{॥ ദശശ്ലോകീസ്തുതീ ॥}
സാമ്ബോ നഃ കുലദൈവതം പശുപതേ സാമ്ബ ത്വദീയാ വയം
സാമ്ബം സ്തൌമി സുരാസുരോരഗഗണാഃ സാമ്ബേന സംതാരിതാഃ ।
സാമ്ബായാസ്തു നമോ മയാ വിരചിതം സാമ്ബാത്പരം നോ ഭജേ
സാമ്ബസ്യാനുചരോഽസ്മ്യഹം മമ രതിഃ സാമ്ബേ പരബ്രഹ്മണി ॥ ൧॥

വിഷ്ണ്വാദ്യാശ്ച പുരത്രയം സുരഗണാ ജേതും ന ശക്താഃ സ്വയം
യം ശംഭും ഭഗവന്വയം തു പശവോഽസ്മാകം ത്വമേവേശ്വരഃ ।
സ്വസ്വസ്ഥാനനിയോജിതാഃ സുമനസഃ സ്വസ്ഥാ ബഭൂവുസ്തത-
സ്തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൨॥

ക്ഷോണീ യസ്യ രഥോ രഥാങ്ഗയുഗലം ചന്ദ്രാര്കബിമ്ബദ്വയം
കോദണ്ഡഃ കനകാചലോ ഹരിരഭൂദ്ബാണോ വിധിഃ സാരഥിഃ ।
തൂണീരോ ജലധിര്ഹയാഃ ശ്രുതിചയോ മൌര്വീ ഭുജങ്ഗാധിപ-
സ്തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൩॥

യേനാപാദിതമങ്ഗജാങ്ഗഭസിതം ദിവ്യാങ്ഗരാഗൈഃ സമം
യേന സ്വീകൃതമബ്ജസംഭവശിരഃ സൌവര്ണപാത്രൈഃ സമമ് ।
യേനാങ്ഗീകൃതമച്യുതസ്യ നയനം പൂജാരവിന്ദൈഃ സമം
തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൪॥

ഗോവിന്ദാദധികം ന ദൈവതമിതി പ്രോച്ചാര്യ ഹസ്താവുഭാ-
വുദ്ധൃത്യാഥ ശിവസ്യ സംനിധിഗതോ വ്യാസോ മുനീനാം വരഃ ।
യസ്യ സ്തമ്ഭിതപാണിരാനതികൃതാ നന്ദീശ്വരേണാഭവ-
ത്തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൫॥

ആകാശശ്ചികുരായതേ ദശദിശാഭോഗോ ദുകൂലായതേ
ശീതാംശുഃ പ്രസവായതേ സ്ഥിരതരാനന്ദഃ സ്വരൂപായതേ ।
വേദാന്തോ നിലയായതേ സുവിനയോ യസ്യ സ്വഭാവായതേ
തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൬॥

വിഷ്ണുര്യസ്യ സഹസ്രനാമനിയമാദമ്ഭോരുഹാണ്യര്ചയ-
ന്നേകോനോപചിതേഷു നേത്രകമലം നൈജം പദാബ്ജദ്വയേ ।
സമ്പൂജ്യാസുരസംഹതിം വിദലയംസ്ത്രൈലോക്യപാലോഽഭവ-
ത്തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൭॥

ശൌരിം സത്യഗിരം വരാഹവപുഷം പാദാമ്ബുജാദര്ശനേ
ചക്രേ യോ ദയയാ സമസ്തജഗതാം നാഥം ശിരോദര്ശനേ ।
മിഥ്യാവാചമപൂജ്യമേവ സതതം ഹംസസ്വരൂപം വിധിം
തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൮॥

യസ്യാസന്ധരണീജലാഗ്നിപവനവ്യോമാര്കചന്ദ്രാദയോ
വിഖ്യാതാസ്തനവോഽഷ്ടധാ പരിണതാ നാന്യത്തതോ വര്തതേ ।
ഓംകാരാര്ഥവിവേചനീ ശ്രുതിരിയം ചാചഷ്ട തുര്യം ശിവം
തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൯॥

വിഷ്ണുബ്രഹ്മസുരാധിപപ്രഭൃതയഃ സര്വേഽപി ദേവാ യദാ
സംഭൂതാജ്ജലധേര്വിഷാത്പരിഭവം പ്രാപ്താസ്തദാ സത്വരമ് ।
താനാര്താഞ്ശരണാഗതാനിതി സുരാന്യോഽരക്ഷദര്ധക്ഷണാ-
ത്തസ്മിന്മേ ഹൃദയം സുഖേന രമതാം സാമ്ബേ പരബ്രഹ്മണി ॥ ൧൦॥

ഇതി ശ്രീമത്പരമഹംസപരിവ്രജകാചാര്യസ്യ
ശ്രീഗോവിന്ദഭഗവത്പൂജ്യപാദശിഷ്യസ്യ
ശ്രീമച്ഛംകരഭഗവത്പാദ കൃതൌ
ദശശ്ലോകീസ്തുതിഃ സമ്പൂര്ണാ ॥


Encoded and proofread by Sridhar Seshagiri
s underscore seshagiri@yahoo.com

Please send corrections to sanskrit@cheerful.com
Last updated ത്oday
http://sanskritdocuments.org

Dashashloki Stuti Lyrics in Malayalam PDF
% File name : dashashlokIstuti.itx
% Location : doc\_shiva
% Language : Sanskrit
% Subject : Hinduism/religion/traditional
% Transliterated by : Sridhar Seshagiri s\_seshagiri at yahoo.com
% Proofread by : Sridhar Seshagiri s\_seshagiri at yahoo.com
% Latest update : December 23, 2007
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 12, 2015 ] at Stotram Website