{॥ శ్రీలలితాత్రిపురసున్దరీహృదయస్తోత్రమ్ ॥}
॥ శ్రీలలితాత్రిపురసున్దర్యై నమః ॥
॥ అథ శ్రీమత్ లలితాత్రిపురసున్దరీహృదయస్తోత్రసాధనా ॥
ఓం శుద్ధస్ఫటికసఙ్కాశం ద్వినేత్రం కరుణానిధిమ్ ।
వరాభయకరం వన్దే శ్రీగురుం శివరూపిణమ్ ॥ ౧॥

భక్తాజ్ఞానతమోభానుం మూర్ధ్ని పఙ్కజసంస్థితమ్ ।
సదాశివమయం నిత్యం శ్రీగురుం ప్రణమామ్యహమ్ ॥ ౨॥

శ్రీవిద్యాం జగతాం ధాత్రీం సర్గస్థితిలయేశ్వరీమ్ ।
నమామి లలితాం నిత్యం మహాత్రిపురసున్దరీమ్ ॥ ౩॥

బిన్దుత్రికోణసంయుక్తం వసుకోణసమన్వితమ్ ।
దశకోణద్వయోపేతం భువనారసమన్వితమ్ ॥ ౪॥

దలాష్టకసమోపేతం దలషోడశకాన్వితమ్ ।
వృత్తత్రయాన్వితం భూమిసదనత్రయభూషితమ్ ॥ ౫॥

నమామి లలితాచక్రం భక్తానామేతదిష్టదమ్ ।
అమృతామ్భోనిధౌ తత్ర రత్నద్వీపం నమామ్యహమ్ ॥ ౬॥

నానావృక్షమహోద్యానం వన్దేఽహం కల్పవాటికామ్ ।
సన్తానవాటికాం వన్దే హరిచన్దనవాటికామ్ ॥ ౭॥

మన్దారవాటికాం వన్దే పారిజాతాఖ్యవాటికామ్ ।
నమామి తవ దేవేశి కదమ్బవనవాటికామ్ ॥ ౮॥

పుష్పరాగమహారత్నప్రాకారం ప్రణమామ్యహమ్ ।
పద్మరాగాఖ్యమణిభిః ప్రాకారం సర్వదా భజే ॥ ౯॥

గోమేదరత్నప్రాకారం వజ్రప్రాకారమాశ్రయే ।
వైడూర్యరత్నప్రాకారం ప్రణమామి తవేశ్వరి ॥ ౧౦॥

ఇన్ద్రనీలాఖ్యరత్నానాం ప్రాకారం ప్రణమామ్యహమ్ ।
ముక్తారత్నమయం చైవ ప్రాకారం సర్వదా భజే ॥ ౧౧॥

మరకతాఖ్యమహారత్నప్రాకారాయ నమస్తవ ।
విద్రుమాఖ్యమహారత్నప్రాకారం తు తవాశ్రయే ॥ ౧౨॥

మాణిక్యమణ్డపం వన్దే సహస్రస్తమ్భమణ్డపమ్ ।
లలితే తవ దేవేశి భజామ్యమృతవాపికామ్ ॥ ౧౩॥

ఆనన్దవాపికాం వన్దే భజే చైవ విమర్శికామ్ ।
భజే బాలాతపోద్గారం చన్ద్రికోద్గారమాశ్రయే ॥ ౧౪॥

మహాశృఙ్గారపరిఖాం మహాపద్మాటవీం భజే ।
చిన్తామణిమహారత్నగృహరాజం నమామ్యహమ్ ॥ ౧౫॥

పూర్వామ్నాయమయం పూర్వద్వారం దేవి భజామి తే ।
దక్షిణామ్నాయ రూపం తే దక్షిణద్వారమాశ్రయే ॥ ౧౬॥

నమామి తే పరం ద్వారం పశ్చిమామ్నాయరూపకమ్ ।
వన్దేఽహముత్తరం ద్వారముత్తరామ్నాయరూపకమ్ ॥ ౧౭॥

ఊర్ధ్వామ్నాయమఽహం వన్దే ఊర్ధ్వద్వారం కులేశ్వరి ।
లలితే తవ దేవేశి మహాసింహాసనం భజే ॥ ౧౮॥

బ్రహ్మాత్మకమఞ్చపాదమేకం తవ నమామ్యహమ్ ।
ఏకం విష్ణుమయం మఞ్చపాదం తవ నమామ్యహమ్ ॥ ౧౯॥

ఏకం రుద్రమయం మఞ్చపాదం తవ నమామ్యహమ్ ।
మఞ్చపాదం నమామ్యేకం తవ దేవీశ్వరాత్మకమ్ ॥ ౨౦॥

మఞ్చైకఫలకం వన్దే సదాశివమయం శుభమ్ ।
నమామి తే హంసతూలతలిమాం పరమేశ్వరి ॥ ౨౧॥

భజామి తే హంసతూల మహోపాధానముత్తమమ్ ।
కౌసుమ్భాస్తరణం దేవి తవ నిత్యం నమామ్యహమ్ ॥ ౨౨॥

మానసపూజా ।
మహావితానకం వన్దే మహాజవనికాం భజే ।
ఏవం పూజాగృహం ధ్యాత్వా శ్రీచక్రస్య శివప్రియే ॥ ౨౩॥

మద్దక్షిణే స్థాపయామి భాగే పుష్పాక్షతాదికమ్ ।
అభితస్తే మహాదేవి దీపాఁస్తాన్ దర్శయామ్యహమ్ ॥ ౨౪॥

మూలేన త్రిపురాచక్రం తవ సమ్పూజయామ్యహమ్ ।
త్రిభిఃఖణ్డైస్తవ త్ర్యస్త్రం పూజయామి శివప్రియే ॥ ౨౫॥

వాయ్వగ్నిజలసంయుక్తప్రాణాయామైరహం శివే ।
శోషణం దాహనం దేవి కరోమ్యాప్లావనం తథా ॥ ౨౬॥

త్రివారం మూలమన్త్రేణ ప్రాణాయామం కరోమ్యహమ్ ।
అపసర్పన్తు తే భూతా యే భూతా భూమిసంస్థితాః ॥ ౨౭॥

యే భూతా విఘ్నకర్తారస్తే నశ్యన్తు శివాజ్ఞయా ।
కరోమ్యనేన మన్త్రేణ తాలత్రయమహం శివే ॥ ౨౮॥

నారాయణోఽహం బ్రహ్మాఽహం భైరవోఽహం శివోఽస్మ్యహమ్ ।
దేవోఽహం పరమాత్మాఽహం మహాత్రిపురసున్దరి ॥ ౨౯॥

