{॥ ಸಂವಿಚ್ಛತಕಮ್ ॥}
॥ ಅಥ ತ್ಯಾಗರಾಜವಿರಚಿತಮ್ ಸಂವಿಚ್ಛತಕಮ್ ॥
ಯಸ್ಯಾ ನಿತ್ಯಂ ಚರಣಕಮಲದ್ವನ್ದ್ವಮೈಶ್ಚರ್ಯಬೀಜಂ
ಪ್ರಧ್ಯಾಯನ್ತೋ ಹೃದಯಕಮಲೇ ಪುಣ್ಯಭಾಜೋ ಮುನೀನ್ದ್ರಾಃ ।
ನಿರ್ದ್ವನ್ದ್ವಂ ತತ್ ಸಮರಸಮಹೋ ಪ್ರಾಪ್ಯ ತಿಷ್ಠನ್ತಿ ತಸ್ಮಿನ್
ತಸ್ಯೈ ದೇವ್ಯೈ ತಪನರುಚಯೇ ತತ್ತ್ವತೋಽಸ್ತು ಪ್ರಣಾಮಃ ॥ ೧॥

ಯಾ ಕಲ್ಯಾಣಗುಣಪ್ರಸೂಃ ಪರಶಿವಾನನ್ದಾಮೃತಸ್ಯನ್ದಿನೀ
ಭೂಮಾನನ್ದಮಯೀ ಪರಾಪರಮಯೀ ತೇಜೋಮಯೀ ವಾಙ್ಗ್ಮಯೀ ।
ಆದ್ಯಾನ್ತಾರ್ಣತನೂಃ ಶಿವಾದಿವಸುಧಾನ್ತಾನ್ತಃಪ್ರಕಾಶಾತ್ಮಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨॥

ಯಸ್ಯಾಂ ಪ್ರೋತಮಿದಂ ಚತುರ್ದಶಜಗತ್ ಸೂತ್ರೇ ಮಣಿಸ್ತೋಮವದ್
ಯಸ್ಯಾಂ ಭಾತಿ ಜಡಂ ಜಡೇತರಮಿದಂ ಸ್ತಮ್ಭಾದಿವದ್ ದಾರುಣಿ ।
ಯಸ್ಯಾಂ ಪಶ್ಯತಿ ವಿಶ್ವಮಜ್ಞಹೃದಯಾಃ ಸ್ಥಾಣೌ ಪುಮಾಂಸಂ ಯಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩॥

ಮೂಲೌಡ್ಯಾಣಗಲೋಪರೋಧನಮಹಾಮುದ್ರಾಪ್ರಸನ್ನಾ ಪರಾ
ತೇಜಃಪುಞ್ಜಮಯೀ ಸದಾ ಗತಿಯುತಾ ಹಂಸೀ ಸಹಸ್ರಾರಕಮ್ ।
ಅಮ್ಭೋಜಂ ಪರಹಂಸಕೇಲಿಸದನಂ ಯಾ ಪ್ರಾಪ್ಯ ಲೇಭೇ ಮುದಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪॥

ಪ್ರಾಣಾಪಾನರವೀನ್ದುಯೋಗಪರಮಾನನ್ದಪ್ರಬುದ್ಧಾ ಸತೀ
ಸಂಸುಪ್ತಾ ಶ್ರುತಿಪತ್ರಪದ್ಮಶಯನೇ ಸೌಷುಮ್ನವೀಥ್ಯಾದ್ಯುತಮ್ ।
ವರ್ಷತ್ಯಸಭಾನಟಂ ಸಮರಸಾನನ್ದಾಮೃತಂ ಪ್ರಾಪ್ಯ ಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫॥

ಯಾ ಮಿತ್ರಾವರುಣಾಲಯಾತ್ ಸಮುದಿತಾ ತೇಜೋಮಯೀ ವಲ್ಲರೀ
ವೀಣಾದಣ್ಡತರುಶ್ರಿತಾ ಶಿವವಿಯದ್ಯಾನ್ತೀ ಸ್ವಭಾವಾತ್ ಸದಾ ।
ನಾನಾವರ್ಣಪದಾದಿಪುಷ್ಪನಿಚಯಾನ್ ಸ್ವಸ್ಮಿನ್ ಕಿರನ್ತೀಚ್ಛಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬॥

ಯಾ ಚೈಕೋತ್ತರಖಾದಿಪಞ್ಚಕಗುಣಾಕಾರಾರ್ಣಮನ್ತ್ರಾತ್ಮಿಕಾ
ಯಾ ಪೀತಾರುಣಶುಭ್ರವಿಗ್ರಹಮಯೀ ಸಂಧ್ಯಾತ್ರಯೇ ರಾಜತೇ ।
ಯಾಪ್ಯೇಕಾಕ್ಷರನಾದಸಂತತಿಸುಖೋದ್ಬೋಧೈಕಮೂರ್ತಿಃ ಪರಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭॥

ಯಾವ್ಯಕ್ತಾ ನವವಾರನಾಥಕರುಣಾಪಾಙ್ಗಾ ಪ್ರಕಾಶಾತ್ಮಿಕಾ
ನೀಲೇನ್ದೀವರಪದ್ಮಹರ್ಷಕರದೃಕ್ತತ್ತ್ವಾರ್ಣಮುಕ್ತಾವಲಿಃ ।
ಕಾಮೇಶ್ಯಾದಿಸುಧಾಂಶುಷೋಡಶಕಲಾಪೂರ್ಣಾತ್ಮವಕ್ತ್ರಾಮ್ಬುಜಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮॥

ಯಾ ಸೀಮಾ ನವಖಣ್ಡಚಕ್ರವಸುಧಾಲಂಕಾರಮೇರೋಃ ಪರಾ
ನಾನಾದೇಶಿಕಯೋಗಿನೀಮಣಿಲಸಚ್ಛುಭ್ರಾದಿವರ್ಣಾವನೇಃ ।
ಕಾಮೇಶಾಙ್ಕನಿರಭ್ರನಿರ್ಮಲಮಹಾಕಾಶಸ್ಥವಿದ್ಯುಲ್ಲತಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯॥

ಯಸ್ಯಾಃ ಪ್ರೀತಿರಹರ್ನಿಶಂ ಕುಲಗಿರಿಸ್ರೋತಃಸುಧಾಯಾಂ ಪರಾ
ನಿಷ್ಕಾಮಪ್ರಣತಾನ್ತರಙ್ಗಕುಸುಮೇ ಹ್ರೀಂಕಾರಘಣ್ಟಾಧ್ವನೌ ।
ಗನ್ಧೇಽಹಂ ಶಿವ ಏವ ನಾನ್ಯ ಇತಿ ಯೋ ದೀಪೇ ವಿಮರ್ಶಾತ್ಮಕೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೦॥

ಯಾ ಚಿತ್ರಂ ತ್ರಿಪುರಾ ಪುರಾನ್ತಕಸಮಾಶ್ಲಿಷ್ಟಾ ಪರಾ ಜ್ಯೋತಿಷಾಮ್
ಅದ್ವೈತಾಪಿ ಶಿವಾರ್ಧರ್ಮೂರ್ತಿರಮಲಾ ಪಾಶಾಪಹಾ ಪಾಶಿನೀ ।
ಪದ್ಮಾರಾಧ್ಯಪದಾರವಿನ್ದಯುಗಲಾ ಭಿಕ್ಷಾಟನೇಶಪ್ರಿಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೧॥

ಯಾ ದೂರಾ ಲಲಿತಾಪಿ ದುಷ್ಕೃತಜುಷಾಂ ಯಾ ಕೋಮಲಾಙ್ಗ್ಯದ್ರಿಜಾ
ಯಾ ನೀಲಾಮ್ಬುದಮೇಚಕಾಪಿ ಭುವನಂ ವಿದ್ಯೋತಯತ್ಯದ್ಭುತಮ್ ।
ಯಾ ಕಲ್ಯಾಣಗುಣಪ್ರವಾಹಸುಮಹಾವಾರಾಂನಿಧಿರ್ನಿರ್ಗುಣಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೨॥

ನಿಷ್ಕ್ರೋಧಾ ನತಲೋಕಮೃತ್ಯುಮಥನೇ ಯಾ ಬದ್ಧಕಚ್ಛಾ ಸದಾ
ನಿರ್ವೈರಾ ನಿಜಪೂಜನಾದಿಕೃತಿನಾಂ ದೈನ್ಯೇ ದ್ವಿಷನ್ತ್ಯದ್ಭುತಮ್ ।
ಭಕ್ತಾನಾಂ ಭಯಮೋಚಿನೀ ಭವರತಾ ಶ್ರೀಕಾಮರಾಜಾತ್ಮಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೩॥

