{॥ ദത്തലഹരീ ॥}
ശ്രീഗണേശായ നമഃ
ദലാദന ഋഷിരുവാച ।
വിഭുര്നിത്യാനന്ദഃ ശ്രുതിഗണശിരോവേദ്യമഹിമാ
യതോ ജന്മാദ്യസ്യ പ്രഭവതി സ മായാഗുണവതഃ ।
സദാധാരഃ സത്യോ ജയതി പുരുഷാര്ഥൈകഫലദഃ
സദാ ദത്താത്രേയോ വിഹരതി മുദാ ജ്ഞാനലഹരിഃ ॥ ൧॥

ഹരീശബ്രാഹ്മാണഃ പദകമലപൂജാം വിദധതേ
ജഗദ്രക്ഷാശിക്ഷാജനനകരണേ തേ ഹ്യധികൃതാഃ ।
അഭൂവന്നിന്ദ്രാദ്യാ ഹരിദധിപതാം ദേവമുനയഃ
പരം തത്ത്വം പ്രാപുഃ ശശിദിനകരൌ ജ്യോതിരമലമ് ॥ ൨॥

പരം ജ്യോതിര്മൂര്തേ തവ രുചിരതേജഃ കലരവാജ്-
ജഗധ്വ്യാപ്യേദാനീം തപനശശിതാരാഹുതഭുജഃ ।
മഹാതേജഃപുഞ്ജാഃ സകലജഗദാരാധ്യചരിതാശ്-
ചരന്ത്യേവം ലോകാന്നതജനമനോഭീഷ്ടഫലദാഃ ॥ ൩॥

ഭവന്മായാരൂപം ജഗദഖിലജീവാത്മകമിദം
ഭവദ്രൂപം പ്രാഹുര്നിഖിലനിഗമാന്തശ്രുതിചയാഃ ।
ത്വയാ സൃഷ്ടം ചാദൌ ഹൃതമവിതമേതത്തദധുനാ
പ്രഭാവം തേ വേത്തും പ്രഭവതി ജനഃ കോഽവനിതലേ ॥ ൪॥

കൃപാസിന്ധോ താവജ്ജനുരജനനസ്ഥാപ്യകഥിതേ
ജഗദ്രക്ഷാദീക്ഷാ ഭവതി ഖലു നോ ചേത്കഥമിദമ് ।
അനിഹസ്യാഽകര്തുസ്തവ ജഗതി കര്മോപകൃതയേ
പ്രമാണീകര്തും വാ സ്വകൃതനിഗമാര്ഥാനിതി മതിഃ ॥ ൫॥

മഹാവിദ്യാരൂപേ ഭഗവതി നിബദ്ധത്വമുചിതം
ഹൃദാ വാചാഗമ്യേ പരമപി വിമുഹ്യന്തി കവയഃ ।
അവിദ്യാതീതഃ കിം യദി ഗുണവിഹീനോപി ഗുണവാന്-
അവിദ്യായുക്തോയം ത്വിതി വദതി മായാമുഷിതധീഃ ॥ ൬॥

ഭവാനാദൌ യാദോനരമൃഗമുഖശ്വാദികതനൂര്-
വിധത്തേ ലോകാനാമവനകൃതിഹേതോരനുയുഗമ് ।
വിശുദ്ധസ്ത്വം ലീലാനരവപുരിദാനീമടസി ഗാം
പവിത്രീകര്തും വാ പരിജനനിവാസാങ്ഗണതലമ് ॥ ൭॥

ജഗദ്രക്ഷാര്ഥം വാ വിചരസി ജഗത്യാത്മജനതാ-
പരിത്രാണായാദ്യഃ പരമപുരുഷോഽഗമ്യചരിതഃ ।
മൃഷാലോകോ ലോകോ വദതി മനുജത്വം തദധുനാ
യയാ ശ്രീകൃഷ്ണത്വം യദവബ്രുവതേ മൂഢമതയഃ ॥ ൮॥

മഹായോഗാധീശൈരവിദിതമഹായോഗചതുരം
കഥം ജാനന്തി ത്വാം കുടിലമതയോ മാധ്ശജനാഃ ।
തഥാപി ത്വാം ജനേ തവ പദയുഗാമ്ഭോജഭജനാന്ന
ചേത്ത്വത്പാദാ സ്മൃതിവിഷയവാണീ കഥമഭൂത് ॥ ൯॥

അപാരേ സംസാരേ സുതഹിതകലത്രാദിഭരണാ -
ദ്യുപാധൌ മന്നാസ്തത്തരണകരണോപായരഹിതാഃ ।
പതന്തി ത്വത്പാദാമ്ബുജയുഗലസേവാസു വിമുഖാ
നരാഃ പാപാത്മാനഃ പ്രവരനരകേ ശോകനിലയേ ॥ ൧൦॥

സുധാസിന്ധൌ ദ്വീപേ കനകലതികേ കല്പകവനേ
വിതാനൈര്മുക്താഢ്യൈര്നവമണിമയേ മണ്ഡപവരേ ।
അശേഷൈര്മാണിക്യൈഃ ഖചിതഹരിപീഠേഽന് കുഹരേ
ഹുതാശാരേ ധ്യായേത്തവ പരമമൂര്തിം നിഖിലദാമ് ॥ ൧൧॥

ധരാധാരാധാരേ ഹുതവഹപുരേധീശഗണപം
വിധിം ശ്രീശേഷൌ വാനലപവനവ്യോമാനി ഹൃദയേ ।
യുതൌ ജീവാത്മാനാവധികമവമത്യാ പ്രവിശതേ
വിധത്തേ ജായാത്വം പരകലിതവാമേന വപുഷാ ॥ ൧൨॥

സഹസ്ത്രാരേ നീരേരുഹി സകലശീതാംശുലലിതേ
സഹസേ ഹംസം യഃ സ്ഫുടമപി ഭവന്തം കലയതേ ।
സുഷുമ്നാവര്തിന്യാം തവ ചരണപീഠേന്ദുസുധയാ -
പ്ലുതോ ഭിത്ത്വാ ഗ്രന്ഥിത്രയമമൃതരൂപോ വിചരതി ॥ ൧൩॥

