{॥ ଶ୍ରୀହଯଗ୍ରୀଵସ୍ତୋତ୍ରମ୍ ॥}
ଶ୍ରିଃ
ଶ୍ରୀମାନ୍ ଵେଙ୍କଟନାଥାର୍ଯଃ କଵିତାର୍କିକକେସରୀ ।
ଵେଦାନ୍ତାଚାର୍ଯଵର୍ଯୋ ମେ ସନ୍ନିଧତ୍ତାଂ ସଦା ହୃଦି ॥

ଜ୍ଞାନାନନ୍ଦମଯଂ ଦେଵଂ ନିର୍ମଲସ୍ଫଟିକାକୃତିମ୍ ।
ଆଧାରଂ ସର୍ଵଵିଦ୍ଯାନାଂ ହଯଗ୍ରୀଵମୁପାସ୍ମହେ ॥ ୧॥

ସ୍ଵତଃ ସିଦ୍ଧଂ ଶୁଦ୍ଧସ୍ଫଟିକମଣି ଭୂଭୃତ୍ପ୍ରତିଭଟଂ
ସୁଧାସଧ୍ରୀଚୀଭିର୍ଦ୍ଯୁତିଭିରଵଦାତତ୍ରିଭୁଵନମ୍ ।
ଅନନ୍ତୈସ୍ତ୍ରଯ୍ଯନ୍ତୈରନୁଵିହିତ ହେଷାହଲହଲଂ
ହତାଶେଷାଵଦ୍ଯଂ ହଯଵଦନମୀଡୀମହି ମହଃ ॥ ୨॥

ସମାହାରଃ ସାମ୍ନାଂ ପ୍ରତିପଦମୃଚାଂ ଧାମ ଯଜୁଷାଂ
ଲଯଃ ପ୍ରତ୍ଯୂହାନାଂ ଲହରି ଵିତତିର୍ବୋଧଜଲଧେଃ ।
କଥାଦର୍ପକ୍ଷୁଭ୍ଯତ୍କଥକକୁଲ କୋଲାହଲଭଵଂ
ହରତ୍ଵନ୍ତର୍ଧ୍ଵାନ୍ତଂ ହଯଵଦନ ହେଷା ହଲହଲଃ ॥ ୩॥

ପ୍ରାଚୀ ସନ୍ଧ୍ଯା କାଚିଦନ୍ତର୍ନିଶାଯାଃ
ପ୍ରଜ୍ଞାଦୃଷ୍ଟେରଞ୍ଜନଶ୍ରୀରପୂର୍ଵା ।
ଵକ୍ତ୍ରୀ ଵେଦାନ୍ ଭାତୁ ମେ ଵାଜିଵକ୍ତ୍ରା
ଵାଗୀଶାଖ୍ଯା ଵାସୁଦେଵସ୍ଯ ମୂର୍ତିଃ ॥ ୪॥

ଵିଶୁଦ୍ଧ ଵିଜ୍ଞାନ ଘନ ସ୍ଵରୂପଂ
ଵିଜ୍ଞାନ ଵିଶ୍ରାଣନ ବଦ୍ଧଦୀକ୍ଷମ୍ ।
ଦଯାନିଧିଂ ଦେହଭୃତାଂ ଶରଣ୍ଯଂ
ଦେଵମ୍ ହଯଗ୍ରୀଵମହଂ ପ୍ରପଦ୍ଯେ ॥ ୫॥

ଅପୌରୁଷେଯୈରପି ଵାକ୍ପ୍ରପଞ୍ଚୈଃ
ଅଦ୍ଯାପି ତେ ଭୂତିମଦୃଷ୍ଟପାରାମ୍ ।
ସ୍ତୁଵନ୍ନହଂ ମୁଗ୍ଧ ଇତି ତ୍ଵଯୈଵ
କାରୁଣ୍ଯତୋ ନାଥ କଟାକ୍ଷଣୀଯଃ ॥ ୬॥

