{॥ ଶ୍ରୀଚତୁର୍ଵିଂଶତ୍ଯଵତାରସ୍ତୋତ୍ରମ୍ ୨ ॥}
ଭାଗଵତପୁରାଣାନ୍ତର୍ଗତମ୍ ସର୍ଗ ୧ ଅଧ୍ଯାଯ ୩
ସୂତ ଉଵାଚ ।
ଜଗୃହେ ପୌରୁଷଂ ରୂପଂ ଭଗଵାନ୍ମହଦାଦିଭିଃ ।
ସମ୍ଭୂତଂ ଷୋଡଶକଲମାଦୌ ଲୋକସିସୃକ୍ଷଯା ॥ ୧॥

ଯସ୍ଯାମ୍ଭସି ଶଯାନସ୍ଯ ଯୋଗନିଦ୍ରାଂ ଵିତନ୍ଵତଃ ।
ନାଭିହ୍ରଦାମ୍ବୁଜାଦାସୀଦ୍ବ୍ରହ୍ମା ଵିଶ୍ଵସୃଜାଂ ପତିଃ ॥ ୨॥

ଯସ୍ଯାଵଯଵସଂସ୍ଥାନୈଃ କଲ୍ପିତୋ ଲୋକଵିସ୍ତରଃ ।
ତଦ୍ଵୈ ଭଗଵତୋ ରୂପଂ ଵିଶୁଦ୍ଧଂ ସତ୍ତ୍ଵମୂର୍ଜିତମ୍ ॥ ୩॥

ପଶ୍ଯନ୍ତ୍ଯଦୋ ରୂପମଦଭ୍ରଚକ୍ଷୁଷା ସହସ୍ରପାଦୋରୁଭୁଜାନନାଦ୍ଭୁତମ୍ ।
ସହସ୍ରମୂର୍ଧଶ୍ରଵଣାକ୍ଷିନାସିକଂ ସହସ୍ରମୌଲ୍ଯମ୍ବରକୁଣ୍ଡଲୋଲ୍ଲସତ୍ ॥ ୪॥

ଏତନ୍ନାନାଵତାରାଣାଂ ନିଧାନଂ ବୀଜମଵ୍ଯଯମ୍ ।
ଯସ୍ଯାଂଶାଂଶେନ ସୃଜ୍ଯନ୍ତେ ଦେଵତିର୍ଯଙ୍ନରାଦଯଃ ॥ ୫॥

ସ ଏଵ ପ୍ରଥମଂ ଦେଵଃ କୌମାରଂ ସର୍ଗମାଶ୍ରିତଃ ।
ଚଚାର ଦୁଶ୍ଚରଂ ବ୍ରହ୍ମା ବ୍ରହ୍ମଚର୍ଯମଖଣ୍ଡିତମ୍ ॥ ୬॥

ଦ୍ଵିତୀଯଂ ତୁ ଭଵାଯାସ୍ଯ ରସାତଲଗତାଂ ମହୀମ୍ ।
ଉଦ୍ଧରିଷ୍ଯନ୍ନୁପାଦତ୍ତ ଯଜ୍ଞେଶଃ ସୌକରଂ ଵପୁଃ ॥ ୭॥

ତୃତୀଯମୃଷିସର୍ଗଂ ଵୈ ଦେଵର୍ଷିତ୍ଵମୁପେତ୍ଯ ସଃ ।
ତନ୍ତ୍ରଂ ସାତ୍ଵତମାଚଷ୍ଟ ନୈଷ୍କର୍ମ୍ଯଂ କର୍ମଣାଂ ଯତଃ ॥ ୮॥

