{॥ శ్రీశక్తిమహిమ్న అథవా త్రిపురామహిమ్నస్తోత్రమ్ ॥}
మాతస్తే మహిమా వక్తుం శివేనాపి న శక్యతే ।
భక్త్యాహం స్తోతుమిచ్ఛామి ప్రసీద మమ సర్వదా ॥ ౧॥

శ్రీమాతస్త్రిపురే పరాత్పరతరే దేవి త్రిలోకీమహా-
సౌన్దర్యార్ణవ-మన్థనోద్భవసుధా-ప్రాచుర్య-వర్ణోజ్జ్వలమ్ ।
ఉద్యద్భానుసహస్రనూతనజపాపుష్పప్రభం తే వపుః
స్వాన్తే మే స్ఫురతు త్రికోణనిలయం జ్యోతిర్మయం వాఙ్మయమ్ ॥ ౨॥

ఆదిక్షాన్త సమస్త-వర్ణ-సుమణి-ప్రోతే వితానప్రభే
బ్రహ్మాది-ప్రతిమాభికీలిత-షడారాబ్జ-కక్షోన్నతే ।
బ్రహ్మాణ్డాబ్జ మహాసనే జనని తే మూర్తిం భజే చిన్మయీం
సౌషుమ్నాయత-పీతపఙ్కజ-మహామధ్య-త్రికోణస్థితామ్ ॥ ౩॥

యా బాలేన్దు దివాకరాక్షిమధురా యా రక్తపద్మాసనా
రత్నాకల్ప-విరాజితాఙ్గ-లతికా పూర్ణేన్దువక్త్రోజ్జ్వలా ।
ఆక్షస్త్రక్సృణి-పాశ-పుస్తక-కరా యా బాలభానుప్రభా
తాం దేవీం త్రిపురాం శివం హృది భజేఽభీష్టార్థ సిద్ధయై సదా ॥ ౪॥

వన్దే వాగ్భవమైన్దవాత్మ-సదృశం వేదాది-విద్యా-గిరో
భాశా దేశసముద్భవాః పశుగతాశ్ఛన్దాంసి సప్తస్వరాన్ ।
తాలాన్ పఞ్చమహాధ్వనీన్ ప్రకటయత్యాత్మప్రకాశేన యత్
తద్బీజం పదవాక్య-మాన-జనకం శ్రీమాతృకే తే పరమ్ ॥ ౫॥

త్రైలోక్యస్ఫుట-మన్త్ర-తన్త్ర-మహిమా స్వాత్మోక్తి-రూపం వినా
యద్బీజం వ్యవహారజాలమఖిలం నాస్త్యేవ మాతస్తవ ।
తజ్జాప్య-స్మరణ-ప్రసక్త-సుమతిః సర్వజ్ఞతాం ప్రాప్య కః
శబ్దబ్రహ్మనివాసభూతవదనో నేన్ద్రాదిభిః స్పర్ధతే ॥ ౬॥

మాత్రా యాఽత్ర విరాజతేఽతివిశదా తామష్టధా మాతృకాం
శక్తిం కున్డలినీం చతుర్విధతనుం యస్తత్త్వవిన్మన్యతే ।
సోఽవిద్యాఖిలజన్మ-కర్మ-దురితారణ్యం ప్రబోధాగ్నినా
భస్మీకృత్య వికల్పజాల-రహితో మాతః పదం తీద్వ్రజేత్ ॥ ౭॥

తత్తే మధ్యమ-బీజమమ్బ కలయామ్యదిత్యవర్ణం క్రియా-
జ్ఞానేచ్ఛాదిమనన్తశక్తి-విభవ-వ్యక్తిం వ్యనక్తి స్ఫుటమ్ ।
ఉత్పతి-స్థితి-కల్ప-కల్పిత-తను స్వాత్మప్రభావేన యత్
కామ్యం బ్రహ్మహరీశ్వరాది-విబుధైః కామం క్రియాయోజితైః ॥ ౮॥

కామాన్ కారణతాం గతాన్ అగణితాన్ కార్యై-రనన్తై-ర్మహీ-
ముఖ్యైః సర్వమనోగతై-రధిగతాన్ మానైరనేకైః స్ఫుట్మ్ ।
కామక్రోధ-సలోభమోహ-మదమాతసర్యారి-షట్కం చ యత్
బీజం భ్రాజయతి ప్రణౌమి తదహం తే సాధు కామేశ్వరి ॥ ౯॥