ଦାକ୍ଷିଣ୍ଯରମ୍ଯା ଗିରିଶସ୍ଯ ମୂର୍ତିଃ
ଦେଵୀ ସରୋଜାସନ ଧର୍ମପତ୍ନୀ ।
ଵ୍ଯାସାଦଯୋଽପି ଵ୍ଯପଦେଶ୍ଯଵାଚଃ
ସ୍ଫୁରନ୍ତି ସର୍ଵେ ତଵ ଶକ୍ତିଲେଶୈଃ ॥ ୭॥

ମନ୍ଦୋଽଭଵିଷ୍ଯନ୍ନିଯତଂ ଵିରିଞ୍ଚୋ
ଵାଚାଂ ନିଧେ ଵଞ୍ଚିତଭାଗଧେଯଃ ।
ଦୈତ୍ଯାପନୀତାନ୍ ଦଯଯୈଵ ଭୂଯୋଽପି
ଅଧ୍ଯାପଯିଷ୍ଯୋ ନିଗମାନ୍ ନ ଚେତ୍ ତ୍ଵମ୍ ॥ ୮॥

ଵିତର୍କଡୋଲାଂ ଵ୍ଯଵଧୂଯ ସତ୍ଵେ
ବୃହସ୍ପତିଂ ଵର୍ତଯସେ ଯତସ୍ତ୍ଵମ୍ ।
ତେନୈଵ ଦେଵ ତ୍ରିଦଶେଶ୍ଵରାଣାମ୍
ଅସ୍ପୃଷ୍ଟ ଡୋଲାଯିତ ମାଧିରାଜ୍ଯମ୍ ॥ ୯॥

ଅଗ୍ନୌ ସମିଦ୍ଧାର୍ଚିଷି ସପ୍ତତନ୍ତୋଃ
ଆତସ୍ଥିଵାନ୍ ମନ୍ତ୍ରମଯଂ ଶରୀରମ୍ ।
ଅଖଣ୍ଡସାରୈର୍ହଵିଷାଂ ପ୍ରଦାନୈଃ
ଆପ୍ଯାଯନଂ ଵ୍ଯୋମସଦାଂ ଵିଧତ୍ସେ ॥ ୧୦॥

ଯନ୍ମୂଲମୀଦୃକ୍ ପ୍ରତିଭାତି ତତ୍ଵଂ
ଯା ମୂଲମାମ୍ନାଯ ମହାଦ୍ରୁମାଣାମ୍ ।
ତତ୍ଵେନ ଜାନନ୍ତି ଵିଶୁଦ୍ଧ ସତ୍ଵାଃ
ତାମକ୍ଷରା ମକ୍ଷରମାତୃକାଂ ତ୍ଵାମ୍ ॥ ୧୧॥

ଅଵ୍ଯାକୃତାଦ୍ ଵ୍ଯାକୃତଵାନସି ତ୍ଵମ୍
ନାମାନି ରୂପାଣି ଚ ଯାନି ପୂର୍ଵମ୍ ।
ଶଂସନ୍ତି ତେଷାଂ ଚରମାଂ ପ୍ରତିଷ୍ଠାଂ
ଵାଗୀଶ୍ଵର ତ୍ଵାଂ ତ୍ଵଦୁପଜ୍ଞଵାଚଃ ॥ ୧୨॥

ମୁଗ୍ଧେନ୍ଦୁ ନିଷ୍ଯନ୍ଦ ଵିଲୋଭନୀଯାଂ
ମୂର୍ତିଂ ତଵାନନ୍ଦ ସୁଧା ପ୍ରସୂତିମ୍ ।
ଵିପଶ୍ଚିତଶ୍ଚେତସି ଭାଵଯନ୍ତେ
ଵେଲାମୁଦାରାମିଵ ଦୁଗ୍ଧସିନ୍ଧୋଃ ॥ ୧୩॥

