{॥ ଶ୍ରୀମୂକପଞ୍ଚଶତୀ ॥}
{ମାତା ମରକତଶ୍ଯାମା ମାତଙ୍ଗୀ ମଦଶାଲିନୀ ।}
{କୁର୍ଯାତ୍ କଟାକ୍ଷଂ କଲ୍ଯାଣୀ କଦମ୍ବଵନଵାସିନୀ ॥}

{॥ ଶ୍ରୀଃ ॥}
{॥ ଶ୍ରୀଚନ୍ଦ୍ରମୌଲୀଶ୍ଵରାଯ ନମଃ ॥}
{॥ ଶ୍ରୀକାରଣପରଚିଦ୍ରୂପାଯୈ ନମଃ ॥}
{ଶ୍ରୀମୂକମହାକଵିପ୍ରଣୀତା}
{॥ ଶ୍ରୀଃ ॥}
{॥ ଶ୍ରୀମୂକପଞ୍ଚଶତୀ ॥}
{ଶ୍ରୀକାମାକ୍ଷୀପରଦେଵତାଯାଃ ପାଦାରଵିନ୍ଦଯୋଃ}
{ଭକ୍ତିଭରେଣ ସମର୍ପିତମ୍ ॥}

ଆର୍ଯାମେଵ ଵିଭାଵଯନ୍ମନସି ଯଃ ପାଦାରଵିନ୍ଦଂ ପୁରଃ
ପଶ୍ଯନ୍ନାରଭତେ ସ୍ତୁତିଂ ସ ନିଯତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ଯା ମୃଦୁଲସ୍ମିତାଂଶୁଲହରୀଜ୍ଯୋତ୍ସ୍ନାଵଯସ୍ଯାନ୍ଵିତା-
ମାରୋହତ୍ଯପଵର୍ଗସୌଧଵଲଭୀମାନନ୍ଦଵୀଚୀମଯୀମ୍॥

[ମନ୍ଦସ୍ମିତ ୧୦୧ ]
ଶ୍ରୀମତ୍ପରମହଂସପରିଵ୍ରାଜକାଚାର୍ଯଵର୍ଯ ଶ୍ରୀକାମକୋଟିପୀଠାଧୀଶ୍ଵର-
ଜଗଦ୍ଗୁରୁ ଶ୍ରୀମତ୍ ଚନ୍ଦ୍ରଶେଖରେନ୍ଦ୍ରସରସ୍ଵତୀ ଶ୍ରୀପାଦାନାଂ
ଶ୍ରୀମୁଖେନ ସମଦ୍ଭାସିତା


{॥ ଶ୍ରୀଃ ॥}
{॥ ଶ୍ରୀଚନ୍ଦ୍ରମୌଲୀଶ୍ଵର ॥}
{ମୁଦ୍ରା}
ସ୍ଵସ୍ତି ଶ୍ରୀମଦଖିଲଭୂମଣ୍ଡଲାଲଂକାର-ତ୍ରଯସ୍ତ୍ରିଂଶତ୍କୋଟି-
ଦେଵତାସେଵିତ ଶ୍ରୀକାମାକ୍ଷୀଦେଵୀସନାଥ-ଶ୍ରୀମଦେକାମ୍ରନାଥ-
ଶ୍ରୀମହାଦେଵୀସନାଥ-ଶ୍ରୀହସ୍ତିନିରିନାଥ-ସାକ୍ଷାତ୍କାରପରମ-
ଅଧିଷ୍ଠାନସତ୍ଯଵ୍ରତନାମାଙ୍କିତ-କାଞ୍ଚୀଦିଵ୍ଯକ୍ଷେତ୍ରେ ଶାରଦା-
ମଠସୁସ୍ଥିତାନାମ୍, ଅତୁଲିତସୁଧାରସମାଧୁର୍ଯକମଲାସନକାମିନୀ-
ଧମ୍ମିଲ୍ଲ ସମ୍ଫୁଲ୍ଲମଲ୍ଲିକାମାଲିକାନିଷ୍ଯନ୍ଦମକରନ୍ଦଝରୀ-
ସୌଵସ୍ତିକଵାଙ୍ନିଗୁମ୍ଭଵିଜୃମ୍ଭଣାନନ୍ଦତୁନ୍ଦିଲିତମଣୀଷି-
ମଣ୍ଡଲାନାମ୍, ଅନଵରତାଦ୍ଵୈତଵିଦ୍ଯାଵିନୋଦରସିକାନାମ୍,
ନିରନ୍ତରାଲଂକୃତୀକୃତଶାନ୍ତିଦାନ୍ତିଭୂମ୍ନାମ୍, ସକଲଭୁଵନ-
ଚକ୍ରପ୍ରତିଷ୍ଠାପକ ଶ୍ରୀଚକ୍ରପ୍ରତିଷ୍ଠାଵିଖ୍ଯାତଯଶୋଽଲଂକୃତାନାମ୍,
ନିଖିଲପାଷଣ୍ଡଷଣ୍ଡକଣ୍ଟକୋଦ୍ଧାଟନେନ ଵିଶଦୀକୃତଵେଦଵେଦାନ୍ତ-
ମାର୍ଗଷଣ୍ମତପ୍ରତିଷ୍ଠାପକାଚାର୍ଯାଣାମ୍, ଶ୍ରୀମତ୍ପରମହଂସପରିଵ୍ରାଜକ-
ଆଚାର୍ଯଵର୍ଯ-ଶ୍ରୀଜଗଦ୍ଗୁରୁ ଶ୍ରୀମଚ୍ଛଂକରଭଗଵତ୍ପାଦାଚାର୍ଯାଣାମ୍
ଅଧିଷ୍ଠାନେ ସିଂହାସନାଭିଷିକ୍ତ ଶ୍ରୀମନ୍ମହାଦେଵେନ୍ଦ୍ରସରସ୍ଵତୀ-
ସଂଯମୀନ୍ଦ୍ରାଣାମ୍, ଅନ୍ତେଵାସିଵର୍ଯ ଶ୍ରୀମଚ୍ଚନ୍ଦ୍ରଶେଖରେନ୍ଦ୍ରସରସ୍ଵତୀ
ଶ୍ରୀପାଦୈଃ ।
{କ୍ରିଯତେ ନାରାଯଣସ୍ମୃତିଃ}
ତତ୍ରଭଵାନ୍ ମୂକ ଇତି ସୁପ୍ରସିଦ୍ଧଃ ମହାକଵିଶିରୋମଣିଃ
ଶ୍ରୀକାମାକ୍ଷୀଦେଵୀକରୁଣାକଟାକ୍ଷତରଙ୍ଗିତପୁଣ୍ଯକଵିତାରସପୂରଃ
`ମୂକପଞ୍ଚଶତୀ' ଇତି କର୍ତୁର୍ନାମ୍ନା ପ୍ରସିଦ୍ଧମିମଂ ଲୋକୋତ୍ତରଂ
ଗ୍ରନ୍ଥଂ ପ୍ରଣୀଯ ଭୂମଣ୍ଡଲେଽନୁତ୍ତମଂ ପୁଣ୍ଯଯଶୋଵିଶେଷଂ ଶାଶ୍ଵତୀଂ
ପରାନନ୍ଦାନୁଭୂତିଂ ଚ ଲବ୍ଧଵାନିତି ସୁଵିଦିତମେଵ । ସ୍ତୋତ୍ରରତ୍ନେ
ଚାସ୍ମିନ୍ କାଞ୍ଚୀମଧ୍ଯଗତ କାମକୋଟିପୀଠାଧିଷ୍ଠାତ୍ରୀମ୍
ଇନ୍ଦୁମୌଲେରୈଶ୍ଵର୍ଯରୂପାଂ ଶ୍ରୀକାମାକ୍ଷୀଂ ପରଦେଵତାମ୍,
ଆରୂଢଯୌଵନାଟୋପା, ତରୁଣିମସର୍ଵସ୍ଵଂ, ନିତ୍ଯତରୁଣୀ,
ଲାଵଣ୍ଯାମୃତତରଙ୍ଗମାଲା, ଵିଭ୍ରମସମଵାଯସାରସନ୍ନାହା,
ଶୃଙ୍ଗାରାଦ୍ଵୈତତନ୍ତ୍ରସିଦ୍ଧାନ୍ତଂ, ମୀନଧ୍ଵଜତନ୍ତ୍ରପରମତାତ୍ପର୍ଯଂ\,
କନ୍ଦର୍ପସୂତିକାପାଙ୍ଗୀ, ମନସିଜସାମ୍ରାଜ୍ଯଗର୍ଵବୀଜଂ,
ପୁଷ୍ପାଯୁଧଵୀର୍ଯସରସପରିପାଟୀ, ମଦନାଗମସମଯଦୀକ୍ଷିତ-
କଟାକ୍ଷା, କୁସୁମଶରଗର୍ଵସମ୍ପତ୍କୋଶଗୃହମ୍, ଅନଙ୍ଗବ୍ରହ୍ମତତ୍ତ୍ଵ-
ବୋଧସିରା, ପଞ୍ଚଶରଶାସ୍ତ୍ରବୋଧନପରମାଚାର୍ଯଦୃଷ୍ଟିପାତା
ଇତ୍ଯାଦିରୂପେଣ ଵର୍ଣଯନ୍ ପୁନଃ ଲାଵଣ୍ଯମୃତପରକାଷ୍ଠାଭୂତାଂ
ତାମେଵ ପରଦେଵତାଂ, କାରଣପରଚିଦ୍ରୂପା, କୈଵଲ୍ଯାନନ୍ଦକନ୍ଦଃ,
ଆମ୍ନାଯରହସ୍ଯମ୍, ଉପନିଷଦରଵିନ୍ଦକୁହରମଧୁଧାରା,
ଵାଙ୍ମନୋଽତୀତା, ଆନନ୍ଦାଦ୍ଵୈତକନ୍ଦଲୀ, ମୁକ୍ତିବୀଜମ୍,
ଆଗମସଲ୍ଲାପସାରଯାଥାର୍ଥ୍ଯଂ, ବୋଧାମୃତଵୀଚୀ, ଅଭିଦାକୃତିଃ,
ଐକାତ୍ମ୍ଯପ୍ରକୃତିଃ, ନିଗମଵଚସ୍ସିଦ୍ଧାନ୍ତଃ, ଗୁରୁମୂର୍ତିଃ, ଇତ୍ଯେଵଂ-
ରୂପେଣ ସାକ୍ଷତ୍କୁର୍ଵନ୍ ଯୌଵନଶୃଙ୍ଗାରାଦିଵିଷଯରସାନୁଭଵ-
ସାମଗ୍ରୀଂ ଜ୍ଞାନଵୈରାଗ୍ଯାଦିବ୍ରହ୍ମାନନ୍ଦାନୁଭଵସାମଗ୍ରୀତ୍ଵେନ
ସମ୍ପାଦଯନ୍ -
"ଶିଵ ଶିଵ ପଶ୍ଯନ୍ତି ସମଂ ଶ୍ରୀକାମାକ୍ଷୀକଟାକ୍ଷିତାଃ ପୁରୁଷାଃ ।
ଵିପିନଂ ଭଵନମମିତ୍ରଂ ମିତ୍ରଂ ଲୋଷ୍ଟଂ ଚ ଯୁଵତିବିମ୍ବୋଷ୍ଠମ୍ ॥"

ଇତି ପରଦେଵତାନୁଗ୍ରହଫଲୀଭୂତାଂ ପରଵୈରାଗ୍ଯକାଷ୍ଠାଂ ପ୍ରକଟଯତି ।
[ଆର୍ଯା ୪୮ ]
ପଦ୍ମପଞ୍ଚଶତକାତ୍ମକେଽତ୍ର ଗ୍ରନ୍ଥେ ଶତକାନାଂ ଯା ଆନୁପୂର୍ଵୀ
ତସ୍ଯାମଯଂ ଵିଶେଷୋ ଦୃଶ୍ଯତେ । ଯଥା କଶ୍ଚନ ଶିଶୁଃ ଚକ୍ଷୁରାଦି
ଇନ୍ଦ୍ରିଯପ୍ରାଗଲ୍ଭ୍ଯାଵିର୍ଭାଵାତ୍ପୂର୍ଵଂ ମନୋଵୃତ୍ତିମାତ୍ରେଣ କଲଯତି
ସ୍ଵେପ୍ସିତମ୍ ; ଏଵମାର୍ଯାଶତକେ ଭକ୍ତଶିଶୋଃ ମନଃ ପ୍ରଵୃତ୍ତିମ୍
ଅମ୍ବିକାଯାଃ ସ୍ଵରୂପାନୁସନ୍ଧାନପଟୀଯସୀଂ ସମ୍ପାଦଯତି
କଵିପୁଙ୍ଗଵଃ ; ଅଯମାଶଯଃ -
"ଅନ୍ତରପି ବହିରପି ତ୍ଵଂ ଜନ୍ତୁତତେରନ୍ତକାନ୍ତକୃଦହନ୍ତେ ।
ଚିନ୍ତିତସନ୍ତାନଵତାଂ ସନ୍ତତମପି ତନ୍ତନୀଷି ମହିମାନମ୍ ॥"

ଇତି ଶ୍ଲୋକେନ ସୂଚିତଃ ॥ [ଆର୍ଯା ୯୮ ]

ଦ୍ଵିତୀଯଶତକେ ତାଵତ୍ ଯଥା କିଞ୍ଚିତ୍ପ୍ରଵୃଦ୍ଧଗ୍ରହଣଶକ୍ତିଃ
ବାଲକଃ ଖାନ୍ତିକେ ଵିଦ୍ଯମାନସ୍ଯ ଵସ୍ତୁନଃ ଦର୍ଶନ-
ସ୍ପର୍ଶନାଦିଭିଃ ଆହ୍ଲାଦମଧିଗଚ୍ଛତି ତଦ୍ଵତ୍ ଭକ୍ତବାଲକଃ
ଅତ୍ଯନ୍ତମଧୋଭାଗେ ଵିଦ୍ଯମାନସ୍ଯ ସ୍ଵସ୍ଯାନ୍ତିକତ୍ଵେନୈଵ
ଜଗନ୍ମାତୁଃ ନିରନ୍ତରଧ୍ଯାନଫଲୀଭୂତ ପାଦାରଵିନ୍ଦ ଦର୍ଶନ-
ଆନନ୍ଦମନୁଭଵତୀତ୍ଯଯମାଶଯଃ -
"ମରାଲୀନାଂ ଯାନାଭ୍ଯସନକଲନାମୂଲଗୁରଵେ
ଦରିଦ୍ରାଣାଂ ତ୍ରାଣଵ୍ଯତିକରସୁରୋଦ୍ଯାନତରଵେ ।
ତମସ୍କାଣ୍ଡପ୍ରୌଢିପ୍ରକଟନତିରସ୍କାରପଟଵେ
ଜନୋଽଯଂ କାମାକ୍ଷ୍ଯାଶ୍ଚରଣନଲିନାଯ ସ୍ପୃହଯତେ ॥"

ଇତି ଶ୍ଲୋକେନ ସୂଚିତଃ ॥ [ପାଦାରଵିନ୍ଦ ୩ ]

ଯଥା ମନସଃ ଜ୍ଞାନେନ୍ଦ୍ରିଯାଣାଂ ଚ ସ୍ଫୂର୍ତ୍ଯନନ୍ତରମେଵ
ଵାକ୍ପ୍ରସରତି, ତଥୈଵ ଆର୍ଯାପାଦାରଵିନ୍ଦଶତକଯୋରନନ୍ତରଂ
ସ୍ଵପ୍ରେମାସ୍ପଦଂ ଵସ୍ତୁ ନିରର୍ଗଲଂ ସ୍ତୋତୁମାରଭତେ -
"ପାଣ୍ଡିତ୍ଯଂ ପରମେଶ୍ଵରି ସ୍ତୁତିଵିଧୌ ନୈଵାଶ୍ରଯନ୍ତେ ଗିରାଂ
ଵୈରିଞ୍ଚାନ୍ଯପି ଗୁମ୍ଫନାନି ଵିଗଲଦ୍ଗର୍ଵାଣି ଶର୍ଵାଣି ତେ ।
ସ୍ତୋତୁଂ ତ୍ଵାଂ ପରିଫୁଲ୍ଲନୀଲନଲିନଶ୍ଯାମାକ୍ଷି କାମାକ୍ଷି ମାଂ
ଵାଚାଲୀକୁରୁତେ ତଥାପି ନିତରାଂ ତ୍ଵତ୍ପାଦସେଵାଦରଃ ॥"

ଇତାଦିନା ସ୍ତୁତିଶତକେନ । [ସ୍ତୁତି ୧ ]
ଲୌକିକାଵିଦ୍ଯାଦିଷୁ କୁଶଲଃ କଶ୍ଚନ ଯଥା ଲୌକିକସମ୍ପଦଃ
ପ୍ରାପ୍ତୁର୍ମହୋ ଭଵତି ତଦ୍ଵତ୍ ପୂର୍ଵକୃତସ୍ତୁତିଫଲତ୍ଵେନ ଭକ୍ତଃ
ଅମ୍ବିକାଯାଃ କଟାକ୍ଷଵିଶେଷମଧିଗମ୍ଯ ପରସଂଵିଦନୁଭୂତ୍ଯ-
ଉଚିତତେଜଃପୁଷ୍ଟ୍ଯାଦିପାତ୍ରଂ ଭଵତୀତ୍ଯଯମାଶଯଃ-
"ଅସ୍ତଂ କ୍ଷଣାନ୍ନଯତୁ ମେ ପରିତାପସୂର୍ଯ-
ମାନନ୍ଦଚନ୍ଦ୍ରମସମାନଯତାଂ ପ୍ରକାଶମ୍ ।
କାଲାନ୍ଧକାରସୁଷମାଂ କଲଯନ୍ ଦିଗନ୍ତେ
କାମାକ୍ଷି କୋମଲକଟାକ୍ଷନିଶାଗମସ୍ତେ ॥"

ଇତ୍ଯାଦିଭିର୍ଵର୍ଣନୈଃ କଟାକ୍ଷଶତକେ ସୂଚିତଃ ॥ [କଟାକ୍ଷ ୬ ]

ଯଥା ଲୌକିକସମ୍ପତ୍ସମ୍ପୂର୍ଣଃ କଶ୍ଚନ ସମଗ୍ରଯୌଵନଃ
ଲୌକିକଶୃଙ୍ଗାରସୁଖାନୁଭଵାଯ ପାତ୍ରଂ ଭଵତି, ତଦ୍ଵତ୍
ଦେଵ୍ଯାଃ ପରମାନୁଗ୍ରହପାତ୍ରୀଭୂତଃ ତଦୀଯମନ୍ଦସ୍ମିତ-
ଚନ୍ଦ୍ରିକାସନାଥଃ ଆନନ୍ଦଚନ୍ଦ୍ର ଇଵ ଅଲୌକିକ-
ନିରତିଶଯାନନ୍ଦାନୁଭଵାତ୍ମକଃ ପ୍ରକାଶତ ଇତି
ଅମୂମେଵ ଭାଵପ୍ରଣାଲିକାଂ ମହାକଵିଃ ସ୍ଵଯମେଵ
ପଞ୍ଚଶତୀପୁର୍ତିମ୍ପଦ୍ଯେନ ଆଵିଷ୍ଯକରୋତି । ଯଥା -
"ଆର୍ଯାମେଵ ଵିଭାଵଯନ୍ମନସି ଯଃ ପାଦାରଵିନ୍ଦଂ ପୁରଃ
ପଶ୍ଯନ୍ନାରଭତେ ସ୍ତୁତିଂ ସ ନିଯତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ଯା ମୃଦୁଲସ୍ମିତାଂଶୁଲହରୀଜ୍ଯୋତ୍ସ୍ନାଵଯସ୍ଯାନ୍ଵିତା-
ମାରୋହତ୍ଯପଵର୍ଗସୌଧଵଲଭୀମାନନ୍ଦଵୀଚୀମଯୀମ୍ ॥"

ଇତି । [ମନ୍ଦସ୍ମିତ ୧୦୧ ]
ଅସ୍ଯା ଲୋକୋତ୍ତରାଯାଃ ସ୍ତୁତେଃ ପଠନମାତ୍ରେଣ ତତ୍କ୍ଷଣେ
ମହାକଵିନାଽମୁନା ଅନ୍ତତଃ ପରଦେଵତଯୈଵ ଵା
ଐକାତ୍ମ୍ଯମନୁଭଵତୀଵ ସାଧକଃ ।
ତଦିଦଂ ଗ୍ରନ୍ଥରତ୍ନଂ ଦ୍ରାଵିଡଭାଷାମଯାର୍ଥାନୁଵାଦ-
ସହିତମଚିରାଦେଵ ମହତା ପରିଶ୍ରମେଣ ଭକ୍ତିଭରେଣ
ମୁଦ୍ରାପ୍ଯ ଶ୍ରୀ କାମାକ୍ଷୀ ଦେଵୀ କୁମ୍ଭାଭିଷେକ ଶୁଭ-
ମୁହୂର୍ତ ଏଵ ଉପହାରୀକୃତଵତେ, ମୁଦ୍ରାପଣଦିଵିଷଯେ ପରମଂ
ସାହାଯ୍ଯମାଚରିତଵଦ୍ଭଯଃ, ତଦ୍ଗ୍ରନ୍ଥପଠିତୃଭ୍ଯଶ୍ଚ
ଭକ୍ତପୁଙ୍ଗଵେଭ୍ଯଃ ଶ୍ରୀକାମାକ୍ଷୀକଟାକ୍ଷାଃ ସମୁଲ୍ଲ-
ସନ୍ତ୍ଵିତ୍ଯାଶାସ୍ମହେ॥

{॥ ଇତି ନାରାଯଣସ୍ମୃତିଃ ॥}


{॥ ଆର୍ଯାଶତକମ୍ ॥}
କାରଣପରଚିଦ୍ରୂପା କାଞ୍ଚୀପୁରସୀମ୍ନି କାମପୀଠଗତା ।
କାଚନ ଵିହରତି କରୁଣା କାଶ୍ମୀରସ୍ତବକକୋମଲାଙ୍ଗଲତା ॥ ୧॥

କଂଚନ କାଞ୍ଚୀନିଲଯଂ କରଧୃତକୋଦଣ୍ଡବାଣସୃଣିପାଶମ୍ ।
କଠିନସ୍ତନଭରନମ୍ରଂ କୈଵଲ୍ଯାନନ୍ଦକନ୍ଦମଵଲମ୍ବେ ॥ ୨॥

ଚିନ୍ତିତଫଲପରିପୋଷଣଚିନ୍ତାମଣିରେଵ କାଞ୍ଚିନିଲଯା ମେ ।
ଚିରତରସୁଚରିତସୁଲଭା ଚିତ୍ତଂ ଶିଶିରଯତୁ ଚିତ୍ସୁଖାଧାରା ॥ ୩॥

କୁଟିଲକଚଂ କଠିନକୁଚଂ କୁନ୍ଦସ୍ମିତକାନ୍ତି କୁଙ୍କୁମଚ୍ଛାଯମ୍ ।
କୁରୁତେ ଵିହୃତିଂ କାଞ୍ଚ୍ଯାଂ କୁଲପର୍ଵତସାର୍ଵଭୌମସର୍ଵସ୍ଵମ୍ ॥ ୪॥

ପଞ୍ଚଶରଶାସ୍ତ୍ରବୋଧନପରମାଚାର୍ଯେଣ ଦୃଷ୍ଟିପାତେନ ।
କାଞ୍ଚୀସୀମ୍ନି କୁମାରୀ କାଚନ ମୋହଯତି କାମଜେତାରମ୍ ॥ ୫॥

ପରଯା କାଞ୍ଚୀପୁରଯା ପର୍ଵତପର୍ଯାଯପୀନକୁଚଭରଯା ।
ପରତନ୍ତ୍ରା ଵଯମନଯା ପଙ୍କଜସବ୍ରହ୍ମଚାରିଲୋଚନଯା ॥ ୬॥

ଐଶ୍ଵର୍ଯମିନ୍ଦୁମୌଲେରୈକାତ୍ମ୍ଯପ୍ରକୃତି କାଞ୍ଚିମଧ୍ଯଗତମ୍ ।
ଐନ୍ଦଵକିଶୋରଶେଖରମୈଦମ୍ପର୍ଯଂ ଚକାସ୍ତି ନିଗମାନାମ୍ ॥ ୭॥

ଶ୍ରିତକମ୍ପସୀମାନଂ ଶିଥିଲିତପରମଶିଵଧୈର୍ଯମହିମାନମ୍ ।
କଲଯେ ପଟଲିମାନଂ କଂଚନ କଞ୍ଚୁକିତଭୁଵନଭୂମାନମ୍ ॥ ୮॥

ଆଦୃତକାଞ୍ଚୀନିଲଯମାଦ୍ଯାମାରୂଢଯୌଵନାଟୋପାମ୍ ।
ଆଗମଵତଂସକଲିକାମାନନ୍ଦାଦ୍ଵୈତକନ୍ଦଲୀଂ ଵନ୍ଦେ ॥ ୯॥

ତୁଙ୍ଗାଭିରାମକୁଚଭରଶୃଙ୍ଗାରିତମାଶ୍ରଯାମି କାଞ୍ଚିଗତମ୍ ।
ଗଙ୍ଗାଧରପରତନ୍ତ୍ରଂ ଶୃଙ୍ଗାରାଦ୍ଵୈତତନ୍ତ୍ରସିଦ୍ଧାନ୍ତମ୍ ॥ ୧୦॥

କାଞ୍ଚୀରତ୍ନଵିଭୂଷାଂ କାମପି କନ୍ଦର୍ପସୂତିକାପାଙ୍ଗୀମ୍ ।
ପରମାଂ କଲାମୁପାସେ ପରଶିଵଵାମାଙ୍କପୀଠିକାସୀନାମ୍ ॥ ୧୧॥

କମ୍ପାତୀଚରାଣାଂ କରୁଣାକୋରକିତଦୃଷ୍ଟିପାତାନାମ୍ ।
କେଲୀଵନଂ ମନୋ ମେ କେଷାଂଚିଦ୍ଭଵତୁ ଚିଦ୍ଵିଲାସାନାମ୍ ॥ ୧୨॥

ଆମ୍ରତରୁମୂଲଵସତେରାଦିମପୁରୁଷସ୍ଯ ନଯନପୀଯୂଷମ୍ ।
ଆରବ୍ଧଯୌଵନୋତ୍ସଵମାମ୍ନାଯରହସ୍ଯମନ୍ତରଵଲମ୍ବେ ॥ ୧୩॥

ଅଧିକାଞ୍ଚି ପରମଯୋଗିଭିରାଦିମପରପୀଠସୀମ୍ନି ଦୃଶ୍ଯେନ ।
ଅନୁବଦ୍ଧଂ ମମ ମାନସମରୁଣିମସର୍ଵସ୍ଵସମ୍ପ୍ରଦାଯେନ ॥ ୧୪॥

ଅଙ୍କିତଶଂକରଦେହାମଙ୍କୁରିତୋରୋଜକଙ୍କଣାଶ୍ଲେଷୈଃ ।
ଅଧିକାଞ୍ଚି ନିତ୍ଯତରୁଣୀମଦ୍ରାକ୍ଷଂ କାଂଚିଦଦ୍ଭୁତାଂ ବାଲାମ୍ ॥ ୧୫॥

ମଧୁରଧନୁଷା ମହୀଧରଜନୁଷା ନନ୍ଦାମି ସୁରଭିବାଣଜୁଷା ।
ଚିଦ୍ଵପୁଷା କାଞ୍ଚିପୁରେ କେଲିଜୁଷା ବନ୍ଧୁଜୀଵକାନ୍ତିମୁଷା ॥ ୧୬॥

ମଧୁରସ୍ମିତେନ ରମତେ ମାଂସଲକୁଚଭାରମନ୍ଦଗମନେନ ।
ମଧ୍ଯେକାଞ୍ଚି ମନୋ ମେ ମନସିଜସାମ୍ରାଜ୍ଯଗର୍ଵବୀଜେନ ॥ ୧୭॥

ଧରଣିମଯୀଂ ତରଣିମଯୀଂ ପଵନମଯୀଂ ଗଗନଦହନହୋତୃମଯୀମ୍ ।
ଅମ୍ବୁମଯୀମିନ୍ଦୁମଯୀମମ୍ବାମନୁକମ୍ପମାଦିମାମୀକ୍ଷେ ॥ ୧୮॥

ଲୀନସ୍ଥିତି ମୁନିହୃଦଯେ ଧ୍ଯାନସ୍ତିମିତଂ ତପସ୍ଯଦୁପକମ୍ପମ୍ ।
ପୀନସ୍ତନଭରମୀଡେ ମୀନଧ୍ଵଜତନ୍ତ୍ରପରମତାତ୍ପର୍ଯମ୍ ॥ ୧୯॥

ଶ୍ଵେତା ମନ୍ଥରହସିତେ ଶାତା ମଧ୍ଯେ ଚ ଵାଡ୍ଭନୋଽତୀତା ।
ଶୀତା ଲୋଚନପାତେ ସ୍ଫୀତା କୁଚସୀମ୍ନି ଶାଶ୍ଵତୀ ମାତା ॥ ୨୦॥

ପୁରତଃ କଦା ନ କରଵୈ ପୁରଵୈରିଵିମର୍ଦପୁଲକିତାଙ୍ଗଲତାମ୍ ।
ପୁନତୀଂ କାଞ୍ଚୀଦେଶଂ ପୁଷ୍ପାଯୁଧଵୀର୍ଯସରସପରିପାଟୀମ୍ ॥ ୨୧॥

ପୁଣ୍ଯା କାଽପି ପୁରନ୍ଧ୍ରୀ ପୁଙ୍ଖିତକନ୍ଦର୍ପସମ୍ପଦା ଵପୁଷା ।
ପୁଲିନଚରୀ କମ୍ପାଯାଃ ପୁରମଥନଂ ପୁଲକନିଚୁଲିତଂ କୁରୁତେ ॥ ୨୨॥

ତନିମାଦ୍ଵୈତଵଲଗ୍ନଂ ତରୁଣାରୁଣସମ୍ପ୍ରଦାଯତନୁଲେଖମ୍ ।
ତଟସୀମନି କମ୍ପାଯାସ୍ତରୁଣିମସର୍ଵସ୍ଵମାଦ୍ଯମଦ୍ରାକ୍ଷମ୍ ॥ ୨୩॥

ପୌଷ୍ଟିକକର୍ମଵିପାକଂ ପୌଷ୍ପଶରଂ ସଵିଧସୀମ୍ନି କମ୍ପାଯାଃ ।
ଅଦ୍ରାକ୍ଷମାତ୍ତଯୌଵନମଭ୍ଯୁଦଯଂ କଂଚିଦର୍ଧଶଶିମୌଲୈଃ ॥ ୨୪॥

ସଂଶ୍ରିତକାଞ୍ଚୀଦେଶେ ସରସିଜଦୌର୍ଭାଗ୍ଯଜାଗ୍ରଦୁତ୍ତଂସେ ।
ସଂଵିନ୍ମଯେ ଵିଲୀଯେ ସାରସ୍ଵତପୁରୁଷକାରସାମ୍ରାଜ୍ଯେ ॥ ୨୫॥

ମୋଦିତମଧୁକରଵିଶିଖଂ ସ୍ଵାଦିମସମୁଦାଯସାରକୋଦଣ୍ଡମ୍ ।
ଆଦୃତକାଞ୍ଚୀଖେଲନମାଦିମମାରୁଣ୍ଯଭେଦମାକଲଯେ ॥ ୨୬॥

ଉରରୀକୃତକାଞ୍ଚିପୁରୀମୁପନିଷଦରଵିନ୍ଦକୁହରମଧୁଧାରାମ୍ ।
ଉନ୍ନମ୍ରସ୍ତନକଲଶୀମୁତ୍ସଵଲହରୀମୁପାସ୍ମହେ ଶମ୍ଭୋଃ ॥ ୨୭॥

ଏଣଶିଶୁଦୀର୍ଘଲୋଚନମେନଃପରିପନ୍ଥି ସନ୍ତତଂ ଭଜତାମ୍ ।
ଏକାମ୍ରନାଥଜୀଵିତମେଵମ୍ପଦଦୂରମେକମଵଲମ୍ବେ ॥ ୨୮॥

ସ୍ମଯମାନମୁଖଂ କାଞ୍ଚୀଭଯମାନଂ କମପି ଦେଵତାଭେଦମ୍ ।
ଦଯମାନଂ ଵୀକ୍ଷ୍ଯ ମୁହୁର୍ଵଯମାନନ୍ଦାମୃତାମ୍ବୁଧୌ ମଗ୍ନାଃ ॥ ୨୯॥

କୁତୁକଜୁଷି କାଞ୍ଚିଦେଶେ କୁମୁଦତପୋରାଶିପାକଶେଖରିତେ ।
କୁରୁତେ ମନୋଵିହାରଂ କୁଲଗିରିପରିବୃଢକୁଲୈକମଣିଦୀପେ ॥ ୩୦॥

ଵୀକ୍ଷେମହି କାଞ୍ଚିପୁରେ ଵିପୁଲସ୍ତନକଲଶଗରିମପରଵଶିତମ୍ ।
ଵିଦ୍ରୁମସହଚରଦେହଂ ଵିଭ୍ରମସମଵାଯସାରସନ୍ନାହମ୍ ॥ ୩୧॥

କୁରୁଵିନ୍ଦଗୋତ୍ରଗାତ୍ରଂ କୂଲଚରଂ କମପି ନୌମି କମ୍ପାଯାଃ ।
କୂଲଂକଷକୁଚକୁମ୍ଭଂ କୁସୁମାଯୁଧଵୀର୍ଯସାରସଂରମ୍ଭମ୍ ॥ ୩୨॥

କୁଡୂମଲିତକୁଚକିଶୋରୈଃ କୁର୍ଵାଣୈଃ କାଞ୍ଚିଦେଶସୌହାର୍ଦମ୍ ।
କୁଙ୍କୁମଶୋଣୈର୍ନିଚିତଂ କୁଶଲପଥଂ ଶମ୍ଭୁସୁକୃତସମ୍ଭାରୈଃ ॥ ୩୩॥

ଅଙ୍କିତକଚେନ କେନଚିଦନ୍ଧଂକରଣୌଷଧେନ କମଲାନାମ୍ ।
ଅନ୍ତଃପୁରେଣ ଶମ୍ଭୋରଲଂକ୍ରିଯା କାଽପି କଲ୍ପ୍ଯତେ କାଞ୍ଚ୍ଯାମ୍ ॥ ୩୪॥

ଊରୀକରୋମି ସନ୍ତତମୂଷ୍ମଲଫାଲେନ ଲଲିତଂ ପୁଂସା ।
ଉପକମ୍ପମୁଚିତଖେଲନମୁର୍ଵୀଧରଵଂଶସମ୍ପଦୁନ୍ମେଷମ୍ ॥ ୩୫॥

ଅଙ୍କୁରିତସ୍ତନକୋରକମଙ୍କାଲଂକାରମେକଚୂତପତେଃ ।
ଆଲୋକେମହି କୋମଲମାଗମସଂଲାପସାରଯାଥାର୍ଥ୍ଯମ୍ ॥ ୩୬॥

ପୁଞ୍ଜିତକରୁଣମୁଦଞ୍ଚିତଶିଞ୍ଜିତମଣିକାଞ୍ଚି କିମପି କାଞ୍ଚିପୁରେ ।
ମଞ୍ଜରିତମୃଦୁଲହାସଂ ପିଞ୍ଜରତନୁରୁଚି ପିନାକିମୂଲଧନମ୍ ॥ ୩୭॥

ଲୋଲହୃଦଯୋଽସ୍ତି ଶମ୍ଭୋର୍ଲୋଚନଯୁଗଲେନ ଲେହ୍ଯମାନାଯାମ୍ ।
ଲଲିତପରମଶିଵାଯାଂ ଲାଵଣ୍ଯାମୃତତରଙ୍ଗମାଲାଯାମ୍ ॥ ୩୮॥

ମଧୁକରସହଚରଚିକୁରୈର୍ମଦନାଗମସମଯଦୀକ୍ଷିତକଟାକ୍ଷୈଃ ।
ମଣ୍ଡିତକମ୍ପାତୀରୈର୍ମଙ୍ଗଲକନ୍ଦୈର୍ମମାସ୍ତୁ ସାରୂପ୍ଯମ୍ ॥ ୩୯॥

ଵଦନାରଵିନ୍ଦଵକ୍ଷୋଵାମାଙ୍କତଟୀଵଶଂଵଦୀଭୂତା ।
ପୂରୁଷତ୍ରିତଯେ ତ୍ରେଧା ପୁରନ୍ଧ୍ରିରୂପା ତ୍ଵମେଵ କାମାକ୍ଷି ॥ ୪୦॥

ବାଧାକରୀଂ ଭଵାବ୍ଧେରାଧାରାଦ୍ଯମ୍ବୁଜେଷୁ ଵିଚରନ୍ତୀମ୍ ।
ଆଧାରୀକୃତକାଞ୍ଚୀ ବୋଧାମୃତଵୀଚିମେଵ ଵିମୃଶାମଃ ॥ ୪୧॥

କଲଯାମ୍ଯନ୍ତଃ ଶଶଧରକଲଯାଽଙ୍କିତମୌଲିମମଲଚିଦ୍ଵଲଯାମ୍ ।
ଅଲଯାମାଗମପୀଠୀନିଲଯାଂ ଵଲଯାଙ୍କସୁନ୍ଦରୀମମ୍ବାମ୍ ॥ ୪୨॥

ଶର୍ଵାଦିପରମସାଧକଗୁର୍ଵାନୀତାଯ କାମପୀଠଜୁଷେ ।
ସର୍ଵାକୃତଯେ ଶୋଣିମଗର୍ଵାଯାସ୍ମୈ ସମର୍ପ୍ଯତେ ହୃଦଯମ୍ ॥ ୪୩॥

ସମଯା ସାନ୍ଧ୍ଯମଯୂଖୈଃ ସମଯା ବୁଦ୍ଧଯା ସଦୈଵ ଶୀଲିତଯା ।
ଉମଯା କାଞ୍ଚୀରତଯା ନ ମଯା ଲଭ୍ଯତେ କିଂ ନୁ ତାଦାତ୍ମ୍ଯମ୍ ॥ ୪୪॥

ଜନ୍ତୋସ୍ତଵ ପଦପୂଜନସନ୍ତୋଷତରଙ୍ଗିତସ୍ଯ କାମାକ୍ଷି ।
ଵନ୍ଧୋ ଯଦି ଭଵତି ପୁନଃ ସିନ୍ଧୋରମ୍ଭସ୍ସୁ ବମ୍ଭ୍ରମୀତି ଶିଲା ॥ ୪୫॥

କୁଣ୍ଡଲି କୁମାରି କୁଟିଲେ ଚଣ୍ଡି ଚରାଚରସଵିତ୍ରି ଚାମୁଣ୍ଡେ ।
ଗୁଣିନି ଗୁହାରିଣି ଗୁହ୍ଯେ ଗୁରୁମୂର୍ତେ ତ୍ଵାଂ ନମାମି କାମାକ୍ଷି ॥ ୪୬॥

ଅଭିଦାକୃତିର୍ଭିଦାକୃତିରଚିଦାକୃତିରପି ଚିଦାକୃତିର୍ମାତଃ ।
ଅନହନ୍ତା ତ୍ଵମହନ୍ତା ଭ୍ରମଯସି କାମାକ୍ଷି ଶାଶ୍ଵତୀ ଵିଶ୍ଵମ୍ ॥ ୪୭॥

ଶିଵ ଶିଵ ପଶ୍ଯନ୍ତି ସମଂ ଶ୍ରୀକାମାକ୍ଷୀକଟାକ୍ଷିତାଃ ପୁରୁଷାଃ ।
ଵିପିନଂ ଭଵନମମିତ୍ରଂ ମିତ୍ରଂ ଲୋଷ୍ଟଂ ଚ ଯୁଵତିବିମ୍ବୋଷ୍ଠମ୍ ॥ ୪୮॥

କାମପରିପନ୍ଥିକାମିନି କାମେଶ୍ଵରି କାମପୀଠମଧ୍ଯଗତେ ।
କାମଦୁଘା ଭଵ କମଲେ କାମକଲେ କାମକୋଟି କାମାକ୍ଷି ॥ ୪୯॥

ମଧ୍ଯେହୃଦଯଂ ମଧ୍ଯେନିଟିଲଂ ମଧ୍ଯେଶିରୋଽପି ଵାସ୍ତଵ୍ଯାମ୍ ।
ଚଣ୍ଡକରଶକ୍ରକାର୍ମୁକଚନ୍ଦ୍ରସମାଭାଂ ନମାମି କାମାକ୍ଷୀମ୍ ॥ ୫୦॥

ଅଧିକାଞ୍ଚି କେଲିଲୋଲୈରଖିଲାଗମଯନ୍ତ୍ରତନ୍ତ୍ରମଯୈଃ ।
ଅତିଶୀତଂ ମମ ମାନସମସମଶରଦ୍ରୋହିଜୀଵନୋପାଯୈଃ ॥ ୫୧॥

ନନ୍ଦତି ମମ ହୃଦି କାଚନ ମନ୍ଦିରଯନ୍ତା ନିରନ୍ତରଂ କାଞ୍ଚୀମ୍ ।
ଇନ୍ଦୁରଵିମଣ୍ଡଲକୁଚା ବିନ୍ଦୁଵିଯନ୍ନାଦପରିଣତା ତରୁଣୀ ॥ ୫୨॥

