% Text title : chaturviMshatyavatArastotram 3 % File name : chaturviMshatyavatArastotram3.itx % Category : % Location : doc\_vishhnu % Author : % Language : Sanskrit % Subject : philosophy/hinduism/religion % Transliterated by : % Proofread by : Psa Easwaran psaeaswaran at gmail.com % Translated by : % Description/comments : dvitIyaskandhe brahmanAradasaMvAde saptamo.adhyAyaH % Source : % Acknowledge-Permission: % Latest update : May 27, 2015 % Send corrections to : Sanskrit@cheerful.com % Site access : http://sanskritdocuments.org % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrIchaturviMshatyavatArastotram 3 ..}## \itxtitle{.. shrIchaturviMshatyavatArastotram 3 ..}##\endtitles ## \section{.. shrIchaturviMshatyavatArastotram 3 ..} bhAgavatapurANAntargatam sarga 2 adhyAya 7 brahmovAcha | yatrodyataH kShititaloddharaNAya bibhrat krauDIM tanuM sakalayaj~namayImanantaH | antarmahArNava upAgatamAdidaityaM taM daMShTrayAdrimiva vajradharo dadAra || 1|| jAto rucherajanayatsuyamAnsuyaj~na AkUtisUnuramarAnatha dakShiNAyAm | lokatrayasya mahatImaharadyadArtiM svAyambhuvena manunA harirityanUktaH || 2|| jaj~ne cha kardamagR^ihe dvija devahUtyAM strIbhiH samaM navabhirAtmagatiM svamAtre | Uche yayAtmashamalaM guNasa~Ngapa~NkaM asminvidhUya kapilasya gatiM prapede || 3|| atrerapatyamabhikA~NkShata Aha tuShTo datto mayAhamiti yadbhagavAnsa dattaH | yatpAdapa~NkajaparAgapavitradehA yogarddhimApurubhayIM yaduhaihayAdyAH || 4|| taptaM tapo vividhalokasisR^ikShayA me Adau sanAtsvatapasaH sa chatuHsano.abhUt | prAkkalpasamplavavinaShTamihAtmatattvaM samyagjagAda munayo yadachakShatAtman || 5|| dharmasya dakShaduhitaryajaniShTa mUrtyAM nArAyaNo nara iti svatapaHprabhAvaH | dR^iShTvAtmano bhagavato niyamAvalopaM devyastvana~NgapR^itanA ghaTituM na shekuH || 6|| kAmaM dahanti kR^itino nanu roShadR^iShTyA roShaM dahantamuta te na dahantyasahyam | so.ayaM yadantaramalaM pravishanbibheti kAmaH kathaM nu punarasya manaH shrayeta || 7|| viddhaH sapatnyuditapatribhiranti rAj~no bAlo.api sannupagatastapase vanAni | tasmA adAddhruvagatiM gR^iNate prasanno divyAH stuvanti munayo yaduparyadhastAt || 8|| yadvenamutpathagataM dvijavAkyavajra\- niShpluShTapauruShabhagaM niraye patantam | trAtvArthito jagati putrapadaM cha lebhe dugdhA vasUni vasudhA sakalAni yena || 9|| nAbherasAvR^iShabha Asa sudevisUnur\- yo vai chachAra samadR^igjaDayogacharyAm | yatpAramahaMsyamR^iShayaH padamAmananti svasthaH prashAntakaraNaH parimuktasa~NgaH || 10|| satre mamAsa bhagavAnhayashIraShAtho sAkShAtsa yaj~napuruShastapanIyavarNaH | Chandomayo makhamayo.akhiladevatAtmA vAcho babhUvurushatIH shvasato.asya nastaH || 11|| matsyo yugAntasamaye manunopalabdhaH kShoNImayo nikhilajIvanikAyaketaH | visraMsitAnurubhaye salile mukhAnme AdAya tatra vijahAra ha vedamArgAn || 12|| kShIrodadhAvamaradAnavayUthapAnAM unmathnatAmamR^italabdhaya AdidevaH | pR^iShThena kachChapavapurvidadhAra gotraM nidrAkShaNo.adriparivartakaShANakaNDUH || 13|| traipiShTaporubhayahA sa nR^isiMharUpaM kR^itvA bhramadbhrukuTidaMShTrakarAlavaktram | daityendramAshu gadayAbhipatantamArAd\- Urau nipAtya vidadAra nakhaiH sphurantam || 14|| antaHsarasyurubalena pade gR^ihIto grAheNa yUthapatirambujahasta ArtaH | AhedamAdipuruShAkhilalokanAtha tIrthashravaH shravaNama~NgalanAmadheya || 15|| shrutvA haristamaraNArthinamaprameyash\- chakrAyudhaH