শ্রীকৃষ্ণবিলাসকাব্যম্ সুকুমারকবিবিরচিতম্
{॥ শ্রীকৃষ্ণবিলাসকাব্যম্ সুকুমারকবিবিরচিতম্ ॥}
॥ শ্রীঃ ॥
প্রথমঃ সর্গঃ
অস্তি শ্রিযঃ সদ্ম সুমেরুনামা সমস্তকল্যাণনিধির্গিরীন্দ্রঃ ।
তিষ্ঠন্নিদং বিশ্বমনুপ্রবিশ্য স্বেনাত্মনা বিষ্ণুরিবোর্জিতেন ॥ ১-০১॥
মিথস্তিরোভাববিলোকনাভ্যাং সঙ্ক্রীডমানাবিব বালকৌ দ্বৌ ।
পার্শ্বেষু যস্যাশু পরিভ্রমন্তৌ চন্দ্রাংশুমন্তৌ নযতো দিনানি ॥ ১-০২॥
উচ্চৈশ্শিখঃ কাঞ্চনগৌরবর্ণস্তমো নিগৃহ্ণন্মহসা নিজেন ।
দীপস্ত্রযাণামিব বিষ্টপানাং যো ভাতি পর্যন্তচরত্পতঙ্গঃ ॥ ১-০৩॥
যস্যা পতিত্বে বিহিতাভিলাষঃ করোতি তীব্রাণি তপাংসি লোকঃ ।
বিভর্তি রত্নাকরমেখলাং তামঙ্কেন পুত্রীমিব যো ধরিত্রীম্ ॥ ১-০৪॥
মহান্তি দানানি মখানুদগ্রান্ পরাঞ্চি পানাশনযোস্তপাংসি ।
শরীরিণঃ শান্তমলৈর্মনোভিঃ কুর্বন্তি যচ্ছৃঙ্গনিবাসকামাঃ ॥ ১-০৫॥
সুরা যুগান্তেষু সহ প্রিযাভির্ন্নিষেদিবাংসো যদধিত্যকাসু ।
উদন্বতামৈক্যমুপাগতানাং পশ্যন্তি কল্লোলশতপ্রচারান্ ॥ ১-০৬॥
পুষ্পাণি শয্যাস্সুরপাদপানাং ক্রীডাগৃহাঃ কাঞ্চনগহ্বরাণি ।
ভবন্তি চ স্বর্গবিলাসিনীনাং রত্নাঙ্কুরা যত্র রতিপ্রদীপাঃ ॥ ১-০৭॥
স্বর্গৌকসস্স্বর্ণমহীষু পীতাঃ শ্বেতত্বিষো রূপ্যমযীষু ভূষু ।
নীলাশ্চ নীলোপলমেদিনীষু জ্ঞাতুং মিথো যত্র ন শক্নুবন্তি ॥ ১-০৮॥
দরীগৃহোত্সঙ্গগতেরনূরোঃ কশাভিঘাতধ্বনিভিঃ সকম্পাঃ ।
সদ্যঃ প্রিযানুজ্ঝিতমানদোষাঃ সুরাঙ্গনা যত্র পরিষ্বজন্তে ॥ ১-০৯॥
নেতুং ত্রপানম্রমুখীরনীশাঃ স্ফুটানি যত্স্বর্ণগুহান্তরাণি ।
সিদ্ধাঃ প্রযত্নেন বিনা নবোঢাঃ নযন্তি নীলোপলগহ্বরাণি ॥ ১-১০॥
যত্রোদ্যতানাং কুসুমাপচাযে কান্তাসু কল্পদ্রুমবাটিকাসু ।
বিভান্তি সুত্রামবিলাসিনীনাং পদানি লাক্ষারসপাটলানি ॥ ১-১১॥
পযোদমার্গব্যতিলঙ্ঘিনীষু হংসাঃ শিরঃপুষ্করিণীষু যস্য ।
বর্ষাগমেঽপ্যশ্রুতমেঘনাদাঃ ন কুর্বতে মানসদীর্ঘযাত্রাম্ ॥ ১-১২॥
ছন্নেষু যস্মিন্ কনকোজ্জ্বলাভিরামূলচূডং নবমঞ্জরীভিঃ ।
গন্ধেন বিজ্ঞায পতন্তি ভৃঙ্গাঃ শৃঙ্গান্তরারগ্বধপাদপেষু ॥ ১-১৩॥
মন্দাকিনী যচ্ছিখরে বহন্তী কুল্যাপথাভ্যন্তরসম্প্রবিষ্টা ।
বালেব তদ্রক্ষণসম্প্রবৃত্তা দিনে দিনে সিঞ্চতি পুষ্পবাটীম্ ॥ ১-১৪॥
শ্রিযাভিরামশ্শরণং সুরাণামলঙ্ঘনীযো মহতা মহিম্না ।
বিরাজমানো বনমালযা চ যঃ শার্ঙ্গধন্বানমনুপ্রযাতি ॥ ১-১৫॥
পুরা পুরাণাং ত্রিতযং দিধক্ষোরুমাপতেঃ কার্মুকতাং প্রপন্নঃ ।
মধ্যেন বজ্রাঙ্কুশমত্স্যচিহ্নং যোঽদ্যাপি তন্মুষ্টিপদং দধাতি ॥ ১-১৬॥
শৃঙ্গাগ্রভাজাং সুরসুন্দরীণাং মুখানি পশ্যন্নমলানি চন্দ্রঃ ।
নিগূহিতুং নূনমুরঃকলঙ্কং হ্রিযেব যত্সানুপথেন যাতি ॥ ১-১৭॥
মনোভিরামে শিখরে তদীযে সহোপবিষ্টং সুরসিদ্ধসঙ্ঘৈঃ ।
অবোচদাগত্য কৃতপ্রণামা কদাচিদুর্বী কমলাধিবাসম্ ॥ ১-১৮॥
পুমানিবাহং ভবতঃ পুরস্তাদ্ব্রবীমি কিঞ্চিত্ প্রতিপদ্য ধৈর্যম্ ।
পীডা মদীযা পরমত্র হেতুর্নির্ল্লজ্জতা নন্বখিলোপহাস্যা ॥ ১-১৯॥
সৃষ্টাস্ত্বযা দত্তবরাশ্চ দৈত্যাঃ ভারেণ মাং সম্প্রতি পীডযন্তি ।
বলে প্রমাণে চ ভবন্তি যেষাং নৈবোপমানং কুলভূভৃতোঽপি ॥ ১-২০॥
স্ববিক্রমোন্মূলিতরাজকানাং জযৈষিণামদ্য পরস্পরেণ ।
তেষাং রণক্ষোণিষু সিংহনাদৈর্নির্ঘাতঘোরৈর্গিরযঃ স্ফুটন্তি ॥ ১-২১॥
মুহুর্বলাদুন্নমযত্যহীন্দ্রে মদ্ভারভুগ্নং ফণচক্রবালম্।
মম প্রকম্পাশ্চলিতাব্ধিশৈলাঃ দিগ্দন্তিনো হন্ত কদর্থযন্তি ॥ ১-২২॥
আশামুখেষু ভ্রমতামজস্রং তেষাং চমূভিঃ পরিসর্পিণীভিঃ ।
তিরোহিতাং ভানুমতো মযূখাঃ ন ক্বাপি মাং সম্প্রতি সংস্পৃশন্তি ॥ ১-২৩॥
সন্নাস্মি দৈতেযভরেণ সাহং ফণীশ্বরস্সীদতি মদ্ভরেণ ।
তদ্ভারশীর্যন্নিজকর্পরস্য ধিক্ তামবস্থাং কমঠেশ্বরস্য ॥ ১-২৪॥
ভারাবসীদদ্ফণমণ্ডলস্য ফণীশ্বরস্যোপরি দুঃস্থিতাঽহম্ ।
আসন্নপাতাস্মি তটীব নদ্যাঃ প্রবাহবেগেন বিলুপ্তমূলা ॥ ১-২৫॥
নিবেদিতা দেব মযা দশেযমনুক্তিদোষো মযি নোপপাদ্যঃ ।
নিবেদ্যতে রক্ষ্যজনেন দুঃখং ততঃ পরস্তাত্ প্রভবঃ প্রমাণম্ ॥ ১-২৬॥
ইত্যুক্তবত্যামুচিতং পৃথিব্যাং চিন্তাবলেন স্তিমিতো মুহূর্তম্ ।
মুখানি পশ্যন্নমৃতাশনানাং দেবঃ প্রজানাং পতিরিত্যুবাচ ॥ ১-২৭॥
নাসত্যমেতদ্যদবোচদুর্বী স্বকর্মণঃ সাধু ফলং মযাঽঽপ্তম্ ।
মদ্বর্দ্ধিতা মামবমত্য দৈত্যাঃ বলাদুপঘ্নন্তি জগন্তি যত্তে ॥ ১-২৮॥
অতীতকার্যানুশযেন কিং স্যাদশেষবিদ্বজ্জনগর্হিতেন ।
সুরাঃ সমুন্মূলনমাশু তেষাং কর্তুং যতধ্বং জগতাং হিতায ॥ ১-২৯॥
সদ্যস্সমুত্তিষ্ঠত চিন্তযালং চিন্তা হি কার্যপ্রতিবন্ধহেতুঃ ।
যামঃ পৃথিব্যা সহ যত্র তত্র নারাযণো দানবকালরাত্রিঃ ॥ ১-৩০॥
অস্ত্বেবমিত্যাদরপূর্বমেব স স্বীকৃতোক্তিস্সুরসিদ্ধসঙ্ঘৈঃ ।
সরোজজন্মা সহ তৈঃ প্রতস্থে বিহাযসা বিশ্বপতেস্সকাশম্ ॥ ১-৩১॥
এলাপরিষ্বঙ্গলসত্তমালং বেলাধিরূঢস্খলদূর্মিমালম্ ।
দদর্শ ধাতা মনসোঽনুকূলং পযঃপযোধেরচিরেণ কূলম্ ॥ ১-৩২॥
দদর্শ চ ক্ষীরমযং সমুদ্রং কৈলাসশৃঙ্গোন্নতফেনকূটম্ ।
পুণ্যং পযঃকেলিসমুত্সুকানাং শ্রিযঃ সখীনামবগাহনেন ॥ ১-৩৩॥
আনন্দযামাস দিবৌকসস্তানাঘ্রাতশেষো মুনিমণ্ডলেন ।
প্রকামপুণ্যঃ পবনোপনীতো বৈকুণ্ঠবক্ষস্তুলসীসুগন্ধঃ ॥ ১-৩৪॥
গন্ধানুসারেণ বিসৃষ্টনেত্রৈর্হিরণ্যগর্ভপ্রমুখৈরমর্তৈঃ ।
নবার্ককল্পং দদৃশে মুরারের্বক্ষস্থলীকৌস্তুভরত্নধাম ॥ ১-৩৫॥
অপহ্নুতাশেষমনোবিকারং দিবিস্পৃশা তূর্যরবেণ মিশ্রম্ ।
আকর্ণ্য বৈকুণ্ঠবিলাসিনীনাং গীতধ্বনিং হর্ষমযাসিষুস্তে ॥ ১-৩৬॥
আসক্তিমালক্ষ্য বিনীতবেষা স্বমৌলিবিন্যস্তকরাস্সুরাস্তে ।
আলোকযামাসুরশেষনাথং সবিগ্রহং পুণ্যমিব প্রজানাম্ ॥ ১-৩৭॥
প্রবৃদ্ধহেমাভরণপ্রকাশং তমালনীলং জলধৌ শযানম্ ।
তটিল্লতাঢ্যং পযসোঽতিপানাদনীশমুদ্গন্তুমিবাম্বুবাহম্ ॥ ১-৩৮॥
তরঙ্গবাতেন পযঃপযোধেরাপূর্যমাণং করপাঞ্চজন্যম্ ।
বামেন তির্যগ্বলতা সলীলং সম্ভাবযন্তং মুহুরীক্ষণেন ॥ ১-৩৯॥
প্রতিক্ষণং প্রেমবিশেষজাভিস্সম্ভাবনাভিঃ কমলাসনাযাঃ ।
পুরাঽঽত্মনা কল্পিতমম্বুরাশেঃ প্রমার্জযন্তং মথনাবমানম্ ॥ ১-৪০॥
পর্যাযতঃ পাণিধৃতং সরোজং বিন্যস্য বিন্যস্য দৃশোঃ পদব্যাম্।
নিদ্রাং প্রবোধং চ মুহুর্ন্নযন্তীং পদ্মাসনাং সস্মিতমীক্ষমাণাম্ ॥ ১-৪১॥
স্বচ্ছস্বদেহপ্রতিবিম্বিতেন ফণাশ্মজালেন ফণীশ্বরস্য ।
ভাস্বত্ ফলস্তোমনিরন্তরস্য বহন্তমাভাং বটপাদপস্য ॥ ১-৪২॥
অজস্রমাসীনরথাঙ্গশঙ্খমতিপ্রসন্নং কমলাধিবাসম্ ।
সন্তাপবিচ্ছেদকরং প্রজানাং হ্রদং মহীযাংসমিবাভিগম্যম্ ॥ ১-৪৩॥
বক্তুং মিথো রাহুবিচেষ্টিতানি কর্ণদ্বযাভ্যর্ণমুপেযিবাংসৌ ।
অলব্ধকালাবিব ভানুচন্দ্রৌ রথাঙ্গশঙ্খৌ দধতং করাভ্যাম্ ॥ ১-৪৪॥
দ্বারস্থসেনাপতিচোদিতেন নিবারিতাঃ কঞ্চুকিমণ্ডলেন ।
সুরাঃ প্রমোদস্খলিতৈর্বচোভিঃ স্থিত্বৈব তে ব্যোমনি তুষ্টুবুস্তম্ ॥ ১-৪৫॥
নমঃ পরস্মৈ পুরুষায তুভ্যং গিরাং ধিযামপ্যপথি স্থিতায ।
অস্মান্ পুনস্ত্রাতুমুদগ্রমোহান্ কৃপাবলাত্ কল্পিতবিগ্রহায ॥ ১-৪৬॥
ভাগীরথী পাদকুশেশযাত্তে বিনির্গতা বিশ্বমিদং পুনীতে ।
কস্ত্বাং পুনর্ভাবযতো জনস্য শুদ্ধিং পরিচ্ছেত্তুমলং মনীষী ॥ ১-৪৭॥
অনন্তশক্তেরপবিক্রিযস্য তিস্রস্ত্রিলোকীশ্বর শক্তযস্তে ।
বিতন্বতে স্থাবরজঙ্গমানামুত্পাদনক্ষেমবিলোপনানি ॥ ১-৪৮॥
কটাক্ষমাত্রেণ ভবাম্বুরাশেঃ পারং পরং প্রাপযিতুস্ত্রিলোকীম্ ।
সকৃন্নমস্যা পরমাতরস্তে যত্নানুরূপং হি ফলং ক্রিযাণাম্ ॥ ১-৪৯॥
ত্বং জ্যোতিরাপস্ত্বমসি ত্বমুর্বী ত্বং ব্যোম বৈশ্বানরসারথিস্ত্বম্ ।
ত্বং জীববর্গঃ পরমস্ত্বমাত্মা যন্নাসি কিং নাম জগত্পতে তত্ ॥ ১-৫০॥
নবাভ্রবর্ণং নলিনাযতাক্ষং পীতাম্বরং হারকিরীটিনং ত্বাম্ ।
বযং তু সেবেমহি বীক্ষমাণাঃ সাযূজ্যমন্বিছতি কঃ সুখার্থী ॥ ১-৫১॥
অলং ন নির্দেষ্টুমিযত্তযা ত্বামশেষনাথ শ্রুতিরগ্রিমাপি ।
স এব সাক্ষাত্ক্রিযতে পুনস্ত্বমহো জিতং নঃ সুকৃতৈরনল্পৈঃ ॥ ১-৫২॥
তৃণায মত্বা নিখিলানি শার্ঙ্গিন্ পদানি বৈধেযমনোহরাণি ।
আবৃত্তিশূন্যং পরমং পদং তে বাঞ্ছন্তি বৈরাগ্যধনা মহান্তঃ ॥ ১-৫৩॥
ইতি স্তুতো দেবগণেন দেবো দযানিধির্দানবকালরাত্রিঃ ।
ন্যষীদদুত্থায ভরাবভুগ্নে ভুজঙ্গতল্পে ভুবনৈকনাথঃ ॥ ১-৫৪॥
বিষ্বক্ স বৈকুণ্ঠবিলাসিনীনাং সলীলমান্দোলিতচামরাণাম্ ।
নিবারযন্নগ্রকরারবিন্দৈঃ কোলাহলং কাঞ্চনকঙ্কণোত্থম্ ॥ ১-৫৫॥
প্রসাদবত্যা কমলাসনাদীন্ সুরানশেষাননুগৃহ্য দৃষ্ট্যা ।
উবাচ বাচং দশনাংশুপূরৈঃ সমেধযন্ দুগ্ধমযং পযোধিম্ ॥ ১-৫৬॥
অধিজ্যকোদণ্ডধরো নিষঙ্গী সন্নাহবান্ পাণিধৃতৈকবাণঃ ।
অযং সমাজো ভবতাং দ্বিষদ্ভ্যো ভযং সমাবেদযতি স্ফুটং মে ॥ ১-৫৭॥
অলং বিলম্বেন দিবৌকসস্তন্নিবেদ্যতামদ্য কুতো ভযং বঃ ।
অযং করো দুষ্টবধোত্সুকং মে সুদর্শনং ন ক্ষমতে নিরোদ্ধুম্ ॥ ১-৫৮॥
ইত্যূচিবাংসং পরমং পুমাংসং নত্বা শিরোভির্বহুশঃ সুরাস্তে ।
আরূঢহর্ষাতিশযাঃ স্বমর্থমারেভিরে বক্তুমশেষমেব ॥ ১-৫৯॥
নিবার্য সর্বানপি বক্তুকামান্ সেনাপতিস্তানমরান্ করেণ ।
সবিভ্রমপ্রেরিতযা পুরস্থং দৃষ্ট্যা সরোজাসনমাজুহাব ॥ ১-৬০॥
অথাগতস্তেন করে গৃহীত্বা নীতঃ প্রভোরন্তিকমব্জযোনিঃ ।
বক্তুং নিযুক্তঃ স কৃতপ্রণামো বিজ্ঞাপযামাস বিনীতবেষঃ ॥ ১-৬১॥
বযং ত্বযা দত্তবিভূতযোঽপি মোহাতিরেকাদভিমন্যমানাঃ ।
কৃচ্ছ্রে পুনস্ত্বাং শরণং ব্রজন্তঃ হা নিস্ত্রপাণাং প্রথমে ভবামঃ ॥ ১-৬২॥
অপারদুঃখার্ণবপোতপাত্রীং ত্বযা কৃপামুদ্বহতাতিগুর্বীম্ ।
কৃতঘ্নতাজন্মভুবামমীষামস্মাকমর্থে ন কিমন্বভাবি ॥ ১-৬৩॥
মনস্বিলোকস্য বিগর্হণীযে প্রতিগ্রহে বর্জযতা জুগুপ্সাম্ ।
পুরা পুরস্তাদ্বলিদানবস্য প্রসারিতো নাগ্রকরস্ত্বযা কিম্ ॥ ১-৬৪॥
দৈত্যাধিরাজেন হিরণ্যনাম্না পর্যাকুলং ত্রাতুমশেষলোকম্ ।
ইদং তু দিব্যং পরিহৃত্য রূপং ন ত্বং কিমাসীর্নরতির্যগাত্মা ॥ ১-৬৫॥
স্ববিক্রমাক্রান্তসুরাসুরস্য রক্ষঃপতের্নিগ্রহণাদরেণ ।
ভূত্বা সুতঃ পঙ্ক্তিরথস্য রাজ্ঞস্তাং তামবস্থাং ন কিমন্বভূস্ত্বম্ ॥ ১-৬৬॥
অনেকধা পালযিতারমেবং সম্প্রত্যপি ত্বাং শরণং প্রপন্নাঃ ।
সন্তাপহারী ননু চাতকানাং ভূযোঽপি ভূযোঽপি পযোদ এব ॥ ১-৬৭॥
বিশ্বং বিদন্নপ্যবিদন্নিব ত্বং নাথানুযুঙ্ক্ষে ভযহেতুমস্মান্ ।
অনুগ্রহস্যৈতদপি প্রভূণাং প্রাযঃ প্রকারান্তরমাশ্রিতেষু ॥ ১-৬৮॥
তপোভিরুগ্রৈর্ভগবন্ সুরাণামবধ্যভাবং দনুজাঃ প্রপন্নাঃ ।
পাতালমুর্বীং চ বিজিত্য দর্পাদুপক্রমং তে দিবমদ্য জেতুম্ ॥ ১-৬৯॥
ন জাতু শূন্যঃ কুলিশেন পাণির্বক্ষো ন মুক্তং মণিকঙ্কটেন ।
শক্রস্য দৈত্যাগতিশঙ্কিনোঽস্য নাসজ্জিতস্তিষ্ঠতি বারণেন্দ্রঃ ॥ ১-৭০॥
দণ্ডং যমাত্পাশমপামধীশাদ্গদাং কুবেরাত্কুলিশং মঘোনঃ ।
আদাতুকামঃ প্রহিণোতি দূতান্ কংসঃ স্বদোর্বিক্রমনির্জিতাশঃ ॥ ১-৭১॥
রণে বিনির্জিত্য বলং সুরাণাং পরাক্রমেণাপ্রতিমেন বীরঃ ।
ভোজেশ্বরঃ ক্রীডতি সাবরোধো মূলেষু সম্প্রত্যমরদ্রুমাণাম্ ॥ ১-৭২॥
ধনুর্ধরাধ্যাসিতবপ্রশীর্ষাঃ দ্বাঃপালনব্যগ্রসমগ্রযোধাঃ ।
প্রবীরনির্ভর্ত্সিতকান্দিশীকা স্থাতুং ন জানাতি পুরী সুরাণাম্ ॥ ১-৭৩॥
হাহেতি বিক্রোশদনাথমেতদ্বিশ্বং জগত্পীডযতঃ প্রকামম্ ।
ত্বযা বিনাঽন্যস্ত্রিষু বিষ্টপেষু ন কর্তুমীষ্টে নরকস্য ভঙ্গম্ ॥ ১-৭৪॥
প্রলম্বকেশিপ্রমুখাস্তথান্যে পরস্সহস্রং পরিযন্তি দৈত্যাঃ ।
নির্ঘাতকল্পৈর্নিজসিংহনাদৈর্বিদারযন্তো বিযদাহবেষু ॥ ১-৭৫॥
ষট্ সূনবস্সন্তি হিরণ্যনাম্নো দৈত্যস্য পাতালতলাধিবাসৈঃ ।
তৈর্ন্নঃ ক্রিযন্তে দুরিতানি যানি বক্তুং ন শক্যানি মুকুন্দ তানি ॥ ১-৭৬॥
তেষাং মহীধ্রপ্রতিমাকৃতীনাং ভারং মহী সোঢুমসাবশক্তা ।
অস্মান্ পুরস্কৃত্য ভবত্সকাশং প্রাপ্তা নিজক্লেশনিবেদনায ॥ ১-৭৭॥
তদেতদাবেদনমস্মদীযং শ্রুত্বা প্রমাণং প্রভুরিত্যুদীর্য ।
বিধির্ব্যরংসীদ্বিহিতপ্রণামঃ স চাপি গম্ভীরমুবাচ দেবঃ ॥ ১-৭৮॥
অলং বিষাদেন দিবৌকসো বঃ সমীহিতং হস্তগতং মনুধ্বম্ ।
ব্রতং হি মে কেবলমেতদেব সংরক্ষণং যচ্ছরণাগতানাম্ ॥ ১-৭৯॥
মামর্থযন্তে বসুদেবপত্ন্যৌ পত্নী চ নন্দস্য সুতং গুণাঢ্যম্ ।
অংশদ্বযেন ব্রতকর্শিতাঙ্গীস্তিস্রোঽপি তাঃ পুত্রবতীর্বিধাস্যে ॥ ১-৮০॥
ইযং চ লোকত্রিতযস্য মাতা মাযাভিধানা মম শক্তিরগ্র্যা ।
কার্যাণি বঃ কান্যপি কর্তুকামা জনিষ্যতে জন্মবিনাশশূন্যা ॥ ১-৮১॥
তদ্গচ্ছত স্বর্গমপেতখেদাঃ ন কালহানিঃ পরিশঙ্কনীযা ।
অনেন শার্ঙ্গেণ শপে শরৈর্বঃ সদ্যো মনঃশল্যমপাকরিষ্যে ॥ ১-৮২॥
ইতি তমমরলোকং সান্ত্বযিত্বা স দেবঃ
সপদি নবঘনাভঃ পদ্মনাভস্তিরোঽভূত্ ।
স চ বিহিতনমস্যস্তস্য বাচং প্রশংসন্
নিজপদমভিপেদে হর্ষপর্যাকুলাত্মা ॥ ১-৮৩॥
ইতি সুকুমারকৃতৌ কৃষ্ণবিলাসকাব্যে প্রথমস্সর্গঃ ॥ ১ ॥
দ্বিতীযঃ সর্গঃ
অথৈকদা পুত্রফলানি সম্যগ্ব্রতানি বাহ্যোপবনে চরন্তীম্ ।
রথেন কংসো বসুদেবযুক্তঃ স্বসারমালোকযিতুং জগাম ॥ ২-০১॥
স্ফুরত্প্রভাপল্লবিতাঙ্গযষ্টীং কথঞ্চিদূঢস্তনমঞ্জরীকাম্ ।
তত্রালকৈঃ ষট্/পদিনীমজানাত্ স তাং লতামধ্যগতাং চিরেণ ॥ ২-০২॥
সা সন্নতাঙ্গী নিযমাবসানে জ্যেষ্ঠায তস্মৈ বিদধে নমস্যাম্ ।
স চাশিষা তামনুগৃহ্য সাধ্বীং ভোজেশ্বরো বাক্যমিদং বভাষে ॥ ২-০৩॥
অদ্যাপি বালাসি সুতাননেকান্ প্রসোষ্যসে কিং ব্রতযাতনাভিঃ ।
পশ্যাধুনা পল্লবসূতিকালে কিং কল্পতে চূতলতা ফলায ॥ ২-০৪॥
কৃশাসি কামং বিরম প্রযাসান্মনোভিরামানুপভুঙ্ক্ষ্ব ভোগান্ ।
অঙ্গানি তে সন্নতগাত্রি দুঃখং মৃণালকল্পানি কথং সহেরন্ ॥ ২-০৫॥
তামেবমুক্ত্বা স তু সাভ্যনুজ্ঞাং রথং সমারোপ্য সহৈব পত্যা ।
