% Text title : shrIlalitAtripurasundarihRRidayastotram % File name : shrIlalitAtripurasundarihRRidayastotram.itx % Category : hRidaya % Location : doc\_devii % Language : Sanskrit % Subject : hinduism/religion % Transliterated by : PP % Proofread by : PP % Description-comments : from Kalyan-Mandir magazine % Latest update : October 19, 2014 % Send corrections to : Sanskrit@cheerful.com % Site access : http://sanskritdocuments.org % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Lalitatripurasundari Hridayastotram ..}## \itxtitle{.. shrIlalitAtripurasundarIhR^idayastotram ..}##\endtitles ## \section{.. shrIlalitAtripurasundarIhR^idayastotram ..} || shrIlalitAtripurasundaryai namaH || || atha shrImat lalitAtripurasundarIhR^idayastotrasAdhanA || OM shuddhasphaTikasa~NkAshaM dvinetraM karuNAnidhim | varAbhayakaraM vande shrIguruM shivarUpiNam || 1|| bhaktAj~nAnatamobhAnuM mUrdhni pa~NkajasaMsthitam | sadAshivamayaM nityaM shrIguruM praNamAmyaham || 2|| shrIvidyAM jagatAM dhAtrIM sargasthitilayeshvarIm | namAmi lalitAM nityaM mahAtripurasundarIm || 3|| bindutrikoNasaMyuktaM vasukoNasamanvitam | dashakoNadvayopetaM bhuvanArasamanvitam || 4|| dalAShTakasamopetaM dalaShoDashakAnvitam | vR^ittatrayAnvitaM bhUmisadanatrayabhUShitam || 5|| namAmi lalitAchakraM bhaktAnAmetadiShTadam | amR^itAmbhonidhau tatra ratnadvIpaM namAmyaham || 6|| nAnAvR^ikShamahodyAnaM vande.ahaM kalpavATikAm | santAnavATikAM vande harichandanavATikAm || 7|| mandAravATikAM vande pArijAtAkhyavATikAm | namAmi tava deveshi kadambavanavATikAm || 8|| puShparAgamahAratnaprAkAraM praNamAmyaham | padmarAgAkhyamaNibhiH prAkAraM sarvadA bhaje || 9|| gomedaratnaprAkAraM vajraprAkAramAshraye | vaiDUryaratnaprAkAraM praNamAmi taveshvari || 10|| indranIlAkhyaratnAnAM prAkAraM praNamAmyaham | muktAratnamayaM chaiva prAkAraM sarvadA bhaje || 11|| marakatAkhyamahAratnaprAkArAya namastava | vidrumAkhyamahAratnaprAkAraM tu tavAshraye || 12|| mANikyamaNDapaM vande sahasrastambhamaNDapam | lalite tava deveshi bhajAmyamR^itavApikAm || 13|| AnandavApikAM vande bhaje chaiva vimarshikAm | bhaje bAlAtapodgAraM chandrikodgAramAshraye || 14|| mahAshR^i~NgAraparikhAM mahApadmATavIM bhaje | chintAmaNimahAratnagR^iharAjaM namAmyaham || 15|| pUrvAmnAyamayaM pUrvadvAraM devi bhajAmi te | dakShiNAmnAya rUpaM te dakShiNadvAramAshraye || 16|| namAmi te paraM dvAraM pashchimAmnAyarUpakam | vande.ahamuttaraM dvAramuttarAmnAyarUpakam || 17|| UrdhvAmnAyama.ahaM vande UrdhvadvAraM kuleshvari | lalite tava deveshi mahAsiMhAsanaM bhaje || 18|| brahmAtmakama~nchapAdamekaM tava namAmyaham | ekaM viShNumayaM ma~nchapAdaM tava namAmyaham || 19|| ekaM rudramayaM ma~nchapAdaM tava namAmyaham | ma~nchapAdaM namAmyekaM tava devIshvarAtmakam || 20|| ma~nchaikaphalakaM vande sadAshivamayaM shubham | namAmi te haMsatUlatalimAM parameshvari || 21|| bhajAmi te haMsatUla mahopAdhAnamuttamam | kausumbhAstaraNaM devi tava nityaM namAmyaham || 22|| mAnasapUjA | mahAvitAnakaM vande mahAjavanikAM bhaje | evaM pUjAgR^ihaM dhyAtvA shrIchakrasya shivapriye || 23|| maddakShiNe sthApayAmi