ವಿದ್ಯಾರಣ್ಯಪುಲಿನ್ದಿಕಾ ಶ್ರುತಿಗಿರಾ ತತ್ತ್ವೋಪದೇಷ್ಟ್ರೀ ಸತಾಂ
ವಾರಾಹೀ ನಕುಲೀ ವಿಲಾಸಕುತುಕಾ ಯಾಪ್ಯುತ್ತಮಬ್ರಾಹ್ಮಣೀ ।
ಯಾ ಚಿತ್ರಂ ಸುಖಶಾನ್ತ್ಯತೀತವಸುಧಾ ಶ್ರೀಚಣ್ಡಿಕಾ ಶೂಲಿನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೪॥

ಯಾ ಶಾಲಾ ನಿಗಮಾಗಮಸ್ಮೃತಿಕಲಾಲೀಲಾತತೇಸ್ತ್ರ್ಯಕ್ಷರೀ
ಯಾ ಫಾಲಾಕ್ಷಮಹಾಸತೀ ಸ್ಮರಕಲಾಹೇಲಾ ಪರಾಪ್ಯದ್ಭುತಮ್ ।
ಯಾ ಕಾಲಾನಲಕಾನ್ತಿಮತ್ಯಪಿ ಸದಾ ನೀಲಾಲಕಾ ಶೀತಲಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೫॥

ಕಲ್ಯಾಣಾಚಲಕಾರ್ಮುಕಸ್ಯ ಮಹಿಷೀ ಪುಣ್ಡ್ರೇಕ್ಷುಚಾಪಾದ್ಭುತಂ
ಲಕ್ಷ್ಮೀವಲ್ಲಭಸಾಯಕಸ್ಯ ರಮಣೀ ಪುಷ್ಪೇಷುಹಸ್ತಾಮ್ಬುಜಾ ।
ಯಾ ರಾಮಾ ಪರಮೇಶ್ವರಸ್ಯ ಲಲಿತಾ ಲೋಕತ್ರಯೇಽತ್ಯದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೬॥

ಯಾ ವಾಚಾಮಧಿದೇವತಾಪ್ಯವಿಷಯಾ ವಾಚಾಂ ಶ್ರುತೇರ್ವರ್ಣಿತುಂ
ಶ್ರೋತ್ರಾದೀನ್ದ್ರಿಯದೇವತಾಪಿ ನ ಜಡೈಃ ಶ್ರೋತ್ರಾದಿಭಿರ್ಜ್ಞಾಯತೇ ।
ಅನ್ತಃಸ್ಥಾಮಪಿ ಯಾಂ ಪ್ರಚೋದಕತಯಾ ನೋ ಜಾನತೇ ಜನ್ತವಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೭॥

ಯಾ ವೀಣಾ ಪರಮೇಶ್ವರಾಙ್ಕನಿಲಯಾ ಹ್ರೀಂಕಾರಮನ್ತ್ರೀ ಸದಾ
ಶ್ಯಾಮಾ ಕಾಲಸುಮೂರ್ಚ್ಛನಾದಿಕಲನಾಹೀನಾಪಿ ರಾಗಿಣ್ಯಹೋ ।
ನಾಥೇನಾಹತನಾದವಿಭ್ರಮವತೀ ಸ್ಥಾಣುಂ ಶಿವಂ ಚಾಕರೋತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೮॥

ಯಾ ಮೋಹಾನ್ಧತಮೋಽಪನೋದನವಿಧೌ ಬೋಧಾತ್ಮಿಕಾ ಕೌಮುದೀ
ಸಂಸಾರಾರ್ಣವತಾರಣೇ ದೃಢತರಾ ನೌಕೇನ್ದ್ರಚಾಪಪ್ರಭಾ ।
ದಾರಿದ್ರ್ಯಾದ್ರಿವಿದಾರಣೇ ಕನಕರುಗ್ ದಮ್ಭೋಲಿರಿಚ್ಛಾತ್ಮಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೧೯॥

ಯಾ ತಾಪತ್ರಯಜಾಡ್ಯಶೋಕಶಮನೇ ಕಾಚಿನ್ನೃಣಾಂ ಸ್ವರ್ಧುನೀ
ಯಾ ಶಾನ್ತ್ಯಾದಿಗುಣಪ್ರವಾಲಮನಿಸಂವೃದ್ಧೌ ಸುಧಾಮ್ಬೋನಿಧಿಃ ।
ಪ್ರತ್ಯಗ್ದೃಷ್ಟ್ಯಸಿತಾಬ್ಜಪೋಷಣವಿಧೌ ಜಾಡ್ಯಾಪಹಾ ದೀರ್ಘಿಕಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೦॥

ಶೋಕಾರಣ್ಯಕುಠಾರಿಕಾ ಶುಭಫಲೋದ್ಯಾನಸ್ಯ ಯಾ ವಾಪಿಕಾ
ಪಾಪಕ್ಷ್ವೇಲಸುಪರ್ಣಕಲ್ಪಘುಟಿಕಾ ಪ್ರಾಜ್ಞಾಜ್ಞಯೋರಮ್ಬಿಕಾ ।
ಆಶೋಚ್ಚಾಟನಮೂಲಿಕಾ ವಿಪಣಿಕಾ ವಾಗರ್ಥವೃದ್ಧೇಃ ಕವೇಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೧॥

ಯಾ ವಾಞ್ಛಾಪರಿಪೂರಣೇ ಸುರಲತಾ ಮೋಕ್ಷೇನ್ದಿರಾ ದೇವತಾ
ಸ್ರಷ್ಟ್ರಾದೇಃ ಕುಲದೇವತಾ ಸುಚರಿತಾ ವಿದ್ಯಾಸು ಸರ್ವೋನ್ನತಾ ।
ನಿತ್ಯಾನನ್ದರತಾ ಸುಕರ್ಮಮುದಿತಾ ಲೋಕತ್ರಯಾರಾಧಿತಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೨॥

ಸಾರಾಸಾರಪಯೋವಿವೇಚನವಿಧೌ ಹಂಸೀ ಪರಂ ತು ತ್ವಿಷಾ
ಶ್ಯಾಮಾ ಮೋಹತಮೋಪನೋದನವಿಧೌ ಹಂಸಃ ಸದಾ ಭಾಸಕಃ ।
ಪ್ರಜ್ಞಾಸೌಧವಿಹಾರಿನಿಸ್ತುಲಮಹಾಜ್ಯೋತ್ಸ್ನಾ ದಿವಾಪಿ ಧ್ರುವಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೩॥

ಯಾ ಚಿನ್ತಾಮಣಿರೇವ ದೋಷಶಮನೇ ದಾನೇ ಪರಂ ತ್ವದ್ರಿಜಾ
ವಾಸನ್ತೀ ಪಿಕಸುನ್ದರೀ ಶ್ರುತಿಸುಖಾಲಾಪೇ ಸ್ವಯಂ ಪಞ್ಚಮೀ ।
ಯಾನೇ ಯೌವನಸಿನ್ಧುತೀರಕರಿಣೀ ಪದ್ಮಾಟವೀರಕ್ಷಿಣೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೪॥

ಯಾ ಶಂಭೋರ್ನಯನೋತ್ಪಲೇನ್ದುವದನಾ ಕಂದರ್ಪದೂತೀಕ್ಷಣಾ
ಚೇತಶ್ಚಾತಕನೀಲನೀರದಕಚಾಜೀವಾತುಸೀಮನ್ತಿನೀ ।
ಶೃಙ್ಗಾರಾದ್ವಯಶಾನ್ತಿಪಾಠಸುಕೃತಶ್ರೇಯಃಫಲಾಗ್ರಯಸ್ತನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೫॥

ಯಾ ತ್ರ್ಯಕ್ಷಸ್ಯ ಮನೋರಥಃ ಕಿಮು ತಪಃಪಾಕಃ ಸುಖಂ ನೈಜಕಂ
ದಕ್ಷಸ್ಯೇವ ತಪಃಫಲಂ ಕುಲಧನಂ ದೈವಂ ಹಿಮಾದ್ರೇರಪಿ ।
ಭಾಗ್ಯಂ ಭಕ್ತಜನಸ್ಯ ದೇಶಿಕದೃಶೋಃ ಶ್ಲಾಧ್ಯಂ ಕವೀನಾಂ ಗಿರಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೬॥

