{॥ രഘുവീര ഗദ്യം ॥}
ജയത്യാശ്രിത സംത്രാസ ധ്വാന്ത വിധ്വംസനോദയഃ ।
പ്രഭാവാന് സീതയാ ദേവ്യാ പരമ-വ്യോമ ഭാസ്കരഃ ॥

ജയ ജയ മഹാവീര !
മഹാധീര ധൌരേയ !
ദേവാസുര സമര സമയ സമുദിത നിഖില നിര്ജര നിര്ധാരിത
നിരവധികമാഹാത്മ്യ !
ദശവദന ദമിത ദൈവത പരിഷദഭ്യര്ഥിത ദാശരഥി-ഭാവ !
രണാധ്വര ധുര്യ ഭവ്യ ദിവ്യാസ്ത്ര ബൃന്ദ വന്ദിത !
പ്രണത ജന വിമത വിമഥന ദുര്ലലിതദോര്ലലിത !
തനുതര വിശിഖ വിതാഡന വിഘടിത വിശരാരു ശരാരു
താടകാ താടകേയ !
ജഡ-കിരണ ശകല-ധരജടില നട പതി-മകുട നടന-പടു
വിബുധ-സരിദ്-അതി-ബഹുല മധു-ഗലന ലലിത-പദ
നലിന-രജ-ഉപ-മൃദിത നിജ-വൃജിന ജഹദുപല-തനു-രുചിര
പരമ-മുനി വര-യുവതി നുത !
കുശിക-സുതകഥിത വിദിത നവ വിവിധ കഥ !
മൈഥില നഗര സുലോചനാ ലോചന ചകോര ചന്ദ്ര !
ഖണ്ഡ-പരശു കോദണ്ഡ പ്രകാണ്ഡ ഖണ്ഡന ശൌണ്ഡ ഭുജ-ദണ്ഡ !
ചണ്ഡ-കര കിരണ-മണ്ഡല ബോധിത പുണ്ഡരീക വന രുചി ലുണ്ടാക ലോചന !
മോചിത ജനക ഹൃദയ ശങ്കാതങ്ക !
പരിഹൃത നിഖില നരപതി വരണ ജനക-ദുഹിത കുച-തട വിഹരണ
സമുചിത കരതല !
ശതകോടി ശതഗുണ കഠിന പരശു ധര മുനിവര കര ധൃത
ദുരവനമ-തമ-നിജ ധനുരാകര്ഷണ പ്രകാശിത പാരമേഷ്ഠ്യ !
ക്രതു-ഹര ശിഖരി കന്തുക വിഹൃതിമുഖ ജഗദരുന്തുദ
ജിതഹരിദന്ത-ദന്തുരോദന്ത ദശ-വദന ദമന കുശല ദശ-ശത-ഭുജ
നൃപതി-കുല-രുധിരഝര ഭരിത പൃഥുതര തടാക തര്പിത
പിതൃക ഭൃഗു-പതി സുഗതി-വിഹതി കര നത പരുഡിഷു പരിഘ !
അനൃത ഭയ മുഷിത ഹൃദയ പിതൃ വചന പാലന പ്രതിജ്ഞാവജ്ഞാത
യൌവരാജ്യ !
നിഷാദ രാജ സൌഹൃദ സൂചിത സൌശീല്യ സാഗര !
ഭരദ്വാജ ശാസനപരിഗൃഹീത വിചിത്ര ചിത്രകൂട ഗിരി കടക
തട രമ്യാവസഥ !
അനന്യ ശാസനീയ !
പ്രണത ഭരത മകുടതട സുഘടിത പാദുകാഗ്ര്യാഭിഷേക നിര്വര്തിത
സര്വലോക യോഗക്ഷേമ !
പിശിത രുചി വിഹിത ദുരിത വല-മഥന തനയ ബലിഭുഗനു-ഗതി സരഭസശയന തൃണ
ശകല പരിപതന ഭയ ചരിത സകല സുരമുനി-വര-ബഹുമത മഹാസ്ത്ര സാമര്ഥ്യ !
ദ്രുഹിണ ഹര വല-മഥന ദുരാലക്ഷ്യ ശര ലക്ഷ്യ !
ദണ്ഡകാ തപോവന ജങ്ഗമ പാരിജാത !
വിരാധ ഹരിണ ശാര്ദൂല !
വിലുലിത ബഹുഫല മഖ കലമ രജനി-ചര മൃഗ മൃഗയാനമ്ഭ
സംഭൃതചീരഭൃദനുരോധ !
ത്രിശിരഃ ശിരസ്ത്രിതയ തിമിര നിരാസ വാസര-കര !
ദൂഷണ ജലനിധി ശോശാണ തോഷിത ഋഷി-ഗണ ഘോഷിത വിജയ ഘോഷണ !
