്ഗകേകീ ॥ ൭൨॥

കാമാക്ഷി മന്മഥരിപോരവലോകനേഷു
കാന്തം പയോജമിവ താവകമക്ഷിപാതമ് ।
പ്രേമാഗമോ ദിവസവദ്വികചീകരോതി
ലജ്ജാഭരോ രജനിവന്മുകുലീകരോതി ॥ ൭൩॥

മൂകോ വിരിഞ്ചതി പരം പുരുഷഃ കുരൂപഃ
കന്ദര്പതി ത്രിദശരാജതി കിമ്പചാനഃ ।
കാമാക്ഷി കേവലമുപക്രമകാല ഏവ
ലീലാതരങ്ഗിതകടാക്ഷരുചഃ ക്ഷണം തേ ॥ ൭൪॥

നീലാലകാ മധുകരന്തി മനോജ്ഞനാസാ-
മുക്താരുചഃ പ്രകടകന്ദബിസാങ്കുരന്തി ।
കാരുണ്യമമ്ബ മകരന്ദതി കാമകോടി
മന്യേ തതഃ കമലമേവ വിലോചനം തേ ॥ ൭൫॥

ആകാംക്ഷ്യമാണഫലദാനവിചക്ഷണായാഃ ।
കാമാക്ഷി താവകകടാക്ഷകകാമധേനോഃ ।
സമ്പര്ക ഏവ കഥമമ്ബ വിമുക്തപാശ-
ബന്ധാഃ സ്ഫുടം തനുഭൃതഃ പശുതാം ത്യജന്തി ॥ ൭൬॥

സംസാരഘര്മപരിതാപജുഷാം നരാണാം
കാമാക്ഷി ശീതലതരാണി തവേക്ഷിതാനി ।
ചന്ദ്രാതപന്തി ഘനചന്ദനകര്ദമന്തി
മുക്താഗുണന്തി ഹിമവാരിനിഷേചനന്തി ॥ ൭൭॥

പ്രേമാമ്ബുരാശിസതതസ്നപിതാനി ചിത്രം
കാമാക്ഷി താവകകടാക്ഷനിരീക്ഷണാനി ।
സന്ധുക്ഷയന്തി മുഹുരിന്ധനരാശിരീത്യാ
മാരദ്രുഹോ മനസി മന്മഥചിത്രഭാനുമ് ॥ ൭൮॥

കാലാഞ്ജനപ്രതിഭടം കമനീയകാന്ത്യാ
കന്ദര്പതന്ത്രകലയാ കലിതാനുഭാവമ് ।
കാഞ്ചീവിഹാരരസികേ കലുഷാര്തിചോരം
കല്ലോലയസ്വ മയി തേ കരുണാകടാക്ഷമ് ॥ ൭൯॥

ക്രാന്തേന മന്മഥദേന വിമോഹ്യമാന-
സ്വാന്തേന ചൂതതരുമൂലഗതസ്യ പുംസഃ ।
കാന്തേന കിംചിദവലോകയ ലോചനസ്യ
പ്രാന്തേന മാം ജനനി കാഞ്ചിപുരീവിഭൂഷേ ॥ ൮൦॥

കാമാക്ഷി കോഽപി സുജനാസ്ത്വദപാങ്ഗസംഗേ
കണ്ഠേന കന്ദലിതകാലിമസമ്പ്രദായാഃ ।
ഉത്തംസകല്പിതചകോരകുടുമ്ബപോഷാ
നക്തന്ദിവസപ്രസവഭൂനയനാ ഭവന്തി ॥ ൮൧॥

നീലോത്പലപ്രസവകാന്തിനിര്ദശനേന
കാരുണ്യവിഭ്രമജുഷാ തവ വീക്ഷണേന ।
കാമാക്ഷി കര്മജലധേഃ കലശീസുതേന
പാശത്രയാദ്വയമമീ പരിമോചനീയാഃ ॥ ൮൨॥

അത്യന്തചഞ്ചലമകൃത്രിമമഞ്ജനം കിം
ഝംകാരഭങ്ഗിരഹിതാ കിമു ഭൃങ്ഗമാലാ ।
ധൂമാങ്കുരഃ കിമു ഹുതാശനസംഗഹീനഃ
കാമാക്ഷി നേത്രരുചിനീലിമകന്ദലീ തേ ॥ ൮൩॥

കാമാക്ഷി നിത്യമയമഞ്ജലിരസ്തു മുക്തി-
ബീജായ വിഭ്രമമദോദയഘൂര്ണിതായ ।
കന്ദര്പദര്പപുനരുദ്ഭവസിദ്ധിദായ
കല്യാണദായ തവ ദേവി ദൃഗഞ്ചലായ ॥ ൮൪॥

ദര്പാങ്കുരോ മകരകേതനവിഭ്രമാണാം
നിന്ദാങ്കുരോ വിദലിതോത്പലചാതുരീണാമ് ।
ദീപാങ്കുരോ ഭവതമിസ്രകദമ്ബകാനാം
കാമാക്ഷി പാലയതു മാം ത്വദപാങ്ഗപാതഃ ॥ ൮൫॥

കൈവല്യദിവ്യമണിരോഹണപര്വതേഭ്യഃ
കാരുണ്യനിര്ഝരപയഃകൃതമഞ്ജനേഭ്യഃ ।
കാമാക്ഷി കിംകരിതശങ്കരമാനസേഭ്യ-
സ്തേഭ്യോ നമോഽസ്തു തവ വീക്ഷണവിഭ്രമേഭ്യഃ ॥ ൮൬॥

അല്പീയ ഏവ നവമുത്പലമമ്ബ ഹീനാ
മീനസ്യ വാ സരണിരമ്ബുരുഹാം ച കിം വാ ।
ദൂരേ മൃഗീദൃഗസമഞ്ജസമഞ്ജനം ച
കാമാക്ഷി വീക്ഷണരുചൌ തവ തര്കയാമഃ ॥ ൮൭॥

മിശ്രീഭവദ്ഗരലപങ്കിലശങ്കരോരസ്-
സീമാങ്ഗണേ കിമപി രിങ്ഖണമാദധാനഃ ।
ഹേലാവധൂതലലിതശ്രവണോത്പലോഽസൌ
കാമാക്ഷി ബാല ഇവ രാജതി തേ കടാക്ഷഃ ॥ ൮൮॥

പ്രൌഢികരോതി വിദുഷാം നവസൂക്തിധാടീ-
ചൂതാടവീഷു ബുധകോകിലലാല്യമാനമ് ।
മാധ്വീരസം പരിമലം ച നിരര്ഗലം തേ
കാമാക്ഷി വീക്ഷണവിലാസവസന്തലക്ഷ്മീഃ ॥ ൮൯॥

കൂലംകഷം വിതനുതേ കരുണാമ്ബുവര്ഷീ
സാരസ്വതം സുകൃതിനഃ സുലഭം പ്രവാഹമ് ।
തുച്ഛീകരോതി യമുനാമ്ബുതരങ്ഗഭങ്ഗീം
കാമാക്ഷി കിം തവ കടാക്ഷമഹാമ്ബുവാഹഃ ॥ ൯൦॥

ജഗര്തി ദേവി കരുണാശുകസുന്ദരീ തേ
താടങ്കരത്നരുചിദാഡിമഖണ്ഡശോണേ ।
കാമാക്ഷി നിര്ഭരകടാക്ഷമരീചിപുഞ്ജ-
മാഹേന്ദ്രനീലമണിപഞ്ജരമധ്യഭാഗേ ॥ ൯൧॥

കാമാക്ഷി സത്കുവലയസ്യ സഗോത്രഭാവാ-
ദാക്രാമതി ശ്രുതിമസൌ തവ ദൃഷ്ടിപാതഃ ।
കിംച സ്ഫുടം കുടിലതാം പ്രകടീകരോതി
ഭ്രൂവല്ലരീപരിചിതസ്യ ഫലം കിമേതത് ॥ ൯൨॥

ഏഷാ തവാക്ഷിസുഷമാ വിഷമായുധസ്യ
നാരാചവര്ഷലഹരീ നഗരാജകന്യേ ।
ശംകേ കരോതി ശതധാ ഹൃദി ധൈര്യമുദ്രാം
ശ്രീകാമകോടി യദസൌ ശിശിരാംശുമൌലേഃ ॥ ൯൩॥

ബാണേന പുഷ്പധനുഷഃ പരികല്പ്യമാന-
ത്രാണേന ഭക്തമനസാം കരുണാകരേണ ।
കോണേന കോമലദൃശസ്തവ കാമകോടി
ശോണേന ശോഷയ ശിവേ മമ ശോകസിന്ധുമ് ॥ ൯൪॥

