{॥ ଶ୍ରୀପଦ୍ମନାଭଶତକମ୍ ॥}
ମହାରାଜା ସ୍ଵାତି ତିରୁନାଳ୍ ଵିରଚିତମ୍
॥ ଶ୍ରୀ ଗଣେଶାଯ ନମଃ ॥
॥ ପ୍ରଥମଂ ଦଶକମ୍ ॥
ଯା ତେ ପାଦସରୋଜଧୂଲିରନିଶଂ ବ୍ରହ୍ମାଦିଭିର୍ନିସ୍ପୃହୈଃ
ଭକ୍ତ୍ଯା ସନ୍ନତକନ୍ଧରୈଃ ସକୁତୁକଂ ସନ୍ଧାର୍ଯମାଣା ହରେ ।
ଯା ଵିଶ୍ଵଂ ପ୍ରପୁନାତି ଜାଲମଚିରାତ୍ ସଂଶୋଷଯତ୍ଯଂହସାଂ
ସା ମାଂ ହୀନଗୁଣଂ ପୁନାତୁ ନିତରାଂ ଶ୍ରୀପଦ୍ମନାଭାନ୍ଵହମ୍ ॥ ୧॥

ସତ୍ତ୍ଵୈକପ୍ରଵଣାଶଯା ମୁନିଵରା ଵେଦୈଃ ସ୍ତୁଵନ୍ତଃ ପରୈଃ
ତ୍ଵନ୍ମାହାତ୍ମ୍ଯପଯୋନିଧେରିହପରଂ ନାଦ୍ଯାପି ପାରଙ୍ଗତାଃ ।
ଏଵଂ ସତ୍ଯହମଲ୍ପବୁଦ୍ଧିରଵଶଃ ସ୍ତୋତୁଂ କଥଂ ଶକ୍ନୁଯାଂ
ତ୍ଵତ୍କାରୁଣ୍ଯମୃତେ ହରେ! ତରତି କଃ ପୋତଂ ଵିନା ସାଗରମ୍ ॥ ୨॥

ତସ୍ମାଚ୍ଛିନ୍ଧି ମଦୀଯମୋହମଖିଲଂ ସଂସାରବନ୍ଧାଵହଂ
ଭକ୍ତିଂ ତ୍ଵତ୍ପଦଯୋର୍ଦିଶ ସ୍ଥିରତରାଂ ସର୍ଵାପଦୁନ୍ମୀଲିନୀମ୍ ।
ଵାଣୀଂ ତ୍ଵତ୍ପଦଵର୍ଣନେ ପଟୁତମାଂ ଵିଦ୍ଵଜ୍ଜନାହ୍ଲାଦିନୀଂ
ଦେହି ତ୍ଵତ୍ପଦସେଵକାଯ ନନୁ ମେ କାରୁଣ୍ଯଵାରାଂନିଧେ ॥ ୩॥

ଯେନେଦଂ ଭୁଵନଂ ତତଂ ସ୍ଵବଲତୋ ଯସ୍ଯାଜ୍ଞଯୋଦେତ୍ଯହର୍-
ନାଥୋ ଵାତ୍ଯନିଲୋ ଦହତ୍ଯପି ଶିଖିଃ ସର୍ଵେଽପି ଯନ୍ନିର୍ମିତାଃ ।
ଯଶ୍ଚେଦଂ ସକଲଂ ଜଗତ୍ସ୍ଵଜଠରେ ଧତ୍ତେ ଚ କଲ୍ପାଵଧୌ
ତତ୍ତାଦୃଗ୍ଵିଭଵେ ତ୍ଵଯି ପ୍ରମୁଦିତେ କିଂ ଵା ଦୁରାପଂ ନୃଣାମ୍ ॥ ୪॥

ଭକ୍ତାନାମଖିଲେପ୍ସିତାର୍ଥଘଟନେ ବଦ୍ଧୋଦ୍ଯମସ୍ତ୍ଵଂ ହରେ!
ନିତ୍ଯଂ ଖଲ୍ଵିତି ବୋଦ୍ଧ୍ଯମସ୍ତି ବହୁଶୋ ଦେଵ! ପ୍ରମାଣଂ ମମ ।
ନୋ ଚେଦ୍ଵ୍ଯାସଵଚସ୍ତଵୈଵ ଵଚନଂ ଵେଦୋପଗୀତଂ ଵଚୋ
ହା ରଥ୍ଯାଜନଵାଦଵଦ୍ବତ ଭଵେନ୍ମିଥ୍ଯା ରମାଵଲ୍ଲଭ! ॥ ୫॥

ଇନ୍ଦ୍ରଦ୍ଯୁମ୍ନନୃପଃ କରୀନ୍ଦ୍ରଜନନଂ ପ୍ରାପ୍ତୋଽଥ ଶାପେନ ଵୈ
ନକ୍ରାକ୍ରାନ୍ତପଦୋ ଵିମୋଚନପଟୁର୍ନାଭୂତ୍ସହସ୍ରଂ ସମାଃ ।
ଭୂଯସ୍ତ୍ଵାମଯମର୍ଚଯନ୍ ସରସିଜୈଃ ଶୁଣ୍ଡୋଦ୍ଧୃତୈଃ ସାଦରଂ
ସାରୂପ୍ଯଂ ସମଵାପ ଦେଵ ଭଵତୋ ନକ୍ରୋଽପି ଗନ୍ଧର୍ଵତାମ୍ ॥ ୬॥

ପାପଃ କଶ୍ଚିଦଜାମିଲାଖ୍ଯଧରଣୀଦେଵୋଽଵସତ୍ସନ୍ତତଂ
ସ୍ଵୈରିଣ୍ଯା ସହ କାମମୋହିତମତିସ୍ତ୍ଵାଂ ଵିସ୍ମରନ୍ ମୁକ୍ତିଦମ୍ ।
ଅନ୍ତେ ଚାହ୍ଵଯଦୀଶ! ଭୀତହୃଦଯୋ ନାରାଯଣେତ୍ଯାତ୍ମଜଂ
ନୀତଃ ସୋଽପି ଭଵଦ୍ଭଟୈସ୍ତଵପଦଂ ସଂରୁଧ୍ଯ ଯାମ୍ଯାନ୍ ଭଟାନ୍ ॥ ୭॥

ପାଞ୍ଚାଲୀଂ ନୃପସନ୍ନିଧୌ ଖଲମତିର୍ଦୁଶ୍ଶାସନଃ ପୁଷ୍ପିଣୀଂ
ଆକର୍ଷଶ୍ଚିକୁରେଣ ଦୀନଵଦନାଂ ଵାସଃ ସମାକ୍ଷିପ୍ତଵାନ୍ ।
ଯାଵତ୍ସା ଭୁଵନୈକବନ୍ଧୁମଵଶା ସସ୍ମାର ଲଜ୍ଜାକୁଲା
କ୍ରୋଶନ୍ତୀ ଵ୍ଯତନୋଃ ପଟୌଘମମଲଂ ତସ୍ଯାସ୍ତ୍ଵନନ୍ତଂ ହରେ ! ॥ ୮॥

ଯାମାର୍ଧେନ ତୁ ପିଙ୍ଗଲା ତଵ ପଦଂ ପ୍ରାପ୍ତା ହି ଵାରାଙ୍ଗନା
ବାଲଃ ପଞ୍ଚଵଯୋଯୁତୋ ଧ୍ରୁଵପଦଂ ଚୌତ୍ତାନପାଦିର୍ଗତଃ ।
ଯାତଶ୍ଚାପି ମୃକଣ୍ଡୁମୌନିତନଯଃ ଶୌରେ! ଚିରଂ ଜୀଵିତଂ
ନାହଂ ଵକ୍ତୁମିହ କ୍ଷମସ୍ତଵ କୃପାଲଭ୍ଯଂ ଶୁଭଂ ପ୍ରାଣିନାମ୍ ॥ ୯॥

ଏଵଂ ଭକ୍ତଜନୌଘକଲ୍ପକତରୁଂ ତଂ ତ୍ଵାଂ ଭଜନ୍ତଃ କ୍ଷଣଂ
ପାପିଷ୍ଠା ଅପି ମୁକ୍ତିମାର୍ଗମମଲଂ କେ କେ ନ ଯାତା ଵିଭୋ! ।
ସ ତ୍ଵଂ ମାମପି ତାଵକୀନଚରଣେ ଭକ୍ତଂ ଵିଧାଯାନତଂ
ସ୍ଯାନନ୍ଦୂରପୁରେଶ! ପାଲଯ ମୁଦା ତାପାନ୍ମମାପାକୁରୁ ॥ ୧୦॥