bhAge puShpAkShatAdikam | abhitaste mahAdevi dIpA.NstAn darshayAmyaham || 24|| mUlena tripurAchakraM tava sampUjayAmyaham | tribhiHkhaNDaistava tryastraM pUjayAmi shivapriye || 25|| vAyvagnijalasaMyuktaprANAyAmairahaM shive | shoShaNaM dAhanaM devi karomyAplAvanaM tathA || 26|| trivAraM mUlamantreNa prANAyAmaM karomyaham | apasarpantu te bhUtA ye bhUtA bhUmisaMsthitAH || 27|| ye bhUtA vighnakartAraste nashyantu shivAj~nayA | karomyanena mantreNa tAlatrayamahaM shive || 28|| nArAyaNo.ahaM brahmA.ahaM bhairavo.ahaM shivo.asmyaham | devo.ahaM paramAtmA.ahaM mahAtripurasundari || 29|| dhyAtvaivaM vajrakavachaM nyAsaM tava karomyaham | kumArIbIjasaMyuktaM mahAtripurasundari || 30|| mAM rakSha rakSheti hR^idi karomya~njalimIshvari | namo devyAsanAyeti te karomyAsanaM shive || 31|| chakrAsanaM namasyAmi sarvamantrAsanaM bhaje | sAdhyasiddhAsanaM vande mantrairebhirmaheshvari || 32|| karomyasmiMshchakramantradevatAsanamuttamam | karomyatha ShaDa~NgAkhyaM mAtR^ikAshcha karomyaham || 33|| vashinyAdyaShTakaM nyAsaM ShoDhAnyAsaM karomyaham | mahAShoDhAM tataH kurve navayonyAkhyamuttamam || 34|| chakranyAsaM tataH kurve shrIkaNThanyAsamuttamam | keshavAdi mahAnyAsaM kAmanyAsaM karomyaham || 35|| kalAnyAsaM tataH kurve kurve kAmakalAhvayam | pIThanyAsaM tataH kurve tattvanyAsaM karomyaham || 36|| tataH karomi sthityAdinyAsaM tat tripureshvari | tataH shuddhodakenAhaM vAmabhAge maheshvari || 37|| karomi maNDalaM vR^ittaM chaturasraM shivapriye | puShpairabhyarchya sAdhAraM sha~NkhaM saMsthApayAmyaham || 38|| archayAmi ShaDa~Ngena jalamApUrayAmyaham | dadAmi chAdimaM binduM kurve mUlAbhimantritam || 39|| tajjalena jaganmAtastrikoNaM vR^ittasaMyutam | ShaTkoNaM chaturastraM cha maNDalaM prakaromyaham || 40|| vidyayA pUjanaM madhye khaNDaistryastrAbhipUjanam | bIjAvR^ityA koNaShaTkaM pUjayAmi shivapriye || 41|| tasmin dashakalAyuktamagnimaNDalamAshraye | dhUmArchiShaM namasyAmi UShmAM cha jvalinIM bhaje || 42|| jvalinIM cha namasyAmi vande.ahaM visphulli~NginIm | sushriyaM cha surUpAM cha kapilAM praNamAmyaham || 43|| naumi havyavahAM nityaM bhaje kavyavahAM kalAm | yAdibhiH sahitA vahneH kalA dasha tathA bhaje || 44|| sUryasya maNDalaM tatra kalAdvAdashakAtmakam | arghyapAtre tva.ahaM vande tapinIM tApinIM bhaje || 45|| dhUmrAM marIchiM vande.ahaM jvAlinIM cha ruchiM bhaje | suShumNAM bhogadAM vande bhaje vishvAM cha bodhinIm || 46|| dhAriNIM cha kShamAM vande saurA etAH kalA bhaje | somasya maNDalaM tatra kalAH ShoDashakAtmakAH || 47|| arghyAmR^itAtmakaM vande.amR^itAM mAnadAM stuve | pUShAM tuShTiM bhaje puShTiM ratiM dhR^itimahaM bhaje || 48|| shashinIM chandrikAM vande kAntiM jyotsnAM shriyaM bhaje | naumi prItiM chA~NgadAM cha pUrNAM pUrNAmR^itAM bhaje || 49|| svaraiH ShoDashabhiryuktA bhaje somasya vai kalAH | trikoNalekhanaM kurve akathAdisurekhakam || 50|| haLakShavarNasaMyuktaM sthitAntarhaMsabhAsvaram | vAkkAmashaktisaMyuktaM haMsenArAdhayAmyaham || 51|| vR^ittAdbahiH ShaDasre cha lekhanaM prakaromyaham | purobhAgAdi ShaTkoNaM ShaDa~NgenArchayAmyaham || 52|| shrIvidyAyAH saptavAraM