প্রযাতুকামঃ পুরমন্তরিক্ষে শুশ্রাব বাচং শতধারকল্পাম্ ॥ ২-০৬॥
ত্বদন্তিকস্থা সহজাশমীযং প্রসোষ্যতে পুত্রমযং কৃশানুম্ ।
মরুত্সমিদ্ধস্স তু দুর্নিবারস্ত্বাং ভস্মসাত্ কংস করিষ্যতীতি ॥ ২-০৭॥
নিশম্য তদ্ভূতবচো নিকামং কংসস্স রোষাগমদুর্নিরীক্ষ্যঃ ।
কৃপাং পরিত্যজ্য কৃপাণপাণিঃ স্বসুর্বধায স্বযমুদ্যতোঽভূত্ ॥ ২-০৮॥
নৃশংসকৃত্যে নিতরাং প্রবৃত্তমুদগ্রকোপস্ফুরিতাধরোষ্ঠম্ ।
প্রসাদযন্নানকদুন্দুভিস্তমুবাচ ধীমানুপপত্তিযুক্তম্ ॥ ২-০৯॥
অলং তবানেন বধোদ্যমেন ত্বযা বিধেযো নৃপতে বিমর্শঃ ।
কিমেষ নাশ্রাবি বিচারশূন্যং ব্রজন্ত্যনর্থা ইতি সাধুবাদঃ ॥ ২-১০॥
ভযেন যুদ্ধেষু পুরন্দরাদীন্ সুরান্ পরাচস্ত্রপযা বিমুঞ্চন্ ।
মহীশ্বর স্ত্রীবধপাতকেঽস্মিন্ কথং তবোপক্রমতে কৃপাণঃ ॥ ২-১১॥
অনেন কিং বা তব জীবিতেন যদ্রক্ষণং স্যাত্ সহজাবধেন ।
গুণেন কেনাপি হি লব্ধনাম্নামপি স্বনাশাদযশো গরীযঃ ॥ ২-১২॥
প্রপদ্যমানস্য সদাভিবৃদ্ধিং দিবানিশং প্রীণযতশ্চ লোকান্ ।
ভবদ্যশশ্চন্দ্রমসোঽস্য মাভূন্নবঃ কলঙ্কো ভগিনীবধেন ॥ ২-১৩॥
স্বসুর্বধেনাস্য ভবেদকীর্তিস্তেন ত্যজেযুস্সুহৃদোঽপি ভীতাঃ ।
ইত্যেব নূনং ভুজনির্জিতৈস্তৈস্সুরৈঃ প্রযুক্তস্সুমহানুপাযঃ ॥ ২-১৪॥
কালেন তদ্দ্রক্ষ্যসি যন্মদুক্তং মা ভূত্তবাস্মিন্ বিষযেঽপি শঙ্কা ।
তথাপি চেতস্তব শঙ্কতে চেদাকর্ণ্যতাং তর্হ্যপরঃ প্রকারঃ ॥ ২-১৫॥
সর্বাণ্যপত্যানি বশে তবাহং জাতানি জাতানি সমর্পযিষ্যে ।
তন্নিগ্রহং বা তদনুগ্রহং বা বিচিন্ত্য কর্তাসি দশানুরূপম্ ॥ ২-১৬॥
কিং বুদ্ধিমান্দ্যেন নিজেন তস্য কিং ভাগধেযেন বরাঙ্গনাযাঃ ।
বলেন কিং বা ভবিতব্যতাযাস্তথেতি জগ্রাহ বচস্তদীযম্ ॥ ২-১৭॥
বধপ্রবৃত্তো বসুদেবমন্ত্রপ্রভাবসংস্তম্ভিতঘোরকর্মা ।
নিবৃত্য নিস্ত্রিংশমহাভুজঙ্গো মহীভৃতঃ কোশবিলং বিবেশ ॥ ২-১৮॥
সত্যা নু সা স্যাদশরীরিণী বাক্ সত্যং কিমেতদ্বসুদেববাক্যম্ ।
বিতর্কযন্নেবমুদস্তকেতুং পুরীং প্রপেদে মণিতোরণাঢ্যাম্ ॥ ২-১৯॥
আলোকনৈর্মৌলিষু ভূপতীনামাসজ্জযন্নঞ্জলিবন্ধনানি ।
স বৈমনস্যেন মুখস্থিতেন ভযাবহঃ স্বং ভবনং জগাম ॥ ২-২০॥
বিশঙ্কমানঃ স গৃহোপকণ্ঠে তৌ সদ্মনি ক্বাপি বিধায গুপ্তৌ ।
পরাক্রমাক্রান্তসমস্তলোকঃ পুরেব ভোগানযমন্বভুঙ্ক্ত ॥ ২-২১॥
মাযা হরেস্সাঽথ হিরণ্যপুত্রান্ যান্ দেবকীগর্ভগতানকার্ষীত্ ।
ভোজেশ্বরস্সত্বরমেত্য ভীত্যা তান্ জাতমাত্রানবধীত্ ক্রমেণ ॥ ২-২২॥
জগদ্বিভূত্যৈ পরমস্য পুংসঃ যো দেবকীগর্ভমবিক্ষদংশঃ ।
আকৃষ্য তস্মান্মুরবৈরিমাযা তং রোহিণীগর্ভগতং চকার ॥ ২-২৩॥
চকাস সপ্তচ্ছদপাণ্ডুরেণ সুতেন সা গর্ভতিরোহিতেন ।
বলাহকান্তর্হিতশীতভানোর্দিশো দশাং বৃত্রজিতঃ প্রপন্না ॥ ২-২৪॥
ততস্সমাহ্লাদনমীক্ষণানামসূত পুত্রং শরদিন্দুকল্পম্ ।
প্রকর্ষমাপন্নুদযেন যস্য সদ্যঃ সমুদ্রা ইব সত্ববন্তঃ ॥ ২-২৫॥
পত্যুস্সমাদিষ্টমিদং বিধায শেষং চিকীর্ষুস্সুরকার্যমার্যা ।
চরাচরাণাং জগতাং সবিত্রী সা শ্রদ্দধে জন্মভুবং যশোদাম্ ॥ ২-২৬॥
অথ প্রজানামভিবৃদ্ধিকামো দেবো দযাযাঃ কিল জন্মভূমিঃ ।
স্বজন্মনে জন্মবিনাশহেতুঃ প্রাপ্যস্সতাং প্রাপ স দেবকীং তাম্ ॥ ২-২৭॥
কৃশাবলগ্না কুচযোর্গরিম্ণা সা দেবকী সন্নতগাত্রযষ্টিঃ ।
জগত্ত্রযীপুণ্যকৃতাবলম্বা বভার গর্ভেণ জগন্নিবাসম্ ॥ ২-২৮॥
অন্তর্দধানা সরসীরুহাক্ষং স্বেনাবতারেণ ভুবং পুনানা ।
সা দেবকী সা চ কবেরকন্যা মিথোঽদধাতামুপমানভাবম্ ॥ ২-২৯॥
অলং নিবাসায ন যস্য বিশ্বং বসন্ স গর্ভে মুমুদে মুকুন্দঃ ।
পরোপকারপ্রভবং হি দুঃখং পুংসস্সুখাযৈব মহত্তরস্য ॥ ২-৩০॥
বহিঃস্ফুরন্ত্যা করপাঞ্চজন্যত্বিষেব বিষ্ণোরুদরস্থিতস্য ।
অধত্ত তস্যাস্তপনীযবর্ণা মধূকপুষ্পচ্ছবিমঙ্গযষ্টিঃ ॥ ২-৩১॥
বভার হারং কুচযোর্ন তন্বী ন পাদযোর্নূপুরমামুমোচ ।
দধৌ মণিং ভারভিযা ন মৌলৌ তদেব কৈবল্যমভূষযত্তাম্ ॥ ২-৩২॥
দৃশঃ প্রযত্নেন দধৌ তিরশ্চীরুবাচ মন্দং নিভৃতং জহাস ।
শনৈর্যযৌ দত্তকরা সখীভির্ভৃশং নিশশ্বাস চ তাবদেব ॥ ২-৩৩॥
সহৈব হর্ষেণ সুধাশনানাং সহৈব পুণ্যেন বসুন্ধরাযাঃ ।
ভযেন ভোজাধিপতেশ্চ দেবো সহৈব গর্ভে ববৃধে মুকুন্দঃ ॥ ২-৩৪॥
শিরোভিরূঢেন বনস্পতীনাং ফলোপহারেণ নিবেদিতর্দ্ধিঃ ।
প্রাবৃট্ সমাসাদিতসূতিকালাং তাং দেবকীং দ্রষ্টুমিবাজগাম ॥ ২-৩৫॥
অথৈকদেশা ইব বারিরাশেরুচ্চৈঃ পুরোমারুতবিপ্রকীর্ণাঃ ।
বৃতাস্তডিদ্বিদ্রুমবল্লরীভির্বিরেজিরে ব্যোমনি বারিবাহাঃ ॥ ২-৩৬॥
বলাহকব্রাতভবৈস্তমোভির্দিনেষু দুর্বোধপুরঃস্থিতেষু ।
ন কশ্চিদাসীদভিসারিকাণাং বিদ্যুত্প্রকাশেন বিনাঽন্তরাযঃ ॥ ২-৩৭॥
পযোদভস্ত্রান্তরনির্গতেন ঝাত্কারিণা চণ্ডসমীরণেন ।
বিযোগিনাং চেতসি মেঘকালঃ সন্ধুক্ষযামাস মনোভবাগ্নিম্ ॥ ২-৩৮॥
স্মরেণ লোকত্রিতযেশ্বরেণ সম্ভাবিতাজ্জীবিতনির্বিশেষম্ ।
ঋতোর্বসন্তাজ্জ্বলদাগমস্য জহার জাতির্নিখিলং নিকর্ষম্ ॥ ২-৩৯॥
বলাদ্গৃহীতা ইব বৈতসীভিঃ শাখাভিরারূঢমদা ইবোচ্চৈঃ ।
পরিস্খলন্ত্যো নিখিলাস্তটিন্যঃ জগ্মুর্জবাদুদ্ভটফেনহাসাঃ ॥ ২-৪০॥
উদারসৌরভ্যবশীকৃতানামন্বীযমানঃ পটলৈরলীনাম্ ।
অকল্পযত্ কেতকমাতরিশ্বা মনোভবস্যাপি মনোবিকারম্ ॥ ২-৪১॥
অত্যম্বুপানপ্রভবস্য কর্তুমন্তর্জডিম্নঃ প্রতিসংবিধানম্ ।
পপুস্তিরস্কারপদেন মেঘাঃ মযূখমালামরবিন্দবন্ধোঃ ॥ ২-৪২॥
ররাজ খর্জূরফলপ্রকাশং নবং পযঃ কাননপল্বলেষু ।
পযোদবৃন্দৈঃ পরিপীয মুক্তং প্রভাকরস্যেব মরীচিজালম্ ॥ ২-৪৩॥
মহীভৃতাং মূর্দ্ধসু দত্তপাদং বিলোক্য মিত্রং বিহতপ্রতাপম্ ।
মগ্নে জলে মর্তুমিবারবিন্দে মধুব্রতাশ্চুক্রুশুরন্তরিক্ষে ॥ ২-৪৪॥
নিষেব্য হংসা মধুরৈর্বচোভিঃ পদ্মাকরং লব্ধসমীহিতার্থাঃ ।
সদ্যো যযুস্তস্য বিপত্তিকালে জলাশযানাং প্রকৃতিঃ কিলৈষা ॥ ২-৪৫॥
প্ররূঢসস্যাঃ ফলমূলশাকৈর্নিরন্তরাঃ স্বাদুনবোদকাঢ্যাঃ ।
পল্লীজুষাং চেতসি পামরাণাং ধৃতিং পরামাদধিরে বনান্তাঃ ॥ ২-৪৬॥
সমুন্মিষন্তী গিরিমল্লিকানাং প্রসূনরাজিস্সুতরাং বিরেজে ।
মুক্ত্বা নভো মেঘবিমর্দভীত্যা নক্ষত্রমালেব গতা ধরিত্রীম্ ॥ ২-৪৭॥
ধারালজীমূতকৃতান্ধকারে তস্মিন্নপর্যন্তজডিম্নি কালে ।
অলক্ষ্যমাণঃ ক্বচিদংশুমালী দিবাঽপ্যুবাসেব তনূনপাতি ॥ ২-৪৮॥
ইতি প্রবৃত্তে সমযে ঘনানাং মাসে নভস্যে নিশি মধ্যমাযাম্ ।
গণে শুভাখ্যাযিনি চ গ্রহাণাং দেবক্যুবাহ প্রসবাভিমুখ্যম্ ॥ ২-৪৯॥
হরত্সু বাহ্যং ভুবনস্য তাপং প্রাবৃট্ প্রসূতেষু বলাহকেষু ।
অসূত তস্যান্তরতাপশান্ত্যৈ কৃষ্ণাম্বুবাহং কৃপযেব দেবী ॥ ২-৫০॥
দিশঃ প্রসেদুঃ সহ নিম্নগাভির্জহর্ষ লোকেন সহাম্বুরাশিঃ ।
জাতে মুকুন্দে মুমুচুশ্চ সদ্যঃ ভযেন দেবাঃ সহ পুষ্পবৃষ্টিম্ ॥ ২-৫১॥
মনোভিরামেণ মধুব্রতানাং নাদেন শংসন্নিব দিষ্টবৃদ্ধিম্ ।
চচার বাযুঃ সুমনোংঽশুকানি সম্প্রাপ্য সম্প্রাপ্য মহীরুহেভ্যঃ ॥ ২-৫২॥
ব্যজৃম্ভত প্রস্ফুটশঙ্খনাদঃ তারেণ গীতধ্বনিনা বিমিশ্রঃ ।
সমশ্নুবানঃ ককুভাং মুখানি দিবৌকসাং মঙ্গলতূর্যঘোষঃ ॥ ২-৫৩॥
ত্রপামপাস্যন্ বিনযং বিলুম্পন্ নীতিং নিগৃহ্ণন্ ভযমাশু ভঞ্জন্ ।
শরীরিণামচ্যুতজন্মজন্মা মোদো জজৃম্ভে মদনির্বিশেষঃ ॥ ২-৫৪॥
আষাঢিনং পাণিমুদস্য দূরং ব্রহ্মর্ষিলোকঃ পতদুত্তরীযঃ ।
ননর্ত পর্যাকুলপাদচারঃ প্রহস্যমানঃ সুরসুন্দরীভিঃ ॥ ২-৫৫॥
শৃঙ্গোজ্ঝিতৈঃ কুঙ্কুমবারিপূরৈরন্যোন্যমভ্যুক্ষণতত্পরাণাম্ ।
প্রমোদজন্মা দিবি সম্বভূব কোলাহলঃ কোঽপি সুধাশনানাম্ ॥ ২-৫৬॥
পিতৄংশ্চ পুত্রা পিতরশ্চ পুত্রান্ গুরূংশ্চ শিষ্যা গুরবশ্চ শিষ্যান্ ।
পতীংশ্চ দারাঃ পতযশ্চ দারান্ প্রমোদমত্তাস্সিষিচুঃ পযোভিঃ ॥ ২-৫৭॥
অসিঞ্চদম্ভোরুহযোনিরিন্দ্রং তং পঙ্কজাবাসমসিঞ্চদিন্দ্রঃ ।
অসিঞ্চতাং দ্বৌ বিবুধানশেষান্ সর্বে সুরাস্তৌ চ বলাদসিঞ্চন্ ॥ ২-৫৮॥
মিথঃ পযোভিঃ সিষিচুর্বিনেদুঃ ববল্গুরুচ্চিক্ষিপুরম্বরাণি ।
অন্যোন্যমংসেন সুদূরমূহুর্মত্তা ইব স্বর্গসদো বভূবুঃ ॥ ২-৫৯॥
ত্রিলোকনাথোদযসম্ভবেন মোদেন পর্যাকুলমানসানাম্ ।
গীতে চ নৃত্তে চ সুরাঙ্গনানাং বভূব তালস্খলিতং ন দোষঃ ॥ ২-৬০॥
শৃঙ্গোদকাস্ফালনরক্তনেত্রাঃ বিচ্ছিন্নহারাশ্চ্যুতকর্ণভূষাঃ ।
প্রহাসসীদধ্বনিভির্বচোভিঃ সমালপন্তো বিবুধা বিজহ্রুঃ ॥ ২-৬১॥
জাতে হরৌ দৈত্যবিমর্দনেন বিশ্বম্ভরাভারমপাচিকীর্ষৌ ।
মুনেঃ প্রহর্ষঃ কলহপ্রিযস্য জগত্প্রহর্ষশ্চ সমাবভূতাম্ ॥ ২-৬২॥
ইতি প্রহর্ষাকুলিতৈর্মনোভিঃ বিশৃঙ্খলং ক্রীডতি দেহিবর্গে ।
কংসস্সভৃত্যঃ প্রতিপদ্য মূর্ছাং নিদ্রাভিধানাং ন কিমপ্যবোধি ॥ ২-৬৩॥
শ্যামং চতুর্বাহুমুদারহারং কিরীটিনং কুণ্ডলদীপ্তগণ্ডম্ ।
পিতাঽপি মাতা চ বিলোক্য পুত্রমানন্দমগ্নৌ বিবশাবভূতাম্ ॥ ২-৬৪॥
নিযম্য হর্ষোদযপারবশ্যং তং দেবকীজানিরুবাচ বাচম্ ।
প্রসীদ ভীতোঽহমতীব কংসাদিদং তু রূপং প্রতিসংহরেতি ॥ ২-৬৫॥
তত্প্রেরিতস্তল্পগতং করাভ্যাং তমাদদে কল্পিতবালভাবম্ ।
তযোশ্শযানঃ করযোস্স তস্য প্রকামমপ্রীযত পদ্মনাভঃ ॥ ২-৬৬॥
অশেত যঃ প্রাগ্বটপত্রমধ্যে লোকানশেষানুদরে দধানঃ ।
বিনা তপোভিঃ কিমু তস্য সিধ্যেত্তত্পাণিযুগ্মে শযনং মুরারেঃ ॥ ২-৬৭॥
তমালনিলেন তমোভরেণ নিপীডিতাশাবলযে নিশীথে ।
আদায পঙ্কেরুহলোচনং তং সদ্যঃ স নির্গত্য গৃহাত্ প্রতস্থে ॥ ২-৬৮॥
নিবার্য বর্ষোদকমাত্মনৈব প্রকাশ্য মার্গং ফণরত্নভাসা ।
উপাযমুক্ত্বা বসুদেবকর্ণে শেষস্সিষেবে বহুধৈব বিষ্ণুম্ ॥ ২-৬৯॥
পুরাত্ স নির্গত্য পুমাংসমাদ্যং বহন্ বহন্তীং যমুনামপশ্যত্ ।
কূলঙ্কষৌঘাঽপি কলিন্দকন্যা তদীযগুল্ফদ্বযসোদকাঽভূত্ ॥ ২-৭০॥
উত্তীর্য তাং তত্তটসংশ্রিতানাং দাতুং করং বার্ষিকমাগতানাম্ ।
ব্রজৌকসাং নন্দপুরোগমানাং প্রীতো নিবেশং সহসা বিবেশ ॥ ২-৭১॥
প্রবিশ্য জানন্নিব নন্দগোপনিবেশনং সুপ্তশরীরিবর্গম্ ।
সুতাং প্রসূয প্রতিপন্ননিদ্রাং দদর্শ তদ্ধর্মবধূং যশোদাম্ ॥ ২-৭২॥
তং শাযযিত্বা শযনে তদীযে কন্যাং সমাদায নিপত্য গচ্ছন্ ।
শুশ্রাব পুত্রোদযহর্ষমূলং কোলাহলং গোপবধূজনানাম্ ॥ ২-৭৩॥
করেণ কন্যাং মনসা চ পুত্রং বহন্ মুহূর্তেন বিলঙ্ঘ্য মার্গম্ ।
বিশঙ্কমাবিশ্য গৃহং গৃহিণ্যাঃ নিধায বালাং শযনে স তস্থৌ ॥ ২-৭৪॥
সা চঞ্চরীকস্বনসন্নিভেন নাদেন লোকস্য মনো হরন্তী ।
রুরোদ কিঞ্চিদ্বিবৃতেন বালা স্ফুটত্পযোজাকৃতিনা মুখেন ॥ ২-৭৫॥
আকর্ণ্য বালধ্বনিমস্তনিদ্রাঃ প্রধাব্য রক্ষাপুরুষা জবেন ।
প্রবোধ্য যত্নেন পতিং পৃথিব্যাঃ শশংসুরস্মৈ ভগিনীং প্রসূতাম্ ॥ ২-৭৬॥
সদ্যঃ সমাগত্য স তত্র দৃষ্ট্বা বালামমর্ষেণ বিমর্শশূন্যঃ ।
স্বস্রা নিষিদ্ধোঽপি বধাভিলাষী জগ্রাহ তস্যাশ্চরণৌ করাভ্যাম্ ॥ ২-৭৭॥
উদস্য দূরং তরসা করেণ চিক্ষেপ তাং দুর্মতিরশ্মপৃষ্ঠে ।
মহীমযাতৈব দিবি স্থিতা সা জজ্বাল ধাম্না জগতাং সবিত্রী ॥ ২-৭৮॥
ততঃ করৈস্তামরসপ্রকাশৈঃ সা মন্দমান্দোলিতশস্ত্রজালা ।
বিলোক্য তং বিহ্বলচিত্তবৃত্তিং জগাদ বাচং জগদেকমাতা ॥ ২-৭৯॥
ত্বমগ্রহীর্মচ্চরণৌ রুষাঽপি প্রাযঃ ফলং তস্য ন হন্মি যত্ত্বাম্ ।
জাতঃ পৃথিব্যাং তব জাল্ম হন্তা সদ্যো হিতং চিন্তয সাধযামি ॥ ২-৮০॥
ইতি নৃপমভিধায জ্যোতিষা কুর্বতী সা তডিদিব নযনানি প্রাণিনামাকুলানি ।
সুরযুবতিভিরুচ্চৈর্গীযমানাপদানা সুরপদমভিপেদে পাটিতাভ্রা জবেন ॥ ২-৮১॥
শ্রুত্বা তস্যা শ্রবণপরুষাং বাচমন্তর্বিষণ্ণঃ
পুত্রাপাযব্যথিতমনসং সান্ত্বযিত্বা স্বসারম্ ।
পদ্ভ্যামেব স্বভবনমথ প্রাপ্য কৃচ্ছ্রাদনৈষীত্
কংসশ্চিন্তাকুলিতহৃদযো জাগ্রদেব ত্রিযামাম্ ॥ ২-৮২॥
ইতি সুকুমারকৃতৌ কৃষ্ণবিলাসকাব্যে দ্বিতীযাস্সর্গঃ ॥ ২ ॥
তৃতীযঃ সর্গঃ
প্রাতঃ প্রলম্বপ্রমুখানমাত্যান্ সর্বান্ সমাহূয স ভোজরাজঃ ।
সবিভ্রমপ্রেরিতদৃষ্টিদত্তে স্থানে নিষণ্ণানবদদ্বিনীতঃ ॥ ৩-০১॥
সন্দিহ্য মোহাদ্বসুদেববাক্যং মযা প্রমাণীকৃতভূতবাচা ।
হতা নৃশংসেন সুতা ভগিন্যাস্তেনাবিলং মে হৃদযং যশোঽপি ॥ ৩-০২॥
জাতাং পুনঃ কাঞ্চনকাঞ্চনাভাং সুতাং গতাযুর্ন্নিশি হন্তুমৈচ্ছম্ ।
উত্প্লুত্য সা ব্যোম্নি জবাদতিষ্ঠত্ শস্ত্রোত্কটা দর্শিতদিব্যরূপা ॥ ৩-০৩॥
নিযম্য সা মাতুল ইত্যমর্ষং প্রসেদুষী মামবদচ্চ বালা ।
অরির্মহীযানজনিষ্ট ভূমৌ তবোচিতং সম্প্রতি চিন্তযেতি ॥ ৩-০৪॥
ব্যাহৃত্য মাং দ্যাং প্রতি দেবনারীগণৈর্গতাযামিতি সেবিতাযাম্ ।
দেব্যামহং দুশ্চরিতং স্বমেব স্মরন্ বিনিদ্রো রজনীমনৈষম্ ॥ ৩-০৫॥
যুদ্ধেষু দেবা পুরুহূতমুখ্যাঃ ভগ্না মযা স্থাতুমশক্নুবন্তঃ ।
অশ্বান্ পরিত্যজ্য বিমুচ্য নাগান্ মুক্ত্বা চ শস্ত্রাণি দিশো দ্রবন্তি ॥ ৩-০৬॥
তদেষু নৈকোঽপি ভুবং গতো মে শক্নোতি কর্তুং প্রতিকূলভাবম্ ।
মহীযসঃ কিং ঘটতে পরাগঃ সমীরণস্যাভিমুখং প্রসক্তুম্ ॥ ৩-০৭॥
কিমন্যদার্তাভ্যবপত্তিকামঃ সুরেষু সন্দর্শিতপক্ষপাতঃ ।
অজাযতোর্ব্যামসুরান্নিহন্তুং স এব মন্যে সরসীরুহাক্ষঃ ॥ ৩-০৮॥
সর্বে বযং দৈত্যকুলপ্রসূতাঃ কেনাপি জাতা ভুবি কারণেন ।
স তেন সন্নহ্যতি জেতুমস্মানুক্তোঽযমর্থঃ কিল নারদেন ॥ ৩-০৯॥
অতস্তদুচ্ছেদবিধৌ বিনিদ্রাঃ যতধ্বমদ্যৈব বলানুরূপম্ ।
নখাগ্রলাব্যস্তরুরঙ্কুরাত্মা পরশ্বধস্যাপি ততোঽতিভূমিঃ ॥ ৩-১০॥
যস্মিন্ ভবত্যাশ্রিতবত্সলত্বং বিপ্রেষু যস্যাস্তি বিশেষসঙ্গঃ ।
মনোহরং যশ্চ বিভর্তি রূপং বধং স বালোঽর্হতি মত্সকাশাত্ ॥ ৩-১১॥
মখাশ্চ তত্প্রীতিকৃতো নিবার্যাঃ নিবারণীযা শ্রুতিরগ্রিমাঽপি ।
তৃণীকৃতাশেষজনপ্রভাবা সংস্থৌতি যা তন্মহিমানমেব ॥ ৩-১২॥
গতে বিরামং গরুডধ্বজেঽস্মিন্ মখেষু সর্বত্র নিবারিতেষু ।
সুরেষু সর্বেষ্বপি দুর্বলেষু হস্তে ভবিষ্যত্যমরাবতী নঃ ॥ ৩-১৩॥