॥ ଦ୍ଵିତୀଯଂ ଦଶକମ୍ ॥
ପିବନ୍ତି ଯେ ତ୍ଵଚ୍ଚରିତାମୃତୌଘଂ
ସ୍ମରନ୍ତି ରୂପଂ ତଵ ଵିଶ୍ଵରମ୍ଯମ୍ ।
ହରନ୍ତି କାଲଂ ଚ ସହ ତ୍ଵଦୀଯୈଃ
ମନ୍ଯେଽତ୍ର ତାନ୍ ମାଧଵ ଧନ୍ଯଧନ୍ଯାନ୍ ॥ ୧॥

ସଦା ପ୍ରସକ୍ତାଂ ଵିଷଯେଷ୍ଵଶାନ୍ତାଂ
ମତିଂ ମଦୀଯାଂ ଜଗଦେକବନ୍ଧୋ! ।
ତଵୈଵ କାରୁଣ୍ଯଵଶାଦିଦାନୀଂ
ସନ୍ମାର୍ଗଗାଂ ପ୍ରେରଯ ଵାସୁଦେଵ! ॥ ୨॥

ଦୃଶୌ ଭଵନ୍ମୂର୍ତିଵିଲୋକଲୋଲେ
ଶ୍ରୁତୀ ଚ ତେ ଚାରୁକଥାପ୍ରସକ୍ତେ ।
କରୌ ଚ ତେ ପୂଜନବଦ୍ଧତୃଷ୍ଣୌ
ଵିଧେହି ନିତ୍ଯଂ ମମ ପଙ୍କଜାକ୍ଷ ! ॥ ୩॥

ନୃଣାଂ ଭଵତ୍ପାଦନିଷେଵଣଂ ତୁ
ମହୌଷଧଂ ସଂସୃତିରୋଗହାରୀ ।
ତଦେଵ ମେ ପଙ୍କଜନାଭ ଭୂଯାତ୍
ତ୍ଵନ୍ମାଯଯା ମୋହିତମାନସସ୍ଯ ॥ ୪॥

ଯଦୀହ ଭକ୍ତିସ୍ତଵପାଦପଦ୍ମେ
ସ୍ଥିରା ଜନାନାମଖିଲାର୍ତିହନ୍ତ୍ରୀ ।
ତଦା ଭଵେନ୍ମୁକ୍ତିରହୋ କରସ୍ଥା
ଧର୍ମାର୍ଥକାମାଃ କିମୁ ଵର୍ଣନୀଯାଃ ॥ ୫॥

ଵେଦୋଦିତାଭିର୍ଵ୍ରତସତ୍କ୍ରିଯାଭିର୍-
ନଶ୍ଯତ୍ଯଘୌଘୋ ନ ହି ଵାସନା ତୁ ।
ତ୍ଵତ୍ପାଦସେଵା ହରତି ଦ୍ଵଯଂ ଯତ୍
ତସ୍ମାତ୍ସ୍ଥିରା ସୈଵ ମମାଶୁ ଭୂଯାତ୍ ॥ ୬॥

ତ୍ଵଦୀଯନାମସ୍ମୃତିରପ୍ଯକସ୍ମାଦ୍
ଧୁନୋତି ପାପୌଘମସଂଶଯଂ ତତ୍ ।
ଯଦ୍ଵଦ୍ଗଦାନୌଷଧମାଶୁ ହନ୍ତି
ଯଥା କୃଶାନୁର୍ଭୁଵି ଦାରୁକୂଟମ୍ ॥ ୭॥

ଯଦ୍ଯତ୍ସ୍ମରନ୍ ପ୍ରୋଜ୍ଝତି ଦେହମେତତ୍
ପ୍ରଯାଣକାଲେ ଵିଵଶୋଽତ୍ର ଦେହୀ ।
ତତ୍ତତ୍କିଲାପ୍ନୋତି ଯଦନ୍ଯଭାଵେ
ତସ୍ମାତ୍ତଵୈଵ ସ୍ମୃତିରସ୍ତୁ ନିତ୍ଯମ୍ ॥ ୮॥

ଅନେକଧର୍ମାନ୍ ପ୍ରଚରନ୍ମନୁଷ୍ଯଃ
ନାକେ ନୁ ଭୁଙ୍କ୍ତେ ସୁଖମଵ୍ଯଲୀକମ୍ ।
ତସ୍ଯାଵଧୌ ସମ୍ପତତୀହଭୂମୌ
ତ୍ଵତ୍ସେଵକୋ ଜାତୁ ନ ଵିଚ୍ଯୁତଃ ସ୍ଯାତ୍ ॥ ୯॥

ତସ୍ମାତ୍ସମସ୍ତାର୍ତିହରଂ ଜନାନାଂ
ସ୍ଵପାଦଭାଜାଂ ଶ୍ରୁତିସାରମୃଗ୍ଯମ୍ ।
ତଵାଦ୍ଯ ରୂପଂ ପରିପୂର୍ଣସତ୍ଵଂ
ରମାମନୋହାରି ଵିଭାତୁ ଚିତ୍ତେ ॥ ୧୦॥


॥ ତୃତୀଯଂ ଦଶକମ୍ ॥
ଦିନମନୁପଦଯୁଗ୍ମଂ ଭାଵଯେଯଂ ମୁରାରେ
କୁଲିଶଶଫରମୁଖ୍ଯୈଶ୍ଚିହ୍ନିତେ ଚାରୁ ଚିହ୍ନୈଃ ।
ନଖମଣିଵିଧୁଦୀପ୍ତ୍ଯା ଧ୍ଵସ୍ତଯୋଗୀନ୍ଦ୍ରଚେତୋ -
ଗତତିମିରସମୂହଂ ପାଟଲାମ୍ଭୋଜଶୋଭମ୍ ॥ ୧॥

ଯଦୁଦିତଜଲଧାରା ପାଵନୀ ଜହ୍ନୁକନ୍ଯା
ପୁରଭିଦପି ମହାତ୍ମା ଯାଂ ବିଭର୍ତି ସ୍ଵମୂର୍ଧ୍ନା ।
ଭୁଜଗଶଯନ! ତତ୍ତେ ମଞ୍ଜୁମଞ୍ଜୀରଯୁକ୍ତଂ
ମୁହୁରପି ହୃଦି ସେଵେ ପାଦପଦ୍ମଂ ମନୋଜ୍ଞମ୍ ॥ ୨॥

ମୁରହର! ତଵ ଜଙ୍ଘେ ଜାନୁଯୁଗ୍ମଂ ଚ ସେଵେ
ଦୁରିତହର ତଥୋରୂ ମାଂସଳୌ ଚାରୁଶୋଭୌ ।
କନକରୁଚିରଚେଲେନାଵୃତୌ ଦେଵ! ନିତ୍ଯଂ
ଭୁଵନହୃଦଯମୋହଂ ସମ୍ଯଗାଶଙ୍କ୍ଯ ନୂନମ୍ ॥ ୩॥

ମଣିଗଣଯୁତକାଞ୍ଚୀଦାମ ସତ୍କିଙ୍କିଣୀଭିଃ
ମୁଖରତମମମେଯଂ ଭାଵଯେ ମଧ୍ଯଦେଶମ୍ ।
ନିଖିଲଭୁଵନଵାସସ୍ଥାନମପ୍ଯଦ୍ଯ କୁକ୍ଷିଂ
ମୁହୁରଜିତ! ନିଷେଵେ ସାଦରଂ ପଦ୍ମନାଭ! ॥ ୪॥

ଭଵହରଣ! ତଥା ଶ୍ରୀଵତ୍ସଯୁକ୍ତଂ ଚ ଵକ୍ଷୋ-
ଵିଲସଦରୁଣଭାସଂ କୌସ୍ତୁଭେନାଙ୍ଗ କଣ୍ଠମ୍ ।
ମଣିଵଲଯଯୁତଂ ତେ ବାହୁଯୁଗ୍ମଂ ଚ ସେଵେ
ଦନୁଜକୁଲଵିନାଶାଯୋଦ୍ଯତଂ ସନ୍ତତଂ ଯତ୍ ॥ ୫॥