యద్భక్తాఖిల-కామ-పూరణచణ-స్వాత్మప్రభావం మహా-
జాడ్యధ్వాన్త-విదారణైక-తరణిజ్యోతిః ప్రబోధప్రదమ్ ।
యద్వేదేషు చ గీయతే శ్రుతిముఖం మాత్రాత్రయేణోమితి
శ్రీవిద్యే తవ సర్వరాజ-వశకృత్ తత్కామరాజం భజే ॥ ౧౦॥

యత్తే దేవి తృతీయబీజ-మనలజ్వాలావలీ-సన్నిభం
సర్వాధార-తురీయబీజ-మపరబ్రహ్మాభిధా-శబ్దితమ్ ।
మూర్ధన్యాన్త-విసర్గ-భూషితమహౌకారాత్మకం తత్పరం
సర్విద్రూపమనన్య-తుల్య మహిమ స్వాన్తే మమ ద్యోతతామ్ ॥ ౧౧॥


సర్వ సర్వత ఏవ సర్గసమయే కార్యేన్ద్రియాణ్యన్తరా
తత్తద్దివ్య-హృషీక-కర్మభిరియం సంవ్యశ్రువానా పరా ।
వాగర్థ-వ్యవహార-కారణతనుః శక్తి-ర్జగద్రూపిణీ
యద్బీజాత్మకతాం గతా తవ శివే తన్నౌమి బీజం పరమ్ ॥ ౧౨॥


అగ్నీన్దు-ద్యుమణి-ప్రభఞ్జన-ధరా-నీరాన్తర-స్థాయినీ
శక్తిర్బ్రహ్మహరీశ-వాసవ-ముఖామర్త్యాసురాత్మ-స్థితా ।
సృష్టస్థావరజఙ్గమ-స్థిత-మహా-చైతన్యరూపా చ యా
యద్బీజస్మరణేన సైవ భవతీ ప్రాదుర్భవత్యమ్బికే ॥ ౧౩॥


స్వాత్మ శ్రీవిజితాజవిష్ణు మఘవ శ్రీపూరణైకవ్రతం
సద్విద్యా-కవితా-విలాసలహరీ-కల్లోలినీ-దీపకమ్ ।
బీజం యత్ త్రిగుణప్రవృతి-జనకం బ్రహ్మేతి యద్యోగినః
శాన్తాః సత్యముపాసతే తదిహ తే చిత్తే దధే శ్రీపరే ॥ ౧౪॥


ఏకైకం తవ మాతృకే పరతరం సంయోగి వాఽయోగి వా
విద్యాదిప్రకట-ప్రభవ-జనకం జాడ్యాన్ధ్కారాపహామ్ ।
యన్నిష్ఠాశ్చ మహోత్పలాసన-మహావిష్ణు-ప్రహన్నార్దయో
దేవాః స్వేషు విధిష్వనన్త-మహిమ-స్ఫూర్తిం దధత్యేవ తత్ ॥ ౧౫॥

ఇత్థం త్రీణ్యపి మూల-వాగ్భవ-మహా-శ్రీకామరాజ స్ఫుర-
చ్ఛక్త్త్యాఖ్యాని చతుః- శ్రుతిప్రకటితాన్యుత్కృష్ట-కూటాని తే ।
భూతర్తు శ్రుతి సంఖ్య-వర్ణ-విదితాఅన్యారక్తకాన్తే శివే
యో జానాతి స ఏవ సర్వజగతాం-స్థితి-ధ్వంసకృత్ ॥ ౧౬॥


బ్రహ్మా యోని-రమా-సురేశ్వర-సుహృల్ల్రేఖభిరుక్త్తైస్తథా
మార్తాణ్డేన్దు-మనోజ-హంస-వసుధా-మాయాభిరుత్తసితైః ।
సోమామ్భు-క్షితి-శక్తిభిః ప్రకటితై-ర్బాణాఙ్గవేదైః క్రమాద్
వర్ణైః శ్రీశివదేశికేన విదితాం విద్యాం తవామ్బాశ్రయే ॥ ౧౭॥