ইত্যূচুষস্তস্য পদোপকণ্ঠং নীরাজযন্তো মকুটপ্রভাভিঃ ।
অবাদিষুর্বিক্রমদর্পিতাস্তে কৃতাট্টহাসধ্বনিকম্পিতাশাঃ ॥ ৩-১৪॥
কিং চিন্তযা পার্থিব ভুঙ্ক্ষ্ব ভোগানস্মাসু জীবত্সু কুতো রিপুস্তে ।
কথং মযূখেষু পরিস্ফুরত্সু সরোজবন্ধোস্তমসাভিভূতিঃ ॥ ৩-১৫॥
অমাতরিশ্বানমহব্যবাহং অসূর্যশীতাংশুমবজ্রপাণিম্ ।
অনচ্যুতেশানপিতামহং চ দ্রষ্টাসি রাজন্নচিরেণ লোকম্ ॥ ৩-১৬॥
ইত্যূচুষস্তানুচিতোপহারৈঃ সম্ভাব্য কৃত্যেষু সমাদিদেশ ।
স দেবকীমানকদুন্দুভিং চ বিমোচযামাস চ বন্ধনস্থৌ ॥ ৩-১৭॥
লব্ধ্বা নিধানং ন তথা দরিদ্রো গতিং সমাসাদ্য তথা ন পঙ্গুঃ ।
তথা ন চান্ধো দৃশমাপ্য হৃষ্যেদ্যথাপ্তপুত্রঃ স জহর্ষ নন্দঃ ॥ ৩-১৮॥
তপনে চরমাচলং প্রপন্নে তমসা চ স্থগিতেষু দিঙ্মুখেষু ।
যমুনাতটবাসিনং তমূচে বসুদেবঃ প্রতিপদ্য নন্দগোপং ॥ ৩-১৯॥
তপসা তব নন্দগোপ মন্যে ফলিতং জন্মসহস্রসঞ্চিতেন ।
ঋণমন্ত্যমপোহিতুং ত্বদীযং যদযং পুত্রনিধিঃ সমাবিরাসীত্ ॥ ৩-২০॥
ইহ খেলতি পূতনেতি কৃত্যা শিশুহত্যানিরতা পুরোপকণ্ঠে ।
তদহর্ন্নিশমত্র রক্ষণীযো নযনানন্দকরঃ সুতস্ত্বযাঽযং ॥ ৩-২১॥
অথবা কিমিবাস্যতে ত্বযাস্মিন্নিজমুত্সৃজ্য পদং পুরোপকণ্ঠে ।
সবিধে ন বসন্তি বুদ্ধিমন্তো ফণিনো বাযুসখস্য ভূপতেশ্চ ॥ ৩-২২॥
প্রতিবেদি নিবিষ্টপূর্ণকুম্ভং বিলসত্তোরণমুজ্জ্বলপ্রদীপম্ ।
ব্রজ গোকুলমাকুলং প্রজাভীভবদীযাগমনপ্রহর্ষিণীভিঃ ॥ ৩-২৩॥
শিশুরস্তি মমাপি রৌহিণেযো ভবদীযে বিষযে বিবর্ধমানঃ ।
স চ সাধু নিরীক্ষ্য রক্ষিতব্যো বপুষা কেবলমাবযোর্হি ভেদঃ ॥ ৩-২৪॥
ইত্যুক্ত্বা গতবতি দেবকীসহাযে সংত্রস্তঃ কথমপি নীতরাত্রিশেষঃ ।
আরোহত্যুদযমহীধরস্য শৃঙ্গং তিগ্মাংশৌ নিজবসতিং প্রতি প্রতস্থে ॥ ৩-২৫॥
সচকিতমৃগমণ্ডলানি কুর্বন্ শকটশতধ্বনিভির্বনান্তরাণি ।
প্রমুদিতমথ গোকুলং প্রপেদে দিশি দিশি মারুতধূতকেতুমালম্ ॥ ৩-২৬॥
নিজবসতিমভিপ্রপদ্য তুষ্টঃ কিমপি ন কর্ম করোতি নন্দগোপঃ ।
নবনলিনপলাশচারুনেত্রং বদনমহর্ন্নিশমাত্মজস্য পশ্যন্ ॥ ৩-২৭॥
মুগ্ধভাবমধুরেণ রঞ্জযন্ শৈশবেন হৃদযং ব্রজৌকসাম্ ।
গোকুলে স বিজহার কেশবঃ ক্ষীরবারিনিধিমপ্যচিন্তযন্ ॥ ৩-২৮॥
বদনং মধুসূদনঃ করাভ্যাং চরণাঙ্গুষ্ঠমুপানযত্ পিপাসুঃ ।
গলিতেব ততস্সুরস্রবন্তী নখমুক্তামণিদীধিতিচ্ছলেন ॥ ৩-২৯॥
অমৃতাংশুরিবাপরঃ প্রমোদং নযনানাং জনযন্ স পদ্মনাভঃ ।
ভবনং ভবনাত্ করৌ করাভ্যাং ব্রজযোষিদ্ভিরনীযতাঙ্কমঙ্কাত্ ॥ ৩-৩০॥
অধঃ কদাচিচ্ছকটস্য শাযিতঃ স্বকার্যপর্যাকুলযা যশোদযা ।
স লীলযা পাদসরোরুহং শনৈরুদঞ্চযামাস সরোজলোচনঃ ॥ ৩-৩১॥
মধুভিদশ্চরণাম্বুজতাডিতং শকটমাশু সমুত্থিতমম্বরে ।
বিপরিবৃত্য পপাত মহীতলে পটুতরধ্বনিপূরিতদিঙ্মুখম্ ॥ ৩-৩২॥
শকটপতনজন্ম নন্দমুখ্যাঃ স্তনিতমিব ধ্বনিতং নিশম্য গোপাঃ ।
কিমিদমিতি ভযেন তত্র জগ্মুস্ত্বরিতগতিচ্যবমানকেশবন্ধাঃ ॥ ৩-৩৩॥
কুচকলশবিলগ্নপাণিপদ্মা বিগলিতবন্ধমনোজ্ঞকেশপাশা ।
সপদি সহ সখীভিরন্বধাবত্ কলমণিনূপুরশিঞ্জিতা যশোদা ॥ ৩-৩৪॥
কৃতস্মিতং ক্বচিদপরিক্ষতং সুতং বিলোক্য তং প্রমুদিতমানসা পরম্ ।
ব্রজৌকসাং সবিধনিবাসিনাং মুখাদ্বিসিস্মিযে বিদিততদীযবিক্রমা ॥ ৩-৩৫॥
স্রুতশোণিতমেব মন্যমানা চরণং তস্য নিসর্গপাটলং তত্ ।
উদমার্জযদংশুকাঞ্চলেন দ্রুতমাগত্য পুনঃ পুনর্যশোদা ॥ ৩-৩৬॥
তিলকং মধুবিদ্বিষো ললাটে রজসা গোমযজন্মনা বিধায ।
উরসা পরিরভ্য নন্দগোপঃ সুচিরং তস্য সুমঙ্গলানি দধ্যৌ ॥ ৩-৩৭॥
শকটং মধুসূদনস্য দৃষ্ট্বা চরণোদঞ্চনবিভ্রমেণ ভগ্নম্ ।
অথ বারিনিধের্বিবেশ গর্ভং স্বরথস্যাপি বিশঙ্ক্য ভঙ্গমর্কঃ ॥ ৩-৩৮॥
পরিতঃস্ফুরতা নবেন সন্ধ্যামহসা পল্লবপাটলেন লিপ্তাঃ ।
পতিতা ইব পাবকে বিরেজুঃ ককুভো দুস্সহভানুবিপ্রযোগাত্ ॥ ৩-৩৯॥
ক্ষুভিতশ্চিরমম্বরাম্বুরাশিঃ তপনস্যন্দনবাহনাবগাহাত্ ।
স্ফুরদুদ্ভটতারকাপদেশাত্ সহসাঽঽকীর্যত ফেনমণ্ডলেন ॥ ৩-৪০॥
অহিমরুচি রসাতলং প্রবিষ্টে ভযচকিতঃ স্ববিনাশমাকলয্য ।
তত ইব তরসোত্পতন্নসীমা তিমিরভরঃ পৃথিবীতলং প্রপেদে ॥ ৩-৪১॥
ভূরন্তরিক্ষং ভবনানি রথ্যাঃ বনানি শৈলাস্সরিতস্সমুদ্রাঃ ।
ধ্বান্তে দিশাং রুন্ধতি চক্রবালং ব্যক্তং ন কেনাপি কিমপ্যবেদি ॥ ৩-৪২॥
অথ প্রযাতি প্রহরে যশোদা জনে চ কিঞ্চিন্নিভৃতে সনিদ্রে ।
পুত্রং পযঃপানগুরুপ্রমোদং প্রস্বাপযন্তী কলমিত্যগাযত্ ॥ ৩-৪৩॥
কুন্দত্বিষস্তালফলপ্রকাশাঃ তাপিঞ্ছবর্ণাস্তরুণার্কভাসাঃ ।
প্রভূতদুগ্ধা নবনীতবত্যো গাবস্সহস্রং তনয ত্বদীযাঃ ॥ ৩-৪৪॥
প্রিযালখর্জূরসমগ্রসানুঃ ফলাঢ্যরম্ভাবনশোভনীযঃ ।
ননূপভোগায সুতাযমাস্তে গোবর্ধনো নাম মহীধরস্তে ॥ ৩-৪৫॥
সরসিরুহবনে গতেঽপি নিদ্রাং কথমিব তে নযনাম্বুজে বিনিদ্রে ।
শ্রুতিপরিচযশালিনো হি কর্ম স্বজননিষেবিতমেব সংশ্রযন্তে ॥ ৩-৪৬॥
তদ্ধ্বনিশ্রবণজাতকৌতুকা বালজীবিতবিলোপবিশ্রুতা ।
আজগাম গগনেন পূতনা যাতনা তনুমতীব দেহিনাং ॥ ৩-৪৭॥
সাঽবতীর্য নভসো নিশাচরী গূঢমেব নিষসাদ কুত্রচিত্ ।
সা চ সুপ্ত ইব বীক্ষিতে সুতে স্বাপমাপ সরসীরুহেক্ষণা ॥ ৩-৪৮॥
কৃষ্ণমঙ্কমধিরোপ্য নির্দযা দাতুমারভত পূতনা স্তনম্ ।
যত্পযোধরমুখে মুখার্পণাদাযুষা শিশুজনো বিযুজ্যতে ॥ ৩-৪৯॥
পাঞ্চজন্যমিব পূতনাস্তনং পাণিপল্লবযুগেন পীডযন্ ।
আননেন মধুশত্রুরান্তরানাদদে স তু ততস্সমীরণান্ ॥ ৩-৫০॥
বিপ্রকীর্ণকচবালপল্লবা ভগ্নবাহুবিটপা নিশাচরী ।
সা পপাত ভুবি ঘোরনিঃস্বনা মারুতাহতমহীরুহোপমা ॥ ৩-৫১॥
ঝটিতি ব্যপনীতগাঢনিদ্রো মহতা তেন রবেণ পূতনাযাঃ ।
প্রতিপত্তুমিযায তাং প্রবৃত্তিং সহ গোপালগণেন নন্দগোপঃ ॥ ৩-৫২॥
তস্যাশ্শরীরমধিরুহ্য বিচেতনাযাঃ
ক্রীডন্তমম্বুরুহলোচনমীক্ষমাণাঃ ।
তস্থুস্সমুন্মিষিতবিস্মযনির্বিকারাঃ
নাসাধিরোপিতকরাঙ্গুলযো মুহূর্তম্ ॥ ৩-৫৩॥
নন্দঃ প্রমৃজ্য নযনে মুহুরশ্রুপূর্ণে
পুত্রং কৃতান্তমুখনির্গলিতং নিদধ্যৌ ।
দধ্যৌ চ তস্য নিতরামভিবৃদ্ধিকামঃ
তত্ত্বং পরং স হৃদযেন সমাহিতেন ॥ ৩-৫৪॥
শ্যামলঃ কমলপত্রলোচনো নীলকুন্তলভরঃ শুচিস্মিতঃ ।
ধ্যাযতো মনসি তস্য সন্নিধিং পুত্র এব বিদধে পুনঃ পুনঃ ॥ ৩-৫৫॥
ন ক্ষমং ভবতি পুত্রবাসনানিস্তরং হৃদযমচ্যুতস্মৃতৌ ।
ইত্যশেষদুরিতাপহারিণীরগ্রজন্মভিরকারযত্ ক্রিযাঃ ॥ ৩-৫৬॥
পূতনাচরিতভাবনাভবং দারুণং হৃদযদারণং পিতুঃ ।
শ্রীপতিঃ শমযতি স্ম বৈশসং ক্রীডিতৈরখিললোকমোহনৈঃ ॥ ৩-৫৭॥
স লোচনে কিঞ্চিদুপান্তঘূর্ণিতে নিধায মাতুর্বদনে শুচিস্মিতঃ ।
পযোধরং পাণিযুগাবলম্বিতং মনশ্চ তস্যা মধুসূদনঃ পপৌ ॥ ৩-৫৮॥
পাণিজানুপরিচঙ্ক্রমশ্রমস্বেদবিন্দুমধুরং মুখং বহন্ ।
ধূসরেণ বপুষা জনার্দনো গোকুলং নিখিলমন্বরঞ্জযত্ ॥ ৩-৫৯॥
পরিভ্রমন্তং ভুবি পাণিজানুনা গবামধস্তাত্প্রবিশন্তমেকদা ।
সুতং যশোদা গৃহকৃত্যতত্পরা ববন্ধ পাশেন বলাদুলূখলে ॥ ৩-৬০॥
জনো হি যঃ কর্ম করোতি যাদৃশং স সর্বথা তাদৃশমশ্নুতে ফলম্ ।
বলিঃ পুরাঽবধ্যত যেন দানবঃ স লোকনাথোঽপি তদাপ বন্ধনম্ ॥ ৩-৬১॥
নিখিলভুবনমুক্তিদে মুরারৌ ভগবতি গাঢমুলূখলে নিবদ্ধে ।
পরিশিথিলসমাধিরাবিরাসীন্মনসি মহামুনিমণ্ডলস্য হাসঃ ॥ ৩-৬২॥
নিষীদ লোলেতি নিবধ্য সস্মিতং চকার কার্যাণি চকোরলোচনা ।
অনাদরেণ ভ্রমযন্নুলূখলং বিনির্যযৌ বিশ্বপতিঃ স্বমন্দিরাত্ ॥ ৩-৬৩॥
উপেযিবাংসৌ ককুভদ্রুমাত্মতাং মহীযসা নারদশাপতেজসা ।
অতিষ্ঠতামধ্বনি কৈটভদ্বিষঃ কুবেরপুত্রৌ তরসৈব রিঙ্খতঃ ॥ ৩-৬৪॥
স সন্নিকৃষ্য স্থিতযোঃ পরস্পরং মহীরুহোর্মধ্যপথেন নিস্সরন্ ।
গতেন তির্যক্ত্বমুলূখলেন তৌ বভঞ্জ দামোদরগন্ধবারণঃ ॥ ৩-৬৫॥
প্রপদ্য দিব্যং বপুরম্বরস্থিতৌ বিমুক্তশাপৌ ধনদাত্মজাবুভৌ ।
প্রণম্য ভক্ত্যা পুরুষং পুরাতনং মুদান্বিতৌ জগ্মতুরন্তিকং পিতুঃ ॥ ৩-৬৬॥
নন্দাদযঃ সপদি গোকুলবাসিনস্তে
তদ্ভঙ্গজন্ম সুমহদ্ধ্বনিতং নিশম্য ।
অভ্যেত্য ভগ্নপতিতৌ ককুভদ্রুমৌ তৌ
তত্রাক্ষতং চ দদৃশুস্সরসীরুহাক্ষং ॥ ৩-৬৭॥
নন্দঃ সমীক্ষ্য দুরিতানি বহূনি সদ্ভ্যঃ
দত্বা গবামযুতমাত্মসুতাভিবৃদ্ধ্যৈ ।
সম্মন্ত্র্য বন্ধুভিরপাস্য পদং তদাশু
বৃন্দাবনং প্রতি যযৌ শকটৈরসঙ্খ্যৈঃ ॥ ৩-৬৮॥
গত্বা স গোকুলপতির্মনসোঽনুকূলে
কূলে কলিন্দদুহিতুর্নিদধে পদানি ।
রেমে চ তত্র পুরুহূতপদাভিরামে
লীলাযিতানি তনযস্য নিরীক্ষ্যমাণঃ ॥ ৩-৬৯॥
দধিনির্মথনে নিরুদ্যমা সা নবনীতশ্রপণে গবাং চ দোহে ।
সুতকেলিহৃতেক্ষণা যশোদা ক্ষণকল্পানি নিনায বাসরাণি ॥ ৩-৭০॥
অনুযাতি জিঘৃক্ষযেব নন্দে তরসা রিঙ্খণতত্পরস্য বিষ্ণোঃ ।
ললিতালকবেল্লিতানি রেজুর্মুখমাত্রেণ মুহুর্নিবর্তিতানি ॥ ৩-৭১॥
অন্তরা বিহতিমদ্ভিরুত্থিতৈরস্ফুটাক্ষরপদাভিরুক্তিভিঃ ।
ভঙ্গুরৈশ্চ পরিরম্ভণোদ্যমৈর্গোকুলং নিখিলমন্বরঞ্জযত্ ॥ ৩-৭২॥
পশ্য মাতুলমিতি প্রদর্শিতং যামিনীষু গগনে যশোদযা ।
আজুহাব ললিতেন পাণিনা শীতভানুমরবিন্দলোচনঃ ॥ ৩-৭৩॥
আত্মনঃ প্রতিকৃতিং বিলোকযন্ মাতৃহস্তমণিদর্পণোদরে ।
এহি মিত্র কিমিহেতি কৌতুকাদ্ব্যাজহার শতপত্রলোচনঃ ॥ ৩-৭৪॥
গৌরবং কথমিযং সহেত মে মেদিনীতি কৃপযেব চিন্তযন্ ।
মাধবঃ পতনভীতিমুদ্বহন্ মন্দমেব নিদধে পদাবলিং ॥ ৩-৭৫॥
দেবো নিশাসু হরিরঙ্কগতো জনন্যাঃ
শৃণ্বন্ কথা মধুমুচো মহতাঽঽদরেণ ।
মন্দং তদীযকরপল্লবতাডিতোরুঃ
সুষ্বাপ কুড্মলিতলোচনপুণ্ডরীকঃ ॥ ৩-৭৬॥
কৌতুকেন পিতুরগ্রতো হরের্ধাবতস্খলনমীক্ষমাণযা ।
মোদনিঘ্নমনসা সলজ্জযা ন স্থিতং ন চলিতং যশোদযা ॥ ৩-৭৭॥
মুখডিণ্ডিমবাদিনা পরীতো মধুজিত্ কৌতুকিনা সুহৃদ্গণেন ।
অধিরোপিতবারণেন্দ্রভাবো ললিতাভির্গতিভির্গৃহেষু রেমে ॥ ৩-৭৮॥
অথাভিবৃদ্ধিং প্রতিপদ্যমানো দধ্যাদিষু প্রীতিমুবাহ শৌরিঃ ।
তত্তত্ প্রদানেন বশে বিধাতুমারেভিরে গোকুলযোষিতস্তম্ ॥ ৩-৭৯॥
কুরুষ্ব নৃত্তং নবনীতমূল্যং কৃষ্ণেতি সাভ্যর্থনমূচিষীণাম্ ।
ব্রজাঙ্গনানাং স পুরস্সলীলমুদঞ্চযামাস পদারবিন্দম্ ॥ ৩-৮০॥
তাসাং মনঃপ্রীতিবিধানদক্ষে তথা ক্ষণং তস্থুষি শার্ঙ্গপাণৌ ।
একাঙ্ঘ্রিসংস্পর্শবিযোগমাত্রাদধন্যমাত্মানমমন্যতোর্বী ॥ ৩-৮১॥
উদঞ্চিতং তস্য বিলোক্য পাদং বেধা পুনর্বিক্রমশঙ্কিচেতাঃ ।
কমণ্ডলুং পাণিতলেন গৃহ্ণন্নভ্যুদ্যতোঽভূদবনেজনায ॥ ৩-৮২॥
নৃত্তামৃতং গোকুলযোষিতস্তত্ কৃষ্ণস্য নেত্রাঞ্জলিভিঃ পিবন্ত্যঃ ।
প্রীতিপ্রকর্ষস্তিমিতৈর্মনোভিরালেখ্যযোষিত্প্রতিমা বভূবুঃ ॥ ৩-৮৩॥
বিদুর্ন তদ্দর্শনপারবশ্যাদ্দাতুং করস্থং নবনীতমেকাঃ ।
বিস্রস্য ভূমৌ পতিতং তদন্যাঃ ন মেনিরে পাণিসরোরুহেভ্যঃ ॥ ৩-৮৪॥
অজস্রমেবং ভবনেষু তাসাং বভ্রাম কৃষ্ণো নবনীতভিক্ষাম্ ।
পুরা কিলান্যৈরনিবর্তনীযা নিবর্তিতা যেন হরস্য ভিক্ষা ॥ ৩-৮৫॥
ধিগ্যাচনাং চৌর্যভবস্য ভূযানস্ত্যংহসো নির্হরণাভ্যুপাযঃ ।
মত্বেতি নূনং নবনীতচৌর্যে মধোর্নিহন্তা মতিমাববন্ধ ॥ ৩-৮৬॥
নির্বাপ্য দীপং মুখমারুতেন হৈযঙ্গবীনং নিশি হর্তুমিচ্ছন্ ।
কৃষ্ণঃ কটীভূষণরত্নভাসা বিহন্যমানো বিষসাদ ভূযঃ ॥ ৩-৮৭॥
নিপীডযন্নগ্রপদেন পৃথ্বীমুন্নম্য দেহং ভৃশমূর্ধ্ববাহুঃ ।
পযোঘটস্পর্শনমশ্নুবানস্ত্রিবিক্রমোঽভূত্ পরিহাসপাত্রম্ ॥ ৩-৮৮॥
নিযমিতশ্বসিতো নিভৃতৈঃ পদৈর্নিশি কথঞ্চন গর্ভগৃহং গতঃ ।
স তু ভযাদসমাপ্তমনোরথো নিববৃতে নবনীতহরো হরিঃ ॥ ৩-৮৯॥
হর্তুং হরের্ব্যবসিতস্য ঘনে নিশীথে
ভূষারবশ্রুতিভযাদ্ব্রজতোঽতিমন্দম্ ।
অন্তর্গৃহস্য নবনীতবতঃ প্রবেশাত্
প্রাগেব হন্ত পথি সা রজনী বিভাতা ॥ ৩-৯০॥
গোপীসমাগমভিযা চ তৃষা চ গুর্ব্যা
পাতুং বিহাতুমপি গোপগৃহেষ্বজানন্ ।
আদ্বারমাদধিঘটং চ গতাগতানি
কুর্বন্ সরোজনযনঃ শ্রমমেব লেভে ॥ ৩-৯১॥
ভিত্তিষু প্রতিশরীরদর্শনাত্ শঙ্কিতঃ স নবনীতনিঃস্পৃহঃ ।
কিঞ্চিদন্যদিব তত্র মার্গযন্নির্জগাম মণিমন্দিরোদরাত্ ॥ ৩-৯২॥
জিহীর্ষুরন্তর্ভবনেষু গোরসং দিনান্যনৈষীত্তদুপাযচিন্তযা ।
স জাগরূকশ্চ নিনায যামিনীং মনোহরাভির্হরণপ্রবৃত্তিভিঃ ॥ ৩-৯৩॥
দৃষ্টেঽপি তত্সবিধসঞ্চরণে স তত্র
বক্তুং নিমিত্তমুচিতং কৃতনিশ্চযস্সন্ ।
অভ্যর্ণ এব নিদধে দধিভাজনস্য
লীলাযিতোপকরণানি নিজানি শৌরিঃ ॥ ৩-৯৪॥
বহন্ গৃহীতো নবনীতমচ্যুতো ভযেন পারিপ্লবনেত্রপঙ্কজঃ ।
পদা লিখন্ ভূমিমবাঙ্মুখস্থিতো জহার চেতোঽপি চ গোপযোষিতাম্ ॥ ৩-৯৫॥
শপে পিতৃভ্যামিত ঊর্ধ্বমেবং নাহং বিধাস্যে নবনীতচৌর্যম্ ।
বিনিঃশ্বসন্নিত্যভিধায কৃষ্ণো জহার মাতুশ্চ পিতুশ্চ চেতঃ ॥ ৩-৯৬॥
এহি সদ্ম তনযেতি সাদরং যাচিতোঽপি স মুহুর্যশোদযা ।
আননেন নবনীতগন্ঘিনা নাজগাম বিহরন্নিবাচ্যুতঃ ॥ ৩-৯৭॥
হৃতং নবং মে নবনীতমালযাত্ হৃতং ঘৃতং মে দধি মে হৃতং নিশি ।
ইতি প্রভাতে বচনানি যোষিতামুবাহ শ্রৃণ্বন্ ন মুখে স বিক্রিযাম্ ॥ ৩-৯৮॥
পুত্রং কুলস্য ভুবনস্য চ রক্ষিতার-
মভ্যর্থিতোঽপি ভগবানরবিন্দনাভঃ ।
ত্বাং মে দদৌ বিধিবশাদ্ভুবনৈকচোর-
মিত্যাহ কোপমভিনীয সুতং যশোদা ॥ ৩-৯৯॥
স সান্ত্বনেন প্রতিপাদনেন ভেদেন তীব্রেণ চ তর্জনেন
নিবদ্ধ্য পৃষ্টোঽপি মুহুর্জনন্যা নাঙ্গীকরোতি স্ম হরিঃ স্বচৌর্যম্ ॥ ৩-১০০॥
সংরক্ষণায জগতামবতীর্য পৃথ্ব্যাং
গোপালসদ্মসু হরত্যখিলং মুকুন্দঃ ।
ইত্থং নিশম্য পরিহাসবচস্সুরাণাম্-
অন্তর্জহাস ভগবানরবিন্দনাভঃ ॥ ৩-১০১॥
কৃষ্ণস্য কেলিসমরেক্ষণকৌতুকেন
গোপীষু মুক্তভবনাসু বহিঃ স্থিতাসু ।
মিত্রৈঃ পরাজিত ইব দ্রুতমেত্য গেহং
বদ্ধ্বা কবাটমহরন্নবনীতমন্তঃ ॥ ৩-১০২॥
ত্রিভুবনমহনীযৈরভ্যুপাযৈরসঙ্খ্যৈঃ
নিখিলমিতি স মুষ্ণন্ গোকুলং নন্দসূনুঃ ।
অরমত সবযোভিস্তত্র গোপালপুত্রৈ-
রপর ইব শশাঙ্কঃ প্রাণিনাং প্রীতিহেতুঃ ॥ ৩-১০৩॥
ইতি সুকুমারকৃতৌ কৃষ্ণবিলাসকাব্যে তৃতীযঃ সর্গঃ ॥ ৩ ॥
চতুর্থঃ সর্গঃ