ಸೇತುರ್ದುಃಖಮಹೋದಧೇರ್ಮಣಿಮಯಚ್ಛಾಯಾ ವಿಭೋಸ್ತತ್ತರೋಃ
ಪಾನ್ಥಾನಾಂ ಪರಮಾರ್ಥಿನಾಂ ಪ್ರತಿಪದಂ ಕಾರುಣ್ಯಪಾಥಃಪ್ರಪಾ ।
ಸತ್ಯಾನನ್ದಚಿದನ್ನದಾನವಿಲಸಚ್ಛಾಲಾ ಚ ಕಲ್ಯಾಣಧೀಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೭॥

ಯಾ ಲೋಕತ್ರಿತಯೈಕರತ್ನಮಜಡಂ ಭಾನ್ವಿನ್ದುಭಾಶೀತಲಂ
ನಿರ್ದೋಷಂ ಗುಣವರ್ಜಿತಂ ಚ ನಿಖಿಲೈಶ್ಚರ್ಯಪ್ರದಂ ದೇಹಿನಾಮ್ ।
ಚಿತ್ರಂ ಭಿಕ್ಷುಕಸಾರ್ವಭೌಮನಿಲಯಂ ಲೋಕತ್ರಯೇ ಭಾಸತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೮॥

ಯಾಪರ್ಣಾಪ್ಯನಪಾಯಕಲ್ಪಲತಿಕಾ ಸ್ಥಾಣುಃ ಪತಿಃ ಕಲ್ಪಕೋ
ಯಸ್ಯಾ ಭಕ್ತಫಲಪ್ರಪೂರಣವಿಧೌ ಪುತ್ರೋ ವಿಶಾಖೋಽದ್ಭುತಮ್ ।
ಇತ್ಥಂ ನಿತ್ಯಕುಟುಮ್ಬಿನೀ ತ್ರಿಜಗತಾಂ ರಕ್ಷಾಕರೀ ರಾಜತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೨೯॥

ಯಾ ಪುಣ್ಯಾಶ್ರಮ ಏವ ಶಾಂಕರತಪಃಸಿದ್ಧ್ಯೈ ಮಹಾಯೋಗಿನಾಂ
ನಿರ್ವೈರೋ ಗಜಪಞ್ಚವಕ್ತ್ರಗತಿಮಧ್ಯಃ ಶಾನ್ತಿರಙ್ಗಸ್ಥಲಮ್ ।
ನಿರ್ದ್ವನ್ದ್ವಸ್ತನಚಕ್ರವಾಕಲಸಿತಃ ಕೋಕಾರಿಚೂಡಾಮಣಿಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೦॥

ಯಾ ಕೇದಾರಮಮೂಲ್ಯಮಾನಮಭಯಂ ನಿಷ್ಪಙ್ಕಮಾಶಾಸ್ಪದಂ
ಶ್ರೀಕಣ್ಠೇತರಭೋಗಬನ್ಧರಹಿತಂ ಕಲ್ಪೇ ಕದಾಪ್ಯದ್ಭುತಮ್ ।
ಪ್ರಜ್ಞಾಶಾಲಿನ ಏವ ದಿತ್ಸತಿ ಬತ ಜ್ಞಾನಾಙ್ಕುರಂ ಕಸ್ಯಚಿತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೧॥

ಯಾ ಚಿತ್ರಂ ಕರಿಣೀ ಹಿಮಾಚಲಭವಾ ತಾಮ್ರಾರವಿನ್ದೇಕ್ಷಣಾ
ಕಾನ್ತ್ಯಾ ಭರ್ತ್ಸಯತೀ ವರಂ ಮರತಕಂ ಪಾಶಾಙ್ಕುಶೋಕ್ಷ್ವನ್ವಿತಾ ।
ಪಞ್ಚಾಸ್ಯಪ್ರಭುಮಞ್ಚಕೋಪರಿ ವಸತ್ಯಾನನ್ದಪುರ್ಯಾಂ ಮುದಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೨॥

ಏಣಾಙ್ಕಾರ್ಭಕಮಾತ್ಮಕುನ್ತಲತಮೋರಾತ್ರ್ಯಾಮಪಿ ದ್ಯೋತಯ-
ತ್ಯಾಶ್ಚರ್ಯಂ ಯಮಿನಾಂ ಕಟಾಕ್ಷಯಮುನಾಕಲ್ಲೋಲಮಾಲಾಂ ಚ ಯಾ ।
ನಿತ್ಯಂ ವಕ್ತ್ರಶಶಾಙ್ಕಮನ್ದಹಸಿತಜ್ಯೋತ್ಸ್ನಾಂ ಕೃಪಾಯಾಂ ಗುರೋಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೩॥

ಯಾ ದೃಷ್ಟಿಃ ಶ್ರುತಿಮೂಲಶೀಲನಪರಾ ನೀಲಾಞ್ಜನಾದ್ರಿಶ್ರಿಯಂ
ಸ್ವಾತ್ಮಸ್ಮೇರಪಯೋದಧೌ ಸಹಭವಂ ಶ್ರೀವಲ್ಲಭಂ ತನ್ವತೀ ।
ವಾತ್ಸಲ್ಯಾನ್ನತಲೋಕಮೋಹಿತಿಮಿರಂ ಚಿತ್ರಂ ಧುನೀತೇ ಚ ಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೪॥

ಯಾ ಕಾರುಣ್ಯಕಟಾಕ್ಷನೀಲವನಜದ್ವೇಷ್ಯಾತ್ಮಜಾಮ್ಭಃಸ್ವಹೋ
ಮುಗ್ಧಸ್ನಿಗ್ಧಮೃದುಸ್ಮಿತಾಮರಧುನೀವೀಚೀವಿಲಾಸಾಶ್ರಿತೇ ।
ಸುಸ್ನಾತಂ ನಿಜಪಾದಪಙ್ಕಜರಜಃಸಿಕ್ತಂ ಬತ ವ್ಯಾತನೋತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೫॥

ಶ್ರೀಕಣ್ಠಾರ್ಧಶರೀರಿಣೀ ಧ್ರುವಮಪಿ ಶ್ರೀಕಾನ್ತಸೋದರ್ಯಹೋ
ನಾರಾಯಣ್ಯಪಿ ಸರ್ವದಾ ಕುಲನಗೋತ್ತಂಸಾತ್ಮಜಾತ್ಯದ್ಭುತಮ್ ।
ಪ್ರಾಲೇಯಾಚಲಕನ್ಯಕಾಪಿ ಸಕಲಾಹಂರೂಪಿಣೀ ಯಾದ್ಭುತಮ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೬॥

ಆನಙ್ಗಸ್ಮೃತಿಸಂಪ್ರದಾಯಮಖಿಲಂ ಸ್ವಾಪಾಙ್ಗಶಿಷ್ಯೇಣ ಯಾ
ಕಾಮದ್ರೋಹಿಣಮೇವ ಶಿಕ್ಷಯತಿ ಹಾ ಲೋಕೋತ್ತರಾತ್ಯದ್ಭುತಮ್ ।
ತೇನೈವಾತ್ಮಪದಾರವಿನ್ದರಸಪಾನೋಥಂ ತ್ರಿಲೋಕೇಽನ್ಯಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೭॥

ಬನ್ಧೂಕಸ್ತಬಕಂ ರುಚಾ ಪರಿಹಸತ್ಯಮ್ಭೋಜಮಪ್ಯದ್ಭುತಂ
ಕರ್ಣಾಸ್ಯೇಕ್ಷಣಪಾಣಿನಾ ವನಚರಂ ಮಧ್ಯೇನ ವಕ್ಷೋರುಹಾ ।
ಗತ್ಯಾ ಸ್ವಾದುಗಿರಾ ಸುಧಾಕರಕಲೋತ್ತಂಸೈಶ್ಚ ನೀಲಾಲಕೈಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೮॥

ನಿಃಸ್ಪನ್ದಂ ನಿಗಮಾಗಮಾದ್ಯವಿಷಯಂ ಶ್ರೋತ್ರಾದಿಹೀನಂ ಪರಂ
ನಿಃಶಬ್ದಂ ತದಹೋ ಪುಮಾಂಸಮಕರೋತ್ ಕಾಮೇಶ ಇತ್ಯಾಖ್ಯಯಾ ।
ಯಾ ಚಿತ್ರಂ ನಿಜದಾಸಮಚ್ಛಹೃದಯಂ ಶಕ್ತ್ಯಾ ತನೋತ್ಯನ್ಯಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೩೯॥