ధ్యాత్వైవం వజ్రకవచం న్యాసం తవ కరోమ్యహమ్ ।
కుమారీబీజసంయుక్తం మహాత్రిపురసున్దరి ॥ ౩౦॥

మాం రక్ష రక్షేతి హృది కరోమ్యఞ్జలిమీశ్వరి ।
నమో దేవ్యాసనాయేతి తే కరోమ్యాసనం శివే ॥ ౩౧॥

చక్రాసనం నమస్యామి సర్వమన్త్రాసనం భజే ।
సాధ్యసిద్ధాసనం వన్దే మన్త్రైరేభిర్మహేశ్వరి ॥ ౩౨॥

కరోమ్యస్మింశ్చక్రమన్త్రదేవతాసనముత్తమమ్ ।
కరోమ్యథ షడఙ్గాఖ్యం మాతృకాశ్చ కరోమ్యహమ్ ॥ ౩౩॥

వశిన్యాద్యష్టకం న్యాసం షోఢాన్యాసం కరోమ్యహమ్ ।
మహాషోఢాం తతః కుర్వే నవయోన్యాఖ్యముత్తమమ్ ॥ ౩౪॥

చక్రన్యాసం తతః కుర్వే శ్రీకణ్ఠన్యాసముత్తమమ్ ।
కేశవాది మహాన్యాసం కామన్యాసం కరోమ్యహమ్ ॥ ౩౫॥

కలాన్యాసం తతః కుర్వే కుర్వే కామకలాహ్వయమ్ ।
పీఠన్యాసం తతః కుర్వే తత్త్వన్యాసం కరోమ్యహమ్ ॥ ౩౬॥

తతః కరోమి స్థిత్యాదిన్యాసం తత్ త్రిపురేశ్వరి ।
తతః శుద్ధోదకేనాహం వామభాగే మహేశ్వరి ॥ ౩౭॥

కరోమి మణ్డలం వృత్తం చతురస్రం శివప్రియే ।
పుష్పైరభ్యర్చ్య సాధారం శఙ్ఖం సంస్థాపయామ్యహమ్ ॥ ౩౮॥

అర్చయామి షడఙ్గేన జలమాపూరయామ్యహమ్ ।
దదామి చాదిమం బిన్దుం కుర్వే మూలాభిమన్త్రితమ్ ॥ ౩౯॥

తజ్జలేన జగన్మాతస్త్రికోణం వృత్తసంయుతమ్ ।
షట్కోణం చతురస్త్రం చ మణ్డలం ప్రకరోమ్యహమ్ ॥ ౪౦॥

విద్యయా పూజనం మధ్యే ఖణ్డైస్త్ర్యస్త్రాభిపూజనమ్ ।
బీజావృత్యా కోణషట్కం పూజయామి శివప్రియే ॥ ౪౧॥

తస్మిన్ దశకలాయుక్తమగ్నిమణ్డలమాశ్రయే ।
ధూమార్చిషం నమస్యామి ఊష్మాం చ జ్వలినీం భజే ॥ ౪౨॥

జ్వలినీం చ నమస్యామి వన్దేఽహం విస్ఫుల్లిఙ్గినీమ్ ।
సుశ్రియం చ సురూపాం చ కపిలాం ప్రణమామ్యహమ్ ॥ ౪౩॥

నౌమి హవ్యవహాం నిత్యం భజే కవ్యవహాం కలామ్ ।
యాదిభిః సహితా వహ్నేః కలా దశ తథా భజే ॥ ౪౪॥

సూర్యస్య మణ్డలం తత్ర కలాద్వాదశకాత్మకమ్ ।
అర్ఘ్యపాత్రే త్వఽహం వన్దే తపినీం తాపినీం భజే ॥ ౪౫॥

ధూమ్రాం మరీచిం వన్దేఽహం జ్వాలినీం చ రుచిం భజే ।
సుషుమ్ణాం భోగదాం వన్దే భజే విశ్వాం చ బోధినీమ్ ॥ ౪౬॥

ధారిణీం చ క్షమాం వన్దే సౌరా ఏతాః కలా భజే ।
సోమస్య మణ్డలం తత్ర కలాః షోడశకాత్మకాః ॥ ౪౭॥

అర్ఘ్యామృతాత్మకం వన్దేఽమృతాం మానదాం స్తువే ।
పూషాం తుష్టిం భజే పుష్టిం రతిం ధృతిమహం భజే ॥ ౪౮॥

శశినీం చన్ద్రికాం వన్దే కాన్తిం జ్యోత్స్నాం శ్రియం భజే ।
నౌమి ప్రీతిం చాఙ్గదాం చ పూర్ణాం పూర్ణామృతాం భజే ॥ ౪౯॥

స్వరైః షోడశభిర్యుక్తా భజే సోమస్య వై కలాః ।
త్రికోణలేఖనం కుర్వే అకథాదిసురేఖకమ్ ॥ ౫౦॥

హళక్షవర్ణసంయుక్తం స్థితాన్తర్హంసభాస్వరమ్ ।
వాక్కామశక్తిసంయుక్తం హంసేనారాధయామ్యహమ్ ॥ ౫౧॥

వృత్తాద్బహిః షడస్రే చ లేఖనం ప్రకరోమ్యహమ్ ।
పురోభాగాది షట్కోణం షడఙ్గేనార్చయామ్యహమ్ ॥ ౫౨॥

శ్రీవిద్యాయాః సప్తవారం కరోమ్యత్రాభిమన్త్రణమ్ ।
సమర్పయామి విశ్వేశి తస్మిన్ గన్ధాక్షతాదికమ్ ॥ ౫౩॥

ధ్యాయామి పూజాద్రవ్యం తే సర్వం విద్యామయం శుభమ్ ।
చతుర్నవతి సన్మన్త్రాన్ స్పృష్ట్వా తత్ప్రజపామ్యహమ్ ॥ ౫౪॥

వహ్నేర్దశకలాః సూర్యకలాద్వాదశకం భజే ।
ఆశ్రయే షోడశకలాస్తత్ర సోమస్య కామదాః ॥ ౫౫॥

సృష్టిమృద్ధిం స్మృతిం వన్దే మేధాం కాన్తిం నమామ్యహమ్ ।
లక్ష్మీం ధృతిం స్థిరాంవన్దే స్థితిం సిద్ధిం భజామ్యహమ్ ॥ ౫౬॥

ఏతాం బ్రహ్మకలాం వన్దే జరాం తాం పాలినీం భజే ।
శాన్తిం నమామీశ్వరీం చ రతిం వన్దే చ కామికామ్ ॥ ౫౭॥

