{॥ ಶ್ರೀಲಲಿತಾತ್ರಿಪುರಸುನ್ದರೀಹೃದಯಸ್ತೋತ್ರಮ್ ॥}
॥ ಶ್ರೀಲಲಿತಾತ್ರಿಪುರಸುನ್ದರ್ಯೈ ನಮಃ ॥
॥ ಅಥ ಶ್ರೀಮತ್ ಲಲಿತಾತ್ರಿಪುರಸುನ್ದರೀಹೃದಯಸ್ತೋತ್ರಸಾಧನಾ ॥
ಓಂ ಶುದ್ಧಸ್ಫಟಿಕಸಙ್ಕಾಶಂ ದ್ವಿನೇತ್ರಂ ಕರುಣಾನಿಧಿಮ್ ।
ವರಾಭಯಕರಂ ವನ್ದೇ ಶ್ರೀಗುರುಂ ಶಿವರೂಪಿಣಮ್ ॥ ೧॥

ಭಕ್ತಾಜ್ಞಾನತಮೋಭಾನುಂ ಮೂರ್ಧ್ನಿ ಪಙ್ಕಜಸಂಸ್ಥಿತಮ್ ।
ಸದಾಶಿವಮಯಂ ನಿತ್ಯಂ ಶ್ರೀಗುರುಂ ಪ್ರಣಮಾಮ್ಯಹಮ್ ॥ ೨॥

ಶ್ರೀವಿದ್ಯಾಂ ಜಗತಾಂ ಧಾತ್ರೀಂ ಸರ್ಗಸ್ಥಿತಿಲಯೇಶ್ವರೀಮ್ ।
ನಮಾಮಿ ಲಲಿತಾಂ ನಿತ್ಯಂ ಮಹಾತ್ರಿಪುರಸುನ್ದರೀಮ್ ॥ ೩॥

ಬಿನ್ದುತ್ರಿಕೋಣಸಂಯುಕ್ತಂ ವಸುಕೋಣಸಮನ್ವಿತಮ್ ।
ದಶಕೋಣದ್ವಯೋಪೇತಂ ಭುವನಾರಸಮನ್ವಿತಮ್ ॥ ೪॥

ದಲಾಷ್ಟಕಸಮೋಪೇತಂ ದಲಷೋಡಶಕಾನ್ವಿತಮ್ ।
ವೃತ್ತತ್ರಯಾನ್ವಿತಂ ಭೂಮಿಸದನತ್ರಯಭೂಷಿತಮ್ ॥ ೫॥

ನಮಾಮಿ ಲಲಿತಾಚಕ್ರಂ ಭಕ್ತಾನಾಮೇತದಿಷ್ಟದಮ್ ।
ಅಮೃತಾಮ್ಭೋನಿಧೌ ತತ್ರ ರತ್ನದ್ವೀಪಂ ನಮಾಮ್ಯಹಮ್ ॥ ೬॥

ನಾನಾವೃಕ್ಷಮಹೋದ್ಯಾನಂ ವನ್ದೇಽಹಂ ಕಲ್ಪವಾಟಿಕಾಮ್ ।
ಸನ್ತಾನವಾಟಿಕಾಂ ವನ್ದೇ ಹರಿಚನ್ದನವಾಟಿಕಾಮ್ ॥ ೭॥

ಮನ್ದಾರವಾಟಿಕಾಂ ವನ್ದೇ ಪಾರಿಜಾತಾಖ್ಯವಾಟಿಕಾಮ್ ।
ನಮಾಮಿ ತವ ದೇವೇಶಿ ಕದಮ್ಬವನವಾಟಿಕಾಮ್ ॥ ೮॥

ಪುಷ್ಪರಾಗಮಹಾರತ್ನಪ್ರಾಕಾರಂ ಪ್ರಣಮಾಮ್ಯಹಮ್ ।
ಪದ್ಮರಾಗಾಖ್ಯಮಣಿಭಿಃ ಪ್ರಾಕಾರಂ ಸರ್ವದಾ ಭಜೇ ॥ ೯॥

ಗೋಮೇದರತ್ನಪ್ರಾಕಾರಂ ವಜ್ರಪ್ರಾಕಾರಮಾಶ್ರಯೇ ।
ವೈಡೂರ್ಯರತ್ನಪ್ರಾಕಾರಂ ಪ್ರಣಮಾಮಿ ತವೇಶ್ವರಿ ॥ ೧೦॥

ಇನ್ದ್ರನೀಲಾಖ್ಯರತ್ನಾನಾಂ ಪ್ರಾಕಾರಂ ಪ್ರಣಮಾಮ್ಯಹಮ್ ।
ಮುಕ್ತಾರತ್ನಮಯಂ ಚೈವ ಪ್ರಾಕಾರಂ ಸರ್ವದಾ ಭಜೇ ॥ ೧೧॥

ಮರಕತಾಖ್ಯಮಹಾರತ್ನಪ್ರಾಕಾರಾಯ ನಮಸ್ತವ ।
ವಿದ್ರುಮಾಖ್ಯಮಹಾರತ್ನಪ್ರಾಕಾರಂ ತು ತವಾಶ್ರಯೇ ॥ ೧೨॥

ಮಾಣಿಕ್ಯಮಣ್ಡಪಂ ವನ್ದೇ ಸಹಸ್ರಸ್ತಮ್ಭಮಣ್ಡಪಮ್ ।
ಲಲಿತೇ ತವ ದೇವೇಶಿ ಭಜಾಮ್ಯಮೃತವಾಪಿಕಾಮ್ ॥ ೧೩॥

ಆನನ್ದವಾಪಿಕಾಂ ವನ್ದೇ ಭಜೇ ಚೈವ ವಿಮರ್ಶಿಕಾಮ್ ।
ಭಜೇ ಬಾಲಾತಪೋದ್ಗಾರಂ ಚನ್ದ್ರಿಕೋದ್ಗಾರಮಾಶ್ರಯೇ ॥ ೧೪॥

ಮಹಾಶೃಙ್ಗಾರಪರಿಖಾಂ ಮಹಾಪದ್ಮಾಟವೀಂ ಭಜೇ ।
ಚಿನ್ತಾಮಣಿಮಹಾರತ್ನಗೃಹರಾಜಂ ನಮಾಮ್ಯಹಮ್ ॥ ೧೫॥

ಪೂರ್ವಾಮ್ನಾಯಮಯಂ ಪೂರ್ವದ್ವಾರಂ ದೇವಿ ಭಜಾಮಿ ತೇ ।
ದಕ್ಷಿಣಾಮ್ನಾಯ ರೂಪಂ ತೇ ದಕ್ಷಿಣದ್ವಾರಮಾಶ್ರಯೇ ॥ ೧೬॥

ನಮಾಮಿ ತೇ ಪರಂ ದ್ವಾರಂ ಪಶ್ಚಿಮಾಮ್ನಾಯರೂಪಕಮ್ ।
ವನ್ದೇಽಹಮುತ್ತರಂ ದ್ವಾರಮುತ್ತರಾಮ್ನಾಯರೂಪಕಮ್ ॥ ೧೭॥

ಊರ್ಧ್ವಾಮ್ನಾಯಮಽಹಂ ವನ್ದೇ ಊರ್ಧ್ವದ್ವಾರಂ ಕುಲೇಶ್ವರಿ ।
ಲಲಿತೇ ತವ ದೇವೇಶಿ ಮಹಾಸಿಂಹಾಸನಂ ಭಜೇ ॥ ೧೮॥

ಬ್ರಹ್ಮಾತ್ಮಕಮಞ್ಚಪಾದಮೇಕಂ ತವ ನಮಾಮ್ಯಹಮ್ ।
ಏಕಂ ವಿಷ್ಣುಮಯಂ ಮಞ್ಚಪಾದಂ ತವ ನಮಾಮ್ಯಹಮ್ ॥ ೧೯॥

ಏಕಂ ರುದ್ರಮಯಂ ಮಞ್ಚಪಾದಂ ತವ ನಮಾಮ್ಯಹಮ್ ।
ಮಞ್ಚಪಾದಂ ನಮಾಮ್ಯೇಕಂ ತವ ದೇವೀಶ್ವರಾತ್ಮಕಮ್ ॥ ೨೦॥

ಮಞ್ಚೈಕಫಲಕಂ ವನ್ದೇ ಸದಾಶಿವಮಯಂ ಶುಭಮ್ ।
ನಮಾಮಿ ತೇ ಹಂಸತೂಲತಲಿಮಾಂ ಪರಮೇಶ್ವರಿ ॥ ೨೧॥

ಭಜಾಮಿ ತೇ ಹಂಸತೂಲ ಮಹೋಪಾಧಾನಮುತ್ತಮಮ್ ।
ಕೌಸುಮ್ಭಾಸ್ತರಣಂ ದೇವಿ ತವ ನಿತ್ಯಂ ನಮಾಮ್ಯಹಮ್ ॥ ೨೨॥

ಮಾನಸಪೂಜಾ ।
ಮಹಾವಿತಾನಕಂ ವನ್ದೇ ಮಹಾಜವನಿಕಾಂ ಭಜೇ ।
ಏವಂ ಪೂಜಾಗೃಹಂ ಧ್ಯಾತ್ವಾ ಶ್ರೀಚಕ್ರಸ್ಯ ಶಿವಪ್ರಿಯೇ ॥ ೨೩॥

ಮದ್ದಕ್ಷಿಣೇ ಸ್ಥಾಪಯಾಮಿ ಭಾಗೇ ಪುಷ್ಪಾಕ್ಷತಾದಿಕಮ್ ।
ಅಭಿತಸ್ತೇ ಮಹಾದೇವಿ ದೀಪಾँಸ್ತಾನ್ ದರ್ಶಯಾಮ್ಯಹಮ್ ॥ ೨೪॥

ಮೂಲೇನ ತ್ರಿಪುರಾಚಕ್ರಂ ತವ ಸಮ್ಪೂಜಯಾಮ್ಯಹಮ್ ।
ತ್ರಿಭಿಃಖಣ್ಡೈಸ್ತವ ತ್ರ್ಯಸ್ತ್ರಂ ಪೂಜಯಾಮಿ ಶಿವಪ್ರಿಯೇ ॥ ೨೫॥

ವಾಯ್ವಗ್ನಿಜಲಸಂಯುಕ್ತಪ್ರಾಣಾಯಾಮೈರಹಂ ಶಿವೇ ।
ಶೋಷಣಂ ದಾಹನಂ ದೇವಿ ಕರೋಮ್ಯಾಪ್ಲಾವನಂ ತಥಾ ॥ ೨೬॥

ತ್ರಿವಾರಂ ಮೂಲಮನ್ತ್ರೇಣ ಪ್ರಾಣಾಯಾಮಂ ಕರೋಮ್ಯಹಮ್ ।
ಅಪಸರ್ಪನ್ತು ತೇ ಭೂತಾ ಯೇ ಭೂತಾ ಭೂಮಿಸಂಸ್ಥಿತಾಃ ॥ ೨೭॥

ಯೇ ಭೂತಾ ವಿಘ್ನಕರ್ತಾರಸ್ತೇ ನಶ್ಯನ್ತು ಶಿವಾಜ್ಞಯಾ ।
ಕರೋಮ್ಯನೇನ ಮನ್ತ್ರೇಣ ತಾಲತ್ರಯಮಹಂ ಶಿವೇ ॥ ೨೮॥

ನಾರಾಯಣೋಽಹಂ ಬ್ರಹ್ಮಾಽಹಂ ಭೈರವೋಽಹಂ ಶಿವೋಽಸ್ಮ್ಯಹಮ್ ।
ದೇವೋಽಹಂ ಪರಮಾತ್ಮಾಽಹಂ ಮಹಾತ್ರಿಪುರಸುನ್ದರಿ ॥ ೨೯॥