ವಾಗರ್ಥೇನ ಯಥಾ ಯುತಾಪಿ ಪರಮಾನನ್ದಾತ್ಮನಾ ಶೂಲಿನಾ
ನಿತ್ಯಂ ಯಾ ವಿಹರತ್ಯಹೋ ಜನಮನೋಗೇಹೇಷು ಮುಗ್ಧೇಷು ಹಾ ।
ನಿರ್ಭೀತಾ ಕುಲಟೇವ ಕರ್ಮ ಕುರುತೇ ಸರ್ವೇನ್ದ್ರಿಯಾಣಾಂ ಸದಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೦॥

ನಾಸಾಮೌಕ್ತಿಕದೈತ್ಯದೇಶಿಕಮಹೋ ಮನ್ದಸ್ಮಿತೈಃ ಪುಷ್ಣತೀ
ತಾಟಙ್ಕದ್ಯುತಿಭಿರ್ದಿನೇಶಶಶಿನೌ ದೇವೌ ತಿರಸ್ಕುರ್ವತೀ ।
ಮಾರಾರೇರ್ಗುಹಮೇಧಿನೀ ಮನಸಿಜಂ ರಕ್ಷತ್ಯಪಾಙ್ಗೋಟಜೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೧॥

ಬನ್ಧಚ್ಛೇದವಿಚಕ್ಷಣಾ ಪಶುಜನಸ್ತೋಮಾತಿದೂರಾದ್ಭುತಂ
ಯಾ ರಕ್ಷತ್ಯಗರಾಜಶೇಖರಸುತಾಪ್ಯಾಮ್ನಾಯಸೂತ್ರೈರ್ದೃಢಮ್ ।
ಬದ್ಧ್ವಾ ದೇವಪಶೂನ್ ಸದಾ ಪಶುಪತೇಃ ಸಂಸರ್ಗದೋಷೇಣ ಹಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೨॥

ಧಾರಾ ದೇಶಿಕದಿವ್ಯದೃಷ್ಟಿಮಧುನೋ ಮಾರಾರಿನೇತ್ರಾಮೃತಂ
ಧಾರಾ ದುರ್ಮತದಾರುದಾರಿಪರಶೋಸ್ತಾರಾವಲಿರ್ಯೋಗಿನಾಮ್ ।
ತೀರಂ ಮನ್ತ್ರಮಹೋದಧೇಃ ಕವಿಗಿರಾಂ ಪೂರಃ ಸುಖಾಮ್ಭೋನಿಧೇಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೩॥

ಕಾಮಾಕ್ಷೀತಿ ವದನ್ತಿ ಕೇಚನ ಬುಧಾಃ ಕಾಮೇಶ್ವರೀತ್ಯದ್ಭುತಂ
ರಾಮಾಸ್ತೋಮಶಿರೋಮಣೀತಿ ಮದನಾರಾತೇರ್ದೃಶೋಃ ಪಾರಣಾ ।
ಸೀಮಾ ಭೂಮಸುಖಸ್ಯ ಚಿನ್ಮಯಕಲಾ ಶೃಙ್ಗಾರಮೂರ್ತಿಶ್ಚ ಯಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೪॥

ಮುಗ್ಧಸ್ನಿಗ್ಧಕಟಾಕ್ಷಮಿತ್ರತನಯಾ ಯಸ್ಯಾಃ ಸದಾನನ್ದಿನೀ
ಮನ್ದಸ್ಮೇರಪಯೋನಿಧಿಂ ನಿಜಪತಿಂ ಸಂಗಮ್ಯ ವಾಣೀಶ್ರಿಯಃ ।
ಸಂಸೂಯ ಪ್ರದದಾತ್ಯಯಾಚಿತತತ್ಯಾ ಭಕ್ತೇಭ್ಯ ಏವಾದರಾತ್
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೫॥

ಔನ್ನತ್ಯಂ ಮುಹುರೇತಿ ಚಿತ್ರಮಮರಶ್ರೇಣೀಷು ಯದ್ಯೋಗತೋ
ದಕ್ಷದ್ವೇಷ್ಯಪಿ ಭಿಕ್ಷುಕೋಽಪಿ ವಿಷಮಾಕ್ಷೋಽಪ್ಯುಕ್ಷಯಾನೋಽಪಿ ವಾ ।
ಅಜ್ಞಾತಾನ್ವಯಸಂಭವೋಽಪಿ ನಿಗಮಾತೀತೋಽಪಿ ಲುಬ್ಧಸ್ತಥಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೬॥

ಯಾ ಲೋಕೈಕಸುಮಙ್ಗಲಾ ಸ್ಮರಕಲಾ ನೀಲಾಮ್ಬುದಶ್ಯಾಮಲಾ
ಡೋಲಾ ಶಂಕರಲೋಚನದ್ವಯಶಿಶೋರ್ಮಾಲಾಷ್ಟಸಿದ್ಧಿಶ್ರಿಯಾಮ್ ।
ಕಾಲಾತೀತಕಲಾ ಕಲಾನಿಧಿಕಲೋತ್ತಂಸಾತುಲಾ ನಿರ್ಮಲಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೭॥

ಅಸ್ತಂ ಯಾ ನಲಿನೇಕ್ಷಣೇನ ನಯತಿ ಕ್ಷೋಭಾತಪಂ ಯೋಗಿನಾಂ
ಸ್ವಾನನ್ದಾಮೃತಚನ್ದ್ರಿಕಾಂ ಕರುಣಯಾ ನಿತ್ಯಂ ತನೋತ್ಯದ್ಭುತಮ್ ।
ವರ್ಷತ್ಯಾನನಪಙ್ಕಜೇ ಸುಕವಿತಾಪೀಯೂಷಧಾರಾಃ ಕವೇಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೮॥

ಯಾ ವಿದ್ಯುತ್ಕಮಲೇಷು ತಿಷ್ಠತಿ ಪರಾ ತಾಪಿಞ್ಛಗುಚ್ಛಚ್ಛವಿ-
ಶ್ಚಿತಂ ಪ್ರಾಣಭೃತಾಂ ದೃಶೋಃ ಸುಖಕರೀ ಭೀಮಪ್ರಕಾಶಿನ್ಯಲಮ್ ।
ಜ್ಯೋತಿಃ ಶೀತಲಭೂಭೃತಸ್ತ್ರಿಭುವನಕ್ಷೇಮಪ್ರವಾಹಪ್ರದಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೪೯॥

ಯಾ ಕಾಚಿದ್ಧರಿಣೀ ಮರಾಲಗಮನಾ ಚಿದ್ವ್ಯೋಮಸಂಚಾರಿಣೀ
ಹ್ರೀಂಕಾರಸ್ವನಸಂತತೇಃ ಪರವಶಾ ಹೃದ್ಯಾನವದ್ಯಾ ದೃಶಾಮ್ ।
ಅಸ್ತ್ರೈವ್ಯಾರ್ಧವರಂ ಪಿನಾಕಿನಮಹೋ ಸಂಮೋಹಯನ್ತ್ಯನ್ವಹಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೦॥

ಧೇನುರ್ಯಾ ಪರಮಾತ್ಮನಃ ಪಶುಪತೇಃ ಸರ್ವಜ್ಞತಾದೋಹಿನೀ
ಚಿತ್ರಂ ಷಣ್ಮುಖವಕ್ರತುಣ್ಡಜನನೀ ಪ್ರಾಲೇಯಶೈಲಾತ್ಮಜಾ ।
ನಿರ್ನಿದ್ರಾಮಲಪುಣ್ಡರೀಕನಯನಾ ಶುಭ್ರಾಂಶುಚೂಡಾಮಣಿಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೧॥

ಯಾಂ ದಣ್ಡಂ ವರವಿದ್ರುಮಾತ್ಮಕಮತಿಶ್ಲಕ್ಷಣಂ ಸುಸೂಕ್ಷ್ಮಂ ಧ್ರುವಂ
ಗಾಢಂ ನಿರ್ವಿಷಯಾಃ ಪುರಾಣಪುರುಷಾ ಆಲಮ್ಬ್ಯ ಗಚ್ಛನ್ತ್ಯಹೋ ।
ತೀರ್ತ್ವಾ ದುಸ್ತರಜನ್ಮಪಙ್ಕನಿಬಿಡಂ ಮಾಯಾಮಹೀಮಣ್ಡಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೨॥