ഖരതര ഖര തരു ഖണ്ഡന ചണ്ഡ പവന !
ദ്വിസപ്ത രക്ഷഃ-സഹസ്ര നല-വന വിലോലന മഹാ-കലഭ !
അസഹായ ശൂര !
അനപായ സാഹസ !
മഹിത മഹാ-മൃഥ ദര്ശന മുദിത മൈഥിലീ ദൃഢ-തര പരിരമ്ഭണ
വിഭവവിരോപിത വികട വീരവ്രണ !
മാരീച മായാ മൃഗ ചര്മ പരികര്മിത നിര്ഭര ദര്ഭാസ്തരണ !
വിക്രമ യശോ ലാഭ വിക്രീത ജീവിത ഗൃഘ്ര-രാജദേഹ ദിധക്ഷാ
ലക്ഷിത-ഭക്ത-ജന ദാക്ഷിണ്യ !
കല്പിത വിബുധ-ഭാവ കബന്ധാഭിനന്ദിത !
അവന്ധ്യ മഹിമ മുനിജന ഭജന മുഷിത ഹൃദയ കലുഷ ശബരീ
മോക്ഷസാക്ഷിഭൂത !
പ്രഭഞ്ജന-തനയ ഭാവുക ഭാഷിത രഞ്ജിത ഹൃദയ !
തരണി-സുത ശരണാഗതിപരതന്ത്രീകൃത സ്വാതന്ത്ര്യ !
ദൃഢ ഘടിത കൈലാസ കോടി വികട ദുന്ദുഭി കങ്കാല കൂട ദൂര വിക്ഷേപ
ദക്ഷ-ദക്ഷിണേതര പാദാങ്ഗുഷ്ഠ ദര ചലന വിശ്വസ്ത സുഹൃദാശയ !
അതിപൃഥുല ബഹു വിടപി ഗിരി ധരണി വിവര യുഗപദുദയ വിവൃത ചിത്രപുങ്ഗ വൈചിത്ര്യ !
വിപുല ഭുജ ശൈല മൂല നിബിഡ നിപീഡിത രാവണ രണരണക ജനക ചതുരുദധി
വിഹരണ ചതുര കപി-കുല പതി ഹൃദയ വിശാല ശിലാതല-ദാരണ ദാരുണ ശിലീമുഖ !
അപാര പാരാവാര പരിഖാ പരിവൃത പരപുര പരിസൃത ദവ ദഹന
ജവന-പവന-ഭവ കപിവര പരിഷ്വങ്ഗ ഭാവിത സര്വസ്വ ദാന !
അഹിത സഹോദര രക്ഷഃ പരിഗ്രഹ വിസംവാദിവിവിധ സചിവ വിപ്രലമ്ഭ സമയ
സംരമ്ഭ സമുജ്ജൃമ്ഭിത സര്വേശ്വര ഭാവ !
സകൃത്പ്രപന്ന ജന സംരക്ഷണ ദീക്ഷിത !
വീര !
സത്യവ്രത !
പ്രതിശയന ഭൂമികാ ഭൂഷിത പയോധി പുലിന !
പ്രലയ ശിഖി പരുഷ വിശിഖ ശിഖാ ശോഷിതാകൂപാര വാരി പൂര !
പ്രബല രിപു കലഹ കുതുക ചടുല കപി-കുല കര-തലതുലിത ഹൃത ഗിരിനികര സാധിത
സേതു-പധ സീമാ സീമന്തിത സമുദ്ര !
ദ്രുത ഗതി തരു മൃഗ വരൂഥിനീ നിരുദ്ധ ലങ്കാവരോധ വേപഥു ലാസ്യ ലീലോപദേശ
ദേശിക ധനുര്ജ്യാഘോഷ !
ഗഗന-ചര കനക-ഗിരി ഗരിമ-ധര നിഗമ-മയ നിജ-ഗരുഡ ഗരുദനില ലവ ഗലിത
വിഷ-വദന ശര കദന !
അകൃത ചര വനചര രണ കരണ വൈലക്ഷ്യ കൂണിതാക്ഷ ബഹുവിധ രക്ഷോ
ബലാധ്യക്ഷ വക്ഷഃ കവാട പാടന പടിമ സാടോപ കോപാവലേപ !
കടുരടദ് അടനി ടങ്കൃതി ചടുല കഠോര കാര്മുക !
വിശങ്കട വിശിഖ വിതാഡന വിഘടിത മകുട വിഹ്വല വിശ്രവസ്തനയവിശ്രമ
സമയ വിശ്രാണന വിഖ്യാത വിക്രമ !
കുമ്ഭകര്ണ കുല ഗിരി വിദലന ദമ്ഭോലി ഭൂത നിഃശങ്ക കങ്കപത്ര !
അഭിചരണ ഹുതവഹ പരിചരണ വിഘടന സരഭസ പരിപതദ് അപരിമിതകപിബല