karomyatrAbhimantraNam | samarpayAmi vishveshi tasmin gandhAkShatAdikam || 53|| dhyAyAmi pUjAdravyaM te sarvaM vidyAmayaM shubham | chaturnavati sanmantrAn spR^iShTvA tatprajapAmyaham || 54|| vahnerdashakalAH sUryakalAdvAdashakaM bhaje | Ashraye ShoDashakalAstatra somasya kAmadAH || 55|| sR^iShTimR^iddhiM smR^itiM vande medhAM kAntiM namAmyaham | lakShmIM dhR^itiM sthirAMvande sthitiM siddhiM bhajAmyaham || 56|| etAM brahmakalAM vande jarAM tAM pAlinIM bhaje | shAntiM namAmIshvarIM cha ratiM vande cha kAmikAm || 57|| varadAM hlAdinIM vande prItiM dIrghAM bhajAmyaham | TAdibhiH sahitA viShNoH kalA dasha tathA bhaje || 58|| etA viShNoH kalA vande tIkShNAM raudrIM bhayAM tathA | nidrAM tandrAM kShudhAM vande namAmi krodhinIM kriyAm || 59|| udgArIM cha bhaje mR^ityumetA rudrakalA bhaje | pItAM shvetAM bhaje nityamaruNAM cha tathA bhaje || 60|| bhaje.asitAM tathA.anantAM ShAdibhiH sahitAstathA | Ishvarasya kalA hyetA vande nityamabhIShTadAH || 61|| nivR^ittiM cha pratiShThAM cha vidyAM shAntiM namAmyaham | indhikAM dIpikAM chaiva rechikAM mochikAM tathA || 62|| parAM sUkShmAM namasyAmi naumi sUkShmAmR^itAM kalAm | vande j~nAnAM kalAM chaiva tathA j~nAnAmR^itAM kalAm || 63|| ApyAyinIM vyApinIM cha vyomarUpAM namAmyaham | kalAH sadAshivasyaitAH ShoDasha praNamAmyaham || 64|| hAMsAkhyaM cha mahAmantraM jyotiShaM haMsamAshraye | pratatprathamavishvAntaM mantraM jyotiShamAshraye || 65|| tryambakaM cha namasyAmi tadviShNoH praNamAmyaham | viShNuryoniM mUlavidyAM mantrairebhiranuttamaiH || 66|| amR^itaM mantritaM vande chaturnavatibhistava | akhaNDaikarasAnandakare.aparasudhAtmani || 67|| svachChandasphuraNAmatra nidhehyakularUpiNi | akulasthAmR^itAkAre shuddhaj~nAnakare pare || 68|| amR^itatvaM nidhehyasmin vastuni klinnarUpiNi | tadrUpiNyaikarasyatvaM kR^itvA hyetatsvarUpiNi || 69|| bhUtvA parAmR^itA.a.akArA mayi chitsphuraNaM kuru | amR^iteshIM namasyAmi sarvadAmR^itavarShiNIm || 70|| vAgvAdinIM namasyAmi shrIvidyAM praNamAmyaham | ebhirmanUttamairvande mantritaM paramAmR^itam || 71|| jyotirmayamidaM kurve paramarghyaM maheshvari| tadbindubhirme shirasi trigurUn pUjayAmyaham || 72|| brahmA.ahamasmi tadbinduM kuNDalinyA juhomyaham | hR^ichchakrasthA mahAdevIM mahAtripurasundarIm || 73|| nirastamohatimirAM sAkShAt saMvitsvarUpiNIm | nAsApuTe parakalAmatha nirgamayAmyaham || 74|| samAnayAmi tAM haste trikhaNDakusumA~njalau | jaganmAtarmahAdevi mahAtripurasundari || 75|| sudhAchaitanyamUrtiM te kalpayAmi namaH shive | anena manunA devi yantre tvAM sthApayAmyaham || 76|| mahApadmavanAntaHsthe kAraNAnandavigrahe | sarvabhUtahite mAtarehyehi parameshvari || 77|| deveshi bhaktisulabhe sarvAvaraNasaMyute | yAvat tvAM pUjayiShyAmi tAvat tvaM susthirA bhava || 78|| anena mantrayugmena tvAmatrAvAhayAmyaham | kalpayAmi namaH pAdyamarghyaM te kalpayAmyaham || 79|| sugandhatailAbhya~NgaM cha majjashAlApraveshanam | kalpayAmi namastasmin maNipIThopaveshanam || 80|| divyasnAnIyamIshAni gR^ihANodvartanaM shubham | gR^ihANoShNodakasnAnaM kalpayAmi namastava || 81|| hemakumbhachyutaistIrthaiH kalpayAmyabhiShechanam | kalpayAmi