ଶମ୍ପାଲତାସଵର୍ଣଂ ସମ୍ପାଦଯିତୁଂ ଭଵଜ୍ଵରଚିକିତ୍ସାମ୍ ।
ଲିମ୍ପାମି ମନସି କିଂଚନ କମ୍ପାତଟରୋହି ସିଦ୍ଧଭୈଷଜ୍ଯମ୍ ॥ ୫୩॥

ଅନୁମିତକୁଚକାଠିନ୍ଯାମଧିଵକ୍ଷଃପୀଠମଙ୍ଗଜନ୍ମରିପୋଃ ।
ଆନନ୍ଦଦାଂ ଭଜେ ତାମାନଙ୍ଗବ୍ରହ୍ମତତ୍ଵବୋଧସିରାମ୍ ॥ ୫୪॥

ଐକ୍ଷିଷି ପାଶାଙ୍କୁଶଧରହସ୍ତାନ୍ତଂ ଵିସ୍ମଯାର୍ହଵୃତ୍ତାନ୍ତମ୍ ।
ଅଧିକାଞ୍ଚି ନିଗମଵାଚାଂ ସିଦ୍ଧାନ୍ତଂ ଶୂଲପାଣିଶୁଦ୍ଧାନ୍ତମ୍ ॥ ୫୫॥

ଆହିତଵିଲାସଭଙ୍ଗୀମାବ୍ରହ୍ମସ୍ତମ୍ବଶିଲ୍ପକଲ୍ପନଯା ।
ଆଶ୍ରିତକାଞ୍ଚୀମତୁଲାମାଦ୍ଯାଂ ଵିସ୍ଫୂର୍ତିମାଦ୍ରିଯେ ଵିଦ୍ଯାମ୍ ॥ ୫୬॥

ମୂକୋଽପି ଜଟିଲଦୁର୍ଗତିଶୋକୋଽପି ସ୍ମରତି ଯଃ କ୍ଷଣଂ ଭଵତୀମ୍ ।
ଏକୋ ଭଵତି ସ ଜନ୍ତୁର୍ଲୋକୋତ୍ତରକୀର୍ତିରେଵ କାମାକ୍ଷି ॥ ୫୭॥

ପଞ୍ଚଦଶଵର୍ଣରୂପଂ କଂଚନ କାଞ୍ଚୀଵିହାରଧୌରେଯମ୍ ।
ପଞ୍ଚଶରୀଯଂ ଶମ୍ଭୋର୍ଵଞ୍ଚନଵୈଦଗ୍ଧ୍ଯମୂଲମଵଲମ୍ବେ ॥ ୫୮॥

ପରିଣତିମତୀଂ ଚତୁର୍ଧା ପଦଵୀଂ ସୁଧିଯାଂ ସମେତ୍ଯ ସୌଷୁମ୍ନୀମ୍ ।
ପଞ୍ଚାଶଦର୍ଣକଲ୍ପିତମଦଶିଲ୍ପାଂ ତ୍ଵାଂ ନମାମି କାମାକ୍ଷି ॥ ୫୯॥

ଆଦିକ୍ଷନ୍ମମ ଗୁରୁରାଡାଦିକ୍ଷାନ୍ତାକ୍ଷରାତ୍ମିକାଂ ଵିଦ୍ଯାମ୍ ।
ସ୍ଵାଦିଷ୍ଠଚାପଦଣ୍ଡାଂ ନେଦିଷ୍ଠାମେଵ କାମପୀଠଗତାମ୍ ॥ ୬୦॥

ତୁଷ୍ଯାମି ହର୍ଷିତସ୍ମରଶାସନଯା କାଞ୍ଚିପୁରକୃତାସନଯା ।
ସ୍ଵାସନଯା ସକଲଜଗଦ୍ଭାସନଯା କଲିତଶମ୍ବରାସନଯା ॥ ୬୧॥

ପ୍ରେମଵତୀ କମ୍ପାଯାଂ ସ୍ଥେମଵତୀ ଯତିମନସ୍ସୁ ଭୂମଵତୀ ।
ସାମଵତୀ ନିତ୍ଯଗିରା ସୋମଵତୀ ଶିରସି ଭାତି ହୈମଵତୀ ॥ ୬୨॥

କୌତୁକିନା କମ୍ପାଯାଂ କୌସୁମଚାପେନ କୀଲିତେନାନ୍ତଃ ।
କୁଲଦୈଵତେନ ମହତା କୁଡ୍ମଲମୁଦ୍ରାଂ ଧୁନୋତୁ ନଃପ୍ରତିଭା ॥ ୬୩॥

ଯୂନା କେନାପି ମିଲଦ୍ଦେହା ସ୍ଵାହାସହାଯତିଲକେନ ।
ସହକାରମୂଲଦେଶେ ସଂଵିଦ୍ରୂପା କୁଟୁମ୍ବିନୀ ରମତେ ॥ ୬୪॥

କୁସୁମଶରଗର୍ଵସମ୍ପତ୍କୋଶଗୃହଂ ଭାତି କାଞ୍ଚିଦେଶଗତମ୍ ।
ସ୍ଥାପିତମସ୍ମିନ୍କଥମପି ଗୋପିତମନ୍ତର୍ମଯା ମନୋରତ୍ନମ୍ ॥ ୬୫॥

ଦଗ୍ଧଷଡଧ୍ଵାରଣ୍ଯଂ ଦରଦଲିତକୁସୁମ୍ଭସମ୍ଭୃତାରୁଣ୍ଯମ୍ ।
କଲଯେ ନଵତାରୁଣ୍ଯଂ କମ୍ପାତଟସୀମ୍ନି କିମପି କାରୁଣ୍ଯମ୍ ॥ ୬୬॥

ଅଧିକାଞ୍ଚି ଵର୍ଧମାନାମତୁଲାଂ କରଵାଣି ପାରଣାମକ୍ଷ୍ଣୋଃ ।
ଆନନ୍ଦପାକଭେଦାମରୁଣିମପରିଣାମଗର୍ଵପଲ୍ଲଵିତାମ୍ ॥ ୬୭॥

ବାଣସୃଣିପାଶକାର୍ମୁକପାଣିମମୁଂ କମପି କାମପୀଠଗତମ୍ ।
ଏଣଧରକୋଣଚୂଡଂ ଶୋଣିମପରିପାକଭେଦମାକଲଯେ ॥ ୬୮॥

କିଂ ଵା ଫଲତି ମମାନ୍ଯୌର୍ବିମ୍ବାଧରଚୁମ୍ବିମନ୍ଦହାସମୁଖୀ ।
ସମ୍ବାଧକରୀ ତମସାମମ୍ବା ଜାଗର୍ତି ମନସି କାମାକ୍ଷୀ ॥ ୬୯॥

ମଞ୍ଚେ ସଦାଶିଵମଯେ ପରିଶିଵମଯଲଲିତପୌଷ୍ପପର୍ଯଙ୍କେ ।
ଅଧିଚକ୍ରମଧ୍ଯମାସ୍ତେ କାମାକ୍ଷୀ ନାମ କିମପି ମମ ଭାଗ୍ଯମ୍ ॥ ୭୦॥

ରକ୍ଷ୍ଯୋଽସ୍ମି କାମପୀଠୀଲାସିକଯା ଘନକୃପାମ୍ବୁରାଶିକଯା ।
ଶ୍ରୁତିଯୁଵତିକୁନ୍ତଲୀମଣିମାଲିକଯା ତୁହିନଶୈଲବାଲିକଯା ॥ ୭୧॥

ଲୀଯେ ପୁରହରଜାଯେ ମାଯେ ତଵ ତରୁଣପଲ୍ଲଵଚ୍ଛାଯେ ।
ଚରଣେ ଚନ୍ଦ୍ରାଭରଣେ କାଞ୍ଚୀଶରଣେ ନତାର୍ତିସଂହରଣେ ॥ ୭୨॥

ମୂର୍ତିମତି ମୁକ୍ତିବୀଜେ ମୂର୍ଧ୍ନି ସ୍ତବକିତଚକୋରସାମ୍ରାଜ୍ଯେ ।
ମୋଦିତକମ୍ପାକୂଲେ ମୁହୁର୍ମୁହୁର୍ମନସି ମୁମୁଦିଷାଽସ୍ମାକମ୍ ॥ ୭୩॥

ଵେଦମଯୀଂ ନାଦମଯୀଂ ବିନ୍ଦୁମଯୀଂ ପରପଦୋଦ୍ଯଦିନ୍ଦୁମଯୀମ୍ ।
ମନ୍ତ୍ରମଯୀଂ ତନ୍ତ୍ରମଯୀଂ ପ୍ରକୃତିମଯୀଂ ନୌମି ଵିଶ୍ଵଵିକୃତିମଯୀମ୍ ॥ ୭୪॥

ପୁରମଥନପୁଣ୍ଯକୋଟୀ ପୁଞ୍ଜିତକଵିଲୋକସୂକ୍ତିରସଧାଟୀ ।
ମନସି ମମ କାମକୋଟୀ ଵିହରତୁ କରୁଣାଵିପାକପରିପାଟୀ ॥ ୭୫॥

କୁଟିଲଂ ଚଟୁଲଂ ପୃଥୁଲଂ ମୃଦୁଲଂ କଚନଯନଜଘନଚରଣେଷୁ ।
ଅଵଲୋକିତମଵଲମ୍ବିତମଧିକମ୍ପାତଟମମେଯମସ୍ମାଭିଃ ॥ ୭୬॥

ପ୍ରତ୍ଯଙ୍ମୁଖ୍ଯା ଦୃଷ୍ଟଯା ପ୍ରସାଦଦୀପାଙ୍କୁରେଣ କାମାକ୍ଷ୍ଯାଃ ।
ପଶ୍ଯାମି ନିସ୍ତୁଲମହୋ ପଚେଲିମଂ କମପି ପରଶିଵୋଲ୍ଲାସମ୍ ॥ ୭୭॥

ଵିଦ୍ଯେ ଵିଧାତୃଵିଷଯେ କାତ୍ଯାଯନି କାଲି କାମକୋଟିକଲେ ।
ଭାରତି ଭୈରଵି ଭଦ୍ରେ ଶାକିନି ଶାମ୍ଭଵି ଶିଵେ ସ୍ତୁଵେ ଭଵତୀମ୍ ॥ ୭୮॥

ମାଲିନି ମହେଶଚାଲିନି କାଞ୍ଚୀଖେଲିନି ଵିପକ୍ଷକାଲିନି ତେ ।
ଶୂଲିନି ଵିଦ୍ରୁମଶାଲିନି ସୁରଜନପାଲିନି କପାଲିନି ନମୋଽସ୍ତୁ ॥ ୭୯॥

ଦେଶିକ ଇତି କିଂ ଶଂକେ ତତ୍ତାଦୃକ୍ତଵ ନୁ ତରୁଣିମୋନ୍ମେଷଃ ।
କାମାକ୍ଷି ଶୂଲପାଣେଃ କାମାଗମସମଯଦୀକ୍ଷାଯାମ୍ ॥ ୮୦॥

ଵେତଣ୍ଡକୁମ୍ଭଡମ୍ବରଵୈତଣ୍ଡିକକୁଚଭରାର୍ତମଧ୍ଯାଯ ।
କୁଙ୍କୁମରୁଚେ ନମସ୍ଯାଂ ଶଂକରନଯନାମୃତାଯ ରଚଯାମଃ ॥ ୮୧॥

ଅଧିକାଞ୍ଚିତମଣିକାଞ୍ଚନକାଞ୍ଚୀମଧିକାଞ୍ଚି କାଂଚିଦଦ୍ରାକ୍ଷମ୍ ।
ଅଵନତଜନାନୁକମ୍ପାମନୁକମ୍ପାକୂଲମସ୍ମଦନୁକୂଲାମ୍ ॥ ୮୨॥

ପରିଚିତକମ୍ପାତୀରଂ ପର୍ଵତରାଜନ୍ଯସୁକୃତସନ୍ନାହମ୍ ।
ପରଗୁରୁକୃପଯା ଵୀକ୍ଷେ ପରମଶିଵୋତ୍ସଙ୍ଗମଙ୍ଗଲାଭରଣମ୍ ॥ ୮୩॥

ଦଗ୍ଧମଦନସ୍ଯ ଶମ୍ଭୋଃ ପ୍ରଥୀଯସୀଂ ବ୍ରହ୍ମଚର୍ଯଵୈଦଗ୍ଧୀମ୍ ।
ତଵ ଦେଵି ତରୁଣିମଶ୍ରୀଚତୁରିମପାକୋ ନ ଚକ୍ଷମେ ମାତଃ ॥ ୮୪॥

ମଦଜଲତମାଲପତ୍ରା ଵସନିତପତ୍ରା କରାଦୃତଖାନିତ୍ରା ।
ଵିହରତି ପୁଲିନ୍ଦଯୋଷା ଗୁଞ୍ଜାଭୂଷା ଫଣୀନ୍ଦ୍ରକୃତଵେଷା ॥ ୮୫॥

ଅଙ୍କେ ଶୁକିନୀ ଗୀତେ କୌତୁକିନୀ ପରିସରେ ଚ ଗାଯକିନୀ ।
ଜଯସି ସଵିଧେଽମ୍ବ ଭୈରଵମଣ୍ଡଲିନୀ ଶ୍ରଵସି ଶଙ୍ଖକୁନ୍ଡଲିନୀ ॥ ୮୬॥

ପ୍ରଣତଜନତାପଵର୍ଗା କୃତବହୁସର୍ଗା ସସିଂହସଂସର୍ଗା ।
କାମାକ୍ଷି ମୁଦିତଭର୍ଗା ହତରିପୁଵର୍ଗା ତ୍ଵମେଵ ସା ଦୁର୍ଗା ॥ ୮୭॥

ଶ୍ରଵଣଚଲଦ୍ଵେତଣ୍ଡା ସମରୋଦ୍ଦଣ୍ଡା ଧୁତାସୁରଶିଖଣ୍ଡା ।
ଦେଵି କଲିତାନ୍ତ୍ରଷଣ୍ଡା ଧୃତନରମୁଣ୍ଡା ତ୍ଵମେଵ ଚାମୁଣ୍ଡା ॥ ୮୮॥

ଉର୍ଵୀଧରେନ୍ଦ୍ରକନ୍ଯେ ଦର୍ଵୀଭରିତେନ ଭକ୍ତପୂରେଣ ।
ଗୁର୍ଵୀମକିଂଚନାର୍ତି ଖର୍ଵୀକୁରୁଷେ ତ୍ଵମେଵ କାମାକ୍ଷି ॥ ୮୯॥

ତାଡିତରିପୁପରିପୀଡନଭଯହରଣ ନିପୁଣହଲମୁସଲା ।
କ୍ରୋଡପତିଭୀଷଣମୁଖୀ କ୍ରୀଡସି ଜଗତି ତ୍ଵମେଵ କାମାକ୍ଷି ॥ ୯୦॥

ସ୍ମରମଥନଵରଣଲୋଲା ମନ୍ମଥହେଲାଵିଲାସମଣିଶାଲା ।
କନକରୁଚିଚୌର୍ଯଶୀଲା ତ୍ଵମମ୍ବ ବାଲା କରାବ୍ଜଧୃତମାଲା ॥ ୯୧॥

ଵିମଲପଟୀ କମଲକୁଟୀ ପୁସ୍ତକରୁଦ୍ରାକ୍ଷଶସ୍ତହସ୍ତପୁଟୀ ।
କାମାକ୍ଷି ପକ୍ଷ୍ମଲାକ୍ଷୀ କଲିତଵିପଞ୍ଚୀ ଵିଭାସି ଵୈରିଞ୍ଚୀ ॥ ୯୨॥

କୁଙ୍କୁମରୁଚିପିଙ୍ଗମସୃକ୍ପଙ୍କିଲମୁଣ୍ଡାଲିମଣ୍ଡିତଂ ମାତଃ ।
ଶ୍ରୀକାମାକ୍ଷି ତଦୀଯସଙ୍ଗମକଲାମନ୍ଦୀଭଵତ୍କୌତୁକଃ
ଜଯତି ତଵ ରୂପଧେଯଂ ଜପପଟପୁସ୍ତକଵରାଭଯକରାବ୍ଜମ୍ ॥ ୯୩॥

କନକମଣିକଲିତଭୂଷାଂ କାଲାଯସକଲହଶୀଲକାନ୍ତିକଲାମ୍ ।
କାମାକ୍ଷି ଶୀଲଯେ ତ୍ଵାଂ କପାଲଶୂଲାଭିରାମକରକମଲାମ୍ ॥ ୯୪॥

ଲୋହିତିମପୁଞ୍ଜମଧ୍ଯେ ମୋହିତଭୁଵନେ ମୁଦା ନିରୀକ୍ଷନ୍ତେ ।
ଵଦନଂ ତଵ କୁଵଯୁଗଲଂ କାଞ୍ଚୀସୀମାଂ ଚ କେଽପି କାମାକ୍ଷି ॥ ୯୫॥

ଜଲଧିଦ୍ଵିଗୁଣିତହୁତବହଦିଶାଦିନେଶ୍ଵରକଲାଶ୍ଵିନେଯଦଲୈଃ ।
ନଲିନୈର୍ମହେଶି ଗଚ୍ଛସି ସର୍ଵୋତ୍ତରକରକମଲଦଲମମଲମ୍ ॥ ୯୬॥

ସତ୍କୃତଦେଶିକଚରଣାଃ ସବୀଜନିର୍ବୀଜଯୋଗନିଶ୍ରେଣ୍ଯା ।
ଅପଵର୍ଗସୌଧଵଲଭୀମାରୋହନ୍ତ୍ଯମ୍ବ କେଽପି ତଵ କୃପଯା ॥ ୯୭॥

ଅନ୍ତରପି ବହିରପି ତ୍ଵଂ ଜନ୍ତୁତତେରନ୍ତକାନ୍ତକୃଦହନ୍ତେ ।
ଚିନ୍ତିତସନ୍ତାନଵତାଂ ସନ୍ତତମପି ତନ୍ତନୀଷି ମହିମାନମ୍ ॥ ୯୮॥

କଲମଞ୍ଜୁଲଵାଗନୁମିତଗଲପଞ୍ଜରଗତଶୁକଗ୍ରହୌତ୍କଣ୍ଠ୍ଯାତ୍ ।
ଅମ୍ବ ରଦନାମ୍ବରଂ ତେ ବିମ୍ବଫଲଂ ଶମ୍ବରାରିଣା ନ୍ଯସ୍ତମ୍ ॥ ୯୯॥

ଜଯ ଜଯ ଜଗଦମ୍ବ ଶିଵେ ଜଯ ଜଯ କାମାକ୍ଷି ଜଯ ଜଯାଦ୍ରିସୁତେ ।
ଜଯ ଜଯ ମହେଶଦଯିତେ ଜଯ ଜଯ ଚିଦ୍ଗଗନକୌମୁଦୀଧାରେ ॥ ୧୦୦॥

ଆର୍ଯାଶତକଂ ଭକ୍ତ୍ଯା ପଠତାମାର୍ଯାକଟାକ୍ଷେଣ ।
ନିସ୍ସରତି ଵଦନକମଲାଦ୍ଵାଣୀ ପୀଯୂଷଧୋରଣୀ ଦିଵ୍ଯା ॥ ୧୦୧॥

{ଆର୍ଯାଶତକଂ ସମ୍ପୂର୍ଣମ୍ ॥}



{॥ ପାଦାରଵିନ୍ଦଶତକମ୍ ॥}
ମହିମ୍ନଃ ପନ୍ଥାନଂ ମଦନପରିପନ୍ଥିପ୍ରଣଯିନି
ପ୍ରଭୁର୍ନିର୍ଣେତୁଂ ତେ ଭଵତି ଯତମାନୋଽପି କତମଃ ।
ତଥାପି ଶ୍ରୀକାଞ୍ଚୀଵିହୃତିରସିକେ କୋଽପି ମନସୋ
ଵିପାକସ୍ତ୍ଵତ୍ପାଦସ୍ତୁତିଵିଧିଷୁ ଜଲ୍ପାକଯତି ମାମ୍ ॥ ୧॥

ଗଲଗ୍ରାହୀ ପୌରନ୍ଦରପୁରଵନୀପଲ୍ଲଵରୁଚାଂ
ଧୃତପାଥମ୍ଯାନାମରୁଣମହସାମାଦିମଗୁରୁଃ ।
ସମିନ୍ଧେ ବନ୍ଧୂକସ୍ତବକସହଯୁଧ୍ଵା ଦିଶି ଦିଶି
ପ୍ରସର୍ପନ୍କାମାକ୍ଷ୍ଯାଶ୍ଚରଣକିରଣାନାମରୁଣିମା ॥ ୨॥

ମରାଲୀନାଂ ଯାନାଭ୍ଯସନକଲନାମୂଲଗୁରଵେ
ଦରିଦ୍ରାଣାଂ ତ୍ରାଣଵ୍ଯତିକରସୁରୋଦ୍ଯାନତରଵେ ।
ତମସ୍କାଣ୍ଡପ୍ରୌଢିପ୍ରକଟନତିରସ୍କାରପଟଵେ
ଜନୋଽଯଂ କାମାକ୍ଷ୍ଯାଶ୍ଚରଣନଲିନାଯ ସ୍ପୃହଯତେ ॥ ୩॥

ଵହନ୍ତୀ ସୈନ୍ଦୂରୀଂ ସରଣିମଵନମ୍ରାମରପୁୀ-
ପୁରନ୍ଧ୍ରୀସୀମନ୍ତେ କଵିକମଲବାଲାର୍କସୁଷମା ।
ତ୍ରଯୀସୀମନ୍ତିନ୍ଯାଃ ସ୍ତନତଟନିଚୋଲାରୁଣପଟୀ
ଵିଭାନ୍ତୀ କାମାକ୍ଷ୍ଯାଃ ପଦନଲିନକାନ୍ତିର୍ଵିଜଯତେ ॥ ୪॥

ପ୍ରଣମ୍ରୀଭୂତସ୍ଯ ପ୍ରଣଯକଲହତ୍ରସ୍ତମନସଃ
ସ୍ମରାରାତେଶ୍ଚୂଡାଵିଯତି ଗୃହମେଧୀ ହିମକରଃ ।
ଯଯୋଃ ସାନ୍ଧ୍ଯାଂ କାନ୍ତିଂ ଵହତି ସୁଷମାଭିଶ୍ଚରଣଯୋଃ
ତଯୋର୍ମେ କାମାକ୍ଷ୍ଯା ହୃଦଯମପତନ୍ଦ୍ରଂ ଵିହରତାମ୍ ॥ ୫॥

ଯଯୋଃ ପୀଠାଯନ୍ତେ ଵିବୁଧମୁକୁଟୀନାଂ ପଟଲିକା
ଯଯୋଃ ସୌଧାଯନ୍ତେ ସ୍ଵଯମୁଦଯଭାଜୋ ଭଣିତଯଃ ।
ଯଯୋଃ ଦାସାଯନ୍ତେ ସରସିଜଭଵାଦ୍ଯାଶ୍ଚରଣଯୋଃ
ତଯୋର୍ମେ କାମାକ୍ଷ୍ଯା ଦିନମନୁ ଵରୀଵର୍ତୁ ହୃଦଯମ୍ ॥ ୬॥

ନଯନ୍ତୀ ସଂକୋଚଂ ସରସିଜରୁଚଂ ଦିକ୍ପରିସରେ
ସୃଜନ୍ତୀ ଲୌହିତ୍ଯଂ ନଖକିରଣଚନ୍ଦ୍ରାର୍ଧଖଚିତା ।
କଵୀନ୍ଦ୍ରାଣାଂ ହୃତ୍କୈରଵଵିକସନୋଦ୍ଯୋଗଜନନୀ
ସ୍ଫୁରନ୍ତୀ କାମାକ୍ଷ୍ଯାଃ ଚରଣରୁଚିସନ୍ଧ୍ଯା ଵିଜଯତେ ॥ ୭॥

ଵିରାଵୈର୍ମାଞ୍ଜୀରୈଃ କିମପି କଥଯନ୍ତୀଵ ମଧୁରଂ
ପୁରସ୍ତାଦାନମ୍ରେ ପୁରଵିଜଯିନି ସ୍ମେରଵଦନେ ।
ଵଯସ୍ଯେଵ ପ୍ରୌଢା ଶିଥିଲଯତି ଯା ପ୍ରେମକଲହ-
ପ୍ରରୋହଂ କାମାକ୍ଷ୍ଯାଃ ଚରଣଯୁଗଲୀ ସା ଵିଜଯତେ ॥ ୮॥

ସୁପର୍ଵସ୍ତ୍ରୀଲୋଲାଲକପରିଚିତଂ ଷଟ୍ପଦକୁଲୈଃ
ସ୍ଫୁରଲ୍ଲାକ୍ଷାରାଗଂ ତରୁଣତରଣିଜ୍ଯୋତିରରୁଣୈଃ ।
ଭୃତଂ କାନ୍ତ୍ଯମ୍ଭୋଭିଃ ଵିସୃମରମରନ୍ଦୈଃ ସରସିଜୈଃ
ଵିଧତ୍ତେ କାମାକ୍ଷ୍ଯାଃ ଚରଣଯୁଗଲଂ ବନ୍ଧୁପଦଵୀମ୍ ॥ ୯॥

ରଜଃସଂସର୍ଗେଽପି ସ୍ଥିତମରଜସାମେଵ ହୃଦଯେ
ପରଂ ରକ୍ତତ୍ଵେନ ସ୍ଥିତମପି ଵିରକ୍ତୈକଶରଣମ୍ ।
ଅଲଭ୍ଯଂ ମନ୍ଦାନାଂ ଦଧଦପି ସଦା ମନ୍ଦଗତିତାଂ
ଵିଧତ୍ତେ କାମାକ୍ଷ୍ଯାଃ ଚରଣଯୁଗମାଶ୍ଚର୍ଯଲହରୀମ୍ ॥ ୧୦॥

ଜଟାଲା ମଞ୍ଜୀରସ୍ଫୁରଦରୁଣରତ୍ନାଂଶୁନିକରୈଃ
ନିଷିଦନ୍ତୀ ମଧ୍ଯେ ନଖରୁଚିଝରୀଗାଙ୍ଗପଯସାମ୍ ।
ଜଗତ୍ତ୍ରାଣଂ କର୍ତୁଂ ଜନନି ମମ କାମାକ୍ଷି ନିଯତଂ
ତପଶ୍ଚର୍ଯାଂ ଧତ୍ତେ ତଵ ଚରଣପାଥୋଜଯୁଗଲୀ ॥ ୧୧॥

ତୁଲାକୋଟିଦ୍ଵନ୍ଦ୍ଵକ୍କଣିତଭଣିତାଭୀତିଵଚସୋଃ
ଵିନମ୍ରଂ କାମାକ୍ଷୀ ଵିସୃମରମହଃପାଟଲିତଯୋଃ ।
କ୍ଷଣଂ ଵିନ୍ଯାସେନ କ୍ଷପିତତମସୋର୍ମେ ଲଲିତଯୋଃ
ପୁନୀଯାନ୍ମୂର୍ଧାନଂ ପୁରହରପୁରନ୍ଧ୍ରୀ ଚରଣଯୋଃ ॥ ୧୨॥

ଭଵାନି ଦ୍ରୁହ୍ଯେତାଂ ଭଵନିବିଡିତେଭ୍ଯୋ ମମ ମୁହୁ-
ସ୍ତମୋଵ୍ଯାମୋହେଭ୍ଯସ୍ତଵ ଜନନି କାମାକ୍ଷି ଚରଣୌ ।
ଯଯୋର୍ଲାକ୍ଷାବିନ୍ଦୁସ୍ଫୁରଣଧରଣାଦ୍ଧ୍ଵର୍ଜଟିଜଟା-
କୁଟୀରା ଶୋଣାଙ୍କଂ ଵହତି ଵପୁରେଣାଙ୍କକଲିକା ॥ ୧୩॥

ପଵିତ୍ରୀକୁର୍ଯୁର୍ନୁଃ ପଦତଲଭୁଵଃ ପାଟଲରୁଚଃ
ପରାଗାସ୍ତେ ପାପପ୍ରଶମନଧୁରୀଣାଃ ପରଶିଵେ ।
କଣଂ ଲବ୍ଧୁଂ ଯେଷାଂ ନିଜଶିରସି କାମାକ୍ଷି ଵିଵଶା
ଵଲନ୍ତୋ ଵ୍ଯାତନ୍ଵନ୍ତ୍ଯହମହମିକାଂ ମାଧଵମୁଖାଃ ॥ ୧୪॥

ବଲାକାମାଲାଭିର୍ନଖରୁଚିମଯୀଭିଃ ପରିଵୃତେ
ଵିନମ୍ରସ୍ଵର୍ନାରୀଵିକଚକଚକାଲାମ୍ବୁଦକୁଲେ ।
ସ୍ଫୁରନ୍ତଃ କାମାକ୍ଷି ସ୍ଫୁଟଦଲିତବନ୍ଧୂକସୁହୃଦ-
ସ୍ତଟିଲ୍ଲେଖାଯନ୍ତେ ତଵ ଚରଣପାଥୋଜକିରଣାଃ ॥ ୧୫॥

ସରାଗଃ ସଦ୍ଵେଷଃ ପ୍ରସୃମରସରୋଜେ ପ୍ରତିଦିନଂ
ନିସର୍ଗାଦାକ୍ରାମନ୍ଵିବୁଧଜନମୂର୍ଧାନମଧିକମ୍ ।
କଥଂକାରଂ ମାତଃ କଥଯ ପଦପଦ୍ମସ୍ତଵ ସତାଂ
ନତାନାଂ କାମାକ୍ଷି ପ୍ରକଟଯତି କୈଵଲ୍ଯସରଣିମ୍ ॥ ୧୬॥

ଜପାଲକ୍ଷ୍ମୀଶୋଣୋ ଜନିତପରମଜ୍ଞାନନଲିନୀ-
ଵିକାସଵ୍ଯାସଙ୍ଗୋ ଵିଫଲିତଜଗଜ୍ଜାଡ୍ଯଗରିମା ।
ମନଃପୂର୍ଵାଦ୍ରିଂ ମେ ତିଲକଯତୁ କାମାକ୍ଷି ତରସା
ତମସ୍କାଣ୍ଡଦ୍ରୋହୀ ତଵ ଚରଣପାଥୋଜରମଣଃ ॥ ୧୭॥

ନମସ୍କୁର୍ମଃ ପ୍ରେଙ୍ଖନ୍ମଣିକଟକନୀଲୋତ୍ପଲମହଃ-
ପଯୋଧୌ ରିଙ୍ଖଦ୍ଭିର୍ନଖକିରଣଫେନୈର୍ଧଵଲିତେ ।
ସ୍ଫୁଟଂ କୁର୍ଵାଣାଯ ପ୍ରବଲଚଲଦୌର୍ଵାନଲଶିଖା-
ଵିତର୍କଂ କାମାକ୍ଷ୍ଯାଃ ସତତମରୁଣିମ୍ନେ ଚରଣଯୋଃ ॥ ୧୮॥

ଶିଵେ ପାଶାଯେତାମଲଘୁନି ତମଃକୂପକୁହରେ
ଦିନାଧୀଶାଯେତାଂ ମମ ହୃଦଯପାଥୋଜଵିପିନେ ।
ନଭୋମାସାଯେତାଂ ସରସକଵିତାରୀତିସରିତି
ତ୍ଵଦୀଯୌ କାମାକ୍ଷି ପ୍ରସୃତକିରଣୌ ଦେଵି ଚରଣୌ ॥ ୧୯॥

ନିଷକ୍ତଂ ଶ୍ରୁତ୍ଯନ୍ତେ ନଯନମିଵ ସଦ୍ଵୃତ୍ତରୁଚିରୈଃ
ସମୈର୍ଜୁଷ୍ଟଂ ଶୁଦ୍ଧୈରଧରମିଵ ରମ୍ଯୈର୍ଦ୍ଵିଜଗଣୈଃ ।
ଶିଵେ ଵକ୍ଷୋଜନ୍ମଦ୍ଵିତଯମିଵ ମୁକ୍ତାଶ୍ରିତମୁମେ
ତ୍ଵଦୀଯଂ କାମାକ୍ଷି ପ୍ରଣତଶରଣଂ ନୌମି ଚରଣମ୍ ॥ ୨୦॥

ନମସ୍ଯାସଂସଜ୍ଜନ୍ନମୁଚିପରିପନ୍ଥିପ୍ରଣଯିନୀ-
ନିସର୍ଗପ୍ରେଙ୍ଖୋଲତ୍କୁରଲକୁଲକାଲାହିଶବଲେ ।
ନଖଚ୍ଛାଯାଦୁଗ୍ଧୋଦଧିପଯସି ତେ ଵୈଦ୍ରୁମରୁଚାଂ
ପ୍ରଚାରଂ କାମାକ୍ଷି ପ୍ରଚୁରଯତି ପାଦାବ୍ଜସୁଷମା ॥ ୨୧॥

କଦା ଦୂରୀକର୍ତୁଂ କଟୁଦୁରିତକାକୋଲଜନିତଂ
ମହାନ୍ତଂ ସନ୍ତାପଂ ମଦନପରିପନ୍ଥିପ୍ରିଯତମେ ।
କ୍ଷଣାତ୍ତେ କାମାକ୍ଷି ତ୍ରିଭୁଵନପରୀତାପହରଣେ
ପଟୀଯାଂସଂ ଲପ୍ସ୍ଯେ ପଦକମଲସେଵାମୃତରସମ୍ ॥ ୨୨॥

ଯଯୋଃ ସାନ୍ଧ୍ଯଂ ରୋଚିଃ ସତତମରୁଣିମ୍ନେ ସ୍ପୃହଯତେ
ଯଯୋଶ୍ଚାନ୍ଦ୍ରୀ କାନ୍ତିଃ ପରିପତତି ଦୃଷ୍ଟ୍ଵା ନଖରୁଚିମ୍ ।
ଯଯୋଃ ପାକୋଦ୍ରେକଂ ପିପଠିଷତି ଭକ୍ତ୍ଯା କିସଲଯଂ
ମ୍ରଦିମ୍ନଃ କାମାକ୍ଷ୍ଯା ମନସି ଚରଣୌ ତୌ ତନୁମହେ ॥ ୨୩॥

ଜଗନ୍ନେଦଂ ନେଦଂ ପରମିତି ପରିତ୍ଯଜ୍ଯ ଯତିଭିଃ
କୁଶାଗ୍ରୀଯସ୍ଵାନ୍ତୈଃ କୁଶଲଧିଷଣୈଃ ଶାସ୍ତ୍ରସରଣୌ ।
ଗଵେଷ୍ଯଂ କାମାକ୍ଷି ଧ୍ରୁଵମକୃତକାନାଂ ଗିରିସୁତେ
ଗିରାମୈଦମ୍ପର୍ଯଂ ତଵ ଚରଣପଦ୍ମଂ ଵିଜଯତେ ॥ ୨୪॥

କୃତସ୍ନାନଂ ଶାସ୍ତ୍ରାମୃତସରସି କାମାକ୍ଷି ନିତରାଂ
ଦଧାନଂ ଵୈଶଦ୍ଯଂ କଲିତରସମାନନ୍ଦସୁଧଯା ।
ଅଲଂକାରଂ ଭୂମେର୍ମୁନିଜନମନଶ୍ଚିନ୍ମଯମହା-
ପଯୋଧେରନ୍ତସ୍ସ୍ଥଂ ତଵ ଚରଣରତ୍ନଂ ମୃଗଯତେ ॥ ୨୫॥

ମନୋଗେହେ ମୋହୋଦ୍ଭଵତିମିରପୂର୍ଣେ ମମ ମୁହୁଃ
ଦରିଦ୍ରାଣୀକୁର୍ଵନ୍ଦିନକରସହସ୍ରାଣି କିରଣୈଃ ।
ଵିଧତ୍ତାଂ କାମାକ୍ଷି ପ୍ରସୃମରତମୋଵଞ୍ଚନଚଣଃ
କ୍ଷଣାର୍ଧଂ ସାନ୍ନିଧ୍ଯଂ ଚରଣମଣିଦୀପୋ ଜନନି ତେ ॥ ୨୬॥

କଵୀନାଂ ଚେତୋଵନ୍ନଖରରୁଚିସମ୍ପର୍କି ଵିବୁଧ-
ସ୍ରଵନ୍ତୀସ୍ରୋତୋଵତ୍ପଟୁମୁଖରିତଂ ହଂସକରଵୈଃ ।
ଦିନାରମ୍ଭଶ୍ରୀଵନ୍ନିଯତମରୁଣଚ୍ଛାଯସୁଭଗଂ
ମଦନ୍ତଃ କାମାକ୍ଷ୍ଯାଃ ସ୍ଫୁରତୁ ପଦପଙ୍କେରୁହଯୁଗମ୍ ॥ ୨୭॥

ସଦା କିଂ ସମ୍ପର୍କାତ୍ପ୍ରକୃତିକଠିନୈର୍ନାକିମୁକୁଟୈଃ
ତଟୈର୍ନୀହାରାଦ୍ରେରଧିକମଣୁନା ଯୋଗିମନସା ।
ଵିଭିନ୍ତେ ସଂମୋହଂ ଶିଶିରଯତି ଭକ୍ତାନପି ଦୃଶାମ୍
ଅଦୃଶ୍ଯଂ କାମାକ୍ଷି ପ୍ରକଟଯତି ତେ ପାଦଯୁଗଲମ୍ ॥ ୨୮॥

ପଵିତ୍ରାଭ୍ଯାମମ୍ବ ପ୍ରକୃତିମୃଦୁଲାଭ୍ଯାଂ ତଵ ଶିଵେ
ପଦାଭ୍ଯାଂ କାମାକ୍ଷି ପ୍ରସଭମଭିଭୂତୈଃ ସଚକିତୈଃ ।
ପ୍ରଵାଲୈରମ୍ଭୋଜୈରପି ଚ ଵନଵାସଵ୍ରତଦଶାଃ
ସଦୈଵାରଭ୍ଯନ୍ତେ ପରିଚରିତନାନାଦ୍ଵିଜଗଣୈଃ ॥ ୨୯॥

ଚିରାଦ୍ଦୃଶ୍ଯା ହଂସୈଃ କଥମପି ସଦା ହଂସସୁଲଭଂ
ନିରସ୍ଯନ୍ତୀ ଜାଡ୍ଯଂ ନିଯତଜଡମଧ୍ଯୈକଶରଣମ୍ ।
ଅଦୋଷଵ୍ଯାସଙ୍ଗା ସତତମପି ଦୋଷାପ୍ତିମଲିନଂ
ପଯୋଜଂ କାମାକ୍ଷ୍ଯାଃ ପରିହସତି ପାଦାବ୍ଜଯୁଗଲୀ ॥ ୩୦॥

ସୁରାଣାମାନନ୍ଦପ୍ରବଲନତଯା ମଣ୍ଡନତଯା
ନଖେନ୍ଦୁଜ୍ଯୋତ୍ସ୍ନାଭିର୍ଵିସୃମରତମଃଖଣ୍ଡନତଯା ।
ପଯୋଜଶ୍ରୀଦ୍ଵେଷଵ୍ରତରତତଯା ତ୍ଵଚ୍ଚରଣଯୋଃ
ଵିଲାସଃ କାମାକ୍ଷି ପ୍ରକଟଯତି ନୈଶାକରଦଶାମ୍ ॥ ୩୧॥

ସିତିମ୍ନା କାନ୍ତୀନାଂ ନଖରଜନୁଷାଂ ପାଦନଲିନ-
ଚ୍ଛଵୀନାଂ ଶୋଣିମ୍ନା ତଵ ଜନନି କାମାକ୍ଷି ନମନେ ।
ଲଭନ୍ତେ ମନ୍ଦାରଗ୍ରଥିତନଵବନ୍ଧୂକକୁସୁମ-
ସ୍ରଜାଂ ସାମୀଚୀନ୍ଯଂ ସୁରପୁରପୁରନ୍ଧ୍ରୀକଚଭରାଃ ॥ ୩୨॥

ସ୍ଫୁରନ୍ମଧ୍ଯେ ଶୁଦ୍ଧେ ନଖକିରଣଦୁଗ୍ଧାବ୍ଧିପଯସାଂ
ଵହନ୍ନବ୍ଜଂ ଚକ୍ରଂ ଦରମପି ଚ ଲେଖାତ୍ମକତଯା ।
ଶ୍ରିତୋ ମାତ୍ସ୍ଯଂ ରୂପଂ ଶ୍ରିଯମପି ଦଧାନୋ ନିରୁପମାଂ
ତ୍ରିଧାମା କାମାକ୍ଷ୍ଯାଃ ପଦନଲିନନାମା ଵିଜଯତେ ॥ ୩୩॥

ନଖଶ୍ରୀସନ୍ନଦ୍ଧସ୍ତବକନିଚିତଃ ସ୍ଵୈଶ୍ଚ କିରଣୈଃ
ପିଶଙ୍ଗୈଃ କାମାକ୍ଷି ପ୍ରକଟିତଲସତ୍ପଲ୍ଲଵରୁଚିଃ ।
ସତାଂ ଗମ୍ଯଃ ଶଙ୍କେ ସକଲଫଲଦାତା ସୁରତରୁଃ
ତ୍ଵଦୀଯଃ ପାଦୋଽଯଂ ତୁହିନଗିରିରାଜନ୍ଯତନଯେ ॥ ୩୪॥