ଵରଦ ଜଲଧିପୁତ୍ର୍ଯା ସାଧୁ ପୀତାମୃତଂ ତେ
ତ୍ଵଧରମିହ ଭଜେଽହଂ ଚାରୁବିମ୍ବାରୁଣାଭମ୍ ।
ଵିମଲଦଶନପଙ୍କ୍ତିଂ କୁନ୍ଦସଦ୍କୁଡ୍ମଲାଭାଂ
ମକରନିଭଵିରାଜତ୍କୁଣ୍ଡଲୋଲ୍ଲାସି ଗଣ୍ଡମ୍ ॥ ୬॥

ତିଲକୁସୁମସମାନାଂ ନାସିକାଂ ଚାଦ୍ଯ ସେଵେ
ଗରୁଡଗମନ! ଚିଲ୍ଯୌ ଦର୍ପକେଷ୍ଵାସତୁଲ୍ଯୌ ।
ମୃଗମଦକୃତପୁଣ୍ଡ୍ରଂ ତାଵକଂ ଫାଲଦେଶଂ
କୁଟିଲମଳକଜାଲଂ ନାଥ ନିତ୍ଯଂ ନିଷେଵେ ॥ ୭॥

ସଜଲଜଲଦନୀଲଂ ଭାଵଯେ କେଶଜାଲଂ
ମଣିମକୁଟମୁଦଞ୍ଚତ୍କୋଟିସୂର୍ଯପ୍ରକାଶମ୍ ।
ପୁନରନଘ! ମତିଂ ମେ ଦେଵ! ସଙ୍କୋଚ୍ଯ ଯୁଞ୍ଜେ
ତଵ ଵଦନସରୋଜେ ମନ୍ଦହାସେ ମନୋଜ୍ଞେ ॥ ୮॥

ଗିରିଧର ତଵ ରୂପଂ ତ୍ଵୀଦୃଶଂ ଵିଶ୍ଵରମ୍ଯଂ
ମମ ଵିହରତୁ ନିତ୍ଯଂ ମାନସାମ୍ଭୋଜମଧ୍ଯେ ।
ମନସିଜଶତକାନ୍ତଂ ମଞ୍ଜୁମାଧୁର୍ଯସାରଂ
ସତତମପି ଵିଚିନ୍ତ୍ଯଂ ଯୋଗିଭିଃ ତ୍ଯକ୍ତମୋହୈଃ ॥ ୯॥

ଅଥ ଭୁଵନପତେଽହଂ ସର୍ଗଵୃଦ୍ଧିକ୍ରମଂ ଵୈ
କିମପି କିମପି ଵକ୍ତୁଂ ପ୍ରାରଭେ ଦୀନବନ୍ଧୋ ।
ପରପୁରୁଷ! ତଦର୍ଥଂ ତ୍ଵତ୍କୃପା ସମ୍ପତେନ୍ମ-
ଯ୍ଯକୃତସୁକୃତଜାଲୈର୍ଦୁର୍ଲଭା ପଙ୍କଜାକ୍ଷ ! ॥ ୧୦॥


॥ ଚତୁର୍ଥଂ ଦଶକମ୍ ॥
ତାଵକନାଭିସରୋଜାତ୍
ଜାତୋ ଧାତା ସମସ୍ତଵେଦମଯଃ ।
ଶଂସତି ସକଲୋ ଲୋକୋ
ଯଂ କିଲ ହିରଣ୍ଯଗର୍ଭ ଇତି ॥ ୧॥

ତଦନୁ ସ ଵିସ୍ମିତଚେତାଃ
ଚତସୃଷୁ ଦିକ୍ଷୁ ସାଧୁ ସମ୍ପଶ୍ଯନ୍ ।
ସମଗାଦଚ୍ଯୁତ ତୂର୍ଣଂ
ଚତୁରାନନତାମିହାଷ୍ଟନଯନଯୁତାମ୍ ॥ ୨॥

ଦୃଷ୍ଟ୍ଵା କମଲଂ ସୋଽଯଂ
ତନ୍ମୂଲାଂ ତଵ ତନୁଂ ତ୍ଵସମ୍ପଶ୍ଯନ୍ ।
କୋଽହଂ ନିଶ୍ଶରଣୋଽଜଂ
କସ୍ମାଦଜନୀତି ଦେଵ! ଚିନ୍ତିତଵାନ୍ ॥ ୩॥

ଜ୍ଞାତୁଂ ତତ୍ଵଂ ସୋଽଯଂ
ସରସିଜନାଳାଧ୍ଵନା ତ୍ଵଧୋ ଗତ୍ଵା ।
ଯୋଗବଲେନ ମନୋଜ୍ଞାଂ
ତଵ ତନୁମଖିଲେଶ! ନାପ୍ଯପଶ୍ଯଦହୋ ॥ ୪॥

ତାଵଦ୍ଦୁଖିତହୃଦଯଃ
ପୁନରପି ଚ ନିଵୃତ୍ଯ ପୂର୍ଵଵଜ୍ଜଲଜେ ।
ତାଵକ କରୁଣାମିଚ୍ଛନ୍
ଚକ୍ରେ ସମାଧିମଯି! ଭଗଵନ୍ ॥ ୫॥

ଵତ୍ସରଶତକସ୍ଯାନ୍ତେ
ଦୃଢତରତପସା ପରିଵିଧୂତହୃଦଯମଲଃ ।
ସ ଵିଧିରପଶ୍ଯତ୍ସ୍ଵାନ୍ତେ
ସୂକ୍ଷ୍ମତଯା ତଵ ତନୁଂ ତୁ ସୁଭଗତମାମ୍ ॥ ୬॥

ପୁନରିହ ତେନ ନୁତସ୍ତ୍ଵଂ
ଶକ୍ତିମଦାସ୍ତସ୍ଯ ଭୁଵନନିର୍ମାଣେ ।
ପୂର୍ଵଂ ତ୍ଵସୃଜତ୍ସୋଽଯଂ
ସ୍ଥାଵରଜଙ୍ଗମମଯଂ ତୁ ସକଲଜଗତ୍ ॥ ୭॥

ସନକମୁଖାନ୍ ମୁନିଵର୍ଯାନ୍
ମନସାହ୍ଯସୃଜତ୍ତଵାଙ୍ଘ୍ରିରତହୃଦଯାନ୍ ।
ସୃଷ୍ଟୌ ତୁ ତେ ନିଯୁକ୍ତାଃ
ଜଗୃହୁର୍ଵାଣୀଂ ନ ଵୈଧସୀଂ ଭୂମନ୍! ॥ ୮॥

ଅଙ୍ଗାଦଭଵଂସ୍ତୂର୍ଣଂ
ନାରଦମୁଖ୍ଯା ମୁନୀଶ୍ଵରାସ୍ତସ୍ଯ ।
ମନୁଶତରୂପାତ୍ମାସୌ
ମାନୁଷସୃଷ୍ଟିଂ ଚକାର କମଲଭଵଃ ॥ ୯॥

ସର୍ଗସ୍ଥିତିଲଯମୂଲଂ
ସୁରମୁନିଜାଲୈରମେଯମହିମାନମ୍ ।
ତଂ ତ୍ଵାମେଵ ପ୍ରଣମନ୍
ମୁଦମତୁଲାଂ ପଦ୍ମନାଭ! କଲଯାମି ॥ ୧୦॥


॥ ପଞ୍ଚମଂ ଦଶକମ୍ ॥
ଭୁଵୋ ଭାରଂ ହର୍ତୁଂ ନିଯତମଵତାରାଂସ୍ତୁ ଭଵତୋ
ନିଯୁଙ୍କ୍ତେ ଵକ୍ତୁଂ ମାମପି ଜଡଧିଯଂ ଭକ୍ତିରଧୁନା ।
ତଦର୍ଥଂ କୃତ୍ଵା ମାମନୁପମପଟୁଂ ପାଲଯ ହରେ
ଭଵତ୍ପାଦାମ୍ଭୋଜପ୍ରଵଣହୃଦଯଂ ଦେଵ ସଦଯମ୍ ॥ ୧॥

ହଯଗ୍ରୀଵାଖ୍ଯେନ ତ୍ରିଦଶରିପୁଣା ଵେଦନିଵହେ
ହୃତେ ନିଦ୍ରାଣସ୍ଯାମ୍ବୁରୁହଜନୁଷୋ ହନ୍ତ ଵଦନାତ୍ ।
ନିହନ୍ତୁଂ ଦୁଷ୍ଟଂ ତଂ ଵିନିହିତମତିସ୍ତ୍ଵଂ ପୁରୁଦଯା-
ପଯୋଧିସ୍ତୂର୍ଣଂ ଵୈ ଦଧିତ ବତ ମାତ୍ସ୍ଯଂ କିଲ ଵପୁଃ ॥ ୨॥