patagarAjabhujAdhirUDhaH | chakreNa nakravadanaM vinipATya tasmAd\- dhaste pragR^ihya bhagavAnkR^ipayojjahAra || 16|| jyAyAnguNairavarajo.apyaditeH sutAnAM lokAnvichakrama imAnyadathAdhiyaj~naH | kShmAM vAmanena jagR^ihe tripadachChalena yAch~nAmR^ite pathi charanprabhubhirna chAlyaH || 17|| nArtho balerayamurukramapAdashauchaM ApaH shikhAdhR^itavato vibudhAdhipatyam | yo vai pratishrutamR^ite na chikIrShadanyad\- AtmAnama~Nga manasA haraye.abhimene || 18|| tubhyaM cha nArada bhR^ishaM bhagavAnvivR^iddha\- bhAvena sAdhu parituShTa uvAcha yogam | j~nAnaM cha bhAgavatamAtmasatattvadIpaM yadvAsudevasharaNA vidura~njasaiva || 19|| chakraM cha dikShvavihataM dashasu svatejo manvantareShu manuvaMshadharo bibharti | duShTeShu rAjasu damaM vyadadhAtsvakIrtiM satye tripR^iShTha ushatIM prathayaMshcharitraiH || 20|| dhanvantarishcha bhagavAnsvayameva kIrtir\- nAmnA nR^iNAM pururujAM ruja Ashu hanti | yaj~ne cha bhAgamamR^itAyuravAvarundha AyuShyavedamanushAstyavatIrya loke || 21|| kShatraM kShayAya vidhinopabhR^itaM mahAtmA brahmadhrugujjhitapathaM narakArtilipsu | uddhantyasAvavanikaNTakamugravIryas\- triHsaptakR^itva urudhAraparashvadhena || 22|| asmatprasAdasumukhaH kalayA kalesha ikShvAkuvaMsha avatIrya gurornideshe | tiShThanvanaM sadayitAnuja Avivesha yasminvirudhya dashakandhara ArtimArchChat || 23|| yasmA adAdudadhirUDhabhayA~Ngavepo mArgaM sapadyaripuraM haravaddidhakShoH | dUre suhR^inmathitaroShasushoNadR^iShTyA tAtapyamAnamakaroraganakrachakraH || 24|| vakShaHsthalasparsharugNamahendravAha\- dantairviDambitakakubjuSha UDhahAsam | sadyo.asubhiH saha vineShyati dArahartur\- visphUrjitairdhanuSha uchcharato.adhisainye || 25|| bhUmeH suretaravarUthavimarditAyAH kleshavyayAya kalayA sitakR^iShNakeshaH | jAtaH kariShyati janAnupalakShyamArgaH karmANi chAtmamahimopanibandhanAni || 26|| tokena jIvaharaNaM yadulUkikAyAs\- traimAsikasya cha padA shakaTo.apavR^ittaH | yadri~NgatAntaragatena divispR^ishorvA unmUlanaM tvitarathArjunayorna bhAvyam || 27|| yadvai vraje vrajapashUnviShatoyapItAn pAlAMstvajIvayadanugrahadR^iShTivR^iShTyA | tachChuddhaye.ativiShavIryavilolajihvaM uchchATayiShyaduragaM viharanhradinyAm || 28|| tatkarma divyamiva yannishi niHshayAnaM dAvAgninA shuchivane paridahyamAne | unneShyati vrajamato.avasitAntakAlaM netre pidhApya sabalo.anadhigamyavIryaH || 29|| gR^ihNIta yadyadupabandhamamuShya mAtA shulbaM sutasya na tu tattadamuShya mAti | yajjR^imbhato.asya vadane bhuvanAni gopI saMvIkShya sha~NkitamanAH pratibodhitA.a.asIt || 30|| nandaM cha mokShyati bhayAdvaruNasya pAshAd\- gopAnbileShu pihitAnmayasUnunA cha | ahnyApR^itaM nishi shayAnamatishrameNa lokaM vikuNThamupaneShyati gokulaM sma || 31|| gopairmakhe pratihate vrajaviplavAya deve.abhivarShati pashUnkR^ipayA rirakShuH | dhartochChilIndhramiva saptadinAni sapta varSho mahIdhramanaghaikakare salIlam || 32|| krIDanvane nishi nishAkararashmigauryAM rAsonmukhaH kalapadAyatamUrchChitena | uddIpitasmararujAM vrajabhR^idvadhUnAM harturhariShyati shiro dhanadAnugasya || 33|| ye cha pralambakharadardurakeshyariShTa\- mallebhakaMsayavanAH kapipauNDrakAdyAH | anye cha shAlvakujabalvaladantavakra\- saptokShashambaravidUratharukmimukhyAH || 34|| ye vA mR^idhe samitishAlina AttachApAH kAmbojamatsyakurusR^i~njayakaikayAdyAH | yAsyantyadarshanamalaM balapArthabhIma\- vyAjAhvayena