ଵଷଟ୍କୁର୍ଵନ୍ମାଞ୍ଜୀରକଲକଲୈଃ କର୍ମଲହରୀ-
ହଵୀଂଷି ପ୍ରୌଦ୍ଦଣ୍ଡଂ ଜ୍ଵଲତି ପରମଜ୍ଞାନଦହନେ ।
ମହୀଯାନ୍କାମାକ୍ଷି ସ୍ଫୁଟମହସି ଜୋହୋତି ସୁଧିଯାଂ
ମନୋଵେଦ୍ଯାଂ ମାତସ୍ତଵ ଚରଣଯଜ୍ଵା ଗିରିସୁତେ ॥ ୩୫॥

ମହାମନ୍ତ୍ରଂ କିଂଚିନ୍ମଣିକଟକନାଦୈର୍ମୃଦୁ ଜପନ୍
କ୍ଷିପନ୍ଦିକ୍ଷୁ ସ୍ଵଚ୍ଛଂ ନଖରୁଚିମଯଂ ଭାସ୍ମନରଜଃ ।
ନତାନାଂ କାମାକ୍ଷି ପ୍ରକୃତିପଟୁରଚ୍ଚାଟ୍ଯ ମମତା-
ପିଶାଚୀଂ ପାଦୋଽଯଂ ପ୍ରକଟଯତି ତେ ମାନ୍ତ୍ରିକଦଶାମ୍ ॥ ୩୬॥

ଉଦୀତେ ବୋଧେନ୍ଦୌ ତମସି ନିତରାଂ ଜଗ୍ମୁଷି ଦଶାଂ
ଦରିଦ୍ରାଂ କାମାକ୍ଷି ପ୍ରକଟମନୁରାଗଂ ଵିଦଧତୀ ।
ସିତେନାଚ୍ଛାଦ୍ଯାଙ୍ଗଂ ନଖରୁଚିପଟେନାଙ୍ଘ୍ରିଯୁଗଲୀ-
ପୁରନ୍ଧ୍ରୀ ତେ ମାତଃ ସ୍ଵଯମଭିସରତ୍ଯେଵ ହୃଦଯମ୍ ॥ ୩୭॥

ଦିନାରମ୍ଭଃ ସମ୍ପନ୍ନଲିନଵିପିନାନାମଭିନଵୋ
ଵିକାସୋ ଵାସନ୍ତଃ ସୁକଵିପିକଲୋକସ୍ଯ ନିଯତଃ ।
ପ୍ରଦୋଷଃ କାମାକ୍ଷି ପ୍ରକଟପରମଜ୍ଞାନଶଶିନ-
ଶ୍ଚକାସ୍ତି ତ୍ଵତ୍ପାଦସ୍ମରଣମହିମା ଶୈଲତନଯେ ॥ ୩୮॥

ଧୃତଚ୍ଛାଯଂ ନିତ୍ଯଂ ସରସିରୁହମୈତ୍ରୀପରିଚିତଂ
ନିଧାନଂ ଦୀପ୍ତୀନାଂ ନିଖିଲଜଗତାଂ ବୋଧଜନକମ୍ ।
ମୁମୁକ୍ଷୂଣାଂ ମାର୍ଗପ୍ରଥନପଟୁ କାମାକ୍ଷି ପଦଵୀଂ
ପଦଂ ତେ ପାତଙ୍ଗୀଂ ପରିକଲଯତେ ପର୍ଵତସୁତେ ॥ ୩୯॥

ଶନୈସ୍ତୀର୍ତ୍ଵା ମୋହାମ୍ବୁଧିମଥ ସମାରୋଢୁମନସଃ
କ୍ରମାତ୍କୈଵଲ୍ଯାଖ୍ଯାଂ ସୁକୃତିସୁଲଭାଂ ସୌଧଵଲଭୀମ୍ ।
ଲଭନ୍ତେ ନିଃଶ୍ରେଣୀମିଵ ଝଟିତି କାମାକ୍ଷି ଚରଣଂ
ପୁରଶ୍ଚର୍ଯାଭିସ୍ତେ ପୁରମଥନସୀମନ୍ତିନି ଜନାଃ ॥ ୪୦॥

ପ୍ରଚଣ୍ଡାର୍ତିକ୍ଷୋଭପ୍ରମଥନକୃତେ ପ୍ରାତିଭସରି-
ତ୍ପ୍ରଵାହପ୍ରୋଦ୍ଦଣ୍ଡୀକରଣଜଲଦାଯ ପ୍ରଣମତାମ୍ ।
ପ୍ରଦୀପାଯ ପ୍ରୌଢେ ଭଵତମସି କାମାକ୍ଷି ଚରଣ-
ପ୍ରସାଦୌନ୍ମୁଖ୍ଯାଯ ସ୍ପୃହଯତି ଜନୋଽଯଂ ଜନନି ତେ ॥ ୪୧॥

ମରୁଦ୍ଭିଃ ସଂସେଵ୍ଯା ସତତମପି ଚାଞ୍ଚଲ୍ଯରହିତା
ସଦାରୁଣ୍ଯଂ ଯାନ୍ତୀ ପରିଣତିଦରିଦ୍ରାଣସୁଷମା ।
ଗୁଣୋତ୍କର୍ଷାନ୍ମାଞ୍ଜୀରକକଲକଲୈସ୍ତର୍ଜନପଟୁଃ
ପ୍ରଵାଲଂ କାମାକ୍ଷ୍ଯାଃ ପରିହସତି ପାଦାବ୍ଜଯୁଗଲୀ ॥ ୪୨॥

ଜଗଦ୍ରକ୍ଷାଦକ୍ଷା ଜଲଜରୁଚିଶିକ୍ଷାପଟୁତରା
ସମୈର୍ନମ୍ଯା ରମ୍ଯା ସତତମଭିଗମ୍ଯା ବୁଧଜନୈଃ ।
ଦ୍ଵଯୀ ଲୀଲାଲୋଲା ଶ୍ରୁତିଷୁ ସୁରପାଲାଦିମୁକୁଟୀ-
ତଟୀସୀମାଧାମା ତଵ ଜନନି କାମାକ୍ଷି ପଦଯୋଃ ॥ ୪୩॥

ଗିରାଂ ଦୂରୌ ଚୋରୌ ଜଡିମତିମିରାଣାଂ କୃତଜଗ-
ତ୍ପରିତ୍ରାଣୌ ଶୋଣୌ ମୁନିହୃଦଯଲୀଲୈକନିପୁଣୌ ।
ନଖୈଃ ସ୍ମେରୌ ସାରୌ ନିଗମଵଚସାଂ ଖଣ୍ଡିତଭଵ-
ଗ୍ରହୋନ୍ମାଦୌ ପାଦୌ ତଵ ଜନନି କାମାକ୍ଷି କଲଯେ ॥ ୪୪॥

ଅଵିଶ୍ରାନ୍ତଂ ପଙ୍କଂ ଯଦପି କଲଯନ୍ଯାଵକମଯଂ
ନିରସ୍ଯନ୍କାମାକ୍ଷି ପ୍ରଣମନଜୁଷାଂ ପଙ୍କମଖିଲମ୍ ।
ତୁଲାକୋଟିଦ୍ଵନ୍ଦଂ ଦଧଦପି ଚ ଗଚ୍ଛନ୍ନତୁଲତାଂ
ଗିରାଂ ମାର୍ଗଂ ପାଦୋ ଗିରିଵରସୁତେ ଲଙ୍ଘଯତି ତେ ॥ ୪୫॥

ପ୍ରଵାଲଂ ସଵ୍ରୀଲଂ ଵିପିନଵିଵରେ ଵେପଯତି ଯା
ସ୍ଫୁରଲ୍ଲୀଲଂ ବାଲାତପମଧିକବାଲଂ ଵଦତି ଯା ।
ରୁଚିଂ ସାନ୍ଧ୍ଯାଂ ଵନ୍ଧ୍ଯାଂ ଵିରଚଯତି ଯା ଵର୍ଧଯତୁ ସା
ଶିଵଂ ମେ କାମାକ୍ଷ୍ଯାଃ ପଦନଲିନପାଟଲ୍ଯଲହରୀ ॥ ୪୬॥

କିରଞ୍ଜ୍ଯୋତ୍ସ୍ନାରୀତିଂ ନଖମୁଖରୁଚା ହଂସମନସାଂ
ଵିତନ୍ଵାନଃ ପ୍ରୀତିଂ ଵିକଚତରୁଣାମ୍ଭୋରୁହରୁଚିଃ ।
ପ୍ରକାଶଃ ଶ୍ରୀପାଦସ୍ତଵ ଜନନି କାମାକ୍ଷି ତନୁତେ
ଶରତ୍କାଲପ୍ରୌଢିଂ ଶଶିଶକଲଚୂଡପ୍ରିଯତମେ ॥ ୪୭॥

ନଖାଙ୍କୂରସ୍ମେରଦ୍ଯୁତିଵିମଲଗଙ୍ଗାମ୍ଭସି ସୁଖଂ
କୃତସ୍ନାନଂ ଜ୍ଞାନାମୃତମମଲମାସ୍ଵାଦ୍ଯ ନିଯତମ୍ ।
ଉଦଞ୍ଚନ୍ମଞ୍ଜୀରସ୍ଫୁରଣମଣିଦୀପେ ମମ ମନୋ
ମନୋଜ୍ଞେ କାମାକ୍ଷ୍ଯାଶ୍ଚରଣମଣିହର୍ମ୍ଯେ ଵିହରତାମ୍ ॥ ୪୮॥

ଭଵାମ୍ଭୋଧୌ ନୌକାଂ ଜଡିମଵିପିନେ ପାଵକଶିଖା-
ମମର୍ତ୍ଯେନ୍ଦ୍ରାଦୀନାମଧିମୁକୁଟମୁତ୍ତଂସକଲିକାମ୍ ।
ଜଗତ୍ତାପେ ଜ୍ଯୋତ୍ସ୍ନାମକୃତକଵଚଃପଞ୍ଜରପୁଟେ
ଶୁକସ୍ତ୍ରୀଂ କାମାକ୍ଷ୍ଯା ମନସି କଲଯେ ପାଦଯୁଗଲୀମ୍ ॥ ୪୯॥

ପରତ୍ମପ୍ରାକାଶ୍ଯପ୍ରତିଫଲନଚୁଞ୍ଚୁଃ ପ୍ରଣମତାଂ
ମନୋଜ୍ଞସ୍ତ୍ଵତ୍ପାଦୋ ମଣିମୁକୁରମୁଦ୍ରାଂ କଲଯତେ ।
ଯଦୀଯାଂ କାମାକ୍ଷି ପ୍ରକୃତିମସୃଣାଃ ଶୋଧକଦଶାଂ
ଵିଧାତୁଂ ଚେଷ୍ଠନ୍ତେ ବଲରିପୁଵଧୂଟୀକଚଭରାଃ ॥ ୫୦॥

ଅଵିଶ୍ରାନ୍ତଂ ତିଷ୍ଠନ୍ନକୃତକଵଚଃକନ୍ଦରପୁଟୀ-
କୁଟୀରାନ୍ତଃ ପ୍ରୌଢଂ ନଖରୁଚିସଟାଲୀଂ ପ୍ରକଟଯନ୍ ।
ପ୍ରଚଣ୍ଡଂ ଖଣ୍ଡତ୍ଵଂ ନଯତୁ ମମ କାମାକ୍ଷି ତରସା
ତମୋଵେତଣ୍ଡେନ୍ଦ୍ରଂ ତଵ ଚରଣକଣ୍ଠୀରଵପତିଃ ॥ ୫୧॥

ପୁରସ୍ତାତ୍କାମାକ୍ଷି ପ୍ରଚୁରରସମାଖଣ୍ଡଲପୁରୀ-
ପୁରନ୍ଧ୍ରୀଣାଂ ଲାସ୍ଯଂ ତଵ ଲଲିତମାଲୋକ୍ଯ ଶନକୈଃ ।
ନଖଶ୍ରୀଭିଃ ସ୍ମେରା ବହୁ ଵିତନୁତେ ନୂପୁରରଵୈ-
ଶ୍ଚମତ୍କୃତ୍ଯା ଶଙ୍କେ ଚରଣଯୁଗଲୀ ଚାଟୁରଚନାଃ ॥ ୫୨॥

ସରୋଜଂ ନିନ୍ଦନ୍ତୀ ନଖକିରଣକର୍ପୂରଶିଶିରା
ନିଷିକ୍ତା ମାରାରେର୍ମୁକୁଟଶଶିରେଖାହିମଜଲୈଃ ।
ସ୍ଫୁରନ୍ତୀ କାମାକ୍ଷି ସ୍ଫୁଟରୁଚିମଯେ ପଲ୍ଲଵଚଯେ
ତଵାଧତ୍ତେ ମୈତ୍ରୀଂ ପଥିକସୁଦୃଶା ପାଦଯୁଗଲୀ ॥ ୫୩॥

ନତାନାଂ ସମ୍ପତ୍ତେରନଵରତମାକର୍ଷଣଜପଃ
ପ୍ରରୋହତ୍ସଂସାରପ୍ରସରଗରିମସ୍ତମ୍ଭନଜପଃ ।
ତ୍ଵଦୀଯଃ କାମାକ୍ଷି ସ୍ମରହରମନୋମୋହନଜପଃ
ପଟୀଯାନ୍ନଃ ପାଯାତ୍ପଦନଲିନମଞ୍ଜୀରନିନଦଃ ॥ ୫୪॥

ଵିତନ୍ଵୀଥା ନାଥେ ମମ ଶିରସି କାମାକ୍ଷି କୃପଯା
ପଦାମ୍ଭୋଜନ୍ଯାସଂ ପଶୁପରିବୃଢପ୍ରାଣଦଯିତେ ।
ପିବନ୍ତୋ ଯନ୍ମୁଦ୍ରାଂ ପ୍ରକଟମୁପକମ୍ପାପରିସରଂ
ଦୃଶା ନାନନ୍ଦ୍ଯନ୍ତେ ନଲିନଭଵନାରାଯଣମୁଖାଃ ॥ ୫୫॥

ପ୍ରଣାମୋଦ୍ଯଦ୍ବୃନ୍ଦାରମୁକୁଟମନ୍ଦାରକଲିକା-
ଵିଲୋଲଲ୍ଲୋଲମ୍ବପ୍ରକରମଯଧୂମପ୍ରଚୁରିମା ।
ପ୍ରଦୀପ୍ତଃ ପାଦାବ୍ଜଦ୍ଯୁତିଵିତତିପାଟଲ୍ଯଲହରୀ-
କୃଶାନୁଃ କାମାକ୍ଷ୍ଯା ମମ ଦହତୁ ସଂସାରଵିପିନମ୍ ॥ ୫୬॥

ଵଲକ୍ଷଶ୍ରୀରୃକ୍ଷାଧିପଶିଶୁସଦୃକ୍ଷୈସ୍ତଵ ନଖୈଃ
ଜିଘୃକ୍ଷୁର୍ଦକ୍ଷତ୍ଵଂ ସରସିରୁହଭିକ୍ଷୁତ୍ଵକରଣେ ।
କ୍ଷଣାନ୍ମେ କାମାକ୍ଷି କ୍ଷପିତଭଵସଂକ୍ଷୋଭଗରିମା
ଵଚୋଵୈଚକ୍ଷନ୍ଯଂ ଚରଣଯୁଗଲୀ ପକ୍ଷ୍ମଲଯତାତ୍ ॥ ୫୭॥

ସମନ୍ତାତ୍କାମାକ୍ଷି କ୍ଷତତିମିରସନ୍ତାନସୁଭଗାନ୍
ଅନନ୍ତାଭିର୍ଭାଭିର୍ଦିନମନୁ ଦିଗନ୍ତାନ୍ଵିରଚଯନ୍ ।
ଅହନ୍ତାଯା ହନ୍ତା ମମ ଜଡିମଦନ୍ତାଵଲହରିଃ
ଵିଭିନ୍ତାଂ ସନ୍ତାପଂ ତଵ ଚରଣଚିନ୍ତାମଣିରସୌ ॥ ୫୮॥

ଦଧାନୋ ଭାସ୍ଵତ୍ତାମମୃତନିଲଯୋ ଲୋହିତଵପୁଃ
ଵିନମ୍ରାଣାଂ ସୌମ୍ଯୋ ଗୁରୁରପି କଵିତ୍ଵଂ ଚ କଲଯନ୍ ।
ଗତୌ ମନ୍ଦୋ ଗଙ୍ଗାଧରମହିଷି କାମାକ୍ଷି ଭଜତାଂ
ତମଃକେତୁର୍ମାତସ୍ତଵ ଚରଣପଦ୍ମୋ ଵିଜଯତେ ॥ ୫୯॥

ନଯନ୍ତୀଂ ଦାସତ୍ଵଂ ନଲିନଭଵମୁଖ୍ଯାନସୁଲଭ-
ପ୍ରଦାନାଦ୍ଦୀନାନାମମରତରୁଦୌର୍ଭାଗ୍ଯଜନନୀମ୍ ।
ଜଗଜ୍ଜନ୍ମକ୍ଷେମକ୍ଷଯଵିଧିଷୁ କାମାକ୍ଷି ପଦଯୋ-
ର୍ଧୁରୀଣାମୀଷ୍ଟେ କରସ୍ତଵ ଭଣିତୁମାହୋପୁରୁଷିକାମ୍ ॥ ୬୦॥

ଜନୋଽଯଂ ସନ୍ତପ୍ତୋ ଜନନି ଭଵଚଣ୍ଡାଂଶୁକିରଣୈଃ
ଅଲବ୍ଧଵୈକଂ ଶୀତଂ କଣମପି ପରଜ୍ଞାନପଯସଃ ।
ତମୋମାର୍ଗେ ପାନ୍ଥସ୍ତଵ ଝଟିତି କାମାକ୍ଷି ଶିଶିରାଂ
ପଦାମ୍ଭୋଜଚ୍ଛାଯାଂ ପରମଶିଵଜାଯେ ମୃଗଯତେ ॥ ୬୧॥

ଜଯତ୍ଯମ୍ବ ଶ୍ରୀମନ୍ନଖକିରଣଚୀନାଂଶୁକମଯଂ
ଵିତାନଂ ବିଭ୍ରାଣେ ସୁରମୁକୁଟସଂଘଟ୍ଟମସୃଣେ ।
ନିଜାରୁଣ୍ଯକ୍ଷୌମାସ୍ତରଣଵତି କାମାକ୍ଷି ସୁଲଭା
ବୁଧୈଃ ସଂଵିନ୍ନାରୀ ତଵ ଚରଣମାଣିକ୍ଯଭଵନେ ॥ ୬୨॥

ପ୍ରତୀମଃ କାମାକ୍ଷି ସ୍ଫୁରିତତରୁଣାଦିତ୍ଯକିରଣ-
ଶ୍ରିଯୋ ମୂଲଦ୍ରଵ୍ଯଂ ତଵ ଚରଣମଦ୍ରୀନ୍ଦ୍ରତନଯେ ।
ସୁରେନ୍ଦ୍ରାଶାମାପୂରଯତି ଯଦସୌ ଧ୍ଵାନ୍ତମଖିଲଂ
ଧୁନୀତେ ଦିଗ୍ଭାଗାନପି ଚ ମହସା ପାଟଲଯତେ ॥ ୬୩॥

ମହାଭାଷ୍ଯଵ୍ଯାଖ୍ଯାପଟୁଶଯନମାରୋପଯତି ଵା
ସ୍ମରଵ୍ଯାପାରେର୍ଷ୍ଯାପିଶୁନନିଟିଲଂ କାରଯତି ଵା ।
ଦ୍ଵିରେଫାଣାମଧ୍ଯାସଯତି ସତତଂ ଵାଧିଵସତିଂ
ପ୍ରଣମ୍ରାନ୍କାମାକ୍ଷ୍ଯାଃ ପଦନଲିନମାହାତ୍ମ୍ଯଗରିମା ॥ ୬୪॥

ଵିଵେକାମ୍ଭସ୍ସ୍ରୋତସ୍ସ୍ନପନପରିପାଟୀଶିଶିରିତେ
ସମୀଭୂତେ ଶାସ୍ତ୍ରସ୍ମରଣହଲସଂକର୍ଷଣଵଶାତ୍ ।
ସତାଂ ଚେତଃକ୍ଷେତ୍ରେ ଵପତି ତଵ କାମାକ୍ଷି ଚରଣୋ
ମହାସଂଵିତ୍ସସ୍ଯପ୍ରକରଵରବୀଜଂ ଗିରିସୁତେ ॥ ୬୫॥

ଦଧାନୋ ମନ୍ଦାରସ୍ତବକପରିପାଟୀଂ ନଖରୁଚା
ଵହନ୍ଦୀପ୍ତାଂ ଶୋଣାଙ୍ଗୁଲିପଟଲଚାମ୍ପେଯକଲିକାମ୍ ।
ଅଶୋକୋଲ୍ଲାସଂ ନଃ ପ୍ରଚୁରଯତୁ କାମାକ୍ଷି ଚରଣୋ
ଵିକାସୀ ଵାସନ୍ତଃ ସମଯ ଇଵ ତେ ଶର୍ଵଦଯିତେ ॥ ୬୬॥

ନଖାଂଶୁପ୍ରାଚୁର୍ଯପ୍ରସୃମରମରାଲାଲିଧଵଲଃ
ସ୍ଫୁରନ୍ମଞ୍ଜୀରୋଦ୍ଯନ୍ମରକତମହଶ୍ଶୈଵଲଯୁତଃ ।
ଭଵତ୍ଯାଃ କାମାକ୍ଷି ସ୍ଫୁଟଚରଣପାଟଲ୍ଯକପଟୋ
ନଦଃ ଶୋଣାଭିଖ୍ଯୋ ନଗପତିତନୂଜେ ଵିଜଯତେ ॥ ୬୭॥

ଧୁନାନଂ ପଙ୍କୌଘଂ ପରମସୁଲଭଂ କଣ୍ଟକକୁଲୈଃ
ଵିକାସଵ୍ଯାସଙ୍ଗଂ ଵିଦଧଦପରାଧୀନମନିଶମ୍ ।
ନଖେନ୍ଦୁଜ୍ଯୋତ୍ସ୍ନାଭିର୍ଵିଶଦରୁଚି କାମାକ୍ଷି ନିତରାମ୍
ଅସାମାନ୍ଯଂ ମନ୍ଯେ ସରସିଜମିଦଂ ତେ ପଦଯୁଗମ୍ ॥ ୬୮॥

କରୀନ୍ଦ୍ରାଯ ଦ୍ରୁହ୍ଯତ୍ଯଲସଗତିଲୀଲାସୁ ଵିମଲୈଃ
ପଯୋଜୈର୍ମାତ୍ସର୍ଯଂ ପ୍ରକଟଯତି କାମଂ କଲଯତେ ।
ପଦାମ୍ଭୋଜଦ୍ଵନ୍ଦ୍ଵଂ ତଵ ତଦପି କାମାକ୍ଷି ହୃଦଯଂ
ମୁନୀନାଂ ଶାନ୍ତାନାଂ କଥମନିଶମସ୍ମୈ ସ୍ପୃହଯତେ ॥ ୬୯॥

ନିରସ୍ତା ଶୋଣିମ୍ନା ଚରଣକିରଣାନାଂ ତଵ ଶିଵେ
ସମିନ୍ଧାନା ସନ୍ଧ୍ଯାରୁଚିରଚଲରାଜନ୍ଯତନଯେ ।
ଅସାମର୍ଥ୍ଯାଦେନଂ ପରିଭଵିତୁମେତତ୍ସମରୁଚାଂ
ସରୋଜାନାଂ ଜାନେ ମୁକୁଲଯତି ଶୋଭାଂ ପ୍ରତିଦିନମ୍ ॥ ୭୦॥

ଉପାଦିକ୍ଷଦ୍ଦାକ୍ଷ୍ଯଂ ତଵ ଚରଣନାମା ଗୁରୁରସୌ
ମରାଲାନାଂ ଶଙ୍କେ ମସୃଣଗତିଲାଲିତ୍ଯସରଣୌ ।
ଅତସ୍ତେ ନିସ୍ତନ୍ଦ୍ରଂ ନିଯତମମୁନା ସଖ୍ଯପଦଵୀଂ
ପ୍ରପନ୍ନଂ ପାଥୋଜଂ ପ୍ରତି ଦଧତି କାମାକ୍ଷି କୁତୁକମ୍ ॥ ୭୧॥

ଦଧାନୈଃ ସଂସର୍ଗଂ ପ୍ରକୃତିମଲିନୈଃ ଷଟ୍ପଦକୁଲୈଃ
ଦ୍ଵିଜାଧୀଶଶ୍ଲାଘାଵିଧିଷୁ ଵିଦଧଦ୍ଭିର୍ମୁକୁଲତାମ୍ ।
ରଜୋମିଶ୍ରୈଃ ପଦ୍ମୈର୍ନିଯତମପି କାମାକ୍ଷି ପଦଯୋଃ
ଵିରୋଧସ୍ତେ ଯୁକ୍ତୋ ଵିଷମଶରଵୈରିପ୍ରିଯତମେ ॥ ୭୨॥

କଵିତ୍ଵଶ୍ରୀମିଶ୍ରୀକରଣନିପୁଣୌ ରକ୍ଷଣଚଣୌ
ଵିପନ୍ନାନାଂ ଶ୍ରୀମନ୍ନଲିନମସୃଣୌ ଶୋଣକିରଣୌ ।
ମୁନୀନ୍ଦ୍ରାଣାମନ୍ତଃକରଣଶରଣୌ ମନ୍ଦସରଣୌ
ମନୋଜ୍ଞୌ କାମାକ୍ଷ୍ଯା ଦୁରିତହରଣୌ ନୌମି ଚରଣୌ ॥ ୭୩॥

ପରସ୍ମାତ୍ସର୍ଵସ୍ମାଦପି ଚ ପରଯୋର୍ମୁକ୍ତିକରଯୋଃ
ନଖଶ୍ରୀଭିର୍ଜ୍ଯୋତ୍ସ୍ନାକଲିତତୁଲଯୋସ୍ତାମ୍ରତଲଯୋଃ ।
ନିଲୀଯେ କାମାକ୍ଷ୍ଯା ନିଗମନୁତଯୋର୍ନାକିନତଯୋଃ
ନିରସ୍ତପ୍ରୋନ୍ମୀଲନ୍ନଲିନମଦଯୋରେଵ ପଦଯୋଃ ॥ ୭୪॥

ସ୍ଵଭାଵାଦନ୍ଯୋନ୍ଯଂ କିସଲଯମପୀଦଂ ତଵ ପଦଂ
ମ୍ରଦିମ୍ନା ଶୋଣିମ୍ନା ଭଗଵତି ଦଧାତେ ସଦୃଶତାମ୍ ।
ଵନେ ପୂର୍ଵସ୍ଯେଚ୍ଛା ସତତମଵନେ କିଂ ତୁ ଜଗତାଂ
ପରସ୍ଯେତ୍ଥଂ ଭେଦଃ ସ୍ଫୁରତି ହୃଦି କାମାକ୍ଷି ସୁଧିଯାମ୍ ॥ ୭୫॥

କଥଂ ଵାଚାଲୋଽପି ପ୍ରକଟମଣିମଞ୍ଜୀରନିନଦୈଃ
ସଦୈଵାନନ୍ଦାର୍ଦ୍ରାନ୍ଵିରଚଯତି ଵାଚଂଯମଜନାନ୍ ।
ପ୍ରକୃତ୍ଯା ତେ ଶୋଣଚ୍ଛଵିରପି ଚ କାମାକ୍ଷି ଚରଣୋ
ମନୀଷାନୈର୍ମଲ୍ଯଂ କଥମିଵ ନୃଣାଂ ମାଂସଲଯତେ ॥ ୭୬॥

ଚଲତ୍ତୃଷ୍ଣାଵୀଚୀପରିଚଲନପର୍ଯାକୁଲତଯା
ମୁହୁର୍ଭ୍ରାନ୍ତସ୍ତାନ୍ତଃ ପରମଶିଵଵାମାକ୍ଷି ପରଵାନ୍ ।
ତିତୀର୍ଷୁଃ କାମାକ୍ଷି ପ୍ରଚୁରତରକର୍ମାମ୍ବୁଧିମମୁଂ
କଦାହଂ ଲପ୍ସ୍ଯେ ତେ ଚରଣମଣିସେତୁଂ ଗିରିସୁତେ ॥ ୭୭॥

ଵିଶୁଷ୍ଯନ୍ତ୍ଯାଂ ପ୍ରଜ୍ଞାସରିତି ଦୁରିତଗ୍ରୀଷ୍ମସମଯ-
ପ୍ରଭାଵେଣ କ୍ଷୀଣେ ସତି ମମ ମନଃକେକିନି ଶୁଚା ।
ତ୍ଵଦୀଯଃ କାମାକ୍ଷି ସ୍ଫୁରିତଚରଣାମ୍ଭୋଦମହିମା
ନଭୋମାସାଟୋପଂ ନଗପତିସୁତେ କିଂ ନ କୁରୁତେ ॥ ୭୮॥

ଵିନମ୍ରାଣାଂ ଚେତୋଭଵନଵଲଭୀସୀମ୍ନି ଚରଣ-
ପ୍ରଦୀପେ ପ୍ରାକାଶ୍ଯଂ ଦଧତି ତଵ ନିର୍ଧୂତତମସି ।
ଅସୀମା କାମାକ୍ଷି ସ୍ଵଯମଲଘୁଦୁଷ୍କର୍ମଲହରୀ
ଵିଘୂର୍ଣନ୍ତୀ ଶାନ୍ତିଂ ଶଲଭପରିପାଟୀଵ ଭଜତେ ॥ ୭୯॥

ଵିରାଜନ୍ତୀ ଶୁକ୍ତିର୍ନଖକିରଣମୁକ୍ତାମଣିତତେଃ
ଵିପତ୍ପାଥୋରାଶୌ ତରିରପି ନରାଣାଂ ପ୍ରଣମତାମ୍ ।
ତ୍ଵଦୀଯଃ କାମାକ୍ଷି ଧ୍ରୁଵମଲଘୁଵହ୍ନିର୍ଭଵଵନେ
ମୁନୀନାଂ ଜ୍ଞାନାଗ୍ନେରରଣିରଯମଙ୍ଘିର୍ଵିଜଯତେ ॥ ୮୦॥

ସମସ୍ତୈଃ ସଂସେଵ୍ଯଃ ସତତମପି କାମାକ୍ଷି ଵିବୁଧୈଃ
ସ୍ତୁତୋ ଗନ୍ଧର୍ଵସ୍ତ୍ରୀସୁଲଲିତଵିପଞ୍ଚୀକଲରଵୈଃ ।
ଭଵତ୍ଯା ଭିନ୍ଦାନୋ ଭଵଗିରିକୁଲଂ ଜୃମ୍ଭିତତମୋ-
ବଲଦ୍ରୋହୀ ମାତଶ୍ଚରଣପୁରୁହୂତୋ ଵିଜଯତେ ॥ ୮୧॥

ଵସନ୍ତଂ ଭକ୍ତାନାମପି ମନସି ନିତ୍ଯଂ ପରିଲସଦ୍-
ଘନଚ୍ଛାଯାପୂର୍ଣଂ ଶୁଚିମପି ନୃଣାଂ ତାପଶମନମ୍ ।
ନଖେନ୍ଦୁଜ୍ଯୋତ୍ସ୍ନାଭିଃ ଶିଶିରମପି ପଦ୍ମୋଦଯକରଂ
ନମାମଃ କାମାକ୍ଷ୍ଯାଶ୍ଚରଣମଧିକାଶ୍ଚର୍ଯକରଣମ୍ ॥ ୮୨॥

କଵୀନ୍ଦ୍ରାଣାଂ ନାନାଭଣିତିଗୁଣଚିତ୍ରୀକୃତଵଚଃ-
ପ୍ରପଞ୍ଚଵ୍ଯାପାରପ୍ରକଟନକଲାକୌଶଲନିଧିଃ ।
ଅଧଃକୁର୍ଵନ୍ନବ୍ଜଂ ସନକଭୃଗୁମୁଖ୍ଯୈର୍ମୁନିଜନୈଃ
ନମସ୍ଯଃ କାମାକ୍ଷ୍ଯାଶ୍ଚରଣପରମେଷ୍ଠୀ ଵିଜଯତେ ॥ ୮୩॥

ଭଵତ୍ଯାଃ କାମାକ୍ଷି ସ୍ଫୁରିତପଦପଙ୍କେରୁହଭୁଵାଂ
ପରାଗାଣାଂ ପୂରୈଃ ପରିହୃତକଲଙ୍କଵ୍ଯତିକରୈଃ ।
ନତାନାମାମୃଷ୍ଟେ ହୃଦଯମୁକୁରେ ନିର୍ମଲରୁଚି
ପ୍ରସନ୍ନେ ନିଶ୍ଶେଷଂ ପ୍ରତିଫଲତି ଵିଶ୍ଵଂ ଗିରିସୁତେ ॥ ୮୪॥

ତଵ ତ୍ରସ୍ତଂ ପାଦାତ୍କିସଲଯମରଣ୍ଯାନ୍ତରମଗାତ୍
ପରଂ ରେଖାରୂପଂ କମଲମମୁମେଵାଶ୍ରିତମଭୂତ୍ ।
ଜିତାନାଂ କାମାକ୍ଷି ଦ୍ଵିତଯମପି ଯୁକ୍ତଂ ପରିଭଵେ
ଵିଦେଶେ ଵାସୋ ଵା ଶରଣଗମନଂ ଵା ନିଜରିପୋଃ ॥ ୮୫॥

ଗୃହୀତ୍ଵା ଯାଥାର୍ଥ୍ଯଂ ନିଗମଵଚସାଂ ଦେଶିକକୃପା-
କଟାକ୍ଷର୍କଜ୍ଯୋତିଶ୍ଶମିତମମତାବନ୍ଧତମସଃ ।
ଯତନ୍ତେ କାମାକ୍ଷି ପ୍ରତିଦିଵସମନ୍ତର୍ଦ୍ରଢଯିତୁଂ
ତ୍ଵଦୀଯଂ ପାଦାବ୍ଜଂ ସୁକୃତପରିପାକେନ ସୁଜନାଃ ॥ ୮୬॥

ଜଡାନାମପ୍ଯମ୍ବ ସ୍ମରଣସମଯେ ତଵଚ୍ଚରଣଯୋଃ
ଭ୍ରମନ୍ମନ୍ଥକ୍ଷ୍ମାଭୃଦ୍ଧୁମୁଘୁମିତସିନ୍ଧୁପ୍ରତିଭଟାଃ ।
ପ୍ରସନ୍ନାଃ କାମାକ୍ଷି ପ୍ରସଭମଧରସ୍ପନ୍ଦନକରା
ଭଵନ୍ତି ସ୍ଵଚ୍ଛନ୍ଦଂ ପ୍ରକୃତିପରିପକ୍କା ଭଣିତଯଃ ॥ ୮୭॥

ଵହନ୍ନପ୍ଯଶ୍ରାନ୍ତଂ ମଧୁରନିନଦଂ ହଂସକମସୌ
ତମେଵାଧଃ କର୍ତୁଂ କିମିଵ ଯତତେ କେଲିଗମନେ ।
ଭଵସ୍ଯୈଵାନନ୍ଦଂ ଵିଦଧଦପି କାମାକ୍ଷି ଚରଣୋ
ଭଵତ୍ଯାସ୍ତଦ୍ଦ୍ରୋହଂ ଭଗଵତି କିମେଵଂ ଵିତନୁତେ ॥ ୮୮॥

ଯଦତ୍ଯନ୍ତଂ ତାମ୍ଯତ୍ଯଲସଗତିଵାର୍ତାସ୍ଵପି ଶିଵେ
ତଦେତତ୍କାମାକ୍ଷି ପ୍ରକୃତିମୃଦୁଲଂ ତେ ପଦଯୁଗମ୍ ।
କିରୀଟୈଃ ସଂଘଟ୍ଟଂ କଥମିଵ ସୁରୌଘସ୍ଯ ସହତେ
ମୁନୀନ୍ଦ୍ରାଣାମାସ୍ତେ ମନସି ଚ କଥଂ ସୂଚିନିଶିତେ ॥ ୮୯॥

ମନୋରଙ୍ଗେ ମତ୍କେ ଵିବୁଧଜନସଂମୋଦଜନନୀ
ସରାଗଵ୍ଯାସଙ୍ଗଂ ସରସମୃଦୁସଂଚାରସୁଭଗା ।
ମନୋଜ୍ଞା କାମାକ୍ଷି ପ୍ରକଟଯତୁ ଲାସ୍ଯପ୍ରକରଣଂ
ରଣନ୍ମଞ୍ଜୀରା ତେ ଚରଣଯୁଗଲୀନର୍ତକଵଧୂଃ ॥ ୯୦॥

ପରିଷ୍କୁର୍ଵନ୍ମାତଃ ପଶୁପତିକପର୍ଦଂ ଚରଣରାଟ୍
ପରାଚାଂ ହୃତ୍ପଦ୍ମଂ ପରମଭଣିତୀନାଂ ଚ ମକୁଟମ୍ ।
ଭଵାଖ୍ଯେ ପାଥୋଧୌ ପରିହରତୁ କାମାକ୍ଷି ମମତା-
ପରାଧୀନତ୍ଵଂ ମେ ପରିମୁଷିତପାଥୋଜମହିମା ॥ ୯୧॥

ପ୍ରସୂନୈଃ ସମ୍ପର୍କାଦମରତରୁଣୀକୁନ୍ତଲଭଵୈଃ
ଅଭୀଷ୍ଟାନାଂ ଦାନାଦନିଶମପି କାମାକ୍ଷି ନମତାମ୍ ।
ସ୍ଵସଙ୍ଗାତ୍କଙ୍କେଲିପ୍ରସଵଜନକତ୍ଵେନ ଚ ଶିଵେ
ତ୍ରିଧା ଧତ୍ତେ ଵାର୍ତାଂ ସୁରଭିରିତି ପାଦୋ ଗିରିସୁତେ ॥ ୯୨॥

ମହାମୋହସ୍ତେନଵ୍ଯତିକରଭଯାତ୍ପାଲଯତି ଯୋ
ଵିନିକ୍ଷିପ୍ତଂ ସ୍ଵସ୍ମିନ୍ନିଜଜନମନୋରତ୍ନମନିଶମ୍ ।
ସ ରାଗସ୍ଯୋଦ୍ରେକାତ୍ସତତମପି କାମାକ୍ଷି ତରସା
କିମେଵଂ ପାଦୋଽସୌ କିସଲଯରୁଚିଂ ଚୋରଯତି ତେ ॥ ୯୩॥

ସଦା ସ୍ଵାଦୁଂକାରଂ ଵିଷଯଲହରୀଶାଲିକଣିକାଂ
ସମାସ୍ଵାଦ୍ଯ ଶ୍ରାନ୍ତଂ ହୃଦଯଶୁକପୋତଂ ଜନନି ମେ ।
କୃପାଜାଲେ ଫାଲେକ୍ଷଣମହିଷି କାମାକ୍ଷି ରଭସାତ୍
ଗୃହୀତ୍ଵା ରୁନ୍ଧୀଥାରସ୍ତଵ ପଦଯୁଗୀପଞ୍ଜରପୁଟେ ॥ ୯୪॥

ଧୁନାନଂ କାମାକ୍ଷି ସ୍ମରଣଲଵମାତ୍ରେଣ ଜଡିମ-
ଜ୍ଵରପ୍ରୌଢିଂ ଗୂଢସ୍ଥିତି ନିଗମନୈକୁଞ୍ଜକୁହରେ ।
ଅଲଭ୍ଯଂ ସର୍ଵେଷାଂ କତିଚନ ଲଭନ୍ତେ ସୁକୃତିନଃ
ଚିରାଦନ୍ଵିଷ୍ଯନ୍ତସ୍ତଵ ଚରଣସିଦ୍ଧୌଷଧମିଦମ୍ ॥ ୯୫॥

ରଣନ୍ମଞ୍ଜୀରାଭ୍ଯାଂ ଲଲିତଗମନାଭ୍ଯାଂ ସୁକୃତିନାଂ
ମନୋଵାସ୍ତଵ୍ଯାଭ୍ଯାଂ ମଥିତତିମିରାଭ୍ଯାଂ ନଖରୁଚା ।
ନିଧେଯାଭ୍ଯାଂ ପତ୍ଯା ନିଜଶିରସି କାମାକ୍ଷି ସତତଂ
ନମସ୍ତେ ପାଦାଭ୍ଯାଂ ନଲିନମୃଦୁଲାଭ୍ଯାଂ ଗିରିସୁତେ ॥ ୯୬॥

ସୁରାଗେ ରାକେନ୍ଦୁପ୍ରତିନିଧିମୁଖେ ପର୍ଵତସୁତେ
ଚିରାଲ୍ଲଭ୍ଯେ ଭକ୍ତ୍ଯା ଶମଧନଜନାନାଂ ପରିଷଦା ।
ମନୋଭୃଙ୍ଗୋ ମତ୍କଃ ପଦକମଲଯୁଗ୍ମେ ଜନନି ତେ
ପ୍ରକାମଂ କାମାକ୍ଷି ତ୍ରିପୁରହରଵାମାକ୍ଷି ରମତାମ୍ ॥ ୯୭॥