ନଦୀତୋଯେ ସନ୍ତର୍ପଯତି କିଲ ସତ୍ଯଵ୍ରତନୃପେ
ଭଵାନ୍ ଦୃଷ୍ଟୋ ହସ୍ତେ ପରମତନୁଵୈସାରିଣଵପୁଃ ।
ତତୋ ନିନ୍ଯେ କୂପଂ ପୁନରପି ତଟାକଂ ଚ ତଟିନୀଂ
ମହାବ୍ଧିଂ ତେନାହୋ ସପଦି ଵଵୃଧେ ତାଵକ ଵପୁଃ ॥ ୩॥

ତତସ୍ତଂ ଭୂପାଲଂ ପ୍ରଲଯସମଯାଲୋକନପରଂ
ମୁନୀନ୍ଦ୍ରାନ୍ ସପ୍ତାପି କ୍ଷିତିତରଣିମାରୋପ୍ଯ ଚ ଭଵାନ୍ ।
ସମାକର୍ଷନ୍ ବଦ୍ଧାଂ ନିଜ ଵିପୁଲଶୃଙ୍ଗେ ପୁନରିମାଂ
ମୁଦା ତେଭ୍ଯଃ ସନ୍ଦର୍ଶିତଭୁଵନଭାଗଃ ସମଚରତ୍ ॥ ୪॥

ପୁନସ୍ସଂହୃତ୍ଯ ତ୍ଵଂ ନିଜପରୁଷଶୃଙ୍ଗେଣ ଦିତିଜଂ
କ୍ଷଣାଦ୍ଵେଦାନ୍ ପ୍ରାଦା ମୁଦିତମନସେ ଦେଵ ଵିଧଯେ ।
ତଥାଭୂତାଽମେଯପ୍ରଣତଜନସୌଭ୍ଯାଗ୍ଯଦ! ହରେ!
ମୁଦା ପାହି ତ୍ଵଂ ମାଂ ସରସିରୁହନାଭାଽଖିଲଗୁରୋ! ॥ ୫॥

ଵହଂସ୍ତ୍ଵଂ ମନ୍ଥାନଂ କମଠଵପୁଷା ମନ୍ଦରଗିରିଂ
ଦଧାନଃ ପାଣିଭ୍ଯାଂ ସ୍ଵଯମପି ଵରତ୍ରାଂ ଫଣିପତିମ୍ ।
ସୁରେଭ୍ଯଃ ସମ୍ପ୍ରଦାସ୍ତ୍ଵମୃତମିହ ମଥ୍ନନ୍ କିଲ ଜଵାତ୍
ହରେ ଦୁଗ୍ଧାମ୍ଭୋଧେଃ ସପଦି କମଲାଽଜାଯତ ତତଃ ॥ ୬॥

ତତୋ ନିକ୍ଷିପ୍ତା ଵୈ ସପଦି ଵରଣସ୍ରକ୍ ଖଲୁ ତଯା
ଭଵତ୍କଣ୍ଠେ ମାତ୍ରା ନିଖିଲଭୁଵନାନାଂ ସକୁତୁକମ୍ ।
ପପୌ ତ୍ଵତ୍ପ୍ରୀତ୍ଯର୍ଥଂ ସପଦି ବତ ହାଲାହଲଵିଷଂ
ଗିରୀଶଃ ପ୍ରାଦାସ୍ତ୍ଵଂ ସୁରତରୁଗଜାଦୀନି ହରଯେ ॥ ୭॥

ପୁରା ତେ ଦ୍ଵାସ୍ଥୌ ଦ୍ଵୌ ସନକମୁଖଶାପେନ ତୁ ଗତୌ
ହରେ! ସର୍ଵୈର୍ନିନ୍ଦ୍ଯଂ ଖଲୁ ଦନୁଜଜନ୍ମାତିକଠିନମ୍ ।
ତଯୋର୍ଭ୍ରାତା ଦୁଷ୍ଟୋ ମୁରହର କନୀଯାନ୍ ଵରବଲାତ୍
ହିରଣ୍ଯାକ୍ଷୋ ନାମ କ୍ଷିତିମିହ ଜଲେ ମଜ୍ଜଯଦସୌ ॥ ୮॥

ମହୀଂ ମଗ୍ନାଂ ଦୃଷ୍ଟ୍ଵା ତଦନୁ ମନୁନା ସେଵିତପଦାତ୍
ଵିଧେର୍ନାସାରନ୍ଧ୍ରାତ୍ସମଭଵଦହୋ ସୂକରଶିଶୁଃ ।
ତତୋ ଦୈତ୍ଯଂ ହତ୍ଵା ପରମମହିତଃ ପୀଵରତନୁଃ
ଭଵାନ୍ ନିନ୍ଯେ ଭୂମିଂ ସକଲଵିନୁତ ପ୍ରାକ୍ତନଦଶାମ୍ ॥ ୯॥

ଵଧେନ ସ୍ଵଭ୍ରାତୁଃ ପରମକୁପିତୋ ଦାନଵଵରୋ
ହିରଣ୍ଯପ୍ରାରମ୍ଭଃ କଶିପୁରିହ ମୋହାକୁଲମତିଃ ।
ଵିଜେତୁଂ ତ୍ଵାଂ ସୋଽଯଂ ନିଖିଲଜଗଦାଧାରଵପୁଷଂ
ପ୍ରତିଜ୍ଞାଂ ଚାକାର୍ଷୀଦ୍ଦନୁସୁତସଭାମଧ୍ଯନିଲଯଃ ॥ ୧୦॥


॥ ଷଷ୍ଠଂ ଦଶକମ୍ ॥
ପୁତ୍ରୋଽସ୍ଯ ଵୈ ସମଜନୀହ ତଵାଙ୍ଘ୍ରିଭକ୍ତଃ
ପ୍ରହ୍ଲାଦ ଇତ୍ଯଭିମତଃ ଖଲୁ ସଜ୍ଜନାନାମ୍ ।
ତଂ ତତ୍ପିତା ପରମଦୁଷ୍ଟମତିର୍ନ୍ଯରୌତ୍ସୀତ୍
ତ୍ଵତ୍ସେଵିନଂ କିମିହ ଦୁଷ୍କରମୀଶ ପାପୈଃ ॥ ୧॥

ଭୂଯୋଽପି ସୋଽଥ ଜଗଦୀଶ୍ଵର! ଗର୍ଭଵାସେ
ଶ୍ରୀନାରଦେନ ମୁନିନୋକ୍ତଭଵତ୍ପ୍ରଭାଵଃ ।
ଶୁଶ୍ରାଵ ନୋ ଜନକଵାକ୍ଯମସୌ ତଦାନୀଂ
ତତ୍ପ୍ରେରିତୈର୍ଗୁରୁଜନୈରପି ଶିକ୍ଷିତଶ୍ଚ ॥ ୨॥

ଦୃଷ୍ଟ୍ଵା ପିତାଽସ୍ଯ ନିଜପୁତ୍ରମତିଂ ତ୍ଵକମ୍ପାଂ
ତ୍ଵତ୍ପାଦପଦ୍ମଯୁଗଳାଦତିରୁଷ୍ଟଚେତାଃ ।
ଶୂଲୈଶ୍ଚ ଦିଗ୍ଗଜଗଣୈରପି ଦନ୍ତଶୂକୈଃ
ଏନଂ ନିହନ୍ତୁମିହ ଯତ୍ନଶତଂ ଚକାର ॥ ୩॥

ସୋଽଯଂ ଦୃଢଂ ତଵ କୃପାକଵଚାଵୃତାଙ୍ଗଃ
ନୋ କିଞ୍ଚିଦାପ କିଲ ଦେହରୁଜାମନନ୍ତ ! ।
lଦ୍୍କସ୍ତେ ବଲଂ ଖଲ! ଵଦେrଦ୍୍ତ୍ଯଥ ଦେଵ ! ପୃଷ୍ଟୋ
lଦ୍୍ଲୋକତ୍ରଯସ୍ଯ ତୁ ବଲଂ ହରିrଦ୍୍ରିତ୍ଯଵାଦୀତ୍ ॥ ୪॥