వరదాం హ్లాదినీం వన్దే ప్రీతిం దీర్ఘాం భజామ్యహమ్ ।
టాదిభిః సహితా విష్ణోః కలా దశ తథా భజే ॥ ౫౮॥

ఏతా విష్ణోః కలా వన్దే తీక్ష్ణాం రౌద్రీం భయాం తథా ।
నిద్రాం తన్ద్రాం క్షుధాం వన్దే నమామి క్రోధినీం క్రియామ్ ॥ ౫౯॥

ఉద్గారీం చ భజే మృత్యుమేతా రుద్రకలా భజే ।
పీతాం శ్వేతాం భజే నిత్యమరుణాం చ తథా భజే ॥ ౬౦॥

భజేఽసితాం తథాఽనన్తాం షాదిభిః సహితాస్తథా ।
ఈశ్వరస్య కలా హ్యేతా వన్దే నిత్యమభీష్టదాః ॥ ౬౧॥

నివృత్తిం చ ప్రతిష్ఠాం చ విద్యాం శాన్తిం నమామ్యహమ్ ।
ఇన్ధికాం దీపికాం చైవ రేచికాం మోచికాం తథా ॥ ౬౨॥

పరాం సూక్ష్మాం నమస్యామి నౌమి సూక్ష్మామృతాం కలామ్ ।
వన్దే జ్ఞానాం కలాం చైవ తథా జ్ఞానామృతాం కలామ్ ॥ ౬౩॥

ఆప్యాయినీం వ్యాపినీం చ వ్యోమరూపాం నమామ్యహమ్ ।
కలాః సదాశివస్యైతాః షోడశ ప్రణమామ్యహమ్ ॥ ౬౪॥

హాంసాఖ్యం చ మహామన్త్రం జ్యోతిషం హంసమాశ్రయే ।
ప్రతత్ప్రథమవిశ్వాన్తం మన్త్రం జ్యోతిషమాశ్రయే ॥ ౬౫॥

త్ర్యమ్బకం చ నమస్యామి తద్విష్ణోః ప్రణమామ్యహమ్ ।
విష్ణుర్యోనిం మూలవిద్యాం మన్త్రైరేభిరనుత్తమైః ॥ ౬౬॥

అమృతం మన్త్రితం వన్దే చతుర్నవతిభిస్తవ ।
అఖణ్డైకరసానన్దకరేఽపరసుధాత్మని ॥ ౬౭॥

స్వచ్ఛన్దస్ఫురణామత్ర నిధేహ్యకులరూపిణి ।
అకులస్థామృతాకారే శుద్ధజ్ఞానకరే పరే ॥ ౬౮॥

అమృతత్వం నిధేహ్యస్మిన్ వస్తుని క్లిన్నరూపిణి ।
తద్రూపిణ్యైకరస్యత్వం కృత్వా హ్యేతత్స్వరూపిణి ॥ ౬౯॥

భూత్వా పరామృతాఽఽకారా మయి చిత్స్ఫురణం కురు ।
అమృతేశీం నమస్యామి సర్వదామృతవర్షిణీమ్ ॥ ౭౦॥

వాగ్వాదినీం నమస్యామి శ్రీవిద్యాం ప్రణమామ్యహమ్ ।
ఏభిర్మనూత్తమైర్వన్దే మన్త్రితం పరమామృతమ్ ॥ ౭౧॥

జ్యోతిర్మయమిదం కుర్వే పరమర్ఘ్యం మహేశ్వరి।
తద్బిన్దుభిర్మే శిరసి త్రిగురూన్ పూజయామ్యహమ్ ॥ ౭౨॥

బ్రహ్మాఽహమస్మి తద్బిన్దుం కుణ్డలిన్యా జుహోమ్యహమ్ ।
హృచ్చక్రస్థా మహాదేవీం మహాత్రిపురసున్దరీమ్ ॥ ౭౩॥

నిరస్తమోహతిమిరాం సాక్షాత్ సంవిత్స్వరూపిణీమ్ ।
నాసాపుటే పరకలామథ నిర్గమయామ్యహమ్ ॥ ౭౪॥

సమానయామి తాం హస్తే త్రిఖణ్డకుసుమాఞ్జలౌ ।
జగన్మాతర్మహాదేవి మహాత్రిపురసున్దరి ॥ ౭౫॥

సుధాచైతన్యమూర్తిం తే కల్పయామి నమః శివే ।
అనేన మనునా దేవి యన్త్రే త్వాం స్థాపయామ్యహమ్ ॥ ౭౬॥

మహాపద్మవనాన్తఃస్థే కారణానన్దవిగ్రహే ।
సర్వభూతహితే మాతరేహ్యేహి పరమేశ్వరి ॥ ౭౭॥

దేవేశి భక్తిసులభే సర్వావరణసంయుతే ।
యావత్ త్వాం పూజయిష్యామి తావత్ త్వం సుస్థిరా భవ ॥ ౭౮॥

అనేన మన్త్రయుగ్మేన త్వామత్రావాహయామ్యహమ్ ।
కల్పయామి నమః పాద్యమర్ఘ్యం తే కల్పయామ్యహమ్ ॥ ౭౯॥

సుగన్ధతైలాభ్యఙ్గం చ మజ్జశాలాప్రవేశనమ్ ।
కల్పయామి నమస్తస్మిన్ మణిపీఠోపవేశనమ్ ॥ ౮౦॥

దివ్యస్నానీయమీశాని గృహాణోద్వర్తనం శుభమ్ ।
గృహాణోష్ణోదకస్నానం కల్పయామి నమస్తవ ॥ ౮౧॥

హేమకుమ్భచ్యుతైస్తీర్థైః కల్పయామ్యభిషేచనమ్ ।
కల్పయామి నమస్తుభ్యం ధౌతేన పరిమార్జనమ్ ॥ ౮౨॥

బాలభానుప్రతీకాశం దుకూలపరిధానకమ్ ।
అరుణేన దుకూలేనోత్తరీయం కల్పయామి తే ॥ ౮౩॥

ప్రవేశనం కల్పయామి తవాలేపనమణ్డపమ్ ।
నమస్తే కల్పయామ్యత్ర మణిపీఠోపవేశనమ్ ॥ ౮౪॥

అష్టగన్ధైః కల్పయామి సర్వాఙ్గేషు విలేపనమ్ ।
కాలాగరు మహాధూపస్తవ కేశభరస్య హి ॥ ౮౫॥

మల్లికామాలతీజాతీచమ్పకాదిమనోరమైః ।
రచితాఃకుసుమైర్మాలాః కల్పయామి నమస్తవ ॥ ౮౬॥

ప్రవేశనం కల్పయామి నమో భూషణమణ్డపమ్ ।
ఉపవేశం రత్నపీఠే తత్ర తే కల్పయామ్యహమ్ ॥ ౮౭॥

నవమాణిక్యముకుటం తచ్చన్ద్రశకలం తతః ।
తతః సీమన్తసిన్దూరం తతస్తిలకముత్తమమ్ ॥ ౮౮॥

కాలాఞ్జనం కల్పయామి పాలీయుగలముత్తమమ్ ।
మణికుణ్డలయుగ్మం తే నాసాభరణమీశ్వరి ॥ ౮౯॥

తే కల్పయామి త్రిపురే లలితాఽధరయావకమ్ ।
అథాఽఽద్యభూషణం కణ్ఠే హేమచిన్తాకముత్తమమ్ ॥ ౯౦॥