ಯಾ ಕುಮ್ಭೋದ್ಭವ ಏವ ಮನ್ಮಥರಿಪೋರ್ಧೈರ್ಯಾಮ್ಬುಧೇಃ ಪ್ರಾಶನೇ
ಪ್ರಾರಬ್ಧಾತ್ಮಕವಿನ್ಧ್ಯಭೂಧರಗತಿಧ್ವಂಸೇ ತಥಾ ಧೀಮತಾಮ್ ।
ಆಚಾರ್ಯಃ ಶಿವಬೋಧನೇ ನಿಜಪತೇರಾನಙ್ಗದೀಕ್ಷಾಕ್ರಮೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೩॥

ಯಾ ಕ್ಷೀರಾಬ್ಧಿಸಹೋದರಸ್ಮಿತರುಚಾ ಕಮ್ಬುಂ ತಿರಸ್ಕುರ್ವತೀ
ಕಾಮಾರೇರ್ಹೃದಯಂ ವಿಶುದ್ಧಮಪಿ ಸಂಮುಗ್ಧಂ ಕರೋತ್ಯನ್ವಹಮ್ ।
ಆಶ್ಚರ್ಯಾಂ ನಮತಾಂ ಧುನೋತಿ ತಿಮಿರಂ ಸ್ವಾಜ್ಞಾನರೂಪಂ ಪರಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೪॥

ಯಸ್ಯಾ ಹಾಸಮರಾಲಿಕಾಮೃದುಗತಿಃ ಶ್ರೀಕಾಮಜೇತ್ರೇ ಮುದಾ
ವಿದ್ಯಾಂ ಬೋಧಯಿತುಂ ಪರಾಂ ವಿತನುತೇಽಪಾಙ್ಗಾರ್ಕಜಾತೋರ್ಮಿಷು ।
ಸ್ಥಿತ್ವಾ ಶ್ರೌತಪಥಸ್ಥಕುಣ್ಡಲಯುಗೇನಾಲೋಚನಾಸಂತತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೫॥

ಯಸ್ಯಾ ವೀಕ್ಷಣಶಕ್ರಮೇಚಕಮಣೀಸಾಮ್ರಾಜ್ಯಸಿಂಹಾಸನಂ
ಶ್ರಿತ್ವಾ ಪುಷ್ಪಶರಪ್ರಭುರ್ವಿಜಯತೇ ತ್ರ್ಯಕ್ಷಸ್ಯ ಪಾರ್ಶ್ವೇಽದ್ಭುತಮ್ ।
ಪೀಯೂಷಾರ್ಣವಫೇನಜೇತೃಸಹಿತಶ್ರೀಚಾಮರಾಸೇವಿತಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೬॥

ನೀಹಾರಾದ್ರಿಯಶೋಽಭಿವರ್ಧನಪರೇ ಕುಞ್ಜೇ ಕಟಾಕ್ಷಾತ್ಮಕೇ
ಯಸ್ಯಾಃ ಕ್ರೀಡತಿ ನೀಲಕಣ್ಠವಿಮಲಪ್ರಜ್ಞಾಮಯೂರಾರ್ಭಕಃ ।
ಪಶ್ಯನ್ ನಿತ್ಯಸುಗನ್ಧಿಕುನ್ತಲಮಯೀಂ ಕಾದಮ್ಬಿನೀಂ ಸಂತತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೭॥

ಯಾ ಹಾಸಾರ್ಜುನಭೂಭೃತಾ ಸುಖಯತಿ ದ್ರಾಗ್ ಭೀಮಚಿತ್ತಂ ಪರಂ
ಧರ್ಮಂ ಪಾಲಯತಿ ಪ್ರವೇಶಯತಿ ವೈವರ್ಣೇಽನುಕೂಲಾಂ ಗತಿಮ್ ।
ಮಾಲಿನ್ಯಂ ನಯತೇತರಾಂ ಧ್ರುವಮಹೋ ತದ್ಧಾರ್ತರಾಷ್ಟ್ರಂ ಕುಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೮॥

ಯಾ ಮುಕ್ತಾಫಲಮದ್ಭುತಂ ಗಿರಿಭವಂ ಶ್ಯಾಮಂ ಪ್ರಕಾಶಾಸ್ಪದಂ
ಸತ್ಸೂತ್ರಂ ಸಕಲಾರ್ಥದಂ ಶಶಿಕಲಾಚೂಡಂ ತ್ರಿಣೇತ್ರಂ ಚರಮ್ ।
ನಿರ್ದೋಷಂಭವಕೌತುಕಪ್ರದಮನಾದ್ಯನ್ತಂ ಪರಂ ನಿಸ್ತುಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೫೯॥

ಯಾ ವಾಪೀ ಭುವನಪ್ರದಾ ರಸಮಯೀ ತೃಷ್ಣಾರ್ದಿತಾನಾಂ ಪರಂ
ನಿಷ್ಪಾಶಾಭಿಗತಾಭಿಮಾನಮಮತಾಪಾಶಾಭಿಲಾಷಾನ್ವಿತಾ ।
ಸತ್ಪಾತ್ರೇ ಫಲದಾಯಿನೀ ಸ್ಮೃತಿಮತಾಂ ತಾಪತ್ರಯಧ್ವಂಸಿನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೦॥

ಶೃಙ್ಗಾರಾಮ್ಬುಧವೀಚಿವಿಭ್ರಮವತೀ ಶೃಙ್ಗಾರಬೀಜಾನಿಲ-
ವ್ಯಾಲೋಲಾ ಕುಮುದಪ್ರಿಯಧ್ವಜಪಟೀ ಪ್ರತ್ಯಕ್ಚರೀ ಪಾರ್ವತೀ ।
ದ್ರೋಣೀ ಯಾ ವಿಷಮೇಕ್ಷಣಾನುಸರಣೀ ಚಿತ್ರಂ ಸದಾ ರಾಜತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೧॥

ಯಸ್ಯಾ ನೀರದಭಾಃ ಕಟಾಕ್ಷಯದುಪಃ ಕರ್ಣಾನುವೃತ್ತೋಽದ್ಭುತಂ
ದೀವ್ಯತ್ಕುಣ್ಡಲಹಾಸಚಕ್ರಜಲಜಶ್ಲಿಷ್ಟಃ ಕೃಪಾನೀರದಃ ।
ಸ್ಥಾನೋರ್ಗೋಕುಲಮನ್ವಹಂ ನಯತಿ ತದ್ವಕ್ಷೋಜಶೈಲಾನ್ತರಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೨॥

ಯಾ ಚಿತ್ರಂ ಮಹತೀಂ ಮಹಾಗುಣವತೀಮಪ್ಯಶ್ರಿತಂ ಸಂತತಂ
ಕಾಠಿನ್ಯಂ ನ ವಿಮುಞ್ಚತಿ ಸ್ತನಯುಗಂ ಮಾನ್ದ್ಯಂ ಗತಿಃ ಕುನ್ತಲಾಃ ।
ಕೌಟಿಲ್ಯಂ ನಯನಾಮ್ಬುಜಂ ಚಪಲತಾಂ ಬಿಮ್ಬಾಧರೋ ರಾಗಿತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೩॥

ಯಾ ಮನ್ದಸ್ಮಿತಕೌಮುದೀಂ ವಿತನುತೇ ನಿತ್ಯೋದಿತೇ ಸರ್ವತ-
ಸ್ತಾಟಙ್ಕಾತ್ಮನಿ ಭಾಸ್ಕರೇ ಸ್ವಯಮಹೋ ಕಾಲಾಮ್ಬುದಶ್ಯಾಮಲಾ ।
ಬಿಮ್ಬೋಷ್ಠದ್ಯುತಿಸಂಧ್ಯಯಾ ದ್ವಿಜಗಣೇ ಶ್ರೀಶಾಂಭವೇ ರಾಗಿತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೪॥