മാരദ്രുഹാ മുകുടസീമനി ലാല്യമാനേ
മന്ദാകിനീപയസി തേ കുടിലം ചരിഷ്ണുഃ ।
കാമാക്ഷി കോപരഭസാദ്വലമാനമീന-
സന്ദേഹമങ്കുരയതി ക്ഷണമക്ഷിപാതഃ ॥ ൯൫॥

കാമാക്ഷി സംവലിതമൌക്തികകുണ്ഡലാംശു-
ചഞ്ചത്സിതശ്രവണചാമരചാതുരീകഃ ।
സ്തമ്ഭേ നിരന്തരമപാങ്ഗമയേ ഭവത്യാ
ബദ്ധശ്ചകാസ്തി മകരധ്വജമത്തഹസ്തീ ॥ ൯൬॥

യാവത്കടാക്ഷരജനീസമയാഗമസ്തേ
കാമാക്ഷി താവദചിരാന്നമതാം നരാണാമ് ।
ആവിര്ഭവത്യമൃതദീധിതിബിമ്ബമമ്ബ
സംവിന്മയം ഹൃദയപൂര്വഗിരീന്ദ്രശൃങ്ഗേ ॥ ൯൭॥

കാമാക്ഷി കല്പവിടപീവ ഭവത്കടാക്ഷോ
ദിത്സുഃ സമസ്തവിഭവം നമതാം നരാണാമ് ।
ഭൃങ്ഗസ്യ നീലനലിനസ്യ ച കാന്തിസമ്പ-
ത്സര്വസ്വമേവ ഹരതീതി പരം വിചിത്രമ് ॥ ൯൮॥

അത്യന്തശീതലമനര്ഗലകര്മപാക-
കാകോലഹാരി സുലഭം സുമനോഭിരേതത് ।
പീയൂഷമേവ തവ വീക്ഷണമമ്ബ കിന്തു
കാമാക്ഷി നീലമിദമിത്യയമേവ ഭേദഃ ॥ ൯൯॥

അജ്ഞാതഭക്തിരസമപ്രസരദ്വിവേക-
മത്യന്തഗര്വമനധീതസമസ്തശാസ്ത്രമ് ।
അപ്രാപ്തസത്യമസമീപഗതം ച മുക്തേഃ
കാമാക്ഷി നൈവ തവ സ്പൃഹയതി ദൃഷ്ടിപാതഃ ॥ ൧൦൦॥

(കാമാക്ഷി മാമവതു തേ കരുണാകടാക്ഷഃ)
പാതേന ലോചനരുചേസ്തവ കാമകോടി
പോതേന പതകപയോധിഭയാതുരാണാമ് ।
പൂതേന തേന നവകാഞ്ചനകുണ്ഡലാംശു-
വീതേന ശീതലയ ഭൂധരകന്യകേ മാമ് ॥ ൧൦൧॥

{കടാക്ഷശതകം സമ്പൂര്ണമ് ॥}



{॥ മന്ദസ്മിതശതകമ് ॥}
ബധ്നീമോ വയമഞ്ജലിം പ്രതിദിനം ബന്ധച്ഛിദേ ദേഹിനാം
കന്ദര്പാഗമതന്ത്രമൂലഗുരവേ കല്യാണകേലീഭുവേ ।
കാമാക്ഷ്യാ ഘനസാരപുഞ്ജരജസേ കാമദ്രുഹശ്ചക്ഷുഷാം
മന്ദാരസ്തബകപ്രഭാമദമുഷേ മന്ദസ്മിതജ്യോതിഷേ ॥ ൧॥

സധ്രീചേ നവമല്ലികാസുമനസാം നാസാഗ്രമുക്താമണേ-
രാചാര്യായ മൃണാലകാണ്ഡമഹസാം നൈസര്ഗികായ ദ്വിഷേ ।
സ്വര്ധുന്യാ സഹ യുധ്വേന ഹിമരുചേരര്ധാസനാധ്യാസിനേ
കാമാക്ഷ്യാഃ സ്മിതമഞ്ജരീധവലിമാദ്വൈതായ തസ്മൈ നമഃ ॥ ൨॥

കര്പൂരദ്യുതിചാതുരീമതിതരാമല്പീയസീം കുര്വതീ
ദൌര്ഭാഗ്യോദയമേവ സംവിദധതീ ദൌഷാകരീണാം ത്വിഷാമ് ।
ക്ഷുല്ലാനേവ മനോജ്ഞമല്ലിനികരാന്ഫുല്ലാനപി വ്യഞ്ജതീ
കാമാക്ഷ്യാ മൃദുലസ്മിതാംശുലഹരീ കാമപ്രസൂരസ്തു മേ ॥ ൩॥

യാ പീനസ്തനമണ്ഡലോപരി ലസത്കര്പൂരലേപായതേ
യാ നീലേക്ഷണരാത്രികാന്തിതതിഷു ജ്യോത്സ്നാപ്രരോഹായതേ ।
യാ സൌന്ദര്യധുനീതരങ്ഗതതിഷു വ്യാലോലഹംസായതേ
കാമാക്ഷ്യാഃ ശിശിരീകരോതു ഹൃദയം സാ മേ സ്മിതപ്രാചുരീ ॥ ൪॥

യേഷാം ഗച്ഛതി പൂര്വപക്ഷസരണിം കൌമുദ്വതഃ ശ്വേതിമാ
യേഷാം സന്തതമാരുരുക്ഷതി തുലാകക്ഷ്യാം ശരച്ചന്ദ്രമാഃ ।
യേഷാമിച്ഛതി കമ്ബുരപ്യസുലഭാമന്തേവസത്പ്രക്രിയാം
കാമാക്ഷ്യാ മമതാം ഹരന്തു മമ തേ ഹാസത്വിഷാമങ്കുരാഃ ॥ ൫॥

ആശാസീമസു സന്തതം വിദധതീ നൈശാകരീം വ്യാക്രിയാം
കാശാനാമഭിമാനഭങ്ഗകലനാകൌശല്യമാബിഭ്രതീ ।
ഈശാനേന വിലോകിതാ സകുതുകം കാമാക്ഷി തേ കല്മഷ-
ക്ലേശാപായകരീ ചകാസ്തി ലഹരീ മന്ദസ്മിതജ്യോതിഷാമ് ॥ ൬॥

ആരൂഢസ്യ സമുന്നതസ്തനതടീസാമ്രാജ്യസിംഹാസനം
കന്ദര്പസ്യ വിഭോര്ജഗത്ത്രയപ്രാകട്യമുദ്രാനിധേഃ ।
യസ്യാശ്ചാമരചാതുരീം കലയതേ രശ്മിച്ഛടാ ചഞ്ചലാ
സാ മന്ദസ്മിതമഞ്ജരീ ഭവതു നഃ കാമായ കാമാക്ഷി തേ ॥ ൭॥

ശമ്ഭോര്യാ പരിരമ്ഭസമ്ഭ്രമവിധൌ നൈര്മല്യസീമാനിധിഃ
ഗൈര്വാണീവ തരങ്ഗിണീ കൃതമൃദുസ്യന്ദാം കലിന്ദാത്മജാമ് ।
കല്മാഷീകുരുതേ കലങ്കസുഷമാം കണ്ഠസ്ഥലീചുമ്ബിനീം
കാമാക്ഷ്യാഃ സ്മിതകന്ദലീ ഭവതു നഃ കല്യാണസന്ദോഹിനീ ॥ ൮॥

ജേതും ഹാരലതാമിവ സ്തനതടീം സംജഗ്മുഷീ സന്തതം
ഗന്തും നിര്മലതാമിവ ദ്വിഗുണിതാം മഗ്നാ കൃപാസ്ത്രോതസി ।
ലബ്ധും വിസ്മയനീയതാമിവ ഹരം രാഗാകുലം കുര്വതീ
മഞ്ജുസ്തേ സ്മിതമഞ്ജരീ ഭവഭയം മഥ്നാതു കാമാക്ഷി മേ ॥ ൯॥

ശ്വേതാപി പ്രകടം നിശാകരരുചാം മാലിന്യമാതന്വതീ
ശീതാപി സ്മരപാവകം പശുപതേഃ സന്ധുക്ഷയന്തീ സദാ ।
സ്വാഭാവ്യാദധരാശ്രിതാപി നമതാമുച്ചൈര്ദിശന്തീ ഗതിം
കാമാക്ഷി സ്ഫുടമന്തരാ സ്ഫുരതു നസ്ത്വന്മന്ദഹാസപ്രഭാ ॥ ൧൦॥