ମନୋଗତଂ ପଶ୍ଯତି ଯଃ ସଦା ତ୍ଵାଂ
ମନୀଷିନାଂ ମାନସ ରାଜହଂସମ୍ ।
ସ୍ଵଯମ୍ ପୁରୋଭାଵ ଵିଵାଦଭାଜଃ
କିଂକୁର୍ଵତେ ତସ୍ଯ ଗିରୋ ଯଥାର୍ହମ୍ ॥ ୧୪॥

ଅପି କ୍ଷଣାର୍ଧଂ କଲଯନ୍ତି ଯେ ତ୍ଵାମ୍
ଆପ୍ଲାଵଯନ୍ତଂ ଵିଶଦୈର୍ମଯୂଖୈଃ ।
ଵାଚାଂ ପ୍ରଵାହୈରନିଵାରିତୈସ୍ତେ
ମନ୍ଦାକିନୀଂ ମନ୍ଦଯିତୁଂ କ୍ଷମନ୍ତେ ॥ ୧୫॥

ସ୍ଵାମିନ୍ ଭଵଦ୍ଧ୍ଯାନ ସୁଧାଭିଷେକାତ୍
ଵହନ୍ତି ଧନ୍ଯାଃ ପୁଲକାନୁବନ୍ଧମ୍ ।
ଅଲକ୍ଷିତେ କ୍ଵାପି ନିରୂଢମୂଲମ୍
ଅଙ୍ଗେଷ୍ଵିଵାନନ୍ଦଥୁଂ ଅଙ୍କୁରନ୍ତମ୍ ॥ ୧୬॥

ସ୍ଵାମିନ୍ ପ୍ରତୀଚା ହୃଦଯେନ ଧନ୍ଯାଃ
ତ୍ଵଦ୍ଧ୍ଯନ ଚନ୍ଦ୍ରୋଦଯ ଵର୍ଧମାନମ୍ ।
ଅମାନ୍ତମାନନ୍ଦ ପଯୋଧିମନ୍ତ
ପଯୋଭିରକ୍ଷ୍ଣାଂ ପରିଵାହଯନ୍ତି ॥ ୧୭॥

ସ୍ଵୈରାନୁଭାଵାସ୍ତ୍ଵଦଧୀନ ଭାଵାଃ
ସମୃଦ୍ଧଵୀର୍ଯାସ୍ତ୍ଵଦନୁଗ୍ରହେଣ ।
ଵିପଶ୍ଚିତୋ ନାଥ ତରନ୍ତି ମାଯାଂ
ଵୈହାରିକୀଂ ମୋହନ ପିଞ୍ଛିକାଂ ତେ ॥ ୧୮॥

ପ୍ରାଙ୍ନିର୍ମିତାନାଂ ତପସାଂ ଵିପାକାଃ
ପ୍ରତ୍ଯଗ୍ରନିଃଶ୍ରେଯସ ସମ୍ପଦୋ ମେ ।
ସମେଧିଷୀରଂସ୍ତଵ ପାଦପଦ୍ମେ
ସଂକଲ୍ପ ଚିନ୍ତାମଣଯଃ ପ୍ରଣାମାଃ ॥ ୧୯॥

ଵିଲୁପ୍ତ ମୂର୍ଧନ୍ଯ ଲିପି କ୍ରମାଣାମ୍
ସୁରେନ୍ଦ୍ର ଚୂଡାପଦ ଲାଲିତାନାମ୍ ।
ତ୍ଵଦଂଘ୍ରି ରାଜୀଵ ରଜଃକଣାନାମ୍
ଭୂଯାନ୍ ପ୍ରସାଦୋ ମଯି ନାଥ ଭୂଯାତ୍ ॥ ୨୦॥

