ಶ್ರೀಕೃಷ್ಣವಿಲಾಸಕಾವ್ಯಮ್ ಸುಕುಮಾರಕವಿವಿರಚಿತಮ್
{॥ ಶ್ರೀಕೃಷ್ಣವಿಲಾಸಕಾವ್ಯಮ್ ಸುಕುಮಾರಕವಿವಿರಚಿತಮ್ ॥}
॥ ಶ್ರೀಃ ॥
ಪ್ರಥಮಃ ಸರ್ಗಃ
ಅಸ್ತಿ ಶ್ರಿಯಃ ಸದ್ಮ ಸುಮೇರುನಾಮಾ ಸಮಸ್ತಕಲ್ಯಾಣನಿಧಿರ್ಗಿರೀನ್ದ್ರಃ ।
ತಿಷ್ಠನ್ನಿದಂ ವಿಶ್ವಮನುಪ್ರವಿಶ್ಯ ಸ್ವೇನಾತ್ಮನಾ ವಿಷ್ಣುರಿವೋರ್ಜಿತೇನ ॥ ೧-೦೧॥
ಮಿಥಸ್ತಿರೋಭಾವವಿಲೋಕನಾಭ್ಯಾಂ ಸಙ್ಕ್ರೀಡಮಾನಾವಿವ ಬಾಲಕೌ ದ್ವೌ ।
ಪಾರ್ಶ್ವೇಷು ಯಸ್ಯಾಶು ಪರಿಭ್ರಮನ್ತೌ ಚನ್ದ್ರಾಂಶುಮನ್ತೌ ನಯತೋ ದಿನಾನಿ ॥ ೧-೦೨॥
ಉಚ್ಚೈಶ್ಶಿಖಃ ಕಾಞ್ಚನಗೌರವರ್ಣಸ್ತಮೋ ನಿಗೃಹ್ಣನ್ಮಹಸಾ ನಿಜೇನ ।
ದೀಪಸ್ತ್ರಯಾಣಾಮಿವ ವಿಷ್ಟಪಾನಾಂ ಯೋ ಭಾತಿ ಪರ್ಯನ್ತಚರತ್ಪತಙ್ಗಃ ॥ ೧-೦೩॥
ಯಸ್ಯಾ ಪತಿತ್ವೇ ವಿಹಿತಾಭಿಲಾಷಃ ಕರೋತಿ ತೀವ್ರಾಣಿ ತಪಾಂಸಿ ಲೋಕಃ ।
ಬಿಭರ್ತಿ ರತ್ನಾಕರಮೇಖಲಾಂ ತಾಮಙ್ಕೇನ ಪುತ್ರೀಮಿವ ಯೋ ಧರಿತ್ರೀಮ್ ॥ ೧-೦೪॥
ಮಹಾನ್ತಿ ದಾನಾನಿ ಮಖಾನುದಗ್ರಾನ್ ಪರಾಞ್ಚಿ ಪಾನಾಶನಯೋಸ್ತಪಾಂಸಿ ।
ಶರೀರಿಣಃ ಶಾನ್ತಮಲೈರ್ಮನೋಭಿಃ ಕುರ್ವನ್ತಿ ಯಚ್ಛೃಙ್ಗನಿವಾಸಕಾಮಾಃ ॥ ೧-೦೫॥
ಸುರಾ ಯುಗಾನ್ತೇಷು ಸಹ ಪ್ರಿಯಾಭಿರ್ನ್ನಿಷೇದಿವಾಂಸೋ ಯದಧಿತ್ಯಕಾಸು ।
ಉದನ್ವತಾಮೈಕ್ಯಮುಪಾಗತಾನಾಂ ಪಶ್ಯನ್ತಿ ಕಲ್ಲೋಲಶತಪ್ರಚಾರಾನ್ ॥ ೧-೦೬॥
ಪುಷ್ಪಾಣಿ ಶಯ್ಯಾಸ್ಸುರಪಾದಪಾನಾಂ ಕ್ರೀಡಾಗೃಹಾಃ ಕಾಞ್ಚನಗಹ್ವರಾಣಿ ।
ಭವನ್ತಿ ಚ ಸ್ವರ್ಗವಿಲಾಸಿನೀನಾಂ ರತ್ನಾಙ್ಕುರಾ ಯತ್ರ ರತಿಪ್ರದೀಪಾಃ ॥ ೧-೦೭॥
ಸ್ವರ್ಗೌಕಸಸ್ಸ್ವರ್ಣಮಹೀಷು ಪೀತಾಃ ಶ್ವೇತತ್ವಿಷೋ ರೂಪ್ಯಮಯೀಷು ಭೂಷು ।
ನೀಲಾಶ್ಚ ನೀಲೋಪಲಮೇದಿನೀಷು ಜ್ಞಾತುಂ ಮಿಥೋ ಯತ್ರ ನ ಶಕ್ನುವನ್ತಿ ॥ ೧-೦೮॥
ದರೀಗೃಹೋತ್ಸಙ್ಗಗತೇರನೂರೋಃ ಕಶಾಭಿಘಾತಧ್ವನಿಭಿಃ ಸಕಮ್ಪಾಃ ।
ಸದ್ಯಃ ಪ್ರಿಯಾನುಜ್ಝಿತಮಾನದೋಷಾಃ ಸುರಾಙ್ಗನಾ ಯತ್ರ ಪರಿಷ್ವಜನ್ತೇ ॥ ೧-೦೯॥
ನೇತುಂ ತ್ರಪಾನಮ್ರಮುಖೀರನೀಶಾಃ ಸ್ಫುಟಾನಿ ಯತ್ಸ್ವರ್ಣಗುಹಾನ್ತರಾಣಿ ।
ಸಿದ್ಧಾಃ ಪ್ರಯತ್ನೇನ ವಿನಾ ನವೋಢಾಃ ನಯನ್ತಿ ನೀಲೋಪಲಗಹ್ವರಾಣಿ ॥ ೧-೧೦॥
ಯತ್ರೋದ್ಯತಾನಾಂ ಕುಸುಮಾಪಚಾಯೇ ಕಾನ್ತಾಸು ಕಲ್ಪದ್ರುಮವಾಟಿಕಾಸು ।
ವಿಭಾನ್ತಿ ಸುತ್ರಾಮವಿಲಾಸಿನೀನಾಂ ಪದಾನಿ ಲಾಕ್ಷಾರಸಪಾಟಲಾನಿ ॥ ೧-೧೧॥
ಪಯೋದಮಾರ್ಗವ್ಯತಿಲಙ್ಘಿನೀಷು ಹಂಸಾಃ ಶಿರಃಪುಷ್ಕರಿಣೀಷು ಯಸ್ಯ ।
ವರ್ಷಾಗಮೇಽಪ್ಯಶ್ರುತಮೇಘನಾದಾಃ ನ ಕುರ್ವತೇ ಮಾನಸದೀರ್ಘಯಾತ್ರಾಮ್ ॥ ೧-೧೨॥
ಛನ್ನೇಷು ಯಸ್ಮಿನ್ ಕನಕೋಜ್ಜ್ವಲಾಭಿರಾಮೂಲಚೂಡಂ ನವಮಞ್ಜರೀಭಿಃ ।
ಗನ್ಧೇನ ವಿಜ್ಞಾಯ ಪತನ್ತಿ ಭೃಙ್ಗಾಃ ಶೃಙ್ಗಾನ್ತರಾರಗ್ವಧಪಾದಪೇಷು ॥ ೧-೧೩॥
ಮನ್ದಾಕಿನೀ ಯಚ್ಛಿಖರೇ ವಹನ್ತೀ ಕುಲ್ಯಾಪಥಾಭ್ಯನ್ತರಸಮ್ಪ್ರವಿಷ್ಟಾ ।
ಬಾಲೇವ ತದ್ರಕ್ಷಣಸಮ್ಪ್ರವೃತ್ತಾ ದಿನೇ ದಿನೇ ಸಿಞ್ಚತಿ ಪುಷ್ಪವಾಟೀಮ್ ॥ ೧-೧೪॥
ಶ್ರಿಯಾಭಿರಾಮಶ್ಶರಣಂ ಸುರಾಣಾಮಲಙ್ಘನೀಯೋ ಮಹತಾ ಮಹಿಮ್ನಾ ।
ವಿರಾಜಮಾನೋ ವನಮಾಲಯಾ ಚ ಯಃ ಶಾರ್ಙ್ಗಧನ್ವಾನಮನುಪ್ರಯಾತಿ ॥ ೧-೧೫॥
ಪುರಾ ಪುರಾಣಾಂ ತ್ರಿತಯಂ ದಿಧಕ್ಷೋರುಮಾಪತೇಃ ಕಾರ್ಮುಕತಾಂ ಪ್ರಪನ್ನಃ ।
ಮಧ್ಯೇನ ವಜ್ರಾಙ್ಕುಶಮತ್ಸ್ಯಚಿಹ್ನಂ ಯೋಽದ್ಯಾಪಿ ತನ್ಮುಷ್ಟಿಪದಂ ದಧಾತಿ ॥ ೧-೧೬॥
ಶೃಙ್ಗಾಗ್ರಭಾಜಾಂ ಸುರಸುನ್ದರೀಣಾಂ ಮುಖಾನಿ ಪಶ್ಯನ್ನಮಲಾನಿ ಚನ್ದ್ರಃ ।
ನಿಗೂಹಿತುಂ ನೂನಮುರಃಕಲಙ್ಕಂ ಹ್ರಿಯೇವ ಯತ್ಸಾನುಪಥೇನ ಯಾತಿ ॥ ೧-೧೭॥
ಮನೋಭಿರಾಮೇ ಶಿಖರೇ ತದೀಯೇ ಸಹೋಪವಿಷ್ಟಂ ಸುರಸಿದ್ಧಸಙ್ಘೈಃ ।
ಅವೋಚದಾಗತ್ಯ ಕೃತಪ್ರಣಾಮಾ ಕದಾಚಿದುರ್ವೀ ಕಮಲಾಧಿವಾಸಮ್ ॥ ೧-೧೮॥
ಪುಮಾನಿವಾಹಂ ಭವತಃ ಪುರಸ್ತಾದ್ಬ್ರವೀಮಿ ಕಿಞ್ಚಿತ್ ಪ್ರತಿಪದ್ಯ ಧೈರ್ಯಮ್ ।
ಪೀಡಾ ಮದೀಯಾ ಪರಮತ್ರ ಹೇತುರ್ನಿರ್ಲ್ಲಜ್ಜತಾ ನನ್ವಖಿಲೋಪಹಾಸ್ಯಾ ॥ ೧-೧೯॥
ಸೃಷ್ಟಾಸ್ತ್ವಯಾ ದತ್ತವರಾಶ್ಚ ದೈತ್ಯಾಃ ಭಾರೇಣ ಮಾಂ ಸಮ್ಪ್ರತಿ ಪೀಡಯನ್ತಿ ।
ಬಲೇ ಪ್ರಮಾಣೇ ಚ ಭವನ್ತಿ ಯೇಷಾಂ ನೈವೋಪಮಾನಂ ಕುಲಭೂಭೃತೋಽಪಿ ॥ ೧-೨೦॥
ಸ್ವವಿಕ್ರಮೋನ್ಮೂಲಿತರಾಜಕಾನಾಂ ಜಯೈಷಿಣಾಮದ್ಯ ಪರಸ್ಪರೇಣ ।
ತೇಷಾಂ ರಣಕ್ಷೋಣಿಷು ಸಿಂಹನಾದೈರ್ನಿರ್ಘಾತಘೋರೈರ್ಗಿರಯಃ ಸ್ಫುಟನ್ತಿ ॥ ೧-೨೧॥
ಮುಹುರ್ಬಲಾದುನ್ನಮಯತ್ಯಹೀನ್ದ್ರೇ ಮದ್ಭಾರಭುಗ್ನಂ ಫಣಚಕ್ರವಾಲಮ್।
ಮಮ ಪ್ರಕಮ್ಪಾಶ್ಚಲಿತಾಬ್ಧಿಶೈಲಾಃ ದಿಗ್ದನ್ತಿನೋ ಹನ್ತ ಕದರ್ಥಯನ್ತಿ ॥ ೧-೨೨॥
ಆಶಾಮುಖೇಷು ಭ್ರಮತಾಮಜಸ್ರಂ ತೇಷಾಂ ಚಮೂಭಿಃ ಪರಿಸರ್ಪಿಣೀಭಿಃ ।
ತಿರೋಹಿತಾಂ ಭಾನುಮತೋ ಮಯೂಖಾಃ ನ ಕ್ವಾಪಿ ಮಾಂ ಸಮ್ಪ್ರತಿ ಸಂಸ್ಪೃಶನ್ತಿ ॥ ೧-೨೩॥
ಸನ್ನಾಸ್ಮಿ ದೈತೇಯಭರೇಣ ಸಾಹಂ ಫಣೀಶ್ವರಸ್ಸೀದತಿ ಮದ್ಭರೇಣ ।
ತದ್ಭಾರಶೀರ್ಯನ್ನಿಜಕರ್ಪರಸ್ಯ ಧಿಕ್ ತಾಮವಸ್ಥಾಂ ಕಮಠೇಶ್ವರಸ್ಯ ॥ ೧-೨೪॥
ಭಾರಾವಸೀದದ್ಫಣಮಣ್ಡಲಸ್ಯ ಫಣೀಶ್ವರಸ್ಯೋಪರಿ ದುಃಸ್ಥಿತಾಽಹಮ್ ।
ಆಸನ್ನಪಾತಾಸ್ಮಿ ತಟೀವ ನದ್ಯಾಃ ಪ್ರವಾಹವೇಗೇನ ವಿಲುಪ್ತಮೂಲಾ ॥ ೧-೨೫॥
ನಿವೇದಿತಾ ದೇವ ಮಯಾ ದಶೇಯಮನುಕ್ತಿದೋಷೋ ಮಯಿ ನೋಪಪಾದ್ಯಃ ।
ನಿವೇದ್ಯತೇ ರಕ್ಷ್ಯಜನೇನ ದುಃಖಂ ತತಃ ಪರಸ್ತಾತ್ ಪ್ರಭವಃ ಪ್ರಮಾಣಮ್ ॥ ೧-೨೬॥
ಇತ್ಯುಕ್ತವತ್ಯಾಮುಚಿತಂ ಪೃಥಿವ್ಯಾಂ ಚಿನ್ತಾಬಲೇನ ಸ್ತಿಮಿತೋ ಮುಹೂರ್ತಮ್ ।
ಮುಖಾನಿ ಪಶ್ಯನ್ನಮೃತಾಶನಾನಾಂ ದೇವಃ ಪ್ರಜಾನಾಂ ಪತಿರಿತ್ಯುವಾಚ ॥ ೧-೨೭॥
ನಾಸತ್ಯಮೇತದ್ಯದವೋಚದುರ್ವೀ ಸ್ವಕರ್ಮಣಃ ಸಾಧು ಫಲಂ ಮಯಾಽಽಪ್ತಮ್ ।
ಮದ್ವರ್ದ್ಧಿತಾ ಮಾಮವಮತ್ಯ ದೈತ್ಯಾಃ ಬಲಾದುಪಘ್ನನ್ತಿ ಜಗನ್ತಿ ಯತ್ತೇ ॥ ೧-೨೮॥
ಅತೀತಕಾರ್ಯಾನುಶಯೇನ ಕಿಂ ಸ್ಯಾದಶೇಷವಿದ್ವಜ್ಜನಗರ್ಹಿತೇನ ।
ಸುರಾಃ ಸಮುನ್ಮೂಲನಮಾಶು ತೇಷಾಂ ಕರ್ತುಂ ಯತಧ್ವಂ ಜಗತಾಂ ಹಿತಾಯ ॥ ೧-೨೯॥
ಸದ್ಯಸ್ಸಮುತ್ತಿಷ್ಠತ ಚಿನ್ತಯಾಲಂ ಚಿನ್ತಾ ಹಿ ಕಾರ್ಯಪ್ರತಿಬನ್ಧಹೇತುಃ ।
ಯಾಮಃ ಪೃಥಿವ್ಯಾ ಸಹ ಯತ್ರ ತತ್ರ ನಾರಾಯಣೋ ದಾನವಕಾಲರಾತ್ರಿಃ ॥ ೧-೩೦॥
ಅಸ್ತ್ವೇವಮಿತ್ಯಾದರಪೂರ್ವಮೇವ ಸ ಸ್ವೀಕೃತೋಕ್ತಿಸ್ಸುರಸಿದ್ಧಸಙ್ಘೈಃ ।
ಸರೋಜಜನ್ಮಾ ಸಹ ತೈಃ ಪ್ರತಸ್ಥೇ ವಿಹಾಯಸಾ ವಿಶ್ವಪತೇಸ್ಸಕಾಶಮ್ ॥ ೧-೩೧॥
ಏಲಾಪರಿಷ್ವಙ್ಗಲಸತ್ತಮಾಲಂ ವೇಲಾಧಿರೂಢಸ್ಖಲದೂರ್ಮಿಮಾಲಮ್ ।
ದದರ್ಶ ಧಾತಾ ಮನಸೋಽನುಕೂಲಂ ಪಯಃಪಯೋಧೇರಚಿರೇಣ ಕೂಲಮ್ ॥ ೧-೩೨॥
ದದರ್ಶ ಚ ಕ್ಷೀರಮಯಂ ಸಮುದ್ರಂ ಕೈಲಾಸಶೃಙ್ಗೋನ್ನತಫೇನಕೂಟಮ್ ।
ಪುಣ್ಯಂ ಪಯಃಕೇಲಿಸಮುತ್ಸುಕಾನಾಂ ಶ್ರಿಯಃ ಸಖೀನಾಮವಗಾಹನೇನ ॥ ೧-೩೩॥
ಆನನ್ದಯಾಮಾಸ ದಿವೌಕಸಸ್ತಾನಾಘ್ರಾತಶೇಷೋ ಮುನಿಮಣ್ಡಲೇನ ।
ಪ್ರಕಾಮಪುಣ್ಯಃ ಪವನೋಪನೀತೋ ವೈಕುಣ್ಠವಕ್ಷಸ್ತುಲಸೀಸುಗನ್ಧಃ ॥ ೧-೩೪॥
ಗನ್ಧಾನುಸಾರೇಣ ವಿಸೃಷ್ಟನೇತ್ರೈರ್ಹಿರಣ್ಯಗರ್ಭಪ್ರಮುಖೈರಮರ್ತೈಃ ।
ನವಾರ್ಕಕಲ್ಪಂ ದದೃಶೇ ಮುರಾರೇರ್ವಕ್ಷಸ್ಥಲೀಕೌಸ್ತುಭರತ್ನಧಾಮ ॥ ೧-೩೫॥
ಅಪಹ್ನುತಾಶೇಷಮನೋವಿಕಾರಂ ದಿವಿಸ್ಪೃಶಾ ತೂರ್ಯರವೇಣ ಮಿಶ್ರಮ್ ।
ಆಕರ್ಣ್ಯ ವೈಕುಣ್ಠವಿಲಾಸಿನೀನಾಂ ಗೀತಧ್ವನಿಂ ಹರ್ಷಮಯಾಸಿಷುಸ್ತೇ ॥ ೧-೩೬॥
ಆಸಕ್ತಿಮಾಲಕ್ಷ್ಯ ವಿನೀತವೇಷಾ ಸ್ವಮೌಲಿವಿನ್ಯಸ್ತಕರಾಸ್ಸುರಾಸ್ತೇ ।
ಆಲೋಕಯಾಮಾಸುರಶೇಷನಾಥಂ ಸವಿಗ್ರಹಂ ಪುಣ್ಯಮಿವ ಪ್ರಜಾನಾಮ್ ॥ ೧-೩೭॥
ಪ್ರವೃದ್ಧಹೇಮಾಭರಣಪ್ರಕಾಶಂ ತಮಾಲನೀಲಂ ಜಲಧೌ ಶಯಾನಮ್ ।
ತಟಿಲ್ಲತಾಢ್ಯಂ ಪಯಸೋಽತಿಪಾನಾದನೀಶಮುದ್ಗನ್ತುಮಿವಾಮ್ಬುವಾಹಮ್ ॥ ೧-೩೮॥
ತರಙ್ಗವಾತೇನ ಪಯಃಪಯೋಧೇರಾಪೂರ್ಯಮಾಣಂ ಕರಪಾಞ್ಚಜನ್ಯಮ್ ।
ವಾಮೇನ ತಿರ್ಯಗ್ವಲತಾ ಸಲೀಲಂ ಸಮ್ಭಾವಯನ್ತಂ ಮುಹುರೀಕ್ಷಣೇನ ॥ ೧-೩೯॥
ಪ್ರತಿಕ್ಷಣಂ ಪ್ರೇಮವಿಶೇಷಜಾಭಿಸ್ಸಮ್ಭಾವನಾಭಿಃ ಕಮಲಾಸನಾಯಾಃ ।
ಪುರಾಽಽತ್ಮನಾ ಕಲ್ಪಿತಮಮ್ಬುರಾಶೇಃ ಪ್ರಮಾರ್ಜಯನ್ತಂ ಮಥನಾವಮಾನಮ್ ॥ ೧-೪೦॥
ಪರ್ಯಾಯತಃ ಪಾಣಿಧೃತಂ ಸರೋಜಂ ವಿನ್ಯಸ್ಯ ವಿನ್ಯಸ್ಯ ದೃಶೋಃ ಪದವ್ಯಾಮ್।
ನಿದ್ರಾಂ ಪ್ರಬೋಧಂ ಚ ಮುಹುರ್ನ್ನಯನ್ತೀಂ ಪದ್ಮಾಸನಾಂ ಸಸ್ಮಿತಮೀಕ್ಷಮಾಣಾಮ್ ॥ ೧-೪೧॥
ಸ್ವಚ್ಛಸ್ವದೇಹಪ್ರತಿಬಿಮ್ಬಿತೇನ ಫಣಾಶ್ಮಜಾಲೇನ ಫಣೀಶ್ವರಸ್ಯ ।
ಭಾಸ್ವತ್ ಫಲಸ್ತೋಮನಿರನ್ತರಸ್ಯ ವಹನ್ತಮಾಭಾಂ ವಟಪಾದಪಸ್ಯ ॥ ೧-೪೨॥
ಅಜಸ್ರಮಾಸೀನರಥಾಙ್ಗಶಙ್ಖಮತಿಪ್ರಸನ್ನಂ ಕಮಲಾಧಿವಾಸಮ್ ।
ಸನ್ತಾಪವಿಚ್ಛೇದಕರಂ ಪ್ರಜಾನಾಂ ಹ್ರದಂ ಮಹೀಯಾಂಸಮಿವಾಭಿಗಮ್ಯಮ್ ॥ ೧-೪೩॥
ವಕ್ತುಂ ಮಿಥೋ ರಾಹುವಿಚೇಷ್ಟಿತಾನಿ ಕರ್ಣದ್ವಯಾಭ್ಯರ್ಣಮುಪೇಯಿವಾಂಸೌ ।
ಅಲಬ್ಧಕಾಲಾವಿವ ಭಾನುಚನ್ದ್ರೌ ರಥಾಙ್ಗಶಙ್ಖೌ ದಧತಂ ಕರಾಭ್ಯಾಮ್ ॥ ೧-೪೪॥
ದ್ವಾರಸ್ಥಸೇನಾಪತಿಚೋದಿತೇನ ನಿವಾರಿತಾಃ ಕಞ್ಚುಕಿಮಣ್ಡಲೇನ ।
ಸುರಾಃ ಪ್ರಮೋದಸ್ಖಲಿತೈರ್ವಚೋಭಿಃ ಸ್ಥಿತ್ವೈವ ತೇ ವ್ಯೋಮನಿ ತುಷ್ಟುವುಸ್ತಮ್ ॥ ೧-೪೫॥
ನಮಃ ಪರಸ್ಮೈ ಪುರುಷಾಯ ತುಭ್ಯಂ ಗಿರಾಂ ಧಿಯಾಮಪ್ಯಪಥಿ ಸ್ಥಿತಾಯ ।
ಅಸ್ಮಾನ್ ಪುನಸ್ತ್ರಾತುಮುದಗ್ರಮೋಹಾನ್ ಕೃಪಾಬಲಾತ್ ಕಲ್ಪಿತವಿಗ್ರಹಾಯ ॥ ೧-೪೬॥
ಭಾಗೀರಥೀ ಪಾದಕುಶೇಶಯಾತ್ತೇ ವಿನಿರ್ಗತಾ ವಿಶ್ವಮಿದಂ ಪುನೀತೇ ।
ಕಸ್ತ್ವಾಂ ಪುನರ್ಭಾವಯತೋ ಜನಸ್ಯ ಶುದ್ಧಿಂ ಪರಿಚ್ಛೇತ್ತುಮಲಂ ಮನೀಷೀ ॥ ೧-೪೭॥
ಅನನ್ತಶಕ್ತೇರಪವಿಕ್ರಿಯಸ್ಯ ತಿಸ್ರಸ್ತ್ರಿಲೋಕೀಶ್ವರ ಶಕ್ತಯಸ್ತೇ ।
ವಿತನ್ವತೇ ಸ್ಥಾವರಜಙ್ಗಮಾನಾಮುತ್ಪಾದನಕ್ಷೇಮವಿಲೋಪನಾನಿ ॥ ೧-೪೮॥
ಕಟಾಕ್ಷಮಾತ್ರೇಣ ಭವಾಮ್ಬುರಾಶೇಃ ಪಾರಂ ಪರಂ ಪ್ರಾಪಯಿತುಸ್ತ್ರಿಲೋಕೀಮ್ ।
ಸಕೃನ್ನಮಸ್ಯಾ ಪರಮಾತರಸ್ತೇ ಯತ್ನಾನುರೂಪಂ ಹಿ ಫಲಂ ಕ್ರಿಯಾಣಾಮ್ ॥ ೧-೪೯॥
ತ್ವಂ ಜ್ಯೋತಿರಾಪಸ್ತ್ವಮಸಿ ತ್ವಮುರ್ವೀ ತ್ವಂ ವ್ಯೋಮ ವೈಶ್ವಾನರಸಾರಥಿಸ್ತ್ವಮ್ ।
ತ್ವಂ ಜೀವವರ್ಗಃ ಪರಮಸ್ತ್ವಮಾತ್ಮಾ ಯನ್ನಾಸಿ ಕಿಂ ನಾಮ ಜಗತ್ಪತೇ ತತ್ ॥ ೧-೫೦॥
ನವಾಭ್ರವರ್ಣಂ ನಲಿನಾಯತಾಕ್ಷಂ ಪೀತಾಮ್ಬರಂ ಹಾರಕಿರೀಟಿನಂ ತ್ವಾಮ್ ।
ವಯಂ ತು ಸೇವೇಮಹಿ ವೀಕ್ಷಮಾಣಾಃ ಸಾಯೂಜ್ಯಮನ್ವಿಛತಿ ಕಃ ಸುಖಾರ್ಥೀ ॥ ೧-೫೧॥
ಅಲಂ ನ ನಿರ್ದೇಷ್ಟುಮಿಯತ್ತಯಾ ತ್ವಾಮಶೇಷನಾಥ ಶ್ರುತಿರಗ್ರಿಮಾಪಿ ।
ಸ ಏವ ಸಾಕ್ಷಾತ್ಕ್ರಿಯತೇ ಪುನಸ್ತ್ವಮಹೋ ಜಿತಂ ನಃ ಸುಕೃತೈರನಲ್ಪೈಃ ॥ ೧-೫೨॥
ತೃಣಾಯ ಮತ್ವಾ ನಿಖಿಲಾನಿ ಶಾರ್ಙ್ಗಿನ್ ಪದಾನಿ ವೈಧೇಯಮನೋಹರಾಣಿ ।
ಆವೃತ್ತಿಶೂನ್ಯಂ ಪರಮಂ ಪದಂ ತೇ ವಾಞ್ಛನ್ತಿ ವೈರಾಗ್ಯಧನಾ ಮಹಾನ್ತಃ ॥ ೧-೫೩॥
ಇತಿ ಸ್ತುತೋ ದೇವಗಣೇನ ದೇವೋ ದಯಾನಿಧಿರ್ದಾನವಕಾಲರಾತ್ರಿಃ ।
ನ್ಯಷೀದದುತ್ಥಾಯ ಭರಾವಭುಗ್ನೇ ಭುಜಙ್ಗತಲ್ಪೇ ಭುವನೈಕನಾಥಃ ॥ ೧-೫೪॥
ವಿಷ್ವಕ್ ಸ ವೈಕುಣ್ಠವಿಲಾಸಿನೀನಾಂ ಸಲೀಲಮಾನ್ದೋಲಿತಚಾಮರಾಣಾಮ್ ।
ನಿವಾರಯನ್ನಗ್ರಕರಾರವಿನ್ದೈಃ ಕೋಲಾಹಲಂ ಕಾಞ್ಚನಕಙ್ಕಣೋತ್ಥಮ್ ॥ ೧-೫೫॥
ಪ್ರಸಾದವತ್ಯಾ ಕಮಲಾಸನಾದೀನ್ ಸುರಾನಶೇಷಾನನುಗೃಹ್ಯ ದೃಷ್ಟ್ಯಾ ।
ಉವಾಚ ವಾಚಂ ದಶನಾಂಶುಪೂರೈಃ ಸಮೇಧಯನ್ ದುಗ್ಧಮಯಂ ಪಯೋಧಿಮ್ ॥ ೧-೫೬॥
ಅಧಿಜ್ಯಕೋದಣ್ಡಧರೋ ನಿಷಙ್ಗೀ ಸನ್ನಾಹವಾನ್ ಪಾಣಿಧೃತೈಕಬಾಣಃ ।
ಅಯಂ ಸಮಾಜೋ ಭವತಾಂ ದ್ವಿಷದ್ಭ್ಯೋ ಭಯಂ ಸಮಾವೇದಯತಿ ಸ್ಫುಟಂ ಮೇ ॥ ೧-೫೭॥
ಅಲಂ ವಿಲಮ್ಬೇನ ದಿವೌಕಸಸ್ತನ್ನಿವೇದ್ಯತಾಮದ್ಯ ಕುತೋ ಭಯಂ ವಃ ।
ಅಯಂ ಕರೋ ದುಷ್ಟವಧೋತ್ಸುಕಂ ಮೇ ಸುದರ್ಶನಂ ನ ಕ್ಷಮತೇ ನಿರೋದ್ಧುಮ್ ॥ ೧-೫೮॥
ಇತ್ಯೂಚಿವಾಂಸಂ ಪರಮಂ ಪುಮಾಂಸಂ ನತ್ವಾ ಶಿರೋಭಿರ್ಬಹುಶಃ ಸುರಾಸ್ತೇ ।
ಆರೂಢಹರ್ಷಾತಿಶಯಾಃ ಸ್ವಮರ್ಥಮಾರೇಭಿರೇ ವಕ್ತುಮಶೇಷಮೇವ ॥ ೧-೫೯॥
ನಿವಾರ್ಯ ಸರ್ವಾನಪಿ ವಕ್ತುಕಾಮಾನ್ ಸೇನಾಪತಿಸ್ತಾನಮರಾನ್ ಕರೇಣ ।
ಸವಿಭ್ರಮಪ್ರೇರಿತಯಾ ಪುರಸ್ಥಂ ದೃಷ್ಟ್ಯಾ ಸರೋಜಾಸನಮಾಜುಹಾವ ॥ ೧-೬೦॥
ಅಥಾಗತಸ್ತೇನ ಕರೇ ಗೃಹೀತ್ವಾ ನೀತಃ ಪ್ರಭೋರನ್ತಿಕಮಬ್ಜಯೋನಿಃ ।
ವಕ್ತುಂ ನಿಯುಕ್ತಃ ಸ ಕೃತಪ್ರಣಾಮೋ ವಿಜ್ಞಾಪಯಾಮಾಸ ವಿನೀತವೇಷಃ ॥ ೧-೬೧॥
ವಯಂ ತ್ವಯಾ ದತ್ತವಿಭೂತಯೋಽಪಿ ಮೋಹಾತಿರೇಕಾದಭಿಮನ್ಯಮಾನಾಃ ।
ಕೃಚ್ಛ್ರೇ ಪುನಸ್ತ್ವಾಂ ಶರಣಂ ವ್ರಜನ್ತಃ ಹಾ ನಿಸ್ತ್ರಪಾಣಾಂ ಪ್ರಥಮೇ ಭವಾಮಃ ॥ ೧-೬೨॥
ಅಪಾರದುಃಖಾರ್ಣವಪೋತಪಾತ್ರೀಂ ತ್ವಯಾ ಕೃಪಾಮುದ್ವಹತಾತಿಗುರ್ವೀಮ್ ।
ಕೃತಘ್ನತಾಜನ್ಮಭುವಾಮಮೀಷಾಮಸ್ಮಾಕಮರ್ಥೇ ನ ಕಿಮನ್ವಭಾವಿ ॥ ೧-೬೩॥
ಮನಸ್ವಿಲೋಕಸ್ಯ ವಿಗರ್ಹಣೀಯೇ ಪ್ರತಿಗ್ರಹೇ ವರ್ಜಯತಾ ಜುಗುಪ್ಸಾಮ್ ।
ಪುರಾ ಪುರಸ್ತಾದ್ಬಲಿದಾನವಸ್ಯ ಪ್ರಸಾರಿತೋ ನಾಗ್ರಕರಸ್ತ್ವಯಾ ಕಿಮ್ ॥ ೧-೬೪॥
ದೈತ್ಯಾಧಿರಾಜೇನ ಹಿರಣ್ಯನಾಮ್ನಾ ಪರ್ಯಾಕುಲಂ ತ್ರಾತುಮಶೇಷಲೋಕಮ್ ।
ಇದಂ ತು ದಿವ್ಯಂ ಪರಿಹೃತ್ಯ ರೂಪಂ ನ ತ್ವಂ ಕಿಮಾಸೀರ್ನರತಿರ್ಯಗಾತ್ಮಾ ॥ ೧-೬೫॥
ಸ್ವವಿಕ್ರಮಾಕ್ರಾನ್ತಸುರಾಸುರಸ್ಯ ರಕ್ಷಃಪತೇರ್ನಿಗ್ರಹಣಾದರೇಣ ।
ಭೂತ್ವಾ ಸುತಃ ಪಙ್ಕ್ತಿರಥಸ್ಯ ರಾಜ್ಞಸ್ತಾಂ ತಾಮವಸ್ಥಾಂ ನ ಕಿಮನ್ವಭೂಸ್ತ್ವಮ್ ॥ ೧-೬೬॥
ಅನೇಕಧಾ ಪಾಲಯಿತಾರಮೇವಂ ಸಮ್ಪ್ರತ್ಯಪಿ ತ್ವಾಂ ಶರಣಂ ಪ್ರಪನ್ನಾಃ ।
ಸನ್ತಾಪಹಾರೀ ನನು ಚಾತಕಾನಾಂ ಭೂಯೋಽಪಿ ಭೂಯೋಽಪಿ ಪಯೋದ ಏವ ॥ ೧-೬೭॥
ವಿಶ್ವಂ ವಿದನ್ನಪ್ಯವಿದನ್ನಿವ ತ್ವಂ ನಾಥಾನುಯುಙ್ಕ್ಷೇ ಭಯಹೇತುಮಸ್ಮಾನ್ ।
ಅನುಗ್ರಹಸ್ಯೈತದಪಿ ಪ್ರಭೂಣಾಂ ಪ್ರಾಯಃ ಪ್ರಕಾರಾನ್ತರಮಾಶ್ರಿತೇಷು ॥ ೧-೬೮॥
ತಪೋಭಿರುಗ್ರೈರ್ಭಗವನ್ ಸುರಾಣಾಮವಧ್ಯಭಾವಂ ದನುಜಾಃ ಪ್ರಪನ್ನಾಃ ।
ಪಾತಾಲಮುರ್ವೀಂ ಚ ವಿಜಿತ್ಯ ದರ್ಪಾದುಪಕ್ರಮಂ ತೇ ದಿವಮದ್ಯ ಜೇತುಮ್ ॥ ೧-೬೯॥
ನ ಜಾತು ಶೂನ್ಯಃ ಕುಲಿಶೇನ ಪಾಣಿರ್ವಕ್ಷೋ ನ ಮುಕ್ತಂ ಮಣಿಕಙ್ಕಟೇನ ।
ಶಕ್ರಸ್ಯ ದೈತ್ಯಾಗತಿಶಙ್ಕಿನೋಽಸ್ಯ ನಾಸಜ್ಜಿತಸ್ತಿಷ್ಠತಿ ವಾರಣೇನ್ದ್ರಃ ॥ ೧-೭೦॥
ದಣ್ಡಂ ಯಮಾತ್ಪಾಶಮಪಾಮಧೀಶಾದ್ಗದಾಂ ಕುಬೇರಾತ್ಕುಲಿಶಂ ಮಘೋನಃ ।
ಆದಾತುಕಾಮಃ ಪ್ರಹಿಣೋತಿ ದೂತಾನ್ ಕಂಸಃ ಸ್ವದೋರ್ವಿಕ್ರಮನಿರ್ಜಿತಾಶಃ ॥ ೧-೭೧॥
ರಣೇ ವಿನಿರ್ಜಿತ್ಯ ಬಲಂ ಸುರಾಣಾಂ ಪರಾಕ್ರಮೇಣಾಪ್ರತಿಮೇನ ವೀರಃ ।
ಭೋಜೇಶ್ವರಃ ಕ್ರೀಡತಿ ಸಾವರೋಧೋ ಮೂಲೇಷು ಸಮ್ಪ್ರತ್ಯಮರದ್ರುಮಾಣಾಮ್ ॥ ೧-೭೨॥
ಧನುರ್ಧರಾಧ್ಯಾಸಿತವಪ್ರಶೀರ್ಷಾಃ ದ್ವಾಃಪಾಲನವ್ಯಗ್ರಸಮಗ್ರಯೋಧಾಃ ।
ಪ್ರವೀರನಿರ್ಭರ್ತ್ಸಿತಕಾನ್ದಿಶೀಕಾ ಸ್ಥಾತುಂ ನ ಜಾನಾತಿ ಪುರೀ ಸುರಾಣಾಮ್ ॥ ೧-೭೩॥
ಹಾಹೇತಿ ವಿಕ್ರೋಶದನಾಥಮೇತದ್ವಿಶ್ವಂ ಜಗತ್ಪೀಡಯತಃ ಪ್ರಕಾಮಮ್ ।
ತ್ವಯಾ ವಿನಾಽನ್ಯಸ್ತ್ರಿಷು ವಿಷ್ಟಪೇಷು ನ ಕರ್ತುಮೀಷ್ಟೇ ನರಕಸ್ಯ ಭಙ್ಗಮ್ ॥ ೧-೭೪॥
ಪ್ರಲಮ್ಬಕೇಶಿಪ್ರಮುಖಾಸ್ತಥಾನ್ಯೇ ಪರಸ್ಸಹಸ್ರಂ ಪರಿಯನ್ತಿ ದೈತ್ಯಾಃ ।
ನಿರ್ಘಾತಕಲ್ಪೈರ್ನಿಜಸಿಂಹನಾದೈರ್ವಿದಾರಯನ್ತೋ ವಿಯದಾಹವೇಷು ॥ ೧-೭೫॥
ಷಟ್ ಸೂನವಸ್ಸನ್ತಿ ಹಿರಣ್ಯನಾಮ್ನೋ ದೈತ್ಯಸ್ಯ ಪಾತಾಲತಲಾಧಿವಾಸೈಃ ।
ತೈರ್ನ್ನಃ ಕ್ರಿಯನ್ತೇ ದುರಿತಾನಿ ಯಾನಿ ವಕ್ತುಂ ನ ಶಕ್ಯಾನಿ ಮುಕುನ್ದ ತಾನಿ ॥ ೧-೭೬॥
ತೇಷಾಂ ಮಹೀಧ್ರಪ್ರತಿಮಾಕೃತೀನಾಂ ಭಾರಂ ಮಹೀ ಸೋಢುಮಸಾವಶಕ್ತಾ ।
ಅಸ್ಮಾನ್ ಪುರಸ್ಕೃತ್ಯ ಭವತ್ಸಕಾಶಂ ಪ್ರಾಪ್ತಾ ನಿಜಕ್ಲೇಶನಿವೇದನಾಯ ॥ ೧-೭೭॥
ತದೇತದಾವೇದನಮಸ್ಮದೀಯಂ ಶ್ರುತ್ವಾ ಪ್ರಮಾಣಂ ಪ್ರಭುರಿತ್ಯುದೀರ್ಯ ।
ವಿಧಿರ್ವ್ಯರಂಸೀದ್ವಿಹಿತಪ್ರಣಾಮಃ ಸ ಚಾಪಿ ಗಮ್ಭೀರಮುವಾಚ ದೇವಃ ॥ ೧-೭೮॥
ಅಲಂ ವಿಷಾದೇನ ದಿವೌಕಸೋ ವಃ ಸಮೀಹಿತಂ ಹಸ್ತಗತಂ ಮನುಧ್ವಮ್ ।
ವ್ರತಂ ಹಿ ಮೇ ಕೇವಲಮೇತದೇವ ಸಂರಕ್ಷಣಂ ಯಚ್ಛರಣಾಗತಾನಾಮ್ ॥ ೧-೭೯॥
ಮಾಮರ್ಥಯನ್ತೇ ವಸುದೇವಪತ್ನ್ಯೌ ಪತ್ನೀ ಚ ನನ್ದಸ್ಯ ಸುತಂ ಗುಣಾಢ್ಯಮ್ ।
ಅಂಶದ್ವಯೇನ ವ್ರತಕರ್ಶಿತಾಙ್ಗೀಸ್ತಿಸ್ರೋಽಪಿ ತಾಃ ಪುತ್ರವತೀರ್ವಿಧಾಸ್ಯೇ ॥ ೧-೮೦॥
ಇಯಂ ಚ ಲೋಕತ್ರಿತಯಸ್ಯ ಮಾತಾ ಮಾಯಾಭಿಧಾನಾ ಮಮ ಶಕ್ತಿರಗ್ರ್ಯಾ ।
ಕಾರ್ಯಾಣಿ ವಃ ಕಾನ್ಯಪಿ ಕರ್ತುಕಾಮಾ ಜನಿಷ್ಯತೇ ಜನ್ಮವಿನಾಶಶೂನ್ಯಾ ॥ ೧-೮೧॥
ತದ್ಗಚ್ಛತ ಸ್ವರ್ಗಮಪೇತಖೇದಾಃ ನ ಕಾಲಹಾನಿಃ ಪರಿಶಙ್ಕನೀಯಾ ।
ಅನೇನ ಶಾರ್ಙ್ಗೇಣ ಶಪೇ ಶರೈರ್ವಃ ಸದ್ಯೋ ಮನಃಶಲ್ಯಮಪಾಕರಿಷ್ಯೇ ॥ ೧-೮೨॥
ಇತಿ ತಮಮರಲೋಕಂ ಸಾನ್ತ್ವಯಿತ್ವಾ ಸ ದೇವಃ
ಸಪದಿ ನವಘನಾಭಃ ಪದ್ಮನಾಭಸ್ತಿರೋಽಭೂತ್ ।
ಸ ಚ ವಿಹಿತನಮಸ್ಯಸ್ತಸ್ಯ ವಾಚಂ ಪ್ರಶಂಸನ್
ನಿಜಪದಮಭಿಪೇದೇ ಹರ್ಷಪರ್ಯಾಕುಲಾತ್ಮಾ ॥ ೧-೮೩॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ಪ್ರಥಮಸ್ಸರ್ಗಃ ॥ ೧ ॥
ದ್ವಿತೀಯಃ ಸರ್ಗಃ
ಅಥೈಕದಾ ಪುತ್ರಫಲಾನಿ ಸಮ್ಯಗ್ವ್ರತಾನಿ ಬಾಹ್ಯೋಪವನೇ ಚರನ್ತೀಮ್ ।
ರಥೇನ ಕಂಸೋ ವಸುದೇವಯುಕ್ತಃ ಸ್ವಸಾರಮಾಲೋಕಯಿತುಂ ಜಗಾಮ ॥ ೨-೦೧॥
ಸ್ಫುರತ್ಪ್ರಭಾಪಲ್ಲವಿತಾಙ್ಗಯಷ್ಟೀಂ ಕಥಞ್ಚಿದೂಢಸ್ತನಮಞ್ಜರೀಕಾಮ್ ।
ತತ್ರಾಲಕೈಃ ಷಟ್/ಪದಿನೀಮಜಾನಾತ್ ಸ ತಾಂ ಲತಾಮಧ್ಯಗತಾಂ ಚಿರೇಣ ॥ ೨-೦೨॥
ಸಾ ಸನ್ನತಾಙ್ಗೀ ನಿಯಮಾವಸಾನೇ ಜ್ಯೇಷ್ಠಾಯ ತಸ್ಮೈ ವಿದಧೇ ನಮಸ್ಯಾಮ್ ।
ಸ ಚಾಶಿಷಾ ತಾಮನುಗೃಹ್ಯ ಸಾಧ್ವೀಂ ಭೋಜೇಶ್ವರೋ ವಾಕ್ಯಮಿದಂ ಬಭಾಷೇ ॥ ೨-೦೩॥
ಅದ್ಯಾಪಿ ಬಾಲಾಸಿ ಸುತಾನನೇಕಾನ್ ಪ್ರಸೋಷ್ಯಸೇ ಕಿಂ ವ್ರತಯಾತನಾಭಿಃ ।
ಪಶ್ಯಾಧುನಾ ಪಲ್ಲವಸೂತಿಕಾಲೇ ಕಿಂ ಕಲ್ಪತೇ ಚೂತಲತಾ ಫಲಾಯ ॥ ೨-೦೪॥
ಕೃಶಾಸಿ ಕಾಮಂ ವಿರಮ ಪ್ರಯಾಸಾನ್ಮನೋಭಿರಾಮಾನುಪಭುಙ್ಕ್ಷ್ವ ಭೋಗಾನ್ ।
ಅಙ್ಗಾನಿ ತೇ ಸನ್ನತಗಾತ್ರಿ ದುಃಖಂ ಮೃಣಾಲಕಲ್ಪಾನಿ ಕಥಂ ಸಹೇರನ್ ॥ ೨-೦೫॥
ತಾಮೇವಮುಕ್ತ್ವಾ ಸ ತು ಸಾಭ್ಯನುಜ್ಞಾಂ ರಥಂ ಸಮಾರೋಪ್ಯ ಸಹೈವ ಪತ್ಯಾ ।