വക്ത്രശ്രീസരസീജലേ തരലിതഭ്രൂവല്ലികല്ലോലിതേ
കാലിമ്നാ ദധതീ കടാക്ഷജനുഷാ മാധുവ്രതീം വ്യാപൃതിമ് ।
നിര്നിദ്രാമലപുണ്ഡരീകകുഹനാപാണ്ഡിത്യമാബിഭ്രതീ
കാമാക്ഷ്യാഃ സ്മിതചാതുരീ മമ മനഃ കാതര്യമുന്മൂലയേത് ॥ ൧൧॥

നിത്യം ബാധിതബന്ധുജീവമധരം മൈത്രീജുഷം പല്ലവൈഃ
ശുദ്ധസ്യ ദ്വിജമണ്ഡലസ്യ ച തിരസ്കര്താരമപ്യാശ്രിതാ ।
യാ വൈമല്യവതീ സദൈവ നമതാം ചേതഃ പുനീതേതരാം
കാമാക്ഷ്യാ ഹൃദയം പ്രസാദയതു മേ സാ മന്ദഹാസപ്രഭാ ॥ ൧൨॥

ദ്രുഹ്യന്തീ തമസേ മുഹുഃ കുമുദിനീസാഹായ്യമാബിഭ്രതീ
യാന്തീ ചന്ദ്രകിശോരശേഖരവപുഃസൌധാങ്ഗണേ പ്രേങ്ഖണമ് ।
ജ്ഞാനാമ്ഭോനിധിവീചികാം സുമനസാം കൂലംകഷാം കുര്വതീ
കാമാക്ഷ്യാഃ സ്മിതകൌമുദീ ഹരതു മേ സംസാരതാപോദയമ് ॥ ൧൩॥

കാശ്മീരദ്രവധാതുകര്ദമരുചാ കല്മാഷതാം ബിഭ്രതീ
ഹംസൌധൈരിവ കുര്വതീ പരിചിതിം ഹാരീകൃതൈര്മൌക്തികൈഃ ।
വക്ഷോജന്മതുഷാരശൈലകടകേ സംചാരമാതന്വതീ
കാമാക്ഷ്യാ മൃദുലസ്മിതദ്യുതിമയീ ഭാഗീരഥീ ഭാസതേ ॥ ൧൪॥

കമ്ബോര്വംശപരമ്പരാ ഇവ കൃപാസന്താനവല്ലീഭുവഃ
സമ്ഫുല്ലസ്തബകാ ഇവ പ്രസൃമരാ മൂര്താഃ പ്രസാദാ ഇവ ।
വാക്പീയൂഷകണാ ഇവ ത്രിപഥഗാപര്യായഭേദാ ഇവ
ഭ്രാജന്തേ തവ മന്ദഹാസകിരണാഃ കാഞ്ചീപുരീനായികേ ॥ ൧൫॥

വക്ഷോജേ ഘനസാരപത്രരചനാഭങ്ഗീസപത്നായിതാ
കണ്ഠേ മൌക്തികഹാരയഷ്ടികിരണവ്യാപാരമുദ്രായിതാ ।
ഓഷ്ഠശ്രീനികുരുമ്ബപല്ലവപുടേ പ്രേങ്ഖത്പ്രസൂനായിതാ
കാമാക്ഷി സ്ഫുരതാം മദീയഹൃദയേ ത്വന്മന്ദഹാസപ്രഭാ ॥ ൧൬॥

യേഷാം ബിന്ദുരിവോപരി പ്രചലിതോ നാസാഗ്രമുക്താമണിഃ
യേഷാം ദീന ഇവാധികണ്ഠമയതേ ഹാരഃ കരാലമ്ബനമ് ।
യേഷാം ബന്ധുരിവോഷ്ഠയോരരുണിമാ ധത്തേ സ്വയം രഞ്ജനം
കാമാക്ഷ്യാഃ പ്രഭവന്തു തേ മമ ശിവോല്ലാസായ ഹാസാങ്കുരാഃ ॥ ൧൭॥

യാ ജാഡ്യാമ്ബുനിധിം ക്ഷിണോതി ഭജതാം വൈരായതേ കൈരവൈഃ
നിത്യം യാം നിയമേന യാ ച യതതേ കര്തും ത്രിണേത്രോത്സവമ് ।
ബിമ്ബം ചാന്ദ്രമസം ച വഞ്ചയതി യാ ഗര്വേണ സാ താദൃശീ
കാമാക്ഷി സ്മിതമഞ്ജരീ തവ കഥം ജ്യോത്സ്നേത്യസൌ കീര്ത്യതേ ॥ ൧൮॥

ആരുഢാ രഭസാത്പുരഃ പുരരിപോരാശ്ലേഷണോപക്രമേ
യാ തേ മാതരുപൈതി ദിവ്യതടിനീശങ്കാകരീ തത്ക്ഷണമ് ।
ഓഷ്ഠൌ വേപയതി ഭ്രുവൌ കുടിലയത്യാനമ്രയത്യാനനം
താം വന്ദേ മൃദുഹാസപൂരസുഷമാമേകാമ്രനാഥപ്രിയേ ॥ ൧൯॥

വക്ത്രേന്ദോസ്തവ ചന്ദ്രികാ സ്മിതതതിര്വല്ഗു സ്ഫുരന്തീ സതാം
സ്യാച്ചേദ്യുക്തിമിദം ചകോരമനസാം കാമാക്ഷി കൌതൂഹലമ് ।
ഏതച്ചിത്രമഹര്നിശം യദധികാമേഷാ രുചിം ഗാഹതേ
ബിമ്ബോഷ്ഠദ്യുമണിപ്രഭാസ്വപി ച യദ്ബിബ്ബോകമാലമ്ബതേ ॥ ൨൦॥

സാദൃശ്യം കലശാമ്ബുധേര്വഹതി യത്കാമാക്ഷി മന്ദസ്മിതം
ശോഭാമോഷ്ഠരുചാമ്ബ വിദ്രുമഭവാമേതാദ്ഭിദാം ബ്രൂമഹേ ।
ഏകസ്മാദുദിതം പുരാ കില പപൌ ശര്വഃ പുരാണഃ പുമാന്
ഏതന്മധ്യസമുദ്ഭവം രസയതേ മാധുര്യരൂപം രസമ് ॥ ൨൧॥

ഉത്തുങ്ഗസ്തനകുമ്ഭശൈലകടകേ വിസ്താരികസ്തൂരികാ-
പത്രശ്രീജുഷി ചഞ്ചലാഃ സ്മിതരുചഃ കാമാക്ഷി തേ കോമലാഃ ।
സന്ധ്യാദീധിതിരഞ്ജിതാ ഇവ മുഹുഃ സാന്ദ്രാധരജ്യോതിഷാ
വ്യാലോലാമലശാരദാഭ്രശകലവ്യാപാരമാതന്വതേ ॥ ൨൨॥

ക്ഷീരം ദൂരത ഏവ തിഷ്ഠതു കഥം വൈമല്യമാത്രാദിദം
മാതസ്തേ സഹപാഠവീഥിമയതാം മന്ദസ്മിതൈര്മഞ്ജുലൈഃ ।
കിം ചേയം തു ഭിദാസ്തി ദോഹനവശാദേകം തു സംജായതേ
കാമാക്ഷി സ്വയമര്ഥിതം പ്രണമതാമന്യത്തു ദോദുഹ്യതേ ॥ ൨൩॥

കര്പൂരൈരമൃതൈര്ജഗജ്ജനനി തേ കാമാക്ഷി ചന്ദ്രാതപൈഃ
മുക്താഹാരഗുണൈര്മൃണാലവലയൈര്മുഗ്ധസ്മിതശ്രീരിയമ് ।
ശ്രീകാഞ്ചീപുരനായികേ സമതയാ സംസ്തൂയതേ സജ്ജനൈഃ
തത്താദൃങ്മമ താപശാന്തിവിധയേ കിം ദേവി മന്ദായതേ ॥ ൨൪॥

മധ്യേഗര്ഭിതമഞ്ജുവാക്യലഹരീമാധ്വീഝരീശീതലാ
മന്ദാരസ്തബകായതേ ജനനി തേ മന്ദസ്മിതാംശുച്ഛടാ ।
യസ്യാ വര്ധയിതും മുഹുര്വികസനം കാമാക്ഷി കാമദ്രുഹോ
വല്ഗുര്വീക്ഷണവിഭ്രമവ്യതികരോ വാസന്തമാസായതേ ॥ ൨൫॥