నిత్యం యస్తవ మాతృకాక్షర సఖీం సౌభాగ్యవిద్యాం జపేత్
సమ్పూజ్యాఖిల చక్రరాజనిలయాం సాయన్తనాగ్ని ప్రభామ్ ।
కామాఖ్యం శివనామతత్త్వముభయం వ్యాప్యాత్మ్నా సర్వతో
దీవ్యాన్తీ-మిహ తస్య సిద్ధి-రచిరాత్ స్యాత్ త్వత్స్వరూపైకతా ॥ ౧౮॥

కావ్యైర్వా పఠితైః కిమల్పవిదుషాం జోఘుష్యమాణైః పునః
కిం తై-ర్వ్యాకరణైర్వివోబుధిషయా కిం వాభిధానశ్రియా ।
ఏతైరమ్బ న బోభవీతి సుకవి-స్తావత్తవ శ్రీమతోః
యావన్నానుసరీసరీతి సరణిం పాదాబ్జయోః పావనీమ్ ॥ ౧౯॥

గేహం నాకతి గర్వితః ప్రవణతి స్త్రీసఙ్గమో మోక్షతి
ద్వేషీ మిత్రతి పాతకం సుకృతతి క్ష్మావల్లభో దాసతి ।
మృత్యుర్వైద్యతి దూషణం సుగుణతి త్వత్పాద-సంసేవనాత్
త్వాం వన్దే భవభీతి-భఞ్జనకరీం గౌరీం గిరీశప్రియామ్ ॥ ౨౦॥


ఆద్యైరగ్ని రవీన్దు బిమ్బ నిలయే రమ్బ త్రిలిఙ్గాత్మభిః-
మిశ్రా రక్త సిత ప్రభైరనుపమైర్యుష్మత్పదై స్తై స్త్రిభిః ।
స్వాత్మోత్పాదిత కాల లోక నిగమావస్థామరాది త్రయైః
ఉద్భూతం త్రిపురేతి నామ కలయేద్యస్తే స ధన్యో బుధః ॥ ౨౧॥


ఆద్యో జాప్యతమర్థ వాచకతయా రూఢః స్వరః పఞ్చమః
సర్వోత్కృష్టతమార్థ వాచకతయా వర్ణః పవర్గాన్తకః ।
వక్తృత్వేన మహావిభూతిసరణిస్త్వాధారగో హృద్గతో
భ్రూమధ్యే స్థిత ఇత్యతః ప్రణవతా తే గీయతేఽమ్బాగమైః ॥ ౨౨॥


గాయత్రీ సశిరాస్తురీయ సహితా సన్ధ్యామయీత్యాగమైః
ఆఖ్యాతా త్రిపురే త్వమేవ మహతాం శర్మప్రదా కర్మణామ్ ।
తత్తద్దర్శన ముఖ్యశక్తిరపి చ త్వం బ్రహ్మకర్మేశ్వరీ
కర్తాఽర్హన్ పురుషో హరిశ్చ సవితా బుద్ధః శివస్త్వం గురు ॥ ౨౩॥


అన్న-ప్రాణ-మన-ప్రబోధ-పరమానన్దైః శిరః-పక్షయుక్
పుచ్ఛాత్మ-ప్రకటై-ర్మహోపనిషదాం వాగ్మిః ప్రసిద్ధికృతై ।
కోశైః పఞ్చభిరేభి-రమ్బ భవతీమేతత్ ప్రలీనామితి
జ్యోతిః ప్రజ్వల-దుజ్జ్వలాత్మచపలాం యో వేద స బ్రహ్మవిత్ ॥ ౨౪॥


సచ్చిత్తత్వమసీతి వాక్యవిదితై-రధ్యాత్మవిద్యా-శివ-
బ్రహ్మాఖ్యై-రతుల-ప్రభావ-మహితై-స్తత్త్వైస్త్రిభిః సద్గురోః ।
త్వద్రూపస్య ముఖారవిన్ద-వివరాత్ సమ్ప్రాప్య దిక్షా-మతో
యస్త్వాం విన్దతి తత్త్వత-స్తదహ-మిత్యార్యే స ముక్తో భవేత్ ॥ ౨౫॥


సిద్ధాన్తైర్బహుభి ప్రమాణ-గదితైరన్యైరవిద్యాతమో
నక్షత్రైరివ సర్వమన్ధతమసం తావన్న నిర్భిద్యతే ।
యావత్తే సవితేవ సమ్మతమిదం నోదేతి విశ్వాన్తరే
జన్తో-ర్జన్మ-విమోచనైకభిదురం శ్రీశామ్భవం శ్రీశివే ॥ ౨౬॥