ಪ್ರಯಾತುಕಾಮಃ ಪುರಮನ್ತರಿಕ್ಷೇ ಶುಶ್ರಾವ ವಾಚಂ ಶತಧಾರಕಲ್ಪಾಮ್ ॥ ೨-೦೬॥
ತ್ವದನ್ತಿಕಸ್ಥಾ ಸಹಜಾಶಮೀಯಂ ಪ್ರಸೋಷ್ಯತೇ ಪುತ್ರಮಯಂ ಕೃಶಾನುಮ್ ।
ಮರುತ್ಸಮಿದ್ಧಸ್ಸ ತು ದುರ್ನಿವಾರಸ್ತ್ವಾಂ ಭಸ್ಮಸಾತ್ ಕಂಸ ಕರಿಷ್ಯತೀತಿ ॥ ೨-೦೭॥
ನಿಶಮ್ಯ ತದ್ಭೂತವಚೋ ನಿಕಾಮಂ ಕಂಸಸ್ಸ ರೋಷಾಗಮದುರ್ನಿರೀಕ್ಷ್ಯಃ ।
ಕೃಪಾಂ ಪರಿತ್ಯಜ್ಯ ಕೃಪಾಣಪಾಣಿಃ ಸ್ವಸುರ್ವಧಾಯ ಸ್ವಯಮುದ್ಯತೋಽಭೂತ್ ॥ ೨-೦೮॥
ನೃಶಂಸಕೃತ್ಯೇ ನಿತರಾಂ ಪ್ರವೃತ್ತಮುದಗ್ರಕೋಪಸ್ಫುರಿತಾಧರೋಷ್ಠಮ್ ।
ಪ್ರಸಾದಯನ್ನಾನಕದುನ್ದುಭಿಸ್ತಮುವಾಚ ಧೀಮಾನುಪಪತ್ತಿಯುಕ್ತಮ್ ॥ ೨-೦೯॥
ಅಲಂ ತವಾನೇನ ವಧೋದ್ಯಮೇನ ತ್ವಯಾ ವಿಧೇಯೋ ನೃಪತೇ ವಿಮರ್ಶಃ ।
ಕಿಮೇಷ ನಾಶ್ರಾವಿ ವಿಚಾರಶೂನ್ಯಂ ವ್ರಜನ್ತ್ಯನರ್ಥಾ ಇತಿ ಸಾಧುವಾದಃ ॥ ೨-೧೦॥
ಭಯೇನ ಯುದ್ಧೇಷು ಪುರನ್ದರಾದೀನ್ ಸುರಾನ್ ಪರಾಚಸ್ತ್ರಪಯಾ ವಿಮುಞ್ಚನ್ ।
ಮಹೀಶ್ವರ ಸ್ತ್ರೀವಧಪಾತಕೇಽಸ್ಮಿನ್ ಕಥಂ ತವೋಪಕ್ರಮತೇ ಕೃಪಾಣಃ ॥ ೨-೧೧॥
ಅನೇನ ಕಿಂ ವಾ ತವ ಜೀವಿತೇನ ಯದ್ರಕ್ಷಣಂ ಸ್ಯಾತ್ ಸಹಜಾವಧೇನ ।
ಗುಣೇನ ಕೇನಾಪಿ ಹಿ ಲಬ್ಧನಾಮ್ನಾಮಪಿ ಸ್ವನಾಶಾದಯಶೋ ಗರೀಯಃ ॥ ೨-೧೨॥
ಪ್ರಪದ್ಯಮಾನಸ್ಯ ಸದಾಭಿವೃದ್ಧಿಂ ದಿವಾನಿಶಂ ಪ್ರೀಣಯತಶ್ಚ ಲೋಕಾನ್ ।
ಭವದ್ಯಶಶ್ಚನ್ದ್ರಮಸೋಽಸ್ಯ ಮಾಭೂನ್ನವಃ ಕಲಙ್ಕೋ ಭಗಿನೀವಧೇನ ॥ ೨-೧೩॥
ಸ್ವಸುರ್ವಧೇನಾಸ್ಯ ಭವೇದಕೀರ್ತಿಸ್ತೇನ ತ್ಯಜೇಯುಸ್ಸುಹೃದೋಽಪಿ ಭೀತಾಃ ।
ಇತ್ಯೇವ ನೂನಂ ಭುಜನಿರ್ಜಿತೈಸ್ತೈಸ್ಸುರೈಃ ಪ್ರಯುಕ್ತಸ್ಸುಮಹಾನುಪಾಯಃ ॥ ೨-೧೪॥
ಕಾಲೇನ ತದ್ದ್ರಕ್ಷ್ಯಸಿ ಯನ್ಮದುಕ್ತಂ ಮಾ ಭೂತ್ತವಾಸ್ಮಿನ್ ವಿಷಯೇಽಪಿ ಶಙ್ಕಾ ।
ತಥಾಪಿ ಚೇತಸ್ತವ ಶಙ್ಕತೇ ಚೇದಾಕರ್ಣ್ಯತಾಂ ತರ್ಹ್ಯಪರಃ ಪ್ರಕಾರಃ ॥ ೨-೧೫॥
ಸರ್ವಾಣ್ಯಪತ್ಯಾನಿ ವಶೇ ತವಾಹಂ ಜಾತಾನಿ ಜಾತಾನಿ ಸಮರ್ಪಯಿಷ್ಯೇ ।
ತನ್ನಿಗ್ರಹಂ ವಾ ತದನುಗ್ರಹಂ ವಾ ವಿಚಿನ್ತ್ಯ ಕರ್ತಾಸಿ ದಶಾನುರೂಪಮ್ ॥ ೨-೧೬॥
ಕಿಂ ಬುದ್ಧಿಮಾನ್ದ್ಯೇನ ನಿಜೇನ ತಸ್ಯ ಕಿಂ ಭಾಗಧೇಯೇನ ವರಾಙ್ಗನಾಯಾಃ ।
ಬಲೇನ ಕಿಂ ವಾ ಭವಿತವ್ಯತಾಯಾಸ್ತಥೇತಿ ಜಗ್ರಾಹ ವಚಸ್ತದೀಯಮ್ ॥ ೨-೧೭॥
ವಧಪ್ರವೃತ್ತೋ ವಸುದೇವಮನ್ತ್ರಪ್ರಭಾವಸಂಸ್ತಮ್ಭಿತಘೋರಕರ್ಮಾ ।
ನಿವೃತ್ಯ ನಿಸ್ತ್ರಿಂಶಮಹಾಭುಜಙ್ಗೋ ಮಹೀಭೃತಃ ಕೋಶಬಿಲಂ ವಿವೇಶ ॥ ೨-೧೮॥
ಸತ್ಯಾ ನು ಸಾ ಸ್ಯಾದಶರೀರಿಣೀ ವಾಕ್ ಸತ್ಯಂ ಕಿಮೇತದ್ವಸುದೇವವಾಕ್ಯಮ್ ।
ವಿತರ್ಕಯನ್ನೇವಮುದಸ್ತಕೇತುಂ ಪುರೀಂ ಪ್ರಪೇದೇ ಮಣಿತೋರಣಾಢ್ಯಾಮ್ ॥ ೨-೧೯॥
ಆಲೋಕನೈರ್ಮೌಲಿಷು ಭೂಪತೀನಾಮಾಸಜ್ಜಯನ್ನಞ್ಜಲಿಬನ್ಧನಾನಿ ।
ಸ ವೈಮನಸ್ಯೇನ ಮುಖಸ್ಥಿತೇನ ಭಯಾವಹಃ ಸ್ವಂ ಭವನಂ ಜಗಾಮ ॥ ೨-೨೦॥
ವಿಶಙ್ಕಮಾನಃ ಸ ಗೃಹೋಪಕಣ್ಠೇ ತೌ ಸದ್ಮನಿ ಕ್ವಾಪಿ ವಿಧಾಯ ಗುಪ್ತೌ ।
ಪರಾಕ್ರಮಾಕ್ರಾನ್ತಸಮಸ್ತಲೋಕಃ ಪುರೇವ ಭೋಗಾನಯಮನ್ವಭುಙ್ಕ್ತ ॥ ೨-೨೧॥
ಮಾಯಾ ಹರೇಸ್ಸಾಽಥ ಹಿರಣ್ಯಪುತ್ರಾನ್ ಯಾನ್ ದೇವಕೀಗರ್ಭಗತಾನಕಾರ್ಷೀತ್ ।
ಭೋಜೇಶ್ವರಸ್ಸತ್ವರಮೇತ್ಯ ಭೀತ್ಯಾ ತಾನ್ ಜಾತಮಾತ್ರಾನವಧೀತ್ ಕ್ರಮೇಣ ॥ ೨-೨೨॥
ಜಗದ್ವಿಭೂತ್ಯೈ ಪರಮಸ್ಯ ಪುಂಸಃ ಯೋ ದೇವಕೀಗರ್ಭಮವಿಕ್ಷದಂಶಃ ।
ಆಕೃಷ್ಯ ತಸ್ಮಾನ್ಮುರವೈರಿಮಾಯಾ ತಂ ರೋಹಿಣೀಗರ್ಭಗತಂ ಚಕಾರ ॥ ೨-೨೩॥
ಚಕಾಸ ಸಪ್ತಚ್ಛದಪಾಣ್ಡುರೇಣ ಸುತೇನ ಸಾ ಗರ್ಭತಿರೋಹಿತೇನ ।
ವಲಾಹಕಾನ್ತರ್ಹಿತಶೀತಭಾನೋರ್ದಿಶೋ ದಶಾಂ ವೃತ್ರಜಿತಃ ಪ್ರಪನ್ನಾ ॥ ೨-೨೪॥
ತತಸ್ಸಮಾಹ್ಲಾದನಮೀಕ್ಷಣಾನಾಮಸೂತ ಪುತ್ರಂ ಶರದಿನ್ದುಕಲ್ಪಮ್ ।
ಪ್ರಕರ್ಷಮಾಪನ್ನುದಯೇನ ಯಸ್ಯ ಸದ್ಯಃ ಸಮುದ್ರಾ ಇವ ಸತ್ವವನ್ತಃ ॥ ೨-೨೫॥
ಪತ್ಯುಸ್ಸಮಾದಿಷ್ಟಮಿದಂ ವಿಧಾಯ ಶೇಷಂ ಚಿಕೀರ್ಷುಸ್ಸುರಕಾರ್ಯಮಾರ್ಯಾ ।
ಚರಾಚರಾಣಾಂ ಜಗತಾಂ ಸವಿತ್ರೀ ಸಾ ಶ್ರದ್ದಧೇ ಜನ್ಮಭುವಂ ಯಶೋದಾಮ್ ॥ ೨-೨೬॥
ಅಥ ಪ್ರಜಾನಾಮಭಿವೃದ್ಧಿಕಾಮೋ ದೇವೋ ದಯಾಯಾಃ ಕಿಲ ಜನ್ಮಭೂಮಿಃ ।
ಸ್ವಜನ್ಮನೇ ಜನ್ಮವಿನಾಶಹೇತುಃ ಪ್ರಾಪ್ಯಸ್ಸತಾಂ ಪ್ರಾಪ ಸ ದೇವಕೀಂ ತಾಮ್ ॥ ೨-೨೭॥
ಕೃಶಾವಲಗ್ನಾ ಕುಚಯೋರ್ಗರಿಮ್ಣಾ ಸಾ ದೇವಕೀ ಸನ್ನತಗಾತ್ರಯಷ್ಟಿಃ ।
ಜಗತ್ತ್ರಯೀಪುಣ್ಯಕೃತಾವಲಮ್ಬಾ ಬಭಾರ ಗರ್ಭೇಣ ಜಗನ್ನಿವಾಸಮ್ ॥ ೨-೨೮॥
ಅನ್ತರ್ದಧಾನಾ ಸರಸೀರುಹಾಕ್ಷಂ ಸ್ವೇನಾವತಾರೇಣ ಭುವಂ ಪುನಾನಾ ।
ಸಾ ದೇವಕೀ ಸಾ ಚ ಕವೇರಕನ್ಯಾ ಮಿಥೋಽದಧಾತಾಮುಪಮಾನಭಾವಮ್ ॥ ೨-೨೯॥
ಅಲಂ ನಿವಾಸಾಯ ನ ಯಸ್ಯ ವಿಶ್ವಂ ವಸನ್ ಸ ಗರ್ಭೇ ಮುಮುದೇ ಮುಕುನ್ದಃ ।
ಪರೋಪಕಾರಪ್ರಭವಂ ಹಿ ದುಃಖಂ ಪುಂಸಸ್ಸುಖಾಯೈವ ಮಹತ್ತರಸ್ಯ ॥ ೨-೩೦॥
ಬಹಿಃಸ್ಫುರನ್ತ್ಯಾ ಕರಪಾಞ್ಚಜನ್ಯತ್ವಿಷೇವ ವಿಷ್ಣೋರುದರಸ್ಥಿತಸ್ಯ ।
ಅಧತ್ತ ತಸ್ಯಾಸ್ತಪನೀಯವರ್ಣಾ ಮಧೂಕಪುಷ್ಪಚ್ಛವಿಮಙ್ಗಯಷ್ಟಿಃ ॥ ೨-೩೧॥
ಬಭಾರ ಹಾರಂ ಕುಚಯೋರ್ನ ತನ್ವೀ ನ ಪಾದಯೋರ್ನೂಪುರಮಾಮುಮೋಚ ।
ದಧೌ ಮಣಿಂ ಭಾರಭಿಯಾ ನ ಮೌಲೌ ತದೇವ ಕೈವಲ್ಯಮಭೂಷಯತ್ತಾಮ್ ॥ ೨-೩೨॥
ದೃಶಃ ಪ್ರಯತ್ನೇನ ದಧೌ ತಿರಶ್ಚೀರುವಾಚ ಮನ್ದಂ ನಿಭೃತಂ ಜಹಾಸ ।
ಶನೈರ್ಯಯೌ ದತ್ತಕರಾ ಸಖೀಭಿರ್ಭೃಶಂ ನಿಶಶ್ವಾಸ ಚ ತಾವದೇವ ॥ ೨-೩೩॥
ಸಹೈವ ಹರ್ಷೇಣ ಸುಧಾಶನಾನಾಂ ಸಹೈವ ಪುಣ್ಯೇನ ವಸುನ್ಧರಾಯಾಃ ।
ಭಯೇನ ಭೋಜಾಧಿಪತೇಶ್ಚ ದೇವೋ ಸಹೈವ ಗರ್ಭೇ ವವೃಧೇ ಮುಕುನ್ದಃ ॥ ೨-೩೪॥
ಶಿರೋಭಿರೂಢೇನ ವನಸ್ಪತೀನಾಂ ಫಲೋಪಹಾರೇಣ ನಿವೇದಿತರ್ದ್ಧಿಃ ।
ಪ್ರಾವೃಟ್ ಸಮಾಸಾದಿತಸೂತಿಕಾಲಾಂ ತಾಂ ದೇವಕೀಂ ದ್ರಷ್ಟುಮಿವಾಜಗಾಮ ॥ ೨-೩೫॥
ಅಥೈಕದೇಶಾ ಇವ ವಾರಿರಾಶೇರುಚ್ಚೈಃ ಪುರೋಮಾರುತವಿಪ್ರಕೀರ್ಣಾಃ ।
ವೃತಾಸ್ತಡಿದ್ವಿದ್ರುಮವಲ್ಲರೀಭಿರ್ವಿರೇಜಿರೇ ವ್ಯೋಮನಿ ವಾರಿವಾಹಾಃ ॥ ೨-೩೬॥
ಬಲಾಹಕವ್ರಾತಭವೈಸ್ತಮೋಭಿರ್ದಿನೇಷು ದುರ್ಬೋಧಪುರಃಸ್ಥಿತೇಷು ।
ನ ಕಶ್ಚಿದಾಸೀದಭಿಸಾರಿಕಾಣಾಂ ವಿದ್ಯುತ್ಪ್ರಕಾಶೇನ ವಿನಾಽನ್ತರಾಯಃ ॥ ೨-೩೭॥
ಪಯೋದಭಸ್ತ್ರಾನ್ತರನಿರ್ಗತೇನ ಝಾತ್ಕಾರಿಣಾ ಚಣ್ಡಸಮೀರಣೇನ ।
ವಿಯೋಗಿನಾಂ ಚೇತಸಿ ಮೇಘಕಾಲಃ ಸನ್ಧುಕ್ಷಯಾಮಾಸ ಮನೋಭವಾಗ್ನಿಮ್ ॥ ೨-೩೮॥
ಸ್ಮರೇಣ ಲೋಕತ್ರಿತಯೇಶ್ವರೇಣ ಸಮ್ಭಾವಿತಾಜ್ಜೀವಿತನಿರ್ವಿಶೇಷಮ್ ।
ಋತೋರ್ವಸನ್ತಾಜ್ಜ್ವಲದಾಗಮಸ್ಯ ಜಹಾರ ಜಾತಿರ್ನಿಖಿಲಂ ನಿಕರ್ಷಮ್ ॥ ೨-೩೯॥
ಬಲಾದ್ಗೃಹೀತಾ ಇವ ವೈತಸೀಭಿಃ ಶಾಖಾಭಿರಾರೂಢಮದಾ ಇವೋಚ್ಚೈಃ ।
ಪರಿಸ್ಖಲನ್ತ್ಯೋ ನಿಖಿಲಾಸ್ತಟಿನ್ಯಃ ಜಗ್ಮುರ್ಜವಾದುದ್ಭಟಫೇನಹಾಸಾಃ ॥ ೨-೪೦॥
ಉದಾರಸೌರಭ್ಯವಶೀಕೃತಾನಾಮನ್ವೀಯಮಾನಃ ಪಟಲೈರಲೀನಾಮ್ ।
ಅಕಲ್ಪಯತ್ ಕೇತಕಮಾತರಿಶ್ವಾ ಮನೋಭವಸ್ಯಾಪಿ ಮನೋವಿಕಾರಮ್ ॥ ೨-೪೧॥
ಅತ್ಯಮ್ಬುಪಾನಪ್ರಭವಸ್ಯ ಕರ್ತುಮನ್ತರ್ಜಡಿಮ್ನಃ ಪ್ರತಿಸಂವಿಧಾನಮ್ ।
ಪಪುಸ್ತಿರಸ್ಕಾರಪದೇನ ಮೇಘಾಃ ಮಯೂಖಮಾಲಾಮರವಿನ್ದಬನ್ಧೋಃ ॥ ೨-೪೨॥
ರರಾಜ ಖರ್ಜೂರಫಲಪ್ರಕಾಶಂ ನವಂ ಪಯಃ ಕಾನನಪಲ್ವಲೇಷು ।
ಪಯೋದವೃನ್ದೈಃ ಪರಿಪೀಯ ಮುಕ್ತಂ ಪ್ರಭಾಕರಸ್ಯೇವ ಮರೀಚಿಜಾಲಮ್ ॥ ೨-೪೩॥
ಮಹೀಭೃತಾಂ ಮೂರ್ದ್ಧಸು ದತ್ತಪಾದಂ ವಿಲೋಕ್ಯ ಮಿತ್ರಂ ವಿಹತಪ್ರತಾಪಮ್ ।
ಮಗ್ನೇ ಜಲೇ ಮರ್ತುಮಿವಾರವಿನ್ದೇ ಮಧುವ್ರತಾಶ್ಚುಕ್ರುಶುರನ್ತರಿಕ್ಷೇ ॥ ೨-೪೪॥
ನಿಷೇವ್ಯ ಹಂಸಾ ಮಧುರೈರ್ವಚೋಭಿಃ ಪದ್ಮಾಕರಂ ಲಬ್ಧಸಮೀಹಿತಾರ್ಥಾಃ ।
ಸದ್ಯೋ ಯಯುಸ್ತಸ್ಯ ವಿಪತ್ತಿಕಾಲೇ ಜಲಾಶಯಾನಾಂ ಪ್ರಕೃತಿಃ ಕಿಲೈಷಾ ॥ ೨-೪೫॥
ಪ್ರರೂಢಸಸ್ಯಾಃ ಫಲಮೂಲಶಾಕೈರ್ನಿರನ್ತರಾಃ ಸ್ವಾದುನವೋದಕಾಢ್ಯಾಃ ।
ಪಲ್ಲೀಜುಷಾಂ ಚೇತಸಿ ಪಾಮರಾಣಾಂ ಧೃತಿಂ ಪರಾಮಾದಧಿರೇ ವನಾನ್ತಾಃ ॥ ೨-೪೬॥
ಸಮುನ್ಮಿಷನ್ತೀ ಗಿರಿಮಲ್ಲಿಕಾನಾಂ ಪ್ರಸೂನರಾಜಿಸ್ಸುತರಾಂ ವಿರೇಜೇ ।
ಮುಕ್ತ್ವಾ ನಭೋ ಮೇಘವಿಮರ್ದಭೀತ್ಯಾ ನಕ್ಷತ್ರಮಾಲೇವ ಗತಾ ಧರಿತ್ರೀಮ್ ॥ ೨-೪೭॥
ಧಾರಾಲಜೀಮೂತಕೃತಾನ್ಧಕಾರೇ ತಸ್ಮಿನ್ನಪರ್ಯನ್ತಜಡಿಮ್ನಿ ಕಾಲೇ ।
ಅಲಕ್ಷ್ಯಮಾಣಃ ಕ್ವಚಿದಂಶುಮಾಲೀ ದಿವಾಽಪ್ಯುವಾಸೇವ ತನೂನಪಾತಿ ॥ ೨-೪೮॥
ಇತಿ ಪ್ರವೃತ್ತೇ ಸಮಯೇ ಘನಾನಾಂ ಮಾಸೇ ನಭಸ್ಯೇ ನಿಶಿ ಮಧ್ಯಮಾಯಾಮ್ ।
ಗಣೇ ಶುಭಾಖ್ಯಾಯಿನಿ ಚ ಗ್ರಹಾಣಾಂ ದೇವಕ್ಯುವಾಹ ಪ್ರಸವಾಭಿಮುಖ್ಯಮ್ ॥ ೨-೪೯॥
ಹರತ್ಸು ಬಾಹ್ಯಂ ಭುವನಸ್ಯ ತಾಪಂ ಪ್ರಾವೃಟ್ ಪ್ರಸೂತೇಷು ವಲಾಹಕೇಷು ।
ಅಸೂತ ತಸ್ಯಾನ್ತರತಾಪಶಾನ್ತ್ಯೈ ಕೃಷ್ಣಾಮ್ಬುವಾಹಂ ಕೃಪಯೇವ ದೇವೀ ॥ ೨-೫೦॥
ದಿಶಃ ಪ್ರಸೇದುಃ ಸಹ ನಿಮ್ನಗಾಭಿರ್ಜಹರ್ಷ ಲೋಕೇನ ಸಹಾಮ್ಬುರಾಶಿಃ ।
ಜಾತೇ ಮುಕುನ್ದೇ ಮುಮುಚುಶ್ಚ ಸದ್ಯಃ ಭಯೇನ ದೇವಾಃ ಸಹ ಪುಷ್ಪವೃಷ್ಟಿಮ್ ॥ ೨-೫೧॥
ಮನೋಭಿರಾಮೇಣ ಮಧುವ್ರತಾನಾಂ ನಾದೇನ ಶಂಸನ್ನಿವ ದಿಷ್ಟವೃದ್ಧಿಮ್ ।
ಚಚಾರ ವಾಯುಃ ಸುಮನೋಂಽಶುಕಾನಿ ಸಮ್ಪ್ರಾಪ್ಯ ಸಮ್ಪ್ರಾಪ್ಯ ಮಹೀರುಹೇಭ್ಯಃ ॥ ೨-೫೨॥
ವ್ಯಜೃಮ್ಭತ ಪ್ರಸ್ಫುಟಶಙ್ಖನಾದಃ ತಾರೇಣ ಗೀತಧ್ವನಿನಾ ವಿಮಿಶ್ರಃ ।
ಸಮಶ್ನುವಾನಃ ಕಕುಭಾಂ ಮುಖಾನಿ ದಿವೌಕಸಾಂ ಮಙ್ಗಲತೂರ್ಯಘೋಷಃ ॥ ೨-೫೩॥
ತ್ರಪಾಮಪಾಸ್ಯನ್ ವಿನಯಂ ವಿಲುಮ್ಪನ್ ನೀತಿಂ ನಿಗೃಹ್ಣನ್ ಭಯಮಾಶು ಭಞ್ಜನ್ ।
ಶರೀರಿಣಾಮಚ್ಯುತಜನ್ಮಜನ್ಮಾ ಮೋದೋ ಜಜೃಮ್ಭೇ ಮದನಿರ್ವಿಶೇಷಃ ॥ ೨-೫೪॥
ಆಷಾಢಿನಂ ಪಾಣಿಮುದಸ್ಯ ದೂರಂ ಬ್ರಹ್ಮರ್ಷಿಲೋಕಃ ಪತದುತ್ತರೀಯಃ ।
ನನರ್ತ ಪರ್ಯಾಕುಲಪಾದಚಾರಃ ಪ್ರಹಸ್ಯಮಾನಃ ಸುರಸುನ್ದರೀಭಿಃ ॥ ೨-೫೫॥
ಶೃಙ್ಗೋಜ್ಝಿತೈಃ ಕುಙ್ಕುಮವಾರಿಪೂರೈರನ್ಯೋನ್ಯಮಭ್ಯುಕ್ಷಣತತ್ಪರಾಣಾಮ್ ।
ಪ್ರಮೋದಜನ್ಮಾ ದಿವಿ ಸಮ್ಬಭೂವ ಕೋಲಾಹಲಃ ಕೋಽಪಿ ಸುಧಾಶನಾನಾಮ್ ॥ ೨-೫೬॥
ಪಿತೄಂಶ್ಚ ಪುತ್ರಾ ಪಿತರಶ್ಚ ಪುತ್ರಾನ್ ಗುರೂಂಶ್ಚ ಶಿಷ್ಯಾ ಗುರವಶ್ಚ ಶಿಷ್ಯಾನ್ ।
ಪತೀಂಶ್ಚ ದಾರಾಃ ಪತಯಶ್ಚ ದಾರಾನ್ ಪ್ರಮೋದಮತ್ತಾಸ್ಸಿಷಿಚುಃ ಪಯೋಭಿಃ ॥ ೨-೫೭॥
ಅಸಿಞ್ಚದಮ್ಭೋರುಹಯೋನಿರಿನ್ದ್ರಂ ತಂ ಪಙ್ಕಜಾವಾಸಮಸಿಞ್ಚದಿನ್ದ್ರಃ ।
ಅಸಿಞ್ಚತಾಂ ದ್ವೌ ವಿಬುಧಾನಶೇಷಾನ್ ಸರ್ವೇ ಸುರಾಸ್ತೌ ಚ ಬಲಾದಸಿಞ್ಚನ್ ॥ ೨-೫೮॥
ಮಿಥಃ ಪಯೋಭಿಃ ಸಿಷಿಚುರ್ವಿನೇದುಃ ವವಲ್ಗುರುಚ್ಚಿಕ್ಷಿಪುರಮ್ಬರಾಣಿ ।
ಅನ್ಯೋನ್ಯಮಂಸೇನ ಸುದೂರಮೂಹುರ್ಮತ್ತಾ ಇವ ಸ್ವರ್ಗಸದೋ ಬಭೂವುಃ ॥ ೨-೫೯॥
ತ್ರಿಲೋಕನಾಥೋದಯಸಮ್ಭವೇನ ಮೋದೇನ ಪರ್ಯಾಕುಲಮಾನಸಾನಾಮ್ ।
ಗೀತೇ ಚ ನೃತ್ತೇ ಚ ಸುರಾಙ್ಗನಾನಾಂ ಬಭೂವ ತಾಲಸ್ಖಲಿತಂ ನ ದೋಷಃ ॥ ೨-೬೦॥
ಶೃಙ್ಗೋದಕಾಸ್ಫಾಲನರಕ್ತನೇತ್ರಾಃ ವಿಚ್ಛಿನ್ನಹಾರಾಶ್ಚ್ಯುತಕರ್ಣಭೂಷಾಃ ।
ಪ್ರಹಾಸಸೀದಧ್ವನಿಭಿರ್ವಚೋಭಿಃ ಸಮಾಲಪನ್ತೋ ವಿಬುಧಾ ವಿಜಹ್ರುಃ ॥ ೨-೬೧॥
ಜಾತೇ ಹರೌ ದೈತ್ಯವಿಮರ್ದನೇನ ವಿಶ್ವಮ್ಭರಾಭಾರಮಪಾಚಿಕೀರ್ಷೌ ।
ಮುನೇಃ ಪ್ರಹರ್ಷಃ ಕಲಹಪ್ರಿಯಸ್ಯ ಜಗತ್ಪ್ರಹರ್ಷಶ್ಚ ಸಮಾವಭೂತಾಮ್ ॥ ೨-೬೨॥
ಇತಿ ಪ್ರಹರ್ಷಾಕುಲಿತೈರ್ಮನೋಭಿಃ ವಿಶೃಙ್ಖಲಂ ಕ್ರೀಡತಿ ದೇಹಿವರ್ಗೇ ।
ಕಂಸಸ್ಸಭೃತ್ಯಃ ಪ್ರತಿಪದ್ಯ ಮೂರ್ಛಾಂ ನಿದ್ರಾಭಿಧಾನಾಂ ನ ಕಿಮಪ್ಯಬೋಧಿ ॥ ೨-೬೩॥
ಶ್ಯಾಮಂ ಚತುರ್ಬಾಹುಮುದಾರಹಾರಂ ಕಿರೀಟಿನಂ ಕುಣ್ಡಲದೀಪ್ತಗಣ್ಡಮ್ ।
ಪಿತಾಽಪಿ ಮಾತಾ ಚ ವಿಲೋಕ್ಯ ಪುತ್ರಮಾನನ್ದಮಗ್ನೌ ವಿವಶಾವಭೂತಾಮ್ ॥ ೨-೬೪॥
ನಿಯಮ್ಯ ಹರ್ಷೋದಯಪಾರವಶ್ಯಂ ತಂ ದೇವಕೀಜಾನಿರುವಾಚ ವಾಚಮ್ ।
ಪ್ರಸೀದ ಭೀತೋಽಹಮತೀವ ಕಂಸಾದಿದಂ ತು ರೂಪಂ ಪ್ರತಿಸಂಹರೇತಿ ॥ ೨-೬೫॥
ತತ್ಪ್ರೇರಿತಸ್ತಲ್ಪಗತಂ ಕರಾಭ್ಯಾಂ ತಮಾದದೇ ಕಲ್ಪಿತಬಾಲಭಾವಮ್ ।
ತಯೋಶ್ಶಯಾನಃ ಕರಯೋಸ್ಸ ತಸ್ಯ ಪ್ರಕಾಮಮಪ್ರೀಯತ ಪದ್ಮನಾಭಃ ॥ ೨-೬೬॥
ಅಶೇತ ಯಃ ಪ್ರಾಗ್ವಟಪತ್ರಮಧ್ಯೇ ಲೋಕಾನಶೇಷಾನುದರೇ ದಧಾನಃ ।
ವಿನಾ ತಪೋಭಿಃ ಕಿಮು ತಸ್ಯ ಸಿಧ್ಯೇತ್ತತ್ಪಾಣಿಯುಗ್ಮೇ ಶಯನಂ ಮುರಾರೇಃ ॥ ೨-೬೭॥
ತಮಾಲನಿಲೇನ ತಮೋಭರೇಣ ನಿಪೀಡಿತಾಶಾವಲಯೇ ನಿಶೀಥೇ ।
ಆದಾಯ ಪಙ್ಕೇರುಹಲೋಚನಂ ತಂ ಸದ್ಯಃ ಸ ನಿರ್ಗತ್ಯ ಗೃಹಾತ್ ಪ್ರತಸ್ಥೇ ॥ ೨-೬೮॥
ನಿವಾರ್ಯ ವರ್ಷೋದಕಮಾತ್ಮನೈವ ಪ್ರಕಾಶ್ಯ ಮಾರ್ಗಂ ಫಣರತ್ನಭಾಸಾ ।
ಉಪಾಯಮುಕ್ತ್ವಾ ವಸುದೇವಕರ್ಣೇ ಶೇಷಸ್ಸಿಷೇವೇ ಬಹುಧೈವ ವಿಷ್ಣುಮ್ ॥ ೨-೬೯॥
ಪುರಾತ್ ಸ ನಿರ್ಗತ್ಯ ಪುಮಾಂಸಮಾದ್ಯಂ ವಹನ್ ವಹನ್ತೀಂ ಯಮುನಾಮಪಶ್ಯತ್ ।
ಕೂಲಙ್ಕಷೌಘಾಽಪಿ ಕಲಿನ್ದಕನ್ಯಾ ತದೀಯಗುಲ್ಫದ್ವಯಸೋದಕಾಽಭೂತ್ ॥ ೨-೭೦॥
ಉತ್ತೀರ್ಯ ತಾಂ ತತ್ತಟಸಂಶ್ರಿತಾನಾಂ ದಾತುಂ ಕರಂ ವಾರ್ಷಿಕಮಾಗತಾನಾಮ್ ।
ವ್ರಜೌಕಸಾಂ ನನ್ದಪುರೋಗಮಾನಾಂ ಪ್ರೀತೋ ನಿವೇಶಂ ಸಹಸಾ ವಿವೇಶ ॥ ೨-೭೧॥
ಪ್ರವಿಶ್ಯ ಜಾನನ್ನಿವ ನನ್ದಗೋಪನಿವೇಶನಂ ಸುಪ್ತಶರೀರಿವರ್ಗಮ್ ।
ಸುತಾಂ ಪ್ರಸೂಯ ಪ್ರತಿಪನ್ನನಿದ್ರಾಂ ದದರ್ಶ ತದ್ಧರ್ಮವಧೂಂ ಯಶೋದಾಮ್ ॥ ೨-೭೨॥
ತಂ ಶಾಯಯಿತ್ವಾ ಶಯನೇ ತದೀಯೇ ಕನ್ಯಾಂ ಸಮಾದಾಯ ನಿಪತ್ಯ ಗಚ್ಛನ್ ।
ಶುಶ್ರಾವ ಪುತ್ರೋದಯಹರ್ಷಮೂಲಂ ಕೋಲಾಹಲಂ ಗೋಪವಧೂಜನಾನಾಮ್ ॥ ೨-೭೩॥
ಕರೇಣ ಕನ್ಯಾಂ ಮನಸಾ ಚ ಪುತ್ರಂ ವಹನ್ ಮುಹೂರ್ತೇನ ವಿಲಙ್ಘ್ಯ ಮಾರ್ಗಮ್ ।
ವಿಶಙ್ಕಮಾವಿಶ್ಯ ಗೃಹಂ ಗೃಹಿಣ್ಯಾಃ ನಿಧಾಯ ಬಾಲಾಂ ಶಯನೇ ಸ ತಸ್ಥೌ ॥ ೨-೭೪॥
ಸಾ ಚಞ್ಚರೀಕಸ್ವನಸನ್ನಿಭೇನ ನಾದೇನ ಲೋಕಸ್ಯ ಮನೋ ಹರನ್ತೀ ।
ರುರೋದ ಕಿಞ್ಚಿದ್ವಿವೃತೇನ ಬಾಲಾ ಸ್ಫುಟತ್ಪಯೋಜಾಕೃತಿನಾ ಮುಖೇನ ॥ ೨-೭೫॥
ಆಕರ್ಣ್ಯ ಬಾಲಧ್ವನಿಮಸ್ತನಿದ್ರಾಃ ಪ್ರಧಾವ್ಯ ರಕ್ಷಾಪುರುಷಾ ಜವೇನ ।
ಪ್ರಬೋಧ್ಯ ಯತ್ನೇನ ಪತಿಂ ಪೃಥಿವ್ಯಾಃ ಶಶಂಸುರಸ್ಮೈ ಭಗಿನೀಂ ಪ್ರಸೂತಾಮ್ ॥ ೨-೭೬॥
ಸದ್ಯಃ ಸಮಾಗತ್ಯ ಸ ತತ್ರ ದೃಷ್ಟ್ವಾ ಬಾಲಾಮಮರ್ಷೇಣ ವಿಮರ್ಶಶೂನ್ಯಃ ।
ಸ್ವಸ್ರಾ ನಿಷಿದ್ಧೋಽಪಿ ವಧಾಭಿಲಾಷೀ ಜಗ್ರಾಹ ತಸ್ಯಾಶ್ಚರಣೌ ಕರಾಭ್ಯಾಮ್ ॥ ೨-೭೭॥
ಉದಸ್ಯ ದೂರಂ ತರಸಾ ಕರೇಣ ಚಿಕ್ಷೇಪ ತಾಂ ದುರ್ಮತಿರಶ್ಮಪೃಷ್ಠೇ ।
ಮಹೀಮಯಾತೈವ ದಿವಿ ಸ್ಥಿತಾ ಸಾ ಜಜ್ವಾಲ ಧಾಮ್ನಾ ಜಗತಾಂ ಸವಿತ್ರೀ ॥ ೨-೭೮॥
ತತಃ ಕರೈಸ್ತಾಮರಸಪ್ರಕಾಶೈಃ ಸಾ ಮನ್ದಮಾನ್ದೋಲಿತಶಸ್ತ್ರಜಾಲಾ ।
ವಿಲೋಕ್ಯ ತಂ ವಿಹ್ವಲಚಿತ್ತವೃತ್ತಿಂ ಜಗಾದ ವಾಚಂ ಜಗದೇಕಮಾತಾ ॥ ೨-೭೯॥
ತ್ವಮಗ್ರಹೀರ್ಮಚ್ಚರಣೌ ರುಷಾಽಪಿ ಪ್ರಾಯಃ ಫಲಂ ತಸ್ಯ ನ ಹನ್ಮಿ ಯತ್ತ್ವಾಮ್ ।
ಜಾತಃ ಪೃಥಿವ್ಯಾಂ ತವ ಜಾಲ್ಮ ಹನ್ತಾ ಸದ್ಯೋ ಹಿತಂ ಚಿನ್ತಯ ಸಾಧಯಾಮಿ ॥ ೨-೮೦॥
ಇತಿ ನೃಪಮಭಿಧಾಯ ಜ್ಯೋತಿಷಾ ಕುರ್ವತೀ ಸಾ ತಡಿದಿವ ನಯನಾನಿ ಪ್ರಾಣಿನಾಮಾಕುಲಾನಿ ।
ಸುರಯುವತಿಭಿರುಚ್ಚೈರ್ಗೀಯಮಾನಾಪದಾನಾ ಸುರಪದಮಭಿಪೇದೇ ಪಾಟಿತಾಭ್ರಾ ಜವೇನ ॥ ೨-೮೧॥
ಶ್ರುತ್ವಾ ತಸ್ಯಾ ಶ್ರವಣಪರುಷಾಂ ವಾಚಮನ್ತರ್ವಿಷಣ್ಣಃ
ಪುತ್ರಾಪಾಯವ್ಯಥಿತಮನಸಂ ಸಾನ್ತ್ವಯಿತ್ವಾ ಸ್ವಸಾರಮ್ ।
ಪದ್ಭ್ಯಾಮೇವ ಸ್ವಭವನಮಥ ಪ್ರಾಪ್ಯ ಕೃಚ್ಛ್ರಾದನೈಷೀತ್
ಕಂಸಶ್ಚಿನ್ತಾಕುಲಿತಹೃದಯೋ ಜಾಗ್ರದೇವ ತ್ರಿಯಾಮಾಮ್ ॥ ೨-೮೨॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ದ್ವಿತೀಯಾಸ್ಸರ್ಗಃ ॥ ೨ ॥
ತೃತೀಯಃ ಸರ್ಗಃ
ಪ್ರಾತಃ ಪ್ರಲಮ್ಬಪ್ರಮುಖಾನಮಾತ್ಯಾನ್ ಸರ್ವಾನ್ ಸಮಾಹೂಯ ಸ ಭೋಜರಾಜಃ ।
ಸವಿಭ್ರಮಪ್ರೇರಿತದೃಷ್ಟಿದತ್ತೇ ಸ್ಥಾನೇ ನಿಷಣ್ಣಾನವದದ್ವಿನೀತಃ ॥ ೩-೦೧॥
ಸನ್ದಿಹ್ಯ ಮೋಹಾದ್ವಸುದೇವವಾಕ್ಯಂ ಮಯಾ ಪ್ರಮಾಣೀಕೃತಭೂತವಾಚಾ ।
ಹತಾ ನೃಶಂಸೇನ ಸುತಾ ಭಗಿನ್ಯಾಸ್ತೇನಾವಿಲಂ ಮೇ ಹೃದಯಂ ಯಶೋಽಪಿ ॥ ೩-೦೨॥
ಜಾತಾಂ ಪುನಃ ಕಾಞ್ಚನಕಾಞ್ಚನಾಭಾಂ ಸುತಾಂ ಗತಾಯುರ್ನ್ನಿಶಿ ಹನ್ತುಮೈಚ್ಛಮ್ ।
ಉತ್ಪ್ಲುತ್ಯ ಸಾ ವ್ಯೋಮ್ನಿ ಜವಾದತಿಷ್ಠತ್ ಶಸ್ತ್ರೋತ್ಕಟಾ ದರ್ಶಿತದಿವ್ಯರೂಪಾ ॥ ೩-೦೩॥
ನಿಯಮ್ಯ ಸಾ ಮಾತುಲ ಇತ್ಯಮರ್ಷಂ ಪ್ರಸೇದುಷೀ ಮಾಮವದಚ್ಚ ಬಾಲಾ ।
ಅರಿರ್ಮಹೀಯಾನಜನಿಷ್ಟ ಭೂಮೌ ತವೋಚಿತಂ ಸಮ್ಪ್ರತಿ ಚಿನ್ತಯೇತಿ ॥ ೩-೦೪॥
ವ್ಯಾಹೃತ್ಯ ಮಾಂ ದ್ಯಾಂ ಪ್ರತಿ ದೇವನಾರೀಗಣೈರ್ಗತಾಯಾಮಿತಿ ಸೇವಿತಾಯಾಮ್ ।
ದೇವ್ಯಾಮಹಂ ದುಶ್ಚರಿತಂ ಸ್ವಮೇವ ಸ್ಮರನ್ ವಿನಿದ್ರೋ ರಜನೀಮನೈಷಮ್ ॥ ೩-೦೫॥
ಯುದ್ಧೇಷು ದೇವಾ ಪುರುಹೂತಮುಖ್ಯಾಃ ಭಗ್ನಾ ಮಯಾ ಸ್ಥಾತುಮಶಕ್ನುವನ್ತಃ ।
ಅಶ್ವಾನ್ ಪರಿತ್ಯಜ್ಯ ವಿಮುಚ್ಯ ನಾಗಾನ್ ಮುಕ್ತ್ವಾ ಚ ಶಸ್ತ್ರಾಣಿ ದಿಶೋ ದ್ರವನ್ತಿ ॥ ೩-೦೬॥
ತದೇಷು ನೈಕೋಽಪಿ ಭುವಂ ಗತೋ ಮೇ ಶಕ್ನೋತಿ ಕರ್ತುಂ ಪ್ರತಿಕೂಲಭಾವಮ್ ।
ಮಹೀಯಸಃ ಕಿಂ ಘಟತೇ ಪರಾಗಃ ಸಮೀರಣಸ್ಯಾಭಿಮುಖಂ ಪ್ರಸಕ್ತುಮ್ ॥ ೩-೦೭॥
ಕಿಮನ್ಯದಾರ್ತಾಭ್ಯವಪತ್ತಿಕಾಮಃ ಸುರೇಷು ಸನ್ದರ್ಶಿತಪಕ್ಷಪಾತಃ ।
ಅಜಾಯತೋರ್ವ್ಯಾಮಸುರಾನ್ನಿಹನ್ತುಂ ಸ ಏವ ಮನ್ಯೇ ಸರಸೀರುಹಾಕ್ಷಃ ॥ ೩-೦೮॥
ಸರ್ವೇ ವಯಂ ದೈತ್ಯಕುಲಪ್ರಸೂತಾಃ ಕೇನಾಪಿ ಜಾತಾ ಭುವಿ ಕಾರಣೇನ ।
ಸ ತೇನ ಸನ್ನಹ್ಯತಿ ಜೇತುಮಸ್ಮಾನುಕ್ತೋಽಯಮರ್ಥಃ ಕಿಲ ನಾರದೇನ ॥ ೩-೦೯॥
ಅತಸ್ತದುಚ್ಛೇದವಿಧೌ ವಿನಿದ್ರಾಃ ಯತಧ್ವಮದ್ಯೈವ ಬಲಾನುರೂಪಮ್ ।
ನಖಾಗ್ರಲಾವ್ಯಸ್ತರುರಙ್ಕುರಾತ್ಮಾ ಪರಶ್ವಧಸ್ಯಾಪಿ ತತೋಽತಿಭೂಮಿಃ ॥ ೩-೧೦॥
ಯಸ್ಮಿನ್ ಭವತ್ಯಾಶ್ರಿತವತ್ಸಲತ್ವಂ ವಿಪ್ರೇಷು ಯಸ್ಯಾಸ್ತಿ ವಿಶೇಷಸಙ್ಗಃ ।
ಮನೋಹರಂ ಯಶ್ಚ ಬಿಭರ್ತಿ ರೂಪಂ ವಧಂ ಸ ಬಾಲೋಽರ್ಹತಿ ಮತ್ಸಕಾಶಾತ್ ॥ ೩-೧೧॥
ಮಖಾಶ್ಚ ತತ್ಪ್ರೀತಿಕೃತೋ ನಿವಾರ್ಯಾಃ ನಿವಾರಣೀಯಾ ಶ್ರುತಿರಗ್ರಿಮಾಽಪಿ ।
ತೃಣೀಕೃತಾಶೇಷಜನಪ್ರಭಾವಾ ಸಂಸ್ಥೌತಿ ಯಾ ತನ್ಮಹಿಮಾನಮೇವ ॥ ೩-೧೨॥
ಗತೇ ವಿರಾಮಂ ಗರುಡಧ್ವಜೇಽಸ್ಮಿನ್ ಮಖೇಷು ಸರ್ವತ್ರ ನಿವಾರಿತೇಷು ।
ಸುರೇಷು ಸರ್ವೇಷ್ವಪಿ ದುರ್ಬಲೇಷು ಹಸ್ತೇ ಭವಿಷ್ಯತ್ಯಮರಾವತೀ ನಃ ॥ ೩-೧೩॥