hariNA nilayaM tadIyam || 35|| kAlena mIlitadhiyAmavamR^ishya nR^INAM stokAyuShAM svanigamo bata dUrapAraH | AvirhitastvanuyugaM sa hi satyavatyAM vedadrumaM viTapasho vibhajiShyati sma || 36|| devadviShAM nigamavartmani niShThitAnAM pUrbhirmayena vihitAbhiradR^ishyatUrbhiH | lokAnghnatAM mativimohamatipralobhaM veShaM vidhAya bahu bhAShyata aupadharmyam || 37|| yarhyAlayeShvapi satAM na hareH kathAH syuH pAShaNDino dvijajanA vR^iShalA nR^idevAH | svAhA svadhA vaShaDiti sma giro na yatra shAstA bhaviShyati kalerbhagavAnyugAnte || 38|| sarge tapo.ahamR^iShayo nava ye prajeshAH sthAne.atha dharmamakhamanvamarAvanIshAH | ante tvadharmaharamanyuvashAsurAdyA mAyAvibhUtaya imAH purushaktibhAjaH || 39|| viShNornu vIryagaNanAM katamo.arhatIha yaH pArthivAnyapi kavirvimame rajAMsi | chaskambha yaH svarahasAskhalatA tripR^iShThaM yasmAttrisAmyasadanAdurukampayAnam || 40|| nAntaM vidAmyahamamI munayo.agrajAste mAyAbalasya puruShasya kuto.avarA ye | gAyanguNAndashashatAnana AdidevaH sheSho.adhunApi samavasyati nAsya pAram || 41|| yeShAM sa eSha bhagavAndayayedanantaH sarvAtmanA.a.ashritapado yadi nirvyalIkam | te dustarAmatitaranti cha devamAyAM naiShAM mamAhamiti dhIH shvashR^igAlabhakShye || 42|| vedAhama~Nga paramasya hi yogamAyAM yUyaM bhavashcha bhagavAnatha daityavaryaH | patnI manoH sa cha manushcha tadAtmajAshcha prAchInabarhirR^ibhura~Nga uta dhruvashcha || 43|| ikShvAkurailamuchukundavidehagAdhi\- raghvambarIShasagarA gayanAhuShAdyAH | mAndhAtralarkashatadhanvanurantidevA devavrato baliramUrttarayo dilIpaH || 44|| saubharyuta~NkashibidevalapippalAda\- sArasvatoddhavaparAsharabhUriSheNAH | ye.anye vibhIShaNahanUmadupendradatta\- pArthArShTiSheNavidurashrutadevavaryAH || 45|| te vai vidantyatitaranti cha devamAyAM strIshUdrahUNashabarA api pApajIvAH | yadyadbhutakramaparAyaNashIlashikShAs\- tiryagjanA api kimu shrutadhAraNA ye || 46|| shashvatprashAntamabhayaM pratibodhamAtraM shuddhaM samaM sadasataH paramAtmatattvam | shabdo na yatra purukArakavAnkriyArtho mAyA paraityabhimukhe cha vilajjamAnA || 47|| tadvai padaM bhagavataH paramasya puMso brahmeti yadvidurajasrasukhaM vishokam | sadhrya~Nniyamya yatayo yamakartahetiM jahyuH svarADiva nipAnakhanitramindraH || 48|| sa shreyasAmapi vibhurbhagavAnyato.asya bhAvasvabhAvavihitasya sataH prasiddhiH | dehe svadhAtuvigame.anuvishIryamANe vyomeva tatra puruSho na vishIryate.ajaH || 49|| so.ayaM te.abhihitastAta bhagavAnvishvabhAvanaH | samAsena harernAnyadanyasmAtsadasachcha yat || 50|| idaM bhAgavataM nAma yanme bhagavatoditam | sa~Ngraho.ayaM vibhUtInAM tvametadvipulI kuru || 51|| yathA harau bhagavati nR^iNAM bhaktirbhaviShyati | sarvAtmanyakhilAdhAre iti sa~Nkalpya varNaya || 52|| mAyAM varNayato.amuShya IshvarasyAnumodataH | shR^iNvataH shraddhayA nityaM mAyayAtmA na muhyati || 53|| iti shrImadbhAgavate mahApurANe pAramahaMsyAM saMhitAyAM dvitIyaskandhe brahmanAradasaMvAde saptamo.adhyAyaH || ## From Srimad Bhagavatam Canto-skandha 2 chapter-adhyAya 7 This stotram praises the 24 important incarnations of Vishnu as described in Srimad Bhagavatam Canto 1 chapter 3 with some variations. Proofread by Psa Easwaran psaeaswaran at gmail.com \medskip\hrule\medskip \medskip\hrule\obeylines Please send corrections to sanskrit@cheerful.com Last updated \today http://sanskritdocuments.org \end{document}