ಶ್ರೀಹಯಗ್ರೀವಸ್ತೋತ್ರಮ್

{॥ ಶ್ರೀಹಯಗ್ರೀವಸ್ತೋತ್ರಮ್ ॥}
ಶ್ರಿಃ
ಶ್ರೀಮಾನ್ ವೇಙ್ಕಟನಾಥಾರ್ಯಃ ಕವಿತಾರ್ಕಿಕಕೇಸರೀ ।
ವೇದಾನ್ತಾಚಾರ್ಯವರ್ಯೋ ಮೇ ಸನ್ನಿಧತ್ತಾಂ ಸದಾ ಹೃದಿ ॥

ಜ್ಞಾನಾನನ್ದಮಯಂ ದೇವಂ ನಿರ್ಮಲಸ್ಫಟಿಕಾಕೃತಿಮ್ ।
ಆಧಾರಂ ಸರ್ವವಿದ್ಯಾನಾಂ ಹಯಗ್ರೀವಮುಪಾಸ್ಮಹೇ ॥ ೧॥

ಸ್ವತಃ ಸಿದ್ಧಂ ಶುದ್ಧಸ್ಫಟಿಕಮಣಿ ಭೂಭೃತ್ಪ್ರತಿಭಟಂ
ಸುಧಾಸಧ್ರೀಚೀಭಿರ್ದ್ಯುತಿಭಿರವದಾತತ್ರಿಭುವನಮ್ ।
ಅನನ್ತೈಸ್ತ್ರಯ್ಯನ್ತೈರನುವಿಹಿತ ಹೇಷಾಹಲಹಲಂ
ಹತಾಶೇಷಾವದ್ಯಂ ಹಯವದನಮೀಡೀಮಹಿ ಮಹಃ ॥ ೨॥

ಸಮಾಹಾರಃ ಸಾಮ್ನಾಂ ಪ್ರತಿಪದಮೃಚಾಂ ಧಾಮ ಯಜುಷಾಂ
ಲಯಃ ಪ್ರತ್ಯೂಹಾನಾಂ ಲಹರಿ ವಿತತಿರ್ಬೋಧಜಲಧೇಃ ।
ಕಥಾದರ್ಪಕ್ಷುಭ್ಯತ್ಕಥಕಕುಲ ಕೋಲಾಹಲಭವಂ
ಹರತ್ವನ್ತರ್ಧ್ವಾನ್ತಂ ಹಯವದನ ಹೇಷಾ ಹಲಹಲಃ ॥ ೩॥

ಪ್ರಾಚೀ ಸನ್ಧ್ಯಾ ಕಾಚಿದನ್ತರ್ನಿಶಾಯಾಃ
ಪ್ರಜ್ಞಾದೃಷ್ಟೇರಞ್ಜನಶ್ರೀರಪೂರ್ವಾ ।
ವಕ್ತ್ರೀ ವೇದಾನ್ ಭಾತು ಮೇ ವಾಜಿವಕ್ತ್ರಾ
ವಾಗೀಶಾಖ್ಯಾ ವಾಸುದೇವಸ್ಯ ಮೂರ್ತಿಃ ॥ ೪॥

ವಿಶುದ್ಧ ವಿಜ್ಞಾನ ಘನ ಸ್ವರೂಪಂ
ವಿಜ್ಞಾನ ವಿಶ್ರಾಣನ ಬದ್ಧದೀಕ್ಷಮ್ ।
ದಯಾನಿಧಿಂ ದೇಹಭೃತಾಂ ಶರಣ್ಯಂ
ದೇವಮ್ ಹಯಗ್ರೀವಮಹಂ ಪ್ರಪದ್ಯೇ ॥ ೫॥

ಅಪೌರುಷೇಯೈರಪಿ ವಾಕ್ಪ್ರಪಞ್ಚೈಃ
ಅದ್ಯಾಪಿ ತೇ ಭೂತಿಮದೃಷ್ಟಪಾರಾಮ್ ।
ಸ್ತುವನ್ನಹಂ ಮುಗ್ಧ ಇತಿ ತ್ವಯೈವ
ಕಾರುಣ್ಯತೋ ನಾಥ ಕಟಾಕ್ಷಣೀಯಃ ॥ ೬॥

