ચામ્પેયગૌરાર્ધશરીરકાયૈ
કર્પૂરગૌરાર્ધશરીરકાય ૤
ધમ્મિલ્લકાયૈ ચ જટાધરાય
નમઃ શિવાયૈ ચ નમઃ શિવાય ૥ 1 ૥

કસ્તૂરિકાકુઙ્કુમચર્ચિતાયૈ
ચિતારજઃપુઞ્જ વિચર્ચિતાય ૤
કૃતસ્મરાયૈ વિકૃતસ્મરાય
નમઃ શિવાયૈ ચ નમઃ શિવાય ૥ 2 ૥

ઝણત્ક્વણત્કઙ્કણનૂપુરાયૈ
પાદાબ્જરાજત્ફણિનૂપુરાય ૤
હેમાઙ્ગદાયૈ ભુજગાઙ્ગદાય
નમઃ શિવાયૈ ચ નમઃ શિવાય ૥ 3 ૥

વિશાલનીલોત્પલલોચનાયૈ
વિકાસિપઙ્કેરુહલોચનાય ૤
સમેક્ષણાયૈ વિષમેક્ષણાય
નમઃ શિવાયૈ ચ નમઃ શિવાય ૥ 4 ૥

મન્દારમાલાકલિતાલકાયૈ
કપાલમાલાઙ્કિતકન્ધરાય ૤
દિવ્યામ્બરાયૈ ચ દિગમ્બરાય
નમઃ શિવાયૈ ચ નમઃ શિવાય ૥ 5 ૥

અમ્ભોધરશ્યામલકુન્તલાયૈ
તટિત્પ્રભાતામ્રજટાધરાય ૤
નિરીશ્વરાયૈ નિખિલેશ્વરાય
નમઃ શિવાયૈ ચ નમઃ શિવાય ૥ 6 ૥

પ્રપઞ્ચસૃષ્ટ્યુન્મુખલાસ્યકાયૈ
સમસ્તસંહારકતાણ્ડવાય ૤
જગજ્જનન્યૈ જગદેકપિત્રે
નમઃ શિવાયૈ ચ નમઃ શિવાય ૥ 7 ૥

પ્રદીપ્તરત્નોજ્જ્વલકુણ્ડલાયૈ
સ્ફુરન્મહાપન્નગભૂષણાય ૤
શિવાન્વિતાયૈ ચ શિવાન્વિતાય
નમઃ શિવાયૈ ચ નમઃ શિવાય ૥ 8 ૥

એતત્પઠેદષ્ટકમિષ્ટદં યો
ભક્ત્યા સ માન્યો ભુવિ દીર્ઘજીવી ૤
પ્રાપ્નોતિ સૌભાગ્યમનન્તકાલં
ભૂયાત્સદા તસ્ય સમસ્તસિદ્ધિઃ ૥

Text Source vignanam.org
PDF file is generated [ October 11, 2015 ] at Stotram Website