ಧ್ಯಾತ್ವೈವಂ ವಜ್ರಕವಚಂ ನ್ಯಾಸಂ ತವ ಕರೋಮ್ಯಹಮ್ ।
ಕುಮಾರೀಬೀಜಸಂಯುಕ್ತಂ ಮಹಾತ್ರಿಪುರಸುನ್ದರಿ ॥ ೩೦॥

ಮಾಂ ರಕ್ಷ ರಕ್ಷೇತಿ ಹೃದಿ ಕರೋಮ್ಯಞ್ಜಲಿಮೀಶ್ವರಿ ।
ನಮೋ ದೇವ್ಯಾಸನಾಯೇತಿ ತೇ ಕರೋಮ್ಯಾಸನಂ ಶಿವೇ ॥ ೩೧॥

ಚಕ್ರಾಸನಂ ನಮಸ್ಯಾಮಿ ಸರ್ವಮನ್ತ್ರಾಸನಂ ಭಜೇ ।
ಸಾಧ್ಯಸಿದ್ಧಾಸನಂ ವನ್ದೇ ಮನ್ತ್ರೈರೇಭಿರ್ಮಹೇಶ್ವರಿ ॥ ೩೨॥

ಕರೋಮ್ಯಸ್ಮಿಂಶ್ಚಕ್ರಮನ್ತ್ರದೇವತಾಸನಮುತ್ತಮಮ್ ।
ಕರೋಮ್ಯಥ ಷಡಙ್ಗಾಖ್ಯಂ ಮಾತೃಕಾಶ್ಚ ಕರೋಮ್ಯಹಮ್ ॥ ೩೩॥

ವಶಿನ್ಯಾದ್ಯಷ್ಟಕಂ ನ್ಯಾಸಂ ಷೋಢಾನ್ಯಾಸಂ ಕರೋಮ್ಯಹಮ್ ।
ಮಹಾಷೋಢಾಂ ತತಃ ಕುರ್ವೇ ನವಯೋನ್ಯಾಖ್ಯಮುತ್ತಮಮ್ ॥ ೩೪॥

ಚಕ್ರನ್ಯಾಸಂ ತತಃ ಕುರ್ವೇ ಶ್ರೀಕಣ್ಠನ್ಯಾಸಮುತ್ತಮಮ್ ।
ಕೇಶವಾದಿ ಮಹಾನ್ಯಾಸಂ ಕಾಮನ್ಯಾಸಂ ಕರೋಮ್ಯಹಮ್ ॥ ೩೫॥

ಕಲಾನ್ಯಾಸಂ ತತಃ ಕುರ್ವೇ ಕುರ್ವೇ ಕಾಮಕಲಾಹ್ವಯಮ್ ।
ಪೀಠನ್ಯಾಸಂ ತತಃ ಕುರ್ವೇ ತತ್ತ್ವನ್ಯಾಸಂ ಕರೋಮ್ಯಹಮ್ ॥ ೩೬॥

ತತಃ ಕರೋಮಿ ಸ್ಥಿತ್ಯಾದಿನ್ಯಾಸಂ ತತ್ ತ್ರಿಪುರೇಶ್ವರಿ ।
ತತಃ ಶುದ್ಧೋದಕೇನಾಹಂ ವಾಮಭಾಗೇ ಮಹೇಶ್ವರಿ ॥ ೩೭॥

ಕರೋಮಿ ಮಣ್ಡಲಂ ವೃತ್ತಂ ಚತುರಸ್ರಂ ಶಿವಪ್ರಿಯೇ ।
ಪುಷ್ಪೈರಭ್ಯರ್ಚ್ಯ ಸಾಧಾರಂ ಶಙ್ಖಂ ಸಂಸ್ಥಾಪಯಾಮ್ಯಹಮ್ ॥ ೩೮॥

ಅರ್ಚಯಾಮಿ ಷಡಙ್ಗೇನ ಜಲಮಾಪೂರಯಾಮ್ಯಹಮ್ ।
ದದಾಮಿ ಚಾದಿಮಂ ಬಿನ್ದುಂ ಕುರ್ವೇ ಮೂಲಾಭಿಮನ್ತ್ರಿತಮ್ ॥ ೩೯॥

ತಜ್ಜಲೇನ ಜಗನ್ಮಾತಸ್ತ್ರಿಕೋಣಂ ವೃತ್ತಸಂಯುತಮ್ ।
ಷಟ್ಕೋಣಂ ಚತುರಸ್ತ್ರಂ ಚ ಮಣ್ಡಲಂ ಪ್ರಕರೋಮ್ಯಹಮ್ ॥ ೪೦॥

ವಿದ್ಯಯಾ ಪೂಜನಂ ಮಧ್ಯೇ ಖಣ್ಡೈಸ್ತ್ರ್ಯಸ್ತ್ರಾಭಿಪೂಜನಮ್ ।
ಬೀಜಾವೃತ್ಯಾ ಕೋಣಷಟ್ಕಂ ಪೂಜಯಾಮಿ ಶಿವಪ್ರಿಯೇ ॥ ೪೧॥

ತಸ್ಮಿನ್ ದಶಕಲಾಯುಕ್ತಮಗ್ನಿಮಣ್ಡಲಮಾಶ್ರಯೇ ।
ಧೂಮಾರ್ಚಿಷಂ ನಮಸ್ಯಾಮಿ ಊಷ್ಮಾಂ ಚ ಜ್ವಲಿನೀಂ ಭಜೇ ॥ ೪೨॥

ಜ್ವಲಿನೀಂ ಚ ನಮಸ್ಯಾಮಿ ವನ್ದೇಽಹಂ ವಿಸ್ಫುಲ್ಲಿಙ್ಗಿನೀಮ್ ।
ಸುಶ್ರಿಯಂ ಚ ಸುರೂಪಾಂ ಚ ಕಪಿಲಾಂ ಪ್ರಣಮಾಮ್ಯಹಮ್ ॥ ೪೩॥

ನೌಮಿ ಹವ್ಯವಹಾಂ ನಿತ್ಯಂ ಭಜೇ ಕವ್ಯವಹಾಂ ಕಲಾಮ್ ।
ಯಾದಿಭಿಃ ಸಹಿತಾ ವಹ್ನೇಃ ಕಲಾ ದಶ ತಥಾ ಭಜೇ ॥ ೪೪॥

ಸೂರ್ಯಸ್ಯ ಮಣ್ಡಲಂ ತತ್ರ ಕಲಾದ್ವಾದಶಕಾತ್ಮಕಮ್ ।
ಅರ್ಘ್ಯಪಾತ್ರೇ ತ್ವಽಹಂ ವನ್ದೇ ತಪಿನೀಂ ತಾಪಿನೀಂ ಭಜೇ ॥ ೪೫॥

ಧೂಮ್ರಾಂ ಮರೀಚಿಂ ವನ್ದೇಽಹಂ ಜ್ವಾಲಿನೀಂ ಚ ರುಚಿಂ ಭಜೇ ।
ಸುಷುಮ್ಣಾಂ ಭೋಗದಾಂ ವನ್ದೇ ಭಜೇ ವಿಶ್ವಾಂ ಚ ಬೋಧಿನೀಮ್ ॥ ೪೬॥

ಧಾರಿಣೀಂ ಚ ಕ್ಷಮಾಂ ವನ್ದೇ ಸೌರಾ ಏತಾಃ ಕಲಾ ಭಜೇ ।
ಸೋಮಸ್ಯ ಮಣ್ಡಲಂ ತತ್ರ ಕಲಾಃ ಷೋಡಶಕಾತ್ಮಕಾಃ ॥ ೪೭॥

ಅರ್ಘ್ಯಾಮೃತಾತ್ಮಕಂ ವನ್ದೇಽಮೃತಾಂ ಮಾನದಾಂ ಸ್ತುವೇ ।
ಪೂಷಾಂ ತುಷ್ಟಿಂ ಭಜೇ ಪುಷ್ಟಿಂ ರತಿಂ ಧೃತಿಮಹಂ ಭಜೇ ॥ ೪೮॥

ಶಶಿನೀಂ ಚನ್ದ್ರಿಕಾಂ ವನ್ದೇ ಕಾನ್ತಿಂ ಜ್ಯೋತ್ಸ್ನಾಂ ಶ್ರಿಯಂ ಭಜೇ ।
ನೌಮಿ ಪ್ರೀತಿಂ ಚಾಙ್ಗದಾಂ ಚ ಪೂರ್ಣಾಂ ಪೂರ್ಣಾಮೃತಾಂ ಭಜೇ ॥ ೪೯॥

ಸ್ವರೈಃ ಷೋಡಶಭಿರ್ಯುಕ್ತಾ ಭಜೇ ಸೋಮಸ್ಯ ವೈ ಕಲಾಃ ।
ತ್ರಿಕೋಣಲೇಖನಂ ಕುರ್ವೇ ಅಕಥಾದಿಸುರೇಖಕಮ್ ॥ ೫೦॥

ಹಳಕ್ಷವರ್ಣಸಂಯುಕ್ತಂ ಸ್ಥಿತಾನ್ತರ್ಹಂಸಭಾಸ್ವರಮ್ ।
ವಾಕ್ಕಾಮಶಕ್ತಿಸಂಯುಕ್ತಂ ಹಂಸೇನಾರಾಧಯಾಮ್ಯಹಮ್ ॥ ೫೧॥

ವೃತ್ತಾದ್ಬಹಿಃ ಷಡಸ್ರೇ ಚ ಲೇಖನಂ ಪ್ರಕರೋಮ್ಯಹಮ್ ।
ಪುರೋಭಾಗಾದಿ ಷಟ್ಕೋಣಂ ಷಡಙ್ಗೇನಾರ್ಚಯಾಮ್ಯಹಮ್ ॥ ೫೨॥

ಶ್ರೀವಿದ್ಯಾಯಾಃ ಸಪ್ತವಾರಂ ಕರೋಮ್ಯತ್ರಾಭಿಮನ್ತ್ರಣಮ್ ।
ಸಮರ್ಪಯಾಮಿ ವಿಶ್ವೇಶಿ ತಸ್ಮಿನ್ ಗನ್ಧಾಕ್ಷತಾದಿಕಮ್ ॥ ೫೩॥

ಧ್ಯಾಯಾಮಿ ಪೂಜಾದ್ರವ್ಯಂ ತೇ ಸರ್ವಂ ವಿದ್ಯಾಮಯಂ ಶುಭಮ್ ।
ಚತುರ್ನವತಿ ಸನ್ಮನ್ತ್ರಾನ್ ಸ್ಪೃಷ್ಟ್ವಾ ತತ್ಪ್ರಜಪಾಮ್ಯಹಮ್ ॥ ೫೪॥

ವಹ್ನೇರ್ದಶಕಲಾಃ ಸೂರ್ಯಕಲಾದ್ವಾದಶಕಂ ಭಜೇ ।
ಆಶ್ರಯೇ ಷೋಡಶಕಲಾಸ್ತತ್ರ ಸೋಮಸ್ಯ ಕಾಮದಾಃ ॥ ೫೫॥

ಸೃಷ್ಟಿಮೃದ್ಧಿಂ ಸ್ಮೃತಿಂ ವನ್ದೇ ಮೇಧಾಂ ಕಾನ್ತಿಂ ನಮಾಮ್ಯಹಮ್ ।
ಲಕ್ಷ್ಮೀಂ ಧೃತಿಂ ಸ್ಥಿರಾಂವನ್ದೇ ಸ್ಥಿತಿಂ ಸಿದ್ಧಿಂ ಭಜಾಮ್ಯಹಮ್ ॥ ೫೬॥

ಏತಾಂ ಬ್ರಹ್ಮಕಲಾಂ ವನ್ದೇ ಜರಾಂ ತಾಂ ಪಾಲಿನೀಂ ಭಜೇ ।
ಶಾನ್ತಿಂ ನಮಾಮೀಶ್ವರೀಂ ಚ ರತಿಂ ವನ್ದೇ ಚ ಕಾಮಿಕಾಮ್ ॥ ೫೭॥

