{॥ ଲଘୁଷୋଡଶାର୍ଣକଲାଵିଲାସଃ ॥}
କଲ୍ଯାଣଂ ଜଗତାମହଂ କଥମୁମେ ଧ୍ଯାଯାମି ସଚ୍ଚିଦ୍ଵପୁ-
ସ୍ତ୍ରଯ୍ଯନ୍ତୈର୍ମନସାପି ତେ ସହ ଚିରଂ ମୃଗ୍ଯାପି ଯତ୍ନେନ ଚ ।
ଜ୍ଞାତୁମ୍ ନୋ ଵଦିତୁଂ ଶକ୍ଯମଭଵଦ୍ ଯସ୍ମାତ୍ ତଥା ଭକ୍ତିତଃ
ଶ୍ରୀଚକ୍ରାଗ୍ରଗଶୈଵମଞ୍ଚପରଶୈଵାଙ୍କସ୍ଥିତାଂ ଭାଵଯେ ॥ ୧॥

ଏଲାସୌରଭିକୁନ୍ତଲେ ପରମୁମେ ତ୍ଵାଂ ଵ୍ଯାପ୍ଯ ସର୍ଵଂ ସ୍ଥିତାଂ
କାଷ୍ଠାଦିଷ୍ଵିଵ ତୈଲଵହ୍ନିନଵନୀତାମ୍ବୁପ୍ରଵାହାଦିକମ୍ ।
ଶ୍ରୀମୂର୍ତିଷ୍ଵତିସୁନ୍ଦରାସୁ ନଵବନ୍ଧୂକପ୍ରଭାସ୍ଵମ୍ବିକେ
ଶକ୍ଯଂ କିଂ ନୁ ତଥାପି ତେ ପରଶିଵେ ଚାସ୍ଥାନମାଵାହଯେ ॥ ୨॥

ଈଶାଵାସ୍ଯମିଦଂ ତ୍ଵଯା ସକଲମପ୍ଯମ୍ବାସନେ ମଞ୍ଜୁଲେ
ତ୍ଵାମାରୋହଯିତୁଂ ସମସ୍ତଭୁଵନାଧାରଂ କଥଂ ଶକ୍ନୁଯାମ୍ ।
ମତ୍ସ୍ଵାନ୍ତାବ୍ଜମପି ତ୍ଵଦାସନଵରଂ ଭୂଯାଦ୍ଯତଃ ସର୍ଵଦା
ସର୍ଵେଷାଂ ହୃଦଯାରଵିନ୍ଦଭଵନେ ନିତ୍ଯଂ ଵସସ୍ଯମ୍ବିକେ ॥ ୩॥

ଲକ୍ଷ୍ଯାଲକ୍ଷ୍ଯଵିଲକ୍ଷଣଂ ତଵ ଵପୁଃ ପାଦାଦିହୀନଂ ପରଂ
ପାଦ୍ଯୈସ୍ତତ୍ ପରିତୋଷଯାମି କଥମପ୍ଯତ୍ଯନ୍ତମଚ୍ଛାତ୍ମକମ୍ ।
ମତ୍ସ୍ଵାନ୍ତଦ୍ରୁତହେମରତ୍ନକଲଶାନୀତାତିଭକ୍ତ୍ଯମ୍ବୁନା
ଵିଜ୍ଞାନାମରସିନ୍ଧୁଜେନ ରଚଯେ ପ୍ରକ୍ଷାଲନଂ ତ୍ଵତ୍ପଦେ ॥ ୪॥

ହ୍ରୀଂକାରଦ୍ରୁମମଞ୍ଜରୀଶଵିନୁତେଽନର୍ଘ୍ଯାଯ ହସ୍ତାଯ ତେ
ସର୍ଵାଭୀଷ୍ଟଫଲପ୍ରଦାନନିରତାଯାର୍ଘ୍ଯଂ କଥଂ କଲ୍ପଯେ ।
ଗୃହ୍ଣୀଷ୍ଵାମ୍ବ ମଯା ପ୍ରଦତ୍ତମନଘେ ଵିଜ୍ଞାନପାତ୍ରେ ସ୍ଥିତଂ
ତ୍ଵଦ୍ରୂପାନୁଭଵାମ୍ବୁକଲ୍ପିତମଥାପ୍ଯର୍ଘ୍ଯଂ ମହାସୁନ୍ଦରି ॥ ୫॥

ହନ୍ତ ତ୍ଵନ୍ମୁଖନିର୍ଗତେନ ସକଲଂ ପୂତଂ ଜଗତ୍ ସର୍ଵଦା
ଵେଦେନାଚମନୀଯମଦ୍ଯ ସହସା ଦାତୁଂ କଥଂ ଶକ୍ନୁଯାମ୍ ।
ତୁଭ୍ଯଂ ଶ୍ରୀପରଦେଵତେ ମଯି ତଥାପ୍ଯମ୍ବାନୁକମ୍ପାଵଶାଦ୍
ଗୃହ୍ଣୀଷ୍ଵାଚମନଂ ପ୍ରକଲ୍ପିତମୁମେ ଗନ୍ଧାଦିଭିର୍ମିଶ୍ରିତମ୍ ॥ ୬॥

