{॥ ಶ್ರೀಕೃಷ್ಣಸಹಸ್ರನಾಮಸ್ತೋತ್ರ ॥}
ಶ್ರೀಮದ್ರುಕ್ಮಿಮಹೀಪಾಲವಂಶರಕ್ಷಾಮಣಿಃ ಸ್ಥಿರಃ ।
ರಾಜಾ ಹರಿಹರಃ ಕ್ಷೋಣೀಂ ರಕ್ಷತ್ಯಮ್ಬುಧಿಮೇಖಲಾಮ್ ।೧॥

ಸ ರಾಜಾ ಸರ್ವತನ್ತ್ರಜ್ಞಃ ಸಮಭ್ಯರ್ಚ್ಯ ವರಪ್ರದಮ್ ।
ದೇವಂ ಶ್ರಿಯಃ ಪತಿಂ ಸ್ತುತ್ಯಾ ಸಮಸ್ತೌದ್ವೇದವೇದಿತಮ್ ॥ ೨॥

ತಸ್ಯ ಹೃಷ್ಟಾಶಯಃ ಸ್ತುತ್ಯಾ ವಿಷ್ಣುರ್ಗೋಪಾಂಗನಾವೃತಃ ।
ಸ ಪಿಂಛಶ್ಯಾಮಲಂ ರೂಪಂ ಪಿಂಛೋತ್ತಂಸಮದರ್ಶಯತ್ ॥ ೩॥

ಸ ಪುನಃ ಸ್ವಾತ್ಮವಿನ್ಯಸ್ತಚಿತ್ತಂ ಹರಿಹರಂ ನೃಪಮ್ ।
ಅಭಿಷಿಚ್ಯ ಕೃಪಾವರ್ಷೈರಭಾಷತ ಕೃತಾಂಜಲಿಮ್ ॥ ೪॥

ಶ್ರೀಭಗವಾನುವಾಚ ।
ಮಾಮವೇಹಿ ಮಹಾಭಾಗ ಕೃಷ್ಣಂ ಕೃತ್ಯವಿದಾಂ ವರ ।
ಪುರಃಸ್ಥಿತೋಽಸ್ಮಿ ತ್ವದ್ಭಕ್ತ್ಯಾ ಪೂರ್ಣಾಸ್ಸನ್ತು ಮನೋರಥಾಃ ॥ ೫॥

ಸಂರಕ್ಷಣಾಯ ಶಿಷ್ಟಾನಾಂ ದುಷ್ಟಾನಾಂ ಶಿಕ್ಷಣಾಯ ಚ ।
ಸಮೃದ್ಧ್ಯೈ ವೇದಧರ್ಮಾಣಾಂ ಮಮಾಂಶತ್ವಮಿಹೋದಿತಃ ॥ ೬॥

ರಾಜನ್ನಾಮಸಹಸ್ರೇಣ ರಾಮೋ ನಾಮ್ನಾಂ ಸ್ತುತಸ್ತ್ವಯಾ ।
ಸೋಽಹಂ ಸರ್ವವಿದೋ ತಸ್ಮಾತ್ಪ್ರಸನ್ನೋಽಸ್ಮಿ ವಿಶೇಷತಃ ॥ ೭॥

ಮಾಮಪಿ ತ್ವಂ ಮಹಾಭಾಗ ಮದೀಯಚರಿತಾತ್ಮನಾ ।
ಸಮ್ಪ್ರೀಣಯ ಸಹಸ್ರೇಣ ನಾಮ್ನಾಂ ಸರ್ವಾರ್ಥದಾಯಿನಾಮ್ ॥ ೮॥

ಪರಾಶರೇಣ ಮುನಿನಾ ವ್ಯಾಸೇನಾಮ್ನಾಯರ್ದಶಿನಾ ।
ಸ್ವಾತ್ಮಭಾಜಾ ಶುಕೇನಾಪಿ ಸೂಕ್ತೇಽಪ್ಯೇತದ್ವಿಭಾವಿತಮ್ ॥ ೯॥

ತಂ ಹಿ ತ್ವಮನುಸನ್ಧೇಹಿ ಸಹಸ್ರಶಿರಸಂ ಪ್ರಭುಮ್ ।
ದತ್ತಾನ್ಯೇಷು ಮಯಾ ನ್ಯಸ್ತಂ ಸಹಸ್ರಂ ರಕ್ಷಯಿಷ್ಯತಿ ॥ ೧೦॥

ಇದಂ ವಿಶ್ವಹಿತಾರ್ಥಾಯ ರಸನಾರಂಗಗೋಚರಮ್ ।
ಪ್ರಕಾಶಯ ತ್ವಂ ಮೇದಿನ್ಯಾಂ ಪರಮಾಗಮಸಮ್ಮತಮ್ ॥ ೧೧॥

ಇದಂ ಶಠಾಯ ಮೂರ್ಖಾಯ ನಾಸ್ತಿಕಾಯ ವಿಕೀರ್ಣಿನೇ ।
ಅಸೂಯಿನೇಽಹಿತಾಯಾಪಿ ನ ಪ್ರಕಾಶ್ಯಂ ಕದಾಚನ ॥ ೧೨॥

ವಿವೇಕಿನೇ ವಿಶುದ್ಧಾಯ ವೇದಮಾರ್ಗಾನುಸಾರಿಣೇ ।
ಆಸ್ತಿಕಾಯಾತ್ಮನಿಷ್ಠಾಯ ಸ್ವಾತ್ಮನ್ಯನುಸೃತೋದಯಮ್ ॥ ೧೩॥

ಕೃಷ್ಣನಾಮಸಹಸ್ರಂ ವೈ ಕೃತಧೀರೇತದೀರಯೇತ್ ।
ವಿನಿಯೋಗಃ
ಓಂ ಅಸ್ಯ ಶ್ರೀಕೃಷ್ಣಸಹಸ್ರನಾಮಸ್ತೋತ್ರಮನ್ತ್ರಸ್ಯ ಪರಾಶರಋಷಿಃ,
ಅನುಷ್ಟುಪ್ ಛನ್ದಃ, ಶ್ರೀಕೃಷ್ಣಃ ಪರಮಾತ್ಮಾ ದೇವತಾ,
ಶ್ರೀಕೃಷ್ಣೇತಿ ಬೀಜಮ್, ಶ್ರೀವಲ್ಲಭೇತಿ ಶಕ್ತಿಃ, ಶಾರ್ಙ್ಗೀತಿ ಕೀಲಕಂ,
ಶ್ರೀಕೃಷ್ಣಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥

ನ್ಯಾಸಃ
ಪರಾಶರಾಯ ಋಷಯೇ ನಮಃ ಇತಿ ಶಿರಸಿ,
ಅನುಷ್ಟುಪ್ ಛನ್ದಸೇ ನಮಃ ಇತಿ ಮುಖೇ,
ಗೋಪಾಲಕೃಷ್ಣದೇವತಾಯೈ ನಮಃ, ಇತಿ ಹೃದಯೇ,
ಶ್ರೀಕೃಷ್ಣಾಯ ಬೀಜಾಯ ನಮಃ ಇತಿ ಗುಹ್ಯೇ, ಶ್ರೀವಲ್ಲಭಾಯ ಶಕ್ತ್ಯೈ ನಮಃ ಇತಿ
ಪಾದಯೋಃ,
ಶಾರ್ಙ್ಗಧರಾಯ ಕೀಲಕಾಯ ನಮಃ ಇತಿ ಸರ್ವಾಂಗೇ ॥

ಕರನ್ಯಾಸಃ
ಶ್ರೀಕೃಷ್ಣ ಇತ್ಯಾರಭ್ಯ ಶೂರವಂಶೈಕಧೀರಿತ್ಯನ್ತಾನಿ ಅಂಗುಷ್ಠಾಭ್ಯಾಂ ನಮಃ ।
ಶೌರಿರಿತ್ಯಾರಭ್ಯ ಸ್ವಭಾಸೋದ್ಭಾಸಿತವ್ರಜ ಇತ್ಯನ್ತಾನಿ ತರ್ಜನೀಭ್ಯಾಂ ನಮಃ ।
ಕೃತಾತ್ಮವಿದ್ಯಾವಿನ್ಯಾಸೇತ್ಯಾರಭ್ಯ ಪ್ರಸ್ಥಾನಶಕಟಾರೂಢ ಇತಿ ಮಧ್ಯಮಾಭ್ಯಾಂ ನಮಃ,
ವೃಂದಾವನಕೃತಾಲಯ ಇತ್ಯಾರಭ್ಯ ಮಧುರಾಜನವೀಕ್ಷಿತ ಇತ್ಯಾನಾಮಿಕಾಭ್ಯಾಂ ನಮಃ,
ರಜಕಪ್ರತಿಘಾತಕ ಇತ್ಯಾರಭ್ಯ ದ್ವಾರಕಾಪುರಕಲ್ಪನ ಇತಿ ಕನಿಷ್ಠಿಕಾಭ್ಯಾಂ ನಮಃ
ದ್ವಾರಕಾನಿಲಯ ಇತ್ಯಾರಭ್ಯ ಪರಾಶರ ಇತಿ ಕರತಲಕರಪೃಷ್ಠಾಭ್ಯಾಂ ನಮಃ,
ಏವಂ ಹೃದಯಾದಿನ್ಯಾಸಃ ॥

ಧ್ಯಾನಮ್ ।
ಕೇಷಾಂಚಿತ್ಪ್ರೇಮಪುಂಸಾಂ ವಿಗಲಿತಮನಸಾಂ ಬಾಲಲೀಲಾವಿಲಾಸಂ
ಕೇಷಾಂ ಗೋಪಾಲಲೀಲಾಙ್ಕಿತರಸಿಕತನುರ್ವೇಣುವಾದ್ಯೇನ ದೇವಮ್ ।
ಕೇಷಾಂ ವಾಮಾಸಮಾಜೇ ಜನಿತಮನಸಿಜೋ ದೈತ್ಯದರ್ಪಾಪಹೈವಂ
ಜ್ಞಾತ್ವಾ ಭಿನ್ನಾಭಿಲಾಷಂ ಸ ಜಯತಿ ಜಗತಾಮೀಶ್ವರಸ್ತಾದೃಶೋಽಭೂತ್ ॥ ೧॥

ಕ್ಷೀರಾಬ್ಧೌ ಕೃತಸಂಸ್ತವಸ್ಸುರಗಣೈರ್ಬ್ರಹ್ಮಾದಿಭಿಃ ಪಣ್ಡಿತೈಃ
ಪ್ರೋದ್ಭೂತೋ ವಸುದೇವಸದ್ಮನಿ ಮುದಾ ಚಿಕ್ರೀಡ ಯೋ ಗೋಕುಲೇ ।
ಕಂಸಧ್ವಂಸಕೃತೇ ಜಗಾಮ ಮಧುರಾಂ ಸಾರಾಮಸದ್ವಾರಕಾಂ
ಗೋಪಾಲೋಽಖಿಲಗೋಪಿಕಾಜನಸಖಃ ಪಾಯಾದಪಾಯಾತ್ ಸ ನಃ ॥ ೨॥

ಫುಲ್ಲೇನ್ದೀವರಕಾನ್ತಿಮಿನ್ದುವದನಂ ಬರ್ಹಾವತಂಸಪ್ರಿಯಂ
ಶ್ರೀವತ್ಸಾಙ್ಕಮುದಾರಕೌಸ್ತುಭಧರಂ ಪೀತಾಮ್ಬರಂ ಸುನ್ದರಮ್ ।
ಗೋಪೀನಾಂ ನಯನೋತ್ಪಲಾರ್ಚಿತತನುಂ ಗೋಗೋಪಸಂಘಾವೃತಂ
ಗೋವಿನ್ದಂ ಕಲವೇಣುವಾದನರತಂ ದಿವ್ಯಾಂಗಭೂಷಂ ಭಜೇ ॥ ೩॥