పదకం తే కల్పయామి మహాపదకముత్తమమ్ ।
కల్పయామి నమో ముక్తావలిమేకావలిం చ తే ॥ ౯౧॥

ఛన్నవీరం చ కేయూరయుగలానాం చతుష్టయమ్ ।
వలయావలిమీశాని ఊర్మికావలిమీశ్వరి ॥ ౯౨॥

కాఞ్చీదామకటీసూత్రం సౌభాగ్యాభరణం చ తే ।
త్రిపురే పాదకటకం కల్పయే రత్ననూపురమ్ ॥ ౯౩॥

పాదాఙ్గులీయకం తుభ్యం పాశమేకకరే తవ ।
అన్యస్మిన్నఙ్కుశం దేవి పుణ్డ్రేక్షుధనుషం పరే ॥ ౯౪॥

అపరే పుష్పబాణాఁశ్చ శ్రీమన్మాణిక్యపాదుకే ।
నవావరణదేవీభిర్మహాచక్రాధిరోహణమ్ ॥ ౯౫॥

కామేశ్వరాఙ్కపర్యఙ్క ఉపవేశనముత్తమమ్ ।
సుధాసవాఖ్యం చషకం తతః ఆచమనీయకమ్ ॥ ౯౬॥

కర్పూరవీటికాం తుభ్యం కల్పయామి నమః శివే ।
ఆనన్దోల్లాసవేలాసహాసం తే కల్పయామ్యహమ్ ॥ ౯౭॥

మఙ్గలారార్తికం దేవి ఛత్రం తే కల్పయామ్యహమ్ ।
తతశ్చామరయుగ్మం తే దర్పణం కల్పయామ్యహమ్ ॥ ౯౮॥

తాలవృన్తం కల్పయామి గన్ధం పుష్పం మహేశ్వరి ।
ధూపం దీపం చ నైవేద్యం కల్పయామి నమస్తవ ॥ ౯౯॥

అథాఽహం వైన్దవే చక్రే సర్వానన్దమయాత్మికే ।
రత్నసింహాసనే రమ్యే సమాసీనాం శివప్రియామ్ ॥ ౧౦౦॥

ధ్యానమ్ ।
ఉద్యద్భానుసహస్రాభ్యాం జపాపుష్పసమప్రభామ్ ।
నవరత్నప్రభాదీప్తముకుటేన విరాజితామ్ ॥ ౧౦౧॥

చన్ద్రరేఖాసమోపేతాం కస్తూరీతిలకాఞ్చితామ్ ।
కామకోదణ్డసౌన్దర్యనిర్జితభ్రూలతాయుగామ్ ॥ ౧౦౨॥

అఞ్జనాఞ్చితనేత్రాం తాం పద్మపత్రనిభేక్షణామ్ ।
మణికుణ్డలసంయుక్తకర్ణద్వయవిరాజితామ్ ॥ ౧౦౩॥

ముక్తామాణిక్యఖచితనాసికాభరణాన్వితామ్ ।
మదపాటలసంయుక్తకపోలయుగలాన్వితామ్ ॥ ౧౦౪॥

పక్వబిమ్బఫలాభాసాధరద్వయవిరాజితామ్ ।
శుద్ధముక్తావలిప్రఖ్యదన్తపఙ్క్తివిరాజితామ్ ॥ ౧౦౫॥

తామ్బూలపూరితముఖీం సుస్మితాస్యవిరాజితామ్ ।
ఆద్యభూషణసంయుక్తాం హేమచిన్తాకసంయుతామ్ ॥ ౧౦౬॥

పదకేన సమోపేతాం మహాపదకసంయుతామ్ ।
ముక్తావలిసమోపేతామేకావలివిరాజితామ్ ॥ ౧౦౭॥

కేయూరాఙ్గదసంయుక్తచతుర్బాహువిరాజితామ్ ।
అష్టగన్ధసమోపేతాం శ్రీచన్దనవిలేపనామ్ ॥ ౧౦౮॥

హేమకుమ్భసమప్రఖ్యస్తనద్వయవిరాజితామ్ ।
రక్తవస్త్రపరీధానాం రక్తకఞ్చుకసంయుతామ్ ॥ ౧౦౯॥

సూక్ష్మరోమావలీయుక్తతనుమధ్యవిరాజితామ్ ।
ముక్తామాణిక్యఖచితకాఞ్చీయుతనితమ్బినీమ్ ॥ ౧౧౦॥

సదాశివాఙ్కస్థపృథుమహాజఘనమణ్డలామ్ ।
కదలీస్తమ్భసఙ్కాశఊరుయుగ్మవిరాజితామ్ ॥ ౧౧౧॥

కదలీకాన్తిసఙ్కాశజఙ్ఘాయుగలశోభితామ్ ।
గూఢగుల్ఫద్వయోపేతాం రక్తపాదయుగాన్వితామ్ ॥ ౧౧౨॥

బ్రహ్మావిష్ణుమహాదేవశిరోముకుటజాతయా ।
కాన్త్యా విరాజితపదాం భక్తత్రాణపరాయణామ్ ॥ ౧౧౩॥

ఇక్షుకార్ముకపుష్పేషు పాశాఙ్కుశధరాం పరామ్ ।
సంవిత్స్వరూపిణీం దేవీం ధ్యాయామి పరమేశ్వరీమ్ ॥ ౧౧౪॥

ఇతి ధ్యానమ్ ।
ప్రదర్శయామ్యథ శివే నవముద్రా వరప్రదాః ।
త్వాం తర్పయామి త్రిపురే త్రిధా మూలేన పార్వతి ॥ ౧౧౫॥

ఆగ్నేయ్యామీశదిగ్భాగే నైఋత్యాం మారుతే తథా ।
మధ్యే దిక్షు షడఙ్గాని క్రమాదభ్యర్చయామ్యహమ్ ॥ ౧౧౬॥