ಇತ್ಯೂಚುಷಸ್ತಸ್ಯ ಪದೋಪಕಣ್ಠಂ ನೀರಾಜಯನ್ತೋ ಮಕುಟಪ್ರಭಾಭಿಃ ।
ಅವಾದಿಷುರ್ವಿಕ್ರಮದರ್ಪಿತಾಸ್ತೇ ಕೃತಾಟ್ಟಹಾಸಧ್ವನಿಕಮ್ಪಿತಾಶಾಃ ॥ ೩-೧೪॥
ಕಿಂ ಚಿನ್ತಯಾ ಪಾರ್ಥಿವ ಭುಙ್ಕ್ಷ್ವ ಭೋಗಾನಸ್ಮಾಸು ಜೀವತ್ಸು ಕುತೋ ರಿಪುಸ್ತೇ ।
ಕಥಂ ಮಯೂಖೇಷು ಪರಿಸ್ಫುರತ್ಸು ಸರೋಜಬನ್ಧೋಸ್ತಮಸಾಭಿಭೂತಿಃ ॥ ೩-೧೫॥
ಅಮಾತರಿಶ್ವಾನಮಹವ್ಯವಾಹಂ ಅಸೂರ್ಯಶೀತಾಂಶುಮವಜ್ರಪಾಣಿಮ್ ।
ಅನಚ್ಯುತೇಶಾನಪಿತಾಮಹಂ ಚ ದ್ರಷ್ಟಾಸಿ ರಾಜನ್ನಚಿರೇಣ ಲೋಕಮ್ ॥ ೩-೧೬॥
ಇತ್ಯೂಚುಷಸ್ತಾನುಚಿತೋಪಹಾರೈಃ ಸಮ್ಭಾವ್ಯ ಕೃತ್ಯೇಷು ಸಮಾದಿದೇಶ ।
ಸ ದೇವಕೀಮಾನಕದುನ್ದುಭಿಂ ಚ ವಿಮೋಚಯಾಮಾಸ ಚ ಬನ್ಧನಸ್ಥೌ ॥ ೩-೧೭॥
ಲಬ್ಧ್ವಾ ನಿಧಾನಂ ನ ತಥಾ ದರಿದ್ರೋ ಗತಿಂ ಸಮಾಸಾದ್ಯ ತಥಾ ನ ಪಙ್ಗುಃ ।
ತಥಾ ನ ಚಾನ್ಧೋ ದೃಶಮಾಪ್ಯ ಹೃಷ್ಯೇದ್ಯಥಾಪ್ತಪುತ್ರಃ ಸ ಜಹರ್ಷ ನನ್ದಃ ॥ ೩-೧೮॥
ತಪನೇ ಚರಮಾಚಲಂ ಪ್ರಪನ್ನೇ ತಮಸಾ ಚ ಸ್ಥಗಿತೇಷು ದಿಙ್ಮುಖೇಷು ।
ಯಮುನಾತಟವಾಸಿನಂ ತಮೂಚೇ ವಸುದೇವಃ ಪ್ರತಿಪದ್ಯ ನನ್ದಗೋಪಂ ॥ ೩-೧೯॥
ತಪಸಾ ತವ ನನ್ದಗೋಪ ಮನ್ಯೇ ಫಲಿತಂ ಜನ್ಮಸಹಸ್ರಸಞ್ಚಿತೇನ ।
ಋಣಮನ್ತ್ಯಮಪೋಹಿತುಂ ತ್ವದೀಯಂ ಯದಯಂ ಪುತ್ರನಿಧಿಃ ಸಮಾವಿರಾಸೀತ್ ॥ ೩-೨೦॥
ಇಹ ಖೇಲತಿ ಪೂತನೇತಿ ಕೃತ್ಯಾ ಶಿಶುಹತ್ಯಾನಿರತಾ ಪುರೋಪಕಣ್ಠೇ ।
ತದಹರ್ನ್ನಿಶಮತ್ರ ರಕ್ಷಣೀಯೋ ನಯನಾನನ್ದಕರಃ ಸುತಸ್ತ್ವಯಾಽಯಂ ॥ ೩-೨೧॥
ಅಥವಾ ಕಿಮಿವಾಸ್ಯತೇ ತ್ವಯಾಸ್ಮಿನ್ನಿಜಮುತ್ಸೃಜ್ಯ ಪದಂ ಪುರೋಪಕಣ್ಠೇ ।
ಸವಿಧೇ ನ ವಸನ್ತಿ ಬುದ್ಧಿಮನ್ತೋ ಫಣಿನೋ ವಾಯುಸಖಸ್ಯ ಭೂಪತೇಶ್ಚ ॥ ೩-೨೨॥
ಪ್ರತಿವೇದಿ ನಿವಿಷ್ಟಪೂರ್ಣಕುಮ್ಭಂ ವಿಲಸತ್ತೋರಣಮುಜ್ಜ್ವಲಪ್ರದೀಪಮ್ ।
ವ್ರಜ ಗೋಕುಲಮಾಕುಲಂ ಪ್ರಜಾಭೀಭವದೀಯಾಗಮನಪ್ರಹರ್ಷಿಣೀಭಿಃ ॥ ೩-೨೩॥
ಶಿಶುರಸ್ತಿ ಮಮಾಪಿ ರೌಹಿಣೇಯೋ ಭವದೀಯೇ ವಿಷಯೇ ವಿವರ್ಧಮಾನಃ ।
ಸ ಚ ಸಾಧು ನಿರೀಕ್ಷ್ಯ ರಕ್ಷಿತವ್ಯೋ ವಪುಷಾ ಕೇವಲಮಾವಯೋರ್ಹಿ ಭೇದಃ ॥ ೩-೨೪॥
ಇತ್ಯುಕ್ತ್ವಾ ಗತವತಿ ದೇವಕೀಸಹಾಯೇ ಸಂತ್ರಸ್ತಃ ಕಥಮಪಿ ನೀತರಾತ್ರಿಶೇಷಃ ।
ಆರೋಹತ್ಯುದಯಮಹೀಧರಸ್ಯ ಶೃಙ್ಗಂ ತಿಗ್ಮಾಂಶೌ ನಿಜವಸತಿಂ ಪ್ರತಿ ಪ್ರತಸ್ಥೇ ॥ ೩-೨೫॥
ಸಚಕಿತಮೃಗಮಣ್ಡಲಾನಿ ಕುರ್ವನ್ ಶಕಟಶತಧ್ವನಿಭಿರ್ವನಾನ್ತರಾಣಿ ।
ಪ್ರಮುದಿತಮಥ ಗೋಕುಲಂ ಪ್ರಪೇದೇ ದಿಶಿ ದಿಶಿ ಮಾರುತಧೂತಕೇತುಮಾಲಮ್ ॥ ೩-೨೬॥
ನಿಜವಸತಿಮಭಿಪ್ರಪದ್ಯ ತುಷ್ಟಃ ಕಿಮಪಿ ನ ಕರ್ಮ ಕರೋತಿ ನನ್ದಗೋಪಃ ।
ನವನಲಿನಪಲಾಶಚಾರುನೇತ್ರಂ ವದನಮಹರ್ನ್ನಿಶಮಾತ್ಮಜಸ್ಯ ಪಶ್ಯನ್ ॥ ೩-೨೭॥
ಮುಗ್ಧಭಾವಮಧುರೇಣ ರಞ್ಜಯನ್ ಶೈಶವೇನ ಹೃದಯಂ ವ್ರಜೌಕಸಾಮ್ ।
ಗೋಕುಲೇ ಸ ವಿಜಹಾರ ಕೇಶವಃ ಕ್ಷೀರವಾರಿನಿಧಿಮಪ್ಯಚಿನ್ತಯನ್ ॥ ೩-೨೮॥
ವದನಂ ಮಧುಸೂದನಃ ಕರಾಭ್ಯಾಂ ಚರಣಾಙ್ಗುಷ್ಠಮುಪಾನಯತ್ ಪಿಪಾಸುಃ ।
ಗಲಿತೇವ ತತಸ್ಸುರಸ್ರವನ್ತೀ ನಖಮುಕ್ತಾಮಣಿದೀಧಿತಿಚ್ಛಲೇನ ॥ ೩-೨೯॥
ಅಮೃತಾಂಶುರಿವಾಪರಃ ಪ್ರಮೋದಂ ನಯನಾನಾಂ ಜನಯನ್ ಸ ಪದ್ಮನಾಭಃ ।
ಭವನಂ ಭವನಾತ್ ಕರೌ ಕರಾಭ್ಯಾಂ ವ್ರಜಯೋಷಿದ್ಭಿರನೀಯತಾಙ್ಕಮಙ್ಕಾತ್ ॥ ೩-೩೦॥
ಅಧಃ ಕದಾಚಿಚ್ಛಕಟಸ್ಯ ಶಾಯಿತಃ ಸ್ವಕಾರ್ಯಪರ್ಯಾಕುಲಯಾ ಯಶೋದಯಾ ।
ಸ ಲೀಲಯಾ ಪಾದಸರೋರುಹಂ ಶನೈರುದಞ್ಚಯಾಮಾಸ ಸರೋಜಲೋಚನಃ ॥ ೩-೩೧॥
ಮಧುಭಿದಶ್ಚರಣಾಮ್ಬುಜತಾಡಿತಂ ಶಕಟಮಾಶು ಸಮುತ್ಥಿತಮಮ್ಬರೇ ।
ವಿಪರಿವೃತ್ಯ ಪಪಾತ ಮಹೀತಲೇ ಪಟುತರಧ್ವನಿಪೂರಿತದಿಙ್ಮುಖಮ್ ॥ ೩-೩೨॥
ಶಕಟಪತನಜನ್ಮ ನನ್ದಮುಖ್ಯಾಃ ಸ್ತನಿತಮಿವ ಧ್ವನಿತಂ ನಿಶಮ್ಯ ಗೋಪಾಃ ।
ಕಿಮಿದಮಿತಿ ಭಯೇನ ತತ್ರ ಜಗ್ಮುಸ್ತ್ವರಿತಗತಿಚ್ಯವಮಾನಕೇಶಬನ್ಧಾಃ ॥ ೩-೩೩॥
ಕುಚಕಲಶವಿಲಗ್ನಪಾಣಿಪದ್ಮಾ ವಿಗಲಿತಬನ್ಧಮನೋಜ್ಞಕೇಶಪಾಶಾ ।
ಸಪದಿ ಸಹ ಸಖೀಭಿರನ್ವಧಾವತ್ ಕಲಮಣಿನೂಪುರಶಿಞ್ಜಿತಾ ಯಶೋದಾ ॥ ೩-೩೪॥
ಕೃತಸ್ಮಿತಂ ಕ್ವಚಿದಪರಿಕ್ಷತಂ ಸುತಂ ವಿಲೋಕ್ಯ ತಂ ಪ್ರಮುದಿತಮಾನಸಾ ಪರಮ್ ।
ವ್ರಜೌಕಸಾಂ ಸವಿಧನಿವಾಸಿನಾಂ ಮುಖಾದ್ವಿಸಿಸ್ಮಿಯೇ ವಿದಿತತದೀಯವಿಕ್ರಮಾ ॥ ೩-೩೫॥
ಸ್ರುತಶೋಣಿತಮೇವ ಮನ್ಯಮಾನಾ ಚರಣಂ ತಸ್ಯ ನಿಸರ್ಗಪಾಟಲಂ ತತ್ ।
ಉದಮಾರ್ಜಯದಂಶುಕಾಞ್ಚಲೇನ ದ್ರುತಮಾಗತ್ಯ ಪುನಃ ಪುನರ್ಯಶೋದಾ ॥ ೩-೩೬॥
ತಿಲಕಂ ಮಧುವಿದ್ವಿಷೋ ಲಲಾಟೇ ರಜಸಾ ಗೋಮಯಜನ್ಮನಾ ವಿಧಾಯ ।
ಉರಸಾ ಪರಿರಭ್ಯ ನನ್ದಗೋಪಃ ಸುಚಿರಂ ತಸ್ಯ ಸುಮಙ್ಗಲಾನಿ ದಧ್ಯೌ ॥ ೩-೩೭॥
ಶಕಟಂ ಮಧುಸೂದನಸ್ಯ ದೃಷ್ಟ್ವಾ ಚರಣೋದಞ್ಚನವಿಭ್ರಮೇಣ ಭಗ್ನಮ್ ।
ಅಥ ವಾರಿನಿಧೇರ್ವಿವೇಶ ಗರ್ಭಂ ಸ್ವರಥಸ್ಯಾಪಿ ವಿಶಙ್ಕ್ಯ ಭಙ್ಗಮರ್ಕಃ ॥ ೩-೩೮॥
ಪರಿತಃಸ್ಫುರತಾ ನವೇನ ಸನ್ಧ್ಯಾಮಹಸಾ ಪಲ್ಲವಪಾಟಲೇನ ಲಿಪ್ತಾಃ ।
ಪತಿತಾ ಇವ ಪಾವಕೇ ವಿರೇಜುಃ ಕಕುಭೋ ದುಸ್ಸಹಭಾನುವಿಪ್ರಯೋಗಾತ್ ॥ ೩-೩೯॥
ಕ್ಷುಭಿತಶ್ಚಿರಮಮ್ಬರಾಮ್ಬುರಾಶಿಃ ತಪನಸ್ಯನ್ದನವಾಹನಾವಗಾಹಾತ್ ।
ಸ್ಫುರದುದ್ಭಟತಾರಕಾಪದೇಶಾತ್ ಸಹಸಾಽಽಕೀರ್ಯತ ಫೇನಮಣ್ಡಲೇನ ॥ ೩-೪೦॥
ಅಹಿಮರುಚಿ ರಸಾತಲಂ ಪ್ರವಿಷ್ಟೇ ಭಯಚಕಿತಃ ಸ್ವವಿನಾಶಮಾಕಲಯ್ಯ ।
ತತ ಇವ ತರಸೋತ್ಪತನ್ನಸೀಮಾ ತಿಮಿರಭರಃ ಪೃಥಿವೀತಲಂ ಪ್ರಪೇದೇ ॥ ೩-೪೧॥
ಭೂರನ್ತರಿಕ್ಷಂ ಭವನಾನಿ ರಥ್ಯಾಃ ವನಾನಿ ಶೈಲಾಸ್ಸರಿತಸ್ಸಮುದ್ರಾಃ ।
ಧ್ವಾನ್ತೇ ದಿಶಾಂ ರುನ್ಧತಿ ಚಕ್ರವಾಲಂ ವ್ಯಕ್ತಂ ನ ಕೇನಾಪಿ ಕಿಮಪ್ಯವೇದಿ ॥ ೩-೪೨॥
ಅಥ ಪ್ರಯಾತಿ ಪ್ರಹರೇ ಯಶೋದಾ ಜನೇ ಚ ಕಿಞ್ಚಿನ್ನಿಭೃತೇ ಸನಿದ್ರೇ ।
ಪುತ್ರಂ ಪಯಃಪಾನಗುರುಪ್ರಮೋದಂ ಪ್ರಸ್ವಾಪಯನ್ತೀ ಕಲಮಿತ್ಯಗಾಯತ್ ॥ ೩-೪೩॥
ಕುನ್ದತ್ವಿಷಸ್ತಾಲಫಲಪ್ರಕಾಶಾಃ ತಾಪಿಞ್ಛವರ್ಣಾಸ್ತರುಣಾರ್ಕಭಾಸಾಃ ।
ಪ್ರಭೂತದುಗ್ಧಾ ನವನೀತವತ್ಯೋ ಗಾವಸ್ಸಹಸ್ರಂ ತನಯ ತ್ವದೀಯಾಃ ॥ ೩-೪೪॥
ಪ್ರಿಯಾಲಖರ್ಜೂರಸಮಗ್ರಸಾನುಃ ಫಲಾಢ್ಯರಮ್ಭಾವನಶೋಭನೀಯಃ ।
ನನೂಪಭೋಗಾಯ ಸುತಾಯಮಾಸ್ತೇ ಗೋವರ್ಧನೋ ನಾಮ ಮಹೀಧರಸ್ತೇ ॥ ೩-೪೫॥
ಸರಸಿರುಹವನೇ ಗತೇಽಪಿ ನಿದ್ರಾಂ ಕಥಮಿವ ತೇ ನಯನಾಮ್ಬುಜೇ ವಿನಿದ್ರೇ ।
ಶ್ರುತಿಪರಿಚಯಶಾಲಿನೋ ಹಿ ಕರ್ಮ ಸ್ವಜನನಿಷೇವಿತಮೇವ ಸಂಶ್ರಯನ್ತೇ ॥ ೩-೪೬॥
ತದ್ಧ್ವನಿಶ್ರವಣಜಾತಕೌತುಕಾ ಬಾಲಜೀವಿತವಿಲೋಪವಿಶ್ರುತಾ ।
ಆಜಗಾಮ ಗಗನೇನ ಪೂತನಾ ಯಾತನಾ ತನುಮತೀವ ದೇಹಿನಾಂ ॥ ೩-೪೭॥
ಸಾಽವತೀರ್ಯ ನಭಸೋ ನಿಶಾಚರೀ ಗೂಢಮೇವ ನಿಷಸಾದ ಕುತ್ರಚಿತ್ ।
ಸಾ ಚ ಸುಪ್ತ ಇವ ವೀಕ್ಷಿತೇ ಸುತೇ ಸ್ವಾಪಮಾಪ ಸರಸೀರುಹೇಕ್ಷಣಾ ॥ ೩-೪೮॥
ಕೃಷ್ಣಮಙ್ಕಮಧಿರೋಪ್ಯ ನಿರ್ದಯಾ ದಾತುಮಾರಭತ ಪೂತನಾ ಸ್ತನಮ್ ।
ಯತ್ಪಯೋಧರಮುಖೇ ಮುಖಾರ್ಪಣಾದಾಯುಷಾ ಶಿಶುಜನೋ ವಿಯುಜ್ಯತೇ ॥ ೩-೪೯॥
ಪಾಞ್ಚಜನ್ಯಮಿವ ಪೂತನಾಸ್ತನಂ ಪಾಣಿಪಲ್ಲವಯುಗೇನ ಪೀಡಯನ್ ।
ಆನನೇನ ಮಧುಶತ್ರುರಾನ್ತರಾನಾದದೇ ಸ ತು ತತಸ್ಸಮೀರಣಾನ್ ॥ ೩-೫೦॥
ವಿಪ್ರಕೀರ್ಣಕಚಬಾಲಪಲ್ಲವಾ ಭಗ್ನಬಾಹುವಿಟಪಾ ನಿಶಾಚರೀ ।
ಸಾ ಪಪಾತ ಭುವಿ ಘೋರನಿಃಸ್ವನಾ ಮಾರುತಾಹತಮಹೀರುಹೋಪಮಾ ॥ ೩-೫೧॥
ಝಟಿತಿ ವ್ಯಪನೀತಗಾಢನಿದ್ರೋ ಮಹತಾ ತೇನ ರವೇಣ ಪೂತನಾಯಾಃ ।
ಪ್ರತಿಪತ್ತುಮಿಯಾಯ ತಾಂ ಪ್ರವೃತ್ತಿಂ ಸಹ ಗೋಪಾಲಗಣೇನ ನನ್ದಗೋಪಃ ॥ ೩-೫೨॥
ತಸ್ಯಾಶ್ಶರೀರಮಧಿರುಹ್ಯ ವಿಚೇತನಾಯಾಃ
ಕ್ರೀಡನ್ತಮಮ್ಬುರುಹಲೋಚನಮೀಕ್ಷಮಾಣಾಃ ।
ತಸ್ಥುಸ್ಸಮುನ್ಮಿಷಿತವಿಸ್ಮಯನಿರ್ವಿಕಾರಾಃ
ನಾಸಾಧಿರೋಪಿತಕರಾಙ್ಗುಲಯೋ ಮುಹೂರ್ತಮ್ ॥ ೩-೫೩॥
ನನ್ದಃ ಪ್ರಮೃಜ್ಯ ನಯನೇ ಮುಹುರಶ್ರುಪೂರ್ಣೇ
ಪುತ್ರಂ ಕೃತಾನ್ತಮುಖನಿರ್ಗಲಿತಂ ನಿದಧ್ಯೌ ।
ದಧ್ಯೌ ಚ ತಸ್ಯ ನಿತರಾಮಭಿವೃದ್ಧಿಕಾಮಃ
ತತ್ತ್ವಂ ಪರಂ ಸ ಹೃದಯೇನ ಸಮಾಹಿತೇನ ॥ ೩-೫೪॥
ಶ್ಯಾಮಲಃ ಕಮಲಪತ್ರಲೋಚನೋ ನೀಲಕುನ್ತಲಭರಃ ಶುಚಿಸ್ಮಿತಃ ।
ಧ್ಯಾಯತೋ ಮನಸಿ ತಸ್ಯ ಸನ್ನಿಧಿಂ ಪುತ್ರ ಏವ ವಿದಧೇ ಪುನಃ ಪುನಃ ॥ ೩-೫೫॥
ನ ಕ್ಷಮಂ ಭವತಿ ಪುತ್ರವಾಸನಾನಿಸ್ತರಂ ಹೃದಯಮಚ್ಯುತಸ್ಮೃತೌ ।
ಇತ್ಯಶೇಷದುರಿತಾಪಹಾರಿಣೀರಗ್ರಜನ್ಮಭಿರಕಾರಯತ್ ಕ್ರಿಯಾಃ ॥ ೩-೫೬॥
ಪೂತನಾಚರಿತಭಾವನಾಭವಂ ದಾರುಣಂ ಹೃದಯದಾರಣಂ ಪಿತುಃ ।
ಶ್ರೀಪತಿಃ ಶಮಯತಿ ಸ್ಮ ವೈಶಸಂ ಕ್ರೀಡಿತೈರಖಿಲಲೋಕಮೋಹನೈಃ ॥ ೩-೫೭॥
ಸ ಲೋಚನೇ ಕಿಞ್ಚಿದುಪಾನ್ತಘೂರ್ಣಿತೇ ನಿಧಾಯ ಮಾತುರ್ವದನೇ ಶುಚಿಸ್ಮಿತಃ ।
ಪಯೋಧರಂ ಪಾಣಿಯುಗಾವಲಮ್ಬಿತಂ ಮನಶ್ಚ ತಸ್ಯಾ ಮಧುಸೂದನಃ ಪಪೌ ॥ ೩-೫೮॥
ಪಾಣಿಜಾನುಪರಿಚಙ್ಕ್ರಮಶ್ರಮಸ್ವೇದಬಿನ್ದುಮಧುರಂ ಮುಖಂ ವಹನ್ ।
ಧೂಸರೇಣ ವಪುಷಾ ಜನಾರ್ದನೋ ಗೋಕುಲಂ ನಿಖಿಲಮನ್ವರಞ್ಜಯತ್ ॥ ೩-೫೯॥
ಪರಿಭ್ರಮನ್ತಂ ಭುವಿ ಪಾಣಿಜಾನುನಾ ಗವಾಮಧಸ್ತಾತ್ಪ್ರವಿಶನ್ತಮೇಕದಾ ।
ಸುತಂ ಯಶೋದಾ ಗೃಹಕೃತ್ಯತತ್ಪರಾ ಬಬನ್ಧ ಪಾಶೇನ ಬಲಾದುಲೂಖಲೇ ॥ ೩-೬೦॥
ಜನೋ ಹಿ ಯಃ ಕರ್ಮ ಕರೋತಿ ಯಾದೃಶಂ ಸ ಸರ್ವಥಾ ತಾದೃಶಮಶ್ನುತೇ ಫಲಮ್ ।
ಬಲಿಃ ಪುರಾಽಬಧ್ಯತ ಯೇನ ದಾನವಃ ಸ ಲೋಕನಾಥೋಽಪಿ ತದಾಪ ಬನ್ಧನಮ್ ॥ ೩-೬೧॥
ನಿಖಿಲಭುವನಮುಕ್ತಿದೇ ಮುರಾರೌ ಭಗವತಿ ಗಾಢಮುಲೂಖಲೇ ನಿಬದ್ಧೇ ।
ಪರಿಶಿಥಿಲಸಮಾಧಿರಾವಿರಾಸೀನ್ಮನಸಿ ಮಹಾಮುನಿಮಣ್ಡಲಸ್ಯ ಹಾಸಃ ॥ ೩-೬೨॥
ನಿಷೀದ ಲೋಲೇತಿ ನಿಬಧ್ಯ ಸಸ್ಮಿತಂ ಚಕಾರ ಕಾರ್ಯಾಣಿ ಚಕೋರಲೋಚನಾ ।
ಅನಾದರೇಣ ಭ್ರಮಯನ್ನುಲೂಖಲಂ ವಿನಿರ್ಯಯೌ ವಿಶ್ವಪತಿಃ ಸ್ವಮನ್ದಿರಾತ್ ॥ ೩-೬೩॥
ಉಪೇಯಿವಾಂಸೌ ಕಕುಭದ್ರುಮಾತ್ಮತಾಂ ಮಹೀಯಸಾ ನಾರದಶಾಪತೇಜಸಾ ।
ಅತಿಷ್ಠತಾಮಧ್ವನಿ ಕೈಟಭದ್ವಿಷಃ ಕುಬೇರಪುತ್ರೌ ತರಸೈವ ರಿಙ್ಖತಃ ॥ ೩-೬೪॥
ಸ ಸನ್ನಿಕೃಷ್ಯ ಸ್ಥಿತಯೋಃ ಪರಸ್ಪರಂ ಮಹೀರುಹೋರ್ಮಧ್ಯಪಥೇನ ನಿಸ್ಸರನ್ ।
ಗತೇನ ತಿರ್ಯಕ್ತ್ವಮುಲೂಖಲೇನ ತೌ ಬಭಞ್ಜ ದಾಮೋದರಗನ್ಧವಾರಣಃ ॥ ೩-೬೫॥
ಪ್ರಪದ್ಯ ದಿವ್ಯಂ ವಪುರಮ್ಬರಸ್ಥಿತೌ ವಿಮುಕ್ತಶಾಪೌ ಧನದಾತ್ಮಜಾವುಭೌ ।
ಪ್ರಣಮ್ಯ ಭಕ್ತ್ಯಾ ಪುರುಷಂ ಪುರಾತನಂ ಮುದಾನ್ವಿತೌ ಜಗ್ಮತುರನ್ತಿಕಂ ಪಿತುಃ ॥ ೩-೬೬॥
ನನ್ದಾದಯಃ ಸಪದಿ ಗೋಕುಲವಾಸಿನಸ್ತೇ
ತದ್ಭಙ್ಗಜನ್ಮ ಸುಮಹದ್ಧ್ವನಿತಂ ನಿಶಮ್ಯ ।
ಅಭ್ಯೇತ್ಯ ಭಗ್ನಪತಿತೌ ಕಕುಭದ್ರುಮೌ ತೌ
ತತ್ರಾಕ್ಷತಂ ಚ ದದೃಶುಸ್ಸರಸೀರುಹಾಕ್ಷಂ ॥ ೩-೬೭॥
ನನ್ದಃ ಸಮೀಕ್ಷ್ಯ ದುರಿತಾನಿ ಬಹೂನಿ ಸದ್ಭ್ಯಃ
ದತ್ವಾ ಗವಾಮಯುತಮಾತ್ಮಸುತಾಭಿವೃದ್ಧ್ಯೈ ।
ಸಮ್ಮನ್ತ್ರ್ಯ ಬನ್ಧುಭಿರಪಾಸ್ಯ ಪದಂ ತದಾಶು
ವೃನ್ದಾವನಂ ಪ್ರತಿ ಯಯೌ ಶಕಟೈರಸಙ್ಖ್ಯೈಃ ॥ ೩-೬೮॥
ಗತ್ವಾ ಸ ಗೋಕುಲಪತಿರ್ಮನಸೋಽನುಕೂಲೇ
ಕೂಲೇ ಕಲಿನ್ದದುಹಿತುರ್ನಿದಧೇ ಪದಾನಿ ।
ರೇಮೇ ಚ ತತ್ರ ಪುರುಹೂತಪದಾಭಿರಾಮೇ
ಲೀಲಾಯಿತಾನಿ ತನಯಸ್ಯ ನಿರೀಕ್ಷ್ಯಮಾಣಃ ॥ ೩-೬೯॥
ದಧಿನಿರ್ಮಥನೇ ನಿರುದ್ಯಮಾ ಸಾ ನವನೀತಶ್ರಪಣೇ ಗವಾಂ ಚ ದೋಹೇ ।
ಸುತಕೇಲಿಹೃತೇಕ್ಷಣಾ ಯಶೋದಾ ಕ್ಷಣಕಲ್ಪಾನಿ ನಿನಾಯ ವಾಸರಾಣಿ ॥ ೩-೭೦॥
ಅನುಯಾತಿ ಜಿಘೃಕ್ಷಯೇವ ನನ್ದೇ ತರಸಾ ರಿಙ್ಖಣತತ್ಪರಸ್ಯ ವಿಷ್ಣೋಃ ।
ಲಲಿತಾಲಕವೇಲ್ಲಿತಾನಿ ರೇಜುರ್ಮುಖಮಾತ್ರೇಣ ಮುಹುರ್ನಿವರ್ತಿತಾನಿ ॥ ೩-೭೧॥
ಅನ್ತರಾ ವಿಹತಿಮದ್ಭಿರುತ್ಥಿತೈರಸ್ಫುಟಾಕ್ಷರಪದಾಭಿರುಕ್ತಿಭಿಃ ।
ಭಙ್ಗುರೈಶ್ಚ ಪರಿರಮ್ಭಣೋದ್ಯಮೈರ್ಗೋಕುಲಂ ನಿಖಿಲಮನ್ವರಞ್ಜಯತ್ ॥ ೩-೭೨॥
ಪಶ್ಯ ಮಾತುಲಮಿತಿ ಪ್ರದರ್ಶಿತಂ ಯಾಮಿನೀಷು ಗಗನೇ ಯಶೋದಯಾ ।
ಆಜುಹಾವ ಲಲಿತೇನ ಪಾಣಿನಾ ಶೀತಭಾನುಮರವಿನ್ದಲೋಚನಃ ॥ ೩-೭೩॥
ಆತ್ಮನಃ ಪ್ರತಿಕೃತಿಂ ವಿಲೋಕಯನ್ ಮಾತೃಹಸ್ತಮಣಿದರ್ಪಣೋದರೇ ।
ಏಹಿ ಮಿತ್ರ ಕಿಮಿಹೇತಿ ಕೌತುಕಾದ್ವ್ಯಾಜಹಾರ ಶತಪತ್ರಲೋಚನಃ ॥ ೩-೭೪॥
ಗೌರವಂ ಕಥಮಿಯಂ ಸಹೇತ ಮೇ ಮೇದಿನೀತಿ ಕೃಪಯೇವ ಚಿನ್ತಯನ್ ।
ಮಾಧವಃ ಪತನಭೀತಿಮುದ್ವಹನ್ ಮನ್ದಮೇವ ನಿದಧೇ ಪದಾವಲಿಂ ॥ ೩-೭೫॥
ದೇವೋ ನಿಶಾಸು ಹರಿರಙ್ಕಗತೋ ಜನನ್ಯಾಃ
ಶೃಣ್ವನ್ ಕಥಾ ಮಧುಮುಚೋ ಮಹತಾಽಽದರೇಣ ।
ಮನ್ದಂ ತದೀಯಕರಪಲ್ಲವತಾಡಿತೋರುಃ
ಸುಷ್ವಾಪ ಕುಡ್ಮಲಿತಲೋಚನಪುಣ್ಡರೀಕಃ ॥ ೩-೭೬॥
ಕೌತುಕೇನ ಪಿತುರಗ್ರತೋ ಹರೇರ್ಧಾವತಸ್ಖಲನಮೀಕ್ಷಮಾಣಯಾ ।
ಮೋದನಿಘ್ನಮನಸಾ ಸಲಜ್ಜಯಾ ನ ಸ್ಥಿತಂ ನ ಚಲಿತಂ ಯಶೋದಯಾ ॥ ೩-೭೭॥
ಮುಖಡಿಣ್ಡಿಮವಾದಿನಾ ಪರೀತೋ ಮಧುಜಿತ್ ಕೌತುಕಿನಾ ಸುಹೃದ್ಗಣೇನ ।
ಅಧಿರೋಪಿತವಾರಣೇನ್ದ್ರಭಾವೋ ಲಲಿತಾಭಿರ್ಗತಿಭಿರ್ಗೃಹೇಷು ರೇಮೇ ॥ ೩-೭೮॥
ಅಥಾಭಿವೃದ್ಧಿಂ ಪ್ರತಿಪದ್ಯಮಾನೋ ದಧ್ಯಾದಿಷು ಪ್ರೀತಿಮುವಾಹ ಶೌರಿಃ ।
ತತ್ತತ್ ಪ್ರದಾನೇನ ವಶೇ ವಿಧಾತುಮಾರೇಭಿರೇ ಗೋಕುಲಯೋಷಿತಸ್ತಮ್ ॥ ೩-೭೯॥
ಕುರುಷ್ವ ನೃತ್ತಂ ನವನೀತಮೂಲ್ಯಂ ಕೃಷ್ಣೇತಿ ಸಾಭ್ಯರ್ಥನಮೂಚಿಷೀಣಾಮ್ ।
ವ್ರಜಾಙ್ಗನಾನಾಂ ಸ ಪುರಸ್ಸಲೀಲಮುದಞ್ಚಯಾಮಾಸ ಪದಾರವಿನ್ದಮ್ ॥ ೩-೮೦॥
ತಾಸಾಂ ಮನಃಪ್ರೀತಿವಿಧಾನದಕ್ಷೇ ತಥಾ ಕ್ಷಣಂ ತಸ್ಥುಷಿ ಶಾರ್ಙ್ಗಪಾಣೌ ।
ಏಕಾಙ್ಘ್ರಿಸಂಸ್ಪರ್ಶವಿಯೋಗಮಾತ್ರಾದಧನ್ಯಮಾತ್ಮಾನಮಮನ್ಯತೋರ್ವೀ ॥ ೩-೮೧॥
ಉದಞ್ಚಿತಂ ತಸ್ಯ ವಿಲೋಕ್ಯ ಪಾದಂ ವೇಧಾ ಪುನರ್ವಿಕ್ರಮಶಙ್ಕಿಚೇತಾಃ ।
ಕಮಣ್ಡಲುಂ ಪಾಣಿತಲೇನ ಗೃಹ್ಣನ್ನಭ್ಯುದ್ಯತೋಽಭೂದವನೇಜನಾಯ ॥ ೩-೮೨॥
ನೃತ್ತಾಮೃತಂ ಗೋಕುಲಯೋಷಿತಸ್ತತ್ ಕೃಷ್ಣಸ್ಯ ನೇತ್ರಾಞ್ಜಲಿಭಿಃ ಪಿಬನ್ತ್ಯಃ ।
ಪ್ರೀತಿಪ್ರಕರ್ಷಸ್ತಿಮಿತೈರ್ಮನೋಭಿರಾಲೇಖ್ಯಯೋಷಿತ್ಪ್ರತಿಮಾ ಬಭೂವುಃ ॥ ೩-೮೩॥
ವಿದುರ್ನ ತದ್ದರ್ಶನಪಾರವಶ್ಯಾದ್ದಾತುಂ ಕರಸ್ಥಂ ನವನೀತಮೇಕಾಃ ।
ವಿಸ್ರಸ್ಯ ಭೂಮೌ ಪತಿತಂ ತದನ್ಯಾಃ ನ ಮೇನಿರೇ ಪಾಣಿಸರೋರುಹೇಭ್ಯಃ ॥ ೩-೮೪॥
ಅಜಸ್ರಮೇವಂ ಭವನೇಷು ತಾಸಾಂ ಬಭ್ರಾಮ ಕೃಷ್ಣೋ ನವನೀತಭಿಕ್ಷಾಮ್ ।
ಪುರಾ ಕಿಲಾನ್ಯೈರನಿವರ್ತನೀಯಾ ನಿವರ್ತಿತಾ ಯೇನ ಹರಸ್ಯ ಭಿಕ್ಷಾ ॥ ೩-೮೫॥
ಧಿಗ್ಯಾಚನಾಂ ಚೌರ್ಯಭವಸ್ಯ ಭೂಯಾನಸ್ತ್ಯಂಹಸೋ ನಿರ್ಹರಣಾಭ್ಯುಪಾಯಃ ।
ಮತ್ವೇತಿ ನೂನಂ ನವನೀತಚೌರ್ಯೇ ಮಧೋರ್ನಿಹನ್ತಾ ಮತಿಮಾಬಬನ್ಧ ॥ ೩-೮೬॥
ನಿರ್ವಾಪ್ಯ ದೀಪಂ ಮುಖಮಾರುತೇನ ಹೈಯಙ್ಗವೀನಂ ನಿಶಿ ಹರ್ತುಮಿಚ್ಛನ್ ।
ಕೃಷ್ಣಃ ಕಟೀಭೂಷಣರತ್ನಭಾಸಾ ವಿಹನ್ಯಮಾನೋ ವಿಷಸಾದ ಭೂಯಃ ॥ ೩-೮೭॥
ನಿಪೀಡಯನ್ನಗ್ರಪದೇನ ಪೃಥ್ವೀಮುನ್ನಮ್ಯ ದೇಹಂ ಭೃಶಮೂರ್ಧ್ವಬಾಹುಃ ।
ಪಯೋಘಟಸ್ಪರ್ಶನಮಶ್ನುವಾನಸ್ತ್ರಿವಿಕ್ರಮೋಽಭೂತ್ ಪರಿಹಾಸಪಾತ್ರಮ್ ॥ ೩-೮೮॥
ನಿಯಮಿತಶ್ವಸಿತೋ ನಿಭೃತೈಃ ಪದೈರ್ನಿಶಿ ಕಥಞ್ಚನ ಗರ್ಭಗೃಹಂ ಗತಃ ।
ಸ ತು ಭಯಾದಸಮಾಪ್ತಮನೋರಥೋ ನಿವವೃತೇ ನವನೀತಹರೋ ಹರಿಃ ॥ ೩-೮೯॥
ಹರ್ತುಂ ಹರೇರ್ವ್ಯವಸಿತಸ್ಯ ಘನೇ ನಿಶೀಥೇ
ಭೂಷಾರವಶ್ರುತಿಭಯಾದ್ವ್ರಜತೋಽತಿಮನ್ದಮ್ ।
ಅನ್ತರ್ಗೃಹಸ್ಯ ನವನೀತವತಃ ಪ್ರವೇಶಾತ್
ಪ್ರಾಗೇವ ಹನ್ತ ಪಥಿ ಸಾ ರಜನೀ ವಿಭಾತಾ ॥ ೩-೯೦॥
ಗೋಪೀಸಮಾಗಮಭಿಯಾ ಚ ತೃಷಾ ಚ ಗುರ್ವ್ಯಾ
ಪಾತುಂ ವಿಹಾತುಮಪಿ ಗೋಪಗೃಹೇಷ್ವಜಾನನ್ ।
ಆದ್ವಾರಮಾದಧಿಘಟಂ ಚ ಗತಾಗತಾನಿ
ಕುರ್ವನ್ ಸರೋಜನಯನಃ ಶ್ರಮಮೇವ ಲೇಭೇ ॥ ೩-೯೧॥
ಭಿತ್ತಿಷು ಪ್ರತಿಶರೀರದರ್ಶನಾತ್ ಶಙ್ಕಿತಃ ಸ ನವನೀತನಿಃಸ್ಪೃಹಃ ।
ಕಿಞ್ಚಿದನ್ಯದಿವ ತತ್ರ ಮಾರ್ಗಯನ್ನಿರ್ಜಗಾಮ ಮಣಿಮನ್ದಿರೋದರಾತ್ ॥ ೩-೯೨॥
ಜಿಹೀರ್ಷುರನ್ತರ್ಭವನೇಷು ಗೋರಸಂ ದಿನಾನ್ಯನೈಷೀತ್ತದುಪಾಯಚಿನ್ತಯಾ ।
ಸ ಜಾಗರೂಕಶ್ಚ ನಿನಾಯ ಯಾಮಿನೀಂ ಮನೋಹರಾಭಿರ್ಹರಣಪ್ರವೃತ್ತಿಭಿಃ ॥ ೩-೯೩॥
ದೃಷ್ಟೇಽಪಿ ತತ್ಸವಿಧಸಞ್ಚರಣೇ ಸ ತತ್ರ
ವಕ್ತುಂ ನಿಮಿತ್ತಮುಚಿತಂ ಕೃತನಿಶ್ಚಯಸ್ಸನ್ ।
ಅಭ್ಯರ್ಣ ಏವ ನಿದಧೇ ದಧಿಭಾಜನಸ್ಯ
ಲೀಲಾಯಿತೋಪಕರಣಾನಿ ನಿಜಾನಿ ಶೌರಿಃ ॥ ೩-೯೪॥
ವಹನ್ ಗೃಹೀತೋ ನವನೀತಮಚ್ಯುತೋ ಭಯೇನ ಪಾರಿಪ್ಲವನೇತ್ರಪಙ್ಕಜಃ ।
ಪದಾ ಲಿಖನ್ ಭೂಮಿಮವಾಙ್ಮುಖಸ್ಥಿತೋ ಜಹಾರ ಚೇತೋಽಪಿ ಚ ಗೋಪಯೋಷಿತಾಮ್ ॥ ೩-೯೫॥
ಶಪೇ ಪಿತೃಭ್ಯಾಮಿತ ಊರ್ಧ್ವಮೇವಂ ನಾಹಂ ವಿಧಾಸ್ಯೇ ನವನೀತಚೌರ್ಯಮ್ ।
ವಿನಿಃಶ್ವಸನ್ನಿತ್ಯಭಿಧಾಯ ಕೃಷ್ಣೋ ಜಹಾರ ಮಾತುಶ್ಚ ಪಿತುಶ್ಚ ಚೇತಃ ॥ ೩-೯೬॥
ಏಹಿ ಸದ್ಮ ತನಯೇತಿ ಸಾದರಂ ಯಾಚಿತೋಽಪಿ ಸ ಮುಹುರ್ಯಶೋದಯಾ ।
ಆನನೇನ ನವನೀತಗನ್ಘಿನಾ ನಾಜಗಾಮ ವಿಹರನ್ನಿವಾಚ್ಯುತಃ ॥ ೩-೯೭॥
ಹೃತಂ ನವಂ ಮೇ ನವನೀತಮಾಲಯಾತ್ ಹೃತಂ ಘೃತಂ ಮೇ ದಧಿ ಮೇ ಹೃತಂ ನಿಶಿ ।
ಇತಿ ಪ್ರಭಾತೇ ವಚನಾನಿ ಯೋಷಿತಾಮುವಾಹ ಶ್ರೃಣ್ವನ್ ನ ಮುಖೇ ಸ ವಿಕ್ರಿಯಾಮ್ ॥ ೩-೯೮॥
ಪುತ್ರಂ ಕುಲಸ್ಯ ಭುವನಸ್ಯ ಚ ರಕ್ಷಿತಾರ-
ಮಭ್ಯರ್ಥಿತೋಽಪಿ ಭಗವಾನರವಿನ್ದನಾಭಃ ।
ತ್ವಾಂ ಮೇ ದದೌ ವಿಧಿವಶಾದ್ಭುವನೈಕಚೋರ-
ಮಿತ್ಯಾಹ ಕೋಪಮಭಿನೀಯ ಸುತಂ ಯಶೋದಾ ॥ ೩-೯೯॥
ಸ ಸಾನ್ತ್ವನೇನ ಪ್ರತಿಪಾದನೇನ ಭೇದೇನ ತೀವ್ರೇಣ ಚ ತರ್ಜನೇನ
ನಿಬದ್ಧ್ಯ ಪೃಷ್ಟೋಽಪಿ ಮುಹುರ್ಜನನ್ಯಾ ನಾಙ್ಗೀಕರೋತಿ ಸ್ಮ ಹರಿಃ ಸ್ವಚೌರ್ಯಮ್ ॥ ೩-೧೦೦॥
ಸಂರಕ್ಷಣಾಯ ಜಗತಾಮವತೀರ್ಯ ಪೃಥ್ವ್ಯಾಂ
ಗೋಪಾಲಸದ್ಮಸು ಹರತ್ಯಖಿಲಂ ಮುಕುನ್ದಃ ।
ಇತ್ಥಂ ನಿಶಮ್ಯ ಪರಿಹಾಸವಚಸ್ಸುರಾಣಾಮ್-
ಅನ್ತರ್ಜಹಾಸ ಭಗವಾನರವಿನ್ದನಾಭಃ ॥ ೩-೧೦೧॥
ಕೃಷ್ಣಸ್ಯ ಕೇಲಿಸಮರೇಕ್ಷಣಕೌತುಕೇನ
ಗೋಪೀಷು ಮುಕ್ತಭವನಾಸು ಬಹಿಃ ಸ್ಥಿತಾಸು ।
ಮಿತ್ರೈಃ ಪರಾಜಿತ ಇವ ದ್ರುತಮೇತ್ಯ ಗೇಹಂ
ಬದ್ಧ್ವಾ ಕವಾಟಮಹರನ್ನವನೀತಮನ್ತಃ ॥ ೩-೧೦೨॥
ತ್ರಿಭುವನಮಹನೀಯೈರಭ್ಯುಪಾಯೈರಸಙ್ಖ್ಯೈಃ
ನಿಖಿಲಮಿತಿ ಸ ಮುಷ್ಣನ್ ಗೋಕುಲಂ ನನ್ದಸೂನುಃ ।
ಅರಮತ ಸವಯೋಭಿಸ್ತತ್ರ ಗೋಪಾಲಪುತ್ರೈ-
ರಪರ ಇವ ಶಶಾಙ್ಕಃ ಪ್ರಾಣಿನಾಂ ಪ್ರೀತಿಹೇತುಃ ॥ ೩-೧೦೩॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ತೃತೀಯಃ ಸರ್ಗಃ ॥ ೩ ॥
ಚತುರ್ಥಃ ಸರ್ಗಃ