স রোহিণীসূনুনিবদ্ধরাগঃ সতাং শরণ্যস্তমসোঽপহর্তা ।
মনোহরো বাল ইবৌষধীশো দিনে দিনে পোষমিযায শৌরিঃ ॥ ৪-০১॥
ত্যক্ত্বা হরিঃ স্তৈন্যকৃতাপবাদং তচ্ছৈশবং প্রাপ্য দশান্তরং সঃ ।
মন্যে তদংহঃপরিমার্জনায গবাং পরিত্রাণসমুদ্যতোঽভূত্ ॥ ৪-০২॥
পুত্রে তথোদ্যোগিনি নন্দগোপো গোপালপুত্রাননুনীয সর্বান্ ।
ত্রাতুস্ত্রযাণামপি বিষ্টপানাং সংরক্ষণে তস্য সমাদিদেশ ॥ ৪-০৩॥
মাত্রা কৃতস্বস্ত্যযনঃ প্রভাতে পিত্রা পরিষ্বজ্য চিরং বিসৃষ্টঃ ।
সহৈব রামেণ সমগ্রহর্ষঃ বিনির্যযৌ বিশ্বপতির্বনায ॥ ৪-০৪॥
স প্রাতরাশী ব্যতিষক্তপাণির্যষ্টিং বহন্নংসবিষক্তশৃঙ্গঃ ।
বিমুচ্যতাং গৌরিতি সম্ভ্রমেণ গচ্ছন্ প্রতিদ্বারমবোচদুচ্চৈঃ ॥ ৪-০৫॥
নিশম্য তস্য ধ্বনিমূর্ধ্বকর্ণাঃ বিলূনপাশা ভৃশমুত্সুকিন্যঃ ।
বত্সানপি স্বাননবেক্ষ্য গাবঃ সসম্ভ্রমং নির্যযুরালযেভ্যঃ ॥ ৪-০৬॥
গত্বা পুরস্তাদ্গজরাজগামী গোষ্ঠং গরিষ্ঠো গুণমণ্ডলেন ।
আপূরযন্মিত্রগণাগমার্থং পিত্রোরভীষ্টেন সহৈব শৃঙ্গম্ ॥ ৪-০৭॥
নভস্স্পৃশা কর্ণপথং গতেন তেনৈব সংজ্ঞাগবলস্বনেন ।
আদায তত্তত্পরিবর্হজাতং সদ্যো গৃহেভ্যঃ সুহৃদো নিরীযুঃ ॥ ৪-০৮॥
গবাং খুরন্যাসসমুদ্ভবেন বিষাণসঙ্ঘট্টনজন্মনা চ ।
প্রসর্পতা দিক্ষু মহাস্বনেন ঘোষঃ ক্ষণং ঘোষমযো বভূব ॥ ৪-০৯॥
প্রধাবনৈরুত্প্লুতিভিস্সুদূরং মিথো বলাদ্গ্রাহবিমোচনৈশ্চ ।
সমাগতৈস্তত্র সমং সুহৃদ্ভির্বহুপ্রকারং বিজহার শৌরিঃ ॥ ৪-১০॥
পরেণ হর্ষেণ পুরাণপুংসঃ সঙ্ক্রীডমানস্য সমং সুহৃদ্ভিঃ ।
পবিত্রযামাস পদাম্বুজোত্থিতা করীষধূলিঃ ককুভাং মুখানি ॥ ৪-১১॥
মহর্ষযস্তত্র মহানুভাবাঃ গৃহীতরূপান্তরদুর্ন্নিরূপাঃ ।
ভবাগ্নিসন্তাপহরে মমজ্জুঃ পদোত্থিতে তস্য পরাগপূরে ॥ ৪-১২॥
প্রহর্ষমালোকযতাং জনানাং ক্রীডাভিরাপাদ্য মনোহরাভিঃ ।
উত্থাপযামাস স চীত্কৃতেন গোষ্ঠে হরির্গোসমজং শযানং ॥ ৪-১৩॥
তস্মিন্ গবাং পালনকৌতুকেন বনায নির্গছতি দৈত্যশত্রৌ ।
যযুঃ প্রিযাখ্যানচিকীর্ষযেব দিবাকৃতো দিগ্বলযং মযূখাঃ ॥ ৪-১৪॥
কূলদ্রুমাণাং কুসুমানি ধূন্বন্ কর্ষন্ পযশ্শীকরমণ্ডলানি ।
কৃষ্ণং কৃতানেকবিহারখিন্নং যান্তং সিষেবে যমুনাসমীরঃ ॥ ৪-১৫॥
পরস্য পুংসঃ পদপঙ্কজাভ্যাং প্রবেক্ষ্যতো গোকুলপালনায ।
চকার নীহারহরৈর্মযূখৈঃ প্রবেশযোগ্যানি বনানি ভানুঃ ॥ ৪-১৬॥
প্রেম্ণা পরিত্যক্তুমশক্নুবন্তং বদ্ধাঞ্জলিং বন্ধুজনং নিবার্য ।
রামং পুরস্কৃত্য সমিত্রবর্গঃ বিবেশ বিষ্ণুর্বিপিনান্তরাণি ॥ ৪-১৭॥
অরণ্যভূমীরবগাহমানং তমাতপক্লান্তমবেক্ষমাণঃ ।
পক্ষাতপত্রেণ পরিস্তৃতেন বিযত্যসেবিষ্ট বিহঙ্গরাজঃ ॥ ৪-১৮॥
মা গচ্ছ গঙ্গে যমুনে ক্ব যাসি কিং তত্র গোদাবরি ধাবসীতি ।
ন্যষেধি তত্তদ্ব্যপদেশপূর্বং মার্গচ্যুতং গোকুলমচ্যুতেন ॥ ৪-১৯॥
প্ররূঢসুস্নিগ্ধতৃণাঙ্কুরাসু ছাযাদ্রুমশ্যামলিতান্তরাসু ।
গবাং কুলং তত্সুলভোদকাসু প্রচারযামাস বনস্থলীষু ॥ ৪-২০॥
সাটোপমান্দোলিতলম্বসাস্নাঃ গাবশ্চরন্ত্যো বলমানবালাঃ ।
ত্রুট্যত্তৃণস্তোমচটত্কৃতিন্যঃ চক্রুঃ প্রিযং চেতসি চক্রপাণেঃ ॥ ৪-২১॥
হরিন্মণিশ্যামরুচীনি তত্র স্বৈরং চরন্তীষু তৃণানি গোষু ।
শৌরিঃ স্বযং ভুক্ত ইবাপ তৃপ্তিং তৃপ্যন্ত্যুদারাঃ পরতর্পণেন ॥ ৪-২২॥
সর্বাসু কণ্ডূযনলিপ্সযোচ্চৈরুন্নম্য কণ্ঠং দধতীষু গোষু ।
বালো হরির্বাহুসহস্রশূন্যং জন্মাত্মনো নিষ্ফলমেব মেনে ॥ ৪-২৩॥
পরিভ্রমদ্গোকুলমুগ্রকোপং সমুচ্চলদ্ধূলিরটদ্বিষাণম্ ।
স যুদ্ধমুক্ষ্ণাং মদনির্ভরাণাং প্রবিশ্য মধ্যং শমযাঞ্চকার ॥ ৪-২৪॥
শাখাকরাগ্রৈরবলম্ব্য পৃথ্বীং নিষেদুষঃ পুষ্পফলাবনম্রান্ ।
তত্র দ্রুমান্ সাদরমীক্ষমাণো জগাম তৃপ্তিং ন কদাঽপি শৌরিঃ ॥ ৪-২৫॥
অলক্ষ্যমূলান্যতিবিপ্রকর্ষাদ্ ঘোষানুমেযস্খলিতোদকানি ।
উত্তুঙ্গরোধস্তরুমণ্ডলানি নিম্নানি দৃষ্ট্বা নিতরাং স রেমে ॥ ৪-২৬॥
অতুচ্ছগুচ্ছস্তনভারনম্রাঃ লতাঃ প্রবালাধরলোভনীযাঃ ।
স তত্র বীক্ষ্য ভ্রমরালকাঢ্যাস্তামস্মরত্তামরসাধিবাসাম্ ॥ ৪-২৭॥
সমুত্সুকং সাগরকন্যকাযামাক্রষ্টুমন্তঃকরণং মুরারেঃ ।
সর্বস্য বেত্তা সরসাং স বাচং সঙ্কর্ষণস্সাদরমিত্যুবাচ ॥ ৪-২৮॥
অন্তস্সমীরভ্রমণপ্রসঙ্গাদুদীর্ণনাদেন গুহামুখেন ।
ভূযঃ প্রযুঙ্ক্তে পৃথিবীধরস্তে গোবর্ধনঃ স্বাগতমেষ শৌরে ॥ ৪-২৯॥
নিশম্য গোবর্ধননির্ঝরাণাং ধীরধ্বনিং কৃষ্ণশিখণ্ডিনোঽমী ।
মুদা ত্বদালোকনজাতযেব নৃত্যন্তি চক্রীকৃতবর্হভারাঃ ॥ ৪-৩০॥
পাদাবিমৌ সঞ্চরণায নালমত্রেতি মত্বা মৃগযূথমেতত্ ।
স্বলোচনাংশুস্তবকাপদেশান্নীলোত্পলৈর্ভূমিমিবাস্তৃণাতি ॥ ৪-৩১॥
বিকীর্য বিষ্বগ্বিপিনদ্রুমাণাং মধূনি পুষ্পস্তবকচ্যুতানি ।
অর্কাংশুতপ্তামনিলো ধরিত্রীং সঞ্চারযোগ্যাং ভবতো বিধত্তে ॥ ৪-৩২॥
ন ভীতিরন্তর্ন দৃশোশ্চলত্বং নাস্থা তৃণেনোত্সুকতাঽপি শাবে ।
রূপেণ দামোদর মোহিতাস্তে তিষ্ঠন্ত্যমী কাষ্ঠকৃতা ইবৈণাঃ ॥ ৪-৩৩॥
তেনেতি সন্দর্শিতমগ্রজেন মনোহরং তত্তদবেক্ষমাণঃ ।
গাশ্চারযন্ শাদ্বলিনীষু ভূষু রেমে রমাযা রমণঃ প্রকামম্ ॥ ৪-৩৪॥
তং তত্র দৃষ্ট্বা মহনীযরূপং শৌরিং শবর্যশ্চরিতার্থনেত্রাঃ ।
ফলোপহারৈরুপসৃত্য বন্যৈরবাদিষুঃ প্রশ্রযশোভি বাক্যম্ ॥ ৪-৩৫॥
ইতঃ পদং নঃ শরপাতমাত্রং যাযাস্সহানেন সুহৃদ্গণেন ।
অত্রাগমিষ্যন্তি কিরাতপুত্রাঃ গবামমূষাং পরিপালনায ॥ ৪-৩৬॥
ব্যাধাহৃতৈর্বারণকুম্ভগর্ভাত্ মুক্তাফলৈরামলকাভিরামৈঃ ।
প্রসাধনং ত্বাং ভুবনত্রযস্য প্রসাধযিষ্যন্তি কিরাতকন্যাঃ॥ ৪-৩৭॥
কন্যাঽস্তি কাচিচ্ছবরেশ্বরস্য যা নঃ কুলানামধিদেবতেব ।
তাং সর্বথা দাস্যতি তে স রাজা মহান্ত্যনর্ঘাণি চ যৌতকানি ॥ ৪-৩৮॥
ইত্যূচিষীণাং শবরাঙ্গনানামত্যাদরং চেতসি বীক্ষমাণঃ ।
কৃষ্ণঃ কৃপানিঘ্নমনাস্স বাচমিত্যাহ লজ্জামৃদুনা স্বনেন ॥ ৪-৩৯॥
পিত্রোরনুজ্ঞামধিগম্য ভদ্রাঃ সমীহিতং বঃ সকলং বিধাস্যে ।
মযি স্থিতে তিষ্ঠতি গোকুলং তদ্গচ্ছামি মা ভূত বিষাদবত্যঃ ॥ ৪-৪০॥
গতে পুলিন্দীরিতি সান্ত্বযিত্বা তদিষ্টভঙ্গ্ব্যথিতে মুকুন্দে ।
ফলাপচাযাদিষু নিস্পৃহাস্তাঃ শনৈর্যযুঃ পক্কণমেব খিন্নাঃ ॥ ৪-৪১॥
বিহৃত্য গর্ভেষু লতাগৃহাণাং নিপীয বারীণি চ পল্বলানাম্ ।
ফলানি চাস্বাদ্য মহীরুহাণাং বনানি ধন্যানি চকার শৌরিঃ ॥ ৪-৪২॥
অথাধিরূঢে গগনস্য মধ্যং দিবাকরে দুঃসহভানুজালে ।
ঘর্মাকুলং গোকুলমীক্ষমাণঃ হলাযুধঃ প্রাহ রথাঙ্গপাণিম্ ॥ ৪-৪৩॥
কিঞ্চিত্পরিম্লানলতাপ্রবালস্তৃণাঙ্কুরভ্রান্তকুরঙ্গযূথঃ ।
অহ্নঃ পরিত্যক্তজনপ্রচারঃ প্রবর্ততে মধ্যম এষ ভাগঃ ॥ ৪-৪৪॥
কুলানি বীক্ষস্ব বিহঙ্গমানাং পক্ষান্তরস্থাপিতশাবকানি ।
কঠোরমেনং গমযন্তি কালং নীডেষু নিদ্রালসলোচনানি ॥ ৪-৪৫॥
প্রাযঃ কঠোরাতপপীডযেব ছাযাঃ পরিত্যক্তবহির্বিহারাঃ ।
আলোকযাধ্বন্যজনেন সার্দ্ধমধ্যাসতে মূলমনোহকানাং ॥ ৪-৪৬॥
করৈরসহ্যৈরযমংশুমালী তপন্ মহীমুগ্র ইব ক্ষিতীশঃ ।
আশংসিতাপত্প্রসরঃ প্রজাভির্ধত্তে দশামদ্য বিগর্হণীযাম্ ॥ ৪-৪৭॥
বিহৃত্য কান্তারমহীষু বেগাদ্ব্রজন্নপঃ পুষ্করিণীষু পাতুম্ ।
মার্গে করীন্দ্রঃ করশীকরেণ প্রিযামসাবুক্ষতি তাপখিন্নাম্ ॥ ৪-৪৮॥
তপ্তানি ভাসা তপনস্য হংসাঃ বিহায বারীণি নখংপচানি ।
পত্রেষু বিন্যস্য পদানি মন্দং পদ্মাকরে সম্প্রতি পর্যটন্তি ॥ ৪-৪৯॥
নিগূঢমীনগ্রহণাভিসন্ধিং কৃছ্রেণ মুক্ত্বা কপটাসিকাং স্বাম্ ।
অমী বকোটাস্তপনাংশুতাপাত্তটীনিকুঞ্জং তরসা বিশন্তি ॥ ৪-৫০॥
তদেহি যামস্তরুষণ্ডমেতদ্ ঘর্মাকুলং গোকুলমানযামঃ ।
অত্রৈব বিশ্রম্য মুহূর্তমাত্রং ভূযোঽপি গাবঃ প্রচরন্ত্বরণ্যে ॥ ৪-৫১॥
ইতীরিতং তত্সমযানুরূপং বাক্যং সমাকর্ণ্য হলাযুধস্য ।
আর্যো যথাজ্ঞাপযতীতি কৃষ্ণস্তং রামমুক্ত্বা তরুষণ্ডমাপ ॥ ৪-৫২॥
অলব্ধমার্তাণ্ডকরপ্রবেশমারামকল্পং তরুষণ্ডমেত্য ।
আনেতুকামঃ স গবাং কুলং তদাসজ্জযামাস মুখেন বেণুম্ ॥ ৪-৫৩॥
সলীলমীষত্পরিবৃত্তপাদং সবিভ্রমোদঞ্চিতসব্যনেত্রং ।
কৃষ্ণস্য বংশার্পিতপাটলোষ্ঠং বীক্ষ্য স্থিতং বিস্মযমাপ লোকঃ ॥ ৪-৫৪॥
তত্র স্থিতং তামরসাযতাক্ষং তাপিঞ্ছবর্ণং শিখিপিঞ্ছচূডং ।
তমেব পশ্যন্ননিমেষতাযাঃ ফলং প্রপেদে সুরসিদ্ধসঙ্ঘঃ ॥ ৪-৫৫॥
স্থিতস্ত্রিভঙ্গ্যা বিবরেষু বেণোর্ব্যাপারযন্নঙ্গুলিপল্লবানি ।
জগত্ত্রযীমোহবিধানদক্ষমুত্থাপযামাস স নাদমুচ্চৈঃ ॥ ৪-৫৬॥
অথোত্থিতানন্দনিমীলিতাক্ষ্যঃ বিলূনদূর্বাঙ্কুরলাঞ্ছিতাস্যাঃ ।
গাবস্তদভ্যাশমুপেত্য তস্থুঃ নিস্পন্দদেহা নিভৃতৈঃ শ্রবোভিঃ ॥ ৪-৫৭॥
নৈসর্গিকং বৈরমপত্যসঙ্গস্তৃষ্ণা বুভুক্ষা কুসুমাযুধশ্চ ।
তদ্বেণুনাদশ্রুতিতত্পরাণাং নালং বিধাতুং বিকৃতিং তিরশ্চাম্ ॥ ৪-৫৮॥
তস্মিন্ মনোহারিণি চক্রপাণের্বনান্তরে মূর্ছতি বংশনাদে ।
বিধীযমানং পরিহৃত্য কর্ম সর্বেঽপি সত্বা লিখিতা ইবাসন্ ॥ ৪-৫৯॥
প্রবৃত্তমাত্রৌ বনপদ্মিনীষু দাতুং গৃহীতুং চ মৃণালভঙ্গম্ ।
চক্রাহ্বযস্তদ্গৃহমেধিনী চ প্রসার্য চঞ্চূ পরমাসিষাতাম্ ॥ ৪-৬০॥
উপাবিশন্নুজ্ঝিতচাপলানি স্বজানুবিন্যস্তকরাননানি ।
নিষ্পন্দদৃষ্টীনি বনদ্রুমাণাং শাখাসু শাখামৃগমণ্ডলানি ॥ ৪-৬১॥
পদ্ভ্যামবষ্টভ্য মহীমুভাভ্যাং সদ্যস্সমুত্তম্ভিতপূর্বকাযঃ ।
সিংহঃ করীন্দ্রাক্রমণে প্রবৃত্তস্তস্থৌ তথা কৃত্রিমসিংহকল্পঃ ॥ ৪-৬২॥
সিদ্ধাঃ কলত্রাণি লতাগৃহেষু সমুদ্যতাঃ পাযযিতুং মধূনি ।
করদ্বযোদঞ্চিতরত্নপাত্রাঃ নিষেদুরালেখ্যমিব প্রপন্নাঃ ॥ ৪-৬৩॥
তদ্বংশনালাচ্চ্যুতমচ্যুতস্য গেযামৃতং সাধু নিষেব্য বৃক্ষাঃ ।
চিরং জরাজর্জরিতত্বচোঽপি বালা ইবাসন্নবপল্লবাঢ্যাঃ ॥ ৪-৬৪॥
নাদেন বেণোর্বিবশীকৃতানাং বিদ্যাধরাণাং গলিতাঃ করেভ্যঃ ।
গতির্ভবাস্মাকমপীতি নূনং বীণা নিপেতুর্মধুবিদ্বিষোঽগ্রে ॥ ৪-৬৫॥
স্ববেণুনাদেন স জীবলোকমিত্থং পরানন্দমযং বিধায ।
প্রভুর্ব্যরংসীদমরাশ্চ সর্বে সুপ্তোত্থিতানাং স্থিতিরন্বভূবন্ ॥ ৪-৬৬॥
প্রত্যাগতে চেতসি তে বিদিত্বা প্রভ্রশ্য হস্তাত্ পতিতা বিপঞ্চীঃ ।
পুনর্ন্ন চক্রুঃ প্রতিপন্নলজ্জাঃ বিদ্যাধরাস্তদ্গ্রহণাভিলাষম্ ॥ ৪-৬৭॥
মধুব্রতানাং ধ্বনিভির্মনোজ্ঞৈর্বাচালযন্তী বলযং দিশানাম্ ।
প্রসূনবৃষ্টিঃ সুরসিদ্ধমুক্তা পপাত মৌলৌ পরমস্য পুংসঃ ॥ ৪-৬৮॥
অবর্ষি কেনাযমদৃষ্টপূর্বঃ প্রসূনরাশিস্তব মূর্ধনীতি ।
পৃষ্টো বিহস্যাহ বিভুস্সহাযান্ জ্ঞানং ভবদ্ভোঽপি কথং মমেতি ॥ ৪-৬৯॥
বিষহ্যতাং যাতি বিবস্বদংশৌ বিশ্রান্তমুত্থাপ্য গবাং স পুঞ্জম্ ।
ভূযস্তৃণাশ্যামলভূতলেষু প্রারব্ধ সঞ্চারযিতুং বনেষু ॥ ৪-৭০॥
ততঃ পরিক্ষীণসহস্রভানোরশাম্যদূষ্মা দিবসস্য তীব্রঃ ।
যথা বিনাশে ধনসঞ্চযস্য মহাবলেপো ধনিনো জনস্য ॥ ৪-৭১॥
প্রভাকরে পাটলভাসি দূরং দিশং প্রতীচীমবগাহমানে ।
আলোক্য রামঃ পরিণামমহ্নো দামোদরং সাদরমিত্যুবাচ ॥ ৪-৭২॥
আবির্ভবন্মন্দমরুত্প্রচারা শান্তাতপা নির্বৃতসর্বসত্বা ।
বিরামবেলা দিবসস্য শৌরে প্রবর্ততে পশ্য মনোভিরামা ॥ ৪-৭৩॥
শিরোভিরূঢেন্ধনশাকমূলাঃ স্বযূথ্যমুচ্চৈঃস্বরমাহ্বযন্তঃ ।
বনেচরা বীক্ষ্য বিরামমহ্নঃ সমারভন্তে সহসৈব গন্তুম্ ॥ ৪-৭৪॥
শতং শতং ব্যোমনি বদ্ধমালাঃ শাত্কারবাচালবিলোলপক্ষাঃ ।
ব্রজন্তি লক্ষ্মীকৃতবাসবৃক্ষাঃ মনোজবাঃ পশ্য পতত্রিণোঽমী ॥ ৪-৭৫॥
ভুবঃ পরাগে বহুশো লুঠিত্বা প্রবিশ্য নীডং কলবিঙ্গযূথম্ ।
ধিনোত্যপত্যানি বুভুক্ষিতানি গ্রাসেন চঞ্চূপুটসঞ্চিতেন ॥ ৪-৭৬॥
তদেহি শৌরে তপনব্যপাযাত্প্রাগেব যামঃ পদমস্মদীযম্ ।
ইযং ক্ষতিঃ শ্বভ্রতটেন পশ্চাদ্দুঃসঞ্চরা লুব্ধকনির্মিতেন ॥ ৪-৭৭॥
শ্রুত্বেতি রামস্য গিরং মুরারিঃ অস্ত্বেবমিত্যাদরপূর্বমুক্ত্বা ।
সহ প্রতস্থে স চ মিত্রবর্গৈঃ প্রচণ্ডশ্রৃঙ্গধ্বনিপূরিতাশৈঃ ॥ ৪-৭৮॥
সহপ্রযাণায কৃতত্বরাণামূধোভরাদ্দূরবিলম্বিনীনাম্ ।
স তত্র তত্র প্রতিপাল্য তস্থৌ প্রীতো গবামাগমনং মুকুন্দঃ ॥ ৪-৭৯॥
সমাবৃতো গোপজনেন নন্দঃ গোপাঙ্গনাভিশ্চ বৃতা যশোদা ।
অতিষ্ঠতামধ্বনি লোচনাভ্যাং পুত্রাগতিপ্রেক্ষণসস্পৃহাভ্যাম্ ॥ ৪-৮০॥
চকার কর্ণেষু তযোঃ প্রমোদং দামোদরাপূরিতশৃঙ্গনাদঃ ।
দিবি প্রসর্পন্নথ পাংসুপূরঃ নেত্রেষু পীযূষমিবাভ্যবর্ষত্ ॥ ৪-৮১॥
তৌ ধূসরাঙ্গৌ রজসা কুমারৌ গত্বা স নন্দঃ পরিরভ্য গাঢম্ ।
আত্মানমানন্দসমুদ্রমগ্নং নালং সমুদ্ধর্তুমভূন্মুহূর্তম্ ॥ ৪-৮২॥
উত্পত্য ধাবদ্ভিরুদস্তশস্ত্রৈঃ ক্ষ্বেলারবক্ষোভিতদিগ্বিভাগৈঃ ।
আভীরবীরৈস্স বৃতঃ প্রপেদে ব্রজং সমাকর্ণিততূর্যঘোষম্ ॥ ৪-৮৩॥
চাটূক্তিভিঃ পার্শ্বচরানশেষান্ বিসৃজ্য গোপান্ সহিতস্স মিত্রৈঃ ।
বিবেশ কৃষ্ণো ভবনং দিনান্তে সমুজ্বলন্মঙ্গলদীপিকাভিঃ ॥ ৪-৮৪॥
কামং দিবা কর্ণপথং গতেন নীতাঃ প্রিযং বেণুরবেণ বিষ্ণোঃ ।
প্রতিপ্রিযং চক্রুরমুষ্য সাযং গাবঃ পযোদোহননিঃস্বনেন ॥ ৪-৮৫॥
অনুদিনমিতি কুর্বন্ পালনং গোকুলস্য
ক্ষণমিব দিবসানি ক্রীডযা যাপযন্ সঃ ।
অখিলমপি ধরিত্রীভারমভ্যুদ্ধরিষ্যন্
অরমত সহ শৌরিস্তত্র সঙ্কর্ষণেন ॥ ৪-৮৬॥
ইতি সুকুমারকৃতৌ কৃষ্ণবিলাসকাব্যে চতুর্থঃ সর্গঃ ॥ ৪ ॥
Encoded and proofread by PSA Easwaran psaeaswaran at gmail.com
Please send corrections to sanskrit@cheerful.com
Last updated ত্oday
http://sanskritdocuments.org
॥ শ্রীঃ ॥
প্রথমঃ সর্গঃ
অস্তি শ্রিযঃ সদ্ম সুমেরুনামা সমস্তকল্যাণনিধির্গিরীন্দ্রঃ ।
তিষ্ঠন্নিদং বিশ্বমনুপ্রবিশ্য স্বেনাত্মনা বিষ্ণুরিবোর্জিতেন ॥ ১-০১॥
মিথস্তিরোভাববিলোকনাভ্যাং সঙ্ক্রীডমানাবিব বালকৌ দ্বৌ ।
পার্শ্বেষু যস্যাশু পরিভ্রমন্তৌ চন্দ্রাংশুমন্তৌ নযতো দিনানি ॥ ১-০২॥
উচ্চৈশ্শিখঃ কাঞ্চনগৌরবর্ণস্তমো নিগৃহ্ণন্মহসা নিজেন ।
দীপস্ত্রযাণামিব বিষ্টপানাং যো ভাতি পর্যন্তচরত্পতঙ্গঃ ॥ ১-০৩॥