ದಾಕ್ಷಿಣ್ಯರಮ್ಯಾ ಗಿರಿಶಸ್ಯ ಮೂರ್ತಿಃ
ದೇವೀ ಸರೋಜಾಸನ ಧರ್ಮಪತ್ನೀ ।
ವ್ಯಾಸಾದಯೋಽಪಿ ವ್ಯಪದೇಶ್ಯವಾಚಃ
ಸ್ಫುರನ್ತಿ ಸರ್ವೇ ತವ ಶಕ್ತಿಲೇಶೈಃ ॥ ೭॥

ಮನ್ದೋಽಭವಿಷ್ಯನ್ನಿಯತಂ ವಿರಿಞ್ಚೋ
ವಾಚಾಂ ನಿಧೇ ವಞ್ಚಿತಭಾಗಧೇಯಃ ।
ದೈತ್ಯಾಪನೀತಾನ್ ದಯಯೈವ ಭೂಯೋಽಪಿ
ಅಧ್ಯಾಪಯಿಷ್ಯೋ ನಿಗಮಾನ್ ನ ಚೇತ್ ತ್ವಮ್ ॥ ೮॥

ವಿತರ್ಕಡೋಲಾಂ ವ್ಯವಧೂಯ ಸತ್ವೇ
ಬೃಹಸ್ಪತಿಂ ವರ್ತಯಸೇ ಯತಸ್ತ್ವಮ್ ।
ತೇನೈವ ದೇವ ತ್ರಿದಶೇಶ್ವರಾಣಾಮ್
ಅಸ್ಪೃಷ್ಟ ಡೋಲಾಯಿತ ಮಾಧಿರಾಜ್ಯಮ್ ॥ ೯॥

ಅಗ್ನೌ ಸಮಿದ್ಧಾರ್ಚಿಷಿ ಸಪ್ತತನ್ತೋಃ
ಆತಸ್ಥಿವಾನ್ ಮನ್ತ್ರಮಯಂ ಶರೀರಮ್ ।
ಅಖಣ್ಡಸಾರೈರ್ಹವಿಷಾಂ ಪ್ರದಾನೈಃ
ಆಪ್ಯಾಯನಂ ವ್ಯೋಮಸದಾಂ ವಿಧತ್ಸೇ ॥ ೧೦॥

ಯನ್ಮೂಲಮೀದೃಕ್ ಪ್ರತಿಭಾತಿ ತತ್ವಂ
ಯಾ ಮೂಲಮಾಮ್ನಾಯ ಮಹಾದ್ರುಮಾಣಾಮ್ ।
ತತ್ವೇನ ಜಾನನ್ತಿ ವಿಶುದ್ಧ ಸತ್ವಾಃ
ತಾಮಕ್ಷರಾ ಮಕ್ಷರಮಾತೃಕಾಂ ತ್ವಾಮ್ ॥ ೧೧॥

ಅವ್ಯಾಕೃತಾದ್ ವ್ಯಾಕೃತವಾನಸಿ ತ್ವಮ್
ನಾಮಾನಿ ರೂಪಾಣಿ ಚ ಯಾನಿ ಪೂರ್ವಮ್ ।
ಶಂಸನ್ತಿ ತೇಷಾಂ ಚರಮಾಂ ಪ್ರತಿಷ್ಠಾಂ
ವಾಗೀಶ್ವರ ತ್ವಾಂ ತ್ವದುಪಜ್ಞವಾಚಃ ॥ ೧೨॥

ಮುಗ್ಧೇನ್ದು ನಿಷ್ಯನ್ದ ವಿಲೋಭನೀಯಾಂ
ಮೂರ್ತಿಂ ತವಾನನ್ದ ಸುಧಾ ಪ್ರಸೂತಿಮ್ ।
ವಿಪಶ್ಚಿತಶ್ಚೇತಸಿ ಭಾವಯನ್ತೇ
ವೇಲಾಮುದಾರಾಮಿವ ದುಗ್ಧಸಿನ್ಧೋಃ ॥ ೧೩॥