ಜಾರೇ ಮಾರಕಿರಾತಜೀವನಕರೇ ಚಿತ್ರಂ ಕಟಾಕ್ಷಾತ್ಮಕೇ
ಯಸ್ಯಾಃ ಕುಣ್ಡಲರಶ್ಮಿವೇಣುಕಲಿತೇ ಲಗ್ನಾ ಸುಖಂ ರಾಜತೇ ।
ಕಾಮಾರೇರ್ಮತಿಶಾರಿಕಾ ಶ್ರುತಿಶಿರೋದ್ಯಾನಾನ್ತರೋಲ್ಲಾಸಿನೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೫॥

ನಿತ್ಯಂ ಸೋಮಕಲಾಧರೋಽಧ್ವರಪತಿರ್ವ್ಯಾಘ್ರಾಜಿನಾಲಂಕೃತ-
ಸ್ತಾಟಙ್ಕದ್ಯುತಿವಹ್ನಿವೀಕ್ಷಣಶಿಖಾಧೂಮಾತಿಲೋಲೇಕ್ಷಣಃ ।
ಯಸ್ಯಾ ಹಾಸಪಯೋನಿಧಾವವಭೃಥವ್ಯಾಜೇನ ಮಜ್ಜತ್ಯಹೋ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೬॥

ಯಸ್ಯಾಃ ಕಾಪಿ ದಯಾತ್ಮಿಕಾ ಪ್ರತಿದಿನಂ ಶೈಲೂಷಬಾಲಾದ್ಭುತಂ
ನೀರಾಗಾಲಯಕಾಲವರ್ಜಿತವತೀ ನಿರ್ಮೂರ್ಚ್ಛನಾ ಕಾಮನಾ ।
ನಿರ್ಲಜ್ಜೈವ ದಿಗಮ್ಬರಾ ನಟತಿ ಹಾ ಸಂಮೋಹಶಾನ್ತ್ಯೈ ನೃಣಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೭॥

ಮಾಙ್ಗಲ್ಯಂ ಹರಿನೀಲಕಾನ್ತಿಸುಗುಣಂ ಶ್ಲಾಧ್ಯಂ ಸುರಸ್ತ್ರೀಜನೈ-
ರ್ಯಸ್ಯಾ ಮಞ್ಜುಲವೀಕ್ಷಣಂ ಸ್ಮರಹಾರಾಜಸ್ಯ ದೇವ್ಯಾ ರತೇಃ ।
ಓಷ್ಠಶೀರ್ವರಕುಙ್ಕುಮಂ ಸ್ಮಿತಮಹೋ ಸ್ರಙ್ಮಾಧವೀ ಶಾಶ್ವತೀ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೮॥

ಚಿತ್ರಂ ಕಾಪಿ ಸುಧಾ ಶಿವೇತರಸುರಾಲಭ್ಯಾ ಹಿಮಾದ್ರ್ಯುದ್ಭವಾ
ದ್ರುಹ್ಯನ್ತೀ ಕುರುವಿನ್ದಮಾತ್ಮರುಚಿಭಿರ್ದೋಷಾಕರೋತ್ತಂಸಿನೀ ।
ಆಸ್ತೇ ಯಾ ಮದನಜ್ವರಂ ಶಶಿಭೃತಃ ಸಂಧುಕ್ಷಯನ್ತ್ಯನ್ವಹಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೬೯॥

ಅರ್ಧಂ ರಾಜ್ಯಮನನ್ಯಸಾಧ್ಯಮಖಿಲೈಶ್ಚರ್ಯಪ್ರದಂ ಶೂಲಿನಃ
ಶುದ್ಧಂ ಮೂರ್ತಿಮಯಂ ಯಯಾತಿವಿನಯೈಃ ಪ್ರಾಪ್ತಂ ತದನ್ಯತ್ ಪುನಃ ।
ವ್ಯಾಪ್ತುಂ ವಾಞ್ಛತಿ ಗಾರುಡೋಪಲವಪುಃ ಕಾನ್ತ್ಯಾ ಮಹತ್ಯಾ ಪರಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೦॥

ಅರ್ಧಂ ಸೋಮಕಲಾಧರೀ ಶಶಿಕಲಾಚೂಡಸ್ಯ ಯಾ ತ್ರ್ಯಮ್ಬಕ-
ಸ್ತ್ರ್ಯಕ್ಷಾಯಾ ಅಥವಾ ಸನಾತನತನೂ ಜಾಯಾಪತೀ ಶಾಶ್ವತೌ ।
ಏಕಂ ವೇತ್ಯವಧಾರಿತುಂ ಮುನಿವರಾ ಅದ್ಯಾಪ್ಯಲಂ ನಾದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೧॥

ದಾರಿದ್ರ್ಯಾಸ್ತಧರಾಧರೋಽಪಿ ಪರಮಂ ಭದ್ರೋದಯೋಽತ್ಯದ್ಭುತಂ
ಪಾಪಾರಣ್ಯದವಾನಲೋಽಪಿ ನಮತಾಂ ಕಾರುಣ್ಯಧಾರಾಧರಃ ।
ಯಾ ದುಹ್ಖಾಮ್ಬುದಮಾಲಿಕಾಪವನರಾಣ್ನೈಶ್ಚಲ್ಯರೂಪಾಸ್ತಿ ವೈ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೨॥

ಶ್ರೌತಂ ಮಾರ್ಗಮತೀತ್ಯ ಗಚ್ಛತಿ ಮುದಾ ಕಾಪಾಲಿಕಂ ದೃಕ್ ಪರಂ
ಮಧ್ಯಃ ಶೂನ್ಯಮತಂ ಗತೋಽತಿವಿಮಲೇ ದ್ವನ್ದ್ವೇ ಕುಚೌ ದ್ವೈತಿನೌ ।
ಸೌರೇ ಕುಣ್ಡಲಯುಗ್ಮಮಾತ್ಮರುಚಿಭಿರ್ಯಸ್ಯಾಃ ಕೃಪಾ ಶಾಂಭವೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೩॥

ವಲ್ಲೀ ಕಾಪಿ ಶಿವಾಙ್ಕಣೇ ಲಸತಿ ಯಾ ಮನ್ದಸ್ಮಿತೈಃ ಪುಷ್ಪಿತಾ
ತಾಮ್ಬೂಲೇನ ಸುಗನ್ಧಿತಾ ಸುಫಲಿತಾ ವಕ್ಷೋರುಹಾಭ್ಯಾಂ ಪರಮ್ ।
ಕಾನ್ತ್ಯಾ ಪಲ್ಲವಿತಾ ಕಚೈರ್ಭ್ರಮರಿತಾ ದೃಗ್ಭ್ಯಾಂ ಪರಂ ಪತ್ರಿತಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೪॥

ಯಸ್ಯಾ ವೀಕ್ಷಣದೇಶಿಕಃ ಶ್ರುತಿಗತಿಸ್ತೇಜೋಮಯಃ ಸರ್ವವಿತ್
ಸಂತುಷ್ಟೋ ಜಿತಕಾಮಶತ್ರುರಣಿಮಾದ್ಯಷ್ಟಾಭಿರಾರಾಧಿತಾ ।
ಸಚ್ಚಿತ್ಸೌಖ್ಯರತಃ ಶಿವಂ ನಟಮಪಿ ಕ್ಷಿಪ್ರಂ ಕರೋತ್ಯದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೫॥

ಯಸ್ಯಾಶ್ಚಾರುಕಪೋಲದರ್ಪಣತಲೇ ದೃಷ್ಟ್ವಾ ಕಪರ್ದೀ ರುಷಾ
ಭೀತೋ ಜಹ್ನುಸುತಾಂ ಮೃದುಸ್ಮಿತಮಯೀಂ ಸಂಕೇತಮಿತ್ಥಂ ವ್ಯಧಾತ್ ।
ಮುಗ್ಧೇ ಗಚ್ಛ ನಿಜಸ್ಥಲಂ ದ್ರುತತರ್ಂ ಜಾಗರ್ತಿ ದೃಷ್ಟಿರ್ಯತಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೬॥

ಶೃಙ್ಗಾರೈಕರಸಂ ವಸನ್ತಸುಹೃದಂ ಕಂದರ್ಪದರ್ಪಪ್ರದಂ
ಚಿತ್ರಂ ಕೋಕನದಪ್ರಬೋಧನಕರಂ ಚನ್ದ್ರೋದಯಂ ಶ್ರೀಕರಮ್ ।
ಯಸ್ಯಾ ಹಾಸಮಯಂ ಚಿರಮಪ್ಯಾಸ್ತೇ ಪುರಾಣಃ ಶಿವಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೭॥