ସ୍ତମ୍ଭେ ଵିଘଟ୍ଟଯତି କୁତ୍ର ହରିସ୍ତଵେତି
ରୂପଂ ତତଃ ସମଭଵତ୍ତଵ ଘୋରଘୋରମ୍ ।
ନୋ ଵା ମୃଗାତ୍ମ ନ ନରାତ୍ମ ଚ ସିଂହନାଦ-
ସନ୍ତ୍ରାସିତାଖିଲଜଗନ୍ନିକରାନ୍ତରାଳମ୍ ॥ ୫॥

ତୂର୍ଣଂ ପ୍ରଗୃହ୍ଯ ଦନୁଜଂ ପ୍ରଣିପାତ୍ଯ ଚୋରୌ
ଵକ୍ଷୋ ଵିଦାର୍ଯ ନଖରୈଃ ରୁଧିରଂ ନିପୀଯ ।
ପାଦାମ୍ବୁଜୈକନିରତସ୍ଯ ତୁ ବାଲକସ୍ଯ
କାଯାଧଵସ୍ଯ ଶିରସି ସ୍ଵକରଂ ନ୍ଯଧାସ୍ତ୍ଵମ୍ ॥ ୬॥

ଏଵଂ ସ୍ଵଭକ୍ତଜନକାମିତଦାନଲୋଲ !
ନିର୍ଲେପ! ନିର୍ଗୁଣ! ନିରୀହ! ସମସ୍ତମୂଲ ! ।
ମାଂ ପାହି ତାଵକ ପଦାବ୍ଜନିଵିଷ୍ଟଚିତ୍ତଂ
ଶ୍ରୀପଦ୍ମନାଭ! ପରପୂରଷ! ତେ ନମସ୍ତେ ॥ ୭॥

ଦୃଷ୍ଟୋ ଭଵାନଦିତିଜୋ ଵଟୁରୂପଧାରୀ
ଦୈତ୍ଯାଧିପେନ ବଲିନା ନିଜ ଯଜ୍ଞଗେହେ ।
ପୃଷ୍ଟଶ୍ଚ ତେନ lଦ୍୍କିମୁ ଵାଞ୍ଛସି ବାଲକେrଦ୍୍ତି
ପାଦତ୍ରଯୀ ପ୍ରମିତଭୂମିତଲଂ ଯଯାଚେ ॥ ୮॥

ଯୁଗ୍ମେନ ଦେଵ! ଚରଣସ୍ଯ ତୁ ସର୍ଵଲୋକେ
ପୂର୍ଣେ ତୃତୀଯଚରଣଂ ତ୍ଵଵଶଃ ପ୍ରଦାତୁମ୍ ।
ବଦ୍ଧଶ୍ଚ ଦେହି ମମ ମୂର୍ଧ୍ନି ତୃତୀଯପାଦଂ
ଇତ୍ଯବ୍ରଵୀଦ୍ଗତମଦୋଽନୁଗୃହୀତ ଏଷଃ ॥ ୯॥

ଜାତୋଽସି ଦେଵ! ଜମଦଗ୍ନିସୁତୋ ମହାତ୍ମା
ତ୍ଵଂ ରେଣୁକାଜଠର ଈଶ୍ଵର! ଭାର୍ଗଵାଖ୍ଯଃ ।
ଶମ୍ଭୁପ୍ରସାଦ! ସୁଗୃହୀତଵରାସ୍ତ୍ରଜାଲଃ
କୃତ୍ତାଖିଲାରିନିକରୋରୁକୁଠାରପାଣିଃ ॥ ୧୦॥


॥ ସପ୍ତମଂ ଦଶକମ୍ ॥
ଯାଞ୍ଚାଭିସ୍ତ୍ଵଂ ଖଲୁ ଦିଵିଷଦାଂ ରାଵଣୋପଦ୍ରୁତାନାଂ
ପୁତ୍ରୀଯେଷ୍ଟ୍ଯା ଫଲଵିଲସିତଂ ମାନଵେ ଦେଵ! ଵଂଶେ ।
ଜାତୋ ରାମୋ ଦଶରଥନୃପାଲ୍ଲକ୍ଷ୍ମଣେନାନୁଜେନ
ଭ୍ରାତ୍ରା ଯୁକ୍ତୋ ଵରଦ! ଭରତେନାଥ ଶତ୍ରୁଘ୍ନନାମ୍ନା ॥ ୧॥

ଧୃତ୍ଵା ଚାପଂ ସହଜସହିତଃ ପାଲଯନ୍ କୌଶିକୀଯଂ
ଯଜ୍ଞଂ ମାରୀଚମୁଖସୁମହାରାକ୍ଷସେଭ୍ଯଃ ପରଂ ତ୍ଵମ୍ ।
କୃତ୍ଵାଽହଲ୍ଯାଂ ଚରଣରଜସା ଗୌତମସ୍ଯେଶ! ପତ୍ନୀଂ
ଭିତ୍ଵା ଶୈଵଂ ଧନୁରଥ ତଦା ଲବ୍ଧଵାଂଶ୍ଚାପି ସୀତାମ୍ ॥ ୨॥

ମଧ୍ଯେମାର୍ଗାଗତ ଭୃଗୁପତିଂ ଦେଵ! ଜିତ୍ଵାଽତିରୁଷ୍ଟଂ
ଭୂଯୋ ଗତ୍ଵା ପରମ! ନଗରୀଂ ସ୍ଵାମଯୋଧ୍ଯାଂ ଵସଂସ୍ତ୍ଵମ୍ ।
କୈକେଯୀଵାଗ୍ଭ୍ରମିତମନସୋ ହନ୍ତ ତାତସ୍ଯ ଵାଚା
ତ୍ଯକ୍ତ୍ଵା ରାଜ୍ଯଂ ଵିପିନମଗମୋ ଦୁଃଖିତାଶେଷଲୋକଃ ॥ ୩॥

ଗତ୍ଵାଽରଣ୍ଯଂ ସହ ଦଯିତଯା ଚାଥ ସୌମିତ୍ରିଣା ତ୍ଵଂ
ଗଙ୍ଗାଂ ତୀର୍ତ୍ଵା ସୁସୁଖମଵସଚ୍ଚିତ୍ରକୂଟାଖ୍ଯଶୈଲେ ।
ତତ୍ର ଶ୍ରୁତ୍ଵା ଭରତଵଚନାତ୍ତାତମୃତ୍ଯୁଂ ଵିଷଣ୍ଣଃ
ତସ୍ମୈ ପ୍ରାଦା ଵରଦ! ଧରଣିଂ ପାଦୁକାଂ ଚାତ୍ମନସ୍ତ୍ଵମ୍ ॥ ୪॥

ଭୂଯୋ ହତ୍ଵା ନିଶିଚରଵରାନ୍ ଦ୍ରାଗ୍ଵିରାଧାଦିକାଂସ୍ତ୍ଵଂ
କୁମ୍ଭୋଦ୍ଭୂତେନ ଖଲୁ ମୁନିନା ଦତ୍ତଦିଵ୍ଯାସ୍ତ୍ରଜାଲଃ ।
ଭ୍ରାତୃଚ୍ଛିନ୍ନଶ୍ରଵଣଵିନଦଚ୍ଛୂର୍ପଣଖ୍ଯା ଵଚୋଭିଃ
ତ୍ଵାଯାତାଂସ୍ତାନ୍ ଖରମୁଖମହାରାକ୍ଷସାନ୍ ପ୍ରାଵଧୀଶ୍ଚ ॥ ୫॥

ମାରୀଚଂ ତଂ କନକହରିଣଛଦ୍ମନାଯାତମାରାତ୍
ଜାଯାଵାକ୍ଯାଦଲମନୁଗତଃ ପ୍ରାଵଧୀଃ ସାଯକେନ ।
ତାଵଦ୍ଭୂମନ୍! କପଟଯତିଵେଷୋଽଥ ଲଙ୍କାଧିନାଥଃ
ସୀତାଦେଵୀମହରତ ତଦା ଦୁଃଖିତାତ୍ମାଽଭଵସ୍ତ୍ଵମ୍ ॥ ୬॥