ಮನೋಗತಂ ಪಶ್ಯತಿ ಯಃ ಸದಾ ತ್ವಾಂ
ಮನೀಷಿನಾಂ ಮಾನಸ ರಾಜಹಂಸಮ್ ।
ಸ್ವಯಮ್ ಪುರೋಭಾವ ವಿವಾದಭಾಜಃ
ಕಿಂಕುರ್ವತೇ ತಸ್ಯ ಗಿರೋ ಯಥಾರ್ಹಮ್ ॥ ೧೪॥

ಅಪಿ ಕ್ಷಣಾರ್ಧಂ ಕಲಯನ್ತಿ ಯೇ ತ್ವಾಮ್
ಆಪ್ಲಾವಯನ್ತಂ ವಿಶದೈರ್ಮಯೂಖೈಃ ।
ವಾಚಾಂ ಪ್ರವಾಹೈರನಿವಾರಿತೈಸ್ತೇ
ಮನ್ದಾಕಿನೀಂ ಮನ್ದಯಿತುಂ ಕ್ಷಮನ್ತೇ ॥ ೧೫॥

ಸ್ವಾಮಿನ್ ಭವದ್ಧ್ಯಾನ ಸುಧಾಭಿಷೇಕಾತ್
ವಹನ್ತಿ ಧನ್ಯಾಃ ಪುಲಕಾನುಬನ್ಧಮ್ ।
ಅಲಕ್ಷಿತೇ ಕ್ವಾಪಿ ನಿರೂಢಮೂಲಮ್
ಅಙ್ಗೇಷ್ವಿವಾನನ್ದಥುಂ ಅಙ್ಕುರನ್ತಮ್ ॥ ೧೬॥

ಸ್ವಾಮಿನ್ ಪ್ರತೀಚಾ ಹೃದಯೇನ ಧನ್ಯಾಃ
ತ್ವದ್ಧ್ಯನ ಚನ್ದ್ರೋದಯ ವರ್ಧಮಾನಮ್ ।
ಅಮಾನ್ತಮಾನನ್ದ ಪಯೋಧಿಮನ್ತ
ಪಯೋಭಿರಕ್ಷ್ಣಾಂ ಪರಿವಾಹಯನ್ತಿ ॥ ೧೭॥

ಸ್ವೈರಾನುಭಾವಾಸ್ತ್ವದಧೀನ ಭಾವಾಃ
ಸಮೃದ್ಧವೀರ್ಯಾಸ್ತ್ವದನುಗ್ರಹೇಣ ।
ವಿಪಶ್ಚಿತೋ ನಾಥ ತರನ್ತಿ ಮಾಯಾಂ
ವೈಹಾರಿಕೀಂ ಮೋಹನ ಪಿಞ್ಛಿಕಾಂ ತೇ ॥ ೧೮॥

ಪ್ರಾಙ್ನಿರ್ಮಿತಾನಾಂ ತಪಸಾಂ ವಿಪಾಕಾಃ
ಪ್ರತ್ಯಗ್ರನಿಃಶ್ರೇಯಸ ಸಮ್ಪದೋ ಮೇ ।
ಸಮೇಧಿಷೀರಂಸ್ತವ ಪಾದಪದ್ಮೇ
ಸಂಕಲ್ಪ ಚಿನ್ತಾಮಣಯಃ ಪ್ರಣಾಮಾಃ ॥ ೧೯॥

ವಿಲುಪ್ತ ಮೂರ್ಧನ್ಯ ಲಿಪಿ ಕ್ರಮಾಣಾಮ್
ಸುರೇನ್ದ್ರ ಚೂಡಾಪದ ಲಾಲಿತಾನಾಮ್ ।
ತ್ವದಂಘ್ರಿ ರಾಜೀವ ರಜಃಕಣಾನಾಮ್
ಭೂಯಾನ್ ಪ್ರಸಾದೋ ಮಯಿ ನಾಥ ಭೂಯಾತ್ ॥ ೨೦॥