ಓಂ
ಕೃಷ್ಣಃ ಶ್ರೀವಲ್ಲಭಃ ಶಾರ್ಙ್ಗೀ ವಿಷ್ವಕ್ಸೇನಃ ಸ್ವಸಿದ್ಧಿದಃ ।
ಕ್ಷೀರೋದಧಾಮಾ ವ್ಯೂಹೇಶಃ ಶೇಷಶಾಯೀ ಜಗನ್ಮಯಃ ॥ ೧॥

ಭಕ್ತಿಗಮ್ಯಃ ತ್ರಈಮೂರ್ತಿರ್ಭಾರಾರ್ತವಸುಧಾಸ್ತುತಃ ।
ದೇವದೇವೋ ದಯಾಸಿನ್ಧುರ್ದೇವದೇವಶಿಖಾಮಣಿಃ ॥ ೨॥

ಸುಖಭಾವಸ್ಸುಖಾಧಾರೋ ಮುಕುನ್ದೋ ಮುದಿತಾಶಯಃ ।
ಅವಿಕ್ರಿಯಃ ಕ್ರಿಯಾಮೂರ್ತಿರಧ್ಯಾತ್ಮಸ್ವಸ್ವರೂಪವಾನ್ ॥ ೩॥

ಶಿಷ್ಟಾಭಿಲಕ್ಷ್ಯೋ ಭೂತಾತ್ಮಾ ಧರ್ಮತ್ರಾಣಾರ್ಥಚೇಷ್ಟಿತಃ ।
ಅನ್ತರ್ಯಾಮೀ ಕಲಾರೂಪಃ ಕಾಲಾವಯವಸಾಕ್ಷಿಕಃ ॥ ೪॥

ವಸುಧಾಯಾಸಹರಣೋ ನಾರದಪ್ರೇರಣೋನ್ಮುಖಃ ।
ಪ್ರಭೂಷ್ಣುರ್ನಾರದೋದ್ಗೀತೋ ಲೋಕರಕ್ಷಾಪರಾಯಣಃ ॥ ೫॥

ರೌಹಿಣೇಯಕೃತಾನನ್ದೋ ಯೋಗಜ್ಞಾನನಿಯೋಜಕಃ ।
ಮಹಾಗುಹಾನ್ತರ್ನಿಕ್ಷಿಪ್ತಃ ಪುರಾಣವಪುರಾತ್ಮವಾನ್ ॥ ೬॥

ಶೂರವಂಶೈಕಧೀಶ್ಶೌರಿಃ ಕಂಸಶಂಕಾವಿಷಾದಕೃತ್ ।
ವಸುದೇವೋಲ್ಲಸಚ್ಛಕ್ತಿರ್ದೇವಕ್ಯಷ್ಟಮಗರ್ಭಗಃ ॥ ೭॥

ವಸುದೇವಸುತಃ ಶ್ರೀಮಾನ್ದೇವಕೀನನ್ದನೋ ಹರಿಃ ।
ಆಶ್ಚರ್ಯಬಾಲಃ ಶ್ರೀವತ್ಸಲಕ್ಷ್ಮವಕ್ಷಾಶ್ಚತುರ್ಭುಜಃ ॥ ೮॥

ಸ್ವಭಾವೋತ್ಕೃಷ್ಟಸದ್ಭಾವಃ ಕೃಷ್ಣಾಷ್ಟಮ್ಯನ್ತಸಮ್ಭವಃ ।
ಪ್ರಾಜಾಪತ್ಯರ್ಕ್ಷಸಮ್ಭೂತೋ ನಿಶೀಥಸಮಯೋದಿತಃ ॥ ೯॥

ಶಂಖಚಕ್ರಗದಾಪದ್ಮಪಾಣಿಃ ಪದ್ಮನಿಭೇಕ್ಷಣಃ ।
ಕಿರೀಟೀ ಕೌಸ್ತುಭೋರಸ್ಕಃ ಸ್ಫುರನ್ಮಕರಕುಣ್ಡಲಃ ॥ ೧೦॥

ಪೀತವಾಸಾ ಘನಶ್ಯಾಮಃ ಕುಂಚಿತಾಂಚಿತಕುನ್ತಲಃ ।
ಸುವ್ಯಕ್ತವ್ಯಕ್ತಾಭರಣಃ ಸೂತಿಕಾಗೃಹಭೂಷಣಃ ॥ ೧೧॥

ಕಾರಾಗಾರಾನ್ಧಕಾರಘ್ನಃ ಪಿತೃಪ್ರಾಗ್ಜನ್ಮಸೂಚಕಃ ।
ವಸುದೇವಸ್ತುತಃ ಸ್ತೋತ್ರಂ ತಾಪತ್ರಯನಿವಾರಣಃ ॥ ೧೨॥

ನಿರವದ್ಯಃ ಕ್ರಿಯಾಮೂರ್ತಿರ್ನ್ಯಾಯವಾಕ್ಯನಿಯೋಜಕಃ ।
ಅದೃಷ್ಟಚೇಷ್ಟಃ ಕೂಟಸ್ಥೋ ಧೃತಲೌಕಿಕವಿಗ್ರಹಃ ॥ ೧೩॥

ಮಹರ್ಷಿಮಾನಸೋಲ್ಲಾಸೋ ಮಹೀಮಂಗಲದಾಯಕಃ ।
ಸನ್ತೋಷಿತಸುರವ್ರಾತಃ ಸಾಧುಚಿತ್ತಪ್ರಸಾದಕಃ ॥ ೧೪॥

ಜನಕೋಪಾಯನಿರ್ದೇಷ್ಟಾ ದೇವಕೀನಯನೋತ್ಸವಃ ।
ಪಿತೃಪಾಣಿಪರಿಷ್ಕಾರೋ ಮೋಹಿತಾಗಾರರಕ್ಷಕಃ ॥ ೧೫॥

ಸ್ವಶಕ್ತ್ಯುದ್ಧಾಟಿತಾಶೇಷಕಪಾಟಃ ಪಿತೃವಾಹಕಃ ।
ಶೇಷೋರಗಫಣಾಚ್ಛತ್ರಶ್ಶೇಷೋಕ್ತಾಖ್ಯಾಸಹಸ್ರಕಃ ॥ ೧೬॥

ಯಮುನಾಪೂರವಿಧ್ವಂಸೀ ಸ್ವಭಾಸೋದ್ಭಾಸಿತವ್ರಜಃ ।
ಕೃತಾತ್ಮವಿದ್ಯಾವಿನ್ಯಾಸೋ ಯೋಗಮಾಯಾಗ್ರಸಮ್ಭವಃ ॥ ೧೭॥

ದುರ್ಗಾನಿವೇದಿತೋದ್ಭಾವೋ ಯಶೋದಾತಲ್ಪಶಾಯಕಃ ।
ನನ್ದಗೋಪೋತ್ಸವಸ್ಫೂರ್ತಿರ್ವ್ರಜಾನನ್ದಕರೋದಯಃ ॥ ೧೮॥

ಸುಜಾತಜಾತಕರ್ಮ ಶ್ರೀರ್ಗೋಪೀಭದ್ರೋಕ್ತಿನಿರ್ವೃತಃ ।
ಅಲೀಕನಿದ್ರೋಪಗಮಃ ಪೂತನಾಸ್ತನಪೀಡನಃ ॥ ೧೯॥

ಸ್ತನ್ಯಾತ್ತಪೂತನಾಪ್ರಾಣಃ ಪೂತನಾಕ್ರೋಶಕಾರಕಃ ।
ವಿನ್ಯಸ್ತರಕ್ಷಾಗೋಧೂಲಿರ್ಯಶೋದಾಕರಲಾಲಿತಃ ॥ ೨೦॥

ನನ್ದಾಘ್ರಾತಶಿರೋಮಧ್ಯಃ ಪೂತನಾಸುಗತಿಪ್ರದಃ ।
ಬಾಲಃ ಪರ್ಯಂಕನಿದ್ರಾಲುರ್ಮುಖಾರ್ಪಿತಪದಾಂಗುಲಿಃ ॥ ೨೧॥

ಅಂಜನಸ್ನಿಗ್ಧನಯನಃ ಪರ್ಯಾಯಾಂಕುರಿತಸ್ಮಿತಃ ।
ಲೀಲಾಕ್ಷಸ್ತರಲಾಲೋಕಶ್ಶಕಟಾಸುರಭಂಜನಃ ॥ ೨೨॥

ದ್ವಿಜೋದಿತಸ್ವಸ್ತ್ಯಯನೋ ಮಂತ್ರಪೂತಜಲಾಪ್ಲುತಃ ।
ಯಶೋದೋತ್ಸಂಗಪರ್ಯಂಕೋ ಯಶೋದಾಮುಖವೀಕ್ಷಕಃ ॥ ೨೩॥

ಯಶೋದಾಸ್ತನ್ಯಮುದಿತಸ್ತೃಣಾವರ್ತಾದಿದುಸ್ಸಹಃ ।
ತೃಣಾವರ್ತಾಸುರಧ್ವಂಸೀ ಮಾತೃವಿಸ್ಮಯಕಾರಕಃ ॥ ೨೪॥

ಪ್ರಶಸ್ತನಾಮಕರಣೋ ಜಾನುಚಂಕ್ರಮಣೋತ್ಸುಕಃ ।
ವ್ಯಾಲಮ್ಬಿಚೂಲಿಕಾರತ್ನೋ ಘೋಷಗೋಪಪ್ರಹರ್ಷಣಃ ॥ ೨೫॥

ಸ್ವಮುಖಪ್ರತಿಬಿಮ್ಬಾರ್ಥೀ ಗ್ರೀವಾವ್ಯಾಘ್ರನಖೋಜ್ಜ್ವಲಃ ।
ಪಂಕಾನುಲೇಪರುಚಿರೋ ಮಾಂಸಲೋರೂಕಟೀತಟಃ ॥ ೨೬॥

ಘೃಷ್ಟಜಾನುಕರದ್ವಂದ್ವಃ ಪ್ರತಿಬಿಮ್ಬಾನುಕಾರಕೃತ್ ।
ಅವ್ಯಕ್ತವರ್ಣವಾಗ್ವೃತ್ತಿಃ ಸ್ಮಿತಲಕ್ಷ್ಯರದೋದ್ಗ್ಮಃ ॥ ೨೭॥

ಧಾತ್ರೀಕರಸಮಾಲಮ್ಬೀ ಪ್ರಸ್ಖಲಚ್ಚಿತ್ರಚಂಕ್ರಮಃ ।
ಅನುರೂಪವಯಸ್ಯಾಢ್ಯಶ್ಚಾರುಕೌಮಾರಚಾಪಲಃ ॥ ೨೮॥

ವತ್ಸಪುಚ್ಛಸಮಾಕೃಷ್ಟೋ ವತ್ಸಪುಚ್ಛವಿಕರ್ಷಣಃ ।
ವಿಸ್ಮಾರಿತಾನ್ಯವ್ಯಾಪಾರೋ ಗೋಪಗೋಪೀಮುದಾವಹಃ ॥ ೨೯॥

ಅಕಾಲವತ್ಸನಿರ್ಮೋಕ್ತಾ ವ್ರಜವ್ಯಾಕ್ರೋಶಸುಸ್ಮಿತಃ ।
ನವನೀತಮಹಾಚೋರೋ ದಾರಕಾಹಾರದಾಯಕಃ ॥ ೩೦॥

ಪೀಠೋಲೂಖಲಸೋಪಾನಃ ಕ್ಷೀರಭಾಣ್ಡವಿಭೇದನಃ ।
ಶಿಕ್ಯಭಾಣ್ಡಸಮಾಕರ್ಷೀ ಧ್ವಾನ್ತಾಗಾರಪ್ರವೇಶಕೃತ್ ॥ ೩೧॥