ଦୃଷ୍ଟ୍ଵା ଲଙ୍କେଶ୍ଵରଵିନିହତଂ ତାତମିତ୍ରଂ ଜଟାଯୁଂ
ତସ୍ଯାଽଥ ତ୍ଵଂ ଵରଦ କୃତଵାନ୍ ପ୍ରେତକାର୍ଯଂ ଵିଷଣ୍ଣଃ ।
ଦୃଷ୍ଟସ୍ତତ୍ରାଽନୁପମ! ଭଵତା ମାରୁତିର୍ଭକ୍ତଵର୍ଯଃ
ଭୂଯସ୍ତୁଷ୍ଟଃ ସରସମକରୋଃ ସାଧୁ ସୁଗ୍ରୀଵସଖ୍ଯମ୍ ॥ ୭॥

ଛିତ୍ଵା ସାଲାନ୍ ସରସମିଷୁଣା ସପ୍ତସଙ୍ଖ୍ଯାନ୍ କ୍ଷଣେନ
ଵ୍ଯାଜେନ ତ୍ଵଂ ବତ ନିହତଵାନ୍ ବାଲିନଂ ଶକ୍ରସୂନୁମ୍ ।
ଭୂଯୋଽନ୍ଵେଷ୍ଟୁଂ ଜନକତନଯାଂ ଦିକ୍ଷୁ ସମ୍ପ୍ରେଷ୍ଯ କୀଶାନ୍
ସୁଗ୍ରୀଵୋକ୍ତାନ୍ ପଵନଜକରେ ଦତ୍ତଵାଂଶ୍ଚାଙ୍ଗୁଲୀଯମ୍ ॥ ୮॥

ଦୃଷ୍ଟ୍ଵା ସୀତାଂ ନିଶିଚରଗୃହେ ତାଵକଂ ଦେଵ! ଵୃତ୍ତଂ
କୃତ୍ସ୍ନଂ ତୂକ୍ତ୍ଵାପ୍ଯଵିଦିତ ଭଵତେ ମାରୁତିର୍ମୌଲିରତ୍ନମ୍ ।
ତୁଷ୍ଟସ୍ତାଵତ୍କିଲ ଜଲନିଧୌ ବାଣଵିତ୍ରାସିତେ ତ୍ଵଂ
ସେତୁଂ ବଦ୍ଧ୍ଵା ନିଶିଚରପୁରଂ ଯାତଵାନ୍ ପଦ୍ମନାଭ! ॥ ୯॥

ହତ୍ଵା ଯୁଦ୍ଧେ କିଲ ଦଶମୁଖଂ ଦେଵ! ସାମାତ୍ଯବନ୍ଧୁଂ
ସୀତାଂ ଗୃହ୍ଣନ୍ ପରିହୃତମଲାଂ ପୁଷ୍ପକେ ରାଜମାନଃ ।
ପ୍ରାପ୍ଯାଯୋଧ୍ଯାଂ ହରିଵରନିଷାଦେନ୍ଦ୍ରଯୁକ୍ତୋଽଭିଷିକ୍ତଃ
ତ୍ରାତାଶେଷୋ ରହିତଦଯିତଶ୍ଚାଗମୋଽନ୍ତେ ସ୍ଵଧିଷ୍ଣ୍ଯମ୍ ॥ ୧୦॥


॥ ଅଷ୍ଟମଂ ଦଶକମ୍ ॥
ଦେଵ! ଦୁଷ୍ଟଜନୌଘଭରେଣ
ଵ୍ଯାକୁଲାଽଥ ଵସୁଧାମ୍ବୁଜଯୋନିମ୍ ।
ପ୍ରାପ୍ଯ ଦେଵନିକରୈଃ ଶ୍ରିତପାଦଂ
ସ୍ଵୀଯତାପମିହ ସମ୍ଯଗୁଵାଚ ॥ ୧॥

ପଦ୍ମଭୂରଥ ନିଶମ୍ଯ ଚ ତାପଂ
ଚିନ୍ତଯନ୍ ସପଦି ଦେଵ! ଭଵନ୍ତମ୍ ।
ଯୁଷ୍ମଦୀଯ ସକଲାଧିହରଃ ଶ୍ରୀ
ପଦ୍ମନାଭ ଇତି ତାନଵଦତ୍ସଃ ॥ ୨॥

ଭୂଯ ଏତ୍ଯ ତଵ ମନ୍ଦିରମେତେ
ହୀନପୁଣ୍ଯନିକରୈରନଵାପ୍ଯମ୍ ।
ତୁଷ୍ଟୁଵୁଃ ସଵିବୁଧୋ ଦ୍ରୁହିଣସ୍ତ୍ଵାଂ
ତାପମାଶ୍ଵକଥଯଦ୍ଵସୁଧାଯାଃ ॥ ୩॥

lଦ୍୍ସଂଭଵାମି ତରସା ଯଦୁଵଂଶେ
ଯାଦଵାଃ କିଲ ଭଵନ୍ତ୍ଵିହ ଦେଵାଃrଦ୍୍ ।
ଏଵମୀଶ! କଥିତେ ତଵ ଵାକ୍ଯେ
ଵେଧସା କିଲ ସୁରା ମୁଦମାପନ୍ ॥ ୪॥

ରୋହିଣୀଜଠରତଃ କିଲ ଜାତଃ
ପ୍ରେରଣାତ୍ତଵ ପରଂ ତ୍ଵହିରାଜଃ ।
ତ୍ଵଂ ଚ ଵିଶ୍ଵଗତକଲ୍ମଷହାରୀ
ଦେଵକୀଜଠରମାଶୁ ନିଵିଷ୍ଟଃ ॥ ୫॥

ଅର୍ଧରାତ୍ରସମଯେ ତୁ ଭଵନ୍ତଂ
ଦେଵକୀ ପ୍ରସୁଷୁଵେଽଧିକଧନ୍ଯା ।
ଶଙ୍ଖଚକ୍ରକମଲୋରୁଗଦାଭୀ -
ରାଜିତାତିରୁଚିବାହୁଚତୁଷ୍କମ୍ ॥ ୬॥

ତାଵଦୀଶ! ସକଲୋ ବତ ଲୋକୋ
ତୁଷ୍ଟିମାପ ତମୃତେ କିଲ କଂସମ୍ ।
ଅଷ୍ଟମଃ କିଲ ସୁତୋଽଥ ଭଗିନ୍ଯା-
ସ୍ତଦ୍ଵଧଂ କଲଯତୀତି ଚ ଵାକ୍ଯାତ୍ ॥ ୭॥

ବାଷ୍ପପୂର୍ଣନଯନୋ ଵସୁଦଵୋ
ନୀତଵାନ୍ ଵ୍ରଜପଦେଽଥ ଭଵନ୍ତମ୍ ।
ତତ୍ର ନନ୍ଦସଦନେ କିଲ ଜାତା -
ମମ୍ବିକାମନଯଦାତ୍ମନିକେତମ୍ ॥ ୮॥

କଂସ ଏତ୍ଯ କିଲ ସୂତିଗୃହେ ତେ
କନ୍ଯକାଂ ତୁ ଶଯିତାଂ ସ ନିଶାମ୍ଯ ।
ନୂନମେଵମଜିତସ୍ଯ ତୁ ମାଯା
ସେଯମିତ୍ଯଯମତୁଷ୍ଟିମଯାସୀତ୍ ॥ ୯॥

ତୂର୍ଣମେଷ ନିଧନେ ନିରତାଂସ୍ତେ
ପୂତନାଶକଟଧେନୁକମୁଖ୍ଯାନ୍ ।
ପ୍ରାହିଣୋଦଜିତ! ମନ୍ଦମତିସ୍ତାନ୍
ଦୁଷ୍କରଂ କିମିହ ଵିସ୍ମୃତପାପୈଃ ॥ ୧୦॥


॥ ନଵମଂ ଦଶକମ୍ ॥
ଏଵଂ ଘୋଷେ ଵିରାଜତ୍ଯଯି! ଭଵତି ଜଗନ୍ନେତ୍ରପୀଯୂଷମୂର୍ତୌ
ଦୁଷ୍ଟା କାଚିନ୍ନିଶାଚର୍ଯଥ ସମଧିଗତା ଚାରୁଯୋଷିତ୍ସ୍ଵରୂପା ।
ସ୍ତନ୍ଯଂ ଦାତୁଂ କୁଚାଗ୍ରଂ ତଵମୁଖଜଲଜେ ଦେଵ! ଚିକ୍ଷେପ ଯାଵତ୍
ତାଵତ୍କ୍ଷୀରଂ ସଜୀଵଂ କପଟଶିଶୁରହୋ ପୀତଵାଂସ୍ତ୍ଵଂ କ୍ଷଣେନ ॥ ୧॥