ಪರಿಸ್ಫುರನ್ನೂಪುರ ಚಿತ್ರಭಾನು-
ಪ್ರಕಾಶ ನಿರ್ಧೂತ ತಮೋನುಷಙ್ಗಾಮ್ ।
ಪದದ್ವಯೀಂ ತೇ ಪರಿಚಿನ್ಮಹೇ ಽನ್ತಃ
ಪ್ರಬೋಧ ರಾಜೀವ ವಿಭಾತ ಸನ್ಧ್ಯಾಮ್ ॥ ೨೧॥

ತ್ವತ್ಕಿಙ್ಕರಾಲಮ್ಕರಣೋಚಿತಾನಾಂ
ತ್ವಯೈವ ಕಲ್ಪಾನ್ತರ ಪಾಲಿತಾನಾಮ್ ।
ಮಞ್ಜುಪ್ರಣಾದಂ ಮಣಿನೂಪುರಂ ತೇ
ಮಞ್ಜೂಷಿಕಾಂ ವೇದಗಿರಾಂ ಪ್ರತೀಮಃ ॥ ೨೨॥

ಸನ್ಚಿನ್ತಯಾಮಿ ಪ್ರತಿಭಾದಶಾಸ್ಥಾನ್
ಸನ್ಧುಕ್ಷಯನ್ತಂ ಸಮಯ ಪ್ರದೀಪಾನ್ ।
ವಿಜ್ಞಾನ ಕಲ್ಪದ್ರುಮ ಪಲ್ಲವಾಭಂ
ವ್ಯಾಖ್ಯಾನ ಮುದ್ರಾ ಮಧುರಂ ಕರಂ ತೇ ॥ ೨೩॥

ಚಿತ್ತೇ ಕರೋಮಿ ಸ್ಫುರಿತಾಕ್ಷಮಾಲಂ
ಸವ್ಯೇತರಂ ನಾಥ ಕರಂ ತ್ವದೀಯಮ್ ।
ಜ್ಞಾನಾಮೃತೋದಞ್ಚನಲಮ್ಪಟಾನಾಂ
ಲೀಲಾಘಟೀ ಯನ್ತ್ರಮಿವಾಶ್ರಿತಾನಾಮ್ ॥ ೨೪॥

ಪ್ರಬೋಧ ಸಿನ್ಧೋರರುಣೈಃ ಪ್ರಕಾಶೈಃ
ಪ್ರವಾಳ ಸಙ್ಘಾತಮಿವೋದ್ವಹನ್ತಮ್ ।
ವಿಭಾವಯೇ ದೇವ ಸಪುಸ್ತಕಂ ತೇ
ವಾಮಂ ಕರಂ ದಕ್ಷಿಣಮಾಶ್ರಿತಾನಾಮ್ ॥ ೨೫॥

ತಮಾಂಸಿ ಭಿತ್ವಾ ವಿಶದೈರ್ಮಯೂಖೈಃ
ಸಮ್ಪ್ರೀಣಯನ್ತಂ ವಿದುಷಶ್ಚಕೋರಾನ್ ।
ನಿಶಾಮಯೇ ತ್ವಾಂ ನವಪುಣ್ಡರೀಕೇ
ಶರದ್ಘನೇ ಚನ್ದ್ರಮಿವ ಸ್ಫುರನ್ತಮ್ ॥ ೨೬॥

ದಿಶನ್ತು ಮೇ ದೇವ ಸದಾ ತ್ವದೀಯಾಃ
ದಯಾತರಙ್ಗಾನುಚರಾಃ ಕಟಾಕ್ಷಾಃ ।
ಶ್ರೋತ್ರೇಷು ಪುಮ್ಸಾಮಮೃತಮ್ ಕ್ಷರನ್ತೀಂ
ಸರಸ್ವತೀಂ ಸಂಶ್ರಿತ ಕಾಮಧೇನುಮ್ ॥ ೨೭॥

ವಿಶೇಷವಿತ್ಪಾರಿಷದೇಷು ನಾಥ
ವಿದಗ್ಧ ಗೋಷ್ಟೀಸಮರಾಙ್ಗಣೇಷು ।
ಜಿಗೀಷತೋ ಮೇ ಕವಿತಾರ್ಕಿಕೇನ್ದ್ರಾನ್
ಜಿಹ್ವಾಗ್ರ ಸಿಂಹಾಸನಮಭ್ಯುಪೇಯಾಃ ॥ ೨೮॥