যস্যা পতিত্বে বিহিতাভিলাষঃ করোতি তীব্রাণি তপাংসি লোকঃ ।
বিভর্তি রত্নাকরমেখলাং তামঙ্কেন পুত্রীমিব যো ধরিত্রীম্ ॥ ১-০৪॥
মহান্তি দানানি মখানুদগ্রান্ পরাঞ্চি পানাশনযোস্তপাংসি ।
শরীরিণঃ শান্তমলৈর্মনোভিঃ কুর্বন্তি যচ্ছৃঙ্গনিবাসকামাঃ ॥ ১-০৫॥
সুরা যুগান্তেষু সহ প্রিযাভির্ন্নিষেদিবাংসো যদধিত্যকাসু ।
উদন্বতামৈক্যমুপাগতানাং পশ্যন্তি কল্লোলশতপ্রচারান্ ॥ ১-০৬॥
পুষ্পাণি শয্যাস্সুরপাদপানাং ক্রীডাগৃহাঃ কাঞ্চনগহ্বরাণি ।
ভবন্তি চ স্বর্গবিলাসিনীনাং রত্নাঙ্কুরা যত্র রতিপ্রদীপাঃ ॥ ১-০৭॥
স্বর্গৌকসস্স্বর্ণমহীষু পীতাঃ শ্বেতত্বিষো রূপ্যমযীষু ভূষু ।
নীলাশ্চ নীলোপলমেদিনীষু জ্ঞাতুং মিথো যত্র ন শক্নুবন্তি ॥ ১-০৮॥
দরীগৃহোত্সঙ্গগতেরনূরোঃ কশাভিঘাতধ্বনিভিঃ সকম্পাঃ ।
সদ্যঃ প্রিযানুজ্ঝিতমানদোষাঃ সুরাঙ্গনা যত্র পরিষ্বজন্তে ॥ ১-০৯॥
নেতুং ত্রপানম্রমুখীরনীশাঃ স্ফুটানি যত্স্বর্ণগুহান্তরাণি ।
সিদ্ধাঃ প্রযত্নেন বিনা নবোঢাঃ নযন্তি নীলোপলগহ্বরাণি ॥ ১-১০॥
যত্রোদ্যতানাং কুসুমাপচাযে কান্তাসু কল্পদ্রুমবাটিকাসু ।
বিভান্তি সুত্রামবিলাসিনীনাং পদানি লাক্ষারসপাটলানি ॥ ১-১১॥
পযোদমার্গব্যতিলঙ্ঘিনীষু হংসাঃ শিরঃপুষ্করিণীষু যস্য ।
বর্ষাগমেঽপ্যশ্রুতমেঘনাদাঃ ন কুর্বতে মানসদীর্ঘযাত্রাম্ ॥ ১-১২॥
ছন্নেষু যস্মিন্ কনকোজ্জ্বলাভিরামূলচূডং নবমঞ্জরীভিঃ ।
গন্ধেন বিজ্ঞায পতন্তি ভৃঙ্গাঃ শৃঙ্গান্তরারগ্বধপাদপেষু ॥ ১-১৩॥
মন্দাকিনী যচ্ছিখরে বহন্তী কুল্যাপথাভ্যন্তরসম্প্রবিষ্টা ।
বালেব তদ্রক্ষণসম্প্রবৃত্তা দিনে দিনে সিঞ্চতি পুষ্পবাটীম্ ॥ ১-১৪॥
শ্রিযাভিরামশ্শরণং সুরাণামলঙ্ঘনীযো মহতা মহিম্না ।
বিরাজমানো বনমালযা চ যঃ শার্ঙ্গধন্বানমনুপ্রযাতি ॥ ১-১৫॥
পুরা পুরাণাং ত্রিতযং দিধক্ষোরুমাপতেঃ কার্মুকতাং প্রপন্নঃ ।
মধ্যেন বজ্রাঙ্কুশমত্স্যচিহ্নং যোঽদ্যাপি তন্মুষ্টিপদং দধাতি ॥ ১-১৬॥
শৃঙ্গাগ্রভাজাং সুরসুন্দরীণাং মুখানি পশ্যন্নমলানি চন্দ্রঃ ।
নিগূহিতুং নূনমুরঃকলঙ্কং হ্রিযেব যত্সানুপথেন যাতি ॥ ১-১৭॥
মনোভিরামে শিখরে তদীযে সহোপবিষ্টং সুরসিদ্ধসঙ্ঘৈঃ ।
অবোচদাগত্য কৃতপ্রণামা কদাচিদুর্বী কমলাধিবাসম্ ॥ ১-১৮॥
পুমানিবাহং ভবতঃ পুরস্তাদ্ব্রবীমি কিঞ্চিত্ প্রতিপদ্য ধৈর্যম্ ।
পীডা মদীযা পরমত্র হেতুর্নির্ল্লজ্জতা নন্বখিলোপহাস্যা ॥ ১-১৯॥
সৃষ্টাস্ত্বযা দত্তবরাশ্চ দৈত্যাঃ ভারেণ মাং সম্প্রতি পীডযন্তি ।
বলে প্রমাণে চ ভবন্তি যেষাং নৈবোপমানং কুলভূভৃতোঽপি ॥ ১-২০॥
স্ববিক্রমোন্মূলিতরাজকানাং জযৈষিণামদ্য পরস্পরেণ ।
তেষাং রণক্ষোণিষু সিংহনাদৈর্নির্ঘাতঘোরৈর্গিরযঃ স্ফুটন্তি ॥ ১-২১॥
মুহুর্বলাদুন্নমযত্যহীন্দ্রে মদ্ভারভুগ্নং ফণচক্রবালম্।
মম প্রকম্পাশ্চলিতাব্ধিশৈলাঃ দিগ্দন্তিনো হন্ত কদর্থযন্তি ॥ ১-২২॥
আশামুখেষু ভ্রমতামজস্রং তেষাং চমূভিঃ পরিসর্পিণীভিঃ ।
তিরোহিতাং ভানুমতো মযূখাঃ ন ক্বাপি মাং সম্প্রতি সংস্পৃশন্তি ॥ ১-২৩॥
সন্নাস্মি দৈতেযভরেণ সাহং ফণীশ্বরস্সীদতি মদ্ভরেণ ।
তদ্ভারশীর্যন্নিজকর্পরস্য ধিক্ তামবস্থাং কমঠেশ্বরস্য ॥ ১-২৪॥
ভারাবসীদদ্ফণমণ্ডলস্য ফণীশ্বরস্যোপরি দুঃস্থিতাঽহম্ ।
আসন্নপাতাস্মি তটীব নদ্যাঃ প্রবাহবেগেন বিলুপ্তমূলা ॥ ১-২৫॥
নিবেদিতা দেব মযা দশেযমনুক্তিদোষো মযি নোপপাদ্যঃ ।
নিবেদ্যতে রক্ষ্যজনেন দুঃখং ততঃ পরস্তাত্ প্রভবঃ প্রমাণম্ ॥ ১-২৬॥
ইত্যুক্তবত্যামুচিতং পৃথিব্যাং চিন্তাবলেন স্তিমিতো মুহূর্তম্ ।
মুখানি পশ্যন্নমৃতাশনানাং দেবঃ প্রজানাং পতিরিত্যুবাচ ॥ ১-২৭॥
নাসত্যমেতদ্যদবোচদুর্বী স্বকর্মণঃ সাধু ফলং মযাঽঽপ্তম্ ।
মদ্বর্দ্ধিতা মামবমত্য দৈত্যাঃ বলাদুপঘ্নন্তি জগন্তি যত্তে ॥ ১-২৮॥
অতীতকার্যানুশযেন কিং স্যাদশেষবিদ্বজ্জনগর্হিতেন ।
সুরাঃ সমুন্মূলনমাশু তেষাং কর্তুং যতধ্বং জগতাং হিতায ॥ ১-২৯॥
সদ্যস্সমুত্তিষ্ঠত চিন্তযালং চিন্তা হি কার্যপ্রতিবন্ধহেতুঃ ।
যামঃ পৃথিব্যা সহ যত্র তত্র নারাযণো দানবকালরাত্রিঃ ॥ ১-৩০॥
অস্ত্বেবমিত্যাদরপূর্বমেব স স্বীকৃতোক্তিস্সুরসিদ্ধসঙ্ঘৈঃ ।
সরোজজন্মা সহ তৈঃ প্রতস্থে বিহাযসা বিশ্বপতেস্সকাশম্ ॥ ১-৩১॥
এলাপরিষ্বঙ্গলসত্তমালং বেলাধিরূঢস্খলদূর্মিমালম্ ।
দদর্শ ধাতা মনসোঽনুকূলং পযঃপযোধেরচিরেণ কূলম্ ॥ ১-৩২॥
দদর্শ চ ক্ষীরমযং সমুদ্রং কৈলাসশৃঙ্গোন্নতফেনকূটম্ ।
পুণ্যং পযঃকেলিসমুত্সুকানাং শ্রিযঃ সখীনামবগাহনেন ॥ ১-৩৩॥
আনন্দযামাস দিবৌকসস্তানাঘ্রাতশেষো মুনিমণ্ডলেন ।
প্রকামপুণ্যঃ পবনোপনীতো বৈকুণ্ঠবক্ষস্তুলসীসুগন্ধঃ ॥ ১-৩৪॥
গন্ধানুসারেণ বিসৃষ্টনেত্রৈর্হিরণ্যগর্ভপ্রমুখৈরমর্তৈঃ ।
নবার্ককল্পং দদৃশে মুরারের্বক্ষস্থলীকৌস্তুভরত্নধাম ॥ ১-৩৫॥
অপহ্নুতাশেষমনোবিকারং দিবিস্পৃশা তূর্যরবেণ মিশ্রম্ ।
আকর্ণ্য বৈকুণ্ঠবিলাসিনীনাং গীতধ্বনিং হর্ষমযাসিষুস্তে ॥ ১-৩৬॥
আসক্তিমালক্ষ্য বিনীতবেষা স্বমৌলিবিন্যস্তকরাস্সুরাস্তে ।
আলোকযামাসুরশেষনাথং সবিগ্রহং পুণ্যমিব প্রজানাম্ ॥ ১-৩৭॥
প্রবৃদ্ধহেমাভরণপ্রকাশং তমালনীলং জলধৌ শযানম্ ।
তটিল্লতাঢ্যং পযসোঽতিপানাদনীশমুদ্গন্তুমিবাম্বুবাহম্ ॥ ১-৩৮॥
তরঙ্গবাতেন পযঃপযোধেরাপূর্যমাণং করপাঞ্চজন্যম্ ।
বামেন তির্যগ্বলতা সলীলং সম্ভাবযন্তং মুহুরীক্ষণেন ॥ ১-৩৯॥
প্রতিক্ষণং প্রেমবিশেষজাভিস্সম্ভাবনাভিঃ কমলাসনাযাঃ ।
পুরাঽঽত্মনা কল্পিতমম্বুরাশেঃ প্রমার্জযন্তং মথনাবমানম্ ॥ ১-৪০॥
পর্যাযতঃ পাণিধৃতং সরোজং বিন্যস্য বিন্যস্য দৃশোঃ পদব্যাম্।
নিদ্রাং প্রবোধং চ মুহুর্ন্নযন্তীং পদ্মাসনাং সস্মিতমীক্ষমাণাম্ ॥ ১-৪১॥
স্বচ্ছস্বদেহপ্রতিবিম্বিতেন ফণাশ্মজালেন ফণীশ্বরস্য ।
ভাস্বত্ ফলস্তোমনিরন্তরস্য বহন্তমাভাং বটপাদপস্য ॥ ১-৪২॥
অজস্রমাসীনরথাঙ্গশঙ্খমতিপ্রসন্নং কমলাধিবাসম্ ।
সন্তাপবিচ্ছেদকরং প্রজানাং হ্রদং মহীযাংসমিবাভিগম্যম্ ॥ ১-৪৩॥
বক্তুং মিথো রাহুবিচেষ্টিতানি কর্ণদ্বযাভ্যর্ণমুপেযিবাংসৌ ।
অলব্ধকালাবিব ভানুচন্দ্রৌ রথাঙ্গশঙ্খৌ দধতং করাভ্যাম্ ॥ ১-৪৪॥
দ্বারস্থসেনাপতিচোদিতেন নিবারিতাঃ কঞ্চুকিমণ্ডলেন ।
সুরাঃ প্রমোদস্খলিতৈর্বচোভিঃ স্থিত্বৈব তে ব্যোমনি তুষ্টুবুস্তম্ ॥ ১-৪৫॥
নমঃ পরস্মৈ পুরুষায তুভ্যং গিরাং ধিযামপ্যপথি স্থিতায ।
অস্মান্ পুনস্ত্রাতুমুদগ্রমোহান্ কৃপাবলাত্ কল্পিতবিগ্রহায ॥ ১-৪৬॥
ভাগীরথী পাদকুশেশযাত্তে বিনির্গতা বিশ্বমিদং পুনীতে ।
কস্ত্বাং পুনর্ভাবযতো জনস্য শুদ্ধিং পরিচ্ছেত্তুমলং মনীষী ॥ ১-৪৭॥
অনন্তশক্তেরপবিক্রিযস্য তিস্রস্ত্রিলোকীশ্বর শক্তযস্তে ।
বিতন্বতে স্থাবরজঙ্গমানামুত্পাদনক্ষেমবিলোপনানি ॥ ১-৪৮॥
কটাক্ষমাত্রেণ ভবাম্বুরাশেঃ পারং পরং প্রাপযিতুস্ত্রিলোকীম্ ।
সকৃন্নমস্যা পরমাতরস্তে যত্নানুরূপং হি ফলং ক্রিযাণাম্ ॥ ১-৪৯॥
ত্বং জ্যোতিরাপস্ত্বমসি ত্বমুর্বী ত্বং ব্যোম বৈশ্বানরসারথিস্ত্বম্ ।
ত্বং জীববর্গঃ পরমস্ত্বমাত্মা যন্নাসি কিং নাম জগত্পতে তত্ ॥ ১-৫০॥
নবাভ্রবর্ণং নলিনাযতাক্ষং পীতাম্বরং হারকিরীটিনং ত্বাম্ ।
বযং তু সেবেমহি বীক্ষমাণাঃ সাযূজ্যমন্বিছতি কঃ সুখার্থী ॥ ১-৫১॥
অলং ন নির্দেষ্টুমিযত্তযা ত্বামশেষনাথ শ্রুতিরগ্রিমাপি ।
স এব সাক্ষাত্ক্রিযতে পুনস্ত্বমহো জিতং নঃ সুকৃতৈরনল্পৈঃ ॥ ১-৫২॥
তৃণায মত্বা নিখিলানি শার্ঙ্গিন্ পদানি বৈধেযমনোহরাণি ।
আবৃত্তিশূন্যং পরমং পদং তে বাঞ্ছন্তি বৈরাগ্যধনা মহান্তঃ ॥ ১-৫৩॥
ইতি স্তুতো দেবগণেন দেবো দযানিধির্দানবকালরাত্রিঃ ।
ন্যষীদদুত্থায ভরাবভুগ্নে ভুজঙ্গতল্পে ভুবনৈকনাথঃ ॥ ১-৫৪॥
বিষ্বক্ স বৈকুণ্ঠবিলাসিনীনাং সলীলমান্দোলিতচামরাণাম্ ।
নিবারযন্নগ্রকরারবিন্দৈঃ কোলাহলং কাঞ্চনকঙ্কণোত্থম্ ॥ ১-৫৫॥
প্রসাদবত্যা কমলাসনাদীন্ সুরানশেষাননুগৃহ্য দৃষ্ট্যা ।
উবাচ বাচং দশনাংশুপূরৈঃ সমেধযন্ দুগ্ধমযং পযোধিম্ ॥ ১-৫৬॥
অধিজ্যকোদণ্ডধরো নিষঙ্গী সন্নাহবান্ পাণিধৃতৈকবাণঃ ।
অযং সমাজো ভবতাং দ্বিষদ্ভ্যো ভযং সমাবেদযতি স্ফুটং মে ॥ ১-৫৭॥
অলং বিলম্বেন দিবৌকসস্তন্নিবেদ্যতামদ্য কুতো ভযং বঃ ।
অযং করো দুষ্টবধোত্সুকং মে সুদর্শনং ন ক্ষমতে নিরোদ্ধুম্ ॥ ১-৫৮॥
ইত্যূচিবাংসং পরমং পুমাংসং নত্বা শিরোভির্বহুশঃ সুরাস্তে ।
আরূঢহর্ষাতিশযাঃ স্বমর্থমারেভিরে বক্তুমশেষমেব ॥ ১-৫৯॥
নিবার্য সর্বানপি বক্তুকামান্ সেনাপতিস্তানমরান্ করেণ ।
সবিভ্রমপ্রেরিতযা পুরস্থং দৃষ্ট্যা সরোজাসনমাজুহাব ॥ ১-৬০॥
অথাগতস্তেন করে গৃহীত্বা নীতঃ প্রভোরন্তিকমব্জযোনিঃ ।
বক্তুং নিযুক্তঃ স কৃতপ্রণামো বিজ্ঞাপযামাস বিনীতবেষঃ ॥ ১-৬১॥
বযং ত্বযা দত্তবিভূতযোঽপি মোহাতিরেকাদভিমন্যমানাঃ ।
কৃচ্ছ্রে পুনস্ত্বাং শরণং ব্রজন্তঃ হা নিস্ত্রপাণাং প্রথমে ভবামঃ ॥ ১-৬২॥
অপারদুঃখার্ণবপোতপাত্রীং ত্বযা কৃপামুদ্বহতাতিগুর্বীম্ ।
কৃতঘ্নতাজন্মভুবামমীষামস্মাকমর্থে ন কিমন্বভাবি ॥ ১-৬৩॥
মনস্বিলোকস্য বিগর্হণীযে প্রতিগ্রহে বর্জযতা জুগুপ্সাম্ ।
পুরা পুরস্তাদ্বলিদানবস্য প্রসারিতো নাগ্রকরস্ত্বযা কিম্ ॥ ১-৬৪॥
দৈত্যাধিরাজেন হিরণ্যনাম্না পর্যাকুলং ত্রাতুমশেষলোকম্ ।
ইদং তু দিব্যং পরিহৃত্য রূপং ন ত্বং কিমাসীর্নরতির্যগাত্মা ॥ ১-৬৫॥
স্ববিক্রমাক্রান্তসুরাসুরস্য রক্ষঃপতের্নিগ্রহণাদরেণ ।
ভূত্বা সুতঃ পঙ্ক্তিরথস্য রাজ্ঞস্তাং তামবস্থাং ন কিমন্বভূস্ত্বম্ ॥ ১-৬৬॥
অনেকধা পালযিতারমেবং সম্প্রত্যপি ত্বাং শরণং প্রপন্নাঃ ।
সন্তাপহারী ননু চাতকানাং ভূযোঽপি ভূযোঽপি পযোদ এব ॥ ১-৬৭॥
বিশ্বং বিদন্নপ্যবিদন্নিব ত্বং নাথানুযুঙ্ক্ষে ভযহেতুমস্মান্ ।
অনুগ্রহস্যৈতদপি প্রভূণাং প্রাযঃ প্রকারান্তরমাশ্রিতেষু ॥ ১-৬৮॥
তপোভিরুগ্রৈর্ভগবন্ সুরাণামবধ্যভাবং দনুজাঃ প্রপন্নাঃ ।
পাতালমুর্বীং চ বিজিত্য দর্পাদুপক্রমং তে দিবমদ্য জেতুম্ ॥ ১-৬৯॥
ন জাতু শূন্যঃ কুলিশেন পাণির্বক্ষো ন মুক্তং মণিকঙ্কটেন ।
শক্রস্য দৈত্যাগতিশঙ্কিনোঽস্য নাসজ্জিতস্তিষ্ঠতি বারণেন্দ্রঃ ॥ ১-৭০॥
দণ্ডং যমাত্পাশমপামধীশাদ্গদাং কুবেরাত্কুলিশং মঘোনঃ ।
আদাতুকামঃ প্রহিণোতি দূতান্ কংসঃ স্বদোর্বিক্রমনির্জিতাশঃ ॥ ১-৭১॥
রণে বিনির্জিত্য বলং সুরাণাং পরাক্রমেণাপ্রতিমেন বীরঃ ।
ভোজেশ্বরঃ ক্রীডতি সাবরোধো মূলেষু সম্প্রত্যমরদ্রুমাণাম্ ॥ ১-৭২॥
ধনুর্ধরাধ্যাসিতবপ্রশীর্ষাঃ দ্বাঃপালনব্যগ্রসমগ্রযোধাঃ ।
প্রবীরনির্ভর্ত্সিতকান্দিশীকা স্থাতুং ন জানাতি পুরী সুরাণাম্ ॥ ১-৭৩॥
হাহেতি বিক্রোশদনাথমেতদ্বিশ্বং জগত্পীডযতঃ প্রকামম্ ।
ত্বযা বিনাঽন্যস্ত্রিষু বিষ্টপেষু ন কর্তুমীষ্টে নরকস্য ভঙ্গম্ ॥ ১-৭৪॥
প্রলম্বকেশিপ্রমুখাস্তথান্যে পরস্সহস্রং পরিযন্তি দৈত্যাঃ ।
নির্ঘাতকল্পৈর্নিজসিংহনাদৈর্বিদারযন্তো বিযদাহবেষু ॥ ১-৭৫॥
ষট্ সূনবস্সন্তি হিরণ্যনাম্নো দৈত্যস্য পাতালতলাধিবাসৈঃ ।
তৈর্ন্নঃ ক্রিযন্তে দুরিতানি যানি বক্তুং ন শক্যানি মুকুন্দ তানি ॥ ১-৭৬॥
তেষাং মহীধ্রপ্রতিমাকৃতীনাং ভারং মহী সোঢুমসাবশক্তা ।
অস্মান্ পুরস্কৃত্য ভবত্সকাশং প্রাপ্তা নিজক্লেশনিবেদনায ॥ ১-৭৭॥
তদেতদাবেদনমস্মদীযং শ্রুত্বা প্রমাণং প্রভুরিত্যুদীর্য ।
বিধির্ব্যরংসীদ্বিহিতপ্রণামঃ স চাপি গম্ভীরমুবাচ দেবঃ ॥ ১-৭৮॥
অলং বিষাদেন দিবৌকসো বঃ সমীহিতং হস্তগতং মনুধ্বম্ ।
ব্রতং হি মে কেবলমেতদেব সংরক্ষণং যচ্ছরণাগতানাম্ ॥ ১-৭৯॥
মামর্থযন্তে বসুদেবপত্ন্যৌ পত্নী চ নন্দস্য সুতং গুণাঢ্যম্ ।
অংশদ্বযেন ব্রতকর্শিতাঙ্গীস্তিস্রোঽপি তাঃ পুত্রবতীর্বিধাস্যে ॥ ১-৮০॥
ইযং চ লোকত্রিতযস্য মাতা মাযাভিধানা মম শক্তিরগ্র্যা ।
কার্যাণি বঃ কান্যপি কর্তুকামা জনিষ্যতে জন্মবিনাশশূন্যা ॥ ১-৮১॥
তদ্গচ্ছত স্বর্গমপেতখেদাঃ ন কালহানিঃ পরিশঙ্কনীযা ।
অনেন শার্ঙ্গেণ শপে শরৈর্বঃ সদ্যো মনঃশল্যমপাকরিষ্যে ॥ ১-৮২॥
ইতি তমমরলোকং সান্ত্বযিত্বা স দেবঃ
সপদি নবঘনাভঃ পদ্মনাভস্তিরোঽভূত্ ।
স চ বিহিতনমস্যস্তস্য বাচং প্রশংসন্
নিজপদমভিপেদে হর্ষপর্যাকুলাত্মা ॥ ১-৮৩॥
ইতি সুকুমারকৃতৌ কৃষ্ণবিলাসকাব্যে প্রথমস্সর্গঃ ॥ ১ ॥
দ্বিতীযঃ সর্গঃ
অথৈকদা পুত্রফলানি সম্যগ্ব্রতানি বাহ্যোপবনে চরন্তীম্ ।
রথেন কংসো বসুদেবযুক্তঃ স্বসারমালোকযিতুং জগাম ॥ ২-০১॥
স্ফুরত্প্রভাপল্লবিতাঙ্গযষ্টীং কথঞ্চিদূঢস্তনমঞ্জরীকাম্ ।
তত্রালকৈঃ ষট্/পদিনীমজানাত্ স তাং লতামধ্যগতাং চিরেণ ॥ ২-০২॥
সা সন্নতাঙ্গী নিযমাবসানে জ্যেষ্ঠায তস্মৈ বিদধে নমস্যাম্ ।
স চাশিষা তামনুগৃহ্য সাধ্বীং ভোজেশ্বরো বাক্যমিদং বভাষে ॥ ২-০৩॥
অদ্যাপি বালাসি সুতাননেকান্ প্রসোষ্যসে কিং ব্রতযাতনাভিঃ ।
পশ্যাধুনা পল্লবসূতিকালে কিং কল্পতে চূতলতা ফলায ॥ ২-০৪॥
কৃশাসি কামং বিরম প্রযাসান্মনোভিরামানুপভুঙ্ক্ষ্ব ভোগান্ ।
অঙ্গানি তে সন্নতগাত্রি দুঃখং মৃণালকল্পানি কথং সহেরন্ ॥ ২-০৫॥
তামেবমুক্ত্বা স তু সাভ্যনুজ্ঞাং রথং সমারোপ্য সহৈব পত্যা ।
প্রযাতুকামঃ পুরমন্তরিক্ষে শুশ্রাব বাচং শতধারকল্পাম্ ॥ ২-০৬॥
ত্বদন্তিকস্থা সহজাশমীযং প্রসোষ্যতে পুত্রমযং কৃশানুম্ ।
মরুত্সমিদ্ধস্স তু দুর্নিবারস্ত্বাং ভস্মসাত্ কংস করিষ্যতীতি ॥ ২-০৭॥
নিশম্য তদ্ভূতবচো নিকামং কংসস্স রোষাগমদুর্নিরীক্ষ্যঃ ।
কৃপাং পরিত্যজ্য কৃপাণপাণিঃ স্বসুর্বধায স্বযমুদ্যতোঽভূত্ ॥ ২-০৮॥
নৃশংসকৃত্যে নিতরাং প্রবৃত্তমুদগ্রকোপস্ফুরিতাধরোষ্ঠম্ ।
প্রসাদযন্নানকদুন্দুভিস্তমুবাচ ধীমানুপপত্তিযুক্তম্ ॥ ২-০৯॥
অলং তবানেন বধোদ্যমেন ত্বযা বিধেযো নৃপতে বিমর্শঃ ।