ଶିଵେ ସଂଵିଦ୍ରୂପେ ଶଶିଶକଲଚୂଡପ୍ରିଯତମେ
ଶନୈର୍ଗତ୍ଯାଗତ୍ଯା ଜିତସୁରଵରେଭେ ଗିରିସୁତେ ।
ଯତନ୍ତେ ସନ୍ତସ୍ତେ ଚରଣନଲିନାଲାନଯୁଗଲେ
ସଦା ବଦ୍ଧଂ ଚିତ୍ତପ୍ରମଦକରିଯୂଥଂ ଦୃଢତରମ୍ ॥ ୯୮॥

ଯଶଃ ସୂତେ ମାତର୍ମଧୁରକଵିତାଂ ପକ୍ଷ୍ମଲଯତେ
ଶ୍ରିଯଂ ଦତ୍ତେ ଚିତ୍ତେ କମପି ପରିପାକଂ ପ୍ରଥଯତେ ।
ସତାଂ ପାଶଗ୍ରନ୍ଥିଂ ଶିଥିଲଯତି କିଂ କିଂ ନ କୁରୁତେ
ପ୍ରପନ୍ନେ କାମାକ୍ଷ୍ଯାଃ ପ୍ରଣତିପରିପାଟୀ ଚରଣଯୋଃ ॥ ୯୯॥

ମନୀଷାଂ ମାହେନ୍ଦ୍ରୀଂ କକୁଭମିଵ ତେ କାମପି ଦଶାଂ
ପ୍ରଧତ୍ତେ କାମାକ୍ଷ୍ଯାଶ୍ଚରଣତରୁଣାଦିତ୍ଯକିରଣଃ ।
ଯଦୀଯେ ସମ୍ପର୍କେ ଧୃତରସମରନ୍ଦା କଵଯତାଂ
ପରୀପାକଂ ଧତ୍ତେ ପରିମଲଵତୀ ସୂକ୍ତିନଲିନୀ ॥ ୧୦୦॥

ପୁରା ମାରାରାତିଃ ପୁରମଜଯଦମ୍ବ ସ୍ତଵଶତୈଃ
ପ୍ରସନ୍ନାଯାଂ ସତ୍ଯାଂ ତ୍ଵଯି ତୁହିନଶୈଲେନ୍ଦ୍ରତନଯେ ।
ଅତସ୍ତେ କାମାକ୍ଷି ସ୍ଫୁରତୁ ତରସା କାଲସମଯେ
ସମାଯାତେ ମାତର୍ମମ ମନସି ପାଦାବ୍ଜଯୁଗଲମ୍ ॥ ୧୦୧॥

ପଦଦ୍ଵନ୍ଦ୍ଵଂ ମନ୍ଦଂ ଗତିଷୁ ନିଵସନ୍ତଂ ହୃଦି ସତାଂ
ଗିରାମନ୍ତେ ଭ୍ରାନ୍ତଂ କୃତକରହିତାନାଂ ପରିବୃଢେ ।
ଜନାନାମାନନ୍ଦଂ ଜନନି ଜନଯନ୍ତଂ ପ୍ରଣମତାଂ
ତ୍ଵଦୀଯଂ କାମାକ୍ଷି ପ୍ରତିଦିନମହଂ ନୌମି ଵିମଲମ୍ ॥ ୧୦୨॥

ଇଦଂ ଯଃ କାମାକ୍ଷ୍ଯାଶ୍ଚରଣନଲିନସ୍ତୋତ୍ରଶତକଂ
ଜପେନ୍ନିତ୍ଯଂ ଭକ୍ତ୍ଯା ନିଖିଲଜଗଦାହ୍ଲାଦଜନକମ୍ ।
ସ ଵିଶ୍ଵେଷାଂ ଵନ୍ଦ୍ଯଃ ସକଲକଵିଲୋକୈକତିଲକଃ
ଚିରଂ ଭୁକ୍ତ୍ଵା ଭୋଗାନ୍ପରିଣମତି ଚିଦ୍ରୂପକଲଯା ॥ ୧୦୩॥

{ପାଦାରଵିନ୍ଦଶତକଂ ସମ୍ପୂର୍ଣମ୍ ॥}



{॥ ସ୍ତୁତିଶତକମ୍ ॥}
ପାଣ୍ଡିତ୍ଯଂ ପରମେଶ୍ଵରି ସ୍ତୁତିଵିଧୌ ନୈଵାଶ୍ରଯନ୍ତେ ଗିରାଂ
ଵୈରିଞ୍ଚାନ୍ଯପି ଗୁମ୍ଫନାନି ଵିଗଲଦ୍ଗର୍ଵାଣି ଶର୍ଵାଣି ତେ ।
ସ୍ତୋତୁଂ ତ୍ଵାଂ ପରିଫୁଲ୍ଲନୀଲନଲିନଶ୍ଯାମାକ୍ଷି କାମାକ୍ଷି ମାଂ
ଵାଚାଲୀକୁରୁତେ ତଥାପି ନିତରାଂ ତ୍ଵତ୍ପାଦସେଵାଦରଃ ॥ ୧॥

ତାପିଞ୍ଛସ୍ତବକତ୍ଵିଷେ ତନୁଭୃତାଂ ଦାରିଦ୍ର୍ଯମୁଦ୍ରାଦ୍ଵିଷେ
ସଂସାରାଖ୍ଯତମୋମୁଷେ ପୁରରିପୋର୍ଵାମାଙ୍କସୀମାଜୁଷେ ।
କମ୍ପାତୀରମୁପେଯୁଷେ କଵଯତାଂ ଜିହ୍ଵାକୁଟୀଂ ଜଗ୍ମୁଷେ
ଵିଶ୍ଵତ୍ରାଣପୁଷେ ନମୋଽସ୍ତୁ ସତତଂ ତସ୍ମୈ ପରଂଜ୍ଯୋତିଷେ ॥ ୨॥

ଯେ ସନ୍ଧ୍ଯାରୁଣଯନ୍ତି ଶଂକରଜଟାକାନ୍ତାରଚନ୍ରାର୍ଭକଂ
ସିନ୍ଦୂରନ୍ତି ଚ ଯେ ପୁରନ୍ଦରଵଧୂସୀମନ୍ତସୀମାନ୍ତରେ ।
ପୁଣ୍ଯଂ ଯେ ପରିପକ୍କଯନ୍ତି ଭଜତାଂ କାଞ୍ଚୀପୁରେ ମାମମୀ
ପାଯାସୁଃ ପରମେଶ୍ଵରପ୍ରଣଯିନୀପାଦୋଦ୍ଭଵାଃ ପାଂସଵଃ ॥ ୩॥

କାମାଡମ୍ବରପୂରଯା ଶଶିରୁଚା କମ୍ରସ୍ମିତାନାଂ ତ୍ଵିଷା
କାମାରେରନୁରାଗସିନ୍ଧୁମଧିକଂ କଲ୍ଲୋଲିତଂ ତନ୍ଵତୀ ।
କାମାକ୍ଷୀତି ସମସ୍ତସଜ୍ଜନନୁତା କଲ୍ଯାଣଦାତ୍ରୀ ନୃଣାଂ
କାରୁଣ୍ଯାକୁଲମାନସା ଭଗଵତୀ କମ୍ପାତଟେ ଜୃମ୍ଭତେ ॥ ୪॥

କାମାକ୍ଷୀଣପରାକ୍ରମପ୍ରକଟନଂ ସମ୍ଭାଵଯନ୍ତୀ ଦୃଶା
ଶ୍ଯାମା କ୍ଷୀରସହୋଦରସ୍ମିତରୁଚିପ୍ରକ୍ଷାଲିତାଶାନ୍ତରା ।
କାମାକ୍ଷୀଜନମୌଲିଭୂଷଣମଣିର୍ଵାଚାଂ ପରା ଦେଵତା
କାମାକ୍ଷୀତି ଵିଭାତି କାପି କରୁଣା କମ୍ପାତଟିନ୍ଯାସ୍ତଟେ ॥ ୫॥

ଶ୍ଯାମା କାଚନ ଚନ୍ଦ୍ରିକା ତ୍ରିଭୁଵନେ ପୁଣ୍ଯାତ୍ମନାମାନନେ
ସୀମାଶୂନ୍ଯକଵିତ୍ଵଵର୍ଷଜନନୀ ଯା କାପି କାଦମ୍ବିନୀ ।
ମାରାରାତିମନୋଵିମୋହନଵିଧୌ କାଚିତତ୍ତମଃକନ୍ଦଲୀ
କାମାକ୍ଷ୍ଯାଃ କରୁଣାକଟାକ୍ଷଲହରୀ କାମାଯ ମେ କଲ୍ପତାମ୍ ॥ ୬॥

ପ୍ରୌଢଧ୍ଵାନ୍ତକଦମ୍ବକେ କୁମୁଦିନୀପୁଣ୍ଯାଂକୁରଂ ଦର୍ଶଯନ୍
ଜ୍ଯୋତ୍ସ୍ନାସଂଗମନେଽପି କୋକମିଥୁନଂ ମିଶ୍ରଂ ସମୁଦ୍ଭାଵଯନ୍ ।
କାଲିନ୍ଦୀଲହରୀଦଶାଂ ପ୍ରକଟଯନ୍କମ୍ରାଂ ନଭସ୍ଯଦ୍ଭୁତାଂ
କଶ୍ଚିନ୍ନେତ୍ରମହୋତ୍ସଵୋ ଵିଜଯତେ କାଞ୍ଚୀପୁରେ ଶୂଲିନଃ ॥ ୭॥

ତନ୍ଦ୍ରାହୀନତମାଲନୀଲସୁଷମୈସ୍ତାରୁଣ୍ଯଲୀଲାଗୃହୈଃ
ତାରାନାଥକିଶୋରଲାଞ୍ଛିତକଚୈସ୍ତାମ୍ରାରଵିନ୍ଦେକ୍ଷଣୈଃ ।
ମାତଃ ସଂଶ୍ରଯତାଂ ମନୋ ମନସିଜପ୍ରାଗଲ୍ଭ୍ଯନାଡିନ୍ଧମୈଃ
କମ୍ପାତୀରଚରୈର୍ଘନସ୍ତନଭରୈଃ ପୁଣ୍ଯାଙ୍କରୈଃ ଶାଂକରୈଃ ॥ ୮॥

ନିତ୍ଯଂ ନିଶ୍ଚଲତାମୁପେତ୍ଯ ମରୁତାଂ ରକ୍ଷାଵିଧିଂ ପୁଷ୍ଣତୀ
ତେଜସ୍ସଂଚଯପାଟଵେନ କିରଣାନୁଷ୍ଣଦ୍ଯୁତେର୍ମୁଷ୍ଣତୀ ।
କାଞ୍ଚୀମଧ୍ଯଗତାପି ଦୀପ୍ତିଜନନୀ ଵିଶ୍ଵାନ୍ତରେ ଜୃମ୍ଭତେ
କାଚିଚ୍ଚିତ୍ରମହୋ ସ୍ମୃତାପି ତମସାଂ ନିର୍ଵାପିକା ଦୀପିକା ॥ ୯॥

କାନ୍ତୈଃ କେଶରୁଚାଂ ଚଯୈର୍ଭ୍ରମରିତଂ ମନ୍ଦସ୍ମିତୈଃ ପୁଷ୍ପିତଂ
କାନ୍ତ୍ଯା ପଲ୍ଲଵିତଂ ପଦାମ୍ବୁରୁହଯୋର୍ନେତ୍ରତ୍ଵିଷା ପତ୍ରିତମ୍ ।
କମ୍ପାତୀରଵନାନ୍ତରଂ ଵିଦଧତୀ କଲ୍ଯାଣଜନ୍ମସ୍ଥଲୀ
କାଞ୍ଚୀମଧ୍ଯମହାମଣିର୍ଵିଜଯତେ କାଚିତ୍କୃପାକନ୍ଦଲୀ ॥ ୧୦॥

ରାକାଚନ୍ଦ୍ରସମାନକାନ୍ତିଵଦନା ନାକାଧିରାଜସ୍ତୁତା
ମୂକାନାମପି କୁର୍ଵତୀ ସୁରଧୁନୀନୀକାଶଵାଗ୍ଵୈଭଵମ୍ ।
ଶ୍ରୀକାଞ୍ଚୀନଗରୀଵିହାରରସିକା ଶୋକାପହନ୍ତ୍ରୀ ସତାମ୍
ଏକା ପୁଣ୍ଯପରମ୍ପରା ପଶୁପତେରାକାରିଣୀ ରାଜତେ ॥ ୧୧॥

ଜାତା ଶୀତଲଶୈଲତଃ ସୁକୃତିନାଂ ଦୃଶ୍ଯା ପରଂ ଦେହିନାଂ
ଲୋକାନାଂ କ୍ଷଣମାତ୍ରସଂସ୍ମରଣତଃ ସନ୍ତାପଵିଚ୍ଛେଦିନୀ ।
ଆଶ୍ଚର୍ଯଂ ବହୁ ଖେଲନଂ ଵିତନୁତେ ନୈଶ୍ଚଲ୍ଯମାବିଭ୍ରତୀ
କମ୍ପାଯାସ୍ତଟସୀମ୍ନି କାପି ତଟିନୀ କାରୁଣ୍ଯପାଥୋମଯୀ ॥ ୧୨॥

ଐକ୍ଯଂ ଯେନ ଵିରଚ୍ଯତେ ହରତନୌ ଦମ୍ଭାଵପୁମ୍ଭାଵୁକେ
ରେଖା ଯତ୍କଚସୀମ୍ନି ଶେଖରଦଶାଂ ନୈଶାକରୀ ଗାହତେ ।
ଔନ୍ନତ୍ଯଂ ମୁହୁରେତି ଯେନ ସ ମହାନ୍ମେନାସଖଃ ସାନୁମାନ୍
କମ୍ପାତୀରଵିହାରିଣା ସଶରଣାସ୍ତେନୈଵ ଧାମ୍ନା ଵଯମ୍ ॥ ୧୩॥

ଅକ୍ଷ୍ଣୋଶ୍ଚ ସ୍ତନଯୋଃ ଶ୍ରିଯା ଶ୍ରଵଣଯୋର୍ବାହ୍ଵୋଶ୍ଚ ମୂଲଂ ସ୍ପୃଶନ୍
ଉତ୍ତଂସେନ ମୁଖେନ ଚ ପ୍ରତିଦିନଂ ଦ୍ରୁହ୍ଯନ୍ପଯୋଜନ୍ମନେ ।
ମାଧୁର୍ଯେଣ ଗିରାଂ ଗତେନ ମୃଦୁନା ହଂସାଙ୍ଗନାଂ ହ୍ରେପଯନ୍
କାଞ୍ଚୀସୀମ୍ନି ଚକାସ୍ତି କୋଽପି କଵିତାସନ୍ତାନବୀଜାଙ୍କୁରଃ ॥ ୧୪॥

ଖଣ୍ଡଂ ଚାନ୍ଦ୍ରମସଂ ଵତଂସମନିଶଂ କାଞ୍ଚୀପୁରେ ଖେଲନଂ
କାଲାଯଶ୍ଛଵିତସ୍କରୀଂ ତନୁରୁଚିଂ କର୍ଣଜପେ ଲୋଚନେ ।
ତାରୁଣ୍ଯୋଷ୍ମନଖମ୍ପଚଂ ସ୍ତନଭରଂ ଜଙ୍ଘାସ୍ପୃଶଂ କୁନ୍ତଲଂ
ଭାଗ୍ଯଂ ଦେଶିକସଂଚିତଂ ମମ କଦା ସମ୍ପାଦଯେଦମ୍ବିକେ ॥ ୧୫॥

ତନ୍ଵାନଂ ନିଜକେଲିସୌଧସରଣିଂ ନୈସର୍ଗିକୀଣାଂ ଗିରାଂ
କେଦାରଂ କଵିମଲ୍ଲସୂକ୍ତିଲହରୀସସ୍ଯଶ୍ରିଯାଂ ଶାଶ୍ଵତମ୍ ।
ଅଂହୋଵଞ୍ଚନଚୁଞ୍ଚୁ କିଂଚନ ଭଜେ କାଞ୍ଚୀପୁରୀମଣ୍ଡନଂ
ପର୍ଯାଯଚ୍ଛଵି ପାକଶାସନମଣେଃ ପୌଷ୍ପେଷଵଂ ପୌରୁଷମ୍ ॥ ୧୬॥

ଆଲୋକେ ମୁଖପଙ୍କଜେ ଚ ଦଧତୀ ସୌଧାକରୀଂ ଚାତୁରୀଂ
ଚୂଡାଲଂକ୍ରିଯମାଣପଙ୍କଜଵନୀଵୈରାଗମପ୍ରକ୍ରିଯା ।
ମୁଗ୍ଧସ୍ମେରମୁଖୀ ଘନ୍ସତନତଟୀମୂର୍ଚ୍ଛାଲମଧ୍ଯାଞ୍ଚିତା
କାଞ୍ଚୀସୀମନି କାମିନୀ ଵିଜଯତେ କାଚିଜ୍ଜଗନ୍ମୋହିନୀ ॥ ୧୭॥

ଯସ୍ମିନ୍ନମ୍ବ ଭଵତ୍କଟାକ୍ଷରଜନୀ ମନ୍ଦେଽପି ମନ୍ଦସ୍ମିତ-
ଜ୍ଯୋତ୍ସ୍ନାସଂସ୍ନପିତା ଭଵତ୍ଯଭିମୁଖୀ ତଂ ପ୍ରତ୍ଯହୋ ଦେହିନମ୍ ।
ଦ୍ରକ୍ଷାମାକ୍ଷିକମାଧୁରୀମଦଭରଵ୍ରୀଡାକରୀ ଵୈଖରୀ
କାମାକ୍ଷି ସ୍ଵଯମାତନୋତ୍ଯଭିସୃତିଂ ଵାମେକ୍ଷଣେଵ କ୍ଷଣମ୍ ॥ ୧୮॥

କାଲିନ୍ଦୀଜଲକାନ୍ତଯଃ ସ୍ମିତରୁଚିସ୍ଵର୍ଵାହିନୀପାଥସି
ପ୍ରୌଢଧ୍ଵାନ୍ତରୁଚଃ ସ୍ଫୁଟାଧରମହୋଲୌହିତ୍ଯସନ୍ଧ୍ଯୋଦଯେ ।
ମଣିକ୍ଯୋପଲକୁଣ୍ଡଲାଂଶୁଶିଖିନି ଵ୍ଯାମିଶ୍ରଧୂମଶ୍ରିଯଃ
କଲ୍ଯାଣୈକଭୁଵଃ କଟାକ୍ଷସୁଷମାଃ କାମାକ୍ଷି ରାଜନ୍ତି ତେ ॥ ୧୯॥

କଲକଲରଣତ୍କାଞ୍ଚୀ କାଞ୍ଚୀଵିଭୂଷଣମାଲିକା
କଚଭରଲସଚ୍ଚନ୍ଦ୍ରା ଚନ୍ଦ୍ରାଵତଂସସଧର୍ମିଣୀ ।
କଵିକୁଲଗିର୍ଃ ଶ୍ରାଵଂଶ୍ରାଵଂ ମିଲତ୍ପୁଲକାଂକୁରା
ଵିରଚିତଶିରଃକମ୍ପା କମ୍ପାତଟେ ପରିଶୋଭତେ ॥ ୨୦॥

ସରସଵଚସାଂ ଵୀଚୀ ନୀଚୀଭଵନ୍ମଧୁମାଧୁରୀ
ଭରିତଭୁଵନା କୀର୍ତିର୍ମୂର୍ତିର୍ମନୋଭଵଜିତ୍ଵରୀ ।
ଜନନି ମନସୋ ଯୋଗ୍ଯଂ ଭୋଗ୍ଯଂ ନୃଣାଂ ତଵ ଜାଯତେ
କଥମିଵ ଵିନା କାଞ୍ଚୀଭୂଷେ କଟାକ୍ଷତରଙ୍ଗିତମ୍ ॥ ୨୧॥

ଭ୍ରମରିତସରିତ୍କୂଲୋ ନୀଲୋତ୍ପଲପ୍ରଭଯାଽଽଭଯା
ନତଜନତମଃଖଣ୍ଡୀ ତୁଣ୍ଡୀରସୀମ୍ନି ଵିଜୃମ୍ଭତେ ।
ଅଚଲତପସାମେକଃ ପାକଃ ପ୍ରସୂନଶରାସନ-
ପ୍ରତିଭଟମନୋହାରୀ ନାରୀକୁଲୈକଶିଖାମଣିଃ ॥ ୨୨॥

ମଧୁରଵଚସୋ ମନ୍ଦସ୍ମେରା ମତଙ୍ଗଜଗାମିନଃ
ତରୁଣିମଜୁଷସ୍ତାପିଚ୍ଛାଭାସ୍ତମଃପରିପନ୍ଥିନଃ ।
କୁଚଭରନତାଃ କୁର୍ଯୁର୍ଭଦ୍ରଂ କୁରଙ୍ଗଵିଲୋଚନାଃ
କଲିତକରୁଣାଃ କାଞ୍ଚୀଭାଜଃ କପାଲିମହୋତ୍ସଵାଃ ॥ ୨୩॥

କମଲସୁଷମାକ୍ଷ୍ଯାରୋହେ ଵିଚକ୍ଷଣଵୀକ୍ଷଣାଃ
କୁମୁଦସୁକୃତକ୍ରୀଡାଚୂଡାଲକୁନ୍ତଲବନ୍ଧୁରାଃ ।
ରୁଚିରରୁଚିଭିସ୍ତାପିଚ୍ଛଶ୍ରୀପ୍ରପଞ୍ଚନଚୁଞ୍ଚଵଃ
ପୁରଵିଜଯିନଃ କମ୍ପାତୀରେ ସ୍ଫୁରନ୍ତି ମନୋରଥାଃ ॥ ୨୪॥

କଲିତରତଯଃ କାଞ୍ଚୀଲୀଲାଵିଧୌ କଵିମଣ୍ଡଲୀ-
ଵଚନଲହରୀଵାସନ୍ତୀନାଂ ଵସନ୍ତଵିଭୂତଯଃ ।
କୁଶଲଵିଧଯେ ଭୂଯାସୁର୍ମେ କୁରଙ୍ଗଵିଲୋଚନାଃ
କୁସୁମଵିଶିଖାରାତେରକ୍ଷ୍ଣାଂ କୁତୂହଲଵିଭ୍ରମାଃ ॥ ୨୫॥

କବଲିତତମସ୍କାଣ୍ଡାସ୍ତୁଣ୍ଡୀରମଣ୍ଡଲମଣ୍ଡନାଃ
ସରସିଜଵନୀସନ୍ତାନାନାମରୁନ୍ତୁଦଶେଖରାଃ ।
ନଯନସରଣେର୍ନେଦୀଯଂସଃ କଦା ନୁ ଭଵନ୍ତି ମେ
ତରୁଣଜଲଦଶ୍ଯାମାଃ ଶମ୍ଭୋସ୍ତପଃଫଲଵିଭ୍ରମାଃ ॥ ୨୬॥

ଅଚରମମିଷୁଂ ଦୀନଂ ମୀନଧ୍ଵଜସ୍ଯ ମୁଖଶ୍ରିଯା
ସରସିଜଭୁଵୋ ଯାନଂ ମ୍ଲାନଂ ଗତେନ ଚ ମଞ୍ଜୁନା ।
ତ୍ରିଦଶସଦସାମନ୍ନଂ ଖିନ୍ନଂ ଗିରା ଚ ଵିତନ୍ଵତୀ
ତିଲକଯତି ସା କମ୍ପାତୀରଂ ତ୍ରିଲୋଚନସୁନ୍ଦରୀ ॥ ୨୭॥

ଜନନି ଭୁଵନେ ଚଙ୍କ୍ରମ୍ଯେଽହଂ କିଯନ୍ତମନେହସଂ
କୁପୁରୁଷକରଭ୍ରଷ୍ଟୈର୍ଦୁଷ୍ଟୈର୍ଧନୈରୁଦରମ୍ଭରିଃ ।
ତରୁଣକରୁଣେ ତନ୍ଦ୍ରାଶୂନ୍ଯେ ତରଙ୍ଗଯ ଲୋଚନେ
ନମତି ମଯି ତେ କିଂଚିତ୍କାଞ୍ଚୀପୁରୀମଣିଦୀପିକେ ॥ ୨୮॥

ମୁନିଜନମନଃପେଟୀରତ୍ନଂ ସ୍ଫୁରତ୍କରୁଣାନଟୀ-
ଵିହରଣକଲାଗେହଂ କାଞ୍ଚୀପୁରୀମଣିଭୂଷଣମ୍ ।
ଜଗତି ମହତୋ ମୋହଵ୍ଯାଧେର୍ନୃଣାଂ ପରମୌଷଧଂ
ପୁରହରଦୃଶାଂ ସାଫଲ୍ଯଂ ମେ ପୁରଃ ପରିଜୃମ୍ଭତାମ୍ ॥ ୨୯॥

ମୁନିଜନମୋଧାମ୍ନେ ଧାମ୍ନେ ଵଚୋମଯଜାହ୍ନଵୀ-
ହିମଗିରିତଟପ୍ରାଗ୍ଭାରାଯାକ୍ଷରାଯ ପରାତ୍ମନେ ।
ଵିହରଣଜୁଷେ କାଞ୍ଚୀଦେଶେ ମହେଶ୍ଵରଲୋଚନ-
ତ୍ରିତଯସରସକ୍ରୀଡାସୌଧାଙ୍ଗଣାଯ ନମୋ ନମଃ ॥ ୩୦॥

ମରକତରୁଚାଂ ପ୍ରତ୍ଯାଦେଶଂ ମହେଶ୍ଵରଚକ୍ଷୁଷାମ୍
ଅମୃତଲହରୀପୂରଂ ପାରଂ ଭଵାଖ୍ଯପଯୋନିଧେଃ ।
ସୁଚରିତଫଲଂ କାଞ୍ଚୀଭାଜୋ ଜନସ୍ଯ ପଚେଲିମଂ
ହିମଶିଖରିଣୋ ଵଂଶସ୍ଯୈକଂ ଵତଂସମୁପାସ୍ମହେ ॥ ୩୧॥

ପ୍ରଣମନଦିନାରମ୍ଭେ କମ୍ପାନଦୀସଖି ତାଵକେ
ସରସକଵିତୋନ୍ମେଷଃ ପୂଷା ସତାଂ ସମୁଦଞ୍ଚିତଃ ।
ପ୍ରତିଭଟମହାପ୍ରୌଢପ୍ରୋଦ୍ଯତ୍କଵିତ୍ଵକୁମୁଦ୍ଵତୀଂ
ନଯତି ତରସା ନିଦ୍ରାମୁଦ୍ରାଂ ନଗେଶ୍ଵରକନ୍ଯକେ ॥ ୩୨॥

ଶମିତଜଡିମାରମ୍ଭା କମ୍ପାତଟୀନିକଟେଚରୀ
ନିହତଦୁରିତସ୍ତୋମା ସୋମାର୍ଧମୁଦ୍ରିତକୁନ୍ତଲା ।
ଫଲିତସୁମନୋଵାଞ୍ଛା ପାଞ୍ଚାଯୁଧୀ ପରଦେଵତା
ସଫଲଯତୁ ମେ ନେତ୍ରେ ଗୋତ୍ରେଶ୍ଵରପ୍ରିଯନନ୍ଦିନୀ ॥ ୩୩॥

ମମ ତୁ ଧିଷଣା ପୀଡ୍ଯା ଜାଡ୍ଯାତିରେକ କଥଂ ତ୍ଵଯା
କୁମୁଦସୁଷମାମୈତ୍ରୀପାତ୍ରୀଵତଂସିତକୁନ୍ତଲାମ୍ ।
ଜଗତି ଶମିତସ୍ତମ୍ଭାଂ କମ୍ପାନଦୀନିଲଯାମସୌ
ଶ୍ରିଯତି ହି ଗଲତ୍ତନ୍ଦ୍ରା ଚନ୍ଦ୍ରାଵତଂସସଧର୍ମିଣୀମ୍ ॥ ୩୪॥

ପରିମଲପରୀପାକୋଦ୍ରେକଂ ପଯୋମୁଚି କାଞ୍ଚନେ
ଶିଖରିଣି ପୁନର୍ଦ୍ବୈଧୀଭାଵଂ ଶଶିନ୍ଯରୁଣାତପମ୍ ।
ଅପି ଚ ଜନଯନ୍କମ୍ବୋର୍ଲକ୍ଷ୍ମୀମନମ୍ବୁନି କୋଽପ୍ଯସୌ
କୁସୁମଧନୁଷଃ କାଞ୍ଚୀଦେଶେ ଚକାସ୍ତି ପରାକ୍ରମଃ ॥ ୩୫॥

ପୁରଦମଯିତୁର୍ଵାମୋତ୍ସଙ୍ଗସ୍ଥଲେନ ରସଜ୍ଞଯା
ସରସକଵିତାଭାଜା କାଞ୍ଚୀପୁରୋଦରସୀମଯା ।
ତଟପରିସରୈର୍ନୀହାରାଦ୍ରେର୍ଵଚୋଭିରକୃତ୍ରିମୈଃ
କିମିଵ ନ ତୁଲାମସ୍ମଚ୍ଚେତୋ ମହେଶ୍ଵରି ଗାହତେ ॥ ୩୬॥

ନଯନଯୁଗଲୀମାସ୍ମାକୀନାଂ କଦା ନୁ ଫଲେଗ୍ରହୀଂ
ଵିଦଧତି ଗତୌ ଵ୍ଯାକୁର୍ଵାଣା ଗଜେନ୍ଦ୍ରଚମତ୍କ୍ରିଯାମ୍ ।
ମରତକରୁଚୋ ମାହେଶାନା ଘନସ୍ତନନମ୍ରିତାଃ
ସୁକୃତଵିଭଵାଃ ପ୍ରାଞ୍ଚଃ କାଞ୍ଚୀଵତଂସଧୁରନ୍ଧରାଃ ॥ ୩୭॥

ମନସିଜଯଶଃପାରମ୍ପର୍ଯଂ ମରନ୍ଦଝରୀସୁଵାଂ
କଵିକୁଲଗିରାଂ କନ୍ଦଂ କମ୍ପାନଦୀତଟମଣ୍ଡନମ୍ ।
ମଧୁରଲଲିତଂ ମତ୍କଂ ଚକ୍ଷୁର୍ମନୀଷିମନୋହରଂ
ପୁରଵିଜଯିନଃ ସର୍ଵସ୍ଵଂ ତତ୍ପୁରସ୍କୁରୁତେ କଦା ॥ ୩୮॥

ଶିଥିଲିତତମୋଲୀଲାଂ ନୀଲାରଵିନ୍ଦଵିଲୋଚନାଂ
ଦହନଵିଲସତ୍ଫାଲାଂ ଶ୍ରୀକାମକୋଟିମୁପାସ୍ମହେ ।
କରଧୃତସଚ୍ଛୂଲାଂ କାଲାରିଚିତ୍ତହରାଂ ପରାଂ
ମନସିଜକୃପାଲୀଲାଂ ଲୋଲାଲକାମଲିକେକ୍ଷଣାମ୍ ॥ ୩୯॥

କଲାଲୀଲାଶାଲା କଵିକୁଲଵଚଃକୈରଵଵନୀ-
ଶରଜ୍ଜ୍ଯୋତ୍ସ୍ନାଧାରା ଶଶଧରଶିଶୁଶ୍ଲାଘ୍ଯମୁକୁଟୀ ।
ପୁନୀତେ ନଃ କମ୍ପାପୁଲିନତଟସୌହାର୍ଦତରଲା
କଦା ଚକ୍ଷୁର୍ମାର୍ଗଂ କନକଗିରିଧାନୁଷ୍କମହିଷୀ ॥ ୪୦॥

ନମଃ ସ୍ତାନ୍ନମ୍ରେଭ୍ଯଃ ସ୍ତନଗରିମଗର୍ଵେଣ ଗୁରୁଣା
ଦଧାନେଭ୍ଯଶ୍ଚୂଡାଭରଣମମୃତସ୍ଯନ୍ଦି ଶିଶିରମ୍ ।
ସଦା ଵାସ୍ତଵେଭ୍ଯଃ ସୁଵିଧଭୁଵି କମ୍ପାଖ୍ଯସରିତେ
ଯଶୋଵ୍ଯାପାରେଭ୍ଯଃ ସୁକୃତଵିଭଵେଭ୍ଯୋ ରତିପତେଃ ॥ ୪୧॥

ଅସୂଯନ୍ତୀ କାଚିନ୍ମରକତରୁଚୋ ନାକିମୁକୁଟୀ-
କଦମ୍ବଂ ଚୁମ୍ବନ୍ତୀ ଚରଣନଖଚନ୍ଦ୍ରାଂଶୁପଟଲୈଃ ।
ତମୋମୁଦ୍ରାଂ ଵିଦ୍ରାଵଯତୁ ମମ କାଞ୍ଚୀର୍ନିଲଯନା
ହରୋତ୍ସଙ୍ଗଶ୍ରୀମନ୍ମଣିଗୃହମହାଦୀପକଲିକା ॥ ୪୨॥

ଅନାଦ୍ଯନ୍ତା କାଚିତ୍ସୁଜନନଯନାନନ୍ଦଜନନୀ
ନିରୁନ୍ଧାନା କାନ୍ତିଂ ନିଜରୁଚିଵିଲାସୈର୍ଜଲମୁଚାମ୍ ।
ସ୍ମରାରେସ୍ତାରଲ୍ଯଂ ମନସି ଜନଯନ୍ତୀ ସ୍ଵଯମହୋ
ଗଲତ୍କମ୍ପା ଶମ୍ପା ପରିଲସତି କମ୍ପାପରିସରେ ॥ ୪୩॥

ସୁଧାଡିଣ୍ଡୀରଶ୍ରୀଃ ସ୍ମିତରୁଚିଷୁ ତୁଣ୍ଡୀରଵିଷଯଂ
ପରିଷ୍କୁର୍ଵାଣାସୌ ପରିହସିତନୀଲୋତ୍ପଲରୁଚିଃ ।
ସ୍ତନାଭ୍ଯାମାନମ୍ରା ସ୍ତବକଯତୁ ମେ କାଙ୍କ୍ଷିତତରୁଂ
ଦୃଶାମୈଶାନୀନାଂ ସୁକୃତଫଲପାଣ୍ଡିତ୍ଯଗରିମା ॥ ୪୪॥

କୃପାଧାରାଦ୍ରୋଣୀ କୃପଣଧିଷଣାନାଂ ପ୍ରଣମତାଂ
ନିହନ୍ତ୍ରୀ ସନ୍ତାପଂ ନିଗମମୁକୁଟୋତ୍ତଂସକଲିକା ।
ପରା କାଞ୍ଚୀଲୀଲାପରିଚଯଵତୀ ପର୍ଵତସୁତା
ଗିରାଂ ନୀଵୀ ଦେଵୀ ଗିରିଶପରତନ୍ତ୍ରା ଵିଜଯତେ ॥ ୪୫॥

କଵିତ୍ଵଶ୍ରୀକନ୍ଦଃ ସୁକୃତପରିପାଟୀ ହିମଗିରେଃ
ଵିଧାତ୍ରୀ ଵିଶ୍ଵେଷାଂ ଵିଷମଶରଵୀରଧ୍ଵଜପଟୀ ।
ସଖୀ କମ୍ପାନଦ୍ଯାଃ ପଦହସିତପାଥୋଜଯୁଗଲୀ
ପୁରାଣୋ ପାଯାନ୍ନଃ ପୁରମଥନସାମ୍ରାଜ୍ଯପଦଵୀ ॥ ୪୬॥

ଦରିଦ୍ରାଣା ମଧ୍ଯେ ଦରଦଲିତତାପିଚ୍ଛସୁଷମାଃ
ସ୍ତନାଭୋଗକ୍କାନ୍ତାସ୍ତରୁଣହରିଣାଙ୍କାଙ୍କିତକଚାଃ ।
ହରାଧୀନା ନାନାଵିବୁଧମୁକୁଟୀଚୁମ୍ବିତପଦାଃ
କଦା କମ୍ପାତୀରେ କଥଯ ଵିହରାମୋ ଗିରିସୁତେ ॥ ୪୭॥

ଵରୀଵର୍ତୁ ସ୍ଥେମା ତ୍ଵଯି ମମ ଗିରାଂ ଦେଵି ମନସୋ
ନରୀନର୍ତୁ ପ୍ରୌଢା ଵଦନକମଲେ ଵାକ୍ଯଲହରୀ ।
ଚରୀଚର୍ତୁ ପ୍ରଜ୍ଞାଜନନି ଜଡିମାନଃ ପରଜନେ
ସରୀସର୍ତୁ ସ୍ଵୈରଂ ଜନନି ମଯି କାମାକ୍ଷି କରୁଣା ॥ ୪୮॥

କ୍ଷଣାତ୍ତେ କାମାକ୍ଷି ଭ୍ରମରସୁଷମାଶିକ୍ଷଣଗୁରୁଃ
କଟାକ୍ଷଵ୍ଯାକ୍ଷେପୋ ମମ ଭଵତୁ ମୋକ୍ଷାଯ ଵିପଦାମ୍ ।
ନରୀନର୍ତୁ ସ୍ଵୈରଂ ଵଚନଲହରୀ ନିର୍ଜରପୁରୀ-
ସରିଦ୍ଵୀଚୀନୀଚୀକରଣପଟୁରାସ୍ଯେ ମମ ସଦା ॥ ୪୯॥

ପୁରସ୍ତାନ୍ମେ ଭୂଯଃପ୍ରଶମନପରଃ ସ୍ତାନ୍ମମ ରୁଜାଂ
ପ୍ରଚାରସ୍ତେ କମ୍ପାତଟଵିହୃତିସମ୍ପାଦିନି ଦୃଶୋଃ ।
ଇମାଂ ଯାଚ୍ଞାମୂରୀକୁରୁ ସପଦି ଦୂରୀକୁରୁ ତମଃ-
ପରୀପାକଂ ମତ୍କଂ ସପଦି ବୁଧଲୋକଂ ଚ ନଯ ମାମ୍ ॥ ୫୦॥

ଉଦଞ୍ଚନ୍ତୀ କାଞ୍ଚୀନଗରନିଲଯେ ତ୍ଵତ୍କରୁଣଯା
ସମୃଦ୍ଧା ଵାଗ୍ଧାଟୀ ପରିହସିତମାଧ୍ଵୀ କଵଯତାମ୍ ।
ଉପାଦତ୍ତେ ମାରପ୍ରତିଭଟଜଟାଜୂଟମୁକୁଟୀ-
କୁଟୀରୋଲ୍ଲାସିନ୍ଯାଃ ଶତମଖତଟିନ୍ଯା ଜଯପଟୀମ୍ ॥ ୫୧॥

ଶ୍ରିଯଂ ଵିଦ୍ଯାଂ ଦଦ୍ଯାଜ୍ଜନନି ନମତାଂ କୀର୍ତିମମିତାଂ
ସୁପୁତ୍ରାନ୍ ପ୍ରାଦତ୍ତେ ତଵ ଝଟିତି କାମାକ୍ଷି କରୁଣା ।
ତ୍ରିଲୋକ୍ଯାମାଧିକ୍ଯଂ ତ୍ରିପୁରପରିପନ୍ଥିପ୍ରଣଯିନି
ପ୍ରଣାମସ୍ତ୍ଵତ୍ପାଦେ ଶମିତଦୁରିତେ କିଂ ନ କୁରୁତେ ॥ ୫୨॥

ମନଃସ୍ତମ୍ଭଂ ସ୍ତମ୍ଭଂ ଗମଯଦୁପକମ୍ପଂ ପ୍ରଣମତାଂ
ସଦା ଲୋଲଂ ନୀଲଂ ଚିକୁରଜିତଲୋଲମ୍ବନିକରମ୍ ।
ଗିରାଂ ଦୂରଂ ସ୍ମେରଂ ଧୃତଶଶିକିଶୋରଂ ପଶୁପତେଃ
ଦୃଶାଂ ଯୋଗ୍ଯଂ ଭୋଗ୍ଯଂ ତୁହିନଗିରିଭାଗ୍ଯଂ ଵିଜଯତେ ॥ ୫୩॥

ଘନଶ୍ଯାମାନ୍କାମାନ୍ତକମହିଷି କାମାକ୍ଷି ମଧୁରାନ୍
ଦୃଶାଂ ପାତାନେତାନମୃତଜଲଶୀତାନନୁପମାନ୍ ।
ଭଵୋତ୍ପାତେ ଭୀତେ ମଯି ଵିତର ନାଥେ ଦୃଢଭଵ-
ନ୍ମନଶ୍ଶୋକେ ମୂକେ ହିମଗିରିପତାକେ କରୁଣଯା ॥ ୫୪॥

ନତାନାଂ ମନ୍ଦାନାଂ ଭଵନିଗଲବନ୍ଧାକୁଲଧିଯାଂ
ମହାନ୍ଧ୍ଯାଂ ରୁନ୍ଧାନାମଭିଲଷିତସନ୍ତାନଲତିକାମ୍ ।
ଚରନ୍ତୀଂ କମ୍ପାଯାସ୍ତଟଭୁଵି ସଵିତ୍ରୀଂ ତ୍ରିଜଗତାଂ
ସ୍ମରାମସ୍ତାଂ ନିତ୍ଯଂ ସ୍ମରମଥନଜୀଵାତୁକଲିକାମ୍ ॥ ୫୫॥

ପରା ଵିଦ୍ଯା ହୃଦ୍ଯାଶ୍ରିତମଦନଵିଦ୍ଯା ମରକତ-
ପ୍ରଭାନୀଲା ଲୀଲାପରଵଶିତଶୂଲାଯୁଧମନାଃ ।
ତମଃପୂରଂ ଦୂରଂ ଚରଣନତପୌରନ୍ଦରପୁରୀ-
ମୃଗାକ୍ଷୀ କାମାକ୍ଷୀ କମଲତରଲାକ୍ଷୀ ନଯତୁ ମେ ॥ ୫୬॥