ವರದಾಂ ಹ್ಲಾದಿನೀಂ ವನ್ದೇ ಪ್ರೀತಿಂ ದೀರ್ಘಾಂ ಭಜಾಮ್ಯಹಮ್ ।
ಟಾದಿಭಿಃ ಸಹಿತಾ ವಿಷ್ಣೋಃ ಕಲಾ ದಶ ತಥಾ ಭಜೇ ॥ ೫೮॥

ಏತಾ ವಿಷ್ಣೋಃ ಕಲಾ ವನ್ದೇ ತೀಕ್ಷ್ಣಾಂ ರೌದ್ರೀಂ ಭಯಾಂ ತಥಾ ।
ನಿದ್ರಾಂ ತನ್ದ್ರಾಂ ಕ್ಷುಧಾಂ ವನ್ದೇ ನಮಾಮಿ ಕ್ರೋಧಿನೀಂ ಕ್ರಿಯಾಮ್ ॥ ೫೯॥

ಉದ್ಗಾರೀಂ ಚ ಭಜೇ ಮೃತ್ಯುಮೇತಾ ರುದ್ರಕಲಾ ಭಜೇ ।
ಪೀತಾಂ ಶ್ವೇತಾಂ ಭಜೇ ನಿತ್ಯಮರುಣಾಂ ಚ ತಥಾ ಭಜೇ ॥ ೬೦॥

ಭಜೇಽಸಿತಾಂ ತಥಾಽನನ್ತಾಂ ಷಾದಿಭಿಃ ಸಹಿತಾಸ್ತಥಾ ।
ಈಶ್ವರಸ್ಯ ಕಲಾ ಹ್ಯೇತಾ ವನ್ದೇ ನಿತ್ಯಮಭೀಷ್ಟದಾಃ ॥ ೬೧॥

ನಿವೃತ್ತಿಂ ಚ ಪ್ರತಿಷ್ಠಾಂ ಚ ವಿದ್ಯಾಂ ಶಾನ್ತಿಂ ನಮಾಮ್ಯಹಮ್ ।
ಇನ್ಧಿಕಾಂ ದೀಪಿಕಾಂ ಚೈವ ರೇಚಿಕಾಂ ಮೋಚಿಕಾಂ ತಥಾ ॥ ೬೨॥

ಪರಾಂ ಸೂಕ್ಷ್ಮಾಂ ನಮಸ್ಯಾಮಿ ನೌಮಿ ಸೂಕ್ಷ್ಮಾಮೃತಾಂ ಕಲಾಮ್ ।
ವನ್ದೇ ಜ್ಞಾನಾಂ ಕಲಾಂ ಚೈವ ತಥಾ ಜ್ಞಾನಾಮೃತಾಂ ಕಲಾಮ್ ॥ ೬೩॥

ಆಪ್ಯಾಯಿನೀಂ ವ್ಯಾಪಿನೀಂ ಚ ವ್ಯೋಮರೂಪಾಂ ನಮಾಮ್ಯಹಮ್ ।
ಕಲಾಃ ಸದಾಶಿವಸ್ಯೈತಾಃ ಷೋಡಶ ಪ್ರಣಮಾಮ್ಯಹಮ್ ॥ ೬೪॥

ಹಾಂಸಾಖ್ಯಂ ಚ ಮಹಾಮನ್ತ್ರಂ ಜ್ಯೋತಿಷಂ ಹಂಸಮಾಶ್ರಯೇ ।
ಪ್ರತತ್ಪ್ರಥಮವಿಶ್ವಾನ್ತಂ ಮನ್ತ್ರಂ ಜ್ಯೋತಿಷಮಾಶ್ರಯೇ ॥ ೬೫॥

ತ್ರ್ಯಮ್ಬಕಂ ಚ ನಮಸ್ಯಾಮಿ ತದ್ವಿಷ್ಣೋಃ ಪ್ರಣಮಾಮ್ಯಹಮ್ ।
ವಿಷ್ಣುರ್ಯೋನಿಂ ಮೂಲವಿದ್ಯಾಂ ಮನ್ತ್ರೈರೇಭಿರನುತ್ತಮೈಃ ॥ ೬೬॥

ಅಮೃತಂ ಮನ್ತ್ರಿತಂ ವನ್ದೇ ಚತುರ್ನವತಿಭಿಸ್ತವ ।
ಅಖಣ್ಡೈಕರಸಾನನ್ದಕರೇಽಪರಸುಧಾತ್ಮನಿ ॥ ೬೭॥

ಸ್ವಚ್ಛನ್ದಸ್ಫುರಣಾಮತ್ರ ನಿಧೇಹ್ಯಕುಲರೂಪಿಣಿ ।
ಅಕುಲಸ್ಥಾಮೃತಾಕಾರೇ ಶುದ್ಧಜ್ಞಾನಕರೇ ಪರೇ ॥ ೬೮॥

ಅಮೃತತ್ವಂ ನಿಧೇಹ್ಯಸ್ಮಿನ್ ವಸ್ತುನಿ ಕ್ಲಿನ್ನರೂಪಿಣಿ ।
ತದ್ರೂಪಿಣ್ಯೈಕರಸ್ಯತ್ವಂ ಕೃತ್ವಾ ಹ್ಯೇತತ್ಸ್ವರೂಪಿಣಿ ॥ ೬೯॥

ಭೂತ್ವಾ ಪರಾಮೃತಾಽಽಕಾರಾ ಮಯಿ ಚಿತ್ಸ್ಫುರಣಂ ಕುರು ।
ಅಮೃತೇಶೀಂ ನಮಸ್ಯಾಮಿ ಸರ್ವದಾಮೃತವರ್ಷಿಣೀಮ್ ॥ ೭೦॥

ವಾಗ್ವಾದಿನೀಂ ನಮಸ್ಯಾಮಿ ಶ್ರೀವಿದ್ಯಾಂ ಪ್ರಣಮಾಮ್ಯಹಮ್ ।
ಏಭಿರ್ಮನೂತ್ತಮೈರ್ವನ್ದೇ ಮನ್ತ್ರಿತಂ ಪರಮಾಮೃತಮ್ ॥ ೭೧॥

ಜ್ಯೋತಿರ್ಮಯಮಿದಂ ಕುರ್ವೇ ಪರಮರ್ಘ್ಯಂ ಮಹೇಶ್ವರಿ।
ತದ್ಬಿನ್ದುಭಿರ್ಮೇ ಶಿರಸಿ ತ್ರಿಗುರೂನ್ ಪೂಜಯಾಮ್ಯಹಮ್ ॥ ೭೨॥

ಬ್ರಹ್ಮಾಽಹಮಸ್ಮಿ ತದ್ಬಿನ್ದುಂ ಕುಣ್ಡಲಿನ್ಯಾ ಜುಹೋಮ್ಯಹಮ್ ।
ಹೃಚ್ಚಕ್ರಸ್ಥಾ ಮಹಾದೇವೀಂ ಮಹಾತ್ರಿಪುರಸುನ್ದರೀಮ್ ॥ ೭೩॥

ನಿರಸ್ತಮೋಹತಿಮಿರಾಂ ಸಾಕ್ಷಾತ್ ಸಂವಿತ್ಸ್ವರೂಪಿಣೀಮ್ ।
ನಾಸಾಪುಟೇ ಪರಕಲಾಮಥ ನಿರ್ಗಮಯಾಮ್ಯಹಮ್ ॥ ೭೪॥

ಸಮಾನಯಾಮಿ ತಾಂ ಹಸ್ತೇ ತ್ರಿಖಣ್ಡಕುಸುಮಾಞ್ಜಲೌ ।
ಜಗನ್ಮಾತರ್ಮಹಾದೇವಿ ಮಹಾತ್ರಿಪುರಸುನ್ದರಿ ॥ ೭೫॥

ಸುಧಾಚೈತನ್ಯಮೂರ್ತಿಂ ತೇ ಕಲ್ಪಯಾಮಿ ನಮಃ ಶಿವೇ ।
ಅನೇನ ಮನುನಾ ದೇವಿ ಯನ್ತ್ರೇ ತ್ವಾಂ ಸ್ಥಾಪಯಾಮ್ಯಹಮ್ ॥ ೭೬॥

ಮಹಾಪದ್ಮವನಾನ್ತಃಸ್ಥೇ ಕಾರಣಾನನ್ದವಿಗ್ರಹೇ ।
ಸರ್ವಭೂತಹಿತೇ ಮಾತರೇಹ್ಯೇಹಿ ಪರಮೇಶ್ವರಿ ॥ ೭೭॥

ದೇವೇಶಿ ಭಕ್ತಿಸುಲಭೇ ಸರ್ವಾವರಣಸಂಯುತೇ ।
ಯಾವತ್ ತ್ವಾಂ ಪೂಜಯಿಷ್ಯಾಮಿ ತಾವತ್ ತ್ವಂ ಸುಸ್ಥಿರಾ ಭವ ॥ ೭೮॥

ಅನೇನ ಮನ್ತ್ರಯುಗ್ಮೇನ ತ್ವಾಮತ್ರಾವಾಹಯಾಮ್ಯಹಮ್ ।
ಕಲ್ಪಯಾಮಿ ನಮಃ ಪಾದ್ಯಮರ್ಘ್ಯಂ ತೇ ಕಲ್ಪಯಾಮ್ಯಹಮ್ ॥ ೭೯॥

ಸುಗನ್ಧತೈಲಾಭ್ಯಙ್ಗಂ ಚ ಮಜ್ಜಶಾಲಾಪ್ರವೇಶನಮ್ ।
ಕಲ್ಪಯಾಮಿ ನಮಸ್ತಸ್ಮಿನ್ ಮಣಿಪೀಠೋಪವೇಶನಮ್ ॥ ೮೦॥

ದಿವ್ಯಸ್ನಾನೀಯಮೀಶಾನಿ ಗೃಹಾಣೋದ್ವರ್ತನಂ ಶುಭಮ್ ।
ಗೃಹಾಣೋಷ್ಣೋದಕಸ್ನಾನಂ ಕಲ್ಪಯಾಮಿ ನಮಸ್ತವ ॥ ೮೧॥

ಹೇಮಕುಮ್ಭಚ್ಯುತೈಸ್ತೀರ್ಥೈಃ ಕಲ್ಪಯಾಮ್ಯಭಿಷೇಚನಮ್ ।
ಕಲ್ಪಯಾಮಿ ನಮಸ್ತುಭ್ಯಂ ಧೌತೇನ ಪರಿಮಾರ್ಜನಮ್ ॥ ೮೨॥