തവാധാരേ ശക്തിസ്ഥിതകമലകര്മാദ്യഭിവൃതേ
മഹാപീഠേ വൈശ്വാനരപുരമരുദ്ഗേഹനിലയേ ।
ധരാവ്യോമാകല്പേ സുരമുനിമഹേന്ദ്രാദ്യഭിനുതം
മഹാതേജോരാശിം നിഗമനിലയം നൌമി ഹൃദയേ ॥ ൧൪॥

ഭവത്പാദാമ്ഭോജം ഭവജലധിപോതം ഭജതി യോ
മഹാസംസാരാബ്ധിം തനണിതരതീത്യേവ നിഗമഃ ।
ഇഹാമുത്ര ത്രാതും തവ ചരണമേവാത്മശരണം
ഭവേദ്ഘീരോ വാഹങ്കൃതിപരമനസ്കോയമധുനാ ॥ ൧൫॥

യഥാ ദാരുഷ്വഗ്നിര്നിവസതി തഥാ ദേഹനികരേ
പ്രവിശ്യ ത്വം ചൈകോ ബഹുവിധ ഇവാഭാസി തി തഥാ ।
ചലന്നീരേ ചന്ദ്രഃ ശതവിധ ഇവാഭാതി ഗുണതോ
ന ചൈതച്ചന്ദ്രേ സ്യാന്ന ശതവിധതാ നാപി ചപലമ് ॥ ൧൬॥

ദരിദ്രോ വാ മൂഢഃ കഠിനഹൃദയോ വാപി ഭവതാം
ദയാപാത്രം സ്യാച്ച്യേദ്ഭജതി മഹതാമപ്യധികതാമ് ।
ന വിദ്യാ രൂപം വാ ന കുലമപി വാ കാരണമഭൂന് -
മഹത്ത്വേ സേവൈകാ തവ പദയുഗാമ്ഭോജകലനാ ॥ ൧൭॥

ന തേ കാരുണ്യം സ്യാത്സകലഗുണവാനപ്യഗുണവാന്
ഭവത്കാരുണ്യം സ്യാദഗുണഗണപോ വോരുഗുണവാന് ।
യഥാ പത്യൌ രക്തേ യദപി ച വിരക്തേ ച യുവതൌ
വൃഥാ സൌന്ദര്യം സ്യാത്സകലമപി തേഽനുഗ്രഹവശാത് ॥ ൧൮॥

അനാഥേ ദീനേ മയ്യധിഗതഭവത്പാദശരണേ
ശരണ്യബ്രഹ്മണ്യപ്രഥിതഗുണസിന്ധോ കുരു ദയാമ് ।
മഹാതേജോവാര്ധേ സ്വസുകൃതമഹിമ്നൈവ സതതം
പുരാ പുണ്യൈര്ഹീനം പുരുഷമുപകുര്വന്തി കൃതിനഃ ॥ ൧൯॥

മഹാശ്വേതദ്വീപേഽമരുതരുഗണാത്യന്തരുചിരേ
മണേഃ പീഠാമ്ഭോജേഽനലശശിഖഗാന്തര്നിവസിതമ് ।
ഗദാചക്രാജാസിപ്രസൃതകരപദ്മം മുരരിപും
സ ധന്യസ്ത്വാം ധ്യായേത്പരതരചിദാനന്ദവപുഷമ് ॥ ൨൦॥

ലസന്മേരോഃ ശൃങ്ഗേ സുരമണിമയേ കല്പകതരു -
പ്രകീര്ണേ വാക്പീഠേ രവിശശിങ്കരാകീര്ണജലജേ
സ്ഥിതം വാചാധീശൈര്നുതമനുദിനം ത്വാം ഭജതി യോ
ഭവേദ്വാണീശാനാമപി ഗുരുരജേയോഽവനിതലേ ॥ ൨൧॥

സമുദ്യദ്ബാലാര്കായുതനിഭശരീരം മുനിവരം
സ്ഥിതം ബീജേ മാരേ ത്രിദശപതിഗോപാതിരുചിരേ ।
ഹൃദി ത്വാം യഃ പശ്യന് സുഖകരമിതി ധ്യായതി സദാ
സ ഏവാഹം നൂനം സ ഭവതി ജഗന്മോഹനകരഃ ॥ ൨൨॥

നിധിര്വിശ്വേഷാം ത്വം നിജചരണപദ്മദ്വയവതാം
ശരണ്യശ്ചാര്കാനാം ചകിതഹൃദയാനാമഭയദഃ ।
വരേണ്യഃ സാധൂനാം വരദ ഇതി വാ കാമിതധിയാം
ഭവത്സേവാ ജന്തോഃ സുരതരുസമാനാ ന ഫലതി ॥ ൨൩॥

യഥാ വൈ പാഞ്ചാലീ നടതി കുഹകേച്ഛാനുശരണം
കുലാലേന ഭ്രാന്തം ഭ്രമതി ച സകൃച്ഛക്രമനിശമ് ।
തഥാ വിശ്വം സര്വം വിയതി മനവശ്ചാനുഗുണിതാഃ
സ്വതന്ത്രഃ കോ വാസ്തേ വദ പരസുരേശസ്ത്രിഭുവനേ ॥ ൨൪॥

ത്വയാജ്ഞപ്തോ ധാതാ സൃജതി ജഗദീശോഽപി ഹരതേ
ഹരിഃ പുഷ്ണാതീദം തപതി തപനോ യാതി പവനഃ ।
ധരാം സാദ്രിദ്വീപാം വഹതി ഭുജഗാനാമധിപതിഃ
സുരാഃ സര്വേ യുഷ്മദ്ഭയപരവശാദ്ബിഭ്രതി ബലിമ് ॥ ൨൫॥

സ്വയം മുക്തേഃ പൂര്വം സ്വകൃതസുകൃതം മാം നയതി ചേത്
ഭവാസത്വം കാ വാ തവ ചരണപങ്കേരുഹരതിഃ ।
ഹരേത്പാപൌധം നഃ ശുഭമപി ദദാതീതി ച സദാ
ഭവന്ത്യാശാബദ്ധ്വാഃ സകലമപി ധാതുര്വശമഹോ ॥ ൨൬॥

