{॥ భక్తామరస్తోత్ర ॥}
భక్తామర-ప్రణత-మౌలిమణి-ప్రభాణా -
ముద్యోతకం దలిత-పాప-తమోవితానమ్ ।
సమ్యక్ ప్రణమ్య జిన పాదయుగం యుగాదా-
వాలంబనం భవజలే పతతాం జనానామ్॥ ౧॥

యః సంస్తుతః సకల-వాఙ్మయ- తత్వ-బోధా-
ద్-ఉద్భూత- బుద్ధిపటుభిః సురలోకనాథైః।
స్తోత్రైర్జగత్త్రితయ చిత్త-హరైరుదరైః
స్తోష్యే కిలాహమపి తం ప్రథమం జినేన్ద్రమ్॥ ౨॥

బుద్ధ్యా వినాఽపి విబుధార్చిత పాదపీఠ
స్తోతుం సముద్యత మతిర్విగతత్రపోఽహమ్ ।
బాలం విహాయ జలసంస్థితమిన్దు బిమ్బ -
మన్యః క ఇచ్ఛతి జనః సహసా గ్రహీతుమ్ ॥ ౩॥

వక్తుం గుణాన్ గుణసముద్ర శశాఙ్క్కాన్తాన్
కస్తే క్షమః సురగురుప్రతిమోఽపి బుద్ధ్యా ।
కల్పాన్త - కాల్ - పవనోద్ధత - నక్రచక్రం
కో వా తరీతుమలమమ్బునిధిం భుజాభ్యామ్ ॥ ౪॥

సోఽహం తథాపి తవ భక్తి వశాన్మునీశ
కర్తుం స్తవం విగతశక్తిరపి ప్రవృత్తః ।
ప్రీత్యఽఽత్మవీర్యమవిచార్య మృగో మృగేన్ద్రం
నాభ్యేతి కిం నిజశిశోః పరిపాలనార్థమ్ ॥ ౫॥

అల్పశ్రుతం శ్రుతవతాం పరిహాసధామ్
త్వద్భక్తిరేవ ముఖరీకురుతే బలాన్మామ్ ।
యత్కోకిలః కిల మధౌ మధురం విరౌతి
తచ్చారుచూత - కలికానికరైకహేతు ॥ ౬॥

త్వత్సంస్తవేన భవసంతతి - సన్నిబద్ధం
పాపం క్షణాత్ క్షయముపైతి శరీర భాజామ్।
ఆక్రాన్త - లోకమలినీలమశేషమాశు
సూర్యాంశుభిన్నమివ శార్వరమన్ధకారమ్ ॥ ౭॥

మత్వేతి నాథ్! తవ్ సంస్తవనం మయేద -
మారభ్యతే తనుధియాపి తవ ప్రభావాత్ ।
చేతో హరిష్యతి సతాం నలినీదలేషు
ముక్తాఫల - ద్యుతిముపైతి ననూదబిన్దుః ॥ ౮॥

ఆస్తాం తవ స్తవనమస్తసమస్త - దోషం
త్వత్సంకథాఽపి జగతాం దురితాని హన్తి ।
దూరే సహస్త్రకిరణః కురుతే ప్రభైవ
పద్మాకరేషు జలజాని వికాశభాంజి ॥ ౯॥

నాత్యద్-భూతం భువన-భుషణ భూతనాథ
భూతైర గుణైర్-భువి భవన్తమభిష్టువన్తః
తుల్యా భవన్తి భవతో నను తేన కిం వా
భూత్యాశ్రితం య ఇహ నాత్మసమం కరోతి ॥ ౧౦॥

దృష్టవా భవన్తమనిమేష-విలోకనీయం
నాన్యత్ర తోషముపయాతి జనస్య చక్షుః ।
పీత్వా పయః శశికరద్యుతి దుగ్ధ సిన్ధోః
క్షారం జలం జలనిధేరసితుం క ఇచ్ఛేత్ ॥ ౧౧॥

యైః శాన్తరాగరుచిభిః పరమాణుభిస్తవం
నిర్మాపితస్త్రిభువనైక లలామ-భూత।
తావన్త ఏవ ఖలు తేఽప్యణవః పృథివ్యాం
యత్తే సమానమపరం న హి రూపమస్తి ॥ ౧౨॥