কিমেষ নাশ্রাবি বিচারশূন্যং ব্রজন্ত্যনর্থা ইতি সাধুবাদঃ ॥ ২-১০॥
ভযেন যুদ্ধেষু পুরন্দরাদীন্ সুরান্ পরাচস্ত্রপযা বিমুঞ্চন্ ।
মহীশ্বর স্ত্রীবধপাতকেঽস্মিন্ কথং তবোপক্রমতে কৃপাণঃ ॥ ২-১১॥
অনেন কিং বা তব জীবিতেন যদ্রক্ষণং স্যাত্ সহজাবধেন ।
গুণেন কেনাপি হি লব্ধনাম্নামপি স্বনাশাদযশো গরীযঃ ॥ ২-১২॥
প্রপদ্যমানস্য সদাভিবৃদ্ধিং দিবানিশং প্রীণযতশ্চ লোকান্ ।
ভবদ্যশশ্চন্দ্রমসোঽস্য মাভূন্নবঃ কলঙ্কো ভগিনীবধেন ॥ ২-১৩॥
স্বসুর্বধেনাস্য ভবেদকীর্তিস্তেন ত্যজেযুস্সুহৃদোঽপি ভীতাঃ ।
ইত্যেব নূনং ভুজনির্জিতৈস্তৈস্সুরৈঃ প্রযুক্তস্সুমহানুপাযঃ ॥ ২-১৪॥
কালেন তদ্দ্রক্ষ্যসি যন্মদুক্তং মা ভূত্তবাস্মিন্ বিষযেঽপি শঙ্কা ।
তথাপি চেতস্তব শঙ্কতে চেদাকর্ণ্যতাং তর্হ্যপরঃ প্রকারঃ ॥ ২-১৫॥
সর্বাণ্যপত্যানি বশে তবাহং জাতানি জাতানি সমর্পযিষ্যে ।
তন্নিগ্রহং বা তদনুগ্রহং বা বিচিন্ত্য কর্তাসি দশানুরূপম্ ॥ ২-১৬॥
কিং বুদ্ধিমান্দ্যেন নিজেন তস্য কিং ভাগধেযেন বরাঙ্গনাযাঃ ।
বলেন কিং বা ভবিতব্যতাযাস্তথেতি জগ্রাহ বচস্তদীযম্ ॥ ২-১৭॥
বধপ্রবৃত্তো বসুদেবমন্ত্রপ্রভাবসংস্তম্ভিতঘোরকর্মা ।
নিবৃত্য নিস্ত্রিংশমহাভুজঙ্গো মহীভৃতঃ কোশবিলং বিবেশ ॥ ২-১৮॥
সত্যা নু সা স্যাদশরীরিণী বাক্ সত্যং কিমেতদ্বসুদেববাক্যম্ ।
বিতর্কযন্নেবমুদস্তকেতুং পুরীং প্রপেদে মণিতোরণাঢ্যাম্ ॥ ২-১৯॥
আলোকনৈর্মৌলিষু ভূপতীনামাসজ্জযন্নঞ্জলিবন্ধনানি ।
স বৈমনস্যেন মুখস্থিতেন ভযাবহঃ স্বং ভবনং জগাম ॥ ২-২০॥
বিশঙ্কমানঃ স গৃহোপকণ্ঠে তৌ সদ্মনি ক্বাপি বিধায গুপ্তৌ ।
পরাক্রমাক্রান্তসমস্তলোকঃ পুরেব ভোগানযমন্বভুঙ্ক্ত ॥ ২-২১॥
মাযা হরেস্সাঽথ হিরণ্যপুত্রান্ যান্ দেবকীগর্ভগতানকার্ষীত্ ।
ভোজেশ্বরস্সত্বরমেত্য ভীত্যা তান্ জাতমাত্রানবধীত্ ক্রমেণ ॥ ২-২২॥
জগদ্বিভূত্যৈ পরমস্য পুংসঃ যো দেবকীগর্ভমবিক্ষদংশঃ ।
আকৃষ্য তস্মান্মুরবৈরিমাযা তং রোহিণীগর্ভগতং চকার ॥ ২-২৩॥
চকাস সপ্তচ্ছদপাণ্ডুরেণ সুতেন সা গর্ভতিরোহিতেন ।
বলাহকান্তর্হিতশীতভানোর্দিশো দশাং বৃত্রজিতঃ প্রপন্না ॥ ২-২৪॥
ততস্সমাহ্লাদনমীক্ষণানামসূত পুত্রং শরদিন্দুকল্পম্ ।
প্রকর্ষমাপন্নুদযেন যস্য সদ্যঃ সমুদ্রা ইব সত্ববন্তঃ ॥ ২-২৫॥
পত্যুস্সমাদিষ্টমিদং বিধায শেষং চিকীর্ষুস্সুরকার্যমার্যা ।
চরাচরাণাং জগতাং সবিত্রী সা শ্রদ্দধে জন্মভুবং যশোদাম্ ॥ ২-২৬॥
অথ প্রজানামভিবৃদ্ধিকামো দেবো দযাযাঃ কিল জন্মভূমিঃ ।
স্বজন্মনে জন্মবিনাশহেতুঃ প্রাপ্যস্সতাং প্রাপ স দেবকীং তাম্ ॥ ২-২৭॥
কৃশাবলগ্না কুচযোর্গরিম্ণা সা দেবকী সন্নতগাত্রযষ্টিঃ ।
জগত্ত্রযীপুণ্যকৃতাবলম্বা বভার গর্ভেণ জগন্নিবাসম্ ॥ ২-২৮॥
অন্তর্দধানা সরসীরুহাক্ষং স্বেনাবতারেণ ভুবং পুনানা ।
সা দেবকী সা চ কবেরকন্যা মিথোঽদধাতামুপমানভাবম্ ॥ ২-২৯॥
অলং নিবাসায ন যস্য বিশ্বং বসন্ স গর্ভে মুমুদে মুকুন্দঃ ।
পরোপকারপ্রভবং হি দুঃখং পুংসস্সুখাযৈব মহত্তরস্য ॥ ২-৩০॥
বহিঃস্ফুরন্ত্যা করপাঞ্চজন্যত্বিষেব বিষ্ণোরুদরস্থিতস্য ।
অধত্ত তস্যাস্তপনীযবর্ণা মধূকপুষ্পচ্ছবিমঙ্গযষ্টিঃ ॥ ২-৩১॥
বভার হারং কুচযোর্ন তন্বী ন পাদযোর্নূপুরমামুমোচ ।
দধৌ মণিং ভারভিযা ন মৌলৌ তদেব কৈবল্যমভূষযত্তাম্ ॥ ২-৩২॥
দৃশঃ প্রযত্নেন দধৌ তিরশ্চীরুবাচ মন্দং নিভৃতং জহাস ।
শনৈর্যযৌ দত্তকরা সখীভির্ভৃশং নিশশ্বাস চ তাবদেব ॥ ২-৩৩॥
সহৈব হর্ষেণ সুধাশনানাং সহৈব পুণ্যেন বসুন্ধরাযাঃ ।
ভযেন ভোজাধিপতেশ্চ দেবো সহৈব গর্ভে ববৃধে মুকুন্দঃ ॥ ২-৩৪॥
শিরোভিরূঢেন বনস্পতীনাং ফলোপহারেণ নিবেদিতর্দ্ধিঃ ।
প্রাবৃট্ সমাসাদিতসূতিকালাং তাং দেবকীং দ্রষ্টুমিবাজগাম ॥ ২-৩৫॥
অথৈকদেশা ইব বারিরাশেরুচ্চৈঃ পুরোমারুতবিপ্রকীর্ণাঃ ।
বৃতাস্তডিদ্বিদ্রুমবল্লরীভির্বিরেজিরে ব্যোমনি বারিবাহাঃ ॥ ২-৩৬॥
বলাহকব্রাতভবৈস্তমোভির্দিনেষু দুর্বোধপুরঃস্থিতেষু ।
ন কশ্চিদাসীদভিসারিকাণাং বিদ্যুত্প্রকাশেন বিনাঽন্তরাযঃ ॥ ২-৩৭॥
পযোদভস্ত্রান্তরনির্গতেন ঝাত্কারিণা চণ্ডসমীরণেন ।
বিযোগিনাং চেতসি মেঘকালঃ সন্ধুক্ষযামাস মনোভবাগ্নিম্ ॥ ২-৩৮॥
স্মরেণ লোকত্রিতযেশ্বরেণ সম্ভাবিতাজ্জীবিতনির্বিশেষম্ ।
ঋতোর্বসন্তাজ্জ্বলদাগমস্য জহার জাতির্নিখিলং নিকর্ষম্ ॥ ২-৩৯॥
বলাদ্গৃহীতা ইব বৈতসীভিঃ শাখাভিরারূঢমদা ইবোচ্চৈঃ ।
পরিস্খলন্ত্যো নিখিলাস্তটিন্যঃ জগ্মুর্জবাদুদ্ভটফেনহাসাঃ ॥ ২-৪০॥
উদারসৌরভ্যবশীকৃতানামন্বীযমানঃ পটলৈরলীনাম্ ।
অকল্পযত্ কেতকমাতরিশ্বা মনোভবস্যাপি মনোবিকারম্ ॥ ২-৪১॥
অত্যম্বুপানপ্রভবস্য কর্তুমন্তর্জডিম্নঃ প্রতিসংবিধানম্ ।
পপুস্তিরস্কারপদেন মেঘাঃ মযূখমালামরবিন্দবন্ধোঃ ॥ ২-৪২॥
ররাজ খর্জূরফলপ্রকাশং নবং পযঃ কাননপল্বলেষু ।
পযোদবৃন্দৈঃ পরিপীয মুক্তং প্রভাকরস্যেব মরীচিজালম্ ॥ ২-৪৩॥
মহীভৃতাং মূর্দ্ধসু দত্তপাদং বিলোক্য মিত্রং বিহতপ্রতাপম্ ।
মগ্নে জলে মর্তুমিবারবিন্দে মধুব্রতাশ্চুক্রুশুরন্তরিক্ষে ॥ ২-৪৪॥
নিষেব্য হংসা মধুরৈর্বচোভিঃ পদ্মাকরং লব্ধসমীহিতার্থাঃ ।
সদ্যো যযুস্তস্য বিপত্তিকালে জলাশযানাং প্রকৃতিঃ কিলৈষা ॥ ২-৪৫॥
প্ররূঢসস্যাঃ ফলমূলশাকৈর্নিরন্তরাঃ স্বাদুনবোদকাঢ্যাঃ ।
পল্লীজুষাং চেতসি পামরাণাং ধৃতিং পরামাদধিরে বনান্তাঃ ॥ ২-৪৬॥
সমুন্মিষন্তী গিরিমল্লিকানাং প্রসূনরাজিস্সুতরাং বিরেজে ।
মুক্ত্বা নভো মেঘবিমর্দভীত্যা নক্ষত্রমালেব গতা ধরিত্রীম্ ॥ ২-৪৭॥
ধারালজীমূতকৃতান্ধকারে তস্মিন্নপর্যন্তজডিম্নি কালে ।
অলক্ষ্যমাণঃ ক্বচিদংশুমালী দিবাঽপ্যুবাসেব তনূনপাতি ॥ ২-৪৮॥
ইতি প্রবৃত্তে সমযে ঘনানাং মাসে নভস্যে নিশি মধ্যমাযাম্ ।
গণে শুভাখ্যাযিনি চ গ্রহাণাং দেবক্যুবাহ প্রসবাভিমুখ্যম্ ॥ ২-৪৯॥
হরত্সু বাহ্যং ভুবনস্য তাপং প্রাবৃট্ প্রসূতেষু বলাহকেষু ।
অসূত তস্যান্তরতাপশান্ত্যৈ কৃষ্ণাম্বুবাহং কৃপযেব দেবী ॥ ২-৫০॥
দিশঃ প্রসেদুঃ সহ নিম্নগাভির্জহর্ষ লোকেন সহাম্বুরাশিঃ ।
জাতে মুকুন্দে মুমুচুশ্চ সদ্যঃ ভযেন দেবাঃ সহ পুষ্পবৃষ্টিম্ ॥ ২-৫১॥
মনোভিরামেণ মধুব্রতানাং নাদেন শংসন্নিব দিষ্টবৃদ্ধিম্ ।
চচার বাযুঃ সুমনোংঽশুকানি সম্প্রাপ্য সম্প্রাপ্য মহীরুহেভ্যঃ ॥ ২-৫২॥
ব্যজৃম্ভত প্রস্ফুটশঙ্খনাদঃ তারেণ গীতধ্বনিনা বিমিশ্রঃ ।
সমশ্নুবানঃ ককুভাং মুখানি দিবৌকসাং মঙ্গলতূর্যঘোষঃ ॥ ২-৫৩॥
ত্রপামপাস্যন্ বিনযং বিলুম্পন্ নীতিং নিগৃহ্ণন্ ভযমাশু ভঞ্জন্ ।
শরীরিণামচ্যুতজন্মজন্মা মোদো জজৃম্ভে মদনির্বিশেষঃ ॥ ২-৫৪॥
আষাঢিনং পাণিমুদস্য দূরং ব্রহ্মর্ষিলোকঃ পতদুত্তরীযঃ ।
ননর্ত পর্যাকুলপাদচারঃ প্রহস্যমানঃ সুরসুন্দরীভিঃ ॥ ২-৫৫॥
শৃঙ্গোজ্ঝিতৈঃ কুঙ্কুমবারিপূরৈরন্যোন্যমভ্যুক্ষণতত্পরাণাম্ ।
প্রমোদজন্মা দিবি সম্বভূব কোলাহলঃ কোঽপি সুধাশনানাম্ ॥ ২-৫৬॥
পিতৄংশ্চ পুত্রা পিতরশ্চ পুত্রান্ গুরূংশ্চ শিষ্যা গুরবশ্চ শিষ্যান্ ।
পতীংশ্চ দারাঃ পতযশ্চ দারান্ প্রমোদমত্তাস্সিষিচুঃ পযোভিঃ ॥ ২-৫৭॥
অসিঞ্চদম্ভোরুহযোনিরিন্দ্রং তং পঙ্কজাবাসমসিঞ্চদিন্দ্রঃ ।
অসিঞ্চতাং দ্বৌ বিবুধানশেষান্ সর্বে সুরাস্তৌ চ বলাদসিঞ্চন্ ॥ ২-৫৮॥
মিথঃ পযোভিঃ সিষিচুর্বিনেদুঃ ববল্গুরুচ্চিক্ষিপুরম্বরাণি ।
অন্যোন্যমংসেন সুদূরমূহুর্মত্তা ইব স্বর্গসদো বভূবুঃ ॥ ২-৫৯॥
ত্রিলোকনাথোদযসম্ভবেন মোদেন পর্যাকুলমানসানাম্ ।
গীতে চ নৃত্তে চ সুরাঙ্গনানাং বভূব তালস্খলিতং ন দোষঃ ॥ ২-৬০॥
শৃঙ্গোদকাস্ফালনরক্তনেত্রাঃ বিচ্ছিন্নহারাশ্চ্যুতকর্ণভূষাঃ ।
প্রহাসসীদধ্বনিভির্বচোভিঃ সমালপন্তো বিবুধা বিজহ্রুঃ ॥ ২-৬১॥
জাতে হরৌ দৈত্যবিমর্দনেন বিশ্বম্ভরাভারমপাচিকীর্ষৌ ।
মুনেঃ প্রহর্ষঃ কলহপ্রিযস্য জগত্প্রহর্ষশ্চ সমাবভূতাম্ ॥ ২-৬২॥
ইতি প্রহর্ষাকুলিতৈর্মনোভিঃ বিশৃঙ্খলং ক্রীডতি দেহিবর্গে ।
কংসস্সভৃত্যঃ প্রতিপদ্য মূর্ছাং নিদ্রাভিধানাং ন কিমপ্যবোধি ॥ ২-৬৩॥
শ্যামং চতুর্বাহুমুদারহারং কিরীটিনং কুণ্ডলদীপ্তগণ্ডম্ ।
পিতাঽপি মাতা চ বিলোক্য পুত্রমানন্দমগ্নৌ বিবশাবভূতাম্ ॥ ২-৬৪॥
নিযম্য হর্ষোদযপারবশ্যং তং দেবকীজানিরুবাচ বাচম্ ।
প্রসীদ ভীতোঽহমতীব কংসাদিদং তু রূপং প্রতিসংহরেতি ॥ ২-৬৫॥
তত্প্রেরিতস্তল্পগতং করাভ্যাং তমাদদে কল্পিতবালভাবম্ ।
তযোশ্শযানঃ করযোস্স তস্য প্রকামমপ্রীযত পদ্মনাভঃ ॥ ২-৬৬॥
অশেত যঃ প্রাগ্বটপত্রমধ্যে লোকানশেষানুদরে দধানঃ ।
বিনা তপোভিঃ কিমু তস্য সিধ্যেত্তত্পাণিযুগ্মে শযনং মুরারেঃ ॥ ২-৬৭॥
তমালনিলেন তমোভরেণ নিপীডিতাশাবলযে নিশীথে ।
আদায পঙ্কেরুহলোচনং তং সদ্যঃ স নির্গত্য গৃহাত্ প্রতস্থে ॥ ২-৬৮॥
নিবার্য বর্ষোদকমাত্মনৈব প্রকাশ্য মার্গং ফণরত্নভাসা ।
উপাযমুক্ত্বা বসুদেবকর্ণে শেষস্সিষেবে বহুধৈব বিষ্ণুম্ ॥ ২-৬৯॥
পুরাত্ স নির্গত্য পুমাংসমাদ্যং বহন্ বহন্তীং যমুনামপশ্যত্ ।
কূলঙ্কষৌঘাঽপি কলিন্দকন্যা তদীযগুল্ফদ্বযসোদকাঽভূত্ ॥ ২-৭০॥
উত্তীর্য তাং তত্তটসংশ্রিতানাং দাতুং করং বার্ষিকমাগতানাম্ ।
ব্রজৌকসাং নন্দপুরোগমানাং প্রীতো নিবেশং সহসা বিবেশ ॥ ২-৭১॥
প্রবিশ্য জানন্নিব নন্দগোপনিবেশনং সুপ্তশরীরিবর্গম্ ।
সুতাং প্রসূয প্রতিপন্ননিদ্রাং দদর্শ তদ্ধর্মবধূং যশোদাম্ ॥ ২-৭২॥
তং শাযযিত্বা শযনে তদীযে কন্যাং সমাদায নিপত্য গচ্ছন্ ।
শুশ্রাব পুত্রোদযহর্ষমূলং কোলাহলং গোপবধূজনানাম্ ॥ ২-৭৩॥
করেণ কন্যাং মনসা চ পুত্রং বহন্ মুহূর্তেন বিলঙ্ঘ্য মার্গম্ ।
বিশঙ্কমাবিশ্য গৃহং গৃহিণ্যাঃ নিধায বালাং শযনে স তস্থৌ ॥ ২-৭৪॥
সা চঞ্চরীকস্বনসন্নিভেন নাদেন লোকস্য মনো হরন্তী ।
রুরোদ কিঞ্চিদ্বিবৃতেন বালা স্ফুটত্পযোজাকৃতিনা মুখেন ॥ ২-৭৫॥
আকর্ণ্য বালধ্বনিমস্তনিদ্রাঃ প্রধাব্য রক্ষাপুরুষা জবেন ।
প্রবোধ্য যত্নেন পতিং পৃথিব্যাঃ শশংসুরস্মৈ ভগিনীং প্রসূতাম্ ॥ ২-৭৬॥
সদ্যঃ সমাগত্য স তত্র দৃষ্ট্বা বালামমর্ষেণ বিমর্শশূন্যঃ ।
স্বস্রা নিষিদ্ধোঽপি বধাভিলাষী জগ্রাহ তস্যাশ্চরণৌ করাভ্যাম্ ॥ ২-৭৭॥
উদস্য দূরং তরসা করেণ চিক্ষেপ তাং দুর্মতিরশ্মপৃষ্ঠে ।
মহীমযাতৈব দিবি স্থিতা সা জজ্বাল ধাম্না জগতাং সবিত্রী ॥ ২-৭৮॥
ততঃ করৈস্তামরসপ্রকাশৈঃ সা মন্দমান্দোলিতশস্ত্রজালা ।
বিলোক্য তং বিহ্বলচিত্তবৃত্তিং জগাদ বাচং জগদেকমাতা ॥ ২-৭৯॥
ত্বমগ্রহীর্মচ্চরণৌ রুষাঽপি প্রাযঃ ফলং তস্য ন হন্মি যত্ত্বাম্ ।
জাতঃ পৃথিব্যাং তব জাল্ম হন্তা সদ্যো হিতং চিন্তয সাধযামি ॥ ২-৮০॥
ইতি নৃপমভিধায জ্যোতিষা কুর্বতী সা তডিদিব নযনানি প্রাণিনামাকুলানি ।
সুরযুবতিভিরুচ্চৈর্গীযমানাপদানা সুরপদমভিপেদে পাটিতাভ্রা জবেন ॥ ২-৮১॥
শ্রুত্বা তস্যা শ্রবণপরুষাং বাচমন্তর্বিষণ্ণঃ
পুত্রাপাযব্যথিতমনসং সান্ত্বযিত্বা স্বসারম্ ।
পদ্ভ্যামেব স্বভবনমথ প্রাপ্য কৃচ্ছ্রাদনৈষীত্
কংসশ্চিন্তাকুলিতহৃদযো জাগ্রদেব ত্রিযামাম্ ॥ ২-৮২॥
ইতি সুকুমারকৃতৌ কৃষ্ণবিলাসকাব্যে দ্বিতীযাস্সর্গঃ ॥ ২ ॥
তৃতীযঃ সর্গঃ
প্রাতঃ প্রলম্বপ্রমুখানমাত্যান্ সর্বান্ সমাহূয স ভোজরাজঃ ।
সবিভ্রমপ্রেরিতদৃষ্টিদত্তে স্থানে নিষণ্ণানবদদ্বিনীতঃ ॥ ৩-০১॥
সন্দিহ্য মোহাদ্বসুদেববাক্যং মযা প্রমাণীকৃতভূতবাচা ।
হতা নৃশংসেন সুতা ভগিন্যাস্তেনাবিলং মে হৃদযং যশোঽপি ॥ ৩-০২॥
জাতাং পুনঃ কাঞ্চনকাঞ্চনাভাং সুতাং গতাযুর্ন্নিশি হন্তুমৈচ্ছম্ ।
উত্প্লুত্য সা ব্যোম্নি জবাদতিষ্ঠত্ শস্ত্রোত্কটা দর্শিতদিব্যরূপা ॥ ৩-০৩॥
নিযম্য সা মাতুল ইত্যমর্ষং প্রসেদুষী মামবদচ্চ বালা ।
অরির্মহীযানজনিষ্ট ভূমৌ তবোচিতং সম্প্রতি চিন্তযেতি ॥ ৩-০৪॥
ব্যাহৃত্য মাং দ্যাং প্রতি দেবনারীগণৈর্গতাযামিতি সেবিতাযাম্ ।
দেব্যামহং দুশ্চরিতং স্বমেব স্মরন্ বিনিদ্রো রজনীমনৈষম্ ॥ ৩-০৫॥
যুদ্ধেষু দেবা পুরুহূতমুখ্যাঃ ভগ্না মযা স্থাতুমশক্নুবন্তঃ ।
অশ্বান্ পরিত্যজ্য বিমুচ্য নাগান্ মুক্ত্বা চ শস্ত্রাণি দিশো দ্রবন্তি ॥ ৩-০৬॥
তদেষু নৈকোঽপি ভুবং গতো মে শক্নোতি কর্তুং প্রতিকূলভাবম্ ।
মহীযসঃ কিং ঘটতে পরাগঃ সমীরণস্যাভিমুখং প্রসক্তুম্ ॥ ৩-০৭॥
কিমন্যদার্তাভ্যবপত্তিকামঃ সুরেষু সন্দর্শিতপক্ষপাতঃ ।
অজাযতোর্ব্যামসুরান্নিহন্তুং স এব মন্যে সরসীরুহাক্ষঃ ॥ ৩-০৮॥
সর্বে বযং দৈত্যকুলপ্রসূতাঃ কেনাপি জাতা ভুবি কারণেন ।
স তেন সন্নহ্যতি জেতুমস্মানুক্তোঽযমর্থঃ কিল নারদেন ॥ ৩-০৯॥
অতস্তদুচ্ছেদবিধৌ বিনিদ্রাঃ যতধ্বমদ্যৈব বলানুরূপম্ ।
নখাগ্রলাব্যস্তরুরঙ্কুরাত্মা পরশ্বধস্যাপি ততোঽতিভূমিঃ ॥ ৩-১০॥
যস্মিন্ ভবত্যাশ্রিতবত্সলত্বং বিপ্রেষু যস্যাস্তি বিশেষসঙ্গঃ ।
মনোহরং যশ্চ বিভর্তি রূপং বধং স বালোঽর্হতি মত্সকাশাত্ ॥ ৩-১১॥
মখাশ্চ তত্প্রীতিকৃতো নিবার্যাঃ নিবারণীযা শ্রুতিরগ্রিমাঽপি ।
তৃণীকৃতাশেষজনপ্রভাবা সংস্থৌতি যা তন্মহিমানমেব ॥ ৩-১২॥
গতে বিরামং গরুডধ্বজেঽস্মিন্ মখেষু সর্বত্র নিবারিতেষু ।
সুরেষু সর্বেষ্বপি দুর্বলেষু হস্তে ভবিষ্যত্যমরাবতী নঃ ॥ ৩-১৩॥
ইত্যূচুষস্তস্য পদোপকণ্ঠং নীরাজযন্তো মকুটপ্রভাভিঃ ।
অবাদিষুর্বিক্রমদর্পিতাস্তে কৃতাট্টহাসধ্বনিকম্পিতাশাঃ ॥ ৩-১৪॥
কিং চিন্তযা পার্থিব ভুঙ্ক্ষ্ব ভোগানস্মাসু জীবত্সু কুতো রিপুস্তে ।
কথং মযূখেষু পরিস্ফুরত্সু সরোজবন্ধোস্তমসাভিভূতিঃ ॥ ৩-১৫॥
অমাতরিশ্বানমহব্যবাহং অসূর্যশীতাংশুমবজ্রপাণিম্ ।
অনচ্যুতেশানপিতামহং চ দ্রষ্টাসি রাজন্নচিরেণ লোকম্ ॥ ৩-১৬॥
ইত্যূচুষস্তানুচিতোপহারৈঃ সম্ভাব্য কৃত্যেষু সমাদিদেশ ।
স দেবকীমানকদুন্দুভিং চ বিমোচযামাস চ বন্ধনস্থৌ ॥ ৩-১৭॥