ಭೂಷಾರತ್ನಪ್ರಕಾಶಾಢ್ಯೋ ಗೋಪ್ಯುಪಾಲಮ್ಭಭರ್ತ್ಸಿತಃ ।
ಪರಾಗಧೂಸರಾಕಾರೋ ಮೃದ್ಭಕ್ಷಣಕೃತೇಕ್ಷಣಃ ॥ ೩೨॥

ಬಾಲೋಕ್ತಮೃತ್ಕಥಾರಮ್ಭೋ ಮಿತ್ರಾನ್ತರ್ಗೂಢವಿಗ್ರಹಃ ।
ಕೃತಸನ್ತ್ರಾಸಲೋಲಾಕ್ಷೋ ಜನನೀಪ್ರತ್ಯಯಾವಹಃ ॥೩೩।

ಮಾತೃದೃಶ್ಯಾತ್ತವದನೋ ವಕ್ತ್ರಲಕ್ಷ್ಯಚರಾಚರಃ ।
ಯಶೋದಾಲಾಲಿತಸ್ವಾತ್ಮಾ ಸ್ವಯಂ ಸ್ವಾಚ್ಛನ್ದ್ಯಮೋಹನಃ ॥ ೩೪॥

ಸವಿತ್ರೀಸ್ನೇಹಸಂಶ್ಲಿಷ್ಟಃ ಸವಿತ್ರೀಸ್ತನಲೋಲುಪಃ ।
ನವನೀತಾರ್ಥನಾಪ್ರಹ್ವೋ ನವನೀತಮಹಾಶನಃ ॥ ೩೫॥

ಮೃಷಾಕೋಪಪ್ರಕಮ್ಪೋಷ್ಠೋ ಗೋಷ್ಠಾಂಗಣವಿಲೋಕನಃ ।
ದಧಿಮನ್ಥಘಟೀಭೇತ್ತಾ ಕಿಕಿಂಣೀಕ್ವಣಸೂಚಿತಃ ॥ ೩೬॥

ಹೈಯಂಗವೀನರಸಿಕೋ ಮೃಷಾಶ್ರುಶ್ಚೌರ್ಯಶಂಕಿತಃ ।
ಜನನೀಶ್ರಮವಿಜ್ಞಾತಾ ದಾಮಬನ್ಧನಿಯಂತ್ರಿತಃ ॥ ೩೭॥

ದಾಮಾಕಲ್ಪಶ್ಚಲಾಪಾಂಗೋ ಗಾಢೋಲೂಖಲಬನ್ಧನಃ ।
ಆಕೃಷ್ಟೋಲೂಖಲೋಽನನ್ತಃ ಕುಬೇರಸುತಶಾಪವಿತ್ ॥। ೩೮॥
ನಾರದೋಕ್ತಿಪರಾಮರ್ಶೀ ಯಮಲಾರ್ಜುನಭಂಜನಃ ।
ಧನದಾತ್ಮಜಸಂಘುಷ್ಟೋ ನನ್ದಮೋಚಿತಬನ್ಧನಃ ॥ ೩೯॥

ಬಾಲಕೋದ್ಗೀತನಿರತೋ ಬಾಹುಕ್ಷೇಪೋದಿತಪ್ರಿಯಃ ।
ಆತ್ಮಜ್ಞೋ ಮಿತ್ರವಶಗೋ ಗೋಪೀಗೀತಗುಣೋದಯಃ ॥ ೪೦॥

ಪ್ರಸ್ಥಾನಶಕಟಾರೂಢೋ ವೃನ್ದಾವನಕೃತಾಲಯಃ ।
ಗೋವತ್ಸಪಾಲನೈಕಾಗ್ರೋ ನಾನಾಕ್ರೀಡಾಪರಿಚ್ಛದಃ ॥ ೪೧॥

ಕ್ಷೇಪಣೀಕ್ಷೇಪಣಪ್ರೀತೋ ವೇಣುವಾದ್ಯವಿಶಾರದಃ ।
ವೃಷವತ್ಸಾನುಕರಣೋ ವೃಷಧ್ವನಿವಿಡಮ್ಬನಃ ॥ ೪೨॥

ನಿಯುದ್ಧಲೀಲಾಸಂಹೃಷ್ಟಃ ಕೂಜಾನುಕೃತಕೋಕಿಲಃ ।
ಉಪಾತ್ತಹಂಸಗಮನಸ್ಸರ್ವಜನ್ತುರುತಾನುಕೃತ್ ॥ ೪೩॥

ಭೃಂಗಾನುಕಾರೀ ದಧ್ಯನ್ನಚೋರೋ ವತ್ಸಪುರಸ್ಸರಃ ।
ಬಲೀ ಬಕಾಸುರಗ್ರಾಹೀ ಬಕತಾಲುಪ್ರದಾಹಕಃ ॥ ೪೪॥

ಭೀತಗೋಪಾರ್ಭಕಾಹೂತೋ ಬಕಚಂಚುವಿದಾರಣಃ ।
ಬಕಾಸುರಾರಿರ್ಗೋಪಾಲೋ ಬಾಲೋ ಬಾಲಾದ್ಭುತಾವಹಃ ॥ ೪೫॥

ಬಲಭದ್ರಸಮಾಶ್ಲಿಷ್ಟಃ ಕೃತಕ್ರೀಡಾನಿಲಾಯನಃ ।
ಕ್ರೀಡಾಸೇತುನಿಧಾನಜ್ಞಃ ಪ್ಲವಂಗೋತ್ಪ್ಲವನೋಽದ್ಭುತಃ ॥ ೪೬॥

ಕನ್ದುಕಕ್ರೀಡನೋ ಲುಪ್ತನನ್ದಾದಿಭವವೇದನಃ ।
ಸುಮನೋಽಲಂಕೃತಶಿರಾಃ ಸ್ವಾದುಸ್ನಿಗ್ಧಾನ್ನಶಿಕ್ಯಭೃತ್ ॥ ೪೭॥

ಗುಂಜಾಪ್ರಾಲಮ್ಬನಚ್ಛನ್ನಃ ಪಿಂಛೈರಲಕವೇಷಕೃತ್ ।
ವನ್ಯಾಶನಪ್ರಿಯಃ ಶೃಂಗರವಾಕಾರಿತವತ್ಸಕಃ ॥ ೪೮॥

ಮನೋಜ್ಞಪಲ್ಲವೋತ್ತಂಸಪುಷ್ಪಸ್ವೇಚ್ಛಾತ್ತಷಟ್ಪದಃ ।
ಮಂಜುಶಿಂಜಿತಮಂಜೀರಚರಣಃ ಕರಕಂಕಣಃ ॥ ೪೯॥

ಅನ್ಯೋನ್ಯಶಾಸನಃ ಕೀಡಾಪಟುಃ ಪರಮಕೈತವಃ ।
ಪ್ರತಿಧ್ವಾನಪ್ರಮುದಿತಃ ಶಾಖಾಚತುರಚಂಕ್ರಮಃ ॥ ೫೦॥

ಅಘದಾನವಸಂಹರ್ತಾ ವ್ರಜವಿಘ್ನವಿನಾಶನಃ ।
ವ್ರಜಸಂಜೀವನಃ ಶ್ರೇಯೋನಿಧಿರ್ದಾನವಮುಕ್ತಿದಃ ॥ ೫೧॥

ಕಾಲಿನ್ದೀಪುಲಿನಾಸೀನಸ್ಸಹಭುಕ್ತವ್ರಜಾರ್ಭಕಃ ।
ಕಕ್ಷಾಜಠರವಿನ್ಯಸ್ತವೇಣುರ್ವಲ್ಲವಚೇಷ್ಟಿತಃ ॥ ೫೨॥

ಭುಜಸನ್ಧ್ಯನ್ತರನ್ಯಸ್ತಶೃಂಗವೇತ್ರಃ ಶುಚಿಸ್ಮಿತಃ ।
ವಾಮಪಾಣಿಸ್ಥದಧ್ಯನ್ನಕಬಲಃ ಕಲಭಾಷಣಃ ॥ ೫೩॥

ಅಂಗುಲ್ಯನ್ತರವಿನ್ಯಸ್ತಫಲಃ ಪರಮಪಾವನಃ ।
ಅದೃಶ್ಯತರ್ಣಕಾನ್ವೇಷೀ ವಲ್ಲವಾರ್ಭಕಭೀತಿಹಾ ॥ ೫೪॥

ಅದೃಷ್ಟವತ್ಸಪವ್ರಾತೋ ಬ್ರಹ್ಮವಿಜ್ಞಾತವೈಭವಃ ।
ಗೋವತ್ಸವತ್ಸಪಾನ್ವೇಷೀ ವಿರಾಟ್-ಪುರುಷವಿಗ್ರಹಃ ॥ ೫೫॥

ಸ್ವಸಂಕಲ್ಪಾನುರೂಪಾರ್ಥೋ ವತ್ಸವತ್ಸಪರೂಪಧೃಕ್ ।
ಯಥಾವತ್ಸಕ್ರಿಯಾರೂಪೋ ಯಥಾಸ್ಥಾನನಿವೇಶನಃ ॥ ೫೬॥

ಯಥಾವ್ರಜಾರ್ಭಕಾಕಾರೋ ಗೋಗೋಪೀಸ್ತನ್ಯಪಸ್ಸುಖೀ ।
ಚಿರಾದ್ವಲೋಹಿತೋ ದಾನ್ತೋ ಬ್ರಹ್ಮವಿಜ್ಞಾತವೈಭವಃ ॥ ೫೭॥

ವಿಚಿತ್ರಶಕ್ತಿರ್ವ್ಯಾಲೀನಸೃಷ್ಟಗೋವತ್ಸವತ್ಸಪಃ ।
ಬ್ರಹ್ಮತ್ರಪಾಕರೋ ಧಾತೃಸ್ತುತಸ್ಸರ್ವಾರ್ಥಸಾಧಕಃ ॥ ೫೮॥

ಬ್ರಹ್ಮ ಬ್ರಹ್ಮಮಯೋಽವ್ಯಕ್ತಸ್ತೇಜೋರೂಪಸ್ಸುಖಾತ್ಮಕಃ ।
ನಿರುಕ್ತಂ ವ್ಯಾಕೃತಿರ್ವ್ಯಕ್ತೋ ನಿರಾಲಮ್ಬನಭಾವನಃ ॥ ೫೯॥

ಪ್ರಭವಿಷ್ಣುರತನ್ತ್ರೀಕೋ ದೇವಪಕ್ಷಾರ್ಥರೂಪಧೃಕ್ ।
ಅಕಾಮಸ್ಸರ್ವವೇದಾದಿರಣೀಯಸ್ಥೂಲರೂಪವಾನ್ ॥ ೬೦॥

ವ್ಯಾಪೀ ವ್ಯಾಪ್ಯಃ ಕೃಪಾಕರ್ತಾ ವಿಚಿತ್ರಾಚಾರಸಮ್ಮತಃ ।
ಛನ್ದೋಮಯಃ ಪ್ರಧಾನಾತ್ಮಾ ಮೂರ್ತಾಮೂರ್ತಿದ್ವಯಾಕೃತಿಃ ॥ ೬೧॥