ଅହନ୍ତାଖ୍ଯା ମତ୍କଂ କବଲଯତି ହା ହନ୍ତ ହରିଣୀ
ହଠାତ୍ସଂଵିଦ୍ରୂପଂ ହରମହିଷି ସସ୍ଯାଙ୍କୁରମସୌ ।
କଟାକ୍ଷଵ୍ଯାକ୍ଷେପପ୍ରକଟହରିପାଷାଣପଟଲୈଃ
ଇମାମୁଚ୍ଚୈରୁଚ୍ଚାଟଯ ଝଟିତି କାମାକ୍ଷି କୃପଯା ॥ ୫୭॥

ବୁଧେ ଵା ମୂକେ ଵା ତଵ ପତତି ଯସ୍ମିନ୍କ୍ଷଣମସୌ
କଟାକ୍ଷଃ କାମାକ୍ଷି ପ୍ରକଟଜଡିମକ୍ଷୋଦପଟିମା ।
କଥଂକାରଂ ନାସ୍ମୈ କରମୁକୁଲଚୂଡାଲମୁକୁଟା
ନମୋଵାକଂ ବ୍ରୂଯୁର୍ନମୁଚିପରିପନ୍ଥିପ୍ରଭୃତଯଃ ॥ ୫୮॥

ପ୍ରତୀଚୀଂ ପଶ୍ଯାମଃ ପ୍ରକଟରୁଚିନୀଵାରକମଣି-
ପ୍ରଭାସଧ୍ରୀଚୀନାଂ ପ୍ରଦଲିତଷଡାଧାରକମଲାମ୍ ।
ଚରନ୍ତୀଂ ସୌଷୁମ୍ନେ ପଥି ପରପଦେନ୍ଦୁପ୍ରଵିଗଲ-
ତ୍ସୁଧାର୍ଦ୍ରାଂ କାମାକ୍ଷୀଂ ପରିଣତପରଂଜ୍ଯୋତିରୁଦଯାମ୍ ॥ ୫୯॥

ଜମ୍ଭାରାତିପ୍ରଭୃତିମୁକୁଟୀଃ ପାଦଯୋଃ ପୀଠଯନ୍ତୀ
ଗୁମ୍ଫାନ୍ଵାଚାଂ କଵିଜନକୃତାନ୍ସ୍ଵୈରମାରାମଯନ୍ତୀ ।
ଶମ୍ପାଲକ୍ଷ୍ମୀଂ ମଣିଗଣରୁଚାପାଟଲୈଃ ପ୍ରାପଯନ୍ତୀ
କମ୍ପାତୀରେ କଵିପରିଷଦାଂ ଜୃମ୍ଭତେ ଭାଗ୍ଯସୀମା ॥ ୬୦॥

ଚନ୍ଦ୍ରାପୀଡାଂ ଚତୁରଵଦନାଂ ଚଞ୍ଚଲାପାଙ୍ଗଲୀଲାଂ
କୁନ୍ଦସ୍ମେରାଂ କୁଚଭରନତାଂ କୁନ୍ତଲୋଦ୍ଧୂତଭୃଙ୍ଗାମ୍ ।
ମାରାରାତେର୍ମଦନଶିଖିନଂ ମାଂସଲଂ ଦୀପଯନ୍ତୀଂ
କାମାକ୍ଷୀଂ ତାଂ କଵିକୁଲଗିରାଂ କଲ୍ପଵଲ୍ଲୀମୁପାସେ ॥ ୬୧॥

କାଲାମ୍ଭୋଦପ୍ରକରସୁଷମାଂ କାନ୍ତିଭିସ୍ତିର୍ଜଯନ୍ତୀ
କଲ୍ଯାଣାନାମୁଦଯସରଣିଃ କଲ୍ପଵଲ୍ଲୀ କଵୀନାମ୍ ।
କନ୍ଦର୍ପାରେଃ ପ୍ରିଯସହଚରୀ କଲ୍ମଷାଣାଂ ନିହନ୍ତ୍ରୀ
କାଞ୍ଚୀଦେଶଂ ତିଲକଯତି ସା କାପି କାରୁଣ୍ଯସୀମା ॥ ୬୨॥

ଊରୀକୁର୍ଵନ୍ନୁରସିଜତଟେ ଚାତୁରୀଂ ଭୂଧରାଣାଂ
ପାଥୋଜାନାଂ ନଯନଯୁଗଲେ ପରିପନ୍ଥ୍ଯଂ ଵିତନ୍ଵନ୍ ।
କମ୍ପାତୀରେ ଵିହରତି ରୁଚା ମୋଘଯନ୍ମେଘଶୈଲୀଂ
କୋକଦ୍ଵେଷଂ ଶିରସି କଲଯନ୍କୋଽପି ଵିଦ୍ଯାଵିଶେଷଃ ॥ ୬୩॥

କାଞ୍ଚୀଲୀଲାପରିଚଯଵତୀ କାପି ତାପିଚ୍ଛଲକ୍ଷ୍ମୀଃ
ଜାଡ୍ଯାରଣ୍ଯେ ହୁତଵହଶିଖା ଜନ୍ମଭୂମିଃ କୃପାଯାଃ ।
ମାକନ୍ଦଶ୍ରୀର୍ମଧୁରକଵିତାଚାତୁରୀ କୋକିଲାନାଂ
ମାର୍ଗେ ଭୂଯାନ୍ମମ ନଯନଯୋର୍ମାନ୍ମଥୀ କାପି ଵିଦ୍ଯା ॥ ୬୪॥

ସେତୁର୍ମାତର୍ମରତକମଯୋ ଭକ୍ତିଭାଜାଂ ଭଵାବ୍ଧୌ
ଲୀଲାଲୋଲା କୁଵଲଯମଯୀ ମାନ୍ମଥୀ ଵୈଜଯନ୍ତୀ ।
କାଞ୍ଚୀଭୂଷା ପଶୁପତିଦୃଶାଂ କାପି କାଲାଞ୍ଜନାଲୀ
ମତ୍କଂ ଦୁଃଖଂ ଶିଥିଲଯତୁ ତେ ମଞ୍ଜୁଲାପାଙ୍ଗମାଲା ॥ ୬୫॥

ଵ୍ଯାଵୃଣ୍ଵାନାଃ କୁଵଲଯଦଲପ୍ରକ୍ରିଯାଵୈରମୁଦ୍ରାଂ
ଵ୍ଯାକୁର୍ଵାଣା ମନସିଜମହାରାଜସାମ୍ରାଜ୍ଯଲକ୍ଷ୍ମୀମ୍ ।
କାଞ୍ଚୀଲୀଲାଵିହୃତିରସିକେ କାଙ୍କ୍ଷିତଂ ନଃ କ୍ରିଯାସୁଃ
ବନ୍ଧଚ୍ଛେଦେ ତଵ ନିଯମିନାଂ ବଦ୍ଧଦୀକ୍ଷାଃ କଟାକ୍ଷାଃ ॥ ୬୬॥

କାଲାମ୍ଭୋଦେ ଶଶିରୁଚି ଦଲଂ କୈତକଂ ଦର୍ଶଯନ୍ତୀ
ମଧ୍ଯେସୌଦାମିନି ମଧୁଲିହାଂ ମାଲିକାଂ ରାଜଯନ୍ତୀ ।
ହଂସାରାଵଂ ଵିକଚକମଲେ ମଞ୍ଜୁମୁଲ୍ଲାସଯନ୍ତୀ
କମ୍ପାତୀରେ ଵିଲସତି ନଵା କାପି କାରୁଣ୍ଯଲକ୍ଷ୍ମୀଃ ॥ ୬୭॥

ଚିତ୍ରଂ ଚିତ୍ରଂ ନିଜମୃଦୁତଯା ଭର୍ତ୍ସଯନ୍ପଲ୍ଲଵାଲୀଂ
ପୁଂସାଂ କାମାନ୍ଭୁଵି ଚ ନିଯତଂ ପୂରଯନ୍ପୁଣ୍ଯଭାଜାମ୍ ।
ଜାତଃ ଶୈଲାନ୍ନ ତୁ ଜଲନିଧେଃ ସ୍ଵୈରସଂଚାରଶୀଲଃ
କାଞ୍ଚୀଭୂଷା କଲଯତୁ ଶିଵଂ କୋଽପି ଚିନ୍ତାମଣିର୍ମେ ॥ ୬୮॥

ତାମ୍ରାମ୍ଭୋଜଂ ଜଲଦନିକଟେ ତତ୍ର ବନ୍ଧୂକପୁଷ୍ପଂ
ତସ୍ମିନ୍ମଲ୍ଲୀକୁସୁମସୁଷମାଂ ତତ୍ର ଵୀଣାନିନାଦମ୍ ।
ଵ୍ଯାଵୃନ୍ଵାନା ସୁକୃତଲହରୀ କାପି କାଞ୍ଚିନଗର୍ଯାମ୍
ଐଶାନୀ ସା କଲଯତିତରାମୈନ୍ଦ୍ରଜାଲଂ ଵିଲାସମ୍ ॥ ୬୯॥

ଆହାରାଂଶଂ ତ୍ରିଦଶସଦସାମାଶ୍ରଯେ ଚାତକାନାମ୍
ଆକାଶୋପର୍ଯପି ଚ କଲଯନ୍ନାଲଯଂ ତୁଙ୍ଗମେଷାମ୍ ।
କମ୍ପାତୀରେ ଵିହରତିତରାଂ କାମଧେନୁଃ କଵୀନାଂ
ମନ୍ଦସ୍ମେରୋ ମଦନନିଗମପ୍ରକ୍ରିଯାସମ୍ପ୍ରଦାଯଃ ॥ ୭୦॥

ଆର୍ଦ୍ରୀଭୂତୈରଵିରଲକୃପୈରାତ୍ତଲୀଲାଵିଲାସୈଃ
ଆସ୍ଥାପୂର୍ଣୈରଧିକଚପଲୈରଞ୍ଚିତାମ୍ଭୋଜଶିଲ୍ପୈଃ ।
କାନ୍ତୈର୍ଲକ୍ଷ୍ମୀଲଲିତଭଵନୈଃ କାନ୍ତିକୈଵଲ୍ଯସାରୈଃ
କାଶ୍ମଲ୍ଯଂ ନଃ କବଲଯତୁ ସା କାମକୋଟୀ କଟାକ୍ଷୈଃ ॥ ୭୧॥

ଆଧୂନ୍ଵନ୍ତ୍ଯୈ ତରଲନଯନୈରାଙ୍ଗଜୀଂ ଵୈଜଯନ୍ତୀମ୍
ଆନନ୍ଦିନ୍ଯୈ ନିଜପଦଜୁଷାମାତ୍ତକାଞ୍ଚୀପୁରାଯୈ ।
ଆସ୍ମାକୀନଂ ହୃଦଯମଖିଲୈରାଗମାନାଂ ପ୍ରପଞ୍ଚୈଃ
ଆରାଧ୍ଯାଯୈ ସ୍ପୃହଯତିତରାମଦିମାଯୈ ଜନନ୍ଯୈ ॥ ୭୨॥

ଦୂରଂ ଵାଚାଂ ତ୍ରିଦଶସଦସାଂ ଦୁଃଖସିନ୍ଧୋସ୍ତରିତ୍ରଂ
ମୋହକ୍ଷ୍ଵେଲକ୍ଷିତିରୁହଵନେ କ୍ରୂରଧାରଂ କୁଠାରମ୍ ।
କମ୍ପାତୀରପ୍ରଣଯି କଵିଭିର୍ଵର୍ଣିତୋଦ୍ଯଚ୍ଚରିତ୍ରଂ
ଶାନ୍ତ୍ଯୈ ସେଵେ ସକଲଵିପଦାଂ ଶାଂକରଂ ତତ୍କଲତ୍ରମ୍ ॥ ୭୩॥

ଖଣ୍ଡୀକୃତ୍ଯ ପ୍ରକୃତିକୁଟିଲଂ କଲ୍ମଷଂ ପ୍ରାତିଭଶ୍ରୀ-
ଶୁଣ୍ଡୀରତ୍ଵଂ ନିଜପଦଜୁଷାଂ ଶୂନ୍ଯତନ୍ଦ୍ରଂ ଦିଶନ୍ତୀ ।
ତୁଣ୍ଡୀରାଖ୍ଯୈ ମହତି ଵିଷଯେ ସ୍ଵର୍ଣଵୃଷ୍ଟିପ୍ରଦାତ୍ରୀ
ଚଣ୍ଡୀ ଦେଵୀ କଲଯତି ରତିଂ ଚନ୍ଦ୍ରଚୂଡାଲଚୂଡେ ॥ ୭୪॥

ଯେନ ଖ୍ଯାତୋ ଭଵତି ସ ଗୃହୀ ପୂରୁଷୋ ମେରୁଧନ୍ଵା
ଯଦ୍ଦୃକ୍କୋଣେ ମଦନନିଗମପ୍ରାଭଵଂ ବୋଭଵୀତି ।
ଯତ୍ପ୍ରୀତ୍ଯୈଵ ତ୍ରିଜଗଦଧିପୋ ଜୃମ୍ଭତେ କିମ୍ପଚାନଃ
କମ୍ପାତୀରେ ସ ଜଯତି ମହାନ୍କଶ୍ଚିଦୋଜୋଵିଶେଷଃ ॥ ୭୫॥

ଧନ୍ଯା ଧନ୍ଯା ଗତିରିହ ଗିରାଂ ଦେଵି କାମାକ୍ଷି ଯନ୍ମେ
ନିନ୍ଦ୍ଯାଂ ଭିନ୍ଦ୍ଯାତ୍ସପଦି ଜଡତାଂ କଲ୍ମଷାଦୁନ୍ମିଷନ୍ତୀମ୍ ।
ସାଧ୍ଵୀ ମାଧ୍ଵୀରସମଧୁରତାଭଞ୍ଜିନୀ ମଞ୍ଜୁରୀତିଃ
ଵାଣୀଵେଣୀ ଝଟିତି ଵୃଣୁତାତ୍ସ୍ଵର୍ଧୁନୀସ୍ପର୍ଧିନୀ ମାମ୍ ॥ ୭୬॥

ଯସ୍ଯା ଵାଟୀ ହୃଦଯକମଲଂ କୌସୁମୀ ଯୋଗଭାଜାଂ
ଯସ୍ଯାଃ ପୀଠୀ ସତତଶିଶିରା ଶୀକରୈର୍ମାକରନ୍ଦୈଃ ।
ଯସ୍ଯାଃ ପେଟୀ ଶ୍ରୁତିପରିଚଲନ୍ମୌଲିରତ୍ନସ୍ଯ କାଞ୍ଚୀ
ସା ମେ ସୋମାଭରଣମହିଷୀ ସାଧଯେତ୍କାଙ୍କ୍ଷିତାନି ॥ ୭୭॥

ଏକା ମାତା ସକଲଜଗତାମୀଯୁଷୀ ଧ୍ଯାନମୁଦ୍ରାମ୍
ଏକାମ୍ରାଧୀଶ୍ଵରଚରଣଯୋରେକତାନାଂ ସମିନ୍ଧେ ।
ତାଟଙ୍କୋଦ୍ଯନ୍ମଣିଗଣରୁଚା ତାମ୍ରକର୍ଣପ୍ରଦେଶା
ତାରୁଣ୍ଯଶ୍ରୀସ୍ତବକିତତନୁସ୍ତାପସୀ କାପି ବାଲା ॥ ୭୮॥

ଦନ୍ତାଦନ୍ତିପ୍ରକଟନକରୀ ଦନ୍ତିଭିର୍ମନ୍ଦଯାନୈଃ
ମନ୍ଦାରାଣାଂ ମଦପରିଣତିଂ ମଥ୍ନତୀ ମନ୍ଦହାସୈଃ ।
ଅଙ୍କୂରାଭ୍ଯାଂ ମନସିଜତରୋରଙ୍କିତୋରାଃ କୁଚାଭ୍ଯା-
ମନ୍ତଃକାଞ୍ଚି ସ୍ଫୁରତି ଜଗତାମାଦିମା କାପି ମାତା ॥ ୭୯॥

ତ୍ରିଯମ୍ବକକୁଟୁମ୍ବିନୀଂ ତ୍ରିପୁରସୁନ୍ଦରୀମିନ୍ଦିରାଂ
ପୁଲିନ୍ଦପତିସୁନ୍ଦରୀଂ ତ୍ରିପୁରଭୈରଵୀଂ ଭାରତୀମ୍ ।
ମତଙ୍ଗକୁଲନାଯିକାଂ ମହିଷମର୍ଦନୀଂ ମାତୃକାଂ
ଭଣନ୍ତି ଵିବୁଧୋତ୍ତମା ଵିହୃତିମେଵ କାମାକ୍ଷି ତେ ॥ ୮୦॥

ମହାମୁନିମନୋନଟୀ ମହିତରମ୍ଯକମ୍ପାତଟୀ-
କୁଟୀରକଵିହାରିଣୀ କୁଟିଲବୋଧସଂହାରିଣୀ ।
ସଦା ଭଵତୁ କାମିନୀ ସକଲଦେହିନାଂ ସ୍ଵାମିନୀ
କୃପାତିଶଯକିଂକରୀ ମମ ଵିଭୂତଯେ ଶାଂକରୀ ॥ ୮୧॥

ଜଡାଃ ପ୍ରକୃତିନିର୍ଧନା ଜନଵିଲୋଚନାରୁନ୍ତୁଦା
ନରା ଜନନି ଵୀକ୍ଷଣଂ କ୍ଷଣମଵାପ୍ଯ କାମାକ୍ଷି ତେ ।
ଵଚସ୍ସୁ ମଧୁମାଧୁରୀଂ ପ୍ରକଟଯନ୍ତି ପୌରନ୍ଦରୀ-
ଵିଭୂତିଷୁ ଵିଡମ୍ବନାଂ ଵପୁଷି ମାନ୍ମଥୀଂ ପ୍ରକ୍ରିଯାମ୍ ॥ ୮୨॥

ଘନ୍ସତନତଟସ୍ଫୁଟସ୍ଫୁରିତକଞ୍ଚୁଲୀଚଞ୍ଚଲୀ-
କୃତତ୍ରିପୁରଶାସନା ସୁଜନଶୀଲିତୋପାସନା ।
ଦୃଶୋଃ ସରଣିମଶ୍ନୁତେ ମମ କଦା ନୁ କାଞ୍ଚୀପୁରେ
ପରା ପରମଯୋଗିନାଂ ମନସି ଚିତ୍କୁଲା ପୁଷ୍କଲା ॥ ୮୩॥

କଵୀନ୍ଦ୍ରହୃଦଯେଚରୀ ପରିଗୃହୀତକାଞ୍ଚୀପୁରୀ
ନିରୂଢକରୁଣାଝରୀ ନିଖିଲଲୋକରକ୍ଷାକରୀ ।
ମନଃପଥଦଵୀଯସୀ ମଦନଶାସନପ୍ରେଯସୀ
ମହାଗୁଣଗରୀଯସୀ ମମ ଦୃଶୋଽସ୍ତୁ ନେଦୀଯସୀ ॥ ୮୪॥

ଧନେନ ନ ରମାମହେ ଖଲଜନାନ୍ନ ସେଵାମହେ
ନ ଚାପଲମଯାମହେ ଭଵଭଯାନ୍ନ ଦୂଯାମହେ ।
ସ୍ଥିରାଂ ତନୁମହେତରାଂ ମନସି କିଂ ଚ କାଞ୍ଚୀରତ-
ସ୍ମରାନ୍ତକକୁଟୁମ୍ବିନୀଚରଣପଲ୍ଲଵୋପାସନାମ୍ ॥ ୮୫॥

ସୁରାଃ ପରିଜନା ଵପୁର୍ମନସିଜାଯ ଵୈରାଯତେ
ତ୍ରିଵିଷ୍ଟପନିତମ୍ବିନୀକୁଚତଟୀ ଚ କେଲୀଗିରିଃ ।
ଗିରଃ ସୁରଭଯୋ ଵଯସ୍ତରୁଣିମା ଦରିଦ୍ରସ୍ଯ ଵା
କଟାକ୍ଷସରଣୌ କ୍ଷଣଂ ନିପତିତସ୍ଯ କାମାକ୍ଷି ତେ ॥ ୮୬॥

ପଵିତ୍ରଯ ଜଗତ୍ତ୍ରଯୀଵିବୁଧବୋଧଜୀଵାତୁଭିଃ
ପୁରତ୍ରଯଵିମର୍ଦିନଃ ପୁଲକକଞ୍ଚୁଲୀଦାଯିଭିଃ ।
ଭଵକ୍ଷଯଵିଚକ୍ଷଣୈର୍ଵ୍ଯସନମୋକ୍ଷଣୈର୍ଵୀକ୍ଷଣୈଃ
ନିରକ୍ଷରଶିରୋମଣିଂ କରୁଣଯୈଵ କାମାକ୍ଷି ମାମ୍ ॥ ୮୭॥

କଦା କଲିତଖେଲନାଃ କରୁଣଯୈଵ କାଞ୍ଚୀପୁରେ
କଲାଯମୁକୁଲତ୍ଵିଷଃ ଶୁଭକଦମ୍ବପୂର୍ଣାଙ୍କୁରାଃ ।
ପଯୋଧରଭରାଲସାଃ କଵିଜନେଷୁ ତେ ବନ୍ଧୁରାଃ
ପଚେଲିମକୃପାରସା ପରିପତନ୍ତି ମାର୍ଗେ ଦୃଶୋଃ ॥ ୮୮॥

ଅଶୋଧ୍ଯମଚଲୋଦ୍ଭଵଂ ହୃଦଯନନ୍ଦନଂ ଦେହିନାମ୍
ଅନର୍ଘମଧିକାଞ୍ଚି ତତ୍କିମପି ରତ୍ନମୁଦ୍ଦ୍ଯୋତତେ ।
ଅନେନ ସମଲଂକୃତା ଜଯତି ଶଙ୍କରାଙ୍କସ୍ଥଲୀ
କଦାସ୍ଯ ମମ ମାନସଂ ଵ୍ରଜତି ପେଟିକାଵିଭ୍ରମମ୍ ॥ ୮୯॥

ପରାମୃତଝରୀପ୍ଲୁତା ଜଯତି ନିତ୍ଯମନ୍ତଶ୍ଚରୀ
ଭୁଵାମପି ବହିଶ୍ଚରୀ ପରମସଂଵିଦେକାତ୍ମିକା ।
ମହଦ୍ଭିରପରୋକ୍ଷିତା ସତତମେଵ କାଞ୍ଚୀପୁରେ
ମମାନ୍ଵହମହଂମତିର୍ମନସି ଭାତୁ ମାହେଶ୍ଵରୀ ॥ ୯୦॥

ତମୋଵିପିନଧାଵିନଂ ସତତମେଵ କାଞ୍ଚୀପୁରେ
ଵିହାରରସିକା ପରା ପରମସଂଵିଦୁର୍ଵୀରୁହେ ।
କଟାକ୍ଷନିଗଲୈର୍ଦୃଢଂ ହୃଦଯଦୁଷ୍ଟଦନ୍ତାଵଲଂ
ଚିରଂ ନଯତୁ ମାମକଂ ତ୍ରିପୁରଵୈରିସୀମନ୍ତିନୀ ॥ ୯୧॥

ତ୍ଵମେଵ ସତି ଚଣ୍ଡିକା ତ୍ଵମସି ଦେଵି ଚାମୁଣ୍ଡିକା
ତ୍ଵମେଵ ପରମାତୃକା ତ୍ଵମପି ଯୋଗିନୀରୂପିଣୀ ।
ତ୍ଵମେଵ କିଲ ଶାମ୍ଭଵୀ ତ୍ଵମସି କାମକୋଟୀ ଜଯା
ତ୍ଵମେଵ ଵିଜଯା ତ୍ଵଯି ତ୍ରିଜଗଦମ୍ବ କିଂ ବ୍ରୂମହେ ॥ ୯୨॥

ପରେ ଜନନି ପାର୍ଵତି ପ୍ରଣତପାଲିନି ପ୍ରାତିଭ-
ପ୍ରଦାତ୍ରି ପରମେଶ୍ଵରି ତ୍ରିଜଗଦାଶ୍ରିତେ ଶାଶ୍ଵତେ ।
ତ୍ରିଯମ୍ବକକୁଟୁମ୍ବିନି ତ୍ରିପଦସଙ୍ଗିନି ତ୍ରୀକ୍ଷଣେ
ତ୍ରିଶକ୍ତିମଯି ଵୀକ୍ଷଣଂ ମଯି ନିଧେହି କାମାକ୍ଷି ତେ ॥ ୯୩॥

ମନୋମଧୁକରୋତ୍ସଵଂ ଵିଦଧତୀ ମନୀଷାଜୁଷାଂ
ସ୍ଵଯମ୍ପ୍ରଭଵଵୈଖରୀଵିପିନଵୀଥିକାଲମ୍ବିନୀ ।
ଅହୋ ଶିଶିରିତା କୃପାମଧୁରସେନ କମ୍ପାତଟେ
ଚରାଚରଵିଧାଯିନୀ ଚଲତି କାପି ଚିନ୍ମଞ୍ଜରୀ ॥ ୯୪॥

କଲାଵତି କଲାଭୃତୋ ମୁକୁଟସୀମ୍ନି ଲୀଲାଵତି
ସ୍ପୃହାଵତି ମହେଶ୍ଵରେ ଭୁଵନମୋହନେ ଭାସ୍ଵତି ।
ପ୍ରଭାଵତି ରମେ ସଦା ମହିତରୂପଶୋଭାଵତି
ତ୍ଵରାଵତି ପରେ ସତାଂ ଗୁରୁକୃପାମ୍ବୁଧାରାଵତି ॥ ୯୫॥

ତ୍ଵଯୈଵ ଜଗଦମ୍ବଯା ଭୁଵନମଣ୍ଡଲଂ ସୂଯତେ
ତ୍ଵଯୈଵ କରୁଣାର୍ଦ୍ରଯା ତଦପି ରକ୍ଷଣଂ ନୀଯତେ ।
ତ୍ଵଯୈଵ ଖରକୋପଯା ନଯନପାଵକେ ହୂଯତେ
ତ୍ଵଯୈଵ କିଲ ନିତ୍ଯଯା ଜଗତି ସନ୍ତତଂ ସ୍ଥୀଯତେ ॥ ୯୬॥

ଚରାଚରଜଗନ୍ମଯୀଂ ସକଲହୃନ୍ମଯୀଂ ଚିନ୍ମଯୀଂ
ଗୁଣତ୍ରଯମଯୀଂ ଜଗତ୍ତ୍ରଯମଯୀଂ ତ୍ରିଧାମାମଯୀମ୍ ।
ପରାପରମଯୀଂ ସଦା ଦଶଦିଶାଂ ନିଶାହର୍ମଯୀଂ
ପରାଂ ସତତସନ୍ମଯୀଂ ମନସି ଚିନ୍ମଯୀଂ ଶୀଲଯେ ॥ ୯୭॥

ଜଯ ଜଗଦମ୍ବିକେ ହରକୁଟୁମ୍ବିନି ଵକ୍ତ୍ରରୁଚା
ଜିତଶରଦମ୍ବୁଜେ ଘନଵିଡମ୍ବିନି କେଶରୁଚା ।
ପରମଵଲମ୍ବନଂ କୁରୁ ସଦା ପରରୂପଧରେ
ମମ ଗତସଂଵିଦୋ ଜଡିମଡମ୍ବରତାଣ୍ଡଵିନଃ ॥ ୯୮॥

ଭୁଵନଜନନି ଭୂଷାଭୂତଚନ୍ଦ୍ରେ ନମସ୍ତେ
କଲୁଷଶମନି କମ୍ପାତୀରଗେହେ ନମସ୍ତେ ।
ନିଖିଲନିଗମଵେଦ୍ଯେ ନିତ୍ଯରୂପେ ନମସ୍ତେ
ପରଶିଵମଯି ପାଶଚ୍ଛେଦହସ୍ତେ ନମସ୍ତେ ॥ ୯୯॥

କ୍ଵଣତ୍କାଞ୍ଚୀ କାଞ୍ଚୀପୁରମଣିଵିପଞ୍ଚୀଲଯଝରୀ-
ଶିରଃକମ୍ପା କମ୍ପାଵସତିରନୁକମ୍ପାଜଲନିଧିଃ ।
ଘନଶ୍ଯାମା ଶ୍ଯାମା କଠିନକୁଚସୀମା ମନସି ମେ
ମୃଗାକ୍ଷୀ କାମାକ୍ଷୀ ହରନଟନସାକ୍ଷୀ ଵିହରତାତ୍ ॥ ୧୦୦॥

ସମରଵିଜଯକୋଟୀ ସାଧକାନନ୍ଦଧାଟୀ
ମୃଦୁଗୁଣପରିପେଟୀ ମୁଖ୍ଯକାଦମ୍ବଵାଟୀ ।
ମୁନିନୁତପରିପାଟୀ ମୋହିତାଜାଣ୍ଡକୋଟୀ
ପରମଶିଵଵଧୂଟୀ ପାତୁ ମାଂ କାମକୋଟୀ ॥ ୧୦୧॥

ଇମଂ ପରଵରପ୍ରଦଂ ପ୍ରକୃତିପେଶଲଂ ପାଵନଂ
ପରାପରଚିଦାକୃତିପ୍ରକଟନପ୍ରଦୀପାଯିତମ୍ ।
ସ୍ତଵଂ ପଠତି ନିତ୍ଯଦା ମନସି ଭାଵଯନ୍ନମ୍ବିକାଂ
ଜପୈରଲମଲଂ ମଖୈରଧିକଦେହସଂଶୋଷଣୈଃ ॥ ୧୦୨॥

{ସ୍ତୁତିଶତକଂ ସମ୍ପୂର୍ଣମ୍ ॥}



{॥ କଟାକ୍ଷଶତକମ୍ ॥}
ମୋହାନ୍ଧକାରନିଵହଂ ଵିନିହନ୍ତୁମୀଡେ
ମୂକାତ୍ମନାମପି ମହାକଵିତାଵଦାନ୍ଯାନ୍ ।
ଶ୍ରୀକାଞ୍ଚିଦେଶଶିଶିରୀକୃତିଜାଗରୂକାନ୍
ଏକାମ୍ରନାଥତରୁଣୀକରୁଣାଵଲୋକାନ୍ ॥ ୧॥

ମାତର୍ଜଯନ୍ତି ମମତାଗ୍ରହମୋକ୍ଷଣାନି
ମାହେନ୍ଦ୍ରନୀଲରୁଚିଶିକ୍ଷଣଦକ୍ଷିଣାନି ।
କାମାକ୍ଷି କଲ୍ପିତଜଗତ୍ତ୍ରଯରକ୍ଷଣାନି
ତ୍ଵଦ୍ଵୀକ୍ଷଣାନି ଵରଦାନଵିଚକ୍ଷଣାନି ॥ ୨॥

ଆନଙ୍ଗତନ୍ତ୍ରଵିଧିଦର୍ଶିତକୌଶଲାନାମ୍
ଆନନ୍ଦମନ୍ଦପରିଘୂର୍ଣିତମନ୍ଥରାଣାମ୍ ।
ତାରଲ୍ଯମମ୍ବ ତଵ ତାଡିତକର୍ଣସୀମ୍ନାଂ
କାମାକ୍ଷି ଖେଲତି କଟାକ୍ଷନିରୀକ୍ଷଣାନାମ୍ ॥ ୩॥

କଲ୍ଲୋଲିତେନ କରୁଣାରସଵେଲ୍ଲିତେନ
କଲ୍ମାଷିତେନ କମନୀଯମୃଦୁସ୍ମିତେନ ।
ମାମଞ୍ଚିତେନ ତଵ କିଂଚନ କୁଞ୍ଚିତେନ
କାମାକ୍ଷି ତେନ ଶିଶିରୀକୁରୁ ଵୀକ୍ଷିତେନ ॥ ୪॥

ସାହାଯ୍ଯକଂ ଗତଵତୀ ମୁହୁରର୍ଜନସ୍ଯ
ମନ୍ଦସ୍ମିତସ୍ଯ ପରିତୋଷିତଭୀମଚେତାଃ ।
କାମାକ୍ଷି ପାଣ୍ଡଵଚମୂରିଵ ତାଵକୀନା
କର୍ଣାନ୍ତିକଂ ଚଲତି ହନ୍ତ କଟାକ୍ଷଲକ୍ଷ୍ମୀଃ ॥ ୫॥

ଅସ୍ତଂ କ୍ଷଣାନ୍ନଯତୁ ମେ ପରିତାପସୂର୍ଯମ୍
ଆନନ୍ଦଚନ୍ଦ୍ରମସମାନଯତାଂ ପ୍ରକାଶମ୍ ।
କାଲାନ୍ଧକାରସୁଷୁମାଂ କଲଯନ୍ଦିଗନ୍ତେ
କାମାକ୍ଷି କୋମଲକଟାକ୍ଷନିଶାଗମସ୍ତେ ॥ ୬॥

ତାଟାଙ୍କମୌକ୍ତିକରୁଚାଙ୍କୁରଦନ୍ତକାନ୍ତିଃ
କାରୁଣ୍ଯହସ୍ତିପଶିଖାମଣିନାଧିରୂଢଃ ।
ଉନ୍ମୂଲଯତ୍ଵଶୁଭପାଦପମସ୍ମଦୀଯଂ
କାମାକ୍ଷି ତାଵକକଟାକ୍ଷମତଙ୍ଗଜେତନ୍ଦ୍ରଃ ॥ ୭॥

ଛାଯାଭରଣେ ଜଗତାଂ ପରିତାପହାରୀ
ତାଟଙ୍କରତ୍ନମଣିତଲ୍ଲଜପଲ୍ଲଵଶ୍ରୀଃ ।
କାରୁଣ୍ଯନାମ ଵିକିରନ୍ମକରନ୍ଦଜାଲଂ
କାମାକ୍ଷି ରାଜତି କଟାକ୍ଷସୁରଦ୍ରୁମସ୍ତେ ॥ ୮॥

ସୂର୍ଯାଶ୍ରଯପ୍ରଣଯିନୀ ମଣିକୁଣ୍ଡଲାଂଶୁ-
ଲୌହିତ୍ଯକୋକନଦକାନନମାନନୀଯା ।
ଯାନ୍ତୀ ତଵ ସ୍ମରହରାନନକାନ୍ତିସିନ୍ଧୁଂ
କାମାକ୍ଷି ରାଜତି କଟାକ୍ଷକଲିନ୍ଦକନ୍ଯା ॥ ୯॥

ପ୍ରାପ୍ନୋତି ଯଂ ସୁକୃତିନଂ ତଵ ପକ୍ଷପାତାତ୍
କାମାକ୍ଷି ଵୀକ୍ଷଣଵିଲାସକଲାପୁରନ୍ଧ୍ରୀ ।
ସଦ୍ଯସ୍ତମେଵ କିଲ ମୁକ୍ତିଵଧୂର୍ଵୃଣୀତେ
ତସ୍ମାନ୍ନିତାନ୍ତମନଯୋରିଦମୈକମତ୍ଯମ୍ ॥ ୧୦॥

ଯାନ୍ତୀ ସଦୈଵ ମରୁତାମନୁକୂଲଭାଵଂ
ଭ୍ରୂଵଲ୍ଲିଶକ୍ରଧନୁରୁଲ୍ଲସିତା ରସାର୍ଦ୍ରା ।
କାମାକ୍ଷି କୌତୁକତରଙ୍ଗିତନୀଲକଣ୍ଠା
କାଦମ୍ବିନୀଵ ତଵ ଭାତି କଟାକ୍ଷମାଲା ॥ ୧୧॥

ଗଙ୍ଗାମ୍ଭସି ସ୍ମିତମଯେ ତପନାତ୍ମଜେଵ
ଗଙ୍ଗାଧରୋରସି ନଵୋତ୍ପଲମାଲିକେଵ ।
ଵକ୍ତ୍ରପ୍ରଭାସରସି ଶୈଵଲମଣ୍ଡଲୀଵ
କାମାକ୍ଷି ରାଜତି କଟାକ୍ଷରୁଚିଚ୍ଛଟା ତେ ॥ ୧୨॥

ସଂସ୍କାରତଃ କିମପି କନ୍ଦଲିତାନ୍ ରସଜ୍ଞ-
କେଦାରସୀମ୍ନି ସୁଧିଯାମୁପଭୋଗଯୋଗ୍ଯାନ୍ ।
କଲ୍ଯାଣସୂକ୍ତିଲହରୀକଲମାଂକୁରାନ୍ନଃ
କାମାକ୍ଷି ପକ୍ଷ୍ମଲଯତୁ ତ୍ଵଦପାଙ୍ଗମେଘଃ ॥ ୧୩॥

ଚାଞ୍ଚଲ୍ଯମେଵ ନିଯତଂ କଲଯନ୍ପ୍ରକୃତ୍ଯା
ମାଲିନ୍ଯଭୂଃ ଶ୍ରତିପଥାକ୍ରମଜାଗରୂକଃ ।
କୈଵଲ୍ଯମେଵ କିମୁ କଲ୍ପଯତେ ନତାନାଂ
କାମାକ୍ଷି ଚିତ୍ରମପି ତେ କରୁଣାକଟାକ୍ଷଃ ॥ ୧୪॥

ସଂଜୀଵନେ ଜନନି ଚୂତଶିଲୀମୁଖସ୍ଯ
ସଂମୋହନେ ଶଶିକିଶୋରକଶେଖରସ୍ଯ ।
ସଂସ୍ତମ୍ଭନେ ଚ ମମତାଗ୍ରହଚେଷ୍ଟିତସ୍ଯ
କାମାକ୍ଷି ଵୀକ୍ଷଣକଲା ପରମୌଷଧଂ ତେ ॥ ୧୫॥

ନୀଲୋଽପି ରାଗମଧିକଂ ଜନଯନ୍ପୁରାରେଃ
ଲୋଲୋଽପି ଭକ୍ତିମଧିକାଂ ଦୃଢଯନ୍ନରାଣାମ୍ ।
ଵକ୍ରୋଽପି ଦେଵି ନମତାଂ ସମତାଂ ଵିତନ୍ଵନ୍
କାମାକ୍ଷି ନୃତ୍ଯତୁ ମଯି ତ୍ଵଦପାଙ୍ଗପାତଃ ॥ ୧୬॥

କାମଦ୍ରୁହୋ ହୃଦଯଯନ୍ତ୍ରଣଜାଗରୂକା
କାମାକ୍ଷି ଚଞ୍ଚଲଦୃଗଞ୍ଚଲମେଖଲା ତେ ।
ଆଶ୍ଚର୍ଯମମ୍ବ ଭଜତାଂ ଝଟିତି ସ୍ଵକୀଯ-
ସମ୍ପର୍କ ଏଵ ଵିଧୁନୋତି ସମସ୍ତବନ୍ଧାନ୍ ॥ ୧୭॥

କୁଣ୍ଠୀକରୋତୁ ଵିପଦଂ ମମ କୁଞ୍ଚିତଭ୍ରୂ-
ଚାପାଞ୍ଚିତଃ ଶ୍ରିତଵିଦେହଭଵାନୁରାଗଃ ।
ରକ୍ଷୋପକାରମନିଶଂ ଜନଯଞ୍ଜଗତ୍ଯାଂ
କାମାକ୍ଷି ରାମ ଇଵ ତେ କରୁଣାକଟାକ୍ଷଃ ॥ ୧୮॥

ଶ୍ରୀକାମକୋଟି ଶିଵଲୋଚନଶୋଷିତସ୍ଯ
ଶୃଙ୍ଗାରବୀଜଵିଭଵସ୍ଯ ପୁନଃପ୍ରରୋହେ ।
ପ୍ରେମାମ୍ଭସାର୍ଦ୍ରମଚିରାତ୍ପ୍ରଚୁରେଣ ଶଙ୍କେ
କେଦାରମମ୍ବ ତଵ କେଵଲଦୃଷ୍ଟିପାତମ୍ ॥ ୧୯॥

ମାହାତ୍ମ୍ଯଶେଵଧିରସୌ ତଵ ଦୁର୍ଵିଲଙ୍ଘ୍ଯ-
ସଂସାରଵିନ୍ଧ୍ଯଗିରିକୁଣ୍ଠନକେଲିଚୁଞ୍ଚୁଃ ।
ଧୈର୍ଯାମ୍ବୁଧିଂ ପଶୁପତେଶ୍ଚୁଲକୀକରୋତି
କାମାକ୍ଷି ଵୀକ୍ଷଣଵିଜୃମ୍ଭଣକୁମ୍ଭଜନ୍ମା ॥ ୨୦॥

ପୀଯୂଷଵର୍ଷଵଶିଶିରା ସ୍ଫୁଟଦୁତ୍ପଲଶ୍ରୀ-
ମୈତ୍ରୀ ନିସର୍ଗମଧୁରା କୃତତାରକାପ୍ତିଃ ।
କାମାକ୍ଷି ସଂଶ୍ରିତଵତୀ ଵପୁରଷ୍ଟମୂର୍ତେଃ
ଜ୍ଯୋତ୍ସ୍ନାଯତେ ଭଗଵତି ତ୍ଵଦପାଙ୍ଗମାଲା ॥ ୨୧॥