লব্ধ্বা নিধানং ন তথা দরিদ্রো গতিং সমাসাদ্য তথা ন পঙ্গুঃ ।
তথা ন চান্ধো দৃশমাপ্য হৃষ্যেদ্যথাপ্তপুত্রঃ স জহর্ষ নন্দঃ ॥ ৩-১৮॥
তপনে চরমাচলং প্রপন্নে তমসা চ স্থগিতেষু দিঙ্মুখেষু ।
যমুনাতটবাসিনং তমূচে বসুদেবঃ প্রতিপদ্য নন্দগোপং ॥ ৩-১৯॥
তপসা তব নন্দগোপ মন্যে ফলিতং জন্মসহস্রসঞ্চিতেন ।
ঋণমন্ত্যমপোহিতুং ত্বদীযং যদযং পুত্রনিধিঃ সমাবিরাসীত্ ॥ ৩-২০॥
ইহ খেলতি পূতনেতি কৃত্যা শিশুহত্যানিরতা পুরোপকণ্ঠে ।
তদহর্ন্নিশমত্র রক্ষণীযো নযনানন্দকরঃ সুতস্ত্বযাঽযং ॥ ৩-২১॥
অথবা কিমিবাস্যতে ত্বযাস্মিন্নিজমুত্সৃজ্য পদং পুরোপকণ্ঠে ।
সবিধে ন বসন্তি বুদ্ধিমন্তো ফণিনো বাযুসখস্য ভূপতেশ্চ ॥ ৩-২২॥
প্রতিবেদি নিবিষ্টপূর্ণকুম্ভং বিলসত্তোরণমুজ্জ্বলপ্রদীপম্ ।
ব্রজ গোকুলমাকুলং প্রজাভীভবদীযাগমনপ্রহর্ষিণীভিঃ ॥ ৩-২৩॥
শিশুরস্তি মমাপি রৌহিণেযো ভবদীযে বিষযে বিবর্ধমানঃ ।
স চ সাধু নিরীক্ষ্য রক্ষিতব্যো বপুষা কেবলমাবযোর্হি ভেদঃ ॥ ৩-২৪॥
ইত্যুক্ত্বা গতবতি দেবকীসহাযে সংত্রস্তঃ কথমপি নীতরাত্রিশেষঃ ।
আরোহত্যুদযমহীধরস্য শৃঙ্গং তিগ্মাংশৌ নিজবসতিং প্রতি প্রতস্থে ॥ ৩-২৫॥
সচকিতমৃগমণ্ডলানি কুর্বন্ শকটশতধ্বনিভির্বনান্তরাণি ।
প্রমুদিতমথ গোকুলং প্রপেদে দিশি দিশি মারুতধূতকেতুমালম্ ॥ ৩-২৬॥
নিজবসতিমভিপ্রপদ্য তুষ্টঃ কিমপি ন কর্ম করোতি নন্দগোপঃ ।
নবনলিনপলাশচারুনেত্রং বদনমহর্ন্নিশমাত্মজস্য পশ্যন্ ॥ ৩-২৭॥
মুগ্ধভাবমধুরেণ রঞ্জযন্ শৈশবেন হৃদযং ব্রজৌকসাম্ ।
গোকুলে স বিজহার কেশবঃ ক্ষীরবারিনিধিমপ্যচিন্তযন্ ॥ ৩-২৮॥
বদনং মধুসূদনঃ করাভ্যাং চরণাঙ্গুষ্ঠমুপানযত্ পিপাসুঃ ।
গলিতেব ততস্সুরস্রবন্তী নখমুক্তামণিদীধিতিচ্ছলেন ॥ ৩-২৯॥
অমৃতাংশুরিবাপরঃ প্রমোদং নযনানাং জনযন্ স পদ্মনাভঃ ।
ভবনং ভবনাত্ করৌ করাভ্যাং ব্রজযোষিদ্ভিরনীযতাঙ্কমঙ্কাত্ ॥ ৩-৩০॥
অধঃ কদাচিচ্ছকটস্য শাযিতঃ স্বকার্যপর্যাকুলযা যশোদযা ।
স লীলযা পাদসরোরুহং শনৈরুদঞ্চযামাস সরোজলোচনঃ ॥ ৩-৩১॥
মধুভিদশ্চরণাম্বুজতাডিতং শকটমাশু সমুত্থিতমম্বরে ।
বিপরিবৃত্য পপাত মহীতলে পটুতরধ্বনিপূরিতদিঙ্মুখম্ ॥ ৩-৩২॥
শকটপতনজন্ম নন্দমুখ্যাঃ স্তনিতমিব ধ্বনিতং নিশম্য গোপাঃ ।
কিমিদমিতি ভযেন তত্র জগ্মুস্ত্বরিতগতিচ্যবমানকেশবন্ধাঃ ॥ ৩-৩৩॥
কুচকলশবিলগ্নপাণিপদ্মা বিগলিতবন্ধমনোজ্ঞকেশপাশা ।
সপদি সহ সখীভিরন্বধাবত্ কলমণিনূপুরশিঞ্জিতা যশোদা ॥ ৩-৩৪॥
কৃতস্মিতং ক্বচিদপরিক্ষতং সুতং বিলোক্য তং প্রমুদিতমানসা পরম্ ।
ব্রজৌকসাং সবিধনিবাসিনাং মুখাদ্বিসিস্মিযে বিদিততদীযবিক্রমা ॥ ৩-৩৫॥
স্রুতশোণিতমেব মন্যমানা চরণং তস্য নিসর্গপাটলং তত্ ।
উদমার্জযদংশুকাঞ্চলেন দ্রুতমাগত্য পুনঃ পুনর্যশোদা ॥ ৩-৩৬॥
তিলকং মধুবিদ্বিষো ললাটে রজসা গোমযজন্মনা বিধায ।
উরসা পরিরভ্য নন্দগোপঃ সুচিরং তস্য সুমঙ্গলানি দধ্যৌ ॥ ৩-৩৭॥
শকটং মধুসূদনস্য দৃষ্ট্বা চরণোদঞ্চনবিভ্রমেণ ভগ্নম্ ।
অথ বারিনিধের্বিবেশ গর্ভং স্বরথস্যাপি বিশঙ্ক্য ভঙ্গমর্কঃ ॥ ৩-৩৮॥
পরিতঃস্ফুরতা নবেন সন্ধ্যামহসা পল্লবপাটলেন লিপ্তাঃ ।
পতিতা ইব পাবকে বিরেজুঃ ককুভো দুস্সহভানুবিপ্রযোগাত্ ॥ ৩-৩৯॥
ক্ষুভিতশ্চিরমম্বরাম্বুরাশিঃ তপনস্যন্দনবাহনাবগাহাত্ ।
স্ফুরদুদ্ভটতারকাপদেশাত্ সহসাঽঽকীর্যত ফেনমণ্ডলেন ॥ ৩-৪০॥
অহিমরুচি রসাতলং প্রবিষ্টে ভযচকিতঃ স্ববিনাশমাকলয্য ।
তত ইব তরসোত্পতন্নসীমা তিমিরভরঃ পৃথিবীতলং প্রপেদে ॥ ৩-৪১॥
ভূরন্তরিক্ষং ভবনানি রথ্যাঃ বনানি শৈলাস্সরিতস্সমুদ্রাঃ ।
ধ্বান্তে দিশাং রুন্ধতি চক্রবালং ব্যক্তং ন কেনাপি কিমপ্যবেদি ॥ ৩-৪২॥
অথ প্রযাতি প্রহরে যশোদা জনে চ কিঞ্চিন্নিভৃতে সনিদ্রে ।
পুত্রং পযঃপানগুরুপ্রমোদং প্রস্বাপযন্তী কলমিত্যগাযত্ ॥ ৩-৪৩॥
কুন্দত্বিষস্তালফলপ্রকাশাঃ তাপিঞ্ছবর্ণাস্তরুণার্কভাসাঃ ।
প্রভূতদুগ্ধা নবনীতবত্যো গাবস্সহস্রং তনয ত্বদীযাঃ ॥ ৩-৪৪॥
প্রিযালখর্জূরসমগ্রসানুঃ ফলাঢ্যরম্ভাবনশোভনীযঃ ।
ননূপভোগায সুতাযমাস্তে গোবর্ধনো নাম মহীধরস্তে ॥ ৩-৪৫॥
সরসিরুহবনে গতেঽপি নিদ্রাং কথমিব তে নযনাম্বুজে বিনিদ্রে ।
শ্রুতিপরিচযশালিনো হি কর্ম স্বজননিষেবিতমেব সংশ্রযন্তে ॥ ৩-৪৬॥
তদ্ধ্বনিশ্রবণজাতকৌতুকা বালজীবিতবিলোপবিশ্রুতা ।
আজগাম গগনেন পূতনা যাতনা তনুমতীব দেহিনাং ॥ ৩-৪৭॥
সাঽবতীর্য নভসো নিশাচরী গূঢমেব নিষসাদ কুত্রচিত্ ।
সা চ সুপ্ত ইব বীক্ষিতে সুতে স্বাপমাপ সরসীরুহেক্ষণা ॥ ৩-৪৮॥
কৃষ্ণমঙ্কমধিরোপ্য নির্দযা দাতুমারভত পূতনা স্তনম্ ।
যত্পযোধরমুখে মুখার্পণাদাযুষা শিশুজনো বিযুজ্যতে ॥ ৩-৪৯॥
পাঞ্চজন্যমিব পূতনাস্তনং পাণিপল্লবযুগেন পীডযন্ ।
আননেন মধুশত্রুরান্তরানাদদে স তু ততস্সমীরণান্ ॥ ৩-৫০॥
বিপ্রকীর্ণকচবালপল্লবা ভগ্নবাহুবিটপা নিশাচরী ।
সা পপাত ভুবি ঘোরনিঃস্বনা মারুতাহতমহীরুহোপমা ॥ ৩-৫১॥
ঝটিতি ব্যপনীতগাঢনিদ্রো মহতা তেন রবেণ পূতনাযাঃ ।
প্রতিপত্তুমিযায তাং প্রবৃত্তিং সহ গোপালগণেন নন্দগোপঃ ॥ ৩-৫২॥
তস্যাশ্শরীরমধিরুহ্য বিচেতনাযাঃ
ক্রীডন্তমম্বুরুহলোচনমীক্ষমাণাঃ ।
তস্থুস্সমুন্মিষিতবিস্মযনির্বিকারাঃ
নাসাধিরোপিতকরাঙ্গুলযো মুহূর্তম্ ॥ ৩-৫৩॥
নন্দঃ প্রমৃজ্য নযনে মুহুরশ্রুপূর্ণে
পুত্রং কৃতান্তমুখনির্গলিতং নিদধ্যৌ ।
দধ্যৌ চ তস্য নিতরামভিবৃদ্ধিকামঃ
তত্ত্বং পরং স হৃদযেন সমাহিতেন ॥ ৩-৫৪॥
শ্যামলঃ কমলপত্রলোচনো নীলকুন্তলভরঃ শুচিস্মিতঃ ।
ধ্যাযতো মনসি তস্য সন্নিধিং পুত্র এব বিদধে পুনঃ পুনঃ ॥ ৩-৫৫॥
ন ক্ষমং ভবতি পুত্রবাসনানিস্তরং হৃদযমচ্যুতস্মৃতৌ ।
ইত্যশেষদুরিতাপহারিণীরগ্রজন্মভিরকারযত্ ক্রিযাঃ ॥ ৩-৫৬॥
পূতনাচরিতভাবনাভবং দারুণং হৃদযদারণং পিতুঃ ।
শ্রীপতিঃ শমযতি স্ম বৈশসং ক্রীডিতৈরখিললোকমোহনৈঃ ॥ ৩-৫৭॥
স লোচনে কিঞ্চিদুপান্তঘূর্ণিতে নিধায মাতুর্বদনে শুচিস্মিতঃ ।
পযোধরং পাণিযুগাবলম্বিতং মনশ্চ তস্যা মধুসূদনঃ পপৌ ॥ ৩-৫৮॥
পাণিজানুপরিচঙ্ক্রমশ্রমস্বেদবিন্দুমধুরং মুখং বহন্ ।
ধূসরেণ বপুষা জনার্দনো গোকুলং নিখিলমন্বরঞ্জযত্ ॥ ৩-৫৯॥
পরিভ্রমন্তং ভুবি পাণিজানুনা গবামধস্তাত্প্রবিশন্তমেকদা ।
সুতং যশোদা গৃহকৃত্যতত্পরা ববন্ধ পাশেন বলাদুলূখলে ॥ ৩-৬০॥
জনো হি যঃ কর্ম করোতি যাদৃশং স সর্বথা তাদৃশমশ্নুতে ফলম্ ।
বলিঃ পুরাঽবধ্যত যেন দানবঃ স লোকনাথোঽপি তদাপ বন্ধনম্ ॥ ৩-৬১॥
নিখিলভুবনমুক্তিদে মুরারৌ ভগবতি গাঢমুলূখলে নিবদ্ধে ।
পরিশিথিলসমাধিরাবিরাসীন্মনসি মহামুনিমণ্ডলস্য হাসঃ ॥ ৩-৬২॥
নিষীদ লোলেতি নিবধ্য সস্মিতং চকার কার্যাণি চকোরলোচনা ।
অনাদরেণ ভ্রমযন্নুলূখলং বিনির্যযৌ বিশ্বপতিঃ স্বমন্দিরাত্ ॥ ৩-৬৩॥
উপেযিবাংসৌ ককুভদ্রুমাত্মতাং মহীযসা নারদশাপতেজসা ।
অতিষ্ঠতামধ্বনি কৈটভদ্বিষঃ কুবেরপুত্রৌ তরসৈব রিঙ্খতঃ ॥ ৩-৬৪॥
স সন্নিকৃষ্য স্থিতযোঃ পরস্পরং মহীরুহোর্মধ্যপথেন নিস্সরন্ ।
গতেন তির্যক্ত্বমুলূখলেন তৌ বভঞ্জ দামোদরগন্ধবারণঃ ॥ ৩-৬৫॥
প্রপদ্য দিব্যং বপুরম্বরস্থিতৌ বিমুক্তশাপৌ ধনদাত্মজাবুভৌ ।
প্রণম্য ভক্ত্যা পুরুষং পুরাতনং মুদান্বিতৌ জগ্মতুরন্তিকং পিতুঃ ॥ ৩-৬৬॥
নন্দাদযঃ সপদি গোকুলবাসিনস্তে
তদ্ভঙ্গজন্ম সুমহদ্ধ্বনিতং নিশম্য ।
অভ্যেত্য ভগ্নপতিতৌ ককুভদ্রুমৌ তৌ
তত্রাক্ষতং চ দদৃশুস্সরসীরুহাক্ষং ॥ ৩-৬৭॥
নন্দঃ সমীক্ষ্য দুরিতানি বহূনি সদ্ভ্যঃ
দত্বা গবামযুতমাত্মসুতাভিবৃদ্ধ্যৈ ।
সম্মন্ত্র্য বন্ধুভিরপাস্য পদং তদাশু
বৃন্দাবনং প্রতি যযৌ শকটৈরসঙ্খ্যৈঃ ॥ ৩-৬৮॥
গত্বা স গোকুলপতির্মনসোঽনুকূলে
কূলে কলিন্দদুহিতুর্নিদধে পদানি ।
রেমে চ তত্র পুরুহূতপদাভিরামে
লীলাযিতানি তনযস্য নিরীক্ষ্যমাণঃ ॥ ৩-৬৯॥
দধিনির্মথনে নিরুদ্যমা সা নবনীতশ্রপণে গবাং চ দোহে ।
সুতকেলিহৃতেক্ষণা যশোদা ক্ষণকল্পানি নিনায বাসরাণি ॥ ৩-৭০॥
অনুযাতি জিঘৃক্ষযেব নন্দে তরসা রিঙ্খণতত্পরস্য বিষ্ণোঃ ।
ললিতালকবেল্লিতানি রেজুর্মুখমাত্রেণ মুহুর্নিবর্তিতানি ॥ ৩-৭১॥
অন্তরা বিহতিমদ্ভিরুত্থিতৈরস্ফুটাক্ষরপদাভিরুক্তিভিঃ ।
ভঙ্গুরৈশ্চ পরিরম্ভণোদ্যমৈর্গোকুলং নিখিলমন্বরঞ্জযত্ ॥ ৩-৭২॥
পশ্য মাতুলমিতি প্রদর্শিতং যামিনীষু গগনে যশোদযা ।
আজুহাব ললিতেন পাণিনা শীতভানুমরবিন্দলোচনঃ ॥ ৩-৭৩॥
আত্মনঃ প্রতিকৃতিং বিলোকযন্ মাতৃহস্তমণিদর্পণোদরে ।
এহি মিত্র কিমিহেতি কৌতুকাদ্ব্যাজহার শতপত্রলোচনঃ ॥ ৩-৭৪॥
গৌরবং কথমিযং সহেত মে মেদিনীতি কৃপযেব চিন্তযন্ ।
মাধবঃ পতনভীতিমুদ্বহন্ মন্দমেব নিদধে পদাবলিং ॥ ৩-৭৫॥
দেবো নিশাসু হরিরঙ্কগতো জনন্যাঃ
শৃণ্বন্ কথা মধুমুচো মহতাঽঽদরেণ ।
মন্দং তদীযকরপল্লবতাডিতোরুঃ
সুষ্বাপ কুড্মলিতলোচনপুণ্ডরীকঃ ॥ ৩-৭৬॥
কৌতুকেন পিতুরগ্রতো হরের্ধাবতস্খলনমীক্ষমাণযা ।
মোদনিঘ্নমনসা সলজ্জযা ন স্থিতং ন চলিতং যশোদযা ॥ ৩-৭৭॥
মুখডিণ্ডিমবাদিনা পরীতো মধুজিত্ কৌতুকিনা সুহৃদ্গণেন ।
অধিরোপিতবারণেন্দ্রভাবো ললিতাভির্গতিভির্গৃহেষু রেমে ॥ ৩-৭৮॥
অথাভিবৃদ্ধিং প্রতিপদ্যমানো দধ্যাদিষু প্রীতিমুবাহ শৌরিঃ ।
তত্তত্ প্রদানেন বশে বিধাতুমারেভিরে গোকুলযোষিতস্তম্ ॥ ৩-৭৯॥
কুরুষ্ব নৃত্তং নবনীতমূল্যং কৃষ্ণেতি সাভ্যর্থনমূচিষীণাম্ ।
ব্রজাঙ্গনানাং স পুরস্সলীলমুদঞ্চযামাস পদারবিন্দম্ ॥ ৩-৮০॥
তাসাং মনঃপ্রীতিবিধানদক্ষে তথা ক্ষণং তস্থুষি শার্ঙ্গপাণৌ ।
একাঙ্ঘ্রিসংস্পর্শবিযোগমাত্রাদধন্যমাত্মানমমন্যতোর্বী ॥ ৩-৮১॥
উদঞ্চিতং তস্য বিলোক্য পাদং বেধা পুনর্বিক্রমশঙ্কিচেতাঃ ।
কমণ্ডলুং পাণিতলেন গৃহ্ণন্নভ্যুদ্যতোঽভূদবনেজনায ॥ ৩-৮২॥
নৃত্তামৃতং গোকুলযোষিতস্তত্ কৃষ্ণস্য নেত্রাঞ্জলিভিঃ পিবন্ত্যঃ ।
প্রীতিপ্রকর্ষস্তিমিতৈর্মনোভিরালেখ্যযোষিত্প্রতিমা বভূবুঃ ॥ ৩-৮৩॥
বিদুর্ন তদ্দর্শনপারবশ্যাদ্দাতুং করস্থং নবনীতমেকাঃ ।
বিস্রস্য ভূমৌ পতিতং তদন্যাঃ ন মেনিরে পাণিসরোরুহেভ্যঃ ॥ ৩-৮৪॥
অজস্রমেবং ভবনেষু তাসাং বভ্রাম কৃষ্ণো নবনীতভিক্ষাম্ ।
পুরা কিলান্যৈরনিবর্তনীযা নিবর্তিতা যেন হরস্য ভিক্ষা ॥ ৩-৮৫॥
ধিগ্যাচনাং চৌর্যভবস্য ভূযানস্ত্যংহসো নির্হরণাভ্যুপাযঃ ।
মত্বেতি নূনং নবনীতচৌর্যে মধোর্নিহন্তা মতিমাববন্ধ ॥ ৩-৮৬॥
নির্বাপ্য দীপং মুখমারুতেন হৈযঙ্গবীনং নিশি হর্তুমিচ্ছন্ ।
কৃষ্ণঃ কটীভূষণরত্নভাসা বিহন্যমানো বিষসাদ ভূযঃ ॥ ৩-৮৭॥
নিপীডযন্নগ্রপদেন পৃথ্বীমুন্নম্য দেহং ভৃশমূর্ধ্ববাহুঃ ।
পযোঘটস্পর্শনমশ্নুবানস্ত্রিবিক্রমোঽভূত্ পরিহাসপাত্রম্ ॥ ৩-৮৮॥
নিযমিতশ্বসিতো নিভৃতৈঃ পদৈর্নিশি কথঞ্চন গর্ভগৃহং গতঃ ।
স তু ভযাদসমাপ্তমনোরথো নিববৃতে নবনীতহরো হরিঃ ॥ ৩-৮৯॥
হর্তুং হরের্ব্যবসিতস্য ঘনে নিশীথে
ভূষারবশ্রুতিভযাদ্ব্রজতোঽতিমন্দম্ ।
অন্তর্গৃহস্য নবনীতবতঃ প্রবেশাত্
প্রাগেব হন্ত পথি সা রজনী বিভাতা ॥ ৩-৯০॥
গোপীসমাগমভিযা চ তৃষা চ গুর্ব্যা
পাতুং বিহাতুমপি গোপগৃহেষ্বজানন্ ।
আদ্বারমাদধিঘটং চ গতাগতানি
কুর্বন্ সরোজনযনঃ শ্রমমেব লেভে ॥ ৩-৯১॥
ভিত্তিষু প্রতিশরীরদর্শনাত্ শঙ্কিতঃ স নবনীতনিঃস্পৃহঃ ।
কিঞ্চিদন্যদিব তত্র মার্গযন্নির্জগাম মণিমন্দিরোদরাত্ ॥ ৩-৯২॥
জিহীর্ষুরন্তর্ভবনেষু গোরসং দিনান্যনৈষীত্তদুপাযচিন্তযা ।
স জাগরূকশ্চ নিনায যামিনীং মনোহরাভির্হরণপ্রবৃত্তিভিঃ ॥ ৩-৯৩॥
দৃষ্টেঽপি তত্সবিধসঞ্চরণে স তত্র
বক্তুং নিমিত্তমুচিতং কৃতনিশ্চযস্সন্ ।
অভ্যর্ণ এব নিদধে দধিভাজনস্য
লীলাযিতোপকরণানি নিজানি শৌরিঃ ॥ ৩-৯৪॥
বহন্ গৃহীতো নবনীতমচ্যুতো ভযেন পারিপ্লবনেত্রপঙ্কজঃ ।
পদা লিখন্ ভূমিমবাঙ্মুখস্থিতো জহার চেতোঽপি চ গোপযোষিতাম্ ॥ ৩-৯৫॥
শপে পিতৃভ্যামিত ঊর্ধ্বমেবং নাহং বিধাস্যে নবনীতচৌর্যম্ ।
বিনিঃশ্বসন্নিত্যভিধায কৃষ্ণো জহার মাতুশ্চ পিতুশ্চ চেতঃ ॥ ৩-৯৬॥
এহি সদ্ম তনযেতি সাদরং যাচিতোঽপি স মুহুর্যশোদযা ।
আননেন নবনীতগন্ঘিনা নাজগাম বিহরন্নিবাচ্যুতঃ ॥ ৩-৯৭॥
হৃতং নবং মে নবনীতমালযাত্ হৃতং ঘৃতং মে দধি মে হৃতং নিশি ।
ইতি প্রভাতে বচনানি যোষিতামুবাহ শ্রৃণ্বন্ ন মুখে স বিক্রিযাম্ ॥ ৩-৯৮॥
পুত্রং কুলস্য ভুবনস্য চ রক্ষিতার-
মভ্যর্থিতোঽপি ভগবানরবিন্দনাভঃ ।
ত্বাং মে দদৌ বিধিবশাদ্ভুবনৈকচোর-
মিত্যাহ কোপমভিনীয সুতং যশোদা ॥ ৩-৯৯॥
স সান্ত্বনেন প্রতিপাদনেন ভেদেন তীব্রেণ চ তর্জনেন
নিবদ্ধ্য পৃষ্টোঽপি মুহুর্জনন্যা নাঙ্গীকরোতি স্ম হরিঃ স্বচৌর্যম্ ॥ ৩-১০০॥
সংরক্ষণায জগতামবতীর্য পৃথ্ব্যাং
গোপালসদ্মসু হরত্যখিলং মুকুন্দঃ ।
ইত্থং নিশম্য পরিহাসবচস্সুরাণাম্-
অন্তর্জহাস ভগবানরবিন্দনাভঃ ॥ ৩-১০১॥
কৃষ্ণস্য কেলিসমরেক্ষণকৌতুকেন
গোপীষু মুক্তভবনাসু বহিঃ স্থিতাসু ।
মিত্রৈঃ পরাজিত ইব দ্রুতমেত্য গেহং
বদ্ধ্বা কবাটমহরন্নবনীতমন্তঃ ॥ ৩-১০২॥
ত্রিভুবনমহনীযৈরভ্যুপাযৈরসঙ্খ্যৈঃ
নিখিলমিতি স মুষ্ণন্ গোকুলং নন্দসূনুঃ ।
অরমত সবযোভিস্তত্র গোপালপুত্রৈ-
রপর ইব শশাঙ্কঃ প্রাণিনাং প্রীতিহেতুঃ ॥ ৩-১০৩॥
ইতি সুকুমারকৃতৌ কৃষ্ণবিলাসকাব্যে তৃতীযঃ সর্গঃ ॥ ৩ ॥
চতুর্থঃ সর্গঃ
স রোহিণীসূনুনিবদ্ধরাগঃ সতাং শরণ্যস্তমসোঽপহর্তা ।
মনোহরো বাল ইবৌষধীশো দিনে দিনে পোষমিযায শৌরিঃ ॥ ৪-০১॥
ত্যক্ত্বা হরিঃ স্তৈন্যকৃতাপবাদং তচ্ছৈশবং প্রাপ্য দশান্তরং সঃ ।
মন্যে তদংহঃপরিমার্জনায গবাং পরিত্রাণসমুদ্যতোঽভূত্ ॥ ৪-০২॥
পুত্রে তথোদ্যোগিনি নন্দগোপো গোপালপুত্রাননুনীয সর্বান্ ।
ত্রাতুস্ত্রযাণামপি বিষ্টপানাং সংরক্ষণে তস্য সমাদিদেশ ॥ ৪-০৩॥
মাত্রা কৃতস্বস্ত্যযনঃ প্রভাতে পিত্রা পরিষ্বজ্য চিরং বিসৃষ্টঃ ।
সহৈব রামেণ সমগ্রহর্ষঃ বিনির্যযৌ বিশ্বপতির্বনায ॥ ৪-০৪॥