പ്രധാനം വാ കര്മ സ്ഥിതിവിലയസര്ഗേലമിതി ചേത്
ജഡത്വാത്ക്ഷീണത്വാത്കഥമുചിതമേതന്നിഗദിതുമ് ।
തയോരീശോഽനീശേ ഭവതി ജഗദുത്പത്തിവിലയാ -
വനാന്യാസന് ബ്രഹ്മാസ്ത്വിതി വദതി ശാസ്ത്രം ശ്രുതിരപി ॥ ൨൭॥

ഭവത്സേവാ ജന്തോര്ഭവദവഹുതാശാമ്ബുദനിഭാ
മഹാമോഹധ്വാന്തപ്രതിഹതമതേര്ദീപകലികാ ।
സുധാവര്ഷിണ്യേഷാ വിഹിതമനസാം നിര്മലനൃണാ -
മുപാധ്യായേ ബ്രഹ്മപ്രവചനവിധാനേഽതിചതുരാ ॥ ൨൮॥

അവജ്ഞായൈ ലോകേ ബഹുപരിചിതിഃ പ്രാകൃതമതിഃ
നിരസ്യാപോ ഗാങ്ഗാഃ പ്രസരതി യഥാ നാല്പതടിനീമ് ।
വിശുദ്ധ്യര്ഥം തത്ത്വം സകലപുരുഷാര്ഥൈകഫലദം
ഭവന്തം ഹിത്വാന്യം ഭജതി ഗുരുമാശാപരവശഃ ॥ ൨൯॥

നിമീല്യാക്ഷിദ്വന്ദ്വം നിഗമനിരതോ നിശ്ചലമനാഃ
പ്രകാശന്തം ദൃഷ്ട്യാ ത്രിഭുവനമുദം ജ്ഞാനപരയാ ।
ലലാടേധോമുഖ്യാ രസജനിതദിവ്യാഞ്ജനധരം
സ്മരേദ്യസ്ത്വാം യോഗീ ഭവതി നിധിസിദ്ധേരധിപതിഃ ॥ ൩൦॥

മഹാമായാമന്ത്രാക്ഷരകമലപദ്മാസനയുതം
മഹാനീലച്ഛായം മധുമുദിതയോഗിന്യഭിവൃതമ് ।
ദധാനം സദ്ബോധാസിതകനകഗോക്ഷീരതിലകം
മുനേ യസ്ത്വാം പശ്യേദ്ഭവതി സകലാദൃശ്യകതനുഃ ॥ ൩൧॥

സുധാധാരേ ഹേതൌ സകലജഗതാം സ്വര്ണകലിതേ
സിതാമ്ഭോജേ തേജോധികതപനബിമ്ഭേ ശ്രുതിതനൌ ।
മണിപ്രോതേ പീഠേ നിഖിലസുരവൃന്ദൈഃ പരിവൃതേ
സ്ഥിതം ത്വാമാരോഗ്യം സ്മരതി ഹൃദി തസ്യാമൃതമയമ് ॥ ൩൨॥

പരത്രാദാതാ ചേദ്ഭവതി ന ദദാത്യൈഹികസുഖം
ദദാത്യേതത്സൌഖ്യം ന വിതരതി ചാമുഷ്മികസുഖമ് ।
ഭവത്സേവാ ജന്തോരിഹ പരസുഖപ്രാഭയകരീ
സുരാണാമന്യേഷാമനുശരണമാത്മൈവമകരോത് ॥ ൩൩॥

ജടീ വല്കീ ക്കാപി ക്കചിദപി സുഭൂഷാമ്ബരഭൃതീ
ക്കചിദ്ഭൂത്യാലിപ്തഃ ക്കചിദപി സുഗന്ധാങ്കിതതനുഃ ।
ക്കചിദ്യോഗീ ഭോഗീ ക്കചിദപി വിരാഗീ വിഹരസേ
ബഹുജ്ഞാനീ ജ്ഞാതും തവ ഗതിമശക്താശ്ച മുനയഃ ॥ ൩൪॥

വിശുദ്ധം ചൈതന്യം ക്കചന ജഡവത്ക്കാപി സകലാ -
ഗമജ്ഞോഽപ്യജ്ഞസ്യാദ്വിഹരസി കദാചിദ്ബഹുവിധഃ ।
ഋഷിഭ്യസ്ത്വം തത്ത്വം പരമമുപദേഷ്ടാസി വിതതം
ചരിത്രം തേ വേത്തും ചതുരധികവക്ത്രാ ന ചതുരാഃ ॥ ൩൫॥

മണിര്വാ മന്ത്രോ വാ വിവിധവിമലൈശ്വര്യമപി വാ
മഹായോഗോഷ്ടാങ്ഗാഭ്യസനവിഹിതോ വാ ത്രിഭുവനമ് ।
സമര്ഥം ചൈകൈകം പ്രഭവതി വിശീകര്തുമധികം
സ്ഥിതം ത്വയ്യേവേദം തവ കിമുത ലോകൈകവശതാ ॥ ൩൬॥

സരസ്വത്യാധാരസ്ഥിതമരുദതിപ്രേരിതപരാം
നൃപോ ധാരാം ഭിത്ത്വാ രസകമലവാസാധിപപുരീ ।
പരം തേജോരൂപം സകലഭുവനാലോകനിരതോ
ഭവം തേ സംയോഗാത്പരമസമവേതം മുനിപതിഃ ॥ ൩൭॥

അപാം തത്ത്വം ഹംസം സകലഭവദേവേ ജലരുഹേ
തഡിദ്ഭാസ്വദ്ദീപ്തിപ്രകടദലഷട്കേ സുലലിതേ ।
പരം സ്വാധിഷ്ഠാനേ രുചിരതരരൂപം നിരുപമം
സ്ഥിതം ധ്യായേത്ത്വാം യോ മദനസമരൂപോ വിജയതേ ॥ ൩൮॥

പരീതം ത്വാം വിഷ്ണോ ഹുതവഹനമായാവിലസിതേ
സരോജേ നീലാഭേ മണിരചിതപീഠേ മണിഗൃഹേ ।
മഹാസിദ്ധേഃ കല്പദ്രുമവരതലേ സ്വര്ണനിചയാമ് -
പ്രവര്ഷദ്ഭിഃ സസ്യാത്പരമതനുഭൂതിഃ സ്മരതി യഃ ॥ ൩൯॥

