% Text title            : yoginiihRidayam.h
% File name             : yoginii.itx
% Category              : hRidaya
% Location              : doc\_devii
% Language              : Sanskrit
% Subject               : tantram
% Transliterated by     : Michael Magee <ac70 at cityscape.co.uk>
% Proofread by          : Mike Magee <ac70 at cityscape.co.uk>
% Description-comments  : yoginiihRidayam.h
% Latest update         : Dec. 22, 1997
% Send corrections to   : Sanskrit@cheerful.com
% Site access           : http://sanskritdocuments.org
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. YoginihRidayam ..}##
\itxtitle{.. yoginIhR^idayam ..}##\endtitles ##
\section{.. yoginIhR^idayam ..}

shrIdevyuvAcha
devadeva mahAdeva paripUrNaprathAmaya .
vAmakeshvaratantre.asminnaj~nAtarthAstvanekashaH .. 1..
tA.nstAnarthAnasheSheNa vaktumarhasi bhairava .
shrIbhairava uvAcha
shR^iNu devi mahAguhyaM yoginihR^idayaM param.h .. 2..
tvatprItyA kathayAmyadya gopanIyaM visheShataH .
karNAtkarNorpadeshena samprAptamavanItalam.h .. 3..
na deyaM parashiShyebhyo nAstikebhyo na cheshvari .
na shushrUShAlasAnA~ncha naivAnarthapradAyinAm.h .. 4..
parIxitAya dAtavyaM vatsarArdhoShitAya cha .
etajj~nAtvA vararohe sadyaH khecharatAM vrajet.h .. 5..
chakrasa~Nketako mantrapUjAsa~Nketakau tathA .
trividhastripurAdevyAH sa~NketaH parameshvari .. 6..
yAvadetanna jAnAti sa~Nketatrayamuttamam.h .
na tAvatripurAchakre paramAj~nAdharo bhavet.h .. 7..
tachChaktipa~nchakaM sR^iShTyA layenAgnichatuShTayam.h .
pa~nchashaktichaturvahnisa.nyogAchchakrasambhavaH .. 8..
etachchakrAvatArantu kathayAmi tavAnaghe .
yadA sA paramA shaktiH svechChayA vishvarUpiNI .. 9..
sphurattAmAtmanaH pashyettadA chakrasya sambhavaH .
shUnyAkArAdvisargAntAd.h bindoH praspandasa.nvidaH .. 10..
prakAshaparamArthatvAt.h sphurattAlaharIyutAt.h .
prasR^itaM vishvalaharIsthAnaM mAtR^itrayAtmakam.h .. 11..
baindavaM chakrametasya trirUpatvaM punarbhavet.h .
dharmAdharmau tathAtmAno mAtR^imeyau tathA pramA .. 12..
navayonyAtmakaM chakraM chidAnandaghanaM mahat.h .
chakraM navAtmakamidaM navadhA bhinnamantrakam.h .. 13..
baindavAsanasa.nrUDhasa.nvartAnalachitkalam.h .
ambikArUpamevedamaShTArasthaM svarAvR^itam.h .. 14..
navatrikoNasphuritaprabhArUpadashArakam.h .
shaktyAdinavaparyantadashArNasphUrtikArakam.h .. 15..
bhUtatanmAtradashakaprakAshAlambanatvataH .
dvidashArasphuradrUpaM krodhIshAdidashArakam.h .. 16..
chatushchakraprabhArUpasa.nyuktapariNAmataH .
chaturdashArarUpeNa sa.nvittikaraNAtmanA .. 17..
khecharyAdijayAntArNaparamArthaprathAmayam.h .
evaM shaktyanalAkArasphuradraudrIprabhAmayam.h .. 18..
jyeShTArUpachatuShkoNaM vAmArUpabhramitrayam.h .
chidaMshAntastrikoNaM cha shAntyatitAShTakoNakaM .. 19..
shAntyaMshadvidashAra~ncha tathaiva bhuvanArakam.h .
vidyAkalApramArUpadalAShTakasamAvR^itam.h .. 20..
pratiShTAvapuShA sR^iShTasphuraddvyaShTadalAmbujam.h .
nivR^ittyAkAravilasachchatusShkoNavirAjitam.h .. 21..
trailokyamohanAdye tu navachakre sureshvari .
nAdo binduH kalA jyeShTA raudrII vAmA tathA punaH .. 22..
viShaghnII dUtarI chaiva sarvAnandA kramAt.h sthitAH .
niraMshau nAdabindU cha kalA chechChAsvarUpakam.h .. 23..
jyeShTA j~nAnaM kriyA sheShamityevaM tritayAtmakam.h .
chakraM kAmakalArUpaM prasArapara,mArthataH .. 24..
akule viShusaMj~ne cha shakte vahnau tathA punaH .
nAbhAvanAhate shuddhe lambikAgre bhruvo.antare .. 25..
bindau tadardhe rodhinyAM nAde nAdAnta eva cha .
shaktau punarvyApikAyAM samanonmani gochare .. 26..
mahAbindau punashchaiva tridhA chakraM tu bhAvayet.h .
Aj~nAntaM sakalaM proktaM tataH sakalaniShkalam.h .. 27..
unmanyantaM pare sthAne niShkala~ncha tridhA sthitam.h .
dIpAkAro.ardhamAtrashcha lalATe vR^itt iShyate .. 28..
ardhachandrastathAkAraH pAdamAtrastadUrdhvake .
jyotsnAkArA tadaShTAMshA rodhinI tryasravigrahA .. 29..
bindudvayAntare daNDaH shevarUpo maNiprabhaH .
kalAMsho dviguNAMshashcha nAdAnto vidyudujjvalaH .. 30..
halAkArastu savyasthabinduyukto virAjate .
shaktirvAmasthabindudyatsthirAkArA tathA punaH .. 31..
vyApikA binduvilasattrikoNAkAratAM gatA .
bindudvayAntarAlasthA R^ijurekhAmayI punaH .. 32..
samanA binduvilasadR^ijurekhA tathonmanA .
shaktyAdInAM vapuH sphUrjaddvAdashAdityasannibham.h .. 33..
chatuHShaShTistadUrdhvaM tu dviguNaM diguNaM tataH .
shaktyAdInAM tu mAtrAMsho manonmanyAstathonmanI .. 34..
daishakAlAnavachChinnaM tadUrdhve paramaM mahat.h .
nisargasundaraM tattu parAnandavighUrNitam.h .. 35..
Atmanah sphuraNaM pashyedyadA sA paramA kalA .
ambikArUpamApanna parA vAk.h sasudIritA .. 36..
bIjabhAvasthitaM vishvaM sphuTIkartuM yadonmukhI..
vAmA vishvasya vamanAda~NkushAkAratAM gatA .. 37..
ichChAshaktistadA seyaM pashyantI vapuShA sthitA .
j~nAnashaktistathA jyeShTA madhyamA vAgudIritA .. 38..