ಬಾಲಭಾನುಪ್ರತೀಕಾಶಂ ದುಕೂಲಪರಿಧಾನಕಮ್ ।
ಅರುಣೇನ ದುಕೂಲೇನೋತ್ತರೀಯಂ ಕಲ್ಪಯಾಮಿ ತೇ ॥ ೮೩॥

ಪ್ರವೇಶನಂ ಕಲ್ಪಯಾಮಿ ತವಾಲೇಪನಮಣ್ಡಪಮ್ ।
ನಮಸ್ತೇ ಕಲ್ಪಯಾಮ್ಯತ್ರ ಮಣಿಪೀಠೋಪವೇಶನಮ್ ॥ ೮೪॥

ಅಷ್ಟಗನ್ಧೈಃ ಕಲ್ಪಯಾಮಿ ಸರ್ವಾಙ್ಗೇಷು ವಿಲೇಪನಮ್ ।
ಕಾಲಾಗರು ಮಹಾಧೂಪಸ್ತವ ಕೇಶಭರಸ್ಯ ಹಿ ॥ ೮೫॥

ಮಲ್ಲಿಕಾಮಾಲತೀಜಾತೀಚಮ್ಪಕಾದಿಮನೋರಮೈಃ ।
ರಚಿತಾಃಕುಸುಮೈರ್ಮಾಲಾಃ ಕಲ್ಪಯಾಮಿ ನಮಸ್ತವ ॥ ೮೬॥

ಪ್ರವೇಶನಂ ಕಲ್ಪಯಾಮಿ ನಮೋ ಭೂಷಣಮಣ್ಡಪಮ್ ।
ಉಪವೇಶಂ ರತ್ನಪೀಠೇ ತತ್ರ ತೇ ಕಲ್ಪಯಾಮ್ಯಹಮ್ ॥ ೮೭॥

ನವಮಾಣಿಕ್ಯಮುಕುಟಂ ತಚ್ಚನ್ದ್ರಶಕಲಂ ತತಃ ।
ತತಃ ಸೀಮನ್ತಸಿನ್ದೂರಂ ತತಸ್ತಿಲಕಮುತ್ತಮಮ್ ॥ ೮೮॥

ಕಾಲಾಞ್ಜನಂ ಕಲ್ಪಯಾಮಿ ಪಾಲೀಯುಗಲಮುತ್ತಮಮ್ ।
ಮಣಿಕುಣ್ಡಲಯುಗ್ಮಂ ತೇ ನಾಸಾಭರಣಮೀಶ್ವರಿ ॥ ೮೯॥

ತೇ ಕಲ್ಪಯಾಮಿ ತ್ರಿಪುರೇ ಲಲಿತಾಽಧರಯಾವಕಮ್ ।
ಅಥಾಽಽದ್ಯಭೂಷಣಂ ಕಣ್ಠೇ ಹೇಮಚಿನ್ತಾಕಮುತ್ತಮಮ್ ॥ ೯೦॥

ಪದಕಂ ತೇ ಕಲ್ಪಯಾಮಿ ಮಹಾಪದಕಮುತ್ತಮಮ್ ।
ಕಲ್ಪಯಾಮಿ ನಮೋ ಮುಕ್ತಾವಲಿಮೇಕಾವಲಿಂ ಚ ತೇ ॥ ೯೧॥

ಛನ್ನವೀರಂ ಚ ಕೇಯೂರಯುಗಲಾನಾಂ ಚತುಷ್ಟಯಮ್ ।
ವಲಯಾವಲಿಮೀಶಾನಿ ಊರ್ಮಿಕಾವಲಿಮೀಶ್ವರಿ ॥ ೯೨॥

ಕಾಞ್ಚೀದಾಮಕಟೀಸೂತ್ರಂ ಸೌಭಾಗ್ಯಾಭರಣಂ ಚ ತೇ ।
ತ್ರಿಪುರೇ ಪಾದಕಟಕಂ ಕಲ್ಪಯೇ ರತ್ನನೂಪುರಮ್ ॥ ೯೩॥

ಪಾದಾಙ್ಗುಲೀಯಕಂ ತುಭ್ಯಂ ಪಾಶಮೇಕಕರೇ ತವ ।
ಅನ್ಯಸ್ಮಿನ್ನಙ್ಕುಶಂ ದೇವಿ ಪುಣ್ಡ್ರೇಕ್ಷುಧನುಷಂ ಪರೇ ॥ ೯೪॥

ಅಪರೇ ಪುಷ್ಪಬಾಣಾँಶ್ಚ ಶ್ರೀಮನ್ಮಾಣಿಕ್ಯಪಾದುಕೇ ।
ನವಾವರಣದೇವೀಭಿರ್ಮಹಾಚಕ್ರಾಧಿರೋಹಣಮ್ ॥ ೯೫॥

ಕಾಮೇಶ್ವರಾಙ್ಕಪರ್ಯಙ್ಕ ಉಪವೇಶನಮುತ್ತಮಮ್ ।
ಸುಧಾಸವಾಖ್ಯಂ ಚಷಕಂ ತತಃ ಆಚಮನೀಯಕಮ್ ॥ ೯೬॥

ಕರ್ಪೂರವೀಟಿಕಾಂ ತುಭ್ಯಂ ಕಲ್ಪಯಾಮಿ ನಮಃ ಶಿವೇ ।
ಆನನ್ದೋಲ್ಲಾಸವೇಲಾಸಹಾಸಂ ತೇ ಕಲ್ಪಯಾಮ್ಯಹಮ್ ॥ ೯೭॥

ಮಙ್ಗಲಾರಾರ್ತಿಕಂ ದೇವಿ ಛತ್ರಂ ತೇ ಕಲ್ಪಯಾಮ್ಯಹಮ್ ।
ತತಶ್ಚಾಮರಯುಗ್ಮಂ ತೇ ದರ್ಪಣಂ ಕಲ್ಪಯಾಮ್ಯಹಮ್ ॥ ೯೮॥

ತಾಲವೃನ್ತಂ ಕಲ್ಪಯಾಮಿ ಗನ್ಧಂ ಪುಷ್ಪಂ ಮಹೇಶ್ವರಿ ।
ಧೂಪಂ ದೀಪಂ ಚ ನೈವೇದ್ಯಂ ಕಲ್ಪಯಾಮಿ ನಮಸ್ತವ ॥ ೯೯॥

ಅಥಾಽಹಂ ವೈನ್ದವೇ ಚಕ್ರೇ ಸರ್ವಾನನ್ದಮಯಾತ್ಮಿಕೇ ।
ರತ್ನಸಿಂಹಾಸನೇ ರಮ್ಯೇ ಸಮಾಸೀನಾಂ ಶಿವಪ್ರಿಯಾಮ್ ॥ ೧೦೦॥

ಧ್ಯಾನಮ್ ।
ಉದ್ಯದ್ಭಾನುಸಹಸ್ರಾಭ್ಯಾಂ ಜಪಾಪುಷ್ಪಸಮಪ್ರಭಾಮ್ ।
ನವರತ್ನಪ್ರಭಾದೀಪ್ತಮುಕುಟೇನ ವಿರಾಜಿತಾಮ್ ॥ ೧೦೧॥

ಚನ್ದ್ರರೇಖಾಸಮೋಪೇತಾಂ ಕಸ್ತೂರೀತಿಲಕಾಞ್ಚಿತಾಮ್ ।
ಕಾಮಕೋದಣ್ಡಸೌನ್ದರ್ಯನಿರ್ಜಿತಭ್ರೂಲತಾಯುಗಾಮ್ ॥ ೧೦೨॥

ಅಞ್ಜನಾಞ್ಚಿತನೇತ್ರಾಂ ತಾಂ ಪದ್ಮಪತ್ರನಿಭೇಕ್ಷಣಾಮ್ ।
ಮಣಿಕುಣ್ಡಲಸಂಯುಕ್ತಕರ್ಣದ್ವಯವಿರಾಜಿತಾಮ್ ॥ ೧೦೩॥

ಮುಕ್ತಾಮಾಣಿಕ್ಯಖಚಿತನಾಸಿಕಾಭರಣಾನ್ವಿತಾಮ್ ।
ಮದಪಾಟಲಸಂಯುಕ್ತಕಪೋಲಯುಗಲಾನ್ವಿತಾಮ್ ॥ ೧೦೪॥

ಪಕ್ವಬಿಮ್ಬಫಲಾಭಾಸಾಧರದ್ವಯವಿರಾಜಿತಾಮ್ ।
ಶುದ್ಧಮುಕ್ತಾವಲಿಪ್ರಖ್ಯದನ್ತಪಙ್ಕ್ತಿವಿರಾಜಿತಾಮ್ ॥ ೧೦೫॥

ತಾಮ್ಬೂಲಪೂರಿತಮುಖೀಂ ಸುಸ್ಮಿತಾಸ್ಯವಿರಾಜಿತಾಮ್ ।
ಆದ್ಯಭೂಷಣಸಂಯುಕ್ತಾಂ ಹೇಮಚಿನ್ತಾಕಸಂಯುತಾಮ್ ॥ ೧೦೬॥

ಪದಕೇನ ಸಮೋಪೇತಾಂ ಮಹಾಪದಕಸಂಯುತಾಮ್ ।
ಮುಕ್ತಾವಲಿಸಮೋಪೇತಾಮೇಕಾವಲಿವಿರಾಜಿತಾಮ್ ॥ ೧೦೭॥

ಕೇಯೂರಾಙ್ಗದಸಂಯುಕ್ತಚತುರ್ಬಾಹುವಿರಾಜಿತಾಮ್ ।
ಅಷ್ಟಗನ್ಧಸಮೋಪೇತಾಂ ಶ್ರೀಚನ್ದನವಿಲೇಪನಾಮ್ ॥ ೧೦೮॥

ಹೇಮಕುಮ್ಭಸಮಪ್ರಖ್ಯಸ್ತನದ್ವಯವಿರಾಜಿತಾಮ್ ।
ರಕ್ತವಸ್ತ್ರಪರೀಧಾನಾಂ ರಕ್ತಕಞ್ಚುಕಸಂಯುತಾಮ್ ॥ ೧೦೯॥

ಸೂಕ್ಷ್ಮರೋಮಾವಲೀಯುಕ್ತತನುಮಧ್ಯವಿರಾಜಿತಾಮ್ ।
ಮುಕ್ತಾಮಾಣಿಕ್ಯಖಚಿತಕಾಞ್ಚೀಯುತನಿತಮ್ಬಿನೀಮ್ ॥ ೧೧೦॥

ಸದಾಶಿವಾಙ್ಕಸ್ಥಪೃಥುಮಹಾಜಘನಮಣ್ಡಲಾಮ್ ।
ಕದಲೀಸ್ತಮ್ಭಸಙ್ಕಾಶಊರುಯುಗ್ಮವಿರಾಜಿತಾಮ್ ॥ ೧೧೧॥

ಕದಲೀಕಾನ್ತಿಸಙ್ಕಾಶಜಙ್ಘಾಯುಗಲಶೋಭಿತಾಮ್ ।
ಗೂಢಗುಲ್ಫದ್ವಯೋಪೇತಾಂ ರಕ್ತಪಾದಯುಗಾನ್ವಿತಾಮ್ ॥ ೧೧೨॥

ಬ್ರಹ್ಮಾವಿಷ್ಣುಮಹಾದೇವಶಿರೋಮುಕುಟಜಾತಯಾ ।
ಕಾನ್ತ್ಯಾ ವಿರಾಜಿತಪದಾಂ ಭಕ್ತತ್ರಾಣಪರಾಯಣಾಮ್ ॥ ೧೧೩॥

ಇಕ್ಷುಕಾರ್ಮುಕಪುಷ್ಪೇಷು ಪಾಶಾಙ್ಕುಶಧರಾಂ ಪರಾಮ್ ।
ಸಂವಿತ್ಸ್ವರೂಪಿಣೀಂ ದೇವೀಂ ಧ್ಯಾಯಾಮಿ ಪರಮೇಶ್ವರೀಮ್ ॥ ೧೧೪॥

ಇತಿ ಧ್ಯಾನಮ್ ।
ಪ್ರದರ್ಶಯಾಮ್ಯಥ ಶಿವೇ ನವಮುದ್ರಾ ವರಪ್ರದಾಃ ।
ತ್ವಾಂ ತರ್ಪಯಾಮಿ ತ್ರಿಪುರೇ ತ್ರಿಧಾ ಮೂಲೇನ ಪಾರ್ವತಿ ॥ ೧೧೫॥

ಆಗ್ನೇಯ್ಯಾಮೀಶದಿಗ್ಭಾಗೇ ನೈಋತ್ಯಾಂ ಮಾರುತೇ ತಥಾ ।
ಮಧ್ಯೇ ದಿಕ್ಷು ಷಡಙ್ಗಾನಿ ಕ್ರಮಾದಭ್ಯರ್ಚಯಾಮ್ಯಹಮ್ ॥ ೧೧೬॥

