{॥ శ్రీశివమీడేస్తవరత్నమ్ ॥}
స్వప్రకాశశివరూపసద్గురుం నిష్ప్రకాశజడచైత్యభాసకమ్ ।
అప్రమేయసుగుణామృతాలయం సంస్మరామి హృది నిత్యమద్భుతమ్ ॥ ౧॥

యః క్రీడార్థం విశ్వమశేషం నిజశక్త్యా
సృష్ట్వా స్వస్మిన్ క్రీడతి దేవోఽప్యనవద్యః ।
నిస్త్రైగుణ్యో మాయికభూమివ్యతిరిక్తః
తం సర్వాఘధ్వంసకమాద్యం శివమీడే ॥ ౨॥

ఏకో దేవో భాతి తరఙ్గేష్వివ భానుః
నానాభూతేష్వాత్మసు సర్వేష్వపి నిత్యమ్ ।
శుద్ధో బుద్ధో నిర్మలరూపో నిరవద్యః
తం సర్వాఘధ్వంసకమాద్యం శివమీడే ॥ ౩॥

దేవాధీశం సర్వవరేణ్యం హృదయాబ్జే
నిత్యం ధ్యాత్వా యోగివరా యం దృఢభక్త్యా ।
శుద్ధా భూత్వా యాన్తి భవాబ్ధిం న పునస్తే
తం సర్వాఘధ్వంసకమాద్యం శివమీడే ॥ ౪॥

శ్రౌతైః స్మార్తైః కర్మశతైశ్చపి య ఈశో
దుర్విజ్ఞేయః కల్పశతం తైర్జడరూపైః ।
సంవిద్రూపస్వైకవిచారాదధిగమ్యః
తం సర్వాఘధ్వంసకమాద్యం శివమీడే ॥ ౫॥

కర్మాధ్యక్షః కామిజనానాం ఫలదాతా
కర్తృత్వాహంకారవిముక్తో నిరపేక్షః ।
దేహాతీతో దృశ్యవివిక్తో జగదీశః
తం సర్వాఘధ్వంసకమాద్యం శివమీడే ॥ ౬॥

నాన్తర్బాహ్యే నోభయతో వా ప్రవిభక్తం
యం సర్వజ్ఞం నాపి సమర్థో నిగమాదిః ।
తత్త్వాతీతం తత్పదలక్ష్యం గురుగమ్యం
తం సర్వాఘధ్వంసకమాద్యం శివమీడే ॥ ౭॥

యద్భాసార్కో భాతి హిమాంశుర్దహనో వా
దృశ్యైర్భాస్యైర్యో న చ భాతి ప్రియరూపః ।
యస్మాద్ భాతి వ్యష్టిసమష్ట్యాత్మకమేతత్
తం సర్వాఘధ్వంసకమాద్యం శివమీడే ॥ ౮॥

ఆశాదేశాద్యవ్యవధానో విభురేకః
సర్వాధారః సర్వనియన్తా పరమాత్మా ।
పూర్ణానన్దః సత్త్వవతాం యో హృది దేవః
తం సర్వాఘధ్వంసకమాద్యం శివమీడే ॥ ౯॥

కోఽహం దేవః కిం జగదేతత్ ప్రవిచారాద్
దృశ్యం సర్వం నశ్వరరూపం గురువాక్యాత్ ।
సిద్ధే చైవం యః ఖలు శేషః ప్రతిపన్నః
తం సర్వాఘధ్వంసకమాద్యం శివమీడే ॥ ౧౦॥

సత్యం జ్ఞానం బ్రహ్మ సుఖం యం ప్రణవాన్తం
సర్వస్ఫూర్తిః శాశ్వతరూపస్త్వితి వేద్ః ।
జల్పన్త్యేవం స్వచ్ఛధియోఽపి ప్రభుమేకం
తం సర్వాఘధ్వంసకమాద్యం శివమీడే ॥ ౧౧॥

యస్మాద్ భీతో వాతి చ వాయుస్త్రిపురేషు
బ్రహ్మేన్ద్రాద్యాస్తే నిజకర్మస్వనుబద్ధాః ।
చన్ద్రాదిత్యౌ లోకసమూహే ప్రచరన్తౌ
తం సర్వాఘధ్వంసకమాద్యం శివమీడే ॥ ౧౨॥

మాయాకార్యం జన్మ చ నాశః పురజేతుః
నాస్తి ద్వన్ద్వం నామ చ రూపం శ్రుతివాక్యాత్ ।
నిర్ణీతార్థో నిత్యవిముక్తో నిరపాయః
తం సర్వాఘధ్వంసకమాద్యం శివమీడే ॥ ౧౩॥

నాయం దేహో నేన్ద్రియవర్గో న చ వాయుః
నేదం దృశ్యం జాత్యభిమానో న చ బుద్ధిః ।
ఇత్థం శ్రుత్యా యో గురువాక్యాత్ ప్రతిలబ్ధః
తం సర్వాఘధ్వంసకమాద్యం శివమీడే ॥ ౧౪॥

స్థూలం సూక్ష్మం క్షామమనేకం న చ దీర్ఘం
హ్రస్వం శుక్లం కృష్ణమఖణ్డోఽవ్యయరూపః ।
ప్రత్యక్సాక్షీ యః పరతేజాః ప్రణవాన్తః
తం సర్వాఘధ్వంసకమాద్యం శివమీడే ॥ ౧౫॥