వక్త్రం క్వ తే సురనరోరగనేత్రహారి
నిఃశేష - నిర్జిత-జగత్ త్రితయోపమానమ్ ।
బిమ్బం కలఙ్క-మలినం క్వ నిశాకరస్య
యద్వాసరే భవతి పాండుపలాశకల్పమ్ ॥ ౧౩॥

సమ్పూర్ణమణ్ఙల - శశాఙ్కకలాకలాప్
శుభ్రా గుణాస్త్రిభువనం తవ లంఘయన్తి ।
యే సంశ్రితాస్-త్రిజగదీశ్వర నాథమేకం
కస్తాన్-నివారయతి సంచరతో యథేష్టమ్ ॥ ౧౪॥

చిత్రం కిమత్ర యది తే త్రిదశాంగనాభిర్-
నీతం మనాగపి మనో న వికార - మార్గమ్ ।
కల్పాన్తకాలమరుతా చలితాచలేన
కిం మన్దరాద్రిశిఖిరం చలితం కదాచిత్ ॥ ౧౫॥

నిర్ధూమవర్తిపవర్జిత - తైలపూరః
కృత్స్నం జగత్త్రయమిదం ప్రకటీ-కరోషి ।
గమ్యో న జాతు మరుతాం చలితాచలానాం
దీపోఽపరస్త్వమసి నాథ్ జగత్ప్రకాశః ॥ ౧౬॥

నాస్తం కాదాచిదుపయాసి న రాహుగమ్యః
స్పష్టీకరోషి సహసా యుగపజ్జగన్తి ।
నామ్భోధరోదర - నిరుద్ధమహాప్రభావః
సూర్యాతిశాయిమహిమాసి మునీన్ద్ర! లోకే ॥ ౧౭॥

నిత్యోదయం దలితమోహమహాన్ధకారం
గమ్యం న రాహువదనస్య న వారిదానామ్ ।
విభ్రాజతే తవ ముఖాబ్జమనల్ప కాన్తి
విద్యోతయజ్జగదపూర్వ - శశాఙ్కబిమ్బమ్ ॥ ౧౮॥

కిం శర్వరీషు శశినాఽహ్ని వివస్వతా వా
యుష్మన్ముఖేన్దు - దలితేషు తమస్సు నాథ
నిష్మన్న శాలివనశాలిని జీవ లోకే
కార్యం కియజ్జలధరైర్ - జలభార నమ్రైః ॥ ౧౯॥

జ్ఞానం యథా త్వయి విభాతి కృతావకాశం
నైవం తథా హరిహరాదిషు నాయకేషు
తేజః స్ఫురన్మణిషు యాతి యథా మహత్వం
నైవం తు కాచ - శకలే కిరణాకులేఽపి ॥ ౨౦॥

మన్యే వరం హరి-హరాదయ ఏవ దృష్టా
దృష్టేషు యేషు హృదయం త్వయి తోషమేతి ।
కిం వీక్షితేన భవతా భువి యేన నాన్యః
కశ్చిన్మనో హరతి నాథ! భవాన్తరేఽపి ॥ ౨౧॥

స్త్రీణాం శతాని శతశో జనయన్తి పుత్రాన్
నాన్యా సుతం త్వదుపమం జననీ ప్రసూతా।
సర్వా దిశో దధతి భాని సహస్త్రరశ్మిం
ప్రాచ్యేవ దిగ్ జనయతి స్ఫురదంశుజాలం ॥ ౨౨॥

త్వామామనన్తి మునయః పరమం పుమాంస-
మాదిత్యవర్ణమమలం తమసః పరస్తాత్ ।
త్వామేవ సమ్యగుపలభ్య జయంతి మృత్యుం
నాన్యః శివః శివపదస్య మునీన్ద్ర! పన్థాః ॥ ౨౩॥

త్వామవ్యయం విభుమచిన్త్యమసంఖ్యమాద్యం
బ్రహ్మాణమీశ్వరమనన్తమనంగకేతుమ్
యోగీశ్వరం విదితయోగమనేకమేకం
జ్ఞానస్వరూపమమలం ప్రవదన్తి సన్తః ॥ ౨౪॥

బుద్ధస్త్వమేవ విబుధార్చిత బుద్ధి బోధాత్,
త్వం శంకరోఽసి భువనత్రయ శంకరత్వాత్ ।
ధాతాఽసి ధీర ! శివమార్గ-విధేర్విధానాత్,
వ్యక్తం త్వమేవ భగవన్! పురుషోత్తమోఽసి ॥ ౨౫॥