ఆత్మాఽసౌ సకలేన్ద్రియాస్రయ-మనో బుధయాదిభిః శోచితః
కర్మాబధతనుర్ జనిం చ మరణం ప్రైతీతి యత్కారణమ్ ।
తతే దేవి మహావిలస లహరి దివ్యయుధానాం జయః
తస్మాత్ సద్గురుమప్యుపేత్య కలయేత్వామేవ చేన్ముచ్యతే ॥ ౨౭॥


నానా-యోని-సహస్ర-సమ్భవ-వశాజ్జాతా జనన్యః కతి
ప్రఖ్యాతా జనకాః కియన్త ఇతి మే సేత్స్యన్తి చాగ్రే కతి ।
ఏతేషాం గణనైవ నాస్తి మహతః సంసారసిన్ధో-ర్విధేః
భీతం మాం నితరా-మనన్యశరణం రక్షానుకమ్పానిధే ॥ ౨౮॥


దేహక్షోభ-కరై-ర్వృతై-ర్బహువిధై-దానైస్చ-హోమై-ర్జపైః
సన్తానై-ర్హయమేధ-ముఖ్య-సుమఖై-ర్నానావిధైః కర్మభిః ।
యత్సఙ్కల్పవికల్పజాల-మలినం ప్రాప్యం పదం తస్యతే
దూరాదేవ నివర్తతే పరతరం మాతః పదం నిర్మలమ్ ॥ ౨౯॥


పఞ్చాశన్నిజదేహజాక్షరమయైర్నానావిధైర్ధాతుభిః
బహ్వర్థైః పదవాక్య-మాన-జనకై-రర్థావినాభావితైః ।
సాభిప్రాయవదర్థ-కర్మ-ఫలదైః ఖ్యాతేరనన్తైరిదం
విశ్వం వ్యాప్య చిదాత్మనాఽహమహమిత్యుజ్జృమ్భసే మాతృకే ॥ ౩౦॥


శ్రీచక్రం శ్రుతిమూలకోశ ఇతి తే సంసారచక్రాత్మకం
విఖ్యాతం తదధిష్ఠితాక్షర-శివజ్యోతిర్మయం సర్వతః ।
ఏతన్మన్త్రమయాత్మికభిరరుణం శ్రీసున్దరీభిర్వృతం
మధ్యే బైన్దవసింహపీఠలలితే త్వం బ్రహ్మవిద్యా శివే ॥ ౩౧॥


బిన్దు-ప్రాణ-విసర్గ-జీవసహితం బిన్దు-త్రిబిజాత్మకం
షట్కూటాని విపర్యయేణ నిగదేత్ తారత్రిబాలాక్షరైః ।
ఏభిః సమ్పుటితం ప్రజప్య విహరేత్ప్రాసాద-మన్త్రం పరం
గుహ్యద్గుహ్యతమం సయోగజనితం సద్భోగమోక్షప్రదమ్ ॥ ౩౨॥


ఆతామ్రార్క సహస్రదీప్తి పరమా సౌన్దర్యసారై-రలం
లోకాతీత మహోదయై రుపయుతా సర్వోపమాఽగోచరైః ।
నానానర్ఘ్య-విభూషణైరగణితై-ర్జాజ్వల్యమానాఽభితః
త్వం మాతాస్త్రిపురారిసున్దరి కురు స్వాన్తే నివాసం మమ ॥ ౩౩॥


శిఞ్జన్నూపుర-పాదకణ్కణ-మహాముద్రాసులాక్షారసా-
లఙ్కారన్కిత-పాదపఙ్కజ-యుగం శ్రీపాదుకాలఙ్కృతమ్ ।
ఉద్భాస్వన్నఖచన్ద్రఖణ్డరుచిరం రాజజ్జపాసన్నిభం
బ్రహ్మాది త్రిదశాసురార్చితమహం మూర్ధ్ని స్మరామ్యమ్బికే ॥ ౩౪॥


ఆరక్తచ్ఛవినాఽతిమార్దవయుజా నిశ్వాసహార్యేణ యత్
కౌశేయేన విచిత్రరత్నధతితైర్ముక్తాఫలైరుజ్జ్వలైః ।
కూజత్కాఞ్చన-కిఙ్కిణీభిరభిత సన్నద్ధకాఞ్చీగుణైః
ఆదీప్తం సునితమ్బబిమ్బమరుణం తే పూజయామ్యమ్బికే ॥ ౩౫॥