ಅನೇಕಮೂರ್ತಿರಕ್ರೋಧಃ ಪರಃ ಪ್ರಕೃತಿರಕ್ರಮಃ ।
ಸಕಲಾವರಣೋಪೇತಸ್ಸರ್ವದೇವೋ ಮಹೇಶ್ವರಃ ॥ ೬೨॥

ಮಹಾಪ್ರಭಾವನಃ ಪೂರ್ವವತ್ಸವತ್ಸಪದರ್ಶಕಃ ।
ಕೃಷ್ಣಯಾದವಗೋಪಾಲೋ ಗೋಪಾಲೋಕನಹರ್ಷಿತಃ ॥ ೬೩॥

ಸ್ಮಿತೇಕ್ಷಾಹರ್ಷಿತಬ್ರಹ್ಮಾ ಭಕ್ತವತ್ಸಲವಾಕ್ಪ್ರಿಯಃ ।
ಬ್ರಹ್ಮಾನನ್ದಾಶ್ರುಧೌತಾಂಘ್ರಿರ್ಲೀಲಾವೈಚಿತ್ರ್ಯಕೋವಿದಃ ॥ ೬೪॥

ಬಲಭದ್ರೈಕಹೃದಯೋ ನಾಮಾಕಾರಿತಗೋಕುಲಃ ।
ಗೋಪಾಲಬಾಲಕೋ ಭವ್ಯೋ ರಜ್ಜುಯಜ್ಞೋಪವೀತವಾನ್ ॥ ೬೫॥

ವೃಕ್ಷಚ್ಛಾಯಾಹತಾಶಾನ್ತಿರ್ಗೋಪೋತ್ಸಂಗೋಪಬರ್ಹಣಃ ।
ಗೋಪಸಂವಾಹಿತಪದೋ ಗೋಪವ್ಯಜನವೀಜಿತಃ ॥೬೬।

ಗೋಪಗಾನಸುಖೋನ್ನಿದ್ರಃ ಶ್ರೀದಾಮಾರ್ಜಿತಸೌಹೃದಃ ।
ಸುನನ್ದಸುಹೃದೇಕಾತ್ಮಾ ಸುಬಲಪ್ರಾಣರಂಜನಃ ॥ ೬೭॥

ತಾಲೀವನಕೃತಕ್ರೀಡೋ ಬಲಪಾತಿತಧೇನುಕಃ ।
ಗೋಪೀಸೌಭಾಗ್ಯಸಮ್ಭಾವ್ಯೋ ಗೋಧೂಲಿಚ್ಛುರಿತಾಲಕಃ ॥ ೬೮॥

ಗೋಪೀವಿರಹಸನ್ತಪ್ತೋ ಗೋಪಿಕಾಕೃತಮಜ್ಜನಃ ।
ಪ್ರಲಮ್ಬಬಾಹುರುತ್ಫುಲ್ಲಪುಣ್ಡರೀಕಾವತಂಸಕಃ ॥ ೬೯॥

ವಿಲಾಸಲಲಿತಸ್ಮೇರಗರ್ಭಲೀಲಾವಲೋಕನಃ ।
ಸ್ರಗ್ಭೂಷಣಾನುಲೇಪಾಢ್ಯೋ ಜನನ್ಯುಪಹೃತಾನ್ನಭುಕ್ ॥ ೭೦॥

ವರಶಯ್ಯಾಶಯೋ ರಾಧಾಪ್ರೇಮಸಲ್ಲಾಪನಿರ್ವೃತಃ ।
ಯಮುನಾತಟಸಂಚಾರೀ ವಿಷಾರ್ತವ್ರಜಹರ್ಷದಃ ॥ ೭೧॥

ಕಾಲಿಯಕ್ರೋಧಜನಕಃ ವೃದ್ಧಾಹಿಕುಲವೇಷ್ಟಿತಃ ।
ಕಾಲಿಯಾಹಿಫಣಾರಂಗನಟಃ ಕಾಲಿಯಮರ್ದನಃ ॥ ೭೨॥

ನಾಗಪತ್ನೀಸ್ತುತಿಪ್ರೀತೋ ನಾನಾವೇಷಸಮೃದ್ಧಿಕೃತ್ ।
ಅವಿಷ್ವಕ್ತದೃಗಾತ್ಮೇಶಃ ಖದೃಗಾತ್ಮಸ್ತುತಿಪ್ರಿಯಃ ॥ ೭೩॥

ಸರ್ವೇಶ್ವರಸ್ಸರ್ವಗುಣಃ ಪ್ರಸಿದ್ಧಸ್ಸರ್ವಸಾತ್ವತಃ ।
ಅಕುಂಠಧಾಮಾ ಚನ್ದ್ರಾರ್ಕದೃಷ್ಟಿರಾಕಾಶನಿರ್ಮಲಃ ॥ ೭೪॥

ಅನಿರ್ದೇಶ್ಯಗತಿರ್ನಾಗವನಿತಾಪತಿಭೈಕ್ಷದಃ ।
ಸ್ವಾಂಘ್ರಿಮುದ್ರಾಂಕನಾಗೇನ್ದ್ರಮೂರ್ಧಾ ಕಾಲಿಯಸಂಸ್ತುತಃ ॥ ೭೫॥

ಅಭಯೋ ವಿಶ್ವತಶ್ಚಕ್ಷುಃ ಸ್ತುತೋತ್ತಮಗುಣಃ ಪ್ರಭುಃ ।
ಅಹಮಾತ್ಮಾ ಮರುತ್ಪ್ರಾಣಃ ಪರಮಾತ್ಮಾ ದ್ಯುಶೀರ್ಷವಾನ್ ॥ ೭೬॥

ನಾಗೋಪಾಯನಹೃಷ್ಟಾತ್ಮಾ ಹ್ರದೋತ್ಸಾರಿತಕಾಲಿಯಃ ।
ಬಲಭದ್ರಸುಖಾಲಾಪೋ ಗೋಪಾಲಿಂಗನನಿರ್ವೃತಃ ॥ ೭೭॥

ದಾವಾಗ್ನಿಭೀತಗೋಪಾಲಗೋಪ್ತಾ ದಾವಾಗ್ನಿನಾಶನಃ ।
ನಯನಾಚ್ಛಾದನಕ್ರೀಡಾಲಮ್ಪಟೋ ನೃಪಚೇಷ್ಟಿತಃ ॥ ೭೮॥

ಕಾಕಪಕ್ಷಧರಸ್ಸೌಮ್ಯೋ ಬಲವಾಹಕಕೇಲಿಮಾನ್ ।
ಬಲಘಾತಿತದುರ್ಧರ್ಷಪ್ರಲಮ್ಬೋ ಬಲವತ್ಸಲಃ ॥ ೭೯॥

ಮುಞ್ಜಾಟವ್ಯಗ್ನಿಶಮನಃ ಪ್ರಾವೃಟ್ಕಾಲವಿನೋದವಾನ್ ।
ಶಿಲಾನ್ಯಸ್ತಾನ್ನಭೃದ್ದೈತ್ಯಸಂಹರ್ತಾ ಶಾದ್ವಲಾಸನಃ ॥ ೮೦॥

ಸದಾಪ್ತಗೋಪಿಕೋದ್ಗೀತಃ ಕರ್ಣಿಕಾರಾವತಂಸಕಃ ।
ನಟವೇಷಧರಃ ಪದ್ಮಮಾಲಾಂಕೋ ಗೋಪಿಕಾವೃತಃ ॥ ೮೧॥

ಗೋಪೀಮನೋಹರಾಪಾಂಗೋ ವೇಣುವಾದನತತ್ಪರಃ ।
ವಿನ್ಯಸ್ತವದನಾಮ್ಭೋಜಶ್ಚಾರುಶಬ್ದಕೃತಾನನಃ ॥ ೮೨॥

ಬಿಮ್ಬಾಧರಾರ್ಪಿತೋದಾರವೇಣುರ್ವಿಶ್ವವಿಮೋಹನಃ ।
ವ್ರಜಸಂವರ್ಣಿತಶ್ರಾವ್ಯವೇಣುನಾದಃ ಶ್ರುತಿಪ್ರಿಯಃ ॥ ೮೩॥

ಗೋಗೋಪಗೋಪೀಜನ್ಮೇಪ್ಸುರ್ಬ್ರಹ್ಮೇನ್ದ್ರಾದ್ಯಭಿವನ್ದಿತಃ ।
ಗೀತಸ್ನುತಿಸರಿತ್ಪೂರೋ ನಾದನರ್ತಿತಬರ್ಹಿಣಃ ॥ ೮೪॥

ರಾಗಪಲ್ಲವಿತಸ್ಥಾಣುರ್ಗೀತಾನಮಿತಪಾದಪಃ ।
ವಿಸ್ಮಾರಿತತೃಣಗ್ರಾಸಮೃಗೋ ಮೃಗವಿಲೋಭಿತಃ ॥ ೮೫॥

ವ್ಯಾಘ್ರಾದಿಹಿಂಸ್ರಸಹಜವೈರಹರ್ತಾ ಸುಗಾಯನಃ ।
ಗಾಢೋದೀರಿತಗೋವೃನ್ದಪ್ರೇಮೋತ್ಕರ್ಣಿತತರ್ಣಕಃ ॥ ೮೬॥

ನಿಷ್ಪನ್ದಯಾನಬ್ರಹ್ಮಾದಿವೀಕ್ಷಿತೋ ವಿಶ್ವವನ್ದಿತಃ ।
ಶಾಖೋತ್ಕರ್ಣಶಕುನ್ತೌಘಶ್ಛತ್ರಾಯಿತಬಲಾಹಕಃ ॥ ೮೭॥

ಪ್ರಸನ್ನಃ ಪರಮಾನನ್ದಶ್ಚಿತ್ರಾಯಿತಚರಾಚರಃ ।
ಗೋಪಿಕಾಮದನೋ ಗೋಪೀಕುಚಕುಂಕುಮಮುದ್ರಿತಃ ॥ ೮೮॥

ಗೋಪಿಕನ್ಯಾಜಲಕ್ರೀಡಾಹೃಷ್ಟೋ ಗೋಪ್ಯಂಶುಕಾಪೃಹತ್ ।
ಸ್ಕನ್ಧಾರೋಪಿತಗೋಪಸ್ರಗ್ವಾಸಾಃ ಕುನ್ದನಿಭಸ್ಮಿತಃ ॥ ೮೯॥

ಗೋಪೀನೇತ್ರೋತ್ಪಲಶಶೀ ಗೋಪಿಕಾಯಾಚಿತಾಂಶುಕಃ ।
ಗೋಪೀನಮಸ್ಕ್ರಿಯಾದೇಷ್ಟಾ ಗೋಪ್ಯೇಕಕರವನ್ದಿತಃ ॥ ೯೦॥

ಗೋಪ್ಯಂಜಲಿವಿಶೇಷಾರ್ಥೀ ಗೋಪಕ್ರೀಡಾವಿಲೋಭಿತಃ ।
ಶಾನ್ತವಾಸಸ್ಫುರದ್ಗೋಪೀಕೃತಾಂಜಲಿರಘಾಪಹಃ ॥ ೯೧॥

ಗೋಪೀಕೇಲಿವಿಲಾಸಾರ್ಥೀ ಗೋಪೀಸಮ್ಪೂರ್ಣಕಾಮದಃ ।
ಗೋಪಸ್ತ್ರೀಈವಸ್ತ್ರದೋ ಗೋಪೀಚಿತ್ತಚೋರಃ ಕುತೂಹಲೀ ॥ ೯೨॥

ವೃನ್ದಾವನಪ್ರಿಯೋ ಗೋಪಬನ್ಧುರ್ಯಜ್ವಾನ್ನಯಾಚಿತಾ ।
ಯಜ್ಞೇಶೋ ಯಜ್ಞಭಾವಜ್ಞೋ ಯಜ್ಞಪತ್ನ್ಯಭಿವಾಞ್ಛಿತಃ ॥ ೯೩॥