ସର୍ଵଂ ସର୍ଵତ ଏଵ ପୂର୍ଣଵିଭଵେ ପୂର୍ଣେନ ପୂର୍ଣଂ କଥଂ
ଵ୍ଯାପ୍ଯ ତ୍ଵତ୍ତନୁମାସ୍ଥିତାମତିତରାଂ ଶୁଦ୍ଧାଂ ଜଗତ୍ପାଵନୀମ୍ ।
ଗାଙ୍ଗୈର୍ନିର୍ମଲଵାରିଭିଃ ପ୍ରଭଵତି ପ୍ରାଣୀ ଜଗତ୍ଯାଂ ତଥା-
ପ୍ଯାନନ୍ଦାମୃତଵାରିଣାହମଭିଷିଞ୍ଚାଭ୍ଯାଦରାଦମ୍ବିକେ ॥ ୭॥

କଲ୍ପଯ କଲ୍ପକଵୃକ୍ଷସଂଭଵମହତ୍କୌସୁମ୍ଭଵସ୍ତ୍ରଦ୍ଵଯଂ
ନାନାରତ୍ନଵିଚିତ୍ରମମ୍ବ ପରମପ୍ରୀତ୍ଯା କଥଂ ତେ ମଯା ।
ଵ୍ଯାପିନ୍ଯୈ ଜଗତାଂ ତଥାପି ଵିମଲେନାଚ୍ଛାଦଯେ ତ୍ଵାଂ ପରଂ
ଵିଜ୍ଞାନାତ୍ମକଵାସସା ପରଶିଵେ ଗୃହ୍ଣୀଷ୍ଵ ତତ୍ ପ୍ରୀତିତଃ ॥ ୮॥

ହଂସସ୍ଫାଟିକକୁନ୍ଦସୁନ୍ଦରତରଶ୍ରୀମୂର୍ତିମାର୍ଯେ ଶିଵେ
କର୍ପୂରାଗରୁକୁଙ୍କୁମାଦିମିଲିତୈର୍ଗନ୍ଧୈଃ କଥଂ ଲେପଯେ ।
ଶ୍ରୁତ୍ଯୁକ୍ତାଂ ତଵ ସର୍ଵଗନ୍ଧତନୁଗାଂ ନିର୍ଲେପନାଂ ନିଷ୍କଲାଂ
ବ୍ରହ୍ମାତ୍ମୈକ୍ଯଭଵାନୁଭୂତିଵିମଲଜ୍ଞାନାଖ୍ଯଗନ୍ଧୈଃ ପରମ୍ ॥ ୯॥

ଲଗ୍ନେନ୍ଦୂଜ୍ଜ୍ଵଲରେଖମମ୍ବ ମକୁଟଂ ମାଣିକ୍ଯଦୀପ୍ତ୍ଯୁଜ୍ଜ୍ଵଲଂ
କାଲୋନ୍ମୀଲିତଚମ୍ପକାମ୍ବୁଜମହଦ୍ବିଲ୍ଵୀଦଲାନାଂ ସ୍ରଜା ।
ସଂଵେଷ୍ଟ୍ଯାହମଖଣ୍ଡନିର୍ମଲପରାନନ୍ଦାମ୍ବୁଧୌ ଵା କଦା
ମଜ୍ଜେ ମନ୍ମଥଵୈରିଭାମିନି ଵଦ ସ୍ଵାନନ୍ଦଵାରାଂନିଧେ ॥ ୧୦॥

ହ୍ରୀଂକାରୀଂ ନିଗମାଗମାନ୍ତଵିଦିତାଂ ଭକ୍ତ୍ଯା କଥଂ ତର୍ପଯେ
ଧୂପୈର୍ଗୁଗ୍ଗୁଲୁସଂଭଵୈର୍ଜଗଦିଦଂ ସଂଵ୍ଯାପ୍ଯ ନିତ୍ଯଂ ସ୍ଥିତମ୍ ।
ଶ୍ରୀମୂର୍ତ୍ଯୁଦ୍ଭଵଵାସନାଭିରଧୁନା ଦିଵ୍ଯାଭିରାରାଧଯେ
ସଂଵିଦ୍ଵହ୍ନିସମର୍ପିତାଖିଲଜଗତ୍କାଲାଗରୋର୍ଧୂପକୈଃ ॥ ୧୧॥

ସର୍ଵଜ୍ଞେ ସକଲେଷ୍ଟଦାନନିରତେ ସାମାଦିଭିଃ ସଂସ୍ତୁତେ
ତୁଭ୍ଯଂ କଲ୍ପଯିତୁଂ ପ୍ରଦୀପମରୁଣେ ସାଜ୍ଯଂ କଥଂ ଶକ୍ନୁଯାମ୍ ।
ବାଲାର୍କାଯୁତକୋଟିସୁନ୍ଦରତନୋ ଭକ୍ତ୍ଯା ତଥାପ୍ଯଞ୍ଚିତେ
ଵିଜ୍ଞାନାତ୍ମକଦୀପଦୀପ୍ତିଭିରହଂ ସଂତର୍ପଯାମ୍ଯମ୍ବିକେ ॥ ୧୨॥

