{॥ లఘుషోడశార్ణకలావిలాసః ॥}
కల్యాణం జగతామహం కథముమే ధ్యాయామి సచ్చిద్వపు-
స్త్రయ్యన్తైర్మనసాపి తే సహ చిరం మృగ్యాపి యత్నేన చ ।
జ్ఞాతుమ్ నో వదితుం శక్యమభవద్ యస్మాత్ తథా భక్తితః
శ్రీచక్రాగ్రగశైవమఞ్చపరశైవాఙ్కస్థితాం భావయే ॥ ౧॥

ఏలాసౌరభికున్తలే పరముమే త్వాం వ్యాప్య సర్వం స్థితాం
కాష్ఠాదిష్వివ తైలవహ్నినవనీతామ్బుప్రవాహాదికమ్ ।
శ్రీమూర్తిష్వతిసున్దరాసు నవబన్ధూకప్రభాస్వమ్బికే
శక్యం కిం ను తథాపి తే పరశివే చాస్థానమావాహయే ॥ ౨॥

ఈశావాస్యమిదం త్వయా సకలమప్యమ్బాసనే మఞ్జులే
త్వామారోహయితుం సమస్తభువనాధారం కథం శక్నుయామ్ ।
మత్స్వాన్తాబ్జమపి త్వదాసనవరం భూయాద్యతః సర్వదా
సర్వేషాం హృదయారవిన్దభవనే నిత్యం వసస్యమ్బికే ॥ ౩॥

లక్ష్యాలక్ష్యవిలక్షణం తవ వపుః పాదాదిహీనం పరం
పాద్యైస్తత్ పరితోషయామి కథమప్యత్యన్తమచ్ఛాత్మకమ్ ।
మత్స్వాన్తద్రుతహేమరత్నకలశానీతాతిభక్త్యమ్బునా
విజ్ఞానామరసిన్ధుజేన రచయే ప్రక్షాలనం త్వత్పదే ॥ ౪॥

హ్రీంకారద్రుమమఞ్జరీశవినుతేఽనర్ఘ్యాయ హస్తాయ తే
సర్వాభీష్టఫలప్రదాననిరతాయార్ఘ్యం కథం కల్పయే ।
గృహ్ణీష్వామ్బ మయా ప్రదత్తమనఘే విజ్ఞానపాత్రే స్థితం
త్వద్రూపానుభవామ్బుకల్పితమథాప్యర్ఘ్యం మహాసున్దరి ॥ ౫॥

హన్త త్వన్ముఖనిర్గతేన సకలం పూతం జగత్ సర్వదా
వేదేనాచమనీయమద్య సహసా దాతుం కథం శక్నుయామ్ ।
తుభ్యం శ్రీపరదేవతే మయి తథాప్యమ్బానుకమ్పావశాద్
గృహ్ణీష్వాచమనం ప్రకల్పితముమే గన్ధాదిభిర్మిశ్రితమ్ ॥ ౬॥

సర్వం సర్వత ఏవ పూర్ణవిభవే పూర్ణేన పూర్ణం కథం
వ్యాప్య త్వత్తనుమాస్థితామతితరాం శుద్ధాం జగత్పావనీమ్ ।
గాఙ్గైర్నిర్మలవారిభిః ప్రభవతి ప్రాణీ జగత్యాం తథా-
ప్యానన్దామృతవారిణాహమభిషిఞ్చాభ్యాదరాదమ్బికే ॥ ౭॥

కల్పయ కల్పకవృక్షసంభవమహత్కౌసుమ్భవస్త్రద్వయం
నానారత్నవిచిత్రమమ్బ పరమప్రీత్యా కథం తే మయా ।
వ్యాపిన్యై జగతాం తథాపి విమలేనాచ్ఛాదయే త్వాం పరం
విజ్ఞానాత్మకవాససా పరశివే గృహ్ణీష్వ తత్ ప్రీతితః ॥ ౮॥

హంసస్ఫాటికకున్దసున్దరతరశ్రీమూర్తిమార్యే శివే
కర్పూరాగరుకుఙ్కుమాదిమిలితైర్గన్ధైః కథం లేపయే ।
శ్రుత్యుక్తాం తవ సర్వగన్ధతనుగాం నిర్లేపనాం నిష్కలాం
బ్రహ్మాత్మైక్యభవానుభూతివిమలజ్ఞానాఖ్యగన్ధైః పరమ్ ॥ ౯॥