ଭୂଯଃ ଶୌରେ! ଵ୍ରଜେ ଵୈ ଶକଟଦନୁସୁତ ପ୍ରାପ୍ତଵାନ୍ ସଂହୃତୋଽଯଂ
ଵାତାତ୍ମା ଦାନଵଶ୍ଚ ପ୍ରଵିତତ ଧରଣୀଭାରନାଶେନ କୃତ୍ତଃ ।
ଦୃଷ୍ଟ୍ଵୈଵଂ ତେ ମହତ୍ଵଂ ଦନୁଜହୃତିଚଣଂ ତାଦୃଶୀଂ ବାଲଲୀଲାଂ
ତ୍ଵନ୍ମାଯାମୋହିତତ୍ଵାଦଯି! ବତ! ପଶୁପା ଵିସ୍ମଯଂ ମୋଦମାପନ୍ ॥ ୨॥

ନନ୍ଦଃ ପଶ୍ଯନ୍ କଦାଚିନ୍ନିଜନିଲଯଗତଂ ଯାଦଵାଚାର୍ଯଵର୍ଯଂ
ଗର୍ଗଂ ତେ କାରଯାମାସ ଚ ଵିଧିଵଦସୌ ନାମ କୃଷ୍ଣେତି ତେନ ।
ରାମାଖ୍ଯାଂ ସୋଦରେ ତେ ମୁନିରଥ କଲଯନ୍ ଵୈଭଵଂ ଚ ତ୍ଵଦୀଯଂ
ନନ୍ଦାଦିଭ୍ଯଃ ପ୍ରଶଂସନ୍ ନିଜପଦମିହ ସମ୍ପ୍ରାପ୍ତଵାନ୍ ଭକ୍ତଵର୍ଯଃ ॥ ୩॥

ଦୃଷ୍ଟଂ ମାତ୍ରା ସମସ୍ତଂ ଜଗଦିହ ଵଦନେ ମୃତ୍ତିକାଭକ୍ଷଣଂ ତେ
ଵ୍ଯାକୁର୍ଵନ୍ତ୍ଯା ଶିଶୂନାମଥ ଵଚନଵଶାତ୍କିଂ ତ୍ଵିତୋ ହନ୍ତ ଚିତ୍ରମ୍ ।
ଭୂଯସ୍ତୂର୍ଣଂ ଭଵାନ୍ ମଙ୍ଗଳଗୁଣ! ଗତଵାନ୍ଦେଵ! ଵୃନ୍ଦାଵନଂ ତତ୍
ଯୁଷ୍ମଦ୍ଗାତ୍ରୋରୁଶୋଭା ପ୍ରତୁଲିତ ଯମୁନାତୀରସଂସ୍ଥଂ ମନୋଜ୍ଞମ୍ ॥ ୪॥

ଵନ୍ଯାଶଂ ତ୍ଵଯ୍ଯଧୀଶେ କଲଯତି ତରସା ଶ୍ରୀଧରାହୋ ଵିରିଞ୍ଚୋ
ଗୋପାନ୍ ଵତ୍ସାନ୍ ତ୍ଵଦୀଯାନହରଦଯି! ଵିଭୋ! ତାଵଦେଵ ସ୍ଵରୂପମ୍ ।
ସଙ୍ଖ୍ଯାହୀନଂ ପରଂ ତ୍ଵାମପି କବଳଧରଂ ଵୀକ୍ଷ୍ଯ ସମ୍ଭ୍ରାନ୍ତଚେତାଃ
ତ୍ଵତ୍ପାଦାବ୍ଜେ ପତିତ୍ଵା ମୁହୁରପି ଭଗଵନ୍ନସ୍ତଵୀଦଚ୍ଯୁତଂ ତ୍ଵାମ୍ ॥ ୫॥

ସର୍ପଂ ତୋଯେ ନିମଗ୍ନଂ ପରମସୁକୁଟିଲଂ କାଳିଯଂ ଵୀକ୍ଷ୍ଯ ଶୌରେ!
ନୃତ୍ଯନ୍ ନୃତ୍ଯନ୍ ଫଣେ ତ୍ଵଂ ତଦନୁ ଗତମଦଂ ଚାକରୋସ୍ତଂ ଗତଂ ଚ ।
ଭୂଯସ୍ତ୍ଵଦ୍ଵେଣୁଗାନାଦଜିତ! ଜଗଦଲଂ ମୋହିତଂ ସର୍ଵମାସୀତ୍
ଯୋଷିଚ୍ଚିତ୍ତାପହାରେ ନିପୁଣମିଦମିତି ଶ୍ରୀଶ! କିଂ ଵର୍ଣନୀଯମ୍ ॥ ୬॥

ଧୃତ୍ଵା ଗୋଵର୍ଧନଂ ତ୍ଵଂ ଗିରିମଲମତନୋର୍ଵାସଵଂ ଵୀତଗର୍ଵଂ
ଯୋଷିଦ୍ଭିସ୍ତ୍ଵଂ ସଲୀଲଂ ରଜନିଷୁ କୃତଵାନ୍ ରାସକେଳିଂ ମନୋଜ୍ଞାମ୍ ।
ଭକ୍ତାଗ୍ର୍ଯଂ ଗାନ୍ଦିନେଯଂ ତଵ ଖଲୁ ନିକଟେ ପ୍ରେଷଯାମାସ କଂସଃ
ହତ୍ଵେଭେନ୍ଦ୍ରଂ ଚ ମଲ୍ଲାନ୍ ଯଦୁଵର! ସବଲୋ ମାତୁଲଂ ଚାଵଧୀସ୍ତ୍ଵମ୍ ॥ ୭॥

ଗତ୍ଵା ସାନ୍ଦୀପନିଂ ତ୍ଵଂ କତିପଯଦିଵସୈଃ ଜ୍ଞାତଵାନ୍ ସର୍ଵଵିଦ୍ଯାଃ
କୃତ୍ଵା ରାଜ୍ଯେ ନରେନ୍ଦ୍ରଂ ଵିମଲତମଗୁଣଂ ଚୋଗ୍ରସେନଂ ଜଵେନ ।
ରାଜାନଂ ଧର୍ମସୂନୁଂ ଚରଣରତମଵନ୍ ଚୈଦ୍ଯମୁଖ୍ଯାଦିହନ୍ତା
ରୁଗ୍ମିଣ୍ଯାଦ୍ଯଷ୍ଟଯୋଷାଯୁତବହୁଵନିତାଶ୍ଚାରମୋ ଦ୍ଵାରକାଯାମ୍ ॥ ୮॥

ଵିପ୍ରଂ ନିସ୍ସ୍ଵଂ କୁଚେଲଂ ସଦନମୁପଗତଂ ବାଲ୍ଯକାଲୈକମିତ୍ରଂ
ପଶ୍ଯନ୍ କାରୁଣ୍ଯଲୋଲଃ ପୃଥୁକମିହ କରାତ୍ତସ୍ଯ ସଙ୍ଗୃହ୍ଯ ତୂର୍ଣମ୍ ।
ଲକ୍ଷ୍ମୀସଂଵାରିତୋଽପି ସ୍ଵଯମପରିମିତଂ ଵିତ୍ତମସ୍ମୈ ଦଦାନଃ
କାରୁଣ୍ଯାମ୍ଭୋନିଧିସ୍ତ୍ଵଂ ଜଯ ଜଯ ଭଗଵନ୍! ସର୍ଵଲୋକାଧିନାଥ! ॥ ୯॥

ଯାଵଦ୍ଵୃଦ୍ଧିଃ କଲେର୍ଵୈ ଭଵତି ବତ ତଦା କଲ୍କିରୂପୋଽତିହୀନାନ୍
ମ୍ଲେଚ୍ଛାନ୍ ଧର୍ମୈକଶତ୍ରୂନ୍ ଭରିତପୁରୁରୁଷା ନାଶଯିଷ୍ଯତ୍ଯଶାନ୍ତାନ୍ ।
ସ ତ୍ଵଂ ସତ୍ଵୈକତାନାଂ ମମ ମତିମନିଶଂ ଦେହି ଶୌରେ! ତଦର୍ଥଂ
ତ୍ଵତ୍ପାଦାବ୍ଜେ ପତିତ୍ଵା ମୁହୁରହମଵଶଃ ପ୍ରାର୍ଥଯେ ପଦ୍ମନାଭ! ॥ ୧୦॥