ಸ ರೋಹಿಣೀಸೂನುನಿಬದ್ಧರಾಗಃ ಸತಾಂ ಶರಣ್ಯಸ್ತಮಸೋಽಪಹರ್ತಾ ।
ಮನೋಹರೋ ಬಾಲ ಇವೌಷಧೀಶೋ ದಿನೇ ದಿನೇ ಪೋಷಮಿಯಾಯ ಶೌರಿಃ ॥ ೪-೦೧॥
ತ್ಯಕ್ತ್ವಾ ಹರಿಃ ಸ್ತೈನ್ಯಕೃತಾಪವಾದಂ ತಚ್ಛೈಶವಂ ಪ್ರಾಪ್ಯ ದಶಾನ್ತರಂ ಸಃ ।
ಮನ್ಯೇ ತದಂಹಃಪರಿಮಾರ್ಜನಾಯ ಗವಾಂ ಪರಿತ್ರಾಣಸಮುದ್ಯತೋಽಭೂತ್ ॥ ೪-೦೨॥
ಪುತ್ರೇ ತಥೋದ್ಯೋಗಿನಿ ನನ್ದಗೋಪೋ ಗೋಪಾಲಪುತ್ರಾನನುನೀಯ ಸರ್ವಾನ್ ।
ತ್ರಾತುಸ್ತ್ರಯಾಣಾಮಪಿ ವಿಷ್ಟಪಾನಾಂ ಸಂರಕ್ಷಣೇ ತಸ್ಯ ಸಮಾದಿದೇಶ ॥ ೪-೦೩॥
ಮಾತ್ರಾ ಕೃತಸ್ವಸ್ತ್ಯಯನಃ ಪ್ರಭಾತೇ ಪಿತ್ರಾ ಪರಿಷ್ವಜ್ಯ ಚಿರಂ ವಿಸೃಷ್ಟಃ ।
ಸಹೈವ ರಾಮೇಣ ಸಮಗ್ರಹರ್ಷಃ ವಿನಿರ್ಯಯೌ ವಿಶ್ವಪತಿರ್ವನಾಯ ॥ ೪-೦೪॥
ಸ ಪ್ರಾತರಾಶೀ ವ್ಯತಿಷಕ್ತಪಾಣಿರ್ಯಷ್ಟಿಂ ವಹನ್ನಂಸವಿಷಕ್ತಶೃಙ್ಗಃ ।
ವಿಮುಚ್ಯತಾಂ ಗೌರಿತಿ ಸಮ್ಭ್ರಮೇಣ ಗಚ್ಛನ್ ಪ್ರತಿದ್ವಾರಮವೋಚದುಚ್ಚೈಃ ॥ ೪-೦೫॥
ನಿಶಮ್ಯ ತಸ್ಯ ಧ್ವನಿಮೂರ್ಧ್ವಕರ್ಣಾಃ ವಿಲೂನಪಾಶಾ ಭೃಶಮುತ್ಸುಕಿನ್ಯಃ ।
ವತ್ಸಾನಪಿ ಸ್ವಾನನವೇಕ್ಷ್ಯ ಗಾವಃ ಸಸಮ್ಭ್ರಮಂ ನಿರ್ಯಯುರಾಲಯೇಭ್ಯಃ ॥ ೪-೦೬॥
ಗತ್ವಾ ಪುರಸ್ತಾದ್ಗಜರಾಜಗಾಮೀ ಗೋಷ್ಠಂ ಗರಿಷ್ಠೋ ಗುಣಮಣ್ಡಲೇನ ।
ಆಪೂರಯನ್ಮಿತ್ರಗಣಾಗಮಾರ್ಥಂ ಪಿತ್ರೋರಭೀಷ್ಟೇನ ಸಹೈವ ಶೃಙ್ಗಮ್ ॥ ೪-೦೭॥
ನಭಸ್ಸ್ಪೃಶಾ ಕರ್ಣಪಥಂ ಗತೇನ ತೇನೈವ ಸಂಜ್ಞಾಗವಲಸ್ವನೇನ ।
ಆದಾಯ ತತ್ತತ್ಪರಿಬರ್ಹಜಾತಂ ಸದ್ಯೋ ಗೃಹೇಭ್ಯಃ ಸುಹೃದೋ ನಿರೀಯುಃ ॥ ೪-೦೮॥
ಗವಾಂ ಖುರನ್ಯಾಸಸಮುದ್ಭವೇನ ವಿಷಾಣಸಙ್ಘಟ್ಟನಜನ್ಮನಾ ಚ ।
ಪ್ರಸರ್ಪತಾ ದಿಕ್ಷು ಮಹಾಸ್ವನೇನ ಘೋಷಃ ಕ್ಷಣಂ ಘೋಷಮಯೋ ಬಭೂವ ॥ ೪-೦೯॥
ಪ್ರಧಾವನೈರುತ್ಪ್ಲುತಿಭಿಸ್ಸುದೂರಂ ಮಿಥೋ ಬಲಾದ್ಗ್ರಾಹವಿಮೋಚನೈಶ್ಚ ।
ಸಮಾಗತೈಸ್ತತ್ರ ಸಮಂ ಸುಹೃದ್ಭಿರ್ಬಹುಪ್ರಕಾರಂ ವಿಜಹಾರ ಶೌರಿಃ ॥ ೪-೧೦॥
ಪರೇಣ ಹರ್ಷೇಣ ಪುರಾಣಪುಂಸಃ ಸಙ್ಕ್ರೀಡಮಾನಸ್ಯ ಸಮಂ ಸುಹೃದ್ಭಿಃ ।
ಪವಿತ್ರಯಾಮಾಸ ಪದಾಮ್ಬುಜೋತ್ಥಿತಾ ಕರೀಷಧೂಲಿಃ ಕಕುಭಾಂ ಮುಖಾನಿ ॥ ೪-೧೧॥
ಮಹರ್ಷಯಸ್ತತ್ರ ಮಹಾನುಭಾವಾಃ ಗೃಹೀತರೂಪಾನ್ತರದುರ್ನ್ನಿರೂಪಾಃ ।
ಭವಾಗ್ನಿಸನ್ತಾಪಹರೇ ಮಮಜ್ಜುಃ ಪದೋತ್ಥಿತೇ ತಸ್ಯ ಪರಾಗಪೂರೇ ॥ ೪-೧೨॥
ಪ್ರಹರ್ಷಮಾಲೋಕಯತಾಂ ಜನಾನಾಂ ಕ್ರೀಡಾಭಿರಾಪಾದ್ಯ ಮನೋಹರಾಭಿಃ ।
ಉತ್ಥಾಪಯಾಮಾಸ ಸ ಚೀತ್ಕೃತೇನ ಗೋಷ್ಠೇ ಹರಿರ್ಗೋಸಮಜಂ ಶಯಾನಂ ॥ ೪-೧೩॥
ತಸ್ಮಿನ್ ಗವಾಂ ಪಾಲನಕೌತುಕೇನ ವನಾಯ ನಿರ್ಗಛತಿ ದೈತ್ಯಶತ್ರೌ ।
ಯಯುಃ ಪ್ರಿಯಾಖ್ಯಾನಚಿಕೀರ್ಷಯೇವ ದಿವಾಕೃತೋ ದಿಗ್ವಲಯಂ ಮಯೂಖಾಃ ॥ ೪-೧೪॥
ಕೂಲದ್ರುಮಾಣಾಂ ಕುಸುಮಾನಿ ಧೂನ್ವನ್ ಕರ್ಷನ್ ಪಯಶ್ಶೀಕರಮಣ್ಡಲಾನಿ ।
ಕೃಷ್ಣಂ ಕೃತಾನೇಕವಿಹಾರಖಿನ್ನಂ ಯಾನ್ತಂ ಸಿಷೇವೇ ಯಮುನಾಸಮೀರಃ ॥ ೪-೧೫॥
ಪರಸ್ಯ ಪುಂಸಃ ಪದಪಙ್ಕಜಾಭ್ಯಾಂ ಪ್ರವೇಕ್ಷ್ಯತೋ ಗೋಕುಲಪಾಲನಾಯ ।
ಚಕಾರ ನೀಹಾರಹರೈರ್ಮಯೂಖೈಃ ಪ್ರವೇಶಯೋಗ್ಯಾನಿ ವನಾನಿ ಭಾನುಃ ॥ ೪-೧೬॥
ಪ್ರೇಮ್ಣಾ ಪರಿತ್ಯಕ್ತುಮಶಕ್ನುವನ್ತಂ ಬದ್ಧಾಞ್ಜಲಿಂ ಬನ್ಧುಜನಂ ನಿವಾರ್ಯ ।
ರಾಮಂ ಪುರಸ್ಕೃತ್ಯ ಸಮಿತ್ರವರ್ಗಃ ವಿವೇಶ ವಿಷ್ಣುರ್ವಿಪಿನಾನ್ತರಾಣಿ ॥ ೪-೧೭॥
ಅರಣ್ಯಭೂಮೀರವಗಾಹಮಾನಂ ತಮಾತಪಕ್ಲಾನ್ತಮವೇಕ್ಷಮಾಣಃ ।
ಪಕ್ಷಾತಪತ್ರೇಣ ಪರಿಸ್ತೃತೇನ ವಿಯತ್ಯಸೇವಿಷ್ಟ ವಿಹಙ್ಗರಾಜಃ ॥ ೪-೧೮॥
ಮಾ ಗಚ್ಛ ಗಙ್ಗೇ ಯಮುನೇ ಕ್ವ ಯಾಸಿ ಕಿಂ ತತ್ರ ಗೋದಾವರಿ ಧಾವಸೀತಿ ।
ನ್ಯಷೇಧಿ ತತ್ತದ್ವ್ಯಪದೇಶಪೂರ್ವಂ ಮಾರ್ಗಚ್ಯುತಂ ಗೋಕುಲಮಚ್ಯುತೇನ ॥ ೪-೧೯॥
ಪ್ರರೂಢಸುಸ್ನಿಗ್ಧತೃಣಾಙ್ಕುರಾಸು ಛಾಯಾದ್ರುಮಶ್ಯಾಮಲಿತಾನ್ತರಾಸು ।
ಗವಾಂ ಕುಲಂ ತತ್ಸುಲಭೋದಕಾಸು ಪ್ರಚಾರಯಾಮಾಸ ವನಸ್ಥಲೀಷು ॥ ೪-೨೦॥
ಸಾಟೋಪಮಾನ್ದೋಲಿತಲಮ್ಬಸಾಸ್ನಾಃ ಗಾವಶ್ಚರನ್ತ್ಯೋ ವಲಮಾನವಾಲಾಃ ।
ತ್ರುಟ್ಯತ್ತೃಣಸ್ತೋಮಚಟತ್ಕೃತಿನ್ಯಃ ಚಕ್ರುಃ ಪ್ರಿಯಂ ಚೇತಸಿ ಚಕ್ರಪಾಣೇಃ ॥ ೪-೨೧॥
ಹರಿನ್ಮಣಿಶ್ಯಾಮರುಚೀನಿ ತತ್ರ ಸ್ವೈರಂ ಚರನ್ತೀಷು ತೃಣಾನಿ ಗೋಷು ।
ಶೌರಿಃ ಸ್ವಯಂ ಭುಕ್ತ ಇವಾಪ ತೃಪ್ತಿಂ ತೃಪ್ಯನ್ತ್ಯುದಾರಾಃ ಪರತರ್ಪಣೇನ ॥ ೪-೨೨॥
ಸರ್ವಾಸು ಕಣ್ಡೂಯನಲಿಪ್ಸಯೋಚ್ಚೈರುನ್ನಮ್ಯ ಕಣ್ಠಂ ದಧತೀಷು ಗೋಷು ।
ಬಾಲೋ ಹರಿರ್ಬಾಹುಸಹಸ್ರಶೂನ್ಯಂ ಜನ್ಮಾತ್ಮನೋ ನಿಷ್ಫಲಮೇವ ಮೇನೇ ॥ ೪-೨೩॥
ಪರಿಭ್ರಮದ್ಗೋಕುಲಮುಗ್ರಕೋಪಂ ಸಮುಚ್ಚಲದ್ಧೂಲಿರಟದ್ವಿಷಾಣಮ್ ।
ಸ ಯುದ್ಧಮುಕ್ಷ್ಣಾಂ ಮದನಿರ್ಭರಾಣಾಂ ಪ್ರವಿಶ್ಯ ಮಧ್ಯಂ ಶಮಯಾಞ್ಚಕಾರ ॥ ೪-೨೪॥
ಶಾಖಾಕರಾಗ್ರೈರವಲಮ್ಬ್ಯ ಪೃಥ್ವೀಂ ನಿಷೇದುಷಃ ಪುಷ್ಪಫಲಾವನಮ್ರಾನ್ ।
ತತ್ರ ದ್ರುಮಾನ್ ಸಾದರಮೀಕ್ಷಮಾಣೋ ಜಗಾಮ ತೃಪ್ತಿಂ ನ ಕದಾಽಪಿ ಶೌರಿಃ ॥ ೪-೨೫॥
ಅಲಕ್ಷ್ಯಮೂಲಾನ್ಯತಿವಿಪ್ರಕರ್ಷಾದ್ ಘೋಷಾನುಮೇಯಸ್ಖಲಿತೋದಕಾನಿ ।
ಉತ್ತುಙ್ಗರೋಧಸ್ತರುಮಣ್ಡಲಾನಿ ನಿಮ್ನಾನಿ ದೃಷ್ಟ್ವಾ ನಿತರಾಂ ಸ ರೇಮೇ ॥ ೪-೨೬॥
ಅತುಚ್ಛಗುಚ್ಛಸ್ತನಭಾರನಮ್ರಾಃ ಲತಾಃ ಪ್ರವಾಲಾಧರಲೋಭನೀಯಾಃ ।
ಸ ತತ್ರ ವೀಕ್ಷ್ಯ ಭ್ರಮರಾಲಕಾಢ್ಯಾಸ್ತಾಮಸ್ಮರತ್ತಾಮರಸಾಧಿವಾಸಾಮ್ ॥ ೪-೨೭॥
ಸಮುತ್ಸುಕಂ ಸಾಗರಕನ್ಯಕಾಯಾಮಾಕ್ರಷ್ಟುಮನ್ತಃಕರಣಂ ಮುರಾರೇಃ ।
ಸರ್ವಸ್ಯ ವೇತ್ತಾ ಸರಸಾಂ ಸ ವಾಚಂ ಸಙ್ಕರ್ಷಣಸ್ಸಾದರಮಿತ್ಯುವಾಚ ॥ ೪-೨೮॥
ಅನ್ತಸ್ಸಮೀರಭ್ರಮಣಪ್ರಸಙ್ಗಾದುದೀರ್ಣನಾದೇನ ಗುಹಾಮುಖೇನ ।
ಭೂಯಃ ಪ್ರಯುಙ್ಕ್ತೇ ಪೃಥಿವೀಧರಸ್ತೇ ಗೋವರ್ಧನಃ ಸ್ವಾಗತಮೇಷ ಶೌರೇ ॥ ೪-೨೯॥
ನಿಶಮ್ಯ ಗೋವರ್ಧನನಿರ್ಝರಾಣಾಂ ಧೀರಧ್ವನಿಂ ಕೃಷ್ಣಶಿಖಣ್ಡಿನೋಽಮೀ ।
ಮುದಾ ತ್ವದಾಲೋಕನಜಾತಯೇವ ನೃತ್ಯನ್ತಿ ಚಕ್ರೀಕೃತಬರ್ಹಭಾರಾಃ ॥ ೪-೩೦॥
ಪಾದಾವಿಮೌ ಸಞ್ಚರಣಾಯ ನಾಲಮತ್ರೇತಿ ಮತ್ವಾ ಮೃಗಯೂಥಮೇತತ್ ।
ಸ್ವಲೋಚನಾಂಶುಸ್ತಬಕಾಪದೇಶಾನ್ನೀಲೋತ್ಪಲೈರ್ಭೂಮಿಮಿವಾಸ್ತೃಣಾತಿ ॥ ೪-೩೧॥
ವಿಕೀರ್ಯ ವಿಷ್ವಗ್ವಿಪಿನದ್ರುಮಾಣಾಂ ಮಧೂನಿ ಪುಷ್ಪಸ್ತಬಕಚ್ಯುತಾನಿ ।
ಅರ್ಕಾಂಶುತಪ್ತಾಮನಿಲೋ ಧರಿತ್ರೀಂ ಸಞ್ಚಾರಯೋಗ್ಯಾಂ ಭವತೋ ವಿಧತ್ತೇ ॥ ೪-೩೨॥
ನ ಭೀತಿರನ್ತರ್ನ ದೃಶೋಶ್ಚಲತ್ವಂ ನಾಸ್ಥಾ ತೃಣೇನೋತ್ಸುಕತಾಽಪಿ ಶಾಬೇ ।
ರೂಪೇಣ ದಾಮೋದರ ಮೋಹಿತಾಸ್ತೇ ತಿಷ್ಠನ್ತ್ಯಮೀ ಕಾಷ್ಠಕೃತಾ ಇವೈಣಾಃ ॥ ೪-೩೩॥
ತೇನೇತಿ ಸನ್ದರ್ಶಿತಮಗ್ರಜೇನ ಮನೋಹರಂ ತತ್ತದವೇಕ್ಷಮಾಣಃ ।
ಗಾಶ್ಚಾರಯನ್ ಶಾದ್ವಲಿನೀಷು ಭೂಷು ರೇಮೇ ರಮಾಯಾ ರಮಣಃ ಪ್ರಕಾಮಮ್ ॥ ೪-೩೪॥
ತಂ ತತ್ರ ದೃಷ್ಟ್ವಾ ಮಹನೀಯರೂಪಂ ಶೌರಿಂ ಶಬರ್ಯಶ್ಚರಿತಾರ್ಥನೇತ್ರಾಃ ।
ಫಲೋಪಹಾರೈರುಪಸೃತ್ಯ ವನ್ಯೈರವಾದಿಷುಃ ಪ್ರಶ್ರಯಶೋಭಿ ವಾಕ್ಯಮ್ ॥ ೪-೩೫॥
ಇತಃ ಪದಂ ನಃ ಶರಪಾತಮಾತ್ರಂ ಯಾಯಾಸ್ಸಹಾನೇನ ಸುಹೃದ್ಗಣೇನ ।
ಅತ್ರಾಗಮಿಷ್ಯನ್ತಿ ಕಿರಾತಪುತ್ರಾಃ ಗವಾಮಮೂಷಾಂ ಪರಿಪಾಲನಾಯ ॥ ೪-೩೬॥
ವ್ಯಾಧಾಹೃತೈರ್ವಾರಣಕುಮ್ಭಗರ್ಭಾತ್ ಮುಕ್ತಾಫಲೈರಾಮಲಕಾಭಿರಾಮೈಃ ।
ಪ್ರಸಾಧನಂ ತ್ವಾಂ ಭುವನತ್ರಯಸ್ಯ ಪ್ರಸಾಧಯಿಷ್ಯನ್ತಿ ಕಿರಾತಕನ್ಯಾಃ॥ ೪-೩೭॥
ಕನ್ಯಾಽಸ್ತಿ ಕಾಚಿಚ್ಛಬರೇಶ್ವರಸ್ಯ ಯಾ ನಃ ಕುಲಾನಾಮಧಿದೇವತೇವ ।
ತಾಂ ಸರ್ವಥಾ ದಾಸ್ಯತಿ ತೇ ಸ ರಾಜಾ ಮಹಾನ್ತ್ಯನರ್ಘಾಣಿ ಚ ಯೌತಕಾನಿ ॥ ೪-೩೮॥
ಇತ್ಯೂಚಿಷೀಣಾಂ ಶಬರಾಙ್ಗನಾನಾಮತ್ಯಾದರಂ ಚೇತಸಿ ವೀಕ್ಷಮಾಣಃ ।
ಕೃಷ್ಣಃ ಕೃಪಾನಿಘ್ನಮನಾಸ್ಸ ವಾಚಮಿತ್ಯಾಹ ಲಜ್ಜಾಮೃದುನಾ ಸ್ವನೇನ ॥ ೪-೩೯॥
ಪಿತ್ರೋರನುಜ್ಞಾಮಧಿಗಮ್ಯ ಭದ್ರಾಃ ಸಮೀಹಿತಂ ವಃ ಸಕಲಂ ವಿಧಾಸ್ಯೇ ।
ಮಯಿ ಸ್ಥಿತೇ ತಿಷ್ಠತಿ ಗೋಕುಲಂ ತದ್ಗಚ್ಛಾಮಿ ಮಾ ಭೂತ ವಿಷಾದವತ್ಯಃ ॥ ೪-೪೦॥
ಗತೇ ಪುಲಿನ್ದೀರಿತಿ ಸಾನ್ತ್ವಯಿತ್ವಾ ತದಿಷ್ಟಭಙ್ಗ್ವ್ಯಥಿತೇ ಮುಕುನ್ದೇ ।
ಫಲಾಪಚಾಯಾದಿಷು ನಿಸ್ಪೃಹಾಸ್ತಾಃ ಶನೈರ್ಯಯುಃ ಪಕ್ಕಣಮೇವ ಖಿನ್ನಾಃ ॥ ೪-೪೧॥
ವಿಹೃತ್ಯ ಗರ್ಭೇಷು ಲತಾಗೃಹಾಣಾಂ ನಿಪೀಯ ವಾರೀಣಿ ಚ ಪಲ್ವಲಾನಾಮ್ ।
ಫಲಾನಿ ಚಾಸ್ವಾದ್ಯ ಮಹೀರುಹಾಣಾಂ ವನಾನಿ ಧನ್ಯಾನಿ ಚಕಾರ ಶೌರಿಃ ॥ ೪-೪೨॥
ಅಥಾಧಿರೂಢೇ ಗಗನಸ್ಯ ಮಧ್ಯಂ ದಿವಾಕರೇ ದುಃಸಹಭಾನುಜಾಲೇ ।
ಘರ್ಮಾಕುಲಂ ಗೋಕುಲಮೀಕ್ಷಮಾಣಃ ಹಲಾಯುಧಃ ಪ್ರಾಹ ರಥಾಙ್ಗಪಾಣಿಮ್ ॥ ೪-೪೩॥
ಕಿಞ್ಚಿತ್ಪರಿಮ್ಲಾನಲತಾಪ್ರವಾಲಸ್ತೃಣಾಙ್ಕುರಭ್ರಾನ್ತಕುರಙ್ಗಯೂಥಃ ।
ಅಹ್ನಃ ಪರಿತ್ಯಕ್ತಜನಪ್ರಚಾರಃ ಪ್ರವರ್ತತೇ ಮಧ್ಯಮ ಏಷ ಭಾಗಃ ॥ ೪-೪೪॥
ಕುಲಾನಿ ವೀಕ್ಷಸ್ವ ವಿಹಙ್ಗಮಾನಾಂ ಪಕ್ಷಾನ್ತರಸ್ಥಾಪಿತಶಾಬಕಾನಿ ।
ಕಠೋರಮೇನಂ ಗಮಯನ್ತಿ ಕಾಲಂ ನೀಡೇಷು ನಿದ್ರಾಲಸಲೋಚನಾನಿ ॥ ೪-೪೫॥
ಪ್ರಾಯಃ ಕಠೋರಾತಪಪೀಡಯೇವ ಛಾಯಾಃ ಪರಿತ್ಯಕ್ತಬಹಿರ್ವಿಹಾರಾಃ ।
ಆಲೋಕಯಾಧ್ವನ್ಯಜನೇನ ಸಾರ್ದ್ಧಮಧ್ಯಾಸತೇ ಮೂಲಮನೋಹಕಾನಾಂ ॥ ೪-೪೬॥
ಕರೈರಸಹ್ಯೈರಯಮಂಶುಮಾಲೀ ತಪನ್ ಮಹೀಮುಗ್ರ ಇವ ಕ್ಷಿತೀಶಃ ।
ಆಶಂಸಿತಾಪತ್ಪ್ರಸರಃ ಪ್ರಜಾಭಿರ್ಧತ್ತೇ ದಶಾಮದ್ಯ ವಿಗರ್ಹಣೀಯಾಮ್ ॥ ೪-೪೭॥
ವಿಹೃತ್ಯ ಕಾನ್ತಾರಮಹೀಷು ವೇಗಾದ್ವ್ರಜನ್ನಪಃ ಪುಷ್ಕರಿಣೀಷು ಪಾತುಮ್ ।
ಮಾರ್ಗೇ ಕರೀನ್ದ್ರಃ ಕರಶೀಕರೇಣ ಪ್ರಿಯಾಮಸಾವುಕ್ಷತಿ ತಾಪಖಿನ್ನಾಮ್ ॥ ೪-೪೮॥
ತಪ್ತಾನಿ ಭಾಸಾ ತಪನಸ್ಯ ಹಂಸಾಃ ವಿಹಾಯ ವಾರೀಣಿ ನಖಂಪಚಾನಿ ।
ಪತ್ರೇಷು ವಿನ್ಯಸ್ಯ ಪದಾನಿ ಮನ್ದಂ ಪದ್ಮಾಕರೇ ಸಮ್ಪ್ರತಿ ಪರ್ಯಟನ್ತಿ ॥ ೪-೪೯॥
ನಿಗೂಢಮೀನಗ್ರಹಣಾಭಿಸನ್ಧಿಂ ಕೃಛ್ರೇಣ ಮುಕ್ತ್ವಾ ಕಪಟಾಸಿಕಾಂ ಸ್ವಾಮ್ ।
ಅಮೀ ಬಕೋಟಾಸ್ತಪನಾಂಶುತಾಪಾತ್ತಟೀನಿಕುಞ್ಜಂ ತರಸಾ ವಿಶನ್ತಿ ॥ ೪-೫೦॥
ತದೇಹಿ ಯಾಮಸ್ತರುಷಣ್ಡಮೇತದ್ ಘರ್ಮಾಕುಲಂ ಗೋಕುಲಮಾನಯಾಮಃ ।
ಅತ್ರೈವ ವಿಶ್ರಮ್ಯ ಮುಹೂರ್ತಮಾತ್ರಂ ಭೂಯೋಽಪಿ ಗಾವಃ ಪ್ರಚರನ್ತ್ವರಣ್ಯೇ ॥ ೪-೫೧॥
ಇತೀರಿತಂ ತತ್ಸಮಯಾನುರೂಪಂ ವಾಕ್ಯಂ ಸಮಾಕರ್ಣ್ಯ ಹಲಾಯುಧಸ್ಯ ।
ಆರ್ಯೋ ಯಥಾಜ್ಞಾಪಯತೀತಿ ಕೃಷ್ಣಸ್ತಂ ರಾಮಮುಕ್ತ್ವಾ ತರುಷಣ್ಡಮಾಪ ॥ ೪-೫೨॥
ಅಲಬ್ಧಮಾರ್ತಾಣ್ಡಕರಪ್ರವೇಶಮಾರಾಮಕಲ್ಪಂ ತರುಷಣ್ಡಮೇತ್ಯ ।
ಆನೇತುಕಾಮಃ ಸ ಗವಾಂ ಕುಲಂ ತದಾಸಜ್ಜಯಾಮಾಸ ಮುಖೇನ ವೇಣುಮ್ ॥ ೪-೫೩॥
ಸಲೀಲಮೀಷತ್ಪರಿವೃತ್ತಪಾದಂ ಸವಿಭ್ರಮೋದಞ್ಚಿತಸವ್ಯನೇತ್ರಂ ।
ಕೃಷ್ಣಸ್ಯ ವಂಶಾರ್ಪಿತಪಾಟಲೋಷ್ಠಂ ವೀಕ್ಷ್ಯ ಸ್ಥಿತಂ ವಿಸ್ಮಯಮಾಪ ಲೋಕಃ ॥ ೪-೫೪॥
ತತ್ರ ಸ್ಥಿತಂ ತಾಮರಸಾಯತಾಕ್ಷಂ ತಾಪಿಞ್ಛವರ್ಣಂ ಶಿಖಿಪಿಞ್ಛಚೂಡಂ ।
ತಮೇವ ಪಶ್ಯನ್ನನಿಮೇಷತಾಯಾಃ ಫಲಂ ಪ್ರಪೇದೇ ಸುರಸಿದ್ಧಸಙ್ಘಃ ॥ ೪-೫೫॥
ಸ್ಥಿತಸ್ತ್ರಿಭಙ್ಗ್ಯಾ ವಿವರೇಷು ವೇಣೋರ್ವ್ಯಾಪಾರಯನ್ನಙ್ಗುಲಿಪಲ್ಲವಾನಿ ।
ಜಗತ್ತ್ರಯೀಮೋಹವಿಧಾನದಕ್ಷಮುತ್ಥಾಪಯಾಮಾಸ ಸ ನಾದಮುಚ್ಚೈಃ ॥ ೪-೫೬॥
ಅಥೋತ್ಥಿತಾನನ್ದನಿಮೀಲಿತಾಕ್ಷ್ಯಃ ವಿಲೂನದೂರ್ವಾಙ್ಕುರಲಾಞ್ಛಿತಾಸ್ಯಾಃ ।
ಗಾವಸ್ತದಭ್ಯಾಶಮುಪೇತ್ಯ ತಸ್ಥುಃ ನಿಸ್ಪನ್ದದೇಹಾ ನಿಭೃತೈಃ ಶ್ರವೋಭಿಃ ॥ ೪-೫೭॥
ನೈಸರ್ಗಿಕಂ ವೈರಮಪತ್ಯಸಙ್ಗಸ್ತೃಷ್ಣಾ ಬುಭುಕ್ಷಾ ಕುಸುಮಾಯುಧಶ್ಚ ।
ತದ್ವೇಣುನಾದಶ್ರುತಿತತ್ಪರಾಣಾಂ ನಾಲಂ ವಿಧಾತುಂ ವಿಕೃತಿಂ ತಿರಶ್ಚಾಮ್ ॥ ೪-೫೮॥
ತಸ್ಮಿನ್ ಮನೋಹಾರಿಣಿ ಚಕ್ರಪಾಣೇರ್ವನಾನ್ತರೇ ಮೂರ್ಛತಿ ವಂಶನಾದೇ ।
ವಿಧೀಯಮಾನಂ ಪರಿಹೃತ್ಯ ಕರ್ಮ ಸರ್ವೇಽಪಿ ಸತ್ವಾ ಲಿಖಿತಾ ಇವಾಸನ್ ॥ ೪-೫೯॥
ಪ್ರವೃತ್ತಮಾತ್ರೌ ವನಪದ್ಮಿನೀಷು ದಾತುಂ ಗೃಹೀತುಂ ಚ ಮೃಣಾಲಭಙ್ಗಮ್ ।
ಚಕ್ರಾಹ್ವಯಸ್ತದ್ಗೃಹಮೇಧಿನೀ ಚ ಪ್ರಸಾರ್ಯ ಚಞ್ಚೂ ಪರಮಾಸಿಷಾತಾಮ್ ॥ ೪-೬೦॥
ಉಪಾವಿಶನ್ನುಜ್ಝಿತಚಾಪಲಾನಿ ಸ್ವಜಾನುವಿನ್ಯಸ್ತಕರಾನನಾನಿ ।
ನಿಷ್ಪನ್ದದೃಷ್ಟೀನಿ ವನದ್ರುಮಾಣಾಂ ಶಾಖಾಸು ಶಾಖಾಮೃಗಮಣ್ಡಲಾನಿ ॥ ೪-೬೧॥
ಪದ್ಭ್ಯಾಮವಷ್ಟಭ್ಯ ಮಹೀಮುಭಾಭ್ಯಾಂ ಸದ್ಯಸ್ಸಮುತ್ತಮ್ಭಿತಪೂರ್ವಕಾಯಃ ।
ಸಿಂಹಃ ಕರೀನ್ದ್ರಾಕ್ರಮಣೇ ಪ್ರವೃತ್ತಸ್ತಸ್ಥೌ ತಥಾ ಕೃತ್ರಿಮಸಿಂಹಕಲ್ಪಃ ॥ ೪-೬೨॥
ಸಿದ್ಧಾಃ ಕಲತ್ರಾಣಿ ಲತಾಗೃಹೇಷು ಸಮುದ್ಯತಾಃ ಪಾಯಯಿತುಂ ಮಧೂನಿ ।
ಕರದ್ವಯೋದಞ್ಚಿತರತ್ನಪಾತ್ರಾಃ ನಿಷೇದುರಾಲೇಖ್ಯಮಿವ ಪ್ರಪನ್ನಾಃ ॥ ೪-೬೩॥
ತದ್ವಂಶನಾಲಾಚ್ಚ್ಯುತಮಚ್ಯುತಸ್ಯ ಗೇಯಾಮೃತಂ ಸಾಧು ನಿಷೇವ್ಯ ವೃಕ್ಷಾಃ ।
ಚಿರಂ ಜರಾಜರ್ಜರಿತತ್ವಚೋಽಪಿ ಬಾಲಾ ಇವಾಸನ್ನವಪಲ್ಲವಾಢ್ಯಾಃ ॥ ೪-೬೪॥
ನಾದೇನ ವೇಣೋರ್ವಿವಶೀಕೃತಾನಾಂ ವಿದ್ಯಾಧರಾಣಾಂ ಗಲಿತಾಃ ಕರೇಭ್ಯಃ ।
ಗತಿರ್ಭವಾಸ್ಮಾಕಮಪೀತಿ ನೂನಂ ವೀಣಾ ನಿಪೇತುರ್ಮಧುವಿದ್ವಿಷೋಽಗ್ರೇ ॥ ೪-೬೫॥
ಸ್ವವೇಣುನಾದೇನ ಸ ಜೀವಲೋಕಮಿತ್ಥಂ ಪರಾನನ್ದಮಯಂ ವಿಧಾಯ ।
ಪ್ರಭುರ್ವ್ಯರಂಸೀದಮರಾಶ್ಚ ಸರ್ವೇ ಸುಪ್ತೋತ್ಥಿತಾನಾಂ ಸ್ಥಿತಿರನ್ವಭೂವನ್ ॥ ೪-೬೬॥
ಪ್ರತ್ಯಾಗತೇ ಚೇತಸಿ ತೇ ವಿದಿತ್ವಾ ಪ್ರಭ್ರಶ್ಯ ಹಸ್ತಾತ್ ಪತಿತಾ ವಿಪಞ್ಚೀಃ ।
ಪುನರ್ನ್ನ ಚಕ್ರುಃ ಪ್ರತಿಪನ್ನಲಜ್ಜಾಃ ವಿದ್ಯಾಧರಾಸ್ತದ್ಗ್ರಹಣಾಭಿಲಾಷಮ್ ॥ ೪-೬೭॥
ಮಧುವ್ರತಾನಾಂ ಧ್ವನಿಭಿರ್ಮನೋಜ್ಞೈರ್ವಾಚಾಲಯನ್ತೀ ವಲಯಂ ದಿಶಾನಾಮ್ ।
ಪ್ರಸೂನವೃಷ್ಟಿಃ ಸುರಸಿದ್ಧಮುಕ್ತಾ ಪಪಾತ ಮೌಲೌ ಪರಮಸ್ಯ ಪುಂಸಃ ॥ ೪-೬೮॥
ಅವರ್ಷಿ ಕೇನಾಯಮದೃಷ್ಟಪೂರ್ವಃ ಪ್ರಸೂನರಾಶಿಸ್ತವ ಮೂರ್ಧನೀತಿ ।
ಪೃಷ್ಟೋ ವಿಹಸ್ಯಾಹ ವಿಭುಸ್ಸಹಾಯಾನ್ ಜ್ಞಾನಂ ಭವದ್ಭೋಽಪಿ ಕಥಂ ಮಮೇತಿ ॥ ೪-೬೯॥
ವಿಷಹ್ಯತಾಂ ಯಾತಿ ವಿವಸ್ವದಂಶೌ ವಿಶ್ರಾನ್ತಮುತ್ಥಾಪ್ಯ ಗವಾಂ ಸ ಪುಞ್ಜಮ್ ।
ಭೂಯಸ್ತೃಣಾಶ್ಯಾಮಲಭೂತಲೇಷು ಪ್ರಾರಬ್ಧ ಸಞ್ಚಾರಯಿತುಂ ವನೇಷು ॥ ೪-೭೦॥
ತತಃ ಪರಿಕ್ಷೀಣಸಹಸ್ರಭಾನೋರಶಾಮ್ಯದೂಷ್ಮಾ ದಿವಸಸ್ಯ ತೀವ್ರಃ ।
ಯಥಾ ವಿನಾಶೇ ಧನಸಞ್ಚಯಸ್ಯ ಮಹಾವಲೇಪೋ ಧನಿನೋ ಜನಸ್ಯ ॥ ೪-೭೧॥
ಪ್ರಭಾಕರೇ ಪಾಟಲಭಾಸಿ ದೂರಂ ದಿಶಂ ಪ್ರತೀಚೀಮವಗಾಹಮಾನೇ ।
ಆಲೋಕ್ಯ ರಾಮಃ ಪರಿಣಾಮಮಹ್ನೋ ದಾಮೋದರಂ ಸಾದರಮಿತ್ಯುವಾಚ ॥ ೪-೭೨॥
ಆವಿರ್ಭವನ್ಮನ್ದಮರುತ್ಪ್ರಚಾರಾ ಶಾನ್ತಾತಪಾ ನಿರ್ವೃತಸರ್ವಸತ್ವಾ ।
ವಿರಾಮವೇಲಾ ದಿವಸಸ್ಯ ಶೌರೇ ಪ್ರವರ್ತತೇ ಪಶ್ಯ ಮನೋಭಿರಾಮಾ ॥ ೪-೭೩॥
ಶಿರೋಭಿರೂಢೇನ್ಧನಶಾಕಮೂಲಾಃ ಸ್ವಯೂಥ್ಯಮುಚ್ಚೈಃಸ್ವರಮಾಹ್ವಯನ್ತಃ ।
ವನೇಚರಾ ವೀಕ್ಷ್ಯ ವಿರಾಮಮಹ್ನಃ ಸಮಾರಭನ್ತೇ ಸಹಸೈವ ಗನ್ತುಮ್ ॥ ೪-೭೪॥
ಶತಂ ಶತಂ ವ್ಯೋಮನಿ ಬದ್ಧಮಾಲಾಃ ಶಾತ್ಕಾರವಾಚಾಲವಿಲೋಲಪಕ್ಷಾಃ ।
ವ್ರಜನ್ತಿ ಲಕ್ಷ್ಮೀಕೃತವಾಸವೃಕ್ಷಾಃ ಮನೋಜವಾಃ ಪಶ್ಯ ಪತತ್ರಿಣೋಽಮೀ ॥ ೪-೭೫॥
ಭುವಃ ಪರಾಗೇ ಬಹುಶೋ ಲುಠಿತ್ವಾ ಪ್ರವಿಶ್ಯ ನೀಡಂ ಕಲವಿಙ್ಗಯೂಥಮ್ ।
ಧಿನೋತ್ಯಪತ್ಯಾನಿ ಬುಭುಕ್ಷಿತಾನಿ ಗ್ರಾಸೇನ ಚಞ್ಚೂಪುಟಸಞ್ಚಿತೇನ ॥ ೪-೭೬॥
ತದೇಹಿ ಶೌರೇ ತಪನವ್ಯಪಾಯಾತ್ಪ್ರಾಗೇವ ಯಾಮಃ ಪದಮಸ್ಮದೀಯಮ್ ।
ಇಯಂ ಕ್ಷತಿಃ ಶ್ವಭ್ರತಟೇನ ಪಶ್ಚಾದ್ದುಃಸಞ್ಚರಾ ಲುಬ್ಧಕನಿರ್ಮಿತೇನ ॥ ೪-೭೭॥
ಶ್ರುತ್ವೇತಿ ರಾಮಸ್ಯ ಗಿರಂ ಮುರಾರಿಃ ಅಸ್ತ್ವೇವಮಿತ್ಯಾದರಪೂರ್ವಮುಕ್ತ್ವಾ ।
ಸಹ ಪ್ರತಸ್ಥೇ ಸ ಚ ಮಿತ್ರವರ್ಗೈಃ ಪ್ರಚಣ್ಡಶ್ರೃಙ್ಗಧ್ವನಿಪೂರಿತಾಶೈಃ ॥ ೪-೭೮॥
ಸಹಪ್ರಯಾಣಾಯ ಕೃತತ್ವರಾಣಾಮೂಧೋಭರಾದ್ದೂರವಿಲಮ್ಬಿನೀನಾಮ್ ।
ಸ ತತ್ರ ತತ್ರ ಪ್ರತಿಪಾಲ್ಯ ತಸ್ಥೌ ಪ್ರೀತೋ ಗವಾಮಾಗಮನಂ ಮುಕುನ್ದಃ ॥ ೪-೭೯॥
ಸಮಾವೃತೋ ಗೋಪಜನೇನ ನನ್ದಃ ಗೋಪಾಙ್ಗನಾಭಿಶ್ಚ ವೃತಾ ಯಶೋದಾ ।
ಅತಿಷ್ಠತಾಮಧ್ವನಿ ಲೋಚನಾಭ್ಯಾಂ ಪುತ್ರಾಗತಿಪ್ರೇಕ್ಷಣಸಸ್ಪೃಹಾಭ್ಯಾಮ್ ॥ ೪-೮೦॥
ಚಕಾರ ಕರ್ಣೇಷು ತಯೋಃ ಪ್ರಮೋದಂ ದಾಮೋದರಾಪೂರಿತಶೃಙ್ಗನಾದಃ ।
ದಿವಿ ಪ್ರಸರ್ಪನ್ನಥ ಪಾಂಸುಪೂರಃ ನೇತ್ರೇಷು ಪೀಯೂಷಮಿವಾಭ್ಯವರ್ಷತ್ ॥ ೪-೮೧॥
ತೌ ಧೂಸರಾಙ್ಗೌ ರಜಸಾ ಕುಮಾರೌ ಗತ್ವಾ ಸ ನನ್ದಃ ಪರಿರಭ್ಯ ಗಾಢಮ್ ।
ಆತ್ಮಾನಮಾನನ್ದಸಮುದ್ರಮಗ್ನಂ ನಾಲಂ ಸಮುದ್ಧರ್ತುಮಭೂನ್ಮುಹೂರ್ತಮ್ ॥ ೪-೮೨॥
ಉತ್ಪತ್ಯ ಧಾವದ್ಭಿರುದಸ್ತಶಸ್ತ್ರೈಃ ಕ್ಷ್ವೇಲಾರವಕ್ಷೋಭಿತದಿಗ್ವಿಭಾಗೈಃ ।
ಆಭೀರವೀರೈಸ್ಸ ವೃತಃ ಪ್ರಪೇದೇ ವ್ರಜಂ ಸಮಾಕರ್ಣಿತತೂರ್ಯಘೋಷಮ್ ॥ ೪-೮೩॥
ಚಾಟೂಕ್ತಿಭಿಃ ಪಾರ್ಶ್ವಚರಾನಶೇಷಾನ್ ವಿಸೃಜ್ಯ ಗೋಪಾನ್ ಸಹಿತಸ್ಸ ಮಿತ್ರೈಃ ।
ವಿವೇಶ ಕೃಷ್ಣೋ ಭವನಂ ದಿನಾನ್ತೇ ಸಮುಜ್ವಲನ್ಮಙ್ಗಲದೀಪಿಕಾಭಿಃ ॥ ೪-೮೪॥
ಕಾಮಂ ದಿವಾ ಕರ್ಣಪಥಂ ಗತೇನ ನೀತಾಃ ಪ್ರಿಯಂ ವೇಣುರವೇಣ ವಿಷ್ಣೋಃ ।
ಪ್ರತಿಪ್ರಿಯಂ ಚಕ್ರುರಮುಷ್ಯ ಸಾಯಂ ಗಾವಃ ಪಯೋದೋಹನನಿಃಸ್ವನೇನ ॥ ೪-೮೫॥
ಅನುದಿನಮಿತಿ ಕುರ್ವನ್ ಪಾಲನಂ ಗೋಕುಲಸ್ಯ
ಕ್ಷಣಮಿವ ದಿವಸಾನಿ ಕ್ರೀಡಯಾ ಯಾಪಯನ್ ಸಃ ।
ಅಖಿಲಮಪಿ ಧರಿತ್ರೀಭಾರಮಭ್ಯುದ್ಧರಿಷ್ಯನ್
ಅರಮತ ಸಹ ಶೌರಿಸ್ತತ್ರ ಸಙ್ಕರ್ಷಣೇನ ॥ ೪-೮೬॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ಚತುರ್ಥಃ ಸರ್ಗಃ ॥ ೪ ॥
Encoded and proofread by PSA Easwaran psaeaswaran at gmail.com
Please send corrections to sanskrit@cheerful.com
Last updated ತ್oday
http://sanskritdocuments.org
॥ ಶ್ರೀಃ ॥
ಪ್ರಥಮಃ ಸರ್ಗಃ
ಅಸ್ತಿ ಶ್ರಿಯಃ ಸದ್ಮ ಸುಮೇರುನಾಮಾ ಸಮಸ್ತಕಲ್ಯಾಣನಿಧಿರ್ಗಿರೀನ್ದ್ರಃ ।
ತಿಷ್ಠನ್ನಿದಂ ವಿಶ್ವಮನುಪ್ರವಿಶ್ಯ ಸ್ವೇನಾತ್ಮನಾ ವಿಷ್ಣುರಿವೋರ್ಜಿತೇನ ॥ ೧-೦೧॥
ಮಿಥಸ್ತಿರೋಭಾವವಿಲೋಕನಾಭ್ಯಾಂ ಸಙ್ಕ್ರೀಡಮಾನಾವಿವ ಬಾಲಕೌ ದ್ವೌ ।
ಪಾರ್ಶ್ವೇಷು ಯಸ್ಯಾಶು ಪರಿಭ್ರಮನ್ತೌ ಚನ್ದ್ರಾಂಶುಮನ್ತೌ ನಯತೋ ದಿನಾನಿ ॥ ೧-೦೨॥
ಉಚ್ಚೈಶ್ಶಿಖಃ ಕಾಞ್ಚನಗೌರವರ್ಣಸ್ತಮೋ ನಿಗೃಹ್ಣನ್ಮಹಸಾ ನಿಜೇನ ।
ದೀಪಸ್ತ್ರಯಾಣಾಮಿವ ವಿಷ್ಟಪಾನಾಂ ಯೋ ಭಾತಿ ಪರ್ಯನ್ತಚರತ್ಪತಙ್ಗಃ ॥ ೧-೦೩॥