namastubhyaM dhautena parimArjanam || 82|| bAlabhAnupratIkAshaM dukUlaparidhAnakam | aruNena dukUlenottarIyaM kalpayAmi te || 83|| praveshanaM kalpayAmi tavAlepanamaNDapam | namaste kalpayAmyatra maNipIThopaveshanam || 84|| aShTagandhaiH kalpayAmi sarvA~NgeShu vilepanam | kAlAgaru mahAdhUpastava keshabharasya hi || 85|| mallikAmAlatIjAtIchampakAdimanoramaiH | rachitAHkusumairmAlAH kalpayAmi namastava || 86|| praveshanaM kalpayAmi namo bhUShaNamaNDapam | upaveshaM ratnapIThe tatra te kalpayAmyaham || 87|| navamANikyamukuTaM tachchandrashakalaM tataH | tataH sImantasindUraM tatastilakamuttamam || 88|| kAlA~njanaM kalpayAmi pAlIyugalamuttamam | maNikuNDalayugmaM te nAsAbharaNamIshvari || 89|| te kalpayAmi tripure lalitA.adharayAvakam | athA.a.adyabhUShaNaM kaNThe hemachintAkamuttamam || 90|| padakaM te kalpayAmi mahApadakamuttamam | kalpayAmi namo muktAvalimekAvaliM cha te || 91|| ChannavIraM cha keyUrayugalAnAM chatuShTayam | valayAvalimIshAni UrmikAvalimIshvari || 92|| kA~nchIdAmakaTIsUtraM saubhAgyAbharaNaM cha te | tripure pAdakaTakaM kalpaye ratnanUpuram || 93|| pAdA~NgulIyakaM tubhyaM pAshamekakare tava | anyasminna~NkushaM devi puNDrekShudhanuShaM pare || 94|| apare puShpabANA.Nshcha shrImanmANikyapAduke | navAvaraNadevIbhirmahAchakrAdhirohaNam || 95|| kAmeshvarA~Nkaparya~Nka upaveshanamuttamam | sudhAsavAkhyaM chaShakaM tataH AchamanIyakam || 96|| karpUravITikAM tubhyaM kalpayAmi namaH shive | AnandollAsavelAsahAsaM te kalpayAmyaham || 97|| ma~NgalArArtikaM devi ChatraM te kalpayAmyaham | tatashchAmarayugmaM te darpaNaM kalpayAmyaham || 98|| tAlavR^intaM kalpayAmi gandhaM puShpaM maheshvari | dhUpaM dIpaM cha naivedyaM kalpayAmi namastava || 99|| athA.ahaM vaindave chakre sarvAnandamayAtmike | ratnasiMhAsane ramye samAsInAM shivapriyAm || 100|| dhyAnam | udyadbhAnusahasrAbhyAM japApuShpasamaprabhAm | navaratnaprabhAdIptamukuTena virAjitAm || 101|| chandrarekhAsamopetAM kastUrItilakA~nchitAm | kAmakodaNDasaundaryanirjitabhrUlatAyugAm || 102|| a~njanA~nchitanetrAM tAM padmapatranibhekShaNAm | maNikuNDalasaMyuktakarNadvayavirAjitAm || 103|| muktAmANikyakhachitanAsikAbharaNAnvitAm | madapATalasaMyuktakapolayugalAnvitAm || 104|| pakvabimbaphalAbhAsAdharadvayavirAjitAm | shuddhamuktAvaliprakhyadantapa~NktivirAjitAm || 105|| tAmbUlapUritamukhIM susmitAsyavirAjitAm | AdyabhUShaNasaMyuktAM hemachintAkasaMyutAm || 106|| padakena samopetAM mahApadakasaMyutAm | muktAvalisamopetAmekAvalivirAjitAm || 107|| keyUrA~NgadasaMyuktachaturbAhuvirAjitAm | aShTagandhasamopetAM shrIchandanavilepanAm || 108|| hemakumbhasamaprakhyastanadvayavirAjitAm | raktavastraparIdhAnAM raktaka~nchukasaMyutAm || 109|| sUkShmaromAvalIyuktatanumadhyavirAjitAm | muktAmANikyakhachitakA~nchIyutanitambinIm || 110|| sadAshivA~NkasthapR^ithumahAjaghanamaNDalAm | kadalIstambhasa~NkAshaUruyugmavirAjitAm || 111|| kadalIkAntisa~NkAshaja~NghAyugalashobhitAm | gUDhagulphadvayopetAM raktapAdayugAnvitAm || 112|| brahmAviShNumahAdevashiromukuTajAtayA | kAntyA virAjitapadAM bhaktatrANaparAyaNAm || 113|| ikShukArmukapuShpeShu