ಮುನಿಪತ್ನೀವಿತೀರ್ಣಾನ್ನತೃಪ್ತೋ ಮುನಿವಧೂಪ್ರಿಯಃ ।
ದ್ವಿಜಪತ್ನ್ಯಭಿಭಾವಜ್ಞೋ ದ್ವಿಜಪತ್ನೀವರಪ್ರದಃ ॥ ೯೪॥

ಪ್ರತಿರುದ್ಧಸತೀಮೋಕ್ಷಪ್ರದೋ ದ್ವಿಜವಿಮೋಹಿತಾ ।
ಮುನಿಜ್ಞಾನಪ್ರದೋ ಯಜ್ವಸ್ತುತೋ ವಾಸವಯಾಗವಿತ್ ॥ ೯೫॥

ಪಿತೃಪ್ರೋಕ್ತಕ್ರಿಯಾರೂಪಶಕ್ರಯಾಗನಿವಾರಣಃ ।
ಶಕ್ರಾಽಮರ್ಷಕರಶ್ಶಕ್ರವೃಷ್ಟಿಪ್ರಶಮನೋನ್ಮುಖಃ ॥ ೯೬॥

ಗೋವರ್ಧನಧರೋ ಗೋಪಗೋವೃನ್ದತ್ರಾಣತತ್ಪರಃ ।
ಗೋವರ್ಧನಗಿರಿಛತ್ರಚಂಡದಂಡಭುಜಾರ್ಗಲಃ ॥ ೯೭॥

ಸಪ್ತಾಹವಿಧೃತಾದ್ರೀನ್ದ್ರೋ ಮೇಘವಾಹನಗರ್ವಹಾ ।
ಭುಜಾಗ್ರೋಪರಿವಿನ್ಯಸ್ತಕ್ಷ್ಮಾಧರಕ್ಷ್ಮಾಭೃದಚ್ಯುತಃ ॥ ೯೮॥

ಸ್ವಸ್ಥಾನಸ್ಥಾಪಿತಗಿರಿರ್ಗೋಪೀದಧ್ಯಕ್ಷತಾರ್ಚಿತಃ ।
ಸುಮನಸ್ಸುಮನೋವೃಷ್ಟಿಹೃಷ್ಟೋ ವಾಸವವನ್ದಿತಃ ॥ ೯೯॥

ಕಾಮಧೇನುಪಯಃಪೂರಾಭಿಷಿಕ್ತಸ್ಸುರಭಿಸ್ತುತಃ ।
ಧರಾಂಘ್ರಿರೋಷಧೀರೋಮಾ ಧರ್ಮಗೋಪ್ತಾ ಮನೋಮಯಃ ॥ ೧೦೦॥

ಜ್ಞಾನಯಜ್ಞಪ್ರಿಯಶ್ಶಾಸ್ತ್ರನೇತ್ರಸ್ಸರ್ವಾರ್ಥಸಾರಥಿಃ ।
ಐರಾವತಕರಾನೀತವಿಯದ್ಗಂಗಾಪ್ಲುತೋ ವಿಭುಃ ॥ ೧೦೧॥

ಬ್ರಹ್ಮಾಭಿಷಿಕ್ತೋ ಗೋಗೋಪ್ತಾ ಸರ್ವಲೋಕಶುಭಂಕರಃ ।
ಸರ್ವವೇದಮಯೋ ಮಗ್ನನನ್ದಾನ್ವೇಷಿಪಿತೃಪ್ರಿಯಃ ॥ ೧೦೨॥

ವರುಣೋದೀರಿತಾತ್ಮೇಕ್ಷಾಕೌತುಕೋ ವರುಣಾರ್ಚಿತಃ ।
ವರುಣಾನೀತಜನಕೋ ಗೋಪಜ್ಞಾತಾತ್ಮವೈಭವಃ ॥ ೧೦೩॥

ಸ್ವರ್ಲೋಕಾಲೋಕಸಂಹೃಷ್ಟಗೋಪವರ್ಗತ್ರಿವರ್ಗದಃ ।
ಬ್ರಹ್ಮಹೃದ್ಗೋಪಿತೋ ಗೋಪದ್ರಷ್ಟಾ ಬ್ರಹ್ಮಪದಪ್ರದಃ ॥ ೧೦೪॥

ಶರಚ್ಚನ್ದ್ರವಿಹಾರೋತ್ಕಃ ಶ್ರೀಪತಿರ್ವಶಕೋ ಕ್ಷಮಃ ।
ಭಯಾಪಹೋ ಭರ್ತೃರುದ್ಧಗೋಪಿಕಾಧ್ಯಾನಗೋಚರಃ ॥ ೧೦೫॥

ಗೋಪಿಕಾನಯನಾಸ್ವಾದ್ಯೋ ಗೋಪೀನರ್ಮೋಕ್ತಿನಿರ್ವೃತಃ ।
ಗೋಪಿಕಾಮಾನಹರಣೋ ಗೋಪಿಕಾಶತಯೂಥಪಃ ॥ ೧೦೬॥

ವೈಜಯನ್ತೀಸ್ರಗಾಕಲ್ಪೋ ಗೋಪಿಕಾಮಾನವರ್ಧನಃ ।
ಗೋಪಕಾನ್ತಾಸುನಿರ್ದೇಷ್ಟಾ ಕಾನ್ತೋ ಮನ್ಮಥಮನ್ಮಥಃ ॥ ೧೦೭॥

ಸ್ವಾತ್ಮಾಸ್ಯದತ್ತತಾಮ್ಬೂಲಃ ಫಲಿತೋತ್ಕೃಷ್ಟಯೌವನಃ ।
ವಲ್ಲವೀಸ್ತನಸಕ್ತಾಕ್ಷೋ ವಲ್ಲವೀಪ್ರೇಮಚಾಲಿತಃ ॥ ೧೦೮॥

ಗೋಪೀಚೇಲಾಂಚಲಾಸೀನೋ ಗೋಪೀನೇತ್ರಾಬ್ಜಷಟ್ಪದಃ ।
ರಾಸಕ್ರೀಡಾಸಮಾಸಕ್ತೋ ಗೋಪೀಮಣ್ಡಲಮಣ್ಡನಃ ॥ ೧೦೯॥

ಗೋಪೀಹೇಮಮಣಿಶ್ರೇಣಿಮಧ್ಯೇನ್ದ್ರಮಣಿರುಜ್ಜ್ವಲಃ ।
ವಿದ್ಯಾಧರೇನ್ದುಶಾಪಘ್ನಶ್ಶಂಖಚೂಡಶಿರೋಹರಃ ॥ ೧೧೦॥

ಶಂಖಚೂಡಶಿರೋರತ್ನಸಮ್ಪ್ರೀಣಿತಬಲೋಽನಘಃ ।
ಅರಿಷ್ಟಾರಿಷ್ಟಕೃದ್ದುಷ್ಟಕೇಶಿದೈತ್ಯನಿಷೂದನಃ ॥ ೧೧೧॥

ಸರಸಸ್ಸಸ್ಮಿತಮುಖಸ್ಸುಸ್ಥಿರೋ ವಿರಹಾಕುಲಃ ।
ಸಂಕರ್ಷಣಾರ್ಪಿತಪ್ರೀತಿರಕ್ರೂರಧ್ಯಾನಗೋಚರಃ ॥ ೧೧೨॥

ಅಕ್ರೂರಸಂಸ್ತುತೋ ಗೂಢೋ ಗುಣವೃತ್ಯುಪಲಕ್ಷಿತಃ ।
ಪ್ರಮಾಣಗಮ್ಯಸ್ತನ್ಮಾತ್ರಾಽವಯವೀ ಬುದ್ಧಿತತ್ಪರಃ ॥ ೧೧೩॥

ಸರ್ವಪ್ರಮಾಣಪ್ರಮಧೀಸ್ಸರ್ವಪ್ರತ್ಯಯಸಾಧಕಃ ।
ಪುರುಷಶ್ಚ ಪ್ರಧಾನಾತ್ಮಾ ವಿಪರ್ಯಾಸವಿಲೋಚನಃ ॥ ೧೧೪॥

ಮಧುರಾಜನಸಂವೀಕ್ಷ್ಯೋ ರಜಕಪ್ರತಿಘಾತಕಃ ।
ವಿಚಿತ್ರಾಮ್ಬರಸಂವೀತೋ ಮಾಲಾಕಾರವರಪ್ರದಃ ॥ ೧೧೫॥

ಕುಬ್ಜಾವಕ್ರತ್ವನಿರ್ಮೋಕ್ತಾ ಕುಬ್ಜಾಯೌವನದಾಯಕಃ ।
ಕುಬ್ಜಾಂಗರಾಗಸುರಭಿಃ ಕಂಸಕೋದಣ್ಡಖಣ್ಡನಃ ॥ ೧೧೬॥

ಧೀರಃ ಕುವಲಯಾಪೀಡಮರ್ದನಃ ಕಂಸಭೀತಿಕೃತ್ ।
ದನ್ತಿದನ್ತಾಯುಧೋ ರಂಗತ್ರಾಸಕೋ ಮಲ್ಲಯುದ್ಧವಿತ್ ॥ ೧೧೭॥

ಚಾಣೂರಹನ್ತಾ ಕಂಸಾರಿರ್ದೇವಕೀಹರ್ಷದಾಯಕಃ ।
ವಸುದೇವಪದಾನಮ್ರಃ ಪಿತೃಬನ್ಧವಿಮೋಚನಃ ॥ ೧೧೮॥

ಉರ್ವೀಭಯಾಪಹೋ ಭೂಪ ಉಗ್ರಸೇನಾಧಿಪತ್ಯದಃ ।
ಆಜ್ಞಾಸ್ಥಿತಶಚೀನಾಥಸ್ಸುಧರ್ಮಾನಯನಕ್ಷಮಃ ॥ ೧೧೯॥

ಆದ್ಯೋ ದ್ವಿಜಾತಿಸತ್ಕರ್ತಾ ಶಿಷ್ಟಾಚಾರಪ್ರದರ್ಶಕಃ ।
ಸಾನ್ದೀಪನಿಕೃತಾಭ್ಯಸ್ತವಿದ್ಯಾಭ್ಯಾಸೈಕಧೀಸ್ಸುಧೀಃ ॥ ೧೨೦॥

ಗುರ್ವಭೀಷ್ಟಕ್ರಿಯಾದಕ್ಷಃ ಪಶ್ಚಿಮೋದಧಿಪೂಜಿತಃ ।
ಹತಪಂಚಜನಪ್ರಾಪ್ತಪಾಂಚಜನ್ಯೋ ಯಮಾರ್ಚಿತಃ ॥ ೧೨೧॥

ಧರ್ಮರಾಜಜಯಾನೀತಗುರುಪುತ್ರ ಉರುಕ್ರಮಃ ।
ಗುರುಪುತ್ರಪ್ರದಶ್ಶಾಸ್ತಾ ಮಧುರಾಜಸಭಾಸದಃ ॥ ೧೨೨॥

ಜಾಮದಗ್ನ್ಯಸಮಭ್ಯರ್ಚ್ಯೋ ಗೋಮನ್ತಗಿರಿಸಂಚರಃ ।
ಗೋಮನ್ತದಾವಶಮನೋ ಗರುಡಾನೀತಭೂಷಣಃ ॥ ೧೨೩॥

ಚಕ್ರಾದ್ಯಾಯುಧಸಂಶೋಭೀ ಜರಾಸನ್ಧಮದಾಪಹಃ ।
ಸೃಗಾಲಾವನಿಪಾಲಘ್ನಸ್ಸೃಗಾಲಾತ್ಮಜರಾಜ್ಯದಃ ॥ ೧೨೪॥

ವಿಧ್ವಸ್ತಕಾಲಯವನೋ ಮುಚುಕುನ್ದವರಪ್ರದಃ ।
ಆಜ್ಞಾಪಿತಮಹಾಮ್ಭೋಧಿರ್ದ್ವಾರಕಾಪುರಕಲ್ಪನಃ ॥ ೧೨೫॥

ದ್ವಾರಕಾನಿಲಯೋ ರುಕ್ಮಿಮಾನಹನ್ತಾ ಯದೂದ್ವಹಃ ।
ರುಚಿರೋ ರುಕ್ಮಿಣೀಜಾನಿಃ ಪ್ರದ್ಯುಮ್ನಜನಕಃ ಪ್ರಭುಃ ॥ ೧೨೬॥