ఆద్యాం కామేశ్వరీం వన్దే నమామి భగమాలినీమ్ ।
నిత్యక్లిన్నాం నమస్యామి భేరుణ్డాం ప్రణమామ్యహమ్ ॥ ౧౧౭॥

వహ్నివాసాం నమస్యామి మహావజ్రేశ్వరీం స్తువే ।
శివదూతీం నమస్యామి త్వరితాం కులసున్దరీమ్ ॥ ౧౧౮॥

నిత్యాం నీలపతాకాం చ విజయాం సర్వమఙ్గలామ్ ।
జ్వాలామాలాం చ చిత్రాం చ మహానిత్యాం చ సంస్తువే ॥ ౧౧౯॥

దివ్యౌఘేభ్యో నమస్యామి పరేశపరమేశ్వరీమ్ ।
మిత్రేశమథ షష్ఠీశముడ్డీశం ప్రణమామ్యహమ్ ॥ ౧౨౦॥

చర్యానాథం నమస్యామి లోపాముద్రామహం భజే ।
అగస్త్యం ప్రణమస్యామి సిద్ధౌఘే కాలతాపనమ్ ॥ ౧౨౧॥

ధర్మాచార్యం నమస్యామి ముక్తకేశీశ్వరం భజే ।
భజే దీపకలానాథం మానవౌఘే తతః పరమ్ ॥ ౧౨౨॥

విష్ణుదేవం నమస్యామి ప్రభాకరమహం భజే ।
తేజోదేవం నమస్యామి మనోజమథ సంస్తువే ॥ ౧౨౩॥

కల్యాణదేవం కలయే రత్నదేవం భజామ్యహమ్ ।
వాసుదేవం నమస్యామి శ్రీరామానన్దమాశ్రయే ॥ ౧౨౪॥

పరమేష్ఠిగురుం వన్దే పరమం గురుమాశ్రయే ।
శ్రీగురుం ప్రణమస్యామి మూర్ధ్ని బ్రహ్మబిలే స్థితమ్ ॥ ౧౨౫॥

కం బిలేఽహం నమస్యామి శ్రీగురోః పాదుకాం తతః ।
అథ ప్రాథమికే దేవి చతురస్రే తవేశ్వరి ॥ ౧౨౬॥

అణిమాం లఘిమాం వన్దే మహిమాం ప్రణమామ్యహమ్ ।
ఈశిత్వసిద్ధిం వన్దేఽహం వశిత్వం చ నమామ్యహమ్ ॥ ౧౨౭॥

ప్రాకామ్యసిద్ధిం వన్దేఽహం భుక్తిమిచ్ఛామహం భజే ।
ప్రాప్తిసిద్ధిం సర్వకామప్రదాసిద్ధిమహం భజే ॥ ౧౨౮॥

మధ్యమే చతురస్రేఽహం బ్రాహ్మీం మాహేశ్వరీం భజే ।
కౌమారీం వైష్ణవీం వన్దే వారాహీం ప్రణమామ్యహమ్ ॥ ౧౨౯॥

మాహేన్ద్రీమపి చాముణ్డాం మహాలక్ష్మీమహం భజే ।
తృతీయే చతురస్రేఽహం సర్వసంక్షోభిణీం భజే ॥ ౧౩౦॥

సర్వవిద్రావిణీం ముద్రాం సర్వాకర్షిణికాం భజే ।
ముద్రాం వశఙ్కరీం వన్దే సర్వోన్మాదినికాం భజే ॥ ౧౩౧॥

భజే మహాఙ్కుశాం ముద్రాం ఖేచరీం ప్రణమామ్యహమ్ ।
బీజముద్రాం యోనిముద్రాం భజే సర్వత్రిఖణ్డినీమ్ ॥ ౧౩౨॥

త్రైలోక్యమోహనం చక్రం నమామి లలితే తవ ।
నమామి యోగినీం తత్ర ప్రకటాఖ్యామభీష్టదామ్ ॥ ౧౩౩॥

సుధార్ణవాసనం వన్దే తత్ర తే పరమేశ్వరి ।
చక్రేశ్వరీం తత్ర వన్దే త్రిపురాం పరమేశ్వరీమ్ ॥ ౧౩౪॥

సర్వేసంక్షోభిణీం ముద్రాం తతోఽహం కలయే శివే ।
అథాఽహం షోడశదలే కామాకర్షణికాం భజే ॥ ౧౩౫॥

బుద్ధ్యాకర్షణికాం వన్దేఽహఙ్కార్షణీం భజే ।
శబ్దాకర్షణికాం వన్దే స్పర్శాకర్షణికాం భజే ॥ ౧౩౬॥

రూపాకర్షణికాం వన్దే రసాకర్షణికాం భజే ।
గన్ధాకర్షణికాం వన్దే చిత్తాకర్షణికాం భజే ॥ ౧౩౭॥

ధైర్యాకర్షణికాం వన్దే స్మృత్యాకర్షణికాం భజే ।
నామాకర్షణికాం వన్దే బీజాకర్షణికాం భజే ॥ ౧౩౮॥

ఆత్మాకర్షణికాం వన్దే హ్యమృతాకర్షణీం భజే ।
శరీరాకర్షణీం వన్దే నిత్యాం శ్రీపరమేశ్వరీమ్ ॥ ౧౩౯॥

సర్వాశాపూరకం చక్రం కలయేఽహం తవేశ్వరి ।
గుప్తాఖ్యాం యోగినీం వన్దే తత్రాఽహం గుప్తపూజితామ్ ॥ ౧౪౦॥

పీతామ్బుజాసనం తత్ర నమామి లలితే తవ ।
త్రిపురేశీం మహాదేవీం భజామీష్టార్థంసిద్ధిదామ్ ॥ ౧౪౧॥

సర్వంవిద్రావిణీం ముద్రాం తత్రాఽహం తాం విచిన్తయే ।
శివే తవాష్టపత్రేఽహమనఙ్గకుసుమాం భజే ॥ ౧౪౨॥

అనఙ్గమేఖలాం వన్దే హ్యనఙ్గమదనాం భజే ।
తతోఽహం ప్రణమస్యామి హ్యనఙ్గమదనాతురామ్ ॥ ౧౪౩॥

అనఙ్గరేఖాం కలయే భజే తేఽనఙ్గవేగినీమ్ ।
భజేఽనఙ్గాఙ్కుశాం దేవి తవ చానఙ్గమాలినీమ్ ॥ ౧౪౪॥

సర్వసంక్షోభణం చక్రం తత్రాఽహం కలయే సదా ।
వన్దే గుప్తతరాఖ్యాం తాం యోగినీం సర్వకామదామ్ ॥ ౧౪౫॥