ଅମ୍ବ ସ୍ମରପ୍ରତିଭଟସ୍ଯ ଵପୁର୍ମନୋଜ୍ଞମ୍
ଅମ୍ଭୋଜକାନନମିଵାଞ୍ଚିତକଣ୍ଟକାଭମ୍ ।
ଭୃଙ୍ଗୀଵ ଚୁମ୍ବତି ସଦୈଵ ସପକ୍ଷପାତା
କାମାକ୍ଷି କୋମଲରୁଚିସ୍ତ୍ଵଦପାଙ୍ଗମାଲା ॥ ୨୨॥

କେଶପ୍ରଭାପଟଲନୀଲଵିତାନଜାଲେ
କାମାକ୍ଷି କୁଣ୍ଡଲମଣିଚ୍ଛଵିଦୀପଶୋଭେ ।
ଶଙ୍କେ କଟାକ୍ଷରୁଚିରଙ୍ଗତଲେ କୃପାଖ୍ଯା
ଶୈଲୂଷିକା ନଟତି ଶଂକରଵଲ୍ଲଭେ ତେ ॥ ୨୩॥

ଅତ୍ଯନ୍ତଶୀତଲମତନ୍ଦ୍ରଯତୁ କ୍ଷଣାର୍ଧମ୍
ଅସ୍ତୋକଵିଭ୍ରମମନଙ୍ଗଵିଲାସକନ୍ଦମ୍ ।
ଅଲ୍ପସ୍ମିତାଦୃତମପାରକୃପାପ୍ରଵାହମ୍
ଅକ୍ଷିପ୍ରରୋହମଚିରାନ୍ମଯି କାମକୋଟି ॥ ୨୪॥

ମନ୍ଦାକ୍ଷରାଗତରଲୀକୃତିପାରତନ୍ତ୍ର୍ଯାତ୍
କାମାକ୍ଷି ମନ୍ଥରତରାଂ ତ୍ଵଦପାଙ୍ଗଡୋଲାମ୍ ।
ଆରୁହ୍ଯ ମନ୍ଦମତିକୌତୁକଶାଲି ଚକ୍ଷୁଃ
ଆନନ୍ଦମେତି ମୁହୁରର୍ଧଶଶାଙ୍କମୌଲେଃ ॥ ୨୫॥

ତ୍ରୈଯମ୍ବକଂ ତ୍ରିପୁରସୁନ୍ଦରି ହର୍ମ୍ଯଭୂମି-
ରଙ୍ଗଂ ଵିହାରସରସୀ କରୁଣାପ୍ରଵାହଃ ।
ଦାସାଶ୍ଚ ଵାସଵମୁଖାଃ ପରିପାଲନୀଯଂ
କାମାକ୍ଷି ଵିଶ୍ଵମପି ଵୀକ୍ଷଣଭୂଭୃତସ୍ତେ ॥ ୨୬॥

ଵାଗୀଶ୍ଵରୀ ସହଚରୀ ନିଯମେନ ଲକ୍ଷ୍ମୀଃ
ଭ୍ରୂଵଲ୍ଲରୀଵଶକରୀ ଭୁଵନାନି ଗେହମ୍ ।
ରୂପଂ ତ୍ରିଲୋକନଯନାମୃତମମ୍ବ ତେଷାଂ
କାମାକ୍ଷି ଯେଷୁ ତଵ ଵୀକ୍ଷଣପାରତନ୍ତ୍ରୀ ॥ ୨୭॥

ମାହେଶ୍ଵରଂ ଝଟିତି ମାନସମୀନମମ୍ବ
କାମାକ୍ଷି ଧୈର୍ଯଜଲଧୌ ନିତରାଂ ନିମଗ୍ନମ୍ ।
ଜାଲେନ ଶୃଙ୍ଖଲଯତି ତ୍ଵଦପାଙ୍ଗନାମ୍ନା
ଵିସ୍ତାରିତେନ ଵିଷମାଯୁଧଦାଶକୋଽସୌ ॥ ୨୮॥

ଉନ୍ମଥ୍ଯ ବୋଧକମଲାକାରମମ୍ବ ଜାଡ୍ଯ-
ସ୍ତମ୍ବେରମଂ ମମ ମନୋଵିପିନେ ଭ୍ରମନ୍ତମ୍ ।
କୁଣ୍ଠୀକୁରୁଷ୍ଵ ତରସା କୁଟିଲାଗ୍ରସୀମ୍ନା
କାମାକ୍ଷି ତାଵକକଟାକ୍ଷମହାଙ୍କୁଶେନ ॥ ୨୯॥

ଉଦ୍ଵେଲ୍ଲିତସ୍ତବକିତୈର୍ଲଲିତୈର୍ଵିଲାସୈଃ
ଉତ୍ଥାଯ ଦେଵି ତଵ ଗାଢକଟାକ୍ଷକୁଞ୍ଜାତ୍ ।
ଦୂରଂ ପଲାଯଯତୁ ମୋହମୃଗୀକୁଲଂ ମେ
କାମାକ୍ଷି ସ୍ତଵରମନୁଗ୍ରହକେସରୀନ୍ଦ୍ରଃ ॥ ୩୦॥

ସ୍ନେହାଦୃତାଂ ଵିଦଲିତୋତ୍ପଲକନ୍ତିଚୋରାଂ
ଜେତାରମେଵ ଜଗଦୀଶ୍ଵରି ଜେତୁକାମଃ ।
ମାନୋଦ୍ଧତୋ ମକରକେତୁରସୌ ଧୁନୀତେ
କାମାକ୍ଷି ତାଵକକଟାକ୍ଷକୃପାଣଵଲ୍ଲୀମ୍ ॥ ୩୧॥

ଶ୍ରୌତୀଂ ଵ୍ରଜନ୍ନପି ସଦା ସରଣିଂ ମୁନୀନାଂ
କାମାକ୍ଷି ସନ୍ତତମପି ସ୍ମୃତିମାର୍ଗଗାମୀ ।
କୌଟିଲ୍ଯମମ୍ବ କଥମସ୍ଥିରତାଂ ଚ ଧତ୍ତେ
ଚୌର୍ଯଂ ଚ ପଙ୍କଜରୁଚାଂ ତ୍ଵଦପାଙ୍ଗପାତଃ ॥ ୩୨॥

ନିତ୍ଯଂ ଶ୍ରେତୁଃ ପରିଚିତୌ ଯତମାନମେଵ
ନୀଲୋତ୍ପଲଂ ନିଜସମୀପନିଵାସଲୋଲମ୍ ।
ପ୍ରୀତ୍ଯୈଵ ପାଠଯତି ଵୀକ୍ଷଣଦେଶିକେନ୍ଦ୍ରଃ
କାମାକ୍ଷୀ କିନ୍ତୁ ତଵ କାଲିମସମ୍ପ୍ରଦାଯମ୍ ॥ ୩୩॥

ଭ୍ରାନ୍ତ୍ଵା ମୁହୁଃ ସ୍ତବକିତସ୍ମିତଫେନରାଶୌ
କାମାକ୍ଷି ଵକ୍ତ୍ରରୁଚିସଂଚଯଵାରିରାଶୌ ।
ଆନନ୍ଦତି ତ୍ରିପୁରମର୍ଦନନେତ୍ରଲକ୍ଷ୍ମୀଃ
ଆଲମ୍ବ୍ଯ ଦେଵି ତଵ ମନ୍ଦମପାଙ୍ଗସେତୁମ୍ ॥ ୩୪॥

ଶ୍ଯାମା ତଵ ତ୍ରିପୁରସୁନ୍ଦରି ଲୋଚନଶ୍ରୀଃ
କାମାକ୍ଷି କନ୍ଦଲିତମେଦୁରତାରକାନ୍ତିଃ ।
ଜ୍ଯୋତ୍ସ୍ନାଵତୀ ସ୍ମିତରୁଚାପି କଥଂ ତନୋତି
ସ୍ପର୍ଧାମହୋ କୁଵଲଯୈଶ୍ଚ ତଥା ଚକୋରୈଃ ॥ ୩୫॥

କାଲାଞ୍ଜନଂ ଚ ତଵ ଦେଵି ନିରୀକ୍ଷଣଂ ଚ
କାମାକ୍ଷି ସାମ୍ଯସରଣିଂ ସମୁପୈତି କାନ୍ତ୍ଯା ।
ନିଶ୍ଶେଷନେତ୍ରସୁଲଭଂ ଜଗତୀଷୁ ପୂର୍ଵ-
ମନ୍ଯତ୍ତ୍ରିନେତ୍ରସୁଲଭଂ ତୁହିନାଦ୍ରିକନ୍ଯେ ॥ ୩୬॥

ଧୂମାଙ୍କୁରୋ ମକରକେତନପାଵକସ୍ଯ
କାମାକ୍ଷି ନେତ୍ରରୁଚିନୀଲିମଚାତୁରୀ ତେ ।
ଅତ୍ଯନ୍ତମଦ୍ଭୁତମିଦଂ ନଯନତ୍ରଯସ୍ଯ
ହର୍ଷୋଦଯଂ ଜନଯତେ ହରୁଣାଙ୍କମୌଲେଃ ॥୩୭॥

ଆରଭ୍ଭଲେଶସମଯେ ତଵ ଵୀକ୍ଷଣସ୍ସ
କାମାକ୍ଷି ମୂକମପି ଵୀକ୍ଷଣମାତ୍ରନମ୍ରମ୍ ।
ସର୍ଵଜ୍ଞତା ସକଲଲୋକସମକ୍ଷମେଵ
କୀର୍ତିସ୍ଵଯଂଵରଣମାଲ୍ଯଵତୀ ଵୃଣୀତେ ॥ ୩୮॥

କାଲାମ୍ବୁଵାହ ଉଵ ତେ ପରିତାପହାରୀ
କାମାକ୍ଷି ପୁଷ୍କରମଧଃକୁରୁତେ କଟା୍ଷଃ ।
ପୂର୍ଵଃ ପରଂ କ୍ଷଣରୁଚା ସମୁପୈତି ମୈତ୍ରୀ-
ମନ୍ଯସ୍ତୁ ସ।ତତରୁଚିଂ ପ୍ରକଟୀକରୋତି ॥ ୩୯॥

ସୂକ୍ଷ୍ମେଽପି ଦୁର୍ଗମତରେଽପି ଗୁରୁପ୍ରସାଦ-
ସାହାଯ୍ଯକେନ ଵିଚରନ୍ନପଵର୍ଗମାର୍ଗେ ।
ସଂସାରପଙ୍କନିଚଯେ ନ ପତତ୍ଯମୂଂ ତେ
କାମାକ୍ଷି ଗାଢମଵଲମ୍ବ୍ଯ କଟାକ୍ଷଯଷ୍ଟିମ୍ ॥ ୪୦॥

କାମାକ୍ଷି ସନ୍ତତମସୌ ହରିନୀଲରତ୍ନ-
ସ୍ତମ୍ଭେ କଟାକ୍ଷରୁଚିପୁଞ୍ଜମଯେ ଭଵତ୍ଯାଃ ।
ବଦ୍ଧୋଽପି ଭକ୍ତିନିଗଲୈର୍ମମ ଚିତ୍ତହସ୍ତୀ
ସ୍ତମ୍ଭଂ ଚ ବନ୍ଧମପି ମୁଞ୍ଚତି ହନ୍ତ ଚିତ୍ରମ୍ ॥ ୪୧॥

କାମାକ୍ଷି କାଷ୍ଣର୍ଯମପି ସନ୍ତତମଞ୍ଜନଂ ଚ
ବିଭ୍ରନ୍ନିସର୍ଗତରଲୋଽପି ଭଵତ୍କଟାକ୍ଷଃ ।
ଵୈମଲ୍ଯମନ୍ଵହମନଞ୍ଜନତା ଚ ଭୂଯଃ
ସ୍ଥୈର୍ଯଂ ଚ ଭକ୍ତହୃଦଯାଯ କଥଂ ଦଦାତି ॥ ୪୨॥

ମନ୍ଦସ୍ମିତସ୍ତବକିତଂ ମଣିକୁଣ୍ଡଲାଂଶୁ-
ସ୍ତୋମପ୍ରଵାଲରୁଚିରଂ ଶିଶିରୀକୃତାଶମ୍ ।
କାମାକ୍ଷି ରାଜତି କଟାକ୍ଷରୁଚେଃ କଦମ୍ବମ୍
ଉଦ୍ଯାନମମ୍ବ କରୁଣାହରିଣେକ୍ଷଣାଯାଃ ॥ ୪୩॥

କାମାକ୍ଷି ତାଵକକଟାକ୍ଷମହେନ୍ଦ୍ରନୀଲ-
ସିଂହାସନଂ ଶ୍ରିତଵତୋ ମକରଧ୍ଵଜସ୍ଯ ।
ସାମ୍ରାଜ୍ଯମଙ୍ଗଲଵିଧୌ ମୁଣିକୁଣ୍ଡଲଶ୍ରୀଃ
ନୀରାଜନୋତ୍ସଵତରଙ୍ଗିତଦୀପମାଲା ॥ ୪୪॥

ମାତଃ କ୍ଷଣଂ ସ୍ନପଯ ମାଂ ତଵ ଵୀକ୍ଷିତେନ
ମନ୍ଦାକ୍ଷିତେନ ସୁଜନୈରପରୋକ୍ଷିତେନ ।
କାମାକ୍ଷି କର୍ମତିମିରୋତ୍କରଭାସ୍କରେଣ
ଶ୍ରେଯସ୍କରେଣ ମଧୁପଦ୍ଯୁତିତସ୍କରେଣ ॥ ୪୫॥

ପ୍ରେମାପଗାପଯସି ମଜ୍ଜନମାରଚଯ୍ଯ
ଯୁକ୍ତଃ ସ୍ମିତାଂଶୁକୃତଭସ୍ମଵିଲେପନେନ ।
କାମାକ୍ଷି କୁଣ୍ଡଲମଣିଦ୍ଯୁତିଭିର୍ଜଟାଲଃ
ଶ୍ରୀକଣ୍ଠମେଵ ଭଜତେ ତଵ ଦୃଷ୍ଟିପାତଃ ॥ ୪୬॥

କୈଵଲ୍ଯଦାଯ କରୁଣାରସକିଂକରାଯ
କାମାକ୍ଷି କନ୍ଦଲିତଵିଭ୍ରମଶଂକରାଯ ।
ଆଲୋକନାଯ ତଵ ଭକ୍ତଶିଵଂକରାଯ
ମାତର୍ନମୋଽସ୍ତୁ ପରତନ୍ତ୍ରିତଶଂକରାଯ ॥ ୪୭॥

ସାମ୍ରାଜ୍ଯମଙ୍ଗଲଵିଧୌ ମକରଧ୍ଵଜସ୍ଯ
ଲୋଲାଲକାଲିକୃତତୋରଣମାଲ୍ଯଶୋଭେ ।
କାମେଶ୍ଵରି ପ୍ରଚଲଦୁତ୍ପଲଵୈଜଯନ୍ତୀ-
ଚାତୁର୍ଯମେତି ତଵ ଚଞ୍ଚଲଦୃଷ୍ଟିପାତଃ ॥ ୪୮॥

ମାର୍ଗେଣ ମଞ୍ଜୁକଚକାନ୍ତିତମୋଵୃତେନ
ମନ୍ଦାଯମାନଗମନା ମଦନାତୁରାସୌ ।
କାମାକ୍ଷି ଦୃଷ୍ଟିରଯତେ ତଵ ଶଂକରାଯ
ସଂକେତଭୂମିମଚିରାଦଭିସାରିକେଵ ॥ ୪୯॥

ଵ୍ରୀଡନୁଵୃତ୍ତିରମଣୀକୃତସାହଚର୍ଯା
ଶୈଵାଲିତାଂ ଗଲରୁଚା ଶଶିଶେଖରସ୍ଯ ।
କାମାକ୍ଷି କାନ୍ତିସରସୀଂ ତ୍ଵଦପାଙ୍ଗଲକ୍ଷ୍ମୀଃ
ମନ୍ଦଂ ସମାଶ୍ରଯତି ମଜ୍ଜନଖେଲନାଯ ॥ ୫୦॥

କାଷାଯମଂଶୁକମିଵ ପ୍ରକଟଂ ଦଧାନୋ
ମାଣିକ୍ଯକୁଣ୍ଡଲରୁଚିଂ ମମତାଵିରୋଧୀ ।
ଶ୍ରୁତ୍ଯନ୍ତସୀମନି ରତଃ ସୁତରାଂ ଚକାସ୍ତି
କାମାକ୍ଷି ତାଵକକଟାକ୍ଷଯତୀଶ୍ଵରୋଽସୌ ॥ ୫୧॥

ପାଷାଣ ଏଵ ହରିନୀଲମଣିର୍ଦିନେଷୁ
ପ୍ରମ୍ଲନତାଂ କୁଵଲଯଂ ପ୍ରକଟୀକରୋତି ।
ନୌମିତ୍ତିକୋ ଜଲଦମେଚକିମା ତତସ୍ତେ
କାମାକ୍ଷି ଶୂନ୍ଯମୁପମନମପାଙ୍ଗଲକ୍ଷ୍ମ୍ଯାଃ ॥ ୫୨॥

ଶୃଙ୍ଗାରଵିଭ୍ରମଵତୀ ସୁତରାଂ ସଲଜ୍ଜା
ନାସାଗ୍ରମୌକ୍ତିକରୁଚା କୃତମନ୍ଦହାସା ।
ଶ୍ଯାମା କଟାକ୍ଷସୁଷମା ତଵ ଯୁକ୍ତମେତତ୍
କାମାକ୍ଷି ଚୁମ୍ବତି ଦିଗମ୍ବରଵକ୍ତ୍ରବିମ୍ବମ୍ ॥ ୫୩॥

ନୀଲୋତ୍ପଲେନ ମଧୁପେନ ଚ ଦୃଷ୍ଟିପାତଃ
କାମାକ୍ଷି ତୁଲ୍ଯ ଇତି ତେ କଥମାମନନ୍ତି ।
ଶୈତ୍ଯେନ ନିନ୍ଦଯତି ଯଦନ୍ଵହମିନ୍ଦୁପାଦାନ୍
ପାଥୋରୁହେଣ ଯଦସୌ କଲହାଯତେ ଚ ॥ ୫୪॥

ଓଷ୍ଠପ୍ରଭାପଟଲଵିଦ୍ରୁମମୁଦ୍ରିତେ ତେ
ଭ୍ରୂଵଲ୍ଲିଵୀଚିସୁଭଗେ ମୁଖକାନ୍ତିସିନ୍ଧୌ ।
କାମାକ୍ଷି ଵାରିଭରପୂରଣଲମ୍ବମାନ-
କାଲାମ୍ବୁଵାହସରଣିଂ ଲଭତେ କଟାକ୍ଷଃ ॥ ୫୫॥

ମନ୍ଦସ୍ମିତୈର୍ଧଵଲିତା ମଣିକୁଣ୍ଡଲାଂଶୁ-
ସମ୍ପର୍କଲୋହିତରୁଚିସ୍ତ୍ଵଦପାଙ୍ଗଧାରା ।
କାମାକ୍ଷି ମଲ୍ଲିକୁସୁମୈର୍ନଵପଲ୍ଲଵୈଶ୍ଚ
ନୀଲୋତ୍ପଲୈଶ୍ଚ ରଚିତେଵ ଵିଭାତି ମାଲା ॥ ୫୬॥

କାମାକ୍ଷି ଶୀତଲକୃପାରସନିର୍ଝରାମ୍ଭଃ-
ସମ୍ପର୍କପକ୍ଷ୍ମଲରୁଚିସ୍ତ୍ଵଦପାଙ୍ଗମାଲା ।
ଗୋଭିଃ ସଦା ପୁରରିପୋରଭିଲଷ୍ଯମାଣା
ଦୂର୍ଵାକଦମ୍ବକଵିଡମ୍ବନମାତନୋତି ॥ ୫୭॥

ହୃତ୍ପଙ୍କଜଂ ମମ ଵିକାସଯତୁ ପ୍ରମୁଷ୍ଣ-
ନ୍ନୁଲ୍ଲାସମୁତ୍ପଲରୁଚେସ୍ତମସାଂ ନିରୋଦ୍ଧା ।
ଦୋଷାନୁଷଙ୍ଗଜଡତାଂ ଜଗତାଂ ଧୁନାନଃ
କାମାକ୍ଷି ଵୀକ୍ଷଣଵିଲାସଦିନୋଦଯସ୍ତେ ॥ ୫୮॥

ଚକ୍ଷୁର୍ଵିମୋହଯତି ଚନ୍ଦ୍ରଵିଭୂଷଣସ୍ଯ
କାମାକ୍ଷି ତାଵକକଟାକ୍ଷତମଃପ୍ରରୋହଃ ।
ପ୍ରତ୍ଯଙ୍ମୁଖଂ ତୁ ନଯନଂ ସ୍ତିମିତଂ ମୁନୀନାଂ
ପ୍ରାକାଶ୍ଯମେଵ ନଯତୀତି ପରଂ ଵିଚିତ୍ରମ୍ ॥ ୫୯॥

କାମାକ୍ଷି ଵୀକ୍ଷଣରୁଚା ଯୁଧି ନିର୍ଜିତଂ ତେ
ନୀଲୋତ୍ପଲଂ ନିରଵଶେଷଗତାଭିମାନମ୍ ।
ଆଗତ୍ଯ ତତ୍ପରିସରଂ ଶ୍ରଵଣଵତଂସ-
ଵ୍ଯୋଜେନ ନୂନମଭଯାର୍ଥନମାତନୋତି ॥ ୬୦॥

ଆଶ୍ଚର୍ଯମମ୍ବ ମଦାନାଭ୍ଯୁଦଯାଵଲମ୍ବଃ
କାମାକ୍ଷି ଚଞ୍ଚଲନିରୀକ୍ଷଣଵିଭ୍ରମସ୍ତେ ।
ଧୈର୍ଯଂ ଵିଧୂଯ ତନୁତେ ହୃଦି ରାଗବନ୍ଧଂ
ଶମ୍ଭୋସ୍ତଦେଵ ଵିପରୀତତଯା ମୁନୀନାମ୍ ॥ ୬୧॥

ଜନ୍ତୋଃ ସକୃତ୍ପ୍ରଣମତୋ ଜଗଦୀଡ୍ଯତାଂ ଚ
ତେଜାସ୍ଵିତାଂ ଚ ନିଶିତାଂ ଚ ମତିଂ ସଭାଯାମ୍ ।
କାମାକ୍ଷି ମାକ୍ଷିକଝରୀମିଵ ଵୈଖରୀଂ ଚ
ଲକ୍ଷ୍ମୀଂ ଚ ପକ୍ଷ୍ମଲଯତି କ୍ଷଣଵୀକ୍ଷଣଂ ତେ ॥ ୬୨॥

କାଦମ୍ବିନୀ କିମଯତେ ନ ଜଲାନୁଷଙ୍ଗଂ
ଭୃଙ୍ଗାଵଲୀ କିମୁରରୀକୁରୁତେ ନ ପଦ୍ମମ୍ ।
କିଂ ଵା କଲିନ୍ଦତନଯା ସହତେ ନ ଭଙ୍ଗଂ
କାମାକ୍ଷି ନିଶ୍ଚଯପଦଂ ନ ତଵାକ୍ଷିଲକ୍ଷ୍ମୀଃ ॥ ୬୩॥

କାକୋଲପାଵକତୃଣୀକରଣେଽପି ଦକ୍ଷଃ
କାମାକ୍ଷି ବାଲକସୁଧାକରଶେଖରସ୍ଯ ।
ଅତ୍ଯନ୍ତଶୀତଲତମୋଽପ୍ଯନୁପାରତଂ ତେ
ଚିତ୍ତଂ ଵିମୋହଯତି ଚିତ୍ରମଯଂ କଟାକ୍ଷଃ ॥ ୬୪॥

କାର୍ପଣ୍ଯପୂରପରିଵର୍ଧିତମମ୍ବ ମୋହ-
କନ୍ଦୋଦ୍ଗତଂ ଭଵମଯଂ ଵିଷପାଦପଂ ମେ ।
ତୁଙ୍ଗଂ ଛିନତ୍ତୁ ତୁହିନାଦ୍ରିସୁତେ ଭଵତ୍ଯାଃ
କାଞ୍ଚୀପୁରେଶ୍ଵରି କଟାକ୍ଷକୁଠାରଧାରା ॥ ୬୫॥

କାମାକ୍ଷି ଘୋରଭଵରୋଗଚିକିତ୍ସନାର୍ଥ-
ମଭ୍ଯର୍ଥ୍ଯ ଦେଶିକକଟାକ୍ଷଭିଷକ୍ପ୍ରସାଦାତ୍ ।
ତତ୍ରାପି ଦେଵି ଲଭତେ ସୁକୃତୀ କଦାଚି-
ଦନ୍ଯସ୍ଯ ଦୁର୍ଲଭମପାଙ୍ଗମହୌଷଧଂ ତେ ॥ ୬୬॥

କାମାକ୍ଷି ଦେଶିକକୃପାଂକୁରମାଶ୍ରଯନ୍ତୋ
ନାନାତପୋନିଯମନାଶିତପାଶବନ୍ଧାଃ ।
ଵାସାଲଯଂ ତଵ କଟାକ୍ଷମମୁଂ ମହାନ୍ତୋ
ଲବ୍ଧ୍ଵା ସୁଖଂ ସମାଧିଯୋ ଵିଚରନ୍ତି ଲୋକେ ॥ ୬୭॥

ସାକୂତସଂଲପିତସମ୍ଭୃତମୁଗ୍ଧହାସଂ
ଵ୍ରୀଡାନୁରାଗସହଚାରି ଵିଲୋକନଂ ତେ ।
କାମାକ୍ଷି କାମପରିପନ୍ଥିନି ମାରଵୀର-
ସାମ୍ରାଜ୍ଯଵିଭ୍ରମଦଶାଂ ସଫଲୀକରୋତି ॥ ୬୮॥

କାମାକ୍ଷି ଵିଭ୍ରମବଲୈକନିଧିର୍ଵିଧାଯ
ଭ୍ରୂଵଲ୍ଲିଚାପକୁଟିଲୀକୃତିମେଵ ଚିତ୍ରମ୍ ।
ସ୍ଵାଧୀନତାଂ ତଵ ନିନାଯ ଶଶାଙ୍କମୌଲେ-
ରଙ୍ଗାର୍ଧରାଜ୍ଯସୁଖଲାଭମପାଙ୍ଗଵୀରଃ ॥ ୬୯॥

କାମାଂକୁରୈକନିଲଯସ୍ତଵ ଦୃଷ୍ଟିପାତଃ
କାମାକ୍ଷି ଭକ୍ତମନସାଂ ପ୍ରଦଦାତୁ କାମାନ୍ ।
ରାଗାନ୍ଵିତଃ ସ୍ଵଯମପି ପ୍ରକଟୀକରୋତି
ଵୈରାଗ୍ଯମେଵ କଥମେଷ ମହାମୁନୀନାମ୍ ॥ ୭୦॥

କାଲାମ୍ବୁଵାହନିଵହୈଃ କଲହାଯତେ ତେ
କାମାକ୍ଷି କାଲିମମଦେନ ସଦା କଟାକ୍ଷଃ ।
ଚିତ୍ରଂ ତଥାପି ନିତରାମମୁମେଵ ଦୃଷ୍ଟ୍ଵା
ସୋତ୍କଣ୍ଠ ଏଵ ରମତେ କିଲ ନୀଲକଣ୍ଠଃ ॥ ୭୧॥

କାମାକ୍ଷି ମନ୍ମଥରିପୁଂ ପ୍ରତି ମାରତାପ-
ମୋହାନ୍ଧକାରଜଲଦାଗମନେନ ନୃତ୍ଯନ୍ ।
ଦୁଷ୍କର୍ମକଞ୍ଚୁକିକୁଲଂ କବଲୀକରୋତୁ
ଵ୍ଯାମିଶ୍ରମେଚକରୁଚିସ୍ତ୍ଵଦପାଙ୍ଗକେକୀ ॥ ୭୨॥

କାମାକ୍ଷି ମନ୍ମଥରିପୋରଵଲୋକନେଷୁ
କାନ୍ତଂ ପଯୋଜମିଵ ତାଵକମକ୍ଷିପାତମ୍ ।
ପ୍ରେମାଗମୋ ଦିଵସଵଦ୍ଵିକଚୀକରୋତି
ଲଜ୍ଜାଭରୋ ରଜନିଵନ୍ମୁକୁଲୀକରୋତି ॥ ୭୩॥

ମୂକୋ ଵିରିଞ୍ଚତି ପରଂ ପୁରୁଷଃ କୁରୂପଃ
କନ୍ଦର୍ପତି ତ୍ରିଦଶରାଜତି କିମ୍ପଚାନଃ ।
କାମାକ୍ଷି କେଵଲମୁପକ୍ରମକାଲ ଏଵ
ଲୀଲାତରଙ୍ଗିତକଟାକ୍ଷରୁଚଃ କ୍ଷଣଂ ତେ ॥ ୭୪॥

ନୀଲାଲକା ମଧୁକରନ୍ତି ମନୋଜ୍ଞନାସା-
ମୁକ୍ତାରୁଚଃ ପ୍ରକଟକନ୍ଦବିସାଙ୍କୁରନ୍ତି ।
କାରୁଣ୍ଯମମ୍ବ ମକରନ୍ଦତି କାମକୋଟି
ମନ୍ଯେ ତତଃ କମଲମେଵ ଵିଲୋଚନଂ ତେ ॥ ୭୫॥

ଆକାଂକ୍ଷ୍ଯମାଣଫଲଦାନଵିଚକ୍ଷଣାଯାଃ ।
କାମାକ୍ଷି ତାଵକକଟାକ୍ଷକକାମଧେନୋଃ ।
ସମ୍ପର୍କ ଏଵ କଥମମ୍ବ ଵିମୁକ୍ତପାଶ-
ବନ୍ଧାଃ ସ୍ଫୁଟଂ ତନୁଭୃତଃ ପଶୁତାଂ ତ୍ଯଜନ୍ତି ॥ ୭୬॥

ସଂସାରଘର୍ମପରିତାପଜୁଷାଂ ନରାଣାଂ
କାମାକ୍ଷି ଶୀତଲତରାଣି ତଵେକ୍ଷିତାନି ।
ଚନ୍ଦ୍ରାତପନ୍ତି ଘନଚନ୍ଦନକର୍ଦମନ୍ତି
ମୁକ୍ତାଗୁଣନ୍ତି ହିମଵାରିନିଷେଚନନ୍ତି ॥ ୭୭॥

ପ୍ରେମାମ୍ବୁରାଶିସତତସ୍ନପିତାନି ଚିତ୍ରଂ
କାମାକ୍ଷି ତାଵକକଟାକ୍ଷନିରୀକ୍ଷଣାନି ।
ସନ୍ଧୁକ୍ଷଯନ୍ତି ମୁହୁରିନ୍ଧନରାଶିରୀତ୍ଯା
ମାରଦ୍ରୁହୋ ମନସି ମନ୍ମଥଚିତ୍ରଭାନୁମ୍ ॥ ୭୮॥

କାଲାଞ୍ଜନପ୍ରତିଭଟଂ କମନୀଯକାନ୍ତ୍ଯା
କନ୍ଦର୍ପତନ୍ତ୍ରକଲଯା କଲିତାନୁଭାଵମ୍ ।
କାଞ୍ଚୀଵିହାରରସିକେ କଲୁଷାର୍ତିଚୋରଂ
କଲ୍ଲୋଲଯସ୍ଵ ମଯି ତେ କରୁଣାକଟାକ୍ଷମ୍ ॥ ୭୯॥

କ୍ରାନ୍ତେନ ମନ୍ମଥଦେନ ଵିମୋହ୍ଯମାନ-
ସ୍ଵାନ୍ତେନ ଚୂତତରୁମୂଲଗତସ୍ଯ ପୁଂସଃ ।
କାନ୍ତେନ କିଂଚିଦଵଲୋକଯ ଲୋଚନସ୍ଯ
ପ୍ରାନ୍ତେନ ମାଂ ଜନନି କାଞ୍ଚିପୁରୀଵିଭୂଷେ ॥ ୮୦॥

କାମାକ୍ଷି କୋଽପି ସୁଜନାସ୍ତ୍ଵଦପାଙ୍ଗସଂଗେ
କଣ୍ଠେନ କନ୍ଦଲିତକାଲିମସମ୍ପ୍ରଦାଯାଃ ।
ଉତ୍ତଂସକଲ୍ପିତଚକୋରକୁଟୁମ୍ବପୋଷା
ନକ୍ତନ୍ଦିଵସପ୍ରସଵଭୂନଯନା ଭଵନ୍ତି ॥ ୮୧॥

ନୀଲୋତ୍ପଲପ୍ରସଵକାନ୍ତିନିର୍ଦଶନେନ
କାରୁଣ୍ଯଵିଭ୍ରମଜୁଷା ତଵ ଵୀକ୍ଷଣେନ ।
କାମାକ୍ଷି କର୍ମଜଲଧେଃ କଲଶୀସୁତେନ
ପାଶତ୍ରଯାଦ୍ଵଯମମୀ ପରିମୋଚନୀଯାଃ ॥ ୮୨॥

ଅତ୍ଯନ୍ତଚଞ୍ଚଲମକୃତ୍ରିମମଞ୍ଜନଂ କିଂ
ଝଂକାରଭଙ୍ଗିରହିତା କିମୁ ଭୃଙ୍ଗମାଲା ।
ଧୂମାଙ୍କୁରଃ କିମୁ ହୁତାଶନସଂଗହୀନଃ
କାମାକ୍ଷି ନେତ୍ରରୁଚିନୀଲିମକନ୍ଦଲୀ ତେ ॥ ୮୩॥

କାମାକ୍ଷି ନିତ୍ଯମଯମଞ୍ଜଲିରସ୍ତୁ ମୁକ୍ତି-
ବୀଜାଯ ଵିଭ୍ରମମଦୋଦଯଘୂର୍ଣିତାଯ ।
କନ୍ଦର୍ପଦର୍ପପୁନରୁଦ୍ଭଵସିଦ୍ଧିଦାଯ
କଲ୍ଯାଣଦାଯ ତଵ ଦେଵି ଦୃଗଞ୍ଚଲାଯ ॥ ୮୪॥

ଦର୍ପାଙ୍କୁରୋ ମକରକେତନଵିଭ୍ରମାଣାଂ
ନିନ୍ଦାଙ୍କୁରୋ ଵିଦଲିତୋତ୍ପଲଚାତୁରୀଣାମ୍ ।
ଦୀପାଙ୍କୁରୋ ଭଵତମିସ୍ରକଦମ୍ବକାନାଂ
କାମାକ୍ଷି ପାଲଯତୁ ମାଂ ତ୍ଵଦପାଙ୍ଗପାତଃ ॥ ୮୫॥

କୈଵଲ୍ଯଦିଵ୍ଯମଣିରୋହଣପର୍ଵତେଭ୍ଯଃ
କାରୁଣ୍ଯନିର୍ଝରପଯଃକୃତମଞ୍ଜନେଭ୍ଯଃ ।
କାମାକ୍ଷି କିଂକରିତଶଙ୍କରମାନସେଭ୍ଯ-
ସ୍ତେଭ୍ଯୋ ନମୋଽସ୍ତୁ ତଵ ଵୀକ୍ଷଣଵିଭ୍ରମେଭ୍ଯଃ ॥ ୮୬॥

ଅଲ୍ପୀଯ ଏଵ ନଵମୁତ୍ପଲମମ୍ବ ହୀନା
ମୀନସ୍ଯ ଵା ସରଣିରମ୍ବୁରୁହାଂ ଚ କିଂ ଵା ।
ଦୂରେ ମୃଗୀଦୃଗସମଞ୍ଜସମଞ୍ଜନଂ ଚ
କାମାକ୍ଷି ଵୀକ୍ଷଣରୁଚୌ ତଵ ତର୍କଯାମଃ ॥ ୮୭॥

ମିଶ୍ରୀଭଵଦ୍ଗରଲପଙ୍କିଲଶଙ୍କରୋରସ୍-
ସୀମାଙ୍ଗଣେ କିମପି ରିଙ୍ଖଣମାଦଧାନଃ ।
ହେଲାଵଧୂତଲଲିତଶ୍ରଵଣୋତ୍ପଲୋଽସୌ
କାମାକ୍ଷି ବାଲ ଇଵ ରାଜତି ତେ କଟାକ୍ଷଃ ॥ ୮୮॥

ପ୍ରୌଢିକରୋତି ଵିଦୁଷାଂ ନଵସୂକ୍ତିଧାଟୀ-
ଚୂତାଟଵୀଷୁ ବୁଧକୋକିଲଲାଲ୍ଯମାନମ୍ ।
ମାଧ୍ଵୀରସଂ ପରିମଲଂ ଚ ନିରର୍ଗଲଂ ତେ
କାମାକ୍ଷି ଵୀକ୍ଷଣଵିଲାସଵସନ୍ତଲକ୍ଷ୍ମୀଃ ॥ ୮୯॥

କୂଲଂକଷଂ ଵିତନୁତେ କରୁଣାମ୍ବୁଵର୍ଷୀ
ସାରସ୍ଵତଂ ସୁକୃତିନଃ ସୁଲଭଂ ପ୍ରଵାହମ୍ ।
ତୁଚ୍ଛୀକରୋତି ଯମୁନାମ୍ବୁତରଙ୍ଗଭଙ୍ଗୀଂ
କାମାକ୍ଷି କିଂ ତଵ କଟାକ୍ଷମହାମ୍ବୁଵାହଃ ॥ ୯୦॥

ଜଗର୍ତି ଦେଵି କରୁଣାଶୁକସୁନ୍ଦରୀ ତେ
ତାଟଙ୍କରତ୍ନରୁଚିଦାଡିମଖଣ୍ଡଶୋଣେ ।
କାମାକ୍ଷି ନିର୍ଭରକଟାକ୍ଷମରୀଚିପୁଞ୍ଜ-
ମାହେନ୍ଦ୍ରନୀଲମଣିପଞ୍ଜରମଧ୍ଯଭାଗେ ॥ ୯୧॥

କାମାକ୍ଷି ସତ୍କୁଵଲଯସ୍ଯ ସଗୋତ୍ରଭାଵା-
ଦାକ୍ରାମତି ଶ୍ରୁତିମସୌ ତଵ ଦୃଷ୍ଟିପାତଃ ।
କିଂଚ ସ୍ଫୁଟଂ କୁଟିଲତାଂ ପ୍ରକଟୀକରୋତି
ଭ୍ରୂଵଲ୍ଲରୀପରିଚିତସ୍ଯ ଫଲଂ କିମେତତ୍ ॥ ୯୨॥

ଏଷା ତଵାକ୍ଷିସୁଷମା ଵିଷମାଯୁଧସ୍ଯ
ନାରାଚଵର୍ଷଲହରୀ ନଗରାଜକନ୍ଯେ ।
ଶଂକେ କରୋତି ଶତଧା ହୃଦି ଧୈର୍ଯମୁଦ୍ରାଂ
ଶ୍ରୀକାମକୋଟି ଯଦସୌ ଶିଶିରାଂଶୁମୌଲେଃ ॥ ୯୩॥

ବାଣେନ ପୁଷ୍ପଧନୁଷଃ ପରିକଲ୍ପ୍ଯମାନ-
ତ୍ରାଣେନ ଭକ୍ତମନସାଂ କରୁଣାକରେଣ ।
କୋଣେନ କୋମଲଦୃଶସ୍ତଵ କାମକୋଟି
ଶୋଣେନ ଶୋଷଯ ଶିଵେ ମମ ଶୋକସିନ୍ଧୁମ୍ ॥ ୯୪॥

ମାରଦ୍ରୁହା ମୁକୁଟସୀମନି ଲାଲ୍ଯମାନେ
ମନ୍ଦାକିନୀପଯସି ତେ କୁଟିଲଂ ଚରିଷ୍ଣୁଃ ।
କାମାକ୍ଷି କୋପରଭସାଦ୍ଵଲମାନମୀନ-
ସନ୍ଦେହମଙ୍କୁରଯତି କ୍ଷଣମକ୍ଷିପାତଃ ॥ ୯୫॥

କାମାକ୍ଷି ସଂଵଲିତମୌକ୍ତିକକୁଣ୍ଡଲାଂଶୁ-
ଚଞ୍ଚତ୍ସିତଶ୍ରଵଣଚାମରଚାତୁରୀକଃ ।
ସ୍ତମ୍ଭେ ନିରନ୍ତରମପାଙ୍ଗମଯେ ଭଵତ୍ଯା
ବଦ୍ଧଶ୍ଚକାସ୍ତି ମକରଧ୍ଵଜମତ୍ତହସ୍ତୀ ॥ ୯୬॥

ଯାଵତ୍କଟାକ୍ଷରଜନୀସମଯାଗମସ୍ତେ
କାମାକ୍ଷି ତାଵଦଚିରାନ୍ନମତାଂ ନରାଣାମ୍ ।
ଆଵିର୍ଭଵତ୍ଯମୃତଦୀଧିତିବିମ୍ବମମ୍ବ
ସଂଵିନ୍ମଯଂ ହୃଦଯପୂର୍ଵଗିରୀନ୍ଦ୍ରଶୃଙ୍ଗେ ॥ ୯୭॥