ജലധിലഹരി കലകല-രവ കുപിത മഘവ-ജിദഭിഹനന-കൃദനുജ സാക്ഷിക
രാക്ഷസ ദ്വന്ദ്വ-യുദ്ധ !
അപ്രതിദ്വന്ദ്വ പൌരുഷ !
ത്ര യമ്ബക സമധിക ഘോരാസ്ത്രാഡമ്ബര !
സാരഥി ഹൃത രഥ സത്രപ ശാത്രവ സത്യാപിത പ്രതാപ !
ശിതശരകൃതലവനദശമുഖ മുഖ ദശക നിപതന പുനരുദയ ദരഗലിത ജനിത
ദര തരല ഹരി-ഹയ നയന നലിന-വന രുചി-ഖചിത നിപതിത സുര-തരു കുസുമ വിതതി
സുരഭിത രഥ പഥ !
അഖില ജഗദധിക ഭുജ ബല വര ബല ദശ-ലപന ലപന ദശക ലവന-ജനിത കദന
പരവശ രജനി-ചര യുവതി വിലപന വചന സമവിഷയ നിഗമ ശിഖര നികര
മുഖര മുഖ മുനി-വര പരിപണിത!
അഭിഗത ശതമഖ ഹുതവഹ പിതൃപതി നിരൃതി വരുണ പവന ധനദഗിരിശപ്രമുഖ
സുരപതി നുതി മുദിത !
അമിത മതി വിധി വിദിത കഥിത നിജ വിഭവ ജലധി പൃഷത ലവ !
വിഗത ഭയ വിബുധ വിബോധിത വീര ശയന ശായിത വാനര പൃതനൌഘ !
സ്വ സമയ വിഘടിത സുഘടിത സഹൃദയ സഹധര്മചാരിണീക !
വിഭീഷണ വശംവദീ-കൃത ലങ്കൈശ്വര്യ !
നിഷ്പന്ന കൃത്യ !
ഖ പുഷ്പിത രിപു പക്ഷ !
പുഷ്പക രഭസ ഗതി ഗോഷ്പദീ-കൃത ഗഗനാര്ണവ !
പ്രതിജ്ഞാര്ണവ തരണ കൃത ക്ഷണ ഭരത മനോരഥ സംഹിത സിംഹാസനാധിരൂഢ !
സ്വാമിന് !
രാഘവ സിംഹ !
ഹാടക ഗിരി കടക ലഡഹ പാദ പീഠ നികട തട പരിലുഠിത നിഖിലനൃപതി കിരീട
കോടി വിവിധ മണി ഗണ കിരണ നികര നീരാജിതചരണ രാജീവ !
ദിവ്യ ഭൌമായോധ്യാധിദൈവത !
പിതൃ വധ കുപിത പരശു-ധര മുനി വിഹിത നൃപ ഹനന കദന പൂര്വകാലപ്രഭവ
ശത ഗുണ പ്രതിഷ്ഠാപിത ധാര്മിക രാജ വംശ !
ശുച ചരിത രത ഭരത ഖര്വിത ഗര്വ ഗന്ധര്വ യൂഥ ഗീത വിജയ ഗാഥാശത !
ശാസിത മധു-സുത ശത്രുഘ്ന സേവിത !
കുശ ലവ പരിഗൃഹീത കുല ഗാഥാ വിശേഷ !
വിധി വശ പരിണമദമര ഭണിതി കവിവര രചിത നിജ ചരിതനിബന്ധന നിശമന
നിര്വൃത !
സര്വ ജന സമ്മാനിത !
പുനരുപസ്ഥാപിത വിമാന വര വിശ്രാണന പ്രീണിത വൈശ്രവണ വിശ്രാവിത യശഃ
പ്രപഞ്ച !
പഞ്ചതാപന്ന മുനികുമാര സഞ്ജീവനാമൃത !
ത്രേതായുഗ പ്രവര്തിത കാര്തയുഗ വൃത്താന്ത !
അവികല ബഹുസുവര്ണ ഹയ-മഖ സഹസ്ര നിര്വഹണ നിര്വ ര്തിത
നിജവര്ണാശ്രമ ധര്മ !
സര്വ കര്മ സമാരാധ്യ !
സനാതന ധര്മ !
സാകേത ജനപദ ജനി ധനിക ജങ്ഗമ തദിതര ജന്തു ജാത ദിവ്യ ഗതി ദാന ദര്ശിത നിത്യ
നിസ്സീമ വൈഭവ !
ഭവ തപന താപിത ഭക്തജന ഭദ്രാരാമ !
ശ്രീ രാമഭദ്ര !
നമസ്തേ പുനസ്തേ നമഃ ॥