యత్సౌఖ్యాబ్ధేర్లేశకణాంశోః సురమర్త్యా-
స్తిర్యఞ్చోఽపి స్థావరభేదాః ప్రభవన్తి ।
తత్తత్కార్యప్రాభవవన్తః సుఖినస్తే
తం సర్వాఘధ్వంసకమాద్యం శివమీడే ॥ ౧౬॥

యస్మిఞ్జ్ఞాతే జ్ఞాతమశేషం భువనం స్యాద్
యస్మిన్ దృష్టే భేదసమూహో లయమేతి ।
యస్మిన్మృత్యుర్నాస్తి చ శోకో భవపాశాః
తం సర్వాఘధ్వంసకమాద్యం శివమీడే ॥ ౧౭॥

ద్యాం మూర్ధానం యస్య వదన్తి శ్రుతయస్తాః
చన్ద్రాదిత్యౌ నేత్రయుగం జ్యాం పదయుగ్మమ్ ।
ఆశాం శ్రోత్రం లోమసమూహం తరువల్లీః
తం సర్వాఘధ్వంసకమాద్యం శివమీడే ॥ ౧౮॥

ప్రాణాయామైః పూతధియో యం ప్రణవాన్తం
సంధాయాత్మన్యవ్యపదేశ్యం నిజబోధమ్ ।
జీవన్ముక్తాః సన్తి దిశాసు ప్రచరన్తః
తం సర్వాఘధ్వంసకమాద్యం శివమీడే ॥ ౧౯॥

యచ్ఛ్రోతవ్యం శ్రౌతగిరా శ్రీగురువాక్యాద్
యన్మన్తవ్యం స్వాత్మసుఖార్థం పురుషాణామ్ ।
యద్ ధ్యాతవ్యం సత్యమఖణ్డం నిరవద్యం
తం సర్వాఘధ్వంసకమాద్యం శివమీడే ॥ ౨౦॥

యం జిజ్ఞాసుః సద్గురుమూర్తిం ద్విజవర్యం
నిత్యానన్దం తం ఫలపాణిః సముపైతి ।
భక్తిశ్రద్ధాదాన్తివిశిష్టో ధృతియుక్తః
తం సర్వాఘధ్వంసకమాద్యం శివమీడే ॥ ౨౧॥

పృథవ్యమ్బవగ్నిస్పర్శనఖాని ప్రవిలాప్య
స్వస్మిన్ మత్యా ధారనయా వా ప్రణవేన ।
యచ్ఛిష్టం తద్ బ్రహ్మ భవామీత్యనుభూతం
తం సర్వాఘధ్వంసకమాద్యం శివమీడే ॥ ౨౨॥

లీనే చిత్తే భాతి చ ఏకో నిఖిలేషు
ప్రత్యగ్దృష్ట్యా స్థావరజన్తుష్వపి నిత్యమ్ ।
సత్యాసత్యే సత్యమభూచ్చ వ్యతిరేకాత్
తం సర్వాఘధ్వంసకమాద్యం శివమీడే ॥ ౨౩॥

చేతఃసాక్షీ ప్రత్యగభిన్నో విభురేకః
ప్రజ్ఞానాత్మా విశ్వభుగాదివ్యతిరిక్తః ।
సత్యజ్ఞానానన్దసుధాబ్ధిః పరిపూర్ణః
తం సర్వాఘధ్వంసకమాద్యం శివమీడే ॥ ౨౪॥

సర్వే కామా యస్య విలీనా హృది సంస్థాః
తస్యోదేతి బ్రహ్మరవిర్యో హృది తత్ర ।
విద్యావిద్యా నాస్తి పరే చ శ్రుతివాక్యాత్
తం సర్వాఘధ్వంసకమాద్యం శివమీడే ॥ ౨౫॥

స త్యాగేశః సర్వగుహాన్తః పరిపూర్ణో
వక్తా శ్రోతా వేదపురాణప్రతిపాద్యః ।
ఇత్థం బుద్ధౌ జ్ఞానమఖణ్డం స్ఫురదాస్తే
తం సర్వాఘధ్వంసకమాద్యం శివమీడే ॥ ౨౬॥

నిత్యం భక్త్యా యః పఠతీదం స్తవరత్నం
తస్యావిద్యా జన్మ చ నాశో లయమేతు ।
కిం చాత్మనం పశ్యతు సత్యం నిజబోధం
సర్వాన్ కామాన్ స్వం లభతాం స ప్రియరూపమ్ ॥ ౨౭॥

ఇత్యానన్దనాథపాదపపద్మోపజీవినా కాశ్యపగోత్రోత్పన్నేనాన్ధ్రేణ
త్యాగరాజనామ్నా విరచితం శివమీడేస్తవరత్నం సంపూర్ణమ్ ॥


Encoded by Sridhar Seshagiri seshagir at engineering.sdsu.edu

Please send corrections to sanskrit@cheerful.com
Last updated త్oday
http://sanskritdocuments.org

Shivamide Stavaratnam Lyrics in Telugu PDF
% File name : shivamIDestava.itx
% Location : doc\_shiva
% Author : tyAgarAja
% Language : Sanskrit
% Subject : philosophy/hinduism/religion
% Transliterated by : Sridhar Seshagiri seshagir at engineering.sdsu.edu
% Proofread by : Sridhar Seshagiri seshagir at engineering.sdsu.edu
% Latest update : June 20, 2002
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 12, 2015 ] at Stotram Website