ಅಪಾಕೃತತ್ರಿಲೋಕಾರ್ತಿರನಿರುದ್ಧಪಿತಾಮಹಃ ।
ಅನಿರುದ್ಧಪದಾನ್ವೇಷೀ ಚಕ್ರೀ ಗರುಡವಾಹನಃ ॥ ೧೨೭॥

ಬಾಣಾಸುರಪುರೀರೋದ್ಧಾ ರಕ್ಷಾಜ್ವಲನಯನ್ತ್ರಜಿತ್ ।
ಧೂತಪ್ರಮಥಸಂರಮ್ಭೋ ಜಿತಮಾಹೇಶ್ವರಜ್ವರಃ ॥ ೧೨೮॥

ಷಟ್ಚಕ್ರಶಕ್ತಿನಿರ್ಜೇತಾ ಭೂತವೇತಾಲಮೋಹಕೃತ್ ।
ಶಮ್ಭುತ್ರಿಶೂಲಜಿಚ್ಛಮ್ಭುಜೃಮ್ಭಣಶ್ಶಂಮ್ಭುಸಂಸ್ತುತಃ ॥ ೧೨೯॥

ಇನ್ದ್ರಿಯಾತ್ಮೇನ್ದುಹೃದಯಸ್ಸರ್ವಯೋಗೇಶ್ವರೇಶ್ವರಃ ।
ಹಿರಣ್ಯಗರ್ಭಹೃದಯೋ ಮೋಹಾವರ್ತನಿವರ್ತನಃ ॥ ೧೩೦॥

ಆತ್ಮಜ್ಞಾನನಿಧಿರ್ಮೇಧಾ ಕೋಶಸ್ತನ್ಮಾತ್ರರೂಪವಾನ್ ।
ಇನ್ದ್ರೋಽಗ್ನಿವದನಃ ಕಾಲನಾಭಸ್ಸರ್ವಾಗಮಾಧ್ವಗಃ ॥ ೧೩೧॥

ತುರೀಯಸರ್ವಧೀಸಾಕ್ಷೀ ದ್ವನ್ದ್ವಾರಾಮಾತ್ಮದೂರಗಃ ।
ಅಜ್ಞಾತಪಾರೋ ವಶ್ಯಶ್ರೀರವ್ಯಾಕೃತವಿಹಾರವಾನ್ ॥ ೧೩೨॥

ಆತ್ಮಪ್ರದೀಪೋ ವಿಜ್ಞಾನಮಾತ್ರಾತ್ಮಾ ಶ್ರೀನಿಕೇತನಃ ।
ಬಾಣಬಾಹುವನಚ್ಛೇತ್ತಾ ಮಹೇನ್ದ್ರಪ್ರೀತಿವರ್ಧನಃ ॥ ೧೩೩॥

ಅನಿರುದ್ಧನಿರೋಧಜ್ಞೋ ಜಲೇಶಾಹೃತಗೋಕುಲಃ ।
ಜಲೇಶವಿಜಯೀ ವೀರಸ್ಸತ್ರಾಜಿದ್ರತ್ನಯಾಚಕಃ ॥ ೧೩೪॥

ಪ್ರಸೇನಾನ್ವೇಷಣೋದ್ಯುಕ್ತೋ ಜಾಮ್ಬವದ್ಧೃತರತ್ನದಃ ।
ಜಿತರ್ಕ್ಷರಾಜತನಯಾಹರ್ತಾ ಜಾಮ್ಬವತೀಪ್ರಿಯಃ ॥ ೧೩೫॥

ಸತ್ಯಭಾಮಾಪ್ರಿಯಃ ಕಾಮಶ್ಶತಧನ್ವಶಿರೋಹರಃ ।
ಕಾಲಿನ್ದೀಪತಿರಕ್ರೂರಬನ್ಧುರಕ್ರೂರರತ್ನದಃ ॥ ೧೩೬॥

ಕೈಕೇಯೀರಮಣೋ ಭದ್ರಾಭರ್ತಾ ನಾಗ್ನಜಿತೀಧವಃ ।
ಮಾದ್ರೀಮನೋಹರಶ್ಶೈಬ್ಯಾಪ್ರಾಣಬನ್ಧುರುರುಕ್ರಮಃ ॥ ೧೩೭॥

ಸುಶೀಲಾದಯಿತೋ ಮಿತ್ರವಿನ್ದಾನೇತ್ರಮಹೋತ್ಸವಃ ।
ಲಕ್ಷ್ಮಣಾವಲ್ಲಭೋ ರುದ್ಧಪ್ರಾಗ್ಜ್ಯೋತಿಷಮಹಾಪುರಃ ॥ ೧೩೮॥

ಸುರಪಾಶಾವೃತಿಚ್ಛೇದೀ ಮುರಾರಿಃ ಕ್ರೂರಯುದ್ಧವಿತ್।
ಹಯಗ್ರೀವಶಿರೋಹರ್ತಾ ಸರ್ವಾತ್ಮಾ ಸರ್ವದರ್ಶನಃ ॥ ೧೩೯॥

ನರಕಾಸುರವಿಚ್ಛೇತ್ತಾ ನರಕಾತ್ಮಜರಾಜ್ಯದಃ।
ಪೃಥ್ವೀಸ್ತುತಃ ಪ್ರಕಾಶಾತ್ಮಾ ಹೃದ್ಯೋ ಯಜ್ಞಫಲಪ್ರದಃ ॥ ೧೪೦॥

ಗುಣಗ್ರಾಹೀ ಗುಣದ್ರಷ್ಟಾ ಗೂಢಸ್ವಾತ್ಮಾ ವಿಭೂತಿಮಾನ್ ।
ಕವಿರ್ಜಗದುಪದ್ರಷ್ಟಾ ಪರಮಾಕ್ಷರವಿಗ್ರಹಃ ॥ ೧೪೧॥

ಪ್ರಪನ್ನಪಾಲನೋ ಮಾಲೀ ಮಹದ್ ಬ್ರಹ್ಮವಿವರ್ಧನಃ ।
ವಾಚ್ಯವಾಚಕಶಕ್ತ್ಯರ್ಥಸ್ಸರ್ವವ್ಯಾಕೃತಸಿದ್ಧಿದಃ ॥ ೧೪೨॥

ಸ್ವಯಂಪ್ರಭುರನಿರ್ವೇದ್ಯಸ್ಸ್ವಪ್ರಕಾಶಶ್ಚಿರನ್ತನಃ ।
ನಾದಾತ್ಮಾ ಮನ್ತ್ರಕೋಟೀಶೋ ನಾನಾವಾದನಿರೋಧಕಃ ॥ ೧೪೩॥

ಕನ್ದರ್ಪಕೋಟಿಲಾವಣ್ಯಃ ಪರಾರ್ಥೈಕಪ್ರಯೋಜಕಃ ।
ಅಮರೀಕೃತದೇವೌಘಃ ಕನ್ಯಕಾಬನ್ಧಮೋಚನಃ ॥ ೧೪೪॥

ಷೋಡಶಸ್ತ್ರೀಸಹಸ್ರೇಶಃ ಕಾನ್ತಃ ಕಾನ್ತಾಮನೋಭವಃ ।
ಕ್ರೀಡಾರತ್ನಾಚಲಾಹರ್ತಾ ವರುಣಚ್ಛತ್ರಶೋಭಿತಃ ॥ ೧೪೫॥

ಶಕ್ರಾಭಿವನ್ದಿತಶ್ಶಕ್ರಜನನೀಕುಣ್ಡಲಪ್ರದಃ ।
ಅದಿತಿಪ್ರಸ್ತುತಸ್ತೋತ್ರೋ ಬ್ರಾಹ್ಮಣೋದ್ಘುಷ್ಟಚೇತನಃ ॥ ೧೪೬॥

ಪುರಾಣಸ್ಸಂಯಮೀ ಜನ್ಮಾಲಿಪ್ತಃ ಷಡ್ವಿಂಶಕೋಽರ್ಥದಃ ।
ಯಶಸ್ಯನೀತಿರಾದ್ಯನ್ತರಹಿತಸ್ಸತ್ಕಥಾಪ್ರಿಯಃ ॥ ೧೪೭॥

ಬ್ರಹ್ಮಬೋಧಃ ಪರಾನನ್ದಃ ಪಾರಿಜಾತಾಪಹಾರಕಃ ।
ಪೌಣ್ಡ್ರಕಪ್ರಾಣಹರಣಃ ಕಾಶಿರಾಜನಿಷೂದನಃ ॥ ೧೪೮॥

ಕೃತ್ಯಾಗರ್ವಪ್ರಶಮನೋ ವಿಚಕ್ರವಧದೀಕ್ಷಿತಃ ।
ಕಂಸವಿಧ್ವಂಸನಸ್ಸಾಮ್ಬಜನಕೋ ಡಿಂಮ್ಭಕಾರ್ದನಃ ॥ ೧೪೯॥

ಮುನಿರ್ಗೋಪ್ತಾ ಪಿತೃವರಪ್ರದಸ್ಸವನದೀಕ್ಷಿತಃ ।
ರಥೀ ಸಾರಥ್ಯನಿರ್ದೇಷ್ಟಾ ಫಾಲ್ಗುನಃ ಫಾಲ್ಗುನಿಪ್ರಿಯಃ ॥ ೧೫೦॥

ಸಪ್ತಾಬ್ಧಿಸ್ತಮ್ಭನೋದ್ಭಾತೋ ಹರಿಸ್ಸಪ್ತಾಬ್ಧಿಭೇದನಃ ।
ಆತ್ಮಪ್ರಕಾಶಃ ಪೂರ್ಣಶ್ರೀರಾದಿನಾರಾಯಣೇಕ್ಷಿತಃ ॥ ೧೫೧॥

ವಿಪ್ರಪುತ್ರಪ್ರದಶ್ಚೈವ ಸರ್ವಮಾತೃಸುತಪ್ರದಃ ।
ಪಾರ್ಥವಿಸ್ಮಯಕೃತ್ಪಾರ್ಥಪ್ರಣವಾರ್ಥಪ್ರಬೋಧನಃ ॥ ೧೫೨॥

ಕೈಲಾಸಯಾತ್ರಾಸುಮುಖೋ ಬದರ್ಯಾಶ್ರಮಭೂಷಣಃ ।
ಘಣ್ಟಾಕರ್ಣಕ್ರಿಯಾಮೌಢ್ಯಾತ್ತೋಷಿತೋ ಭಕ್ತವತ್ಸಲಃ ॥ ೧೫೩॥

ಮುನಿವೃನ್ದಾದಿಭಿರ್ಧ್ಯೇಯೋ ಘಣ್ಟಾಕರ್ಣವರಪ್ರದಃ ।
ತಪಶ್ಚರ್ಯಾಪರಶ್ಚೀರವಾಸಾಃ ಪಿಂಗಜಟಾಧರಃ ॥ ೧೫೪॥

ಪ್ರತ್ಯಕ್ಷೀಕೃತಭೂತೇಶಶ್ಶಿವಸ್ತೋತಾ ಶಿವಸ್ತುತಃ ।
ಕೃಷ್ಣಾಸ್ವಯಂವರಾಲೋಕಕೌತುಕೀ ಸರ್ವಸಮ್ಮತಃ ॥ ೧೫೫॥