ಯಸ್ಯಾ ಪತಿತ್ವೇ ವಿಹಿತಾಭಿಲಾಷಃ ಕರೋತಿ ತೀವ್ರಾಣಿ ತಪಾಂಸಿ ಲೋಕಃ ।
ಬಿಭರ್ತಿ ರತ್ನಾಕರಮೇಖಲಾಂ ತಾಮಙ್ಕೇನ ಪುತ್ರೀಮಿವ ಯೋ ಧರಿತ್ರೀಮ್ ॥ ೧-೦೪॥
ಮಹಾನ್ತಿ ದಾನಾನಿ ಮಖಾನುದಗ್ರಾನ್ ಪರಾಞ್ಚಿ ಪಾನಾಶನಯೋಸ್ತಪಾಂಸಿ ।
ಶರೀರಿಣಃ ಶಾನ್ತಮಲೈರ್ಮನೋಭಿಃ ಕುರ್ವನ್ತಿ ಯಚ್ಛೃಙ್ಗನಿವಾಸಕಾಮಾಃ ॥ ೧-೦೫॥
ಸುರಾ ಯುಗಾನ್ತೇಷು ಸಹ ಪ್ರಿಯಾಭಿರ್ನ್ನಿಷೇದಿವಾಂಸೋ ಯದಧಿತ್ಯಕಾಸು ।
ಉದನ್ವತಾಮೈಕ್ಯಮುಪಾಗತಾನಾಂ ಪಶ್ಯನ್ತಿ ಕಲ್ಲೋಲಶತಪ್ರಚಾರಾನ್ ॥ ೧-೦೬॥
ಪುಷ್ಪಾಣಿ ಶಯ್ಯಾಸ್ಸುರಪಾದಪಾನಾಂ ಕ್ರೀಡಾಗೃಹಾಃ ಕಾಞ್ಚನಗಹ್ವರಾಣಿ ।
ಭವನ್ತಿ ಚ ಸ್ವರ್ಗವಿಲಾಸಿನೀನಾಂ ರತ್ನಾಙ್ಕುರಾ ಯತ್ರ ರತಿಪ್ರದೀಪಾಃ ॥ ೧-೦೭॥
ಸ್ವರ್ಗೌಕಸಸ್ಸ್ವರ್ಣಮಹೀಷು ಪೀತಾಃ ಶ್ವೇತತ್ವಿಷೋ ರೂಪ್ಯಮಯೀಷು ಭೂಷು ।
ನೀಲಾಶ್ಚ ನೀಲೋಪಲಮೇದಿನೀಷು ಜ್ಞಾತುಂ ಮಿಥೋ ಯತ್ರ ನ ಶಕ್ನುವನ್ತಿ ॥ ೧-೦೮॥
ದರೀಗೃಹೋತ್ಸಙ್ಗಗತೇರನೂರೋಃ ಕಶಾಭಿಘಾತಧ್ವನಿಭಿಃ ಸಕಮ್ಪಾಃ ।
ಸದ್ಯಃ ಪ್ರಿಯಾನುಜ್ಝಿತಮಾನದೋಷಾಃ ಸುರಾಙ್ಗನಾ ಯತ್ರ ಪರಿಷ್ವಜನ್ತೇ ॥ ೧-೦೯॥
ನೇತುಂ ತ್ರಪಾನಮ್ರಮುಖೀರನೀಶಾಃ ಸ್ಫುಟಾನಿ ಯತ್ಸ್ವರ್ಣಗುಹಾನ್ತರಾಣಿ ।
ಸಿದ್ಧಾಃ ಪ್ರಯತ್ನೇನ ವಿನಾ ನವೋಢಾಃ ನಯನ್ತಿ ನೀಲೋಪಲಗಹ್ವರಾಣಿ ॥ ೧-೧೦॥
ಯತ್ರೋದ್ಯತಾನಾಂ ಕುಸುಮಾಪಚಾಯೇ ಕಾನ್ತಾಸು ಕಲ್ಪದ್ರುಮವಾಟಿಕಾಸು ।
ವಿಭಾನ್ತಿ ಸುತ್ರಾಮವಿಲಾಸಿನೀನಾಂ ಪದಾನಿ ಲಾಕ್ಷಾರಸಪಾಟಲಾನಿ ॥ ೧-೧೧॥
ಪಯೋದಮಾರ್ಗವ್ಯತಿಲಙ್ಘಿನೀಷು ಹಂಸಾಃ ಶಿರಃಪುಷ್ಕರಿಣೀಷು ಯಸ್ಯ ।
ವರ್ಷಾಗಮೇಽಪ್ಯಶ್ರುತಮೇಘನಾದಾಃ ನ ಕುರ್ವತೇ ಮಾನಸದೀರ್ಘಯಾತ್ರಾಮ್ ॥ ೧-೧೨॥
ಛನ್ನೇಷು ಯಸ್ಮಿನ್ ಕನಕೋಜ್ಜ್ವಲಾಭಿರಾಮೂಲಚೂಡಂ ನವಮಞ್ಜರೀಭಿಃ ।
ಗನ್ಧೇನ ವಿಜ್ಞಾಯ ಪತನ್ತಿ ಭೃಙ್ಗಾಃ ಶೃಙ್ಗಾನ್ತರಾರಗ್ವಧಪಾದಪೇಷು ॥ ೧-೧೩॥
ಮನ್ದಾಕಿನೀ ಯಚ್ಛಿಖರೇ ವಹನ್ತೀ ಕುಲ್ಯಾಪಥಾಭ್ಯನ್ತರಸಮ್ಪ್ರವಿಷ್ಟಾ ।
ಬಾಲೇವ ತದ್ರಕ್ಷಣಸಮ್ಪ್ರವೃತ್ತಾ ದಿನೇ ದಿನೇ ಸಿಞ್ಚತಿ ಪುಷ್ಪವಾಟೀಮ್ ॥ ೧-೧೪॥
ಶ್ರಿಯಾಭಿರಾಮಶ್ಶರಣಂ ಸುರಾಣಾಮಲಙ್ಘನೀಯೋ ಮಹತಾ ಮಹಿಮ್ನಾ ।
ವಿರಾಜಮಾನೋ ವನಮಾಲಯಾ ಚ ಯಃ ಶಾರ್ಙ್ಗಧನ್ವಾನಮನುಪ್ರಯಾತಿ ॥ ೧-೧೫॥
ಪುರಾ ಪುರಾಣಾಂ ತ್ರಿತಯಂ ದಿಧಕ್ಷೋರುಮಾಪತೇಃ ಕಾರ್ಮುಕತಾಂ ಪ್ರಪನ್ನಃ ।
ಮಧ್ಯೇನ ವಜ್ರಾಙ್ಕುಶಮತ್ಸ್ಯಚಿಹ್ನಂ ಯೋಽದ್ಯಾಪಿ ತನ್ಮುಷ್ಟಿಪದಂ ದಧಾತಿ ॥ ೧-೧೬॥
ಶೃಙ್ಗಾಗ್ರಭಾಜಾಂ ಸುರಸುನ್ದರೀಣಾಂ ಮುಖಾನಿ ಪಶ್ಯನ್ನಮಲಾನಿ ಚನ್ದ್ರಃ ।
ನಿಗೂಹಿತುಂ ನೂನಮುರಃಕಲಙ್ಕಂ ಹ್ರಿಯೇವ ಯತ್ಸಾನುಪಥೇನ ಯಾತಿ ॥ ೧-೧೭॥
ಮನೋಭಿರಾಮೇ ಶಿಖರೇ ತದೀಯೇ ಸಹೋಪವಿಷ್ಟಂ ಸುರಸಿದ್ಧಸಙ್ಘೈಃ ।
ಅವೋಚದಾಗತ್ಯ ಕೃತಪ್ರಣಾಮಾ ಕದಾಚಿದುರ್ವೀ ಕಮಲಾಧಿವಾಸಮ್ ॥ ೧-೧೮॥
ಪುಮಾನಿವಾಹಂ ಭವತಃ ಪುರಸ್ತಾದ್ಬ್ರವೀಮಿ ಕಿಞ್ಚಿತ್ ಪ್ರತಿಪದ್ಯ ಧೈರ್ಯಮ್ ।
ಪೀಡಾ ಮದೀಯಾ ಪರಮತ್ರ ಹೇತುರ್ನಿರ್ಲ್ಲಜ್ಜತಾ ನನ್ವಖಿಲೋಪಹಾಸ್ಯಾ ॥ ೧-೧೯॥
ಸೃಷ್ಟಾಸ್ತ್ವಯಾ ದತ್ತವರಾಶ್ಚ ದೈತ್ಯಾಃ ಭಾರೇಣ ಮಾಂ ಸಮ್ಪ್ರತಿ ಪೀಡಯನ್ತಿ ।
ಬಲೇ ಪ್ರಮಾಣೇ ಚ ಭವನ್ತಿ ಯೇಷಾಂ ನೈವೋಪಮಾನಂ ಕುಲಭೂಭೃತೋಽಪಿ ॥ ೧-೨೦॥
ಸ್ವವಿಕ್ರಮೋನ್ಮೂಲಿತರಾಜಕಾನಾಂ ಜಯೈಷಿಣಾಮದ್ಯ ಪರಸ್ಪರೇಣ ।
ತೇಷಾಂ ರಣಕ್ಷೋಣಿಷು ಸಿಂಹನಾದೈರ್ನಿರ್ಘಾತಘೋರೈರ್ಗಿರಯಃ ಸ್ಫುಟನ್ತಿ ॥ ೧-೨೧॥
ಮುಹುರ್ಬಲಾದುನ್ನಮಯತ್ಯಹೀನ್ದ್ರೇ ಮದ್ಭಾರಭುಗ್ನಂ ಫಣಚಕ್ರವಾಲಮ್।
ಮಮ ಪ್ರಕಮ್ಪಾಶ್ಚಲಿತಾಬ್ಧಿಶೈಲಾಃ ದಿಗ್ದನ್ತಿನೋ ಹನ್ತ ಕದರ್ಥಯನ್ತಿ ॥ ೧-೨೨॥
ಆಶಾಮುಖೇಷು ಭ್ರಮತಾಮಜಸ್ರಂ ತೇಷಾಂ ಚಮೂಭಿಃ ಪರಿಸರ್ಪಿಣೀಭಿಃ ।
ತಿರೋಹಿತಾಂ ಭಾನುಮತೋ ಮಯೂಖಾಃ ನ ಕ್ವಾಪಿ ಮಾಂ ಸಮ್ಪ್ರತಿ ಸಂಸ್ಪೃಶನ್ತಿ ॥ ೧-೨೩॥
ಸನ್ನಾಸ್ಮಿ ದೈತೇಯಭರೇಣ ಸಾಹಂ ಫಣೀಶ್ವರಸ್ಸೀದತಿ ಮದ್ಭರೇಣ ।
ತದ್ಭಾರಶೀರ್ಯನ್ನಿಜಕರ್ಪರಸ್ಯ ಧಿಕ್ ತಾಮವಸ್ಥಾಂ ಕಮಠೇಶ್ವರಸ್ಯ ॥ ೧-೨೪॥
ಭಾರಾವಸೀದದ್ಫಣಮಣ್ಡಲಸ್ಯ ಫಣೀಶ್ವರಸ್ಯೋಪರಿ ದುಃಸ್ಥಿತಾಽಹಮ್ ।
ಆಸನ್ನಪಾತಾಸ್ಮಿ ತಟೀವ ನದ್ಯಾಃ ಪ್ರವಾಹವೇಗೇನ ವಿಲುಪ್ತಮೂಲಾ ॥ ೧-೨೫॥
ನಿವೇದಿತಾ ದೇವ ಮಯಾ ದಶೇಯಮನುಕ್ತಿದೋಷೋ ಮಯಿ ನೋಪಪಾದ್ಯಃ ।
ನಿವೇದ್ಯತೇ ರಕ್ಷ್ಯಜನೇನ ದುಃಖಂ ತತಃ ಪರಸ್ತಾತ್ ಪ್ರಭವಃ ಪ್ರಮಾಣಮ್ ॥ ೧-೨೬॥
ಇತ್ಯುಕ್ತವತ್ಯಾಮುಚಿತಂ ಪೃಥಿವ್ಯಾಂ ಚಿನ್ತಾಬಲೇನ ಸ್ತಿಮಿತೋ ಮುಹೂರ್ತಮ್ ।
ಮುಖಾನಿ ಪಶ್ಯನ್ನಮೃತಾಶನಾನಾಂ ದೇವಃ ಪ್ರಜಾನಾಂ ಪತಿರಿತ್ಯುವಾಚ ॥ ೧-೨೭॥
ನಾಸತ್ಯಮೇತದ್ಯದವೋಚದುರ್ವೀ ಸ್ವಕರ್ಮಣಃ ಸಾಧು ಫಲಂ ಮಯಾಽಽಪ್ತಮ್ ।
ಮದ್ವರ್ದ್ಧಿತಾ ಮಾಮವಮತ್ಯ ದೈತ್ಯಾಃ ಬಲಾದುಪಘ್ನನ್ತಿ ಜಗನ್ತಿ ಯತ್ತೇ ॥ ೧-೨೮॥
ಅತೀತಕಾರ್ಯಾನುಶಯೇನ ಕಿಂ ಸ್ಯಾದಶೇಷವಿದ್ವಜ್ಜನಗರ್ಹಿತೇನ ।
ಸುರಾಃ ಸಮುನ್ಮೂಲನಮಾಶು ತೇಷಾಂ ಕರ್ತುಂ ಯತಧ್ವಂ ಜಗತಾಂ ಹಿತಾಯ ॥ ೧-೨೯॥
ಸದ್ಯಸ್ಸಮುತ್ತಿಷ್ಠತ ಚಿನ್ತಯಾಲಂ ಚಿನ್ತಾ ಹಿ ಕಾರ್ಯಪ್ರತಿಬನ್ಧಹೇತುಃ ।
ಯಾಮಃ ಪೃಥಿವ್ಯಾ ಸಹ ಯತ್ರ ತತ್ರ ನಾರಾಯಣೋ ದಾನವಕಾಲರಾತ್ರಿಃ ॥ ೧-೩೦॥
ಅಸ್ತ್ವೇವಮಿತ್ಯಾದರಪೂರ್ವಮೇವ ಸ ಸ್ವೀಕೃತೋಕ್ತಿಸ್ಸುರಸಿದ್ಧಸಙ್ಘೈಃ ।
ಸರೋಜಜನ್ಮಾ ಸಹ ತೈಃ ಪ್ರತಸ್ಥೇ ವಿಹಾಯಸಾ ವಿಶ್ವಪತೇಸ್ಸಕಾಶಮ್ ॥ ೧-೩೧॥
ಏಲಾಪರಿಷ್ವಙ್ಗಲಸತ್ತಮಾಲಂ ವೇಲಾಧಿರೂಢಸ್ಖಲದೂರ್ಮಿಮಾಲಮ್ ।
ದದರ್ಶ ಧಾತಾ ಮನಸೋಽನುಕೂಲಂ ಪಯಃಪಯೋಧೇರಚಿರೇಣ ಕೂಲಮ್ ॥ ೧-೩೨॥
ದದರ್ಶ ಚ ಕ್ಷೀರಮಯಂ ಸಮುದ್ರಂ ಕೈಲಾಸಶೃಙ್ಗೋನ್ನತಫೇನಕೂಟಮ್ ।
ಪುಣ್ಯಂ ಪಯಃಕೇಲಿಸಮುತ್ಸುಕಾನಾಂ ಶ್ರಿಯಃ ಸಖೀನಾಮವಗಾಹನೇನ ॥ ೧-೩೩॥
ಆನನ್ದಯಾಮಾಸ ದಿವೌಕಸಸ್ತಾನಾಘ್ರಾತಶೇಷೋ ಮುನಿಮಣ್ಡಲೇನ ।
ಪ್ರಕಾಮಪುಣ್ಯಃ ಪವನೋಪನೀತೋ ವೈಕುಣ್ಠವಕ್ಷಸ್ತುಲಸೀಸುಗನ್ಧಃ ॥ ೧-೩೪॥
ಗನ್ಧಾನುಸಾರೇಣ ವಿಸೃಷ್ಟನೇತ್ರೈರ್ಹಿರಣ್ಯಗರ್ಭಪ್ರಮುಖೈರಮರ್ತೈಃ ।
ನವಾರ್ಕಕಲ್ಪಂ ದದೃಶೇ ಮುರಾರೇರ್ವಕ್ಷಸ್ಥಲೀಕೌಸ್ತುಭರತ್ನಧಾಮ ॥ ೧-೩೫॥
ಅಪಹ್ನುತಾಶೇಷಮನೋವಿಕಾರಂ ದಿವಿಸ್ಪೃಶಾ ತೂರ್ಯರವೇಣ ಮಿಶ್ರಮ್ ।
ಆಕರ್ಣ್ಯ ವೈಕುಣ್ಠವಿಲಾಸಿನೀನಾಂ ಗೀತಧ್ವನಿಂ ಹರ್ಷಮಯಾಸಿಷುಸ್ತೇ ॥ ೧-೩೬॥
ಆಸಕ್ತಿಮಾಲಕ್ಷ್ಯ ವಿನೀತವೇಷಾ ಸ್ವಮೌಲಿವಿನ್ಯಸ್ತಕರಾಸ್ಸುರಾಸ್ತೇ ।
ಆಲೋಕಯಾಮಾಸುರಶೇಷನಾಥಂ ಸವಿಗ್ರಹಂ ಪುಣ್ಯಮಿವ ಪ್ರಜಾನಾಮ್ ॥ ೧-೩೭॥
ಪ್ರವೃದ್ಧಹೇಮಾಭರಣಪ್ರಕಾಶಂ ತಮಾಲನೀಲಂ ಜಲಧೌ ಶಯಾನಮ್ ।
ತಟಿಲ್ಲತಾಢ್ಯಂ ಪಯಸೋಽತಿಪಾನಾದನೀಶಮುದ್ಗನ್ತುಮಿವಾಮ್ಬುವಾಹಮ್ ॥ ೧-೩೮॥
ತರಙ್ಗವಾತೇನ ಪಯಃಪಯೋಧೇರಾಪೂರ್ಯಮಾಣಂ ಕರಪಾಞ್ಚಜನ್ಯಮ್ ।
ವಾಮೇನ ತಿರ್ಯಗ್ವಲತಾ ಸಲೀಲಂ ಸಮ್ಭಾವಯನ್ತಂ ಮುಹುರೀಕ್ಷಣೇನ ॥ ೧-೩೯॥
ಪ್ರತಿಕ್ಷಣಂ ಪ್ರೇಮವಿಶೇಷಜಾಭಿಸ್ಸಮ್ಭಾವನಾಭಿಃ ಕಮಲಾಸನಾಯಾಃ ।
ಪುರಾಽಽತ್ಮನಾ ಕಲ್ಪಿತಮಮ್ಬುರಾಶೇಃ ಪ್ರಮಾರ್ಜಯನ್ತಂ ಮಥನಾವಮಾನಮ್ ॥ ೧-೪೦॥
ಪರ್ಯಾಯತಃ ಪಾಣಿಧೃತಂ ಸರೋಜಂ ವಿನ್ಯಸ್ಯ ವಿನ್ಯಸ್ಯ ದೃಶೋಃ ಪದವ್ಯಾಮ್।
ನಿದ್ರಾಂ ಪ್ರಬೋಧಂ ಚ ಮುಹುರ್ನ್ನಯನ್ತೀಂ ಪದ್ಮಾಸನಾಂ ಸಸ್ಮಿತಮೀಕ್ಷಮಾಣಾಮ್ ॥ ೧-೪೧॥
ಸ್ವಚ್ಛಸ್ವದೇಹಪ್ರತಿಬಿಮ್ಬಿತೇನ ಫಣಾಶ್ಮಜಾಲೇನ ಫಣೀಶ್ವರಸ್ಯ ।
ಭಾಸ್ವತ್ ಫಲಸ್ತೋಮನಿರನ್ತರಸ್ಯ ವಹನ್ತಮಾಭಾಂ ವಟಪಾದಪಸ್ಯ ॥ ೧-೪೨॥
ಅಜಸ್ರಮಾಸೀನರಥಾಙ್ಗಶಙ್ಖಮತಿಪ್ರಸನ್ನಂ ಕಮಲಾಧಿವಾಸಮ್ ।
ಸನ್ತಾಪವಿಚ್ಛೇದಕರಂ ಪ್ರಜಾನಾಂ ಹ್ರದಂ ಮಹೀಯಾಂಸಮಿವಾಭಿಗಮ್ಯಮ್ ॥ ೧-೪೩॥
ವಕ್ತುಂ ಮಿಥೋ ರಾಹುವಿಚೇಷ್ಟಿತಾನಿ ಕರ್ಣದ್ವಯಾಭ್ಯರ್ಣಮುಪೇಯಿವಾಂಸೌ ।
ಅಲಬ್ಧಕಾಲಾವಿವ ಭಾನುಚನ್ದ್ರೌ ರಥಾಙ್ಗಶಙ್ಖೌ ದಧತಂ ಕರಾಭ್ಯಾಮ್ ॥ ೧-೪೪॥
ದ್ವಾರಸ್ಥಸೇನಾಪತಿಚೋದಿತೇನ ನಿವಾರಿತಾಃ ಕಞ್ಚುಕಿಮಣ್ಡಲೇನ ।
ಸುರಾಃ ಪ್ರಮೋದಸ್ಖಲಿತೈರ್ವಚೋಭಿಃ ಸ್ಥಿತ್ವೈವ ತೇ ವ್ಯೋಮನಿ ತುಷ್ಟುವುಸ್ತಮ್ ॥ ೧-೪೫॥
ನಮಃ ಪರಸ್ಮೈ ಪುರುಷಾಯ ತುಭ್ಯಂ ಗಿರಾಂ ಧಿಯಾಮಪ್ಯಪಥಿ ಸ್ಥಿತಾಯ ।
ಅಸ್ಮಾನ್ ಪುನಸ್ತ್ರಾತುಮುದಗ್ರಮೋಹಾನ್ ಕೃಪಾಬಲಾತ್ ಕಲ್ಪಿತವಿಗ್ರಹಾಯ ॥ ೧-೪೬॥
ಭಾಗೀರಥೀ ಪಾದಕುಶೇಶಯಾತ್ತೇ ವಿನಿರ್ಗತಾ ವಿಶ್ವಮಿದಂ ಪುನೀತೇ ।
ಕಸ್ತ್ವಾಂ ಪುನರ್ಭಾವಯತೋ ಜನಸ್ಯ ಶುದ್ಧಿಂ ಪರಿಚ್ಛೇತ್ತುಮಲಂ ಮನೀಷೀ ॥ ೧-೪೭॥
ಅನನ್ತಶಕ್ತೇರಪವಿಕ್ರಿಯಸ್ಯ ತಿಸ್ರಸ್ತ್ರಿಲೋಕೀಶ್ವರ ಶಕ್ತಯಸ್ತೇ ।
ವಿತನ್ವತೇ ಸ್ಥಾವರಜಙ್ಗಮಾನಾಮುತ್ಪಾದನಕ್ಷೇಮವಿಲೋಪನಾನಿ ॥ ೧-೪೮॥
ಕಟಾಕ್ಷಮಾತ್ರೇಣ ಭವಾಮ್ಬುರಾಶೇಃ ಪಾರಂ ಪರಂ ಪ್ರಾಪಯಿತುಸ್ತ್ರಿಲೋಕೀಮ್ ।
ಸಕೃನ್ನಮಸ್ಯಾ ಪರಮಾತರಸ್ತೇ ಯತ್ನಾನುರೂಪಂ ಹಿ ಫಲಂ ಕ್ರಿಯಾಣಾಮ್ ॥ ೧-೪೯॥
ತ್ವಂ ಜ್ಯೋತಿರಾಪಸ್ತ್ವಮಸಿ ತ್ವಮುರ್ವೀ ತ್ವಂ ವ್ಯೋಮ ವೈಶ್ವಾನರಸಾರಥಿಸ್ತ್ವಮ್ ।
ತ್ವಂ ಜೀವವರ್ಗಃ ಪರಮಸ್ತ್ವಮಾತ್ಮಾ ಯನ್ನಾಸಿ ಕಿಂ ನಾಮ ಜಗತ್ಪತೇ ತತ್ ॥ ೧-೫೦॥
ನವಾಭ್ರವರ್ಣಂ ನಲಿನಾಯತಾಕ್ಷಂ ಪೀತಾಮ್ಬರಂ ಹಾರಕಿರೀಟಿನಂ ತ್ವಾಮ್ ।
ವಯಂ ತು ಸೇವೇಮಹಿ ವೀಕ್ಷಮಾಣಾಃ ಸಾಯೂಜ್ಯಮನ್ವಿಛತಿ ಕಃ ಸುಖಾರ್ಥೀ ॥ ೧-೫೧॥
ಅಲಂ ನ ನಿರ್ದೇಷ್ಟುಮಿಯತ್ತಯಾ ತ್ವಾಮಶೇಷನಾಥ ಶ್ರುತಿರಗ್ರಿಮಾಪಿ ।
ಸ ಏವ ಸಾಕ್ಷಾತ್ಕ್ರಿಯತೇ ಪುನಸ್ತ್ವಮಹೋ ಜಿತಂ ನಃ ಸುಕೃತೈರನಲ್ಪೈಃ ॥ ೧-೫೨॥
ತೃಣಾಯ ಮತ್ವಾ ನಿಖಿಲಾನಿ ಶಾರ್ಙ್ಗಿನ್ ಪದಾನಿ ವೈಧೇಯಮನೋಹರಾಣಿ ।
ಆವೃತ್ತಿಶೂನ್ಯಂ ಪರಮಂ ಪದಂ ತೇ ವಾಞ್ಛನ್ತಿ ವೈರಾಗ್ಯಧನಾ ಮಹಾನ್ತಃ ॥ ೧-೫೩॥
ಇತಿ ಸ್ತುತೋ ದೇವಗಣೇನ ದೇವೋ ದಯಾನಿಧಿರ್ದಾನವಕಾಲರಾತ್ರಿಃ ।
ನ್ಯಷೀದದುತ್ಥಾಯ ಭರಾವಭುಗ್ನೇ ಭುಜಙ್ಗತಲ್ಪೇ ಭುವನೈಕನಾಥಃ ॥ ೧-೫೪॥
ವಿಷ್ವಕ್ ಸ ವೈಕುಣ್ಠವಿಲಾಸಿನೀನಾಂ ಸಲೀಲಮಾನ್ದೋಲಿತಚಾಮರಾಣಾಮ್ ।
ನಿವಾರಯನ್ನಗ್ರಕರಾರವಿನ್ದೈಃ ಕೋಲಾಹಲಂ ಕಾಞ್ಚನಕಙ್ಕಣೋತ್ಥಮ್ ॥ ೧-೫೫॥
ಪ್ರಸಾದವತ್ಯಾ ಕಮಲಾಸನಾದೀನ್ ಸುರಾನಶೇಷಾನನುಗೃಹ್ಯ ದೃಷ್ಟ್ಯಾ ।
ಉವಾಚ ವಾಚಂ ದಶನಾಂಶುಪೂರೈಃ ಸಮೇಧಯನ್ ದುಗ್ಧಮಯಂ ಪಯೋಧಿಮ್ ॥ ೧-೫೬॥
ಅಧಿಜ್ಯಕೋದಣ್ಡಧರೋ ನಿಷಙ್ಗೀ ಸನ್ನಾಹವಾನ್ ಪಾಣಿಧೃತೈಕಬಾಣಃ ।
ಅಯಂ ಸಮಾಜೋ ಭವತಾಂ ದ್ವಿಷದ್ಭ್ಯೋ ಭಯಂ ಸಮಾವೇದಯತಿ ಸ್ಫುಟಂ ಮೇ ॥ ೧-೫೭॥
ಅಲಂ ವಿಲಮ್ಬೇನ ದಿವೌಕಸಸ್ತನ್ನಿವೇದ್ಯತಾಮದ್ಯ ಕುತೋ ಭಯಂ ವಃ ।
ಅಯಂ ಕರೋ ದುಷ್ಟವಧೋತ್ಸುಕಂ ಮೇ ಸುದರ್ಶನಂ ನ ಕ್ಷಮತೇ ನಿರೋದ್ಧುಮ್ ॥ ೧-೫೮॥
ಇತ್ಯೂಚಿವಾಂಸಂ ಪರಮಂ ಪುಮಾಂಸಂ ನತ್ವಾ ಶಿರೋಭಿರ್ಬಹುಶಃ ಸುರಾಸ್ತೇ ।
ಆರೂಢಹರ್ಷಾತಿಶಯಾಃ ಸ್ವಮರ್ಥಮಾರೇಭಿರೇ ವಕ್ತುಮಶೇಷಮೇವ ॥ ೧-೫೯॥
ನಿವಾರ್ಯ ಸರ್ವಾನಪಿ ವಕ್ತುಕಾಮಾನ್ ಸೇನಾಪತಿಸ್ತಾನಮರಾನ್ ಕರೇಣ ।
ಸವಿಭ್ರಮಪ್ರೇರಿತಯಾ ಪುರಸ್ಥಂ ದೃಷ್ಟ್ಯಾ ಸರೋಜಾಸನಮಾಜುಹಾವ ॥ ೧-೬೦॥
ಅಥಾಗತಸ್ತೇನ ಕರೇ ಗೃಹೀತ್ವಾ ನೀತಃ ಪ್ರಭೋರನ್ತಿಕಮಬ್ಜಯೋನಿಃ ।
ವಕ್ತುಂ ನಿಯುಕ್ತಃ ಸ ಕೃತಪ್ರಣಾಮೋ ವಿಜ್ಞಾಪಯಾಮಾಸ ವಿನೀತವೇಷಃ ॥ ೧-೬೧॥
ವಯಂ ತ್ವಯಾ ದತ್ತವಿಭೂತಯೋಽಪಿ ಮೋಹಾತಿರೇಕಾದಭಿಮನ್ಯಮಾನಾಃ ।
ಕೃಚ್ಛ್ರೇ ಪುನಸ್ತ್ವಾಂ ಶರಣಂ ವ್ರಜನ್ತಃ ಹಾ ನಿಸ್ತ್ರಪಾಣಾಂ ಪ್ರಥಮೇ ಭವಾಮಃ ॥ ೧-೬೨॥
ಅಪಾರದುಃಖಾರ್ಣವಪೋತಪಾತ್ರೀಂ ತ್ವಯಾ ಕೃಪಾಮುದ್ವಹತಾತಿಗುರ್ವೀಮ್ ।
ಕೃತಘ್ನತಾಜನ್ಮಭುವಾಮಮೀಷಾಮಸ್ಮಾಕಮರ್ಥೇ ನ ಕಿಮನ್ವಭಾವಿ ॥ ೧-೬೩॥
ಮನಸ್ವಿಲೋಕಸ್ಯ ವಿಗರ್ಹಣೀಯೇ ಪ್ರತಿಗ್ರಹೇ ವರ್ಜಯತಾ ಜುಗುಪ್ಸಾಮ್ ।
ಪುರಾ ಪುರಸ್ತಾದ್ಬಲಿದಾನವಸ್ಯ ಪ್ರಸಾರಿತೋ ನಾಗ್ರಕರಸ್ತ್ವಯಾ ಕಿಮ್ ॥ ೧-೬೪॥
ದೈತ್ಯಾಧಿರಾಜೇನ ಹಿರಣ್ಯನಾಮ್ನಾ ಪರ್ಯಾಕುಲಂ ತ್ರಾತುಮಶೇಷಲೋಕಮ್ ।
ಇದಂ ತು ದಿವ್ಯಂ ಪರಿಹೃತ್ಯ ರೂಪಂ ನ ತ್ವಂ ಕಿಮಾಸೀರ್ನರತಿರ್ಯಗಾತ್ಮಾ ॥ ೧-೬೫॥
ಸ್ವವಿಕ್ರಮಾಕ್ರಾನ್ತಸುರಾಸುರಸ್ಯ ರಕ್ಷಃಪತೇರ್ನಿಗ್ರಹಣಾದರೇಣ ।
ಭೂತ್ವಾ ಸುತಃ ಪಙ್ಕ್ತಿರಥಸ್ಯ ರಾಜ್ಞಸ್ತಾಂ ತಾಮವಸ್ಥಾಂ ನ ಕಿಮನ್ವಭೂಸ್ತ್ವಮ್ ॥ ೧-೬೬॥
ಅನೇಕಧಾ ಪಾಲಯಿತಾರಮೇವಂ ಸಮ್ಪ್ರತ್ಯಪಿ ತ್ವಾಂ ಶರಣಂ ಪ್ರಪನ್ನಾಃ ।
ಸನ್ತಾಪಹಾರೀ ನನು ಚಾತಕಾನಾಂ ಭೂಯೋಽಪಿ ಭೂಯೋಽಪಿ ಪಯೋದ ಏವ ॥ ೧-೬೭॥
ವಿಶ್ವಂ ವಿದನ್ನಪ್ಯವಿದನ್ನಿವ ತ್ವಂ ನಾಥಾನುಯುಙ್ಕ್ಷೇ ಭಯಹೇತುಮಸ್ಮಾನ್ ।
ಅನುಗ್ರಹಸ್ಯೈತದಪಿ ಪ್ರಭೂಣಾಂ ಪ್ರಾಯಃ ಪ್ರಕಾರಾನ್ತರಮಾಶ್ರಿತೇಷು ॥ ೧-೬೮॥
ತಪೋಭಿರುಗ್ರೈರ್ಭಗವನ್ ಸುರಾಣಾಮವಧ್ಯಭಾವಂ ದನುಜಾಃ ಪ್ರಪನ್ನಾಃ ।
ಪಾತಾಲಮುರ್ವೀಂ ಚ ವಿಜಿತ್ಯ ದರ್ಪಾದುಪಕ್ರಮಂ ತೇ ದಿವಮದ್ಯ ಜೇತುಮ್ ॥ ೧-೬೯॥
ನ ಜಾತು ಶೂನ್ಯಃ ಕುಲಿಶೇನ ಪಾಣಿರ್ವಕ್ಷೋ ನ ಮುಕ್ತಂ ಮಣಿಕಙ್ಕಟೇನ ।
ಶಕ್ರಸ್ಯ ದೈತ್ಯಾಗತಿಶಙ್ಕಿನೋಽಸ್ಯ ನಾಸಜ್ಜಿತಸ್ತಿಷ್ಠತಿ ವಾರಣೇನ್ದ್ರಃ ॥ ೧-೭೦॥
ದಣ್ಡಂ ಯಮಾತ್ಪಾಶಮಪಾಮಧೀಶಾದ್ಗದಾಂ ಕುಬೇರಾತ್ಕುಲಿಶಂ ಮಘೋನಃ ।
ಆದಾತುಕಾಮಃ ಪ್ರಹಿಣೋತಿ ದೂತಾನ್ ಕಂಸಃ ಸ್ವದೋರ್ವಿಕ್ರಮನಿರ್ಜಿತಾಶಃ ॥ ೧-೭೧॥
ರಣೇ ವಿನಿರ್ಜಿತ್ಯ ಬಲಂ ಸುರಾಣಾಂ ಪರಾಕ್ರಮೇಣಾಪ್ರತಿಮೇನ ವೀರಃ ।
ಭೋಜೇಶ್ವರಃ ಕ್ರೀಡತಿ ಸಾವರೋಧೋ ಮೂಲೇಷು ಸಮ್ಪ್ರತ್ಯಮರದ್ರುಮಾಣಾಮ್ ॥ ೧-೭೨॥
ಧನುರ್ಧರಾಧ್ಯಾಸಿತವಪ್ರಶೀರ್ಷಾಃ ದ್ವಾಃಪಾಲನವ್ಯಗ್ರಸಮಗ್ರಯೋಧಾಃ ।
ಪ್ರವೀರನಿರ್ಭರ್ತ್ಸಿತಕಾನ್ದಿಶೀಕಾ ಸ್ಥಾತುಂ ನ ಜಾನಾತಿ ಪುರೀ ಸುರಾಣಾಮ್ ॥ ೧-೭೩॥
ಹಾಹೇತಿ ವಿಕ್ರೋಶದನಾಥಮೇತದ್ವಿಶ್ವಂ ಜಗತ್ಪೀಡಯತಃ ಪ್ರಕಾಮಮ್ ।
ತ್ವಯಾ ವಿನಾಽನ್ಯಸ್ತ್ರಿಷು ವಿಷ್ಟಪೇಷು ನ ಕರ್ತುಮೀಷ್ಟೇ ನರಕಸ್ಯ ಭಙ್ಗಮ್ ॥ ೧-೭೪॥
ಪ್ರಲಮ್ಬಕೇಶಿಪ್ರಮುಖಾಸ್ತಥಾನ್ಯೇ ಪರಸ್ಸಹಸ್ರಂ ಪರಿಯನ್ತಿ ದೈತ್ಯಾಃ ।
ನಿರ್ಘಾತಕಲ್ಪೈರ್ನಿಜಸಿಂಹನಾದೈರ್ವಿದಾರಯನ್ತೋ ವಿಯದಾಹವೇಷು ॥ ೧-೭೫॥
ಷಟ್ ಸೂನವಸ್ಸನ್ತಿ ಹಿರಣ್ಯನಾಮ್ನೋ ದೈತ್ಯಸ್ಯ ಪಾತಾಲತಲಾಧಿವಾಸೈಃ ।
ತೈರ್ನ್ನಃ ಕ್ರಿಯನ್ತೇ ದುರಿತಾನಿ ಯಾನಿ ವಕ್ತುಂ ನ ಶಕ್ಯಾನಿ ಮುಕುನ್ದ ತಾನಿ ॥ ೧-೭೬॥
ತೇಷಾಂ ಮಹೀಧ್ರಪ್ರತಿಮಾಕೃತೀನಾಂ ಭಾರಂ ಮಹೀ ಸೋಢುಮಸಾವಶಕ್ತಾ ।
ಅಸ್ಮಾನ್ ಪುರಸ್ಕೃತ್ಯ ಭವತ್ಸಕಾಶಂ ಪ್ರಾಪ್ತಾ ನಿಜಕ್ಲೇಶನಿವೇದನಾಯ ॥ ೧-೭೭॥
ತದೇತದಾವೇದನಮಸ್ಮದೀಯಂ ಶ್ರುತ್ವಾ ಪ್ರಮಾಣಂ ಪ್ರಭುರಿತ್ಯುದೀರ್ಯ ।
ವಿಧಿರ್ವ್ಯರಂಸೀದ್ವಿಹಿತಪ್ರಣಾಮಃ ಸ ಚಾಪಿ ಗಮ್ಭೀರಮುವಾಚ ದೇವಃ ॥ ೧-೭೮॥
ಅಲಂ ವಿಷಾದೇನ ದಿವೌಕಸೋ ವಃ ಸಮೀಹಿತಂ ಹಸ್ತಗತಂ ಮನುಧ್ವಮ್ ।
ವ್ರತಂ ಹಿ ಮೇ ಕೇವಲಮೇತದೇವ ಸಂರಕ್ಷಣಂ ಯಚ್ಛರಣಾಗತಾನಾಮ್ ॥ ೧-೭೯॥
ಮಾಮರ್ಥಯನ್ತೇ ವಸುದೇವಪತ್ನ್ಯೌ ಪತ್ನೀ ಚ ನನ್ದಸ್ಯ ಸುತಂ ಗುಣಾಢ್ಯಮ್ ।
ಅಂಶದ್ವಯೇನ ವ್ರತಕರ್ಶಿತಾಙ್ಗೀಸ್ತಿಸ್ರೋಽಪಿ ತಾಃ ಪುತ್ರವತೀರ್ವಿಧಾಸ್ಯೇ ॥ ೧-೮೦॥
ಇಯಂ ಚ ಲೋಕತ್ರಿತಯಸ್ಯ ಮಾತಾ ಮಾಯಾಭಿಧಾನಾ ಮಮ ಶಕ್ತಿರಗ್ರ್ಯಾ ।
ಕಾರ್ಯಾಣಿ ವಃ ಕಾನ್ಯಪಿ ಕರ್ತುಕಾಮಾ ಜನಿಷ್ಯತೇ ಜನ್ಮವಿನಾಶಶೂನ್ಯಾ ॥ ೧-೮೧॥
ತದ್ಗಚ್ಛತ ಸ್ವರ್ಗಮಪೇತಖೇದಾಃ ನ ಕಾಲಹಾನಿಃ ಪರಿಶಙ್ಕನೀಯಾ ।
ಅನೇನ ಶಾರ್ಙ್ಗೇಣ ಶಪೇ ಶರೈರ್ವಃ ಸದ್ಯೋ ಮನಃಶಲ್ಯಮಪಾಕರಿಷ್ಯೇ ॥ ೧-೮೨॥
ಇತಿ ತಮಮರಲೋಕಂ ಸಾನ್ತ್ವಯಿತ್ವಾ ಸ ದೇವಃ
ಸಪದಿ ನವಘನಾಭಃ ಪದ್ಮನಾಭಸ್ತಿರೋಽಭೂತ್ ।
ಸ ಚ ವಿಹಿತನಮಸ್ಯಸ್ತಸ್ಯ ವಾಚಂ ಪ್ರಶಂಸನ್
ನಿಜಪದಮಭಿಪೇದೇ ಹರ್ಷಪರ್ಯಾಕುಲಾತ್ಮಾ ॥ ೧-೮೩॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ಪ್ರಥಮಸ್ಸರ್ಗಃ ॥ ೧ ॥
ದ್ವಿತೀಯಃ ಸರ್ಗಃ
ಅಥೈಕದಾ ಪುತ್ರಫಲಾನಿ ಸಮ್ಯಗ್ವ್ರತಾನಿ ಬಾಹ್ಯೋಪವನೇ ಚರನ್ತೀಮ್ ।
ರಥೇನ ಕಂಸೋ ವಸುದೇವಯುಕ್ತಃ ಸ್ವಸಾರಮಾಲೋಕಯಿತುಂ ಜಗಾಮ ॥ ೨-೦೧॥
ಸ್ಫುರತ್ಪ್ರಭಾಪಲ್ಲವಿತಾಙ್ಗಯಷ್ಟೀಂ ಕಥಞ್ಚಿದೂಢಸ್ತನಮಞ್ಜರೀಕಾಮ್ ।
ತತ್ರಾಲಕೈಃ ಷಟ್/ಪದಿನೀಮಜಾನಾತ್ ಸ ತಾಂ ಲತಾಮಧ್ಯಗತಾಂ ಚಿರೇಣ ॥ ೨-೦೨॥
ಸಾ ಸನ್ನತಾಙ್ಗೀ ನಿಯಮಾವಸಾನೇ ಜ್ಯೇಷ್ಠಾಯ ತಸ್ಮೈ ವಿದಧೇ ನಮಸ್ಯಾಮ್ ।
ಸ ಚಾಶಿಷಾ ತಾಮನುಗೃಹ್ಯ ಸಾಧ್ವೀಂ ಭೋಜೇಶ್ವರೋ ವಾಕ್ಯಮಿದಂ ಬಭಾಷೇ ॥ ೨-೦೩॥
ಅದ್ಯಾಪಿ ಬಾಲಾಸಿ ಸುತಾನನೇಕಾನ್ ಪ್ರಸೋಷ್ಯಸೇ ಕಿಂ ವ್ರತಯಾತನಾಭಿಃ ।
ಪಶ್ಯಾಧುನಾ ಪಲ್ಲವಸೂತಿಕಾಲೇ ಕಿಂ ಕಲ್ಪತೇ ಚೂತಲತಾ ಫಲಾಯ ॥ ೨-೦೪॥
ಕೃಶಾಸಿ ಕಾಮಂ ವಿರಮ ಪ್ರಯಾಸಾನ್ಮನೋಭಿರಾಮಾನುಪಭುಙ್ಕ್ಷ್ವ ಭೋಗಾನ್ ।
ಅಙ್ಗಾನಿ ತೇ ಸನ್ನತಗಾತ್ರಿ ದುಃಖಂ ಮೃಣಾಲಕಲ್ಪಾನಿ ಕಥಂ ಸಹೇರನ್ ॥ ೨-೦೫॥
ತಾಮೇವಮುಕ್ತ್ವಾ ಸ ತು ಸಾಭ್ಯನುಜ್ಞಾಂ ರಥಂ ಸಮಾರೋಪ್ಯ ಸಹೈವ ಪತ್ಯಾ ।
ಪ್ರಯಾತುಕಾಮಃ ಪುರಮನ್ತರಿಕ್ಷೇ ಶುಶ್ರಾವ ವಾಚಂ ಶತಧಾರಕಲ್ಪಾಮ್ ॥ ೨-೦೬॥
ತ್ವದನ್ತಿಕಸ್ಥಾ ಸಹಜಾಶಮೀಯಂ ಪ್ರಸೋಷ್ಯತೇ ಪುತ್ರಮಯಂ ಕೃಶಾನುಮ್ ।
ಮರುತ್ಸಮಿದ್ಧಸ್ಸ ತು ದುರ್ನಿವಾರಸ್ತ್ವಾಂ ಭಸ್ಮಸಾತ್ ಕಂಸ ಕರಿಷ್ಯತೀತಿ ॥ ೨-೦೭॥
ನಿಶಮ್ಯ ತದ್ಭೂತವಚೋ ನಿಕಾಮಂ ಕಂಸಸ್ಸ ರೋಷಾಗಮದುರ್ನಿರೀಕ್ಷ್ಯಃ ।
ಕೃಪಾಂ ಪರಿತ್ಯಜ್ಯ ಕೃಪಾಣಪಾಣಿಃ ಸ್ವಸುರ್ವಧಾಯ ಸ್ವಯಮುದ್ಯತೋಽಭೂತ್ ॥ ೨-೦೮॥
ನೃಶಂಸಕೃತ್ಯೇ ನಿತರಾಂ ಪ್ರವೃತ್ತಮುದಗ್ರಕೋಪಸ್ಫುರಿತಾಧರೋಷ್ಠಮ್ ।
ಪ್ರಸಾದಯನ್ನಾನಕದುನ್ದುಭಿಸ್ತಮುವಾಚ ಧೀಮಾನುಪಪತ್ತಿಯುಕ್ತಮ್ ॥ ೨-೦೯॥
ಅಲಂ ತವಾನೇನ ವಧೋದ್ಯಮೇನ ತ್ವಯಾ ವಿಧೇಯೋ ನೃಪತೇ ವಿಮರ್ಶಃ ।