R^ijurekhAmayI vishvasthitaui prathitavigrahA .
tatsaMhR^itidashAyAM tu baindavaM rUpamAsthitA .. 39..
pratyAvR^ittikrameNaivaM shR^i~NgaTavapurujjvalA .
kriyAshaktistu raudrIyaM vaikharI vishvavigrahA .. 40..
bhAsanAdvishvarUpasya svarUpe bAhyato.api cha .
etAshchatastraH shaktyastu kA pU jA o iti kramAt.h .. 41..
pIThAH kande pade rUpe rUpAtIte kramAt.h sthitAH .
caturastraM tatha binduShaTkayuktaM cha vR^ittakam.h .. 42..
ardhachandraM trikoNaM cha rUpANyeShAM krameNa tu .
pIto dhUmrastathA shveto rakto rUpaM cha kIrtitam.h .. 43..
svayambhurbANali~NgaM cha itaraM cha paraM punaH .
pITheShvetAni li~NgAni saMsthitAni varAnane .. 44..
hemabandhR^ikakusumasharachchandranibhAni tu .
svAvR^itaM trikUTaM cha mahAli~NgaM svayambhuvam.h .. 45..
kAditAntA xaropetaM bANali~NgaM trikoNakam.h .
kadambagolakAkAraM thAdisAntAxarAvR^itam.h .. 46..
sUkShmarUpaM samastArNavR^itaM paramali~Ngakam.h .
bindurUpaM parAnandakandaM nityapaoditam.h .. 47
bIatritayayuktAsya sakasya manoH punaH .
etAni vAchyarUpANi kulakaulamayAni tu .. 48..
jAgratsvapnasuShuptyAkhyaturyarUpANyamUni tu .
atitaM tu paraM tejaH svasaMvidudayAtmakam.h .. 49..
svechChAvishvamayollekhakhachitaM vishvarUpakam.h .
chaitanyamAtmano rUpaM nisargAnandasundaram.h .. 50..
meyamAtR^ipramAmAnaprasaraiH saMkuchatprabham.h .
shR^i~NgATarUpamApannamichChAj~nAnakriyAtmakam.h .. 51..
vishvAkAraprathAdhAranijarUpashivAshrayam.h .
kAmeshvarA~Nkaparya~NkaniviShTamatisundaram.h .. 52..
ichChAshaktimayaM pAshama~NkushaM j~nanarUpiNam.h .
kriyAshaktimaye bANadhanuShI dadhadujjvalam.h .. 53..
AshrayAshrayibhedena aShTadhA bhinnahetimat.h .
aShTArachakrasaMrUDhaM navachakrAsanasthitam.h .. 54..
evaMrUpaM paraM tejaH shrIchakravapuShA sthitam.h .
tadIyashaktinikarasphuradUrmisamAvR^itam.h .. 55..
chidAtmabhittau vishvasya prakAshAmarshane yadA .
karoti svechChayA pUrNavichikIrShAsamanvitA .. 56..
kriyAshaktistu vishvasya modanAd.h drAvaNAttathA .
mudrAkhyA sA yadA saMvidambikA trikalAmayI .. 57..
trikhaNDArUpamApannA sadA sannidhikAriNI .
sarvasya chakrarAjasya vyApikA parikIrtita .. 58..
yoniprAchuryataH saiShA sarvasaMkShobhikA punaH .
vAmAshaktipradhAneyaM dvArachakre sthitA bhavet.h .. 59..
kShubdhAvishvasthitatirkarI jyeShTAprAchuryamAshritA .
sthUlanAdakalArUpA sarvAnugrahakAriNI .. 60..
sarvAshapUraNAkhye tu saiShA sphuritavigrahA .
jyeShTAvAmAsamantvena sR^iShTeH prAdhAnyamAshritA .. 61..
AkarShiNI tu mudreyaM sarvasaMkShobhiNI smR^itA .
vyomadvayAntarAlasthabindurUpA maheshvari .. 62..
shivashaktyAtmasaMshleShAddivyAkeshakarI smR^itA.
chaturdashArachakrasthA saMvidAnandavigrahA .. 63..
bindvantarAlavilasatsUkShma rekhAshikhAmayI .
jyeShTAshaktipradhAnA tu sarvonmAdanakAriNI .. 64..
dashArachakramAsthAya saMsthitA vIravandite .
vAmAshaktipradhAnA tu mahA~NkushamayI punaH .. 65..
tadvadvishvaM vamantI sA divtIye tu dashArake .
saMsthitA modanaparA mudrArUpatvamAsthitA .. 66..
dharmAdharmasya saMghaTTAdutthitA vittIrUpiNI .
vikalpotthakriyAloparUpadoShavidhAtinI .. 67..
vikalparUparogANAM hAriNI khecharI parA .
sarvarogaharAkhye tu chakre saMvinmayI sthitA .. 68..
shivashaktisamAshleShasphuradvyomAntare punaH .
prakAshayati vishvaM sA sUkShmarUpasthita sadA .. 69..
bIjarUpA mahAmudrA sarvasiddhimaye sthitA .
sampUrNasya prakAshasya lAbhabhUmiriyaM punaH .. 70..
yonimudrA kalArUpA sarvAnandamaye sthitA .
kriyA chaitanyarUpatvAdevaM chakramayaM sthitam.h .. 71..
ichChArUpaM paraM tejAH sarvadA bhAvayed.h budhaH .
tridhA cha navadhA chaiva chakrasa~NketakaH punaH .. 72..
vahninaikena shaktibhyAM dvAbhyAM chaiko.apraH punaH .
taishcha vahnitrayeNApi shaktInAM tritayena cha .. 73..
padmadvayena chAnyaH syAd bhUgR^ihatritayena cha .
pa~nchashakti chaturvahnipadmadvayamahItrayam.h .. 74..
paripUrNaM mahachakraM tatprakAraH pradarshyate .
tatrAdyaM navayoni syAt.h tena dvidashAsaMyutam.h .. 75..
manuyoni paraM vidyAt.h tR^itIyaM tadanantaram.h .
aShTadvyaShTadalopetaM chaturasratrayAnvitam.h .. 76..
chakrasya triprakAratvaM kathitaM parameshvari .
sR^iShTiHsyAnnavayonyAdipR^ithvyantaM saMhR^iti punaH .. 77..
pR^ithvyAdinavayonyantamiti shAstrasya nirNayaH .
etatsamaShTirUpaM tu tripurAchakramuchyate .. 78..
yasya vij~nAnamAtreNa tripurAj~nAnavAn.h bhavet.h .
chakrasya navadhAtvaM cha kathayAmi tava priye .. 79..
AdimaM bhUtrayeNa syAd dvitIyaM ShoDashArakam.h .
anyadaShTadalaM proktaM manukoNamanantaram.h .. 80..
pa~nchamaM dashakoNaM syAt.h ShaShTaM chApi dashArakam.h..
saptamaM vasukoNaM syAnmadhyatryasramathAShTamam.h .. 81..
navamaM tryasramadhyaM syAt.h teShAM nAmAnyataH shR^iNu .
trailokyamohanaM chakraM sarvAshAparipUrakam.h .. 82..
sarvasaMkShobhaNaM gauri sarvAsaubhAgyadAyakam.h .
sarvArthasAdhakaM chakraM sarvarakShAkaraM param.h .. 83..
sarvarogaharaM devi sarvasiddhimayaM tathA .
sarvAnandamayaM chApi navamaM shR^iNu sundari .. 84..
atra pujyA mahAdevI mahAtripurasundarI .
paripUrNaM mahAchakramajarAmarakArakam.h .. 85..
etameva mahAchakrasa~NketaH parameshvari .
kathitastripurAdevyA jIvanmuktipravartakaH .. 86..

atha dvitIyaH paTalaH
mantrasa~NketaM divyamadhunA kathyAmi te .
yadvettA tripurAkAro virachakreshvaro bhavet.h .. 1..
karashuddhikaro tvAdyA dvitIyA chAtmarakShikA .
AtmAsanagatA devI tR^itIyA tadanantaram.h .. 2..
chakrAsanagatA pashchAt.h sarvamantrAsanasthitA .
sAdhyasiddhAsanA ShShTA mAyAlakShmImayI parA .. 3..
mUrtividyA cha sA devI saptamo parikIrtitA .
aShTamyAvAhinI vidyA navamA bhairavI parA .. 4..
mUlavidyA tathA khyAtA trailokyavashakAriNI .
evaM navaprakArAstu pUjAkAle prayatnataH .. 5..
etAH krameNa nyastavyAH sAdhakena kuleshvari .
pAdAgraja~NghAjAnUrugudali~NgAgrakeShu cha .. 6..