ಬಲಸಂರಮ್ಭಶಮನೋ ಬಲದರ್ಶಿತಪಾಣ್ಡವಃ ।
ಯತಿವೇಷಾರ್ಜುನಾಭೀಷ್ಟದಾಯೀ ಸರ್ವಾತ್ಮಗೋಚರಃ ॥ ೧೫೬॥

ಸುಭದ್ರಾಫಾಲ್ಗುನೋದ್ವಾಹಕರ್ತಾ ಪ್ರೀಣಿತಫಾಲ್ಗುನಃ ।
ಖಾಣ್ಡವಪ್ರೀಣಿತಾರ್ಚಿಷ್ಮಾನ್ಮಯದಾನವಮೋಚನಃ ॥ ೧೫೭॥

ಸುಲಭೋ ರಾಜಸೂಯಾರ್ಹಯುಧಿಷ್ಠಿರನಿಯೋಜಕಃ ।
ಭೀಮಾರ್ದಿತಜರಾಸನ್ಧೋ ಮಾಗಧಾತ್ಮಜರಾಜ್ಯದಃ ॥ ೧೫೮॥

ರಾಜಬನ್ಧನನಿರ್ಮೋಕ್ತಾ ರಾಜಸೂಯಾಗ್ರಪೂಜನಃ ।
ಚೈದ್ಯಾದ್ಯಸಹನೋ ಭೀಷ್ಮಸ್ತುತಸ್ಸಾತ್ವತಪೂರ್ವಜಃ ॥ ೧೫೯॥

ಸರ್ವಾತ್ಮಾರ್ಥಸಮಾಹರ್ತಾ ಮನ್ದರಾಚಲಧಾರಕಃ ।
ಯಜ್ಞಾವತಾರಃ ಪ್ರಹ್ಲಾದಪ್ರತಿಜ್ಞಾಪ್ರತಿಪಾಲಕಃ ॥ ೧೬೦॥

ಬಲಿಯಜ್ಞಸಭಾಧ್ವಂಸೀ ದೃಪ್ತಕ್ಷತ್ರಕುಲಾನ್ತಕಃ ।
ದಶಗ್ರೀವಾನ್ತಕೋ ಜೇತಾ ರೇವತೀಪ್ರೇಮವಲ್ಲಭಃ ॥ ೧೬೧॥

ಸರ್ವಾವತಾರಾಧಿಷ್ಠಾತಾ ವೇದಬಾಹ್ಯವಿಮೋಹನಃ ।
ಕಲಿದೋಷನಿರಾಕರ್ತಾ ದಶನಾಮಾ ದೃಢವ್ರತಃ ॥ ೧೬೨॥

ಅಮೇಯಾತ್ಮಾ ಜಗತ್ಸ್ವಾಮೀ ವಾಗ್ಮೀ ಚೈದ್ಯಶಿರೋಹರಃ ।
ದ್ರೌಪದೀರಚಿತಸ್ತೋತ್ರಃ ಕೇಶವಃ ಪುರುಷೋತ್ತಮಃ ॥ ೧೬೩॥

ನಾರಾಯಣೋ ಮಧುಪತಿರ್ಮಾಧವೋ ದೋಷವರ್ಜಿತಃ ।
ಗೋವಿನ್ದಃ ಪುಣ್ಡರೀಕಾಕ್ಷೋ ವಿಷ್ಣುಶ್ಚ ಮಧುಸೂದನಃ ॥ ೧೬೪॥

ತ್ರಿವಿಕ್ರಮಸ್ತ್ರಿಲೋಕೇಶೋ ವಾಮನಃ ಶ್ರೀಧರಃ ಪುಮಾನ್ ।
ಹೃಷೀಕೇಶೋ ವಾಸುದೇವಃ ಪದ್ಮನಾಭೋ ಮಹಾಹ್ರದಃ ॥ ೧೬೫॥

ದಾಮೋದರಶ್ಚತುರ್ವ್ಯೂಹಃ ಪಾಂಚಾಲೀಮಾನರಕ್ಷಣಃ ।
ಸಾಲ್ವಘ್ನಸ್ಸಮರಶ್ಲಾಘೀ ದನ್ತವಕ್ತ್ರನಿಬರ್ಹಣಃ ॥ ೧೬೬॥

ದಾಮೋದರಪ್ರಿಯಸಖಾ ಪೃಥುಕಾಸ್ವಾದನಪ್ರಿಯಃ ॥

ಘೃಣೀ ದಾಮೋದರಃ ಶ್ರೀದೋ ಗೋಪೀಪುನರವೇಕ್ಷಕಃ ॥ ೧೬೭॥

ಗೋಪಿಕಾಮುಕ್ತಿದೋ ಯೋಗೀ ದುರ್ವಾಸಸ್ತೃಪ್ತಿಕಾರಕಃ ।
ಅವಿಜ್ಞಾತವ್ರಜಾಕೀರ್ಣಪಾಣ್ಡವಾಲೋಕನೋ ಜಯೀ ॥ ೧೬೮॥

ಪಾರ್ಥಸಾರಥ್ಯನಿರತಃ ಪ್ರಾಜ್ಞಃ ಪಾಣ್ಡವದೂತ್ಯಕೃತ್ ।
ವಿದುರಾತಿಥ್ಯಸನ್ತುಷ್ಟಃ ಕುನ್ತೀಸನ್ತೋಷದಾಯಕಃ ॥ ೧೬೯॥

ಸುಯೋಧನತಿರಸ್ಕರ್ತಾ ದುರ್ಯೋಧನವಿಕಾರವಿತ್ ।
ವಿದುರಾಭಿಷ್ಠುತೋ ನಿತ್ಯೋ ವಾರ್ಷ್ಣೇಯೋ ಮಂಗಲಾತ್ಮಕಃ ॥ ೧೭೦॥

ಪಂಚವಿಂಶತಿತತ್ವೇಶಶ್ಚತುರ್ವಿಂಶತಿದೇಹಭಾಕ್ ।
ಸರ್ವಾನುಗ್ರಾಹಕಸ್ಸರ್ವದಾಶಾರ್ಹಸತತಾರ್ಚಿತಃ ॥ ೧೭೧॥

ಅಚಿನ್ತ್ಯೋ ಮಧುರಾಲಾಪಸ್ಸಾಧುದರ್ಶೀ ದುರಾಸದಃ ।
ಮನುಷ್ಯಧರ್ಮಾನುಗತಃ ಕೌರವೇನ್ದ್ರಕ್ಷಯೇಕ್ಷಿತಾ ॥ ೧೭೨॥

ಉಪೇನ್ದ್ರೋ ದಾನವಾರಾತಿರುರುಗೀತೋ ಮಹಾದ್ಯುತಿಃ ।
ಬ್ರಹ್ಮಣ್ಯದೇವಃ ಶ್ರುತಿಮಾನ್ ಗೋಬ್ರಾಹ್ಮಣಹಿತಾಶಯಃ ॥ ೧೭೩॥

ವರಶೀಲಶ್ಶಿವಾರಮ್ಭಸ್ಸುವಿಜ್ಞಾನವಿಮೂರ್ತಿಮಾನ್ ।
ಸ್ವಭಾವಶುದ್ಧಸ್ಸನ್ಮಿತ್ರಸ್ಸುಶರಣ್ಯಸ್ಸುಲಕ್ಷಣಃ ॥ ೧೭೪॥

ಧೃತರಾಷ್ಟ್ರಗತೋದೃಷ್ಟಿಪ್ರದಃ ಕರ್ಣವಿಭೇದನಃ ।
ಪ್ರತೋದಧೃಗ್ವಿಶ್ವರೂಪವಿಸ್ಮಾರಿತಧನಂಜಯಃ ॥ ೧೭೫॥

ಸಾಮಗಾನಪ್ರಿಯೋ ಧರ್ಮಧೇನುರ್ವರ್ಣೋತ್ತಮೋಽವ್ಯಯಃ ।
ಚತುರ್ಯುಗಕ್ರಿಯಾಕರ್ತಾ ವಿಶ್ವರೂಪಪ್ರದರ್ಶಕಃ ॥ ೧೭೬॥

ಬ್ರಹ್ಮಬೋಧಪರಿತ್ರಾತಪಾರ್ಥೋ ಭೀಷ್ಮಾರ್ಥಚಕ್ರಭೃತ್ ।
ಅರ್ಜುನಾಯಾಸವಿಧ್ವಂಸೀ ಕಾಲದಂಷ್ಟ್ರಾವಿಭೂಷಣಃ ॥ ೧೭೭॥

ಸುಜಾತಾನನ್ತಮಹಿಮಾ ಸ್ವಪ್ನವ್ಯಾಪಾರಿತಾರ್ಜುನಃ ।
ಅಕಾಲಸನ್ಧ್ಯಾಘಟನಶ್ಚಕ್ರಾನ್ತರಿತಭಾಸ್ಕರಃ ॥ ೧೭೮॥

ದುಷ್ಟಪ್ರಮಥನಃ ಪಾರ್ಥಪ್ರತಿಜ್ಞಾಪರಿಪಾಲಕಃ ।
ಸಿನ್ಧುರಾಜಶಿರಃಪಾತಸ್ಥಾನವಕ್ತಾ ವಿವೇಕದೃಕ್ ॥ ೧೭೯॥

ಸುಭದ್ರಾಶೋಕಹರಣೋ ದ್ರೋಣೋತ್ಸೇಕಾದಿವಿಸ್ಮಿತಃ ।
ಪಾರ್ಥಮನ್ಯುನಿರಾಕರ್ತಾ ಪಾಣ್ಡವೋತ್ಸವದಾಯಕಃ ॥ ೧೮೦॥

ಅಂಗುಷ್ಠಾಕ್ರಾನ್ತಕೌನ್ತೇಯರಥಶ್ಶಕ್ತೋಽಹಿಶೀರ್ಷಜಿತ್ ।
ಕಾಲಕೋಪಪ್ರಶಮನೋ ಭೀಮಸೇನಜಯಪ್ರದಃ ॥ ೧೮೧॥

ಅಶ್ವತ್ಥಾಮವಧಾಯಾಸತ್ರಾತಪಾಣ್ಡುಸುತಃ ಕೃತೀ ।
ಇಷೀಕಾಸ್ತ್ರಪ್ರಶಮನೋ ದ್ರೌಣಿರಕ್ಷಾವಿಚಾರಣಃ ।೧೮೨॥

ಪಾರ್ಥಾಪಹಾರಿತದ್ರೌಣಿಚೂಡಾಮಣಿರಭಂಗುರಃ ।
ಧೃತರಾಷ್ಟ್ರಪರಾಮೃಷ್ಟಭೀಮಪ್ರತಿಕೃತಿಸ್ಮಯಃ ॥ ೧೮೩॥

ಭೀಷ್ಮಬುದ್ಧಿಪ್ರದಶ್ಶಾನ್ತಶ್ಶರಚ್ಚನ್ದ್ರನಿಭಾನನಃ ।
ಗದಾಗ್ರಜನ್ಮಾ ಪಾಂಚಾಲೀಪ್ರತಿಜ್ಞಾಪರಿಪಾಲಕಃ ॥ ೧೮೪॥

ಗಾನ್ಧಾರೀಕೋಪದೃಗ್ಗುಪ್ತಧರ್ಮಸೂನುರನಾಮಯಃ ।
ಪ್ರಪನ್ನಾರ್ತಿಭಯಚ್ಛೇತ್ತಾ ಭೀಷ್ಮಶಲ್ಯವ್ಯಧಾವಹಃ ॥ ೧೮೫॥