ତୁର୍ଯେ ଧର୍ମକଲାସର୍ଗେ ନରନାରାଯଣାଵୃଷୀ ।
ଭୂତ୍ଵାତ୍ମୋପଶମୋପେତମକରୋଦ୍ଦୁଶ୍ଚରଂ ତପଃ ॥ ୯॥

ପଞ୍ଚମଃ କପିଲୋ ନାମ ସିଦ୍ଧେଶଃ କାଲଵିପ୍ଲୁତମ୍ ।
ପ୍ରୋଵାଚାସୁରଯେ ସାଙ୍ଖ୍ଯଂ ତତ୍ତ୍ଵଗ୍ରାମଵିନିର୍ଣଯମ୍ ॥ ୧୦॥

ଷଷ୍ଠମତ୍ରେରପତ୍ଯତ୍ଵଂ ଵୃତଃ ପ୍ରାପ୍ତୋଽନସୂଯଯା ।
ଆନ୍ଵୀକ୍ଷିକୀମଲର୍କାଯ ପ୍ରହ୍ଲାଦାଦିଭ୍ଯ ଊଚିଵାନ୍ ॥ ୧୧॥

ତତଃ ସପ୍ତମ ଆକୂତ୍ଯାଂ ରୁଚେର୍ଯଜ୍ଞୋଽଭ୍ଯଜାଯତ ।
ସ ଯାମାଦ୍ଯୈଃ ସୁରଗଣୈରପାତ୍ସ୍ଵାଯମ୍ଭୁଵାନ୍ତରମ୍ ॥ ୧୨॥

ଅଷ୍ଟମେ ମେରୁଦେଵ୍ଯାଂ ତୁ ନାଭେର୍ଜାତ ଉରୁକ୍ରମଃ ।
ଦର୍ଶଯନ୍ଵର୍ତ୍ମ ଧୀରାଣାଂ ସର୍ଵାଶ୍ରମନମସ୍କୃତମ୍ ॥ ୧୩॥

ଋଷିଭିର୍ଯାଚିତୋ ଭେଜେ ନଵମଂ ପାର୍ଥିଵଂ ଵପୁଃ ।
ଦୁଗ୍ଧେମାମୋଷଧୀର୍ଵିପ୍ରାସ୍ତେନାଯଂ ସ ଉଶତ୍ତମଃ ॥ ୧୪॥

ରୂପଂ ସ ଜଗୃହେ ମାତ୍ସ୍ଯଂ ଚାକ୍ଷୁଷୋଦଧିସମ୍ପ୍ଲଵେ ।
ନାଵ୍ଯାରୋପ୍ଯ ମହୀମଯ୍ଯାମପାଦ୍ଵୈଵସ୍ଵତଂ ମନୁମ୍ ॥ ୧୫॥

ସୁରାସୁରାଣାମୁଦଧିଂ ମଥ୍ନତାଂ ମନ୍ଦରାଚଲମ୍ ।
ଦଧ୍ରେ କମଠରୂପେଣ ପୃଷ୍ଠ ଏକାଦଶେ ଵିଭୁଃ ॥ ୧୬॥

ଧାନ୍ଵନ୍ତରଂ ଦ୍ଵାଦଶମଂ ତ୍ରଯୋଦଶମମେଵ ଚ ।
ଅପାଯଯତ୍ସୁରାନନ୍ଯାନ୍ମୋହିନ୍ଯା ମୋହଯନ୍ସ୍ତ୍ରିଯା ॥ ୧୭॥

ଚତୁର୍ଦଶଂ ନାରସିଂହଂ ବିଭ୍ରଦ୍ଦୈତ୍ଯେନ୍ଦ୍ରମୂର୍ଜିତମ୍ ।
ଦଦାର କରଜୈରୂରାଵେରକାଂ କଟକୃଦ୍ଯଥା ॥ ୧୮॥

ପଞ୍ଚଦଶଂ ଵାମନକଂ କୃତ୍ଵାଗାଦଧ୍ଵରଂ ବଲେଃ ।
ପଦତ୍ରଯଂ ଯାଚମାନଃ ପ୍ରତ୍ଯାଦିତ୍ସୁସ୍ତ୍ରିପିଷ୍ଟପମ୍ ॥ ୧୯॥