pAshA~NkushadharAM parAm | saMvitsvarUpiNIM devIM dhyAyAmi parameshvarIm || 114|| iti dhyAnam | pradarshayAmyatha shive navamudrA varapradAH | tvAM tarpayAmi tripure tridhA mUlena pArvati || 115|| AgneyyAmIshadigbhAge naiR^ityAM mArute tathA | madhye dikShu ShaDa~NgAni kramAdabhyarchayAmyaham || 116|| AdyAM kAmeshvarIM vande namAmi bhagamAlinIm | nityaklinnAM namasyAmi bheruNDAM praNamAmyaham || 117|| vahnivAsAM namasyAmi mahAvajreshvarIM stuve | shivadUtIM namasyAmi tvaritAM kulasundarIm || 118|| nityAM nIlapatAkAM cha vijayAM sarvama~NgalAm | jvAlAmAlAM cha chitrAM cha mahAnityAM cha saMstuve || 119|| divyaughebhyo namasyAmi pareshaparameshvarIm | mitreshamatha ShaShThIshamuDDIshaM praNamAmyaham || 120|| charyAnAthaM namasyAmi lopAmudrAmahaM bhaje | agastyaM praNamasyAmi siddhaughe kAlatApanam || 121|| dharmAchAryaM namasyAmi muktakeshIshvaraM bhaje | bhaje dIpakalAnAthaM mAnavaughe tataH param || 122|| viShNudevaM namasyAmi prabhAkaramahaM bhaje | tejodevaM namasyAmi manojamatha saMstuve || 123|| kalyANadevaM kalaye ratnadevaM bhajAmyaham | vAsudevaM namasyAmi shrIrAmAnandamAshraye || 124|| parameShThiguruM vande paramaM gurumAshraye | shrIguruM praNamasyAmi mUrdhni brahmabile sthitam || 125|| kaM bile.ahaM namasyAmi shrIguroH pAdukAM tataH | atha prAthamike devi chaturasre taveshvari || 126|| aNimAM laghimAM vande mahimAM praNamAmyaham | IshitvasiddhiM vande.ahaM vashitvaM cha namAmyaham || 127|| prAkAmyasiddhiM vande.ahaM bhuktimichChAmahaM bhaje | prAptisiddhiM sarvakAmapradAsiddhimahaM bhaje || 128|| madhyame chaturasre.ahaM brAhmIM mAheshvarIM bhaje | kaumArIM vaiShNavIM vande vArAhIM praNamAmyaham || 129|| mAhendrImapi chAmuNDAM mahAlakShmImahaM bhaje | tR^itIye chaturasre.ahaM sarvasaMkShobhiNIM bhaje || 130|| sarvavidrAviNIM mudrAM sarvAkarShiNikAM bhaje | mudrAM vasha~NkarIM vande sarvonmAdinikAM bhaje || 131|| bhaje mahA~NkushAM mudrAM khecharIM praNamAmyaham | bIjamudrAM yonimudrAM bhaje sarvatrikhaNDinIm || 132|| trailokyamohanaM chakraM namAmi lalite tava | namAmi yoginIM tatra prakaTAkhyAmabhIShTadAm || 133|| sudhArNavAsanaM vande tatra te parameshvari | chakreshvarIM tatra vande tripurAM parameshvarIm || 134|| sarvesaMkShobhiNIM mudrAM tato.ahaM kalaye shive | athA.ahaM ShoDashadale kAmAkarShaNikAM bhaje || 135|| buddhyAkarShaNikAM vande.aha~NkArShaNIM bhaje | shabdAkarShaNikAM vande sparshAkarShaNikAM bhaje || 136|| rUpAkarShaNikAM vande rasAkarShaNikAM bhaje | gandhAkarShaNikAM vande chittAkarShaNikAM bhaje || 137|| dhairyAkarShaNikAM vande smR^ityAkarShaNikAM bhaje | nAmAkarShaNikAM vande bIjAkarShaNikAM bhaje || 138|| AtmAkarShaNikAM vande hyamR^itAkarShaNIM bhaje | sharIrAkarShaNIM vande nityAM shrIparameshvarIm || 139|| sarvAshApUrakaM chakraM kalaye.ahaM taveshvari | guptAkhyAM yoginIM vande tatrA.ahaM guptapUjitAm || 140|| pItAmbujAsanaM tatra namAmi lalite tava | tripureshIM mahAdevIM bhajAmIShTArthaMsiddhidAm || 141|| sarvaMvidrAviNIM mudrAM tatrA.ahaM tAM vichintaye | shive tavAShTapatre.ahamana~NgakusumAM bhaje || 142|| ana~NgamekhalAM vande hyana~NgamadanAM bhaje | tato.ahaM praNamasyAmi hyana~NgamadanAturAm || 143|| ana~NgarekhAM kalaye bhaje te.ana~NgaveginIm | bhaje.ana~NgA~NkushAM devi tava chAna~NgamAlinIm || 144|| sarvasaMkShobhaNaM chakraM tatrA.ahaM kalaye sadA | vande guptatarAkhyAM tAM yoginIM sarvakAmadAm || 145|| tatrA.ahaM praNamasyAmi devyAtmAsanamuttamam | namAmi jagadIshAnIma.ahaM tripurasundarIm || 146|| sarvAkarShaNikAM mudrAM tatrA.ahaM kalayAmi te | bhuvanAre tava shive sarvasaMkShobhiNIM bhaje || 147|| sarvavidrAviNIM vande.ahaM sarvAkarShiNikAM bhaje | sakalAhlAdinIM vande sarvasammohinIM bhaje || 148|| sakala stambhinIM vande kalaye sarvajR^imbhinIm | vasha~NkarIM namasyAmi sarvara~njanikAM bhaje || 149|| sakalonmAdinIM vande bhaje sarvArthasAdhinIm | sampattipUriNIM vande sarvamantramayIM bhaje || 150|| bhajAmyahaM tataH shaktiM sarvadvandvakShaya~NkarIm | tatrA.ahaM kalaye chakraM sarvasaubhAgyadAyakam || 151|| namAmi jagatAM dhAtrIM sampradAyAkhyayoginIm | shive tava namasyAmi shrIchakrAsanamuttamam || 152|| namAmi jagadIshAnImahaM tripuravAsinIm | kalaye.ahaM tava shive mudrAM sarvavasha~NkarIm || 153|| bahirdashAre te devi sarvasiddhipradAM bhaje | sarvasampatpradAM vande bhaje sarvapriya~NkarIm || 154|| namAmyahaM tato devIM sarvama~NgalakAriNIm | sarvakAmapradAM vande sarvaduHkhavimochinIm || 155|| sarvamR^ityuprashamanIM sarvavighnanivAriNIm | sarvA~NgasundarIM devIM sarvasaubhAgyadAyinIm || 156|| sarvArthasAdhakaM chakraM tathA.ahaM kalaye sadA | kalayAmi tato devIM kulottIrNAkhyayoginIm || 157|| sarvamantrAsanaM vande tripurAshrIyamAshraye | kalayAmi tato mudrAM sarvonmAdanakAriNIm || 158|| antardashAre te devi sarvaj~nAM praNamAmyaham | sarvashaktiM namasyAmi sarvaishvaryapradAM bhaje || 159|| sarvaj~nAnamayIM vande sarvavyAdhivinAshinIm | sarvAdhArasvarUpAM cha sarvapApaharAM bhaje || 160|| sarvAnandamayIM vande sarvarakShAsvarUpiNIm | praNamAmi mahAdevIM sarvepsitapradAM bhaje || 161|| sarvarakShAkaraM chakraM tatrA.ahaM kalaye sadA | nigarbhayoginIM vande tatrA.ahaM parameshvarIm || 162|| sAdhyasiMhAsanaM vande bhaje tripuramAlinIm | kalayAmi tato devi mudrAM sarvamahA~NkushAm || 163|| aShTAre vashinIM vande bhaje kAmeshvarIM sadA | modinIM vimalAM vande hyaruNAM jayinIM bhaje || 164|| sarveshvarIM namasyAmi kaulinIM praNamAmyaham | sarvarogaharaM chakraM tavA.ahaM devi chintaye || 165|| rahasyayoginIM devIM sadA.ahaM kalayAmi te | namAmi tripurAsiddhAM bhaje mudrAM cha khecharIm || 166|| mahAtrikoNasya bAhye chaturdikShu maheshvari | namAmi jR^imbhNAn bANAn chApaM sammohanaM bhaje || 167|| pAshaM vasha~NkaraM vande bhaje stambhanama~Nkusham | trikoNe.ahaM jagaddhAtrIM mahAkAmeshvarIM bhaje || 168|| mahAvajreshvarIM vande mahAshrImAlinIM bhaje | mahAshrIsundarIM vande sarvakAmaphalapradAm || 169|| sarvasiddhipradaM chakraM tava devi namAmyaham | namAmyatirahasyAkhyAM yoginIM tatra kAmadAm || 170|| tripurAmbAM namasyAmi bIjamudrAM namAmyaham | mUlamantreNa lalite tvAM bindau pUjayAmyaham || 171|| sarvAnandamayaM chakraM namAmi lalite tava | parApararahasyAkhyAM yoginIM kalaye sadA || 172|| mahAchakreshvarIM