{॥ ದಶಶ್ಲೋಕೀಸ್ತುತೀ ॥}
ಸಾಮ್ಬೋ ನಃ ಕುಲದೈವತಂ ಪಶುಪತೇ ಸಾಮ್ಬ ತ್ವದೀಯಾ ವಯಂ
ಸಾಮ್ಬಂ ಸ್ತೌಮಿ ಸುರಾಸುರೋರಗಗಣಾಃ ಸಾಮ್ಬೇನ ಸಂತಾರಿತಾಃ ।
ಸಾಮ್ಬಾಯಾಸ್ತು ನಮೋ ಮಯಾ ವಿರಚಿತಂ ಸಾಮ್ಬಾತ್ಪರಂ ನೋ ಭಜೇ
ಸಾಮ್ಬಸ್ಯಾನುಚರೋಽಸ್ಮ್ಯಹಂ ಮಮ ರತಿಃ ಸಾಮ್ಬೇ ಪರಬ್ರಹ್ಮಣಿ ॥ ೧॥

ವಿಷ್ಣ್ವಾದ್ಯಾಶ್ಚ ಪುರತ್ರಯಂ ಸುರಗಣಾ ಜೇತುಂ ನ ಶಕ್ತಾಃ ಸ್ವಯಂ
ಯಂ ಶಂಭುಂ ಭಗವನ್ವಯಂ ತು ಪಶವೋಽಸ್ಮಾಕಂ ತ್ವಮೇವೇಶ್ವರಃ ।
ಸ್ವಸ್ವಸ್ಥಾನನಿಯೋಜಿತಾಃ ಸುಮನಸಃ ಸ್ವಸ್ಥಾ ಬಭೂವುಸ್ತತ-
ಸ್ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೨॥

ಕ್ಷೋಣೀ ಯಸ್ಯ ರಥೋ ರಥಾಙ್ಗಯುಗಲಂ ಚನ್ದ್ರಾರ್ಕಬಿಮ್ಬದ್ವಯಂ
ಕೋದಣ್ಡಃ ಕನಕಾಚಲೋ ಹರಿರಭೂದ್ಬಾಣೋ ವಿಧಿಃ ಸಾರಥಿಃ ।
ತೂಣೀರೋ ಜಲಧಿರ್ಹಯಾಃ ಶ್ರುತಿಚಯೋ ಮೌರ್ವೀ ಭುಜಙ್ಗಾಧಿಪ-
ಸ್ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೩॥

ಯೇನಾಪಾದಿತಮಙ್ಗಜಾಙ್ಗಭಸಿತಂ ದಿವ್ಯಾಙ್ಗರಾಗೈಃ ಸಮಂ
ಯೇನ ಸ್ವೀಕೃತಮಬ್ಜಸಂಭವಶಿರಃ ಸೌವರ್ಣಪಾತ್ರೈಃ ಸಮಮ್ ।
ಯೇನಾಙ್ಗೀಕೃತಮಚ್ಯುತಸ್ಯ ನಯನಂ ಪೂಜಾರವಿನ್ದೈಃ ಸಮಂ
ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೪॥

ಗೋವಿನ್ದಾದಧಿಕಂ ನ ದೈವತಮಿತಿ ಪ್ರೋಚ್ಚಾರ್ಯ ಹಸ್ತಾವುಭಾ-
ವುದ್ಧೃತ್ಯಾಥ ಶಿವಸ್ಯ ಸಂನಿಧಿಗತೋ ವ್ಯಾಸೋ ಮುನೀನಾಂ ವರಃ ।
ಯಸ್ಯ ಸ್ತಮ್ಭಿತಪಾಣಿರಾನತಿಕೃತಾ ನನ್ದೀಶ್ವರೇಣಾಭವ-
ತ್ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೫॥

ಆಕಾಶಶ್ಚಿಕುರಾಯತೇ ದಶದಿಶಾಭೋಗೋ ದುಕೂಲಾಯತೇ
ಶೀತಾಂಶುಃ ಪ್ರಸವಾಯತೇ ಸ್ಥಿರತರಾನನ್ದಃ ಸ್ವರೂಪಾಯತೇ ।
ವೇದಾನ್ತೋ ನಿಲಯಾಯತೇ ಸುವಿನಯೋ ಯಸ್ಯ ಸ್ವಭಾವಾಯತೇ
ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೬॥