ଅଵତାରେ ଷୋଡଶମେ ପଶ୍ଯନ୍ବ୍ରହ୍ମଦ୍ରୁହୋ ନୃପାନ୍ ।
ତ୍ରିଃସପ୍ତକୃତ୍ଵଃ କୁପିତୋ ନିଃକ୍ଷତ୍ରାମକରୋନ୍ମହୀମ୍ ॥ ୨୦॥

ତତଃ ସପ୍ତଦଶେ ଜାତଃ ସତ୍ଯଵତ୍ଯାଂ ପରାଶରାତ୍ ।
ଚକ୍ରେ ଵେଦତରୋଃ ଶାଖା ଦୃଷ୍ଟ୍ଵା ପୁଂସୋଽଲ୍ପମେଧସଃ ॥ ୨୧॥

ନରଦେଵତ୍ଵମାପନ୍ନଃ ସୁରକାର୍ଯଚିକୀର୍ଷଯା ।
ସମୁଦ୍ରନିଗ୍ରହାଦୀନି ଚକ୍ରେ ଵୀର୍ଯାଣ୍ଯତଃ ପରମ୍ ॥ ୨୨॥

ଏକୋନଵିଂଶେ ଵିଂଶତିମେ ଵୃଷ୍ଣିଷୁ ପ୍ରାପ୍ଯ ଜନ୍ମନୀ ।
ରାମକୃଷ୍ଣାଵିତି ଭୁଵୋ ଭଗଵାନହରଦ୍ଭରମ୍ ॥ ୨୩॥

ତତଃ କଲୌ ସମ୍ପ୍ରଵୃତ୍ତେ ସମ୍ମୋହାଯ ସୁରଦ୍ଵିଷାମ୍ ।
ବୁଦ୍ଧୋ ନାମ୍ନାଞ୍ଜନସୁତଃ କୀକଟେଷୁ ଭଵିଷ୍ଯତି ॥ ୨୪॥

ଅଥାସୌ ଯୁଗସନ୍ଧ୍ଯାଯାଂ ଦସ୍ଯୁପ୍ରାଯେଷୁ ରାଜସୁ ।
ଜନିତା ଵିଷ୍ଣୁଯଶସୋ ନାମ୍ନା କଲ୍କିର୍ଜଗତ୍ପତିଃ ॥ ୨୫॥

ଅଵତାରା ହ୍ଯସଙ୍ଖ୍ଯେଯା ହରେଃ ସତ୍ତ୍ଵନିଧେର୍ଦ୍ଵିଜାଃ ।
ଯଥାଵିଦାସିନଃ କୁଲ୍ଯାଃ ସରସଃ ସ୍ଯୁଃ ସହସ୍ରଶଃ ॥ ୨୬॥

ଋଷଯୋ ମନଵୋ ଦେଵା ମନୁପୁତ୍ରା ମହୌଜସଃ ।
କଲାଃ ସର୍ଵେ ହରେରେଵ ସପ୍ରଜାପତଯଃ ସ୍ମୃତାଃ ॥ ୨୭॥

ଏତେ ଚାଂଶକଲାଃ ପୁଂସଃ କୃଷ୍ଣସ୍ତୁ ଭଗଵାନ୍ସ୍ଵଯମ୍ ।
ଇନ୍ଦ୍ରାରିଵ୍ଯାକୁଲଂ ଲୋକଂ ମୃଡଯନ୍ତି ଯୁଗେ ଯୁଗେ ॥ ୨୮॥

ଜନ୍ମ ଗୁହ୍ଯଂ ଭଗଵତୋ ଯ ଏତତ୍ପ୍ରଯତୋ ନରଃ ।
ସାଯଂ ପ୍ରାତର୍ଗୃଣନ୍ଭକ୍ତ୍ଯା ଦୁଃଖଗ୍ରାମାଦ୍ଵିମୁଚ୍ଯତେ ॥ ୨୯॥