ಆದ್ಯಾಂ ಕಾಮೇಶ್ವರೀಂ ವನ್ದೇ ನಮಾಮಿ ಭಗಮಾಲಿನೀಮ್ ।
ನಿತ್ಯಕ್ಲಿನ್ನಾಂ ನಮಸ್ಯಾಮಿ ಭೇರುಣ್ಡಾಂ ಪ್ರಣಮಾಮ್ಯಹಮ್ ॥ ೧೧೭॥

ವಹ್ನಿವಾಸಾಂ ನಮಸ್ಯಾಮಿ ಮಹಾವಜ್ರೇಶ್ವರೀಂ ಸ್ತುವೇ ।
ಶಿವದೂತೀಂ ನಮಸ್ಯಾಮಿ ತ್ವರಿತಾಂ ಕುಲಸುನ್ದರೀಮ್ ॥ ೧೧೮॥

ನಿತ್ಯಾಂ ನೀಲಪತಾಕಾಂ ಚ ವಿಜಯಾಂ ಸರ್ವಮಙ್ಗಲಾಮ್ ।
ಜ್ವಾಲಾಮಾಲಾಂ ಚ ಚಿತ್ರಾಂ ಚ ಮಹಾನಿತ್ಯಾಂ ಚ ಸಂಸ್ತುವೇ ॥ ೧೧೯॥

ದಿವ್ಯೌಘೇಭ್ಯೋ ನಮಸ್ಯಾಮಿ ಪರೇಶಪರಮೇಶ್ವರೀಮ್ ।
ಮಿತ್ರೇಶಮಥ ಷಷ್ಠೀಶಮುಡ್ಡೀಶಂ ಪ್ರಣಮಾಮ್ಯಹಮ್ ॥ ೧೨೦॥

ಚರ್ಯಾನಾಥಂ ನಮಸ್ಯಾಮಿ ಲೋಪಾಮುದ್ರಾಮಹಂ ಭಜೇ ।
ಅಗಸ್ತ್ಯಂ ಪ್ರಣಮಸ್ಯಾಮಿ ಸಿದ್ಧೌಘೇ ಕಾಲತಾಪನಮ್ ॥ ೧೨೧॥

ಧರ್ಮಾಚಾರ್ಯಂ ನಮಸ್ಯಾಮಿ ಮುಕ್ತಕೇಶೀಶ್ವರಂ ಭಜೇ ।
ಭಜೇ ದೀಪಕಲಾನಾಥಂ ಮಾನವೌಘೇ ತತಃ ಪರಮ್ ॥ ೧೨೨॥

ವಿಷ್ಣುದೇವಂ ನಮಸ್ಯಾಮಿ ಪ್ರಭಾಕರಮಹಂ ಭಜೇ ।
ತೇಜೋದೇವಂ ನಮಸ್ಯಾಮಿ ಮನೋಜಮಥ ಸಂಸ್ತುವೇ ॥ ೧೨೩॥

ಕಲ್ಯಾಣದೇವಂ ಕಲಯೇ ರತ್ನದೇವಂ ಭಜಾಮ್ಯಹಮ್ ।
ವಾಸುದೇವಂ ನಮಸ್ಯಾಮಿ ಶ್ರೀರಾಮಾನನ್ದಮಾಶ್ರಯೇ ॥ ೧೨೪॥

ಪರಮೇಷ್ಠಿಗುರುಂ ವನ್ದೇ ಪರಮಂ ಗುರುಮಾಶ್ರಯೇ ।
ಶ್ರೀಗುರುಂ ಪ್ರಣಮಸ್ಯಾಮಿ ಮೂರ್ಧ್ನಿ ಬ್ರಹ್ಮಬಿಲೇ ಸ್ಥಿತಮ್ ॥ ೧೨೫॥

ಕಂ ಬಿಲೇಽಹಂ ನಮಸ್ಯಾಮಿ ಶ್ರೀಗುರೋಃ ಪಾದುಕಾಂ ತತಃ ।
ಅಥ ಪ್ರಾಥಮಿಕೇ ದೇವಿ ಚತುರಸ್ರೇ ತವೇಶ್ವರಿ ॥ ೧೨೬॥

ಅಣಿಮಾಂ ಲಘಿಮಾಂ ವನ್ದೇ ಮಹಿಮಾಂ ಪ್ರಣಮಾಮ್ಯಹಮ್ ।
ಈಶಿತ್ವಸಿದ್ಧಿಂ ವನ್ದೇಽಹಂ ವಶಿತ್ವಂ ಚ ನಮಾಮ್ಯಹಮ್ ॥ ೧೨೭॥

ಪ್ರಾಕಾಮ್ಯಸಿದ್ಧಿಂ ವನ್ದೇಽಹಂ ಭುಕ್ತಿಮಿಚ್ಛಾಮಹಂ ಭಜೇ ।
ಪ್ರಾಪ್ತಿಸಿದ್ಧಿಂ ಸರ್ವಕಾಮಪ್ರದಾಸಿದ್ಧಿಮಹಂ ಭಜೇ ॥ ೧೨೮॥

ಮಧ್ಯಮೇ ಚತುರಸ್ರೇಽಹಂ ಬ್ರಾಹ್ಮೀಂ ಮಾಹೇಶ್ವರೀಂ ಭಜೇ ।
ಕೌಮಾರೀಂ ವೈಷ್ಣವೀಂ ವನ್ದೇ ವಾರಾಹೀಂ ಪ್ರಣಮಾಮ್ಯಹಮ್ ॥ ೧೨೯॥

ಮಾಹೇನ್ದ್ರೀಮಪಿ ಚಾಮುಣ್ಡಾಂ ಮಹಾಲಕ್ಷ್ಮೀಮಹಂ ಭಜೇ ।
ತೃತೀಯೇ ಚತುರಸ್ರೇಽಹಂ ಸರ್ವಸಂಕ್ಷೋಭಿಣೀಂ ಭಜೇ ॥ ೧೩೦॥

ಸರ್ವವಿದ್ರಾವಿಣೀಂ ಮುದ್ರಾಂ ಸರ್ವಾಕರ್ಷಿಣಿಕಾಂ ಭಜೇ ।
ಮುದ್ರಾಂ ವಶಙ್ಕರೀಂ ವನ್ದೇ ಸರ್ವೋನ್ಮಾದಿನಿಕಾಂ ಭಜೇ ॥ ೧೩೧॥

ಭಜೇ ಮಹಾಙ್ಕುಶಾಂ ಮುದ್ರಾಂ ಖೇಚರೀಂ ಪ್ರಣಮಾಮ್ಯಹಮ್ ।
ಬೀಜಮುದ್ರಾಂ ಯೋನಿಮುದ್ರಾಂ ಭಜೇ ಸರ್ವತ್ರಿಖಣ್ಡಿನೀಮ್ ॥ ೧೩೨॥

ತ್ರೈಲೋಕ್ಯಮೋಹನಂ ಚಕ್ರಂ ನಮಾಮಿ ಲಲಿತೇ ತವ ।
ನಮಾಮಿ ಯೋಗಿನೀಂ ತತ್ರ ಪ್ರಕಟಾಖ್ಯಾಮಭೀಷ್ಟದಾಮ್ ॥ ೧೩೩॥

ಸುಧಾರ್ಣವಾಸನಂ ವನ್ದೇ ತತ್ರ ತೇ ಪರಮೇಶ್ವರಿ ।
ಚಕ್ರೇಶ್ವರೀಂ ತತ್ರ ವನ್ದೇ ತ್ರಿಪುರಾಂ ಪರಮೇಶ್ವರೀಮ್ ॥ ೧೩೪॥

ಸರ್ವೇಸಂಕ್ಷೋಭಿಣೀಂ ಮುದ್ರಾಂ ತತೋಽಹಂ ಕಲಯೇ ಶಿವೇ ।
ಅಥಾಽಹಂ ಷೋಡಶದಲೇ ಕಾಮಾಕರ್ಷಣಿಕಾಂ ಭಜೇ ॥ ೧೩೫॥

ಬುದ್ಧ್ಯಾಕರ್ಷಣಿಕಾಂ ವನ್ದೇಽಹಙ್ಕಾರ್ಷಣೀಂ ಭಜೇ ।
ಶಬ್ದಾಕರ್ಷಣಿಕಾಂ ವನ್ದೇ ಸ್ಪರ್ಶಾಕರ್ಷಣಿಕಾಂ ಭಜೇ ॥ ೧೩೬॥

ರೂಪಾಕರ್ಷಣಿಕಾಂ ವನ್ದೇ ರಸಾಕರ್ಷಣಿಕಾಂ ಭಜೇ ।
ಗನ್ಧಾಕರ್ಷಣಿಕಾಂ ವನ್ದೇ ಚಿತ್ತಾಕರ್ಷಣಿಕಾಂ ಭಜೇ ॥ ೧೩೭॥

ಧೈರ್ಯಾಕರ್ಷಣಿಕಾಂ ವನ್ದೇ ಸ್ಮೃತ್ಯಾಕರ್ಷಣಿಕಾಂ ಭಜೇ ।
ನಾಮಾಕರ್ಷಣಿಕಾಂ ವನ್ದೇ ಬೀಜಾಕರ್ಷಣಿಕಾಂ ಭಜೇ ॥ ೧೩೮॥

ಆತ್ಮಾಕರ್ಷಣಿಕಾಂ ವನ್ದೇ ಹ್ಯಮೃತಾಕರ್ಷಣೀಂ ಭಜೇ ।
ಶರೀರಾಕರ್ಷಣೀಂ ವನ್ದೇ ನಿತ್ಯಾಂ ಶ್ರೀಪರಮೇಶ್ವರೀಮ್ ॥ ೧೩೯॥

ಸರ್ವಾಶಾಪೂರಕಂ ಚಕ್ರಂ ಕಲಯೇಽಹಂ ತವೇಶ್ವರಿ ।
ಗುಪ್ತಾಖ್ಯಾಂ ಯೋಗಿನೀಂ ವನ್ದೇ ತತ್ರಾಽಹಂ ಗುಪ್ತಪೂಜಿತಾಮ್ ॥ ೧೪೦॥

ಪೀತಾಮ್ಬುಜಾಸನಂ ತತ್ರ ನಮಾಮಿ ಲಲಿತೇ ತವ ।
ತ್ರಿಪುರೇಶೀಂ ಮಹಾದೇವೀಂ ಭಜಾಮೀಷ್ಟಾರ್ಥಂಸಿದ್ಧಿದಾಮ್ ॥ ೧೪೧॥

ಸರ್ವಂವಿದ್ರಾವಿಣೀಂ ಮುದ್ರಾಂ ತತ್ರಾಽಹಂ ತಾಂ ವಿಚಿನ್ತಯೇ ।
ಶಿವೇ ತವಾಷ್ಟಪತ್ರೇಽಹಮನಙ್ಗಕುಸುಮಾಂ ಭಜೇ ॥ ೧೪೨॥

ಅನಙ್ಗಮೇಖಲಾಂ ವನ್ದೇ ಹ್ಯನಙ್ಗಮದನಾಂ ಭಜೇ ।
ತತೋಽಹಂ ಪ್ರಣಮಸ್ಯಾಮಿ ಹ್ಯನಙ್ಗಮದನಾತುರಾಮ್ ॥ ೧೪೩॥

ಅನಙ್ಗರೇಖಾಂ ಕಲಯೇ ಭಜೇ ತೇಽನಙ್ಗವೇಗಿನೀಮ್ ।
ಭಜೇಽನಙ್ಗಾಙ್ಕುಶಾಂ ದೇವಿ ತವ ಚಾನಙ್ಗಮಾಲಿನೀಮ್ ॥ ೧೪೪॥