vande yonimudrAmahaM bhaje | dhUpAdikaM sarvamayi te kalpayAmyaham || 173|| tvatprItaye mahAmudrAM darshayAmi tataH shive | tridhA tvAM mUlamantreNa tarpayAmi tataH shive || 174|| shAlyannaM madhusaMyuktaM pAyasApUpasaMyutam | ghR^itasUpasamAyuktaM sarvabhakShyasamanvitam || 175|| sasitaM kShIrasaMyuktaM bahushAkasamanvitam | nikShipya kA~nchane pAtre naivedyaM kalpayAmi te || 176|| sa~Nkalpya bindunA vaktraM kuchau bindudvayena cha | yoniM tu saparArdhena kR^itvA shrItripure tava || 177|| etat kAmakalArUpaM bhaktAnAM sarvakAmadam | sarvasampatpradaM vande namaste tripureshvari || 178|| vAmabhAge trikoNaM cha vR^ittaM cha chaturasrakam | kR^itvA gandhAkShatAdyaishcha hyarchayAmi maheshvari || 179|| vAgbhavAdyaM namasyAmi tatra vyApakamaNDalam | jalayuktArdrAnnayuktaM makAratrayabhAjanam || 180|| tatra vinyasya dAsyAmi bhUtebhyo balimuttamam | namaste devadeveshi namastrailokyavandite || 181|| namaH parashivA~Nkasthe namastripurasundari | pradakShiNAM namaskAraM manasA.ahaM karomi te || 182|| tataH sakalamantrANAM samrAj~nIM parameshvarIm | prajapAmi mahAvidyAM tvatprItyArthamahaM sadA | tava vidyAM prajaptvA.atha staumi tvAM parameshvarIm || 183|| mahAdevi maheshAni sadAshiva mahApriye | mahAnitye mahAsiddhe tvAmahaM sharaNaM vraje || 184|| jaya tvaM tripure devi lalite jagadIshvari | sadAshivapriyakari pAhi mAM karuNAkari || 185|| jaganmAtarjagadrUpe jagadIshvaravallabhe | jaganmaye jagastulye gauri tvAmahamAshraye || 186|| anAdye sarvalokAnAmAdye bhakteShTadAyini | girirAjasya tanaye namaste tripureshvari || 187|| jayAdidevadeveshi brahmamAtarnamo.astu te | viShNumAtaranAdyante haramAtaH sureshvari || 188|| brahmAdisurasaMstutye lokatrayavasha~Nkari | sarvasampatprade nitye tvAmahaM kalaye sadA || 189|| nityAnande nirAdhAre chidrUpiNi shivapriye | aNimAdiguNAdhAre tvAM sadA kalayAmyaham || 190|| brAhmyAdimAtR^isaMstutye sarvAvaraNasaMyute | jyotirmaye mahArUpe pAhi mAM tripure sadA || 191|| lakShmIvANyAdisampUjye brahmaviShNushivastute | bhajAmi tava pAdAbjaM sarvakAmaphalapradam || 192|| sarvashaktisamopetaM sarvAbhIShTaphalaprade | namAmi tava pAdAbjaM devi tripurasundari || 193|| tvatpriyArthaM tataH kAMshchichChaktiM sampUjayAmyaham | mapa~nchakena tAM shaktiM tarpayAmi maheshvari || 194|| tayopetaM haviHsheShaM chidagnau prajuhomyaham | tvatpriyArthaM mahAdevi mamAbhIShTArthasiddhaye || 195|| baddhvA tAM khecharIM mudrAM kShamasvodvAsayAmyaham | tiShTha me hR^idaye nityaM tripure parameshvari || 196|| jagadambe mahArAj~ni mahAshakti shivapriye | hR^ichchakre tiShTha satataM mahAtripurasundari || 197|| sarvalokaikasampUjye sakalAvaraNairyute | hR^ichchakre tiShTha me nityaM mahAtripurasundari || 198|| || phalashruti || etat tripurasundaryA hR^idayaM sarvakAmadam | mahArahasyaM paramaM durlabhaM daivatairapi || 1|| sAkShAt sadAshivenoktaM guhyAdguhyamanuttamam || 2|| yaH paThennityamekAgraH shrR^iNuyAd vA samAhitaH | nityapUjAphalaM devyAH sa labhennAtra saMshayaH || 3|| pApaiH sa muchyate sadyaH kAyavAkchittasambhavaiH | sarvajanmasamudbhUtairj~nAnakR^itairapi || 4|| ## missing letter