లగ్నేన్దూజ్జ్వలరేఖమమ్బ మకుటం మాణిక్యదీప్త్యుజ్జ్వలం
కాలోన్మీలితచమ్పకామ్బుజమహద్బిల్వీదలానాం స్రజా ।
సంవేష్ట్యాహమఖణ్డనిర్మలపరానన్దామ్బుధౌ వా కదా
మజ్జే మన్మథవైరిభామిని వద స్వానన్దవారాంనిధే ॥ ౧౦॥

హ్రీంకారీం నిగమాగమాన్తవిదితాం భక్త్యా కథం తర్పయే
ధూపైర్గుగ్గులుసంభవైర్జగదిదం సంవ్యాప్య నిత్యం స్థితమ్ ।
శ్రీమూర్త్యుద్భవవాసనాభిరధునా దివ్యాభిరారాధయే
సంవిద్వహ్నిసమర్పితాఖిలజగత్కాలాగరోర్ధూపకైః ॥ ౧౧॥

సర్వజ్ఞే సకలేష్టదాననిరతే సామాదిభిః సంస్తుతే
తుభ్యం కల్పయితుం ప్రదీపమరుణే సాజ్యం కథం శక్నుయామ్ ।
బాలార్కాయుతకోటిసున్దరతనో భక్త్యా తథాప్యఞ్చితే
విజ్ఞానాత్మకదీపదీప్తిభిరహం సంతర్పయామ్యమ్బికే ॥ ౧౨॥

కల్యాణ్యమ్బ కథం నివేదితుమహం నైవేద్యమార్యే శుభే
తప్తాష్టాపదభాజనోజ్జ్వలముమే భక్ష్యాదిభిః సంయుతమ్ ।
శక్ష్యే సంభృతసర్వలోకజఠరాయై తుభ్యమత్యుజ్జ్వలం
విశ్వాసేన సమర్పయామి జగదాత్మైక్యాన్నమానన్దదమ్ ॥ ౧౩॥

లక్ష్మీవన్దితపాదపద్మయుగలే లక్ష్మీధవాద్యర్చితే
కర్పూరాజ్యలసత్సువర్ణకలశప్రోద్భాసి నీరాజనమ్ ।
నానాశోభనగీతనృత్తసహితం దివ్యాఙ్గనాభిర్ధృతం
వీక్ష్యాద్యామ్బ ముదం ప్రయాహి కృపయా శ్రీకామరాజేశ్వరి ॥ ౧౪॥

హ్రీంహ్రీమిత్యనుభావ్యతాం హృతతమఃపుఞ్జే సమస్తార్థదే
త్వత్పాదాబ్జయుగే భవత్వనుదినం బిల్వామ్బుజార్చావిధిః ।
హ్రీంకారార్ణమనుప్రయుక్తమరుణే మత్స్వాన్తజైః స్వానుభూ-
త్యబ్జైః సాకమఖణ్డసౌఖ్యనిలయే శ్రీచక్రరాజేశ్వరి ॥ ౧౫॥

హ్రీంకారోన్నతరత్నమఞ్జులమహత్సింహాసనే భాసురా-
మూఢే బ్రహ్మహరీశ్వరాదివిరలం శ్రీకామరాజాఙ్కకమ్ ।
సర్వజ్ఞాదిసమస్తశక్తినివహైః సంసేవితామమ్బికాం
సైవాస్మీతి విభావనానతిశతైః సంతోషయామ్యన్వహమ్ ॥ ౧౬॥

యే యే సంతతమన్ధకారిగృహిణీస్తోత్రం సమస్తార్థదం
జ్ఞాత్వార్థం హృది మన్త్రరాజవిమలశ్రీబీజవర్ణక్రమాత్ ।
ప్రోక్తం మన్త్రవిదః పఠన్తి సహసా కాలత్రయేఽప్యమ్బికా-
సాంనిధ్యే తదనన్యభావనాధియస్తత్రైక్యతాం ప్రాప్నుయుః ॥ ౧౭॥

॥ ఇతి శ్రీలఘుషోడశార్ణకలావిలాసస్తోత్రం సంపూర్ణమ్॥

Encoded and proofread by Sridhar Seshagiri seshagir at engineering.sdsu.edu

Please send corrections to sanskrit@cheerful.com
Last updated త్oday
http://sanskritdocuments.org

Laghu Shodasharna Kalavilasa Lyrics in Telugu PDF
% File name : laghu16.itx
% Location : doc\_devii
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Description-comments : Hymn to Devi
% Latest update : October 15, 2001
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website