ಕಿಮೇಷ ನಾಶ್ರಾವಿ ವಿಚಾರಶೂನ್ಯಂ ವ್ರಜನ್ತ್ಯನರ್ಥಾ ಇತಿ ಸಾಧುವಾದಃ ॥ ೨-೧೦॥
ಭಯೇನ ಯುದ್ಧೇಷು ಪುರನ್ದರಾದೀನ್ ಸುರಾನ್ ಪರಾಚಸ್ತ್ರಪಯಾ ವಿಮುಞ್ಚನ್ ।
ಮಹೀಶ್ವರ ಸ್ತ್ರೀವಧಪಾತಕೇಽಸ್ಮಿನ್ ಕಥಂ ತವೋಪಕ್ರಮತೇ ಕೃಪಾಣಃ ॥ ೨-೧೧॥
ಅನೇನ ಕಿಂ ವಾ ತವ ಜೀವಿತೇನ ಯದ್ರಕ್ಷಣಂ ಸ್ಯಾತ್ ಸಹಜಾವಧೇನ ।
ಗುಣೇನ ಕೇನಾಪಿ ಹಿ ಲಬ್ಧನಾಮ್ನಾಮಪಿ ಸ್ವನಾಶಾದಯಶೋ ಗರೀಯಃ ॥ ೨-೧೨॥
ಪ್ರಪದ್ಯಮಾನಸ್ಯ ಸದಾಭಿವೃದ್ಧಿಂ ದಿವಾನಿಶಂ ಪ್ರೀಣಯತಶ್ಚ ಲೋಕಾನ್ ।
ಭವದ್ಯಶಶ್ಚನ್ದ್ರಮಸೋಽಸ್ಯ ಮಾಭೂನ್ನವಃ ಕಲಙ್ಕೋ ಭಗಿನೀವಧೇನ ॥ ೨-೧೩॥
ಸ್ವಸುರ್ವಧೇನಾಸ್ಯ ಭವೇದಕೀರ್ತಿಸ್ತೇನ ತ್ಯಜೇಯುಸ್ಸುಹೃದೋಽಪಿ ಭೀತಾಃ ।
ಇತ್ಯೇವ ನೂನಂ ಭುಜನಿರ್ಜಿತೈಸ್ತೈಸ್ಸುರೈಃ ಪ್ರಯುಕ್ತಸ್ಸುಮಹಾನುಪಾಯಃ ॥ ೨-೧೪॥
ಕಾಲೇನ ತದ್ದ್ರಕ್ಷ್ಯಸಿ ಯನ್ಮದುಕ್ತಂ ಮಾ ಭೂತ್ತವಾಸ್ಮಿನ್ ವಿಷಯೇಽಪಿ ಶಙ್ಕಾ ।
ತಥಾಪಿ ಚೇತಸ್ತವ ಶಙ್ಕತೇ ಚೇದಾಕರ್ಣ್ಯತಾಂ ತರ್ಹ್ಯಪರಃ ಪ್ರಕಾರಃ ॥ ೨-೧೫॥
ಸರ್ವಾಣ್ಯಪತ್ಯಾನಿ ವಶೇ ತವಾಹಂ ಜಾತಾನಿ ಜಾತಾನಿ ಸಮರ್ಪಯಿಷ್ಯೇ ।
ತನ್ನಿಗ್ರಹಂ ವಾ ತದನುಗ್ರಹಂ ವಾ ವಿಚಿನ್ತ್ಯ ಕರ್ತಾಸಿ ದಶಾನುರೂಪಮ್ ॥ ೨-೧೬॥
ಕಿಂ ಬುದ್ಧಿಮಾನ್ದ್ಯೇನ ನಿಜೇನ ತಸ್ಯ ಕಿಂ ಭಾಗಧೇಯೇನ ವರಾಙ್ಗನಾಯಾಃ ।
ಬಲೇನ ಕಿಂ ವಾ ಭವಿತವ್ಯತಾಯಾಸ್ತಥೇತಿ ಜಗ್ರಾಹ ವಚಸ್ತದೀಯಮ್ ॥ ೨-೧೭॥
ವಧಪ್ರವೃತ್ತೋ ವಸುದೇವಮನ್ತ್ರಪ್ರಭಾವಸಂಸ್ತಮ್ಭಿತಘೋರಕರ್ಮಾ ।
ನಿವೃತ್ಯ ನಿಸ್ತ್ರಿಂಶಮಹಾಭುಜಙ್ಗೋ ಮಹೀಭೃತಃ ಕೋಶಬಿಲಂ ವಿವೇಶ ॥ ೨-೧೮॥
ಸತ್ಯಾ ನು ಸಾ ಸ್ಯಾದಶರೀರಿಣೀ ವಾಕ್ ಸತ್ಯಂ ಕಿಮೇತದ್ವಸುದೇವವಾಕ್ಯಮ್ ।
ವಿತರ್ಕಯನ್ನೇವಮುದಸ್ತಕೇತುಂ ಪುರೀಂ ಪ್ರಪೇದೇ ಮಣಿತೋರಣಾಢ್ಯಾಮ್ ॥ ೨-೧೯॥
ಆಲೋಕನೈರ್ಮೌಲಿಷು ಭೂಪತೀನಾಮಾಸಜ್ಜಯನ್ನಞ್ಜಲಿಬನ್ಧನಾನಿ ।
ಸ ವೈಮನಸ್ಯೇನ ಮುಖಸ್ಥಿತೇನ ಭಯಾವಹಃ ಸ್ವಂ ಭವನಂ ಜಗಾಮ ॥ ೨-೨೦॥
ವಿಶಙ್ಕಮಾನಃ ಸ ಗೃಹೋಪಕಣ್ಠೇ ತೌ ಸದ್ಮನಿ ಕ್ವಾಪಿ ವಿಧಾಯ ಗುಪ್ತೌ ।
ಪರಾಕ್ರಮಾಕ್ರಾನ್ತಸಮಸ್ತಲೋಕಃ ಪುರೇವ ಭೋಗಾನಯಮನ್ವಭುಙ್ಕ್ತ ॥ ೨-೨೧॥
ಮಾಯಾ ಹರೇಸ್ಸಾಽಥ ಹಿರಣ್ಯಪುತ್ರಾನ್ ಯಾನ್ ದೇವಕೀಗರ್ಭಗತಾನಕಾರ್ಷೀತ್ ।
ಭೋಜೇಶ್ವರಸ್ಸತ್ವರಮೇತ್ಯ ಭೀತ್ಯಾ ತಾನ್ ಜಾತಮಾತ್ರಾನವಧೀತ್ ಕ್ರಮೇಣ ॥ ೨-೨೨॥
ಜಗದ್ವಿಭೂತ್ಯೈ ಪರಮಸ್ಯ ಪುಂಸಃ ಯೋ ದೇವಕೀಗರ್ಭಮವಿಕ್ಷದಂಶಃ ।
ಆಕೃಷ್ಯ ತಸ್ಮಾನ್ಮುರವೈರಿಮಾಯಾ ತಂ ರೋಹಿಣೀಗರ್ಭಗತಂ ಚಕಾರ ॥ ೨-೨೩॥
ಚಕಾಸ ಸಪ್ತಚ್ಛದಪಾಣ್ಡುರೇಣ ಸುತೇನ ಸಾ ಗರ್ಭತಿರೋಹಿತೇನ ।
ವಲಾಹಕಾನ್ತರ್ಹಿತಶೀತಭಾನೋರ್ದಿಶೋ ದಶಾಂ ವೃತ್ರಜಿತಃ ಪ್ರಪನ್ನಾ ॥ ೨-೨೪॥
ತತಸ್ಸಮಾಹ್ಲಾದನಮೀಕ್ಷಣಾನಾಮಸೂತ ಪುತ್ರಂ ಶರದಿನ್ದುಕಲ್ಪಮ್ ।
ಪ್ರಕರ್ಷಮಾಪನ್ನುದಯೇನ ಯಸ್ಯ ಸದ್ಯಃ ಸಮುದ್ರಾ ಇವ ಸತ್ವವನ್ತಃ ॥ ೨-೨೫॥
ಪತ್ಯುಸ್ಸಮಾದಿಷ್ಟಮಿದಂ ವಿಧಾಯ ಶೇಷಂ ಚಿಕೀರ್ಷುಸ್ಸುರಕಾರ್ಯಮಾರ್ಯಾ ।
ಚರಾಚರಾಣಾಂ ಜಗತಾಂ ಸವಿತ್ರೀ ಸಾ ಶ್ರದ್ದಧೇ ಜನ್ಮಭುವಂ ಯಶೋದಾಮ್ ॥ ೨-೨೬॥
ಅಥ ಪ್ರಜಾನಾಮಭಿವೃದ್ಧಿಕಾಮೋ ದೇವೋ ದಯಾಯಾಃ ಕಿಲ ಜನ್ಮಭೂಮಿಃ ।
ಸ್ವಜನ್ಮನೇ ಜನ್ಮವಿನಾಶಹೇತುಃ ಪ್ರಾಪ್ಯಸ್ಸತಾಂ ಪ್ರಾಪ ಸ ದೇವಕೀಂ ತಾಮ್ ॥ ೨-೨೭॥
ಕೃಶಾವಲಗ್ನಾ ಕುಚಯೋರ್ಗರಿಮ್ಣಾ ಸಾ ದೇವಕೀ ಸನ್ನತಗಾತ್ರಯಷ್ಟಿಃ ।
ಜಗತ್ತ್ರಯೀಪುಣ್ಯಕೃತಾವಲಮ್ಬಾ ಬಭಾರ ಗರ್ಭೇಣ ಜಗನ್ನಿವಾಸಮ್ ॥ ೨-೨೮॥
ಅನ್ತರ್ದಧಾನಾ ಸರಸೀರುಹಾಕ್ಷಂ ಸ್ವೇನಾವತಾರೇಣ ಭುವಂ ಪುನಾನಾ ।
ಸಾ ದೇವಕೀ ಸಾ ಚ ಕವೇರಕನ್ಯಾ ಮಿಥೋಽದಧಾತಾಮುಪಮಾನಭಾವಮ್ ॥ ೨-೨೯॥
ಅಲಂ ನಿವಾಸಾಯ ನ ಯಸ್ಯ ವಿಶ್ವಂ ವಸನ್ ಸ ಗರ್ಭೇ ಮುಮುದೇ ಮುಕುನ್ದಃ ।
ಪರೋಪಕಾರಪ್ರಭವಂ ಹಿ ದುಃಖಂ ಪುಂಸಸ್ಸುಖಾಯೈವ ಮಹತ್ತರಸ್ಯ ॥ ೨-೩೦॥
ಬಹಿಃಸ್ಫುರನ್ತ್ಯಾ ಕರಪಾಞ್ಚಜನ್ಯತ್ವಿಷೇವ ವಿಷ್ಣೋರುದರಸ್ಥಿತಸ್ಯ ।
ಅಧತ್ತ ತಸ್ಯಾಸ್ತಪನೀಯವರ್ಣಾ ಮಧೂಕಪುಷ್ಪಚ್ಛವಿಮಙ್ಗಯಷ್ಟಿಃ ॥ ೨-೩೧॥
ಬಭಾರ ಹಾರಂ ಕುಚಯೋರ್ನ ತನ್ವೀ ನ ಪಾದಯೋರ್ನೂಪುರಮಾಮುಮೋಚ ।
ದಧೌ ಮಣಿಂ ಭಾರಭಿಯಾ ನ ಮೌಲೌ ತದೇವ ಕೈವಲ್ಯಮಭೂಷಯತ್ತಾಮ್ ॥ ೨-೩೨॥
ದೃಶಃ ಪ್ರಯತ್ನೇನ ದಧೌ ತಿರಶ್ಚೀರುವಾಚ ಮನ್ದಂ ನಿಭೃತಂ ಜಹಾಸ ।
ಶನೈರ್ಯಯೌ ದತ್ತಕರಾ ಸಖೀಭಿರ್ಭೃಶಂ ನಿಶಶ್ವಾಸ ಚ ತಾವದೇವ ॥ ೨-೩೩॥
ಸಹೈವ ಹರ್ಷೇಣ ಸುಧಾಶನಾನಾಂ ಸಹೈವ ಪುಣ್ಯೇನ ವಸುನ್ಧರಾಯಾಃ ।
ಭಯೇನ ಭೋಜಾಧಿಪತೇಶ್ಚ ದೇವೋ ಸಹೈವ ಗರ್ಭೇ ವವೃಧೇ ಮುಕುನ್ದಃ ॥ ೨-೩೪॥
ಶಿರೋಭಿರೂಢೇನ ವನಸ್ಪತೀನಾಂ ಫಲೋಪಹಾರೇಣ ನಿವೇದಿತರ್ದ್ಧಿಃ ।
ಪ್ರಾವೃಟ್ ಸಮಾಸಾದಿತಸೂತಿಕಾಲಾಂ ತಾಂ ದೇವಕೀಂ ದ್ರಷ್ಟುಮಿವಾಜಗಾಮ ॥ ೨-೩೫॥
ಅಥೈಕದೇಶಾ ಇವ ವಾರಿರಾಶೇರುಚ್ಚೈಃ ಪುರೋಮಾರುತವಿಪ್ರಕೀರ್ಣಾಃ ।
ವೃತಾಸ್ತಡಿದ್ವಿದ್ರುಮವಲ್ಲರೀಭಿರ್ವಿರೇಜಿರೇ ವ್ಯೋಮನಿ ವಾರಿವಾಹಾಃ ॥ ೨-೩೬॥
ಬಲಾಹಕವ್ರಾತಭವೈಸ್ತಮೋಭಿರ್ದಿನೇಷು ದುರ್ಬೋಧಪುರಃಸ್ಥಿತೇಷು ।
ನ ಕಶ್ಚಿದಾಸೀದಭಿಸಾರಿಕಾಣಾಂ ವಿದ್ಯುತ್ಪ್ರಕಾಶೇನ ವಿನಾಽನ್ತರಾಯಃ ॥ ೨-೩೭॥
ಪಯೋದಭಸ್ತ್ರಾನ್ತರನಿರ್ಗತೇನ ಝಾತ್ಕಾರಿಣಾ ಚಣ್ಡಸಮೀರಣೇನ ।
ವಿಯೋಗಿನಾಂ ಚೇತಸಿ ಮೇಘಕಾಲಃ ಸನ್ಧುಕ್ಷಯಾಮಾಸ ಮನೋಭವಾಗ್ನಿಮ್ ॥ ೨-೩೮॥
ಸ್ಮರೇಣ ಲೋಕತ್ರಿತಯೇಶ್ವರೇಣ ಸಮ್ಭಾವಿತಾಜ್ಜೀವಿತನಿರ್ವಿಶೇಷಮ್ ।
ಋತೋರ್ವಸನ್ತಾಜ್ಜ್ವಲದಾಗಮಸ್ಯ ಜಹಾರ ಜಾತಿರ್ನಿಖಿಲಂ ನಿಕರ್ಷಮ್ ॥ ೨-೩೯॥
ಬಲಾದ್ಗೃಹೀತಾ ಇವ ವೈತಸೀಭಿಃ ಶಾಖಾಭಿರಾರೂಢಮದಾ ಇವೋಚ್ಚೈಃ ।
ಪರಿಸ್ಖಲನ್ತ್ಯೋ ನಿಖಿಲಾಸ್ತಟಿನ್ಯಃ ಜಗ್ಮುರ್ಜವಾದುದ್ಭಟಫೇನಹಾಸಾಃ ॥ ೨-೪೦॥
ಉದಾರಸೌರಭ್ಯವಶೀಕೃತಾನಾಮನ್ವೀಯಮಾನಃ ಪಟಲೈರಲೀನಾಮ್ ।
ಅಕಲ್ಪಯತ್ ಕೇತಕಮಾತರಿಶ್ವಾ ಮನೋಭವಸ್ಯಾಪಿ ಮನೋವಿಕಾರಮ್ ॥ ೨-೪೧॥
ಅತ್ಯಮ್ಬುಪಾನಪ್ರಭವಸ್ಯ ಕರ್ತುಮನ್ತರ್ಜಡಿಮ್ನಃ ಪ್ರತಿಸಂವಿಧಾನಮ್ ।
ಪಪುಸ್ತಿರಸ್ಕಾರಪದೇನ ಮೇಘಾಃ ಮಯೂಖಮಾಲಾಮರವಿನ್ದಬನ್ಧೋಃ ॥ ೨-೪೨॥
ರರಾಜ ಖರ್ಜೂರಫಲಪ್ರಕಾಶಂ ನವಂ ಪಯಃ ಕಾನನಪಲ್ವಲೇಷು ।
ಪಯೋದವೃನ್ದೈಃ ಪರಿಪೀಯ ಮುಕ್ತಂ ಪ್ರಭಾಕರಸ್ಯೇವ ಮರೀಚಿಜಾಲಮ್ ॥ ೨-೪೩॥
ಮಹೀಭೃತಾಂ ಮೂರ್ದ್ಧಸು ದತ್ತಪಾದಂ ವಿಲೋಕ್ಯ ಮಿತ್ರಂ ವಿಹತಪ್ರತಾಪಮ್ ।
ಮಗ್ನೇ ಜಲೇ ಮರ್ತುಮಿವಾರವಿನ್ದೇ ಮಧುವ್ರತಾಶ್ಚುಕ್ರುಶುರನ್ತರಿಕ್ಷೇ ॥ ೨-೪೪॥
ನಿಷೇವ್ಯ ಹಂಸಾ ಮಧುರೈರ್ವಚೋಭಿಃ ಪದ್ಮಾಕರಂ ಲಬ್ಧಸಮೀಹಿತಾರ್ಥಾಃ ।
ಸದ್ಯೋ ಯಯುಸ್ತಸ್ಯ ವಿಪತ್ತಿಕಾಲೇ ಜಲಾಶಯಾನಾಂ ಪ್ರಕೃತಿಃ ಕಿಲೈಷಾ ॥ ೨-೪೫॥
ಪ್ರರೂಢಸಸ್ಯಾಃ ಫಲಮೂಲಶಾಕೈರ್ನಿರನ್ತರಾಃ ಸ್ವಾದುನವೋದಕಾಢ್ಯಾಃ ।
ಪಲ್ಲೀಜುಷಾಂ ಚೇತಸಿ ಪಾಮರಾಣಾಂ ಧೃತಿಂ ಪರಾಮಾದಧಿರೇ ವನಾನ್ತಾಃ ॥ ೨-೪೬॥
ಸಮುನ್ಮಿಷನ್ತೀ ಗಿರಿಮಲ್ಲಿಕಾನಾಂ ಪ್ರಸೂನರಾಜಿಸ್ಸುತರಾಂ ವಿರೇಜೇ ।
ಮುಕ್ತ್ವಾ ನಭೋ ಮೇಘವಿಮರ್ದಭೀತ್ಯಾ ನಕ್ಷತ್ರಮಾಲೇವ ಗತಾ ಧರಿತ್ರೀಮ್ ॥ ೨-೪೭॥
ಧಾರಾಲಜೀಮೂತಕೃತಾನ್ಧಕಾರೇ ತಸ್ಮಿನ್ನಪರ್ಯನ್ತಜಡಿಮ್ನಿ ಕಾಲೇ ।
ಅಲಕ್ಷ್ಯಮಾಣಃ ಕ್ವಚಿದಂಶುಮಾಲೀ ದಿವಾಽಪ್ಯುವಾಸೇವ ತನೂನಪಾತಿ ॥ ೨-೪೮॥
ಇತಿ ಪ್ರವೃತ್ತೇ ಸಮಯೇ ಘನಾನಾಂ ಮಾಸೇ ನಭಸ್ಯೇ ನಿಶಿ ಮಧ್ಯಮಾಯಾಮ್ ।
ಗಣೇ ಶುಭಾಖ್ಯಾಯಿನಿ ಚ ಗ್ರಹಾಣಾಂ ದೇವಕ್ಯುವಾಹ ಪ್ರಸವಾಭಿಮುಖ್ಯಮ್ ॥ ೨-೪೯॥
ಹರತ್ಸು ಬಾಹ್ಯಂ ಭುವನಸ್ಯ ತಾಪಂ ಪ್ರಾವೃಟ್ ಪ್ರಸೂತೇಷು ವಲಾಹಕೇಷು ।
ಅಸೂತ ತಸ್ಯಾನ್ತರತಾಪಶಾನ್ತ್ಯೈ ಕೃಷ್ಣಾಮ್ಬುವಾಹಂ ಕೃಪಯೇವ ದೇವೀ ॥ ೨-೫೦॥
ದಿಶಃ ಪ್ರಸೇದುಃ ಸಹ ನಿಮ್ನಗಾಭಿರ್ಜಹರ್ಷ ಲೋಕೇನ ಸಹಾಮ್ಬುರಾಶಿಃ ।
ಜಾತೇ ಮುಕುನ್ದೇ ಮುಮುಚುಶ್ಚ ಸದ್ಯಃ ಭಯೇನ ದೇವಾಃ ಸಹ ಪುಷ್ಪವೃಷ್ಟಿಮ್ ॥ ೨-೫೧॥
ಮನೋಭಿರಾಮೇಣ ಮಧುವ್ರತಾನಾಂ ನಾದೇನ ಶಂಸನ್ನಿವ ದಿಷ್ಟವೃದ್ಧಿಮ್ ।
ಚಚಾರ ವಾಯುಃ ಸುಮನೋಂಽಶುಕಾನಿ ಸಮ್ಪ್ರಾಪ್ಯ ಸಮ್ಪ್ರಾಪ್ಯ ಮಹೀರುಹೇಭ್ಯಃ ॥ ೨-೫೨॥
ವ್ಯಜೃಮ್ಭತ ಪ್ರಸ್ಫುಟಶಙ್ಖನಾದಃ ತಾರೇಣ ಗೀತಧ್ವನಿನಾ ವಿಮಿಶ್ರಃ ।
ಸಮಶ್ನುವಾನಃ ಕಕುಭಾಂ ಮುಖಾನಿ ದಿವೌಕಸಾಂ ಮಙ್ಗಲತೂರ್ಯಘೋಷಃ ॥ ೨-೫೩॥
ತ್ರಪಾಮಪಾಸ್ಯನ್ ವಿನಯಂ ವಿಲುಮ್ಪನ್ ನೀತಿಂ ನಿಗೃಹ್ಣನ್ ಭಯಮಾಶು ಭಞ್ಜನ್ ।
ಶರೀರಿಣಾಮಚ್ಯುತಜನ್ಮಜನ್ಮಾ ಮೋದೋ ಜಜೃಮ್ಭೇ ಮದನಿರ್ವಿಶೇಷಃ ॥ ೨-೫೪॥
ಆಷಾಢಿನಂ ಪಾಣಿಮುದಸ್ಯ ದೂರಂ ಬ್ರಹ್ಮರ್ಷಿಲೋಕಃ ಪತದುತ್ತರೀಯಃ ।
ನನರ್ತ ಪರ್ಯಾಕುಲಪಾದಚಾರಃ ಪ್ರಹಸ್ಯಮಾನಃ ಸುರಸುನ್ದರೀಭಿಃ ॥ ೨-೫೫॥
ಶೃಙ್ಗೋಜ್ಝಿತೈಃ ಕುಙ್ಕುಮವಾರಿಪೂರೈರನ್ಯೋನ್ಯಮಭ್ಯುಕ್ಷಣತತ್ಪರಾಣಾಮ್ ।
ಪ್ರಮೋದಜನ್ಮಾ ದಿವಿ ಸಮ್ಬಭೂವ ಕೋಲಾಹಲಃ ಕೋಽಪಿ ಸುಧಾಶನಾನಾಮ್ ॥ ೨-೫೬॥
ಪಿತೄಂಶ್ಚ ಪುತ್ರಾ ಪಿತರಶ್ಚ ಪುತ್ರಾನ್ ಗುರೂಂಶ್ಚ ಶಿಷ್ಯಾ ಗುರವಶ್ಚ ಶಿಷ್ಯಾನ್ ।
ಪತೀಂಶ್ಚ ದಾರಾಃ ಪತಯಶ್ಚ ದಾರಾನ್ ಪ್ರಮೋದಮತ್ತಾಸ್ಸಿಷಿಚುಃ ಪಯೋಭಿಃ ॥ ೨-೫೭॥
ಅಸಿಞ್ಚದಮ್ಭೋರುಹಯೋನಿರಿನ್ದ್ರಂ ತಂ ಪಙ್ಕಜಾವಾಸಮಸಿಞ್ಚದಿನ್ದ್ರಃ ।
ಅಸಿಞ್ಚತಾಂ ದ್ವೌ ವಿಬುಧಾನಶೇಷಾನ್ ಸರ್ವೇ ಸುರಾಸ್ತೌ ಚ ಬಲಾದಸಿಞ್ಚನ್ ॥ ೨-೫೮॥
ಮಿಥಃ ಪಯೋಭಿಃ ಸಿಷಿಚುರ್ವಿನೇದುಃ ವವಲ್ಗುರುಚ್ಚಿಕ್ಷಿಪುರಮ್ಬರಾಣಿ ।
ಅನ್ಯೋನ್ಯಮಂಸೇನ ಸುದೂರಮೂಹುರ್ಮತ್ತಾ ಇವ ಸ್ವರ್ಗಸದೋ ಬಭೂವುಃ ॥ ೨-೫೯॥
ತ್ರಿಲೋಕನಾಥೋದಯಸಮ್ಭವೇನ ಮೋದೇನ ಪರ್ಯಾಕುಲಮಾನಸಾನಾಮ್ ।
ಗೀತೇ ಚ ನೃತ್ತೇ ಚ ಸುರಾಙ್ಗನಾನಾಂ ಬಭೂವ ತಾಲಸ್ಖಲಿತಂ ನ ದೋಷಃ ॥ ೨-೬೦॥
ಶೃಙ್ಗೋದಕಾಸ್ಫಾಲನರಕ್ತನೇತ್ರಾಃ ವಿಚ್ಛಿನ್ನಹಾರಾಶ್ಚ್ಯುತಕರ್ಣಭೂಷಾಃ ।
ಪ್ರಹಾಸಸೀದಧ್ವನಿಭಿರ್ವಚೋಭಿಃ ಸಮಾಲಪನ್ತೋ ವಿಬುಧಾ ವಿಜಹ್ರುಃ ॥ ೨-೬೧॥
ಜಾತೇ ಹರೌ ದೈತ್ಯವಿಮರ್ದನೇನ ವಿಶ್ವಮ್ಭರಾಭಾರಮಪಾಚಿಕೀರ್ಷೌ ।
ಮುನೇಃ ಪ್ರಹರ್ಷಃ ಕಲಹಪ್ರಿಯಸ್ಯ ಜಗತ್ಪ್ರಹರ್ಷಶ್ಚ ಸಮಾವಭೂತಾಮ್ ॥ ೨-೬೨॥
ಇತಿ ಪ್ರಹರ್ಷಾಕುಲಿತೈರ್ಮನೋಭಿಃ ವಿಶೃಙ್ಖಲಂ ಕ್ರೀಡತಿ ದೇಹಿವರ್ಗೇ ।
ಕಂಸಸ್ಸಭೃತ್ಯಃ ಪ್ರತಿಪದ್ಯ ಮೂರ್ಛಾಂ ನಿದ್ರಾಭಿಧಾನಾಂ ನ ಕಿಮಪ್ಯಬೋಧಿ ॥ ೨-೬೩॥
ಶ್ಯಾಮಂ ಚತುರ್ಬಾಹುಮುದಾರಹಾರಂ ಕಿರೀಟಿನಂ ಕುಣ್ಡಲದೀಪ್ತಗಣ್ಡಮ್ ।
ಪಿತಾಽಪಿ ಮಾತಾ ಚ ವಿಲೋಕ್ಯ ಪುತ್ರಮಾನನ್ದಮಗ್ನೌ ವಿವಶಾವಭೂತಾಮ್ ॥ ೨-೬೪॥
ನಿಯಮ್ಯ ಹರ್ಷೋದಯಪಾರವಶ್ಯಂ ತಂ ದೇವಕೀಜಾನಿರುವಾಚ ವಾಚಮ್ ।
ಪ್ರಸೀದ ಭೀತೋಽಹಮತೀವ ಕಂಸಾದಿದಂ ತು ರೂಪಂ ಪ್ರತಿಸಂಹರೇತಿ ॥ ೨-೬೫॥
ತತ್ಪ್ರೇರಿತಸ್ತಲ್ಪಗತಂ ಕರಾಭ್ಯಾಂ ತಮಾದದೇ ಕಲ್ಪಿತಬಾಲಭಾವಮ್ ।
ತಯೋಶ್ಶಯಾನಃ ಕರಯೋಸ್ಸ ತಸ್ಯ ಪ್ರಕಾಮಮಪ್ರೀಯತ ಪದ್ಮನಾಭಃ ॥ ೨-೬೬॥
ಅಶೇತ ಯಃ ಪ್ರಾಗ್ವಟಪತ್ರಮಧ್ಯೇ ಲೋಕಾನಶೇಷಾನುದರೇ ದಧಾನಃ ।
ವಿನಾ ತಪೋಭಿಃ ಕಿಮು ತಸ್ಯ ಸಿಧ್ಯೇತ್ತತ್ಪಾಣಿಯುಗ್ಮೇ ಶಯನಂ ಮುರಾರೇಃ ॥ ೨-೬೭॥
ತಮಾಲನಿಲೇನ ತಮೋಭರೇಣ ನಿಪೀಡಿತಾಶಾವಲಯೇ ನಿಶೀಥೇ ।
ಆದಾಯ ಪಙ್ಕೇರುಹಲೋಚನಂ ತಂ ಸದ್ಯಃ ಸ ನಿರ್ಗತ್ಯ ಗೃಹಾತ್ ಪ್ರತಸ್ಥೇ ॥ ೨-೬೮॥
ನಿವಾರ್ಯ ವರ್ಷೋದಕಮಾತ್ಮನೈವ ಪ್ರಕಾಶ್ಯ ಮಾರ್ಗಂ ಫಣರತ್ನಭಾಸಾ ।
ಉಪಾಯಮುಕ್ತ್ವಾ ವಸುದೇವಕರ್ಣೇ ಶೇಷಸ್ಸಿಷೇವೇ ಬಹುಧೈವ ವಿಷ್ಣುಮ್ ॥ ೨-೬೯॥
ಪುರಾತ್ ಸ ನಿರ್ಗತ್ಯ ಪುಮಾಂಸಮಾದ್ಯಂ ವಹನ್ ವಹನ್ತೀಂ ಯಮುನಾಮಪಶ್ಯತ್ ।
ಕೂಲಙ್ಕಷೌಘಾಽಪಿ ಕಲಿನ್ದಕನ್ಯಾ ತದೀಯಗುಲ್ಫದ್ವಯಸೋದಕಾಽಭೂತ್ ॥ ೨-೭೦॥
ಉತ್ತೀರ್ಯ ತಾಂ ತತ್ತಟಸಂಶ್ರಿತಾನಾಂ ದಾತುಂ ಕರಂ ವಾರ್ಷಿಕಮಾಗತಾನಾಮ್ ।
ವ್ರಜೌಕಸಾಂ ನನ್ದಪುರೋಗಮಾನಾಂ ಪ್ರೀತೋ ನಿವೇಶಂ ಸಹಸಾ ವಿವೇಶ ॥ ೨-೭೧॥
ಪ್ರವಿಶ್ಯ ಜಾನನ್ನಿವ ನನ್ದಗೋಪನಿವೇಶನಂ ಸುಪ್ತಶರೀರಿವರ್ಗಮ್ ।
ಸುತಾಂ ಪ್ರಸೂಯ ಪ್ರತಿಪನ್ನನಿದ್ರಾಂ ದದರ್ಶ ತದ್ಧರ್ಮವಧೂಂ ಯಶೋದಾಮ್ ॥ ೨-೭೨॥
ತಂ ಶಾಯಯಿತ್ವಾ ಶಯನೇ ತದೀಯೇ ಕನ್ಯಾಂ ಸಮಾದಾಯ ನಿಪತ್ಯ ಗಚ್ಛನ್ ।
ಶುಶ್ರಾವ ಪುತ್ರೋದಯಹರ್ಷಮೂಲಂ ಕೋಲಾಹಲಂ ಗೋಪವಧೂಜನಾನಾಮ್ ॥ ೨-೭೩॥
ಕರೇಣ ಕನ್ಯಾಂ ಮನಸಾ ಚ ಪುತ್ರಂ ವಹನ್ ಮುಹೂರ್ತೇನ ವಿಲಙ್ಘ್ಯ ಮಾರ್ಗಮ್ ।
ವಿಶಙ್ಕಮಾವಿಶ್ಯ ಗೃಹಂ ಗೃಹಿಣ್ಯಾಃ ನಿಧಾಯ ಬಾಲಾಂ ಶಯನೇ ಸ ತಸ್ಥೌ ॥ ೨-೭೪॥
ಸಾ ಚಞ್ಚರೀಕಸ್ವನಸನ್ನಿಭೇನ ನಾದೇನ ಲೋಕಸ್ಯ ಮನೋ ಹರನ್ತೀ ।
ರುರೋದ ಕಿಞ್ಚಿದ್ವಿವೃತೇನ ಬಾಲಾ ಸ್ಫುಟತ್ಪಯೋಜಾಕೃತಿನಾ ಮುಖೇನ ॥ ೨-೭೫॥
ಆಕರ್ಣ್ಯ ಬಾಲಧ್ವನಿಮಸ್ತನಿದ್ರಾಃ ಪ್ರಧಾವ್ಯ ರಕ್ಷಾಪುರುಷಾ ಜವೇನ ।
ಪ್ರಬೋಧ್ಯ ಯತ್ನೇನ ಪತಿಂ ಪೃಥಿವ್ಯಾಃ ಶಶಂಸುರಸ್ಮೈ ಭಗಿನೀಂ ಪ್ರಸೂತಾಮ್ ॥ ೨-೭೬॥
ಸದ್ಯಃ ಸಮಾಗತ್ಯ ಸ ತತ್ರ ದೃಷ್ಟ್ವಾ ಬಾಲಾಮಮರ್ಷೇಣ ವಿಮರ್ಶಶೂನ್ಯಃ ।
ಸ್ವಸ್ರಾ ನಿಷಿದ್ಧೋಽಪಿ ವಧಾಭಿಲಾಷೀ ಜಗ್ರಾಹ ತಸ್ಯಾಶ್ಚರಣೌ ಕರಾಭ್ಯಾಮ್ ॥ ೨-೭೭॥
ಉದಸ್ಯ ದೂರಂ ತರಸಾ ಕರೇಣ ಚಿಕ್ಷೇಪ ತಾಂ ದುರ್ಮತಿರಶ್ಮಪೃಷ್ಠೇ ।
ಮಹೀಮಯಾತೈವ ದಿವಿ ಸ್ಥಿತಾ ಸಾ ಜಜ್ವಾಲ ಧಾಮ್ನಾ ಜಗತಾಂ ಸವಿತ್ರೀ ॥ ೨-೭೮॥
ತತಃ ಕರೈಸ್ತಾಮರಸಪ್ರಕಾಶೈಃ ಸಾ ಮನ್ದಮಾನ್ದೋಲಿತಶಸ್ತ್ರಜಾಲಾ ।
ವಿಲೋಕ್ಯ ತಂ ವಿಹ್ವಲಚಿತ್ತವೃತ್ತಿಂ ಜಗಾದ ವಾಚಂ ಜಗದೇಕಮಾತಾ ॥ ೨-೭೯॥
ತ್ವಮಗ್ರಹೀರ್ಮಚ್ಚರಣೌ ರುಷಾಽಪಿ ಪ್ರಾಯಃ ಫಲಂ ತಸ್ಯ ನ ಹನ್ಮಿ ಯತ್ತ್ವಾಮ್ ।
ಜಾತಃ ಪೃಥಿವ್ಯಾಂ ತವ ಜಾಲ್ಮ ಹನ್ತಾ ಸದ್ಯೋ ಹಿತಂ ಚಿನ್ತಯ ಸಾಧಯಾಮಿ ॥ ೨-೮೦॥
ಇತಿ ನೃಪಮಭಿಧಾಯ ಜ್ಯೋತಿಷಾ ಕುರ್ವತೀ ಸಾ ತಡಿದಿವ ನಯನಾನಿ ಪ್ರಾಣಿನಾಮಾಕುಲಾನಿ ।
ಸುರಯುವತಿಭಿರುಚ್ಚೈರ್ಗೀಯಮಾನಾಪದಾನಾ ಸುರಪದಮಭಿಪೇದೇ ಪಾಟಿತಾಭ್ರಾ ಜವೇನ ॥ ೨-೮೧॥
ಶ್ರುತ್ವಾ ತಸ್ಯಾ ಶ್ರವಣಪರುಷಾಂ ವಾಚಮನ್ತರ್ವಿಷಣ್ಣಃ
ಪುತ್ರಾಪಾಯವ್ಯಥಿತಮನಸಂ ಸಾನ್ತ್ವಯಿತ್ವಾ ಸ್ವಸಾರಮ್ ।
ಪದ್ಭ್ಯಾಮೇವ ಸ್ವಭವನಮಥ ಪ್ರಾಪ್ಯ ಕೃಚ್ಛ್ರಾದನೈಷೀತ್
ಕಂಸಶ್ಚಿನ್ತಾಕುಲಿತಹೃದಯೋ ಜಾಗ್ರದೇವ ತ್ರಿಯಾಮಾಮ್ ॥ ೨-೮೨॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ದ್ವಿತೀಯಾಸ್ಸರ್ಗಃ ॥ ೨ ॥
ತೃತೀಯಃ ಸರ್ಗಃ
ಪ್ರಾತಃ ಪ್ರಲಮ್ಬಪ್ರಮುಖಾನಮಾತ್ಯಾನ್ ಸರ್ವಾನ್ ಸಮಾಹೂಯ ಸ ಭೋಜರಾಜಃ ।
ಸವಿಭ್ರಮಪ್ರೇರಿತದೃಷ್ಟಿದತ್ತೇ ಸ್ಥಾನೇ ನಿಷಣ್ಣಾನವದದ್ವಿನೀತಃ ॥ ೩-೦೧॥
ಸನ್ದಿಹ್ಯ ಮೋಹಾದ್ವಸುದೇವವಾಕ್ಯಂ ಮಯಾ ಪ್ರಮಾಣೀಕೃತಭೂತವಾಚಾ ।
ಹತಾ ನೃಶಂಸೇನ ಸುತಾ ಭಗಿನ್ಯಾಸ್ತೇನಾವಿಲಂ ಮೇ ಹೃದಯಂ ಯಶೋಽಪಿ ॥ ೩-೦೨॥
ಜಾತಾಂ ಪುನಃ ಕಾಞ್ಚನಕಾಞ್ಚನಾಭಾಂ ಸುತಾಂ ಗತಾಯುರ್ನ್ನಿಶಿ ಹನ್ತುಮೈಚ್ಛಮ್ ।
ಉತ್ಪ್ಲುತ್ಯ ಸಾ ವ್ಯೋಮ್ನಿ ಜವಾದತಿಷ್ಠತ್ ಶಸ್ತ್ರೋತ್ಕಟಾ ದರ್ಶಿತದಿವ್ಯರೂಪಾ ॥ ೩-೦೩॥
ನಿಯಮ್ಯ ಸಾ ಮಾತುಲ ಇತ್ಯಮರ್ಷಂ ಪ್ರಸೇದುಷೀ ಮಾಮವದಚ್ಚ ಬಾಲಾ ।
ಅರಿರ್ಮಹೀಯಾನಜನಿಷ್ಟ ಭೂಮೌ ತವೋಚಿತಂ ಸಮ್ಪ್ರತಿ ಚಿನ್ತಯೇತಿ ॥ ೩-೦೪॥
ವ್ಯಾಹೃತ್ಯ ಮಾಂ ದ್ಯಾಂ ಪ್ರತಿ ದೇವನಾರೀಗಣೈರ್ಗತಾಯಾಮಿತಿ ಸೇವಿತಾಯಾಮ್ ।
ದೇವ್ಯಾಮಹಂ ದುಶ್ಚರಿತಂ ಸ್ವಮೇವ ಸ್ಮರನ್ ವಿನಿದ್ರೋ ರಜನೀಮನೈಷಮ್ ॥ ೩-೦೫॥
ಯುದ್ಧೇಷು ದೇವಾ ಪುರುಹೂತಮುಖ್ಯಾಃ ಭಗ್ನಾ ಮಯಾ ಸ್ಥಾತುಮಶಕ್ನುವನ್ತಃ ।
ಅಶ್ವಾನ್ ಪರಿತ್ಯಜ್ಯ ವಿಮುಚ್ಯ ನಾಗಾನ್ ಮುಕ್ತ್ವಾ ಚ ಶಸ್ತ್ರಾಣಿ ದಿಶೋ ದ್ರವನ್ತಿ ॥ ೩-೦೬॥
ತದೇಷು ನೈಕೋಽಪಿ ಭುವಂ ಗತೋ ಮೇ ಶಕ್ನೋತಿ ಕರ್ತುಂ ಪ್ರತಿಕೂಲಭಾವಮ್ ।
ಮಹೀಯಸಃ ಕಿಂ ಘಟತೇ ಪರಾಗಃ ಸಮೀರಣಸ್ಯಾಭಿಮುಖಂ ಪ್ರಸಕ್ತುಮ್ ॥ ೩-೦೭॥
ಕಿಮನ್ಯದಾರ್ತಾಭ್ಯವಪತ್ತಿಕಾಮಃ ಸುರೇಷು ಸನ್ದರ್ಶಿತಪಕ್ಷಪಾತಃ ।
ಅಜಾಯತೋರ್ವ್ಯಾಮಸುರಾನ್ನಿಹನ್ತುಂ ಸ ಏವ ಮನ್ಯೇ ಸರಸೀರುಹಾಕ್ಷಃ ॥ ೩-೦೮॥
ಸರ್ವೇ ವಯಂ ದೈತ್ಯಕುಲಪ್ರಸೂತಾಃ ಕೇನಾಪಿ ಜಾತಾ ಭುವಿ ಕಾರಣೇನ ।
ಸ ತೇನ ಸನ್ನಹ್ಯತಿ ಜೇತುಮಸ್ಮಾನುಕ್ತೋಽಯಮರ್ಥಃ ಕಿಲ ನಾರದೇನ ॥ ೩-೦೯॥
ಅತಸ್ತದುಚ್ಛೇದವಿಧೌ ವಿನಿದ್ರಾಃ ಯತಧ್ವಮದ್ಯೈವ ಬಲಾನುರೂಪಮ್ ।
ನಖಾಗ್ರಲಾವ್ಯಸ್ತರುರಙ್ಕುರಾತ್ಮಾ ಪರಶ್ವಧಸ್ಯಾಪಿ ತತೋಽತಿಭೂಮಿಃ ॥ ೩-೧೦॥
ಯಸ್ಮಿನ್ ಭವತ್ಯಾಶ್ರಿತವತ್ಸಲತ್ವಂ ವಿಪ್ರೇಷು ಯಸ್ಯಾಸ್ತಿ ವಿಶೇಷಸಙ್ಗಃ ।
ಮನೋಹರಂ ಯಶ್ಚ ಬಿಭರ್ತಿ ರೂಪಂ ವಧಂ ಸ ಬಾಲೋಽರ್ಹತಿ ಮತ್ಸಕಾಶಾತ್ ॥ ೩-೧೧॥
ಮಖಾಶ್ಚ ತತ್ಪ್ರೀತಿಕೃತೋ ನಿವಾರ್ಯಾಃ ನಿವಾರಣೀಯಾ ಶ್ರುತಿರಗ್ರಿಮಾಽಪಿ ।
ತೃಣೀಕೃತಾಶೇಷಜನಪ್ರಭಾವಾ ಸಂಸ್ಥೌತಿ ಯಾ ತನ್ಮಹಿಮಾನಮೇವ ॥ ೩-೧೨॥
ಗತೇ ವಿರಾಮಂ ಗರುಡಧ್ವಜೇಽಸ್ಮಿನ್ ಮಖೇಷು ಸರ್ವತ್ರ ನಿವಾರಿತೇಷು ।
ಸುರೇಷು ಸರ್ವೇಷ್ವಪಿ ದುರ್ಬಲೇಷು ಹಸ್ತೇ ಭವಿಷ್ಯತ್ಯಮರಾವತೀ ನಃ ॥ ೩-೧೩॥
ಇತ್ಯೂಚುಷಸ್ತಸ್ಯ ಪದೋಪಕಣ್ಠಂ ನೀರಾಜಯನ್ತೋ ಮಕುಟಪ್ರಭಾಭಿಃ ।
ಅವಾದಿಷುರ್ವಿಕ್ರಮದರ್ಪಿತಾಸ್ತೇ ಕೃತಾಟ್ಟಹಾಸಧ್ವನಿಕಮ್ಪಿತಾಶಾಃ ॥ ೩-೧೪॥
ಕಿಂ ಚಿನ್ತಯಾ ಪಾರ್ಥಿವ ಭುಙ್ಕ್ಷ್ವ ಭೋಗಾನಸ್ಮಾಸು ಜೀವತ್ಸು ಕುತೋ ರಿಪುಸ್ತೇ ।
ಕಥಂ ಮಯೂಖೇಷು ಪರಿಸ್ಫುರತ್ಸು ಸರೋಜಬನ್ಧೋಸ್ತಮಸಾಭಿಭೂತಿಃ ॥ ೩-೧೫॥
ಅಮಾತರಿಶ್ವಾನಮಹವ್ಯವಾಹಂ ಅಸೂರ್ಯಶೀತಾಂಶುಮವಜ್ರಪಾಣಿಮ್ ।
ಅನಚ್ಯುತೇಶಾನಪಿತಾಮಹಂ ಚ ದ್ರಷ್ಟಾಸಿ ರಾಜನ್ನಚಿರೇಣ ಲೋಕಮ್ ॥ ೩-೧೬॥
ಇತ್ಯೂಚುಷಸ್ತಾನುಚಿತೋಪಹಾರೈಃ ಸಮ್ಭಾವ್ಯ ಕೃತ್ಯೇಷು ಸಮಾದಿದೇಶ ।
ಸ ದೇವಕೀಮಾನಕದುನ್ದುಭಿಂ ಚ ವಿಮೋಚಯಾಮಾಸ ಚ ಬನ್ಧನಸ್ಥೌ ॥ ೩-೧೭॥