or word## sarvakratuShu yatpuNyaM sarvatIrtheShu yat phalam | tatpuNyaM labhate nityaM mAnavo nAtra saMshayaH || 5|| achalAM labhate lakShmIM trailokye chApi durlabhAm | sAkShAd viShNusamo martyo shIghrameva bhavet sadA || 6|| aShTaishvaryamavApnoti sa shIghraM mAnavottamaH | guTikApAdukAsiddhyAdyaShTakaM shIghramashnute || 7|| sha~NkhAdyA nidhyo vA.api taM nityaM paryupAsate | vashyAdInyaShTakarmANi shIghraM siddhyanti sarvadA || 8|| bhUlokasthAH sarvanAryaH pAtAlasthAH sadA~NganAH | sarvalokasthitAH sarvA yAshchAnyArUpagarvitAH || 9|| ramante tena satataM shIghraM vashyA na saMshayaH | rAjAdyAH sakalA martyAH haraharyAdayaH surAH || 10|| anantAdyA mahAnAgAH siddhayogeshvarAdayaH | R^iShayo munayo yakShAstaM nityaM paryupAsate || 11|| mahatIM kIrtimApnoti shivaviShNusamaprabhAm | paramaM yogamAsAdya khecharo jAyate sadA || 12|| apamR^ityuvinirmuktaH kAlamR^ityuvivarjitaH | paramAyuShyamApnoti haraharyAdidurlabham || 13|| ashrutAni cha shAstrANi vyAchaShTe vidhivat sadA | mUDho.api sarvavidyAvAn dakShiNAmUrtivadbhavet || 14|| grahabhUtapishAchAdyA yakShagandharvarAkShasAH | etasya smaraNAdeva vinashyanti hi sarvadA || 15|| tadgAtraM prApya sakalaM viShaM sadyo vinashyati | sahasrakAmasa~NkAshaH kAntyA yaH sarvadA bhavet || 16|| tasmAdetat paThet stotraM tripurAhR^idayaM shubham | japed yaH sarvadA sAkShAd bhaved devIsvarUpakaH || 17|| sA~NgaM tripurasundaryA nityapUjAphalaM labhet | vimukto rogasa~NghAtairArogyaM mahadashnute || 18|| prApnoti mahadaishvaryaM sarvavidyAnidhirbhavet | tatkarasparshamAtreNa naro brAhmaNatAM labhet || 19|| muchyate sakalairvighnaiH sa nityaM mAnavottamaH | sa bhu~Nkte sakalAn bhogAn durlabhAMshcha dine dine || 20|| labhate putrapautrAMshcha mahAlakShmIsamanvitAn | paramAyuShyasaMyuktAn sAkShachChivasamAn guNaiH || 21|| sR^iShTipAlanasaMhArakartevAyaM sadA bhavet | yaste kR^ipAvAn bhavati sa trimUrtirna saMshayaH || 22|| tatsamIpasthitaH shIghraM sadA jAtismarobhavet | tasya gehe sadA kAmadhenuH kalpatarustathA || 23|| chintAmaNishcha satataM tiShThatyeva na saMshayaH | mahAjayamavApnoti sadA sarvatra mAnavaH || 24|| vajrakAyasamo bhUtvA charatyeva jagatyayam | mahAsukhI bhavennityaM paramAtmA bhavet sadA || 25|| muchyate sakalebhyo.api bandhanaiH shrR^i~NkhalAdibhiH | taM pUjayanti satataM harirudrAdayo.api cha || 26|| shubhameva bhavennityaM sadApadbhirvimuchyate | devagandharvarakShAdyairbrahmAdyairapi durlabhAn || 27|| prApnoti sakalAn kAmAn shIghrameva na saMshayaH | divyabhogayuto divyakanyAbhiH saha saMyutaH || 28|| vimAnaM sa samAsthAya divyAbharaNabhUShitaH | divyachandanaliptA~NgaH sadA viMshativArShikaH || 29|| sa bhu~Nkte sakalAn bhogAn devaloke naraH sadA | tasmAdetat paThet stotraM tripurAhR^idayaM shubham | japedyaH satataM bhaktyA bhavet sAkShAt sadA shivaH || 30|| || iti shrI rudrayAmale IshvarapArvatIsaMvAde shrIlalitAtripurasundarIhR^idayastotram || ## Encoded and proofread by PP From Shrividya Sadhana. \medskip\hrule\obeylines Please send corrections to sanskrit@cheerful.com Last updated \today http://sanskritdocuments.org \end{document}