Adhare vinyasanmUrti tasyAmAvAhinIM nyaset.h .
mUlena vyApakanyAsaH kartavyaH paremshvari .. 7..
akulAdiShu pUrboktasthAneShu parichintayet.h .
chakreshvarisamAyuktaM navachakraM puroditam.h .. 8..
tAsAM nAmAni vakShyAmi yathAnukramayogataH .
tatrAdyA tripurA devI dvitIyA tripureshvarI .. 9..
tR^itIyA cha tathA proktA devI tripurasundarI .
chaturthI cha mahAdevI devI tripuravAsinI .. 10..
pa~nchamI tripurA shrIH syAt.h ShaShTI tripuramAlinI .
saptamI tripurA siddhiraShTamI tripurAmbikA .. 11..
navamI tu mAhadevI mahAtripurasundarI .
pUjayechcha kramAdetA navachakre purodite .. 12..
evaM navaprakArAdyA pujAkale tu pArvati .
ekAkArA hyAdyashaktirajarAmarakAriNI .. 13..
mantrasa~NketakastasyA nAnAkAro vyavasthitaH .
nAnAmantrakarmeNaiva pAramparyeNa labhyate .. 14..
ShaDavidhastaM tu deveshi kathayAmi tavAnadhe .
bhAvArthaH sampradAyArtho nigamArthashcha kaulikaH .. 15..
tathA sarvarahasyArtho mahAtattvArtha eva cha .
akSharArtho hi bhAvArthaH kevalaH parameshvari .. 16..
yoginIbhistathA virairvIrendrAiH sarvadA priye .
shivashaktisamAyogA~jjanito mantrarAjakaH .. 17..
tanmayIM paramAnandananditAM spandarUpiNIm.h .
nisargasundarIM devIM j~nAtvA svairamupAsate .. 18..
shivashaktyAtmasaMghaTTarUpe brhmANi shAshvate .
tatprathAprasarAshleShabhuvi tvaindropalakShite .. 19..
j~nAtR^ij~nAnamayAkArasananAnmantrarUpiNI .
teShAM samaShTirUpeNa parAshaktistu mAtR^ikA .. 20..
madhyabinduvisargAntaH samAsthAnamaye pare .
kuTilArUpake tasyAH pratirUpe viyatkale .. 21..
madhyaprANaprathArUpapaspandavyomni sthita punaH .
madhyame mantrapiNDe tu tR^itIye piNDake punaH .. 22..
rAhukUTAdvayasphUrjachchalattAsaMsthitasya tu .
dharmAdharmasya vAchyasya viShAmR^itamayasya cha .. 23..
vAchakrAkSharasaMyogAt.h kathitA vishvarUpiNI .
teShAM samaShTirUpeNa parAshaktiM tu mAtR^ikAm.h .. 24..
kUTatrayAtmikAM devIM samaShTivyaShTirUpiNim.h .
AdyAM shaktiM bhAvayanto bhAvArthamiti manvate .. 25..
sampradAyo mahAbodharUpo gurumukhe sthitaH .
vishvAkAraprathAyAstu mahattva~ncha yadAshrayam.h .. 26..
shivashaktyAdyayA mUlavidyayA parameshvari .
jagatkR^itsnaM tayA vyAptaM shR^iNuShvAvahitA priye .. 27..
pa~nchabhUtamayaM vishvaM tanmayI sA sadAnaghe .
tanmayI mUlavidyA cha tadadya kathayAmmi te .. 28..
hakArAd.h vyoma sambhUtaM kakArAttu prabha~njanah .
rephAdagniH sakArAchcha jalatattvasya sambhavaH .. 29..
lakArAt,h pR^ithivI jAtA tasmAd vishvamayI cha sA .
guNAHpa~nchadasha proktA bhUtAnaM tanmayI shivA .. 30..
yasya yasya padArthasya sA yA shaktirudIritA .
sA sA sarveshvarI devI sa sa sarvo maheshvaraH .. 31..
vyAptA pa~nchadashArNaH sA vidyA bhUtaguNAtmikAH .
pa~nchabhishcha tathA ShaD bhishchaturbhirapi chAkSharaH .. 32..
svaravya~njanabhedena saptatriMshatprabhedenI .
saptatriMshatprabhedena ShaT triMshatattvarUpiNI .. 33..
tattvAtItasvabhAvA cha vidyaiShaM bhAvyate sadA .
pR^ithivyAdiShu bhUteShu vyApakaM chottarottaram.h .. 34..
bhUtaM tvadhastanaM vyApyaM tad guNA vyApakAshrayAH .
vyApyeShvavasthitA devi sthUlasUkShmavibhedataH .. 35..
tasmAdvyomaguNaH shabdo vAyvAdIn.h vyApya saMsthitaH .
vyomabihaistu vidyAsthairlakShayechChabdapa~nchakam .. 36..
teShAM kAruNarUpeNa sthita dhvanimayaM param.h .
bhaved.h guNavatAM bIjaM guNAnAmapi vAchakam.h .. 37..
kAryakAraNabhAvena tayoraikya vivakShayA .
mahAmAyAtrayeNApi kAraNena cha bindunA .. 38..
vAyvAgnijalabhUmInAM sparshAnAM cha chatuShTayam.h .
utpannaM bhAvayed.h devi sthUlasUkShmavibhedataH .. 39..
rUpANAM tritayaM tadvat.h tribhI rephairvibhAvitam.h .
pradhAnaM tejaso rUpaM tad bIjena hi janyate .. 40..
vidyAsthaishchandrabIjaistu sthUlasUkShmo rasaH smR^itaH .
sambandho vidito loke rasasyApyamR^itasya cha .. 41..
vasu dhAyA guNo gandhastallipirgandhavAchikA .
bhuvanatrayasambhandhAt.h tridhAtvaM tu maheshvari .. 42..
ashuddhashuddhamishrANAM pramAtR^INAM paraM vapuH .
krodhIshatritaye nAtha vidyAsthena prakAshyate .. 43..
shrIkaNThadashakaM tadvada vyaktasyApi vAchakaH .
prANarUpasthito devi tadvadekAdashaH paraH .. 44..
ekaH sanneva puruSho bahudhA kAyate hi saH .
rudreshvarasadeshAkhyA devatA mitavigrahAH .. 45..
bindutrayeNa kathitA amitAmitavigrahAH .
shAntiH shaktishcha shambhushcha nAdatritayabodhanAH .. 46..
vAgurAmUlavalaye sUtrAdyAH kavalIkR^itAH .
tathA mantrAH samastAshcha vidyAyAmatra saMsthitAH .. 47..
gurukrameNa samprAptaH sampradAyArtha IritaH .
nigarbhArtho mahadevi shivagurvAtmagocharaH .. 48..
shivagurvAtmanAmaikyAnusaMdhAnAttadAtmakam.h .. 49..
niShkalatvaM shive budhvA tadrUpatvaM gurorapi .
tannirIkShaNasAmarthyAdAtmanashcha shivAtmatAm.h .. 50..
bhAvayedabhaktinamraH sa~NkochonmeShAkala~NkitaH .
kaulikaM kathayiShyAmi chakradevatayorapi .. 51..
vidyAgurvAtmanAmaikyaM tatprakAraH pradarshyate .
lakAraishchaturasrANi vR^ittatritayasaMyutam.h .. 52..
saroruhadvayaM shaktairagnIShomAtmakaM priye.
hR^illekhAtrayasaMbhUtairakSharairnavasa~NkhyakaiH .. 53..
bindutrayayutairjAtaM navayonyAtmakaM priye.
maNDalatrayayuktaM tu chakraM shaktyanalAtmakam.h .. 54..
vyomabIjatrayeNaiva pramAtR^itrityAnvitam.h.
ichChAj~nAnakriyArUpamAdanatrayasaMyutam.h .. 55..
sadAshivAsanaM devi mahAbindumayaM param.h.
itthaM mantrAtmakaM chakraM devatAyAH paraM vapuH .. 56..
ekAdashAdhikashatadevatAtmatayA punaH .
gaNeshatvaM mahAdevyAH sasomaravipAvakaiH .. 57..
ichChAj~nAnakriyAbhishcha guNatrayayutaih punaH.