ബിമ്ബോഷ്ഠദ്യുതിപുഞ്ജരഞ്ജിതരുചിസ്ത്വന്മന്ദഹാസച്ഛടാ ।
കല്യാണം ഗിരിസാര്വഭൌമതനയേ കല്ലോലയത്വാശു മേ ।
ഫുല്ലന്മല്ലിപിനദ്ധഹല്ലകമയീ മാലേവ യാ പേശലാ
ശ്രീകാഞ്ചീശ്വരി മാരമര്ദിതുരുരോമധ്യേ മുഹുര്ലമ്ബതേ ॥ ൨൬॥

ബിഭ്രാണാ ശരദഭ്രവിഭ്രമദശാം വിദ്യോതമാനാപ്യസോ
കാമാക്ഷി സ്മിതമഞ്ജരീ കിരതി തേ കാരുണ്യധാരാരസമ് ।
ആശ്ചര്യം ശിശിരീകരോതി ജഗതീശ്ചാലോക്യ ചൈനാമഹോ
കാമം ഖേലതി നീലകണ്ഠഹൃദയം കൌതൂഹലാന്ദോലിതമ് ॥ ൨൭॥

പ്രേങ്ഖത്പ്രൌഢകടാക്ഷകുഞ്ജകുഹരേഷ്വത്യച്ഛഗുച്ഛായിതം
വക്ത്രേന്ദുച്ഛവിസിന്ധുവീചിനിചയേ ഫേനപ്രതാനായിതമ് ।
നൈരന്തര്യവിജൃമ്ഭിതസ്തനതടേ നൈചോലപട്ടായിതം
കാലുഷ്യം കബലീകരോതു മമ തേ കാമാക്ഷി മന്ദസ്മിതമ് ॥ ൨൮॥

പീയൂഷം തവ മന്ഥരസ്മിതമിതി വ്യര്ഥൈവ സാപപ്രഥാ
കാമാക്ഷി ധ്രുവമീദൃശം യദി ഭവേദേതത്കഥം വാ ശിവേ ।
മന്ദാരസ്യ കഥാലവം ന സഹതേ മഥ്നാതി മന്ദാകിനീ-
മിന്ദും നിന്ദതി കീര്തിതേഽപി കലശീപാഥോധിമീര്ഷ്യായതേ ॥ ൨൯॥

വിശ്വേഷാം നയനോത്സവം വിതനുതാം വിദ്യോതതാം ചന്ദ്രമാ
വിഖ്യാതോ മദനാന്തകേന മുകുടീമധ്യേ ച സംമാന്യതാമ് ।
ആഃ കിം ജാതമനേന ഹാസസുഷമാമാലോക്യ കാമാക്ഷി തേ
കാലങ്കീമവലമ്ബതേ ഖലു ദശാം കല്മാഷഹീനോഽപ്യസൌ ॥ ൩൦॥

ചേതഃ ശീതലയന്തു നഃ പശുപതേരാനന്ദജീവാതവോ
നമ്രാണാം നയനാധ്വസീമസു ശരച്ചന്ദ്രാതപോപക്രമാഃ ।
സംസാരാഖ്യസരോരുഹാകരഖലീകാരേ തുഷാരോത്കരാഃ
കാമാക്ഷി സ്മരകീര്തിബീജനികരാസ്ത്വന്മന്ദഹാസാങ്കുരാഃ ॥ ൩൧॥

കര്മൌഘാഖ്യതമഃകചാകചികരാന്കാമാക്ഷി സംചിന്തയേ
ത്വന്മന്ദസ്മിതരോചിഷാം ത്രിഭുവനക്ഷേമംകരാനങ്കുരാന് ।
യേ വക്ത്രം ശിശിരശ്രിയോ വികസിതം ചന്ദ്രാതപാമ്ഭോരുഹ-
ദ്വേഷോദ്ധേഷോണചാതുരീമിവ തിരസ്കര്തും പരിഷ്കുര്വതേ ॥ ൩൨॥

കുര്യുര്നഃ കുലശൈലരാജതനയേ കൂലംകഷം മങ്ഗലം
കുന്ദസ്പര്ധനചുഞ്ചവസ്തവ ശിവേ മന്ദസ്മിതപ്രക്രമാഃ ।
യേ കാമാക്ഷി സമസ്തസാക്ഷിനയനം സന്തോഷയന്തീശ്വരം
കര്പൂരപ്രകരാ ഇവ പ്രസൃമരാഃ പുംസാമസാധാരണാഃ ॥ ൩൩॥

കമ്രേണ സ്നപയസ്വ കര്മകുഹനാചോരേണ മാരാഗമ-
വ്യാഖ്യാശിക്ഷണദീക്ഷിതേന വിദുഷാമക്ഷീണലക്ഷ്മീപുഷാ ।
കാമാക്ഷി സ്മിതകന്ദലേന കലുഷസ്ഫോടക്രിയാചുഞ്ചുനാ
കാരുണ്യാമൃതവീചികാവിഹരണപ്രാചുര്യധുര്യേണ മാമ് ॥ ൩൪॥

ത്വന്മന്ദസ്മിതകന്ദലസ്യ നിയതം കാമാക്ഷി ശങ്കാമഹേ
ബിമ്ബഃ കശ്ചന നൂതനഃ പ്രചലിതോ നൈശാകരഃ ശീകരഃ ।
കിംച ക്ഷീരപയോനിധിഃ പ്രതിനിധിഃ സ്വര്വാഹിനീവീചികാ-
ബിബ്വോകോഽപി വിഡമ്ബ ഏവ കുഹനാ മല്ലീമതല്ലീരുചഃ ॥ ൩൫॥

ദുഷ്കര്മാര്കനിസര്ഗകര്കശമഹസ്സമ്പര്കതപതം മില-
ത്പങ്കം ശങ്കരവല്ലഭേ മമ മനഃ കാഞ്ചീപുരാലംക്രിയേ ।
അമ്ബ ത്വന്മൃദുലസ്മിതാമൃതരസേ മങ്ക്ത്വാ വിധൂയ വ്യഥാ-
മാനന്ദോദയസൌധശൃങ്ഗപദവീമാരോഢുമാകാങ്ക്ഷതി ॥ ൩൬॥

നമ്രാണാം നഗരാജശേഖരസുതേ നാകാലയാനാം പുരഃ
കാമാക്ഷി ത്വരയാ വിപത്പ്രശമേന കാരുണ്യധാരാഃ കിരന് ।
ആഗച്ഛന്തമനുഗ്രഹം പ്രകടയന്നാനന്ദബീജാനി തേ
നാസീരേ മൃദുഹാസ ഏവ തനുതേ നാഥേ സുധാശീതലഃ ॥ ൩൭॥

കാമാക്ഷി പ്രഥമാനവിഭ്രമനിധിഃ കന്ദര്പദര്പപ്രസൂഃ
മുഗ്ധസ്തേ മൃദുഹാസ ഏവ ഗിരിജേ മുഷ്ണാതു മേ കില്ബിഷമ് ।
യം ദ്രഷ്ടും വിഹിതേ കരഗ്രഹ ഉമേ ശമ്ഭുസ്ത്രപാമീലിതം
സ്വൈരം കാരയതി സ്മ താണ്ഡവവിനോദാനന്ദിനാ തണ്ഡുനാ ॥ ൩൮॥

ക്ഷുണ്ണം കേനചിദേവ ധീരമനസാ കുത്രാപി നാനാജനൈഃ
കര്മഗ്രന്ഥിനിയന്ത്രിതൈരസുഗമം കാമാക്ഷി സാമാന്യതഃ ।
മുഗ്ധൈര്ദ്രുഷ്ടുമശക്യമേവ മനസാ മൂഢസയ മേ മൌക്തികം
മാര്ഗം ദര്ശയതു പ്രദീപ ഇവ തേ മന്ദസ്മിതശ്രീരിയമ് ॥ ൩൯॥

ജ്യോത്സ്നാകാന്തിഭിരേവ നിര്മലതരം നൈശാകരം മണ്ഡലം
ഹംസൈരേവ ശരദ്വിലാസസമയേ വ്യാകോചമമ്ഭോരുഹമ് ।
സ്വച്ഛൈരേവ വികസ്വരൈരുഡുഗുണൈഃ കാമാക്ഷി ബിമ്ബം ദിവഃ
പുണ്യൈരേവ മൃദുസ്മിതൈസ്തവ മുഖം പുഷ്ണാതി ശോഭാഭരമ് ॥ ൪൦॥

മാനഗ്രന്ഥിവിധുന്തുദേന രഭസാദാസ്വാദ്യമാനേ നവ-
പ്രേമാഡമ്ബരപൂര്ണിമാഹിമകരേ കാമാക്ഷി തേ തത്ക്ഷണമ് ।
ആലോക്യ സ്മിതചന്ദ്രികാം പുനരിമാമുന്മീലനം ജഗ്മുഷീം
ചേതഃ ശീലയതേ ചകോരചരിതം ചന്ദ്രാര്ധചൂഡാമണേഃ ॥ ൪൧॥