ಸರ್ವಸಂಕ್ಷೋಭಣಂ ಚಕ್ರಂ ತತ್ರಾಽಹಂ ಕಲಯೇ ಸದಾ ।
ವನ್ದೇ ಗುಪ್ತತರಾಖ್ಯಾಂ ತಾಂ ಯೋಗಿನೀಂ ಸರ್ವಕಾಮದಾಮ್ ॥ ೧೪೫॥

ತತ್ರಾಽಹಂ ಪ್ರಣಮಸ್ಯಾಮಿ ದೇವ್ಯಾತ್ಮಾಸನಮುತ್ತಮಮ್ ।
ನಮಾಮಿ ಜಗದೀಶಾನೀಮಽಹಂ ತ್ರಿಪುರಸುನ್ದರೀಮ್ ॥ ೧೪೬॥

ಸರ್ವಾಕರ್ಷಣಿಕಾಂ ಮುದ್ರಾಂ ತತ್ರಾಽಹಂ ಕಲಯಾಮಿ ತೇ ।
ಭುವನಾರೇ ತವ ಶಿವೇ ಸರ್ವಸಂಕ್ಷೋಭಿಣೀಂ ಭಜೇ ॥ ೧೪೭॥

ಸರ್ವವಿದ್ರಾವಿಣೀಂ ವನ್ದೇಽಹಂ ಸರ್ವಾಕರ್ಷಿಣಿಕಾಂ ಭಜೇ ।
ಸಕಲಾಹ್ಲಾದಿನೀಂ ವನ್ದೇ ಸರ್ವಸಮ್ಮೋಹಿನೀಂ ಭಜೇ ॥ ೧೪೮॥

ಸಕಲ ಸ್ತಮ್ಭಿನೀಂ ವನ್ದೇ ಕಲಯೇ ಸರ್ವಜೃಮ್ಭಿನೀಮ್ ।
ವಶಙ್ಕರೀಂ ನಮಸ್ಯಾಮಿ ಸರ್ವರಞ್ಜನಿಕಾಂ ಭಜೇ ॥ ೧೪೯॥

ಸಕಲೋನ್ಮಾದಿನೀಂ ವನ್ದೇ ಭಜೇ ಸರ್ವಾರ್ಥಸಾಧಿನೀಮ್ ।
ಸಮ್ಪತ್ತಿಪೂರಿಣೀಂ ವನ್ದೇ ಸರ್ವಮನ್ತ್ರಮಯೀಂ ಭಜೇ ॥ ೧೫೦॥

ಭಜಾಮ್ಯಹಂ ತತಃ ಶಕ್ತಿಂ ಸರ್ವದ್ವನ್ದ್ವಕ್ಷಯಙ್ಕರೀಮ್ ।
ತತ್ರಾಽಹಂ ಕಲಯೇ ಚಕ್ರಂ ಸರ್ವಸೌಭಾಗ್ಯದಾಯಕಮ್ ॥ ೧೫೧॥

ನಮಾಮಿ ಜಗತಾಂ ಧಾತ್ರೀಂ ಸಮ್ಪ್ರದಾಯಾಖ್ಯಯೋಗಿನೀಮ್ ।
ಶಿವೇ ತವ ನಮಸ್ಯಾಮಿ ಶ್ರೀಚಕ್ರಾಸನಮುತ್ತಮಮ್ ॥ ೧೫೨॥

ನಮಾಮಿ ಜಗದೀಶಾನೀಮಹಂ ತ್ರಿಪುರವಾಸಿನೀಮ್ ।
ಕಲಯೇಽಹಂ ತವ ಶಿವೇ ಮುದ್ರಾಂ ಸರ್ವವಶಙ್ಕರೀಮ್ ॥ ೧೫೩॥

ಬಹಿರ್ದಶಾರೇ ತೇ ದೇವಿ ಸರ್ವಸಿದ್ಧಿಪ್ರದಾಂ ಭಜೇ ।
ಸರ್ವಸಮ್ಪತ್ಪ್ರದಾಂ ವನ್ದೇ ಭಜೇ ಸರ್ವಪ್ರಿಯಙ್ಕರೀಮ್ ॥ ೧೫೪॥

ನಮಾಮ್ಯಹಂ ತತೋ ದೇವೀಂ ಸರ್ವಮಙ್ಗಲಕಾರಿಣೀಮ್ ।
ಸರ್ವಕಾಮಪ್ರದಾಂ ವನ್ದೇ ಸರ್ವದುಃಖವಿಮೋಚಿನೀಮ್ ॥ ೧೫೫॥

ಸರ್ವಮೃತ್ಯುಪ್ರಶಮನೀಂ ಸರ್ವವಿಘ್ನನಿವಾರಿಣೀಮ್ ।
ಸರ್ವಾಙ್ಗಸುನ್ದರೀಂ ದೇವೀಂ ಸರ್ವಸೌಭಾಗ್ಯದಾಯಿನೀಮ್ ॥ ೧೫೬॥

ಸರ್ವಾರ್ಥಸಾಧಕಂ ಚಕ್ರಂ ತಥಾಽಹಂ ಕಲಯೇ ಸದಾ ।
ಕಲಯಾಮಿ ತತೋ ದೇವೀಂ ಕುಲೋತ್ತೀರ್ಣಾಖ್ಯಯೋಗಿನೀಮ್ ॥ ೧೫೭॥

ಸರ್ವಮನ್ತ್ರಾಸನಂ ವನ್ದೇ ತ್ರಿಪುರಾಶ್ರೀಯಮಾಶ್ರಯೇ ।
ಕಲಯಾಮಿ ತತೋ ಮುದ್ರಾಂ ಸರ್ವೋನ್ಮಾದನಕಾರಿಣೀಮ್ ॥ ೧೫೮॥

ಅನ್ತರ್ದಶಾರೇ ತೇ ದೇವಿ ಸರ್ವಜ್ಞಾಂ ಪ್ರಣಮಾಮ್ಯಹಮ್ ।
ಸರ್ವಶಕ್ತಿಂ ನಮಸ್ಯಾಮಿ ಸರ್ವೈಶ್ವರ್ಯಪ್ರದಾಂ ಭಜೇ ॥ ೧೫೯॥

ಸರ್ವಜ್ಞಾನಮಯೀಂ ವನ್ದೇ ಸರ್ವವ್ಯಾಧಿವಿನಾಶಿನೀಮ್ ।
ಸರ್ವಾಧಾರಸ್ವರೂಪಾಂ ಚ ಸರ್ವಪಾಪಹರಾಂ ಭಜೇ ॥ ೧೬೦॥

ಸರ್ವಾನನ್ದಮಯೀಂ ವನ್ದೇ ಸರ್ವರಕ್ಷಾಸ್ವರೂಪಿಣೀಮ್ ।
ಪ್ರಣಮಾಮಿ ಮಹಾದೇವೀಂ ಸರ್ವೇಪ್ಸಿತಪ್ರದಾಂ ಭಜೇ ॥ ೧೬೧॥

ಸರ್ವರಕ್ಷಾಕರಂ ಚಕ್ರಂ ತತ್ರಾಽಹಂ ಕಲಯೇ ಸದಾ ।
ನಿಗರ್ಭಯೋಗಿನೀಂ ವನ್ದೇ ತತ್ರಾಽಹಂ ಪರಮೇಶ್ವರೀಮ್ ॥ ೧೬೨॥

ಸಾಧ್ಯಸಿಂಹಾಸನಂ ವನ್ದೇ ಭಜೇ ತ್ರಿಪುರಮಾಲಿನೀಮ್ ।
ಕಲಯಾಮಿ ತತೋ ದೇವಿ ಮುದ್ರಾಂ ಸರ್ವಮಹಾಙ್ಕುಶಾಮ್ ॥ ೧೬೩॥

ಅಷ್ಟಾರೇ ವಶಿನೀಂ ವನ್ದೇ ಭಜೇ ಕಾಮೇಶ್ವರೀಂ ಸದಾ ।
ಮೋದಿನೀಂ ವಿಮಲಾಂ ವನ್ದೇ ಹ್ಯರುಣಾಂ ಜಯಿನೀಂ ಭಜೇ ॥ ೧೬೪॥

ಸರ್ವೇಶ್ವರೀಂ ನಮಸ್ಯಾಮಿ ಕೌಲಿನೀಂ ಪ್ರಣಮಾಮ್ಯಹಮ್ ।
ಸರ್ವರೋಗಹರಂ ಚಕ್ರಂ ತವಾಽಹಂ ದೇವಿ ಚಿನ್ತಯೇ ॥ ೧೬೫॥

ರಹಸ್ಯಯೋಗಿನೀಂ ದೇವೀಂ ಸದಾಽಹಂ ಕಲಯಾಮಿ ತೇ ।
ನಮಾಮಿ ತ್ರಿಪುರಾಸಿದ್ಧಾಂ ಭಜೇ ಮುದ್ರಾಂ ಚ ಖೇಚರೀಮ್ ॥ ೧೬೬॥

ಮಹಾತ್ರಿಕೋಣಸ್ಯ ಬಾಹ್ಯೇ ಚತುರ್ದಿಕ್ಷು ಮಹೇಶ್ವರಿ ।
ನಮಾಮಿ ಜೃಮ್ಭ್ಣಾನ್ ಬಾಣಾನ್ ಚಾಪಂ ಸಮ್ಮೋಹನಂ ಭಜೇ ॥ ೧೬೭॥

ಪಾಶಂ ವಶಙ್ಕರಂ ವನ್ದೇ ಭಜೇ ಸ್ತಮ್ಭನಮಙ್ಕುಶಮ್ ।
ತ್ರಿಕೋಣೇಽಹಂ ಜಗದ್ಧಾತ್ರೀಂ ಮಹಾಕಾಮೇಶ್ವರೀಂ ಭಜೇ ॥ ೧೬೮॥

ಮಹಾವಜ್ರೇಶ್ವರೀಂ ವನ್ದೇ ಮಹಾಶ್ರೀಮಾಲಿನೀಂ ಭಜೇ ।
ಮಹಾಶ್ರೀಸುನ್ದರೀಂ ವನ್ದೇ ಸರ್ವಕಾಮಫಲಪ್ರದಾಮ್ ॥ ೧೬೯॥

ಸರ್ವಸಿದ್ಧಿಪ್ರದಂ ಚಕ್ರಂ ತವ ದೇವಿ ನಮಾಮ್ಯಹಮ್ ।
ನಮಾಮ್ಯತಿರಹಸ್ಯಾಖ್ಯಾಂ ಯೋಗಿನೀಂ ತತ್ರ ಕಾಮದಾಮ್ ॥ ೧೭೦॥

ತ್ರಿಪುರಾಮ್ಬಾಂ ನಮಸ್ಯಾಮಿ ಬೀಜಮುದ್ರಾಂ ನಮಾಮ್ಯಹಮ್ ।
ಮೂಲಮನ್ತ್ರೇಣ ಲಲಿತೇ ತ್ವಾಂ ಬಿನ್ದೌ ಪೂಜಯಾಮ್ಯಹಮ್ ॥ ೧೭೧॥

ಸರ್ವಾನನ್ದಮಯಂ ಚಕ್ರಂ ನಮಾಮಿ ಲಲಿತೇ ತವ ।
ಪರಾಪರರಹಸ್ಯಾಖ್ಯಾಂ ಯೋಗಿನೀಂ ಕಲಯೇ ಸದಾ ॥ ೧೭೨॥

ಮಹಾಚಕ್ರೇಶ್ವರೀಂ ವನ್ದೇ ಯೋನಿಮುದ್ರಾಮಹಂ ಭಜೇ ।
ಧೂಪಾದಿಕಂ ಸರ್ವಮಯಿ ತೇ ಕಲ್ಪಯಾಮ್ಯಹಮ್ ॥ ೧೭೩॥

ತ್ವತ್ಪ್ರೀತಯೇ ಮಹಾಮುದ್ರಾಂ ದರ್ಶಯಾಮಿ ತತಃ ಶಿವೇ ।
ತ್ರಿಧಾ ತ್ವಾಂ ಮೂಲಮನ್ತ್ರೇಣ ತರ್ಪಯಾಮಿ ತತಃ ಶಿವೇ ॥ ೧೭೪॥