ಲಬ್ಧ್ವಾ ನಿಧಾನಂ ನ ತಥಾ ದರಿದ್ರೋ ಗತಿಂ ಸಮಾಸಾದ್ಯ ತಥಾ ನ ಪಙ್ಗುಃ ।
ತಥಾ ನ ಚಾನ್ಧೋ ದೃಶಮಾಪ್ಯ ಹೃಷ್ಯೇದ್ಯಥಾಪ್ತಪುತ್ರಃ ಸ ಜಹರ್ಷ ನನ್ದಃ ॥ ೩-೧೮॥
ತಪನೇ ಚರಮಾಚಲಂ ಪ್ರಪನ್ನೇ ತಮಸಾ ಚ ಸ್ಥಗಿತೇಷು ದಿಙ್ಮುಖೇಷು ।
ಯಮುನಾತಟವಾಸಿನಂ ತಮೂಚೇ ವಸುದೇವಃ ಪ್ರತಿಪದ್ಯ ನನ್ದಗೋಪಂ ॥ ೩-೧೯॥
ತಪಸಾ ತವ ನನ್ದಗೋಪ ಮನ್ಯೇ ಫಲಿತಂ ಜನ್ಮಸಹಸ್ರಸಞ್ಚಿತೇನ ।
ಋಣಮನ್ತ್ಯಮಪೋಹಿತುಂ ತ್ವದೀಯಂ ಯದಯಂ ಪುತ್ರನಿಧಿಃ ಸಮಾವಿರಾಸೀತ್ ॥ ೩-೨೦॥
ಇಹ ಖೇಲತಿ ಪೂತನೇತಿ ಕೃತ್ಯಾ ಶಿಶುಹತ್ಯಾನಿರತಾ ಪುರೋಪಕಣ್ಠೇ ।
ತದಹರ್ನ್ನಿಶಮತ್ರ ರಕ್ಷಣೀಯೋ ನಯನಾನನ್ದಕರಃ ಸುತಸ್ತ್ವಯಾಽಯಂ ॥ ೩-೨೧॥
ಅಥವಾ ಕಿಮಿವಾಸ್ಯತೇ ತ್ವಯಾಸ್ಮಿನ್ನಿಜಮುತ್ಸೃಜ್ಯ ಪದಂ ಪುರೋಪಕಣ್ಠೇ ।
ಸವಿಧೇ ನ ವಸನ್ತಿ ಬುದ್ಧಿಮನ್ತೋ ಫಣಿನೋ ವಾಯುಸಖಸ್ಯ ಭೂಪತೇಶ್ಚ ॥ ೩-೨೨॥
ಪ್ರತಿವೇದಿ ನಿವಿಷ್ಟಪೂರ್ಣಕುಮ್ಭಂ ವಿಲಸತ್ತೋರಣಮುಜ್ಜ್ವಲಪ್ರದೀಪಮ್ ।
ವ್ರಜ ಗೋಕುಲಮಾಕುಲಂ ಪ್ರಜಾಭೀಭವದೀಯಾಗಮನಪ್ರಹರ್ಷಿಣೀಭಿಃ ॥ ೩-೨೩॥
ಶಿಶುರಸ್ತಿ ಮಮಾಪಿ ರೌಹಿಣೇಯೋ ಭವದೀಯೇ ವಿಷಯೇ ವಿವರ್ಧಮಾನಃ ।
ಸ ಚ ಸಾಧು ನಿರೀಕ್ಷ್ಯ ರಕ್ಷಿತವ್ಯೋ ವಪುಷಾ ಕೇವಲಮಾವಯೋರ್ಹಿ ಭೇದಃ ॥ ೩-೨೪॥
ಇತ್ಯುಕ್ತ್ವಾ ಗತವತಿ ದೇವಕೀಸಹಾಯೇ ಸಂತ್ರಸ್ತಃ ಕಥಮಪಿ ನೀತರಾತ್ರಿಶೇಷಃ ।
ಆರೋಹತ್ಯುದಯಮಹೀಧರಸ್ಯ ಶೃಙ್ಗಂ ತಿಗ್ಮಾಂಶೌ ನಿಜವಸತಿಂ ಪ್ರತಿ ಪ್ರತಸ್ಥೇ ॥ ೩-೨೫॥
ಸಚಕಿತಮೃಗಮಣ್ಡಲಾನಿ ಕುರ್ವನ್ ಶಕಟಶತಧ್ವನಿಭಿರ್ವನಾನ್ತರಾಣಿ ।
ಪ್ರಮುದಿತಮಥ ಗೋಕುಲಂ ಪ್ರಪೇದೇ ದಿಶಿ ದಿಶಿ ಮಾರುತಧೂತಕೇತುಮಾಲಮ್ ॥ ೩-೨೬॥
ನಿಜವಸತಿಮಭಿಪ್ರಪದ್ಯ ತುಷ್ಟಃ ಕಿಮಪಿ ನ ಕರ್ಮ ಕರೋತಿ ನನ್ದಗೋಪಃ ।
ನವನಲಿನಪಲಾಶಚಾರುನೇತ್ರಂ ವದನಮಹರ್ನ್ನಿಶಮಾತ್ಮಜಸ್ಯ ಪಶ್ಯನ್ ॥ ೩-೨೭॥
ಮುಗ್ಧಭಾವಮಧುರೇಣ ರಞ್ಜಯನ್ ಶೈಶವೇನ ಹೃದಯಂ ವ್ರಜೌಕಸಾಮ್ ।
ಗೋಕುಲೇ ಸ ವಿಜಹಾರ ಕೇಶವಃ ಕ್ಷೀರವಾರಿನಿಧಿಮಪ್ಯಚಿನ್ತಯನ್ ॥ ೩-೨೮॥
ವದನಂ ಮಧುಸೂದನಃ ಕರಾಭ್ಯಾಂ ಚರಣಾಙ್ಗುಷ್ಠಮುಪಾನಯತ್ ಪಿಪಾಸುಃ ।
ಗಲಿತೇವ ತತಸ್ಸುರಸ್ರವನ್ತೀ ನಖಮುಕ್ತಾಮಣಿದೀಧಿತಿಚ್ಛಲೇನ ॥ ೩-೨೯॥
ಅಮೃತಾಂಶುರಿವಾಪರಃ ಪ್ರಮೋದಂ ನಯನಾನಾಂ ಜನಯನ್ ಸ ಪದ್ಮನಾಭಃ ।
ಭವನಂ ಭವನಾತ್ ಕರೌ ಕರಾಭ್ಯಾಂ ವ್ರಜಯೋಷಿದ್ಭಿರನೀಯತಾಙ್ಕಮಙ್ಕಾತ್ ॥ ೩-೩೦॥
ಅಧಃ ಕದಾಚಿಚ್ಛಕಟಸ್ಯ ಶಾಯಿತಃ ಸ್ವಕಾರ್ಯಪರ್ಯಾಕುಲಯಾ ಯಶೋದಯಾ ।
ಸ ಲೀಲಯಾ ಪಾದಸರೋರುಹಂ ಶನೈರುದಞ್ಚಯಾಮಾಸ ಸರೋಜಲೋಚನಃ ॥ ೩-೩೧॥
ಮಧುಭಿದಶ್ಚರಣಾಮ್ಬುಜತಾಡಿತಂ ಶಕಟಮಾಶು ಸಮುತ್ಥಿತಮಮ್ಬರೇ ।
ವಿಪರಿವೃತ್ಯ ಪಪಾತ ಮಹೀತಲೇ ಪಟುತರಧ್ವನಿಪೂರಿತದಿಙ್ಮುಖಮ್ ॥ ೩-೩೨॥
ಶಕಟಪತನಜನ್ಮ ನನ್ದಮುಖ್ಯಾಃ ಸ್ತನಿತಮಿವ ಧ್ವನಿತಂ ನಿಶಮ್ಯ ಗೋಪಾಃ ।
ಕಿಮಿದಮಿತಿ ಭಯೇನ ತತ್ರ ಜಗ್ಮುಸ್ತ್ವರಿತಗತಿಚ್ಯವಮಾನಕೇಶಬನ್ಧಾಃ ॥ ೩-೩೩॥
ಕುಚಕಲಶವಿಲಗ್ನಪಾಣಿಪದ್ಮಾ ವಿಗಲಿತಬನ್ಧಮನೋಜ್ಞಕೇಶಪಾಶಾ ।
ಸಪದಿ ಸಹ ಸಖೀಭಿರನ್ವಧಾವತ್ ಕಲಮಣಿನೂಪುರಶಿಞ್ಜಿತಾ ಯಶೋದಾ ॥ ೩-೩೪॥
ಕೃತಸ್ಮಿತಂ ಕ್ವಚಿದಪರಿಕ್ಷತಂ ಸುತಂ ವಿಲೋಕ್ಯ ತಂ ಪ್ರಮುದಿತಮಾನಸಾ ಪರಮ್ ।
ವ್ರಜೌಕಸಾಂ ಸವಿಧನಿವಾಸಿನಾಂ ಮುಖಾದ್ವಿಸಿಸ್ಮಿಯೇ ವಿದಿತತದೀಯವಿಕ್ರಮಾ ॥ ೩-೩೫॥
ಸ್ರುತಶೋಣಿತಮೇವ ಮನ್ಯಮಾನಾ ಚರಣಂ ತಸ್ಯ ನಿಸರ್ಗಪಾಟಲಂ ತತ್ ।
ಉದಮಾರ್ಜಯದಂಶುಕಾಞ್ಚಲೇನ ದ್ರುತಮಾಗತ್ಯ ಪುನಃ ಪುನರ್ಯಶೋದಾ ॥ ೩-೩೬॥
ತಿಲಕಂ ಮಧುವಿದ್ವಿಷೋ ಲಲಾಟೇ ರಜಸಾ ಗೋಮಯಜನ್ಮನಾ ವಿಧಾಯ ।
ಉರಸಾ ಪರಿರಭ್ಯ ನನ್ದಗೋಪಃ ಸುಚಿರಂ ತಸ್ಯ ಸುಮಙ್ಗಲಾನಿ ದಧ್ಯೌ ॥ ೩-೩೭॥
ಶಕಟಂ ಮಧುಸೂದನಸ್ಯ ದೃಷ್ಟ್ವಾ ಚರಣೋದಞ್ಚನವಿಭ್ರಮೇಣ ಭಗ್ನಮ್ ।
ಅಥ ವಾರಿನಿಧೇರ್ವಿವೇಶ ಗರ್ಭಂ ಸ್ವರಥಸ್ಯಾಪಿ ವಿಶಙ್ಕ್ಯ ಭಙ್ಗಮರ್ಕಃ ॥ ೩-೩೮॥
ಪರಿತಃಸ್ಫುರತಾ ನವೇನ ಸನ್ಧ್ಯಾಮಹಸಾ ಪಲ್ಲವಪಾಟಲೇನ ಲಿಪ್ತಾಃ ।
ಪತಿತಾ ಇವ ಪಾವಕೇ ವಿರೇಜುಃ ಕಕುಭೋ ದುಸ್ಸಹಭಾನುವಿಪ್ರಯೋಗಾತ್ ॥ ೩-೩೯॥
ಕ್ಷುಭಿತಶ್ಚಿರಮಮ್ಬರಾಮ್ಬುರಾಶಿಃ ತಪನಸ್ಯನ್ದನವಾಹನಾವಗಾಹಾತ್ ।
ಸ್ಫುರದುದ್ಭಟತಾರಕಾಪದೇಶಾತ್ ಸಹಸಾಽಽಕೀರ್ಯತ ಫೇನಮಣ್ಡಲೇನ ॥ ೩-೪೦॥
ಅಹಿಮರುಚಿ ರಸಾತಲಂ ಪ್ರವಿಷ್ಟೇ ಭಯಚಕಿತಃ ಸ್ವವಿನಾಶಮಾಕಲಯ್ಯ ।
ತತ ಇವ ತರಸೋತ್ಪತನ್ನಸೀಮಾ ತಿಮಿರಭರಃ ಪೃಥಿವೀತಲಂ ಪ್ರಪೇದೇ ॥ ೩-೪೧॥
ಭೂರನ್ತರಿಕ್ಷಂ ಭವನಾನಿ ರಥ್ಯಾಃ ವನಾನಿ ಶೈಲಾಸ್ಸರಿತಸ್ಸಮುದ್ರಾಃ ।
ಧ್ವಾನ್ತೇ ದಿಶಾಂ ರುನ್ಧತಿ ಚಕ್ರವಾಲಂ ವ್ಯಕ್ತಂ ನ ಕೇನಾಪಿ ಕಿಮಪ್ಯವೇದಿ ॥ ೩-೪೨॥
ಅಥ ಪ್ರಯಾತಿ ಪ್ರಹರೇ ಯಶೋದಾ ಜನೇ ಚ ಕಿಞ್ಚಿನ್ನಿಭೃತೇ ಸನಿದ್ರೇ ।
ಪುತ್ರಂ ಪಯಃಪಾನಗುರುಪ್ರಮೋದಂ ಪ್ರಸ್ವಾಪಯನ್ತೀ ಕಲಮಿತ್ಯಗಾಯತ್ ॥ ೩-೪೩॥
ಕುನ್ದತ್ವಿಷಸ್ತಾಲಫಲಪ್ರಕಾಶಾಃ ತಾಪಿಞ್ಛವರ್ಣಾಸ್ತರುಣಾರ್ಕಭಾಸಾಃ ।
ಪ್ರಭೂತದುಗ್ಧಾ ನವನೀತವತ್ಯೋ ಗಾವಸ್ಸಹಸ್ರಂ ತನಯ ತ್ವದೀಯಾಃ ॥ ೩-೪೪॥
ಪ್ರಿಯಾಲಖರ್ಜೂರಸಮಗ್ರಸಾನುಃ ಫಲಾಢ್ಯರಮ್ಭಾವನಶೋಭನೀಯಃ ।
ನನೂಪಭೋಗಾಯ ಸುತಾಯಮಾಸ್ತೇ ಗೋವರ್ಧನೋ ನಾಮ ಮಹೀಧರಸ್ತೇ ॥ ೩-೪೫॥
ಸರಸಿರುಹವನೇ ಗತೇಽಪಿ ನಿದ್ರಾಂ ಕಥಮಿವ ತೇ ನಯನಾಮ್ಬುಜೇ ವಿನಿದ್ರೇ ।
ಶ್ರುತಿಪರಿಚಯಶಾಲಿನೋ ಹಿ ಕರ್ಮ ಸ್ವಜನನಿಷೇವಿತಮೇವ ಸಂಶ್ರಯನ್ತೇ ॥ ೩-೪೬॥
ತದ್ಧ್ವನಿಶ್ರವಣಜಾತಕೌತುಕಾ ಬಾಲಜೀವಿತವಿಲೋಪವಿಶ್ರುತಾ ।
ಆಜಗಾಮ ಗಗನೇನ ಪೂತನಾ ಯಾತನಾ ತನುಮತೀವ ದೇಹಿನಾಂ ॥ ೩-೪೭॥
ಸಾಽವತೀರ್ಯ ನಭಸೋ ನಿಶಾಚರೀ ಗೂಢಮೇವ ನಿಷಸಾದ ಕುತ್ರಚಿತ್ ।
ಸಾ ಚ ಸುಪ್ತ ಇವ ವೀಕ್ಷಿತೇ ಸುತೇ ಸ್ವಾಪಮಾಪ ಸರಸೀರುಹೇಕ್ಷಣಾ ॥ ೩-೪೮॥
ಕೃಷ್ಣಮಙ್ಕಮಧಿರೋಪ್ಯ ನಿರ್ದಯಾ ದಾತುಮಾರಭತ ಪೂತನಾ ಸ್ತನಮ್ ।
ಯತ್ಪಯೋಧರಮುಖೇ ಮುಖಾರ್ಪಣಾದಾಯುಷಾ ಶಿಶುಜನೋ ವಿಯುಜ್ಯತೇ ॥ ೩-೪೯॥
ಪಾಞ್ಚಜನ್ಯಮಿವ ಪೂತನಾಸ್ತನಂ ಪಾಣಿಪಲ್ಲವಯುಗೇನ ಪೀಡಯನ್ ।
ಆನನೇನ ಮಧುಶತ್ರುರಾನ್ತರಾನಾದದೇ ಸ ತು ತತಸ್ಸಮೀರಣಾನ್ ॥ ೩-೫೦॥
ವಿಪ್ರಕೀರ್ಣಕಚಬಾಲಪಲ್ಲವಾ ಭಗ್ನಬಾಹುವಿಟಪಾ ನಿಶಾಚರೀ ।
ಸಾ ಪಪಾತ ಭುವಿ ಘೋರನಿಃಸ್ವನಾ ಮಾರುತಾಹತಮಹೀರುಹೋಪಮಾ ॥ ೩-೫೧॥
ಝಟಿತಿ ವ್ಯಪನೀತಗಾಢನಿದ್ರೋ ಮಹತಾ ತೇನ ರವೇಣ ಪೂತನಾಯಾಃ ।
ಪ್ರತಿಪತ್ತುಮಿಯಾಯ ತಾಂ ಪ್ರವೃತ್ತಿಂ ಸಹ ಗೋಪಾಲಗಣೇನ ನನ್ದಗೋಪಃ ॥ ೩-೫೨॥
ತಸ್ಯಾಶ್ಶರೀರಮಧಿರುಹ್ಯ ವಿಚೇತನಾಯಾಃ
ಕ್ರೀಡನ್ತಮಮ್ಬುರುಹಲೋಚನಮೀಕ್ಷಮಾಣಾಃ ।
ತಸ್ಥುಸ್ಸಮುನ್ಮಿಷಿತವಿಸ್ಮಯನಿರ್ವಿಕಾರಾಃ
ನಾಸಾಧಿರೋಪಿತಕರಾಙ್ಗುಲಯೋ ಮುಹೂರ್ತಮ್ ॥ ೩-೫೩॥
ನನ್ದಃ ಪ್ರಮೃಜ್ಯ ನಯನೇ ಮುಹುರಶ್ರುಪೂರ್ಣೇ
ಪುತ್ರಂ ಕೃತಾನ್ತಮುಖನಿರ್ಗಲಿತಂ ನಿದಧ್ಯೌ ।
ದಧ್ಯೌ ಚ ತಸ್ಯ ನಿತರಾಮಭಿವೃದ್ಧಿಕಾಮಃ
ತತ್ತ್ವಂ ಪರಂ ಸ ಹೃದಯೇನ ಸಮಾಹಿತೇನ ॥ ೩-೫೪॥
ಶ್ಯಾಮಲಃ ಕಮಲಪತ್ರಲೋಚನೋ ನೀಲಕುನ್ತಲಭರಃ ಶುಚಿಸ್ಮಿತಃ ।
ಧ್ಯಾಯತೋ ಮನಸಿ ತಸ್ಯ ಸನ್ನಿಧಿಂ ಪುತ್ರ ಏವ ವಿದಧೇ ಪುನಃ ಪುನಃ ॥ ೩-೫೫॥
ನ ಕ್ಷಮಂ ಭವತಿ ಪುತ್ರವಾಸನಾನಿಸ್ತರಂ ಹೃದಯಮಚ್ಯುತಸ್ಮೃತೌ ।
ಇತ್ಯಶೇಷದುರಿತಾಪಹಾರಿಣೀರಗ್ರಜನ್ಮಭಿರಕಾರಯತ್ ಕ್ರಿಯಾಃ ॥ ೩-೫೬॥
ಪೂತನಾಚರಿತಭಾವನಾಭವಂ ದಾರುಣಂ ಹೃದಯದಾರಣಂ ಪಿತುಃ ।
ಶ್ರೀಪತಿಃ ಶಮಯತಿ ಸ್ಮ ವೈಶಸಂ ಕ್ರೀಡಿತೈರಖಿಲಲೋಕಮೋಹನೈಃ ॥ ೩-೫೭॥
ಸ ಲೋಚನೇ ಕಿಞ್ಚಿದುಪಾನ್ತಘೂರ್ಣಿತೇ ನಿಧಾಯ ಮಾತುರ್ವದನೇ ಶುಚಿಸ್ಮಿತಃ ।
ಪಯೋಧರಂ ಪಾಣಿಯುಗಾವಲಮ್ಬಿತಂ ಮನಶ್ಚ ತಸ್ಯಾ ಮಧುಸೂದನಃ ಪಪೌ ॥ ೩-೫೮॥
ಪಾಣಿಜಾನುಪರಿಚಙ್ಕ್ರಮಶ್ರಮಸ್ವೇದಬಿನ್ದುಮಧುರಂ ಮುಖಂ ವಹನ್ ।
ಧೂಸರೇಣ ವಪುಷಾ ಜನಾರ್ದನೋ ಗೋಕುಲಂ ನಿಖಿಲಮನ್ವರಞ್ಜಯತ್ ॥ ೩-೫೯॥
ಪರಿಭ್ರಮನ್ತಂ ಭುವಿ ಪಾಣಿಜಾನುನಾ ಗವಾಮಧಸ್ತಾತ್ಪ್ರವಿಶನ್ತಮೇಕದಾ ।
ಸುತಂ ಯಶೋದಾ ಗೃಹಕೃತ್ಯತತ್ಪರಾ ಬಬನ್ಧ ಪಾಶೇನ ಬಲಾದುಲೂಖಲೇ ॥ ೩-೬೦॥
ಜನೋ ಹಿ ಯಃ ಕರ್ಮ ಕರೋತಿ ಯಾದೃಶಂ ಸ ಸರ್ವಥಾ ತಾದೃಶಮಶ್ನುತೇ ಫಲಮ್ ।
ಬಲಿಃ ಪುರಾಽಬಧ್ಯತ ಯೇನ ದಾನವಃ ಸ ಲೋಕನಾಥೋಽಪಿ ತದಾಪ ಬನ್ಧನಮ್ ॥ ೩-೬೧॥
ನಿಖಿಲಭುವನಮುಕ್ತಿದೇ ಮುರಾರೌ ಭಗವತಿ ಗಾಢಮುಲೂಖಲೇ ನಿಬದ್ಧೇ ।
ಪರಿಶಿಥಿಲಸಮಾಧಿರಾವಿರಾಸೀನ್ಮನಸಿ ಮಹಾಮುನಿಮಣ್ಡಲಸ್ಯ ಹಾಸಃ ॥ ೩-೬೨॥
ನಿಷೀದ ಲೋಲೇತಿ ನಿಬಧ್ಯ ಸಸ್ಮಿತಂ ಚಕಾರ ಕಾರ್ಯಾಣಿ ಚಕೋರಲೋಚನಾ ।
ಅನಾದರೇಣ ಭ್ರಮಯನ್ನುಲೂಖಲಂ ವಿನಿರ್ಯಯೌ ವಿಶ್ವಪತಿಃ ಸ್ವಮನ್ದಿರಾತ್ ॥ ೩-೬೩॥
ಉಪೇಯಿವಾಂಸೌ ಕಕುಭದ್ರುಮಾತ್ಮತಾಂ ಮಹೀಯಸಾ ನಾರದಶಾಪತೇಜಸಾ ।
ಅತಿಷ್ಠತಾಮಧ್ವನಿ ಕೈಟಭದ್ವಿಷಃ ಕುಬೇರಪುತ್ರೌ ತರಸೈವ ರಿಙ್ಖತಃ ॥ ೩-೬೪॥
ಸ ಸನ್ನಿಕೃಷ್ಯ ಸ್ಥಿತಯೋಃ ಪರಸ್ಪರಂ ಮಹೀರುಹೋರ್ಮಧ್ಯಪಥೇನ ನಿಸ್ಸರನ್ ।
ಗತೇನ ತಿರ್ಯಕ್ತ್ವಮುಲೂಖಲೇನ ತೌ ಬಭಞ್ಜ ದಾಮೋದರಗನ್ಧವಾರಣಃ ॥ ೩-೬೫॥
ಪ್ರಪದ್ಯ ದಿವ್ಯಂ ವಪುರಮ್ಬರಸ್ಥಿತೌ ವಿಮುಕ್ತಶಾಪೌ ಧನದಾತ್ಮಜಾವುಭೌ ।
ಪ್ರಣಮ್ಯ ಭಕ್ತ್ಯಾ ಪುರುಷಂ ಪುರಾತನಂ ಮುದಾನ್ವಿತೌ ಜಗ್ಮತುರನ್ತಿಕಂ ಪಿತುಃ ॥ ೩-೬೬॥
ನನ್ದಾದಯಃ ಸಪದಿ ಗೋಕುಲವಾಸಿನಸ್ತೇ
ತದ್ಭಙ್ಗಜನ್ಮ ಸುಮಹದ್ಧ್ವನಿತಂ ನಿಶಮ್ಯ ।
ಅಭ್ಯೇತ್ಯ ಭಗ್ನಪತಿತೌ ಕಕುಭದ್ರುಮೌ ತೌ
ತತ್ರಾಕ್ಷತಂ ಚ ದದೃಶುಸ್ಸರಸೀರುಹಾಕ್ಷಂ ॥ ೩-೬೭॥
ನನ್ದಃ ಸಮೀಕ್ಷ್ಯ ದುರಿತಾನಿ ಬಹೂನಿ ಸದ್ಭ್ಯಃ
ದತ್ವಾ ಗವಾಮಯುತಮಾತ್ಮಸುತಾಭಿವೃದ್ಧ್ಯೈ ।
ಸಮ್ಮನ್ತ್ರ್ಯ ಬನ್ಧುಭಿರಪಾಸ್ಯ ಪದಂ ತದಾಶು
ವೃನ್ದಾವನಂ ಪ್ರತಿ ಯಯೌ ಶಕಟೈರಸಙ್ಖ್ಯೈಃ ॥ ೩-೬೮॥
ಗತ್ವಾ ಸ ಗೋಕುಲಪತಿರ್ಮನಸೋಽನುಕೂಲೇ
ಕೂಲೇ ಕಲಿನ್ದದುಹಿತುರ್ನಿದಧೇ ಪದಾನಿ ।
ರೇಮೇ ಚ ತತ್ರ ಪುರುಹೂತಪದಾಭಿರಾಮೇ
ಲೀಲಾಯಿತಾನಿ ತನಯಸ್ಯ ನಿರೀಕ್ಷ್ಯಮಾಣಃ ॥ ೩-೬೯॥
ದಧಿನಿರ್ಮಥನೇ ನಿರುದ್ಯಮಾ ಸಾ ನವನೀತಶ್ರಪಣೇ ಗವಾಂ ಚ ದೋಹೇ ।
ಸುತಕೇಲಿಹೃತೇಕ್ಷಣಾ ಯಶೋದಾ ಕ್ಷಣಕಲ್ಪಾನಿ ನಿನಾಯ ವಾಸರಾಣಿ ॥ ೩-೭೦॥
ಅನುಯಾತಿ ಜಿಘೃಕ್ಷಯೇವ ನನ್ದೇ ತರಸಾ ರಿಙ್ಖಣತತ್ಪರಸ್ಯ ವಿಷ್ಣೋಃ ।
ಲಲಿತಾಲಕವೇಲ್ಲಿತಾನಿ ರೇಜುರ್ಮುಖಮಾತ್ರೇಣ ಮುಹುರ್ನಿವರ್ತಿತಾನಿ ॥ ೩-೭೧॥
ಅನ್ತರಾ ವಿಹತಿಮದ್ಭಿರುತ್ಥಿತೈರಸ್ಫುಟಾಕ್ಷರಪದಾಭಿರುಕ್ತಿಭಿಃ ।
ಭಙ್ಗುರೈಶ್ಚ ಪರಿರಮ್ಭಣೋದ್ಯಮೈರ್ಗೋಕುಲಂ ನಿಖಿಲಮನ್ವರಞ್ಜಯತ್ ॥ ೩-೭೨॥
ಪಶ್ಯ ಮಾತುಲಮಿತಿ ಪ್ರದರ್ಶಿತಂ ಯಾಮಿನೀಷು ಗಗನೇ ಯಶೋದಯಾ ।
ಆಜುಹಾವ ಲಲಿತೇನ ಪಾಣಿನಾ ಶೀತಭಾನುಮರವಿನ್ದಲೋಚನಃ ॥ ೩-೭೩॥
ಆತ್ಮನಃ ಪ್ರತಿಕೃತಿಂ ವಿಲೋಕಯನ್ ಮಾತೃಹಸ್ತಮಣಿದರ್ಪಣೋದರೇ ।
ಏಹಿ ಮಿತ್ರ ಕಿಮಿಹೇತಿ ಕೌತುಕಾದ್ವ್ಯಾಜಹಾರ ಶತಪತ್ರಲೋಚನಃ ॥ ೩-೭೪॥
ಗೌರವಂ ಕಥಮಿಯಂ ಸಹೇತ ಮೇ ಮೇದಿನೀತಿ ಕೃಪಯೇವ ಚಿನ್ತಯನ್ ।
ಮಾಧವಃ ಪತನಭೀತಿಮುದ್ವಹನ್ ಮನ್ದಮೇವ ನಿದಧೇ ಪದಾವಲಿಂ ॥ ೩-೭೫॥
ದೇವೋ ನಿಶಾಸು ಹರಿರಙ್ಕಗತೋ ಜನನ್ಯಾಃ
ಶೃಣ್ವನ್ ಕಥಾ ಮಧುಮುಚೋ ಮಹತಾಽಽದರೇಣ ।
ಮನ್ದಂ ತದೀಯಕರಪಲ್ಲವತಾಡಿತೋರುಃ
ಸುಷ್ವಾಪ ಕುಡ್ಮಲಿತಲೋಚನಪುಣ್ಡರೀಕಃ ॥ ೩-೭೬॥
ಕೌತುಕೇನ ಪಿತುರಗ್ರತೋ ಹರೇರ್ಧಾವತಸ್ಖಲನಮೀಕ್ಷಮಾಣಯಾ ।
ಮೋದನಿಘ್ನಮನಸಾ ಸಲಜ್ಜಯಾ ನ ಸ್ಥಿತಂ ನ ಚಲಿತಂ ಯಶೋದಯಾ ॥ ೩-೭೭॥
ಮುಖಡಿಣ್ಡಿಮವಾದಿನಾ ಪರೀತೋ ಮಧುಜಿತ್ ಕೌತುಕಿನಾ ಸುಹೃದ್ಗಣೇನ ।
ಅಧಿರೋಪಿತವಾರಣೇನ್ದ್ರಭಾವೋ ಲಲಿತಾಭಿರ್ಗತಿಭಿರ್ಗೃಹೇಷು ರೇಮೇ ॥ ೩-೭೮॥
ಅಥಾಭಿವೃದ್ಧಿಂ ಪ್ರತಿಪದ್ಯಮಾನೋ ದಧ್ಯಾದಿಷು ಪ್ರೀತಿಮುವಾಹ ಶೌರಿಃ ।
ತತ್ತತ್ ಪ್ರದಾನೇನ ವಶೇ ವಿಧಾತುಮಾರೇಭಿರೇ ಗೋಕುಲಯೋಷಿತಸ್ತಮ್ ॥ ೩-೭೯॥
ಕುರುಷ್ವ ನೃತ್ತಂ ನವನೀತಮೂಲ್ಯಂ ಕೃಷ್ಣೇತಿ ಸಾಭ್ಯರ್ಥನಮೂಚಿಷೀಣಾಮ್ ।
ವ್ರಜಾಙ್ಗನಾನಾಂ ಸ ಪುರಸ್ಸಲೀಲಮುದಞ್ಚಯಾಮಾಸ ಪದಾರವಿನ್ದಮ್ ॥ ೩-೮೦॥
ತಾಸಾಂ ಮನಃಪ್ರೀತಿವಿಧಾನದಕ್ಷೇ ತಥಾ ಕ್ಷಣಂ ತಸ್ಥುಷಿ ಶಾರ್ಙ್ಗಪಾಣೌ ।
ಏಕಾಙ್ಘ್ರಿಸಂಸ್ಪರ್ಶವಿಯೋಗಮಾತ್ರಾದಧನ್ಯಮಾತ್ಮಾನಮಮನ್ಯತೋರ್ವೀ ॥ ೩-೮೧॥
ಉದಞ್ಚಿತಂ ತಸ್ಯ ವಿಲೋಕ್ಯ ಪಾದಂ ವೇಧಾ ಪುನರ್ವಿಕ್ರಮಶಙ್ಕಿಚೇತಾಃ ।
ಕಮಣ್ಡಲುಂ ಪಾಣಿತಲೇನ ಗೃಹ್ಣನ್ನಭ್ಯುದ್ಯತೋಽಭೂದವನೇಜನಾಯ ॥ ೩-೮೨॥
ನೃತ್ತಾಮೃತಂ ಗೋಕುಲಯೋಷಿತಸ್ತತ್ ಕೃಷ್ಣಸ್ಯ ನೇತ್ರಾಞ್ಜಲಿಭಿಃ ಪಿಬನ್ತ್ಯಃ ।
ಪ್ರೀತಿಪ್ರಕರ್ಷಸ್ತಿಮಿತೈರ್ಮನೋಭಿರಾಲೇಖ್ಯಯೋಷಿತ್ಪ್ರತಿಮಾ ಬಭೂವುಃ ॥ ೩-೮೩॥
ವಿದುರ್ನ ತದ್ದರ್ಶನಪಾರವಶ್ಯಾದ್ದಾತುಂ ಕರಸ್ಥಂ ನವನೀತಮೇಕಾಃ ।
ವಿಸ್ರಸ್ಯ ಭೂಮೌ ಪತಿತಂ ತದನ್ಯಾಃ ನ ಮೇನಿರೇ ಪಾಣಿಸರೋರುಹೇಭ್ಯಃ ॥ ೩-೮೪॥
ಅಜಸ್ರಮೇವಂ ಭವನೇಷು ತಾಸಾಂ ಬಭ್ರಾಮ ಕೃಷ್ಣೋ ನವನೀತಭಿಕ್ಷಾಮ್ ।
ಪುರಾ ಕಿಲಾನ್ಯೈರನಿವರ್ತನೀಯಾ ನಿವರ್ತಿತಾ ಯೇನ ಹರಸ್ಯ ಭಿಕ್ಷಾ ॥ ೩-೮೫॥
ಧಿಗ್ಯಾಚನಾಂ ಚೌರ್ಯಭವಸ್ಯ ಭೂಯಾನಸ್ತ್ಯಂಹಸೋ ನಿರ್ಹರಣಾಭ್ಯುಪಾಯಃ ।
ಮತ್ವೇತಿ ನೂನಂ ನವನೀತಚೌರ್ಯೇ ಮಧೋರ್ನಿಹನ್ತಾ ಮತಿಮಾಬಬನ್ಧ ॥ ೩-೮೬॥
ನಿರ್ವಾಪ್ಯ ದೀಪಂ ಮುಖಮಾರುತೇನ ಹೈಯಙ್ಗವೀನಂ ನಿಶಿ ಹರ್ತುಮಿಚ್ಛನ್ ।
ಕೃಷ್ಣಃ ಕಟೀಭೂಷಣರತ್ನಭಾಸಾ ವಿಹನ್ಯಮಾನೋ ವಿಷಸಾದ ಭೂಯಃ ॥ ೩-೮೭॥
ನಿಪೀಡಯನ್ನಗ್ರಪದೇನ ಪೃಥ್ವೀಮುನ್ನಮ್ಯ ದೇಹಂ ಭೃಶಮೂರ್ಧ್ವಬಾಹುಃ ।
ಪಯೋಘಟಸ್ಪರ್ಶನಮಶ್ನುವಾನಸ್ತ್ರಿವಿಕ್ರಮೋಽಭೂತ್ ಪರಿಹಾಸಪಾತ್ರಮ್ ॥ ೩-೮೮॥
ನಿಯಮಿತಶ್ವಸಿತೋ ನಿಭೃತೈಃ ಪದೈರ್ನಿಶಿ ಕಥಞ್ಚನ ಗರ್ಭಗೃಹಂ ಗತಃ ।
ಸ ತು ಭಯಾದಸಮಾಪ್ತಮನೋರಥೋ ನಿವವೃತೇ ನವನೀತಹರೋ ಹರಿಃ ॥ ೩-೮೯॥
ಹರ್ತುಂ ಹರೇರ್ವ್ಯವಸಿತಸ್ಯ ಘನೇ ನಿಶೀಥೇ
ಭೂಷಾರವಶ್ರುತಿಭಯಾದ್ವ್ರಜತೋಽತಿಮನ್ದಮ್ ।
ಅನ್ತರ್ಗೃಹಸ್ಯ ನವನೀತವತಃ ಪ್ರವೇಶಾತ್
ಪ್ರಾಗೇವ ಹನ್ತ ಪಥಿ ಸಾ ರಜನೀ ವಿಭಾತಾ ॥ ೩-೯೦॥
ಗೋಪೀಸಮಾಗಮಭಿಯಾ ಚ ತೃಷಾ ಚ ಗುರ್ವ್ಯಾ
ಪಾತುಂ ವಿಹಾತುಮಪಿ ಗೋಪಗೃಹೇಷ್ವಜಾನನ್ ।
ಆದ್ವಾರಮಾದಧಿಘಟಂ ಚ ಗತಾಗತಾನಿ
ಕುರ್ವನ್ ಸರೋಜನಯನಃ ಶ್ರಮಮೇವ ಲೇಭೇ ॥ ೩-೯೧॥
ಭಿತ್ತಿಷು ಪ್ರತಿಶರೀರದರ್ಶನಾತ್ ಶಙ್ಕಿತಃ ಸ ನವನೀತನಿಃಸ್ಪೃಹಃ ।
ಕಿಞ್ಚಿದನ್ಯದಿವ ತತ್ರ ಮಾರ್ಗಯನ್ನಿರ್ಜಗಾಮ ಮಣಿಮನ್ದಿರೋದರಾತ್ ॥ ೩-೯೨॥
ಜಿಹೀರ್ಷುರನ್ತರ್ಭವನೇಷು ಗೋರಸಂ ದಿನಾನ್ಯನೈಷೀತ್ತದುಪಾಯಚಿನ್ತಯಾ ।
ಸ ಜಾಗರೂಕಶ್ಚ ನಿನಾಯ ಯಾಮಿನೀಂ ಮನೋಹರಾಭಿರ್ಹರಣಪ್ರವೃತ್ತಿಭಿಃ ॥ ೩-೯೩॥
ದೃಷ್ಟೇಽಪಿ ತತ್ಸವಿಧಸಞ್ಚರಣೇ ಸ ತತ್ರ
ವಕ್ತುಂ ನಿಮಿತ್ತಮುಚಿತಂ ಕೃತನಿಶ್ಚಯಸ್ಸನ್ ।
ಅಭ್ಯರ್ಣ ಏವ ನಿದಧೇ ದಧಿಭಾಜನಸ್ಯ
ಲೀಲಾಯಿತೋಪಕರಣಾನಿ ನಿಜಾನಿ ಶೌರಿಃ ॥ ೩-೯೪॥
ವಹನ್ ಗೃಹೀತೋ ನವನೀತಮಚ್ಯುತೋ ಭಯೇನ ಪಾರಿಪ್ಲವನೇತ್ರಪಙ್ಕಜಃ ।
ಪದಾ ಲಿಖನ್ ಭೂಮಿಮವಾಙ್ಮುಖಸ್ಥಿತೋ ಜಹಾರ ಚೇತೋಽಪಿ ಚ ಗೋಪಯೋಷಿತಾಮ್ ॥ ೩-೯೫॥
ಶಪೇ ಪಿತೃಭ್ಯಾಮಿತ ಊರ್ಧ್ವಮೇವಂ ನಾಹಂ ವಿಧಾಸ್ಯೇ ನವನೀತಚೌರ್ಯಮ್ ।
ವಿನಿಃಶ್ವಸನ್ನಿತ್ಯಭಿಧಾಯ ಕೃಷ್ಣೋ ಜಹಾರ ಮಾತುಶ್ಚ ಪಿತುಶ್ಚ ಚೇತಃ ॥ ೩-೯೬॥
ಏಹಿ ಸದ್ಮ ತನಯೇತಿ ಸಾದರಂ ಯಾಚಿತೋಽಪಿ ಸ ಮುಹುರ್ಯಶೋದಯಾ ।
ಆನನೇನ ನವನೀತಗನ್ಘಿನಾ ನಾಜಗಾಮ ವಿಹರನ್ನಿವಾಚ್ಯುತಃ ॥ ೩-೯೭॥
ಹೃತಂ ನವಂ ಮೇ ನವನೀತಮಾಲಯಾತ್ ಹೃತಂ ಘೃತಂ ಮೇ ದಧಿ ಮೇ ಹೃತಂ ನಿಶಿ ।
ಇತಿ ಪ್ರಭಾತೇ ವಚನಾನಿ ಯೋಷಿತಾಮುವಾಹ ಶ್ರೃಣ್ವನ್ ನ ಮುಖೇ ಸ ವಿಕ್ರಿಯಾಮ್ ॥ ೩-೯೮॥
ಪುತ್ರಂ ಕುಲಸ್ಯ ಭುವನಸ್ಯ ಚ ರಕ್ಷಿತಾರ-
ಮಭ್ಯರ್ಥಿತೋಽಪಿ ಭಗವಾನರವಿನ್ದನಾಭಃ ।
ತ್ವಾಂ ಮೇ ದದೌ ವಿಧಿವಶಾದ್ಭುವನೈಕಚೋರ-
ಮಿತ್ಯಾಹ ಕೋಪಮಭಿನೀಯ ಸುತಂ ಯಶೋದಾ ॥ ೩-೯೯॥
ಸ ಸಾನ್ತ್ವನೇನ ಪ್ರತಿಪಾದನೇನ ಭೇದೇನ ತೀವ್ರೇಣ ಚ ತರ್ಜನೇನ
ನಿಬದ್ಧ್ಯ ಪೃಷ್ಟೋಽಪಿ ಮುಹುರ್ಜನನ್ಯಾ ನಾಙ್ಗೀಕರೋತಿ ಸ್ಮ ಹರಿಃ ಸ್ವಚೌರ್ಯಮ್ ॥ ೩-೧೦೦॥
ಸಂರಕ್ಷಣಾಯ ಜಗತಾಮವತೀರ್ಯ ಪೃಥ್ವ್ಯಾಂ
ಗೋಪಾಲಸದ್ಮಸು ಹರತ್ಯಖಿಲಂ ಮುಕುನ್ದಃ ।
ಇತ್ಥಂ ನಿಶಮ್ಯ ಪರಿಹಾಸವಚಸ್ಸುರಾಣಾಮ್-
ಅನ್ತರ್ಜಹಾಸ ಭಗವಾನರವಿನ್ದನಾಭಃ ॥ ೩-೧೦೧॥
ಕೃಷ್ಣಸ್ಯ ಕೇಲಿಸಮರೇಕ್ಷಣಕೌತುಕೇನ
ಗೋಪೀಷು ಮುಕ್ತಭವನಾಸು ಬಹಿಃ ಸ್ಥಿತಾಸು ।
ಮಿತ್ರೈಃ ಪರಾಜಿತ ಇವ ದ್ರುತಮೇತ್ಯ ಗೇಹಂ
ಬದ್ಧ್ವಾ ಕವಾಟಮಹರನ್ನವನೀತಮನ್ತಃ ॥ ೩-೧೦೨॥
ತ್ರಿಭುವನಮಹನೀಯೈರಭ್ಯುಪಾಯೈರಸಙ್ಖ್ಯೈಃ
ನಿಖಿಲಮಿತಿ ಸ ಮುಷ್ಣನ್ ಗೋಕುಲಂ ನನ್ದಸೂನುಃ ।
ಅರಮತ ಸವಯೋಭಿಸ್ತತ್ರ ಗೋಪಾಲಪುತ್ರೈ-
ರಪರ ಇವ ಶಶಾಙ್ಕಃ ಪ್ರಾಣಿನಾಂ ಪ್ರೀತಿಹೇತುಃ ॥ ೩-೧೦೩॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ತೃತೀಯಃ ಸರ್ಗಃ ॥ ೩ ॥
ಚತುರ್ಥಃ ಸರ್ಗಃ
ಸ ರೋಹಿಣೀಸೂನುನಿಬದ್ಧರಾಗಃ ಸತಾಂ ಶರಣ್ಯಸ್ತಮಸೋಽಪಹರ್ತಾ ।
ಮನೋಹರೋ ಬಾಲ ಇವೌಷಧೀಶೋ ದಿನೇ ದಿನೇ ಪೋಷಮಿಯಾಯ ಶೌರಿಃ ॥ ೪-೦೧॥
ತ್ಯಕ್ತ್ವಾ ಹರಿಃ ಸ್ತೈನ್ಯಕೃತಾಪವಾದಂ ತಚ್ಛೈಶವಂ ಪ್ರಾಪ್ಯ ದಶಾನ್ತರಂ ಸಃ ।
ಮನ್ಯೇ ತದಂಹಃಪರಿಮಾರ್ಜನಾಯ ಗವಾಂ ಪರಿತ್ರಾಣಸಮುದ್ಯತೋಽಭೂತ್ ॥ ೪-೦೨॥
ಪುತ್ರೇ ತಥೋದ್ಯೋಗಿನಿ ನನ್ದಗೋಪೋ ಗೋಪಾಲಪುತ್ರಾನನುನೀಯ ಸರ್ವಾನ್ ।
ತ್ರಾತುಸ್ತ್ರಯಾಣಾಮಪಿ ವಿಷ್ಟಪಾನಾಂ ಸಂರಕ್ಷಣೇ ತಸ್ಯ ಸಮಾದಿದೇಶ ॥ ೪-೦೩॥
ಮಾತ್ರಾ ಕೃತಸ್ವಸ್ತ್ಯಯನಃ ಪ್ರಭಾತೇ ಪಿತ್ರಾ ಪರಿಷ್ವಜ್ಯ ಚಿರಂ ವಿಸೃಷ್ಟಃ ।
ಸಹೈವ ರಾಮೇಣ ಸಮಗ್ರಹರ್ಷಃ ವಿನಿರ್ಯಯೌ ವಿಶ್ವಪತಿರ್ವನಾಯ ॥ ೪-೦೪॥