తుభ్యం నమస్త్రిభువనార్తిహరాయ నాథ ।
తుభ్యం నమః క్షితితలామలభూషణాయ ।
తుభ్యం నమస్త్రిజగతః పరమేశ్వరాయ,
తుభ్యం నమో జిన ! భవోదధి శోషణాయ ॥ ౨౬॥

కో విస్మయోఽత్ర యది నామ గుణైరశేషైస్ -
త్వం సంశ్రితో నిరవకాశతయా మునీశ!
దోషైరూపాత్త వివిధాశ్రయ జాతగర్వైః,
స్వప్నాన్తరేఽపి న కదాచిదపీక్షితోఽసి ॥ ౨౭॥

ఉచ్చైరశోక-తరుసంశ్రితమున్మయూఖ-
మాభాతి రూపమమలం భవతో నితాన్తమ్ ।
స్పష్టోల్లసత్కిరణమస్త-తమోవితానం
బిమ్బం రవేరివ పయోధర పార్శ్వవర్తి ॥ ౨౮॥

సింహాసనే మణిమయూఖశిఖావిచిత్రే,
విభ్రాజతే తవ వపుః కనకావదాతమ్ ।
బిమ్బం వియద్విలసదంశులతా - వితానం,
తుంగోదయాద్రి - శిరసీవ సహస్త్రరశ్మేః ॥ ౨౯॥

కున్దావదాత - చలచామర - చారుశోభం,
విభ్రాజతే తవ వపుః కలధౌతకాన్తమ్ ।
ఉద్యచ్ఛశాంక - శుచినిర్ఝర - వారిధార-,
ముచ్చైస్తటం సుర గిరేరివ శాతకౌమ్భమ్ ॥ ౩౦॥

ఛత్రత్రయం తవ విభాతి శశాంకకాన్త-
ముచ్చైః స్థితం స్థగిత భానుకర - ప్రతాపమ్ ।
ముక్తాఫల - ప్రకరజాల - వివృద్ధశోభం,
ప్రఖ్యాపయత్త్రిజగతః పరమేశ్వరత్వమ్ ॥ ౩౧॥

గమ్భీరతారవపూరిత - దిగ్విభాగస్-
త్రైలోక్యలోక - శుభసంగమ భూతిదక్షః ।
సద్ధర్మరాజజయఘోషణ - ఘోషకః సన్,
ఖే దున్దుభిర్ధ్వనతి తే యశసః ప్రవాదీ ॥ ౩౨॥

మన్దార - సున్దరనమేరూ - సుపారిజాత
సన్తానకాదికుసుమోత్కర-వృష్టిరుద్ధా ।
గన్ధోదబిన్దు - శుభమన్ద - మరుత్ప్రపాతా,
దివ్యా దివః పతిత తే వచసాం తతిర్వా ॥ ౩౩॥

శుమ్భత్ప్రభావలయ - భూరివిభా విభోస్తే,
లోకత్రయే ద్యుతిమతాం ద్యుతిమాక్షిపన్తీ ।
ప్రోద్యద్-దివాకర - నిరన్తర భూరిసంఖ్యా
దీప్త్యా జయత్యపి నిశామపి సోమ-సౌమ్యామ్ ॥ ౩౪॥

స్వర్గాపవర్గగమమార్గ - విమార్గణేష్టః,
సద్ధర్మతత్వకథనైక - పటుస్త్రిలోక్యాః ।
దివ్యధ్వనిర్భవతి తే విశదార్థసత్వ
భాషాస్వభావ - పరిణామగుణైః ప్రయోజ్యః ॥ ౩౫॥

ఉన్నిద్రహేమ - నవపంకజ - పుంజకాన్తీ,
పర్యుల్లసన్నఖమయూఖ-శిఖాభిరామౌ ।
పాదౌ పదాని తవ యత్ర జినేన్ద్ర ! ధత్తః
పద్మాని తత్ర విబుధాః పరికల్పయన్తి ॥ ౩౬॥

ఇత్థం యథా తవ విభూతిరభూజ్జినేన్ద్ర,
ధర్మోపదేశనవిధౌ న తథా పరస్య ।
యాదృక్ ప్రభా దినకృతః ప్రహతాన్ధకారా,
తాదృక్-కుతో గ్రహగణస్య వికాశినోఽపి । ౩౭॥