graharUpA cha sA devI j~nAnakarmendriyairapi .. 58..
tadarthaireva deveshi karaNairAntaraiH punaH.
prakR^ityA cha guNenApi puMstvabandhena chAtmanA .. 59..
nakShatravigrahA jAtA yoginItvamathochyate.
tvagAdidhAtunAthAbhirDAkinyAdibhirapyasau .. 60..
vargAShTakaniviShTAbhiryoginIbhishcha saMyutA.
yoginIrUpamAsthAya rAjate vishvavigrA .. 61..
prANApAnau samAnashchodanavyAnau tathA punaH.
nAgaH kUrmo.atha kR^ikaro devadatto dhana~njayaH .. 62..
jIvAtmA parmAtmA chaityetai rAshisvarUpiNI.
akathAditripa~NktyAtmA tArtiyAdikrameNa sA .. 63..
gaNesho.abhUnmahAvidyA parAvAgAdivA~NmayI.
bIjabindudhvanInAM cha trikUTeShu grahAtmikA .. 64..
hR^illekhAtrayasaMbhUtaistithisaMkhyaistathAkSharaiH.
anyairdvAdashabhirvarNaireShA nakShatrarUpiNI .. 65..
vidyAnantarbhUtashaktyAdyaiH shAktaiH ShaD bhistathAkSharaiH.
yoginItvaM cha vidyAya rAshitvaM cAntyavarjitaiH .. 66..
evaM vishvaprakArA cha chakra rUpA maheshvarI.
devyA dehe yathA prokto gurudehe tathaiva hi .. 67..
tatprasAdAchcha shiShyo.api tadrUpaH samprajAyate.
ityevaM kaulikArthastu kathito viravandite .. 68..
tathA sarvarahsyArthaM kathayAmi tavAnaghe.
mUlAdhAre taDidrUpe vAgbhavAkAratAM gate .. 69..
aShTAtriMshatkalAyuktapa~nchAshadvarNavigrahA.
vidyA kuNDalinIrUpA maNdalatrayabhedinI .. 70..
taDitkoTinibhaprakhyA bisatantunibhAkR^itiH.
vyomendumaNDalAsaktA sudhAstrotaHsvarUpiNI .. 71..
sadA vyAptajagat.h kR^itsnA sadAnandasvarUpiNI.
eShA svAtmeti buddhistu rahasyArtho maheshvari .. 72..
mahAtattvArthaM iti yattacha devi vadAmi te.
niShkale prame sUkShme nirlakShye bhAvavarjite .. 73..
vyomAtIte pare tattve prakAshAnandavigrahe.
vishvottirNe vishvamaye tattve svAtmaniyojanam.h .. 74..
tadA prakAshamAnatvaM tejasAM tamasAmapi.
avinAbhAvarUpatvaM tasmAdvishvasya sarvataH .. 75..
prakAshate mahAtattvaM divyakrIDArasojjvale.
nirastasarvasaMkalpavikalpasthitipUrvakaH .. 76..
rahasyArtho mayA guptaH sadyaH pratyayakArakaH.
mahAj~nAnArNave dR^iShTaH sha~NkA tatra na pArvati .. 77..
vidyApIThanibaddheShu saMsthito divyasiddhidaH.
kaulAchAraparairdevi pAdukAbhAvanAparaiH .. 78..
yoginImelanodyuktaiH prAptavidyAbhiShechanaiH.
sha~NkAkala~NkavigataiH sadA muditamAnasaiH .. 79..
pAramparyeNa vij~nAtarahasyArthavishAradaiH.
labhyate nAnyatha devi tvAM shapekulasundari .. 80..
pAramparyavihInA ye j~nAnamAtreNa garvitAH.
teShAM samayalopena vikurvanti marIchayaH .. 81..
yastu divyarasAsvAdamodamAnavimarshanaH.
deatAtithinakShatre vAre.api cha vivasvataH .. 82..
marIchIn.h prINayatyeva madirAnandaghUrNitaH.
sarvadA cha visheShaNa labhate pUrNabodhatAm.h .. 83..
evaMvhAvastu deveshi deshikendraprasAdataH.
mahAj~nAnamayo devi sadyaH samprApyate naraiH .. 84..
evametatpradaM j~nAnaM vidyArNAgamagocharam.h.
devi guhyapriyeNaiva vyAkhyAtaM durgi ShaD vidham.h.
sadyo yasya prabodhena vIrachakreshvaro bhavet.h .. 85..

atha tR^itAyaH paTalaH
pUjAsa~NketamadhunA kathayAmi tavAnaghe.
yasya prabodhamAtreNa jivanmuktaH pramodate .. 1..
tava nityoditA pUjA tribhirbhedairvyavasthitA.
parA chApyapara gauri tR^itIyA cha parAparA .. 2..
prathamAdvaitabhAvasthA sarvaprasaragocharA.
dvitIyA chakrapUjA cha sadA niShpAdyate mayA .. 3..
evaM j~nAnamaye devi tR^itIyA tu parAparA.
uttamA sA parA j~neyA vidhAnaM shR^iNu sAmpratam.h .. 4..
mahApadmavanAntasthe vAgbhave gurupAdukAm.h.
ApyAyitajagad.hrUpAM parmAmR^itavarShiNIm.h .. 5..
sa~nchintya paramAdvaitabhAvanAmR^itaghUrNitaH.
daharAntarasaMsarpannAdAlokanatatparaH .. 6..
vikalparUpasaMjalpavimukho.antarmukhaH sadA.
chitkalollAsadalitasaMkochastvatisundaraH.
indriyaprINanadravyaiviM hitasvAtmapUjanaH .. 7..
nyAsaM nirvartayedehe ShoDhAnyAsapuraHsaram.h.
gaNeshaiH prathamo nyAso dvitItastu grahairmataH .. 8..
nakShatraishcha tR^itIyaH syAdyoginIbhishchaturthakaH.
rAshibhiH pa~nchamo nyAsaH ShaShThaH pIThairnigadyate .. 9..
ShoDhAnyAsastvayaM proktaH sarvatraivAparAjitaH.
evaM yo nyastagAtrastu sa pUjyaH sarvayogibhiH .. 10..
nAstyasya pUjyo lokeShu pitR^imAtR^imukho janaH.
sa eva pUjyaH sarveShAM sa svayaM parameshvaraH .. 11..
ShoDhAnyAsavihInaM yaM praNamedeSha pArvati.
so.achirAnmR^ityumApnoti narakaM cha prapadyate .. 12..
ShoDhAnyAsaprakAraM cha kathayAmi tavAnaghe.
vighnesho vighnarAjashcha vinAyakashivottamau .. 13..
vighnakR^idvighnahartA cha gaNarAT gaNanAyakaH.
ekadanto dvidantashcha gajavaktro nira~njanaH .. 14..
kapardavAn.h dIrghamukhaH sha~NkukarNo vR^iShadhvajaH.
gaNanAtho gajendrashcha shurpakarNastrilochanaH .. 15..
lambodaro mahAnAdashchaturmUrtiH sadAshivaH.
Amodo durmukhashchaiva sumukhashcha pramodakaH .. 16..
ekapAdo dvijihvashcha shUro vIrashcha ShaNmukhaH.
varado vAmadevashcha vakratuNDo dviraNDakaH .. 17..
senAnIrgrAmaNIrmatto vimatto mattavAhanaH.
jaTI muNDI tathA khaDgI vareNyo vR^iShaketanaH .. 18..
bhakShyapriyo gaNeshashcha meghanAdo gaNeshvaraH.
taruNAruNasa~NkAshAn.h gajavaktrAn.h trilochanAn.h .. 19..
pAshA~NkushavarAbhItihastAn.h shaktisamanvitAn.h.
etAMstu vinyasedehe mAtR^ikAnyAsavatpriye .. 20..
svaraistu sahitaM sUryaM hR^idayAthaH pravinyaset.h.
bindusthAne sudhAsUtiM yAdivarNacatuShTayaiH .. 21..
bhUputraM lochanadvandva kavargAdhipatiM priye.
hR^idaye vinyasechChukraM chavargAdhipatiM punaH .. 22..
hR^idayopari vinyaseTTavargAdhipatiM budham.h.
bR^ihaspatiM kaNThadeshe tavargAdhipatiM priye .. 23..
nAbhau shanaishcharaM devi pavargeshaM sureshvari.
vaktreshAdichaturvarNaiH sahitaM rAhumeva cha .. 24..
kShakArasahitaM ketuM pAyo deveshi vinyaset.h.