ಶಾನ್ತಶ್ಶಾನ್ತನವೋದೀರ್ಣಸರ್ವಧರ್ಮಸಮಾಹಿತಃ ।
ಸ್ಮಾರಿತಬ್ರಹ್ಮವಿದ್ಯಾರ್ಥಪ್ರೀತಪಾರ್ಥೋ ಮಹಾಸ್ತ್ರವಿತ್ ॥ ೧೮೬॥

ಪ್ರಸಾದಪರಮೋದಾರೋ ಗಾಂಗೇಯಸುಗತಿಪ್ರದಃ ।
ವಿಪಕ್ಷಪಕ್ಷಕ್ಷಯಕೃತ್ಪರೀಕ್ಷಿತ್ಪ್ರಾಣರಕ್ಷಣಃ ॥ ೧೮೭॥

ಜಗದ್ಗುರುರ್ಧರ್ಮಸೂನೋರ್ವಾಜಿಮೇಧಪ್ರವರ್ತಕಃ ।
ವಿಹಿತಾರ್ಥಾಪ್ತಸತ್ಕಾರೋ ಮಾಸಕಾತ್ಪರಿವರ್ತದಃ ॥ ೧೮೮॥

ಉತ್ತಂಕಹರ್ಷದಾತ್ಮೀಯದಿವ್ಯರೂಪಪ್ರದರ್ಶಕಃ ।
ಜನಕಾವಗತಸ್ವೋಕ್ತಭಾರತಸ್ಸರ್ವಭಾವನಃ ॥ ೧೮೯॥

ಅಸೋಢಯಾದವೋದ್ರೇಕೋ ವಿಹಿತಾಪ್ತಾದಿಪೂಜನಃ ॥

ಸಮುದ್ರಸ್ಥಾಪಿತಾಶ್ಚರ್ಯಮುಸಲೋ ವೃಷ್ಣಿವಾಹಕಃ ॥ ೧೯೦॥

ಮುನಿಶಾಪಾಯುಧಃ ಪದ್ಮಾಸನಾದಿತ್ರಿದಶಾರ್ಥಿತಃ ।
ವೃಷ್ಟಿಪ್ರತ್ಯವಹಾರೋತ್ಕಸ್ಸ್ವಧಾಮಗಮನೋತ್ಸುಕಃ ॥ ೧೯೧॥

ಪ್ರಭಾಸಾಲೋಕನೋದ್ಯುಕ್ತೋ ನಾನಾವಿಧನಿಮಿತ್ತಕೃತ್ ।
ಸರ್ವಯಾದವಸಂಸೇವ್ಯಸ್ಸರ್ವೋತ್ಕೃಷ್ಟಪರಿಚ್ಛದಃ ॥ ೧೯೨॥

ವೇಲಾಕಾನನಸಂಚಾರೀ ವೇಲಾನಿಲಹೃತಶ್ರಮಃ ।
ಕಾಲಾತ್ಮಾ ಯಾದವೋಽನನ್ತಸ್ಸ್ತುತಿಸನ್ತುಷ್ಟಮಾನಸಃ ॥ ೧೯೩॥

ದ್ವಿಜಾಲೋಕನಸನ್ತುಷ್ಟಃ ಪುಣ್ಯತೀರ್ಥಮಹೋತ್ಸವಃ ।
ಸತ್ಕಾರಾಹ್ಲಾದಿತಾಶೇಷಭೂಸುರಸ್ಸುರವಲ್ಲಭಃ ॥ ೧೯೪॥

ಪುಣ್ಯತೀರ್ಥಾಪ್ಲುತಃ ಪುಣ್ಯಃ ಪುಣ್ಯದಸ್ತೀರ್ಥಪಾವನಃ ।
ವಿಪ್ರಸಾತ್ಕೃತಗೋಕೋಟಿಶ್ಶತಕೋಟಿಸುವರ್ಣದಃ ॥ ೧೯೫॥

ಸ್ವಮಾಯಾಮೋಹಿತಾಽಶೇಷವೃಷ್ಣಿವೀರೋ ವಿಶೇಷವಿತ್ ।
ಜಲಜಾಯುಧನಿರ್ದೇಷ್ಟಾ ಸ್ವಾತ್ಮಾವೇಶಿತಯಾದವಃ ॥ ೧೯೬॥

ದೇವತಾಭೀಷ್ಟವರದಃ ಕೃತಕೃತ್ಯಃ ಪ್ರಸನ್ನಧೀಃ ।
ಸ್ಥಿರಶೇಷಾಯುತಬಲಸ್ಸಹಸ್ರಫಣಿವೀಕ್ಷಣಃ ॥ ೧೯೭॥

ಬ್ರಹ್ಮವೃಕ್ಷವರಚ್ಛಾಯಾಸೀನಃ ಪದ್ಮಾಸನಸ್ಥಿತಃ ।
ಪ್ರತ್ಯಗಾತ್ಮಾ ಸ್ವಭಾವಾರ್ಥಃ ಪ್ರಣಿಧಾನಪರಾಯಣಃ ॥ ೧೯೮॥

ವ್ಯಾಧೇಷುವಿದ್ಧಪೂಜ್ಯಾಂಘ್ರಿರ್ನಿಷಾದಭಯಮೋಚನಃ ।
ಪುಲಿನ್ದಸ್ತುತಿಸನ್ತುಷ್ಟಃ ಪುಲಿನ್ದಸುಗತಿಪ್ರದಃ ॥ ೧೯೯॥

ದಾರುಕಾರ್ಪಿತಪಾರ್ಥಾದಿಕರಣೀಯೋಕ್ತಿರೀಶಿತಾ ।
ದಿವ್ಯದುನ್ದುಭಿಸಂಯುಕ್ತಃ ಪುಷ್ಪವೃಷ್ಟಿಪ್ರಪೂಜಿತಃ ॥ ೨೦೦॥

ಪುರಾಣಃ ಪರಮೇಶಾನಃ ಪೂರ್ಣಭೂಮಾ ಪರಿಷ್ಟುತಃ ।
ಪತಿರಾದ್ಯಃ ಪರಂ ಬ್ರಹ್ಮ ಪರಮಾತ್ಮಾ ಪರಾತ್ಪರಃ ॥ ೨೦೧॥

ಶ್ರೀಪರಮಾತ್ಮಾ ಪರಾತ್ಪರಃ ಓಂ ನಮಃ ಇತಿ-
ಫಲಶ್ರುತಿಃ
ಇದಂ ಸಹಸ್ರಂ ಕೃಷ್ಣಸ್ಯ ನಾಮ್ನಾಂ ಸರ್ವಾರ್ಥದಾಯಕಮ್ ।
ಅನನ್ತರೂಪೀ ಭಗವಾನ್ ವ್ಯಾಖ್ಯಾತಾದೌ ಸ್ವಯಮ್ಭುವೇ ॥ ೨೦೨॥

ತೇನ ಪ್ರೋಕ್ತಂ ವಸಿಷ್ಠಾಯ ತತೋ ಲಬ್ಧ್ವಾ ಪರಾಶರಃ ।
ವ್ಯಾಸಾಯ ತೇನ ಸಮ್ಪ್ರೋಕ್ತಂ ಶುಕೋ ವ್ಯಾಸಾದವಾಪ್ತವಾನ್ ॥ ೨೦೩॥

ತಚ್ಛಿಷ್ಯೈರ್ಬಹುಭಿರ್ಭೂಮೌ ಖ್ಯಾಪಿತಂ ದ್ವಾಪರೇ ಯುಗೇ ।
ಕೃಷ್ಣಾಜ್ಞಯಾ ಹರಿಹರಃ ಕಲೌ ಪ್ರಖ್ಯಾಪಯದ್ವಿಭುಃ ॥ ೨೦೪॥

ಇದಂ ಪಠತಿ ಭಕ್ತ್ಯಾ ಯಃ ಶೃಣೋತಿ ಚ ಸಮಾಹಿತಃ ।
ಸ್ವಸಿದ್ಧ್ಯೈ ಪ್ರಾರ್ಥಯನ್ತ್ಯೇನಂ ತೀರ್ಥಕ್ಷೇತ್ರಾದಿದೇವತಾಃ ॥ ೨೦೫॥

ಪ್ರಾಯಶ್ಚಿತ್ತಾನ್ಯಶೇಷಾಣಿ ನಾಲಂ ಯಾನಿ ವ್ಯಪೋಹಿತುಮ್ ।
ತಾನಿ ಪಾಪಾನಿ ನಶ್ಯನ್ತಿ ಸಕೃದಸ್ಯ ಪ್ರಶಂಸನಾತ್ ॥ ೨೦೬॥

ಋಣತ್ರಯವಿಮುಕ್ತಸ್ಯ ಶ್ರೌತಸ್ಮಾರ್ತಾನುವರ್ತಿನಃ ।
ಋಷೇಸ್ತ್ರಿಮೂರ್ತಿರೂಪಸ್ಯ ಫಲಂ ವಿನ್ದೇದಿದಂ ಪಠನ್ ॥ ೨೦೭॥

ಇದಂ ನಾಮಸಹಸ್ರಂ ಯಃ ಪಠತ್ಯೇತಚ್ಛೃಣೋತಿ ಚ ।
ಶಿವಲಿಂಗಸಹಸ್ರಸ್ಯ ಸ ಪ್ರತಿಷ್ಠಾಫಲಂ ಲಭೇತ್ ॥ ೨೦೮॥

ಇದಂ ಕಿರೀಟೀ ಸಂಜಪ್ಯ ಜಯೀ ಪಾಶುಪತಾಸ್ತ್ರಭಾಕ್ ।
ಕೃಷ್ಣಸ್ಯ ಪ್ರಾಣಭೂತಸ್ಸನ್ ಕೃಷ್ಣಂ ಸಾರಥಿಮಾಪ್ತವಾನ್ ॥ ೨೦೯॥

ದ್ರೌಪದ್ಯಾ ದಮಯನ್ತ್ಯಾ ಚ ಸಾವಿತ್ರ್ಯಾ ಚ ಸುಶೀಲಯಾ ।
ದುರಿತಾನಿ ಜಿತಾನ್ಯೇತಜ್ಜಪಾದಾಪ್ತಂ ಚ ವಾಞ್ಛಿತಮ್ ॥ ೨೧೦॥

ಕಿಮಿದಂ ಬಹುನಾ ಶಂಸನ್ಮಾನವೋ ಮೋದನಿರ್ಭರಃ ।
ಬ್ರಹ್ಮಾನನ್ದಮವಾಪ್ಯಾನ್ತೇ ಕೃಷ್ಣಸಾಯೂಜ್ಯಮಾಪ್ನುಯಾತ್ ॥ ೨೧೧॥

॥ ಕೃಷ್ಣಸಹಸ್ರನಾಮಸ್ತೋತ್ರಂ ಸಮ್ಪೂರ್ಣಮ್ ॥

Proofread by PSA EASWARAN psaeaswaran at gmail.com

Please send corrections to sanskrit@cheerful.com
Last updated ತ್oday
http://sanskritdocuments.org

Krishna Sahasranama Stotram 2 Lyrics in Kannada PDF
% File name : krishnasahasra.itx
% Category : sahasranAma
% Location : doc\_vishhnu
% Author : Traditional
% Language : Sanskrit
% Subject : philosophy/hinduism/religion
% Transliterated by : WD/NA
% Proofread by : Proofread by PSA EASWARAN psaeaswaran at gmail.com
% Latest update : May 16, 2012, December 12, 2014
% Send corrections to : Sanskrit@cheerful.com
% Site access : http://sanskritdocuments.org
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%

We acknowledge well-meaning volunteers for Sanskritdocuments.org and other sites to have built the collection of Sanskrit texts.
Please check their sites later for improved versions of the texts.
This file should strictly be kept for personal use.
PDF file is generated [ October 13, 2015 ] at Stotram Website