శ్చ్యోతన్మదావిలవిలోల-కపోలమూల
మత్తభ్రమద్-భ్రమరనాద - వివృద్ధకోపమ్ ।
ఐరావతాభమిభముద్ధతమాపతన్తం
దృష్ట్వా భయం భవతి నో భవదాశ్రితానామ్ ॥ ౩౮॥

భిన్నేభ - కుమ్భ - గలదుజ్జవల - శోణితాక్త,
ముక్తాఫల ప్రకర - భూషిత భుమిభాగః ।
బద్ధక్రమః క్రమగతం హరిణాధిపోఽపి,
నాక్రామతి క్రమయుగాచలసంశ్రితం తే ॥ ౩౯॥

కల్పాంతకాల - పవనోద్ధత - వహ్నికల్పం,
దావానలం జ్వలితముజ్జవలముత్స్ఫులింగమ్ ।
విశ్వం జిఘత్సుమివ సమ్ముఖమాపతన్తం,
త్వన్నామకీర్తనజలం శమయత్యశేషమ్ ॥ ౪౦॥

రక్తేక్షణం సమదకోకిల - కణ్ఠనీలం,
క్రోధోద్ధతం ఫణినముత్ఫణమాపతన్తమ్ ।
ఆక్రామతి క్రమయుగేన నిరస్తశంకస్-
త్వన్నామ నాగదమనీ హృది యస్య పుంసః ॥ ౪౧॥

వల్గత్తురంగ గజగర్జిత - భీమనాద-
మాజౌ బలం బలవతామపి భూపతినామ్ !
ఉద్యద్దివాకర మయూఖ - శిఖాపవిద్ధం,
త్వత్-కీర్తనాత్ తమ ఇవాశు భిదాముపైతి ॥ ౪౨॥

కున్తాగ్రభిన్నగజ - శోణితవారివాహ
వేగావతార - తరణాతురయోధ - భీమే ।
యుద్ధే జయం విజితదుర్జయజేయపక్షాస్-
త్వత్పాద పంకజవనాశ్రయిణో లభన్తే ॥ ౪౩॥

అమ్భౌనిధౌ క్షుభితభీషణనక్రచక్ర-
పాఠీన పీఠభయదోల్బణవాడవాగ్నౌ
రంగత్తరంగ - శిఖరస్థిత - యానపాత్రాస్-
త్రాసం విహాయ భవతఃస్మరణాద్ వ్రజన్తి ॥ ౪౪॥

ఉద్భూతభీషణజలోదర - భారభుగ్నాః
శోచ్యాం దశాముపగతాశ్చ్యుతజీవితాశాః ।
త్వత్పాదపంకజ-రజోఽమృతదిగ్ధదేహా,
మర్త్యా భవన్తి మకరధ్వజతుల్యరూపాః ॥ ౪౫॥

ఆపాద - కణ్ఠమురూశ్రృంఖల - వేష్టితాంగా,
గాఢం బృహన్నిగడకోటినిఘృష్టజంఘాః ।
త్వన్నామమంత్రమనిశం మనుజాః స్మరన్తః,
సద్యః స్వయం విగత-బన్ధభయా భవన్తి ॥ ౪౬॥

మత్తద్విపేన్ద్ర - మృగరాజ - దవానలాహి
సంగ్రామ - వారిధి - మహోదర-బన్ధనోత్థమ్ ।
తస్యాశు నాశముపయాతి భయం భియేవ,
యస్తావకం స్తవమిమం మతిమానధీతే ॥ ౪౭॥

స్తోత్రస్త్రజం తవ జినేన్ద్ర ! గుణైర్నిబద్ధాం,
భక్త్యా మయా వివిధవర్ణవిచిత్రపుష్పామ్ ।
ధత్తే జనో య ఇహ కంఠగతామజస్రం,
తం మానతుంగమవశా సముపైతి లక్ష్మీః ॥ ౪౮॥

లిపికార అశోక సేఠీ, సంశోధక యశవంత మలైయా

%%Aug 30, 97

Please send corrections to sanskrit@cheerful.com
Last updated త్oday
http://sanskritdocuments.org

Bhaktamara Stotram Lyrics in Telugu PDF
% File name : bhaktaamara.itx
% Location : doc\_deities\_misc
% Author : Traditional
% Language : Sanskrit
% Subject : philosophy/hinduism/religion
% Transliterated by : ashoka seThii
% Proofread by : ashoka seThii
% Latest update : August 23, 2000
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ December 15, 2015 ] at Stotram Website