కస్తూరీ-ఘనసార-కుఙ్కుమరజో-గన్ధోత్కటై-శ్చన్దనైః
ఆలిప్తం మణిమాలయాఽతిరుచిరం గ్రైవేయ-హారాదిభిః ।
దీప్తం దివ్య-విభూషణై-ర్జనని తే జ్యోతి-ర్విభాస్వత్కుచ
వ్యాజ-స్వర్ణధటద్వయం హరిహర-బ్రహ్మాది-పీతం భజే ॥ ౩౬॥


ముక్తారత్నసువర్ణకాన్తికలితైస్తే బాహువల్లీరహం
కేయూరోత్తమ బాహుదణ్డవలయైర్హస్తాఙ్గులీభూషణైః ।
సమ్పృక్త్తాః కలయామి హీరమణిమన్ముక్తాఫలాకీలిత-
గ్రీవాపట్టవిభూషణేన సుభగే కణ్ఠం చ కమ్బుశ్రియమ్ ॥ ౩౭॥

తప్తస్వర్ణ-కృతోరుకుణ్డలయుగం మాణిక్య-ముక్తోల్లస-
ద్ధిరాబద్ధ-మనన్య-తుల్య-మపరం హైమం చ చక్రద్వయమ్ ।
శుక్రాకార-నికార-దక్ష-మపరం ముక్తాఫలం సున్దరం
బిభ్రత్కణయుగం నమామి లలితం నాసాగ్రభాగం శివే ॥ ౩౮॥


ఉద్యుత్పూర్ణ కలానిధిశ్రి వదనం భక్తప్రసన్నం సదా
సమ్ఫుల్లామ్బుజ-పత్ర-చిత్ర-సుషమా-ధిక్కార దక్షేక్షణమ్ ।
సానన్దం కృతమన్దహాసమసకృత్ ప్రాదుర్భవత్కౌతుకం
కున్దాకార సుదన్తపఙ్క్తి శశిభా పూర్ణం స్మరామ్యమ్బికే ॥ ౩౯॥


శృఙ్గారాది-రసాలయం త్రిభువని-మాల్యై-రతుల్యై-ర్యుతం
సర్వాఙ్గీణ సదఙ్గరాగ-సురభి-శ్రీమద్వపు-ర్దీపితమ్ ।
తామ్బూలాలరుణ పల్లవాధర-యుతం రమ్యం త్రిపున్డ్రం దధ-
ద్భాలం నన్దనచన్దనేన జనని ధ్యాయామి తే మఙ్గలమ్ ॥ ౪౦॥


జాతి-చమ్పక-కున్దకేసర-మహాగన్ధోద్నిరత్ కేతకీ
నీపశోక-శిరీష-ముఖ్య-కుసుమైః ప్రోత్తంసిత ధూపితా ।
ఆనిలాఞ్జన-తుల్య-మత్త-మధుప-శ్రేణీవ వేణీ తవ
శ్రీమాతః శ్రయతాం మదియ హృదయామ్భోజాం సరోజలయే ॥ ౪౧॥


లేఖాలభ్య-విచిత్ర-రత్న-ఘటితం హైమం కిరీటోత్తమం
ముక్తా-కాఞ్చన-కిఙ్కిణీ-గణ-మహా-హీర-ప్రబద్ధోజ్జ్వలమ్ ।
చఞ్చశ్చన్ద్రకలా-కలాప-మహితం-దేవద్రుపుష్పాచితైః
మాల్యై-రమ్బ విలమ్బితం సశిఖరం బిభ్రచ్ఛిరస్తే భజే ॥ ౪౨॥

ఉత్క్షిప్తోచ్చసువర్ణ-దణ్డ-కలితం-పూర్ణేన్దు-బిమ్బాకృతి
చ్ఛత్రం మౌక్తిక-చిత్రరత్నఖచితం క్షౌమాంశుకోత్తంసితమ్ ।
ముక్తజాల-విలమ్బితం-సకలశం నానాప్రసూనార్చితం
చన్ద్రోఙ్డామర-చామరాణి దధతే శ్రీదేవి తే స్వః స్త్రియః ॥ ౪౩॥