മരുന്ത്താരാപ്രാഭേ കനകരുചിപദ്മേ ശൃതിമയം
പ്രഭും ലോകാതീതം നിഖിലനിഗമാവേദ്യചരിതമ് ।
ഭജന്തേ യേ ത്വാം തേ സുദൃഢതരതാദാത്മ്യകദൃശാ
ചിദാനന്ദം മായാഗുണവിരഹിതം യാന്തി പരമമ് ॥ ൪൦॥

സുധാശുദ്ധേ വ്യോഭ്നി ദ്രുഹിണരമണീബീജലസിതേ
വിശുദ്ധാമ്ഭോജാന്തേ സുരനരഖഗാദ്യന്തരഹിതമ് ।
ഭവന്തം ഭാവോത്ഥൈഃ കുസുമമുഖപൂജോപകരണൈഃ
സമര്ഹല്ലോകേ നാ ദ്വിതയപരമം ബ്രഹ്മഭജതേ ॥ ൪൧॥

തഡില്ലേഖാശോചിര്ദ്വിദലകമലേ ഭാസി പരമോ
മഹായുക്താനങ്ഗോനലശശിഭൃതോക്ഷീണി ഭവതഃ ।
അശേഷസ്രോത സു പ്രസൃതചിതിരൂപോഡ്ഗകനകഃ
ശ്രുതിപ്രാണോഷ്ടാഡ്ഗപ്രഗുണിതകലാപീഠ നിലയഃ ॥ ൪൨॥ ???

ക്വചിദ്ഗുഹ്യം ജിഹ്വാ ക്വച ഗുദകമന്യത്ര കവിതാ
ക്വചിദ്വാഗന്യത്ര ശ്രുതിരപരതോ ലോചനയുഗമ് ।
സമാകാര്ഷന്ത്യാത്മാനമിവ ബഹുഭാര്യാഃ പ്രലുഭിതാ -
സ്തതോ ധ്യാതും സ്ഥാതും കഥമപി ന ശക്തസ്തവ പദമ് ॥ ൪൩॥

അശക്തോഹം സ്നാതും ക്ഷണമപി ജപം കര്തുമപി വൌ -
ദനാഭാവാദേവാതിഥിജനസപര്യാ ച ന കൃതാ ।
കുതോ ജ്ഞാനം ധ്യാനം ത്വകൃതഗുരുദേവസ്യ മമ ഭോ
ഭവേദേവൈകാശാ വസതി തവ ഭക്താത്വജനിതാ ॥ ൪൪॥

അമന്ദേ മന്ദാരദ്രുമചരസമീപേ മണിമയേ
സുഖാസീനം പീഠേ സുരവരമുനീന്ദ്രാദിവിനുതമ് ।
സ്വഹൃത്പദ്മേ വാപി സ്ഥിതമനുദിനം ത്വാം ഭജതി യഃ
സ ചേഹാമുഷ്മിന്വാ സകലജനപൂജ്യശ്ച ഭവതി ॥ ൪൫॥

തൃണം മേരും കുര്യാത്സുരവരഗിരിം വാപി ച തൃണം
ഭവത്സാമര്ഥ്യം വാഽഘടിതഘടനാപ്രൌഢിമതനോ ॥

ഇദം ജാനേ തസ്മൈ പുനരപി ന ജാനന്തി കവയോഽ -
ഽപ്യഹോ യുഷ്മന്മായാ സകലജനമോഹോന്മദകരീ ॥ ൪൬॥

നടോ ഭൂയോ വേഷൈര്ബഹുവിധ ഇവാഭാതി സുഗുണോ
യഥൈകോ വാകാശോ ഘടമഠഗുഹാസ്വന്തരഗതഃ ।
യഥൈകം ഗാങ്ഗേയം കടകമുകുടാധ്യാകൃതിവശാത് -
തഥാ ദത്താത്രേയ ത്വമപി ബഹുരൂപസ്ത്രിഭുവനമ് ॥ ൪൭॥

സഹസ്ത്രാംശുപ്രാഭേ സുരതരുസമാഢ്യേധികതരേ
വിമാനേ ഹംസാഖ്യേ സ്ഥിതമമൃതനീഹാരവപുഷമ് ।
പരീതം ത്വാം ധ്യായേദ്യദരജസമാരൂഢമനിലൈഃ
അശേഷൈരാജ്ഞായാം ഭവതി ഖചരോ വ്യോമഗമനൈഃ ॥ ൪൮॥

സ്ഥിതം മൂലാധാരേ കനകരുചിരാങ്ഗം ഹുതഭുജഃ
ശിഖാഭിഃ പ്രഖ്യാഭിര്വൃതമഖിലതേജോരസഘടമ് ।
ധരന്തം ഭ്രൂമധ്യേ പ്രസൃതനയനഃ പശ്യതി ച യഃ
പരം ത്വാം സത്യം സ്യാദഖിലരസവിദ്യാതിനിപുണഃ ॥ ൪൯॥

ശിരഃപ്രാന്തഭ്രാന്തായതകുടിലബാലാര്കമതുലം
പ്രദീപ്തസ്വര്ണാഢ്യാരുണശതലസത്കുണ്ഡലധരമ് ।
മരുത്പുത്രം ലങ്കാധിപതനുജനാശോദ്യതകരം
സ്മരേദ്യസ്ത്വാം യന്താത്സകലഭയഭൂതാപഹരണേ ॥ ൫൦॥

ഗരുത്മന്തം ചഞ്ചച്ചലകനകപക്ഷദ്വയയുതം
സുധാകുമ്ഭോദ്ഭാസ്വത്കരമഖിലലോകാഭിഗമനമ് ।
അചിന്ത്യം വേദൈസ്ത്വാം പരമമുനിനാഥം സ്മരതി യഃ
സ ദക്ഷോഽസൌ വാദീ കപടവിഷജന്തുപ്രഹരണേ ॥ ൫൧॥

സ്മൃതിം നന്ദന്തം യോ മനുജമുപതിഷ്ഠന്ത്യതിബലാത്
കൃതാശാമിഥ്യാദ്യാത്പ്രണതജനമന്ദാര ഭവതാ ।
അദത്തേ ദത്തത്വാദമലതരചിദ്ഗഭ്യവിഭവാഃ
സദാ ദത്താത്രേയോ ഭജസി ഭജതാമിഷ്ടഫലദഃ ॥ ൫൨॥