##[## raktaM shvetaM tathA raktaM shyAmaM pItaM cha pANDuram.h.
kR^iShNaM dhUmraM dhUmradhUmraM bhAvayedravipurvakAn.h..
kAmarUpadharAn.h devi divyAmbaravibhUShaNAn.h.
vAmorunyastahastAMshcha dakShahastavarapradAn.h ..##]##
lalATe dakShanetre cha vAme karNadvaye punaH .. 25..
puTayonirnAsikAyAshcha kaNThe skandhadvaye punaH.
pashchAtkUrparayugme cha maNibandhadvaye punaH .. 26..
stanayornAbhideshe cha kaTibandhe tataH param.h.
Uruyugme tathA jAnvorja~Nghayoshcha padadvaye .. 27..
##[## AdyayugmantathA chaikaM tastrINi catuShTayam.h.
ekamekaM dvaya~ncheti svarAH proktAshcaturdasha .. 28..
vya~njaneShvekamubhayaM dvayaM nyasyedataH param.h.
ekaM yugmaM dvayandvandvamekaM yugmaM dvayantataH .. 29..
ekaM trayaM tathA chaikaM ekamekaM dvayantathA.
ekaM dvayaM trayaM pashchAllakShaM aM mashchatuShTayam.h .. 30..
ashivnyAdeH puro bhage datvA chakramato nyaset.h ##]##
jvalatkAlAnalaprakhyA varadAbhayapANayaH .. 31..
natipANyo.ashvinIpUrvAH sarvAbharaNabhUShitAH.
etAstu vinyaseddevi sthAneShveShu surArchite .. 32..
vishuddhau hR^idaye nAbhau svAdhiShTAne cha mUlake.
AGYAyAM dhAtunAthAshcha nyastavyA DAdidevatAH .. 33..
amR^itAdiyutAH samya~NnyastavyAshcha sureshvari.
pAde li~Nge cha kukShau cha hR^idaye bAhumUlayoH .. 34..
dakShiNaM pAdamArabhya vAmapAdAvasAnakam.h.
meShAdirAshayo varNairnyastavyAH saha pArvati .. 35..
##[## chatuShkaM tritayaM trINi dvitayaM dvitayaM dvayam.h.
pa~nchakaM pa~nchakaM pa~ncha pa~nchaktaM pa~nchakaM tataH..
catvAri merurmine syuH kanyAyAM pa~ncha shAdayaH. ##]##
piThAni vinyaseddevi mAtR^ikAsthAnake punaH.
teShAM nAmAni vakShyante shR^iNuShvAvahitA priye .. 36..
kAmarUpaM vArANasI nepAlaM pauNDravardhanam.h.
charasthiraM kAnyakubjaM pUrNashailaM tathArbudam.h .. 37..
AmrAtakeshvaraikAmraM trisrotaH kAmakoTakam.h.
kailAsaM bhR^igunagaraM kedArapUrNachandrake .. 38..
shrIpIThamo~NkArapIThaM jAlandhraM mAlavotkale.
kulAntaM devikoTaM cha gokarNaM mAruteshvaram.h .. 39..
aTTahAsaM cha virajaM rAjagehaM mahApatham.h.
kolApura melApuraM o~NkArantu jayantikA .. 40..
ujjayinyApi chitrA cha kShIrakaM hastinApuraM.
oDDIshaM cha prayAgAkhyaM ShaShThaM mAyApuraM tathA .. 41..
jaleshaM malayaM shailaM meruM girivaraM tathA.
mahendraM vAmanaM chaiva hiraNyapurameva chA .. 42..
mahAlakShmIpuroDyANaM ChAyAChatramataH param.h.
ete pIThAH samuddiShTA mAtR^ikArUpakAH sthitAH .. 43..
evaM ShoDhA puraH kR^itvA shrIchakranyAsamAcharet.h.
shrImattripurasundaryAshchakranyAsaM shR^iNu priye .. 44..
yanna kasyachidAkhyAtaM tanushuddhikaraM param.h.
chaturastrAdyarekhAyai nama ityAdito nyaset.h .. 45..
dakShAMsapR^iShThapANyagrasphikkapAdA~NgulIShvatha.
vAmA~Nghrya~NguliShusphikke pANyagre chAMsapR^iShThake .. 46..
sachUlImUlapR^iShTheShu vyApakatvena sundari.
atraiva sthAnadashake aNimAdyAstu vinyaset.h .. 47..
siddhistadantashcha tanuvyApakatvena sundari.
##[ ## chaturasramadhyarekhAyai nama ityapi vallabhe. ##]##
tasyAH sthAneShu vinyasya brahmANyAdyAstadAShTasu .. 48..
pAdA~NguShThadvaye pArshve dakShe mUrdhanyapArshvake.
vAmadakShiNajAnvoshcha bahiraMsadvaye tathA .. 49..
nyastavyAshchaturasrAntyarekhAyai nama ityapi.
vinyased.h vyApakatvena pUrvoktAntashcha vigrahe .. 50..
tasyAH sthAneShu dashasu mudrANAM dashakaM nyaset.h.
brahmANyAdyaShTasthAnAntastAsAmaShTau nyasettataH .. 51..
shiShTe dve dvAdashAnte cha pAdA~NguShThe cha vinyaset.h.
tadAntaH ShoDashadalapadmAya nama ityapi .. 52..
vinyasya taddale kAmAkarShiNyAdyAshcha vinyaset.h.
dalAni dakShinashrotrapR^iShThamaMsaM cha kUrparam.h .. 53..
karapR^iShThaM chorujAnugulphapAdatalaM tathA.
vAmapAdatalAdyevametadevAShTakaM matam.h .. 54..
tadantare chAShTadalapadmAya nama ityapi.
vinyasya taddaleShveShu dakShasha~Nkhe cha jatruke .. 55..
Urvantargulphagulphorujatrusha~Nkhe cha vamataH.
ana~NgakusumAdyAshcha shaktIraShTau cha vinyaset .. 56
tadanatashcaturdashArachakrAya nama ityapi.
vinyasya tasya koNeShu nyasechChaktIshchaturdasha .. 57..
sarvasa~NkShobhiNyAdyAstu tasya koNAni vachmyaham.h.
lalATaM dakShabhAgaM cha dakShagaNDAMsamadhyataH .. 58..
pArshvAntarUruka~NghAntarvAmaja~NghAdi pArvati.
vAmorvantaM vAmapArshvaM vAmAMsaM vAmagaNDakam.h .. 59..
lalATavAmamadhye cha tathA vai pR^iShThamityapi.
tato dashArachakrAya nama ityapi pArvati .. 60..
tasya koNAni dakShAkShinAsAmUlA.a.asyanetrake.
kukShIshavAyukoNeShu jAnudvayagudeShu cha .. 61..
kukShinai R^IrtivahnyAkhyakoNeShveShu nyaset.h punaH.
sarvAsiddhipradAdInAM shaktInAM dashakaM tathA .. 62..
tadantascha dashArAdichakrAya nama ityapi.
vinyasya tasya koNeShu sarvaGYAdyAH pravinyaset.h .. 63..
dakShanAsA sR^ikkiNI chA stanaM vR^iShaNameva cha.
sIvinI vAmamuShkaM cha stanaM sR^ikkiNi nAsike .. 64..
nAsAgraM chaiva viGYeyaM koNAnAM dashakaM tathA.
tadantaraShTakoNAdichakrAya nama ityapi .. 65..
vinyasya tasya koNeShu vaShinyAdyaShTakam.h nyaset.h.
chibukaM kaNThahR^idayanAbhInAM chaiva dakShiNam.h .. 66..