ಶಾಲ್ಯನ್ನಂ ಮಧುಸಂಯುಕ್ತಂ ಪಾಯಸಾಪೂಪಸಂಯುತಮ್ ।
ಘೃತಸೂಪಸಮಾಯುಕ್ತಂ ಸರ್ವಭಕ್ಷ್ಯಸಮನ್ವಿತಮ್ ॥ ೧೭೫॥

ಸಸಿತಂ ಕ್ಷೀರಸಂಯುಕ್ತಂ ಬಹುಶಾಕಸಮನ್ವಿತಮ್ ।
ನಿಕ್ಷಿಪ್ಯ ಕಾಞ್ಚನೇ ಪಾತ್ರೇ ನೈವೇದ್ಯಂ ಕಲ್ಪಯಾಮಿ ತೇ ॥ ೧೭೬॥

ಸಙ್ಕಲ್ಪ್ಯ ಬಿನ್ದುನಾ ವಕ್ತ್ರಂ ಕುಚೌ ಬಿನ್ದುದ್ವಯೇನ ಚ ।
ಯೋನಿಂ ತು ಸಪರಾರ್ಧೇನ ಕೃತ್ವಾ ಶ್ರೀತ್ರಿಪುರೇ ತವ ॥ ೧೭೭॥

ಏತತ್ ಕಾಮಕಲಾರೂಪಂ ಭಕ್ತಾನಾಂ ಸರ್ವಕಾಮದಮ್ ।
ಸರ್ವಸಮ್ಪತ್ಪ್ರದಂ ವನ್ದೇ ನಮಸ್ತೇ ತ್ರಿಪುರೇಶ್ವರಿ ॥ ೧೭೮॥

ವಾಮಭಾಗೇ ತ್ರಿಕೋಣಂ ಚ ವೃತ್ತಂ ಚ ಚತುರಸ್ರಕಮ್ ।
ಕೃತ್ವಾ ಗನ್ಧಾಕ್ಷತಾದ್ಯೈಶ್ಚ ಹ್ಯರ್ಚಯಾಮಿ ಮಹೇಶ್ವರಿ ॥ ೧೭೯॥

ವಾಗ್ಭವಾದ್ಯಂ ನಮಸ್ಯಾಮಿ ತತ್ರ ವ್ಯಾಪಕಮಣ್ಡಲಮ್ ।
ಜಲಯುಕ್ತಾರ್ದ್ರಾನ್ನಯುಕ್ತಂ ಮಕಾರತ್ರಯಭಾಜನಮ್ ॥ ೧೮೦॥

ತತ್ರ ವಿನ್ಯಸ್ಯ ದಾಸ್ಯಾಮಿ ಭೂತೇಭ್ಯೋ ಬಲಿಮುತ್ತಮಮ್ ।
ನಮಸ್ತೇ ದೇವದೇವೇಶಿ ನಮಸ್ತ್ರೈಲೋಕ್ಯವನ್ದಿತೇ ॥ ೧೮೧॥

ನಮಃ ಪರಶಿವಾಙ್ಕಸ್ಥೇ ನಮಸ್ತ್ರಿಪುರಸುನ್ದರಿ ।
ಪ್ರದಕ್ಷಿಣಾಂ ನಮಸ್ಕಾರಂ ಮನಸಾಽಹಂ ಕರೋಮಿ ತೇ ॥ ೧೮೨॥

ತತಃ ಸಕಲಮನ್ತ್ರಾಣಾಂ ಸಮ್ರಾಜ್ಞೀಂ ಪರಮೇಶ್ವರೀಮ್ ।
ಪ್ರಜಪಾಮಿ ಮಹಾವಿದ್ಯಾಂ ತ್ವತ್ಪ್ರೀತ್ಯಾರ್ಥಮಹಂ ಸದಾ ।
ತವ ವಿದ್ಯಾಂ ಪ್ರಜಪ್ತ್ವಾಽಥ ಸ್ತೌಮಿ ತ್ವಾಂ ಪರಮೇಶ್ವರೀಮ್ ॥ ೧೮೩॥

ಮಹಾದೇವಿ ಮಹೇಶಾನಿ ಸದಾಶಿವ ಮಹಾಪ್ರಿಯೇ ।
ಮಹಾನಿತ್ಯೇ ಮಹಾಸಿದ್ಧೇ ತ್ವಾಮಹಂ ಶರಣಂ ವ್ರಜೇ ॥ ೧೮೪॥

ಜಯ ತ್ವಂ ತ್ರಿಪುರೇ ದೇವಿ ಲಲಿತೇ ಜಗದೀಶ್ವರಿ ।
ಸದಾಶಿವಪ್ರಿಯಕರಿ ಪಾಹಿ ಮಾಂ ಕರುಣಾಕರಿ ॥ ೧೮೫॥

ಜಗನ್ಮಾತರ್ಜಗದ್ರೂಪೇ ಜಗದೀಶ್ವರವಲ್ಲಭೇ ।
ಜಗನ್ಮಯೇ ಜಗಸ್ತುಲ್ಯೇ ಗೌರಿ ತ್ವಾಮಹಮಾಶ್ರಯೇ ॥ ೧೮೬॥

ಅನಾದ್ಯೇ ಸರ್ವಲೋಕಾನಾಮಾದ್ಯೇ ಭಕ್ತೇಷ್ಟದಾಯಿನಿ ।
ಗಿರಿರಾಜಸ್ಯ ತನಯೇ ನಮಸ್ತೇ ತ್ರಿಪುರೇಶ್ವರಿ ॥ ೧೮೭॥

ಜಯಾದಿದೇವದೇವೇಶಿ ಬ್ರಹ್ಮಮಾತರ್ನಮೋಽಸ್ತು ತೇ ।
ವಿಷ್ಣುಮಾತರನಾದ್ಯನ್ತೇ ಹರಮಾತಃ ಸುರೇಶ್ವರಿ ॥ ೧೮೮॥

ಬ್ರಹ್ಮಾದಿಸುರಸಂಸ್ತುತ್ಯೇ ಲೋಕತ್ರಯವಶಙ್ಕರಿ ।
ಸರ್ವಸಮ್ಪತ್ಪ್ರದೇ ನಿತ್ಯೇ ತ್ವಾಮಹಂ ಕಲಯೇ ಸದಾ ॥ ೧೮೯॥

ನಿತ್ಯಾನನ್ದೇ ನಿರಾಧಾರೇ ಚಿದ್ರೂಪಿಣಿ ಶಿವಪ್ರಿಯೇ ।
ಅಣಿಮಾದಿಗುಣಾಧಾರೇ ತ್ವಾಂ ಸದಾ ಕಲಯಾಮ್ಯಹಮ್ ॥ ೧೯೦॥

ಬ್ರಾಹ್ಮ್ಯಾದಿಮಾತೃಸಂಸ್ತುತ್ಯೇ ಸರ್ವಾವರಣಸಂಯುತೇ ।
ಜ್ಯೋತಿರ್ಮಯೇ ಮಹಾರೂಪೇ ಪಾಹಿ ಮಾಂ ತ್ರಿಪುರೇ ಸದಾ ॥ ೧೯೧॥

ಲಕ್ಷ್ಮೀವಾಣ್ಯಾದಿಸಮ್ಪೂಜ್ಯೇ ಬ್ರಹ್ಮವಿಷ್ಣುಶಿವಸ್ತುತೇ ।
ಭಜಾಮಿ ತವ ಪಾದಾಬ್ಜಂ ಸರ್ವಕಾಮಫಲಪ್ರದಮ್ ॥ ೧೯೨॥

ಸರ್ವಶಕ್ತಿಸಮೋಪೇತಂ ಸರ್ವಾಭೀಷ್ಟಫಲಪ್ರದೇ ।
ನಮಾಮಿ ತವ ಪಾದಾಬ್ಜಂ ದೇವಿ ತ್ರಿಪುರಸುನ್ದರಿ ॥ ೧೯೩॥

ತ್ವತ್ಪ್ರಿಯಾರ್ಥಂ ತತಃ ಕಾಂಶ್ಚಿಚ್ಛಕ್ತಿಂ ಸಮ್ಪೂಜಯಾಮ್ಯಹಮ್ ।
ಮಪಞ್ಚಕೇನ ತಾಂ ಶಕ್ತಿಂ ತರ್ಪಯಾಮಿ ಮಹೇಶ್ವರಿ ॥ ೧೯೪॥

ತಯೋಪೇತಂ ಹವಿಃಶೇಷಂ ಚಿದಗ್ನೌ ಪ್ರಜುಹೋಮ್ಯಹಮ್ ।
ತ್ವತ್ಪ್ರಿಯಾರ್ಥಂ ಮಹಾದೇವಿ ಮಮಾಭೀಷ್ಟಾರ್ಥಸಿದ್ಧಯೇ ॥ ೧೯೫॥

ಬದ್ಧ್ವಾ ತಾಂ ಖೇಚರೀಂ ಮುದ್ರಾಂ ಕ್ಷಮಸ್ವೋದ್ವಾಸಯಾಮ್ಯಹಮ್ ।
ತಿಷ್ಠ ಮೇ ಹೃದಯೇ ನಿತ್ಯಂ ತ್ರಿಪುರೇ ಪರಮೇಶ್ವರಿ ॥ ೧೯೬॥

ಜಗದಮ್ಬೇ ಮಹಾರಾಜ್ಞಿ ಮಹಾಶಕ್ತಿ ಶಿವಪ್ರಿಯೇ ।
ಹೃಚ್ಚಕ್ರೇ ತಿಷ್ಠ ಸತತಂ ಮಹಾತ್ರಿಪುರಸುನ್ದರಿ ॥ ೧೯೭॥

ಸರ್ವಲೋಕೈಕಸಮ್ಪೂಜ್ಯೇ ಸಕಲಾವರಣೈರ್ಯುತೇ ।
ಹೃಚ್ಚಕ್ರೇ ತಿಷ್ಠ ಮೇ ನಿತ್ಯಂ ಮಹಾತ್ರಿಪುರಸುನ್ದರಿ ॥ ೧೯೮॥

॥ ಫಲಶ್ರುತಿ ॥
ಏತತ್ ತ್ರಿಪುರಸುನ್ದರ್ಯಾ ಹೃದಯಂ ಸರ್ವಕಾಮದಮ್ ।
ಮಹಾರಹಸ್ಯಂ ಪರಮಂ ದುರ್ಲಭಂ ದೈವತೈರಪಿ ॥ ೧॥

ಸಾಕ್ಷಾತ್ ಸದಾಶಿವೇನೋಕ್ತಂ ಗುಹ್ಯಾದ್ಗುಹ್ಯಮನುತ್ತಮಮ್ ॥ ೨॥

ಯಃ ಪಠೇನ್ನಿತ್ಯಮೇಕಾಗ್ರಃ ಶ್ರೃಣುಯಾದ್ ವಾ ಸಮಾಹಿತಃ ।
ನಿತ್ಯಪೂಜಾಫಲಂ ದೇವ್ಯಾಃ ಸ ಲಭೇನ್ನಾತ್ರ ಸಂಶಯಃ ॥ ೩॥

ಪಾಪೈಃ ಸ ಮುಚ್ಯತೇ ಸದ್ಯಃ ಕಾಯವಾಕ್ಚಿತ್ತಸಮ್ಭವೈಃ ।
ಸರ್ವಜನ್ಮಸಮುದ್ಭೂತೈರ್ಜ್ಞಾನಕೃತೈರಪಿ ॥ ೪॥ missing letter or word