విద్యా-మన్త్ర-రహస్యవిన్మునిగణైః క్లృప్తోపచారార్చనాం
వేదాది-స్తుతి-గీయమాన-చరితాం వేదాన్త-తత్త్వాత్మికామ్ ।
సర్వాస్తాః ఖలు తుర్యతా-ముపగతా-స్త్వద్రశ్మిదేవ్యః పరాః
త్వాం నిత్యం సముపాసతే స్వవిభవైః శ్రీచక్రనాథే శివే ॥ ౪౪॥


ఏవం య స్మరతి ప్రబుద్ధసుమతిః శ్రీమత్స్వరూపం పరం
వృద్ధోఽప్యాశు యువా భవత్యనుపమః స్త్రీణామనఙ్గాయతే ।
సోఽష్టైశ్వర్య-తిరస్కృతఖిలా-సురశ్రీ-జృమ్భణైకాలయః
పృథ్వీపాలకిరీట-కోటివలభి-పుష్పార్చితాఙ్ఘ్రి-ర్భవేత్త్ ॥ ౪౫॥

అథ తవ ధనుః పుణ్డ్రేక్షుత్వాత్ ప్రసిదధ్మతిద్యుతి
త్రిభువనవధూ ముద్యజ్జ్యోత్స్నాకలానిధి-మణ్డలమ్ ।
సకల జనని స్మారం స్మారం గతః స్మరతాం నరః
త్రిభువనవధూ-మోహామ్బోధేః ప్రపూర్ణవిధు-ర్భవేత్ ॥ ౪౬॥



ప్రసూన శర పఞ్చక ప్రకట జృమ్భణాగుమ్భితం
త్రిలోకమవలోకయ త్యమలచేతసాఽచఞ్చలమ్ ।
అశేష తరుణీజన స్మరవిజృమ్భణే యః సదా
పటుర్భవతి తే శివే త్రిజగదఙ్గనాక్షోభణే ॥ ౪౭॥


పాశం ప్రపూరిత-మహా-సుమతి-ప్రకాశో
యో వా తవ త్రిపురసున్దరి సున్దరీణామ్ ।
ఆకర్షణేఽఖిలవశీకరణే ప్రవీణం
చిత్తే దధాతి స జగత్త్రయ-వశ్యకృత్ స్యాత్ ॥ ౪౮॥


యః స్వాన్తే కలయతి కోవిద-స్త్రిలోకీ-
స్తమ్భారమ్భణచణ-మత్యుదారవీర్యమ్ ।
మాతస్తే విజయ-నిజాఙ్కుశం స యోషాః
దేవాన్స్తమ్భయతి చ భూభుజోఽన్యసైన్యమ్ ॥ ౪౯॥


చాప చ్యాన వశాద్భవోద్భవ మహామోహం మహాజృమ్భణం
ప్రఖ్యాతం ప్రసవేషుచిన్తన-వశాత్ తత్తచ్ఛరవ్యం సుధీః ।
పాశధ్యానవసాత్ సమస్తజగతాం మృత్యోర్వశత్వం మహా-
దుర్గస్తమ్భ-మహాఙ్కుశస్య మననాన్మాయా-మమేయాం తరేత్ ॥ ౫౦॥


న్యాసం కృత్వా గణేశ-గ్రహ-భగణ-మహాయోగినీ-రాశి-పీఠైః
షడ్భిః శ్రీమాతృకార్ణైః సహిత-బహుకలై-రష్టవాగ్దేవతాభిః ।
సశ్రీకణ్ఠాదియుగ్మై-ర్విమలనిజతనౌ కేశవాద్యైశ్చ తత్త్వైః
షట్త్రింశద్భిశ్చ తత్త్వైర్భగవతి భవతీం య స్మరేత్ స త్వమేవ ॥ ౫౧॥


సురపతిపుర-లక్ష్మీ-జృమ్భణాతీతలక్ష్మీః
ప్రభవతి నిజగేహే యస్య దైవం త్వమార్యే ।
తవ వివిధకలానాం పాత్రభూతస్య తస్య
త్రిభువనవిదితా సా జృమ్భతే కీర్తిర్రేచ్ఛా ॥ ౫౨॥