স প্রাতরাশী ব্যতিষক্তপাণির্যষ্টিং বহন্নংসবিষক্তশৃঙ্গঃ ।
বিমুচ্যতাং গৌরিতি সম্ভ্রমেণ গচ্ছন্ প্রতিদ্বারমবোচদুচ্চৈঃ ॥ ৪-০৫॥
নিশম্য তস্য ধ্বনিমূর্ধ্বকর্ণাঃ বিলূনপাশা ভৃশমুত্সুকিন্যঃ ।
বত্সানপি স্বাননবেক্ষ্য গাবঃ সসম্ভ্রমং নির্যযুরালযেভ্যঃ ॥ ৪-০৬॥
গত্বা পুরস্তাদ্গজরাজগামী গোষ্ঠং গরিষ্ঠো গুণমণ্ডলেন ।
আপূরযন্মিত্রগণাগমার্থং পিত্রোরভীষ্টেন সহৈব শৃঙ্গম্ ॥ ৪-০৭॥
নভস্স্পৃশা কর্ণপথং গতেন তেনৈব সংজ্ঞাগবলস্বনেন ।
আদায তত্তত্পরিবর্হজাতং সদ্যো গৃহেভ্যঃ সুহৃদো নিরীযুঃ ॥ ৪-০৮॥
গবাং খুরন্যাসসমুদ্ভবেন বিষাণসঙ্ঘট্টনজন্মনা চ ।
প্রসর্পতা দিক্ষু মহাস্বনেন ঘোষঃ ক্ষণং ঘোষমযো বভূব ॥ ৪-০৯॥
প্রধাবনৈরুত্প্লুতিভিস্সুদূরং মিথো বলাদ্গ্রাহবিমোচনৈশ্চ ।
সমাগতৈস্তত্র সমং সুহৃদ্ভির্বহুপ্রকারং বিজহার শৌরিঃ ॥ ৪-১০॥
পরেণ হর্ষেণ পুরাণপুংসঃ সঙ্ক্রীডমানস্য সমং সুহৃদ্ভিঃ ।
পবিত্রযামাস পদাম্বুজোত্থিতা করীষধূলিঃ ককুভাং মুখানি ॥ ৪-১১॥
মহর্ষযস্তত্র মহানুভাবাঃ গৃহীতরূপান্তরদুর্ন্নিরূপাঃ ।
ভবাগ্নিসন্তাপহরে মমজ্জুঃ পদোত্থিতে তস্য পরাগপূরে ॥ ৪-১২॥
প্রহর্ষমালোকযতাং জনানাং ক্রীডাভিরাপাদ্য মনোহরাভিঃ ।
উত্থাপযামাস স চীত্কৃতেন গোষ্ঠে হরির্গোসমজং শযানং ॥ ৪-১৩॥
তস্মিন্ গবাং পালনকৌতুকেন বনায নির্গছতি দৈত্যশত্রৌ ।
যযুঃ প্রিযাখ্যানচিকীর্ষযেব দিবাকৃতো দিগ্বলযং মযূখাঃ ॥ ৪-১৪॥
কূলদ্রুমাণাং কুসুমানি ধূন্বন্ কর্ষন্ পযশ্শীকরমণ্ডলানি ।
কৃষ্ণং কৃতানেকবিহারখিন্নং যান্তং সিষেবে যমুনাসমীরঃ ॥ ৪-১৫॥
পরস্য পুংসঃ পদপঙ্কজাভ্যাং প্রবেক্ষ্যতো গোকুলপালনায ।
চকার নীহারহরৈর্মযূখৈঃ প্রবেশযোগ্যানি বনানি ভানুঃ ॥ ৪-১৬॥
প্রেম্ণা পরিত্যক্তুমশক্নুবন্তং বদ্ধাঞ্জলিং বন্ধুজনং নিবার্য ।
রামং পুরস্কৃত্য সমিত্রবর্গঃ বিবেশ বিষ্ণুর্বিপিনান্তরাণি ॥ ৪-১৭॥
অরণ্যভূমীরবগাহমানং তমাতপক্লান্তমবেক্ষমাণঃ ।
পক্ষাতপত্রেণ পরিস্তৃতেন বিযত্যসেবিষ্ট বিহঙ্গরাজঃ ॥ ৪-১৮॥
মা গচ্ছ গঙ্গে যমুনে ক্ব যাসি কিং তত্র গোদাবরি ধাবসীতি ।
ন্যষেধি তত্তদ্ব্যপদেশপূর্বং মার্গচ্যুতং গোকুলমচ্যুতেন ॥ ৪-১৯॥
প্ররূঢসুস্নিগ্ধতৃণাঙ্কুরাসু ছাযাদ্রুমশ্যামলিতান্তরাসু ।
গবাং কুলং তত্সুলভোদকাসু প্রচারযামাস বনস্থলীষু ॥ ৪-২০॥
সাটোপমান্দোলিতলম্বসাস্নাঃ গাবশ্চরন্ত্যো বলমানবালাঃ ।
ত্রুট্যত্তৃণস্তোমচটত্কৃতিন্যঃ চক্রুঃ প্রিযং চেতসি চক্রপাণেঃ ॥ ৪-২১॥
হরিন্মণিশ্যামরুচীনি তত্র স্বৈরং চরন্তীষু তৃণানি গোষু ।
শৌরিঃ স্বযং ভুক্ত ইবাপ তৃপ্তিং তৃপ্যন্ত্যুদারাঃ পরতর্পণেন ॥ ৪-২২॥
সর্বাসু কণ্ডূযনলিপ্সযোচ্চৈরুন্নম্য কণ্ঠং দধতীষু গোষু ।
বালো হরির্বাহুসহস্রশূন্যং জন্মাত্মনো নিষ্ফলমেব মেনে ॥ ৪-২৩॥
পরিভ্রমদ্গোকুলমুগ্রকোপং সমুচ্চলদ্ধূলিরটদ্বিষাণম্ ।
স যুদ্ধমুক্ষ্ণাং মদনির্ভরাণাং প্রবিশ্য মধ্যং শমযাঞ্চকার ॥ ৪-২৪॥
শাখাকরাগ্রৈরবলম্ব্য পৃথ্বীং নিষেদুষঃ পুষ্পফলাবনম্রান্ ।
তত্র দ্রুমান্ সাদরমীক্ষমাণো জগাম তৃপ্তিং ন কদাঽপি শৌরিঃ ॥ ৪-২৫॥
অলক্ষ্যমূলান্যতিবিপ্রকর্ষাদ্ ঘোষানুমেযস্খলিতোদকানি ।
উত্তুঙ্গরোধস্তরুমণ্ডলানি নিম্নানি দৃষ্ট্বা নিতরাং স রেমে ॥ ৪-২৬॥
অতুচ্ছগুচ্ছস্তনভারনম্রাঃ লতাঃ প্রবালাধরলোভনীযাঃ ।
স তত্র বীক্ষ্য ভ্রমরালকাঢ্যাস্তামস্মরত্তামরসাধিবাসাম্ ॥ ৪-২৭॥
সমুত্সুকং সাগরকন্যকাযামাক্রষ্টুমন্তঃকরণং মুরারেঃ ।
সর্বস্য বেত্তা সরসাং স বাচং সঙ্কর্ষণস্সাদরমিত্যুবাচ ॥ ৪-২৮॥
অন্তস্সমীরভ্রমণপ্রসঙ্গাদুদীর্ণনাদেন গুহামুখেন ।
ভূযঃ প্রযুঙ্ক্তে পৃথিবীধরস্তে গোবর্ধনঃ স্বাগতমেষ শৌরে ॥ ৪-২৯॥
নিশম্য গোবর্ধননির্ঝরাণাং ধীরধ্বনিং কৃষ্ণশিখণ্ডিনোঽমী ।
মুদা ত্বদালোকনজাতযেব নৃত্যন্তি চক্রীকৃতবর্হভারাঃ ॥ ৪-৩০॥
পাদাবিমৌ সঞ্চরণায নালমত্রেতি মত্বা মৃগযূথমেতত্ ।
স্বলোচনাংশুস্তবকাপদেশান্নীলোত্পলৈর্ভূমিমিবাস্তৃণাতি ॥ ৪-৩১॥
বিকীর্য বিষ্বগ্বিপিনদ্রুমাণাং মধূনি পুষ্পস্তবকচ্যুতানি ।
অর্কাংশুতপ্তামনিলো ধরিত্রীং সঞ্চারযোগ্যাং ভবতো বিধত্তে ॥ ৪-৩২॥
ন ভীতিরন্তর্ন দৃশোশ্চলত্বং নাস্থা তৃণেনোত্সুকতাঽপি শাবে ।
রূপেণ দামোদর মোহিতাস্তে তিষ্ঠন্ত্যমী কাষ্ঠকৃতা ইবৈণাঃ ॥ ৪-৩৩॥
তেনেতি সন্দর্শিতমগ্রজেন মনোহরং তত্তদবেক্ষমাণঃ ।
গাশ্চারযন্ শাদ্বলিনীষু ভূষু রেমে রমাযা রমণঃ প্রকামম্ ॥ ৪-৩৪॥
তং তত্র দৃষ্ট্বা মহনীযরূপং শৌরিং শবর্যশ্চরিতার্থনেত্রাঃ ।
ফলোপহারৈরুপসৃত্য বন্যৈরবাদিষুঃ প্রশ্রযশোভি বাক্যম্ ॥ ৪-৩৫॥
ইতঃ পদং নঃ শরপাতমাত্রং যাযাস্সহানেন সুহৃদ্গণেন ।
অত্রাগমিষ্যন্তি কিরাতপুত্রাঃ গবামমূষাং পরিপালনায ॥ ৪-৩৬॥
ব্যাধাহৃতৈর্বারণকুম্ভগর্ভাত্ মুক্তাফলৈরামলকাভিরামৈঃ ।
প্রসাধনং ত্বাং ভুবনত্রযস্য প্রসাধযিষ্যন্তি কিরাতকন্যাঃ॥ ৪-৩৭॥
কন্যাঽস্তি কাচিচ্ছবরেশ্বরস্য যা নঃ কুলানামধিদেবতেব ।
তাং সর্বথা দাস্যতি তে স রাজা মহান্ত্যনর্ঘাণি চ যৌতকানি ॥ ৪-৩৮॥
ইত্যূচিষীণাং শবরাঙ্গনানামত্যাদরং চেতসি বীক্ষমাণঃ ।
কৃষ্ণঃ কৃপানিঘ্নমনাস্স বাচমিত্যাহ লজ্জামৃদুনা স্বনেন ॥ ৪-৩৯॥
পিত্রোরনুজ্ঞামধিগম্য ভদ্রাঃ সমীহিতং বঃ সকলং বিধাস্যে ।
মযি স্থিতে তিষ্ঠতি গোকুলং তদ্গচ্ছামি মা ভূত বিষাদবত্যঃ ॥ ৪-৪০॥
গতে পুলিন্দীরিতি সান্ত্বযিত্বা তদিষ্টভঙ্গ্ব্যথিতে মুকুন্দে ।
ফলাপচাযাদিষু নিস্পৃহাস্তাঃ শনৈর্যযুঃ পক্কণমেব খিন্নাঃ ॥ ৪-৪১॥
বিহৃত্য গর্ভেষু লতাগৃহাণাং নিপীয বারীণি চ পল্বলানাম্ ।
ফলানি চাস্বাদ্য মহীরুহাণাং বনানি ধন্যানি চকার শৌরিঃ ॥ ৪-৪২॥
অথাধিরূঢে গগনস্য মধ্যং দিবাকরে দুঃসহভানুজালে ।
ঘর্মাকুলং গোকুলমীক্ষমাণঃ হলাযুধঃ প্রাহ রথাঙ্গপাণিম্ ॥ ৪-৪৩॥
কিঞ্চিত্পরিম্লানলতাপ্রবালস্তৃণাঙ্কুরভ্রান্তকুরঙ্গযূথঃ ।
অহ্নঃ পরিত্যক্তজনপ্রচারঃ প্রবর্ততে মধ্যম এষ ভাগঃ ॥ ৪-৪৪॥
কুলানি বীক্ষস্ব বিহঙ্গমানাং পক্ষান্তরস্থাপিতশাবকানি ।
কঠোরমেনং গমযন্তি কালং নীডেষু নিদ্রালসলোচনানি ॥ ৪-৪৫॥
প্রাযঃ কঠোরাতপপীডযেব ছাযাঃ পরিত্যক্তবহির্বিহারাঃ ।
আলোকযাধ্বন্যজনেন সার্দ্ধমধ্যাসতে মূলমনোহকানাং ॥ ৪-৪৬॥
করৈরসহ্যৈরযমংশুমালী তপন্ মহীমুগ্র ইব ক্ষিতীশঃ ।
আশংসিতাপত্প্রসরঃ প্রজাভির্ধত্তে দশামদ্য বিগর্হণীযাম্ ॥ ৪-৪৭॥
বিহৃত্য কান্তারমহীষু বেগাদ্ব্রজন্নপঃ পুষ্করিণীষু পাতুম্ ।
মার্গে করীন্দ্রঃ করশীকরেণ প্রিযামসাবুক্ষতি তাপখিন্নাম্ ॥ ৪-৪৮॥
তপ্তানি ভাসা তপনস্য হংসাঃ বিহায বারীণি নখংপচানি ।
পত্রেষু বিন্যস্য পদানি মন্দং পদ্মাকরে সম্প্রতি পর্যটন্তি ॥ ৪-৪৯॥
নিগূঢমীনগ্রহণাভিসন্ধিং কৃছ্রেণ মুক্ত্বা কপটাসিকাং স্বাম্ ।
অমী বকোটাস্তপনাংশুতাপাত্তটীনিকুঞ্জং তরসা বিশন্তি ॥ ৪-৫০॥
তদেহি যামস্তরুষণ্ডমেতদ্ ঘর্মাকুলং গোকুলমানযামঃ ।
অত্রৈব বিশ্রম্য মুহূর্তমাত্রং ভূযোঽপি গাবঃ প্রচরন্ত্বরণ্যে ॥ ৪-৫১॥
ইতীরিতং তত্সমযানুরূপং বাক্যং সমাকর্ণ্য হলাযুধস্য ।
আর্যো যথাজ্ঞাপযতীতি কৃষ্ণস্তং রামমুক্ত্বা তরুষণ্ডমাপ ॥ ৪-৫২॥
অলব্ধমার্তাণ্ডকরপ্রবেশমারামকল্পং তরুষণ্ডমেত্য ।
আনেতুকামঃ স গবাং কুলং তদাসজ্জযামাস মুখেন বেণুম্ ॥ ৪-৫৩॥
সলীলমীষত্পরিবৃত্তপাদং সবিভ্রমোদঞ্চিতসব্যনেত্রং ।
কৃষ্ণস্য বংশার্পিতপাটলোষ্ঠং বীক্ষ্য স্থিতং বিস্মযমাপ লোকঃ ॥ ৪-৫৪॥
তত্র স্থিতং তামরসাযতাক্ষং তাপিঞ্ছবর্ণং শিখিপিঞ্ছচূডং ।
তমেব পশ্যন্ননিমেষতাযাঃ ফলং প্রপেদে সুরসিদ্ধসঙ্ঘঃ ॥ ৪-৫৫॥
স্থিতস্ত্রিভঙ্গ্যা বিবরেষু বেণোর্ব্যাপারযন্নঙ্গুলিপল্লবানি ।
জগত্ত্রযীমোহবিধানদক্ষমুত্থাপযামাস স নাদমুচ্চৈঃ ॥ ৪-৫৬॥
অথোত্থিতানন্দনিমীলিতাক্ষ্যঃ বিলূনদূর্বাঙ্কুরলাঞ্ছিতাস্যাঃ ।
গাবস্তদভ্যাশমুপেত্য তস্থুঃ নিস্পন্দদেহা নিভৃতৈঃ শ্রবোভিঃ ॥ ৪-৫৭॥
নৈসর্গিকং বৈরমপত্যসঙ্গস্তৃষ্ণা বুভুক্ষা কুসুমাযুধশ্চ ।
তদ্বেণুনাদশ্রুতিতত্পরাণাং নালং বিধাতুং বিকৃতিং তিরশ্চাম্ ॥ ৪-৫৮॥
তস্মিন্ মনোহারিণি চক্রপাণের্বনান্তরে মূর্ছতি বংশনাদে ।
বিধীযমানং পরিহৃত্য কর্ম সর্বেঽপি সত্বা লিখিতা ইবাসন্ ॥ ৪-৫৯॥
প্রবৃত্তমাত্রৌ বনপদ্মিনীষু দাতুং গৃহীতুং চ মৃণালভঙ্গম্ ।
চক্রাহ্বযস্তদ্গৃহমেধিনী চ প্রসার্য চঞ্চূ পরমাসিষাতাম্ ॥ ৪-৬০॥
উপাবিশন্নুজ্ঝিতচাপলানি স্বজানুবিন্যস্তকরাননানি ।
নিষ্পন্দদৃষ্টীনি বনদ্রুমাণাং শাখাসু শাখামৃগমণ্ডলানি ॥ ৪-৬১॥
পদ্ভ্যামবষ্টভ্য মহীমুভাভ্যাং সদ্যস্সমুত্তম্ভিতপূর্বকাযঃ ।
সিংহঃ করীন্দ্রাক্রমণে প্রবৃত্তস্তস্থৌ তথা কৃত্রিমসিংহকল্পঃ ॥ ৪-৬২॥
সিদ্ধাঃ কলত্রাণি লতাগৃহেষু সমুদ্যতাঃ পাযযিতুং মধূনি ।
করদ্বযোদঞ্চিতরত্নপাত্রাঃ নিষেদুরালেখ্যমিব প্রপন্নাঃ ॥ ৪-৬৩॥
তদ্বংশনালাচ্চ্যুতমচ্যুতস্য গেযামৃতং সাধু নিষেব্য বৃক্ষাঃ ।
চিরং জরাজর্জরিতত্বচোঽপি বালা ইবাসন্নবপল্লবাঢ্যাঃ ॥ ৪-৬৪॥
নাদেন বেণোর্বিবশীকৃতানাং বিদ্যাধরাণাং গলিতাঃ করেভ্যঃ ।
গতির্ভবাস্মাকমপীতি নূনং বীণা নিপেতুর্মধুবিদ্বিষোঽগ্রে ॥ ৪-৬৫॥
স্ববেণুনাদেন স জীবলোকমিত্থং পরানন্দমযং বিধায ।
প্রভুর্ব্যরংসীদমরাশ্চ সর্বে সুপ্তোত্থিতানাং স্থিতিরন্বভূবন্ ॥ ৪-৬৬॥
প্রত্যাগতে চেতসি তে বিদিত্বা প্রভ্রশ্য হস্তাত্ পতিতা বিপঞ্চীঃ ।
পুনর্ন্ন চক্রুঃ প্রতিপন্নলজ্জাঃ বিদ্যাধরাস্তদ্গ্রহণাভিলাষম্ ॥ ৪-৬৭॥
মধুব্রতানাং ধ্বনিভির্মনোজ্ঞৈর্বাচালযন্তী বলযং দিশানাম্ ।
প্রসূনবৃষ্টিঃ সুরসিদ্ধমুক্তা পপাত মৌলৌ পরমস্য পুংসঃ ॥ ৪-৬৮॥
অবর্ষি কেনাযমদৃষ্টপূর্বঃ প্রসূনরাশিস্তব মূর্ধনীতি ।
পৃষ্টো বিহস্যাহ বিভুস্সহাযান্ জ্ঞানং ভবদ্ভোঽপি কথং মমেতি ॥ ৪-৬৯॥
বিষহ্যতাং যাতি বিবস্বদংশৌ বিশ্রান্তমুত্থাপ্য গবাং স পুঞ্জম্ ।
ভূযস্তৃণাশ্যামলভূতলেষু প্রারব্ধ সঞ্চারযিতুং বনেষু ॥ ৪-৭০॥
ততঃ পরিক্ষীণসহস্রভানোরশাম্যদূষ্মা দিবসস্য তীব্রঃ ।
যথা বিনাশে ধনসঞ্চযস্য মহাবলেপো ধনিনো জনস্য ॥ ৪-৭১॥
প্রভাকরে পাটলভাসি দূরং দিশং প্রতীচীমবগাহমানে ।
আলোক্য রামঃ পরিণামমহ্নো দামোদরং সাদরমিত্যুবাচ ॥ ৪-৭২॥
আবির্ভবন্মন্দমরুত্প্রচারা শান্তাতপা নির্বৃতসর্বসত্বা ।
বিরামবেলা দিবসস্য শৌরে প্রবর্ততে পশ্য মনোভিরামা ॥ ৪-৭৩॥
শিরোভিরূঢেন্ধনশাকমূলাঃ স্বযূথ্যমুচ্চৈঃস্বরমাহ্বযন্তঃ ।
বনেচরা বীক্ষ্য বিরামমহ্নঃ সমারভন্তে সহসৈব গন্তুম্ ॥ ৪-৭৪॥
শতং শতং ব্যোমনি বদ্ধমালাঃ শাত্কারবাচালবিলোলপক্ষাঃ ।
ব্রজন্তি লক্ষ্মীকৃতবাসবৃক্ষাঃ মনোজবাঃ পশ্য পতত্রিণোঽমী ॥ ৪-৭৫॥
ভুবঃ পরাগে বহুশো লুঠিত্বা প্রবিশ্য নীডং কলবিঙ্গযূথম্ ।
ধিনোত্যপত্যানি বুভুক্ষিতানি গ্রাসেন চঞ্চূপুটসঞ্চিতেন ॥ ৪-৭৬॥
তদেহি শৌরে তপনব্যপাযাত্প্রাগেব যামঃ পদমস্মদীযম্ ।
ইযং ক্ষতিঃ শ্বভ্রতটেন পশ্চাদ্দুঃসঞ্চরা লুব্ধকনির্মিতেন ॥ ৪-৭৭॥
শ্রুত্বেতি রামস্য গিরং মুরারিঃ অস্ত্বেবমিত্যাদরপূর্বমুক্ত্বা ।
সহ প্রতস্থে স চ মিত্রবর্গৈঃ প্রচণ্ডশ্রৃঙ্গধ্বনিপূরিতাশৈঃ ॥ ৪-৭৮॥
সহপ্রযাণায কৃতত্বরাণামূধোভরাদ্দূরবিলম্বিনীনাম্ ।
স তত্র তত্র প্রতিপাল্য তস্থৌ প্রীতো গবামাগমনং মুকুন্দঃ ॥ ৪-৭৯॥
সমাবৃতো গোপজনেন নন্দঃ গোপাঙ্গনাভিশ্চ বৃতা যশোদা ।
অতিষ্ঠতামধ্বনি লোচনাভ্যাং পুত্রাগতিপ্রেক্ষণসস্পৃহাভ্যাম্ ॥ ৪-৮০॥
চকার কর্ণেষু তযোঃ প্রমোদং দামোদরাপূরিতশৃঙ্গনাদঃ ।
দিবি প্রসর্পন্নথ পাংসুপূরঃ নেত্রেষু পীযূষমিবাভ্যবর্ষত্ ॥ ৪-৮১॥
তৌ ধূসরাঙ্গৌ রজসা কুমারৌ গত্বা স নন্দঃ পরিরভ্য গাঢম্ ।
আত্মানমানন্দসমুদ্রমগ্নং নালং সমুদ্ধর্তুমভূন্মুহূর্তম্ ॥ ৪-৮২॥
উত্পত্য ধাবদ্ভিরুদস্তশস্ত্রৈঃ ক্ষ্বেলারবক্ষোভিতদিগ্বিভাগৈঃ ।
আভীরবীরৈস্স বৃতঃ প্রপেদে ব্রজং সমাকর্ণিততূর্যঘোষম্ ॥ ৪-৮৩॥
চাটূক্তিভিঃ পার্শ্বচরানশেষান্ বিসৃজ্য গোপান্ সহিতস্স মিত্রৈঃ ।
বিবেশ কৃষ্ণো ভবনং দিনান্তে সমুজ্বলন্মঙ্গলদীপিকাভিঃ ॥ ৪-৮৪॥
কামং দিবা কর্ণপথং গতেন নীতাঃ প্রিযং বেণুরবেণ বিষ্ণোঃ ।
প্রতিপ্রিযং চক্রুরমুষ্য সাযং গাবঃ পযোদোহননিঃস্বনেন ॥ ৪-৮৫॥
অনুদিনমিতি কুর্বন্ পালনং গোকুলস্য
ক্ষণমিব দিবসানি ক্রীডযা যাপযন্ সঃ ।
অখিলমপি ধরিত্রীভারমভ্যুদ্ধরিষ্যন্
অরমত সহ শৌরিস্তত্র সঙ্কর্ষণেন ॥ ৪-৮৬॥
ইতি সুকুমারকৃতৌ কৃষ্ণবিলাসকাব্যে চতুর্থঃ সর্গঃ ॥ ৪ ॥
Encoded and proofread by PSA Easwaran psaeaswaran at gmail.com
Please send corrections to sanskrit@cheerful.com
Last updated ত্oday
http://sanskritdocuments.org
Krishna Vilasa Kavyam Lyrics in Bengali PDF
% File name : shrIkRiShNavilAsakAvyam.itx
% Location : doc\_vishhnu
% Author : sukumArakavi
% Language : Sanskrit
% Subject : philosophy/hinduism/religion
% Transliterated by : NS Panicker in Malayalam http://sreekrishnavilasam.blogspot.in/
% Proofread by : PSA Easwaran psaeaswaran at gmail.com
% Latest update : August 2, 2012
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : shrIkRiShNavilAsakAvyam.itx
% Location : doc\_vishhnu
% Author : sukumArakavi
% Language : Sanskrit
% Subject : philosophy/hinduism/religion
% Transliterated by : NS Panicker in Malayalam http://sreekrishnavilasam.blogspot.in/
% Proofread by : PSA Easwaran psaeaswaran at gmail.com
% Latest update : August 2, 2012
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website