ಸರ್ವಕ್ರತುಷು ಯತ್ಪುಣ್ಯಂ ಸರ್ವತೀರ್ಥೇಷು ಯತ್ ಫಲಮ್ ।
ತತ್ಪುಣ್ಯಂ ಲಭತೇ ನಿತ್ಯಂ ಮಾನವೋ ನಾತ್ರ ಸಂಶಯಃ ॥ ೫॥

ಅಚಲಾಂ ಲಭತೇ ಲಕ್ಷ್ಮೀಂ ತ್ರೈಲೋಕ್ಯೇ ಚಾಪಿ ದುರ್ಲಭಾಮ್ ।
ಸಾಕ್ಷಾದ್ ವಿಷ್ಣುಸಮೋ ಮರ್ತ್ಯೋ ಶೀಘ್ರಮೇವ ಭವೇತ್ ಸದಾ ॥ ೬॥

ಅಷ್ಟೈಶ್ವರ್ಯಮವಾಪ್ನೋತಿ ಸ ಶೀಘ್ರಂ ಮಾನವೋತ್ತಮಃ ।
ಗುಟಿಕಾಪಾದುಕಾಸಿದ್ಧ್ಯಾದ್ಯಷ್ಟಕಂ ಶೀಘ್ರಮಶ್ನುತೇ ॥ ೭॥

ಶಙ್ಖಾದ್ಯಾ ನಿಧ್ಯೋ ವಾಽಪಿ ತಂ ನಿತ್ಯಂ ಪರ್ಯುಪಾಸತೇ ।
ವಶ್ಯಾದೀನ್ಯಷ್ಟಕರ್ಮಾಣಿ ಶೀಘ್ರಂ ಸಿದ್ಧ್ಯನ್ತಿ ಸರ್ವದಾ ॥ ೮॥

ಭೂಲೋಕಸ್ಥಾಃ ಸರ್ವನಾರ್ಯಃ ಪಾತಾಲಸ್ಥಾಃ ಸದಾಙ್ಗನಾಃ ।
ಸರ್ವಲೋಕಸ್ಥಿತಾಃ ಸರ್ವಾ ಯಾಶ್ಚಾನ್ಯಾರೂಪಗರ್ವಿತಾಃ ॥ ೯॥

ರಮನ್ತೇ ತೇನ ಸತತಂ ಶೀಘ್ರಂ ವಶ್ಯಾ ನ ಸಂಶಯಃ ।
ರಾಜಾದ್ಯಾಃ ಸಕಲಾ ಮರ್ತ್ಯಾಃ ಹರಹರ್ಯಾದಯಃ ಸುರಾಃ ॥ ೧೦॥

ಅನನ್ತಾದ್ಯಾ ಮಹಾನಾಗಾಃ ಸಿದ್ಧಯೋಗೇಶ್ವರಾದಯಃ ।
ಋಷಯೋ ಮುನಯೋ ಯಕ್ಷಾಸ್ತಂ ನಿತ್ಯಂ ಪರ್ಯುಪಾಸತೇ ॥ ೧೧॥

ಮಹತೀಂ ಕೀರ್ತಿಮಾಪ್ನೋತಿ ಶಿವವಿಷ್ಣುಸಮಪ್ರಭಾಮ್ ।
ಪರಮಂ ಯೋಗಮಾಸಾದ್ಯ ಖೇಚರೋ ಜಾಯತೇ ಸದಾ ॥ ೧೨॥

ಅಪಮೃತ್ಯುವಿನಿರ್ಮುಕ್ತಃ ಕಾಲಮೃತ್ಯುವಿವರ್ಜಿತಃ ।
ಪರಮಾಯುಷ್ಯಮಾಪ್ನೋತಿ ಹರಹರ್ಯಾದಿದುರ್ಲಭಮ್ ॥ ೧೩॥

ಅಶ್ರುತಾನಿ ಚ ಶಾಸ್ತ್ರಾಣಿ ವ್ಯಾಚಷ್ಟೇ ವಿಧಿವತ್ ಸದಾ ।
ಮೂಢೋಽಪಿ ಸರ್ವವಿದ್ಯಾವಾನ್ ದಕ್ಷಿಣಾಮೂರ್ತಿವದ್ಭವೇತ್ ॥ ೧೪॥

ಗ್ರಹಭೂತಪಿಶಾಚಾದ್ಯಾ ಯಕ್ಷಗನ್ಧರ್ವರಾಕ್ಷಸಾಃ ।
ಏತಸ್ಯ ಸ್ಮರಣಾದೇವ ವಿನಶ್ಯನ್ತಿ ಹಿ ಸರ್ವದಾ ॥ ೧೫॥

ತದ್ಗಾತ್ರಂ ಪ್ರಾಪ್ಯ ಸಕಲಂ ವಿಷಂ ಸದ್ಯೋ ವಿನಶ್ಯತಿ ।
ಸಹಸ್ರಕಾಮಸಙ್ಕಾಶಃ ಕಾನ್ತ್ಯಾ ಯಃ ಸರ್ವದಾ ಭವೇತ್ ॥ ೧೬॥

ತಸ್ಮಾದೇತತ್ ಪಠೇತ್ ಸ್ತೋತ್ರಂ ತ್ರಿಪುರಾಹೃದಯಂ ಶುಭಮ್ ।
ಜಪೇದ್ ಯಃ ಸರ್ವದಾ ಸಾಕ್ಷಾದ್ ಭವೇದ್ ದೇವೀಸ್ವರೂಪಕಃ ॥ ೧೭॥

ಸಾಙ್ಗಂ ತ್ರಿಪುರಸುನ್ದರ್ಯಾ ನಿತ್ಯಪೂಜಾಫಲಂ ಲಭೇತ್ ।
ವಿಮುಕ್ತೋ ರೋಗಸಙ್ಘಾತೈರಾರೋಗ್ಯಂ ಮಹದಶ್ನುತೇ ॥ ೧೮॥

ಪ್ರಾಪ್ನೋತಿ ಮಹದೈಶ್ವರ್ಯಂ ಸರ್ವವಿದ್ಯಾನಿಧಿರ್ಭವೇತ್ ।
ತತ್ಕರಸ್ಪರ್ಶಮಾತ್ರೇಣ ನರೋ ಬ್ರಾಹ್ಮಣತಾಂ ಲಭೇತ್ ॥ ೧೯॥

ಮುಚ್ಯತೇ ಸಕಲೈರ್ವಿಘ್ನೈಃ ಸ ನಿತ್ಯಂ ಮಾನವೋತ್ತಮಃ ।
ಸ ಭುಙ್ಕ್ತೇ ಸಕಲಾನ್ ಭೋಗಾನ್ ದುರ್ಲಭಾಂಶ್ಚ ದಿನೇ ದಿನೇ ॥ ೨೦॥

ಲಭತೇ ಪುತ್ರಪೌತ್ರಾಂಶ್ಚ ಮಹಾಲಕ್ಷ್ಮೀಸಮನ್ವಿತಾನ್ ।
ಪರಮಾಯುಷ್ಯಸಂಯುಕ್ತಾನ್ ಸಾಕ್ಷಚ್ಛಿವಸಮಾನ್ ಗುಣೈಃ ॥ ೨೧॥

ಸೃಷ್ಟಿಪಾಲನಸಂಹಾರಕರ್ತೇವಾಯಂ ಸದಾ ಭವೇತ್ ।
ಯಸ್ತೇ ಕೃಪಾವಾನ್ ಭವತಿ ಸ ತ್ರಿಮೂರ್ತಿರ್ನ ಸಂಶಯಃ ॥ ೨೨॥

ತತ್ಸಮೀಪಸ್ಥಿತಃ ಶೀಘ್ರಂ ಸದಾ ಜಾತಿಸ್ಮರೋಭವೇತ್ ।
ತಸ್ಯ ಗೇಹೇ ಸದಾ ಕಾಮಧೇನುಃ ಕಲ್ಪತರುಸ್ತಥಾ ॥ ೨೩॥

ಚಿನ್ತಾಮಣಿಶ್ಚ ಸತತಂ ತಿಷ್ಠತ್ಯೇವ ನ ಸಂಶಯಃ ।
ಮಹಾಜಯಮವಾಪ್ನೋತಿ ಸದಾ ಸರ್ವತ್ರ ಮಾನವಃ ॥ ೨೪॥

ವಜ್ರಕಾಯಸಮೋ ಭೂತ್ವಾ ಚರತ್ಯೇವ ಜಗತ್ಯಯಮ್ ।
ಮಹಾಸುಖೀ ಭವೇನ್ನಿತ್ಯಂ ಪರಮಾತ್ಮಾ ಭವೇತ್ ಸದಾ ॥ ೨೫॥

ಮುಚ್ಯತೇ ಸಕಲೇಭ್ಯೋಽಪಿ ಬನ್ಧನೈಃ ಶ್ರೃಙ್ಖಲಾದಿಭಿಃ ।
ತಂ ಪೂಜಯನ್ತಿ ಸತತಂ ಹರಿರುದ್ರಾದಯೋಽಪಿ ಚ ॥ ೨೬॥

ಶುಭಮೇವ ಭವೇನ್ನಿತ್ಯಂ ಸದಾಪದ್ಭಿರ್ವಿಮುಚ್ಯತೇ ।
ದೇವಗನ್ಧರ್ವರಕ್ಷಾದ್ಯೈರ್ಬ್ರಹ್ಮಾದ್ಯೈರಪಿ ದುರ್ಲಭಾನ್ ॥ ೨೭॥

ಪ್ರಾಪ್ನೋತಿ ಸಕಲಾನ್ ಕಾಮಾನ್ ಶೀಘ್ರಮೇವ ನ ಸಂಶಯಃ ।
ದಿವ್ಯಭೋಗಯುತೋ ದಿವ್ಯಕನ್ಯಾಭಿಃ ಸಹ ಸಂಯುತಃ ॥ ೨೮॥

ವಿಮಾನಂ ಸ ಸಮಾಸ್ಥಾಯ ದಿವ್ಯಾಭರಣಭೂಷಿತಃ ।
ದಿವ್ಯಚನ್ದನಲಿಪ್ತಾಙ್ಗಃ ಸದಾ ವಿಂಶತಿವಾರ್ಷಿಕಃ ॥ ೨೯॥

ಸ ಭುಙ್ಕ್ತೇ ಸಕಲಾನ್ ಭೋಗಾನ್ ದೇವಲೋಕೇ ನರಃ ಸದಾ ।
ತಸ್ಮಾದೇತತ್ ಪಠೇತ್ ಸ್ತೋತ್ರಂ ತ್ರಿಪುರಾಹೃದಯಂ ಶುಭಮ್ ।
ಜಪೇದ್ಯಃ ಸತತಂ ಭಕ್ತ್ಯಾ ಭವೇತ್ ಸಾಕ್ಷಾತ್ ಸದಾ ಶಿವಃ ॥ ೩೦॥

॥ ಇತಿ ಶ್ರೀ ರುದ್ರಯಾಮಲೇ ಈಶ್ವರಪಾರ್ವತೀಸಂವಾದೇ

ಶ್ರೀಲಲಿತಾತ್ರಿಪುರಸುನ್ದರೀಹೃದಯಸ್ತೋತ್ರಮ್ ॥


Encoded and proofread by PP
From Shrividya Sadhana.

Please send corrections to sanskrit@cheerful.com
Last updated ತ್oday
http://sanskritdocuments.org

Lalita Tripura Sundari Hrudaya Stotram Lyrics in Kannada PDF
% File name : shrIlalitAtripurasundarihRRidayastotram.itx
% Category : hRidaya
% Location : doc\_devii
% Language : Sanskrit
% Subject : hinduism/religion
% Transliterated by : PP
% Proofread by : PP
% Description-comments : from Kalyan-Mandir magazine
% Latest update : October 19, 2014
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website