GYeyaM pArshvachatuShkaM cha maNipUrAdi vAmakam.h.
chatuShThayaM cha pArshvAnAmetat.h koNAShTakaM matam.h .. 67..
hR^idayasthatrikoNasya chaturdikShu bahirnyaset.h.
sharachApau pAshasR^iNI trikoNAya namastathA .. 68..
vinyasya tasya koNeShu agradakShottareShu cha.
kAmeshvaryAdidevInAM madhye devIM cha vinyaset.h .. 69..
evaM mayodito devi ##!## nyAso guhyatamakramaH.
etad.h guhyatamaM kAryaM tvayA vai vIravandite .. 70..
samayasthAya dAtavyaM na.ashiShyAya kadAchana.
guptAd.h guptataraM chaitattavA.adya prakaTIkR^itam.h .. 71..
mUladevyAdikaM nyAsamaNimAntaM punarnyaset.h.
##[## trikoNasthe mahAbindau mahAtripurasundarIm.h ##]##.
shirastrikoNapUrvAdi kAmeshvaryAdikaM nyaset.h .. 72..
bANAnnetre bhruvoshchApau karNe pAshadvayaM nyaset.
sR^iNidvayaM cha nAsAgre dakShiNAgraM tu vinyaset.h .. 73..
muNDamUlakrameNaiva nyasedvAgdevatAShTakam.h .
baindavAdIni chakrANi nyastavyAni varAnane .. 74..
netramUle tvapA~Nge cha karNapUrvottare punaH.
chUDAdikaNThanimne.ardhaM sheShArdhaM karNapR^iShTake .. 75..
karNe pUrve tvapA~Nge cha tasya mUle cha vinyaset.h.
hR^idaye manukoNastha shaktayo.api cha pUrvavat.h .. 76..
sarvasiddhyAdikaM kaNThe prAdakShiNyena vinyaset.h.
nAbhAvaShTadalaM tattu va.nshe vAme cha pArshvake .. 77..
udare savyapArshve cha nyasedAdichatuShTayam.h.
va.nshavAmAntarAlAdi nyasedanya chatuShTayam.h .. 78..
svAdhiShThAne nyaset.h svasya pUrvAddakShAvasAnakam.h.
chatasrastu chatasrastu chaturdikShu kramAnnyaset.h .. 79..
mUlAdhAre nyasenmudrAdashakaM sAdhakottamaH.
punarva.nshe cha savye cha vAme chaivAntarAlake .. 80..
Urdhodho dashamudrAshcha UrdhvAdhovarjitaM punaH.
brahmANyAdyAShTakaM dakShajanghAyAM tAstu pUrvavat.h .. 81..
vAmaja~NghAM samArabhya vAmAdikramato.api cha .
siddhyaShTakaM nyasetteShu dvayaM pAdatale nyaset.h .. 82..
kAraNAtprasR^itaM nyAsaM dIpAddIpamivoditam.h .
evaM vinyasya deveshIM svAbhedena vichintayet.h .. 83..
tatashcha karashuddhyAdinyAsaM kuryAt.h samAhitaH .
ahaM te kathayAmyadya vidyAnyAsaM shR^inu priye .. 84..
mUrdhni guhye cha hR^idaye netreShu tritayeShu cha .
shrotrayoryugale chaiva mukhe cha bhujayostathA .. 85..
pR^iShTe jAnvoshcha nAbhau cha vidyAnyAsaM vidhAya cha .
karashuddhiM punashchaiva AsanAdiShaDa~Ngakam.h .. 86..
shrIkaNThAdIni vAgdevIrAdhAre hR^idaye punaH .
shikhAyAM baindavasthAne tvagnichakrAdikA nyaset.h .. 87..
tattvatrayaM samastaM cha vidyAbijatrayAnvitam.h .
pAdAdinAbhiparyantamAgalaM shirastathA .. 88..
vyApakaM chaiva vinyasya svAtmIkR^itya paraM punaH .
santarpayet.h punardevIM saumyAgneyAmR^itadravaiH .. 89..
evaM chaturvidho nyAsaH karvavyo vIravandite .
ShoDhAnyAso.aNimAdyashcha mUladevyAdikaH priye .. 90..
karashuddhyAdikaschaiva sAdhakena susiddhaye .
prAtaH kAle tathA pUjAsamaye homakarmaNi .. 91..
japakAle tathA teShAM viniyogaH pR^ithak.h pR^ithak.h .
pUjAkAle samastaM vA kR^itvA sAdhakapu~NgavaH .. 92..
ShaTtri.nshatattvaparyantamAsanaM parikalpya cha .
guptAdiyoginInAM cha mantreNA.atha baliM dadet.h .. 93..
piN~DarUpapadagranthibhedanAd.h vighnabhedakam.h .
guhyahR^inmukhamUrdhasu vidyAnyAsanea sundari .. 94..
yAgamandiragA.nshchaiva vighnAnutsArya mantravit.h .
##[## apasarpantu te bhUtA ye bhutA bhUmisa.nsthitAH..
ye bhUtA vighnakartAraste nashyantu shivAGYayA ##]##
pArShNighAtena bhaumA.nshcha tAlena cha nabhogatAn.h .. 95..
astramantreNa vidyA.nshcha dR^iShTyA vighAnapohayet.h .
dixvadhordhvaM mahAvahniprAkAraM paribhAvayet.h .. 96..
sAmAnyArdhyeNa deveshi##!## mArtaN~DaM paripUjayet.h .
prakAshashaktisahitamaruNAkalpamujjvalam.h .. 97..
grahAdiparivAra~ncha vishvatejo.avabhAsanam.h .
saumyAgneyayutairdevi rochanAguruku~NkumaiH .. 98..
mUlamuchchArayan.h samyagbhAvayechchakrarAjakam.h .
yoginI mUlamantreNa xipet.h puShpA~njaliM tataH .. 99..
maNimuktApravAlairvA vilomaM mUlavidyayA .
ashUnyaM sarvadA kuryAchChUnye vighnAstvanekashaH .. 100..
shrIchakrasyAtmanashchaiva madhye tvarghyaM pratixipet.h .
chaturasrAntarAlasthakANaShaTke sureshvari .. 101..
ShaDAsanAni sampujya trikoNasyAntare punaH .
pIThAni chaturo devi kApUjA o iti kramAt.h .. 102..
archayitvA.arghyapAde tu vahnerdasha kalA yajet.h .
arghyapAtraM pratiShThApya tatra sUryakalA yajet.h .. 103..
pAtre sUryakalAshchaiva kabhAdidvAdashArchayet.h .
vidhR^ite tu punardravye ShoDashendukalA yajet.h .. 104..
amR^iteshIM cha tanmadhye bhAvayechcha navAtmanA.
navAtmanA tato devi tarpeyddhAtudevatAH .. 105..