ଏତଦ୍ରୂପଂ ଭଗଵତୋ ହ୍ଯରୂପସ୍ଯ ଚିଦାତ୍ମନଃ ।
ମାଯାଗୁଣୈର୍ଵିରଚିତଂ ମହଦାଦିଭିରାତ୍ମନି ॥ ୩୦॥

ଯଥା ନଭସି ମେଘୌଘୋ ରେଣୁର୍ଵା ପାର୍ଥିଵୋଽନିଲେ ।
ଏଵଂ ଦ୍ରଷ୍ଟରି ଦୃଶ୍ଯତ୍ଵମାରୋପିତମବୁଦ୍ଧିଭିଃ ॥ ୩୧॥

ଅତଃ ପରଂ ଯଦଵ୍ଯକ୍ତମଵ୍ଯୂଢଗୁଣବୃଂହିତମ୍ ।
ଅଦୃଷ୍ଟାଶ୍ରୁତଵସ୍ତୁତ୍ଵାତ୍ସ ଜୀଵୋ ଯତ୍ପୁନର୍ଭଵଃ ॥ ୩୨॥

ଯତ୍ରେମେ ସଦସଦ୍ରୂପେ ପ୍ରତିଷିଦ୍ଧେ ସ୍ଵସଂଵିଦା ।
ଅଵିଦ୍ଯଯାତ୍ମନି କୃତେ ଇତି ତଦ୍ବ୍ରହ୍ମଦର୍ଶନମ୍ ॥ ୩୩॥

ଯଦ୍ଯେଷୋପରତା ଦେଵୀ ମାଯା ଵୈଶାରଦୀ ମତିଃ ।
ସମ୍ପନ୍ନ ଏଵେତି ଵିଦୁର୍ମହିମ୍ନି ସ୍ଵେ ମହୀଯତେ ॥ ୩୪॥

ଏଵଂ ଚ ଜନ୍ମାନି କର୍ମାଣି ହ୍ଯକର୍ତୁରଜନସ୍ଯ ଚ ।
ଵର୍ଣଯନ୍ତି ସ୍ମ କଵଯୋ ଵେଦଗୁହ୍ଯାନି ହୃତ୍ପତେଃ ॥ ୩୫॥

ସ ଵା ଇଦଂ ଵିଶ୍ଵମମୋଘଲୀଲଃ ସୃଜତ୍ଯଵତ୍ଯତ୍ତି ନ ସଜ୍ଜତେଽସ୍ମିନ୍ ।
ଭୂତେଷୁ ଚାନ୍ତର୍ହିତ ଆତ୍ମତନ୍ତ୍ରଃ ଷାଡ୍ଵର୍ଗିକଂ ଜିଘ୍ରତି ଷଡ୍ଗୁଣେଶଃ ॥ ୩୬॥

ନ ଚାସ୍ଯ କଶ୍ଚିନ୍ନିପୁଣେନ ଧାତୁରଵୈତି ଜନ୍ତୁଃ କୁମନୀଷ ଊତୀଃ ।
ନାମାନି ରୂପାଣି ମନୋଵଚୋଭିଃ ସନ୍ତନ୍ଵତୋ ନଟଚର୍ଯାମିଵାଜ୍ଞଃ ॥ ୩୭॥

ସ ଵେଦ ଧାତୁଃ ପଦଵୀଂ ପରସ୍ଯ ଦୁରନ୍ତଵୀର୍ଯସ୍ଯ ରଥାଙ୍ଗପାଣେଃ ।
ଯୋଽମାଯଯା ସନ୍ତତଯାନୁଵୃତ୍ତ୍ଯା ଭଜେତ ତତ୍ପାଦସରୋଜଗନ୍ଧମ୍ ॥ ୩୮॥