ತ್ವಾಂ ಚಿನ್ತಯನ್ ತ್ವನ್ಮಯತಾಂ ಪ್ರಪನ್ನಃ
ತ್ವಾಮುದ್ಗೃಣನ್ ಶಬ್ದಮಯೇನ ಧಾಮ್ನಾ ।
ಸ್ವಾಮಿನ್ ಸಮಾಜೇಷು ಸಮೇಧಿಷೀಯ
ಸ್ವಚ್ಛನ್ದ ವಾದಾಹವ ಬದ್ಧಶೂರಃ ॥ ೨೯॥

ನಾನಾವಿಧಾನಾಮಗತಿಃ ಕಲಾನಾಂ
ನ ಚಾಪಿ ತೀರ್ಥೇಷು ಕೃತಾವತಾರಃ ।
ಧ್ರುವಂ ತವಾನಾಥಪರಿಗ್ರಹಾಯಾಃ
ನವಂ ನವಂ ಪಾತ್ರಮಹಂ ದಯಾಯಾಃ ॥ ೩೦॥

ಅಕಮ್ಪನೀಯಾನ್ಯಪನೀತಿ ಭೇದೈಃ
ಅಲನ್ಕೃಷೀರನ್ ಹೃದಯಂ ಮದೀಯಮ್ ।
ಶಙ್ಕಾಕಳಙ್ಕಾಪಗಮೋಜ್ಜ್ವಲಾನಿ
ತತ್ವಾನಿ ಸಮ್ಯಞ್ಚಿ ತವ ಪ್ರಸಾದಾತ್ ॥ ೩೧॥

ವ್ಯಾಖ್ಯಾ ಮುದ್ರಾಂ ಕರಸರಸಿಜೈಃ ಪುಸ್ತಕಮ್ ಶಙ್ಖಚಕ್ರೇ
ಬಿಭ್ರದ್ಭಿನ್ನಸ್ಫಟಿಕರುಚಿರೇ ಪುಣ್ಡರೀಕೇ ನಿಷಣ್ಣಃ ।
ಅಮ್ಲಾನಶ್ರೀರಮೃತವಿಶದೈರಂಶುಭಿಃ ಪ್ಲಾವಯನ್ ಮಾಂ
ಆವಿರ್ಭೂಯಾದನಘ ಮಹಿಮಾ ಮಾನಸೇ ವಾಗಧೀಶಃ ॥ ೩೨॥

ವಾಗರ್ಥ ಸಿದ್ಧಿಹೇತೋಃ
ಪಠತ ಹಯಗ್ರೀವಸಂಸ್ತುತಿಂ ಭಕ್ತ್ಯಾ ।
ಕವಿತಾರ್ಕಿಕಕೇಸರಿಣಾ
ವೇಙ್ಕಟನಾಥೇನ ವಿರಚಿತಾಮೇತಾಮ್ ॥ ೩೩॥

॥ ಇತಿ ಶ್ರೀಹಯಗ್ರೀವಸ್ತೋತ್ರಂ ಸಮಾಪ್ತಮ್ ॥
ಕವಿತಾರ್ಕಿಕಸಿಂಹಾಯ ಕಲ್ಯಾಣಗುಣಶಾಲಿನೇ ।
ಶ್ರೀಮತೇ ವೇಙ್ಕಟೇಶಾಯ ವೇದಾನ್ತಗುರವೇ ನಮಃ ॥



Encoded and proofread by Sundar Rajan RD sundar.rajanrd at gmail.com

Please send corrections to sanskrit@cheerful.com
Last updated ತ್oday
http://sanskritdocuments.org

Hayagriva Stotram Lyrics in Kannada PDF
% File name : hayagrIvastotramDesika.itx
% Location : doc\_deities\_misc
% Author : Vedanta Desika
% Language : Sanskrit
% Subject : philosophy/hinduism/religion
% Transliterated by : Sundar Rajan RD sundar.rajanrd at gmail.com
% Proofread by : Sundar Rajan RD sundar.rajanrd at gmail.com
% Latest update : November 23, 2011
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ December 15, 2015 ] at Stotram Website