വിധിം വിഷ്ണും മായാം ശൃണിമദനയോനിം ദിനകരം
മിലിത്വാനങ്ഗേനാനലയുവതിയുക്താം ജപതി യഃ ।
ത്വദാഖ്യാമാഖ്യേയാം നിഖിലനിഗമാഢ്യാമഖിലദാം
സ സ്മ്പദ്ഭിര്ദേവാധിപവിഭവയുക്തോ വിഹരതി ॥ ൫൩॥

പരാമായാവാണീമദനകമലാബീജസഹിതം
മനും പ്രത്യേകം തേ ജപതി സതതം നിശ്ചലധിയാ ।
തതോഽഭ്യേത്യൈശ്വര്യശ്രുതസകലവിദ്യാനിപുണതാം
വശിത്വം ബ്രഹ്മൈക്യം സപദി യദി യായാത്പരമുനേ ॥ ൫൪॥

അവിജ്ഞാതം കിഞ്ചിത്തവ ജഗതി നാസ്തി പ്രഭവിതുഃ
തദാവിജ്ഞാതോഽഹം യദപി സകലജ്ഞേന ഭവതാ ।
അദൃഷ്ടം മന്യേഽഹം പ്രതിഭടമവിജ്ഞാനകരണേ
മുനേ ദത്താത്രേയ പ്രകുരു മയി കാരുണ്യമതുലമ് ॥ ൫൫॥

ഭവത്പാദാമ്ഭോജദ്വയ ശുഭരസാസ്വാദ ചതുര -
ഭ്രമദ്ഭൃങ്ഗീസങ്ഘായിത ഹൃദയ വൃത്തിം കലയമാമ് ।
അനാധാരാധാരാശ്രിതസുരതരോ താവകജനേ
മുനേ കാരുണ്യാബ്ധേ പ്രകുരുമയി സമ്പത്പ്രകടനമ് ॥ ൫൬॥

വദന്ത്യേകേഽപാര്ഥാം തവ ഗതിമനേകാര്ഥ കരിണീ
അജാനന്തോജ്ഞേഽയാമനധിഗത തത്ത്വാര്ഥ മതയഃ ।
മഹായോഗിം ല്ലോകേ ജഡമതികൃതേ ത്വം ധൃതവപുഃ
തഥാ നോചേഭ്ദക്ത സ്വജന പരിരക്ഷാ കഥമഹോ ॥ ൫൭॥

സ്മൃതസ്ത്വച്ഛിഷ്യോ വാ ജഗതി കൃതവീര്യസ്യ തനയോ -
ഽര്ജുനോ രാജാ ചോരാദ്ഭയമഹിഭയം വൃശ്ചികഭയമ് ।
ഹിനസ്ത്യാജൌ ശത്രൂദിതമപി ഭയം ചേതി ഗദിതം
ഭവേയുസ്ത്വച്ഛിഷ്യാഃ കിമുതഹൃത ചോരാദിക ഭയാഃ ॥ ൫൮॥

പദാനാം സേവ്യോ വാ ന ഭവസി യദാഽകിഞ്ചന നൃണാം
പ്രിയഃ സാധൂനാം ത്വം തവ ച സുഹൃദസ്തേഽപി സുജനാഃ ।
മയിത്വാര്തേ ദീനേ ജനനമരണാദ്യൈഃ കുരുദയാം
ദയാവാന്കോ വാ മേ ഭ്രമനിഗഡനിര്മോചനവിധൌ ॥ ൫൯॥

യഥാ മാതാ പുത്രം സകലഗുണഹീനം ച കുടിലം
പ്രപുഷ്ണാത്യന്നാദ്യൈരനുദിനമതീവാദരയുതാ ।
തഥാ ത്വം ലോകാനാം മമ ച പിതരാവിത്യഭിമതം
തതസ്ത്രാതും ദാതും ഫലമഭിമതം ചാര്ഹസി വിഭോ ॥ ൬൦॥

ജഡം വാചാധീശം സുധിയമപി മൂഇകം ച കുരുഷേ
രവേര്വാ ശീതത്വം യദി ച കുരുപേ ദൃഷ്ടിവസതേഃ ।
അകര്തും കര്തും വാഽന്യദപി പരികര്തും ച മനുഷേ
തദാ സര്വം കുര്യാഃ ക്വചന കിമസാധ്യം ത്രിഭുവനേ ॥ ൬൧॥

പുമാന്യോ വൈ യുഷ്മച്ചരണപരിചര്യാകൃതിപരഃ
മഹാലാപാസ്ഥാനാശനശയനപാനാനി കുരുതേ ।
സവൈ ധന്യോ ലോകേ സകലജഗദാരാധ്യഗരിമാ
അഹോ ഭാഗ്യം തസ്യാഗണിതയശസഃ കോഽപി ന ഭജേത് ॥ ൬൨॥

പ്രസാദാത്തേ യസ്മിന്പ്രബലതരദാരിദ്ര്യവിഭവഃ
സ യായാദിന്ദ്രത്വം സകല സുരനാരീപരിവൃതഃ ।
തവോപേക്ഷാ യസ്മിന്ഭവതി സ സുരാണാമധിപതിഃ
പരത്രഹ്യത്യന്തം പ്രവിഹതമഹൈശ്ചര്യവിഭവഃ ॥ ൬൩॥

സദാ മന്ത്രൈര്ജാപ്യഃ പുനരപി മനൂനേവ ജപസി
സ്വയം തന്ത്രധ്യേയോ യദപി കുരുതേ തന്ത്രനിചയമ് ।
സദാ ബ്രഹ്മാനന്ദാമൃതജലധികേലീകലിതധീഃ
സ ഭൂതേര്ഭൂയസ്യാ ഭവതു ഭഗവന്നഃ കുരുദയാമ് ॥ ൬൪॥

തരീയാഗ്നിശ്വേതദ്യുതിദിനകൃദര്കൈര്മുനിപതേഃ
മഹാവിദ്യാഖണ്ഡൈഃ പരിയുതമഹാനുഷ്ടുഭമനോഃ ।
ചതുര്ഭിശ്ചക്രാബ്ജാഽഡ്കുശഗുണധരം സാമിയുവതിം
നൃസിംഹം ത്വദ്രൂപം ഭവതി സപുമര്ഥൈക നിലയഃ ॥ ൬൫॥