କାମାକ୍ଷି କଲ୍ପଵିଟପୀଵ ଭଵତ୍କଟାକ୍ଷୋ
ଦିତ୍ସୁଃ ସମସ୍ତଵିଭଵଂ ନମତାଂ ନରାଣାମ୍ ।
ଭୃଙ୍ଗସ୍ଯ ନୀଲନଲିନସ୍ଯ ଚ କାନ୍ତିସମ୍ପ-
ତ୍ସର୍ଵସ୍ଵମେଵ ହରତୀତି ପରଂ ଵିଚିତ୍ରମ୍ ॥ ୯୮॥

ଅତ୍ଯନ୍ତଶୀତଲମନର୍ଗଲକର୍ମପାକ-
କାକୋଲହାରି ସୁଲଭଂ ସୁମନୋଭିରେତତ୍ ।
ପୀଯୂଷମେଵ ତଵ ଵୀକ୍ଷଣମମ୍ବ କିନ୍ତୁ
କାମାକ୍ଷି ନୀଲମିଦମିତ୍ଯଯମେଵ ଭେଦଃ ॥ ୯୯॥

ଅଜ୍ଞାତଭକ୍ତିରସମପ୍ରସରଦ୍ଵିଵେକ-
ମତ୍ଯନ୍ତଗର୍ଵମନଧୀତସମସ୍ତଶାସ୍ତ୍ରମ୍ ।
ଅପ୍ରାପ୍ତସତ୍ଯମସମୀପଗତଂ ଚ ମୁକ୍ତେଃ
କାମାକ୍ଷି ନୈଵ ତଵ ସ୍ପୃହଯତି ଦୃଷ୍ଟିପାତଃ ॥ ୧୦୦॥

(କାମାକ୍ଷି ମାମଵତୁ ତେ କରୁଣାକଟାକ୍ଷଃ)
ପାତେନ ଲୋଚନରୁଚେସ୍ତଵ କାମକୋଟି
ପୋତେନ ପତକପଯୋଧିଭଯାତୁରାଣାମ୍ ।
ପୂତେନ ତେନ ନଵକାଞ୍ଚନକୁଣ୍ଡଲାଂଶୁ-
ଵୀତେନ ଶୀତଲଯ ଭୂଧରକନ୍ଯକେ ମାମ୍ ॥ ୧୦୧॥

{କଟାକ୍ଷଶତକଂ ସମ୍ପୂର୍ଣମ୍ ॥}



{॥ ମନ୍ଦସ୍ମିତଶତକମ୍ ॥}
ବଧ୍ନୀମୋ ଵଯମଞ୍ଜଲିଂ ପ୍ରତିଦିନଂ ବନ୍ଧଚ୍ଛିଦେ ଦେହିନାଂ
କନ୍ଦର୍ପାଗମତନ୍ତ୍ରମୂଲଗୁରଵେ କଲ୍ଯାଣକେଲୀଭୁଵେ ।
କାମାକ୍ଷ୍ଯା ଘନସାରପୁଞ୍ଜରଜସେ କାମଦ୍ରୁହଶ୍ଚକ୍ଷୁଷାଂ
ମନ୍ଦାରସ୍ତବକପ୍ରଭାମଦମୁଷେ ମନ୍ଦସ୍ମିତଜ୍ଯୋତିଷେ ॥ ୧॥

ସଧ୍ରୀଚେ ନଵମଲ୍ଲିକାସୁମନସାଂ ନାସାଗ୍ରମୁକ୍ତାମଣେ-
ରାଚାର୍ଯାଯ ମୃଣାଲକାଣ୍ଡମହସାଂ ନୈସର୍ଗିକାଯ ଦ୍ଵିଷେ ।
ସ୍ଵର୍ଧୁନ୍ଯା ସହ ଯୁଧ୍ଵେନ ହିମରୁଚେରର୍ଧାସନାଧ୍ଯାସିନେ
କାମାକ୍ଷ୍ଯାଃ ସ୍ମିତମଞ୍ଜରୀଧଵଲିମାଦ୍ଵୈତାଯ ତସ୍ମୈ ନମଃ ॥ ୨॥

କର୍ପୂରଦ୍ଯୁତିଚାତୁରୀମତିତରାମଲ୍ପୀଯସୀଂ କୁର୍ଵତୀ
ଦୌର୍ଭାଗ୍ଯୋଦଯମେଵ ସଂଵିଦଧତୀ ଦୌଷାକରୀଣାଂ ତ୍ଵିଷାମ୍ ।
କ୍ଷୁଲ୍ଲାନେଵ ମନୋଜ୍ଞମଲ୍ଲିନିକରାନ୍ଫୁଲ୍ଲାନପି ଵ୍ଯଞ୍ଜତୀ
କାମାକ୍ଷ୍ଯା ମୃଦୁଲସ୍ମିତାଂଶୁଲହରୀ କାମପ୍ରସୂରସ୍ତୁ ମେ ॥ ୩॥

ଯା ପୀନସ୍ତନମଣ୍ଡଲୋପରି ଲସତ୍କର୍ପୂରଲେପାଯତେ
ଯା ନୀଲେକ୍ଷଣରାତ୍ରିକାନ୍ତିତତିଷୁ ଜ୍ଯୋତ୍ସ୍ନାପ୍ରରୋହାଯତେ ।
ଯା ସୌନ୍ଦର୍ଯଧୁନୀତରଙ୍ଗତତିଷୁ ଵ୍ଯାଲୋଲହଂସାଯତେ
କାମାକ୍ଷ୍ଯାଃ ଶିଶିରୀକରୋତୁ ହୃଦଯଂ ସା ମେ ସ୍ମିତପ୍ରାଚୁରୀ ॥ ୪॥

ଯେଷାଂ ଗଚ୍ଛତି ପୂର୍ଵପକ୍ଷସରଣିଂ କୌମୁଦ୍ଵତଃ ଶ୍ଵେତିମା
ଯେଷାଂ ସନ୍ତତମାରୁରୁକ୍ଷତି ତୁଲାକକ୍ଷ୍ଯାଂ ଶରଚ୍ଚନ୍ଦ୍ରମାଃ ।
ଯେଷାମିଚ୍ଛତି କମ୍ବୁରପ୍ଯସୁଲଭାମନ୍ତେଵସତ୍ପ୍ରକ୍ରିଯାଂ
କାମାକ୍ଷ୍ଯା ମମତାଂ ହରନ୍ତୁ ମମ ତେ ହାସତ୍ଵିଷାମଙ୍କୁରାଃ ॥ ୫॥

ଆଶାସୀମସୁ ସନ୍ତତଂ ଵିଦଧତୀ ନୈଶାକରୀଂ ଵ୍ଯାକ୍ରିଯାଂ
କାଶାନାମଭିମାନଭଙ୍ଗକଲନାକୌଶଲ୍ଯମାବିଭ୍ରତୀ ।
ଈଶାନେନ ଵିଲୋକିତା ସକୁତୁକଂ କାମାକ୍ଷି ତେ କଲ୍ମଷ-
କ୍ଲେଶାପାଯକରୀ ଚକାସ୍ତି ଲହରୀ ମନ୍ଦସ୍ମିତଜ୍ଯୋତିଷାମ୍ ॥ ୬॥

ଆରୂଢସ୍ଯ ସମୁନ୍ନତସ୍ତନତଟୀସାମ୍ରାଜ୍ଯସିଂହାସନଂ
କନ୍ଦର୍ପସ୍ଯ ଵିଭୋର୍ଜଗତ୍ତ୍ରଯପ୍ରାକଟ୍ଯମୁଦ୍ରାନିଧେଃ ।
ଯସ୍ଯାଶ୍ଚାମରଚାତୁରୀଂ କଲଯତେ ରଶ୍ମିଚ୍ଛଟା ଚଞ୍ଚଲା
ସା ମନ୍ଦସ୍ମିତମଞ୍ଜରୀ ଭଵତୁ ନଃ କାମାଯ କାମାକ୍ଷି ତେ ॥ ୭॥

ଶମ୍ଭୋର୍ଯା ପରିରମ୍ଭସମ୍ଭ୍ରମଵିଧୌ ନୈର୍ମଲ୍ଯସୀମାନିଧିଃ
ଗୈର୍ଵାଣୀଵ ତରଙ୍ଗିଣୀ କୃତମୃଦୁସ୍ଯନ୍ଦାଂ କଲିନ୍ଦାତ୍ମଜାମ୍ ।
କଲ୍ମାଷୀକୁରୁତେ କଲଙ୍କସୁଷମାଂ କଣ୍ଠସ୍ଥଲୀଚୁମ୍ବିନୀଂ
କାମାକ୍ଷ୍ଯାଃ ସ୍ମିତକନ୍ଦଲୀ ଭଵତୁ ନଃ କଲ୍ଯାଣସନ୍ଦୋହିନୀ ॥ ୮॥

ଜେତୁଂ ହାରଲତାମିଵ ସ୍ତନତଟୀଂ ସଂଜଗ୍ମୁଷୀ ସନ୍ତତଂ
ଗନ୍ତୁଂ ନିର୍ମଲତାମିଵ ଦ୍ଵିଗୁଣିତାଂ ମଗ୍ନା କୃପାସ୍ତ୍ରୋତସି ।
ଲବ୍ଧୁଂ ଵିସ୍ମଯନୀଯତାମିଵ ହରଂ ରାଗାକୁଲଂ କୁର୍ଵତୀ
ମଞ୍ଜୁସ୍ତେ ସ୍ମିତମଞ୍ଜରୀ ଭଵଭଯଂ ମଥ୍ନାତୁ କାମାକ୍ଷି ମେ ॥ ୯॥

ଶ୍ଵେତାପି ପ୍ରକଟଂ ନିଶାକରରୁଚାଂ ମାଲିନ୍ଯମାତନ୍ଵତୀ
ଶୀତାପି ସ୍ମରପାଵକଂ ପଶୁପତେଃ ସନ୍ଧୁକ୍ଷଯନ୍ତୀ ସଦା ।
ସ୍ଵାଭାଵ୍ଯାଦଧରାଶ୍ରିତାପି ନମତାମୁଚ୍ଚୈର୍ଦିଶନ୍ତୀ ଗତିଂ
କାମାକ୍ଷି ସ୍ଫୁଟମନ୍ତରା ସ୍ଫୁରତୁ ନସ୍ତ୍ଵନ୍ମନ୍ଦହାସପ୍ରଭା ॥ ୧୦॥

ଵକ୍ତ୍ରଶ୍ରୀସରସୀଜଲେ ତରଲିତଭ୍ରୂଵଲ୍ଲିକଲ୍ଲୋଲିତେ
କାଲିମ୍ନା ଦଧତୀ କଟାକ୍ଷଜନୁଷା ମାଧୁଵ୍ରତୀଂ ଵ୍ଯାପୃତିମ୍ ।
ନିର୍ନିଦ୍ରାମଲପୁଣ୍ଡରୀକକୁହନାପାଣ୍ଡିତ୍ଯମାବିଭ୍ରତୀ
କାମାକ୍ଷ୍ଯାଃ ସ୍ମିତଚାତୁରୀ ମମ ମନଃ କାତର୍ଯମୁନ୍ମୂଲଯେତ୍ ॥ ୧୧॥

ନିତ୍ଯଂ ବାଧିତବନ୍ଧୁଜୀଵମଧରଂ ମୈତ୍ରୀଜୁଷଂ ପଲ୍ଲଵୈଃ
ଶୁଦ୍ଧସ୍ଯ ଦ୍ଵିଜମଣ୍ଡଲସ୍ଯ ଚ ତିରସ୍କର୍ତାରମପ୍ଯାଶ୍ରିତା ।
ଯା ଵୈମଲ୍ଯଵତୀ ସଦୈଵ ନମତାଂ ଚେତଃ ପୁନୀତେତରାଂ
କାମାକ୍ଷ୍ଯା ହୃଦଯଂ ପ୍ରସାଦଯତୁ ମେ ସା ମନ୍ଦହାସପ୍ରଭା ॥ ୧୨॥

ଦ୍ରୁହ୍ଯନ୍ତୀ ତମସେ ମୁହୁଃ କୁମୁଦିନୀସାହାଯ୍ଯମାବିଭ୍ରତୀ
ଯାନ୍ତୀ ଚନ୍ଦ୍ରକିଶୋରଶେଖରଵପୁଃସୌଧାଙ୍ଗଣେ ପ୍ରେଙ୍ଖଣମ୍ ।
ଜ୍ଞାନାମ୍ଭୋନିଧିଵୀଚିକାଂ ସୁମନସାଂ କୂଲଂକଷାଂ କୁର୍ଵତୀ
କାମାକ୍ଷ୍ଯାଃ ସ୍ମିତକୌମୁଦୀ ହରତୁ ମେ ସଂସାରତାପୋଦଯମ୍ ॥ ୧୩॥

କାଶ୍ମୀରଦ୍ରଵଧାତୁକର୍ଦମରୁଚା କଲ୍ମାଷତାଂ ବିଭ୍ରତୀ
ହଂସୌଧୈରିଵ କୁର୍ଵତୀ ପରିଚିତିଂ ହାରୀକୃତୈର୍ମୌକ୍ତିକୈଃ ।
ଵକ୍ଷୋଜନ୍ମତୁଷାରଶୈଲକଟକେ ସଂଚାରମାତନ୍ଵତୀ
କାମାକ୍ଷ୍ଯା ମୃଦୁଲସ୍ମିତଦ୍ଯୁତିମଯୀ ଭାଗୀରଥୀ ଭାସତେ ॥ ୧୪॥

କମ୍ବୋର୍ଵଂଶପରମ୍ପରା ଇଵ କୃପାସନ୍ତାନଵଲ୍ଲୀଭୁଵଃ
ସମ୍ଫୁଲ୍ଲସ୍ତବକା ଇଵ ପ୍ରସୃମରା ମୂର୍ତାଃ ପ୍ରସାଦା ଇଵ ।
ଵାକ୍ପୀଯୂଷକଣା ଇଵ ତ୍ରିପଥଗାପର୍ଯାଯଭେଦା ଇଵ
ଭ୍ରାଜନ୍ତେ ତଵ ମନ୍ଦହାସକିରଣାଃ କାଞ୍ଚୀପୁରୀନାଯିକେ ॥ ୧୫॥

ଵକ୍ଷୋଜେ ଘନସାରପତ୍ରରଚନାଭଙ୍ଗୀସପତ୍ନାଯିତା
କଣ୍ଠେ ମୌକ୍ତିକହାରଯଷ୍ଟିକିରଣଵ୍ଯାପାରମୁଦ୍ରାଯିତା ।
ଓଷ୍ଠଶ୍ରୀନିକୁରୁମ୍ବପଲ୍ଲଵପୁଟେ ପ୍ରେଙ୍ଖତ୍ପ୍ରସୂନାଯିତା
କାମାକ୍ଷି ସ୍ଫୁରତାଂ ମଦୀଯହୃଦଯେ ତ୍ଵନ୍ମନ୍ଦହାସପ୍ରଭା ॥ ୧୬॥

ଯେଷାଂ ବିନ୍ଦୁରିଵୋପରି ପ୍ରଚଲିତୋ ନାସାଗ୍ରମୁକ୍ତାମଣିଃ
ଯେଷାଂ ଦୀନ ଇଵାଧିକଣ୍ଠମଯତେ ହାରଃ କରାଲମ୍ବନମ୍ ।
ଯେଷାଂ ବନ୍ଧୁରିଵୋଷ୍ଠଯୋରରୁଣିମା ଧତ୍ତେ ସ୍ଵଯଂ ରଞ୍ଜନଂ
କାମାକ୍ଷ୍ଯାଃ ପ୍ରଭଵନ୍ତୁ ତେ ମମ ଶିଵୋଲ୍ଲାସାଯ ହାସାଙ୍କୁରାଃ ॥ ୧୭॥

ଯା ଜାଡ୍ଯାମ୍ବୁନିଧିଂ କ୍ଷିଣୋତି ଭଜତାଂ ଵୈରାଯତେ କୈରଵୈଃ
ନିତ୍ଯଂ ଯାଂ ନିଯମେନ ଯା ଚ ଯତତେ କର୍ତୁଂ ତ୍ରିଣେତ୍ରୋତ୍ସଵମ୍ ।
ବିମ୍ବଂ ଚାନ୍ଦ୍ରମସଂ ଚ ଵଞ୍ଚଯତି ଯା ଗର୍ଵେଣ ସା ତାଦୃଶୀ
କାମାକ୍ଷି ସ୍ମିତମଞ୍ଜରୀ ତଵ କଥଂ ଜ୍ଯୋତ୍ସ୍ନେତ୍ଯସୌ କୀର୍ତ୍ଯତେ ॥ ୧୮॥

ଆରୁଢା ରଭସାତ୍ପୁରଃ ପୁରରିପୋରାଶ୍ଲେଷଣୋପକ୍ରମେ
ଯା ତେ ମାତରୁପୈତି ଦିଵ୍ଯତଟିନୀଶଙ୍କାକରୀ ତତ୍କ୍ଷଣମ୍ ।
ଓଷ୍ଠୌ ଵେପଯତି ଭ୍ରୁଵୌ କୁଟିଲଯତ୍ଯାନମ୍ରଯତ୍ଯାନନଂ
ତାଂ ଵନ୍ଦେ ମୃଦୁହାସପୂରସୁଷମାମେକାମ୍ରନାଥପ୍ରିଯେ ॥ ୧୯॥

ଵକ୍ତ୍ରେନ୍ଦୋସ୍ତଵ ଚନ୍ଦ୍ରିକା ସ୍ମିତତତିର୍ଵଲ୍ଗୁ ସ୍ଫୁରନ୍ତୀ ସତାଂ
ସ୍ଯାଚ୍ଚେଦ୍ଯୁକ୍ତିମିଦଂ ଚକୋରମନସାଂ କାମାକ୍ଷି କୌତୂହଲମ୍ ।
ଏତଚ୍ଚିତ୍ରମହର୍ନିଶଂ ଯଦଧିକାମେଷା ରୁଚିଂ ଗାହତେ
ବିମ୍ବୋଷ୍ଠଦ୍ଯୁମଣିପ୍ରଭାସ୍ଵପି ଚ ଯଦ୍ବିବ୍ବୋକମାଲମ୍ବତେ ॥ ୨୦॥

ସାଦୃଶ୍ଯଂ କଲଶାମ୍ବୁଧେର୍ଵହତି ଯତ୍କାମାକ୍ଷି ମନ୍ଦସ୍ମିତଂ
ଶୋଭାମୋଷ୍ଠରୁଚାମ୍ବ ଵିଦ୍ରୁମଭଵାମେତାଦ୍ଭିଦାଂ ବ୍ରୂମହେ ।
ଏକସ୍ମାଦୁଦିତଂ ପୁରା କିଲ ପପୌ ଶର୍ଵଃ ପୁରାଣଃ ପୁମାନ୍
ଏତନ୍ମଧ୍ଯସମୁଦ୍ଭଵଂ ରସଯତେ ମାଧୁର୍ଯରୂପଂ ରସମ୍ ॥ ୨୧॥

ଉତ୍ତୁଙ୍ଗସ୍ତନକୁମ୍ଭଶୈଲକଟକେ ଵିସ୍ତାରିକସ୍ତୂରିକା-
ପତ୍ରଶ୍ରୀଜୁଷି ଚଞ୍ଚଲାଃ ସ୍ମିତରୁଚଃ କାମାକ୍ଷି ତେ କୋମଲାଃ ।
ସନ୍ଧ୍ଯାଦୀଧିତିରଞ୍ଜିତା ଇଵ ମୁହୁଃ ସାନ୍ଦ୍ରାଧରଜ୍ଯୋତିଷା
ଵ୍ଯାଲୋଲାମଲଶାରଦାଭ୍ରଶକଲଵ୍ଯାପାରମାତନ୍ଵତେ ॥ ୨୨॥

କ୍ଷୀରଂ ଦୂରତ ଏଵ ତିଷ୍ଠତୁ କଥଂ ଵୈମଲ୍ଯମାତ୍ରାଦିଦଂ
ମାତସ୍ତେ ସହପାଠଵୀଥିମଯତାଂ ମନ୍ଦସ୍ମିତୈର୍ମଞ୍ଜୁଲୈଃ ।
କିଂ ଚେଯଂ ତୁ ଭିଦାସ୍ତି ଦୋହନଵଶାଦେକଂ ତୁ ସଂଜାଯତେ
କାମାକ୍ଷି ସ୍ଵଯମର୍ଥିତଂ ପ୍ରଣମତାମନ୍ଯତ୍ତୁ ଦୋଦୁହ୍ଯତେ ॥ ୨୩॥

କର୍ପୂରୈରମୃତୈର୍ଜଗଜ୍ଜନନି ତେ କାମାକ୍ଷି ଚନ୍ଦ୍ରାତପୈଃ
ମୁକ୍ତାହାରଗୁଣୈର୍ମୃଣାଲଵଲଯୈର୍ମୁଗ୍ଧସ୍ମିତଶ୍ରୀରିଯମ୍ ।
ଶ୍ରୀକାଞ୍ଚୀପୁରନାଯିକେ ସମତଯା ସଂସ୍ତୂଯତେ ସଜ୍ଜନୈଃ
ତତ୍ତାଦୃଙ୍ମମ ତାପଶାନ୍ତିଵିଧଯେ କିଂ ଦେଵି ମନ୍ଦାଯତେ ॥ ୨୪॥

ମଧ୍ଯେଗର୍ଭିତମଞ୍ଜୁଵାକ୍ଯଲହରୀମାଧ୍ଵୀଝରୀଶୀତଲା
ମନ୍ଦାରସ୍ତବକାଯତେ ଜନନି ତେ ମନ୍ଦସ୍ମିତାଂଶୁଚ୍ଛଟା ।
ଯସ୍ଯା ଵର୍ଧଯିତୁଂ ମୁହୁର୍ଵିକସନଂ କାମାକ୍ଷି କାମଦ୍ରୁହୋ
ଵଲ୍ଗୁର୍ଵୀକ୍ଷଣଵିଭ୍ରମଵ୍ଯତିକରୋ ଵାସନ୍ତମାସାଯତେ ॥ ୨୫॥

ବିମ୍ବୋଷ୍ଠଦ୍ଯୁତିପୁଞ୍ଜରଞ୍ଜିତରୁଚିସ୍ତ୍ଵନ୍ମନ୍ଦହାସଚ୍ଛଟା ।
କଲ୍ଯାଣଂ ଗିରିସାର୍ଵଭୌମତନଯେ କଲ୍ଲୋଲଯତ୍ଵାଶୁ ମେ ।
ଫୁଲ୍ଲନ୍ମଲ୍ଲିପିନଦ୍ଧହଲ୍ଲକମଯୀ ମାଲେଵ ଯା ପେଶଲା
ଶ୍ରୀକାଞ୍ଚୀଶ୍ଵରି ମାରମର୍ଦିତୁରୁରୋମଧ୍ଯେ ମୁହୁର୍ଲମ୍ବତେ ॥ ୨୬॥

ବିଭ୍ରାଣା ଶରଦଭ୍ରଵିଭ୍ରମଦଶାଂ ଵିଦ୍ଯୋତମାନାପ୍ଯସୋ
କାମାକ୍ଷି ସ୍ମିତମଞ୍ଜରୀ କିରତି ତେ କାରୁଣ୍ଯଧାରାରସମ୍ ।
ଆଶ୍ଚର୍ଯଂ ଶିଶିରୀକରୋତି ଜଗତୀଶ୍ଚାଲୋକ୍ଯ ଚୈନାମହୋ
କାମଂ ଖେଲତି ନୀଲକଣ୍ଠହୃଦଯଂ କୌତୂହଲାନ୍ଦୋଲିତମ୍ ॥ ୨୭॥

ପ୍ରେଙ୍ଖତ୍ପ୍ରୌଢକଟାକ୍ଷକୁଞ୍ଜକୁହରେଷ୍ଵତ୍ଯଚ୍ଛଗୁଚ୍ଛାଯିତଂ
ଵକ୍ତ୍ରେନ୍ଦୁଚ୍ଛଵିସିନ୍ଧୁଵୀଚିନିଚଯେ ଫେନପ୍ରତାନାଯିତମ୍ ।
ନୈରନ୍ତର୍ଯଵିଜୃମ୍ଭିତସ୍ତନତଟେ ନୈଚୋଲପଟ୍ଟାଯିତଂ
କାଲୁଷ୍ଯଂ କବଲୀକରୋତୁ ମମ ତେ କାମାକ୍ଷି ମନ୍ଦସ୍ମିତମ୍ ॥ ୨୮॥

ପୀଯୂଷଂ ତଵ ମନ୍ଥରସ୍ମିତମିତି ଵ୍ଯର୍ଥୈଵ ସାପପ୍ରଥା
କାମାକ୍ଷି ଧ୍ରୁଵମୀଦୃଶଂ ଯଦି ଭଵେଦେତତ୍କଥଂ ଵା ଶିଵେ ।
ମନ୍ଦାରସ୍ଯ କଥାଲଵଂ ନ ସହତେ ମଥ୍ନାତି ମନ୍ଦାକିନୀ-
ମିନ୍ଦୁଂ ନିନ୍ଦତି କୀର୍ତିତେଽପି କଲଶୀପାଥୋଧିମୀର୍ଷ୍ଯାଯତେ ॥ ୨୯॥

ଵିଶ୍ଵେଷାଂ ନଯନୋତ୍ସଵଂ ଵିତନୁତାଂ ଵିଦ୍ଯୋତତାଂ ଚନ୍ଦ୍ରମା
ଵିଖ୍ଯାତୋ ମଦନାନ୍ତକେନ ମୁକୁଟୀମଧ୍ଯେ ଚ ସଂମାନ୍ଯତାମ୍ ।
ଆଃ କିଂ ଜାତମନେନ ହାସସୁଷମାମାଲୋକ୍ଯ କାମାକ୍ଷି ତେ
କାଲଙ୍କୀମଵଲମ୍ବତେ ଖଲୁ ଦଶାଂ କଲ୍ମାଷହୀନୋଽପ୍ଯସୌ ॥ ୩୦॥

ଚେତଃ ଶୀତଲଯନ୍ତୁ ନଃ ପଶୁପତେରାନନ୍ଦଜୀଵାତଵୋ
ନମ୍ରାଣାଂ ନଯନାଧ୍ଵସୀମସୁ ଶରଚ୍ଚନ୍ଦ୍ରାତପୋପକ୍ରମାଃ ।
ସଂସାରାଖ୍ଯସରୋରୁହାକରଖଲୀକାରେ ତୁଷାରୋତ୍କରାଃ
କାମାକ୍ଷି ସ୍ମରକୀର୍ତିବୀଜନିକରାସ୍ତ୍ଵନ୍ମନ୍ଦହାସାଙ୍କୁରାଃ ॥ ୩୧॥

କର୍ମୌଘାଖ୍ଯତମଃକଚାକଚିକରାନ୍କାମାକ୍ଷି ସଂଚିନ୍ତଯେ
ତ୍ଵନ୍ମନ୍ଦସ୍ମିତରୋଚିଷାଂ ତ୍ରିଭୁଵନକ୍ଷେମଂକରାନଙ୍କୁରାନ୍ ।
ଯେ ଵକ୍ତ୍ରଂ ଶିଶିରଶ୍ରିଯୋ ଵିକସିତଂ ଚନ୍ଦ୍ରାତପାମ୍ଭୋରୁହ-
ଦ୍ଵେଷୋଦ୍ଧେଷୋଣଚାତୁରୀମିଵ ତିରସ୍କର୍ତୁଂ ପରିଷ୍କୁର୍ଵତେ ॥ ୩୨॥

କୁର୍ଯୁର୍ନଃ କୁଲଶୈଲରାଜତନଯେ କୂଲଂକଷଂ ମଙ୍ଗଲଂ
କୁନ୍ଦସ୍ପର୍ଧନଚୁଞ୍ଚଵସ୍ତଵ ଶିଵେ ମନ୍ଦସ୍ମିତପ୍ରକ୍ରମାଃ ।
ଯେ କାମାକ୍ଷି ସମସ୍ତସାକ୍ଷିନଯନଂ ସନ୍ତୋଷଯନ୍ତୀଶ୍ଵରଂ
କର୍ପୂରପ୍ରକରା ଇଵ ପ୍ରସୃମରାଃ ପୁଂସାମସାଧାରଣାଃ ॥ ୩୩॥

କମ୍ରେଣ ସ୍ନପଯସ୍ଵ କର୍ମକୁହନାଚୋରେଣ ମାରାଗମ-
ଵ୍ଯାଖ୍ଯାଶିକ୍ଷଣଦୀକ୍ଷିତେନ ଵିଦୁଷାମକ୍ଷୀଣଲକ୍ଷ୍ମୀପୁଷା ।
କାମାକ୍ଷି ସ୍ମିତକନ୍ଦଲେନ କଲୁଷସ୍ଫୋଟକ୍ରିଯାଚୁଞ୍ଚୁନା
କାରୁଣ୍ଯାମୃତଵୀଚିକାଵିହରଣପ୍ରାଚୁର୍ଯଧୁର୍ଯେଣ ମାମ୍ ॥ ୩୪॥

ତ୍ଵନ୍ମନ୍ଦସ୍ମିତକନ୍ଦଲସ୍ଯ ନିଯତଂ କାମାକ୍ଷି ଶଙ୍କାମହେ
ବିମ୍ବଃ କଶ୍ଚନ ନୂତନଃ ପ୍ରଚଲିତୋ ନୈଶାକରଃ ଶୀକରଃ ।
କିଂଚ କ୍ଷୀରପଯୋନିଧିଃ ପ୍ରତିନିଧିଃ ସ୍ଵର୍ଵାହିନୀଵୀଚିକା-
ବିବ୍ଵୋକୋଽପି ଵିଡମ୍ବ ଏଵ କୁହନା ମଲ୍ଲୀମତଲ୍ଲୀରୁଚଃ ॥ ୩୫॥

ଦୁଷ୍କର୍ମାର୍କନିସର୍ଗକର୍କଶମହସ୍ସମ୍ପର୍କତପତଂ ମିଲ-
ତ୍ପଙ୍କଂ ଶଙ୍କରଵଲ୍ଲଭେ ମମ ମନଃ କାଞ୍ଚୀପୁରାଲଂକ୍ରିଯେ ।
ଅମ୍ବ ତ୍ଵନ୍ମୃଦୁଲସ୍ମିତାମୃତରସେ ମଙ୍କ୍ତ୍ଵା ଵିଧୂଯ ଵ୍ଯଥା-
ମାନନ୍ଦୋଦଯସୌଧଶୃଙ୍ଗପଦଵୀମାରୋଢୁମାକାଙ୍କ୍ଷତି ॥ ୩୬॥

ନମ୍ରାଣାଂ ନଗରାଜଶେଖରସୁତେ ନାକାଲଯାନାଂ ପୁରଃ
କାମାକ୍ଷି ତ୍ଵରଯା ଵିପତ୍ପ୍ରଶମେନ କାରୁଣ୍ଯଧାରାଃ କିରନ୍ ।
ଆଗଚ୍ଛନ୍ତମନୁଗ୍ରହଂ ପ୍ରକଟଯନ୍ନାନନ୍ଦବୀଜାନି ତେ
ନାସୀରେ ମୃଦୁହାସ ଏଵ ତନୁତେ ନାଥେ ସୁଧାଶୀତଲଃ ॥ ୩୭॥

କାମାକ୍ଷି ପ୍ରଥମାନଵିଭ୍ରମନିଧିଃ କନ୍ଦର୍ପଦର୍ପପ୍ରସୂଃ
ମୁଗ୍ଧସ୍ତେ ମୃଦୁହାସ ଏଵ ଗିରିଜେ ମୁଷ୍ଣାତୁ ମେ କିଲ୍ବିଷମ୍ ।
ଯଂ ଦ୍ରଷ୍ଟୁଂ ଵିହିତେ କରଗ୍ରହ ଉମେ ଶମ୍ଭୁସ୍ତ୍ରପାମୀଲିତଂ
ସ୍ଵୈରଂ କାରଯତି ସ୍ମ ତାଣ୍ଡଵଵିନୋଦାନନ୍ଦିନା ତଣ୍ଡୁନା ॥ ୩୮॥

କ୍ଷୁଣ୍ଣଂ କେନଚିଦେଵ ଧୀରମନସା କୁତ୍ରାପି ନାନାଜନୈଃ
କର୍ମଗ୍ରନ୍ଥିନିଯନ୍ତ୍ରିତୈରସୁଗମଂ କାମାକ୍ଷି ସାମାନ୍ଯତଃ ।
ମୁଗ୍ଧୈର୍ଦ୍ରୁଷ୍ଟୁମଶକ୍ଯମେଵ ମନସା ମୂଢସଯ ମେ ମୌକ୍ତିକଂ
ମାର୍ଗଂ ଦର୍ଶଯତୁ ପ୍ରଦୀପ ଇଵ ତେ ମନ୍ଦସ୍ମିତଶ୍ରୀରିଯମ୍ ॥ ୩୯॥

ଜ୍ଯୋତ୍ସ୍ନାକାନ୍ତିଭିରେଵ ନିର୍ମଲତରଂ ନୈଶାକରଂ ମଣ୍ଡଲଂ
ହଂସୈରେଵ ଶରଦ୍ଵିଲାସସମଯେ ଵ୍ଯାକୋଚମମ୍ଭୋରୁହମ୍ ।
ସ୍ଵଚ୍ଛୈରେଵ ଵିକସ୍ଵରୈରୁଡୁଗୁଣୈଃ କାମାକ୍ଷି ବିମ୍ବଂ ଦିଵଃ
ପୁଣ୍ଯୈରେଵ ମୃଦୁସ୍ମିତୈସ୍ତଵ ମୁଖଂ ପୁଷ୍ଣାତି ଶୋଭାଭରମ୍ ॥ ୪୦॥

ମାନଗ୍ରନ୍ଥିଵିଧୁନ୍ତୁଦେନ ରଭସାଦାସ୍ଵାଦ୍ଯମାନେ ନଵ-
ପ୍ରେମାଡମ୍ବରପୂର୍ଣିମାହିମକରେ କାମାକ୍ଷି ତେ ତତ୍କ୍ଷଣମ୍ ।
ଆଲୋକ୍ଯ ସ୍ମିତଚନ୍ଦ୍ରିକାଂ ପୁନରିମାମୁନ୍ମୀଲନଂ ଜଗ୍ମୁଷୀଂ
ଚେତଃ ଶୀଲଯତେ ଚକୋରଚରିତଂ ଚନ୍ଦ୍ରାର୍ଧଚୂଡାମଣେଃ ॥ ୪୧॥

କାମାକ୍ଷି ସ୍ମିତମଞ୍ଜରୀଂ ତଵ ଭଜେ ଯସ୍ଯାସ୍ତ୍ଵିଷାମଙ୍କୁରା-
ନାପୀନସ୍ତନପାନଲାଲସତଯା ନିଶ୍ଶଙ୍କମଙ୍କେଶଯଃ ।
ଊର୍ଧ୍ଵଂ ଵୀକ୍ଷ୍ଯ ଵିକର୍ଷତି ପ୍ରସୃମରାନୁଦ୍ଦାମଯା ଶୁଣ୍ଡଯା
ସୂନୁସୁତେ ବିସଶଙ୍କଯାଶୁ କୁହନାଦନ୍ତାଵଲଗ୍ରାମଣୀଃ ॥ ୪୨॥

ଗାଢାଶ୍ଲେଷଵିମର୍ଦସମ୍ଭ୍ରମଵଶାଦୁଦ୍ଦାମମୁକ୍ତାଗୁଣ-
ପ୍ରାଲମ୍ବେ କୁଚକୁମ୍ଭଯୋର୍ଵିଗଲିତେ ଦକ୍ଷଦ୍ଵିଷୋ ଵକ୍ଷସି ।
ଯା ସଖ୍ଯେନ ପିନହ୍ଯତି ପ୍ରଚୁରଯା ଭାସା ତଦୀଯାଂ ଦଶାଂ
ସା ମେ ଖେଲତୁ କାମକୋଟି ହୃଦଯେ ସାନ୍ଦ୍ରସ୍ମିତାଂଶୁଚ୍ଛଟା ॥ ୪୩॥

ମନ୍ଦାରେ ତଵ ମନ୍ଥରସ୍ମିତରୁଚାଂ ମାତ୍ସର୍ଯମାଲୋକ୍ଯତେ
କାମାକ୍ଷି ସ୍ମରଶାସନେ ଚ ନିଯତୋ ରାଗୋଦଯୋ ଲକ୍ଷ୍ଯତେ ।
ଚାନ୍ଦ୍ରୀଷୁ ଦ୍ଯୁତିମଞ୍ଜରୀଷୁ ଚ ମହାନ୍ଦ୍ଵେଷାଙ୍କୁରୋ ଦୃଶ୍ଯତେ
ଶୁଦ୍ଧାନାଂ କଥମୀଦୃଶୀ ଗିରିସୁତେଽତିଶୁଦ୍ଧା ଦଶା କଥ୍ଯତାମ୍ ॥ ୪୪॥

ପୀଯୂଷଂ ଖଲୁ ପୀଯତେ ସୁରଜନୈର୍ଦୁଗ୍ଧାମ୍ବୁଧିର୍ମଥ୍ଯତେ
ମାହେଶୈଶ୍ଚ ଜଟାକଲାପନିଗଡୈର୍ମନ୍ଦାକିନୀ ନହ୍ଯତେ ।
ଶୀତାଂଶୁଃ ପରିଭୂଯତେ ଚ ତମସା ତସ୍ମାଦନେତାଦୃଶୀ
କାମାକ୍ଷି ସ୍ମିତମଞ୍ଜରୀ ତଵ ଵଚୋଵୈଦଗ୍ଧ୍ଯମୁଲ୍ଲଙ୍ଘତେ ॥ ୪୫॥

ଆଶଙ୍କେ ତଵ ମନ୍ଦହାସଲହରୀମନ୍ଯାଦୃଶୀଂ ଚନ୍ଦ୍ରିକା-
ମେକାମ୍ରେଶକୁଟୁମ୍ବିନି ପ୍ରତିପଦଂ ଯସ୍ଯାଃ ପ୍ରଭାସଂଗମେ ।
ଵକ୍ଷୋଜାମ୍ବୁରୁହେ ନ ତେ ରଚଯତଃ କାଂଚିଦ୍ଦଶାଂ କୌଙ୍ମଲୀ-
ମାସ୍ଯାମ୍ଭୋରୁହମମ୍ବ କିଂଚ ଶନକୈରାଲମ୍ବତେ ଫୁଲ୍ଲତାମ୍ ॥ ୪୬॥

ଆସ୍ତୀର୍ଣାଧରକାନ୍ତିପଲ୍ଲଵଚଯେ ପାତଂ ମୁହୁର୍ଜଗ୍ମୁଷୀ
ମାରଦ୍ରୋହିଣି କନ୍ଦଲତ୍ସ୍ମରଶରଜ୍ଵାଲାଵଲୀର୍ଵ୍ଯଞ୍ଜତୀ ।
ନିନ୍ଦନ୍ତୀ ଘନସାରହାରଵଲଯଜ୍ଯୋତ୍ସ୍ନାମୃଣାଲାନି ତେ
କାମାକ୍ଷି ସ୍ମିତଚାତୁରୀ ଵିରହିଣୀରୀତିଂ ଜଗାହେତରାମ୍ ॥ ୪୭॥

ସୂର୍ଯାଲୋକଵିଧୌ ଵିକାସମଧିକଂ ଯାନ୍ତୀ ହରନ୍ତୀ ତମ-
ସ୍ସନ୍ଦୋହଂ ନମତାଂ ନିଜସ୍ମରଣତୋ ଦୋଷାକରଦ୍ଵେଷିଣୀ ।
ନିର୍ଯାନ୍ତୀ ଵଦନାରଵିନ୍ଦକୁହରାନ୍ନିର୍ଧୂତଜାଡ୍ଯା ନୃଣାଂ
ଶ୍ରୀକାମାକ୍ଷି ତଵ ସ୍ମିତଦ୍ଯୁତିମଯୀ ଚିତ୍ରୀଯତେ ଚନ୍ଦ୍ରିକା ॥ ୪୮॥

କୁଣ୍ଠୀକୁର୍ଯୁରମୀ କୁବୋଧଘଟନାମସ୍ମନ୍ମନୋମାଥିନୀଂ
ଶ୍ରୀକାମାକ୍ଷି ଶିଵଂକରାସ୍ତଵ ଶିଵେ ଶ୍ରୀମନ୍ଦହାସାଙ୍କୁରାଃ ।
ଯେ ତନ୍ଵନ୍ତି ନିରନ୍ତରଂ ତରୁଣିମସ୍ତମ୍ବେରମଗ୍ରାମଣୀ-
କୁମ୍ଭଦ୍ଵନ୍ଦ୍ଵଵିଡମ୍ବିନି ସ୍ତନତଟେ ମୁକ୍ତାକୁଥାଡମ୍ବରମ୍ ॥ ୪୯॥

ପ୍ରେଙ୍ଖନ୍ତଃ ଶରଦମ୍ବୁଦା ଇଵ ଶନୈଃ ପ୍ରେମାନିଲୈଃ ପ୍ରେରିତା
ମଜ୍ଜନ୍ତୋ ମନ୍ଦନାରିକଣ୍ଠସୁଷମାସିନ୍ଧୌ ମୁହୁର୍ମନ୍ଥରମ୍ ।
ଶ୍ରୀକାମାକ୍ଷି ତଵ ସ୍ମିତାଂଶୁନିକରାଃ ଶ୍ଯାମାଯମାନଶ୍ରିଯୋ
ନୀଲାମ୍ଭୋଧରନୈପୁଣୀଂ ତତ ଇତୋ ନିର୍ନିଦ୍ରଯନ୍ତ୍ଯଞ୍ଜସା ॥ ୫୦॥