ಯಾ ಕಾಚಿತ್ ಪಿಕಕಾಮಿನೀ ಶ್ರುತಿಗತಿಃ ಸಪ್ತಸ್ವರಾಲಾಪಿನೀ
ನಿತ್ಯಂ ಮಾಧವಬೋಧಿನೀ ತ್ರಿಭುವನೇ ನಿಷ್ಪಕ್ಷಪಾತಾ ಸುಖಮ್ ।
ಚಿತ್ರಂ ಚೂತನವಪ್ರಸೂನವಿಶಿಖದ್ವೇಷ್ಯಾಶ್ರಯೇ ರಾಜತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೮॥

ಯಸ್ಯಾ ವೀಕ್ಷಣಮಾನ್ತ್ರಿಕಃ ಸುಕೃತಿನಾಮಗ್ರೇಸರಃ ಶಂಕರೀ-
ಮನ್ತ್ರಾಮ್ಭೋನಿಧಿಪಾರಗಃ ಸ್ಮಿತವಿಭೂತ್ಯೋಚ್ಚಾಲಯನ್ ಸರ್ವದಾ ।
ದ್ವೇಷಂ ಶಂಕರಕರ್ತೃಕಂ ಸುಮಶರೇ ವಿಭ್ರಾಜತೇ ಶಾಶ್ವತಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೭೯॥

ಯಸ್ಯಾ ದೃಗ್ರಮಣೀಮಣಿರ್ವಿವದತೇ ಕಾಮಾರಿಸಲ್ಲಾಪನೇ
ಸ್ವಾಧೀನಪ್ರಿಯಯಾ ಮೃದುಸ್ಮಿತಶರೀರಿಣ್ಯಾ ಪರಂ ಗಙ್ಗಯಾ ।
ಆದ್ಯಾಹಂಶ್ರುತಿಮೂಲಗಾಧರಭವಾ ತ್ವಂ ಸ್ವೀಕೃತೇತಿ ಧ್ರುವಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೦॥

ಯಾ ಕಾಚಿದ್ ಭುಜಗೀ ಸದಾ ಸರಲಗಾ ಪೀಯೂಷದಾಯಿನ್ಯಹೋ
ಪದ್ಮಾರಣ್ಯವಿಹಾರಿಣೀ ಶ್ರುತಿಮತೀ ತೇಜಸ್ತನೂರ್ನಿರ್ಭಯಾ ।
ಜನ್ಮಾಬ್ಧಿಪ್ಲವವರ್ಧಿನೀ ವಶಯತಿ ಶ್ರೀನೀಲಕಣ್ಠಂ ದೃಶಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೧॥

ಆಸ್ಯಾಮ್ಭೋಜಭವಾ ಪತಿಂ ನಿಜಮನಾದ್ಯನ್ತಂ ಕಟಾಕ್ಷಾತ್ಮಕಂ
ಪೃಚ್ಛನ್ತೀತಿ ಪಯೋನಿಧೇಃ ಸ್ಮಿತಮಯಾನ್ಮಜ್ಜನ್ಮ ಕಿಂ ವಾಮ್ಬುಜಾತ್ ।
ಯಸ್ಯಾ ನಿಃಸ್ಮರಸಂಪದಂ ಸುಧನಿಕಂ ಕರ್ತುಂ ಶಿವಂ ಕಾಙ್ಕ್ಷತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೨॥

ಯಸ್ಯಾಃ ಪಾಣಿಪರಿಗ್ರಹೇ ಮೃದುತನೋರ್ಹೇಮಾದ್ರಿಧನ್ವಾ ಶಿವಃ
ಪಾದಾನ್ಯಾಸವಿಧೌ ದೃಷದ್ಯಪಿ ಸುರಸ್ತ್ರೀಣಾಂ ಪುರೋ ಲಜ್ಜಿತಃ ।
ಮನ್ದಾಕ್ಷಂ ಗತವಾನನಙ್ಗಕಲಿಕಾಂ ಯಾಂ ವೀಕ್ಷಿತುಂ ನಾದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೩॥

ಯಸ್ಯಾಃ ಪಾದಕೇಶಶಯಶ್ರಿಯಮಹೋ ಶ್ರುತ್ವಾನಿಲಾದನ್ವಹಂ
ಗಾಙ್ಗಾನ್ಯಮ್ಬುರುಹಾಣಿ ಹನ್ತ ಕತಿಚಿತ್ ಪ್ರಾಪ್ತುಂ ಪರಾಂ ತಾಂ ದ್ರುತಮ್ ।
ಪೀತ್ವಾ ಕ್ಷೀರಲವಂ ತಪನ್ತಿ ತಪನಂ ಪಶ್ಯನ್ತಿ ಮಜ್ಜನ್ತ್ಯಲಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೪॥

ನಿತ್ಯಂ ಸಂಧಿಮಪೇಕ್ಷತೇ ಸುಚರಿತಾ ದೂತೀ ಕಟಾಕ್ಷಾತ್ಮಿಕಾ
ರಾಜಸ್ಯಾಧರರಾಮಯಾಪಿ ನ ತಯಾ ಗರ್ಭೇ ವಹನ್ತ್ಯಾಮೃತಮ್ ।
ಕಾಮಾರೇ ರತಿಸಾತ್ತ್ವಿಕದ್ವಿಜಮಣೇರ್ಮೋದಾಯ ಸುಶ್ರೇಯಸೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೫॥

ಪಕ್ಷೇ ಶೈವಮನೋಮಹೀಭೃತಿ ಮನೋಜಾಗ್ನಿಂ ಧ್ರುವಂ ಸಾಧಯನ್
ಯಸ್ಯಾ ಮಞ್ಜುಕಟಾಕ್ಷಧೂಮಶಿಶುನಾ ಶ್ರೌತೇನ ಸದ್ಧೇತುನಾ ।
ಓಷ್ಠದ್ವನ್ದ್ವಸಭಾನ್ತರೇ ಸ್ಮಿತಮಯೋ ನೈಯಾಯಿಕೋ ಭಾಸತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೬॥

ಯಾ ಪದ್ಮಂ ಹಿಮಶೈಲಜಂ ಮರತಕಂ ಭಾಸಾ ಭೃಶಂ ಭರ್ತ್ಸಯತ್
ಕಂದರ್ಪಸ್ಯ ಜ್ಯೇನ್ದಿರಾಜನಿಗೃಹಂ ನಿರ್ಹೇತುಕೋತ್ಫುಲ್ಲನಮ್ ।
ಸ್ಥಾಣೋರ್ಲೋಚನಭೃಙ್ಗಸಂಭ್ರಮಕರಂ ಶೀತಾಂಶುಲೇಖಾಙ್ಕಿತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೭॥

ಯಸ್ಯಾ ಮನ್ದಗತಿಃ ಪರಂ ಶುಭಗತಿಃ ಕಾಮಸ್ಯ ಕಾಮದ್ರುಹಃ
ಕಾಮೋದ್ರೇಕಗತಿಶ್ಚಿರಂ ಭಜನಕೃದ್ಧಂಸಾಙ್ಗನಾಸಂತತೇಃ ।
ಕಾಮಂ ದತ್ತಗತಿಃ ಸದಾ ವಿಜಯತೇ ಹಂಸಾತ್ಮಿಕಾ ಯೋಗಿನಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೮॥

ನಿಃಸ್ನೇಹಾಪಿ ಶಿವಾತಿರಾಗಕಲಿತಾ ಯಾ ದೀಪಿಕಾ ಕಾಪ್ಯಹೋ
ಝಞ್ಝಾಮಾರುತಭೀತಿದಾಪಿ ಚಪಲಾ ನಿಷ್ಕಲ್ಮಷಾ ಸಾಞ್ಜನಾ ।
ತ್ರೈಲೋಕ್ಯೇಽಪಿ ವಿರಾಜತೇ ಶ್ರಿತವತೀ ಶ್ರೀಶಂಕರಾಙ್ಕಂ ಧ್ರುವಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೮೯॥

ನಿರ್ಯತ್ನೈವ ಮಹಾಸತೀ ಸುಚರಿತಾ ಯಾ ಶೈಲರಾಜಾತ್ಮಜಾ
ನಾಥಂ ಲೋಕವಿಲಕ್ಷಣಂ ಪ್ರಹೃತವತ್ಯದ್ಯಾಪಿ ಸೇವಾಜನೇ ।
ಗಾಣ್ಡೀವೇನ ವರಾಶ್ಮಭಿಶ್ಚ ಮುಸಲೇನೋಪಾನಹಾ ವರ್ತತೇ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೦॥