ചതുര്മുഖേശ്വരമുഖൈഃ പുത്ര പൌത്രാദി ശാലിനേ ।
നമഃ സീതാ സമേതായ രാമായ ഗൃഹമേധിനേ ॥

കവികഥക സിംഹകഥിതം
കഠോത സുകുമാര ഗുമ്ഭ ഗമ്ഭീരമ് ।
ഭവ ഭയ ഭേഷജമേതത്
പഠത മഹാവീര വൈഭവം സുധിയഃ ॥

സര്വം ശ്രീ കൃഷ്ണാര്പണമസ്തു

The text is authored by Shri vedAnta deshika a great Vaishnava
scholar, also known as Shri nigamAnta mahA deshikan, also
possessing the title kavithArkika simham.
In his works, the indication or mudhra is "venkatesa" or venkata kavi .
Encoded by T. R. Chari trchari@hotmail.com
http://trchari.tripod.com/scripttml

Please send corrections to sanskrit@cheerful.com
Last updated ത്oday
http://sanskritdocuments.org

Raghuveera Gadyam Lyrics in Malayalam PDF
% File name : traghuvira.itx
% Location : doc\_raama
% Author : Shri vedAnta deshika
% Language : Sanskrit
% Subject : kavya
% Transliterated by : T. R. Chari trchari at hotmail.com
% Description-comments : The text is authored by Shri vedAnta deshika a great Vaishnava scholar, also known as Shri nigamaanta mahaa deshikan, also possessing the title kavithaarkika simham. In his works, the indication or mudhra is @@venkatesa@@ or venkata kavi . http://trchari.tripod.com/script.html
% Latest update : August 24, 2002
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website