తత్రాఽహం ప్రణమస్యామి దేవ్యాత్మాసనముత్తమమ్ ।
నమామి జగదీశానీమఽహం త్రిపురసున్దరీమ్ ॥ ౧౪౬॥

సర్వాకర్షణికాం ముద్రాం తత్రాఽహం కలయామి తే ।
భువనారే తవ శివే సర్వసంక్షోభిణీం భజే ॥ ౧౪౭॥

సర్వవిద్రావిణీం వన్దేఽహం సర్వాకర్షిణికాం భజే ।
సకలాహ్లాదినీం వన్దే సర్వసమ్మోహినీం భజే ॥ ౧౪౮॥

సకల స్తమ్భినీం వన్దే కలయే సర్వజృమ్భినీమ్ ।
వశఙ్కరీం నమస్యామి సర్వరఞ్జనికాం భజే ॥ ౧౪౯॥

సకలోన్మాదినీం వన్దే భజే సర్వార్థసాధినీమ్ ।
సమ్పత్తిపూరిణీం వన్దే సర్వమన్త్రమయీం భజే ॥ ౧౫౦॥

భజామ్యహం తతః శక్తిం సర్వద్వన్ద్వక్షయఙ్కరీమ్ ।
తత్రాఽహం కలయే చక్రం సర్వసౌభాగ్యదాయకమ్ ॥ ౧౫౧॥

నమామి జగతాం ధాత్రీం సమ్ప్రదాయాఖ్యయోగినీమ్ ।
శివే తవ నమస్యామి శ్రీచక్రాసనముత్తమమ్ ॥ ౧౫౨॥

నమామి జగదీశానీమహం త్రిపురవాసినీమ్ ।
కలయేఽహం తవ శివే ముద్రాం సర్వవశఙ్కరీమ్ ॥ ౧౫౩॥

బహిర్దశారే తే దేవి సర్వసిద్ధిప్రదాం భజే ।
సర్వసమ్పత్ప్రదాం వన్దే భజే సర్వప్రియఙ్కరీమ్ ॥ ౧౫౪॥

నమామ్యహం తతో దేవీం సర్వమఙ్గలకారిణీమ్ ।
సర్వకామప్రదాం వన్దే సర్వదుఃఖవిమోచినీమ్ ॥ ౧౫౫॥

సర్వమృత్యుప్రశమనీం సర్వవిఘ్ననివారిణీమ్ ।
సర్వాఙ్గసున్దరీం దేవీం సర్వసౌభాగ్యదాయినీమ్ ॥ ౧౫౬॥

సర్వార్థసాధకం చక్రం తథాఽహం కలయే సదా ।
కలయామి తతో దేవీం కులోత్తీర్ణాఖ్యయోగినీమ్ ॥ ౧౫౭॥

సర్వమన్త్రాసనం వన్దే త్రిపురాశ్రీయమాశ్రయే ।
కలయామి తతో ముద్రాం సర్వోన్మాదనకారిణీమ్ ॥ ౧౫౮॥

అన్తర్దశారే తే దేవి సర్వజ్ఞాం ప్రణమామ్యహమ్ ।
సర్వశక్తిం నమస్యామి సర్వైశ్వర్యప్రదాం భజే ॥ ౧౫౯॥

సర్వజ్ఞానమయీం వన్దే సర్వవ్యాధివినాశినీమ్ ।
సర్వాధారస్వరూపాం చ సర్వపాపహరాం భజే ॥ ౧౬౦॥

సర్వానన్దమయీం వన్దే సర్వరక్షాస్వరూపిణీమ్ ।
ప్రణమామి మహాదేవీం సర్వేప్సితప్రదాం భజే ॥ ౧౬౧॥

సర్వరక్షాకరం చక్రం తత్రాఽహం కలయే సదా ।
నిగర్భయోగినీం వన్దే తత్రాఽహం పరమేశ్వరీమ్ ॥ ౧౬౨॥

సాధ్యసింహాసనం వన్దే భజే త్రిపురమాలినీమ్ ।
కలయామి తతో దేవి ముద్రాం సర్వమహాఙ్కుశామ్ ॥ ౧౬౩॥

అష్టారే వశినీం వన్దే భజే కామేశ్వరీం సదా ।
మోదినీం విమలాం వన్దే హ్యరుణాం జయినీం భజే ॥ ౧౬౪॥

సర్వేశ్వరీం నమస్యామి కౌలినీం ప్రణమామ్యహమ్ ।
సర్వరోగహరం చక్రం తవాఽహం దేవి చిన్తయే ॥ ౧౬౫॥

రహస్యయోగినీం దేవీం సదాఽహం కలయామి తే ।
నమామి త్రిపురాసిద్ధాం భజే ముద్రాం చ ఖేచరీమ్ ॥ ౧౬౬॥

మహాత్రికోణస్య బాహ్యే చతుర్దిక్షు మహేశ్వరి ।
నమామి జృమ్భ్ణాన్ బాణాన్ చాపం సమ్మోహనం భజే ॥ ౧౬౭॥

పాశం వశఙ్కరం వన్దే భజే స్తమ్భనమఙ్కుశమ్ ।
త్రికోణేఽహం జగద్ధాత్రీం మహాకామేశ్వరీం భజే ॥ ౧౬౮॥

మహావజ్రేశ్వరీం వన్దే మహాశ్రీమాలినీం భజే ।
మహాశ్రీసున్దరీం వన్దే సర్వకామఫలప్రదామ్ ॥ ౧౬౯॥

సర్వసిద్ధిప్రదం చక్రం తవ దేవి నమామ్యహమ్ ।
నమామ్యతిరహస్యాఖ్యాం యోగినీం తత్ర కామదామ్ ॥ ౧౭౦॥

త్రిపురామ్బాం నమస్యామి బీజముద్రాం నమామ్యహమ్ ।
మూలమన్త్రేణ లలితే త్వాం బిన్దౌ పూజయామ్యహమ్ ॥ ౧౭౧॥

సర్వానన్దమయం చక్రం నమామి లలితే తవ ।
పరాపరరహస్యాఖ్యాం యోగినీం కలయే సదా ॥ ౧౭౨॥

మహాచక్రేశ్వరీం వన్దే యోనిముద్రామహం భజే ।
ధూపాదికం సర్వమయి తే కల్పయామ్యహమ్ ॥ ౧౭౩॥

త్వత్ప్రీతయే మహాముద్రాం దర్శయామి తతః శివే ।
త్రిధా త్వాం మూలమన్త్రేణ తర్పయామి తతః శివే ॥ ౧౭౪॥