ಯಸ್ಯಾಃ ಪಾದಕಿಸಾಲಯಪ್ರಭುವರಂ ಯಾಚನ್ತ್ಯಜಸ್ರಂ ಪರಂ
ಕಸ್ತೂರ್ಯಃ ಸುರಯೋಷಿತಾಂ ತಿಲಕಿತಾಃ ಸದ್ವಾಸನಾಂ ರಾಗಿತಾಮ್ ।
ಬಿಮ್ಬೋಷ್ಠಂ ಮೃದುತಾಂ ಶ್ರಿಯಂ ಚ ಯುಗಪದ್ಧಸ್ತಾಃ ಪ್ರವಾಲಪ್ರಿಯಾಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೧॥

ಯಸ್ಯಾಃ ಪಾದಸಹಸ್ರರಶ್ಮಿಚರಲಂ ಕಾಮಾರಿಚಿತ್ತಾತ್ಮಕಂ
ಹೈಮಂ ಭ್ರಾಮಯತಿ ಪ್ರಣಾಶಯತಿ ಸಂತಾಪಂ ಸತಾಮಙ್ಕುರಮ್ ।
ಪ್ರಜ್ಞಾನಾತ್ಮಕಮದ್ಭುತಂ ಶಿಶಿರಯತ್ಯಕ್ಷೀಣ್ಯಲಂ ಪಶ್ಯತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೨॥

ಚಿತ್ರಂ ಯಾ ಕುರುತೇ ಮನೋಽಪಿ ಯಮಿನಾಂ ಬದ್ಧಂ ಮಹಾಯತ್ನತೋ
ಮುಕ್ತಂ ಶೋಣಪದಾರವಿನ್ದಯುಗಲೇ ನೀರಾಗಿಣಂ ರಾಗಿಣಮ್ ।
ಮಞ್ಜೀರಸ್ವನಮನ್ಮಥಸ್ಮಿತರವೈಃ ಸಂಮೋಹನಂ ಶೂಲಿನಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೩॥

ಪಾದಾಮ್ಭೋಜರಜೋ ರಜಾಂಸಿ ಹರತಿ ಪ್ರೌಢಾನಿ ಯಸ್ಯಾ ನೃಣಾಂ
ಸತ್ತ್ವಂ ವರ್ಧಯತಿ ಪ್ರದರ್ಶಯತಿ ಸನ್ಮಾರ್ಗಂ ಸುರಾಣಾಮಪಿ ।
ಜನ್ಮವ್ಯಾಧಿಮೃತಿಪ್ರವಾಹಮತುಲಂ ಸಂರೋಧಯತ್ಯದ್ಭುತಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೪॥

ನಾಹಂ ವಿಶ್ವಮಿದಂ ಚರಾಚರಮಯಂ ಮಾಯಾವಿಲಾಸಾಸ್ಪದಂ
ದೃಶ್ಯತ್ವಾದಿತಿ ಶೋಧಯನ್ತಿ ಸುಧಿಯಃ ಸರ್ವಂ ಯಯಾ ಪ್ರಜ್ಞಯಾ ।
ಆತ್ಮೈವಾಯಮಿದಂ ವದನ್ತಿ ಪುನಸ್ತೂಷ್ಣೀಂಭವನ್ತಃ ಸ್ಥಿತಾಃ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೫॥

ರಾಹುಂ ನಿನ್ದತಿ ಚನ್ದ್ರಚೂಡಚಿಕುರೈಸ್ತಾಟಙ್ಕಕಾನ್ತ್ಯಾ ರವಿಂ
ವಕ್ತ್ರಾಬ್ಜೇನ ವಿಧುಂ ಗುರುಂ ನತಗಿರಾ ಸೌಗ್ಯಂ ದೃಶಾ ಭದ್ರಯಾ ।
ಗತ್ಯಾ ಮನ್ದಮಹೋ ಕುಜಂ ತನುರುಚಾ ನಾಸಾಗ್ರಮಣ್ಯಾ ಕವಿಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೬॥

ನಿಃಶ್ರೇಣೀ ಕೃತಿನಾಂ ಪರಾಮೃತಫಲಪ್ರಾಪ್ತೌ ಪ್ರವಾಲದ್ಯುತಿ-
ರ್ಯಾ ನೀಲಾಞ್ಜನಮಕ್ಷರಾತ್ಮಕನಿಧೇಃ ಸಂದರ್ಶನೇ ಶ್ರೀಮತಾಮ್ ।
ನಿತ್ಯಾನನ್ದರಸಾ ಪರೋಕ್ಷಕರಣೇ ಶ್ರೀದೇಶಿಕಶ್ರೀಕೃಪಾ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೭॥

ಯಾ ಕುಣ್ಠೀಕುರುತೇ ನಿಜಸ್ತುತಿವಿಧೌ ಗರ್ವಾತ್ ಪ್ರವೃತ್ತಾಂ ಗಿರಂ
ವೇದಾನಾಮಪಿ ಗೀಷ್ಪತೇರಪಿ ಮಹಾಭಾಷ್ಯಾರ್ಥವಿಜ್ಞಾನಿನಃ ।
ದತ್ತೇ ವಾಗ್ಭವವೈಭವಾಮೃತಝರೀಂ ಮೂಕಾಜ್ಞಯೋರ್ವಾಗ್ಮಿತಾಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೮॥

ಆದ್ಯಾಮಮ್ಬುರುಹೇಕ್ಷಣಾಮನುಪಮಾಮಾಪೀನತುಙ್ಗಸ್ತನೀ-
ಮಾರ್ಯಾಮಾಗಮಸಾರಮೂರ್ತಿಮರುಣಾಮಾನನ್ದಚನ್ದ್ರಾನನಾಮ್ ।
ಸಾಧ್ವೀಂ ಸತ್ಕವಿವಾಗ್ಝರೀಂ ಸಮರಸಾನನ್ದಾಮೃತಸ್ಯನ್ದಿನೀಂ
ಸಾ ಸಂವಿತ್ ಸುಕೃತೋದಯಾ ಸ್ಫುರತು ನಶ್ಚಿತ್ತೇ ಸದಾ ಸರ್ವಗಾ ॥ ೯೯॥

ಗುರುಚರಣಸರೋಜಂ ಗುಪ್ತಗಙ್ಗಾತರಙ್ಗ-
ಸ್ತಿಮಿತಮಮಿತಶುಕ್ಲಜ್ಯೋತಿಷಾಂ ಜ್ಯೋತಿರೇಕಮ್ ।
ನಿರುಪಮಮಕರನ್ದಸ್ಪನ್ದಮಾನನ್ದಕನ್ದಂ
ನಿಧನಜನನಹೀನೋ ನಿರ್ಮಲೋಽಹಂ ನಿಷೇವೇ ॥ ೧೦೦॥

ಶಾರ್ದೂಲವೃತ್ತಮಪಿ ಸಾಧು ಭವತ್ಯಹೋ ತತ್
ಸಾರಸ್ವತಂ ಸಮರಸಾಮೃತಲೋಚನಾನಾಮ್ ।
ಸದ್ಯೋ ಜಯತ್ಯಘರಿಪುಂ ಶ್ರುತಿಮಾರ್ಗಯೋಗಾತ್
ತ್ಯಾಗೇಶಸಾನ್ದ್ರಕರುಣಾದ್ಭುತಮೇವ ಭದ್ರಮ್ ॥ ೧೦೧॥

ಇತ್ಯಾನನ್ದನಾಥಪಾದಪಪದ್ಮೋಪಜೀವಿನಾ ಕಾಶ್ಯಪಗೋತ್ರೋತ್ಪನ್ನೇನಾನ್ಧ್ರೇಣ
ತ್ಯಾಗರಾಜನಾಮ್ನಾ ವಿರಚಿತಂ ಸಂವಿಚ್ಛತಕಂ ಸಂಪೂರ್ಣಮ್

Encoded and proofread by Sridhar Seshagiri seshagir at engineering.sdsu.edu

Please send corrections to sanskrit@cheerful.com
Last updated ತ್oday
http://sanskritdocuments.org

Samvichatakam Lyrics in Kannada PDF
% File name : sanvich100.itx
% Category : aShTottarashatanAma
% Location : doc\_devii
% Author : tyAgarAja
% Language : Sanskrit
% Subject : hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : June 28, 2003
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website