{॥ দশশ্লোকীস্তুতী ॥}
সাম্বো নঃ কুলদৈবতং পশুপতে সাম্ব ত্বদীযা বযং
সাম্বং স্তৌমি সুরাসুরোরগগণাঃ সাম্বেন সংতারিতাঃ ।
সাম্বাযাস্তু নমো মযা বিরচিতং সাম্বাত্পরং নো ভজে
সাম্বস্যানুচরোঽস্ম্যহং মম রতিঃ সাম্বে পরব্রহ্মণি ॥ ১॥

বিষ্ণ্বাদ্যাশ্চ পুরত্রযং সুরগণা জেতুং ন শক্তাঃ স্বযং
যং শংভুং ভগবন্বযং তু পশবোঽস্মাকং ত্বমেবেশ্বরঃ ।
স্বস্বস্থাননিযোজিতাঃ সুমনসঃ স্বস্থা বভূবুস্তত-
স্তস্মিন্মে হৃদযং সুখেন রমতাং সাম্বে পরব্রহ্মণি ॥ ২॥

ক্ষোণী যস্য রথো রথাঙ্গযুগলং চন্দ্রার্কবিম্বদ্বযং
কোদণ্ডঃ কনকাচলো হরিরভূদ্বাণো বিধিঃ সারথিঃ ।
তূণীরো জলধির্হযাঃ শ্রুতিচযো মৌর্বী ভুজঙ্গাধিপ-
স্তস্মিন্মে হৃদযং সুখেন রমতাং সাম্বে পরব্রহ্মণি ॥ ৩॥

যেনাপাদিতমঙ্গজাঙ্গভসিতং দিব্যাঙ্গরাগৈঃ সমং
যেন স্বীকৃতমব্জসংভবশিরঃ সৌবর্ণপাত্রৈঃ সমম্ ।
যেনাঙ্গীকৃতমচ্যুতস্য নযনং পূজারবিন্দৈঃ সমং
তস্মিন্মে হৃদযং সুখেন রমতাং সাম্বে পরব্রহ্মণি ॥ ৪॥

গোবিন্দাদধিকং ন দৈবতমিতি প্রোচ্চার্য হস্তাবুভা-
বুদ্ধৃত্যাথ শিবস্য সংনিধিগতো ব্যাসো মুনীনাং বরঃ ।
যস্য স্তম্ভিতপাণিরানতিকৃতা নন্দীশ্বরেণাভব-
ত্তস্মিন্মে হৃদযং সুখেন রমতাং সাম্বে পরব্রহ্মণি ॥ ৫॥

আকাশশ্চিকুরাযতে দশদিশাভোগো দুকূলাযতে
শীতাংশুঃ প্রসবাযতে স্থিরতরানন্দঃ স্বরূপাযতে ।
বেদান্তো নিলযাযতে সুবিনযো যস্য স্বভাবাযতে
তস্মিন্মে হৃদযং সুখেন রমতাং সাম্বে পরব্রহ্মণি ॥ ৬॥

বিষ্ণুর্যস্য সহস্রনামনিযমাদম্ভোরুহাণ্যর্চয-
ন্নেকোনোপচিতেষু নেত্রকমলং নৈজং পদাব্জদ্বযে ।
সম্পূজ্যাসুরসংহতিং বিদলযংস্ত্রৈলোক্যপালোঽভব-
ত্তস্মিন্মে হৃদযং সুখেন রমতাং সাম্বে পরব্রহ্মণি ॥ ৭॥

শৌরিং সত্যগিরং বরাহবপুষং পাদাম্বুজাদর্শনে
চক্রে যো দযযা সমস্তজগতাং নাথং শিরোদর্শনে ।
মিথ্যাবাচমপূজ্যমেব সততং হংসস্বরূপং বিধিং
তস্মিন্মে হৃদযং সুখেন রমতাং সাম্বে পরব্রহ্মণি ॥ ৮॥

যস্যাসন্ধরণীজলাগ্নিপবনব্যোমার্কচন্দ্রাদযো
বিখ্যাতাস্তনবোঽষ্টধা পরিণতা নান্যত্ততো বর্ততে ।
ওংকারার্থবিবেচনী শ্রুতিরিযং চাচষ্ট তুর্যং শিবং
তস্মিন্মে হৃদযং সুখেন রমতাং সাম্বে পরব্রহ্মণি ॥ ৯॥

বিষ্ণুব্রহ্মসুরাধিপপ্রভৃতযঃ সর্বেঽপি দেবা যদা
সংভূতাজ্জলধের্বিষাত্পরিভবং প্রাপ্তাস্তদা সত্বরম্ ।
তানার্তাঞ্শরণাগতানিতি সুরান্যোঽরক্ষদর্ধক্ষণা-
ত্তস্মিন্মে হৃদযং সুখেন রমতাং সাম্বে পরব্রহ্মণি ॥ ১০॥

ইতি শ্রীমত্পরমহংসপরিব্রজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছংকরভগবত্পাদ কৃতৌ
দশশ্লোকীস্তুতিঃ সম্পূর্ণা ॥


Encoded and proofread by Sridhar Seshagiri
s underscore seshagiri@yahoo.com

Please send corrections to sanskrit@cheerful.com
Last updated ত্oday
http://sanskritdocuments.org

Dashashloki Stuti Lyrics in Bengali PDF
% File name : dashashlokIstuti.itx
% Location : doc\_shiva
% Language : Sanskrit
% Subject : Hinduism/religion/traditional
% Transliterated by : Sridhar Seshagiri s\_seshagiri at yahoo.com
% Proofread by : Sridhar Seshagiri s\_seshagiri at yahoo.com
% Latest update : December 23, 2007
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 12, 2015 ] at Stotram Website