ପରିସ୍ଫୁରନ୍ନୂପୁର ଚିତ୍ରଭାନୁ-
ପ୍ରକାଶ ନିର୍ଧୂତ ତମୋନୁଷଙ୍ଗାମ୍ ।
ପଦଦ୍ଵଯୀଂ ତେ ପରିଚିନ୍ମହେ ଽନ୍ତଃ
ପ୍ରବୋଧ ରାଜୀଵ ଵିଭାତ ସନ୍ଧ୍ଯାମ୍ ॥ ୨୧॥

ତ୍ଵତ୍କିଙ୍କରାଲମ୍କରଣୋଚିତାନାଂ
ତ୍ଵଯୈଵ କଲ୍ପାନ୍ତର ପାଲିତାନାମ୍ ।
ମଞ୍ଜୁପ୍ରଣାଦଂ ମଣିନୂପୁରଂ ତେ
ମଞ୍ଜୂଷିକାଂ ଵେଦଗିରାଂ ପ୍ରତୀମଃ ॥ ୨୨॥

ସନ୍ଚିନ୍ତଯାମି ପ୍ରତିଭାଦଶାସ୍ଥାନ୍
ସନ୍ଧୁକ୍ଷଯନ୍ତଂ ସମଯ ପ୍ରଦୀପାନ୍ ।
ଵିଜ୍ଞାନ କଲ୍ପଦ୍ରୁମ ପଲ୍ଲଵାଭଂ
ଵ୍ଯାଖ୍ଯାନ ମୁଦ୍ରା ମଧୁରଂ କରଂ ତେ ॥ ୨୩॥

ଚିତ୍ତେ କରୋମି ସ୍ଫୁରିତାକ୍ଷମାଲଂ
ସଵ୍ଯେତରଂ ନାଥ କରଂ ତ୍ଵଦୀଯମ୍ ।
ଜ୍ଞାନାମୃତୋଦଞ୍ଚନଲମ୍ପଟାନାଂ
ଲୀଲାଘଟୀ ଯନ୍ତ୍ରମିଵାଶ୍ରିତାନାମ୍ ॥ ୨୪॥

ପ୍ରବୋଧ ସିନ୍ଧୋରରୁଣୈଃ ପ୍ରକାଶୈଃ
ପ୍ରଵାଳ ସଙ୍ଘାତମିଵୋଦ୍ଵହନ୍ତମ୍ ।
ଵିଭାଵଯେ ଦେଵ ସପୁସ୍ତକଂ ତେ
ଵାମଂ କରଂ ଦକ୍ଷିଣମାଶ୍ରିତାନାମ୍ ॥ ୨୫॥

ତମାଂସି ଭିତ୍ଵା ଵିଶଦୈର୍ମଯୂଖୈଃ
ସମ୍ପ୍ରୀଣଯନ୍ତଂ ଵିଦୁଷଶ୍ଚକୋରାନ୍ ।
ନିଶାମଯେ ତ୍ଵାଂ ନଵପୁଣ୍ଡରୀକେ
ଶରଦ୍ଘନେ ଚନ୍ଦ୍ରମିଵ ସ୍ଫୁରନ୍ତମ୍ ॥ ୨୬॥

ଦିଶନ୍ତୁ ମେ ଦେଵ ସଦା ତ୍ଵଦୀଯାଃ
ଦଯାତରଙ୍ଗାନୁଚରାଃ କଟାକ୍ଷାଃ ।
ଶ୍ରୋତ୍ରେଷୁ ପୁମ୍ସାମମୃତମ୍ କ୍ଷରନ୍ତୀଂ
ସରସ୍ଵତୀଂ ସଂଶ୍ରିତ କାମଧେନୁମ୍ ॥ ୨୭॥

ଵିଶେଷଵିତ୍ପାରିଷଦେଷୁ ନାଥ
ଵିଦଗ୍ଧ ଗୋଷ୍ଟୀସମରାଙ୍ଗଣେଷୁ ।
ଜିଗୀଷତୋ ମେ କଵିତାର୍କିକେନ୍ଦ୍ରାନ୍
ଜିହ୍ଵାଗ୍ର ସିଂହାସନମଭ୍ଯୁପେଯାଃ ॥ ୨୮॥