ಸ ಪ್ರಾತರಾಶೀ ವ್ಯತಿಷಕ್ತಪಾಣಿರ್ಯಷ್ಟಿಂ ವಹನ್ನಂಸವಿಷಕ್ತಶೃಙ್ಗಃ ।
ವಿಮುಚ್ಯತಾಂ ಗೌರಿತಿ ಸಮ್ಭ್ರಮೇಣ ಗಚ್ಛನ್ ಪ್ರತಿದ್ವಾರಮವೋಚದುಚ್ಚೈಃ ॥ ೪-೦೫॥
ನಿಶಮ್ಯ ತಸ್ಯ ಧ್ವನಿಮೂರ್ಧ್ವಕರ್ಣಾಃ ವಿಲೂನಪಾಶಾ ಭೃಶಮುತ್ಸುಕಿನ್ಯಃ ।
ವತ್ಸಾನಪಿ ಸ್ವಾನನವೇಕ್ಷ್ಯ ಗಾವಃ ಸಸಮ್ಭ್ರಮಂ ನಿರ್ಯಯುರಾಲಯೇಭ್ಯಃ ॥ ೪-೦೬॥
ಗತ್ವಾ ಪುರಸ್ತಾದ್ಗಜರಾಜಗಾಮೀ ಗೋಷ್ಠಂ ಗರಿಷ್ಠೋ ಗುಣಮಣ್ಡಲೇನ ।
ಆಪೂರಯನ್ಮಿತ್ರಗಣಾಗಮಾರ್ಥಂ ಪಿತ್ರೋರಭೀಷ್ಟೇನ ಸಹೈವ ಶೃಙ್ಗಮ್ ॥ ೪-೦೭॥
ನಭಸ್ಸ್ಪೃಶಾ ಕರ್ಣಪಥಂ ಗತೇನ ತೇನೈವ ಸಂಜ್ಞಾಗವಲಸ್ವನೇನ ।
ಆದಾಯ ತತ್ತತ್ಪರಿಬರ್ಹಜಾತಂ ಸದ್ಯೋ ಗೃಹೇಭ್ಯಃ ಸುಹೃದೋ ನಿರೀಯುಃ ॥ ೪-೦೮॥
ಗವಾಂ ಖುರನ್ಯಾಸಸಮುದ್ಭವೇನ ವಿಷಾಣಸಙ್ಘಟ್ಟನಜನ್ಮನಾ ಚ ।
ಪ್ರಸರ್ಪತಾ ದಿಕ್ಷು ಮಹಾಸ್ವನೇನ ಘೋಷಃ ಕ್ಷಣಂ ಘೋಷಮಯೋ ಬಭೂವ ॥ ೪-೦೯॥
ಪ್ರಧಾವನೈರುತ್ಪ್ಲುತಿಭಿಸ್ಸುದೂರಂ ಮಿಥೋ ಬಲಾದ್ಗ್ರಾಹವಿಮೋಚನೈಶ್ಚ ।
ಸಮಾಗತೈಸ್ತತ್ರ ಸಮಂ ಸುಹೃದ್ಭಿರ್ಬಹುಪ್ರಕಾರಂ ವಿಜಹಾರ ಶೌರಿಃ ॥ ೪-೧೦॥
ಪರೇಣ ಹರ್ಷೇಣ ಪುರಾಣಪುಂಸಃ ಸಙ್ಕ್ರೀಡಮಾನಸ್ಯ ಸಮಂ ಸುಹೃದ್ಭಿಃ ।
ಪವಿತ್ರಯಾಮಾಸ ಪದಾಮ್ಬುಜೋತ್ಥಿತಾ ಕರೀಷಧೂಲಿಃ ಕಕುಭಾಂ ಮುಖಾನಿ ॥ ೪-೧೧॥
ಮಹರ್ಷಯಸ್ತತ್ರ ಮಹಾನುಭಾವಾಃ ಗೃಹೀತರೂಪಾನ್ತರದುರ್ನ್ನಿರೂಪಾಃ ।
ಭವಾಗ್ನಿಸನ್ತಾಪಹರೇ ಮಮಜ್ಜುಃ ಪದೋತ್ಥಿತೇ ತಸ್ಯ ಪರಾಗಪೂರೇ ॥ ೪-೧೨॥
ಪ್ರಹರ್ಷಮಾಲೋಕಯತಾಂ ಜನಾನಾಂ ಕ್ರೀಡಾಭಿರಾಪಾದ್ಯ ಮನೋಹರಾಭಿಃ ।
ಉತ್ಥಾಪಯಾಮಾಸ ಸ ಚೀತ್ಕೃತೇನ ಗೋಷ್ಠೇ ಹರಿರ್ಗೋಸಮಜಂ ಶಯಾನಂ ॥ ೪-೧೩॥
ತಸ್ಮಿನ್ ಗವಾಂ ಪಾಲನಕೌತುಕೇನ ವನಾಯ ನಿರ್ಗಛತಿ ದೈತ್ಯಶತ್ರೌ ।
ಯಯುಃ ಪ್ರಿಯಾಖ್ಯಾನಚಿಕೀರ್ಷಯೇವ ದಿವಾಕೃತೋ ದಿಗ್ವಲಯಂ ಮಯೂಖಾಃ ॥ ೪-೧೪॥
ಕೂಲದ್ರುಮಾಣಾಂ ಕುಸುಮಾನಿ ಧೂನ್ವನ್ ಕರ್ಷನ್ ಪಯಶ್ಶೀಕರಮಣ್ಡಲಾನಿ ।
ಕೃಷ್ಣಂ ಕೃತಾನೇಕವಿಹಾರಖಿನ್ನಂ ಯಾನ್ತಂ ಸಿಷೇವೇ ಯಮುನಾಸಮೀರಃ ॥ ೪-೧೫॥
ಪರಸ್ಯ ಪುಂಸಃ ಪದಪಙ್ಕಜಾಭ್ಯಾಂ ಪ್ರವೇಕ್ಷ್ಯತೋ ಗೋಕುಲಪಾಲನಾಯ ।
ಚಕಾರ ನೀಹಾರಹರೈರ್ಮಯೂಖೈಃ ಪ್ರವೇಶಯೋಗ್ಯಾನಿ ವನಾನಿ ಭಾನುಃ ॥ ೪-೧೬॥
ಪ್ರೇಮ್ಣಾ ಪರಿತ್ಯಕ್ತುಮಶಕ್ನುವನ್ತಂ ಬದ್ಧಾಞ್ಜಲಿಂ ಬನ್ಧುಜನಂ ನಿವಾರ್ಯ ।
ರಾಮಂ ಪುರಸ್ಕೃತ್ಯ ಸಮಿತ್ರವರ್ಗಃ ವಿವೇಶ ವಿಷ್ಣುರ್ವಿಪಿನಾನ್ತರಾಣಿ ॥ ೪-೧೭॥
ಅರಣ್ಯಭೂಮೀರವಗಾಹಮಾನಂ ತಮಾತಪಕ್ಲಾನ್ತಮವೇಕ್ಷಮಾಣಃ ।
ಪಕ್ಷಾತಪತ್ರೇಣ ಪರಿಸ್ತೃತೇನ ವಿಯತ್ಯಸೇವಿಷ್ಟ ವಿಹಙ್ಗರಾಜಃ ॥ ೪-೧೮॥
ಮಾ ಗಚ್ಛ ಗಙ್ಗೇ ಯಮುನೇ ಕ್ವ ಯಾಸಿ ಕಿಂ ತತ್ರ ಗೋದಾವರಿ ಧಾವಸೀತಿ ।
ನ್ಯಷೇಧಿ ತತ್ತದ್ವ್ಯಪದೇಶಪೂರ್ವಂ ಮಾರ್ಗಚ್ಯುತಂ ಗೋಕುಲಮಚ್ಯುತೇನ ॥ ೪-೧೯॥
ಪ್ರರೂಢಸುಸ್ನಿಗ್ಧತೃಣಾಙ್ಕುರಾಸು ಛಾಯಾದ್ರುಮಶ್ಯಾಮಲಿತಾನ್ತರಾಸು ।
ಗವಾಂ ಕುಲಂ ತತ್ಸುಲಭೋದಕಾಸು ಪ್ರಚಾರಯಾಮಾಸ ವನಸ್ಥಲೀಷು ॥ ೪-೨೦॥
ಸಾಟೋಪಮಾನ್ದೋಲಿತಲಮ್ಬಸಾಸ್ನಾಃ ಗಾವಶ್ಚರನ್ತ್ಯೋ ವಲಮಾನವಾಲಾಃ ।
ತ್ರುಟ್ಯತ್ತೃಣಸ್ತೋಮಚಟತ್ಕೃತಿನ್ಯಃ ಚಕ್ರುಃ ಪ್ರಿಯಂ ಚೇತಸಿ ಚಕ್ರಪಾಣೇಃ ॥ ೪-೨೧॥
ಹರಿನ್ಮಣಿಶ್ಯಾಮರುಚೀನಿ ತತ್ರ ಸ್ವೈರಂ ಚರನ್ತೀಷು ತೃಣಾನಿ ಗೋಷು ।
ಶೌರಿಃ ಸ್ವಯಂ ಭುಕ್ತ ಇವಾಪ ತೃಪ್ತಿಂ ತೃಪ್ಯನ್ತ್ಯುದಾರಾಃ ಪರತರ್ಪಣೇನ ॥ ೪-೨೨॥
ಸರ್ವಾಸು ಕಣ್ಡೂಯನಲಿಪ್ಸಯೋಚ್ಚೈರುನ್ನಮ್ಯ ಕಣ್ಠಂ ದಧತೀಷು ಗೋಷು ।
ಬಾಲೋ ಹರಿರ್ಬಾಹುಸಹಸ್ರಶೂನ್ಯಂ ಜನ್ಮಾತ್ಮನೋ ನಿಷ್ಫಲಮೇವ ಮೇನೇ ॥ ೪-೨೩॥
ಪರಿಭ್ರಮದ್ಗೋಕುಲಮುಗ್ರಕೋಪಂ ಸಮುಚ್ಚಲದ್ಧೂಲಿರಟದ್ವಿಷಾಣಮ್ ।
ಸ ಯುದ್ಧಮುಕ್ಷ್ಣಾಂ ಮದನಿರ್ಭರಾಣಾಂ ಪ್ರವಿಶ್ಯ ಮಧ್ಯಂ ಶಮಯಾಞ್ಚಕಾರ ॥ ೪-೨೪॥
ಶಾಖಾಕರಾಗ್ರೈರವಲಮ್ಬ್ಯ ಪೃಥ್ವೀಂ ನಿಷೇದುಷಃ ಪುಷ್ಪಫಲಾವನಮ್ರಾನ್ ।
ತತ್ರ ದ್ರುಮಾನ್ ಸಾದರಮೀಕ್ಷಮಾಣೋ ಜಗಾಮ ತೃಪ್ತಿಂ ನ ಕದಾಽಪಿ ಶೌರಿಃ ॥ ೪-೨೫॥
ಅಲಕ್ಷ್ಯಮೂಲಾನ್ಯತಿವಿಪ್ರಕರ್ಷಾದ್ ಘೋಷಾನುಮೇಯಸ್ಖಲಿತೋದಕಾನಿ ।
ಉತ್ತುಙ್ಗರೋಧಸ್ತರುಮಣ್ಡಲಾನಿ ನಿಮ್ನಾನಿ ದೃಷ್ಟ್ವಾ ನಿತರಾಂ ಸ ರೇಮೇ ॥ ೪-೨೬॥
ಅತುಚ್ಛಗುಚ್ಛಸ್ತನಭಾರನಮ್ರಾಃ ಲತಾಃ ಪ್ರವಾಲಾಧರಲೋಭನೀಯಾಃ ।
ಸ ತತ್ರ ವೀಕ್ಷ್ಯ ಭ್ರಮರಾಲಕಾಢ್ಯಾಸ್ತಾಮಸ್ಮರತ್ತಾಮರಸಾಧಿವಾಸಾಮ್ ॥ ೪-೨೭॥
ಸಮುತ್ಸುಕಂ ಸಾಗರಕನ್ಯಕಾಯಾಮಾಕ್ರಷ್ಟುಮನ್ತಃಕರಣಂ ಮುರಾರೇಃ ।
ಸರ್ವಸ್ಯ ವೇತ್ತಾ ಸರಸಾಂ ಸ ವಾಚಂ ಸಙ್ಕರ್ಷಣಸ್ಸಾದರಮಿತ್ಯುವಾಚ ॥ ೪-೨೮॥
ಅನ್ತಸ್ಸಮೀರಭ್ರಮಣಪ್ರಸಙ್ಗಾದುದೀರ್ಣನಾದೇನ ಗುಹಾಮುಖೇನ ।
ಭೂಯಃ ಪ್ರಯುಙ್ಕ್ತೇ ಪೃಥಿವೀಧರಸ್ತೇ ಗೋವರ್ಧನಃ ಸ್ವಾಗತಮೇಷ ಶೌರೇ ॥ ೪-೨೯॥
ನಿಶಮ್ಯ ಗೋವರ್ಧನನಿರ್ಝರಾಣಾಂ ಧೀರಧ್ವನಿಂ ಕೃಷ್ಣಶಿಖಣ್ಡಿನೋಽಮೀ ।
ಮುದಾ ತ್ವದಾಲೋಕನಜಾತಯೇವ ನೃತ್ಯನ್ತಿ ಚಕ್ರೀಕೃತಬರ್ಹಭಾರಾಃ ॥ ೪-೩೦॥
ಪಾದಾವಿಮೌ ಸಞ್ಚರಣಾಯ ನಾಲಮತ್ರೇತಿ ಮತ್ವಾ ಮೃಗಯೂಥಮೇತತ್ ।
ಸ್ವಲೋಚನಾಂಶುಸ್ತಬಕಾಪದೇಶಾನ್ನೀಲೋತ್ಪಲೈರ್ಭೂಮಿಮಿವಾಸ್ತೃಣಾತಿ ॥ ೪-೩೧॥
ವಿಕೀರ್ಯ ವಿಷ್ವಗ್ವಿಪಿನದ್ರುಮಾಣಾಂ ಮಧೂನಿ ಪುಷ್ಪಸ್ತಬಕಚ್ಯುತಾನಿ ।
ಅರ್ಕಾಂಶುತಪ್ತಾಮನಿಲೋ ಧರಿತ್ರೀಂ ಸಞ್ಚಾರಯೋಗ್ಯಾಂ ಭವತೋ ವಿಧತ್ತೇ ॥ ೪-೩೨॥
ನ ಭೀತಿರನ್ತರ್ನ ದೃಶೋಶ್ಚಲತ್ವಂ ನಾಸ್ಥಾ ತೃಣೇನೋತ್ಸುಕತಾಽಪಿ ಶಾಬೇ ।
ರೂಪೇಣ ದಾಮೋದರ ಮೋಹಿತಾಸ್ತೇ ತಿಷ್ಠನ್ತ್ಯಮೀ ಕಾಷ್ಠಕೃತಾ ಇವೈಣಾಃ ॥ ೪-೩೩॥
ತೇನೇತಿ ಸನ್ದರ್ಶಿತಮಗ್ರಜೇನ ಮನೋಹರಂ ತತ್ತದವೇಕ್ಷಮಾಣಃ ।
ಗಾಶ್ಚಾರಯನ್ ಶಾದ್ವಲಿನೀಷು ಭೂಷು ರೇಮೇ ರಮಾಯಾ ರಮಣಃ ಪ್ರಕಾಮಮ್ ॥ ೪-೩೪॥
ತಂ ತತ್ರ ದೃಷ್ಟ್ವಾ ಮಹನೀಯರೂಪಂ ಶೌರಿಂ ಶಬರ್ಯಶ್ಚರಿತಾರ್ಥನೇತ್ರಾಃ ।
ಫಲೋಪಹಾರೈರುಪಸೃತ್ಯ ವನ್ಯೈರವಾದಿಷುಃ ಪ್ರಶ್ರಯಶೋಭಿ ವಾಕ್ಯಮ್ ॥ ೪-೩೫॥
ಇತಃ ಪದಂ ನಃ ಶರಪಾತಮಾತ್ರಂ ಯಾಯಾಸ್ಸಹಾನೇನ ಸುಹೃದ್ಗಣೇನ ।
ಅತ್ರಾಗಮಿಷ್ಯನ್ತಿ ಕಿರಾತಪುತ್ರಾಃ ಗವಾಮಮೂಷಾಂ ಪರಿಪಾಲನಾಯ ॥ ೪-೩೬॥
ವ್ಯಾಧಾಹೃತೈರ್ವಾರಣಕುಮ್ಭಗರ್ಭಾತ್ ಮುಕ್ತಾಫಲೈರಾಮಲಕಾಭಿರಾಮೈಃ ।
ಪ್ರಸಾಧನಂ ತ್ವಾಂ ಭುವನತ್ರಯಸ್ಯ ಪ್ರಸಾಧಯಿಷ್ಯನ್ತಿ ಕಿರಾತಕನ್ಯಾಃ॥ ೪-೩೭॥
ಕನ್ಯಾಽಸ್ತಿ ಕಾಚಿಚ್ಛಬರೇಶ್ವರಸ್ಯ ಯಾ ನಃ ಕುಲಾನಾಮಧಿದೇವತೇವ ।
ತಾಂ ಸರ್ವಥಾ ದಾಸ್ಯತಿ ತೇ ಸ ರಾಜಾ ಮಹಾನ್ತ್ಯನರ್ಘಾಣಿ ಚ ಯೌತಕಾನಿ ॥ ೪-೩೮॥
ಇತ್ಯೂಚಿಷೀಣಾಂ ಶಬರಾಙ್ಗನಾನಾಮತ್ಯಾದರಂ ಚೇತಸಿ ವೀಕ್ಷಮಾಣಃ ।
ಕೃಷ್ಣಃ ಕೃಪಾನಿಘ್ನಮನಾಸ್ಸ ವಾಚಮಿತ್ಯಾಹ ಲಜ್ಜಾಮೃದುನಾ ಸ್ವನೇನ ॥ ೪-೩೯॥
ಪಿತ್ರೋರನುಜ್ಞಾಮಧಿಗಮ್ಯ ಭದ್ರಾಃ ಸಮೀಹಿತಂ ವಃ ಸಕಲಂ ವಿಧಾಸ್ಯೇ ।
ಮಯಿ ಸ್ಥಿತೇ ತಿಷ್ಠತಿ ಗೋಕುಲಂ ತದ್ಗಚ್ಛಾಮಿ ಮಾ ಭೂತ ವಿಷಾದವತ್ಯಃ ॥ ೪-೪೦॥
ಗತೇ ಪುಲಿನ್ದೀರಿತಿ ಸಾನ್ತ್ವಯಿತ್ವಾ ತದಿಷ್ಟಭಙ್ಗ್ವ್ಯಥಿತೇ ಮುಕುನ್ದೇ ।
ಫಲಾಪಚಾಯಾದಿಷು ನಿಸ್ಪೃಹಾಸ್ತಾಃ ಶನೈರ್ಯಯುಃ ಪಕ್ಕಣಮೇವ ಖಿನ್ನಾಃ ॥ ೪-೪೧॥
ವಿಹೃತ್ಯ ಗರ್ಭೇಷು ಲತಾಗೃಹಾಣಾಂ ನಿಪೀಯ ವಾರೀಣಿ ಚ ಪಲ್ವಲಾನಾಮ್ ।
ಫಲಾನಿ ಚಾಸ್ವಾದ್ಯ ಮಹೀರುಹಾಣಾಂ ವನಾನಿ ಧನ್ಯಾನಿ ಚಕಾರ ಶೌರಿಃ ॥ ೪-೪೨॥
ಅಥಾಧಿರೂಢೇ ಗಗನಸ್ಯ ಮಧ್ಯಂ ದಿವಾಕರೇ ದುಃಸಹಭಾನುಜಾಲೇ ।
ಘರ್ಮಾಕುಲಂ ಗೋಕುಲಮೀಕ್ಷಮಾಣಃ ಹಲಾಯುಧಃ ಪ್ರಾಹ ರಥಾಙ್ಗಪಾಣಿಮ್ ॥ ೪-೪೩॥
ಕಿಞ್ಚಿತ್ಪರಿಮ್ಲಾನಲತಾಪ್ರವಾಲಸ್ತೃಣಾಙ್ಕುರಭ್ರಾನ್ತಕುರಙ್ಗಯೂಥಃ ।
ಅಹ್ನಃ ಪರಿತ್ಯಕ್ತಜನಪ್ರಚಾರಃ ಪ್ರವರ್ತತೇ ಮಧ್ಯಮ ಏಷ ಭಾಗಃ ॥ ೪-೪೪॥
ಕುಲಾನಿ ವೀಕ್ಷಸ್ವ ವಿಹಙ್ಗಮಾನಾಂ ಪಕ್ಷಾನ್ತರಸ್ಥಾಪಿತಶಾಬಕಾನಿ ।
ಕಠೋರಮೇನಂ ಗಮಯನ್ತಿ ಕಾಲಂ ನೀಡೇಷು ನಿದ್ರಾಲಸಲೋಚನಾನಿ ॥ ೪-೪೫॥
ಪ್ರಾಯಃ ಕಠೋರಾತಪಪೀಡಯೇವ ಛಾಯಾಃ ಪರಿತ್ಯಕ್ತಬಹಿರ್ವಿಹಾರಾಃ ।
ಆಲೋಕಯಾಧ್ವನ್ಯಜನೇನ ಸಾರ್ದ್ಧಮಧ್ಯಾಸತೇ ಮೂಲಮನೋಹಕಾನಾಂ ॥ ೪-೪೬॥
ಕರೈರಸಹ್ಯೈರಯಮಂಶುಮಾಲೀ ತಪನ್ ಮಹೀಮುಗ್ರ ಇವ ಕ್ಷಿತೀಶಃ ।
ಆಶಂಸಿತಾಪತ್ಪ್ರಸರಃ ಪ್ರಜಾಭಿರ್ಧತ್ತೇ ದಶಾಮದ್ಯ ವಿಗರ್ಹಣೀಯಾಮ್ ॥ ೪-೪೭॥
ವಿಹೃತ್ಯ ಕಾನ್ತಾರಮಹೀಷು ವೇಗಾದ್ವ್ರಜನ್ನಪಃ ಪುಷ್ಕರಿಣೀಷು ಪಾತುಮ್ ।
ಮಾರ್ಗೇ ಕರೀನ್ದ್ರಃ ಕರಶೀಕರೇಣ ಪ್ರಿಯಾಮಸಾವುಕ್ಷತಿ ತಾಪಖಿನ್ನಾಮ್ ॥ ೪-೪೮॥
ತಪ್ತಾನಿ ಭಾಸಾ ತಪನಸ್ಯ ಹಂಸಾಃ ವಿಹಾಯ ವಾರೀಣಿ ನಖಂಪಚಾನಿ ।
ಪತ್ರೇಷು ವಿನ್ಯಸ್ಯ ಪದಾನಿ ಮನ್ದಂ ಪದ್ಮಾಕರೇ ಸಮ್ಪ್ರತಿ ಪರ್ಯಟನ್ತಿ ॥ ೪-೪೯॥
ನಿಗೂಢಮೀನಗ್ರಹಣಾಭಿಸನ್ಧಿಂ ಕೃಛ್ರೇಣ ಮುಕ್ತ್ವಾ ಕಪಟಾಸಿಕಾಂ ಸ್ವಾಮ್ ।
ಅಮೀ ಬಕೋಟಾಸ್ತಪನಾಂಶುತಾಪಾತ್ತಟೀನಿಕುಞ್ಜಂ ತರಸಾ ವಿಶನ್ತಿ ॥ ೪-೫೦॥
ತದೇಹಿ ಯಾಮಸ್ತರುಷಣ್ಡಮೇತದ್ ಘರ್ಮಾಕುಲಂ ಗೋಕುಲಮಾನಯಾಮಃ ।
ಅತ್ರೈವ ವಿಶ್ರಮ್ಯ ಮುಹೂರ್ತಮಾತ್ರಂ ಭೂಯೋಽಪಿ ಗಾವಃ ಪ್ರಚರನ್ತ್ವರಣ್ಯೇ ॥ ೪-೫೧॥
ಇತೀರಿತಂ ತತ್ಸಮಯಾನುರೂಪಂ ವಾಕ್ಯಂ ಸಮಾಕರ್ಣ್ಯ ಹಲಾಯುಧಸ್ಯ ।
ಆರ್ಯೋ ಯಥಾಜ್ಞಾಪಯತೀತಿ ಕೃಷ್ಣಸ್ತಂ ರಾಮಮುಕ್ತ್ವಾ ತರುಷಣ್ಡಮಾಪ ॥ ೪-೫೨॥
ಅಲಬ್ಧಮಾರ್ತಾಣ್ಡಕರಪ್ರವೇಶಮಾರಾಮಕಲ್ಪಂ ತರುಷಣ್ಡಮೇತ್ಯ ।
ಆನೇತುಕಾಮಃ ಸ ಗವಾಂ ಕುಲಂ ತದಾಸಜ್ಜಯಾಮಾಸ ಮುಖೇನ ವೇಣುಮ್ ॥ ೪-೫೩॥
ಸಲೀಲಮೀಷತ್ಪರಿವೃತ್ತಪಾದಂ ಸವಿಭ್ರಮೋದಞ್ಚಿತಸವ್ಯನೇತ್ರಂ ।
ಕೃಷ್ಣಸ್ಯ ವಂಶಾರ್ಪಿತಪಾಟಲೋಷ್ಠಂ ವೀಕ್ಷ್ಯ ಸ್ಥಿತಂ ವಿಸ್ಮಯಮಾಪ ಲೋಕಃ ॥ ೪-೫೪॥
ತತ್ರ ಸ್ಥಿತಂ ತಾಮರಸಾಯತಾಕ್ಷಂ ತಾಪಿಞ್ಛವರ್ಣಂ ಶಿಖಿಪಿಞ್ಛಚೂಡಂ ।
ತಮೇವ ಪಶ್ಯನ್ನನಿಮೇಷತಾಯಾಃ ಫಲಂ ಪ್ರಪೇದೇ ಸುರಸಿದ್ಧಸಙ್ಘಃ ॥ ೪-೫೫॥
ಸ್ಥಿತಸ್ತ್ರಿಭಙ್ಗ್ಯಾ ವಿವರೇಷು ವೇಣೋರ್ವ್ಯಾಪಾರಯನ್ನಙ್ಗುಲಿಪಲ್ಲವಾನಿ ।
ಜಗತ್ತ್ರಯೀಮೋಹವಿಧಾನದಕ್ಷಮುತ್ಥಾಪಯಾಮಾಸ ಸ ನಾದಮುಚ್ಚೈಃ ॥ ೪-೫೬॥
ಅಥೋತ್ಥಿತಾನನ್ದನಿಮೀಲಿತಾಕ್ಷ್ಯಃ ವಿಲೂನದೂರ್ವಾಙ್ಕುರಲಾಞ್ಛಿತಾಸ್ಯಾಃ ।
ಗಾವಸ್ತದಭ್ಯಾಶಮುಪೇತ್ಯ ತಸ್ಥುಃ ನಿಸ್ಪನ್ದದೇಹಾ ನಿಭೃತೈಃ ಶ್ರವೋಭಿಃ ॥ ೪-೫೭॥
ನೈಸರ್ಗಿಕಂ ವೈರಮಪತ್ಯಸಙ್ಗಸ್ತೃಷ್ಣಾ ಬುಭುಕ್ಷಾ ಕುಸುಮಾಯುಧಶ್ಚ ।
ತದ್ವೇಣುನಾದಶ್ರುತಿತತ್ಪರಾಣಾಂ ನಾಲಂ ವಿಧಾತುಂ ವಿಕೃತಿಂ ತಿರಶ್ಚಾಮ್ ॥ ೪-೫೮॥
ತಸ್ಮಿನ್ ಮನೋಹಾರಿಣಿ ಚಕ್ರಪಾಣೇರ್ವನಾನ್ತರೇ ಮೂರ್ಛತಿ ವಂಶನಾದೇ ।
ವಿಧೀಯಮಾನಂ ಪರಿಹೃತ್ಯ ಕರ್ಮ ಸರ್ವೇಽಪಿ ಸತ್ವಾ ಲಿಖಿತಾ ಇವಾಸನ್ ॥ ೪-೫೯॥
ಪ್ರವೃತ್ತಮಾತ್ರೌ ವನಪದ್ಮಿನೀಷು ದಾತುಂ ಗೃಹೀತುಂ ಚ ಮೃಣಾಲಭಙ್ಗಮ್ ।
ಚಕ್ರಾಹ್ವಯಸ್ತದ್ಗೃಹಮೇಧಿನೀ ಚ ಪ್ರಸಾರ್ಯ ಚಞ್ಚೂ ಪರಮಾಸಿಷಾತಾಮ್ ॥ ೪-೬೦॥
ಉಪಾವಿಶನ್ನುಜ್ಝಿತಚಾಪಲಾನಿ ಸ್ವಜಾನುವಿನ್ಯಸ್ತಕರಾನನಾನಿ ।
ನಿಷ್ಪನ್ದದೃಷ್ಟೀನಿ ವನದ್ರುಮಾಣಾಂ ಶಾಖಾಸು ಶಾಖಾಮೃಗಮಣ್ಡಲಾನಿ ॥ ೪-೬೧॥
ಪದ್ಭ್ಯಾಮವಷ್ಟಭ್ಯ ಮಹೀಮುಭಾಭ್ಯಾಂ ಸದ್ಯಸ್ಸಮುತ್ತಮ್ಭಿತಪೂರ್ವಕಾಯಃ ।
ಸಿಂಹಃ ಕರೀನ್ದ್ರಾಕ್ರಮಣೇ ಪ್ರವೃತ್ತಸ್ತಸ್ಥೌ ತಥಾ ಕೃತ್ರಿಮಸಿಂಹಕಲ್ಪಃ ॥ ೪-೬೨॥
ಸಿದ್ಧಾಃ ಕಲತ್ರಾಣಿ ಲತಾಗೃಹೇಷು ಸಮುದ್ಯತಾಃ ಪಾಯಯಿತುಂ ಮಧೂನಿ ।
ಕರದ್ವಯೋದಞ್ಚಿತರತ್ನಪಾತ್ರಾಃ ನಿಷೇದುರಾಲೇಖ್ಯಮಿವ ಪ್ರಪನ್ನಾಃ ॥ ೪-೬೩॥
ತದ್ವಂಶನಾಲಾಚ್ಚ್ಯುತಮಚ್ಯುತಸ್ಯ ಗೇಯಾಮೃತಂ ಸಾಧು ನಿಷೇವ್ಯ ವೃಕ್ಷಾಃ ।
ಚಿರಂ ಜರಾಜರ್ಜರಿತತ್ವಚೋಽಪಿ ಬಾಲಾ ಇವಾಸನ್ನವಪಲ್ಲವಾಢ್ಯಾಃ ॥ ೪-೬೪॥
ನಾದೇನ ವೇಣೋರ್ವಿವಶೀಕೃತಾನಾಂ ವಿದ್ಯಾಧರಾಣಾಂ ಗಲಿತಾಃ ಕರೇಭ್ಯಃ ।
ಗತಿರ್ಭವಾಸ್ಮಾಕಮಪೀತಿ ನೂನಂ ವೀಣಾ ನಿಪೇತುರ್ಮಧುವಿದ್ವಿಷೋಽಗ್ರೇ ॥ ೪-೬೫॥
ಸ್ವವೇಣುನಾದೇನ ಸ ಜೀವಲೋಕಮಿತ್ಥಂ ಪರಾನನ್ದಮಯಂ ವಿಧಾಯ ।
ಪ್ರಭುರ್ವ್ಯರಂಸೀದಮರಾಶ್ಚ ಸರ್ವೇ ಸುಪ್ತೋತ್ಥಿತಾನಾಂ ಸ್ಥಿತಿರನ್ವಭೂವನ್ ॥ ೪-೬೬॥
ಪ್ರತ್ಯಾಗತೇ ಚೇತಸಿ ತೇ ವಿದಿತ್ವಾ ಪ್ರಭ್ರಶ್ಯ ಹಸ್ತಾತ್ ಪತಿತಾ ವಿಪಞ್ಚೀಃ ।
ಪುನರ್ನ್ನ ಚಕ್ರುಃ ಪ್ರತಿಪನ್ನಲಜ್ಜಾಃ ವಿದ್ಯಾಧರಾಸ್ತದ್ಗ್ರಹಣಾಭಿಲಾಷಮ್ ॥ ೪-೬೭॥
ಮಧುವ್ರತಾನಾಂ ಧ್ವನಿಭಿರ್ಮನೋಜ್ಞೈರ್ವಾಚಾಲಯನ್ತೀ ವಲಯಂ ದಿಶಾನಾಮ್ ।
ಪ್ರಸೂನವೃಷ್ಟಿಃ ಸುರಸಿದ್ಧಮುಕ್ತಾ ಪಪಾತ ಮೌಲೌ ಪರಮಸ್ಯ ಪುಂಸಃ ॥ ೪-೬೮॥
ಅವರ್ಷಿ ಕೇನಾಯಮದೃಷ್ಟಪೂರ್ವಃ ಪ್ರಸೂನರಾಶಿಸ್ತವ ಮೂರ್ಧನೀತಿ ।
ಪೃಷ್ಟೋ ವಿಹಸ್ಯಾಹ ವಿಭುಸ್ಸಹಾಯಾನ್ ಜ್ಞಾನಂ ಭವದ್ಭೋಽಪಿ ಕಥಂ ಮಮೇತಿ ॥ ೪-೬೯॥
ವಿಷಹ್ಯತಾಂ ಯಾತಿ ವಿವಸ್ವದಂಶೌ ವಿಶ್ರಾನ್ತಮುತ್ಥಾಪ್ಯ ಗವಾಂ ಸ ಪುಞ್ಜಮ್ ।
ಭೂಯಸ್ತೃಣಾಶ್ಯಾಮಲಭೂತಲೇಷು ಪ್ರಾರಬ್ಧ ಸಞ್ಚಾರಯಿತುಂ ವನೇಷು ॥ ೪-೭೦॥
ತತಃ ಪರಿಕ್ಷೀಣಸಹಸ್ರಭಾನೋರಶಾಮ್ಯದೂಷ್ಮಾ ದಿವಸಸ್ಯ ತೀವ್ರಃ ।
ಯಥಾ ವಿನಾಶೇ ಧನಸಞ್ಚಯಸ್ಯ ಮಹಾವಲೇಪೋ ಧನಿನೋ ಜನಸ್ಯ ॥ ೪-೭೧॥
ಪ್ರಭಾಕರೇ ಪಾಟಲಭಾಸಿ ದೂರಂ ದಿಶಂ ಪ್ರತೀಚೀಮವಗಾಹಮಾನೇ ।
ಆಲೋಕ್ಯ ರಾಮಃ ಪರಿಣಾಮಮಹ್ನೋ ದಾಮೋದರಂ ಸಾದರಮಿತ್ಯುವಾಚ ॥ ೪-೭೨॥
ಆವಿರ್ಭವನ್ಮನ್ದಮರುತ್ಪ್ರಚಾರಾ ಶಾನ್ತಾತಪಾ ನಿರ್ವೃತಸರ್ವಸತ್ವಾ ।
ವಿರಾಮವೇಲಾ ದಿವಸಸ್ಯ ಶೌರೇ ಪ್ರವರ್ತತೇ ಪಶ್ಯ ಮನೋಭಿರಾಮಾ ॥ ೪-೭೩॥
ಶಿರೋಭಿರೂಢೇನ್ಧನಶಾಕಮೂಲಾಃ ಸ್ವಯೂಥ್ಯಮುಚ್ಚೈಃಸ್ವರಮಾಹ್ವಯನ್ತಃ ।
ವನೇಚರಾ ವೀಕ್ಷ್ಯ ವಿರಾಮಮಹ್ನಃ ಸಮಾರಭನ್ತೇ ಸಹಸೈವ ಗನ್ತುಮ್ ॥ ೪-೭೪॥
ಶತಂ ಶತಂ ವ್ಯೋಮನಿ ಬದ್ಧಮಾಲಾಃ ಶಾತ್ಕಾರವಾಚಾಲವಿಲೋಲಪಕ್ಷಾಃ ।
ವ್ರಜನ್ತಿ ಲಕ್ಷ್ಮೀಕೃತವಾಸವೃಕ್ಷಾಃ ಮನೋಜವಾಃ ಪಶ್ಯ ಪತತ್ರಿಣೋಽಮೀ ॥ ೪-೭೫॥
ಭುವಃ ಪರಾಗೇ ಬಹುಶೋ ಲುಠಿತ್ವಾ ಪ್ರವಿಶ್ಯ ನೀಡಂ ಕಲವಿಙ್ಗಯೂಥಮ್ ।
ಧಿನೋತ್ಯಪತ್ಯಾನಿ ಬುಭುಕ್ಷಿತಾನಿ ಗ್ರಾಸೇನ ಚಞ್ಚೂಪುಟಸಞ್ಚಿತೇನ ॥ ೪-೭೬॥
ತದೇಹಿ ಶೌರೇ ತಪನವ್ಯಪಾಯಾತ್ಪ್ರಾಗೇವ ಯಾಮಃ ಪದಮಸ್ಮದೀಯಮ್ ।
ಇಯಂ ಕ್ಷತಿಃ ಶ್ವಭ್ರತಟೇನ ಪಶ್ಚಾದ್ದುಃಸಞ್ಚರಾ ಲುಬ್ಧಕನಿರ್ಮಿತೇನ ॥ ೪-೭೭॥
ಶ್ರುತ್ವೇತಿ ರಾಮಸ್ಯ ಗಿರಂ ಮುರಾರಿಃ ಅಸ್ತ್ವೇವಮಿತ್ಯಾದರಪೂರ್ವಮುಕ್ತ್ವಾ ।
ಸಹ ಪ್ರತಸ್ಥೇ ಸ ಚ ಮಿತ್ರವರ್ಗೈಃ ಪ್ರಚಣ್ಡಶ್ರೃಙ್ಗಧ್ವನಿಪೂರಿತಾಶೈಃ ॥ ೪-೭೮॥
ಸಹಪ್ರಯಾಣಾಯ ಕೃತತ್ವರಾಣಾಮೂಧೋಭರಾದ್ದೂರವಿಲಮ್ಬಿನೀನಾಮ್ ।
ಸ ತತ್ರ ತತ್ರ ಪ್ರತಿಪಾಲ್ಯ ತಸ್ಥೌ ಪ್ರೀತೋ ಗವಾಮಾಗಮನಂ ಮುಕುನ್ದಃ ॥ ೪-೭೯॥
ಸಮಾವೃತೋ ಗೋಪಜನೇನ ನನ್ದಃ ಗೋಪಾಙ್ಗನಾಭಿಶ್ಚ ವೃತಾ ಯಶೋದಾ ।
ಅತಿಷ್ಠತಾಮಧ್ವನಿ ಲೋಚನಾಭ್ಯಾಂ ಪುತ್ರಾಗತಿಪ್ರೇಕ್ಷಣಸಸ್ಪೃಹಾಭ್ಯಾಮ್ ॥ ೪-೮೦॥
ಚಕಾರ ಕರ್ಣೇಷು ತಯೋಃ ಪ್ರಮೋದಂ ದಾಮೋದರಾಪೂರಿತಶೃಙ್ಗನಾದಃ ।
ದಿವಿ ಪ್ರಸರ್ಪನ್ನಥ ಪಾಂಸುಪೂರಃ ನೇತ್ರೇಷು ಪೀಯೂಷಮಿವಾಭ್ಯವರ್ಷತ್ ॥ ೪-೮೧॥
ತೌ ಧೂಸರಾಙ್ಗೌ ರಜಸಾ ಕುಮಾರೌ ಗತ್ವಾ ಸ ನನ್ದಃ ಪರಿರಭ್ಯ ಗಾಢಮ್ ।
ಆತ್ಮಾನಮಾನನ್ದಸಮುದ್ರಮಗ್ನಂ ನಾಲಂ ಸಮುದ್ಧರ್ತುಮಭೂನ್ಮುಹೂರ್ತಮ್ ॥ ೪-೮೨॥
ಉತ್ಪತ್ಯ ಧಾವದ್ಭಿರುದಸ್ತಶಸ್ತ್ರೈಃ ಕ್ಷ್ವೇಲಾರವಕ್ಷೋಭಿತದಿಗ್ವಿಭಾಗೈಃ ।
ಆಭೀರವೀರೈಸ್ಸ ವೃತಃ ಪ್ರಪೇದೇ ವ್ರಜಂ ಸಮಾಕರ್ಣಿತತೂರ್ಯಘೋಷಮ್ ॥ ೪-೮೩॥
ಚಾಟೂಕ್ತಿಭಿಃ ಪಾರ್ಶ್ವಚರಾನಶೇಷಾನ್ ವಿಸೃಜ್ಯ ಗೋಪಾನ್ ಸಹಿತಸ್ಸ ಮಿತ್ರೈಃ ।
ವಿವೇಶ ಕೃಷ್ಣೋ ಭವನಂ ದಿನಾನ್ತೇ ಸಮುಜ್ವಲನ್ಮಙ್ಗಲದೀಪಿಕಾಭಿಃ ॥ ೪-೮೪॥
ಕಾಮಂ ದಿವಾ ಕರ್ಣಪಥಂ ಗತೇನ ನೀತಾಃ ಪ್ರಿಯಂ ವೇಣುರವೇಣ ವಿಷ್ಣೋಃ ।
ಪ್ರತಿಪ್ರಿಯಂ ಚಕ್ರುರಮುಷ್ಯ ಸಾಯಂ ಗಾವಃ ಪಯೋದೋಹನನಿಃಸ್ವನೇನ ॥ ೪-೮೫॥
ಅನುದಿನಮಿತಿ ಕುರ್ವನ್ ಪಾಲನಂ ಗೋಕುಲಸ್ಯ
ಕ್ಷಣಮಿವ ದಿವಸಾನಿ ಕ್ರೀಡಯಾ ಯಾಪಯನ್ ಸಃ ।
ಅಖಿಲಮಪಿ ಧರಿತ್ರೀಭಾರಮಭ್ಯುದ್ಧರಿಷ್ಯನ್
ಅರಮತ ಸಹ ಶೌರಿಸ್ತತ್ರ ಸಙ್ಕರ್ಷಣೇನ ॥ ೪-೮೬॥
ಇತಿ ಸುಕುಮಾರಕೃತೌ ಕೃಷ್ಣವಿಲಾಸಕಾವ್ಯೇ ಚತುರ್ಥಃ ಸರ್ಗಃ ॥ ೪ ॥
Encoded and proofread by PSA Easwaran psaeaswaran at gmail.com
Please send corrections to sanskrit@cheerful.com
Last updated ತ್oday
http://sanskritdocuments.org
Krishna Vilasa Kavyam Lyrics in Kannada PDF
% File name : shrIkRiShNavilAsakAvyam.itx
% Location : doc\_vishhnu
% Author : sukumArakavi
% Language : Sanskrit
% Subject : philosophy/hinduism/religion
% Transliterated by : NS Panicker in Malayalam http://sreekrishnavilasam.blogspot.in/
% Proofread by : PSA Easwaran psaeaswaran at gmail.com
% Latest update : August 2, 2012
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
% File name : shrIkRiShNavilAsakAvyam.itx
% Location : doc\_vishhnu
% Author : sukumArakavi
% Language : Sanskrit
% Subject : philosophy/hinduism/religion
% Transliterated by : NS Panicker in Malayalam http://sreekrishnavilasam.blogspot.in/
% Proofread by : PSA Easwaran psaeaswaran at gmail.com
% Latest update : August 2, 2012
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website