మాతస్త్వం భూర్భువఃస్వ-ర్మహరసి నృతపః-సత్యలోకైశ్చ సూర్యే-
న్ద్వారజ్ఞాచార్య-శుక్రార్కిభిరపి-నిగమబ్రహ్మభిః ప్రోతశక్తిః ।
ప్రాణాయామాదియత్నైః కలయసి సకలం మానసం ధ్యానయోగం
యేషాం తేషాం సపర్యా భవతి సురకృతా బ్రహ్మ తే జానతే చ ॥ ౫౩॥


క్వ మే బుధిర్వాచా పరమవిదుషో మన్దసరణిః
క్వ తే మాత-బ్రహ్మప్రముఖ-విదుషా-మాప్తవచసామ్ ।
ఆభూన్మే విస్ఫూర్తిః పరతర మహిమ్నస్తవ నుతిః
ప్రసిద్ధం క్షన్తవ్యం బహులతర-చాపల్యమిహ మే ॥ ౫౪॥

ప్రసీద పరదేవతే మమ హృది ప్రభూతం భయం
విధారయ దరిద్రతాం దలయ దేహి సర్వజ్ఞతామ్ ।
నిధేహి కరుణానిధే చరణపద్మయుగ్మం స్వకం
నివారయ జరామృతి త్రిపురసున్దరి శ్రీశివే ॥ ౫౫॥


ఇతి త్రిపురసున్దరీ-స్తుతిమిమాం పఠేద్యః సుధీః
స సర్వదురితాటవి-పటల-చణ్డ-దావానలః ।
భవేన్మనసి వాఞ్ఛిత-ప్రథిత-సిద్ధి-వృద్ధిర్భవేత్
అనేక-విధ-సమ్పదాం పద-మనన్తుల్యో భవేత్ ॥ ౫౬॥

పృథ్వీపాల ప్రకటముకుట స్రగ్రజో రాజితాఙ్ఘ్రిః
విద్యుత్పుఞ్జానతినుతిసమారాధితో బాధితారిః ।
విద్యాః సర్వాః కలయతి హృద వ్యాకరోతి ప్రవాచా
లోకాశ్చార్యైర్నవనవపదైరిన్దు బిమ్బ ప్రకాశైః ॥ ౫౭॥


సంగీతం గిరిజే కవిత్వసరణిం-చామ్నాయ-వాక్య-స్మృతేః
వ్యాఖ్యానం హృది తావకీన-చరణద్వన్దం చ సర్వజ్ఞతామ్ ।
శ్రద్ధాం కర్మణి కాలికేఽతివిపుల-శ్రీజృమ్భణం మన్దిరే
సౌన్దర్యం వపుషి ప్రకాశమతులం ప్రాప్నోతి విద్వాన్ కవి ॥ ౫౮॥


భూష్యం వైదుష్యముద్యద్దినకర కిరణాకరమాకారతేజః
సువ్యక్తం భక్తిమార్గం నిగమనిగదితం దుర్గమం యోగమార్గమ్ ।
ఆయుష్యం బ్రహ్మపోష్యం హరగిరివిశదాం కీర్తిమభ్యేత్య భూమౌ
దేహాన్తే బ్రహ్మపారం పరశివచరణాకరమభ్యేతి విద్వాన్ ॥ ౫౯॥

దుర్వాససా మహిత దివ్య మునీశ్వరేణ
విద్యాకలా యువతి మన్మథ-మూర్తినైతత్ ।
స్తోత్రం వ్యధాయి రుచిరం త్రిపురామ్బికాయాః
వేదాగమైక పటలీ విదితైకమూర్తేః ॥ ౬౦॥

సదసదనుగ్రహ-నిగ్రహ-గృహిత-మునివిగ్రహో భగవాన్ ।
సర్వాసాముపనిషదాం దుర్వాసా జయతి దేశికః ప్రథమః ॥ ౬౧॥

॥ ఇతి శ్రీదుర్వాససా మునీన్ద్రేణ విరచితం శ్రీశక్తిమహిమ్న స్తోత్రం సమ్పూర్ణమ్ ॥

Proofread by DPD

Please send corrections to sanskrit@cheerful.com
Last updated త్oday
http://sanskritdocuments.org

Shakti Mahimna ( Tripura Mahimna ) Stotram Lyrics in Telugu PDF
% File name : shaktitripurAmahimnastotra.itx
% Location : doc\_devii
% Language : Sanskrit
% Subject : philosophy/hinduism/religion
% Transliterated by : DPD
% Proofread by : DPD
% Latest update : April 5, 2013
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website