കാമാക്ഷി സ്മിതമഞ്ജരീം തവ ഭജേ യസ്യാസ്ത്വിഷാമങ്കുരാ-
നാപീനസ്തനപാനലാലസതയാ നിശ്ശങ്കമങ്കേശയഃ ।
ഊര്ധ്വം വീക്ഷ്യ വികര്ഷതി പ്രസൃമരാനുദ്ദാമയാ ശുണ്ഡയാ
സൂനുസുതേ ബിസശങ്കയാശു കുഹനാദന്താവലഗ്രാമണീഃ ॥ ൪൨॥

ഗാഢാശ്ലേഷവിമര്ദസമ്ഭ്രമവശാദുദ്ദാമമുക്താഗുണ-
പ്രാലമ്ബേ കുചകുമ്ഭയോര്വിഗലിതേ ദക്ഷദ്വിഷോ വക്ഷസി ।
യാ സഖ്യേന പിനഹ്യതി പ്രചുരയാ ഭാസാ തദീയാം ദശാം
സാ മേ ഖേലതു കാമകോടി ഹൃദയേ സാന്ദ്രസ്മിതാംശുച്ഛടാ ॥ ൪൩॥

മന്ദാരേ തവ മന്ഥരസ്മിതരുചാം മാത്സര്യമാലോക്യതേ
കാമാക്ഷി സ്മരശാസനേ ച നിയതോ രാഗോദയോ ലക്ഷ്യതേ ।
ചാന്ദ്രീഷു ദ്യുതിമഞ്ജരീഷു ച മഹാന്ദ്വേഷാങ്കുരോ ദൃശ്യതേ
ശുദ്ധാനാം കഥമീദൃശീ ഗിരിസുതേഽതിശുദ്ധാ ദശാ കഥ്യതാമ് ॥ ൪൪॥

പീയൂഷം ഖലു പീയതേ സുരജനൈര്ദുഗ്ധാമ്ബുധിര്മഥ്യതേ
മാഹേശൈശ്ച ജടാകലാപനിഗഡൈര്മന്ദാകിനീ നഹ്യതേ ।
ശീതാംശുഃ പരിഭൂയതേ ച തമസാ തസ്മാദനേതാദൃശീ
കാമാക്ഷി സ്മിതമഞ്ജരീ തവ വചോവൈദഗ്ധ്യമുല്ലങ്ഘതേ ॥ ൪൫॥

ആശങ്കേ തവ മന്ദഹാസലഹരീമന്യാദൃശീം ചന്ദ്രികാ-
മേകാമ്രേശകുടുമ്ബിനി പ്രതിപദം യസ്യാഃ പ്രഭാസംഗമേ ।
വക്ഷോജാമ്ബുരുഹേ ന തേ രചയതഃ കാംചിദ്ദശാം കൌങ്മലീ-
മാസ്യാമ്ഭോരുഹമമ്ബ കിംച ശനകൈരാലമ്ബതേ ഫുല്ലതാമ് ॥ ൪൬॥

ആസ്തീര്ണാധരകാന്തിപല്ലവചയേ പാതം മുഹുര്ജഗ്മുഷീ
മാരദ്രോഹിണി കന്ദലത്സ്മരശരജ്വാലാവലീര്വ്യഞ്ജതീ ।
നിന്ദന്തീ ഘനസാരഹാരവലയജ്യോത്സ്നാമൃണാലാനി തേ
കാമാക്ഷി സ്മിതചാതുരീ വിരഹിണീരീതിം ജഗാഹേതരാമ് ॥ ൪൭॥

സൂര്യാലോകവിധൌ വികാസമധികം യാന്തീ ഹരന്തീ തമ-
സ്സന്ദോഹം നമതാം നിജസ്മരണതോ ദോഷാകരദ്വേഷിണീ ।
നിര്യാന്തീ വദനാരവിന്ദകുഹരാന്നിര്ധൂതജാഡ്യാ നൃണാം
ശ്രീകാമാക്ഷി തവ സ്മിതദ്യുതിമയീ ചിത്രീയതേ ചന്ദ്രികാ ॥ ൪൮॥

കുണ്ഠീകുര്യുരമീ കുബോധഘടനാമസ്മന്മനോമാഥിനീം
ശ്രീകാമാക്ഷി ശിവംകരാസ്തവ ശിവേ ശ്രീമന്ദഹാസാങ്കുരാഃ ।
യേ തന്വന്തി നിരന്തരം തരുണിമസ്തമ്ബേരമഗ്രാമണീ-
കുമ്ഭദ്വന്ദ്വവിഡമ്ബിനി സ്തനതടേ മുക്താകുഥാഡമ്ബരമ് ॥ ൪൯॥

പ്രേങ്ഖന്തഃ ശരദമ്ബുദാ ഇവ ശനൈഃ പ്രേമാനിലൈഃ പ്രേരിതാ
മജ്ജന്തോ മന്ദനാരികണ്ഠസുഷമാസിന്ധൌ മുഹുര്മന്ഥരമ് ।
ശ്രീകാമാക്ഷി തവ സ്മിതാംശുനികരാഃ ശ്യാമായമാനശ്രിയോ
നീലാമ്ഭോധരനൈപുണീം തത ഇതോ നിര്നിദ്രയന്ത്യഞ്ജസാ ॥ ൫൦॥

വ്യാപാരം ചതുരാനനൈകവിഹൃതൌ വ്യാകുര്വതീ കുര്വതീ
രുദ്രാക്ഷഗ്രഹണം മഹേശി സതതം വാഗൂര്മികല്ലോലിതാ ।
ഉത്ഫുല്ലം ധവലാരവിന്ദമധരീകൃത്യ സ്ഫുരന്തീ സദാ
ശ്രീകാമാക്ഷി സരസ്വതീ വിജയതേ ത്വന്മന്ദഹാസപ്രഭാ ॥ ൫൧॥

കര്പൂരദ്യുതിതസ്കരേണ മഹസാ കല്മാഷയത്യാനനം
ശ്രീകാഞ്ചീപുരനായികേ പതിരിവ ശ്രീമന്ദഹാസോഽപി തേ ।
ആലിങ്ഗത്യതിപീവരാം സ്തനതടീം ബിമ്ബാധരം ചുമ്ബതി
പ്രൌഢം രാഗഭരം വ്യനക്തി മനസോ ധൈര്യം ധുനീതേതരാമ് ॥ ൫൨॥

വൈശദ്യേന ച വിശ്വതാപഹരണക്രീഡാപടീയസ്തയാ
പാണ്ഡിത്യേന പചേലിമേന ജഗതാം നേത്രോത്സവോത്പാദേന ।
കാമാക്ഷി സ്മിതകന്ദലൈസ്തവ തുലാമാരോഢുമുദ്യോഗിനീ
ജ്യോത്സ്നാസൌ ജലരാശിപോഷണതയാ ദൂഷ്യാം പ്രപന്നാ ദശാമ് ॥ ൫൩॥

ലാവണ്യാമ്ബുജിനീമൃണാലവലയൈഃ ശൃങ്ഗാരഗന്ധദ്വിപ-
ഗ്രാമണ്യഃ ശ്രുതിചാമരൈസ്തരുണിമസ്വാരാജ്യതേജോങ്കുരൈഃ ।
ആനന്ദാമൃതസിന്ധുവീചിപൃഷതൈരാസ്യാബ്ജഹംസൈസ്തവ
ശ്രീകാമാക്ഷി മഥാന മന്ദഹസിതൈര്മത്കം മനഃകല്മഷമ് ॥ ൫൪॥

ഉത്തുങ്ഗസ്തനമണ്ഡലീപരിചലന്മാണിക്യഹാരച്ഛടാ-
ചഞ്ചച്ഛോണിമപുഞ്ജമധ്യസരണിം മാതഃ പരിഷ്കുര്വതീ ।
യാ വൈദഗ്ധ്യമുപൈതി ശംകരജടാകാന്താരവാടീപത-
ത്സ്വര്വാപീപയസഃ സ്മിതദ്യുതിരസൌ കാമാക്ഷി തേ മഞ്ജുലാ ॥ ൫൫॥

സന്നാമൈകജുഷാ ജനേന സുലഭം സംസൂചയന്തീ ശനൈ-
രുത്തുങ്ഗസ്യ ചിരാദനുഗ്രഹതരോരുത്പത്സ്യമാനം ഫലമ് ।
പ്രാഥമ്യേന വികസ്വരാ കുസുമവത്പ്രാഗല്ഭ്യമഭ്യേയുഷീ
കാമാക്ഷി സ്മിതചാതുരീ തവ മമ ക്ഷേമംകരീ കല്പതാമ് ॥ ൫൬॥