శాల్యన్నం మధుసంయుక్తం పాయసాపూపసంయుతమ్ ।
ఘృతసూపసమాయుక్తం సర్వభక్ష్యసమన్వితమ్ ॥ ౧౭౫॥

ససితం క్షీరసంయుక్తం బహుశాకసమన్వితమ్ ।
నిక్షిప్య కాఞ్చనే పాత్రే నైవేద్యం కల్పయామి తే ॥ ౧౭౬॥

సఙ్కల్ప్య బిన్దునా వక్త్రం కుచౌ బిన్దుద్వయేన చ ।
యోనిం తు సపరార్ధేన కృత్వా శ్రీత్రిపురే తవ ॥ ౧౭౭॥

ఏతత్ కామకలారూపం భక్తానాం సర్వకామదమ్ ।
సర్వసమ్పత్ప్రదం వన్దే నమస్తే త్రిపురేశ్వరి ॥ ౧౭౮॥

వామభాగే త్రికోణం చ వృత్తం చ చతురస్రకమ్ ।
కృత్వా గన్ధాక్షతాద్యైశ్చ హ్యర్చయామి మహేశ్వరి ॥ ౧౭౯॥

వాగ్భవాద్యం నమస్యామి తత్ర వ్యాపకమణ్డలమ్ ।
జలయుక్తార్ద్రాన్నయుక్తం మకారత్రయభాజనమ్ ॥ ౧౮౦॥

తత్ర విన్యస్య దాస్యామి భూతేభ్యో బలిముత్తమమ్ ।
నమస్తే దేవదేవేశి నమస్త్రైలోక్యవన్దితే ॥ ౧౮౧॥

నమః పరశివాఙ్కస్థే నమస్త్రిపురసున్దరి ।
ప్రదక్షిణాం నమస్కారం మనసాఽహం కరోమి తే ॥ ౧౮౨॥

తతః సకలమన్త్రాణాం సమ్రాజ్ఞీం పరమేశ్వరీమ్ ।
ప్రజపామి మహావిద్యాం త్వత్ప్రీత్యార్థమహం సదా ।
తవ విద్యాం ప్రజప్త్వాఽథ స్తౌమి త్వాం పరమేశ్వరీమ్ ॥ ౧౮౩॥

మహాదేవి మహేశాని సదాశివ మహాప్రియే ।
మహానిత్యే మహాసిద్ధే త్వామహం శరణం వ్రజే ॥ ౧౮౪॥

జయ త్వం త్రిపురే దేవి లలితే జగదీశ్వరి ।
సదాశివప్రియకరి పాహి మాం కరుణాకరి ॥ ౧౮౫॥

జగన్మాతర్జగద్రూపే జగదీశ్వరవల్లభే ।
జగన్మయే జగస్తుల్యే గౌరి త్వామహమాశ్రయే ॥ ౧౮౬॥

అనాద్యే సర్వలోకానామాద్యే భక్తేష్టదాయిని ।
గిరిరాజస్య తనయే నమస్తే త్రిపురేశ్వరి ॥ ౧౮౭॥

జయాదిదేవదేవేశి బ్రహ్మమాతర్నమోఽస్తు తే ।
విష్ణుమాతరనాద్యన్తే హరమాతః సురేశ్వరి ॥ ౧౮౮॥

బ్రహ్మాదిసురసంస్తుత్యే లోకత్రయవశఙ్కరి ।
సర్వసమ్పత్ప్రదే నిత్యే త్వామహం కలయే సదా ॥ ౧౮౯॥

నిత్యానన్దే నిరాధారే చిద్రూపిణి శివప్రియే ।
అణిమాదిగుణాధారే త్వాం సదా కలయామ్యహమ్ ॥ ౧౯౦॥

బ్రాహ్మ్యాదిమాతృసంస్తుత్యే సర్వావరణసంయుతే ।
జ్యోతిర్మయే మహారూపే పాహి మాం త్రిపురే సదా ॥ ౧౯౧॥

లక్ష్మీవాణ్యాదిసమ్పూజ్యే బ్రహ్మవిష్ణుశివస్తుతే ।
భజామి తవ పాదాబ్జం సర్వకామఫలప్రదమ్ ॥ ౧౯౨॥

సర్వశక్తిసమోపేతం సర్వాభీష్టఫలప్రదే ।
నమామి తవ పాదాబ్జం దేవి త్రిపురసున్దరి ॥ ౧౯౩॥

త్వత్ప్రియార్థం తతః కాంశ్చిచ్ఛక్తిం సమ్పూజయామ్యహమ్ ।
మపఞ్చకేన తాం శక్తిం తర్పయామి మహేశ్వరి ॥ ౧౯౪॥

తయోపేతం హవిఃశేషం చిదగ్నౌ ప్రజుహోమ్యహమ్ ।
త్వత్ప్రియార్థం మహాదేవి మమాభీష్టార్థసిద్ధయే ॥ ౧౯౫॥

బద్ధ్వా తాం ఖేచరీం ముద్రాం క్షమస్వోద్వాసయామ్యహమ్ ।
తిష్ఠ మే హృదయే నిత్యం త్రిపురే పరమేశ్వరి ॥ ౧౯౬॥

జగదమ్బే మహారాజ్ఞి మహాశక్తి శివప్రియే ।
హృచ్చక్రే తిష్ఠ సతతం మహాత్రిపురసున్దరి ॥ ౧౯౭॥

సర్వలోకైకసమ్పూజ్యే సకలావరణైర్యుతే ।
హృచ్చక్రే తిష్ఠ మే నిత్యం మహాత్రిపురసున్దరి ॥ ౧౯౮॥

॥ ఫలశ్రుతి ॥
ఏతత్ త్రిపురసున్దర్యా హృదయం సర్వకామదమ్ ।
మహారహస్యం పరమం దుర్లభం దైవతైరపి ॥ ౧॥

సాక్షాత్ సదాశివేనోక్తం గుహ్యాద్గుహ్యమనుత్తమమ్ ॥ ౨॥

యః పఠేన్నిత్యమేకాగ్రః శ్రృణుయాద్ వా సమాహితః ।
నిత్యపూజాఫలం దేవ్యాః స లభేన్నాత్ర సంశయః ॥ ౩॥

పాపైః స ముచ్యతే సద్యః కాయవాక్చిత్తసమ్భవైః ।
సర్వజన్మసముద్భూతైర్జ్ఞానకృతైరపి ॥ ౪॥ missing letter or word

సర్వక్రతుషు యత్పుణ్యం సర్వతీర్థేషు యత్ ఫలమ్ ।
తత్పుణ్యం లభతే నిత్యం మానవో నాత్ర సంశయః ॥ ౫॥