॥ ଦଶମଂ ଦଶକମ୍ ॥
ଭୂଷଣେଷୁ କିଲ ହେମଵଜ୍ଜଗତି ମୃତ୍ତିକାଵଦଥଵା ଘଟେ
ତନ୍ତୁଜାଲଵଦହୋ ପଟେଷ୍ଵପି ରାଜିତାଦ୍ଵଯରସାତ୍ମକମ୍ ।
ସର୍ଵସତ୍ଵହୃଦଯୈକସାକ୍ଷିଣମିହାତିମାଯ ନିଜଵୈଭଵଂ
ଭାଵଯାମି ହୃଦଯେ ଭଵନ୍ତମିହ ପଦ୍ମନାଭ! ପରିପାହି ମାମ୍ ॥ ୧॥

ଚିନ୍ମଯାମ୍ବୁନିଧିଵୀଚିରୂପ! ସନକାଦିଚିନ୍ତ୍ଯଵିମଲାକୃତେ !
ଜାତିକର୍ମଗୁଣଭେଦହୀନ! ସକଲାଦିମୂଲ! ଜଗତାଂ ଗୁରୋ ! ।
ବ୍ରହ୍ମଶଙ୍କରମୁଖୈରମେଯଵିପୁଲାନୁଭାଵ! କରୁଣାନିଧେ!
ଭାଵଯାମି ହୃଦଯେ ଭଵନ୍ତମିହ ପଦ୍ମନାଭ! ପରିପାହି ମାମ୍ ॥ ୨॥

ମାଯଯାଵୃତତନୁର୍ବହିଃ ସୃଜସି ଲୋକଜାଲମଖିଲଂ ଭଵାନ୍
ସ୍ଵପ୍ନସନ୍ନିଭମିଦଂ ପୁନସ୍ସପଦି ସଂହରନ୍ନିଜବଲାଦହୋ! ।
ହନ୍ତ! କୂର୍ମ ଇଵ ପାଦମାତ୍ମନି ତୁ ଧାରଯତ୍ଯଥ ଯଦା ତଦା
ଦାରୁଣେ ତମସି ଵିସ୍ତୃତେ ଵିତିମିରୋ ଲସତ୍ଯନିଶମାତ୍ମନା ॥ ୩॥

ଦେଵଦେଵ! ତନୁଵାଙ୍ମନୋଭିରିହ ଯତ୍କରୋମି ସତତଂ ହରେ!
ତ୍ଵଯ୍ଯସାଵହମର୍ପଯାମ୍ଯଖିଲମେତଦୀଶ! ପରିତୁଷ୍ଯତାମ୍ ।
ତ୍ଵତ୍ପଦୈକମତିରନ୍ତ୍ଯଜୋଽପି ଖଲୁ ଲୋକମୀଶ୍ଵର! ପୁନାତ୍ଯହୋ!
ନୋ ରମେଶ! ଵିମୁଖାଶଯୋ ଭଵତି ଵିପ୍ରଜାତିରପି କେଵଲମ୍ ॥ ୪॥

ପାପ ଏଷ କିଲ ଗୂହିତୁଂ ନିଜ ଦୁଶ୍ଚରିତ୍ରମିହ ସର୍ଵଦା
କୃଷ୍ଣ! ରାମ! ମଧୁସୂଦନେତ୍ଯନିଶମାଲପତ୍ଯହହ! ନିଷ୍ଫଲମ୍ ।
ଏଵମୀଶ! ତଵ ସେଵକୋ ଭଵତି ନିନ୍ଦିତଃ ଖଲଜନୈଃ କଲୌ
ତାଦୃଶଂ ତ୍ଵନଘ! ମା କୃଥା ଵରଦ! ମାମସୀମତମଵୈଭଵ! ॥ ୫॥

କସ୍ତୁ ଲୋକ ଇହ ନିର୍ଭଯୋ ଭଵତି ତାଵକଂ କିଲ ଵିନା ପଦଂ
ସତ୍ଯଲୋକଵସତି ସ୍ଥିତୋଽପି ବତ ନ ସ୍ଥିରୋ ଵସତି ପଦ୍ମଭୂଃ ।
ଏଵମୀଶ ସତି କା କଥା ପରମ! ପାପିନାଂ ତୁ ନିରଯାତ୍ମନାଂ
ତନ୍ମଦୀଯ ଭଵବନ୍ଧମୋହମଯି! ଖଣ୍ଡଯାଽନଘ! ନମୋଽସ୍ତୁ ତେ ॥ ୬॥

ଭାଵଯନ୍ତି ହି ପରେ ଭଵନ୍ତମଯି! ଚାରୁ ବଦ୍ଧଵିମଲାସନାଃ
ନାସିକାଗ୍ରଧୃତଲୋଚନା ପରମ! ପୂରକାଦିଜିତମାରୁତାଃ ।
ଉଦ୍ଗତାଗ୍ରମଥ ଚିତ୍ତପଦ୍ମମଯି! ଭାଵଯନ୍ତ ଇହ ସାଦରଂ
ଭାନୁସୋମଶିଖିମଣ୍ଡଲୋପରି ତୁ ନୀଲନୀରଦସମପ୍ରଭମ୍ ॥ ୭॥

ଶ୍ଲକ୍ଷ୍ଣନୀଲକୁଟିଲାଳକଂ ମକରକୁଣ୍ଡଲଦ୍ଯୁତିଵିରାଜିତଂ
ମନ୍ଦହାସହୃତସର୍ଵଲୋକଵିପୁଲାତିଭାରମତିମୋହନମ୍ ।
କୌସ୍ତୁଭେନ ଵନମାଲଯାପି ଚ ଵିରାଜିତଂ ମଦନସୁନ୍ଦରଂ
କାଞ୍ଚନାଭଵସନଂ ଭଵନ୍ତମଯି! ଭାଵଯନ୍ତି ହୃତକଲ୍ମଷାଃ ॥ ୮॥

ଜ୍ଞାନମୀଶ! ବତ! କର୍ମ ଭକ୍ତିରପି ତତ୍ତ୍ରଯଂ ଭଵଦଵାପକଂ
ଜ୍ଞାନଯୋଗଵିଷଯେଽଧିକାର ଇହ ଵୈ ଵିରକ୍ତଜନତାହିତଃ ।
କର୍ମଣୀହ ତୁ ଭଵେନ୍ନୃଣାମଧିକସକ୍ତମାନସଜୁଷାଂ ହରେ!
ଯେ ତୁ ନାଧିକଵିରକ୍ତସକ୍ତହୃଦଯା ହି ଭକ୍ତିରଯି! ତଦ୍ଧିତା ॥ ୯॥

ଦେଵ! ଵୈଭଵମଜାନତାଦ୍ଯ ତଵ ଯନ୍ମଯା ନିଗଦିତଂ ହରେ!
କ୍ଷମ୍ଯତାଂ ଖଲୁ ସମସ୍ତମେତଦିହ ମୋଦମୀଶ! କୁରୁ ତାଵକେ ।
ଦୀର୍ଘମାଯୁରଯି! ଦେହସୌଖ୍ଯମପି ଵର୍ଧତାଂ ଭଵଦନୁଗ୍ରହାତ୍
ପଙ୍କଜାଭନଯନାପଦୋ ଦଲଯ ପଦ୍ମନାଭ! ଵିଜଯୀ ଭଵ! ॥ ୧୦॥


॥ ଇତି ମହାରାଜା ସ୍ଵାତି ତିରୁନାଳ୍ ଵିରଚିତଂ ପଦ୍ମନାଭଶତକମ୍ ॥


Encoded and proofread by P. P. Narayanaswami swami at mun.ca
PSA Easwaran

Please send corrections to sanskrit@cheerful.com
Last updated ତ୍oday
http://sanskritdocuments.org

Padmanabha Shatakam Lyrics in Oriya PDF
% File name : padmanAbhashatakam.itx
% Category : shataka
% Location : doc\_vishhnu
% Author : mahArAjA svAti tirunAL
% Language : Sanskrit
% Subject : philosophy/hinduism/religion
% Transliterated by : P. P. Narayanaswami swami at mun.ca
% Proofread by : P. P. Narayanaswami swami at mun.ca, PSA Easwaran
% Translated by :
% Description-comments :
% Source :
% Acknowledge-Permission:
% Latest update : May 16, 2015
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ December 10, 2015 ] at Stotram Website