AnandabhairavaM vauShaDantenaiva cha tarpayet.h .
tadAGYApreritaM tachcha guruSha~Nktau nivedayet.h .. 106..
tathaivArghyaM visheSheNa sAdhayet.h sAdhakottamaH .
gurupAdAlimApUjya bhairavAya dadet.h punaH .. 107..
tadIyaM sheShamAdAya kAmAgnau vishva ## ...## sthuShi .
pAdukAM mUlavidyAM cha japan.h homaM samAcharet.h .. 108..
mahAprakAshe vishvasya sa.nhAravamanodyate .
marIchivR^ittIrjuhuyAnmanasA kuNDalImukhe .. 109..
ahantedantayoraikyamunmanyAM sruchi kalpitam.h .
mathanodrekasambhUtaM vasturUpaM mahAhaviH .. 110..
hutvA hutvA svayaM chaivaM mahajAnandavigrahaH .
svapradhAprasarAkAraM shrIchakraM pUjayet.h sudhIH .. 111..
gaNeshaM dUtarIM chaiva kShetreshaM dUtikAM tathA .
bAhyadvare yajed.h devi devIshcha svastikAdikAH .. 112..
tataschAntastrikoNa.api gurupa~NktiM tridhA sthitAm.h .
tadantashcha mahAdevIM tAmAvAhya yajet.h punaH .. 113..
mahApadmavanAntasthAM kAraNAnandavigrahAm.h .
mada~NkopAshritAM devImichChAkAmaphalapradAm.h .. 114..
bhavatIM tvanmayaireva naivedyAdibhirarchayet.h .
trikoNe tatsphurattAyAH pratibimbAkR^itIH punaH .. 115..
tattattithimayIrnityAH kAmyakarmAnusAriNIH .
tatra prakaTayoginyashchakre trailokyamohane .. 116..
mAtR^ikAsthUlarUpatvAttvagAdivyApakatvataH .
yoginyaH prakaTA GYeyAH sthUlavishvapradhAtmani .. 117..
aNimAdyA mahAdevi siddhayo.aShTau vyavasthitAH .
tAsu raktatarA baNairvarAbhayakarAstathA .. 118..
dhR^itachintAmahAratnA manIShitaphalapradAH .
brAhmyAdyA api tatraiva yaShTavyAH kramataH priye .. 119..
brahmANI pItavarNA cha chaturbhiH shobhitA mukhaiH .
varadA.abhayahastA cha kuNDikA kShalasatkarA .. 120..
mAheshvarI shvetavarNA trinetrA shUladhAriNI .
kapAlameNaM parashuM dadhAnA pANibhiH priye .. 121..
##[## aindrI tu shyAmavarNA cha vrajotpalalasatkarA ##]##
kaumArI pItavarNA cha shaktitomaradhariNI .. 122..
varadAbhayahastA cha dhyAtavyA parameshvarI .
vaiShNavI shyAmavarNA cha sha~NkhachakravarAbhayAn.h .. 123..
hastapadmaistu vibhrANA bhUShitA divyabhUShaNaiH .
vArAhI shyAmalachChAyA potri vaktrasamujjvalA .. 124..
halaM cha musalaM khaDgaM kheTakaM dadhAtI bhujaiH .
##[## aindrI shyAmalavarNA cha vajradvayalasatkarA ##]## .. 125..
chAmuNDA kR^iShNavarNA cha shUlaM DamarukaM tathA .
khaDgaM vetAlakaM chaiva dadhAnA daxiNaiH karaiH .. 126..
nAgakheTakaghaNTA khyAn.h dadhAnAnyaiH kapAlakam.h .
mahAlaxmIstu pItAbhA padmadarpaNameva cha .. 127..
mAta lu~NgaphalaM chaiva dadhAna parameshvarI .
evaM dhyAtvA yajedetAshchakreshIM tripurAM tataH .. 128..
karmendriyANAM vaimalyAt.h karashuddhikarI smR^itA .
kAyashuddhibhavA siddhiraNimA chAtra sa.nsthitA .. 129..
ShoDashaspandasandohe chamatkR^itimayoH kalAH .
prANAdiShoDashAnAM tu vayunA prANanAtmikAH .. 130..
bIja bhUtAH svarAtmatvAt.h kalanAd bIjarUpakAH .
antara~NgatayA guptA yoginyaH sa.nvyavasthitAH .. 131..
kAmAkarShaNarUpAdyAH sR^iShTeH prAdhAnyataH priye .
sarvAshApUraNAkhye tu chakre vAmena pUjayet.h .. 132..
pAshA~NkushadharA hyetA raktA raktAmbarA vR^itAH .
prANashuddhimayI siddhirlaghimA bhokturAtmanaH .. 133..
tripureshI cha chakreshI pUjyA sarvopachArakaiH .
##[## kaulikAnubhavAviShTabhogapuryaShTakAshritAH .. 134..
vAgbhavAShTakasambandhasUxmA vargasvarUpataH .
tAstu guptatarAH sarvAH sarvasa.nxobhaNAtmake .. 135..
ana~NgakusumAdyAstu raktaka~nchukashobhitAH ##]##
##[## veNIkR^ita lasatkeshAshchApabANadharAH shubhAH ##] ## .. 136..
tattadAjArabuddhyAtmabogyabhokturmaheshituH .
piNDAdipadavishrAntisaundaryaguNasa.nyutA .. 137..
chakreshvarI buddhishuddhirUpA cha parameshvarI .
mahimAsiddhirUpA tu pUjyA sarvopachArakaiH .. 138..
dvAdashagranthibhedena samullasitasa.nvidaH .
visargAntadashaveshAchChAktAnubhavapUrvakam.h .. 139..
unmeShaShaktiprasaraIrichChAshaktipradhAnakaiH .
tadevA.akulasa~NghaTTarUpairvarNachatuShTayaiH .. 140..
vedyoShmarUpasAvarNairmishrechChAbhAvitairapi .
kulashaktisamAvesharUpavarNadvayAnvitaiH .. 141..
shakteH sAramayatvena prasR^itatvAnmaheshvari .
sa,pradAyakramAyAtAshchakre saubhAgyadAyake .. 142..
nirantaraoradhA rUpasaubhAgyaM kalayogataH .
antarthasa.nGYike devi aNimAsadR^ishA: shubhAH .. 143..
sarvasa~NxobhiNIpUrvA dehAxAdivishuddhidAH .
Ishitvasiddhirapi cha protarUpe puratraye .. 144..
yogAdikleshabhedena siddhA tripuravAsinIi.
etAH sampUjayed devi sarvAH sarvopachArakaiH .. 145..
sadAtanAnA nAdAnAM navarandhrasthitAtmanAm.h .
mahAsAmAnyarUpeNa vyAvR^ittadhvanirUpiNIi .. 146..
asthirasthiravedyAnAM ChAyArUpairdashArNakaiH .
kulakaulikayoginyaH sarvsiddhipradAyikAH .. 147..
shvetAmbradharAH shvetAH shvetAbharaNabhUShitAH .
mantrANAM svapradhArUpayogAdanvarthasa.nGYke .. 148..
sarvasiddhipradAdyAstu chakre sarvarthasAdhake .
lokatrayasamR^iddhInAM hetutvAchchakranAyikA .. 149..
tripurA shrIrmaheshAni mantrashuddhibhavA punaH .
vashitvasiddhirAkhyAtA etAH sarvAK samarchayet.h .. 150..
UrdhvAdhomukhayA devi kuNDalinyA prakAshitAH .
kulechChayA bahirbhAvAt.h kAdivarNaprathAmayI .. 151..
nigarbhayoginIvAchyAH svarUpAvesharUpake .
sarvAveshakara chakre sarvaraxAkare parAH .. 152..
sarvaGYAdyAH sthitA etAH saha pustAkShamAlikAH .
mAtR^imAnaprameyANAM purANAM paripoShiNI .. 153..
tripurAmAlinI khyAtA chakreshI tripuramohinI .
nirUddhavAyusa~NghaTTasphaTitagranthimUlataH .. 154..
hR^idayAntarasa.nvittishUnyaparyaShTakAtmanA .
bIjarUpasvarakalAspR^iShTavargAnusArataH .. 155..
rahsyayoginIrdevIH sa.nsAradalanojjvale .
sarvarogahare chakre sa.nsthitA vIravandite .. 156..
vashinyAdyA raktavarNA varadAbhayamudritAH .
pustakaM japamAlAM cha dadhAnAH siddhayoginIH .. 157..
shuddhividyAvishuddhiM cha bhuktisiddhiM maheshvari .
IshvarIM tripurAM siddhAM pUjayed bindutarpaNaiH .. 158..
shaktitrayAtmikA devi chiddhAmaprasarAH punAH .
sa.nvartAgnikalArUpAH paramAtirahasyakAH .. 159..
pUrNApurNasvarUpAyAH siddherhetuH sureshvari .
sarvAsiddhimayAkhye tu chakre tvAyudhabhUShitAH .. 160..
sthitAH kAmeshvarIpUrvAshchatastraH pIThadevatAH .