అచలాం లభతే లక్ష్మీం త్రైలోక్యే చాపి దుర్లభామ్ ।
సాక్షాద్ విష్ణుసమో మర్త్యో శీఘ్రమేవ భవేత్ సదా ॥ ౬॥

అష్టైశ్వర్యమవాప్నోతి స శీఘ్రం మానవోత్తమః ।
గుటికాపాదుకాసిద్ధ్యాద్యష్టకం శీఘ్రమశ్నుతే ॥ ౭॥

శఙ్ఖాద్యా నిధ్యో వాఽపి తం నిత్యం పర్యుపాసతే ।
వశ్యాదీన్యష్టకర్మాణి శీఘ్రం సిద్ధ్యన్తి సర్వదా ॥ ౮॥

భూలోకస్థాః సర్వనార్యః పాతాలస్థాః సదాఙ్గనాః ।
సర్వలోకస్థితాః సర్వా యాశ్చాన్యారూపగర్వితాః ॥ ౯॥

రమన్తే తేన సతతం శీఘ్రం వశ్యా న సంశయః ।
రాజాద్యాః సకలా మర్త్యాః హరహర్యాదయః సురాః ॥ ౧౦॥

అనన్తాద్యా మహానాగాః సిద్ధయోగేశ్వరాదయః ।
ఋషయో మునయో యక్షాస్తం నిత్యం పర్యుపాసతే ॥ ౧౧॥

మహతీం కీర్తిమాప్నోతి శివవిష్ణుసమప్రభామ్ ।
పరమం యోగమాసాద్య ఖేచరో జాయతే సదా ॥ ౧౨॥

అపమృత్యువినిర్ముక్తః కాలమృత్యువివర్జితః ।
పరమాయుష్యమాప్నోతి హరహర్యాదిదుర్లభమ్ ॥ ౧౩॥

అశ్రుతాని చ శాస్త్రాణి వ్యాచష్టే విధివత్ సదా ।
మూఢోఽపి సర్వవిద్యావాన్ దక్షిణామూర్తివద్భవేత్ ॥ ౧౪॥

గ్రహభూతపిశాచాద్యా యక్షగన్ధర్వరాక్షసాః ।
ఏతస్య స్మరణాదేవ వినశ్యన్తి హి సర్వదా ॥ ౧౫॥

తద్గాత్రం ప్రాప్య సకలం విషం సద్యో వినశ్యతి ।
సహస్రకామసఙ్కాశః కాన్త్యా యః సర్వదా భవేత్ ॥ ౧౬॥

తస్మాదేతత్ పఠేత్ స్తోత్రం త్రిపురాహృదయం శుభమ్ ।
జపేద్ యః సర్వదా సాక్షాద్ భవేద్ దేవీస్వరూపకః ॥ ౧౭॥

సాఙ్గం త్రిపురసున్దర్యా నిత్యపూజాఫలం లభేత్ ।
విముక్తో రోగసఙ్ఘాతైరారోగ్యం మహదశ్నుతే ॥ ౧౮॥

ప్రాప్నోతి మహదైశ్వర్యం సర్వవిద్యానిధిర్భవేత్ ।
తత్కరస్పర్శమాత్రేణ నరో బ్రాహ్మణతాం లభేత్ ॥ ౧౯॥

ముచ్యతే సకలైర్విఘ్నైః స నిత్యం మానవోత్తమః ।
స భుఙ్క్తే సకలాన్ భోగాన్ దుర్లభాంశ్చ దినే దినే ॥ ౨౦॥

లభతే పుత్రపౌత్రాంశ్చ మహాలక్ష్మీసమన్వితాన్ ।
పరమాయుష్యసంయుక్తాన్ సాక్షచ్ఛివసమాన్ గుణైః ॥ ౨౧॥

సృష్టిపాలనసంహారకర్తేవాయం సదా భవేత్ ।
యస్తే కృపావాన్ భవతి స త్రిమూర్తిర్న సంశయః ॥ ౨౨॥

తత్సమీపస్థితః శీఘ్రం సదా జాతిస్మరోభవేత్ ।
తస్య గేహే సదా కామధేనుః కల్పతరుస్తథా ॥ ౨౩॥

చిన్తామణిశ్చ సతతం తిష్ఠత్యేవ న సంశయః ।
మహాజయమవాప్నోతి సదా సర్వత్ర మానవః ॥ ౨౪॥

వజ్రకాయసమో భూత్వా చరత్యేవ జగత్యయమ్ ।
మహాసుఖీ భవేన్నిత్యం పరమాత్మా భవేత్ సదా ॥ ౨౫॥

ముచ్యతే సకలేభ్యోఽపి బన్ధనైః శ్రృఙ్ఖలాదిభిః ।
తం పూజయన్తి సతతం హరిరుద్రాదయోఽపి చ ॥ ౨౬॥

శుభమేవ భవేన్నిత్యం సదాపద్భిర్విముచ్యతే ।
దేవగన్ధర్వరక్షాద్యైర్బ్రహ్మాద్యైరపి దుర్లభాన్ ॥ ౨౭॥

ప్రాప్నోతి సకలాన్ కామాన్ శీఘ్రమేవ న సంశయః ।
దివ్యభోగయుతో దివ్యకన్యాభిః సహ సంయుతః ॥ ౨౮॥

విమానం స సమాస్థాయ దివ్యాభరణభూషితః ।
దివ్యచన్దనలిప్తాఙ్గః సదా వింశతివార్షికః ॥ ౨౯॥

స భుఙ్క్తే సకలాన్ భోగాన్ దేవలోకే నరః సదా ।
తస్మాదేతత్ పఠేత్ స్తోత్రం త్రిపురాహృదయం శుభమ్ ।
జపేద్యః సతతం భక్త్యా భవేత్ సాక్షాత్ సదా శివః ॥ ౩౦॥

॥ ఇతి శ్రీ రుద్రయామలే ఈశ్వరపార్వతీసంవాదే

శ్రీలలితాత్రిపురసున్దరీహృదయస్తోత్రమ్ ॥


Encoded and proofread by PP
From Shrividya Sadhana.

Please send corrections to sanskrit@cheerful.com
Last updated త్oday
http://sanskritdocuments.org

Lalita Tripura Sundari Hrudaya Stotram Lyrics in Telugu PDF
% File name : shrIlalitAtripurasundarihRRidayastotram.itx
% Category : hRidaya
% Location : doc\_devii
% Language : Sanskrit
% Subject : hinduism/religion
% Transliterated by : PP
% Proofread by : PP
% Description-comments : from Kalyan-Mandir magazine
% Latest update : October 19, 2014
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website