മുനേ തേ മാണിക്യപ്രവരഖചിതേ ഹേമമുകുടേ
പുരാകല്പധ്വംസേ പരികലിതസൂര്യാപരരുചഃ ।
വസന്ത്യസ്മിന്നൂനം നഹി യദി തദാ ഭൂതമുനയോ
ന വിദ്യന്തേ ലോകാഃ പ്രഖരതിമിരാന്തൈകചതുരാഃ ॥ ൬൬॥

അഹോ യോഗിന്നാനാമണിഖചിതഭാവത്കമകുടഃ
ശിഖാഗ്രാലമ്ബിന്യാസ്ത്രിക തലമസൌ രത്നശിഖരാത് ।
മഹോമേരോര്ലീലാം കലയതി സദാ യാമകലിതാം
ശരത്സൌദാമിന്യാഃ കടകവരതേജോമയതനോഃ ॥ ൬൭॥

സുവിജ്ഞാതം ലോകൈരനവധിസദാദേശനപരൈഃ
സുധാഭാനോഃ ഖണ്ഡം തവ നിബിഡഭാവാന്ധകരണമ് ।
ദ്വിതീയം സോമേന്ദുസ്ഫുടമുകുടതഃ കാന്തമനഘം
മഹാമൂര്തിജ്യോത്സ്നാ ഹരതി നതദാരിദ്ര്യതിമിരമ് ॥ ൬൮॥

ധൃതം പുണ്ഡ്രം മാത്രാത്രിതയരുചിരം സാക്ഷരമിദം
സഹസ്രാരേ ഹംസഃ സ്ഥിതപരമഹംസാജിഗമിഷോഃ ।
വഹന്തീ പാദാബ്ജദ്വയസരലലാക്ഷാരസപദം
പരാശക്തേശ്ചന്ദ്രോപലരചിതസോപാനപദവീ ॥ ൬൯॥

ശ്രയേതേ ഹൈമന്തേ തരുവിമലപത്രേ മധുകരൌ
ശുഭം ഗര്ഭാമ്ഭോജേ സ്ഥിതമിതി സുചിത്രം ശമനിധേ ।
കഠോരേന്ദുപ്രാംശുപ്രവരനികരീഭൂതതിമിരം
സുധാമ്ശുര്ഭാവത്കോ മുകുലയതി വിദ്യുത്കുവലയമ് ॥ ൭൦॥

തമോഭിര്മൂകാലീഗൃഹമിദമനുജ്ജൃമ്ഭിതമിതി
ത്വദീയേ നേത്രാബ്ജേ കമലസദനാ ജൃമ്ഭിതവതീ ।
സദാ സുജ്ഞാനേനാവിശതി സദയാക്ഷി പ്രസരതി
പ്രഭോ യസ്മിന്സ്യാത്തേ ധ്രുവമതിധനോഽയം മുനിപതേ ॥ ൭൧॥

യദാ യോഗിന്നീഷദ്വലിരവിലസത്കോഽപ്യസദൃശോ -
രുപാന്തേ നീലാലീ ഉദരയുഗലീ കഞ്ജദലയോഃ ।
വരം കാരായേതേ കനകമകരീകുണ്ഡലയുഗേ
കടാക്ഷൌ ചാമ്പേയസ്തബകവിചരന്താവിവ വരൌ ॥ ൭൨॥

ത്രയീവിദ്യാരൂപസ്ത്രിതനുരഹിമാംശുഃ പ്രതിദിനം
ശ്രുതീ ഭാവത്കേചിദ്വിവിധമകരീകുണ്ഡലപദേ ।
മിലിത്വാത്മായം തേ ഘനതരമുപാധിദ്വയമിതി
വ്യനക്തി ശ്രീകാരം നിഖിലജഗദൂദ്ദീപകമുനേ ॥ ൭൩॥

കപോലൌ യൌഷ്മാകൌ സ്ഫുടമുകുരബിമ്ബപ്രതിഭടൌ
ഭൃശം സങ്ഘര്ഷിത്വാത്പ്രതിദിനസമാരോപിതരൂചൌ ।
നിജാകാന്തിര്നിത്യാ കനകനികഷോഽത്യന്തമഹിമാ
ത്വദീയാ നീചൈവ പ്രചുരതരകാന്തിസ്തവമുനേ ॥ ൭൪॥

മുഖേന്ദും ദൃഷ്ട്വാ തേ യദി വിശതി രാഹും പ്രതി
ഭയാച്ഛശീ വക്ത്രം പ്രാപ്യദ്വിഗുണിതകലാനാം നിധിരഭൂത് ।
ദ്വിജാനാം രാജ്യത്വം പ്രകടിതമതോ ദത്തശരണം
ബലേനാഹോ സ്വാമിന് കഥമപി ച ലഭ്യോ ഹി മഹിമാ ॥ ൭൫॥

തവായം ബിമ്ബോഷ്ഠശ്ചിബുകസഹിതോ വിദ്രുമലതാ
സമാക്ഷിപ്താ തിര്യഗ്യദി ബഹുപദം സ്യാത്ഫലയുഗമ് ।
വ്രജേ തത്സാമ്യം തന്നിഹിതമുത വാ പല്ലവപദം
യദി സ്യാത്തേ നാലം തുലയിതുമഹോ സംയമിപതേ ॥ ൭൬॥

ഭവദ്വാണീശ്രേണീം ശ്രവണപുടസൌഖ്യപ്രകരണീം
വിജേതും വാക് ശ്രുത്വാ സ്വയമുത വിദിത്വാഽഹമിതി ഭാക് ।
അശക്താ തേഽത്യന്തം ഫണിലലിതജിഹ്വാഗ്രമിഷതഃ
പ്രവിഷ്ടാ വക്ത്രാന്തം സിതമണിലസദ്വിദ്രുമഗൃഹമ് ॥ ൭൭॥

തവാവൃത്താ രേഖാത്രയവിലസിതാ കമ്ബുരഭവത് -
ച്ഛിരാണാമാധാരഃ കഥമഭവദേതന്ന യദി ചേത് ।
അഥേമാമൂഹേഽഹം ത്വിതി കവിഹരാദ്യാകൃതിധരാം
തഥാ നോ ചേദ്വേദത്രിതയകലിതാം വാപി ഗണയേ ॥ ൭൮॥