AyudhAstvatiraktAbhAH svAyudhojjvalamastakAH .. 161..
varadAbhayahastAshccha pUjyA vrataphalapradA:H .
tvadIyAshcha madIyAshcha pu.nstrivashyavidhAyinaH .. 162..
tvagasR^i~NmA.nsamedosthishuk.hlAnAM cha maheshvari .
dvitIyasvarasa.nyuktA ete bANAstvadIyakAH .. 163..
vAmAdInAM purANAM tu jananI tripurmbikA .
parasvAtantryarUpatvAdichChAsiddhirmaheshvari .. 164..
etAH sarvopachAreNa pUjayettu varAnane .
sarvAnandamaye devi parabrahmAtmake pare .. 165..
chakre sa.nvittirUpA cha mahAtripurasundarI .
svairAchAreNa sampUjyA tvahantedantayoH sama .. 166..
mahAkAmakalArUpA pIThavidyAdisiddhidA .
mahAmudrAmayI devi pUjyA pa~nchadashAtmikA .. 167..
tattattithimayI nityA navamI bhairavI parA .
pratichakraM samudrAstu chakrasa~NketachoditAH .. 168..
nityaklinnnAdikAshchaiva kAmyakarmAnusArataH .
chaturasrAntarAle vA trikoNe vA yajet.h sudhIH .. 169..
alinA pishitairgandhairdhUpairArAdhya devatAH .
chakrapUjAM vidhAetthaM kuladIpaM nivedayet.h .. 170..
antarbahirbhAsamAnaM svaprakAshojjvalaM priye .
puShpA~njaliM tataH kR^itvA japaM kuryAt.h samAhitaH .. 171..
kUTatraye mahAdevi kuNDalItritaye.api cha .
chakrANAM pUrvapUrveShAM nAdarUpeNa yojitAm.h .. 172..
teShu prANAgnimAyArNakalAbindvardhachandrikAH .
rodhinInAdanAdAntAH shaktivyApikalAnvitAH .. 173..
samanA chonmanA cheti dvAdashante sthitAH priye .
mUlakuNDalinIrUpe madhyame cha tataH punaH .. 174..
sR^iShTyunmukhe cha vishvasya sthitirUpe maheshvari .
kevalaM nAdarUpeNa uttarottarayojitam.h .. 175..
shabalAkArake devi tR^itIye dvAdashI kalA .
shUnyaShaTkaM tathA devi hyavasthApa~nchakaM punaH .. 176..
viShuvaM saptarUpaM cha bhAvayan.h manasA japet.h .
agnyAdidvAdashAnteShu trI.nstrIn.h tyaktvA varAnane .. 177..
shUnyatrayaM vijAnIyAdekaikAntarataH priye .
##[## shunyatrayAt.h pare sthAne mahAshUnyaM vibhAvayet.h ##]##
prabodha karaNasyA.atha jAgaratvena bhAvanam.h .. 178..
vahnau devi mahAjAgradavasthA tvindriyadvayaiH .
AntaraiH karaNaireva svapnamAyAvabodhakaH .. 179..
galadeshe suShuptistu lInapUrvasya vedanam.h .
antaHkaraNavR^iottInAM layato viShayasya tu .. 180..
pUrvArNAnAM vilomena bhrUmadhye bindusa.nsthitA .
turyarUpaM tathA chAtra vR^ittArdhAdestu sa~NgrahaH .. 181..
chaitanyavyaktihetostu nAdarUpasya vedanam.h .
turyAtItaM sukhasthAnaM nAdAntAdisthitaM priye .. 182..
atraiva japakAle tu pa~nchAvasthAH smared budhaH .
yogaH prANAtmamanasAM viShuvaM prANasa.nGYitam.h .. 183..
AdhAritthitanAde tu lInaM buddhyAtmarUpakam.h .
sa.nyogena viyogena mantrArNAnAM maheshvari .. 184..
anahatAdyAdhArAntaM nAdAtmatvavichintanam.h .
nAdasa.nsparshanAttasya nADIviShuvamuchyate .. 185..
dvAdashagranthibhedena varNAnAmantare priye .
nAdayogaH prashAntaM tu prashAntendriyagocharam.h .. 186..
vahniM mAyAM kalAM chaiva chetanAmardhachandrakam.h .
rodhinInAdanAdAntAn.h shaktau lInAn.h vibhAvayet.h .. 187..
viShuvaM shaktisa.nGYM tu tadurdhvaM nAdachintanam.h .
tadurdhvaM kAlaviShuvamunmanAntaM maheshvari .. 188..
munichandrA.aShTadashabhistruTibhirnAdavedanam.h .
chaitanyavyaktihetushcha viShuvaM tattvasa.nGYitam.h .. 189..
paraM sthAnaM mahAdevi nisargAnandasundaram.h .
evaM chitayamAnasya japakAleShu pArvati .. 190..
siddhayaH sakalAstUrNAM siddhyanti tvatprasAdataH .
evaM kR^itvA japaM devyA vAmahaste nivedayet.h .. 191..
anAmA~NguShThayogena tarpayechchakradevatAH .
madyaM mA.nsaM tathA matsyaM devyAstu vinivedayet.h .. 192..
kaulAchArasamAyuktairvirairstu saha pUjayet.h .
puShyabhena tu vAre cha saure cha parameshvari .. 193..
gurordine svanakShatre chaturdashyaShTamIShu cha .
chakrapUjAM visheSheNa yoginInAM samAcharet.h .. 194..
chatuHShaShTiyutAH koTyo yoginInAM mahaujasAm.h .
chakrametat.h samAshritya sa.nsthitA vIravandite .. 195..
aShTAShTakaM tu kartavyaM vittashAThyavivarjitam.h .
tvameva tAsAM rUpeNa krIDase vishvamohinI .. 196..
aGYAtva tu kulAchAramayaShTvA gurupAdukAm.h .
yo.asmin.h shAstre prvarteta taM tvaM pIDayasi dhruvam.h .. 197..
evaM GYAtvA varArohe kaulAchAraparaH sadA .
AvayoH shabalAkAraM madyaM tatra nivedya cha .. 198..
tvatpradhA prasarAkArAstvAmeva paribhAvayet.h .
vAmichChAvigrahAM devIM gururUpAM vibhAvayet.h .. 199..
tvanmayasya guroH sheShaM nivedyAtmani yojayet.h .
yoginInAM mahAdevi baTukAyAtmarUpiNe .. 200..
xetrANAM pataye madyaM baliM kurvita hetunA .
nityaM piban.h vaman.h khAdan.h svechChAchAraparaH svayam.h .. 201..
ahantedantayoraukyaM bhAvayan.h viharet.h sukham.h .
etatte kathitaM sarvaM sa~Nketatrayamuttamam.h .. 202..
gopanIyaM prayatnena svaguhyamiva suvrate .
chumbake GYAnalubdhe cha na prakAshyaM tvayAnaghe .. 203..
anyAyena na dAtavyaM nAstikAnAM maheshvari .
evaM tvayA.ahamAGYapto madichChArUpayA prabho .. 204..
aGYAnena tu yo dadyAt.h sa pareto bhaviShyati .
sa~NketaM yo vijAnAti yoginInAM bhavetpriyaH .. 205..
sarvepsitaphalAvAptiH sarvakAmaphalAshrayaH .
yato.api dR^ishyate devi kathaM vidvAnna chintayet.h .. 206..
.. iti yoginIhR^idayam.h stotram.h ..
##
\medskip
Encoded and proofread by Mike Magee (ac70@cityscape.co.uk).

\medskip\hrule\obeylines

Please send corrections to sanskrit@cheerful.com
Last updated \today
http://sanskritdocuments.org

\end{document}