ವಿಷ್ಣುರ್ಯಸ್ಯ ಸಹಸ್ರನಾಮನಿಯಮಾದಮ್ಭೋರುಹಾಣ್ಯರ್ಚಯ-
ನ್ನೇಕೋನೋಪಚಿತೇಷು ನೇತ್ರಕಮಲಂ ನೈಜಂ ಪದಾಬ್ಜದ್ವಯೇ ।
ಸಮ್ಪೂಜ್ಯಾಸುರಸಂಹತಿಂ ವಿದಲಯಂಸ್ತ್ರೈಲೋಕ್ಯಪಾಲೋಽಭವ-
ತ್ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೭॥

ಶೌರಿಂ ಸತ್ಯಗಿರಂ ವರಾಹವಪುಷಂ ಪಾದಾಮ್ಬುಜಾದರ್ಶನೇ
ಚಕ್ರೇ ಯೋ ದಯಯಾ ಸಮಸ್ತಜಗತಾಂ ನಾಥಂ ಶಿರೋದರ್ಶನೇ ।
ಮಿಥ್ಯಾವಾಚಮಪೂಜ್ಯಮೇವ ಸತತಂ ಹಂಸಸ್ವರೂಪಂ ವಿಧಿಂ
ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೮॥

ಯಸ್ಯಾಸನ್ಧರಣೀಜಲಾಗ್ನಿಪವನವ್ಯೋಮಾರ್ಕಚನ್ದ್ರಾದಯೋ
ವಿಖ್ಯಾತಾಸ್ತನವೋಽಷ್ಟಧಾ ಪರಿಣತಾ ನಾನ್ಯತ್ತತೋ ವರ್ತತೇ ।
ಓಂಕಾರಾರ್ಥವಿವೇಚನೀ ಶ್ರುತಿರಿಯಂ ಚಾಚಷ್ಟ ತುರ್ಯಂ ಶಿವಂ
ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೯॥

ವಿಷ್ಣುಬ್ರಹ್ಮಸುರಾಧಿಪಪ್ರಭೃತಯಃ ಸರ್ವೇಽಪಿ ದೇವಾ ಯದಾ
ಸಂಭೂತಾಜ್ಜಲಧೇರ್ವಿಷಾತ್ಪರಿಭವಂ ಪ್ರಾಪ್ತಾಸ್ತದಾ ಸತ್ವರಮ್ ।
ತಾನಾರ್ತಾಞ್ಶರಣಾಗತಾನಿತಿ ಸುರಾನ್ಯೋಽರಕ್ಷದರ್ಧಕ್ಷಣಾ-
ತ್ತಸ್ಮಿನ್ಮೇ ಹೃದಯಂ ಸುಖೇನ ರಮತಾಂ ಸಾಮ್ಬೇ ಪರಬ್ರಹ್ಮಣಿ ॥ ೧೦॥

ಇತಿ ಶ್ರೀಮತ್ಪರಮಹಂಸಪರಿವ್ರಜಕಾಚಾರ್ಯಸ್ಯ
ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಮಚ್ಛಂಕರಭಗವತ್ಪಾದ ಕೃತೌ
ದಶಶ್ಲೋಕೀಸ್ತುತಿಃ ಸಮ್ಪೂರ್ಣಾ ॥


Encoded and proofread by Sridhar Seshagiri
s underscore seshagiri@yahoo.com

Please send corrections to sanskrit@cheerful.com
Last updated ತ್oday
http://sanskritdocuments.org

Dashashloki Stuti Lyrics in Kannada PDF
% File name : dashashlokIstuti.itx
% Location : doc\_shiva
% Language : Sanskrit
% Subject : Hinduism/religion/traditional
% Transliterated by : Sridhar Seshagiri s\_seshagiri at yahoo.com
% Proofread by : Sridhar Seshagiri s\_seshagiri at yahoo.com
% Latest update : December 23, 2007
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 12, 2015 ] at Stotram Website