മഹാനന്തശ്ചാസീദ്വിഷധരവരോ വാസുകിരസൌ
നിബര്ഹന്തൌ മര്ത്യാധികഭയകരത്വം ഗണയതാമ് ।
ഭുജാകാരൌ സ്വീയൌ തവ തു ഭുജസത്ത്വം വിദധതാം
മുനേ ഭൂതൌ സ്നിഗ്ധൌ സപദി വരദൌ ചാഭയകരൌ ॥ ൭൯॥

മുനേ ഗഽഡ്ഗാസ്രോതോഽമരവരഗിരിപ്രസ്ഥഫലകേ
പ്രസാദേ സ്വര്ണാഢ്യം പ്രഭവദഭവദ്ഭാഗലുലിതമ് ।
ത്രിസൂത്രം സുസ്നിഗ്ധം ധവലമുപവീതം കലയതേ
മഹായോഗിന്മൂര്തിത്രയമപി വിലീനം തദഭവാ ॥ ൮൦॥

പ്രസിദ്ധഃ സ്വര്ണാദ്രിര്ദിവി വിബുധവാചാവിതരണാത് -
പ്രശസ്തൌ തേ ഹസ്താബഖില പുരുഷാര്ഥ പ്രകരണാത് ।
ജനാനാം പാദാബ്ജദ്വിതയമധികം പ്രേമ ഭജതാം
മുനീന്ദ്ര ത്രൈലോക്യദ്ഭുതഗണമണിക്ഷീരജലധേ ॥ ൮൧॥

ഇയം രോമ്ണാം രാജിര്വിലസതി മഹാനാഭിസരസഃ
പ്രവൃത്താ കുല്യേവ പ്രതിപതിതഭഽഡ്ഗ്യസ്ത്രിവലയഃ ।
നവാലേഖാലോകത്രയവിഭജനാര്ഥേ വിരചിതാ
മുനേ ദത്താത്രേയ ത്വദുദരവിലഗ്നാ വിലസിതാഃ ॥ ൮൨॥

ധ്രുവം ശമ്പാ മൌജ്ജീത്രിതയവലിരേഖാവരതനോ
രുരുക്ഷോഃ പ്രാസാദം ഖശയ ഹൃദയാഖ്യം തവ ഹരേ ।
മഹാലക്ഷ്മ്യാശ്ചഞ്ചത്കനകമയസോപാനപദവീ
ന ചേന്നാഭീകുണ്ഡോപരി ചിദുപലബ്ധാ സുപരിഖാ ॥ ൮൩॥

പ്രവൃത്താവൂരൂ തേ ലസദുദരലോകവ്രജധൃതേഃ
ധൃതൌ താവദീന്ദ്രസ്ഫുടപടുകടൌ സമ്പ്രകടിതൌ ।
കടൌ വിസ്താരൌ യത്കടകഫലകൌ താവിവ മുനേ
മഹായോഗിന്വിശ്വമ്ഭര ഇതി ച നൂനം ത്വമധിസൂഃ ॥ ൮൪॥

കൃപാലോ വിശ്വേശ ത്രിഭുവനതലേ തേ പ്രമിതിതോ
ദിവാരാത്രൌ സ്ഥാനം മിലതി വപുഷോ ജാനുയുഗലമ് ।
അഭക്താനിത്യേതത്കഥിതമഭിയുക്തൌഃ സമതനോഃ
പ്രപുഷ്ടം ത്വം സമ്പ്രത്യപി ത്വദിദമര്ഥം ഹി സുദൃഢമ് ॥ ൮൫॥

ജഗന്മൂലം സ്രഷ്ടാ സകലജഗതാം സര്ഗകുശലോ
ഭവജ്ജഡ്ഘേ ലക്ഷ്മീകൃദസമശരസ്യ പ്രകുരുതേ ।
പ്രകൃഷ്ടേ തേ വീക്ഷ്യ ഭ്രമവദവിലക്ഷ്യോഽല്പഗുണവാന്
മുനേ തേനാനഽഡ്ഗസ്തവ തു വിമുഖോ ലക്ഷണവതഃ ॥ ൮൬॥

നരാണാം നാനാര്ഥപ്രദരസഗുടിത്വം ച ദധതൌ
മുനേ ഗുല്ഫൌ ഗൂഢൌ തവ ചരണപുഷ്ട്യാ പ്രകടിതൌ ।
ഘടാവൃത്തീ നാര്യാ ഇവ സകലകൌ വൃത്തരുചിരൌ
വിരാജേതേ തേജോനികരകലിതായാഃ സുവപുഷഃ ॥ ൮൭॥

മദാധാരം യുഷ്മത്പ്രപദമതിപൂജ്യം സുരുചിരം
ധ്രുവാത്മാനം മത്വാ ജിതമിതി സദാ കച്ഛപപതിഃ ।
വിവേശാധോ ഭൂമേര്യദി തദിദമേകം സ്മയകരം
ത്വിദാനീം തജ്ജാതിര്മുകുലിതശിരാശ്ചാഭവദഹോ ॥ ൮൮॥

മയാ ദത്തം കിഞ്ചിന്ന യദി കലിതം വാസവമഹം
തദാ രോചിര്ജാതം ജനനമപി പങ്കപ്രകടിതമ് ।
പ്രവിശ്യേത്യായോജ്യം ന ചലതി ഹ യത്തത്പദധിയാ
പദം തേ തു ശ്രീദം സകലസമയേ ശ്രീനിലയനമ് ॥ ൮൯॥

മുനേ തേ പാദാബ്ജം നവമമൃതപാദോദ്ഭവമഹോ
ശ്രിതസ്തത് സോദര്യം പശുപതിശിരോബ്ജം ഹിമകരഃ ।
നിവൃത്തം സ്വസ്യാങ്കം ഭവതി ഭവദേകാത്മവപുഷഃ
കഥം ബ്രഹ്മാഗാരേ പരമപുരുഷാ നാങ്ഘ്രിഭജനാഃ ॥ ൯൦॥

ന ചിത്രം തേ പാദൌ വിതരത ഇതി പ്രാര്ഥിതഫലം
വിധിം ശ്രീശം രക്ഷാകലുഷവിപദം ദൃശ്യമതുലമ് ।
സ്മരാമ്തശ്രീഗങ്ഗാധരചരണശങ്ഖാമ്ബുജ -
സുരദ്രുമാംശ്ച ത്വദ്ഭാവാനതജനസദാനന്ദകലനാത് ॥ ൯൧॥