ധാനുഷ്കാഗ്രസരസ്യ ലോലകുടിലഭ്രൂലേഖയാ ബിഭ്രതോ
ലീലാലോകശിലീമുഖം നവവയസ്സാമ്രാജ്യലക്ഷ്മീപുഷഃ ।
ജേതും മന്മഥമര്ദിനം ജനനി തേ കാമാക്ഷി ഹാസഃ സ്വയം
വല്ഗുര്വിഭ്രമഭൂഭൃതോ വിതനുതേ സേനാപതിപ്രക്രിയാമ് ॥ ൫൭॥

യന്നാകമ്പത കാലകൂടകബലീകാരേ ചുചുമ്ബേ ന യദ്-
ഗ്ലാന്യാ ചക്ഷുഷി രൂഷിതാനലശിഖേ രുദ്രസ്യ തത്താദൃശമ് ।
ചേതോ യത്പ്രസഭം സ്മരജ്വരശിഖിജ്വാലേന ലേലിഹ്യതേ
തത്കാമാക്ഷി തവ സ്മിതാംശുകലികാഹേലാഭവം പ്രാഭവമ് ॥ ൫൮॥

സമ്ഭിന്നേവ സുപര്വലോകതടിനീ വീചീചയൈര്യാമുനൈഃ
സംമിശ്രേവ ശശാങ്കദീപ്തിലഹരീ നീലൈര്മഹാനീരദൈഃ ।
കാമാക്ഷി സ്ഫുരിതാ തവ സ്മിതരുചിഃ കാലാഞ്ജനസ്പര്ധിനാ
കാലിമ്നാ കചരോചിഷാം വ്യതികരേ കാംചിദ്ദശാമശ്നുതേ ॥ ൫൯॥

ജാനീമോ ജഗദീശ്വരപ്രണയിനി ത്വന്മന്ദഹാസപ്രഭാം
ശ്രീകാമാക്ഷി സരോജിനീമഭിനവാമേഷാ യതഃ സര്വദാ ।
ആസ്യേന്ദോരവലോകേന പശുപതേരഭ്യേതി സമ്ഫുല്ലതാം
തന്ദ്രാലുസ്തദഭാവ ഏവ തനുതേ തദ്വൈപരീത്യക്രമമ് ॥ ൬൦॥

യാന്തീ ലോഹിതിമാനമഭ്രതടിനീ ധാതുച്ഛടാകര്ദമൈഃ
ഭാന്തീ ബാലഗഭസ്തിമാലികിരണൈര്മേഘാവലീ ശാരദീ ।
ബിമ്ബോഷ്ഠദ്യുതിപുഞ്ജചുമ്ബനകലാശോണായമാനേന തേ
കാമാക്ഷി സ്മിതരോചിഷാ സമദശാമാരോഢുമാകാങ്ക്ഷതേ ॥ ൬൧॥

ശ്രീകാമാക്ഷി മുഖേന്ദുഭൂഷണമിദം മന്ദസ്മിതം താവകം
നേത്രാനന്ദകരം തഥാ ഹിമകരോ ഗച്ഛേദ്യഥാ തിഗ്മതാമ് ।
ശീതം ദേവി തഥാ യഥാ ഹിമജലം സന്താപമുദ്രാസ്പദം
ശ്വേതം കിംച തഥാ യഥാ മലിനതാം ധത്തേ ച മുക്താമണിഃ ॥ ൬൨॥

ത്വന്മന്ദസ്മിതമഞ്ജരീം പ്രസൃമരാം കാമാക്ഷി ചന്ദ്രാതപം
സന്തഃ സന്തതമാമനന്ത്യമലതാ തല്ലക്ഷണം ലക്ഷ്യതേ ।
അസ്മാകം ന ധുനോതി താപകമധികം ധൂനോതി നാഭ്യന്തരം
ധ്വാന്തം തത്ഖലു ദുഃഖിനോ വയമിദം കേനോതി നോ വിദ്മഹേ ॥ ൬൩॥

നമ്രസ്യ പ്രണയപ്രരൂഢകലഹച്ഛേദായ പാദാബ്ജയോഃ
മന്ദം ചന്ദ്രകിശോരശേഖരമണേഃ കാമാക്ഷി രാഗേണ തേ ।
ബന്ധൂകപ്രസവശ്രിയം ജിതവതോ ബംഹീയസീം താദൃശീം
ബിമ്ബോഷ്ഠസ്യ രുചിം നിരസ്യ ഹസിതജ്യോത്സ്നാ വയസ്യായതേ ॥ ൬൪॥

മുക്താനാം പരിമോചനം വിദധതസ്തത്പ്രീതിനിഷ്പാദിനീ
ഭൂയോ ദൂരത ഏവ ധൂതമരുതസ്തത്പാലനം തന്വതീ ।
ഉദ്ഭൂതസ്യ ജലാന്തരാദവിരതം തദ്ദൂരതാം ജഗ്മുഷീ
കാമാക്ഷി സ്മിതമഞ്ജരീ തവ കഥം കമ്ബോസ്തുലാമശ്നുതേ ॥ ൬൫॥

ശ്രീകാമാക്ഷി തവ സ്മിതദ്യുതിഝരീവൈദഗ്ധ്യലീലായിതം
പശ്യന്തോഽപി നിരന്തരം സുവിമലംമന്യാ ജഗന്മണ്ഡലേ ।
ലോകം ഹാസയിതും കിമര്ഥമനിശം പ്രാകാശ്യമാതന്വതേ
മന്ദാക്ഷം വിരഹയ്യ മങ്ഗലതരം മന്ദാരചന്ദ്രാദയഃ ॥ ൬൬॥

ക്ഷീരാബ്ധേരപി ശൈലരാജതനയേ ത്വന്മന്ദഹാസസ്യ ച
ശ്രീകാമാക്ഷി വലക്ഷിമോദയനിധേഃ കിംചിദ്ഭിദാം ബ്രൂമഹേ ।
ഏകസ്മൈ പുരുഷായ ദേവി സ ദദൌ ലക്ഷ്മീം കദാചിത്പുരാ
സര്വേഭ്യോഽപി ദദാത്യസൌ തു സതതം ലക്ഷ്മീം ച വാഗീശ്വരീമ് ॥ ൬൭॥

ശ്രീകാഞ്ചീപുരരത്നദീപകലികേ താന്യേവ മേനാത്മജേ
ചാകോരാണി കുലാനി ദേവി സുതരാം ധന്യാനി മന്യാമഹേ ।
കമ്പാതീരകുടുമ്ബചംക്രമകലാചുഞ്ചൂനി ചഞ്ചൂപുടൈഃ
നിത്യം യാനി തവ സ്മിതേന്ദുമഹസാമാസ്വാദമാതന്വതേ ॥ ൬൮॥

ശൈത്യപ്രക്രമമാശ്രിതോഽപി നമതാം ജാഡ്യപ്രഥാം ധൂനയന്
നൈര്മല്യം പരമം ഗതോഽപി ഗിരിശം രാഗാകുലം ചാരയന് ।
ലീലാലാപപുരസ്സരോഽപി സതതം വാചംയമാന്പ്രീണയന്
കാമാക്ഷി സ്മിതരോചിഷാം തവ സമുല്ലാസഃ കഥം വര്ണ്യതേ ॥ ൬൯॥

ശ്രോണീചഞ്ചലമേഖലാമുഖരിതം ലീലാഗതം മന്ഥരം
ഭ്രൂവല്ലീചലനം കടാക്ഷവലനം മന്ദാക്ഷവീക്ഷാചണമ് ।
യദ്വൈദഗ്ധ്യമുഖേന മന്മഥരിപും സംമോഹയന്ത്യഞ്ജസാ
ശ്രീകാമാക്ഷി തവ സ്മിതായ സതതം തസ്മൈ നമ്സകുര്മഹേ ॥ ൭൦॥

ശ്രീകാമാക്ഷി മനോജ്ഞമന്ദഹസിതജ്യോതിഷ്പ്രരോഹേ തവ
സ്ഫീതശ്വേതിമസാര്വഭൌമസരണിപ്രാഗല്ഭ്യമഭ്യേയുഷി ।
ചന്ദ്രോഽയം യുവരാജതാം കലയതേ ചേടീധുരം ചന്ദ്രികാ
ശുദ്ധാ സാ ച സുധാഝരീ സഹചരീസാധര്മ്യമാലമ്ബതേ ॥ ൭൧॥