ଅଥେହ ଧନ୍ଯା ଭଗଵନ୍ତ ଇତ୍ଥଂ ଯଦ୍ଵାସୁଦେଵେଽଖିଲଲୋକନାଥେ ।
କୁର୍ଵନ୍ତି ସର୍ଵାତ୍ମକମାତ୍ମଭାଵଂ ନ ଯତ୍ର ଭୂଯଃ ପରିଵର୍ତ ଉଗ୍ରଃ ॥ ୩୯॥

ଇଦଂ ଭାଗଵତଂ ନାମ ପୁରାଣଂ ବ୍ରହ୍ମସମ୍ମିତମ୍ ।
ଉତ୍ତମଶ୍ଲୋକଚରିତଂ ଚକାର ଭଗଵାନୃଷିଃ ॥ ୪୦॥

ନିଃଶ୍ରେଯସାଯ ଲୋକସ୍ଯ ଧନ୍ଯଂ ସ୍ଵସ୍ତ୍ଯଯନଂ ମହତ୍ ।
ତଦିଦଂ ଗ୍ରାହଯାମାସ ସୁତମାତ୍ମଵତାଂ ଵରମ୍ ॥ ୪୧॥

ସର୍ଵଵେଦେତିହାସାନାଂ ସାରଂ ସାରଂ ସମୁଦ୍ଧୃତମ୍ ।
ସ ତୁ ସଂଶ୍ରାଵଯାମାସ ମହାରାଜଂ ପରୀକ୍ଷିତମ୍ ॥ ୪୨॥

ପ୍ରାଯୋପଵିଷ୍ଟଂ ଗଙ୍ଗାଯାଂ ପରୀତଂ ପରମର୍ଷିଭିଃ ।
କୃଷ୍ଣେ ସ୍ଵଧାମୋପଗତେ ଧର୍ମଜ୍ଞାନାଦିଭିଃ ସହ ॥ ୪୩॥

କଲୌ ନଷ୍ଟଦୃଶାମେଷ ପୁରାଣାର୍କୋଽଧୁନୋଦିତଃ ।
ତତ୍ର କୀର୍ତଯତୋ ଵିପ୍ରା ଵିପ୍ରର୍ଷେର୍ଭୂରିତେଜସଃ ॥ ୪୪॥

ଅହଂ ଚାଧ୍ଯଗମଂ ତତ୍ର ନିଵିଷ୍ଟସ୍ତଦନୁଗ୍ରହାତ୍ ।
ସୋଽହଂ ଵଃ ଶ୍ରାଵଯିଷ୍ଯାମି ଯଥାଧୀତଂ ଯଥାମତି ॥ ୪୫॥

ଇତି ଶ୍ରୀମଦ୍ଭାଗଵତେ ମହାପୁରାଣେ ପାରମହଂସ୍ଯାଂ ସଂହିତାଯାଂ ପ୍ରଥମସ୍କନ୍ଧେ
ନୈମିଷୀଯୋପାଖ୍ଯାନେ ତୃତୀଯୋଽଧ୍ଯାଯଃ ॥


From Srimad Bhagavatam Canto-sarga 1 chapter-adhyAya 3
This stotram praises the 24 (22+ haMsa and hayagrIva not mentioned here)
important incarnations of Vishnu as described in Srimad Bhagavatam
Canto 2 chapter 7 with some variations.
Proofread by Psa Easwaran psaeaswaran at gmail.com


Please send corrections to sanskrit@cheerful.com
Last updated ତ୍oday
http://sanskritdocuments.org

Chaturvimshati Avatara Stotram 2 Lyrics in Oriya PDF
% File name : chaturviMshatyavatArastotram2.itx
% Category :
% Location : doc\_vishhnu
% Author :
% Language : Sanskrit
% Subject : philosophy/hinduism/religion
% Transliterated by :
% Proofread by : Psa Easwaran psaeaswaran at gmail.com
% Translated by :
% Description/comments : prathamaskandhe naimiShIyopAkhyAne tRitIyo.adhyAyaH
% Source :
% Acknowledge-Permission:
% Latest update : May 27, 2015
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ December 9, 2015 ] at Stotram Website