ତ୍ଵାଂ ଚିନ୍ତଯନ୍ ତ୍ଵନ୍ମଯତାଂ ପ୍ରପନ୍ନଃ
ତ୍ଵାମୁଦ୍ଗୃଣନ୍ ଶବ୍ଦମଯେନ ଧାମ୍ନା ।
ସ୍ଵାମିନ୍ ସମାଜେଷୁ ସମେଧିଷୀଯ
ସ୍ଵଚ୍ଛନ୍ଦ ଵାଦାହଵ ବଦ୍ଧଶୂରଃ ॥ ୨୯॥

ନାନାଵିଧାନାମଗତିଃ କଲାନାଂ
ନ ଚାପି ତୀର୍ଥେଷୁ କୃତାଵତାରଃ ।
ଧ୍ରୁଵଂ ତଵାନାଥପରିଗ୍ରହାଯାଃ
ନଵଂ ନଵଂ ପାତ୍ରମହଂ ଦଯାଯାଃ ॥ ୩୦॥

ଅକମ୍ପନୀଯାନ୍ଯପନୀତି ଭେଦୈଃ
ଅଲନ୍କୃଷୀରନ୍ ହୃଦଯଂ ମଦୀଯମ୍ ।
ଶଙ୍କାକଳଙ୍କାପଗମୋଜ୍ଜ୍ଵଲାନି
ତତ୍ଵାନି ସମ୍ଯଞ୍ଚି ତଵ ପ୍ରସାଦାତ୍ ॥ ୩୧॥

ଵ୍ଯାଖ୍ଯା ମୁଦ୍ରାଂ କରସରସିଜୈଃ ପୁସ୍ତକମ୍ ଶଙ୍ଖଚକ୍ରେ
ବିଭ୍ରଦ୍ଭିନ୍ନସ୍ଫଟିକରୁଚିରେ ପୁଣ୍ଡରୀକେ ନିଷଣ୍ଣଃ ।
ଅମ୍ଲାନଶ୍ରୀରମୃତଵିଶଦୈରଂଶୁଭିଃ ପ୍ଲାଵଯନ୍ ମାଂ
ଆଵିର୍ଭୂଯାଦନଘ ମହିମା ମାନସେ ଵାଗଧୀଶଃ ॥ ୩୨॥

ଵାଗର୍ଥ ସିଦ୍ଧିହେତୋଃ
ପଠତ ହଯଗ୍ରୀଵସଂସ୍ତୁତିଂ ଭକ୍ତ୍ଯା ।
କଵିତାର୍କିକକେସରିଣା
ଵେଙ୍କଟନାଥେନ ଵିରଚିତାମେତାମ୍ ॥ ୩୩॥

॥ ଇତି ଶ୍ରୀହଯଗ୍ରୀଵସ୍ତୋତ୍ରଂ ସମାପ୍ତମ୍ ॥
କଵିତାର୍କିକସିଂହାଯ କଲ୍ଯାଣଗୁଣଶାଲିନେ ।
ଶ୍ରୀମତେ ଵେଙ୍କଟେଶାଯ ଵେଦାନ୍ତଗୁରଵେ ନମଃ ॥



Encoded and proofread by Sundar Rajan RD sundar.rajanrd at gmail.com

Please send corrections to sanskrit@cheerful.com
Last updated ତ୍oday
http://sanskritdocuments.org

Hayagriva Stotram Lyrics in Oriya PDF
% File name : hayagrIvastotramDesika.itx
% Location : doc\_deities\_misc
% Author : Vedanta Desika
% Language : Sanskrit
% Subject : philosophy/hinduism/religion
% Transliterated by : Sundar Rajan RD sundar.rajanrd at gmail.com
% Proofread by : Sundar Rajan RD sundar.rajanrd at gmail.com
% Latest update : November 23, 2011
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ December 15, 2015 ] at Stotram Website