ଵ୍ଯାପାରଂ ଚତୁରାନନୈକଵିହୃତୌ ଵ୍ଯାକୁର୍ଵତୀ କୁର୍ଵତୀ
ରୁଦ୍ରାକ୍ଷଗ୍ରହଣଂ ମହେଶି ସତତଂ ଵାଗୂର୍ମିକଲ୍ଲୋଲିତା ।
ଉତ୍ଫୁଲ୍ଲଂ ଧଵଲାରଵିନ୍ଦମଧରୀକୃତ୍ଯ ସ୍ଫୁରନ୍ତୀ ସଦା
ଶ୍ରୀକାମାକ୍ଷି ସରସ୍ଵତୀ ଵିଜଯତେ ତ୍ଵନ୍ମନ୍ଦହାସପ୍ରଭା ॥ ୫୧॥

କର୍ପୂରଦ୍ଯୁତିତସ୍କରେଣ ମହସା କଲ୍ମାଷଯତ୍ଯାନନଂ
ଶ୍ରୀକାଞ୍ଚୀପୁରନାଯିକେ ପତିରିଵ ଶ୍ରୀମନ୍ଦହାସୋଽପି ତେ ।
ଆଲିଙ୍ଗତ୍ଯତିପୀଵରାଂ ସ୍ତନତଟୀଂ ବିମ୍ବାଧରଂ ଚୁମ୍ବତି
ପ୍ରୌଢଂ ରାଗଭରଂ ଵ୍ଯନକ୍ତି ମନସୋ ଧୈର୍ଯଂ ଧୁନୀତେତରାମ୍ ॥ ୫୨॥

ଵୈଶଦ୍ଯେନ ଚ ଵିଶ୍ଵତାପହରଣକ୍ରୀଡାପଟୀଯସ୍ତଯା
ପାଣ୍ଡିତ୍ଯେନ ପଚେଲିମେନ ଜଗତାଂ ନେତ୍ରୋତ୍ସଵୋତ୍ପାଦେନ ।
କାମାକ୍ଷି ସ୍ମିତକନ୍ଦଲୈସ୍ତଵ ତୁଲାମାରୋଢୁମୁଦ୍ଯୋଗିନୀ
ଜ୍ଯୋତ୍ସ୍ନାସୌ ଜଲରାଶିପୋଷଣତଯା ଦୂଷ୍ଯାଂ ପ୍ରପନ୍ନା ଦଶାମ୍ ॥ ୫୩॥

ଲାଵଣ୍ଯାମ୍ବୁଜିନୀମୃଣାଲଵଲଯୈଃ ଶୃଙ୍ଗାରଗନ୍ଧଦ୍ଵିପ-
ଗ୍ରାମଣ୍ଯଃ ଶ୍ରୁତିଚାମରୈସ୍ତରୁଣିମସ୍ଵାରାଜ୍ଯତେଜୋଙ୍କୁରୈଃ ।
ଆନନ୍ଦାମୃତସିନ୍ଧୁଵୀଚିପୃଷତୈରାସ୍ଯାବ୍ଜହଂସୈସ୍ତଵ
ଶ୍ରୀକାମାକ୍ଷି ମଥାନ ମନ୍ଦହସିତୈର୍ମତ୍କଂ ମନଃକଲ୍ମଷମ୍ ॥ ୫୪॥

ଉତ୍ତୁଙ୍ଗସ୍ତନମଣ୍ଡଲୀପରିଚଲନ୍ମାଣିକ୍ଯହାରଚ୍ଛଟା-
ଚଞ୍ଚଚ୍ଛୋଣିମପୁଞ୍ଜମଧ୍ଯସରଣିଂ ମାତଃ ପରିଷ୍କୁର୍ଵତୀ ।
ଯା ଵୈଦଗ୍ଧ୍ଯମୁପୈତି ଶଂକରଜଟାକାନ୍ତାରଵାଟୀପତ-
ତ୍ସ୍ଵର୍ଵାପୀପଯସଃ ସ୍ମିତଦ୍ଯୁତିରସୌ କାମାକ୍ଷି ତେ ମଞ୍ଜୁଲା ॥ ୫୫॥

ସନ୍ନାମୈକଜୁଷା ଜନେନ ସୁଲଭଂ ସଂସୂଚଯନ୍ତୀ ଶନୈ-
ରୁତ୍ତୁଙ୍ଗସ୍ଯ ଚିରାଦନୁଗ୍ରହତରୋରୁତ୍ପତ୍ସ୍ଯମାନଂ ଫଲମ୍ ।
ପ୍ରାଥମ୍ଯେନ ଵିକସ୍ଵରା କୁସୁମଵତ୍ପ୍ରାଗଲ୍ଭ୍ଯମଭ୍ଯେଯୁଷୀ
କାମାକ୍ଷି ସ୍ମିତଚାତୁରୀ ତଵ ମମ କ୍ଷେମଂକରୀ କଲ୍ପତାମ୍ ॥ ୫୬॥

ଧାନୁଷ୍କାଗ୍ରସରସ୍ଯ ଲୋଲକୁଟିଲଭ୍ରୂଲେଖଯା ବିଭ୍ରତୋ
ଲୀଲାଲୋକଶିଲୀମୁଖଂ ନଵଵଯସ୍ସାମ୍ରାଜ୍ଯଲକ୍ଷ୍ମୀପୁଷଃ ।
ଜେତୁଂ ମନ୍ମଥମର୍ଦିନଂ ଜନନି ତେ କାମାକ୍ଷି ହାସଃ ସ୍ଵଯଂ
ଵଲ୍ଗୁର୍ଵିଭ୍ରମଭୂଭୃତୋ ଵିତନୁତେ ସେନାପତିପ୍ରକ୍ରିଯାମ୍ ॥ ୫୭॥

ଯନ୍ନାକମ୍ପତ କାଲକୂଟକବଲୀକାରେ ଚୁଚୁମ୍ବେ ନ ଯଦ୍-
ଗ୍ଲାନ୍ଯା ଚକ୍ଷୁଷି ରୂଷିତାନଲଶିଖେ ରୁଦ୍ରସ୍ଯ ତତ୍ତାଦୃଶମ୍ ।
ଚେତୋ ଯତ୍ପ୍ରସଭଂ ସ୍ମରଜ୍ଵରଶିଖିଜ୍ଵାଲେନ ଲେଲିହ୍ଯତେ
ତତ୍କାମାକ୍ଷି ତଵ ସ୍ମିତାଂଶୁକଲିକାହେଲାଭଵଂ ପ୍ରାଭଵମ୍ ॥ ୫୮॥

ସମ୍ଭିନ୍ନେଵ ସୁପର୍ଵଲୋକତଟିନୀ ଵୀଚୀଚଯୈର୍ଯାମୁନୈଃ
ସଂମିଶ୍ରେଵ ଶଶାଙ୍କଦୀପ୍ତିଲହରୀ ନୀଲୈର୍ମହାନୀରଦୈଃ ।
କାମାକ୍ଷି ସ୍ଫୁରିତା ତଵ ସ୍ମିତରୁଚିଃ କାଲାଞ୍ଜନସ୍ପର୍ଧିନା
କାଲିମ୍ନା କଚରୋଚିଷାଂ ଵ୍ଯତିକରେ କାଂଚିଦ୍ଦଶାମଶ୍ନୁତେ ॥ ୫୯॥

ଜାନୀମୋ ଜଗଦୀଶ୍ଵରପ୍ରଣଯିନି ତ୍ଵନ୍ମନ୍ଦହାସପ୍ରଭାଂ
ଶ୍ରୀକାମାକ୍ଷି ସରୋଜିନୀମଭିନଵାମେଷା ଯତଃ ସର୍ଵଦା ।
ଆସ୍ଯେନ୍ଦୋରଵଲୋକେନ ପଶୁପତେରଭ୍ଯେତି ସମ୍ଫୁଲ୍ଲତାଂ
ତନ୍ଦ୍ରାଲୁସ୍ତଦଭାଵ ଏଵ ତନୁତେ ତଦ୍ଵୈପରୀତ୍ଯକ୍ରମମ୍ ॥ ୬୦॥

ଯାନ୍ତୀ ଲୋହିତିମାନମଭ୍ରତଟିନୀ ଧାତୁଚ୍ଛଟାକର୍ଦମୈଃ
ଭାନ୍ତୀ ବାଲଗଭସ୍ତିମାଲିକିରଣୈର୍ମେଘାଵଲୀ ଶାରଦୀ ।
ବିମ୍ବୋଷ୍ଠଦ୍ଯୁତିପୁଞ୍ଜଚୁମ୍ବନକଲାଶୋଣାଯମାନେନ ତେ
କାମାକ୍ଷି ସ୍ମିତରୋଚିଷା ସମଦଶାମାରୋଢୁମାକାଙ୍କ୍ଷତେ ॥ ୬୧॥

ଶ୍ରୀକାମାକ୍ଷି ମୁଖେନ୍ଦୁଭୂଷଣମିଦଂ ମନ୍ଦସ୍ମିତଂ ତାଵକଂ
ନେତ୍ରାନନ୍ଦକରଂ ତଥା ହିମକରୋ ଗଚ୍ଛେଦ୍ଯଥା ତିଗ୍ମତାମ୍ ।
ଶୀତଂ ଦେଵି ତଥା ଯଥା ହିମଜଲଂ ସନ୍ତାପମୁଦ୍ରାସ୍ପଦଂ
ଶ୍ଵେତଂ କିଂଚ ତଥା ଯଥା ମଲିନତାଂ ଧତ୍ତେ ଚ ମୁକ୍ତାମଣିଃ ॥ ୬୨॥

ତ୍ଵନ୍ମନ୍ଦସ୍ମିତମଞ୍ଜରୀଂ ପ୍ରସୃମରାଂ କାମାକ୍ଷି ଚନ୍ଦ୍ରାତପଂ
ସନ୍ତଃ ସନ୍ତତମାମନନ୍ତ୍ଯମଲତା ତଲ୍ଲକ୍ଷଣଂ ଲକ୍ଷ୍ଯତେ ।
ଅସ୍ମାକଂ ନ ଧୁନୋତି ତାପକମଧିକଂ ଧୂନୋତି ନାଭ୍ଯନ୍ତରଂ
ଧ୍ଵାନ୍ତଂ ତତ୍ଖଲୁ ଦୁଃଖିନୋ ଵଯମିଦଂ କେନୋତି ନୋ ଵିଦ୍ମହେ ॥ ୬୩॥

ନମ୍ରସ୍ଯ ପ୍ରଣଯପ୍ରରୂଢକଲହଚ୍ଛେଦାଯ ପାଦାବ୍ଜଯୋଃ
ମନ୍ଦଂ ଚନ୍ଦ୍ରକିଶୋରଶେଖରମଣେଃ କାମାକ୍ଷି ରାଗେଣ ତେ ।
ବନ୍ଧୂକପ୍ରସଵଶ୍ରିଯଂ ଜିତଵତୋ ବଂହୀଯସୀଂ ତାଦୃଶୀଂ
ବିମ୍ବୋଷ୍ଠସ୍ଯ ରୁଚିଂ ନିରସ୍ଯ ହସିତଜ୍ଯୋତ୍ସ୍ନା ଵଯସ୍ଯାଯତେ ॥ ୬୪॥

ମୁକ୍ତାନାଂ ପରିମୋଚନଂ ଵିଦଧତସ୍ତତ୍ପ୍ରୀତିନିଷ୍ପାଦିନୀ
ଭୂଯୋ ଦୂରତ ଏଵ ଧୂତମରୁତସ୍ତତ୍ପାଲନଂ ତନ୍ଵତୀ ।
ଉଦ୍ଭୂତସ୍ଯ ଜଲାନ୍ତରାଦଵିରତଂ ତଦ୍ଦୂରତାଂ ଜଗ୍ମୁଷୀ
କାମାକ୍ଷି ସ୍ମିତମଞ୍ଜରୀ ତଵ କଥଂ କମ୍ବୋସ୍ତୁଲାମଶ୍ନୁତେ ॥ ୬୫॥

ଶ୍ରୀକାମାକ୍ଷି ତଵ ସ୍ମିତଦ୍ଯୁତିଝରୀଵୈଦଗ୍ଧ୍ଯଲୀଲାଯିତଂ
ପଶ୍ଯନ୍ତୋଽପି ନିରନ୍ତରଂ ସୁଵିମଲଂମନ୍ଯା ଜଗନ୍ମଣ୍ଡଲେ ।
ଲୋକଂ ହାସଯିତୁଂ କିମର୍ଥମନିଶଂ ପ୍ରାକାଶ୍ଯମାତନ୍ଵତେ
ମନ୍ଦାକ୍ଷଂ ଵିରହଯ୍ଯ ମଙ୍ଗଲତରଂ ମନ୍ଦାରଚନ୍ଦ୍ରାଦଯଃ ॥ ୬୬॥

କ୍ଷୀରାବ୍ଧେରପି ଶୈଲରାଜତନଯେ ତ୍ଵନ୍ମନ୍ଦହାସସ୍ଯ ଚ
ଶ୍ରୀକାମାକ୍ଷି ଵଲକ୍ଷିମୋଦଯନିଧେଃ କିଂଚିଦ୍ଭିଦାଂ ବ୍ରୂମହେ ।
ଏକସ୍ମୈ ପୁରୁଷାଯ ଦେଵି ସ ଦଦୌ ଲକ୍ଷ୍ମୀଂ କଦାଚିତ୍ପୁରା
ସର୍ଵେଭ୍ଯୋଽପି ଦଦାତ୍ଯସୌ ତୁ ସତତଂ ଲକ୍ଷ୍ମୀଂ ଚ ଵାଗୀଶ୍ଵରୀମ୍ ॥ ୬୭॥

ଶ୍ରୀକାଞ୍ଚୀପୁରରତ୍ନଦୀପକଲିକେ ତାନ୍ଯେଵ ମେନାତ୍ମଜେ
ଚାକୋରାଣି କୁଲାନି ଦେଵି ସୁତରାଂ ଧନ୍ଯାନି ମନ୍ଯାମହେ ।
କମ୍ପାତୀରକୁଟୁମ୍ବଚଂକ୍ରମକଲାଚୁଞ୍ଚୂନି ଚଞ୍ଚୂପୁଟୈଃ
ନିତ୍ଯଂ ଯାନି ତଵ ସ୍ମିତେନ୍ଦୁମହସାମାସ୍ଵାଦମାତନ୍ଵତେ ॥ ୬୮॥

ଶୈତ୍ଯପ୍ରକ୍ରମମାଶ୍ରିତୋଽପି ନମତାଂ ଜାଡ୍ଯପ୍ରଥାଂ ଧୂନଯନ୍
ନୈର୍ମଲ୍ଯଂ ପରମଂ ଗତୋଽପି ଗିରିଶଂ ରାଗାକୁଲଂ ଚାରଯନ୍ ।
ଲୀଲାଲାପପୁରସ୍ସରୋଽପି ସତତଂ ଵାଚଂଯମାନ୍ପ୍ରୀଣଯନ୍
କାମାକ୍ଷି ସ୍ମିତରୋଚିଷାଂ ତଵ ସମୁଲ୍ଲାସଃ କଥଂ ଵର୍ଣ୍ଯତେ ॥ ୬୯॥

ଶ୍ରୋଣୀଚଞ୍ଚଲମେଖଲାମୁଖରିତଂ ଲୀଲାଗତଂ ମନ୍ଥରଂ
ଭ୍ରୂଵଲ୍ଲୀଚଲନଂ କଟାକ୍ଷଵଲନଂ ମନ୍ଦାକ୍ଷଵୀକ୍ଷାଚଣମ୍ ।
ଯଦ୍ଵୈଦଗ୍ଧ୍ଯମୁଖେନ ମନ୍ମଥରିପୁଂ ସଂମୋହଯନ୍ତ୍ଯଞ୍ଜସା
ଶ୍ରୀକାମାକ୍ଷି ତଵ ସ୍ମିତାଯ ସତତଂ ତସ୍ମୈ ନମ୍ସକୁର୍ମହେ ॥ ୭୦॥

ଶ୍ରୀକାମାକ୍ଷି ମନୋଜ୍ଞମନ୍ଦହସିତଜ୍ଯୋତିଷ୍ପ୍ରରୋହେ ତଵ
ସ୍ଫୀତଶ୍ଵେତିମସାର୍ଵଭୌମସରଣିପ୍ରାଗଲ୍ଭ୍ଯମଭ୍ଯେଯୁଷି ।
ଚନ୍ଦ୍ରୋଽଯଂ ଯୁଵରାଜତାଂ କଲଯତେ ଚେଟୀଧୁରଂ ଚନ୍ଦ୍ରିକା
ଶୁଦ୍ଧା ସା ଚ ସୁଧାଝରୀ ସହଚରୀସାଧର୍ମ୍ଯମାଲମ୍ବତେ ॥ ୭୧॥

ଜ୍ଯୋତ୍ସ୍ନା କିଂ ତନୁତେ ଫଲଂ ତନୁମତାମୌଷ୍ଣ୍ଯପ୍ରଶାନ୍ତିଂ ଵିନା
ତ୍ଵନ୍ମନ୍ଦସ୍ମିତରୋଚିଷା ତନୁମତାଂ କାମାକ୍ଷି ରୋଚିଷ୍ଣୁନା ।
ସନ୍ତାପୋ ଵିନିଵାର୍ଯତେ ନଵଵଯଃପ୍ରାଚୁର୍ଯମଙ୍କୂର୍ଯତେ
ସୌନ୍ଦର୍ଯଂ ପରିପୂର୍ଯତେ ଜଗତି ସା କୀର୍ତିଶ୍ଚ ସଂଚାର୍ଯତେ ॥ ୭୨॥

ଵୈମଲ୍ଯଂ କୁମୁଦଶ୍ରିଯାଂ ହିମରୁଚଃ କାନ୍ତ୍ଯୈଵ ସନ୍ଧୁକ୍ଷ୍ଯତେ
ଜ୍ଯୋତ୍ସ୍ନାରୋଚିରପି ପ୍ରଦୋଷସମଯଂ ପ୍ରାପ୍ଯୈଵ ସମ୍ପଦ୍ଯତେ ।
ସ୍ଵଚ୍ଛତ୍ଵଂ ନଵମୌକ୍ତିକସ୍ଯ ପରମଂ ସଂସ୍କାରତୋ ଦୃଶ୍ଯତେ
କାମାକ୍ଷ୍ଯାଃ ସ୍ମିତଦୀଧିତେର୍ଵିଶଦିମା ନୈସର୍ଗିକୋ ଭାସତେ ॥ ୭୩॥

ପ୍ରାକାଶ୍ଯଂ ପରମେଶ୍ଵରପ୍ରଣଯିନି ତ୍ଵନ୍ମନ୍ଦହାସଶ୍ରିଯଃ
ଶ୍ରୀକାମାକ୍ଷି ମମ କ୍ଷିଣୋତୁ ମମତାଵୈଚକ୍ଷଣୀମକ୍ଷଯାମ୍ ।
ଯଦ୍ଭୀତ୍ଯେଵ ନିଲୀଯତେ ହିମକରୋ ମେଘୋଦରେ ଶୁକ୍ତିକା-
ଗର୍ଭେ ମୌକ୍ତିକମଣ୍ଡଲୀ ଚ ସରସୀମଧ୍ଯେ ମୃଣାଲୀ ଚ ସା ॥ ୭୪॥

ହେରମ୍ବେ ଚ ଗୁହେ ହର୍ଷଭରିତଂ ଵାତ୍ସଲ୍ଯମଙ୍କୂରଯତ୍
ମାରଦ୍ରୋହିଣି ପୂରୁଷେ ସହଭୁଵଂ ପ୍ରେମାଙ୍କୁରଂ ଵ୍ଯଞ୍ଜଯତ୍ ।
ଆନମ୍ରେଷୁ ଜନେଷୁ ପୂର୍ଣକରୁଣାଵୈଦଗ୍ଧ୍ଯମୁତ୍ତାଲଯତ୍
କାମାକ୍ଷି ସ୍ମିତମଞ୍ଜସା ତଵ କଥଂକାରଂ ମଯା କଥ୍ଯତେ ॥ ୭୫॥

ସଂକ୍ରୁଦ୍ଧଦ୍ଵିଜରାଜକୋଽପ୍ଯଵିରତଂ କୁର୍ଵନ୍ଦ୍ଵିଜୈଃ ସଂଗମଂ
ଵାଣୀପଦ୍ଧତିଦୂରଗୋଽପି ସତତଂ ତତ୍ସାହଚର୍ଯଂ ଵହନ୍ ।
ଅଶ୍ରାନ୍ତଂ ପଶୁଦୁର୍ଲଭୋଽପି କଲଯନ୍ପତ୍ଯୌ ପଶୂନାଂ ରତିଂ
ଶ୍ରୀକାମାକ୍ଷି ତଵ ସ୍ମିତାମୃତରସସ୍ଯନ୍ଦୋ ମଯି ସ୍ପନ୍ଦତାମ୍ ॥ ୭୬॥

ଶ୍ରୀକାମାକ୍ଷି ମହେଶ୍ଵରେ ନିରୁପମପ୍ରେମାଙ୍କୁରପ୍ରକ୍ରମମ୍ଂ
ନିତ୍ଯଂ ଯଃ ପ୍ରକଟୀକରୋତି ସହଜାମୁନ୍ନିଦ୍ରଯନ୍ମାଧୁରୀମ୍ ।
ତତ୍ତାଦୃକ୍ତଵ ମନ୍ଦହାସମହିମା ମାତଃ କଥଂ ମାନିତାଂ
ତନ୍ମୂର୍ଧ୍ନା ସୁରନିମ୍ନଗାଂ ଚ କଲିକାମିନ୍ଦୋଶ୍ଚ ତାଂ ନିନ୍ଦତି ॥ ୭୭॥

ଯେ ମାଧୁର୍ଯଵିହାରମଣ୍ଟପଭୁଵୋ ଯେ ଶୈତ୍ଯମୁଦ୍ରାକରା
ଯେ ଵୈଶଦ୍ଯଦଶାଵିଶେଷସୁଭଗାସ୍ତେ ମନ୍ଦହାସାଙ୍କୁରାଃ ।
କାମାକ୍ଷ୍ଯାଃ ସହଜଂ ଗୁଣତ୍ରଯମିଦଂ ପର୍ଯାଯତଃ କୁର୍ଵତାଂ
ଵାଣୀଗୁମ୍ଫନଡମ୍ବରେ ଚ ହୃଦଯେ କୀର୍ତିପ୍ରରୋହେ ଚ ମେ ॥ ୭୮॥

କାମାକ୍ଷ୍ଯା ମୃଦୁଲସ୍ମିତାଂଶୁନିକରା ଦକ୍ଷାନ୍ତକେ ଵୀକ୍ଷଣେ
ମନ୍ଦାକ୍ଷଗ୍ରହିଲା ହିମଦ୍ଯୁତିମଯୂଖାକ୍ଷେପଦୀକ୍ଷାଙ୍କୁରାଃ ।
ଦାକ୍ଷ୍ଯଂ ପକ୍ଷ୍ମଲଯନ୍ତୁ ମାକ୍ଷିକଗୁଡଦ୍ରାକ୍ଷାଭଵଂ ଵାକ୍ଷୁ ମେ
ସୂକ୍ଷ୍ମଂ ମୋକ୍ଷପଥଂ ନିରୀକ୍ଷିତୁମପି ପ୍ରକ୍ଷାଲଯେଯୁର୍ମନଃ ॥ ୭୯॥

ଜାତ୍ଯା ଶୀତଶୀତଲାନି ମଧୁରାଣ୍ଯେତାନି ପୂତାନି ତେ
ଗାଙ୍ଗାନୀଵ ପଯାଂସି ଦେଵି ପଟଲାନ୍ଯଲ୍ପସ୍ମିତଜ୍ଯୋତିଷାମ୍ ।
ଏନଃପଙ୍କପରମ୍ପରାମଲିନିତାମେକାମ୍ରନାଥପ୍ରିଯେ
ପ୍ରଜ୍ଞାନାତ୍ସୁତରାଂ ମଦୀଯଧିଷଣାଂ ପ୍ରକ୍ଷାଲଯନ୍ତୁ କ୍ଷଣାତ୍ ॥ ୮୦॥

ଅଶ୍ରାନ୍ତଂ ପରତନ୍ତ୍ରିତଃ ପଶୁପତିସ୍ତ୍ଵନ୍ମନ୍ଦହାସାଙ୍କୁରୈଃ
ଶ୍ରୀକାମାକ୍ଷି ତଦୀଯଵର୍ଣସମତାସଙ୍ଗେନ ଶଙ୍କାମହେ ।
ଇନ୍ଦୁଂ ନାକଧୁନୀଂ ଚ ଶେଖରଯତେ ମାଲାଂ ଚ ଧତ୍ତେ ନଵୈଃ
ଵୈକୁଣ୍ଠୈରଵକୁଣ୍ଠନଂ ଚ କୁରୁତେ ଧୂଲୀଚଯୈର୍ଭାସ୍ମନୈଃ ॥ ୮୧॥

ଶ୍ରୀକାଞ୍ଚୀପୁରଦେଵତେ ମୃଦୁଵଚସ୍ସୌରଭ୍ଯମୁଦ୍ରାସ୍ପଦଂ
ପ୍ରୌଢପ୍ରେମଲତାନଵୀନକୁସୁମଂ ମନ୍ଦସ୍ମିତଂ ତାଵକମ୍ ।
ମନ୍ଦଂ କନ୍ଦଲତି ପ୍ରିଯସ୍ଯ ଵଦନାଲୋକେ ସମାଭାଷଣେ
ଶ୍ଲକ୍ଷ୍ଣେ କୁଙ୍ମଲତି ପ୍ରରୂଢପୁଲକେ ଚାଶ୍ଲୋଷଣେ ଫୁଲ୍ଲତି ॥ ୮୨॥

କିଂ ତ୍ରୈସ୍ରୋତସମମ୍ବିକେ ପରିଣତଂ ସ୍ରୋତଶ୍ଚତୁର୍ଥଂ ନଵଂ
ପୀଯୂଷସ୍ଯ ସମସ୍ତତାପହରଣଂ କିଂଵା ଦ୍ଵିତୀଯଂ ଵପୁଃ ।
କିଂସ୍ଵିତ୍ତ୍ଵନ୍ନିକଟଂ ଗତଂ ମଧୁରିମାଭ୍ଯାସାଯ ଗଵ୍ଯଂ ପଯଃ
ଶ୍ରୀକାଞ୍ଚୀପୁରନାଯକପ୍ରିଯତମେ ମନ୍ଦସ୍ମିତଂ ତାଵକମ୍ ॥ ୮୩॥

ଭୂଷା ଵକ୍ତ୍ରସରୋରୁହସ୍ଯ ସହଜା ଵାଚାଂ ସଖୀ ଶାଶ୍ଵତୀ
ନୀଵୀ ଵିଭ୍ରମସନ୍ତତେଃ ପଶୁପତେଃ ସୌଧୀ ଦୃଶାଂ ପାରଣା ।
ଜୀଵାତୁର୍ମଦନଶ୍ରିଯଃ ଶଶିରୁଚେରୁଚ୍ଚାଟନୀ ଦେଵତା
ଶ୍ରୀକାମାକ୍ଷି ଗିରାମଭୂମିମଯତେ ହାସପ୍ରଭାମଞ୍ଜରୀ ॥ ୮୪॥

ସୂତିଃ ଶ୍ଵେତିମକନ୍ଦଲସ୍ଯ ଵସତିଃ ଶୃଙ୍ଗାରସାରଶ୍ରିଯଃ
ପୂର୍ତିଃ ସୂକ୍ତିଝରୀରସସ୍ଯ ଲହରୀ କାରୁଣ୍ଯପାଥୋନିଧେଃ ।
ଵାଟୀ କାଚନ କୌସୁମୀ ମଧୁରିମସ୍ଵାରାଜ୍ଯଲକ୍ଷ୍ମ୍ଯାସ୍ତଵ
ଶ୍ରୀକାମାକ୍ଷି ମମାସ୍ତୁ ମଙ୍ଗଲକରୀ ହାସପ୍ରଭାଚାତୁରୀ ॥ ୮୫॥

ଜନ୍ତୂନାଂ ଜନିଦୁଃଖମୃତ୍ଯୁଲହରୀସନ୍ତାପନଂ କୃନ୍ତତଃ
ପ୍ରୌଢାନୁଗ୍ରହପୂର୍ଣଶୀତଲରୁଚୋ ନିତ୍ଯୋଦଯଂ ବିଭ୍ରତଃ ।
ଶ୍ରୀକାମାକ୍ଷି ଵିସୃତ୍ଵରା ଇଵ କରା ହାସାଙ୍କୁରାସ୍ତେ ହଠା-
ଦାଲୋକେନ ନିହନ୍ଯୁରନ୍ଧତମସସ୍ତୋମସ୍ଯ ମେ ସନ୍ତତିମ୍ ॥ ୮୬॥

ଉତ୍ତୁଙ୍ଗସ୍ତନମଣ୍ଡଲସ୍ଯ ଵିଲସଲ୍ଲାଵଣ୍ଯଲୀଲାନଟୀ-
ରଙ୍ଗସ୍ଯ ସ୍ଫୁଟମୂର୍ଧ୍ଵସୀମନି ମୁହୁଃ ପ୍ରାକାଶ୍ଯମଭ୍ଯେଯୁଷୀ ।
ଶ୍ରୀକାମାକ୍ଷି ତଵ ସ୍ମିତଦ୍ଯୁତିତତିର୍ବିମ୍ବୋଷ୍ଠକାନ୍ତ୍ଯଙ୍କୁରୈଃ
ଚିତ୍ରାଂ ଵିଦ୍ରୁମମୁଦ୍ରିତାଂ ଵିତନୁତେ ମୌକ୍ତୀଂ ଵିତାନଶ୍ରିଯମ୍ ॥ ୮୭॥

ସ୍ଵାଭାଵ୍ଯାତ୍ତଵ ଵକ୍ତ୍ରମେଵ ଲଲିତଂ ସନ୍ତୋଷସମ୍ପାଦନଂ
ଶମ୍ଭୋଃ କିଂ ପୁନରଞ୍ଚିତସ୍ମିତରୁଚଃ ପାଣ୍ଡିତ୍ଯପାତ୍ରୀକୃତମ୍ ।
ଅମ୍ଭୋଜଂ ସ୍ଵତ ଏଵ ସର୍ଵଜଗତାଂ ଚକ୍ଷୁଃପ୍ରିଯମ୍ଭାଵୁକଂ
କାମାକ୍ଷି ସ୍ଫୁରିତେ ଶରଦ୍ଵିକସିତେ କୀଦୃଗ୍ଵିଧଂ ଭ୍ରାଜତେ ॥ ୮୮॥

ପୁମ୍ଭିର୍ନିର୍ମଲମାନସୌର୍ଵିଦଧତେ ମୈତ୍ରୀଂ ଦୃଢଂ ନିର୍ମଲାଂ
ଲବ୍ଧ୍ଵା କର୍ମଲଯଂ ଚ ନିର୍ମଲତରାଂ କୀର୍ତିଂ ଲଭନ୍ତେତରାମ୍ ।
ସୂକ୍ତିଂ ପକ୍ଷ୍ମଲଯନ୍ତି ନିର୍ମଲତମାଂ ଯତ୍ତାଵକାଃ ସେଵକାଃ
ତତ୍କାମାକ୍ଷି ତଵ ସ୍ମିତସ୍ଯ କଲଯା ନୈର୍ମଲ୍ଯସୀମାନିଧେଃ ॥ ୮୯॥

ଆକର୍ଷନ୍ନଯନାନି ନାକିସଦସାଂ ଶୈତ୍ଯେନ ସଂସ୍ତମ୍ଭଯ-
ନ୍ନିନ୍ଦୁଂ କିଂଚ ଵିମୋହଯନ୍ପଶୁପତିଂ ଵିଶ୍ଵାର୍ତିମୁଚ୍ଚାଟଯନ୍ ।
ହିଂସତ୍ସଂସୃତିଡମ୍ବରଂ ତଵ ଶିଵେ ହାସାହ୍ଵଯୋ ମାନ୍ତ୍ରିକଃ
ଶ୍ରୀକାମାକ୍ଷି ମଦୀଯମାନସତମୋଵିଦ୍ଵେଷଣେ ଚେଷ୍ଟତାମ୍ ॥ ୯୦॥

କ୍ଷେପୀଯଃ କ୍ଷପଯନ୍ତୁ କଲ୍ମଷଭଯାନ୍ଯସ୍ମାକମଲ୍ପସ୍ମିତ-
ଜ୍ଯୋତିର୍ମଣ୍ଡଲଚଂକ୍ରମାସ୍ତଵ ଶିଵେ କାମାକ୍ଷି ରୋଚିଷ୍ଣଵଃ ।
ପୀଡାକର୍ମଠକର୍ମଘର୍ମସମଯଵ୍ଯାପାରତାପାନଲ-
ଶ୍ରୀପାତା ନଵହର୍ଷଵର୍ଷଣସୁଧାସ୍ରୋତସ୍ଵିନୀଶୀକରାଃ ॥ ୯୧॥

ଶ୍ରୀକାମାକ୍ଷି ତଵ ସ୍ମିତୈନ୍ଦଵମହଃପୂରେ ପରିମ୍ଫୂର୍ଜତି
ପ୍ରୌଢାଂ ଵାରିଧିଚାତୁରୀଂ କଲଯତେ ଭକ୍ତାତ୍ମନାଂ ପ୍ରାତିଭମ୍ ।
ଦୌର୍ଗତ୍ଯପ୍ରସରାସ୍ତମଃପଟଲିକାସାଧର୍ମ୍ଯମାବିଭ୍ରତେ
ସର୍ଵଂ କୈରଵସାହଚର୍ଯପଦଵୀରୀତିଂ ଵିଧତ୍ତେ ପରମ୍ ॥ ୯୨॥

ମନ୍ଦାରାଦିଷୁ ମନ୍ମଥାରିମହିଷି ପ୍ରାକାଶ୍ଯରୀତିଂ ନିଜାଂ
କାଦାଚିତ୍କତଯା ଵିଶଙ୍କ୍ଯ ବହୁଶୋ ଵୈଶଦ୍ଯମୁଦ୍ରାଗୁଣଃ ।
ସାତତ୍ଯେନ ତଵ ସ୍ମିତେ ଵିତନୁତେ ସ୍ଵୈରାସନାଵାସନାମ୍ ॥ ୯୩॥

ଇନ୍ଧାନେ ଭଵଵୀତିହୋତ୍ରନିଵହେ କର୍ମୌଘଚଣ୍ଡାନିଲ-
ପ୍ରୌଢିମ୍ନା ବହୁଲୀକୃତେ ନିପତିତଂ ସନ୍ତାପଚିନ୍ତାକୁଲମ୍ ।
ମାତର୍ମାଂ ପରିଷିଞ୍ଚ କିଂଚିଦମଲୈଃ ପୀଯୂଷଵର୍ଷୈରିଵ
ଶ୍ରୀକାମାକ୍ଷି ତଵ ସ୍ମିତଦ୍ଯୁତିକଣୈଃ ଶୈଶିର୍ଯଲୀଲାକରୈଃ ॥ ୯୪॥

ଭାଷାଯା ରସନାଗ୍ରଖେଲନଜୁଷଃ ଶୃଙ୍ଗାରମୁଦ୍ରାସଖୀ-
ଲୀଲାଜାତରତେଃ ସୁଖେନ ନିଯମସ୍ନାନାଯ ମେନାତ୍ମଜେ ।
ଶ୍ରୀକାମାକ୍ଷି ସୁଧାମଯୀଵ ଶିଶିରା ସ୍ରୋତସ୍ଵିନୀ ତାଵକୀ
ଗାଢାନନ୍ଦତରଙ୍ଗିତା ଵିଜଯତେ ହାସପ୍ରଭାଚାତୁରୀ ॥ ୯୫॥

ସନ୍ତାପଂ ଵିରଲୀକରୋତୁ ସକଲଂ କାମାକ୍ଷି ମଚ୍ଚେତନା
ମଜ୍ଜନ୍ତୀ ମଧୁରସ୍ମିତାମରଧୁନୀକଲ୍ଲୋଲଜାଲେଷୁ ତେ ।
ନୈରନ୍ତର୍ଯମୁପେତ୍ଯ ମନ୍ମଥମରୁଲ୍ଲୋଲେଷୁ ଯେଷୁ ସ୍ଫୁଟଂ
ପ୍ରେମେନ୍ଦୁଃ ପ୍ରତିବିମ୍ବିତୋ ଵିତନୁତେ କୌତୂହଲଂ ଧୂର୍ଜଟେଃ ॥ ୯୬॥

ଚେତଃକ୍ଷୀରପଯୋଧିମନ୍ଥରଚଲଦ୍ରାଗାଖ୍ଯମନ୍ଥାଚଲ-
କ୍ଷୋଭଵ୍ଯାପୃତିସମ୍ଭଵାଂ ଜନନି ତେ ମନ୍ଦସ୍ମିତଶ୍ରୀସୁଧାମ୍ ।
ସ୍ଵାଦଂସ୍ଵାଦମୁଦୀତକୌତୁକରସା ନେତ୍ରତ୍ରଯୀ ଶାଂକରୀ
ଶ୍ରୀକାମାକ୍ଷି ନିରନ୍ତରଂ ପରିଣମତ୍ଯାନନ୍ଦଵୀଚୀମଯୀ ॥ ୯୭॥

ଆଲୋକେ ତଵ ପଞ୍ଚସାଯକରିପୋରୁଦ୍ଦାମକୌତୂହଲ-
ପ୍ରେଙ୍ଖନ୍ମାରୁତଘଟ୍ଟନପ୍ରଚଲିତାଦାନନ୍ଦଦୁଗ୍ଧାମ୍ବୁଧେଃ ।
କାଚିଦ୍ଵୀଚିରୁଦଞ୍ଚତି ପ୍ରତିନଵା ସଂଵିତ୍ପ୍ରରୋହାତ୍ମିକା
ତାଂ କାମାକ୍ଷି କଵୀଶ୍ଵରାଃ ସ୍ମିତମିତି ଵ୍ଯାକୁର୍ଵତେ ସର୍ଵଦା ॥ ୯୮॥

ସୂକ୍ତିଃ ଶୀଲଯତେ କିମଦ୍ରିତନଯେ ମନ୍ଦସ୍ମିତାତ୍ତେ ମୁହୁଃ
ମାଧୁର୍ଯାଗମସମ୍ପ୍ରଦାଯମଥଵା ସୂକ୍ତେର୍ନୁ ମନ୍ଦସ୍ମିତମ୍ ।
ଇତ୍ଥଂ କାମପି ଗାହତେ ମମ ମନଃ ସନ୍ଦେହମାର୍ଗଭ୍ରମିଂ
ଶ୍ରୀକାମାକ୍ଷି ନ ପାରମାର୍ଥ୍ଯସରଣିସ୍ଫୂର୍ତୌ ନିଧତ୍ତେ ପଦମ୍ ॥ ୯୯॥

କ୍ରୀଡାଲୋଲକୃପାସରୋରୁହମୁଖୀସୌଧାଙ୍ଗଣେଭ୍ଯଃ କଵି-
ଶ୍ରେଣୀଵାକ୍ପରିପାଟିକାମୃତଝରୀସୂତୀଗୃହେଭ୍ଯଃ ଶିଵେ ।
ନିର୍ଵାଣାଙ୍କୁରସାର୍ଵଭୌମପଦଵୀସିଂହାସନେଭ୍ଯସ୍ତଵ
ଶ୍ରୀକାମାକ୍ଷି ମନୋଜ୍ଞମନ୍ଦହସିତଜ୍ଯୋତିଷ୍କଣେଭ୍ଯୋ ନମଃ ॥ ୧୦୦॥

ଆର୍ଯାମେଵ ଵିଭାଵଯନ୍ମନସି ଯଃ ପାଦାରଵିନ୍ଦଂ ପୁରଃ
ପଶ୍ଯନ୍ନାରଭତେ ସ୍ତୁତିଂ ସ ନିଯତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ଯା ମୃଦୁଲସ୍ମିତାଂଶୁଲହରୀଜ୍ଯୋତ୍ସ୍ନାଵଯସ୍ଯାନ୍ଵିତାମ୍
ଆରୋହତ୍ଯପଵର୍ଗସୌଧଵଲଭୀମାନନ୍ଦଵୀଚୀମଯୀମ୍ ॥ ୧୦୧॥

{ମନ୍ଦସ୍ମିତଶତକଂ ସମ୍ପୂର୍ଣମ୍ ॥}

{ଶ୍ରୀ ମୂକପଞ୍ଚଶତୀ ସମ୍ପୂର୍ଣା ॥}

{॥ ଓଂ ତତ୍ ସତ୍ ॥}


Encoded and proofread by Sridhar Seshagiri sridhar.seshagiri at gmail.com

Please send corrections to sanskrit@cheerful.com
Last updated ତ୍oday
http://sanskritdocuments.org

Muka Pancha Shati Lyrics in Oriya PDF
% File name : shrImUka500.itx
% Category : trishati
% Location : doc\_devii
% Author : mUka mahAkavi
% Language : Sanskrit
% Subject : stotra/hinduism/religion
% Transliterated by : Sridhar Seshagiri sridhar.seshagiri at gmail.com
% Proofread by : Sridhar Seshagiri sridhar.seshagiri at gmail.com
% Latest update : January 6, 2003, March 10, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website