ജ്യോത്സ്നാ കിം തനുതേ ഫലം തനുമതാമൌഷ്ണ്യപ്രശാന്തിം വിനാ
ത്വന്മന്ദസ്മിതരോചിഷാ തനുമതാം കാമാക്ഷി രോചിഷ്ണുനാ ।
സന്താപോ വിനിവാര്യതേ നവവയഃപ്രാചുര്യമങ്കൂര്യതേ
സൌന്ദര്യം പരിപൂര്യതേ ജഗതി സാ കീര്തിശ്ച സംചാര്യതേ ॥ ൭൨॥

വൈമല്യം കുമുദശ്രിയാം ഹിമരുചഃ കാന്ത്യൈവ സന്ധുക്ഷ്യതേ
ജ്യോത്സ്നാരോചിരപി പ്രദോഷസമയം പ്രാപ്യൈവ സമ്പദ്യതേ ।
സ്വച്ഛത്വം നവമൌക്തികസ്യ പരമം സംസ്കാരതോ ദൃശ്യതേ
കാമാക്ഷ്യാഃ സ്മിതദീധിതേര്വിശദിമാ നൈസര്ഗികോ ഭാസതേ ॥ ൭൩॥

പ്രാകാശ്യം പരമേശ്വരപ്രണയിനി ത്വന്മന്ദഹാസശ്രിയഃ
ശ്രീകാമാക്ഷി മമ ക്ഷിണോതു മമതാവൈചക്ഷണീമക്ഷയാമ് ।
യദ്ഭീത്യേവ നിലീയതേ ഹിമകരോ മേഘോദരേ ശുക്തികാ-
ഗര്ഭേ മൌക്തികമണ്ഡലീ ച സരസീമധ്യേ മൃണാലീ ച സാ ॥ ൭൪॥

ഹേരമ്ബേ ച ഗുഹേ ഹര്ഷഭരിതം വാത്സല്യമങ്കൂരയത്
മാരദ്രോഹിണി പൂരുഷേ സഹഭുവം പ്രേമാങ്കുരം വ്യഞ്ജയത് ।
ആനമ്രേഷു ജനേഷു പൂര്ണകരുണാവൈദഗ്ധ്യമുത്താലയത്
കാമാക്ഷി സ്മിതമഞ്ജസാ തവ കഥംകാരം മയാ കഥ്യതേ ॥ ൭൫॥

സംക്രുദ്ധദ്വിജരാജകോഽപ്യവിരതം കുര്വന്ദ്വിജൈഃ സംഗമം
വാണീപദ്ധതിദൂരഗോഽപി സതതം തത്സാഹചര്യം വഹന് ।
അശ്രാന്തം പശുദുര്ലഭോഽപി കലയന്പത്യൌ പശൂനാം രതിം
ശ്രീകാമാക്ഷി തവ സ്മിതാമൃതരസസ്യന്ദോ മയി സ്പന്ദതാമ് ॥ ൭൬॥

ശ്രീകാമാക്ഷി മഹേശ്വരേ നിരുപമപ്രേമാങ്കുരപ്രക്രമമ്ം
നിത്യം യഃ പ്രകടീകരോതി സഹജാമുന്നിദ്രയന്മാധുരീമ് ।
തത്താദൃക്തവ മന്ദഹാസമഹിമാ മാതഃ കഥം മാനിതാം
തന്മൂര്ധ്നാ സുരനിമ്നഗാം ച കലികാമിന്ദോശ്ച താം നിന്ദതി ॥ ൭൭॥

യേ മാധുര്യവിഹാരമണ്ടപഭുവോ യേ ശൈത്യമുദ്രാകരാ
യേ വൈശദ്യദശാവിശേഷസുഭഗാസ്തേ മന്ദഹാസാങ്കുരാഃ ।
കാമാക്ഷ്യാഃ സഹജം ഗുണത്രയമിദം പര്യായതഃ കുര്വതാം
വാണീഗുമ്ഫനഡമ്ബരേ ച ഹൃദയേ കീര്തിപ്രരോഹേ ച മേ ॥ ൭൮॥

കാമാക്ഷ്യാ മൃദുലസ്മിതാംശുനികരാ ദക്ഷാന്തകേ വീക്ഷണേ
മന്ദാക്ഷഗ്രഹിലാ ഹിമദ്യുതിമയൂഖാക്ഷേപദീക്ഷാങ്കുരാഃ ।
ദാക്ഷ്യം പക്ഷ്മലയന്തു മാക്ഷികഗുഡദ്രാക്ഷാഭവം വാക്ഷു മേ
സൂക്ഷ്മം മോക്ഷപഥം നിരീക്ഷിതുമപി പ്രക്ഷാലയേയുര്മനഃ ॥ ൭൯॥

ജാത്യാ ശീതശീതലാനി മധുരാണ്യേതാനി പൂതാനി തേ
ഗാങ്ഗാനീവ പയാംസി ദേവി പടലാന്യല്പസ്മിതജ്യോതിഷാമ് ।
ഏനഃപങ്കപരമ്പരാമലിനിതാമേകാമ്രനാഥപ്രിയേ
പ്രജ്ഞാനാത്സുതരാം മദീയധിഷണാം പ്രക്ഷാലയന്തു ക്ഷണാത് ॥ ൮൦॥

അശ്രാന്തം പരതന്ത്രിതഃ പശുപതിസ്ത്വന്മന്ദഹാസാങ്കുരൈഃ
ശ്രീകാമാക്ഷി തദീയവര്ണസമതാസങ്ഗേന ശങ്കാമഹേ ।
ഇന്ദും നാകധുനീം ച ശേഖരയതേ മാലാം ച ധത്തേ നവൈഃ
വൈകുണ്ഠൈരവകുണ്ഠനം ച കുരുതേ ധൂലീചയൈര്ഭാസ്മനൈഃ ॥ ൮൧॥

ശ്രീകാഞ്ചീപുരദേവതേ മൃദുവചസ്സൌരഭ്യമുദ്രാസ്പദം
പ്രൌഢപ്രേമലതാനവീനകുസുമം മന്ദസ്മിതം താവകമ് ।
മന്ദം കന്ദലതി പ്രിയസ്യ വദനാലോകേ സമാഭാഷണേ
ശ്ലക്ഷ്ണേ കുങ്മലതി പ്രരൂഢപുലകേ ചാശ്ലോഷണേ ഫുല്ലതി ॥ ൮൨॥

കിം ത്രൈസ്രോതസമമ്ബികേ പരിണതം സ്രോതശ്ചതുര്ഥം നവം
പീയൂഷസ്യ സമസ്തതാപഹരണം കിംവാ ദ്വിതീയം വപുഃ ।
കിംസ്വിത്ത്വന്നികടം ഗതം മധുരിമാഭ്യാസായ ഗവ്യം പയഃ
ശ്രീകാഞ്ചീപുരനായകപ്രിയതമേ മന്ദസ്മിതം താവകമ് ॥ ൮൩॥

ഭൂഷാ വക്ത്രസരോരുഹസ്യ സഹജാ വാചാം സഖീ ശാശ്വതീ
നീവീ വിഭ്രമസന്തതേഃ പശുപതേഃ സൌധീ ദൃശാം പാരണാ ।
ജീവാതുര്മദനശ്രിയഃ ശശിരുചേരുച്ചാടനീ ദേവതാ
ശ്രീകാമാക്ഷി ഗിരാമഭൂമിമയതേ ഹാസപ്രഭാമഞ്ജരീ ॥ ൮൪॥

സൂതിഃ ശ്വേതിമകന്ദലസ്യ വസതിഃ ശൃങ്ഗാരസാരശ്രിയഃ
പൂര്തിഃ സൂക്തിഝരീരസസ്യ ലഹരീ കാരുണ്യപാഥോനിധേഃ ।
വാടീ കാചന കൌസുമീ മധുരിമസ്വാരാജ്യലക്ഷ്മ്യാസ്തവ
ശ്രീകാമാക്ഷി മമാസ്തു മങ്ഗലകരീ ഹാസപ്രഭാചാതുരീ ॥ ൮൫॥

ജന്തൂനാം ജനിദുഃഖമൃത്യുലഹരീസന്താപനം കൃന്തതഃ
പ്രൌഢാനുഗ്രഹപൂര്ണശീതലരുചോ നിത്യോദയം ബിഭ്രതഃ ।
ശ്രീകാമാക്ഷി വിസൃത്വരാ ഇവ കരാ ഹാസാങ്കുരാസ്തേ ഹഠാ-
ദാലോകേന നിഹന്യുരന്ധതമസസ്തോമസ്യ മേ സന്തതിമ് ॥ ൮൬॥

