{॥ శ్రీగణేశస్తోత్రమ్ ॥}
ఓంకారమాద్యం ప్రవదన్తి సన్తో వాచః శ్రుతినామపి యే గృణన్తి ।
గజాననం దేవగణానతాంఘ్రిం భజేఽహమర్ద్ధేన్దుకృతావతంసమ్ ॥ ౧॥

పాదారవిన్దార్చనతత్పరాణాం సంసారదావానలభఙ్గదక్షమ్ ।
నిరన్తరం నిర్గతదానతోయైస్తం నౌమి విఘ్నేశ్వరమమ్బుజాభమ్ ॥ ౨॥

కృతాఙ్గరాగం నవకుంకుమేన, మత్తాలిమాలాం మదపఙ్కలగ్నామ్ ।
నివారయన్తం నిజకర్ణతాలైః, కో విస్మరేత్ పుత్రమనఙ్గశత్రోః ॥ ౩॥

శమ్భోర్జటాజూటనివాసిగఙ్గాజలం సమానీయ కరామ్బుజేన ।
లీలాభిరారాచ్ఛివమర్చయన్తం, గజాననం భక్తియుతా భజన్తి ॥ ౪॥

కుమారభుక్తౌ పునరాత్మహేతోః, పయోధరౌ పర్వతరాజపుత్ర్యాః ।
ప్రక్షాలయన్తం కరశీకరేణ, మౌగ్ధ్యేన తం నాగముఖం భజామి ॥ ౫॥

త్వయా సముద్ధృత్య గజాస్యహస్తం, శీకరాః పుష్కరరన్ధ్రముక్తాః ।
వ్యోమాఙ్గనే తే విచరన్తి తారాః, కాలాత్మనా మౌక్తికతుల్యభాసః ॥ ౬॥

క్రీడారతే వారినిధౌ గజాస్యే, వేలామతిక్రామతి వారిపూరే ।
కల్పావసానం పరిచిన్త్య దేవాః, కైలాసనాథం శ్రుతిభిః స్తువన్తి ॥ ౭॥

నాగాననే నాగకృతోత్తరీయే, క్రీడారతే దేవకుమారసఙ్ఘైః ।
త్వయి క్షణం కాలగతిం విహాయ, తౌ ప్రాపతుః కన్దుకతామినేన్దు ॥ ౮॥

మదోల్లసత్పఞ్చముఖైరజస్రమధ్యాపయన్తం సకలాగమార్థాన్ ।
దేవాన్ ఋషీన్ భక్తజనైకమిత్రం, హేరమ్బమర్కారుణమాశ్రయామి ॥ ౯॥

పాదామ్బుజాభ్యామతికోమలాభ్యాం, కృతార్థయన్తం కృపయా ధరిత్రీమ్ ।
అకారణం కారణమాప్తవాచాం, తన్నాగవక్త్రం న జహాతి చేతః ॥ ౧౦॥

యేనార్పితం సత్యవతీసుతాయ, పురాణమాలిఖ్య విషాణకోట్యా ।
తం చన్ద్రమౌలేస్తనయం తపోభిరారాధ్యమానన్దఘనం భజామి ॥ ౧౧॥

పదం శ్రుతీనామపదం స్తుతీనాం, లీలావతారం పరమాత్మమూర్తేః ।
నాగాత్మకో వా పురుషాత్మకో వేత్యభేద్యమాద్యం భజ విఘ్నరాజమ్ ॥ ౧౨॥

పాశాంకుశౌ భగ్నరదం త్వభీష్టం, కరైర్దధానం కరరన్ధ్రముక్తైః ।
ముక్తాఫలాభైః పృథుశీకరౌఘైః, సిఞ్చన్తమఙ్గం శివయోర్భజామి ॥ ౧౩॥

అనేకమేకం గజమేకదన్తం, చైతన్యరూపం జగదాదిబీజమ్ ।
బ్రహ్మేతి యం బ్రహ్మవిదో వదన్తి, తం శమ్భుసూనుం సతతం భజామి ॥ ౧౪॥

అఙ్కే స్థితాయా నిజవల్లభాయా, ముఖామ్బుజాలోకనలోలనేత్రమ్ ।
స్మేరాననాబ్జం మదవైభవేన, రుద్ధం భజే విశ్వవిమోహనం తమ్ ॥ ౧౫॥

యే పూర్వమారాధ్య గజానన! త్వాం, సర్వాణి శాస్త్రాణి పఠన్తి తేషామ్ ।
త్వత్తో న చాన్యత్ ప్రతిపాద్యమస్తి, తదస్తి చేత్ సత్యమసత్యకల్పమ్ ॥ ౧౬॥

హిరణ్యవర్ణం జగదీశితారం, కవిం పురాణం రవిమణ్డలస్థమ్ ।
గజాననం యం ప్రవదన్తి సన్తస్తత్ కాలయోగైస్తమహం ప్రపద్యే ॥ ౧౭॥

వేదాన్త గీతం పురుషం భజేఽహమాత్మానమానన్దఘనం హృదిస్థమ్ ।
గజాననం యన్మహసా జనానాం, విఘ్నాన్ధకారో విలయం ప్రయాతి ॥ ౧౮॥

శమ్భోః సమాలోక్య జటాకలాపే, శశాఙ్కఖణ్డం నిజపుష్కరేణ ।
స్వభగ్నదన్తం ప్రవిచిన్త్య మౌగ్ధ్యాదాకర్ష్టుకామః శ్రియమాతనోతు ॥ ౧౯॥

విఘ్నార్గలానాం వినిపాతనార్థం, యం నారికేలైః కదలీఫలాద్యైః ।
ప్రభావయన్తో మదవారణాస్యం, ప్రభుం సదాఽభీష్టమహం భజే తమ్ ॥ ౨౦॥

॥ ఫలశ్రుతి ॥
యజ్ఞైరనేకైర్బహుభిస్తపోభిరారాధ్యమాద్యం గజరాజవక్త్రమ్ ।
స్తుత్యాఽనయా యే విధినా స్తువన్తి, తే సర్వలక్ష్మీనిధయో భవన్తి ॥ ౧॥

॥ ఇతి శ్రీగణేశస్తోత్రం సమ్పూర్ణమ్ ॥

Encoded and proofread by Pooja P pooanaji at gmail.com

Please send corrections to sanskrit@cheerful.com
Last updated త్oday
http://sanskritdocuments.org

Ganesha Stotram Lyrics in Telugu PDF
% File name : gaNeshastotra.itx
% Location : doc\_ganesha
% Language : Sanskrit
% Subject : hinduism/religion
% Transliterated by : Pooja P pooanaji at gmail.com
% Proofread by : Pooja P pooanaji at gmail.com
% Description-comments : Shri-Maha-Ganapati-Sadhana from Kalyan-Mandir
% Latest update : May 21, 2014
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 12, 2015 ] at Stotram Website