ത്രിഖണ്ഡൈഃ ശ്രീവിദ്യാമനുവരഭവൈര്ഭാവകരിപോ
വിവൃദ്ധസ്തേ മന്ത്രോ വിഷവദതി യോ ജ്യോതിരമലമ് ।
ഷഡര്ണം ചന്ദ്രാര്കപ്രകരരുചി തന്മേ പ്രഭവതാം
സദാ ജ്ഞാനാനന്ദം യുവതിനൃമയം ലോചനപദമ് ॥ ൯൨॥

സമുന്മീലദ്ഭാനുപ്രകരരുചി വാഗ്ബീജമമലം
മരുത്വദ്ഗോപാഭാം മദനലിപിമാധാരകമലേ ।
ഹൃദബ്ജേ ശക്ത്യാഖ്യം സിതകരകരാഭം ശിരസിജേ
സരോജേ ത്വാം ധ്യായേത്സകലപുരുഷാര്ഥാന് സ ലഭതേ ॥ ൯൩॥

ചിദംശസ്ത്വദൂപം കിമപി സവിതുര്മണ്ഡലഗതം
വരേണ്യം ഭര്ഗോ വൈ ത്രിവിധതനുദേവസ്യ വപുഷി ।
മുനേ ധീമഹ്യാസീര്ഹരിരപി ധിയോ യോ ന
ഇതരത്പ്രചോദായാസ്തത്വം സ്ഥിതിലയസൃജസ്ത്വം മുനിപതേ ॥ ൯൪॥

ഹരിത്തന്തുപ്രോതസദസി ശിഖരേ ശുഭ്രകപടോ
ജഗന്മൂലസ്ഥാണുസ്ത്വമിതി ശുഭമസ്പന്ദമുനിഭിഃ ।
ഝരീഭിഃ സ്വര്ണാഢ്യൈഃ പവനഹതവാര്ബിന്ദുനികരൈര്ജടാ -
സക്താബ്ജാഹീരുചിരമഭിഷിക്തഃ സ്ഥിത ഇവ ॥ ൯൫॥

ദുരാചാരോ ജാരശ്ചപലമതിരാജഃ പരവശഃ
പരദ്രവ്യാകാംക്ഷീ ബഹുജനവിരോധീ ച സതതമ് ।
തഥാ ചാഹം പൂതസ്തവ പദയുഗസ്പര്ശവശതോ ഹ്യയഃ
ഖണ്ഡഃ സ്വര്ണം ഭവതി ഹി യദാ സിദ്ധസുരതിഃ ॥ ൯൬॥

പരിക്രാന്താ ദേശാ ബഹുതരധനസ്യാര്ജനധിയാ
കുലാചാരം ഹിത്വാ കുമതിനൃപസേവാപി ച കൃതാ ।
വിധായാഹം ശ്രാന്തഃ കിമപി ന ച തു വപുഷാ
ശ്രിതം ത്വത്പാദാബ്ജം ശ്രിതമനുജമന്ദാരമധുനാ ॥ ൯൭॥

ത്വദീയോ മേ ദേഹസ്ത്വമപി പിതരൌ ഭ്രാതൃസുഹൃ -
ദസ്ത്വമേവ ബ്രഹ്മന്മേ സുതഹിതഗൃഹക്ഷേത്രനിവഹാഃ ।
ത്വമേവ പ്രാണോ മേ ധനമപി മമ ത്വം തവ പദം
ന ജാനേ മയ്യേവ സ്ഥിതമപി മഹന്മേയമധുനാ ॥ ൯൮॥

നമസ്തേ താരായാമൃതജലധിധാമ്നേഽധിമഹസേ
നമസ്തേ ബ്രഹ്മാദ്യൈഃ മുനിസുരവരരൈഃ ക്ലൃപ്തമഹസേ ।
നമസ്തുഭ്യം നാരായണമുനിവിലാസായ ഭവതേ
മനൂനാം കോടീനാമചലഗണിതാനാം ച പതയേ ॥ ൯൯॥

നമസ്തേ ദേവൈരപ്യവിദിതമഹിമ്നേഽതിയശസേ
നമസ്തേ ദിക്പാലപ്രകടമുകുടാലങകൃതപദേ ।
നമസ്തേ തേജസ്വിന്നതമനുജമന്ദാരവപുഷേ
നമോ ദത്താത്രേയാകൃതിഹരിഹരാജായ മഹതേ ॥ ൧൦൦॥

നമസ്തേ പാപൌഘാചലവിതതിസംഹാരപവയേ
നമസ്തേ ദാരിദ്ര്യവ്യഥിതജനദൈവാന്തവിധയേ ।
നമസ്തേ രോഗാര്താനത മനുജദിവ്യൌഷധിദൃഅശേ
നമസ്തേ ദൈവം മേ നഹി ജഗത്യാം തവ പദമ് ॥ ൧൦൧॥

അസൌ ദത്താത്രേയസ്തുതിയുതകൃതിര്ജ്ഞാനലഹരീ
സുധാധാരാപൂരാഖിലനിഗമസാരാനുപഠതാമ് ।
ശ്രുതശ്രീവിദ്യായുര്വിഭവധനധാന്യാമൃതചയം
ദദാത്യേവാത്യന്തം ജയതി സകലാഹ്ലാദജനികാ ॥ ൧൦൨॥

ഇതി ദലാദനമുനിവിരചിതാ ശ്രീദത്തപദപ്രാപികാ
ശ്രീദത്താത്രേയജ്ഞാനലഹരിഃ സമ്പൂര്ണാ ॥


Encoded and proofread by Madhavi Upadrasta mupadrasta at gmail.com

Please send corrections to sanskrit@cheerful.com
Last updated ത്oday
http://sanskritdocuments.org

Datta Lahari Lyrics in Malayalam PDF
% File name : dattalahari.itx
% Category : lahari
% Location : doc\_deities\_misc
% Language : Sanskrit
% Subject : philosophy/hinduism/religion
% Transliterated by : Madhavi Upadrasta mupadrasta at gmail.com
% Proofread by : Madhavi Upadrasta mupadrasta at gmail.com
% Latest update : May 25, 2015
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ December 8, 2015 ] at Stotram Website