ഉത്തുങ്ഗസ്തനമണ്ഡലസ്യ വിലസല്ലാവണ്യലീലാനടീ-
രങ്ഗസ്യ സ്ഫുടമൂര്ധ്വസീമനി മുഹുഃ പ്രാകാശ്യമഭ്യേയുഷീ ।
ശ്രീകാമാക്ഷി തവ സ്മിതദ്യുതിതതിര്ബിമ്ബോഷ്ഠകാന്ത്യങ്കുരൈഃ
ചിത്രാം വിദ്രുമമുദ്രിതാം വിതനുതേ മൌക്തീം വിതാനശ്രിയമ് ॥ ൮൭॥

സ്വാഭാവ്യാത്തവ വക്ത്രമേവ ലലിതം സന്തോഷസമ്പാദനം
ശമ്ഭോഃ കിം പുനരഞ്ചിതസ്മിതരുചഃ പാണ്ഡിത്യപാത്രീകൃതമ് ।
അമ്ഭോജം സ്വത ഏവ സര്വജഗതാം ചക്ഷുഃപ്രിയമ്ഭാവുകം
കാമാക്ഷി സ്ഫുരിതേ ശരദ്വികസിതേ കീദൃഗ്വിധം ഭ്രാജതേ ॥ ൮൮॥

പുമ്ഭിര്നിര്മലമാനസൌര്വിദധതേ മൈത്രീം ദൃഢം നിര്മലാം
ലബ്ധ്വാ കര്മലയം ച നിര്മലതരാം കീര്തിം ലഭന്തേതരാമ് ।
സൂക്തിം പക്ഷ്മലയന്തി നിര്മലതമാം യത്താവകാഃ സേവകാഃ
തത്കാമാക്ഷി തവ സ്മിതസ്യ കലയാ നൈര്മല്യസീമാനിധേഃ ॥ ൮൯॥

ആകര്ഷന്നയനാനി നാകിസദസാം ശൈത്യേന സംസ്തമ്ഭയ-
ന്നിന്ദും കിംച വിമോഹയന്പശുപതിം വിശ്വാര്തിമുച്ചാടയന് ।
ഹിംസത്സംസൃതിഡമ്ബരം തവ ശിവേ ഹാസാഹ്വയോ മാന്ത്രികഃ
ശ്രീകാമാക്ഷി മദീയമാനസതമോവിദ്വേഷണേ ചേഷ്ടതാമ് ॥ ൯൦॥

ക്ഷേപീയഃ ക്ഷപയന്തു കല്മഷഭയാന്യസ്മാകമല്പസ്മിത-
ജ്യോതിര്മണ്ഡലചംക്രമാസ്തവ ശിവേ കാമാക്ഷി രോചിഷ്ണവഃ ।
പീഡാകര്മഠകര്മഘര്മസമയവ്യാപാരതാപാനല-
ശ്രീപാതാ നവഹര്ഷവര്ഷണസുധാസ്രോതസ്വിനീശീകരാഃ ॥ ൯൧॥

ശ്രീകാമാക്ഷി തവ സ്മിതൈന്ദവമഹഃപൂരേ പരിമ്ഫൂര്ജതി
പ്രൌഢാം വാരിധിചാതുരീം കലയതേ ഭക്താത്മനാം പ്രാതിഭമ് ।
ദൌര്ഗത്യപ്രസരാസ്തമഃപടലികാസാധര്മ്യമാബിഭ്രതേ
സര്വം കൈരവസാഹചര്യപദവീരീതിം വിധത്തേ പരമ് ॥ ൯൨॥

മന്ദാരാദിഷു മന്മഥാരിമഹിഷി പ്രാകാശ്യരീതിം നിജാം
കാദാചിത്കതയാ വിശങ്ക്യ ബഹുശോ വൈശദ്യമുദ്രാഗുണഃ ।
സാതത്യേന തവ സ്മിതേ വിതനുതേ സ്വൈരാസനാവാസനാമ് ॥ ൯൩॥

ഇന്ധാനേ ഭവവീതിഹോത്രനിവഹേ കര്മൌഘചണ്ഡാനില-
പ്രൌഢിമ്നാ ബഹുലീകൃതേ നിപതിതം സന്താപചിന്താകുലമ് ।
മാതര്മാം പരിഷിഞ്ച കിംചിദമലൈഃ പീയൂഷവര്ഷൈരിവ
ശ്രീകാമാക്ഷി തവ സ്മിതദ്യുതികണൈഃ ശൈശിര്യലീലാകരൈഃ ॥ ൯൪॥

ഭാഷായാ രസനാഗ്രഖേലനജുഷഃ ശൃങ്ഗാരമുദ്രാസഖീ-
ലീലാജാതരതേഃ സുഖേന നിയമസ്നാനായ മേനാത്മജേ ।
ശ്രീകാമാക്ഷി സുധാമയീവ ശിശിരാ സ്രോതസ്വിനീ താവകീ
ഗാഢാനന്ദതരങ്ഗിതാ വിജയതേ ഹാസപ്രഭാചാതുരീ ॥ ൯൫॥

സന്താപം വിരലീകരോതു സകലം കാമാക്ഷി മച്ചേതനാ
മജ്ജന്തീ മധുരസ്മിതാമരധുനീകല്ലോലജാലേഷു തേ ।
നൈരന്തര്യമുപേത്യ മന്മഥമരുല്ലോലേഷു യേഷു സ്ഫുടം
പ്രേമേന്ദുഃ പ്രതിബിമ്ബിതോ വിതനുതേ കൌതൂഹലം ധൂര്ജടേഃ ॥ ൯൬॥

ചേതഃക്ഷീരപയോധിമന്ഥരചലദ്രാഗാഖ്യമന്ഥാചല-
ക്ഷോഭവ്യാപൃതിസമ്ഭവാം ജനനി തേ മന്ദസ്മിതശ്രീസുധാമ് ।
സ്വാദംസ്വാദമുദീതകൌതുകരസാ നേത്രത്രയീ ശാംകരീ
ശ്രീകാമാക്ഷി നിരന്തരം പരിണമത്യാനന്ദവീചീമയീ ॥ ൯൭॥

ആലോകേ തവ പഞ്ചസായകരിപോരുദ്ദാമകൌതൂഹല-
പ്രേങ്ഖന്മാരുതഘട്ടനപ്രചലിതാദാനന്ദദുഗ്ധാമ്ബുധേഃ ।
കാചിദ്വീചിരുദഞ്ചതി പ്രതിനവാ സംവിത്പ്രരോഹാത്മികാ
താം കാമാക്ഷി കവീശ്വരാഃ സ്മിതമിതി വ്യാകുര്വതേ സര്വദാ ॥ ൯൮॥

സൂക്തിഃ ശീലയതേ കിമദ്രിതനയേ മന്ദസ്മിതാത്തേ മുഹുഃ
മാധുര്യാഗമസമ്പ്രദായമഥവാ സൂക്തേര്നു മന്ദസ്മിതമ് ।
ഇത്ഥം കാമപി ഗാഹതേ മമ മനഃ സന്ദേഹമാര്ഗഭ്രമിം
ശ്രീകാമാക്ഷി ന പാരമാര്ഥ്യസരണിസ്ഫൂര്തൌ നിധത്തേ പദമ് ॥ ൯൯॥

ക്രീഡാലോലകൃപാസരോരുഹമുഖീസൌധാങ്ഗണേഭ്യഃ കവി-
ശ്രേണീവാക്പരിപാടികാമൃതഝരീസൂതീഗൃഹേഭ്യഃ ശിവേ ।
നിര്വാണാങ്കുരസാര്വഭൌമപദവീസിംഹാസനേഭ്യസ്തവ
ശ്രീകാമാക്ഷി മനോജ്ഞമന്ദഹസിതജ്യോതിഷ്കണേഭ്യോ നമഃ ॥ ൧൦൦॥

ആര്യാമേവ വിഭാവയന്മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിമ് ।
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാമ്
ആരോഹത്യപവര്ഗസൌധവലഭീമാനന്ദവീചീമയീമ് ॥ ൧൦൧॥

{മന്ദസ്മിതശതകം സമ്പൂര്ണമ് ॥}

{ശ്രീ മൂകപഞ്ചശതീ സമ്പൂര്ണാ ॥}

{॥ ഓം തത് സത് ॥}


Encoded and proofread by Sridhar Seshagiri sridhar.seshagiri at gmail.com

Please send corrections to sanskrit@cheerful.com
Last updated ത്oday
http://sanskritdocuments.org

Muka Pancha Shati Lyrics in Malayalam PDF
% File name : shrImUka500.itx
% Category : trishati
% Location : doc\_devii
% Author : mUka mahAkavi
% Language : Sanskrit
% Subject : stotra/hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : January 6, 2003, March 10, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website