କଲ୍ଯାଣ୍ଯମ୍ବ କଥଂ ନିଵେଦିତୁମହଂ ନୈଵେଦ୍ଯମାର୍ଯେ ଶୁଭେ
ତପ୍ତାଷ୍ଟାପଦଭାଜନୋଜ୍ଜ୍ଵଲମୁମେ ଭକ୍ଷ୍ଯାଦିଭିଃ ସଂଯୁତମ୍ ।
ଶକ୍ଷ୍ଯେ ସଂଭୃତସର୍ଵଲୋକଜଠରାଯୈ ତୁଭ୍ଯମତ୍ଯୁଜ୍ଜ୍ଵଲଂ
ଵିଶ୍ଵାସେନ ସମର୍ପଯାମି ଜଗଦାତ୍ମୈକ୍ଯାନ୍ନମାନନ୍ଦଦମ୍ ॥ ୧୩॥

ଲକ୍ଷ୍ମୀଵନ୍ଦିତପାଦପଦ୍ମଯୁଗଲେ ଲକ୍ଷ୍ମୀଧଵାଦ୍ଯର୍ଚିତେ
କର୍ପୂରାଜ୍ଯଲସତ୍ସୁଵର୍ଣକଲଶପ୍ରୋଦ୍ଭାସି ନୀରାଜନମ୍ ।
ନାନାଶୋଭନଗୀତନୃତ୍ତସହିତଂ ଦିଵ୍ଯାଙ୍ଗନାଭିର୍ଧୃତଂ
ଵୀକ୍ଷ୍ଯାଦ୍ଯାମ୍ବ ମୁଦଂ ପ୍ରଯାହି କୃପଯା ଶ୍ରୀକାମରାଜେଶ୍ଵରି ॥ ୧୪॥

ହ୍ରୀଂହ୍ରୀମିତ୍ଯନୁଭାଵ୍ଯତାଂ ହୃତତମଃପୁଞ୍ଜେ ସମସ୍ତାର୍ଥଦେ
ତ୍ଵତ୍ପାଦାବ୍ଜଯୁଗେ ଭଵତ୍ଵନୁଦିନଂ ବିଲ୍ଵାମ୍ବୁଜାର୍ଚାଵିଧିଃ ।
ହ୍ରୀଂକାରାର୍ଣମନୁପ୍ରଯୁକ୍ତମରୁଣେ ମତ୍ସ୍ଵାନ୍ତଜୈଃ ସ୍ଵାନୁଭୂ-
ତ୍ଯବ୍ଜୈଃ ସାକମଖଣ୍ଡସୌଖ୍ଯନିଲଯେ ଶ୍ରୀଚକ୍ରରାଜେଶ୍ଵରି ॥ ୧୫॥

ହ୍ରୀଂକାରୋନ୍ନତରତ୍ନମଞ୍ଜୁଲମହତ୍ସିଂହାସନେ ଭାସୁରା-
ମୂଢେ ବ୍ରହ୍ମହରୀଶ୍ଵରାଦିଵିରଲଂ ଶ୍ରୀକାମରାଜାଙ୍କକମ୍ ।
ସର୍ଵଜ୍ଞାଦିସମସ୍ତଶକ୍ତିନିଵହୈଃ ସଂସେଵିତାମମ୍ବିକାଂ
ସୈଵାସ୍ମୀତି ଵିଭାଵନାନତିଶତୈଃ ସଂତୋଷଯାମ୍ଯନ୍ଵହମ୍ ॥ ୧୬॥

ଯେ ଯେ ସଂତତମନ୍ଧକାରିଗୃହିଣୀସ୍ତୋତ୍ରଂ ସମସ୍ତାର୍ଥଦଂ
ଜ୍ଞାତ୍ଵାର୍ଥଂ ହୃଦି ମନ୍ତ୍ରରାଜଵିମଲଶ୍ରୀବୀଜଵର୍ଣକ୍ରମାତ୍ ।
ପ୍ରୋକ୍ତଂ ମନ୍ତ୍ରଵିଦଃ ପଠନ୍ତି ସହସା କାଲତ୍ରଯେଽପ୍ଯମ୍ବିକା-
ସାଂନିଧ୍ଯେ ତଦନନ୍ଯଭାଵନାଧିଯସ୍ତତ୍ରୈକ୍ଯତାଂ ପ୍ରାପ୍ନୁଯୁଃ ॥ ୧୭॥

॥ ଇତି ଶ୍ରୀଲଘୁଷୋଡଶାର୍ଣକଲାଵିଲାସସ୍ତୋତ୍ରଂ ସଂପୂର୍ଣମ୍॥

Encoded and proofread by Sridhar Seshagiri seshagir at engineering.sdsu.edu

Please send corrections to sanskrit@cheerful.com
Last updated ତ୍oday
http://sanskritdocuments.org

Laghu Shodasharna Kalavilasa Lyrics in Oriya PDF
% File name : laghu16.itx
% Location : doc\_devii
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Description-comments : Hymn to Devi
% Latest update : October 15, 2001
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website